Nogna Famane Khoje King Solomon
Thoutonu kmo’ei eigna buka igne
Buka igne au khoje te chekedi nalhaꞌu nei gaꞌase eigna repa te fari magnahaghei fara. Naugna igne, kmana cheke ke lamnagna buka igne theome naba te iuꞌiju ke lamna suga tharai, naugna ka noda kastom tahati na, glepo te eghu na, blahi fara te cheke eidi kate au fodu teu nalhaꞌu ghe gaꞌase re. Keha naikno kiloni buka igne “Nogna khoje King Solomon,” naugna ka cheke Hibru na, buka igne au nanghagna king ke lamnagna, eghuteuna chekeni ka 1:1 te khoje igre nogna mana. Nu ka cheke Hibru, thofno nanghagna buka igne “Famane khoje salaꞌudi keha khojere.”
Vido biꞌo ka cheke ke lamnagna buka igne, nogna cheke nalhaꞌu balu khetogna, repa cheke eidi puhi repa te magnahagheidi fara. Nu ka keha vido re ninhigrana te filo glanini ihei te cheke na, naugna nodi puhi te mala cheke mare tifa re jafrau ka cheke tahati. Transleson igne leghuni gaoghathodi kmana naikno iheire te thofno sikolu fakeli ka nodi Cheke Hibru vikegna Israel tifa, te rioriso mare khoje igne.
Buka igne au kmana cheke thotoghale te roi ninhigrana te lase fakelini tahati, nu thofno famane puhi mala ghathoni eigna nodi namha nalhaꞌu ghe gaꞌase. Kaisei thofno cheke thotoghale keli fara ka puhi te cheke eidi gaꞌase majaghani ka buka igne jateula thobi ba nagare grep. Eigna ka keha vido re cheke eidi mae nalhaꞌu te tei lamna nagare te mala ghamu ghegna sisi nei gnangho ka khakladi te famane sisiri. Cheke thotoghale ka puhi eidi repa te fari namhai fara nei thofno kelitadi fara.
Mae Jiu ghathoni buka igne cheke naba ka puhi God te namhadi fara nogna naiknodi Israel. Kmana naikno khiloau ghathoni cheke naba eigna Jisas Kraes te namhani nogna khiloau. Eghuteuna kmana naikno gognarogne, buka igne au gaoghatho biꞌo ka mare eigna puhidi nalhaꞌu ghe khetogna te klino nei doglo.
Keha vido ka buka igne
Taetol: 1:1
Khoje ululahu: 1:2–2:7
Fapea khoje: 2:8–3:5
Fatilo khoje: 3:6–5:1
Fafati khoje: 5:2–6:3
Falima khoje: 6:4–8:4
Fafamno khoje: 8:5-14
11Nogna Famane Khoje King Solomon.
Khoje ululahu
Gaꞌase majaghani ne cheke
2Kheraguo,
iara magnahaghei nigho iagho fara te gnangho ghau iara na.
Nou namha iagho ranghi ghau iara na mamahe fara
salaꞌuni famane waen.
3Iara magnahagheni fara sisirigna oel igne
te famane sisiri fara ka thinimu iagho na.
Eghuteuna nanghamu iagho na jaola famane nonomho gna na
jateula te siri mamahegna oel igne eghu.
Tutuani fara, gaꞌase gre tangomana te magnahaghei nigho iagho fara na!
4Iagho jateula nogu king eghu iara.
Iagho atha ghau iara!
Tapa faghose tei
mala au lamna nou chogho iagho.
Goro gaꞌase re ne cheke
Tapa ginauna thofno glealeꞌa fara,
naugna iara thofno namha nigho eghuteuna iagho namha ghau iara fara
salaꞌudi famane waen.
Gaꞌase majaghani ne cheke
Nabadi kolho goro gaꞌase gre te namha nigho na.
5Goro gaꞌasedi Jerusalem,
iara pipito, nu iara famane fara.
Neuba iara ne pipito jateula suga tapuale ka namono nagou Keda ra neu,
nu iara famane jateula famane pohe
te mala horo nogna suga King Solomon te famane fara filogna ra eghu.
6Thosei filo fapari ghau iara naugna guligu iara gne ne pipito.
Guligu iara gne nhogri,
naugna thabusigu iara re diꞌatadi ka iara
eghume mare huhuru ghau iara mala loku ka nagare grep ke lamna naprai te brana.
Naugna igne te theome tangomana iara te reireghi fakelini thinigu thegu gne!
7Kheraguo,
iagho cheke ka iara,
aheva te atha te tei koba iagho nou sipu re te mala ghamu na,
nei aheva te gnafa reꞌe kate brana naprai na.
Theome nabagu iara te nolo thegu na
te mala hiro nigho ka vido aheva kheramu iagho te reireghidi nou sipu iagho re.
Goro gaꞌase re ne cheke
8Kheraguo,
iagho famane fara filomu na salaꞌudi keha gaꞌase gre.
Jame te theome laseni vido aheva te au sipu igre tagna na,
iagho mala leghuni nodi nabrou mare na,
mala tangomana nou nanigot iagho re te ghamu
rhedi nogna suga tapuale mae te mala reireghi sipu na.
Mae majaghani ne cheke
9Kheraguo,
iagho gaꞌase famane fara!
Kate filo kaisei mae ka iagho na mana na magnahaghei nigho iagho,
jateula hose nalhaꞌudi te korho nogna chariot mala magra king gna Ijep,
te theome tangomana te au kmu kate filoni hose gaꞌase gnara eghu.
10Nou dedenge iagho te gefe sukha ke ulu tathamu nei foflomu
teu are famane fara filodire,
eghuteuna khekeve te au ka graramu iagho are
jaola famane filodi re.
11Iara ginauna ei dedenge ka gol malamu iagho
nei khekeve silva.
Gaꞌase majaghani ne cheke
12Nogu king,
kate thuru soru iagho ka nou chea brahu na,
sisirigna oel te famane sisiri keligna ka thinigu iara na igne
ne fodu ka chogho igne.
13Kheraguo,
iara magnahaghei nigho iagho fara.
Kate thuru soru iagho balugu iara bongi ia
iagho jateula kaisei glepo te thofno famane siri keligna fara,
te au farihotei di phei chuꞌugu iara ra eghu.
14Kheraguo,
thinimu iagho na siri keligna fara jateula sisi ke lamnagna nagare En-Gedi eghu.
Mae majaghani ne cheke
15Kheraguo,
iagho famane fara ka tathagu iara na.
Tathamu iagho na
thofno famane fara, jateula balhu eghu.
Gaꞌase majaghani ne cheke
16Kheraguo,
iagho famane fara.
Iara kelitagu fara ka iagho!
Tapa ginauna tei thuru ke kligna famane buburu,
17ke pari famane gaju sida nei famane gaju paen.
Mae majaghani ne cheke
Gaju sida igre ginauna jateula noda suga eghu tapa,
eghuteuna gaju paen igre ginauna jateula gaghaho gna eghu suga igne.
2Gaꞌase majaghani ne cheke
1Iara jateula sisi ka namhata
te kotu ka sare biꞌo Saron eghu kolho.
Uve, iara jateula famane sisi ikoi eghu kolho,
te kotu lamna glogu eghu.
Mae majaghani ne cheke
2Kheraguo,
kate au iagho farihoteidi keha gaꞌase majaghani,
iagho thofno jateula kaisei famane sisi
te kotu farihotei buburu fachuchuru.
Gaꞌase majaghani ne cheke
3Kate au iagho farihoteidi keha mae majaghani re,
iagho thofno jateula kaisei gaju te ure sisi
farihoteidi keha gaju mata ra eghu.
Iara magnahaghei fara te mala gnokro ka naungogna gaju igne,
eghuteuna maimani gna sisi igne thofno mamahe fara.
4Iagho tathalei ghau iara mala tei ka suga gaghamu,
iagho filo ghau iara fabrahu naugna iagho thofno namha ghau iara!
5-6Iagho habo khame mairimu na ke pari phaꞌugu iara,
eghuteuna tugha ari ghau rhemui fei khame nhetamu.
Tusu mei sisi grep moja nei keha sisi,
mala ghamu rheta iara,
Iara thofno leheni nou namha iagho na.
7Goro gaꞌasedi Jerusalem.
Ghotilo eni kaisei nhaꞌa cheke te rheta balugu iara
Te mala thosei farhana ghami ghepa
kate thuru fodu teu ghepa na.
Fapea khoje
8Fanomho mei! Iara nomhini kheragu na.
Filo! Mana la mei!
Mana chari la mei ke kligna thogele,
ghosei leghu gukhu la mei.
9Kheragu iara igne famane fara jateula kaisei glepo tautagu gasele eghu,
ba lase chari faghose fara jateula kaisei diꞌa eghu.
Filo! Naꞌa kegrau ke leghu gringni ke kosi suga,
eghuteuna naꞌa filo mei ka wida,
nei filo mei lamna suga.
10Eghuteuna naꞌa ne eghu ka iara,
“Kheraguo, mei!
Uve, ari tapa.
11Narane reka nei nakhete teuna la gnafahi.
12Uve, narane te mala tatasrei na la mei hi.
Gognarona narane mala koje,
eghuteuna heva heva ka noda glose gre
iagho tangomana te nomhidi balhu te koje re,
eghuteuna sisi mata igre funu kotu tafru glose na.
13Gognarona sisidi gaju fig igre jaola funu muita,
eghuteuna tapa gnanghidi sisidi grep te famane siri kelidi fara igre.
Kheraguo, mei!
Uve, ari tapa.”
Mae majaghani ne cheke
14Iagho mala poru kolho
jateula kaisei balhu te mhaghu ra eghu,
eghuteuna poru lamna khora
thina ka geri thogele.
Iara magnahagheini fara filo nigho
naugna tathamu foflomu iagho re jaola famane fara.
Iara magnahagheini fara nomhini naoglamu iagho na,
naugna naoglamu iagho na famane fara.
15Tapa tei ngolho mala lolhoku sua khuma,
glahu goigoni mare nagare grep te chechenge teura.
Gaꞌase majaghani ne cheke
16Kheraguo, iara namha nigho fara.
Uve, iagho nogu iara, eghuteuna iara nou iagho.
Iagho jateula kaisei sipu
te ghamu farihoteidi famane sisi ra eghu.
17Kheraguo,
kate ghaghafa mei nuri hamerane te reka na
narane na funu thakle haghe,
iagho faghose tei jateula glepo tautagu gasele,
eghuteuna umhu tei jateula sua diꞌa ka thogele nei glogu.
31Kaisei bongi kate fadoglo soru teu iara ka sape na,
iara leheni fara kheragu na,
nu naꞌa theome au balugu iara.
2Aonu iara kegra haghe ne tei hironi kheragu na
heva heva ka nabrou nei ka glalaba gna namono na.
Iara hironi kheragu te namhani iara na
nu iara theome tangomana te deni.
3Mae greireghi gna namono igne ne lhoti ghau iara.
Aonu, iara ne ghusna eghu ka mare,
“Iara hironi kheragu te namhani iara ia.
Ba? Ghotilo filoni naꞌa?”
4Nu theome raugha kate jifla kokoni iara mae greireghi igre,
iara ne megeinga ne filoni kheragu na!
Uve, iara loku famaku
ne theome snakre teini,
ne ghilei tathalei ne tei ka sugagna idogu na,
ka nogna chogho ihei teke fakarhi ghau iara na.
5Goro gaꞌasedi Jerusalem.
Ghotilo eni kaisei nhaꞌa cheke te rheta balugu iara
Te mala thosei farhana ghami ghepa
kate thuru fodu teu ghepa na.
Fatilo khoje
6Ihei site jifla mei funu ka namono nagou
jateula gagahu khaꞌaghi biꞌo teu gnea?
Sisirigna gna thofno famane fara,
jateula sisirigna famane insens,
teke atha teke mei mae bisnis funu ka vido khaba fara.
7Ei! King Solomon!
Mana gnokro ka nogna sape nafnakno,
teke atha neke mei nogna mae glokure.
Namno salei soldia nhetadi Israel
neke reireghini mana.
8Mare te gnafa na lase fakelini fara
puhigna magra na.
Mae te gnafa ka mae igre sara bae naflahi fei soro,
eghuteuna mare tarabana mala magra baludi
iheire te mei magra ka mare bongiro.
9King Solomon neke eni sape nafnakno igne
ka thofno famane thaba funu Lebanon.
10Mare ghiha tafru ghahegna sape nafnakno igne ka silva,
eghuteuna mare ghiha tafru gerigna re ka gol.
Mare toku tafru kokhogu gna na ka pohe ngonge.
Eghuteuna goro gaꞌasedi Jerusalem loku heta fara te lalaoni lamna na,
mala famane fara filo gna na.
11Mei, ghotilo goro gaꞌasemi ka Thogele Saion!
Mei filoni King Solomon!
Mana fahaghe nogna khepi nafnakno king
teke nhaꞌa lao idogna na ka phaꞌugna mana na,
ka narane teke tolaghi mana,
igne kaisei narane glealeꞌa biꞌo fara ka nagnafa gna mana na.
4Mae majaghani ne cheke
1Kheraguo,
iagho thofno famane fara!
Neuba vido pohe igne toku tafri katha tathamu foflomu iagho are,
nu iara tangomana te filoni kolho tathamu iagho na,
eghuteuna iara ghathoni balhu te famane fara.
Khaklamu re flalo kate nolo iagho na,
jateula nanigot pipito te ghasa,
kate getu te sukha ka thogele Gilead.
2Kheꞌimu iagho re
famane vegha fara
jateula sipu vegha teke titihi la thinigna na te famane klino,
eghuteuna tarabana mala kuchi khakla gnare.
Theo kaisei kheꞌimu iagho te brusu,
kafe keliu kolho.
3Phei phepeomu iagho re ukru fara.
Uve, foflomu iagho na thofno famane fara.
Neuba vido pohe igne ne toku tafru tathamu foflomu iaghore,
nu iara filo glani kolho tathamu nei foflomu teu iagho te famane fara.
4Graramu iagho na famane salhu,
jateula nogna famane suga mala toetoe King Devet.
Eghuteuna khekeve ka graramu iagho ana
jateula kaisei thogha nodi greoreo mae te nheta ka magra
te fagefe te lithu mare ka suga mala toetoe igne mala thofno famane filogna na.
5Phei chuꞌumu iagho re thofno famane fara
jateula phei sua glepo tautagu gasele eghu.
Eghuteuna jaola famane fara jateula phei sua glepo tautagu diꞌa te phakri,
te ghamu buburu farihoteidi famane sisi.
6Ghilei ghaghafa nagrifu fei hamerane
eghuteuna naphae funu mala haghe,
iara ginauna au ka vido igne farihoteidi phei gukhu
te au kmana insens tadi.
7Kheraguo,
iagho thofno famane fara.
Vido te gnafa ka thinimu iagho kolho te famane na,
theo kaisei vido ka iagho te goigoni nigho.
8Kheraguo, mei!
Iagho mei ka iara.
Iagho jifla tei ka Thogele Lebanon.
Soru funu holo ka thogele Amana,
nei funu holo ka phei thogele Senia ghe Hemon,
aheva te au tadi glepo tautagu lion nei lepad.
9Kheraguo,
iagho kheragu iara.
Kate filo iara ka tathamu iagho na
iara filoni khekeve igne ka graramu iagho,
iagho thofno goigoni nagnafagu iara na.
10Kheraguo,
iagho khetogu iara.
Nou namha iagho ranghi ghau iara na
mamahe fara salaꞌuni famane waen,
eghuteuna iara magnahagheni fara sisirimu iagho na
salaꞌuni famane insens.
11Kheraguo,
phepeomu iagho na mamahe jateula jurukuli,
eghuteuna glapimu iagho na mamahe jateula milk balu jurukuli.
Nou pohe iagho na siri keligna fara,
jateula te famane sisirigna gaju sida gna Lebanon.
12Kheraguo,
iagho khetogu iara.
Iagho jateula kaisei nagare balu gringni te lithu ka thina,
aheva iara thegu kolho nate tangomana te tei lamna tagna na.
Jare na au kaisei glokha khoꞌu lamna,
aheva iara thegu kolho nate koꞌu tagna na.
13-14Iagho jateula gaju
te kotu fakeli fara ka vido igne ra eghu,
jateula kaisei nagare gaju pomegranet
te ure famane sisi ra eghu.
Gaju teula hena nei nad nei safron nei kalamas nei sinamon
te kotu ka vido igne balu keha nafnata gaju mala ei insens.
Mur nei alo langau te kotu ka vido igne,
aheva mare tangomana mare te edi glepo te siri famane fara.
15Iagho jaola jateula kaisei glokha khoꞌu ka nagare,
aheva te fodu ka khoꞌu te keli.
Jateula khoꞌu te loloro soru
funu ka thogele ro Lebanon.
Gaꞌase majaghani ne cheke
16Nuri ke raru, iagho soru mei!
Nuri ke mata, iagho mei ka iara!
Ghopa ghaghafa mei ka nogu nagare iara,
mala sisirigna na te ikotongana vido igne.
Snakre kheragu iara na mei lamna ka nogna nagare na,
eghuteuna snakreni mala ghamuni famane sisigna na.
5Mae majaghani ne cheke
1Kheraguo,
iagho khetogu iara.
Iara meihi lamna ka nogu nagare na.
Iara atha khakladi te famane sisiri nei glaghobe.
Iara kelitagu fara te ghamu ghegu famane jurukuli.
Iara koꞌu waen balu milk.
Goro gaꞌase re ne cheke
Ghopa kheraguro,
ghopa mala ghamu fodu,
nei koꞌu fodu,
eghu ghilei thofno boho ghopa
ka nomi namha na.
Fafati khoje
Gaꞌase majaghani ne cheke
2Kate thuru na,
iara mala ghathoni kolho kheragu na.
Iara mifini te filoni mana,
te kikidi mei ka nogu grengatha iara na.
Fanomho mei!
Mana eha mei eghu ka iara,
“Kheraguo, tora grengatha!
Iagho thofno famane fara filomu na,
eghuteuna iagho thofno keli.
Snakre ghau mala mei lamna.
Phaꞌugu iara na bothu ka khoꞌu bongiro,
eghuteuna khaklagu re bothuhi tagna.”
3Nu iara ne cheke eghu,
“Iara la atha kokohi nogu pohe na
eghuteuna iara tarabana mala thuru.
Ba, na pipichi ghu iara?
Eghuteuna iara la titihi hi ghahegu re.
Ba, iara gne thonau signea?”
4Kheragu iara na raꞌu lao khamegna na
ka khoragna grengatha igne,
mala keli gaoghathogu fara iara.
5Iara kegra haghe ne tora grengatha
ranghini kheragu na.
Kate tora iara grengatha na,
geghesugu iara na bothu
ka kholo te famane siri keligna fara.
6Aonu, iara tora grengatha na mala mei mana lamna.
Nu mana la teihi!
Iara magnahaghei te mala lehe nogu kolho
kate theome nomhini naoglagna na.
Iara ne hironi mana, nu iara theome deni mana.
Iara ehani mana, nu mana theome cheke tughu.
7Mae greireghi ka namono igne filo ghau iara.
Mare puri ghau ne fnera iara.
Mae iheire te reireghini baragna namono igne,
ne rerheku pohe teke toku tafru iara phaꞌugu na.
8Goro gaꞌase di Jerusalem.
Ghotilo mala nhaꞌa cheke:
Jame te filoni ghotilo kheragu iara ia,
ghotilo ginauna chekeni mana
iara thofno leheni fara mana!
Goro gaꞌase re ne cheke
9Iagho ihei te thofno famane fara salaꞌudi keha goro gaꞌase te gnafa gre,
Cheke ghami!
Unha gne te nhogri kheramu iagho gne ka keha mae re?
Unha kolho te keli te salaꞌui mae igne ka keha mae igre,
mala nhaꞌa cheke ghehati?
Gaꞌase majaghani ne cheke
10Kheragu iara igne nheta,
nei thofno famane fara.
Neubane nabotho thogha mae igre mei filo ghau iara,
nu ka gaoghathogu iara na,
mana keli salaꞌudi mare gnafa.
11Tathagna foflogna mana re salhu nei famane fara jateula gol.
Eghuteuna khaklagna re thofno pipito nei pila fara.
12Tathagna re thofno famane fara
jateula balhu te thofno vegha jateula milk.
Ba jateula kaisei balhu te gnokro ka geri khoꞌu.
13Tathagna foflogna mana re famane fara,
jateula nagare te fodu ka gaju te khaklagna na famane sisiri.
Eghuteuna foflogna mana na famane fara
jateula thofno famane sisi te bothu ka khologna gaju te kiloi mur.
14Phei khamegna re famane rheta fara,
jateula gol te lilisei thofno thina mare tagna.
Thiꞌa nei babango teu mana re salhu nei maku
jateula kaisei famane glepo te lalaoni mare ka kheꞌi elefant
eghuteuna lalaoni ka famane thina blu.
15Phei ghahegna re jateula phei khegra
teke horo mare ka famane thina vegha,
eghuteuna pesidi phei khegra igre,
mare neke horo ka gol.
Kate filoni iara mana,
iara ghathodi thogele te maku ra
eghuteuna gaju sida brahu Lebanon.
16Chekegna mana na mamahe fara
Iara thofno magnahagheini fara mana.
Goro gaꞌasemi Jerusalem,
igne kheragu iara na.
Mana kheragu iara.
6Goro gaꞌase re ne cheke
1Iagho ihei te thofno famane fara salaꞌudi keha gaꞌase te gnafa ra,
Chekeni ka ghehati,
Aheva ne tei kheramu iagho na?
Iagho cheke meini vido aheva te tei mana tagna na,
mala tangomana ghehati te togho nigho te mala deni mana na.
Gaꞌase majaghani ne cheke
2Kheragu iara na soru ka nogna nagare,
te fodu ka gaju khakladi re famane sisiri.
Mana ghamu ka nagare igne,
eghuteuna mana atha famane sisi.
3Kheragu iara na mana namha ghau iara fara,
iara nogna mana eghuteuna mana nogu iara.
Mana jateula kaisei sipu
te ghamu farihotei ka famane sisi ra eghu.
Falima khoje
Mae majaghani ne cheke
4Kheraguo,
iagho thofno famane fara,
jateula namono Tiasa ghe Jerusalem.
Iara thofno keli tagu fara ka iagho!
5Iagho thosei filo mei ka iara!
Iagho thofno goigoni nagnafagu iara na kate filo iara ka tathamu iagho na.
Khaklamu iagho re
jateula nanigot pipito te krokrofu,
leghu thogele te sukha ka thogele Gilead.
6Kheꞌimu iaghore
famane vegha fara
jateula sipu vegha teke titihi la thinigna na te famane klino,
eghuteuna tarabana mala kuchi khakla gnare.
Theo kaisei kheꞌimu iagho te brusu
kafe fakeliu kolho.
7Neuba vido pohe igne ne toku tafru tathamu foflomu iaghore,
nu iara filo glani kolho tathamu nei foflomu teu iagho te famane fara.
8Neuba iagho ne au baludi namno salei kuin
nei nhana salei fapea khetogna king,
baludi kmana gaꞌase majaghani te theome tangomana kaisei naikno te kahadi re.
9Nu iagho themu kolho iagho famane jateula kaisei balhu,
eghuteuna iara magnahaghei nigho iagho fara.
Idomu na namha nigho iagho fara salaꞌudi keha thugna naꞌare.
Kate filo mei gaꞌase te gnafa igre ka iagho,
reꞌe na cheke fakeli nigho.
Uve, kate filo mei ka iagho kuin te gnafa nei keha khetogna king te gnafa teu igre ka iagho na,
reꞌe na cheke fakeli nigho iagho.
Goro gaꞌase re ne cheke
10Reꞌe na cheke eghu,
Ihei si gaꞌase te famane fara
jateula nathunu rane teu ignea?
Naꞌa thofno famane fara
jateula glaba te agha bongiro
eghuteuna naprai phae narane ro.
Iara thofno keli tagu fara ka naꞌa!
Mae majaghani ne cheke
11Iara neke sukha ka nagare sitha
mala filodi gaju majaghani ke lamna glogu.
Eghuteuna mala filo glahu au khakla majaghani sisi grep nei pomegranet ra.
12Ame laseni nga teuna, iara thofno rhana nogu fara,
jateula mae ihei te tei lamna ka nogna chariot king.
Goro gaꞌase re ne cheke
13Iagho gaꞌasemu Sulam!
Ke pulo mei,
ke pulo mei!
Ghehati magnahaghei mala fiofilo ka iagho!
Mae majaghani ne cheke
Naugna unha si ghotilo te magnahaghei mala filo ka iara kolho,
kate ragi iara farihoteidi phei tothoghei grea?
71Kheraguo,
iagho jateula thugna gaꞌase king eghu!
Phei ghahemu baludi sadol igre
famane fara.
Grege ghahemu na thofno famane fara,
jateula nogna gloku mae ihei te thofno lalase fara.
2Seꞌomu iagho te lithui na jateula kaisei kapu,
te fodu fabrahu kolho ka famane waen.
Uve, thiꞌamu iagho na famane fara,
Famane jateula kaisei bukrei wit aheva famane sisi te au faligohoni.
3Phei chuꞌumu iagho re thofno famane fara
jateula phei sua glepo tautagu gasele eghu.
Eghuteuna jaola famane fara jateula phei sua glepo tautagu diꞌa te phakri.
4Graramu iagho na brahu nei famane fara jateula nogna suga mala toetoe eghu King Devet.
Phei tathamu iagho re sigla fara
jateula khoꞌu seu ka namono Hesbon,
te au rhegna grengatha Bat-Rabim.
Nehumu iagho na fnonu nei famane fara
jateula thoa Lebanon
aheva mare tangomana te filo teini Damaskas.
5Kate filoni iara phaꞌumu iagho na,
iara ghathoni thogele brahu Kamel te famane fara.
Khaklamu iagho te pipito na sigla fara.
Neuba kaisei king ne khae nigho iagho kate filodi khaklamu iagho re
naugna ne famane fara.
6Iara thofno glealeꞌa fara
naugna iagho thofno famane!
Eghuteuna iara magnahaghei nigho iagho fara.
7Iagho jateula kaisei gaju thubo brahu
te famane fara,
eghuteuna phei chuꞌumu iagho re fodu
jateula nure sisigna ra eghu.
8Iara ginauna apla gaju thubo igne,
mala atha sisigna na.
Phei chuꞌumu iagho igre ginauna famane fara ka iara,
jateula sisi grep eghu mamahe.
Foflomu iagho na ginauna siri famane fara ka iara,
jateula sisi te keli te famane siri keligna ra eghu.
9Uve, gnanghomu iagho na jaola mamahe,
jateula thofno famane waen.
Eghume, snakreni waen mamahe igne mala oro soru
doglo tei ka foflogna kheragu iara na,
mala faboubothuni phepeogna
nei kheꞌigna.
Gaꞌase majaghani ne cheke
10Iara nogna naꞌa,
eghuteuna naꞌa magnahaghei ghau iara fara.
11Kheraguo, mei!
Mei, mala tei tapa mata.
Eghuteuna ginau bongi na tapa thuru noda
farihoteidi sisi mata are.
12Tapa ginauna dofra hamerane boibongi,
mala tei ka nagare gaju grep
mala filoni glahula funu au khakla majaghani,
eghuteuna sisidi re fnerhahi.
Eghuteuna mala jaola filodi glahu gaju pomegranet igre la funu au sisi tagna.
Ka vido igne,
iara ginauna snakre ghau thegu malamu iagho.
13Ka vido ignela,
iagho ginauna tangomana te gnanghodi sisi mandrek te siri famane fara,
eghuteuna reꞌe ginauna famane sisi mala ghamu
eghuteuna famane sisi igre au faligoho ghita tapa.
Kheraguo,
iara neke tathaji malagu thegu fabrahu malamu iagho.
81Jame iagho thabusigu iara
teke karha tapa ka kaisei idoda!
Jame te eghuna,
neuba iara ne gnangho nigho kate thafo nigho ka nabrou na,
theo kaisei naikno nate chekeni kaisei glepo na.
2Jame te eghu na,
iara ginauna atha nigho tei ka sugagna idogu na,
ihei teke farirhiu ghau iara na.
Eghuteuna iara ginauna tusu ari ka iagho waen
nei khologna sisi pomegranet te famane mamahe fara mala koꞌu iagho.
3Iagho habo khame mairimu na ke pari phaꞌugu iara,
eghuteuna tugha ari ghau rhemui fei khame nhetamu.
4Ghotilo gaꞌasemi Jerusalem.
Ghotilo mala nhaꞌa cheke:
Ghotilo thosei farhani ghami ghepa
kate thuru fodu teu ghepa na.
Fafamno Khoje
Goro gaꞌase re ne cheke
5Ihei site mei funugna ka namono nagou,
te loku khame te mei balugna kheragna na gnea?
Gaꞌase majaghani ne cheke
Kheraguo.
Iara neke fadofra nigho ke pari gaju sisi te keli,
ka vido aheva
teke funu bukla idomu iagho,
teke karha iagho na.
6Iagho those ghathodi keha gaꞌasei.
Iagho lisei ghau iara thegu kolho lamna ka nagnafamu na.
Jateula te theome tangomana kaisei naikno te fanogrini glehe na,
theome kaisei naikno tangomana te fanogrini noda namha tapa igne.
Puhi te fari magnahaghei fara tapa igne,
theome tangomana te gnafa na,
jateula naikno na theome tangomana te rikhani Beku na.
Uve, noda namha tapa
na jateula kaisei khaꞌaghi biꞌo te dudulu fabiꞌo fara ra eghu.
7Jame namha na jateula khaꞌaghi eghu
ba khoꞌu biꞌo na,
ba nabritha na
theome tangomana te faknoho ni namha na.
Eghuteuna neuba jame kaisei mae snakredi gobigna lepo te keli te au tagna re
mala foli namha nogna keha mae na,
mana ginauna theome magnahagheni.
Goro gaꞌase re ne cheke
8Ghehati au kaisei greghami majaghani,
nu ikoi fara ngau te mala tolaghi na.
Jame kaisei mae majaghani mei tore mala tolaghi,
igne unha nate eni ghehati na:
9Uve, jame naꞌa gaꞌase majaghani,
ghehati na reireghi fakelini naꞌa.
Nu jame naꞌa kaisei gaꞌase glalaba,
ghehati na theome snakreni naꞌa te mala tei tafri kolho.
Gaꞌase majaghani ne cheke
10Iara neke jateula kaisei gringni thina neku,
nu gognarona, phei chuꞌugu iara gre biꞌo
jateula phei thoa brahu eghu.
Kate filo ka iara kheragu iara igne,
mana thofno kelitagna fara ka iara,
naugna iara la gaꞌase biꞌohi naba mala tolaghi.
11Solomon au nagare grep
ka vido Baal-Hemon.
Keha mae toreni nagare igne,
eghuteuna mare folini mana ka kaisei thogha silva mala sisigna na.
12Solomon, iara kelitagu mala tathaji iagho kaisei thogha silva mala nou iagho,
eghuteuna iara jaola kelitagu ka mae igre mala tathaji mare phei gobi silva mala nodi mare.
Naugna iara au kaisei nogu nagare mala nogu iara thegu!
Mae majaghani ne cheke
13Kheraghuo,
iagho te au ka nagare.
Kheramu re falithui nigho jare nei magnahaghei fara te nomhini naoglamu iagho na.
Nu iara jaola magnahaghei te mala nomhini naoglamu iagho na!
Gaꞌase majaghani ne cheke
14Kheraguo,
Faghose mei ka iara!
Iagho faghose mei jateula kaisei glepo tautagu te chari faghose fara ka thogele te au gaju te khakladi re famane sisiri fara!