Lamentations
Khoje Diꞌanagnafa Te Kiloi Lamentations
Thoutonu kmo’ei eigna buka igne
Buka igne au glima khoje diꞌanagnafa tagna. Mare ka vikegna Israel te koje na te kojedi glima khoje diꞌanagnafa igre ka narane te tanhini mare Jerusalem ke leghugna narane teke mei mae naoka teke goigonini namono igne. Mare diꞌanagnafa nei tanhi eghu kate filoni mare Jerusalem te thono diꞌa fara na, nei ka puhi maedi Babilonia te hata naiknodi Israel igre te jifla kokoni nodi namono na te tei au ka keha kantri delei. Puhi biꞌo igne thokeni Jerusalem ka finogha 586 B.K.
Ka buka igne, chekeni nodi cheke naiknore thofno diꞌanagnafa nei tanhi, nu jaola chekeni te naikno igre tangomana te rouronuni God. Mare toreni God mala ke hata fapulodi ka nodi namonore mala ke au ka nakarha te keli. Leuleghu finogha na, vikegna Israel igne kojeni khoje igne ka narane biꞌo te theome ghamu mare na, eghuteuna mare diꞌanagnafa nei tanhi eghu kate ghathoni mare puhi biꞌo teke thokeni Jerusalem ka finogha tuana.
Mae ihei te rioriso buka igne mana toutonu ka cheke naba eigna namono Jerusalem na jateula kaisei gaꞌase te cheke eidi nakhibogna re, nei puhi te au papara na. Ka namono igre iagho tangomana te filoni te cheke eghu na, “Jerusalem ne cheke.” Eghuteuna ka namono aheva mana thegna te cheke, iagho tangomana te filoni te cheke eghu igne, “Profet ne cheke.”
Khoje diꞌanagnafa ka buka igne
Namono Jerusalem papara: 1:1-22
LORD ne paradi naiknodi Jerusalem: 2:1-22
Neuba naiknodi Jerusalem igre ne papara, mare theome gnafa te rouronu ka LORD: 3:1-66
Nakarha Jerusalem ke leghugna narane te mei mae naoka te goigonini namono igne: 4:1-22
Tarai ka LORD mala kokhonidi mana naiknodi Jerusalem: 5:1-22
1Namono Jerusalem ne papara
1Namono Jerusalem,
tifa na neke fodu ka naikno.
Gognarona krogha.
Tifa, naiknogna nauthoglu igne neke ghatho tahuni namono Jerusalem.
Gognarona jateula gaꞌase teke lehehi khetogna ra eghu,
te au thegna kolho.
Namono igne tifa na jateula Kuin
te funei frunidi keha namono ra neku.
Gognarona jateula kaisei naikno sneka eghu kolho.
2Ka bongi thongana igne naꞌa tanhi ghilei hamerane,
eghuteuna kholodi thatagna re
oro soru ka foflogna nei tathagna re.
Tifa na naꞌa jateula gaꞌase te au kmana khetogna ra neku.
Gognarona, mare tirodini naꞌa.
Kheragna re tirodini naꞌa,
kela nogna naoka naꞌa.
3Mae naoka mei goigoni naiknodi Juda,
eghuteuna hata fajifladi ka nodi namono na.
Gognarona mare tei au ka keha kantri delei,
aheva mare te theome tangomana te kiloi namono.
Mae naoka lokidi mare,
mala theome tangomana mare te rikha na.
4Nabrou te mala tei ka namono Jerusalem na krogha fara, nei diꞌanagnafa eghu,
naugna theo kaisei naikno te mei ka narane biꞌo re.
Eghuteuna grengatha re jaola krogha eghuteuna hatimare mae pris jaola tanhi nodi.
Eghuteuna goro gaꞌasedi re au papara, eghuteuna Thogele Saion thofno diꞌa parilahu.
5LORD ginauna lisa lao na au papara ke klignadi,
naugna mare ne tapla jafra fabrahu ka nakhibo ranghini Mana.
Naoka mei funei fruni au fakeli nodi.
Neubane goro sua ikodi, naoka mei hata fajifladi ka nodi namono re.
6Nafnakno biꞌogna Jerusalem ia la theo nafugnahi,
gognarona ari la diꞌahi.
Mae biꞌore jateula bosu te theome tangomana te dei ghedi ganora eghu.
Mare glaꞌe soru theome tangomana te rikha na.
7Jerusalem gognarona thofno diꞌa parilahu,
eghuteuna naiknore neke ghatho fapulodi nakarha te keli
nei dedei fara teku tifa re.
Kate mei naoka te uluni namono biꞌo Jerusalem igne,
theo kaisei naikno nate toghoni na.
Kate filoni igne, mae naoka gre ne maꞌeni,
naugna namono igne la groꞌehi.
8Jerusalem gne jateula gaꞌase te gnognoro fara ra eghu,
eghume naꞌa theome gae ka tathagna God na.
Naꞌa soesole kolho, eghuteuna naiknore thofno cheke faparini naꞌa.
Naꞌa pophoru tathagna re balu diꞌanagnafa nei tanhi,
naugna naꞌa ne mamaja nogna fara.
9Naikno te gnafare filodi nakhibogna naꞌare,
nu naꞌa theome nanga nogna kolho ka unha nate thoke mei ginauna.
Nu mae naoka igre thofno koko soruni naꞌa pari,
eghuteuna theo kaisei naikno te toghoni naꞌa na.
“LORD! Naoka gre la ulu ghauhi iara.
Filo ghau nei kokhoni ghau iara!”
10Mae bongihehe teke chekedi LORD mala thosei tei
ruma lamna Sugablahi teku igre,
Jerusalem ne filodi mare te tei ruma lamna Sugablahi na,
eghuteuna mare blau glepo blahire.
11Naiknodi Jerusalem re ne tanhi kate hiro gano tafri na.
Mare ne sabiri nodi glepo te keli re mala foli gano,
mala tangomana mare te au karha teuna.
“LORD! Naikno te gnafa igre theome ghatho tahu ghau iara gognarona.
Iagho kokhoni ghau iara nei filo mei ka iara!”
Jerusalem ne cheke eghu
12“Ghotilo te salaꞌu ka iara ra,
papara biꞌo te thoke ghau iara igne glepo theo nafugna kolho ka ghotilo?
Ka narane te diꞌatagna LORD na,
iara para ghau fara.
Theo kaisei papara te jateula te para ghau iara igne teuna!
13“Mana kuru soru khaꞌaghi funu kligna ne gnhubra glamnagu iara na.
Mana ne lilisei kaisei phighoro malagu iara,
mala uka iara.
Mana tei koko ghau iara,
mala glaꞌe soru iara.
14“Nogu funei neke hata nakhibogu gre neke loku fodu.
Nakhibo igre jateula glepo tahu te nhaꞌa mei ke klignadi fafragu iara ra eghu,
eghume iara thofno glaꞌe soru fara.
Mana lisa lao ghau iara ka khamedi nogu naokare,
eghuteuna iara theome nheta te mala magra ka mare na.
15“Funei igne tirognadi nogu mae nheta iara re.
Mana kuru mei naoka mala goigonidi nogu mae majaghani iara re.
Eghuteuna mana kina ngujadi nogu naikno iara re
jateula mae te kina ngujadi sisi grep te mala eꞌei waen ra neu.
16“Naugna igne te tanhini fara iara na,
eghuteuna kholodi phei tathagu iara re oro soru ka thinigu iara na.
Eghuteuna theo kaisei naikno te au teu jare te mala farhetani gaoghathogu iara na.
Mae naoka gre ulu ghau iara,
eghuteuna nogu naikno iara re ne rhana nodi fara.”
Mae profet ne cheke eghu
17Jerusalem tore thotogho, nu theo kaisei te au te mala toghoni naꞌa na.
LORD ne cheke ka naikno te au faligohoni Jerusalem igre mala nogna naoka naꞌa,
eghuteuna te ghathoni mare na Saion gne glepo theo nafugna kolho.
Jerusalem ne cheke eghu
18“LORD na thofno doglo fara, nu iara tirogu leghuni nogna Vetula mana na.
Fanomho mei, ghotilo naiknogna nauthoglu igne!
Filo mei ka puhi te au papara iara igne!
Nogu mae majaghani nei gaꞌase majaghani teu iara ra,
mae naoka gre la hata la tei kokodi nodi namono re,
la tei au ka keha kantri delei!
19“Iara kilo meidi kheragure, nu mare tirodi ghau iara.
Nogu mae pris nei mae funei teu iara re,
mare tei hiro gano ka nabrougna namono na,
nu mare theome tangomana te thafoni kaisei gano,
eghuteuna gognarona mare lehe ka grofo kolho.
20“LORD! Filo mei! Iara au papara fara!
Iara diꞌanagnafagu fara,
naugna iara ne figri tagru nigho iagho.
Ke lamnagna nogu suga iara na, naiknore lehe,
eghuteuna ke kosi na, naoka mei aknu falehe gnafa naiknore.
21“Naiknore nomhini te tanhi fabiꞌo iara na,
nu theo kaisei naikno te au teu jare te mala togho ghau iara na.
Mae naokare jaola nomhini, nu mare kelitadi fara kolho,
naugna iagho kuru mei puhi biꞌo igne mala thoke ghau iara.
Lisa mei sagho narane te mala thoke mei puhi biꞌo igne
leghuni unha teke chekeni iagho ia mala jaola papara mae naoka igre jateula iara eghu.
22“Filo mei sagho ka puhidi naikno te diꞌa igre, paradi sagho,
jateula iagho te para ghau iara eidi nakhibogu iara gre eghu.
Iara tanhi gaoghathogu fara,
eghuteuna nagnafagu na glaꞌe soru fara.”
2Namono biꞌo Jerusalem ne papara
1LORD ne toku tafru namono Jerusalem kate diꞌatagna na.
Diꞌatagna mana igne jateula saeklon biꞌo te toku tafru namono na ka gromno biꞌo ra neu.
Tifa na Jerusalem gne neke kaisei famane namono agne Israel,
aheva te au nogna Sugablahi funei na.
Nu ka narane te diꞌatagna LORD igne, mana goigoni namono igne,
eghuteuna mana theome ghatho tahuni Sugablahi igne.
2Suga te gnafa ka namono te gnafa Juda igre,
LORD theome kokhoni nognadi.
Mana diꞌatagna fara ne paꞌe soru ne gnafa suga
mala poru ka namono igne.
Mana goigoni fahui kantri igre baludi hatimare mae funei te gnafa igre
mala mamaja nodi naiknore.
3Mana thono diꞌatagna fara,
aonu mana hata fadelei nogna nolaghi na ka mae Israel mala glaꞌe fara mare.
Kate mei mae naokare,
mana tirogna toghodi naiknodi Israel.
Diꞌatagna mana igne jateula khaꞌaghi
te nhako te hui nodi gobigna lepo vikegna mae Jekop ra eghu.
4Mana jateula mae naoka te ghao nogna phaloho na
mala fada jata na teura eghu,
mana tarabana mala goigoni ni Jerusalem.
Mana jateula mae naoka te aknu falehedi te gnafa
famane naikno ra eghu.
Diꞌatagna mana na jateula khaꞌaghi brana te gnhubra namono Jerusalem ra eghu.
5LORD jateula mae naoka te mei goigoni ni Israel eghu.
Mana jaola goigoni vido mala poru,
baludi nodi suga biꞌo naikno te dedei.
Mana eni igne ka naiknodi Juda
mala diꞌanagnafadi fara nei tanhi eghu mare.
6LORD ne paꞌe soru nogna Sugablahi na,
jateula grorofe ka thobi ra neu.
Narane biꞌo nei narane Sabat teu igre,
mana bobotho nagnafadi naiknodi Saion mala ghatho ihodi narane biꞌo igre.
Naugna mana diꞌatagna fara ka mare,
eghuteuna mana theome magnahaghedi mae king nei mae pris teu igre.
7Mana tirognani nogna olta na,
ne lisani nogna vido blahi na.
Mana snakredi mae naoka re
mala mei paꞌe soru gringni thinagna Sugablahi igne.
Tifa na naiknore neke eha fabiꞌo
mala glealeꞌa ka narane biꞌo ra.
Jaola mae naoka eha fabiꞌo, naugna mare ne uluni namono na.
8LORD au nogna gaoghatho rheta
te mala paꞌe soru gringni thinagna Jerusalem.
Mana fafajahi gringni thina igne,
eghuteuna fakakhana nogna nolaghi na mala goigonidi mare.
Mana koko sorudihi pari mala jateula mae te nigra ra eghu
mare mala diꞌanagnafa nei tanhi eghu.
9Grengatha te gnafa ka namono biꞌo na ne khoko pari ne thafru ka glose,
eghuteuna loki re ne klopa.
King baludi nogna mae funei re,
naoka hata tei au ka keha kantri delei,
eghuteuna theo kaisei naikno teke farirhiudi naiknore
nogna vetula God na.
Eghuteuna LORD theome fakakhana mifi
ka hatimare mae profet.
10Mae biꞌodi Jerusalem theome gleꞌa
gnokro soru kmu kolho ka glose na.
Mare ghiha nakrofu ka phaꞌudire,
eghuteuna pipichi ka pohe thona.
Eghuteuna gaꞌase majaghani re
jaola turupuku balu mamaja,
eghuteuna tufru soru phaꞌudi re pari ka glose na.
11Iara tanhi ghilei kabru tathagu re,
naugna iara kokhoni nogudi fara naiknore.
Nagnafagu na kabru fara,
naugna nogu naikno iara re la dofidihi.
Eghuteuna goro sua nei gegeꞌe teure
jaola lehe ka glehe grofo heva heva ka nabrougna namono na.
12Goro sua igre tanhi ghedi gano
nei khoꞌu eghu ka idodire.
Ghilei khoko soru lamna nabrou
jateula mae te fnera ra neu.
Eghuteuna lehe soru nodi ka thinidi idodire.
13Jerusalem, iara kokhoni nogu nigho!
Unha gne naba te mala chekeni iara ka iagho
te mala togho ghau na?
Juda, iara kokhoni nogu nigho!
Unha gne naba te mala pala hagheni
iara gaoghathomu iagho na?
Puhi te thoke nigho iagho igne thono biꞌo fara,
eghuteuna theo kaisei naikno naba
teke fakeli nigho iagho na.
14Nou profet iagho igre chaghi kolho theo nafudi.
Nodi mifi mare igre theome tangomana te tathakle nakhibomu iaghore,
eghuteuna theome togho nigho mala koko nakhibo igre
mala ke au fakeli,
eghuteuna fakarhi nigho ka puhi biꞌo.
Cheke te chekedi mare igre chaghi kolho,
eghuteuna batu nigho mala leghuni nabrou te jafra.
15Jerusalem, naikno te ari salaꞌu ka iagho are,
filo fapari nigho iagho,
naugna naoka ra neke mei goigoni nighohi,
mare neke cheke fadiꞌa eghu nighohi,
“Igne si namono te chekeni mare famane namono
ka nauthoglu igne,
eghuteuna naikno te gnafa gre kelitadini fara te au tagna?”
16Nou naoka iagho igre maꞌe nigho iagho
eha eghu fabiꞌo,
“Tahati la goigoni nodanihi!
Igne narane teke ofoni tahati ia,
eghuteuna narane igne la meihi!”
17Tifa na LORD neke ghathonihi glepo igne
mala eni neku.
Uve, gognarona mana la enihi
unha teke chekeni mana tifa ia.
Mana la goigoni nighohi,
eghuteuna mana theome kokhoni nigho iagho kolho.
Mana tusu lao nolaghi biꞌo ka nogna naokare
mala tangomana mare te glealeꞌa
te mala ulu nigho iagho na.
18Ghotilo naiknomi Jerusalem ne eha tei ka LORD!
Gringni thinagna Jerusalem,
kholodi tathamu iagho are ginauna thofa soru
jateula khoꞌu biꞌo eghu bongi narane!
Te keli na iagho eghu fabrahu
ghilei glaꞌe soru iagho.
19Leghu bongi, kate tughu mae te reireghi igre,
jame te keli na iagho dofra haghe mala tanhi ka LORD.
Ngafa haghe khame ka mana,
mala toreni mana mala toghodi goro sua.
Goro sua igre glehe grofo heva heva
ka sulukhugna nabrou biꞌo na.
Jerusalem ne cheke eghu
20“LORD! Filo mei sagho ka iara, mala ghatho ghau iara:
Iagho neke parani kaisei naikno
jateula igne neku tifa na?
Neubane gaꞌase te namhadi fara thudi re,
rehati ghamu thinidi thudi te lehe re!
Nou mae pris nei profet teu iagho igre,
mae naoka igre aknu falehedi ke lamna nou Sugablahi iagho!
21“Neubane naikno majaghani ba naikno biꞌo,
mare kafe lehe ke lamna nabrou.
Nalhaꞌu ba gaꞌase,
naoka mei neke aknu falehedi ka naflahi.
Iagho themu ngala teke aknu falehedire
ka narane teke diꞌatamu iagho ra,
eghuteuna iagho neke theome kokhoni noudi kolho.
22“Iagho toredi nogu naoka iara re,
jateula mae te kilo meidi naikno
ka gaghamu ra neu ne kilo meidi mae naoka gre,
ne mei edi kmana glepo te au heva heva faligoho ghau iara
ne mhaghu nogu fara iara.
LORD, ka narane te diꞌatamu fara iagho na,
theo kaisei naikno te tangomana te rikha na,
eghuteuna theo kaisei naikno nate karha na.
Iheire te namhadi fara iara re,
iara na reireghi fakelidi,
nu nogu naoka iara re,
mare na goigonidi gnafa.”
3Neuba ne au papara, Jerusalem na au nogna grouronu ka God
1Iara kaisei mae te lase fakelini puhigna LORD te parani kaisei naikno
kate diꞌatagna fara tagna na.
2Mana khi fajifla ghau iara kate phae na,
mala au iara kate romno.
3Mana puri fadiꞌa ghau iara,
funu hamerane ghilei romno.
4Nafnahigu nei guligu teu iara re
jateula thini khuekuꞌe neu,
eghuteuna mana ne lolhopa nhubragu iara re.
5Mana para ghau iara,
eghuteuna lisa mei ke klignagu nafnata nakarha te ninhigrana fara,
jateula naoka te kegra faligohoni namono na tarabana
mala goigonini namono tuana.
6Mana nhaꞌa lao ghau iara ka vido te romno,
jateula mae teke lehehi tifa ra eghu.
7Mana reri ghau iara ka chen maku,
eghuteuna nhaꞌa lao ghau iara ka suga sosolo
mala theome tangomana iara te rikha na.
8Neuba iara ne eha ka mana,
mana tirogna fanomho ka nogu tharai iara na.
9Ka vido aheva te magnahaghei tei iara na,
mana bara ghau iara.
Jateula te lilisei kaisei thina biꞌo te fanagra
ka nogu nabrou iara naia eghu.
10Mana ofo ghau iara,
jateula bea ba lion te ofo teu te
mala hata unha te mei salaꞌu jare na mala ghamu.
11Mana loki ghau iara,
eghuteuna korho fadelei ghau iara
ka nabrou na ne goigoni ghau iara.
Eghuteuna lisei soru ghau iara
ka vido aheva te theo kaisei naikno
te mala togho ghau iara na.
12God iagho jateula mae te fadi ghau iara ka phaloho ra
neu ne fadi ghau iara.
13Jata te fadi ghau iara na
ne churu ka nagnafagu iara na.
14Kheragu thofno iara re filo fapari ghau iara.
Mare ei khoje mala maꞌe ghau iara kolho
funu hamerane ghilei rafi.
15Mana goigoni nakarhagu iara na,
iara jateula te ghamu gano te boto
nei koꞌu khoꞌu te raha ra eghu.
16Mana huju soru ghau iara pari ne tapla ka iara,
tathagu nei foflogu teure ne totokhei ka glose,
eghuteuna kheꞌigu re ne klopa ka thina.
17Gognarona iara theome au ka pharikeli,
eghuteuna iara ghatho iho nogudi
puhi teke au glealeꞌa ra.
18Eghume nanhetagu nei nogu grouronu teura
la gnafahi!
Iara theome tangomana te ofoni LORD
te mala togho ghau na!
19Leuleghu fata na iara ghathodi puhi biꞌo
te thoke mei ka iara igre,
eigna iara thono diꞌanagnafagu fara.
Iara jateula te theo sugagu te mala gnafa ra eghu,
eghuteuna iara jateula te koꞌu khori ra eghu.
20Uve, leuleghu fata na iara ghathoni glepo igne,
thono diꞌanagnafagu fara.
21Nu neuba, keha glepo na
ke mei ka gaoghathogu iara na
ne pala hagheni nagnafagu iara na:
22Nogna namha LORD na theo ka khusu gna.
Puhi te kokhoni ghita nei keli ranghi ghita teu mana igne
au fabrahu tifa tifa.
23Uve, puhigna LORD na au fabrahu,
jateula narane majaghani
te haghe fabrahu hamerane boibongi ra eghu.
“Uve, LORD, iara cheke fakeli nigho
eigna iagho ne namhadi fabrahu nou naiknore!”
24Te ghathoni iara na,
“LORD ngala thua nafnotu te magnahaghedi iara re,
eghume iara tangomana te fatutuanini mana na.”
25LORD na fablahidi iheire te fatutuani ni mana,
nei iheire te magnahaghei lase fakelini mana.
26Te keli na tahati jame au kmu,
ofoni LORD mala mei fakarhi ghita.
27Te keli na tahati jame hata farirhiu
ka mana kani majaghaniu.
28Jame LORD parani kaisei mae,
te keli na mae igne tei gnokro thegna
ka vido aheva te muana.
29Te keli na mana au faparini thegna,
glahu mei LORD toghoni mana ginauna.
30Jame naiknore magnahaghei magrini mae igne
ba cheke fadiꞌani eghu mana,
keliu kolho, mana tangomana te snakre lao ka mare
te eni unha te magnahagheni mare na.
31LORD theome tangomana te thodo
ghita fabrahu na.
32Neuba mana ne para ghita,
nu mana ginauna tangomana te kokhoni ghita
nei keli ranghi ghita teuna,
naugna mana ghatho tahu ghita fabrahu.
33Mana theome glealeꞌa kate filoni te paradi naiknore
ba te thokedi puhi biꞌo.
34God laseni ka narane naoka te tapla ke klignada
kate au tahati ka suga sosolo na.
35God mae ihei te Haghe Fara igne laseni
jame te hata fadelei mare nodi nolaghi keha naiknore,
36LORD ginauna jaola laseni te theome leghuni mae fate na
puhi te doglo na kate fate ghita tahati na.
37Ba, ihei tangomana te eni kaisei glepo jame
te theome snakreni LORD na? Thono theo fara!
38God mae ihei te haghe fara igne ngala te tangomana te cheke,
eghuteuna glepo te keli ba puhi biꞌo teu igre ginau thoke mei.
39Ba, keliu kolho te diꞌatada kate thoke mei papara biꞌo
ka tahati eidi nakhiboda gre? Theola!
40Te keli na tahati filo fakeli ka puhida gre,
eghuteuna koko puhi te diꞌa igre
mala ke pulo mei ka LORD.
41Te keli na tahati pala haghe nagnafada nei khameda teugre
ka God mae ihei te au teu kligna,
eghuteuna tarai eghu tei ka mana,
42“Ghehati tapla jafra ka nakhibo,
eghuteuna ghehati theome keli ranghi nigho,
nu iagho theome koko fadeleidi la ngau nakhibomi ghehati gre.
43“Diꞌatamu iagho na ngolhi tafri ghami ghilei falehe ghami ghehati,
eghuteuna iagho theome kokhoni ghami ghehati.
44Diꞌatamu iagho na
jateula khoveo te thuta ra eghu,
eghuteuna nomi tharai ghehati gre
theome ari posa ka iagho.
45Iagho eni ghami ghehati
mala jateula bukrei chara eghu
ka gaoghathodi naiknogna nauthoglu igne.
46“Mae naoka gre cheke fapari ghami ghehati.
47Ghehati papara fara,
eghuteuna kmana puhi biꞌo jaola thoke ghami ghehati.
Ghehati mhaghu nomi fara,
eghuteuna nakarhami ghehati gre thofno diꞌa fara.”
48Iara tanhi fabiꞌo,
eghuteuna kholodi tathagu re oro soru jateula khoꞌu biꞌo neu,
naugna iagho ne goigonidi nogu naikno iara gre.
49Iara ginauna na theome gnafa
te tanhi fabiꞌo na,
50ghilei thoke mei narane LORD
mae ihei te au kligna na
te filo soru ka puhi biꞌo igne.
51Kate filoni iara puhi biꞌo
te thokedi goro gaꞌasegna namono Jerusalem,
iara ne thofno diꞌanagnafagu fara ne tanhi fabiꞌo.
52Neuba iara ne theome eni kaisei puhi ka mare,
nu mae naoka gre mei fakhale ghau iara
jateula nanghaji te khale ka phighoro ra neu.
53Mare magnahaghei te falehe ghau iara
ne koko lao ghau iara ka kaisei khora,
aonu mare ne fadi ghau iara ka thina.
54Jateula khoꞌu te mei
te toku tafru ghaura.
Aonu iara ne cheke eghu,
“Ao iara glehegu naia!”
55Nu lamna ka khora igne,
iara ne tanhi ari eghu ka iagho,
56“LORD! Fanomho mei ka iara,
thosei fofotho khulimu na
kate tanhi ari iara ka iagho na!”
57Iagho neke mei rhegu iara
mala togho ghau iara neku
neke cheke eghu ka iara,
“Thosei mhaghu.”
58LORD, mei au balugu iara,
mala fakarhi ghau iara.
59Iagho filodihi mae naoka
te goigoni ghau iara gre.
Nu gognarona iagho fate ka puhi te doglo,
fakakhana sagho te doglo iara na.
60Iagho lasedihi mae naoka gre mare theome magnahaghei ghau
nei ghaoghatho mala falehe ghau eghu iara.
61LORD, iagho nomhinihi te cheke fadiꞌa ghau
nei roghe poru mala falehe ghau teu mare igre.
62Mare cheke fapari ghau iara
funu hamerane ghilei bongi.
63Uve, leuleghu fata na,
mare koje maꞌe faparini mana eghuteuna gnokro pari,
koje kegra haghe eghu
funu hamerane ghilei bongi.
64LORD, tughu fapulo sagho ka mare
gobigna lepo fateote’o teke edi mare ka ghehati ra.
65Bobotho sagho nagnafadire
mala thoke mei puhi biꞌo ka mare!
66Ngolhidi nei roꞌedi eghu sagho
kate diꞌatamu te salaꞌui na
mala dofidi mare ka nauthoglu igne.
4Ke leghugna narane teke mei naoka teke roꞌeni Jerusalem
1Tifa na noda gol tahati gre,
ulu lahudire neke famane siasigla fara,
nu gognarona thofno thona fara.
Eghuteuna thina blahi ka Sugagna LORD na igre,
naga tafri ke lamna nabrou.
2Mae majaghanidi Jerusalem,
mare neke keli fara jateula gol ra neku.
Nu gognarona naiknore ghatho faparidi mare,
jateula suspen te theo nafudi ra eghu kolho.
3Neuba idogna khuma mata na
famane fachuꞌuni thugna na.
Nu nogu naikno iara gre gognarona
theome fanomho jateula nanghaji biꞌo
te tirogna reireghidi thugna ra eghu.
4Goro sua gegeꞌe re rodi koꞌu fara.
Goro sua te ikodire tore ghedi gano,
nu theo kaisei naikno te tusu ranghidi.
5Tifa na, naiknore neke ghamu gano te keli.
Gognarona, mare rofo lehe kolho ke lamna nabrou.
Iheire teke biꞌo haghe ka sugadi mae te dedei ra,
gognarona mare hiro gano ka chara.
6God neke roꞌeni kaisei fata kolho namono Sodom,
eghuteuna theo kaisei naikno te toghodi naiknogna namono tuana.
Nu naꞌau papara te thokedi nogu naikno iara igre
thofno diꞌa fara salaꞌuni nodi naꞌau papara naiknodi Sodom tifa ra.
7Tifa na, mae biꞌore neke klino fara,
neke famane filodi re.
Mare nheta fara eghuteuna theo kaisei fogra
te tangomana te thokedi mare.
8Nu gognarona tathadi nei foflodi teure thona
jateula nakrofu khaꞌaghi eghu,
eghuteuna naiknore theome tangomana te filo glanidire.
Mare nhubradi kolho eghuteuna thinidi re mojadi tahu
jateula gaju eghu.
9Mare theo ghedi gano ka nagare,
eghuteuna mare thono rofo nodi fara.
Te keli na mare nabadi te lehe na,
jateula iheire te lehe ka magra ra eghu.
10Tifa na, idodi suare reireghi fakelidi thudire.
Nu kate goigonidi God nogu naikno iara igre na,
idodi re aknu falehe sua igre mala gahu ghamu.
11LORD ne thono diꞌatagna fara,
eghuteuna diꞌatagna mana igne
jateula khaꞌaghi biꞌo te tofa soru
te gnhubra Jerusalem ra neu ne ghilei glose kolho te au na.
12Theo kaisei king ba kaisei fiti mae kolho ka nauthoglu igne
te fatutuani nate ruma lamna mae naoka
te goigoni ni namono biꞌo Jerusalem.
13Nu naoka gre ne jugru lamna,
naugna mae profet nei mae pris teu igre
ne ei puhi te diꞌa ke lamnagna namono igne.
Mae igre aknu falehe naikno te doglo re.
14Mae mala baubatu igre tei tafri
jateula mae te dofu eghu ke lamna nabrou biꞌo.
Mare fathonadi thedi ka dadara,
mala theome tangomana kaisei naikno
te habo ka nodi pohe mare re.
15Naiknore ne eha eghu fabiꞌo ka mare,
“Tei nomi delei! Ghotilo thosei habo ghami ghehati!
Ghotilo theome gae ka tathagna God na!”
Eghuteuna kate rikha tafri mare na,
naiknodi keha kantri igre ne cheke eghu ka mare,
“Mare theome tangomana te au balumi ghehati agne na!”
16LORD diꞌatagna fara
ne fariki raka tafridi mala tei au tafri mare delei.
Mana jaola theome magnahaghei te ghatho tahudi
hatimare mae pris.
Eghuteuna mana theome kelitagnadi
hatimare mae mala baubatu igre.
17Tahati jaola toetoe fakelini ihei nate mei togho ghita na.
Jateula mae te toetoe teu ke kligna thoa ra eghu,
tahati ofoni kantri te fofodu ka tahati na mala mei eghu,
nu kantri igne theome tangomana kolho te totogho na.
18Mae naoka gre tapla leghu ghita fabrahu,
mala theome tei tahati ke lamnagna namono na.
Uve, thofno glola fara
te noda narane tahati na la gnafahi teuna.
19Noda naoka tahati gre flalo
jateula gaghata te flalo te soru
te hata ghegna gano ra eghu.
Mare ngolhi ghita ke kligna thogele,
eghuteuna poru ka namono nagou mala loki ghita.
20King igne neke vavahi LORD,
mana jateula te louloku teu eghu nakarhada tahati gre.
Tahati gaoghathoda na mana tangomana
te reireghi ghita ka keha kantri are neku,
nu naoka hata fajiflani mana ka tahati.
21Ghotilo naiknomi Idom nei Us teura
ghotilo glealeꞌa nomi gognaro gne.
Nu ginauna puhi biꞌo na thoke ghami ghotilo,
eigna ghotilo nolo jateula mae te koꞌu
te fagoigoli ra neu,
eghuteuna ghotilo mamaja nomi naugna ghotilo ne soesole.
22Ghotilo naiknomi Jerusalem ra,
noda naꞌau papara tahati ra ginauna hui.
LORD ginauna theome snakre ghita
te au fabrahu tahati ka kantri te khaba.
Nu ghotilo naiknomi Idom ra,
LORD ginauna para ghami ghotilo eidi nakhibomi ghotilo are,
eghuteuna fakakhana najafra teke edi ghotilo ra eghu.
5Profet ne tarai ka LORD mala kokhonidi naiknore
1LORD, ghathoni sagho puhi biꞌo
te thoke ghami ghehati igne.
Eghuteuna iagho jaola filoni
eigna ghehati la mamaja nomi fara.
2Namono teke tusu mei iagho ka ghehati igre
baludi nomi suga igre eghu
gognarona au ka khamedi maedi delei
te mei au ka nomi namono ghehati igre.
3Ghehati gognarona jateula sua
te theo idodi nei kmadi teura eghu,
eghuteuna idomi ghehati na
jateula tela lehehi khetogna na ra eghu.
4Ghehati mala foli khoꞌu mala koꞌu ghemi,
eghuteuna theome naba sileni te mala foli gaju te mala kuki na.
5Mae naoka gre para ghami ghehati,
eghuteuna ghehati theome gnafa
ka gloku na babaꞌo fara.
6Ghehati lisa soru ghami themi
ke parigna nodi nolaghi naiknodi Ijep ghe Asiria
mala tangomana ghehati te au gano karha teuna.
7Kuꞌemi ghehati tifa ra neke tapla jafra ka nakhibo,
nu la kafe lehehi eghu,
eghuteuna gognarona ghehati papara fara eidi nakhibodi mare igre.
8Mae gloku kolho te funei fruni ghami ghehati na,
eghuteuna theo kaisei naikno
te tangomana te hata fajifla ghami
ka nodi nolaghi mare na.
9Ghehati nabami te tei mata mala hiro gano,
nu ninhigrana fara eghu, naugna mae
te aknu poru re au tafri
ke lamna namhata te krogha.
10Ghehati fagrutu fara,
naugna ghehati rofo ne salaꞌui.
11Mae naoka mei goigoni gaꞌasedi Jerusalem,
nei gaꞌasedi ka namono te gnafa Juda.
12Mare haru gnarho graradi mae mala baubatu ka ghehati re,
eghuteuna mare theome ghatho tahudi mae biꞌore.
13Mare huhurudi mae majaghani re
mala tugha thina biꞌo
te mala ghorhu wit te mala ei flaoa re.
Eghuteuna mae sitei re mala pala nanhiꞌo gaju te tahu fara mala gahu gano.
14Mae mala baubatu re theome gnokro
ka vido mala fari thafoi ka namono na,
eghuteuna mae majaghani re theome lalahu gita.
15Ghehati theome tangomana te glealeꞌa na.
Tifa na ghehati neke tangomana
te ragi nei glealeꞌa teuna,
nu gognarona ghehati au diꞌanagnafa nei tanhi eghu kolho.
16Glepo teke fahaehaghedi ghehati ra,
gognarona theo nafudi kolho.
Kokhoni ghami fara,
naugna ghehati gne tapla jafra ka nakhibo!
17Naudi naꞌau papara igre ghehati fadiꞌa ghami fara,
eghuteuna ghehati diꞌanagnafa
nei tanhi eghu fabrahu
ghilei theome tangomana te fifilo na.
18Ghehati au diꞌanagnafa nei tanhi eghu fabrahu,
naugna Thogele Saion na la vuhai namono nagou
aheva khuma mata kolho te au jare na.
19Nu iagho LORD,
iagho king fabrahu tifa tifa.
20Naugna unha sagho te ghatho iho
ghami ghehati fabrahu gnea?
Naugna unha sagho te tirou ghami ghehati gnea?
21LORD, ghehati tore nigho mala hata fafigri ghami ka iagho,
nei mala au glealeꞌa jateula teke tifa ra eghu!
22Nu iagho theome magnahaghei ghami ghehati fara!
Diꞌatamu iagho ka ghehati igne ginauna theome gnafa.