2 Tesalonika

Dene eꞌbaꞌbasu köcökpa te Pawülü ba fü wü kpara ka Yesu agbü Tesalonika

2 Tesalonika

Masere si-ngü

Dene eꞌbaꞌbasu köcökpa te Pawülü ba fü wü *kpara ka Yesu agbü Tesalonika. Fütanga gina köcökpa te engu ba la, fü Pawülü adu aje gara ngü ka wü kpara ka Tesalonika, gü ba, “Gara wü ngü ladü te kpo ngbü esiti fïngangü ka wü kpara ka Yesu kpala.”

Gina ngü, ah de ngü ka wü gara kpara, te ewü ngbü emala, ga, “Miri Yesu du koro eyi füh kotö ne.” Te di bala, fü Pawülü aba ngü fü ewü, gü ba, “Miri Yesu tï akoro esalakumu nda de. Kpah bala, gara wü ngü ladü te ewü ena amere te-wü feke, fü Miri Yesu adu akoro sidi. Angü gara siti kpara ena akoro da efiti wü kpara, da emere wü *siti ngü efa sü.”

Eꞌbaꞌbasu ngü, ah de ngü ka gara wü kpara esüka wü kpara ka Yesu, te ewü le amere tima de. Wüh ngbü emere tïne bü töndö ngü, da engbü ka-wü bü kükürü bane. Pawülü mala ngü fü wü mürü basa la kpekpeke, gü ba, “Wü ce töndö ngü ka-wü la asidi.” Fü ah adu amala fü wü bu wü, gü ba, “Te kpara le amere tima de la, wüh mere e ato zü-e fefe kpah de.”

Wü ngü te mü ena amaka gbü 2 Tesalonika, wüh dene.

Sapïta 1 Ngü ka wü kpara ka Yesu agbü Tesalonika,

te wü Pawülü gbo nga ïrï Me tekaka na

Sapïta 2 Ngü teka dudu ka Yesu füh kotö ne

Sapïta 3 Ngü de te wü kpara ka Yesu ena adi emere

Dene mandï ka Pawülü fü wü kpara

ka Yesu agbü Tesalonika

¹De-yi wü kpara ka Me, wü kpara ka Miri Yesu *Kurisito, te yi ngbü agbü Tesalonika, a ngbü eba köcökpa ne fü yi me-a, de-ra Pawülü, bete Sïla,1:1 Ïrï de Sïla ne, ah de Sïlïvanü, wüh ngbü eï ïrï la mba piti bala. ake Timoteyo. Kpara to mandï fü yi fa sü. ²Wö nih Me bete Miri Yesu Kurisito ngbü de yi, da eto gu ngü ka-wü fü yi, de *züka maguma wü.

Dene ngü de te a gbo nga ïrï Me tekaka na

³Wü di enga wüna, a ngbü kpakine egbo nga ïrï Me teka ngü ka-yi, ra de biti mini. Kükürü de, angü ngü ka-yi ngbü eto mere tadu fü a. Angü a je, gü ba, yi zoro ngü ka Me eyi de kpa yi ꞌbasu mini, da ele te-yi de wü bu yi. A je kpah, gü ba, yi ngbü fï bü da emere ngü la, enü di kpa engagira nü. ⁴Teka ngü la, kpara ngbü kpakine kpah da egbo nga ïrï yi fü wü kpara ka Me gbü wü sü ꞌburu, teka züka ngü de te yi ngbü emere la. Angü yi ngbü elala fï bü gbü nga Yesu *Kurisito. Baka te wü vügü ngbü fï bü da emere yi sisiti, teka ngü ka Yesu ne, yi kpe cürü nda-yi de, yi ngbü erü fï bü kpekpeke gbü mere cïnga ka-yi la.

⁵Wü di enga wüna, Me ladü, te wu cïnga ka-yi la me-ye. Ah wu kpah eyi, gü ba, yi ngbü erü kpekpeke, gbü cïnga de te ngbü emere yi ne, angü yi de wü kpara ka-ni. Te di eyi bala ne, ah ena aküwa yi gbü sïkpï te Miri Yesu ena adu akoro tete. Angü gbü sïkpï la, ah ena aï yi, gü ba, “De-yi dene, yi de züka wü kpara ka-ni. Te di bala, yi koro ekoro kpaka ni, fü yi angbü tundu de wü ani, agbü sü ka-ni agbü kpï, baka wü di ni.” ^6-9Angü Me ka-ye de züka miri. Ah ena aküwa yi gbü mere cïnga ka-yi la, fü engu aküwa kpah a gbü nda-a cïnga ne. Fü nih angbü de ewü agbü kpï kpala gbü züka gu sü, de mere tadu fï mere badi. Amba Me ena ato mere cïnga te wü kpara, de te ewü ngbü eto cïnga te yi ne. Me ena amere ngü la bala, gbü sïkpï te Miri Yesu ena adu akoro füh kotö ne, de mere wazi, de mere kpeke wü *malayïka ka-ye mini, teka azoro wü kpara, de te ewü le ngü ka Me de, te ewü le aje ngü ka Yesu kpah de ne. Me ena ato mere siti kuru te wü kpara la, de mere wazi ye, kpah de mere siti te-wa te embele ambele, fü ewü akpi fï mere badi. Wüh tï awu Me tïne de. ¹⁰Gbü sïkpï engu la, wü kpara ꞌburu te ewü to maguma wü fü Miri Yesu, wüh ena adu agbo nga ïïrï na, teka mere wazi kaka. Wayi, ah ngbürü bala, yi ena aci agbo nga ïïrï na, gbü sïkpï engu la kpah cu me-yi, angü yi le ngü kaka-na, de te yi je gömö a, ne eyi.

¹¹Dela si-ngü de te a ngbü fï bü eku gba fü Me tete teka yi, gü ba, “Ah le de Me ceka yi baka züka wü kpara ka-ye, angü engu de kpara te fe yi teka ngü la me-ye. De ah to kpah wazi fü yi, teka fü yi adi eo jia yi, adi emere züka wü ngü, da emere tima ka Me kpekpeke, angü yi to maguma yi eyi fefe fanü.” ¹²Te yi ngbü fï bü emere wü ngü la kpekpeke bala, fü wü kpara angbü da ewu züka ngü ka-yi la, wüh ena aci agbo nga ïrï Miri ka-nih Yesu Kurisito, ka ngü la. Fü ewü adi kpah da egbo nga ïrï yi, gü ba, “Yi de wü *kpara ka Yesu fanü fanü.” Dela ngü te kpara ngbü eku gba fü Me tekaka na, teka ne de, angü a wu kpo, ga, Me ake Miri Yesu Kurisito ena ato wü ngü la fü yi me-wü, angü wüh de wü mürü *züka maguma.

Dene ngü teka dudu ka Yesu füh kotö ne

¹Wü di enga wüna, dene ngü te a le amala fü yi, teka dudu ka Miri Yesu *Kurisito, teka akö nih, ago di kpaka ye. ²Angü ma je, gü ba, wü gara kpara ngbü efiti yi, gü ba, “Angü sïkpï ka Miri Yesu la koro ka-ye eyi.” Wüh ngbü esu ka-wü dela ꞌburu wu! Yi mere e adi eje ngü ka-ewü la de, angü fïngangü ka-yi ena asiti. Te wüh mala, ga, “Angü *Nzïla Wazi Me sere ngü engu fü ani me-ye,” di de, “Angü de-ra Pawülü, ma mala fü ani cu me-ra,” di de, “Angü ma ba, tima fü ani gbü köcökpa,” yi mere e aje wü ngü la nda-yi ꞌburu de, angü dela ka-ye nda-ye ꞌburu wu!

^3-5Yi fï la nga wü ngü ta te ma mala fü yi, teka dudu ka Miri Yesu, o nih ngbü de nih ma agbü Tesalonika kpala ne. Yi mere e asiti fïngangü ka-yi teka ngü la de, angü yi wu kpo, ga, Miri Yesu tï akoro esalakumu nda de. Teka ne de, wü ngü de ta te ma mala nganga fü yi ne, wüh ena amere te-wü feke, fü Miri Yesu adu akoro sidi. Angü, te sïkpï ka dudu ka Yesu la koro eyi gbamari, mere bi wü kpara ena ayia ace ngü ka Me. Kpah bala, gara siti vügü ka Me, de ta te ma mala nganga na fü yi ne, ah ena ayia akpo de tima ka-ye. Ah ena angbü esu wu te ye, da ecu ngü ye, gü ba, “Ngü ka-ni ga fa sü, fa nda Me ka.” Angü ah ngbü ele ta, ga, wü kpara mere e agbo nga ïrï Me de. Wüh di ele nzö ngü ka-ni, da egbo nga ïrï ni. Te ah bala, ah ena arï kpa esa *Mere Kambü ka Me agbü Yerüsalema kpala. Fü ah angbü cu kpala, da egbo nga ye, gü ba, “Ni ka-ni de Me me-ni, wüh gbo nga ïrï ni.”

⁶Amba nda-yi, yi mere e akpe cürü de, angü Me tï aü kaje, teka siti komoko la, nda la de, angü Me ngbü ecï nga sïkpï te ni, Me, fe me-ni teka ngü la. ⁷Gbü wü sïkpï ne, mere bi wü *siti ngü ladü füh kotö sene fanü fanü, angü *Satana ngbü emere tima ka-ye la gbü zi. Ah mere ngü la ngbaangba la de. Kükürü de, angü Me to wazi eyi fü gara kpara, de ah ni kaje fü siti komoko te ena akoro la. Ma mala ngü la fü yi eyi gügü. Kpara la ena angbü fï bü da etïrï kaje fü vügü ka Me, zalü akoro di gbü sïkpï te Me fe me-ye. ^8-12Gbü sïkpï la, siti vügü ka Me ena ayia akoro, akpo tima ka-ye gbü jia wü kpara ꞌburu. Angü Satana ena ato mere wazi fefe na, de ah di emere wü kpeke ngü ka talara di, teka afiti wü kpara ꞌburu. Teka ngü la, mere bi wü kpara ena ale ngü ka vügü la, gü ba, “Komoko la de Me fanü.” Wü kpara te ewü to maguma wü fü Me, Me ena aküwa ewü aküwa esaka vügü la. Amba mere bi wü kpara ladü, te ewü le ngü ka Me de. Wüh ena ao maguma wü, teka adi emere wü siti ngü, te reke areke gbü jia wü, baka e te ewü ngbü ele. Te di bala, Me ena ace ewü, de wüh le ngü ka vügü ka-ni la. Te di tïne eyi bala ne, wüh ena amaka mere siti kuru te gara, angü Me ena agü ewü kpa gbü mere du ka wa, fï mere badi.

Teka ngü ka mere vügü ka Me la, yi mere e akpe cücürü de, angü Miri Yesu ena akoro de mere siti kpeke wazi ka-ye, fü ah azoro siti vügü ka Me la, amörö engu asidi. Wayi, ah ena auru engu bü de komö ye, fü siti vügü ka Me la adu akpi, azi ka!

Wü di enga wüna, dela ngü te ma le amala fü yi teka dudu ka Miri Yesu. Yi mere e afï, ga, ah du koro eyi ne, yi fï bala de, angü wü ngü la mere te-wü nda-wü la de.

Dene gba te a ngbü eku fü Me teka yi, de yi rü kpekpeke

^13-14Wü di enga wüna, a ngbü egbo nga ïrï Me de ra de biti, teka mere tadu, te Me to fü a teka ngü ka-yi. Angü Me fe yi eyi wü kpara ka-ye gügü te enga gina. Fü ah adu aï yi, teka ngü de te yi je gömö a ne. Fü engu ayia aküwa yi, angü yi le ngü la eyi, de maguma yi ꞌburu. Fü ah adu atima Nzïla Wazi ye, de ah di efü yi züka wü kpara ka-ye tete. Fü Me ato wazi fü yi, teka fü yi ago te gara, angbü tundu de wü Miri Yesu Kurisito agbü kpï, angü ah le nih fa sü.

¹⁵Te di bala ne, wü di enga wüna, yi di engbü tïne de jia yi te yi. Yi zoro wü rïrï ka Me de kpa yi ꞌbasu. Wü rïrï la, a to ta fü yi, o a ngbü emala ngari Me fü yi de kpala ne. Fü a adu kpah anda nga wü rïrï la gbü köcökpa, ta te a ba fü yi ne. Te di bala, yi mere e ace wü ngü la nda-yi de.

¹⁶Wü di enga wüna, Miri Yesu Kurisito ake Wö nih Me le nih fa sü. Teka ngü la, fü ewü ayia ato wazi fü nih teka *züka maguma wü, de nih rü kpekpeke, zalü koro di gbü sïkpï te nih ena ago tete kpaka ani la. Fü nih adu angbü eo jia nih teka züka wü ngü, te Me ena amere fü nih te gara kpala. ¹⁷De te di tïne eyi bala ne, a ngbü eku gba fü Miri Yesu ake Wö nih Me, de wüh ngbü de yi, da eto wazi fü yi, fü yi ai maguma yi di, arü kpekpeke, teka angbü kpah fï bü emere züka wü ngü te reke areke gbü jia Me.

Dene gba te yi ena aku fü Me teka ngü ka-a

¹Wü di enga wüna, yi di kpah eku gba fü Me teka a, teka fü ngari Miri Yesu awü abaya gbü wü sü ꞌburu, teka de mere bi wü kpara yia le ngü ka Miri Yesu gömö a, kpah baka nda-yi. ²Yi ku kpah gba fü Me, teka de Me di eküwa a kpah aküwa, esaka siti wü kpara, te ewü ni kaje fü a, teka tima ka Miri Yesu ne, angü wüh le ngü ka Yesu nda-wü de.

³Wü di enga wüna, Miri Yesu de kpeke kpara. Ngü te engu mala, engu tï ace de. Te di bala ne, ah ena angbü fï bü da eto wazi fü yi, kpah da eceka kpï fütanga yi, teka wü ngü ka *Satana. ⁴A wu kpah kpo, ga, yi de wü kpeke kpara, te yi lala eyi gbü ngü ka Yesu. Yi ngbü kpah eyi emere wü rïrï, de ta te a to fü yi ne ereke areke, abe kpah te wü ngü de te a ba fü yi gbü köcökpa ne. ⁵A ngbü eku gba fü Miri Yesu *Kurisito, teka de ah ngbü fï bü da eü jia yi, teka fü yi awu, ga, Me le ani de maguma ye ꞌburu. Ah le kpah de Miri Yesu to wazi fü yi, teka de yi di erü fï bü kpekpeke.

Dene ngü teka wü kpara te ewü le adi emere tima de 

⁶Wü di enga wüna, gara ngü ladü te a le amala fü yi. Ah de ngü teka wü mürü basa esüka yi, te ewü le aje rïrï, ta te a to fü yi, ne de. Rïrï la gü ba, wü kpara ꞌburu di emere tima. Te wü kpara la ladü esüka yi la, a ngbü emala ngü fü yi kpekpeke de ïrï Miri Yesu Kurisito, ga, “Yi mere e adi engbü de ewü de.” ^7-8Angü yi wu kpo, ga, tima de züka ngü. Ta te nih di de nih ma kpala ne, a ngbü ta angbü bü geee kükürü, a mere tima de? Anga a ngbü ta eyi endondoro bü faaa, da eyo e-mazü ba mürü to-fere-eto? A mere bala nda-a de! A ngbü ta emere tima kpekpeke de kpa a, ra de biti, teka amaka zü-e di. Ah le de yi di emere kpah bala! ⁹Fanü fanü, ah le de yi di ele ta-ngü te wü kpara, te ewü ngbü erï yi de ngari Me ne. Amba nda-a, a le ayi-ta yi teka e nda-a de. Kükürü de, angü a le ta, teka de a gü tamu züka kaje fü yi, teka de yi ce ngü ka basa, adu amere tima kpekpeke, kpah baka nda-a la. ¹⁰Fü a adu ato ta rïrï fü yi, gü ba, “Te kpara le amere tima de la, wüh mere e ato zü-e fefe na kpah de.”

¹¹A mala ngü la kükürü de, angü a je nga yi eyi, ga, “Wü gara kpara ladü esüka yi, te ewü ngbü emere tïne bü töndö ngü, da engbü ka-wü bü kükürü bane. Fü ewü adu angbü eto ba-nzö fü wü bu wü gbü nda-ewü tima.” ¹²A ngbü emala ngü fü wü kpara dela, kpekpeke de ïrï Miri Yesu Kurisito, ga, “Wüh ce wü töndö ngü de bala asidi. Wüh yia eyia adi emere tima, teka de wüh maka e-mazü te ena atï de ewü.”

¹³Amba nda-yi, wü kpeke kpara, yi mere e ace da emere züka ngü de. Yi i maguma yi ai, da emere fï bü kpeke ngü la.

¹⁴Te wü mürü basa la le aje rïrï ka-a ne de, de yi mala nga ewü fü wü bu yi ꞌburu, teka de yi ce da engbü de ewü, teka de lümü zoro ewü, fü ewü afü maguma wü. ¹⁵Te di bala, yi mere e aceka ewü baka vügü ka-yi de, yi kpü ewü kpah de, angü wüh de wü di enga ni yi. Yi du, yi rï ewü de *züka maguma yi, teka de wüh ce ngü la.

Dene adu ngü ka-a

¹⁶Wü di enga wüna, Miri Yesu ngbü de yi ꞌburu, de ah to gu ngü fü yi gbü wü ngü ꞌburu, angü engu de kpara te ngbü egu maguma yi, fï mere badi.

¹⁷De-ra Pawülü, ma to mandï ne fü yi me-ra. Mandï la, ah de ngü te ma ba cu me-ra de kpa ra, teka de yi wu tete, ga, fanü fanü angü ma tima köcökpa ne fü yi me-ra.

¹⁸Yesu Kurisito di de yi ꞌburu, de ah to wazi fü yi, de züka maguma ye.

Dela adu ngü te ma ba, tima fü yi. De-ra Pawülü.