1 Tesalonika

Dene gina köcökpa te Pawülü ba fü wü kpara ka Yesu agbü Tesalonika

1 Tesalonika

Masere si-ngü

Dene gina köcökpa te Pawülü ba fü wü *kpara ka Yesu Kurisito agbü Tesalonika. Pawülü ta de gina kpara te mala ngari Yesu fü wü kpara agbü Tesalonika kpala me-ye. Ah nü ta kpala de wü bu ye ꞌbasu, wü Sïla ake Timoteyo. (Mü ena amaka ngü la gbü buku ka wü Mürü Tima ka Yesu 17.) Te wü Pawülü mala ngari Yesu fü wü kpara ka Tesalonika la, fü mere bi ewü afü maguma wü, adu ara fü Yesu.

Amba Pawülü ngbü ta kpala teka fe biringbö nda de, angü wü gara wü di enga *Yïsarayele, te ewü ngbü de kpala, wüh yia liki engu agbü Tesalonika asidi. Angü wü di enga Yïsarayele la, wüh le ngü ka Yesu, te Pawülü ngbü emala kpala ne, nda-wü de. Angü Pawülü gü ba, “Mene wü kpara, te ewü ena ato maguma wü fü Yesu ne, Yesu ena aküwa ewü aküwa ꞌburu. Anga te ah de wü di enga Yïsarayele, anga wü *ganzi kpara, anga neh wü da, Yesu ena aküwa ewü ꞌburu.” Ngü la siti eküte wü di enga Yïsarayele fa sü, angü nda-wü fïngangü gü ba, “Me le wü ganzi kpara ꞌburu ꞌburu de. Ah nzö de ani, wü di enga Yïsarayele, ani ena aküwa ꞌduwa me-ani.” Te di bala, fü ewü ayia aliki wü Pawülü agbü Tesalonika kpala de gü. Fü wü Pawülü ayia anü angbü agbü gara sü de ïrï ye Atenayï.

Fü Pawülü angbü agbü Atenayï kpala de mere fïngangü emaguma ye, teka wü kpara de te ewü le ngari Yesu gömö ni ne. Angü ah ngbü kpala teka sïkpï mba cüküꞌdaye, dada te ah ena arï wü kpara dela, de ngari Me mbi mbi mbi bane ma. Ah wu kpah kpo, gü ba, “Wü kpara te ewü liki ni, wüh ena adu kpah ato cïnga te wü kpara la.” Pawülü le ta adu kpaka ewü kpala, teka ato wazi fü ewü, de wüh rü kpekpeke gbü ngü ka Me ne, amba ah maka kaje de.

Te di bala, fü Pawülü ayia atima Timoteyo agbü Tesalonika teka aceka ewü, de ah du, ah mala nga ewü fü ni. Te Timoteyo du koro, fü ah amala nga wü kpara la fü Pawülü, gü ba, “Wü vügü ka-ye agbü Tesalonika de kpala ne, ngbü eto cïnga te wü kpara ka Yesu efa sü. Amba wü kpara ka Yesu la, wüh kpe cürü nda-wü de. Wüh ngbü erü fï bü kpekpeke gbü ngü ka Yesu.”

Te Pawülü je ngü ka wü kpara la bala, fü ah angbü de mere tadu. Fü ah ayia aba köcökpa ne fü ewü, teka ato wazi fü ewü. Ah le kpah arï ewü de gara rïrï ka Me, te ewü je mbi mbi la de. Ah de ngü ka dudu ka Yesu, teka fü ewü angbü emere ngü, te ena areke gbü jia Me, zalü akoro di gbü sïkpï, te Yesu ena adu akoro tete na. Te mü ena atanga ngü la enatikine, ah ena ato wazi kpah fü mü, agü kpah tamu wü rïrï ka Me fü mü fanü, fü mü amaka wazi gbü ngü la.

Wü ngü te mü ena amaka gbü 1 Tesalonika ne, wüh dene.

Sapïta 1:1–3:13 Ngü ka wü kpara ka Yesu agbü Tesalonika

te ngbü eto tadu fü Pawülü

Sapïta 4:1-12 Ngü te wü kpara ka Yesu ena adi emere

Sapïta 4:13–5:11 Ngü teka dudu ka Miri Yesu füh kotö ne

Sapïta 5:12-28 Adu rïrï

Dene mandï ka Pawülü fü wü kpara

ka Yesu agbü Tesalonika

¹De-yi wü kpara ka Me, wü kpara ka *Miri Yesu Kurisito, te yi ngbü agbü Tesalonika, a ngbü eba köcökpa ne fü yi me-a, de-ra Pawülü, bete Sïla,1:1 Ïrï de Sïla, ah de Sïlïvanü, wüh ngbü eï ïrï la mba piti bala. ake Timoteyo. Kpara to mandï fü yi fa sü. Me di de yi, da eto gu ngü ka-ye fü yi de *züka maguma ye.

Dene ngü te ngbü eto tadu emaguma a, teka ngü ka-yi

²Wü di enga wüna, a ngbü egbo nga ïrï Me, teka ngü ka-yi, gbü wü sïkpï ꞌburu. ³Kükürü de, angü a wu, gü ba, yi ngbü emere ngü te ereke areke gbü jia Miri Yesu, angü yi to maguma yi eyi fefe fanü fanü. Kpah bala, yi ngbü eto te-yi teka ale ta-ngü te wü bu yi, angü yi le Miri Yesu eyi de maguma yi ꞌburu. Fü yi arü kpekpeke, angü yi ngbü eo jia yi teka dudu ka Yesu Kurisito. Te di bala, züka ngü ka-yi la, Me wu eyi ꞌburu.

⁴Wü di enga wüna, a ngbü egbo nga ïrï Me, teka ne de, angü a wu eyi kpo, gü ba, Me le ngü ka-yi fa sü, fü engu afe yi, ao wü di ye tete. ⁵Angü ta te a koro teka amala ngü ka Yesu Kurisito fü yi agbü Tesalonika kpala ne, *Nzïla Wazi Me to ta wazi fü a me-ye, de a di emala ngü la di kpekpeke. Fü Nzïla Wazi Me adu kpah ato wazi la fü yi, teka fü yi awu, gü ba, ngü ka Yesu Kurisito la de zu ngü ka Me fanü fanü. Wazi te Nzïla Wazi Me to fü a la, yi wu cu de jia yi, angü, ta te a ngbü esüka yi kpala ne, a kpe cürü nda-a de, a rü fï bü kpekpeke, teka amala ngari Miri Yesu fü yi. ⁶Ta te yi wu bala ne, fü yi ayia amere kpah ba nda-a la. Angü yi rü kpah kpekpeke, baka a, kpah baka Miri ka-nih, Yesu Kurisito. Angü te wü bu yi ngbü ta eto mere kuru te yi tete, yi kpe cürü kpo de. Fü yi angbü kpah fï bü da ele ngü ka Me gömö a de mere tadu, teka ne de, angü Nzïla Wazi Me ngbü eto wazi la fü yi cu me-ye.

⁷Dela si-ngü de enatikine, te ïrï yi wü tete gbü wü sü ka Makedoniya, bete sü ka Akaya1:7 Enatikine gbü wü sïkpï dene, wüh ngbü eï sü ka Makedoniya bete sü ka Akaya ꞌburu tö ka wü Giriki. zalü nde ꞌburu ne, angü yi zoro ngü engu la ta de kpa yi ꞌbasu mini, fü yi adu arü kpekpeke. Angü wü kpara ka Me gbü wü sü la je wü ngü ta te yi mere dela eyi ꞌburu, fü ewü ale arü kpah kpekpeke baka yi la. ⁸Te di bala, ngü ka Me wü eyi gbü nga nzö sü ne le ꞌburu, koro eyi zalü kpa gbü gara wü sü nengete, teka ngü ka-yi la. Amba a mala ngü la fü ewü nda-a de, ⁹wü kpara ngbü ebaya ngü la esüka wü de tete-wü, gü ba dene, “Te a koro kpaka yi, yi le ngü ka Miri Yesu gömö a de maguma yi ꞌburu. Angü yi ce gele ka wü me ka wü kundu yi eyi, fü yi adu afü maguma yi, akoro tïne, alala eküte ngü ka Mere Me, te di kpa gbü kpï. ¹⁰Fü yi adu tïne, angbü eo jia yi gbü nga Yesu *Kurisito, Ye Me, te ena ayia agbü kpï, adu akoro füh kotö sene.” Angü yi wu eyi, ga, Me zükü Yesu gbü kpi eyi. Te gara, kpa engagira nü kpala, gbü *adu sïkpï te Me ena ato kuru fü siti wü kpara tete, Yesu ena aküwa nih gbü siti kuru la me-ye.

Dela si-ngü de te a ba köcökpa ne fü yi tete, teka nga ngü ka-yi, te wü gara kpara ngbü emala fü a. Fü a aje ngü la de mere tadu.

¹Wü di enga wüna, wü vügü ka-a ladü, te ewü ngbü emala ambalaꞌba, gü ba, “A de wü töndö kpara, te a koro teka afiti yi.” Amba yi wu eyi, gü ba, wü vügü la ngbü esutu wu, angü a ngbü ta esüka yi kpala, ba züka wü kpara, te ngbü emala zu ngari Me fü yi. ²Yi wu wü ngü te mere a, ta te a koro tete kpaka yi ne, kpo. Angü te a di ta agbü Fïlïpoyi, o a koro kpaka yi la de ne, wü kpara ka Fïlïpoyi to ta mere cïnga te a, da efala a, fü a ayia akoro kpaka yi agbü Tesalonika de kpala, de mere kuru te a.2:2 Ngü te mere wü Pawülü gbü Fïlïpoyi, yi ena amaka gbü Mürü Tima 16. Wü gara kpara kpa gba yi kpala le ta kpah aliki a. Te di bala, ah kpe cürü ta nda-a de. Angü Me to wazi fü a, fü a ayia ai maguma a, teka amala ngari Yesu fü yi.

³Wü vügü ka-a ga, a de wü kpara te a koro de mani, teka afiti yi, amala siti rïrï fü yi, ato yi te kaje ka *siti ngü. Amba ah bala nda de. ⁴Ngü te a mala fü yi, ah de zu ngari Me fanü fanü. Angü Me fe a cu me-ye, ayia atima a teka amala ngari ni fü wü kpara. Te di bala, a fï ngü ka wü kpara nda-a de. A ngbü efï nda-a nga Me, teka areke gbü jijia, angü engu wu fïngangü ka-a ꞌburu kpo. ⁵Fïngangü ka-yi gü neh fe? Baka ta te a koro kpaka yi ne, a mala ta türü ngü, afiti yi di, de yi di eto jiase fü a? Ah bala de. Me ladü te wu ngü la kpah eyi cu me-ye. ⁶Baka ta te a koro kpaka yi ne, a koro ta baka wü cögbörö kpara, te wüh ena adi ecu ngü a acu? Ah bala de. Wü di enga wüna, yi wu ngbürü kpo, ga, Yesu *Kurisito to wazi fü a me-ye, ba wü *mürü tima ka-ye. Amba a to rïrï fü yi kpekpeke, baka wü cögbörö kpara, nda-a de. ⁷A ngbü erï yi ferrre, baka würüse te ngbü erï wü di enga ye. ⁸Wü di enga wüna, gümü yi ngbü emere a efa sü. Dela si-ngü te a to te-a di ꞌburu teka amala ngari Me fü yi, de mere kuru la te a, angü a le yi fa sü. ⁹De ta te a ngbü emala ngü ka Me fü yi tete ne, a yi-ta yi ta eyi, teka de yi to wü e fü a? A mere bala nda-a de. Angü yi wu ta kpah bü kpo, ga, a ngbü ta embü da emere tima de ra, de biti nde, teka amaka mba jiase, adi ese e-mazü di ne, cu de kpa a.

¹⁰Wü di enga wüna, yi wu ta wü ngü ka-a, te a ngbü emere kpa esüka yi la, cu de jia yi. A ngbü ta emere siti ngü? Ah bala de. A ngbü ta ba züka wü kpara. A ngbü ka-a ta emere fï bü züka ngü, te reke areke gbü jia Me. Me ladü te wu ngü la kpah ꞌburu kpo. ^11-12Angü a ngbü ta erï yi biri biri ꞌburu, baka kpara te ngbü erï wü di ye. A ngbü ta erï yi ferrre, da eto wazi fü yi, de yi di ei maguma yi ai. Fü a angbü kpah emala ngü fü yi kpekpeke, teka de yi di enü ꞌbe ꞌbe ꞌbe, fü yi akoro ba züka wü kpara gbü jia Me. Angü Me ï yi dela me-ye, de yi di ba wü kpara ka-ni, de maguma yi lofo, fü yi angbü de wü ni, Me, kpa gbü kpï kpala de mere tadu.

¹³Wü di enga wüna, a ngbü egbo nga ïrï Me teka ngü ka-yi, gbü wü sïkpï ꞌburu. Teka ne de, angü, de ta te yi je ngari Me gömö a ne, fü yi ayia ꞌduwa, ale ngü la. Yi le ngü la cu de maguma yi biringbö, angü yi wu kpo, ga, ngü engu la, ah de zu ngü ka Me, te engu tima fü yi me-ye. Ah de kükürü ngü ka-a, te a mala de tete-a ne, nda de. Ngü engu la, ah de zu ngü ka Me fanü fanü, te ngbü eto wazi fü yi. ¹⁴Fanü fanü, ngü ka Me la ngbü fï bü da eto wazi fü yi, angü te wü bu yi ngbü eto cïnga te yi la, a wu eyi, ga, yi ngbü erü ka-yi fï bü kpekpeke. Ngü ka-yi la, ah gegege ba ngü, de te wü *kpara ka Yesu Kurisito mere agbü *Yudaya. Teka ne de, angü wüh rü kpekpeke, te wü bu wü, wü di enga *Yïsarayele, ngbü eto cïnga te ewü tete ne. ^15-16Angü wü di enga Yïsarayele la ngbü fï bü da emere *siti ngü gbü jia Me. Wüh kpah de wü kpara, te ewü mörö Miri Yesu. Ta gügü, wüh ngbü mörö wü *mürü dofo kpah bala. De-ra, te ma di kpah de enga Yïsarayele ne, wüh le ngü ka-ra nda-wü kpah de. Fü ewü ayia aliki a agbü Tesalonika kpala asidi. Wüh le de a mala ngari Yesu fü nguwa wü *ganzi kpara, baka yi ne, nda-wü de. Wüh le de Me küwa nguwa gara wü kpara kpah de. Angü wüh ka-wü de vügü ka nguwa wü gara kpara, füh kotö ne ꞌburu. Amba ngü de te ewü ngbü emere la, ah reke te Me nda de. Ah ngbü gbü jijia na esiti ꞌduwa ba-neh-ene-la. Wüh lala ka-wü fï bü gbü siti ngü ka-wü la, wüh le ace nda-wü de. Teka ngü la, fü maguma Me angbü enzu eküte ewü. Te di bala, sïkpï te Me ena ato kuru te ewü tete eyi gbamari.

Dene kpah gara ngü te to tadu emaguma a,

angü yi lala fï bü gbü ngü ka Yesu Kurisito

¹⁷Wü di enga wüna, gümü yi ngbü eke a efa sü. Baka ta te wüh liki a kpaka yi agbü Tesalonika de kpala ne, fü a anü angbü nengete, kpara du wu te-a de wü yi de. A ngbü kpakine kpah fï bü da efï nga yi. Teka ngü la, nga a yiri de, fü a akpo da egïrï kaje, teka adu kpaka yi kpala. Amba a gïrï kaje la ma. ¹⁸Kpah cu de-ra Pawülü, ma gïrï kaje de ma du kpaka yi kpala bi ma, angü *Satana ni kaje la fere eyi. ^19-20Gümü yi ngbü emere a kükürü de, angü yi de züka wü kpara ka-a, te yi to tadu fü a fa sü. Angü, baka te yi je ngü ka Me gömö a, fü yi adu arü kpekpeke gbü ngü la ne, te di bala, gbü sïkpï te Miri Yesu ena adu akoro tete, engu ena agbo nga ïrï a teka ngü ka-yi la. Teka ngü la, fü a angbü eo jia a fï bü teka sïkpï la.

^1-2Teka ngü la, a ngbü fï bü efï nga yi de mere bi sïkpï. Angü gümü yi ngbü eke a ꞌduwa ba-neh-ene-la. Fü a aga dene, te ah tïne eyi bala, ah le de a tima Timoteyo kpaka yi kpala, de ah to wazi fü yi, teka de yi i maguma yi, arü kpekpeke. Teka ne de, angü Timoteyo de züka kpara, te mere tima ka Me kpekpeke. A ga, te a ngbü gbü Atenayï sene kpikpi a la, ah mere e de. Timoteyo nü enü kpaka yi kpala, de ah to wazi fü yi agbü Tesalonika la. ^3-4Angü yi ena ace ngü ka Me, teka cïnga, te wüh ngbü eto eküte yi la. Angü ma mala ngü la ta eyi fü yi, ga, “Te yi le ngü ka Yesu eyi la, wü kpara ena ato kuru te yi ato.” Tïtïne ngü la koro eyi fanü. Angü Me ngbü eto cïnga fü nih, wü kpara ka-ye, teka are maguma nih di. De te di eyi bala ne, ah le de yi rü arü kpekpeke gbü ngü la. ⁵Dela si-ngü de te ma tima Timoteyo kpaka yi tete na ne, ah dela. Angü ma ngbü efï nga yi efa sü. Ma wu de, anga *Satana fiti yi dene eyi, teka de yi ce ngü ka Me, ka ngü ka kuru la? Te ah bala, amba mere züka tima, te a mere teka amala ngari Me fü yi ne, ah ena angbü kükürü. Fü ra ayia atima Timoteyo tüngü la, teka de ah nü, ah ceka yi, de ah du, ah mala nga yi fere.

⁶Amba tïtïne, baka te Timoteyo du koro, amala nga yi fü a ne, ma ngbü de mere tadu te ra fa sü. Angü ah gü ba dene, “Yi ngbü fï bü elala gbü nga Miri Yesu. Fü yi angbü ele te-yi de wü bu yi. Kpah bala, yi ngbü da efï nga a efa sü, baka e te kpara ngbü sene kpah efï nga yi ne.” ⁷Ngü ka-yi la ngbü eto wazi fü a, gbü mere cïnga te ngbü kpah emere a de kpakine ne. ⁸Fü maguma a adu agu, teka ngü ka-yi de te a je, ga, “Angü yi zoro lö Miri Yesu eyi de kpa yi ꞌbasu ne.”

⁹Wü di enga wüna, ngü de te yi ngbü emere de kpala ne, ah ngbü eto tadu te a efa sü. Teka ngü la, kpara gbo nga ïrï Me tïne eyi cu fa sü de maguma a ꞌburu, teka te a je nga yi de bala. ¹⁰A ngbü kpah eku gba fü Me teka yi, de ra de biti, da endaꞌba te-a fefe, de ah ü kaje fü a, de a lügü nga a, du koro kpaka yi kpala, teka arï yi de züka rïrï. Angü wü gara du rïrï ka Me ladü, te ma rï yi di la de.

¹¹Dela gba ka-a, te a ngbü eku fü Wö nih Me, kpah fü Miri Yesu, teka de wüh ü kaje fü a, de a du koro kpaka yi kpala. ¹²Miri Yesu di de yi, da eto wazi fü yi, de yi di ele te-yi di esüka yi, de maguma yi biringbö, kpah baka e te a ngbü ele yi ne. Fü yi ale wü kpara kpah ꞌburu ba e la, anü de ngü la kpa engagira nü. ¹³Te di bala, ah le de Miri Yesu to wazi fü yi, teka fü yi ace wü *siti ngü ka-yi le ꞌburu, adu angbü emere wü ngü te ngbü ereke gbü jijia. Te ah bala, te gara, gbü sïkpï te Miri Yesu ena adu akoro tete na, de wü *malayïka ka-ye zalü ꞌburu nde, yi ena arü engagira Wö nih Me, de mere tadu, angü yi eyi de züka wü kpara kaka fanü fanü.

Dene ngü te ena areke gbü jia Me

^1-2Wü di enga wüna, nih ꞌburu nde wü kpara ka Miri Yesu. Te di bala, a ngbü emala fü yi kpekpeke, ga, “Yi di emere fï bü züka ngü, te reke areke gbü jia Me.” Angü yi je ngü la eyi gömö a, ta te a ngbü esüka yi kpala ne. Te di bala, ah le de yi nü de ngü la fï bü kpa engagira nü.

³Wü di enga wüna, Me ngbü ele de yi di engbü ba züka wü kpara ka-ni, *nzïla. Te di bala, yi mere e angbü emere waza de. ⁴Ah le de mü di engbü bü nzö de wara mü biringbö, de züka fïngangü. De mü di emere ngü fefe ereke areke, angü Me to engu fü mü me-ye. ⁵Wü kpara te ewü le ngü ka Me de ne, wüh ngbü emere ngü ba e te ewü le. Wüh fï nga wara wü baka kpara de, wüh le ewü nzö würüse tete. Gara ewü ngbü eza würüse nzö teka abï mere bi wü jaji. Amba nda-yi, yi mere e amere ngü baka nda-ewü la de, angü yi de wü kpara ka Me. ⁶A mala ta ngü la eyi fü yi kpekpeke, gü ba, “Te mü ngbü de würüse te di de wara mü de, mü baka mürü zi te ngbü ezi e ka wü bu ye.” Dela ngü te Me le ꞌduwa kpo fï de, furu afuru. Te mü ngbü emere ngü de bala, Me ena ato mere siti kuru fü mü fanü fanü. ⁷Angü ngü ka waza siti gbü jia Me ꞌduwa ba-neh-ene-la. Me ngbü ele de wü kpara ka-ni di engbü nzïla, adi emere bü duu züka ngü gbü jia ni. ⁸Dela si-ngü de te engu to *Nzïla Wazi ye tete fü yi, teka de yi di engbü nzïla. Te ah bala, ah le de yi je rïrï ka-a ne reke areke. Teka ne de, angü ah de rïrï ka Me, ah baka gele ka kötï nda de. Te di bala, te mü le ngü la de, Me ena ato kuru fü mü ato.

^9-10Dene eꞌbaꞌbasu ngü te a le amala fü yi, ah de ngü ka le-te. A wu kpo, ga, yi ngbü ele te-yi de wü bu yi, wü *kpara ka Yesu, ale fanü fanü. Angü yi kpo de ngü la eyi gügü, angü Me gü tamu ngü la eyi fü yi. Fü yi angbü ele te-yi de wü kpara ka Yesu ꞌburu gbü sü ka-yi, agbü Makedoniya de kpala ne, ale. Wü di enga wüna, a ngbü emala fü yi kpekpeke, ga, “Yi nü de wü ngü la fï bü kpa engagira nü.”

^11-12Ah le kpah de yi di eo maguma yi teka angbü ziii. Yi mere e adi ekpülü wü bu yi de. Yi di emere tima de kpa yi, teka fü yi adi emaka e-mazü, te ena atï teka yi, kpah baka e te a mala fü yi tane. Te yi ngbü emere wü ngü la bala, wü kpara te ewü le ngü ka Yesu de ne, wüh ena awu, ga, yi de kpeke wü kpara.

Dene ngü teka dudu ka Miri Yesu, füh kotö ne

¹³Wü di enga wüna, ma le amala ngü fü yi teka ngü ka wü kpara ka Me, te ewü kpi eyi ne. Te gara, Me ena azükü ewü azükü gbü kpi la. Wü kpara te ewü le ngü ka Me de ne, wüh tï awu ngü la bala nda-wü de. Fü ewü adi engbü de mere siti cïnga, da eku mere gba, teka ngü la. Yi mere e adi engbü de mere cïnga, baka nda-ewü la, de. ¹⁴Angü nih wu eyi, gü ba, Yesu kpi ta akpi, fü ah adu azükü. Kpah bala, Me ena azükü wü kpara ka-ye, te ewü to maguma wü fü Yesu, te ewü kpi eyi akpi ne, aza ewü kpaka ye agbü kpï kpala, gbü sïkpï te Yesu ena adu akoro tete.

¹⁵Ngü de te ma emala fü yi ne, ah de kpeke ngü. Ah de ngü te Miri Yesu mala me-ye. Angü engu mala ngü la, gü ba dene, “Gbü sïkpï te ni ena adu akoro tete, wü kpara ka-ni te ewü kpi eyi akpi ne, ni tï ace ewü de.” Angü wüh ena ayia fi me-wü. ¹⁶Angü gbü sïkpï la, Miri Yesu ena ayia agbü kpï kpala, adu akoro. Fü wü kpara aje ri mere *malayïka, de kono ka Me mini, teka abiti wü kpara ka Yesu Kurisito ꞌburu. Fü Miri Yesu ayia aï wü kpara ka-ye de mere ri ye. Fü wü kpara kaka te ewü kpi akpi ne, fü ewü ayia azükü fi me-wü, de to küte wü mini. ¹⁷Fütanga ngü la, Me ena aza nih de ezükü ne, fü nih ayia ꞌburu de ewü, teka fü nih anü amaka te-nih de wü Miri Yesu kpa tikpi kpala. Fü nih angbü de wü Miri Yesu, fï mere badi.

¹⁸Te di bala, wü di enga wüna, te cïnga te emere yi teka wü bu yi, te ewü kpi akpi ne la, yi di efï nga wü ngü de te ma mala fü yi ne, adi emala esüka yi, teka fü maguma yi adi egu gbü ngü la.

^1-2Wü di enga wüna, yi wu kpah bü kpo, ga, kpara biringbö, te wu sïkpï te Miri Yesu ena adu akoro tete na, ah nda ma. Te di bala, a tï amala nga sïkpï la fü yi nda-a kpah de. Angü sïkpï engu la ena ata wü kpara ata. Ah ena adi gegege baka mürü zi te ngbü ekoro gbü biti, agüka wü kpara da era ara. ³Gbü sïkpï engu la, wü kpara te ewü le ngü ka Me de, wüh ena agüka agüka. Angü wüh ngbü efï, gü ba dene, “Ani ngbü engbü ka-ani gbü züka gu sü ne zözö. Me wu ngü ka-ani nda de, ah tï ato kuru fü ani kpah de.” Te gara wüh ga, ani ceka kpï bane de, gbangbara! Miri Yesu koro eyi, teka ato kuru te ewü! Ngü la ena agüka ewü gegege baka e te keke ka yayaka ngbü egüka würüse de bu ye. Wüh tï aküwa de, angü da ewü teka afü maguma ewü nda tïne eyi ma.

⁴Wü di enga wüna, yi de wü kpara ka biti baka ewü nda-yi de. Te ah bala, sïkpï ka Miri Yesu tï agüka yi agüka baka ewü de, angü yi ngbü eo jia yi teka sïkpï la. ⁵Nih ka-nih nda-nih wü kpara ka ra-sü, angü Me lofo jia nih eyi. Nih tï adu angbü gbü biti nda-nih tïne de.

⁶Wü di enga wüna, de te nih di ka-nih nda-nih wü kpara ka ra-sü ne, nih ceka te-nih mbi, da etüka te-nih, gbü wü re-ngü ka *Satana. Nih o fïngangü ka-nih, teka amere wü ngü, te ena areke gbü jia Me. Nih mere e adu gbü ngü ka biti, baka wü bu nih ne, de. ⁷Angü wü bu nih la, wüh ka-wü de wü kpara ka biti, jia ewü nda ma. Wü kpara te ewü ele adi era ara ne, wüh ngbü era nda-wü gbü biti. Wü kpara te ewü le adi enzö fï ne, wüh ngbü enzö fï kpah gbü biti, da eküya di. ⁸Amba nih mere e amere bala de, angü nih de wü kpara ka biti nda-nih de. Nih ka-nih nda-nih wü kpara ka ra-sü. Te di bala, ah le de nih ceka te-nih mbi, teka adi emere wü ngü te ena areke gbü jia Me. Nih ena amaka wazi, teka adi emere wü züka ngü di, neh kaye? Ah le fü Miri Yesu ato wazi fü nih me-ye. Te ah bala, nih to maguma nih fü Miri Yesu, da ele Miri Yesu de maguma nih ꞌburu, da eo jia nih teka sïkpï ka dudu kaka. Teka ne de, angü nih wu eyi kpo, ga, Miri Yesu ena aküwa nih gbü sïkpï la. ⁹Nih ena aküwa fanü fanü, angü nih ꞌburu wü kpara te Me fe nih eyi, ao ba züka wü kpara ka Miri Yesu. Te ah bala la, Me ena adu ato kuru te nih, neh baye baye? Me ena aküwa nih aküwa, angü nih de wü kpara ka Miri Yesu Kurisito fanü. ¹⁰Angü Miri Yesu to te-ye akpi teka nih, te nih di de wü kpara kaka-na ne. Miri Yesu ena adu abiti nih, gbü sïkpï te engu ena adu akoro tete na. Anga ah ena adu akoro amaka nih ezükü, anga o nih kpi eyi la, engu ena abiti nih, fü nih angbü de ewü fï mere badi.

¹¹Te di eyi bala ne, wü di enga wüna, te cïnga ngbü emere yi, de yi di emala wü ngü la esüka yi, da eto wazi fü wü bu yi, teka fü yi arü kpekpeke, baka e te yi ngbü emere, zalü akoro di enatikine ne.

Dene adu rïrï, te a ngbü eto fü yi

^12-13Wü di enga wüna, ah le de yi di emere wü ngü de te reke areke gbü jia Me. Teka ngü ka wü *kovo te Me o ewü, de wüh ngbü gbü nzö yi, da erï yi de ngü ka Me ne, ah le de yi di eje ngü ka-ewü, da ecu ngü ewü. Yi di kpah ele ta-ngü te ewü. Teka ne de, angü wüh ngbü emere tima kpekpeke ꞌduwa ba-neh-ene-la teka yi. Yi mere e angbü ega yïkï esüka yi de ewü ne de.

¹⁴Te ena adi teka wü bu yi la, yi mere e adi ewü nga fü ewü kpah de. Te wü gara ewü di de wü mürü cürü la, yi mala züka ngü fü ewü, de wüh rü kpekpeke. Te wazi ewü ma, de yi di ele ta-ngü te ewü. Te wüh di kpah de mürü basa la, yi di erï ewü mba kpekpeke de wüh ce ngü la. Yi ngbü de züka maguma, da emala ngü fü wü kpara ꞌburu de gu maguma yi. ¹⁵Teka mene wü kpara, te ewü ngbü emere siti ngü eküte yi, yi mere e alügü siti ngü la fü ewü tïne de. Yi di elügü fü ewü fï bü züka ngü. Kpah bala, yi di fï bü emere züka ngü fü wü bu yi, wü *kpara ka Yesu, kpah de gara wü kpara ꞌburu nde.

^16-18Wü di enga wüna, ah le de yi ngbü da egbo nga ïrï Me gbü wü ngü ka-yi ꞌburu. Te ah di de züka ngü, anga te ena adi kpah de cïnga la, yi mere e ace da egbo nga ïrï Me de. Te yi ngbü emere bala, yi ena angbü de tadu emaguma yi. Yi di kpah eku gba fü Me de ra de biti ꞌburu. Te fïngangü ka-yi ngbü bala, dela ngü te ena areke gbü jia Me. Angü dela ngü te Me ngbü ele, ga, wü kpara ka Yesu Kurisito di emere bala.

¹⁹Te *Nzïla Wazi Me ngbü eyi erï yi emaguma yi la, yi je ꞌduwa ngü kaka-na. ²⁰Te Nzïla Wazi Me mala ngü fü yi gömö wü bu yi la, yi mere e ace ngü la kpah de. ²¹Te gara kpara ena akpo da eto rïrï fü yi de ïrï Nzïla Wazi Me la, yi di eceka kpï gbü ngü engu la kpo kpo kpo feke. Te yi wu eyi, gü ba, ah de zu ngü ka Me fanü fanü la, de yi le ngü kaka de maguma yi ꞌburu. ²²Te ah ka-ye nda de siti rïrï la, de yi ce ace asidi.

²³Wü di enga wüna, Me di de yi, da eto züka ngbüngbü zözö, de gu maguma fü yi. Me di eto wazi fü yi gbü wü sïkpï ꞌburu, de yi ngbü fï bü da emere wü ngü, te ena areke gbü jijia na. Me ceka kpï fütanga küte yi, de fïngangü ka-yi, bete maguma yi zalü nde ꞌburu, teka de yi ngbü mbi, angü yi ena amere *siti ngü. Te di bala, Miri Yesu tï eyi amaka yi baka züka wü kpara ka-ye, gbü sïkpï te engu ena adu akoro tete na. ²⁴Angü Me fe yi, de yi ngbü ba wü di ni, cu me-ye. Teka ngü la, engu ena ato wazi fü yi bala fanü fanü, angü ngü te engu mala, ah tï ace de.

²⁵Wü di enga wüna, yi ku gba fü Me teka a.

²⁶Yi to mandï ka-a fü wü di enga ni nih kpala ꞌburu, de mere lele fa sü.

²⁷Ma mala fü yi de ïrï Miri ka-nih, Yesu Kurisito, ga, “Yi ï wü bu yi, wü kpara ka Me, de yi tanga köcökpa ne fü ewü zalü nde ꞌburu.”

²⁸Miri Yesu Kurisito ngbü de yi, da eto wazi fü yi, de *züka maguma ye.

Dela adu ngü te ma mala fü yi, de-ra Pawülü.