1 THESSALONIAN
11 Paul, Silas la Timothi ni naw--- Pa Khanpughi la Bawipa Jesuh Khrit ah chang gui ah kiak ciah, Thessalonika Khrithabum-am ca kami pe lawk ci nei. M’geinsei nak la dimdeeih nak cu nangmi ah khan ah om sä. 2 Nangmi nami van ah hmawk ah ang täi sei Khanpughi kami m’hlüngtai ci, nangmi ah hmawk ah ang täi sei kami taigü ci. 3 Mi Pa Khanpughi ah ma ah nami zum nak cu akcang ah dang khai ah, a i hlawk ah nami om ih ah mawng, nami m’hni nak naw a i hlawk ah a ning khüghat sak gui ah mawng la Bawipa Jesuh Khrit ung nami ngaih u nak a i hlawk ah a khänhtek ah mawng cu kami shüm hmat ci nei. 4 Phäi nau gui aw, Khanpughi naw nangmi cu ning m’hni gui ne, ak chang ah a ning ghü gui cu keimi naw kami hmat ci nei. 5 Keimi naw ng’Thu Ni ka mi ning thak law gui cu, thu m’gawng bäng awn ah kä kiak ci, hlüngtai nak, Mumcha Theing la düng nak kümbe ciah zum nak awn ah kiak ci. Keimi cu nangmi awn atäng ah kami om zah ung a i ah kami om cu nami hmat ci;cun cu nang mi ah ni kiom nak vai ah kiak ci. 6 Nangmi naw keimi la Bawipa cu nami na ng’thei nak gui ci;nangmi cu zaica geinvai ne nami kia pang ung phi, Mumcha Theing awn lawk ciah Thu Ni cu zeikiai ne nami gah ci. 7 Cun ah kia sei nangmi cu Macedonia la Achaia ung zum ciah chang van naw aning thei nak gui vai ah nami kiak ci. 8 Bawipa ah mawng Thu Ni nangmi ung dang ci cu Macedonia la Achaia kho avan ung gawk ci, cun bäng ah kä kiak ciah Khanpughi ung nangmi ah zum nak cun phi kho nüng ah gawk ci. Cun ah kia sei keimi naw a i kami pyein vai kä om ci. 9 Keimi kami law ah mawng la a i cha nami na dou gui ah mawng, düng ne ghing ciah Khanpughi ah a khuut bi vai la khankho ah ka kyum law ba khai ah Ahtapa ngäng vai ah hmawk ah agup gui nawng shüt ne Khanpughi ah nami ng’hlah law ba ah mawng gui cu, cun ah chang gui naw pyein sak ci gui nei. 10 Cun ah Ahtapa Jesuh cu Khanpughi naw sih nak ung kaa thawh ba sak sei, gawk law ge ciah Khanpughi ah m’lungseh nak ung kaa nak phiawn gui ciah Bawipa ah kiak ci nei.
21 Phäi nau gui aw, nangmi ah om nak ah keimi kami law cu a kholä düt ah kä kiak ci, ciah nami mät naw nami hmat ci nei. 2 Nangmi ah om nak Thessalonika ah kä kami law pha ung, Philippi ah a i hawk cha ah shedam dukdeiu nak kami gah cu nami hmat ci nei. Cun hlawk ah hnu ng’tuk püi nak a om tu pang ung phi, Khanpughi naw amät ung kaa lawk ciah Thu Ni cu, ning m’thein gui vai ah thamah nak na pe gui ci nei. 3 Keimi naw hmakat nak, kä ng’cim ciah m’lung ngaih la kä ng’düng ciah ng’bü nak awn kami ning m’cäi gui ciah kä kiak ci. 4 Khanpughi naw ang zak hlü ah ana ng’thu sak gui ah mäih ah keimi ang täi sei thu kami pyein ci; a i ah kia sei ci ung ani awn ng’müi ne ng’Thu Ni awn ng’ap vai ah a nam khoi m’cha gui pyi ah hmawk ah kiak ci. Keimi cu chang naw ana zei nak gui vai ah kä kami k’tha nak ci, kami m’lung kyong nam nüm gui ciah Khanpughi naw ana zei nak gui vai ah kami tha nak ci. 5 Nangmi naw nami hmat ah mäih ah keimi cu chang m’tam khah ne kä kami ng’thu ci, kami mät ah hmawk ah kä kami ng’thu ci nei.Shin ah amawng ung Khanpughi cu kami saksi ah kiak ci nei. 6 Nangmi naw phi bäi, chang hei naw phi bäi, a u naw phi nami nam kümto gui ah kä kami tha na man ci. 7 Cun ung phi keimi cu Bawi Khrit ah ng’düihpüi ah kami kiak nak awn nangmi ah khan ah a i phi kami k’thäh hning ci. Cun ung phi anu naw ahta am htei ah mäih ah, nangmi awn atäng ah mi om zah ung kami ning k’dük gui ci. 8 Nangmi, kami ning m’hni nak gui awn, Khanpughi ah Thu Ni ning teipai gui vai bäng ah kä kiak ciah, kami mät ah ghin nak hnun gui phi, ning teipai gui vai ah kami ng’düi ci nei. Nangmi cu ang htei ah kami ning m’hni gui ci. 9 Phäi nau gui aw, keimi naw a i hlawk ah cümbawng ne, kami bilawh cu nangmi naw akcang ah nami hmat ci nei. Khanpughi ah Thu Ni kami pyein nak ung nangmi ah khan ah zaica nak kä a om vai ah, amü ak hnüüp bi kami bik ci nei. 10 Nangmi cu keimi ah saksi ah nami kiak ci, Khanpughi phi saksi ah kiak ci;a i ah kia sei ci ung keimi cu zum nak om ciah nangmi awn mi ng’hmuhteng nak ung shetkat nak kä om ne ci cim nak la düng nak om ci. 11 Apa naw ahta am htei ah mäih ah keimi naw ak chang sing kami ning m’htei gui cu, nami hmat ci. 12 Thamah nak kami ning pe gui ci, m’lung üp ngaih gep nak kami ning pe gui ci, amät ah uk nak kho kyong ung lut tu ne, abämang nak nami gah tu vai ah, ning khü gui ciah Khanpughi ah ang zak hlü ah nami ghin vai ah kami ning thawhlet sak gui ci. 13 Cun kawn ah keimi naw ang täi sei Khanpughi kami m’hlüngtai nak ah mawng a hei tumat om ba ci. Cun cu, Keimi naw Khanpughi ah Thu Ni kami ning m’thein gui cu, chang ah ng’thu ah mäih ah kä kiak ciah Khanpughi ah ng’thu akcang ah ngai ng’zak ne nami dou nak ah kiak ci. Cun cu Khanpughi ah ng’thu akcang ah kiak ci. A i ah kia sei ci ung Khanpughi cu zum ciah chang gui ah kyong ah hnüntho ne om ci. 14 Phäi nau gui aw, nangmi ah bui awt ah mäih ah Bawipa Jesuh Khrit ung om ci gui ah Judea kho ah Khrithabum gui cun phi, bui awt tuk ci gui nei. Nangmi cu nami mät ah kho chang gui naw ami ning k’dukdeiu nak gui ah mäih ah, ngami cun phi Jew chang gui naw dukdeiu na gui ci gui nei. 15 Cun ah Jew chang gui cu Bawipa Jesuh la profet gui ngawn u ne, keimi nak dukdeiu na gui ci gui ah kiak ci. 16 Keimi naw hun nak ah mawng chang pakhui hei gui-am ng’thu kami m’thein phi tha na ne na ma na gui ci gui. Cun ah ami kiak cu ang täi sei ami cheishoh nak ami kümbe sak nak ah kiak ci. Cun ah kia sei tuhbäi ak hnu ah Khanpughi ah m’lungshe nak cu ngami ah khan ah gawk pyi ci nei. 17 Phäi nau gui aw, keimi cu nangmi awn a shäng hta nei ng’shawng ne kami om. Cun ah pumsa awn mi ng’shawng pang ung phi, kä kami ning m’hnih gui phung ci nei. Nangmi cu ang htei ah ning khaih na gui ne, ning hmuh ba gui vai ah kami tha nak ci nei. 18 Nangmi ah om nak ah keimi kami law ba hlük ci. Kei mät phi nangmi ah om nak ah law vai ah hnih thum vei kak tha nak ci, cun ung phi Satan naw na ma nak ci. 19 Bawipa Jesuh a kyum law ba hnüüp ung, Bawipa ah ma ah nangmi ah mawng näng nak bäng pyein ne keimi kami ng’düng nak vai om ci. Cun kawn ah nangmi cu chang a hei gui ah kä nami ng’neim pi ci, nangmi cu keimi ah ngaih u nak la längtang nak ah nami kiak ci. 20 Akcang ah nangmi cu keimi ah khähghah nak la längtang nak ah nami kiak ci.
31 Ak hnu ah keimi naw kä ging law ba hning u netah, Athens ung om shüt vai ah kami k’bäi kawn ah; 2 Bawi Khrit ah mawng Thu Ni pyein nak ung keimi awn atäng ah Khanpughi ah khuut bik ciah kami nau Timothi cu kami tüi lawk ci nei. Ani naw nangmi-am thagui ning pe gui ne, nami zum nak ning hnünthawh püi gui khai ah kami tüih law ah kiak ci nei. 3 Cun ah kia sei shin ah dukdeiu nak gui awn nangmi ung kaa a u chang phi a hnu täng ah kä ng’hlat ba khai nei. Cun ah dukdeiu nak gui am shah cu mik mi ah hmawk ah Khanpughi ah ang zak hlü ah kiak ci, ci cu nangmi nami mät naw nami hmat ci. 4 Keimi dukdeiu nak kami gah law vai ah mawng cu nangmi awn atäng ah kami om zah ung ka ning m’thein gui pyi ah kiak ci. Kei naw ka pyein ah mäih ah tuhbäi akcang ah a kiak law cu nangmi naw nami hmat ci. 5 Cun ah kia sei Timothi cu ka tüih law ah kiak ci. Akcang ah nangmi khoshe ah tüihtok nak ung nami gawk ah khoi ung, keimi ah bilawh nak cu akholä ah kiak khai kiak ci. 6 Tuhbäi Timothi cu law ba ne nangmi ah zum nak la m’hni nak ah mawng akbä akni ah pyein law ba ci. Nangmi naw keimi cu na shüm gui kheng geng u ne, keimi naw kami ning hmuh gui hlü ah mäih ah nami na hmuh gui hlü cu, nam thein law gui ci nei. 7 Cun ah kia sei phäi nau gui aw, keimi naw zaica nak la geinvai nak kami gah zah ung nangmi ah mawng ng’za u ne, kami k’thamah ba ci nei. Nangmi ah zum nak naw keimi cu k’thagui na be sak gui ci nei. 8 Nangmi ah ghin nak Bawipa ung kawng ät ne ngaih gep vai ah a kiak ung keimi cu tuhbäi akcang ah kami ghing ciah kiak ci nei. 9 Tuhbäi nangmi ah hmawk ah kami Khanpughi cu kami m’hlüngtai hning pyi ci nei. Nangmi ah mawng ung Bawipa ah ma ah keimi ah zeikiai nak a om ah hmawk ah kami m’hlüngtai ci nei. 10 Ak chang sing ming hmuh vai ah nami zum nak ung hlü ci gui cu kami ning so chan nak gui hning vai ah kami m’lung kyong avan naw amü ak hnüüp kami taigü ci nei. 11 Mipa Khanpughi la Bawipa Jesuh Khrit naw, nangmi ah om nak ah kami law nak vai ah lam cu na pian pe gui sä. 12 Nangmi tumat la tumat nami ng’hni nak tu la chang hei nami m’hni nak cu, keimi naw nangmi kami ning m’hni gui hlawk ah a hlüngtai law vai ah Bawipa naw ning piang m’tham gui sä. 13 A cu cha ah Bawipa naw ning k’thamah sak gui khai nei. Bawipa Jesuh cu ak chang theing gui awn a kyum law ba hnüüp ung, nangmi cu mi Pa Khanpughi ah ma ah, kümbe ne theingcim ciah chang ah nami kiak khai nei.
41 Phäi nau gui aw, Khanpughi ah m’hni ah ghin nak ah mawng cu, keimi ah nami ng’thei tu pyi ci nei. Keimi naw kami ning m’thein gui ah mäih ah nami ghing ciah a kiak ung phi, cun natah bä pi sei nami ghin om thei vai ah Bawipa Jesuh ah ming ung ka ning m’cäi gui ci nei. 2 Keimi naw kami ning m’shüm thein gui cu, Bawipa Jesuh ah huham awn ah kiak ci, ci cu nami hmat pyi ci nei. 3 Khanpughi naw nangmi cu nami theingcim vai lah ng’zakhlü m’gukplet nak kä a om-en vai ah ang zak hlü om ci nei. 4 Pami phung cu amät ah chu awn ak theingcim ah, chang m’sui tu vai ah a om vai nei. 5 Khanpughi kä zum ci gui ah mäih ah pumsa ng’zak hlü düt ah kä nami om ih-en vai nei. 6 Shin ah mawng ung khritha gui nami mät kä nami cheishoh-en vai, kä nami ei-hlü mang-k’phya vai. A cun ah mäih ah om ciah chang cu Bawipa naw m’kat khai nei, ciah khän ne ka ning m’thein gui ci nei. 7 Khanpughi naw m’gukplet humhlam vai ah a na khü gui ah kä kiak ci, ak theingcim ah om vai ah ana khü gui ah kiak ci. 8 Shin ah m’theithang nak hnu ng’tuk püi ciah chang cu, chang hnu ng’tuk püi ciah kä kiak ci, Mumcha Theing na pe gui ciah Khanpughi cu hnu ng’tuk püi ciah kiak ci. 9 Zum ci gui nami mät nami ng’hni tu vai ah mawng cu ca guk vai kä hlü ci. Nami mät gui nami ng’hni tu vai ah nami mät cu Khanpughi naw ning m’thein gui pyi ci. 10 Nangmi naw Mecedonia ah om ciah Khritha phäi nau gui cu nami m’hni gui ci nei. Phäi nau gui aw, cun ah bä pi sei nami bi vai ah ka ning m’cäi gui ci nei. 11 Azan ä ka mi ning m’cäi gui ah mäih ah dimdeeih sei nami ghin om thei vai, chang kä khuihphaa ne nami mät ah bi ung nami khän htek vai, nami mät ah hnun nami mät naw nami m’ghin hning vai ah nami tha nak vai nei. 12 Cun ung nangmi cu Khritha gui ah kä kiak ciah chang hei gui ah, chang m’sui nak nami gah khai. A u ung ng’zung phya ne nami kiak vai phi kä hlü khai nei. 13 Phäi nau gui aw, sik ciah chang gui ah mawng akcang cu kami ninghmat sak gui hlük ci nei. Cun ung vah nangmi cu ngaih u nak kä om ciah chang gui ah mäih ah thüisei nak kä om khai. 14 Bawipa Jesuh cu sih nak ung kaa tho ba ci, ci cu mi zum ci;a cun ah mäih ah Bawipa Jesuh azum kawn ah sik ciah chang gui cu Khanpughi naw, Bawipa awn atäng ah khäm ba gui khai ci cu mi zum ci. 15 Tuhbäi kami ning m’thei gui cu Bawipa ah ning m’thei gui ah kiak ci; Bawipa a kyum law hnüüp ghing ne om ciah mik mi cu sih pyi ci gui ah mä kä mi hlüngtai pi hnga khai. 16 Khanpughi ah thukhän, khanchang ang vaipi ah thu k’aw, Khanpughi ah phyungheng, ang thang law hnüüp ung, khankho ah kaa Bawipa amät cu kyum lawk khai nei. Bawi Khrit ami zum kawn ah sik ciah chang gui cu tho ba htük khai gui. 17 Cun ah akhin ung ghing ne ana om ciah mik mi cu tho ba ci gui awn atäng ah Bawipa hmuh vai ah khomei bawk awn m’hleim ne khankho mik ung na kai püi gui khai. Cun ung mik mi cu ang täi sei Bawipa awn mi om khai. 18 Cun ah kia sei shin ah ng’thu awn tumat la tumat k’thagui nami ng’peit tu vai nei.
51 Phäi nau gui aw, shin gui a gawk law nak vai a khin la a mawng gui cu ca awn guk vai kä hlü ci nei. 2 A i ah kia sei ci ung Bawipa ah kho Hnüüp cu khomü ah m’guk-ei a law ah mäih ah gawk lawk khai nei, ci cu nangmi nami mät naw nami hmat pyi ah kiak ci. 3 “Chang gui naw apäng avan cu ding gei ne, om phyak ci nei,” ci ne pyein khai gui. Cun zah ung käü-mah ciah hnumi cu ang ghit ah anau poi am neh law ah mäih ah geinvai nak cu ang hgit ah gawk lawk khai nei. Cun cu chang gui naw kä phiawn ah hlawt khai gui. 4 Cun ung phi phäi nau gui aw, nangmi cu hmüp khui ung nami om ba ciah kä kia sei, cun ah hnüüp cu m’guk-ei ah mäih ah nangmi ah kä gawk lawk khai nei. 5 Nangmi nami van cu akdei ung ng’len pyi ne, kho hnüüp khäm pyi ciah chang ah nami kiak ci. 6 Cun ah kia sei mik mi cu chang hei gui ah mäih ah ip düt ne kä mi om khai nei, cim’gang tholet ne mi om khai nei. 7 Chang gui cu mü ah ip ci gui;mü ah awktat ci gui. 8 Cun ung phi mik mi cu akdei ah chang ah mi kiak ci, cim’gang ne mi om khai nei. Mik mi cu zum nak zih sui ne, m’hni nak ah shawi kawt ne, mi ngaih u ah kiak ciah hun nak m’si lukhu cu mi ng’büng khai nei. 9 Khanpughi naw mik mi cu am lung she nak awn zaica vai ah ana ghü gui ah kä kiak ci, Bawipa Jesuh Khrit ung hun nak mi gah vai ah a ghü gui ah kiak ci. 10 Ani a kyum law ba hnüüp ung, sih ung phi bäi, ghin ung phi bäi, ani awn atäng ah om vai ah Bawipa cu mik mi ah hmawk ah si pyi ci nei. 11 A cun ah kia sei tuhbäi nami bi ah mäih ah tumat la tumat k’thagui nami ng’peit tu vai, nami ng’hteihtang tu vai nei. 12 Kami ning m’cäi gui ci nei, phäi nau gui aw, nangmi ung khuut bik ci gui, khritha ghin ah mawng lam ning m’shüm gui ne ning m’cumcäi gui ci gui cu nami chang m’sui gui vai nei. 13 Ami khut bi ah hmawk ah ak hlüngtai säih ah m’hni nak la chang m’sui nak awn nami m’tamkhah gui vai nei. Nami mät ah kyong ungphi ding gei nak om sä. 14 Phäi nau gui aw, ning m’cäi gui nei; a om shek ci gui khän ne m’cäi vä, kyikyawk ci gui thamah nak pe vä, zoken ci gui m’hteihtang tu vä, chang nüng ah khan ah hnimgei nak awn om vä. 15 Akshe cu akshe awn kä nami thung ba vai nei, nami mät gui ah ni kiom nak vai ah, chang avan ah ni kiom nak vai cu, ang täi sei shui ne nami tha nak vai nei. 16 Ang täi sei zeikiai vä, 17 ak phlüt ah taigü vä, 18 amawng ama avan ung Khanpughi cu m’hlüngtai vä. Bawipa Jesuh Khrit ung kawng ät ne nami ghin nak awn cun ah nami bi vai ah Khanpughi naw ng’za hlük ci nei. 19 Mumcha Theing cu kä nami ng’zom sak vai, 20 Mumcha Theing awn ak phyutheh ah küikyang ciah thu cu kä nami päipih vai. 21 Apäng avan m’nüm ne k’tä netah, nik ci phung cu kut shum u ne, 22 akshe phung cu nami nawng vai nei. 23 Dimdeeih nak ah a phung Khanpughi naw, amawng alam avan ung ning theingcim sak gui sä! Bawipa Jesuh Khrit a kyum law ba ung ng’ä vai kä om khai ah, nami mumcha, nami m’lung ngaih, nami pumsa avan cu Khanpughi naw ning kut shum gui sä. 24 Nangmi ning khü gui ci cu bekhüt ciah kia ne cun gui cu akcang ah bik khai nei. 25 Phäi nau gui aw, keimi ah hmawk ah phi nami taigü vai nei. 26 Khrihta phäi nau avan cu zum nak awn ng’ui ne zavaih nah vä. 27 Shin ah ca cu zum ciah chang avan-am phat ne nami m’thien vai ah Bawipa ah na peit ah huham awn ka ning m’thien gui ci nei. 28 Mi Bawipa Jesuh Khrit ah m’gein nak cu nami van ah khan ah be ne om sä.