Rut
Thoutonu eigna Rut
Thoutonu kmo’ei eigna buka igne
Thoutonu te au lamna ka buka igne neke edi ka narane tharakna gna Israel kani theo ngau king. Ka narane tuana, funei kolho teke batudi mare teke magridi naokare, eghuteuna mare fadogli di puhi biꞌo fateote’o. Buka tuana mare kiloni Jajis cheke eidi magra teke edi mare.
Nu buka igne ka Rut na theome cheke eidi magra, cheke eigna Rut, kaisei gaꞌase funu kantri Moab ihei teke tolaghi ka kaisei mae ka tharakna gna Israel ihei teke mei au Moab. Ke leghu mae igne lehe, leuleghu fata na Rut toghoni fabrahu nanghogna na, eghuteuna naꞌa fatutuani heta ka LORD, nodi God tharakna gna Israel.
Aonu kate jifla Moab nanghogna na teke figri ka nogna kantri na, Rut ne tei balugna, eghuteuna naꞌa au balugna ka kantri igne. Naꞌa au ka vido igne ne tolaghi ka kaisei mae ka tharakna gna khetogna na, eghuteuna karha kaisei mae sua nalhaꞌu mae ihei te kiloni mare Obed. Eghuteuna King Devet mae ihei te king biꞌo ka king te gnafa Israel, karha mei ka tharakna gna Rut.
Kaisei gaoghatho ulu ka puhigna God, au lamna ka buka igne. Ka Ol Testamen, Profet Isaia neke cheke eigna puhi God te foli fajifladi nogna naiknore ka puhi biꞌo fateote’o te thokedi mare. (Filoni Isaia 43:1; 44:22-23; 63:9.) Eghuteuna ka Nonomho te keli na, mare cheke eigna Jisas te foli fajifla ghita tahati ka nakhiboda. (Filo ka Taetus 2:14.) Ka buka Rut igne, tahati tangomana te filoni kaisei gaoghatho te keli eigna puhigna God. Boas ne foli fajifla nogna gobigna lepo Naomi ne tolaghi ka Rut mala gnafa nodi puhi biꞌo fateote’o repare.
Keha glepo ulu te mala laseni tahati na, puhidi naiknodi Israel te tathaji nanghagna mae ihei teke lehehi nu theome au sua. Ka Diutronomi 25:5-10, Moses neke chekeni kaisei nogna vetula God. Jame kaisei mae ihei tolaghi, nu theo thugna, kaisei thabusigna mana mala tolaghi ka glehe kokoi igne mala au thugna. Sua igne ginauna au nanghagna khetogna ululahu gaꞌase igne naugna mare theome magnahaghei nanghagna kaisei maegna Israel te hui na. Ka thoutonu eigna Rut igne, mare fatutuani jame kaisei glehe kokoi theo ivagna, keha mae ka tharakna gna mae ihei teke lehe na, mana tangomana teke tolaghi ka glehe kokoi igne mala tathaji nanghagna khetogna naꞌa ulu lahu na. Eigna igne Boas kaisei mae ka tharakna gna khetogna Rut ululahu igne, neke tolaghi ka naꞌa.
Thoutonu eidi mae funei te au lamna ka nodi buka mae Jajis, falalase ghita tahati puhi biꞌo thokedi fabrahu nogna naikno God Israel, naugna mare theome leghuni mana. Nu thoutonu eigna Rut igne jaola falalase ka tahati te God fablahi ni kaisei gaꞌase te theome ka tharakna gna Israel. God fablahi ni gaꞌase igne, mala kaisei naꞌa ka iheire te fatutuani rheta ka God nei thofno ghatho tahuni mana.
Keha vido ka buka igne
Rut neke pulo balugna Naomi Betlehem: 1:1-22
Rut neke thafoni Boas: 2:1–3:18
Rut ne tolaghi ka Boas: 4:1-17
Tharakna gna King Devet: 4:18-22
1Khetogna nei thugna teu Naomi re ne kafe lehe ka kantri Moab
1-3Ka narane ame kegra king nga Israel teuna, vido te theo gano ka kantri tuana na ne thoke mei. Aonu mae Elimelek, kaisei maegna ka namono Betlehem ne tei au keha finogha ka kantri Moab. Mana ne jifla baludi khetogna nei thugna nalhaꞌu teure ne tei au jare. Nanghagna khetogna mae Elimelek na Naomi, eghuteuna nanghadi phei mae thugna mana re, mae Malon ghe mae Kilion. Naiknodi ka vikegna Efrata, ka namono Betlehem ka provins Juda. Mare au neu jare Moab ne ghilei lehe mae Elimelek. Naomi au soru jare baludi phei mae thugna re. 4Aonu mae Kilion ne tolaghi ka Opa eghuteuna mae Malon ne tolaghi ka Rut neu, ne au soru jare nabotho finogha. 5Ke leghu na mae Malon ghe mae Kilion gre ne jaola ne lehe jare Moab, eghuteuna Naomi ne theo khetogna nei thugna neu.
Naomi neke figri Betlehem
6-7Kate nomhini Naomi God te kokhonidi naiknodi Israel gre te toghodi ka gano na, naꞌa ne tarabana mala ke figri Juda baludi phei nanghognare.
Aonu kate tei teu retilo ka nabrou na, 8Naomi ne cheke eghu ka Opa ghe Rut, “Jame te keli na ghopa ke figri ka namono mala ke au keu ka kmami, idomi nei vikemi teure. Iara na toreni God mala falalase ranghi ghami nogna namha na, jateula te eni ghopa te namha ghau iara gne eghu. Phei thugu nalhaꞌu iara ra la lehehi eghu ra. Eghuteuna ghopa neke jaola neke keli ranghidi phei thugu nalhaꞌu iara ra. 9God ginauna togho ghami ghopa mala ke tolaghi nei au fakeli eghu ghopa baludi khetomire.”
Kate kubae te gnafa Naomi ka repa na, repa ne orio tanhi fabiꞌo. 10Aonu repa ne cheke eghu ka Naomi, “Theo, neuba ngau, ghepa na tei ngala balumu iagho mala tei au baludi vikemu iagho re.”
11Nu Naomi ne cheke eghu ka repa, “Theo, theome raꞌe keli jame te mei ghopa balugu iara na. Te keli na ghopa ke figri, naugna iara gne na theome tangomanahi nate ke au sua nalhaꞌu mala teke tolaghi ghopa na. 12-13Ke figri ka namono si ghopa. Eigna iara gne la kaekave noguhi la theome nabahi teke tolaghi na. Naugna neubane cheke eghu ngau iara ka ghopa, ‘Ofou ngala si ghopa, iara gne ginauna nake au phei thugu nalhaꞌu signea mala ke tolaghi ghopa!’ Cheke te edi iara igre theome mala ke lhoti ghami ghopa mala teke tolaghi na eghu. Ba, jame neubane tolaghi ngala iara ginau bongi na ne au phei thugu nalhaꞌu, ghopa theome tangomana te ofo teu te ghilei biꞌo repa na. Nu glepo igre thofno ninhigrana fara! Naugna God na la theome filo meihi ka iara gognaro na.”
14Aonu repa neke funu orio tanhi fabiꞌo, kate tanhi te gnafa na, Opa ne kubae ka Naomi tanhi neke figri. Nu Rut ne tirogna tei kokoni Naomi.
15Aonu Naomi ne cheke eghu ka Rut, “Filo sagho, kheramu gaꞌase ia keli figri hila ka kheragna nei nogna god eghu te pogho soruni naꞌa Moab na. Eghume, jame te keli na iagho ke figri balugna.”
16Nu Rut ne cheke eghu ka Naomi, “Ido, iara theome magnahaghei te tei koko nigho iagho na, iara gne magnahaghei te tei ngala balumu iagho. Thosei ke kuru fafigri ghau iara. Aheva te tei iagho na, iara na jaola tei jare. Kheramu iagho re mala jaola kheragu iara, eghuteuna nodi God mae Israel te pogho soruni iagho na jaola pogho soruni iara. 17Ka vido aheva te lehe iagho na, iara mala jaola lehe jare mala giugilu balumu iagho ka vido tuana. Eghume, thofno glepo te tutuani na ngala te cheke arini iara ka iagho igne. Theo kaisei glepo te tangomana ni te fota ghita, nu kaisei glehe ngala te tangomana ni te mala fota ghita na eghu. Jame te cheke chaichaghi nogu kolho iara ke ulumu iagho na, God ginauna fate ghau iara.” 18Kate filo glani ni Naomi te lao gaoghathogna fara Rut te mala te tei balugna na, Naomi ne theome cheke.
19Aonu Naomi ghe Rut ne jifla jare Moab ne tei Betlehem. Kate filodi repa te posa ka namono na, goro gaꞌasere ne eha eghu fabiꞌo, “Ihei signea? Naomi na kela pulo mei ka tahati!”
20Nu Naomi ne cheke eghu ka reꞌe, “Uve, iara Naomi ngala, nu ghotilo thosei ke kilo ghau iara Naomi gognaro na eghu. Eigna gaoghathogna nangha Naomi teu igne, ‘Glealeꞌa’ eghu. Te keli na ghotilo kilo ghau iara Mara, gaoghathogna na, ‘diꞌanagnafa’ eghu. Naugna God mae ihei te au nolaghi na ne fadiꞌa nagnafa ghau iara. 21Kate jifla kokoni iara namono igne, iara neke jifla balugu kmana glepo. Nu gognaro na iara ke pulo mei sasama. Nu gognaro na, kate batu fapulo ghau iara God agne na, God atha fadelei gobigna lepo fateote’o re ka nakarhaghu iara na.”
22Thoutonu igne eigna Naomi te jifla kokoni kantri Moab. Naꞌa neke figri balugna Rut gaꞌasegna Moab. Repa neke pulo Betlehem ka narane teke katogna mare nagare bali na.
2Rut ne tei hiro gano
1Mae Boas gne khetogna Naomi. Mana kaisei mae dedei nei mana jaola kaisei mae biꞌo eghu ka namono tuana.
2Aonu Rut ne cheke eghu ka Naomi, “Iara magnahaghei tei loku ka nagare mala salo keha bali kate kato soru te lilisei te tei goro nalhaꞌure are. Jame te keliu ngala teu rehati na, iara ginauna tei ke leghudi reꞌe mala salo tei bali te ikodi are.”
Naomi ne cheke eghu ka naꞌa, “Keliu ngala, tei sagho.” 3Aonu Rut ne tei ka nagare na. Naꞌa ne tei ke leghudi mae glokure ne salo phaꞌudi bali te lilisei faleghu teke tei mae glokure. Nu Rut theome laseni nagare igne te nogna nagare mae Boas, vikegna mae Elimelek teu na.
4Ke leghugna igne, mae Boas jifla ka namono na ne mei ka nagare na ne cheke eghu, “Hamerane keli,” neu ka nogna mae gloku te kato bali teure ne cheke eghu, “LORD te au balumi.”
Aonu mare ne cheke eghu, “LORD te fablahi nigho.”
5Mae Boas ne ghusna eghu ka mae funeigna gloku na, “Ghema, vikegna mae ihei si gaꞌase majaghani ana ia?”
6Mae funeigna gloku na ne cheke eghu ka mae Boas, “Gaꞌase ana thaugna Moab neke mei agne balugna Naomi. 7Naꞌa neke tore ka iara mala tei ke leghudi mae glokure mala salo tei phaꞌudi bali are. Naꞌa loku funugna hamerane na la ghilei posa gognaro gne. Gognaro na naꞌa ke gnafa lao ghu katha vido ka grorofe ana.”
8Mae Boas ne cheke eghu ka Rut, “Thughuo, fanomho sagho ka iara, iagho thosei tei salo phaꞌu bali ka keha nagare are. Iagho mala atha phaꞌu bali ka nagare igne kolho. Iagho au agne mala loku baludi nogu gaꞌase gloku iara igre. 9Filo fakeli ka vido aheva te loku mae nalhaꞌu nei gaꞌase teu are mala tei ke leghudi gaꞌase gre. Iara chekehi mala thosei eni naiknore kaisei puhi ka iagho. Eghuteuna glahula te rou koꞌu na, iagho tei koꞌu ka botol tela tohohi goro gaꞌase na are eghu.”
10Eghuteuna Rut tufru soru pari ne cheke eghu ka mae Boas, “Iara gaꞌasegu ka keha vidoi. Naugna unha sagho te keli fara ranghi ghau iara gnea?”
11Nu mae Boas ne cheke eghu ka Rut, “Iara la nomhidihi unha te edi iagho ranghini nanghomu ia, funu ke leghugna teke lehe khetomu ia tela ghilei mei posa ka narane gognaro gne. Iara laseni te tei kokodi iagho idomu nei kmamu teura, nei iagho jaola jifla kokoni thofno namonomu na tela mei au balumi ghehati ka namono aheva iagho te theome lasedi puhidi naikno igre. 12God gna Israel ginauna taba nigho eidi unha gloku te keli teke edi iagho ra. Eghuteuna mana ginauna reireghi fakeli nigho, naugna iagho ne mei ka mana jateula kaisei sua nanghaji te deni nogna vido mala poru na ia neu.”
13Aonu Rut ne cheke eghu ka mana, “Mae funei, iagho thofno keli fara ranghi ghau iara, neubane theome kaisei nou naikno gloku iagho ngau iara, iagho ne thoghei ne famane cheke ranghi ghau iara. Eghume iara gognaro na thofno glealeꞌa fara gaoghathogu na.”
14Ka vido te ima teu mare na, mae Boas ne cheke eghu ka Rut, “Mei atha kaisei bret mala titihi ka waen igre mala famane mamahe mala ima.”
Eghume, Rut leghuni nogna cheke mae Boas igne ne atha bret na ne mei gnokro baludi mae glokure ne ima baludi mare. Aonu mae Boas ne atha keha bali teke gahuhi ka khaꞌaghire ne tusu lao ka naꞌa. Rut ima ne boho ne salaꞌui keha gano. 15-16Ke leghugna ima te boho na, Rut kegra haghe neke funu salo phaꞌudi balire. Mae Boas ne cheke eghu ka nogna mae glokure, “Ghotilo lisa soru keha ka naꞌa na mala haru teu ghotilo are mala salo naꞌa, thosei khini naꞌa.”
17Aonu, Rut salo phaꞌudi balire ne ghilei plulu naprai na. Kate salo te gnafa na, naꞌa gnokro soru ne fifliti khunedire ne atha ganodire. Tahudi re jame gijana nabotho kilo. 18Rut gnafa gloku ne atha ne posa balugna vido gano teke ima kokodi naꞌa fari hotei aublatha re ka Naomi.
19Aonu, Naomi ne ghusna eghu ka Rut, “Ba? Iagho neke tei atha bali aheva? Ka nagare ihei? God te fablahini ihei te ghatho nigho igne!”
Rut ne cheke eghu ka Naomi, “Uve, iara neke tei loku ka nogna nagare mae te kiloi Boas.”
20Naomi ne cheke eghu, “Tutuani fara, LORD na fablahini mae igne! LORD na thofno keli fara ranghi ghita, eghuteuna mana theome ghatho ihoni nogna nhaꞌa cheke teke eni mana ka iheire tela lehehira nei ka iheire te karha nga teu gre eghu.”
Naomi ne cheke eghui, “Uve, thau igne kaisei vike ngala ka thau teke tolaghi iara tagna ulu lahu ia. Eghume jame mana meu ngala jame te gijagna te mala reireghi ghita tapa na eghu.”
21Aonu Rut ne cheke eghu, “Uve, tutuani fara, mae funei na neke cheke eghu langau ka iara, ‘Iagho mala loku fabrahu agne baludi goro gaꞌase nei mae gloku igre eghu mala ghilei gnafa salogna bali igne.’ ”
22Naomi ne cheke eghu ka Rut, “Thofno keli fara, iagho na tei mala loku baludi rehati kolho, eigna glahula jame te tei loku iagho baludi keha naiknoi na, reꞌe ginauna edi keha puhi te theome keli ka iagho.”
23Aonu Rut ne loku fabrahu baludi goro gaꞌase te loku ka mae Boas ne ghilei gnafa katogna bali nei wit teure. Eghuteuna Rut au fabrahu neu repa Naomi.
3Naomi ne magnahaghei hironi kaisei khetogna Rut
1Naomi neke cheke eghu ka Rut, “Nanghona, iara magnahaghei te hironi kaisei khetomu iagho, mala taji nigho nei fiofilo nigho eghu. 2Fanomho fakeli ka iara iagho ia! Boas, mae funei te loku teu iagho baludi nogna gaꞌase gloku na are, naꞌa kaisei vike ngala ka mae biꞌo teke tolaghi iara ia. Eghume mana ngala tangomanau te tolaghi ka iagho na. Ginau bongi na mana na tei ka vido te mala fifliti khunedi balire. 3Eghume iagho na tei apu nou ghiha sedi nei famane pipichi nou eghu ia! Eghuteuna iagho na tei ka vido aheva nate tei loku mana na eghu, nu iagho thosei tei fakakhana eghu. Te keli na iagho ofou ghilei gnafa ghamu nei koꞌu eghu mana. 4Kate kaikaliti thuru eghu teu mana na iagho tei ka vido aheva te thuru teu mana na eghu. Iagho te pagli haghe thotoku ka ghahegna na, eghuteuna iagho lao thuru rhedi ghahegnare eghu. Eghuteuna mana ginauna na cheke ranghi nigho unha te mala eni iagho na.”
5Rut ne cheke eghu, “Keli fara, iara na leghudi unha te chekedi iagho igre.” 6Aonu Rut kegra haghe ne tei ka vido aheva te mala fifliti khunedi balire ne leghudi nogna cheke Naomi re.
Mae Boas magnahaghei te toghoni Rut
7Ke leghugna ima nei koꞌu teu te boho na, mae Boas ne keli tagna ne tei ne thuru soru rhegnai bukrei bali na. Rut thoghei ne tei ne pagli haghe thotoku na ne tei thuru rhedi ghahegna mae Boas re. 8Fari hotei bongiro kate figri te dofra haghe na, mae Boas ne jaglo nogna kaisei gaꞌase te thuru teu rhedi ghahegnare ne dofra haghe.
9Mana ne ghusna eghu, “Ihei sagho ia?”
Rut ne cheke eghu, “Iara Rut, kaisei nou gaꞌase gloku iagho. Iara magnahaghei nigho iagho te atha ghau iara mala khetomu iagho, naugna iagho vikegna ngala ihei teke tolaghi iara tagna tifa ia.”
10Mae Boas nomhidi nogna cheke Rut igre ne cheke eghu ka naꞌa, “God te fablahi nigho, thuguo, naugna puhi te eni iagho igne tei la salaꞌuni fara unha teke eni iagho ranghini nanghomu Naomi ia. Eghume, iara thofno jaglo nogu fara te tirou hironi iagho kaisei mae te majaghani te thofno dedei ba mae majaghani te kuma, nu iagho na theome gaoghatho te mala tolaghi ka nafnata mae majaghani igre na. 11Naikno gna namono igne la kafe lase nigho iaghohi te kaisei gaꞌase keli fara iagho na. Eghume, iagho thosei mhaghu eghu, eigna iara ginauna na edi unha te toredi iagho igre. 12Tutuani fara, iara kaisei mae ka vike gna khetomu iagho na. Nu mae te au teu agne te thofno namo fara ke ulugu iarai ka mae teke tolaghi iagho tagna na te thofno nabagna te mala tolaghi ka iagho na. 13Thofno keli fara te thuru teu iagho agne bongi gognaro gne. Iara na faghila tei hironi gaoghathogna mae ihei te chekeni iara igne. Jame te magnahaghei nigho mana na, thofno keli fara. Nu jame te tirogna teu mana na, iara cheke ka nanghagna LORD mae ihei te karha te tifa, iara ginauna tolaghi ka iagho. Iagho au agne ka iara ghilei hamerane nathuꞌu.”
14Aonu Rut ne thuru ne ghilei rane jare rhedi phei ghahegna mae Boas re. Hamerane boibongi, mae Boas ne fadofrani Rut mala theome laseni kaisei naikno te mei thuru teu Rut jare na.
15Mae Boas ne cheke eghu ka Rut, “Atha mei kaisei nou pohe mala pakra soru agne pari mala tofa soru iara keha bali malamu iagho.” Mae Boas ne tofa soru keha bali ka nogna pohe Rut na ne thokeni varadaki kilo. Mana ne toghoni Rut ne pala haghe ka naꞌa ne atha neke pulo ka suga na.
16Kate posa lao Rut ka suga na, Naomi ne ghusna eghu ka naꞌa, “Nanghona, ne faꞌunha neu ngala iagho ia?”
Aonu Rut ne toutonu ka Naomi gobigna lepo teke edi mae Boas ka naꞌa re. 17Rut ne cheke eghu, “Boas na theome magnahaghei te sasama teke mei iara ka iagho na ne famei ka iara varadaki kilo igre.”
18Naomi ne cheke eghu ka Rut. “Uve, tapa na ofoni kolho unha nate chekeni mae Boas na. Boas ginauna ghosei fadoglini puhi igne. Tapa theome laseni unha nate thakle mei ginauna.”
4Mae Boas ne tolaghi ka Rut
1Mae Boas ne tei ka grengathagna namono te mala faidu na ne gnokro ofo neu jare. Theome raugha mae Boas ne filo thafoni mae ihei teke chekeni mana ka Rut ia, mana ne mei salaꞌu jare. Mae Boas ne cheke eghu ka mana, “Ghema thabusigna, meigu sagho agne.” Aonu mana mei ne gnokro soru balugna mae Boas.
2Mae Boas ne kilo meidi nabotho mae funei te au ka namono tuana ne cheke eghu ka mare, “Mei ghotilo gnokro agne mala fanomho ka iara.” Aonu mare ne mei ne gnokro balugna mana jare. 3Mae Boas ne cheke eghu ka mare, “Naomi ia kela pulo mei funugna Moab. Naꞌa magnahaghei te fofoli nogna vido glose mae nebuda mae Elimelek ia. 4Iara magnahaghei te cheke ka iagho mae thabusigu ia glahula me magnahaghei iagho vido glose igne. Te magnahagheni iagho na, iagho na foli vido glose igne ke uludi hatimare mae funei te gnokro teu igre eghu ia. Nu jame te tirouni iagho na, iagho cheke mei ka iara gognarola mala laseni iara, naugna iagho ngala te au nolaghi te mala foli na vido glose igne. Nu jame te theome foli na, iara gne ngala fapea mae te au nogu nolaghi te mala foli na vido glose igne eghu.”
Mae igne ne cheke eghu ka mae Boas, “Uve, keliu ngala, iara na foli vido glose igne.”
5Mae Boas ne cheke eghu ka mana, “Uve, keliu ngala te mala foli vido glose igne ka Naomi teuna. Jame te eni iagho igne na, iagho na tolaghi ka Rut eghu, gaꞌase gna Moab ana nanghogna Naomi khetogna mae Elimelek. Kate teke tolaghi iagho ka Rut na, iagho mala ke khotogna keu tharaknagna mae khotogna vido glose igne.”
6Nu mana ne cheke eghu ka mae Boas, “Tore theo, iara theome tangomana teke foli fapulo vido glose igne na. Tutuani glepo igne neke nogu iara, nu iara theome magnahaghedi glepo igre teke maladi mae thugure teku iara re teke tei ka keha mae suai na. Eghume foli iagho eghu.”
7Ka nodi kastom mae Israel tifa na, jame kaisei mae magnahaghei foli falehe glose ba fari tughui glose ka keha mae na, mae ihei te snakreni nogna vido glose na te mala foli keha mae na, mae khotogna vido glose igne mana na atha koko nogna sadol na. Aonu mana na tusu lao sadol na ka mae ihei te magnahaghei foli vido glose tuana, mala laseni naiknore tela khotogna hila mana u vido glose tuana.
8Mana ne cheke eghu ka mae Boas, “Iagho themu ngala nate foli na vido glose tuana.” Mana atha koko nogna sadol na ne tusu lao ka mae Boas.
9Mae Boas ne cheke eghu ke uludi hatimare mae funeire nei keha mae biꞌola ngau teure, “Filo ghotilo ia. Gognaro na iara la foli fajifla hila ka khamegna Naomi gobigna lepo teke khotodi naꞌa ra. Gobigna lepo teke nodi mae Elimelek, mae Kilion nei mae Malon teku ra gognaro na kela noguhi iara. 10Eghuteuna Rut, thaugna Moab teke lehe kokoni mae Malon ia kela khetogu hi iara gognaro na, mala ke au sua Rut ke au nanghagna mana mala ke atha kasa teke nogna vido glose mana re. Eghume nanghagna mae ihei teke lehehia ginauna na theome luvu ka tathadi mae kheragnare, ba ka tathada tahati te hui kau namono igne. Ghotilo te gnafa na mae igre la filonihi unha te eni iara gognaro gne.”
11Aonu hatimare mae funei nei keha mae biꞌo langau eghu au teku jare na ne kafe cheke eghu, “Uve, keli fara, ghehati gne mala cheke balumu iagho. God fablahini Rut ihei nate mei au ka sugamu iagho na mala jateula teke edi Resel ghe Lea tifara eghu, eigna repa neke au kmana thudi ka Jekop, tahati gne neke vikegna mana. Iagho mala kaisei mae funei te fnakno ka namonoda Betlehem ka nohi Efrata. 12Goro thumi ghopa nate tusu ari God re ginauna fnakno jateula teke tharaknagna mae Peres tifa ra eghu, mae Peres ia neke thudi mae Juda ghe Tama.”
Mae Boas ghe Rut ne au thudi
13Aonu mae Boas ne atha Rut na ne tei ka sugagna na. Eghuteuna ke leghugna, God te fablahidi repa. Eghume, Rut ne bukla ne karha kaisei thugna nalhaꞌu. 14Goro gaꞌasegna namono Betlehem ne cheke eghu ka Naomi, “Naomi, tahati cheke fakelini God! Gognaro na God la tusu ranghi nigho kaisei gramu la karha mei ka Rut mala reireghi nigho iagho. Sua igne mala kaisei mae biꞌo ka tahati agne Israel ginauna. 15Mana ginauna tusu ranghi nigho nakarha majaghani nei mala taji nigho eghu kate kaekavemu na. Rut gne ne namha nigho fara. Neuba iagho ne au fitu thumu nalhaꞌu te mala togho nigho na, mare ginauna na theome taji fakeli nigho kolho jateula te eni naꞌa ranghi nigho kate karha meigna thugna nalhaꞌu igne eghu.”
16Naomi atha ne pala haghe sua na ne taegoni. 17Goro gaꞌasegna namono na ne kiloni nanghagna sua na, Obed. Eghuteuna rehati ne cheke eghu fabrahu ka Naomi, “Gognaro na Naomi la au kaisei thugna nalhaꞌu!” Mae Obed gne neke kmagna mae Jesi, eghuteuna mae Jesi gne neke kmagna mae King Devet.
Vikegna mae King Devet
18-22Igne teke thoutonu eigna vikegna mae Peres te posa ka teke vikegna mae King Devet na.
Peres gne neke kmagna mae Hesron,
mae Hesron gne neke kmagna mae Ram,
mae Ram gne neke kmagna mae Aminadab,
mae Aminadab gne neke kmagna mae Nason,
mae Nason gne neke kmagna mae Salmon,
mae Salmon gne neke kmagna mae Boas,
mae Boas gne neke kmagna mae Obed,
mae Obed gne neke kmagna mae Jesi,
eghuteuna mae Jesi gne neke kmagna mae Devet.