1 Petero

Dene gina köcökpa te Petero ba fü wü kpara ka Yesu

1 Petero

Masere si-ngü

Sïmüna Petero, te di ta de biri kpara esüka wü *mürü tima ka Yesu ne, ba köcökpa ne me-ye. Gara komoko, de ïrï ye Sïlïvanü ne, le ta-ngü tete me-ye gbü tima la. Petero ba köcökpa ne fü wü kpara ka Yesu agbü wü sü de ïrï wü Potïyü, Galatïya, Kapadokïya bete Bïtunïya. Wü sü la, wüh ꞌburu gbü tö, te nih ngbü eï enatikine, Turukiya ne. Ta gügü, gbü wü re la, wüh ngbü eï tö la, Asïya. Si-ngü te Petero ba ngü la di fü ewü ne, ah teka te wü vügü ngbü eto cïnga te ewü, teka ngü ka Yesu. Fü Petero amala ngü fü ewü, de wüh rü kpekpeke. Wüh mere e ace ngü ka Yesu teka cïnga la de.

Wü ngü te Petero ba gbü köcökpa ne, wüh dene.

Sapïta 1:1-12 Ngü ka *küküwa te Me to fü nih, teka ngü ka Yesu

Sapïta 1:13–2:10 Ngü te Me le de nih di emere,

angü ah fe nih, ao baka züka wü kpara ka-ye

Sapïta 2:11–4:19 Ngü te nih ena adi emere, gbü wü cïnga te ngbü emere nih ne

Sapïta 5:1-4 Ngü teka wü *kovo gbü tima ka Yesu

Sapïta 5:5-14 Ngü teka wü kpara ka Yesu ꞌburu

Dene mandï ka Petero fü wü kpara ka Yesu

¹De-ra Petero, te ma di de *mürü tima ka Miri Yesu Kurisito ne, ma to mandï fü yi, wü kpara ka Me, te yi baya baka wü ganzi kpara, gbü wü gara sü gbü tö ka Asïya, gbü nzö kötï ka Potïyü, Galatïya, Kapadokïya bete Bïtunïya1:1 Wü sü la ta ꞌburu de nga nzö wü kötï gbü tö de ïrï ye Turukiya ne. ne ꞌburu. ²Angü Wö nih Me fe yi me-ye gügü. Fü *Nzïla Wazi Me ayia afü yi tïne wü kpara ka Me, teka fü yi angbü emere ngü ka Yesu *Kurisito. Angü *ngüte Yesu zürü yi eyi *nzïla gbü *siti ngü ka-yi. Me ngbü de yi, de ah to gu ngü fü yi fa sü di, teka *züka maguma ye.

Dene ngü teka küküwa te Me to fü nih, teka ngü ka Yesu

³Wü di enga wüna, nih gbo nga ïrï Me, te di de Wö ye Yesu Kurisito ne, angü ah wu cïnga nih, fü ah ayia aküwa nih gbü wü *siti ngü, te nih ngbü ta emere, afü nih ba wü di ye tete. Te di bala, nih ngbü de tadu, fü nih angbü eo jia nih ꞌduwa teka wü züka ngü, te Yesu ena ato fü nih te gara, agbü sü ka-ye agbü kpï kpala ne. Angü Me zükü Yesu eyi gbü kpi. Amba sidi nga kpi ka-nih, engu ena adu azükü nih kpah bala, fï mere badi, fü nih angbü agbü sü kaka agbü kpï. ⁴Me reke kpah mere bi wü züka ngü eyi fü nih kpala, te tï anza kpo de. Angü agbü kpï kpala, siti ngü nda ma, cïnga ma, kpi kpah ma. ⁵Me ena angbü eceka kpï fütanga yi me-ye gbü wazi ka-ye, angü yi to maguma yi eyi fefe na. Engu ena angbü fï bü da emere kpa te yi, zalü akoro di gbü *adu sïkpï, fü ah adu aküwa yi fï mere badi.

⁶Te di bala, ah reke fa sü, te yi ena angbü de tadu teka ngü la. Amba tïtïne yi ngbü engbü la de cïnga, teka bi wü ngü te ngbü embü yi gbü wü sïkpï ne. ⁷Ah reke fa sü te wü cïnga la ngbü embü yi bala, teka ato wazi fü yi. Ah baka ngü ka se, te wüh ngbü emï kpa esa boro. Angü wüh ngbü eto se la gbü wa, fü ah ambe ambe ꞌduwa ba-neh-ene-la, teka de züka se-tima koro gbügbü. Amba ngü ka maguma yi ka-ye memere gbü jia Me, fa ngü ka se la ka, angü ngü ka se la ena anza anza. Amba te yi to maguma yi fanü fanü fü Me la, ngü ka-yi tï anza kpo fï de. Te di bala, Yesu Kurisito ena agbo nga yi, gbü sïkpï te engu ena adu akoro, asere te-ye tete fü wü kpara ꞌburu te gara ne. ⁸Ah fanü, yi wu Yesu Kurisito de jia yi nda-yi de, amba ma wu eyi kpo, gü ba, yi le engu eyi cu de maguma yi. Tïtïne dene, yi tï awu engu de jia yi kpah la de, amba yi to maguma yi eyi fefe na, fü yi angbü de mere tadu teka ngü la. ⁹Angü yi wu eyi kpo, gü ba, Me ena aküwa ani aküwa fï mere badi, teka te ani to maguma ani eyi fü Yesu ne.

¹⁰Wü *mürü dofo ka Me mala ta nga *küküwa la eyi gügü, gü ba, “Me ena aküwa wü kpara ka-ye, teka *züka maguma ye.” Fü ewü ayia afï ngü teka ngü la afa sü. Fü ewü angbü egïrï da ewü, teka de ani wu si-ngü gbü ngü la. ¹¹Amba *Nzïla Wazi ka Yesu, te di ta emaguma ewü ne, ayia asere fü ewü, gü ba, Me ena atima gara kpara te ena aküwa nih. Amba kpara la ena azü mere cïnga, fü ah akpi. Fü Me adu azükü engu gbü kpi la, de mere wazi ka-ye. Te wü mürü dofo la je ngü la, fü ewü ayia ao to wü ꞌburu, teka awu si-ngü la mbi mbi mbi. Anga wü ngü la ena amere te-wü baye baye? Anga neh elaye? ¹²Fü Me ayia asere ngü fü wü mürü dofo la, gü ba, ngü de te ewü ngbü emala nganga la, ah tï amere te-ye gbü wü lakï ka-wü ne, nda la de. Ngü la ena amere te-ye te gara. Angü ngü ta te ewü ngbü emala nganga na la, ah ka-ye de ngü ka Yesu, te wü *mürü tima kaka ngbü kpah emala nganga na fü yi, gbü wazi ka Nzïla Wazi Me ne. Ngü ka Yesu la, wü *malayïka ka Me ngbü ta kpah ele de ani wu si-ngü gbügbü na.

Dene ngü te Me le, de nih di emere zu ngü gbü jia ni

¹³Te di bala, ah le de yi reke te-yi ngbü nzo, teka adi emere züka ngü gbü jia Me. Yi di etüka te-yi atüka, da ecï sü! Yi di eo jia yi ꞌburu ꞌburu teka *küküwa, te Me ena ato fü yi, gbü *adu sïkpï, te Yesu ena adu akoro tete, asere te-ye fü wü kpara füh kotö ne ꞌburu. ¹⁴Ah le de yi di emere rïrï ka Me, angü yi de wü di Me. Yi mere e adu angbü emere wü *siti ngü, te maguma yi ngbü ele, baka ta te yi ngbü emere gügü, ne de. Yi ngbü ta emere wü ngü la bala, angü yi wu ngü ka Me mbi mbi la de. ¹⁵Amba ah le de yi ce wü siti ngü ka-yi, fü yi adu angbü *nzïla, gbü wü ngü ka-yi, te yi ngbü emere, ꞌburu. Angü Me ï yi me-ye, de yi ngbü nzïla, baka te engu di kpah nzïla ne. ¹⁶Angü ah kpah baka ngü te Me mala gbü Ngari ye, gü ba, “Ah le de wü kpara ka-ni ngbü nzïla, angü ni ka-ni nzïla.”1:16 Mü ena amaka ngü la gbü buku ka Rïrï ka Gele ka wü Levi 11:44-45 bete 19:2.

¹⁷Yi ngbü eku gba fü Me, da eï engu, Wüba. Amba yi wu awu, gü ba, engu de kpara te ngbü eye süka wü ngü ka wü kpara ꞌburu mbi mbi mbi, ereke areke. Engu de kpara te ngbü efolo te-ye kperekede nda de. Te di bala, te yi la ladü ezükü füh kotö sene la, ah le de yi di ecu ngüngü, da emere rïrï kaka-na. ^18-19Angü yi wu eyi, gü ba, Yesu Kurisito küwa ani eyi, gbü töndö gele ka wü kundu ani ne. Te di bala, e ta te Yesu to, teka afa yi di, ah de neh ene? Ah ta de töndö e, baka jiase ne engu? Ah bala de! Yesu kpi cu me-ye, teka afa yi de *ngüte ye, angü ngüngüte fa wü e ꞌburu. Angü Yesu ka-ye baka züka *kambiliki, te keke di tete na ma, de te wüh wa teka areke ngü di, ezengba nih de wü Me ne. ²⁰Me fe engu, o ta kü eyi gügü, teka aküwa nih, o Me mere kotö ne la de. Fü Yesu ayia akoro gbü wü adu sïkpï ne, teka aküwa nih. ²¹Teka ngü ka Yesu la, yi lala eyi gbü ngü ka Me. Yesu Kurisito to wazi la eyi fü yi, angü Me zükü engu gbü kpi, fü ah adu ato mere wazi fefe, agbü sü ka-ye agbü kpï. Te di bala, ah le de yi o jia yi te ngü ka Me, da eto maguma yi ꞌburu fefe na. Angü Me tï eyi aküwa yi fanü fanü.

²²Wü di enga wüna, ah le de yi di ele wü bu yi de maguma yi biringbö. Yi tï eyi amere ngü la tïtïne bala, angü yi fü maguma yi eyi, du le zu ngü ka Yesu Kurisito. Te di bala ne, ah le fü yi adi ele wü bu yi baka wü di enga ni yi. ²³Angü Me bï yi eyi toto baka wü di ye. Tïtïne nguwa yi tïne baka nguwa wü kpara de füh kotö, de te ewü ena anza anza, ne nda de. Yi tïne eyi nguwa wü kpara ka Me, te tï anza de. Angü yi le zu ngü ka Me, te ena ato *küküwa fü yi, ne eyi de maguma yi ꞌburu. ²⁴*Mürü dofo Yïsaya ba ta ngü la eyi gbü *Ngari Me, gü ba, “Wü kpara füh kotö ne ꞌburu, baka yi-rü, te su fa sü. Angü yi-rü la ngbü engbü mba teka sïkpï cüküꞌdaye, fü ah ayia aürü, anza ꞌburu. ²⁵Amba Ngari Me tï anza nda de. Ah ena angbü ka-ye fï mere badi.”1:25 Mü ena amaka ngü la gbü Yïsaya 40:6-8. Amba ngü ka Me, te wüh mala nganga na la, ah de ngü ka Yesu Kurisito, te tï anza de.

¹Te di bala, wü di enga wüna, ah le de yi ce ngü ka siti maguma, fiti, mani, ngü ka maguma ꞌbasu ꞌbasu, kanga, bete siti ngü mündü, ꞌburu asidi. ²Angü Me bï yi eyi toto. Yi tïne eyi baka wü vürü jaji. Te di bala, ah le de yi o gümü ngü ka Me emaguma yi, baka wü jürü jaji, te ewü ngbü eo gümü ka, ala. Teka ngü la, yi ena aga gbü ngü ka Me, fü yi amaka *küküwa te gara gbügbü na. ³Angü ah baka ngü ta te wüh ba gbü *Ngari Me, gü ba, “Me to Ngari ye eyi fü yi baka e-mazü, te türü fa sü.”2:3 Mü ena amaka ngü la gbü Ci ka wü Davidi 34:8.

Dene ngü te Me fe yi di, ao baka züka wü kpara ka-ye

⁴Wü kpara de füh kotö ne, wüh le ngü ka Yesu nda-wü de. Amba Yesu ka-ye baka züka rü, te di de miri ka kambü. Baka ta te wü kpara ngbü ejï *Mere Kambü ka Me, wüh ce rü la kpo, angü wüh ceka rü la gbü jia wü baka töndö e. Amba Me fe rü la me-ye, baka züka rü, te wü bu ye ena amaka wazi, alala ꞌburu eküküte. Kpah bala, Me fe Miri Yesu me-ye, fü ah aza engu, ao baka züka kpara ka-ye. Te di bala, yi nü enü kpaka Yesu, fü yi alala eküküte na, ⁵teka fü yi angbü kpekpeke, baka züka wü rü, te Me ena ajï kambü ka-ye di. Me ena ao yi kpah baka wü *kovo ka-ye, fü yi angbü emere tima gbü kambü kaka la. Te di bala, teka ngü ka Yesu Kurisito, *Nzïla Wazi Me ena angbü eto wazi fü yi me-ye, teka fü yi adi emere tima la di mbi mbi mbi, gbü jia Me.

^6-7Wayi, yi to maguma yi eyi fü Miri Yesu. Yi wu engu kpah eyi, baka kpeke kpara te ena aküwa yi, angü Me mala eyi gbü Ngari ye, gü ba, “Ni fe züka Miri eyi, te di baka kpeke rü kambü, te ni ena ao engu memere, teka de engu mere tima ka-ni agbü Yerüsalema. Mene wü kpara, te ewü ena azoro rü la de kpa wü ꞌbasu, wüh ena aküwa fï mere badi.”2:6-7 Mü ena amaka ngü la gbü Yïsaya 28:16. Amba teka mene wü kpara, te ewü le ngü kaka de, ngü ka-ewü ena adi gegege baka gara ngü, te wüh ba gbü Ngari Me, gü ba, “Wü gara kpara ngbü ta ejï Mere Kambü ka Me. Fü ewü amaka gara mere rü, te ewü le nda-wü de. Fü ewü ace rü la asidi. Tïtïne rü ta te ewü ce la, Me du o tïne eyi mere kpeke rü de wazi ye, te wü bu ye na ngbü engbü ꞌburu eküküte.”2:6-7 Mü ena amaka ngü la gbü Ci ka wü Davidi 118:22.⁸Te di bala, mene wü kpara, te ewü le engu de ne, wüh ena amaka mere cïnga gbü ngü la, kpah baka gara ngü te wüh ba gbü Ngari Me gü ba, “Amba, te wüh le ngü ka rü la de la, rü la ena atïrï kaje fü mere bi wü kpara, wüh le ta de ani nzi asidi, amba wazi ewü nda ma, fü ewü atï ꞌburu kötö.”2:8 Mü ena amaka ngü la gbü Yïsaya 8:14. Si-ngü de te wüh ena atï tete ne, angü wüh le aje Ngari Me nda-wü de. Me mala eyi bala.

⁹Amba nda-yi, yi ka-yi eyi de nguwa wü kpara te Me fe me-ye. Yi kpah baka wü kovo te Me fe ewü, teka amere tima ka-ye. Yi ka-yi fanü fanü zu wü kpara ka Me. Te di bala ne, ah le de yi di egbo nga ïrï Me, teka fü yi adi emala nga wü kpeke ngü, te Me mere fü yi ne. Angü engu fe yi me-ye, fü ah ayia aküwa yi gbü *siti ngü, teka fü yi adi engbü gbü züka ngü kaka-na. ¹⁰Ta gügü, yi de wü kpara ka Me nda-yi de. Amba tïtïne Me za yi, o eyi zu wü kpara ka-ye tete fanü fanü, angü ta gügü, yi wu *züka maguma ka Me nda-yi kpah de. Amba tïtïne Me sere züka maguma ye eyi fü yi.

Dene wü ngü te nih, wü kpara ka Yesu ena adi emere

¹¹Wü di enga wüna, nih de wü kpara ka kotö ne nda-nih de. Nih ka-nih de wü kpara ka Yesu. Nih ngbü engbü füh kotö sene, baka wü ganzi kpara. Te di bala, ma ngbü emala fü yi kpekpeke, gü ba, yi ce ngü ka siti gümü wü ngü de füh kotö ne asidi, angü dela wü ngü te ena asiti ngü ka-yi gbü jia Me. ¹²Ah le de yi di emere fï bü wü züka ngü, angü wü kpara te ewü le ngü ka Me de ne, wüh ngbü kpah fï da eceka ngü te yi ngbü emere. Angü wüh ena angbü emala ambalaꞌba eküte yi, gü ba, yi de siti wü kpara. Amba, te yi ngbü ka-yi fï bü emere wü züka ngü te nga wü sïkpï ꞌburu la, e-wu neh da, Me ena afü maguma ewü, teka fü ewü adu angbü egbo nga Me, teka wü züka ngü ka-yi, de te yi ngbü emere la.

^13-14Wü di enga wüna, ah le de yi di ecu ngü wü mere kpara, te ewü ngbü gbü nzö yi füh kotö ne ꞌburu. Kpah bala, ah le de yi di eje rïrï ka-ewü, anga te ah de mere miri, te di mürü tö, anga wü jürü ewü. Angü Me fe wü miri la, o me-ye, teka adi eto kuru te wü kpara, te ewü ngbü emere *siti ngü ne. Kpah bala, miri ena angbü egbo nga mene wü kpara, te ewü ngbü emere züka ngü ne. Te di bala, ah le de yi di ecu ngü wü miri, teka fü wü kpara adi egbo nga ïrï Miri Yesu teka ngü ka-yi la. ¹⁵Dela ngü te Me ngbü ele, teka de yi di emere. Te yi ngbü fï bü emere züka wü ngü bala la, wü töndö kpara tï adi emala siti ngü eküte yi nda-wü de. Ngü ena anza gömö ewü ꞌburu. ¹⁶Fanü fanü, yi de wü labï ka siti ngü nda-yi tïne de, amba yi mere e afï, gü ba, te ah bala la, ani tï eyi amere wü siti ngü, baka te ani ngbü ele, ne de, angü yi ka-yi de wü labï ka Me. ¹⁷Yi mere e aceka kpara kpaakpa de. Yi le wü bu yi, wü kpara ka Yesu de maguma yi ꞌburu, angü wüh de wü di enga ni yi. Yi to maguma yi ꞌburu ꞌburu fü Me, da ecu ngüngü. De yi di kpah ecu ngü wü miri.

Dene ngü teka wü kpara, te ewü ngbü emere tima esa

rïrï ka wü mere kpara ka-wü

¹⁸Te mü de labï la, ah le de mü di ecu ngü mere kpara ka-mü, da eje rïrï kaka-na. Ngü ma, te engu ngbü emere mü ereke areke, anga engu ngbü emere mü esiti la, mü ena adi fï bü eje rïrï kaka-na. ¹⁹Kükürü de, angü te wüh ngbü eto cïnga te mü kükürü, fü mü angbü etüka te-mü gbü cïnga la, teka ngü ka Me la, ngü ka-mü ena areke gbü jia Me cu afa sü. Engu ena ato mere takpa fü mü, te gara, gbü ngü la. ²⁰Te wüh ngbü emï mü, teka *siti ngü te mü ngbü emere la, wüh mï mü mbi, angü Me le siti ngü kpah de. Amba, te mü ngbü fï bü emere züka ngü, fü ewü angbü emï mü, fü mü angbü ka-mü fï bü etüka te-mü, angbü ka-mü de gu maguma gbü ngü la, ngü ka-mü la ena areke gbü jia Me afa sü.

²¹Cïnga la, ah de tima te Me to fü mü, angü Yesu Kurisito zü ta cïnga teka mü, kpah bala. Te di bala, Yesu le de mü di emere wü ngü baka nda-ni, da elala gbü nga ni. ²²Miri Yesu mere ta siti ngü nda kü de. Kpah bala, engu mala ngü ka wu nda de, ah fiti kpara nda kpah de. ²³Wüh ngbü ta esoko engu, amba engu soko ewü nda de. Wüh to mere cïnga tete, amba engu mere siti ngü fü ewü kpah de. Amba ah ce wü ngü ka-ye, o ꞌburu esaka Me, de Me kolo lïya la me-ye. ²⁴Yesu Kurisito kpi füh *rü gbegbete, teka afa nih gbü siti wü ngü ka-nih, kpah teka de nih ce wü siti ngü ka-nih asidi. Fü nih adu angbü emere fï bü züka wü ngü, te ena areke gbü jia Me, te nga wü sïkpï ꞌburu. Te di bala, cïnga ka Yesu la küwa nih eyi gbü wü siti ngü ka-nih. ²⁵Ta te enga gina, yi ngbü baka wü kambiliki, te ewü dürü adürü agbü gü. Amba enatikine Me maka yi, za du koro di eyi kpaka Yesu, de Yesu di eceka kpi fütanga yi me-ye.

Dene ngü teka wü komoko de wü wara wü 

¹Teka ngü ka-yi, wü würüse, ah le de yi di kpah eje rïrï ka wü watï yi. Angü, te wü watï yi le ngü ka Me de la, e-wu neh da, wüh ena adu awu züka ngü, de te yi ngbü emere la, fü ewü adu afü maguma wü, ale ngü ka Me, o yi mala ngü ka Me fü ewü la de. ²Angü wüh ena angbü ewu, gü ba, wü ngü ka-yi, te yi ngbü emere, ka-wü ꞌburu mbi, angü yi to maguma yi eyi fü Yesu reke areke fanü. ^3-4Te mü le areke te-mü, de ni su asu gbü jia watï ni la, mü mere e afï nga susu ka-mü la de. Ah le de mü di engbü de züka fïngangü gbü nzö mü. Mü mere e ao maguma mü gbü ngü ka ma-i su-nzö mü, da efüfü de wü lara ye, gbü wü to mani de tïtïne, ne de. Kpah bala, mü mere e ao fïngangü ka-mü, teka kpeke wü lara e ka ngürü, anga ꞌbiri, te wüh ngbü ese de bi jiase, ne de. Yi mere e adi eto wü gara lara bongo, te wüh ngbü etükü gbü siti kaje, te ngbü esiti fïngangü ka wü kpara, ne kpah de. Ah le de mü o to mü, teka adi emere züka ngü, te ena areke gbü jia Me, da engbü ziii, baka züka kpara de gu maguma ye. Angü te mü ngbü ziii kpah de gu maguma mü bala, ngü la tï angbü kükürü de. Mü ena amaka züka ngü te gara gbügbü. ⁵Angü ta gügü, gina wü würüse, te wüh ba ngü ka-ewü gbü *Ngari Me ne, wüh ngbü ta emere züka wü ngü bala. Fü ewü angbü eje rïrï ka wü watï wü. ⁶Baka Sara,3:6 Sara ta de wara Abarayama. Mü ena amaka ngü ka Sara gbü Gina Ngü 12-23. ta te ngbü eje rïrï ka *Abarayama. Fü ah angbü eï engu, gü ba, “Mere kpara.” Tïtïne, yi eyi de wü di enga Sara, angü yi ngbü eyi emere züka ngü, baka te engu ngbü ta emere ne. Te di bala, ah le de yi di erü kpekpeke. Yi mere e ace ngü ka Me, teka ngü ka cürü ka wü ngü füh kotö ne, de.

⁷Kpah bala, de-yi, wü komoko, ah le de yi di engbü de wü wara yi te züka kaje, de züka fïngangü. Yi mere e adi ekpa ngü ewü, da efala ewü, ne de. Fanü fanü, wazi ewü baka nda-yi, nda ma. Amba Me küwa ewü eyi, teka *züka maguma ye, kpah baka te engu küwa yi. Ah le de yi di engbü tundu de ewü, ereke areke de züka fïngangü, teka fü Me adi eje gba ka-yi ereke areke.

Dene mene ngü te ma le amala fü yi ꞌburu

⁸Wü di enga wüna, ah le de yi di engbü de wü bu yi ereke areke, de fïngangü ka-yi biringbö. Ah le de yi di ewu cïnga wü bu yi, kpah da ele te-yi esüka yi, de maguma yi ꞌburu. Yi mere e adi eo ngü ka-yi memere de. ⁹Te gara kpara mere siti ngü fü mü la, mü mere e alügü na siti ngü la fefe na de. Te kpara soko mü la, mü mere e asoko engu kpah de. Mü du, mü mala züka ngü fefe na, angü dela eyi ngü te Me le de mü di emere. Te mü mere bala, Me ena ato wazi fü mü ato fanü. ^10-11Ah baka ngü te wüh ba gbü *Ngari Me, gü ba, “Te mü le aküwa, angbü de tadu la, ah le de mü ce *siti wü ngü ka-mü ꞌburu, adu angbü emere wü ngü, te ena areke gbü jia Me. Ah le de mü ce ngü ka di-ngü, mü mere e asu wu eküte wü bu mü kpah de. Mü to te-mü, teka adi engbü mbi de wü bu mü, de gu maguma. ¹²Kükürü de, angü Me ngbü eceka kpï fütanga mene wü kpara, te ewü ngbü emere ngü ereke areke gbü jia ye ne, fü engu angbü eje gba ka-ewü. Amba teka mene wü kpara, te ewü ngbü nda-wü fï bü da emere siti ngü ne, Me le ngü ka-ewü nda de.”3:12 Mü ena amaka ngü la gbü Ci ka wü Davidi 34:12-16.

Dene cïnga te yi ena azü, teka züka wü ngü, te yi ngbü emere

¹³Wü di enga wüna, ah le de yi di eo to yi ꞌburu, teka adi emere züka wü ngü, te ena angbü ereke gbü jia Me. Te yi mere bala, gara kpara te ena amere yi esiti, gbü ngü la, nda ma. ¹⁴Anga te yi ngbü ezü cïnga, teka züka wü ngü te yi ngbü emere la, ah le de yi ngbü de tadu! Angü Me ena ato wazi fü yi me-ye. Yi mere e akpe cürü de. Yi fï nga ngü kpah de. ¹⁵Yi di egbo nga ïrï Yesu emaguma yi, angü engu de Miri ka-yi. Ah le de yi reke te-yi, angbü nzo, angü wü kpara ena ayi-ta yi, teka si-ngü de te yi to maguma yi di fü Yesu ne, gü ba, “Yi ngbü eo to yi teka ngü ka Yesu, neh teka ne?” Te di bala, ah le de yi ngbü de züka ngü gömö yi, te yi ena alügü fü ewü. Ah le de yi di elügü ngü fü ewü ferrre, de züka fïngangü. ¹⁶Fü yi angbü fï bü emere wü ngü te reke areke gbü jia Me. Angü wü gara kpara ladü, te ewü ngbü efala nih, da emala ambalaꞌba eküte nih, gü ba, nih, te nih di de wü kpara ka Yesu ne, nih de siti wü kpara. Amba te yi ngbü fï bü da emere züka ngü la, jia ewü ena avi, fü ngü adu anza gömö ewü. ¹⁷Amba, te wüh to cïnga te yi, zu bü teka züka wü ngü ka-yi la, ngü ma, ngü ka-yi ena areke gbü jia Me. Amba te yi mere *siti ngü, fü ewü ato cïnga te yi teka ngü la, ngü la ena adi de siti ngü gbü jia Me afa sü. Angü mazü cïnga teka züka ngü reke me-ye, da engu te mü ena azü cïnga teka siti ngü ne.

¹⁸Fanü fanü, ah le de yi fï la nga ngü ka Yesu Kurisito. Engu ngbü ta emere ka-ye fï bü züka wü ngü, fü ewü ayia ato mere cïnga tete, teka züka ngü kaka la. Fü ah ayia akpi, teka aküwa nih, gbü *siti ngü ka-nih, angü ngü ka-nih ta gbü jia Me esiti fa sü. Te di bala, fü Yesu ayia akpi afa nih gbü siti ngü la, teka fü nih afü maguma nih, adu ara fü Me. Wüh mörö bü küte Yesu, amba *Nzïla Wazi Me du zükü engu gbü kpi la eyi. Ah tï adu akpi tïne de. ¹⁹Kpah bala, fü Nzïla Wazi ka Me ayia ato wazi fü Yesu, teka de ah nü agbü sü, te kuru wü kpara, te ewü kpi akpi, ngbü tete gbü ku. Fü ah ayia amala ngari Me fü kuru wü kpara la. ²⁰Dela wü kpara ta gügü, gbü wü lakï ka mere kundu nih, *Nüwa, te ewü le ngü ka Me de ne. Angü gbü sïkpï ta te Nüwa ngbü egoro *zabu ka-ye tete, Me ngbü ta de gu maguma, teka ace lö-ra fü wü kpara la, de wüh fü maguma wü, amba wüh le nda-wü de. Te di bala, ah ta bü wü kpara ngbee ꞌbajena, wü Nüwa de wü di ye, te ewü küwa esaka mere siti ngu, ta te si füh kotö ꞌburu ne.3:20 Mü ena amaka ngü ka Nüwa gbü Gina Ngü 6 - 9.²¹Ngu te si la, ah ge baka ngu, te wüh to *babatïza di fü yi, teka fü yi aküwa. Angü ngu la, ah baka kükürü ngu, te yi ngbü ezürü küte yi di ne, nda de. Si-ngü la, ah teka asere fü wü kpara, gü ba, yi to maguma yi eyi fü Me, teka fü yi aküwa, teka ngü ka Yesu Kurisito, te zükü gbü kpi ne. ²²Angü Yesu togo eyi agbü sü ka Me agbü kpï. Engu ngbü engbü ka-ye füh kpökpö, gbü kokpa ka Me, baka miri. Engu ngbü gbü nzö wü kpara ꞌburu, wü *malayïka ka Me, wü muruyi, siti wü di enga me, de wü miri ka-wü kpah ꞌburu.

Dene ngü te yi ena ao to yi teka adi emere

¹Wü di enga wüna, yi fï la nga mere cïnga, te Yesu zü füh kotö ne. Te di bala, yi i maguma yi gö! de yi rü kpekpeke. Ah le de fïngangü ka-yi di kpah baka nda Yesu, angü wüh ena ato cïnga te yi kpah baka nda-ka. Angü te yi zü cïnga füh kotö sene la, ah esiti de, angü yi küwa gbü ku ka *siti ngü eyi. ²Te di bala, ah le de yi ce gümü siti wü ngü de füh kotö ne asidi, teka fü yi angbü fï bü da emere mene wü ngü, te ena adi ereke gbü jia Me, te nga wü sïkpï ꞌburu, angü yi la ladü de jia yi füh kotö sene. ³Ta te enga gina, o yi to maguma yi fü Me la de ne, yi ngbü tane emere wü ngü ka lümü, baka te yi ngbü ele. Angü yi ngbü ta emere waza bü fa fa fa, da enzönzö wü fï, eküya di, teka angbü elolo wü siti bï di. Kpah bala, yi ngbü kpah emere gele ka faranda ka wü kundu yi, kpah baka mene wü kpara, te ewü le ngü ka Me de ne. Amba enatikine, ah le de yi ce wü ngü la asidi, angü yi tïne eyi de wü kpara ka Yesu. ⁴Fanü fanü, wü diri wü awuba yi, te ewü le ngü ka Me de ne, ngü la ena adi gbü jia ewü esiti. Angü tïtïne, yi le adu angbü emere siti wü ngü ka lümü baka ewü nda-yi tïne de. Te di bala, wüh ngbü efala yi teka ngü la. ⁵Amba nda-yi, yi mere e afï nga ngü ka-ewü la nda-yi de, angü wüh ena akoro te gara engagira Me, fü Me ayi-ta ewü, teka wü siti ngü ka-ewü la. Angü gbü *adu sïkpï, Me ena aye süka ngü ka wü kpara ꞌburu, mene ewü de te ewü di la ezükü, bete mene ewü de te ewü kpi eyi ne. ⁶Dela si-ngü te Yesu mala ngü ka Me di, kpah cu fü mene wü kpara, de te ewü kpi eyi akpi ne. Ngü ma, baka te küte ewü kpi kpah eyi, baka nda wü gara kpara ꞌburu ne, kuru ewü ena aküwa kpah aküwa agbü sü ka Me agbü kpï, fï mere badi.

⁷Wü di enga wüna, adu sïkpï koro eyi gbamari. Te di bala, ah le de yi ceka te-yi mbi. Yi di engbü de züka fïngangü gbü nzö yi, teka fü yi adi eku gba fü Me ereke areke. ⁸Mere kpeke ngü, te ena areke te Me, afa wü gara ngü di ꞌburu le, ah de ngü te yi ena adi ele te-yi esüka yi de maguma yi biringbö. Angü te yi ngbü ele wü bu yi la, yi ena adi kpah eboro siti ngü ka-ewü. ⁹Teka wü bu yi, wü kpara ka Yesu, te ewü ena angbü ekoro kpaka yi, baka wü ngba ne, ah le de yi di eza ewü agba yi, gbü mürü, de mere tadu.

¹⁰Me to wazi eyi fü yi ꞌburu, teka fü yi adi emere tima ka-ni di, te wü kaje kpikpi ye kpikpi ye. Ah le de yi di eto te-yi ꞌburu, adi emere tima te engu to fü yi la, teka adi eto wazi fü wü bu yi, baka te Me ngbü ele. ¹¹Te mü ngbü erï wü kpara de ngari Me la, ah le de mü di emala fï bü mene ngü, te Me ngbü esere fü mü me-ye. Te tima ka-mü nda-ye, teka adi ele ta-ngü te wü bu mü la, ah le de mü mere tima la de maguma mü ꞌburu, te nga wazi de te Me to fü mü la. Ah le fü yi angbü emere fï bü wü züka ngü, teka fü wü kpara angbü egbo nga ïrï Me, teka ngü ka Yesu Kurisito. Ah le de nih di egbo nga Me, da ecu ngüngü na fï mere badi, angü engu de mere kpeke mürü wazi. Ah di bala.

Dene kpah gara ngü ka cïnga, te ena amere wü kpara ka Yesu

¹²Wü di enga wüna, te yi maka mere cïnga, teka ngü ka Yesu la, ngü la mere e aga gbü jia yi afa sü de. ¹³Amba ah le de yi ngbü de mere tadu, kükürü de, angü Yesu Kurisito maka cïnga ta kpah baka nda-yi la. Te di bala, yi ena amaka mere tadu te gara, gbü sïkpï te Yesu Kurisito ena adu akoro füh kotö sene tete, de mere wazi ye. ¹⁴Te wüh soko mü teka ngü ka Yesu Kurisito la, ah de züka ngü, angü ngü la ngbü esere, gü ba, wazi ka *Nzïla Wazi Me ladü emaguma mü. ¹⁵Amba, te wüh to kuru te mü, teka te mü mere siti ngü, anga mü zi e, anga mü mörö kpara, anga mü ngbü erï gbü ngü ka wü kpara, de wüh di emere baka fïngangü ka-ni la, ngü la tï nda de. ¹⁶Te wüh to cïnga te yi, teka ngü ka Yesu Kurisito la, yi mere e angbü de lümü de. Yi di egbo nga ïrï Me, angü wüh ena awu, gü ba, yi de wü kpara ka Yesu Kurisito, teka ngü la.

¹⁷*Adu sïkpï te Me ena akolo lïya ka wü kpara tete, koro eyi gbamari. Engu ena akolo ngü ka wü kpara ka-ye te enga gina. Amba teka mene wü kpara, te ewü le ngü kaka de ne, ngü ka-ewü ena adi baye? Ah ena adi de mere siti cïnga! ¹⁸Baka ngü te wüh ba gbü *Ngari Me ta gügü, gü ba, “Ah ena adi kpekpeke fü züka wü kpara, te ewü ena amaka *küküwa, angü wüh ena azü cïnga feke. Amba, teka mene wü kpara, te ewü le ngü ka Me de ne, wüh tï aküwa kpo fï de.”4:18 Mü ena amaka ngü la gbü buku ka Ngü Mani 11:31.

¹⁹Dela ngü te ma le amala fü yi, te Me ce mba yi, de yi zü cïnga teka ngü ka Yesu Kurisito la, ah le de yi to maguma yi ꞌburu fefe, de yi ngbü fï bü da emere züka wü ngü, angü toto tï aïrï te yi de.

Dene ngü te ma le amala fü yi, wü kovo ka Me

¹Wü di enga wüna, ma kpah de mere *kovo ka Me baka yi. Ma wu cïnga te wüh to eküte Miri Yesu Kurisito ne, cu de jia ra. Nih ngbü ꞌburu eo jia nih eküte Yesu, angü engu ena adu akoro füh kotö sene de mere wazi ye. Engu ena ato kpah wazi fü nih, wü kpara ka-ye, gbü sïkpï la. ²Te di eyi bala ne, ma ngbü emala fü yi, wü mere kpara, kpekpeke, gü ba, ah le de yi ceka kpï fütanga wü *kpara ka Yesu mbi mbi mbi. Angü wüh baka wü kambiliki, te Me to ewü eyi esaka yi, teka fü yi adi eceka kpï fütanga ewü. Yi mere e amere tima la de maguma yi ꞌbasu ꞌbasu de. Yi mere tima la de tadu, angü Me to tima la fü yi cu me-ye, de yi di emere. Yi mere e angbü de gümü jiase de. Amba ah le de gümü wü kpara ka Yesu la di emere yi me-ye, teka fü yi adi eceka kpï fütanga ewü ereke areke. ³Yi mere e angbü gbü nzö wü kpara ka Yesu la de wazi de, angü Me to ewü me-ye esaka yi. Yi di erï ewü ferrre. Yi di kpah fï bü emere züka wü ngü, te nga wü sïkpï ꞌburu, teka fü ewü awu züka kaje te yi ngbü emere la, fü ewü adi emere kpah bala. ⁴Te yi mere bala, Yesu, te di de mere kpara ka-nih ne, ena ato mere wazi fü yi, te tï anza de, gbü sïkpï te engu ena adu akoro tete.

Dene ngü te ma le amala fü wü kpara ka Yesu ꞌburu

⁵Teka ngü ka-yi, wü kaꞌdörö, ah le de yi di eje rïrï ka wü mere kpara ka-yi. De-yi, wü *kpara ka Yesu ꞌburu, ah le fü yi adi eo ngü ka-yi kötö, da ele ta-ngü te wü bu yi ferrre. Angü wüh ba ta eyi gbü *Ngari Me, gü ba, “Te mü ngbü ecu ngü mü la, Me tï ale ngü ka-mü nda de. Amba te mü ndaꞌba te-mü fefe, baka mürü cïnga la, Me ena ato wazi fü mü, teka *züka maguma ye.”5:5 Mü ena amaka ngü la gbü buku ka Ngü Mani 3:34.⁶Te di bala, ah le de yi füwa te-yi engagira Me, angü engu tï eyi ato wazi fü yi gbü sïkpï ka-ye, te engu le me-ye. ⁷Yi mere e asiti fïngangü ka-yi, angbü de cïnga teka wü e, de. Yi ce wü ngü la ꞌburu esaka Me, angü engu tï eyi aceka kpï fütanga yi me-ye.

⁸Yi rü kpekpeke da ecï sü! Angü vügü ka-yi, *Satana, ladü gbamari. Engu ngbü endondoro, da engböngbö de gba, baka mere moko kami, te ngbü egïrï nü azoro, azü. ⁹Yi mere e akpe cürü Satana de. Yi i maguma yi gö! de yi rü kpekpeke gbü ngü ka Yesu. Baka te wüh ngbü eto mere bi cïnga te yi, teka ngü ka Yesu ne, yi mere e ace ngü ka Yesu de. Angü wü di enga ni yi, wü kpara ka Yesu, gbü wü sü füh kotö ne ꞌburu, ngbü kpah ezü cïnga efa sü baka nda-yi la. ¹⁰Yi rü kpekpeke, da etüka te-yi gbü wü cïnga la. Angü, fütanga sïkpï mba cüküꞌdaye, Me ena adu aküwa yi gbü ngü la, teka züka maguma ye. Angü Me fe yi me-ye, teka fü yi aküwa fï mere badi, agbü sü ka-ye, agbü kpï, teka ngü ka Yesu Kurisito. Me ena areke ngü ka-yi kpah ꞌburu me-ye. Engu ena ato wazi fü yi, teka fü yi arü di kpekpeke. ¹¹Ah le de nih gbo nga ïrï Me, angü engu de Mere Miri ka-nih me-ye, fï mere badi! Ah di bala.

Dene adu ngü ka-ra

¹²Dela mba enga ngü, te ma ba, tima fü yi, teka ato wazi fü yi. Enga wüna, Sïlïvanü,5:12 Wü gara kpara ngbü eï ïrï Sïlïvanü ne, gü ba, Sïla. te di de züka kpara ka Yesu ne, ah le ta-ngü te ra, da eba köcökpa ne me-ye. Ma ngbü emala fü yi kpekpeke, gü ba, ngü ka Yesu ne, ah de zu ngü ka Me, te engu to fü nih, teka *züka maguma ye. Ah le de yi rü kpekpeke gbü ngü la.

¹³Wü kpara ka Yesu agbü *Rüma kpakine5:13 Gbü wü gara buku, wüh ba ïrï *Babïlona, angü ngü ka wü kpara ka Rüma, gbü wü re la, ta kpah baka ngü ka wü kpara ka Babïlona. to mandï fü yi. Mbarase ka-ra, Marako, to kpah mandï fü yi. ¹⁴Yi to kpah mandï fü wü kpara ꞌburu, da efaka te-yi, de züka maguma yi, te ïrï Miri Yesu.

Me di de yi, de ah to gu ngü fü yi, gbü ngü ka Yesu Kurisito.

Wü di enga wüna, dela adu ngü te ma le amala fü yi, ah bala. De-ra Petero.