Levitikas

Levitikas

Vetula Nei Fafara Mala Mei Ka God

Thoutonu kmo’ei eigna buka igne

Buka igne eidi vetula teke chekedi LORD nodi God maedi Israel, mana neke cheke ka mae Moses. Nangha kmoꞌei gna na Levitikas. Nangha igne ne eghu jare naugna buka igne chekedi kmana glepo eidi gloku te mala edi mae pris. Eghuteuna tahati lasedi mae pris di Israel igre vikegna mae Livae kolho. Eghume nanghagna buka te kmoꞌei igne mei ka nangha gna vikegna mae Livae.

Ka buka igne, au vetula mala tarai, nei mala klino naiknore ka tathagna LORD, baludi vetula eidi narane biꞌo te mala tufru soruni mana. Eghuteuna jaola chekedi unha nafnata glepo tautagu naba te mala ghamu na, nei puhi te mala reireghi fakelidi naikno te kuma, nei puhi te mala reireghi fakelidi nodi glose naiknodi Israel. Vetula igre, God neke tusu lao ka nogna naiknore naugna mana neke namhadi fara, eghuteuna mana magnahaghedi naiknore te blahi nei tangomana te mei ka mana.

Gaoghathogna cheke “blahi” teu igne thofno glola ka Levitikas. Mae pris nei naikno teu igre tangomana te au blahi na, eghu jame te leghudi mare gobigna lepo te chekedi LORD tadi re. Keha glepo te chekedi mana re, mana magnahaghedi nogna naiknore mala thofno nhogri ka keha naikno te au faligohodi mare. Keha glepo te chekedi mana te mala edi mare re, mare mala au ka nakarha te doglo nei klino eghu ka tathagna mana na. Keha glepo te chekedi mana te mala edi mare re, mare mala reireghi fakelidi nodi glose re naugna glose tuana thofno nogna God. Keha glepo te chekedi mana te mala edi mare re, mare mala edi fafara igre thofno blahi fara naugna puhi mala koko fadelei nakhibodi mare re. Keha glepo te chekedi mana te mala edi mare re, mare mala ghatho tahuni LORD kolho. Eghume puhi te mala au fadelei ka keha naiknore igne, mala laseni tahati gaoghathogna “blahi” teu igne.

Namo ka huigna buka igne, LORD neke cheke ka mae Moses jame te leghuni mare mana na, mana ginauna fablahidi mare. Nu mana jaola neke cheke ka mae Moses jame te tirodi mare te leghuni mana na, mana ginauna paradi mare. God neke eni igne, naugna mana neke eni kaisei nhaꞌa cheke baludi mare. Ulu lahu na God neke eni kaisei nhaꞌa cheke ka Ebraham, eghuteuna ke leghu na mana eni kaisei balugna mae Moses nei naikno teke atha fajifla mana Ijep.

Kmana fata cheke te au ke lamna gna buka na igre mei ka Nonomho te keli. Kaisei cheke na kmana naikno laseni fara, igne au ka 19:18. Kmana fata mae Jisas cheke eghu, “…ghotilo namhadi kherami fofodu are jateula iagho te namha nigho themu eghu, naugna iara LORD.” Keha glepo na, ghatho fakelini buka Hibru ka Nonomho te keli na igne tahati mala lase fakeli buka igne.

Na faꞌunha eghu tahati tangomana nate ghathodi vetula te au ka Levitikas igre gognaro gne? Vetula te kmana igre nabadi nakarhadi maedi Israel tifa ra kolho. Gognarona tahati mala iuꞌiju fakeli eghuteuna fariuriu ghathoni unha nafnata gaoghatho biꞌo te au ke lamnadi vetula igre. Kaisei na igne: Vetuladi nodi glose mare igre falalase ranghi ghita te tahati mala ghatho tahudi nei reireghi fakelidi eghu glose gre. Keha na: vetula mala fafara mala doglo tahati ka tathagna God. Jaola tahati mala fariuriu mala doglo vido te gnafa ka nakarhada re ka tathagna God. Eghuteuna jame te theome doglo na, tahati mala tei ka God mala toreni mana mala atha koko nakhibodare. Tahati mala au blahi naugna God blahi (19:2).

Keha vido ka buka igne

Vetula eidi soasopai nafnata fafara: 1:1–7:38

Puhi te mala fablahidi mae pris: 8:1-36

Nogna fafara ululahu pris biꞌo Eron: 9:1-24

Phei thugna pris Eron ne lehe: 10:1-20

Unha te klino nei theome klino ka tathagna God: 11:1–15:33

Narane biꞌo mala atha koko nakhibo: 16:1-34

Keha vetula eidi puhi mala au fodu: 17:1–20:27

Keha nodi vetula mae pris: 21:1–22:33

Vetula di gaghamu: 23:1-44

Keha vetula di Suga Tapuale te Blahi: 24:1-9

Mae ihei te cheke fadiꞌani nanghagna God: 24:10-23

Vetula di Finogha Sabat nei Glima fulu Finogha: 25:1-55

Fablahi nei Papara: 26:1-46

Vetula eidi nhaꞌa cheke blahi: 27:1-34

Vetula mala fafara

¹LORD au neu ka Suga tapuale te Blahi aheva mare te mala thafoni mana na ne ehani mae Moses. ²Eghuteuna LORD ne cheke ka mae Moses mala cheke mana ka naiknore. Mana ne cheke eghu, “Jame kaisei ka ghotilo magnahaghei fafara mala pogho soru ka iara, te keli na mana atha kaisei buluka ba kaisei nanigot ba kaisei nogna sipu.”

Fafara te thofno krono

^3-5LORD ne cheke eghu, “Jame kaisei mae ka ghotilo magnahaghei mala fafara buluka nalhaꞌu te thofno krono, mana mala atha kaisei te famane te theome au kaisei thona ka thinigna na. Mana mala tusu mei ka iara ka grengathagna Suga tapuale te Blahi te namo ka Olta te mala Gahu Fafara tagna na, mala kelitagu iara. Eghuteuna mae igne mala habo lao khamegna na ka phaꞌugna buluka nalhaꞌugna, eghuteuna iara ginauna kelitagu ka fafara tuana mala atha koko nakhibogna mae igne. Eghuteuna mana mala falelehe buluka nalhaꞌugna na ke ulugu iara, eghuteuna mae pris ka vikegna mae Eron igne ginauna atha dadaragna na atha mei ka iara mala totofa ka fati philegna olta na. ⁶Mae igne mala vahe koko guligna buluka igne, eghuteuna mana vahe buluka igne ka vidodi. ^7-9Eghuteuna mana titihi fagae lamna ka thiꞌagna na eghuteuna jaola ghahegna. Aonu mae pris igre kaikaliti gaju mala ei khaꞌaghi ke kligna olta, eghuteuna gnafa teuna mana lilisei fakeli vidogna buluka igne ke kligna khaꞌaghi. Aonu mana gahu ka olta na vidogna te gnafa buluka igne, balu phaꞌugna, nei garofagna. Mana mala gahu buluka igne mala kaisei glepo blahi eghuteuna LORD kelitagna fara ka sisiri gna na.

¹⁰“Jame kaisei mae ka ghotilo magnahaghei fafara sipu ba nanigot te thofno krono, mana atha kaisei nalhaꞌu gna te theo kaisei thona ka thinigna na. ¹¹Mana aknu falehe buluka igne ke ulugu iara phile ke raru olta, eghuteuna pris ka tharaknagna mae Eron ginauna atha dadaragna buluka igne tofa ka fati philegna olta na. ^12-13Aonu mae igne vahe buluka igne ka vidodi, eghuteuna famane titihi fagae ka thiꞌagna lamna na baludi la gobigna lepo nei ghahegna teure. Aonu mae pris ginauna atha vido igre, eghuteuna mana atha phaꞌugna nei garofadi teu buluka igne mala lilisei ke kligna khaꞌaghi ka olta na. Fafara igne sisigna na thofno kelitagna ni LORD.

¹⁴“Jame kaisei mae ka ghotilo magnahaghei te fafara kaisei nanghaji te krono fara, mana mala atha mei kaisei thukmu ba kaisei balhu. ¹⁵Mae pris ginauna atha mei nanghaji igne ka olta na, eghuteuna pala mei ke ulugu iara mala pipiruki graragna na mala lehe naꞌa, eghuteuna kusu koko phaꞌugna nanghaji igne ke kligna olta. Nu mana kulu totofa dadaragna nanghaji igne ka gerigna olta na. ¹⁶Mae pris jaola dalha nanghaji igne, eghuteuna atha fajifla butugna na koko tei ke maghati rhegna olta, ka vido aheva te mala lilisei mare nakrofu gna olta tagna na. ¹⁷Eghuteuna mana loku ka phei baghigna re, eghuteuna korho mala klopa kakatha thinigna na, eghuteuna mana gahu ka khaꞌaghi ke kligna olta. Mana gahu balhu igne mala kaisei glepo blahi, eghuteuna sisirigna na kelitagnani LORD.”

Atha mei flaoa teke eni ka famane wit

¹LORD ne cheke eghu, “Jame kaisei mae ka ghotilo magnahaghei atha mei gano ka nagare mala famei ka iara, mana mala atha mei flaoa teke eni ka famane wit. Eghuteuna mana mala lilisei oliv oel nei insens eghu ka flaoa igne. ²Kate lilisei te gnafa na, mana atha tei tusu lao glepo igre ka mae pris thugna mae Eron. Aonu pris igne mala atha kakatha vido flaoa nei oel eghu baludi insens te gnafa igre, eghuteuna mana gahu ke kligna olta mala laseni te famei mana flaoa igre ka iara eghuteuna glepo igre blahi naugna iara LORD kelitagu ka sisirigna na. ³Keha vidogna flaoa nei oel teu igre maladi mae pris Eron nei thugna mana re. Flaoa igne blahi fara naugna vidogna na neke tusu meihi ka iara.

⁴“Jame kaisei mae ka ghotilo magnahaghei te atha te mei ka iara bret teke tetego na, bret igne blahi te lilisei isi tagna na. Mana atha famane flaoa ngigno balu oliv oel mala tetego bret, ba ei bisket te ghiha oliv oel tagna. ⁵Jame kaisei mae ka ghotilo magnahaghei te atha te mei ka iara flaoa teke gahu ka fraepan, mana ngigno famane flaoa te theo isi tagna na balu oliv oel. ⁶Mana piphike eghuteuna tofa oliv oel tagna. Igne puhi te mala atha te mei ka iara flaoa teke eni ka famane wit. ⁷Jame kaisei mae ka ghotilo magnahaghei te atha te mei ka iara flaoa teke kuki ka suspen, mana kulu ngigno famane flaoa balu oliv oel. ⁸Jame kaisei mae ka ghotilo eni kaisei fafara ka wit malagu iara, mana ginauna atha mei ka mae pris, eghuteuna mae pris igne atha mei ka olta. ⁹Aonu mae pris ginauna atha kaisei vido ka gano igne, eghuteuna mana gahu ke kligna olta mala laseni te atha te mei mana ka iara na eghuteuna igne glepo blahi naugna iara LORD kelitagu ka sisirigna na. ¹⁰Keha vidogna flaoa nei oel teu igre maladi mae pris Eron nei thugna mana re. Flaoa igne blahi fara naugna vidogna na neke tusu meihi ka iara.

¹¹“Flaoa ka famane wit atha te mei ghotilo ka iara igne mala theome au isi tagna. Ghotilo theome tangomana te lilisei isi ba jurukuli ka gano te gahu ghotilo igne jateula thufa blahi eghu ka iara. ¹²Leuleghu finogha, kate atha mei ghotilo ka iara gano saro ulu ka nomi nagare ghotilo re, ghotilo tangomana te lilisei isi ba jurukuli tagna, nu ghotilo theome tangomana te gahu isi ba jurukuli ke kligna olta te mala kelitagu iara ka sisirigna na. ¹³Flaoa te edi ka famane wit te atha te mei ghotilo ka iara igne, ghotilo lilisei tahi tagna, naugna tahi igne fagaglana gna nhaꞌa cheke teke eni iara balumi ghotilo ia. Ghotilo mala lilisei tahi ka gano te atha te mei ghotilo ka iara re.

¹⁴“Kate atha te mei ghotilo ka iara gano teke saro ulu ka nomi nagare re, ghotilo tangomana te atha te mei wit teke gahu nei jigri teku ghotilo re. ¹⁵Eghuteuna ghotilo tofa oliv oel tagna, eghuteuna ghotilo jaola lilisei insens tagna naugna famane flaoa majaghani teke eni ka wit. ¹⁶Aonu mae pris ginauna atha kakatha flaoa nei oel baludi insens te tusu mei ghotilo re, eghuteuna gahu ke kligna olta mala laseni ghotilo te tusu mei gano igre ka iara na eghuteuna igne jateula kaisei gano te tufa ka LORD eghu.”

Fafara mala au fakeli balugna LORD

¹LORD ne cheke eghu, “Jame kaisei mae ka ghotilo magnahaghei fafara mala au fakeli balugu iara, mana tangomana te atha kaisei nalhaꞌugna ba gaꞌase gna buluka te theo kaisei thona ka thinigna na, eghuteuna mana atha mei ke ulugu iara. ²Mana mala habo khamegna na ka phaꞌugna buluka igne mala laseni fafara igne te nogna mana na. Eghuteuna mana mala aknu falehe ka grengathagna Suga Tapuale te Blahi na, aonu pris thugna mae Eron igre fuafusa dadara igne ka fati philegna olta na. ^3-4Mae igne mana atha garofa lamna ka thiꞌagna buluka igne, baludi phei chauchau nei garofadi, balu vido te keli ka khebugna na, mala tusu lao ka mae pris igre, mala kaisei thufa blahi. ⁵Aonu mae pris igne gahu glepo igre ke kligna olta, baludi keha fafara te thofno krono. Igne kaisei glepo blahi te kelitagu iara LORD ka sisirigna na.

⁶“Jame kaisei mae ka ghotilo magnahaghei te atha sipu ba nanigot mala fafara ka iara LORD mala laseni mana te au fakeli balugu iara na, mana tangomana te atha te mei kaisei nalhaꞌugna ba gaꞌasegna te theo kaisei thona ka thinigna na. ⁷Jame mana atha mei kaisei sipu ke ulugu iara LORD, ⁸mana habo khamegna na ka phaꞌugna sipu igne, eghuteuna mana aknu falehe sipu igne ke ulugna Suga Tapuale te Blahi igne. Aonu mae pris ka thugna mae Eron igne atha dadaragna sipu igne mala fuafusa ka fati philegna olta na. ^9-11Fafara igne te mala lase ni au fakeli balugu iara, mae igne mala atha mei garofagna sipu igne, garofa ka gleghugna te vahe fadelei ka thagrugna sipu igne, nei garofa lamna ka thiꞌagna na, phei chauchau balu garofadi, nei vido keli ka khebugna na. Aonu mae pris igne gahu glepo igre ke kligna olta mala blahi gano igre.

¹²“Jame mana atha mei kaisei nanigot ke ulugna LORD, ¹³mana habo lao khamegna na ka phaꞌugna nanigot igne, eghuteuna mana aknu falehe ke ulugna Suga Tapuale te Blahi na. Aonu mae pris ka thugna mae Eron igne mana mala atha dadaragna nanigot igne mala fuafusa ka fati philegna olta na. ^14-16Fafara igne mala laseni te au fakeli mana balugu iara na, mae igne mala atha mei garofa te au lamna ka thiꞌagna na, eghuteuna phei chauchau balu garofadi, eghuteuna vido keli ka khebugna na. Aonu mae pris igne mala gahu glepo igre ke kligna olta mala blahi gano igre eghuteuna iara LORD kelitagu ka sisirigna na. Garofagna te gnafa glepo te tautagu igne nogu fafara iara kolho.

¹⁷“Ghotilo naiknomi Israel ra thosei ghamu kaisei garofa ba dadara buluka. Igne kaisei vetula te mala leghuni nei taji fakelini teu fabrahu ghotilo ka namono aheva nate au ghotilo tagna na.”

Fafara te mala doglo ka tathagna LORD

¹LORD ne cheke ka mae Moses, ²mala tei cheke eghu mana ka naiknodi Israel, “Jame kaisei naikno eni kaisei najafra, glepo igne mana neke theome ghathoni mala eni teku na, nu mana huhughuni nogna vetula LORD na, te eghuna mana fafara leghuni unha te chekeni iara na.”

³“Jame mae pris biꞌo na tapla jafra ka nakhibo. Naugna nakhibogna mana igne, ghotilo te gnafa na ginauna kafe jafra ka tathagu iara na. Eghume mana atha kaisei buluka nalhaꞌugna majaghani te theo kaisei thona ka thinigna na, te eghuna mana fafara mala doglo ka tathagu iara na. ⁴Mana atha mei ka iara buluka nalhaꞌugna igne ka grengatha gna Suga Tapuale te Blahi na, eghuteuna mana habo lao ka phaꞌugna buluka nalhaꞌugna igne mala falalase nogna fafara mana na, eghuteuna mana aknu falehe buluka igne ke ulugu iara LORD. ⁵Eghuteuna mana atha mei keha dadara buluka lamna ka Suga Tapuale te Blahi na, ⁶eghuteuna mana tihi lao geghesugna ka dadara igne eghuteuna krisu kakatha dadara mala fuafusa fitu fata ke ulugu iara LORD ka pohe te bobothogna Chogho te Thofno Blahi fara na. ⁷Eghuteuna mana ghiha keha dadara ka fati honagna olta te mala gahu insens na. Eghuteuna dadara teke salaꞌui tekuna, mana ne totofa ka pesigna olta te mala gahu fafara te au rhegna grengathagna Suga Tapuale te Blahi na. ^8-10Mana jaola ne atha dadaradi fafara tuana mala falalase te au fakeli mana balugu iara na, mana atha fajifla garofa te au lamna ka thiꞌagna na, eghuteuna phei chauchau balu garofadi, eghuteuna vido te keli ka khebugna na. Aonu mae pris biꞌo igne mana gahu glepo igre ka olta te mala gahu fafara igne. ^11-12Nu keha vidogna buluka igne ghotilo pala tei mala gnubra ke kosi namono aheva te au ghotilo na, ka vido te gae aheva te mala totofa nakrofu gna olta mare na. Jare ke kligna gna bukrei nakrofu igne te ei khaꞌaghi mana ka gaju na, eghuteuna mana gnubra fahui keha vidogna buluka igne jateula te gulidi, nei nafnahidi, nei phaꞌudi, nei ghahedi, nei butu baludi gobigna lepo lamnagna.”

¹³“Jame mae lida igre huhughuni nogu vetula iara na eigna mare neke theome ghathoni te mala eni na, nu naiknore theome laseni teuna, ghotilo te gnafa na kafe jafra ka tathagu iara na. ¹⁴Kate lasedi ghotilo nakhibomi re, ghotilo atha mei kaisei sua buluka mala fafara mala doglo ghotilo ka tathagu iara na. Ghotilo atha mei buluka nalhaꞌugna igne ke ulugna Suga Tapuale te Blahi na. ¹⁵Eghuteuna hatimare mae lida gna namono na habo khamedi re ka phaꞌugna buluka igne, mala laseni te fafara igne nomi ghotilo gnafa, eghuteuna gnafa teuna mare aknu falehe buluka igne ke ulugu iara LORD. ¹⁶Aonu mae pris biꞌo na atha keha dadara ka buluka igne tei ruma ka Suga Tapuale te Blahi na, ¹⁷eghuteuna mana tihi lao geghesugna na ka dadara igne, eghuteuna mana fuafusa fitu fata ke ulugu iara LORD ka pohe te bobothogna Chogho te Thono Blahi fara na. ¹⁸Eghuteuna mana ghiha keha dadara ka fati honagna olta te mala gahu insens na. Eghuteuna dadara teke salaꞌui tekuna, mana ne totofa ka pesigna olta te mala gahu fafara te au rhegna grengathagna Suga Tapuale te Blahi na. ¹⁹Eghuteuna mana atha garofagna buluka igne mala gnubra ke kligna olta. ²⁰Mana eni ka buluka nalhaꞌugna igne jateula teke eni mana ka buluka nalhaꞌugna teke fafara te mala doglo thegna ka tathagu iara LORD na ia eghu. Ka puhi igne mae pris atha fadelei nakhibomi ghotilo re, eghuteuna iara ginauna jaola tangomana te atha fadeleidi nakhibomi ghotilo re. ²¹Aonu mae pris ginauna pala tei buluka nalhaꞌugna igne mala gahu ke kosigna vido te au mare na, jateula teke eni ka buluka ululahu teke fafara teke atha fadelei nakhibogna ra eghu. Eghume buluka te fafara igne mala doglo ghotilo gnafa ka tathagu iara na.”

²²“Jame kaisei mae lida huhughuni kaisei nogu vetula iara, nu mana theome laseni ne jafra teuna, glepo igne fathona ni mana ka tathagu iara na. ²³Kate laseni mana nakhibogna na, mana atha mei kaisei nanigot nalhaꞌugna te theo kaisei thona ka thinigna na. ²⁴Mana habo khamegna na ka phaꞌugna nanigot igne mala laseni te fafara igne nogna mana. Eghuteuna mana aknu falehe nanigot igne ke rarugna olta te mala gahu fafara ka vido te mala aknu falehe glepo te tautagu te mala gahu fakrono mare na. Igne fafara te mala doglo mana ka tathagu iara na. ²⁵Aonu mae pris ginauna tihi lao geghesugna na ka dadara igne eghuteuna ghiha ka fati honagna olta na. Eghuteuna mana totofa vido dadara igne ka pesigna olta na. ²⁶Eghuteuna mana gahu fahui garofagna re ka olta na jateula teke gahu mare fafara tuana te mala laseni te au fakeli balugu iara na. Ka puhi tuana, pris tangomana te fafara te mala doglo mae lida igne ka tathagu iara na, eghuteuna iara ginauna atha fadeleidi nakhibogna mana re.”

Fafara malagna ihei

²⁷“Jame kaisei naikno huhughu ni nogu vetula iara na nu mana theome laseni te jafra na, glepo igne fathona ni mana ka tathagu iara na. ²⁸Kate laseni mana nakhibogna na, mana mala atha mei kaisei nanigot gaꞌasegna te theo kaisei thona ka thinigna na. ²⁹Mana habo khamegna na ka phaꞌugna nanigot igne mala laseni te fafara igne nogna mana. Eghuteuna mana aknu falehe nanigot igne ke rarugna olta te mala gahu fafara ka vido te mala aknu falehe glepo tautagu te gahu te thofno krono fara mare na. ³⁰Aonu pris tihi lao geghesugna na ka dadara igne eghuteuna ghiha ka fati honagna olta na. Eghuteuna mana totofa keha vido dadara ka pesigna olta na. ³¹Mae tuana atha fajifla gnafa garofagna nanigot igne, jateula teke atha fajifla mare garofadi glepo tautagu na ka fafara tuana te mala laseni te au fakeli mare balugu iara na. Aonu pris igne gahu garofa igre ke kligna olta, eghuteuna iara LORD keli tagu ka sisirigna na. Ka puhi igne, pris tangomana te fafara te mala teke doglo mae igne ka tathagu iara na, eghuteuna iara ginauna atha fadeleidi nakhibogna mana re.

³²“Jame kaisei mae huhughu ni vetula na eghuteuna mana mala atha nogna sipu gaꞌasegna te theo kaisei thona ka thinigna na mala fafara mala ke doglo ka tathagu iara na. ³³Mana habo lao ka phaꞌugna sipu igne mala laseni te fafara igne nogna mana. Eghuteuna mana aknu falehe sipu igne ke raru olta mala gahu fafara ka vido te aknu falehe glepo tautagu te gahu te thofno krono mare na. ³⁴Aonu pris ginauna tihi lao geghesu gna na ka dadara igne eghuteuna ghiha ka fati honagna olta na. Eghuteuna mana totofa keha vido dadara na ka pesigna olta na. ³⁵Mae tuana ginauna atha fadelei garofagna sipu igne, jateula teke atha fadelei mare garofagna sipu na ka fafara tuana mala laseni mare te au fakeli balugu iara na. Aonu pris igne mala gahu garofa igre ke kligna olta, mala kaisei nogu glepo blahi iara LORD. Ka puhi igne, pris tangomana te fafara te mala doglo mae igne ka tathagu iara na, eghuteuna iara ginauna atha fadelei nakhibogna mana re.”

Najafra naba te fafara mala ke doglo ka tathagna God

¹“Jame kaisei mae au ka fate mala cheke thakleni glepo teke filoni ba te lase fakelini, nu theome cheke thakleni teuna, mae igne ei nakhibo eghuteuna mana nabagna te papara na.

²“Jame kaisei mae tafini thinigna glepo tautagu tela lehehi te theome gae ka tathagu iara na, nu theome laseni teuna, igne te fathonani mana ka tathagu iara na eghuteuna mana nabagna te papara eigna na. ³Jame kaisei mae haboni kaisei nafnata glepo gna nalhaꞌu ba gaꞌase te theome gae ka tathagu iara na, nu theome laseni mana teuna, kate laseni mana na nabagna te papara eigna. ⁴Jame kaisei mae eni kaisei nafnata nhaꞌa cheke te fagoigoli ka nanghagu iara LORD na, nu mana neke theome kulu ghatho fakelini nhaꞌa cheke tuana eigna puhi teke eni mana na. Ke leghu na, mana filo glani glepo teke eni mana tuana. Eghume, neubane keli ba na diꞌa, mana nabagna te papara eigna. ⁵Jame kaisei mae nabagna te papara eigna kaisei nafnata puhi te diꞌa ka teke edi mana igre, mana cheke fajiflani nakhibo teke eni mana na. ⁶Eghuteuna te mala fadoglini glepo igne, mana atha kaisei sipu gaꞌasegna ba kaisei nanigot gaꞌasegna, mala fafara mei ka iara LORD, eghuteuna mae pris tangomana te fafara mala doglo mana ka tathagu iara na.

⁷“Jame kaisei mae kuma eghuteuna mana ninhigrana ranghini te atha te mei kaisei sipu ba kaisei nanigot ka iara, mana tangomana te atha te mei phei balhu ba phei thukmu majaghani, mala eni kaisei fafara mala ke doglo mana, eghuteuna keha na mala eni fafara te thofno krono fara. ⁸Kate atha te mei mana phei nanghaji igre ka mae pris na, mana atha nanghaji ululahu igne mala fafara mala doglo mana ka tathagu iara na. Mana mala pipiruki graragna nanghaji igne mala lehe naꞌa, nu mana mala thosei korho koko phaꞌugna na, ⁹aonu mana atha keha dadara mala fuafusa ka gerigna olta na, eghuteuna vido dadara te au teuna, mana mala faꞌoro soru ka pesigna olta na. Igne fafara te mala doglo mana ka tathagu iara na. ¹⁰Eghuteuna mae pris ginauna atha keha nanghaji na mala gahu fafara leghuni unha te chekeni ka vetula na. Ka puhi igne, mae pris tangomana te fafara te mala atha koko nakhibo gna mae igne eghuteuna iara ginauna atha fadelei nakhibogna mana na.

¹¹“Nu jame mana kuma fara, eghuteuna mana theome tangomana te atha te mei phei balhu ba phei sua thukmu, te eghuna mana tangomana te atha kaisei kilo ka famane flaoa mala fafara. Nu blahi te mala tofa oliv oel tagna na ba lilisei insens balugna naugna igne kaisei fafara mala ke doglo mana ka tathagu iara na. ¹²Mana mala atha mei flaoa igne ka mae pris, eghuteuna mae pris na aghu haghe katha ka khamegna na eghuteuna gahu vido flaoa igne ke kligna olta ke klignadi glepo blahi teke atha teke mei ka LORD. Mana eni igne mala laseni mae igne atha mei flaoa igre ka iara. Igne fafara te mala doglo mana ka tathagu iara na. ¹³Ka puhi igne, mae pris tangomana te fafara mala atha koko thua nakhibo teke edi mae igne, eghuteuna iara ginauna atha fadelei nakhibogna mana re. Keha vido flaoa te au teuna ghegna mae pris jateula flaoa teke atha teke mei teke eni ka famane wit.”

¹⁴LORD ne cheke eghu ka mae Moses, ¹⁵“Jame kaisei mae ka ghotilo theome ghathoni ne huhughuni vetula eigna nogu glepo blahi iara LORD, iagho atha mei kaisei sipu nalhaꞌugna te theo kaisei thona ka thinigna na, malagna fafara te mala poloru igne. Praes gna sipu igne fananaba ka unha teke eni mana na, eghuteuna mare mala fananaba ka praes gna sipu na ka silva koen teke skel mare ka nodi skel mae pris. ¹⁶Eghuteuna mae igne mala poloru eigna vetula teke huhughuni mana nogu glepo blahi iara LORD. Mana mala ke foli fapulo thofno praes gna glepo igne eghuteuna ke nhaꞌa lao kaisei ke klignadi glima sileni ka praes igne. Poloru igne mala tusu lao ka mae pris, eghuteuna mae pris atha sipu nalhaꞌugna igne ka fafara na mala poloru mala atha koko nakhibogna mae igne, eghuteuna iara ginauna atha koko nakhibogna mana na.

¹⁷“Jame kaisei mae tapla najafra ka nakhibo eni unha te theome snakreni ka nogu vetula iara LORD, neuba mana neke theome kulu laseni, mana nabagna te papara eigna igne. ¹⁸Kate laseni mana nogna najafra na, mana atha mei ka mae pris kaisei sipu nalhaꞌugna te theo kaisei thona ka thinigna na, eghuteuna praes gna sipu igne nabagna fafara mala poloru. Ka puhi igne, mae pris igne ginauna fafara mala atha koko nakhibo teke theome laseni teke eni mae igne. Eghuteuna iara ginauna atha koko nakhibogna mae igne. ¹⁹Igne fafara te mala poloru ranghi ni mae ihei te nabagna te mala papara eigna najafra teke eni mana ranghi ghau iara LORD.”

^1-3Aonu LORD ne cheke eghu ka mae Moses, “Jame kaisei mae chaghi eigna glepo teke tusu lao keha mae na ka mana mala reireghi mana tekuna, ba mana blau nogna ihei, ba chaghini ihei, ba mana deni nogna glepo keha mae na nu mana chaghi tathaji glepo igne. Jame te edi mana thua nafnata phoge igre, ba mana nhaꞌa cheke eidi thua nafnata phoge igre nu mana chaghi kolho, mae tuana huhughuni nogu vetula iara na eghuteuna mana tapla jafra ka nakhibo, ^4-5eghuteuna mana nabagna te papara eigna igne. Mae tuana mala ke tusu fapulo gobigna lepo teke atha mana ka puhi te diꞌa igre, eghuteuna mana mala ke nhaꞌa lao kaisei ke klignadi glima sileni ka praesdi glepo igre. ⁶Aonu mana atha mei kaisei sipu nalhaꞌugna te theo kaisei thona ka thinigna na, mala tusu lao ka mae pris mala fafara mala poloru ka iara LORD. Praes gna sipu igne mala nabagna unha teke eni mana na. ⁷Ka puhi igne, pris ginauna fafara mala atha koko nakhibodi naiknore, eghuteuna iara ginauna atha koko nakhibogna mae igne maladi thua nakhibo teke edi mana te nabagna te mala papara eidi mana re.”

Vetula gna fafara te thofno krono na

⁸Aonu LORD ne cheke eghu ka mae Moses, ⁹“Cheke ka mae Eron baludi thugna mana ra cheke igne: Igne vetula gna fafara te thofno krono na. Fafara te thofno krono igne te mala atha te mei ghotilo leuleghu rafi na, fafara igne mala au ke kligna olta ghilei hamerane, eghuteuna mae pris mala reireghi khaꞌaghi gna olta na mala dudulu fabrahu bongi thongana na. ¹⁰Aonu hamerane na, kaisei mae pris ginauna fahaghe nogna phoko na balugna nogna trasis kmo’ei na, eghuteuna mana tei mala atha koko nakrofu baludi garofa re eghuteuna lisei fadelei rhegna olta na. ¹¹Aonu mana tei tughu nogna pohere, eghuteuna ke pulo mei mala atha nakrofu igre tei kosi ka vido te au ghotilo na tei ka kaisei vido te gae ka tathagu iara LORD na mala totofa ka vido tuana. ¹²Eghuteuna khaꞌaghi ka olta na mala dudulu fabrahu, theome mala lehe. Leuleghu hamerane na mae pris ginauna ke nhaꞌa lao keha gaju tagna, eghuteuna lilisei fafara te thofno krono na ke kligna olta, eghuteuna mana gnubra garofadi fafara igre mala laseni mare te au fakeli balugu iara na. ¹³Khaꞌaghi ka olta na igne theome mala lehe, nu mala dudulu fabrahu kolho.”

Vetuladi flaoa te edi ka famane wit

^14-15LORD ne cheke eghu ka mae Moses, “Igne vetula eidi flaoa te edi ka famane wit. Mae pris thugna mae Eron igre mala atha fajifla keha famane flaoa ka khamegna na eghuteuna ngigno balu oliv oel nei insens, eghuteuna pala mei ke ulu olta mala tusu mei ka iara. Aonu mana ginauna gnubra ke kligna olta mala laseni mae igne te tusu mei ka iara na, eghuteuna sisirigna glepo blahi igne iara LORD keli taguni fara. ^16-17Aonu keha vido flaoa te au teu igne maladi mae pris, mala tangomana mare te ei bisket tagna na, nu blahi te nhaꞌa lao isi tagna na. Eghuteuna mare ghamu bisket igne ka glalabagna Suga Tapuale te Blahi na, naugna vido igne blahi. Gano te tusu lao iara ka mare igne kaisei glepo blahi, blahi fara jateula fafara te mala doglo naikno na ka tathagu iara na igne eghu, nei fafara mala poloru. ¹⁸Ihei ka tharaknagna mae Eron igne mare tangomana te ghamu vido gano igne naugna vidodi mare fabrahu. Gano igne blahi fara, eghume ihei te haboni na blahi ginauna mei ka mana.”

¹⁹LORD ne cheke eghu ka mae Moses, ²⁰“Igne flaoa teke eni ka famane wit teke tusu lao mae Eron ba kaisei thugna ke leghugna mana re mala atha mei ka iara LORD funu ka narane teke taofi pris gna mana na. Leghu narane na mana atha kaisei kilo famane flaoa eghuteuna fofota ka phei vido. Kaisei vido malagna hamerane eghuteuna keha vido na malagna grafi. ²¹Flaoa igne ngigno balu oliv oel eghuteuna frae. Nguanguja bret igne eghuteuna atha mei jateula fafara te keli tagna LORD ka sisirigna na ra eghu. ²²Eghuteuna thugna mae Eron, mae ihei mala teke mae pris biꞌo ke leghugna mana na mala eni koba igne, eghuteuna mana mala gnubra fahui thufagna LORD igne. ²³Jateula tuana eghu, flaoa te gnafa teke edi ka famane wit teke atha mei kaisei mae pris igre mala thofno gnubra fahui ke kligna olta. Blahi te ghamu mae pris kaisei vido tagna na.”

Vetula eigna fafara te mala doglo naikno na ka tathagna LORD

²⁴LORD neke cheke ka mae Moses, ²⁵mala cheke mana ka mae Eron baludi mae thugna re mala thofno leghuni mare nogna gloku mae pris na. Mana ne cheke eghu, “Igne vetula gna fafara te mala doglo naikno na ka tathagu iara, ke raru olta igne mala aknu falehe mare glepo tautagu malagna fafara te thofno krono na, tuana vido aheva mare te mala aknu falehe glepo tautagu malagna fafara igne. Aonu nafnahigna fafara igne thofno blahi fara. ²⁶Eghume mae pris teke gnubra fafara igne, mana ghamu nafnahi igne ka vido blahi na, ka glalabagna Suga Tapuale te Blahi na. ²⁷Kaisei naikno ba kaisei glepo te tafini nafnahi teke fafara tuana, mana ginauna jaola blahi. Eghuteuna jame dadaragna fafara igne au ka nogna pohe kaisei naikno, mana titihi pohe igne ka vido blahi tuana kolho. ²⁸Jame kaisei mae pris kuki nafnahi ka kaisei suspen teke horo ka glose, mana ginauna poposa suspen tuana. Ba mana jame kuki ka kaisei suspen, mana grahi mala gae, eghuteuna titihi ka khoꞌu. ²⁹Kaisei mae ka tharaknadi mae pris mana tangomana te ghamu nafnahigna fafara tuana, naugna thono blahi fara. ³⁰Nu jame mae pris biꞌo fafara mala doglo ka tathagu iara LORD, eghuteuna mana atha mei dadaragna na lamna ka Suga Tapuale te Blahi na, eghuteuna blahi kaisei naikno te ghamu nafnahigna fafara igne. Mare mala thofno gnubra fahui ka khaꞌaghi.”

Vetula eigna fafara mala poloru

¹LORD ne cheke eghu, “Igne vetula eigna fafara te mala poloru na: Nafnahigna fafara igne blahi fara. ²Phile ke raru olta ka vido mala aknu falehe glepo tautagu gna fafara te thono krono igne, tuana vido mala aknu falehe glepo tautagu igne mala fafara mala poloru. Eghuteuna mare mala totofa dadaragna na ka fati philegna olta na. ^3-4Mare vahe koko garofa te gnafa re mala gnubra ke kligna olta, tulao garofa te au ka sekogna na, baludi garofa te au ka thiꞌagna na, nei phei chauchau balu garofadi, nei vido te keli ka khebugna na. ⁵Mae pris ginauna gahu glepo igre ke kligna olta mala kaisei glepo blahi malagna LORD. Igne fafara mala poloru. ⁶Kaisei mae ka tharaknadi mae pris igre tangomana te ghamu nafnahigna na, nu mare mala ghamu lamna ka Suga Tapuale te Blahi na naugna fafara igne thono blahi fara.”

⁷LORD ne cheke eghu, “Kaisei vetula au maladi phei nafnata fafara igre, fafara mala doglo naikno na ka tathagu iara na, nei fafara mala poloru igne. Vetula igre chekedi nafnahidi phei fafara igre ghedi mae pris, mae ihei te edi fafara igre. ⁸Mae pris te eni fafara te krono fara igne, mana tangomana te atha guligna glepo tautagu te fafara igne. ⁹Eghuteuna mare eni flaoa ka famane wit, neubane unha nafnata kuki bret te eni mare na, igne malagna mae pris mala famei ka iara. ¹⁰Nu flaoa te edi ka famane wit te theome kuki igre, neubane flaoa igne neke ngigno balu oliv oel ba neke theome ngigno, fafara igne mala tufa fari hoteidi mae pris thugna mae Eron.”

Vetula gna fafara mala laseni naiknore te au fakeli balugna LORD

¹¹LORD ne cheke eghu, “Igre vetuladi fafara te mala laseni naiknore au ka pharikeli balugu iara na.

¹²“Jame ihei te eni fafara igne te mala tegio ka iara na, mana atha thilo nafnata bret te theo kaisei isi gna. Nafnata bret ulu lahu na au flaoa te ngigno balu oliv oel. Fapea nafnata na jateula bisket te ghiha oliv oel tagna ra eghu. Eghuteuna fatilo nafnata na bret te eni mana ka flaoa famane wit. ¹³Eghuteuna keha na teuna, mana jaola tusu lao keha bret te tetego balu isi. ¹⁴Mana tusu mei kaisei vido ka fati nafnata bret te gnafa igre mala famei ka iara LORD. Thufa igre malagna pris mae ihei teke atha dadaradi glepo tautagu mala fafara eghuteuna totofa ka geri olta na. ¹⁵Mae ihei te eni fafara igne mana tangomana te ghamu nafnahigna na, eghuteuna mana mala ghamu fahui nafnahi igne ka narane tuanala. Mana theome tangomana te tathaji kaisei nafnahi te ghilei hamerane na.

¹⁶“Jame kaisei mae ei fafara naugna mana neke eni kaisei nhaꞌa cheke, ba fafara te eni mana leghuni unha te magnahagheni mana na, mana tangomana te ghamu nafnahi gna fafara igne ka narane tuanala nei jaola ka keha narane na. ¹⁷Nu jame keha nafnahi au ghilei posa ka fatilo narane na, mare gnubra nafnahi igne. ¹⁸Jame nafnahi na au ghilei posani fatilo narane gna, eghuteuna ghamu kaisei mae teuna, iara ginauna theome kelitagu ka mae te eni fafara igne. Eghuteuna iara ginauna theome tangomana nate ghathoni te fafara na kaisei glepo keli malagna mae igne. Fafara igne jateula kaisei glepo diꞌa eghu ka tathagu iara na. Eghuteuna mae te ghamu nafnahi igne, mana tapla jafra ka nakhibo eghuteuna mana nabagna te papara eigna.

¹⁹“Jame nafnahi gna fafara igne tafini kaisei glepo te theome gae ka tathagu iara na, mare mala thofno gnubra ka khaꞌaghi. Nu keha nafnahigna fafara igne, mae iheire te klino ka tathagu iara na mae igre tangomana te ghamu na. ²⁰Eghuteuna jame kaisei mae theome klino ka tathagu iara na ghamu nafnahi igne, ghotilo faꞌau kosini ka naiknodi Israel. ²¹Jame kaisei mae ka ghotilo haboni kaisei glepo te theome klino ka tathagu iara na, neuba mana ne haboni glepo tautagu ba glepo te jifla mei ka thinigna nalhaꞌu ba gaꞌase, eghuteuna ke leghu mana ghamu nafnahigna fafara igne, te eghuna, ghotilo faꞌau kosini mana ka naiknodi Israel.”

²²LORD ne cheke eghu ka mae Moses, ²³“Cheke ka naiknodi Israel ra: Blahi te ghamu ghotilo garofadi buluka, ba garofadi sipu, ba garofadi nanigot. ²⁴Eghuteuna garofadi glepo tautagu te lehe kolho thedi, ba garofadi glepo tautagu teke kathu falehe glepo tautagudi mata igre, ghotilo thosei ghamu. Ghotilo tangomana te atha garofa tuana maladi keha nafnata gaoghatho, nu blahi te ghamu ghotilo na. ²⁵Jame kaisei mae ghamu garofa gna nafnata glepo tautagu naba te atha te mei te mala fablahi iara LORD na, ghotilo faꞌau kosini mana ka naiknodi Israel. ²⁶Eghuteuna namono aheva te au ghotilo tagna na, blahi te ghamu ghotilo dadaradi nanghaji ba dadaradi glepo tautagu. ²⁷Ihei te ghamu dadara na ghotilo faꞌau kosini mana mala jateula naikno phosa eghu mana ka naiknodi Israel.”

Thufa maladi mae pris

²⁸LORD ne cheke eghu ka mae Moses, ²⁹“Cheke ka naiknodi Israel ra: Jame kaisei ka ghotilo fafara mala laseni te au fakeli balugu iara, mana tusu mei keha vidogna na jateula kaisei thufa eghu ka iara. ³⁰Mana thegna mei ka LORD jateula kaisei fafara blahi eghu. Mana atha mei garofadi glepo tautagu igre, balu babangodi, eghuteuna mana pala haghe glepo igre ke ulugu iara jateula thufa eghu ka iara. ^31-33Eghuteuna mae pris teke tofa dadaradi glepo tautagu igre ka olta na, mana ginauna gnubra garofa igre ke kligna olta, nu babangogna na ghegna pris thugna mae Eron igre. Jaola, grege ghahe nhetagna glepo tautagu igne kaisei namha ka mae pris teke eni fafara na. ³⁴Babangogna glepo tautagu te pala te mei ghotilo ke ulugu iara balugna grege ghahe nhetagna teu igre iara vavahi fadelei keha nafnahi mala fafara, mala atha tei ka mae pris. Eghuteuna leuleghu fata na, phei nafnahi igre ginauna mala ghedi mae pris ka vikegna mae Eron.”

³⁵Funu ka narane mae Moses teke fablahini mae Eron baludi mae thugna re te mala nogna pris LORD na, LORD neke vahi fadeleihi phei nafnahi igre malagna mae Eron balu goro thugna. ³⁶Ka narane tuana, LORD neke cheke ranghidi naiknodi Israel mala atha tei phei nafnahi igre, nafnahi teke fafara fabrahu ka hatimare mae pris, igne kaisei vetula te mala leghuni fabrahu mare na.

³⁷Igre vetuladi fafara te thofno krono re, nei fafara ka famane flaoa ka wit, nei fafara te mala doglo naikno na ka tathagna LORD, fafara mala poloru, nei fafara mala fablahi mae pris, nei fafara te mala au fakeli balugna LORD. ³⁸Vetula igre LORD neke tusu lao ka mae Moses ka namono nagou ka Thogele Sanai. Ka narane tuare mana neke cheke ka naiknodi Israel mala fafara nei pogho soruni eghu mana.

Mae Moses ne fablahini mae Eron baludi thugna re

¹LORD ne cheke eghu ka mae Moses, ^2-3“Atha mei Eron baludi thugna ra ka grengathagna Suga Tapuale te Blahi. Atha mei nodi pohe blahi mae pris ra, nei oel blahi, nei buluka nalhaꞌugna ia mala fafara mala doglo mare ka tathagu iara na, nei phei sipu nalhaꞌudi nei kharaꞌo te au thilo nafnata bret te theo isi tadi. Eghuteuna iagho kafe kilo meidi ka vido tuana.”

⁴Aonu mae Moses ne leghuni unha te chekeni LORD igne. Eghuteuna kate kafe mei naiknore, ⁵mana ne cheke eghu ka naiknore, “Igne unha te chekeni LORD te mala eni tahati na!” ⁶Aonu mae Moses atha meini mae Eron baludi thugna re ke ulu, eghuteuna mana ne faꞌapudi mare mala klino mare ka tathagna LORD. ⁷Aonu mae Moses atha ne nhaꞌa lao nogna pohe mae pris biꞌo na ka mae Eron, eghuteuna ke haru nhugha na ka soro mana na, eghuteuna mana jaola ne atha phoko brahu na ne nhaꞌa lao ka mana. Eghuteuna nhaꞌa lao pohe te kiloi mare efod, eghuteuna haru efod igne ka nhughagna na. ⁸Aonu mae Moses atha paos na ne fagefe lao ka babangogna mae pris biꞌo na, mana famaku lao ke ulu ka efod na, eghuteuna mana atha phei thina te kilodi mare Urim ghe Tumim igre ne hono lao lamna ka paos igne. ⁹Eghuteuna mana atha nogna khepi mae pris biꞌo na ne nhaꞌa lao ka phaꞌugna mae Eron, eghuteuna ke ulu ka khepi tuana mana fagefe lao medol blahi teke eni ka gol igne. Gobigna lepo igre mae Moses ne thofno leghudi unha teke chekedi LORD ka mana re.

¹⁰Aonu mae Moses atha oel blahi na ne fablahi Suga Tapuale te Blahi igne, nei gobigna lepo te au ke lamnagna. ¹¹Eghuteuna mana fuafusa keha oel fitu fata ke kligna Olta mala Gahu Fafara, baludi tul, nei Dis Biꞌo teke eni ka bras baludi pesigna na, mala blahi glepo igre. ¹²Mana tofa keha oel ka phaꞌugna mae Eron, mala blahi mana. ¹³Aonu mae Moses ne atha mei thugna mana re ne nhaꞌa lao nogna pohe pris na ka mare, eghuteuna mana famamhaku pohe igre ka nodi nhugha mae pris. Eghuteuna nhaꞌa lao nogna khepi pris ka phaꞌudi re, thofno leghuni unha teke chekeni LORD ka mana na.

¹⁴Aonu mae Moses atha ne mei buluka mala fafara mala doglo mare ka tathagna LORD. Eghuteuna mae Eron baludi thugna re ne habo khamedi re ka phaꞌugna buluka nalhaꞌugna igne. ¹⁵Mae Moses aknu falehe buluka nalhaꞌugna igne. Aonu mana ne tihi lao geghesugna na ka dadara na ne ghiha ka fati honagna olta na. Eghuteuna mana atha vido dadara teke au tekuna ne tofa soru ka pesigna olta na. Ka puhi igne mana ne faklinoni olta igne ka tathagna LORD. ¹⁶Aonu mae Moses atha garofa lamna ka thiꞌagna buluka igne, nei vido te keli ka khebugna na, nei phei chauchau balu garofadi teure ne thofno gahu fakrono ke kligna olta. ¹⁷Nu mana atha ne tei keha vidogna buluka igne, balu guli nei chara lamna ka thiꞌagna na, ne thofno gnubra fateo ke kosigna vido glose te au mare na, jateula unha teke chekeni LORD ka mana na neu.

¹⁸Ke leghu, mae Moses atha sipu nalhaꞌugna na ne eni fafara te thofno krono na, eghuteuna mae Eron baludi mae thugna re mei ne habo khamedi re ka phaꞌugna sipu igne. ¹⁹Aonu mae Moses ne aknu falehe sipu na ne atha dadaragna na ne fuafusa ka fati gerigna olta na. ^20-21Mana vahe ne riorido sipu igne, eghuteuna mana atha khoꞌu ne titihi lamna ka thiꞌagna sipu igne balu gobigna lepo te au tagna re, eghuteuna phei ghahegna re. Eghuteuna mana gnubra gobigna lepogna re ke kligna olta, balu phaꞌugna nei garofagna teure, jateula teke chekeni LORD ka mana na neu. Fafara igne thofno krono mala kaisei glepo blahi te keli tagna LORD ka sisirigna na.

²²Aonu mae Moses atha phei sipu nalhaꞌudi mala taofi pris. Mae Eron baludi mae thugna re ne habo lao khamedire ka phaꞌugna sipu igne. ²³Mae Moses aknu falehe sipu igne ne atha keha dadara ne tihi lao fei khuli nhetagna mae Eron, nei ka geghesu biꞌo fei khame nhetagna, nei ka geghesu biꞌo fei ghahe nhetagna. ²⁴Eghuteuna mana atha ne mei thugna mae Eron igre ne tihi lao keha dadara fei khuli nhetadi, nei ka geghesu biꞌo fei khame nhetadi, nei ka geghesu biꞌo fei ghahe nhetadi. Aonu mana atha keha vido dadara te au teure ne fuafusa ka fati philegna olta na. ²⁵Ke leghugna tuana, mana atha ne mei garofagna sipu igne balu gleghugna te garofa na, eghuteuna te au ka nafnahidi te vahe fajifla lamna ka thiꞌagna na, nei vido keli ka khebugna na, nei phei chauchau gna balu garofadi, nei grege ghahe fei nhetagna. ²⁶Aonu mana atha fajifla ka kharaꞌo na thilo nafnata bret blahi te theo isi di: kaisei bret te theo isi gna, keha bret na neke ngigno ka oliv oel, aonu fatilo na bisket teke eni ka oliv oel. Mana ne nhaꞌa lao thilo nafnata igre ke klignadi garofa fei ghahe nhetagna sipu igne. ²⁷Mana lilisei gobigna lepo igre ka khamegna mae Eron nei mae goro thugna mala pala haghe tei mare ke ulugna LORD kaisei thufa ka mana. ²⁸Mae Moses atha glepo igre ne tei lilisei ka olta mala gahu baludi fafara te gahu teure. Glepo igre kaisei thufa blahi. Igne fafara te mala taofi pris eghuteuna LORD kelitagna ka sisirigna na. ²⁹Aonu mana atha babangogna sipu igne ne pala haghe ne tei ke ulugna LORD mala kaisei thufa. Babango igne vidogna fafara ghegna mae Moses mala ghamu mana. Mana edi gobigna lepo igre thofno jateula teke chekeni LORD ka mana na neu.

³⁰Aonu mae Moses ne atha katha oel blahi balugna katha dadara teke lilisei ka olta na, eghuteuna mana fuafusa thoghei ne tei ka mae Eron nei ka nogna pohe mana re, nei ka thugna neu nodi pohe teu mare re. Ka puhi igne, mana ne taofidi mare balu nodi pohe.

³¹Mae Moses ne cheke eghu ka mae Eron baludi thugna mana re, “Ghotilo atha nafnahigna fapea sipu na mala kuki ka khoꞌu ka vido igne kolho, ka grengathagna Suga Tapuale te Blahi. Eghuteuna ghotilo mala ghamu nafnahi igne balu bret te au ka kharaꞌo gano te mala taofi ghotilo ana. Igne unha te chekeni LORD te mala eni ghotilo na. ³²Eghuteuna jame keha nafnahi ba keha bret salaꞌui, ghotilo thosei ghamu, nu ghotilo gnubra fahui. ³³Ghotilo ginauna au ka vido igne ghilei thokeni fitu narane, mala ghilei gnafa gaghamu teke taofi ghotilo na. ³⁴Gobigna lepo te edi tahati gognaro igne, LORD kolho teke chekeni teke eni tahati na mala atha koko nakhibomi ghotilo re. ³⁵Bongi narane na, ghotilo mala au fabrahu ka grengathagna Suga Tapuale te Blahi na, ghilei thokeni fitu narane, eghuteuna ghotilo mala edi fabrahu glepo teke chekedi LORD re. Jame te theome eni ghotilo igne na, ghotilo ginauna lehe, naugna igne unha te chekeni LORD ka iara na.”

³⁶Aonu mae Eron baludi thugna mana igre, mare ne edi gobigna lepo igre thofno jateula teke chekedi LORD ka mae Moses mala edi mare tekure.

Pris biꞌo Eron ne edi fafara

¹Nhana narane ke leghugna teke taofi pris Eron igne, mae Moses ne kiloni mae Eron nei thugna mana re eghu baludi mae lidadi Israel mala kafe mei. ²Mana ne cheke eghu ka mae Eron, “Iagho atha mei kaisei buluka majaghani nalhaꞌugna nei kaisei sipu nalhaꞌugna te theo kaisei thona ka thinidi re. Buluka igne mala fafara mala doglo iagho ka tathagna LORD, eghuteuna sipu igne mala fafara mala thofno krono. ³Eghuteuna iagho mala cheke ka naiknodi Israel mala atha mei kaisei nanigot mala fafara mala doglo mare ka tathagna LORD. Eghuteuna cheke ka mare mala atha mei kaisei buluka majaghani nalhaꞌugna balugna kaisei sipu majaghani nalhaꞌugna mala fafara te thofno krono fara. Repa kafe kaisei finogha, eghuteuna repa mala theo kaisei thona ka thinidi re. ⁴Eghuteuna mare mala atha mei kaisei buluka nalhaꞌugna balugna kaisei sipu nalhaꞌugna mala fafara mala laseni te au fakeli balugna LORD. Mare jaola mala fafara ka glepo tautagu igre balu flaoa ka famane wit teke ngigno fodu mare balu oliv oel. Mare mala edi glepo igre gognaro, naugna LORD ginauna thakle ka tahati ka narane gognaro gne.”

⁵Eghume naikno ra atha mei glepo igre ke ulu Suga Tapuale te Blahi jateula teke chekeni mae Moses igne eghu. Eghuteuna naikno te gnafa Israel igre mala kafe mei ke ulugna LORD. ⁶Aonu mae Moses ne cheke eghu ka naiknore, “LORD neke cheke ka ghotilo mala edi glepo igre, mala ghotilo ginauna filoni siasiglagna nogna nolaghi mana na.”

⁷Aonu mae Moses ne cheke eghu ka mae Eron, “Iagho tei ka olta mala fafara mala doglo themu ka tathagna LORD, eghuteuna ei fafara te thofno krono mala atha koko nakhibomu iagho. Eghuteuna ke leghu, iagho fafara mala atha koko nakhibodi naiknore, thofno jateula teke chekedi LORD ra eghu.”

⁸Aonu mae Eron ne tei ka olta na ne aknu falehe buluka majaghani nalhaꞌugna na ne fafara mala doglo thegna ka tathagna LORD. ⁹Eghuteuna thugna mana igre ne atha dadaragna buluka igne, ne tusu lao ka mana, aonu mana ne tihi lao geghesugna na ka dadara igne ne lilisei ka fati honagna olta na. Eghuteuna mana totofa vido dadara teke salaꞌui igne ka pesigna olta na. ¹⁰Mana atha garofagna buluka igne baludi phei chauchau nei vido te keli ka khebugna na, eghuteuna mana ne gahu fahui ke kligna olta, jateula teke chekeni LORD ka mae Moses ia neu. ¹¹Nu mana atha ne tei nafnahigna buluka na balu guligna na mala gnubra ke kosigna vido te au mare tagna na.

¹²Ke leghu, mae Eron ne aknu falehe sipu nalhaꞌugna na mala eni fafara te thofno krono na. Thugna mana igre falao ka mana dadaragna sipu teke aknu falehe mana igne ne totofa ka fati philegna olta na. ¹³Eghuteuna mare atha phaꞌugna sipu igne baludi vido te gnafa re ne falao ka mana ne gnubra ke kligna olta. ¹⁴Aonu mana ne titihi lamna ka thiꞌagna sipu igne baludi gobigna lepo te au tagnare, eghuteuna ghahedi sipu igne mana jaola ne gnubra ke kligna olta baludi keha vidogna sipu igne.

¹⁵Ke leghu mae Eron ne fafara maladi naiknore. Mana atha nanigot na ne aknu falehe ne fafara mala doglo naiknore ka tathagna LORD, jateula teke enihi mana malagna thegna.

¹⁶Eghuteuna mana atha ne mei kaisei buluka nalhaꞌugna nei kaisei sipu nalhaꞌugna teu igre, mala eni fafara te thofno krono fara na, eghuteuna mana ne eni fafara igne jateula teke chekeni LORD na neu. ¹⁷Mana atha ne mei flaoa teke eni ka famane wit na, eghuteuna mana atha katha ka flaoa igne ne gnubra ke kligna olta. Mana neke nhaꞌa lao ka fafara te gnubra fabrahu leuleghu hamerane igne.

¹⁸Aonu mae Eron aknu falehe buluka nalhaꞌugna nei sipu nalhaꞌugna teu igre mala fafara ranghidi naiknore mala laseni mare te au fakeli balugna LORD. Eghuteuna thugna mana igre atha dadaradi buluka ghe sipu igre ne tusu lao ka mana, aonu mana ne totofa ka fati philegna olta na. ¹⁹Aonu mana atha ne mei garofadi phei glepo tautagu igre, garofa ka sekogna sipu igne, nei garofa lamna ka thiꞌadi, nei chauchaudi, nei famane vido ka khebudi teu phei glepo tautagu igre. ^20-21Mare lilisei glepo igre ke klignadi nafnahi babangodi phei glepo tautagu igre, eghuteuna mana atha ne mei glepo igre ka olta na. Aonu mana ne gnubra garofa igre ke kligna olta. Nu mana atha babangodi phei glepo tautagu igre balu ghahe nhetadi, eghuteuna mana pala haghe ne tei ka tathagna LORD mala kaisei thufa ka mana jateula teke chekeni mae Moses na neu.

²²Ke leghugna te gnafa fafara igre, mae Eron ngafa haghe phei khamegna re ne fablahidi naiknore, aonu mana neke soru ka olta na.

²³Aonu mae Moses ghe mae Eron ne tei ruma ka Suga Tapuale te Blahi na, eghuteuna kate jifla mei phia mare kosi na, phia mare ne fablahidi naiknore, eghuteuna siasiglagna nogna nolaghi LORD na ne siasigla mei ka mavitu na. ²⁴Khaꞌaghi na megei nga ne jifla mei ka vido te au teu LORD na ne gnhubra fahui nafnahi te gnafa nei garofadi teu fafara ka olta na. Eghuteuna kate filoni igne, naiknore ne thagru fabiꞌo ne pogho soru ka glose na.

Nakhibodi mae Nadab ghe mae Abihu

¹Aonu mae Nadab ghe mae Abihu phei thugna mae pris biꞌo Eron igre, phia mare ne atha phei dis, mala lilisei nakrofu khaꞌaghi te ngaja. Eghuteuna phia mare ne lilisei insens ka khaꞌaghi, aonu phia mare atha ne ruma lamna ka vido aheva te au LORD na. Nu khaꞌaghi igne ne theome blahi naugna LORD neke theome chekedi phia mare te mala eni igne. ²Aonu khaꞌaghi igne megei nga ne jifla mei ka vido aheva te au teu LORD na ne gnhubra ne lehe phia mare ke ulugna mana. ³Aonu mae Moses ne cheke eghu ka mae Eron, “Igne gaoghatho gna unha teke cheke eghu LORD ia:

“ ‘Iara ginauna fakakhana te blahi iara ka iheire te mei namo ka iara na.

Eghuteuna nogu naikno iara gre ginauna fafnaknoni nogu nolaghi iara na.’ ”

Nu mae Eron ne au kmu kolho.

⁴Aonu mae Moses ne kilodi mae Misael ghe mae Elsafan phei thugna mae Usiel nebugna mae Eron. Mana ne cheke eghu ka phia mare, “Ghopa mei mala pala tei delei thinidi phei mae kherada igre. Ghopa atha fajifladi phiamare ka Suga Tapuale te Blahi igne mala tei lilisei ke kosigna vido te au tahati tagna ana.” ⁵Aonu phiamare mei ne loku ka pohe phiamare re pala ne jifla kosi jateula te chekeni mae Moses na neu.

⁶Mae Moses ne cheke eghu ka mae Eron baludi phei thugna mana igre, mae Eleasa ghe mae Itama, “Ghotilo thosei fakakhana te diꞌanagnafa ghotilo ka glehedi phia mae igre, eigna ghotilo mala thosei pore, ba rerheku nomi pohere. Jame te eghu ghotilo na, LORD ginauna diꞌatagna na falehe ghami ghotilo. Nu kherami te gnafa ghotilo Israel igre tangomana te tanhidi phia mae te lehe ka khaꞌaghi teke kuru mei LORD igne. ⁷Ghotilo thosei jifla ka grengathagna Suga tapuale te Blahi na. Jame te jifla ghotilo ka vido tuana na, ghotilo ginauna lehe, naugna iara neke taofi ghami ghotilo hi ka nogna oel blahi LORD.” Aonu thilo mare ne eni jateula teke chekeni mana na neu.

Nogna vetula LORD ranghidi mae pris

⁸LORD ne cheke eghu ka mae Eron, ⁹“Jame iagho ba kaisei thumu iagho koꞌu waen ba beer, ghotilo thosei mei ruma lamna ka Suga tapuale te Blahi igne. Jame kaisei ka ghotilo huhughuni blahi igne mana ginauna lehe. Igne kaisei vetula te mala tathaji fabrahu tharaknamu iagho na. ¹⁰Ghotilo mala ghaoghatho fakeli mala vahidi glepo te blahi nei glepo te theome blahi, nei mala vahidi glepo te klino nei glepo te theome klino ka tathagu iara na. ¹¹Eghuteuna vetula teke tusu lao iara ka mae Moses ra, ghotilo mala farirhiudi naiknodi Israel.”

¹²Aonu mae Moses ne cheke ka mae Eron nei ka phei thugna mana mae Eleasa ghe mae Itama, phei thugna mana te karha nga teu, mana ne cheke eghu, “Kate atha te mei naiknore flaoa teke eni ka famane wit na, ghotilo tangomana te atha flaoa blahi te theome krono igne mala ei bret te theo isi gna. Eghuteuna leuleghu fata na, ghotilo ghamu bret igne rhegna olta kolho, naugna blahi fara. ¹³Ghotilo mala ghamu ka kaisei vido blahi, naugna nogna glepo blahi LORD teke tusu ari ka ghotilo. Cheke igne, LORD teke cheke ka iara na mala cheke ka ghotilo. ^14-15Nu babangogna nei grege ghahe fei nhetagna eghu glepo tautagu teke pala iagho teke tusu lao ka LORD baludi garofadi teu fafara blahi igne, nafnahi igre ghemi ghotilo. Ghotilo baludi thumi nalhaꞌu nei thumi gaꞌase teu ghotilo are, ghotilo te gnafa na tangomana te ghamu na. Eghuteuna ghotilo mala ghamu nafnahi igre ka vido te klino ka tathagna LORD. Nafnahi teke jifla mei ka glepo blahi gna fafara te mala laseni mare te au fakeli balugna LORD, nafnahi igne malami ghotilo fabrahu nei vikemi ghotilo are, jateula teke chekeni LORD igne eghu.”

¹⁶Mae Moses ne ghusnadi thilo mare eigna nanigot teke fafara te mala doglo naiknore ka tathagna LORD. Nu mana ne laseni te Eleasa ghe mae Itama phei thugna mae Eron te karha teu igre, phiamare la gnubrahi. Kate filoni mana puhi igne, mana ne diꞌatagna fara ka phiamare, ne cheke faheta eghu ka phiamare, ¹⁷“Fafara igne mala doglo naikno te gnafare ka tathagna LORD! Eghume naugna unha si ghotilo te theome ghamu thofno nafnahi blahi igne ka glalaba blahi gna Suga tapuale te Blahi gnea? ¹⁸Theo kaisei naikno teke atha dadaragna fafara igne te tei ruma lamna ka Chogho Blahi na, eghume nafnata fafara te ghamu ghotilo nafnahigna ka vido blahi aheva te nabagna, jateula te chekeni iara ia eghu. Nu neuba, ghotilo la thofno gnubrahi.”

¹⁹Aonu mae Eron ne cheke eghu ka mae Moses, “Nu jame gognaro gne, iara neke ghamu nafnahigna fafara te mala doglo mare ka tathagna LORD, jau LORD na theome tangomana te gleꞌa balugu iara na! Iagho laseni, gognarona phei mae thugu iara ra neke fafara mala doglo naiknore ka tathagna LORD, eghuteuna phiamare neke eni fafara te thofno krono na, nu puhi biꞌo igne ne thoke ghau iara.” ²⁰Eghuteuna kate nomhi mae Moses igne, unha te chekeni mae Eron igne thofno doglo kolho ka Moses.

Glepo tautagu naba te mala ghamu

¹LORD ne tusu lao vetula ka mae Moses ghe mae Eron ²mala cheke phiamare ka naiknodi Israel. Mana ne cheke eghu, “Ghotilo tangomana te ghamu glepo te tautagu ³te fnota phei thatabla ghahegna eghuteuna reꞌe tangomana te ghamu buburu jateula buluka eghu.

^4-6“Nu nafnata glepo tautagu te jateula kamel, nei nakusi biꞌo te tangomana te au ka khora thina, nei rabet, neuba reꞌe ne ghamu buburu jateula buluka neu, nu thatabladi re theome fnota pea, eghume glepo igre blahi te mala ghamu ghotilo na. Nafnata glepo tautagu igre theome klino ka tathagu iara na. ⁷Eghuteuna bosu na, neuba thatablagna na ne fnota pea, nu ghotilo thosei ghamu, naugna ne theome ghamu buburu jateula buluka neu. Blahi te ghamu ghotilo na, naugna ne theome klino ka tathagu iara na. ⁸Ghotilo thosei ghamu nafnahidi re, eghuteuna jame te lehe reꞌe na, ghotilo jaola thosei habo tadi. Glepo tautagu igre theome klino ka tathagu iara na.

⁹“Glepo karha te au ka khoꞌu ba ka thongna teu au thingodi nei khapudi teu igre ghotilo tangomana te ghamu na. ¹⁰Nu ghotilo thosei ghamu glepo te au lamna khoꞌu ba lamna thongna te theome au thingodi nei khapudi teu are. ¹¹Nafnata glepo igre thono theome keli nei theome klino eghu ka tathagu iara LORD na, eghuteuna ghotilo thosei habo ka thinidi tela lehehi re. ¹²Gobigna lepo te au ke lamna khoꞌu ba ke lamna thongna te theome au thingodi nei khapudi teu igre, ghotilo lasedi glepo igre thono diꞌa fara.

^13-19“Igre keha nafnata nanghaji te thosei ghamu ghotilo re: Gaghata, saroko, nakrudu, gleghaha, chiochio, nei nasihe. Nafnata nanghaji igre thono diꞌa fara.

²⁰“Ghotilo thosei ghamu nafnata momogo te lase flalo nei lase tagu ka ghahedi re teu igre, ghotilo lasedi glepo igre thono diꞌa fara. ^21-22Nu keha nafnata momogo te lase ghasa tafri igre klino ka tathagu iara na. Nafnata cheche nei khupo teu igre te tangomana te ghamu ghotilo na. ²³Nu keha momogo te lase flalo nei tagu ka ghahedi re teu igre ghotilo lasedi glepo igre thono diꞌa fara.

²⁴“Jame kaisei naikno ka ghotilo haboni thinigna kaisei glepo tautagu te theome klino teke lehe na, mana ginauna theome klino ka tathagu iara na ghilei rafi. ²⁵Ihei te pala kaisei glepo tautagu te theome klino teke lehe na mana mala titihi nogna pohe re, eghuteuna mana theome klino ka tathagu iara na ghilei rafi. ²⁶Ghotilo lasedi keha nafnata glepo te tautagu igre theome klino ka tathagu iara na. Nafnata glepo te tautagu igre thatabladi re theome fnota pea, ba theome ghamu buburu jateula buluka eghu. Nafnata glepo te tautagu igre theome klino ka tathagu iara na eghuteuna jame ihei te haboni thinigna kaisei glepo te tautagu teke lehe na, mana ginauna jaola theome klino ka tathagu iara na. ²⁷Ghotilo lasedi nafnata glepo te tautagu te theome fnota pea thatabladi re te jateula khuma teu igre theome klino ka tathagu iara na. Nafnata glepo te tautagu igre theome klino ka tathagu iara na eghuteuna jame ihei te haboni thinigna kaisei glepo te tautagu te lehe na. Mana ginauna jaola theome klino ghilei rafi. ²⁸Ihei te pala thinigna kaisei glepo te tautagu teke lehe na, mana mala titihi fagae nogna pohe na eghuteuna mana na theome klino ka tathagu iara na ghilei rafi.

^29-30“Keha nafnata glepo te tautagu te lase nolo ka glose igre jaola theome klino ka tathagu iara na: Nakusi, nei thotoli, nei garo. ³¹Jame ihei te haboni thinigna kaisei glepo te tautagu teke lehe na, mana ginauna na theome klino ka tathagu iara na ghilei rafi. ³²Eghuteuna jame kaisei ka glepo te tautagu igre lehe eghuteuna khoko soru ka kaisei glepo, neuba glepo igne ne khoko soru ke kligna kaisei vido thaba, ba ka pohe, ba ka guli glepo te tautagu, ba ka baeg, glepo igne theome klino ka tathagu iara na. Neuba ghotilo ne eni glepo igne ka unha nafnata gloku, ghotilo mala lilisei lamna khoꞌu, ginauna na theome klino ghilei rafi, nu ke leghu na nake klino fapulo. ³³Ba jame kaisei ka glepo te tautagu igre lehe, eghuteuna khoko soru ke lamna suspen teke horo mare ka glose. Aonu, gobigna lepo ke lamnagna suspen igne theome klino ka tathagu iara na, eghuteuna ghotilo mala jaola poposa suspen igne. ³⁴Jame ghotilo titihi kaisei famane gano ka khoꞌu te au ke lamnagna suspen tuana, gano igre theome klino ka tathagu iara na. Ba jame kaisei glepo te keli mala koꞌu au ke lamnagna suspen tuana, glepo tuana ginauna jaola theome klino ka tathagu iara na. ³⁵Jame kaisei nafnata glepo tautagu ka igre lehe, eghuteuna khoko soru ka kaisei nomi glepo ghotilo, glepo igne theome klino ka tathagu iara na. Ba jame glepo te tautagu igne lehe eghuteuna khoko soru ka kaisei biti teke horo ka glose ba ka kaisei suspen glose biꞌo te mala kuki bret mare tagna na, ghotilo poposa naugna theome klino ka tathagu iara na. ³⁶Jame nafnata glepo te tautagu igne lehe ne khoko soru ka glokha khoꞌu, ba ka seu, phei glepo igre klinou ka tathagu iara na. Nu ihei te haboni thinigna nafnata glepo tautagu te lehe igne theome klino ka tathagu iara na. ³⁷Jame glepo tautagu igne lehe ne khoko soru ka kaisei nafnata khatu mala joꞌu, khatu igre klinou ka tathagu iara na. ³⁸Nu jame ghotilo lilisei khatu igre ka khoꞌu, eghuteuna kaisei glepo tautagu lehe ne khoko soru ka khatu igre, khatu igre theome klino ka tathagu iara na.

³⁹“Jame kaisei glepo tautagu te naba te mala ghamu ghotilo na lehe thegna, eghuteuna ihei te habo tagna na, mana theome klino ka tathagu iara LORD na ghilei rafi. ⁴⁰Ba jame kaisei mae ghamu nafnahigna kaisei glepo tautagu teke lehe thegna, mana mala titihi nogna pohe na, eghuteuna mana ginauna na theome klino ka tathagu iara na ghilei rafi. Eghuteuna jame ihei te pala glepo tautagu igne na, mana mala titihi nogna pohe na, eghuteuna mana ginauna na theome klino ka tathagu iara na ghilei rafi.

⁴¹“Glepo tautagu te ikodi te tagu tafri ka glose na igre, thono diꞌa fara, eghuteuna blahi te mala ghamu ghotilo na. ⁴²Neuba reꞌe ne agra tafri ka thiꞌadi re, ba au fati ghahe, ba au kmana ghahe, reꞌe kafe thofno diꞌa fara. ⁴³Ghotilo thosei ghamu kaisei ka glepo tautagu igre. Jame te ghamu ghotilo na, ghotilo ginauna na theome klino ka tathagu iara na. ⁴⁴Iara LORD nomi God ghotilo, eghume ghotilo mala klino ka tathagu iara na, eghuteuna ghotilo mala au blahi naugna iara au blahi. Eghume ghotilo thosei ghamu kaisei nafnata glepo tautagu igre nate fathona ghami ghotilo ka tathagu iara na. ⁴⁵Naugna iara, LORD, iara neke atha fajifla ghami ghotilo Ijep, mala tangomana iara te nomi God ghotilo na. Eghume, ghotilo mala au blahi naugna iara blahi.

⁴⁶“Igre vetula te cheke eidi nafnata glepo te tautagu, nei nafnata nanghaji, nei nafnata sasa baludi keha glepo ka khoꞌu, nei keha nafnata momogo. ⁴⁷Ghotilo mala famane ghaoghatho fakeli mala vavahi glepo te klino ka tathagu iara na, nei glepo te theome klino ka tathagu iara na. Eghuteuna ghotilo mala jaola vavahi ka glepo te karha naba te mala ghamu ghotilo na, nei glepo te blahi te mala thosei ghamu ghotilo na.”

Puhi te mala eni ka gaꞌase te karha sua majaghani mala klino ka tathagna LORD

¹LORD ne cheke eghu ka mae Moses, ²“Cheke ka naiknodi Israel, jame kaisei gaꞌase karha thugna nalhaꞌu, naꞌa theome gae ka tathagu iara na nabagna fitu narane. Naꞌa theome klino ka tathagu iara na jateula narane te filoi khafa ia eghu. ³Ka fahana narane na, mare ginauna vahe mae sitei igne. ⁴Eghuteuna ke leghu na, gaꞌase igne theome klino ngau ka tathagu iara na nabagna tolufulu thilo narane, naugna ka narane tuare naꞌa neke snoto dadara na. Eghume ka narane igre naꞌa those habodi glepo te blahi re, eghuteuna naꞌa those mei ke lamnagna Suga tapuale te Blahi na. ⁵Jame kaisei gaꞌase karha thugna gaꞌase, naꞌa theome klino ka tathagu iara na nabagna nabotho fati narane. Naꞌa theome klino ka tathagu iara na jateula kani teke filoni khafa ia eghu. Eghuteuna ke leghu, gaꞌase igne theome klino au ka tathagu iara na nabagna namno salei namno narane.

⁶“Jame gaꞌase na karha kaisei thugna eghuteuna kate theome klino naꞌa ka tathagu iara na, naꞌa atha mei kaisei sipu ikoi te kaisei finoghagna, eghuteuna tusu lao ka pris ka grengathagna Suga tapuale te Blahi na. Sipu ikoi igne mala fafara te thono krono fara. Eghuteuna naꞌa mala atha mei kaisei thukmu majaghani ba kaisei balhu mala fafara mala doglo thegna ka tathagu iara na. ⁷Eghuteuna pris ginauna atha mei phei glepo igre, mala fafara mei ka iara mala klino gaꞌase igne ka tathagu iara na.

“Igre vetula te mala leghudi goro gaꞌase ke leghugna narane te karha sua na, neubane nalhaꞌu ba gaꞌase. ⁸Jame gaꞌase igne kuma fara eghuteuna naꞌa theome tangomana te atha te mei sipu ikoi na, naꞌa tangomana te atha te mei phei balhu ba phei thukmu majaghani, keha na mala fafara te thofno krono na eghuteuna keha na mala doglo naꞌa ka tathagu iara na. Eghuteuna pris ginauna atha mei phei nanghaji igre mala fafara ka iara mala klino gaꞌase igne ka tathagu iara LORD na.”

Puhi te mala eni mae pris ka ihei te au kaisei nafnata khabru ka thinigna na

¹LORD ne cheke eghu ka mae Moses ghe mae Eron, ²“Jame kaisei naikno au thubu ba nhuge, ba ka thinigna na popoꞌo haghe kakatha ne funu ukru, mare atha mei mae igne ka mae Eron ba ka kaisei mae pris ka thugna mana re. ³Aonu mae pris igne ginauna filo ka thubu, eghuteuna jame khakla ka vido igne vegha, eghuteuna thubu igne theome au ka guli kolho nu tei lamna nafnahigna mana teuna, gaoghathogna thubu igne na kaisei fogra diꞌa ka thinigna mana na. Eghuteuna mae pris ginauna chekeni te mae igne theome klino ka tathagu iara LORD na. ⁴Nu jame te filoni mae pris te thubu igne vegha, eghuteuna theome tei lamna ka nafnahi na, eghuteuna khakla ka vido igne theome vegha teuna, mae pris ginauna chekeni mae igne mala au ka kaisei suga thegna sopa nabagna fitu narane. ⁵Aonu ka fafitu narane na mae pris ginauna nake filoi ka mae igne, eghuteuna jame te filoni mana thubu igne te theome biꞌo na, te nanaba teu kolho na, mae pris ginauna nake cheke ka mana mala ke au thegna ka suga igne nabagna keha fitu naranei. ⁶Eghuteuna ka fafitu naranegna mana na, mae pris ginauna nake filoi ka mana, eghuteuna jame thubu igne ikoi theome tei tongana teuna, mae pris ginauna cheke hagheni te mae igne klino, naugna glepo igne kaisei thubu kolho. Nu mae igne mala titihi nogna pohere, mala klino ka tathagu iara na. ⁷Nu jame te funu tei tongana ka thinigna mana na thubu igne ke leghugna teke filonihi mana mae pris na teke cheke tela klinohi mana na, mae igne mala ke mei filoni mae pris. ⁸Eghuteuna jame filoni mae pris thubu igne teke tei tongana na, mana nake chekeni te mana theome klino ka tathagu iara na, naugna thubu igne kaisei fogra diꞌa ka thinigna mana na.

⁹“Eghuteuna jame kaisei naikno au fogra diꞌa ka thinigna na, mare athani mana tei ka mae pris, ¹⁰mala filo mana tagna. Jame thubugna mana igne vegha nu mare tangomana te filoni nafnahi eghuteuna keha khakla re vegha tongana kate au thubu igne teuna, ¹¹igne kaisei fogra diꞌa ka guli gna mana na igne theome tangomana te gnafa na. Aonu mae pris ginauna chekeni te mae igne theome klino ka tathagu iara na. Eghuteuna mae pris na theome tangomana te cheke ka mana te mala au sopa thegna ka suga igne, naugna glolahi mana te theome klino ka tathagu iara na.

¹²“Nu jame fogra igne tei tongana ka thinigna kaisei mae, funu ka phaꞌu tei posa ka ghahegna re, ¹³mae pris mala fifilo ka mae igne. Eghuteuna jame te filoni mana thinigna mae igne teke vegha na eghuteuna fogra igne thofno gnafa ka mana teuna, mana na chekeni te fogragna mae igne la gnafahi, eghuteuna mana kela klino fapulohi. ¹⁴Nu jame te filodi iagho nafnahi teke jifla mei kau thubu ka thinigna mana igne, mana theome klino ka tathagu iara na. ¹⁵Aonu mae pris na filo ka mana, eghuteuna jame te filoni mana kaisei thubu teke thora haghe na, mana na chekeni te mae igne theome klino ka tathagu iara na. Thubu te jateula igne teuna gaoghathogna thubu igne au ngala ka mae igne, eghuteuna mana theome klino ka tathagu iara na. ¹⁶Nu jame thubu igne gnafahi, mae igne tei filoni mae pris, ¹⁷eghuteuna mae pris na fifilo ka mana. Jame thubugna mana na thofno gnafahi, mae igne kela klinohi, eghuteuna mae pris ginauna cheke eghu ka mana, ‘Iagho kela klinohi!’

¹⁸“Eghuteuna jame kaisei mae au kaisei nhuge ka thinigna na, eghuteuna nhuge igne la mafohi, ¹⁹nu ke leghu, thoragna na ke vegha fapulo eghuteuna ke popoꞌo haghe, ba au kaisei thora tagna aheva te vegha nei ukru kakatha teuna, mae igne mala mei filoni mae pris. ²⁰Aonu mae pris na fifilo tagna, eghuteuna jame filoni mana thubu igne theome ka thini kolho nu tei lamna ka nafnahi, eghuteuna khakla te au ka vido te vegha igne, mana na chekeni te mana theome klino ka tathagu iara na. Thubu igne kaisei fogra diꞌa ka thini te jifla mei ka vido teke nhuge na. ²¹Nu jame te fifilo mae pris ka thubu igne, eghuteuna mae pris filodi khakla ka vido igne theome vegha, eghuteuna thubu igne au ka thini kolho kela roi kelihi teuna, mana cheke ka mae igne mala au thegna sopa lamna suga nabagna fitu narane. ²²Aonu ka fafitu narane na, jame te filoni mae pris thubu igne te tei tongana ka thinigna mana na, mae pris na chekeni mae igne theome klino ka tathagu iara na naugna igne kaisei fogra diꞌa fara. ²³Nu jame te filoni mana thubu igne theome tughu nei theome tei tongana ka thinigna mana na teuna, igne khogla glafigna nhuge kolho kela mafohi, te eghuna mae pris ginauna chekeni te mae igne klino ka tathagu iara na.

²⁴“Jame kaisei mae thunu ka khaꞌaghi, eghuteuna au kaisei thora te vegha nei ukru kakatha, ba vegha fara eghu ka thinigna mana na, ²⁵mae pris na fifilo ka mae igne. Jame ka vido igne vegha tongana, eghuteuna thubu na theome au ka guli na kolho, nu tei lamna ka nafnahi na, igne kaisei fogra diꞌa ka thini te funu ka vido aheva teke thunu ka khaꞌaghi na, eghuteuna pris ginauna chekeni te mae igne theome klino ka tathagu iara na. ²⁶Nu jame pris filoni te theo khakla vegha ka vido igne, eghuteuna thubu igne au kolho ka guli na teuna, eghuteuna fagaglana igne keli ka katha teuna, mae pris ginauna cheke ka mana mala au thegna sopa lamna suga nabagna fitu narane. ²⁷Aonu ka fafitu narane na, mae pris na fifilo ka mana, eghuteuna jame thubu igne tei tongana ka thinigna mana na, igne kaisei fogra diꞌa ka thini, eghuteuna mae pris na chekeni te mae igne theome klino ka tathagu iara na. ²⁸Nu jame thubu igne theome tughu, ba theome tei tongana ka thinigna mana na, eghuteuna ke keli katha teuna, igne theome fogra diꞌa. Eghuteuna pris ginauna chekeni te mae igne klino ka tathagu iara na, naugna glafi igne neke thunu kolho ka khaꞌaghi.

²⁹“Jame kaisei mae ba kaisei gaꞌase au thubu ka phaꞌugna ba ka tathagna nei foflogna teure, ³⁰pris na filo ka thubu igne. Nu jame thubu igne theome au ka guli nu tei lamna ka nafnahi eghuteuna keha khakla ka vido igne khoko eghuteuna kehare rija teuna, igne kaisei nafnata bakua te au ka phaꞌu ba ka tatha nei foflo eghu, eghuteuna mae pris na chekeni te mae igne theome klino ka tathagu iara na. ³¹Nu jame mae pris filo ka thubu igne, eghuteuna mana filoni te thubu igne te au kolho ka guli na, eghuteuna theome kaisei khakla pipito te au ka vido igne teuna, mana chekeni mae igne mala au thegna sopa ka suga na nabagna fitu narane. ³²Ka fafitu narane na, pris nake filo ka thubu igne, eghuteuna jame te theome tei tongana ka thinigna mae igne na, eghuteuna khakla te au ka vido igne theome rija, eghuteuna thubu igne au kolho ka guli na teuna, ³³mae igne mala ghoighori khakla au te gnafare, nu mana theome tangomana te ghoighori khakla te au ka thubu igne. Eghuteuna pris cheke ka mae igne nake au thegna sopai ka suga na nabagna fitu narane. ³⁴Ka fafitu narane na, pris ginauna nake filo ka thubu igne, eghuteuna jame te theome tei tongana ka thinigna mae igne na, nei theome tei lamna nafnahi teuna, pris na chekeni te mana klino ka tathagu iara na. Nu mae igne mala titihi fagae nogna pohe re mala klino ka tathagu iara na. ³⁵Nu jame thubu igne funu tei tongana ke leghugna narane teke chekeni mae pris ne klinohi mana teuna, ³⁶mae pris nake filo ka mana. Eghuteuna kate filoni mana thubu igne teke tei tongana ka thini na, mae pris theome tangomana mala teke filoni kaisei khakla rija na, naugna mana glani mae igne te theome klino ka tathagu iara na. ³⁷Nu jame te filo glani mae pris te theome biꞌo thubu igne na, eghuteuna famane khakla ke kotu ka vido teke au thubu tuana na teuna, igne glola te thubu igne teke la kelihi na. Eghuteuna pris ginauna chekeni te mae igne mana klino ka tathagu iara na.

³⁸“Jame kaisei mae ba kaisei gaꞌase au keha khani ka thinigna na, ³⁹pris na filo ka vido igne. Jame te filodi mana glafi igre vegha nu theome thofno vegha fara eghu, thora igne theo nafugna kolho, eghuteuna mae igne ba gaꞌase igne klino ka tathagu iara na.

^40-41“Neuba kaisei mae ne khoko khaklagna re ne klaja phaꞌugna na, ba greregna na, mana klino ka tathagu iara na. ⁴²Nu jame kaisei thubu te vegha nei ukru katha teuna thakle mei ka naklajagna mana na, igne kaisei fogra diꞌa ka thini. ⁴³Pris na filo tagna, eghuteuna jame te vegha nei ukru katha teuna, ⁴⁴mana na chekeni te mae igne theome klino ka tathagu iara na, naugna thubu ka phaꞌugna mana igne kaisei fogra diꞌa ka thini.

⁴⁵“Jame ihei te au fogra diꞌa ka thinigna na, mana pipichi ka nabreku pohe thona, eghuteuna mana thosei pore khaklagna re. Jame te filoni mana kaisei mae na, mana mala toku tafru foflogna na, eghuteuna na eha eghu, ‘Iara theome klino! Iara theome klino!’ ⁴⁶Kate au raugha fogra igne ka mana na, mana theome klino ka tathagu iara na ghilei gnafa fogra igne ka mana. Eghuteuna mana jifla ka vido te au naiknore igne mala tei au thegna sopa ke kosi namono.”

Nabubla te diꞌa na au ka pohe na

^47-49“Aonu jame kaisei nabubla au ka pohe ba ka kaisei glepo te mala ei pohe ghotilo, ghotilo atha mei glepo igne mala filoni mae pris. Ghotilo fakakhana glepo igne ka mae pris neuba mare neke horo ka wul ba ka ghajo te kiloni flaks ba ka guli sipu. Eghuteuna jame kalagna nabubla igne figri ke kakarha, ba ukru, glahu kaisei glepo diꞌa tangomana te luti ka pohe igne, eghume ghotilo fakakhana nabubla igne ka mae pris. ⁵⁰Aonu mae pris na filo ka vido glepo igne, pris na lilisei glepo igne mala au thegna ka suga na nabagna fitu narane. ^51-52Ka fafitu narane na, mae pris nake filo fakeli ka glepo igne. Jame vido te thona igne tei tongana ka mana, vido te tora igne kaisei thofno thora diꞌa eghuteuna glepo igne theome klino ka tathagu iara na. Eghume mae pris mala gnubra glepo igne neuba pohe neke horo ka wul ba ka flaks ba ka guli buluka.

⁵³“Nu jame mae pris filo fakeli ka glepo igne, eghuteuna mana filoni thora igne theome tei tongana ka mana, ⁵⁴mae pris ginauna cheke ka mare mala titihi glepo igne. Ke leghu, mae pris lilisei glepo igne mala au thegna sopa ka kaisei suga nabagna fitu narane. ⁵⁵Aonu ka fafitu narane na, mae pris na filo fakeli tagna. Eghuteuna jame thora igne theome tughu kalagna na nu au thegna sopa, neuba thubu igne ne theome tei tongana, glepo igne theome klino ka tathagu iara na. Neuba thora igne ne au ke kosigna glepo igne, ba lamna, nu mae pris mala gnubra glepo igne. ⁵⁶Nu jame mae pris filo fakeli ka glepo igne, eghuteuna mana filoni thora igne namo mafohi, neubane unha nafnata pohe ba guli, nu mana mala rerheku vido aheva te au thona tagna igne. ⁵⁷Nu ke leghu, jame nabubla ke thakle ka pohe ba ka glepo teke eni ka guli buluka teu igre, mare atha glepo igre mala gnubra ka khaꞌaghi. ⁵⁸Nu jame mana titihi la gnafahi glepo igre, eghuteuna thona teke au ka pohe na igre la theohi teuna, mana mala ke titihi fapuloi pohe igre, mala klino ka tathagu iara na.

⁵⁹“Igre vetula te mala leghudi nei filo fakelidi teu mae pris gre ka nabubla te khasa ka pohe teke horo mare ka wul ba ka flaks ba guli buluka. Igre vetula te mala lasedi pohe igre te klino ba te theome klino ka tathagu iara na.”

Vetula te mala kelini ihei te au fogra diꞌa ka thini gna na mala klino ka tathagna LORD

¹LORD ne cheke eghu ka Moses, ²“Igne vetula malagna ihei te gnafa fogra te diꞌa teke au ka guli gna na. Igne puhi te mala klino ka tathagu iara: mare atha mei ni mana mala filoni pris, ³eghuteuna pris mala jifla ka vido te au ghotilo tagna na, eghuteuna mana mala tei filoni mana te au teu kosi na. Ka vido tuana pris mala fifilo fakeli ka thini gna mana na. Jame fogra diꞌa ka thinigna mana igne la mafohi, ⁴pris chekedi naiknore mala atha mei phei nafnata nanghaji te klino te naba gna fafara igne balu kaisei gaju sida, nei kaisei gnarho ukru ikoi, nei kaisei grege gaju te kiloi hisop. ⁵Eghuteuna pris ginauna chekedi mare mala atha mei kaisei ka phei nanghaji igre, eghuteuna mana mala loku fakligna gna kaisei suspen thina te fodu ka khoꞌu glokha. Eghuteuna mana mala aknu falehe nanghaji igne mala thofa lao dadara gna na ke lamna gna suspen thina igne. ⁶Pris ginauna atha keha nanghaji te karha teuna balu gaju nei gnarho nei grege hisop tuare. Eghuteuna lisei lao gobigna lepo igre ka dadara tuana, ⁷aonu pris na fuafusa katha dadara fitu fata ka mae ihei te magnahaghei klino ka tathagu iara LORD. Mana mala cheke thakleni mae igne tekela salhu na. Eghuteuna mana lisani keha nanghaji na mala tei nogna.

⁸“Ke leghu, mae igne mala titihi fagae nogna pohe re eghuteuna ghoighori khakla gnare, eghuteuna mana mala apu, eghuteuna kate edi mana glepo igre, mana ginauna klino ka tathagu iara na. Funu ka narane tuana, mana tangomana te mei lamna ka vido aheva te au ghotilo tagna na, nu mana theome tangomana te tei lamna ka nogna suga tapuale na. Mana mala thuru kosi ka nogna suga tapuale na ghilei thokedi fitu narane. ⁹Eghuteuna ka fafitu narane na, mana mala fapea fata ghoighori khakla ka phaꞌu gna na, balu gremoho gna, eghuteuna khakla ka tatha gnare, eghuteuna khakla te gnafa ka thini gnare, eghuteuna mana mala titihi nogna pohe na, eghuteuna mana mala apu. Ka puhi igne, mana la gaehi ka tathagu iara na.

¹⁰“Ka fahana narane na, mae igne mala atha mei phei sipu nalhaꞌudi ikodi balugna kaisei sipu gaꞌase gna ikoi te kaisei finogha, eghuteuna thilo glepo igre theo kaisei thona ka thinidi re. Eghuteuna mana mala atha mei fafara ka thilo kilo flaoa ka famane wit teke ngigno fodu mare ka oliv oel, eghuteuna mana jaola mala atha mei kaisei kapu oliv oel biꞌo. ¹¹Eghuteuna pris ginauna mala atha mei mae igne balu nogna fafara, eghuteuna phia mare mala mei ke ulugu iara LORD ka grengatha gna Suga Tapuale te Blahi na.

¹²“Eghuteuna pris mala atha kaisei ka sipu igre, balu kapu oliv oel biꞌo, eghuteuna eni poloru fafara gna mae igne. Pris mala pala haghe phei glepo igre ke ulugu iara jateula fafara eghu ka iara. ¹³Mana mala aknu falehe sipu igne lamna ka vido gna Suga tapuale te Blahi na, ka vido te mala aknu falehe glepo tautagu gna fafara tuana mala ke doglo naikno na ka tathagu iara na eghuteuna fafara te thofno knoro. Igne mala aknu falehe ka vido tuana naugna nafnahi gna poloru fafara tuana mala ke doglo naikno na ka tathagu iara na fafara te thofno krono tuana. Mana mala aknu falehe ka vido tuana naugna nafnahi gna poloru fafara tuana thofno blahi fara, eghuteuna mala ghedi mae pris kolho jateula nafnahi gna fafara tuana mala ke doglo naikno na. ¹⁴Mana mala atha keha dadara gna sipu ikoi igne, eghuteuna mana mala fa bothu ka vido te pila fei khuli nhetagna mae igne, nei ka geghesu biꞌo fei khame nheta, nei ka geghesu biꞌo fei ghahe nheta gna mana. ¹⁵Aonu pris ginauna atha oliv oel nei tofa ka khame maeri gna thegna na. ¹⁶Eghuteuna mana ginauna fabothu lao geghesu fei khame nheta gna na ka oliv oel igne, eghuteuna mana fuafusa fitu fata ka glose na ke ulugu iara. ¹⁷Pris ginauna atha oliv oel teke salaꞌu teku na ka khame maeri gna na, nei fabothu lao fei nheta ka vido phiapila khuli gna mae tuana, nei ka geghesu biꞌo ka khame nhetagna mana na, nei ka geghesu biꞌo ka ghahe nhetagna na, kligna ka dadara gna sipu teke nanhaꞌa tekuhi na. ¹⁸Ke leghu, vido oliv oel salaꞌui teku ka khame gna pris na, mana mala tofa lao ka phaꞌugna mae tuana. Eghume ka puhi igne, mana eni mae tuana mala klino ka tathagu iara na.

¹⁹“Ke leghu, pris mala aknu falehe sipu gaꞌase gna na mala ei fafara mala ke doglo mae tuana ka tathagu iara na, eghuteuna mana mala jaola ke aknu falehe keha sipu nalhaꞌu gna na mala eni fafara te thofno krono na. ²⁰Eghuteuna mana mala gahu ke kligna olta mala tarai nei pogho soru eghu ka iara, balu fafara ka flaoa ka famane wit. Ka puhi igne, pris eni mae igne mala klino mana ka tathagu iara LORD na.

²¹“Jame kaisei mae kuma fara, eghuteuna mana theome tangomana te atha te mei thilo sipu te edi fafara igre, mana tangomana te atha kaisei sipu nalhaꞌu gna te ikoi kolho mala eni fafara poloru igne mala klino mana ka tathagu iara na. Pris mala pala haghe sipu igne ka tathagu iara na jateula kaisei fafara eghu ka iara. Eghuteuna mala eni fafara igne ka flaoa ka famane wit, mana mala atha kaisei kilo flaoa te ngigno balu oliv oel, eghuteuna mana mala jaola atha kaisei kapu oliv oel biꞌo. ²²Eghuteuna mana mala atha mei phei balhu ba phei thukmu majaghani unha te naba te foli mana na. Kaisei mala fafara mala ke doglo mana ka tathagu iara na, eghuteuna keha na mala eni fafara te thofno krono.

²³“Ka fahana gna narane na, mae igne mala atha mei glepo igre mala tusu lao ka pris ka grengatha gna nogu Suga Tapuale te Blahi iara LORD. ²⁴Eghuteuna pris mala atha mei sipu igne balu kapu oliv oel biꞌo mala eni nogna fafara poloru mae tuana. Pris mala pala haghe phei glepo igre ke ulugu iara jateula fafara eghu ka iara. ²⁵Mana mala aknu falehe sipu malagna fafara poloru igne eghuteuna mana mala atha keha dadara gna, nei fa bothu lao ka vido phiapila khuli fei nheta gna mae tuana, nei ka geghesu biꞌo fei khame nheta, nei ka geghesu biꞌo fei ghahe nheta gna mana. ²⁶Pris mala atha oliv oel eghuteuna mana mala jaola tofa keha ka khame mairi gna thegna na. ²⁷Eghuteuna mana mala tihi lao geghesu fei khame nhetagna na ka oliv oel igne, eghuteuna mana mala fuafusa fitu fata ka glose na ke ulugu iara. ²⁸Eghuteuna mana mala atha ka khame mairi gna na oliv oel teke salaꞌu teku na mala fabothu lao ka phiapila khuli fei nheta gna mae tuana, nei ka geghesu biꞌo fei khame nhetagna, nei ka geghesu biꞌo fei ghahe nhetagna, kligna ka dadara gna sipu teke kulu auhi na mala fafara. ²⁹Vido oliv oel au teku ka khame gne mana igne tofa lao ka phaꞌugna mae tuana. Ka puhi igne, mana ginauna eni mae tuana mala klino ka tathagu iara na. ³⁰Aonu mana mala fafara mei ka iara phei balhu ba phei thukmu majaghani naba unha mana tangomana te foli. ³¹Kaisei na mala ei fafara mala ke doglo mana ka tathagu iara na, eghuteuna keha na mala fafara eigna te mala thofno krono na. Eghuteuna mana mala gahu fapea balhu na kligna olta na fodu balugna fafara flaoa ka famane wit. Ka puhi igne, mana eni mae tuana mala klino ka tathagu iara na.

³²“Igre vetula maladi iheire te kuma te theome tangomana te foli sipu te mala fafara na. Mae te kuma igre mala thofno leghudi jame fogra te diꞌa ka guli gna mana igne gnafa eghuteuna mana magnahaghei te klino ka tathagu iara na.”

Thona diꞌa kotu ka gringni gna suga na

³³LORD ne cheke eghu ka Moses ghe Eron, ³⁴“Kate tei ghopa te atha glose gna Kenan nate tusu ari iara ka ghotilo te mala khotogna fabrahu igne, eghuteuna jame kaisei naikno filoni kaisei thona teke lilisei iara te kotu ka gringni gna nogna suga na, ³⁵mae khoto gna suga tuana tei cheke ka pris glahu kaisei fogra diꞌa te kotu ka gringni gna nogna suga na. ³⁶Aonu pris ginauna cheke ka mae khoto gna suga na mala pala fajifla gobigna lepore ka suga na ame tangomana nga mana tei fifilo fakeli ka thona igne teuna, glahu gobigna lepo teke au ka suga igne theome klino ka tathagu iara na. Eghuteuna ke leghu, pris mala ke tei lamna ka suga tuana. ³⁷Eghuteuna mana mala fifilo fakeli ka thona te kotu ka nogna gringni na. Jame te filoni mana thona igne roi kakarha kakatha ba roi ukru kakatha eghuteuna thona igne au lamna ka gringni gna nogna suga mana na, ³⁸eghuteuna mana mala jifla kosi mala bibilakhi suga na mala kroghau ghilei thokeni fitu narane. ³⁹Eghuteuna ka fafitu narane na, pris mala ke pulo mei ka suga na mala ke fifilo fakeli tagna. Eghuteuna jame thona te diꞌa igne ikotongana ka gringni gna Suga na, ⁴⁰mana mala chekedi mare mala atha koko thina ka gringni gna suga aheva thona te diꞌa igne te kotu tagna na. Mare mala pala tei thina igre mala tei koko delei ka vido aheva te theome klino ka tathagu iara na. ⁴¹Eghuteuna pris mala jaola grahi koko plasta te au ka gringni thina te gnafa lamna suga igre, eghuteuna mare mala tei koko ke kosi namono, ka vido aheva te theome klino ka tathagu iara na. ⁴²Mare mala atha keha thina majaghani mala ke tughudi te diꞌa te atha kokore, eghuteuna mare mala ke tughu plasta majaghani ka gringni igre.

⁴³“Nu jame thona igne ke thakle mei ke leghudi teke atha koko mare gobigna lepore teke babana fapulo gringni igne, ⁴⁴pris mala ke tei fifilo fakeli ka suga igne. Eghuteuna jame thona diꞌa igne ke ikotongai, te eghu na thona diꞌa igne goigoni suga, eghuteuna theome klino ka tathagu iara na. ⁴⁵Eghume mare mala pa’e soru suga igne, eghuteuna pala tei thina te gnafa baludi thaba nei chara re eghu mala tei ke kosi namono mala koko ka kaisei vido te theome klino ka tathagu iara na.

⁴⁶“Iagho laseni, ihei te tei lamna ka suga igne ka narane pris te bobotho igre, mana theome klino ka tathagu iara na, eghuteuna mana na theome klino ghilei rafi. ⁴⁷Eghuteuna ihei te thuru ba ghamu lamna ka suga igne, mana mala titihi nogna pohere.

⁴⁸“Nu jame pris tei fifilo ka suga igne, eghuteuna mana filoni thona igne neke theome ke jifla mei ke leghugna narane teke lilisei plasta majaghani na, mana mala chekeni suga tuana klino ka tathagu iara na, naugna thona tuia la gnafahi. ⁴⁹Te mala klino suga tuana ka tathagu iara na, pris mala atha mei phei nanghaji, balu kaisei gaju sida, nei kaisei gnarho ukru ikoi, nei kaisei grege gaju hisop ikoi. ⁵⁰Mana atha kaisei ka phei nanghaji igre, mala loku haghe ke kligna gna kaisei suspen thina te fodu ka khoꞌu glokha. Eghuteuna mana aknu falehe nanghaji igne mala thofa soru dadara gna na ka suspen te fodu ka khoꞌu glokha igne. ⁵¹Eghuteuna mana ginauna atha keha nanghaji te karha teuna, balu gaju sida nei gnarho ukru nei grege hisop, eghuteuna tihi lao gobigna lepo igre ka dadara gna nanghaji teke aknu falehe ia ngigno balu khoꞌu. Aonu mana fuafusa fitu fata ka suga na. ⁵²Ka puhi igne, mana atha dadara gna nanghaji teke ngigno balu khoꞌu glokha ia, eghuteuna nanghaji te karha balu gaju nei hisop nei gnarho teu igre mala eni suga igne klino ka tathagu iara na. ⁵³Eghuteuna ke leghu, pris igne ginauna atha nanghaji tuana tei ka sare ke kosi namono mala lisa teini, mala flalo tei delei. Ka puhi igne, pris eni suga igne mala klino ka tathagu iara na, eghuteuna suga igne ginauna klino hi.”

^54-57Igre vetula eidi fogra diꞌa ka guli, nei thubu, nei nhuge, nei bakua, nei flea te diꞌa te au ka pohe ba ka gringnidi suga.

Vetula igre mala lasedi ghotilo jame kaisei naikno ba kaisei glepo klino ka tathagu iara na, ba theome klino.

Glepo te jifla mei ka thini te fathonadi nalhaꞌu ba gaꞌase te theome klino ka tathagna LORD

¹LORD neke tusu lao vetula igre ka Moses ghe pris biꞌo Eron ²mala cheke ranghidi naiknodi Israel. Mana ne cheke eghu, “Jame kaisei mae au tagna fogra te jifla mei glotho ka mamaja gna na, glotho igne theome klino ka tathagu iara na. ³Neuba glotho tuana ne jifla mei fabrahu jateula khoꞌu ba thuke ka mamaja gna mana na, nu glotho igne theome klino, eghuteuna mae igne theome klino ka tathagu iara na.

⁴“Eghuteuna jame mae igne gnokro ka kaisei glepo ba thuru ka kaisei sape, glepo tuana ba sape tuana jaola theome klino ka tathagu iara na. ^5-6Eghuteuna jame keha mae haboni sape tuana, ba gnokro ka unha teke gnokro mae tuana tagna na, te eghu na, mana titihi nogna pohe re eghuteuna mana apu, naugna mae tuana na theome klino ka tathagu iara na ghilei rafi.

⁷“Jame keha mae na habo ka thinigna mae te au fogra tagna na, te eghuna, mana mala titihi nogna pohe re eghuteuna mana apu, eghuteuna mae tuana na jaola theome klino ka tathagu iara na ghilei rafi.

⁸“Jame mae ihei te au fogra tuana kmisu ka keha mae ihei te klino ka tathagu iara na, te eghu na, keha mae tuana mala titihi nogna pohe re eghuteuna apu, eghuteuna mana jaola theome klino ka tathagu iara na ghilei rafi.

⁹“Jame mae ihei te au fogra tuana mana gnokro ka kaisei chea ka hose ba kamel, te eghu na, chea tuana theome klino ka tathagu iara na. ¹⁰Jame kaisei naikno habo chea tuana, ba thotoku gna chea teke gnokro mana tagna tuana, ba mana pala kaisei glepo jateula tuana eghu, te eghu na, mana mala titihi nogna pohe re eghuteuna mana apu, mae tuana jaola theome klino ka tathagu iara na ghilei rafi.

¹¹“Jame mae ihei au fogra tuana theome titihi khame gna na, nu mana habo ka keha mae na, te eghu na, keha mae tuana mana mala titihi nogna pohe re eghuteuna mana apu, mana na theome klino ka tathagu iara na ghilei rafi.

¹²“Jame kaisei mae ihei te au tagna fogra tuana habo ka kaisei suspen thina, te eghuna, mare mala poposa suspen thina tuana. Ba jame habo ka kaisei goe teke jou mare ka gaju, te eghuna mare mala titihi fagae goe igne.

¹³“Jame fogra tuana gnafa, eghuteuna glotho na jaola gnafa, te eghuna, mae tuana mana mala eghu au nabagna fitu narane, ke leghu mana mala titihi nogna pohe re nei mala apu ka khoꞌu glokha, nei mana ginauna nake klino ka tathagu iara na. ¹⁴Eghuteuna ka fahana narane na, mana mala atha phei balhu ba phei sua thukmu, eghuteuna tusu lao ka pris ka grengatha gna nogna Suga Tapuale te Blahi LORD. ¹⁵Eghuteuna pris aknu falehe kaisei nanghaji mala fafara mala ke doglo mae igne ka tathagu iara na, eghuteuna mana ke aknu falehe keha nanghaji na mala eni fafara te thofno krono na. Ka puhi igne, mae tuana tangomana teke klino ka tathagu iara na.

¹⁶“Eghuteuna kaisei fata, jame kholo gna mana na jifla mei, te eghuna, glepo igne tangomana te fathonani naikno na ka tathagu iara na, eghuteuna mae tuana mala apu, eghuteuna mana mala theome klino ka tathagu iara na ghilei rafi. ¹⁷Jame kholo gna mae te thokeni kaisei glepo ka teke eni mare ka pohe ba ka guli nanigot, mare mala titihi glepo igne, eghuteuna mana theome klino ka tathagu iara na ghilei rafi. ¹⁸Eghuteuna jame kaisei mae thuru balu gaꞌase, te eghu na, repa mala apu, eghuteuna repa theome klino ka tathagu iara na ghilei rafi.

¹⁹“Jame kaisei gaꞌase thokeni khabru gaꞌase, naꞌa theome klino ka tathagu iara na, eghuteuna naꞌa ginauna na au kolho nabagna fitu narane. Eghuteuna ihei te haboni naꞌa ka vido narane tuana, jaola theome klino ka tathagu iara na, eghuteuna na theome klino ghilei rafi.

²⁰“Eghuteuna jame gaꞌase tuana gnokro ka kaisei glepo ba thuru ka kaisei glepo, te eghuna, glepo igne theome klino ka tathagu iara na. ^21-23Eghuteuna jame kaisei naikno habo ka sape gna gaꞌase tuana, ba kaisei glepo teke gnokro gaꞌase igne tagna na, naikno tuana mala titihi nogna pohe re, eghuteuna naikno tuana mala apu, eghuteuna naikno tuana na theome klino ghilei rafi.

²⁴“Eghuteuna jame kaisei mae thuru balugna kaisei gaꞌase te thokeni khabru gaꞌase na, te eghuna, mana jaola theome klino ka tathagu iara na, eghuteuna mana na theome klino nabagna fitu narane. Eghuteuna jame mae igne thuru ka kaisei sape, te eghuna, sape na jaola theome klino ka tathagu iara na.

²⁵“Jame kaisei gaꞌase au fogra jateula te filoni nodi khabru gaꞌase ra eghu, nu theome thokeni thofno narane gna na, ba filoni te dadara fabrahu salaꞌuni narane te mala snoto gna na, te eghu na, gaꞌase igne theome klino ka tathagu iara na. Tutuani, naꞌa na theome klino ghilei thokeni narane nate gnafa ka naꞌa fogra igne. Fogra igne mala theome klino gaꞌase igne ka tathagu iara na jateula teke filoni naꞌa nodi khabru gaꞌase ra eghu. ²⁶Eghuteuna ka narane teke au ka naꞌa fogra igne, jame thuru naꞌa ka kaisei sape, ba gnokro ka kaisei glepo, te eghuna, sape ba glepo igne jaola theome klino ka tathagu iara na. ²⁷Eghuteuna jame kaisei mae ba gaꞌase habo ka glepo igre, naikno igne na jaola theome klino ka tathagu iara na, eghuteuna naikno tuana mala titihi nogna pohe re nei apu, eghuteuna naikno igne na theome klino ka tathagu iara na ghilei rafi.

²⁸“Eghuteuna jame fogra igne gnafa ka naꞌa, te eghuna, naꞌa mala au nabagna fitu narane, eghuteuna naꞌa ginauna klino ka tathagu iara na. ²⁹Ka fahana gna narane na, naꞌa mala atha mei phei balhu ba phei sua thukmu, mala tusu lao ka pris ka grengatha gna Suga Tapuale te Blahi na. ³⁰Eghuteuna pris ginauna aknu falehe kaisei mala fafara mala ke doglo ka tathagu iara na, eghuteuna mana mala ke aknu falehe keha na malagna fafara te thofno krono na. Ka puhi igne, gaꞌase tuana ginauna tangomana na teke klino ka tathagu iara na.

³¹“Ka puhi igre, ghotilo te gnafa Israel thosei snakreni kaisei glepo te diꞌa mala fathona ghami ka tathagu iara na. Glahu kafe lehe mare naugna ne theome klino ka tathagu iara na eghuteuna mei goigoni Suga Tapuale te Blahi te au fari hoteimi ghotilo igne.”

³²Igne vetula maladi iheire te theome klino ka tathagu iara na jateula kaisei mae te au fogra te jifla mei glotho ka thinigna ra eghu, ba ihei te jifla mei khoꞌu ka thinigna ra eghu. ³³Igne vetula maladi iheire te theome klino ka tathagu iara na jateula kaisei gaꞌase te filoni khabru gaꞌase ra eghu. Eghuteuna igne vetula malagna ihei te theome klino ka tathagu iara na naugna glepo te theome klino igne ne jifla mei ka thinigna nalhaꞌu ba gaꞌase, eghuteuna vetula eigna mae nalhaꞌu te thuru fodu balugna gaꞌase te theome klino ka tathagu iara na.

Narane mala hata koko nakhibo

¹LORD ne cheke eghu ka Moses ke leghugna narane te lehe phei thugna Eron naugna phia mare neke mei ka LORD ka puhi te theome doglo. ²LORD ne cheke eghu, “Cheke ka thabusimu Eron, mala thosei ruma mei fabrahu mana ke lamnagna Chogho te thono Blahi fara te bobotho ka pohe igne. Jame te mei mana ka narane te theome naba te mala mei mana na, mana ginauna lehe naugna ka vido blahi igne iara tangomana te mei ka ghopa ke lamna grokho ke kligna thotoku gna Bokis Nhaꞌa Cheke te thofno Blahi fara na.

³“Nu ka puhi igne kolho Eron tangomana te mei ka Thofno Chogho te Blahi fara igne: Mana mala fafara kaisei sua buluka nalhaꞌugna, fafara igne malagna thegna mala doglo ka tathagu iara na, eghuteuna mana mala fafara kaisei sua sipu nalhaꞌugna, fafara igne mala thofno krono fara. ⁴Mana mala kulu apu, eghuteuna mana mala fahaghe nogna pohe blahi teke horo ka famane pohe. Tuana nogna pohe brahu mana na, nei nogna trasis kmoꞌei na, nei nogna nhugha pohe na, nei nogna khepi na. ⁵Naikno te gnafa Israel igre mala hata mei phei nanigot nalhaꞌudi nei kaisei sipu nalhaꞌugna eghu ka pris biꞌo mala fafara phei nanigot igre mala ke doglo ghotilo gnafa ka tathagu iara na, eghuteuna sipu nalhaꞌugna igne malagna fafara te thofno krono na.

⁶“Eron mala hata mei kaisei buluka nalhaꞌugna mala fafara eigna mana balu tharakna gna mala ke doglo ka tathagu iara na. ⁷Aonu mana mala hata mei phei nanigot igre ka iara LORD ke ulu grengatha gna Suga Tapuale te Blahi na. ⁸Jare Eron mala hata phei thina mala lalahu khale, ‘Nogna LORD’ kaisei eghuteuna ‘Nogna Asasel’ keha na. Eghuteuna mana lalahu khale ka phei thina igre mala laseni nanigot igne nogu iara ba nanigot igne nogna naitu Asasel te au ka namono nagou. ⁹Nanigot te nogu iara na, Eron mala aknu falehe malagna fafara igne mala kafe doglo ghotilo hui ka tathagu iara na. ¹⁰Nu nanigot nate tei ka Asasel igne theome mala aknu falehe. Nanigot igne mala kegra ke ulugu iara mala hata fadelei nakhibomi ghotilore kate faririkhani mare te tei ka namono nagou na mala tei ka Asasel.

¹¹“Kate aknu falehe Eron buluka nalhaꞌugna igne mala fafara eigna thegna nei tharakna gna mana teu te mala ke doglo ka tathagu iara na, ¹²mana mala mei ka olta mala gahu insens. Eghuteuna mana mala hata fajifla keha nakrofu khaꞌaghi te karha teu, eghuteuna fafofodu ka kaisei dis, eghuteuna mana mala hata mei ka khamegna na keha sitha malagna insens te famane sisiri keligna. Aonu mana mei ruma lamna ka Chogho te Thofno Blahi fara na. ¹³Jare ke ulugu iara, mana ginauna lisei lao insens ka khaꞌaghi te au ka dis na, eghuteuna gagahu gna na ginauna eni igne mala theome tangomana Eron te filoni thotoku gna Bokis Blahi na, aonu mana ginauna theome lehe. ¹⁴Kate mei mana lamna na, mana mala hata mei keha dadara buluka, mana mala tihi lao geghesu gna ka dadara igre mala fuafusa katha ke kligna thotoku gna Bokis Blahi na. Eghuteuna mana mala fuafusa katha dadara igre fitu fata ka glose ke ulugna Bokis Blahi igne.

¹⁵“Eghuteuna ke leghu na, mana mala aknu falehe nanigot gna fafara te mala ke doglo ghotilo ka tathagu iara na. Eghuteuna mana mala hata mei dadara gna na lamna ka Chogho te Thofno Blahi fara na, eghuteuna mana mala fuafusa lao katha ka thotoku gna Bokis Blahi na nei ka glose ke ulugna Bokis Blahi na, jateula teke eni ka dadara gna buluka ia eghu. ¹⁶Eghume ka puhi igne, pris biꞌo tangomana te eni igne ka Chogho te Thofno Blahi fara na nei ka Suga Tapuale te Blahi na mala klino ka tathagu iara na. Eron mala jateula igne eghu ka nakhibodi naiknodi Israel naugna mare theome klino ka tathagu iara na. ¹⁷Eghuteuna kate mei mana lamna ka Chogho te Thofno Blahi fara na te mala edi glepo ranghini mana balu tharakna gna nei iheire te gnafa Israel mala klino ka tathagu iara na, theo kaisei naikno te au lamna ka Suga Tapuale te Blahi na ghilei thokeni narane te gnafadi glepo igre.

¹⁸“Eghuteuna ke leghu, Eron ginauna mala hata tei keha dadara buluka nei nanigot eghu mala lilisei ka Olta mala Gahu Fafara mala jaola klino mana. Mana mala lilisei dadara igre ka fati hona gna olta na, ¹⁹eghuteuna mana ginauna mala tihi lao geghesu gna na ka dadara igne, eghuteuna fuafusa fitu fata ka olta na, eghuteuna ka puhi igne mana fablahini olta igne mala klino ka nakhibomi ghotilore.”

Nanigot mala hata fadelei nakhibodi naiknore

²⁰LORD ne cheke eghu, “Kate fablahi te gnafa pris biꞌo Eron Chogho te Thofno Blahi fara igne, nei Suga Tapuale te Blahi na, nei Olta te mala Gahu Fafara na teu igre, mana ginauna hata mei nanigot te karha igne. ²¹Eghuteuna Eron ginauna habo lao phei khame gna re ka phaꞌu gna nanigot igne, mala cheke fajifladi nakhibo te gnafa nei puhi te diꞌa te gnafa baludi puhi te diꞌa te gnafa te edi ghotilo ranghi ghau iara ra. Eghume ka puhi igne mana lisa lao nakhibo te gnafare ka nanigot tuana. Eghuteuna mana ginauna snakre tei nanigot igne ka kaisei mae tela vahinihi mare na. Mae tuana mala hata nanigot igne tei ka namono nagou. ²²Kate tei nanigot igne ka namono nagou na, naꞌa ginauna pala tei nakhibomi ghotilore ke kligna gna thegna ka vido te khaba aheva te theo kaisei naikno te au tagna.

²³“Eghuteuna pris Eron ginauna ke pulo ke tei ruma ke lamna ka Suga Tapuale te Blahi, mala hata koko pohe fahaghe teke mei mala ruma lamna ka Chogho te Thofno Blahi fara na, mana mala lilisei pohe igre ka vido tuana. ²⁴Eghuteuna mana mala apu ka vido blahi tuana, eghuteuna ke leghu mana mala fahaghe keha pohe mala eni nogna gloku na. Mana fahaghe nogna pohe ne jifla kosi mala fafara sipu nalhaꞌugna te thofno krono fara na mala hata fadelei nakhibo gna thegnare, eghuteuna mana fafara keha sipu nalhaꞌu gna na mala thofno krono fara mala hata fadelei nakhibodi naiknore. ²⁵Mana mala hata garofadi glepo tautagu teke fafara re mala gahu ke kligna olta mala ke doglo ghotilo ka tathagu iara na.

²⁶“Mae ihei teke vahini mare te mala hata te tei nanigot igne ka Asasel ka namono nagou na, mana mala titihi nogna pohere nei apu eghu ame tangomana nga mana teke figri ke lamnagna vido aheva te au ghotilo tagna na. ²⁷Eghuteuna mare hata ne tei keha vidodi buluka igne nei nanigot eghu teke fafara pris biꞌo igne mala ke doglo ghotilo ka tathagu iara na, eghuteuna dadara teke hata teke mei pris Eron lamna ka Chogho te Thofno Blahi fara na. Mare mala hata tei thinidi phei glepo igre balu gulidi nei butudi eghu mala tei gnubra ke kosigna vido te au ghotilo tagna. ²⁸Eghuteuna ke leghu, mare mala titihi nodi pohe re, nei apu fakeli eghu mala tangomana mare te mei lamna ka vido te au ghotilo tagna na.”

Keha vetula eidi Narane biꞌo te mala Hata Fadelei Nakhibo

²⁹“Igne vetula eigna Narane biꞌo te mala Hata Fadelei Nakhibo te mala leghuni fabrahu ghotilo na. Leuleghu finogha, ka fafitu nhigra, ka fabotho narane gna na, ghotilo naiknomi Israel baludi keha naikno te au balumi ghotilo are, ghotilo te gnafa na mala thosei ghamu nei thosei eni kaisei gloku. ³⁰Ka narane igne, pris biꞌo ginauna mala edi gobigna lepo teke chekedi iara te mala hata fadelei nakhibomi ghotilore mala ke klino ghotilo ka tathagu iara na. ³¹Narane igne kaisei narane ulu mala gnafa fakeli ghotilo tagna jateula kaisei narane Sabat eghu. Eghume leuleghu finogha, ka narane igne, blahi te mala ghamu ghotilo na, eghuteuna jaola blahi te mala loku ghotilo na. Vetula igre ghotilo mala thofno leghudi fabrahu. ³²Pris biꞌo teke tofa oel blahi mare ka phaꞌu gna na te fablahi na mala ke tughuni kmagna na, mana tangomana te edi glepo te mala hata fadelei nakhibodi naiknore. Aonu, mana mala fahaghe nogna pohe mae pris biꞌo na. ³³Mana mala fablahi Chogho te thofno Blahi fara na, nei Suga Tapuale te Blahi na, nei Olta te mala Gahu Fafara na, mala kafe klino ka tathagu iara na. Eghuteuna ka narane tuanala mana mala edi mae pris nei naiknodi Israel teu igre mala klino ka tathagu iara na.

³⁴“Vetula igre ghotilo mala leghudi fabrahu. Kaisei narane kolho leghu finogha na ghotilo mala edi glepo igre ka narane biꞌo igne mala hata fadelei nakhibomi te gnafa ghotilore.”

Eghume, Eron neke leghudi unha teke chekedi LORD ka Moses.

Dadaragna glepo te tautagu na blahi

¹LORD neke cheke eghu ka Moses, ²“Igne nogu cheke iara te mala facheke iagho ka Eron baludi thugna mana ra, nei naiknodi Israel. Cheke ka mare: ^3-4Jame kaisei khulumono gna Israel aknu falehe kaisei buluka, ba sipu, ba nanigot mala fafara ka iara, mana mala eni igne ke ulugna grengatha gna Suga Tapuale te Blahi na. Jame te aknu falehe glepo te tautagu igne ka keha vidoi, neubane ke lamnagna nomi namono ghotilo na ba ke kosi namono, nabagna na mae tuana mala papara eigna naugna mana ne huhughuni vetula eigna dadara jateula te falehe naiknora eghu mana. Eghume ghotilo lisei fakosi mae tuana ka naiknodi Israel. ⁵Gaoghatho gna vetula igne mala lhotidi naiknodi Israel te mala fafara glepo tautagu ke kosi glalaba na igne theome doglo te eni igne. Ghotilo mala hata mei glepo te tautagu igne ka iara, eghuteuna ghotilo mala tusu lao ka pris ke ulugna grengatha gna Suga Tapuale te Blahi na. Eghuteuna ghotilo mala aknu falehe jare mala fafara mala laseni ghotilo te au fakeli balugu iara na. ⁶Pris hata dadara gna glepo tautagu tuana mala fuafusa ka fati khukru gna olta te au rhegna grengatha gna Suga Tapuale te Blahi na. Eghuteuna mana mala gahu garofa gna na mala kelitagna LORD ka sisiri gna na. ⁷Aonu ghotilo mala thosei ke fafarai ka nanigot naitu tuana, naugna puhi igne jateula gaꞌase te tei balugna mae te theome khetogna naꞌa ia eghu. Igne vetula te mala leghuni fabrahu ghotilo na.

⁸“Jame kaisei naikno khulumono Israel, ba kaisei naikno phosa au balumi ghotilo, eni fafara te thofno krono ba eni keha fafara, ⁹nu theome hata mei ka grengatha gna Suga Tapuale te Blahi na te theome fafara mei ka iara LORD na, ghotilo lisei fakosini ka naiknodi Israel.

¹⁰“Eghuteuna jame kaisei naikno gna Israel, ba kaisei naikno phosa au balumi ghotilo, koꞌu dadara ba ghamu nafnahi te dadara teu, iara ginauna theome magnahagheni naikno tuana, hata fadeleini ka naiknodi Israel. ¹¹Gobigna lepo te karha igre, nakarhadi na au ka dadaragna na. Naugna igne iara vahini dadaragna fafara na pris tangomana te toatoafa dadara igne ka olta na mala hata fadelei nakhibomi ghotilo re. Naugna dadaragna glepo te tautagu na jateula nakarhagna eghu, eghume dadara na tangomana te hata fadelei nakhibomi ghotilo re. ¹²Naugna igne iara cheke ka ghotilo naiknomi Israel ba naikno phosa te au balumi ghotilo, theome magnahagheni kaisei ka ghotilo te koꞌu dadara ba te ghamu nafnahi te au dadara teu tagna na.

¹³“Jame kaisei khulumono gna Israel ba kaisei naikno phosa tei hili eghuteuna falelehe kaisei glepo tautagu ba kaisei nanghaji naba te mala ghamu na, mana tofa koko dadaragna na mala tatafru ka glose. ¹⁴Nakarhadi gobigna lepore au ka dadara gna na, naugna igne te chekeni iara ka ghotilo naiknomi Israel, te mala thosei koꞌu dadara ba ghamu nafnahigna glepo tautagu te au teu dadara gna na. Jame ihei te ghamu nafnata nafnahi igne na, ghotilo ginauna hata fadeleini ka naiknodi Israel.

¹⁵“Jame kaisei khulumono gna Israel ba mae phosa ghamu nafnahi glepo tautagu teke lehe thegna, ba neke kathu falehe khuma mhata, mae tuana mala titihi nogna pohe na, eghuteuna mana mala apu fakeli, mae igne ginauna theome klino ka tathagu iara na ghilei rafi. Nu ke leghu, mana ginauna klino ka tathagu iara na. ¹⁶Nu jame te theome titihi mana nogna pohe na, ba te theome apu mana na, mana ginauna papara eigna.”

Vetula eigna ihei te eni puhi te diꞌa na

^1-2LORD neke cheke ka Moses mala cheke mana ka naiknodi Israel. Aonu Moses ne cheke eghu, “Iara LORD nomi God ghotilo. ³Tifa na ghotilo neke au Ijep, eghuteuna gognarona iara hata ghami ghotilo tei Kenan, nu ghotilo thosei leghudi puhi te diꞌa te edi naiknodi phei kantri Ijep ghe Kenan.

^4-5“Iara LORD, nomi God ghotilo, eghume ghotilo mala faꞌuvedi nogu Vetula iara re, eghuteuna ghotilo mala leghuni gaoghathogu iara na. Jame te eghu ghotilo na, ghotilo ginauna hatini thofno nakarha na.

⁶“Thosei thuru balugna kaisei ka tharaknamu themu na. Iara LORD.

⁷“Thosei thuru balugna idomu teke fakarhi nigho na. Nafnata puhi igne famamajadi idomu kmamu re.

⁸“Thosei thuru balugna gaꞌase te tolaghi ka kmamu na. Puhi igne jaola famamajani kmamu na.

⁹“Thosei thuru balugna thofno greghamu teke karha mei ka kaisei kmami nei idomi, ba balugna greghamu teke kaisei kmami nu sopai idomi, ba kaisei idomi nu sopai kmami.

¹⁰“Thosei thuru balugna thugna gaꞌase thumu nalhaꞌu na, ba balugna thugna gaꞌase thumu gaꞌase themu na. Puhi igne mana ginauna famamajani thegna.

¹¹“Thosei thuru balugna thugna gaꞌase ihei teke tolaghi ka kmamu na, naugna gaꞌase igne jaola greghamu iagho.

¹²“Thosei thuru balugna greghagna kmamu na, naugna thofno namo fara ka kmamu iagho na.

¹³“Thosei thuru balugna gaꞌase ke ikogna idomu na, naugna namo fara ka idomu iagho na.

¹⁴“Thosei thuru balugna khetogna nebumu na, naugna fapea greghamu iagho. Puhi igne famamajani nebumu na.

¹⁵“Thosei thuru balugna ivamu na, naugna gaꞌase igne khetogna mae thabusimu iagho.

¹⁶“Thosei thuru balugna khetogna mae thabusimu na. Puhi igne famamajani mae thabusimu na.

¹⁷“Thosei kafe thuru baludi idogna ghe thugna gaꞌase na. Ba gragna gaꞌase idogna na. Naugna retilo igre kaisei tharakna kolho, puhi igne thono diꞌa fara.

¹⁸“Eghuteuna blahi fara ihei te tolaghi ka thabusigna khetogna na kate karha nga teu khetogna na.

¹⁹“Eghuteuna blahi te thuru balugna gaꞌase te thokeni teu nodi khabru goro gaꞌase re, naugna theome klino ka tathagu iara LORD.

²⁰“Eghuteuna blahi mae ihei te thuru balugna khetogna mae kheragna na, naugna puhi igne fathonani mana ka tathagu iara na.

²¹“Blahi ihei ka ghotilo te faleheni thugna na, eghuteuna gahu ka khaꞌaghi te mala fafara ka god Molek, naugna puhi igne goigoni nanghagu iara te blahi nomi LORD God ghotilo.

²²“Eghuteuna blahi fara eigna mae ihei te eni puhi te diꞌa na balugna keha mae na jateula kaisei gaꞌase teuna, naugna iara thono tiroguni fara puhi igne.

²³“Eghuteuna blahi fara nalhaꞌu ba gaꞌase te eni puhi te diꞌa na ka bosu ba ka khuma. Naugna puhi igne theome doglo, eghuteuna fathona ni naikno na ka tathagu iara na.

²⁴“Thuagna nafnata puhi igre tangomana te fathona ghami ka tathagu iara na, eghume ghotilo thosei eni glepo te diꞌa igne. Tharaknagna Kenan igne neke edi nafnata glepo igre neke theome klino mare ka tathagu iara na, eigna iara ginauna ngolhi fajifladi eghuteuna tusu ari nodi glose mare na ka ghotilo. ²⁵Nafnata puhidi mare igne fathonani glose na mala theome klino ka tathagu iara na, eghume iara na paradi naikno te au jare ra. Papara igne mala eni glose igne mala jateula mae ihei te rogna luꞌara eghu, eghume glose igne na luꞌa fajifladi naikno te au tagna re. ^26-27Glepo te edi naiknodi Kenan igre thono diꞌa fara, eghume iara haimini te rogu luꞌa na, eghuteuna eni glose igne mala theome klino ka tathagu iara na. Nu ghotilo mala thosei edi glepo igre. Neuba ghotilo ne tharakna gna Israel, ba naikno phosa, nu ghotilo te gnafa na mala leghudi nogu vetula iara igre, nei leghudi gaoghathogu iara re. ²⁸Nu jame te leghuni ghotilo puhi te diꞌa na, glose igne ginauna na jateula mae ihei te rogna luꞌara eghu, eghuteuna mana ginauna luꞌa fajifla ghami la ghotilo jateula te edi mana ka keha naiknora eghu.

²⁹“Eghuteuna jame ihei te eni kaisei glepo te diꞌa ka igre na, ghotilo mala lisei fadelei ka naiknodi Israel. ³⁰Eghume ghotilo mala leghudi farirhiu igre, eghuteuna ghotilo thosei leghudi naikno te diꞌa teke kulu au ka glose nate tei te au ghotilo tagna na. Ghotilo mala thosei edi glepo nate edi ghotilo te theome klino ka tathagu iara na, naugna iara LORD, nomi God ghotilo.”

Keha nogna vetula LORD

^1-2LORD jaola neke cheke ka Moses mala cheke mana ka naiknodi te gnafa Israel. LORD ne cheke eghu, “Iara LORD, nomi God ghotilo, eghume ghotilo mala blahi, naugna iara blahi.

³“Ghotilo te gnafa na mala ghathodi idomi kmami are, eghuteuna ghotilo mala tajini narane Sabat, naugna iara LORD, nomi God ghotilo.

⁴“Ghotilo mala thosei lisa ghau iara mala tei tarai ka god teke horo kolho naikno ka aean, naugna iara LORD, nomi God ghotilo.

⁵“Kate fafara ghotilo te mala laseni te au fakeli ghotilo balugu iara na, ghotilo mala eni ka puhi te doglo mala glealeꞌa iara ka nomi fafara ghotilo na. ⁶Ghotilo mala ghamu nafnahi gna fafara igne ka narane teke eni ghotilo tuana la ba ka keha narane na, nu jame kaisei nafnahi au ghilei thoke ka fatilo narane na, ghotilo gnubra fahui. ⁷Eghuteuna jame kaisei naikno ghamu nafnahi tuana ka fatilo narane na, iara ginauna theome gleꞌa ka nogna fafara naikno tuana, naugna fafara igne jateula kaisei glepo diꞌa eghu ka tathagu iara na. ⁸Ihei te ghamu nafnahi tuana, nabagna te mala papara na naugna mana goigoni kaisei glepo blahi, eghume ghotilo lisei fakosini ka naiknodi Israel.

⁹“Kate hata mei gano ghotilo ka nomi nagare re, ghotilo thosei kafe hata gano ka gerigna nagare na, eghuteuna ghotilo thosei figri ke hata kaisei glepo ka unha teke lisei ghotilo ke leghu re. ¹⁰Eghuteuna ghotilo thosei ke figri ka nagare grep ghotilo ra mala ke salo sisi teke lilisei ghotilo ra, ba mala ke sene haghe sisi teke khoko ra. Ghotilo mala lisa lao glepo igre maladi iheire te kuma nei naikno phosa te au balumi ghotilo igre. Iara LORD, nomi God ghotilo.

¹¹“Ghotilo thosei blau, ba thosei chaghi tafridi keha kherami re.

¹²“Eghuteuna ghotilo thosei nhaꞌa cheke chaichaghi ka nanghagu iara, naugna goigoni ni nanghagu iara na. Iara LORD.

¹³“Eghuteuna ghotilo thosei chaghi tafrini ba blauni kherami na. Eghuteuna kate hata ghotilo kaisei te mala edi nomi gloku re, ghotilo mala thosei toki au nogna taba mana na ghilei thokeni keha narane na. Ghotilo mala folini mana ka narane teke loku mana tuana la.

¹⁴“Eghuteuna ghotilo thosei tibrini mae te megli na, ghotilo thosei goigonini mae te dofu na mala uka mana, naugna iara LORD, nomi God ghotilo, eghuteuna ghotilo mala thofno ghatho tahu ghau iara.

¹⁵“Kate fateni ghotilo kherami na ka kot, ghotilo fateni mana ka puhi te doglo. Jame kaisei mae kuma tei ka kot, ghotilo thosei kaisei phile fara ka mana naugna te kuma mana na. Eghuteuna jame mae dedei tei ka kot, ghotilo theome ghatho tahuni fara mana naugna mana mae dedei. Ghotilo fatedi phia mare kaisei nanaba kolho.

¹⁶“Eghuteuna ghotilo thosei cheke fadiꞌani ba chaghi eigna ihei. Eghuteuna jame kaisei kherami tei ka kot, eghuteuna iagho laseni unha teke eni mana na, iagho mala cheke fajiflani igne ka kot eigna puhi te tutuani na mala toghoni mana. Naugna iara LORD.

¹⁷“Ghotilo thosei tiromini fara kherami na, nu kate filoni ghotilo kherami igne te eni mana unha te jafra na, ghotilo tei cheke ka mana najafra igne. Ka puhi igne ghotilo ginauna theome eni nakhibo na ka mae tuana.

¹⁸“Ghotilo thosei susuku ni kaisei kherami ba tughu fapulo kaisei puhi diꞌa teke eni mana na. Nu, ghotilo mala thofno namhadi kherami re jateula ghotilo te namha ghami themi eghu, naugna iara LORD.

¹⁹“Ghotilo mala leghudi nogu vetula iara gre.

“Ghotilo thosei snakreni kaisei nafnata glepo tautagu mala ei sua ka keha nafnata glepo tautagu te jafra.

“Eghuteuna ghotilo thosei joꞌu phei nafnata khatu ka kaisei nagare kolho.

“Eghuteuna ghotilo thosei pipichi pohe teke horo mare phei soasopai glepo jateula ghajo ghe wul.

²⁰“Eghuteuna jame kaisei mae thuru balugna kaisei gaꞌase sneka teke nhaꞌa cheke mare mala tolaghi ka keha mae na teku na, nu naꞌa theome snagla naugna keha mae igne mana theome foli fajifla ni ngau naꞌa, eghume, mae ihei teke thuru balugna gaꞌase sneka igne mala foli poloru. Nu ghotilo thosei mala falehedi repa naugna gaꞌase igne naikno sneka kolho. ²¹Mae ihei teke eni puhi diꞌa ka gaꞌase sneka igne mana mala hata mei kaisei sipu nalhaꞌugna ka grengatha gna Suga Tapuale te Blahi na, mala eni kaisei fafara poloru. ²²Eghuteuna pris hata sipu igne, mala fafara poloru ka iara LORD mala hata fadelei nakhibo gna mae tuana, eghuteuna iara ginauna hata fadelei nakhibo tuana.

²³“Kate tei au ghotilo ka kantri Kenan, ghotilo mala joꞌu thua nafnata sisi gaju, nu ghotilo mala thosei ukli sisi igre nabagna thilo finogha. Eghume ka fatilo finogha igre blahi ghotilo te mala ghamu sisi igre. ²⁴Ka fafati finogha na, ghotilo hata mei sisi igre ka iara jateula kaisei glepo blahi eghu mala kilo fnakno ghau iara LORD. ²⁵Leghu lahu na, ka falima finogha na ghotilo tangomana te ghamu sisi na. Jame te leghuni ghotilo igne na, iara ginauna fablahidi nomi gaju ghotilo re, mala ure kmana sisi, naugna iara LORD, nomi God ghotilo.

²⁶“Ghotilo thosei ghamu nafnahi te au teu dadara tagna.

“Eghuteuna ghotilo mala thosei eni kaisei glepo ka kastom meresin, ba fariuriu edi glepo ka kastom meresin mala laseni unha nate thoke mei ginauna.

^27-28“Eghuteuna jame kaisei ka ghotilo lehe, ghotilo thosei kuchi koko khakla ka geri phaꞌumi are, eghuteuna ghotilo thosei korho koko khakla ka gremohomi re, nei thosei raurapu thinimi re eigna ihei te lehe, nei thosei vahe thinimi re fagaglana eigna te diꞌanagnafa ghotilo na. Iara LORD.

²⁹“Ghotilo thosei snakredi thumi are mala gaꞌase vine gna vido blahi na, naugna puhi igne ginauna goigoni thumi gaꞌase ghotilo re. Eghuteuna jame te eni fabrahu ghotilo puhi igne na, ghotilo ginauna leghudi keha god delei, eghuteuna nomi namono ghotilo re ginauna fodu ka thua nafnata puhi te diꞌa.

³⁰“Ghotilo mala tajini narane Sabat, eghuteuna ghotilo mala ghatho tahuni vido te blahi te mala kilo fnakno ghau iara tagna na, naugna iara LORD.

³¹“Eghuteuna ghotilo thosei tei ka naikno te cheke baludi tharungadi iheire teke lehe tifa ra, ba ka keha naitu. Jame te hirodi ghotilo igre na, ghotilo goigoni ghami themi ka tathagu iara na. Iara LORD, nomi God ghotilo.

³²“Eghuteuna ghotilo kegra haghe ke uludi goro mae biꞌo, mala filoni naiknore te ghatho tahudi ghotilo mae khuekuꞌe re. Eghuteuna ghotilo mala ghatho tahu ghau iara nomi God ghotilo. Iara LORD.

³³“Ghotilo thosei diꞌa ranghidi naiknodi delei te mei au balumi ka nomi glose ghotilo are. ³⁴Ghotilo mala ghathodi narane teke au ghotilo Ijep jateula naikno phosa teku jare ra. Ghotilo namhadi naiknodi delei are jateula te namha ghami themi eghu, eghuteuna ghotilo mala reireghi fakelidi, jateula ghotilo te reireghi fakelidi tharaknami themi are eghu. Iara LORD, nomi God ghotilo.

³⁵“Ghotilo thosei chaghini ihei kate sabiri iagho kaisei glepo na. Ghotilo thosei skel ba fananaba glepo tuana ka puhi te diꞌa. ³⁶Kate skel ghotilo tahugna kaisei glepo, ba ghotilo fananaba niha lita glepo tuana, ghotilo eni ka puhi te doglo fara, naugna iara LORD, nomi God ghotilo, ihei teke hata fajifla ghami Ijep.

³⁷“Ghotilo mala faꞌuvedi nei leghudi eghu nogu vetula te gnafa nei cheke te gnafa teu iara igre, naugna iara LORD.”

Mae ihei te huhughuni nogna vetula God na, mana mala papara

^1-2LORD neke cheke ka Moses mala cheke mana ka naiknodi Israel. Moses ne cheke eghu, “Jame ihei ka ghotilo, ba kaisei naikno phosa te au balumi ghotilo, mana snakreni thugna na ka god Molek jateula kaisei fafara eghu, ghotilo fada falehe ka thina. ³Mae ihei te eni igne mana goigoni ni nogu vido blahi iara na, nei goigoni ni nanghagu iara te blahi na. Eghume iara ginauna figri tagruni nei lisei fadeleini ka naiknodi Israel. ⁴Jame te theome ghathoni ghotilo unha te eni mae tuana kate fafara mana thugna na ka god Molek, nei theome faleheni mana teu ghotilo na, ⁵iara thegu nate figri tagruni mana nei tharaknagna mana na, nei keha naikno iheire te loku fodu balugna mana te mala leghuni god Molek igne, eghuteuna iara ginauna hata fadeleidi mare ka naiknodi Israel.

⁶“Eghuteuna jame kaisei ka ghotilo tei ka mae ihei tangomana te cheke baludi tharungadi naikno teke lehe tifa ra ba ka keha naitu, iara ginauna figri tagruni mana eghuteuna lisei fadeleini mana ka naiknodi Israel.

⁷“Ghotilo lisei fadelei ghami themi mala blahi ke ulugu iara, naugna iara LORD, nomi God ghotilo. ⁸Ghotilo faꞌuvedi nei leghudi eghu nogu vetula nei nogu cheke teu iara gre, naugna iara LORD neke fablahi ghami ghotilo.

⁹“Jame kaisei naikno tibrini idogna ba kmagna na, ghotilo aknu faleheni mana, eghuteuna glehegna mana na najafra gna thegna.

¹⁰“Jame kaisei ka ghotilo tapla jafra ka khetogna keha mae na, ghotilo mala aknu falehedi repa.

¹¹“Jame kaisei mae tapla jafra ka khetogna kmagna na, mana famamajani kmagna na. Eghume ghotilo aknu falehedi repa, glehedi repa igne najafradi thedi repa.

¹²“Jame kaisei mae tapla jafra ka khetogna thugna na, ghotilo aknu falehedi repa. Repa igre eni kaisei glepo te theome doglo, eghuteuna glehedi repa igne eigna nodi najafra thedi.

¹³“Jame kaisei mae eni puhi te diꞌa na ka keha mae na jateula kaisei gaꞌase eghu, phia mare eni puhi te thofno suku noguni fara iara na. Ghotilo aknu falehedi phia mare, glehe igne eigna nodi najafra thedi phia mare.

¹⁴“Jame kaisei mae tolaghi ka kaisei gaꞌase eghuteuna ke leghu mana jaola ke tolaghi ka idogna gaꞌase tuana, igne kaisei thofno glepo diꞌa fara. Eghume ghotilo gnubradi retilo ghilei lehe retilo, mala theo kaisei glepo te diꞌa jateula igne eghu na teke eni fari hoteimi ghotilo.

¹⁵“Jame kaisei mae eni puhi te diꞌa na ka kaisei glepo tautagu, ghotilo faleheni mana, eghuteuna ghotilo jaola aknu falehe glepo tautagu tuana.

¹⁶“Eghuteuna jame kaisei gaꞌase eni puhi te diꞌa na ka kaisei glepo tautagu, ghotilo faleheni naꞌa, eghuteuna ghotilo jaola aknu falehe glepo tautagu tuana. Glehedi gaꞌase ghe glepo tautagu igre najafradi thedi.

¹⁷“Jame kaisei mae tolaghi ka thofno greghagna na, neubane thugna gaꞌase kmagna mana, ba thugna gaꞌase idogna mana, repa mala mamaja ka glepo igne. Eghuteuna mare mala au fadelei ka kheradi repa re. Naugna mana famamajani greghagna na, mae igne nabagna te mala papara eigna puhi igne.

¹⁸“Jame kaisei mae thuru fodu balugna gaꞌase te thokeni khabru gaꞌase na, ghotilo lisa fadeleidi repa ka naiknodi Israel, naugna repa ne fakakhana vido aheva te jifla mei dadara tagna na.

¹⁹“Eghuteuna jame kaisei mae ei puhi diꞌa ka greghagna idogna na ba greghagna kmagna na, mae igne balugna gaꞌase igne mala papara eigna puhi igne, naugna repa kaisei tharakna kolho.

²⁰“Eghuteuna jame kaisei mae eni puhi te diꞌa na ka khetogna mae thabusigna kmagna na, mana famamajani nebugna na, mae igne balugna gaꞌase na mala papara eigna. Eghume repa ginauna theome tangomana nate au kaisei sua na ghilei thokeni narane te lehe repa na.

²¹“Jame kaisei mae atha khetogna mae thabusigna na kate karha nga teu mana na, mae igne famamajani mae thabusigna na. Glepo igne kaisei glepo diꞌa, eghume repa ginauna theome thudi kolho.

²²“Iara ginauna atha ghami ghotilo tei ka glose te mala au ghotilo tagna na. Ghotilo mala faꞌuvedi nogu vetula iara re, eghuteuna ghotilo mala leghudi nogu cheke te gnafa iara re. Jame te eghu na, iara ginauna theome ki fajifla ghami ka glose teke tusu ari iara ka ghotilo igne. ²³Ghotilo ginauna mala thosei leghudi nodi kastom te diꞌa naikno bongihehe gna kantri teke brue fajifladi iara ra, mala tei au ghotilo tagna. Naikno bongihehe igre neke edi kmana glepo te diꞌa, iara thofno tirogudi mare. ²⁴Nu iara neke nhaꞌa chekehi ka ghotilo te mala atha ghotilo nodi glose mare na. Uve, iara ginauna tusu ari ka ghotilo mala khotogna namono aheva glosegna na thofno keli fara, eghuteuna leuleghu fata na au kmana gano.” Iara LORD, nomi God ghotilo. Iara neke vahi ghami ghotilo neke hata fajifla ghami ka keha naikno re, mala nogu naikno iara.

²⁵“Eghume ghotilo mala fofota glepo tautagu nei nanghaji eghu te theome klino. Ba unha glepo tautagu nei nanghaji eghu te klino ka tathagu iara na. Ghotilo mala thosei fathona ghami ka tathagu iara na ka kaisei glepo te blahi te mala ghamu ghotilo jateula nafnata glepo tautagu nei nafnata nanghaji, nei keha glepo ikodi te theome klino ka tathagu iara na. ²⁶Ghotilo mala au blahi naugna iara LORD, iara blahi, eghuteuna iara neke atha fajifla ghami ghotilo ka keha naiknore, mala nogu naikno iara.

²⁷“Jame kaisei mae ba gaꞌase cheke baludi tharungadi naikno teke lehe ra ba ka keha naitu, ghotilo fada faleheni ka thina, eghuteuna glehegna na eigna najafra gna mana thegna.”

Mae pris re mala mae blahi

¹LORD ne cheke eghu ka Moses, “Cheke ka Eron nei hatimare mae pris ka tharakna gna mana. Kate lehe kheragna pris na, pris tuana mala thosei tei namo ka thinigna mae te lehe na, naugna mana ginauna theome klino ka tathagu iara na. ²Nu jame thini na idogna ba kmagna mana, ba thugna nalhaꞌu ba thugna gaꞌase mana, ba thabusigna mana, te eghu na, mana tangomana te tei baludi ka giugilui. ³Ba jame thini na greghagna mana te theome tolaghi ngau eghuteuna naꞌa neke au ka sugagna pris, te eghu na, mana tangomana te tei baludi ka giugilui. ⁴Jame mae te lehe na lehe ivagna mae pris, mana thosei tei baludi mare ka giugilui naugna mana mala au klino ka tathagu iara na.

⁵“Pris na theome mala ghoighori phaꞌugna na ba gremohogna na mala laseni te diꞌanagnafa ka glehegna kaisei naikno na, eghuteuna mana mala theome vahe thinigna naugna mana te diꞌanagnafa na. ⁶Mare mala au blahi malagu iara nodi God mare, eghuteuna mare mala theome goigoni ni nanghagu iara na, naugna mare mala ei fafara mala tangomana gano re te kaisei glepo blahi na. Naugna igne mare mala blahi fara.

⁷“Pris te gnafa igre mala blahi ranghi ghau iara nogna God, eghume mana mala theome tangomana te tolaghi ka gaꞌase vine na, ba gaꞌase teke koko khetogna na. ⁸Ghotilo naiknomi Israel ra mala ghatho tahudi mae pris gre mae blahi, naugna mare mala fafara gano blahi. Naiknore mala laseni mae pris te gnafa igre blahi naugna iara LORD, iara blahi, eghuteuna iara fablahidi nogu naiknore mala blahi.

⁹“Eghuteuna jame thugna gaꞌase kaisei mae pris fathonani thegna ka puhi vine, naꞌa famamajani kmagna na, eghuteuna ghotilo mala gnubrani naꞌa ka khaꞌaghi mala ghilei lehe naꞌa.

^10-12“Mae ihei te pris biꞌo teke tofa oel blahi mare ka phaꞌugna na, eghuteuna mare neke taofini mana mala fahaghe mana nodi pohe mae pris. Eghume kate lehe kaisei ka tharakna gna mana na, mana theome tangomana te edi glepo te mala laseni te diꞌanagnafa na, ba rerheku nogna pohe na, nei mana theome mala leghuni puhi te mala pore khaklagna re teu igne. Neuba mae ihei ne lehe kmagna ba idogna, mana blahi te tei ka thini na te fathonani thegna te theome mala klino ka tathagu iara na. Eghuteuna mana theome tangomana te jifla ka nogu vido blahi iara na te mala giugilui thini igne, naugna jame te eghu na, mana eni nogu vido blahi iara nogna God mala theome klino ka tathagu iara na. Naugna mare neke taofini mana ka nogu oel blahi iara na. Mana mala leghudi glepo igre naugna iara LORD.

¹³“Eghuteuna pris biꞌo kolho tangomana te tolaghi ka kaisei gaꞌase majaghani te theo kaisei mae teke thuru balugna. ¹⁴Mae pris biꞌo theome tangomana te tolaghi ka gaꞌase glehe kokoi, ba gaꞌase teke divos mare, ba kaisei gaꞌase vine. Eghuteuna mana mala tolaghi ka kaisei gaꞌase majaghani ka vikegna Livae, teke theo kaisei mae teke thuru balugna naꞌa teku na. ¹⁵Jame te theome eghu na, thugna re theome klino ka tathagu iara na. Iara LORD, iara neke fablahini mana.”

¹⁶Eghuteuna LORD neke cheke eghu ka Moses, ¹⁷“Cheke ka Eron, jame kaisei ka tharakna gna mana na au keha glepo te jafra ka thinigna na, mana blahi te mei namo ka olta te mala fafara mei ka iara gano blahi na. ¹⁸Theo kaisei ka mae igre tangomana te loku kate dofu, ba mae te theome nolo tafri naugna ghahe gna na diꞌa, ba kaisei glepo goigoni tatha gna nei foflo gna teu re, ba ghahe gna na peko, ¹⁹ba khame gna ba ghahe gna teu mana re klopa. ²⁰Theo kaisei ka mae igre tangomana te loku kate peko thagru gna na, ba thini gna na thofno sokmo fara, ba tatha gna na diꞌa, ba au bakua ka thini gna na, ba tathagu. ²¹Kate au kaisei glepo te jafra ka thini gna kaisei ka tharakna gna mae pris biꞌo na, blahi te mei namo ka olta te mala fafara mei gano blahi na ka iara. ²²Nu mana tangomana te ghamu vidodi fafara te mala ghedi mae pris, neuba vido gna fafara igne ne blahi, ba thono blahi fara. ²³Nu mana thosei mei namo ka pohe te bobotho gna Chogho te Thono Blahi Fara, eghuteuna mana mala thosei mei namo ka nogu olta iara na, glahu edi phei vido blahi igre theome klino ka tathagu iara na. Iara LORD, iara mae ihei teke fablahidi re.”

²⁴Igre glepo teke chekedi Moses ka Eron baludi thugna mana re nei ka naiknodi Israel.

Fafara naiknodi Israel te tusu lao ka LORD mae blahi

¹LORD ne cheke eghu ka Moses, ²“Cheke ka Eron baludi thugna mana ra mala au fadelei mare ka glepo blahi teke lisei fadelei naiknodi Israel mala fafara mei ka iara, aonu mae pris gre mala theome goigoni nanghagu iara te blahi na. Iara LORD.

³“Cheke ka mare, ginauna mae pris ka tharakna di mare igre te theome klino ka tathagu iara na, mana theome naba te mei namo ka fafara blahi igre. Tutuani, mae pris tuana theome tangomana teke mei loku ka olta ke ulugu iara. Vetula igne ginauna au fabrahu. Iara LORD.

⁴“Jame kaisei ka mae pris igre au fogra diꞌa ka thini, ba mana au fogra te jifla mei glotho ka mamaja gna na, pris igne theome klino ka tathagu iara na. Eghuteuna mana mala thosei ghamu kaisei vido ka gano blahi ghilei thokeni narane teke klino fapulo mana na. Eghuteuna jame kaisei pris haboni kaisei glepo te theome klino naugna mana neke haboni thini gna mae te lehe na, ba kholo gna mae pris igne jifla mei ka thini gna mana na, ⁵ba mana haboni kaisei glepo tautagu te theome klino ka tathagu iara na, ba mana haboni mae te theome klino, te eghu na, pris igne jaola theome klino ka tathagu iara na. ^6-7Jame pris na theome klino, mana na theome klino ghilei rafi, eghuteuna mana blahi te mala ghamu gano blahi re ka narane tuana. Kate plulu naprai na, mana ginauna mala apu mala ke klino, eghuteuna ke leghu, mana tangomana teke ghamu gano blahi na naugna ghegna vido gano mana. ⁸Mae pris re theome tangomana te ghamu nafnahidi glepo tautagu teke lehe thegna na, ba glepo mata teke aknu falehe na, naugna nafnahi tuana ginauna fathona ni mana ka tathagu iara na. Iara LORD.

⁹“Hatimare mae pris mala leghudi unha teke chekedi iara mala edi mare teku ra, glahu papara nei lehe eghu mare te theome leghudi nogu farirhiu iara igre. Iara LORD, mae ihei teke fablahidi mare.

¹⁰“Ihei te theome tharakna gna pris na, mana theome tangomana te ghamu gano blahi na. Eghuteuna ihei teke sighoni kaisei pris, ba ihei loku ranghini kaisei pris, mana jaola theome tangomana te ghamu gano blahi na. ¹¹Nu jame kaisei pris foli kaisei naikno sneka, naikno sneka igne tangomana te ghamu gano blahi na. Jaola, thugna mae sneka teke karha mei ka sugagna pris tangomana te ghamu gano blahi na. ¹²Eghuteuna thugna gaꞌase pris te tolaghi ka mae ihei te theome pris, naꞌa theome tangomana te ghamu gano blahi na. ¹³Jame mae tuana koko khetogna na ba mana lehe, eghuteuna naꞌa theo thugna. Jame teke pulo mei naꞌa ka sugagna kmagna na mala ke au jateula ame tolaghi nga teku ia, naꞌa tangomana teke ghamu gano blahi kmagna na. Nu ihei te theome tharakna gna pris na theome tangomana te ghamu gano blahi na.

¹⁴“Eghuteuna jame ihei te ghamu katha vido ka gano blahi igne, nu theome laseni kolho unha te eni mana na teuna, mana ke foli ka pris unha teke ghamu mana na, eghuteuna ke nhaꞌa lao kaisei ke klignadi glima vido gano teke ghamu mana tuana. ¹⁵Pris re theome mala goigoni ghedi gano blahi naiknodi Israel teke fafara mei ka iara LORD. ¹⁶Jame pris snakreni mae ihei te theome nabagna te mala ghamu gano blahi igne na, nabagna na mae igne papara eigna igne. Iara LORD, mae ihei teke edi fablahi igre.”

Glepo tautagu naba te mala fafara

¹⁷LORD neke cheke eghui ka Moses, ^18-19“Cheke ka Eron baludi thugna mana ra, nei naiknodi Israel eidi vetula te mala edi fafara te thofno krono fara. Jame kaisei ka ghotilo, ba kaisei naikno phosa te au balumi ghotilo hata mei glepo tautagu mala fafara gna kaisei nhaꞌa cheke, ba fafara teke eni leghuni unha teke magnahagheni mana na, te eghu na, glepo tautagu igne mala nabagna. Mala tangomana iara te glealeꞌa di fafara igre, mare tangomana hata te mei kolho buluka nalhaꞌugna, ba sipu nalhaꞌugna, ba nanigot nalhaꞌugna te theome au kaisei thona ka thinigna na. ²⁰Ghotilo mala thosei fafara kaisei glepo tautagu te au kaisei glepo te thona ka thinigna na. Jame ghotilo fariuriu, iara ginauna theome gleꞌani fafara tuana. ²¹Jame kaisei naikno fafara mala laseni te au fakeli balugu iara LORD neuba mana ne fafara naugna mana neke eni kaisei nhaꞌa cheke, ba fafara te eni mana leghuni unha te magnahagheni mana, mana ginauna mala fafara glepo tautagu te theome au kaisei thona ka thini gna na. Jame te theo na, iara ginauna theome gleꞌa ka nogna fafara mana na. ²²Jame glepo tautagu igne dofu, ba ghahe gna na klopa, ba fnera ka thini gna na, ba guli gna na diꞌa, ba au thubu glotho te jifla mei, te eghu na, ghotilo mala thosei fafara mei ka iara. Ghotilo mala thosei fafara kaisei nafnata glepo tautagu ke kligna olta mala tusu mei jateula glepo blahi eghu ka iara. ²³Jame kaisei mae magnahaghei fafara glepo tautagu nu thinigna na theome karha keligna, ba katha glepo goigoni thinigna na, nabagna na fafara igne eni leghuni unha te magnahagheni mana na. Nu theome naba te fafara malagna nhaꞌa cheke na nafnata glepo tautagu igne naugna iara theome gleꞌani nafnata glepo tautagu igne. ²⁴Ghotilo mala thosei fafara ka iara LORD, kaisei glepo tautagu te chrahi ba neke lage. Ghotilo mala thosei eni nafnata glepo igne ka nomi kantri. ²⁵Ghotilo theome tangomana te hata nafnata glepo tautagu igne ka ihei te theome naikno gna Israel, ghotilo thosei fafara glepo igne jateula gano blahi eghu ka iara. Nafnata glepo tautagu igne theome naba nei au thona ka thinigna na, eghume iara theome gleꞌani nafnata fafara igne.”

²⁶LORD tudu ne cheke eghu ka Moses, ²⁷“Jame kaisei sua buluka, ba sua sipu, ba sua nanigot karha majaghani, khudau mala au balugna idogna na nabagna fitu narane. Ke leghu gna te gnafa fitu narane igre, naba ghotilo te hata te mei te mala fafara ke kligna olta mala tusu mei jateula glepo blahi eghu ka iara LORD. ²⁸Ghotilo mala thosei fafara kaisei buluka gaꞌase gna balu thugna, ba sipu gaꞌase gna balu thugna, ba nanigot gaꞌase gna balu thugna, teke kaisei fata aknu falehedi repa ghotilo ka narane tuana kolho.

²⁹“Kate fafara ghotilo te mala tegio ka iara LORD na, ghotilo mala eni igne ka puhi te doglo mala tangomana iara te gleꞌa tagna na. ³⁰Ghotilo mala ghamu nafnahi gna fafara igne ka narane te fafara ghotilo na, ghotilo mala thosei tathaji katha vido ghilei hamerane ka keha narane na. Iara LORD.

³¹“Ghotilo mala leghudi nogu cheke iara igre naugna iara LORD. ³²Ghotilo thosei lausasaba ni nanghagu iara te blahi gne, nu ghotilo naiknomi Israel ra laseni te iara blahi, eghuteuna iara na fablahi ghami fabrahu leghu fata. ³³Iara neke hata fajifla ghami ghotilo Ijep mala nomi God ghotilo. Iara LORD.”

Narane biꞌo mala kilo fnaknoni LORD

¹LORD cheke eghu ka Moses, ²“Cheke ka naiknodi Israel. Igre nogna narane biꞌo LORD mala khapru mei ghotilo mala kilo fnakno ghau iara.”

Narane Sabat

³“Ghotilo au fitu narane te mala edi ghotilo nomi loku re, nu ka fafitu narane leuleghu wik na narane Sabat narane mala gnafa. Ka narane Sabat ghotilo mala theome mala loku, nu ghotilo mala kafe mei mala kilo fnakno ghau iara. Neubane ka namono aheva te tei au ghotilo tagna na, narane Sabat nogu narane iara LORD eghuteuna ghotilo mala ghatho tahuni.”

Gaghamu Ghasa-Polho balugna Narane biꞌo eigna Bret te Theo Isi gna na

⁴“Keha Narane biꞌo te mala kafe khapru mei te mala kilo fnakno ghau iara, iara neke vahini malami ghotilo, eghuteuna iagho mala chekeni thofno narane gna na ka naiknore. ⁵Leuleghu finogha, ka nhigra ulu lahu, ka nabotho fati narane, kate plulu naprai na, ghotilo ginauna mala eni Gaghamu gna Ghasa-Polho. ⁶Eghuteuna ka nabotho glima narane gna nhigra igne, ghotilo ginauna mala fufunu Narane biꞌo gna Bret te Theo Isi gna tuana. Narane biꞌo tuana eni nabagna fitu narane eghuteuna bret te ghamu ghotilo na mala theo kaisei isi tagna. ⁷Ka narane ulu lahu gna gaghamu biꞌo igne, igne kaisei narane blahi mala kafe khapru mei ghotilo mala kilo fnakno ghau iara. Eghuteuna ka narane igne ghotilo mala thosei loku. ⁸Eghuteuna leuleghu narane ka fitu narane gna narane biꞌo igne, ghotilo mala fafara mala tusu mei jateula glepo blahi eghu ka iara LORD. Ka fafitu narane gna narane biꞌo igne keha narane blahi na mala kafe khapru mei ghotilo mala kilo fnakno ghau iara. Eghuteuna ka narane igne ghotilo mala jaola theome loku.”

Gaghamu Gano Saro Ulu

⁹LORD ne cheke eghu ka Moses, ¹⁰“Kate tei ghotilo te au ka glose nate tusu ari iara ka ghotilo na, ghotilo mala hata mei ka pris gano saro ulu teke hata ghotilo ka nomi nagare ra. ¹¹Eghuteuna ka narane ke leghugna narane Sabat, pris igne mala hata gano saro ulu igne, mana pala mei ke ulugu iara jateula kaisei fafara te tusu mei mala kelitagu iara balumi ghotilo. ¹²Eghuteuna ka narane tuana, ghotilo mala hata kaisei sua sipu nalhaꞌugna te kaisei finogha gna eghuteuna theo kaisei glepo te diꞌa ka thini gna na. Ghotilo hata sipu igne mala eni fafara te thofno krono fara mala kilo fnakno ghau iara LORD. ¹³Eghuteuna balugna sipu igne, pris mala ei fafara ka phei kilo flaoa ka famane wit teke ngigno fodu ghotilo balu oliv oel. Pris mala gahu ke kligna olta mala eni kaisei glepo blahi te siri keli gna mala kelitagu iara LORD. Eghuteuna ghotilo mala tofa kaisei lita waen rhegna olta na mala kaisei fafara balu sipu nei fafara ka flaoa. ¹⁴Blahi te ghamu ghotilo gano saro ulu ka nomi nagare are, neuba ne famane, ba ghotilo gahu, ba ghotilo ei bret tagna, ghilei thokeni narane te fafara ghotilo ka iara na. Igne kaisei vetula te mala leghuni fabrahu ghotilo na, neuba ghotilo ne au ka namono aheva.”

Narane biꞌo Fitu Wik

¹⁵“Leuleghu finogha, ghotilo mala kaha fitu wik funu ka narane ke leghu Sabat, narane te eni ghotilo ka iara ka gano saro ulu funudi ka nagare ghotilo are. ¹⁶Ka glima fulu narane, igne narane ke leghugna fafitu narane Sabat teke kaha ghotilo ia, ghotilo mala tusu mei ka iara LORD kaisei fafara ka famane flaoa ka gano majaghani ka nagare ghotilo are. ¹⁷Ghotilo te gnafa funu aheva te au ghotilo, hata mei phei bret, mala pala mei pris ke ulugu iara jateula kaisei fafara eghu ka iara. Phei bret igre, ghotilo mala edi ka fati kilo flaoa, eghuteuna keha isi. Igne nogu fafara iara funudi ka gano saro ulu ka nagare ghotilo ra. ¹⁸Eghuteuna ghotilo mala kafe hata fitu sua sipu nalhaꞌudi te thokeni kaisei finogha, nei kaisei sua buluka nalhaꞌugna, nei phei sipu nalhaꞌudi, te theo kaisei thona ka thinidire. Glepo tautagu igre mala eni fafara te thofno krono fara mala kilo fnakno ghau iara LORD. Ghotilo mala eni fafara igne balu famane flaoa nei fafara mala tofa waen rhegna olta. Pris mala gahu fafara igre mala eni kaisei glepo blahi sirigna na LORD kelitagna. ¹⁹Eghuteuna ghotilo fafara mei kaisei nanigot nalhaꞌugna mala ke doglo ghotilo ka tathagu iara na. Eghuteuna ghotilo mala hata phei sipu nalhaꞌudi te thokeni kaisei finogha mala fafara mala laseni ghotilo te au fakeli balugu iara. ²⁰Pris mala hata phei bret igre baludi phei sipu, mala pala mei ke ulugu iara jateula kaisei fafara eghu ka iara. Eghuteuna fafara igne blahi nogu iara LORD, eghuteuna pris kolho tangomana te mala ghamu na. ²¹Ghotilo mala thosei eni kaisei gloku ka narane biꞌo igne, ghotilo mala kafe mei mala kilo fnakno ghau iara. Igne vetula gna narane biꞌo te mala leghuni fabrahu ghotilo ka vido te gnafa aheva te au ghotilo na.

²²“Iara LORD, nomi God ghotilo, eghume kate tei ghotilo te hata gano ka nomi nagare are, ghotilo thosei hata hui tei thoke ka gerigna nagare na. Eghuteuna ghotilo thosei ke pulo mala ke hata gano teke lisei faleghu teku ghotilo ra. Ghotilo khudau gano igre maladi iheire te kuma nei naikno phosa te au balumi ghotilo.”

Narane biꞌo mala Ifu Trampet

²³LORD ne cheke eghu ka Moses, ²⁴“Cheke ka naiknodi Israel, leuleghu finogha, ka fafitu nhigra ka narane ulu lahu gna nhigra tuana, ghotilo mala tathaji kaisei narane mala thofno gnafa kolho. Kate nomhini ghotilo naogla gna trampet te taitanhi fabiꞌo na, igne fagaglana gna narane biꞌo na, ghotilo te gnafa na mala kafe mei mala kilo fnakno ghau iara. ²⁵Ka narane biꞌo tuana, ghotilo mala thosei eni kaisei gloku. Eghuteuna ghotilo mala eni kaisei fafara mala tusu mei jateula kaisei glepo blahi eghu ka iara LORD.”

Narane biꞌo mala Hata Fadelei Nakhibo

²⁶LORD ne cheke eghu ka Moses, ²⁷“Leuleghu finogha, ka fabotho narane gna fafitu nhigra na, ghotilo mala tarai ka Narane biꞌo igne mala Hata Fadelei Nakhibo. Ka narane biꞌo igne, ghotilo mala thosei ghamuni kaisei glepo. Eghuteuna ghotilo mala kafe mei mala kilo fnakno ghau iara, eghuteuna ghotilo mala eni kaisei fafara mala tusu mei jateula glepo blahi eghu ka iara LORD. ²⁸Ghotilo thosei eni kaisei gloku ka narane biꞌo igne, blahi! Naugna narane mala hata fadelei nakhibomi ghotilo re, mala ke doglo ghotilo ka tathagu iara na. ²⁹Jame ihei te huhughu te ghamu ka narane biꞌo igne na, ghotilo mala lisei fadelei ka nogu naikno iara re. ³⁰Eghuteuna jame kaisei naikno eni kaisei gloku ka narane biꞌo igne, iara ginauna faleheni mana. ³¹Ghotilo thosei eni kaisei gloku ka narane igne! Igne kaisei vetula te mala leghuni fabrahu ghotilo ka vido aheva te au ghotilo na. ³²Funu ka faheva narane gna nhigra igne ghilei plulu naprai ka fabotho narane na, ghotilo mala gnafa. Igne kaisei narane mala gnafa ghotilo, blahi ghotilo te ghamu kaisei gano na.”

Narane biꞌo te mala Au ka Grorofe Ikoi

³³LORD ne cheke eghu ka Moses, ³⁴“Cheke ka naiknodi Israel, leuleghu finogha, ka fafitu nhigra igne, ka fabotho glima narane gna na, ghotilo mala eni Narane biꞌo te mala Au ka Grorofe Ikoi, narane biꞌo igne mala eni nabagna fitu narane. ³⁵Ka narane ululahu gna narane biꞌo igne, ghotilo mala thosei eni kaisei gloku, ghotilo mala kafe mei mala kilo fnakno ghau iara. ³⁶Eghuteuna leuleghu narane te tei thoke ka fafitu narane na, ghotilo mala eni kaisei fafara mala tusu mei ka iara jateula kaisei glepo blahi eghu ka iara LORD. Ka fahana narane na, ghotilo mala kafe mei mala kilo fnakno ghau iara, nei mala ke eni kaisei fafara mala tusu mei jateula kaisei glepo blahi eghu ka iara. Igne narane mala kilo fnakno ghau iara, eghuteuna blahi te mala eni ghotilo kaisei gloku tagna na.

³⁷“Narane biꞌo igre nomi ghotilo mala kafe mala kilo fnakno ghau iara nei mala ghatho tahu ghau iara. Eghume ghotilo mala eni kaisei fafara mala tusu mei jateula kaisei glepo blahi eghu ka iara LORD. Igre fafara te thofno krono fara, eghuteuna mare eni ka famane wit, eghuteuna fafara igne ghotilo totofa waen rhegna olta. Ghotilo mala edi igre ka thofno naranedi re. ³⁸Narane biꞌo te gnafa igre ghotilo mala jaola tathaji fakeli narane Sabat te gnafa, nei namha te gnafa, nei nhaꞌa cheke te gnafa, nei nogna fafara te gnafa mae ihei te leghuni unha te magnahagheni mana.

³⁹“Leuleghu finogha, ke leghu kate hata gano ka nomi nagare re, ka fafitu nhigra, ka fabotho glima narane gna na, ghotilo mala eni Narane biꞌo te mala Au ka Grorofe Ikoi igne. Narane biꞌo igne mala eni nabagna fitu narane. Narane ululahu gna na, nei fahana narane gna na, phei narane igre mala gnafa ghotilo. ⁴⁰Ka narane ululahu gna narane biꞌo igne, ghotilo mala hata mei famane sisi ka nomi gaju ghotilo ra, eghuteuna ghotilo mala hata khakladi gaju thubo, nei gregedi gaju te au kmana khaklagna, mala fufunu narane biꞌo igne. Eghuteuna ghotilo mala glealeꞌa nei ghatho tahu ghau iara LORD nomi God ghotilo. ⁴¹Leuleghu finogha, ka fafitu nhigra, ghotilo mala eni narane biꞌo igne mala ghatho tahuni LORD nabagna fitu narane. Igne vetula gna narane biꞌo te mala leghuni fabrahu ghotilo na. ⁴²Ghotilo te gnafa ka tharakna gna Israel ra ghotilo mala au ka grorofe ikodi ra nabagna fitu narane. ⁴³Ka puhi igne, iheire nate karha mei ke leghumi ghotilo igre laseni teke hata fajifla ghami iara Ijep. Eghuteuna ka narane tuana, iara neke cheke ka ghotilo mala au kolho ka grorofe ikodi. Iara LORD, nomi God.”

⁴⁴Aonu Moses ne leghuni unha te chekeni LORD igne ne cheke ka naiknodi Israel eidi nogna narane biꞌo LORD igre.

Thaba mala lilisei juta ka Suga Tapuale te Blahi

¹LORD ne cheke eghu ka Moses, ²“Cheke ka naiknodi Israel, mare mala hata mei thofno famane oliv oel maladi juta di Thaba mala lilisei Juta lamna ka Suga Tapuale te Blahi na, mala phae fabrahu. ³Leuleghu bongi na, Eron fakasa juta re ka Thaba te lilisei Juta, eghuteuna mana fiofilodi mala phae ke ulugu iara ghilei hamerane. Thaba te mala lilisei Juta igre mala au ke ulugu iara ke lamna Suga Tapuale te Blahi ke kosi ka pohe te bobotho Chogho te Thofno Blahi fara na aheva te au Bokis Blahi na. Ghotilo mala leghuni fabrahu vetula igne. ⁴Eghume Eron mala fiofilodi fabrahu juta ka Thaba mala lilisei Juta teke edi mare ka famane gol te au ke ulugu iara LORD.”

Bret Blahi

⁵LORD ne cheke eghu, “Ghotilo mala hata duku biꞌo famane flaoa, eghuteuna ghotilo mala gahu nabotho phei bret tagna. ⁶Eghuteuna ghotilo mala hata mei nabotho phei bret igre ke ulugu iara ka Tevo malagna Bret Blahi teke horo mare ka famane gol igne. Ghotilo mala lilisei bret igre ka phei thura, namno bret ka kaisei thura, eghuteuna namno bret ka keha thura na. ⁷Ghotilo mala hata famane insens eghuteuna lilisei rhedi bret leghudi phei thura igre. Kate gahu ghotilo insens igre, glepo igre jateula fafara blahi te famei ghotilo ka iara LORD. ⁸Leuleghu wik, ka narane Sabat, pris mala lilisei bret igre ke ulugu iara LORD. Igne kaisei vetula te mala leghuni fabrahu ghotilo na. ⁹Bret igre ghegna pris biꞌo baludi tharakna gna mana re. Bret igne ghedi mare fabrahu. Eghuteuna mare ghamu lamna ka vido aheva te blahi na naugna kaisei baludi glepo blahi te famei ka iara LORD.”

Jame ihei te cheke diꞌa ka nanghagna LORD mana mala papara

^10-11Selomit thugna gaꞌase Dibri ka vikegna Dan, mana tolaghi ka kaisei maegna Ijep. Repa au kaisei thudi nalhaꞌu. Kaisei narane, thudi repa igne ne tei ka nodi vido mae Israel eghuteuna mana ne fapholai balugna kaisei maegna Israel. Kate fapholai phia mare na, mana ne cheke diꞌa ka nanghagna LORD. Aonu naiknore lokini mana, hata ne tei ka Moses. ¹²Mare liliseini mana ka suga sosolo ghilei thokeni narane te laseni mare unha LORD nate falalase te mala eni mare tagna na.

¹³LORD ne cheke eghu ka Moses, ¹⁴“Ghotilo hata mae tuana tei ke kosigna vido te au ghotilo na. Eghuteuna iheire teke nomhini mana teke cheke fadiꞌa na mala tei lisei khamedi re ka phaꞌugna mana na, mala laseni mana te jafra na. Eghuteuna ghotilo te gnafa na fadi faleheni mana ka thina. ¹⁵Ke leghu, iagho mala cheke ka naiknodi Israel ihei te cheke diꞌa ka God, mana mala papara. ¹⁶Ihei te cheke goigoni ni nanghagna LORD na mala lehe. Neuba mana ne maegna ka ghotilo ba kaisei mae phosa au balumi ghotilo, nu jame te cheke goigoni ni nangha blahi igne na, ghotilo te gnafa na mala fada faleheni mana ka thina.

¹⁷“Eghuteuna jame kaisei mae faleheni keha mae na leghuni unha teke ghathoni mana na, ghotilo mala faleheni mana. ¹⁸Nu jame kaisei mae aknu falehe nogna glepo tautagu keha mae na, mana mala ke tughu fapulo glepo tautagu tuana balugna keha glepo tautagu te karha. ¹⁹Jame kaisei mae fafnerani keha mae na, ghotilo mala tei mala jaola fafnerani mana. ²⁰Jame kaisei mae lolhopa nhubragna keha mae na, ghotilo mala jaola tei lolhopa nhubragna mana na. Jame kaisei mae goigoni tathagna keha mae na, ghotilo mala jaola tei goigoni tathagna mana na. Jame kaisei mae magrini keha mae na eghuteuna klopa kaisei kheꞌi gna mana, ghotilo mala jaola tei mala lolhopa kaisei kheꞌi gna mana. Neuba unha nafnata glepo te eni mana te fnera keha mae na, ghotilo mala enila ka mae tuana mala enila nafnata nafnera tuana. ²¹Ihei te aknu falehe nogna glepo tautagu keha mae na, mana mala hata mei kaisei glepo tautagu mala ke tughu fapulo. Nu ihei te faleheni keha mae na, ghotilo jaola faleheni mana. ²²Eghuteuna neuba mae igne ne ka tharaknamu ghotilo, ba mae phosa au balumi ghotilo, vetula igne malami ghotilo hui, naugna iara LORD, nomi God ghotilo.”

²³Kate tei Moses te cheke ka mare nogna cheke LORD igre ka naiknore, mare hata fajifla ne tei mae te cheke diꞌa ka nangha gna LORD igne. Eghuteuna mare ne fadini mana ka thina ne ghilei lehe. Ka puhi igne, mare ne edi unha teke chekedi LORD ka Moses.

Fafitu finogha

¹Kate au teu Moses ka Thogele Sanai, LORD ne cheke eghu ka mana, ²“Cheke ka naiknodi Israel kate tei ghotilo ka glose aheva teke nhaꞌa cheke hi iara mala tusu ari ka ghotilo teku ia, leuleghu fata ka fafitu finogha na, ghotilo mala thosei joꞌu gano ka nomi glose na. Nomi glose ghotilo na mala gnafa jateula narane Sabat eghu. Ghotilo mala eni igne mala fagaglana gna ghotilo te ghatho tahu ghau iara LORD. ³Eigna ka namno finogha igre ghotilo tangomana te joꞌu gano ka nomi nagare ghotilo re, eghuteuna ghotilo tangomana te reireghidi nomi nagare grep, eghuteuna ghotilo tangomana te hata gano ka nagare. ⁴Nu ka fafitu finogha na, ghotilo mala snakreni glose na mala gnafa. Eghuteuna ka fafitu finogha tuana, ghotilo mala eni jateula narane Sabat eghu ka glose na kaisei finogha mala ghatho tahu ghau iara LORD. Ghotilo thosei joꞌu kaisei gano ka glose na, eghuteuna thosei kato koko gregedi gaju grep eghu ka finogha tuana. ⁵Gano te karha thedi ka phegra ghotilo ra, ghotilo mala thosei hata malami themi ba mala sabiri. Eghuteuna ghotilo mala thosei pala tei sisidi grep teke hata ka nomi nagare re mala tathajiu malami themi ba mala sabiri. Naugna igne, ghotilo mala eni Sabat ka glose nabagna kaisei finogha mala ghatho tahu ghau iara. ⁶Neuba ghotilo thosei tobi ka finogha tuana, nu glose na tangomana te favuragha gano ka ghotilo naiknomi Israel. Kaisei gano teke karha thegna na, malami ghotilo, nei maladi naikno sneka, nei maladi naikno gloku, nei maladi naikno phosa te au balumi ghotilo. ⁷Gano te karha thegna na, maladi nomi glepo tautagu ghotilo are baludi glepo tautagu te au mata are.”

Ka falimafulu finogha mala snagla naikno sneka

⁸“Ghotilo kaha fitu finogha igre naba fitu fata, mala thokeni phiatutu nheva finogha. ⁹Ka phiatutu nheva finogha tuare, ka fafitu nhigra na, ka fabotho narane gna na, igne Narane biꞌo mala Hata Fadelei Nakhibo, eghume ghotilo mala kurudi naiknore mala tei ifu fabiꞌo trampet heva heva ka nomi kantri na. ¹⁰Ghotilo fablahi falimafulu finogha, igne mala kaisei finogha blahi mala nogu iara. Finogha igne mala chekeni ka naikno te au heva heva ka nodi glose re narane nate snagla nodi naiknore ke lamna gna kantri igne. Ka finogha igne, glose teke sabiri naiknore ka keha mae mala ke pulo mei ka tharakna teke kulu khotogna na. Eghuteuna ka finogha igne, iheire teke sneka ra nake snagla nodi mala tangomana mare teke pulo ka tharaknadi re. ¹¹Ka finogha igne, ghotilo thosei joꞌu gano. Eghuteuna ka finogha igne gano teke karha thedi ka phegra ghotilo ra, ghotilo thosei hata tathajiu malami themi ba mala sabiri. Eghuteuna ghotilo thosei te pala sisi grep ka nagare ra tathajiu malami themi ba mala sabiri. ¹²Finogha igne blahi, ghotilo mala ghamu kolho kaisei gano teke karha thegna.

¹³“Jame kaisei naikno neke sabiri nogna glose na ka keha mae, glose tuana mala ke pulo ka mae teke kulu khotogna na igne ka falimafulu finogha.

¹⁴“Eghume, jame ihei ka ghotilo magnahaghei sabiri glose ka keha mae na, ba foli glose eghu, ghotilo thosei chaghi fari themi. ¹⁵Te eghuna, ghotilo mala ei praes gna glose na mala horoghoto ka nabadi finogha glose igne tangomana te tusu lao gano ka mae ihei teke foli na, ghilei thokeni finogha glose tuana na teke snagla na teke pulo ka mae ihei teke kulu khotogna na. ¹⁶Jame kmana finogha, praes gna na glose igne tangomana te haghe na, nu jame phei ba thilo finogha kolho, praes gna na pari. Igne ne eghu naugna praes tuana theome praes gna glose, nu praes di gano teke karha ka glose aheva teke hata mana ka glose tuana. ¹⁷Ghotilo thosei chaichaghi fari themi. Nu ghotilo mala ghatho tahu ghau iara naugna iara LORD, nomi God ghotilo.”

Nogna nhaꞌa cheke LORD mala fablahini nodi glose naiknore

¹⁸“Jame te faꞌuvedi nei leghudi teu ghotilo nogu vetula nei nogu farirhiu teu iara igre na, ghotilo tangomana te au fakeli ka nomi glose na. ¹⁹Jame te eghu ghotilo na, nomi glose ghotilo igne ginauna au kmana gano, eghuteuna ghotilo ginauna theome tangomana te kmoꞌe ka gano na, eghuteuna ghotilo ginauna tangomana te au fakeli ka vido tuana. ²⁰Nu glahu cheke eghu keha naikno, ‘Jame ka fafitu finogha na, theome snakre ghami te joꞌu gano nei bubukrei gano ka sugami re teuna, ghehati na ghamu unha ginauna?’ ²¹Iara LORD, iara ginauna fablahi nomi glose na ka fafamno finogha na mala au kmana gano nabagna thilo finogha. ²²Gano gna fafamno finogha na, ghotilo ginauna tangomana te ghamu te ghilei gnafa ka fahana finogha na. Eghuteuna ka fahana finogha na ghotilo ginauna tangomana teke joꞌu gano majaghani. Eghuteuna ghotilo ginauna ghamu au ngala gano igre ghilei thokeni faheva finogha na teke hata gano ghotilo ka nomi nagare are.”

Keha farirhiui ka faglima fulu finogha

²³“Jame kaisei ka ghotilo magnahaghei sabiri nogna glose na ka keha mae, mana ginauna thosei sabiri fahui, naugna glose igne theome nogna mana, nu nogu iara LORD. Iara neke tusu ari ka ghotilo mala loku ghotilo, nu ghotilo jateula naikno phosa te au katha vido kolho ka glose igne eghu. ²⁴Eghuteuna heva heva ka nomi kantri ghotilo igne, kate sabiri kaisei mae nogna glose na ka keha mae, mae ihei teke kulu khotogna mana au nogna nolaghi te mala ke foli fapulo glose tuana, eigna mana neke kulu khotogna tifa.

²⁵“Jame kaisei ka ghotilo thono kuma fara, eghuteuna mana sabiri nogna glose na, kheragna ka tharakna gna mana na mala ke foli mala ke hata fapulo glose tuana. ²⁶Eghuteuna jame mae tuana theome au kaisei kheragna mala foli mala ke hata fapulo glose tuana, nu ke leghu, mana mae dedei, te eghu na mana tangomana teke foli mala ke hata fapulo glose igne. ²⁷Jame te eni mana igne na, mana mala kaha niha finogha te au na ame thokeni nga Falimafulu Finogha na teke snagla glose igne ka khamegna mana na. Eghuteuna mana mala foli fajifla ka mae ihei teke foli tifa, ka praes te nabagna niha finogha ame thoke mei nga Falimafulu Finogha igne. Mana tangomana teke pulo au ka nogna glose na. ²⁸Nu jame mana theome naba te mala foli fapulo glose teke sabiri mana igne, te eghu na, glose tangomana te au ka mae khotogna majaghani na ghilei thokeni Falimafulu Finogha. Aonu ka Falimafulu Finogha igne, glose igne ginauna snagla nake pulo mei ka mae ihei teke kulu khotogna na, mana tangomana teke loku tagna.

²⁹“Jame kaisei mae au nogna suga ke lamna namono te au gringni thina biꞌo, eghuteuna mana sabiri suga igne ka keha mae, mana au nogna nolaghi mala foli mala teke hata fapulo ke lamnagna finogha thongana te funu ka narane teke sabiri mana na. ³⁰Nu jame te theome foli mana mala ke hata fapulo ka finogha igne na, mana theo nogna nolaghi mala teke foli ke leghu na. Eghuteuna suga igne ginauna nogna mae teke foli eghuteuna nogna tharakna gna mana na fabrahu. Eghuteuna ka Falimafulu Finogha igne, suga igne theome tangomana teke pulo mei ka mae ihei teke khotogna ulu lahu na. ³¹Nu suga te au ka namono te theo kaisei gringni thina na, ghotilo mala leghuni jateula puhi te leghuni ghotilo ka nagare na are eghu. Mana tangomana te foli mala ke hata fapulo, ba suga igne tangomana te snagla teke pulo mei kolho ka Falimafulu Finogha igne.

³²“Nu ka nodi namono vikegna Livae te au gringni thina biꞌo igne, jame mana neke sabiri nogna suga na, mae igne au nogna nolaghi fabrahu mala foli mala ke hata fapulo suga igne. ³³Jame kaisei mae ka vikegna Livae mana theome mala foli mala ke hata fapulo nogna suga na, te eghu na, kate thokeni Falimafulu Finogha igne, suga igne mala snagla mala ke pulo mei ka mana. Naugna suga te au ka nodi namono mae Livaet igre nodi mare fabrahu. ³⁴Nu glose te au falithui ka kaisei nodi namono vikegna Livae igre, mare theome tangomana te sabiri na. Glose igne nodi mare fabrahu.”

Puhi te mala reireghidi naikno kuma

³⁵“Jame kaisei kheramu thono kuma fara eghuteuna mana thono theome au kaisei glepo te mala reireghini thegna na, te eghu na, ghotilo mala reireghini nei toghoni eghu mana jateula puhi te reireghidi nei toghodi teu ghotilo naikno phosa te au balumi ghotilo are eghu. ³⁶Eghuteuna ghotilo mala thosei chekeni mae te kuma igne mala foli intres ka kaisei kaoni teke tusu lao ghotilo ka mana. Ghotilo mala ghatho tahuni LORD, eghuteuna ghotilo mala keli ranghidi naikno te kuma te au balumi ghotilo are. ³⁷Ghotilo thosei snakredi naikno te kuma re mala foli intres ka kaisei kaoni teke tusu lao ghotilo tadi re, eghuteuna ghotilo thosei nhaꞌa lao intres ka gano teke sabiri ghotilo ka naikno te kuma re. ³⁸Ghotilo mala edi glepo igre naugna iara LORD, nomi God ghotilo. Iara neke hata fajifla ghami ghotilo Ijep, mala tusu mei kantri Kenan igne ka ghotilo, eghuteuna mala nomi God ghotilo.”

Puhi te mala snakredi naikno sneka mala tei ka nasnagla

³⁹“Jame kaisei kherami ghotilo thono kuma fara ghilei sabirini thegna ka kaisei ka ghotilo, te eghu na, ghotilo thosei snakreni mana mala loku jateula kaisei nomi sneka eghu. ⁴⁰Ghotilo filo laoni mana jateula nomi mae gloku eghu ghotilo ba jateula kaisei naikno phosa eghu. Mana mala loku balumi ghotilo tei thokeni Falimafulu Finogha igne. ⁴¹Aonu ka Finogha igne, mana baludi thugna re mala snagla ke pulo ka thabukna gna na, nei ka nodi glose na. ⁴²Ghotilo naiknomi Israel, iara neke hata fajifla ghami Ijep aheva ghotilo teke sneka tagna. Tutuani, ghotilo nogu naikno gloku iara LORD. Naugna igne blahi kaisei ka ghotilo te mala sneka ka keha mae na. ⁴³Ghotilo thosei fanolidi naikno te kuma re naugna ghotilo mala ghatho tahu ghau iara kolho, nomi God ghotilo.

⁴⁴“Eghume, jame te magnahaghei au nomi naikno sneka ghotilo na, ghotilo tangomana te tei foli nalhaꞌu ba gaꞌase ka keha kantri te au falithui ghami ghotilo are. ⁴⁵Eghuteuna ghotilo tangomana te foli kaisei naikno sneka ka naikno phosa te au balumi ghotilo are. Eghuteuna thudi naikno phosa teke karha ka nomi glose ghotilo are, ghotilo tangomana te tajidi mala nomi sneka ghotilo. ⁴⁶Thumi nalhaꞌu ghotilo are tangomana teke hata kasa ka kaisei sneka, eghuteuna mare ginauna mala loku jateula naikno sneka eghu fabrahu ghilei lehe. Nu ghotilo mala thosei tapla faparini kaisei kherami maegna Israel mala jateula kaisei naikno sneka eghu, eghuteuna ghotilo mala thosei fagoigolidi mare.

⁴⁷“Jame kaisei mae phosa te au balumi ghotilo na kaisei mae dedei, eghuteuna kaisei kherami ghotilo kuma ne ghilei sabirini thegna ka mae dedei igne, ba ka kaisei tharakna gna mae dedei tuana. ⁴⁸Neuba ne eghu ngau, mae khuma igne au nogna nolaghi te mala kiloni mae thabusigna na mala ke mei foli fajifla ka mana. ⁴⁹Ba mana tangomana te toreni nebugna na, ba keha thabusigna na, ba kaisei kheragna ka tharakna gna mana mala mei ke foli fajifla ka mana. Ba mana thegna tangomana te dei sileni, mana tangomana te fajifla thegna mala tei snagla. ⁵⁰Eghuteuna te mala laseni praes te mala foli na, mana mala toutonu balugna mae dedei igne, eghuteuna phiamare mala kahadi finogha gna nogna kontrak na, funu ka finogha teke sabiri thegna ka mae dedei tuana te tei thokeni Falimafulu Finogha. Eghuteuna phia mare eni praes te nabagna foligna mae gloku ka finogha teke kaha phia mare na. ⁵¹Jame kmana finogha te au na ame thokeni nga Falimafulu Finogha. Te eghu na, praes te mala folini mana na haghe te nabadi finogha igre, ⁵²nu jame phei ba thilo finogha kolho te au na ame thokeni nga Falimafulu Finogha, te eghu na, praes te mala foli na pari nabadi finogha igre. ⁵³Mae gna Israel teke sabirini thegna ka mae dedei tuana mana neke jateula mae ihei te loku ka sileni eghu. Eghuteuna ghotilo mala fiofilo ghami ka mae dedei igne glahu fagoigolini mana kherami na.

⁵⁴“Jame te theo kaisei mae te foli fajiflani mae kherami igne, ka Falimafulu Finogha, mana baludi thugnare mala tei snagla. ⁵⁵Ghotilo naiknomi Israel ra nogu iara. Iara neke hata fajifla ghami ghotilo Ijep, uve, ghotilo nogu naikno gloku iara LORD nomi God ghotilo.”

LORD ne fablahidi naikno te leghuni mana

¹LORD ne cheke eghu, “Ghotilo thosei horo mumuju blahi, ba kaisei nafnata glepo mala tarai ghotilo tagna. Eghuteuna ghotilo mala thosei fakegra haghe thina mumuju brahu mala pogho soru ghotilo tadi, naugna iara LORD, nomi God ghotilo.

²“Ghotilo mala tajini narane Sabat, eghuteuna ghotilo mala ghatho tahuni vido te blahi te mala kilo fnakno ghau iara tagna na. Naugna iara LORD.

³“Jame te leghudi ghotilo nogu vetula nei faꞌuvedi nogu cheke iara re teuna, ⁴iara ginauna kuru mei nakhete malami ghotilo ka thofno narane gna na, mala tangomana ghotilo te au ghemi kmana gano ka nomi glose ghotilo re, eghuteuna nomi gaju ghotilo re tangomana jaola te au kmana sisi na. ⁵Eghume, ghotilo ginauna au ghemi kmana gano salaꞌudi unha ghotilo tangomana te ghathodi. Eghuteuna ghotilo ginauna au ghemi kmana sisi grep salaꞌudi unha ghotilo tangomana te ghathodi. Eghuteuna ka nomi vido ghotilo re ginauna fodu ka gano, eghuteuna ghotilo ginauna tangomana te au fakeli.

⁶“Iara ginauna togho ghami ghotilo mala au fakeli ka nomi kantri igne, eghuteuna ghotilo ginauna tangomana te thuru fakeli na eghuteuna bongiro na ghotilo ginauna theome mhaghuni kaisei glepo. Glepo tautagu te lase falehe naikno igre iara ginauna ngolhi fajifladi ka nomi vido ghotilo re, eghuteuna ginauna theo kaisei magra nate mei ka nomi kantri ghotilo igre. ⁷Ghotilo ginauna ngolhi fajifladi nomi naokare eghuteuna aknu falehedi ka nodi naflahi mala magra re. ⁸Glima mae ka ghotilo kolho nate ngolhi fajifladi kaisei gobi naoka! Eghuteuna kaisei gobi mae kolho ka ghotilo na ginauna ngolhi fajifladi nabotho thogha naoka! Nomi naoka ghotilo igre ginauna kafe lehe ka nomi naflahi mala magra ghotilo re.

⁹“Eghuteuna iara ginauna fablahi ghami ghotilo, mala au kmana thumi ghotilo, jateula teke chekeni iara ka nhaꞌa cheke teke eni iara balumi ghotilo ia eghu. ¹⁰Gano nate hata ghotilo ka nomi nagare re ginauna kmana fara salaꞌui, ginauna ghotilo naba gano salaꞌuni finogha thongana na. Eghuteuna leuleghu fata kate ari te gnafa finogha na, ghotilo ginauna tangomana te koko fahui gano teke kulu au re mala au kaisei chogho te krogha maladi gano majaghani. ¹¹Iara ginauna au balumi ghotilo, eghuteuna iara ginauna theome thodo ghami ghotilo. ¹²Iara ginauna nomi God ghotilo fabrahu, eghuteuna ghotilo ginauna nogu naikno iara. ¹³Ulu lahu na ghotilo neke loku jateula naikno sneka neku Ijep, nu iara nomi LORD God ghotilo neke hata fajifla ghami ka vido tuana. Eghuteuna iara kukusu chen teke edi mare teke hata ghami ghotilo mala thofno snagla ghotilo.”

LORD neke paradi naikno te theome leghuni mana

¹⁴“Nu jame te theome fanomho ghotilo ka iara na, nei theome leghudi nogu cheke iara re teuna, iara ginauna para ghami ghotilo. ¹⁵Jame te thofno tiromi leghudi ghotilo nogu vetula nei nogu cheke teu iara igre na, ghotilo huhughuni nhaꞌa cheke teke eni iara balumi ghotilo ia, ¹⁶iara ginauna para ghami ghotilo. Iara ginauna ghosei hata mei puhi biꞌo mala thoke ghami nei goigoni ghami eghu ghotilo. Fogra tuana theome tangomana nate gnafa ka ghotilo na, eghuteuna fagrutu tuana ginauna mala dofu ghotilo, eghuteuna ghotilo na fogra fabrahu ghilei lehe. Kate joꞌu ghotilo nomi nagare re, ginauna theo nafudi kolho, naugna nomi naoka ghotilo re ginauna ghamu gano igre. ¹⁷Iara ginauna figri tagru ghami ghotilo, eghuteuna nomi naoka ghotilo are ginauna ulu ghami ghotilo, eghuteuna iheire te susuku ghami ghotilo are ginauna funei fruni ghami ghotilo. Neubane theo kaisei naikno te ngolhi ghami ghotilo na, ghotilo ginauna rikha, naugna ghotilo ne thono mhaghu nomi fara!

¹⁸“Eghuteuna jame ghotilo theome leghu ghau iara ke leghudi papara igre, iara ginauna para ghami ghotilo fitu fata salaꞌudi nakhibomi ghotilo re. ¹⁹Kate fahaehaghe nei thofno patu gama fara teu ghotilo na, iara ginauna faparidi kolho nomi gaoghatho ghotilo re. Uve, theo kaisei nakhete nate soru mei ka nomi vido ghotilo re, eghuteuna nomi glose ghotilo re ginauna khapra fara, eghuteuna maku jateula aean eghu. ²⁰Nomi nakmusa ghotilo re ginauna theome tangomana nate togho ghami ghotilo na, naugna nomi glose ghotilo re ginauna theome tangomana nate tusu ari gano ka ghotilo na, eghuteuna nomi gaju ghotilo re ginauna theome tangomana nate ure sisi na.

²¹“Eghuteuna jame te theome keli ranghi ghau iara ghotilo na, nei theome leghu ghau iara teuna, iara ginauna thofno para ghami ghotilo fabrahu eidi nakhibomi ghotilo re. ²²Iara ginauna kuru tei glepo tautagu mala kathu falehe thumi ghotilo re, baludi nomi glepo tautagu ghotilo re. Eghume ginauna na phei ba thiloi kolho nate karha na ghilei theo kaisei nate au te mala nolo ka nomi nabrou ghotilo are.

²³“Jame papara igre theome tangomana te tughu puhimi ghotilo re teke figri mei ka iara na, nu heta ghemi kolho te theome keli ranghi ghau iara teuna, ²⁴iara thegu ginauna goigoni ghami fara ghotilo. Eghuteuna iara thegu ginauna thofno papara ghami ghotilo fabrahu eidi nakhibomi ghotilo re. ²⁵Iara ginauna snakreni magra biꞌo na mala roꞌeni nomi vido ghotilo na, mala para ghami ghotilo naugna ghotilo ne huhughuni nhaꞌa cheke teke eni iara balumi ghotilo ia. Eghuteuna jame te rikha te tei poru ghotilo ka vido keli ka nomi namonore, iara ginauna kuru ari thua nafnata fogra mala thoke ghami ghotilo, eghuteuna iara ginauna snakre lao ghami ghotilo ka khamedi nomi naoka ghotilo re. ²⁶Ginauna na thoke mei thofno narane ninhigrana nate theo gano nate rofo ghotilo na, eghuteuna nabotho gaꞌase kolho nate tangomana nate kafe gahu bret ka kaisei biti kolho. Eghuteuna kate tufa ghotilo katha bret kolho, ghotilo ginauna rofo.

²⁷“Jame papara igre theome togho ghami ghotilo teke figri mei ka iara, nu heta ghemi kolho ghotilo te theome keli ranghi ghau iara na, ²⁸iara ginauna diꞌatagu fara nei theome keli ranghi ghami eghu ghotilo. Eghuteuna iara thegu ginauna thofno para ghami ghotilo fabrahu. ²⁹Ghotilo ginauna thono rofo fara salaꞌudi tifa ra, ghilei ghamu ghotilo thumi themi are. ³⁰Eghuteuna iara ginauna goigoni nomi vido blahi ghotilo are. Iara ginauna paꞌe olta te mala gahu insens ghotilo are. Eghuteuna iara ginauna koko lao thinimi ghotilo te lehe are mala pagu ke klignadi nomi mumuju blahi ghotilo te theome karha te pogho soru ghotilo tadi are. Eghuteuna iara ginauna tirogu ghami fara ghotilo. ³¹Iara ginauna goigoni fahui nomi namono ghotilo are, eghuteuna paꞌe soru nomi vido blahi ghotilo are. Iara ginauna tirogudi sisiridi nomi fafara ghotilo are. ³²Iara ginauna goigoni nomi glose ghotilo are, ghilei nomi naoka ghotilo te mala au ka nomi glose ghotilo igre ginauna rhana nodi fara ka unha te eni iara tagna na. ³³Iara ginauna kurudi nomi naoka ghotilo are mala ngolhi fajifla ghami ghotilo mala tei au tafri ka keha kantri delei. Eghuteuna ke leghu, mare ginauna goigoni fahui nomi namono ghotilo are ghilei krogha. ^34-35Ka narane tuana, nomi glose ghotilo na ginauna thofno gnafa ka finogha te krogha tuana. Kate tei ghotilo te sosolo ka nodi vido nomi naoka re, eghuteuna nomi glose ghotilo na mala gnafa jateula narane Sabat. Naugna ghotilo ne theome snakreni glose na mala gnafa leuleghu fitu finogha jateula teke chekeni iara ka ghotilo ia eghu.

^36-37“Iara ginauna famamhaghu ghami ghotilo iheire te au teu ka keha kantri ra mala thofno mhaghu nomi fara ghotilo. Neubane naogla gna kaisei khakla gnognofi te flalo ka nuri, ghotilo mhaghu na rikha. Eghuteuna ghotilo ginauna rikha jateula te ngolhi ghami mae naoka ra eghu, eghuteuna ghotilo ginauna tangomana te uka na, neubane theo kaisei naikno te ngolhi ghami ghotilo na. Eghuteuna ghotilo ginauna rikha na tothokei fari themi kolho, na uka tafri pari, eghuteuna ginauna theo nomi nolaghi te mala magridi nomi naoka re. ³⁸Ghotilo ginauna lehe ka keha kantri te tei au ghotilo tagna na, eghuteuna mae naoka ginauna giugilu ghami ka nodi glose re. ³⁹Eghuteuna tothoghei ikoi iheire te karha nga teu ka ghotilo igre, ghotilo ginauna diꞌa nagnafami fara ka nodi vido nomi naoka ghotilore. Uve, ghotilo ginauna diꞌa nagnafami fara eidi nakhibomi themi re, nei nakhibodi kuꞌemi ghotilo ra.”

LORD ginauna tajini nogna nhaꞌa cheke na

^40-41“Nu ginauna tharaknami ghotilo mala cheke thakledi nakhibodi re, nei cheke thakledi nakhibodi kuꞌedire. Eghuteuna mare ginauna mala cheke thakledi kuꞌedi mare teke figri tagru ghau iara ra. Mare ginauna mala cheke thakledi puhidi kuꞌedi ra teke figri tagrudi iara teke ghilei kuru teidi iara ka nodi kantri nodi naoka mare re. Eghuteuna jame iheire te patu gama igre faparadi thedi, mare laseni papara igne thoke mei ka nakhibodi thedi, ⁴²te eghu na, iara ginauna ghathoni nogu nhaꞌa cheke teke eni iara baludi kuꞌedi mare, Ebraham, Isak, nei Jekop. Eghume iara ginauna nake ghathoni nomi glose ghotilo na mala ke pulo mei mare tagna. ⁴³Nu ulu lahu na, mare mala tei kokoni glose igne, mala tangomana glose igne mala gnafa fakeli kate krogha na. Eghuteuna mare te gnafa na mala papara naugna ghotilo neke figri tagru ghau iara, eghuteuna ghotilo tiromi leghudi nogu vetula iara re. ^44-45Nu ka narane tuana kani au nga teu mare ka nodi kantri mae nodi naoka re, iara ginauna theome tangomana te thofno lisa kokodi mare, ba thododi mare, mala goigonidi mare hui. Eghuteuna iara theome tangomana te huhughuni nogu nhaꞌa cheke baludi mare ia, naugna iara LORD, nomi God ghotilo. Iara ginauna toghodi mare, naugna iara ginauna ghathoni nogu nhaꞌa cheke iara ia. Nhaꞌa cheke igne iara neke eni balumi ghotilo kani teke hata fajifla ghami iara Ijep ka tathadi keha naikno ra mala nodi God mare. Iara LORD.”

⁴⁶Igre vetula, nei farirhiu, nei nogna cheke LORD teke tusu lao ka Moses ka Thogele Sanai, mala chekedi ka naiknodi Israel mala leghudi.

Vetula eigna nhaꞌa cheke blahi

¹LORD ne cheke eghu ka Moses, ²“Jame kaisei naikno gna Israel magnahaghei snagla ke leghugna narane teke eni nhaꞌa cheke blahi te mala snakreni thegna ba kaisei thugna mala eni nogu gloku iara na, ³mana mala foli fajifla ka praes teke lilisei pris ka silva.”

Kaisei mae te varadaki finogha tei thokeni namnosalei finogha, praes na glimafulu silva.

⁴Kaisei gaꞌase, praes na tolufulu silva.

⁵Kaisei mae sua nalhaꞌu te glima finogha tei thokeni varadaki finogha, praes na varadaki silva.

Kaisei sua gaꞌase te glima finogha tei thokeni varadaki finogha, praes na nabotho silva.

⁶Kaisei sua nalhaꞌu te kaisei nhigra tei thokeni glima finogha, praes na glima silva.

Kaisei sua gaꞌase te kaisei nhigra tei thokeni glima finogha, praes na thilo silva.

⁷Kaisei mae te salaꞌuni namnosalei finogha, praes na nabotho glima silva.

Kaisei gaꞌase te salaꞌuni namnosalei finogha, praes na nabotho silva.

⁸Jame kaisei naikno kuma fara te nabagna te foli praes igne te mala snagla na, mare ginauna hatani mana mei ka pris, eghuteuna pris ginauna fapari praes naba unha tangomana mana te foli na.

⁹“Jame kaisei naikno nhaꞌa cheke mei ka iara kaisei glepo tautagu te nabagna te mala fafara, glepo tautagu igne blahi nei nogu iara. ¹⁰Mae ihei te eni nhaꞌa cheke igne mana mala theome tughu glepo tautagu igne balugna keha na. Mana theome tangomana te tughu famane glepo tautagu balugna kaisei te diꞌa, eghuteuna theome tangomana te tughu glepo tautagu te diꞌa balugna kaisei te keli. Jame te eni igne na, phei glepo tautagu igre kafe blahi. ¹¹Nu jame mae tuana nhaꞌa cheke mei ka iara kaisei glepo tautagu te theome klino ka tathagu iara na te theome naba te mala fafara na, aonu ke leghu mana magnahaghei teke foli glepo tautagu igne, te eghu na, mana mala hata mei glepo tautagu tuana ka pris mala eni mana praes gna na. ¹²Eghuteuna pris ginauna eni praes gna glepo tautagu tuana leghuni unha te filoni mana tagna na, naba te haghe ba sukha. ¹³Jame mae tuana magnahaghei te foli fapulo glepo tautagu tuana, mana mala foli ka praes teke lilisei pris na, ke nhaꞌa lao kaisei ke klignadi glima sileni ka praes igne.

¹⁴“Jame kaisei mae nhaꞌa cheke mala snakre mei nogna suga na ka iara, eghuteuna ke leghu, mana magnahaghei teke foli fapulo, te eghu na, pris mala eni praes suga tuana. Mana ginauna eni praes gna suga igne leghuni unha te filoni mana na, naba te haghe ba sukha. ¹⁵Jame mae tuana magnahaghei teke foli fapulo suga igne, mana mala foli ka praes teke lilisei mae pris, ke nhaꞌa lao kaisei ke klignadi glima sileni ka praes igne. Eghuteuna suga igne mala ke nogna mana fapulo.

¹⁶“Jame kaisei naikno nhaꞌa cheke mala tusu mei ka iara kaisei nodi vido glose tharakna gna thegna na, eghuteuna ke leghu, mana magnahaghei teke foli fapulo, te eghu na, pris ginauna eni praes gna leghuni niha sisi bali tangomana te joꞌu tagna na. Aonu praes igne na glima fulu silva maladi phia gobi kilo khatu te tangomana te joꞌu ka nagare tuana. ¹⁷Jame kaisei naikno nhaꞌa cheke mala tusu mei vido glose ka iara ka Falimafulu Finogha na, te eghu na, praes te mala foli fajifla vido glose tuana mala thokeni nabagna praes thongana na. ¹⁸Nu jame te nhaꞌa cheke mana ke leghu ka Falimafulu Finogha tuana, pris mala fapari praes te mala foli fajifla leghuni niha finogha te au nga teu te mala thokeni keha Falimafulu Finogha na. ¹⁹Jame ihei te magnahaghei teke foli fapulo vido igne na, mana mala foli praes thongana gna na, ke nhaꞌa lao kaisei ke klignadi glima sileni ka praes igne. ²⁰Nu mana jame theome magnahaghei teke foli fapulo vido glose tuana eghuteuna mana sabiri ka keha maei teuna, mana ginauna theo nogna nolaghi mala teke foli fapulo na. ²¹Eghuteuna ka Falimafulu Finogha na, glose igne thofno blahi fara, eghuteuna nogu iara fabrahu, eghuteuna mae pris kolho nate hata na.

²²“Jame kaisei mae nhaꞌa cheke mala tusu mei ka iara kaisei vido glose teke foli ka keha maei, naugna glose tuana theome nogna thabukna gna mana, ²³pris mala eni praes leghuni niha finogha te au teu ame thokeni nga Falimafulu Finogha na. Eghuteuna mae igne mala lisei lao sileni igne ka narane tuana la leghuni praes teke lilisei mae pris. Eghuteuna sileni igne ginauna jateula glepo blahi eghu ka iara. ²⁴Nu ka Falimafulu Finogha na, vido glose tuana ginauna nake figri ka tharaknadi iheire teke kulu khotogna glose tuana. ²⁵Ihei te magnahaghei foli fajifla kaisei mae ba kaisei glepo mala snagla tei, mana mala foli fajifla ka praes pris teke fananaba ka silva teke skel mare ka nodi skel mae pris.

²⁶“Goro sua te kulu karha ka nomi glepo tautagu ghotilo igre mala kafe nogu iara la gnafahi, eghume theo kaisei naikno tangomana te eni nhaꞌa cheke blahi na mala tusu mei ka iara LORD teke kulu karha igre. Neuba kaisei buluka, ba kaisei sipu, ba kaisei nanigot teke kulu karha igre, reꞌe te gnafa igre nogu iara. ²⁷Nu jame glepo tautagu igre theome klino ka tathagu iara na eghuteuna theome naba te mala fafara na, naiknore tangomana te foli fapulo ka praes thongana igne, eghuteuna ke nhaꞌa lao kaisei ke klignadi glima sileni ka praes igne. Nu jame te theome magnahagheni mana te foli fapulo ka iara na, hatimare mae pris tangomana te sabiri fajifla ka keha mae na ka praes thongana igne.

²⁸“Gobigna lepo teke lisei fadelei ghotilo malagu iara LORD teu igre thofno blahi fara. Neuba glepo igre ne naikno, ba glepo tautagu, ba vido glose nodi tharakna gna mae ihei teke nhaꞌa cheke na, ghotilo theome tangomana teke sabiri ba foli fapulo.

²⁹“Eghuteuna jame ghotilo mala aknu falehe keha mae naugna mana ne huhughuni kaisei vetula, ghotilo theome tangomana te foli fajiflani mana te mala snagla na. Mana mala lehe.

³⁰“Eghuteuna ka gano te gnafa teke hata ka nomi nagare ghotilo re, ba ka nomi gaju ghotilo re, ghotilo mala tusu mei kaisei ka fabothodi glepo te gnafa tuare ka iara. Kaisei ka fabotho igne blahi nei nogu iara LORD. ³¹Nu jame kaisei naikno magnahaghei te foli fapulo kaisei glepo ka kaisei ka fabotho igne, mana ginauna mala foli ka thofno praes gna na, eghuteuna ke nhaꞌa lao kaisei ke klignadi glima sileni ka praes igne. ³²Eghuteuna leuleghu finogha na, kate kaha ghotilo buluka majaghani nei sipu majaghani, fabothodi glepo tautagu igre blahi naugna ne nogu iara. ³³Eghuteuna kate tufa ghotilo fabothodi glepo tautagu te gnafa ka iara igre, ghotilo mala thosei fariuriu mala laseni, glepo tautagu igne keli ba diꞌa. Eghuteuna theo kaisei naikno tangomana te tughu kaisei glepo tautagu mala tusu mei keha na ka iara. Jame kaisei naikno hata mei kaisei glepo tautagu eghuteuna fariuriu mala tughu keha na, phei igre ginauna kafe blahi naugna repa nogu iara, eghuteuna mae tuana mana theome tangomana teke foli fapulo na.”

³⁴Igre vetula teke tusu lao LORD ka Moses ke kligna Thogele Sanai, mala chekedi ka naiknodi Israel mala leghudi mare.