Profet Malakai
Nogna Buka Mae Profet Malakai
Thoutonu kmo’ei eigna buka igne
Profet Malakai neke rioriso buka igne jame ka finogha 450 neke karha nga Kraes (450 B.K.). Mana rioriso ke leghugna teke babana fapulo nogna Sugablahi LORD Jerusalem. Gaoghatho biꞌo ke lamnagna buka igne na: LORD neke magnahaghedi mae pris nei naiknodi Israel mala ghathoni nhaꞌa cheke teke eni mana baludi mare. Buka igne tahati thofno lasedi fara puhidi naiknodi Israel, eigna mare theome keli ka tathagna God na. Mare loku heta fei kastom meresin, nei theome leghuni puhigna tholaghi, ba cheke chaichaghi ka fate. Mae funei gre mare taba chaichaghidi nodi mae glokure, theome keli ranghidi iheire te posa mei ka sugadire, goro naikno biꞌo teke lehe khetodire, ba goro sua te glehe kokoi. Mae pris nei naiknodi teu Israel gre mare cheke faparini God. Eghuteuna theome leghudi nogna vetula nei cheke teke chekedi manare. Neuba, God na ginau fatedi nogna naikno thegna te edi igre. Mana thono magnahaghedi nogna naiknore teke tughu nagnafa ngala ke figri nei mala ke naikno doglo eghu ka tathagna mana na. Nu ulu lahu na mana na kuruni kaisei mae mala atha nonomho mala chekedi naiknore mala kaikaliti nabrougna mana, nei mala chekeni ka mare u nhaꞌa cheke teke eni mana ka nogna naiknore. Ka buka igne cheke eigna kaisei glepo te kiloi, “tithe”, gaoghathogna na fabothodi unha te atha mare ka nodi nagare are mala ranghini God. Nu mana magnahaghedi nogna naiknore te leghudi nogna vetula te chekedi mana mala edi mare teure.
Keha vido ka buka igne
LORD namhadi iheire teke karha mei ka vikegna Israel: 1:1-5
LORD tirognadi pris: 1:6–2:9
Naiknodi Juda huhughuni nhaꞌa cheke na: 2:10-16
Narane na mei eigna LORD ginauna fablahidi naikno te doglo, eghuteuna paradi iheire te leghuni puhi te diꞌa na: 2:17–4:6
1Cheke ululahu
1Igne cheke teke cheke LORD ka mae Malakai mala toutonu mana ka naiknodi Israel.
God namhadi naikno te karha mei ka vikegna Israel
2Igne unha teke chekeni LORD, “Ghotilo te karha mei ka vikegna Jekop ra, iara thofno namha ghami ghotilo fara.”
Nu ghotilo cheke eghu ka mana, “Mala faꞌunha sagho te namha ghami ghehati gnea?”
Aonu LORD ne cheke eghu, “Uve, tifa na mae Jekop ghe mae Iso ra neke phei mae thabusigna. Eghuteuna iara neke namhani mae Jekop, eghuteuna iara neke jaola neke namha ghami ghotilo naikno teke karha mei ka vikegna mae Jekop ra eghu. 3Nu iara neke theome magnahagheini mae Iso nei iheire te karha mei ke leghugna manare. Naugna igne iara snakredi mae naokare mala mei goigonini nodi namono vikegna mana teke au ka thogele na mala nodi namono khuma mata.”
4Naiknodi Idom teke karha mei ke leghugna mae Iso igre jame cheke eghu, “Neuba mare ne mei goigoni noda namono tahati gne, tahati tangomana teke hohoro fapulo na.”
Nu LORD mae ihei te au nolaghi fateoteꞌo igne ne cheke eghu, “Uve, jame teke hohoro fapulo ghotilo na, iara ginauna kiloni namono Idom igne, ‘Nodi namono iheire te tapla jafra ka nakhibo’ eghuteuna LORD ginauna diꞌatagna fabrahu ka naiknodi Idom gre. 5Mana ne cheke eghu, ‘Ghotilo naiknomi Israel ra ginauna filo tathami glepo te chekedi iara igre. Eghuteuna kate filodi ghotilo glepo igre, ghotilo ginauna cheke eghu: LORD na au nolaghi fateoteo! Mana tangomana jaola te fakakhana nogna nolaghi na ke kosi kantri Israel. ’ ”
LORD ne cheke faheta ka hatimare mae pris
6Igne nogna cheke LORD mae ihei te au nolaghi fateoteꞌo. Mana ne cheke eghu ka hatimare mae pris, “Leuleghu fata na mae sitei na ghatho tahuni mae kmagna na, eghuteuna mae gloku na mana thofno leghuni nogna mae funei na. Eghume iara thofno mae kmami ghotilo. Naugna unha si ghotilo te theome leghudi nogu cheke iara grea? Iara nomi mae funei ghotilo.
“Ghotilo mae pris gre cheke fadiꞌani nanghagu iara na.
“Nu ghotilo cheke eghu, ‘Ba? Niha ngala si ghehati teke cheke fadiꞌani nanghamu iagho na ia?’
7“Filo si ghotilo, ghotilo cheke eghu, ‘Ba? Niha ngala si teke cheke fadiꞌani ghehati nanghamu iagho naia?’
“Nu te chekeni iara ka ghotilo na, ‘Leghu fata na, ghotilo loku fadiꞌa ke kligna nogu olta iara. 8Ghotilo fafara ka iara buluka te dofu, te fogra, te lehe ghahedi teu igre. Ba? Tuare site doglo ka gaoghathomi ghotilo rea? Fariuriu atha tei si ghotilo nafnata gano tuare ka nomi mae funei na, na keli tagna mana neu si ghotilo ia? Thono theo fara!’
9“Ghotilo mae pris gre cheke eghu koba, ‘Tahati tore ka God mala kokhoni ghita nei togho ghita eghu mana!’ Tore, iara tirogu ghami ghotilo. Iara theome kokhoni ghami ghotilo! Naugna ghotilo atha mei ka iara fafara te diꞌa tuare.
10“Fanomho si ghotilo, igne nogna cheke LORD mae ihei te au nolaghi fateoteꞌo na, ‘Mae pris cheke eghu koba ka ghotilo, “Bobotho Sugablahi ana mala thosei tei ruma ghotilo mala fafara ke kligna olta.” Naugna iara theome kelitagu ka ghotilo, iara ginauna na tirogudi fafara te atha te mei ghotilo tuare. 11Naikno te gnafa ka kantri te gnafa teu ka nauthoglu na igre ginauna atha insens nei gano eghu mei mala fafara ka olta, eigna mare ghatho tahu ghau iara.’
12“Nu ghotilo cheke fadiꞌani nogu olta iara na, eghuteuna ghotilo atha mei gano te tiromidi themi re mala fafara. 13Ghotilo cheke eghu koba, ‘Ghehati hongo ghami kate edi koba glepo igre!’ Uve, nafnata cheke te eni ghotilo igne jateula te kmisu mei ka tathagu nei foflogu teu iara gre eghu. Leuleghu fata na ghotilo atha mei koba ka iara buluka teke blau, te lehe gahedi, te au fogra tadi teu igre mala fafara ka iara. Ba? Ne magnahaghedi iara nafnata fafara tuare neu si ghotilo ia? Thono theo fara! 14Iara ginau tibridi iheire te nhaꞌa cheke chaichaghi ka iara igre. Naugna mare ne theome leghuni nhaꞌa cheke mala atha mei famane sipu mala fafara ka iara tekura, nu mare atha mei ka iara sipu te diꞌare. Iara mae king biꞌo, mae ihei te nolaghi fateoteꞌo, eghuteuna naikno te gnafa ka nauthoglu igne mala kilo fnakno ghau iara. Uve, igne nogna cheke LORD.”
2LORD ne cheke faheta ka mae pris eidi nodi farirhiu mare te diꞌa igre
1LORD mae ihei te au nolaghi fateoteꞌo igne ne cheke eghu, “Ghotilo mae pris ra. Gognarona iara ari ka ghotilo cheke igne. 2Jame ghotilo theome leghu ghau iara ba theome ghatho tahuni nanghagu iara na, iara ginauna ei puhi biꞌo mala thoke ghami ghotilo nei thokeni nakarhami keli ghotilo mae pris ra. Uve, iara enihi ka ghotilo, naugna ghotilo ne theome ghatho tahuni nanghagu iara na.
3“Naugna igne, iara ginauna fagnafani vikemi ghotilo gne, eghuteuna iara ginauna ghiha tathami nei foflomi teu ghotilo are ka butu te atha fajifla ghotilo ka buluka teke fafara ghotilo are. Eghume ghotilo theome naba te eni nogna gloku pris, eghuteuna iara ginauna atha ghami ghotilo baludi butu tuare mala tei koko ka chara. 4Ka narane tuana, ghotilo ginauna laseni iara te cheke faheta ka ghotilo igne, mala theome gnafa nhaꞌa cheke teke eni iara tifa balumi ghotilo mae pris ka vikegna Livae. 5Ka nhaꞌa cheke igne, iara neke baubahu mala tusu ari nakarha te keli nei pharikeli ka vikemi ghotilo are. Uve, iara eni igne mala ghatho tahuni mare nanghagu iara na. 6Mare farirhiudi naiknore mala leghuni kolho puhi te doglo na. Mare neke leghuni puhigu iara te doglo igne mala au fakeli kau pharikeli, mala toghodi kmana naikno mala theome leghuni puhigna nakhibo.
7“Mae pris igre nogu mae mala atha nonomho iara LORD mae te au nolaghi fateoteꞌo. Eghume, mare mala farirhiudi naiknore mala lase fakelini thofno puhigu iara na, eghuteuna naiknore mala mei atha glalase ka mare. 8Nu ghotilo mae pris gre la theome leghunihi puhi te doglo. Eghuteuna gobigna lepo te farirhiu ghotilo ka naiknore, batudi kmana mala jafra. Ghotilo huhughuni hi nhaꞌa cheke teke eni iara balumi ghotilo ka vikegna Livae. 9Eghume, iara snakredi naikno te gnafa igre mala famamaja ghami ghotilo, naugna ghotilo ne tiromi leghuni kolho puhigu iara na, nu leghudi kolho keha naiknore kate farirhiudi ghotilo re.”
Igne nogna cheke LORD mae ihei te au nolaghi fateoteo.
Maedi Juda tolaghi ka gaꞌasedi keha namono delei
10Mae profet Malakai ne cheke eghu ka mare, “God na kmada tahati, mana teke vuavuha ghita tahati gnafa. Jame te eghu na, naugna unha si ghotilo te theome leghuni u nhaꞌa cheke teke eni God baludi ku’eda tifa ra? Ba? Naugna unha si ghotilo te goigoni noda na au fodu tahati gnea?
11“Ghotilo naiknomi Juda huhughuni nhaꞌa cheke teke eni tahati balugna God. Uve, ghotilo Jerusalem nei keha vido te gnafa ka kantri igne edi glepo te thono diꞌa fara. Ka puhi te tolaghi ghotilo ka gaꞌasedi keha kantri delei te pogho soru te tarai ka mumuju, eghuteuna ghotilo mei ne eni puhi te diꞌa na ka nogna Sugablahi LORD. 12Mae ihei te eni nafnata puhi te diꞌa igne, nabagna na lisa lao ka khamegna LORD mala atha fadelei ka vikeda tahati maeda Israel. Eghuteuna tahati ginauna theome snakreni mana mala loku fodu baluda tahati kate mei fafara tahati ka narane te mei fafara tahati ka LORD na mae ihei te au nolaghi fateoteꞌo.”
LORD theome magnahagheni mae ihei te koko khetogna na
13Mae profet Malakai ne cheke eghu, “Kaisei glepo te chekeni koba ghotilo na igne: Kate laseni ghotilo te theome magnahagheni LORD unha te tusu lao ghotilo ka mana na, ghotilo tanhi ghilei lao ke kligna olta kholo te tathamire. 14Ba? Naugna unha site eghu ghotilo gnea? Mana theome magnahaghedi unha te tufa ghotilo ka mana re, naugna mana lasedi te theome tajini ghotilo nomi nhaꞌa cheke teke eni ghotilo ka tholaghi ia kate tolaghi. Kani teke majaghani na ghotilo neke nhaꞌa cheke ka khetomire. Eghuteuna neubane eghu ngau, ghotilo theome leghuni kolho nomi nhaꞌa cheke na.
15“Nu kate eni repa nhaꞌa cheke igne, God loku fodudi repa mala jateula kaisei thini nei kaisei gaoghatho eghu ngala repa. Naugna unha si God te eni ignea? God neke eni igne mala au sua vuragha ghotilo neku, eghuteuna goro sua igre mala goro thugna God. Eghume ghotilo mala reireghi fakelini nakarhagna thegna na, thosei huhughuni nhaꞌa cheke teke eni ghotilo ka narane teke loku fodu ghami God.
16“Igne nogna cheke LORD noda God tahati maeda Israel. Mana neke cheke eghu, ‘Iara theome magnahagheni nafnata puhi te koko ghotilo khetomi gre. Nafnata puhi te koko ghotilo khetomire igne, iara thofno tiroguni fara. Eghume, te chekeni iara na, reireghi fakelidi nakarhami are, nei thosei huhughuni nomi nhaꞌa cheke teke eni ghotilo ka narane teke tolaghi ia eghu.’ ”
Narane God te mala fatedi nogna naiknore ginauna mei
17Mae profet Malakai ne cheke eghu, “LORD na theome magnahaghei te nomhidi nomi cheke ghotilo are.
“Nu ghotilo cheke eghu fabrahu koba, ‘Naugna unha si mana te theome magnahaghedi noda cheke tahati grea?’
“Mana theome magnahaghei nomhidi nomi cheke ghotilo re naugna ghotilo ne cheke eghu fabrahu koba, ‘LORD na theome diꞌatagna ka mae ihei te tapla jafra ka nakhibo na.’ Eghuteuna ghotilo jaola cheke eghu koba, ‘Naugna unha si God te theome fatedi naiknore ka puhi te doglo gnea?’ ”
31Nu LORD mae ihei te nolaghi fateotei igne ne cheke eghu, “Iara ginauna kuruni nogu mae mala atha nonomho na mala kulu tarabana nabrou gu iara. Nomi LORD te ofoni teu ghotilo igne ginauna megeinga mei ka nogna Sugablahi na. Uve, mae te thofno magnahaghei filoni ghotilo igne ginauna mei, eghuteuna mana ginauna chekeni nogu nhaꞌa cheke iara na.”
2Nu ihei gne te nabagna te mala au heta teu ka narane nate mei mana na? Uve, theo kaisei mae nate tangomana te kegra heta kate filoni mana na. Mana ginauna na jateula mae ihei te gahu ka khaꞌaghi silva te mala khoko thonara eghu, ba jateula mae ihei te sopu nogna pohe te thona na te mala gaera eghu. 3Eghume mana na jateula tuana eghu na fatedi mae pris igre mala gae, eghuteuna mare ginauna hogri nagnafa mala atha mae pris fafara gano te keli ka puhi te doglo. 4Aonu LORD ginauna na keli tagna fara ka gano te keli te atha te mei naikno te gnafa ka nohi Juda nei ka namono Jerusalem jateula teke edi tifa ra eghu.
5LORD mae ihei te au nolaghi fateoteꞌo igne ne cheke eghu, “Iara ginauna mei mala fate ghami ghotilo. Eghuteuna iara ginauna ghosei cheke thakleni nanghagna ihei te au naitu khora pha’u, nei iheire te theome leghuni puhigna tholaghi na, nei iheire te cheke chaichaghi ka fate, nei mae funei te taba fadiꞌadi nodi mae glokure, nei iheire te fakokhoanadi goro naikno biꞌo tela lehehi khetodi, nei goro sua glehe kokoi, nei iheire te theome kokhonidi naikno te posa mei ka sugadire teu igre. Uve, naikno te gnafa te edi puhi te diꞌa igre ginauna theome ghatho tahu ghau iara.”
Jame teke pulo mei ka God naikno igre na, God ginauna fablahidi
6LORD mae ihei te au nolaghi fateoteo igne ne cheke eghu, “Iara LORD, iara theome tangomana teke tughu na. Eghume ghotilo vikegna mae Jekop ra ghotilo ginauna theo kaisei glepo ka nauthoglu igne nate tapla fapari ghami ba fahui ghami ghotilo. 7Funu ka naranedi mae kuꞌemi ghotilo tifara te ghilei posa mei ka ghotilo gognaro gre, ghotilo tiromi leghudi nogu puhi nei vetula teu iara gre. Nu jame koko ghotilo puhimi te diꞌare eghuteuna hogri nagnafa ghotilo meke pulo mei ka iara meuna, iara ginauna nake pulo mei ka ghotilo.
“Nu ghotilo cheke eghu, ‘Na faꞌunha eghu ke pulo mei ka ghehati sagho ia?’
8“Eghume te chekeni iara ka ghotilo na, ‘Ghotilo blau nogu glepo iara re. Puhi te diꞌa igre theome gnafa ka ghotilo eghu.’
“Thogheiro na ghotilo nake cheke ka iara, ‘Naugna unha sagho te chekeni ne blau ghehati nou glepore teu gnea?’
“Filo si ghotilo, ghotilo chaghi ghau iara, naugna ghotilo ne theome atha ne mei ka iara fabothodi gobigna lepo malagu iara teku ghotilora. 9Tutuani fara, puhi biꞌo thoke ghami ghotilo naikno te gnafa Israel igre, naugna ghotilo ne blau nogu glepo iara re. 10Ghotilo atha mei ka iara fabothodi unha teke atha ghotilo ka nagare are mala kmana ghedi gano nogu mae gloku iara gre. Te eghu ghotilo na, iara ginauna na thofno fablahi ghami ghotilo, eghuteuna ghotilo ginauna na theome kmoꞌe ka gano na. Ginauna ghotilo na laseni unha te chekeni iara igne thofno tutuani fara. 11Iara ginauna theome snakreni kaisei cheche mala goigonidi ghemi gano ghotilo are, eghuteuna iara ginauna theome snakredi sisidi nomi gaju ghotilo are mala brusu ame muita nga reꞌe eghu. 12Kate filoni te eghu fabrahu ghotilo na, keha naiknore ginauna cheke eghu, ‘Naiknodi Israel gre keli tadi nei glealeꞌa nodi eghu fara! Naugna nomi namono ghotilo igne keli fara te mala au tagna na.’ ”
God neke nhaꞌa cheke mala kokhonidi naikno te doglore
13LORD ne cheke eghu, “Ghotilo edi kmana cheke te diꞌa ranghi ghau iara.
“Nu ghotilo cheke eghu ka iara, ‘Ba? Unha cheke te diꞌa gre teke chekedi ghehati ka iagho re?’
14“Ghotilo neke cheke eghu, ‘Tahati tore koba ka God eghuteuna God na theome togho ghita tahati, eghume mala unha site leghuni tahati chekegna mana gnea? Ka tathagna LORD mae ihei te au nolaghi fateoteꞌo igne diꞌanagnafa eidi nakhibodare, nu mana theome togho ghita ngala eghu. Eghume diꞌanagnafa te edi tahati igre theo nafudi kolho. 15Tahati filodi naikno te fahaehaghe igre mare au fakeli nodi nei glealeꞌa nodi eghu koba. Eghuteuna naikno te tapla jafra koba ka nakhibo igre mare au nodi kmana glepo te keli fara. Eghuteuna God na theome paradi kolho unha puhi te diꞌa te edi mare re eghu. Thono theo fara!’ ”
16“Ke leghu na, naikno te ghatho tahuni LORD igre ginau cheke fari thedi, eghuteuna LORD ginauna fanomho ka unha te chekedi nogna naikno te ghatho tahuni LORD igre, nei mhaghu teu igre ginauna rioriso soru ka buka mala ghathodiu.
17“Aonu LORD mae ihei te au nolaghi fateoteꞌo igne ne cheke eghu, ‘Naikno igre mala nogu iara. Eghuteuna iara ginauna kokhonidi naikno igre jateula mae kmami ghotilo te kokhonidi thudi ra eghu. 18Kau narane nate mei ginau igne, ghotilo ginauna laseni naikno te au doglo ka tathagu, nei leghu ghau iara teu igre na nhogri ka naikno te diꞌa te theome leghu ghau iara igre.’ ” Igne chekegna LORD mae ihei te au nolaghi fateoteo.
4Nogna Narane LORD na ginau mei
1LORD ne cheke eghu, “Nogu narane iara te mala fatedi naiknore ginauna mei jateula khaꞌaghi eghu. Naikno te cheke fahaehaghe, nei naikno te diꞌa puhidire teu igre ginauna jateula gaju te gnagha te brusu khaklagnare ra eghu. Eghuteuna ka narane tuana naikno igre ginauna nhako fahui ka khaꞌaghi. 2Nu ghotilo naikno te ghatho tahuni nanghagu iara na igre nogu nolaghi iara na ginau soru mei ke klignami ghotilo jateula naphaegna naprai te agha soru mei funu klignara eghu mala fablahi ghami ghotilo. Eghume, ghotilo ginauna na snagla nomi nei glealeꞌa nomi eghu, jateula sua buluka te jifla balu glealeꞌa ka bara na te ghasa tafri ra eghu. 3Ka narane tuana, ghotilo na tapla ke klignadi naikno te diꞌa igre, naugna mare ginauna na jateula nakrofu khaꞌaghira eghu kolho.” Igne unha te chekeni LORD mae ihei te au nolaghi fateoteꞌo.
4“Ghotilo mala ghatho tahudi nogna farirhiu mae nogu gloku iara mae Moses, nei vetula teke tusu lao iara ka mae Moses ka Thogele Sanai ra eghu malami ghotilo te gnafa Israel.
5“Nogu narane biꞌo iara na ginauna mei, eghuteuna naiknore ginauna mhaghu nodi fififri fara kate thokei meigna narane igne. Nu ulu lahu na iara na kuru meini mae profet Elija ka ghotilo ame thoke mei nga narane te mala fatedi naiknore. 6Mae profet gne ginauna loku fodudi kmadi nei thudi teure mala au ka pharikeli. Te theo ghotilo na iara ginauna tibri ghami ghotilo.”