Profet Sefanaea
Nogna Buka Mae Profet Sefanaea
Thoutonu kmo’ei eigna buka igne
Profet Sefanaea ne cheke eidi cheke ka buka igne, kate namo thokei finogha 625 B.K. Eghuteuna theome raugha ke leghu, King Josia ne fadoglini puhi te malagna nodi tharai mare na, ka finogha 621 B.K.
Naiknodi Juda, mare gaoghathodi na LORD ginauna mei paradi nodi naokare. Mare gaoghathodi na nogna narane God te mala fadoglidi gobigna lepore nei eni nakarha na famane fara. Aonu kate thoke mei glepo igre, mare ginauna kiloni, “Nogna narane LORD mala fatedi naiknore.” Nu Profet Sefanaea chekeni LORD ginauna vahini hi kaisei narane mala paradi iheire te theome leghuni mana. Eghume mana ginauna paradi naiknodi kmana kantri, eghuteuna ginauna jaola paradi naiknodi Juda, naugna mare ne tarai ka keha god delei. Naugna igne te cheke eghu mana, “Ghotilo naikno te au fapari ka glose igne ra, ghotilo iheire te leghuni LORD ra, ghotilo mala hironi mana kolho. Hironi puhi te doglo na, eghuteuna fariuriu mala au fapari kolho. Ka puhi igne ghotilo na au fakeli ka narane nate fakakhana LORD diꞌatagna na.”
Mae profet igne mana neke fufunu nogna gloku na kani teke fadoglini mae Josaea puhi fameomekro te leghuni naiknodi Juda eigna tharai na (2 Kings 22 nei 23). Mae Sefanaea neke cheke faheta ranghidi naikno te au ka kantri Juda mala lilisei puhi te fameomekro te edi mare tuare. Te chekeni mana na, jame te theome fanomho naiknore, God ginauna snakre mei kaisei khabru biꞌo ka naikno tuare. Mae Sefanaea neke jaola neke chekeni God ginauna paradi naikno te au ka kantri Juda. Namono biꞌo Jerusalem ginauna jaola groꞌe theo tokagna, nu naiknore ginauna kafe tughu nagnafa mala ke leghuni puhi te doglo na mala ke au fakeli ka nodi kantri na. Eghuteuna namono biꞌo Jerusalem igne ginauna nake keli fapulo, eghuteuna naikno te doglore ginauna mala au ke lamnagna.
Keha vido ka buka igne
Nogna narane LORD mala fatedi naiknore: 1:1–2:3
LORD ginauna paradi keha kantri te falithui Juda: 2:4-15
LORD ginauna fakarhidi naiknore, eghuteuna ke babana fapulo Jerusalem: 3:1-20
1Ka narane igne LORD ginauna fatedi naiknore
1LORD ne cheke ka mae Sefanaea ka narane te king mae Josaea, thugna mae Emon ka kantri Juda. Mae Sefanaea igne neke karha ka vikegna mae king Hesekaea. Mae Sefanaea gne thugna mae Kusi, eghuteuna mae Kusi gne thugna mae Gedalaea. Eghuteuna mae Gedalaea gne thugna mae Amaria, eghuteuna mae Amaria gne thugna king Hesekaea. 2LORD ne cheke eghu ka mae Sefanaea,
“Iara ginauna goigoni fahui gobigna lepo te au ka nauthoglu igne.
3Naikno te gnafa, bosu te gnafa, nanghaji te gnafa,
nei sasa te gnafa teu igre ginauna hui.”
“Iara ginauna roꞌedi naikno te edi puhi te diꞌa igre,
eghuteuna faluvu fahuidi naikno te gnafa te au ka nauthoglu igne mala theo kaisei naikno te karha na,”
iara LORD te chekeni igne.
4“Iara ginauna paradi naiknodi Juda,
nei naikno te gnafa te au Jerusalem.
Eghuteuna iara ginauna thofno goigoni fahui mumuju god Baal baludi nogna pris,
nei iheire te figri tagruni LORD te tufru soru ka mumuju igre,
eghuteuna theo kaisei naikno na teke ghatho fapulodi naikno igre.
5Iara ginauna koko sorudi pari iheire te haghe ke tagru suga te pogho soru ka naprai,
nei ka glaba, nei ka nathunu.
Naikno igre neke nhaꞌa cheke ka iara mala loku ranghi ghau iara neku,
nu mare jaola nhaꞌa cheke mala loku ranghini mumuju god Molek.
6Iara ginauna paradi naikno te figri tagru ghau,
nei tirodi leghu ghau, nei tirodi mei mala toghodi,
nei mala saghe leghudi eghu iara.”
7Nogna Narane LORD te mala fatedi naiknore la namo meihi.
Eghume ghotilo ginauna theome tangomana te ghagri kaisei cheke kate mei kegra ke ulugna LORD.
Naugna mana la kulu tarabanahi te mala fafara nogna naiknore.
Eghuteuna mana ginauna toredi mae naokare mala mei roꞌedi nogna naiknore.
8LORD ne cheke eghu, “Ka Narane nate fafara iara nogu naiknore,
iara ginauna paradi nogna mae ofisa nei thugna teu mae king igre,
ba iheire te leghudi puhidi mae bongihehe.
9Ka Narane tuana iara ginauna paradi iheire te tarai jateula naikno bongihehe teu,
iheire te blau, iheire te falehe naikno,
nei iheire te fodu ka cheke chaichaghi,
nei ka puhi te diꞌa ka suga gna nodi funei na.”
10LORD ne cheke eghu, “Ka Narane tuana,
ghotilo na nomhidi naiknore ginauna kegra tanhi fabiꞌo rhegna grengatha te kiloi Grengatha Sasa ka namono biꞌo Jerusalem.
Ka keha vido ke lamnagna namono tuana, naiknore ginauna tanhi fabiꞌo.
Eghuteuna ghotilo ginauna nomhidi naogladi suga te grofo pari ka thogele ke holo.
11Ghotilo te au ka maket ra, ghotilo diꞌanagnafa nei tanhi,
naugna mae bisnis te mala sabiri nei foli teu ghotilo ra la lehehi.
12Ka Narane tuana, iara ginauna hata juta mala tei hiro ke lamnagna namono biꞌo Jerusalem.
Iara na jaola paradi naikno te rouronu kolho ka nodi nanheta thedi te cheke eghu igre,
‘LORD na fiti au nogna kolho,
theome eni kaisei glepo te keli te mala togho ghita tahati na,
ba eni kaisei glepo te diꞌa te mala para ghita tahati.’
13Hatimare mae naoka ginauna mei blau fahui nodi dedei naiknore,
nei paꞌe soru nodi sugare.
Eghume, neuba mare ne babana suga majaghani,
mare na theome autadi.
Neuba mare ne joꞌu nagare grep,
mare ginauna theome koꞌu kaisei waen.”
14Nogna Narane biꞌo LORD te mala fatedi naiknore igne la namo fara gognarona.
Ka Narane biꞌo tuana naiknore ginauna mhaghu tanhi,
neubane mae soldia te nheta fara igre,
ginauna mhaghu tanhi kokhonidi.
Naugna mare theo kaisei nodi grouronu ka ihei nate mei toghodi na.
15Narane tuana, narane diꞌatagna God.
Naiknore ginauna nanga nodi fara,
naugna gobigna lepore ginauna groꞌe theo tokadi.
Eghuteuna naprai gne ginauna thafru ka khoveo,
aonu gromno biꞌo ginauna thoke mei.
16Ka Narane tuana naiknore ginauna nomhini naoglagna khufli na,
eghuteuna mae soldiare ginauna eha fabiꞌo,
eghuteuna mae soldia igre ginauna mei snura ka namono biꞌo te bara te maku,
nei ka suga brahu te mala toetoe.
17LORD ne cheke eghu, “Naiknore ei puhi diꞌa ranghi ghau iara,
eghume iara ginauna na tusu ranghidi thua nafnata puhi biꞌo.
Eghuteuna naikno igre ginauna jateula naikno te dofu ra eghu na theome laseni aheva te tei na.
Eghuteuna dadaradire ginauna thofa jateula khoꞌu eghu,
eghuteuna thinidire ginauna boto siri ka glose na.
18Ka Narane te diꞌatagna God igne,
silva nei gol teu igre ginauna theome tangomana nate toghodi mare na.
Naugna diꞌatagna God igne thofno brana fara jateula khaꞌaghi te brana te nhako fahui namhata biꞌo ra eghu.
Eghume diꞌatagna God igne ginauna na jateula tuana eghu na falehedi hui naikno te gnafa ka nauthoglu igne.”
2Naiknore mala tughu nagnafa
1Ghotilo naiknogna kantri igne, puhimi ghotilo igre famamaja ikno fara,
ghotilo kafe figri mala tughu nagnafa.
Filo si ghotilo! Jame ghaoghatho fakeli ghotilo meuna,
ghotilo jame mamajadi fara puhi te thofno diꞌa fara igre.
2Jame te theome tughu nagnafa ghotilo na,
diꞌatagna God igne ginauna brue tei ghami ghotilo delei jateula chara te flalo te tei delei ka nuri ra eghu.
Eghuteuna diꞌatagna God te brana fara jateula khaꞌaghi teu igne ginauna mei thoke ghami ghotilo.
3Ghotilo te au ka kantri igne, ghotilo leghuni LORD!
Ghotilo naikno te nhaꞌa fapari ghami themi ra, eni unha te chekeni mana na.
Ghotilo eni unha te doglo na nei au fapari ghami themi.
Jame te leghuni ghotilo unha te chekeni iara igne na,
jau God ginauna na theome para ghami ghotilo.
God ginauna goigonidi kantri te au rhegna Juda
4Kate roꞌeni LORD kantri Filistia igne,
theo kaisei naikno nate au faleghu ka phei namono biꞌo Gasa ghe Askelon.
Mae naokare ginauna mei hata fajifla gnafa naikno te au ka namono Asdod ka kaisei vido narane kolho.
Eghuteuna mare na jaola hata fajifla naikno te au ka namono Ekron.
5Ghotilo naiknomi Filistia te au ka gratha ra,
ghotilo ginauna au papara, naugna God na la fate ghamihi ghotilo.
Mana ginauna goigoni ghami ghotilo,
eghuteuna theo kaisei naikno nate au faleghu ka ghotilo na.
6Nomi vido ghotilo te au ka gratha na igre ginauna thafru ka soro.
Eghuteuna mae greireghi sipu are ginauna horo nodi suga nei bara sipu eghu ka vido tuare.
7Eghuteuna naikno teke au faleghu teu Juda igre ginauna nake khotodi nomi vido glose ghotilo igre.
Nodi sipure ginauna ghamu ghedi buburu ka vido igre,
aonu maedi Juda igre ginauna ruma au ka suga teke jifla kokodi mare teke tei ka namono Askelon.
Eghuteuna nodi LORD God mae Juda igne ginauna au baludi mala toghodi,
mala ke au fakeli ka kantri igne.
8LORD mae ihei te au nolaghi igne ne cheke eghu,
“Iara nomhidihi naiknodi phei kantri Moab ghe Amon te cheke fahaehaghe nei cheke fadiꞌadi teu nogu naikno iara gre.”
Mare cheke eghu fabiꞌo,
“Ghehati ginauna nake khotogna nodi glose maedi Juda igne.
9Tutuani, te chekeni iara nodi God mae Israel igre na,
phei kantri Moab ghe Amon igre ginauna thofno groꞌe theo tokadi jateula phei namono biꞌo Sodom ghe Gomora tifa ra eghu.
Eghuteuna nodi glose mare igre ginauna theome tangomana nate karha gano na,
naugna tahi kolho nate thafru ka vido tuare.
Eghuteuna buburu kolho nate karha jare na.
Eghuteuna nogu naikno iara te karha teu igre ginauna hata nodi glepo te keli ka naiknodi phei namono biꞌo Moab ghe Amon,
eghuteuna hata fadelei teke nodi glose mare igre.”
10Eghume, igne unha nate eni LORD ka naiknodi Moab ghe Amon,
eigna nodi cheke fahaehaghe mare balu nodi cheke fadiꞌadi nogu naikno iara LORD mae ihei te au nolaghi fateote’o.
11LORD ginauna famamhaghudi fara,
eghuteuna koko soru pari nodi mumuju god mare te theo nafudi are.
Eghuteuna kate filoni mare igne,
naikno te gnafa ka vido te gnafa igre ginauna pogho soru ka LORD.
12Ghotilo naiknomi ka kantri Sudan,
LORD ginauna snakredi nomi naoka ghotilo are mala ari falehe ghami ghotilo.
13LORD ginauna loku ka nogna nolaghi na mala roꞌedi naikno te au ke raru ka kantri Asiria.
Eghuteuna mana ginauna roꞌeni namono biꞌo Ninive,
namono igne ginauna theo kaisei naikno nate au tagna na,
naugna glose igne ginauna moja salaꞌui.
14Buluka, nei sipu, nei nanigot,
nei gobigna lepo te tautagu igre ngala nate mei thuru jare na.
Suga teke hohoro ka gaju sida igre ginauna groꞌe ka mae naoka.
Eghuteuna nanghaji bongiro,
nakrudu nei khare teu igre ginauna mei thoti taitanhi ka wida di sugare.
15Igne unha nate thoke mei ka naikno te au ka namono biꞌo Ninive.
Eigna naikno te au ka namono igne cheke fahaehaghe eghu koba,
“Namono tahati igne kaisei namono ulu fara ka keha kantri igre!”
Nu theo eghu. Naugna namono te ulu tuana ginauna groꞌe theo tokagna.
Eghuteuna namono tuana ginauna mala nodi namono buluka,
nei sipu, nei nanigot, nei nanghaji, nei gobigna lepo te tautagu igre kolho.
Eghuteuna iheire te mei filoni igne ginauna mhaghu nodi fara na suaraghi faleghu.
3LORD ne atha fadelei nakhibodi naikno te au ka namono Jerusalem
1Jerusalem! Iagho ginauna groꞌe theo tokamu!
Naugna puhidi naikno igre jateula chara eghu,
eigna mare ne huhughu nei goigonidi neu naiknore.
2Naikno igre theome nomhini chekegna LORD na,
eghuteuna mare theome magnahagheni LORD te mala fadoglidi puhidi te diꞌa re.
Eghuteuna mare theome fatutuani nei tirodi toreni LORD mala toghodi.
3Hatimare mae lida ka namono biꞌo Jerusalem,
mare jateula lion te rofo te ku’e tafri ra eghu.
Eghuteuna mae biꞌo ka namono igre,
mare jateula khuma te rofo te ghamu fateo ghegna gano ra eghu.
Eghuteuna theome lisei faleghu kaisei nhubra malagna keha narane na.
4Hatimare mae profet igre fahaeghe fara,
eghuteuna mare toutonu eidi unha te theome mei funudi ka LORD.
Mae pris igre mare lausasaba di kolho glepo te blahi re,
eghuteuna mare theome leghuni nogna vetula God te mala toghodi thedi na.
5Nu LORD mae ihei te au teu Jerusalem igne,
mana eni unha te doglo na.
Mana theome tangomana te eni unha te diꞌa na.
Leuleghu narane na mana eni koba unha te keli na ranghidi nogna naiknore.
Neuba, naikno te au ka namono igne theome mamaja te edi puhi te diꞌare.
6LORD ne cheke eghu,
“Iara neke roꞌedihi naikno te gnafa,
baludi nodi namono te bara te maku teu igre.
Eghuteuna ginauna na theo kaisei naikno nate nolo tafri ke lamnagna nabrou na, naugna theo kaisei naikno te au faleghu na.
7Te chekeni iara na, naiknore ginauna filoni puhigu iara na mhaghu nodi fara,
eghuteuna mare magnahaghei ghau iara te mei fadogli re.
Jame fanomho fakeli mare ka nogu cheke iara igre meuna,
iara ginauna theome roꞌedi mare.
Nu mare kegra haghe edi koba puhi te diꞌare salaꞌudi puhi teke edi tifa ra.”
8Aonu LORD ne cheke eghu,
“Ghotilo ofoni kolho Narane nate fatedi iara naiknodi soasopaigna kantri igre.
Naugna, iara diꞌatagu fara ka naikno igre.
Eghuteuna gaoghatho te mala salo meidi naikno igre te mala paradi re la auhi ka nagnafagu iara na.
Eghume, diꞌatagu iara igne ginauna brana fara salaꞌui jateula khaꞌaghi eghu,
eghuteuna iara ginauna roꞌe fahuidi nodi namono te gnafa mare are.
9“Ka Narane igne, iara ginauna tusu lao gaoghatho majaghani ka naikno te au ka kantri igre.
Uve, gaoghathodi naikno igre ginauna majaghani mala pogho soru ghau iara,
nei mala kaisei nagnafa eghu mala leghuni chekegu iara na.”
10Eghuteuna nogu naikno iara te au ka kantri Sudan,
nei ka keha vido te au khaba fara igre ginauna hata mei fafara ka iara.
11Ka narane tuana, ghotilo ginauna na theome mamajadi puhi te diꞌa teke edi ghotilo tifa ra.
Naugna igne iara ginauna brue fajifladi naikno te fahaehaghe nei huhughu teu igre.
Eghuteuna ghotilo ginauna au ka nogu Thogele blahi iara igne Jerusalem,
eghuteuna ghotilo ginauna theome figri tagru ghau iara.
12Iara ginauna snakredi naikno igre mala au Jerusalem,
iheire te au fapari nei iheire te rouronu ka God te mala toghodi re.
13Naiknodi Jerusalem te au faleghu teu igre ginauna theome eni kaisei puhi te diꞌa ranghidi keha naiknore.
Eghuteuna theo kaisei naikno nate cheke chaichaghini nei majorani teu kheragna fofodu na.
Mare ginauna au blagna nodi jare,
eghuteuna theo kaisei naikno nate famamhaghudire.
Kaisei khoje mala gleale’a
14Ghotilo naiknomi Israel!
Ghotilo eha nei koje balu gleale’a!
Ghotilo naiknomi Jerusalem,
gleale’a ka nagnafami fateote’o!
15LORD na theome para ghami ghotilo,
eghuteuna mana brue fajifladihi nomi naoka ghotilo ra.
LORD gognarona king gna Israel,
eghuteuna mana au balumi ghotilo.
Eghume, ghotilo theome tangomana te mhaghuni kaisei glepo na.
16Ka Narane tuana,
naiknore ginauna cheke eghu ranghini Jerusalem,
“Iagho namono Saion,
thosei mhaghuni kaisei glepo.
Thosei snakreni namhaghu na faglaꞌe nigho.
17God, nomi LORD ghotilo na au balumi.
Nogna nolaghi mana na ginauna togho ghami mala uluni ghotilo magra na.
LORD ginauna kelitagna ka ghotilo,
eghuteuna nogna namha na ginauna tusu ranghi ghami nakarha majaghani.
Aonu mana ginauna koje
jateula naikno te gleale’a te koje ka narane biꞌo ra eghu.”
18LORD ne cheke eghu,
“Iara neke fagnafadihi nomi naꞌau papara,
nei hata fadeleihi mamajami ghotilo naiknomi Jerusalem.
19Ka Narane tuana iara ginauna paradi mae naoka teke fakokhoana ghami
nei para ghami teku ghotilo ra.
Ghotilo iheire te diꞌa ghahemi ra,
nei iheire te au tafri ka keha kantri ra,
iara ginauna nake hata fapulo ghami
ka nomi thofno namono na.
Gognarona ghotilo mamaja nomi ka tathadi keha vike igre,
nu iara ginauna na hata fadelei mamaja igne mala tusu ari nafnakno biꞌo ka ghotilo.
Eghuteuna naikno te gnafa teke filo fapari ghami ghotilo ka nauthoglu igne ra
ginauna filo haghe ghami ghotilo.
20Ka Narane tuana,
iara ginauna hata fapulo ghami ka nomi thofno namono na.
Aonu iara na tusu ari nafnakno biꞌo ka ghotilo,
eghuteuna naikno te gnafa ka nauthoglu igne ginauna filo haghe ghami ghotilo.
Iara ginauna togho ghami ghotilo fabrahu
mala au ghotilo kau pharikeli!
Iara LORD te chekeni igne.”