JOSHUA
1Bada Joshua i Kaotunei
1 Ba Bada ana saibisaibirina Moses i rabobo murinai Bada Moses kana bibaita Joshua Nun natuna sebare kurina i wona, 2 “Au saibisaibirina Moses i rabobo. Karaku kom ba nikosi pipiya ereonowasi ko bobunaga ba Jordan okowina koni garubonei ba kupura Israel biyisi ana berisi wai nakai kona nae. 3 Yauku gawara ereonowana memena kaem kuna tereterei wai ana berim, Moses a kaobiyoyobani wai nanakasike. 4 Am kupura wai kupura momnai ina dagui ba ina nae ku Lebanon ba namai okowa kaikapona Euphrates ai ba i nae Hitti biyisi asi kupura Mediterranean Enagina ku mara sipuna mena. 5 Kega kesana kotoi am yawasa ereonowana kamonai ina gebeyim. Yauku Moses yabata wai yebo kesanina kom ba Yauku yabata, ba Yauku kega ani sumarim kona ana tere bigaruim.- 1:5 Hebrews 13:5
6 Ki maragata ba ki tepatora kairavina nikosi pipiya kuni naovisi kata nosinosim a kaobiyoyobanisi kupura ata berisi wai ini karimi yai.- 1:6 Deuteronomy 31:6-8,237 Ki maragata ba ki tepatora saki. Kairuwana ereonowana au saibisaibirina Moses a berei wai ko kinana kabitamni kata kona bosisirana; ba kega kesana kona vera taveyei wai birana gairena wata. 8 Niko kairuwana bukana kega kawami ina kasibau taveyei; kao ba pom kona nota bitetei wai kamonai ereonowana si kirumi wai kona wose roboi wai kona mariya ba awaika kona wosei wai ereonowana gairena wata.”
59 Damanina ba Bada Joshua kurina i wona, “Karaku Egypt patuma sinimayina a kasikasipupuni.” Kona kairavina niko kupura kana waba Gilgal ba karaku patana te yoreyorei Gilgal.
10 Kata Israel biyisi Gilgal siru basekwa Jericho guburinai, ba rabisi yai kao kana bi 14 ba nawaravi dagudagunai Baisaubona Kamna si wosewosei.- 5:10 Exodus 12:1-13
Baisaubona Canaan Kupurinai
11 Mara itom Baisaubona Kamna murinai kupurinai grain si boyauna ba si kapukapuna ba bread kega yeast yabata si kani. 12 Niko kam si kanikani ba mara i tomtom wai manna i kakaba ba Canaan kupurinai awaika si bobaoni wai kona si kani.- 5:12 Exodus 16:35
Damanina ba Joshua ba Israel biyisi Canaan kupurinai sepinai ba i nae ku sepina yabata si abiya. Kosi pipiya namai si kasibunuwana saba mutusi si gegenuwisi ba si ma yabata. Damanina ba Joshua kupura Israel asi dam kamosi yai i yapara owaowa. Ba kata si nae kosi yaparisi bubausi yai Canaan biyisi meyaga si bowa wai namai si mana. Bodu pesarisi si kakaba ba Joshua Israel biyisi iru notuwanisi.
24Baidamanina Maragasina si Waubirai
1 Damanina ba Joshua Israel biyisi asi dam nununai Shechem meyaginai i runotuwanisi. Ba wara i porapora asi magumagura, babada, bibuibuya biyisi ba abiya babadisi sita botu God naonai si gaenisi.
2 Ba Joshua pipiya ereonowasi kurisi i wona, “ Bada Israel biyisi asi God nikasike i wona, ‘Matapa naki tamatamami naki, Abraham ba Nahor tamasi Terah yabata Euphrates okowina sepinai si mamana ba god mutusi si bopepetisi. 3 Ba yauku tamami Abraham kupura okowa sepinai a yauni ba Canaan kupurinai wata ai naovei- 24:3 Genesis 12:1-9 ba natuna Isaac kamonai ana rakaraka pesarisi a berei.- 24:3 Genesis 21:1-3
13 Kata kupura a berimi wai tano kega ko baoni ba meyaga kega ko bowai, saba kamosi yai ko mamana ba vine ba olive keyamisi kega ko bao ba kamsi ko kamkam.’
14 Karaku Bada ko kumarei ba nuwanuwami tupanai ko bosaibiri. God mutusi nosinosimi Euphrates okowina sepinai, ba Egypt kamonai si bopepetisi wai koi garugaru, ba Bada ko bosaibiri. 15 Saba Bada bosaibirina sinimi ina kai wai, karaku niko kaonai kairavimi ko binei kata kotoi kona bosaibiri, abisiri yai god mutusi okowa sepinai nosinosimi si bosaibirisi wai, kona Amori biyisi asi god, asi kupurai ko mamana wai kosi. Saba yauku ba au rakaraka wai Bada kana bosaibisaibiri.”
16 Damanina ba pipiya si kaobeya, “Yakai kega rubarubana Bada kana boterei ba god mutusi kana bosaibisaibirisi! 17 Yakai Bada ama God ikesina Egypt kamonai tamatamakai yabata patuma kupurinai i uraba kasibauwikai, ba kiyakiyaya kaikaposi mataki ai i wose. Kona dam ba dam kamosi yai ama wagawaga ereonowanai i pota kabitamnikai. 18 Ba Bada naoki ai dam pesarisi i kwabinisi si kasibau, nanakasike Amori biyisi kupurinai si mamana wai, ba yakai yebo Bada kana bosaibiri basuna kona wai ama God.”