Sam

Sam

Nodi Khoje Hatimare Mae Jiu

Thoutonu kmo’ei eigna buka igne

Buka Sam igne au kaisei nangha te brahu fara “Nodi khoje hatimare mae Jiu.” Buka igne au khoje nei tharai eghu ke lamnagna. Cheke “Sam” teu igne gaoghathogna na “Khoje” eghu. Sam igre kmana mae ka hatimare mae Israel teke riorisodire.

Buka igne au kmana nafnata khoje. Khoje igre kehare mala cheke fakelini God nei mala pogho soruni mana eghu. Kehare mala tarai lao ka God mala toghodi mana naiknore nei reireghidi, nei fakarhadi eghu mana. Keha ka khoje igre mala tarai ka God mala toreni mana mala hata koko nakhibodi naiknore nei mala cheke thakledi nakhibodire ka mana. Eghuteuna keha khojere mala tegioni God naugna mana ne mae keli fara. Eghuteuna kehare mala jaola khoje balu tarai ka God mala paradi mae naoka.

Ka Sam igre tahati filodi mae Israel gre chekeni koba nanghagna God te blahi na nei kiloni mana Iawe. Nanghagna Iawe igne tahati na kiloni “LORD.” Buka igne thofno falalase ghita tahati eigna Iawe ngala te thofno God te tutuani te au te tifa na.

Kani au teku Jisas ka nauthoglu igne, mana neke cheke ka SAM ka nogna gloku na. Mae teke rioriso Nonomho te keli gne, mare jaola neke rioriso ka nodi buka re. Eghuteuna kani teke fufunu Jisas nogna khiloau na te mei thoke gognaro gne, leuleghu fata na naikno khiloau igre mare iu’iju ka SAM kate tarai re.

Buka SAM, au 150 sam tagna, ululahu au glima buka ikodi. Nu ke leghu, vikegna Israel lilisei fodu ka kaisei buka kolho. Glima buka igre neke eghu:

Keha vido ka buka igne

Buka Sam Kaisei: 1–41

Fapea Buka Sam: 42–72

Fatilo Buka Sam: 73–89

Fafati Buka Sam: 90–106

Falima Buka Sam: 107–150

Buka Kaisei

(Sam 1–41)

Sam 1

Puhigna naikno te keli nei puhigna naikno te diꞌa

¹Keli tadi fara iheire te tirodi fanomho ka nodi farirhiu naikno te diꞌa puhidire.

Eghuteuna tirodi gnokro baludi mala cheke fadiꞌa ni God.

²Naikno igre na iu’ijuni nei ghathoni eghu fabrahu nogna vetula LORD na bongi narane.

³Nakarhadi naikno igre na jateula gaju te karha ka geri khoꞌura eghu na keli fara.

Kate thoke mei nodi thofno narane na, gaju igre ginauna ure,

eghuteuna khakladire ginauna theome brango.

Aonu unha te edi naikno igre na ginauna na jateula igne eghu mala keli fara.

⁴Naikno te diꞌa puhidire na theome jateula tuana eghu.

Thono theo fara.

Mare na jateula chara te flalo ka nuri ia eghu kolho.

⁵God ginauna fate falehedi naikno te diꞌa puhidire igre.

Eghuteuna mana ginauna na hata fadeleidi naikno te diꞌa re ka naikno te keli re.

⁶Naikno te leghuni nabrou te diꞌa na mala lehe kolho.

Eghuteuna naikno te leghuni nabrou te keli na mala karha fabrahu tifa tifa.

Sam 2

Nogna vavahi king God

¹Naugna unha ne roghe fodu nga naikno igre te mala tapla sorudi God ghe nogna king teke vavahi God?

Mare theome tangomana!

²Neubane eghu ngau, hatimare mae king ka nauthoglu igne ne tarabana mala magra neu.

Hatimare mae funei hironi kaisei nabrou te mala tapla sorudi LORD ghe nogna king.

³Hatimare ne cheke eghu,

“Tahati magnahaghei te jifla ka khamedi phia mae igre mala snagla noda.

Tahati theome magnahaghedi phiamare te funei fruni ghita.”

⁴LORD gnokro neu ka sape nafnakno kligna na,

ne rogna maꞌedi fara nodi nafnata groghe mare igre.

⁵Aonu mana ne diꞌatagna fara ne cheke eghu ka mare,

“Fiofilo ghami ghotilo ia!”

Kate laseni mare te diꞌatagna God na,

mare ne thono mhaghu nodi fara.

⁶Mana ne cheke eghu ka mare,

“Iara LORD neke vahini mae king igne mala funei ka Thogele blahi Saion.”

⁷King na ne cheke eghu,

“Gognarona iara na chekeni unha teke chekeni LORD ia.

Mana neke cheke eghu ka iara, ‘Iagho mae thugu iara.

Funu gognaro gne, iara mae kmamu iagho.

⁸Iagho tore ghau iara mala funei frunidi naikno te gnafa,

nei namono te gnafa teu ka nauthoglu igne.

Iara na snakre aridi ka iagho mala reireghidi iagho.

⁹Iagho ginauna na falehedi naikno te gnafa igre ka aean,

eghuteuna iagho ginauna na puri nguangujadi jateula suspen thina eghu.’ ”

¹⁰Eghume ghotilo mae king te gnafa ra, fanomho fakeli ka cheke te edi iara igre.

Ghotilo mae lida ka nauthoglu ra, ghotilo hiro fakelidi gaoghathodi cheke igre.

¹¹Ghotilo mala pogho soru ranghini LORD, nei fafnaknoni eghu mana.

¹²Ghotilo mala mhaghuni nei tufru soruni eghu mana.

Te theo ghotilo na, ghotilo ginauna ghosei lehe kate diꞌatagna fara mana na.

Nu ihei te fatutuani God nei au famaku ka mana teuna,

mae tuana keli tagna fara.

Sam 3

Tharai hamerane

Nogna khoje kilo fnakno mae Devet kate rikhani mae thugna Absalom naugna mae Absalom magnahaghei faleheni mae kmagna na.

¹LORD, nogu naoka iara gre kmana fara.

²Eghuteuna mare figri tagru ghau iara ne cheke eghu,

“God ginauna tirogna toghoni mana.”

³LORD, iagho mala jateula nogu greoreo eghu iara ka hoholo te thoke ghau iara igre.

Iagho ngala te loku haghe ghau iara na nei loku fapuloni nagnafagu iara na.

⁴LORD, kate au teu iagho ka thogele te blahi na, iara neke tore ari ka iagho.

Eghuteuna iagho neke nomhi meidi nogu tharai iara gre neke togho ghau iara.

⁵LORD, iara na thuru soru mala thuru blakno nogu, eghuteuna hamerane na iara neke dofra haghe.

Theo kaisei naikno te eni kaisei puhi te diꞌa ranghi ghau iara na, naugna iagho ne reireghi ghau neu iara.

⁶Iara theome tangomana te mhaghudi nabotho thogha naoka te mei kegra falithui ghau igre.

⁷Nogu LORD,

mei fakarhi ghau.

Iagho nabamu te magridire nogu naoka iara igre nei tapla sorudi eghu nodi nolaghi naikno te diꞌa igre.

⁸LORD, kaisei iagho ngala te au nolaghi te mala fakarha naikno na.

Iara gne tore nigho mala fablahidi nou naikno igre.

Sam 4

Tharai thuru

Nogna khoje mae Devet mala koje ka gita.

¹God, iara laseni puhimu iagho na, eigna iagho edi koba unha te keli re.

Iara jaola lase nigho te taji ghau nei bara fothi ghau teuna.

Eghume, kate au iara ka hoholo te kilo ari ka iagho na, iagho kokhoni ghau nei togho ghau eghu iara!

Gognarona iagho kokhoni mei ghau iara nei nomhidi eghu nogu tharai gre.

²Ghotilo naikno ra, niha fata ghotilo nate tapla faparini nanghagu iara na?

Niha fata magnahagheidi fabrahu si ghotilo glepo te theo nafudi igrea?

Niha fata leghudi si ghotilo puhi te chaichaghi igrea?

³Ghatho fakelini si ghotilo cheke igne. Eigna LORD na vavahi naikno te doglo malagna thegna.

Eghuteuna ka narane te kiloni iara na, LORD tangomana te nomhi ghau iara na.

⁴Ghotilo mala mhaghuni God, eghuteuna lilisei puhi te diꞌa re eghu.

Kate thuru na, ghotilo mala ghatho fakelini u cheke igne, nei au kmu eghu.

⁵Ghotilo mala fafara ka LORD jateula te chekeni teu ka vetula na igne eghu.

Eghuteuna fatutuani ni mana eghu.

⁶LORD, kmana naikno tarai eghu, “God filo mei ghami.

Ghehati magnahaghei nomi kmana glepo te keli ka iagho.”

⁷Naikno te chekedi glepo igre keli tadi fara kate au kmana ghedi wit ka nagare na, nei au ghedi kmana waen te mala koꞌu na.

Nu glealeꞌa te lilisei iagho ka thiꞌagu iara na ke biꞌogna nodi glealeꞌa naikno igrei.

⁸LORD, kaisei iagho ngala te reireghi ghau iara te mala au fakeli iara na.

Iara gne theome tangomana te mhaghuni kaisei glepo na.

Kate thuru na, iara thuru blakno.

Sam 5

Mana tarai ka God mala reireghini

Nogna khoje mae Devet mala koje kau nifu phoposa.

¹LORD, iagho laseni te au diꞌanagnafa iara gognaro gne.

Nomhi meidi nogu tharai gre.

²Iagho nogu God nei nogu king eghu iara.

Togho mei ghau nei nomhidi eghu nogu natanhi gre.

³Hamerane na iagho nomhini naoglagu iara na.

LORD, kate phagegna naprai na, iara mei tarai ke ulumu iagho,

eghuteuna iara ofoni gho mala cheke tughudi nogu tharai gre.

⁴God, iagho theome glealeꞌadi puhi te diꞌare.

Naikno te edi puhi te diꞌa igre theome nabadi te au balumu iagho na.

⁵Naikno te fahaehaghe na theome nabagna te kegra ke ulumu iagho na.

Eghuteuna iagho tirouni fara naikno te gnognoro fara na.

⁶Iagho tangomana te tapla sorudi nafnata naikno te chaichaghi re.

Eghuteuna iagho tiroudi naikno te falehe porudi keha naiknore,

ba naikno te maomajora.

⁷Naugna ka nou namha biꞌo iagho ranghi ghau iara,

iara nabagu te tei ruma ka Sugamu iagho te blahi na.

Iara ginauna na tei ka sugamu iagho te blahi tuana mala tufru soru nigho nei tarai eghu.

⁸LORD, nogu naoka iara gre thono kmana fara.

Eghume iara magnahaghei nigho iagho te bara fothi ghau ka mae iheire te magnahaghei mei goigoni ghau iara igre.

Batudi ghahegu gre mala leghuni iara u puhimu iagho te doglo na.

Falalase ranghi ghau u nabrou te magnahaghei iagho te mala leghuni iara na.

⁹God, nogu naoka iara gre nodi chekere theome tutuani kolho.

Unha te ghathoni mare na mala goigonidi keha naiknore kolho.

Nodi chekere famane mamahe fara jateula suka eghu.

Nu thiꞌadire fodu ka saosagro nei falehe naikno eghu.

¹⁰God, fatedi nei fapuhidi naikno te diꞌa tuare.

Eghuteuna lisa laodi mala snoꞌo mare ka khora teke dokha thedi mala snoꞌo iara teku mare na!

Eigna mare thono patugama fara ka iagho ne edi kmana nakhibo.

Eghume thosei snakredi te kegra ke ulumu iagho na eghu.

¹¹Nu naikno te fatutuani nigho iagho re ngala te glealeꞌa fabrahu na.

Mare ginauna na glealeꞌa balu koje nei kilo fnaknoni eghu nanghamu iagho na.

Reireghidi nei fakarhidi eghu.

¹²LORD, iagho fablahidi naikno te leghudi nou chekere.

Iagho na jateula greoreo eghu mala reireghi fakelidi naiknore.

Sam 6

Nogna tharai mae ihei te fogra biꞌo

Nogna khoje mae Devet mala koje ka gita.

¹LORD, neubane diꞌatamu iagho ka iara,

iagho thosei cheke fabiꞌo ghau nei para ghau eghu iara.

²LORD, iara gne la glaꞌe fara hi, eigna nogu nanhetare la gnafahi.

Kokhoni ghau fara, ke faheta fapulo ghau.

³LORD, thosei ofo me raugha, mei togho ghau.

Eigna nakarhagu iara gne la thono diꞌa fara gognaro na!

⁴LORD, mei hata fapulo ghau.

Eigna iagho kaisei mae mala lolokeli fara, fakarhi ghau kau glehe.

⁵Naikno tela lehehi ra, mare theome tangomana teke ghatho nigho na.

Ka namono te au teu mare na, mare theome tangomana teke kilofnakno nigho na.

⁶Iara eha la eha la ghilei glaꞌe soru nogu.

Leuleghu bongi na iara tanhi nogu fabrahu kolho.

Nogu sape na la ghilei bothu ka kholodi tathagure.

Nogu kokhogu na la jaola la bothu ka kholodi tathagure.

⁷Nogu naoka gre e fatanhi ghau iara fabrahu, la ghilei huge tathagure.

Gognarona iara theome tangomana te fifilo na.

⁸Ghotilo naikno te diꞌara thosei mei namo ka iara.

Eigna God na la nomhidihi nogu tharai iara re.

⁹God na fanomho ka iara kate kiloni iara mana na.

Mana ginauna na nomhidiu nogu tharai iara re mala mei togho ghau iara.

¹⁰Nogu naoka iara gre ginauna mamaja nodi nei mhaghu nodi eghu fara kate filoni mare te togho ghau iara LORD na.

Mare ginauna ghosei rikha tei delei.

Sam 7

Nogna tharai mae ihei te au ka hoholo

Nogna khoje mae Devet balu tharai ka God eigna puhi bi’o teke eni mae Kus vikegna mae Benjamin ranghini mana.

¹LORD, iagho nogu mae funei iara. Iara mei ka iagho mala poru ka iagho.

Fakarhi ghau, hata fadelei ghau ka khamedi mae te ngolhi tafri ghau iara igre.

²Jame te theo iagho na, mare ginauna na jateula lion eghu pala ghau tei ka vido aheva te theo kaisei naikno te mala fakarhi ghau iara na.

Ka vido tuana mare ginauna na kina sasakani u thinigu iara na.

³LORD God, iara neke theome eni kaisei najafra ranghidi keha naiknore.

⁴Iara theome chaghini iara mae kheragu na,

ba fiti chekeni kolho, nei fiti fadiꞌani eghu kolho iara nogu naoka na.

⁵Te eni iara kaisei glepo te diꞌa na,

iagho tangomana te snakredi mae naokare mala mei ngolhi ghau nei haru famaku ghau eghu iara.

Mare tangomana te tapla soru ghau nei goigoni ghau teu iara na,

eghuteuna lisa soruni thinigu iara na mala thuru au jare pari ka glose na.

⁶God, nogu naoka iara gre thono diꞌatadi fara ka iara.

Iara magnahaghei nigho te mei togho ghau.

Iagho mei mala kegra fanogridi.

Diꞌatamudi sagho nei figri tagrudi eghu mare.

Eghume iara magnahaghe nigho iagho te falalase meini te mae doglo iara ka tathamu na.

⁷Gognarona iagho gnokro ka nogna sape nafnakno king kligna eghuteuna chekedi naiknore mala mei rhemui.

⁸LORD, iagho tangomana te fatedi naiknore.

Fate ghau iara sagho jateula iagho te fatedi keha naiknora eghu.

Kate fate ghau iara iagho na, naiknore ginauna nomhini ka iagho te theome eni kaisei puhi te diꞌa iara ranghidi keha naiknore.

⁹God, puhimu iagho na thofno doglo fara,

iagho filo suplidi nagnafami nei lasedi teu glepo te magnahaghedi ghehati re.

Tapla fothidi sagho u gaoghatho te diꞌa te au ka naikno te diꞌa are.

Eghuteuna toghodi naikno te keli re mala kegra heta.

¹⁰God na nogu greoreo iara.

Naugna mana ne baradi iheire te leghudi nogna chekere.

¹¹God na fatedi koba naiknore ka puhi te doglo.

Nu iheire te edi puhi te diꞌare mana thofno paradi fara.

¹²Jame te theome ke tughu mae te diꞌa puhidire igre,

God ginauna jaha fafnonu nogna naflahi te mala magra na.

Mana la kulu tarabana lolho lauhi nogna phaloho na.

¹³Eghuteuna nogna jata khaꞌaghi na mana la kulu tarabana lauhi.

Mana la kulu louloku lauhi nogna glepo mala magra igre ka khamegna na.

¹⁴Filo si ghotilo! Naikno te diꞌa tuare, mare la kulu ghaoghathonihi mala eni puhi te diꞌa na.

Eghuteuna mare tangomana te chaichaghidi naiknore.

¹⁵Nu khora teke eni mare mala snoꞌo keha naiknore teku na,

tuana ngala na teke snoꞌo mare thedi na.

¹⁶Eghume, najafra teke eni mare igne ginauna nake figri ka thedi.

Eghuteuna magra teke eni mare ranghidi keha naiknore igne ginauna jaola nake figri neke fakokhoanadi kolho thedi.

¹⁷God na eni koba unha te doglo na, eghuteuna iara na cheke fakelini mana.

Iara ginauna na koje ranghini LORD ka maloa kligna mala pala hagheni nanghagna mana na.

Sam 8

Nogna nolaghi God nei nogna nafnakno naikno

Nogna khoje mae Devet.

¹LORD, iagho nomi funei ghehati.

Naikno ka namono te gnafa ka nauthoglu na igre filoni nou nolaghi biꞌo iagho na nei cheke fakeli ni God.

Naikno ka namono te gnafa ka nauthoglu na igre filoni nou nolaghi biꞌo iagho na.

Ghehati cheke fakelini nou nolaghi iagho na ghilei ari posa kligna.

²Goro sua nei gegeꞌe teu igre jaola cheke fakelini nanghamu iagho na.

Iagho au ka vido te keli te theome tangomana nou naoka nate ari te magri nigho na.

Eghuteuna naikno te tirodi leghudi nou cheke iagho re, mare theome tangomana te ari te goigoni nigho na.

³Kate filoni iara u maloa teke vuavuha iagho gne,

iara ne filodi glaba nei nathunu teu are thono te famane lilisei fakeli iagho fara.

⁴Iara ne cheke eghu, “Tore, ghehati gne khogla naikno kolho.

Mala unha sagho te reireghi fakeli ghami ghehati gnea?”

⁵Neuba ngau, nafnakno teke tusu mei iagho ka ghehati igne thofno biꞌo fara uludi nafnakno fateote’o teke tusu lao iagho ka gobigna lepo te au ka maloa na are.

Nu nomi nafnakno ghehati igne au kolho ke parigna nou nafnakno iagho kligna na.

⁶Iagho neke vahi ghami mala funei frunidi nei reireghidi eghu gobigna lepo teke vuavuha iagho gre.

⁷Uve, sipu nei buluka nei bosu mhata

⁸nei nanghaji nei sasa nei gobigna lepo ka nhorora.

⁹LORD God, iagho nomi funei ghehati.

Naikno ka namono te gnafa ka nauthoglu na igre filoni nou nolaghi biꞌo iagho na nei cheke fakeli nigho ka maloa kligna.

Sam 9

Tharai mala cheke fakelini God

Nogna khoje mae Devet.

¹LORD, iara magnahaghei te cheke fakeli nigho ka nagnafagu na.

Iara magnahaghei te toutonudi ka naiknore u famane gloku te gnafa teke edi iagho igre.

²Iagho fagleꞌani fara nagnafagu iara na, iara ginauna koje kilo fnakno nigho.

God, iagho te au nolaghi biꞌo ke klignadi gobigna lepo fateote’o.

³Kate filo ari nigho na, nogu naoka iara gre ne kafe rikha,

eghuteuna mare ne kafe khoko soru pari ne lehe.

⁴Tutuani fara, kate fateni iagho naikno na, puhimu iagho na thono doglo fara.

Eghuteuna kate fate ghau iara na, iagho theome filoni kaisei najafra ka iara.

⁵Iagho la fatedihi naikno bongihehe te pogho soru ka mumuju ra.

Iagho la roꞌe sorudihi naikno te gnognoro ra,

eghuteuna naikno igre ginauna na theo kaisei naikno nate ghatho fapulodire tifa e tifa.

⁶Nomi naoka ghehati ra la hui ari nodi hila si ra.

Iagho neke paꞌe soruhi namonodire, eghuteuna naiknore teuna la thofno ghatho ihodihi eghu mare.

⁷Nu LORD na ginauna mala king fabrahu tifa e tifa.

Mana la kulu gnokrohi ka nogna sape nafnakno na mala fatedi naiknore.

⁸Mana funei frunini nauthoglu igne ka puhi te doglo.

Eghuteuna ka puhi te keli igne te fatedi mana naiknore.

⁹LORD iagho jateula suga te maku ia eghu.

Naikno te au papara ka nodi naokare, mare tangomana te tei au jare na.

Kate au diꞌanagnafa na mare tangomana te tei poru jare na.

¹⁰Naikno te lase nigho re mare ginauna na fatutuani nigho.

God, thosei figri tagrudi naikno te mei ka iagho te mala toghodi iagho re.

¹¹Tahati koje kilo fnaknoni LORD, mae ihei te king ka namono Saion.

Tahati mala toutonuni nogna gloku te keli ka naikno te gnafa te au heva heva.

¹²God na kokhonidi iheire te au papara. Mana theome ghatho ihodi nodi tharaire.

Eghuteuna ke tughu fapulo naꞌau papara na ka iheire teke paradi naikno te au diꞌanagnafa re.

¹³LORD, kokhoni ghau iara! Filo meidi khabru nei diꞌanagnafa teu tela edi ka iara nogu naoka gre.

Hata fapulo ghau, naugna iara gne la namohi kau glehe.

¹⁴Eghume iara gne ginauna kegra haghe ke uludi naiknore ka namono Jerusalem mala toutonudi gobigna lepo teke edi iagho ra.

Iara ginauna na eha balu glealeꞌa ka iagho naugna iagho neke fakarhi ghau iara.

¹⁵Hatimare mae bongihehe gre neke dokha kaisei khora malami ghehati neku, nu ke snoꞌo kolho thedi.

Phigoro malami ghehati teke lilisei mare na neke khale kolho thedi.

¹⁶LORD ne falalase puhigna te doglo na kate fatedi mana naiknore.

Naikno te diꞌare ne eꞌei puhi mala goigonidi keha naiknore, nu glepo igre nake figri nake goigonidi kolho thedi.

¹⁷Naikno te diꞌa te figri tagruni God teu are ginauna tei ka namonodi naikno tela lehehira mala luvu fabrahu kolho jare.

¹⁸Naikno te au kuma gognaro gre ginauna nake gleale’au.

Naugna God ginauna nake toghodiu.

Eghuteuna naikno te lisei faparidi thedire God ginauna nake pala haghedi kligna.

¹⁹LORD, mei sagho! Thosei snakredi naikno ne nhetahi thedi teu te figri tagru nigho are mala filodi tathamu nei foflomu teu iagho re.

Iagho fakegradi ke ulumu mae bongihehe are mala fate falehedi.

²⁰LORD, falalase sagho nou nolaghi na mala mhaghu nodi mare.

Eigna mare theome tangomana te ulu nigho na, naugna mare khogla naikno kolho.

Mare theo kaisei nodi nolaghi.

Sam 10

Tharai mala toreni thotogho na ka God

¹LORD, naugna unha sagho te au fakhaba ka ghehati gnea?

Naugna unha sagho te poru teu kate au teu ghehati kau hoholo gnea?

²Naikno te diꞌa gre mare neke dokha khora mala snoꞌo naikno te kuma gre neku.

Nu iara magnahaghei nigho te snakre laodi ka khora tuare mala snoꞌo thedi.

Naugna mare ne fahaehaghe fara ne ngolhi tafridi naikno te kuma re.

³God, mae te diꞌa igne, mana cheke fahaehaghedi fara glepo te diꞌa te magnahaghedi thegna re.

Mae igne magnahaghedi kmana glepo fara, ne figri tagru nigho, ne cheke fadiꞌa nigho.

⁴Mae te diꞌa igne mana tirogna ghatho tahuni God.

Mana ne lalasehi thegna neu ne cheke eghu,

“God na theome tangomana te lasedi nei nangadi teu puhi najafra teke edi iara re.”

⁵Nu God, iagho theome fateni kolho mana!

Mae te diꞌa igne theome magnahaghei te pari ka nogna chekere.

Mana cheke fadiꞌadi nei maꞌedi eghu nogna naokare.

⁶Aonu mana ne funu cheke eghu,

“Iara ginauna kegra hetau, theome tangomana kaisei puhi nate thoke ghau iara ginauna.”

⁷Foflogna mae igne thono diꞌa fara. Naugna e fodu ka chaichaghi nei famamhagu eghu koba.

Mana ghosei ngala te cheke fajifladire cheke te diꞌa te mala goigonidi keha naiknore.

⁸Mana gnokro poru efrau ke lamna namono,

ofoni ihei te au kokhonini na mala akni faleheni.

⁹Mana poru efrau jateula lion te efra teu ka gluma thina ra eghu.

Mana poru ofodiu iheire te kuma mala fakhaledi ka nogna phighoro na, mala korho teidi delei.

¹⁰Mana gnokro kmu ofoniu kolho ihei te au kokhonini na.

Nogna nolaghi biꞌo mae te diꞌa igne thofno tapla faparini fara mana.

¹¹Mae te diꞌa na cheke eghu ka nagnafagna na,

“God na theome nanga nognadi puhigu iara re!

Mana la dofuhi phei tathagnare!

Mana theome tangomana te filo ghau iara na!”

¹²God, mei sagho. Iagho mei mala fapuhini mae igne.

Ghathodi sagho naikno te au kokhonidi igre.

¹³God, mala unha eghu sagho te snakreni mae igne te filo fapari nigho gnea?

Mala unha eghu sagho te cheke eghu ni mana gnea,

“God na theome tangomana te para ghau iara na?”

¹⁴Nu iagho la filodihi puhidi mae te diꞌara.

Iagho la lasedihi khabru nei papara eghu te edi mare ka keha naiknora,

eghume iagho tarabana mala toghodi naikno te au papara are.

Naikno te au kokhonidi nei glehe kokoi teu igre lisei soru ka khamemu iagho nakarhadi re.

¹⁵Rorhoꞌe sagho nodi nolaghi mae te diꞌa are mala thosei ke edi mare u nafnata puhi te diꞌa tuare.

¹⁶God ginauna mala king fabrahu tifa e tifa.

Mana ginauna na brue fadeleidi naikno bongihehe te au ka nauthoglu igne mala luvu fabrahu mare tifa e tifa.

¹⁷God, iagho ginauna na fanomho ka nou naikno tela goigonidi mare igre,

iagho ginauna fameomegodi mala ke keli nagnafa fapulo mare.

¹⁸Iagho ginauna na nomhidi nodi natanhi goro sua te glehe kokoi nei iheire te au kokhonidi.

Iagho ginauna toghodi nei tapla sorudi naikno te diꞌa igre.

Te eghu na naikno nogna nauthoglu igne ginauna nake theome eni kaisei puhi te diꞌa ka mare.

Sam 11

Nogna khoje mae ihei te fatutuani ni God

Nogna khoje mae Devet.

¹Iara thofno laseni LORD na ginauna togho ghau iara kate mei puhi biꞌo ka iara na.

Jau iagho gaoghathomu na cheke eghu ka iara,

“Rikha tei sagho ka thogele gno, jateula kaisei nanghaji te mhaghu te rikha te tei ia eghu.

²Naugna hatimare mae te diꞌa gre la lolhohi nodi phalohore.

Mare poru kate romno na la fatoti laohi nodi jatare ka gnarhodi nodi phalohore mala fada ka nagnafadi naikno te doglore.

³Uve, kate te theome eni naiknore kaisei puhi te keli na,

unha gne nate eni mae te doglo na? Ihei gne nate toghoni mana ginauna?”

⁴LORD na au ka nogna Sugablahi na.

Mana au kligna mala funei frunidi naiknore, eghuteuna tathagna na mana filou ngala ka naiknore.

Mana lasedi ngala unha te edi naiknore.

⁵LORD na filo glani nakarhagna ihei te keli na nei ihei te diꞌa na eghu.

Nu mana theome magnahagheni ihei te kuru magridi keha naiknore.

⁶Mana ginauna na tofa soru khaꞌaghi te ngire na ke klignadi mala thunu mare thinidire.

Mana ginauna paradi nafnata naikno igre, eigna mare ne eni puhi te diꞌa na.

⁷LORD na mae te doglo fara, eghume mana magnahaghedi naiknore te edi puhi te doglo re eghu.

Ihei ngala te leghuni chekegna God na nate filoni tathagna mana na.

Sam 12

Ihei te tore na, God ginauna toghoni mana

Nogna khoje mae Devet mala koje ka gita.

¹God, iagho togho mei ghami.

Naugna gognaro na iagho theome tangomana te filoni kaisei naikno te keli te au teu agne na.

Theo kaisei naikno te leghu nigho fabrahu.

²Mare chaichaghidi koba keha naiknore.

Mare thono lase cheke famaemahe fara nei muamugna eghu.

³God, fofotho sagho foflodi naikno te cheke famaemahe koba are,

nei fofotho foflodi naikno te cheke fahaehaghe te cheke eghu are,

⁴“Ghehati ginauna na chekedi unha te magnahaghedi themire, eghuteuna naiknore ginauna leghudi unha te chekedi ghehati re.

Naugna foflomi gre thono heta fara. Theo ihei nga te fothi ghami na.”

⁵Nu God ne cheke eghu,

“Iara ginauna mei, naugna naikno te diꞌa gre ne goigonidi naikno te kuma gre ne au kokhonidi nei tanhi neu.

Iara ginauna na tusu ranghidi u nablagna te magnahagheni fara mare na.”

⁶Chekegna God na thofno tutuani fara, nei thofno keli fara eghu,

jateula silva teke fitu fata gahu mare ka khaꞌaghi te famane klino ia eghu.

⁷God, fiofilo fakeli ghami,

nei reireghi fakeli ghami eghu fabrahu, naikno te diꞌa puhidire igre ginauna theome tangomana te goigoni ghami na.

⁸Naikno te diꞌa igre au tafriu ngala ka vido igre, mare ediu ngala puhi te diꞌare.

Eghuteuna naikno te diꞌa re gaoghathodi na glepo te diꞌa igre ngala glepo te keli re eghu.

Sam 13

Tharai mala thotogho

Nogna khoje mae Devet.

¹God, niha nau iagho nate ghatho ghau iara na?

Ba, iagho la ghatho iho ghauhila iara fabrahu tifa e tifa?

Ba niha nau iagho nate snakre ghau iara te mala filoni tathamu na?

²Niha nau iagho nate hata fadelei ka iara puhi te au ka iara igne?

Niha narane nei niha bongi eghu puhi igne nate au ka iara na?

Niha nau iagho nate togho ghau iara te mala theome au iara ke parigna nodi nolaghi mae naoka gre?

³God, iagho nogu mae funei iara. Ghatho ghau iara sagho nei nomhidi eghu nogu tharai gre.

Farheta ghau mala theome tangomana iara te lehe na.

⁴Eghume, nogu naoka iara gre ginauna theome tangomana te cheke eghu na, “La au hila ka khameda tahati si mae gnea.”

Iagho thosei snakredi mare mala glealeꞌa te filoni mare te au teu iara ka khamedi mare na.

⁵Nu tutuani, iagho ginauna kokhoni ghau iara koba naugna iagho ne namha ghau iara fabrahu.

Eghuteuna iara thofno glealeꞌa fara ka iagho, eigna iagho ginauna na togho ghau iara.

⁶Uve, iara ginauna na koje mala kilo fnakno nigho God.

Naugna iagho ne keli fara ranghi ghau iara.

Sam 14

Nogna puhi najafra naikno

Nogna khoje mae Devet.

¹Naikno te fameomekro na cheke eghu ka nagnafagna na,

“Jare na theo kaisei God kolho.”

Mae igne kaisei mae gnognoro fara kolho, mana ngala kaisei mae te mala eni u puhi te diꞌa na.

Theo kaisei naikno te tangomana te mala eni unha puhi te keli na.

²God au neu kligna ne filo soru ka naiknore.

Mana magnahaghei te filodi keha naikno te au tadi glalase te keli te mala tufru soru ranghini nei leghuni mana eghu.

³Nu theo fara. Mare la snivihi ka nabrou te keli na.

Mare kaisei nanaba ngala la kafe diꞌa fara tutuani.

Theo kaisei naikno te eni puhi te keli na. Theo fara.

⁴God ne cheke eghu, “Tore, naikno igre te edi puhi te diꞌa igre, ba, theome lalase sigrea? Ba, theo pha’udi sigrea?

Mare karhau kolho ka unha teke blau mare ka nogu naikno iara re, nei jaola tirodi tarai ka iara.”

⁵Nu ka narane tuana, naikno te diꞌa igre ginauna mhaghu nodi fara.

Naugna God na au baludi naikno te leghuni mana re.

⁶Naikno te diꞌa puhidire igre loku heta fara mala goigonidi naikno te kuma re.

Nu God na ne reireghi fakelidi te kuma igre.

⁷Iara toreni fara noda God mae ihei te au ka Thogele Saion te mala snakreni kaisei mae te mala fakarha ghita ka khamedi noda naokare.

Ka narane tuana tahati na thofno glealeꞌa noda,

eigna God na togho ghita tahati maeda Israel.

Sam 15

Ihei God te magnahagheni fara

Nogna khoje mae Devet.

¹God, ihei gne te nabagna te mala ruma ka sugamu iagho na?

Ihei gne te nabagna te mala tufru soru nigho Saion ka nou thogele te blahi na?

²Uve, jame ihei ngala te leghudi nei edi teu koba teu gobigna lepo te keli fara ka tathamu iagho na.

Nogna chekere mala tutuani nei keli eghu koba,

³mana theome mala chaichaghi tafridi keha naiknore.

Mana theome mala eꞌei puhi te diꞌa ranghini kheragna fofodu na,

ba theome mala vuavuha cheke te mala goigoni ni nanghagna ihei te au ka namonogna na.

⁴Mana theome mala fofodu ka ihei te tapla jafra ka nakhibo,

nu mana mala ghatho tahudi iheire te leghu nigho re.

Mana mala edi unha teke nhaꞌa chekedi thegna re,

neubane ninhigrana ranghini.

⁵Mana mala toghoni ihei te theo nogna sileni na,

nu mana theome mala ke tore fapuloni unha teke toghoni kheragna na.

Eghuteuna mana theome tangomana te hata sileni ka ihei nga te mala cheke fadiꞌani ihei te doglo teu kolho na.

Ihei te edi koba glepo igne na,

mana ginau kegra heta fabrahu.

Sam 16

Nogna tharai mae ihei te biꞌo nogna fatutuani na ka God

Nogna khoje mae Devet.

¹God, iara te tore nigho mala reireghi fakeli ghau,

naugna iara fatutuani nigho te mala bara fothi ghau na.

²Iara cheke eghu ka LORD, “LORD, iagho nogu funei iara.

Gobigna lepo te au ka khamegu iara na igre neke mei funudi ka iagho ngala.”

³Nogna naikno God ka nauthoglu igne thofno keli fara.

Iara thofno keli tagu fara te au nogu baludi mare.

⁴Iheire te tufru soru ka mumuju tuare ginauna hata mei kmana hoholo kolho ka thedi.

Iara ginauna na theome fafara fodu baludi, ba cheke thakledi nanghadi nodi god mare tuare.

⁵God, iagho ngala nafugna nakarhagu iara na.

Iagho tusu mei ka iara glepo te kmo’edi iara re.

Nakarhagu iara nathuꞌu nauriha na au ka khamemu iagho.

⁶Gobigna lepo te tusu mei iagho ka iara re thono keli fara.

Tututani, thono glepo keli fara.

⁷Iara cheke fakelini God, eigna mana ne batu fakeli ghau iara.

Neubane fari hotei bongiro, God ne cheke ranghi ghau iara mala leghuni nabrou te doglo na.

⁸Leuleghu fata na iara laseni te au teu God balugu na.

Mana au rhegui iara, eghume theome tangomana kaisei glepo nate mei goigoni ghau iara na.

⁹Eghume, nagnafagu na iara thofno glealeꞌa fara.

Eghuteuna iara theome tangomana te mhaghuni kaisei glepo na.

¹⁰Iagho ginauna na theome snakre tei ghau iara ka namonodi naikno tela lehehi ra.

Iagho theome snakre ghau iara te mala boto ke lamna gluma na naugna iara ne namha nigho iagho.

¹¹Iagho falalase fabrahu ka iara u nafnata nakarha te magnahagheni iagho na.

Kate au teu iara balumu na, iara keli tagu fara,

nei gaoghathogu na fodu fabrahu kau glealeꞌa.

Sam 17

Nogna tharai mae ihei te theome eni kaisei najafra

Nogna tharai mae Devet.

¹LORD, iara la khale ka puhi. Fadoglini tagu puhi igne.

Fanomhi ghau, nei togho ghau eghu eigna iara theome chaghi.

²Chekeni sagho te theome eni iara kaisei puhi te diꞌa iara.

Naugna iagho ngala te laseni unha puhi te doglo na.

³Iagho laseni gaoghathogu iara na.

Bongi thongana na iagho neke mei fariuriuni nakarhagu iara na.

Iagho neke theome filoni kaisei puhi te diꞌa ka iara.

⁴Iara theome cheke diꞌa jateula te edi keha naikno are eghu.

Iara leghuni nou cheke iagho na,

eghume iara theome jateula naikno te kuru magra nei gnognoro teu gre te eni puhi te diꞌa na.

⁵Leuleghu fata na iara leghuni nabroumu iagho na.

Eghume iara theome tangomana te snivi ka nabrou na.

⁶God, iara tore ari ka iagho, eigna iagho fanomhou ka iara.

Fanomho mei mala nomhidi nogu cheke gre.

⁷Falalase meini ka iara nou namha biꞌo na mala fakarha ghau iara.

Eghuteuna nogu naoka iara re ginauna na theome goigoni ghau iara naugna iagho ne bara fothi ghau iara.

⁸Reireghi ghau jateula iagho te reireghi fakelidi tathamu are eghu.

Pophoru fakeli ghau jateula khokorako gaꞌase gna te toku tafrudi thugnare ke paridi phia bagignara eghu.

⁹Te eghu na, naikno te diꞌa puhidire ginauna na theome tangomana te goigoni ghau iara na.

Hatimare mae naoka gre thono diꞌa fara ranghi ghau iara, eghuteuna mare bara ligoho ghau iara te mala falehe ghau iara na.

(Nu iagho theome snakredi mare te falehe ghau iara.)

¹⁰Hatimare cheke fabiꞌo fara balu pala haghedi kolho nangadi thedire.

Eigna mare tirodi kokhonidi kolho keha naiknore.

¹¹Eghume, aheva te tei iara na, mare tapla leghuni gahegu iara na.

Hatimare hironi narane aheva te mala tapla soru ghau iara na.

¹²Hatimare jateula lion te ofo ghau teu iara ra eghu.

Hatimare magnahaghei te kina sasakani thinigu iara na mala breku theo tokagna.

¹³God, mei sagho mala magra e tapla sorudi nogu naoka iara gre.

Iagho hata nou naflahi na mala magra ka mare mala ke hata fapulo ghau ka khamedi mae te gnognoro gre.

¹⁴God, fakarhi ghau ka khamedi mae iheire te ghathodi kolho nakarhagna nauthoglu igne.

Paradi fara sagho eidi unha glepo te diꞌa teke edi mare ra. Fapuhidi thudi mare gognaro gre nei gradi mare nate karha mei thogheiro.

¹⁵Nu iara gne neke theome eni kaisei najafra, eghume iara gne ginauna na thofno ari filo nigho.

Kate dofra haghe te filo nigho na, iara ginauna na thofno glealeꞌa fara.

Sam 18

God na tangomana te togho ghita ka magra na

Mae Devet neke kojeni khoje igne ka LORD kani teke fakarhini LORD mana ka mae Sol nei ka hatimare nogna mae naoka mana re.

¹God, iara namha nigho fara.

Iagho ngala nogu nolaghi iara na.

²God na jateula nogu bara eghu iara, mala bara fothi ghau fabrahu. Mana tangomana teke hata fapulo ghau iara ka khamedi nogu naokare.

Nogu God na jateula kaisei thina biꞌo eghu te mala tei te porudi iara nogu naokare.

God na jateula kaisei greoreo eghu te mala tafra iara ka nogu naokare.

Mana au nolaghi biꞌo te mala fakarha ghau nei reireghi ghau teu iara fabrahu na.

³Iara kiloni God, eghuteuna mana togho ghau iara, eghuteuna mae naokare theome tangomana te mei goigoni ghau iara na.

Tahati mala pala hagheni nanghagna LORD.

⁴U glehe na theome tei fakhaba ghau iara.

Glehe na jateula dogi te haru famaku ghau iara ia eghu, ba jateula galo te mei toku tafru ghau iara ia eghu.

⁵U glehe na loku famaku ghau iara jateula phighoro eghu mala hata tei ghau iara kau gluma.

⁶Kate au diꞌanagnafa na iara eha fabiꞌo ka nogu God mala togho ghau.

Mana au neku ka sugagna na neke nomhini naoglagu iara na.

⁷Gognaro na God ne thono diꞌatagna fara ka nogu naoka iara re.

Aonu mana ne fakheuni glose na, eghuteuna thogele te gnafa re ne kafe nghali tongana.

⁸Gagahu na ne jifla mei ka nehugna mana na.

Eghuteuna khaꞌaghi nei thina ngire eghu ne jifla mei ka foflogna mana na ne nhako gobigna lepore.

⁹Mana tothora maloa na ne soru mei.

Eghuteuna kaisei gromno ne au ke paridi phei ghahegnare.

¹⁰Kaisei engel ne palani mana ne ghosei flalo ne mei ka nuri biꞌo na.

¹¹Mana ne eni gromno te thuta na mala toku tafruni thegna jateula kaisei pohe neu.

Eghuteuna gromno gna nakhete na ne toku tafruni mana.

¹²Nu nakafli na ne mei funugna ka mana,

eghuteuna nakhete thina balu khaꞌaghi na ne jifla mei funugna ka gromno te thuta na ne khoko soru pari.

¹³LORD na au neu kligna ne cheke fabiꞌo jateula fila neu ka maloa na.

God au neu kligna ka maloa na ne cheke, eghuteuna khaꞌaghi nei nakhete thina teure ne khoko ne soru pari.

¹⁴Mana hohoro nakafli ka khoveo ne jateula jata neu ne fadi di nogna naokare,

aonu mare ne rikha ne theo tokadi.

¹⁵Kate diꞌatagna mana te cheke faheta ka nogna naokare, khotogna nhorora na thakle haghe ne kakhana.

Eghuteuna famamhakugna nauthoglu na ne jaola ne kakhana kate gae na.

¹⁶LORD na au neu kligna ne ngafa soru ne hata fapulo ghau iara kau karha.

Kate plulu iara ka nhorora na mana ne loku ka phei khamegu iara re ne korho haghe ghau iara.

¹⁷Nogu naoka iara re thono nheta fara ne theome tangomana iara te tapla sorudi mare na.

Nu God ne hata fapulo ghau iara ka khamedi mare re.

¹⁸Kate khale iara ka puhi na, mae naokare neke magri ghau iara.

Nu LORD neke reireghi ghau iara.

¹⁹Mana neke togho ghau iara neke hata fajifla ghau iara ka u glehe.

Naugna mana neke keli tagna ka iara.

²⁰Iara thofno leghudi puhi te doglo na,

naugna igne LORD ne tusu ranghi ghau iara kmana glepo te keli.

Kate theome eni iara kaisei najafra na, LORD ne fablahi ghau iara.

²¹Iara leghu fakelini nogna vetula LORD na. Iara neke theome figri tagruni nogu God na, nei iara neke theome eni kaisei puhi te diꞌa.

²²Iara ghaoghathoni fabrahu nogna vetula mana na.

Eghuteuna iara neke theome huhughuni nogna famane cheke mana na.

²³Mana laseni te theome eni iara kaisei najafra na.

Iara fiofilo fakelini nathaplagu na, glahula eni iara kaisei najafra.

²⁴LORD ne ghathoni puhi te doglo te eni iara na ne taba ghau iara.

Naugna iara ne au klino ka tathagna mana na.

²⁵God, ihei te au balumu fabrahu, iagho na au balugna mana fabrahu.

Ihei te eni puhi te doglo na iagho tabani mana ka puhi te doglo.

²⁶Ihei te leghuni puhi te klino na, iagho falalase ka mana puhi themu te klino na.

Nu ihei te leghuni puhi te diꞌa na, iagho parani mana ka puhi te diꞌa.

²⁷Iagho lisei haghedi iheire te nhaꞌa faparidi thedi.

Nu iagho ke nhaꞌa faparidi iheire te nhaꞌa fahaghedi thedi.

²⁸Nogu LORD, iagho nogu juta iara,

iagho hata fadelei gromno te toku tafru ghau iara igne.

²⁹God, ka nou tothogo iagho, iara ginauna na tangomana te tapla sorudi bukrei naoka igre.

Eghuteuna jame te tusu mei iagho nanheta ka iara na, iara nabagu te apla ka nodi bara mare na.

³⁰Puhigna God na e thofno keli fara nei doglo eghu. Jame te nhaꞌa chekeni mana kaisei glepo na, nogna cheke mana tuana ginauna na tutuani fara. God na jateula kaisei greoreo mala magra eghu, eghuteuna mana reireghi fakelidi iheire te tei poru ka mana.

³¹God mae ihei te tufru soruni tahati igne, kaisei mana ngala God na. Kaisei mana ngala te jateula kaisei thina teu te mala bara ghita na. ³²Kaisei God igne ngala mae ihei te mala fakegra heta ghau nei mala reireghi fakeli ghau teu kate tei iara na.

³³Mana fahetadi phei gahegu iara gre mala maku jateula ghahe nanigot eghu. Eghuteuna nogu naoka iara gre na filo ghau iara te theome uka iara kate tei ka phegu te ninhigrana na.

³⁴Mana farirhiu ghau iara eigna puhi te mala magra na. Mana fahetadi phei khamegu iara gre mala tangomana iara te gaoni phaloho te maku na.

³⁵God, iagho fakarhi ghau iara ka khamedi naoka gre.

Iagho pophoru ghau iara ka nou greoreo iagho ana. Iagho loku haghedi khamegu gre mala kegra heta iara.

Kate cheke tughuni iagho nogu thore iara na, iara na fnakno ka tathadi naikno gre.

³⁶Iagho neke reireghi fakeli ghau iara mala theome mei hati ghau nogu naokare.

Eghume mare theome tangomana te tapla soru ghau iara na.

³⁷Iara theome gnafa te ngolhidi fabrahu mare na.

Iara magnahaghei te ngolhidi mare ghilei tei thokedi nei goigonidi eghu mare.

³⁸Kate fadi sorudi iara te thuru lehe teu mare pari ke uludi phei gahegu gre,

mare na theome tangomana teke kegra haghe na.

³⁹Eigna iagho neke tusu mei nolaghi ka iara te mala magra na te mala tangomana iara te tapla sorudi mare pari na.

⁴⁰Iagho neke famamhagudi nogu naoka iara re neke figri neke rikha.

Iara falehedi mae iheire teke tirodi ghau iara re.

⁴¹Mare neke eha naikno mala mei toghodi neku, nu theo kaisei naikno te mei fakarhidire.

Mare neke tanhi ka God, nu God neke tirogna nomhidi mare.

⁴²Iara neke puri ngujadi neke jateula gaughavu glose te flalo tafri ka nuri ra neku kolho mare.

Iara neke tapla ghiaghihadi neke jateula gnagnapa ka nabrou ra neku kolho mare.

⁴³Kate naoka ghau iara naiknore,

iagho neke mei togho ghau iara te mala tapla sorudi iara mare.

Eghuteuna iagho neke snakre ghau iara mala funei frunidi keha naikno teke theome lasedi iara tifa re.

⁴⁴Kate nomhi ghau iara na, naiknodi keha kantri re ne ghosei ne mei pogho soru ke ulugu iara nei leghudi nogu cheke iara re.

⁴⁵Kate laseni tela ari tela theo nafudi hila nodi gaoghathore,

mare ne jifla kokodi nodi vido mala poru re ne mei balu fififri ke ulugu iara.

⁴⁶God, iara lase nigho iagho karha te tifa! Iara te cheke fakeli nigho eigna iagho ne reireghi fakeli ghau iara.

Iara pala hagheni nanghamu na eigna iagho ne fakarhi ghau iara.

⁴⁷Iagho neke foli fapulodihi puhi te diꞌa teke edi ranghi ghau iara nogu naokara.

Eghuteuna lilisei soru kmana naikno ke parigu iara.

⁴⁸Iagho neke hata fapulo ghau iara ka khamedi nogu naokare.

Tutuani fara, God, iagho neke fafnakno ghau iara ka tathadi nogu naokare.

Iagho neke togho ghau iara neke theome tangomana naiknore te magra falehe ghau iara na.

⁴⁹Eghume iara ginauna na pala hagheni nanghamu iagho na ke uludi iheire te theome lase nigho.

Eghuteuna iara ginauna na koje fafnakno nigho eigna nanghamu iagho na.

⁵⁰God, iagho neke vahi ghau iara mala king neku.

Eghuteuna iagho neke togho ghau iara mala tapla sorudi nogu naokare. Iara thofno laseni te thofno namha ghau iara iagho na.

Eghuteuna iagho ginauna na jaola namhadi fara mae king Devet nei vikegna mana nate karha mei thogheiro re.

Sam 19

Nogna nolaghi God na kakhana ka unha te edi mana re

Nogna khoje mae Devet.

¹Kate filo haghe ka maloa na, tahati filoni nogna nolaghi biꞌo God na.

Eghuteuna kate filo haghedi gobigna lepo ka maloa na igre, tahati thofno filoni nogna famane gloku teke eni mana ka khamegnare.

²Leuleghu narane na tahati filoni nogna nolaghi God na.

Eghuteuna leuleghu bongi na tahati jaola filoni nogna gloku mana na.

³Maloa baludi gobigna lepo igre theome tangomana te cheke na,

eghume tahati theome nomhidi naogladire.

⁴Nu nodi chekere la jiflahi ka naikno te gnafa ka nauthoglu gne,

eghuteuna nodi chekere la tei posahi ka naikno te au ka sulukhu te gnafa ka nauthoglu gne.

God neke eni bongi na mala jateula suga eghu mala plulugna naprai na.

⁵Naprai na phage haghe hamerane boibongi jateula mae teke tolaghi majaghani la te glealeꞌa te jifla mei ka nogna chogho na ia eghu.

Naprai na glealeꞌa te leghuni nogna nabrou na, jateula mae te lase chari te tarabana te mala chari ia eghu.

⁶Naprai na phage haghe ka keha philegna maloa na tei plulu ka keha philegna maloa na.

Eghuteuna theo kaisei glepo te rikhani nabranagna na.

⁷Nogna vetula LORD na thofno doglo fara, eghuteuna tangomana te tusu mei nakarha majaghani ka tahati.

Tahati tangomana te fatutuanidi nogna cheke mana re.

Eghuteuna nogna cheke mana igre tangomana te tusu lao gaoghatho te keli ka iheire te theome lalase.

⁸Tutuani, nogna vetula LORD na thofno doglo fara. Eghuteuna iheire te leghudi nogna farirhiu mana re thofno keli tadi fara.

Nogna vetula LORD na thofno tutuani fara, eghuteuna tusu mei gaoghatho te keli ka tahati.

⁹Ihei te ghatho tahuni LORD na mana eni puhi te keli na, eghuteuna puhi igne ginauna au fabrahu ka mana.

Gaoghathogna LORD na thofno keli fara, eghuteuna mana ginauna kafe fate ghita gnafa ka puhi te doglo.

¹⁰Iara magnahagheni fara gaoghathogna God na ke tulaodi dedei te gnafa ka nauthoglu igne.

Eghuteuna iara haimini glamnagu na thono mamahe fara jateula jujurukuli eghu.

¹¹LORD, nou farirhiu iagho gre tusu ranghi ghau iara gaoghatho te keli, eigna iara gne nou naikno gloku iagho.

Iagho taba ghau iara, naugna iara ne leghudi nou cheke iagho na.

¹²LORD, theo kaisei naikno te filo glanidi nakhibogna thegnare.

Hata fadeleidi nakhibo teke edi iara nu ihodi iara teugre.

¹³Lhoti ghau mala thosei ke edi iara puhi te fameomekro te magnahaghedi iara gre,

eghuteuna iagho thosei snakredi puhi te diꞌa igre mala funei fruni ni nakarhagu gne.

Gognaro te haghe na iara mala snagla ka nogna nolaghi nakhibo.

¹⁴LORD, iagho nogu vido keli mala poru iara nei fakarhi ghau eghu iara.

Iara magnahaghedi nogu tharai,

nogu cheke nei gaoghathogu teu iara gre mala keli nei doglo eghu ka tathamu iagho na.

Sam 20

Taraini king mala tei ka magra

Nogna khoje mae Devet.

¹Ghehati toreni LORD mala togho nigho kate au ka hoholo iagho na.

Nogna God mae ku’eda Jekop ginau bara fothi nigho.

²Mana au ka nogna Sugablahi na ka Thogele Saion.

Ghehati toreni mana mala togho nigho nei faheta nigho eghu.

³Ghehati toreni mana mala theome ghatho ihodi nou fafara iagho re.

Nu ghehati magnahagheni mana te mala keli tagna fara ka fafara teke gahu iagho ka khaꞌaghi teke fafara lao ka mana ra.

⁴Ghehati toreni mana mala tusu ranghigho unha te magnahaghedi iagho re.

Eghuteuna togho nigho ka unha gloku tela kulu ghathodi mala edi teu iagho ra.

⁵Eghume, kate uluni iagho magra na, ghehati ginauna eha fabiꞌo balu glealeꞌa.

Eghuteuna ghehati na ghathoni igne mala pala hagheni kligna nanghagna noda God.

Ghehati na toreni noda LORD mala tusu ranghi nigho gobigna lepo te toredi iagho re.

⁶Iara laseni LORD na neke vahi ghau iara te mala king teku na.

Tutuani fara, kate tei iara ka magra na, mana ginauna fakarhi ghau iara ka khamegna te nolaghi na.

Uve, mana au ka namono blahi kligna mala fanomho ka noda tharai tahati re mala togho ghita.

⁷Keha naiknore rouronu ka armi, kehare rouronu ka chariot, nei kehare rouronu ka jata.

Nu tahati na rouronu ka nogna nolaghi noda God.

⁸Nu nafnata naikno te rouronu ka chariot nei jata teu te magra igre ginauna tothokei mala uka pari.

Nu tahati ginauna kegra heta fabrahu tifa tifa.

⁹LORD, toghoni king mala tapla sorudi mana nogna naokare.

Togho mei ghami kate kilo ari nigho na.

Sam 21

Cheke fakelini God mae King

Nogna khoje mae Devet.

¹LORD, nomi king ghehati gne mana thofno glealeꞌa fara ka iagho eigna iagho neke tusu ranghini mana u nolaghi.

Mana thofno glealeꞌa fara eigna iagho neke tapla sorudi nogna naoka mana re.

²Unha te thono magnahaghedi fara mana re iagho neke tusu lao ka mana.

Unha te toredi mana re iagho neke edi ranghini mana.

³Iagho mei balu nou nolaghi te biꞌo mala fablahini mana nei mala lilisei soru ka pha’ugna na u khepi nafnakno teke hohoro kau gol.

⁴Iagho neke tusu lao u nakarha te keli teke toreni mana na.

Eghuteuna iagho neke tusu lao u nakarha te keli tuana ka mana mala au fabrahu tifa e tifa.

⁵Mana au nafnakno biꞌo naugna iagho neke toghoni mana mala tapla sorudi mana nogna naokare.

Nogna naiknore neke cheke fakelini nei kilo fafnaknoni neku mana.

⁶Iagho fablahini mana fabrahu tifa e tifa.

Mana thofno glealeꞌa fara naugna iagho ne au balugna mana.

⁷Nomi king ghehati gne thofno fatutuani ni LORD.

Eghuteuna mana ginauna kegra maku fabrahu naugna God ka maloa kligna thofno namhani fara nei taji fakelini eghu mana.

⁸King, iagho ginauna salo fodudi nou naoka te figri tagru nigho are mala koko laodi kau suga sosolo.

⁹Kate thakle mei iagho na, iagho ginauna na fahuidi jateula gnognofi te nhako fahui ka khaꞌaghira eghudi kolho.

Tutuani fara, LORD, iagho diꞌatamudi fara na eni kaisei khaꞌaghi biꞌo mala nako fahuidi.

¹⁰Ginauna na theo kaisei naikno ka mare te karha na,

eigna iagho ginauna na kafe falehedi gnafa.

¹¹Mare na edi keha gaoghatho te diꞌa te mala goigoni nigho iagho na.

Nu mare ginauna theome tangomana di kolho eghu.

¹²Iagho ginauna na fadi jatadi,

eghuteuna mare ginauna na figri tagru e rikha nigho iagho.

¹³LORD, ghehati nabami te pala hagheni nanghamu iagho na, eigna nou nanheta biꞌo iagho na.

Ghehati ginauna na koje fafnakno nigho eigna nou nolaghi biꞌo iagho na.

Sam 22

Nogna tharai ihei te au papara nei koje mala cheke fakelini God

Nogna khoje mae Devet.

¹Nogu God, nogu God, naugna unha sagho te tei koko ghau iara gnea?

Naugna unha sagho te tei au fakhaba ka iara te theome nomhidi nogu tharai iara grea?

²Nogu God, bongi narane na iara theome gnafa te kilo nigho na,

nu iagho theome fameomegoni nagnafagu gne.

³Nu neuba, iagho God te blahi, iagho king gna Israel te gnokro teu kau sape nafnakno,

ghehati cheke fakeli nigho.

⁴Ku’emi ghehati tifa ra neke ghatho tahu nigho nei fatutuani nigho neku.

Eghuteuna iagho neke hata fajifladi kau puhi biꞌo fateote’o.

⁵Mare neke tanhi ka iagho, eghuteuna iagho neke fakarhidi ka khamedi nodi naokare.

Mare neke fatutuani nigho, eghuteuna iagho neke toghodi mare.

⁶Nu gognaro na iara theome jateula naikno eghu, nu ka gaoghathodi naiknore iara gne jateula madukhe eghu kolho.

Naiknore diꞌa tadi fara ka iara, mare tirodi ghau iara.

⁷Naiknore filo mei ka iara ne maꞌe ghau iara.

Mare kmisu ghau iara ne bliubliu pha’udire.

⁸Mare cheke eghu ka iara, “Uve, iagho fatutuani ni God,

nu aheva ne tei si mana te theome mei te fakarhi nigho gnea?

Jame te magnahaghe nigho God na, naugna unha si mana te theome mei te togho nigho gnea?”

^9-10God, funu ka narane teke karha meigu na te ghilei mei posa ka narane gognaro gne iara neke fatutuani nigho.

Kate karha mei ka idogu na, iagho neke reireghi fakeli ghau iara.

Eghuteuna kani sua ikoi teku iara na, iagho neke fakarhi ghau iara.

¹¹Thosei tei fakhaba ghau kate au diꞌanagnafa teu iara gognaro gne. Naugna theo kaisei naikno nate mei togho ghau iara na.

¹²Kmana naoka mei falithui ghau iara jateula bukrei buluka te diꞌatadi ra eghu ka iara. Mare nheta fara jateula bukrei buluka di Besan ra eghu fara.

¹³Mare tarabana mala goigoni ghau iara,

jateula lion te rofo te nganga teu foflogna na te mala tomno lao bosu ra eghu.

¹⁴Iara gne la theo hi kaisei nogu nolaghi te mala kegra heta na,

eigna nogu nolaghi na jateula khoꞌu te thofa soru te blalho ka nusu ra eghu kolho.

Nhubragure la klasuhi ka thududire.

Eghuteuna gaoghathogure la blalhohi jateula suka eghu.

¹⁵Foflogu na la mojani fara la vuhai nakrofu, eghuteuna glapigu na la lutihi ka doadohagu na.

Iagho la lisa lao ghauhi iara ka glehe mala vuhai nakrofu kolho.

¹⁶Mae te diꞌa igre mei falithui ghau iara jateula bukrei khuma te rodi mei kathi ghau iara ra eghu.

Mare magnahaghei te mei kathidi khamegu nei gahegu teu iara re.

¹⁷Kate filo meidi nhubragu iara re, nogu naoka iara re filo mei e maꞌe ghau iara.

Naugna mare ne filo meini thinigu iara te glaꞌe fara te namo lehe na.

¹⁸Mare neke tufa nogu pohe iara na farihoteidi thedi kate lalahu khale mala laseni mae ihei nate nabagna te mala hata nogu pohe iara na.

¹⁹Nu, God, thosei tei koko ghau iara. Ghosei mei mala fakarhi ghau iara.

Eigna iagho ngala mae ihei te mala farheta ghau iara.

²⁰Hata fapulo ghau, eigna mae igre ginauna mei falehe ghau iara.

Iagho togho ghau iara eigna mae igre jateula khuma eghu na mei falehe ghau iara. Iara gne ginauna theome karhahi.

²¹Fakarhi ghau ka mae te jateula lion teu te magnahaghei mei ghamu ghau iara igre.

Bara fothi ghau ka nodi nolaghi mae te jateula buluka fakaukathu teu igre. Iara lase nigho te nomhidi nogu tharai iara igre!

²²Gognaro na iara ginauna toutonu ka mae kheragure eidi glepo teke edi iagho ra.

Iara ginauna na cheke fakeli nigho ke uludi mare.

²³Iara ginauna na cheke eghu, “Ghotilo maemi Israel, vikegna mae Jekop te ghatho tahuni nei pogho soruni teu God ra.

Ghotilo mala cheke fakelini mana.

²⁴Mana theome tangomana te ghatho ihodi figri tagrudi teu iheire te kuma, ba iheire te au papara.

Nu mana tangomana te cheke tughudi unha te toredi mare ka mana re.”

²⁵Iara ginauna na cheke fakeli nigho eidi unha teke edi iagho re ke uludi iheire te kafe khapru mei te mala pogho soru nigho re.

Iara ginauna na fathokeni nogu nhaꞌa cheke na mala fafara ari ka iagho ka Sugablahi na.

²⁶Naikno te kuma re ginauna ghamu ghedi boho.

Eghuteuna naikno te hironi God na, mare ginauna na pala hagheni nanghagna God na.

Iara toreni God mala fablahidi fabrahu tifa e tifa!

²⁷Naikno te gnafa nei kokholo te gnafa teu kau nauthoglu igne ginauna nake pulo mei ka iagho mala tufru soru nigho.

²⁸Eigna iagho mae king biꞌo te mala funei frunidi naiknore te gnafa heva heva ka nauthoglu igne.

²⁹Naikno te nolaghi fara ka nauthoglu gne ginauna na ghamu fodu nei pogho soru nigho eghu. Uve, naikno te gnafa nate mei pogho soru nigho re.

Kaisei narane ginauna mare na orio lehe.

³⁰Naikno te theome karha nga teu ra ginauna mala loku ranghi nigho.

Mare ginauna na toutonu eimu iagho ranghidi naikno nate karha mei teu thogheiro.

³¹Mare ginauna toutonuni puhimu iagho te keli na ka naikno nate karha mei thogheiro,

na cheke eghu ranghidi,

“God na neke fakarhidi nogna naiknore.”

Sam 23

God na reireghi fakeli ghita

Nogna khoje mae Devet.

¹LORD na reireghi fakeli ghau iara jateula kaisei nogna sipu eghu.

Eghume iara theome kmoꞌe kaisei glepo.

²Mana filoni kaisei vido te au buburu te keli mala tei ghamu nei gnafa fakeli eghu iara.

Mana batu tei ghau iara ka vido aheva te muana te au khoꞌu te keli mala koꞌu iara.

³Mana tusu mei gaoghatho majaghani ka iara.

Eghuteuna farirhiu ghau iara mala leghuni iara puhi te doglo na, naugna puhigna thegna LORD na thofno doglo fara.

⁴God, neubane tei iara ka vido aheva te romno fara, iara theome mhaghu nogu, naugna iagho au balugu iara.

Tutuani fara, iara laseni nou nanala nei khodo teu iagho gre ngala te fameomego ghau iara na.

⁵Iagho tarabana kaisei gaghamu biꞌo malagu iara ka tathadi nogu naokare.

Iagho taji fakeli ghau iara jateula kaisei mae biꞌo eghu ka suga muna.

Eghume nogu glealeꞌa iara na thono biꞌo fara jateula kaisei kapu khoꞌu te fodu te salauꞌi ra eghu.

⁶Tutuani fara, kate au teu iara ka nauthoglu gne, iagho ginauna kokhoni ghau iara nei namha ghau iara eghu fabrahu.

Eghuteuna iara magnahaghei te au balumu fabrahu tifa tifa.

Sam 24

God na mae King biꞌo

Nogna khoje mae Devet.

¹Nauthoglu nei thua nafnotu fateo te au ke lamnagna igre nogna LORD,

eghuteuna naikno te au tagna re jaola nogna mana.

²Naugna mana neke hohoro nauthoglu igne farihotei nhorora,

eghuteuna famamhaku pari ka khotogna nhorora.

³Ihei te nabagna te mala haghe Saion, ka nogna thogele LORD na?

Ihei te nabagna te mala ruma te tarai ka nogna Sugablahi mana na?

⁴Uve, ihei te klino nakarhagna na te theome tapla jafra ka nakhibo na,

ihei ngala te theome pogho soru ka mumuju,

nei ihei ngala te theome nhaꞌa cheke chaichaghi teu igne ngala nafnata naikno te nabagna na.

⁵LORD ginauna fablahini nafnata naikno igne eghuteuna fakarhani mana nei God kiloni mae igne “mae theo nakhibogna.”

⁶Nafnata mae igne tangomana te filoni nogna God mae Jekop.

Eghuteuna mae igne tangomana te tei namo ka mana.

⁷Ghotilo te au Jerusalem ra,

tothora fabiꞌo grengathagna namono biꞌo mala ruma haghe mae king biꞌo na.

⁸Mae ihei te mae king biꞌo na?

God ngala mae te nheta nei nolaghi teu ka magra na ngala te mae king biꞌo na.

⁹Ghotilo te au Jerusalem ra,

tothora fabiꞌo grengathagna namono biꞌo mala ruma haghe mae king biꞌo na.

¹⁰Mae ihei te mae king biꞌo na?

LORD ngala mae ihei te nheta ne au nolaghi biꞌo teu ke uludi naikno te gnafa ka nauthoglu igne na ngala te mae king biꞌo na.

Sam 25

U tharai kate au ka hoholo

Nogna khoje mae Devet.

¹LORD, iara tarai ka iagho kolho.

²Nogu LORD, iara fatutuani nigho koba.

Thosei snakredi nogu naoka iara gre mala tapla fapari ghau nei maꞌe ghau eghu iara.

Thosei snakredi mare mala famamaja ghau iara.

³Iheire te rouronu nigho re theome tangomana te mamaja na,

nu iheire ngala te ghosei te kegra te tapla soru nigho re ngala nate mamaja nodi na.

⁴LORD, farirhiu ghau mala leghuni iara puhimu iagho na,

farirhiu ghau mala laseni iara nakarha te keli na.

⁵Nogu God, iagho ngala te fakarhi ghau iara na.

Eghume, farirhiu ghau mala leghuni iara thofno chekemu na.

Iara ofo nigho fabrahu mala togho ghau.

⁶Thosei ghatho ihodi nou namha biꞌo nei lolokeli teku fabrahudi iagho nou naiknore funu tifa ra tela ghilei mei posa gognaro gne.

⁷LORD, ghatho ihodi nakhibo nei najafra eghu teke edi iara kani mae majaghanigu ra.

Naugna iagho namha ghau nei keli ranghi ghau eghu iara koba.

⁸Naugna LORD na mae doglo nei mae keli eghu,

mana farirhiudi naikno te diꞌa re mala leghuni puhigna mana na.

⁹Mana falalase puhi te doglo na ka naikno te nhaꞌa faparidi thedire,

nei farirhiudi puhi te magnahaghedi thegna re.

¹⁰God na tutuani ranghidi nei namhadi eghu koba naikno te leghudi nogna nhaꞌa cheke nei nogna vetula teure.

¹¹God, leghuni sagho nou nhaꞌa cheke na hata fadeleidi nakhibogu gre,

naugna nakhibogu iara gre kmana fara.

¹²LORD, ihei te leghudi nou cheke iagho re,

iagho ginauna falalase ka mana nabrou te keli te mala leghuni mana na.

¹³Nafnata mae igne ginauna au nogna kmana glepo te keli,

eghuteuna thugnare ginauna au fakeli nodi ka nogna vido glose mana na.

¹⁴LORD, iagho kheradi iheire te leghu nigho iagho re.

Iagho farerheta u nhaꞌa cheke teke eni iagho ka mae ku’emi tifa ra.

¹⁵LORD, leuleghu fata na iara filo kolho ka iagho te mala togho ghau na,

eghuteuna iagho ke hata fapulo ghau iara ka unha te magnahaghei goigoni ni nakarhagu iara gne.

¹⁶Filo kokhoni mei ghau iara sagho. Iara gne theome nheta,

nei theo kaisei kheragu te mala togho ghau na.

¹⁷Kmana glepo fara te bukrini nagnafagu gne.

Hata fajifla ghau ka hoholo teke thoke ghau iara gre.

¹⁸Ghatho mei ghau, eigna iara gne au papara fara, nei kokhoni ghau eghu.

Hata fadeleidi nakhibogu fateote’o gre.

¹⁹Filo sagho! Nogu naoka iara gre kmana fara,

mare thono kafe tirodi ghau iara fara.

²⁰Reireghi fakeli ghau nei fakarhi ghau eghu ka nogu naoka gre,

thosei snakredi mare mala famamaja ghau.

Naugna iagho nogu vido keli mala poru iara.

²¹LORD, naugna te mae keli nei doglo teu iara gne,

iara tore nigho mala reireghi fakeli ghau iara.

²²God, fakarhi ghami ghehati naiknomi Israel,

hata fajifla ghami ka puhi biꞌo te au teu ghehati ke lamnadi gre.

Sam 26

Nogna tharai kaisei mae te keli

Nogna khoje mae Devet.

¹LORD, kilo ghau iara kaisei mae te doglo ka tathamu na sagho,

naugna iara ne eni koba puhi te magnahaghedi iagho re nei iara fatutuani nigho koba neu.

²LORD, filo fakeli sagho ka nakarhagu iara gne, mala laseni unha nafnata naikno te iara gne,

nei mala filo glanidi gaoghathogu iara gre.

³Naugna iara theome ghatho ihoni nou namha biꞌo iagho te saghe leghu ghau fabrahu teu iara na.

Iara laseni nigho te au ke ulugu iara te mala falalase nabrou na ka iara.

⁴Iara theome magnahaghei te au baludi naikno te chaichaghire ba te tei ruma ka sugadi naikno te mamahe chekedire nu boto nagnafadire teuna.

⁵Iara tirogu fara te tei fodu baludi naikno te gnognoro re,

nei theome keli tagu la te tei gnokro fodu baludi naikno te diꞌare.

⁶LORD, iara na titihi khamegu gre mala laseni iagho te theo hila kaisei najafra ka iara na.

Eghuteuna iara na tei falithuini nou olta iagho na balu tharai.

⁷Iara na kojeni kaisei himu mala kilo fnakno nigho iagho,

nei chekedi ka naiknore famane gloku te keli teke edi iagho ra.

⁸LORD, iara magnahagheni fara te au ka sugamu iagho na,

ka vido aheva te au siasiglamu iagho na.

⁹Thosei khi fajifla ghau ka iagho baludi naikno te gnognoro gre nei naikno te aknu poru gre eghu.

¹⁰Thosei kaha fodu ghau baludi naikno te diꞌa fabrahu puhidi gre,

nei naikno te tarabana fabrahu te mala hata poru sileni ka iheire te magnahaghei eni puhi te diꞌa na.

¹¹Nu iara theome jateula naikno te diꞌa tuare eghu,

naugna iara eni unha te keli na.

Kokhoni ghau nei fakarhi ghau eghu iara sagho!

¹²Iara te kegra ke ulumu ke lamnagna suga te blahi gne ka nagnafa te gae naugna iagho theome snakre ghau iara te eni unha te diꞌa na.

Iara ginauna na kilo fnaknoni nanghamu iagho na farihoteidi naikno te mei tufru soru nigho iagho gre.

Sam 27

Tharai mala cheke fakelini LORD

Nogna khoje mae Devet.

¹LORD ngala mae ihei te fakarhi ghau eghu iara.

Eghume iara theome mhaghuni naikno na.

LORD ngala te reireghi ghau iara na,

eghume iara ginauna na theome mhaghuni kaisei glepo.

²Kate mei namo mae te diꞌa puhidire te farirhiu falehe ghau iara na,

mare ginauna tothokei uka pari.

³Jame neuba kaisei thara ne mei bara falithui ghau iara,

iara ginauna na theome mhaghu nogu kolho.

Jame neuba nogu naoka iara re ne mei magra ka iara,

iara ginauna au nogu grouronu biꞌo fara ka God.

⁴Iara la torenihi kaisei glepo ka LORD, kaisei glepo kolho te magnahagheini fara iara na.

Iara magnahaghei te au fabrahu ka sugagna LORD na mala filoni nei ghaoghathoni eghu puhigna LORD te thofno keli fara na.

Eghuteuna iara magnahaghei te toreni mana mala falalaseni tagu u nabrou te keli na.

⁵Kate thoke mei puhi biꞌo ka iara na, mana ginauna pophoru ghau iara ka nogna suga na.

Mana ginauna bobotho grengatha na mala pophoru fakeli ghau iara mala jateula te au teu iara ka phaꞌu thina biꞌo kligna ra eghu mala theome tangomana nogu naoka iara gre te mei te mala roꞌe ghau iara na.

⁶Eghume iara ginauna na tapla ke klignadi hatimare mae naoka te mei bara falithui ghau re.

Iara ginauna na fafara ka sugagna LORD na balu eha glealeꞌa.

Iara ginauna koje mala pala hagheni nanghagna mana na.

⁷LORD, kate kilo nigho iara na, iagho kokhoni mei ghau iara.

Fanomho mei ka nogu tharai iara gne.

⁸Kate cheke eghu iagho ka iara na, “Mei sagho mala pogho soru ke ulugu iara,”

iara na cheke eghu, “LORD, iara thofno keli tagu fara, iara na ari ka iagho.”

⁹God, thosei poru ka iara, naugna iagho mae ihei te fakarhi ghau iara na. Iara nou mae gloku iagho, thosei diꞌatamu ka iara.

Iagho neke togho ghau iara kmana fata, thosei tei koko ghau iara.

¹⁰Uve, jame te tei koko ghau iara kmagu nei idogu teu gre,

LORD ginauna taji fakeli ghau iara.

¹¹LORD, farirhiu ghau puhimu iagho na eghuteuna iara ginauna na leghu nigho iagho.

Bara fothi ghau, naugna nogu naoka iara gre kmana fara.

¹²Thosei snakre lao ghau ka khamedi nogu naoka gre mala magri ghau ka nodi cheke te chaichaghi nei ka nodi cheke te nheta eghu te famamhagu ghau iara gre.

¹³Tutuani fara, iara laseni,

iara ginauna karhau ghilei filoni LORD te fablahidi nogna naiknore.

¹⁴Tahati mala fatutuani ni LORD, nei thosei ghatho peapea eghu.

Tahati mala fatutuani nei ofoni eghu LORD nate mei togho ghita na.

Sam 28

Tharai eigna thotogho

Nogna khoje mae Devet.

¹LORD, iara kilo nigho iagho, iagho nogu vido keli mala poru iara.

Fanomho mei ka nogu tharai iara gre.

Jame te theome cheke tughudi iagho nogu tharai iara gre na,

iara ginauna lehe nei tei au baludi naikno teke lehe tela arihi ka namonodi naikno tela lehehi tifa ra.

²Fanomho mei sagho ka nogu tharai iara gre.

Iara tanhi ka iagho mala togho mei ghau iara.

Iara filo lao ka sugamu iagho te blahi na nei ngafa haghe khamegure ne tarai.

³Kate fatedi iagho naikno te diꞌa puhidire,

eidi glepo te diꞌa teke edi mare re,

iagho thosei kaha fodu ghau iara baludi mare.

Mare lase cheke famaemahe fara ka keha naiknore, nu gaoghatho te diꞌa na fodu ka nagnafadire.

⁴Paradi sagho eidi unha teke edi nei leghudi teku mare re.

Ke foli fapulodi sagho ka mare unha te nabagna u najafra teke eni mae te diꞌa gre.

⁵LORD, mare theome ghathodi kolho nou gloku nei unha eghu teke edi iagho ra.

Eghume te keli na iagho paradi nei koko sorudi eghu pari mala mei gnafa kolho mare jare.

⁶Iara cheke fakelini nanghagna LORD!

Naugna iara tanhi ka mana eghuteuna mana la nomhi ghauhi iara.

⁷Kaisei LORD ngala te reireghi ghau nei bara fothi ghau teu iara na.

Eghume iara thofno rouronuni mana.

Mana tangomana te togho ghau iara na,

eghume iara thofno glealeꞌa fara ka mana, eghuteuna iara koje mala cheke fakelini nanghagna mana na.

⁸LORD ngala mae ihei te reireghidi nogna naiknore, eghuteuna mare karha kolho ka mana.

Mana neke vavahi ghau iara mala king, mala funei frunidi iara nogna naikno mana re.

Iara tei poru koba ka mana, eghuteuna mana fakarhi ghau iara.

⁹God, fakarhidi nei fablahidi eghu nou naikno gre, eigna mare jateula sipu eghu kolho.

Reireghidi nei doadofradi eghu fabrahu tifa tifa.

Sam 29

Tahati nomhini naoglagna God na farihotei nuri nei nakhete eghu

Nogna khoje mae Devet.

¹Ghotilo engel te au kligna ra, ghotilo cheke fakelini LORD.

Ghotilo cheke fakelini mana eidi nogna nolaghi biꞌo nei nogna famane gloku te keli eghu te edi mana re.

²Cheke fakelini nanghagna LORD te nolaghi fara.

Ghotilo tufru soru nei pogho soru eghu kate thakle mei mana na.

Eigna mana na thono blahi fara.

³Naiknore nomhini naoglagna LORD na ke kligna nhorora.

Naugna nolaghi LORD na oaꞌongha jateula fila eghu,

eghuteuna chekegna mana na oaꞌongha ke kligna nhorora.

⁴Chekegna LORD na thono nolaghi fara.

Naiknore nomhini te cheke fabiꞌo LORD na ne mhaghu nodi fara.

⁵Chekegna LORD na ne klopa gaju thubi te maku na gna ka Thogele Lebanon.

⁶Kate chekeni LORD na, Thogele Lebanon ne kroukrofu jateula sua buluka neu,

eghuteuna thogele gna Hemon na ne jaola ne kroukrofu jateula sua buluka nalhaꞌugna neu.

⁷Chekegna LORD na ne khafli ka gromno na.

⁸Chekegna mana na ne fakheuni namono nagou Kades.

⁹Chekegna LORD na ne fakheudi u gaju ok te biꞌo fara re ne brusu khakladire.

Eghuteuna naikno te au teu ka nogna Sugablahi LORD na,

mare ne kafe eha eghu fabiꞌo, “Tahati cheke fakelini nanghagna God!”

¹⁰LORD na gnokro ka nogna sape nafnakno na mala funei fruni nhorora na fabrahu tifa e tifa.

¹¹LORD na tusu ranghi ghita tahati nogna naikno gre nanheta nei pharikeli.

Sam 30

Tharai mala cheke fakelini God ke leghugna te namo lehe na

Nogna khoje mae Devet mala koje kate faruma Sugablahi mare na.

¹LORD, iara ginauna cheke fakeli nigho eigna iagho neke hata fapulo ghauhi iara ka glehe.

Naugna iagho ne theome snakredi nogu naoka iara gre mala gleale’ani glehegu iara na.

^2-3Nogu LORD God, iara neke tore nigho iagho neke mei togho ghau kau glehe.

Iagho neke theome snakre ghau iara te tei ka namonodi mae tela lehehi ra, nu teke fakarha fapulo ghau iara na.

⁴Tahati nogna naikno LORD te ghatho tahuni mana ra, tahati koje kilofnaknoni mana.

Mana mae blahi. Tahati ghathodi glepo teke edi mana ra, nei tegioni eghu mana.

⁵Mana diꞌatagna katha vido kmoꞌei kolho,

nu puhigna mana te keli na au fabrahu ghilei ari gnafa nakarhagna naikno na.

Fei grafi na tahati na tanhi nei diꞌanagnafa eghu,

eghuteuna fei hamerane na tahati na keli nagnafada nei ke glealeꞌa fapulo eghu.

⁶Tifa kani au fakeli nogu teku iara na, iara neke cheke eghu,

“Theome tangomana kaisei glepo nate mei tapla fapari ghau iara na.”

⁷LORD, iagho thofno keli fara ranghi ghau iara,

nei reireghi fakeli ghau iara mala jateula kaisei mae te nheta te au ka thogele ia eghu iara.

Nu kate pophoru iagho tathamu na ka iara na,

iara neke mhaghu nogu fapulo ngala.

⁸LORD, ka narane tuana, iara neke kilo nigho iagho,

iara neke tore nigho iagho mala mei togho ghau.

⁹Iara neke cheke eghu, “Jame lehehi iara meuna, unha glepo te keli gne nate atha iagho na?

Jame tei iara ka namonodi mae tela lehehi ra meuna unha gne nate toghoni ihei na?

Thono theo fara. Mae tela lehehi ra theome tangomana te cheke fakeli nigho iagho na!

Nakrofugna naikno na theome tangomana te famane toutonu eidi glepo teke edi iagho ra teuna.

¹⁰LORD, nomhi ghau nei kokhoni ghau eghu iara.

LORD, togho ghau iara!”

¹¹Gognaro na iagho la hata fadeleidihi nogu naꞌau diꞌanagnafa iara re, eghuteuna iagho kela faglealeꞌa ghauhi iara.

Eigna iara neke jateula mae te au diꞌanagnafa te tanhi ka naikno te lehera neku.

Nu gognaro na iagho kela tuthughu nogu natanhi iara re kau glealeꞌa.

¹²Nogu LORD, iara gognaro na theome tangomana te fofotho foflogu na. Iara ginauna na koje mala kilo fafnakno nigho.

Iara ginauna tegio nigho fabrahu tifa tifa.

Sam 31

Nogna cheke mae ihei te au nogna grouronu biꞌo ka God

Nogna khoje mae Devet.

¹LORD, iara mei ka iagho mala reireghi ghau iagho.

Thosei snakredi nogu naokare mala mei tapla soru ghau iara.

LORD, puhimu iagho na thofno keli fara.

Iara tore nigho iagho mala fakarha ghau.

²Nomhi ghau nei fakarha ghau eghu gognaro gne. Iagho jateula thogele thina eghu mala poru iara.

Iagho bara fakeli ghau iara mala theome tangomana nogu naokare te mei tapla soru ghau iara na.

³Tutuani fara, iagho jateula nogu vido keli eghu mala poru iara.

Iagho au ke ulugu iara mala baubatu ghau iara ka nabrou te keli,

jateula teke nhaꞌa chekenihi iagho ia eghu.

⁴Those snakre ghau iara mala snoꞌo ka phighoro teke kulu lilisei malagu iara teku nogu mae naoka iara igre.

Neuba, iagho nogu vido mala poru iara mala theo kaisei hoholo te mei goigoni ghau iara na.

⁵LORD, iara nou naikno gloku gne. Iara lisa ari nakarhagu na ka khamemu iagho.

Iara laseni eigna iagho ginauna na fakarhi ghau iara, naugna iagho ne taji fabrahu ghau iara.

⁶LORD, iagho tiroudi iheire te tufru suru ka mumuju te theo nafudi gre.

Nu iara fatutuani nigho iagho LORD.

⁷Iara keli tagu nei glealeꞌa eghu fara ka iagho eigna iagho ne kokhoni ghau iara kate filo meidi te diꞌanagnafa nei au papara teu iara gre.

⁸Iagho neke theome snakredi mae nogu naoka iara re mala loki ghau iara.

Iagho neke togho ghau iara neke fakarhi ghau iara.

⁹LORD, iagho kokhoni ghau iara, eigna iara gne la au hila ke lamna puhi biꞌo.

Iara tanhi la ghilei huge phei tathagure.

Thinigu na la ghilei glaꞌe soru, nei gaoghathogure la ghilei theome doglo eghu.

¹⁰Diꞌanagnafa te eni iara gne fakmoꞌeni nakarhagu iara na.

Iara tanhi nogu fara, eghuteuna iara theome nabagu te au faraugha na.

Nanhetagure la hui, eghuteuna nhubragure la jaola salha hi.

¹¹Nogu naoka iara re cheke fahaehaghe fara ka iara.

Tulao, mae kheragu iara gre mare thono cheke fadiꞌa ghau iara.

Eghuteuna mae kheragu iara gre mare thono mhaghu ghau iara.

Kate filo ghau iara ka nabrou na mare rikha ghau iara.

¹²Mare te gnafa na mare kafe ghatho iho ghau iara jateu tela lehehi iara ra eghu.

Iara gne jateula kaisei glepo te diꞌa tela tirodinihi naiknora eghu kolho.

¹³Iara nomhidi kmana mae naoka hatimare buiburi ghau iara.

Eghuteuna ka vido aheva te tei salaꞌu iara na mare famamhagu ghau iara fara.

Mae iheire te magnahaghei tapla soru ghau iara re,

mare hiro phoge mala falehe ghau iara.

¹⁴Nu LORD, iara au nogu grouronu ka iagho.

Te chekeni iara na, iagho nogu God iara.

¹⁵Nakarhagu iara na au ka khamemu iagho na kolho.

Hata fajifla ghau ka khamedi hatimare mae naoka te au faligoho ghau teu iara igre eigna mare magnahaghei te falehe ghau iara.

¹⁶Iara nou mae gloku iagho, fiofilo mei ghau, keli ranghi ghau.

Te laseni iara na iagho namha ghau iara fara, eghume fakarha ghau iara eghu.

¹⁷LORD, iara kilo nigho mala togho mei ghau.

Eghume, iagho thosei snakredi hatimare mae naokare mala famamaja ghau.

Mae igre diꞌa fara puhidire, te keli na iagho famamajadi mare.

Te keli na iagho fofotho foflodire, eghuteuna snakre teidi ka namonodi mae tela lehehira.

¹⁸Fofotho foflodi mae te patugama igre sagho, eigna mare lase cheke fahahage nei cheke fadiꞌadi mae te doglore igre neu.

Nu mare mae lase cheke chaichaghi kolho eghu.

¹⁹Iagho tangomana te edi famane gloku te keli fara te mala toghodi iheire te ghatho tahu nigho igre.

Iagho tangomana te reireghi fakelidi iheire te fatutuani nigho re nei toghodi eghu ke uludi naiknore.

²⁰Iagho pophorudi ka vido aheva te au teu themu na,

nei reireghi fakelidi ka vido aheva te theome tangomana mae iheire te magnahaghei cheke fadiꞌani nei falehedi teu mare re.

²¹Iara cheke fakelini LORD!

Kate mei te kegra faligoho ghau iara mae naokare te mala mei magra ka iara na,

mana thono namha ghau iara fara ne togho ghau iara.

²²LORD, tifa na iara neke mhaghu nogu fara glahula me fota ghau hila iagho neu sia.

Nu kate kilo nigho iara na, iagho nomhi ghau iara ne togho ghau iara.

²³Ghotilo naikno te fatutuani ni LORD ra, ghotilo namhani mana.

Mana tangomana te reireghi fakelidi iheire te ghatho foboni mana re.

Nu mana tangomana te thono paradi fara iheire te fahaehaghe fara re.

²⁴Ghotilo naikno te fatutuani, ghotilo kegra heta,

nei au nomi grouronu ka LORD.

Sam 32

God tangomana te hata fadelei nakhibogna mae ihei te cheke thakledi ka God nakhibognare

Nogna khoje mae Devet.

¹Mae ihei LORD te hata koko nakhibognare nei hata fadeleidi gobigna lepo te diꞌare teu tagna na,

mae tuana thono keli tagna fara.

²Mae ihei LORD te theome filoni kaisei najafra ka nakarhagna na nei theome leghuni puhi te chaichaghi na teuna,

mae tuana thono keli tagna fara.

³Kate theome cheke thakledi iara nakhibogure, iara kaisei tanhi kolho bongi narane na.

⁴Bongi narane na khamemu iagho na para ghau iara fara.

Iara theo kaisei nogu nolaghi kolho,

jateula khoꞌu te krango ka naprai ia eghu.

⁵Nu, LORD, u gaoghathogu na iara magnahaghei te cheke thakledi nakhibogure ka iagho.

Eghume, iara neke eni tuana.

Ke leghugna te cheke thakledi iara nakhibogure ka iagho na, iara neke theome porudi nakhibogure.

Kate cheke thakledi te hui iara re, iagho hata kokodi najafragu nei nakhibogu teu iara re.

⁶Eghume nou naikno iagho re jame te keli na mare tore ka iagho ka vido te thoke mei puhi biꞌo na.

Eghuteuna jame te jateula nabritha teu te mei tadi puhi te biꞌo na,

puhi biꞌo igne ginauna theome tangomana te tapla faparidi naikno tuare na.

⁷Iagho nogu vido keli mala poru iara, iagho pophoru ghau iara mala theome tangomana kaisei puhi te thoke ghau iara na.

Iara na koje fabiꞌo eigna nou nolaghi iagho te fakarhi ghau iara,

eigna iagho ne pophoru ghau nei reireghi ghau neu iara.

⁸LORD ne cheke eghu, “Iara ginauna na farirhiu ka iagho puhi te keli te mala leghuni iagho na.

Iara ginauna na tusu ari gaoghatho te keli ka iagho eghuteuna iara na reireghi nigho iagho.

⁹Iagho thosei jateula hose ghe dongki eghu, eigna phei glepo igre theo kaisei glalase tadi.

Eghume tahati mala lilisei phukri ka foflodire mala bligi te sagheleghudire.

Te theome eghu tahati na,

repa na theome leghuni unha te magnahaghei tahati na.”

¹⁰Naikno te diꞌare ginauna au papara fara ka nakarhadire,

nu naikno te rouronu kolho ka LORD re,

LORD ginauna na kokhonidi e reireghi fakelidi.

¹¹Ghotilo naikno te doglo fara puhimira, ghotilo kelitami nei glealeꞌa eghu ka glepo te keli te edi LORD re!

Ghotilo naikno te keli ka tathagna LORD ra, ghotilo mala glealeꞌa balu koje fabiꞌo!

Sam 33

Khoje mala cheke fakelini nanghagna LORD

¹Ghotilo naikno te doglo ke ulugna LORD, ghotilo eha balu glealeꞌa eidi unha teke edi LORD ra.

Ghotilo te gnafa te leghuni mana ra kafe cheke fakelini mana.

²Ghotilo koje ka gita mala cheke fakelini nanghagna LORD.

³Koje ranghini mana ka khoje majaghani!

Koje fakeli ka gita nei kafe eha fabiꞌo balu glealeꞌa!

⁴Chekegna LORD na thofno tutuani fara,

eghuteuna mana eni koba unha teke chekeni thegna na.

⁵LORD na namhadi fara naikno te au fadoglo nei edi unha te keli re teuna.

Tutuani fara, mana namhadi fara naikno te gnafa te au heva heva kau nauthoglu gne.

⁶Gobigna lepo ka maloa na are neke vuavuha ka chekegna LORD kolho.

Naprai nei glaba nei nathunu teu are neke jifla mei ka chekegna mana.

⁷Mana neke lilisei fodu thongnare ka kaisei vido kolho, mana neke lilisei fakeli khotogna nhorora na ka mala au gna na.

⁸Ghotilo naikno te gnafa ka nauthoglu gne mala kafe tufru soruni nei ghatho tahuni eghu LORD.

⁹Naugna kate cheke na, mana neke vuavuhani nauthoglu gne.

Ka chekegna mana na, gobigna lepore neke thakle mei.

¹⁰LORD na rorhoꞌe nodi groghei hatimare mae bongihehe re.

Mana theome snakredi mare te eni unha te vaovatoni mare na.

¹¹Nu unha te vaovatoni mana na ginauna kegra maku fabrahu.

Gaoghathogna mana re theome tangomana te tughu na.

¹²Keli tadi fara naiknodi kantri te nodi LORD na God ngala teu igre.

Keli tadi fara naikno teke vavahi mana te mala atha unha teke nhaꞌa cheke ranghidi mana re.

¹³LORD na au neu kligna ne filo soru ne filodi naiknore.

¹⁴Mana au neu jare ka sape nafnakno te mala funei fruni na ne filo soru ka naikno te gnafa te au teu ka nauthoglu gne.

¹⁵Mana neke vuavuhani u gaoghathogna naikno na,

eghume mana tangomana te filo suplidi u puhi te edi naiknore.

¹⁶Theo kaisei armi biꞌo ba kaisei mae soldia te nheta fara te mala tapla sorudi nogna naokare ka nogna nanheta thegna te mala fakarhini nodi mae king na.

¹⁷Hose na theome tangomana te magra toghodi mae soldiare te mala theome lehe ba te mala uluni mare magra na.

¹⁸Nu LORD na reireghidi iheire te ghatho tahuni nei rouronuni teu nogna namha biꞌo mana na.

¹⁹Mana reireghidi ka glehe nei ka glehe rofo.

²⁰Tahati rouronu ka LORD,

mala reireghi ghita nei togho ghita eghu mana.

²¹Tahati glealeꞌa naugna tahati fatutuani ni kaisei God ngala.

²²LORD, ghehati fatutuani nigho nei ofo nigho eghu fabrahu te mala mei te togho ghami na.

Kokhoni ghami fabrahu!

Sam 34

Tharai mala cheke fakelini God eidi puhigna te keli

Nogna khoje mae Devet ka narane teke jateula kaisei mae te fameomekro teku teke chaghini mae king Abimelek. Aonu mae king ne kuru teini mana.

¹Iara ginauna na cheke fakelini LORD fabrahu.

²Iara fahaehagheni LORD fara ka nagnafagu na eidi unha teke edi mana re.

Naikno te au kokhonidi ra fanomhini cheke igne mala ke au glealeꞌa.

³Tahati gnafa kafe fafnaknoni nanghagna LORD.

Tahati gnafa kafe pala hagheni nanghagna mana!

⁴Iara neke toreni LORD mala togho ghau, eghuteuna mana ne nomhi ghau iara ne cheke tughuni nogu tharai iara na.

Mana ne atha fadeleidi ne gnafa namhagu teke au teku ka thi’agu iara na.

⁵Iheire te au diꞌanagnafa nu au nodi fatutuani ka LORD teure, mare kelitadi fara. Eghume nodi fatutuani re theome tangomana te fiti luvu kolho na.

⁶Iara gne theo ihei nga te kokhoni ghau na, nu kate tore iara na, LORD nomhi ghau iara ne togho ghau iara ne atha fadeleidi puhigu iara re.

⁷Nogna engel LORD na, tangomana te reireghidi iheire te ghatho tahuni mana re, nei atha fadelei ranghidi u puhi te au tadire.

⁸Ghotilo mei ka LORD mala au balugna mana. Ghotilo ginauna filoni mana.

Iheire te mei ka mana re ginauna keli tadi fara naugna mare ginauna laseni LORD te reireghidire.

⁹Ghotilo nogna naikno LORD ra, ghatho tahuni mana.

Ghotilo iheire te leghuni mana ra, ghotilo theome kmoꞌe ka glepo te keli na.

¹⁰Ihei te ghatho ihoni LORD na, mana tangomana te kmoꞌe ka gano na,

nu naikno te ghatho tahuni LORD na theome tangomana te kmoꞌe ka gano na.

¹¹Ghotilo kheragu mae majaghani iara ra, ghotilo mei mala fanomho ka iara.

Iara ginauna na farirhiu ghami ghotilo mala ghatho tahuni LORD.

¹²Ihei te magnahaghei karha fabrahu nei glealeꞌa fabrahu leuleghu narane teuna,

¹³mana thosei cheke diꞌa nei chaichaghi eghu.

¹⁴Mana lilisei puhi te diꞌare nei leghudi kolho puhi te kelire eghu.

Nei mana fariuriu au kolho ka pharikeli baludi keha naiknore eghu.

¹⁵LORD na reireghidi iheire te au doglo eghuteuna fanomho ka nodi tharaire.

¹⁶Nu LORD na theome magnahaghedi naikno te diꞌa puhidire.

Eghuteuna ka glehedire naikno tuare ginauna,

na theo kaisei naikno ka nauthoglu igne na teke ghatho fapulodire.

¹⁷Kate tarai nogna naiknore mala toghodi teuna,

LORD ginau na toghodi nei hata fajifladi eghu ka hoholo.

¹⁸LORD na au rhedi naikno te au kokhonidi nei diꞌanagnafa teure.

¹⁹Kmana glepo te diꞌa thoke mei ka nogna naikno LORD re,

nu LORD na toghodi mala theome tangomana glepo te diꞌa igre te tapla sorudire.

²⁰LORD na famane reireghi fakelidi thinidire,

nei na theome snakreni kaisei nhubradi klopa na eghu na.

²¹Naikno te diꞌa na faleheni thegna ka puhi te diꞌa teke edi thegnare.

Eghuteuna jame ihei te tirognadi nogna naikno LORD re naikno tuana ginauna au papara fara!

²²Nu LORD na fakarhidi nogna naiknore, eghuteuna iheire te lao poru ka mana re,

mana ginauna reireghi fakelidi nei na theome paradi eghu.

Sam 35

Toreni nogna thotogho God

Nogna khoje mae Devet.

¹LORD, diꞌatamudi sagho naikno te diꞌatadi ghau iara igre.

Magridi sagho naikno te magri ghau iara igre.

²Atha sagho nou glepo mala magra re

mala mei togho ghau iara.

³Atha sagho nou goru nei nhirama teu are mala mei magra ka mae te kegra faligoho ghau iara igre.

Chekeni sagho ka iara nate mei iagho te togho ghau iara na.

⁴Mae igre magnahaghei te mei te falehe ghau iara.

Mei sagho mala tapla sorudi pari naikno igre mala mamaja nodi kolho mare.

Mae igre roghe nodi te mala goigoni ghau iara na.

Fasnividi sagho pha’udire mala ke figri ke pulo mare.

⁵Kuru meini sagho nou engel na mala ngolhidi mae igre

mala jateula chara wit te flalo tafri ka nuri ia eghu mare mala sopagna tei kolho.

⁶Kate mei teidi mare nou engel iagho na te ngolhire,

iara magnahagheni vido aheva te tei mare na totoglo nei romno fara eghu mala theome bligidi mare te rikha na.

⁷Iara neke theome eni kaisei puhi te diꞌa ranghidi mare,

nu mare lilisei kaisei phighoro te mala fakhale ghau iara na.

Eghuteuna mare neke dokha kaisei khora te mala snoꞌo iara na.

⁸Nu LORD, kate iho teu mare na,

iara magnahaghei nigho iagho te eꞌei puhi ranghidi mare na.

Fakhaledi thedi kolho sagho ka phighoro teke lilisei mare thedi ana.

Fasnoꞌodi thedi kolho sagho ka khora teke dokha thedi mare ana.

⁹Ka narane tuana iara na kelitagu fara ka God,

naugna mana ne fakarhi ghau iara.

¹⁰Eghuteuna ka nagnafagu fateo na iara ginauna cheke eghu ka God,

“Theo kaisei naikno te jateula iagho teuna,

iagho togho fakelidi naikno te nigra re.

Eghume naikno te nheta re theome tangomana te goigonidi re naikno te kumare.”

¹¹Naikno te diꞌa igre mare fathoro mei ka

iara keha puhi te diꞌa teke theome edi iara re.

¹²Iara keli ranghidi mare, nu mare theome keli ranghi ghau iara,

eghume iara la namo glaꞌehi nagnafagu na eghu.

¹³Nu iara theome jateula mare eghu. Thono theo fara.

Kate fogra mare na iara pipichi pohe thona nei theome ghamu eghu, fagaglanagna nogu diꞌanagnafa eidi mare na.

Eghuteuna iara neke tore nigho iagho mala toghodi mare.

¹⁴Eghume iara tanhidi mare jateula teke kheragu nei thabusigu eghu thegu.

Iara nonolo tafri balu diꞌanagnafa nei tanhi eghu. Jateula tela lehehi idogu ra eghu kolho.

¹⁵Nu kate au iara ka puhi na, mare kelitadi fara,

mare khapru falithui ghau iara mala maꞌe ghau iara.

Keha mae te theome lasedi iara re,

mare theome gnafa te fathoro mei puhi te diꞌa ka iara na.

¹⁶Mae te diꞌa re mare goigoni ghau iara, mare maꞌe ghau iara,

mare fangingiri mei ka iara.

¹⁷God, niha fata fifilo kolho ka glepo te diꞌa gre sagho ia?

Mare goigoni ghau iara jateula lion te magnahaghei ghamu ghau iara ia eghu.

Mei sagho mala fakarhi ghau iara ka khamedi mae igre.

¹⁸Jame te eghu iagho na, iara ginauna cheke fakeli nigho iagho ke uludi naikno te kmana gre.

Tutuani fara, iara ginauna pala hagheni nanghamu iagho na ke uludi naikno gre.

¹⁹Thosei snakredi nogu naoka iara te mae chaichaghi gre mala tapla fapari ghau iara.

Thosei snakredi mare mala maꞌe ghau iara kate filoni mare te au diꞌanagnafa iara na.

²⁰Mare tirodi cheke fakeli baludi iheire te magnahaghei pharikeli,

nu mare edi kmana cheke chaichaghi fara.

²¹Mare cheke eghu fabiꞌo ka iara,

“Tutuani fara, ghehati filo nigho iagho neke eni puhi te diꞌa na!”

²²Nu LORD, iagho filoni ghau iara te leghuni u puhi te keli na.

LORD, thosei gnokro kmu meu, thosei tei koko ghau iara.

²³Nogu LORD, kegra haghe mei togho ghau iara.

Nogu God, kegra haghe mei cheke ka mare eigu iara.

²⁴God, iagho nogu LORD iara, puhimu iagho na thofno doglo fara.

Te keli na iagho cheke fajiflani ne mae keli iara puhigu na teuna.

Thosei snakredi nogu mae naoka iara gre te mala glealeꞌa kate filoni mare te au diꞌanagnafa iara na.

²⁵Iagho thosei snakredi mare me cheke eghu, “Thofno keli fara!

Tahati la ulunihi mana. Ao ngala si glepo teke magnahagheni tahati la!”

²⁶Iheire te glealeꞌa kate filoni te diꞌanagnafa iara na,

te keli na iagho famamajadi nei faꞌihodi eghu mare.

Tapla sorudi sagho mae iheire ne au doglohi thedi ke ulugu iara teu are

mala mamaja nodi kolho mare.

²⁷Nu naiknore magnahaghe nigho iagho te cheke thakleni ne mae keli iara teuna,

mare na glealeꞌa na eha eghu fabiꞌo fabrahu,

“LORD na kaisei mae biꞌo fara!

Mana kelitagna fara kate filoni te ulu nogna mae gloku na.”

²⁸Eghume iara ginauna cheke thakleni puhimu iagho na,

eghuteuna iara ginauna cheke fakeli nigho leuleghu narane funu hamerane ghilei bongi.

Sam 36

Puhigna mae te gnognoro nei mae ihei te leghuni puhigna God

Nogna khoje mae Devet nogna mae gloku LORD. Khoje igne malagna mae kwaemasta.

¹U nakhibo na au ka thi’agna mae te gnognoro

na eghuteuna mana leghuni fabrahu puhigna nakhibo na.

Mae te gnognoro igne tirogna mhaghuni God,

nei theome ghatho tahuni eghu God.

²Naugna mana kaisei mae lase fahaehaghe fara ka gaoghathogna na e cheke eghu,

“Iara kaisei mae keli fara. God na theome tangomana te lasedi puhi te diꞌa te edi iara re,

eghuteuna mana theome tangomana nate fate ghau iara na.”

³Leuleghu fata na mae igne cheke diꞌa nei chaichaghi eghu koba ka keha naiknore.

Mana theo kaisei gaoghatho te keli te mala eni puhi te doglo na.

⁴Kate thuru teu ka sape na, mana hironi kolho nabrou te mala eni puhi te diꞌa na.

Mana leghuni kolho nabrou te diꞌa na, nei mana theome tangomana te figri tagruni puhi te diꞌa na.

⁵LORD, nou namha iagho na thono biꞌo fara tei posa ka maloa gro.

Puhi te tajini fabrahu iagho nou nhaꞌa cheke na biꞌo fara tei posa ka khoveo gro.

⁶Puhimu iagho te doglo na ke tulaogna tuanai, thono haghe fara jateula thogele are eghu,

puhimu iagho te mala fateni naikno ne soru pari fara jateula nhorora te mamhara eghu.

LORD, naikno nei hose nei buluka, nei bosu mhata, nei saba, nei nanghaji teu igre au ka khamemu iagho.

⁷God, puhimu iagho te namha ghami ghehati na thofno keli fara.

Eghume ghehati tangomana te ari poru ka iagho na jateu sua khokorako te poru ke paridi bagi gna idodi na ia eghu mala taji fakeli ghami ghehati.

⁸Iagho au kmana gano ka sugamu na, eghume ghehati theome kmoꞌe ka gano na.

Leuleghu fata na puhimu iagho te keli na jateula khoꞌu biꞌo te snakreni iagho te tei koꞌu ghehati tagna ia eghu.

⁹Iagho ngala nafugna te mala karhadi gobigna lepore.

Eghuteuna iagho ngala nafugna u naphae na.

Ghehati tangomana te filoni u naphae na ka iagho ngala.

¹⁰Namhadi fabrahu sagho naikno te lase nigho re, eghuteuna fablahidi iheire te keli puhidire eghu.

¹¹Thosei snakredi mae te fahaehaghe re mala mei magra ka iara.

Iagho thosei snakredi mae te diꞌa puhidire mala kuru tei ghau iara.

¹²Filo si ghotilo. Mae te diꞌa ra khoko soru pari thuru lau ka glose na.

God neke koko sorudi mae te diꞌare pari ka glose na,

eghuteuna mare theome tangomana na teke kegra haghe na.

Sam 37

Nakarhagna mae ihei te diꞌa nei nakarhagna mae ihei te doglo

Nogna khoje mae Devet.

¹Thosei nanga nou ka puhi te edi mae te diꞌare.

Thosei mamagnani ka nagnafamu na te leghuni puhidi mare re.

²Theome raughau mare ginauna brango jateula u buburu eghu kolho.

Mare ginauna lehe jateula gaju ikodi te lehe ka nhigra te ahora eghu.

³Fatutuani ka LORD sagho nei eni puhi te keli na eghu.

Te eghu iagho na, iagho ginauna na au fakeli fabrahu ka nou vido glose na,

eghuteuna ginauna theo kaisei glepo nate goigoni nigho iagho na.

⁴Gleale’a sagho ka LORD,

eghuteuna mana ginauna na tusu ranghi nigho unha teke thono mamagnani iagho ka nagnafamu na.

⁵Lisa lao nakarhamu na ka khamegna LORD.

Fatutuani heta ka mana, eghuteuna mana ginauna na togho nigho iagho.

⁶Eghume naikno te gnafare ginauna filoni puhimu jateula glepo te au ka vido te snagla fara na.

Tutuani fara, puhimu te doglore ginauna theome poru.

⁷Iagho megei gnokrou rhegna LORD.

Au kmu ofoniu mana mala togho nigho.

Thosei diꞌanagnafamu kate atha nodi kmana glepo te keli ka puhi te edi mae re.

Tutuani fara, iagho thosei ngana nou ka mae te ghathodi thua nafnata puhi te diꞌa igre te edi haghe puhi tuare.

⁸Thosei diꞌatamu, lilisei sagho puhi te diꞌatamu fara tuana.

Thosei nanga nou, glepo tuare nabrou mala dei ghita puhi kolho sarea.

⁹Iheire te fatutuani ni LORD ginauna atha nodi vido glose,

nu iheire te diꞌa puhidire LORD ginauna kuru fajifladi.

¹⁰Mae te diꞌare na theome raugha dofidi.

Iagho ginauna na hirodi mare ka vido aheva teke au dire na, nu iagho ginauna na theome tangomana te filodire.

¹¹Nu iheire te lisei faparidi thedire, mare na atha nodi vido glose teke nhaꞌa cheke God ranghidi na.

Mare na au fakeli nodi nei na au glealeꞌa nodi eghu.

¹²Mae te diꞌa na gaoghatho mala eni puhi te diꞌa na ranghini mae te doglo na,

nei diꞌatagna eghu ka mana.

¹³Nu Lord, noda mae funei tahati na rogna maꞌedi mae te diꞌare,

naugna mana laseni kaisei narane na mana ginauna mei fatedi mare,

eghuteuna mae te diꞌare ginauna dofidi ke leghugna fate igne.

¹⁴Mae te diꞌare na korho fajifla nodi naflahi mala magra re nei na kulu lolho nodi phalohore eghu mala fadi falehedi naikno te kuma nei au kokhonidi teure,

nei mala goigonidi eghu naikno te edi puhi te kelire.

¹⁵Nu nodi naflahi mala magra mare igre ginauna nake falehedi kolho thedi,

eghuteuna phaloho igre ginauna na klopa dofidi.

¹⁶Glepo ikoi te au ka mae te keli na,

thofno keli fara uludi glepo te khotodi mae te diꞌare.

¹⁷Naugna LORD ginauna na hata fadelei nogna nolaghi mae te diꞌa na,

nu na bara fothini naikno te keli na.

¹⁸LORD na reireghi fakelini naikno te leghudi nogna cheke na,

eghuteuna nogna vido glose teke tusu ranghini mana LORD na ginauna nogna mana fabrahu.

¹⁹Ka vido te ninhigrana na mana na theome au diꞌanagnafa.

Eghuteuna ka nhigra te theo gano na mana na theome glehe rofo.

²⁰Nu naikno te diꞌa na ginauna lehe.

Nogna naoka LORD na ginauna dofidi jateula chechenge gaju eghu.

Tutuani fara, mana ginauna jateula gagahu khaꞌaghi eghu kolho dofidi aheva te tei na.

²¹Mae te diꞌa mana lase kaoni fara, eghuteuna mana theome tangomana teke tughu fapulo na.

Nu mae te keli puhigna na mana magnahaghei fara te tufa glepo ka keha naiknore.

²²Iheire LORD te fablahidire ginauna atha vido glose teke nhaꞌa cheke mana ranghidire.

Nu iheire te diꞌatagnadi LORD naugna te leghuni mare puhi te diꞌa na, mana ginau brue fajifladi.

²³Kate filoni LORD puhigna kaisei mae te doglo fabrahu na,

mana na sagheleghuni naikno tuana ka nabrou te doglo.

²⁴Neuba mana ne uka, mana na theome thuru fabrahu pari,

naugna LORD ginauna na loku ka khamegna na nake korho hagheni mana.

²⁵Funu suagu tela ghilei kueku’ehi gnognoro gne iara theome filoni God te figri tagruni naikno te doglo na.

Eghuteuna iara theome filodi thugna mana re te kmo’e ka gano te tore tafri ka keha naiknore.

²⁶Leuleghu fata na mana tufa glepo koba ka keha naiknore ka nagnafa te lolokeli. Eghuteuna mana thono keli tagna fara te au thugna na. Naugna God neke tusu lao sua igre ka mana.

²⁷Eghume iagho figri lao thagrumu na ka glepo te diꞌare mala eni kolho unha te keli na.

Te eghu iagho na, thumu iagho re ginauna au fakeli nodi fabrahu ka vido glose teke nhaꞌa chekeni God ka ghotilo igne.

²⁸LORD na magnahagheni fara puhi te doglo na. Mana theome snakredi te lisa laodi nogna naiknore.

Leuleghu fata na mana tangomana te baubatu fakeli nogna naiknore mala tei ka nabrou te fadoglo.

Nu vikegna mae te diꞌa na mana ginauna brue fajifladi mala tei au delei.

²⁹Mae ihei te doglo ka tathagna God na, mana ginauna na khotogna glose teke tusu ranghini God na,

eghuteuna mana ginauna na au fabrahu tagna.

³⁰Mae te doglo igne au tagna u gaoghatho te keli, eghuteuna unha te chekedi mana ka naiknore famane keli koba.

Mana tangomana te cheke ka puhi te doglo.

³¹Vetula nogna God na au ka nagnafagna mana na,

eghuteuna mana tangomana te leghuni God nei theome tangomana te ghathoni iho u vetula igne.

³²Mae te diꞌa na tangomana te poru te fiofiloni teu mae te keli na,

mana magnahaghei te filoni kaisei nabrou te mala faleheni mae te keli na.

³³Nu LORD ginauna na theome tei kokoni mana, eghuteuna mae te diꞌa na theome tangomana te faleheni mana na.

Jame te kegra haghe mae te diꞌa na te hata laoni mana ka fate na, mana theome tangomana te tapla soruni mae te keli na.

³⁴Fatutuani ka LORD nei leghudi nogna puhi mana re eghu.

Te eghu iagho na, mana ginauna fafnakno nigho iagho,

eghuteuna iagho na tangomana te khotogna vido glose teke tusu ari mana ka iagho igne.

Eghuteuna iagho ginauna na filoni mana nate kuru teini mae te diꞌa na.

³⁵Tifa na iara neke filoni kaisei mae te diꞌa te thono heta fara te goigonidi keha naiknore.

Mana haghe uludi fara keha naiknore jateula gaju gurighau biꞌo te tei uludi keha gajura eghu.

³⁶Ke leghu na iara neke mei salaꞌu ka vido igne, nu mana ne theome au jare.

Iara neke fariuriu hironi mana nu iara ne theome tangomana te filoni mana na!

³⁷Filo tutu laoni sagho mae te keli nei doglo teu puhigna ana. Mana au blagna nogna kolho baludi keha naiknore.

Vikegna mana re ginauna au fabrahu tifa tifa.

³⁸Nu LORD tangomana te goigonidi iheire te tapla jafra ka nakhibore.

Vikedire ginauna theo kaisei namonodi.

³⁹LORD na tangomana te fakarhidi iheire te au doglore kate thoke mei vido te ninhigrana.

Mare tangomana te tei ka mana te mala reireghi fakelidire.

⁴⁰Leuleghu fata na mana toghodi nei fakarhidi eghu naikno te doglo igre.

Mana hata fajifladi ka khamedi mae te diꞌare,

naugna naikno te doglo igre filo kolho ka LORD te mala toghodi na.

Sam 38

Nogna tharai mae ihei te fogra

Nogna khoje mae Devet.

¹LORD, neuba iagho ne diꞌatamu ka iara,

thosei para ghau eghu.

²Iagho la fadi ghauhi iara ka nou jata na,

nei iara la fnerahi ka khamemu iagho na.

³Iara au khabru biꞌo ka thinigu na,

naugna iagho ne diꞌatamu ka iara eidi nakhibo teke edi iara igre.

⁴Gognaro na iara knoho ka nakhibo jateula te knoho ka nhorora neu,

eghuteuna iara theome tangomana te pala haghedi nakhibogure naugna ne tahu fara.

⁵Naugna ka puhi fameomekro te edi iara gre,

la au mei kmana thubu te thono siri diꞌadi fara ka iara.

⁶Iara theome tangomana te kegra haghe na, naugna nakhibo gre ne bukri soru ghau iara.

Leuleghu narane na iara tanhi nei diꞌanagnafa eghu kolho funu hamerane na ghilei bongi.

⁷Kate fagrutu biꞌo te brana jateula khaꞌaghi teu thinigu na,

iara ne namo lehe nogu ngala.

⁸Iara ne thofno glaꞌe soru nogu fara ngala ka vido te biꞌo fara u diꞌanagnafa na,

eghuteuna kate kabru ghegu fara na iara ne tanhi nogu kolho.

⁹LORD, iagho laseni te magnahaghei mafo iara na.

Iagho nomhidi te tanhi iara kate kabru ghegu gre.

¹⁰Gognaro na, nagnafagu na thono loku heta fara, nei nanhetagure la tei la dofidi.

Tathagure la romno la theome fifilohi.

¹¹Kheragu nei vikegu teu iara re tirodi te mei namo te filodi thubugu iara re.

Tharaknagu thofno iara na jaola tirodi te mei gnokro balugu iara na.

¹²Iheire te magnahaghei falehe ghau iara re lilisei phighoro mala fakhale ghau iara.

Iheire te magnahaghei goigoni ghau iara re mare cheke fapari ghau iara.

Eghuteuna leuleghu fata na mare theome gnafa te gaoghatho te mala eni ranghi ghau iara puhi te diꞌa na.

¹³Iara jateula mae te meglira eghu theome nomhidi mare.

Iara jateula mae te iho chekera eghu theome gagri kaisei cheke.

¹⁴Iara jateula kaisei mae te iho cheke tughu ra neu ne theome cheke fapulo ka mare.

Naugna iara ne megli fara.

¹⁵Nu LORD, iara rouronu ka iagho. Iagho nogu LORD,

nei nogu God iara, iagho ginauna na nomhi ghau iara.

¹⁶Te tore nigho iara na, thosei snakredi nogu naoka iara re mala glealeꞌa kate au diꞌanagnafa nei au papara teu iara na.

Kate tapla jafra iara na, thosei snakredi mare mala cheke fahaehaghe nei glealeꞌa eghu ke ulugu iara.

¹⁷Naugna nakarhagu iara na la glaꞌe fara hi,

eghuteuna iara la kabru fabrahuhi.

¹⁸Iara cheke thakledi nakhibogu gre ka iagho,

nei diꞌanagnafa eidi thua glepo te diꞌa teke edi iara ra.

¹⁹Nogu naoka iara gre mare theome fogradi e thono heta ghedi fabrahu.

Kmana mae fara te tirodi ghau iara na, nu mare theo nafudi kolho eghu.

²⁰Iara eni puhi te keli na ranghidi,

nu mare fapulo meini puhi te diꞌa na ka iara.

Mare naoka ranghi ghau iara, naugna iara ne leghuni puhi te doglo na.

²¹LORD, thosei lisa lao ghau.

Nogu God, thosei tei koko ghau.

²²Iagho nogu funei iara,

faghose mei togho ghau iara.

Sam 39

Nogna cheke mae ihei te gaoghatho eigna u nakarhagna na nate theome raugha te salaꞌu ari nogna na

Nogna khoje mae Devet. Khoje igne neke eni mae Devet malagna mae Jedutun mae kwaemasta.

¹Te chekeni iara na,

iara ginauna na reireghi fakelidi unha te edi iara re.

Na eghu nu cheke fadiꞌa iara ka nogu chekere eghu.

Kate au teu mae te diꞌare rhegui na, iara ginauna na theome gagri kaisei cheke.

²Uve, iara neke au kmu neke theome gagri kaisei cheke kolho.

Eghuteuna iara neke theome eni kaisei cheke eigna kaisei glepo te keli la ngau.

Nu nogu diꞌanagnafa iara na ke la biꞌo fapulo gognaro na.

³Glamnagu na iara na nga nogu fara.

Eghuteuna kate ghaoghathoni teu iara puhi igne na, gaoghathogu iara na raꞌe diꞌa ne tei jafra fara.

Eghume gognaro na iara theome tangomana te au kmu na. Theo fara.

⁴Eghume, iara cheke eghu ka LORD,

“LORD, niha finogha te mala karha nga teu iara na?

Niha nau na te lehe iara na?

Cheke meini sagho ka iara, niha nau na te ari te gnafa nakarhagu iara na?

⁵Iagho lilisei fakmoꞌei kolho nakarhagu iara na.

Nakarhagu iara na theo nafugna kolho ka tathamu iagho na.

⁶“Nakarhagna naikno na jateula naungo gaju eghu kolho.

Gobigna lepo te magnahaghei mana te loku brana di mana re na ari theo nafudi kolho.

Eghuteuna unha te salo fodu mana malagna thegna teure tahati theome laseni ihei nate khotodi ginau re.

⁷“Eghume, Lord, unha gne te ofoni nei rouronuni teu iara na?

Iagho ngala te ofoni nei rouronuni teu iara gognaro na.

⁸Hata fapulo ghau nei hata kokodi eghu nakhibogu gre.

Thosei snakredi naikno te fameomekro are mala maꞌe ghau iara.

⁹Gognaro na iara au kmu. Iara na theome gagri kaisei cheke,

naugna iagho neke para ghau.

¹⁰La nabahi, thosei ke para ghau.

Iara la namo lehehi naugna iagho ne tapo ghau iara.

¹¹Kate diꞌatamu fara iagho ka mae ihei te tapla jafra ka nakhibo na, iagho fadidiꞌa unha te magnahaghedi fara mana re,

jateula gnata te ghamu fadidiꞌa gobigna lepo ra eghu.

Tutuani fara, nakarhagna nafnata naikno igne ghosei ari gnafa kolho.

¹²“LORD, fanomho fakeli ka nogu tharai gre, mala mei togho ghau.

Eigna iara gne jateula teke edi mae kmagu tifara eghu au katha vido kmo’ei kolho balumu iagho ka nauthoglu igne.

¹³Ame lehe nga iara me dofi ghau ka nauthoglu igne teuna lisa lao ghau mala ke keligu iara nagnafagu na.

Iara tore nigho mala thosei para ghau iara.”

Sam 40

Khoje mala kilofnaknoni nanghagna God

Nogna khoje mae Devet.

¹Iara neke ofoni LORD mala mei togho ghau,

aonu mana neke kokhoni ghau iara neke nomhidi nogu tharai iara re.

²Iara gne jateula kaisei mae te au teu ke lamna glodu te mamhara nei ka naoro te fodu ka chopu ra eghu.

Nu LORD neke korho haghe ghau iara neke fakegra ghau iara ke tagrugna kaisei thina, eghuteuna iara gognaro na kegrau ka vido te keli.

³Mana neke farirhiu ghau iara kaisei khoje majaghani mala koje kilofnaknoni ngala God.

Kate filoni igne ka iara na kmana naikno ginauna pala hagheni nei fatutuani ni eghu nanghagna LORD.

⁴Ihei te fatutuani ni LORD na, mana keli tagna fara.

Nafnata mae igne theome leghuni naikno te ghatho tahuni thegna na,

eghuteuna ihei te ghatho ihoni God nei jaola tarai lao ka mumuju.

⁵Nogu LORD God, iagho neke edi kmana glepo fara malami ghehati neku,

jare na theo kaisei God te jateula iagho teuna!

Iagho neke edi famane gaoghatho te keli te mala leghudi ghehati teku re.

Iara theome tangomana te kahadi unha teke edi iagho mala togho ghami ghehati teku re.

⁶Iagho theome magnahaghei fafara ba toreni kaisei bosu mala gahu ke kligna olta mala hata koko nakhibo.

Nu iagho tusu mei khuli ka iara mala tangomana iara te nomhidi nei leghudi teu nou cheke iagho re.

Igne unha te magnahaghei iagho te mala eni iara na.

⁷Kate cheke iagho na, iara eghu, “God, iara gne la meihila.

Nou cheke iagho te mala farirhiu ghau iara na la kulu auhi ka nou buka vetula iagho na.

⁸Nogu God, iara magnahaghedi fara te edi unha te magnahaghedi iagho re.

Leuleghu fata na iara theome ghatho ihodi nou cheke iagho re ka nagnafagu na.”

⁹God, iara neke toutonuni u nonomho te keli igne kate khapru teu nou naikno iagho re,

neke cheke eghu, “LORD, na tangomana te fakarhi ghita tahati na.”

LORD, iagho laseni, iara ginauna theome tangomana te gnafa na nafnata cheke igre.

¹⁰Iagho neke togho ghau nei fakarhi ghau neku iara, eghume iara na theome poruni igne.

Iara la chekenihi eigna iagho te leghuni nou nhaꞌa cheke na te fakarhi ghami ghehati na.

Iagho namhadi nei tajidi eghu koba nou naiknore,

eghume iara na theome poru ni igne ka naikno te khapru mei te mala tarai re.

¹¹LORD, kokhoni ghau iara koba sagho! Reireghi ghau iara fabrahu!

Iara tore nigho iagho te mala eni igne naugna iara lase nigho iagho te namha ghau nei tajini teu fabrahu nou u nhaꞌa cheke na.

¹²Gognaro na kmana puhi biꞌo fara te mei ka iara na.

Iara theome tangomana te kahadire.

Nakhibo teke edi iara re te bukri soru ghau iara re.

Eghume iara gognaro na la theome tangomana te filoni kaisei nabrou aheva nate tei iara na.

Nakhibo igre la kmana fara la uludi khakla te au ka phaꞌugu

iara gre eghuteuna gaoghathogu iara na la theome au blagna.

¹³LORD, faghose mei mala togho ghau

nei fakarhi ghau eghu iara.

¹⁴Keha naiknore magnahaghei te falehe ghau iara.

Te keli na sagho tapla sorudi mala mamaja nodi kolho mare.

Eghuteuna keha naiknore keli tadi fara kate diꞌanagnafa iara na.

Te keli na iagho brue fapulodi mala theo nafudi mare.

¹⁵Iheire te maꞌe ghau iara igre te keli na iagho tapla faparidi kolho ka magra te eni mare igne mala jaglo nodi kolho mare.

¹⁶Nu iheire te mei ka iagho re mare keli tadi fara te cheke fakeli nigho na naugna iagho neke fakarhadi mare.

Eghuteuna mare keli tadi fara ka gloku te eni iagho ka mare na, naugna iagho teke fakarhadi teuna,

mare na te cheke eghu na,

“LORD na thofno mae keli fara!”

¹⁷Tore, iara kuma, nei theo nogu nolaghi eghu,

nu iagho na theome ghatho iho ghau iara, iagho ghatho ghau iara fabrahu.

Nogu God, iagho ngala mae te mala togho ghau iara na.

Faghose mei mala fakarha ghau iara.

Sam 41

Nogna tharai ihei te fogra mala ke keli fapulo

Nogna khoje mae Devet. Khoje mala koje mae kwaemasta.

¹Ihei te ghathoni nei toghoni teu naikno te kuma na, naikno igne thofno keli tagna fara.

LORD ginau toghoni mana kate nhotei mana kau hoholo na.

²LORD ginau reireghini nei bara fothini eghu nakarhagna na.

LORD ginau toghoni mana mala au fakeli ka namonogna na.

Eghuteuna God ginau theome snakreni mana ka khamedi nogna naokare.

³Kate fogra mana na,

LORD ginau reireghini nei fakelini eghu mana.

⁴Nu kate fogra ghau na, iara cheke eghu, “LORD, iara eꞌei nakhibo biꞌo ranghi nigho iagho,

kokhoni ghau iara, ke fakarha fapulo ghau.”

⁵Nogu naoka iara gre mare diꞌatadi ka iara neke cheke eghu,

“Nabagna na mana ghosei lehe kolho mala ghatho iho nodani.”

⁶Iheire te mei filo ghau iara teure mare chaichaghi nodi kolho, mare theome kokhoni ghau iara.

Mare mei mala filoni fogra iara na eghuteuna ke tei nodi.

Eghuteuna ke leghugna igne mare jifla tei toutonu eigu iara heva heva ka keha naiknore.

⁷Mae te theome magnahaghei ghau iara igre mare cheke faꞌikoi fari thedi eigna fogra iara igne.

Nei keli tadi fara ka nonomho te diꞌa eigu iara na.

⁸Mare ne cheke eghu, “Mana la fograhi la theome tangomanahi te kegra mei ka sapegna na.

Mana na leheu ngala.”

⁹Mae kheragu thofno ba te rouronuni nei ghamu fodu teu iara balugna na,

mana jaola tapla fapari ghau iara.

¹⁰LORD, kokhoni ghau nei fakarha fapulo ghau eghu iara ka fogra te thoko ghau iara igne,

eghuteuna iara nake tusu fapulo ka nogu naoka re unha teke eni mare ka iara na.

¹¹Kate filoni iara te theome tangomana mare te ulu ghau iara na,

iara ginauna laseni iagho te keli tamu ka iara na.

¹²Iagho ginauna na togho ghau iara, eigna te eni iara unha te doglo na.

Iagho ginauna na loku ghau iara mala au fabrahu balumu.

¹³Tahati cheke fakelini LORD, eigna mana noda God tahati naiknoda Israel.

Tahati cheke fakelini mana fabrahu tifa tifa.

Amen. Amen.

Fapea Buka

(Sam 42–72)

Sam 42

Nogna tharai ihei te tei au fakhaba ka nogna kantri na

Igne nodi khoje vikegna mae Kora mala koje mae kwaemasta.

¹God, iara magnahaghei fara te pogho soru nigho.

Uve, iara thofno magnahagheni fara te eni igne, jateula kaisei nanigot te magnahaghei mei koꞌu ka khoꞌura eghu.

²God, iagho God te karha, iara magnahaghei nigho iagho fara jateula mae ihei te moja graragna na te magnahaghei koꞌura eghu.

God, niha nau te mala ari iara te mala kegra ke ulumu te mala tarai na?

³Leuleghu fata na nogu naoka iara gre cheke eghu koba ka iara,

“Ahevau nou God iagho na?”

Aonu iara loku kolho ka natanhi na.

Kholodi phei tathagure ngala te jateula ghegu gano teu iara bongi narane na.

⁴God, tifara iara neke batudi kmana naikno neke tei ka sugamu iagho na.

Iara neke baludi mare neke tei balu glealeꞌa, balu khoje nei balu kilo fnakno nigho.

Nu kate ghatho fapulodi iara glepo igre,

gaoghathogu na iara tanhi nogu fara.

⁵Naugna unha site au diꞌanagnafa iara gnea?

Naugna unha site tahu fara ka gaoghathogu iara na puhi ignea?

God, iara ginauna na lisa ari ka iagho kolho nagnafagu na

mala cheke fakeli nigho eigna iagho nogu God mala fakarhi ghau iara!

^6-7Ka vido te au teu iara ke kosigna nogu kantri na, iara gaoghathogu na thono diꞌa fara,

eghume gaoghathogu na iara ke ghatho fapulo nigho.

Uve, iara ghatho nigho naugna iagho neke togho ghami fabrahu ka namono Israel,

ka vido aheva te au Khoꞌu biꞌo Jordan, nei phei Thogele Hemon ghe Misa.

Nu gognaro na puhi biꞌo thoke ghau iara jateula galo fari hotei nhorora eghu.

Puhi biꞌo igre mei jateula nabritha te mei te knoho iara ra eghu.

Tutuani fara, puhi igre mei jateula khoꞌu te jaja soru te oa’ongha fabiꞌo ra eghu,

ba jateula fila teura eghu.

⁸God iagho ngala te funei frunini nakarhagu iara gne. Iara gne ofoniu kolho glehe na.

Iara laseni ka kaisei narane teuna iagho falalase nou namha biꞌo na ka iara.

Eghuteuna leuleghu bongi na iara koje balu tharai ka iagho.

⁹God, iagho bara fothidi koba nogu naoka iara re mala thosei mei mare mala magri ghau iara.

Eghume iara thono faꞌiho ghau fara.

Naugna gognaro na iagho jateula te ghatho iho ghau eghu iara!

Iara theome keli gaoghathogu, naugna mae naoka gre goigoni ghau iara!

Ba, iagho na mei togho ghau iara?

¹⁰Nodi cheke mae te diꞌa fara are ngala

te jaꞌi ghau iara re.

Leuleghu fata na mare cheke eghu koba ka iara,

“Aheva gne nou God iagho na?!”

¹¹Naugna unha site au diꞌanagnafa iara gnea?

Naugna unha site tahu fara ka gaoghathogu iara na puhi ignea?

God, iara ginauna na lisa ari ka iagho kolho nagnafagu na

mala cheke fakeli nigho eigna iagho nogu God mala togho ghau iara!

Sam 43

Nogna tharai mae ihei te tei kokoni namonogna na

¹God, chekeni sagho ka naiknore te kaisei mae doglo iara te theome eni kaisei glepo te diꞌa na.

Kaisei phile sagho ka iara mala tapla sorudi naikno te theome keli ranghi nigho re.

Bara fothidi sagho naikno te chaichaghi nei naikno te diꞌa teu are mala fakarhi ghau iara.

²God, iagho kaisei vido keli mala fakarhi ghau iara.

Eghume iara thono faꞌiho ghau fara.

Naugna gognaro na iagho jateula te ghatho iho ghau eghu iara!

Iara theome keli gaoghathogu, naugna mae naoka gre goigoni ghau iara!

Ba, iagho na mei togho ghau iara?

³Snakre meidi sagho naphaemu nei thofno chekemu teure.

Iara magnahaghedi naphaemu nei chekemu teu gre te mala batu ghau te mala atha fapulo ghau ka sugamu te blahi te au ka nou namono blahi Saion, ka vido aheva te au teu iagho na.

⁴Eghume iara ginauna tei ka nou olta mala fafara.

Nogu God, iara ginauna hata gita mala koje balu kilo fnaknoni nanghamu na.

Uve, iara thofno glealeꞌa fara naugna iagho ne toghodi nou naiknore.

⁵Naugna unha site au diꞌanagnafa iara gnea?

Naugna unha site tahu fara ka gaoghathogu iara na puhi ignea?

God, iara ginauna na lisa ari ka iagho kolho nagnafagu na

mala cheke fakeli nigho eigna iagho nogu God mala fakarhi ghau iara!

Sam 44

Nogna tharai mae ihei te magnahaghei thotogho ka God

Nodi khoje mae vikegna Kora mala koje mae kwaemasta.

¹God, glepo biꞌo teke edi iagho ranghidi ku’emi ghehati tifara,

mare la toutonuhi ka ghehati la nomhidihi ghehati themi.

²Iagho neke khi fajifladi nei goigonidi neku naikno teke theome lase nighore mala ke au nou naikno themure ka vido aheva teke au mare na,

mala au nodi kmana glepo nou naikno themure.

³Nou naikno iagho igre neke theome atha namono igne ka magra,

ba ka nodi nolaghi thedi.

Theo. Mare neke atha vido igne ka nou nolaghi nei ka khamemu eghu iagho,

naugna iagho magnahaghedi mare te lase nigho te au teu baludi na.

Ka puhi igne iagho falalase ranghidi iagho te namhadi fara nou naiknore.

⁴Iagho nogu Lord nei nogu God eghu iara,

iagho gognaro na toghodi nou naiknore mala nheta frunidi nodi naokare ka magra na.

⁵Uve, ka nou nolaghi nei ka khamemu eghu

iagho te tapla sorudi ghehati nomi naoka gre.

⁶Iara theome rouronudi nogu phaloho

nei nogu naflahi teu igre nate fakarhi ghau iara kau magra na.

⁷Thono theo fara. Naugna kaisei iagho ngala te tangomana nate fakarhi ghami ghehati ka khamedi nomi naoka gre.

Iagho famamajadi naikno te tirodi ghami ghehati gre mala jateula te noinolira eghu mare fifilodire.

⁸Ghehati ginauna kilo fnakno nigho fabrahu.

Eghuteuna ghehati ginauna tegiou ka iagho tifa tifa.

⁹Nu gognaro na iagho tirou ghami ghehati,

eghuteuna iagho tirou tei baludi nomi soldia ghehati gre.

¹⁰Iagho neke eni igne neke rikhadi ghehati nomi naokare,

gognaro na mare mei la athahi nomi gobigna lepore.

¹¹Iagho snakredi mare mala falehe ghami jateula sipu eghu,

mala tei au tafri ghehati ka keha kantri delei.

¹²Iagho neke foli nou naikno themu gre ka sileni ikoi

jateula chara eghu kolho.

¹³Naikno te au falithui ghami igre filoni unha te eni iagho na

ne cheke fapari ghami nei maꞌe ghami neu ghehati.

¹⁴Iagho neke eni igne ka ghehati mala jateula kaisei glepo te mala cheke fapari nodini naiknodi keha kantri gre eghu kolho.

Mare filo uchu fabrahu ka ghehati ne maꞌe ghami ghehati.

¹⁵Leuleghu fata na iara haimini ka nagnafagu na,

iara gne diꞌa fara ka tathadi naiknore gognaro na. Iara mamaja nogu fara

¹⁶naugna iara nomhidi cheke te diꞌa fara te edi mae naokare,

nodi cheke te diꞌa igre theome magnahaghei ghau iara.

¹⁷Neuba glepo igre ne thoke ghami ghehati,

ghehati theome ghatho iho nigho,

nei ghehati theome huhughuni nou nhaꞌa cheke teke eni iagho balumi ghehatia.

¹⁸Ghehati theome tei koko nigho,

nu ghehati leghu nigho iagho fabrahu kolho.

¹⁹Nu iagho lilisei ghami kolho fari hoteidi khuma te fakaukathu gre,

iagho theome togho ghami ghehati kolho,

eghuteuna iagho snakre ghami ghehati mala au kolho ka vido te romno fara na.

²⁰Nomi Lord, jame te theome pogho soru nigho,

nei tarai ghehati ka mumuju teuna,

²¹tutuani fara, iagho laseni ngala glepo igne,

naugna iagho lasedi gaoghatho te poru teu ka ghehati gre.

²²Nu naikno gre magnahaghei fara te falehe ghami ghehati leuleghu narane.

Naugna ghehati gne nou iagho, mare gaoghatho mala falehe ghami ghehati jateula sipu eghu.

²³Lord, dofra sagho! Thuru unha sagho ia?

Faghose mei, thosei thodo ghami ghehati!

²⁴Naugna unha sagho te poru ghami ghehati gnea?

Thosei ghatho iho ghami ka vido te au papara nei au ka hoholo teu ghehati gne!

²⁵Mare la goigoni ghamihi ghehati, eghuteuna ghehati la thuruhi pari ka glose na gognaro gne.

Uve, mare la ulu ghamihi ghehati, eghuteuna ghehati la thuru fabrahuhi pari lamna chara gognaro na.

²⁶Mei sagho mala togho ghami ghehati!

Naugna iagho namha ghami ghehati fara, mei sagho fakarha ghami ghehati.

Sam 45

Khoje mala koje kate tolaghi mae King

Nodi khoje mae vikegna Kora mala koje mae kwaemasta. Khoje eigna namha.

¹Kmana famane cheke au ka gaoghathogu iara na. Iara magnahaghei te riso soruni khoje igne mala tusu lao ka king.

Foflogu iara na jateula nogna baero mae glalase te mala rioriso ra eghu.

²King, tutuani iagho kaisei mae famane fara. Theo kaisei ihei nga jateula iagho teuna.

Chekemu iagho re thofno keli fara. Eghume God na fablahi nigho fabrahu.

³Iagho kaisei mae king te nheta fara kau magra.

Iagho au nou glepo fara eghuteuna nanghamu iagho na thono haghe fara. Iagho tarabanau nou naflahi na mala magra.

⁴King, iagho na fnakno fara nanghamu na.

Iagho saghe ka hose te tei magra! Iagho ginauna na uluni magra na ka nou nolaghi te biꞌo fara.

Eghume, ka puhi igne iagho na kafe toghodi nou naikno te leghudi thofno chekemu te tutuani nei puhimu te thofno doglo fara,

nei farirhiudi mala namhadi nei taegodi eghu keha naiknore.

⁵Nou jata iagho te fnonu na ginauna churu ka thinidi nou naokare ghilei tei posa ka nagnafadire.

Eghuteuna maedi ka keha kantri are ginauna pogho soru ke ulumu iagho.

⁶Nolaghi teke tusu ari God ka iagho teke king iagho igne ginauna au fabrahu ka iagho tifa tifa.

Iagho funei frunidi nou naiknore ka puhi te doglo.

⁷Iagho magnahaghedi fara glepo te keli re, nu iagho theome magnahaghedi glepo te diꞌa re.

Naugna igne nou God iagho na neke vahi nigho hi, eghuteuna keha mae king re theome glealeꞌa jateula iagho eghu.

⁸Nou pohe brahu iagho na famane sisiri keligna fara ka phei nafnata sedi te kilodi mur ghe alo nei kasia.

Iagho au ka famane suga nei tevo eghu re te nabagna king te lalaoni fakeli ka kheꞌi elefant.

Eghuteuna hatimare mae string-band te mei lalahu te mala keli tamu iagho.

⁹Thudi gaꞌase hatimare mae king te kegra haghe ka suga te au teu iagho na baludi goro krupe te fnakno nanghadi.

Kuin te kegra fei nhetamu kate gnokro teu iagho ka sape nafnakno.

Naꞌa te lalaoni ka thua nafnata glepo teke hohoro ka famane gol ka kantri Ofa.

¹⁰Iagho sua gaꞌase te magnahaghei tolaghi ka king teu ia, fanomho fakeli ka unha nate chekeni iara gne nei ghathoni eghu.

Iagho na theome fanomho ka nodi farirhiu kheramu nei vikemu te au teu ka namonodire.

¹¹Te eghu iagho na, king ginauna filo nigho nei magnahaghei nigho eghu iagho, naugna iagho kaisei famane gaꞌase fara.

Mana mala nou mae funei iagho, eghume iagho mala ghatho tahuni mana.

¹²Naiknodi ka namono Taea ginauna atha mei namha ka iagho.

Eghuteuna mae te dedeire ginauna na jaola fariuriu nigho iagho mala magnahaghei nigho.

¹³Thugna gaꞌase king na la kulu auhi ka sugagna king, naꞌa kaisei famane gaꞌase fara.

Naꞌa pipichi ka pohe teke susuki ka ghajo gol.

¹⁴Nogna pohe naꞌa igne valakasi ka kmana nafnata kala. Gognaro na mare tathaleini naꞌa tei ka mae king.

Eghuteuna kheragna gaꞌase naꞌa re, reꞌe tei ke leghugna naꞌa.

¹⁵Rehati keli tadi te ruma ka sugagna mae king balu glealeꞌa.

¹⁶King, iagho ginauna au kmana thumu nalhaꞌu, eghuteuna mare ginauna mala king ke tughudi kuꞌemura.

Iagho ginauna na fakegra funeidi mare mala funei frunidi namono te gnafa ka nauthoglu igne.

¹⁷U khoje te eni iara igne ginauna loku famakuni fabrahu nafnaknomu iagho.

Eghuteuna naikno te gnafare ginauna theome gnafa te kilo fnakno nigho na tifa tifa.

Sam 46

God na au baluda tahati

Nodi khoje mae vikegna Kora mala koje mae kwaemasta.

¹God na taji ghita nei reireghi fakeli eghu ghita.

Kate au tahati ka puhi te biꞌo na, mana au jare baluda mala togho ghita.

²Eghume, neubane nghali nauthoglu igne ka nakheu, neuba ne diha soru thogele biꞌo igre lamna nhorora,

tahati theome tangomana te mhaghudi gobigna lepo te thoke mei ka tahati gre.

³Uve, neubane malu thongna na, ba neubane mei goigovi na ne tafru thogele gre,

tore, tahati theome tangomana te mhaghu na!

⁴Jare ka namonogna God,

mae ihei te blahi fara na au kaisei khoꞌu biꞌo te mala faglealeꞌadi naikno te tufru soruni mana ka namono tuana.

⁵Namono tuana theome tangomana te nghali ba te paꞌe na, naugna God na au baludi naikno te tufru soruni mana ka namono tuana.

Kate phage naprai na, mana auhi jare mala toghoni namono tuana.

⁶Kate diꞌatagna God te fnaja fabiꞌo jateula fila teuna, naikno bongihehe ka nauthoglu gne ginauna blalho jateula khoꞌu eghu.

Eghuteuna naiknore ginauna mhaghu nodi fara kate nghali te diha nodi namono na.

⁷LORD, mae ihei te blahi fara na au baluda tahati.

Noda God tahati naiknoda Israel, mana taji fakeli ghita tahati.

⁸Mei ghotilo mala filoni unha te eni God na.

Ghotilo na filodi glepo ninhigrana te edi mana ka nauthoglu igne.

⁹God ne cheke faheta ka naiknore mala thosei magra fari thedi ka nauthoglu gne.

Mana ne lolhopa nodi phaloho nei nodi jata teure, eghuteuna koko lao nodi greoreo ka khaꞌaghi.

¹⁰God ne cheke eghu ka naiknore, “Thosei magra! Filo si ghotilo, iara God!

Iara nodi king naikno te gnafa ka namono te gnafa ka nauthoglu gne.”

¹¹LORD mae ihei te funei frunini tharagna kligna na auhi baluda tahati agne.

Mana noda God tahati maeda Israel.

Mana noda namono keli mala poru tahati.

Sam 47

God na noda King tahati naikno heva ka nauthoglu igne

Nodi khoje mae vikegna Kora mala koje mae kwaemasta.

¹Ghotilo naikno ka namono te gnafa ra! Ghotilo kafe proaposa!

Koje fabiꞌo balu glealeꞌa nei kilo fnaknoni God.

²Tahati mala mhaghuni LORD. Mana God te fnakno kligna lahu.

Mana te mae nolaghi fara te funei frunidi naikno te gnafa ka nauthoglu igne.

³Mana togho ghita mala tapla sorudi naikno di keha vido gre,

eghuteuna togho ghita mala funei frunidi tahati keha kantri are.

⁴Mana magnahaghei fara ghita vikegna mae Jekob na, naugna tahati nogna naikno mana.

Eghuteuna vido te au teu tahati te fahaehagheni teu tahati igne, mana neke vahini mala noda tahati neku.

⁵Noda LORD na kela pulohi kligna. Mana gognaro na gnokro ka nogna sape nafnakno na.

Eghuteuna kate haghe mana kligna na naiknore keli tadi ne eha fabiꞌo balu khufli.

⁶Tahati koje! Tahati cheke fakelini God!

Mana noda king tahati! Tahati koje kilo fnaknoni mana.

⁷God na King ka vido te gnafa ka nauthoglu igne!

Tahati cheke fakelini mana ka koje!

^8-9God, nogna God mae Ebraham,

te gnokro teu ka nogna sape nafnakno na mana funei frunidi naikno te gnafare.

Mae lida di keha kantri are ginauna na salofodu mei

mala kaisei ngala baluda tahati nogna naikno mana re.

Mana au nogna nolaghi te mala tapla sorudi hatimare mae armi,

eghuteuna mana ginauna kaisei nodi king naiknore.

Sam 48

Saion nogna namono biꞌo God

Nodi khoje vikegna mae Kora.

^1-2LORD te fnakno kligna lahu!

Tahati na tei ka nogna thogele blahi God na mala pala hagheni nanghagna mana na kilgna!

Tahati na tei ka nogna namono biꞌo God na mala cheke fakelini mana.

Nogna thogele blahi God igne au ke raru nei famane fara eghu.

God na mae King,

eghuteuna nogna thogele blahi mana igne faglealeꞌadi naikno te gnafa ka nauthoglu igne.

³God na au ka namono tuana mala togho ghita ka narane te magra na

mala au fakeli tahati.

⁴Hatimare mae king te salo fodu mei te kegra faligohoni Thogele Saion

mala magra ka tahati.

⁵Nu kate filo haghe mare ka namono na,

mare jaglo nodi fara ne mhaghu ne rikha kolho.

⁶Mare ne bobolo nodi fara balu khabru biꞌo

jateula gaꞌase te namo karha sua ra neu.

⁷Mare ne mhaghu nodi fara jateula hatimare mae pasenja

ka vaka te namo lodu ka nuri biꞌo ia eghu.

⁸Tahati theda neke nomhidihi unha teke edi God glepo igre tifa na,

nu gognaro na tahati kela filoni mana teke la edi glepo igre.

Tahati gognaro na au ka nogna namono biꞌo noda God,

mana LORD te au nolaghi biꞌo eghuteuna tahati filoni mana te edi glepo igre ka namono biꞌo igne.

God ginauna loku famaku fabrahu namono biꞌo igne tifa tifa.

⁹God, kate au teu ghehati ka sugamu iagho na,

ghehati ke ghathoni nou namha biꞌo iagho na.

¹⁰Naikno ka namono te gnafa igre cheke fakeli nigho,

eghuteuna nanghamu iagho na tei tongana heva heva ka nauthoglu igne.

Iagho funei frunidi naiknore ka puhi te doglo.

¹¹Eghume ghehati te gnafa na keli tami fara te au ka namono Saion.

Iagho fatedi naiknore ka puhi te doglo.

Eghume ghehati te au ka namono biꞌo te gnafa agne Juda, ghehati keli tami fara.

¹²Ghotilo nogna naikno God ra tei falithuini namono biꞌo Saion

mala kahadi suga te mala toetoe te au jare ra.

^13-14Ghotilo ghatho fakelini bara thina te falithuini namono Saion,

eghuteuna ghotilo filo ka suga te famaku are eghu.

Eghume, ghotilo ginauna tangomana te cheke eghu ka thumire,

“God te au Saion igne, noda God tahati fabrahu.

Mana ginauna mala au ului mala batu ghita ka nabrou aheva nate tei tahati na.”

Sam 49

Mae ihei te ghathoni kolho sileni nei gano teuna mae tuana kaisei mae theome mae glalase kolho

Nodi khoje mae vikegna Kora mala koje mae kwaemasta.

^1-2Ghotilo naikno ka namono te gnafa ra,

ghotilo kafe fanomho!

Mae funeira, mae mavitura, mae te dedeira,

nei mae te kumara, nei ghotilo te gnafa ka nauthoglu igne ra ghotilo fanomho fakeli ka cheke igne!

³Cheke nate chekedi iara igre thofno gaoghatho keli fara.

Eghume cheke nate jifla mei ka gaoghathogu iara igre na tusu ari glalase ka ghotilo.

⁴Iara ginauna na kulu toutonu ka ghotilo kau cheke naba,

eghuteuna iara ginauna nake rurutha gaoghatho di cheke naba igre kate koje iara ka gita na.

^5-6Iheire te rouronu ka sileni na nei me eha tonganadi ka keha naiknore teu igre ngala te magnahaghei te mei goigoni ghau iara re,

nu iara sa tirogu mhaghudi kolho hatimare mae naoka te mei kegra falithui ghau iara igre eghu.

⁷Filo sagho, theo kaisei naikno te tangomana te foli fapuloni thegna ka sileni na.

Tutuani, mana theome tangomana te tusu lao sileni ka God te mala ke foli fapuloni nakarhagna na.

^8-9Naugna fofoli te mala foli fapuloni naikno na thono biꞌo fara.

Naikno na theome tangomana te folini nakarhagna na ka God te mala karha nei theome lehe teu na.

¹⁰Uve, te laseni tahati na mae te lalase na,

mana na lehela jateula mae te theome lalase nei mae te fameomekro teugre eghu.

Mana ginauna lisei faleghu nogna silenire eghuteuna keha naiknoi na teke khotodire.

^11-12Neubane khotodi mana namhata nei glose teugre,

beku na ngala namonogna mana te mala au fabrahu mana te tifa te tifa na.

Neubane fnakno mana nanghagna na, tuana theome mala fanograni mana kau glehe.

Theo. Mana ginauna lehe jateula bosu eghu kolho.

¹³Filo si ghotilo, igne unha nate eni ka ihei te ghatho tahuni kolho thegna baludi glepo te khotodi mana re,

nei jaola thokeni mae ihei te leghuni nafnata naikno igne.

¹⁴Eghume, God vahini mana mala lehe jateula sipu eghu, naugna u glehe na ngala te hironi mana na.

Ihei te au doglo na ginau keli tagna kate ghosei te boto thinigna na ke lamna beku, te khaba ka nogna famane suga na.

¹⁵Nu God ginauna fakarhi ghau iara kau glehe.

¹⁶Ghotilo thosei nanga nomi kate filoni ghotilo ihei te dedei fara

nei kmana nogna fara teu na.

¹⁷Uve, kate lehe na mana theome tangomana te atha te tei balugna nogna glepo te kelire.

Tutuani, mana jaola theome tangomana te atha te tei balugna glepo tuare lamna beku na.

¹⁸Kate karha teuna mana glealeꞌa koba,

eghuteuna naiknore ghatho tahuni mana, naugna mana haghe fara fei bisnis.

¹⁹Neuba, mana ginauna leheu,

eghuteuna mana ginauna tei au lamna beku baludi kuꞌegna teke lehe tifa ra.

²⁰Leghu lahu na naikno na theome tangomana nate rikhani u glehe na.

Uve, mana ginauna na lehe jateula bosu eghu kolho.

Sam 50

Thofno puhi te mala tufru soruni God

Nogna khoje mae Asaf.

¹Noda LORD God te thofno nolaghi fara.

Mana te kilo meidi naikno te gnafa ka nauthoglu igne funu maghati posa ke mosu.

²God na au Saion, namono keli tutuani, famane namono fara, naphaegna God na au ka namono te keli nei famane namono tutuani fara.

Naphaegna God na jifla mei funu Saion ka vido te snagla ne tei heva heva ka nauthoglu igne.

³Noda God na la meihi, nu mana na theome au kmu.

Khaꞌaghi te mala nhako gobigna lepore na mei ke ulugna mana,

eghuteuna nuri blahi balu nakhete na au faligohoni mana.

⁴Mana eha lao ka maloa kligna na

nei ka nauthoglu pari igne mala au jare balugna mana mala fatedi mana nogna naiknore.

⁵Ghopa maloa ghe nauthoglu ra fanomho ka God kate cheke teu mana ka nogna naiknore.

Mana na cheke eghu, “Ghotilo nogu naikno iara teke nhaꞌa cheke balugu iara ra,

nei fafara mala farerhetagna u nhaꞌa cheke igne teura, ghotilo khapru mei ke ulugu iara.”

⁶Gobigna lepo ka maloa na are cheke thakleni puhigna God te doglo na,

eghuteuna mana ngala te tangomana te fateni naikno na.

⁷Aonu God ne cheke eghu, “Ghotilo nogu naikno iara Israel ra.

Ghotilo fanomho ka iara, iara magnahaghei te facheke ka ghotilo. Iara ginauna fate ghami ghotilo.

Eigna iara nomi God ghotilo.

⁸Iara theome diꞌatagu ka ghotilo eidi fafara teke edi ghotilo ra. Theo.

Kate filo ghami iara te gahu koba ghotilo ka khaꞌaghi nomi fafara ra tuare keliu kolho.

⁹Nu neuba nau, iara theome magnahaghedi buluka nalha’udi

nei nanigot nalha’udi teu ka nomi bara ghotilo are. Theo.

¹⁰Gobigna lepo te au ka namhata na are nogu iara,

buluka te au ka nhebei thogha thogele na are nogu iara.

¹¹Nanghaji nei gobigna lepo karha teu te au tafri ka namhata na are nogu iara.

¹²Eghuteuna jame te rofo na, iara ginauna na theome tore ka ghotilo,

naugna nauthoglu igne baludi gobigna lepo te au ke lamnagna igre nogu iara.

¹³Ba? Ne ghamu nafnahi buluka

nei na koꞌu dadara nanigot eghu iara neu si ghotilo ia? Theo!

¹⁴“Iara God, ka maloa kligna,

eghuteuna te keli na ghotilo cheke fakeli ghau iara fabrahu.

Igne thofno nomi fafara ghotilo na.

Eghume te keli na ghotilo edi glepo teke nhaꞌa chekedihi ghotilo ka iara ra.

¹⁵Eghume jame te eha ghotilo ka iara kate au ghotilo ka hoholo na iara na togho ghami ghotilo,

eghuteuna ghotilo ginauna na pala hagheni nanghagu iara na.”

¹⁶Nu God ne cheke eghu ka naikno te diꞌa re,

“Mala unha si ghotilo te iju polodi nogu vetula iara grea?

Mala unha si ghotilo te toutonudi nogu nhaꞌa cheke iara teke edi iara ka mae kuꞌemi ghotilo tifa ra?

Ghotilo mae chaichaghi kolho.

¹⁷Ghotilo tiromi fara te mala farirhiu ghami iara na,

eghuteuna leuleghu fata na ghotilo tiromidi chekegu iara re.

¹⁸Leuleghu fata na ghotilo fofodu ka mae te khuru blau are,

nei au fodu baludi mae iheire te tolaghi pedo are eghu.

¹⁹Leuleghu fata na ghotilo snakredi foflomi are te

mala cheke diꞌa nei cheke chaichaghi teuna.

²⁰Eghuteuna ghotilo cheke faparidi

nei cheke fadiꞌadi eghu ngala nanghadi thabusimi themi are.

²¹Ghotilo neke edi gobigna lepo igre,

eghuteuna iara neke theome cheke ka ghotilo neku.

Aonu gaoghathomi ghotilo na iara gne jateula ghotilo eghu kolho.

Nu thono theo fara eghu.

Iara gognaro na diꞌatagu fara ka ghotilo,

eghuteuna iara na falalase ari ke ulumi ghotilo unha teke eni fadi ghotilo na eghu!

²²“Ghotilo naikno te ghatho iho ghau iara ra, ghotilo fanomho fakeli ka gobigna lepo igre.

Te theo ghotilo na, iara ginauna na fadidiꞌa ghami ghotilo, eghuteuna ginauna na theo kaisei mae te nabagna te mala fakarhi ghami ghotilo na.

²³Mae ihei te cheke fakeli ghau iara na, tuana jateula te fafara eghu ka iara, mana pala hagheni nanghagu iara na.

Mae ihei te leghuni chekegu iara na, iara ginauna fakarhini mana.”

Sam 51

Nogna tharai mae Devet kate tapla jafra ka nakhibo

Nogna khoje mae Devet. Mana neke eni koje igne ke leghugna teke cheke mae profet Natan ka mana na, naugna mana neke thuru balugna Batseba, khetogna mae Uria.

¹God, kokhoni ghau iara, eigna nou namha nei nou lolokeli teu iagho ranghidi naiknore thofno biꞌo fara.

Hata fadeleidi sagho puhigu iara te diꞌa gre.

²Tihi kokodi sagho ka iara nakhibo te edi iara gre.

Hata fadeleidi sagho tagu, mala gae nogu iara.

³Iara filo glanidi puhi te diꞌa teke edi iara re.

Iara ghathodi fabrahu nakhibo teke edi iara re.

⁴Nakhibo te eidi iara gre thofno tapla fapari nigho iagho kolho. Iara edi puhi te diꞌa igre ka tathamu iagho na.

Eghume iagho nabamu fara te fate ghau iara na, iagho nabamu fara te chekeni te la jafrahi iara teuna.

⁵Uve, iagho lase ghauhi iara, iara neke kulu naikno diꞌa neke mei ngala funu karhagu.

Puhigu iara na kulu diꞌa neke mei ngala funu ka narane teke theome karha nga teku iara na.

⁶Iagho magnahagheni fara naikno te cheke kate tutuani na.

Eghume, iara magnahaghei nigho iagho te fafodu mei gaoghatho te keli ka iara.

⁷Hata fadeleidi sagho nakhibogu iara gre,

naugna iagho ngala te au nolaghi te mala titihi fagae ghau iara te mala jateula pohe vegha teu iara na.

⁸Iara magnahaghei te nomhini ka iagho tela kokohi iagho nakhibogure.

Te eghu iagho na, iara ginauna na glealeꞌa fara.

⁹Thosei filo mei ka puhi te diꞌa te edi iara gre,

iara te tore nigho te mala hata fadeleidi ka iara puhi te diꞌa igre.

¹⁰God, lilisei mei sagho ka iara gaoghatho ka iara te mala leghu nigho fabrahu na mala gae nogu fara iara.

Tusu mei sagho nagnafa majaghani ka iara mala gae iara ke ulumu.

¹¹Thosei huju fadelei ghau iara mala tei fakhaba nigho, God,

thosei hata fadeleini mae Tharunga te Blahi na ka iara.

¹²Faglealeꞌa fapulo ghau, eigna iagho neke fakarhi ghauhi iara.

Togho mei ghau mala thofno leghu nigho iara.

¹³Eghuteuna iara ginauna farirhiu chekemu iagho na ka naikno te diꞌa puhidi gre mala ke pulo mei ka iagho.

¹⁴God, fakarhi ghau iara, thosei falehe ghau iara eigna unha puhi diꞌa teke eni iara ia.

Iara ginauna koje kilo fafnakno nigho eigna te eni iagho puhi te doglo na.

¹⁵Lord, togho ghau iara mala cheke eigna

iara magnahaghei te cheke fakeli nigho na.

¹⁶God, jame te gahu buluka iara ke kligna olta te fafara ari ka iagho na,

iagho ginauna theome keli tamuni,

naugna iagho theome magnahagheni nafnata fafara igne.

¹⁷Nafnata fafara te magnahagheni iagho na, u nakarha te nhaꞌa fapari na kolho.

Iagho theome tangomana te figri tagruni ihei te tughu nagnafa te nhaꞌa faparini thegna na.

¹⁸God, iagho filo kokhoni ghami ghehati naikno te au ka Thogele Saion.

Eghuteuna togho mei ghami ghehati mala fakegra hagheni gringni thina biꞌo Jerusalem.

¹⁹Eghuteuna iagho ginauna keli tamu fara ka buluka te gahu ghehati ka khaꞌaghi te fafara ari ka iagho na.

Uve, ghehati ginauna na gahu buluka nalhaꞌudi ke kligna olta mala fafara ari ka iagho,

naugna iagho ne togho ghami ghehati.

Sam 52

God ginauna fateni mae ihei te eni puhi te diꞌa na

Nogna khoje mae Devet. Mana neke eni ke leghugna narane mae Doeg maegna Edom teke tei cheke ka mae Sol eigna mae Devet te la teihi ka nogna suga mae Ahimelek.

¹Iagho mae biꞌo te nheta fara kau magra ia,

naugna unha sagho te fahaehaeghedi fara puhi te diꞌa grea?

Eigna puhigna God te keli ranghini naikno na au fabrahu tifa tifa.

²Iagho kaisei mae chaichaghi fara.

Foflomu iagho na jateula kaisei bled te fnonu fara eghu goigoni ni fara keha naikno na ka narane te ghathoni teu iagho puhi te

mala goigoni ni keha naikno na.

³Iagho theome magnahagheni puhi te keli na.

Nu iagho magnahagheni kolho puhi te diꞌa na. Iagho theome magnahagheni te chekeni unha te tutuani na.

Nu iagho magnahagheni kolho puhi te cheke chaichaghi na.

⁴Iagho kaisei mae chaichaghi fara. Iagho magnahagheni kolho te

mala cheke fadiꞌani keha naikno na ka chekemure.

⁵Nu God ginauna na tapla soru nigho mala theome tangomana iagho teke kegra haghe na.

Mana ginauna na loku famaku nigho, nei na khi fajifla nigho ka nou suga na.

Eghuteuna mana ginauna na koko soru nigho kau namonodi iheire te au ka glehe ra.

^6-7Naikno te keli re ginauna filoni glepo igne na mhaghu nodi fara.

Mare ginauna maꞌe nigho iagho na cheke eghu, “Filo si ghotilo ka mae igne.

Mana theome fatutuani ni God te mala fakarhini na. Dedei nei puhi te diꞌa teu are kolho te fatutuanidi mana re!”

⁸Nu iara gne theome eghu jare.

God na reireghini nakarhagu iara na gne jateula gaju oliv te au rhegna sugagna God na ia eghu.

Iara fatutuani ni God eigna mana kokhoni ghau iara fabrahu tifa tifa.

⁹God, iara ginauna cheke fakeli nigho fabrahu eidi glepo teke edi iagho ra.

Iara ginauna na chekedi glepo igre ke uludi nou naikno iagho re na cheke eghu,

“God na ne eni ka iara puhi te keli na.”

Sam 53

Puhi fameomekro nei puhi te diꞌa teugre ngala nogna puhi naiknore

Nogna khoje mae Devet malagna mae kwaemasta.

¹Naikno te fameomekro na cheke eghu ka nagnafagna na,

“Jare na theo kaisei God kolho.”

Mae igne kaisei mae gnognoro fara kolho, mana ngala kaisei mae te mala eni u puhi te diꞌa na.

Theo kaisei naikno te tangomana te mala eni unha puhi te keli na.

²God au neu kligna ne filo soru ka naiknore.

Mana magnahaghei te filodi keha naikno te au tadi glalase te keli te mala tufru soru ranghini nei leghuni mana eghu.

³Nu theo fara. Mare la snivihi ka nabrou te keli na.

Mare kaisei nanaba ngala la kafe diꞌa fara tutuani.

Theo kaisei naikno te eni puhi te keli na. Theo fara.

⁴God ne cheke eghu, “Tore, naikno igre te edi puhi te diꞌa igre, ba, theome lalase sigrea?

“Ba, theo pha’udi sigrea?

Mare karhau kolho ka unha teke blau mare ka nogu naikno iara re, nei jaola tirodi tarai ka iara.”

⁵Nu mare ginauna na thono mhaghu nodi fara.

Tifa na mare neke theome mhaghu nodi jateula tuana neku.

Thono theo fara. God ginauna falehedi nei tofa tafridi eghu nhubradire.

Mana ginauna roꞌedi naugna mana ne theome magnahaghedi.

⁶Iara toreni fara noda God mae ihei te au ka Thogele Saion te mala snakreni kaisei mae te mala fakarha ghita ka khamedi noda naokare.

Ka narane tuana tahati na thofno glealeꞌa noda, eigna God na togho ghita tahati maeda Israel.

Sam 54

God na mae mala thotogho

Nogna khoje mae Devet. Mana neke eni khoje igne ke leghugna teke chekeni naikno di Sif ka mae Sol aheva te poru mae Devet na. Khoje igne mala koje ka nifu.

¹God iara toreni u nou nolaghi iagho na mala fakarhi ghau ka khamedi naikno te diꞌa gre.

God, mei fakarha ghau iara.

²God, fanomho mei ka nogu tharai gre,

fanomho mei ka nogu cheke iara gre.

³Naikno te patu gama igre mare la meihi, mare magnahaghei te mei magri ghau iara.

Mae igre rodi magridi keha naiknore, mare magnahaghei te falehe ghau la iara.

God na theo nafugna kolho ka gaoghathodire.

⁴Nu God na togho ghau iara.

Tutuani fara, God na tangomana te reireghi ghau iara te mala au fakeli iara na.

⁵God na tangomana te goigonidi nogu naoka iara re.

Puhi te diꞌa teke edi mare ka iara re,

mana tangomana teke eni fafigri ka mare puhi te diꞌa tuana.

God, thosei tei koko ghau, nu iagho tangomana te fahuidi naoka igre!

⁶LORD, iara keli tagu kolho te fafara ka iagho na.

Iara ginauna na cheke fakeli nigho eigna iagho ne thofno keli fara.

⁷Iagho neke hata fadelei ghau iara ka puhi teke edi mare ranghi ghau iara ra,

eghuteuna iara filodi nogu naoka iara ra la theo nafudi kolho.

Sam 55

Nogna tharai mae ihei te tore ka God mala toghoni

Nogna khoje mae Devet mala mae kwaemasta nei koje ka nifu.

¹God, fanomho mei ka nogu tharai gre.

Thosei figri mei thagrumu na kate tanhi iara na.

²Fanomho fakeli ka iara, nei cheke tughu ghau eghu.

Iara gognaro na thono glaꞌe fara eigna diꞌanagnafa na thono biꞌo fara ka iara.

³Iara mhaghu nogu fara ka nodi cheke nogu naokare.

Nakarhagu na faꞌiho fara eigna mae te diꞌa gre nenei ghau iara fara.

Mare goigoni ghau iara fara, diꞌatadi ghau nei tirodi ghau la iara eghu.

⁴Iara mhaghu nogu fara,

eigna mhaghu glehe na au ka iara.

⁵Uve, iara thono mhaghu nogu fara nei thinigu na thono nigra fara.

Namhagu na fapari ghau iara.

⁶Aonu iara ne cheke eghu, “Iara magnahaghei te au bagi jateula balhu eghu.

Iara magnahaghei te flalo te tei te hiro vido mala gnafa.

⁷Jame te eghu na, iara ginauna na flalo tei fabrahu ka vido te gou

mala au nogu jare.

⁸Iara ginauna ghosei flalo tei mala filoni kaisei vido

mala porudi ka nogu naoka te jateula saeklon nei nakhete teu te mei te goigoni ghau iara gre.”

⁹Iara filodi naikno te au ka namono biꞌo na, mare faphoaphola nei magra eghu.

Lord, roꞌe noudi sagho nodi groghe te edi mae naoka are.

¹⁰Bongi narane na mare tei faligohoni baragna namono na naugna mare kaikaliti fabrahu mala magra.

¹¹Mare thofno goigonidi fara namonore, eghuteuna nabroure fodu ka naikno te lalamadi keha naiknore.

Eghuteuna mare mae chaichaghi nei mae mala blau eghu kolho.

¹²Jame kaisei mae naoka cheke fapari ghau iara,

iara theome nangadi kolho nogna cheke mana tuare.

¹³Nu theo eghu, iagho ngala.

Iagho thofno mae kheragu fofodu iara!

¹⁴Tifa na tapa neke kaisei thei ngala

nei kaisei cheke te keli ngala neku kate pogho soru ka sugagna God na.

¹⁵Gaoghatho te diꞌa na la kulu fodu hi ka thi’adi nei sugadi teu nogu naoka iara re.

Eghume iara magnahaghedi mare te mala ghosei te lehe na. Kate karha nga teuna, mare mala kafe tei ka namonodi mae tela lehehira.

¹⁶Nu iara ginauna kiloni nogu God na mala mei togho ghau,

nei mala mei fakarhi ghau eghu.

¹⁷Fei hamerane nei fei naublatha nei fei grafi teuna iara tanhi ka mana eidi puhi te fadiꞌa ghau re.

Eghuteuna mana ginauna na nomhidi nogu tharai iara re.

¹⁸Kmana mae naoka fara te magri ghau iara re.

Nu iara theome diꞌadi eghu, naugna God na reireghi ghau nei togho ghau eghu iara.

¹⁹God na King funu tifa mei ngala kani theome au nga teku nauthoglu igne te ghilei mei posa gognaro gne.

Mana ginauna na nomhidi nogu tharai iara re, eghuteuna mana ginauna na tapla sorudi mae naokare te rodi magri ghau iara re.

Naugna mare theome mhaghuni mana, eghuteuna mare theome tangomanadi te tughu nodi puhi te diꞌare eghu.

²⁰Mae kheragu iara igne mana neke nhaꞌa cheke ka ghehati tifa na

ka mae kheragnare neke magridi mare.

²¹Nogna chekere mamahe fara jateula suka eghu,

nu gaoghathogna mana na theome magnahaghei kaisei naikno te cheke faparini,

eghuteuna nogna cheke igre fagano salhu jateula sedi eghu mala au kmu naiknore.

Nu nogna cheke mana igre fagoreho ghami ghehati jateula naflahi te fnonu eghu.

²²Puhi biꞌo te tahu ghami ghotilo are lisei lao ka khamegna LORD.

Eghuteuna mana ginauna na bara fothi ghami nei fakarhi ghami eghu ghotilo.

Eghuteuna mana ginauna na theome snakreni kaisei glepo mala goigonini ihei te doglo na.

²³God, iagho ginauna kuru teidi iheire te falehe naikno nei chaichaghi teu are

mala tei au mare ka namonodi naikno te au ka glehera mala snivi fabrahu mare.

Narane te mala lehedire na ghosei mei kolho.

Nu iara gne fatutuani nigho iagho fabrahu kolho.

Sam 56

Nogna tharai mae ihei te fatutuani ka God

Nogna khoje mae Devet malagna mae kwaemasta. Mana neke eni koje igne ke leghugna teke lokini mana hatimare mae Filistia ka namono Gat.

¹God, kokhoni ghau iara,

eigna naikno gre la mei la magri ghau iara.

Leuleghu fata na mae naoka igre mei kegra faligoho ghau iara.

²Kmana naikno cheke fapari ghau iara funu hamerane na ghilei posa fei grafi.

³God, kaisei iagho ngala te au nolaghi biꞌo na.

Kate mhaghu na, iara lisa ari ka iagho gaoghathogure.

⁴Iara theome tangomana te mhaghu na naugna iara thofno fatutuani ni nogna nhaꞌa cheke God na.

Iara cheke fakelini God!

Unha glepo gne nate eni naiknore ka iara na?

Thono theo fara kheraguro.

⁵Funu hamerane te ghilei posa fei grafi na nogu naoka iara re, mare magnahaghei te eni puhi diꞌa na ranghi ghau iara.

Leuleghu fata na mare gaoghatho fara mala filoni kaisei nabrou te mala goigoni ghau iara na.

⁶Mare salo fodu ka vido te mala poru na,

eghuteuna filo tutu ka vido aheva te tei iara na mala falehe ghau iara.

⁷God, diꞌatamu sagho e tapla sorudi mala theo nafudi kolho mare.

Fakokhoanadi sagho eidi puhi te diꞌa te edi mare are.

⁸Iagho laseni puhi biꞌo te au ka iara igne.

Iara gne au diꞌanagnafa nei tanhi eghu nogu fara.

Uve, iagho neke ghathoni igne neke kulu riorisonihi ka nou buka na.

⁹Tutuani, ka narane nate kilo nigho iara na,

iagho ginauna na bruedi nogu naoka iara gre mala rikha tei mare delei.

Kate filoni iara te rikha mare na iara na laseni iagho togho ghau iara na.

¹⁰Iara ghathoni nei fatutuani ni eghu nogna nhaꞌa cheke God na.

Eghume iara cheke fakelini nanghagna God na.

Tutuani fara, iara ghathoni nogna nhaꞌa cheke LORD na,

eghuteuna iara na cheke fakelini nanghagna mana na.

¹¹Iara thofno fatutuani ni mana, eghume iara ginauna na theome mhaghuni kaisei glepo.

Ba, unha glepo gne nate eni naiknore ka iara na? Thono theo fara, kheraguro.

¹²God, iara ginauna na tusu ari ka iagho glepo teke nhaꞌa chekedi iara mala faꞌari ka iagho teku ra.

Iara ginauna tusu ari ka iagho nogu namha na kate cheke fakeli nigho na.

¹³Eigna iagho ne theome snakreni te lehe iara na ne fakarhi ghau iara.

Eghume iara mala kaisei thei ngala balumu iagho ka vido aheva te au iagho baludi nou naiknore te phae fabrahu na.

Sam 57

God ginauna toghoni mae ihei te tore ka mana na

Nogna khoje mae Devet malagna mae kwaemasta. Mana neke eni koje ke leghugna teke rikhani mae Sol teke tei poru ka gluma na.

¹God, kokhoni ghau iara.

Naugna iara au ka puhi biꞌo te jateula goigovi biꞌo teu igne.

Iara mei mala poru ka iagho jateula sua nanghaji te poru ke paridi bagignai idodi na ia eghu mala au fakeli nogu ka iagho,

ghilei salaꞌu ari u puhi biꞌo jateula goigovi biꞌo teu te goigoni ghau iara igne.

²Iara na kiloni God te au kligna na mala togho ghau.

Eghuteuna mana na tusu mei ka iara unha te ari te kmoꞌeni iara na.

³Mana na au kligna, mana ginauna na nomhini nogu tharai iara na, eghuteuna mana ginauna fakarhi ghau iara.

Mana ginauna na famamajadi iheire te magnahaghei mei goigoni ghau iara re.

Tutuani fara, God na magnahaghei ghau iara fabrahu, nei theome tei koko ghau iara eghu.

⁴Uve, naikno diꞌa igre kegra faligoho ghau iara jateula lion te tarabana teu te

mala ghamudi naikno ra eghu.

Kheꞌidire fnonu fara jateula goru nei jata eghu,

eghuteuna glapidire thono fnonu fara jateula naflahi mala magra eghu.

⁵Iara magnahaghedi naiknore te pala hagheni kligna nanghamu iagho na mala tei e salaꞌuni maloa gne.

God fakakhana sagho nou nolaghi te biꞌo na ka namono te gnafa ka nauthoglu igne.

⁶Nogu naoka iara gre mare lilisei kaisei fangna mala fakhale ghau iara teuna,

eghume iara gne thofno au diꞌanagnafa fara.

Hatimare dokha kaisei khora ka nabrou na mala snoꞌo iara teuna.

Nu iara theome snoꞌo kolho tagna eghu, mare thedi nga kolho teke snoꞌo tagna na.

⁷God, iara maku fabrahu gaoghathogu na ka iagho.

Uve, iara gaoghathogu na thono heta fara ka iagho.

Eghuteuna iara ginauna na koje mala pala hagheni nanghamu iagho na.

⁸Gognaro gne iara dofra!

Iara na lalahu gita nei hukalele eghu.

Uve, kate gagra pasa na iara na koje balu kilo fnakno.

⁹Lord, iara na cheke fakeli nigho ke uludi naikno igre,

eghuteuna iara ginauna koje kilo fnakno nigho ke uludi keha kantri gre.

¹⁰God, nou namha iagho na thono biꞌo fara tei posa ka maloa gro.

Puhi te tajini fabrahu iagho nou nhaꞌa cheke na biꞌo fara tei posa ka khoveo gro.

¹¹Iara magnahaghedi naiknore te pala hagheni kligna nanghamu iagho na mala tei e salaꞌuni maloa gne.

God, fakakhana sagho nou nolaghi te biꞌo na ka namono te gnafa ka nauthoglu igne.

Sam 58

Tharai mala toreni God mala fatedi naikno te diꞌa re

Nogna khoje mae Devet malagna mae kwaemasta.

¹Ghotilo mae funeira! Ba, tore, ghotilo fatedi naiknore ka puhi te doglo?

Ba, ghotilo fatedi naiknore ka nabrou te doglo?

²Tore, thono theo fara! Ghotilo ghathodi kolho glepo te diꞌa te magnahaghei edi kolho themire,

eghuteuna ghotilo cheke fahetani kolho puhi te mala goigonidi naiknogna nauthoglu igne.

³Naikno te diꞌare neke tapla jafra fabrahu neke mei ngala funu tifa kani au teku ka thiꞌadi idodire,

mare neke cheke chaichaghi neke mei ngala funu karha meidi.

⁴Nodi chekere jateula mogo te faghughumhu ra eghu.

Mare fofotho khulidire, jateula mogo te megli te theome nomhidi cheke ra eghu.

⁵Naikno te diꞌare theome tangomana te nomhini naogla gna God na,

nei theome nomhini nogna khoje mae ihei te lalase na eghu.

⁶God, paradi sagho naikno te diꞌa puhidire tuare.

LORD, naikno tuare jateula lion te khuru magra ra eghu,

eghume paradi sagho naikno tuare eghu.

⁷Lisa laodi sagho mala rughui mare jateula khoꞌu te thofa ke kligna nusu ra eghu.

Tapla sorudi sagho mala brango mare jateula buburu eghu.

⁸Lisa laodi sagho mala jateula kholu te soru naoko gna na te lehera eghu mare.

Ba, mala jateula sua te karha mei te lehe nu theome filoni narane na teu ia eghu mare.

⁹God, ghosei brasi sorudi sagho kate iho teu mare na mala jateula buburu eghu kolho mare.

Kate diꞌatamu na phanga lao sagho ka mare mala flalo tei delei kate karha teu mare na.

¹⁰Naikno te keli re ginauna keli tadi kate filoni mare te paradi iagho naikno te diꞌa re.

Mare ginauna na keli tadi fara kate filoni mare te falehe fahuidi iagho re.

¹¹Naiknore ginauna cheke eghu,

“Tutuani fara! God na tabadi naikno te keli re.

Eghuteuna mana au na fatedi naiknogna nauthoglu igne!”

Sam 59

Nogna tharai mae ihei te tore ka God mala fakarhini

Nogna khoje mae Devet malagna mae kwaemasta. Mana neke eni koje igne ke leghugna teke kuru teidi mae king Sol nogna mae glokure neke tei ka sugagna mae Devet mala faleheni mana.

¹Nogu God, togho ghau iara, mala theome mei goigoni ghau iara nogu naoka iara gre.

Bara fothi ghau kate mei te magri ghau iara mare na.

²Mae igre mae diꞌa nei mae mala falehe naikno eghu.

Hata fajifla ghau ka khamedi mae igre eigna mare magnahaghei te falehe ghau iara.

^3-4Filo sagho. Mare poru mala falehe ghau iara.

Mae te diꞌa igre mare khapru poru au mala magri ghau iara.

LORD, iara gne neke theome eni kaisei najafra nei neke theome huhughuni eghu nou vetula iagho na,

ba iara neke theome eni kaisei nakhibo. Nu mare ghosei ne tei poru mala magra ka iara.

⁵LORD God, iagho mae ihei te au nolaghi biꞌo ia faghosei mei mala togho ghau iara.

Iagho nodi God mae Israel ra, filodi mae igre.

Faghosei mei mala fathasudi mae bongihehe igre,

thosei kokhonidi naikno te diꞌa te fakokhoanadi kheragu iara gre.

⁶Leuleghu bongi na mare ke pulo mei ka iara ke eha faligohoni namono biꞌo na jateula khuma eghu.

⁷Fanomho sagho nodi chekere thono diꞌa fara pari lahu.

Nodi chekere fnonu fara jateula naflahi te ravedi naikno ra eghu.

Nu mare ne cheke eghu, “Ihei gne nate nomhi ghami ghehati na?”

Theo ihei nga nate nomhidi mare na.

⁸Nu LORD, iagho maꞌe noudi kolho mae bongihehe tuare.

⁹God, leuleghu fata na iara rouronu kolho ka nou nolaghi iagho na. Ka iagho kolho te mala ari te poru iara na.

¹⁰Nogu God, iagho namha ghau iara fara, eghuteuna iagho ginauna na mei mala togho ghau iara.

God iagho ginauna snakre ghau iara mala filodi nogu naokare te ari te theo nafudi kolho are.

¹¹God, tapla sorudi sagho, nu thosei falehedi eghu, na eghunu ghatho ihoni naiknodi Israel gre glepo igre eghu.

Mare mala ghatho fakelini u puhi teke paradi iagho nou naokare.

Iagho nomi mae funei ghehati ia, bara fothi ghami mala thosei khale ghami puhi biꞌo.

Brue teidi sagho mae naokare ka nou nolaghi na mala rikha tei mare.

¹²Nakhibo na au fabrahu ka foflodire eigna nodi chekere thono diꞌa fara.

Te keli na nodi puhi fahaehaghe thedi tuare mala ke fakokhoanadi kolho thedi.

Eigna mare tibri ghami ghehati na nei chaichaghi koba eghu.

¹³Eghume te keli na iagho diꞌatamudi nei falehedi eghu.

Fahui aridi sagho naikno te diꞌa tuare.

Te eghu iagho na, naiknore ginauna laseni te iagho ngala God na,

mae ihei te funei fruni ni Israel,

nei nou nolaghi iagho na tei posa ka namono te gnafa ka nauthoglu igne.

¹⁴Leuleghu bongi na mare ke pulo mei ka iara ke eha faligohoni namono biꞌo na jateula khuma eghu.

¹⁵Mare jateula khuma eghu leuleghu suga tafri hirogna gano na,

eghuteuna kate ari te theome naba gano te mala ghamu na mare thono diꞌatadi fara.

¹⁶Nu iara ginauna na koje mala cheke thakleni nou nolaghi iagho na.

Leuleghu hamerane na iara ginauna koje fabiꞌo mala cheke thakleni iagho te namha ghau iara na.

Naugna iagho jateula nogu vido te keli eghu mala poru iara ka vido te au ka hoholo na.

¹⁷God, kaisei iagho ngala nogu nanheta iara na.

Eghume iara magnahaghei te koje, mala pala hagheni nanghamu iagho na.

God, iagho namha ghau iara, eghuteuna iagho nogu thoa maku iara.

Sam 60

Nogna tharai ihei te nigra ka magra

Nogna khoje mae Devet malagna mae kwaemasta. Mana neke eni koje igne mala farirhiudi naiknore. Mana neke eni koje igne kani teke magra mana ka vikegna mae Aram teke jifla mei ka namono Naharaimi nei Soba. Ka narane tuare mae Joab balu nogna ami na mare neke figri ka namono aheva mare te kiloi “Glogu te mala atha tahi.” Ka vido tuana mare neke falelehedi nabotho phei thogha maedi Idom.

¹God, iagho ne tirou au balumi ghehati ne nigra ghehati ka magra.

Tifa na iagho neke diꞌatamu ka ghehati, nu ke figri mei sagho gognaro mala ke togho ghami ghehati.

²Iagho neke fakheudi glose au teu ghehati gre, gognaro na la bagra la khora biꞌo.

Glose gne la diꞌa, ke fakekheli fapulo sagho.

³Iagho thofno para ghami ghehati nou naikno gre fara.

Ghehati tei tafri jateula naikno te koꞌu te noinoli ra eghu tafri.

⁴Iagho tusu meihi ka ghehati naikno te ghatho tahu nigho gre u fagaglana te

mala rikha te mala theome thafo ghami u puhi biꞌo na.

⁵Iara tore nigho mala fakarhi ghami ka nou nolaghi.

Cheke tughudi nomi tharai ghehati naikno te namhadi fara iagho gre mala au fakeli ghehati.

⁶God na au neu ka Sugablahi na ne cheke eghu,

“Iara la ulunihila u magra na, eghume iara ginauna tufa namono Sekem

igne nei sare biꞌo Sakot gne eghu ka nogu naiknore.

⁷Namono Gilead gne nogu iara, eghuteuna namono Manase gne jaola nogu iara.

Efrem gne namono mala audi nogu mae soldia iara re,

eghuteuna nogu mae king iara re ginauna mei ka nohi Juda.

⁸Nu phei kantri Moab nei Idom gre mala nogu sneka iara.

Iara ginauna na uludi hatimare mae Filistia ka magra,

eghuteuna iara ginauna na glealeꞌa balu thagru.”

⁹God, ihei gne te nabagna te mala hata mei ghami ghehati ka namono biꞌo te au bara te maku igne?

Ihei gne te nabagna te mala hata mei ghami ghehati ka namono Idom?

¹⁰God, iagho la figri tagru ghami ghehati tutuani hila sia?

Ba, iagho la tirou tei magra hila balumi ghehati sia?

¹¹Mei sagho mala togho ghami ghehati mala kegra fothidi nomi naoka gre.

Naugna nogna thotogho naikno na theo nafugna kolho.

¹²God, jame au teu iagho balumi ghehati na, ghehati gne ginauna na theome nigra ka magra na.

Eigna iagho ginauna tapla sorudi nomi naoka ghehatire.

Sam 61

Nogna tharai mae ihei te jifla kokoni nogna kantri na

Nogna khoje mae Devet malagna mae kwaemasta. Khoje igne koje balu nifu.

¹God, fanomho ka nogu natanhi gre,

fanomho ka nogu tharai gre.

²Iara gne au khaba ka nogu namono na, nei diꞌanagnafagu fara eghu.

Eghume iara gne na eha ari ka iagho.

Hata ghau tei ka kaisei vido te keli mala poru.

³Naugna kaisei iagho ngala te tangomana nate reireghi fakeli ghau iara na te

mala bara ghau ka nogu naokare.

⁴Iara magnahaghei te au fabrahu ka sugamu iagho na ghilei lehe.

Eghuteuna iara magnahaghei te au fakeli nogu ke parimu iagho jateula khokorako te toku tafru thugnare ke parigna bagignara eghu.

⁵God, iagho la nomhidihi unha teke nhaꞌa chekedi iara ka iagho ra.

Eghuteuna iagho la fameihi ka iara unha te maladi iheire te ghatho tahu nigho re.

⁶Snakreni nakarha te brahu na ka nomi king ghehati gne.

Snakreni mana mala au fabrahu tifa tifa.

⁷God, iagho tangomana te snakreni mana te mala funei fruni fabrahu ke ulumu iagho.

Lord, tore nigho mala bara fothini mana!

Naugna te laseni iara na iagho namhani mana nei tajini fabrahu eghu nou nhaꞌa cheke na.

⁸Leuleghu narane na, iara ginauna tusu ari ka iagho unha teke nhaꞌa cheke ne iara mala tusu ari ka iagho teku ia,

eghuteuna iara ginauna na koje mala kilo fnakno nigho.

Sam 62

Kaisei God ngala te tangomana te reireghi ghita na

Nogna khoje mae Devet malagna mae kwaemasta mae Jedutun.

¹Leuleghu fata na iara fatutuani ka kaisei God ngala.

Eigna kaisei mana ngala te tangomana nate ke hata fapulo ghau iara te mala karha iara na.

²Kaisei mana ngala te mala doadofra ghau nei togho ghau teu iara na. Kaisei mana ngala te mala bara fothi ghau iara na.

Eghume iara gne theome tangomana te mhaghuni ihei te mei magra ghau nei tapla soru ghau teu.

³Iara theome nheta, iara jateula suga te diꞌa tela namo grofohia eghu kolho.

Ba, ghotilo te gnafa na, niha nau ame gnafa nga te magri ghau iara na eghu?

⁴Ghotilo jame magnahagheni kolho te tapla soru ghau iara te mala diꞌa iara nanghagu na.

Tutuani fara, ghotilo magnahaghei fara te cheke chaichaghi na eigu iara ka keha naiknore,

nu kate au balugu iara na nomi cheke ghotilo re e thofno keli fara.

Ghotilo chekedi cheke te keli fara ka naiknore.

Nu ka gaoghathomi ghotilore cheke eghu meu agne eghu,

“Tahati magnahagheni kaisei fogra biꞌo te thokeni mana.”

⁵Leuleghu fata na iara fatutuani ni kaisei God ngala.

Eghuteuna ofoni kaisei mana ngala te mala togho ghau na.

⁶Kaisei mana ngala te mala doadofra ghau nei togho ghau teu iara na.

Eghuteuna kaisei mana ngala mae ihei te mala bara fothi ghau iara na.

Eghume iara gne theome tangomana te nigra ka magra na eghu.

⁷Kaisei God ngala te tangomana teke hata fapulo ghau nei tusu mei nafnakno teu ka iara na.

Mana ngala mae nheta te mala doadofra ghau iara na, mala theome tangomana mae naokare te mei magri ghau iara na.

⁸Kheraguro, God na noda vido keli mala poru tahati.

Eghume te keli na ghotilo fatutuani ni fabrahu mana,

ghotilo cheke fajifladi puhi te biꞌo te au teu ka nagnafamire.

⁹Naikno gre jateula nuinuri te jifla mei ka foflogna naikno na nu tei la dofini la teu ia eghu kolho.

Naikno te fnakno nei fiti naikno kolho teugre kaisei nanaba ngala, kafe theo nafudi kolho ka tathagna God.

Jame fagefe haghedi ghotilo ka skel meuna,

mare na jateula nuri eghu theome tahu kolho.

¹⁰Thosei cheke eghu ka gaoghathomire, “Puhi te magra nei puhi te blau teugre ngala puhi keli fara,

eigna tahati na dedei noda fara.”

Eigna neubane dedei ghotilo ba ne fnakno ghotilo,

u dedei nei nafnakno teu tuare ginauna theome fakarhi ghami ghotilo,

eghume ghotilo thosei rouronu ka glepo igre eghu.

^11-12Kmana fata iara nomhi ni God na cheke eghu,

“Iara God, iara au nogu nolaghi biꞌo. Eghuteuna iara namhadi fara nogu naiknore.”

Lord, iagho ngala te tangomana te taba ghami ghehati te gnafa na,

eidi gloku teke edi ghehati na.

Sam 63

Nogna tharai mae ihei te magnahagheni fara God te au balugna

Nogna khoje mae Devet. Mana neke eni koje igne kani teke au mana ka namono nagou Juda.

¹God, iagho nogu God iara.

Iara magnahaghei nigho iagho fara te mala au fabrahu ka nakarhagu gne.

Kate theomu iagho na,

iara haimini ka nakarhagu na jateula glose te moja te theo khoꞌura eghu,

eghume iara magnahaghei nigho iagho fara te mala au balugu iara.

²Iara magnahaghei te ari te filo nigho ka sugamu na,

mala laseni iara nou nolaghi biꞌo nei nafnakno teu iagho na.

³Nou namha iagho na thofno biꞌo fara salaꞌuni nauthoglu igne,

tutuani fara, biꞌo salaꞌudi thua nafnata fateo te au ka nakarhagu iara gne.

Naugna igne iara magnahaghei te cheke fakeli nigho.

⁴Iara ginauna na tegio nigho nei pala hagheni eghu nanghamu iagho na ghilei lehe.

Iara ginauna na ngafa haghe phei khamegu gre mala tarai ari ka iagho.

⁵Lord, iara thofno glealeꞌa fara ka iagho,

jateula mae te ghamu gano te keli te bohora eghu.

Iara thofno keli tagu fara na pala hagheni nanghamu iagho na.

⁶Kate thuru na, iara ghatho nigho iagho kolho,

funu grafi te posa hamerane na.

⁷Naugna iagho ne togho ghau iara koba.

Iara gne au fakeli nogu ke parimu iagho jateula khokorako te toku tafru thugnare ke paradi phei bagi gnara eghu na.

Eghume iara koje balu gleꞌa.

⁸Gaoghathogure iara loku famaku ka iagho,

eigna khame nhetamu iagho na loku famaku ghau iara.

⁹Naiknore magnahaghei te falehe ghau iara,

nu mare ginauna tei ka namonodi naikno tela lehehira eghu.

¹⁰Mare ginauna lehe ka magra,

eghuteuna khuma mhata ginauna ghamu thinidire.

¹¹Nu iara mae King. Iara ginauna keli tagu fara eigna iagho ginauna togho ghau iara mala theome tangomana nogu naoka iara re te ulu ghau iara na.

Iheire teke nhaꞌa cheke ka nanghamu iagho re ginauna cheke fakeli nigho iagho, nu iheire te chaichaghire iagho ginau fofotho foflodire.

Sam 64

Mana tarai ka God mala reireghi fakelini

Nogna khoje mae Devet malagna mae kwaemasta.

¹God, iara gne au ka puhi biꞌo, fanomho mei ka nogu tharai iara gre.

Iara mhaghu nogudi fara mae naoka gre.

Togho mei ghau iara mala thosei mei falehe ghau iara mare.

²Mare hiro phoge te mala fadiꞌa ghau iara na, mare fakhaprui te mala magri ghau iara.

Eghume iara tore nigho iagho mala reireghi fakeli ghau iara eghu mala theome tangomana mare te goigoni iara na.

³Nodi chekere fnonu fara jateula naflahi eghu jaꞌi mei ghau iara.

Mare tarabana mala ja’i ghau iara ka nodi cheke te thono diꞌa fara re.

⁴Iara gne kaisei mae doglo fara, iara theome ghathoni kaisei cheke te diꞌa nate eni mare ka iara na.

Naugna unha si mare te cheke fadiꞌa ghau iara kate theome tarabana teu iara gnea?

⁵Mare famamhaku ka gaoghathodire puhi te diꞌa na.

Mare ne ghatho fakelini aheva nate liliseigna phighoro na ne cheke eghu,

“Theome tangomana kaisei naikno nate filodire unha te lilisei tahati igre.”

⁶Mare neke fagroghei ne ke edi keha puhi te diꞌa, ne cheke eghu,

“U gaoghatho te eni tahati igne thofno keli fara. Ginauna na theo kaisei naikno nate laseni na puhi igne!”

Tutuani fara, tahati theome tangomana te laseni unha te poru teu ka gaoghathogna nei thiꞌagna teu naikno na.

⁷Nu God ginauna na tirogna toghodi mare nogna,

eghuteuna mare na megei nga ghoreho nodi kolho ka hatimare mae naokare.

⁸God ginauna paradi mare eidi nodi cheke mare te diꞌa tuare.

Iheire te filodi mae igre na mare ginauna maꞌedi mare.

⁹Naikno te gnafare ginauna mhaghu nodi fara ka God.

Eghuteuna mare ginauna na ghathoni unha te eni God igne na toutonu eidi nogna gloku mana re.

¹⁰Naikno te doglo re ginauna keli tadi fara ka unha te edi LORD re,

eghuteuna mare ginauna tei vido te keli ka mana mala poru na.

Eghuteuna naikno te keli igre ginauna cheke fakelini mana.

Sam 65

Khoje mala cheke fakelini nei tegio ni eghu God

Nogna khoje mae Devet malagna mae kwaemasta.

¹God, ghehati na haghe ka Thogele Saion mala pala hagheni nanghamu iagho na.

Eghuteuna ghehati na edi unha teke mala edi teku teke nhaꞌa chekedi ghehati tifa ra.

²Naugna te nomhidi iagho nomi tharai ghehati gre,

naikno te gnafa ka namono te gnafa gre ginauna na ari mala fafara ka iagho.

³Ghehati ghathodi nakhibomire ne eni igne.

U najafra te edi ghehati igre thofno fapari ghami ghehati fara,

nu te laseni ghehati na iagho tangomana te hata fadeleidi nakhibomi ghehatire.

⁴Iheire teke vahidi iagho te ari au ka sugamu na igre thofno keli fara.

Mare keli tadi fara kate filodi glepo te keli te au teu ka sugamu iagho na igre,

eghume ghehati kelitami fara te ari jare na naugna ghehati magnahaghei te pogho soru nigho nei cheke fakelini eghu nanghamu iagho na.

⁵Kate tore ari nigho ghehati na, iagho cheke tughu ghami ghehati,

ne tangomana ghehati te uluni u magra na.

Iagho edi glepo biꞌo te mala fakarhi ghami ghehati na.

Naikno te gnafa ka nauthoglu igne fatutuani nigho iagho.

⁶Ka nou nolaghi, iagho neke fakegra haghedi thogele biꞌo gre ka mala au dire.

Ka puhi igne iagho ne thofno falalase nigho themu te au nolaghi biꞌo na.

⁷Iagho ngala te tangomana te fabeatadi u nhorora te maraghata gre.

Eghuteuna iagho famuanadi galo biꞌo te oa’ongha gre.

Eghuteuna iagho tangomana te famuanadi iheire te fari fapholai.

⁸Naikno te gnafa heva te heva ka nauthoglu igne mhaghu nodi fara kate filodi glepo te biꞌo te edi iagho igre ne ghatho tahu nigho iagho.

Naiknogna nauthoglu igne ne kelitadi fara ka gloku te edi iagho igre ne thagru fabiꞌo funu ka keha philegna nauthoglu na ne tei posa ka keha phile na.

⁹Iagho falalase ka naiknore te reireghini teu iagho nauthoglu igne,

naugna iagho ne snakre meini ne u nakhete na mala fabuabublani glose na mala gri haghe kmana gano.

God, iagho neke edi khoꞌu gre mala fodu fabrahu,

eghuteuna eni glose gne mala karha te vuragha gano na maladi naiknore.

Igne puhimu iagho.

¹⁰Iagho snakre mei kmana nakhete ke klignadi nagare, teke joꞌuni naiknore mala bothu glose na.

Uve, iagho neke eni glose na neke fapila mala karha kmana gano eghu.

¹¹Iagho thofno lolokeli ranghi ghami ghehati ne fabruara kmana gano.

Ka vido aheva te tei iagho na iagho tusu mei kmana gano ka naiknore.

¹²Namhata re fodu ka buburu, aheva te mala ghamudi buluka nei sipu teure,

eghuteuna gobigna lepo te au ka thogelere ne thofno kelitadi fara.

¹³Uve, thogele gre fodu ka sipu nei nagare te au ka sare te gnafa ne kafe fodu ka gano.

Eghuteuna gobigna lepo te au ka vido te gnafare kafe koje, naugna ne kelitadi fara.

Sam 66

Nodi khoje iheire te tegioni God

Kaisei khoje malagna mae kwaemasta.

¹Tahati cheke fakelini God!

Tahati glealeꞌa, tahati koje ranghini mana!

²Tahati koje mala pala hagheni nanghagna mana na!

Tahati cheke fakelini mana. Tahati pala hagheni mana!

³Tahati cheke eghu ka God, “Gobigna lepo te edi iagho re thofno keli fara,

nou nolaghi iagho na biꞌo e salaꞌui,

nou naoka iagho re ne mhaghu nodi ne tufru soru, ne ghatho tahu nigho.

⁴Naikno te gnafa ka nauthoglu igne mare tufru soru nigho.

Mare koje ne pala hagheni nanghamu na.”

⁵Tore, mei si ghotilo, mala filodi glepo te biꞌo te edi God igre.

Uve, mei si ghotilo mala filodi gloku te biꞌo fara te edi mana farihoteidi naiknore igre.

⁶Tifa na mana neke fofota pea thongna biꞌo na neke khapra neke nonolo ka ghahe kolho neke kasa ka keha philegna khoꞌu na mae ku’eda tahatira.

Ka narane tuare mae ku’eda tahatire neke thofno glealeꞌa fara ka unha teke edi mana igre.

Eghume tahati glealeꞌa nei cheke fakelini eghu God.

⁷Mana au nolaghi biꞌo te mala funei fruni fabrahu te tifa te tifa.

Eghuteuna mana ginauna filo tutudi fabrahu naiknodi keha kantri are.

Glahula me kegra haghe nogna naoka manare me mei magra ka mana.

⁸Ghotilo naikno ka namono te gnafa ra mala cheke fakelini nanghagna nomi God ghehati gne!

Tutuani, naiknore mala nomhini kate cheke fakelini mana ghehati balu eha fabiꞌo na.

⁹Mana reireghi fakelidi nakarhada tahati re,

eghuteuna mana theome snakredi noda naokare mala tapla soru ghita.

¹⁰God, iagho neke fariuriudihi nakarhami ghehati gre mala gae

jateula mae te gahu silva te mala khoko thonagna na ia eghu.

¹¹Iagho neke snakre ghami ghehati neke khale ka phighoro,

nei lisa mei puhi biꞌo ke klignami.

¹²Iagho neke snakredi mae naokare neke tapla soru ghami.

Eghuteuna ghehati neke ruma haghe ke lamnadi vido te ninhigrana nei puhi biꞌo eghu te jateula khaꞌaghi biꞌo teu ba jateula u nabritha biꞌo.

Nu gognaro na iagho kela hata fapulo ghami ka vido te keli.

¹³Iara ginauna gahu nogu fafara na ka sugamu iagho na.

Uve, iara ginauna tusu ari glepo teke kulu nhaꞌa chekedihi iara ka iagho ra.

¹⁴Iara ginauna tusu ari ka iagho glepo teke chekedihi iara kani teke au iara puhi biꞌo ia.

¹⁵Iara ginauna gahu sua sipu te blokha gre ke kligna nou olta.

Iara ginauna gahu sipu gre mala haghe khujogna na ka iagho.

Uve, iara na jaola fafara buluka nei nanigot teu gre ka iagho.

¹⁶Ghotilo naikno te ghatho tahuni God ra mei mala fanomho ka nogu cheke iara gne.

Iara na toutonudi ka ghotilo unha glepo teke edi mana ka iara re.

¹⁷Iara neke toreni mana mala togho ghau,

nei cheke fakelini nei pala hagheni eghu nanghagna mana na ka khoje.

¹⁸Nu jame te ghatho ihodi iara nakhibogure jateula te theo kolho nafudi teuna,

God ginauna na theome fanomho ka nogu tharai iara re.

¹⁹Nu iara neke cheke thakledi ka God nakhibogure eghuteuna mana na la nomhidihi nogu tharai iara re eghu.

²⁰Iara pala hagheni nanghagna God.

Naugna mana ne theome figri tagruni nogu tharai iara na,

ba mana theome hata fapulo nogna namha biꞌo na ranghi ghau iara.

Sam 67

Khoje mala cheke fakelini God

Khoje mala koje balu nifu.

¹God, kokhoni ghami, nei fablahi ghami,

filo mei ghami nei togho ghami.

²Te eghu na naikno te gnafa ka nauthoglu igne ginauna laseni puhimu iagho na,

eghuteuna naiknodi keha kantri gre ginauna laseni te fakarhidi iagho naiknore.

³God, te keli na naiknore jame cheke fakeli nigho iagho, nei pala hagheni teu nanghamu iagho na!

Uve, te keli na naikno te gnafa gre jame cheke fakeli nigho.

⁴Naiknore na koje balu glealeꞌa, naugna iagho ginauna fatedi naiknore ka puhi te doglo,

eghuteuna iagho na batudi naikno te gnafa ka nauthoglu igne.

⁵God, iara magnahaghedi naiknore te cheke fakeli nigho,

nei pala hagheni eghu nanghamu iagho na!

⁶Nauthoglu tahati igne fodu nei vuragha eghu ka gano.

Naugna noda God te pogho soruni tahati igne mana ne fablahi ghita.

⁷God te fablahi ghita.

Naikno te au heva te heva ka nauthoglu igne mala ghatho tahuni mana.

Sam 68

Hatimare mae Israel ne kelitadi eigna God ne toghodi mare

Nogna khoje mae Devet malagna mae kwaemasta.

¹God, faghosei mei mala gigi teidi naikno te tirodi nigho gre mala rikha tei mare delei.

²Gigi teidi sagho naikno te diꞌa gre delei mala jateula khoveo te flalo te tei ka nuri ra eghu mare.

³Nu ghotilo naikno te keli ra keli tami nei glealeꞌa eghu ke ulugna God,

ghotilo glealeꞌa balu eha fabiꞌo.

⁴Tahati koje ranghini God, tahati koje kilo fnaknoni nanghagna mae ihei te gnokro teu ke kligna grokho.

Nanghagna na LORD. Tahati glealeꞌa ke ulugna mana.

⁵God mae ihei te au teu ka nogna suga te blahi na,

mana reireghidi goro sua te glehe kokoi, ba goro gaꞌase te lehe khetodire.

⁶Mana na fofodu ka iheire te theo kheradi nei tusu ranghidi suga te mala au fakeli na.

Eghuteuna mana na atha fajifladi iheire te au ka suga sosolo mala ke pulo au fakeli mare ka namono.

Nu iheire te patugama fara te tirodi leghuni God re, mana ginauna lisei sorudi ka vido te thono diꞌa fara na.

⁷God, kani teke batudi teke mei iagho naiknore funudi Ijep tifa ia,

iagho neke hata fakasadi ka namono nagou na.

⁸Ka narane tuana glose na neke nghali eghuteuna nakhete biꞌo na neke soru mei,

naugna nodi God mae Israel neke soru mei ka Thogele Sanai.

⁹God, iagho neke snakre meini nakhete biꞌo na mala soru ka nou glose teke diꞌa na mala ke keli fapulo.

¹⁰Nou naikno iagho re neke hohoro nodi namono jare ka glose tuana,

eigna puhimu iagho na ne thofno keli fara ne faghedi gano fabrahu naikno te kuma re.

¹¹Noda Lord neke cheke ranghidi naiknore,

eghuteuna kmana gaꞌase ne jifla ne tei toutonuni chekegna mana igne.

¹²Mana cheke eghu, “Hatimare mae king nei hatimare mae armi teure la rikhahi.”

Eghuteuna goro gaꞌase teke au teku ka namono na ne tufa glepo teke hata hatimare ka magra ra.

¹³Neuba iheire teke au teku ka namono re,

mare neke jaola neke hata famane glepo te keli teke uludi mare ka magra na.

¹⁴Ka narane igne God mae ihei te au nolaghi te biꞌo na neke tapla sorudi hatimare mae king,

aonu nhubradi hatimare armi ne chara ka thogele biꞌo Salmon neku.

¹⁵Besan, iagho kaisei thogele biꞌo fara,

iagho au kmana gukhu fara tamu.

¹⁶Naugna unha si ghotilo naikno te tarai ka thogele Besan gre te filo faparidi naikno te tarai teu ka thogele aheva teke vahinihi God mala au nogna tagna teku gnea?

LORD ginauna au fabrahu ka thogele tuana tifa tifa.

¹⁷Noda LORD na neke jifla mei ka Thogele Sanai neke mei au ka nogna suga te blahi na.

Mana neke mei balu nogna soldia nei kmana thogha chariot mala magra.

¹⁸Kate haghe mana ka Thogele Saion na,

mana hata ne haghe balugna kmana naikno teke hata mana ka magra re mala tei au jare ka sosolo.

Eghuteuna iheire teke huhughuni mana tifa ra ne jaola neke tusu ranghini mana keha namha.

LORD God ginauna au ka thogele igne tifa tifa.

¹⁹Tahati pala hagheni nanghagna noda Lord mae ihei te togho ghita leuleghu narane ka puhi biꞌo thoke ghita.

God kaisei igne ngala te fakarhi ghita na.

²⁰Noda God tahati igne ngala te tangomana te mala fakarhidi naiknore.

Noda LORD God tahati igne ngala te tangomana te mala fakarhi ghita kau lehe ka magra na.

²¹Tutuani fara, God ginauna poposa phaꞌudi nogna naokare,

eghuteuna rurhuja phaꞌudire naugna mare ne leghudi te fabrahu puhi te diꞌare.

²²Noda Lord na neke cheke eghu hi,

“Iara ginauna nake hata fapulo nogu naoka te au ka namono te gnafa ka nauthoglu igne.

²³Ghotilo ginauna na tapla ghahemire ka dadara ke kligna eghuteuna nomi khumare ginauna koꞌu dadara ghilei boho.”

²⁴God, iagho nogu king iara, naiknore filo nigho te ulunihi iagho magra igne.

Eghuteuna naiknore filo nigho iagho te tei ruma iagho ka nou suga te blahi na.

²⁵Mae te koje re tei ke leghumu iagho, eghuteuna ke leghudi mare na hatimare mae nifu.

Aonu goro gaꞌase ne koje falithuidi mare ne ruma ka Sugablahi na re.

²⁶Mare ne koje eghu, “Tahati nogna naikno God ra kafe mei mala koje kilo fnaknoni mana.

Tahati vikegna Jekop ra pala hagheni nanghagna LORD.”

²⁷Ke leghudi hatimare mae nifu, vikegna mae Benjamin te theome biꞌo na ne tapla ulu,

ke leghugna igne hatimare mae lida ka vikegna mae Juda balugna nodi mavitu na, eghuteuna leghu lahu na, hatimare mae lida ka vikegna mae Sebulun nei hatimare mae lida ka vikegna mae Naftali.

²⁸God, falalase mei ka ghehati nou nolaghi na,

jateula teke eni iagho ka ghehati tifa ia eghu.

²⁹Nolaghi igne jifla mei ka iagho ka sugamu Jerusalem,

ka vido aheva hatimare mae king te hata mei namha ka iagho.

³⁰Kantri Ijep jateula kaisei nasava te poru teu fari hotei buburu ka khoꞌu ra eghu.

Diꞌa tamu sagho ka hatimare mae biꞌo nei naiknodi teu Ijep ghilei mei tufru soru nigho mare nei mei tusu ranghi nigho nodi sileni re eghu ka iagho mala rikha sopagna thei mae te rodi magra re.

³¹Hatimare mae biꞌo ka gavman gna Ijep ginauna ari mala fanomho ka iagho.

Hatimare maedi Sudan ginauna ngafa haghe khamedire mala tarai ka iagho.

³²Ghotilo naikno te gnafa ka nauthoglu ra koje mala pala hagheni nanghagna noda God.

³³Ghotilo koje ranghini mae ihei te nolo tafri teu ka maloa kligna, maloa igne neke au vuha tifa.

Fanomho si ghotilo, mana eha fabiꞌo jateula fila eghu.

³⁴Ghotilo toutonuni nogna nolaghi God. Mana mae king gna Israel.

Tahati tangomana te filoni nogna nolaghi mana na ka maloa kligna na.

³⁵Kate jifla mei God ka sugagna te blahi na, naiknore mhaghuni mana, mare ghatho tahuni mana.

Mana noda God tahati maeda Israel. Mana tusu mei nolaghi biꞌo ka tahati mala nheta tahati.

Tahati cheke fakelini God!

Sam 69

Mana toreni God mala toghoni

Nogna khoje mae Devet malagna mae kwaemasta.

¹God, ghose mei togho ghau iara! Iara gne la thoke ghau puhi biꞌo!

Jateula khoꞌu te haghe posa ka graragu iara na ia eghu.

²Iara gne knoho ka naoro te fodu ka chopu,

eghuteuna theo kaisei vido te khapra te mala tapla iara na.

Uve, iara au ke lamna khoꞌu te nabritha biꞌo,

iara gne thafru la namo knohohi.

³God, iara tore nigho koba mala togho ghau iara, la ghilei babaꞌo nogu fara, la ghilei khaprani thotomnogu gne.

Iara filo ari ka iagho te mala togho ghau na, la ghilei kabru tathagure.

⁴Naikno te tirodi ghau iara gre la thono kmana fara, mare kmana fara uludi khakla ka phaꞌugu iara na.

Nogu naoka iara gre mare toutonu chaghi eigu iara.

Mare thono nheta fara nei magnahaghei falehe ghau iara.

Mare huhuru ghau iara mala ke tusu fapulo glepo teke theome blau iara re.

⁵God, iagho la kulu lase ghauhi iara, iara fagoigoli fara puhigu na.

Nakhibogu iara gre theome poru ka tathamu iagho na.

⁶LORD God, te thofno nolaghi, thosei snakreni kaisei glepo

mala thoke ghau iara eigna glepo igne ginauna naikno teke fatutuani nigho iagho

nake theome fatutuani nigho iagho.

Iagho nomi God ghehati mae Israel.

Iara theome magnahaghei te eni kaisei glepo te mala famamajadi naikno te pogho soru nigho re.

⁷Mare cheke fadiꞌa ghau nei famamaja ghau eghu iara,

naugna iara ne pogho soru nigho iagho.

⁸Gognaro, mae thabusigu iara gre filo mei ka iara jateula te keha vikei eghu kolho.

Eghuteuna tharakna gu iara na filo mei ka iara jateula maegu iara ka namono delei eghu.

⁹God, leuleghu fata na iara thono ghatho tahuni fara nou Sugablahi iagho gne,

eghuteuna leuleghu fata na gaoghatho igne loku fabrahu ke lamnagu iara jateula khaꞌaghi eghu.

Thua cheke te diꞌa te edi mare ranghi nigho iagho igre, fadiꞌa ghau iara.

¹⁰Kate tarai iara te funu theome ghamu na,

naiknore maꞌe ghau iara.

¹¹Kate pipichi iara pohe te thonare,

fagaglana eigna te diꞌanagnafa iara na,

mare maꞌe ghau iara.

¹²Leuleghu fata na mare salo fodu ka namono na mala buiburi ghau iara,

eghuteuna mae te koꞌu te dranga re jaola edi keha khoje te diꞌa eigu iara.

¹³Nu LORD God, iagho nogu God iara, gognaro na iara tore koba ka iagho.

Cheke tughu mei ranghi ghau ka vido te vahini iagho na.

Leuleghu fata na iagho namha ghau iara fara,

eghuteuna iagho tajini nou nhaꞌa cheke te mala fakarhi ghau iara,

eghume iagho cheke tughu mei ranghi ghau iara.

¹⁴Fakarhi ghau iara sagho, na eghu nu knoho iara ka naoro igne eghu.

Uve, fakarhi ghau iara sagho, na eghu nu lalama ghau nogu naoka gre eghu.

¹⁵Thosei snakreni khoꞌu te britha igne mala toku tafru ghau, thosei snakre ghau mala knoho ke lamna nhorora,

nei thosei snakre ghau mala giugilui ke lamna beku.

¹⁶LORD God, eigna iagho namha ghau iara fara, cheke tughu mei ranghi ghau.

Iagho kokhoni ni fara naikno na, eghume iagho filo mei ghau iara.

¹⁷Iara gne nou mae gloku iagho, eghume iagho thosei poru ka iara eghu.

Puhi biꞌo fara te thoke ghau iara gognaro gne, ghosei cheke tughu mei ka iara.

¹⁸Mei fakarhi ghau,

nei mei atha fajifla ghau eghu ka khamedi nogu naoka gre.

¹⁹Iagho lasenihi te cheke fapari ghau iara mae igre.

Uve, mare la cheke faparinihi nanghagu iara na, nei mare famamaja ghau iara gognaro na. Iagho lasedihi nogu naoka iara gre.

²⁰Nodi cheke mare te diꞌa fara igre, thofno goigonini fara gaoghathogu iara na.

Eghuteuna gaoghathogu iara na thofno glaꞌe soru gognaro na. Iara ofoni kolho ihei te kokhoni ghau na, nu theo kaisei.

²¹Kate rofo iara na, mare tusu mei poesen ka iara,

eghuteuna kate rogu koꞌu iara na, mare tusu mei waen te raha.

²²Ka vido te gnokro fodu teu nogu naoka iara gre ka gaghamu biꞌo na,

mei paradi sagho mala diꞌa theo tokadi mare.

²³Fadodofu tathadire mala theome fifilo mare.

Eghuteuna thinidire mala papara fara ka thua nafnata hoholo.

²⁴Diꞌatamu sagho nei paradi eghu mare, uve,

mala thokedi mare hoholo.

²⁵Falehedi gnafa sagho mala theo kaisei naikno te karha teu ka nogna suga tapuale na.

²⁶Eni sagho igne, naugna mare ne fakokhoanadi iheire teke paradihi iagho ra,

nei cheke fadiꞌadi iheire teke fagorehodihi iagho ra.

²⁷Fatedi sagho eidi nakhibo teke edi mare ra.

Thosei snakreni kaisei naikno mala karha ka mare.

²⁸Te keli na iagho ghiha koko nanghadi mae naokare ka buka te au nanghadi naikno te au ka karhare,

thosei kaha fodu baludi ka nou naikno iagho re.

²⁹God, iara gne au kokhoni ghau fara, eghuteuna gaoghathogu na la funu glaꞌe soru.

Farhetani gaoghathogu gne nei fakarhi ghau eghu.

³⁰Iara na cheke fakelini God ka khoje,

iara ginau na tegio ka mana nei fafnaknoni nanghagna mana na.

³¹Gloku te cheke fakelini iara nanghagna mana na igne thofno keli fara ranghini God ke tulao gnai te fafara lao buluka tahati ka mana na.

³²Naikno te theome fahaehaghere ginauna filoni igne na keli tadi fara.

God ginauna farerheta gaoghathodi iheire te pogho soruni mana re.

³³LORD na fanomho ka nodi thore iheire te kuma,

eghuteuna mana theome ghatho ihodi iheire te au ka suga sosolo.

³⁴Gobigna lepo te au ka maloa gne nei gobigna lepo te au ka nauthoglu igne eghu ghotilo cheke fakelini God.

Uve, gobigna lepo te au ke lamna nhorora ra, ghotilo jaola cheke fakelini mana.

³⁵God ginauna fakarhidi naikno te au ka namono Jerusalem, eghuteuna nake babana fapulo namono te au ka nohi Juda.

Nogna naikno mana re ginauna au jare, eghuteuna mare ginauna na khotogna glose tuana.

³⁶Naikno nate karha mei ka nogna naikno mana re ginauna na ke atha kasa glose igne,

eghuteuna iheire te namhani God igre mare ginauna nate au ka vido tuana.

Sam 70

Toreni nogna thotogho God

Nogna khoje mae Devet malagna mae kwaemasta. Khoje mala ghatho fapulo.

¹God, fakarhi ghau.

LORD God, ghosei mei togho ghau.

²Keha naikno magnahaghei te falehe ghau iara. Iagho tapla sorudi pari mala mamaja mare.

Kehare kelitadi kate au diꞌanagnafa iara na. Kuru fapulodi sagho mala mamaja nodi fara mare.

³Mae igre cheke fahaehaghedi fara thedi ka iara.

Fakmudi sagho mala rhana nodi mare ka puhidi thedire.

⁴Nu naikno te ari te pogho soru nigho re mare kelitadi nei gleale’a eghu fara ka iagho.

Naikno teke hata fapulo iagho igre,

nei ihei re te magnahagheni gloku teke eni iagho ranghidi igne teuna, mare e cheke eghu koba,

“LORD ngala mae ihei te ulu fara na.”

⁵God, ghose mei ka iara, naugna iara gne kuma,

iara gne theo kaisei nogu glepo gognaro na.

Eghume, LORD God, iagho ghose mei togho ghau iara,

naugna iagho ngala te tangomana te fakarhi ghau iara na.

Sam 71

Nogna tharai kaisei mae biꞌo

¹LORD God, iagho mei ka iara mala batu ghau iara.

Thosei snakredi mae naoka gre mala tapla soru ghau iara.

²Naugna puhimu iagho na thofno doglo fara,

togho ghau nei fakarhi ghau eghu.

Fanomho mei ka iara mala fakarhi ghau.

³Leuleghu fata na iara mei koba ka iagho mala poru,

eghuteuna filo ari kolho ka iagho te mala batu ghau na.

Iagho ngala vido te keli te mala poru iara na. Fakarhi ghau.

⁴Nogu God, fakarhi ghau ka naikno te diꞌa fara puhidi gre.

⁵LORD God, iara fatutuani fabrahu nou nhaꞌa cheke iagho na.

Uve, funu kani mae majaghanigu te mei na iara fatutuani nigho iagho fabrahu.

⁶Iara fatutuani nigho fabrahu ka nakarhagu na.

Funu ka narane teke karha meigu na ghilei mei posa gognarogne,

kaisei iagho ngala te reireghi ghau iara fabrahu na.

Eghume iara ginauna cheke fakeli nigho fabrahu.

⁷Leuleghu fata na nakarhagu iara gne ngala kaisei te mala filo leghuni naiknore,

naugna iagho ngala nogu vido keli te mala poru iara na.

⁸Leuleghu narane, funu hamerane ghilei posa fei grafi, iara cheke fakeli nigho.

Uve, iara ghatho tahuni fabrahu nanghamu iagho na.

⁹Neuba iara ne mae biꞌohi, iagho thosei thodo ghau iara.

Thosei tei koko ghau ka vido te glaꞌe iara gne.

¹⁰Nogu naoka iara gre ei puhi ranghi ghau iara.

Mare magnahaghei te falehe ghau iara.

¹¹Mare ne cheke eghu, “Tore, God na la tei kokonihi mana!

Ngolhi si tahati mala lolhoku!

Theo kaisei mae te mala fakarhini mana na.”

¹²God, thosei tei fagaꞌu ghau iara.

Nogu God, ghose mei togho ghau.

¹³Tapla sorudi nei fakokhoanadi eghu sagho mae te magri ghau iara igre.

Iara magnahaghedi mae igre te mamaja nei theome keli teu ka tathadi naiknore.

¹⁴Nu iara ginauna au nogu grouronu fabrahu ka iagho.

Iara ofo nigho te mala togho ghau na.

Iara ginauna cheke fakelini nanghamu iagho na.

¹⁵Iara ginauna cheke edi glepo te doglo teke edi iagho ra, funu hamerane ghilei posa fei grafi.

Iara ginauna cheke eigna nou nolaghi iagho te mala fakarhidi naiknore.

Neubane theome raꞌe lase fakelidi iara, iara ginauna cheke fajifladi ngala.

¹⁶LORD God, iagho nogu mae funei iara,

iara ginauna tei ka nou Sugablahi iagho na mala cheke fakeli nigho eigna nou nolaghi biꞌo iagho na.

Eghuteuna iara ginauna chekeni puhimu iagho te doglo fara na.

¹⁷God, funu ka narane teke mae majaghanigu iara na, iagho neke farirhiu ghau iara,

eghuteuna iara na chekedi fabrahu glepo biꞌo teke edi iagho ra.

¹⁸Gognaro na iara la mae biꞌohi la nufahi khaklagure,

God thosei tei koko ghau iara.

Au balugu kate chekeni iara nou nolaghi iagho na ka naikno nate karha mei ke leghugu iara re.

¹⁹God, puhimu iagho na thono doglo fara tei posa ka glepo te au kligna ka maloa gno.

Iagho neke edi gloku te biꞌo fara igre eghuteuna glepo igre salaꞌudi fara nomi glalase ghehatire.

Uve, God, theo kaisei naikno te jateula iagho teuna.

²⁰Iagho hata mei puhi biꞌo igre ka iara mala papara iara neku,

nu te laseni iara na,

iagho nake faheta fapulo ghau iara,

eghuteuna iagho theome tangomana te snakre lao ghau iara ka glehe na.

²¹Iara lase nigho iagho ginauna tusu mei nafnakno biꞌo ka iara uluni tifa ia.

Iagho ginauna nake cheke mei ka iara mala ke keli fapulo iara gaoghathogu na.

²²Nogu God, iara ginauna cheke fakeli nigho balu gita.

Uve, iara ginauna cheke fakeli nigho, naugna iagho ne tathaji fabrahu nou nhaꞌa cheke na.

Iagho nomi God ghehati naiknomi Israel, nei iagho thono blahi fara,

eghuteuna iara ginauna lalahu gita mala koje kilo fnakno nigho.

²³Iara ginauna koje fabiꞌo naugna iara ne glealeꞌa fara.

Uve, ka nakarhagu fateote’o na iara ginauna koje koba naugna iagho ne fakarhi ghau iara.

²⁴Leuleghu narane, te funu hamerane te ghilei posa fei grafi na,

iara ginauna toutonu eidi puhimu iagho te doglo fara are,

naugna mae iheire te magnahaghei goigoni ghau iara ra,

iagho la tapla faparidihi mare e mamaja nodi fara.

Sam 72

Tore ka God mala fablahini mae king

Nogna khoje mae Solomon.

¹God, ghehati tore nigho iagho mala tusu lao glalase ka nomi king gne mala fatedi mana naiknore ka puhi te doglo jateula iagho themu eghu.

Tusu lao glalase ka mana mala tangomana mana te fadogli thua nafnata puhi te edi naikno gre.

²Te keli na iagho funei fruni ghami ghehati ka puhi te doglo,

nei fadoglidi puhidi iheire te au ke paridi naikno te diꞌa puhidi gre eghu.

³Te toreni iara ka iagho na vido ka thogele na are ginauna karha kmana gano maladi nou naikno iagho gre naugna puhidi nou naikno iagho re thofno doglo fara.

⁴Te keli na jame mae king tangomana te fadoglidi puhidi iheire te kuma,

nei toghodi naikno te theo kaisei nodi glepo.

Eghuteuna tapla sorudi iheire te magnahaghei goigonidi keha naiknore.

⁵Te keli na jame mae king gne mala karha fabrahu,

jateula naprai nei glaba eghu te phae fabrahu are eghu.

⁶Te keli na jame mana mala thofno keli fara

jateula nakhete te soru ka nagare te kotu fakeli gano ra eghu.

⁷Te keli na jame gobigna lepo ka kantri igne mala doglo ka narane te king mana na.

Eghuteuna ghehati na au fabrahu ka nakarha te keli.

⁸Te keli na jame mana king ka kantri te gnafa gre, funu ke maghati tei posa ke mosu.

Uve, funu ka Khoꞌu biꞌo Iufretis tei posa ka namono te gnafa ka nauthoglu igne.

⁹Te keli na jame nogna naoka mana re mala mei tufru soru ka mana.

Eghuteuna jame te keli na mana mala tapla sorudi mare pari.

¹⁰Te keli na jame mae king gna Spen nei mae king di moumolu igre eghu ginauna mei tusu lao glepo mala namha ranghini mana.

Jame te keli na phei mae king di Arebia ghe Itiopia gre mala hata mei glepo mala namha ka mana.

¹¹Te keli fara na jame hatimare mae king te gnafa igre mei tufru soru ke ulugna mana.

Eghuteuna naikno te gnafa ka kantri fateote’o igre mala loku ranghini mana.

¹²Mae king igne mala fakarhidi iheire te theo kaisei nodi glepo, iheire kilo lao ka mana.

Mana ginauna toghodi iheire te kuma nei iheire te theo kaisei naikno te toghodi.

¹³Mana kokhonidi iheire te kuma nei iheire te theome nheta,

nei fakarhidi iheire te theo kaisei nodi glepo.

¹⁴Uve, mae king tangomana te magra fothidi iheire te paradi nei goigonidi teu naikno igre naugna te ghathoni mana na nakarhadi naikno igre thofno glepo ulu fara ka mana.

¹⁵God, tusu lao fabrahu nakarha te keli ka mae king.

Te keli na jame naiknodi Arebia gre ginauna atha mei gol ka mana.

Te keli na jame naiknore mala tarai fabrahu ka mana,

iagho fablahi mae king fabrahu.

¹⁶Te keli na jame kantri ghehati gne mala au kmana gano fara,

eghuteuna thogele igre ginauna fodu ka gano.

Te keli na jame glose ghehati igre au kmana gano jateula glose gna Lebanon eghu.

Eghuteuna te keli na jame namono biꞌo te au ghehati gre ginauna fodu ka naikno jateula kaisei sare te fodu ka buburu ra eghu.

¹⁷Te keli na jame mare theome ghatho ihoni nanghagna mae king na, uve,

nanghagna mana te fnakno na mala au fabrahu,

jateula naprai te au fabrahu ka maloa na ana eghu.

Eghuteuna naikno te gnafa ka nauthoglu igne ginauna tore nigho iagho mala fablahidi jateula iagho teke fablahini mae king ia eghu.

Naikno ginauna ghatho tahuni mana.

¹⁸Cheke fakelini LORD, noda God tahati naiknoda Israel.

Kaisei mana ngala te edi glepo te keli re.

¹⁹Cheke fakelini nanghagna te fnakno tifa tifa.

Nafnaknogna nogna nolaghi biꞌo God na mala tei posa ka namono te gnafa ka nauthoglu igne.

Amen! Amen!

²⁰Igne huigna nogna tharai mae king Devet, thugna mae Jesi.

Fatilo Buka

(Sam 73–89)

Sam 73

Puhigna God na thofno doglo fara

Nogna khoje mae Asaf.

¹Tutuani fara, God na keli fara ka tahati naiknoda Israel,

eigna gaoghathoda tahatire thofno gae fara.

^2-3Nu kate filodi iara nodi glepo te keli naikno te diꞌare,

nei fahaehaghedi fara teu mare na,

nogu gaoghatho nheta nei fatutuani teu iara re namo ari luvu theo tokadi kolho.

Naugna iara goghotu fara kate au nodi glepo te keli naikno te diꞌa puhidi igre.

⁴Naikno igre theome au papara nei fogradi eghu,

eghuteuna thinidire thofno fara ngala nheta.

⁵Mare theome au papara jateula keha naikno gre eghu,

nei mare theome au puhi tadi jateula keha naikno gre eghu kolho.

⁶Naugna igne, nodi fahaehaghe mare na jateula famane chen te babaꞌo mare ka graradi na are eghu,

eghuteuna puhi glalama te au ka mare na jateula pohe te pipichi mare are eghu.

⁷Leuleghu fata na, glepo te diꞌa na ngala te jifla mei ka gaoghathodire,

eghuteuna leuleghu fata na nagnafadire fodu kolho ka majora.

⁸Mare maꞌedi naikno te doglo puhidire,

eghuteuna mare chekedi ngala glepo te diꞌare.

Mare thono fahaehaghedi fara,

eghuteuna mare loku ka majora na malagna te goigonidi keha naiknore.

⁹Mare cheke fadiꞌani God mae ihei te au teu kligna na, eghuteuna mare fahaehaghedi fara e cheke eghu,

“Ghehati ngala te funei frunidi naikno te au ka nauthoglu igne!”

¹⁰Aonu nogna naikno God re jaola leghudi mare,

eghuteuna mare fatutuanidi glepo te chekedi mare re.

¹¹Naikno te diꞌare ne cheke eghu, “God na theome tangomana te lasedi glepo te edi ghehati gre.

God na au kligna fara, mana theo kaisei nabrou te mala mei te hirodi puhimi ghehatire.”

¹²Tuana puhidi mare na.

Mare au nodi kmana glepohi, nu leuleghu fata na mare hata nodi glepo kmana fara ngala.

^13-15Keha naiknore jame buiburi eghu ka iagho God,

“Theo kaisei nafugna kolho iara te mala bara fothini gaoghathogu na te mala gae te mala theome eni iara nakhibo na.

Leuleghu hamerane na iagho para ghau iara.

Eghuteuna iagho fakokhoana ghau iara fabrahu,

funu hamerane ghilei posa fei grafi.”

Nu jame te cheke eghu iara na,

eghume ghehati na theome leghuni kolho puhidi nou naikno iagho re eghu.

¹⁶Iara fariuriu gaoghatho tonganadi gaoghatho igre,

nu ninhigrana ranghi ghau fara eghu.

¹⁷Ghilei posa ka narane te tei te ruma iara te mala pogho soru nigho ka sugamu te blahi na.

Ka vido tuana ngala ne laseni nga iara unha nate thokedi naikno te diꞌa gre ginauna.

¹⁸Iagho ginauna lisa laodi mare ka vido te totoglo,

eꞌei puhi ranghidi sagho mala uka kokhonidi mare.

¹⁹Iagho ginauna ghosei goigonidi kolho naikno tuare,

eghuteuna glehedire naikno tuare ginauna thono diꞌa fara.

²⁰Lord, nakarhadire ginauna jateula kaisei mifi te dofra haghe fei hamerane te ghatho ihoni ra eghu kolho.

Kate mei iagho te togho ghau iara na, mare ginauna ari ghatho iho nodadi kolho.

²¹Kate ninhigrana ranghi ghau fei nakarha na,

iara thono diꞌatagu fara ka gobigna lepore kolho.

²²Tifa na, iara ne thono fagoigoli fara ne theome ghatho nigho.

²³Neubane eghu ngau, iagho theome tei koko ghau iara,

iagho batu ghau iara jateula mae te loku ka khamegna thugna na ia eghu.

²⁴Iagho farirhiu ghau iara fabrahu mala leghudi iara puhimu iagho re, eghuteuna ke leghu na,

iagho ginauna ghatho tahu ghau iara nei hata ghau iara mala au balumu.

²⁵God iagho te au teu kligna, kaisei iagho ngala te rouronu nigho iara na.

Eigna iagho ngala nogu God iara na,

iara theome magnahagheni kaisei glepo ka nauthoglu igne.

²⁶Gaoghathogu nei thinigu teu iara gre tangomana te glaꞌe na,

nu iagho God ngala te mala farheta ghau iara na,

iagho ngala te au fabrahu ka nakarhagu iara na.

²⁷Iheire te figri tagru nigho iagho re ginauna lehe dofidi.

Eghuteuna iheire teke leghu nigho iagho tifa ra, mare gognaro na kela tei koko nigho iaghohi. Iagho ginauna goigonidi mare.

²⁸Nu iara thofno keli tagu fara te au namo ka iagho God.

LORD God, iagho nogu vido keli mala poru iara,

eghume iara magnahagheni fara te toutonudi gobigna lepo teke edi iagho ra.

Sam 74

Tharai mala toreni nogna thotogho God na

Nogna khoje mae Asaf.

¹God, naugna unha sagho te figri tagru ghami ghehati gnea?

Ghehati gne jateula nou sipu eghu iagho kolho!

Ba? Iagho ginauna diꞌatamu fabrahu ka ghehati sia?

²Ghatho ghami ghehati sagho, eigna iagho neke vahi ghami ghehati funu tifa.

Funu tifa te mei na, ghehati neke sneka kolho, nu iagho neke fakarhi ghami ghehati mala vikemu themu.

Iagho jaola ghathoni Thogele blahi Saion aheva teke au iagho tifa ia.

³Filo sagho, hatimare mae naoka gre mare goigonidi fara gobigna lepo te au ka nou Sugablahi iagho na.

Te keli na iagho mei filodi glepo teke goigoni mare igre.

⁴Nou naoka iagho gre neke eha fabiꞌo ke lamna nou Sugablahi iagho,

naugna mare la ulu ghami hila ghehati ka magra na.

Mare gognaro na la rafe haghe hila nodi flagi na jare,

fagaglana eigna mare tela ulu ghamihila ghehati na.

⁵Mare atha ne mei nodi khilare.

⁶Mare paphaꞌe fadi famane thabagna nou Sugablahi iagho gne ka khila nei hama biꞌo eghu.

⁷Mare paꞌe soru nou Sugablahi iagho gne ne nako ka khaꞌaghi.

Mare goigoni fara vido te mala tufru soru nigho iagho ia mala theome blahi naꞌa.

⁸Mare magnahaghei fara te goigoni ghami ghehati.

Aonu mare ne nako ka khaꞌaghi vido te gnafa te mala tarai ghehati ka kantri igne.

⁹U fagaglana te mala filoni ghehati nou nolaghi iagho na la theohi.

Gognaro na theo kaisei mae profet te au na,

aonu theo kaisei mae ka ghehati niha nau nate ari te gnafa na puhi igne.

¹⁰God, niha fata eghu fabrahu maꞌe ghami ghehati si mae naoka grea?

Ba? Iagho snakredi mare mala cheke faparini koba nanghamu iagho na sia?

¹¹Iara tore nigho iagho mala goigonidi nou mae naoka gre!

¹²God, neubane eghu ngau, iagho funu tifa te mei na neke nomi king ngala ghehati,

kmana fata iagho neke fakarhi ghami ghehati.

¹³Ka nou nolaghi biꞌo iagho, nhorora na neke fnota pea,

eghuteuna iagho neke aknu poaposa phaꞌugna vuavula na.

¹⁴Uve, iagho neke aknu poaposa phaꞌudi mogo thongna te biꞌo fara igne neke lisa lao ka naikno gna namono nagou na neke ghamu mare.

¹⁵Glokha nei khoꞌu biꞌo eghu teke kafe khaprahi re iagho neke fafuafura haghedi,

eghuteuna khoꞌu biꞌo teke theome khapra funu tifare, iagho neke fakhapradi.

¹⁶Iagho neke vuavuha narane nei bongi teu gre,

eghuteuna iagho neke lilisei naprai nei glaba teu gre ka mala au ka maloa na.

¹⁷Iagho neke vuavuhadihi khukrudi thongna ghe moumolu gre ka nauthoglu igne,

eghuteuna iagho neke vuavuhadi vido te reka nei vido te brana teu gre.

¹⁸LORD God, ghathodi sagho mae naoka te maꞌe nigho gre.

Mare theome fatutuani nigho, nei cheke fapaiparini eghu nanghamu iagho na.

¹⁹Thosei snakredi mae naoka te diꞌa fara puhidire igre mala fakokhoana ghami ghehati nou naikno iagho gre.

Eigna ghehati gne thofno ulu tulao ka tathamu iagho na! Iagho thosei ghatho iho ghami ghehati eigna naikno te diꞌa igre fakokhoana ghami ghehati fara.

²⁰Thosei ghatho ihoni u nhaꞌa cheke teke eni iagho ka ghehati ia,

naugna gognaro na kmana naikno te diꞌa poru tafriu ka vido te romno gre.

²¹Thosei snakre ghami ka mae naoka gre mala nenei ghami nei famamaja ghami eghu.

Ghehati naikno te kuma te theo nomi gognaro gre ghehati cheke fakeli nigho.

²²God, mei sagho mala cheke fajifladi eidi unha te edi iagho re doglou kolho.

Ghathodi sagho iheire te theome fatutuani nigho gre, mare maꞌe nigho leuleghu narane funu hamerane ghilei posa fei grafi.

²³Nou naoka iagho gre mare eha fadiꞌa nigho fabrahu kolho.

Eghume iagho thosei ghatho iho te mei paradire eghu.

Sam 75

God ginauna kafe fatedi naiknore

Nogna khoje mae Asaf malagna mae kwaemasta.

¹God ghehati thofno tegio nigho nei cheke fakeli nigho eghu fabrahu.

Ghehati jaola cheke thakleni nou nafnakno iagho na,

nei toutonudi gloku te keli eghu teke edi iagho ra.

²God ne cheke eghu, “Iara la kulu liliseihi thofno narane te mala fatedi naiknore,

eghuteuna iara ginauna fatedi naiknore ka puhi te doglo.

³Neuba ne nghali gobigna lepo te karha teugre,

ba jaola ne nghali nauthoglu gne,

iara ginauna eni famamhakugna nauthoglu gne mala rheta fabrahu.

⁴Iara cheke ka naikno te diꞌa puhidi gre

mala thosei fahaehaghe,

⁵nei iara cheke fadoglo lao ka mare

mala thosei cheke fabiꞌobiꞌo.”

⁶Naugna nolaghi te mala fateni naikno na theome mei funu ke maghati ba ke mosu,

theome mei funu ke raru ba ke mata.

⁷Nu kaisei God thegna ngala te tangomana te mala fatedi naikno te gnafare.

Mana ngala nate chekeni ihei nate au papara na nei ihei nate theome au papara na teuna.

⁸God ne diꞌatagna fara ka naikno te diꞌare.

Eghuteuna diꞌatagna God ka naikno te diꞌa igre,

jateula waen te thono nheta fara te fodu ka kapu te louloku teu mana ra eghu.

Mana ginau totofa waen te nheta igne ka naikno te diꞌare mala koꞌu fahui mare.

⁹Nu iara ginauna toutonu fabrahu eigna nogna God mae Jekop.

Eghuteuna iara ginauna koje kilo fnaknoni mana.

¹⁰Mana ginauna roꞌe soru nodi nolaghi naikno te diꞌare,

nu mana ginauna tusu lao nolaghi ka naikno te doglore.

Sam 76

God ne tapla sorudi naikno te diꞌare

Nogna khoje mae Asaf malagna mae kwaemasta. Khoje igne mala koje balu gita.

¹Naiknodi Juda mare thofno laseni God.

Eghuteuna naiknodi Israel mare thofno ghatho tahuni nanghagna mana na.

²Namonogna God na Jerusalem.

Uve, mana au ka Thogele Saion.

³Jare ka vido tuana teke lolhopa mana nodi jata mae naokare.

Uve, mana neke fadidiꞌa fahui nodi glepo mala magra mare re.

⁴God, iagho thofno fnakno fara!

Iagho fnakno fara jateula kaisei mae king te uludi nogna naokare ka magra teke pulo mei ka nolaghi biꞌora eghu.

⁵Iagho la falehedihi nodi mae nheta hatimare mae naokara,

eghuteuna iagho la athahi nodi gobigna lepo mare re.

Nodi nolaghi nei glalase teu mare re diꞌa theo tokadi gognaro na.

⁶God nogna mae Jekop, ka vido te cheke faheta iagho ka mare na,

nodi hose nei naikno teke gnokro teku ka hose re eghu grofo ne kafe lehe.

⁷God, naikno te gnafare kafe mhaghu nigho iagho.

Kate diꞌatamu iagho na, theo kaisei naikno te frane te ari kegra ke ulumu iagho na.

^8-9Iagho au kligna, eghuteuna iagho edi naikno ka nauthoglu gne mala lase fakelini gaoghathomu iagho na.

Naugna igne, kate fatedi iagho naikno te gnafare nei fakarhidi iheire te au papara teure,

naikno te gnafa ka nauthoglu igne ne mhaghu nodi fara ne au kmu.

¹⁰Kate fagnafa aridi sagho nodi diꞌatadi nou mae naoka are, mare ginauna kafe ghatho tahu nigho iagho.

Tutuani, neubane au neu katha vido fadiadiꞌa ka mare, tuana ginauna ari huiu ngala ka mare.

¹¹Tahati te gnafa na mala kafe mhaghuni hui noda LORD God.

Ghotilo hui ka kantri te gnafa te au rhegna Israel mala tusu ranghini mana unha teke nhaꞌa chekedi ghotilo ka mana ra.

Eghuteuna atha mei nomi namhare ka mana.

¹²Mana tapla sorudi nodi gaghatho mae biꞌo te thono fahaehaghe fara ra.

Tutuani, mana famamhagudi hatimare mae king.

Sam 77

God na toghoni naikno te au papara na

Nogna khoje mae Asaf malagna mae kwaemasta nanghagna mae Jedutun.

¹Iara tanhi fabiꞌo ka God.

Iara magnahagheni mana te nomhidi nogu tharai re.

²Kate thoke ghau puhi na iara tarai ka noda Lord.

Funu grafi posa hamerane, iara ngafa haghe fabrahu khamegure ka tharai.

Neuba, gaoghatho gu iara na theome nheta kolho.

³Kate ghatho laoni iara God na iara ne tanhi,

eghuteuna gaoghathogu iara na ne thono glaꞌe fara.

⁴God theome snakre ghau iara te thuru na funu grafi posa hamerane,

naugna igne iara ne nanga nogu fara ne theome tangomana iara te tarai na.

⁵Iara kela ghatho laodi narane tela salaꞌu ari hira,

eigna u nakarhagu iara tifa ka narane tuare neke thofno keli fara.

⁶Leuleghu bongi na iara gaoghathodi fabrahu eidi narane teke koje iara teke glealeꞌa nagnafagu na, aonu iara ne cheke eghu:

⁷“Ba? Nomi Lord ghehati gne la tirogna ghami hila ghehati fabrahu signea?

Ba? Mana ginauna tirogna phile hila ka ghehati?

⁸Ba? Nogna namha biꞌo mana ka ghehati ia la theo hila sia?

Ba? Nogna nhaꞌa cheke mana ka ghehati ia la theo hila sia?

⁹Ba? God na theome kokhoni ghami ghehati sia?

Ba? Diꞌatagna mana ka ghehati na salaꞌuni puhi te keli ranghi ghami ghehati na sia?”

¹⁰Aonu iara ne cheke eghu ka gaoghathogu na, “Tore, God mae ihei te fnakno fara igne, tirogna ghauhila iara gognaro na.

Glepo igne la thofno fadiꞌani gaoghathogu iara na.”

¹¹LORD God, iara ginauna ghathodi glepo biꞌo teke edi iagho ra.

Uve, iara ginauna ghathodi glepo biꞌo teke edi iagho tifara.

¹²Iara ginauna ghathodi fara glepo te keli te gnafa nei glepo biꞌo te gnafa eghu teke edi iagho ra.

¹³God, puhimu iagho na thofno blahi fara.

Uve, theo kaisei god aheva nga te jateula iagho teuna.

¹⁴God, kaisei iagho ngala te tangomana te edi kofubobhoire.

Uve, tifa na iagho neke fakakhana nou nolaghi na ka keha naiknore.

¹⁵Ka nou nolaghi, iagho neke fakarhidi nou naiknore.

Uve, iagho neke fakarhi ghami ghehati vikegna mae Jekop nei vikegna mae Josep.

¹⁶God, kate mei iagho na thongna gne ginauna jateula naikno te filo nigho te mhaghura eghu.

Uve, nhorora gne na jateula naikno te rhana ra eghu.

¹⁷Kate mei iagho na khoveo biꞌo na mei balu nakhete biꞌo,

eghuteuna fila na poha ka maloa gne,

eghuteuna nakafli na fada tafri heva heva jateula khuali eghu.

¹⁸Iagho neke eni fila gne mala poha fabiꞌo,

eghuteuna iagho neke eni nakafli gne mala khafli ka namono te gnafa ka nauthoglu igne,

eghuteuna glose gne na nghali jateula kaisei mae te mhaghura eghu.

¹⁹Iagho neke nonolo ke kligna galo,

eghuteuna iagho neke kasa farihotei nhorora,

nu theo kolho kaisei naikno teke filo nigho na eghu.

²⁰Kani teke batudi iagho mae Moses ghe mae Eron ra,

iagho jaola neke batudi nei reireghidi eghu naiknore jateula kaisei mae te batudi nei reireghidi teu nogna sipura neku.

Sam 78

Puhigna God nei puhidi nogna naiknore

Nogna khoje mae Asaf.

¹Ghotilo nogu naikno iara ra fanomho mei ka nogu farirhiu iara gre.

Uve, ghotilo famane fanomho fakeli mei ka unha nate chekedi iara gre.

²Kate cheke ka ghotilo na, iara ginauna toutonu ka cheke naba.

Iara na toutonudi unha teke edi teke mei tifa tela theo kaisei ka ghotilo te lasedire.

³Glepo igre tahati la nomhidihi nei la lasedihi eghu.

Glepo igre neke toutonudihi mae kmadara ka tahati.

⁴Tahati thosei pophoru ka thudare glepo igre, nu tahati toutonu ranghidi thudare nei ranghidi iheire nate karha mei thogheiro.

Tahati toutonu ranghidi eigna nogna nolaghi te mala edi koba kofubobhoi nei gloku te biꞌo teure.

⁵LORD neke tusu laohi nogna vetula nei nogna cheke teure tifa ka vikegna mae ku’eda Jekop.

Eghuteuna mana neke chekehi ka mare mala farirhiudi thudire u vetula igre.

⁶Eghume thudi mare nate karha mei thogheiro re ginauna sikoludi vetula igre, eghuteuna mare ginauna nake toutonu ranghidi la thudire.

⁷Ka puhi igne mare na jaola fatutuani ni God,

nei na ghathodi unha teke edi mana re eghu,

nei leghudi koba nogna cheke mana re eghu.

⁸Ka puhi igne mare ginauna na theome jateula mae kmadi tifara eghu,

eigna mare neke huhughuni God, nei tirodini mana neku.

Hatimare neke tirodi ghatho tahuni God,

nei mare neke jaola neke tirodi fatutuani ni God.

⁹Hatimare mae soldia ka vikegna mae Efrem, mare neke kulu kaikaliti hi nodi phaloho te mala magra re,

nu ka narane te mala magra na, mare neke rikha kolho.

¹⁰Mare neke theome leghuni kolho u nhaꞌa cheke teke eni God ka mare na,

nei mare jaola neke tirodi te leghudi kolho nogna vetula mana re.

¹¹Mare theome ghatho tahudi unha teke edi mana tifara nei mare theome ghathodi u kofubobhoi teke edi mana ka tathadi mare ra.

¹²God neke eni kaisei kofubobhoi mala filoni mare neku ka sare na jare Soa ka kantri Ijep.

¹³God neke alha pea thongna na ka phei vido neke fakegra haghe jateula phei gringni thina biꞌo neku,

eghuteuna hata fakasadi nogna naiknore ka keha phile na.

¹⁴Ka narane tuana, mana neke eni kaisei nafnata khoveo mala batudi mare,

eghuteuna fei bongiro na, mana neke batudi ka naphaegna kaisei nafnata khaꞌaghi.

¹⁵Kate au mare ka namono nagou na, God neke piphike thina biꞌore,

aonu khoꞌu na neke loloro mei mala koꞌu naiknore.

¹⁶Mana neke eni khoꞌu te jifla mei ka thinare igne ne soru mei jateula kaisei khoꞌu biꞌo neku.

¹⁷Neubane eghu ngau, kate au ka namono nagou na,

naiknore neke theome gnafa te eni nakhibo ra ranghini God mae ihei te fnakno fara na.

¹⁸Mare magnahaghei te fariuriuni God mala tusu ranghidi mana u gano te magnahagheni mare na.

¹⁹Mare ne ke cheke faparini God, ne ke cheke eghu,

“God na theome tangomana te tusu mei gano te keli ka tahati ka namono nagou igne.

²⁰Uve, tutuani fara, God na neke piphike thina re ne loloro mei fabiꞌo khoꞌu na,

nu mana theome tangomana te tusu mei gano ka tahati na eghu.”

²¹Aonu, kate nomhini LORD nodi cheke mare igne, mana ne thono diꞌatagna fara,

diꞌatagna mana ka mare na thono biꞌo fara jateula kaisei khaꞌaghi te dudulu fabiꞌora eghu.

Uve, diꞌatagna mana na raꞌe ne heta fara.

²²Naugna mare ne theome rouronu ni mana,

nei theome fatutuani ni mana eghu nate fakarhidire.

²³Neubane eghu ngau mare,

mana neke eni maloa na neke thora jateula kaisei grengatha neu.

²⁴Aonu mana ne tofu soru ganogna kligna te kiloni mare,

“Manna” igne mala ima mare.

²⁵Aonu God ne tusu ranghidi naba gano ne imani mare ghedi gano engel na.

²⁶Ka nogna nolaghi igne mana neke eni nuri na mala gaghafa mei ke maghati,

nei jaola gaghafa mei ke mata.

²⁷Nanghajire neke soru mei pari ne ke thafru glose na jateula nusu ka glilihi na ra neu,

aonu naiknore ne au ghedi naba nafnahi te mala ima na.

²⁸Nanghaji gre ne khoko soru ka vido te gnafa faligohoni suga thapuale te au naiknore.

²⁹Aonu naiknore ne ima ne glealeꞌa.

Uve, God ne tusu ranghidi unha teke magnahagheni fara mare na.

³⁰Nu kate ima teu mare gano teke magnahagheni fara mare igne na,

³¹God ne thono diꞌatagna fara ka mare.

Aonu mana ne falelehe keha mae majaghani te nheta fara ka mare.

³²Neuba God ne edi kofubobhoi igre ka mare,

mare heta ghedi fara ngala ka puhi nakhibo na nei te theome rouronu ka mana na eghu.

³³Aonu mana ne eꞌei puhi biꞌo ranghidi mare mala ghosei lehe kolho mare.

³⁴Leuleghu fata kate lehe na kehare neke tughu nagnafa neke pulo ka mana neke pogho ka mana.

³⁵Gognaro na mare ne ke ghatho fapulo eigna God na thofno fnakno fara,

mana ngala teke reireghidi nei fakarhidi teku mare na.

³⁶Nu mare thono mae chaichaghi fara,

nei theome chekeni kaisei glepo te tutuani.

³⁷Gaoghathodire theome nheta ka God.

Naugna igne mare huhughuni nhaꞌa cheke teke eni God ka mare na.

³⁸Neuba mare ne eghu ngau, God na kokhoni nognadi fara, aonu mana ne hata koko nakhibodire ne theome paradi.

Kmana fata mana diꞌatagna ka mare, nu mana loku fapulo diꞌatagna na.

³⁹Mana laseni te naikno kolho mare na.

Mare jateula kaisei nuri te tei nei ke theome pulo mei teu ia eghu kolho.

⁴⁰Kmana fata kate au mare ke lamna namono nagou na, mare tirodini,

nei fadiꞌa nagnafani eghu mana.

⁴¹Kmana fata mare magnahaghei te fariuriuni noda God tahati naiknoda Israel.

Uve, mare tirodini mae ihei te blahi fara na.

⁴²Mare theome ghathoni kolho nogna nolaghi biꞌo God na.

Uve, mare theome ghathoni kolho narane teke fakarhidi mana ka hatimare mae naokare.

⁴³Ka narane tuana God neke edi kofubobhoi ka sare Soan jare Ijep,

nu mare neke theome ghathodi kolho neku.

⁴⁴God neke figri kho’ure neke vuhai dadara,

mala theome koꞌu naiknore.

⁴⁵Mana neke kuru mei sisimi mala kathidi nei paradi eghu mare,

mana jaola neke kuru mei groma mala goigoni namonodire.

⁴⁶Mana neke kuru mei cheche mala ghamu fahui nagare re, nei goigoni fahui gano ka nagare re.

⁴⁷Mana neke kuru mei aes neke soru mei

jateula nakhete neku neke lehe fahui nodi grep nei gaju fig teu re.

⁴⁸Nodi bulukare neke jaola neke lehe ka aes,

nei nodi sipu nei nanigot teure neke lehe ka nakafli.

⁴⁹Mana neke thono diꞌatagna fara, aonu mana neke eꞌei puhi biꞌo mala thokedi mare.

Diꞌatagna mana na jateula bukrei engel neu ne soru mei mala au papara mare.

⁵⁰God na neke theome loku fapulo diꞌatagna na ka mare,

aonu mana ne tirogna fakarhidi ne kuru mei kaisei fogra biꞌo te thono diꞌa fara mala na lehe mare.

⁵¹Mana neke falelehe fahui goro sua nalhaꞌu teke kulu karha mei ka tharakna te gnafa ka namono Ijep.

⁵²Ke leghugna igne, mana neke batu fajifladi nogna naiknore Ijep,

nei reireghidi ke lamnagna namono nagou na.

⁵³Mare ne sa tirodi mhaghu kolho,

naugna mana ne batu fakeli ne tei kolho, nu nodi naokare ne knoho kolho ka thongna.

⁵⁴God neke hata teidi ka nogna glose thegna na.

Uve, mana neke hata teidi ka vido thogele teke hata mana ka nogna nolaghi na.

⁵⁵Aonu kate theome posa nga teu naiknore ka vido tuana,

mana neke brue fajifladi naikno bongihehe teke kulu au teku jare re.

Aonu mana ne tufa nodi glose naikno bongihehere ka naiknodi Israel,

eghuteuna snakredi nogna naikno thegnare mala ke khotodi nodi suga tapuale naiknore.

⁵⁶Neubane eghu ngau, mare heta ghedi te figri tagruni God mae ihei te thofno fnakno fara na.

Uve, mare magnahaghei fara te fariuriuni mana na.

Eghuteuna mare jaola theome tajini nogna vetula mana na.

⁵⁷Mare figri tagruni, nei theome ghatho tahuni eghu kolho mana.

Ku’edire neke jaola tifa na, eghume theo kaisei naikno te tangomana te rouronudire.

⁵⁸Mare fa eꞌei mala diꞌatagna fara God eghu, ka puhi te tarai mare ka keha god delei ka thogele na.

Ka puhi te fakegra haghe mare mumuju na igne ngala te thofno diꞌatagna fara God na.

⁵⁹Kate filodi mana glepo igre,

mana ne hongoni fara ka mare ne thono diꞌatagna fara.

⁶⁰Mana neke tei kokoni nogna suga thapuale na Saelo,

jare teke au mana baludi nogna naiknore.

⁶¹Mana neke snakredi mae naokare neke mei atha Bokis Blahi Nhaꞌa Cheke na.

Bokis igne kaisei fagaglana gna nogna nolaghi God na.

⁶²Mana neke diꞌatagna fara ka nogna naiknore,

aonu mana snakredi mae naokare mala falehedi nogna naiknore.

⁶³Hatimare mae nalhaꞌu majaghani ra ne kafe lehe ka magra,

aonu goro gaꞌase majaghani ra theo kaisei mae nalhaꞌu te mala tolaghi ka reꞌe na.

⁶⁴Hatimare mae pris jaola ne lehe ka magra,

eghuteuna khetodire ne thono mhaghu nodi fara ne theome tanhi kolho.

⁶⁵Ke leghu na igne, Lord ne kegra haghe jateula kaisei mae teke dofra nathuru ra neu.

Uve, mana jateula kaisei mae nheta te dranga ka waen ra neu ne kaikaliti mala magra.

⁶⁶Mana neke tapla sorudi nogna naokare kau magra na, neke ngolho fapulodi.

Uve, mana neke famamajadi fabrahu, eghuteuna mare theome naba teke magra na.

⁶⁷Mana neke theome vahini vikegna mae Efrem.

Uve, mana thono tirognani fara vike igne.

⁶⁸Nu mana neke vahini vikegna mae Juda,

nei Thogele Saion te thono magnahagheni fara mana na.

⁶⁹Jare teke hohoro mana nogna Sugablahi na, jateula nogna suga mana te au kligna na eghu.

Uve, mana neke hohoro famamhaku fara suga igne, jateula mana teke hohoro famaku fabrahu nauthoglu igne eghu.

^70-71Mae Devet na mae mala reireghi sipu,

nu God neke vahini mana mala kaisei nogna mae gloku.

Aonu mana neke atha fajiflani mae Devet ka gloku tuana mala nodi king vikegna Israel.

Gognaro na mana mae mala reireghidi nogna naikno mana re.

⁷²Mae Devet neke ghatho tahuni nogna gloku na neke reireghi fakelidi naiknore ka puhi te thofno doglo fara,

nei batudi ka thofno puhi te keli.

Sam 79

Tharai mala tore thotogho ka God

Nogna khoje mae Asaf.

¹God, naikno bongihehe igre la ruma mei hila ka kantri mala nomi ghehati teku iagho igne.

Uve, mare la mei goigonihila nou Sugablahi iagho gne,

eghuteuna mare la fadidiꞌa hila namono biꞌo Jerusalem.

²Mae bongihehe igre tirodi bebekudi kolho thinidi nou naikno iagho teke lehe gre.

Nu lisa lao kolho thinidi naiknore ka khuma nei nanghaji biꞌo eghu mala ghamu fateo.

³Mare falelehe nou naikno iagho re, nei dadaradire thofa tongana ka namono Jerusalem.

Eghuteuna theo kaisei naikno te au teu te mala giugilu dire eghu.

⁴Naikno bongihehe te au faligoho ghami ghehati igre cheke fadiꞌa ghami ghehati,

nei maꞌe ghami nei tukma ghami eghu ngala ghehati.

⁵LORD God, ba? Iagho na diꞌatamu fabrahu ka ghehati?

Ba? Na brana fabrahu diꞌatamu na ka ghehati jateula khaꞌaghi eghu?

⁶Diꞌatamu sagho ka naikno bongihehe di keha kantri te theome pogho soru nigho nei tarai ka iagho teu are.

⁷Naugna mareu te falehe ghami ghehati vikegna mae Jekop,

nei goigoni nomi kantri ghehati teku iagho igne eghu.

⁸God, thosei para ghami ghehati eidi nakhibo teke edi ghehati tifara.

Faghosei kokhoni ghami ghehati sagho, naugna gaoghathomire ghehati la thofno glaꞌe soru fara.

⁹God, togho ghami nei fakarhi ghami eghu ghehati sagho.

Hata kokodi sagho nakhibomi ghehati gre, mala ghatho tahu nigho naikno te gnafa igre eghu.

¹⁰Theome keli naiknodi keha kantri gre te cheke eghu ka ghehati na,

“Aheva gne nomi God ghotilo na?”

God, ghehati thono magnahaghei nigho iagho fara te paradi naikno igre,

naugna mare neke falelehe nou naikno iagho re.

¹¹Fanomho mei sagho ka nomi natanhi ghehati te au teu ka suga sosolo gne.

Mare la fate falehe ghamihi ghehati. Fakarhi ghami ka nou nolaghi biꞌo.

¹²Lord, naiknodi keha kantri are cheke fadiꞌa nigho iagho.

Paradi fabrahu sagho eidi cheke te diꞌa tuare.

¹³Jame te eghu iagho na, ghehati te jateula nou sipu teu iagho gre ghehati ginauna cheke fakeli nigho fabrahu.

Uve, ghehati cheke fakeli nigho fabrahu leuleghu fata.

Sam 80

Tarai ka God mala fakarhini Israel

Nogna khoje mae Asaf malagna mae kwaemasta.

¹God, leuleghu fata na iagho reireghi ghami ghehati naiknomi Israel jateula nou sipu teu iagho gre.

Fanomho mei sagho ka ghehati, eigna iagho nodi king hatimare mae engel.

²Fatakle meini sagho nou nolaghi na ka ghehati vikegna mae Efrem,

nei vikegna mae Benjamin, nei vikegna mae Manase.

Fatakle mei sagho nou nolaghi na ka ghehati hui.

Uve, mei sagho mala fakarhi ghami ka khamedi mae naoka gre.

³God, hata fapulo ghami ka iagho.

Uve, kokhoni ghami nei fakarhi ghami eghu ghehati sagho ka khamedi mae naoka gre.

⁴LORD God, ka iagho ngala te au nolaghi fateote’o na.

Niha fata diꞌatamu nei tirou cheke tughudi eghu sagho nomi tharai ghehati grea?

⁵Diꞌanagnafa kolho te tusu mei iagho ka ghehati te mala jateula gano teu te mala ghamu ghehati na.

Eghuteuna kholo ka tathami gre kolho te mala jateula khoꞌu teu te tusu mei iagho ka ghehati te mala koꞌu na.

⁶Iagho neke snakredi naiknodi keha kantri te au faligoho ghami ghehati gre mala magra mare ka ghehati mala atha nomi kantri ghehati gne.

Hatimare mae naoka gre cheke fadiꞌa ghami fara ghehati.

⁷God, ke hata fapulo ghami ka iagho.

Uve, kokhoni ghami nei fakarhi ghami eghu ghehati sagho ka khamedi mae naoka gre.

⁸Iagho neke atha fajifla ghami Ijep, eghuteuna iagho neke ngolhi fajifladi naiknodi keha kantri are.

Aonu gognaro na iagho snakre ghami ghehati mala khotogna nodi namono mare Kenan.

⁹Ke leghugna teke ngolhi fajifladi iagho naiknore ka keha kantri are, iagho neke snakre ghami ghehati mala au ka nodi namono mare re.

Gognaro na la kmana fara la kafe au soru ka namono Kenan.

¹⁰Iagho ngala teke togho ghami ghehati teke khotogna ghehati kantri igne,

funu ke mata tei posa ke raru ka Thogele Lebanon.

¹¹Iagho ngala teke togho ghami ghehati teke mala tuthugha nohi igne,

funu ka thongna Mediterenian tei posa ka Khoꞌu biꞌo Iufretis.

¹²God, naugna unha sagho te snakredi mae naoka gre te mei atha nomi glose ghehati grea?

Mare neke tei salaꞌu jare neke blau nomi glepo ghehatire nei mare jaola neke goigonidi gobigna lepore.

¹³Mare mei tapla fapari ghami ghehati jateula bosu mata te tei ka kaisei nagare na te tapla goigonidi gano ra neu.

Uve, mare mei goigoni ghami ghehati jateula glepo te mhaumhaghu te tei ka nagare na te goigoni fara ra neu.

¹⁴God, iagho ngala te au nolaghi fateo na, filo mei ka ghehati sagho.

Au sagho kligna filo soru ka ghehati.

Mei sagho mala fakarhi ghami ghehati nou naikno gre.

¹⁵Ghehati gne nou naikno iagho, eigna iagho atha ghami ghehati neke mei agne ka namono igne, la kaisei kantri nheta fara gognaro na.

Mei sagho mala fakarhi ghami ka naoka gre.

¹⁶Naoka gre la thofno goigoni ghami fara ghehati gognaro na.

Uve, ghehati la jateula gaju te lehe te khoko soru te koko lao ka khaꞌaghira eghu.

Eghume cheke faheta sagho ka mare mala papara fara mare.

¹⁷Taji ghami nei batu ghami eghu sagho ghehati nou naikno teke vavahi themu gre.

Naugna iagho neke magnahaghei ghami ghehati te kmana nei nheta neku.

¹⁸Jame te eghu na, ghehati theome tangomana te ghatho iho nigho na.

Taji fakeli ghami, eghuteuna ghehati ginauna na kilo fnaknoni nanghamu iagho na.

¹⁹LORD God, iagho ngala te au nolaghi na, atha fapulo ghami ka iagho.

Uve, kokhoni ghami nei fakarhi ghami eghu ka khamedi mae naoka gre.

Sam 81

Khoje mala koje ka narane gaghamu

Nogna khoje mae Asaf malagna mae kwaemasta.

¹Tahati glealeꞌa nei eha fabiꞌo lao eghu ka God nogna Jekop.

Uve, tahati koje fabiꞌo mala kilo fnaknoni God, naugna mana neke batu ghita.

²Tahati koje nei ghita eghu balu sesele.

Uve, tahati lalahu ka glepo igre mala keli tada nonomhodire.

³Kau gaghamu khafa nei kau gaghamu glaba rane teu igre tahati kufli mala fufunu tharai na.

⁴U vetula teke tusu mei God ka tahati vikegna Israel igne ngala u vetula te mala leghuni tahati na.

⁵God neke tusu mei vetula igne ka kuꞌeda tahati tifa ra,

ka narane teke falehedi mare naiknodi Ijep ra.

Iara neke nomhini kaisei naogla teke theome raꞌe laseni iara na neke cheke eghu:

⁶“Iarau ngala teke hata fadelei ghami ghotilo ka naꞌau papara ia.

Uve, iara ngala teke hata fajifla ghau ghotilo ka gloku biꞌo teke eni ghotilo jare Ijep ia.

⁷Kani teke thoke mei puhi biꞌo ka ghotilo na, ghotilo kilo mei ghau iara,

eghuteuna iara neke fakarhi ghau ghotilo.

Uve, iara ngala teke togho ghau ghotilo kani teke mei iara ke lamnagna fila ia.

Iara neke fariuriu ghau ghotilo jare ke lamnagna namono nagou na ka glokha khoꞌu Meriba.

⁸Ghotilo nogu naikno iara Israel ra, ghotilo fanomho mei ka iara.

Uve, iara magnahagheni fara te fanomho ghotilo ka nogu cheke iara igne!

⁹Ghotilo thosei atha mei kaisei god aheva nga,

nei thosei pogho soru ka keha god delei.

¹⁰Iara ngala nomi LORD God ghotilo na,

nei iara ngala teke atha fajifla ghau ghotilo Ijep na.

Jame te rouronu ghau iara ghotilo na,

iara ginauna tusu ari glepo te keli ka ghotilo.

¹¹“Naiknodi Israel gre nogu iara,

nu mare theome fanomho ka iara nei theome leghu ghau iara eghu.

¹²Eghume iara lisa laodi mala patu gama mare,

mala eni mare unha te magnahagheni thedi na eghu.

¹³“Iara thono magnahagheni fara jame te fanomho nogu naiknore ka iara.

Uve, iara thono magnahagheni fara jame te leghuni mare puhigu iara na.

¹⁴Jame te eghu mare na, iara ginauna magridi nodi naoka mare re,

eghuteuna iara na theome raugha na tapla sorudi naikno te diꞌa tuare.

¹⁵Uve, jame fanomho koba nogu naikno re ka iara meuna, iara ginauna na famamhagudi naikno te tirodi ghau iara gre.

Eghuteuna iara ginauna paradi fabrahu naikno te diꞌa tuare.

¹⁶Jame leghu ghau iara nogu naikno gre meuna,

iara ginauna na faꞌimadi ka thofno gano te keli,

eghuteuna iara ginauna na thofno faglealeꞌadi ka narane te imani mare jujurukuli te keli na.”

Sam 82

God na ginauna fatedi hatimare mae biꞌo te theome doglo nodi glokure

Nogna khoje mae Asaf.

¹God na eni kaisei faidu biꞌo kligna, eghuteuna mana na fatedi hatimare mae engel te jateula god teu te khapru faligohoni teu mana jare na.

²Aonu mana na cheke eghu ka mare, “Ghotilo thosei fatedi naiknore kau nafnata puhi te theome doglo, nei ghotilo thosei ke phile ka naikno te diꞌa puhidi are.

³Nu iheire te kuma, nei goro sua eghu tela lehehi kmadi are ghotilo fatedi ka nafnata puhi te doglo. Eghuteuna ghotilo saghe leghudi iheire te au ka puhi te biꞌo nei iheire te theo nodi nolaghi.

⁴Uve, ghotilo fakarhidi ka nodi nolaghi mae iheire te thono diꞌa fara puhidi are.

⁵“Ghotilo thono fameomekro fara! Ghotilo theome laseni kaisei glepo! Puhimi ghotilore thofno diꞌa parilahu. Gognarona gobigna lepo te edi ghotilo kau nauthoglu igne theome doglo kolho.

⁶“Iara ngala God mae ihei te thofno fnakno fara kligna lahu na, iara neke kulu cheke eghu hi ka ghotilo, ‘Ghotilo jateula god eghu, eghuteuna ghotilo te gnafa na, ghotilo goro thugu iara kolho.’

⁷Nu neubane eghu ngau, ghotilo ginauna lehe kolho jateula naikno eghu. Uve, ghotilo ginauna na jaola lehe jateula te lehe goro mae biꞌo are eghu.”

⁸God, mei sagho mala funei fruni ni nauthoglu igne, naugna naikno te gnafa ka kantri te gnafa na igre nou iagho.

Sam 83

Tharai mala toreni God mala roꞌe fahuidi iheire te naoka ranghini Israel

Nogna khoje mae Asaf.

¹God, thosei au kmu jare jateula tuana eghu!

²Filo sagho! Hatimare mae naoka gre la kaikaliti te mala magri nigho iagho na.

Uve, mae iheire te theome magnahaghei nigho iagho re jaola magri nigho iagho.

³Mare roghe porudi keha glepo te diꞌa te mala mei goigoni ghami ghehati nou naikno iagho gre.

Uve, mare roghe mala goigoni ghami ghehati naikno te namhadi fara iagho gre.

⁴Hatimare mae naoka gre cheke eghu, “Ari si tahati mala goigoni tahati nodi kantri mare tuana!

Uve, mala theo kaisei naikno te ghathoni Israel gne!”

⁵Mare ne kaisei gaoghatho ka nodi groghe na ne salo fodu te mala magra ka iagho na.

⁶Mae iheire teke loku fodure igre, hatimare ka vikegna mae Edom,

hatimare ka vikegna mae Ismael, naiknodi Moab, hatimare ka vikegna Hega,

⁷naiknodi Gebal, hatimare ka vikegna mae Amon,

hatimare ka vikegna mae Amalek, naiknodi Filistia, nei naiknodi Taea.

⁸Eghuteuna naiknodi Asiria gre jaola neke loku fodu baludi mare,

naugna mare kaisei phile ka vikegna mae Amon nei naiknodi Moab iheire teke vikegna mae Lot.

⁹Tapla faparidi sagho, eigna iagho neke tapla faparidihi naiknodi Midian tifara,

nei iagho neke jaola neke roꞌedi mae Sisera ghe Jabin ka khoꞌu biꞌo Kison.

¹⁰Iagho neke falehedi phei mae igre ka namono biꞌo Endo,

eghuteuna thinidire neke boto jare.

¹¹Ro’edi sagho mae iheire te baubatu ka mae naoka igre mala jateula teke eni iagho ka phei mae funeidi Oreb ghe Seheb ra eghu.

Tapla faparidi sagho hatimare mae king te gnafa are mala jateula teke eni iagho ka phia mae king ra eghu, mae Seba ghe mae Salmuna.

¹²Eigna mae igre neke cheke eghu,

“Tahati ginauna atha nogna glose God igne mala ke khotogna theda.”

¹³God, eghume ifu faflalodi sagho mala jateula nakrofu khaꞌaghi

ba jateula khakla gaju te lehera eghu mare mala flalo tei dofidi.

¹⁴Roꞌedi fara ngala sagho mala jateula khaꞌaghi biꞌo te gnubra fahui namhata ra eghu.

Uve, jateula khaꞌaghi biꞌo te gnubra gaju te gnafa ka thogelera eghu.

¹⁵Mei sagho jateula saeklon biꞌo ra eghu.

Uve, famamhagudi sagho ka nuri khoburu biꞌo.

¹⁶LORD God, famamajadi sagho,

mala filoni mare nou nolaghi iagho na.

¹⁷Te thofno keli na iagho thofno famamhagudi nei famamajadi eghu fabrahu,

nei te keli na u nanghadire jame thofno diꞌa fara kate lehe mare na.

¹⁸LORD God, te thofno keli fara na jame mare laseni eigna te iagho ngala God mae ihei te thofno fnakno fara na,

eghuteuna iagho ngala king te funei frunidi naikno te gnafa ka nauthoglu igne.

Sam 84

Mae ihei te magnahagheni fara nogna Sugablahi God na

Nodi khoje vikegna mae Kora malagna mae kwaemasta.

¹LORD God, iara magnahagheni fara nou Sugablahi iagho na,

eigna ka iagho ngala te au nolaghi fateote’o na!

²Iara magnahagheni fara te au jare na! LORD God,

iara thono magnahagheni fara te au ke lamnagna nou Sugablahi iagho na.

Iagho ngala God mae ihei te karha tifa te tifa na.

Ka nakarhagu fateote’o na,

iara koje naugna iara thofno glealeꞌa fara ka iagho.

³LORD God, iagho te thofno nolaghi fara.

Iagho ngala nogu king, nei nogu God teu iara na.

Neubane nanghaji ikodi, reꞌe lase hohoro nodi gnoku ke lamnagna nou Sugablahi iagho na,

eghuteuna reꞌe lilisei thudire rhegna nou olta iagho na.

⁴Iheire ngala te au ka sugamu iagho na, mare ngala te keli tadi fara na,

eghuteuna leuleghu fata na mare cheke fakeli nigho iagho ka khoje.

⁵Iheire ngala te au fakeli nodi ka iagho re, mare ngala te thofno glealeꞌa nodi fara na.

Mare thono magnahaghei fara te haghe ka Thogele Saion mala tufru soru nigho.

⁶Kate tei salaꞌu mare kau glogu te thono khapra fara na, vido igne jateula vido te au kmana khoꞌura eghu tagna.

Naugna u nakhete na ne soru mei ne fodu khora re.

⁷Kate haghe naiknore Saion na, mare nake heta fapulo,

naugna mare ginauna na filoni God.

⁸LORD God, iagho nogna God ku’emi Jekop, iagho mae ihei te thofno nolaghi fara ia, fanomho mei ka iara.

Uve, iagho fanomho mei ka nogu tharai iara gne.

⁹God, iagho ngala teke vavahi na nomi king ghehati gne!

Fablahini mana sagho.

¹⁰Nogu God, jame te au kolho iara kaisei narane ka nou Sugablahi iagho na,

tuana thofno keli fara salaꞌu jame te au iara nabagna kaisei thogha narane ka keha vido delei na.

Neubane khogla kegra kolho iara ka grengathagna nou Sugablahi iagho na tuana keli fara salaꞌu jame te au iara ke lamnagna nodi suga iheire te gnognoro re.

¹¹LORD God, kaisei iagho ngala God na,

eghuteuna iaghou ngala te saghe leghu ghami nei taji fakeli ghami teuna.

Uve, iagho ngala te keli ranghi ghami nei tusu ranghi ghami teu u nafnakno na.

LORD God, leuleghu fata na iagho tusu lao kolho glepo te kelire ka iheire te edi unha te doglore.

¹²LORD God, mae ihei te au nolaghi fateo,

iheire te fatutuani nigho iagho re te thofno glealeꞌa nodi fara re.

Sam 85

Tarai ka God eigna nakarha te keli

Nodi khoje vikegna mae Kora malagna mae kwaemasta.

¹LORD God, kani au teku ghehati ka nou kantri na tifa ia iagho neke kelitamu fara ka ghehati.

Naugna iagho neke togho ghami ghehati naiknomi Israel mala au fakeli.

²Iagho neke atha koko nakhibomi

nei atha fasnaglidi najafra teke edi ghehati nou naiknore.

³Tifa na iagho neke diꞌatamu ka ghehati,

uve, gognaro na iagho kela theome diꞌatamu ka ghehati.

⁴God, fakarha ghami nei ke hata fapulo ghami eghu ka iagho.

Thosei lisa koko ghami.

⁵Ba? Iagho na diꞌatamu fabrahu ka ghehati sia?

Ba? Diꞌatamu iagho ka ghehati gne na theome gnafa signea?

⁶Ke farerheta fapulo sagho nakarhami ghehati gre.

Eigna ghehati gne nou naikno iagho mala tangomana ghehati te kilo fnakno nigho na.

⁷LORD God, fakakhana sagho nou namha biꞌo na ka ghehati,

nei ke hata fapulo ghami eghu mala au fakeli ghehati.

⁸Iara nomhini unha te chekeni nogu God na ka nogna naiknore.

Mana neke nhaꞌa cheke eigna pharikeli,

eghu jame teke figri tahati ka puhi fameomekro teke edi tahati ra.

⁹Tutuani fara, God na kaikaliti fabrahu te mala fakarhidi iheire te ghatho tahuni mana na,

eghume tahati ginauna filoni nogna nolaghi mana te mala fakarhi ghita tahati naikno te au ka kantri igne.

¹⁰God namhadi fabrahu nogna naiknore, naugna igne mare mala fatutuani nei leghuni eghu God.

Uve, iheire te doglo puhidire God ginau tusu ranghidi u pharikeli.

¹¹Ka nauthoglu igne na, naiknore mala leghuni puhigna God na.

Jame te eni mare igne na, God gna kligna na ginauna cheke eghu, “Mare au doglo ka tathagu iara na.”

¹²Tutuani fara God ginau tusu mei kmana glepo te keli ka tahati,

eghuteuna glose igne ginauna thofno keli fara mala au kmana gano na.

¹³Tahati ginauna kulu fadoglighu puhidare eghuteuna ka puhi igne tahati na tangomana te kaikaliti u nabrou malagna God.

Sam 86

King tore thotogho ka God

Nogna tharai mae Devet.

¹LORD God, fanomho mei sagho ka nogu tharai iara gre,

naugna iara gne thono magnahagheini fara nou thotogho iagho na.

²Fakarha ghau kau glehe, naugna iara gne kaisei nou mae gloku iagho.

Iara fatutuani nigho nei kaisei phile ka iagho eghu.

³Iagho na nogu God iara, iara tarai fabrahu ka iagho funu hamerane boibongi ghilei ke romno.

Eghume, iagho kokhoni mei ghau iara.

⁴LORD, faglealeꞌa ghau, naugna iara gne nou mae gloku iagho,

nei iara gne tarai ari kolho ka iagho.

⁵LORD God, iagho thofno keli fara, nei iagho atha kokodi koba nakhibomi ghehatire.

Eghuteuna iagho namhadi fara iheire te tarai ari ka iagho re.

⁶LORD God, fanomho mei ka nogu tharai gre.

Uve, fanomho mei sagho mala togho ghau iara ka vido te tanhi ari iara ka iagho na.

⁷Iara kilo ari ka iagho ka vido te thoke mei puhi tagu na,

naugna iara lase nigho te cheke tughudi nogu tharaire.

⁸LORD, theo kaisei god ka keha kantri gre te jateula iagho teuna.

Naugna theo kaisei god ka kantri tuare te tangomana te jateula iagho teu te edi gloku te keli gre.

⁹Iagho neke vuavuha naikno te au ka kantri te igre.

Mare ginau mei pogho soru ka iagho mala cheke fakelini nanghamu iagho na.

¹⁰Kaisei iagho ngala thofno God na.

Uve, kaisei iagho ngala te au nolaghi na, nei kaisei iagho ngala te tangomana te edire glepo te biꞌore.

¹¹LORD God, farirhiu mei ghau glepo te magnahaghedi iagho te mala edi iara re, mala leghudi iara thofno chekemu iagho re.

Uve, togho ghau iara sagho mala thofno keli tagu iara te mala ghatho tahu nigho na.

¹²God, iagho ngala thofno nogu mae funei iara na.

Iara ginau cheke fakeli nigho ka nagnafagu fateote’o na,

nei iara ginau pala hagheni fabrahu nanghamu iagho na.

¹³Nou namha iagho ranghi ghau iara na thono biꞌo fara.

Uve, iagho neke fakarhi ghau iara kau glehe.

¹⁴God, naikno te thono fahaehaghedi fara igre mare figri tagru nigho gognaro na.

Uve, kaisei tothoghei naikno te thono diꞌa fara puhidire tirodi fara te fanomho ka iagho na,

mae igre magnahaghei te falehe ghau iara.

¹⁵Nu Lord, iagho ngala God mae ihei te kokhonidi fara,

nei namhadi fara teu naiknore.

Uve, iagho thofno keli fara, eigna iagho theome ghosei diꞌatamu,

nei iagho tangomana te tajini fabrahu nou nhaꞌa cheke na.

¹⁶Filo mei kokhoni ghau iara sagho.

Uve, iagho farheta ghau nei fakarhi ghau eghu iara,

naugna iara gne nou mae gloku iagho,

jateu teke eni idogu ka iara tifa ia eghu.

¹⁷LORD God, falalase mei sagho te phile iagho ka iara na.

Jame te eghu iagho te togho ghau nei farhetani nagnafagu iara gne teu na,

naikno teke tirodi ghau iara re ginau thono mamaja nodi fara.

Sam 87

Khoje mala cheke fakelini Jerusalem

Nodi khoje vikegna mae Kora.

¹LORD neke hohoro nogna namono na ka Thogele blahi Saion.

²LORD na magnahagheni fara namono Jerusalem ke tulaodi keha namono te au Israel.

³Ghotilo naikno te au ka namonogna God ra, ghotilo fanomho ka famane cheke igre.

God na edi gloku te keli ka ghotilo!

⁴God na ne cheke eghu, “Kate kahadi iara naikno te lase ghau iara re,

iara ginau kaha naiknodi Ijep ghe Babilonia, nei naiknodi Filistia, nei Taea nei Itiopia.

Iara na kahadi naikno igre balumi ghotilo eigna ghotilo kafe naiknomi Jerusalem ngala.”

⁵Eghuteuna naiknore ginau cheke eghu eigna Saion,

“Naikno ka kantri te gnafa igro neke jifla mei ngala ka vido igne.”

God mae ihei te fnakno na ginau fanhetadi naikno te au ka namono tuana.

⁶LORD ginau rioriso soru ka buka nanghadi keha vikere mala kaha fodu baludi naiknodi Jerusalem.

⁷Naikno te au ka namono Jerusalem, mare ginauna koje nei glealeꞌa eghu.

Mare ginauna cheke eghu, “God na thofno fablahi ghami ghehati Saion ka noda famane namono tahati gne!”

Sam 88

Ihei te tanhi ka God te mala toghoni

Nodi khoje vikegna mae Kora malagna mae kwaemasta. Khoje igne neke eni mae Heman vikegna mae Esra.

¹LORD God, iagho nogu God iara mala togho ghau.

Ka narane nei ka bongi teuna, iara diꞌanagnafa nei tanhi fabiꞌo eghu ka iagho mala mei togho ghau.

²Fanomho mei sagho ka nogu tharai iara gre.

Iara tanhi ari ka iagho mala togho ghau, eghume fanomho mei sagho ka iara.

³Kmana puhi fara te thoke ghau iara gne,

iara la namo lehe gognaro na.

⁴Iara gognaro na theome nheta, eghuteuna naikno te gnafare gaoghathodi na,

iara gne kaisei ka iheire te namo lehe teu igre.

⁵Naiknore te filo mei ghau iara na, iara gne jateula mae tela lehehi ra eghu.

Uve, iara gne jateula mae teke lehehi ka magra te giugiluhi ke lamna khora ra eghu hi.

Iagho la ghatho ihodihi mare, iagho thosei ghathodi mare.

⁶Iagho koko soru ghauhi iara ka glumadi mae iheire tela lehehira.

Iara au jare ka glave te romno fara na.

⁷Diꞌatamu iagho na tahu fara ranghi ghau iara.

Uve, thono goigoni ghau fara iara jateula galo te mei te toku tafru ghau ra eghu.

⁸Iagho neke toghodi mae kheragu iara re neke tei koko ghau iara.

Uve, iagho neke toghodi mare neke thono tirodi ghau iara.

Iagho neke lisa lao ghau iara farihotei hoholo mala theome tangomana iara teke jifla na.

⁹Iara au papara fara, iara tanhi la ghilei theome fifilo fakeli phei tathagure.

LORD God, leuleghu narane na iara kilo nigho nei ngafa haghe phei khamegure mala tharai ka iagho.

¹⁰Ba? U kofubobhoi te edi iagho are mala fakakhana mae iheire tela lehehira sarea?

Ba, mae iheire tela lehehira tangomana teke kegra haghe teke mala kilo fnakno nigho iagho na? Theo fara!

¹¹Ba? Mae iheire tela lehehira ginau tangomana teke toutonu eigna nou namha biꞌo iagho na?

Ba, mae iheire tela lehehira theome tangomana te tajini nou nhaꞌa cheke iagho na ke lamna beku? Theo fara!

¹²Mare au ka vido te romno, eghuteuna theo kaisei naikno nate ghathoni nou nhaꞌa cheke iagho na eghu.

Eghume mare na theome filodi nou famane puhi nei nou kofubobhoi teu iagho re.

¹³LORD God, neubane eghu ngau, leuleghu hamerane na iara tarai ari koba ka iagho,

eghuteuna iara tanhi ari ka iagho mala togho mei ghau.

¹⁴LORD God, ne faꞌunha ne tirou ghau iara sagho ia?

Ba? Faꞌunha neke tirou filo mei ka iara sagho ia?

¹⁵Funu ka narane teke mae majaghanigu te mei posa gognaro na, iara au papara fabrahu ngala ka fogra igne, iara la namo lehe.

Iagho thono para ghau fara iara, eghume, iara la thono glaꞌe soru fara.

Uve, puhi te para ghau iara iagho igne, thofno goigoni ghau fara iara.

¹⁶Iagho thofno diꞌatamu fara ka iara, eghume gaoghathogu iara na thono glaꞌe soru fara.

Uve, puhi te para ghau iara iagho igne thono goigoni ghau fara iara.

¹⁷Funu hamerane te ghilei romno na iara au papara fara ka fogra igne.

Uve, jateula khoꞌu te britha te mei toku tafru ghau ra eghu.

¹⁸Iagho neke toghodi mae kheragu fofodu nei mae mala kaisei cheke teu iara re mala jaola tei koko ghau iara.

Gognaro na iara theo kaisei kheragu fofodu, eghume iara khogla ofoniu kolho glehegu na.

Sam 89

Khoje eigna nogna nhaꞌa cheke God

Nogna khoje mae Ethan kaisei mae vikegna mae Esra.

¹LORD God, iara ginauna kojeni koba nou namha biꞌo iagho na,

nei iara ginauna toutonuni koba eigna puhi te tajini iagho u nou nhaꞌa cheke na.

²Iara laseni nou namha biꞌo iagho na ginau au fabrahu,

eghuteuna puhi te tajini iagho nou nhaꞌa cheke na igne jateula maloa te au fabrahu ana eghu.

³Iagho neke cheke eghu,

“Iara neke enihi kaisei nhaꞌa cheke ka mae Devet nogu mae gloku teke vahini iara tifa ia.

⁴Iara neke cheke eghu ka mae Devet,

‘Uve, vikemu iagho na ngala te mala king koba na, eghuteuna mare na mae nheta koba.’ ”

⁵LORD God, hatimare maedi kligna re, mare koje nei kilo fnakno nigho eghu iagho eidi glepo te keli te edi iagho ra.

Uve, hatimare mae engel te blahi, mare koje eigna puhi te keli te tajidi iagho nou nhaꞌa cheke ra.

⁶LORD God, theo kaisei naikno te au kligna te jateula iagho teuna.

Uve, neubane engel puhidire theome keli kolho jateula puhimu iagho eghu.

⁷Kaisei iagho God ngala te mhaghu nigho nei ghatho tahu nigho teu tothoghei engel di klignare.

Uve, kaisei iagho ngala te fnakno ke klignadi mare te hui na.

Naugna igne te kilo fnakno nigho mare na.

⁸LORD God, kaisei iagho ngala te au nolaghi biꞌo na. Theo kaisei naikno te au nolaghi biꞌo jateula iagho teuna.

LORD God, kaisei iagho ngala te tangomana te tajidi nou nhaꞌa chekere.

⁹U thongna biꞌo na au nolaghi biꞌo fara, nu iagho themu ngala te batuni nei saghe leghuni teuna.

Ka vido te galo biꞌo na, iagho ngala te tangomana te fabeatani na.

¹⁰Iagho neke faleheni mogo biꞌo ka thongna te kiloi Rehab.

Uve, iagho neke tapla sorudi nou naokare ka nou nolaghi biꞌo na.

¹¹Maloa nei nauthoglu teu igre nou iagho kolho.

Uve, iagho ngala teke vuavuhani nauthoglu igne baludi gobigna lepo te au ke lamnagna igre.

¹²Iagho ngala teke vuavuhadi namono te gnafa, funu ke raru te posa ke mhata.

Thogele Tebo nei Thogele Hemon teu igre glealeꞌa fara jateula naikno eghu glealeꞌa nei koje kilo fnakno nigho eghu.

¹³LORD God, iagho ngala te au nolaghi te mala vuavuhadi gobigna lepore!

Uve, nou nolaghi iagho na thono biꞌo fara.

¹⁴Iaghou ngala King na eghuteuna puhimu iaghore kafe doglo fara.

Iagho fatedi koba naiknore ka puhi te doglo fara.

Gobigna lepo te edi iagho re falaseni nou namha biꞌo iagho na ka naiknore,

eghuteuna iagho tajini fabrahu nou nhaꞌa cheke na.

¹⁵Iheire te koje kilo fnakno nigho iagho gre ngala te glealeꞌa nodi na,

naugna iagho ne keli fara ranghidi, nei kaisei phile baludi.

¹⁶Iaghou ngala te faglealeꞌadire, funu hamerane posa fei grafi.

Eghuteuna mare kilo fnakno nigho eidi puhimu iagho te doglore.

¹⁷Iaghou ngala te togho ghami ghehati te tapla sorudi nomi naoka kau magra na.

Uve, iagho neke togho ghami ghehati mala uluni ghehati magra na, naugna iagho ne namha ghami ghehati fara.

¹⁸LORD God, iagho ngala te vahini naikno na te mala saghe leghu ghami ghehati na.

Uve, iagho ngala te blahi na nei iagho ngala nomi God ghehati mae Israel, nei iagho ngala teke vahini mae king te mala funei fruni ghami ghehati na.

¹⁹Tifa tifa na, iagho neke mei ka nou mae gloku te kelire neke cheke eghu ka mare ka mifi na,

“Iara neke toghoni kaisei mae sitei mala kaisei mae soldia te fnakno fara nanghagna na.

Eghuteuna iara neke vahini mana ka mare mala king.

²⁰Iara ngala teke tofa oel blahi na ka phaꞌugna nogu mae gloku Devet.

Uve, igne fagaglanagna te vahini mana te mala king na.

²¹Iara ngala te fahetani mana na,

eghuteuna nogu nolaghi iara na ginau au fabrahu balugna mana.

²²Nogna naoka mana re ginauna theome tangomana te uluni mana ka magra na,

nei mare theome tangomana te tapla soruni mana na.

²³Iara ginauna roꞌedi nogna naoka mana re,

eghuteuna iara ginauna falehedi iheire te tirodini mana re.

²⁴Nu iara ginauna namhani fara mana, nei mala kaisei phile balugna mana eghu fabrahu.

Eghuteuna iara ginauna mala toghoni mana fabrahu mala nheta mana kau magra na.

²⁵Iara ginauna tusu ranghini mana nolaghi mala funei frunidi mana naikno te au ka vido te funu ka thongna Mediterenian

tei posa ka Khoꞌu biꞌo Iufretis.

²⁶Mae Devet ginau cheke eghu ka iara, ‘Iagho nogu God iara,

nei iagho kmagu iara na.

Uve, iaghou ngala te mala saghe leghu ghau nei fakarhi ghau teu iara na.’

²⁷Mana ginau na mala jateula mae thugu teke kulu karha mei ka iara ra eghu,

eghuteuna mana ginauna mala kaisei mae nafnakno ke uludi hatimare mae king te gnafa ka nauthoglu igne.

²⁸Nogu namha biꞌo iara ranghini mana na ginauna theome gnafa,

eghuteuna nhaꞌa cheke teke eni iara ka mana ia na au fabrahu tifa tifa.

²⁹Leuleghu fata na kaisei mae ka vikegna mana na ngala te mala mae king na,

eghuteuna iara ginauna kaisei mae king ka vikegna mana igne ginauna funei frunidi fabrahu naiknogna Israel jateula maloa te au fabrahu te theome gnafa kligna ana eghu.

^30-32“Nu jame te theome leghudi mare nogu vetula iara re,

nei theome leghudi puhigu iara re teuna,

iara na thofno paradi fara ngala mare,

naugna mare ne tapla jafra ka nakhibo.

Eghuteuna jame te huhughuni mare u vetula te farirhiudi iara mare igne na,

nei jaola theome edi mare unha mala edi mare teku iara na,

iara ginauna na paradi fara ngala mare eidi nakhibo teke edi mare re.

³³Nu iara ginauna na namhani fabrahu mae Devet,

eghuteuna iara ginauna tajini nogu nhaꞌa cheke teke eni ka mana na.

³⁴Uve, iara ginauna na theome ari fadidiꞌa nogu nhaꞌa cheke balugna mana na,

eghuteuna iara ginauna na theome tuthughu kaisei glepo ka nhaꞌa cheke tuana.

³⁵Iara neke nhaꞌa chekehi ka nanghagu te blahi ne,

eghume iara theome tangomana te chaghini mae Devet.

³⁶Vikegna mana na ginauna na theome tangomana te ari te khusu na.

Uve, mare ginau au fabrahu jateula naprai te au fabrahu ka maloa na ana eghu mala king fabrahu.

³⁷Leuleghu fata na kaisei ka mare ngala nate mae king na.

Uve, mala jateula glaba te au fabrahu ka maloa na ana eghu, vike igne ginauna na jaola au fabrahu.

Eghuteuna glaba te au ka maloa na ana ngala u fagaglana gne te thofno tutuani iara na.”

³⁸Nu LORD God, mae king teke vavahi iagho ia, gognaro na iagho kela diꞌatamu ka mana.

Uve, iagho tirounihi mana, la lisa kokonihi mana.

³⁹Iagho la theome leghunihi u nhaꞌa cheke teke eni iagho ka nou mae gloku gne.

Iagho jateula te hata nogna khepi mana na te koko lao ka chopu ra eghu kolho.

⁴⁰Iagho la roꞌe soru nounihi gringni thina ka nogna namono mana na.

Uve, iagho la thofno roꞌenihi la theo tokadi vido te mala poru mana re.

⁴¹Naikno te gnafa te salaꞌu ka vido tuana, mare blau fateo nogna glepo mana re,

eghuteuna naikno te au namo teu ka mana re mare maꞌeni mana.

⁴²Iagho neke snakredi hatimare nogna mae naoka mana re mala tapla faparini mana kau magra na,

aonu gognaro na mare kelitadi fara te filoni mana te theome nheta.

⁴³Iagho neke goigonidi nogna glepo mana te mala magra re,

eghuteuna iagho snakredi hatimare nogna mae naoka mana re mala uluni mana u magra na.

⁴⁴Iagho neke hata fadeleihi nogna nolaghi mae king na ka mana,

eghuteuna iagho gognaro na theome magnahagheni hila mana te mae king na.

⁴⁵Gognaro na iagho magnahagheni mana te ghosei te mae khuekuꞌe na,

eghume mana na thofno mamaja nogna fara.

⁴⁶LORD God, iagho ginauna na poru nou fabrahu ngala sia?

Ba? Na niha fata thunu fabrahu jateula khaꞌaghi eghu si diꞌatamu iagho na ka iara?

⁴⁷Ghatho mei ghau iara sagho.

Iara gne khogla naikno kolho, eghuteuna nakarhagu iara na theome brahu kolho.

Iagho neke vuavuha ghami ghehati mala karha neku, eghuteuna ke leghu na ghehati ginauna mala kafe lehe kolho.

⁴⁸Ihei gne nate karha fabrahu te theome lehe na?

Tore, theo kaisei naikno nate rikha kokoni u glehe na.

⁴⁹Lord, aheva gne nou namha biꞌo iagho ranghi ghami ghehati gognaro na, jateula teke fakakhana iagho ka ghehati tifa ia teuna?

Lord, aheva gne nou nhaꞌa cheke iagho teke edi ka mae Devet ra?

⁵⁰God, naikno gre la cheke fapari ghau iara, thosei ghatho iho ghau iara sagho.

Uve, naikno bongihehe igre eꞌei puhi te mala thoke ghau iara na.

⁵¹LORD God, hatimare mae naoka igre mare cheke faparini mae king teke vavahi iagho igne.

Ka vido aheva te tei mana na, mare maꞌeni kolho mana.

⁵²Tahati ginauna cheke fakelini LORD tifa tifa!

Amen! Amen!

Fafati Buka

(Sam 90–106)

Sam 90

Narkarhagna naikno na theome brahu kolho, nu God na au fabrahu tifa tifa

Nogna tharai mae Moses mae nogna God.

¹Lord, funu tifa tela ghilei mei posa gognaro gne,

iaghou ngala te jateula sugami teu ghehati na.

²Tifa na kani theome vuavuha nga teku iagho nauthoglu igne nei theome vuavuha teku thogele igre teku na,

iagho neke kulu au nekuhi.

Iagho na God ngala funu tifa, gognaro gne nei nathuꞌu nauriha eghu tifa tifa.

³Kate lehe na iagho nake hata fapulo ghami ka glose mala ke vuhai nakrofu.

Uve, iagho nake atha fapulo ghami ghehati ka glose teke vuavuha ghami iagho na.

⁴Ka iagho na kaisei thogha finogha na jateula te kaisei narane eghu kolho, jateula gnora tela salaꞌu arihi eghu,

nei jateula kaisei aoa tela ghosei tela salaꞌu ari hila bongi ia eghu kolho.

⁵Iagho neke vuavuha ghami ghehati mala ghosei lehe kolho jateula khoꞌu te britha te kmerhu ghehati ra eghu.

Uve, ghehati au katha vido kmoꞌei kolho jateula mifi eghu ka nauthoglu igne.

Ghehati jateula buburu te kotu haghe majaghani hamerane ra eghu kolho.

⁶Kate biꞌo haghe te kotu chechenge buburu na,

chechenge buburu igre ginauna brango eghuteuna khoko soru pari fei grafi.

⁷Diꞌatamu iagho na goigoni ghami ghehati.

Uve, ghehati mhaghu nomi fara kate diꞌatamu iagho na.

⁸Iagho filodi kolho nakhibomi ghehati re.

Uve, neubane fariuriu pophoru ghehati nakhibomire, iagho filodi kolho.

⁹Kate diꞌatamu na, iagho fakmoꞌei arini kolho naranemi ghehati te mala au ka nauthoglu igne na.

Uve, ghehati ghosei lehe kolho jateula vido gaghafa te mei nei ghosei me salaꞌu ari teu ia eghu kolho.

¹⁰Nakarhami ghehati ka nauthoglu igne na thokeni kolho fitu salei finogha,

jame te nheta thinimi ghehati gre na, ghehati ginauna thokeni kolho nhana salei finogha na.

Neubane eghu ngau, kmana puhi nei diꞌanagnafa eghu thoke ghami ghehati.

Uve, theome raugha ngala ghehati glehemi na.

¹¹Theo kaisei naikno te filo glani u nolaghi te diꞌatamu iagho ka ghehati igne.

Naugna nou nolaghi iagho na thono biꞌo fara.

Uve, theo kaisei naikno te filo glani u namhagu nate thoke ghami ghehati kate diꞌatamu iagho ka ghehati ginauna.

¹²Falase meini sagho mala laseni ghehati te kmoꞌe kolho nakarhami gne,

mala gaoghatho fakelini ghehati eigna nakarhami na.

¹³LORD God, niha fata diꞌatamu ka ghehati sagho ia?

Kokhoni mei ghami ghehati sagho eigna ghehati gne nou naikno gloku iagho.

¹⁴Leuleghu hamerane na, falase meini sagho ka ghehati nou namha te biꞌo na.

Jame te eghu iagho na, ghehati ginauna na koje nei glealeꞌa eghu fabrahu.

¹⁵Faglealeꞌa ghami ghehati sagho,

mala ghatho ihodi ghehati diꞌanagnafa biꞌo teke thoke ghami ka finogha tifa ra.

¹⁶Ghehati gne nou mae gloku iagho, snakre ghami ghehati sagho mala filodi ghehati nou gloku biꞌo te edi iagho ra.

Uve, snakredi iheire nate karha mei ka vikemi ghehati gre mala filoni nou nolaghi biꞌo iagho na.

¹⁷LORD, iagho ngala nomi funei ghehati na.

Tusu mei sagho glepo te keli ka ghehati.

Togho mei ghami sagho ka gobigna lepo te edi ghehati gre mala edi fakeli ghehati.

Sam 91

God thofno mae te mala reireghi ghita na

^1-2God na fnakno kligna lahu nei au nolaghi biꞌo eghu.

Naikno te rouronuni LORD te mala reireghi fakelidire na cheke eghu,

“Iagho nogu God iara, eghume iara te rouronu nigho.

Iagho mala reireghi ghau nei baubatu ghau eghu iara.”

³God ginauna batu nigho ka glepo te diꞌa te poru teu, mala theome thoke nigho,

eghuteuna mana ginauna fakarhi nigho kau fogra te diꞌa nate faleheni naikno na.

⁴Mana ginauna reireghi fakeli nigho jateula khokorako gaꞌasegna te toku tafrudi thugnare ke paridi bagigna ra eghu.

Eghuteuna mana ginauna tajini nogna nhaꞌa cheke na mala reireghi nigho nei baubatu nigho eghu.

⁵Ka bongi na, iagho ginauna theome mhaghu naitu, eghuteuna ka narane na,

iagho ginauna theome mhaghudi naikno te diꞌa puhidire nate mei te falehe nigho na.

⁶Iagho ginauna theome mhaghudi naitu te mei ka naikno bongiro,

ba naitu te falehe naikno naranero.

⁷Jame kaisei thogha naikno te au rhemu iagho na, mare na uka lehe kolho ka fogra biꞌo.

Uve, jame nabotho thogha naikno te mei kegra falithui nigho na, mare na kafe lehe kolho,

nu glepo te diꞌare ginauna theome tangomana te goigoni nigho iagho na.

⁸Iagho ginauna na khogla filo tathamu kolho,

kate paradi God naikno te diꞌare.

⁹LORD na fnakno fara kligna lahu, eghuteuna, naugna te rouronuni iagho mana na, mana ginauna baubatu nigho,

nei reireghi fakeli nigho eghu.

¹⁰Eghume, ginauna na theo kaisei glepo te diꞌa fara nate goigoni nigho iagho na,

eghuteuna theo kaisei fogra te diꞌa fara nate mei namo ka sugamu iagho na.

¹¹LORD ginauna kuru meidi nogna tothoghei engel re mala reireghi nigho,

nei mala baubatu nigho eghu ka vido aheva te tei iagho na.

¹²Mare ginauna pala haghe nigho ka khamedire

mala theome tothokei iagho gahemure ka thina.

¹³Iagho ginauna tapla ke klignadi lion, nei mogo te faghughumhu.

Uve, neubane eghu ngau na theo kaisei glepo te diꞌa nate thoke nigho iagho na.

¹⁴LORD neke cheke eghu, “Iara ginauna fakarhidi iheire te namha ghau iara re.

Uve, iara ginauna batudi mare, naugna mare ne thofno chekeni te iara ngala LORD na.

¹⁵Kate kilo mei mare ka iara na, iara na cheke tughu ka mare.

Nei iara ginauna au baludi kate thoke mei puhi ka mare na.

Uve, iara na atha fajifladi ka puhi nei tusu ranghidi nafnakno.

¹⁶Iara ginauna fakarhidi nei tusu ranghidi nakarha te brahu,

mala keli tadi mare.”

Sam 92

Khoje mala kilo fnaknoni God

Khoje igne mala koje ka narane sabat.

¹LORD God, iagho thofno God te nolaghi fara, thofno keli fara te cheke fakeli nigho iara na.

Uve, thofno keli fara te cheke fakeli nigho iara ka khoje na.

^2-3Thofno keli fara iara te koje fafnakno nigho ka soasopai nafnata gita na

mala thofno cheke fajifladi puhimu iagho te keli fara re.

Leuleghu hamerane na, thofno keli fara te mala cheke fajiflani iara eigna te biꞌo fara iagho nou namha na.

Eghuteuna leuleghu grafi na, thofno keli fara te mala cheke fajiflani iara eigna iagho te tajidi nou nhaꞌa chekera.

⁴LORD God, nou gloku iagho re thofno biꞌo fara.

Uve, iara koje kilo fnakno nigho eidi glepo te edi iagho ranghi ghau iara ra.

⁵LORD God, nou gloku iagho re thofno biꞌo fara,

nei gaoghathomu iagho re jaola theome tangomana ghehati te lasedire.

⁶LORD God, iheire te theome lalase

nei iheire te edi glepo te fameomekro teu igre ginauna theome tangomana te lasedire glepo igre.

⁷Glepo igre ia eghu agne, naikno te diꞌare famane kotu haghe jateula buburu eghu,

eghuteuna naikno te edi puhi te diꞌare mare au ka nakarha te keli ka nauthoglu igne,

nu iagho ginauna roꞌedi mala theo nafudi fabrahu.

⁸Naugna, LORD iaghou ngala te mala King fabrahu te tifa te tifa na.

⁹Ghehati thofno laseni, iheire te naoka ranghi nigho iagho re, mare ginauna lehe.

Uve, iagho ginauna tapla sorudi hui naikno te diꞌare.

¹⁰Iagho tusu mei nanheta biꞌo ka iara, jateula nogna nanheta lion eghu.

Iagho neke vahi ghau iara mala thumu neku.

¹¹Iara neke filodihi te tapla sorudi God nogu naokare.

Iara neke nomhidihi kate au papara nei tanhi teu naikno te diꞌa teke magri ghau iara gre.

¹²Naikno te doglore ginau thofno keli nodi fara jateula gaju te ure sisi te kelira eghu,

eghuteuna biꞌo haghe jateula gaju sida ka namono Lebanon.

¹³Uve, mare ginau au fabrahu ka nogna Sugablahi LORD.

Eghuteuna mare ginau kegra maku fabrahu jateula gaju te karha ka famane glose te kelira eghu.

¹⁴Neuba mare ne kueku’ehi,

mare ginauna heta fabrahu jateula gaju gna tifa te maku karha te ure teura eghu.

¹⁵Igne falalase ranghi ghita eigna puhigna LORD te thofno doglo fara na,

eghuteuna jaola falalase ranghi ghita eigna God te batu ghau iara na thofno doglo fabrahu.

Sam 93

God na King

¹LORD God, iagho King!

Uve, ka nanghamu nei ka nou nolaghi eghu te King iagho na.

Iagho neke vuavuhani nauthoglu igne mala au fabrahu ka vido teke augna na mala theome ke thugha tafri.

²LORD God, kani theome vuavuha nga teku iagho thua nafnotu fateote’o ka nauthoglu igne,

iagho neke kulu King neku ngala. Iagho King fabrahu tifa tifa.

³LORD God, naogladi nhorora gre thono biꞌo fara.

Uve, thofno oa’ongha fabiꞌo fara.

⁴Nu iagho funei teu kligna na thono haghe salaꞌudi fara oa’onghadi nhorora gre.

Uve, nou nolaghi iagho na thono biꞌo salaꞌudi fara nodi nolaghi nhorora gre.

⁵LORD God, nou vetula iagho re ginauna kegra fabrahu.

Eghuteuna, nou Sugablahi iagho na thono blahi fara,

nei ginauna na au fabrahu tifa tifa.

Sam 94

God ginau fatedi naiknore

¹LORD God, iagho God mae ihei te mala paradi naikno te diꞌare.

Fakakhana sagho nou nolaghi na ka mare!

²Iagho ginauna fatedi naikno te gnafa gre.

Paradi sagho naikno te fahaehaghe are, leghuni unha najafra teke eni mare na.

³LORD God, niha fata faglealeꞌadi fabrahu nakhibodi naikno te diꞌa grea?

⁴Naikno igre huhughuni u vetula na.

Niha fata fahaehaghedi si mare puhidi te diꞌa grea?

⁵LORD God, mare goigonidi fara nou naikno iagho re.

Uve, mare para ghami fara ghehati nou naikno iagho gre.

⁶Mare falehedi naikno biꞌo tela lehehi khetodira, nei goro sua glehe kokoi gre eghu.

Uve, mare jaola falehedi naikno phosa te au balumi ghehati kau kantri igne.

⁷Mare cheke eghu, “LORD na nodi God kolho mae Israel, nu theome tangomana te filo ghita tahati na eghu.

Uve, mana theome nanga nognadi kolho unha te edi tahati gre.”

⁸Ghotilo naikno te diꞌara thono meomekro fara!

Ba! Niha fata fameomekro fabrahu si ghotilo ia?

⁹God ngala teke vuavuhadi khulida tahati gre! Ba? God na ne megli neu si ghotilo ia?

Mana ngala teke vuavuhadi tathada tahati gre! Ba? God na ne dofu neu si ghotilo ia?

¹⁰Mana ngala te paradi naiknodi kantri igre!

Ba? Na theome para ghami mana neu si ghotilo ia?

Mana ngala te mala farirhiudi naiknore! Ba? Ne theome laseni kaisei glepo mana neu si ghotilo ia?

¹¹God na thofno lasedi gaoghathodi naiknore.

Eghuteuna mana laseni gaoghathogna naikno na theo nafugna kolho teuna.

¹²LORD God, mae ihei te tusu lao iagho nou cheke na tagna nei farirhiuni nou famane farirhiu iagho re tagna teuna,

mana keli tagna fara.

¹³Eghuteuna iagho ginauna theome snakreni kaisei hoholo mala thokeni mana.

Uve, iagho ginauna toghoni mana mala au fakeli ghilei thokeni narane te mala paradi iagho naikno te diꞌa re.

¹⁴LORD na ginau theome figri tagrudi nogna naiknore.

Uve, mana ginau na theome tangomana te figri tagru ghita tahati nogna naikno mana gre.

¹⁵Eghuteuna mae mala fatere ginauna fatedi naiknore ka puhi te doglo.

Uve, kate filoni igne naikno te doglore na leghuni mana.

¹⁶God ngala te togho ghau iara na,

nei kaisei phile ka iara mala magridi naikno te diꞌare teuna.

¹⁷Eghume, jame theome togho ghau iara LORD meuna,

jau iara neke lehe hi tifa.

¹⁸LORD God, kate eha eghu iara na, “Iara gne la namo lehehi,”

nu naugna te biꞌo fara iagho nou namha na, iara gne theome tangomana te lehe na.

¹⁹Kate nanga nogu fara iara na,

iagho fakeli nagnafagu iara koba leuleghu fata na.

²⁰Iagho tiroudi fara hatimare mae funei te diꞌa fara puhidire.

Uve, iagho hongo nigho fara ka hatimare mae funei te mala eni kaisei vetula mala huhurudi naiknore mala leghuni vetula igne.

Nu vetula igne theome raꞌe keli kolho eghu.

²¹Hatimare roghe fodu ka puhi te diꞌa

mala falehedi naikno te keli re.

²²Nu LORD te noda God tahati na batu ghau iara ka vido te keli te

mala poru iara na eghu.

²³Mana ginauna paradi naikno te diꞌa puhidire.

Uve, LORD mae ihei te noda God tahati na, ginau roꞌe fahuidi eidi nakhibodire.

Sam 95

Khoje mala kilo fnaknoni God

¹Mei ghotilo, mala kilo fnaknoni tahati LORD!

Uve, mei ghotilo mala koje tahati balu gleꞌa, naugna mana ngala noda vido keli tahati na.

²Tahati tei ka Sugablahi mala cheke fakelini

nei kilo fnaknoni eghu mana ka khoje.

³Naugna LORD na thono nolaghi fara.

Uve, mana King mae ihei te au nolaghi ke klignadi god fateote’o.

⁴Funu ke lamna glose te tei posa kligna ka thogelero,

nei thua nafnotu ka nauthoglu na igre eghu au kolho ka khamegna mana.

⁵Mana neke vuavuha thonga nei moumolu la ngau eghu.

Uve, thua nafnotu igre au kolho ka khamegna mana.

⁶Ghotilo mei, mala pogho soru nei tufru soru eghu tahati ka mana.

Tahati mala tuturupuku soru ke ulugna LORD mae ihei teke vuavuha ghita.

⁷Naugna mana noda God tahati, nei reireghi ghita nogna naiknore.

Uve, mana reireghi ghita nei batu ghita jateula nogna sipu.

Gognaro, ghotilo nomhini nogna cheke na! God neke cheke eghu,

⁸“Ghotilo thosei maumaku

jateula teke edi ku’emi tifa ka namono nagou Meriba te kiloi Masah.

⁹Neuba mare ne filodi unha teke edi iara tadire,

mare fariuriu mala laseni glaula me namhadi iara ba theo.”

¹⁰Naugna igne, phiatutu finogha iara neke diꞌatagu fara neke cheke eghu,

“Naikno igre theome ghatho tahu ghau iara,

nei theome leghuni nogu vetula iara na.”

¹¹Iara diꞌatagu fara ka mare, naugna igne iara neke cheke eghu,

“Ghotilo ginauna theome tei thoke ka kantri teke magnahagheni fara te tusu ari ka ghotilo mala gnafa.”

Sam 96

God mae ihei te fnakno kligna lahu

¹Ghotilo kojeni kaisei khoje majaghani mala kilo fnaknoni LORD!

Ghotilo te gnafa ka nauthoglu igne, ghotilo koje ranghini LORD.

²Uve, ghotilo koje ranghini LORD, nei pala hagheni nanghagna mana na!

Leuleghu narane na ghotilo cheke thakleni mana, eigna mana neke fakarha ghita.

³Ghotilo cheke thakleni nogna nolaghi mana na ka naiknodi keha kantri are.

Uve, ghotilo cheke thakleni nogna gloku te biꞌo ka naikno fateote’o.

⁴LORD na fnakno kligna lahu. Uve, tahati pala hagheni nanghagna mana na.

Fnakno kligna lahu ka God fateote’o, nei tahati mala ghatho tahuni mana kolho.

⁵Nodi god naiknore theo nafudi kolho.

Uve, mare theome eni kaisei glepo kolho,

nu LORD te fnakno kligna lahu igne neke vuavuhani maloa gne baludi thua nafnotu te au ke lamnagna.

⁶Naikno te gnafare laseni te au nolaghi nei King teu mana na.

Uve, thua nafnotu fateote’o te au ka Sugablahi na re nogna mana, fagaglana gna te heta nei keli fara teu nogna nolaghi mana na.

⁷Vike te gnafa ka nauthoglu igne, ghotilo cheke fakelini LORD!

Ghotilo cheke fakelini mana eigna nogna nolaghi biꞌo mana na, nei puhigna te keli fara.

⁸Nanghagna na thofno fnakno kligna lahu, eghume ghotilo cheke fakelini mana.

Eghuteuna ghotilo tusu mei nomi fafara re ka nogna Sugablahi igne.

⁹Mana thofno blahi fara, eghume ghotilo pogho soru nei tufru soru eghu ka mana.

Te keli na ghotilo te gnafa na mala ghatho tahuni mana!

¹⁰Ghotilo cheke eghu ka naiknodi keha kantri are, “LORD na King!”

Mana neke vuavuha nauthoglu igne mala au snoto mala theome ke thugha tafri ka mala augna na.

Eghuteuna LORD ginauna fatedi naiknore ka puhi te doglo.

¹¹Maloa ghe nauthoglu igre, ghopa mala glealeꞌa nomi!

Thongna, iagho baludi thua nafnotu te au ka iagho are, ghotilo thagru fabiꞌo balu glealeꞌa!

^12-13Ghotilo nagare ra ghotilo baludi thua nafnotu te au ka iagho ra, ghotilo glealeꞌa!

Uve, thua nafnata gaju te au ka namhata na are glealeꞌa nei thagru eghu balu kilo fnaknoni LORD kate mei mana na.

Uve, mana na ginau mei mala funei frunidi naiknogna nauthoglu

igne ka puhi te keli te thofno doglo fara.

Sam 97

God na au nolaghi ke klignadi hatimare mae King

¹LORD na mae King! Naikno te gnafa ka nauthoglu igne, ghotilo glealeꞌa ka mana!

Uve, ghotilo vike te gnafara jaola kafe glealeꞌa!

²Khoveo nei gromno teura au faligohoni mana.

Mana funei frunidi nei fatedi eghu naiknore ka puhi te thofno doglo fara.

³LORD na kulu kuru fajifla khaꞌaghi

mala tei nakodi nogna naoka te au faligohoni teu mana re.

⁴Kate phae mei ka namono te gnafa re nogna nakafli na,

nauthoglu na nghali tongana jateula naikno te mhaghu te fififrira neu.

⁵Ka tathagna LORD nodi mae funei naikno te gnafa ka nauthoglu igne na,

thogelere ne blalho jateula kadele te nhaꞌa lao ka khaꞌaghi ra neu.

⁶Thua nafnotu ka maloa na are ne cheke thakleni eigna God te doglo fara na.

Eghuteuna naikno te gnafa ka nauthoglu igne filoni nogna nolaghi mana na.

⁷Iheire fateo te pogho soru nei cheke fahaehaghedi teu eidi keha god are ginau mamaja nodi fara,

naugna keha god are ginau pogho soru mala tarai kolho ka God.

⁸LORD God, naiknodi ka namono biꞌo Jerusalem nei naiknodi ka provins Juda teu igre thofno glealeꞌa fara,

naugna iagho ne paradi nodi naokare.

⁹LORD God, iagho King frunidi naikno te gnafa ka nauthoglu igne,

eghuteuna iagho thofno fnakno fara ke uludi keha god re.

¹⁰LORD na namhadi fara iheire te thono tirodini fara puhi te diꞌa na,

nei mana bara fothidi kau glehe.

Uve, mana fakarhidi ka iheire te diꞌa fara puhi dire.

¹¹God na fablahidi iheire te doglo puhidire,

nei toghodi naikno te kelire mala glealeꞌa.

¹²Puhimi ghotilo te gnafa na thofno doglo fara,

ghotilo mala glealeꞌa nei cheke fakelini LORD mae ihei te blahi.

Sam 98

God na funei frunidi naikno te gnafa gre

¹Tahati kojeni kaisei khoje majaghani mala koje kilo fnaknoni LORD,

naugna mana edi glepo te biꞌo.

Mana la uludihi nogna naokare kau magra.

Uve, mana ulu ka nogna nolaghi te blahi nei nheta fara.

²LORD na la chekenihi tela uludihi nogna naokare kau magra,

nei la fakakhanahi ka keha kantri are eigna mana te au nolaghi te fakarha ghita na.

³Mana tajini nogna nhaꞌa cheke na teke eni mana baludi nogna naikno Israel,

naugna mana thofno namha ghita fabrahu.

Naikno te gnafa ka namono te gnafa gre la lasenihi noda God tahati na

uludihi hatimare mae naoka kau magra na.

^4-6God na noda King tahati!

Eghume, tahati te gnafa ka nauthoglu igne mala kafe glealeꞌa!

Tahati mala glealeꞌa nei thagru eghu,

nei kilo fnaknoni mana ka khoje balu glealeꞌa.

Tahati mala koje ka gita, nei ifu ka khufli nei phoposa,

kate glealeꞌa nei koje kilo fnaknoni teu tahati mana na!

⁷Iagho thongna baludi thua nafnotu te au ka iagho are, ghotilo te gnafa na mala thagru fabiꞌo.

Iagho nauthoglu baludi thua nafnotu te au ka iagho are, ghotilo te gnafa na mala kafe koje.

^8-9Ghotilo khoꞌura,

ghotilo mala glealeꞌa nei proaprosa eghu.

Uve, ghotilo thogelera, ghotilo kafe khapru mei ke ulugna LORD mala koje nei kilo fnaknoni eghu mana,

naugna mana na mei mala funei frunidi naikno te gnafa ka nauthoglu igne!

Uve, mana ginauna fatedi naikno te gnafa ka nauthoglu igne

ka puhi te doglo.

Sam 99

God na fnakno fara

¹LORD na King! Kate funei fruni mana naiknore thono mhaghuni fara mana.

Mana gnokro ka nogna sape nafnakno na fari hoteidi phei engel,

eghuteuna u nauthoglu na nghali kate kilo fnaknoni mana.

²LORD na fnakno fara ke uludi naikno te gnafa ka kantri te gnafa igre.

Mana au Saion nei mana au nolaghi biꞌo.

³Kaisei God ngala te blahi na nei fnakno teuna.

Eghume, tahati te gnafa na mala kafe cheke fakelini nogna nafnakno mana na.

⁴Iagho nomi King ghehati, eigna iagho ngala te au nolaghi na.

Iagho leuleghu fata na magnahaghei puhi te doglo na.

Eigna iagho themu ngala te tusu mei puhi te doglo igne mala fateni naiknogna kantri ghehati igne.

⁵LORD mae ihei te blahi na noda God tahati.

Mana gnokro ka nogna sape nafnakno na mala funei fruni.

Eghume, tahati mala pogho soru ka mana mala tarai nei cheke fakelini eghu mana.

⁶Mae Moses ghe mae Eron, phia mare nogna mae pris God,

eghuteuna mae Samuel kaisei mae ka mae iheire neke tarai ka God.

Hatimare mae igre neke tarai ka God,

eghuteuna mana neke cheke tughudi nodi tharai mare re.

⁷Mana neke cheke mei ka mare ka kaisei khoveo biꞌo te kegra fadoglo haghe ka maloa na.

Eghume mare neke leghuni nogna farirhiu teke tusu ranghidi na neke leghuni nogna vetula mana na.

⁸LORD God, iagho nomi God ghehati,

eghuteuna iagho neke cheke tughudi nodi tharai nou naikno gre.

Neuba iagho neke paradi eidi nakhibodire,

iagho falalase ranghidi te iagho ngala God na,

mae ihei te mala atha kokodi u nakhibodire.

⁹Tahati mala cheke fakelini noda LORD God mae ihei te blahi.

Uve, tahati tarai ka mana ka nogna thogele blahi na.

Sam 100

Koje mala cheke fakelini God

Khoje mala cheke fakelini God.

¹Ghotilo naikno te gnafa ka nauthoglu igne, koje fabiꞌo ranghini LORD!

²Ghotilo mei mala pogho soru ranghini mana mala koje balu glealeꞌa!

³Ghotilo mala filo glani mana eigna LORD na mana God.

Tahati nogna mana, naugna mana neke vuavuha ghita.

Tahati nogna naikno mana te fiofilo ghita jateula nogna sipu.

⁴Ghotilo tei! Ruma ka nogna Sugablahi mana na mala cheke fakelini mana.

Uve, tahati cheke fakelini nei tegioni eghu mana.

⁵LORD na thofno keli fara, nei mana namha ghita fabrahu.

Eghuteuna nogna nhaꞌa cheke na theo ka huigna.

Sam 101

Nogna nhaꞌa cheke mae King

Nogna khoje mae Devet.

¹LORD God, iara ginauna kojeni kaisei khoje eigna puhi te magnahaghei tathaji

iara nogu nhaꞌa chekere ka iagho.

²Iara magnahaghe nigho fara te mei ka iara te

mala leghuni iara puhimu iagho te doglo na.

Gobigna lepo te edire,

iara ginauna leghudi puhi te doglo ka tathamu iagho na.

³Iara theome magnahaghedi puhidi naikno te diꞌare.

Iara ginauna na theome au baludi mare.

⁴Iara ginauna theome leghudi puhi te chaichaghire,

nei iara ginauna theome au baludi naikno te diꞌare.

⁵Iara ginauna fakmudi iheire te cheke pouporu te magnahaghei goigonidi nanghadi keha naiknore.

Eghuteuna iara ginauna khidi iheire te fahaehaghe fara.

⁶Nu iheire ngala te ghatho brana nigho re

nate au balugu iara re.

Eghuteuna iheire te doglo puhidire,

ginauna loku ranghi ghau iara.

⁷Naikno te lase cheke chaichaghi na,

iara na theome snakreni te ruma mei ka nogu suga na.

Naikno te cheke chaichaghi na,

iara na jaola theome snakreni te au balugu iara na. Thono theo fara.

⁸LORD God, leuleghu narane na,

iara na goigonidi fara naikno te diꞌa te au ka noda namono ghehati igne.

Iara ginauna khi teidi iheire te edi puhi te diꞌa fara

ka noda namono biꞌo tahati igne.

Sam 102

Nogna tharai mae ihei te au papara

Nogna tharai mae ihei te au papara nei toreni LORD mala toghoni.

¹LORD God, fanomho mei ka nogu tharai iara gne,

nei fanomhi meini nogu natanhi gne mala togho ghau.

²Kate thoke mei puhi ka iara na, mei togho ghau.

Kate eha mei iara ka iagho na, nomhi mei ghau nei faghosei mei cheke tughu ghau eghu.

³Thinigu na fobo jateula khaꞌaghi eghu,

eghuteuna iara na theome raugha lehe jateula gagahu te flalo ka nuri ia eghu.

⁴Thinigu iara na la gagaro fara la ghilei nhubragna kolho, jateula buburu tela goꞌehira eghu.

Iara la ghilei tirogu imahi gognaro na.

⁵Iara tanhi nogu fara, naugna iara gne au papara fara.

Eghume, thinigu iara ngala nhubragna kolho gognaro na.

⁶Iara jateula sua tela lelehi idogna nei kmagna ra eghu.

Iara au thegu kolho, eghuteuna theo kaisei naikno te mei togho ghau na.

⁷Iara bulhi soru, nu iara theome tangomana te thuru na.

Iara jateula kaisei naikno theo kaisei mae ba kheragna te mala tei te mala filoni ia eghu.

⁸Nogu naoka iara gre mare theome gnafa te cheke fapari ghau iara na.

Iheire te maꞌe ghau iara re atha nanghagu iara na mala eꞌei puhi mala thokedi keha naiknore.

^9-10Naugna iagho thono diꞌatamu fara ka iara, iagho koko fadelei ghau iara jateula chara eghu kolho.

Diꞌanagnafa iara te biꞌo fara na jateula ghegu gano eghu iara, eghuteuna kholodi tathagu gre jateula ghegu khoꞌu eghu iara.

¹¹Iara karhau katha vido kmoꞌei kolho, jateula naungo te namo dofini fei grafi ra eghu kolho.

Uve, iara gne jateula buburu tela brangohira eghu kolho.

¹²Nu iagho LORD God, iagho ginauna King fabrahu tifa e tifa.

Eghuteuna iheire na teke karha mei ke leghure, ginauna ghatho nigho fabrahu.

¹³Gognaro gne narane te mala kokhoni ni iagho Jerusalem na.

Thofno narane te mala phile iagho balugna mana na.

¹⁴Neuba hatimare mae nou naoka iagho gre ne mei roꞌeni namono igne, nu ghehati magnahagheni au ngala.

Uve, neuba namono igne ne diꞌahi, nu ghehati diꞌa nagnafami kolho tagna eghu.

¹⁵Naikno te gnafa ka kantri te gnafa igre ginauna ghatho tahuni LORD.

Uve, hatimare mae king ka nauthoglu na gre ginauna na jaola fafnaknoni mana eigna nogna nolaghi biꞌo na.

¹⁶LORD ginauna fatakleni nogna nolaghi biꞌo na,

kate hata fapulo ghita mala teke fapulo ka namono biꞌo Jerusalem.

¹⁷Mana ginauna nomhidi noda tharai tahati gre,

eigna tahati gne theo kaisei namonoda aheva te mala au na.

¹⁸Tahati mala rioriso soru glepo teke edi LORD re,

mala tangomana naikno na teke karha mei ke leghure te iuꞌijudi nei cheke fakelini teu mana na. Uve, tahati rioriso eghu jare,

¹⁹“LORD na au ka namonogna te blahi na kligna

mala filo soru kau nauthoglu gne.

²⁰Mana neke nomhidi noda tharai re kate au tahati kau sosolo na,

nei atha fajifla ghita kate chekeni mare ka fate na, tahati mala au ka glehe.”

^21-22Kate salo fodu mei naikno te gnafa ka kantri te gnafa gre te mala tarai ka God ka namono Jerusalem na,

mare ginauna toutonuni nanghagna mana na nei cheke fakelini eghu mana.

²³Kani kate mae majaghanigu iara na, God na la kulu lilisei fakmoꞌeihi nakarhagu iara na,

nei mana la faglaꞌe ghauhi iara eghu.

²⁴Nogu God, iagho te karha fabrahu tifa e tifa.

Snakre ghau iara mala karha fabrahu ghilei khueku’e ame lehe nga eghu.

²⁵Funu tifa te mei na, iagho ngala teke vuavuha u nauthoglu igne na,

eghuteuna iagho neke vuavuhadi maloa nei thua lepo te au ke lamnagna.

²⁶Gobigna lepo igre ginau hui, nu iagho themu ngala nate au fabrahu na.

Uve, gobigna lepo igre ginauna na theome raugha diꞌa jateula pohe tiatifa te koko teke tughu kate majaghani ra eghu.

²⁷Nu iagho na theome jateula tuana eghu, iagho na kaisei nanaba fabrahu kolho,

eghuteuna iagho ginauna na theome tangomana te lehe niha nau na.

²⁸Iagho ginauna reireghi fakelidi thumi ghehatire.

Eghuteuna iheire teke karha mei ginau ka vike ke leghudi mare re, iagho ginauna na jaola reireghidi.

Sam 103

God na magnahaghei ghita fara

Nogna khoje mae Devet.

¹Iara mala cheke fakelini nanghagna God na ka nagnafagu na.

Uve, thinigu nei nagnafagu teugre mala cheke fakelini nanghagna mana te blahi na.

²Iara mala cheke fakelini nanghagna God na,

eghuteuna iara ginauna na theome tangomana te ghatho ihodi glepo te keli teke edi mana re.

³Mana hata kokodi nakhibogu iara re,

eghuteuna fagaota fapulodi khabrugu iara re.

⁴Mana ne lolokeli ghau nei kokhoni ghau eghu iara ne hata fadelei ghau iara ka glehe.

⁵Kate au teu iara ka nauthoglu igne LORD ne kokhoni gu iara ne tusu mei glepo te nabagu iara.

Naugna igne, iara ne majaghani nogu, nei heta nogu eghu fabrahu jateula kaisei gaghata eghu.

⁶Kate filodi God naikno te au papara ke paridi mae biꞌo te diꞌa puhidire,

mana lisei haghedi ke klignadi mae biꞌo diꞌa gre.

⁷Tifa na, mana cheke thakleni nogna gaoghatho na ka mae Moses,

eghuteuna snakredi naiknodi Israel re mala filo glani nogna nolaghi biꞌo na.

⁸Puhigna God na thono keli fara, mana theome tangomana te ghosei te diꞌatagna na.

Nu mana namhadi nei kokhonidi eghu fara naiknore.

⁹Mana theome fiti diꞌatagna ka tahati, nu mana diꞌatagna kate au nafugna,

eghuteuna mana theome tangomana te diꞌatagna fabrahu ka tahati na.

¹⁰Neuba tahati ne nabada te au papara fara eidi nakhibo teke edi tahati re,

nu God tusu mei ka tahati katha vido papara ikoi kolho.

¹¹Eigna nogna namha mana ranghidi naikno te ghatho tahuni mana re thofno biꞌo fara jateula maloa kligna eghu.

¹²Ke maghati na thono khaba fara theome namo ke mosu.

Eghume jateula tuana eghu God koko tei delei nakhiboda tahatire ka vido aheva te khaba fara.

¹³God na jateula tahati te kokhonidi thudara eghu e kokhoni ghita tahati naikno te ghatho tahuni mana na.

¹⁴God lase ghita tahati te theo noda nolaghi theda na.

Eghuteuna ka gaoghathogna mana na, tahati gne khogla glose kolho.

Naugna mana neke hata glose neke vuavuha ghita tahati.

¹⁵Nakarhada tahati naikno na kmoꞌe fara jateula buburu eghu,

ba jateula keha nafnata sisi te kotu haghe te biꞌo ka nagare ra eghu kolho.

¹⁶Nu kate mei nabranagna nuri na naꞌa na brango na lehe eghuteuna, tahati ginauna na dofi nodani.

Eghume tahati naikno na jateula tuana eghu na ghosei dofi ghita kolho.

^17-18Nu God namha ghita tahati iheire te ghatho tahudi

nei leghudi teu fabrahu nogna chekere.

Eghuteuna mana ginauna na jateula tuana eghudi fabrahu thuda

nei grada teu tahati te karha mei thogheiro re.

¹⁹LORD, mae ihei te gnokro teu ka sape nafnakno kligna na,

mana ngala te funei frunidi gobigna lepo te au ka nauthoglu igne ba ka maloa kligna.

²⁰Ghotilo engel, mae te nheta nei nolaghi teu te leghudi nei fanomho teu ka nogna cheke mana ra,

ghotilo cheke fakelini mana!

²¹Ghotilo nogna naikno gloku God te au kligna te edi unha te magnahaghedi mana ra,

ghotilo cheke fakelini mana!

²²Ghotilo gobigna lepo teke vuavuha ghami LORD te au heva heva te funei fruni ghami mana ra,

ghotilo cheke fakelini nanghagna mana na!

Iara jaola cheke fakelini nanghagna mana na!

Sam 104

Khoje mala cheke fakelini God mae ihei teke vuavuhadi gobi nafnotu fateote’o

¹Leuleghu fata na iara magnahaghei te cheke fakelini LORD!

Iagho nogu LORD God. Iagho te fnakno fara.

Iagho kegra funei ka nou nafnakno nei ka nou nolaghi.

²U naphae te au faligoho nigho ana fagaglana gna nou nolaghi biꞌo iagho na.

Iagho lilisei haghe u maloa na jateula kaisei suga thapuale eghu.

³Eghuteuna iagho neke hohoro nou suga na ka maloa.

Iagho neke eꞌei grokho na mala jateula nou chariot eghu, mala saghe kate gaghafa teu nuri na.

⁴Iagho eꞌei nuri na mala jateula nou engel eghu te mala athadi nou chekere,

nei eꞌei fila na mala jateula nou mae gloku eghu.

⁵Iagho neke hohoro famaku mala makugna nauthoglu igne,

eghuteuna u nauthoglu igne ginauna theome tangomana te thugha na.

⁶Ulu lahu na iagho neke vuavuha nhorora mala thafru nauthoglu igne.

Uve, u thogele gre langau eghu.

⁷Nu kate cheke faheta iagho na, u nhorora na neke kgnao soru pari.

Uve, kate nomhini chekemu iagho te jateula kaisei fila teuna, u nhorora na ne tei delei fara.

⁸U thongna na ne kgnao soru pari funu kligna ka thogelero mala soru au pari ka gloharo.

Uve, neke tei ka vido aheva teke kulu tarabana teku iagho te mala augna na.

⁹Iagho neke kulu lilisei nohi te

mala mei snotogna na mala theome mei ke thafrui nauthoglu igne.

¹⁰Iagho neke eꞌei glokha mala fura mei khoꞌu ka gloharo,

nei khoꞌu biꞌo mala loloro soru fari hotei thogele.

¹¹Tothoghei dongki te mhaumhaghu nei keha glepo

te tautagu fateo eghu tangomana te mei te koꞌu ghedi.

¹²Tothoghei nanghaji te mei te uareghe ka gaju te au ka geri khoꞌu,

te koje nodi koba.

¹³Iagho kuru mei nakhete funu kligna mala soru mei ke kligna thogele

mala fakeligna glose na mala karha gobigna lepo teke vuavuha iagho re.

^14-15Iagho neke eni neke kotu buburu gre mala ghamu buluka,

nei gano malagna naikno.

Aonu naiknore ne au ghedi waen nei oliv oel te mala keli thinidire nei bret mala ima te nheta na.

¹⁶Nogna gaju sida LORD na kotu Lebanon,

eigna jare na kmana nakhete te mala faboubothudire.

¹⁷Nanghajire mei hohoro nodi gnoku ka gaju tuare.

Uve, nanghaji biꞌore jaola mei hohoro nodi gnoku ka gaju biꞌo te au ka vido tuana.

¹⁸Tothoghei nanigot re au ka thogele kligna,

nei gauhare poru ka khora thina ka thabafe te ninhigrana fara.

¹⁹LORD God, iagho neke vuavuha glaba na mala laseni nhigra na,

eghuteuna naprai ne la lasenihi vido te mala plulugna na.

²⁰Iagho neke faromnoni bongiro na,

aonu thua nafnotu te tautagure jifla mei ka nodi vido te mala poru re.

²¹Sua lion re nguru fabiꞌo ka vido aheva te tei hiro gano na.

Uve, reꞌe hiro ra ghedi gano teke tusu ranghidi iagho re.

²²Nu kate phage haghegna naprai na,

lion igre nake pulo neke thuru ka mala audire.

²³Naiknore tei edi nodi glokure ghilei rafi.

²⁴LORD God, iagho edi kmana glepo fara.

Gobigna lepo igre falalase puhimu iagho te thofno keli fara na.

Uve, nauthoglu igne fodu ka thua nafnotu fateote’o teke vuavuha iagho gre.

²⁵Iagho neke vuavuha kmana glepo ke lamnagna nhorora igne.

Glepo igre thono kmana fara eigna theo kaisei naikno te kahadire.

Kehare biꞌo, nei kehare ikodi kolho.

²⁶Vakare tei tei ke kligna nhorora.

Eghuteuna u vuavula teke vuavuha iagho igne tao tafri ke lamnagna nhorora igne.

²⁷Kate rofo na, glepo igre filo ari ka iagho te mala fei ghedi na.

²⁸Uve, glepo igre thono keli tadi fara kate fei ghedi iagho re.

²⁹Nu kate theome fei ghedi iagho na,

rehati na rofo fara.

Eghuteuna kate atha fadelei iagho tadi u nuinuri na,

rehati na lehe, nake pulo ka glose teke vuavuhadi iagho gne.

³⁰Nu kate phanga lao iagho ke klignadi na, rehati na karha.

Leuleghu fata na iagho vuavuha thua nafnotu fateote’o gre ka glose mala karha majaghani.

³¹Jame te keli na nogna nolaghi biꞌo God igne mala au fabrahu tifa e tifa.

Uve, keli fara te keli tagna God ka unha teke vuavuha mana re.

³²Kate filo soru mana kau nauthoglu igne na, glose na ne nghali jateula nakheu neu.

Uve, kate habo lao mana ke klignadi thogelere, gagahu na jifla mei jateula khaꞌaghi eghu.

³³Iara ginauna koje kilo fnaknoni fabrahu nogu LORD God na ka nakarhagu na.

Uve, iara ginauna koje kilo fnaknoni mana ghilei lehe.

³⁴God na faglealeꞌa ghau fara iara,

eghuteuna iara magnahagheini mana te keli tagna ka nogu gaoghathore.

³⁵Jame te keli na mana goigonidi mala theo nafudi kolho naikno te diꞌa ka nauthoglu igne,

mala theo ngala kaisei naikno ka mare te karha na.

Iara magnahaghei fara te kilo fnaknoni LORD fabrahu!

Uve, iara mala kilo fnaknoni mana!

Sam 105

Nogna namha biꞌo God ranghidi nogna naiknore.

¹Tahati tegioni LORD! Uve, tahati kiloni nanghagna mana na.

Eghuteuna tahati toutonu ranghidi naiknodi keha kantri are unha te eni LORD na.

²Tahati koje mala kilo fnaknoni mana.

Uve, tahati mala toutonudi glepo biꞌo teke edi mana re.

³Tahati te hui na mala pala hagheni nanghagna LORD.

Tahati glealeꞌa, naugna tahati pogho soruni mana.

⁴Tahati ari namo ka LORD mala togho ghita mana, nei mala pogho soruni mana fabrahu.

^5-6Tahati gne, karha mei ka vikegna mae Ebraham, nogna mae gloku LORD.

Eghuteuna tahati jaola karha mei ka vikegna Jekop, mae ihei teke vavahi God.

Tahati mala ghathodi koba u kofubobhoi teke edi mana ra,

nei puhi te fatedi mana hatimare mae naokara.

⁷LORD na noda God tahati.

Eghuteuna mana funei frunidi naikno te gnafa ka nauthoglu igne.

⁸U nhaꞌa cheke teke eni mana ka tahati igne, ginauna au fabrahu.

Uve, mana ginauna tajini fabrahu u nhaꞌa cheke teke eni mana ka tahati te gnafa igne nei mala dila iheire la ngau nate karha mei teu ke leghuda tahati thogheiro.

⁹U nhaꞌa cheke teke kulu eni mana balugna mae Ebraham igne mana neke enila balugna mae Isak, eghuteuna mana na tathaji fakeli u nhaꞌa cheke igne.

¹⁰Ke leghu na, mana neke enila u nhaꞌa cheke igne balugna mae Jekop, eghuteuna u nhaꞌa cheke igne ginauna theo ka huigna.

¹¹Mana neke cheke eghu ka mae Jekop, “Iara ginauna snakre ari ka iagho namono Kenan ana, eghuteuna vikemu iagho re ginauna nate ke khotogna na.”

¹²Nu ka narane tuare, kuꞌeda tahatire neke theome kmana nga teku, eghuteuna mare neke theome au ka kaisei vido ngala ka kantri tuana.

¹³Leuleghu fata na mare tugha tafri leuleghu namono neke theome au snoto ka namonodi na,

mare jifla ka keha nohi na mala tei ka keha nohi na eghu tafri kolho.

¹⁴Nu LORD na neke theome snakreni ihei te mala tapla sorudire,

nei cheke faheta ranghidi hatimare mae king mala thosei roꞌedi neku.

¹⁵Mana neke cheke eghu ka hatimare mae king,

“Ghotilo thosei goigonidi naikno teke vavahi iara igre,

nei ghotilo thosei eni kaisei glepo te diꞌa ka nogu mae mala cheke iara igre eghu mae Ebraham, mae Isak nei mae Jekop.”

¹⁶LORD na neke lilisei kaisei vido te ninhigrana mala theo gano ka kantri mare na,

nei mana neke jaola neke fabehudi mare.

¹⁷Nu mana neke hohoro kaisei nabrou maladi mare neke kuru teini kaisei mae mala kulu tei Ijep.

Nanghagna na, mae Josep. Mare neke kuru teini mana mala jateula kaisei mae sneka eghu jare.

¹⁸Ka suga sosolo jare Ijep, mare neke haruni mana ka chen ghahegnare,

aonu mare neke lisei lao kaisei aean ring ka graragna na.

¹⁹Aonu mae Josep au neu jare ne ghilei thokeni u cheke teke eni mana ka keha mae sosolo na ne horoghoto tutuani.

Nogna cheke LORD eigna vido te ninhigrana te theo gano na, ne thofno laseni te cheke tutuani mae Josep na.

²⁰Aonu mae king gna Ijep, mae ihei te funei frunidi naikno kmana na

ne atha fajiflani mae Josep ka suga sosolo.

²¹King neke naꞌini mana ka sape nafnakno mala kaisei mae biꞌo,

mae ihei te mala reireghidi nogna thua nafnotu fateote’o re Ijep.

²²Mae Josep ne fnakno fara ke uludi hatimare mae funei,

nei cheke ranghidi mala eni mare unha te magnahagheni mana na.

²³Ke leghu na, mae kmagna na

ne soru baludi mae thugnare ne au Ijep.

²⁴LORD ne fathovudi ne bruara fara neu jare.

Mana ne fanhetadi mala theome tangomana hatimare mae naoka te tapla sorudire.

²⁵LORD ne faꞌeiꞌeidi naiknodi Ijep mala susukudi nogna naiknore.

Mare hiro phoge te mala paradi nogna naikno mana re.

²⁶Aonu LORD ne kurudi mae Moses ghe mae Eron,

phia mae teke vavahi mana re mala tei Ijep.

²⁷Phia mare ne edi kmana fagaglana ka naiknore,

nei phia mare edi kmana kofubobhoi jare.

²⁸LORD ne kuru soruni u gromno na ne toku tafruni kantri thongana na,

nu naiknodi Ijep re ne tirodi leghudi kolho nogna cheke mana re.

²⁹Aonu, mana figri khoꞌu na neke vuhai dadara,

eghuteuna ghedi sasa teke au ka khoꞌure ne kafe lehe.

³⁰Vido te gnafa heva heva ka nodi kantri mare na ne fodu ka groma.

Neubane sugagna mae king fodula ka groma.

³¹LORD na cheke kolho,

eghuteuna khakaramahe nei khare teure ne fodu ka vido te gnafa ka kantri tuana.

³²Mana neke theome snakreni thofno nakhete na neke soru mei ka maloa na,

nu mana neke snakre mei nakhete thina aes nei nakafli neku neke soru mei ka namono na.

³³Phei glepo igre neke thofno goigoni grep nei fig teure.

Phei glepo igre neke jaola neke rorofo fahui gaju te gnafa ka vido tuana.

³⁴Mana neke cheke kolho,

eghuteuna chechere ne ke mei.

Theome tangomana kaisei naikno te kahadire.

³⁵Cheche igre ghamu fateo gobigna lepo teke joꞌu mare ka nagare re,

baludi langau keha nafnata glepo te karha tafri ka namono na.

³⁶Aonu LORD ne falehedi goro sua nalhaꞌu teke kulu karha ka tharakna te gnafa Ijep.

³⁷Mana neke batu fajifladi naiknodi Israel re mala jifla Ijep tei balu nodi silva nei gol.

Mare te hui na kafe keli kolho, theo kaisei te fogra na.

³⁸Naiknodi Ijep re ne keli tadi fara kate jifla naiknore,

naugna mare thono mhaghu nodidi fara ka naiknodi Israel re.

³⁹God ne lilisei kaisei khoveo mala reireghidi nogna naiknore,

eghuteuna ka bongiro na mana lilisei kaisei khaꞌaghi biꞌo mala faphaedi.

⁴⁰Mare neke tore gano ka mana, aonu mana neke tusu ranghidi nanghaji te mala ima na.

Mana neke tusu ranghidi bret gna kligna na neke ima neke boho mare.

⁴¹Mana neke eni khoꞌu na neke jifla mei ka thina biꞌo na.

Khoꞌu na jateula khoꞌu biꞌo neu ne tei posa ka namono nagou te khapra fara na.

⁴²LORD na theome ghatho ihoni nogna nhaꞌa cheke te blahi

teke eni tifa ka mae nogna gloku Ebraham.

⁴³Aonu God ne batudi nogna naiknore ne tei.

Mare ne koje nei eha eghu ne tei, naugna mare ne glealeꞌa fara.

⁴⁴Mana ne snakre lao nodi glose keha naiknore ka nogna naikno thegnare,

nei mare jaola hata maladi thedi nagare re.

⁴⁵Mana neke eni igne ka nogna naiknore mala leghudi mare nogna vetulare.

Eghuteuna mare ne leghudi nogna farirhiu mana re.

Tahati kilo fnaknoni LORD!

Sam 106

God na keli fara ranghidi naiknore

¹Tahati kilo fnaknoni LORD!

Tahati tegioni mana, naugna mana thofno keli fara.

Uve, mana namha ghita fabrahu.

²Ihei gne te nabagna te mala toutonudi glepo te keli te edi LORD re?

Ihei gne te nabagna te mala kilo fnaknoni nanghagna na ka puhigna thegna te keli na?

Thono theo fara!

³Iheire te leghudi nogna cheke,

nei iheire te edi glepo te doglo re eghu, mare keli tadi fara.

⁴LORD God, ghatho ghau ka vido te mei iagho te toghodi nou naiknore.

Uve, ka vido te mei iagho te mala fakarhidi re, iagho jaola mei fakarhi ghau iara.

⁵Jame te eghu na, iara ginauna filoni nakarha te keli na ka nou naikno iagho re,

nei iara ginauna tangomana te glealeꞌa baludi.

Uve, mala tangomana ghau iara te mala kaisei baludi te mala kilo fnaknoni nanghamu iagho na.

⁶Tahati gne au nakhiboda jateula ku’eda tifa ra eghu.

Uve, tahati neke leghudi puhi te diꞌare neke edi glepo te diꞌare.

⁷Tifa, kani au teku Ijep mae kuꞌedara,

mare neke theome filo glanidi u kofubobhoi teke edi God ra.

Uve, kmana fata mare ghatho ihodi kolho puhi teke fakakhana mana nogna namha te biꞌo na ka mare ra.

Mare neke figri tagruni mana ka Thongna Ukru na.

⁸Nu LORD neke fakakhana ka mare nogna nanheta na neke fakarhidi,

leghuni nogna nhaꞌa cheke na.

⁹Mana neke cheke ranghini kolho u Thongna Ukru na,

aonu thongna na ne jateula glose te khapra neu kolho, ne batudi nogna naiknore ne kasa ka keha phile na.

¹⁰Mana neke fakarhidi nogna naiknore.

Uve, mana neke atha fajifladi ka khamedi mae naokare.

¹¹Mae naoka igre neke kafe knoho neke lehe ka khoꞌu,

theo kaisei ka mare te karha na.

¹²Aonu nogna naiknore ne fatutuanidi nogna nhaꞌa cheke mana re,

ne koje kilo fnaknoni mana.

¹³Nu theome raugha kolho mare neke ghatho ihodi kolho unha teke edi God re.

Eghuteuna mare tirodi ofoni te mala laseni unha te magnahagheni God te mala eni mare na.

¹⁴Kate au teu mare ka namono nagou na, mare neke rofo fara,

aonu mare neke tore gano ka God mala fariuriuni mana.

¹⁵Aonu mana ne tusu ranghidi unha teke magnahagheni mare na.

Nu mana jaola neke tusu ranghidi kaisei fogra te thono diꞌa fara.

¹⁶Jare ke lamnagna namono nagou na, keha mae ka mare ne goghotudi fara mae Moses

ghe mae Eron, nogna mae pris LORD na.

¹⁷Aonu ka narane tuare, glose na ne diha ne thafru mae Datan ghe mae Abiram baludi vikedi

nei iheire eghu teke leghudi phia mare re.

¹⁸God ne kuru soruni khaꞌaghi na ke klignadi naikno teke leghudi phia mare re ne nhako ne theo tokadi.

¹⁹Ka Thogele Sanai,

mare neke hohoro kaisei mumuju buluka ka gol neke pogho soru tagna.

²⁰Mare neke tughu nodi God te fnakno fara na ka mumuju gna buluka te ghamu buburu na ne tarai tagna.

Ka puhi igne mare thofno tapla faparini nanghagna God na.

²¹God na neke edi glepo te biꞌo fara Ijep, neke fakarhidi mare,

nu mare neke theome ghathoni mana kolho eghu.

²²Kofubobhoi teke edi God Ijep ra thono biꞌo fara, eghuteuna glepo teke edi mana ka Thongna Ukru ra,

thono glepo mala jaglo nodi fara, nu mare theome ghathoni mana kolho eghu.

²³Aonu te chekeni God na, mana ginauna roꞌedi nogna naiknore.

Nu mae Moses, mae ihei teke vavahi thegna LORD na ne theome magnahagheni gaoghathogna God na.

Aonu mana ne kegra ke ulugna God ne fanograni te diꞌatagna mana ka naiknodi Israel re.

²⁴Nu ke leghu na mare ne tirodi fara te tei posa ka famane kantri Kenan,

naugna mare neke theome fatutuani ni nogna nhaꞌa cheke God na.

²⁵Mare au neu ka nodi suga thapuale re ne cheke buiburini God,

ne tirodi leghuni mana.

²⁶Aonu mana ne eni kaisei cheke te thono nheta fara te

mala lehe mare ke lamnagna namono nagou na.

²⁷Eghuteuna mana ginauna brue fajifladi iheire nate karha mei ka vikedi mare thogheiro mala tei au tafri farihoteidi naikno te bongihehere,

nei lisa laodi mala tei lehe mare ka keha kantri delei.

²⁸Naugna mare ne kegra fodu baludi naikno khulumono re mala tarai ka mumuju Baal ka thogele Pio.

Mare ne kafe ima nafnahi teke fafara naiknodi Pio re ka mumuju te theo karha tagna na.

²⁹God ne thono diꞌatagna fara ka unha te edi mare igre, aonu kaisei fogra te thono diꞌa fara ne thokedi mare.

³⁰Nu mae Finihas ne kegra haghe ne falehedi phei mae teke baubatugna puhi tuana, aonu fogra tuana ari ne khusu.

³¹Funu gognaro te haghe na famane puhi te doglo te nomhini tahati teke eni mae Finihas igne,

naikno nate karha mei thogheiro re na theome ghatho ihoni.

³²Kate au teu mare ka khoꞌu Meriba na, LORD neke thono diꞌatagna fara ka naiknore,

aonu mae Moses ne nhotei ka puhi, naugna eidi unha teke edi naiknore.

³³Mae Moses ne thono diꞌatagna fara ka naiknore ne cheke ne ghilei theome doglo nogna cheke re.

^34-35God neke cheke ka nogna naiknore mala falehedi naikno te bongihehere.

Nu naiknore neke theome leghudi kolho neke tolaghi ngala ka naikno te bongihehere,

nei jaola leghudi nodi kastom mare re.

³⁶Mare tarai ka mumuju.

Eghuteuna naiknore ne kafe khale ka puhi te jateula phighoro teu igne.

³⁷Mare ne falelehe thudi nalhaꞌu

nei gaꞌase teure ne fafara ka mumuju.

³⁸Uve, mare neke falelehe neke fafara lao famane suare ka mumuju.

Ka puhi igne nodi kantri mare na ne thono diꞌa fara ka tathagna God na.

³⁹Uve, ka puhi igne na mare fathonadi fara thedi ka tathagna God na,

nei figri tagruni nei theome leghuni eghu nogna nhaꞌa cheke mana na.

⁴⁰Aonu LORD ne thono diꞌatagna fara ne tirognadi nogna naiknore.

⁴¹Mana ne lisa laodi ka khamedi naikno te bongihehere

mala au ke paridi mae nodi naokare.

⁴²Hatimare mae naoka gre ne paradi fara

mare ne ghilei kokhonidi fara.

⁴³Kmana fata, God neke fakarhidi,

nu leuleghu fata na mare vahini kolho puhi te mala figri tagruni mana na,

naugna mare au ka nakarha te fodu ka nakhibo.

⁴⁴Nu kate tanhi lao mare ka mana na, mana nomhidi mare ne kokhoni nognadi,

naugna mare ne au fari hotei hoholo.

⁴⁵Mana kokhoni nognadi fara neke ghatho fapuloni nogna nhaꞌa cheke na,

neke figri gaoghathogna na.

⁴⁶Mana neke fifigri gaoghathodi mae naoka te funei frunidi nogna naiknore mala kokhonidi.

⁴⁷LORD, iagho nomi God ghehati! Fakarhi ghami nei atha fajifla ghami eghu khamedi naikno bongihehe gre.

Atha fafigri ghami ka namonomi ra.

Te eghu na, ghehati ginauna tegio ka iagho,

nei ghehati na cheke fakelini nanghamu iagho te blahi na.

⁴⁸Tahati cheke fakelini LORD, mae ihei te noda God tahati naiknoda Israel!

Uve, tahati cheke fakelini mana gognaro gne nei tifa tifa!

Ghotilo te hui na cheke eghu, “Amen!”

Cheke fakelini LORD!

Falima Buka

(Sam 107–150)

Sam 107

Tahati thofno gleale’ani puhigna God te keli

¹Tahati tegio ka LORD, naugna mana thofno keli fara!

Uve, naugna mana namha ghita fabrahu!

²Tahati naikno teke atha fapulo ghita LORD ka khamedi hatimare mae naoka ra,

tahati kafe pala hagheni nanghagna LORD.

³Mana neke atha fapulo ghita ka kantri ke maghati, ke mosu,

ke raru nei ke mata, mala ke pulo ka noda kantri igne.

⁴Keha ka tahati tei tafri ka namono nagou te theo nabrougna na,

eghuteuna mare theome tangomana te filo deni kaisei namono biꞌo te mala au tagna na.

⁵Mare rofo nei roi koꞌu, aonu, mare ne glaꞌe soru gaoghathodire.

⁶Kate au teu mare ka hoholo na, mare tanhi lao ka LORD mala toghodi.

Aonu mana ne fakarhidi ka thua hoholo fateote’o.

⁷Mana neke baubatudi neke tei ka kaisei nabrou te doglo,

neke ghilei tei posa ka kaisei namono biꞌo aheva te mala au fakeli mare tagna na.

⁸Eghume, mare ne tegioni God eigna nogna namha biꞌo mana ranghidi mare na,

nei eidi glepo te biꞌo teke edi mana te toghodi mare re.

⁹Mana neke tusu lao khoꞌu ka iheire te roi koꞌu fara,

nei tusu lao gano te keli ka iheire te rofo, mala boho nei glealeꞌa eghu mare.

¹⁰Kehare neke haru mare ka chen neke au ka suga sosolo te thono romno fara na.

¹¹Naugna mare neke thono figri tagruni fara chekegna God na,

nei tirodi fanomho ka nogna farirhiu God mae ihei te thofno fnakno fara na.

¹²Mare glaꞌe fara ne uka pari eigna mare neke loku heta fara.

Nu theo kaisei naikno te toghodire.

¹³Kate au teu mare ka hoholo na, mare tanhi lao ka LORD mala toghodi.

Aonu mana ne fakarhidi ka thua hoholo fateote’o.

¹⁴Uve, mana neke kukusu chen teke au ka thinidire ne atha fajifladi ka suga sosolo te romno fara na.

^15-16Mana neke fadidiꞌa grengathagna suga sosolo teke hohoro mare ka bras na, nei lolhopa aean teke loku mare na.

Uve, mana neke atha fajifladi hui.

Eghume mare tegioni nogna namha biꞌo God na, nei glepo te biꞌo teke edi mana teke toghodi mare na eghu.

¹⁷Keha ka tahati fogra ne au papara fara,

naugna mare ne meomekro fara ne edi puhi te diꞌare.

¹⁸Mare tirodi ima ne namo lehe kate fogra te au papara na.

¹⁹Kate au teu mare ka hoholo na, mare tanhi ka LORD mala toghodi.

Aonu mana ne fakarhidi ka thua hoholo fateote’o.

²⁰God neke cheke ranghidi neke keli fapulo thinidire.

Uve, mana neke fakarhidi kau glehe.

²¹Eghume, mare ne tegioni God eigna nogna namha biꞌo mana ranghidi mare na,

nei eidi glepo te biꞌo teke edi mana te toghodi mare re.

²²Mare fafara mala tegio ka mana,

mare mala toutonu ka khoje glealeꞌa eidi thua nafnotu teke edi mana re.

²³Eghuteuna keha ka tahati loku ka vaka.

²⁴Mare la filodihi unha te edi LORD re.

Nei mare lasedi fara glepo biꞌo teke edi mana ka thongnare.

²⁵Kate cheke mana na,

u nuri biꞌo na neke mei neke malu nhorora na.

²⁶U maraghata na neke pala haghedi vakare kligna, eghuteuna ke koko sorudi pari neku neke namo lodu.

U maraghata igne faglaꞌedi fara gaoghathodi mae te loku ka vakare.

²⁷Mare neke khoko soru pari neke phili tafri pari ka vaka na jateula mae te dranga ra neku neke theome tangomana te

mala eni kaisei glepo te mala toghoni u vaka na.

²⁸Kate au teu mare ka hoholo na, mare tanhi lao ka LORD mala toghodi.

Aonu mana ne fakarhidi ka thua hoholo fateote’o.

²⁹Mana neke cheke ranghini nuri na mala snoto,

nei thongna na ne muana.

³⁰Mare neke keli tadi fara kate muana thongna na,

eghuteuna God neke batudi mare neke tei thoke ka vido aheva te mala tei mare na.

³¹Eghume, mare ne tegioni God eigna nogna namha biꞌo mana ranghidi mare na,

nei eidi glepo te biꞌo teke edi mana te toghodi mare re.

³²Mare kilo fnaknoni mana ke uludi naiknore

nei cheke fakelini mana kate haidu hatimare mae biꞌo.

³³God na tangomana te fakhapradi khoꞌu biꞌore,

eghuteuna glokha re theome tangomana teke loloro na.

Aonu glose na mojani theo tokagna.

³⁴Eghuteuna mana na edi glose igre

mala fodu ka solt mala theo kaisei glepo te kotu jare na.

Naugna naikno te au ka vido tuana ra ne diꞌa fara puhidire.

³⁵God neke vuavuha khoꞌu mala jifla mei lamna khora ke lamna namono nagou,

nei glokha mala loloro tei ka vido te moja.

³⁶Mana neke snakredi naikno te rofo re mala au ka vido tuana,

nei mala ei nodi namono biꞌo mala au jare.

³⁷Mare tobi neke joꞌu grep.

Aonu mare neke au ghedi kmana gano nei sisi eghu ka nagare.

³⁸Mana fablahidi koba naiknore,

mala vuragha e thovu nei mala kmana nodi buluka eghu.

³⁹Kate tapla fapari ghita noda naokare kau magra na,

mare fakokhoana ghita nei para ghita eghu fara tahati.

⁴⁰Nu kate eni mare igne na, LORD na ne kakhana nogna nolaghi na ka mare eigna mana te theome magnahaghedi mare te goigoni ghita tahati na.

Aonu mana neke fanonolodi mare ka namono nagou na, eigna jare na theo kaisei nabrou te mala leghui na.

⁴¹Nu mana neke fakarhi ghita tahati naikno te kuma gre ka hoholo.

Eghuteuna mana toghodi tharaknada tahati gre mala au kmana sua.

⁴²Kate filodi glepo igre naikno te doglore, mare ne thono keli tadi fara.

Nu kate filodi naikno te diꞌare glepo igre, mare neke theome gagri kaisei cheke ne faꞌikodi.

⁴³Ihei te au tagna glalase te keli na, ginauna ghathodi glepo igre.

Mana ginauna ghathoni fabrahu eigna nogna namha biꞌo LORD ranghi ghita tahati na.

Sam 108

Tharai mala toreni God mala toghodi nogna naiknore

Nogna khoje mae Devet.

¹God, iara au nogu fatutuani biꞌo fara ka iagho!

Eghume, iara ginauna koje nei kilo fnakno nigho eghu iagho!

Gognaro na iara dofra haghe!

²Ghotilo nogu ghita iara ra, dofra haghe!

Iara ginauna fadofrani naprai gne!

³LORD God, iara ginauna tegio nigho ka tathadi keha naikno are.

Uve, iara ginauna koje mala kilo fnakno nigho ka tathadi naikno ka keha kantri are.

⁴Puhi te namhadi koba iagho naiknore thono haghe fara, uve, haghe tei posa kligna ka maloa gno.

Puhimu iagho te tajidi koba nou nhaꞌa cheke gre thono haghe fara, uve, thono haghe fara tei posa kligna ka khoveo gno.

⁵Iara magnahaghedi naiknore te pala hagheni kligna nanghamu iagho na mala tei e salaꞌuni maloa gne.

God, fakakhana sagho nou nolaghi te biꞌo na ka namono te gnafa ka nauthoglu igne.

⁶Iagho namha ghami fara ghehati, eghume, fakarhi ghami ghehati sagho ka nou nolaghi biꞌo na,

nei cheke tughu meidi nomi tharai gre, mala au fakeli ghehati.

⁷God au neu ka nogna Sugablahi na ne cheke eghu,

“Kate uluni iara magra na, iara ginauna fofota Sekem gne

nei glogu Sukot gne eghu ka nogu naiknore.

⁸Nohi Gilead ghe Manase igre nogu iara.

Nohi Efrem te jateula khepi mala magra teu igne

nei nohi Juda te jateula nogna khodo mae King teu igne iara te loulokugna na.

⁹Eghuteuna kantri Moab te jateula dis teu igne mala dadalu nogu iara,

iara ginauna koko lao nogu slipa na ka kantri Idom, tuana fofotagna vido aheva te nogu iara na.

Iara eha fabiꞌo naugna iara ne ulunihi kantri Filistia.”

¹⁰God, ihei gne nate batu ghami ghehati te mala tei ka kantri Idom?

Ihei gne nate atha ghami ghehati te mala tei ruma ka nodi namono biꞌo mae te nheta fara re?

¹¹Ba? Iagho la figri tagru ghami ghehati hila tutuani sia?

Ba? Iagho tirou tei ka magra baludi nomi armi ghehati gre sia?

¹²Togho ghami ghehati sagho mala magra ghehati ka mae naoka gre,

naugna nodi thotogho naiknore theo nafudi kolho.

¹³Kate au teu God baluda tahati na,

tahati ginau ulu gheda, naugna mana tangomana te uludi noda naoka tahati re.

Sam 109

Nogna tharai mae ihei te thokeni hoholo

Khoje mae Devet malagna mae kwaemasta.

¹God, iara kilo fnakno nigho koba!

Thosei au kmu, filo mei kolho ka iara sagho!

²Naikno te diꞌa nei mae te chaichaghi teu igre mare cheke fapari ghau iara.

Mare cheke chaichaghi koba eigna te mala goigoni ghau kolho iara na.

³Eghuteuna mare edi ranghi ghau iara kmana nafnata cheke te diꞌa,

nu iara theome eni kaisei puhi te diꞌa ranghidi mare.

⁴Neuba iara ne namhadi nei tarai neu koba baludi,

mare magnahaghei te cheke fapari ghau iara koba ngala.

⁵Neuba iara ne edi glepo te keli koba ranghidi, mare edi ngala glepo te diꞌare ranghi ghau iara.

Iara namhadi mare, nu mare tirodi ghau iara kolho. Naikno te diꞌa igre cheke eghu ka iara:

⁶“Tahati na vahini kaisei mae te diꞌa mala cheke fadiꞌani mae igne,

eghuteuna snakreni kaisei mae mala fateni mana eghu.

⁷Kate fanomho mae te diꞌa na ka fate na, mae fate ginau laseni tela jafrahi mana na, aonu mare ginau kuru teini mana ka suga sosolo.

Mae fate na jaola ne laseni te theome doglo nogna tharai mana re.

⁸Ghehati magnahagheni mana te ghosei lehe na!

Eghuteuna keha maei na teke atha nogna gloku mana na.

⁹Ghehati magnahagheni mana te lehe na mala theo kmadi thugna mana re,

nei gaꞌase teke tolaghi mana tagna na ginau theo khetogna.

¹⁰Ghehati magnahaghedi thugna mana re te theo sugadi nei mala leuleghu suga nei hiro gano eghu mare.

Eghuteuna naiknore ginau khi fajifladi ka suga te diꞌa fara teke au rehati na.

¹¹Jame te keli na naikno teke kaoni sileni mana tadire mei atha fateo gobigna lepo teke khotodi mana re.

Jame te keli na hatimare mae phosa re mei blau fateo gobigna lepo teke loku eidi mana re.

¹²Ghehati theome magnahagheni kaisei naikno te kokhoni ni mana na,

nei jaola theo kaisei naikno te kokhonidi thugna mana teke lehe kokodire eghu!

¹³Ghehati magnahagheni mana nei iheire fateo eghu nate karha mei ka vikegna mana ginau re mala kafe lehe!

Uve, ghehati theome magnahagheni kaisei naikno te ghatho fapuloni mana na.

¹⁴Ghehati magnahagheni LORD te ghathodi puhi te diꞌa teke edi kuꞌegna mana tifa ra!

Nei thosei atha fadeleidi nakhibogna idogna mana na!

¹⁵Ghehati magnahagheni God te thosei atha kokodi nakhibodi kuꞌegna mana re,

nei theo kaisei naikno nate ghatho fapulodi vikegna mana ra eghu!

¹⁶“Mae igne neke theome keli ranghini ihei! Leuleghu fata na,

mana neke paradi nei falehedi neku naikno te kumare baludi iheire teke diꞌanagnafa fara re!

¹⁷Mae igne neke magnahaghei te tibri falehedi keha naiknore.

Eghume, jame te keli na, tibri teke edi mana tuare mala ke thokeni thegna!

Mana neke theome magnahaghei te eni kaisei glepo te keli ranghidi keha naiknore.

Eghume, thosei snakreni kaisei glepo te keli te mei ka mana na!

¹⁸Puhi te tibridi keha naiknore igne ngala mana te eni koba ka nakarhagna na.

Jateula ghegna khoꞌu ba ghegna gano te ima teu mana na.

¹⁹Eghume, snakre lao thibri igne ka mana mala toku tafruni mana jateula pohe eghu.

Snakre lao mala solt ligohoni mana jateula nhugha eghu.”

²⁰LORD God, iagho la nomhidihi hatimare mae te diꞌa te cheke fapari ghau iara

nei tore nigho iagho mala para ghau iara teu igre.

Nu iara tore nigho iagho mala paradi mare jateula tuana eghu kolho.

²¹LORD God, iagho nogu mae funei iara!

Togho ghau iara sagho mala ghatho tahuni nanghamu iagho naikno te gnafa igre.

Fakarha ghau, naugna nou namha iagho na thono biꞌo fara.

²²Iara gne au kuma fara eigna iara gne theome au kaisei nogu glepo te keli,

nei ka gaoghathogu na iara gne thono glaꞌe fara.

²³Iara gne jateula naungo gaju te namo salaꞌu ari te dofini fei grafira eghu kolho.

Uve, iara gne jateula kaisei naꞌalo te flalo te tei ka nuri ra eghu kolho.

²⁴Iara thono glaꞌe fara, naugna iara ne theome ima,

nei thinigu na la gagaro fara eghu!

²⁵Kate filo ghau iara na, naiknore maꞌe ghau iara,

nei filo uchu ka iara eghu.

²⁶LORD God, iagho nogu God iara.

Togho ghau nei fakarhi ghau eghu iara sagho, naugna nou namha iagho na thono biꞌo fara.

²⁷Falalase lao sagho ka nogu naoka

iara gre eigna iagho te fakarhi ghau iara gne.

²⁸Lisa lao sagho tibri ghau iara mare, nu iagho ginau fablahi ghau iara kolho.

Tapla sorudi sagho naikno te cheke famamaja ghau iara are.

Jame te eghu iagho na, nou mae gloku iagho na ginauna thono glealeꞌa fara.

²⁹Iara magnahaghedi nogu naokare te thono mamaja nodi fara ka nakarhadire.

³⁰Iara ginau tegio fabiꞌo ka LORD.

Uve, iara ginauna kilo fnaknoni mana ke uludi naikno te hui igre.

³¹Naugna LORD na bara fothidi iheire te kuma,

nei fakarhidi ka iheire te chekeni, “Mae igre mala lehe” teu are eghu.

Sam 110

King neke vavahi God

Nogna khoje mae Devet.

¹LORD ne cheke eghu ka nogu King iara na:

“Iagho gnokro fei nhetagu

iara ghilei lisei soru iara nou naoka iagho re

ke parigna nou nolaghi na.”

²Fufunu Jerusalem te tei posa ka keha vido are, mana ne tusu ari nolaghi biꞌo ka iagho neke cheke eghu,

“Iagho na funei frunidi nou naokare.”

³Ka narane te tei iagho ka magra na,

nou naikno iagho re ginau tei balumu iagho mala togho nigho,

eghuteuna ghotilo ginau haghe ka nogna thogele Lord na.

Uve, iagho atha nou nolaghi majaghani

mala jateula te dofra haghe hamerane ra eghu e heta thinimu na.

⁴LORD neke eni kaisei nhaꞌa cheke ka iagho,

eghuteuna mana ginauna nake theome tughu gaoghathogna na.

Mana neke nhaꞌa cheke eghu,

“Iagho ginauna pris fabrahu jateula mae Melkisedek tifa ia eghu.”

⁵LORD na kegra balumu iagho mala faheta nigho iagho.

Kate diꞌatagna na, mana ginau magra mala falehedi hatimare mae king.

⁶Mana ginauna fatedi naikno te gnafa ka keha kantri are, nei falehedi gnafa nou naoka iagho gre.

Uve, mana ginauna tapla sorudi gnafa hatimare mae king te gnafa heva heva ka nauthoglu igne.

⁷King, iagho jateula te koꞌu ka khoꞌu rhegna nabrou na

te eghu e fahetadi thinimu na,

eghume iagho ginauna na nheta fabrahu ghilei uludi iagho magra te gnafare.

Sam 111

Khoje mala kilo fnaknoni God

¹Tahati kilo fnaknoni LORD!

Ka nakarhagu fateote’o na,

iara ginauna tegioni LORD ke uludi naikno te khapru mei te tarai gre.

²Gobigna lepo te edi LORD re thofno keli fara, eghuteuna naiknore thono keli tadi fara ka nogna gloku LORD re.

Mare magnahaghedi fara te lase fakelidi glepo igre.

³Gobigna lepo te edi mana igre pala hagheni nanghagna mana na, eghuteuna glepo igre fakakhana nogna nolaghi mana te mae king na.

Puhigna mana te doglo fara igre ginau na au fabrahu tifa e tifa.

⁴LORD magnahaghei ghita tahati te ghathodi fabrahu glepo te keli teke edi mana igrei.

Eigna LORD ne thofno keli ranghi ghita nei kokhoni ghita eghu fabrahu.

⁵Mana tusu lao gano koba ranghidi iheire te ghatho tahunire,

naugna mana theome ghatho ihoni nogna nhaꞌa cheke teke mana ka tahati na.

⁶Mana fakakhana ka tahati nogna nolaghi na

ka puhi te snakre meini ka tahati kantri teke nodi keha naiknoi igne.

⁷Puhigna mana na thono tutuani fara nei doglo eghu.

Tahati nabada te fatutuanidi nei leghudi teu nogna vetula mana re.

⁸Nogna vetula mana te tutuani fara

nei doglo teu igre ginauna au fabrahu tifa e tifa.

⁹Mana neke fakarhi ghita tahati nogna naikno gre,

nei eni u nhaꞌa cheke te theo ka huigna igne baluda tahati.

Mana mae blahi nei nolaghi fara eghu.

¹⁰Mae ihei te magnahaghei mae glalase na, mana mala ghatho tahuni LORD.

Uve, mana tusu lao glalase te keli ka iheire te leghudi nogna vetula mana re.

Tahati kilo fnaknoni fabrahu mana.

Sam 112

Ihei te lisei faparini thegna na ginau glealeꞌa nogna fabrahu

¹Tahati kilo fnaknoni LORD!

Ihei te ghatho tahuni LORD,

nei magnahaghei leghudi nogna vetula LORD re teuna, mae igne keli tagna fara.

²Thugna mana re ginau au nodi kmana glepo ka kantri aheva teke tusu ranghidi LORD na.

Eghuteuna LORD ginauna fablahidi iheire nate karha mei ka vikegna mana na iheire te leghuni mana re.

³Tharaknagna mana na ginauna dedei fara nei au nodi kmana glepo te keli eghu.

Eghuteuna mae te doglo ke ulugna LORD ginauna au fakeli nogna fabrahu tifa e tifa.

⁴Ihei te leghuni puhi te keli na, nei kokhonidi keha naiknore,

nei keli nei doglo teuna, mana jateula juta te phae fabiꞌo ka gromno ia eghu.

⁵Ihei te eni bisnis ka puhi te doglo na,

nei snakreni kaoni na ka keha naiknore teuna, mae igne keli tagna fara.

⁶Mae te keli na theome tangomana te pari na,

eghuteuna naiknore theome tangomana te ghatho ihoni mana na.

⁷Mae igne theome tangomana te mhaghuni u nonomho te diꞌa na,

naugna mana rouronu lao kolho ka LORD, nei nogna fatutuani na thono heta fara ka LORD.

⁸Mana theome tangomana te ghatho peapea nei mhaghu teuna,

naugna mana laseni nogna naoka mana re ginauna theo nafudi kolho.

⁹Mana tangomana te toghodi iheire te kuma,

aonu puhigna mana te keli igre ginauna au fabrahu.

Naiknore ginauna ghatho tahuni mana.

¹⁰Kate filoni naikno te diꞌare puhigna mae te doglo igne na, mare na thono diꞌa tadi fara.

Mare na theome magnahagheni mae igne, nu mare theo nafudi kolho eghu.

Uve, unha te magnahagheni naikno te diꞌare, theome tangomana kegra haghe ba te loku fakeli na.

Sam 113

Khoje kilo fnaknoni God eidi puhigna mana te keli na

¹Tahati koje kilo fnaknoni God!

Uve, tahati kafe nogna mae gloku mana

mala kilo fnaknoni nanghagna mana na.

²Tahati funu kilo fnaknoni nanghagna mana gognaro gne

nei tahati ginauna mala kilo fnaknoni nanghagna mana na tifa e tifa.

³Tahati hui mala kilo fnaknoni nanghagna LORD funu ke

maghati tei posa ke mosu.

⁴Mana ngala mae ihei te funei frunidi naikno te gnafa ka kantri te gnafa igre.

Nogna nafnakno mana na tei salaꞌuni maloa igno.

⁵Theo kaisei naikno te jateula God noda LORD tahati gne teu na.

Mana mae King te gnokro teu kligna ka nogna sape nafnakno na.

⁶Mana au neu kligna ne pogho soru ne filo sukha pari

mala toghodi nogna naiknore.

⁷Mana toghodi iheire te kuma,

nei atha fajifladi kau hoholo.

⁸Mana ghatho tahudi jateula thugna king eghu,

nei jateula nodi funei eghu nogna naiknore.

⁹Mana neke fablahidi goro gaꞌase te theo thudire

mala ke au kmana thudi nei glealeꞌa eghu reꞌe.

Cheke fakelini nanghagna LORD!

Sam 114

Khoje ka Gaghamu Gasa-Polho

^1-2Tahati naiknoda Juda ra kafe vikegna ngala mae Israel, mae ku’eda Jekop tifa ia.

Kani teke jifla tahati Ijep ia God neke eni ghita tahati mala nogna naikno mana.

³Kate mei God na, Thongna Ukru na neke fnota pea.

Uve, khoꞌu Jordan neke jaola neke theome loloro keligna.

⁴U thogelere neke fififri jateula nanigot te mhaghu nodira neku.

Uve, fanukhu neke jateula sipu te chari tafri ra neku naugna neke mhaghu nodi fara.

⁵Thongna Ukru, naugna unha si teke fnota pea iagho ia?

Khoꞌu biꞌo Jordan, naugna unha si teke theome loloro fakeli iagho ia?

⁶Ghotilo thogelera, naugna unha si ghotilo te fififri jateula nanigot teu gnea?

Ghotilo fanukhura, naugna unha si ghotilo te gasa tafri jateula sipu teu gnea?

^7-8Kate mei God, mae ihei teke pogho soruni mae Jekop na,

u glose na nghali ne jifla mei khoꞌu na ka thina.

Uve, kate mei LORD na,

khoꞌu na jaola ne jifla mei ka thina maku na.

Sam 115

Kaisei God ngala te God tutuani na

¹LORD God, kaisei iagho ngala te mala ghatho tahu nigho ghehati na,

naugna kaisei iagho ngala te namha ghami ghehati na,

nei iagho taji fakelidi u nhaꞌa cheke teke edi iagho ka ghehati ra.

²Keha naiknodi keha kantri te theome leghuni noda God tahati na mare ghusna eghu,

“Aheva gneu nomi God ghotilo na?”

³Tututani, noda God tahati na au kligna,

eghuteuna mana au nolaghi te mala eni unha te magnahagheni mana na.

⁴Nu nodi god naikno bongihehere neke edi kolho ka silva nei gol.

⁵God igre au foflodi, nu theome tangomana te facheke na.

Mare au tathadi, nu mare theome tangomana te fifilo na.

⁶Mare au khulidi, nu mare theome tangomana te nonomho na.

Mare au nehudi, nu mare theome tangomana te gnangho na.

⁷Mare au khamedi, nu mare theome tangomana te habo na.

Mare au gahedi, nu mare theome tangomana te nonolo na.

Uve, mare theome tangomana te eha ba te tanhi na,

naugna mare theome karha.

⁸Mae iheire te sari mumuju nei fatutuanidi teu igre theo nafudi kolho,

eigna mae jateula mumuju eghu theo nafudi kolho.

⁹Ghotilo naiknomi Israel ra mala fatutuani ni LORD.

Naugna mana ne togho ghami nei reireghi ghami neu ghotilo.

¹⁰Ghotilo nogna mae pris God ra, ghotilo fatutuani ni LORD.

Naugna mana ne togho ghami nei reireghi ghami neu ghotilo.

¹¹Ghotilo naikno fateote’o te tarai ka LORD ra mala fatutuani ni mana.

Naugna mana ne togho ghami nei reireghi ghami neu ghotilo.

¹²LORD na ghatho ghita fabrahu, nei mana ginauna fablahi ghita tahati.

Uve, mana ginauna fablahi ghita tahati naiknoda Israel nei hatimare nogna mae pris.

¹³Mana ginauna fablahidi ihei te ghatho tahuni mana,

neubane mae ihei te au tagna nafnakno ba theo.

¹⁴Iara magnahagheni LORD te tusu ari kmana sua ka ghotilo,

nei ka iheire nate karha mei ke leghumi ghotilo.

¹⁵Iara magnahagheni LORD mae ihei teke vuavuhani

u maloa kligna nei nauthoglu pari igne teu te fablahi ghami ghotilo.

¹⁶Kligna na nogna namono LORD kolho,

nu nauthoglu igne mana neke tusu ranghini naikno.

¹⁷Iheire tela lehehi ra

theome tangomana te cheke fakelini LORD na.

¹⁸Nu tahati te karha nga teu igre ginauna tegioni mana,

funu gognaro tifa tifa.

Tahati cheke fakelini LORD!

Sam 116

Tegioni God naugna mana ne fakarhini naikno na kau glehe

¹Iara namhani fara LORD,

naugna mana ne fanomho ka nogu tharai iara re.

²Ka nakarhagu na iara ginauna tarai koba

ka mana naugna mana ne fanomho ka iara.

³Iara neke namo lehe kate thoke ghau hoholo te biꞌo na.

Naugna igne iara thono mhaghu nogu fara nei nanga nogu fara eghu.

⁴Aonu iara ne eha eghu lao ka LORD,

“LORD God, fakarhi ghau.”

⁵Noda LORD God tahati na thofno mae keli fara.

Uve, mana lolokelidi ne kokhonidi eghu naiknore.

⁶Mana reireghidi koba iheire te glaꞌe.

Uve, mana neke fakarhi ghau iara kani teke au iara ka hoholo na.

⁷Eghuteuna iara gognaro na kela keli tagu fara,

naugna LORD na thofno keli fara ranghi ghau iara.

⁸LORD na neke fakarhi ghau iara kau glehe,

naugna igne iara gognaro na tirogu tanhi kolho.

Uve, mana taji ghau iara kau glehe.

⁹Eghume iara leghuni fabrahu puhigna

mana na kau nauthoglu igne.

^10-11Neubane au papara ngau iara, iara nheta fara nogu fatutuani na ka iagho.

Uve, neubane mhaghu ngau iara, ba ne theome rouronuni kaisei naikno, iara nheta fara nogu fatutuani na ka iagho.

¹²Unha gne nate fafara lao iara ka LORD

eidi glepo te keli teke edi mana ranghi ghau iara ra?

¹³Iara ginauna fafara lao waen ka mana

mala tegioni mana naugna mana neke fakarhi ghau iara.

¹⁴Ka tathadi nogna naikno God te salo fodu mei tarai teu igre

iara ginauna tusu ranghini mana gobigna lepo teke nhaꞌa cheke iara ka mana ra.

¹⁵LORD God, kaisei glepo biꞌo fara eghu ka tathamu iagho na kate lehe kaisei ka nou naikno iagho igre na.

¹⁶LORD God, iara gne kaisei nou mae gloku iagho jateula idogu tifa ia eghu.

Iagho neke fakarhi ghau iara kau glehe.

¹⁷Iara ginauna fafara mala tegio ka iagho.

Uve, iara ginauna tarai ka iagho mala tegio nigho.

^18-19Ka tathadi nou naikno iagho te salo fodu mei tarai ka nou Sugablahi iagho na Jerusalem igre,

iara ginauna tusu ari glepo teke nhaꞌa chekedi iara ra.

Tahati cheke fakelini LORD!

Sam 117

Tahati cheke fakelini LORD

¹Naikno te gnafa ka kantri te gnafa igre, cheke fakelini LORD!

Naikno te gnafa ka namono te gnafa igre, ghatho tahuni mana!

²LORD na thofno namha ghita tahati gnafa,

eghuteuna mana tajidi nogna nhaꞌa chekere ranghi ghita.

Tahati cheke fakelini LORD!

Sam 118

Tegio eigna te uluni magra na

¹Tahati tegio ka LORD, eigna mana na thofno keli fara,

nei namha ghita fabrahu tifa tifa.

²Tahati naiknoda Israel ra, tahati cheke eghu,

“Mana namha ghita fabrahu tifa tifa.”

³Ghotilo nogna mae pris mana ra jaola cheke eghu,

“Mana namha ghita fabrahu tifa tifa.”

⁴Tahati te gnafa te ghatho tahuni mana ra, tahati cheke eghu,

“Mana namha ghita fabrahu tifa tifa.”

⁵Kate au iara ka hoholo na, iara eha lao ka mana,

aonu mana nomhini te eha iara na ne atha fasnagli ghau iara ka hoholo.

⁶Iara ginauna theome mhaghu naugna LORD na au balugu iara.

Naiknore theome tangomana te eni kaisei glepo te diꞌa te mala goigoni ghau iara na.

⁷LORD ngala te tangomana te togho ghau iara na,

eghume iara ginauna filoni mana mala tapla faparidi hatimare mae naoka.

⁸Theome keli naiknore te rouronu kolho ka naikno na.

Te keli na mare rouronu kolho ka LORD.

⁹Theome keli naiknore te rouronu kolho ka hatimare mae funei.

Te keli na mare rouronu ka LORD.

¹⁰Naiknodi keha kantri igre mare khapru mei mala magra ka iara,

nu iara uludi kolho mare ka nogna nolaghi LORD.

¹¹Uve, mare khapru faligoho ghau iara mala magra,

nu iara uludi fara kolho mare ka nogna nolaghi LORD.

¹²Mare khapru faligoho ghau iara jateula naungo eghu,

nu iara la goigonidihi mare ka nogna nolaghi LORD.

Kate mei mare te mala magra ka iara na,

mare jateula buburu te gnubra ka khaꞌaghi te ghosei te dofidi ra eghu kolho.

¹³Kate heta ghedi fara mare ka magra na, iara ne namo nigrahi,

nu LORD neke togho ghau iara.

¹⁴LORD ne tusu mei nolaghi ka iara mala nheta iara,

eghuteuna mana ne fakarhi ghau iara.

¹⁵Fanomho mei ghotilo ia, eigna tahati nogna naikno LORD,

tahati mala glealeꞌa nei eha eghu ke lamnadi noda suga thapuale gre.

Uve, tahati eha eghu fabiꞌo,

“Ka nogna nolaghi LORD te uluni tahati u magra na.

¹⁶Mana ne eni igne ka nogna nolaghi.

Uve, ka nogna nolaghi te edi mana glepo te biꞌo igre!”

¹⁷Iara ginauna na theome lehe,

iara na karhau mala toutonudi unha teke edi LORD re.

¹⁸Mana thofno para ghau fara iara,

nu mana theome snakre ghau iara te lehe na.

¹⁹Tothora fabiꞌo grengathagna nogna Sugablahi LORD

mala ruma iara mala tegioni mana.

²⁰Igne grengathagna nogna Sugablahi LORD,

eghuteuna naikno te doglo ke ulugna mana re kolho nate ruma ke lamna na.

²¹LORD God, iara cheke fakeli nigho koba, naugna iagho neke cheke tughudi nogu tharai iara re,

nei iagho neke fakarhi ghau iara.

²²U thina teke tirodini mae iheire te horo suga na,

kela kegra haghe kaisei thina ulu fara ka suga na.

²³Glepo igne LORD teke eni na

ne keli fara fifilogna na.

²⁴Tahati keli tada nei glealeꞌa eghu,

naugna LORD neke tapla sorudi noda naoka tahati re ka narane igne.

²⁵LORD God, fakarhi ghami.

Uve, iagho fakarhi ghami nei edi nomi gloku ghehati gre eghu mala keli.

²⁶God fablahini mae king mae ihei te mei ka nanghagna LORD,

eghuteuna ghehati mae pris gna nogna Sugablahi LORD na ginauna fablahi ghami ghotilo.

²⁷LORD kolho ngala God te tutuani na,

nei mana keli fara ranghi ghita.

Eghuteuna ka narane te biꞌo igne ghotilo louloku grege gaju

mala tei falithuini olta na.

²⁸LORD God, iagho nogu God iara, iara magnahaghei te cheke fakeli nigho.

Uve, iagho nogu God iara, iara ginau toutonuni nanghamu iagho na.

²⁹Tahati cheke fakelini LORD, naugna mana thofno keli fara,

nei namha ghita fabrahu tifa tifa.

Sam 119

Nogna vetula God

¹Naikno te thofno doglo fara nakarhadire mare thofno glealeꞌa nodi fara,

naugna mare ne leghudi nogna vetula LORD re.

²Naikno te leghudi nogna farirhiu mana re,

nei leghuni mana teu ka nagnafadi fateote’o re, mare keli tadi fara.

³Naikno igre theome eni kaisei najafra,

nei leghuni fabrahu kolho thofno puhigna LORD na.

⁴LORD God, iagho neke tusu meihi nou famane chekere ka ghehati,

nei cheke ranghi ghamihi te mala leghudi u cheke igre.

⁵Iara magnahaghei te au heta te

mala leghudi nou vetula iagho re.

⁶Jame te fanomho fakeli iara ka nou famane cheke iagho re meuna,

naiknore ginauna theome tangomana te famamaja ghau iara na.

⁷Kate laseni iara te thofno doglo fara nou vetula iagho na,

iara na cheke fakeli nigho ka thofno gaoghathogu fateote’o.

⁸Iara ginauna leghudi nou vetula iagho re.

Eghume iagho thosei tei koko ghau iara.

⁹LORD God, hatimare mae majaghani gre mala leghudi nou cheke iagho re,

mala tangomana mare te mala thofno tajidi thofno nakarhadire.

¹⁰Ka nagnafagu fateote’o na, iara magnahagheni te mala leghu nigho na,

togho ghau iara sagho mala leghudi iara nou cheke iagho re.

¹¹Iara gaoghathodi fabrahu nou cheke iagho te tutuani fara ra,

mala theome eni iara kaisei najafra ranghi nigho iara.

¹²LORD God, iara cheke fakeli nigho.

Farirhiu ghau iara sagho nou vetulare.

¹³Iara ginauna toutonu eidi nou vetula iagho teke chekedi iagho ka ghehati ra.

¹⁴Kate leghudi iara nou farirhiu iagho re, nogu glealeꞌa iara thono biꞌo fara salaꞌuni,

jateula kaisei mae te dedei fara te au nogna glepo te kmana ra eghu.

¹⁵Leuleghu fata na iara hirodi koba u gaoghathodi nou cheke iagho re,

nei leghudi fabrahu eghu nou farirhiu iagho re.

¹⁶Leuleghu fata na iara keli tagu fara ka nou vetula iagho na,

eghuteuna iara ginauna na theome ghatho kokodi nou cheke iagho re.

¹⁷God, iara magnahaghei nigho iagho te reireghi fakeli ghau

iara nou mae gloku gne mala karha fakeli iara te mala leghudi nou cheke iagho re.

¹⁸Fasnaglini nagnafagu gne mala filo glanidi

iara thofno chekemu iagho te au ka vetula na igre.

¹⁹Iara gne au ka nauthoglu igne katha vido kmo’ei kolho,

eghume iagho falase mei ranghi ghau chekemu iagho re.

²⁰Leuleghu fata na iara magnahaghei fara te lasedi nou vetula iagho re.

²¹Diꞌatamu sagho ka naikno te thonu fahaehaghedi fara are,

nei paradi iheire te theome leghudi teu nou cheke iaghore are.

²²Thosei snakredi sagho naikno te diꞌa puhidire are mala maꞌe ghau nei cheke fadiꞌa ghau eghu iara,

naugna iara ne leghudi koba nou farirhiu iagho re.

²³Mae biꞌo gre ba mae funei, mare gnokro fodu te mala rogheni te mala falehe ghau iara na.

Nu neuba ngau, iara nou mae gloku iagho. Iara ginauna leghuni fabrahu nou vetula iagho na.

²⁴Iara keli tagu fara ka nou farirhiu iagho ra,

naugna nou farirhiu iagho ra jateula kaisei mae te farirhiu ghau iara ka cheke te keli ra eghu.

²⁵LORD God, iara gne la namo lehehi, mei fakarhi ghau,

jateula teke kulu nhaꞌa chekehi iagho ia eghu.

²⁶Farirhiu ghau nou vetula iagho ra, naugna iara neke toutonudihi gobigna lepo teke edi iagho ra,

eghuteuna iagho cheke tughu ghau iara.

²⁷Togho ghau iara sagho mala lase fakelidi iara nou famane cheke iagho ra,

aonu iara ginauna na gaoghatho heta ka nou farirhiu iagho ra eghu.

²⁸Nogu diꞌanagnafa iara na te namo falehe ghau iara na,

faheta ghau iara sagho jateula teke nhaꞌa chekehi themu ia eghu.

²⁹Togho ghau iara sagho, mala leghudi iara nou cheke nei vetula.

Naugna iara theome magnahaghei te leghudi puhidi naikno te theome ghatho tahu nighore.

³⁰Tutuani, iara neke kulu vahinihi te mala leghu nigho na,

nei iara la lasedihi nou vetula iagho ra.

³¹LORD God, thosei snakredi naikno gre mala famamaja ghau iara,

naugna iara leghudi koba nou farirhiu iagho ra.

³²Iara magnahaghei fara te leghudi nou cheke iagho ra,

naugna iagho ginauna togho ghau iara mala lase fakelidi iara.

³³LORD God, falase ranghi ghau gaoghathodi nou vetula iagho gre

mala leghu fabrahudi iara.

³⁴Togho ghau mala lase fakelidi iara nou farirhiu iagho gre,

aonu iara ginauna leghudi nou farirhiu gre ka nakarhagu fateote’o na.

³⁵Baubatu ghau ka puhimu iagho, naugna kate leghudi iara nou cheke iagho re,

iara thono kelitagu fara.

³⁶Togho ghau iara sagho mala sasaꞌa iara te leghudi nou farirhiu iagho re,

ke kelignai te magnahaghei glepo kmana iara na.

³⁷Togho ghau iara sagho mala leghuni iara puhimu iagho te keli na, mala theome leghudi iara puhi te diꞌare.

³⁸Tajini sagho nhaꞌa cheke teke eni iagho ka iara nou mae gloku gne.

U nhaꞌa cheke igne iagho neke eni maladi iheire te leghu nigho re.

³⁹Fakarha ghau iara sagho ka nafnata cheke te diꞌa te edi iheire te magnahaghei te tapla fapari ghau iara igre.

Naugna te keli na iagho paradi naikno te edi puhi te diꞌa tuare.

⁴⁰Iara magnahaghei fara te leghudi nou famane cheke iagho re! Iara lase nigho iagho edi koba unha te doglo,

eghume iara tore nigho mala tusu mei nakarha majaghani ka iara.

⁴¹LORD God, fathakle mei ranghi ghau nou namha biꞌo iagho na.

Uve, fakarhi ghau iara sagho jateula teke nhaꞌa chekeni iagho themu ia eghu.

⁴²Aonu iara ginauna tangomana te cheke tughudi iheire te cheke diꞌa ranghi ghau iara ra,

naugna iara ne rouronudi nou cheke iagho re.

⁴³Iagho neke chekeni te mala fakarhi ghau iara na eghuteuna

iara fatutuani nigho iagho nate eni ngala igne na.

Thosei fakmu ghau iara te cheke eigna iagho te tajini nou nhaꞌa cheke na te mala toghodi nou naiknore.

⁴⁴Iara ginauna leghudi koba nou famane farirhiu iagho ra.

⁴⁵Eghuteuna iara snagla nogu fara ke ulumu iagho,

naugna iara ne leghudi nou cheke iagho re.

⁴⁶Iara ginauna na theome mamaja te toutonu ranghidi

hatimare mae king nou farirhiu iagho igre.

⁴⁷Iara keli tagu fara leghudi nou cheke iagho igre,

naugna igne unha te thono magnahagheni fara te mala eni iara na.

⁴⁸Iara ghatho tahudi fara nou cheke iagho re te thono magnahaghedi fara iara te leghudire.

Eghuteuna iara ginauna ghathodi fara nou farirhiu iagho re.

⁴⁹LORD God, thosei ghatho ihoni u nhaꞌa cheke teke eni iagho ka iara nou mae gloku gne,

naugna iara rouronuni iara u nou nhaꞌa cheke iagho na.

⁵⁰Kate au papara na,

iara theome diꞌanagnafagu naugna nou nhaꞌa cheke iagho na tusu mei karha ka iara.

⁵¹Naikno te fahaehaghe igre mare maꞌe ghau iara

nu iara theome ghatho ihodi nou famane farirhiu iagho re.

⁵²LORD God, kate ghathodi iara nou vetula iagho teke au funu tifa teke mei igre na,

iara gaoghathogu na ne keli fabrahu.

⁵³Iara ne thono diꞌatagu fara kate filodi

iara naikno te diꞌa te theome leghudi nou cheke iagho re.

⁵⁴Kate au teu iara katha vido kmo’ei kolho kau nauthoglu igne na, iara koje fabrahu eidi nou vetula iagho re.

⁵⁵LORD God, bongiro na iara ghatho nigho iagho,

aonu iara na leghudi fabrahu nou famane farirhiu iagho ra.

⁵⁶Iara kelitagu fara kate leghudi

iara nou famane cheke iagho ra.

⁵⁷LORD God, kaisei iagho ngala te tusu mei ka iara u karha na,

eghume iara nhaꞌa cheke mala leghudi nou cheke iagho re.

⁵⁸Ka gaoghathogu fateote’o na, iara tore nigho iagho mala kokhoni ghau

iara jateula teke nhaꞌa chekeni iagho ia eghu.

⁵⁹Kate ghathodi iara puhimu iagho te keli gre eghuteuna filodi puhigu te theome raꞌe keli gre teuna,

iara neke figri gaoghathogu na mala leghudi nou farirhiu iagho ra.

⁶⁰Iara theome ofoni ihei nga te

mala leghuni chekemu iagho na.

⁶¹Neuba naikno te diꞌa gre ne fariuriu ghau iara mala leghudi iara puhidi te diꞌare neu ngau,

iara leghudi kolho nou famane farirhiu iagho re.

⁶²Neubane farihotei bongiro, iara dofra mala cheke fakeli nigho,

naugna nou vetula iagho re thofno doglo fara.

⁶³Iara kaisei loku fodu baludi iheire te ghatho tahu nigho re,

nei iheire te leghudi nou famane cheke iagho re.

⁶⁴LORD God, nou namha iagho ranghidi naikno te gnafa ka nauthoglu igne na thono biꞌo fara.

Eghume, farirhiu ghau iara sagho nou vetulare.

⁶⁵LORD God, iagho thofno keli fara ranghi ghau iara nou mae gloku gne kolho,

eigna iagho ne tajini fabrahu nou nhaꞌa cheke na.

⁶⁶Tusu mei glalase nei gaoghatho te keli eghu ka iara,

naugna iara ne fatutuanidi nou cheke iagho re.

⁶⁷Kani theome para ghau iara nga teku iagho na,

iara neke leghuni nabrou te jafra na, nu gognaro na,

iara thofno leghuni chekemu iagho te tutuani na.

⁶⁸Iagho keli fara nei eni unha te keli na eghu ranghi ghau iara.

Eghume, farirhiu ghau iara sagho nou vetulare eghu.

⁶⁹Naikno te fahaehaghe fara igre toutonu chaichaghi eigu iara, nu ka gaoghathogu fateote’o iara na,

iara leghudi fabrahu kolho nou famane cheke iagho ra.

⁷⁰Naikno te fahaehaghe fara igre theome lasedi kolho nou famane farirhiu iagho re,

nu iara keli tagudi fara famane farirhiu tuare.

⁷¹Thofno keli fara teke au papara iara na,

mala lasedi iara nou vetula iagho re.

⁷²Iara magnahagheni fara nou famane farirhiu iagho

igne ke uludi sileni te gnafa kau nauthoglu igne.

⁷³LORD God, iagho neke vuavuha ghau iara neke reireghi fakelini nakarhagu iara na.

Togho ghau iara sagho mala laseni iara nou cheke iagho na.

⁷⁴Kate filo mei ghau iara iheire te ghatho tahu nigho re,

mare ginauna keli fara, naugna iara ne fatutuani ni chekemu iagho te tutuani na.

⁷⁵LORD, God, iagho fatedi naiknore ka puhi te doglo. Uve, iagho para ghau iara eidi nakhibogu iara re,

naugna iagho ne tajini nou nhaꞌa cheke na.

⁷⁶Iagho neke nhaꞌa chekehi ka iara nou mae gloku gne eigna nou namha biꞌo iagho na

tangomana te fakelini gaoghathogu iara na.

⁷⁷Iara thofno magnahagheni fara nou vetula iagho na.

Eghume, kokhoni ghau iara na mala athini iara u karha na.

⁷⁸Jame te keli na iagho famamajadi naikno te thono fahaehaghedi fara are, naugna mare ne cheke chaichaghi eigu iara.

Neuba mare ne chaichaghi eghu koba ngau, iara ginauna gaoghatho heta kolho ka nou famane cheke iagho ra.

⁷⁹Jame te keli na iheire te ghatho tahu nigho gre jame

mala mei ka iara mala laseni mare u nou farirhiu iagho re.

⁸⁰Jame te keli ne iara leghuni fara nou vetula iagho na

mala theome tangomana iara te mamaja na.

⁸¹LORD God, iara ofo nigho te mala fakarhi ghau na la ghilei glaꞌe soru.

Neubane eghu ngau, iara fatutuanidi kolho nou cheke iagho re.

⁸²Iara ofoniu unha teke nhaꞌa chekeni iagho na la ghilei babaꞌo.

Niha nau ame mei togho ghau nga iara eghu sagho ia?

⁸³Neubane diꞌa fara ngau iara nakarhagu na,

iara theome ghatho ihoni kolho nou vetula iagho na.

⁸⁴Niha fata ofo nigho te mala mei fakarhi ghau na sara gnea?

Niha nau ame paradi nga eghu sagho naikno te fakokhoana ghau iara igrea?

⁸⁵Naikno te fahaehaghe fara te tirodi leghudi nou famane farirhiu iagho na igre, fariuriu fara te mala leghudi iara puhidi te diꞌare.

⁸⁶Iara thofno fatutuanidi nou cheke te gnafare iagho na. Naugna nou cheke iaghore thofno tutuani fara.

Togho mei ghau iara sagho naugna naikno te diꞌa gre chekedi kolho cheke te chaichaghi re eigu iara na.

⁸⁷Mare namo falehe ghau iara kolho,

nu iara leghudi kolho nou famane cheke iagho ra eghu.

⁸⁸Iagho theome snakre ghau iara te lehe na,

naugna iagho ne namha ghau iara fara. Eghume iara tangomana te leghudi nou vetula iagho re.

⁸⁹LORD God, chekemu iagho na ginauna au fabrahu tifa e tifa.

Uve, ginauna na au fabrahu kligna tifa e tifa.

⁹⁰U puhi te tajini fabrahu iagho nou nhaꞌa cheke na

igne ginauna theome tangomana nate ari te hui na.

Uve, iagho neke vuavuha nauthoglu igne mala au fabrahu tifa tifa.

⁹¹Gobigna lepo igre au fabrahu funu tifa ghilei mei posa ka narane gognaro gre leghuni nou cheke iagho na,

naugna glepo igre leghuni mei unha teke cheke ranghidi iagho re.

⁹²Iara thofno keli tagu fara kate ghathoni iara nou vetula iagho na.

Eghume, kate para ghau nogu naokare, iara theome nigra nei lehe eghu naugna iara ghatho nigho iagho kolho.

⁹³Iara theome tangomana te ghatho kokodi nou vetula iagho re,

naugna u vetula igre ne batuni ghau iara kate leghu fakelidi iara re ne theome eni iara kaisei najafra ka nakarhagu na.

⁹⁴Iara nou naikno iagho kolho, eghume iara thosei theo te fakarhi ghau iara na eghu.

Tutuani, iara thofno fariuriu fara te mala leghudi nou cheke iagho re.

⁹⁵Naikno te diꞌa igre ofou kolho te mala falehe ghau iara na,

nu iara gaoghatho heta kolho ka nou famane farirhiu iagho ra.

⁹⁶Te laseni iara gognaro na, gobigna lepo fateote’o igre ginauna hui,

nu chekemu iagho na theo ka huigna.

⁹⁷Funu hamerane te ghilei plulu naprai na,

iara gaoghathodi nou cheke iagho ra, iara keli tagudi fara!

⁹⁸Nou cheke iagho ra au fabrahu ka iara nei tusu mei gaoghatho te keli ka iara.

Eghume, gaoghathogu iara re uludi fara nodi gaoghatho nogu naoka re.

⁹⁹Tutuani, iara ghathodi fabrahu nou cheke iagho re,

eghume iara atha gaoghatho te keli fara uludi nodi gaoghatho mae nogu velepuhi re.

¹⁰⁰Nogu glalase iara eigna nou vetula iagho na,

uludi fara nodi glalase goro mae biꞌo re naugna iara ne leghudi nou cheke iagho re.

¹⁰¹Iara theome magnahaghei te leghuni puhi te diꞌa na

naugna iara magnahaghei te leghuni kolho chekemu iagho na.

¹⁰²Iagho themu ngala teke farirhiu ghau iara nou vetula na,

eghume iara theome magnahaghei te lisa kokodi chekemu iagho re.

¹⁰³Nou cheke iagho ra thono mamahe fara salauꞌi

jateula jujurukuli eghu ka foflogu iara na!

¹⁰⁴Chekemu iagho re ngala te thono doglo fara ka gaoghathogu iara na.

Eghume iara theome magnahaghedi puhi te chaichaghi re.

¹⁰⁵Nou cheke iagho tuare jateula juta eghu mala batu ghau iara tei ka nabrou te doglo,

ba jateula naphae te batu fakeli ghau iara ka nabrou te keli ra eghu.

¹⁰⁶Iara la nhaꞌa chekehi ka iagho te mala leghudi nou famane cheke re.

Eghume iara ginauna theome tangomana te chaichaghi nigho na.

¹⁰⁷LORD, filo sagho. Iara gne au papara fara ka thinigu.

LORD, farheta ghau mala ke karha fapulo iara, jateula teke chekeni iagho ka ghehati tifa ia eghu.

¹⁰⁸LORD, farirhiu fakeli ghau chekemu na,

mala cheke fakelini iara nanghamu iagho na. Igne kaisei fafara te keli tamuni iagho na.

¹⁰⁹Leuleghu narane na iara tarabana mala lehe naugna iara ne leghu nigho iagho koba,

nu iara theome ghatho ihoni nou vetula iagho na.

¹¹⁰Naikno te diꞌa puhidi gre lilisei kaisei phighoro malagu iara,

nu iara theome figri tagrudi nou vetula iagho re.

¹¹¹Iara ginauna leghudi fabrahu nou cheke iagho re.

Eghuteuna nou cheke iagho re ginauna faglealeꞌani nagnafagu iara na.

¹¹²Iara la kulu chekehi ka iagho te

mala leghudi fabrahu nou farirhiu iagho re ghilei lehe.

¹¹³LORD God, iara thono magnahaghedi fara nou famane farirhiu iagho ra,

nu iara theome magnahaghedi iheire te tirodi leghu nigho re.

¹¹⁴Kaisei iagho ngala nogu vido te keli te mala poru iara na.

Eigna iara thofno fatutuanidi nou cheke iagho te tutuani re.

¹¹⁵Ghotilo naikno te diꞌa ra! Ghotilo tei nomi,

mala leghudi kolho iara nogna cheke God re.

¹¹⁶LORD God, iagho neke kulu nhaꞌa chekehi te mala fakarhi ghau iara na, iara fatutuani ni nou nhaꞌa cheke iagho igne.

Tusu mei ka iara u nanheta igne, na eghunu theo nafugna kolho nogu fatutuani iara igne eghu.

¹¹⁷Loku hagheni khamegu gne, mala au fakeli iara,

eghuteuna iara ginauna na ghathodi nou vetula iagho ra.

¹¹⁸Iagho neke figri lao thagrumu na ka iheire te tirodi leghudi nou vetula iagho are.

Nodi saosagro te diꞌa are ginau theo nafudi kolho.

¹¹⁹Naikno te diꞌa te gnafa te au teu ka nauthoglu igne jateula chara eghu kolho ka tathamu iagho na.

Eghume iara magnahaghedi fara nou farirhiu iagho re eghu.

¹²⁰Iara thono mhaghu nogu nigho fara ne ngegra thinigu na.

Uve, kate ghathoni iara te fateni iagho naikno na, iara ne mhaghu nogu nigho fara.

¹²¹LORD God, iara neke edi glepo te keli nei doglo teure.

Thosei snakre ghau ka iheire te magnahaghei falehe ghau iara gre.

¹²²Iara magnahaghei nigho te nhaꞌa cheke te mala togho ghau iara nou mae gloku gne.

Thosei snakredi naikno te fahaehaghedi fara igre te falehe ghau na.

¹²³Iagho neke nhaꞌa chekehi te mala fakarhi ghau iara na,

eghume, iara filo ofoniu unha teke nhaꞌa chekeni iagho ia nate tutuani na la ghilei kabru tathagure.

¹²⁴Falalase sagho nou namha na ka iara, nou mae gloku gne,

nei farirhiu ghau nou vetula na eghu.

¹²⁵Tusu mei glalase ka iara nou mae gloku gne,

mala lase fakelidi iara nou farirhiure.

¹²⁶LORD God, igne hila nou narane iagho te mala eni iagho unha te magnahaghei na,

naugna naikno gre tirodi leghudi nou famane farirhiu iagho re.

¹²⁷Iara thono magnahagheni fara nou famane farirhiu iagho igne

ke uludi sileni te gnafa ka nauthoglu igne.

¹²⁸Eghume, iara thono tirogudi fara puhi diꞌa te gnafare

mala leghuni kolho nou famane cheke iagho na.

¹²⁹LORD God, nou farirhiu iagho re thofno keli fara,

eghume iara keli tagu fara te leghudire.

¹³⁰Jateula naphae eghu ka naiknore kate glola fara u gaoghathodi nou cheke iagho re,

eghuteuna naikno teke ihore ke lalase eghu.

¹³¹Iara thono magnahaghedi fara nou cheke iagho re, jateula naikno te roi koꞌu te salaꞌui ia eghu.

¹³²Filo kokhoni mei ghau iara sagho,

jateula te edi koba iagho ka iheire te namha nigho ra eghu.

¹³³Thosei snakre ghau mala tapla jafra iara ka nakhibo.

Uve, iagho eni igne eigna iagho neke nhaꞌa chekenihi.

¹³⁴Fakarhi ghau ka iheire te magnahaghei falehe ghau iara gre,

mala tangomana iara te leghu fakelidi nou famane cheke iagho gre.

¹³⁵Iara nou mae gloku iagho, filo mei nei keli ranghi ghau eghu iara,

nei farirhiu ghau nou vetulare eghu.

¹³⁶Kate filodi iara naikno te theome leghudi nou famane farirhiu iagho re,

iara ne diꞌa nagnafagu fara ne tanhi.

¹³⁷LORD God, iagho eni unha te doglo na,

nei nou vetula iagho re jaola thono doglo fara.

¹³⁸Nou farirhiu thono doglo fara,

eghuteuna iagho edi koba unha te chekedi mala edi teu iagho re.

¹³⁹Iara thono diꞌatagu fara kate filodi

hatimare mae naoka te tirodi leghudi nou cheke iagho te tutuani fara re.

¹⁴⁰Iara magnahagheni fara nou nhaꞌa cheke iagho na,

naugna u nhaꞌa cheke igne thofno tutuani fara!

¹⁴¹Neuba iara ne fiti mae kolho ne filo soru ghau naiknore,

iara theome tangomana te ghatho ihodi nou famane cheke iagho re.

¹⁴²Puhimu iagho te doglo fara na ginauna au fabrahu tifa e tifa,

eghuteuna nou vetula iagho thono tutuani fara.

¹⁴³Iara thoke ghau puhi biꞌo nei naꞌau papara eghu,

nu nou cheke iagho na ngala te faglealeꞌa ghau iara na.

¹⁴⁴Nou farirhiu iagho re doglo fabrahu tifa tifa.

Tusu mei glalase ka iara sagho mala karha iara.

¹⁴⁵LORD God, ka gaoghathogu fateote’o, iara te kilo nigho mala fakarhi ghau. Cheke tughu meini sagho nogu khiokilo iara gne,

mala tangomana iara te leghuni nou vetula iagho na.

¹⁴⁶Iara kilo mei nigho fabrahu mala fakarhi ghau,

mala tangomana iara te tajidi nou famane farirhiu iagho ra.

¹⁴⁷Ame haghe nga naprai na teuna, iara kilo nigho mala mei fakarhi ghau.

Leuleghu fata na iara fatutuanidi fabrahu nou cheke iagho te tutuanire.

¹⁴⁸Bongi thongana na iara theome thuru,

iara ghathodi kolho nou nhaꞌa cheke iagho ra.

¹⁴⁹LORD God, ka nou namha biꞌo na iagho fanomho mei ka iara.

Uve, kokhoni ghau iara sagho nei tajini eghu nakarhagu gne eigna iagho neke nhaꞌa cheke te mala fakarhadi nou naiknore ka hoholo biꞌo.

¹⁵⁰Naikno te tirodi leghudi nou famane farirhiu iagho ra la mei namo te goigoni ghau iara na.

¹⁵¹Nu LORD God, leuleghu fata na iagho mei au namo ka iara,

eghuteuna nou cheke iagho re thofno tutuani fara.

¹⁵²Iara lasedi mei ngala nou farirhiu iagho re funu tifa.

Uve, iagho neke edi farirhiu igre mala au fabrahu tifa tifa.

¹⁵³LORD God, iara au papara fara ka thinigu na, eghume mei sagho mala atha fadelei ka iara u naꞌau papara igne,

naugna iara theome ghatho ihodi nou famane farirhiu iagho ra.

¹⁵⁴Togho ghau nei fakarhi ghau eghu iara sagho mala snagla nogu iara.

Uve, fakarhi ghau iara sagho leghuni nou nhaꞌa cheke na.

¹⁵⁵Iagho ginauna thosei fakarhidi naikno te diꞌa are,

naugna mare ne tirodi leghudi nou vetula iagho re.

¹⁵⁶LORD God, nou namha iagho na thono biꞌo fara salaꞌuni,

fakarhi ghau jateula teke nhaꞌa chekeni iagho ia eghu.

¹⁵⁷Hatimare mae naoka te fakokhoana ghau iara igre la ghilei kmana fara,

nu iara theome gnafa te leghuni kolho nou farirhiu iagho na.

¹⁵⁸Kate filodi iara mae iheire tirodi fatutuani gre,

iara diꞌatagu fara ka mare, naugna mare ne tirodi leghudi nou cheke iagho re.

¹⁵⁹LORD God, iara magnahaghedi fara nou famane cheke iagho ra.

Fakarhi ghau iara sagho, naugna nou namha iagho ranghi ghau iara na thono biꞌo fara.

¹⁶⁰Nou cheke iagho re tutuani fabrahu funu tifa,

eghuteuna puhimu iagho te fatedi naiknore thono doglo fabrahu.

¹⁶¹LORD God, hatimare mae naoka gre fiti fakokhoana ghau iara kate theo nafugna kolho.

Nu iara leuleghu fata na iara ghatho tahuni kolho nou cheke iagho te tutuani na.

¹⁶²Iara keli tagu fara ka nou cheke iagho te tutuani gre.

Uve, iara keli tagu fara, jateula mae ihei teke atha kmana glepo te keli ka vido te uluni magra ra eghu.

¹⁶³Iara tirogudi fara nafnata puhi chaichaghi fateote’o re,

nu iara magnahaghedi fara nou famane farirhiu iagho re.

¹⁶⁴Leuleghu fata na iara cheke fakeli nigho koba fitu fata ke lamnagna kaisei narane na eidi nafnata puhi te famane fate fadoglodi iagho naiknore.

¹⁶⁵Iheire te magnahaghedi fara nou famane farirhiu iagho re,

mare au fakeli nodi, nei theo kaisei glepo te diꞌa te thoke mei ka mare na.

¹⁶⁶LORD God, iara rouronu ari ka iagho te mala mei fakarhi ghau na,

nei iara leghudi kolho nou vetula iagho re.

¹⁶⁷Iara leghudi koba nou farirhiu iagho re,

eghuteuna ka gaoghathogu fateote’o na iara magnahaghei fara te leghudire eghu.

¹⁶⁸Iara leghu nou cheke nei nou farirhiu teu iagho re.

Iagho filodi gobigna lepo te edi iara re.

¹⁶⁹LORD God, fanomho mei sagho ka nogu tharai iara gre.

Tusu mei glalase ka iara jateula teke nhaꞌa chekeni iagho ia eghu.

¹⁷⁰Fanomho mei sagho ka nogu tharai iara gre,

nei mei fakarhi ghau iara eghu jateula teke nhaꞌa chekeni iagho ia eghu.

¹⁷¹Iara ginauna cheke fakeli nigho koba,

naugna iagho ne farirhiu ghau iara nou vetulare.

¹⁷²Iara ginauna koje eidi nou vetula iagho re,

naugna nou vetula iagho gre ne thofno doglo fara.

¹⁷³Tarabana kobau sagho mala mei togho ghau iara,

naugna iara ne leghudi nou famane vetula iagho gre.

¹⁷⁴LORD God, iara magnahaghe nigho fara te mei fakarhi ghau na.

Nou famane farirhiu iagho re faglealeꞌa ghau fara iara.

¹⁷⁵Tusu mei sagho u nakarha na ka iara mala cheke fakeli nigho iara.

Iara magnahagheni chekemu iagho na te togho ghau iara na.

¹⁷⁶Iara jateula sipu te tei snivi ra eghu la tei jafra kau nabrou te keli na.

Eghume, mei sagho hiro ghau iara nou mae gloku gne,

naugna iara gne theome ghatho ihoni nou vetula iagho na.

Sam 120

Tharai mala toreni nogna thotogho God na

Mare koje khoje igne kate haghe ka gaghamu bi’o Jerusalem

¹Kate au teu iara ka hoholo na, iara LORD God,

aonu mana ne cheke tughu ka iara.

²Iara ne cheke eghu ka mana,

“LORD God, mei fakarhi ghau ka naikno te chaichaghi nei ka iheire te lase saosagro te mala fakokhoana ghau iara na.”

³Ghotilo naikno te chaichaghi ra,

ghotilo theome laseni kolho unha nate eni God ka ghotilo na.

Mana ginauna na thono para ghami fara ghotilo.

⁴Papara igne ginauna na thono diꞌa fara,

na jateula nodi jata fnonu hatimare mae soldia te fada susuplu thinimi ghotilo ra na eghu.

Eghuteuna ghotilo ginauna kabru ghemi ka papara igne jateula u khaꞌaghi te thunu ra na eghu ka ghotilo.

⁵Theome te keli ka iara naugna iara ne au ka vido igne.

Naikno igre, mare thono diꞌa fara ne goigonidi keha naiknore.

⁶Funu tifa fara te ghilei mei posa gognaro na iara neke au baludi naikno te tirodini u pharikeli na.

⁷Neubane magnahaghei pharikeli iara na,

mare magnahaghei magra kolho.

Sam 121

God na mae mala reireghi ghita

Mare koje khoje igne kate hage ka gaghamu bi’o Jerusalem.

¹Iara filo haghe ka thogelero,

nu theo kaisei naikno jare te mei togho ghau na.

²LORD neke vuavuha maloa ghe nauthoglu,

eghume kaisei mana ngala te tangomana nate togho ghau iara na.

³Uve, LORD na theome thuru nei ghatho iho ghau eghu iara.

Leuleghu fata na mana na reireghi fakeli ghau iara.

⁴Mana theome tangomana te thuru na,

nei leuleghu fata na mana reireghi fakeli ghita naiknoda Israel.

⁵LORD ginauna reireghi ghita,

nei au baluda eghu.

⁶Uve, mana ginauna reireghi ghita bongi narane na.

⁷LORD ginauna reireghi ghita ka thua hoholo fateote’o.

Uve, mana na reireghidi nakarhadare.

⁸LORD ginauna reireghi ghita kate jiflada na ba kate ruma meida na,

funu gognaro gne tifa e tifa.

Sam 122

Koje kilo fnaknoni God kate ruma haghe Jerusalem

Nogna khoje mae Devet. Mare koje khoje igne kate hage ka gaghamu bi’o Jerusalem.

^1-2Iara thono keli tagu fara kate cheke eghu naiknore ka iara na,

“Tahati na kafe tei ka Sugablahi nogna LORD.”

Aonu ghehati gognaro na kegra ke lamnagna Sugablahi na Jerusalem.

³Namono biꞌo Jerusalem gne mare famane eni fara.

Mare babana suga igre ke lamnagna namono biꞌo igne na,