Exodus

EXODUS

Kasikasibau

Wonaberena

Niko wona Exodus wai basuna kona kasikasibau ba ebi beyita wose kaimasavisi Israel biyisi asi yawasa kainaonai i tupuwa. Egypt kamonai si kasikasibau taveyei ba memena si wosisi kosi patupatumisi. Niko buka si keauwari wai asi bata (4).

God mekabage Hebrew biyisi patupatumisi i yawasisi.

Hebrew biyisi si wagaga ku Sainai koyana.

God baidamanina maragasina Sainai koyanai i wosei ana pipiya kurisi ba kairuwana i berisi.

Israel biyisi bopepeta gawarina si wosei.

Israel Biyisi si Bobisipuvisi

¹ Israel natunatuna, asi rakaraka yabata si nae ku Egypt wai nikosi, ² Ruben, Simeon, Levi, Judah, ³ Isaka, Zebulun, Benjamin, ⁴ Dan, Naphtali, Gad ba Asha. ⁵ Jacob ana rakaraka kamonai wai pipiyisi ereonowasi asi 70; ba Joseph wai matapa Egypt yai i mamana.

⁶ Joseph ba tuwateiteina kona kimtina kamonai ereonowasi si rabobo, ⁷ saba Israel biyisi si tuwa wai si pesara saki, Egypt si bonuvi i nunu roboi.- 1:7 Acts 7:17

Egypt Taupaumina Israel Biyisi Bita i Berisi

⁸ Damanina ba, taupauma wauna bibadana i yauni ba, Egypt kamonai Joseph awaika i wosei wai kega i kuiri.- 1:8 Acts 7:18⁹ Ba ana pipiya kurisi i wona, “Ko kinani, Israel biyisi si pesara saki, kega bage kota. ¹⁰ Ko botu tana nuwasuya kabitam ba, awaika tana wosei kata kega sina pesara ba sina getawanita. Kega awaika tana wosei wai, biabiya maranai, kata abiya sini baisisi yabata tani rauwa ba sina getawanita wai, kupura sini sumarei.”

¹¹ Patuma babadisi si terisi kata saibira kaikaposi yai siti poroporovisi, ba ita bobunuisi. Israel biyisi si tamarisi kata, Pharaoh ana kam kasi bobitaura yovesi, meyaga kaikaposi, Pithom ba Ramese si bowa. ¹² Ba bagunai wata si bitupa ketowana saburerisi, saba ba Israel biyisi yebo asi koroto nakata naki i rakarakata wai, Egypt biyisi si naganagarisi, ¹³ ba si wosisi si bagibagi saburere. ¹⁴ Asi yawasa si wosei i goyo saburere ba, asi saibira isu bita taveyana brick ba motar si wosewose, ba yebo masawa si wosewose kata, si bobisipuvisi kega bage rorowa rutainina.

²² Damanina ba Pharaoh ana dam i kaotunetuneyisi, “Sebasebare ereonowasi sina tupuwa wai ku Nile okowina koi garuisi, saba bibaine wai ko boterisi sina mana.”- 1:22 Acts 7:19

Moses ana Tupuwa

¹ Kona maranai Levi rakarakana kamonai, sebare kesana yebo Levi wasike i rabai, ² ba i manawa ba i tuwa natuna sebare. Ba i kinani wai, pepeya nuwarubarubana wai i buneyei navaravi tonu rubana.- 2:2 Acts 7:20; Hebrews 11:23³ Saba kega rubarubana nanakasike iti buniyena manei wai, keyama kana waba papyrus ruraunai sinana tegara konai i bowai ba sawara kana waba tar i yauni ba i pasipasi potapotai. Ba pipiyinaikei i wani ku kamona ba Nile okowina parinai weguru kamosi yai i terei. ⁴ Ba nobuna wai yogina rabarabai i msi taveyana i bo kibukibui, kata awaika kurina ita tupuwa.

⁵ Ba Pharaoh natuna wasike i gakira ku okowa iti towatowa, ba okowa parinai kana aba potapota yabata si yewo si nenae, wai i kinana kata, tegara weguru kamosi yai i kitai, ba kana aba potapota wasike kesana, i porai ita yauni. ⁶ Maranai i botatari wai pepeya i kinani i tutou, wai i kamyosukuwei. Ba i wona, “Nikona wai Hebrew biyisi natusi.”

⁷ Damanina ba nobuna i nae, Pharaoh natuna wasike i toirubai, “Mekabage, ana nae Hebrew wasike kesana ana urabai kata pepeya kairavim ini tomani?”

⁸ Kona i kaobeya, “Eee, ke nae.” Ba wasikena i nae kata pepeya sinana damana i urabai. ⁹ Pharaoh natuna wasike kuurin i wona, “Niko pepeya ke yauni ba kairaviku ki tomani ba ani maisanim.” Kata wasikena pepeya i yauni i nae ana ku yove ba namai i potai.

¹⁰ Maranai pepeya i rakata wai i yauni i nae Pharaoh natuna wasike kurina, ba kona i natunei.- 2:10 Acts 7:21 Ba kana waba i yorei Moses, kairavina i wona, “Kona wai okowa kamonai a taina geyei.”

Moses i Vera ku Midian

¹¹ Moses i waraete murinai, kao kesana i kasibau ana pipiya damana memena si mamana wai kurisi, ba si saibisaibira wai i bokibukibuisi. Ba i kinakinana ba Egypt biyina Hebrew sebare, kona mom ana pipiya kesana i raviravi. ¹² Kata i kita nanaga nikei ba nokoi ba, kega kesana kotoi i kinani wai, Egypt biyina i kasibunui, ba tore i sarei ba i dogui.

¹³ Mara i tom wai i kasibau ba Hebrew biyisi asi ruwamo i kinanisi si birauwa. Ba kotoi birauwa i dagu wai, kona i toirubai, “Awaika kairavina Hebrew kwainam ke raviravi?”

¹⁴ Ba sebarena i wona, “Kom kotoi bibadana i berim kata kuni buibuiyikai, kom ke nosinosi, Egypt biyina ku kasibunui wai nanakasike kuna kasibunuiku?”- 2:14 Acts 7:23-28 Damanina Moses i nagara ba i nuwasuya, “A nosinosi awaika a wosei wai si kuira roboi.”

¹⁵ Maranai Pharaoh nikona i nonori wai, i baga saki kata Moses ita kasibunui. Saba Moses, Pharaoh nagarina i vera i nae ku Midia ba namai i mana.- 2:15 Acts 7:29; Hebrews 11:27

Moses namai priest yabata si mana ba natuna wasike Zipporah i rabai.

God i Sisiya Moses kurina

¹ Kao kesana Moses rawana Jethro, Midia biyisi asi priest, ana sheep i potapotaisi, ba sheep i naovisi si nae ku kupura momna sepina ba si botu ku Horeb, God ana ku koya mena. ² Ba namai Bada ana aneya kaikairuku karakarasina kamonai i rerematara kurina. Moses i kinani kata kaikairukuna i karakarasi saba kega i karakara roboi. ³ Kata Moses nota i yauni, “Ana nae ba niko wose bauna naki ana kitai. Awaika kairavina kaikairuku kega e karakara roboi?”

⁴ Maranai Bada i kinani kata kona i nae ita kinani wai, God kaikairuku kamonai kurina i yoreyana, “Moses! Moses!”

Ba Moses i wona, “Awaika, yauku nina.”

⁵ Ba God i wona, “Kega kuna botu saki, ba kam kae sumasuma ke botavetaveyana, kairavina kom tano kaobaisiyena tepanai ke bimsiri.” Damanina ba i wona, ⁶ “Yauku wai tamam ana God, Abraham ana God, Isaac ana God ba Jacob ana God.” Maranai, Moses nikona i nonori wai naona i sowoi kairavina i nagara kega rubana God ita kitai.

⁷ Damanina ba Bada i wona, “Yauku au pipiya Egypt kamonai si bogoyoisi wai a kinani. Yauku pipiya Egypt kamonai asi tou rasarasa a nonori, basuna babada te potapota goyoisi ba, yauku asi siniyara a nomonomosei. ⁸ Kona kairavina a gakira kosi Egypt biyisi yarosi yai ani yawasisi, ba kona kupurinai ana uraba kasibauwisi ku kupura gairena ba kupura kaikapona, mariya bonabonana. Kosi Canaan, Hitti, Amori, Perizzi, Hivi ba Jebusi biyisi asi kupura. ⁹ Ba karaku Israel biyisi asi tou i borubaiku, ba Egypt biyisi mekabage tebo bisipuvisi wai a kinani. ¹⁰ Kata karaku ke nae, yauku a biporaim Pharaoh kurina, au pipiya Israel biyisi, Egypt kamonai kuna uraba kasibauwisi.”- 3:10 Acts 7:30-34

¹¹ Saba Moses God kurina i wona, “Yauku kotoi, ba ana nae Pharaoh kurina ba Israel biyisi Egypt kamonai ana uraba kasibauwisi?”

¹² Ba God i wona, “Yauku wai kom gwabimiyai. Ba nikona wai am matakira kata, kuna kuiri Yauku mom ai poraim. Maranai pipiya Egypt kamonai kuna uraba kasibauwisi wai, niko koyai God kona bopepetei.”

¹³ Ba Moses, God kurina i wona, “Maranai ana nae ba Israel biyisi kurisi ana wona, ‘Komi tamatamami asi God i poraiku kurimi.’ Ba kosi sina toirubaiku, ‘Ba kona kana waba kotoi?’ Kata mekabage ana wona?”

¹⁴ God Moses kurina i wona, “YAUKU kona YAUKU. Nikasike Israel biyisi kurisi ke wona, ‘God e yoreyore meyei, YAUKU, kona i poraiku kurimi.’”- 3:14 Revelation 1:4,8¹⁵ God yebo Moses kurina i wona, “Israel biyisi kurisi ke wona, ‘ Bada , tamatamami asi God, Abraham ana God, Isaac ana God, ba Jacob ana God, kona i poraiku kurimi.’ Nikona wai kau waba mama damanina ina mana. Niko waba YAUKU, ba kimta ba kimta nunusi yai kona nosiku.”

Kona murinai Moses i veramaga ana ku yove ba i nae ku Egypt, waresina Aaron ba Israel babadisi awaika ereonowana i wonisi. Damanina ba Moses ba waresina Aaron si nae Pharaoh kurina ba si wona, “ Bada i poraikai kata wonim kata ana dam Israel biyisi kuni poraisi ku kupura mama wapana mena Bada kurina sina puyobunuwa.”

Pharaoh kurisi i wona, “Kega rubarubana! Kosi sina bobagibagi mana.”

Kona kairavina Bada Egypt biyisi kurisi wose goyogoyosi pesarisi i wosewose, saba Pharaoh kega i boterisi si nae. Bagunai Nile okowina i wosei i botaratara, Pharaoh Israel biyisi kega i boterisi si nae. Egypt biyisi asi aba payapaya pesarisi si rabobo ba kapukapura sinisi yai si yauna saba kega i boterisi si nae.

Egypt Biyisi Kasi Rabobo

¹ Damanina ba Bada Moses kurina i wona, “Yauku, Pharaoh ba Egypt kupurina ana kasibigoyana meyei, kona murinai Pharaoh niko kupurai ina boterimi kona nae, ba ina wosei wai ini su kwabina taveyimi. ² Israel biyisi ereonowasi ko wonisi kata, maturaturasi Egypt biyisi sebasebare ba bibaine sina wonisi kata sawara silver ba gold yai si wose wai sina berisi.” ³ Kata Bada , Egypt biyisi i wosisi wai, Israel biyisi si kamyosukuvisi, ba Egypt kamonai Pharaoh ana babada ba pipiya mom yebo Moses si bokuwayena sakiyei.

⁴ Kata Moses i wona, “ Bada nikasike i wona, ‘Pom basunai Egypt kupurina tupana ana verabauni. ⁵ Egypt kamonai natunatusi sebasebare, si tupuwa kainao wai ereonowasi sina rabobo. Pharaoh yebo natuna iyarokona yabata, taupauma asi aba makimakirai e mamana wai, ba aba saibisaibira wasikena aba gudaguda nimanai kona natuna iyarokona ba aba payapayaya manamisi si nao si tupuwa wai ereonowasi yabata. ⁶ Kata namai Egypt kamonai wai tou rasarasa ina rakata saki kega meyana nanakasike i tupuwa, kona murinai ina tupuwa mena. ⁷ Saba Israel biyisi kamosi yai, wai kega kukou, pipiya kona abapayapayaya ina kokonisi. Ba nikonai kuiri kata Bada mekabage Egypt biyisi ba Israel biyisi e totonisi.’ ⁸ Nikosi Egypt babadisi sina botu kuriku ba naokuai sini maere sogasoga ba sina wona, ‘Ko nae, am pipiya tebi sununurim wai yabata!’ Kona murinai yauku ana nae.” Damanina ba Moses ere yagisina taupauma i sumarei.

⁹ Ba Bada , Moses kurina i wona, “Karaku wata taupauma kega am sisiya ina nonori wai au kiyakiyaya mutusi Egypt kamonai pesarisi ana wose.” ¹⁰ Moses ba Aaron kiyakiyaya pesarisi taupauma naonai si wose, saba Bada taupauma nuwanuwana i badobadoi wai Israel biyisi kega i boterisi Egypt si kasibau taveyei.

Baisaubona Kamna

¹ Ba Israel biyisi Egypt kupurinai si mamana, ba Bada Moses ba Aaron kurisi i wona, ² “Niko nawaravi wai ko wosei, bodu dagudaguna kana nawaravi kairavimi. ³ Israel biyisi ereonowasi ko wonisi kata niko nawaravi, kao kana bi 10 kamonai wai sebare kesana rakaraka kamonai yove nununai, sheep wotuna ina yauni kanina kairavina. ⁴ Ba rakaraka kega pesarisi ba aba payapaya kega tupana sina kam roboi wai rakaraka kesana maturaturasi gwabisi yai sina kam yabata. Aba payapaya sini kodei rakaraka nununai mekabage te kamkam wai nanakasike. ⁵ Ba aba payapaya kona binei wai sheep sebare, kona goat kana bodu kesana, ba kega ere purupurukanina. ⁶ Niko aba payapaya ko pota kabitamni yepo kao 14 niko nawaravi kamonai. Ba Israel biyisi ereonowasi asi sheep kona goat wotuna rabisi ina pompom wai sini kasibunuwana. ⁷ Kosi tara mutuna sina yauni ba yove memena siyauwa si kam wai, matam ketasi parisi, ba tepasi, sini rupakipaki. ⁸ Kona pomnai siyauwa keyamai sina sowo matagi ba sinamona kawasi kwarikwarina ba bread kega yeast yabata sina kani.

¹¹ Nikasike niko kam kona kani, komi koni gara kabitam, kami kae sumasuma kona kote ba nimami yai wai ami ruwakuna. Kona kam yagiyagina kairavina nikona wai Bada ana Baisaubona Kamna.

¹² Kona pomi nai yauku Egypt ana yewo roboi, sebasebare ba aba payapaya iyarokosi ani kasibunuwana. Ba Egypt biyisi asi god ereonowasi ani buibuiyisi, kairavina yauku wai Bada . ¹³ Ba tara ami matamketai ini mamatara kata komi wai namai ko mamana ba maranai ana kitai wai ani subonei. Maranai Egypt ana ravi wai komi kega nuwapoya ina borubaimi.

¹⁴ Niko kaona wai komi kona bosirei kata kimta murinai te botubotu wai sina kam bibitaba sini nuwagaire ba sina poraga Bada kurina, ba niko kaotunetune maragasina ina madamana.

¹⁵ Kata kao 7 kamonai bread kona kamkam wai kega yeast yabata. Ba kona kaonai ami yove yai yeast ko taura sairana, ba kotoi wata bread yeast yabata poraga kamonai ina kani wai, Israel kamonai koi pora taveyei. ¹⁶ Ba yebo kona kaonai ba kao 7 murinai dugu kaobaisiyena kona yauni, kega nikosi kao ruwamo kamosi yai saibira kesana kona wosei saba kam wata ko bobunagi. ¹⁷ Niko kaonai wai Bread Kega Yeast Yabata Poragina ko wosei ba ko kam bibitaba, koni nuwagaire kata nikona ini mamatara Egypt kupurinai ami bokwarakwara kamonai au rabaimi a kasibauwimi. Niko kaonai poragina kimta nununai ko wosei mama damanina ina mana kata au kaotunetune maragasina.”

²¹ Damanina ba Moses, Israel warawaraetesi iru notuwanisi ba kurisi i wona, “Ko nae yagiyagina ba Baisaubona aba payapayayisi ko bine ba koi kasibunuwana ami rakaraka kairavisi. ²² Ba keyama hyssop ragaragana si gedowi wai tara kabomai e mamana wai ko kutubi ba tarana mutuna matamketa yatasi ba parisi koi rupakipaki. Kega kesana kotoi matam ketai ina rukasibau yepo mara ina tom. ²³ Maranai Bada kupura ina riu roboi Egypt biyisi ravisi kairavina wai matam ketai, tara ina kinani wai kona yovena ini subonei ba, rabobo aneyina ini taraparanimi kata kega ami yove ina riuni ba ini kasibunuwanimi.- 12:23 Hebrews 11:28²⁴ Nikosi kao bibeyebeyena ko yauni kata kaotuntune maragasina mama damanina komi ba natunatumi muri yai yabata. ²⁵ Maranai kona riuriu Bada kupura i kao biyoyobani i na berimi wai niko poragina ko bokikisi ami puyobunuwa Bada kurina. ²⁶ Ba maranai natunatumi sina toirubaimi, ‘Niko awaika poragina?’ ²⁷ Kata ko wonisi, ‘Nikona wai Baisaubona puyobunuwina Bada kurina, kairavina kona pominai Israel biyisi asi yove Egypt kamonai i subonisi, ba ata rakaraka i gegenuwanisi. Ba Egypt biyisi i kasibunuwana.’” Damanina ba pipiya ereonowasi si rudune si gakira ba Bada si bopepetei.

²⁸ Ba Israel biyisi mekabage Moses ba Aaron si kaotuneisi wai nanakasike si wosei.

Sebasebare Iyarokosi si Rabobo

²⁹ Ba pom basunai Bada Egypt biyisi natunatusi iyarokosi, ba Pharaoh natuna yarokona, taupauma asi aba makimakirai e mamana wai, ba patuma yovena tano kamonai aba patupatuma natuna iyarokona ba aba payapaya manamisi natunatusi iyarokosi ereonowasi yabata i kasibunuwana. ³⁰ Ba Pharaoh, ana babada ereonowasi ba yebo Egypt biyisi ereonowasi si bomsiri, wai tou rasarasa i rakata saki Egypt kamonai kona pominai, basuna rabobo wai kega yove kesana i vera taveyei.

Israel Egypt si Kasibau Taveyei

³¹ Ba kona pominai Pharaoh Moses ba Aaron i yorisi si botu ba i wona, “Ko nae! Au pipiya ko boterisi, komi ba Israel biyisi, ba koi baba kairavina wai, Bada ko bopepetei. ³² Ami aba payapayaya manamisi ko yauna ba ko wona wai, ko nae, ba yauku yebo koi gaireniku.”

³³ Egypt biyisi, Israel si ru bisasarisi kata siti yagiyagina ba kupurina siti sumarei si wona, “Muri yai ba ereonowakai kana rabobo!”

³⁷ Israel biyisi Ramese si kasibau taveyei ba si nae ku Sukkoth mena. Kosi sebasebare wata ereonowana asi 600,000 rubana kaesi yai si yewo, ba bibaine ba pipiya gunaguna wai kega si baiyavisi. ³⁸ Pipiya pesarisi yabata si nae, ba yebo aba payapayaya yabosi pesarisi, cow ba sheep yabata. ³⁹ Ba Egypt kamonai flour kega yeast yabata si botuwana wai bread dubidubisi si kapuna kasi tamasina. Basuna si sasarisi wai kega si bobunaga kata bread kega yeast yabata sita kapuna ba Egypt si kasibau taveyei.

⁴⁰ Israel biyisi Egypt kamonai si mana wai bodu 430 rubana.- 12:40 Genesis 15:13; Galatians 3:17

Baisaubona Biyoyobanina

⁴³ Ba Bada Moses ba Aaron kurisi i wona, “Nikona wai Baisaubona kamna biyoyobanina: Dam tumana kega niko kam sina kani. ⁴⁴ Abisiri yai aba saibisaibira kona gimoni wai sinina ko bonai wai niko kam ina kani. ⁴⁵ Ba meo dam tumana saibisaibirina nina e mamana ba kega ko gimoni ba i botu e bobagibagi wai niko kam kega ina kani. ⁴⁶ Niko kam wai yove kamonai sina kani ba siyauwa kega kona kabari ku matara ba kega sirikena kesana kona kasikotobi.- 12:46 John 19:36⁴⁷ Israel ereonowasi Baisaubona kamna sina kam binuwagaire.”

Iyarokosi sina Bosireisi

¹ Bada Moses kurina i wona, ² “Sebasebare iyarokosi ereonowasi kairaviku ko bosireisi. Ba pipiya kona aba payapaya Israel kamonai tebi nao te tuputupuwa, wai yauku kairaviku.”- 13:2 Luke 2:23

Moses Israel biyisi kurisi i wona,

¹¹ “Muri yai Bada ina urabaimi kona riu ku Canaan kupurina ba ina berimi, mekabage komi ba tamatamami ana kaotunetune maragasina i kaobiyoyobanimi nanakasike wai, ¹² komi rapa kamonai ereonowasi te tuputupuwa kainaona wai Bada kurina kona berena. Aba payapaya manamisi natunatusi sebasebare te tuputupuwa kainao wai ereonowasi Bada karinai. ¹³ Aba payapaya ereonowasi iyarokosi wai sina puyobunuisi. Donkey iyarokona wata wai wasana sheep natuna sina puyobunuwa, ba sheep kega wai donkey kamyona sina kiyageoni. Natunatumi sebasebare iyarokosi ereonowasi wai Bada kurina ko berena.

¹⁴ Tamarai natum sebare ina toirubaim, ‘Nikona basuna wai awaika?’ Ba ke wonei, ‘ Bada yarona maragasina Egypt kupurinai patuma kamonai i urabakasibauwikai. ¹⁵ Maranai Bada Pharaoh nuwanuwana i akimei wai kega ana waina kata nae wai, damania ba Bada Egypt biyisi natunatusi iyarokosi ereonowasi, asi aba payapaya yabata i kasibunuwana. Kona kairavina yauku sebasebare iyarokosi ereonowasi rapa kamonai si nao si kasibau wai a puyopuyo bunuwa Bada kurina ba natunatuku sebasebare iyarokosi a gimogimona mena.’ ¹⁶ Kata kona wai nimami yai ini matakira ba nao bakobako mi ai ini gubei kata Bada yarona maragasinai Egypt kamonai i uraba kasibauwikai.”

²⁰ Ba Sukkoth si sumare murinai si botu ku Etham mena ba namai kupura momna parinai si kwanatu. ²¹ Ba Bada guba kasu rutainina kamonai kaoai asi keta i naovei ba pomai wai keyama karakarasina rutainina yasegana i bereisi kata kaoai ba pomai sita bowagawaga.

⁵ Maranai Egypt kana taupauma Pharaoh si wonei kata pipiya wai si vera wai, ana babadisi yabata nuwanuwasi si nebirabira ba si wona, “Kota awaika ta wosei? Kota Israel biyisi ta boterisi si nae ba karaku kotoi ina bo saibisaibirita!” ⁶ Kata ana chariot si bobunagi ba ana abiabiyisi yabata i yaunisi. ⁷ Ba ana chariot abiya woraworasi asi 600 i yaunisi, ba yebo Egypt ana chariot mutusi yabata ere kasi babada kesakesasike sita pota wai i urabaisi. ⁸ Ba Bada Pharaoh, Egypt kana taupauma nuwanuwana i badobadoi, wai Israel biyisi ere tepatorasi si yewoyewo wai i vera nunurisi. ⁹ Ba Egypt biyisi ba Pharaoh ana horse ba chariot pipiyisi, ba horse pipiyisi ba ana abiabiyisi si vera nunurisi yepo, Pi Hahiroth enaga parinai Baal Zephon sepinai, si kwanatu wai namai si taina tawanisi.

¹⁰ Ba Pharaoh i veravera kasibau maranai wai, Israel biyisi si tagagawa kata Egypt biyisi wai, murisi yai si kewai si daru si botubotu. Kosi si nagara saburere wai Bada kurina si tou gagawa. ¹¹ Ba Moses kurina si wona, “Mekabage, kata Egypt kamonai karawaga kega wai ku uraba kasibauwikai kata nina kupura momnai kana rabobo! ¹² Ka wonim, kata Egypt kamonai kuta boterikai, kata bosaibisaibirisi, i gaire kata Egypt biyisi kata bo saibisaibirisi ba ka botubotu yepo nina kupura momnai kana rabobo!”

¹³ Moses pipiyisi i kaobeyisi, “Kega kona nagara. Ko msi kikita ba Bada niko kaonai ini yawasimi kona kinani. Karaku nikosi Egypt biyisi ko kinakinanisi wai kega kona kinana meyisi. ¹⁴ Koi raoboraobo ba Bada kairavimi ini rauwa.”

Enaga Taratarana

¹⁵ Damanina ba Bada Moses kurina i wona, “Awaika kairavina kuriku ke tutou? Israel biyisi ke wonisi sina nae mom. ¹⁶ Am ruwakuna ke bokabari ba nisa tepanai ke kotoi kata okowa basuna ini baubaurani ba Israel biyisi tano gasarinai sini garubona. ¹⁷ Yauku Egypt biyisi ani nuwa badobadoisi wai, murisi yai sina vera nunurisi. Ba Pharaoh, ana abiabiyisi, ana chariot ba horse pipiyisi ana gebinubaisi, kairavina kosi kamosi yai wai, yauku kadara ana yauni. ¹⁸ Maranai ana gebinubaisi wai Egypt biyisi au kadara sina kitai ba sina kuiri kata Yauku kona Bada .”

¹⁹ Damanina ba God ana aneya Israel biyisi mamanina i binaovisi wai, i muritaina i veramaga ku murisi. Ba guba kasu rutainina yebo i muritaina ku murisi. ²⁰ Guba Israel biyisi ba Egypt biyisi basusi yai i msiri. Kona pomnai guba i wosei kata Egypt biyisi wai baidibarai si mamana, ba Israel biyisi wai yaseganai. Kata pom veoromina wai kosi kega rubana sita botu ku parisi.

²¹ Moses yarona enaga tepanai i kotoi, ba Bada sibe maragasina maramatanai i porai wai enaga i rubukoini i veramaga ba tano i gasari. Kata okowa i keyauwari ku sepinai ba yebo ku sepinai, ²² kata Israel biyisi tano gasarinai si garubona ba enaga wai papa rutainina kasusi ai ba gedusi ai si mana.- 14:22 1 Corinthians 10:1,2; Hebrews 11:29

²³ Ba Egypt biyisi murisi yai si kwabinisi, Pharaoh ana horse ba chariot ba horse pipiyisi yabata si kibisi ku enaga si gakira. ²⁴ Matapa mara i tomtom ba Bada keyama karakarasina, kasu ba guba kamonai Bada i giyou Egypt biyisi asi abiabiyisi i kinanisi, ba i wosisi wai si bo negenegisi. ²⁵ Kata asi chariot kaesi si tamotaveyana, kega rubana sita vera. Ba Egypt biyisi si wona, “ Bada Israel biyisi kairavisi Egypt ebi abiyei wai nagarisi tana vera!”

²⁶ Damanina ba Bada Moses kurina i wona, “Yarom enaga tepanai ke kotoi kata okowa ina veramaga mena ba Egypt biyisi ba asi chariot pipiyisi yabata ina kutubisi.” ²⁷ Kata Moses yarona enaga tepanai i kotoi ba mara i tomtom wai okowa yebo i veramaga kana ku gawara mena. Egypt biyisi okowa nagarina asi waina sita vera saba Bada ku enaga i kutubisi. ²⁸ Okowa i veramaga ba chariot ba horse pipiyisi ba Egypt abiabiyisi ereonowasi Israel biyisi si kibisi si gakira ku enaga wai si toma bunuwa, kega kesana i yawasa.

³¹ Maranai Israel biyisi Bada ana maragata kaikapo sakina i debei si kinani ba mekabage Egypt biyisi i gebinubaisi wai kawasi si saeke damanana, ba Bada si wareyei, ba si kumarei, ba ana saibisaibirina Moses si geruwei.

Moses ba Miriam kasi Tabora

¹ Dama ba Moses ba Israel biyisi niko tabora Bada kurina si tabori:

“ Bada kurina ana tabora basuna,

kona kaidamo sakina.

Horse ba geru pipiyina

i ru kasi paiyisi ku enaga.

² Bada kona au maragata ba kau tabora

Kona au bibiyawasina, kona wai au God.- 15:2 Psalms 118:14

Ba ana bokabakabari

Kona wai tamaku ana God, ba ana bogegeyei.

³ Bada wai abiabiyina;

Kana waba wai Bada .

⁴ Pharaoh ana chariot ba ana abiabiyisi

i kasi paiyisi ku enaga.

Pharaoh ana abiya babadisi kaimatanisi

Enaga Tarataranai si toma bunuwa.

⁵ Boga dumaduma i tarasowoisi;

Akima rutaina si rukwauruba ku raguna si gakira.

⁶ Yaro kasaum Bada wai,

maragata sakina, biwareyena kabakabana.

Yaro kasaum Bada wai,

abiya e kasikasi bimosarisi.

⁷ Am maragata biwareyena kabakabana kamonai

iyabosi si gebeyimi wai kui garu kireisi.

Am yagisi rugweyaurina i kasibau;

ba gwanewa rutanisi i kara pupunisi.

⁸ Enaga ku baina tatabi

ba i gaeni i gae saki.

I msi totora bage papa;

Ba okowa ragu boga basunai i bopadapada.

⁹ Ba abiya i pasa i wona,

‘Ana vera nunurisi, ba ana taina tawanisi.

Ba asi mariya ani kodei;

au waina wata sawara ana yauna

Au seri ana yauni

ba yaroku maragasinai ani tara bunuwanisi.’

¹⁰ Saba kom Bada am yasibe ku baini,

ba enaga i tarasowoisi;

si rukwauruba bage kawakari bitana

yoyo kaikapo sakina kamonai.

¹¹ Bada , god kesana kom rutainim?

Kotoi kom rutainim

biwareyim ba kaobaisiyem,

Maragata sakim ka kumakumarim

Wose kaimasavisi ke wosewose.

¹² Nima kasaum ku kotoi

ba kam abiya tano i tonanisi.

¹³ Am nuwayauyauna kega kakabinai kuni naovikai

ba am pipiya kui yawasisi wai.

Am maragatai kuni naovisi

am ku aba mamana kaobaisiyena.

¹⁴ Dam ba dam sina nonori ba sina kiroro

Philistia biyisi sini nuwagoyo.

¹⁵ Ba Edom kaikaiwabo nagara ina bobunuisi

Moab babada sina kiroro sini pokipokiyisi

Canaan biyisi asi maragata ina kakaba.

¹⁶ Kiroro ba nuwa kairagaraga ini bonuvisi.

Yarom ana maragatai

sini msiri bage akima

yepo am pipiya sina tupa saira, Bada ,

yepo ku gimonisi wai sina tupa saira.

¹⁷ Kuna botuvisi ba kuna terisi

am buderi koyanai.

Gawarina, O Bada , ku wosei am aba mamana

gawara kaobaisiyena Bada nimami yai ku bowai.

¹⁸ Bada ini taupauma damana.”

Miriam kana Tabora

¹⁹ Israel biyisi enaga kamonai tano gasarinai si yewo. Saba maranai Pharaoh ana horse ba chariot pipiyisi si riu ku enaga wai Bada okowina i neveramagei ba i kutubisi.

²⁰ Ba peroveta Miriam, Aaron nobuna ana retoreto i yauni ba bibaine si kibi wai asi retoreto si yauna si biyakwarana ba si rikuriku. ²¹ Ba Miriam kurisi nikasike i tabora:

“ Bada kurina ko tabora,

Kaidamonai tana bogegeyei.

Kata horse ba pipiyisi yabata

i kasi paiyisi ku enaga mena.”

Marah ba Elim Okowisi

²² Damanina ba Moses Enaga Tarataranai Israel biyisi i naovisi si nae ku Shur kupura momna. Kao tonu kupura momnai si wagawaga wai kega memena okowa si panani. ²³ Maranai si botu ku Marah wai okowina kega rubana ba sita tomani kairavina okowina wai kawasi kwarikwarina. (Kona kairavina si yorei Marah.) ²⁴ Pipiya si gwini Moses kurina si wona, “Awaika kana toma?”

²⁵ Moses bibaita kairavina wai Bada kurina i tou ba Bada keyama ragana yoginaikei i beyei ba keyamina i garu kirei ku okowa wai okowina tomanina i gaire. Ba namai Bada i yoyobanisi ba kairuwana kairavisi i wosei ba yebo i rurubaisi. ²⁶ Ba i wona, “ Bada ami God gamona kona nonora kabitamni ba gairena matanai kona wosei ba kairuwana ba ana kaotunetune kona bokikisi wai Egypt biyisi gubaga a berisis wai kega ana berimi, kairavina Yauku Bada ami bibi yawasina.”

²⁷ Damanina ba si botu ku Elim, memena okowa busibusirisi asi 12 ba palm keyamisi asi 70 temamana wai, ba namai okowa parinai si kwanatu.

Manna ba Aririta

¹ Kao 15 ba nawaravi bairuwainai Egypt si sumarei murinai, Israel biyisi ereonowasi Elim yai si tauya ba si botu ku Sin kupura momna, ba kona wai Elim ba Sinai basusi yai. ² Israel biyisi ereonowasi kupura momnai Moses ba Aaron kurisi si gwini. ³ Ba Israel biyisi si wona, “Namai Egypt kamonai Bada yaronai kata rabobo mom! Kairavina namai wai siyauwa nausi ba kam yabata ka ma bisubibirana, ba ama wainai wata ka kamkam. Saba ku botuvikai niko kupura momnai kam soyana ina bobunukai.”

⁴ Damanina ba Bada Moses kurina i wona, “Yauku kam sapamai kusana rutainina kairavimi ani porai ina gakira.- 16:4 Psalms 78:24; John 6:31 Kao patepatena pipiya sina kasibau kam kona kaona, rubana wata sina utubitaura. Ba nikasike ana rurubaisi ba ana kinani kata au kaotunetune maragasina te kibikibi kona kega. ⁵ Ba kao 6 kamonai kam sina utu bitaura ba sina bobunagi wai kao ruwamo rubana.”

¹¹ Damanina ba Bada Moses kurina i wona, ¹² “Yauku Israel biyisi asi gwini a nonori. Ke wonisi, ‘Rabisi pompom ai siyauwa kona kani ba didibarai wai kam kona kam siyabagi. Ba kona kuiri kata Yauku Bada ami God.’”

¹³ Kona rabisinai aririta si gakira asi basekwa si bonuvi ba, didibarai wai yawara i gakira asi basekwa i subibiri. ¹⁴ Maranai turuba i netaveyei, wai sawara nenanenasi ba dubidubisi ba poepoesi bage isara kupura momna tanona, i bonuvi. ¹⁵ Maranai Israel biyisi si kinani wai si kaoboneyana si wona, “Niko abi awaika?” Kairavina kosi kega si kuiri kata kona abi sawara.

Ba Moses kurisi i wona, “Nikona wai kam, Bada i berimi kanina kairavina.- 16:15 1 Corinthians 10:3¹⁶ Bada nikasike i kaotunetune: Kesakesasike wata rubanai ina utubitaura, rakaraka kamonai pipiya kesana, litre ruwamo rubana ina yauni.”

¹⁷ Israel biyisi mekabage si wonisi wai si wosei; mutusi si utubitaura saki, ba mutusi wai kega. ¹⁸ Ba maranai si rubai wai, kotoi i utubitaura saki wai kega i yauna saki, ba kotoi kega i utubitaura saki wai,- 16:18 2 Corinthians 8:15 ereonowana rubana kesanina wata si yauni. ¹⁹ Damanuna ba Moses kurisi i wona, “Kega kotoi kamna ina terei ina mamaratom.” ²⁰ Saba mutusi Moses ana sisiya kega si nonori wai, si botaura si mamaratom si puwata wai motamota si yowa, ba si dagui si pagapaga. Kata Moses i yagisi kurisi.

²¹ Didibara patepatena rakaraka kesakesasike wata asi wainai si biutubitaura ba kao i gegae i boborabora wai, mekona si ma boterei wai ibi okowa. ²² Kao 6 kamonai pipiya ereonowasi 4 litre rubana si utubitaura pipiya kesana kairavina. Ba pipiya asi babada ereonowasi nikona kairavina, si botu Moses si wonei, ²³ ba kurisi i wona, “Nikasike Bada i kaotunetune: Kata maram wai biyakam kaona kaobaisiyena, kona kairavina, karaku ami waina awaika kona gibu wai, ko gibu ba awaika koni tabi wai koi tabi.- 16:23 Exodus 20:8-11 Ba awaika wata kona ma boterei wai, maram kairavina ko tere sirei.”

²⁴ Kata Moses i kaotunetuneisi, ba si tere sisirana si mamaratom wai, kega si paga ba motamota kega si yowa. ²⁵ Moses i wona, “Niko kam wai karaku nina ko kani, basuna karaku wai Sabath, Bada kurina ba kega memena kam tano ai kona panani. ²⁶ Kao 6 kamonai koni utubitaura, saba kao kana bi 7 wai Sabath, ba tano ai kega kam kesana kona panani.”

²⁷ Bagunai wata kaotunetune si nonori, saba pipiya mutusi kao 7 kamonai si kasibau siti utubitaura saba si kinana kabakaba, kega kesana si panani. ²⁸ Damanina ba Bada , Moses kurina i wona, “Mara biyamo, au kaotunetune ba kao bibeyebeyena kona nonori? ²⁹ Kega nuwanuwami ina wapa kata, Bada Sabath komi kairavimi i berimi, kata kao 6 kamonai kam kao ruwamo rubana e bereberimi. Ba pipiya ereonowasi kao kana bi 7 wai, kega yove sina kasibau taveyei.” ³⁰ Kata pipiya kao 7 kamonai kega si bagibagi ba si yakam.

³¹ Kata Israel biyisi kamna si yorei manna. Kona kinanina bage coriander pesina rutainina ba kanina damina bage wafers ba manigewa yabata si wosei.

³⁵ Israel biyisi manna bodu 40 si kam bonei yepo si verakasibau ku Canaan kupurina.- 16:35 Joshua 5:12

Okowa Akimai Iru Busibusira

¹ Israel korotona ereonowana Sin kupura momna si kasibau taveyei, ba kupura nununai si bowagawaga neubuwa Bada i kaotuneisi wai nanakasike. Ba Rephidim yai asi basekwa si bowai, saba namai wai okowa kega ba pipiya sita toma. ² Kata Moses yabata si kawapata ba si wona, “Okowa ke berikai kana toma.”

Saba Moses i kaobeyisi, “Awaika kairavina ko bikawapatiku? Ba awaika kairavina Bada ko raurubai?”

³ Ba pipiyisi kamyosi si puru saki wai Moses kurina si gwini si wona, “Awaika kairavina Egypt kamonai ku urabaikai nikei ba natunatukai ba ama aba payapaya yabata nina kamyokai sini puru ba kana rabobo?”

⁴ Damanina ba Moses i tou Bada kurina, “Yauku abi awaika ana wosei nikosi pipiya kurisi? Kosi te bobunaga kata akimai sina raviku.”

⁵ Bada Moses i kaobeyei, “Pipiya naosi yai, ki nao ke nae ba Israel babadisi mutusi ke urabaisi ba nao am ruwakuna Nile okowina ku ravi wai ke yauni ba ke nae. ⁶ Yauku Horeb akimina tepanai naomi yai ani msiri. Ba akimina ke ravi ba okowa ina busira ina kasibau wai pipiya sina toma.” Ba Moses niko wose Israel babadisi matasi yai i wosei.

⁷ Ba kupurina i yorei Massah ba Meribah basuna Israel biyisi namai si kawapata ba Bada si rurubai ba si wonawona, “Niko Bada kamoti yai e mamana kona kega?”- 17:7 Nambas 20:2-13

Amalek Biyisi si Gebinubaisi

⁸ Damanina ba Amalek biyisi si botu ku Rephidim ba Israel biyisi yabata siti abiya. ⁹ Kata Moses, Joshua kurina i wona, “Ata sebasebare mutusi ke bineisi ba kona nae Amalek biyisi yabata koni abiya kairavita. Yauku maram God ana ruwakuna yaroku ai ba koya tepanai ani msiri.”

¹⁰ Joshua mekabage Moses i kaotunei wai nanakasike i wosei, kata Amalek biyisi yabata si abiya, ba kona kamonai wai Moses, ba Aaron, ba Hur si gae ku koya tepana. ¹¹ Maranai Moses ruwakuna yaronai i bokabari wai, Israel biyisi Amalek si getawanisi, ba yarona ibo wagawaga ba i teretere kirei wai, Amalek biyisi Israel si getawanisi. ¹² Maranai Moses yarona si bowagawagana wai akima si yauni, gaburinai si terei ba tepanai i makira. Kata Aaron ba Hur yarona si bokabara wai, kesana sepinai ba kesana yebo sepinai, kata yaroyarona kasi gawarai si mamana yepo kao i yori. ¹³ Kata Joshua Amalek abiabiyisi ana seri yai i gebinubaisi.

Jethro i Bowagawaga Moses Kurina

¹ Moses rawana sebarena Jethro, Midia biyisi asi priest, awaika ereonowana Moses ba Israel biyisi God kurisi i wosei ba, Egypt kamonai i uraba kaibuvisi wai, warana i nonori.

⁵ Kata Jethro, Moses natunatuna ruwamo ba sinasi yabata si nae ku kupura momna, God ana ku koya memena Moses i mamana wai nakai. ⁶ Karaku wata i botubotu ba wara i porai Moses kurina, “Yauku rawam Jethro, natunatum ruwamo ba kaowam yabata ka botubotu kana kinanim.”

⁷ Damanina ba Moses iverabeyisi ba rawana i pepetei ba i yaoni. Ba kosi si toiruba bibirana kata kosi damanina wata kona? Ba si riu Moses ana ku tent mena. ⁸ Ba abi awaika ereonowana Bada Egypt biyisi ba asi kaiwabo Pharaoh yabata kurisi i wosei wai, ba yebo Israel biyisi mekabage si bokwarakwara si botu, ba Bada i yawasisi wai Moses rawana i tupana mamatarei. ⁹ Awaika gairena ereonowana Israel biyisy kurisi i tupuwa ba Jethro i nonori wai i nuwagaire, kata Bada Egypt biyisi asi maragata i bobinubai.

¹⁰ Ba Jethro i wona, “Bokabakabara Bada kurina, kairavina Egypt biyisi yarosiyai ba asi teupauma Pharaoh yaronai i yawasimi, ba Israel biyisi Egypt yarosiyai i yawasisi. ¹¹ Karaku yona a kuiri kata Bada i maragata saki, kega bage god ereonowasi pipiya te bopepetisi wai rutainisi. Kairavina Egypt biyisi si bimaragata saivira ba si kaotawatawanisi wai i yauna taveyisi.”

¹² Damanina ba Moses rawana Jethro suwara kapukapunina ba puyo bunuwa mutusi i kabara i botu God kurina. Ba Aaron ba Israel babadisi si botu si kesanisi ba Moses rawana yabata puyobunuwa kamna God matanai si kani.

Jethro Moses i Kaobitotori

¹³ Mara i tom wai Moses ana bibuibuiya gawarinai i makira, ba pipiya asi bimagoyowana i nonora ba i teretere bitotora, didibarai i dagui ba i nenae yepo i rabisi. ¹⁴ Moses pipiya kairavisi niko wose i wosewosei wai rawana sebarena i kitai wai i wona, “Kata awaika kairavina nikosi wose pipiya kairavisi ke wosewosei? Ba awaika kairavina kom ikesimi ke bi buibuiya? Ba nikosi pipiya nina didibarai si msiri yepo i pom.”

¹⁵ Moses i kaobeya i wona, “Yauku nikona a wosewosei basuna pipiya tebotubotu kuiriku God ana waina sina kuiri. ¹⁶ Maranai pipiya ruwamo sini bi magoyowana ba sina botu kuriku wai yauku ana nonori ba ana wonisi kata kotoi e bisuwona, ba yauku God ana kaotunetune ba kaobibeyebeyena ana wonisi.”

¹⁷ Saba Moses, rawana i wona, “Nikasike ke wosewosei wai kega i gaire. ¹⁸ Niko saibira ikesim damana ke wosewosei wai i bita saki. Kom ba nikosi pipiya yabata wai sinimi sina kariari. ¹⁹ Ke nonora kabitam ba ana kaobibeyebeyim, ba God kaurim ina mana. I gaire saki kata nikosi pipiya asi bimagoyowana kom kuna yauna kuna nae God kurina. Damanina pipiya kairavisi God kurina kuni sisiya ba asi bita kuna berei. ²⁰ Kom God ana kaotunetune, ba ana kairuwana kuni beyebeyisi, ba kuna wonisi kata yawasa gairena ketanai sina mana. ²¹ Ba yebo pipiya kabitam, kamosi yai kuna bineisi, kotoi God e kumakumarei ba iyabosi maisa kwarukwarumina kega te yuyauni wai, ke bineisi sini bada kesana pipiya 1,000 rubana ba kesana, 100 rubana kesana, 50 rubana, ba kesana, 10 rubana sini naovisi. ²² Kosi pipiya sini buibuiyisi ba asi bimagoyowana sina tere bitotorisi. Ba awaika ina padapada saki wai, sina botuwei kurim, ba awaika kega padapadana wai, kosi yebo sina bobitotori. Sini baisim bita sina kabari wai kom kurim ina tapeyana. ²³ Nikona kuna wosei wai God ini naovim, ba kega sinim ina kai, ba nikosi pipiya nuwagaireai ba nuwanubai sina nae asi ku yove.”

²⁴ Kata Moses rawana gamona i nonori. ²⁵ Damanina ba pipiya kabitam i bineisi Israel kamonai ba i terisi kata pipiya siti naovisi kesana 1,000 rubana, kesana 100 rubana, kesana 50 rubana ba kesana 10 rubana. ²⁶ Nikosi babada wai kosi mamanina pipiya asi bi magoyowana sina tere bitotorisi. Ba bi magoyowana piropirosi wai Moses kurina sina nae, ba tapeyanisi wai, kosi yebo sina bobitotora.

²⁷ Ba kona murinai Moses rawana i kiuruwei ba i veramaga ana ku kupura.

Sinai Koyanai

¹ Israel biyisi nawaravi tonu murinai Egypt si kasibau taveyei ba si nae ku Sinai kupura momna. ² Namai Sinai koyana gaburinai si kwanatu.

³ Damanina ba Moses i gae God kurina ku koya tepana ba namai Bada Moses i yorei, ba i wona, “Nikasike Jacob ana yove ba Israel biyisi ke wonisi, ⁴ ‘Komi ikesimi ko kinani awaika Egypt biyisi kurisi a wosei, ba mekabage a kabarimi manubada natunatuna mapemapenai e kabakabarisi wai rutainina, ba a botuvimi nikei kuriku. ⁵ Kona bosisiriku ba au bidamanina maragasina kona bokikisi wai, komi dam ereonowasi kamosiyai wai komi au pipiya. Niko dobu tompipinina wai yauku kariku ai, saba ereonowasi kamosi yai, komi ana bineimi kata komi au sawara kaimasawina.- 19:5 Titus 2:14⁶ Komi kona bosaibiriku priest asi saibira kona wosei, kata ami dam wai pipiya kaobaisiyesi yauku karikuai.’- 19:6 Deuteronomy 7:6; 1 Peter 2:9; Revelation 1:6, 5:10 Ba nikosi sisiya Israel biyisi kuna wonisi.”

⁷ Kata Moses koyai i gakira ba Israel babadisi i runotuwanisi ba Bada awaika ereonowana i kaotunetunei wai i kara berisi. ⁸ Damanina ba pipiya ereonowasi si kaobeyei si wona, “Awaika ereonowana Bada i kaotunetunei wai kana wosei.” Ba Moses mekabage pipiya si kaobeyei i veramaga wai Bada i mamatarei.

⁹ Ba Bada Moses i wonei, “Guba duma potanai ana botu ani sisiya kurim wai pipiya sina nonoriku ba mara kau ereonowana sini geruvim.”

Damanina ba Moses mekabage pipiya si sisiya wai Bada i mamatarei. ¹⁰ Ba Bada Moses i wonei, “Ke gakira pipiya kuna wonisi kata karaku ba maram sina bobunaga meyisi kata God sina bopepetei, ba kasi gara sina bosusuwana, ¹¹ ba mara bitonuina sina bobunaga kairavina, kona kaonai Bada Sinai koyanai ina gakira, ba pipiya ereonowana sina kinani. ¹² Parata ko taini koya koni subibiri, kata pipiya kega sini garubona. Ko kaobiyoyobanisi sina kinana kabitam, kega ku koya kona gae kona, parinai kona yewo. Kotoi wata koya ina borubai wai ina rabobo. ¹³ Meo pipiya kona aba payapaya parata ini garubonei wai, kega nimami yai kona borubai, saba i yowai kona akimai ko kasibunui.- 19:13 Hebrews 12:18-20 Saba maranai gisuma sina baini, gugurina kaikapona ba veoromina wai pipiya sina gae ku koya.”

¹⁴ Damanina ba Moses koyai i gakira ba pipiya i wonisi kata sita bobunaga meyisi bokabakabara kairavina ba kasi gara sita bosusuwana. ¹⁵ Ba Moses kurisi i wona, “Ko bobunaga meyimi kao bitonuina kairavina, ba karaku ba i nae ku marana wai kega kaokaowami yabata kona dauwa.”

¹⁶ Kao bitonuina didibarinai i bokadakadari ba waiparara i guguri ba, guba dumadumana koya tepana i sowoi, ba kosi gisuma gugurina kaikapo sakina si nonori.- 19:16 Revelation 4:5 Ba pipiya ereonowasi namai si mamana wai si nagara ba si kiroro saburere. ¹⁷ Moses asi kwanatu ai i naovisi si kasibau ku koya gaburina ba si msiri, God sita verabeyei. ¹⁸ Sinai koyana ereonowana kasu i sowo potai, kairavina Bada keyama kaikarakarasina tepanai i gakira. Kasu kaikapona i gae nanakasike bage gwaba e karakarasi wai rutainina, ba koya ereonowana i nukei. ¹⁹ Kata gisuma gugurina i rakata ba i rakarakata saki wai kamonai Moses i sisiya, ba God gamona waiparara rutainina i kaobeyei. ²⁰ Ba Bada Sinai koyana tepanai i gakira ba Moses i yore ita gae ku koya tepana. Damanina ba Moses i gae ku koya tepana.

Kairuwana asi 10

¹ Damanina ba God pipiya nikosi wona ereonowasi i sisiyana.

² “Yauku Bada ami God Egypt kupurinai patuma saibirina kamonai ai yawasimi.

³ Komi kega god mutusi kona bopepetisi. Yauku ikesiku wata.

⁴ Komi kega tarabibisaka kairavim, kana kinana bage sawara kesana kaidamonai, kona dobu ai, kona okowai, kona tano gaburinai, kona tasi. ⁵ Komi kega kosi kona ruduneyisi, kona kosi kona pepetisi kairavina Yauku Bada ami God nuwanuwa rauwiku, ba pipiya iyabosi te bi sinikikiyiku wai, tamatamasi asi saroba ini garubona natunatusi kurisi, ba wawasi ba ini garubona tuputupusi, ba nosinosisi kurisi. ⁶ Saba iyabosi tebi nuwayauyauniku ba au kairuwana te bosisireyei wai au nuwayauyauna kurisi ina nae bonabona, kimta ba ku kimta kesana ba ina madamana.- 20:6 Exodus 34:6,7; Deuteronomy 7:9,10

⁷ Kau waba kega kona kaobibisakei kairavina Yauku Bada ami God, ba kotoi wata kau waba ina kaobibisakei wai saroba ina yauni.

⁸ Au Sabath marana ko nota kikisi ba ko bokuwayei.- 20:8 Exodus 16:23-30⁹ Taparoro kesana kamonai kao 6 ami saibira kona wosei, ¹⁰ saba kao kana bi 7 wai biyakam kaona bibigairenina, Bada ami God kairavina. Kona kaonai wai kega kotoi ina saibira, kega kom, kona natunatum, kona am saibisaibirina, kona am aba payapaya, kona kam wagawaga i botu yabata ko mamana wai. ¹¹ Kairavina Bada ami God kao 6 kamonai wai sapama ba dobu, enaga ba awaika ereonowasi kamosi yai i wose, ba kao kana bi 7 kamonai wai i yakam. Kona kairavina i gaireni ba i bosairei kata kona kaobaisiyena.- 20:11 Genesis 2:1-3

¹² Tamam ba sinam kuna bokuwayisi,- 20:12 Matthew 15:4, 19:19; Mark 7:10; Ephesians 6:2 wai Bada am God yawasa niko dobu ai e bereberimi wai kuna mana ina veoroma.- 20:12 Ephesians 6:3

¹³ Kom kega kuna kasibunuwa.- 20:13 Genesis 9:6; Matthew 5:21

¹⁴ Kom kega kuna rukaipara.- 20:14 Matthew 5:27; James 2:11

¹⁵ Kom kega kuna pisikara.

¹⁶ Kom kega maturam kuni sisiyena kwarumei.- 20:16 Exodus 23:1; Matthew 19:18; Mark 10:19; Luke 18:20

¹⁷ Kom kega maturam ana yove, kuna kita kirorowei; kega maturam kaowana kuna kita kirorowei, kona ana aba saibisaibira sebare kona wasike, kona ana aba payapayaya, kona ana sawara kesana kuna kita kirorowei.”- 20:17 Romans 7:7, 13:9

Ikesim Kam Gubaga

¹² “Kotoi wata pipiya kesana ina ravi, ba ina rabobo wai, kona sina kasibunui. ¹³ Saba memena bage i tupuwa kwatama ba God i damaninei ba i tupuwa wai, yauku ana gawara ana binei ba yawasa kairavina naka mena ina vera.- 21:13 Nambas 35:10-34¹⁴ Saba abisiri yai pipiya nuwanuwana i geyei, ba i kasibunuwa wai kasibunuwa pipiyina bagunai wata ina vera au ku raunabonabo saba sina taina kwarokwaroi ba sina kasibunui.

¹⁵ Kotoi wata tamana kona sinana ina ravi wai, sina kasibunui.

¹⁶ Kotoi wata pipiya kesana ina i veruwei ba i buniyei, ba memna bage i gimoni, kona e botawani ba sina panani wai, ko kasibunui.

¹⁷ Kotoi wata tamana kona sinana ina kaonawai wai, sina kasibunui.”- 21:17 Matthew 15:4; Mark 7:10

Yawasa Kairuwanina

¹⁶ “Memei bage sebare kesana wasike sinitupana ba kega si bobeyei ba i dauwei, wai wasikena maisana ina terei ba ina rabai. ¹⁷ Saba memei bage wasike tamana ini gesa wai, sebarena wasike sinitupana maisana rubanai tamana ini maisani.

¹⁸ Kaikairapusi kega kona boterisi sina mana.- 22:18 Deuteronomy 18:10,11

¹⁹ Kotoi wata aba payapaya ina dauwei wai kona pipiyina ko kasibunui.- 22:19 Levitikus 18:23

²⁰ Kotoi wata god mutusi kurisi e puyopuyo bunuwa, ba kega Bada kurina wai, ko kasibigoyoni.

²¹ Komi dam tumana kega kona bogoyoisi, kona koni poroporovisi. Kona nosi, kata komi yebo kainaonai Egypt kamonai wai nanakasike.

²² Kega sobesobere kona boyeboyewa kona bogoyoisi. ²³ Memena bage kona bogoyoisi ba, sina tou kuriku wai, asi tou ana nonori, ²⁴ ba ani yagisi saki wai seri yai ani kasibunuwanimi. Ba kaokaowami sina sobere ba natunatumi sini boyeboyewa.

²⁵ Memei bage au pipiya kesana bibaita ana waina ba mane ku berei, wai kega yebo maisana ku tepana kuna tere geyei, mane aba potapota biyisi rutainisi. ²⁶ Memena bage maturam kana nuba garana ku yauni wai ke bere meyei ba muri yai kao ina gakira, ²⁷ kairavina kana nuba garana kesanaikei ba mekabage ina dauwa. Ba memena bage kega kuna berei ba ina tou kuriku bibaita kairavina wai, ana nonori, kairavina Yauku Bada baibai nuwanuwaniku.”

Kaobiyoyoba Totorisi, Poponisi ba Bainuwanuwana

¹ “Kom kega sisiya kwaru kwarumisi kuni sisiyana pipiya kurisi.- 23:1 Exodus 20:16 Ba yebo kom kega bibuibuiya badana naonai kuna kwaruma ba pipiya goyona i wosei wai kuni baisi.

² Kega koroto kuni bonebonisi goyona kona wosei, ba bibuibuiya biyina naonai pipiya kwaru karumisi kuni bonebonisi. Kega goyona kona kibi, kosi rutainisi.”

Bidamanina Maragasina si Bosekwai

¹ Damanina ba Bada Moses i wonei, “Kom ba Aaron, Nadab, Abihu, ba Israel magumagurisi asi 70 ko gae Bada kurina ba yogina rabarabai kona bopepeta. ² Saba Moses ikesinaikei ini msi gwabi Bada kurina ba mutusi wai kega yabata, ba kega pipiya yabata sina gae ku koya tepana.”

³ Maranai Moses i nae ba Bada mekabage i wonei wai, pipiya i wonisi ba ereonowasi si kaobeyei si wona, “Yakai Bada awaika i wonei wai ereonowana kana wosei.” ⁴ Ba Moses Bada ana sisiya ereonowasi i kiruma kabikabitam.

Ba maratom didibarinai i bomsiri ba koya gaburinai akimai raunabobo i bowai, ba yebo akima kaikaposi asi 12 i totorisi, i matakira kata dam asi 12 Israel kamonai te mamana. ⁵ Ba Moses Israel yaraka mutusi i poraisi kata suwara kapukapunina si suwara ba bull wotusi nuwanuba suwarina Bada kurina si puyobunuwa. ⁶ Moses tara mutuna i yauni ba ku kaboma i sewai, ba mutuna raunabonabo i rusewasewai. ⁷ Ba Bidamanina Maragasina Bukana i yauni ba i baiyavi pipiya kurisi. Ba si kaobeyei, “Yakai Bada awaika ereonowana i wona wai kana wosei, ba kana bosisiri.”

⁸ Damanina Moses tara kabomina i yauni ba pipiya ku tepasi iru sewasewaisi ba i wona, “Ko kinani, niko tara ebi beyita kata bi damanina maragasina Bada yabata ko wosei wai gamona nununai nanakasike ko wosei.”- 24:8 Matthew 26:28; Mark 14:24; Luke 22:20; 1 Corinthians 11:25; Hebrews 9:19,20, 10:29

¹² Ba Bada Moses kurina i wona, “Kom ke gae kuriku ku koya tepana, ba namai ke mana, ba au kairuwana ba kaotunetune akimai a kirumi kao bibeyebeyesi kairavina wai ana berim.” ¹³ Damanina Moses ba kana bibaita Joshua yabata si bobunaga ba Moses, God ana koya i gaeni.

¹⁴ Ba Moses warawaraetesi i wonisi, “Nina koni bipotapota yepo kana veramaga kurimi. Aaron ba Hur wai komi yabata kona mamana. Ba iyabosi te bimagoyowana wai, sina botu kosi sina kinanisi wai, kosi sina bobitotorisi.”

¹⁵ Moses God ana koya i gaeni i gae ku tepana ba guba koyana i sowo potai. ¹⁶ Kata Bada ana kadara i gakira ku Sinai koyana ba guba i sowo potai kao 6 rubana ba, kana bi 7 wai Bada guba kamonai Moses i yorei. ¹⁷ Ba Israel biyisi koya gaburinai, si gagawa wai God ana kadara yaseganina kaikapona, bage keyama kaikarakarasina rutainina koya tepanai si kinani. ¹⁸ Ba Moses maranai koya i gaeni wai guba ku kamona i riu ba nai i mana kao 40 ba pom 40.

God ana Tabernacle

God Moses i wonei pipiya ita wonisi kata siti baita puyo bubausi ba bubausi sita puyo God ana Tabernacle bowaina kairavina.

⁸ Bada , Moses kurina i sisiya i wona, “Pipiya au Tabernacle sina bowai kata yauku kamosi yai yabata kana mana. ⁹ Niko Tabernacle kona bowai wai sawarina ereonowana mekabage ani beyim wai nanakasike kona wosei.”

Baidamanina Maragasina Dedewagina

¹⁰ “Pipiya ke kinanisi, kata acacia keyaminai Bidamanina Maragasina Dedewagina sina bowai, ana veoroma 110 cm rubana, ba ana nabanaba 66 cm rubana, ba ana kaidagima wai 66 cm rubana. ¹¹ Ereonowana kamona ba kupuna gold wata kona pasi koni subibiri. ¹² Kapi asi bata gold yai ko kapuni ba ko wosei kata, ruwamo kaena sepinai ba yebo ruwamo sepinai koi karapasipasi. ¹³ Ba pawo acacia keyaminai ko wosei ba gold yai ko pasibibiri. ¹⁴ Bidamanina Maragasina Dedewagina kabarina kairavina wai pawo koi tupasusurana ku kapi kamona ba kona kabari. ¹⁵ Nikosi pawo kapi kamonai sina mana wai kega meyana kona botavetaveyana. ¹⁶ Au bi damanina maragasina akimai a kiruma wai, ba ana berimi wai ku Bidamanina Maragasina Dedewagina ku kamona ko terei.

¹⁷ Ba piragagoyo pupuna taveyina gawarina kana sowo wai, gold yai wata, kona wosei, ana veoroma 110 cm rubana, ba ana nabanaba 66 cm rubana. ¹⁸ Cherubim+ 25:18 Cherubim wai aba koyakoyaga aneaneya. ruwamo gold yai ko gudai ba kana sowo pusirisi yai ko taura.- 25:18 Hebrews 9:5¹⁹ Ba cherubim kesana sowona damonai ko terei, ba yebo kesana sepinai ko terei. Kata sowo ba cherubim sina wosei wai kesanina. ²⁰ Ba mapemapesiyai sina sowoi ba sina bo papari. Kosi sini nao bereyana ba sini genara ku piragagoyo pupuna taveyina kana ku sowo. ²¹ Ba kaobiyiyibana maragasina dedewagina kana sowo ai ke kasi tawani ba au bi damanina maragasina akimisi ana berim wai ku kamona ki uwani. ²² Ba namai ana pananim ba au kaotunetune maragasina ereonowana ana berim Israel biyisi kairavisi.”

God yebo Moses i wonei, kata mekabage pesapesa kaobaisiyena ita wosei ba gold yai bane kapukapuna kana raunabonabo, ba kibe kana aba bimsimsiri ere ragaragana kibe asi 7 sita botawanisi, yebo Moses i wonei, kata ana gweda kaobaisiyena ita bowai, tupayaraga ruwamo kamonai garai sina tupayaragi ba yovena, sina gari potai. Yebo i wonei bronze yai raunabonabo sita wosei aba payapaya puyobunuwa kairavina ba bosuwana kabomina bosuwana kairavina.

Priest kasi Gara

¹ “Tuwateim Aaron ba natunatuna Nadab, Abihu, Eleazar, ba Ithamar. Israel kamosi yai ke yorisi. Ba ke bosairisi yauku au priest ba sina bosaibisaibiriku. ² Ba Aaron kana kaobunaga garana bobokuwayina ba nuwarubarubana ke wosei kata, maranai ina kotei wai pipiya sina kumarei ba sina bokuwayei. ³ Pipiya a bineisi ba nuwasuya i a berisi, kata sawara mutusi te wosewose wai, kosi wata ke yorisi kata Aaron kana priest garana sina wosei. Ba kuni gaireni ba kuna bosairei, kata kona priest rutainina ina bosaibiriku.”

Bezalel ba Oholiab

¹ Kata Bada Moses kurina i wona, ² “Ke kinani! Yauku Judah ana dam kamonai Bezalel, Uri natuna ba Hur wawana a binei, ³ ba God ana Kanuma ai bonuwei, wai nuwasuya, kuira ba saibira a berei wai sawara ereonowasi yaronai e wosewose: ⁴ Kona saibira e bigayamei ba e kaobibeyebeyisi wai gold, silver, ba bronze yai te wosewose, ⁵ akima te taratara kiruma, ba keyama te rautasi bibisaka. Nikosi saibira i kesina i kuira wai nimanai ina wose kabitam. ⁶ Ba yebo Oholiab a binei, Ahisamak natuna, Dan ana dam kamonai. Kona, kana bibaita kesana, saibira a berei kata turaturana yabata sina saibira. Ba yebo kosi ereonowasi nuwasuya a berisi wai nimasiyai saibira a kaotunetune yim wai, ereonowana sina wose. ⁷ Au Tabernacle, ba Bidamaina Maragasina Dedewagina kana kasitawana, ba piragagoyo pupuna taveyina gawarina ba sawarina ereonowana, ⁸ pesapesa, ba kana sawara ereonowana, kibe kana aba bimsimsiri. Gold yai si wosei wai ba sawarina ereonowana, pugu gairena kana kapukapuna raunabonabona ba sawarina, ⁹ ba suwara kapukapuna kana raunabonabo, ba sawarina, ba bosuwana kabomina ba kana aba bimsimsiri, ¹⁰ ba yebo gara kaobaisiyesi kona metena, Aaron kairavina ba natunatuna yabata kata sina kote ba priest saibirina sina wosei. ¹¹ Ba biboro wairorona, ba bane puguna, gawara kaobaisiyena kairavina. Ba pipiya nikosi sawara sina wose mekabage a kaotunetuneyim wai nanakasike.”

Cow Natuna Gold yai si Wosei

¹ Maranai si kinana kabakaba kata Moses koyai i bi metewa wai, si botu Aaron kurina si kesanisi ba si wona, “Ke botu ama god kuna wosei kata, kona ini naovikai. Ba niko sebare Moses Egypt kamonai i urabaikai ka botu nina, ba i tere bigaruikai wai kega ka kuiri awaika i tupuwa kurina.”- 32:1 Acts 7:40

² Ba Aaron i kaobeyisi i wona, “Kaokaowami bibaine ba natunatumi sebasebare ba bibaine kasi taina komakoma gold yai si wose wai ko bo tavetaveyana ba ko yauna ko botu kuriku.” ³ Kata pipiya ereonowasi kasi taina komakoma gold yai si wose wai si bo tavetaveyana ba si botu Aaron si berei. ⁴ Ba Aaron taina komakomasi i yauna ba i kapuna si nubanuba ba tarabibisaka cow natuna rutainina i wosei.- 32:4 Acts 7:41

Ba maranai si kinani wai si yogoi ba si wona, “O Israel, niko god Egypt kamonai i uraba kasibauvita!”- 32:4 1 Kings 12:28

⁵ Maranai Aaron nikona i kinani wai bull natuna naonai raunabonabo i bowai ba i yonayona, “Maram wai Bada kurina tana poraga.” ⁶ Maratom didibarinai pipiya asi suwara kapukapunisi ba nuwanuba suwarisi aba payapayayisi si kapuna. Ba si makira si kam yogoyogo ba si tomatoma neganega, ba sibi kakaiwaka wose.- 32:6 1 Corinthians 10:7

⁷ Ba Bada Moses i wonei, “Ke gakira yagiyagina, kairavina am pipiya Egypt yai ku uraba kasibauvisi wai kosi te boneganega tebi kakaiwaka wose. ⁸ Kosi au kaotunetune a wonisi siti sununuri wai ketana si siwani, ba gold yai bull natuna si wosei ba kona te bopepetei. Ba te wonawona, ‘Israel biyimi, nikona wai ami god kona Egypt kamonai i naovimi ko kasibau.’ ⁹ Nikosi pipiya a kinanisi i kakaba.” Bada Moses kurina i wona, “Ba kosi asi bi kawakasekase wai, a kuiri. ¹⁰ Kona kairavina ke boteriku. Au yagisi damina sina yauni. Yauku ana reso bigarugaruisi ba ana kasibigoyonisi. Ba kosi wasasi wai, muri yai kom kamomi yai dam kaikapona ana wosei.”

¹¹ Saba Moses Bada ana God kurina i baba kuwakuwayei i wona, “ Bada , awaika kairavina am pipiya kurisi ke biyagisi, kom am maragatai am pipiya Egypt kamonai ku urabaisi si kasibau. Kona kairavina kega kuni yagisi ba kuna kasibigoyoisi! ¹² Memena bage Egypt biyisi sina kayo wona, ‘Ana nota goyona wai, Israel biyisi i uraba kasibauvisi ku koya mena, kata niko dobu ai iti kakabisi.’ Am yagisi ke boterei, ba ki nuwanuwanisi, ba kega goyona am pipiya kurisi ke wosei. ¹³ Am saibisaibirisi Abraham, Isaac ba Jacob ke nosisi, kom ikesim mom ku wona, ‘Am rakaraka ana wosisi sina rakata saki, bage gwamegwame sapamai, ba niko dobu wai iti karisi yai asi buderi yepo mara ku damona.’”- 32:13 Genesis 17:8, 22:16,17¹⁴ Kata Bada i nuwabirabira ba Israel biyisi i nuwanuwanisi ba kega i kasibigoyonisi.

¹⁵ Ba God ana kairuwana akimisi ruwamo naonai ba murinai i kiruma ba Moses i berei ba koyai i kabara i gaikira. ¹⁶ Nikosi akima petapetasi wai God i wose wai, ikesina mom i kiruma.

¹⁷ Maranai Joshua pipiya si rasarasa ba sibi kwaributu wai Moses i wonei, “Nonorina bage abiya kwanatu kamonai i tupuwa.”

¹⁸ Ba Moses i kaobeyei i wona, “Kega bimaragata rasana kona getawana rasana saba nuwagaire taborina a nonori.”

¹⁹ Maranai Moses i botu ku basekwa parina, ba bull wotuna si wosei, ba si rikuriku i kinanisi wai, i yagisi saburere. Ba akima petapetasi koya gaburinai i garugaru ku tano ba si kasigaoworana. ²⁰ Ba bull wotuna si wosei wai i yauni ba keyamai i kapuni, ba i kasigudagudai i isara ba i garu kirei ku okowa ba Israel biyisi i kaomainimainisi si tomani.

²¹ Ba Aaron kurina i wona, “Nikosi pipiya mekabage si wosim wai, kui naovisi niko piragagoyo kaikapo sakina ko wosei?”

²² Ba Aaron i kaobeyei, “Au bada, kega ki yagisi kuriku, nikosi pipiya ku kuirisi kata piragagoyo wai asi nuwaonowana. ²³ Kona kairavina kosi si woniku, ‘Ama god ke wosei kata kona ini naovikai. Ba niko pipiya Moses, Egypt kamonai i urabaikai ka kasibau wai kega ka kuiri awaika kurina i tupuwa.’ ²⁴ Kata a wonisi, ‘Kotoi wata gold karimi yai wai ke botaveyei kuna beriku.’ Ba si beriku wai ku keyama karakarasina ai garu gegeyana ba kosi kamosi yai bull wotuna i tupuwa.”

²⁵ Moses i kitai kata Aaron pipiya i kita bigaruisi si veravera kwatakwatama ba kasi abiya matasi yai si bigigima meyisi. ²⁶ Kata Moses basekwa matam ketanai i msiri ba i parara, “Kotoi wata Bada kairavina wai, ke botu kuriku!” Ba Levi biyisi ereonowasi si notuwa kurina.

²⁷ Damanina ba Moses kurisi i wona, “ Bada Israel asi God nikasike e wonawona, ‘Ereonowami ami seri ko yauna ba niko basekwa kona riu roboi, niko mutunai kona dagui ba kona nae no ku mutuna, warewaresimi, turaturami ba maturaturami ereonowasi koni kasibunuwana.’” ²⁸ Kata Levi biyisi Moses i kaotunetuneyisi wai si wosei, kata kona kaonai, wai pipiya 3,000 rubana si rabobo. ²⁹ Damanina ba Moses i wona, “Komi karaku Bada i bosairimi kairavina natunatumi ba warewaresimi kega ko gegenuvisi wai niko kaonai i gairenimi.”

³⁰ Kata mara i tom wai Moses pipiya kurisi i wona, “Komi piragagoyo i rakata saki ko wosei, wai karaku yauku ana gae Bada kurina, ba ani babai ami piragagoyo meimei bage ina notataveyei.”

³¹ Damanina Moses i veramaga i gae Bada kurina ba i wona, “ Bada , nikosi pipiya piragagoyo i rakata saki si wosei. Kosi yebo gold yai asi god si wosei. ³² Ba karaku a bibaba kuwakuwaim asi piragagoyo ke notataveyei, ba kega wai yauku sarobina ana kabari.”

³³ Saba Bada Moses i kaobeyei i wona, “Kega, iyabosi wata piragagoyo si wosei kuriku wai, kosi wata kasi waba au buka kamonai ana kasipupuna.- 32:33 Psalms 69:28; Revelation 3:5³⁴ Ba karaku ke nae, ba au pipiya ki naovisi ba a wonim wai kona ku kupurina. Au aneya ini naovimi. Ba saba saroba kana mara ina botu wai, kona maranai piragagoyo kairavina saroba ana berisi.”

³⁵ Kata Bada gubaga goyona mom i porai, pipiya kurisi kairavina kosi bull natuna Aaron i wosei wai, si bopepetei.

Baidamanina Maragasina

¹ Bada , Moses kurina i wonei, “Akima petapetasi ruwamo ke ru tasi, rorowa kui kasi gaoworana wai rutainisi ba wona, a kiruma wai nanakasike yebo ana kiruma mena. ² Maram mara ina tom wai ke bobunaga, ba ke gae ku Sinai koyana ba namai tepanai ana pananim. ³ Kega kesana kotoi yabata kona gae, kona kotoi kesana koyanai sina kinani. Ba kega abapayapayaya yabosi koya gaburinai sina kam bisubibiri.”

⁴ Damanina ba Moses, Bada i kaotunetunei wai, nanakasike akima ruwamo rorowa i rutasi wai rutainisi i bobunaga ba mara tom wai i kabara i gae ku Sinai koyana. ⁵ Ba Bada guba kamonai i gakira, ba asi ruwamo nai si msiri. Ba Bada ikesina mom kana waba i kaobidebei “Yauku Bada .” ⁶ Ba Moses naonai i veraibira, i wonawona, “Yauku Bada , Yauku Bada yagaireku, ba bibaita bitaku. Kega yagisi yagiyaginiku ba au nuwayauyauna ba yapaiki i rakata saki. ⁷ Au bai nuwayauyauna ne bonabonana, kimta thousand rubana kurisi ba wose goyogoyosi, kawakasekase, ba piragagoyo a notanota taveyana. Saba wose goyosi pipiyisi kega ana kita bigaruisi, tama ana saroba ini garubona natunatuna, ba natunatusi ba kimta bitonuina ba bai bataina kurisi.”- 34:7 Exodus 20:5,6; Deuteronomy 7:9,10

⁸ Moses i rudune ku tano ba God i bopepetei ba i wona, ⁹ “ Bada , memna bage ke binuwagaire kuriku wai, a bibabaim yabata ta nanae. Bisuwona nikosi pipiya wai kawakasekasesi, saba ama piragagoyosi ke notataveyana ba ke yaunikai kata am buderi.”

¹⁰ Damanina ba Bada i wona, “Yauku bidamanina maragasina kom yabata a wosewosei. Ami pipiya ereonowasi matasi yai, wose kaimasavisi kega meyana dam kesana kamonai kona dobu kamonai si wosei wai ana wose. Nikosi wose wai komi kairavimi ana wose, pipiya yabata ko mamana wai ereonowasi au maragata sina kinani ba sini wareyei.”

²⁸ Moses kao 40 ba pom 40 Bada yabata si mana ba kega kesana kam i kani kona okowa i tomani. Ba bidamanina maragasina akima petapetasi tepasi yai Bada i kiruma — kata Kairuwana asi 10.

Moses Naona Iru Yasegana

²⁹ Maranai Moses Sinai koyanai kairuwana akimisi petapetasi ruwamo i kabara i gakira wai, kega i kuiri kata Bada yabata si sisiya wai naona i ruyasegana. ³⁰ Maranai Aaron ba Israel biyisi Moses naona si kinani i ruyasegana wai si nagara ba kega si botu ku gwabina. ³¹ Saba Moses i yoereyana wai Aaron ba Israel badasi si botu ba kurisi i sisiya. ³² Kona murinai Israel biyisi si notuwa kurina, ba God ana kaobiyoyobana ereonowana Sinai koyanai Bada i berei wai i kara berisi. ³³ Maranai Moses kurisi i sisiya i kakaba wai, kana kwarewai naona i sowoi. ³⁴ Ba maranai Moses i riuriu Bada kurina bisisiya kairavina wai kwarewa i botaveyei. Ba i kasikasibau wai Bada awaika i kaotunei wai ereonowana i bimamatarisi, ³⁵ ba si kinakinani kata naona wai yaseganina. Ba yebo Moses naona i sowosowo meyei yepo i veraveramaga mena Bada yabata si bisisiya.- 34:35 2 Corinthians 3:7-16

Damanina ba Moses suwara kairavina i baba Tabernacle bowaina kairavina ba Tabernacle sawarisi ba priests kasi gara. Ba pipiya sawara i rakata saki si yauna si botu. Bezalel ba Oholiab Judah biyisi kasi bibaita kuikuirisi sebasebare ba bibaine, mekabage God, Moses i beyei sawara sita wosei wai nanakasike si wose.

Moses pipiya i babaisi suwara kairavina, Tabernacle bowaina ba sawarisi ba yebo priest kasi gara kairavina, ba pipiya sawara si yauna si botu wai i pesara saki rubana sawarisi sita wose. Bezalel ba Oholiab ba kasi bibaita kuikuirisi sebasebare ba bibaine nikosi sawara si wose God, Moses i beyei wai nanakasike si wose.

Bada ana Tabernacle si Kakabi

¹ Damanina ba Bada , Moses kurina i sisiya, ² “Niko bodu nawaravina ba yebo kaona dagudagunai Tabernacle ke bowai. ³ Ba au kairuwana asi 10 akimisi kiuwana ku Bidamanina Maragasina Dedewagina kamona ba gawara kaobaisiyena kana tupapapara ke wosei kata Dedewagina ina sowoi. ⁴ Pesapesa ke botuwei kuna terei ba kana sawara si wose wai ereonowasi ke taura kabitam, ba yebo kibe kana aba bimsimsiri ki totori ba kibesi ku tepana ke taura. ⁵ Pugu gairena kana kapukapuna, raunabonabona gold yai ko wosei wai, Bidamanina Maragasina Dedewagina naonai ko terei, ba kana tupapapara matam ketanai ko terei. ⁶ Suwara kapukapuna raunabonabona God ana Tabernacle naonai ko terei. ⁷ Tabernacle ba raunabonabo basusi yai, kaboma kaikapona ere okowina ko terei. ⁸ Tabernacle ba raunabonabo ke gara bibiri ba matam ketana tupapapara ki rorokei.

⁹ Ba wairoro ke yauni ba yove ba sawara ereonowana kamonai ki boroi ba ke bobaisiyei, kata kona kaobaisiyena ina mana. ¹⁰ Ba yebo suwara kapukapuna raunabonabona ba sawarina ereonowana ki boroi, ba ke bobisiyei kata kosi wai kaobaisiyesi. ¹¹ Bosuwana kabomina ba kana aba bimsiri yebo yabata ki boroisi ba ke bobaisiyeisi.

¹² Aaron natunatuna yabata ke botuvisi ku Tabernacle matam ketina ba okowai ki yekaisi. ¹³ Ba Aaron gara kaobaisiyenai ki garai, ki boroi ba ke bosairei kata priest rutainina yauku ina bosaibiriku. ¹⁴ Natunatuna ke botuvisi ba kasi garai ki garaisi. ¹⁵ Damanina ba tamasi rutainina ki boroisi kata kosi au priest ba sina bosabiriku. Kata kuni biboroisi wai kosi priest saibirina kamosi yai ini garubonebonei.”

¹⁶ Moses Bada mekabage i kaotunetunei wai ereonowana nanakasike i wosei. ¹⁷ Damanina ba, bodu bairuwaina ba nawaravi dagudaguna, kaonai Tabernacle si bobimsiri. ¹⁸ Moses Tabernacle i bokabari maranai tukeke kasibimsimsiri i totorana ba tupabona i taura ba i sogai ba ariri i totorana. ¹⁹ Kata Bada i kaotunei wai, yove korarina i yabara potai ba Tabernacle tepanai aba payapayaya kwapirinai i sowoi.

²⁰ Kata Moses kairuwana akimisi petapetasi ruwamo ku Bidamanina Maragasina Dedewagina kamona i uwana, ba kana pawo ku kapi i tupasusurana ba piragagoyo pupuna taveyina gawarina i kasitawani. ²¹ Damanina ba Bidamanina maragasina dedewagina ku Tabernacle kamonai i terei ba i tupapapari. Bada i kaotunei wai, nanakasike Dedewagina i kasipapari.

²² Pesapesa yebo Tabernacle kamonai ku yabarata mena gawara kaobaisiyena parinai i terei, tupapapara garana kupunai, ²³ ba bread tepanai i terei, suwara Bada kurina, i kaotunetunei wai nanakasike.

²⁴ Kibe kana bimsimsiri Tabernacle kamonai i terei ku yawara mena pesapesa sepinai, ²⁵ damanina yebo kibe i kapuna Bada naonai, Bada i kaotunei wai nanakasike.

²⁶ Ba yebo runabonabo gold yai si wosei wai Tabernacle kamonai tupapapara naonai i terei, ²⁷ ba bane i kapuni Bada i kaotunei wai nanakasike.

²⁸ Ba Tabernacle matam ketanai tupapapara garana i rorokei. ²⁹ Suwara kapukapuna raunabonabona Tabernacle matam ketana parinai i terei kata tepanai suwara kapukapunisi ba grain suwara kapukapunisi berena kairavina, Bada i kaotunei wai nanakasike.

³⁰ Bosuwana kabomina wai Tabernacle ba raunabonabo basusi yai i terei ba kamonai okowa i sewai. ³¹ Moses ba Aaron, natunatuna yabata namai yarosi ba kaesi si bosuwana. ³² Maranai si riuriu ku Tabernacle kona ku raunabonabo wai, yarosi ba kaesi si bosuwana, Bada Moses i kaotunetunei wai nanakasike.

³³ Ba yebo Moses Tabernacle ba raunabonabo i gara bibiri ba matamketana i tupapapari kata i gudui. Damanina ba Moses saibira i kakabi.

Bada ana Kadara

³⁴ Ba guba Tabernacle i sowoi ba Bada ana kadara i bonuvi.- 40:34 1 Kings 8:10,11; Isaiah 6:4; Revelation 15:8³⁵ Moses kega rubana ita riu ku Tabernacle kamona kairavina guba i sowo potai ba Bada ana kadara i bonuvi. ³⁶ Maranai guba Tabernacle tepanai ina bokabari wai Israel biyisi wagawaga sina dagui, ³⁷ ba abisiri yai guba kega ina gae wai, sina mamana yepo guba ina gae wai sina tauya. ³⁸ Mamanina asi wagawagana kamonai Bada ana guba kaoai wai Tabernacle tepanai si kitakitai ba pomai wai keyama kaikarakarasina guba kamonai si kitakitai.