LEVITIKUS
Livai asi saibira
Wonaberena
Levitikus bukana wai Livai biyisi asi saibira e bimamatarei, kosi damsi wai priests kasi bibaita. Bada ana Tabernacle si potapotai.
1Suwara Kapukapunina
1 Bada Tabernacle kamonai i yoereyana Moses kurina ba i wona, 2 “Ki sisiya, Israel biyisi kurisi ba ke wonisi, ‘Maranai kom kotoi wata, am puyo kuna botuwei Bada kurina wai, am aba payapayaya cow, sheep, kona goat yabona kamosi yai kesana ke yauni ke botu kuna puyobunuwa.
3 Memei bage am suwara kapukapunina wai aba payapayaya sebare wotuna kesana kuna suwara wai, kega gubagubagina kuna botuwei ku Tabernacle matamketana wai Bada ina bosekwaim. 4 Kona yarona suwara kapukapunina gayamina ina terei wai Bada ina bosekwaim, ini waubirai ba ana piragagoyona ini maisa taveyei. 5 Kata bull wotuna Bada naonai ina kasibunui ba Aaron natunatuna wai kosi priest kata, tarana sina yauni ba raunabonabo Tabernacle matamketanai e bimsiri wai, sina sewa bibiri. 6 Ba aba payapayaya kwapirina ina sikai ba ina mutui. 7 Ba Aaron natunatuna kosi priest raunabonabo tepanai keyama sina kemai ba sina kapuni. 8 Kata Aaron natunatuna priests aba payapayaya si mutui wai gayamina, ba nanarina raunabonabo keyama karakarasina tepanai sina bobunagi. 9 Ba yebo kamokamona ba kaekaena okowai ina kai bosuwana ba priest ereonowana raunabonabo tepanai ina kapuni. Kona wai suwara kapukapunina ba kaimasavina ba sirina pugunai, wai Bada ini nuwagaire.’”
Ba yebo Bada Moses i wonei kata pipiya sheep, goat kona bunebune kona buruko natuna wosena kesaninai sina wosei. Puyobunuwa kairavina wai yebo matapa i kaobibeyisi.
3Nuwanuba Suwarina
1 “Abisiri yai kotoi kam yabata suwarina aba payapayaya yabona kamonai ina suwara wai, sebare kona wasike, kega maumauwina Bada ina puyoi. 2 Yebo yarona ana suwara abapayapayayina gayaminai ina terei ba Tabernacle matamketanai ina kasibunui. Kata Aaron natunatuna, kosi priest tarana raunabonabo sina sewa bibiri. 3 Kata priest kam yabata suwarina mutuna wai puyobunuwa kaimasavina Bada kurina. Nikosi wai ereonowasi wairoro e sowosowoi kamokamona kamonai, 4 kupuvidividi ruwamo, ere wairorosi ba katekatena e sowosowoi ba ere kupuvidividina ina taina taveyei. 5 Ba Aaron natunatuna nikosi raunabonabo tepanai sina kapuna, suwara kapukapunina keyama karakarasi tepanai. Nikona wai sirina puguna gairena ba puyo kaimasavina Bada kurina.”
Mekabage Bada bull kona cow kairavina i wona wai kesanina yebo sheep ba goat sina berena kam yabata suwarina.
13Sinita kasi Gubaga
1 Bada Moses ba Aaron kurisi i wona, 2 “Kotoi wata gubaga kona, dibudowa kona sinina ina yano tabiri wai yagiyagina ina botu Aaron kona natuna kesana e bipriest wai kurina. 3 Gubagina priest sina bokinakinani ba sini korokorona ina poepoe ba gubagina ina gakira ku biyona wai, kona wai gubaga goyona. Ba priest ina kita kabai wai ini yoneyonei kata kona pipiyina wai pudapudana, ba meyaga ina kasibau taveyei.
45 Kotoi wata gubaga kaikapona sininai wai gara tamo sikasikasi ina kote, ba kega uyawina ina pagiri ba kipuruna ina kasi papari ba ina para pipiya kurisi, ‘Pudapudaku! Pudapudaku!’ 46 Ba gubagina karakuwata gwabinai ina manamana wai, kona wai pudapudana. Ba i kesina meyaga kupunai ina mataveyana.”
1710 “Meo Israel biyina, kona dam tumana nina e mamana ba siyauwa ere taratarana ina kani wai, kana parata ana taini ba ana ma kupukupusi.”- 17:10 Genesis 9:4
Abapaypayaya Tarasi Wonana
11 “Yawasa ereonowana tara kamonai e mamana wai, kona kairavina Bada i kaotunetune kata tara ereonowana ina sewa taveyei ku raunabonabo tepana. Kona tarana wai piragagoyo ebi maisa taveyei.”- 17:11 Hebrews 9:22
18Yawasa gairena aba mamanina
1 Bada i sisiya Moses kurina, 2 “Israel biyisi ke wonisi, ‘Yauku Bada ami God. 3 Kona kairavina kega Egypt biyisi koi boneboneisi memena ko mamana wai, kona Canaan biyisi karaku nakai au rabaimi ta nenae wai, kega kosi koi boneboneisi. 4 Au kairuwana kona bosisirei ba kona kita kabitamni kata au kaobiyoyobana kona kibi. Yauku Bada ami God. 5 Kona kairavina au kairuwana ba au kaobiyoyobana kona bokikisi, kairavina sebare kotoi e bosisira wai yawasina ina manei.- 18:5 Romans 10:5; Galatians 3:12 Yauku Bada .
6 Au kaobiyoyobana ko nonori. Kega kesana kotoi ana rakaraka damana ba ina dauwei.
19 Wasike kana nawaravi ina yauni maranai kega kuna dauwei. Kona wai pudapudana.
20 Maturam kaowana kega kuna dauwei, ba kuni pudapudaim.
21 Kega natunatumi god Molech ana raunabonabo tepanai kona puyobunuwa. Yauku Bada ami God, ba nikona kona wosei wai kau waba koni gigimi.- 18:21 Levitikus 20:1-5
22 Kega sebare kesana sebare kwainana ina dauwei nakasike bage wasike e dudauwei wai rutainina. Nikona God kurina wai i goyo saki.
23 Kega kesana sebare aba payapaya ina dauwei, ba ini pudapudai ba wasike kega sinina ina kaotaveyei aba payapaya sebarena ina dauwei. Niko wose kega e mamana ba kega nikasike ina tupuwa.- 18:23 Exodus 22:19
24 Nikosi wose kega kona wose. Canaan biyisi kosi wosesi si wosewose kairavia ana kwabina taveyisi.’”
19Kairuwana Bubausi yai
1 Ba Bada Moses kurina i wona, 2 “Israel biyisi ki runotuwanisi ba ke wonisi, ‘Yauku ami Bada ba ami God kaobaisiyeku wai, komi yebo kaobaisiyemi.- 19:2 1 Peter 1:16
17 Kega nuwanuwami yai waresim kurina kuni yagisi. Ba maturam ke kaorumatani kata ana goyona kega bitana kuna kabari.- 19:17 Matthew 18:15
18 Kega kotoi ana goyona bisarobina kuna nuweni kona nuwanuwami yai yagisi ina mana ba maturaturam ki nuwayauyaunisi nanakasike bage ikesim ke binuwayauyaunim.- 19:18 Matthew 5:43, 19:19, 22:39; Mark 12:31; Luke 10:27; Romans 13:9; Galatians 5:14; James 2:8 Yauku Bada .’”
20Piragagoyo ana Saroba
1 Bada God Moses kurina i wona, 2 “Israel biyisi ke wonisi, ‘Komi Israel biyimi kona neneyana Israel kamonai ko mamana wai natunatumi Molech kona berei wai, kona rabobo. Meyaga biyisi akimai sina kasibunuimi.
6 Ba iyabosi raoboraobosi kanumisi yabata te bisisiya, ba te bisununurisi, ba kanuma goyogoyosi te binaovisi te raukaipara wai, ana ma kupusisi ba asi dam kamosi yai kasi parata ana taini.’”
Pari Raoboraobosi kurisi
24Kaobiyoyobana Saroba kairavina
19 Bada Moses kurina i sisiya i wona, “Israel biyisi ke wonisi, ‘Kotoi wata kwainana ini sirageyei wai, yebo kesanina kurina sina wosei. 20 Abisiri yai sirikena ina kasikotobi wai, kona yebo sirikena sina kasikotobi. Abisiri yai kotoi matana ini goyoni wai, kona yebo matana sini goyoni. Abisiri yai kotoi nibona ina kasitaveyei wai, kona yebo nibona sina kasitaveyei.- 24:20 Matthew 5:38 Kotoi wata wose goyona ina wosei wai, yebo kesanina kurina sina wosei. 21 Kotoi wata pipiya ana aba payapaya ina kasibunui wai, ini tepari. Kotoi wata pipiya ina kasibunui wai, kona yebo ko kasibunui. 22 Yauku Bada, ami God, niko kairuwana, wai komi Israel biyimi, ba dam tumana, kamomi yai kosi te mamana wai ereonowami kairavimi.’”