Taetus

Taetus

Letas Teke Riso Tei Mae Pol Ka Mae Taetus

Thoutonu kmo’ei eigna buka igne

Mae Taetus gne kaisei mae majaghani gna Griki neke fatutuani ni Kraes. Ulu lahu na mana neke tei balugna mae Pol mala toutonu eigna Nonomho te Keli na, nu ke leghu na, mae Pol neke kuruni mana mala tei sopa. Kate risoni mae Pol letas igne, mae Taetus neke au ka moumolu Krit. Mae Taetus gne kaisei mae biꞌo ka khiloau ka namono tuana.

Mae Pol neke cheke ka mae Taetus mala kulu fifilo fakeli ka puhidi iheire te magnahaghei mae biꞌo ka khiloau. Mana jaola cheke eigna puhi te mala farirhiudi soasopai tothoghei ke lamnagna khiloau. Mae Pol cheke ranghini mae Taetus mala filodi naikno khiloau te fapoaphola nei magra teu ka nafnata cheke igre, nu mare mala leghuni kolho puhigna namha na.

Phei vido ka letas igne

Farirhiu eigna puhidi mae gloku ka khiloau: 1:1-16

Farirhiu eigna nogna gloku mae Taetus: 2:1–3:15

¹Ranghi nigho iagho ghema Taetus. Uve ghema, iara mae Pol nogna mae gloku God nei nogna mae khuru mae Jisas Kraes. Mae Jisas Kraes neke vahi ghau iara mala toghodi nei famane farirhiudi eghu naikno teke vavahi God re mala kotu biꞌo eghu nodi fatutuani na. Nu u gloku te eni iara igne farirhiudi naiknore u thofno farirhiu tutuani eigna God. Eghume, u farirhiu tutuani te eni iara igne toghodi fara naiknore mala leghudi mare u nafnata nakarha te magnahagheni God na. ²Mana magnahaghei ghita tahati te mala hata u karha te theo ka huigna na. Eghuteuna, tahati rouronu eigna u nakarha igne naugna God neke kulu nhaꞌa chekenihi igne funu tifa kani theome vuvuha nga tekeu u nauthoglu igne. Nu tahati kafe laseni God na theome tangomana te chaghi ghita tahati na. ³Eghuteuna kate thokeni u thofno nogna narane thegna God na, mana ne fatakleni eigna u karha na kau nogna Nonomho te Keli te toutonuni iara ranghidi naikno te gnafa kau nauthoglu igne. Nu God noda mae Fakarhai na neke kuru ghau iara mala toutonuni u Nonomho te Keli igne ka naikno te gnafare.

⁴Uve ghema Taetus, iara na riso ari ka iagho. Eigna iagho jateula thofno mae thugu eghu iara kau noda khiloau gne naugna iagho fatutuani nila unha glepo te fatutuani ni iara gne. Gognaro na iara toreni God Kmada nei mae Fakarhaida Jisas Kraes mala fablahi nigho nei tusu ranghi nigho u nodi pharikeli na.

U nafnata naikno te mala baubatu ka khiloau na

⁵Iara neke lilisei fapulo nigho ka moumolu Krit naugna iara magnahaghe nigho te mala ke edi fagnafa keha glepo teke theome edi fagnafa nga teku ra. Nu iara magnahaghei nigho te mala vavahi keha mae mala baubatu ka khiloau gne leuleghu namono. Leghudi unha teke chekedi iara ka iagho ra. ⁶Igne u nafnata naikno te mala vavahi iagho te mala baubatu kau khiloau na. Nu mae ihei te vavahi iagho na, mana mala kaisei mae te thono keli fara puhigna na, nu naiknore theome tangomana te filo deni kaisei najafra ka mana. Mana jaola mala tolaghi ka kaisei gaꞌase kolho. Eghuteuna thugna mana re mala fatutuani ni mae Jisas Kraes. Theome mala eni kaisei puhi te diꞌa, ba lalama ba huhughudi idodi kmadire. ⁷Eghume iara magnahaghe nigho te mala vavahi mae mala baubatu ka mae iheire te keli puhidire naugna mana mala loku ranghini God nei reireghi fakelini eghu u gloku gna u khiloau na. Mana theome kaisei mae mala fabiꞌobiꞌo, ba mae mala ghosei diꞌatagna, ba mae mala koꞌu koba, ba mae mala khuru magra ba mae mala magnahaghei hata glepo kmana kolho ka puhi te chaichaghidi naiknore. ⁸Nu mana kaisei mae mala namhadi nei reireghidi eghu keha naikno te mei ka sugagna mana re. Mana kaisei mae mala magnahaghe te edi koba glepo te kelire. Nu mana kaisei mae mala reireghini thegna. Nogna gaoghatho mana re mala doglo koba nu puhigna mana re mala keli fara ke ulugna God nei edi koba unha glepo te magnahaghedi God re. Mana theome mala u nafnata naikno te snakreni u thinigna thegna na te mala funei frunini u nakarhagna na. ⁹Glepo leghu lahu na, mana mala thofno fatutuani fara nei loku famaku eghu kau Nonomho te Keli eigna mae Jisas Kraes te farirhiuni tahati gne. Te eghu na, mana na tangomana te farirhiudi naikno khiloau re eigna u thofno farirhiu te tutuani igne. Eghume naikno khiloau re na au nodi gaoghatho nheta te mala leghuni u farirhiu te tutuani na. Mana jaola mala fatakledi unha glepo te jafra re ranghidi naikno te tirodi leghuni u farirhiu tutuani na.

Filo glanidi mae velepuhi chaichaghi are

¹⁰Iara magnahaghe nigho te vahidi keha mae mala baubatu, naugna gognaro na kmana mae velepuhi chaichaghi au jare ka moumolu Krit. Mae velepuhi chaichaghi igre mare theome magnahaghei te leghuni chekegna ihei na, nu hatimare edi kmana thoutonu chaichaghi te theo nafudi kolho igre ranghidi naiknore. Kmana mae ka hatimare mae velepuhi igre mare au ka tothoghei mae te magnahaghedi naikno khiloau re te mala leghudi nodi vetula mae Jiu re. ¹¹Eghume ghotilo thosei snakredi mae velepuhi chaichaghi tuare mala farirhiu mare u puhi te jafra re, naugna mare na goigonidi u nodi fatutuani naikno te kmanare. Ghotilo theome ke ihodi mae igre, mare thono goigonidi fara tharakna te au Krit are ka nodi farirhiu chaichaghi are. Mare edi igre naugna mare magnahaghei te chaghidi kolho keha tharaknare mala hata nodi sileni kolho thedi. ¹²Kaisei mae ka hatimare thedi, mae profet gna Krit na, mana neke cheke eghu eidi mare, “Naiknodi Krit igre naikno chaichaghi fara, puhidire jateula u khuma fakaukathu te goigonidi glepo te keli ra eghu. Mare thono thodo loku fara, eghuteuna mare magnahaghei ghamu fabiꞌo koba eghu.” ¹³Unha glepo te chekeni mae profet igne thono tutuani fara ngala. Eghume iara magnahaghe nigho te cheke faheta ka naiknodi Krit are mala laseni naiknodi Krit re u nodi farirhiu chaichaghi mae velepuhi te chaichaghi te theome doglo igre eghu. Nu famane farirhiudi iagho eghu mala fatutuani ni kolho mare u farirhiu te tutuani na, ¹⁴nu mala thosei leghudi u nodi thoutonu poto mae Jiu are, ba u nodi vetula naikno te tirodi leghuni u farirhiu te tutuani na. ¹⁵Mae ihei te famane keli u gaoghathogna na ke ulugna God na mana filo glanidi gobigna lepo te kelire. Nu eigna mae ihei te theome keli ke ulugna God nu theome fatutuani ni mae Jisas Kraes teuna, mana theome tangomana te filo glani kaisei glepo te keli na. U nafnata naikno tuana au u gaoghatho te diꞌa nu u glalase eigna God na theome keli kolho ka mana. ¹⁶Neubane cheke eghu mana, “Iara laseni fara God” neu, iagho ginauna na laseni ka puhigna nei nogna gloku teu mana re te theome laseni God na. Igne tutuani fara, naugna mana mae thono diꞌa fara, mae huhughu nei mae ihei te theome tangomana leghudi u puhi te kelire eghu.

U nafnata farirhiu te keli

¹Nu iagho ghema Taetus, iagho famane cheke ranghidi naikno are mala leghu fakelini mare u nafnata farirhiu te tutuani na. ²Famane farirhiudi goro mae biꞌo are mala reireghi fakelidi thedi, mala au fakeli, nei mala lalase eghu. Nu mala nheta nodi fatutuani na, nei mala nheta nodi namha na, nei mala loku famaku ka unha glepo te keli na.

³Nu iagho ginauna na famane farirhiudi goro naikno biꞌo are mala au fakeli reꞌe, mala thosei buiburi naikno, ba thosei khuru koꞌu waen. Mala farirhiuni reꞌe unha glepo te keli na. ⁴Naugna tuana me reꞌe tangomana te farirhiu fakelidi goro gaꞌase majaghani are mala namhadi rehati khetodi nei thudi teure. ⁵Goro naikno biꞌo are mala farirhiudi goro gaꞌase majaghani are mala reireghi fakelidi reꞌe thedi nei au fakeli eghu, reireghi fakelidi nodi sugare, namhadi nei leghudi eghu puhidi khetodire eghu. Aonu mala theome tangomana kaisei naikno te cheke fadiꞌani u nogna Nonomho te Keli God na.

⁶Nu iagho ginauna na jateula tuana eghu mala famane farirhiudi goro mae majaghani are mala reireghi fakelidi mare thedi nei au fakeli eghu. ⁷Jaola, iagho themu na mala edila glepo te keli igre mala filo leghu nigho goro mae majaghani are. Nu kate farirhiudi iagho naiknore, iagho famane gaoghatho fakeli ngau eghu. ⁸Ne cheke nga iagho nu, cheke kate tutuani koba eghu, mala theome tangomana kaisei naikno te buiburi nigho na eghu, eghuteuna nou mae naoka iagho teke cheke fadiꞌa nigho na ginauna mamaja nogna kolho. Naugna mana theome laseni kaisei glepo te mala cheke fapari ghita tahati na.

^9-10Chekedi mae sneka are mala nomhidi koba nodi cheke mae funeire. Te eni mare igne na, nodi mae funeire na keli tadi fara. Thosei ke cheke fapulo ba blau ka nodi glepo mae funei dire eghu, mala tangomana nodi mae funeire te au nodi grouronu ka nodi mae snekare. Glepo igre jame teke edi hatimare mae snekare, mala famane falalase ka naiknore u farirhiu te keli eigna God mae Fakarhaida ka gobigna lepo te edi mare re.

¹¹Naugna God ne fatakle ranghi ghita u nogna namha te biꞌo na, kate ke kuru meini mae Jisas Kraes kau nauthoglu igne. Mana neke hata meini u karha tuana mala kafe fakarhidi naiknogna nauthoglu gne. ^12-13God neke namha ghita tahati mala hatini tahati u karha tuana mala theome tangomana tahati te mamagnadi puhi te diꞌare nei leghudi u puhidi naikno te theome laseni God re. Nu God magnahaghei ghita tahati te mala reireghi fakeli ghita theda kau nauthoglu igne. Mana jaola magnahaghei ghita te edi unha glepo te keli tagnadi mana kau narane te ofoni teu tahati balu grouronu biꞌo ka meigna noda mae Fakarhai Jisas Kraes. Mana ngala mae noda God te biꞌo tahati na, mana ginauna na thakle mei balu siasigla. ¹⁴Mae Jisas Kraes neke snakreni thegna mala lehe tughu ghita tahati nei neke hata fajifla ghita kau nakhibo. Nu mana neke hata fadeleidi nakhiboda tahati re, mala tangomana tahati nogna naikno mana re te magnahaghe edi fara unha glepo te magnahaghedi mana re.

¹⁵Uve, iara magnahaghe nigho te farirhiudi naikno khiloaure u glepo te chekedi iara ka iagho igre. Iagho au nou nolaghi te mala toghodi mare te mala leghudi u farirhiu igre, nu ne theome leghudi nga mare u farirhiu igre nu chekedi iagho ka mare unha glepo te keli te mala edi mare re eghu. Iagho eni igne ka puhi te mala theome tangomana kaisei naikno te filo fapari nigho na.

Nafnata naꞌau te keli

¹Famane farirhiudi naikno khiloau are mala leghudi mare nogna vetula gavman na, nei leghudi nodi cheke goro mae biꞌo ka namono are, nei sasaꞌa te edi unha glepo te kelire. ²Farirhiudi mala thosei cheke faparini ihei, nu te keli na au fodu kau pharikeli nei au faleghu, nei famane taegodi keha naiknore eghu.

³Naugna tifa na tahati neke theome ghaoghatho fakeli, jateula naikno te theome fatutuani ni Kraes ra neku. Tutuani, tahati neke huhughu koba. Nu keha naiknore chaichaghi ghita koba mala loku jafra tahati. Tahati tifa na neke loku ranghini kolho unha te magnahaghei fara u thinida theda na. Tahati neke edi fabrahu ngala unha glepo te diꞌa nei goghotu teure. Naiknore neke theome magnahaghei ghita fara nu tahati jaola ngau neke theome magnahaghedi fara keha naiknore. ⁴Neubane eghu ngau tahati, God noda mae Fakarhai na mana falalase ranghi ghita nogna nagnafa lolokeli nei namha teu ranghi ghita nogna naiknore. ⁵Mana neke fakarhi ghita. Nu mana neke theome fakarha ghita eidi unha gloku te keli teke edi tahati re, theo! Ka nogna kokhoni ghita kolho mana teke fakarha ghita na. Mana neke tusu mei ka tahati u nogna Tharunga te Blahi na mala fagagaedi u nagnafadare, nei hatini tahati u karha majaghani na. ⁶God tusu mei neke salaꞌui u Tharunga te Blahi na ka tahati, naugna mae Jisas Kraes neke lehe tughu ghita ke kligna gaju fafatha. ⁷Mana neke eni igne mala tangomana tahati te hatini u karha majaghani te theo ka huigna teke rouronuni teku tahati na. Tahati tangomana te hatini u karha igne naugna God na thofno namha ghita ne fadoglo ghita ke ulugna thegna. ⁸U farirhiu te edi iara igre glepo tutuani fara. Nu iara magnahaghe nigho te hati nhetamu na mala famane farirhiudi naikno te fatutuani ni God are. Aonu iagho mala ghatho tahuni fabrahu mare te mala eni unha glepo te keli na eghu naugna unha glepo te keli na ngala te tangomana te toghodi keha naiknore.

⁹Nu thosei au baludi iagho naikno te chekedi gobigna lepo te fameomekro ba te magra eidi susurei teke funu tifa teke mei, ba naikno te fapoaphola, ba magra eigna u gaoghathogna nogna vetula mae Moses. Eghume u glepo te edi mare tuare theome glepo mala toghoni kaisei naikno. ¹⁰Nu mae iheinga ne faꞌeiꞌei magra, ba te fafoafota na, thosei snakreni mala eni fabrahu mana u puhi tuana eghu. Te phei fata cheke nga iagho ka mana te tirogna fanomho mana ka nou cheke iagho re, koko fakosini kau khiloau eghu. ¹¹Naugna iagho laseni u nafnata naikno tuana, mana la snivihi kau farirhiu te tutuani na. Nu puhigna mana re la thaklehi te thofno jafra farahi nei theome doglohi teu mana na.

¹²Iara ginauna na kuru aridi mae Atimas ghe mae Tikikas jare ka iagho. Nu kate posa ari phiamare jare na ghosei me mei iagho eghu mala filo ghau iara jare Nikapolis, naugna iara magnahaghei te ari au teu jare ka vido te khoburu na. ¹³Eghuteuna keha glepo na igne ngau eghu, kaisei mae loea nanghagna na mae Sinas ghe mae Apolosi gre ginauna na jifla jare Krit. Iagho toghodi phiamare eghu. Nu kulu tarabana ranghidi iagho unha glepo te nabadi phiamare re eghu.

¹⁴Uve ghema Taetus, glepo leghu lahu na igne, famane farirhiudi naikno khiloau te au Krit are mala thosei thodo ka unha gloku te kelire, nei thosei fiti au kolho eghu. Nu mare mala loku nei toghodi langau eghu naikno te kumare.

¹⁵Uve, naikno khiloau te kafe au balugu iara igre magnahaghei te cheke arini u nodi namha na ka iagho.

Nu ke tusu lao langau nomi namha ghehati gre ka naikno khiloau te namha ghami langau ghehati te au teu jare Krit are eghu.

Nogna khokofakasai God te au balumi ghotilo hui. Me gnafa. Iara, mae Pol.