Ebere

Dene köcökpa fü wü Ebere

Ebere

Masere si-ngü

Kpara te ba köcökpa ne, nih je ïïrï na nda-nih de. Ah ba köcökpa ne fü wü *kpara ka Yesu, amba sü ta te wü kpara la ngbü engbü tete ne, nih tï awu nda-nih kpah de, angü wüh sere nda-wü de. Ngü te nih tï eyi awu tüngü ewü, ah bü teka te wüh di de wü di enga *Yïsarayele, te wüh fü ngü ka-wü teka ale ngü ka Yesu. Dela si-ngü te nih gü ïrï köcökpa ne tete, gü ba, wü *Ebere. Angü dela kpah gara ïrï wü di enga Yïsarayele.

Nih wu kpah eyi, gü ba, wü vügü to ta mere cïnga te ewü, teka ngü ka Yesu *Kurisito. Te di bala, gara ewü ngbü efï, gü ba, anga te ani ena ace ngü ka Yesu, adu arï gbü diri gele ka-ani, wü Yïsarayele la, e-wu neh da, wü vügü ena adu ace da embü ani. Amba kpara te ba köcökpa ne, mala fü ewü, gü ba, wü rü kpekpeke gbü cïnga la, de wü mere e ace ngü ka Yesu de. Engu gü ba, ngü ka Yesu ka-ye memere, fa ngü ka rïrï ka gele ka wü di enga Yïsarayele ka. Fü ah amala ngü fü wü kpara la kpekpeke, gü ba, ah le de wüh mere e, ace ngü ka Yesu, teka adu angbü emere gele ka wü kundu wü ne, tïne de. Ngü la kpah fü nih de enatikine ne.

Gbü diri gele ka wü di enga Yïsarayele, wüh gü ba, tima ka wü *Arona de wü kundu ye de mere kpeke tima. Wüh ngbü eï ewü, gü ba, wü *mürü gele. Tima ka-ewü ka-ye adi ewa nü fü Me, teka adi ereke ngü ezengba wü kpara de wü Me di. Wüh ngbü ta eï Arona, gü ba, mere kovo ka wü mürü gele. Ngü kaka-na nye nda wü bu ye, te ewü eyiti e ne ꞌburu ka. Engu me-ye kpikpi ye de mene kpara te ngbü erï gbü mene guvu *Kambü ka Me agbü Yerüsalema, te wü kpara rï gbügbü na ꞌdaaa de ne. Ah ngbü erï kpala du biri gbü re biringbö, de ngüte nü esaka ye, teka anü areke ngü ezengba wü kpara de wü Me, de ngüte nü la. Fütanga kpi ka Arona, fü ewü adu afe gara süka wü di ye na biringbö, teka amere tima ka mere kovo ka wü mürü gele la. Fü ngü la angbü engbü fï bü bala teka mere bi wü re.

Kpara te ba köcökpa ne, gü ba, tïtïne ah le de nih wu awu, gü ba, Yesu fü ngü la eyi. Angü kpara te ngbü ereke ngü ezengba nih de wü Me tïtïne ne, ah ka-ye de Yesu. Ngüte, de te Yesu reke ngü di ezengba nih de wü Me ne, ah cu de *ngüngüte, te tökö kpa füh *rü gbegbete, teka aküwa nih ne, ah de ngüte wü nü nda tïne de. Fü Yesu ayia aza ngüte ye la, ago di agbü kpï, teka areke ngü te di ezengba nih de wü Me ne di. Te di bala, enatikine Yesu ka-ye ladü agbü kpï, ede kpökpö ka Me kpala.

Wü ngü te mü ena amaka gbü köcökpa ka wü Ebere ne, wüh dene.

Sapïta 1:1-3 Ngü ka Yesu ga fa nda wü kpara ꞌburu

Sapïta 1:4–2:18 Wazi Yesu fa nda wü *malayïka ka Me ka

Sapïta 3:1–4:13 Ngü ka Yesu fa nda *Müse ka

Sapïta 4:14–7:28 Yesu de mere mürü gele ka-nih

Sapïta 8:1–9:28 Yesu de mere vüngüte ka-nih

Sapïta 10:1-31 Yesu reke ngü te di ezengba nih de wü Me cu de ngüte ye

Sapïta 11:1–13:25 Ah le de nih le ngü ka Yesu de maguma nih biringbö

Dene ngü ka Yesu, te ga fa nda wü kpara ꞌburu

¹Wü di enga wüna, ta gügü, Me ngbü emala ngü fü wü kundu nih enda nganga gömö bi wü *mürü dofo ka-ye. Ah ngbü ta esere ngü la fü ewü cüküꞌdaye cüküꞌdaye, enü di kpa engagira nü bala. ²Tïtïne gbü wü adu re ne, Me mala ngü ka-ye eyi ꞌburu mbölö fü nih gömö Yesu *Kurisito, angü Yesu de Ye Me. Ta te Me mere kpï bete kotö tete, ah to tima la esaka Yesu, de engu mere tima la me-ye. Fü Me aza engu, ao kpah Mere Miri gbü nzö wü ngü ꞌburu, agbü kpï, zalü füh kotö sene ꞌburu. ³Yesu ka-ye de Ye Me, ah kpah gegege baka Wö ye. Engu sere mere wazi ka Me fü nih, teka de wü kpara ꞌburu di egbo nga ïrï Me. Te di bala, Yesu, Ye Me, ngbü eto wazi gbü wü ngü agbü kpï, akoro di füh kotö sene, ꞌburu me-ye, teka de wü ngü ka-ewü ngbü ꞌburu ꞌbe. Yesu kpi teka aküwa nih gbü wü *siti ngü ka-nih. Fü engu ayia ago agbü kpï, angbü kpala ede kpökpö ka Mere Me, te di de mere mürü wazi ne.

Dene ngü ka wazi Yesu, te fa nda wü malayïka ka Me ka

⁴Te Me o Ye ye baka Mere Miri bala ne, fü ah ayia ato mere wazi fefe na, afa nda wü *malayïka ka-ye la di ka. Te di bala, ah le de wü kpara ꞌburu di egbo nga ïrï Yesu, afa nda wü malayïka di ka.

⁵Gara malayïka ladü, te Me mala ngü fefe, gü ba, “Ye de ye ni”? Ah nda ma! Me mala ngü bala, duu teka Yesu, gü ba, “Ye de Ye ni. Enatikine, ni sere ngü la eyi fü wü kpara ꞌburu, gü ba, ni de Wö ye.”1:5 Mü ena amaka ngü la gbü Ci ka wü Davidi 2:7. Me mala kpah ngü teka Yesu, gömö gara *mürü dofo ka-ye, gü ba, “Ni fefe baka Wö ye na, engu nda-ye baka Ye ni.”1:5 Mü ena amaka ngü la gbü 2 Samüwele 7:14.⁶Me mala nga sïkpï de te ni ena adu atima biri Ye ni, de ah koro füh kotö ne, gömö gara mürü dofo, gü ba, “Ah le de wü malayïka ka-ni ꞌburu di egbo nganga na.”

⁷Dene ngü te Me mala teka wü malayïka ka-ye, gü ba, “Wü malayïka ka-ni, wüh de wü mürü kitima ka-ni, Me, te ni ngbü etima ewü, adi emere tima ka-ni. Ni ngbü kpah efü ewü gbü wege, efü wü gara baka te-wa, teka de wüh di emere tima ka-ni.”1:7 Mü ena amaka ngü la gbü Ci ka wü Davidi 104:4.⁸Amba dene ngü te Me mala fü Yesu Kurisito, gü ba, “Wayi, Ye ni, ni to wazi ni eyi fü ye, fü ye angbü baka ni, Me. Ye kpah de Mere Miri. Ye ena angbü gbü nzö wü kpara ka-ye fï mere badi. Ye ena angbü emere ngü ka-ewü ereke areke. ⁹Ye ngbü ele de wü kpara ꞌburu di emere züka ngü. Angü ye le siti ngü nda de. Dela si-ngü de te ni, Me, fe ye miri tete. Fü ni ato wazi fü ye, afa nda wü bu ye ꞌburu. Te wü kpara wu bala, fü ewü angbü ecu ngü ye de mere tadu!”1:9 Mü ena amaka ngü la gbü Ci ka wü Davidi 45:6-7.

¹⁰Wüh ba kpah ngü gbü *Ngari Me teka Yesu, Ye Me, gü ba, “Wayi Me, ye de mere kpara! Ta gügü te enga gina, ye reke kpï bete tö me-ye. ¹¹Ngü ka kotö ne bete ngü ka kpï, ena anza ka-wü ꞌburu anza, baka diri bongo, amba ngü ka-ye tï anza nda kü de. ¹²Ye ena aza ewü, agara agara baka bongo, fü ngü ka-ewü anza. Amba ngü ka-ye ena angbü ka-ye fï da ye. Ye tï akpi nda-ye de.”1:12 Mü ena amaka ngü la gbü Ci ka wü Davidi 102:25-27.

¹³Me mala kpah gara ngü gömö gara *mürü dofo tüngü Ye ye, gü ba, “Ye ngbü gbü kokpa ka-ni sene! Angü ni fe ye, o eyi Mere Miri! Te di bala, ye ena angbü gbü nzö wü kpara ꞌburu! Angü ni ena ao wü vügü ka-ye ꞌburu esa lö ye!”1:13 Mü ena amaka ngü la gbü Ci ka wü Davidi 110:1. Amba Me mala la ngü bala, fü biri gara malayïka ka-ye nda kü de!

¹⁴Wü *malayïka nda-wü neh wü da? Wüh de wü mürü kitima ka Me, te ewü ngbü emere tima kaka. Fü Me angbü etima ewü teka adi eto wazi fü nih, wü kpara ka-ye, de te Me le aküwa ewü ne.

Dene kpeke ngü teka küküwa guvu Yesu

¹Wü di enga wüna, baka te ngü ka Yesu di de mere kpeke ngü de bala ne, ah le de nih ceka te-nih ꞌbe, da erü kpekpeke gbü ngü ka Yesu. Angü ta te enga gina, wü *mürü tima ka Yesu sere zu ngü teka Yesu eyi fü nih. To nih mere e aïrï teka ngü la de, angü nih ena adürü te kaje ka Me. ²Ta gügü, Me to ta *Rïrï ka-ye fü *Müse, gömö wü *malayïka ka-ye. Rïrï la ta de enga ngü nda de. Mene wü kpara te ewü le ta adi eje Rïrï la de ne, fü wü mere *kovo ka Me angbü eto kuru te ewü fanü fanü! ^3-4Amba ngü ka *küküwa, te Miri Yesu koro di ne, fa Rïrï ka Müse ka. Angü Miri Yesu sere ngü ka küküwa la cu me-ye fü wü mürü tima ka-ye. Sidi nga ngü la, fü wü mürü tima kaka, te ewü je ngü la gögömö ne, ayia tïne, akoro amala ngü la fü nih. Fü Me ayia asere kpah fü nih, gü ba, “Ngü ka Yesu la, ah ka-ye de zu ngü fanü fanü,” angü Me to wazi fü wü *kpara ka Yesu la me-ye, de wüh di eküwa wü mürü keke, da emere wü gara ngü ka talara di. Fü Me ayia kpah ato wazi *Nzïla Wazi ye fü wü kpara ka-ye ꞌburu, de te engu fe ewü ne, baka te engu le. Te di bala, te nih lala eküte ngü ka Yesu de la, nih ena aküwa baye baye? Nih tï aküwa de! Me ena ato kuru ato te nih fanü fanü!

Dene ngü teka Yesu, te kpi, aküwa nih ne

⁵Me mala fü nih gbü *Ngari ye, gü ba, “Te gara, ni ena adu amere to kotö bete to kpï.” Te Me mere ngü la eyi bala la, kpara te Me ena adu ao ewü, baka wü mere kpara gbü nzö wü ngü füh to kotö la, ena adi neh wü da? Ah ena adi de wü *malayïka? Aꞌa, ah bala de! ⁶Angü Me gü ba, “Ni ena ao nih, wü kpara de füh kotö ne, baka wü mere kpara gbü sïkpï engu la,” baka ta te wüh ba gbü Ngari Me, gü ba, “Ööö Me, ani ka-ani de töndö wü kpara kükürü, amba ye ngbü ele ani cu de maguma ye. Komö ani gu ka ngü la eyi agu! ⁷Angü ta gügü, wazi ani koro baka nda wü malayïka ka-ye la de. Amba tïtïne ye to mere wazi eyi fü ani. Ye o ani eyi baka wü miri, ⁸teka de ani ngbü gbü nzö wü ngü füh kotö ne ꞌburu.”2:8 Mü ena amaka ngü la gbü Ci ka wü Davidi 8:4-6. Dela ngü ta te wüh ba gbü Ngari Me. Te ah bala la, wü e ꞌburu ena angbü esa wazi ka-nih. Wü di enga wüna, tïtïne nih ngbü eyi baka wü miri, gbü nzö wü e füh kotö ne ꞌburu, fanü? Ah bala de! Te di bala, ngü la neh baye? ⁹Wü di enga wüna, wüh ba ngü la teka ngü ka Yesu. Angü, ta te Yesu koro füh kotö sene, Me o engu baka kükürü kpara, baka nih bane. O Yesu di ta la de wü nih füh kotö sene ne, wazi küküte ka-ye kpah bü baka nda-nih. Fü engu ayia azü cïnga, akpi. Amba tïtïne, Me du o engu eyi baka Mere Miri, teka de wü kpara ꞌburu di ecu ngüngü na! Kükürü de, angü Yesu kpi teka aküwa nih, angü Me le me-ye bala, teka *züka maguma ye.

¹⁰Me le nih, wü kpara, cu de maguma ye. Fü engu ayia atima Yesu, de ah koro, ah küwa nih. Kpah bala, teka de ah za nih, koro de nih agbü sü ka Me, agbü kpï kpala, baka wü di Me. Te di bala, Me le me-ye de Yesu zü cïnga bala füh kotö sene, teka de engu tüka te-ye, de ah maka wazi gbü cïnga la, teka ale ta-ngü di te nih. Dela ngü te Me le me-ye. Ah tï atï bala, angü Me de kpara te mere kotö bete kpï ꞌburu me-ye, fü ah angbü kpah eceka kpï fütanga wü e ꞌburu me-ye. ¹¹Yesu küwa nih me-ye, fü ah adu afü nih, akoro di wü di Me. Yesu mere ngü la bala, angü engu fü te-ye, za küte baka nih, wü kpara füh kotö ne. Dela si-ngü te engu ngbü eï nih tete, gü ba, “Nih de wü di enga ni ni ne.” Angü nih koro eyi, wü di enga ni ye na fanü. ¹²Nih tï eyi awu, gü ba, Yesu, Ye Me, ngbü eï nih, wü di enga ni ye. Kükürü de, angü engu mala fü Wö ye, gü ba, “Wö ni, Me, ni ena amala ngü ka-ye fü wü di enga ni ni, fü ani adi egbo nga ïrï ye tundu de ewü.”2:12 Mü ena amaka ngü la gbü Ci ka wü Davidi 22:22.¹³Wüh ba kpah gara ngü te Yesu mala, gü ba, “Ni ena ato maguma ni ꞌburu fü Me. Ani ngbü eyi kpakine gbü ngü ka Me, tundu de wü di enga ni, te engu to fü ni ne.”2:13 Mü ena amaka ngü la gbü buku ka Yïsaya 8:17-18.

¹⁴Wü di enga wüna, de-nih, te wüh ngbü eï nih wü di enga ni ye Yesu ne, nih ka-nih de wü kpara ka kotö ne. Dela si-ngü te Yesu fü te-ye baka nih, wü kpara ka kotö ne, teka de ni kpi, teka aküwa nih. Kükürü de, angü kpi ka Yesu fa wazi *Satana, te di de miri ka kpi ne, ka. ¹⁵De-nih, wü kpara füh kotö ne, te nih di la ladü de jia nih ne, nih ngbü engbü ꞌburu de mere cürü, teka ngü ka kpi. Amba Yesu kpi eyi, teka aküwa nih gbü cürü ka kpi la. ¹⁶Yesu kpi teka aküwa wü da? Teka aküwa wü *malayïka ka Me? Ah bala de! Yesu kpi teka aküwa mene nih, de te nih to maguma nih eyi fü Me, baka nda kundu nih, *Abarayama ne. ¹⁷Dela si-ngü te Yesu fü te-ye, za küte gegege baka nda-nih, wü di enga ni ye, teka aküwa nih. Te di bala, Yesu wu cïnga nih kpo. Angü engu de gina enga ni nih, te ngbü ereke ngü ezengba nih de wü Me, teka de Me boro wü *siti ngü ka-nih. ¹⁸Yesu ngbü ewu cïnga nih, angü engu zü ta mere cïnga fa sü. Kpah bala, Satana re ta mamaguma ma! Te di bala, te Satana le are maguma nih la, Yesu ena ato wazi fü nih, arü di kpekpeke.

Dene ngü ka Yesu, te fa nda Müse ka

¹Wü di enga wüna, nih ꞌburu de wü kpara ka Me, angü Me ï nih me-ye. Te di bala ne, ah le de nih fï ngü ka Yesu mbi mbi mbi, de nih di ezoro engu, da elala tete, de kpa nih ꞌbasu mini. Angü Yesu de kpara te Me tima engu, teka akoro, arï nih de zu ngari Me. Yesu kpah de gina enga ni nih, mere *mürü gele te ngbü ereke ngü ezengba nih de wü Me. ²Te di bala, ngü ka Yesu fa nda *Müse afa, angü Me fe ta Yesu teka tima la me-ye. Fü engu angbü emere tima la de maguma ye biringbö. Müse ta kpah de mürü tima ka Me ta gügü. Engu ngbü ta kpah emere tima ka Me de maguma ye biringbö, da erï wü di enga *Yïsarayele. ³Baka te ngü ka Yesu fa nda Müse ka ne, nih ena angbü ecu neh ngü da? Nih ena acu ngü mere kpara? Anga nih ena acu ngü wü di ye, de te engu bï ne? Ah le de yi fï nga ngü la mbi mbi mbi. Enatikine, Yesu me-ye baka mere kpara la, angü engu fü nih eyi wü di Me tete. Te di bala, ah le de nih di ecu ngü Yesu. ⁴Mere bi nga nzö wü kpara füh kotö ne ꞌburu, kundu wü ka-ye kpikpi ye kpikpi ye. Amba kpara de te o wü kundu wü la neh da? Ah de Me de? ⁵Müse mere ta tima ka Me reke areke. Engu ngbü ta erï wü di enga Yïsarayele de ngü ka Me. Fü engu angbü ta esere fü ewü wü ngü, de te Me ena amere te gara ne. Amba Müse o wü di enga Yïsarayele la me-ye nda de. Me o ewü ka-ye me-ye. ⁶Amba teka ngü ka Yesu *Kurisito, engu ka-ye de Ye Me. Me fe engu, o baka mere Wö nih, te bï nih ꞌburu me-ye. Baka te nih to maguma nih eyi fü Yesu ne, ah le de nih rü kpekpeke, fü nih ao jia nih bü nzö eküküte. Te di bala, engu ena afü nih, fü nih angbü tïne wü di Me fanü fanü.

Dene ngü te nih ena adi ele ngü ka Yesu de maguma nih biringbö

⁷Wü di enga wüna, yi fï la nga ngü, te wüh ba gbü *Ngari Me gbü wazi ka *Nzïla Wazi Me ne. Ngü la gü ba, “Dene ngü te ni, Me, le amala fü wü enatikine, gü ba, ‘Ah le de wü le ngü ka-ni, Me, de maguma wü biringbö. ⁸Wü mere e angbü emere ngü, baka nda wü kundu wü ta gügü, ne de, angü wüh ka-wü ta de wü mürü kögö-nzö. Baka ta te wüh ngbü ejiji de wü *Müse kpa etü gü ne, wüh le ta adi eje rïrï ka-ni, Me, nda-wü de. ⁹Angü wüh ngbü ta ere maguma ni, teka awu, anga ni tï eyi ale ta-ngü te ani fanü ya? Mere bi wü kpeke ngü, te ni ngbü mere fü ewü, nda nganga anda, teka wü re teke ꞌbasu (40) ne, ngü la rï gbü nzö ewü ꞌburu ꞌburu nda de. ¹⁰Teka ngü la, fü maguma ni ayia ta anzu eküte ewü. Ni le ewü ta de, angü wüh le aje ngü ka-ni nda-wü de. Wüh le rïrï ka-ni kpah de. ¹¹Baka ta te maguma ni nzu eküte ewü ne, fü ni ayia akïna ewü, gü ba, “Wü tï arï gbü züka sü, te ni reke tüngü wü ne, de.” ’ ”3:11 Mü ena amaka ngü la gbü Ci ka wü Davidi 95:7-11. Dela ngü ta te Me mala fü wü di enga *Yïsarayele, teka kögö-nzö ka-ewü la.

¹²Wü di enga wüna, yi mere e angbü de maguma yi ꞌbasu ꞌbasu ne de. Yi mere e ace ngü ka Me de, angü engu ka-ye de mere mürü wazi. ¹³Ah le de yi ngbü kpah da efï nga wü bu yi, da eto wazi fü ewü, teka fü ewü adi erü kpekpeke, da elala fï bü gbü nga Yesu. Yi mere ngü la te nga sïkpï ꞌburu, o yi di la ezükü. Angü te maguma yi ngbü ꞌbasu ꞌbasu gbü ngü ka Me la, nzö yi ena akoro ka-ye kpekpeke, fü yi adürü te kaje ka Me ka. ¹⁴Angü ah le de nih di elala eküte Yesu gö gö gö! Nih di emere ngü la fï bü bala, baka ngü ta te nih to maguma nih tete fefe na ne, zalü koro di gbü sïkpï te nih ena akpi tete. Te nih ngbü emere ngü la bala la, nih ena angbü wü *kpara ka Yesu Kurisito fanü fanü. ¹⁵Dela si-ngü te Me mala fü nih enatikine, gü ba, “Ah le de nih le ngü ka-ni, Me, de maguma nih biringbö ne. Nih mere e, amere ngü baka nda wü kundu nih tane de, angü wüh ka-wü ta de wü mürü kögö-nzö.”

¹⁶Wü mürü kögö-nzö, ta te ewü le aje ngü ka Me de ne, ah de wü da? Ah de wü *ganzi kpara, te ewü wu ngü ka Me ta la de? Ah bala de! Ah zu de wü gina wü di enga *Yïsarayele, te Me tima *Müse, teka aküwa ewü esaka wü kpara ka *Ezepeto ne. Fü Müse amere bi wü ngü ka talara gbü jia ewü. Amba maguma ewü ngbü ka-ye fï bü ꞌbasu ꞌbasu. ¹⁷Wüh le aje ngü ka Me de, neh teka wü re fe? Wüh le aje ngü ka Me de, teka wü re teke ꞌbasu (40). Teka ngü la, fü Me ayia afü kürüfe ye fü ewü. Dela si-ngü de te wüh kpi ta tete ꞌburu kpa etü gü, fü ewü ati ewü ciki kpala ne. Wüh nü koro gbü sü, ta te Me reke fü ewü ne, nda-wü tïne de. ¹⁸Angü Me yia ta, kïna ewü, gü ba, “Wü tï anü akoro gbü züka sü, te ni, Me, reke tüngü wü ne de.” Me kïna ta ewü bala kükürü de, angü güje ewü ma. ¹⁹Dela si-ngü te wü gina wü di enga Yïsarayele la nü koro tete na agbü züka sü, ta te Me reke fü ewü, de ne, angü wüh ta de wü mürü kögö-nzö. Wüh le aje ngü ka Me ta nda-wü de.

¹Wü di enga wüna, kpah bala Me mala ngü eyi fü nih, gü ba, “Ni reke züka sü eyi fü nih, teka fü nih anü afe te-nih tete kpala.” Ah le de nih ceka te-nih ꞌbe, angü te nih ngbü kpah de kögö-nzö baka nda wü kundu nih tane la, nih tï arï agbü züka sü la nda-nih kpah de. ²Wü kundu nih la wu ngü ka Me kpo, wüh je ngü ka Me kpah eyi. Amba wüh küwa de, angü wüh le ta ngü ka Me de maguma wü biringbö nda-wü de. Te di bala, ah le de nih ceka te-nih ꞌbe, angü te nih le ngü ka Me de maguma nih biringbö de la, nih tï arï gbü züka sü ka Me nda-nih kpah de. ³Fanü fanü, te nih le ngü ka Me de maguma nih biringbö la, nih tï eyi akoro gbü züka sü ka Me la. Amba mene wü kpara de maguma wü ꞌbasu ꞌbasu ne, wüh tï akoro agbü sü la nda-wü de, kpah baka ngü ta te Me mala, gü ba, “Ni kïna wü mürü kögö-nzö la eyi, gü ba, ‘Wü tï arï gbü züka sü ka-ni de,’ ne.” Me mala ngü la ta bala teka ne? Ah mala bala, angü ah reke sü la nza la de? Ah bala nda de! Ah reke sü la nza ta eyi gügü, o engu ngbü eo kotö ne. ⁴Nih tï eyi awu ngü la, angü wüh ba ngü la eyi gbü *Ngari Me, gü ba, “Me mere kpï bete kotö de wü e ꞌburu, gbü wü sïkpï maꞌdiya. Fü ah adu afe te-ye gbü sïkpï lorozi.”4:4 Mü ena amaka ngü la gbü Gina Ngü 2:2.^5-6Me reke ta sü teka wü kundu nih eyi, ce nzo. Amba wüh koro ta gbü sü la nda-wü de, angü wüh le ngü ka Me, ta te wüh ngbü emala fü ewü ne, nda-wü de. Dela si-ngü te Me mala ngü tete na, gü ba, “Wü tï arï agbü züka sü ka-ni de,” ne.4:5-6 Mü ena amaka ngü la gbü wü Ci ka wü Davidi 95:11. Sü la, ah ka-ye fï ladü, zalü akoro enatikine. Me ngbü la fï bü ele wü kpara ka-ye, de wüh rï koro kpala.

⁷Nih tï kpah eyi awu, gü ba, Me ngbü ele de nih rï agbü züka sü ka-ni la. Kükürü de, angü sidi nga mere bi wü re, *Nzïla Wazi Me mala ta ngü la eyi, gömö Miri *Davidi, gü ba, “Dene ngü te ni, Me, le amala fü nih enatikine, gü ba ‘Nih le ngü ka-ni de maguma nih biringbö. Nih mere e adi emere ngü baka nda wü kundu nih tane de, angü wüh ka-wü ta wü mürü kögö-nzö.’ ”4:7 Mü ena amaka ngü la gbü wü Ci ka wü Davidi 95:7-8. Miri Davidi ba ngü la gbü *Ngari Me, sidi nga mere bi wü re, te Me kïna wü kundu nih la tete na. Te di bala, ah le de nih wu awu, gü ba, du sïkpï la ladü fü nih, teka fü nih akoro agbü züka sü ka Me la. ⁸Angü, ta sidi nga kpi ka *Müse, *Yosuwa za wü di enga *Yïsarayele, akoro di me-ye, agbü tö ka wü *Kanana. Yi ngbü efï nda-yi, gü ba, tö ka Kanana la de züka sü, te Me mala nganga ne? Ah bala de! Te ah ena adi ta bala la, Davidi du ba wü ngü la, sidi nga bi wü re, fütanga kpi ka Yosuwa, neh teka ne? ⁹Te di bala, nih tï eyi anü arï agbü sü ka Me kpala, afe te-nih, baka ta te Me fe te-ye, gbü sïkpï ka lorozi ne. ¹⁰Gbü sïkpï te yi ena akoro tete agbü sü ka Me, yi ena afe te-yi kpah bala, angü wü tima ka-yi nza eyi ꞌburu, baka ta te Me fe te-ye, te engu mere kpï ake kotö nza tete na ne. ¹¹Te di bala, ah le de nih to te-nih ꞌburu ꞌburu teka ale ngü ka Me, teka fü nih arï agbü züka sü ka Me la. Nih mere e amere ngü ka kögö-nzö, baka nda wü kundu nih ta la, nda-nih de!

¹²Wü di enga wüna, ah le de nih le ngü ka Me de maguma nih biringbö. Nih ce ngü ka maguma ꞌbasu ꞌbasu asidi, angü nih tï afiti Me de. Ngü ka Me ka-ye baka mere maguruma te dere fa sü, te tï eyi awa so de biki gbü ye, akolo gbö! Angü Me tï eyi aceka kpï kpa emaguma nih kpörö! awu wü fïngangü ka-nih kpah ꞌburu. ¹³Kpara biringbö te tï afiti Me nda ma! Me wu wü ngü ꞌburu kpo! Ah wu fïngangü ka-nih kpah kpo. Nih tï awo ngü gbü jia Me nda-nih de. Ah le de nih le ngü ka Me de maguma nih biringbö. Angü te gara nih ena arü engagira Me, fü engu aye süka ngü ka-nih mbi mbi mbi, te nga wü ngü ka-nih ꞌburu, te nih ngbü emere ne.

Dene ngü ka Yesu te di baka mere mürü gele,

te reke ngü ezengba nih de wü Me fanü

¹⁴Wü di enga wüna, te nih gü ba, nih zu de wü *kpara ka Yesu la, ah le de nih zoro ngü ka Yesu de kpa nih ꞌbasu. Angü Yesu de mere *mürü gele ka-nih, ah kpah de Ye Me. Engu tadu eyi kpa gbü kpï, kpaka Me, angü engu reke ngü ezengba nih de wü Me, nza eyi ꞌburu fï mere badi. ¹⁵Ngü ka Yesu reke fa nda wü gara mürü gele ꞌburu. Yesu wu kpo, gü ba, wazi nih teka arü di kpekpeke gbü wü re-ngü ka *Satana nda ma. Wü mere bi ngü te Satana le afiti nih di ne, ah wu kpah kpo. Kükürü de, angü baka ta te Yesu di la füh kotö sene ne, Satana re engu ta kpah eyi, de wü ngü la ꞌburu, baka te engu ngbü ere nih di de enatikine ne. Ah re engu bima, teka mere bi wü sïkpï, amba Yesu le wü siti ngü kaka-na la nda de. ¹⁶Te di bala ne, de nih mere e akpe cürü de, nih i maguma nih ai, fü nih anü kpaka Miri Yesu. Kükürü de, angü engu ngbü ele nih de *züka maguma ye. Te Satana ngbü ere nih la, nih yi-ta Yesu. Engu ena awu cïnga nih, fü ah ato wazi fü nih.

¹Gbü gele ka-nih, ka wü di enga *Yïsarayele, wü cögbörö *mürü gele ka Me ka-wü kpah bü kükürü wü kpara ka kotö ne. Wüh de wü kundu ye *Arona. Fü Me ayia afe ewü ta teka tima la. Te di bala, tima ka mere mürü gele neh ene? Ah ngbü ewete wü nü, da eto fü Me, teka *siti ngü ka wü kpara. ²Wü mürü gele ka wü di enga Yïsarayele la, wüh ta wü kpara ka kotö ne, kpah baka nih. Te di bala, wüh ngbü ta ewu cïnga wü kpara, te ewü ngbü emere siti ngü gbü ïrï-to ne. Kpah bala, wüh wu da erï wü kpara, te ewü ngbü edürü ngü ne, ferrre kpo. Angü wü kpara te ewü ngbü edürü ngü la, wüh wu ta ngü ka Me mbi mbi nda-wü de. ³Baka te mürü gele la di ta kpah bü kpara ka kotö, te ngbü kpah edürü ngü baka nih ne, fü ah ngbü kpah ewa nü, eto fü Me, teka nda-ye siti ngü.

⁴Teka tima ka mere mürü gele, kpara tï ao te-ye mere mürü gele de tete-ye nda de. Me ngbü efe kpara teka tima la me-ye, angü dela ka-ye mere kpeke tima. Baka ta gügü te Me fe Arona, enga ni ye *Müse, ao engu mere mürü gele tete na ne. Engu me-ye de mere kundu ye wü mürü gele ka wü di enga Yïsarayele ꞌburu. ⁵Yesu *Kurisito o te-ye mere mürü gele de tete-ye nda kpah de. Me fe engu teka tima la kpah me-ye, gü ba, “Ye zu de Ye ni. Enatikine ni sere ye eyi fü wü kpara ꞌburu, gü ba, ni de Wö ye, ni to tima la fü ye me-ni.”5:5 Mü ena amaka ngü la gbü Ci ka wü Davidi 2:7.⁶Me mala kpah gara ngü fü Ye ye, gü ba, “De-ni, Me, ni o ye me-ni mere mürü gele baka Miri Meleke-Sadiki. Ye ena angbü ereke ngü ezengba ni de wü kpara ka-ni, fï mere badi.”5:6 Mü ena amaka ngü la gbü Ci ka wü Davidi 110:4.

⁷Baka ta te Yesu di la füh kotö sene ne, ah yi-ta Me kpekpeke de mere ri ye, da eku gba de ngura, angü engu wu kpo, gü ba, Me ena aküwa ni gbü wazi ka kpi. Te di bala, fü Me ayia aje gba kaka-na, ayia ato wazi fefe na, teka de ah rü di kpekpeke. Angü Yesu o to ye ꞌburu teka amere tima te Me to fefe na ne. ^8-9Yesu de Ye Me fanü. Enatikine engu koro eyi mere kpeke kpara, baka te Wö ye na, Me, ngbü ele, angü engu ngbü eje rïrï ka Me ereke areke. Me le me-ye de engu zü cïnga baka e dela, teka fü engu amaka wazi, amere ngü ka-ni, Me, anza di ꞌburu. Te di bala, wazi Yesu fa sü. Te nih le ngü kaka-na la, engu tï eyi aküwa nih fï mere badi. ¹⁰Dela si-ngü de te Me o Yesu tete na mere mürü gele, teka adi ereke ngü ezengba nih, de wü ye, baka Meleke-Sadiki tane.5:10 Mü ena amaka ngü ka Miri Meleke-Sadiki gbü Gina Ngü 14:18-20.

Dene ngü te ma le amala fü yi, gü ba, yi mere e ace ngü ka Me de

¹¹Wü di enga wüna, ngü ka Yesu, te reke ngü di ezengba nih de wü Me ne, ah ka-ye de mere kpeke ngü. Ma le ta amala mere bi wü ngü fü yi teka ngü la, amba ngü la tï arï gbü nzö yi kere nda de. ¹²Yi le ngü ka Yesu tane eyi gügü. A rï yi eyi de ngü ka Yesu teka bi wü re. Amba ngü la rï gbü nzö yi fï de, neh teka ne? Fïngangü ka-a gü ba, yi ena akpo ta dene me-yi, angbü erï wü bu yi de ngü ka Yesu. Amba yi di ngbü fï bü ele de wü gara kpara di erï ani de mene wü ngü, ta te a rï yi di eyi ne kpah toto, neh teka ne? Yi le la angbü fï bü baka wü vürü jaji, te wüh ngbü ela ngu-ka? Ah le de yi zü kümü de so, angü yi ndri eyi. ¹³Ah fanü, te wüh yaka vürü mbarase la, ah tï azü kümü la de, ah ena angbü ela ka-ye bü ngu-ka. Amba sidi nga re bata, anga bala, te mbarase la ngbü fï bü ela ka, ah le azü kümü de la, dela züka ngü? Teka ngü ka-yi, ah kpah bala. ¹⁴A fï ta, gü ba, yi wu ngü ka Me eyi, yi je sisi na reke dene kpah eyi mbi mbi mbi. Yi ga koro dene kpah eyi kpekpeke gbü ngü ka Me, fü yi adi emere wü ngü te ena areke gbü jia Me. Amba yi ka-yi la fï baka wü vürü jaji? Te di bala, ah le de yi o to yi ꞌburu, teka aje si-ngü ka Me areke areke mbi mbi mbi, teka fü yi awu mene ngü, te ngbü ereke gbü jia Me ne. Te yi mere bala la, yi ena amaka wazi teka adi emere ngü ka Me di. Yi ena awu kpah mene wü ngü, te di esiti gbü jia Me ne. Fü Me angbü eto wazi fü yi, teka fü yi ace wü *siti ngü la.

^1-3Wü di enga wüna, gina wü ngü ka Me, te di baka ngu-ka te vürü mbarase ngbü ela ne, a rï yi de ngü la eyi gügü, gü ba, “Ah le de yi fü maguma yi, fü yi ace *siti ngü ka-yi. Ah le de yi le ngü ka Yesu Kurisito de maguma yi biringbö. Ah le de wüh to *babatïza fü yi, fü ewü ao kpa wü gbü nzö yi, teka fü *Nzïla Wazi Me akoro angbü emaguma yi. Te yi le ngü ka Yesu la, Yesu Kurisito ena aküwa yi, fü ah azükü yi gbü kpi, adu ato to küte fü yi. Amba, te yi le ngü ka Yesu de la, Me ena ato kuru te yi fï mere badi.” Dela wü ngü ka Me ta te a rï yi di, yi wu ngü la bala de? Wayi, ah le de nih nü enü de ngü ka Me kpa engagira nü, teka fü Me aceka nih baka kpeke wü kpara ka-ye.

^4-6Wü di enga wüna, nih nü enü de ngü ka Me kpa engagira nü. Yi mere e adu kpa sidi de, angü yi ena adürü te kaje ka Me. Yi ngbü efï neh ngü ne? Me ü jia yi eyi. Ah to wazi ka Nzïla Wazi ye kpah eyi fü yi. Fü yi angbü eje ngü kaka-na de mere tadu. Yi wu kpah wü kpeke ngü, de te wü *kpara ka Yesu ngbü emere, de wazi ka Nzïla Wazi Me, ne eyi. Te di bala, te mü fü te-mü, du ce ngü ka Yesu asidi la, mü ena adu afü maguma mü kpah toto, neh baye baye? Ngü la tï nda de! Angü mü fü kürüfe mü eyi fü Yesu! Wü kpara ena angbü esiti ïrï Yesu teka ngü ka-mü la! Ah ge baka te mü du bere Yesu eküte *rü gbegbete kpah toto!

⁷Wü di enga wüna, yi fï nga ngü la mbi mbi mbi. Te mü ru e kpa gbü yï ka-mü, fü agö angbü elï fefeh na ereke areke la, wü e de te mü ru gbü yï la ena akö areke areke. Fü ewü aga kpah mbi. Fü mü amaka mere bi zü-e gbü yï la. Te di bala, mü ena angbü de mere tadu, gü ba, Me to wazi gbü yï ka-ni eyi fanü. ⁸Amba, te mü ru e gbü yï ka-mü, fü wü fu wü ti, de wü siti gü adu akö gbü yï ka-mü me-wü la, mü ena angbü de tadu? Mü tï angbü de tadu de! Mü ena angbü de cïnga, fü mü adu ace yï la asidi, ah bala de? Wü gara ne, mü ena ato wa gbü yï la, fü ah acuru asidi! Te di bala, ah le de yi reke ngü ka-yi, teka fü yi angbü baka züka yï la. Yi mere e angbü baka mene yï te di esiti ne de!

⁹Wü di enga wüna, ma ngbü emala wü kpeke ngü la fü yi, angü ma le yi fa sü. Amba ma wu eyi, gü ba, ngü ka-yi baka fu wü ti, de wü siti gü ne, nda de. Angü ma wu eyi, gü ba, yi ngbü elala fï bü sidi nga Yesu. Engu ena aküwa yi aküwa fanü fanü. ¹⁰Me ka-ye de züka miri. Engu ngbü eto züka ngü fü wü kpara te nga züka ngü ka-wü, de te ewü ngbü emere ne. Ah wu kpo, gü ba, yi ngbü ele ngü ka-ni de maguma yi ꞌburu. Angü engu wu kpah kpo, ga, yi ngbü ele ta-ngü te wü kpara ka-ni efa sü, zalü akoro dene, yi ngbü la fï bü emere bala. Te di bala ne, engu ena ato züka ngü fü yi ato, te gara fanü, toto tï aïrï te yi nda de. ¹¹Ah le de yi o to yi teka anü de ngü ka Yesu la kpa engagira nü. Ma ngbü ele de yi di eo jia yi ꞌburu eküte Yesu, zalü akoro di gbü sïkpï, te yi ena ago akoro kpakaka na, agbü züka sü ka Me agbü kpï. ¹²Ah le fü yi ato te-yi, ale ngü ka Me de maguma yi biringbö. Yi mere ngü kpah baka nda diri wü kpara ka Me ta gügü ne. Te cïnga ngbü emere yi la, yi i maguma yi ai, fü yi arü kpekpeke. Te di bala, yi ena amaka wü züka ngü agbü kpï, baka te Me mala nganga fü nih ne.

Dene ngü te ma le amala fü yi, gü ba,

ngü te Me mala, ah tï ace de

^13-14Wü di enga wüna, yi fï la nga ngü ka *Abarayama. Me mala ngü fü Abarayama ta gügü, gü ba, “Ni ena ato wazi fü ye, teka de wü kundu ye sibi fa sü.”6:13-14 Mü ena amaka ngü la gbü Gina Ngü 22:17. Fü Me ayia akïna kïna te ïrï ye, gü ba, “Ni ena amere ngü la bala, fanü fanü,” kükürü de, angü gara kpara te fa Me nda ma. Teka ngü la, fü Me ayia akïna kïna la te ïrï ye. ¹⁵Fü Abarayama ayia agu maguma ye, teka züka ngü de te Me mala fü ye ne. Fü ah angbü da ecï nga ngü la. Fü Me ayia amere züka ngü la fefe na bala fanü.

¹⁶Wü di enga wüna, te gara kpara mala ngü, kïna te-ye te ïrï Me, gü ba, “Ni ena amere gara ngü ka-ni bane,” wü bu ye na ena afï, gü ba, engu ngbü esu dela wu? Aꞌa, ah bala de! Wüh ena adu ale ngü kaka, teka kïna te engu kïna te-ye di la. ^17-18Dela si-ngü ta te Me kïna kïna fü nih di te ïrï ye, teka de nih wu, gü ba, de-ni Me, ni tï afüfü fïngangü ka-ni nda-ni de. Angü, Me mala ta ngü kpekpeke, gü ba, “Ni, Me, ni o Yesu mere *mürü gele, teka areke ngü ezengba ni de wü kpara.” Fü ah ayia akïna kïna, teka acu ngü la di. Te di bala ne, nih mere e afï nga ngü de. Nih rü kpekpeke, de nih zoro ngü ka Me de kpa nih ꞌbasu, angü Me ena aküwa nih aküwa, baka ngü de te engu mala. Engu tï asu wu nda de. ^19-20Te di bala, ngü ka Yesu, te reke ngü ezengba nih de wü Me ne, tï eyi ato wazi fü nih fanü, fü nih angbü eo jia nih nzö eküte Yesu. Wü di enga wüna, nih rü kpekpeke, da elala gbü nga Yesu, angü Yesu nü sü eyi kpa engagira nü, agbü sü ka Me agbü kpï, teka aü kaje fü nih. Angü Yesu de mere mürü gele ka-nih, te reke ngü ezengba nih de wü Me fï mere badi, kpah baka Miri Meleke-Sadiki, te di ta mere mürü gele, gbü re ka Abarayama ne.6:19-20 Mü ena amaka ngü ka Miri Meleke-Sadiki gbü Gina Ngü 14:18-20.

Dene ngü ka Yesu, te ngbü eyi to mürü gele ka-nih,

fï mere badi ne

¹Yesu de mere *mürü gele ka-nih baka Miri Meleke-Sadiki ta gügü ne.7:1 Mü ena amaka ngü ka Miri Meleke-Sadiki gbü Gina Ngü 14:18-20. Miri Meleke-Sadiki la ta neh da? Meleke-Sadiki ta de mere miri ka gara sü de ïrï ye Salema.7:1 Salema de diri ïrï Yerüsalema. Engu ta kpah de mürü gele, te ngbü emere tima ka mere Me. Ta gügü wü *Abarayama nü tï gü gbü nzö wü vügü ka-wü, fü ewü afa wü vügü la.7:1 Wü vügü te wü Abarayama mere gü de ewü ne, wü de wü miri ka wü sü bala, te ewü zoro Loto, te di de ye enga ni Abarayama. Mü ena amaka ngü la gbü Gina Ngü 14. Te wü Abarayama ngbü ego tete kpa ekötï, fü Abarayama anü amaka te-wü de wü Miri Meleke-Sadiki. Fü Miri Meleke-Sadiki ayia asü ngüsü gbü nzö Abarayama. Fü ah ayia aku gba fü Me, teka de Me to wazi fefe na. ²Fü Abarayama ayia aza süka wü e, te ewü za esaka wü vügü la, ato fü Miri Meleke-Sadiki baka tari-e,7:2 Wü e ta te wü Abarayama za esaka wü vügü ne, wüh ye süsüka na gbü wü da-sü nzükpa nzükpa. Fü ewü aza da-sü biringbö, ato fü Miri Meleke-Sadiki. teka agbo nga ïrï Me di. Te di bala, ngü ka Miri Meleke-Sadiki ka-ye baka nda Yesu. Kükürü de, angü si-ngü gbü ïrï Meleke-Sadiki la gü ba, “Miri te ngbü emere ngü gbü jia Me ereke areke.” Miri Meleke-Sadiki, ah kpah de miri ka Salema. Amba si-ngü gbü ïrï de Salema ne gü ba, “Zö-ngbüngbü.” ³Ngü ka Miri Meleke-Sadiki koro ka-ye bü gbogbogbo! Baka te wüh ba ngü ka Miri Meleke-Sadiki gbü *Ngari Me ne, wüh ba ïrï wö ye na nda-wü de. Wüh ba ïrï ni ye na kpah de. Wüh ba ïrï wü kundu ye na kpah de. Nih wu wü sïkpï anga re te wüh bï engu tete ne kpah de. Wüh je nga kpi kaka-na nda-wü kpah de. Ah ge baka te engu ngbü ka-ye ta ezükü, fï mere badi. Te ah bala, ngü kaka ka-ye baka nda Yesu, Ye Me, te di de mere mürü gele, te reke ngü ezengba nih de wü Me, fï mere badi ne.

⁴Ceka la! Miri Meleke-Sadiki ta de mere kpeke kpara. Angü mere kundu nih, Abarayama, to ta takpa fefe baka tari-e, teka acu ngüngü na di. Wüh ngbü eto takpa de bala fü mere kpara de? Te ah bala la, Miri Meleke-Sadiki me-ye de mere kpara, te fa Abarayama ka. ⁵Gbü gele ka-nih, wü di enga *Yïsarayele, wü mürü gele ka-nih ka-wü ꞌburu gbü nguwa *Levi. Amba nih ꞌburu de wü kundu ye Abarayama. Te di bala, de-nih, wü di enga Yïsarayele ꞌburu, nih ngbü eto takpa ka tari-e fü wü mürü gele la, angü rïrï ka-nih mala bala. ⁶Miri Meleke-Sadiki ta de mürü gele ka mere Me, amba engu gbü nguwa Levi nda de. Abarayama me-ye de mere kundu ye Levi. Engu kpah de kpara te Me mala ngü fefe na, gü ba, “Ni ena ato mere wazi fü ye, fü nguwa ye asibi di afa sü.” Amba Abarayama ta me-ye de kpara te to takpa baka tari-e fü Miri Meleke-Sadiki. Fü Meleke-Sadiki adu ayi-ta Me, teka de Me to wazi fü Abarayama. ⁷Kpara te ngbü eyi-ta Me, teka de Me to wazi fü wü bu ye, neh da? Ah de mere kpara de? Te ah bala, Miri Meleke-Sadiki de mere kpara fa Abarayama ka. ⁸Te di bala, ah ge baka te wazi Miri Meleke-Sadiki fa wazi wü di enga Levi, wü mürü gele ka-nih, wü di enga Yïsarayele ne, afa. Kpah bala, wü di enga Levi de wü mürü gele ka kotö ne, wüh tï eyi akpi. Amba teka ngü ka Miri Meleke-Sadiki, wüh je nga ngü ka kpi kaka-na nda-wü de. Ah ge baka te engu ngbü ka-ye ta ezükü fï mere badi. ^9-10Abarayama ta de wö ye *Yïsaka. Yïsaka ta de kundu ye Levi, te di de kundu ye wü mürü gele ka-nih, wü di enga Yïsarayele ne. Amba gbü sïkpï ta te Abarayama to takpa la tete fü Miri Meleke-Sadiki ne, o Abarayama bï Yïsaka ta nda la de. Ah baka te wü Levi to takpa kpah eyi fü Miri Meleke-Sadiki la guvu Abarayama. Te ah bala, Miri Meleke-Sadiki me-ye de mere kpara, te fa Levi, de wü kundu ye la, ꞌburu.

^11-12Teka ngü ka *Rïrï, ta te Me to fü nih, wü di enga Yïsarayele, gömö *Müse ne, Rïrï la gü ba, ah le de wü mürü gele la di ꞌburu wü kundu ye *Arona, gbü nguwa Levi. Amba, sidi nga mere bi wü re fütanga Müse, fü Me adu amala gara ngü, gü ba, “Ni ena atima gara mürü gele fü nih, te ena adi baka Meleke-Sadiki, teka fü engu areke ngü ezengba nih de wü ni, Me.” Te mere bi wü mürü gele gbü nguwa Levi la, ena angbü ta ereke ngü ka-nih gbü jia Me fanü la, de bane Me du tima gara mürü gele fü nih, tïne de. Fanü, mere bi wü mürü gele la tï areke ngü ka-nih gbü jia Me nda-wü de. Diri Rïrï la tï areke ngü ezengba nih de wü Me nda kpah de. Dela si-ngü te Me tima gara mürü gele, de engu koro asere to kaje ka *küküwa fü nih, angü Me fü rïrï ka diri gele la eyi. Amba to mürü gele la, ah de kundu ye Arona nda de, angü ngü kaka ka-ye baka nda Miri Meleke-Sadiki. ^13-14To mürü gele ka-nih ne, ah de Miri Yesu. Ah koro gbü nguwa Levi nda de. Engu ka-ye gbü nguwa *Yuda. Rïrï ka Müse mala teka wü mürü gele gü neh fe? Rïrï la gü ba, wü mürü gele la di ꞌburu gbü nguwa Levi. Ah mala ngü teka nguwa Yuda nda de.

¹⁵Te di bala, nih tï eyi awu, gü ba, Me fü ngü ka diri Rïrï la eyi, angü engu du tima Yesu, gü ba, engu de mere mürü gele baka Miri Meleke-Sadiki. ¹⁶Me o Yesu baka mere mürü gele, neh teka ne? Wüh bï engu ta gbü nguwa Levi? Aꞌa, Me o Yesu baka mürü gele, angü engu de kpara te ngbü ka-ye fï mere badi. Engu tï akpi nda de. ¹⁷Yi fï la nga ngü, ta te wüh ba teka Yesu gbü *Ngari Me, gü ba, “De-ni, Me, ni o ye eyi mere mürü gele fï mere badi, baka mere Miri Meleke-Sadiki tane.”7:17 Mü ena amaka ngü la gbü Ci ka wü Davidi 110:4.^18-19Me du fü ngü ka rïrï ka diri gele la eyi, angü gele la tï adu areke ngü ezengba nih de wü Me nda tïne de. Dela si-ngü te Me tima Yesu tete na, teka de engu koro, agü tamu to kaje fü nih, de wazi te fa ngü ka diri gele la afa. Te di bala, de nih o jia nih eküte Yesu, angü Yesu tï eyi areke ngü, te di ezengba nih de wü Me ne, duu me-ye.

²⁰Kpah bala, ngü ka Yesu fa rïrï ka diri gele ka, teka kïna te Me kïna. Angü ta te wüh fe wü kundu ye Levi tete wü mürü gele ne, Me kïna kïna nda de. ²¹Amba, gbü sïkpï te Me fe Yesu tete, Me gü ba, “De-ni, Me, ni kïna kïna eyi, gü ba, ‘Ni o ye eyi mere mürü gele, te ena angbü fï mere badi, teka adi ereke ngü ezengba ni de wü kpara.’ ” Dela ngü ta te Me kïna kïna di. Engu tï afü ngü la nda de. ²²Te di bala, ah le de nih wu, gü ba, ngü ka Yesu fa ngü ka mere bi wü diri mürü gele tane afa. Ah le kpah fü nih awu, gü ba, Yesu tï eyi aküwa nih fanü, angü engu tïne eyi mere *vüngüte ka-nih.

²³Kpah bala, diri wü mürü gele la, wüh ta de kükürü wü kpara ka kotö ne. Te gara kpi eyi la, fü ewü angbü eo gara kpara gbü nguwa ewü la, da kiri ye te kpi la, teka de tima la di fï bü enü kpa engagira nü. Dela si-ngü te wüh sibi fa sü ne ²⁴Amba, teka ngü ka Yesu, engu tï akpi tïne de. Wüh tï ao gara kpara dada na kpah de. Angü engu ngbü eyi me-ye baka mere mürü gele, fï mere badi. ²⁵Te di bala, te nih yi-ta Me te ïrï Yesu la, Me ena aküwa nih aküwa fï mere badi. Kükürü de, angü Yesu ngbü eyi fï da eyi-ta Me teka ngü ka-nih, de Me küwa nih.

²⁶Wü di enga wüna, dela ngü te ma le amala fü yi. Yesu ka-ye me-ye de mere mürü gele ka-nih. Engu me-ye de kpara te ena aküwa nih. Angü engu de züka kpara, *nzïla, te ngü kaka reke gbü jia Me fa sü. Ah mere siti ngü nda kü de. Fü Me ayia ato mere wazi fefe na, adu ao engu ede ye, Mere Miri agbü kpï. ²⁷Ngü ka Yesu fa ngü ka wü diri wü mürü gele tane ka. Angü Yesu to te-ye, akpi, teka afa nih gbü wü *siti ngü ka-nih, cu de *ngüte ye. Ah mere ngü la ngbee du biringbö. Amba, teka ngü ka mere bi wü diri wü mürü gele, wüh de wü kükürü kpara ka kotö ne. Wüh ngbü ta kpah emere wü gara *siti ngü. Teka ngü la, fü ewü angbü kpah ewa wü nü, eto ngüngüte fü Me, teka siti ngü ka-wü feke, teka de Me boro siti ngü ka-ani la. Wüh le teka angbü eto ngüte wü nü la bala, te nga wü sïkpï ꞌburu, angü ngüte wü nü, ta te wüh ngbü ewete la, tï anza siti ngü nda de.7:27 Mü ena amaka ngü la gbü buku ka Rïrï ka Gele ka wü Levi 9:7.²⁸Te di bala, mene wü kpara ta te wüh o ewü wü mürü gele, baka te *Müse mala gbü *Rïrï ka-ye ne, wüh ta de kükürü wü kpara ka kotö ne, kpah baka nih. Amba, teka ngü ka Yesu, engu ka-ye de Ye Me. Wawazi na fa sü. Engu ka-ye de züka kpara gbü jia Me. Fü Me ayia ao engu baka to mürü gele ka-ye. Fü ah ayia akïna kïna, gü ba, tima ka Yesu tï anza nda de.

Dene ngü ka Yesu, te ngbü eyi mere mürü gele ka-nih agbü kpï

¹Wü di enga wüna, mere kpeke ngü te ma le amala fü yi, ah dene. Miri Yesu de züka *mürü gele ka-nih ka-ye me-ye, te ü kaje ka *küküwa eyi fü nih. Tïtïne engu ngbü engbü ede kpökpö ka Me, baka Mere Miri agbü kpï. ²Yesu reke ngü ezengba nih de wü Me eyi, agbü *nzïla sü kpaka Me. Sü la, ah baka *Kambü ka Me de füh kotö ne nda de, angü Kambü ka Me de füh kotö ne, wü kpara jï me-wü de kpa wü. Amba zu Kambü ka Me de agbü kpï ne, Me mere e ka-ye cu me-ye.

³Tima ka wü mürü gele neh ene? Wüh ngbü ewete mere bi wü nü, teka adi eto ngüte ewü fü Me, teka afa *siti ngü ka wü kpara di. Ah bala de? Amba baka te Yesu di de mürü gele ka-nih ne, engu to fü Me neh ene? Ah to zu *ngüte ye. ⁴Amba, te Yesu ena adi ta fï bü füh kotö sene la, de bane engu tï angbü mürü gele nda de. Angü mere bi wü mürü gele la ta ladü esüka wü di enga *Yïsarayele, te ewü ngbü emere gele ka Me füh kotö ne. Amba Yesu ka-ye ladü agbü sü ka Me agbü kpï. Angü engu reke ngü ezengba nih de wü Me nza eyi. ⁵Amba tima de te mere bi wü mürü gele la ngbü ta emere de füh kotö de sene ne, ah ka-ye ta nda-ye bü kuru ngü, de te Miri Yesu du mere agbü kpï ne. Kpah bala, Kambü ka Me de füh kotö ne, ta te wüh ngbü emere gele ka Me gbügbü ne, ah ta kpah de kuru zu Kambü ka Me de agbü kpï ne. Angü Me sere ta zu Kambü ka-ye agbü kpï ne fü *Müse. Fü Me ayia amala ngü fü Müse kpekpeke, gü ba, “Ye mere Kambü ka-ni la füh kotö sene, kpah baka engu te ni sere fü ye la.”8:5 Me sere ngü la fü Müse o wüh di tete na kpa füh mere da de ïrï ye Sïnayï. Mü ena amaka ngü la gbü buku ka Gogo ka wü Yïsarayele 25:40.⁶Amba teka tima ka Yesu, engu mere zu gele ka Me agbü kpï ne nza eyi. Angü Yesu reke ngü ezengba nih de wü Me eyi cu fa sü, fa nda diri wü mürü gele tane di ka. Kpah bala, Yesu nzö ngüte eyi de wü nih. Teka ngü la, tïtïne Me eyi de mere *vüngüte ka-nih. Fü Me adu amala ngü fü nih, gü ba, “Ni ena adu aküwa nih, teka ngü ka Yesu la.” Te di bala, ngü ka *küküwa te Yesu to fü nih ne reke fa ngü ka diri gele tane ka.

⁷Me nzö ngüte de wü kundu nih ta gügü. Fü ngü la ayia asiti, angü maguma wü kundu nih la ka-ye ta ꞌbasu ꞌbasu. Dela si-ngü te Me du nzö ngüte de wü nih kpah toto ne. ⁸Te Me wu dürü ngü ka wü kundu nih la, fü ah ayia amala ngü gömö *mürü dofo ka-ye, gü ba, “Te gara, ni ena adu anzö ngüte de wü, wü kpara ka-ni, wü di enga Yïsarayele, kpah toto. ⁹Amba to ngüte engu la, ah baka didiri na, ta te ni nzö de wü kundu wü ne, nda de. Ta gügü, ni nzö ngüte de wü kundu wü la, o wü kundu wü la di ta wü labï, gbü tö ka wü *Ezepeto. Fü ni ayia aküwa ewü esaka wü kpara ka Ezepeto, angü wüh de wü vüngüte ka-ni. Fü ni ayia ato *Rïrï ka-ni fü ewü gömö Müse. Amba wüh le aje Rïrï ka-ni la nda-wü de. Fü ewü angbü emere ngü ka-ni de maguma wü ꞌbasu ꞌbasu. Teka ngü la, fü ni ayia afü kürüfe ni fü ewü. ^10-12Amba te gara, ni ena adu anzö ngüte de wü kpah toto. Amba ngü la tï angbü baka mene diri ngü tane nda de. Angü ni ena awu cïnga wü, fü ni ayia aboro wü *siti ngü ka-wü ꞌburu, teka *züka maguma ni. Ni tï adu afï nga siti ngü ka-wü la tïne de. Ni ena aba wü rïrï ka-ni la, ao emaguma wü, angü wü ena adu ace ngü ka-ni. Ni ena ale wü afa sü, angü ni ena adi de mere vüngüte ka-wü. Wü ena ale rïrï ka-ni kpah de maguma wü biringbö. Wü ena awu ngü ka-ni areke areke, te nga wü ꞌburu. Fü wü angbü eje ngü ka-ni mbi mbi mbi, da ele cu de maguma wü.”8:10-12 Mü ena amaka ngü la gbü buku ka Yeremaya 31:31-34.¹³Dela ta ngü te Me mala gömö mürü dofo ka-ye, gü ba, “Ni ena adu anzö ngüte te gara, de wü kpara ka-ni kpah toto,” ne. Me mala ngü la bala, angü ngü ka diri ngüte, ta te engu nzö de ewü ne, siti eyi. Te e siti eyi la, mü ena amere di baye? Mü ena adu ace e la asidi, fü mü adu areke gara toto. Ah bala de? Te di bala, ah le de nih ce ngü ka diri gele la asidi, fü nih adu alala te to ngü ka Yesu ne.

Dene ngü ka diri gele ka wü di enga Yïsarayele

¹Diri wü *mürü gele tane, ngbü emere nda-wü tima gbü *Kambü ka Me, de te wüh jï füh kotö de sene. Fü ewü angbü efete wü rïrï ka gele, ta te Me to fü *Müse ne, ereke areke. ^2-3Wüh ye süka guvu Kambü ka Me la ta ꞌbasu. Wüh gbala ta mere bongo baka ngisi la, kolo tütü na di. Mene gigina, de to kpa etanü ne, ah de mene de te wü mürü gele ngbü emere gele ka Me gbügbü na, te nga wü sïkpï ꞌburu. Lamba ta ladü kpala, te wüh ngbü esiya, teka de ah di elofo sü kpa esambü la. Cangalï ta kpah ladü kpala, te wüh ngbü eo ambata fefeh na, adi eto fü Me. Mene eꞌbaꞌbasu guvu kambü, te di to kpa gbügbü ne, wü mürü gele ꞌburu tï arï gbügbü kpala nda-wü de. ꞌDuwa mere kpara füh kpökpö ka-ewü ngbü erï kpala me-ye, gbü re biringbö du biri. ⁴Gbü eꞌbaꞌbasu guvu kambü la, gara *cangalï ladü, te wüh reke gbü *diki-se, te wüh ngbü ecuru *rü de züka se ye fefeh na. Mere züka *Sanduku ta kpah ladü kpala, te wüh o züka wü e ka Me gbügbü. Wü e la baka zü-e, ta te Me ngbü eto fü wü di enga *Yïsarayele, o wüh ngbü endoro tete na kpa etü gü ne.9:4 E-mazü te wüh eï ga, mana ne, wüh o engu nda-wü gbü sila te ewü fo gbü diki-se. Bete ngbangba ka *Arona, ta te Me to wazi gbügbü na, fü ah ayia ato kpa ye baka fu-e ne. Kpah bete wü fara da ꞌbasu, ta te wüh ba wü *Rïrï ka Me nzükpa fefeh ne. ⁵Kuru mere wü *malayïka ka Me ladü,9:5 Wüh o ta kuru wü malayïka la ꞌbasu füh sanduku la. Mü ena amaka wü ngü la gbü buku ka Gogo ka wü Yïsarayele 25:18-22. te wüh reke, o füh sanduku la. Fü mbula wü malayïka la agbala te-ye füh sanduku la ꞌburu. Dela sü te mürü gele ngbü emoko ngüte nü tete, teka adi ereke ngü ezengba wü kpara de wü Me di. Mere bi wü gara rïrï ka gele kpah ladü, amba ma le aza mere bi lö-ra, teka aro mö füh ngü la, nda-ra de.

⁶Mere bi wü mürü gele ta ladü, te ewü ngbü erï agbü gina guvu kambü la, te nga wü sïkpï nde, teka adi emere gele ka mere Me kpala. ⁷Amba teka eꞌbaꞌbasu guvu kambü la, ꞌduwa mere kpara füh kpökpö ka wü mürü gele la ngbü erï kpala me-ye. Ah ngbü erï kpala du biri, gbü re biringbö. Ah rï kpala bü kükürü kükürü bala ne de. Ah ngbü eza ngüte nü, angbü erï di kpala. Fü ah amoko ngüte la füh *Sanduku de kpa esambü la, teka afa *siti ngü ka-ye di, kpah bete wü siti ngü, de te wü kpara ꞌburu mere gbü mene re la. ⁸Diri Kambü ka Me la, wü kükürü kpara rï nda-wü kpala ꞌburu ꞌburu de. Si-ngü la, neh baye baye? Ngü la, *Nzïla Wazi Me ngbü esere fü nih, gü ba, gele de te wü mürü gele la ngbü ta emere ne, ah tï areke ngü ka wü kpara gbü jia Me nda de. ⁹Gbü wü ngü la, Nzïla Wazi Me ngbü egü tamu ngü fü nih, gü ba, ngüte wü nü la tï afa wü kpara gbü siti ngü ka-ewü, nda kpah de. Ah tï azürü maguma wü kpara, de te ewü ngbü emere gele la, nda kpah de. ¹⁰Mere bi wü rïrï la, ah ꞌburu teka gele ka mato e fü Me. Wü gara gele la, ah teka ngü ka mazürü küte, de wü ngü ka zü-e, de wü gara. Angü wü kpara la ngbü emere wü gele la ꞌburu de wü e füh kotö ne, te tï areke ngü ka wü kpara gbü jia Me nda ꞌburu ꞌburu de. Amba enatikine dene, Yesu reke züka kaje eyi fü nih cu de *ngüte ye.

Dene ngü teka Yesu, te reke ngü ezengba nih de wü Me,

cu de ngüte ye

¹¹Enatikine, Me o Yesu *Kurisito eyi baka mere *mürü gele ka-nih. Yesu mere nda-ye ngü la gbü *Kambü ka Me, te wü kpara jï de kpa wü füh kotö ne, nda de. Ah rï mere nda-ye ngü la cu agbü sü ka Me agbü kpï. Nda Yesu, gele de te engu mere ne, ah fa nda wü mürü gele füh kotö ne ꞌburu, angü ah küwa nih eyi fï mere badi. ¹²E te Yesu za, rï di agbü sü ka Me kpala, ah za cu *ngüte ye, ah de ngüte nü nda de. Angü ah kpi teka aküwa nih fï mere badi. Ah mere ngü la bala ngbee du biringbö, ah du nda nganga nda de. ¹³Gbü *Rïrï ka Müse, te kpara le areke ngü ka-ye gbü jia Me la, kpara la ena aza meme, anga yiti, anü di kpaka mürü gele. Fü mürü gele aza nü la, awa, aza ngüngüte, amoko eküte kpara la.9:13 Mürü gele tï kpah eyi aza so joro yiti, acuru acuru. Fü ah aza mbïmbï na dela, areke ngü ka kpara la di. Mü ena amaka ngü la gbü buku ka Namba 19. Amba ngü la ngbü ereke bü nzö küte kpara, ah tï anza *siti ngü ka kpara la nda de. ¹⁴Amba, teka ngü ka Yesu Kurisito, wazi ngüngüte na fa ngü ka ngüte wü nü ka. Angü Yesu mere siti ngü nda kü de. Fü *Nzïla Wazi Me ayia ato wazi fefe na, fü ah ayia ato te-ye fü kpi, teka aküwa nih. Ngüte Yesu la tï eyi afa nih gbü siti ngü ka-nih ꞌburu fï mere badi. Te di tïne eyi bala ne, fanü fanü, cürü kpi tï angbü emere nih tïne de. Nih gbo nga ïrï Me, da emere tima kaka-na de tadu.

¹⁵Wü di enga wüna, Yesu reke to kaje eyi fü nih. Kpah bala, engu reke ngü ta te di ezengba nih de wü Me ne, eyi ꞌburu. Ah mere ngü la de ngüte ye, te engu tökö teka ngü ka-nih ne. Te di bala, nih tï eyi amaka züka ngü ka Me agbü kpï, baka te Me mala fü nih, te engu ï nih tete ne. Angü Yesu kpi ne, teka afa wü siti ngü, de te nih mere ne ꞌburu. Angü wazi nih teka amere mere bi wü *rïrï ka gele, ta te Me to fü Müse ne, ꞌburu nda ma.

^16-17Te gara enga ni mü kpi eyi la, yi tï eyi aye süka e-nga-kpa gbü nganga la de wü gara wü di enga ni mü.9:16-17 Gbü wü re ta de kpala, kpara ngbü eba ngü me-ye de kpa ye, teka ngü ka wü e ka-ye, gü ba, “Sidi nga kö ni, wü e ka-ni dene, wüh to fü mene kpara bane”. Amba te engu ba kpah bü ngü bala la, mü tï amofo wü e te engu ele ace fü mü ne la de, zalü te engu ena akpi feke. Amba te engu kpi nda la de la, mü ena aye süka wü e kaka, ba e-nga-kpa, neh baye baye? Mü tï amofo e kaka biringbö bane de! Te di bala, te Yesu ena akpi ta de la, de bane nih tï amaka *küküwa kpah de. ^18-19Kpah bala, ah ngbü ele ngüte teka areke ngü di ezengba nih, wü kpara, de wü Me. Dela si-ngü de te diri wü mürü gele tane ngbü ewa wü nü tete, teka adi eto ngüte ewü fü Me ne. Ah kpah baka ngü ta te Müse mere, gbü sïkpï te engu sere wü rïrï ka Me tete ꞌburu fü wü kpara. Ah za ta ngüte yiti, bala de ngu, fü ah ayia amoko füh buku, de te engu ba wü Rïrï la gbügbü na ne. Fü ah adu amoko ngüte la kpah gbü nzö wü di enga *Yïsarayele ꞌburu,9:18-19 Müse i kala kambiliki te di didiki, dünda de akindo, teka amoko ngüte la di.²⁰gü ba, “Ngüte de te ni ngbü emoko gbü nzö wü enatikine ne, ah baka e te wü nzö *ngüte eyi de wü Me. Angü wü le wü *Rïrï ka Me ne eyi ꞌburu, de maguma wü biringbö.”9:20 Mü ena amaka ngü la gbü buku ka Gogo ka wü Yïsarayele 24:8.²¹Fü Müse ayia amoko ngüte la kpah füh Kambü ka Me, de wü e de ta te wüh ngbü emere gele di, de gbügbü na la ꞌburu. ²²Angü Rïrï ka Müse mala, gü ba, ah le de wüh di ereke ngü ka wü e ꞌburu de ngüte wü nü. Te wüh ena angbü ta ewa wü nü fü Me, teka adi ereke ngü ka-wü di de la, de bane ngü ka-ewü tï ta areke gbü jia Me nda de. Dela si-ngü te Yesu kpi tete na, atökö ngüte ye, teka azürü *siti ngü ka-nih ne.

^23-24Kpah bala, *Kambü ka Me de füh kotö ne, de wü ngü ka-ye, ah ꞌburu baka kuru ngü te di agbü kpï ne. Müse moko ngüte nü eküte wü e la mbi, teka de wü e la reke gbü jia Me, angü dela wü e te wü kpara mere me-wü de kpa wü. Amba Yesu Kurisito rï gbü Kambü ka Me de füh kotö ne nda de. Engu rï ka-ye agbü *nzïla sü ka Me agbü kpï, angü Yesu tökö cu *ngüte ye, te reke fa sü ne. Tïtïne engu ladü agbü kpï kpala, da eyi-ta Me teka ngü ka-nih. ²⁵Yesu rï agbü sü ka Me, nda nga ye anda, te nga re biri biri ne, nda de. Mere mürü gele ka wü di enga Yïsarayele ngbü ta erï te nga wü re biri biri ꞌburu, guvu mene Kambü ka Me, te wüh rï gbügbü ꞌdaaa de ne, de ngüte wü nü esaka ye. ²⁶Te ngü ka Yesu ena adi ta baka nda wü mürü gele la, de bane engu ena akpi ta te nga wü re biri biri ꞌburu, akpo gbü sïkpï ta te Me mere kotö ne tete, zalü akoro di enatikine. Amba ngü la bala nda de. Yesu kpi ka-ye ngbee du biringbö. Te di bala, kpi te Yesu kpi di du biringbö ne, kpi la tï eyi afa wü kpara gbü siti ngü ka-ewü ꞌburu. ²⁷De-nih, wü kpara ka kotö ne, nih ngbü ekpi neh du fe? Nih ngbü ekpi ngbee du biringbö. Sidi nga kpi la, fü nih adu akoro arü engagira Me, teka fü Me akolo ngü ka-nih. ²⁸Kpah bala, Yesu kpi ka-ye ngbee du biringbö. Angü ah ce te-ye fü kpi, teka anza siti ngü ka wü kpara ꞌburu, cu de ngüte ye. Fanü fanü, Yesu ena adu akoro füh kotö ne te gara. Amba engu du koro teka adu kpah akpi, teka afa nih gbü siti ngü ka-nih ne, nda tïne de. Yesu ena adu akoro füh kotö ne, teka abiti nih wü kpara ka-ye, te nih ngbü eo jia nih tengüngü ne. Engu ena aküwa nih, fü nih ago angbü agbü kpï kpala fï mere badi.

Dene ngü ka Yesu, te fa ngü ka diri gele ka

¹Wü di enga wüna, dene ngü te ma le amala fü yi. Diri gele, ta te Me sere fü *Müse ne, tï areke ngü ka-nih gbü jia Me anza nda de. Angü ngü ka gele la ka-ye bü kuru ngü, te ngbü esere ngü ka Yesu fü nih. Angü Yesu zu me-ye de kpara, te reke ngü ka-nih, o eyi mbi gbü jia Me. Te ah teka ngü ka diri gele la, ah le de *mürü gele la di ewa wü nü, fü ah angbü eto ngüte ewü fü Me te nga wü re biri biri ꞌburu. Wüh ngbü emere ngü la enda nganga anda bala. Angü ngü ka gele la tï ta, teka areke ngü ka-nih gbü jia Me, nda de. ²Te diri gele la ena areke ta ngü te di ezengba nih de wü Me ne, anza ta eyi la, de bane wüh ena adu kpah adi emere gele la, enda nganga na anda? Aꞌa! Wüh tï ta adu angbü emere gele la te nga wü re ꞌburu ne de. ³Fanü fanü, diri gele la tï teka areke ngü ka-nih gbü jia Me nda de. Teka ngü la, fü ewü angbü emere gele la, te nga wü re ꞌburu, angü wüh ngbü fï bü efï nga wü *siti ngü ka-wü, emaka. ⁴Kükürü de, angü ngüte wü nü la tï, teka areke ngü ezengba nih de wü Me, nda de. Ah le ka-ye cu *ngüte Yesu Kurisito.

^5-7Dela si-ngü te Me tima Yesu *Kurisito, fü ah akoro füh kotö sene, aza küte baka nih, wü kpara, teka de engu kpi, teka aküwa nih. Angü, ta te Yesu ngbü ereke te-ye, teka akoro tete kpa füh kotö kpakine ne, ah mala ta fü Wö ye, gü neh fe? Ah mala ta, gü ba, “Wö ni, Me, ni ladü nzo. Ni to te-ni eyi ꞌburu ꞌburu teka amere ngü, de te ye ngbü ele ne. Angü ni wu eyi, gü ba, mere bi wü nü te wüh ngbü ewa fü ye ne, ngü la reke gbü jia ye nda de. Ngüte wü nü la tï anza siti ngü ka wü kpara nda de. Dela si-ngü te ye to küte di fü ni, teka de wüh mörö ni, teka fü ngüte ni anza siti ngü ka wü kpara, baka züka gele ka boro ngü, te ye ngbü ele.”10:5-7 Mü ena amaka ngü la gbü Ci ka wü Davidi 40:6-8. Dela ngü ta te wü *mürü dofo ba gbü *Ngari Me, teka kokoro ka Ye Me füh kotö ne. ⁸Ngü te Yesu mala fü Wö ye, gü ba, “Ni wu eyi, gü ba, mere bi wü nü te wüh ngbü ewa fü ye ne, ngü la reke gbü jia ye nda de. ⁹Wayi, ni ladü nzo. Ni to te-ni eyi ꞌburu ꞌburu, teka amere ngü te ye ngbü ele.” Ngü la, ah baka e te Yesu mala, gü ba, ngü ka wü diri gele la nza eyi. Angü enatikine dene, *ngüte Yesu du reke ngü la eyi cu me-ye. ¹⁰Angü Yesu to te-ye ꞌburu ꞌburu, teka amere ngü de te Me ngbü ele ne. Fü ah ayia amere tima ka-ye kpini kpini, anza ꞌburu, baka te Me mala fefe. Fü ah ayia akpi ngbee du biringbö, teka aküwa nih gbü *siti ngü ka-nih fï mere badi.

¹¹Teka mere bi wü mürü gele ka wü di enga *Yïsarayele, wüh ngbü emere gele la, enda nganga anda. Wüh ngbü emömörö wü nü neh du fe, teka adi eto ngüte ewü fü Me? Amba ngüte wü nü la tï, teka areke ngü ka-nih gbü jia Me nda la fï de. ¹²Amba teka ngü ka Yesu, ah kpi ka-ye ngbee du biringbö. Fü *ngüngüte na la ayia areke ngü ka wü kpara, te ewü le ngü kaka ne ꞌburu. Te Yesu reke ngü ka-nih nza tete, fü engu adu angbü füh kpökpö, gbü kokpa ka Wö ye agbü kpï, baka mere miri. ¹³Enatikine Yesu fï ladü engbü kpala, ecï nga sïkpï, te Me ena aza wü vügü kaka ꞌburu, ao esa lölö. ¹⁴Kükürü de, angü baka te Yesu kpi, fü ah atökö ngüte ye teka siti ngü ka-nih ne, ngüngüte na la zürü nih, wü kpara kaka, eyi ꞌburu. Ngüte Yesu la du reke ngü ka-nih eyi ꞌburu gbü jia Me. Gara ngü tïne eyi ma.

¹⁵Gbü wazi ka *Nzïla Wazi Me, wüh ba ngü la kpah eyi gbü *Ngari Me, gü ba, ¹⁶“Me mala gü ba, ‘Te gara, ni ena adu anzö *ngüte de wü nih kpah toto. Amba ngü la tï angbü baka mene diri ngü tane nda de. Ni ena aba wü rïrï ka-ni la, ao emaguma nih, teka de nih mere e ace ngü la tïne de.’ ¹⁷Fü Me adu kpah amala gara ngü, gü ba, ‘Ni ena awu cïnga nih, fü ni aboro siti ngü ka-nih ꞌburu, teka *züka maguma ni.’ ”10:17 Mü ena amaka ngü la gbü buku ka Yeremaya 31:34. Dela ngü ta te Me mala gömö *mürü dofo ka-ye gügü. ¹⁸Baka te Me boro siti ngü ka-nih eyi ꞌburu, teka züka maguma ye ne, nih ena adu angbü emere gele, da ewa wü nü, neh kpah teka ne? Ah le de nih ce ngü ka diri gele ace. Nih du, nih mere bala nda-nih tïne de.

Dene ngü te nih ena arü di kpekpeke,

alala eküte Yesu

¹⁹Wü di enga wüna, Yesu reke ngü te di ezengba nih de wü Me ne eyi de *ngüte ye. Te di eyi bala ne, nih nü enü kpaka Me. Cürü mere e amere nih tïne de. ²⁰Angü Yesu ü to kaje eyi fü nih. Ah de kaje ka *küküwa. Te nih le kaje dela la, fanü fanü nih ena anü akoro kpaka Me. Yesu ü kaje la, neh baye baye? Ah ü kaje la, angü ah kpi füh *rü gbegbete, teka aküwa nih. ²¹Yesu me-ye de mere kpeke *mürü gele ka-nih. Ah reke ngü ezengba nih de wü Me eyi ꞌburu reke areke, teka fü nih akoro züka wü kpara ka Me. ²²Te di bala, Me ngbü eyi eceka nih baka züka wü kpara ka-ye, angü ngüte Yesu zürü nih eyi *nzïla. Teka ngü la, nih koro ekoro kpaka Me. Nih mere e akpe cürü tïne de. Ah le de nih lala te ngü ka Yesu de maguma nih biringbö, angü nih za *babatïza eyi te ïïrï na. ²³Nih zoro ngü ka Yesu de kpa nih ꞌbasu, baka kïna ta te nih kïna te-nih di ne. Nih o jia nih ꞌburu eküte Yesu, angü engu ena adu akoro te gara, teka aza nih, anü di kpaka ye agbü kpï, kpah baka ta te engu mala fü nih ne. ²⁴Kpah bala, nih to te-nih, teka adi eto wazi fü wü bu nih, kpah da ele te-nih esüka nih, teka fü nih amaka wazi angbü emere züka ngü di. ²⁵Ah le kpah fü yi adi ebiti te-yi tundu de wü bu yi, teka adi egbo nga ïrï Me, da eto wazi esüka yi, teka fü yi alala fï gbü ngü ka Yesu. Angü wü gara kpara ce da ebiti te-wü de wü bu wü eyi. Amba yi mere e amere nda-yi bala de. Kükürü de, angü Yesu ena adu akoro füh kotö sene kere.

²⁶Wü di enga wüna, nih le ngü ka Me de maguma nih ꞌburu biringbö. Nih mere e ace ngü la de. Angü, te nih du fü te-nih, gü ba, nih du le ngü la nda-nih tïne de la, nih ena aküwa baye baye? Dela mere *siti ngü, te siti gbü jia Me cu fa sü! Mene ngüte e te nih ena aza, teka areke ngü la di ne, ah de ngüte ne? ²⁷Te yi gü ba, ani le ngü ka Yesu de la, Me ena ato mere kuru te yi. Yi tï aküwa kpo fï de! Angü engu ena agü yi gbü mere wa, te ünü nda kü de! ²⁸Nih wu eyi, gü ba, ta gügü ne, te kpara le ngü ka *Rïrï ka Müse de la, kpara la tï aküwa nda de. Wüh ena aï engu engagira wü *kovo, teka agïrï si-ngü kaka-na la. Te wü kpara ꞌbasu, anga bata, mala ngü kaka eyi, gü ba, “Fanü fanü, ani wu siti ngü kaka eyi cu de jia ani la,” wüh ena adu amere de engu baye? Wüh ena akolo ngü ka kpara la, fü ewü amörö engu asidi.10:28 Mü ena amaka ngü la gbü Manda nga Rïrï 17:6.²⁹Te di bala, te mü le ngü ka Yesu de la, mü ena aküwa, neh baye baye? Ah ge baka te mü ngbü ekpa ngü ka *ngüte Yesu, te tökö teka azürü *siti ngü ka-mü ne. Angü ah ge baka te mü ngbü edoto Yesu esa lö mü la. Ah kpah ge baka te mü ngbü esoko *Nzïla Wazi Me, de te ngbü eto wazi fü nih ne. Te mü ngbü emere ngü bala la, Me ena ato mere siti kuru te mü. ³⁰Wüh ba ta ngü la gbü *Ngari Me, gü neh fe? Me gü ba, “Ni ena ato kuru te siti wü kpara ꞌburu.” Fü ah adu kpah amala gara ngü, gü ba, “Te wü kpara ka-ni ngbü kpah emere siti ngü la, ni ena ato kuru te ewü kpah ato.”10:30 Mü ena amaka ngü la gbü Manda nga Rïrï 32:35-36.³¹Nih ceka ngü la mbi mbi mbi! Angü te Me to kuru te mü cu me-ye la, mü tï aküwa nda-mü de. Angü Me ka-ye de mere siti mürü wazi!

³²Wü di enga wüna, ma wu eyi, gü ba, yi to maguma yi fü Yesu eyi gügü. Te di bala, ah le de yi fï la nga wü züka ngü, ta te yi ngbü emere gügü ne. Angü, baka ta te yi to maguma yi fü Yesu ne, yi rü ka-yi ta kpekpeke. Ta te wü kpara ngbü eto cïnga te yi teka ngü ka Yesu, yi kpe cürü nda-yi ta de. Yi zoro Yesu ta de kpa yi ꞌbasu. Yi ce ngü kaka-na ta nda-yi de. ^33-34Wüh ngbü ta esoko wü gara kpara esüka yi, da emï ewü gbü jia wü kpara. Wüh ngbü ta ei wü gara yi, egü agbü ku. Fü wü gara yi angbü nda-wü ta da ele ta-ngü te wü bu wü, te wüh gü ewü agbü ku ne. Wüh ngbü ta egbene e ka wü gara yi, ece ewü de kpa wü kükürü. Gbü wü ngü la ꞌburu, yi kpe cürü ta nda-yi de. Yi ngbü ta de tadu te yi, angü yi wu kpo, gü ba, züka ngü ka-ani ladü agbü sü ka Me agbü kpï, te tï anza nda de.

^35-36Wü di enga wüna, ah le de yi i maguma yi ai! Yi mere e ace ngü ka Yesu de. Yi rü kpekpeke, adi emere ꞌduwa mene ngü te ena areke gbü jia Me, baka ta te yi ngbü emere gügü ne. Te yi mere bala la, Me ena ato mere tadu fü yi, fü ah adu aküwa yi fï mere badi, kpah baka ngü ta te engu mala fü yi ne. ³⁷Yi fï nga ngü de, Yesu te edu. Engu ena adu akoro kere. Engu tï ayiri tïne de. ³⁸Yi fï la nga ngü, ta te Me mala, gü ba, “Mene wü kpara, te ewü le ngü ka-ni, Me, de maguma wü biringbö ne, ni ena aceka ewü baka züka wü kpara ka-ni fanü, fü ni adu aküwa ewü fï mere badi. Amba, te wüh ce ngü ka-ni eyi la, maguma ni ena anzu eküte wü.”10:38 Mü ena amaka ngü la gbü Abakuka 2:3-4.³⁹Wü di enga wüna, ma wu eyi, gü ba, yi lala eyi gbü ngü ka Yesu Kurisito. Angü fanü fanü, yi le ngü ka Me eyi de maguma yi biringbö. Teka ngü la, Me ena aküwa yi aküwa fï mere badi. Ah tï ato kuru te yi tïne de.

Dene ngü ka wü diri kpara ka Me,

te ewü rü ta kpekpeke gbü ngü ka Me

¹Wü di enga wüna, nih ena ale ngü ka Me de maguma nih biringbö neh baye baye? Te nih le ngü ka Me de maguma nih biringbö la, nih ena awu, gü ba, Me le nih fa sü. Te di bala, wü züka ngü de te Me mala nganga fü nih ne, engu ena amere amere fanü. Amba nih tï awu ngü la de jia nih tïtïne la de, nih ena adu awu wü ngü la te gara. ²Angü mere bi wü kpara ka Me ta gügü ne le ngü ka Me ꞌburu de maguma wü biringbö. Fü ngü ka-ewü la areke ta te Me afa cu sü. ³Te nih le ngü ka Me de maguma nih biringbö la, nih tï eyi awu, gü ba, Me o kotö ne bete kpï de wü e gbü wü ꞌburu me-ye. Angü, Me mala ta bü ngü de komö ye kükürü, fü wü e la ayia akoro!11:3 Mü ena amaka ngü ka kotö ne bete kpï, ta te Me o ewü ne, gbü Gina Ngü 1:1-31.

⁴Yi fï la nga ngü ka Abele. Abele le ngü ka Me de maguma ye biringbö. Dela si-ngü ta te ngü ka nü kaka, de te engu wa fü Me ne, reke di gbü jia Me fa sü, fa ngü ka tari-e, ta te enga ni ye na to fü Me ne.11:4 Mü ena amaka ngü ka Abele ake enga ni ye na gbü Gina Ngü 4:3-12. Fü Me ayia aceka Abele baka züka kpara ka-ye, teka ngü ta te engu to maguma ye fü Me ne. Nih wu eyi, gü ba, Abele kpi ka-ye ta eyi gügü, amba teka züka ngü kaka la, ah ge baka e te nih ngbü eyi eje riri na, te nih ngbü etanga ngü kaka gbü *Ngari Me la.

⁵Yi fï la kpah nga ngü ka Enoka.11:5 Mü ena amaka ngü ka Enoka gbü Gina Ngü 5:18-24. Enoka le ngü ka Me ta kpah de maguma ye biringbö. Fü Me ayia aza engu cu ezükü bala, anü sü di agbü kpï, teka ngü ta te engu lala gbü nga Me ne. Enoka kpi ta akpi nda de. Angü wüh ba ta ngü tekaka gbü Ngari Me, gü ba, “Ngü ka Enoka reke gbü jia Me fa sü.” ⁶Te mü le ngü ka Me de maguma mü biringbö de la, ngü ka-mü tï areke gbü jia Me kpah de. Angü, te mü le aku gba fü Me la, ah le de mü wu, gü ba, fanü fanü, Me le nih fa sü. Ah le kpah de mü wu, gü ba, Me ngbü eto wazi fü mene wü kpara, te ewü le ngü kaka de maguma wü biringbö ne.

⁷De yi fï la kpah nga ngü ka *Nüwa. Nüwa le ta ngü ka Me de maguma ye ꞌburu. Angü Me mala ta ngü fü Nüwa, gü ba, “Te gara, mere ngu ena asi, fü ah ata sü füh kotö ne ꞌburu. Te di bala, ah le de ye reke *zabu, teka fü ye aküwa gbügbü.”11:7 Mü ena amaka ngü ka Nüwa gbü Gina Ngü 6 - 9. Ngü ka ngu te si la, ah ta de ngü te wü kpara wu bala te enga gina nda-wü la de. Amba Nüwa ceka ta ngü la gbü jia ye ba wu nda de. Fü ah ayia aje rïrï ka Me. Fü ah adu areke zabu, kpah baka e te Me mala fefe na la. Fü Nüwa ayia ta aküwa esaka ngu la, de wü kpara ka-ye ꞌburu gbü zabu la. Fü wü gara kpara füh kotö ne ayia akpi ꞌburu, angü wüh le ta aje rïrï ka Me la nda-wü de. Dela si-ngü ta te ngü ka Nüwa reke di gbü jia Me ne, angü engu le ngü ka Me de maguma ye biringbö.

⁸Kpah bala, *Abarayama kpah de kpara te le ngü ka Me de maguma ye biringbö. Me mala ta ngü fü Abarayama, gü ba, “Ye yia eyia, de ye ce gba ye, de ye go ngbü agbü gara ganzi sü, te ye wu ta gügü la de.”11:8 Mü ena amaka ngü ka Abarayama te Me ï engu, gbü Gina Ngü 12:1-7. Fü Abarayama ayia aje ri Me, fü ah ayia anü agbü tö la. Fü Me ayia amala kpah gara ngü fefe, gü ba, “Te gara, ni ena ato tö ne fü wü kundu ye, fü ewü angbü gbügbü fï mere badi.” ^9-10Amba Me to ta tö la fü ewü kere nda de. Abarayama ngbü ta endondoro, da ejiji gbü tö la sela, baka ganzi kpara. Ah jï ta züka kötï kpala nda de. Wüh ngbü ta era bü esa wü gugu. Ye ye na *Yïsaka ake kundu ye na, de ïrï ye *Yakobo ne, wüh mere ta kpah bala. Amba wüh ceka ngü ka Me la gbü jia wü baka wu nda-wü de. Wüh o jia wü fï bü teka ngü te Me mala fü ewü ne, angü wüh wu eyi, gü ba, te gara Me ena ato züka kötï fü ani, te Me reke cu me-ye tüngü ani, te ena angbü fï badi.

^11-12Fütanga ngü la, fü Me adu amala gara ngü fü Abarayama, gü ba, “Abarayama deyï, wü kundu ye ena asibi te gara, akoro kpah coboro baka wü küfara etongo kpï.”11:11-12 Mü ena amaka ngü te Me mala fü Abarayama teka wü kundu ye ne gbü Gina Ngü 15:5. Amba ngü te Me mala la, Abarayama ceka gbü jia ye baka wu kpah de. Angü baka te wü Abarayama za te-wü ake Sara, teka mere bi wü re, wü bï ye nda-wü de. Wüh gbe ka-wü tïne eyi cu agbe. Amba wüh o jia wü nzö eküte Me, teka awu ngü te engu ena amere. Fü Me ayia ato wazi fü wü Abarayama ake Sara de wüh bï ye. Te ah ena adi ta gbü fïngangü ka-nih, de bane nih ena amala ta, gü ba, Abarayama gbe eyi. Wawazi te engu ena abï ye di tïne eyi ma. Amba wazi ka Me fa ka-ye sü! Fü Me ayia ato wazi fü Abarayama, fü Abarayama adu abï ye.11:11-12 Mü ena amaka ngü ka ye Abarayama te wüh bï la gbü Gina Ngü 18:10-12bete Gina Ngü 21:1-7. Fü yeye na la abï wü jaji komoko ꞌbasu. Fü wü jaji komoko ꞌbasu la adu abï mere bi wü jaji. Fü wü kundu ye Abarayama la adu asibi gbe coboro, baka küfara agbü kpï la. Ngü la mere te-ye bala kükürü de, angü Me to wazi fü Abarayama, teka te engu to maguma ye ꞌburu fü Me ne.

¹³Wü kpara te nih ngbü emala nga ewü ne, wüh le ta ngü ka Me de maguma wü ꞌburu biringbö, zalü koro di gbü sïkpï te wüh kpi tete na. Wü züka ngü ta te Me mala, gü ba, ni ena amere fü ewü ne, Me mere ta wü züka ngü la fü ewü kere nda de. Te di bala, wüh ceka ta ngü ka Me la gbü jia wü baka wu ne nda-wü de. Wüh o to wü ꞌburu te ngü te Me mala la, angü wüh wu kpo, gü ba, Me tï eyi amere wü ngü la fü ani te gara, gbü sïkpï ka-ye te engu fe me-ye. Fü wü kpara la angbü ta de tadu teka ngü la. Wüh o ta maguma wü teka wü ngü füh kotö ne nda-wü de, angü wüh wu kpo, gü ba, “Gba ani füh kotö sene nda ma. Ani ngbü bü ejiji füh kotö ne, da endondoro baka wü ganzi kpara la.” ¹⁴Te kpara mala ngü bala la, nih tï eyi awu, gü ba, züka gba ka na ena adi ladü kpa te gara sü. ¹⁵Te wü kpara la ena ao maguma wü ta, teka wü e de füh kotö ne la, de bane wüh ena amala, gü ba, “Ani le angbü füh kotö sene ayiri ayiri.” ¹⁶Amba wüh o maguma wü ka-wü teka sü ka Me agbü kpï. Teka ngü la, fü ngü ka-ewü ayia areke gbü jia Me. Fü Me angbü de tadu, angü wü kpara la koro eyi *vüngüte ka-ni. Fü Me ayia aza ewü agbü züka sü ka-ye agbü kpï, te engu reke fü ewü ne.

^17-18Ta gügü, Me mala ngü fü Abarayama, gü ba, “Mene kundu kundu ye, te ni mala nganga fü ye ne, wüh ena abï engu gbü nguwa *Yïsaka. Angü ni, Me, ni fe ka-ni Yïsaka.”11:17-18 Mü ena amaka ngü te Me mala la gbü Gina Ngü 21:12-13. Gbü gara sïkpï, fü Me ayia are maguma Abarayama, gü ba, “Ye za ye ye biringbö la, de ye wa engu fü ni laꞌbï tete.”11:17-18 Mü ena amaka ngü ka Abarayama te yia teka ato ye ye fü Me laꞌbï tete ne, gbü Gina Ngü 22:1-14. Amba Abarayama fï nga ngü la de maguma ye ꞌbasu ꞌbasu ne nda de. Ah le ngü ka Me la zu de maguma ye biringbö. Fü ah ayia aza Yïsaka, anü di, teka awa, ato laꞌbï tete, baka te Me mala fefe na la. ¹⁹Angü Abarayama wu eyi, gü ba, wazi Me ladü teka amere wü ngü ꞌburu. Fü ah afï ngü la, gü ba, “Te ah bala, Me ena adu azükü Yïsaka gbü kpi la.” Fü Abarayama ayia aza mere maguruma ka-ye, teka awa ye ye la di. Fü Me ayia atïrï engu, gü ba, “Abarayama deyï, ye ce engu ece! Ye mere e awa engu de!” Ngü la, ah ge baka te Me zükü Yïsaka eyi gbü kpi la fanü fanü.

²⁰Yïsaka11:20 Mü ena amaka ngü te Yïsaka mala fü wü di ye ne, gbü Gina Ngü 27:25-29 bete 28:1-4. ta kpah de kpara te le ngü ka Me de maguma ye biringbö. Fü engu ayia aza wü di ye ꞌbasu ne, wü *Yakobo ake Esawu, ayia asere ngü ta te Me mala fü ewü, gü ba, “Te gara, ni, Me, ni ena ato tö la ꞌburu fü wü ne.”

²¹Yakobo le ta kpah ngü ka Me de maguma ye biringbö. Ta te engu wu, gü ba, sïkpï ka kpi ka-ni eyi gbamari ne,11:21 Mü ena amaka gba te Yakobo ku teka wü di ye Yüsefa gbü Gina Ngü 48:1-22. fü ah ayia aza wü kundu ye ꞌbasu, wü di *Yüsefa, ayi-ta Me tüngü ewü, de Me to wazi fü ewü. Fü ah ayia ari te-ye te ngbangba ka-ye, agbo nga Me.

²²Yüsefa le ngü ka Me kpah de maguma ye biringbö. Yüsefa ngbü ka-ye ta agbü *Ezepeto kpala, teka mere bi wü re. Te engu gbe tete, fü engu ayia afï nga tö, ta te Me mala nganga fü ewü, gü ba, “Te gara, ni, Me, ni ena ato tö la fü wü kundu ye Abarayama ne.” Fü Yüsefa awu, gü ba, te ah bala la, te gara wü nguwa ani ena adu, ago angbü agbü tö engu la. Fü Yüsefa ayia amala ngü fü wü di ye kpekpeke, gü ba, “Te gara, te wü yia eyi, teka ago agbü tö ka-ani la, wü za kö ni, wü go di agbü tö te Me ena ato fü ani ne.”

²³De yi fï la kpah nga ngü ka wü wö ye *Müse.11:23 Mü ena amaka ngü ka wü wö ye Müse gbü buku ka Gogo ka wü Yïsarayele 2:1-10. Wü wö ye Müse, wüh ta kpah wü kpara, te ewü le ngü ka Me de maguma wü biringbö. Gbü wü re la, miri ka *Ezepeto to ta rïrï, gü ba, “Ah le de wüh di emörö wü jürü jaji komoko ka wü *Yïsarayele, te wüh ngbü ebï ewü ne, ꞌburu asidi.” Amba, baka te wüh bï Müse, wü wö ye na ake ni ye na ceka ta engu baka züka mbarase, te ngü kaka ena areke gbü jia Me afa sü. Te di bala, fü ewü ayia ai maguma wü, ayia aza vürü Müse, awo teka fe bata, angü wü marajümïya ka miri ena amaka engu. Fütanga ngü la, fü mbarase ka miri, ye würüse, anü amaka vürü Müse. Fü ye würüse la aza engu, adu di, teka aga engu enga ye tete, angü mbarase la su ta gbü jijia fa sü.

²⁴Kpah bala, cu *Müse le ngü ka Me kpah de maguma ye biringbö. Kükürü de, angü baka te engu ga koro mere komoko tete, fü engu awu cïnga, te wü di enga Yïsarayele ngbü ezü, esaka wü kpara ka Ezepeto ne. Fü ah adu afï, gü ba, “Ni le de wüh ï ni kundu ye miri ka Ezepeto tïne de. Angü ni ka-ni nda-ni de enga Yïsarayele.” ^25-26Te engu ena ao jia ye ta teka züka wü e, te miri ka wü Ezepeto la ngbü eto fü ye ne, de bane engu tï ta eyi angbü de tadu teka ngü la. Amba Müse le ace ngü ka Me, teka tadu ka wü e füh kotö, te ena anza anza ne, nda de. Angü ah wu eyi, gü ba, wü di enga Yïsarayele ka-wü de wü kpara ka Me, te Me le ngü ka-ewü fa sü. Fü Müse ayia ale teka de ni zü cïnga, teka ale ta-ngü te wü di enga ni ni, wü di enga Yïsarayele. Fü wü kpara ka Ezepeto angbü efala engu ka ngü la. Amba Müse fï nga ngü ka-ewü la nda de. Ah ngbü eo jia ye ꞌduwa teka Miri te Me ena atima te gara, teka aküwa wü kpara ka-ye ne. Kükürü de, angü Müse wu eyi, gü ba, wü züka ngü te Me ena ato ne, ena afa wü züka ngü ka miri ka Ezepeto la ka.

^27-28Fütanga mere bi wü re, fü Müse ayia aküwa wü di enga Yïsarayele esaka miri ka Ezepeto la.11:27-28 Mü ena amaka ngü la gbü buku ka Gogo ka wü Yïsarayele 12:1-32. Angü Me sere eyi fefe, gü ba, “Ni ena atima *malayïka ka-ni, teka ato kuru te wü kpara ka Ezepeto la.” Fü Müse ayia amala ngü fü wü di enga Yïsarayele, gü ba, “Ah le de wü za ngüte kambiliki, de wü ꞌbüra eküte wü möngïtï ka-wü. Te malayïka ka Me la wu ngüte kambiliki la, ah tï amörö wü jaji ka-wü de.” Fü wü di enga Yïsarayele ayia amere ngü la bala, baka te Müse mala la. Fü malayïka la ayia akoro amömörö bü wü jaji ka wü kpara ka Ezepeto. Fü Müse ayia aza wü di enga Yïsarayele, akoro de ewü agbü Ezepeto asidi, anü sü de ewü agbü gü. Miri ka Ezepeto le ta atïrï ewü agbü Ezepeto kpala, amba Müse le aje rïrï ka miri la nda de. Ah je ka-ye ta nzö ngü ka Me, angü ah wu eyi, gü ba, wazi Me fa wazi miri ka Ezepeto la ka-ye afa.

²⁹Wü di enga Yïsarayele la, ta kpah wü kpara, te ewü le ngü ka Me de maguma wü biringbö. Angü, baka ta te wüh nü koro eküte mere siti *yï-ngu ne, fü Me ayia amala fü ewü, gü ba, “Wü kö ngu la ekö.” Fü ewü ayia aje ngü ka Me la. Fü Me ayia aü kaje fü ewü gbü jia ngu la. Fü wü di enga Yïsarayele ayia akö ngu la füh kagara sü. Fü wü marajümïya ka miri ka Ezepeto, ta te wüh ngbü eliki nga wü di enga Yïsarayele ne, ayia arï kpah gbü nga wü di enga Yïsarayele la. Te wü marajümïya la koro tete kpa etü ngu la, fü Me ayia alügü ngu la da ye. Fü ngu la ata ewü, amörö ewü ꞌburu.11:29 Mü ena amaka ngü la gbü buku ka Gogo ka wü Yïsarayele 14:1-31.

³⁰Fütanga ngü la, te wü di enga Yïsarayele nü koro tete agbü tö ka-wü, wüh ce ngü ka Me nda-wü de. Wüh ngbü fï bü ele ngü ka Me de maguma wü biringbö. Fü ewü akpo angbü ejiji ekere ꞌbaranga ka gara mere kötï de ïrï ye Yeriko ne, teka wü sïkpï lorozi. Kükürü de, angü ah de ngü te Me mala fü ewü me-ye. Fü ꞌbaranga la ayia amürü, atï ꞌburu kötö. Fü wü di enga Yïsarayele la ayia arï gbü mere kötï la, amere gü, amömörö wü vügü ka-wü la ꞌburu, kpah baka te Me mala fü ewü ne.11:30 Mü ena amaka ngü ka Yeriko la gbü buku ka Yosuwa 6:1-21.

³¹Gara würüse ta ladü agbü Yeriko la de ïrï ye Rakaba. Engu kpah de kpara te le ngü ka Me de maguma ye biringbö. Angü ah küwa ta gara wü di enga Yïsarayele, te ewü zi te-wü, nü rï agbü Yeriko ne. Teka ngü la, gbü sïkpï te wü di enga Yïsarayele mörö wü kpara gbü Yeriko tete na ne, wüh mörö Rakaba, de wü mürü ye, nda-wü de.11:31 Mü ena amaka ngü ka Rakaba la gbü buku ka Yosuwa 2:1-21 bete 6:22-25.

³²Wü di enga wüna, ma ena amala fü yi, agü neh fe? Angü gina wü kpara ka Me, ta te ewü le ngü ka Me de maguma wü biringbö ne, wüh sibi fa sü! Dada te ma ena amala nga ewü biri biri ꞌburu ne, nda ma. Baka Gidona,11:32 Mü ena amaka ngü ka Gidona gbü buku ka Wü E-kolo-ngü 6 - 8. Baraka,11:32 Mü ena amaka ngü ka Baraka gbü buku ka Wü E-kolo-ngü 4:6-16. Sïmasona,11:32 Mü ena amaka ngü ka Sïmasona gbü buku ka Wü E-kolo-ngü 13 - 16. Yefeta,11:32 Mü ena amaka ngü ka Yefeta gbü buku ka Wü E-kolo-ngü 10:6 - 12:7. *Davidi bete Samüwele,11:32 Mü ena amaka ngü ka Samüwele gbü 1 Samüwele 1 - 28. de mere bi wü gara *mürü dofo ka Me, te ma tï atanga ïrï ewü anza ꞌburu ne, nda-ra de. ³³Me mala ta ngü fü wü kpara la biri biri ꞌburu, gü ba, “Ni ena ato wazi fü wü.” Fü wü kpara la ayia ale ngü ka Me la de maguma wü biringbö. Fü Me ato kpah wazi la fü ewü fanü. Teka ngü la, fü wü gara ewü amaka ta wazi, teka agü gü di de wü gara miri, te ewü di de wü vügü ka-ewü ne, fü ewü ayia aza esaka ewü. Wü gara wü kpara ka Me la, wüh de wü miri. Fü ewü amaka wazi, teka adi ekolo ngü ka wü kpara ka-wü tïne ereke areke. Nda wü gara, kami le ta teka amörö ewü, azü, fü Me ayia aküwa ewü gömö wü kami la. ³⁴Nda wü gara, wü vügü ka-ewü le ta asötö ewü, amörö, anga acuru ewü acuru gbü wa. Fü Me ayia aküwa ewü gbü wü kpeke ngü la. Wazi wü gara ewü ta nda ma. Fü Me ayia ato wazi fü ewü. Fü ewü adu akoro kpeke wü kpara. Fü ewü ayia agü gü de wü vügü ka-wü, afa wü vügü la ka. ³⁵Wü gara ewü ta de wü würüse, te wü di enga ewü kpi akpi. Fü wü würüse la alala fï bü gbü ngü ka Me, de maguma wü biringbö. Fü Me ayia azükü wü di enga ewü la gbü kpi.

Wü gara kpara ka Me maka ta cïnga teka ngü ka Me. Angü wü vügü miki ta wü gara ewü, mörö ka. Amba wüh le ace ngü ka Me nda-wü fï de! Kükürü de, angü wüh le ngü ka Me de maguma wü biringbö. Wüh wu kpo, gü ba, Me ena adu azükü ani te gara, fü ah ato to küte fü ani. Fü ani adu angbü tïne de wü Me fï mere badi. Angü wüh le amaka züka ngü füh kotö sene nda-wü de. ³⁶Wüh ngbü süsüma wü gara wü kpara ka Me la ta asüsüma. Fü wü kpara angbü efala gara ewü. Wüh i wü gara ewü ta, gü gbü ku. ^37-38Wüh sötö ta gara wü kpara ka Me la, mörö de teme. Wüh doro wü gara ewü, mörö ta de maguruma. Wüh de tü wü gara, kolo cu gbö! Amba wü kpara ka Me la ce ta ngü ka Me, teka wü cïnga la, nda-wü de. Fü ewü adu aliki gara ewü agba wü kpah cu asidi. Fü wü kpara ka Me la akpe angbü ewo te-wü tïne agbü gü, de kpa wü kükürü. Bongo eküte ewü tïne kpah ma. Fü ewü angbü eto tïne bü wü konü eküte wü. Fü ewü angbü endondoro tïne bü faaa! Sü te wüh ena angbü tete mbi bane, tïne kpah ma. Wüh ngbü enü da era bü gbü wü gö da, de wü görö-zi. Amba gbü wü cïnga la ꞌburu, wüh lala ka-wü fï bü gbü ngü ka Me de maguma wü biringbö. Wüh ta de wü kpeke kpara ka Me fanü fanü! Angü wü ngü füh kotö ne du ngbü gbü jia ewü, baka töndö ngü kükürü.

³⁹Dela ꞌburu wü ngü ka gina wü kpara ka Me ta gügü, te ewü le ngü ka Me de maguma wü biringbö ne. Fü ngü ka-ewü la areke gbü jia Me afa sü. Amba *küküwa ta te Me mala nganga, gü ba, “Ni ena ato fü ewü ne,” wüh maka füh kotö sene nda-wü de. ⁴⁰Kükürü de, angü Me le de wü gina wü kpara la maka küküwa fï mere badi, kpah baka te nih maka, ꞌduwa teka ngü ka Yesu ne.

¹Wü di enga wüna, dela ngü ka diri wü kpara ka Me ta gügü ne. Wüh le ta ngü ka Me, zu de maguma wü biringbö. Enatikine, wüh ladü agbü kpï kpala eceka nih. Te di bala, ah le de nih rü kpah kpekpeke baka nda-ewü la. Nih ce wü *siti ngü asidi, teka fü nih anü de ngü ka Me kpa engagira nü. Nih mere e andïrï, ace ngü ka Me la de. Nih tüka te-nih, de nih nü fï bü kpa engagira nü. ²Nih o jia nih eküte Yesu, angü engu ü kaje ka Me fü nih me-ye, teka fü nih anü akoro kpa te adu kaje la. Nih fï la nga cïnga te Yesu zü teka nih ne. Te di bala, ah le de nih lala fï bü gbü nga Yesu, da etüka te-nih gbü wü cïnga ka-nih, kpah baka nda Yesu. Angü wüh za engu, bere füh *rü gbegbete. Fü ah ayia akpi. Wüh ngbü ta efala engu, da eto lümü tete. Amba ah ce ngü ka Me, teka ngü ka lümü la, nda de. Ah o jia ye nzö teka tadu, te ni ena amaka te gara ne. Fü engu ai maguma ye, arü kpekpeke. Enatikine, engu ladü agbü kpï, gbü kokpa ka Me, baka Mere Miri.

Dene rïrï ka Me, teka fü nih adi etüka te-nih di,

gbü wü cïnga ka-nih

³Wü di enga wüna, fanü fanü, ah le de yi fï la nga ngü ka Yesu, ta te wü vügü kaka kpü engu di ꞌduwa sürüsürü ne. Wüh to ta mere cïnga te Yesu, amba Yesu ce ta ngü ka Me nda de. Te di bala, ah le de yi rü kpekpeke kpah bakaka. Yi mere e ace ngü ka Me teka ngü ka cïnga de. ⁴Ma wu eyi, gü ba, siti wü kpara ngbü eyi eto cïnga te yi, teka ngü ka Yesu. Amba, wüh mörö gara süka yi nda-wü la kpah de. Te di bala, ah le de yi rü kpekpeke! ^5-6Nih de wü di Me. Te di bala, ah le de yi fï la nga züka ngü, ta te wüh ba gbü *Ngari Me gügü, gü ba, “Me ngbü erï nih kpekpeke, angü nih de wü di ye na, te engu ngbü ele cu de maguma ye. Me ngbü ece wü cïnga angbü emere nih bala, angü ah le de jia nih mba amba, teka fü nih andri, akoro kpekpeke. Te di bala, ngü ka wü cïnga la mere e asiti fïngangü ka-nih de.”12:5-6 Mü ena amaka ngü la gbü buku ka Ngü Mani 3:11-12.

⁷Wü di enga wüna, te cïnga ngbü emere nih la, nih i maguma nih ai, de nih rü kpekpeke. Kükürü de, angü gbü wü ngü la, Me ngbü dela erï nih, angü nih de wü di ye na. Te wü di mü ladü la, mü tï arï ewü de? Mü tï eyi arï ewü kpekpeke, teka fü jia ewü amba. ⁸Yi fï la nga ngü te Me ngbü erï yi di ne. Te yi le de Me rï ani de la, yi ena adi zu wü di Me, neh baye baye? ⁹Ta te nih di la wü jürü jaji ne, nih je rïrï ka wü wö nih de? Wü wö nih la ngbü ta erï nih, teka de nih koro kpekpeke. Ah bala de? Te di bala, ah le de Me di kpah erï nih, angü engu me-ye de mere Wö nih. Ah ngbü emere bala teka de nih le rïrï ka-ni, fü nih aküwa te gara, angbü fï mere badi kpaka ni agbü kpï. ¹⁰Wü wö nih la ngbü ta erï nih, baka ngü te di ꞌbe te nga jia wü. Amba Me ngbü nda-ye erï nih, teka de nih di emere wü ngü ꞌburu mbi, baka te engu ngbü ele, teka de ngü ka-nih ngbü kpah baka nda-ni. ¹¹Ta te wö mü ngbü erï mü kpekpeke ne, mü ngbü ta de tadu teka ngü la? Aꞌa! Ngü la ngbü ta eke te mü efa sü! Amba te mü i maguma mü gbü ngü te Me ngbü erï mü di la, mü ena adu amaka wazi bete züka ngü, teka angbü emere wü ngü, te ena areke gbü jia Me.

¹²Wü di enga wüna, dela ngü te ma le amala fü yi. Ah le de yi ce ngü ka maguma ꞌbasu ꞌbasu. Yi i maguma yi, fü yi arü kpekpeke. ¹³Ah le de yi di emere wü ngü te züka kaje, ba e te Me ngbü ele, teka fü wü bu yi, te ewü ndri gbü ngü ka Me la de ne, adi efa nga yi. Angü te yi mere bala la, wüh tï adürü te kaje ka Me de. Wüh ena amaka wazi, fü ewü arü kpah kpekpeke baka yi.

Dene siti ngü te ena amaka yi, te yi ce ngü ka Yesu la

¹⁴Wü di enga wüna, ah le de yi o to yi ꞌburu, teka adi engbü de wü bu yi de maguma yi biringbö. Kpah bala, ah le de yi o to yi kpah, teka adi emere ngü te ena areke gbü jia Me. Angü te ngü ka-yi reke gbü jia Me nda de la, yi tï akoro agbü sü ka Me agbü kpï ne kü de. ¹⁵Ah le de yi ceka te-yi ꞌbe, angü gara yi ena adürü te kaje ka Me asidi. Kükürü de, angü te wü gara yi kpo eyi emere *siti ngü la, ngü la ena asiti fïngangü ka wü bu ewü, fü ewü adu ace ngü ka Yesu. ¹⁶Yi ceka te-yi ꞌbe. Yi mere e adi egïrï wü würüse anga wü komoko ꞌdaaa de. Yi o jia yi bü duu te wü wara yi, anga watï yi biringbö. Kpah bala, yi mere e aceka ngü ka Me baka töndö ngü kükürü ne de. Yi fï la nga ngü ka Esawu, ta te engu mere ne. Engu ta de gina ye *Yïsaka me-ye. Te di bala, wö ye na ena afe ta engu, ao ba mürü kötï sidi nga ye. Fü Me ato ta mere wazi fefe. Amba ngü la mere ta te-ye bala nda de. Kükürü de, angü ngü ka Me ngbü ta gbü jia Esawu baka kükürü ngü. Angü gbü gara sïkpï, tala yia ta mere Esawu. Fü ah adu amala ngü fü enga ni ye, de ïrï ye *Yakobo ne, gü ba, “Te ye to mba enga zü-e fü ni la, ni ena ace wazi, de te Me ena ato fü ni baka gina ye ne, ꞌburu fü ye.” Ngü ka e-mazü siti ta fïngangü ka Esawu bü me-ye, fü ah ayia ace ngü ka Me ka. ¹⁷Sidi nga ngü la, fü Esawu ayia anü kpaka wö ye, andaꞌba te-ye fefe, de ah ku gba fü Me, teka de Me to wazi fü ni, de ni ngbü te gara da wö ni. Wö ye na tï ta eyi ato wazi la fefe na? Aꞌa, ah tï nda de! Fü Esawu angbü egïrï kaje, da eku gba cu de ngura, teka de ni reke ngü la, amba ngü la siti ka-ye ta eyi ꞌburu ꞌburu. Kükürü de, angü Esawu ceka ta ngü ka Me baka töndö ngü. Te di bala, wü di enga wüna, yi mere e angbü efala ngü ka Me baka Esawu ne de.12:17 Mü ena amaka ngü ka Esawu la gbü Gina Ngü 25:29-34; 27:30-40.

¹⁸Wü di enga wüna, cürü tï amere nih, da enü kpaka Me, tïne de, teka ngü ka *züka maguma kaka guvu Yesu ne. Ta gügü, te Me koro ro mö tete fü wü kundu nih, kpa füh mere da de ïrï ye *Sïnayï ne, ngü la ta baye? Ngü la to ta mere cürü te ewü de? Angü wüh wu ta mere te-wa, te ngbü eci, da embele sü ambele füh da la. Fü sü la ayia atï ꞌduwa ngbuka! Fü ülele angbü eü ꞌduwa lelele! ¹⁹Fü ewü angbü eje ri Me, te ngbü ero mö fü ewü de mere ri ye, da engböngbö sü ꞌduwa ba-neh-ene-la! Fü ngü la ato mere cürü te ewü. Fü ewü andaꞌba te-wü fü *Müse, gü ba, “Ani le de Me ro mö tïne cu me-ye fü ani de.” ²⁰Fü Me ayia amala ngü fü ewü, gü ba, “Wü mere e amofo sü ne de! Angü, te kpara lï kpa füh da kpakine la, ah le de wüh mörö engu amörö! Anga te meme lï kpakine la, wü sötö engu de teme, mörö asidi.” Fü cürü adu ta arï te wü kpara la afa cu sü.12:20 Mü ena amaka ngü la gbü buku ka Gogo ka wü Yïsarayele 19:12-13.²¹Cürü ngbü ta kpah cu emere Müse amere. Fü ah amala ta ngü, gü ba, “Küte ni ngbü eyï ayï ka cürü!”12:21 Mü ena amaka ngü la gbü buku ka Manda nga Rïrï 9:19.

²²Wü di enga wüna, to ngü ka Me te engu to fü nih ne, ah de mere züka ngü te reke fa sü. Angü nih tï eyi akoro kpaka Me, agbü sü kaka agbü kpï, te wüh ngbü eï, gü ba, “To Yerüsalema” ne.12:22 Wüh ngbü kpah eï sü la, gü ba, “Da Sïyona”. Fü nih angbü egbo nga ïrï Me kpala, de wü mere bi wü *malayïka kaka de mere tadu. ²³Nih ena abiti te-nih tundu de wü *kpara ka Yesu ꞌburu agbü kpï, angü Me ba ïrï nih eyi ꞌburu gbü buku ka-ye. Nih ena angbü egbo nga ïrï Me agbü kpï kpala, de wü gara kpara kaka, de te wüh kpi eyi ne. Angü wüh ka-wü tïtïne ladü, da egbo nga ïrï Me kpala. Nih ena awu Mere Miri ka-nih, Yesu, te ena aye süka ngü ka wü kpara ꞌburu me-ye mbi mbi mbi. ²⁴Angü Yesu kpi eyi teka ngü ka-nih. *Ngüngüte na fa nih gbü wü *siti ngü ka-nih eyi. Ta te Kayïna mörö Abele tete ne, ngüte Abele ngbü ta eku gba fü Me, teka de Me to kuru te Kayïna, teka siti ngü, de te engu mere la.12:24 Mü ena amaka ngü ka Kayïna ake Abele la gbü Gina Ngü 4:1-12. Amba ngü ka ngüte Yesu reke ka-ye fa sü, angü ngüte Yesu ngbü eku gba fü Me, teka de Me boro siti ngü ka-nih. Te di bala, nih mere e ace ngü ka Yesu de.

²⁵Wü di enga wüna, yi ceka ngü la mbi mbi mbi! Yi mere e amere ngü ka Yesu de maguma yi ꞌbasu ꞌbasu de. Ta gügü, Me ngbü ero mö fü wü kpara ka-ye füh kotö sene, gömö Müse de wü gara *mürü dofo. Wü kpara ta te ewü mere ngü la de maguma wü ꞌbasu ꞌbasu ne, wüh küwa eyi? Aꞌa, wüh küwa nda-wü de! Tïtïne Me ngbü ero mö fü nih cu gömö Yesu, te di de Yeye ne. Te ah bala, te nih ngbü emere ngü ka Yesu de maguma nih ꞌbasu ꞌbasu la, nih ena aküwa, neh baye baye? ²⁶Angü, ta gügü, te Me ro mö tete fü wü kundu nih ne, tö yiki ta ayiki teka ri Me la. Sidi nga mere bi wü re, fü Me adu amala ngü fü gara mürü dofo ka-ye, gü ba, “Te gara ni ena ayiki tö ne, de wü e gbü ye ꞌburu, abe kpah te kpï mini.”12:26 Mü ena amaka ngü la gbü buku ka Agayï 2:6.²⁷Si-ngü gbü ngü la neh baye? Si-ngü la ena adi bane, angü Me ena ayiki wü e, de te engu mere füh kotö ne ꞌburu, fü ah anza ngü ka-ewü. Me ena anza ngü ka wü e füh kotö ne, neh teka ne? Ah ena anza ngü ka wü e la bala, teka de ngü ka-ni, Me, ngbü duu me-ye, fï mere badi.

²⁸Wü di enga wüna, dela ngü te ma le amala fü yi. Nih mere e ace ngü ka Yesu de. Nih lala fï bü gbü nganga. Me ka-ye de Mere Miri ka-nih. Nih nda-nih de wü di ye na. Ah le de nih di egbo nga ïrï Me, da ecu ngüngü na de maguma nih biringbö. ²⁹Kükürü de, angü wazi Me fa sü. Engu ka-ye ba mere wa, te ena acuru wü kpara ꞌburu, te ewü le ngü kaka de la.

Dene wü ngü te ena areke gbü jia Me

¹Wü di enga wüna, ah le de yi di ele te-yi esüka yi, angü yi tïne eyi ꞌburu wü di enga ni biringbö, guvu Yesu Kurisito. ²Te wü ganzi kpara koro agba yi la, fanü fanü, ah le de yi za ewü gbü mürü ba wü ngba ka-yi tete. E-wu neh da, wü kpara de bala, wüh ena adi ka-wü wü *malayïka ka Me, te Me tima ewü me-ye fü yi. Angü wü gara kpara za ta wü malayïka gbü mürü kpah bala, amba wüh wu de, gü ba, wüh de wü malayïka ka Me.13:2 Mü ena amaka ngü la gbü Gina Ngü 18, 19.³Te wü gara wü bu yi ngbü ezü cïnga, anga wüh gü wü gara ewü gbü ku la, ah le de yi di ewu cïnga ewü, fü yi adi ele ta-ngü te ewü. E-wu neh da, te gara yi ena azü cïnga kpah baka nda-ewü la.

⁴Ah le de yi di eo jia yi bü duu te wü wara yi, anga wü watï yi, biringbö, angü dela ngü te Me ngbü ele. Yi mere e adi emere waza de. Anga te yi za te-yi la de la, yi mere e adi egïrï wü würüse, anga wü komoko ꞌda ꞌda ꞌda kpah de. Angü Me ngbü eceka wü ngü de te yi ngbü emere la. Engu ena ato kuru te wü kpara, de te ewü ngbü emere wü *siti ngü de bala ne, ato.

⁵Yi mere e adi ekpi gümü e de. Yi mere e ao maguma yi teka mere bi jiase kpah de. Angü Me de kpara te ngbü eceka kpï fütanga nih me-ye. Engu mala eyi cu me-ye, gü ba, “Ni tï ace nih kpikpi nih kpo fï de.” Ah le fü nih angbü de tadu teka ngü la. ⁶Nih i maguma nih, nih rü kpekpeke, angü nih wu ngü de te wüh ba gbü *Ngari Me, te gü ba, “Me ladü tundu de nih, engu ngbü eto wazi fü nih ka-ye me-ye. Te di bala, cürü mere e amere nih tïne de, angü wazi wü vügü tï afa nih nda de.”13:6 Mü ena amaka ngü la gbü Ci ka wü Davidi 118:6.

⁷Ah le de yi fï la nga ngü ka wü *kovo, ta te ewü rï yi de ngari Me te enga gina ne. Wüh ngbü ta emere ngü baye? Te di bala, ah le de yi le ngü ka Yesu *Kurisito de maguma yi biringbö, kpah baka nda-ewü la. ⁸Yesu Kurisito tï afü te-ye nda de. Te kpo kü gügü, akoro enatikine, anü kpa engagira nü fï mere badi, ah ka-ye fï da ye.

⁹Yi ceka te-yi ꞌbe teka wü mürü mani. Te wü gara kpara koro da erï yi de wü gara rïrï, te di kpikpi ye, te ah baka nda Yesu nda de la, de yi mere e ale rïrï ka-ewü la nda-yi de. Anga te wüh le asiti fïngangü ka-yi, teka ngü ka wü e-mazü, gü ba, “Yi mere e azü so wü gara nü de la,” yi mere e aje ngü ka-ewü la kpah de. Angü kpara tï amaka *küküwa teka ngü ka e-mazü nda de. Ngü de te ena aküwa yi, ah ka-ye de wazi te Me ena ato fü yi, teka *züka maguma ye. ¹⁰Angü Yesu ka-ye baka *kambiliki, te wüh mörö, teka de *ngüngüte reke ngü ezengba nih de wü Me. Amba wü kpara, de te ewü to maguma wü, teka ngü ka diri gele ne, Yesu tï ale ta-ngü te ewü nda de.

¹¹Gbü diri gele ka wü *Yïsarayele, mere *mürü gele ngbü eza nü, fü ah awa. Fü ah aza ngüngüte la, anü di kpa *esambü ka Me. Fü ah ayia ato ngüte la fü Me, teka areke ngü di ezengba wü kpara de wü Me. Amba kö wü nü la, wüh ena aza, anü di, acuru kpa edere sü. ¹²Dela si-ngü te wüh mörö Yesu di kpah kpa edere sü ne, angü engu kpi baka kambiliki, teka areke ngü ezengba nih de wü Me, teka de nih koro wü di Me. ¹³Te di bala, wü di enga wüna, ah le de nih lala fï bü eküte Yesu. Ngü ma, te wüh fala nih, anga wüh to lümü te nih, kpah baka te wüh mere eküte Yesu ne la, nih mere e ace nganga de, nih lala fï bü eküküte. ¹⁴Angü züka sü fü nih füh kotö sene nda ma. Züka sü ka-nih ka-ye ꞌduwa agbü kpï kpaka Me, te nih ena anü te gara, angbü gbügbü na ne. Te di bala, ah le de nih o jia nih fï bü teka züka sü la.

¹⁵De-nih, wü *kpara ka Yesu, nih tï angbü ewa wü nü, baka ta te wü kundu nih ngbü emere ne, nda-nih tïne de. Amba ah le fü nih angbü egbo nga ïrï Me, te nga wü sïkpï ꞌburu. Angü ngü la ena ato tadu te Me, teka te nih to maguma nih eyi fanü fanü fü Yesu ne. ¹⁶Ah le de yi di kpah emere züka ngü, da ele ta-ngü te wü bu yi de maguma yi biringbö. Angü dela kpah gara ngü, te ena areke gbü jia Me. Te mü ngbü emere bala la, ah ge baka te mü ngbü eto züka takpa fü Me.

¹⁷Ah le de yi di kpah eje ri wü *kovo, te Me o ewü gbü nzö yi ne, angü wüh ngbü eceka kpï fütanga yi ereke areke me-wü. Kükürü de, angü Me to tima la fü ewü me-ye. Ah ena ayi-ta ewü te gara, teka tima la. Te di bala, te yi ngbü eje rïrï ka-ewü ereke areke la, ngü la ena ato tadu fü ewü. Amba, te yi le aje ngü ka-ewü de la, ngü la ena ato mere cïnga fü ewü. Teka ngü la, yi tï amaka züka ngü kpah de.

¹⁸Wü di enga wüna, yi di kpah fï bü eku gba fü Me tüngü a. A wu eyi, gü ba, ngü ka-a ka-ye mbi gbü jia Me, angü a o to a eyi, teka adi emere wü ngü, te engu ngbü ele. ¹⁹Ah le de yi di kpah eyi-ta Me fere kpekpeke, teka de Me ü kaje fere, fü ra akoro kpaka yi kpala kere.

Dene adu ngü ka-ra fü yi

^20-21Wü di enga wüna, Me di de yi, da eto wazi fü yi, teka fü yi adi emere fï bü wü züka ngü, te ngbü ereke gbü jijia. Ah le de Me ngbü fï bü da ereke maguma nih, teka ngü ka Miri Yesu, teka fü ngü ka-nih areke gbü jijia.

Nih gbo nga ïrï Me,

te tima Yesu, te kpi teka areke ngü ezengba nih de wü ye ne.

Nih gbo nga ïrï Me,

angü Me zükü Yesu gbü kpi eyi.

Nih gbo nga ïrï Yesu,

angü Yesu ngbü eceka kpï fütanga nih me-ye ereke areke,

baka kpara te ngbü eceka kpï fütanga wü kambiliki ka-ye.

Gbo nga e ngbü te ïrï Yesu fï mere badi!

Ah di bala!

²²Dela mba enga ngü te ma le amala fü yi, teka ato wazi di fü yi gbü ngü ka Me. Ah le de yi gu maguma yi, yi o to yi, teka adi eje ngü la.

²³Gara züka ngü ladü, te ma ele amala fü yi. Enga ni nih, Timoteyo, ta te wüh i engu, gü gbü ku ne, wüh ce kpa tete na eyi! Ma fï, gü ba, engu ena akoro kpaka ra kpakine tïtïne. Te ah bala la, ma ena aza engu kpo, fü a akoro kpaka yi kpala ake di.

²⁴A to mandï ka-a fü wü cögbörö kpara esüka yi, wü kpara ka Me, de kpala ꞌburu. Wü di enga ni nih, wü kpara ka Ïtalïya, to kpah mandï fü yi cu fa sü. ²⁵Me ngbü de yi kpala ꞌburu, de *züka maguma ye. Ah di bala.