Job

Job

Thoutonu Eigna Mae Job

Thoutonu kmo’ei eigna buka igne

Buka igne kaisei thoutonu eigna kaisei mae te keli nanghagna na Job. Job gne kaisei mae dedei fara. Te ghathoni mare na mana neke karha ka naiknodi Israel tifa, neuba, mana neke tarai ka God neke chekeni nanghagna LORD te blahi na. Nu Satan neke cheke faparini Job ka God. Te chekeni mana na mae Job leghuni God kolho naugna God neke tufa kmana glepo ka mae Job. Aonu God snakreni Satan neke hata nogna dedei, goro thugna teu mae Job igre ne fafograni mana. Ka glepo igre Satan ne kegra haghe ne fariuriu falaseni te mae Job theome thofno fatutuani ka God. Nu ka thoutonu igne tahati filoni mae Job mana ghatho tahuni God kolho.

Kate thoke mei puhi biꞌo ka mae Job igne, thilo kheragna mana re mei ne farerheta gaoghathogna mana na. Te fatutuani ni thilo mae igre na, dedei nei nakarhagna teu ihei na igne fagaglanagna God te fablahini mana na. Naugna te lilisei mae Job nogna gobigna lepore, te thokeni fogra na, te chekeni thilomare na God parani Job eidi nakhibogna mana re. Te chekeni mae Job na mana doglou kolho eghuteuna gaoghathodi mare igne jafra. Thilo fata thilo mae igre cheke faheta ka mae Job, eghuteuna mana ne cheke tughu ka thilomare, ne ghilei babaꞌo naugna thilomare theome tangomana te tughu gaoghathogna Job.

Job ne papara fara. Keha fata nogna cheke re mana toreni God mala mei cheke ranghini naugna unha ne au papara nga mana. Kmana fata nogna cheke mae Job igre jateula te cheke ka fate ra eghu. Ke leghu thilo kheragna mana igre neke theome cheke, Job laseni naikno igre theome laseni kaisei cheke tughu te keli ka faghusna te ninhigrana fara. Mana laseni kaisei God kolho te lasedi glepo igre. Kate gnafa mae Job nogna cheke re, mana chekeni te mana doglou kolho teuna, eghuteuna mana theome eni kaisei glepo te jafra.

Eghuteuna kaisei mae majaghani, Elihu, mana ne funu cheke. Mana cheke faparidi kmana glepo te chekedi mae Job nei thilo kheragna mana igre. Mana ne cheke fahui nogna chekere ka kaisei khoje te mala laseni nogna nolaghi God te mala reireghidi gobigna lepo ka nauthoglu igne.

Ke leghu, God ne mei cheke ka mae Job. Mana theome chekeni ka mae Job eigna te au papara mana igne. Nu mana falalase glepo biꞌo te edi mana igre ninhigrana fara te lasedi naiknore. God cheke faheta ka mae Job naugna mae Job ne khuru cheke fara nu theome lasedi gaoghathodi unha te chekedi mana re. Neuba, God kelitagna ka mae Job naugna mae Job ne ghatho tahuni mana fabrahu.

Leghugna nogna thoutonu na, mae Job ne chekeni te mana theome laseni kaisei glepo te mala tughu gaoghathogna eigna God. Ka puhi igne God ne diꞌatagna ka thilo kheragna mae Job igre naugna thilomare ne theome cheke fadoglo eigna puhidi Job ghe God. Aonu God ne fablahi ni Job kate tusu ranghini kmana thugna nei kmana glepo. Eghuteuna mae Job ne au ka nakarha te keli.

Theo kaisei narane te laseni mae Job ne faꞌunha ne au papara mana teuna. Mana diꞌanagnafa ka nagnafagna na, eghuteuna mana khuru cheke ka God, nu nogna fatutuani na nheta fara ka God. Mana cheke eghu: Iara laseni God mae ihei te phile balugu iara na mana karha, ghilei mei mana ka nauthoglu igne mala fakarhi ghau iara (19:25).

Keha vido ka buka igne

Fufunu gna thoutonu igne: 1:1–2:13

Job ne cheke naugna mana ne diꞌanagnafagna fara: 3:1-26

Job baludi kheragna re: 3:31-40

Nogna cheke ululahu baludi mae kheragna re: 4:1–14:22

Fapea nogna cheke mana: 15:1–21:34

Fatilo nogna cheke ka mare: 22:1–27:23

Cheke naba ka famane gaoghatho: 28:1-28

Nogna cheke leghu lahu mae Job: 29:1–31:40

Nogna cheke mae Elihu: 32:1–37:24

God cheke tughu ka mae Job: 38:1–42:6

Leghu lahugna thoutonu: 42:7-17

Job nei tharaknagna mana

¹Kaisei mae nanghagna na Job, mana au ka kantri te kiloi Us. Mana kaisei mae te keli nei doglo eghu. Mana ghatho tahuni God nei theome magnahaghei te eni kaisei glepo te diꞌa. ²Mana au fitu thugna nalhaꞌu nei thilo thugna gaꞌase. ³Mana au nogna fitu thogha sipu, nei thilo thogha kamel, nei kaisei thogha buluka, nei glima gobi dongki. Eghuteuna mana au nogna kmana mae gloku. Eghuteuna mana kaisei mae dedei fara salaꞌudi mae te gnafa ka rijon ke maghati.

⁴Leuleghu fata na thugna mana igre tarabana gaghamu koba ka sugadi thedi re. Ulu lahu na kaisei mae nate kulu eni na, aonu ke leghu keha mae na, eghu ghilei gnafa fitu mae thabusigna igre kate ei gaghamu na. Eghuteuna mare jaola toredi thilo greghadi igre mala mei au ka gaghamu. ⁵Hamerane boibongi ke leghudi gaghamu igre, mae Job ne gahu fafara mala klino ka tathagna God na maladi mae thugna re. Leuleghu fata na, mana eni koba igne naugna te ghathoni mana na, na glahu kaisei ka mare tapla jafra ka nakhibo ranghini God ba cheke faparini mana ka nagnafadi re.

Satan ne fariuriuni mae Job

⁶Kaisei narane, kate mei maedi kligna re te kegra ke ulugna LORD na, Satan jaola ne mei kegra ka vido igne baludi mare. ⁷LORD ne ghusna eghu ka mana, “Satan, iagho neke mei funu aheva?”

Satan ne cheke eghu, “Iara nolo tafri kolho heva heva ka nauthoglu igne.”

⁸LORD ne cheke eghu ka Satan, “Ba, iagho filo glani puhigna nogu mae gloku iara Job igne? Theo kaisei mae ka nauthoglu igne te jateula mana teuna. Mana kaisei mae keli nei doglo eghu. Eghuteuna mana ghatho tahu ghau iara nei theome magnahaghei te eni kaisei glepo te diꞌa.”

⁹Satan ne cheke eghu ka LORD, “Uve, nu mae Job au nogna gaoghatho te keli te mala ghatho tahuni God na naugna iagho ne fablahini mana kolho. ¹⁰Iagho doadofrani fabrahu mana baludi thugna nei gobigna lepo te khotodi mana re nei reireghidi mare. Iagho fablahidi nogna gloku mana re, nei rijon aheva te au mana igne la fodu ka sipu, ka kamel, ka buluka nei ka dongki eghu teke tusu lao iagho ka mana ra. ¹¹Nu jame hata fadelei iagho gobigna lepo igre ka mana meuna, mana ginauna cheke fadiꞌa nigho ka tathamu iagho na!”

¹²LORD ne cheke eghu ka Satan, “Uve, gobigna lepo te au ka mae Job igre, ka khamemu iagho gognarona. Eghume iagho tangomana te eni unha te magnahagheni iagho ka gobigna lepo te khotodi mana re. Nu iagho thosei eni kaisei glepo ka mana.” Aonu Satan jifla ne tei.

Satan ne aknu falehe thugna mae Job nei goigonidi nogna gobigna lepo mana re

¹³Kaisei narane, thugna mae Job igre ne ei gaghamu ka sugagna mae ihei teke kulu karha ka mare na. ¹⁴Ka narane tuana kaisei mae gloku chari ne mei ka mae Job ne cheke eghu, “Funei! Ghehati hata nou buluka iagho te mala tarabana glose mala joꞌu gano ka nagare, eghuteuna dongki ra ghamu neu kolho rhemi ghehati. ¹⁵Keha maedi Seba igre megei nga ne mei magra ka ghehati. Eghuteuna mare kafe aknu falehe gnafa nou mae gloku iagho ra nei hata tei nou sipu, nei kamel, nei buluka nei dongki teura. Iara thegu kolho te rikha te mei te cheke ka iagho na.”

¹⁶Kate cheke teu mana igne, keha mae gloku na posa mei ne cheke eghu, “Funei! Nakafli na soru mei funu kligna gnhubra fahui nou sipu iagho ra baludi mae greireghi sipu ra. Iara thegu kolho rikha te mei cheke ka iagho na.”

¹⁷Eghuteuna kate cheke teu mana na, keha mae gloku na mei ne cheke eghu, “Funei! Keha maedi Kaldia edi thilo tothoghei ne mei magra ka ghehati. Mare aknu falehe nou mae gloku iagho ra, nei hata nou kamel iagho ra. Iara thegu kolho rikha te mei cheke ka iagho na.”

¹⁸Eghuteuna kate cheke teu mae igne na, keha mae gloku ne mei cheke eghu, “Funei! Kate ei gaghamu teu thumu iagho ra ka sugagna thumu iagho teke kulu karha ia, ¹⁹kaisei nuri biꞌo ne mei funugna ka namono nagou na, eghuteuna suga na grofo pari ne kafe lehe naikno au teku ke lamnagna suga igne. Iara thegu kolho rikha te mei cheke ka iagho na.”

²⁰Job kegra haghe ne rerheku nogna pohe na, eghuteuna kuchi koko khaklagna re naugna mana ne diꞌa nagnafagna fara. Mana thuru soru pari tathagna nei foflogna teure ka glose na ne cheke fakelini LORD. ²¹Mana ne cheke eghu,

“Kate karha mei ka thiꞌagna idogu na, iara karha soesole,

eghuteuna kate lehegu na, iara ginauna jaola nake soesole ke pulo.

LORD, iagho neke tusu mei glepo ka iara,

eghuteuna gognaro na iagho ke hata fadelei ka iara.

Iara cheke fakelini nanghagna LORD.”

²²Neuba puhi biꞌo igre ne thokeni mae Job, nu mana theome tapla jafra ka nakhibo eghuteuna mana theome faghoroni God.

Satan ne fariuriuni Job

¹Kaisei narane, maedi kligna re mei ne kegra ke ulugna LORD, Satan jaola ne mei baludi mare. ²LORD ne ghusna eghu ka mana, “Satan, iagho neke mei funu aheva?”

Satan ne cheke eghu, “Iara nolo tafri kolho heva heva ka nauthoglu igne.”

³LORD ne cheke eghu ka Satan, “Ba, iagho filoni puhigna nogu mae gloku iara Job igne? Theo kaisei mae ka nauthoglu igne te jateula mana teuna. Mana kaisei mae keli nei doglo eghu. Mana ghatho tahu ghau iara eghuteuna mana theome magnahaghei te eni kaisei glepo te diꞌa. Neuba iagho ne tore ghau iara mala goigonini mana kate theo nafugna.”

⁴Nu Satan ne cheke eghu, “Naikno na tangomana te lilisei nogna gobigna lepore mala fakarhini thegna. ⁵Nu jame tei iagho te goigoni thinigna mana na, mana ginauna cheke fadiꞌa nigho ka tathamu iagho na.”

⁶LORD ne cheke eghu ka mana, “Uve, mana ka khamemu iagho gognaro na, nu iagho thosei faleheni mana.”

⁷Aonu Satan jifla ne tei, eghuteuna mana ne edi thua nafnata thubu te diꞌa ka thinigna mae Job, funu ka phaꞌu tei posa ka ghahegna ro. ⁸Job tei ne gnokro ka vido mala gnubra chara na, eghuteuna mana hata kaisei thina fnonu mala grahi thubu ka thinigna re.

⁹Khetogna na ne cheke eghu ka mana, “Ba, iagho leghuniu kolho puhi te doglo na? Jame te keli na iagho cheke fadiꞌani God mala lehe nou!”

¹⁰Nu Job ne cheke eghu, “Iagho thosei cheke fameomekro jateula tuana eghu! Kate tusu mei God glepo te keli ka tahati na, tahati kelitada kate hata na. Naugna unha site khuru cheke tahati kate tusu mei mana puhi biꞌo ka tahati grea?”

Neuba puhi biꞌo te diꞌa fateote’o igre ne thokeni Job, Job theome cheke diꞌa.

Thilo kheragna Job igre ne mei sighoni mana

¹¹Thilo kheragna Job re igre, mae Elifas gna namono Teman, mae Bildad gna namono Sua, nei mae Sofa gna namono Nama. Kate nomhini thilomare eigna puhi te thokeni Job igne, mare ghaoghatho mala tei diꞌanagnafa balugna mana, nei farerheta gaoghathogna mana na. ¹²Kate au teu delei te filo teini mae Job na, mare ne theome filo glani mana. Aonu mare ne funu tanhi fabiꞌo, mare rerheku nodi pohere, eghuteuna ghiha nakrofu ka phaꞌudire naugna mare ne thofno diꞌa nagnafadi fara ka mana. ¹³Mare mei ne gnokro pari ka glose na balugna mana fitu narane nei fitu bongi. Mare theome cheke ka mana naugna mare filoni mana te thofno parani fara na.

Job ne diꞌanagnafa fara naugna mana ne karha mei ka nauthoglu igne

¹Aonu Job ne funu cheke fadiꞌa eigna narane teke karha mei mana tagna na. ²Mana ne cheke eghu:

³“Snakreni narane teke karha mei iara tuana mala salaꞌu ari.

Eghuteuna snakreni bongi teke bukla idogu iara tuana mala salaꞌu ari.

⁴Snakreni narane tuana mala romno.

Uve, iara theome magnahagheni God te ghathoni narane tuana,

eghuteuna iara theome magnahagheni kaisei naphaegna naprai te agha mei tagna na.

⁵Snakreni gromno na mala hata kasa narane tuana,

snakreni kaisei gromno mala toku tafru narane igne,

eghuteuna snakreni gromno igne mala fanograni naphaegna naprai na.

⁶Snakreni bongi tuana mala romno fara,

snakreni mala dofini ke lamna kalenda,

Jateula te theo kaisei narane ka finogha na eghu.

⁷Thosei snakreni kaisei gaꞌase mala bukla ka bongi tuanala.

Eghuteuna thosei snakreni kaisei naikno mala glealeꞌa ka bongi tuana.

⁸Iheire te lase cheke te mala thokedi puhi biꞌo naiknora,

snakreni naikno igre mala cheke balugna mogo biꞌo ka thongna te kiloi Leviatana mala ei puhi biꞌo mala thokeni narane tuana.

⁹Jame te keli na nathunu hamerane ka bongi tuana mala romno fabrahu.

Eghuteuna te keli na jame bongi tuana fiti ofoni naphae na.

¹⁰Iara theome magnahagheni narane tuana naugna ne snakreni idogu iara na ne fakarhi ghau iara.

Idogu iara fakarhi ghau iara mala au ke lamna puhi biꞌo.

¹¹“Naugna unha ne theome lehe lamna ka thi’agna idogu na sara gnea?

Naugna unha ne theome lehe kate jifla mei ka thiꞌagna idogu na sara gnea?

¹²Naugna unha si idogu iara gne te fagnokro fakeli ghau iara ka bokegna gnea?

Naugna unha si naꞌa te fachuꞌu ghau iara gnea?

¹³Jame lehehi iara ka narane tuana meuna,

jau gognarona iara gnafa fakeli nogu ka thua hoholo igre.

¹⁴Jame te eghu na, iara jau gnafa fakeli nogu baludi king gna nauthoglu igne nei praeminista mae iheire te lehe,

neuba mare ne fnakno nanghadire mare neke babana fapulo nodi suga mae king tela lehehi ra.

¹⁵Jame lehe na, jau gognarona iara thuru fakeli jateula mae funei te lehe

neuba nodi sugare ne fodu ka gol nei silva.

¹⁶Naugna unha si mare te theome giugilu ghau iara jateula sua te karhalehe,

ba jateula sua te lehe te theome filoni naphae na teu gnea?

¹⁷Uve, lamna ka beku na, naikno te diꞌare theome nanga nodi,

eghuteuna iheire te kmusa ka gloku ra, mare gnafa gognarona.

¹⁸Neuba ne mae sneka, mare glealeꞌa te au blagna ka namono igne,

naugna mare theome nomhidi nodi cheke fangangara nodi funei re.

¹⁹Ka namono tuana, iheire te dedei, nei iheire te kuma kafe au jare.

Iheire te sneka te mala snagla ka nodi nolaghi nodi funei re.

²⁰“Naugna unha si God te snakredi iheire te au papara fara igre te mala filoni kolho naphae gnea?

²¹Leuleghu fata na mae igre magnahaghei te lehe, nu mare theome tangomana na te lehe na.

Mae igre magnahaghei fara te kulu lehe uluni kaisei glepo te keli ka nauthoglu igne.

²²Mae igre kelitadi fara kolho kate lehe te soru pari lamna beku na.

²³Naugna unha si God te tusu lao karha ka ihei nu theome snakreni mae igne filoni puhigna thegna na?

Eghuteuna naugna unha si God te reireghini mae igne te mala theome leghuni unha te magnahagheni te eni mae ignea?

²⁴Kholodi phei tathagu gre te jateula ghegu gano teu iara na.

Iara tanhi fabrahu kolho jateula khoꞌu te britha ra eghu.

²⁵Glepo te mhaghuni iara na, igne te thoke ghau iara na.

Glepo te nanga noguni iara na, igne te thoke mei ka iara na.

²⁶Iara theome au muana, eghuteuna iara theome gnafa.

Eghuteuna iara theome au ka pharikeli, nu iara au ka puhi biꞌo kolho.”

Nogna cheke ululahu Elifas

¹Aonu mae Elifas maegna Teman igne ne cheke eghu,

²“Job, iagho ginauna tirou jame te cheke iara ka iagho na?

Nu iara na cheke eghu.

³Tifa na iagho neke farirhiu fakelidi kmana naikno,

eghuteuna iagho neke toghodi iheire te glaꞌe, mala ke rheta fapulo.

⁴Kate babaꞌo ihei na, chekemu iagho kolho te toghoni na.

Eghuteuna kate uka pari ihei na, iagho toghoni mana mala ke farheta fapuloni.

⁵Nu gognarona, kate thoke nigho puhi biꞌo na,

gaoghathomu iagho na glaꞌe soru.

Kate thoke nigho puhi biꞌo na,

iagho na huruhanga.

⁶Naugna unha sagho te theome ronuni puhi teke ghatho tahuni iagho God ia?

Eghuteuna ne faꞌunha sagho teke theome leghuni puhimu iagho te doglo ia?”

God na theome paradi naikno te keli re

⁷“Fariuriu ghathoni sagho puhigna ihei te doglo ia.

Ba, nafnata mae igne tangomana te lehe na?

Ba, iagho filoni te thoke mei puhi biꞌo ka mae igne na?

⁸Ihei te joꞌu gano ka nagare na,

mana ginauna jaola hata gano ka nagare igne.

Jateula tuana eghu, ihei te eni puhi te diꞌa na,

puhi biꞌo ginauna jaola thokeni mana.

⁹Nuri te mei funugna ka God na roꞌedi mare.

Kate diꞌatagna te fnaja mana na, mare na dofidi.

¹⁰Mae igre jateula lion te eha fabiꞌo ra eghu,

nu God ne fanogradi mare ne lolhopa khe’i mare re.

¹¹Eghume mae igre dofidi jateula lion te theo ghedi gano ra eghu,

eghuteuna thudi mare igre tei tafri kolho.”

Unha te nomhini Elifas ka mifi na

¹²“Kaisei cheke ne mei poru ka iara.

Cheke igne mei muana fara.

¹³Igne kaisei mifi mei bongiro kate thofno thuru iho teu iara na,

eghuteuna iara ne mhaghu nogu fara.

¹⁴Uve, iara ne thofno mhaghu fara

ne ghilei fififri fara thinigu na.

¹⁵Iara haimini katha nuri ne ghaghafa mei ka tathagu nei foflogu teu iara re,

ne ngegra thinigu iara na.

¹⁶Ka narane tuana, iara ne filoni kaisei glepo,

nu iara theome filo glani ni.

Aonu iara ne nomhini kaisei naogla ikoi.

¹⁷Mana ne cheke eghu,

Ba, kaisei mae te doglo ke ulugna God?

Ba, kaisei mae te blahi ke ulugna God mae ihei teke vuavuhani mana na?

¹⁸Neuba engel nogna mae gloku God te au kligna re,

mana theome rouronudi mare naugna mana jaola lasedi mare theome doglo.

¹⁹Ba, na rouronudi LORD naikno teke horo kolho ka glose igre neu sagho ia?

Theo! Mana theome tangomana te rouronuni naikno teke jifla mei kolho ka gaughavu na.

Naikno na ghosei lehe kolho jateula kaisei sua naꞌalo te aknu falehe naiknora eghu kolho.

²⁰Naikno na famane karha keligna fei hamerane,

nu mana na ghosei lehe kolho ame plulu nga naprai na eghu.

Eghuteuna theo kaisei naikno te laseni aheva te tei na.

²¹Naikno na jateula suga tapuale te krutha gnarhogna na te grofo pari,

te fiti lehe kolho ka naꞌiho na.”

Mae Elifas chekeni ne jafra mae Job teu na

¹“Job, eha sagho, mala filoni tahati mae ihei nate mei togho nigho iagho na.

Ba, ihei ka engel igre nate kiloni iagho te mala mei togho nigho iagho na?

²Puhi te diꞌanagnafa na ginauna faleheni mae te fameomekro na.

Eghuteuna gaoghatho goghotu na ginauna faleheni ihei te theome lalase na.

³Iara la filonihi mae te fameomekro te au fakeli fabrahu gognarona,

nu hoholo megei nga thoke mei ka mana.

⁴Thugna mana re theome au fakeli.

Eghuteuna theo kaisei naikno te toghodi ka fate na.

⁵Eghuteuna naikno te rofo ginauna te hata ghegna gano ka nogna nagare mae te fameomekro na.

Neuba gano igre ne karha farihotei phono, mare ginauna na jaola hata.

Eghuteuna naikno te ghamu nhoto na hata nogna dedei.

⁶Puhi te diꞌa na theome tangomana te kotu ke lamna nagare na,

eghuteuna puhi biꞌo na theome tangomana te kotu haghe funu ka glose na.

⁷Naikno na ei puhi biꞌo mala thokeni thegna.

Uve, tuana jateula khaꞌaghi te deudeplu haghe ra eghu.

⁸“Iara jame nogu iagho meuna, iara ginauna figri ka God.

Eghuteuna iara na chekedi nogu puhi biꞌo re ka mana.

⁹God edi glepo te biꞌo te theome tangomana kaisei naikno te lasedi re.

Kofubobhoi te edi mana re, theo kaisei naikno te tangomana te kahadi re.

¹⁰Mana kuru soru mei nakhete ka glose,

nei khoꞌu ka nagare.

¹¹God ghatho tahudi iheire te kuma.

Eghuteuna reireghi fakelidi iheire te diꞌanagnafa nei tanhi mala ke glealeꞌa fapulo.

¹²Mana rorhoꞌe nodi gaoghatho mae iheire te diꞌa.

Mala theome tangomana mare te thokeni unha te magnahagheni mare na.

¹³Mana fakhaledi iheire ne lalasehi thedi teu igre mala goigonidi thedi mare.

Eghuteuna mana goigonidi nodi gaoghatho te diꞌa mare re.

¹⁴Eghuteuna neubane farihotei narane, God eni gromno na mala toku tafrudi mae igre.

Aonu mare jateula te au farihotei bongiro neu ne theome tangomana te fifilo na.

¹⁵Nu God fakarhidi iheire te kuma ka nodi cheke te diꞌa iheire te theome keli puhidi re.

Eghuteuna iheire te theo nodi glepo, God fakarhidi naikno igre ka khamedi iheire nheta fara.

¹⁶Aonu, God ne eni nodi gaoghatho naikno te kuma igre mala ke rheta fapulo,

eghuteuna mana ne fofotho foflodi naikno te diꞌa igre.”

Elifas ne cheke ka Job eigna God na toghoni mana

¹⁷“Ihei God te fadoglini nakarhagna na, mana tangomana te glealeꞌa na.

Aonu kate fadogli nigho God mae ihei te au nolaghi fateote’o igne na, iagho thosei thodoni.

¹⁸Eigna God tangomana te nhaꞌa lao thubu ka naikno na,

nu mana jaola nhaꞌa lao meresin tagna.

God tangomana te eni naikno na mala ghoreho,

nu mana tangomana te eni te mala ke keli fapulo naikno na.

¹⁹God ginauna fakarhi nigho ka puhi biꞌo.

Neubane thoke nigho kmana glepo te diꞌa, mana ginauna reireghi fakeli nigho.

²⁰Kate thoke mei narane ninhigrana ka gano na,

God ginauna fakarhi nigho.

Eghuteuna ka narane te magra na,

mana ginauna reireghi nigho ka glehe.

²¹God ginauna fakarhi nigho ka mae iheire te mala goigoni nigho teu te chaghi nigho are.

Iagho thosei mhaghu, eigna mana ginauna fakarhi nigho kate thoke mei puhi biꞌo ka iagho na.

²²Uve, ka narane puhi biꞌo,

nei ka narane te ninhigrana ka gano na,

iagho ginauna nake glealeꞌa nei maꞌe eghu.

Eghuteuna iagho ginauna theome nanga nou ka glepo te kaukathu.

²³Vido aheva nate loku nagare iagho tagna na,

ginauna na theo kaisei thina tagna.

Eghuteuna khuma mata re ginauna theome mei kathu falehe nigho.

²⁴Iagho ginauna au ka pharikeli ka sugamu na.

Kate tei filodi iagho nou sipure,

iagho ginauna filodi nou sipure au keliu kolho.

²⁵Thumu nei gramu teu iaghore,

ginauna kmana fara jateula khakla buburu eghu.

²⁶Iagho ginauna karha kelimu au ghilei kuekuꞌe fara,

jateula sopho te famane kotu ka nagare na te ghilei thokeni narane te naba te mala ukli na ia eghu.

²⁷“Job, ghehati neke famane filo fakeli ka glepo igre,

eghuteuna thofno tutuani fara.

Iagho fanomho ka nogu cheke iara igre nei leghudi eghu.”

Job cheke tughu ka thilo mae kheragna re

¹Job ne cheke eghu:

²“Jame lisei lao iara puhi te diꞌanagnafani iara igne ke kligna skel meuna,

³ginauna tahu salaꞌudi tahudi nusu te gnafa ka gratha na are.

Naugna igne te cheke fameomekro iara na.

⁴God mae ihei te au nolaghi te gnafa igne ne famei papara igne ka iara

jateula te fada mei kaisei mae jata khaꞌaghi na ka nagnafagu iara na ia eghu.

Jata khaꞌaghi igne tei lamna ka nakarhagu iara na.

Iara mhaghu nogu fara te au papara

ka puhi biꞌo te kuru mei God ka iara igre.

⁵Ba, dongki na tangomana te eha fadiꞌa kate ghamu buburu na?

Ba, buluka na tangomana te uareghe kate au gano na?

Theo, kate au ghedi gano na reꞌe kelitadi glealeꞌa.

⁶Ihei te magnahaghei gano te khoꞌu kolho te theo kaisei tahi tagna na?

Ihei te magnahaghei ghamu flaoa moja gna naota na?

⁷Iara theome magnahaghei nafnata gano igne,

naugna iara rogu luꞌani.”

Job magnahagheni God te fagnafani nakarhagna na

⁸“Naugna unha si God te theome tusu mei glepo teke toreni iara gnea?

Naugna unha si mana te theome cheke tughu meini nogu tharai iara gnea?

⁹Iara magnahagheni mana te falehe ghau!

Iara magnahagheni mana te kusu koko nakarhagu na!

¹⁰Eghuteuna jame te eni mana igne na,

neuba iara ne thofno diꞌanagnafa fara, iara ginauna nake glealeꞌa fara.

Naugna iara theome cheke fadiꞌani nogna cheke God mae ihei te blahi fara na.

¹¹“Nu iara theome nheta.

Eghume naugna unha site karha teu kolho iara gnea?

Nakarhagu iara gne theo nafugnahi.

Naugna unha site ofoni mana teu iara gnea?

¹²Ba, iara rheta jateula thina eghu?

Ba, aean si thinigu iara gnea?

¹³Theo, iara theome naba te fakarhini nakarhagu thegu na.

Theo kaisei naikno te au teu te mala togho ghau iara na.”

Job ne theome kelitagna ka thilo mae kheragna re

¹⁴“Ihei te diꞌanagnafagna fara na, neuba mana ne koko puhi te ghatho tahuni God mae ihei te au nolaghi fateote’o igne,

mana magnahaghedi fara kheragna fofodure te mala namhani mana.

¹⁵Nu iara theome rouronudi kheragu iara re.

Mae igre jateula kaisei khoꞌu ikoi te khapra kate theome soru mei nakhete ra eghu.

¹⁶Kate blalho aes ke kligna thogele te britha na,

khoꞌu ikoi igne ginauna fodu ka khoꞌu na britha fabiꞌo.

¹⁷Nu kate thoke mei narane te brana prai na,

khoꞌu igne na dofini, eghuteuna khoꞌu ikoi igne na thofno khapra fara.

¹⁸Kate lehe khoꞌu igre, mae bisnis igre na tei ka kamel

mare na snivini nabrou te mala tei hiro khoꞌu ke lamna namono nagou na,

ghilei tei lehe kolho.

¹⁹Mae igre funudi Seba nei Tema,

tei hiro khoꞌu.

²⁰Nu kate posa mare ka khoꞌu ikodi igre,

mare theo kaisei nodi grouronu kate filodi mare te khapra khoꞌu igre.

²¹Ghotilo thilo mae igre theome togho ghau iara kolho.

Ghotilo thilo mae igre jateula khoꞌu te khapra igre eghu kolho.

Ghotilo filoni nogu puhi biꞌo iara gne,

eghuteuna ghotilo mhaghu nomini.

²²Iara theome tore ghami mala tusu mei kaisei namha ka iara.

Iara theome cheke ghami mala folini kaisei mae mala chaghini mana, mala togho ghau iara.

²³Iara theome cheke ghami ghotilo te mala mei foli fajifla ghau ka nogu naoka iara igre.

Eghuteuna iara theome tore ghami ghotilo mala fakarhi ghau ka khamedi mae te diꞌa igre.”

Job te chekeni na mana doglou kolho

²⁴“Ghotilo farirhiu ghau iara,

eghuteuna iara ginauna au kmu.

Ghotilo falase meini ka iara unha najafra teke eni iara na.

²⁵Cheke te doglo na tangomana te fakabruni naikno na.

Nu nomi cheke ghotilo igre fameomekro kolho.

²⁶Ba, nogu cheke iara igre jateula nuri eghu kolho?

Ba, ghotilo magnahaghei te fadoglidi nogu cheke iara igre kate diꞌanagnafa teu iara gne?

²⁷Ghotilo jateula te foli sua te theo kmagna na mala nomi naikno gloku teura eghu.

Ba, ghotilo jateula te magnahaghei te sabiri kherami ra eghu.

²⁸“Ghotilo filo mei ka iara.

Iara theo chaghi ka ghotilo.

²⁹Ghotilo mala ghaoghatho ghau iara.

Iara magnahaghei ghami ghotilo mala thosei eni kaisei glepo te najafra.

Ghotilo ke ghatho ghau iara,

naugna glahu theome filoni ghotilo puhigu iara te doglo gne.

³⁰Ba, iara chaghi?

Theo!

Ba, ghotilo ne theome laseni iara eigna puhi biꞌo na eghu gaoghathomi na?

Theo!”

Job ne cheke pouporu ka God

¹“Nakarhagna naikno na ninhigrana fara jateula kaisei soldia eghu.

Nakarha igne loku kmusa fabrahu kolho.

²Nakarha igne jateula kaisei naikno sneka te babaꞌo fara te magnahaghei tei gnafa

ka naungogna gaju te jemnu ra eghu.

Uve, nakarha na jateula mae gloku te ofo mala hata nogna taba ra eghu.

³Kmana nhigra, God ne eni nakarhagu iara na mala theo nafugna kolho.

Mana para ghau iara fabrahu leghu bongi kolho.

⁴Kate thuru soru mala thuru teu iara na, bongi na brahu fara

eghuteuna iara ghathoni kolho narane te mala kegra haghe iara na.

Iara theome thuru fakeli, iara figri tafri kolho ghilei hamerane.

⁵Kmana thubu thafru ka thinigu iara na,

eghuteuna siosilo gna glango na fodu ka thubugu iara na.

Kmana thona thafru ka thubugu iara igre.

Eghuteuna kmana glotho jaola jifla mei ka thubu igre.

⁶Nakarhagu iara na ghosei tei salaꞌu jateula khoꞌu te britha ra eghu.

Namo tei dofini naugna glepo theo nafugna kolho.”

Job ne tarai ka God

⁷“God, iagho ghatho meini nakarhagu iara gne.

Nakarhagu iara na jateula katha nuri ikoi eghu kolho.

Jau iara ginauna na theome filoni kaisei glepo te keli.

⁸Iagho filo ghau iara gognarona,

nu iagho ginauna theome raugha na hiro ghau iara.

Nu iagho ginauna theome tangomana te dei ghau iara na naugna iara ginauna tei dofi ghau.

⁹Kate lehe na,

naikno na jateula kaisei khoveo te ghosei te tei dofini ra eghu.

¹⁰Kate tei mana ke lamna beku na,

mana theome tangomana na teke pulo mei ka nogna suga na.

¹¹“Gaoghathogu iara na fodu ka puhi biꞌo,

eghume iara theome tangomana te au kmu na, iara mala cheke.

Iara thofno diꞌanagnafagu fara,

eghume iara na cheke fajiflani gaoghathogu na.

¹²Naugna unha sagho te filo ka iara te saghe leghu ghau iara gnea?

Jau iagho gaoghathomu na iara jateula kaisei nhorora ba kaisei pholi biꞌo ke lamna nhorora eghu.

¹³Iara fariuriu thuru soru ka nogu sape na mala gnafa,

mala fakeli nagnafagu katha vido ikoi.

¹⁴Nu, iagho famamhaghu ghau iara fara

ka mifi te diꞌa te edi iagho te filodi iara igre.

¹⁵Ka glepo igre, iara theome magnahaghei te karha na.

Iara magnahaghedi kolho keha mae te pipiruki graragu iara gne mala lehe iara.

¹⁶Iara theome magnahaghei te karha teuna.

Iara tiroguni kolho nakarha na.

Iagho thosei nanga ghau iara,

naugna nakarhagu iara na theo nafugna kolho.

¹⁷“Naugna unha sagho te ghaoghatho fara ka naikno gnea?

Naugna unha sagho te filo tutu ka mana gnea?

¹⁸Leghu hamerane na,

iagho filo mei ka mana.

Eghuteuna leghu fata na,

iagho fariuriuni nakarhagna mana.

¹⁹Iagho tei fadelei katha vido ikoi ka iara,

mala ke phanga fakeli ghu iara.

²⁰Iagho filo ka naiknore,

nu jame te tapla jafra iara ka nakhibo na unha glepo te diꞌa teke eni iara ka iagho na?

Naugna unha sagho te eni ghau iara jateula te lilisei nou vido mala fada tagna teu gnea?

Ba, iara te edi kmana puhi biꞌo ka iagho na?

²¹Naugna unha sagho te theome hata fadelei nei ghatho ihodi eghu nakhibogu iara grea?

Iara ginauna na theome raugha na soru pari ke lamna beku.

Eghuteuna neuba iagho ne hiro ghau iara, iara ginauna tei dofi ghau.”

Nogna cheke ululahu Bildad

¹Aonu mae Bildad maegna namono Sua igne ne cheke eghu:

²“Ba, nou cheke iagho re la gnafahi?

Nou cheke iagho igre jateula nuri eghu kolho.

³God na theome tangomana faphireini puhi te doglo na mala ke peko tafri.

God mae ihei te au nolaghi fateote’o igne theome tangomana te faphireini unha te doglo na.

⁴Thumu iagho igre tapla jafra ka nakhibo ranghini God.

Eghume God nabagna te paradi mare na.

⁵Nu iagho tarai ka God mae ihei te au nolaghi fateote’o,

eghuteuna toreni mana mala togho nigho.

⁶Eghuteuna jame te keli nei doglo teu nakarhamu iagho na,

mana ginauna funu togho nigho.

Eghuteuna gobigna lepo teke kulu au ka iagho re,

mana ginauna nake tusu fapulo ka iagho.

⁷Eghuteuna neuba nakarhamu iagho gognarogne ne jateula glepo te theo nafugna neu kolho,

iagho ginauna fodu ka nou glepo kmana nate tusu ari mana ka iagho ginauna.

⁸“Te keli na iagho ke ghathodi famane cheke funu tifa te mei ra,

eghuteuna lasedi nodi cheke kuꞌeda tifa ra.

⁹Nakarhada tahati na sokmo kolho,

eghuteuna tahati theome laseni kaisei glepo.

Uve, nakarhada tahati na ghosei tei salaꞌu kolho jateula naungo gaju eghu.

¹⁰Te keli na iagho fanomho ka nodi famane farirhiu kuꞌeda tifa ra.

Kuꞌeda re tangomana te chekedi ka iagho glepo te keli re.

¹¹Buburu te kotu te brahu ke lamna khoꞌu igre,

iagho theome tangomana te filodi buburu igre te kotu ka vido aheva te theo khoꞌu na.

¹²Kate khapra khoꞌu na,

nafnata buburu igre nate kulu lehe na.

¹³Jateula tuana eghu iheire te theome ghathoni God.

Mare ginauna jaola ghosei lehe jateula nafnata buburu igre eghu.

Eghuteuna iheire te tei kokoni God igre,

ginauna na jaola ghosei lehe jateula nafnata buburu te theo khoꞌu igre eghu.

¹⁴Naikno igre rouronuni kolho unha te theome rheta kolho na.

Bligi kolho te klopa jateula gnarho faghau teuna.

¹⁵Kate rouronu mana ka nogna gobigna lepore te mala sekuriti ni nogna suga na,

mana jateula te gefe teu ka gnarho ka sugagna khakafre na

te ghilei khusu eghuteuna uka teura eghu kolho.

¹⁶Mae te diꞌa na ghosei nheta

jateula buburu diꞌa te kotu ke lamna nagare ra eghu.

Naꞌa na agra tongana kate bagha fakeli naprai tagna na.

¹⁷Glathigna buburu te diꞌa igne agra faligohoni thina biꞌo na,

eghuteuna loku famaku.

¹⁸Nu kate korho koko kaisei naikno buburu te diꞌa igne na,

ginauna na theo kaisei naikno nate filo glani kolho ka vido aheva teke kotu tagna na.

¹⁹Igne ngala leghu lahugna nakarhagna naikno te diꞌa na.

Kate gnafa mana na keha naikno na kegra mala ke tughuni mana.

²⁰“Tahati laseni God na theome thododi naikno te doglo re,

eghuteuna mana theome tangomana te toghodi naikno te diꞌare.

²¹Mana ginauna tothora foflomu iagho na mala ke maꞌe,

eghuteuna iagho ginauna eha fabiꞌo naugna iagho ne glealeꞌa.

²²God ginauna famamajadi nou naoka iagho re,

eghuteuna mana ginauna goigoni fahui nodi namono naikno te diꞌa re.”

Job ne cheke tughu ka mae Bildad

¹Job ne cheke tughu eghu:

²“Uve, iara lasedihi gobigna lepo igre.

Nu unha nafnata cheke gne nate chekeni mana te mala laseni

te doglo mana ka tathagna God na?

³Jau keha naikno magnahaghei te fateni God,

nu jame faghusna God kaisei thogha kuestin

mana ginauna theome tangomana te cheke tughuni kaisei tadi.

⁴God na thofno lalase fara,

eghuteuna mana nolaghi fara.

Eghuteuna theo kaisei naikno te tangomana te kegra haghe

te uluni mana na.

⁵Keha fata mana tangomana te fathughadi thogele gre,

eghuteuna kate diꞌatagna na, mana tangomana te faphotadi thogele gre.

⁶God kuruni nakheu na mala fakheuni nauthoglu,

eghuteuna mana tuthugha famamhaku gna na.

⁷Mana tangomana te cheke faheta ka naprai mala thosei haghe hamerane,

eghuteuna mana tangomana te lhotidi nathunu gre mala thosei phae soru bongiro.

⁸Mana thegna kolho teke edi glepo te au ka maloa na are,

eghuteuna mana tapla ke kligna galo mala muana nhorora na.

⁹Mana kolho teke lilisei fodu ka tothoghei nathunu te gnafa ka maloa na are.

¹⁰Tahati theome raꞌe lase fakelidi glepo te biꞌo teke edi mana re.

Eghuteuna kofubobhoi teke edi mana re,

thono kmana fara.

¹¹Neuba, kate mei namo mana na,

iara theome tangomana te filoni mana.

¹²Mana tangomana te hata kaisei glepo te magnahagheni mana na.

Theo kaisei naikno tangomana te cheke eghu ka mana na,

‘Ei! Unha site eni iagho ana ia?’

¹³Jame te diꞌatagna God na, theome loku fapulo diꞌatagna mana na.

Neuba mae naoka te phile balugna nasava biꞌo Rehab ka nhorora na igne,

God faꞌuka sorudi pari ke ulugna mana.

¹⁴“Eghume iara mae ihei sia, mala fapholai ka mana?

Eghuteuna iara ginauna na chekeni unha mala fateni mana?

¹⁵Neuba iara ne theome eni kaisei glepo te diꞌa

nu iara theome tangomana te cheke lao kaisei cheke ka mana.

God nate fate ghau iara na,

eghuteuna iara mala toreni kolho mana mala kokhoni ghau.

¹⁶Eghuteuna neuba iara ne kiloni mana mala mei ka fate neu mana ginau mei,

te ghathoni iara na mana ginauna na theome fanomho ka iara.

¹⁷Jau mana ginauna kuru mei khoburu ka iara,

eghuteuna mana fiti faghoreho ghau iara kate theo nafugna.

¹⁸Mana ginauna theome snakre ghau iara mala ke phanga ghu iara,

eghuteuna mana ginauna eni nakarhagu iara na mala diꞌa fara.

¹⁹Ka fei nanheta na,

iara theome tangomana te huhuruni mana te mala eni kaisei glepo na.

Eghuteuna ka fei fate na,

theo kaisei naikno tangomana te fadoglini puhigu iara ranghini mana ka fate na.

²⁰Neuba iara ne theome eni kaisei glepo te diꞌa,

ka chekegu iara na fakakhana te iara nabagu te mala au papara na.

Neuba iara ne doglo neu kolho,

jau God ginauna fakakhana te diꞌa iara na.

²¹“Neuba iara ne doglo neu kolho,

nu iara theome nangani nakarhagu na.

Iara babaꞌo nogu te au ka nafnata nakarha igne.

²²Ihei te doglo nei ihei te theome doglo teuna,

God ginauna kafe goigonidi phia mare hui.

²³Kate thoke mei puhi biꞌo ka ihei te mala ghosei te lehe na,

God na maꞌe kolho ka glehegna naikno te doglo na.

²⁴Kate au kantri igne ka khamedi mae funei te diꞌare,

God fadodofu tathadi mae mala fate re.

Jame te theome eni God igne na,

ihei gne nate eni na?”

Job ne tarai ka God

²⁵“Gognarona, iara haimini narane ka nakarhagu iara na gre

ghosei chari salaꞌu kolho.

Theo kaisei glepo te keli kolho te thoke mei ka nakarhagu iara na.

²⁶Nakarhagu iara na ghosei tei dofini

jateula kaisei hore te umhu fara ra eghu.

Ba jateula kaisei gaghata flalo te soru te tathako ghegna gano ra eghu.

²⁷Neuba iara ne fariuriu mala glealeꞌa

mala ghatho ihodi nogu diꞌanagnafa re neu,

nu iara theome tangomana ghau.

²⁸Iara thono mhaghu nogu fara ka puhi biꞌo te thoke ghau iara igne,

naugna te laseni iara na iagho ginauna chekeni ne theome doglo iara teuna.

²⁹Eghuteuna naugna iagho neke chekehi eigna iara gne nabagu te papara na,

eghume mala unha si iara te fariuriuni nakarhagu na gnea?

³⁰Theo kaisei sopu naba te tihi kokodi nakhibogu iara re.

³¹Neuba iara ne fariuriu titihi,

iagho ginauna koko soru ghau iara kolho lamna khora

aheva te fodu ka chopu te siri diꞌagna.

Eghuteuna nogu pohere

thono tirodi ghau iara.”

Job ne cheke ka thilo mae kheragna re

³²“God na theome naikno jateula iara eghu,

eghume iara theome tangomana te fapholai ka mana,

eghuteuna ghepa theome tangomana te tei ka fate

te mala fadoglini nomi fapholai ghepa na.

³³Nu theo kaisei naikno te au farihoteimi ghepa,

te mala fate ghami ghepa na.

³⁴Eghuteuna theo kaisei naikno te kegra farihotei

te mala lhotini God te mala para ghau nei famamhaghu ghau teu iara na.

³⁵Jame tangomana keha mae te eni na,

iara ginauna na theome mhaghu te cheke na.

Nu naugna iara te mhaghuni God na,

iara theome tangomana te fapholai balugna mana na.”

Job theome keli gaoghathogna ka God

¹“Iara hongo ghau ka nakarhagu na.

Eghume iara ginauna cheke fajiflani gaoghathogu na.

Iara ginauna cheke fajiflani puhi te thofno diꞌanagnafani iara na.

²Iara ginauna cheke ka iagho God,

iagho thosei chekeni iara naba te mala papara na,

nu iagho cheke mei ka iara unha te eni fadiꞌa iara na.

³Unha glepo te keli nate hata iagho kate papara iara na?

Iagho neke vuavuha ghau iara,

nu gognarona iagho tirou ghau iara.

Iagho jateula te kelitamu eghu ka nodi gloku naikno te diꞌare.

⁴Ba, iagho au tatha jateula naikno eghu?

Ba, iagho filo glanidi glepo te tangomana te edi ghehati re?

⁵Ba, God, nakarhamu iagho na sokmo kolho

jateula nakarhagna naikno eghu?

⁶Naugna unha sagho te leghu ghau iara te

mala hironi nakhibogu iara gnea?

Naugna unha sagho te fariuriu mala lasedi

najafra te gnafa teke edi iara grea?

⁷Iagho lasenihi

te theome eni iara kaisei glepo te diꞌa na.

Eghuteuna iagho jaola laseni

te theo kaisei naikno te tangomana nate fakarhi ghau iara ka nou nolaghi iagho na.

⁸“Iagho neke vuavuha ghau iara.

Jau gognarona iagho themula na teke goigoni ghau iara na.

⁹Iagho ghathoni,

eigna iagho neke vuavuha ghau iara ka glose.

Ba, iagho ginauna nake figri fapulo ghau iara ka glose?

¹⁰Iagho neke eni nogna khoꞌu kmagu iara

neke te lamna ka thiꞌagna idogu iara na.

Eghuteuna iagho neke eni ghau iara neke kotu lamna ka thiꞌagna na.

¹¹Iagho neke tudu nhubra re lamna ka thinigu iara na,

eghuteuna iagho neke toku tafru nhubra igre ka nafnahi nei guli.

¹²Iagho neke tusu mei nakarha na ka iara,

eghuteuna iagho namha ghau iara fabrahu.

Iagho reireghi fakelini nakarhagu iara na.

¹³“Nu gognarona iara filo glani

te pophoru fabrahu iagho gaoghathomu na.

Eghuteuna iara laseni te pophoru iagho nou gaoghatho te mala goigoni ghau iara na.

¹⁴Leuleghu fata na iagho filo kolho ka iara mala filou kate eni iara nakhibo na,

mala theome chekeni ne doglo neu kolho iara teuna.

¹⁵Kate tapla jafra iara ka nakhibo na,

iara thofno diꞌa fara ka tathamu iagho na.

Nu neuba iara ne doglo,

iara diꞌanagnafagu nei mamaja nogu eghu fara.

¹⁶Kate fariuriu fakakhana iara te doglo teu kolho na,

iagho hiro ghau iara jateula kaisei mae te hiro lion eghu mala goigoni ghau iara.

¹⁷Leuleghu fata na iagho laseni puhi te mala nenei ghau iara na.

Diꞌatamu iagho ka iara na thono biꞌo fara.

Eghuteuna leuleghu fata na iagho au nou gaoghatho te mala nenei ghau iara na.

¹⁸“Naugna unha sagho te snakre ghau iara te karha mei gnea?

Iara nabagu na lehe

kate theome filo ghau teu kaisei naikno na.

¹⁹Te haimini iara na jame te keli na kate karha mei na

iara jame doglo tei lamna beku kolho.

²⁰Iagho thosei eni kaisei glepo ka iara.

Nakarhagu iara na la namo gnafahi,

eghume snakre ghau mala glealeꞌa iara katha vido.

²¹Iara la namo teihi,

eghuteuna iara ginauna nake theome ke pulo mei.

Iara ginauna na tei ka vido te romno,

aheva te theo kaisei naphae tagna.

²²Namono igne romno jateula farihotei bongiro eghu,

eghuteuna theo kaisei glepo te doglo tagna.

Ka namono igne, theo kaisei naphae tagna,

naugna naphae igne romno jateula fari hotei bongiro eghu kolho.”

Nogna cheke ululahu mae Sofa

¹Aonu mae Sofa maegna ka namono Namati na, ne cheke eghu:

²“Iara na cheke tughudi cheke te diꞌa igre.

Puhi te khuru chekeni fara mana igne

theome fakakhana ne doglo teuna.

³Ba, iagho gaoghathomu na ghetilo mala au kmu?

Chekemu iagho igre diꞌa,

eghume ghetilo mala cheke faheta ka iagho.

⁴Te chekeni iagho na glepo te ghathodi iagho re doglo.

Eghuteuna te chekeni iagho na nakarhamu iagho na klino ka tathagna God na.

⁵Ghema, God kolho tangomana te cheke tughu ka iagho na!

Iara magnahagheni fara mana te cheke ka iagho!

⁶God tangomana te cheke ka iagho eigna gaoghatho te keli igne au kmana vido tagna,

eghuteuna ninhigrana fara te mala laseni thofno gaoghatho te keli na.

Iagho laseni God para nigho iagho

ka puhi te ikoi fara uluni unha te nabagna nakhibomu iagho na.

⁷“Ba, iagho gaoghathomu na iagho tangomana te lasedi gobigna lepo te mamhara eigna God?

Ba, iagho tangomana te thokeni khukrugna nogna nolaghi God mae ihei te au nolaghi fateote’o igne?

⁸Nogna nolaghi God na haghe fara salaꞌuni maloa gno,

eghuteuna ninhigrana fara ranghi nigho iagho te laseni mana na.

Famane gaoghatho gna God igne mamhara fara salaꞌuni beku,

nu iagho theome lasedi kolho glepo igre.

⁹Nogna nolaghi God na biꞌo e salaꞌuni nauthoglu igne,

eghuteuna krepa e salaꞌuni thongna.

¹⁰“Jame God mei lisei nigho ke lamna suga sosolo,

eghuteuna mana fate nigho,

ginauna unha nate eni iagho na?

¹¹Mana lasedi iheire te diꞌa fara re,

eghuteuna mana lasedi glepo te diꞌa te edi mare re.

¹²Naikno te theo kaisei glalase ka phaꞌugna na, mana theome tangomana te leghuni puhi te lalase na.

Kaisei nanaba ka puhigna dongki te theome tangomana te karha thugna naikno!

¹³“Nu iagho fadoglini gaoghathomu na,

eghuteuna ngafa haghe khamemu re mala tarai ka God.

¹⁴Iagho koko puhimu te diꞌa re,

eghuteuna iagho thosei snakreni kaisei glepo te diꞌa ka nou namono na.

¹⁵Kate edi iagho glepo igre,

iagho ginauna na theome mamaja,

Gaoghatomu iagho na ginauna rheta,

eghuteuna iagho ginauna theome tangomana te mhaghuni kaisei glepo na.

¹⁶Eghuteuna iagho ginauna ghatho ihodi nou diꞌanagnafa re jateula nabritha te loloro te tei ra eghu.

¹⁷Nakarhamu iagho na ginauna keli,

jateula naprai te agha farihotei narane ra eghu.

Eghuteuna kate hui puhi biꞌo ka nakarhamu iagho na,

jateula naprai te haghe hamerane te toku tafru gromno ra eghu.

¹⁸Iagho ginauna tangomana te au fakeli na,

eghuteuna gaoghathomu iagho na ginauna rheta.

Eghuteuna God ginauna reireghi nigho,

eghuteuna togho nigho mala gnafa fakeli iagho.

¹⁹Uve, iagho ginauna thuru fakeli,

eghuteuna theo kaisei naikno nate mei famamhaghu nigho na.

Eghuteuna kmana naikno ginauna tore nigho mala toghodi.

²⁰Nu tathadi naikno te diꞌa re ginauna dofu.

Mare ginauna filo ligoho, nu mare na theome tangomana te rikhani puhi biꞌo na.

Kaisei glepo kolho nate magnahagheni fara mare na,

mare magnahaghei te lehe kolho.”

Job ne cheke tughu ka mae Sofa

¹Job ne cheke tughu eghu:

²“Jau ghotilo thilo mae igre

mae glalase fara!

Jau kate lehe ghotilo thilo mae igre na,

ginauna na theo kaisei mae glalase nate au ka nauthoglu igne!

³Nu iara jaola au glalase jateula ghotilo thilo mae igre eghu.

Iara jaola au gaoghatho nheta jateula ghotilo eghu.

Naiknore kafe lasedi ngala

glepo te chekedi ghotilo igre.

⁴“Neuba iara ne tarai ka God ne cheke tughu mana ka iara,

iara jateula kaisei mae kheragna manare maꞌeni mana.

Uve, neuba iara ne doglo nei keli neu,

mare maꞌe fadiꞌa ghau iara.

⁵Iheire te au ka nakarha te keli

igre cheke goigonini mae ihei te thokeni puhi biꞌo na.

Puhi igne faꞌeiꞌei puhi biꞌo

ka iheire te namo khoko pari.

⁶Nu mae te khuru blau re au fakeli ka namonodi re.

Eghuteuna iheire te faꞌeiꞌei te diꞌatagna God igre,

mare tirodi nangani kaisei glepo.

Neuba ne eghu, mare theome tangomana te au ke kosigna nogna nolaghi God.

⁷“Tei toredi nanghaji nei buluka teu are,

reꞌe tangomana te farirhiu nigho

kmana glepo eigna God.

⁸Tei filo ka nakarhadi glepo ka glose nei ka thongna,

mala cheke ranghi nigho eigna famane glalase te keli.

⁹Naugna mare kafe laseni

eigna LORD neke vuavuhadi mare ka khamegna mana.

¹⁰Gobigna lepo te karha igre,

au kolho ka thatabla khamegna mana.

Eghuteuna nakarhagna naikno na,

jaola au ka khamegna mana.

¹¹Jateula glapigna naikno na gnaignami ni gano mamahe ba theo,

khuligna naikno na fariuriu cheke.

¹²Glalase nodi mae te kuekuꞌe,

eghuteuna mare lasedi fara kmana glepo.

¹³“Nu God kolho te au glalase te tutuani nei nolaghi teuna.

Eghuteuna mana lalase fara nei ghaoghatho fakeli.

¹⁴Jame te paꞌe soru mana kaisei glepo na,

ginauna na theo kaisei naikno na teke fakegra haghe na.

Eghuteuna jame te lilisei mana kaisei naikno ka suga sososlo na,

ginauna na theo kaisei naikno na teke hata fajifla na.

¹⁵Jame te loku fapulo mana nakhete na,

nauthoglu igne ginauna na jateula kaisei namono nagou eghu na theo khoꞌu.

Eghuteuna jame te snakredi mana khoꞌu biꞌo gre te britha na,

ginauna na goigonidi gobigna lepore.

¹⁶Uve, God na nheta fara,

eghuteuna mana uludi fabrahu nogna naokare.

Neuba mae te chaichaghi na, ba mae ihei te fatutuani ni chaichaghi na,

phiamare te gnafa na lamna ka khamegna mana.

¹⁷Mana hata fadeleidi nei famamajadi eghu goro mae biꞌo,

eghuteuna mae mala baubatu re mala ke fameomekro.

¹⁸Mana hata fadelei nodi nolaghi hatimare mae king,

eghuteuna mana nhaꞌa sorudi pari mare mala jateula naikno gloku eghu kolho.

¹⁹Mana hata fadeleidi mae pris mala famamajadi mare,

eghuteuna mana goigoni nodi nolaghi goro mae funei.

²⁰Mana fofotho foflodi mae iheire te cheke fajifladi cheke te keli,

eghuteuna hata koko glalase ka goro mae biꞌo.

²¹Mana famamajadi mae iheire te au nolaghi,

eghuteuna mana faglaꞌedi goro mae nheta.

²²Mana fakakhana gaoghatho te diꞌa teke poru kate romno,

eghuteuna mana hata mei juta mala faphae ka glepo te diꞌa jaola te au kate romno.

²³Mana edi kantri mala kegra heta,

eghuteuna mana jaola goigonidi.

Uve, mana edi kantri igre mala kmana nei vuragha eghu ka naikno,

eghuteuna mana jaola brue fajifladi ka nodi kantri re.

²⁴Mana hata koko nodi glalase hatimare mae king,

mala nolo tafri mare ka vido te diꞌa.

²⁵Mare snivi kate thono romno fara.

Uve, mare uka tafri kolho

jateula mae te koꞌu te thaviru ra eghu.”

Job cheke ka thilomare mana te magnahaghei cheke balugna God

¹“Filo si ghotilo, iara filo tathagu glepo igre.

Eghuteuna iara nomhidihi ka khuligure la lasedihi.

²Iara lasedi gobigna lepo te lasedi ghotilo re.

Iara jaola nheta gaoghathogu na jateula ghotilo eghu.

³Nu ghotilo laseni, iara magnahaghei te cheke balugna God mae ihei te au nolaghi fateote’o.

Eghuteuna iara magnahaghei te fadoglini gaoghathogna God na eigu iara.

⁴Ghotilo thilo mae igre theome laseni kaisei glepo kolho,

ghotilo thilo mae igre eni nomi chaichaghi na mala pophoru unha te tutuani na.

Ghotilo thilo mae igre jateula thilo mae dokta te theo nafudi ra eghu kolho.

⁵Jame te theome cheke ghotilo na,

keha mae jau gaghathodire ne mae glalase ghotilo eghu.

⁶Fanomho mei ka nogu cheke iara igne.

⁷Ba, ghotilo thilo mae igre gaoghathomi na ghotilo tangomana te chaghi kolho mala toghoni God eghu?

Ba, ghotilo magnahaghei te cheke chaichaghi eigna nogna gloku mana na?

⁸Ba, ghotilo magnahaghei God te phile ka ghotilo?

Ba, ghotilo gaoghathomi na ghotilo tangomana te toghoni God mala fapholai ka fate na?

⁹Ba, jame filo fakeli God ka ghotilo meuna,

ghotilo thilo mae igre gaoghathomi na ghotilo keliu kolho?

Ba, ghotilo thilo mae igre gaoghathomi na ghotilo tangomana te chaghi ka mana,

jateula ghotilo te chaghidi keha naiknore eghu?

¹⁰Jame pophoru ghotilo puhi te phile ka God na,

mana ginauna thofno fadogli ghami ghotilo.

¹¹Nogna nolaghi biꞌo mana igne ghotilo ginauna fififri fara,

eghuteuna ghotilo ginauna mhaghu nomi fara tagna.

¹²Nomi famane cheke ghotilo,

igre glepo diꞌa kolho jateula nakrofu eghu.

Eghuteuna nomi cheke ghotilo te rheta igre,

theome tangomana te kegra fothi ghami ghotilo na naugna igne glepo igre theo nafugna kolho.

¹³“Ghotilo thilo mae igre au kmu,

mala kulu cheke iara!

Iara theome nangadi kolho unha

nate thoke ghau iara ginauna.

¹⁴Iara tarabanau kolho eigna unha nate thoke mei ka iara na.

Uve, iara sasaꞌa te mala lisa lao nakarhagu na.

¹⁵Neuba God na falehe ghau iara,

iara tangomana te ofoni mana te mala fakarhi ghau na.

Eghume iara ginauna cheke fadoglo ka tathagna mana na

mala fakakhana puhigu iara te doglo na.

¹⁶Puhi te theome mhaghuni iara te cheke fadoglo ka God igne,

ginauna fakarhi ghau iara.

Naugna ninhigrana fara ranghini kaisei mae te diꞌa

te tei kegra ka tathagna mana na.

¹⁷Ghotilo famane fanomho mei

ka nogu cheke iara igre.

¹⁸Iara tarabanahi nogu cheke na,

eghuteuna iara laseni eigna God ginauna chekeni te doglo kolho iara na.

¹⁹Jame kaisei mae tangomana te chekeni ne jafra iara teuna,

iara ginauna au kmu kolho mala lehe.”

Job ne tarai ka God

²⁰“God, phei glepo te theome magnahagheni iara te eni iagho ka iara na.

Jame te theome eni iagho na, iara ginauna theome fariuriu pophoru ka iagho.

²¹Glepo ulu lahu na, thosei para ghau.

Fapea glepo na, thosei famamhaghu ghau.

²²Gognarona iagho kulu cheke,

eghuteuna iara ginauna cheke tughu nigho.

Jame te theo na, iagho snakre ghau iara mala kulu cheke,

eghuteuna iagho ginauna cheke tughu ghau iara.

²³Cheke fajifladi nakhibogu iara re.

Fakakhana ka iara najafra teke edi iara ranghi nigho iaghore.

²⁴Naugna unha sagho te pophoru tathamu nei foflomu teugre ka iara gnea?

Naugna unha sagho te filo mei ka iara jateula nou naoka teugnea?

²⁵Leuleghu fata na iagho nenei ghau iara

jateula nuri te pala te tei buburu moja ra eghu.

²⁶Iagho jateula mae ihei te rioriso soru glepo te diꞌa eigu iara ra eghu.

Iagho jau para ghau iara eidi glepo teke edi iara kani mae majaghanigu teku iara ra.

²⁷Iagho reri phei ghahegu iara gre,

eghuteuna iagho filo leghudi gobigna lepo teke edi iara ra.

Eghuteuna iagho filo ka glose na mala filo glanidi ghahegu iara gre

ka vido te gnafa aheva teke tei iara tadire.

²⁸“Eghume te haimini iara na, iara jateula mae tela diꞌa

te jateula kaisei nabreku pohe te boto,

ba jateula pohe te ghamu khokorosi ra eghu.”

¹“Naikno na karha ka gaꞌase,

nakarhagna na sokmo fara,

eghuteuna mana au ke lamna kmana puhi biꞌo.

²Mana ghosei kotu haghe jateula chechenge gaju eghu,

eghuteuna jaola ghosei lehe jateula chechenge gaju eghu.

Nakarhagna na ghosei

dofini kolho jateula naungo gaju eghu.

³Eghume naugna unha sagho te magnahaghei te filo ka nakarhagna mana gnea?

Eghuteuna naugna unha sagho te magnahaghei fate ghau iara gnea?

⁴Ba, mae ihei gne te tangomana te filoni mae ihei te klino ka tathagna God na?

Theo kolho!

⁵Iagho la liliseihi niha narane nei nhigra eghu ka nakarhagna naikno na.

Iagho la liliseihi,

kaisei mae theome tangomana teke tughu na.

⁶Eghume iagho thosei filo mei ka mana,

eghuteuna iagho snakreni mana mala karhau ghilei thokeni narane te gnafadi nogna nakmusa mana re.

⁷“Jame kato soru mare kaisei gaju,

gaju igne ginauna nake kotu fapulo,

eghuteuna grege majaghani ginauna nake kotu haghe.

⁸Neuba glathignare ne thi’atifadi,

pesigna na khaprau,

⁹kate au katha khoꞌu na,

naꞌa ginauna nake kotu haghe jateula kaisei gaju majaghani eghu.

¹⁰Nu kate glaꞌe soru te lehe naikno na,

igne ngala leghu lahugna mana na.

¹¹Jateula khoꞌu te krangohi

ba kholo te krango te dofini,

¹²kate lehe na

naikno na theome tangomana na teke kegra haghe na.

Uve, jame te lehe na mana theome tangomana na teke dofra haghe na

ghilei thokeni narane nate dofini maloa gne.

¹³“Te keli fara na iagho jame pophoru ghau iara

ka nodi namono mae te lehe ra.

Mala poru iara ka namono igne ghilei thokeni

narane te gnafagna diꞌatamu iagho na.

Eghuteuna iagho lilisei narane te mala au iara ka namono igne

eghuteuna thosei ghatho iho ghau.

¹⁴Ba, jame te lehe naikno na,

mana ginauna tangomana na teke karha fapulo na?

Jame te eghu na,

iara ginauna ofou ghilei thokeni narane ari te gnafadi nogu puhi biꞌo iara re.

¹⁵Ka narane tuana iagho ginauna magnahaghei te filo ghau iara mae ihei teke vuavuha iagho,

iagho ginauna kilo mei ghau iara, eghuteuna iara ginauna cheke tughu nigho.

¹⁶Ka narane tuana iagho ginauna filo leghuni puhigu iara na,

nu iagho ginauna nake theome ghathodi nakhibogu iara re.

¹⁷Eghuteuna iagho ginauna na jateula te hohono puhigu iara te diꞌare lamna ka kaisei kharaꞌo eghu,

nu iagho famamhaku kharaꞌo igne mala theome tangomana kaisei naikno te tothora na.

Uve, iagho ginauna toku tafru nakhibogu iara re.

¹⁸“Nu, na jateula thogele te diha te soru pari,

nei jateula thina biꞌo te phili te soru funu ka vido teke au dire teura eghu,

iagho nhaꞌa fapari gaoghathogna naikno na.

¹⁹Jateula khoꞌu te pili fadelei thina biꞌo,

nei jateula nakhete biꞌo te haglu koko glose funu ka thogelero,

eghu iagho rorhoꞌe nodi grouronu naiknore.

²⁰Iagho thofno figri tagruni naikno na,

eghuteuna mana tei la dofinihi.

Iagho aknu faleheni mana,

eghuteuna kuru teini ka nakarha igne.

²¹Neuba naikno gre ne fafnaknodi thudi mae te lehe ra,

nu mana theome laseni kolho.

Eghuteuna neuba mare ne famamajadi naikno igre,

mana jaola theome laseni.

²²Leuleghu fata na mana haimini te kabru lamna ka thinigna na,

eghuteuna mana diꞌa nagnafagna kolho ka thegna.”

Nogna fapea cheke Elifas

¹Elifas maegna Teman igne ne cheke eghu:

²“Mae te lalase na theome fiti cheke eghu,

eghuteuna mana theome toho fafodu foflogna na ka nuri kolho.

³Mae te lalase na theome tangomana te chekeni cheke te theo nafugna na,

eghuteuna mana theome chekeni glepo te theo nafugna kolho na!

⁴Jame te cheke eghu fabrahu iagho na,

ginauna na theo kaisei naikno nate ghatho tahuni God.

Eghuteuna iagho ginauna eni nogna fatutuani naikno te glaꞌe na.

⁵Unha te chekeni iagho na, iagho fakakhana puhimu te diꞌa na.

Eghuteuna iagho cheke jateula mae te chaichaghi eghu.

⁶Theome iara te chekeni ne diꞌa iagho teuna,

nu ka nou cheke themu iagho are te falalaseni ne diꞌa iagho teuna.

⁷“Ba, iagho si mae teke kulu karha ka nauthoglu igne naia?

Ba, iagho neke karhahi neke edi nga God thogele igre?

⁸Ba, iagho neke fanomho ka nogna gaoghatho God teke faidu mare kligna re?

Eghuteuna iagho gaoghathomu na iagho kolho te lalase na?

⁹Faꞌunha ne laseni iagho ne theome laseni ghehati teuna?

Unha nafnata gaoghatho te au ka iagho te theome au ka ghehati na?

¹⁰Ghehati neke hata nomi glalase ka mae biꞌo ra.

Mae biꞌo igre neke karha tifa tifa neke karha nga kmamu iagho na.

¹¹Ghehati chekedi nogna famane cheke God re ka iagho,

eghuteuna ghehati cheke faꞌikoi ka iagho.

Ba, theome naba te fagleꞌa nigho iagho na?

¹²Naugna unha site diꞌa nagnafamu,

nei diꞌatamu teu iagho ka ghehati gnea?

¹³Eigna tuana iagho te diꞌatamu ka God na,

eghuteuna iagho chekedi kmana cheke te diꞌa ranghini mana.

¹⁴“Ba, ihei te doglo fara na?

Ba, ihei te karha mei ka gaꞌase,

te doglo ka tathagna God na?

¹⁵Neuba engel di kligna re,

God na theome ronudi mare kolho.

Uve, mare theome klino ka tathagna mana na.

¹⁶Eghume faꞌunha eghu God tangomana te ronu ghita tahati te thono diꞌa fara,

eghuteuna tahati magnahaghei te koꞌuni puhi te diꞌa na.

¹⁷“Job, iagho famane fanomho mei ka nogu cheke iara,

nate chekedi iara ka iagho glepo teke filodi iara ra.

¹⁸Eghuteuna iara ginauna chekedi ka iagho nogna cheke mae glalase igre.

Cheke igre theome poruni kaisei glepo

teke nomhidi mare ka mae biꞌodi mare ra.

¹⁹God ne snakre lao namono igne ka mae biꞌo ra,

eghuteuna theo kaisei naikno aheva nga teke au te mala goigonidi mare na.

²⁰Mae te diꞌa na au diꞌanagnafa fabrahu leuleghu narane ka nakarhagna na.

Eghuteuna puhi biꞌo ginauna thokeni mae te diꞌa igne leuleghu finogha ka nakarhagna na.

²¹Lamna ka nagnafagna na,

mana haimidi glepo te mhaghudi fara mana re.

Eghuteuna kate ghathoni mana ne au fakeli neu kolho teuna,

mae te blau igre ginauna mei goigonini mana.

²²Mana gaoghathogna na mana theome tangomana te rikhani narane te ninhigrana eghu.

Eghuteuna mana jaola laseni mare ginauna faleheni mana.

²³Mana tei tafri hiro gano.

Eghuteuna mana lasenihi te puhi biꞌo igne namo thokeni mana.

²⁴Puhi biꞌo famamhaghuni mana.

Naꞌau huru hanga nei puhi biꞌo teu igre jateula kaisei king te tarabana armi mala mei magra ka mana teura eghu.

²⁵Puhi biꞌo igre ginauna thokeni mana,

naugna mana ne figri tagruni God mae ihei te au nolaghi fateote’o.

²⁶Uve, mae te diꞌa igne patu gama fara,

eghume mana magra ka God.

²⁷“Mae igne jateula mae te blokha nei dedei ra eghu,

eghuteuna mae igne hiuhiku.

²⁸Nu mana ginauna au kolho ka namono te groꞌe,

nei ka suga te theo ihei nga te au tagna,

eghuteuna suga igne ginauna phaꞌe soru.

²⁹Nogna dedei mana igre ginauna hui,

naugna glepo igre

theome tangomana te au raugha ka nauthoglu igne.

³⁰Mana ginauna theome tangomana nate rikhani puhi biꞌo na.

Eghuteuna mana ginauna na jateula kaisei gaju

te nhako ka khaꞌaghi gregegna te majaghani ra eghu.

God ginauna phanga mei ka mana,

mala hata koko fadelei nakarhagna mana na.

³¹Mae igne chaghini thegna jame te rouronu mana ka glepo te theo nafudi re,

naugna glepo te theo nafudi igre kolho nate au ka mana re.

³²Mana ginauna na kulu lehe ame thokeni nga nogna thofno narane mana na.

Uve, mana ginauna na jateula kaisei grege gaju thubo tela lehehi ra eghu.

³³Mana ginauna na jateula grege gaju te brusu sisigna te theome muita teura eghu,

ba jateula gaju oliv te brusu chechenge gna na ra eghu.

³⁴Kheragna mae ihei te theome fatutuani ka God na,

mana ginauna theo thugna.

Eghuteuna khaꞌaghi ginauna goigoni nogna suga mae

ihei te magnahaghei chaghidi naiknore ka sileni.

³⁵Naikno na gugumu puhi biꞌo,

eghuteuna luꞌa soru glepo te diꞌa.

Leuleghu fata na, mana tarabanani kolho puhi te mala chaghi na.”

Job ne cheke tughu ka Elifas

¹Job ne cheke tughu eghu:

²“Iara neke nomhidihi cheke igre.

Cheke igre ghotilo chekedi mala togho ghau iara,

nu puhi biꞌo thoke ghau iara.

³Niha nau gnafadi re nomi cheke ghotilo te theo nafudi igre?

Unha site edi ghotilo te cheke mei ka iara gnea?

⁴Jame diꞌanagnafa ghotilo jateula iara meuna,

iara tangomana te cheke ari kolho ka iagho gobigna lepo te cheke mei iagho ka iara igre.

Eghuteuna jame te eghu na,

iara jaola tangomana te chekedi kolho cheke tuarela ka iagho,

eghuteuna bliubliu phaꞌugu na naugna iara diꞌa nagnafagu ka iagho.

⁵Jame te eghu na,

iara ginauna farerheta gaoghathomu iagho na,

eghuteuna nogu cheke iara na ginauna iagho kelitamu ni.”

Job ne tarai ka God

⁶Job ne tarai eghu ka God:

“Neubane cheke eghu iara, theome tangomana te fakhusuni khabrugu iara na,

eghuteuna neuba iara ne au kmu, theome tangomana te gnafa na khabru igne.

⁷God, iagho bukri soru ghau iara pari,

eghuteuna iagho thofno goigoni ni tharaknagu iara na.

⁸Eghuteuna iagho eni thinigu iara gne jateula kaisei glepo te theo nafugna eghu,

eghume kate filoni naiknore te nhubragu kolho iara na,

mare ne diꞌa iara eghu gaoghathodi na.”

Job neke chekei ka thilo mae kheragna re

⁹“God na magri ghau iara eghuteuna mana filo mei diꞌatagna ka iara.

Mana goigoni thinigu iara na jateula lion te kina sasaka thinigna sipu na te ghamu ra eghu.

¹⁰Naiknore cheke goigoni ghau iara,

eghuteuna mare mei khapru faligoho ghau iara

eghuteuna mare tapodi tathagu nei foflogu teu iara re.

¹¹God na snakre lao ghauhi iara ka naikno te diꞌa re,

eghuteuna koko lao ghau iara ka khamedi mae te diꞌa re.

¹²Ulu lahu na iara au fakeli neku kolho,

nu God neke loku ka graragu iara na,

neke pipiruki ghau iara.

Uve, mana lilisei haghe ghau iara jateula kaisei nogna vido

mala fada ka nogna jata re.

¹³Eghuteuna gognarona mana fada faligoho ka vido te gnafa.

Mana theome kokhoni ghau iara,

eghuteuna nogna jata mana

igre fadi supli thiꞌagu iara na,

ghilei jifla mei butugu iara na kosi ka glose na.

¹⁴Mana magra ka iara kmana fata.

Uve, mana magri ghau iara koba

jateula soldia te paꞌe gringni thina gna namono na ia eghu.

¹⁵“Iara diꞌanagnafagu fara eghume iara pipichi ka pohe thona,

eghuteuna iara gnokro pari lamna nakrofu balu tanhi fagaglanagna nogu diꞌanagnafa na.

^16-17Iara theome mae mala magra,

eghuteuna iara tarai ka puhi te doglo.

Neuba ne eghu ngau,

iara tanhi fabrahu ghilei huge,

nei ukru eghu phei tathagu re.

¹⁸Glose! Jame te lehe iara na, iagho thosei pophoru dadaragu iara na,

snakreni mala tanhi fabrahu.

¹⁹Filo sagho,

gognarona, God na lase ghauhi iara,

eghuteuna mana ginauna na kaisei balugu iara kligna.

²⁰Mana togho ghau iara eghuteuna mana mae kheragu iara

ka narane te oro soru kholodi phei tathagu iara gre,

naugna iara tanhi fara ka God.

²¹Mae te lase ghau iara igne tangomana te cheke ka God eigna nogu puhi biꞌo iara na,

jateula mae te tore glepo malagna mae kheragna ra eghu.”

Job ne tarai ka God

²²“Nakarhagu iara na sokmo,

eghuteuna iara namo tei ka namono

aheva te theo kaisei naikno te tangomana na teke pulo mei.”

¹“Nakarhagu iara na diꞌa gognarona,

eghuteuna glehegu iara na la namo mei gognarona.

Bekugu iara na tarabanahi.

²Iara filodi kolho naikno te

faligoho ghau

iheire te diꞌatadi ka iara nei cheke goigoni ghau iara.

³God, nhaꞌa cheke sagho te mala togho ghau iara na.

Iara theo kaisei naikno te mala foli fajifla ghau te mala snagla te jifla iara na.

⁴Iagho bobothohi gaoghathodi re,

mala theome lalase mare.

Nu thosei snakredi mala ulu ghau iara.

⁵Jame mae ihei te hata sileni te mala

cheke goigoni ni kheragna fofodu na,

thugna mana re ginauna au papara.

⁶“Gognarona mare te gnafa na maꞌeni nanghagu iara na,

eghuteuna mare kmisu ka phei tathagu iara re.

⁷Iara diꞌanagnafa fabrahu nei tanhi eghu ghilei theome tangomana te fifilo na.

Eghuteuna iara gognarona nhubragu kolho.

⁸Naikno te doglo re rhana nodi fara ka iara.

Eghuteuna mare diꞌatadi fara ka iheire te theome leghuni God.

⁹Keha mae cheke eghu, ‘Ihei te leghuni God na,

ginauna theome tangomana te uka pari na.

Eghuteuna nakarhagna mae ihei te theome eni kaisei najafra na,

ginauna rheta fabrahu.’

¹⁰“Nu neuba ghotilo ne kafe cheke meini cheke igne,

iara theome filoni kaisei ka ghotilo te lalase na.

¹¹Nogu narane iara re la salaꞌuhi.

Nogu grouronu iara re la dofidi.

Eghuteuna nagnafagu iara na theome glealeꞌa.

¹²Te chekeni kheragu fofodu iara re iara au kate phae,

narane na romno kolho.

Te chekeni mare na narane na la namo meihi,

nu unha te filoni iara na gromno kolho.

¹³Gognarona, kaisei glepo te ofoni iara na,

mala lehe eghuteuna mare giugilu ghau iara lamna beku.

Eghuteuna ka namono tuana,

iara ginauna thuru lamna kate romno.

¹⁴Beku na jateula kmagu eghu iara.

Eghuteuna siosilo re jateula idogu nei greghagu eghu iara.

¹⁵Jame iara ghaoghatho eghu,

unha gne te tangomana nate togho ghau iara te mala laseni te doglo iara na?

¹⁶Ba, jame te lehe iara te soru pari ka beku na,

nogu grouronu iara te mala ke karha fapulo igne ginauna soru pari balugu iara ka namonodi mae te lehe ra?

Theo kolho!”

Nogna fapea cheke mae Bildad

¹Bildad maegna Sua ne cheke eghu:

²“Niha nau ame gnafa nga iagho cheke igne?

Jame te roi lalase te cheke iagho na,

ghehati ginauna tangomana te cheke fakeli balumu iagho na.

³Ba, ne fameomekro ghehati

jateula buluka neu sagho ia?

⁴Diꞌatamu iagho igne, goigoni nigho themu kolho.

Ba, gaoghathomu iagho na naikno te gnafa igre mala tei kokoni nauthoglu igne

mala kelitamu iagho?

Ba, gaoghathomu iagho na iagho magnahagheini God te hata koko thogele igre,

mala keli gaoghathomu iagho na?

⁵“Tutuani fara, nogna juta naikno te diꞌa na ginauna lehe,

eghuteuna khaꞌaghigna na ginauna jaola lehe.

⁶Uve, ginauna na jateula suga tapuale te theo kaisei juta tagna ra eghu.

Eghuteuna neubane juta ikoi rhegnai,

ginauna lehe.

⁷Ulu lahu na mana na nonolo faheta,

nu thogheiro na, mana na glaꞌe.

Nogna farirhiu thegna igne kolho

te koko soruni mana pari na.

⁸Ghahegna re khale

ka kaisei fangna te lilisei poru teu.

⁹Mare lilisei kaisei phighoro mala khale mana,

eghuteuna mana khale ka phighoro igne.

¹⁰Mare lilisei poru kaisei gnarho ka glose na,

mala khale ka ghahegna mana na.

Gnarho igne loku famakuni mana.

¹¹Puhi biꞌo te mhaghudi mana igre

au faligohonihi mana.

Uve, puhi biꞌo igre leghuni mana ka vido te gnafa

aheva te tei mana tagna na.

¹²Tifa na, mana kaisei mae dedei,

nu gognarona mana rofo.

Puhi biꞌo la kulu tarabanahi

te mala goigonini mana kate khoko mana pari na.

¹³Kaisei fogra te diꞌa

toku tafruhi thinigna mana na.

Uve, fogra igne mala lehe

phei khamegna nei ghahegna teu mana re mala boto.

¹⁴Fogra igne hata fajiflani mana ka nogna suga tapuale na.

Eghuteuna huhuruni mana mala tei

ka nodi king mae iheire te lehe ra.

¹⁵Mare ginauna gnubra nogna suga tapuale mana na.

Eghuteuna thina ngire te brana igne gnubra nogna namono mana na.

¹⁶Mae te diꞌa igne kegra haghe jateula kaisei gaju,

tela mojahi glathigna nei gregegna teura eghu.

¹⁷Theo kaisei naikno nate ghathoni mana na,

eghuteuna theo kaisei naikno ka kantri igne na teke chekeni nanghagna mana na.

¹⁸God ginauna hata fadeleini mana ka nauthoglu te phae igne,

mala tei mana ka vido aheva te romno na.

¹⁹Mana ginauna theo thugna,

eghuteuna theo kaisei naikno nate karha mei ka vikegna mana na.

²⁰Naikno te gnafa ke maghati nei ke mosu

teu igre nomhi meini nonomho eigna glehe mana igne,

ne mhaghu nodi nei fififri fara neu tagna.

²¹Puhi biꞌo ginauna thokeni naikno te diꞌa igne.

Uve, mare ginauna cheke eghu, ‘Igne namonodi iheire teke tirodini God ra.’ ”

Job ne cheke tughuni Bildad

¹Job ne cheke eghu:

²“Niha fata eghu ghotilo thilo mae igre te mala cheke te mala para ghau iara na?

³Kmana fata ghotilo te cheke goigoni ghau iara na.

Ba, ghotilo theome mamaja nomi kolho

ka puhi te eni ghotilo ka iara igne?

⁴Neuba iara ne eni kaisei puhi te diꞌa,

tuana puhigu iara thegu, theome nomi ghotilo.

⁵Ghotilo gaoghathomi na ghotilo ne keli ulu ghau iara eghu.

Eghuteuna ghotilo chekeni te mamajagna puhi biꞌo te thoke ghau iara igne fagaglanagna te jafra iara na.

⁶Nu te mala laseni ghotilo na God neke para ghau iara.

Eghuteuna mana neke loki ghau iara ka nogna phighoro na.”

Job ne khuru cheke ranghini God

⁷“Neuba iara ne eha mala mei togho ghau neu,

nu theo kaisei naikno te cheke tughu ghau iara na.

Eghuteuna kate eha iara ka ihei te mei togho ghau na,

nu theo kaisei te eni glepo te doglo ranghi ghau iara na.

⁸God fanograhi nogu nabrou iara na,

eghume iara theome tangomana te thugha na.

Mana eni nogu nabrou iara igne mala au ka gromno.

⁹Mana hata koko nogu nafnakno iara na,

eghuteuna mana la goigonihi famane nanghagu iara na.

¹⁰Mana puri fadiꞌa ghau iara,

eghuteuna iara tei ne dofi ghau.

Mana ne hata koko nogu grouronu iara na

jateula saeklon te koko gaju ka glose ra neu.

¹¹God gnubra ghau iara,

naugna mana diꞌatagna fara ka iara.

Eghuteuna mana kaha ghau iara kaisei nogna naoka mana.

¹²God kuruni nogna armi na mala mei magri ghau iara.

Mare khapru faligohoni nogu suga tapuale iara na.

Eghuteuna mare tarabana mala goigoni ghau iara.”

Job ne au sopa thegna

¹³“God chekedi mae kheragu iara re mala au fadelei ka iara.

Eghuteuna mae kheragu iara igre tirodi te filo ghau iara na.

¹⁴Tharaknagu nei thofno kheragu teu iara igre

la tei koko ghauhi iara.

¹⁵Iheire te mei koba ka sugagu iara tifa ra,

gognarona mare theome lase ghau iara.

Eghuteuna nogu gaꞌase gloku iara igre gaoghathodi na

iara kaisei mae phosa kolho.

¹⁶Neuba iara ne kilo meini kaisei nogu mae gloku iara,

nu mana theome mei kolho.

Eghuteuna neuba iara ne toreni mana mala togho ghau neu,

nu mana theome eni kolho.

¹⁷Khetogu iara na tirogna

ka sirigna foflogu iara na.

Mae thabusigu iara re jaola,

thono tirodi fara ka iara.

¹⁸Goro sua re jaola maꞌe ghau iara.

Kate mei iara rhedi mare na, mare cheke goigoni ghau iara.

¹⁹Kheragu iara

igre thono tirodi ka iara.

Eghuteuna mae iheire te namhadi fara iara re,

mare figri tagru ghau iara.

²⁰Iara krurhu la nhubragu kolho,

eghuteuna iara namo lehe, nu iara karha ngau.

²¹“Ghotilo thilo mae kheragu iara ra,

kokhoni ghau iara, naugna God na la tapo ghau iara.

²²Ghotilo nenei ghau iara

jateula te eni God igne eghu?

Ba, ghotilo magnahaghei chubo hagheni thinigu iara gne?”

Job rouronu ka God

²³“Iara magnahaghedi keha mae mala ghathoni nogu cheke iara igne,

mala rioriso soru ka kaisei buka.

²⁴Uve, iara magnahaghedi keha mae

mala hata kaisei sisel,

mala jou chekegu iara na ke kligna gna kaisei thina,

mala theome tangomana te dofi na.

²⁵Iara laseni God mae ihei te kaisei phile balugu iara na mana karha ngau,

eghuteuna mana ginauna mei ka nauthoglu igne mala hata fajifla ghau iara.

²⁶Neuba fogra igne ne goigoni ni thinigu iara na,

iara ginauna tangomana te filoni God kate karha iara na.

²⁷Iara ginauna filoni mana ka tathagu na,

eghuteuna mana ginauna na theome jateula mae phosa eghu.

Iara nigra naugna iara magnahagheni fara ka gaoghathogu na!

²⁸“Ghotilo te chekeni na ghotilo ginauna hiro ghau iara,

naugna ghotilo chekeni te iara eni ranghi ghau thegu puhi biꞌo igne.

²⁹Nu ghotilo mhaghuni naꞌau papara na.

Kate diꞌatagna God na mana ginauna paradi naikno te diꞌa re,

eghuteuna ghotilo ginauna laseni God nate fate ghami ghotilo na.”

Fapea nogna cheke mae Sofa

¹Sofa ne cheke eghu:

²“Job, iara theome gleꞌadi nou cheke iagho igre.

Iara nanga nogu fara eghume iara na cheke tughu nigho iagho.

³Cheke te chekeni iagho igne,

goigoni ghau iara,

eghume iara ginauna loku ka nogu glalase na mala cheke tughu nigho.

⁴“Iagho la lasenihi, tifa ka fufunu gna narane na God neke vuavuha naikno,

ghilei mei posa gognarogne,

⁵naikno te diꞌa igre tangomana te glealeꞌa katha vido kmoꞌei kolho.

⁶Keha fata mae te diꞌa igne,

tangomana te kegra funei,

eghuteuna mana tangomana te au nangha te haghe te tei posa ka maloa gno.

⁷Neuba, mae te diꞌa igne ginauna dofini fabrahu kolho

jateu charagna thegna eghu.

Mae iheire teke laseni na

ginauna theome laseni aheva te tei na.

⁸Uve, mana ginauna dofini kolho jateula kaisei mifi

te theo kaisei naikno te tangomana teke ghathoni na.

⁹Mana ginauna dofini ka namonogna na,

eghuteuna theo kaisei naikno na teke filoni mana na.

^10-11Neuba mae igne ne theome kuekuꞌe neu,

eghuteuna thinigna mana na rheta ngau,

nu theome raugha mana ginauna lehe,

eghuteuna mare ginauna giugiluni mana ke lamna glose.

Aonu thugna mana igre

ginauna nake tughu fapulo glepo

teke blau mana ka naikno te kuma re.

Uve, mare ginauna nake tusu fapulo nogna dedei mana re.”

Cheke naba eigna mae te diꞌa

¹²“Puhi te diꞌa na jateula ghegna gano keli eghu mae te diꞌa na,

eghuteuna mana magnahaghei te nhaꞌa lao ka foflogna na.

¹³Mana magnahagheni fara mamahegna na,

eghume mana gugumu ka foflogna na.

¹⁴Neuba,

ke leghu na, nafnata gano igne nake raha,

eghuteuna jateula kaisei poesen eghu lamna ka thiꞌagna mana na.

¹⁵Glepo teke blau igre, jateula ghegna gano eghu mana,

nu mana ginauna nake luꞌa tagna.

Uve, God ginauna eni

mae igne mala luꞌani nafnata gano igne.

¹⁶Mae te diꞌa igne nairu balu mogo.

Uve, mana ginauna lehe ka poesen gna mogo igne.

¹⁷Eghume mana ginauna theome tangomana nate filodi kmana glepo te keli jateula oel, nei jurukuli, nei milk

eghu te jifla mei ka nogna glose na.

¹⁸Eghuteuna mana ginauna theome khotogna kaisei glepo te keli

teke loku teke kmusadi mana re.

Eghuteuna theo kaisei narane kolho

te glealeꞌa mana ka nogna gobigna lepo te keli re.

¹⁹Naugna mana neke theome keli ranghidi kolho naikno te kuma re,

eghuteuna mana neke theome kokhonidi,

eghuteuna fiti hata kolho nodi suga keha naiknore neku.

^20-21“Mae te khiri igne theome au muana,

eghuteuna mana neubane au kmana glepohi,

mana theome glealeꞌa ka nagnafagna na.

Mana magnahaghei te hata kmana glepo fara,

ghilei theo kaisei glepo te au na,

nu nogna glealeꞌa mana igne ginauna theome raugha hui.

²²Fari hoteidi narane te au gobigna lepo igre,

kmana puhi biꞌo ginauna mei

goigonini fara mana.

²³Kate ghamu mana gano te magnahaghedi re,

God ginauna diꞌatagna na thono parani mana.

Eghume diꞌatagna God igne ginauna mei

jateula ghegna gano eghu naikno te diꞌa igne.

²⁴Neuba mae igne ne fariuriu rikhani jata na,

nu jata igre ginauna fadini mana.

²⁵Jata igre ginauna fada churu ka thinigna mana na.

Na thono tei lamna ka thiꞌagna mana na.

Puhi biꞌo te gnafa teke mhaghudi mana igre mei ka mana.

²⁶Eghuteuna nogna glepo te keli mana igre koko fahui,

naugna God ginauna kuru soru khaꞌaghi

mala nakoni mana nei tharaknagna nei nogna glepo mana re eghu.

²⁷Gobigna lepo ka maloa na are ginauna cheke jateula kaisei mae teke filo tathagna ra eghu,

nabagna te mala au papara.

Eghuteuna nauthoglu igne ginauna jaola cheke jateula kaisei mae teke filo tathagna ra eghu,

mala cheke faparini mana.

²⁸Ka narane te diꞌatagna God ka mana igne,

mare ginauna hata fahui nogna gobigna lepo mana re.

²⁹Igne kaisei taba

te tarabana teu God te mala tusu lao ka naikno te diꞌa na.”

Job ne cheke tughu ka mae Sofa

¹Job ne cheke tughu eghu:

²“Fanomho fakeli

ka nogu cheke iara igre.

Tuana kolho te tangomana te roi keli gaoghathogu iara na.

³Ghotilo ofo ghu au mala kulu cheke ghu iara.

Kate gnafa iara na

ame tangomana nga ghotilo teke maꞌe ghau iara na.

⁴“Ba, ne khuru chekedi iara naikno gre neu si ghotilo ia?

Theo, iara khuru cheke ka God.

Naugna igne site tirogu ofo iara gnea.

⁵Filo mei si ghotilo ka gobigna lepo te thoke ghau iara igre,

mala rhana nomi,

mala fofotho foflomi are.

⁶Iara jaola mhaghu nei rhana eghu

ka glepo te thoke ghau iara igre.

⁷Naugna unha si God te snakredi naikno te diꞌa igre

te karha raugha nei kuekuꞌe,

nei nheta nei dedei fara teu igrea?

⁸Mare karhau mala filodi narane

te biꞌo haghe thudi nei gradi teure.

⁹Mare au fakeli

eghuteuna mare theome mhaghuni kaisei glepo te diꞌa.

Eghuteuna God theome paradi mare.

¹⁰Buluka nalhaꞌugna na theome gnafa te faꞌau sua ka buluka gaꞌasegna na.

Eghuteuna buluka igre

bligi kolho te fakarha thudi re.

¹¹Leuleghu fata na, thudi naikno te diꞌa igre

au fakeli eghuteuna chari tafri jateula sua buluka eghu naugna reꞌe ne glealeꞌa.

¹²Mare koje ka tamborin,

nei ghita nei ifu ka phoposa,

eghuteuna mare jaola ragi.

¹³Naiknore glealeꞌa nodi kolho,

eghuteuna mare theome diꞌanagnafa kate soru ka beku na.

¹⁴Naikno te diꞌa igre cheke ka God mala thosei au baludi.

Mare theome magnahaghei te lasedi

puhigna mana re.

¹⁵Mare gaoghathodi na, mare theome tangomana te eni kaisei glepo ranghini God mae ihei te au nolaghi fateote’o.

Eghuteuna mare gaoghatho dina, tharai gne glepo theo nafugna kolho.

¹⁶Te ghathoni mare na glepo te keli te au ka mare na,

nodi gloku nei nakmusa eghu thedi re kolho.

Nu te laseni iara na,

gaoghathodi mare igne theome tutuani.

¹⁷“Naikno te diꞌa igre

theome lehe kate majaghani teu mare na.

Eghuteuna puhi biꞌo te jifla mei kate diꞌatagna God na,

theome thokedi mae igre.

¹⁸God na theome koko teidi mare delei kolho,

jateula buburu moja pala te tei delei te dofidi ka nuri ra eghu.

¹⁹Keha naiknore te chekeni na God paradi goro sua re

eidi nakhibodi kmadi re.

Nu te ghathoni iara na puhi igne theome keli.

Te keli na God parani mana

eidi nakhibogna mana thegna re.

²⁰Mae te diꞌa na au nogna papara thegna,

mala haimini mana diꞌatagna God mae ihei te au nolaghi fateote’o na.

²¹Kate lehehi mana na,

mana na theome tangomana teke ghathoni

unha nate thoke mei ka thugna mana re ginauna.

²²“God ginauna fatedi mae iheire te nheta fara igre,

eghume theo kaisei naikno nate farirhiuni mana na.

^23-24Keha naiknore glealeꞌa nei au fakeli eghu,

eghuteuna thinidi re kolo kuthu

ghilei thoke mei narane te lehe na.

²⁵Eghuteuna keha naiknore kokhonidi nei diꞌanagnafa fara eghu

eghuteuna theome au fakeli kolho

ghilei thoke mei narane te lehe na.

²⁶Nu mare te gnafa na ginauna kafe lehe,

eghuteuna thinidi re mala kafe tei ka glose.

Siosilo ginauna fodu ka thinidi re.

²⁷“Iara lasenihi unha te ghathoni ghotilo na,

eghuteuna iara lasenihi gaoghatho te diꞌa te mala goigoni ghau iara na.

²⁸Ghotilo ghusna eghu fabrahu,

‘Aheva si namono gna mae biꞌo na ia?

Aheva nogna suga tapuale mae te diꞌa na?’

²⁹Ba, ghotilo theome toutonu ngau baludi naikno

te tei ka keha namono ra?

Ba, ghotilo theome nomhini thoutonu te chekeni mare ia?

³⁰Thoutonu na eghu agne:

Ka narane te diꞌatagna God te paradi naiknore,

puhi biꞌo theome thokedi naikno te diꞌa re.

³¹Theo kaisei naikno te cheke faparini puhi te diꞌa eni mae te diꞌa na,

eghuteuna theo kaisei naikno te parani mana

eidi glepo te diꞌa te edi mana re.

³²Kate lehe mana na,

mare palani mana tei ka beku.

Eghuteuna mare reireghi fakelini beku gna mana na.

³³Kmana naikno fara te khapru kate giugiluni mana na,

eghuteuna thinigna mana na glealeꞌa te tei ka glose na.

³⁴“Eghume ghotilo theome tangomana te farerheta gaoghathogu iara na

baludi nomi tharu maei cheke ghotilo are.

Nomi cheke te gnafa ghotilo are cheke chaichaghi kolho!”

Fatilo nogna cheke Elifas

¹Elifas maegna Teman ne cheke eghu:

²“Tangomana ngau kaisei naikno te toghoni God na?

Neuba mana ne lalase fara

mana theome tangomana te toghoni God na.

³Ba, jame nakarhamu iagho na doglo,

iagho gaoghathomu na iagho tangomana te toghoni God mae ihei te au nolaghi fateote’o igne?

Jame nakarhamu iagho te keli na,

igne theome tangomana te eni kaisei glepo te keli malagna God.

⁴“God na theome fate nigho nei para nigho

naugna iagho ghatho tahuni mana.

⁵Mana para nigho iagho naugna iagho nakhibo fara,

eghuteuna gobigna lepo te edi iagho re thono diꞌa.

⁶Iagho hata nogna pohe mae kheramu fofodu na,

mala tughu fapulo mare kaoni na ka iagho.

Eghume mare na theome au kaisei glepo te mala pipichi na.

⁷Iagho theome fei ghedi khoꞌu iheire te thono roi koꞌu,

eghuteuna iagho theome snakreni te ghamu na ka iheire te rofo.

⁸Iagho neke loku ka nou nolaghi nei ka nanghamu te fnakno

mala hata glose,

eghuteuna iagho snakre lao ka kheramu iagho re.

⁹Iagho tirou toghodi iheire te lehe khetodi,

eghuteuna iagho jaola goigoni goro sua glehe kokoi.

¹⁰Naugna igne mare lilisei phighoro falithui nigho,

eghuteuna puhi biꞌo te mhaghudi fara iagho igre na ghosei mei ka iagho.

¹¹Uve, naugna igne

gromno na mei ka iagho eghuteuna iagho na theome tangomana nate fifilo na.

Eghuteuna nabritha biꞌo mei toku tafru nigho,

mala knoho iagho.

¹²“God na au ka namono te haghe fara.

Neuba nathunu re ne haghe,

nu God na filo soru kolho ka mare.

¹³Nu iagho cheke eghu,

‘God na theome lasedi gobigna lepo igre.

Khoveo te romno igre toku tafruni mana,

eghume mana theome tangomana te fate ghita na.

¹⁴Kate nonolo mana ka maloa na,

mana theome tangomana te filo ghita na,

naugna grokho biꞌo toku tafruni mana.’

¹⁵Ba, iagho ginauna leghuni kolho

puhigna tifa teke leghuni

naikno te diꞌa re tifa ra?

¹⁶Mare neke lehe tifa kani teke thoke mei nodi narane re,

jateula suga te hata te tei nabritha biꞌo ra eghu.

¹⁷Naikno igre tirodini God,

eghuteuna mare theome fatutuani te

God na tangomana te eni kaisei glepo ka naikno te tirodini mana igre.

¹⁸Neubane eghu, God tusu ranghidi

gobigna lepo te keli ka naikno te diꞌa igre.

Nu iara tirogudi nodi gaoghatho mare igre.

¹⁹Kate paradi God naikno te diꞌa igre,

naikno te doglo igre glealeꞌa nei maꞌe eghu ka mare,

²⁰‘Nomi naoka ghehati igre la dofidi,

nodi gobigna lepo re la gnhubrahi ka khaꞌaghi!’

²¹“Job, iagho mala kaisei gaoghatho balugna God mala au fakeli balugna mana,

aonu glepo te keli re ginauna tangomana te thoke ka iagho.

²²Iagho mala leghudi glepo te farirhiu mana re,

eghuteuna iagho mala ghathodi fabrahu nogna cheke mana re.

²³Kate figri fapulo iagho ka God mae ihei au nolaghi fateote’o igne na,

iagho lilisei puhi te diꞌa ka nakarhamu na,

eghuteuna iagho ginauna nake keli.

²⁴Jame te lilisei iagho nagnafa magnahaghei sileni na,

iagho koko tei nou famane gol na lamna khoꞌu biꞌo.

²⁵Aonu God mae ihei te au nolaghi fateote’o igne,

mana tangomana te jateula nou famane gol nei silva teu iagho na.

²⁶Jame te eghu iagho na,

leuleghu fata na iagho ginauna tangomana te glealeꞌa fara ka God,

eghuteuna iagho ginauna tangomana te filo tei ka mana.

²⁷Eghuteuna kate tarai iagho ka mana na,

mana ginauna nomhi nigho iagho.

Eghuteuna iagho ginauna tangomana te edi gobigna lepo

teke nhaꞌa cheke iagho ka mana mala edi teku ra.

²⁸Gobigna lepo mala edi teku iagho ra,

ginauna thofno keli fara.

Uve, ginauna agha jateula juta eghu ka nabrou te mala tei iagho na.

²⁹Iagho laseni, kate khoko pari naikno igre ka nakarhadi re,

eghuteuna iagho cheke eghu ka God, ‘Toghodi mare,’

God tangomana nate fakarhidi re.

³⁰Naugna te thofno doglo puhimu iagho na,

God ginauna fakarhini mae ihei te naba te mala papara na.”

Job ne cheke tughuni Elifas

¹Job ne cheke tughu eghu:

²“Gognarona iara na khuru chekeu ngala.

Iara theome keli gaoghathogu fara,

eghuteuna iara na theome tangomana te gnafa nogu natanhi na.

³Iara magnahagheni fara te laseni namono

aheva te au teu God tagna na.

Eghuteuna iara magnahagheni fara te laseni nabrou

te mala tei thoke ka nogna fate mana na.

⁴Kate thafoni mana na,

iara ginauna cheke ka mana, ‘Iara theome neke eni kaisei najafra.’

⁵Iara magnahaghei te laseni unha nate chekeni God ka iara na,

eghuteuna na faꞌunha eghu mana cheke tughu ka iara na.

⁶Ba, mana ginauna fapholai balugu iara ka nogna nolaghi na?

Theo.

Mana ginauna fanomho ka unha te chekedi iara re.

⁷Ka narane tuana, iara ginauna famane cheke balugna mana

eghuteuna mana tangomana te fanomho ka nafnata mae te doglo te jateula iara teu igne.

Jame te eni iara igne na,

nogu mae mala fate iara na ginauna chekeni te iara theome naba te papara na.

⁸“Jame tei iara te hironi God ke maghati,

nu mana theo ka namono igne.

Eghuteuna jame tei iara te hironi mana ke mosu,

nu iara na jaola theome filoni mana jare.

⁹Iara tei hironi mana ke raru nei ke mata,

nu iara theome tangomana te filoni mana na.

¹⁰Neuba,

God na lasedi vido te gnafa aheva mana tangomana te filo ghau iara na.

Eghuteuna kate fariuriuni mana puhigu iara na,

mana ginauna filoni nakarhagu iara na thofno doglo kolho.

¹¹Leuleghu fata na, iara ghatho tahuni mana,

eghuteuna iara leghudi puhigna mana re.

Iara theome tei kokoni mana mala leghuni

kaisei nabrou delei.

¹²Leuleghu fata na, iara leghudi nogna cheke God te rheta tulao.

Uve, iara thofno tajidi nogna cheke mana re ka nagnafagu na.

¹³“Mana theome tangomana teke tughu na,

eghuteuna theo kaisei naikno tangomana teke tughu gaoghathogna mana na.

Eghuteuna theo kaisei naikno tangomana te lhotini ka mana

unha te magnahaghei eni mana na.

¹⁴Eghume mana ginauna eni unha teke ghathoni mana mala eni ka iara teku na.

Eghuteuna kmana gaoghatho eigu iara na la kulu auhi ka gaoghathogna mana na.

¹⁵Naugna igne te mhaghu nogu fara iara

kate ghathoni mana na.

¹⁶God eni gaoghathogu iara gne la glaꞌe soru.

Uve, God mae ihei te au nolaghi fateote’o igne

mana famamhaghu ghau iara fara.

¹⁷Tutuani, gromno igne ne falithui ghau nei toku tafrudi tathagu nei foflogu teu iara gre,

nu iara theome tangomana te au kmu na.”

Job ne khuru cheke ka God

¹“Naugna unha si God gne te theome vahini kaisei narane te mala fatedi

naikno te diꞌa grea?

Eghuteuna naugna unha si iheire te leghuni mana

igre te theome filoni narane tuana ia?

²Naikno te diꞌa igre blau glose

ka keha naiknore.

Eghuteuna blau sipu

mala lilisei baludi nodi sipu thedi re.

³Mare hata nodi dongki iheire te glehe kokoi.

Eghuteuna hata nodi sua buluka goro naikno biꞌo tela lehehi khetodi,

mala ke tughu fapulo nodi kaoni re.

⁴Mare theome snakredi naikno te kuma

mala thosei nolo ka nabrou.

Eghume, naikno te kuma igre rikha porudi

iheire te maꞌedi.

⁵Naugna igne,

naikno te kuma igre jifla tei ka namono nagou jateula dongki mata eghu,

mala tei hiro gano maladi thudi re.

⁶Mare tei hata gano te theome raꞌe keli mata.

Eghuteuna mare sene sisi gaju

ka nodi nagare naikno te diꞌa puhidi re igre.

⁷Mare theo nodi pohe

mala totoku bongiro kate reka.

⁸Kate soru nakhete ka thogele ro

mare buebugne kolho.

Aonu mare tei au ke pari gluma thina biꞌo

mala poru ka nakhete.

⁹Naikno te diꞌa puhidi igre hata sua tela lehehi kmadi re,

neubane chuꞌu neu ka idogna na.

Uve, mare hata thudi naikno te kumare,

mala ke tughu fapulo nodi kaoni re.

¹⁰Naikno te kuma igre nolo soesole tafri kolho,

naugna mare theo pohe.

Eghuteuna mare loku mala au ghedi gano keha naiknore,

nu mare thedi na rofo kolho.

¹¹Mare poji oel ka sisi oliv,

eghuteuna ei khoꞌu ka sisi grep,

nu mare thedi na langasa fara kate roi koꞌu na.

¹²Iheire te ghoreho te namo lehe re,

tanhi ke lamna namono

mala toghodi God.

Nu God theome eni kaisei glepo

eidi glepo te diꞌa igre.

¹³“Naikno te diꞌa igre cheke faparini naphae.

Mare theome magnahaghei te nolo

ka nabrou te agha naphae na.

¹⁴Mae te aknu poru igre kegra haghe hamerane boibongi,

mala jifla aknu falehedi iheire te kuma.

Uve, mare jifla bongiro mala blau.

¹⁵Mae te tolaghi pedo igre,

mare ofo rafi.

Mare toku tafru tathadi nei foflodi teure

mala theo kaisei naikno te filo glanidi,

te agra te tei mare na.

¹⁶Mae te blau igre mare jifla bongiro tei blau ka suga re.

Nu ka narane na mare poru,

theome jifla mei kate phae.

¹⁷Te grughu bongi igne te nodi hamerane mare na.

Nu mare kheradi fofodu naitu

te au kate romno te mhaghudi naiknore.

¹⁸“Nu naikno te diꞌa igre tei ne dofidi,

jateula nabritha biꞌo te kafe hata tei naiknore te dofidi ra neu.

Puhi biꞌo ginauna thokeni nodi namono mare na,

eghuteuna theo kaisei naikno nate mei loku

ka nodi nagare grep mare na.

¹⁹Naikno te gnognoro igre mala jateula khoꞌu te krango kate brana naprai na ia eghu.

Tutuani, naikno te diꞌa te gnafa igre ginauna jaola ghosei lehe

eghuteuna soru lamna beku.

²⁰Idodi naikno igre,

ginauna ghatho ihodi.

Eghuteuna siosilo ginauna ghamu thinidi re,

Eghume ginauna theo kaisei naikno na teke ghathodi re.

Nakarhadi naikno te diꞌa igre,

ginauna ari gnafa jateula gaju te kato soru pari,

eghuteuna boto ka glose na teu ra eghu kolho.

²¹Mae te diꞌa igre neneidi goro gaꞌase te theo thudi.

Eghuteuna mae igre jaola goigonidi goro naikno biꞌo tela lehehi khetodi re.

²²Nu neuba naikno te diꞌa igre ne nheta,

God ginauna goigonidi kolho mare ka nogna nolaghi na.

Eghuteuna neuba mae igre ne au ka nakarha te keli,

glehe na au namo kolho ka mare.

²³Glahula God na snakredi mare mala au ka vido te keli,

eghuteuna gaoghathodi mare na ne au fakeli neu eghu,

nu leuleghu fata na God na filo tutu ka puhidi mare re.

²⁴Naikno te diꞌa igre au fakeli katha vido narane kolho,

nu mare ginauna theome raugha lehe kolho

jateula buburu te tobi soru

te moja ka naprai te brana ra eghu.

²⁵“Cheke igre tutuani fara, theome chaichaghi!

Eghume nogu cheke iara igne theome tangomana kaisei naikno nate chekeni ne tharu maei kolho teuna.”

Fatilo nogna cheke mae Bildad

¹Bildad maegna Sua igne ne cheke eghu:

²“God mae ihei te au nolaghi fateote’o igne mana saghe leghudi gobigna lepo re,

eghuteuna nogna nolaghi mana igne toghodi naikno te gnafare mala ghatho tahuni mana.

Mana tangomana te fadoglidi gobigna lepo kligna re.

³Theo kaisei naikno tangomana te kahadi engel ke lamnagna nogna armi mana na.

Eghuteuna nogna juta mana na sigla tei ka namono te gnafa ka nauthoglu igne.

⁴Ihei gne te doglo kolho te theo nakhibogna ka tathagna God na?

Theo kaisei naikno te karha mei ka nauthoglu igne

te klino ka tathagna God na.

⁵Kate filo God ka glaba nei nathunu teu igre,

tuare theome agha fakeli ka tathagna mana na.

⁶Aonu kate filo mei ka tahati naikno na,

tahati thofno glepo theo nafuda kolho ka tathagna mana na.

Ka tathagna mana na,

tahati thugna naikno igre jateula madukhe eghu kolho.”

Job neke cheke tughu ka mae Bildad

¹Job ne cheke eghu:

²“Sei, iara theo kaisei nogu nolaghi,

eghuteuna iara theome nheta,

nu iagho theome togho ghau iara kolho!

³Tore, iara theome lalase nei au tagu gaoghatho te keli eghu,

nu iagho tusu mei nou famane farirhiu igre ka iara!

⁴Ghema!

Mae ihei teke togho nigho iagho teke chekedi nou cheke iagho igre?

Faꞌunha ne cheke eghu nga iagho?”

Bildad neke cheke eghui ka mae Job

⁵“Tharungadi iheire te lehe ra fififri nodi fara.

Iheire te au ke lamna thongna ke pari nauthoglu igre mhaghu nodi fara.

⁶God na filodi kolho iheire te gnafa

te au ka namonodi naikno te lehe ra.

Theo kaisei naikno tangomana te poru Abadon. Igne namonodi naikno te diꞌa re.

⁷God lilisei maloa ke rarugna kaisei namono nagou,

eghuteuna mana eni nauthoglu igne gefe fabrahu ka vido aheva te theo kaisei glepo te loku hagheni.

⁸Mana pipiha khoꞌu na

lamna ka khoveo biꞌo.

Nu neuba khoꞌu igne tahu fara,

khoꞌu igne theome tangomana te rekudi khoveo igre.

⁹Mana eni khoveo na

mala toku tafru vido aheva te gnokro mana tagna na.

¹⁰Mana lilisei vido ke kligna thongna aheva te thafoni maloa na,

mana lilisei nohi fari hoteidi narane ghe bongi.

¹¹Kate cheke faheta mana ka khegra te loku hagheni maloa gne,

khegra te loku hagheni maloa igre mhaghu nodi fara, ne fififri jateula kaisei naikno neu.

¹²God cheke ka nogna nolaghi

mala snoto thongna na.

Eghuteuna ka nogna glalase,

mana aknu falehe nasava biꞌo te kiloi Rehab.

¹³Tharunga gna mana igne ne ifu teidi khoveo re

mala snagla maloa na.

Eghuteuna mana fada mogo thongna biꞌo te kiloi mare Leviatana te tugha tafri fara igne,

mala lehe mogo igne ka khamegna mana.

¹⁴Nu, glepo igre God jateula te cheke faꞌikoi ra eghu kolho.

Uve, glepo igre thofno vido ikoi kolho

ka glepo teke edi mana re.

Eghume jame fakakhana God nogna nolaghi na meuna,

ginauna na jateula fila biꞌo eghu,

eghuteuna tahati ginauna theome tangomana te laseni nolaghi tuana.”

Nogna cheke leghu lahu mae Job

¹Job neke cheke eghui,

²“Tutuani fara God na theome snakre ghau iara te au nogu nolaghi na.

Uve, God mae ihei te au nolaghi fateote’o igne

mana eni nakarhagu iara na ne thono diꞌa fara.

³Kate au teu katha nakarhagna God ke lamnagu iara na,

⁴iara theome tangomana te chekeni kaisei cheke te diꞌa,

eghuteuna iara theome tangomana te chaghi na.

⁵Leuleghu fata na iara ginauna na theome chekeni

te nomi cheke ghotilo thilo mae igre ne doglo teuna.

Eghuteuna nate ghilei thokeni narane nate lehe iara na,

iara na theome tangomana nate chekeni ne theome doglo iara teuna.

⁶Gaoghathogu iara na snaglau kolho.

Eghume iara na theome gnafa nate chekeni

te puhigu iara na doglou kolho.

⁷“Lisa lao ka God mala paradi nogu naoka iara re,

jateula te parani mae ihei te eni puhi te diꞌa na ia eghu.

⁸Kate kato kusu God nakarhagna ihei te diꞌa na,

gobigna lepo teke ghatho tahudi mana re

ari theo nafudi.

⁹Kate thoke mei puhi biꞌo ka mae te diꞌa na,

God ginauna theome nomhini nogna natanhi mana na.

¹⁰Eghu naugna,

mae te diꞌa igne mana theome kelitagna ka God mae ihei te au nolaghi fateote’o igne,

eghuteuna mana theome tarai koba ka God.

¹¹“Iara ginauna farirhiu ghami ghotilo

eigna nogna nolaghi God.

Eghuteuna iara ginauna chekedi gaoghathodi nogna

nolaghi mana igre.

¹²Nu ghotilo la filodihi glepo igre,

neuba ghotilo chekedi fabrahu nafnata cheke te theo nafudi kolho igre.

¹³“Iara ginauna chekeni puhigna God mae ihei te au nolaghi fateote’o te parani naikno te diꞌa

ihei te neneidi naiknore.

¹⁴Neuba mare ne au kmana sua,

nu mare ginauna na theome au naba gano,

ba lehe ka magra.

¹⁵Kehare ginauna lehe ka kaisei fogra te diꞌa.

Neuba khetodi mare teke lehe kokodi igre,

reꞌe ginauna na theome tanhidi mare.

^16-17Eghuteuna neuba naikno te diꞌa igre ne au nodi kmana sileni,

naikno te doglo igre ginauna tufa sileni igre.

Uve, neuba mae te diꞌa igre ne tothoghei kmana pohe,

nu naikno te doglo igre ginauna pipichi ka pohe tuare.

¹⁸Suga teke horo mae te diꞌa igne

ginauna theome au raugha jateula gnoku khakafre eghu.

Uve, theome maku jateula suga ka thobi

teke horo kolho ka khakla chau ra eghu.

¹⁹Kaisei narane,

mae te diꞌa igne dedei kate tei thuru na,

nu kate dofra haghe hamerane na,

nogna dedei te gnafa mana igre dofidi theome filodi aheva te tei re.

²⁰Puhi biꞌo ginauna thoke mei ka mana jateula nabritha biꞌo eghu.

Puhi biꞌo igre mei ka mana jateula kaisei nuri biꞌo bongiro eghu.

²¹Uve, mei jateula nuri biꞌo te ghaghafa mei ke maghati,

te pala te teini mana delei ra eghu.

²²Mana fariuriu rikha,

nu ninhigrana fara naugna nuri igne

thono nheta fara ne mei goigonini mae igne.

²³Naiknore jateula naoglagna nuri neu ne cheke faparini mae igne.

Ba jateula nuri saeklon te nghoji ra neu ne maꞌeni mana.”

Koje mala cheke fakelini famane gaoghatho te keli

¹Naiknore laseni aheva te au teu silva na,

nei vido aheva te mala dokha haghe famane gol.

²Mare laseni aheva te mala dokha aean ka glose na,

eghuteuna mare jaola au vido te mala dokha famane bras te keli fara na.

³Mae igre hata juta

kate dokha te soru pari ke lamna glose na.

Mare dokha tei pari fara mala hiro aean

ke lamna glose te romno fara.

⁴Ka vido aheva te khaba fara,

phei ba thilo naikno kolho nate tei jare na,

mare dokha khora tei ke lamna glose

mala hata fajifla famane thina.

Kate loku mare ke lamna khora igne,

mare loku famaku ka phukri,

eghuteuna gefe kolho ka gerigna khora igne.

⁵Gano na kotu ke kligna glose,

nu ke pari glose na,

mare hata khaꞌaghi mala piphike thina re.

⁶Ka thina igre,

mare dedi famane thina nei gol.

⁷Gaghatare tangomana te flalo kligna ka maloa,

nu reꞌe theome laseni nabrou te mala tei ka vido te au kmana famane thina.

Neuba nanghaji biꞌo te flalo kligna,

theome tangomana te filoni kolho nabrou igne.

⁸Lion nei keha glepo te tautagu langau teu igre

theome tangomana te leghuni nabrou igne.

⁹Neubane thina re ne maku fara,

nu mare dokha tei lamna kolho.

Eghuteuna mare dokha haghe

pesidi thogelere.

¹⁰Kate dokha khora te mala ei nabrou te tei lamna thina na,

mare thafodi kmana famane thina.

¹¹Mare dokha tei posadi vido

aheva te jifla mei khoꞌu biꞌo re.

Eghuteuna mare hata fajifla mei

glepo teke au poru teku re,

mala tangomana naiknore te filodi re.

Hironi famane gaoghatho te keli

¹²Nu aheva naikno gre nate laseni famane gaoghatho te keli na?

Aheva mare nate hata glalase te keli igne?

¹³Theo kaisei naikno te laseni aheva nate filoni gaoghatho te keli na.

Ninhigrana fara te mala filoni ka nauthoglu igne.

¹⁴Theome au ke pari glose.

Eghuteuna theome au pari ke lamna nhorora.

¹⁵Theome tangomana kaisei naikno te foli silva ba gol

te mala hata gaoghatho te keli na.

¹⁶Naikno na theome tangomana te foli ka famane gol,

ba ka famane thina te ninhigrana fara,

te mala hata glalase na.

¹⁷Neubane gol ba kaisei famane glas,

glalase te keli na keli salaꞌudi gol nei famane thina.

Eghuteuna theo kaisei naikno tangomana te tughu famane gol na

te mala hata glalase te keli na.

¹⁸Te mala hata glalase na,

thofno keli fara salaꞌudi thua nafnata thina

te famane fara nei ninhigrana fara.

¹⁹Famane thina nei gol,

teu igre theome naba te foli famane cheke na.

²⁰Gaoghatho te keli na au aheva sia?

Glalase na au ka namono aheva?

²¹Theo kaisei glepo te karha nate filoni glalase na.

Eghuteuna neubane nanghaji te flalo kligna ka maloa na igre,

reꞌe theome tangomana te filoni glalase na.

²²Naikno ka namonodi iheire te lehera,

nomhini katha cheke kolho

eigna namono aheva te au glalase na nei te mala filoni glalase na.

²³Kaisei God kolho te laseni nabrou te mala filoni glalase na.

God laseni namono aheva te au glalase te keli na.

²⁴Naugna kaisei mana ngala te filo ka namono te gnafa,

eghuteuna fifilo ka gobigna lepo ka nauthoglu igne.

²⁵God tusu lao nolaghi ka nuri mala ghaghafa faheta.

Eghuteuna mana liliseihi vido aheva te mala mei snotogna thongna na.

²⁶God lilisei narane te mala soru mei nakhete.

Eghuteuna mana lilisehi nabrou

te mala leghuni khoveo ghe fila.

²⁷Ka narane te edi glepo igre,

mana filo glani gaoghatho te keli na,

eghuteuna mana chekeni puhigna na.

Uve, ka narane igne mana enihi unha gaoghatho te keli na,

nei ghathoni unha te thofno doglo na.

²⁸Aonu God ne cheke eghu ka tahati,

“Ghatho tahuni LORD,

igne thofno gaoghatho te keli na.

Te mala hatini glalase te keli na,

ghotilo thosei eni puhi te diꞌa na.”

Job ke ghatho fapuloni nakarhagna tifa na

¹Job ne cheke eghu:

²“Iara magnahaghei nakarha te keli jateula tifa,

kani teke reireghi fakeli ghau iara God ia.

³Ka narane tuana,

leuleghu fata na God jateula juta eghu

mala faphae ghau iara kate tei iara kate romno na.

⁴Ka narane tuana,

gobigna lepo te keli ranghi ghau iara,

eghuteuna God fofodu fakeli balugu iara,

eghuteuna mana reireghi fakelini nogu suga iara na.

⁵Ka narane tuana,

God mae ihei te au nolaghi fateote’o igne,

au balugu iara,

eghuteuna thugu iara re jaola au balugu iara.

⁶Ka narane tuana,

nogu buluka iara re tusu ranghi ghau iara kmana milk,

eghuteuna iara au ghegu kmana sisi oliv mala ei kmana oel.

⁷“Ka narane tuana,

iara gnokro ka faidu ka namono na,

eghuteuna iara jaola tei faidu baludi goro mae biꞌo.

⁸Ka narane tuana,

goro mae majaghani igre mare riu fadelei kate filo ghau iara na mala tei salaꞌu iara,

eghuteuna mae biꞌore jaola ghatho tahu ghau iara kegra haghe kate mei iara na.

⁹Ka narane tuana,

kate mei iara na, mae funei re theome cheke kegrau,

¹⁰eghuteuna neubane mae nafnakno,

mare jaola au kmu.

¹¹Ka narane tuana,

iheire te gnafa te filo ghau iara igre, ba nomho thoutonu eigu iara,

mare cheke fakeli ghau iara.

¹²Mare eni igne naugna

iara neke toghodi iheire naikno te kuma te tanhi mei ka iara,

eghuteuna iara neke reireghi fakelidi goro sua te glehe kokoi.

¹³Ka narane tuana,

naikno te papara fara igre cheke fakeli ghau iara,

eghuteuna naikno biꞌo re thono glealeꞌa fara,

naugna iara neke toghodi.

¹⁴Ka narane tuana,

puhi te doglo na jateula nogu pohe eghu iara,

eghuteuna puhi te edi te doglo gobigna lepore igne,

jateula pohe te pipichi fabrahu iara igne eghu.

¹⁵Ka narane tuana,

iara neke batudi naikno te dofu,

eghuteuna iara neke toghodi iheire te blughu.

¹⁶Ka narane tuana,

iara neke reireghi fakelidi naikno te kuma

jateula kmadi eghu mare,

eghuteuna kate thoke mei puhi biꞌo ka naikno phosa,

iara mala cheke ranghidi ka fate.

¹⁷Ka narane tuana,

iara lisei soru pari nodi nolaghi mae te diꞌa,

eghuteuna iara fakarhidi naikno teke goigonidi mae te diꞌa ra.

¹⁸“Ka narane tuana,

iara gaoghathogu na iara gne ginauna karha raugha,

eghuteuna iara ginauna lehe kolho ka sugagu na.

¹⁹Ka narane tuana,

iara gaoghathogu na iara rheta jateula kaisei gaju te kotu te karha keligna ra eghu,

eghuteuna au ghegna kmana khoꞌu te keli.

²⁰Ka narane tuana,

iara gaoghathogu na nogu nafnakno iara na ginauna au fabrahu,

eghuteuna iara ginauna jaola nheta fabrahu.

²¹“Ka narane tuana,

naiknore au kmu nei fanomho fakeli

ka nogu farirhiu iara re.

²²Eghuteuna kate cheke te gnafa iara na,

theo kaisei naikno te chekeni kaisei glepo na,

naugna nogu cheke iara igre thofno keli fara.

²³Ka narane tuana,

mae iheire te ofo mala nomhini nogu cheke iara na teu igre,

jateula naikno te ofo nakhete mala soru ka nagare ra eghu.

²⁴Ka narane tuana,

naiknore thono keli tadi fara jame te maꞌe muhi iara ka mare na,

eghuteuna nogu maꞌe muhi iara igne farerheta gaoghathodi naiknore.

²⁵Ka narane tuana,

iara jateula mae funei eghu, eghuteuna iara ghathodi puhidi naiknore,

iara jateula kaisei mae komanda ka armi eghu,

eghuteuna iara fameomego nagnafadi iheire te au diꞌanagnafa.”

Job neke khuru cheke

¹“Gognaro na iara kuekuꞌe,

eghuteuna mae majaghani igre mare maꞌe ghau iara.

Kmadi re theo nafudi fara.

Mae kuekuꞌe igre theome nabadi te toghodi nogu khuma iara re

mala reireghidi sipu re!

²Mae igre theome tangomana te togho ghau iara na,

naugna mare kuekuꞌehi nei jaola thono glaꞌe fara.

³Mae igre thono kuma nei rofo fara eghu.

Eghume leuleghu fata na, mare jifla bongiro

tei ghamu glathi gaju te moja

aheva te thafoni mare ka namono nagou na.

⁴Mare hata unha nafnata khakla gaju te diꞌa mala ghamu.

Neubane glathi gaju te diꞌa are,

nu mare jaola ghamu.

⁵Naiknore khi teidi mae igre,

eghuteuna ngolhi fajifladi ka namonore,

jateula mae te blau eghu.

⁶Mae igre theo suga te mala au tagna na,

aonu mare au tafri kolho ke lamna gluma thina

ka geri jari.

⁷Mare eha tafri kolho farihotei mata,

jateula khuma mata eghu,

eghuteuna mare khapru fodu ke pari gaju.

⁸Mae khuekuꞌe igre fameomekro nei theo kaisei nangha te keli.

Naugna igne, naiknore puridi

nei brue fajifladi ka namono.

⁹“Eghuteuna gognarona, thudi mae igre,

maꞌe ghau iara ka khoje te diꞌa.

Uve, mare loku ka nanghagu iara na

jateula kaisei cheke nagho eghu.

¹⁰Mare tirodi ghau iara,

eghume mare mei kmisu kolho ka tathagu iara re.

¹¹God faglaꞌe ghau iara nei para ghau iara,

eghume mare eni kolho unha glepo te mala nenei ghau iara na.

¹²Mare loku fodu mala magri ghau iara,

mala rikha tei iara delei.

Mare tarabanahi te mala mei

goigoni ghau iara na.

¹³Mare goigoni nogu nabrou iara na,

eghuteuna iara theome tangomana te rikha na.

Kate goigoni ghau iara na,

mare theome magnahaghei ihei nga te mala toghodi mare na.

¹⁴Mare mei nenei ghau iara

jateula armi te tei ruma ka gringni thina te phaꞌera eghu.

Uve, mare mei toku tafru ghau iara

jateula galo te poha te mei toku tafru ghau iara ra neu.

¹⁵Iara mhaghu nogu fara kate thoke mei puhi biꞌo igne.

Nogu nafnakno iara na ghosei la tei dofini kolho

jateula gagahu khaꞌaghi te pala te tei nuri ra neu.

Eghuteuna nakarhagu iara teke keli ia jaola tei dofini ka iara

jateula kaisei khoveo te pala te tei ka nuri ra neu.

¹⁶“Gognarona, nakarhagu iara na namo tei dofini.

Eghuteuna iara au papara leuleghu narane kolho.

¹⁷Ka bongi na,

khabru igne jateula te ghamu ka nhubragu iara re eghu.

Te kabru lamna ka thinigu iara na igne,

theome tangomana te khusu na.

¹⁸Khabru igne thofno goigoni guligu iara na.

Khabru igne jateula te pirukini graragu iara na eghu.

¹⁹Khabru igne koko soru ghau iara pari

ke lamna chopu.

Eghuteuna iara tharuma’ei lepo jateula nakrofu eghu gognarona.”

Job ne tarai ka God

²⁰“God, iara tanhi ari ka agho,

nu iagho theome cheke tughu ghau kolho.

Iara kegra tarai ari ka agho,

nu iagho filo kolho ka iara.

²¹Iagho mei nenei ghau iara.

Eghuteuna ka nolaghi ka khamemu iagho, iagho fapara ghau iara.

²²Iagho snakreni nuri mala pala ghau tei.

Eghuteuna iagho koko haghe ghau kligna mala pala tafri ghau

ke lamna kaisei maraghata biꞌo.

²³“Tutuani, iara laseni iagho ginauna snakre ghau iara ka glehe,

eghuteuna kuru tei ghau ke lamna beku,

ka namono teke vavahi maladi iheire te karha teu igre,

nu mae igre ginauna na lehe hui.

²⁴Jame kaisei mae diꞌa nakarhagna na,

mana tanhi mei ka iara,

eghuteuna iara na theome figri tagruni mana.

²⁵Iara tanhi koba baludi naiknore

te au ka puhi biꞌo,

eghuteuna iara kokhoni nogudi fara naikno te kuma.

²⁶Aonu kate hironi iara puhi te keli na,

nu puhi te diꞌa kolho te mei goigoni ghau iara na.

Eghuteuna kate ofoni iara naphae na,

gromno kolho te soru mei na.

²⁷Nagnafagu iara na fodu ka diꞌanagnafa,

eghuteuna iara au papara fabrahu.

²⁸Leuleghu fata na tathagu foflogu re romno soru,

jateula te au teu ke lamna gluma te romno ra eghu.

Iara kegra farihoteidi naikno te khapru teu jare,

ne tanhi mala togho ghau.

²⁹Naoglagu iara na tanhi fadiꞌa

jateula naoglagna khuma mata eghu.

Iara au thegu kolho

jateula nanghaji biꞌo ka namono nagou ra eghu.

³⁰Thinigu na brana fara ka fagrutu.

Eghuteuna guligu iara na jateula te thunu ka naprai ra lau.

³¹Gognarona, iara nomhidi koje ghita diꞌanagnafa,

eghuteuna kate ifu mare phoposa na fanomhodi re jateula te tanhi eghu kolho.”

Te chekeni mae Job na mana doglou ka tathagna God

¹Job ne cheke eghu:

“Iara la enihi kaisei nhaꞌa cheke,

mala theome filo tutu ka gaꞌase,

eghuteuna thosei ghaoghatho mala eni puhi te diꞌa na ka naꞌa.

²God mae ihei te au nolaghi fateote’o na mana au kligna,

mana parani naikno na jame te eni mana glepo te diꞌa igne.

³Mana kuru mei puhi biꞌo mala thokedi naikno te diꞌa.

Uve, mana ginauna mala goigonidi

iheire te tapla jafra ka nakhibo.

⁴God na la lasedihi gobigna lepo te edi iara re,

eghuteuna mana lasedihi vido te gnafa aheva te tei iara tagna na.

⁵“Iara theome leghuni puhigna mae te boho ka chaichaghi na,

eghuteuna iara theome lase chaghi ka ihei.

⁶Lisa lao ka God mala fafaja nakarhagu iara na,

mala filoni mana

te theome eni iara kaisei glepo te diꞌa na.

⁷Jame te lisani iara puhigna God te keli na,

ba jame te leghuni kolho iara unha te filoni iara na,

ba khamegu iara na batu ghau iara ka nakhibo,

⁸uve, lisa lao ka keha maei

mala hata gano teke joꞌu iara ra,

mala ghamu.

⁹“Jame khaeni iara khetogna keha mae na,

eghuteuna agra tei ka naꞌa,

¹⁰uve, snakreni khetogu iara na mala

jateula nogna gaꞌase gloku eghu keha mae na

mala thuru balugna mana.

¹¹Jame tapla jafra iara ka nakhibo te famamaja ikno fara igne,

mae mala fate na nabagna te para ghau iara leghuni vetula na.

¹²Nafnata nakhibo te tapla jafra igne

jateula khaꞌaghi biꞌo te nhako te tei thoke Gehena ia eghu.

Eghuteuna tangomana te nhako fateo gobigna lepo te khotodi iara re.

¹³“Jame kaisei nogu mae gloku iara ba kaisei nogu gaꞌase gloku iara

khuru cheke ka iara,

aonu iara fanomho fabrahu kolho tagna,

eghuteuna iara fadoglini glepo igne.

¹⁴Jame te theome eni iara igne na,

unha gne nate eni iara kate mei God te fate ghau iara na?

Eghuteuna kate mei God te filo ghau iara na,

unha nate chekeni iara ka mana ginauna?

¹⁵God igne ngala teke vuavuha ghau iara

ka thiꞌagna idogu iara na,

mana jaola neke vuavuhadi mare

ka thiꞌadi idodi re.

¹⁶“Leuleghu fata na iara toghodi iheire te kuma,

eghuteuna iara farerheta gaoghathodi naikno biꞌo teke lehehi khetodi re.

¹⁷Leghu narane na iara tufa ghedi gano goro sua

tela lehehi kmadi ra.

¹⁸Leuleghu fata ka nakarhagu iara na,

iara reireghi fakelidi iheire te theo kmadi,

eghuteuna iara togho haghedi goro naikno biꞌo tela lehehi khetodi ra.

¹⁹Kate filodi iara

naikno te kuma te theo nodi pohe

te lehe ka greka na,

²⁰iara tufa nodi pohe.

Pohe igre neke horo

ka khakla ka nogu sipu iara.

Aonu naikno igre ne brana thinidire ka pohe igre,

mare ne cheke fakeli ghau iara.

²¹Jame te ei fagaglana iara ka khamegu na te mala tutidi

iheire te theo kmadi,

naugna iara laseni mae mala fate igne mana na phile balugu iara ka fate na,

²²iara snakreni God mala lolhopa khamegu na

funu ka fafragu na.

²³Iara theome magnahaghei te eni kaisei glepo te diꞌa ka naikno te kuma,

naugna iara mhaghuni nogna nolaghi God na,

eghuteuna iara nanga nogu glahu goigoni ghau mana.

²⁴“Iara theo nogu grouronu kolho ka nogu dedei gre.

Eghuteuna iara theome lelheghu ka glepo te au ka iara igre.

²⁵Iara theome fahaehaghedi kolho

glepo kmana te khotodi iara igre

naugna iara neke loku heta.

²⁶Neuba iara ne filo ka naprai te sigla ka maloa gne,

ba glaba te famane fara filogna na igne,

nu iara theome pogho soruni kolho kaisei ka phei igre.

²⁷Iara theome poru te mala kilo fnaknodi phei glepo igre.

Eghuteuna iara theome gnangho ka khamegu na

mala pogho sorudi phei glepo igre.

²⁸Jame teke eni iara nafnata nakhibo igne na,

iara theome keli ranghini God mae ihei te haghe fara,

eghuteuna iara nabagu te lehe na.

²⁹“Iara theome glealeꞌa kate papara nogu naokare,

eghuteuna iara theome glealeꞌa kolho kate thokedi puhi biꞌo mare na.

³⁰Iara theome nakhibo ka nogu chekere

naugna iara theome kilo mei puhi biꞌo ka mare.

³¹Nogu mae gloku iara igre lasenihi

te leuleghu fata na mare te gnafa na ghamu fakeli ka nogu suga tapuale iara na.

³²Iara toredi naikno phosa te mei ka namonogu iara na

mala au ka nogu suga tapuale iara na.

Eghuteuna mare te gnafa na kaisei thei,

mei ruma lamna ka nogu suga tapuale iara na.

³³Kmana naikno fariuriu pophoru nakhibodi re,

nu iara theome tangomana te pophoru nakhibogu re.

³⁴Iara theome mhaghudi unha jame te toutonu eigu iara naiknore.

Neuba mare ne cheke fadiꞌa ghau iara,

nu iara theome tangomana te au kmu ka nogu suga tapuale na.

³⁵“Jame iara magnahaghedi fara

keha mae mala fanomho mei ka nogu cheke iara ka fate na.

Iara na lilisei nogu fagaglana ka gobigna lepo te chekedi iara re.

Eghume, lisa lao ka God mae ihei te au nolaghi fateote’o igne,

mala cheke tughu ka iara.

Lisa lao ka mae ihei te fathoro ghau iara igne

mala rioriso soru unha teke edi iara re.

³⁶Ghotilo laseni, iara ginauna glealeꞌa fara te mala pala

unha te rioriso mana ke kligna fafragu iara na.

Eghuteuna iara ginauna lilisei ke kligna phaꞌugu

jateula khepi nafnakno eghu.

³⁷Ka narane tuana,

iara ginauna kegra haghe jateula kaisei thugna king eghu ke ulugna God,

eghuteuna chekedi ka mana gobigna lepo teke edi iara re.

³⁸“Jame te theome reireghi fakelini iara nogu glose na,

eghuteuna iara goigonini,

³⁹ba jame ghamu fahui iara gobigna lepo teke kotu ka nogu nagare iara na,

ba aknu phorudi mae iheire teke joꞌu nagare igne

mala rofo kolho,

⁴⁰te eghu na, lisa lao ka phono nei gaju te diꞌa eghu kolho

mala kotu ka nagare igne.”

Nogna cheke mae Job igre gnafa agne.

¹Thilo kheragna mae Job igre tirodi cheke tughu fabrahu ka mana, naugna mana thofno fatutuani ni ne mae doglo thegna teuna.

Mae Elihu ne cheke ka thilo mae kheragna mae Job igre

²Nu ka narane tuana, kaisei mae nanghagna na mae Elihu. Mana thugna mae Barakel ka tharaknagna mae Bus, eghuteuna mae Bus gne tharaknagna mae Ram. Mae Elihu ne diꞌatagna fara ka mae Job, naugna mae Job te chekeni na mana kaisei mae doglo, eghuteuna mana chekeni fabrahu te God na theome doglo te parani mana na. ³Mae Elihu jaola ne diꞌatagna ka thilo mae kheragna mae Job igre, naugna thilo mare ne theome tangomana te cheke tughu ka nogna cheke mana re, nu mare fateni mana eigna mana naba te mala papara na. ⁴Nu naugna mae Elihu gne mae ke majaghanidi thilo mae igrei, mana ofo neu ne ghilei gnafa mare nodi cheke re. ⁵Kate filoni mana te theome ghagri thilo mae igre kaisei cheke na, mana ne thono diꞌatagna fara.

⁶Aonu mae Elihu ne cheke eghu:

“Iara kaisei mae majaghani kolho,

eghuteuna ghotilo mae biꞌo,

eghume iara mhaghu nogu te cheke fajiflani

gaoghathogu na ka ghotilo.

⁷Te ghathoni iara na,

te keli na ghotilo mae biꞌo ra

jame cheke ka famane gaoghatho te keli.

^8-9Theome mae biꞌo kolho te au gaoghatho te keli na,

eghuteuna theome mae biꞌo kolho

te laseni unha te doglo na.

Tharunga te Blahi nogna God mae ihei te au nolaghi fateote’o igne,

te tusu ranghini mana gaoghatho te keli nei glalase teuna.

¹⁰“Eghume iara magnahaghei ghami ghotilo te fanomho mei ka iara

kate cheke fajifladi iara gaoghathogu igre.

¹¹Iara famane fanomho fakeli

ka nomi cheke ghotilo ra.

Eghuteuna iara nomhidi nomi gaoghatho ghotilo ra

kate fariuriu hironi ghotilo unha te mala chekeni na.

¹²Iara neke fanomho fakeli ka ghotilo,

nu te filoni iara na gaoghathomi ghotilore

sokmo fara.

Eghuteuna theo kaisei ka ghotilo

te chekeni ne jafra mae Job teuna.

¹³Fiofilo ghami,

glahula ne filo deni gaoghatho te keli na eghu ghotilo.

God kolho teke tusu lao cheke tughu ka mae Job,

naugna ghotilo theome nabami.

¹⁴Job theome fariuriu ngau te fapholai balugu iara na.

Nu kate eni mana na,

iara ginauna na theome cheke tughu ka mana jateula puhi

teke tusu lao ghotilo ka mana igne eghu.”

Elihu ne cheke ka Job

¹⁵“Job, thilo mae igre la sokmohi,

eghume thilo mae igre theome tangomana te cheke tughu nigho na.

¹⁶Thilo mae igre theo kaisei glepo nate chekeni na,

eghume iara theome tangomana te fiti kegra ofo teu kolho na.

¹⁷Gognarona, iara ginauna cheke ka iagho.

Uve, iara ginauna chekeni unha te ghathoni iara na.

¹⁸Iara theome tangomana te ofo na,

naugna iara fodu ka cheke,

eghume iara na cheke gognarona.

¹⁹Iara namo poha ka cheke gognarona,

jateula waen majaghani te totoho ka guli nanigot te popoto te poha ra eghu.

²⁰Iara rogu cheke,

mala keli gaoghathogu na.

²¹Job, iara ginauna na theome phile balumu iagho,

eghuteuna iara theome tangomana la te phile baludi thilo mae igre.

Eghuteuna iara ginauna na theome fariuriu mala famaemaheni

kaisei mae ka ghotilo.

²²Iara theome tangomana te cheke famaemahe ka ghotilo na,

naugna jame eni iara igne na,

God mae ihei teke vuavuha ghau iara na,

ginauna ghosei para ghau iara.”

¹“Job, fanomho sagho ka cheke

nate cheke iara ka iagho igre.

²Gognarona, iara na funu cheke,

nogu cheke iara igre la namo jifla mei ka foflogu iara na.

³Cheke nate chekedi iara igre,

doglo nei tutuani eghu.

⁴Tharunga te Blahi nogna God mae ihei te au nolaghi fateote’o igne,

teke vuavuha ghau iara na,

eghuteuna tusu mei nakarha ka iara.

⁵Jame te tangomana iagho te cheke tughu na,

iagho kegra haghe mala fapholai balugu iara.

⁶Iagho jateula iara eghu kolho

ka tathagna God na.

God na jaola neke vuavuha ghau iara ka glose,

jateula iagho eghu.

⁷Iagho thosei mhaghu ghau iara.

Iara ginauna na theome goigoni nigho iagho.

⁸“Iara neke nomhini unha te chekeni iagho na.

⁹‘Iagho neke chekeni te

iagho doglo eghuteuna iagho theo nakhibomu.

Eghuteuna iagho chekeni te

iagho klino ka tathagna God na eghuteuna iagho theome naba te mala papara na.

¹⁰Te chekeni iagho na,

God filodi thua nafnata gaoghatho te mala para nigho iagho na,

eghuteuna ghatho ghau iara nogna naoka mana.

¹¹Te chekeni iagho na

mana haru phei ghahemu iagho re,

eghuteuna mana filo leghudi gobigna lepo teke edi iagho re.’

¹²“Nu te ckekeni iara na, iagho jafrau,

naugna nafnaknogna God na haghe salaꞌuni nafnaknogna naikno na.

¹³Ba, iagho cheke faparini God,

naugna mana ne theome cheke tughuni nou khuru cheke na?

¹⁴Neuba God ne cheke kmana fata,

theo kaisei naikno te fanomho ka mana.

¹⁵Kate thuru teu naiknore,

God tangomana te cheke mei ka mifi.

¹⁶Mana cheke faꞌikoi ka khulidi re

eghuteuna famamhaghudi

ka nogna cheke re.

¹⁷Mana eni igne mala thosei tapla jafra naiknore ka nakhibo,

nei mala thosei fahaehaghe.

¹⁸Naugna mana ginauna theome snakredi naiknore mala soru pari ka beku.

Uve, mana ginauna theome snakredi mala lehe ka magra.

¹⁹“Mana snakreni fogra na mala thokedi naiknore,

eghuteuna naiknore theome gnafa te kabru fara ka nhubradi re.

Ka puhi igne mana fadoglini nakarhagna mana na.

²⁰Kmana fata,

mae ihei te fogra na mana tirogna ghamu,

eghuteuna neubane famane gano

filo diꞌa kolho ka tathagna mana na.

²¹Mana gagaro fara,

eghuteuna iagho tangomana te kahadi kolho

nhubragna te gnafa mana re.

²²Mana namo lehe,

mala soru pari ke lamna beku.

²³Neubane kaisei thogha engel te au na,

kaisei kolho nate toghoni mana na,

eghuteuna cheke ranghini mana unha te doglo na.

²⁴Engel igne tangomana te keli ranghini mana,

cheke eghu ka God,

‘God, iagho thosei snakreni mae igne mala soru pari ke lamna beku.

Iara au kaisei nabrou te mala fakarhani mana na.

²⁵Ka narane tuana,

thinigna mae igne tangomana teke keli fapulo na,

eghuteuna mana ginauna nake nheta fapulo jateula mae majaghani eghu.’

²⁶Aonu mae igne tangomana na teke tarai ka God,

eghuteuna God ginauna kelitagna ka mana.

Eghuteuna mae igne ginauna glealeꞌa fara

kate tei kegra mana ke ulugna God,

naugna God neke fakelini mana mala theome lehe.

²⁷Ke leghu na mae igne ginauna koje

eghu ka naiknore,

‘Iara tapla jafra ka nakhibo,

eghuteuna iara theome edi glepo te doglo re,

nu God theome para ghau iara eidi nakhibo igre.

²⁸Iara namo lehe mala soru pari ka beku,

nu mana hata fapulo ghau iara kau glehe,

eghuteuna iara gognarona karhau mala filoni naphae na.’

²⁹“Uve, leghu fata na,

God edi glepo igre.

³⁰Leghu fata na, mana theome snakredi naiknore mala soru pari ke lamna beku,

eghuteuna mana eni nogna juta na mala agha tei tadi.

³¹“Job, iagho fanomho mei ka iara.

Iagho au kmu, mala kulu cheke iara.

³²Nu jame te au iagho kaisei glepo te mala chekeni na,

iagho cheke mei mala nomhi iara.

Iara magnahaghei nomhini nou cheke iagho na

mala laseni te doglo iagho na.

³³Nu jame te theo iagho kaisei glepo te mala chekeni na,

te keli na iagho au kmu kolho,

eghuteuna fanomho mei ka iara.

Iara ginauna farirhiu nigho famane gaoghatho te keli.”

Elihu neke chekei ka thilo kheragna mae Job

¹Elihu ne cheke eghu:

²“Ghotilo thilo mae glalase te lalase fara ra,

ghotilo fanomho mei ka nogu cheke iara igre.

³Job neke cheke eghu, ‘Eigna khuli na fariuriuni cheke na,

jaola glapi na fariuriuni gano na te mamahe ba theo.’

⁴Tahati mala loku fodu

mala laseni unha te doglo,

nei unha te keli.”

Elihu ne cheke eigna unha mae Job teke chekeni

⁵“Job neke cheke eghu,

‘Nakarhagu iara na doglou kolho,

nu God theome snakre ghau iara te au nogu nolaghi iara na.

⁶Neuba iara ne doglo neu,

mana filo ghau iara na

jateula kaisei mae chaichaghi eghu.

Eghuteuna neuba iara ne theome naba te mala papara na,

God fadi ghau iara

eghuteuna iara tarabana mala lehe kolho.’

⁷Theo kaisei naikno te jateula Job teuna.

Mana magnahaghei te koꞌudi puhi te diꞌa jateula khoꞌu teuna.

⁸Mana fofodu fabrahu kolho

baludi naikno te diꞌa re.

⁹Jame kaisei mae chekeni mana ne theo nafugna kolho

te mala eni unha te glealeꞌani God na.

¹⁰“Ghotilo thilo mae te lalase fara ra,

ghotilo fanomho ka iara.

God mae ihei te au nolaghi fateote’o igne,

mana theome eni kaisei glepo te diꞌa.

¹¹Mana folidi naiknore

leghuni gloku te eni mare na.

Eghuteuna mana tufa ka mare

unha te nabadi puhidi mare re.

¹²Tutuani, God na theome eni kaisei najafra.

Uve, God mae ihei te au nolaghi fateote’o igne,

mana theome tangomana te goigoni puhi te doglo na.

¹³Theo kaisei naikno te tusu lao nolaghi ka God,

te mala funei fruni mana nauthoglu igne.

¹⁴Jame hata fapulo mana Tharunga gna

te mala fakarha ghita tahati na,

¹⁵tahati te gnafa ka nauthoglu igne ginauna lehe,

eghuteuna tahati ginauna nake figri ka glose.”

Elihu ne cheke ka Job

¹⁶“Job, jame lalase iagho na,

iagho fanomho mei ka iara.

¹⁷Ba, jame tirognani God puhi te doglo na,

iagho gaoghathomu na mana tangomana te funei frunini ni nauthoglu igne?

Ba, iagho ginauna cheke faparini

God mae ihei te doglo nei nheta fara teu igne?

¹⁸Eigna te chekeni God na

mae funeigna nauthoglu igne mare theo nafudi,

eghuteuna mae mala baubatu igre theome doglo.

¹⁹Mana theome phile baludi mae mala baubatu,

eghuteuna mana theome fanomho ka mae te dedei nei mae te kuma,

naugna mana ngala teke vuavuhadi mare te gnafa na.

²⁰Ghosei kolho, mare te gnafa na ginauna lehe farihotei bongiro.

Uve, naiknore na rhana nodi, neubane mae nheta fara,

bligi kolho ranghini God te hata fadeleidi re.

²¹“God na filo tutu ka puhidi naiknore.

Eghuteuna filo ka vido te gnafa aheva te tei mare tagna na.

²²Theo kaisei vido te romno fara,

naba naikno te diꞌa igre te tei poru ka tathagna God na.

²³Tahati theome lilisei narane

niha nau nate tei tahati ke ulugna God ka fate na.

²⁴God lasedihi mae biꞌo re,

eghume mana theome nanga nogna te mala lase fakelidi mare

ame goigonidi nga nei tughudi eghu mare.

²⁵God lasedihi puhidi mae biꞌo igre,

eghume, mana koko sorudi bongiro,

eghuteuna goigonidi gnafa.

^26-27Mae igre theome leghudi nogna cheke mana re,

eghuteuna mare theome nanga nodini puhigna God.

Aonu, mana ne paradi naikno te diꞌa igre,

ke uludi naikno te gnafa re mala kafe filoni mare.

²⁸Leuleghu fata na mare neke goigonidi fara

naikno te kuma re.

Eghuteuna naikno te kuma igre tanhi ka God.

God nomhidi iheire te au kokhonidi,

ne toghodi.

²⁹Ba, jame God nomhidi mare,

nu theome eni kaisei glepo teuna,

ihei gne te au nogna nolaghi te mala chekeni ne jafra mana teuna?

Jame God pophoru tathagna nei foflogna teure,

ihei gne nate filoni mana na?

Nu mana saghe leghudi naikno nei kantri teu igre.

³⁰Eghume God na theome snakreni naikno te diꞌa na mala funei fruni ni kaisei kantri,

mala theome lilisei phighoro mana ranghidi naiknore.

³¹“Job, iagho cheke thakledi nakhibomu re ka God.

Eghuteuna iagho nhaꞌa cheke mala thosei ke tapla jafra ka nakhibo ginauna.

³²Iagho toreni God

mala fakakhana mana najaframu iagho teke theome filodi iagho re.

Eghuteuna iagho nhaꞌa cheke ka mana na

teke theome eni iagho na.

³³Job, jau iagho magnahagheni God te mala ke tughu puhimu iagho na

leghuni gaoghathomu iagho na,

naugna iagho ne tirouni unha te eni God na.

“Iara theome tangomana te chekedi nakhibomu iagho re ka God,

iagho themu te mala vahini puhi te mala leghuni.

Eghume, iagho cheke meini gaoghathomu iagho na ka iara.

³⁴Naikno te au tadi gaoghatho te keli nei lalase teure

ginauna kelitadi ka nogu cheke iara na, na cheke eghu,

³⁵‘Unha te chekeni mae Job igne theo kaisei glalase te keli tagna,

eghuteuna nogna cheke mana igre khogla fameomekro kolho.’

³⁶Ghehati magnahagheni fara God te parani fara Job,

naugna mana ne cheke jateula kaisei mae te diꞌa neu ne cheke fadiꞌani God.

³⁷Puhi te cheke fadiꞌani mana God igne,

mala pagu biꞌo kolho nakhibogna re.

Mana goigoni ghami ghehati proaprosa khamegna re,

eghuteuna mana jaola khuru cheke ranghini God.”

¹Elihu tudu ne cheke eghu:

²“Job, jau na puhimu iagho gne theome doglo.

Te chekeni iagho na nakarhamu iagho na

doglo kolho ka tathagna God na eghu.

³Ka vido narane tuana la iagho neke chekeni

jame te theome tapla jafra iagho ka nakhibo na

theo kaisei glepo te keli nate togho nigho iagho na.

⁴“Gognarona, iara ginauna cheke tughu ka iagho

nei ka thilo mae kheramu iagho ra.

⁵Filo haghe sagho ka maloa gno mala filodi khoveo are,

reꞌe haghe fara ke kligna glose.

God na ke haghegna tuanai.

⁶Neuba iagho ne tapla jafra ka nakhibo, theome tangomana te haboni God.

Eghuteuna neuba iagho ne edi kmana glepo te diꞌa,

theome tangomana te eni kaisei glepo tagna.

⁷Neuba iagho ne edi glepo te doglo re,

nu theome toghoni God kolho.

God na theome ngaguni kaisei glepo kolho ka khamemu iagho na.

⁸Nakhibomu iagho re goigonidi kolho

keha naiknore.

Eghuteuna glepo te keli te edi iagho re,

tangomana te toghodi naiknore kolho.

⁹Kate thoke mei puhi biꞌo ka naiknore,

naiknore tanhi nodi fara.

Uve, kate kegra haghe mae biꞌore te goigonidi naiknore,

mare ehani ihei mala toghodi.

¹⁰“Nu mare theome kilo tei kolho ka God

mae ihei teke vuavuhadi mare na.

Eghuteuna ka gromno na mare theome eha tei ka God

mae ihei teke tusu lao khoje ka mare.

¹¹Neuba God ne vuavuha naikno

mala lalase salaꞌudi nanghaji ka maloa gne neu,

naiknore theome figri tei ka mana mala toghodi.

¹²Naugna naikno te diꞌa re fahaehaghe fara,

God theome cheke tughu ka mare.

¹³Theo nafugna kolho te mala tanhi na,

naugna God mae ihei te au nolaghi fateote’o igne,

theome filo glanidi mare,

eghuteuna mana theome nomhidi mare.

¹⁴Jame te eghu na,

faꞌunha eghu fanomho mei mana ka iagho ghema Job.

Te chekeni iagho na iagho theome filoni God,

nu iagho ofoni kolho mana mala cheke tughuni nou gaoghatho iagho na.

¹⁵Ba, gaoghathomu iagho, kate diꞌatagna God na,

mana ginauna theome paradi naikno te diꞌa re,

eghuteuna theome ghathodi kolho nakhibodi mare re eghu?

¹⁶Job, nou cheke iagho igre theo nafudi kolho,

iagho cheke jateula kaisei mae te fameomekro eghu.”

¹Elihu tudu ne cheke eghu:

²“Iagho ofou, nei fanomho katha vido

mala nomhidi glepo te magnahagheidi iara te mala cheke eigna God.

³Iara hata nogu glalase funu ka namono delei.

Eghuteuna iara ginauna hata mei glalase igne,

mala laseni naiknore God mae ihei teke vuavuha ghau iara igne,

God te thofno doglo fara na.

⁴Eghume unha te chekedi iara ka iagho igre thofno tutuani fara.

Naugna iara kaisei mae lalase fara.

⁵“God na au nolaghi biꞌo,

nu mana theome thodoni ihei.

Mana thono lasedi fara gobigna lepore.

⁶Mana snakredi naikno te diꞌa re mala lehe kolho,

nu mana toghodi naikno te kuma re mala au nodi nolaghi mare.

⁷God na theome filo kokodi iheire te doglo,

eghuteuna mana fagnokro haghedi ka sape funei,

eghuteuna fafnaknodi fabrahu.

⁸Nu jame te khale mare ka puhi biꞌo na,

mare na au papara,

⁹aonu God ginauna cheke ranghidi unha teke eni mare na,

nei falalase ranghidi teke tapla jafra mare ka puhi fahaehaghe na.

¹⁰Mana cheke ka mare mala fanomho fakeli,

kate fadoglidi mare na.

Eghuteuna cheke faheta ka mare mala ke figri mare

mala koko mare puhidi te diꞌa re.

¹¹Jame te fanomho mare te leghuni God

eghuteuna loku fakeli ranghini mana teuna,

mare ginauna au ka nakarha te keli,

eghuteuna au ka pharikeli fabrahu ghilei kuekuꞌe.

¹²Nu jame te theome fanomho fakeli mare ka God,

mare ginauna lehe ka magra

naugna mare ne theome lalase.

¹³“Iheire te theome rouronu ka God

igre diꞌa tadi fara ka nagnafadi re.

Eghuteuna neuba God ne fadoglidi mare,

mare tirodi tarai kolho ka God mala toghodi mana.

¹⁴Mare lehe kate majaghani nga teu,

naugna mare ne eni puhi te diꞌa na ka nodi sugablahi keha god re.

¹⁵God snakre lao puhi biꞌo mala thokedi naiknore,

mala fakarhidi mare.

Mana snakredi naiknore mala au papara,

mala fanomho mare ka mana.

¹⁶“God ginauna togho nigho iagho mala jifla mei ka puhi biꞌo,

eghuteuna mana ginauna reireghi nigho ka namono te keli.

Mana ginauna fafodu nou tevo iagho na

ka famane gano te keli.

¹⁷Nu gognarona, nakarhamu iagho na fodu ka khabru nei papara,

nu iagho magnahaghei te fathoroni God te eni unha te jafra na!

¹⁸Filo nighoi, ka naikno te diꞌa are

glahu mei faꞌoso oso nigho ka seleni.

Glahu dedei gna nauthoglu igne batu nigho tei jafra

ka puhigna God te doglo na.

¹⁹Nou nanheta, nei nou dedei teu iagho igre

theome naba nate togho nigho kate thoke mei puhi biꞌo ka iagho na.

²⁰Iagho thosei ofoni bongiro,

na eghunu dofi nigho eghu.

²¹Iagho thosei leghuni puhi te diꞌa na.

God na snakre nigho iagho mala papara

mala thosei leghuni iagho puhi te diꞌa na.

²²“Iagho laseni, God na au nolaghi fateote’o.

Mana kaisei famane velepuhi,

salaꞌudi gnafa keha velepuhi are.

²³Theome tangomana kaisei naikno te cheke ranghini God te mala eni unha te magnahaghedi naiknore.

Eghuteuna jaola theome tangomana kaisei naikno te laseni

aheva teke eni God glepo te diꞌa na.

²⁴Leuleghu fata na, iagho mala cheke fakelini nogna gloku mana na,

jateula te edi naiknore ka khoje are eghu.

²⁵Naikno te gnafare filodihi glepo igre,

nu tahati tangomana te filo fakhaba teidi kolho glepo tuare.

²⁶Tahati theome tangomana te lase fakelini nogna nolaghi God na,

eghuteuna tahati theome tangomana te kahadi finogha gna manare.

²⁷“God eni khoꞌu na mala loloro haghe ke kligna glose,

eghuteuna mana eni neke soru mei jateula nakhete neu.

²⁸Eghuteuna mana lilisei khoꞌu igne ke lamna khoveo

mala soru mei jateula nakhete eghu ranghidi naikno fateote’o.

²⁹Theo kaisei naikno te laseni

ne faꞌunha ne thugha tafri khoveo gre teuna.

Eghuteuna theo kaisei naikno te laseni

ne faꞌunha ne poha fila na kligna

ka vido aheva te au teu God tagna na.

³⁰God eni nakafli na mala phae faligohoni mana ka maloa na,

nu eni ke lamna nhorora na mala romno.

³¹Ka nakhete, God reireghidi naiknore,

eghuteuna mana tusu mei kmana gano te keli ka mare.

³²Mana louloku nakafli na jateula goru eghu ka khamegna na,

eghuteuna mana fada tei ka vido aheva te magnahaghei tei thokeni na.

³³Kate nomhini naiknore fila na,

mare laseni nate mei khoburu na.

Khoburu gne fagaglana gna te

diꞌatagna fara God ka puhi te diꞌa na.”

Elihu tudu neu cheke na

¹“Kate ghathoni iara igne, nagnafagu iara na nghali tongana jateula khoburu eghu.

Uve, kroukrofu fara.

²Ghotilo famane fanomho ka naoglagna God

te jifla mei jateula fila teu igne.

³Mana fada tei nakafli na ka vido te gnafa ka maloa gne,

funu ka keha phile tei posa ka keha phile na.

⁴Naoglagna mana igne oa’ongha mei

jateula kaisei fila biꞌo eghu.

Eghuteuna leuleghu fata na ghotilo nomhini naoglagna mana igne,

falalase nogna nolaghi mana na ka nakafli.

⁵Kate cheke faheta God ka fila na,

tahati te gnafa na jaglo noda tagna.

Eghuteuna mana edi glepo te biꞌo

te theome tangomana kaisei naikno ka tahati te lasedi re.

⁶Mana cheke ka thina aes na mala khoko soru mei ke kligna glose,

eghuteuna mana cheke ka nakhete na mala nakhete fabiꞌo.

⁷Mana fakhusudi nodi gloku naiknore,

mala filo glanidi mare glepo te edi mana igre.

⁸Eghuteuna ka nafnata narane igre, glepo te tautagu re tei poru

lamna ka nodi gluma re.

⁹Leuleghu fata na khoburu na jifla mei funu ka nogna vido na,

eghuteuna nuri te rifu na jaola ghaghafa mei.

¹⁰Kate phanga kolho God na

khoꞌu na neke vuhai thina aes ne thono maku fara.

¹¹Mana eni nakafli na mala kafli tongana ka khoveo teke toho fafodu mana ka khoꞌu igre.

¹²Khoveo igre flalo tongana tei faligohoni nauthoglu igne leghuni gaoghathogna God,

eghuteuna reꞌe edi unha teke cheke ranghidi mana re.

¹³Keha fata mana kuru mei nakhete

mala faboubothu glose nei fakakhana nogna namha na.

Nu mana jaola tangomana te famei glepo igre

mala paradi naiknore.

¹⁴“Job, fanomho mei katha vido.

Au kmu sagho mala ghathodi glepo biꞌo te edi God igre.

¹⁵Ba, iagho lasedi ne faꞌunha ne saghe leghudi God khoveo gre teuna,

ba faꞌunha neu nakafli gne ne phae ne fada tongana ka maloa gne?

¹⁶Ba, iagho jaola laseni nogna famane glalase God,

te mala fathaodi khoveo gre ka maloa gne?

¹⁷Kate ghaghafa mei nuri ke mata na,

iagho ginauna brana nigho nei diꞌa thinimu fara

ka pohe te pipichi iaghore.

¹⁸Ba, kate eghu na, iagho tangomana te toghoni God

te mala nhaꞌa haghe maloa gne kligna jateula thiro te sigla ra teuna?

¹⁹“Iagho farirhiu ghami ghehati unha

nate chekeni ghehati eimu iagho ka God na.

Ghehati theome laseni nou puhi iagho na

naugna ghehati thono romno fara phaꞌumi re.

²⁰Iara mhaghu nogu te cheke balugna God,

naugna iara tirogu lehe.

²¹Theome tangomana kaisei naikno te filo ka naprai kate snagla maloa na,

naugna naprai na thono sigla fara.

²²Eghume jaola juta na, juta te phae fabiꞌo fara na jateula gol eghu,

sigla mei ke raru.

Eghuteuna siasigla gna nogna nolaghi biꞌo God na,

tahati mhaghu nodani fara.

²³Nogna nolaghi God mae ihei te au nolaghi fateote’o igne, biꞌo fara,

tahati theome tangomana te lao namo tagna na.

Naugna puhigna mana na thofno doglo fara,

mana theome tangomana te goigoni ghita na.

²⁴Eghume, naikno te gnafa igre kafe ghatho tahuni mana.

Tutuani, iheire te lalase igre jaola ghatho tahuni mana.”

God ne cheke ka Job

¹Aonu nogna cheke tughu LORD ka mae Job na ne jifla mei ka kaisei khoburu. Mana ne cheke eghu:

²“Ihei site pophoru ka nagnafagna te romno?

Nou cheke iagho igre fakakhana ni

te theome laseni kolho iagho kaisei glepo na.

³Jame kaisei mae tutuani iagho na, iagho kegra haghe,

cheke tughu mei nogu faghusna iara igre.

⁴“Iagho au neku aheva, kani teke vuavuha iara nauthoglu igne?

Jame te lasedi iagho glepo igre,

iagho cheke mei ka iara.

⁵Ihei teke fafaja krepagna nauthoglu igne?

Ihei teke hata rula teke fafaja brahugna na?

Ba, iagho theome laseni?

^6-7Tifa na iara neke lilisei khegra thina maku mala pala hagheni nauthoglu igne.

Ka narane tuana, nathunu re kelitadi fara neke koje fodu,

eghuteuna engel kligna re jaola ne eha balu gleꞌa.

⁸“Ihei teke eni fofotagna thongna gne

kate jifla mei khoꞌu na te toku tafru nauthoglu gne?

⁹Iara neke toku tafru thongna igne

baludi khoveo thuta te romno igre.

¹⁰Iara neke lilisei nohi

aheva thongna gne nate mei snoto na.

Uve, iara neke lilisei kaisei gringni thina,

mala bobotho fanagra nhorora gne mala theome mei lamna namono.

¹¹Iara neke cheke eghu ka khoꞌu na,

‘Iagho mei posa ka vido igne eghuteuna iagho snoto jare.

Nou nolaghi iagho na tangomana te haghe posa ka vido igne eghuteuna hui.’

¹²“Ba, iagho neke chekeni hamerane na

mala thakle haghe leuleghu narane?

Ba, neke nomhi nigho iagho?

¹³Ba, iagho tangomana te cheke faheta ka naprai

mala kuru teini naphae na mala tei kasa ka nauthoglu igne,

eghuteuna khi fajifladi ka namono aheva mare te poru teu naikno te diꞌa igre tagna na?

¹⁴Kate haghe naphae na,

tahati tangomana te filo glanidi thogele nei glogu teure.

Reꞌe jateula kaisei pohe te famane fara ra eghu filodi re,

eghuteuna reꞌe jateula kaisei famane glepo eghu.

¹⁵Naphaegna naprai na,

siasigla fara maladi naikno te diꞌa re.

Nu hamerane na lhotidi mare te mala eni puhi te diꞌa na.

¹⁶“Ba, kaisei fata na iagho neke thokeni vido ka pesigna thongna na,

ba iagho neke nonolohi ka pesigna nhorora na?

¹⁷Ba, iagho neke filohi

grengatha ka namonodi naikno te lehe

te thofno romno fara ia?

¹⁸Ba, iagho laseni krepagna nauthoglu igne?

Jame te laseni iagho na, iagho cheke mei ka iara!

¹⁹“Ba, iagho laseni vido aheva te jifla mei naphae tagna na,

ba vido aheva te funu mei gromno tagna na?

²⁰Ba, iagho tangomana te falaseni kolho

vido aheva te tei thokeni naphae ghe gromno na?

Ba, iagho laseni nabrou

mala leghuni teke figri repa na?

²¹Tutuani, iagho lasedi gobigna lepo igre,

naugna iagho neke karhahi ka narane teke vuavuha iara nauthoglu igne.

Tore! Iagho mala lasedi,

naugna iagho thono kuekuꞌe fara.

²²“Ba, iagho thokenihi suga

aheva te tathaji iara thina aes na?

²³Iara tathaji glepo igre,

tarabana kolho maladi narane te thoke mei puhi biꞌo nei ka magra.

²⁴Ba, iagho thokenihi vido

aheva te jifla mei nakafli tagna na?

Ba, iagho thokenihi vido

aheva nara te haghe mei tagna na?

²⁵Ihei teke eni nabrou

te leghuni te soru mei nakhete na?

Eghuteuna ihei teke fasnagla nabrou

te leghuni te poha fila na?

²⁶Ihei teke snakreni nakhete na teke soru mei ka namono nagou

te theo kaisei naikno tagna na?

²⁷Uve, ihei si teke kuruni nakhete gne teke soru mei ka namono te khapra

te mala kotu haghe buburu grea?

²⁸Ba, nakhete ghe nabubla gre

au kaisei kmadi? Theo!

²⁹Ba, aes ghe nuri gre,

au kaisei idodi?

³⁰Ihei teke eni khoꞌu na teke maku

jateula thina teu na?

Ihei tangomana jaola te eni ke kligna khoꞌu teke vuhai aes na?

³¹“Ba, iagho tangomana te haru fodu

tothoghei nathunu are?

Ba, iagho tangomana te hata gnarho

te loku fodudi nathunu are?

³²Ba, iagho tangomana te lilisei thofno narane

te mala jifla meidi nathunu re?

Ba, iagho tangomana te chekedi bukrei nathunu

igre te mala tei au ka nodi vido re? Theo!

³³Ba, iagho lase fakelidi vetula

te saghe leghudi glepo ka maloa gne?

Ba, iagho tangomana te lasedi vetula igre

te mala funei ka nauthoglu igne?

³⁴“Ba, iagho tangomana te eha tei ka khoveo are

te mala nakhete na?

³⁵Ba, iagho tangomana te cheke faheta

ka nakafli are te mala phae na?

Ba, iagho gaoghathomu na nakafli gre tangomana te mei

te cheke eghu ka iagho,

‘Mae funei, ghehati agneu gognarona’ teuna?

³⁶Ba, iagho laseni ihei teke salo mei khoveo igre

te mala edi nakhete na?

Eghuteuna, ihei te eni khoꞌu na te mala haghe

jateula gagahu teu ka maloa na?

^37-38Ihei te lalase te mala

kaha khoveo ka maloa gne?

Ihei gne te tangomana ni te tofa soru nakhete

te mala bothu glose te khapra te maku fara na?

^39-40“Ba, iagho tangomana te hili ghedi gano lion,

ka narane te rofo nodi fara te ofo ghedi gano teu lamna gluma na?

⁴¹Ihei te faghedi gano nanghaji biꞌo igre

ka vido te rofo te hiro ghedi gano re?

Uve, ihei te faghamu re thudi nanghaji igre

kate rofo nodi te tanhi mei ka iara re?”

¹“Ba, iagho laseni narane te mala fakarha sua

nanigot te au mata igre?

Ba, iagho filodi glepo te tautagu

te fakarha sua igre?

²Ba, iagho laseni niha nhigra

te bukla na ame karha sua nga reꞌe teuna?

Ba, iagho laseni narane

te mala karha sua glepo te tautagu igre na?

³Ba, iagho laseni narane

nate tugha soru ka glose na

te mala karha thugna na?

⁴Suadi igre biꞌo haghe

rheta mata.

Aonu reꞌe lisa kokodi idodi na

eghuteuna theome ke pulo mei.

⁵“Ihei teke chekedi dongki igre te mala au mata na?

Ihei teke chekedi te mala tei tafri reꞌe na?

⁶Iara thegu teke liliseidi mala au ke lamna namono nagou,

eghuteuna iara snakredi mala au reꞌe

ka sare biꞌo aheva te theome au buburu tagna.

⁷Dongki te au ka namono nagou na igre

theome magnahaghei nomhidi naogla biꞌo.

Eghuteuna reꞌe theome nomhini kaisei mae te eha ka reꞌe na.

⁸Reꞌe tangomana te tei tafri ka thabafe ba gukhu

mala hara gano.

Eghuteuna reꞌe tangomana te filo ka vido te gnafa,

mala filo khakla buburu mala ghamu.

⁹“Ba, buluka na

ginauna edi nou gloku iagho re?

Ka bongi na,

naꞌa na mei au ka sugadi nou buluka iagho re?

¹⁰Iagho gaoghathomu na, iagho tangomana te lilisei

phukri ka graragna na, eghuteuna batuni

mala korho hou teke eni ka gaju na mala dokha nou nagare na eghu.

¹¹Neuba ne nheta fara naꞌa,

iagho theome tangomana te ronuni naꞌa thegna te mala edi nou gloku iagho re.

¹²Ba, iagho ronuni naꞌa nate hata gano ka nou nagare iagho na,

eghuteuna hata mei ka vido te mala koko khunedi wit re?

Theo!

¹³“Nanghaji biꞌo te kiloi ostrik igne,

tangomana te feferha baghigna na,

nu naꞌa theome tangomana te flalo jateula gaghata teuna.

¹⁴Ostrik gne leghu fata na,

opo nakredi kolho ke kligna glose,

eghuteuna lisa lao ka glose te mala branadi nakredi igre.

¹⁵Naꞌa theome nangadi glepo tautagu

nate tapla ka nakredi igre te phosa re.

¹⁶Naꞌa lisa laodi kolho nakredi igre,

jateula te theome thugna ra eghu.

Eghuteuna naꞌa theome ghathodi kolho te mala karha thugna re.

¹⁷Iara neke eni tuana ka naꞌa mala theome gaoghatho fakeli,

eghuteuna iara neke theome tusu lao glalase ka naꞌa.

¹⁸Nu neuba, kate kegra haghe ostrik igne te chari na,

naꞌa nheta salaꞌudi hose te saghe naiknore.

¹⁹“Ba, ghema Job, iagho si teke edi hose gre

te mala nheta fara grea?

Ba iagho si teke lilisei khakla brahu

leghu ka graragna hose gnea?

²⁰Ba, iagho neke tusu lao nolaghi ka hose gre

mala ghasa jateula cheche neku?

Ba iagho neke edi hose gre mala sune fabiꞌo

mala mhaghu nodi fara naiknore?

²¹Kate magra na,

hose gre haro haro ka glose na

kate kegra haghe te tarabana mala magra na.

Reꞌe nheta fara,

eghuteuna reꞌe kelitadi fara kate chari te tei ka magra na.

²²Reꞌe theome nanga nodi ka puhi biꞌo,

reꞌe theome tangomana te mhaghu,

eghuteuna reꞌe theome rikha kate magra na.

²³Kate chari te tei ka magra na,

reꞌe au thua nafnata khuali nei goru aean eghu ke klignadi.

²⁴Eghuteuna kate nomhini hose igre

naogladi khufli te kufli mala magra na,

rehati theome tangomana te kegra muana na.

Nu rehati chari faghose fara mala tei ka magra.

²⁵Kate nomhidi naogladi khufli re,

rehati jaola sune ka nehudi re.

Kate au khaba teuna,

rehati tangomana te gnangho teini magra igne.

Eghuteuna rehati tangomana te nomhi teidi kolho

mae komanda kate eha mare ka mae soldia re.

²⁶“Ba, iagho teke farirhiudi gaghata gre te mala flalo,

kate fnerha baghidi re te mala flalo tei ke mata na?

²⁷Ba, iagho neke cheke ranghini gaghata

mala horo nogna gnoku na ke kligna thogele?

²⁸Leuleghu fata na gaghata igne horo nogna vido mala poru ke kligna thina biꞌo

te haghe fara.

²⁹Naꞌa au ka vido te haghe fara igne,

eghuteuna naꞌa filo tafri ka vido te gnafa,

te mala filoni unha lepo te mala ghamu na.

³⁰Leuleghu fata na gaghata igre khapru faligohodi thinidi mae te lehe re.

Eghuteuna suadi re ghamu dadaradi mae te lehe igre.”

LORD ne cheke ka Job

^1-2Aonu LORD, God mae ihei te au nolaghi fateote’o igne, ne cheke eghu ka Job:

“Ba, iagho ginauna fadogli ghau iara

kate fathoro ghau iara iagho igne?

Iagho neke cheke fapari ghau iara,

eghume gognaro na iagho cheke tughu ka iara.”

Job ne cheke tughu ka LORD

³Job ne cheke tughu eghu ka LORD:

⁴“Iagho laseni, iara theome naba te cheke na.

Unha nate chekeni iara ginauna?

Iara ginauna fofotho foflogu na.

⁵Phei thilo fata iara neke cheke,

nu gognarona iara theome cheke.”

LORD neke cheke ka Job

⁶Aonu LORD ne cheke tughu ka Job funu ka kaisei khoburu:

⁷“Jame kaisei mae tutuani iagho na, kegra haghe,

cheke tughu mei nogu faghusna iara igne.

⁸“Ba, iagho magnahaghei te falalase ne jafra iara,

eghuteuna chekeni ne doglo iagho teuna?

⁹Ba, iagho nheta jateula iara eghu?

Iagho tangomana te cheke fabiꞌo jateula iara

te naoglagu na te jateula fila teu igne?

¹⁰Jame te eghu na,

iagho fakakhana nou nolaghi na, nei nou nafnakno na.

Eghuteuna iagho fakakhana ka naiknore te iagho te kaisei mae biꞌo na,

eghuteuna fakakhana mala filoni naiknore siasiglagna nou nolaghi iagho na.

¹¹Iagho fakakhana iheire te fahaehaghe mala laseni mare

te diꞌatamu iagho ka mare na.

¹²Iagho mala nhaꞌa faparidi iheire te fahaehaghe.

Eghuteuna iagho tapla ke klignadi naikno te diꞌa

ka vido aheva te gnokro teu mare tagna na.

¹³Iagho kafe giugiluidi gnafa ke lamna glose.

Eghuteuna iagho fadodofu fabrahu tathadi re ke lamna beku.

¹⁴Jame te eghu iagho na, iara mae ulu lahu nate

mala cheke fakeli nigho iagho na.

Eghuteuna iara ginauna chekeni

te iagho la ulu ghauhi iara ka nou nolaghi iagho themu teuna.

¹⁵“Filo sagho ka glepo tautagu te biꞌo te kilo mare Behemot igne,

uve, iara ngala teke vuavuha na glepo igne balumu iagho.

Naꞌa ghamu buburu kolho jateula buluka eghu.

¹⁶Iagho laseni ghahegna na thono biꞌo fara,

eghuteuna au nolaghi biꞌo ka thinigna na.

¹⁷Naula ka ghahegna na rheta fara,

eghuteuna sekogna na biꞌo fara jateula kaisei gaju thubi eghu.

¹⁸Nhubragna re rheta jateula bras eghu,

eghuteuna ghahegna re rheta fara jateula aean eghu.

¹⁹Ka gobigna lepo teke vuavuha iara re,

igne ngala glepo ulu lahu ka glepo te tautagu igre.

Iara ngala teke vuavuhani na,

iara tangomana te batuni na.

²⁰Uve, ghegna gano re kotu ke kligna thogele,

ka vido aheva te tangomana te nairu reꞌe tagna na.

²¹Naꞌa thuru ke paridi vido te soro,

eghuteuna poru ka naoro

aheva te kotu buburu brahu.

²²Uve, naꞌa tangomana te au ke pari

naungodi gaju ka geri khoꞌu.

²³Naꞌa theome mhaghu

kate britha khoꞌu na.

Neubane britha Khoꞌu biꞌo Jordan igne,

naꞌa theome tangomana te mhaghu na.

²⁴Theome tangomana kaisei mae te lokini na.

Neuba mare ne fariuriu fadini tathagna na,

ba ei phighoro ka foflogna na,

ninhigrana fara te mala lolhoku na.”

¹“Iagho theome tangomana te taotaghoni nasava biꞌo te jateula glepo te kiloi mare, Leviatana igne,

eghuteuna iagho theome tangomana te haru glapigna na ka gnarho na.

²Iagho theome tangomana te haru gnarho ka nehugna na,

ba fakhale thagho ka foflogna na.

³Jame tangomana te lolhoku iagho na,

ba, iagho gaoghathomu na naꞌa ginauna tore nigho iagho mala snakre tei ni?

Ba, iagho gaoghathomu na naꞌa ginauna tanhi ka iagho

mala kokhoni ni iagho?

⁴Naꞌa theome tangomana te kaisei gaoghatho balumu iagho te mala loku ranghi nigho iagho

te mala nou sneka fabrahu iagho na.

⁵Ba, iagho gaoghathomu na iagho tangomana te nairu balugna

jateula kaisei makara te oho iagho ia teuna?

Iagho theome tangomana te haru ka gnarho

te mala nairu balugna thumu sua gaꞌase na.

⁶Ba, iagho gaoghathomu na mae te maket igne ginauna

cheke balumu iagho te mala lilisei praes gna na?

Mae bisnis re theome tangomana te vaevahe faꞌikoi te mala sabiri na.

⁷Iagho gaoghathomu na iagho tangomana te fadini ni na?

Thono ninhigrana fara iagho te fada ka phaꞌugna na.

⁸Jame te fariuriu lolhoku iagho na,

naꞌa ginauna magra ka iagho, na falehe nigho iagho.

Eghuteuna iagho ginauna na theome tangomana te ghatho ihoni unha teke eni naꞌa ka iagho na.

⁹Theome tutuani jame kaisei te mana tangomanau ngala te uluni Leviatana na teu ka gaoghatho gna na.

Kate filoni kaisei mae glepo biꞌo igne, mana ginauna mhaghu fififri fara.

¹⁰Theo kaisei naikno nabagna te magra ka Leviatana te biꞌo fara igne.

Jame te tutuani na, theo kaisei naikno te mei magra ka iara na!

¹¹Ihei te tangomana te fapholai ka iara te mala fadoglini iara glepo tuana?

Thono theo fara, naugna iara ngala te batudi gobigna lepo fateote’o ka nauthoglu igne.

¹²“Iara ginauna toutonu ka iagho eidi ghahegna Leviatana,

nei eigna nolaghi te au ka thinigna na.

¹³Theome tangomana kaisei naikno te ligi koko guligna na.

Uve, theome tangomana kaisei naikno te vahe guligna te jateula aean teuna.

¹⁴Theo kaisei naikno naba te mala

tothora foflogna na.

Ihei te filoni khe’igna na,

mana ginauna thono mhaghu nogna fara.

¹⁵Ka thagrugna na,

glepo jateula vido aean teu igre

thofno toku tafruni.

¹⁶Soasopai khapu ka thinigna na igre loku fodu maku fara,

eghuteuna neubane katha nuri theome tangomana te ruma lamna na.

¹⁷Uve, khapu igre loku fodu thono maku fara,

eghuteuna theo kaisei glepo tangomana te hata kokodi re.

¹⁸Phei tathagna re thono siasigla fara jateula naprai eghu

kate haghe hamerane na.

Eghuteuna kate chihe na,

nakafli jifla mei ka foflogna na.

¹⁹Kate tothora naꞌa foflogna na,

khaꞌaghi jifla mei.

Eghuteuna nasnire khaꞌaghi

sridi jifla mei ka foflogna na.

²⁰Gagahu jifla mei

ka nehugna na.

Gagahu igne jateula gagahu ka buburu te moja te gnhubra ka khaꞌaghi ra eghu,

ba suspen ka khoꞌu brana te fufutu fabiꞌo ra eghu.

²¹Phaphanga gna na tangomana te karha khaꞌaghi,

eghuteuna khaꞌaghi sridi jifla mei ka foflogna na.

²²Graragna Leviatana igne thono rheta fara,

eghuteuna iheire te filoni aheva te tei naꞌa na,

mare thono mhaghu nodi fara.

²³Vido te gnafa ka thinigna na maku fara,

eghuteuna rheta fara jateula aean eghu.

²⁴Babango gna na thono maku fara

jateula thina maku eghu.

²⁵Kate kegra haghe nasava igne,

mae te nheta re mhaghu nodi fara.

Uve, kate ghasa tafri te mala magra teuna,

mare mhaghu rikha.

²⁶Theo kaisei naflahi mala magra te tangomana te mala faghorehoi na.

Eghuteuna theo kaisei nafnata goru ba jata te tangomana te fadi teini na.

²⁷Ka nasava igne na,

goru aean na jateula kaisei khakla buburu eghu kolho,

eghuteuna jata bras na jateula gaju tela bothohi ra eghu kolho.

²⁸Theo kaisei jata tangomana te farikhani na,

eghuteuna thina te fada lao mare tagna na,

khogla jateula gaughavu glose eghu kolho.

²⁹Nanala mala magra na,

jateula kaisei khakla buburu eghu kolho.

Eghuteuna kate fariuriu fadi goruni teu naiknore,

naꞌa maꞌe kolho ka mare.

³⁰Khapu ka thiꞌagna na

fnonu jateula vido botol te phosa ra eghu.

Kate agra te tei naꞌa ka glose na

naꞌa thofno dokha haghe glose na.

³¹Kate tao ke lamna nhorora na,

thongna na haghe jateula khoꞌu

te fufutu ke lamna suspen ra eghu.

³²Eghuteuna kate tugha te tei ka thongna na,

kmana galo haghe ke leghugna,

jateula kaisei vaka te umhu te tei ka thongna ra eghu.

³³Theo kaisei glepo ka nauthoglu igne te jateula naꞌa teu filogna na,

eghuteuna naꞌa theome mhaghuni kaisei glepo.

³⁴Neuba gobigna lepo te nheta fara igre,

nu naꞌa filo faparidi kolho.

Naꞌa te nodi funei gobigna lepo te tautagu igre!”

Job ne cheke tughu ka LORD

¹Job ne cheke eghu ka LORD:

²“Iara lase nigho iagho te au nolaghi fateote’o na,

eghuteuna iagho tangomana te edi gobigna lepo te ghathodi iagho re.

³Iagho neke ghusna eghu ka iara,

‘Ihei te pophoru nogu gaoghatho iara na

ka nagnafagna te romno na?’

Tutuani, iara neke cheke eidi glepo te theome raꞌe lasedi iara re,

eghuteuna glepo te uludi nogu glalase iara re.

⁴“Iagho neke cheke eghu ka iara,

‘Iagho famane fanomho mei kate cheke iara gne.

Iagho cheke tughu mei nogu faghusna iara igre!’

⁵Tifei na, iara nomhini kolho unha naikno gre te cheke eimu iagho na,

nu gognarona, iara filo nigho ka tathagu thegu na.

⁶Eghume, iara tirogu ghau thegu,

eghuteuna iara gnokro lamna nakrofu nei ka gaughavu glose

fagaglana gna te tughu nagnafa iara na.”

God ne thofno fablahini Job

⁷Ke leghugna cheke te gnafa ka mae Job igne, God ne cheke eghu ka mae Elifas maegna Teman, “Iara diꞌatagu fara ka iagho nei ka phei mae kheramu iagho ra, naugna ghotilo theome cheke tutuani eigu iara, jateula nogna cheke nogu mae gloku iara mae Job. ⁸Eghume ghotilo na hata tei fitu buluka nalhaꞌudi nei fitu sipu nalhaꞌudi, eghu tei ka mae Job. Eghuteuna ghotilo falelehe glepo igre mala fafara te thofno krono fara. Eghuteuna mae Job nogu mae gloku iara igne ginauna tarai mei ka iara eimi ghotilo. Eghuteuna iara ginauna nomhidi nogna tharai mana re. Neuba ghotilo ne jafrahi, nu iara ginauna na theome para ghami ghotilo. Ghotilo theome cheke fadoglo eigu iara jateula mae Job eghu.” ⁹Aonu, mae Elifas, nei Bildad nei mae Sofa eghu ne eni unha teke chekeni LORD ka thilo mare na. Eghuteuna LORD ne cheke tughuni nogna tharai mae Job.

¹⁰Ke leghugna te taraidi thilo mare te gnafa mae Job igne, LORD toghoni mae Job mala kaisei mae dedei. Mana ne pagu pea baludi gobigna lepo teke kulu au ka mana re. ¹¹Aonu thabusigna te gnafa, greghagna te gnafa, nei iheire te gnafa teke laseni mana tifa igre mei ne sighoni mana. Eghuteuna mare ne eni kaisei gaghamu biꞌo ka sugagna mana na. Mare kokhoni nognani ne fameomegoni mala ke rheta fapulo mana gaoghathogna na eidi puhi biꞌo teke eni LORD teke thokeni mana. Eghuteuna mare te gnafa na ne kafe tusu lao kaisei silva sileni nei kaisei ring gol eghu ka mana.

¹²Aonu LORD ne fablahini mae Job eigna fapea vido ka nakarhagna mae Job, salaꞌuni vido ulu lahu ka nakarhagna mana na. Eghume gognarona mana au nabotho fati thogha sipu, eghuteuna namno thogha kamel, eghuteuna phei thogha buluka, eghuteuna kaisei thogha dongki. ¹³Mana jaola au keha fitu thugna nalhaꞌu nei keha thilo thugna gaꞌase. ¹⁴Thugna gaꞌase ulu lahu igne mana kiloi Jimaema, eghuteuna fapea na Kesia, eghuteuna thugna gaꞌase leghu lahu na Keren-Hapuk. ¹⁵Theo kaisei gaꞌase te famane te salaꞌui jateula thilo thugna gaꞌase mae Job igre teu ka namono te gnafa ka rijon mare igne. Eghuteuna mae Job ne tufa glose ka retilo igre thofno nanaba ka thabusidi retilo igre.

¹⁶Ke leghudi narane igre, mae Job au nabagna kaisei gobi phiatutu finogha. Mana karha neu ne ghilei filodi gragna nei thudi gragnare teure. ¹⁷Kate lehe na, mana thono kuekuꞌe fara.