2 Timoteyo

Dene eꞌbaꞌbasu köcökpa te Pawülü ba fü Timoteyo

2 Timoteyo

Masere si-ngü

Dene eꞌbaꞌbasu köcökpa te Pawülü tima fü Timoteyo. Fütanga gina köcökpa te engu tima fefe, fü wü kpara ka Miri ka wü *Rüma ayia azoro Pawülü, ai engu, agü gbü ku agbü Rüma kpala. Pawülü ba köcökpa ne o engu ngbü fï gbü ku la. Ah ba fü Timoteyo, gü ba dene, “Gbü jia ni, sïkpï ka kpi ka-ni koro eyi gbamari.” Angü ah fï gü ba, *Kayïsara, Miri ka wü Rüma la, ena amörö ni amörö asidi. Te di bala, Pawülü kpe cürü nda de, angü ah wu kpo, gü ba, Me ladü te ena aküwa ni gbü sü ka-ye agbü kpï, fï mere badi. Gümü Timoteyo ngbü emere engu efa sü, fü ah amala fü Timoteyo, de engu yia kere, akoro kpaka ni agbü Rüma. Kpah bala, ah rï Timoteyo de mere bi züka rïrï, de ah rü kpekpeke sidi nga ni, da erï wü *kpara ka Yesu mbi mbi mbi.

Te mü ena atanga köcökpa ne enatikine, mü ena amaka mere bi züka rïrï, te ena ato wazi fü mü, teka fü mü arü kpekpeke, da elala gbü ngü ka Me.

Wü ngü te Pawülü ba gbü köcökpa ne, wüh dene.

Sapïta 1:1–2:13 Ngü teka tima ka Timoteyo

Sapïta 2:14–3:9 Ngü ka siti rïrï ka wü mürü fiti

Sapïta 3:10–4:8 Ngü teka Ngari Me

Sapïta 4:9-22 Adu ngü

Dene mandï ka Pawülü fü Timoteyo

¹Wayi bala, Timoteyo, de-ra Pawülü, ma ba köcökpa ne fü mü me-ra. Ma de *mürü tima ka Yesu Kurisito kpah baka e te mü wu kpo, angü Me fe ra ta me-ye, teka de ma di emala ngari Yesu fü wü kpara, gü ba, “Yesu *Kurisito kpi teka aküwa wü kpara fï mere badi.” ²Timoteyo, mü de züka ye ra. Ma to mandï fü mü fa sü. Wö nih, Me, ake Miri Yesu Kurisito, di de mü, de wüh wu cïnga mü, da eto züka gu ngü fü mü, de *züka maguma wü.

Dene ngü ka-mü te ngbü eto tadu fere

³Timoteyo, ye ra, ma ngbü egbo nga ïrï Mere Me teka ngü ka-mü. Ma de kpara te ma ngbü emere tima ka Me de maguma ra biringbö, kpah ba e ta te wü kundu ra ngbü emere ne. Ma egbo nga ïrï Me, angü mü to maguma mü ꞌburu fü Me kpah bala. Ma ngbü efï nga mü ra de biti ꞌburu, da eku gba fü Me teka mü, de ah to wazi fü mü. ⁴Gümü mü ngbü eke ra efa sü, angü ma ngbü efï nga gba ka-mü, ta te mü ku de ngura, gbü sïkpï te nih ye süka nih tete. Nih ena adu awu te-nih neh elaye, teka fü nih angbü de tadu? ⁵Ma gbo nga ïrï Me teka mü, angü ma wu kpo, ga, mü le ngü ka Yesu Kurisito eyi de maguma mü biringbö. Wü ni mü Yunisi ake ata mü Loyïsï, wüh kpo de ngü la eyi gügü. Tïtïne dene, ma wu kpah eyi, ga, mü lala kpah eyi gbü nga Yesu.

Dene ngü teka tima te Me to fü mü

⁶Timoteyo, ye ra, mü o to mü ꞌburu teka amala ngari Me fü wü bu mü, angü dela tima ka Me, te engu to fü mü me-ye, gbü sïkpï ta te ma o kpa ra gbü nzö mü tete. ⁷Mü mere tima la amere kpekpeke, angü Me to wazi ka *Nzïla Wazi ye eyi emaguma nih, teka tima ka-ye la. Te di bala, mü tï akpe cürü de, angü Me ngbü eto wazi fü nih, teka amere tima ka-ye di kpekpeke, de züka fïngangü gbü nzö nih, kpah da ele wü bu nih de maguma nih.

⁸Te di tïne eyi bala ne, Timoteyo, mü rü arü kpekpeke, teka adi emala ngari Miri Yesu fü wü kpara. Mü mere e akpe cürü de. Mü wu ngü te ngbü emere ra kpakine ne eyi, angü wüh zoro ra, gü eyi gbü ku, teka ngü ka Miri Yesu. Te wüh le ato cïnga te mü kpah bala la, mü mere e akpe cürü de, angü Me ena ato wazi fü mü me-ye kpah baka nda-ra. ⁹Angü Me küwa nih eyi, o nih eyi ba züka wü kpara ka-ye, teka de nih di emere wü ngü te ena areke gbü jijia. Me küwa nih, neh teka ne? Teka gara züka ngü te nih mere? Ah bala de! Me küwa nih teka mere lele ka-ye, angü ah le ngü la me-ye, de *züka maguma ye. Ta gügü te enga gina, o engu mere kotö ne la de, engu ga, “Ni ena aküwa wü kpara teka ngü ka Yesu *Kurisito.” ¹⁰Enatikine Yesu Kurisito koro eyi teka aküwa nih fanü. Angü Yesu fa wazi kpi eyi. Te di bala, te nih to maguma nih fü Yesu, nih tï akpi fï de. Te küte nih kpi la, Me ena ato to küte fü nih, fü nih aküwa fï mere badi. Dela eyi ngari Yesu, te Me to eyi fü nih, de nih di emala fü wü bu nih.

¹¹Ngari Yesu la, ah de ngü te Me fe ra, tima, teka adi emala fü wü kpara, da erï ewü di. ¹²Dela si-ngü te ewü zoro ra, gü agbü ku tete na ne. Ma kpe cürü kpah de, angü ma to maguma ra eyi fü Yesu Kurisito. Ma wu eyi, gü ba, engu tï ace ra nda de. Yesu de kpara te to tima la fere me-ye. Ah ngbü fï bü eto wazi fere, teka amere tima ka-ye la di. Te di bala, ma wu kpah kpo, ga, tima ka Yesu tï anza nda de, zalü akoro di gbü sïkpï de te engu ena adu akoro tete na.

Dene ngü teka züka rïrï ka Me, te mü ena angbü erï wü kpara di

¹³Timoteyo, ma de kpara te ma rï mü de ngari Me la me-ra. Mü o to mü teka ngü la, de mü di erï wü bu mü di. Mü di elala fï bü gbü nga Yesu, de mü le wü bu mü de maguma mü biringbö, angü Yesu ena ato wazi la fü mü me-ye. ¹⁴Ngari Me la, ah de kpeke ngü te engu to fü mü. Mü mere e afü ngü la de. Mü zoro ngü la de kpa mü ꞌbasu, fü mü adi emala fü wü kpara, da erï ewü di. Angü *Nzïla Wazi Me ladü emaguma mü, da eto wazi fü mü teka tima la.

¹⁵Timoteyo, ngü te wü *kpara ka Yesu agbü tö ka Asïya mere ra di, mü wu kpo. Angü, te wüh je, gü ba, “Miri ka wü *Rüma zoro ra eyi, gü agbü ku,” ne, fü wü Figelo ake Eremogene ayia afü te-wü, de wü bu wü ꞌburu, ba wü kpara te ewü wu ra de la. ^16-17ꞌDuwa duu Ünesiforo te kpe cürü de. Angü te engu koro kpa gbü Rüma kpakine, ah to te-ye teka agïrï ra. Te engu je nga ra, fü ah adu anü zalü aceka ra, agbü ku. Fü ah ale ta-ngü te ra afa sü. Miri Yesu di de engu, da ele ta-ngü tete, de wü kpara kaka ka kötï nde ꞌburu. ¹⁸Ünesiforo de kpeke kpara fanü. Kpeke tima ta te engu ngbü emere fere, de wü kpara ka Me kpaka yi, agbü Efeso kpala ne, mü wu kpah eyi. Ah le de Miri Yesu le ta-ngü tete, de *züka maguma ye, gbü *adu sïkpï, te engu ena akolo ngü ka wü kpara tete, te gara.

Dene ngü te ma emala fü mü, de mü rü kpekpeke

gbü wazi ka Yesu

¹Timoteyo, mü mere e ace ra de, angü mü fere baka ye ra. Mü rü nda-mü kpekpeke de wazi ka Yesu *Kurisito. ²Mü je ngari Yesu Kurisito ta gömö ra, gbü jia mere bi wü kpara. Ah le de mü lala eküte ngari Yesu la, fü mü adu agïrï kpeke wü kpara, te jia ewü mba amba. Fü mü amala ngari Yesu la fü ewü, da erï ewü di, teka fü ewü adi erï wü bu wü di, sidi nga mü.

³Timoteyo, te mü ena amaka cïnga, teka ngü ka Yesu Kurisito la, baka ngü de te ewü mere ra di ne, mü mere e afï nga ngü de. Mü i maguma mü ai kpah ba nda-ra. Angü nih de wü marajümïya ka Miri Yesu Kurisito. ⁴Te ah bala, nih o fïngangü ka-nih ꞌburu fü Miri Yesu, angü marajümïya o to ye teka wü gara wü ngü ka kötï nda de. Ah ngbü eo fïngangü ka-ye ꞌburu teka mere kpara ka-ye, teka amere wü ngü te ena areke gbü jijia na. ⁵Ah kpah baka kpara te ngbü emere kalafiyi.2:5 Kalafiyi anga kulakula de wutu ka woro, te wü kpara ngbü ego woro, teka akoro te enga gina, anga akoro gina kpara gbü woro la. Angü, te engu le woro gbü züka kaje de la, wüh tï agbo nganga na, anga ato takpa fefe kpah de. Kpah bala, ah le de mü mere tima ka Yesu gbü züka kaje, teka fü mü amaka takpa gbügbü na. ⁶Te mü sö e ka-mü kpa gbü yï, ah le de mü mere tima engu la kpekpeke, teka fü mü amaka mere bi zü-e gbü kpïrï kaka. ⁷Dela wü ngü de bata te ma le amala fü mü, teka tima ka Yesu Kurisito. Mü fï nga wü ngü la mbi mbi mbi, fü Miri Yesu agü tamu si-ngü la fü mü me-ye.

⁸Mü rü kpekpeke, da efï nga ngü ka Miri Yesu Kurisito, kundu ye *Davidi, fü mü amaka wazi gbü ngü la. Angü te engu kpi, fü Me adu azükü engu gbü kpi la. Dela ngari Yesu de te ma ngbü emala fü wü kpara ꞌburu. ⁹Wü vügü ngbü eto kuru te ra teka ngari Yesu la, angü wüh zoro ra eyi, i de nyarï baka siti kpara. Ma fï nga ngü la nda-ra de, angü wüh tï ai ngari Yesu nda-wü de. Ngü la ngbü fï bü da ewü ka-ye gbü wü sü ꞌburu. ¹⁰Gbü wü ngü la ꞌburu, ma kpe cürü nda-ra de. Ma i maguma ra, teka ne de, angü ma ngbü efï nga wü gara kpara, de te Me fe ewü eyi ne. Ma ngbü fï bü da emala ngari Yesu fü wü kpara, teka fü ewü ato maguma wü fü Yesu Kurisito, fü ewü aküwa agbü sü ka Me, agbü kpï kpala fï mere badi.

¹¹Wayi, Timoteyo, Yesu Kurisito de züka *E-küwa-nih! Mü di efï nga züka ci ka-nih, te gü ba dene,

Nih ce te-nih fü kpi baka Yesu,

Fü nih azükü gbü kpi kpah bakaka na.

¹²Nih rü kpekpeke gbü ngü ka Yesu,

Fü Yesu ao nih ba cögbörö wü kpara ka-ye te gara.

Nih mere e ace ngü ka Yesu de,

Angü Yesu ena ace ngü ka-nih kpah bala.

¹³Te nih le ngü ka Yesu de,

Yesu ena amere wü ngü ꞌburu de te engu mala la.

Ah tï ace ngü ka-ye nda de.

Dela kpeke ngü fanü fanü. Mü fï nga ngü la, fü mü amaka wazi gbügbü na.

Dene ngü te ma le amala fü mü teka yïkï

¹⁴Timoteyo, ngü de te ma mala fü mü la, ah de mere kpeke ngü. Dela ngü te mü ena angbü erï wü bu mü gbü tima ka Me di. Mü rï ewü mbi mbi mbi, da emala fü ewü kpekpeke de ïrï Me, gü ba, “Wüh mere e aga yïkï gbü ngü ka Me de.” Angü te wü cögbörö kpara ngbü ega yïkï esüka wü la, ah ka-ye de töndö ngü. Te wü gara wü di enga ni nih ena aje töndö ngü la bala, nzö ewü ena asiti, fü fïngangü ka-ewü akoro faaa, fü ewü ace ngü ka Me ka, teka ngü la. ¹⁵De-mü Timoteyo, mü o fïngangü ka-mü ꞌburu, teka fü mü adi ba züka kpara gbü jia Me. Mü mere tima ka-mü kpekpeke, angü Me to tima la fü mü me-ye. Mü rï wü kpara de zu ngü ka Me. Mü mere ngü la bala, teka fü mü angbü de tadu, gbü sïkpï te mü ena arü engagira Me tete.

¹⁶Mü di ekpe ngü ka yïkï akpe, angü yïkï de töndö ngü, te siti gbü jia Me fa sü. Wü kpara te ewü ngbü ega yïkï, da efüfü ngü ka Me afüfü ne, wüh ena adürü te kaje ka Me asidi. ¹⁷Rïrï ka-ewü la, ah baka mere ambalö eküte lö kpara, te ena asiti fïngangü ka wü *kpara ka Yesu asiti. Wü Imeneyo ake Filito de wü bu wü, wüh ngbü erï wü kpara de siti rïrï la me-wü. ¹⁸Angü wüh ngbü esu wu, ga, “Me zükü nih gbü kpi eyi.” Töndö rïrï ka-ewü la siti nzö wü gara kpara eyi, fü ewü adürü te kaje ka Me asidi. ¹⁹Nih, de te nih di nda-nih zu wü kpara ka Me fanü fanü ne, ah le de nih lala eküte zu ngü ka Me. Nih fï la nga mere kpeke ngü, de te wüh ba gbü *Ngari Me, gü ba dene, “Me wu wü kpara ka-ye eyi. Wü kpara te ewü le ngü kaka de ne, ah wu ewü kpah kpo.”2:19 Mü ena amaka ngü la gbü Namba 16:5. Wüh ba kpah gara ngü gbü Ngari Me, gü ba, “Wü kpara te ewü ra fü Me, ah le de wüh ce *siti ngü ka-wü asidi.”

²⁰Te di bala, Timoteyo, ah le mü di emere züka ngü te reke areke gbü jia Me. Ah ba e te mü ena anü agba mere miri, mü ena amaka züka wü ndüꞌba te su asu, teka ato ngu di fü cögbörö wü kpara. Mü ena amaka kpah wü siti külü ndüꞌba, te ngbü eyu ayu, te wüh ngbü eto ngu fü wü labï gbügbü na. ²¹Te kpara ce siti ngü ka-ye la ꞌburu, fü ah angbü *nzïla la, ah ena angbü ba züka ndüꞌba, te ena areke gbü jia Miri ka-ye, teka fü engu amere züka tima ka-ye di. ²²Te di bala, mü mere e amere wü siti ngü baka wü bu mü, wü kaꞌdörö ne, nda-mü de. Mü kpe ngü la akpe. Mü o to mü teka adi emere wü züka ngü te ena areke gbü jia Me. Mü lala eküte ngü ka Me. Mü le wü kpara de maguma mü, da engbü ziii de wü bu mü, wü kpara te ewü le ngü ka Me de maguma wü biringbö ne.

²³Ye ra Timoteyo, mü di ekpe ngü ka yïkï akpe. Wü kpara te ewü ngbü ega yïkï, da efüfü ngü ka Me afüfü ne, wüh wu ngü mbi mbi nda-wü de. Mü mere e adi engbü de ewü de, angü ngü la ena akoro baka gü esüka yi. ²⁴Te mü de kpara ka tima ka Me la, mü tï amere tima ka Me de gü nda-mü de. Ah le de mü ngbü de züka maguma mü, da erï wü kpara ferrre. ²⁵Anga te gara kpara le aga yïkï, mü rï engu kpah ferrre. E-wu neh da, Me ena adu afü fïngangü kaka la, fü engu adu afü maguma ye, ale zu ngü ka Me. ²⁶Te di bala, fïngangü kaka ena adu areke, fü ah ayia aküwa gbü yïmba ka *Satana. Angü yïkï la, ah de ngü ka Satana. Satana fiti kpara la me-ye, de ah mere tima ka-ni, ka Satana.

Dene ngü ka siti wü kpara gbü wü sïkpï ne

¹Timoteyo enga ra, dene kpeke ngü te ma le amala fü mü. Nih, te nih to maguma nih eyi fanü fanü fü Me ne, wü vügü ka-nih ena asibi afa sü, zalü akoro di gbü sïkpï te Yesu ena adu akoro tete na. ²Angü siti wü kpara fa gbü sïkpï ne eyi sü. Wü gara ewü le wü bu wü de. Wüh le ꞌduwa ngü ka-wü, da eo to wü ꞌburu teka angbü emaka jiase. Wü gara ewü ngbü da ecu ngü wü, da egbo nga ïrï wü, da esoko wü bu wü. Wü gara ewü je ngü ka wü wö wü de. Wüh fï nga wü kpara te ewü ngbü ele ta-ngü te ewü kpah de. Wüh ngbü fï bü da emere wü ngü, te siti gbü jia Me fa sü. ³Wüh le wü mürü wü agba wü kpah de. Wüh wu cïnga kpara ꞌburu de. Wü gara ewü ngbü emala ambalaꞌba eküte wü bu wü. Gara ewü je rïrï ꞌburu ꞌburu de. Gara ewü de mürü gü. Wüh le amere züka ngü nda-wü kü de. ⁴Wü gara ewü ngbü efiti wü bu wü de mani, eto fü wü vügü. Wü gara ewü de wü mürü kögö-nzö. Wü gara ngbü eꞌdu ngü wü, gü ba, “Ani de kpeke kpara! Ani wu ngü fa sü!” Wüh le ngü ka Me nda-wü ꞌburu ꞌburu de. Wüh le ka-wü ꞌduwa ngü de füh kotö ne, angü ah ngbü eto tadu fü ewü me-ye. ⁵Gara ewü gü ba, “Ani de kpara ka Me,” amba maguma ewü ka-ye ꞌbasu ꞌbasu. Ngü ka-ewü tï de ngü ka Me nda de, angü wüh wu wazi Me nda-wü kpah de. Mü di ekpe wü kpara la akpe. Mü mere e adi engbü de ewü de.

⁶Gara siti wü kpara baka e la eyi ladü, te ewü ngbü efiti wü kpara. Angü wüh ngbü ekoro agba wü kpara, fü ewü akpo da emala töndö rïrï fü ewü, gü ba, ah de rïrï ka Me. Fü ewü afiti wü kpara, te ewü wu ngü mbi mbi de, baka wü gara würüse, te ewü ngbü ekpe cürü, teka mere bi *siti ngü ka-wü. Angü wazi ewü teka ace siti ngü ka-wü la di nda ma. ⁷Wüh ngbü ta ele awu zu ngü ka Me, amba wüh tï awu ngü la de, teka siti rïrï la. ⁸Wü kpara te ewü ngbü efiti wü kpara de töndö rïrï de bala, wüh de wü vügü ka Me, kpah baka Yane ake Yambere tane, te ewü di de wü vügü ka *Müse ne.3:8 Wü Yane ake Yambere, wüh de wü mürü talara, ta te ewü mere tima fü mere miri ka Ezepeto. Mü ena amaka ngü la gbü buku ka Gogo ka wü Yïsarayele 7:10-13. Wü mürü fiti la ngbü eo fïngangü ka-wü ꞌburu teka siti ngü. Te di bala, Me ena ato kuru te ewü ato. ⁹Fü ngü ka-ewü anza. Angü wü kpara ꞌburu ena awu töndö ngü ka-ewü la, kpah baka e ta te wüh wu töndö ngü ka wü Yane ake Yambere ne.

Dene ngü te ma emala fü mü, mü lala eküte ngari Me

^10-11De-mü Timoteyo, ah le de mü rü kpekpeke kpah baka ra. Mü wu ngü te ma ngbü emere ne ꞌburu kpo. Mü wu ngü te ma ngbü erï wü kpara di kpah kpo. Mü wu eyi, gü ba, ma ngbü eo jia ra fï bü teka tima ka Me. Mü wu kpah kpo, gü ba, ma ngbü eo to ra ꞌburu teka ngü ka Me, fü ra angbü kpah ele wü bu ra, de maguma ra ꞌburu. Mü wu mere cïnga te wüh to eküte ra, teka ngü ka Yesu Kurisito ne, kpah kpo. Mü wu kpah kpo, gü ba, gbü wü ngü la ꞌburu, ma rü fï bü kpekpeke. Mü wu ngü ta te mere ra agbü Atïyokïya ake Ïkoniyo bete Lïsïtera ne kpah kpo.3:10-11 Mü ena amaka ngü la gbü Mürü Tima 13-14. Amba fü Miri Yesu ayia aküwa ra gbü wü ngü la ꞌburu. ¹²Angü wü kpara ꞌburu te ewü le afa nga Yesu Kurisito, wüh ena amaka cïnga füh kotö ne amaka bala. ¹³Amba siti rïrï ka wü mürü fiti la ena anü fï bü kpa engagira nü. Wüh ena angbü fï bü da efiti wü kpara, da eo maguma wü teka siti rïrï ka-wü la.

¹⁴Timoteyo, enga ra, te di bala ne, ah le de mü rü kpekpeke, da elala eküte zu ngari Yesu, te mü je gömö a ne. Mü wu eyi, gü ba, ah de zu ngü fanü fanü, angü a mala ngü la fü mü me-a. ¹⁵Kpah bala, mü maka ngü la kpah eyi gbü *Ngari Me, angü mü kpo da etanga ngü la kü gügü, gbü jaji te mü. Angü Ngari Me la, ah de kpeke ngü, te gü tamu kaje eyi fü mü, teka fü mü ato maguma mü fü Yesu Kurisito, fü mü aküwa. ¹⁶Angü wü kpara te ewü ba Ngari Me la, wüh ba ngü la ta ꞌburu esa ri Me. Me to ngü la fü nih, teka arï nih de züka rïrï, kpah teka agü tamu wü *siti ngü ka-nih fü nih, kpah teka ato wazi fü nih, de nih di emere wü ngü, te ena areke gbü jia Me di. ¹⁷Te ah bala, te mü de kpara ka Me la, ah le de mü di etanga Ngari Me la, teka fü mü awu züka ngü, de te ngbü ereke gbü jia Me. Fü mü amaka kpah wazi, teka amere tima la di.

Dene ngü te mü ena amere sidi nga ra

¹Timoteyo, enga ra, ma ngbü emala ngü ne fü mü kpekpeke, gbü jia Me ake Yesu *Kurisito, te di de Miri ka-nih ne, angü sïkpï ka dudu kaka eyi gbamari. Ah ena adu akoro füh kotö ne, teka aye süka ngü ka wü kpara ꞌburu. ²Te di bala, ah le de mü di fï bü emala ngari Yesu fü wü kpara gbü wü sïkpï ꞌburu. Anga te ewü le aje ngü la kpah de la, mü mere e ace da emala fü ewü nda-mü de. Mü di erï wü kpara te ewü ngbü emere *siti ngü, de wüh ce ngü la asidi. Mü di kpah eto wazi fü mene ewü, de te ewü ngbü emere züka ngü ne, teka de wüh nü de ngü la kpa engagira nü. Mü di erï ewü ꞌburu ferrre, de züka maguma mü. ³Mü mere e ace da erï ewü de, angü te gara, mere bi wü kpara ena ace da eje rïrï ka Me, angü gümü siti wü ngü ena angbü eke ewü. Te di bala, wüh ena angbü egïrï wü gara kpara, te ewü ena angbü erï ani de wü gara rïrï kpikpi ye kpikpi ye, te ena atï kpini de mene ngü, te ani ngbü ele. ⁴Wüh ena ace zu *ngari Me, fü ewü adu ka-wü, adi eda güje wü, teka adi eje töndö wü lara ngü. ⁵Amba de-mü, Timoteyo, ah le de mü ngbü nda-mü da emere tima ka Me gbü züka kaje, ba e te Me to fü mü. Mü di emala ngari Yesu fü wü kpara, anga te wüh to cïnga te mü la, mü mere e akpe cürü de. Mü rü kpekpeke, de mü ai maguma mü baka kpeke kpara.

⁶Dela ngü te ma le amala fü mü enatikine, teka fü mü adi emere fütanga kö ra. Angü sïkpï ka kpi ka-ra eyi gbamari. Ah de sïkpï te wü vügü ena amörö ra tete, teka ngü ka Yesu Kurisito. ⁷Ma wu eyi, gü ba, tima ta te Miri Yesu to fere ne, ma mere nza eyi ꞌburu, baka kpara te mere kalafiyi4:7 Kalafiyi anga kulakula de wutu ka woro, te wü kpara ngbü ego woro, teka akoro te enga gina, anga akoro gina kpara gbü woro la. ka mere woro, de wazi ye ꞌburu. Ma o to ra ꞌburu teka amere gü de wü vügü ka Miri Yesu, fü ra ayia afa ewü, angü ma lala fï bü fütanga Miri Yesu. ⁸Te di bala ne, ma wu eyi kpo, gü ba, Miri Yesu ngbü eyi nzo, teka ato takpa fere teka tima la. Gbü sïkpï te Yesu ena adu akoro tete ba Mere Miri, ah ena agbo nga ïrï ra, angü engu wu kpo, gü ba, ma mere züka ngü eyi gbü jia ni. Angü Yesu de züka Miri, te wu da eye süka ngü ereke areke. Ah ena ato züka ngü kpah bala fü gara wü kpara ꞌburu, te ewü o jia wü teka sïkpï, te engu ena adu akoro tete na ne.

Dene adu ngü ka-ra

⁹Timoteyo, enga ra, mü gïrï kaje teka fü mü akoro kpaka ra kpakine kere. ¹⁰Angü ma kpakine bü kpikpi ra. Ma tima gara wü bu ra ne eyi ꞌburu agbü wü gara sü. Keresekene nü sü eyi agbü Galatïya. Tito nü sü nda-ye agbü Dalümatïya. Nda Dema, ah ce ra ta nda eyi gügü, teka gümü e de füh kotö ne. Ah tadu ka-ye eyi agba ye, agbü Tesalonika. ¹¹Kpara te di ede ra kpakine, ah ka-ye bü de Luka kpikpi ye. Te di bala ne, mü koro kere, de mü za Marako zalü, mü koro de engu akine, angü engu de kpeke kpara te ena ale ta-ngü te ra, gbü tima ka-ra ne. ¹²Ma tima Tïkïko kpah eyi agbü Efeso. ¹³Te mü te ekoro la, de mü za mere bongo ka-ra, ta te ma ce kpa gba Karapo agbü Türüwa kpala ne mini. Mü za kpah wü köcökpa ka-ra, mü koro di ꞌburu, bete mene ewü te ewü ba gbü wü konü ne.

^14-15Amba mü ceka te-mü mbi teka ngü ka Alekezanda, mürü boro la, angü ah mere ra ta esiti. Mü ceka ꞌbe! E-wu neh da, engu ena aga, “Ni mere mü kpah bala,” angü engu ka-ye de mere siti vügü ka tima ka-nih! Amba Me ladü! Ah wu ngü kaka-na la ꞌburu kpo!

¹⁶Ta, gbü gina sïkpï te wüh ï ra engagira mere Miri ka *Rüma tete na ne, kpara biringbö te le ta-ngü te ra gbü ngü la, nda ma. Wüh kpe ka-wü ꞌburu, ce ra bü kpikpi ra bala. Ah le de Me ce siti ngü ka-ewü la asidi. ¹⁷Ma rü ta engagira mere Miri ka wü Rüma la bü kpikpi ra. Fü Me ato wazi fere me-ye, teka fü ra amala ngari Yesu Kurisito fü mere miri la, de mere bi wü kpara, te ewü di gbü nganga na la ꞌburu. Fü Me aküwa ra esaka mere miri la, ba kpara te küwa gömö kami. ¹⁸Te di bala ne, ma wu eyi kpo, ga, Me ena aküwa ra fï bala esüka wü siti ngü ꞌburu. Fü engu aza ra, akoro di kpa gbü sü ka-ye, kpa gbü kpï kpala. Ma gbo nga ïrï Me teka ngü la! Ah di bala!

¹⁹Ma to mandï fü Akuwila ake Pïrïsïla, be kpah te wü kpara agba Ünesiforo. ^20-21Wü Wubulu, Pudene, Linü, bete Kalodïya, abe kpah te wü *kpara ka Yesu de agbü Rüma de kpakine ne, tima kpah mandï ka-wü fü mü. Mü gïrï da mü, de mü koro kpakine mba kere, angü te ah koro eyi gbü bigü la, kaje ena adi ma teka siti wege gbü jia ngu. Ma ngbü kpakine bü kpikpi ra, angü ta te ma yia teka akoro kpa gbü Rüma kpakine ne, Eraseto ngbü ka-ye ciki gbü Korïnito kpala. Ma ce Torofïmü, o agbü Mileto de keke te ye.

²²Me di de mü, Timoteyo, be kpah te gara wü kpara ka Yesu Kurisito ꞌburu, da ele ta-ngü te yi de *züka maguma ye.

Dela adu ngü ka-ra. De-ra Pawülü.