Jone

Jone

Nonomho Te Keli Teke Risoi Mae Jone

Thoutonu kmo’ei eigna buka igne

Gaoghathodi mare na igne ngala buka leghu lahu teke rioriso mare ke leghudi mae Matiu nei mae Mak nei mae Luku. Eghuteuna gaoghathodi mare na mae Jone neke rioriso buka igne ka finogha 90 ba katha vido ke ulugna finogha igne. Ka narane igre kmana nafnata farirhiu te jafra neke thakle mei mala faparini Kraes. Kaisei farirhiu ka igre na mare cheke eghu, “Mae Jisas na naikno kolho, theome Thugna God.” Mae Jone neke rioriso buka igne mala doglo nafnata gaoghatho igne.

Mae Jone neke rioriso buka igne mala toghodi naiknore mala fatutuani ka mae Jisas Kraes Thugna God, mala hatini mare thofno karha te theo ka huigna na (filoni 20:30-31). Kaisei cheke te chekeni fara mae Jone ka buka igne na “Fatutuani.” Keha glepo jaola te chekeni fara mana na “Mae Jisas na Thugna God.” Te chekeni mae Jone na mae Jisas ngala tangomana te toghodi naiknore te mala laseni God na. Eghume jame ihei te magnahaghei filoni God na, mana mala fifilo ka puhigna mae Jisas na.

Keha vido ka buka igne

Ame fufunu nga mae Jisas nogna gloku na: 1:1-51

Mae Jisas neke eni nogna gloku na: 2:1–12:50

Wik leghu lahu te au mae Jisas Jerusalem: 13:1–17:26

Mae Jisas lehe eghuteuna ke karha fapulo: 18:1–21:25

Mae Jisas Kraes neke mei kau nauthoglu igne

¹Tifa na, mae te kiloi “Chekegna God” gne neke kulu auhi. Mana neke kulu auhi balugna God, nei mana kaisei ngala balugna God. ²Funu tifa ka vuvuhagna na mae “Chekegna God” gne neke auhi balugna God. ³Eghuteuna God neke vahini mana mala edi gobigna lepore. Eghume gobigna lepo gre mana ngala teke edire. ⁴Thofno karha na neke funu mei ka mana. Eghuteuna, karha tuana jateu langau u naphae eghu mala faphaedi naiknore. ⁵Naphae igne neke faphaedi namono te romno re, eghuteuna gromno na theome tangomana te toku tafruni naphae na.

⁶Ulu lahu na God neke kuru meini kaisei mae te kiloi Jone Apublahi. ⁷Mana neke mei neke toutonu ka naiknore eigna naphae tuana, mala tangomana naikno te kafe nomhini mana re fatutuani ni naphae na. ⁸Mae Jone gne theome naphae tuana, nu mana neke mei mala toutonuni eigna naphae tuana kolho.

⁹Thofno naphae igne ne mei kau nauthoglu gne mala kafe faphaedi naikno te gnafare. ¹⁰Mana la auhi ka nauthoglu igne, nu neuba God neke vahini mana neke vuavuha nauthoglu igne, naiknogna nauthoglu igne theome laseni ngala mana. ¹¹Mana mei au ka nogna namono thegna na. Nu nogna naikno thegna mana re theome keli tadi ngala ka mana. ¹²Nu keha naiknore ne keli tadi nei fatutuani ni eghu mana. Aonu mana ne tusu ranghidi nolaghi te mala goro thugna God. ¹³Naugna mare theome karha mei jateula sua te karha mei ka dadaradi idogna ghe kmagna ra eghu, nu thegna God ngala kmadi na.

¹⁴Mae Chekegna God igne neke karha mei fei thini jateula tahati neku, neke au balumi ghehati. Ghehati neke filonihi u nogna nolaghi mana na. Nolaghi tuana neke tusu lao mae Mama ka mae thofno Thugna na. Eghuteuna mae Chekegna God igne fodu kau khokofakasai nei tutuani.

¹⁵Mae Jone neke cheke eghu eigna mana, “Igne mae teke chekenihi iara ka ghotilo ia, ‘Mae te mei ke leghugu iara na, mana mae ke biꞌogu iarai, naugna mana neke kulu auhi neke karha nga iara.’ ” ¹⁶Tutuani fara, mae igne thofno mae keli fara, naugna mana ne edi fabrahu glepo te kelire ranghi ghita tahati hui. ¹⁷God neke tusu lao vetula na ka mae Moses. Nu khokofakasai ghe tutuani re neke mei balugna mae Jisas Kraes. ¹⁸Funu tifa te ghilei thoke ka narane gognarogne, theo kaisei naikno te thofno filoni God na. Nu mae Jisas Kraes thofno mae Thugna God te au balugna Mama na ngala te mei fatakleni God ka tahati na.

Nogna nonomho mae Jone Apublahi eigna mae Jisas

(Mat 3:1-12; Mak 1:1-8; Luk 3:1-18)

¹⁹Kaisei fata na, hatimare mae biꞌodi mae Jiu te au ka namono Jerusalem igre ne kurudi keha mae pris baludi keha mae te loku ka Sugablahi na mala mei ghusna eghu ka mae Jone, “Ghema, iagho mae hei?” ²⁰Mae Jone ne theome ghatho peapea te cheke tughugna na ne cheke fadoglo eghu ka mare, “Iara theome mae Kraes.”

²¹Mare neke ghusna eghu ka mana, “Eghume mae ihei eghu sagho? Ba, iagho mae Elija?”

Mana ne cheke eghu ka mare, “Theo, iara theome mae Elija.”

Hatimare neke ghusna fapuloi ka mana, “Ba, iagho mae profet te ofoni teu ghehati gne?”

Mae Jone ne cheke eghu ka mare, “Theo, iara theome mae profet tuana.”

²²Eghuteuna, hatimare ne cheke eghu ka mana, “Teuna, mae ihei eghu sagho ia? Famane cheke fakeli sagho eimu themu na mala ke pulo toutonu ghehati ranghidi mae teke kuru mei ghami ghehati ra. Ba, unha eghu iagho cheke eimu themu na?”

²³Mae Jone ne cheke eghu ka mare, “Iara gne ngala mae teke cheke eghu mae profet Isaia tifa ia,

‘Kaisei mae na eha fabiꞌo ke lamnagna namono nagou na na cheke eghu:

Noda mae funei na la meihi, tarabana nabrou mala meigna mana!’ ”

²⁴Aonu, mae teke kuru meidi mae Farasi gre, ²⁵mare ne ghusna eghu ka mae Jone, “Jame iagho te theome mae Kraes nei theome mae Elija nei theome mae profet teuna. Naugna unha iagho te faꞌapublahi naikno gnea?”

²⁶Mae Jone ne cheke eghu ka mare, “Iara mae mala faꞌapublahi naikno ka khoꞌu kolho. Nu kaisei mae biꞌo te au teu balumi ghotilo na, ghotilo theome laseni mana. ²⁷Mana na mei ke leghugu iara, nu iara theome nabagu te rurutha nogna sadol mana re naugna mana mae ke biꞌogu iarai.”

²⁸Cheke igre neke edi ka namono Betani ke maghati Kho’u Jordan. Igne ka vido aheva teke faꞌapublahi naikno mae Jone ia.

Mae Jone toutonu eigna mae Jisas

²⁹Ka keha narane na mae Jone ne filoni mae Jisas ne mei ke ulugna mana. Mae Jone ne cheke eghu, “Filo laoni mae te mei ana. Mana ngala nogna sipu God te mala fafara na. Mana ginauna hata fadelei nakhibodi naiknore ka nauthoglu igne. ³⁰Mae igne ngala mae teke chekeni iara ia. Iara neke cheke eghu, ‘Kaisei mae ginauna mei ke leghugu iara, nu mana mae ke biꞌogu iarai, naugna mana neke kulu auhi neke karha mei nga iara.’ ³¹Ulu lahu na iara neke theome raꞌe laseni mana, nu iara faꞌapublahidi naiknore ka khoꞌu, mala laseni mana naiknodi Israel re ginauna.”

³²Aonu mae Jone ne cheke eghu ka naiknore, “Iara filoni Tharunga te Blahi na ne soru mei jateula kaisei balhu neu ka maloa na ne thoti ka mana. ³³Iara theome raꞌe laseni ngala mae Kraes teuni na. Nu God mae teke kuru mei ghau iara na mala faꞌapublahi naikno ka khoꞌu teku na, neke cheke eghu ka iara, ‘Iagho ginauna filoni Tharunga te Blahi na, mana na soru mei thoti ka kaisei mae. Mae tuana ngala mae nate faꞌapublahi naikno kau Tharunga te Blahi na.’ ³⁴Tutuani fara, iara la filonihi. Eghume unha te chekeni iara ka naiknore mae igne ngala thofno mae Thugna God na.”

Mae fanomho teke kulu kilodi mae Jisas re

³⁵Ka keha narane na mae Jone kegra neu baludi phei mae nogna fanomhore. ³⁶Mana filoni mae Jisas nolo te tei sala’u na ne cheke eghu ka phiamare, “Filoni mae tela ari ana! Mana ngala nogna sipu te mala fafara God na.”

³⁷Aonu kate nomhini phei mae fanomhore cheke mana igne, phiamare kegra haghe ne tei ke leghugna mae Jisas. ³⁸Mae Jisas figri ne filodi phiamare te mei ke leghugna re. Mana ne cheke eghu ka phiamare, “Magnahaghei unha si ghopa ia?”

Phiamare ne cheke eghu ka mana, “Rabae, au aheva si iagho ia?” Cheke “Rabae” teu igne gaoghathogna na “Mae velepuhi” eghu.

³⁹Mae Jisas ne cheke eghu ka phiamare, “Mei si ghopa balugu iara mala ari filoni themi.”

Vido tuana jame tanhi fati fei grafi. Phiamare tei balugna mae Jisas ne filoni aheva te au teu mana na. Phiamare au balugna mana narane tuana ne ghilei bongi.

⁴⁰Kaisei mae ka phia mae nogna fanomho mae Jone igre nomhini unha teke chekeni mae Jone na teke leghuni mae Jisas igne mae Aduru, tahigna mae Simon Pita. ⁴¹Glepo ulu lahu teke eni mae Aduru na, mana tei ne hironi mae Simon ne cheke eghu ka mana, “Ghepa la filonihi mae Mesia teke ofoni tahati ia!” Mae Mesia teu igne gaoghathogna na “Mae Kraes.” ⁴²Mae Aduru hatani mae Pita ne tei ka mae Jisas.

Mae Jisas ne filo ka mae Pita ne cheke eghu ka mana, “Gognarona nanghamu iagho na mae Simon, thugna mae Jone, eghuteuna ginauna mare na kilo nigho iagho mae Sifas.” Nangha igne gaoghathogna na “mae Pita” ba “thina.”

Mae Jisas ne kilodi Filip ghe Natanel

⁴³Ka keha narane na, mae Jisas neke magnahaghe tei ka Provins Galili. Kate posa ka namono na, mana thafoni mae Filip ne cheke eghu ka mana, “Ghema Filip, mei leghu ghau iara.”

⁴⁴Mae Filip gne mae gna Betsaeda, kaisei namono baludi mae Aduru ghe mae Pita. ⁴⁵Ke leghugna igne, mae Filip tei ne thafoni mae Natanel ne cheke eghu ka mana, “Ghehati la thafonihi mae ihei mae Moses teke rioriso eigna mana ka buka vetula ia, nei hatimare mae profet neke rioriso eigna la mana. Nanghagna na mae Jisas, thugna mae Josep, mae gna ka namono Nasaret.”

⁴⁶Nu mae Natanel ne cheke eghu ka mae Filip, “Nasaret! Theome tangomana kaisei glepo te keli te jifla mei Nasaret na!”

Mae Filip ne cheke eghu ka mana, “Mei sagho, mala filoni themu!”

⁴⁷Mae Jisas filoni mae Natanel te mei ke ulugna mana na, ne cheke eghu eigna mana, “Filoni si ghotilo. Mae igne ngala thofno mae gna Israel na, naugna mana theome tangomana te chaghi na.”

⁴⁸Mae Natanel nomhini cheke mae Jisas igne ne jaglo nogna fara ne cheke eghu ka mana, “Faꞌunha neke lase ghau iara sagho ia?”

Mae Jisas ne cheke eghu ka mana, “Iara neke kulu filo nigho iagho ka teke gnokro teku iagho ke parigna gaju fig ia. Ka vido tuana mae Filip neke theome kilo mei nigho iagho nekeu ka iara.”

⁴⁹Mae Natanel ne cheke eghu ka mana, “Mae velepuhi, iagho thofno Thugna God! Iagho nodi King hatimare mae Israel!”

⁵⁰Mae Jisas ne cheke eghu ka mae Natanel, “Iagho fatutuani ghau iara naugna te cheke nigho iara neke filo nigho ke parigna gaju fig na teu ia. Nu iagho ginauna filoni glepo ke biꞌogna ignei!”⁵¹Mae Jisas ne cheke eghu ka mare, “Tutuani fara, te chekeni iara ka ghotilo na, ghotilo ginauna filoi maloa na thora. Eghuteuna ghotilo ginauna filodi nogna engel God re na haghe nei soru eghu ke klignagu iara, mae teke mei funu ka God na.”

Gaghamu tholaghi jare Kena

¹Phei narane ke leghugna igne, mare ne eni kaisei gaghamu tholaghi ka namono te kiloi Kena, ka provins Galili. Eghuteuna idogna mae Jisas na ne au langau baludi keha naikno teke mei ka gaghamu tholaghi na. ²Hatimare ne toreni mae Jisas baludi nogna mae fanomhore mala au langau ka gaghamu tholaghi igne. ³Fari hoteigna gaghamu na, waen te mala koꞌu mare ka vido tuana na la gnafahi. Aonu idogna mae Jisas na ne mei cheke eghu ka mana, “Thuguo, rehati la theo waen te mala koꞌu na.”

⁴Mae Jisas ne cheke eghu ka idogna na, “Ido, thosei cheke ka iara unha te mala eni gognarona, naugna nogu narane iara te mala fatakleni nogna nolaghi God na theome thoke mei ngau.”

⁵Aonu, idogna mae Jisas na tei ne cheke eghu ka mae glokure, “Eni unha te chekeni mana ka ghotilo na.”

⁶Aonu mae Jiu au nodi kmana vetula te mala titihi na. Naugna igne mare au namno botol biꞌo mala toho khoꞌu ka suga na. Botol igre thono biꞌo fara, fodudire jame naba kaisei gobi lita.

⁷Mae Jisas ne cheke eghu ka mae glokure, “Ghotilo toho fafodu botol biꞌo igre ka khoꞌu.” Mae glokure leghuni nogna cheke mae Jisas na ne toho fafodu ne ngata botol biꞌo igre.

⁸Aonu mana ne cheke eghu ka mae glokure, “Ghotilo totoho fakasa katha khoꞌu mala atha tei ka mae biꞌo te areꞌare gna gaghamu gne.”

Mare leghui chekegna mae Jisas igne ne atha ne tei katha khoꞌu teke vuhai waen na ka mae biꞌo na. ⁹Mana gnaignami ne nongharini khoꞌu teke vuhai waen igne. Eghuteuna mana ne thofno jaglo nogna fara, naugna mana theome laseni waen te keli igne neke mei funugna aheva. Nu mae gloku teke toho khoꞌu na laseni igne. Mae biꞌo mala areꞌare gna gaghamu na ne kilo meini mae te tolaghi na, ¹⁰ne cheke eghu ka mana, “Funu tifa te mei na tahati kulu tufa koba waen te keli na ka naiknore. Ke leghu, kate koꞌu fara mare waen te keli na, ame tufa nga waen te theome raꞌe keli na leghu lahu eghu sia. Nu iagho ne tathaji neu ngala waen te keli na ne ghilei thoke gognaro gne.”

¹¹Igne kofubobhoi ulu lahu teke eni mae Jisas ka namono Kena ka provins Galili. Jare mae Jisas ne falalase nogna nolaghi biꞌo God na, eghuteuna nogna mae fanomho manare ne fatutuani ni mana.

¹²Ke leghugna igne mae Jisas ne tei baludi idogna, thabusigna nei nogna mae fanomhore. Eghuteuna mare ne kafe au jare keha narane.

Mae Jisas ne brue fajifladi naiknore ka Sugablahi na

(Mat 21:12-13; Mak 11:15-17; Luk 19:45-46)

¹³Aonu, mae Jisas ne haghe Jerusalem. Naugna nodi narane Gaghamu Ghasa-Polho mae Jiure la namohi. ¹⁴Ka glalabagna Sugablahi na, mae Jisas ne filodi naikno te sabiri buluka, sipu, nei balhu teure. Keha naiknore gnokro ka tevo re tutughu sileni neu. ¹⁵Aonu, mae Jisas ne horo kaisei phukri. Mana ne kafe brue fajifladi naikno, sipu nei buluka teure ka Sugablahi na. Eghuteuna, mana ne pili fapogru nodi tevo mae te mala tutughu silenire, nei tofa tafri nodi sileni re. ¹⁶Mana diꞌatagna ne cheke eghu ka naikno te sabiri balhure, “Atha tei nomi gobigna lepo gre! Thosei jateula suga mala maket eghu sugagna mae Mama gne!”¹⁷Kate chekeni mana igne, mae fanomhore neke ghatho fapuloni unha te cheke eghu ka grioriso te blahi na ia, “God, leghu fata na iara ghatho tahuni koba nou suga iagho gne.”2:17 Sam 69:9.

¹⁸Kate filoni unha te eni mae Jisas igne, mae biꞌodi mae Jiu gre ne diꞌatadi fara ne ghusna eghu ka mana, “Unha kofubobhoi nate eni iagho te mala laseni ghehati God neke tusu ari ka iagho nolaghi te mala edi glepo igre na?”

¹⁹Mae Jisas ne cheke eghu ka mare, “Jame paꞌe soru ghotilo Sugablahi igne na, iara ginauna ke babana fapulo ka fatilo narane na.”

²⁰Mae biꞌodi mae Jiu re ne cheke eghu ka mana, “Ghema, tangomana nigho ngau sagho te loku kolho thilo narane na suga ignea? Phiatutu namno finogha si mare teke loku gna na Sugablahi ignea!” ²¹Nu Sugablahi te chekeni mae Jisas igne thofno gaoghathogna eigna thinigna thegna na kolho. ²²Ke leghugna teke karha fapulo mana ka glehe na, nogna mae fanomho manare neke ghathoni unha teke chekeni mana igne. Eghuteuna, mare ne fatutuani ni unha teke chekedi mae Jisas re nei grioriso blahi na.

²³Kate au teu mae Jisas Jerusalem malagna u narane Gaghamu Ghasa-Polho na, kmana naikno filodi u kofubobhoi teke edi mana re ne fatutuani ni mana. ²⁴Nu mae Jisas ne theome snakredi ka naiknore naugna mana thofno lase fakelidi nagnafadi naikno te gnafare. ²⁵Neubane theo kaisei naikno te cheke fajiflani kaisei glepo ka mana eidi naiknore, mana kulu lasedihi unha te au ka gaoghathodi naiknore.

Mae Jisas ghe mae Nikodimas

¹Kaisei mae nanghagna na mae Nikodimas, mana kaisei mae biꞌo ka tothoghei Farasi. ²Kaisei bongi mana neke mei ka mae Jisas, ne cheke eghu ka mana, “Velepuhi, ghehati lase nigho iagho kaisei mae velepuhi biꞌo neke mei funu ka God. Naugna jame te theome togho nigho God na, iagho jame theome tangomana te edi kofubobhoi igre.”

³Mae Jisas ne cheke eghu ka mana, “Uve, tutuani fara te chekeni iara ka iagho na. Theo kaisei naikno tangomanani te ruma ke lamnadi naikno te funei frunidi God re ghilei ke karha majaghani ghu mana.”

⁴Mae Nikodimas neke ghusna eghu ka mana, “Nu jame kaisei mae tela khomabrohi na, faꞌunha eghu ke karha si mana gnea? Naikno na theome tangomana teke fapea rumai ka thi’a idogna na mala teke karha majaghani na.”

⁵Aonu, mae Jisas ne cheke eghu ka mae Nikodimas, “Tutuani fara te chekeni iara ka iagho na. Te theome karha mana kau khoꞌu nei Tharunga te Blahi teuna mana theome nabagna te au baludi naikno te funei frunidi God.⁶Naugna u thinigna naikno na neke karha kolho ka gaꞌase. Nu u tharungagna naikno na neke karha ka nogna nolaghi Tharunga te Blahi.⁷Thosei jaglo nou ka cheke iara ao, ‘Ghotilo ke fapea karha ghu ngala.’⁸Ghathoi sagho u nuri ia. U nuri na ghaghafa nogna u ngala ka vido aheva te magnahaghei tei na. Iagho tangomana te nomhini u naoglagna u nuri na. Nu iagho theome laseni ghaghafa mei funugna aheva ba aheva tei teuna eghu. Jateula tuana eghu naikno te karha majaghani ka nogna nolaghi Tharunga te Blahi na.”

⁹Mae Nikodimas ne ghusna eghu ka mana, “Faꞌunha eghu tangomana si ignea?”

¹⁰Mae Jisas ne cheke eghu ka mana, “Iagho kaisei mae velepuhi biꞌo gna Israel. Nu theome laseniu ngala eghu sagho gaoghathogna na u cheke ignea, ghema? ¹¹Tutuani fara te chekeni iara ka iagho na. Ghehati cheke eidi unha glepo te thofno lasedi nei cheke eidi unha glepo teke filodi kau tathamire. Nu ghotilo theome fatutuanidi unha te chekedi ghehati re.¹²Iara chekedi ka ghotilo glepodi nauthoglu igne, nu ghotilo theome fatutuani ghau ngala iara. Eghume ghotilo ginauna theome fatutuani ghaula iara kate toutonudi iara glepodi kligna re!¹³Theo kaisei naikno tela tei thokehi kligna na, te mala lasedi unha glepo te edi kligna re. Kaisei iara mae teke mei funu ka God na ngala te lasedi te tangomana te chekedire unha te edi kligna re.¹⁴Mae Moses neke lilisei haghe ka gaju na u thotoghale gna mogo na ka namono nagou na tifa. Eghume mare ginauna jateula tuana eghu na tupijuru ghau iara mae teke mei funu ka God na kau gaju fafatha.¹⁵Aonu ihei te fatutuani ghau iara na tangomana nate athini u karha fei tifa na.”

¹⁶“God ne namhadi fara naikno te au kau nauthoglu igne. Naugna igne mana ne snakre meini thofno mae Thugna kaisei ngala mala ihei te fatutuani ni mana na ginauna theome lehe fabrahu, nu mana na karha fabrahu tifa tifa.¹⁷Naugna God neke theome kuru meini mae Thugna na ka nauthoglu gne mala mei fateni ihei te jafra ka nauthoglu igne, nu mei mala karha naiknore ka mana.¹⁸Tutuani fara, mae ihei te fatutuani ni mae Thugna God na, God na theome fate faleheni mana. Nu mae ihei te theome fatutuani na, God la kulu fate falehenihi mana naugna mana ne theome fatutuani ni mae thofno Thugna God kaisei ngala.¹⁹God fatedi naiknore ka puhi igne: mae Thugna God na neke meihi jateula ngau u naphae neku kau nauthoglu igne, nu naiknore theome magnahagheni mana. Naugna hatimare jateula te au kate romno ra neu ne edi glepo te thono diꞌa fara re.²⁰Iheire te edi glepo te diꞌare theome magnahagheni u naphae tuana. Mare na theome mei kate phae na naugna ginauna kafe thakle gnafa unha glepo te diꞌa teke edi mare re.²¹Nu mae ihei te edi glepo te tutuanire mana ginauna mei kau naphae na. Aonu u naphae na ginauna falalase fakeli ka naiknore unha glepo teke edi God ka mana re.”

Mae Jisas ghe mae Jone Apublahi

²²Ke leghugna igne, mae Jisas ne tei baludi nogna mae fanomhore ne au ka nohi Judia. Mae Jisas ne au jare keha narane baludi nogna mae fanomhore ne faꞌapublahidi naiknore. ²³Ka narane tuare mae Jone ne faꞌapublahi naiknore ka namono Aenon rhegna Salim, naugna jare na au khoꞌu. Kmana naikno ne tei jare mala apublahi ka mana. ²⁴Ka narane igne mae Jone Apublahi theome au ngau ka suga sosolo. ²⁵Keha nogna mae fanomho mae Jone re ne fapoaphola balugna kaisei mae Jiu eigna nodi vetula mae Jiu te mala titihi fakeli thini na. ²⁶Aonu mare ne mei ka mae Jone ne cheke eghu ka mana, “Mae velepuhi, laseni sagho kaisei mae teke au balumu ka keha phile Kho’u Jordan ia? Mae teke chekeni iagho ka naikno ra, gognarona mana la faꞌapublahi naikno, eghuteuna naiknore la kafe tei ka mana!”

²⁷Mae Jone ne cheke eghu ka mare, “Tutuani fara, theo kaisei naikno te tangomana te eni kaisei glepo na, nu thegna God ngala tangomana te tusu ranghini mana nolaghi na. ²⁸Ghotilo themi la nomhinihi teke cheke eghu iara ia, ‘Iara gne theome mae Kraes. Nu God neke kuru mei ghau iara ke ulugna mana mala kulu tarabana nabrougna mana.’ ²⁹Ghathoi si ghotilo, mae te tolaghi na ngala te khotogna gaꞌase na. Eghuteuna iara gne jateula kheragna mae te tolaghi ia eghu mei ofo balu fanomho ka mana. Eghume kate mei mana te mala hata khetogna na iara gognaro thofno gleale’a fara te nomhi naoglagna mana na. ³⁰Eghume te keli na mana mala ke mae biꞌo, eghuteuna iara mala au ke parigna mana.”

Mae ihei teke mei funu kligna

³¹Mae ihei teke mei funu kligna na, mana mae ke biꞌo laodi mae te gnafare. Mae ihei teke karha mei ka nauthoglu igne na mana nogna nauthoglu kolho, eghuteuna mana tangomana te cheke eidi kolho glepo gna nauthoglu igne. Nu mae ihei teke mei funu kligna na, mana mae ke biꞌo laodi mae te gnafare. ³²Mana toutonu ranghidi naiknore eidi unha glepo biꞌo teke filodi nei nomhidi teu thegna re, neubane eghu ngau theo kaisei naikno te magnahaghei fatutuanidi unha te chekedi mana re. ³³Nu mae ihei te fatutuanidi unha te chekedi mana re, mana fatakleni unha te chekeni God na thofno tutuani fara. ³⁴Mae ihei teke kuru mei God funu kligna na mana chekedi unha teke chekedi God re, naugna God neke tusu lao ka mana Tharunga te Blahi na ne fodu ka mana mala toghoni mana. ³⁵God Mama ne namhani fara mae Thugna na ne tusu lao ka mana u nolaghi te mala funei frunidi gobigna lepore. ³⁶Ihei te fatutuani ni mae Thugna God na, mana na athini u karha te theo ka huigna na. Nu mae ihei te theome fatutuani ni mae Thugna God na mana na theome athini u karha tuana. Eghuteuna God ginauna diꞌatagna fabrahu ka mana.

Mae Jisas ghe kaisei gaꞌase gna Samaria

¹Hatimare mae Farasi ne nomhini eigna mae Jisas te faꞌapublahi kmana naikno ke tulaogna mae Jone Apublahi te mala leghuni mana na. ²Eghuteuna mae Jisas thegna na neke theome faꞌapublahi naikno. Hatimare nogna mae fanomho mana re teke faꞌapublahi naikno na. ³Kate laseni mae Jisas te nomhini hatimare mae Farasi eigna nogna gloku mana na, mana jifla ka Provins Judia neke funu pulo ka Provins Galili.

⁴Aonu, mana neke sala’u ka nabrou fei Provins Samaria. ⁵Jare Samaria, mana ne mei posa ka namono te kiloi Saeka. Namono igne au rhegna sare teke tusu lao mae Jekop ka mae thugna Josep tifa. ⁶Kaisei seu teke dokha mae Jekop na au ngala jare. Aonu mae Jisas lao ne gnokro soru rhegna seu tuana, naugna mana ne babaꞌo fara ka thei. Ka vido tuana jame tanhi nabotho phei fari hotei naublatha.

^7-8Ka vido tuana hatimare mae fanomhore neke tei kokoni mana mala foli gano ka namono na. Kaisei gaꞌase gna Samaria ne mei ka seu na mala toho khoꞌu. Aonu, mae Jisas ne cheke eghu ka gaꞌase na, “Mei katha ghegu khoꞌu.”

⁹Gaꞌase na ne cheke eghu ka mana, “Sei, iara jaglo nogu ka iagho te tore khoꞌu ka iara gne. Iagho maemu Jiu eghuteuna iara gne gaꞌase gu Samaria. Naugna unha site tore khoꞌu iagho ka iara gnea?” Mae Jiure theome fofodu ka mae Samaria re.

¹⁰Aonu mae Jisas ne cheke eghu ka gaꞌase na, “Naikno biꞌo, iagho theome laseni nogna khokofakasai God ranghini naikno na, nu iagho theome laseni mae ihei te tore khoꞌu teu ka iagho gne. Jame laseni iagho na, iagho tangomana te tore ghau iara na, eghuteuna iara tangomana te tusu ari ka iagho u khoꞌu karha na.”

¹¹Gaꞌase na ne cheke eghu ka mana, “Mae biꞌo, khoꞌu na au pari fara, iagho theo kaisei glepo te mala krisu khoꞌu na. Na tei atha aheva saghoi u khoꞌu karha te chekeni iagho tuana? ¹²Ba iagho, mae biꞌo uluni mae kuꞌeda Jekop mae teke tusu ranghi ghita u seu igne sia? Naꞌa baludi goro thugnare nei nodi bulukare eghu neke koꞌu la ka khoꞌu igne tifa na.”

¹³Mae Jisas ne cheke eghu ka naꞌa, “Tutuani fara, ihei te koꞌu ka seu igne na, ginau nake roi koꞌu ngala.¹⁴Nu ihei te koꞌu ka khoꞌu te tusu ranghini iara na, mana ginauna nake theome roi koꞌu. U khoꞌu nate tusu mei iara igne na jateula ngau glokha eghu na fura mei fabrahu ke lamnagna mana. U khoꞌu igne ginauna na tusu ranghini mana u karha fei tifa na.”

¹⁵Gaꞌase na ne cheke eghu ka mana, “Mae biꞌo, tusu mei ka iara u nafnata khoꞌu igne mala koꞌu iara nu theome ke roi koꞌu iara eghu. Eghuteuna iara ginau nake theome pulo mei agne mala toho khoꞌu koba.”

¹⁶Aonu, mae Jisas ne cheke eghu ka naꞌa, “Tei sagho mala chekeni mae khetomu ia mala kafe mei ghopa agne.”

¹⁷Naꞌa neke cheke eghu ka mana, “Iara theo khetogu.”

Mae Jisas ne cheke eghu ka naꞌa, “Iagho doglo fara te chekeni iagho ne theo khetomu teuna.¹⁸Tutuani fara iagho neke au glima khetomu. Nu mae te au balumu teu iagho gognaro theome thofno khetomu iagho eghume unha te chekeni iagho na tutuani fara.”

¹⁹Gaꞌase na ne cheke eghu ka mana, “Mae biꞌo, iara ao la filo glani nigho nga, iagho kaisei mae profet! ²⁰Tifa na mae ku’emi ghehati mae Samaria gre neke tarai lao ka God ka thogele igne. Nu ghotilo mae Jiure te chekei na Jerusalem kolho thofno vido te mala tei tahati te mala tarai lao ka God na eghu.”

²¹Mae Jisas ne cheke eghu ka naꞌa, “Naikno biꞌo, fatutuanidi sagho te chekedi iara igre. Naugna ginauna thoke mei u narane nate theome ke pulo naiknore Jerusalem ba haghe ka thogele igne te mala tarai ka mae Mama na. ²²Ghotilo naiknomi Samaria gre theome thofno laseni mae ihei te mala tarai lao tagna na. Nu ghehati mae Jiu gre laseni mae ihei te mala tarai lao tagna na. Naugna u nogna puhi God te mala fakarha naikno na mei funu ka ghehati mae Jiu gre kolho.²³Narane na la meihi, u narane tuana agne hi gognaro. Naikno te tarai tutuani ka mae Kmada na, u Tharunga te Blahi na ginauna toghodi mare mala falalase glepo eigna mana ka naiknore. Nafnata naikno igre te magnahaghedi mae Kmada te mala tarai lao ka mana na.²⁴God na mae tharunga, theome naikno. Eghume mae Tharunga te Blahi na falalase gobigna lepo te tutuani eigna mana re ka naikno te tarai lao ka mana na.”

²⁵Gaꞌase na ne cheke eghu ka mae Jisas, “Iara laseni mae fakarhai te kiloni mae Kraes na na mei. Kate mei mae Kraes na mana ginauna famane rurutha ranghi ghita tahati gobigna lepore.”

²⁶Aonu, mae Jisas ne cheke eghu ka naꞌa, “Iara mae te facheke teu balumu iagho igne ngala mae Kraes na.”

²⁷Ka vido tuana, nogna mae fanomho mae Jisas re neke pulo mei teke tei foli gano ka namono na. Mare ne jaglo nodi fara naugna mare ne filoni mae Jisas te toutonu teu balugna gaꞌase gna Samaria na. Nu theo kaisei mae ka hatimare te cheke eghu ka naꞌa na, “Magnahaghei unha sagho ia?” Ba, te cheke eghu ka mana, “Naugna unha site toutonu iagho balugna gaꞌase tuana ia?”

²⁸Aonu gaꞌase na ne lisa soru nogna glepo mala toho khoꞌu na neke pulo ka namono na. Naꞌa ne cheke eghu ka naikno au teu ka namono na, ²⁹“Ghotilo re, kaisei mae na ne chekedi ka iara gobigna lepo teke edi iara tifa re. Mei si ghotilo filoni mana. Glahula me mae igne ngala mae Kraes na!” ³⁰Aonu, naiknore jifla ka namono na ne tei mala filoni mae Jisas.

³¹Ke leghugna teke pulo naꞌa ka namono Saeka na mae fanomhore ne cheke eghu ka mana, “Velepuhi, ima gheu!”

³²Nu mae Jisas ne cheke eghu ka mare, “Iara au ghegu gano te mala ghamu na, ghotilo theome laseni.”

³³Kate nomhini mare te cheke eghu mana igne, mae fanomhore ne funu cheke eghu fari thedi, “Glahula keha naikno neke hata gano neke mei ka mana!”

³⁴Aonu, mae Jisas ne cheke eghu ka mare, “Ghegu gano iara na te mala leghuni unha te magnahaghei mae teke kuru mei ghau iara na nei mala loku fahuidi gloku mala mei edi iara teku mana re.³⁵Nomi cheke ghotilo ia eghu agne, ‘Fati nhigra ngau te ofo na ame ghano nga nagare na eghu.’ Nu te chekeni iara ka ghotilo na, ‘Faghano filo fakeli si ghotilo ka nagare ana, u nagare na la ghanohi!’³⁶Eghuteuna mae ihei te atha gano na mana atha nogna taba eigna nogna gloku na, u gano te salo fodu naiknore igre nate athani mare u karha fei tifa na. Eghume, mae ihei teke joꞌu na, nei mae ihei teke pulei na eghu phiamare na kafe gleale’a fodu.³⁷Kaisei cheke te eghu agnea, ‘Kaisei mae mala joꞌu, keha mae na mala atha gano’ teu igne gognaro la tutuani fara.³⁸Na jateula tuana eghu iara na kuru fajifla ghami ghotilo mala tei salo gano ka nagare aheva ghotilo teke theome kmusa ka joꞌu gna na. Keha naikno delei teke kmusa ka joꞌu gna na, eghuteuna u nodi nakmusa mare na mala togho ghami ghotilo.”

³⁹Kmana naiknodi Samaria teke au ka namono tuana mare mei ne fatutuani ni mae Jisas naugna ka cheke te eghu gaꞌase na igre, “Thau igne ne chekedi gobi lepo teke edi iara tifa te ghilei thoke ka narane gognaro gne.” ⁴⁰Naiknore mei ka mae Jisas ne toreni mana mala au baludi. Aonu, mana ne au jare phia narane. ⁴¹Kmana naikno langau neke fatutuani ni mae Jisas naugna ka unha te chekedi mana re.

⁴²Aonu, naiknore ne cheke eghu ka gaꞌase na, “Ulu lahu na ghehati neke fatutuani ni mae Jisas ka unha teke chekedi iagho ka ghehati ra. Nu gognaro na ghehati fatutuani naugna ghehati neke nomhini themi. Tutuani fara, ghehati laseni mae igne ngala thofno mae te mala fakarhadi naikno te gnafa ka nauthoglu gne.”

Mae Jisas ne fakelini thugna nalhaꞌu kaisei mae biꞌo

⁴³Mae Jisas ne au phei narane Samaria, ke leghugna igne mana jifla baludi nogna mae fanomhore ne tei ka Provins Galili. ⁴⁴Naugna mae Jisas neke kulu cheke eghu agne, “Mae ihei te profet na, kheragna mana re na theome ghatho tahuni mana.” ⁴⁵Kate posa mae Jisas Galili na, naikno jare re ne gleale’a fara kate filoni mana na. Naugna mare neke tei ka Gaghamu Ghasa-Polho Jerusalem neke filodi gobigna lepo teke edi mana ka narane gaghamu na.

⁴⁶Ka vido tuana mae Jisas neke pulo ka namono Kena jare Galili, ka namono teke eni mana khoꞌu na teke vuhai u waen na ia. Kaisei mae biꞌo te loku ranghini mae King gna Rom na au jare Kapanam. Thugna mae biꞌo igne na ne fogra fara. ⁴⁷Mana ne nomhini mae Jisas teke funugna nohi Judia teke mei Provins Galili na. Aonu mana mei ka mae Jisas ne toreni mana mala tei ka namono Kapanam, mala ke keli fapulo mae thugna te namo lehe na.

⁴⁸Mae Jisas ne cheke eghu ka mae biꞌo na, “Ghotilo magnahaghei te kulu filodi ghu kofubobhoi nei fagaglana teu te edi iara re ame fatutuani ghau nga iara eghu.”

⁴⁹Mae biꞌo na ne cheke eghu ka mae Jisas, “Mae biꞌo, faghose mei sagho balugu iara ame lehe nga mae thugu iara na eghu.”

⁵⁰Mae Jisas ne cheke eghu ka mana, “Ke pulo sagho. Mae thumu iagho na kela keli fapulohi!”

Mana ne fatutuani ka cheke mae Jisas na neke pulo ka namono na. ⁵¹Ka teke pulo mana ka nabrou na, nogna mae gloku mana re mei ne thafoni mana ka nabrou na ne cheke eghu ka mana, “Mae thumu iagho na kela kelihi!” ⁵²Mana neke ghathoni nogna cheke mae Jisas na ne ghusna eghu ka mare, “Ka tanhi nihai teke keli fapulo mae thugu iara na?” Mare ne cheke eghu ka mana, “Tanhi kaisei ngala naublatha gnorai teke ghaota mana ka fogra na.”

⁵³Mae kmagna masitei na neke ghatho fapuloni ka tanhi kaisei ngala teke cheke eghu mae Jisas na, “Mae thumu iagho na kela kelihi.” Aonu ke leghugna igne mana nei tharaknagna mana na eghu ne kafe fatutuani ni mae Jisas.

⁵⁴Igne fapea kofubobhoi teke eni mae Jisas Galili ke leghugna teke pulo mei funugna Judia na.

Mae Jisas fakarhini kaisei mae te fogra na ka narane Sabat na

¹Kaisei fata ke leghugna igne, mae Jisas neke haghe Jerusalem malagna kaisei nodi gaghamu biꞌo hatimare mae Jiu. ²Jare Jerusalem au kaisei kholo rhegna grengatha te kiloi mare nogna “Grengatha Sipu”. Kholo tuana mae Jiure kiloni Betsata. Rhegna kholo tuana au glima grorofe brahu. ³Kmana naikno thuru ka suga tuare. Naikno igre au kmana nafnata khabru tadi. Kehare dofu, kehare lehehi ghahedire nei kehare blughu. Engel nogna Lord na soru mei leuleghu fata mala fakaploni kholo tuana. ⁴Mae ihei ka hatimare te au khabru tagna nu kulu soru kate kaplo teu kholo na teuna, mana nake keli fapulo nogna. ⁵Kaisei mae te thuru teu jare na mana fogra fabrahu nabagna tolufulu nhana finogha. ⁶Kate mei te filoni mae igne na, mae Jisas laseni mae igne fogra fabrahu funu tifa. Aonu, mae Jisas ne ghusna eghu ka mana, “Ghema, iagho magnahaghei teke keli nou sia?”

⁷Mae te fogra igne ne cheke eghu ka mae Jisas, “Mae biꞌo, iara magnahaghei teke keli nogu, nu iara theo kaisei mae te mala togho ghau te lao ka vido te kaplo teu kholo na. Leuleghu fata na iara fariuriu te mala kulu lao ka kholo na eghu, nu theome tangomana eghu naugna kaisei mae nga te kulu tei na ame iara nga eghu.”

⁸Aonu, mae Jisas ne cheke eghu ka mana, “Kegra haghe, pipiri nou khifra na, nonolo tei ka sugamu na.”⁹Theome raugha mana neke keli nogna. Mana pala nogna khifra na ne tei ka nogna suga na.

Narane te fakelini mae Jisas mae te fogra na igne narane Sabat, nodi narane blahi hatimare mae Jiu. ¹⁰Aonu, hatimare mae biꞌodi mae Jiu igre ne cheke eghu ka mae teke keli fapulo na, “Gognarogne narane Sabat. Thono blahi fara ka noda vetula tahati na te pala iagho nou khifra na kau narane Sabat gne.”

¹¹Nu mana ne cheke eghu ka mare, “Mae teke fakeli ghau iara na, neke cheke ghau iara te mala hata nogu khifra na.”

¹²Hatimare ne ghusna eghu ka mana, “Ghema, mae ihei teke cheke nigho iagho te mala hata nou khifra na te mala nonolo te tei na?”

¹³Nu mae teke keli fapulo na theome laseni mae ihei teke fakelini mana na. Naugna kmana naikno fara au tekeu ka vido tuana. Aonu mae Jisas ne megei nga ne jifla ne tei nogna.

¹⁴Kaisei fata ke leghugna igne, mae Jisas neke filoni mae igne ka Sugablahi na. Mae Jisas ne cheke eghu ka mana, “Filo sagho, iagho gognaro na kela kelihi. Eghume iagho gognaro na thosei ke eni kaisei glepo te diꞌa, na eghunu ke thoke nigho iagho kaisei glepo ke diꞌagna ignei eghu.”¹⁵Aonu, mae igne laseni mae Jisas ne tei cheke eghu ka mae biꞌodi mae Jiure, “Mae teke fakeli ghau iara na, nanghagna na mae Jisas!”

¹⁶Aonu funu ka narane tuana, hatimare mae biꞌodi mae Jiure ne theome magnahagheini mae Jisas. Mare mei ka mae Jisas ne funu cheke faparini mana, naugna mana ne fakelini mae igne kau narane Sabat te blahi fara kau vetula na. ¹⁷Nu mae Jisas ne filo glanidi gaoghathodi mare re ne cheke eghu ka mare, “Mae Kmagu iara na theome gnafa ka gloku. Eghume iara na loku la.”¹⁸Kate nomhidi mae biꞌodi mae Jiu gre cheke te edi mae Jisas igre, mare fariuriu fara te mala faleheni mae Jisas. Theome naugna te huhughuni mana vetula eigna narane Sabat na kolho, nu mana ne kiloni thegna mae Thugna God. Gaoghathogna igne mana magnahaghei te kaisei ngala balugna God.

God ne tusu lao u nolaghi ka mae Thugna na

¹⁹Mae Jisas ne cheke eghu ka mae biꞌodi mae Jiure, “Tutuani fara te chekeni iara ka ghotilo na. Iara mae Thugna God na, theome tangomana te eni kaisei glepo leghuni u gaoghathogu thegu na. Iara edi kolho unha glepo teke filodi thegu te edi mae Mama re. Eghuteuna unha te edi mae Mama re tuare ngala te edi la iara re.²⁰Mae Kmagu iara na namha ghau iara mae Thugna na nei mana falalase ka iara gobigna lepo te edi mana re. Mana ginauna falalase ka iara u gloku ke biꞌodi te edi iara igrei, eghuteuna ghotilo ginauna kafe jaglo nomi fara ka thoke meidire.²¹Mae Kmagu iara na tangomana teke fakarha fapulodi naikno teke lehehire. Eghume iara mae Thugna na ginauna eghu la ke tusu lao u karha ka iheire te vahidi iara re.²²Jaola ngau mae Kmagu iara na theome fateni kaisei naikno. Nu mana la tusu meihi ka iara mae Thugna na u nolaghi te mala fate naikno na.²³Mae Mama ne eni igne mala ghatho tahu ghau iara mae Thugna na naikno te gnafare, jateula ngau mare te ghatho tahu nila mae Kmagu iara na. Mae ihei te theome ghatho tahu ghau iara na, naikno tuana theome ghatho tahu nila mae Mama mae ihei teke kuru mei ghau iara na.”

²⁴Mae Jisas ne cheke eghu ka mare, “Tutuani fara te chekeni iara ka ghotilo na. Mae ihei te nomhidi nei leghudi teu u nogu cheke iara re, nei fatutuani ni Mama mae ihei teke kuru mei ghau iara na teuna, mana na athini u karha te theo ka huigna na. Mae tuana iara na theome fate faleheni mana, naugna mana jateula mae ihei teke lehehi nu ke karha fapulo teu ia eghu.²⁵Tutuani fara te chekeni iara ka ghotilo na. U narane na la meihi, la kulu auhi agne, kau narane tuana naikno teke lehehira ginauna nomhi ghau iara mae Thugna God na. Eghuteuna naikno nate nomhi ghau nei leghu ghau teu iara tuare na athini u karha na.²⁶Uve, u thofno karha na mei funu ka thegna mae Mama. Eghume mae Mama neke snakreni ka iara mae Thugna na mala tufa u karha tuana ka ihei te nomhi ghau nei leghu ghau teu iara na.²⁷Eghuteuna mae Mama neke tusu ranghi ghau iara u nolaghi te mala fate na, naugna iara neke mei funu ka mana.

²⁸“Thosei jaglo nomi ka cheke iara igre. U narane na la namo meihi, kau narane tuana naikno teke kafe lehehire ginauna nomhi ghau iara.²⁹Aonu mare ginauna kafe jifla mei ka bekudire. Iheire teke edi koba gloku te keli tifa re mare ginauna karha fabrahu. Nu iheire teke edi koba glepo te diꞌare mare ginauna au papara fabrahu.”³⁰Mae Jisas ne cheke eghu ka mae biꞌodi mae Jiure, “Iara theome tangomana te eni kaisei glepo leghuni u nogu gaoghatho thegu na. Iara tangomana te fateni naikno na leghuni unha te chekeni mae Mama na. Eghume unha te fatedi iara naiknore thofno doglo fara, naugna iara theome fariuriu loku leghudi kolho unha glepo te magnahaghedi iara thegu re, nu iara loku leghudi kolho unha glepo te magnahaghei mae teke kuru mei ghau na.

Mae Jisas na Thugna God

³¹“Jame toutonu eigu thegu iara ka naiknore meuna, mare ginauna theome fatutuanidi unha glepo tutuani te chekedi iara re.³²Nu kaisei mae ngau te au teu te mala cheke eigu iara ka naiknore, eghuteuna iara laseni unha te chekedi mana eigu iara re thofno tutuani fara.

³³“Mae igne nanghagna na, mae Jone. Ghotilo neke kurudi keha mae neke tei ghusnani mana eidi gobigna lepo te edi iara igre. Eghuteuna unha teke chekedi mana eigu iara igre thofno tutuani fara. ³⁴Iara theome lelheghu ka naiknogna nauthoglu gne te mala chekedi unha te edi iara re tutuani fara teuna. Nu iara chekeni ka ghotilo igne mala fatutuani ghotilo mala athani u karha fei tifa na.³⁵Mae Jone gne jateula kaisei juta te faghano phae te mala filo fakelini u nabrou te tei ka God ia eghu. Eghuteuna katha vido ikoi ghotilo neke nomhidi chekegna mana re neke gleale’a fara.

³⁶“Nu glepo te edi iara igre, ke biꞌodi teke chekedi mae Jone rei, naugna u kofubobhoi te edi iara igre neke edi kau nogna nolaghi mae Mama neke famei ka iara. Eghuteuna u kofubobhoi te edi iara igre u fagaglana gna mae Mama teke kuru mei ghau iara na.³⁷Uve, mae Mama mae ihei teke kuru mei ghau iara na, mana thegna neke cheke eigu la iara. Ghotilo neke theome nomhini u naoglagna mana na, nei theome filoni la mana.³⁸Eghuteuna chekegna mana re theome au ka nagnafami ghotilo re, naugna ghotilo ne theome fatutuani ghau iara mae teke kuru mei mae Mama gne.³⁹Famane hiro fakelidi si ghotilo u gaoghathodi u grioriso te blahi gne, naugna ghotilo gaoghathomi ka glepo igre na, te tusu ranghi ghau u karha fei tifa na eghu. Eghuteuna u grioriso te blahi igre cheke eigu iara kolho!⁴⁰Neubane eghu ngau ne cheke eigu iara u grioriso te blahi gre ghotilo theome magnahagheini te mei ka iara te mala athini u thofno karha tuana.

⁴¹“Iara theome hironi u nafnakno na ka naiknogna nauthoglu igne.⁴²Nu iara lase ghami ghotilo fara, naugna ghotilo theome namhani mae Kmagu iara na ka nagnafamire.⁴³Iara neke mei ka nanghagna mae Mama, nu ghotilo theome magnahaghei ghau iara. Nu jame kaisei mae mei ka nanghagna thegna kolho na, ghotilo ginauna fanomho ka nogna cheke mana re nei leghuni eghu mana.⁴⁴Ghotilo magnahagheidi naiknore te ghatho tahu ghami kolho themi, nu ghotilo theome fariuriu hatani u nafnakno te mei funu ka thegna God na. Eghume thono ninhigrana ghami fara ghotilo te fatutuani ghau iara na.

⁴⁵“Na eghunu ginauna mei cheke fapari ghami iara ke ulugna mae Mama na ghotilo gaoghathomire. Theo! Mae Moses mae ihei na falalase ranghi ghami u nabrou te tutuani na teu ghotilo igne nate cheke fapari ghami ghotilo na.⁴⁶Jame thofno fatutuanidi ghotilo unha teke chekedi mae Moses re na ghotilo tangomana te fatutuani ghau iara na, naugna mana neke rioriso eigu iara.⁴⁷Ghotilo theome fatutuanidi unha teke riorisodi mae Moses eigu iara igre, eghume ghotilo theome tangomana te fatutuanidi nogu cheke iara re.”

Mae Jisas neke faghamudi glima thogha mae

(Mat 14:13-21; Mak 6:30-44; Luk 9:10-17)

¹Kaisei fata ke leghugna igne mae Jisas ne kasa baludi nogna mae fanomhore ka keha phile Kholo Galili te kiloni jaola Kholo Taebirias. ²Kmana naikno leghuni mana, naugna mare ne filodi nogna gloku te nolaghi te edi mana te fakelidi naikno te fogra re. ³Aonu, kate tei posa mare ka keha phile kholo na, mae Jisas ne haghe ka kaisei thogele, ne gnokro pari baludi nogna mae fanomhore. ⁴Ka vido tuana u nodi Gaghamu Ghasa-Polho mae Jiure la namohi.

⁵Mae Jisas efra haghe ne filodi kmana naikno ne mei ka mana. Aonu mae Jisas ne cheke eghu ka mae Filip, “Filip, aheva nate tei foli gano tahati te mala faghamudi naikno igre?”⁶Mana ghusna eghu mala fariuriuni kolho mae Filip. Naugna mana la kulu lasenihi unha nate eni na.

⁷Mae Filip ne cheke eghu ka mana, “Tahati jame kafe loku kaisei nhigra te mala foli naba gano te mala katha vido kaisei naikno teuna!”

⁸Kaisei nogna mae fanomho mae Jisas, nanghagna na mae Aduru, tahigna mae Simon Pita, mana ne cheke eghu ka mae Jisas, ⁹“Kaisei mae sitei agne au glima bret nei phei sasa. Nu gano igre ginauna theome naba kolho ka naikno te kmana igre!”

¹⁰Mae Jisas ne cheke eghu ka mae fanomhore, “Ghotilo chekedi naikno are mala gnokro pari.” Vido tuana au kmana faghano buburu te mala gnokro na. Naiknore ne kafe gnokro pari. Eghuteuna khaputudi mae biꞌo te au jare kau narane tuana, jame naba glima thogha. ¹¹Aonu, mae Jisas ne atha glima bret re, ne cheke fakelidi ka God, mana tusu lao ka mae fanomhore mala tufa ka naiknore. Mana jaola ka phei sasare, eghuteuna naiknore kafe ghamu ne boho.

¹²Ke leghugna te kafe ghamu te boho naiknore mae Jisas ne cheke eghu ka mae fanomhore, “Salo fodu ghotilo vido gano teke salaꞌui are na eghunu chochoghei tahati gano gre eghu.”¹³Aonu, hatimare ne salofodu vido gano teke salaꞌui ka glima bret re ne fafofodu nabotho phei khara’o.

¹⁴Kate filoni u kofubobhoi te eni mae Jisas igne naiknore ne cheke eghu, “Tutuani fara, igne ngala mae profet biꞌo mala mei ka nauthoglu gne teku ka nodi grioriso hatimare mae profet tifa ra!” ¹⁵Ka narane tuana mae Jisas ne filo glanidi u gaoghathodi naiknore te magnahaghei huhuruni mana mala mae King. Aonu mana megei nga ne jifla ne tei au thegna kau thogele na.

Mae Jisas nonolo ne tei ke tagru kholo na

(Mat 14:22-33; Mak 6:45-52)

^16-17Ka grafi tuana, nogna fanomho mae Jisas re ne soru ka kholo na ne ofoni mana ne ghilei bongi. Kate dofini mana na, mare saghe ka nodi mola na ne funu kasa ka kholo na mala thoke Kapanam. ¹⁸Ka vido tuana kaisei seseuru biꞌo ne mei ka mare, ne funu diꞌa u kholo na. ¹⁹Kate ghorha te teihi mare nabagna glima kilomita na, mare ne filoni mae Jisas te nonolo te mei ka thagrugna kholo na, mana mei ne namo ka nodi mola mare na. Kate filoni mae Jisas na hatimare ne kafe mhaghu fara. ²⁰Nu mae Jisas ne cheke eghu mei ka mare, “Tore, thosei mhaghu! Iara mae Jisas!”²¹Hatimare gleale’a fara ne fasagheni mana ka mola na. Aonu mare ghosei ne mei longa ka vido aheva teke magnahaghei tei mare na.

Naiknore ne hironi mae Jisas

²²Ka keha narane na, naikno teke au faleghu tekeu ka keha phile kholo na mare laseni kaisei mola kolho au tekeu jare na, eghuteuna mare neke laseni la mae Jisas gne neke theome tei baludi nogna mae fanomhore nu mare neke tei kolho thedi. ²³Aonu, keha molare ne mei funudi Taebirias. Mare mei ne longa ka vido aheva mae Jisas teke cheke fakelini ka God u gano teke ghamu naiknora. ²⁴Aonu, kate theome filoni mae Jisas jare baludi nogna mae fanomhore, mare saghe ka molare ne tei hironi mana Kapanam.

Mae Jisas ngala u gano te mala tusu lao u karha na ka naiknore

²⁵Naiknore ludeni mae Jisas ka keha phile kholo na ne cheke eghu ka mana, “Velepuhi, neke mei niha agne sagho ia?”

²⁶Mae Jisas ne cheke eghu ka mare, “Tutuani fara te chekeni iara ka ghotilo na. Ghotilo mei hiro ghau iara agne naugna ghotilo neke ghamu neke boho kau bret ra kolho. Nu ghotilo theome lase fakelidi kolho gaoghathodi u kofubobhoi teke edi iara ra.²⁷U gano gna nauthoglu igne ghosei boto nei diꞌa eghu. Thosei loku eigna u nafnata gano tuana. Nu loku eigna u gano te au fabrahu te tusu ranghi ghami ghotilo u karha fei tifa na. Iara mae teke mei funu ka God na ginauna tusu ari ka ghotilo u gano tuana. Naugna God Mama na la falalasehi te namha ghau iara na.”

²⁸Aonu naiknore ne ghusna eghu ka mana, “Unha glepo gre te magnahaghedi God te mala edi ghehati re?”

²⁹Mana ne cheke eghu ka mare, “U gloku te magnahagheni God te mala eni ghotilo na igne, fatutuani ghau iara, mae ihei teke kuru mei mana gne.”

³⁰Aonu, naiknore neke cheke eghu ka mana, “Edi sagho keha kofubobhoi mala fatutuani nigho ghehati. Unha glepo nate eni iagho na? ³¹Ka narane teke jifla teke tei mae kuꞌeda tahati re kau namono nagou na, mare neke ghamu fabrahu u nafnata gano te kiloi mare u ‘manna’ na. Jateula te chekeni kau grioriso te blahi na, ‘God neke tusu ranghidi mare u gano funugna kligna na mala ghamu.’ ” 6:31 Eks 16:4; Neh 9:15; Sam 78:24,25.

³²Mae Jisas ne cheke eghu ka mare, “Tutuani fara te chekeni iara ka ghotilo na. Mae Moses neke theome tusu ranghidi mae ku’emi ghotilo ra gano gna kligna na. Nu mae Kmagu iara na neke tusu ranghi ghami ghotilo u thofno gano teke mei funugna kligna na.³³U gano teke tusu mei God na mae ihei teke soru mei funugna kligna te mala tusu lao u karha na ka naikno te gnafa kau nauthoglu igne.”

³⁴Naiknore ne cheke eghu ka mae Jisas, “Mae biꞌo, tusu mei fabrahu u nafnata gano tuana ka ghehati.”

³⁵Mae Jisas ne cheke eghu ka mare, “Iara jateula u gano eghu mala tusu lao u karha na ka naiknore. Mae ihei te mei ka iara na mana ginauna theome rofo. Mae ihei te fatutuani ghau iara na mana ginauna theome roi koꞌu.³⁶Nu iara neke chekenihi ka ghotilo, neuba ghotilo ne filo ghauhi iara, ghotilo theome fatutuani ghau iara kolho.³⁷Naikno te gnafa teke tusu mei mae Mama ka iara re ginauna mei ka iara. Nu ihei te mei ka iara na iara ginauna theome brue fapuloni.³⁸Naugna iara neke mei funu kligna mala edi unha te magnahaghedi mae Mama mae ihei teke kuru mei ghau iara na theome mala edi unha te magnahaghedi iara thegu re.³⁹Mae ihei teke kuru mei ghau iara na mana theome magnahaghei ghau iara te lisa lao mala sniki kaisei naikno teke chekedi mana mala reireghidi iara teku igre, nu mala fakarha fapulodi iara kau narane leghu lahu na.⁴⁰Naugna mae Kmagu iara na magnahagheidi naiknore te kafe filo glani ghau iara mae Thugna na nei fatutuani ghau iara teuna mala athini u karha fei tifa na. Eghuteuna iara na fakarha fapulodi kau narane leghu lahu na.”

⁴¹Ka vido tuana hatimare mae Jiure ne funu buiburini mae Jisas. Mare buiburini mae Jisas naugna mana ne cheke eghu, “Iara ngala u gano teke mei funugna kligna na.”⁴²Mare ne cheke eghu fari thedi, “Mae igne mae Jisas kolho. Tahati kafe lasedi kmagna nei idogna teure. Mana thugna mae Josep kolho. Naugna unha site chekeni mana ‘Iara neke mei funu kligna’ teu gnea?”

⁴³Aonu, mae Jisas ne cheke eghu ka mare, “Thosei buiburi eghu fari themi!⁴⁴Theo kaisei naikno tangomana te mei ka iara na ghilei batu meini mae Mama mae teke kuru mei ghau iara na. Eghuteuna mae ihei te mei ka iara na, iara ginauna fakarha fapuloni mana kau narane leghu lahu na.⁴⁵U cheke teke risodi hatimare mae profet tifa ra cheke eghu, ‘God ginauna kafe farirhiudi naiknore.’6:45 Isa 54:13.Ihei te nomhini chekegna mae Mama na eghuteuna leghuni teuna, mana na mei ka iara.⁴⁶Theo kaisei naikno teke filoni God mae Kmagu iara na. Kaisei iara mae teke au balugna mana na ngala te filoni mana na.⁴⁷Tutuani fara te chekeni iara ka ghotilo na. Mae ihei te fatutuani ghau iara na, mana na athini u karha fei tifa na.⁴⁸Iara ngala u gano te mala tusu lao u karha na ka naiknore.⁴⁹Mae ku’emi ghotilo re neke ghamuni u ‘manna’ na ka namono nagou na, nu neuba ngau mare neke kafe lehe ngala.⁵⁰Nu igne u gano teke soru mei funugna kligna na. Mae ihei te ghamuni u gano igne na, mana ginauna theome lehe.⁵¹Iara ngala u gano karha teke mei funu kligna na. Ihei te ghamuni gano igne na, mana na karha fabrahu. U gano igne ngala u thinigu iara na. Iara ginauna tusu lao ka naiknogna u nauthoglu igne mala tangomana te athini u karha na.”

⁵²Kate nomhidi cheke mae Jisas igre, hatimare mae Jiu ne funu diꞌa tadi ne fapholai fari thedi. Aonu, mare ne cheke eghu, “Faꞌunha tangomana si mae igne te tusu mei ka tahati thinigna na te mala ghamu na ia?”

⁵³Mae Jisas ne cheke eghu ka mare, “Tutuani fara te chekeni iara ka ghotilo na. Te theome ghamuni ghotilo thinigu iara na nei theome ko’uni dadaragu iara mae teke mei funu ka God na teuna ghotilo ginauna theome athini u thofno karha na!⁵⁴Mae ihei te ghamuni thinigu iara na nei ko’uni dadaragu iara na teuna, mana athini karha fei tifa na. Iara ginauna fakarha fapuloni mana kau narane leghu lahu na.⁵⁵Naugna thinigu iara na ngala u thofno gano te tutuani na, nei u dadaragu iara na ngala u thofno khoꞌu te tutuani na.⁵⁶Mae ihei te ghamuni thinigu iara na nei ko’uni dadaragu iara na teuna, mana na au balugu iara, eghuteuna iara na au balugna mana.⁵⁷Mae Kmagu iara mae ihei teke kuru mei ghau iara na, mana neke tusu mei u karha na. Eghuteuna u karha tuana au ka iara naugna mae Mama neke tusu mei ka iara. Jateula tuana eghu mae ihei te ghamu ghau iara na, mana na athini u karha tutuani na ka iara.⁵⁸Eghume igne u thofno gano tutuani teke mei funugna kligna na. Theome jateula u gano te kiloi ‘manna’ teke ghamuni mae ku’emi ghotilo ra eghu. Ke leghugna ghamu te gnafa mare u ‘manna’ tuana na mare neke kafe lehe ngala. Nu mae ihei te ghamuni u gano igne na mana ginauna karha fabrahu.”⁵⁹Mae Jisas neke chekedi u glepo igre ka teke farirhiudi mana naiknore ke lamnagna u suga tharai na ka namono Kapanam.

U farirhiu eigna u karha fei tifa

⁶⁰Kmana ka naikno teke leghuni fabrahu mae Jisas igre nomhini u nafnata farirhiu igne ne cheke eghu, “U farirhiu igne thono ninhigrana fara. Ginauna theome tangomana kaisei naikno nate fatutuanidi u nafnata farirhiu igre.”

⁶¹Neubane theome nomhidi ngau, mae Jisas lasenihi te buiburi mare eigna u farirhiu igne. Aonu mana ne cheke eghu ka mare, “Ba, ka farirhiu igne nu la tiromi leghu ghau la iara eghu si ghotilo ia?⁶²Te eghu na, na unha eghu ghotilo gaoghathomi na nate filo ghau iara mae teke mei funu ka God na teke pulo iara ka vido aheva teke kulu au iara tifa na?⁶³U thini na theome tangomana tusu lao u karha ka naikno na. Mae Tharunga te Blahi ngala tangomana te tusu lao u karha ka naikno na. Eghume, chekegu iara gre ngala te mala athini ghotilo u Tharunga te Blahi na, mae ihei nate tusu mei u karha na.⁶⁴Nu keha naikno ka ghotilo theome fatutuani ghau iara.” Funu ka vuvuhagna na mae Jisas la kulu lasedihi mae iheire te theome fatutuani ni mana re. Eghuteuna mana la lasenihi mae ihei nate majorani mana na. ⁶⁵Mae Jisas neke cheke eghu, “Igne u gaoghathogna teke chekeni iara ia, theome tangomana kaisei naikno te mei ka iara na jame te theome snakre meini mae Mama ka iara na.”

⁶⁶Ke leghugna te cheke eghu mae Jisas igne, kmana naikno teke leghuni fabrahu mana re, mare ne tei kokoni mana neke tirodi leghuni mana.

⁶⁷Aonu, mae Jisas ne ghusna eghu ka nabotho phei nogna mae fanomhore, “Ghotilo ba, ghotilo jaola magnahaghei te tei koko ghau iara sia?”

⁶⁸Mae Simon Pita ne cheke eghu ka mana, “Lord, ghehati theo kaisei mae te mala leghuni na kaisei iagho ngala. Eghuteuna u chekemu iagho re ngala te mala athini ghehati u karha fei tifa na. ⁶⁹Gognaro ghehati fatutuani nigho iagho. Ghehati laseni nigho iagho mae blahi neke mei funu ka God.”

⁷⁰Mae Jisas ne cheke eghu ka mare, “Iara neke kafe vahi ghami ghotilo nabotho phei mae. Nu neuba ngau kaisei mae ka ghotilo na thono jateula mae Satan eghu.”⁷¹Mae Jisas cheke eigna mae Judas, thugna mae Simon Iskariot. Mae Judas gne kaisei mae ka hatimare nabotho phei mae nogna fanomho gre. Nu mana ngala nate majorani mae Jisas na.

Thabusigna mae Jisas re theome fatutuani ni mana

¹Ke leghugna igne, mae Jisas neke teitei ke lamnagna Provins Galili. Mana ne tirogna teitei ka Provins Judia, naugna mae biꞌodi mae Jiu te au jare re ne ofo mala faleheni mana. ²U narane biꞌo nodi mae Jiu te kiloi “Gaghamu Grorofe” na la namohi. ³Aonu, mae thabusigna mae Jisas re ne cheke eghu ka mana, “Ghema, jifla sagho tei Judia mala filodi naikno te leghu nigho re kofubobhoi te edi iagho are eghu. ⁴Naugna mae ihei te magnahaghei fnakno ka tathadi naiknore, mana theome tangomana te eni poru nogna gloku na. Eghume te edi iagho glepo te biꞌo igre, edi fakakhana sagho ka tathadi naikno te gnafare mala kafe filo glani nigho.” ⁵Neubane mae thabusigna mae Jisas gre mare theome fatutuani ni mana.

⁶Mae Jisas ne cheke eghu ka mare, “U thofno nogu narane iara te mala tei jare na theome mei ngau. Nu ghotilo na lelheghu kolho ka themi te tei eni unha te magnahagheni na.⁷Naiknogna nauthoglu igne mare na theome diꞌa tadi ka ghotilo. Nu ka iara na mare diꞌa tadi fara, naugna iara ne cheke thakledi u puhidi mare te diꞌare.⁸Tei si ghotilo kau narane gaghamu tuana. Nu iara na theome tei gognaro, naugna u nogu narane iara te mala tei jare na theome thoke mei ngau.”⁹Ke leghugna te cheke eghu ka mare igne, mana neke au fapulo keha narane ka Provins Galili.

Mae Jisas ne tei ka Gaghamu Grorofe na

¹⁰Aonu, hatimare mae thabusigna mae Jisas re ne tei Jerusalem ka gaghamu na. Mae Jisas ne tei la Jerusalem ke leghudi mare. Nu mana ne tei poru mala theome laseni kaisei naikno aheva te tei mana na. ¹¹Kau narane gaghamu na mae biꞌodi mae Jiure ne hironi mae Jisas, ne ghusna eghu tafri, “Aheva si mae ignea?”

¹²Kmana naikno ne cheke pouporu eigna mae Jisas. Keha naiknore ne cheke eghu, “Mae igne kaisei mae keli fara puhigna na.”

Keha naiknore ne cheke eghu, “Theo, mae igne magnahaghedi naiknore mala leghudi kolho nogna chaghi thegna re.” ¹³Nu theo kaisei naikno ka mare te frane te cheke thakleni mana na, naugna mare thono mhaghudi fara goro mae biꞌodi mae Jiu.

¹⁴Kate thoke farihoteigna gaghamu na, mae Jisas ne ruma ka Sugablahi na ne funu farirhiudi naiknore. ¹⁵Hatimare mae biꞌodi mae Jiu gre ne jaglo nodi fara kate nomhidi nogna farirhiu mana re ne cheke eghu, “Mae igne neke theome tei kolho ka sikolu. Faꞌunha ne lasedi fara si mana glepo igrea?”

¹⁶Mae Jisas ne cheke eghu ka mare, “Hea, u glepo te farirhiu iara igre theome nogu iara thegu. Nogu farirhiu iara igre neke mei funudi ka mae teke kuru mei ghau iara na.¹⁷Mae ihei te magnahaghei leghuni unha glepo te magnahaghedi God re, mae tuana ginauna lasedi unha te chekedi iara igre neke mei funudi ka God teuna. Mana ginauna laseni u farirhiu igre theome nogu iara thegu.¹⁸Mae ihei te farirhiudi kolho nogna gaoghatho thegna re, mana fariuriu fafnaknoni kolho thegna. Nu mae ihei te fariuriu fafnaknoni mae teke kuru mei ghau iara na, naikno tuana chekeni koba u glepo te tutuani na eghuteuna mana theome lase chaghi.¹⁹Mae Moses neke tusu ari ka ghotilo u vetula na, nu theo kaisei ka ghotilo te leghuni u nogna vetula mana na. Naugna unha site fariuriu falehe ghau iara ghotilo gnea?”

²⁰Aonu naikno khapru teu jare re ne cheke eghu ka mana, “Ghema, kaisei naitu na au ke lamnamu iagho! Mae ihei gne site rogna falehe nigho iagho na ia?”

²¹Aonu mae Jisas ne cheke eghu ka mare, “Iara neke eni kaisei kofubobhoi ka narane Sabat ia. Eghuteuna ghotilo neke kafe jaglo nomi.²²Mae Moses neke tusu ari ka ghotilo kaisei vetula eigna tohi fagaglana. (Theome mae Moses ulu lahu na, nu mae kuꞌeda tahati tifa re teke kulu eni na.) Eghuteuna neubane narane Sabat ghotilo neke eni ngala u puhi tuana.²³Te mala leghuni nogna vetula mae Moses na ghotilo tohi fagaglana sua nalhaꞌu na ka fahanagna narane na. Te khale kau narane Sabat fahanagna u narane na ghotilo ginauna eni tohi fagaglana na kau narane tuana. Naugna unha site diꞌatami ghotilo ka iara kate fakelini iara thinigna thongana kaisei mae kau narane Sabat gnea?²⁴Thosei vavahi ka unha glepo te keli kolho fifilogna ke kosi na, nu te keli na vavahi ka unha glepo te thofno tutuani.”

Gusna eigna mae Kraes

²⁵Keha naikno te au Jerusalem re ne cheke eghu, “Igne si mae teke mala fariuriu faleheni teku goro mae biꞌo ra. ²⁶Filoni si ghotilo, gognaro na mana kafe cheke ka naiknore, eghuteuna goro mae biꞌo re theome chekeni ngala kaisei cheke ka mana! Glahula me lasenihi goro mae biꞌo gre te mae igne tutuani ngala mae Kraes na. ²⁷Nu kate mei mae Kraes na theo kaisei naikno nate laseni mana teke mei funugna aheva. Eghuteuna tahati kafe laseni namono gna mae igne.”

²⁸Kate farirhiudi naiknore teu ka Sugablahi na mae Jisas ne cheke eghu fabiꞌo, “Uve, ghotilo lase ghau iara, eghuteuna ghotilo laseni funu aheva teke mei iara na. Nu iara theome mei ka nogu gaoghatho thegu. Mae ihei te tutuani na teke kuru mei ghau iara na. Ghotilo theome laseni mana!²⁹Nu iara laseni mana, naugna iara mei funu ka mana, eghuteuna mana neke kuru mei ghau iara!”

³⁰Kate chekeni mae Jisas igne, mae Jiure ne fariuriu lokini mana. Nu theo kaisei mae ka mare tangomana te lokini mana na, naugna nogna narane mana na theome mei au. ³¹Nu kmana naikno ne fatutuani ni mana. Mare ne cheke eghu fari thedi, “Kofubobhoi te edi mana igre thono jateula gobigna lepo teke chekedi mare mala edi mae Kraes ka narane nate mei mana ginauna.”

Mae Jiure fariuriu lokini mae Jisas

³²Mae Farasi re nomhidi naiknore te cheke pouporu eidi glepo te edi mae Jisas igre. Aonu mae pris ulu nei mae Farasi eghu igre ne kurudi keha mae greireghi Sugablahi na mala tei lokini mana.

³³Mae Jisas ne cheke eghu, “Iara ginauna au balumi ghotilo katha vido kmoꞌei kolho. Aonu iara ginau nake pulo ka mae ihei teke kuru mei ghau na.³⁴Ghotilo ginauna hiro ghau iara, nu ghotilo ginauna theome filo ghau iara, naugna ghotilo ginauna theome tangomana te thoke ka vido aheva nate tei au iara na.”

³⁵Hatimare mae Jiure nomhidi cheke mana igre ne cheke eghu fari thedi, “Sei, na tei aheva si mae ignea mala theome filoni tahati? Ba, na tei ka naikno tahati te au ka namonodi mae Griki ra? Ba mala tei farirhiudi mae Griki are? ³⁶Mae igne te chekei na tahati ginauna hironi mana, nu tahati ginauna theome filoni mana, eghuteuna tahati ginauna theome tei thoke ka vido aheva te au mana na teu signe. Unha eghu si mana gaoghathodi u cheke igrea?”

Mae Jisas cheke eigna mae Tharunga te Blahi

³⁷Narane leghu lahu igne ngala narane biꞌo fara ka gaghamu na. Kau narane tuana mae Jisas kegra haghe farihoteigna nakhapru na ne cheke eghu fabiꞌo, “Mae ihei te roi koꞌu na mei ka iara mala koꞌu.³⁸Mae ihei te fatutuani ghau iara na, mana ginauna jateula te cheke eghu kau grioriso te blahi na ia eghu, ‘U khoꞌu karha na ginauna loloro mei fabrahu ka nagnafagna mana na.’ ”³⁹Mae Jisas neke cheke eigna mae Tharunga te Blahi nate mei ka iheire te fatutuani ni mana re. Kau narane tuana God theome kuru mei ngau mae Tharunga na, naugna mae Jisas theome kegra ngau kau nafnakno.

Naiknore ne fapoaphola eigna mae Jisas

⁴⁰Keha naiknore nomhidi glepo te chekedi mae Jisas igre ne cheke eghu, “Tutuani fara, mae igne ngala thofno mae profet biꞌo te ofoni tahati na.”

⁴¹Aonu, keha naiknore ne cheke eghu, “Mae igne ngala mae Kraes na.”

Nu keha naiknore ne cheke eghu, “Theo, mae Kraes na theome mala mei funugna ka Provins Galili. ⁴²Unha te chekeni kau grioriso te blahi na mae Kraes na mala karha mei ka vikegna mae King Devet. Eghuteuna mana na karha ka namono Betlehem, namono aheva teke karha mae Devet.” ⁴³Aonu naiknore ne theome kaisei gaoghatho eigna mae Jisas ne fnota. ⁴⁴Keha naiknore ne magnahaghei lokini mana, nu theo kaisei naikno te frane te habo lao ka mana na.

Mae biꞌodi mae Jiure ne theome fatutuani ni mae Jisas

⁴⁵Hatimare mae greireghi gna Sugablahi na neke pulo ka hatimare mae pris ulu nei ka hatimare mae Farasi. Aonu mae pris ulu nei mae Farasi teu igre ne cheke eghu, “Naugna unha site theome atha te mei ghotilo mae Jisas gnea?”

⁴⁶Mae greireghigna Sugablahi gne ne cheke eghu ka mare, “Tore, ghehati theome nomhini kaisei mae te cheke ka nolaghi jateula mae igne teuna.”

⁴⁷Mae Farasi gre ne cheke eghu ka mare, “Tutuani fara, ghotilo la fatutuanidi hila nogna chaghi mana re. ⁴⁸Theo kaisei mae biꞌo nei kaisei mae Farasi eghu te fatutuani ni mana na. ⁴⁹Nu naikno te fatutuani ni mana tuare theome laseni nogna vetula mae Moses. Eghume naikno tuare God ginauna tibridi mare!”

⁵⁰Kaisei mae ka hatimare mae Farasi gre au jare, mae igne mae Nikodimas, mae ihei teke tei filoni mae Jisas kaisei fata tifa ia. Mana ne cheke eghu ka mare, ⁵¹“Nu noda vetula tahati ia, theome keli te fateni naikno na kate theome nomhini teu mana na. Tahati na theome fateni mana ghilei laseni ngau tahati unha puhi teke eni mana na.”

⁵²Hatimare ne cheke eghu ka mae Nikodimas, “Ba, iagho mae funumu Galili la sia? Hiro fakelidi sagho grioriso te blahi igre, iagho ginauna theome filoni kaisei mae profet te mei funu Galili na.”

⁵³Aonu mare ne kafe jifla ne sopa tei ka sugadire.

Kaisei naikno biꞌo te tolaghi pedo

¹Ke leghugna teke pulohi naiknore ka namonodire, mae Jisas ne haghe ka kaisei thogele te kiloi Thogele Gaju Olivi.

²Hamerane boibongi ka keha narane na, mae Jisas neke pulo Jerusalem ne ruma ka Sugablahi na. Ka narane tuana, kmana naikno filoni mana ne mei khapru faligohoni mana. Eghuteuna mana gnokro soru ne toutonu ranghidi Nonomho te Keli na. ³Hatimare mae velepuhigna vetula nogna mae Moses nei keha mae Farasi eghu hata ne mei kaisei gaꞌase teke tolaghi pedo. Aonu, mare ne fakegrani naꞌa ke uludi naiknore. ⁴Mare ne cheke eghu ka mae Jisas, “Mae velepuhi, gaꞌase igne thofno khale ka puhi tholaghi pedo. ⁵Eghuteuna, ka noda vetula tahati teke tusu ranghi ghita mae Moses ia thono blahi fara te tolaghi pedo na. Nu te chekeni ka vetula na cheke eghu agne, ‘Ihei te loku jafra jateula gaꞌase igne teuna, mala fada falehe kau thina’, ba unha eghu iagho gaoghathomu na?” ⁶Mare cheke igre khogla saosagroni kolho mae Jisas, mala cheke jafra mana nu athini mana ka fate eghu kolho.

Nu mae Jisas theome cheke ne pogho soru ne rioriso ka thagru glose na, ka geghesu thegna na. ⁷Mare magnahaghei keha cheke tughu ka mana ne ghusna fabrahu. Mana gnokro fadoglo haghe ne cheke eghu ka mare, “Mae ihei ka ghotilo te theome eni kaisei najafra na, kulu atha kaisei thina mala fadi faleheni naꞌa.”⁸Aonu, mana fapea pogho soru neke rioriso ka thagru glose na.

⁹Kate nomhini nogna cheke mae Jisas igne, mae biꞌodi mae Jiure ne megei nga ne sopa thei. Hatimare mae biꞌo kulu tei, eghuteuna, mae majaghani re leghu lahu. Kate kafe tei te gnafa mare na, thegna gaꞌase na ngala kegra teu balugna mae Jisas na. ¹⁰Mae Jisas filo haghe ka naꞌa ne cheke eghu, “Naikno biꞌo, la kafe tei ngala aheva si ra? Theo kaisei naikno site au teu te mala fate falehe nigho iagho na ia?”

¹¹Naꞌa ne cheke eghu ka mana, “Funei, theo kaisei ka reꞌe.”

Mae Jisas ne cheke eghu ka naꞌa, “Iara theome tangomana la te fate nigho na. Jifla tei sagho nu thosei ke eni kaisei najafra eghu!”

Mae Jisas u naphae gna nauthoglu

¹²Ke leghugna igne, mae Jisas ne cheke eghu ka naiknore, “Iara jateula u naphae eghu ka naiknogna nauthoglu igne. Ihei te leghu ghau iara na, mana ginauna theome totokhei kate romno na, nu mana na au kau naphae mala filoi u nabrou te karha na.”

¹³Hatimare mae Farasi ne cheke eghu ka mana, “Iagho khogla cheke leghudi kolho nou gaoghatho themu re. Eghume u nou cheke iagho tuare theome tutuani kolho. Ghehati theome fatutuanidi kolho nou cheke iagho re!”

¹⁴Mae Jisas ne cheke eghu ka mare, “Uve, ka thegu iara na iara cheke kate au nafugna, eghuteuna u nogu cheke iara igre tutuani fara, naugna iara laseni aheva teke mei gu na nei aheva nate ke tei gu na. Ghotilo theome laseni aheva teke mei gu na nei aheva nate ke tei gu na.¹⁵Ghotilo khogla fate leghuni kolho gaoghathogna naiknogna u nauthoglu igne kolho, eghuteuna iara theome fateni kaisei naikno jateula te eni ghotilo tuana eghu.¹⁶Nu kate fateni iara naikno na, iara fateni mana ka puhi te tutuani nei doglo eghu. Naugna theome iara thegu kolho te fate na, nu ghepa mae Mama mae teke kuru mei ghau iara na te mala fate naikno na.¹⁷U nomi vetula ghotilo ia cheke eghu, ‘Te kafe nanaba phiamare nodi chekere unha te chekeni phiamare na tutuani fara.’¹⁸Iara cheke eigu thegu, eghuteuna mae Mama mae teke kuru mei ghau iara na mana cheke eigu la iara.”

¹⁹Hatimare ne ghusna eghu ka mae Jisas, “Aheva gne mae kmamu iagho te chekeni iagho na?”

Mana ne cheke eghu ka mare, “Ghotilo theome lase ghau iara nei theome laseni la mae Mama. Jame lase ghau iara ghotilo na, ghotilo jame laseni la mae Mama.”²⁰Mae Jisas neke chekedi u cheke igre ka teke farirhiudi mana naiknore kau Sugablahi na, rhegna vido mala lilisei sileni ka God naiknore. Eghuteuna, theo kaisei mae te mei lokini mae Jisas na, naugna nogna narane mana teke lilisei God na theome thoke mei ngau.

Mae Jisas neke mei funugna kligna

²¹Mae Jisas neke cheke eghu ka naiknore, “Iara ginau nake tei koko ghami ghotilo. Eghuteuna ke leghugu iara na, ghotilo ginauna hari ghau iara, nu ghotilo ginauna lehe baludi nakhibomi are. Ghotilo ginauna theome tangomana nate mei thoke ka namono aheva te tei iara na.”

²²Mae biꞌodi hatimare mae Jiu ne cheke eghu fari thedi, “Mana te chekeni na tahati ginauna theome tangomana te tei ka vido aheva te tei thegna na teu si mana gne. Na tei faleheni thegna mana fou?”

²³Mae Jisas ne cheke eghu ka mare, “Ghotilo neke karha ka nauthoglu igne kolho, eghuteuna iara theome maegu ka nauthoglu igne. Nu iara neke mei funu kligna ka God.²⁴Naugna igne te chekeni iara ka ghotilo na, ‘Ghotilo ginauna lehe baludi nakhibomi are’. Te theome fatutuani ghau iara ghotilo, iara kaisei mae teke karha mei jateula kaisei mae biꞌo teuna, ghotilo ginauna na lehe kau nakhibomire!”

²⁵Hatimare ne ghusna eghu ka mana, “Ghema, iagho mae ihei sia?”

Mae Jisas ne cheke eghu ka mare, “Iara ngala mae ihei teke chekeni thegu ka ghotilo tifa ia.²⁶Iara au kmana glepo fara te mala cheke eimi ghotilo nei mala fate ghami ghotilo teuna. Nu iara ginauna kafe cheke ka ghotilo naiknogna nauthoglu igne unha teke nomhidi iara ka mae teke kuru mei ghau na. Naugna unha te chekedi mana re thono tutuani fara.”

²⁷Hatimare theome laseni gaoghathogna te chekeni mana eigna God mae Kmagna na. ²⁸Mae Jisas ne cheke eghu ka mare, “Gognaro ghotilo na theome lasedi nogu cheke iara gre ghilei nhaꞌa haghe ghau iara ghotilo mae teke mei funu ka God gne kau gaju fafatha na. Kau narane tuana ame laseni nga ghotilo te theome eni iara kaisei glepo leghuni nogu gaoghatho thegu na. Nu unha mae Kmada teke farirhiu ghau iara re ngala te farirhiudi iara ka ghotilo re.²⁹Eghuteuna mae Mama mae teke kuru mei ghau iara na, mana au fabrahu balugu iara. Mana theome tei koko ghau iara, naugna iara edi fabrahu gobigna lepo te magnahaghedi mana mala edi iara teku re.”³⁰Aonu, kate chekedi mae Jisas glepo igre, kmana naikno ne fatutuani ni mana.

Mae Jisas vikegna mae Ebraham

³¹Mae Jisas ne cheke eghu ka mae Jiu te fatutuani ni mana re, “Te leghudi fabrahu ghotilo nogu farirhiu iara re, ghotilo thofno nogu mae fanomho iara.³²Ghotilo ginauna laseni u glepo te tutuani eigna God na, eghuteuna u glepo te tutuani tuana ginauna hata fasnagla ghami ghotilo.”

³³Nu keha naikno te theome magnahaghedi cheke te edi mana re ne cheke eghu, “Sei, ghehati theome nogna naikno sneka ihei nga, nu ghehati gne vikegna mae Ebraham. Eghume, unha eghu iagho gaoghathogna cheke te ‘Ghotilo na hata fasnagla ghami’ teu tuana?”

³⁴Mae Jisas ne cheke eghu ka mare, “Tutuani fara, te chekeni iara ka ghotilo na, iheire te loku jafra ka nakhibo na, naikno tuare sneka ka nakhibo.³⁵Mae ihei teke karha ke lamnagna u tharakna na mana au nolaghi te mala au fabrahu ke lamnagna tharakna tuana. Nu mae sneka na mana theome au kaisei nolaghi te mala au fabrahu ke lamnagna u tharakna tuana.³⁶Eghume, jame te atha fasnagla ghau iara mae Thugna God na, ghotilo ginauna snagla nomi tutuani ngala.³⁷Iara lase ghami ghotilo thofno vikegna mae Ebraham. Nu iara lase ghami ghotilo magnahaghei te falehe ghau iara, naugna ghotilo theome magnahaghei te leghudi u nogu farirhiu iara re.³⁸Iara chekedi unha teke filodi thegu ka namono gna mae Mama na, nu ghotilo edi unha glepo teke cheke ranghi ghami mae kmami themi na.”

³⁹Hatimare ne cheke eghu ka mana, “Sei ghema, mae kmami ghehati na mae Ebraham.”

Mae Jisas ne cheke eghu, “Jame thofno vikegna tutuani mae Ebraham ghotilo na, ghotilo jame leghudi puhi te keli teke edi mae Ebraham re.⁴⁰Iara ngala kaisei mae te chekedi ka ghotilo u glepo te tutuani teke nomhidi iara thegu ka thegna mae God Mama re. Nu ghotilo theome magnahagheni glepo te tutuani na. Eghuteuna ghotilo fariuriu mala falehe ghau iara. Mae Ebraham na neke theome eni kaisei glepo jateula tuana neku!⁴¹Eghume, te chekeni iara ka ghotilo na, ghotilo ke edi la glepo teke edi mae kmami themi re.”

Nu mae Jiure ne cheke eghu ka mana, “Ghema, ghehati theome jateula goro sua te theome laseni mae kmadi na ia eghu sia. Nu ghehati mae kmami na kaisei God ngala.”

⁴²Mae Jisas ne cheke eghu ka mare, “Jame thugna God tutuani ghotilo na, ghotilo jame namha ghau iara naugna iara neke mei funu ka God, eghuteuna te gognarona iara au agne. Aonu, iara theome mei kau nogu nolaghi thegu, nu iara mei ka nogna nolaghi God mae teke kuru mei ghau na.⁴³Ghotilo theome laseni unha te chekeni iara na. Naugna ghotilo theome magnahagheni te leghudi nogu cheke iara re.⁴⁴Ghotilo mae kmami na mae Satan. Ghotilo nogna naikno mana eghuteuna ghotilo magnahaghei edi unha glepo te magnahaghedi mana re. Mana kaisei mae falehe naikno funu tifa. Mana theome magnahaghei te leghuni u nabrou te tutuani na, naugna theo kaisei tutuani ke lamnagna mana. Mana kaisei mae chaichaghi, eghuteuna mana jateula chaichaghi te chekedi thegna tuare eghu. Eghuteuna, u chaichaghi te gnafare mei funudi ka mana.⁴⁵Nu iara chekeni ka ghotilo u glepo tutuani na. Naugna igne ghotilo theome fatutuanidi unha te chekedi iara re.⁴⁶Ba mae ihei ka ghotilo te filo ghau iara te eni unha glepo te diꞌa na? Te chekeni iara tutuani na, naugna unha me theome fatutuanidi ghotilo unha te chekedi iara re?⁴⁷Mae iheire te nogna God re, mare fanomhidi chekegna God re. Nu ghotilo gne theome nogna God naugna ghotilo ne tiromi fanomho ka mana!”

Mae Jisas ghe mae Ebraham

⁴⁸Hatimare mae Jiu ne cheke eghu ka mana, “Tutuani fara te chekeni ghehati ka iagho na, iagho theome mae Jiu nu iagho maemu ka namono Samaria, eghuteuna kaisei naitu au ke lamnamu iagho. Ba, theome doglo si cheke te edi ghehati grea?”

⁴⁹Mae Jisas ne cheke eghu ka mare, “Theo, theo kaisei naitu te au ke lamnagu iara na. Iara ghatho tahuni mae Kmagu na, nu ghotilo cheke fadiꞌa ghau iara.⁵⁰Iara theome harini nafnaknogu thegu na mala ghatho tahu ghau naiknore. Nu mae Mama magnahaghedi naiknore te mala fafnakno ghau iara na, naugna te chekeni mana na iara kaisei mae thono doglo fara. Eghuteuna God ginauna kafe fate ghami ghotilo.⁵¹Tutuani fara, te chekeni iara ka ghotilo na, mae ihei te leghuni chekegu iara na, mana ginauna theome lehe tifa e tifa.”

⁵²Goro mae biꞌo re ne cheke eghu ka mae Jisas, “Uve, gognaro na ghehati lase nigho hi ka nou cheke themu re, iagho au kaisei naitu ke lamnamu. Naugna mae Ebraham ia la lehehi tifa nei hatimare mae profet ra jaola lehe hila. Nu te chekeni iagho na, ‘Mae ihei te leghuni chekegu iara na mana na theome lehe tifa e tifa.’ ⁵³Ba, iagho mae ke biꞌogna mae kmada Ebraham sia? Mana lehehi tifa nei hatimare mae profet ra jaola lehehi eghu sia. Ba, iagho mae ihei sia, mala cheke eghu iagho?”

⁵⁴Mae Jisas ne cheke eghu ka mare, “Jame fafnakno ghau iara thegu na, igne theo kaisei nafugna kolho. Nu mae ihei te fafnakno ghau iara na mae Kmagu iara ngala, mae te chekeni ghotilo ne mae nomi God themi teuni ghotilo ia.⁵⁵Neubane chekeni ghotilo ‘Mana na noda God tahati’ neu, ghotilo theome thofno laseni mana. Nu iara ngala te laseni mana na. Jame chekeni iara ne theome laseni mana teuna, iara jame kaisei mae chaghi jateula ghotilo eghu. Nu iara laseni fara mana nei leghudi chekegna mana re.⁵⁶Mae kmami ghotilo Ebraham na neke gleale’a nei keli tagna fara neku kate filoni narane meigu iara na.”

⁵⁷Goro mae biꞌo re ne cheke eghu ka mana, “Icho idomi, iagho theome glimafulu finoghamu ngala funu karhamu! Faꞌunha ne filoni hila mae Ebraham sagho ia?”

⁵⁸Mae Jisas ne cheke eghu ka mare, “Tutuani fara, te chekeni iara ka ghotilo na, ka narane theome karha nga tekeu mae Ebraham na, iara neke kulu auhi!”⁵⁹Kate nomhidi mare cheke te edi mae Jisas igre, mare atha thina ne rodi fada faleheni mana. Nu mae Jisas poru ne jifla ka Sugablahi na.

Mae Jisas ne fakelini kaisei mae te dofu

¹Mae Jisas tei ne filoni kaisei mae teke karha dofu. ²Nogna mae fanomho mana re ne ghusna eghu ka mana, “Mae velepuhi, nakhibogna mae ihei si te fadofuni mae ignea? Nakhibogna thegna ba idogna kmagnare?”

³Mae Jisas ne cheke eghu ka mare, “Theo, dofu mana tuana theome nakhibogna mana nei theome nakhibodi idogna kmagna manare eghu. Dofu tuana thokeni mana mala filoi naiknore gloku nate eni God ka mana na.⁴Kani phae ngau narane gne edi tahati nogna gloku God mae teke kuru mei ghau iara na. Naugna bongi na la namo meihi. Eghuteuna theome tangomana kaisei naikno te loku kate romno na.⁵Kani au nga teu iara kau nauthoglu igne, iara ngala u juta te mala faphaedi naikno te au kau nauthoglu igne.”

⁶Ke leghugna te chekeni igne mae Jisas ne kmisu ka thagru glose na ne edi keha chopu ne puipuki ne muki ka phia tathagna mae te dofu na. ⁷Aonu, mae Jisas ne cheke eghu ka mae te dofu na, “Tei dadalu tathamure ka kholo seu te kiloi Siloam.” Gaoghathogna Siloam gne “Kuru tei”. Aonu mana tei ka Kholo Siloam na ne dadalu phia tathagnare. Kate ke pulo mei ka sugagna na, mana tangomana teke fifilo na.

Kheragna mae te dofu na, nei mae Farasire eghu ne ghusnani mana

⁸Aonu keha naiknore ne filoni mae igne teke tore sileni ka naiknore tifa na. Mare nei kheragna fofodu mana re eghu ne funu cheke eghu fari thedi, “Tore, mae te dofu igne ngala jau si mae teke gnokro koba ka geri nabrou na teke tore sileni ia?”

⁹Keha naiknore ne cheke eghu, “Uve, mana ngala!”

Nu kehare ne cheke eghu, “Theo, theome mana, kaisei mae jateula mana eghu.”

Mana thegna ne cheke eghu ka mare, “Uve, iara ngala!”

¹⁰Hatimare ne ghusna eghu ka mana, “Ne faꞌunha neke keli fapulo sagho phei tathamu teke dofu ra?”

¹¹Mana ne cheke eghu ka mare, “Mae te kiloi Jisas na neke eꞌei keha chopu neke muki ka tathagu iara re. Aonu mana cheke ghau iara neke tei dadalu ka kholo te kiloi Siloam. Aonu, iara tei ne dadalu phei tathagure, neke ghosei neke fifilo fapulo.”

¹²Hatimare ne ghusna eghu ka mana, “Ahevau mae igne?”

Mana ne cheke eghu ka mare, “Iara iho noguni.”

¹³Mare hatani mae teke dofu na ne tei ka mae Farasi re. ¹⁴Narane te fabobothu mae Jisas glose na te muki ka phei tathagna mana re teke fifilo fapulo igne, narane Sabat, nodi narane blahi hatimare mae Jiu. ¹⁵Hatimare mae Farasi neke ghusnani langau mana eigna teke keli fapulo mana phei tathagnare. Mana ne cheke eghu ka mare, “Mae igne ne muki glose te bothu na ka phei tathagu iara re. Kate tei dadalu iara tathagure, iara neke fifilo fakeli.”

¹⁶Eghuteuna, keha mae Farasi re ne cheke eghu, “Mae teke eni igne neke theome mei funu ka God, naugna mana ne theome leghuni vetula gna narane Sabat.”

Nu keha mae re ne cheke eghu, “Jame mae teke eni igne mana mae diꞌa meuna, mana jame theome tangomana te edi kofubobhoi igre.” Mae Farasire ne theome kaisei gaoghatho eigna mae Jisas.

¹⁷Hatimare mae Farasi gre neke fapea ghusna eghu ka mae teke dofu na, “Iagho te chekeni na mae igne ngala te fakelini dofumu na eghu, unha eghu iagho gaoghathomu themu na eigna mae igne?”

Mana ne cheke eghu ka mare, “Iara gaoghathogu na mae igne kaisei mae profet.”

Mae Farasire ne ghusnadi idogna kmagna mae teke dofu na

¹⁸Mae biꞌodi mae Jiu gre ne theome fatutuani neke karha dofu mana tifa teuna, nu gognarona kela fifilo fapulo. Aonu mare ne chekedi idogna kmagna teu mana re mala mei. ¹⁹Mare ne ghusna eghu ka repa, “Ba, thumi ghopa tutuani si mae ignea? Te chekeni ghopa na, mae igne neke karha dofu. Nu faꞌunha si gognarogne tekela fifilo mana gnea?”

²⁰Idogna kmagna teu mana re ne cheke eghu, “Te laseni ghepa na, mae igne thofno thumi ngala ghepa neke karha mei balugna dofu. ²¹Nu ghepa theome laseni ne faneha neke keli nga mana phei tathagnare teuna, nu ghepa theome laseni mae ihei teke fakelidi phei tathagnare. Tei si ghotilo ghusnani mana mala toutonu mana thegna, mana theome mae sua.” ²²Idogna kmagna teu mana ne cheke eghu naugna repa ne mhaghudi mae biꞌodi mae Jiure. Mae Jiure la kulu chekenihi mae ihei te chekeni mae Jisas gne ngala mae Kraes na teuna mala au kosi kau suga tharai na. ²³Naugna igne, idogna kmagna teu mana ne cheke eghu ka mare, “Ghusnani mana si ghotilo themi.”

Mae Farasire ne faꞌau kosini mae teke dofu na ka suga tharai na

²⁴Hatimare ne fapea kilo meini mae teke dofu tifa na ne cheke eghu ka mana, “Ghema, iagho mei agne mala nhaꞌa cheke ke ulugna God, mala chekeni iagho unha te tutuani na! Ghehati laseni mae te fakelidi phei tathamu iagho gre mana kaisei mae diꞌa fara puhigna na.”

²⁵Eghuteuna, mana ne cheke eghu ka mare, “Iara theome laseni ne mae diꞌa fara mana puhigna teuna. Nu kaisei glepo te lase fakelini iara na, iara neke dofu, eghuteuna gognaro na iara kela fifilo!”

²⁶Goro mae biꞌo re ne ghusna eghu ka mana, “Phei tathamu are ba? Unha te eni mana ka iagho tekela fifilo iagho gognarogne?”

²⁷Mana ne cheke eghu ka mare, “Iara la chekehi ka ghotilo sia, nu ghotilo theome fatutuanidi nogu cheke iara re neu. Mala ke faꞌunhai si ghotilo teke magnahaghei nomhini ngala gnea? Ba, ghotilo magnahaghei teke mala nogna mae fanomho la mana sia?”

²⁸Hatimare diꞌa tadi fara ka mana ne cheke eghu balu thibri, “Iagho themu te mala nogna mae fanomho mana na, ghehati gne nogna fanomho mae Moses. ²⁹Ghehati laseni mae Moses, naugna tifa na God neke cheke balugna mana. Nu mae Jisas gne ghehati theome laseni mana nei theome laseni neke mei funugna heva!”

³⁰Mana ne cheke eghu ka mare, “Tore! Iara la thono jaglo nogu fara ka ghotilo sia! Ghotilo theome laseni aheva teke mei mana na, nu mana au nolaghi neke fakelidi phei tathagu iara gre. ³¹Tahati kafe laseni God na theome fanomho ka nogna tharai mae te diꞌa na nei toghoni mana eghu. Nu God na fanomho ka ihei te pogho soruni nei leghuni teu mana na ngala. ³²Funu tifa te mei ka vuvuhagna nauthoglu igne te ghilei mei posa gognarona tahati theome nomhini kaisei naikno te fakelini tathagna mae teke karha dofu na. ³³Jame theome mei funugna ka God mana meuna, mana jame theome tangomana te eni kaisei glepo te nolaghi fara na.”

³⁴Aonu, hatimare diꞌa tadi fara ka mana ne cheke eghu, “Ghema, iagho mae tuana diꞌa fabrahu ngala puhimu na funu karha mei mu! Iagho theome naba te farirhiu ghami ghehati na!” Aonu, hatimare ne faꞌau kosini mana kau suga tharai na.

Mae Jisas neke fapea filoni mae teke dofu gne

³⁵Mae Jisas ne nomhini te faꞌau kosini mana hatimare ka suga tharai na. Aonu, mae Jisas tei ne filoni mana ne cheke eghu, “Ba, ghema, iagho fatutuani ni ngau mae teke mei funu ka God gne sia?”

³⁶Mana ne cheke eghu ka mae Jisas, “Mae biꞌo, mae ihei sia? Cheke ranghi ghau iara mala fatutuani ni mana iara.”

³⁷Mae Jisas ne cheke eghu ka mana, “Iagho la filonihi mana. Iara ngala, mae te cheke teu balumu iagho gognaro gne.”

³⁸Aonu mana ne cheke eghu, “Uve, Lord, iara fatutuani nigho iagho gognaro na.” Aonu, mana tuturupuku ne pogho soru ranghini mae Jisas.

³⁹Mae Jisas ne cheke eghu, “Iara mei ka nauthoglu igne mala fatakle nakhibodi naiknore. Nu tathadi naikno teke dofure ke fifilo, eghuteuna naikno ne fifilohi thedi teure nake dofu.”

⁴⁰Keha mae ka hatimare mae Farasire nomhini cheke te eni mae Jisas igne ne cheke eghu, “Ghema, ne dofu ghehati eghu jau sagho?”

⁴¹Mae Jisas ne cheke eghu ka mare, “Te dofu tutuani ghotilo na, ghotilo jame theome jafra. Nu te chekeni ghotilo na, ‘Ghehati la lasenihi u tutuani na teuna!’ Tuana ngala gaoghathogna te chekeni iara ne jafra fara ghotilo teuna.”

U cheke naba eigna mae greireghi sipu

¹Mae Jisas ne cheke eghu, “Tutuani fara te chekeni iara ka ghotilo na. Mae ihei te theome ruma ka thofno grengathagna u baradi u sipure, nu apla ka keha philei teuna, mana mae nablau nei mae glalama eghu kolho.²Eghuteuna mae ihei te ruma kau thofno grengatha na igne ngala mae thofno greireghidi u sipure.³Eghuteuna mae greireghi grengatha na, filo glanini mana nei na tora ranghini mana. Mana na kilodi nanghadi nogna sipure, eghuteuna nogna sipu mana re na glanini naoglagna mana na. Eghuteuna mana na batu fajifladi ke kosigna bara na.⁴Ka vido te atha fajifladi mana ke kosi bara na, mana na au ke uludi mala baubatudi. Eghuteuna nogna sipu mana re na kafe leghuni mana, naugna reꞌe ne lase fakelini u naoglagna mana na.⁵Mae te theome laseni reꞌe na, reꞌe rikhani mana nei theome leghuni mana, naugna reꞌe ne theome lase fakelini u naoglagna mana na.”⁶Mae Jisas ne toutonu ka mare ka cheke naba igne, nu mare ne theome laseni gaoghathogna cheke mana igne.

Mae Jisas mae greireghi sipu te keli na

⁷Mae Jisas neke cheke eghu ka mare, “Tutuani fara te chekeni iara ka ghotilo na. Iara gne jateula ngau u grengatha eghu mala rumadi u sipure.⁸Naikno teke kulu mei ke ulugu iara re, mare kafe jateula ngau mae nablau nei mae glalama eghu kolho. Eghuteuna u sipure tirodi fanomho ka mare.⁹Iara gne jateula u grengatha eghu. Naikno te ruma mei ka iara na, mana ginauna tangomana te ludeni u vido te keli na. Eghuteuna mana ginauna tangomana nate ruma mei nei jifla teu kau nasnagla na. Eghuteuna mana ginauna ludedi u glepo te keli te malagna u nakarhagna na.¹⁰Mae nablau na mei kolho mala blau nei falelehe nei mala lalamadi eghu kolho naiknore. Nu iara gne mei mala tufa ka mare u thofno karha te theo ka huigna na. U nafnata karha te fodu kau glepo te keli.

¹¹“Iara ngala thofno mae greireghi sipu te keli na, te snakreni karhagu na mala lehe ranghidi nogu sipure.¹²Te mae gloku kolho mana te theome khotodi mana sipure, mana tangomana te rikha kokodi u sipure kate filoni mana te mei khuma fakaukathu na. Aonu khuma fakaukathu igne ginauna mei hata kehare, eghuteuna keha sipure na rikha tafri.¹³Mana na rikha kokodi sipure, naugna mana mae gloku kolho. Nu mana theome thofno nangadi u sipure.

^14-15“Iara ngala mae greireghi sipu te keli na. Jateula ngau mae Mama te lase ghau iara, nei iara laseni la mae Mama, jateula tuana eghu iara lasedi nogu sipure nei nogu sipu iara re jaola lase ghau iara. Iara snakreni karhagu na mala lehe nei ke fakarhidi eghu nogu sipure.¹⁶Aonu, keha nogu sipure au ngau ke kosi bara. Iara ginauna na atha mei dila ke lamna bara. Reꞌe ginauna nomhini naoglagu iara na, eghuteuna reꞌe ginauna kaisei bukredi ngala nei iara ngala te mala reireghidire eghu.¹⁷Mae Mama na namha ghau iara naugna iara magnahaghei te snakreni karhagu na mala lehe. Eghuteuna iara laseni kate lehe iara na, iara nake karha fapulo.¹⁸Theo kaisei naikno tangomana te falehe ghau iara ka nogna nheta thegna. Naugna iara ngala te au nolaghi te mala snakre ghau thegu te mala lehe nei ke karha fapulo teuna. Tuana ngala unha mae Mama teke chekeni mala eni iara teku na.”

¹⁹Kate nomhidi mae Jiu gre cheke mae Jisas igre, mare ne theome kaisei gaoghatho ka nogna cheke mana re. ²⁰Kmana naikno ka mare ne cheke eghu, “Mae igne au kaisei naitu ke lamnagna la fanolini pha’ugna mana na! Ghotilo thosei lao fanomho ka mana!”

²¹Keha naiknore ne cheke eghu, “Theo. Mae te au naitu na theome tangomana te cheke eghu na. Naugna naitu na theome tangomana te fakelini tathagna mae te dofu na.”

Mae biꞌodi hatimare mae Jiu ne magnahagheni te faleheni mae Jisas

²²Ka nhigra te rifu na mae Jisas ne haghe Jerusalem kau gaghamu ghatho fapulogna narane teke fablahigna Sugablahi Jerusalem. ²³Eghuteuna, mae Jisas ne nolo ne tei ka varanda gna Sugablahi na kau vido te kiloi nogna varanda mae Solomon. ²⁴Hatimare mae Jiu ne kafe khapru mei ka mae Jisas ne cheke eghu ka mana, “Ghema, iagho faraugha ghami ghehati. Faghose cheke mei sagho mala lase nigho ghehati. Iagho ngala si mae Kraes na ia, ba theo?”

²⁵Mae Jisas ne cheke eghu ka mare, “Iara la chekehi ka ghotilo, eghuteuna ghotilo theome fatutuani ghau ngala iara. Ghotilo la filodihi gloku biꞌo teke edi iara ka nogna nolaghi mae Mama. Eghuteuna glepo te edi iara igre ngala te mala lase ghau iara ghotilo na.²⁶Nu ghotilo tiromi fatutuani ghau iara, naugna ghotilo theome nogu sipu iara.²⁷Naikno te leghudi nogu cheke iara igre jateula ngau sipu te laseni naoglagna mae greireghi sipu ia eghu. Iara lasedi reꞌe nei reꞌe kafe leghu ghau iara.²⁸Iara tusu ranghidi u karha fei tifa na, eghuteuna reꞌe ginauna theome lehe. Eghuteuna theome tangomana kaisei naikno nate blaudi ka iara re.²⁹Mae Mama mae ihei neke snakre mei sipure ka iara igne mana kaisei mae biꞌo tulao. Eghume theo kaisei naikno te au nolaghi biꞌo jateula Mama teu nate mei blau fajifladi ka mae Mama re.³⁰Uve, ghepa mae Mama na kaisei ngala.”

³¹Ka narane tuana hatimare mae Jiu salo thina ne rodi fadi faleheni mae Jisas. ³²Nu mae Jisas ne cheke eghu ka mare, “Iara neke edi kmana gloku te keli ka nogna nolaghi mae Mama tela filodihi ghotilo ra. Kau gloku te keli aheva gre site romi fadi falehe ghau iara ghotilo ka thina gnea?”

³³Hatimare ne cheke eghu ka mana, “Theo, ghehati theome romi fadi thina nigho eidi nou gloku te keli teke edi iagho re. Nu iagho ne chekedi glepo te faparini God re! Ghehati lase nigho iagho kaisei naikno kolho. Eghuteuna iagho ne magnahaghei nigho themu te nanaba ka God neu. Tuana site romi fadi thina nigho ghehati gnea.”

³⁴Mae Jisas ne cheke eghu ka mare, “Te risoni ka nomi vetula ghotilo themi na, God neke cheke eghu, ‘Ghotilo kafe jateula God eghu.’10:34 Sam 82:6.³⁵Tahati laseni unha te chekeni ka grioriso te blahi na tutuani fabrahu. God kilodi naikno te toutonuni chekegna mana tuare jateula thegna God eghu.³⁶Eghuteuna ka unha gne site ne cheke faparini iara mae Mama teuni ghotilo gnea? Ba, naugna te cheke eghu iara, ‘Iara Thugna God’ teu iara gne? God vahi ghau iara neke kuru mei ghau iara kau nauthoglu gne.³⁷Jame theome edi iara nogna gloku mae Mama mala edi iara tekure meuna, ghotilo jame nabami te theome fatutuani ghau iara na.³⁸Nu jame edi iara unha te edi mae Mama re, neubane theome fatutuani ghau iara ghotilo, ghotilo jame fatutuanidi unha te edi iara re. Aonu, ghotilo ginauna laseni mae Mama na au ke lamnagu iara, nei iara au ke lamnagna mae Mama.”³⁹Hatimare mae Jiu neke fariuriu lokini mae Jisas, nu mana ne rikhadi mare.

⁴⁰Eghuteuna, ke leghugna igne mae Jisas pulo neke kasa ka keha phile Kho’u Jordan. Mana neke tei au ka vido teke fa’apublahi naikno mae Jone tifa ia. ⁴¹Kmana naikno neke mei mala fanomho ka nogna cheke mae Jisas re. Aonu mare cheke eghu fari thedi, “Tore! Mae Jone ia neke theome eni kaisei kofubobhoi jateula mae igne neku. Nu gobigna lepo teke chekedi mae Jone eigna mae igne ra thono tutuani fara.” ⁴²Kmana naikno te au ka vido tuana ne fatutuani ni mae Jisas.

U glehegna mae Lasaros

¹Kaisei mae te fogra biꞌo fara nanghagna na mae Lasaros. Mana au ka namono Betani baludi Meri ghe Mafa phei greghagnare. ²Meri gne thau teke totofa sedi tifa ka ghahegna mae Jisas na ia. Naꞌa neke famomoja ka khaklagna thegna te brahure. ³Phei greghagna mana re ne kurudi keha mae mala tei cheke eghu ka mae Jisas, “Lord, mae kheramu iagho mae Lasaros ia ne fogra.”

⁴Kate nomhini mae Jisas nonomho igne mana ne cheke eghu, “U fogra tuana theome mala lehe mae Lasaros, nu mala filoni naiknore nogna nolaghi biꞌo God na. Eghuteuna mala laseni naiknore iara mae Thugna mana na jaola au nolaghi biꞌo jateula mana eghu.”⁵Mae Jisas gne namhadi fara Meri ghe Mafa nei mae Lasaros. ⁶Nu kate nomhini mana te fogra mae Lasaros na, mana neke au soru phei narane ka namono na. ⁷Ke leghugna igne mana ne magnahaghei tei filoni mae Lasaros, ne cheke eghu ka nogna mae fanomhore, “Tahati na ke pulo Judia.”

⁸Mae fanomhore ne cheke eghu ka mana, “Mae velepuhi, iagho theome laseni ngala si teke rodi fadi falehe nigho hatimare mae biꞌodi mae Jiure ka thina jare ia? Nu gognarona iagho ke magnahaghei pulo ngala jare sia?”

⁹Mae Jisas ne cheke eghu ka mare, “Tore, kaisei narane na nabotho phei aoa ke lamnagna. Eghume, mae ihei te tei ka narane na mana theome tangomana te totokhei na, naugna mana ne filoni u naphae na kau nauthoglu igne.¹⁰Nu mae ihei te tei bongiro na, mana tangomana te totokhei na naugna theo naphae te mala batuni mana na.”

¹¹Ke leghugna te chekeni mae Jisas igne, mana neke cheke eghu, “Mae kherada Lasaros na khogla thuru kolho. Nu iara na tei jare mala fadofrani mana.”

¹²Mae fanomhore ne cheke eghu ka mana, “Lord, jame thuru kolho mana na, mana ginauna nake keli fapulo.” ¹³Mae Jisas chekeni eigna glehegna mae Lasaros na, nu gaoghathodi mae fanomhore ne thuru neu kolho mae Lasaros eghu.

¹⁴Aonu, mae Jisas ne cheke eghu fadoglo ka mare, “Mae Lasaros na la lehehi.¹⁵Eghuteuna te mala kelimi ghotilo na, iara gleale’a fara te theome au jare na mala fatutuani ghau iara ghotilo. Tahati na ari mala filoni mana.”

¹⁶Aonu, mae Tomas, mae te kiloi mae Didimus ne cheke eghu ka mae fanomhore, “Tore, tahati na kafe tei balugna mae funei gne mala lehe balugna mana!”

Mae Jisas ne tei Betani

¹⁷Kate posa mae Jisas Betani na, thinigna mae Lasaros na la auhi fati narane ke lamna gluma. ¹⁸Nu Betani gne theome gaꞌu Jerusalem. ¹⁹Aonu, kmana mae Jiu ne mei funudi jare mala toghodi Mafa ghe Meri mala theome diꞌanagnafa repa eigna greghadi te lehe na. ²⁰Kate nomhini Mafa te mei mae Jisas na, naꞌa tei ne thafoni mana ka nabrou na. Nu Meri ne au neu ka suga na.

²¹Mafa thoke lao ka mae Jisas ne cheke eghu ka mana, “Lord, jame au meu iagho agne na, greghagu iara mae Lasaros gne jame neke theome lehe. ²²Nu te laseni iara na unha te tore iagho ka God gognaro na, God ginauna tusu ranghi nigho iagho.”

²³Mae Jisas ne cheke eghu ka naꞌa, “Mafa, thosei nanga nou, greghamu iagho na nake karha fapulou ginauna.”

²⁴Mafa ne cheke eghu ka mana, “Iara laseni mana ginauna nake karha fapulo ka narane mala karha fapulodi naikno te gnafare kau narane leghu lahu na.”

²⁵Mae Jisas ne cheke eghu ka naꞌa, “Uve, kaisei iara ngala te tusu lao u karha ka naikno te lehe na mala teke karha fapulo na. Nu ihei te fatutuani ghau iara na, neubane lehe mana ginauna karha fabrahu.²⁶Nu ihei te karha teu nu fatutuani ghau iara teuna, mana ginauna na theome lehe. Ba, Mafa, iagho fatutuani ni ngau te chekeni iara igne?”

²⁷Mafa ne cheke eghu ka mana, “Uve, Lord. Iara fatutuani nigho iagho te mae Kraes Thugna God na. Iagho ngala mae ihei te ofoni ghehati te mala mei kau nauthoglu igne.”

Mae Jisas ne tanhi

²⁸Ke leghugna te chekeni igne, Mafa neke pulo ka suga na ne cheke eghu faꞌikoi ka Meri, “Meri, mae velepuhi na la meihi. Mana neke ghusna nigho iagho mala tei ka mana.” ²⁹Kate nomhini Meri igne, naꞌa ghosei ne kegra haghe ne tei ka mae Jisas ka nabrou na. ³⁰Mae Jisas theome posa ngau ka namono na. Mana au ngau ka vido aheva Mafa teke tei thafoni mana ia. ³¹Naikno Jiure au neu balugna Meri mala toghoni naꞌa mala thosei diꞌanagnafa na’a. Mare ne filoni Meri te ghosei te kegra haghe te jifla te tei na. Aonu, naikno teke au balugna naꞌa re ne kafe jifla ne tei ke leghugna naꞌa, naugna gaoghathodi reꞌe re na tei tanhi naꞌa ka gluma na eghu.

³²Nu Meri ne tei ka vido te au mae Jisas na. Kate filoni mana na, Meri ne tuturupuku soru ne cheke eghu ka mana, “Lord, jame au meu iagho agne na, greghagu iara mae Lasaros ia jame neke theome lehe.”

³³Kate filoni mana te tanhi Meri na eghuteuna mana ne filodi la naikno te mei tanhi balugna naꞌa re, mana ne thono diꞌanagnafa ne phanga fabiꞌo. ³⁴Aonu, mana ne cheke eghu, “Aheva teke giugiluni mana ghotilo na?”

Mare ne cheke eghu, “Lord, mei sagho mala filoni.”

³⁵Mae Jisas ne tanhi.

³⁶Aonu, mae Jiure ne cheke eghu fari thedi, “Filoni si ghotilo, mae igne namhani fara mae Lasaros.”

³⁷Nu keha naiknore ne cheke eghu, “Tifei na mae igne neke fakelidi phia tathagna mae teke dofu na. Theome tangomana si mana te fakarhani mae Lasaros gnea, mala theome lehe mana?”

Mae Jisas ne fakarhini mae Lasaros teke lehe na

³⁸Mae Jisas ne posa ka gluma na ne thono diꞌanagnafagna fara. Gluma igne mare neke jou ka thina tataba, eghuteuna kaisei thina biꞌo teke fofothogna gluma tuana. ³⁹Mae Jisas ne cheke eghu ka mare, “Hata fadelei u thina biꞌo tuana.”

Nu, Mafa gregagna mae te lehe na ne cheke eghu ka mae Jisas, “Lord, la siri diꞌa gnahi, naugna gognarona la fati narane gnahi ke lamna gluma.”

⁴⁰Mae Jisas ne cheke eghu ka naꞌa, “Mafa, kela ghatho ihoni sagho teke cheke ranghi nigho iara ia? Te fatutuani ghau iara iagho na, iagho tangomana te filoni fagaglana gna nogna nolaghi biꞌo God na.”

⁴¹Aonu, mare ne pili fadelei thina biꞌo tuana. Eghuteuna mae Jisas ne filo haghe kligna ne cheke eghu, “Mama, iara cheke fakeli nigho iagho, naugna iagho neke nomhi ghauhi iara.⁴²Iara lase nigho te nomhini koba nogu tharai iara na. Nu iara chekedi glepo igre ka iagho eidi naikno te kegra faligoho ghau teu iara igre. Iara magnahaghedi mare te fatutuani nigho iagho mae teke kuru mei ghau iara na.”

⁴³Ke leghugna te cheke eghu igne, mae Jisas ne eha fabiꞌo, “Lasaros, jifla mei!”⁴⁴Mae teke lehe na nolo ne jifla mei ka gluma na. Nabreku pohe teke pipiha ka khamegna, ghahegna nei ka pha’ugna teku mana re ne maku neu ngala.

Mae Jisas ne cheke eghu ka mare, “Hata koko ghotilo u pohe are mala snakre teini mana.”

Mae biꞌodi mae Jiu re ne hiro puhi mala faleheni mae Jisas

(Mat 26:1-5; Mak 14:1-2; Luk 22:1-2)

⁴⁵Kmana mae Jiu teke mei au balugna Meri igre ne filoni unha te eni mae Jisas igne ne fatutuani ni mana. ⁴⁶Nu keha naiknore ne tei ka mae Farasi gre ne toutonu ka mare eigna unha teke eni mae Jisas na. ⁴⁷Aonu, hatimare mae Farasi baludi mae pris ulure ne kilo fodudi goro mae biꞌo re ne eni kaisei faidu.

Mare ne cheke eghu, “Na faꞌunhani si tahati mae ignea? Naugna mana edi kmana nafnata kofubobhoi fara. ⁴⁸Jame te lisa laoni tahati te eni fabrahu mana igne na, naiknore ginauna kafe fatutuani ni mana. Aonu, mae armi di Rom gre ginauna na mei goigoni ni noda Sugablahi gne nei goigoni nila noda namono gne eghu!”

⁴⁹Kaisei mae ka hatimare nanghagna na mae Kaefas. Mana te mae pris biꞌo kau finogha tuana. Mana ne cheke eghu ka mare, “Ghotilo theome laseni kaisei unha glepo nga. ⁵⁰Te keli na mala kaisei mae te mala lehe tughudi naiknore, mala theome kafe lehe naikno te gnafare.”

⁵¹Mae Kaefas gne neke theome fiti ghathoni kau nagnafagna thegna na cheke igne. Nu God neke cheke ranghini mae Kaefas, naugna mana neke mae pris biꞌo ka finogha tuana. Mana kulu cheke thakleni eigna mae Jisas te mala kafe lehe tughudi naikno Jiu te au ka nauthoglu igne. ⁵²Eghuteuna mae Jisas theome mala lehe tughudi kolho mae Jiu gre, nu mana jaola maladi nogna naikno God te au heva heva ka namono te kmana ka nauthoglu igne. Mana mala hata fodu meidi mala ke kaisei tothoghei ngala mare. ⁵³Aonu funu ka narane tuana te haghe na, goro mae biꞌodi mae Jiu gre ne edi kmana nafnata phoge mala faleheni mae Jisas.

⁵⁴Naugna igne mana ne theome nolo tafri ke uludi mae Jiu. Nu mana jifla jare baludi nogna mae fanomhore ne tei au Ifrem rhegna namono nagou na.

⁵⁵Ka vido tuana, nodi narane biꞌo mae Jiu te mala eni gna Gaghamu Ghasa-Polho na la namohi. Eghuteuna kmana naikno mei Jerusalem funudi ka namono te au namo teu jare, te mala kulu gae ke ulugna God ame thoke mei nga narane gaghamu na. ⁵⁶Kate khapru teu mare kau glalabagna u Sugablahi na, mare ne funu hironi mae Jisas ne ghusna eghu fari thedi, “Ba, unha eghu ghotilo gaoghatho mina, mana ginauna mei kau gaghamu igne ba theo?” ⁵⁷Nu mae pris ulu nei mae Farasi teu gre ne kulu lilisei cheke igne ranghidi naiknore eigna mae Jisas. “Ihei te laseni aheva te au teu mae Jisas na chekeni ka ghehati eghu.” Mare ne cheke eghu, naugna mare ne magnahaghei te lokini mae Jisas.

Meri ne totofa sedi na ka ghahegna mae Jisas re

(Mat 26:6-13; Mak 14:3-9)

¹Namno narane ngau ame thokeni nga narane Gaghamu Ghasa-Polho na, mae Jisas neke pulo Betani, ka namono aheva te au mae Lasaros. Mae igne teke lehe nu ke fakakarha mae Jisas teku ia. ²Mare ne tarabana kaisei gaghamu malagna mae Jisas jare. Eghuteuna Mafa ne toghodi mare ka tufagna gano na. Mae Lasaros gne kaisei mae ka mae teke ima balugna mae Jisas kau tevo na. ³Ka vido tuana Meri ne hata ne mei kaisei botol sedi te ninhigrana fara foligna na nei famane sisiri keligna teuna, ne totofa ka phia ghahegna mae Jisas re ne famomoja ka khaklagna thegna te brahure. Eghuteuna suga thongana na ne fodu ka sisirigna sedi na.

⁴Mae Judas Iskariot gne, kaisei mae ka hatimare mae fanomho gre au la jare. Mana kaisei mae nate majorani mae Jisas. Aonu mae Judas ne cheke eghu, ⁵“Tore! Sedi igne jame neke fofoli mala hata sileni te naba folini mae gloku kaisei finogha. Nu sileni igne mala tufa nodi naikno te kumare.” ⁶Nu mae Judas chekeni igne naugna mana kaisei mae mala blau kolho. Mana theome kokhonidi naikno te kumare. Theo, naugna mana ngala kaisei mae te mala reireghi gna gloi sileni hatimare mae fanomhore, eghuteuna mana blau sileni keha fata ka gloi sileni na.

⁷Mae Jisas ne cheke eghu, “Lisa lao ka naꞌa. Te keli na tathaji teu naꞌa u sedi igne malagna narane glehegu iara na. ⁸Naikno te kuma gre au fabrahu agne balumi ghotilo mala toghodi, eghuteuna iara gne theome au fabrahu agne balumi ghotilo.”

Mae pris ulure ne rodi faleheni mae Lasaros

⁹Kmana mae Jiu teke khapru tekeu Jerusalem re nomhini te au teu mae Jisas Betani na. Aonu, mare ne tei jare theome mala tei filoni kolho mae Jisas, nu mare mala tei filoni langau mae Lasaros tekela karha fapulo na. ¹⁰Eghuteuna mae pris ulure ne hiro phoge mala faleheni la mae Lasaros. ¹¹Naugna kate filoni mae Lasaros teke karha fapulo na, kmana mae Jiu ne jifla kokodi mae pris ulure ne fatutuani ni mae Jisas.

Naiknore tei thafoni mae Jisas ka nabrou

(Mat 21:1-11; Mak 11:1-11; Luk 19:28-40)

¹²Ka keha narane na mae Jisas ne jifla Betani mala pulo Jerusalem. Eghuteuna kmana naikno teke tei ka narane Gaghamu Ghasa-Polho na nomhini te mei mae Jisas jare na. ¹³Eghume, mare ne tei pulei grege thubo mala tei thafoni mana ka nabrou na. Aonu, mare ne gleale’a fara kate filoni te mei mae Jisas na ne thagru eghu fabiꞌo,

“Hosanna! Kilo fnaknoni God!”

“God fablahini mana te mei ka nanghagna Lord!”

“God fablahini nodi King mae Israel!”

¹⁴Mae Jisas ne hata kaisei dongki majaghani ne saghe ne tei. Igne ne horoghoto fara ka unha te cheke eghu kau grioriso te blahi ia,

¹⁵“Ghotilo naiknomi Jerusalem, thosei mhaghu.

Nomi King ghotilo na la saghe la mei ka dongki.”

¹⁶Kate kilo fafnaknoni mae Jisas naiknore, nogna mae fanomho mana re ne theome laseni gaoghathogna te eni naiknore ka mana igne. Eghuteuna kate karha fapulo nei ke haghe kligna teu mana na, mare neke ghatho fapuloni unha teke eni naiknore ka mae Jisas na. Eghume, mae fanomhore ne cheke eghu, “Tutuani fara, igne siba gaoghathogna teke rioriso eigna mana hatimare mae profet tifa ra!”

¹⁷Naikno au tekeu balugna mae Jisas ka narane teke eha fajiflani mana mae Lasaros ka gluma na neke fakarha fapuloni mana ia, mare ne toutonu tafri unha teke filoni mare na. ¹⁸Naugna kate nomhini thoutonu eigna kofubobhoi biꞌo te eni mana igne, naiknore ne magnahaghei fara te mei filoni mae Jisas. ¹⁹Mae Farasi gre ne filodi naikno te keli tadi ka mae Jisas te kafe khapru ka mana re. Aonu, mare ne nanga nodi fara ne cheke eghu fari thedi, “Filo si ghotilo, unha puhi te edi tahati igre ginauna theo nafudi kolho, naugna naikno te gnafare la kafe tei leghuni mana!”

Keha naikno Griki re ne magnahaghei mei filoni mae Jisas

²⁰Keha mae Griki neke haghe la Jerusalem mala tarai ka narane Gaghamu Ghasa-Polho na. ²¹Mare mei ne thafoni mae Filip, mae Filip gne mae gna Betsaeda ka nohi Galili. Mare ne cheke eghu ka mana, “Mae biꞌo, ghehati magnahaghei mei filoni mae Jisas.” ²²Aonu, mae Filip kegra haghe ne tei cheke ka mae Aduru, eghuteuna phiamare ne kafe tei ne facheke ka mae Jisas.

²³Mae Jisas ne cheke eghu ka mare, “Narane na la thoke meihi te mala hata nolaghi biꞌo iara mae teke mei funu ka God na. Eghuteuna naiknore ginauna filo meini igne ka iara.²⁴Tutuani fara te chekeni iara ka ghotilo na. Jame kaisei sisi sopho koko soru ka glose na eghuteuna lehe, sisi tuana ginauna kotu haghe, eghuteuna ginauna ure sisi kmana. Nu jame te theome koko soru sisi tuana ka glose te lehe na, sisi tuana ginauna na kaisei fabrahu kolho.²⁵Jateula tuana eghu nakarhagna naikno na. Naikno te namhani nakarhagna thegna na ginauna theome hatini thofno nakarha te tutuani na. Nu naikno te tirognani nakarhagna thegna ka nauthoglu igne ginauna tathaji malagna karha fei tifa.²⁶Jaola mae ihei te magnahaghei loku ranghi ghau iara na, mana mala leghu ghau iara. Eghuteuna nogu mae gloku iara tuana ginauna tei balugu iara ka namono aheva te tei iara na. Eghuteuna mae Kmagu iara na ginauna ghatho tahuni mana.”

Mae Jisas ne chekeni u glehegna thegna na

²⁷Mae Jisas ne cheke eghu, “Gognaro na iara thono diꞌanagnafagu fara eigna glepo nate mei ginauna. Na cheke faꞌunha eghu iara ka mae Mama? Iara na cheke eghu, ‘Mama, thosei snakre mei ke klignagu iara glepo te biꞌo igne na eghu’? Theo. Naugna igne ngala teke meini iara ka nauthoglu igne na mala ruma ke lamnagna glepo te ninhigrana igne.²⁸Iara na cheke eghu, ‘Mama, fathakle ka naikno gre nou nolaghi te biꞌo!’ ”

Kate chekedi mana cheke igre, kaisei cheke ghosei ne soru mei funu kligna ne cheke eghu, “Nogu nolaghi biꞌo iara na neke thaklehi, eghuteuna ginauna nake fathakleniu ngala u nolaghi biꞌo tuana.” ²⁹Naikno te kegra teu jare re ne kafe nomhini naogla tuana. Aonu mare gaoghathodi na ne kaisei fila ne taitanhi neu nodini, eghuteuna keha naiknore ne cheke mei neu kaisei engel ka mana eghu gaoghathodi na.

³⁰Eghuteuna mae Jisas ne cheke eghu ka mare, “Cheke te cheke mae Mama te nomhini ghotilo igne theome malagu iara kolho, nu mala togho ghami ghotilo. ³¹Gognarona God ginauna kafe fatedi naikno te theome fatutuani ghau iara. Eghuteuna gognaro mana na kulu hata fadelei nogna nolaghi mae Satan, mae ihei te baubatu fadiꞌadi naikno te au ka nauthoglu igne.³²Ka narane nate tupijuru ghau iara mare ke kligna gaju fafatha na, iara na salo fodu mei naiknore ka thegu.”³³Mae Jisas neke chekedi glepo igre mala glola ka naiknore unha nafnata glehe nate lehe mana ginauna.

³⁴Naiknore ne cheke eghu ka mana, “Tore! Na lehe sagho ia ghema? Ghehati te laseni ka vetula na mae Kraes na mala theome lehe sia, nu mana mala karha fabrahu! Naugna unha site chekeni iagho mae teke mei funugna ka God na na lehe teu gnea? Mae ihei si ‘Mae teke mei funugna ka God’ gnea?”

³⁵Mae Jisas ne cheke eghu ka mare, “Gognarona naphae na ginauna au balumi ghotilo katha vido. Eghume te keli na ghotilo nonolo kani au ngau naphae na. Eghuteuna gromno na ginauna theome tangomana te mei ka ghotilo na. Mae ihei te nonolo kate romno na, mana na theome laseni nabrou na.³⁶Eghume, fatutuani ni si ghotilo naphae gne kani au ngau naphae gne balumi ghotilo, mala nogna naikno naphae ghotilo.” Ke leghugna te chekedi mana glepo igre mana jifla ne porudi mare.

Kmana mae Jiu ne tirodi fatutuani ni mae Jisas

³⁷Neubane edi mana kmana kofubobhoi ke uludi mae Jiu, mare theome fatutuani ni ngala mana ne mae Kraes teuna. ³⁸Igne ne horoghoto fara ka nogna cheke mae profet Isaia teke cheke eghu tifa ia,

“LORD, iheire nate fatutuanidi nomi cheke ghehati gre?

Ka iheire LORD teke fakakhana nogna nolaghi na?”

³⁹Tutuani fara, naiknore tirodi fatutuani ni mae Jisas, naugna mae Isaia neke chekeni la igne tifa,

⁴⁰“God neke fadodofu tathadire nei famamhaku nagnafadire.

Naugna igne gognaro na tathadire la dofuhi nei nagnafadire la ihohi.

Naugna igne mare ginauna theome ke pulo mei ka iara mala fakarhidi.”

⁴¹Mae Isaia neke chekedi glepo igre tifa na, naugna mana la kulu filonihi nogna nolaghi biꞌo mae Jisas na ne chekeni igne eigna mana.

⁴²Neubane eghu ngau, kmana mae bi’odi mae Jiu ne fatutuani ni mae Jisas. Nu mare theome falalase ka ihei nga, naugna mare mhaghudi hatimare mae Farasi. Glahu faꞌau kosidi ka suga tharai na. ⁴³Mare magnahaghei nafnakno ka naiknore ke tulao gnai nafnakno te mei ka God.

⁴⁴Mae Jisas kegra haghe ne cheke eghu fabiꞌo, “Mae ihei te fatutuani ghau iara na, mana theome fatutuani ghau iara kolho, nu fatutuani nila mae Mama mae teke kuru mei ghau iara kau nauthoglu igne.⁴⁵Jateula ngau, mae ihei te filo ghau iara na, mana la filonihi mae Mama mae teke kuru mei ghau iara na.⁴⁶Iara mei jateula juta eghu mala faphaedi naikno te au ka nauthoglu igne. Eghuteuna iheire te fatutuani ghau iara re mare ginauna theome tei tafri ke lamna gromno.

⁴⁷“Ihei te nomhidi nogu cheke iara igre, eghuteuna theome leghudi nei theome fatutuani ghau iara teuna, iara na theome fateni mana. Naugna iara theome mei mala fatedi naikno te au ka nauthoglu igne, nu mei mala fakarhidi naikno te au ka nauthoglu igne.⁴⁸Mae ihei te theome keli tagna ka iara, nei tirogna fanomho ka chekegu iara na teuna, kaisei glepo nate fateni mana na. Cheke te farirhiu iara igre na fateni mana kau narane leghu lahu na.⁴⁹Naugna iara theome cheke leghudi kolho gaoghathogu thegu. Mae Mama mae teke kuru mei ghau iara kau nauthoglu igne te cheke ranghi ghau iara unha te mala chekedi nei farirhiudi teure.⁵⁰Eghuteuna te laseni iara na karha fei tifa na mei ka unha te chekedi mae Mama igre. Eghume unha mala chekedi iara ka ghotilo teku mae Mama re te chekedi iara igre.”

Mae Jisas titihi ghahedi nogna mae fanomhore

¹Ka grafi gna Gaghamu Ghasa-Polho na mae Jisas la kulu lasenihi narane na la namohi te mala jifla kokoni nauthoglu igne teke pulo ka mae Kmagna na. Funu ka vuvuhagna na te ghilei thoke ka narane glehegna na, mae Jisas ne namhadi fara naikno teke leghuni mana re.

²Kate ima rafi teu mae Jisas baludi nogna mae fanomhore, mae Satan neke kulu liliseihi ka nagnafagna mae Judas na te mala majorani mae Jisas. Mae Judas gne kaisei mae ka hatimare nabotho phei mae fanomho gre, thugna mae Simon Iskariot. ³Eghuteuna, mae Jisas kulu lasenihi mae Kmagna na neke tusu ranghini nolaghi te mala funei frunidi gobigna lepore, nu mana laseni la mana neke mei funugna ka God nei nake pulo la ka God. ⁴Kate gnokro teu mare na, mae Jisas ne kegra haghe kau tevo na ne atha koko phoko brahu na. Aonu mana ne hata mamango na ne pipichi. ⁵Mana hata khoꞌu na ne tofa soru kau dis na ne funu titihi ghahedi mae fanomhore. Eghuteuna, mana ne famomoja ghahedi mae fanomhore ka mamango te pipichi teu thegna na.

⁶Mae Jisas ne mei ka mae Simon Pita. Nu mae Pita ne cheke eghu ka mana, “Lord, iagho na titihi ghahegu iara gre sia?”

⁷Mae Jisas ne cheke eghu ka mana, “Iagho theome laseni unha te eni iara gognarona. Nu iagho ginauna laseniu thogheiro na.”

⁸Mae Pita ne tirogna fara ne cheke eghu ka mae Jisas, “Lord, iagho theome tangomana te titihi ghahegu iara gre funu gognaro te haghe na.”

Mae Jisas ne cheke eghu ka mana, “Uve, ghema Pita, te theome titihi iara ghahemu iagho re, iagho theome tangomana te kaisei mae nogu gloku iara na.”

⁹Kate nomhidi mana cheke igre, mae Simon Pita ne cheke eghu ka mana, “Lord, iagho tangomana titihi ghahegu iara gre, eghuteuna ke leghu na iagho jaola ke titihi khamegu nei pha’ugu gre eghu.”

¹⁰Mae Jisas ne cheke eghu ka mana, “Mae ihei tela kulu apu tela gaehi na mana theome tangomana teke apu thinigna tongana na. Khogla ghahegnare kolho nate titihi na. Aonu, iara na titihi ghahemu iagho gre kolho, naugna ghotilo nogu mae fanomho iara gre la kafe gaehi. Nu te chekeni iara na, ghotilo theome kafe gae.”¹¹Mae Jisas la kulu lasenihi mae ihei nate snakre laoni mana ka nogna mae naokare. Naugna igne mana ne cheke eghu, “Theome kafe ghotilo te gae na.”

¹²Kate titihi te gnafa mae Jisas ghahedi mae fanomhore, mana neke fahaghe phoko na neke gnokro pari. Aonu mana ne cheke eghu ka mare, “La laseni ghotilo unha te eni iara ka ghotilo igne?¹³Ghotilo kilo ghau iara ‘Mae Velepuhi’ nei ‘Lord’. Eghuteuna tuana doglo fara, naugna mae tuana ngala iara gne.¹⁴Iara nomi mae velepuhi nei nomi funei eghu ghotilo te titihi ghahemi ghotilo gre. Eghume ghotilo mala jaola titihi ghahe fari themi.¹⁵Iara eni glepo igne ka ghotilo mala filo leghuni ghotilo, mala eni ghotilo jateula teke eni iara ia eghu.¹⁶Tutuani fara te chekeni iara ka ghotilo na. Mae gloku na theome tangomana te uluni nogna mae funei na. Eghuteuna jaola mae khuru na theome uluni mae ihei teke kuru meini mana na.¹⁷Naugna ghotilo la lasedihi unha te chekedi iara igre. Eghuteuna ghotilo ginauna keli tami fara jame te leghudi re.

¹⁸“Iara theome kafe cheke ghami ghotilo. Naugna iara kulu lasedihi nafnata naikno teke vavahi thegu iarare. Nu cheke kau grioriso te blahi na igne ne horoghoto fara ka unha te eni gognaro gne, ‘Mae te gnokro ghamu bret teu balugu iara igne, mana ginau nake figri ke majora ghau iara.’13:18 Sam 41:9.

¹⁹“Eghume iara kulu chekeni ka ghotilo glepo igne kani theome thoke mei ngau. Aonu, kate thoke mei glepo tuana, ghotilo ginauna cheke eghu, ‘Tutuani fara, mae Jisas gne ngala mae Kraes na!’²⁰Tutuani fara te chekeni iara ka ghotilo na. Mae ihei te taji fakelini kaisei nogu naikno gloku teke kuru meini iara na, mana taji fakeli ghau la iara. Nu ihei te taji fakeli ghau iara na, mana mala jaola taji fakelini mae Mama, mae teke kuru mei ghau iara na.”

Mae Jisas ne cheke thakleni mae te mala majorani mana na

(Mat 26:20-25; Mak 14:17-21; Luk 22:21-23)

²¹Ke leghugna te chekeni igne, mae Jisas diꞌanagnafa gna fara ne funu cheke eghu ka mare, “Tutuani fara te chekeni iara ka ghotilo na. Kaisei mae ka ghotilo ginauna majora ghau iara.”

²²Kate nomhini igne, mae fanomhore ne filoi fari thedi. Naugna hatimare ne theome laseni mae ihei te chekeni mae Jisas na. ²³Kaisei mae fanomho te namhani fara mae Jisas na ne gnokro rhegna mae Jisas. ²⁴Mae Simon Pita ne kaflo gehe ka mana mala ghusnani mae Jisas mae ihei te chekeni mana na.

²⁵Aonu, mae fanomho tuana tugha ne lao rhegna ka mae Jisas ne fanganghau eghu ka khuligna mana na, “Lord, eigna mae ihei site chekeni iagho gnea?”

²⁶Mae Jisas ne cheke eghu ka mana, “Iagho ginauna filoni mae ihei nate atha ka iara te ghamu bret te titihi iara kau susupu na. Mae tuana ngala nate majora ghau iara na.” Aonu mae Jisas ne atha bret na ne titihi kau susupu na, ne tusu lao ka mae Judas Iskariot, thugna mae Simon. ²⁷Theome raugha kate hata mae Judas bret na, Satan ghosei ne ruma haghe ka thiꞌagna mae Judas na ne fadiꞌani nagnafagna mana na.

Aonu mae Jisas ne cheke eghu ka mae Judas, “Faghose tei eni glepo teke ghathoni iagho na.”²⁸Keha nogna mae fanomho mae Jisas te gnokro ghamu teu ka tevo na, mare theome lasedi gaoghathodi unha te chekedi mae Jisas ka mae Judas igre. ²⁹Mae Judas gne mae ihei te reireghi gna gloi sileni mare na. Eghume keha mae fanomhore te ghathoi na mae Jisas gne jame chekeni mana mala atha fajifla keha sileni mala tei foli gano malagna gaghamu na. Ba mae Jisas gne magnahagheni mae Judas mala tufa ka nodi sileni naikno te kumare. ³⁰Ke leghugna te hata te ghamu mae Judas bret teke tusu lao mae Jisas na, mae Judas ghosei ne jifla ka suga na bongiro.

Mae Jisas ne farirhiu vetula majaghani na

³¹Ke leghugna te jifla te tei mae Judas na, mae Jisas ne cheke eghu ka keha nogna mae fanomhore, “Tutuani fara, gognarona naiknore na filoni nogu nolaghi biꞌo iara mae teke mei funu ka God. Eghuteuna, naiknore ginauna filoni nogna nolaghi biꞌo God na ka iara.³²Eghuteuna jame te filoni naiknore nogna nolaghi biꞌo God na ka nogu gloku iara re, God ginauna jaola fatakleni nogu nolaghi iara mae teke mei funu ka God. God ginauna ghosei fafnakno ghau iara gognaro gne.

³³“Uve, thuguro, iara ginauna theome au faraugha balumi ghotilo. Iara na jifla tei koko ghami ghotilo. Ghotilo ginauna hari ghau iara, nu ghotilo na theome filo ghau iara. Jateula teke chekeni iara tifei ka goro mae biꞌodi mae Jiura eghu, eghuteuna te chekeni iara gognarona, aheva te tei iara na ghotilo ginauna theome tangomana te mei na.

³⁴“Eghume, iara na tusu ari kaisei vetula majaghani ka ghotilo: ‘Fari namhai jateula ngau iara te namha ghami ghotilo. ³⁵Te fari namhai ghotilo na, keha naiknore ginauna lase ghami ghotilo te nogu mae fanomho tutuani iara na.’ ”

Mae Jisas ne cheke eigna mae Pita nate pophoru u nanghagna mana na

(Mat 26:31-35; Mak 14:27-31; Luk 22:31-34)

³⁶Mae Simon Pita ne cheke eghu ka mae Jisas, “Lord, na tei heva sagho ia?” Mae Jisas ne cheke eghu ka mana, “Vido aheva nate tei iara na, iagho theome tangomana te leghu ghau iara te tei gognarona. Nu iagho ginauna leghu ghau iara thogheiro.”

³⁷Mae Pita ne cheke eghu ka mana, “Lord, naugna unha site theome tangomana iara te leghu nigho iagho gognaro na ia? Tutuani fara, iara tarabana mala lehe ranghi nigho iagho.”

³⁸Mae Jisas ne cheke eghu ka mae Pita, “Ba, iagho na lehe tutuani ranghi ghau iara sia? Tutuani fara te chekeni iara ka iagho na. Ame tanhi nga khokorako na teuna, iagho na thilo fata chekeni ne iho ghau iara teuna.”

Mae Jisas ngala u nabrou te mala thoke ka God na

¹Mae Jisas ne cheke eghu ka nogna mae fanomhore, “Thosei nanga nomi nei diꞌanagnafami eghu. Fatutuani ni God nei fatutuani ghau la iara.²Jare na kmana chogho te mala au ghotilo ka sugagna mae Mama na. Jame theome tutuani na, iara jame theome chekeni igne ka ghotilo. Iara na kulu tei jare mala tarabana choghomi ghotilo.³Ke leghugna te tei iara te tarabana choghomi ghotilo na, iara nake pulo mei. Aonu iara ginauna hata ghami ghotilo mala au balugu ka vido aheva nate au iara na.⁴Ghotilo lasenihi u nabrou te thoke ka vido aheva nate tei iara na.”

⁵Mae Tomas ne cheke eghu ka mana, “Lord, ghehati theome laseni aheva nate tei iagho na. Faneha eghume laseni ghehati nabrou te tei thoke jare na eghu sia?”

⁶Mae Jisas ne cheke eghu ka mana, “Iara nabrou na, iara tutuani na, nei iara karha na. Jare na theo kaisei nabrou heva nga te mala tei te thoke ka Mama na, mei ka iara.⁷Gognarona ghotilo la lase ghauhi iara, eghume ghotilo ginauna laseni mae Mama. Funu gognarona ghotilo lasenihi mae Mama, eghuteuna ghotilo filonihi mana.”

⁸Mae Filip ne cheke eghu ka mana, “Lord, tuana ngala unha te magnahagheni ghehati na mala falalase iagho mae Kmamu na ka ghehati.”

⁹Mae Jisas ne cheke eghu ka mana, “Ghema Filip, iara au raughahi balumi ghotilo. Ba theome lase fakeli ghau ngala iara si ghotilo ia? Tutuani fara, mae ihei te filo ghau iara na, mana la filonihi mae Mama. Naugna unha site chekeni iagho, ‘Fatakle ranghi ghami mae Mama na’ teu gnea? ¹⁰Fatutuani ghau iara sagho. Iara au balugna mae Mama, nei mae Mama au balugu iara. Cheke te chekedi iara ka ghotilo igre theome nogu cheke iara thegu. Nu mae Mama te au balugu iara na te edi nogna glokure.¹¹Khogla fatutuani ghau iara te au balugna mae Mama, nei mae Mama au balugu iara. Ghotilo jame fatutuanidi nogu cheke iara te tutuani igre, naugna ghotilo la filodihi gloku biꞌo te edi iara ra eghu. Eghuteuna ghotilo mala fatutuani eidi glepo tuare.¹²Tutuani fara te chekeni iara ka ghotilo na. Mae ihei te fatutuani ghau iara na, mana ginauna edila glepo te edi iara re. Mana ginauna na edi glepo ke kmanadi te edi iara igrei, naugna iara na tei kokoni nauthoglu igne mala tei au balugna mae Mama.¹³Eghuteuna iara na eni unha te toreni ghotilo ka nanghagu iara na. Iara na eni igne ranghi ghami ghotilo mala filoni naiknore nogna nolaghi biꞌo mae Mama te thakle mei ka iara mae Thugna na.¹⁴Tutuani fara, unha te toreni ghotilo ka nanghagu iara na, iara na eni ranghi ghami ghotilo.”

Mae Jisas ne nhaꞌa chekeni eigna u Tharunga te Blahi

¹⁵Mae Jisas ne cheke eghu ka nogna mae fanomhore, “Uve, jame te namha ghau iara tutuani ghotilo na, ghotilo leghudi koba nogu cheke iara gre.^16-17Iara ginauna toreni mae Mama mala kuru meini mana ka ghotilo keha mae te mala togho ghami ghotilo, mana ginauna au fabrahu balumi ghotilo. Mana mae Tharunga te Blahi, mae ihei nate falalase glepo te tutuani eigna God na. Naikno te leghuni puhigna nauthoglu igne na, naikno tuana theome snakreni mae Tharunga te Blahi te mala mei ka mana, naugna mana ne theome laseni nei filo glanini neu mana. Nu ghotilo lasenihi mana, naugna mana au balumi ghotilo, eghuteuna mana ginauna theome tei koko ghami ghotilo.¹⁸Iara na theome tei koko ghami ghotilo, jateula goro sua te theo ihei nga te mala tajidi ra eghu. Naugna iara nake pulo mei mala au balumi ghotilo.¹⁹Na theome raugha naiknogna nauthoglu igne na theome filo ghau iara. Nu ghotilo na filo ghau iara, naugna iara na karhau ngala. Eghuteuna ghotilo na karha la, naugna iara ginauna nake kegra fapulo kau karha.²⁰Kau narane tuana, ghotilo ginauna lase ghau iara te au balugna mae Mama, eghuteuna ghotilo au balugu iara, eghuteuna iara au balumi ghotilo.²¹Mae ihei te nomhidi nei leghudi teu nogu vetula iara re, mae tuana ngala te namha ghau iara na. Eghuteuna mae ihei te namha ghau iara na, mae Kmagu iara na ginauna namhani mana. Eghuteuna iara ginauna namha nila mana, nei na fatakle ghau thegu ka mana.”

²²Aonu, mae Judas (theome mae Judas Iskariot), ne nomhidi cheke igre ne cheke eghu ka mae Jisas, “Lord, naugna unha site magnahaghei fatakle nigho themu kolho ka ghehati, nu theome ka naikno te leghuni puhigna nauthoglu gne teu gnea?”

²³Mae Jisas ne cheke eghu ka mana, “Tutuani fara, mae ihei te namha ghau iara na, mana ginauna leghudi nogu farirhiu iara re. Mae Mama ginauna jaola namhani mana, eghuteuna ghepa mae Mama ginauna mei ka mana mala au fabrahu balugna mana.²⁴Mae te theome namha ghau iara na, mana theome leghudi nogu farirhiu iara re. Uve, farirhiu te nomhini ghotilo igne theome khogla nogu farirhiu iara kolho, nu jaola mei funugna ka mae Mama, mae teke kuru mei ghau iara na.

²⁵“Iara kafe chekedi glepo igre ka ghotilo kani au ngau iara balumi.²⁶Nu mae Tharunga te Blahi te mala togho ghami ghotilo na, mae Mama ginauna kuru meini mana ka nanghagu iara. Kau narane te mei mana na, mana ginauna farirhiu ghami ghotilo gobigna lepore, eghuteuna mana ginauna eni igne mala ke ghatho fapulodi ghotilo gobigna lepo teke chekedi iara ka ghotilo ra.²⁷Iara na lilisei soru nogu pharikeli na balumi ghotilo, nogu pharikeli iara igne tusu ari ka ghotilo. Nogu pharikeli iara igne theome jateula glepo te tusu ari naiknogna nauthoglu igne eghu. Eghume thosei nanga nomi nei thosei mhaghu eghu ghotilo ia.

²⁸“Ghathoni unha teke cheke eghu iara ia, ‘Iara ginauna tei ka mae Mama, eghuteuna iara nake pulo mei ka ghotilo.’ Te thofno namha ghau iara ghotilo na, ghotilo ginauna keli tami te tei iara ka mae Mama na, naugna mae Mama na mae ke biꞌogu iarai.²⁹Iara kulu chekedi glepo igre ka ghotilo kani theome tei koko ghami ngau iara. Kate tei koko ghami iara na ghotilo ginauna ghathodi nei fatutuanidi eghu unha te chekedi iara igre.³⁰Iara ginauna theome cheke faraugha balumi ghotilo, naugna mae Satan mae funei gna nauthoglu igne, la namo meihi. Tutuani fara, mana theo kaisei nogna nolaghi ke klignagu iara.³¹Nu iara magnahaghedi naiknogna nauthoglu igne te lase ghau iara te namhani mae Mama na. Eghume iara edi ngala unha te chekedi mae Mama mala edi iara teku mana re.

“Uve, kheraguro, ghotilo kegra haghe mala tei kokoni tahati vido igne.”

U cheke naba eigna u gaju te tutuani

¹Mae Jisas ne cheke eghu ka nogna mae fanomhore, “Iara jateula kaisei gaju te ure sisi te kelira eghu. Mae Kmagu iara na mana jateula mae greireghi gaju te ure sisi te kelira eghu.²Mana na kato koko grege te au ka iara te theome ure. Mae Mama na tatasrei, nei fagagae eghu grege te au ka iara re, mala tangomana reꞌe teke ure ginauna. ³Ghotilo la gaehi kau farirhiu te chekedi iara ka ghotilo igre.⁴Eghume ghotilo au fabrahu balugu iara, eghuteuna iara ginauna au fabrahu balumi ghotilo. Grege te au thegna sopa na theome tangomana te ure na, naugna ne theome au fodu kau gaju gna na. Ghotilo na jateula tuana eghu te theome au ghotilo balugu iara na. Eghuteuna ghotilo theome tangomana te ure themi na.

⁵“Iara jateula gaju eghu, eghuteuna ghotilo jateula grege eghu. Mae ihei te au balugu iara na, iara na au balugna mana. Mana na ure na au sisi kmana. Naugna te theome au ghotilo balugu iara na, ghotilo theome tangomana te eni kaisei glepo na.⁶Mae ihei te theome au balugu iara na, mana ginauna jateula grege te gnagha te lehe ia eghu. Eghuteuna grege te lehe tuare mala salofodu mala koko lao ka khaꞌaghi mala nako.⁷Jame te au fabrahu ghotilo balugu iara eghuteuna chekegu iara re au fabrahu ka ghotilo teuna, ghotilo ginauna tangomana te toreni unha te magnahagheni ghotilo na, eghuteuna God ginauna tusu ari ka ghotilo.⁸Kate ure sisi kmana ka ghotilo na, ghotilo falalase ghami themi te nogu mae fanomho tutuani iara na. Eghuteuna naiknore ginauna filoni ka ghotilo nogna nolaghi biꞌo mae Mama na.

⁹“Iara namha ghami ghotilo, jateula ngau mae Mama te namha ghaula iara. Eghume, ghotilo au fabrahu balugu iara, mala tangomana iara te namha ghami ghotilo na.¹⁰Te leghudi ghotilo nogu vetula iara re, iara ginauna namha ghami ghotilo fabrahu. Jateula ngau iara te leghudi nogna vetula mae Mama re, eghuteuna mana namha ghaula iara. ¹¹Iara chekeni igne ka ghotilo, mala keli tami ghotilo jateula ngau iara te keli tagu gne eghu. Eghuteuna iara magnahaghei ghami ghotilo te mala thofno keli tami fara.¹²Igne nogu vetula iara na: Fari namhai jateula ngau iara te namha ghami ghotilo gne eghu.¹³U thofno namha biꞌo te tangomana kaisei naikno te falalase ranghidi kheragnare ngala te lehe ranghidire.¹⁴Ghotilo thofno kheragu iara, eghu te edi koba ghotilo unha te chekedi iara re.¹⁵Gognarona iara theome kilo ghami ghotilo mae gloku, naugna mae gloku na theome tangomana te laseni gaoghathogna nogna mae funei na. Nu iara kilo ghami ghotilo mae kheragu iara, naugna iara chekedi ka ghotilo gobigna lepo teke chekedi mae Mama ka iara re ngala.¹⁶Ghotilo neke theome vahi ghau iara, nu iara nga teke vahi ghami ghotilo te mala tei te mala ure ghotilo na, nafnata sisi te keli te au fabrahu. Te eghu ghotilo na, mae Mama na tusu ari ka ghotilo unha te toreni ghotilo ka nanghagu iara na.¹⁷Eghume igne nogu vetula biꞌo iara te tusu ari ka ghotilo na: Fari namhai!”

Naiknore na theome magnahaghedi mae fanomhore

¹⁸“Te theome magnahaghei ghami ghotilo naikno te leghuni puhigna u nauthoglu igne na, ghotilo lasedihi mare neke kulu theome magnahaghei ghaula iara.¹⁹Nu jame leghuni ghotilo puhigna nauthoglu igne na, mare ginauna na namha ghami ghotilo, naugna ghotilo nogna naikno u nauthoglu igne. Nu iara neke vahi fadelei ghamihi ghotilo kau nauthoglu igne. Eghume ghotilo theome nogna naikno nauthoglu igne. Naugna tuana naiknogna nauthoglu igne ginauna theome magnahaghei ghami ghotilo.²⁰Thosei ghatho ihoni cheke teke cheke eghu iara ka ghotilo tifeiro ia, ‘Mae gloku na theome tangomana te uluni nogna mae funei na.’15:20 Jon 13:16.Te theome magnahaghei ghau iara mare na, naiknore ginau nake theome magnahaghei ghami la ghotilo. Te leghudi mare nogu cheke iara re, mare ginauna leghudi la nomi cheke ghotilo re.²¹Nu mare na edi glepo igre ka ghotilo naugna ghotilo nogu iara. Jaola mare theome laseni mae Mama mae ihei teke kuru mei ghau iara kau nauthoglu igne na.²²Jame theome mei iara kau nauthoglu igne te cheke ka mare na, mare na theome tangomana te filo glanidi nakhibodire. Nu gognarona theome tangomana kaisei naikno te porudi u nakhibognare.²³Ihei te theome magnahaghei ghau iara na, mana theome magnahaghe nila mae Mama.²⁴Iara neke edi glepo te theome tangomana kaisei naikno te edi re fari hoteidi mare. Jame theome edi iara igre na, naiknore jame theome tangomana te filo glanidi nakhibodire. Eghume neuba ngau mare ne filodihi glepo te edi iara re, mare theome kafe magnahaghei ghami ghepa mae Mama.²⁵Igne horoghoto ka unha teke risoni ka vetula na eigna mae Kraes, ‘Mare theome magnahaghei ghau iara kate theo nafugna.’15:25 Sam 35:19; 64:9.

²⁶“Iara ginauna kuru meini ka ghotilo mae mala thotogho na. Mae igne mae Tharunga te Blahi, mae te mala falalase glepo te tutuanire. Mana na mei ka ghotilo funugna ka mae Mama mala toutonu eigu iara.²⁷Eghuteuna ghotilo jaola mala toutonu eigu iara kau nauthoglu igne, naugna ghotilo neke au balugu iara kani teke fufunu gna iara nogu gloku gne.”

¹Mae Jisas ne cheke eghu, “Iara chekedi glepo igre ka ghotilo mala thosei blogho ghotilo nomi fatutuani na.²Naiknore ginauna faꞌau kosi ghami ghotilo ka nodi suga tharai are. Uve, narane na mei, mare ginauna falehe ghami ghotilo. Eghuteuna mare gaoghathodire ne enihi unha te magnahagheni God na eghu. ³Mare ginauna edi glepo igre ka ghotilo naugna mare theome lase ghami ghepa mae Mama.⁴Uve, iara gognarona kulu chekedi glepo igre ka ghotilo mala ne funu edi mare glepo igre ka ghotilo, ghotilo nake ghatho fapulodi unha teke chekedi iara igre eghu.

Nogna gloku mae Tharunga te Blahi

“Iara neke theome chekedi ka ghotilo glepo igre tifa na, naugna iara neke au nekeu balumi ghotilo.⁵Nu iara gognarona namo ke pulo ka mae Mama mae ihei teke kuru mei ghau na. Nu na theo kaisei ka ghotilo nate ghusna ghau iara aheva nate tei iara na.⁶Ghotilo diꞌanagnafami fara naugna eidi unha te chekedi iara ka ghotilo igre.⁷Nu tutuani fara te chekeni iara ka ghotilo na. Te mala kelimi ghotilo na iara ginauna tei koko ghami ghotilo, naugna jame te theome tei iara na, mae mala totogho, mae Tharunga te Blahi na theome mei ka ghotilo. Nu jame te tei iara na, iara ginauna kuru meini mana ka ghotilo.⁸Eghuteuna, kate mei mae mala totogho na, mana ginauna falalase fakeli ka naiknogna nauthoglu igne eigna nakhibo, eigna ihei te doglo ke ulugna God na, nei eigna ihei God nate fateni na.⁹Mare ghaoghatho fadiꞌa eigna ihei te jafra ka nakhibo na, naugna mare ne tirodi fatutuani ghau iara.¹⁰Mare au ghaoghatho fadiꞌa eigu iara mae ihei te doglo ke ulugna God, naugna iara ginauna tei ka mae Mama. Eghuteuna ghotilo ginauna theome filo ghau iara. ¹¹Mare au ghaoghatho fadiꞌa eigna mae ihei God nate fateni, naugna God la fatenihi mae Satan, mae funei gna u nauthoglu igne.

¹²“Iara au kmana glepo te mala chekedi ka ghotilo re, nu gognarona kmana glepo fara te mala ghathodi ghotilo re.¹³Nu kate mei mae Tharunga te Blahi na, mana ginauna batu ghami ghotilo ka tutuani fateoteo eigna God. Mana ginauna theome cheke leghudi nogna gaoghatho thegna re. Mana ginauna chekedi kolho ka ghotilo unha teke nomhini mana na nei toutonuni ka ghotilo eigna unha nate thoke mei nathuꞌu nauriha.¹⁴Mae Tharunga te Blahi ginauna fafnakno ghau iara. Naugna mana ginauna atha unha teke chekedi iara gre mala ke toutonu ka ghotilo.¹⁵Gobigna lepo te khotodi mae Mama re nogu iara. Naugna igne te chekeni iara na, mae Tharunga te Blahi na nomhidi unha nate chekedi iara re mala ke toutonu ka ghotilo.”

Ke pulo meigna mae Jisas

¹⁶Mae Jisas ne cheke eghu ka mare, “Katha vido ikoi ghotilo ginauna na theome filo ghau iara. Nu katha vido ikoi ke leghugna tuana, ghotilo ginauna nake filo ghau iara.”

¹⁷Keha nogna mae fanomho mana re ne cheke eghu fari thedi, “Unha eghu si gaoghathogna na te cheke eghu mana ka tahati ignea? ‘Katha vido ikoi ghotilo ginauna theome filo ghau iara. Katha vido ikoi ke leghugna tuana ghotilo ginau nake filo ghau iara.’ Mana neke cheke eghula ngau, ‘Naugna igre iara ginauna tei ka mae Mama.’ ” ¹⁸Aonu mare ne cheke eghu, “Unha eghu si mana gaoghathogna te cheke eghu mana, ‘Katha vido ikoi’ teu ignea? Tahati theome laseni unha te chekeni mana igne.”

¹⁹Mae Jisas lasenihi te magnahaghei ghusnani mae fanomhore eigna igne. Eghuteuna mana ne cheke eghu ka mare, “Tore! ‘Katha vido ikoi ghotilo ginauna theome filo ghau iara. Katha vido ikoi ghotilo ginauna nake filo ghau iara’ teu iara igne ngala site romi ghusna ghotilo ka iara gnea?²⁰Tutuani fara te chekeni iara ka ghotilo na. Naiknogna nauthoglu igne ginauna keli tadi fara ka unha nate eni mare ka iara na. Eghuteuna ghotilo ginauna tanhi nei diꞌanagnafa eghu, nu nomi diꞌanagnafa ghotilo na nake figri kau gleale’a.²¹Ghathoni igne. Kate namo karha sua na, gaꞌase na ginauna diꞌanagnafa naugna la thokenihi u narane te mala kabru naꞌa na. Nu kate karha thugna na, naꞌa ginauna nake ghatho ihoni narane teke khabru na, naugna naꞌa ne gleꞌani thugna te karha majaghani.²²Na jateula tuana eghu ka ghotilo. Eghume gognarona ghotilo diꞌanagnafa. Eghuteuna kate filo ghau iara na ghotilo ginauna keli tami nei gleale’a eghu. Nafnata gleale’a te theome tangomana kaisei naikno nate atha fadelei ka ghotilo.²³Kate filo ghau iara ka narane tuana, ghotilo ginauna theome toreni kaisei glepo ka iara. Tutuani fara te chekeni iara ka ghotilo na. Mae Mama ginauna tusu ari ka ghotilo unha te toreni ghotilo ka nanghagu iara na.²⁴Funu tifa te ghilei thoke kau narane gognaro gne ghotilo neke theome toreni kaisei glepo kau nanghagu iara na. Eghume ghotilo tore ka mae Mama, eghuteuna ghotilo ginauna hata ka mana. Eghuteuna ghotilo ginauna thono gleale’a fara.”

²⁵Aonu, mana ne cheke eghu ka mare, “Glepo te chekedi iara ka ghotilo igre, iara toutonu kau cheke naba. Nu narane na ginauna mei nate theome cheke naba iara ka ghotilo na. Nu iara ginauna cheke fadoglo eigna mae Mama ka ghotilo.²⁶Kau narane tuana iara ginauna theome toreni mae Mama mala togho ghami ghotilo, nu ghotilo ginauna toreni mae Mama unha te magnahagheni ka nanghagu iara na.²⁷Naugna mae Mama namha ghami ghotilo. Mana namha ghami ghotilo naugna ghotilo ne namha ghau iara nei ghotilo fatutuani ghau iara teke mei funu ka God.²⁸Uve, iara neke mei funu ka mae Mama kau nauthoglu igne. Eghuteuna gognarona iara nake jifla kokoni nauthoglu igne mala ke pulo ka mae Mama.”

²⁹Aonu nogna mae fanomho mana re ne cheke eghu ka mana, “Tutuani fara, gognaro na iagho la cheke thaklenihi ka ghehati, la theome toutonuhi ka cheke naba. ³⁰Gognarona ghehati lase nigho iagho thofno lasedi gobi lepore. Neuba kaisei naikno ne theome ghusna nigho iagho, iagho la kulu lasenihi unha te ghathoni mana na. Ka igne te fatutuani nigho ghehati neke mei iagho funumu ka God teuna.”

³¹Nu mae Jisas ne cheke eghu ka mare, “Ghotilo la fatutuani gognaro ba theo? ³²Fanomho ghotilo ia. Narane te mala sopa thei ghotilo na la namohi. Ka narane tuana ghotilo ginauna kafe tei koko ghau iara nake pulo ka nomi namono themi re. Narane tuana agne hi gognarona. Nu iara ginauna theome au thegu eghu, naugna mae Kmagu iara na au balugu iara.

³³“Iara chekedi glepo igre ka ghotilo mala au ghotilo ka pharikeli balugu iara. Tutuani fara, kate au teu ghotilo ka nauthoglu igne naiknore ginauna para ghami fara ghotilo. Nu thosei mhaghu ghotilo eghu, naugna iara la tapla sorunihi mae funei te batu fadiꞌadi naiknore te edi fabrahu puhi te diꞌa igre.”

Jisas taraidi nogna mae fanomhore

¹Ke leghugna te chekedi mae Jisas glepo igre, mana filo haghe kligna ne tarai,

“Mama, narane na la meihi. Fatakle meini nou nolaghi biꞌo na ka iara mae Thumu gne mala fatakle ari langau iara mae Thumu gne nolaghi biꞌo na ka iagho.²Naugna iagho neke tusu mei ka iara nolaghi te mala reireghidi naikno fateo gre, mala tangomana iara te tusu lao u karha fei tifa na ka naikno nogu iara teku iagho gre. ³Eghuteuna karha fei tifa igne gaoghathogna na naiknore mala lase nigho, iagho kaisei God ngala te tutuani, eghuteuna naiknore mala lase ghau la iara mae Thumu Jisas Kraes, mae teke kuru mei iagho kau nauthoglu igne.⁴Iara na fatakleni nou nolaghi biꞌo iagho na ka naiknogna nauthoglu igne. Eghuteuna iara la loku fahuidihi gobigna lepo mala edi iara teku iagho ra.⁵Mama, gognarona fafnakno ghau iara ke ulumu. Tusu mei ka iara nafnakno teke kulu au ka iara kani teke au tekeu iara balumu iagho ia, ame eni nga iagho nauthoglu gne teku ia.

⁶“Iara neke fatakle nigho iagho ka naikno teke tusu mei iagho ka iara teke vavahi fadelei iagho kau nauthoglu igne. Naikno igre nou iagho, eghuteuna iagho neke snakre meidi ka iara. Mare leghudi nou cheke iagho teke cheke ranghidi iara ra.⁷Eghuteuna gognarona mare la lasedihi gobigna lepo teke tusu mei iagho ka iara ra, neke mei funudi ka iagho.⁸U nou farirhiu iagho teke famei iagho ka iara ra, iara la cheke laohi ka mare, la nomhidihi mare. Mare fatutuani nigho iagho ngala mae teke kuru mei ghau iara na nei laseni fara teke mei iara funu ka iagho na. ⁹Gognaro na iara taraidi mare. Iara theome taraidi naikno te leghuni puhigna nauthoglu igne. Nu iara taraidi naikno teke tusu mei iagho ka iara gre, naugna mare nou iagho.¹⁰Naikno te nogu iara re nou la iagho, nei naikno te nou iagho re nogu la iara. Naugna nogu nolaghi biꞌo iara na la thaklehi ka naikno igre.¹¹Iara theome raugha na ari ka iagho. Iara ginauna theome au ka nauthoglu igne, nu mae igre nga nate au teu ka nauthoglu igne. Mama te blahi, taji fakelidi ka nolaghi gna nanghamu, nangha teke famei iagho ka iara, mala kaisei mare jateula tapa te kaisei gne eghu.¹²Kani au tekeu iara baludi, iara neke taji fakelidi kau nolaghi gna nanghamu iagho na, nangha teke famei iagho ka iara ia. Iara neke kafe taji fakelidi mare hui. Eghuteuna kaisei mae ngala ka mare nate snivi na mala horoghoto ka unha teke cheke eghu kau grioriso te blahi ia.

¹³“Mama, iara theome raugha na ari ka iagho. Iara chekedi glepo igre ka iagho kani au nga iara kau nauthoglu igne, mala thofno gleale’a mare jateula te gleale’a fara iara gne eghu.¹⁴Iara la tusu laohi ka mare nou farirhiu iagho ra. Eghuteuna naiknogna nauthoglu igne theome magnahaghedi mare, naugna mare theome nogna nauthoglu igne, jateula ngau iara gne theome nogna nauthoglu igne. ¹⁵Iara theome tore nigho iagho mala atha fajifladi kau nauthoglu igne. Nu iara tore nigho iagho mala reireghi fakelidi mare kau nogna nolaghi mae Satan.¹⁶Mare theome thofno nogna nauthoglu igne, jateula iara te theome nogna nauthoglu igne.¹⁷Mama, fablahidi kau chekemu te tutuani fara.¹⁸Iara kuru fajifladi mala tei mare kau naiknogna nauthoglu igne, jateula ngau iagho teke kuru mei ghau iara kau nauthoglu igne.¹⁹Iara na fablahi ghau thegu mala loku ranghi nigho iagho, mala tangomana langau mare te thofno blahi fara te mala loku ranghi nigho iagho na.”

Mae Jisas taraidi iheire te fatutuani

²⁰“Iara theome taraidi kolho mare, nu iara taraidi langau iheire te gnafa nate fatutuani ghau iara ginauna kate nomhidi nodi cheke mae igre.²¹Mama, iara kafe taraidi naikno te fatutuani ghau iara gre mala kaisei ngala mare, jateula iagho te au balugu iara nei iara au balumu iagho. Iara tore nigho iagho mala kaisei ngala mare baluda tapa, eghuteuna naiknogna nauthoglu igne ginauna fatutuani nigho iagho mae teke kuru mei ghau iara gne.²²Nolaghi biꞌo teke tusu mei iagho ka iara ia kela tusu laohi iara ka naiknore. Iara la tusu laohi ka mare mala kaisei ngala mare jateula tapa te kaisei gne eghu.²³Iara au baludi mare, eghuteuna iagho au balugu iara. Eghume mare ginauna thofno mala kaisei ngala. Aonu nauthoglu igne ginauna lase nigho iagho teke kuru mei ghau iara na. Jaola, nauthoglu igne ginauna lase nigho iagho te namhadi naikno igre jateula iagho te namha ghau iara.

²⁴“Mama, iara magnahaghedi naikno teke tusu mei iagho ka iara igre mala au balugu iara ka namono aheva te au iara na, mala filoni mare nogu nolaghi biꞌo iara na. Nolaghi biꞌo teke famei iagho ka iara ia naugna iagho neke kulu namha ghau iara neke vuvuha nga nauthoglu igne.

²⁵“Mama, iagho ngala te thofno keli fara na. Naiknogna nauthoglu igne theome lase nigho iagho, nu iara lase nigho iagho. Eghuteuna nogu naikno iara igre lase nigho iagho mae teke kuru mei ghau iara na.²⁶Iara la falalasehi ka mare nanghamu iagho na, eghuteuna iara na eni koba igne. Iara ginauna au baludi mare, mala jateula iagho te namha ghau iara gne eghu mare mala namhadi keha naiknore.”

Mae Judas ne majorani mae Jisas

(Mat 26:47-56; Mak 14:43-50; Luk 22:47-53)

¹Kate gnafa tharai na, mae Jisas ne jifla baludi nogna mae fanomhore. Mare ne tei kasa ka glogu te kiloi Kedron. Ka keha phile glogu tuana, jare au kaisei nagare gaju. Mae Jisas ne tei jare baludi nogna mae fanomhore.

²Aonu, mae Judas laseni vido tuana, naugna kmana fata mae Jisas tei koba jare baludi nogna mae fanomhore. Mae Judas gne kaisei mae te magnahaghei majorani Jisas. ³Mae Judas ne batuni kaisei tothoghei mae soldia ne tei ka nagare na. Eghuteuna, mana ne hata langau balugna keha mae soldia teke kukhuru mae pris ulu nei hatimare mae Farasi. Mare ne atha juta, nei juta jeklo ba phoposa, nei keha glepo mala magra eghu baludi.

⁴Eghuteuna, mae Jisas la kulu lasedihi unha nate eni mare ka mana na. Kate posa mei mare na, mana tei ne ghusna eghu ka mare, “Mei harini mae ihei si ghotilo ia?”

⁵Mare ne cheke eghu ka mana, “Ghehati mei harini mae Jisas gna Nasaret.”

Mae Jisas ne cheke eghu ka mare, “Uve, iara ngala mana na.” Judas, mae ihei te majorani mae Jisas na kegra neu jare baludi mare. ⁶Kate cheke eghu mae Jisas, “Uve, iara ngala mana na” teuna, mare ne kafe ghogro faleghu ne uka soru pari.

⁷Mae Jisas neke fapea cheke eghu ka mare, “Mei harini mae ihei si ghotilo ia?”

Mare ne cheke eghu ka mana, “Mae Jisas gna Nasaret.”

⁸Mae Jisas ne cheke eghu ka mare, “Iara la chekehi ka ghotilo, iara ngala mana na! Mei hari ghau iara teu ghotilo na snakredi nogu mae fanomho iara gre mala tei nodi mare.”⁹Igne ne horoghoto ka unha teke cheke eghu mana tifa ia, “Mama, iara na theome lisa lao mala sniki kaisei naikno ka teke chekedi iagho mala reireghidi iara teku gre.”

¹⁰Eghuteuna, mae Simon Pita au kaisei naflahi. Aonu, mana korho fajifla naflahi tuana ne kusu koko khuli fei nhetagna nogna mae gloku mae pris ulu na. Nanghagna mae gloku igne mae Malkus.

¹¹Mae Jisas ne cheke eghu ka mae Pita, “Ghema Pita, ke nhaꞌa fapulo nou naflahi ana! Iara na leghuni unha teke magnahagheni mae Mama te mala au papara na.”

Mare hata ni mae Jisas ne tei ke ulugna mae Anas

¹²Aonu mae soldia, balugna nodi mae funei na, nei keha mae Jiu te reireghi gna Sugablahi na eghu ne mei lokini mae Jisas. Mare haru fodu phia khamegna mana re. ¹³Mare kulu athani mana ne tei ka mae Anas. Mae Anas gne mae nanghogna mae Kaefas, mae ihei te pris biꞌo ka finogha tuana. ¹⁴Mae Kaefas gne kaisei mae neke cheke eghu tifa ka mae Jiu, “Te keli na kaisei mae mala lehe tughudi naikno te gnafare.”

Mae Pita theome laseni mae Jisas

(Mat 26:69-70; Mak 14:66-68; Luk 22:55-57)

¹⁵Mae Simon Pita ghe keha mae fanomho na, phiamare ne tei ke leghugna mae Jisas. Mae pris ulu na laseni mae fanomho tuana. Aonu mare snakreni mana ne tei balugna mae Jisas ne ruma ka glalabagna nogna suga mae pris ulu tuana. ¹⁶Eghuteuna, mae Pita tei ofo neu ke kosi rhegna grengatha na. Aonu, keha mae fanomho te laseni mae pris ulu na neke jifla kosi. Mana ne cheke ka gaꞌase gloku te reireghi grengatha na, mana tathaleini mae Pita ne ruma lamna suga.

¹⁷Gaꞌase igne ne cheke eghu ka mae Pita, “Iagho kaisei nogna mae fanomho langau mae Jisas gne sia?”

Mae Pita ne chaghi ne cheke eghu ka naꞌa, “Theo! Iara theo.”

¹⁸Ka bongi tuana thono rifu fara. Aonu hatimare mae gloku, nei hatimare mae soldia te reireghi gna Sugablahi na eghu ne ifu khaꞌaghi na peha neu. Mae Pita kegra peha neu jare baludi mare.

Mae Anas ne ghusnani mae Jisas

(Mat 26:59-66; Mak 14:55-64; Luk 22:66-71)

¹⁹Mae pris biꞌo na ne funu ghusnani mae Jisas eidi nogna mae fanomho manare, nei nogna farirhiu te edi mana ka naiknore.

²⁰Mae Jisas ne cheke eghu ka mana, “Iara neke famane cheke ke uludi naiknore. Eghuteuna iara neke farirhiu koba ke lamna suga tharai, nei ke lamna Sugablahi, ka vido aheva te kafe khapru teu mae Jiure. Tutuani, iara neke theome cheke poruni kaisei glepo.²¹Naugna unha sagho te ghusna ghau iara gnea? Ghusnadi sagho naikno teke nomhidi nogu farirhiu iara re. Mare lasedihi unha teke chekedi iara re.”

²²Kate cheke eghu mae Jisas na, kaisei mae te reireghi gna Sugablahi te kegra teu jare na mei ne taponi mae Jisas. Mana ne cheke eghu ka mae Jisas, “Ghema, theome tuana nafnata cheke te mala cheke tughu iagho ka mae pris ulu na!”

²³Mae Jisas neke cheke eghu ka mana, “Te theome doglo nogu cheke iara na, ke falalase meini sagho aheva te jafra iara na. Nu te doglo teu ngala nogu cheke iara na, naugna unha site mei tapo ghau iara iagho gnea?”²⁴Ka vido tuana mae Anas neke kuru teini mae Jisas ka mae Kaefas mae pris biꞌo na. Mare ne theome rurutha phia khamegna mana re.

Mae Pita ne chaghi eigna mae Jisas

(Mat 26:71-75; Mak 14:69-72; Luk 22:58-62)

²⁵Mae Pita kegra peha neu ka khaꞌaghi na ke kosigna suga mae pris biꞌo na. Eghuteuna, keha naikno te filoni mae Pita re ne cheke eghu ka mana, “Iagho kaisei nogna mae fanomho mae igne sia?”

Mae Pita chaghi ne cheke eghu, “Theo, iara theo.”

²⁶Kaisei mae ka nogna mae gloku mae pris biꞌo na au jare. Mae igne kaisei mae ka vikegna mae teke kusu koko mae Pita khuligna na. Mae gloku tuana ne cheke eghu ka mae Pita, “Tuani fara, iara neke filo nigho iagho balugna mae Jisas ka nagare ia!” ²⁷Nu mae Pita chaghi ne cheke eghu ka mana, “Theo! Theome iara!” Ka vido narane te cheke teu ngala mae Pita igne khokorako na ne taitanhi.

Hatimare mae Jiu hatani mae Jisas ne tei ka mae Paelat

(Mat 27:1-2,11-14; Mak 15:1-5; Luk 23:1-5)

²⁸Aonu, hamerane boibongi, hatimare mae Jiu hatani mae Jisas funu ka sugagna mae Kaefas na ne tei ka sugagna mae Paelat mae gavana gna Rom. Eghuteuna, goro mae biꞌodi hatimare mae Jiu ne theome ruma lamna ka suga na. Naugna mare magnahaghei blahi teu te ghilei thokei narane Gaghamu Ghasa-Polho na. ²⁹Aonu, mae Paelat jifla kosi ka naiknore ne cheke eghu, “Unha fathoro site nhaꞌa lao ghotilo ke kligna gna mae ignea?”

³⁰Mare ne cheke eghu, “Mae igne kaisei mae diꞌa! Jame theome loku jafra mana meuna, ghehati jame theome atha meini mae igne ka iagho.”

³¹Mae Paelat ne cheke eghu ka mare, “Te eghuna ghotilo athani mana mala fateni mana ka nomi vetula themi.”

Mae Jiu gre ne cheke eghu ka mana, “Ghehati theome tangomana te faleheni naikno na, naugna ghotilo mae Rom theome snakre ghami ghehati te mala fateni nei faleheni teu naikno na.” ³²Igne ne horoghoto fara ka nogna cheke thegna mae Jisas teke kulu chekeni mana tifa eigna unha nafnata glehe nate lehe mana na.

³³Aonu, mae Paelat neke ruma lamna suga. Mana kiloni mae Jisas, ne ghusna eghu ka mana, “Ba, iagho thofno nodi King mae Jiu gre sia ghema?”

³⁴Mae Jisas ne cheke eghu ka mana, “Gusna igne nou iagho themu, ba keha naiknoi teke cheke ranghi nigho iagho eigu iara na?”

³⁵Mae Paelat ne cheke eghu ka mana, “Sei, ne mae Jiu iara eghu sagho gaoghathomu na ia? Hatimare mae pris ulu nei nou naikno themu iagho gre eghu site atha nigho iagho te mei ka iara gnea! Unha najafra biꞌo si teke eni iagho na ia?”

³⁶Mae Jisas ne cheke eghu ka mana, “Iara mae King, nu iara theome jateula king gna nauthoglu pari igne eghu. Jame mae king gna nauthoglu pari igne iara meuna, nogu mae fanomho iara gre jame magra heta eigu iara mala theome atha ghau iara mae Jiu gre. Iara mae King, nu iara theome jateula ngau keha mae king te funei frunidi naiknogna nauthoglu pari igne eghu sia.”

³⁷Mae Paelat ne cheke eghu ka mana, “Eghume, iagho mae King eghu?”

Mae Jisas ne cheke eghu ka mana, “Uve, te chekeni teu ngala iagho themu tuana, iara mae King. Iara neke karha mei ka nauthoglu igne mala cheke thakleni unha te tutuani na. Mae ihei te magnahaghei leghuni unha te tutuani na, fanomho ka iara.”

³⁸Mae Paelat ne cheke eghu ka mana, “Unha si gaoghathogna ‘tutuani’ te chekeni iagho gnea?”

Mae Paelat ne fateni mae Jisas

(Mat 27:15-31; Mak 15:6-20; Luk 23:13-25)

Mae Paelat neke jifla kosi ka mavitu na, ne cheke eghu, “Iara theome filoni kaisei najafra te nabagna te mala fate faleheni mae igne. ³⁹Nu, ka Narane Ghasa-Polho na, iara na eni ranghi ghami ghotilo unha te eni koba iara leuleghu finogha ia, iara na snakreni kaisei mae sosolo ka ghotilo. Ghotilo magnahaghei ghau iara te snakre arini ka ghotilo mae Jiu gre nomi mae King gne sia?”

⁴⁰Mare ne cheke tughu balu eha fabiꞌo, “Theo! Theome mae igne! Ghehati magnahagheni mae Barabas!” Mae Barabas gne kaisei mae neke blau nei aknu poru eghu.

¹Aonu, mae Paelat ne chekedi nogna mae soldiare mala purini mae Jisas. ²Ke leghugna igne, mae soldiare ne lolhopo kaisei khepi fifiriulu ne nhaꞌa lao ka pha’ugna mae Jisas na. Eghuteuna, mare ne fapoko lao kaisei nogna phoko ukru king ka mana mala maꞌeni mana. ³Aonu, mare ne mei koba ke ulugna mae Jisas ne tuturupuku soru ne cheke eghu, “Cheke fakeli nigho, iagho nodi king mae Jiu!” Gnafa teuna, mare lao ne taponi mana.

⁴Mae Paelat neke jiflai ne cheke eghu ka mae Jiu gre, “Tore, filo si ghotilo! Iara atha fajiflani mae Jisas ka ghotilo. Naugna iara magnahaghei ghami ghotilo te laseni iara theome filoni kaisei najafra ka mana te nabagna te mala fate faleheni mana na.” ⁵Aonu, mae Jisas ne jifla mei ne kegra ke uludi mare balugna khepi fifiriulu na, nei nogna phoko ukru mae king. Mae Paelat ne cheke eghu ka mae Jiu gre, “Filoi ghotilo! Igne mana na!”

⁶Kate filoni mae Jisas na mae pris ulu nei mae pulis te reireghi gna Sugablahi na mare filo lao ka mae Jisas ne eha fabiꞌo, “Tupijuruni mae tuana! Tupijuruni mae tuana!”

Mae Paelat ne cheke eghu ka mare, “Athani mana si ghotilo mala tupijuruni mana themi. Naugna iara theome filoni kaisei najafra ka mana te nabagna te mala fate faleheni mana na.”

⁷Mae Jiu gre ne eha fabiꞌo ka mae Paelat, “Unha te risoni ka nomi vetula ghehati na, mae igne nabagna te lehe, naugna mana ne kiloni thegna Thugna God.”

⁸Kate nomhini mae Paelat cheke te Thugna God teu igne, mae Paelat ne mhaghu nogna fara. ⁹Aonu, mana neke ruma lamna suga ne ghusna eghu ka mae Jisas, “Iagho neke mei funumu aheva sia?” Mae Jisas ne theome cheke tughu ka mana. ¹⁰Mae Paelat ne cheke eghu ka mana, “Iagho tirou cheke tughu ka iara sia? Ba, iagho theome lase ghau iara sia? Iara au nogu nolaghi te mala hata fajifla nigho ba tupijuru nigho kau gaju fafatha. Ba, theome laseni sagho tuana ia?”

¹¹Mae Jisas ne cheke eghu ka mae Paelat, “Iagho theo kaisei nou nolaghi ke klignagu iara. Nu iagho tangomana te tupijuru ghau iara na, naugna God neke snakre nigho iagho te mala eni tuana. Nu mae ihei te snakre ghau iara ka khamemu iagho na, mana thono nakhibogna biꞌo fara ke tulao mu iaghoi.”

¹²Kate nomhini mae Paelat cheke igne, mana ne funu hiro phoge te mala snakre teini mae Jisas. Eghuteuna, mae Jiu gre ne eha fabiꞌo eghu ka mae Paelat, “Te snakre teini iagho mae igne na, ghehati lase nigho iagho theome kheragna Sisa mae funei biꞌo gna Rom na eghu. Naugna mae ihei te kiloni thegna mae king na, mana theome keli ranghini mae Sisa.”

¹³Mae Paelat nomhidi unha te chekedi mae Jiu igre ne atha fajiflani mae Jisas ke kosi suga. Mae Paelat ne gnokro ka sape mala fate te kiloi “Thabasoa” na, ka cheke Hibru na “Gabatha”. ¹⁴Ka vido tuana la namo naublathahi, eghuteuna nodi narane te mala tarabana eigna nodi Gaghamu Ghasa-polho mae Jiu gre.

Mae Paelat ne cheke eghu ka mare, “Filo si ghotilo, igne nomi mae king ghotilo na.”

¹⁵Mae Jiu gre ne eha eghu ka mae Paelat, “Atha tei mae tuana delei! Faleheni mae tuana! Tupijuruni mae tuana ka gaju fafatha!”

Mae Paelat ne cheke eghu ka mare, “Tore, ghotilo magnahaghei ghau iara te tupijuruni nomi king gne sia?”

Hatimare mae pris ulu re ne cheke eghu ka mae Paelat, “Mae tuana theome nomi king ghehati. Nomi king ghehati na kaisei mae Sisa ngala!”

¹⁶Aonu, mae Paelat ne snakreni mae Jisas ka mare mala tupijuruni mana kau gaju fafatha.

Mae soldia re ne tupijuruni mae Jisas kau gaju fafatha

(Mat 27:32-44; Mak 15:21-32; Luk 23:26-43)

Mae soldiare ne hatani mae Jisas ne tei. ¹⁷Jisas pala nogna gaju fafatha thegna na ne jifla ka namono biꞌo na ne tei ka thogele te kiloi “Khorongosa”, ka cheke Hibru na “Golgota”. ¹⁸Jare mare ne tupijuruni mae Jisas ka gaju fafatha na. Mare ne tupijurudi langau phia mae balugna mae Jisas, kaisei fei mairi nei keha na fei nhetagna, eghuteuna mana hotei.

¹⁹Mae Paelat ne risoi kaisei fagaglana ne nhaꞌa haghe ke kligna gna mae Jisas ka gaju fafatha na cheke igre:

“MAE JISAS GNA NASARET, NODI KING HATIMARE MAE JIU.”

²⁰Kmana mae Jiu te liu jare na, mare filoni fagaglana tuana. Naugna aheva te tupijuruni mae Jisas na namo fara Jerusalem. Thilo nafnata cheke te rioriso soru mae Paelat na, ka nodi cheke mae Jiu, ka nodi cheke mae Rom, nei ka nodi cheke mae Griki. ²¹Kate filoni mae pris ulure fagaglana igne, mare ne tei ne cheke eghu ka mae Paelat, “Thosei risoni iagho ‘Nodi King mae Jiu’ teu ana. Nu te keli na rioriso eghu agne, ‘Mae igne ne cheke eghu, Iara nodi King mae Jiu.’ ”

²²Mae Paelat ne cheke eghu ka mare, “Unha cheke tela risodihi iara na, khudau ngala jare.”

²³Ke leghugna te tupijuruni mae Jisas ka gaju na, mae soldiare ne hata nogna pohe mana. Mare ne tufa ka fati vido, kaisei vido kaisei mae ka fati mae soldiare. Mare jaola ne atha nogna phoko mana na. Phoko igne neke hohoro kaisei vido biꞌo kolho.

²⁴Mae soldiare ne cheke eghu fari thedi, “Tahati jame neke theome tufa phoko igne. Nu tahati jame neke lalahu khale mala laseni mae ihei nate atha na.” Cheke igre ne horoghoto kau gaoghathogna unha teke risoni kaisei mae profet tifa,

“Mare ne tufa nogu pohe iara na farihoteidi thedi nei lalahu khale nogu phoko iara na.”

Eghume, hatimare mae soldiare neke eni igne.

²⁵Naikno kegra teu rhegna gaju fafatha mae Jisas na igre: idogna mae Jisas, tahigna idogna mana na, Meri khetogna mae Klopas, nei Meri gna Makidala. ²⁶Mae Jisas ne filoni idogna na. Mana jaola ne filoni nogna mae fanomho te namhani fara mana kegra teu jare na. Mana ne cheke eghu ka idogna na, “Naikno biꞌo, filoni mae ana, ghathoni mana jateula mae thumu eghu.”²⁷Aonu mana neke cheke eghu ka nogna mae fanomho tuana, “Filoni thau ana, ghathoni naꞌa jateula idomu eghu.” Funu ka narane tuana, mae fanomho igne ne tathalei idogna mae Jisas na ne tei ka sugagna na ne tajini.

Narane glehegna mae Jisas

(Mat 27:45-56; Mak 15:33-41; Luk 23:44-49)

²⁸Ke leghugna igne, mae Jisas la lasenihi nogna gloku na la gnafahi. Te mala horoghoto kau grioriso te blahi na mana ne cheke eghu, “Iara roi koꞌu.”²⁹Jare na kaisei botol te fodu ka waen te raha fara na, aonu mae soldiare hata u phocho na ne tihi lao ka waen tuana. Aonu mare ne fachakhi lao phocho na ka fora na ne tusu haghe ka phepeogna mae Jisas na. ³⁰Mae Jisas ne gnaignami waen te raha tuana ne cheke eghu, “La gnafahi!” Mana pogho soru pha’u na ne lehe.

³¹Narane igne narane mala tarabana eigna Sabat. Mae Jiure theome magnahaghei te gefe teu thinidi mae te lehere ka gaju fafatha na te ghilei thoke ka narane Sabat. Eigna narane Sabat igne kaisei narane blahi fara tulao. Naugna igne, mae biꞌodi mae Jiure ne tore ka mae Paelat mala tei mare lolhopa ghahedi thilo mae igre, mala lehe thilo mare mala hata tei giugilui. ³²Mae soldiare mei ne lolhopa ghahedi phia mae teke tupijuru balugna mae Jisas igre. ³³Eghuteuna, kate mei mare ka mae Jisas na, mana la kulu lehehi. Mare ne theome lolhopa phia ghahegna mana re. ³⁴Kaisei mae soldia ne jajaꞌi fei gagarogna mae Jisas na ka grojo. Aonu dadara balu khoꞌu ne thofa soru ka thinigna mana na. ³⁵Iara, mae teke kegra tekeu jare na, iara filodi glepo igre ne fatutuani ne toutonudi. Unha te chekedi iara igre thofno tutuani fara, theome chaghi. Eghuteuna iara toutonudi glepo igre mala fatutuani ni ghotilo mae Jisas Kraes. ³⁶Gobigna lepo te edi igre ne horoghoto ka grioriso te blahi na, “Theo kaisei nhubragna mana te lolhopa mare na.”19:36 Eks 12:46; Nab 9:12; Sam 34:20.³⁷Eghuteuna, keha grioriso te blahi na cheke eghu, “Naiknore ginauna filoni mae teke jajaꞌi mare na.”19:37 Sek 12:10.

Bekugna mae Jisas

(Mat 27:57-61; Mak 15:42-47; Luk 23:50-56)

³⁸Ke leghugna igne, kaisei mae nanghagna na mae Josep, maegna Arimatea. Mana toreni mae Paelat mala atha thinigna mae Jisas na mala giugilu. Mae Josep gne kaisei mae leghuni mae Jisas, eghuteuna mana pophoruni thegna, naugna mana mhaghudi mae biꞌodi mae Jiu. Mae Paelat ne snakreni ka mana thinigna mae Jisas na mala atha fadelei. ³⁹Mae Nikodimas, mae teke mei filoni mae Jisas bongiro tifa ia ne tei la balugna mae Josep. Mae Nikodimas ne atha phia nafnata meresin te kilodi mur nei alo. Meresin igre famane sisiri kelidi, tahudire tolufulu kilo. ⁴⁰Phia mae igre atha thinigna mae Jisas na ne pipiha ka pohe balu meresin. Igne nodi kastom giugilui mae Jiu. ⁴¹Ka vido aheva te tupijuruni mare mae Jisas na jare au kaisei nagare sisi. Ka nagare tuana au kaisei gluma majaghani te theome giugilui nga teu kaisei naikno tagna. ⁴²Phia mare ne lilisei thinigna mae Jisas na jare, naugna gluma tuana theome thei gaꞌu. Eghuteuna, narane tuana nodi narane mala tarabana mae Jiu eigna narane Sabat.

Gluma kokhoba

(Mat 28:1-8; Mak 16:1-8; Luk 24:1-12)

¹Ghagra pasa hamerane Sade, Meri gna Makidala jifla ne tei ka gluma aheva teke lilisei mare thinigna mae Jisas na. Kate thoke lao ka gluma na, naꞌa ne filoni thina biꞌo teke fofothogna gluma na la pili fadeleihi. ²Aonu, Meri ghosei ne chari neke pulo ka mae Simon Pita ghe keha mae fanomho te namhani mae Jisas na. Meri ne cheke eghu ka phia mare, “Ghopa re, rehati la atha fadelei thinigna noda Lord na kau gluma na. Eghuteuna, ghehati theome laseni aheva te tei lilisei rehati na.”

³Aonu, mae Pita balugna keha mae fanomho na funu chari ne tei ka gluma na. ⁴Phiamare kafe chari ne tei, eghuteuna keha mae ke majaghani na ne chari uluni mae Pita ne kulu thoke ka gluma na. ⁵Mana pogho soru ne efra falamna. Mana ne filodi jare nabreku pohe teke pipihani mae Jisas re, eghuteuna mana ne theome ruma lamna. ⁶Mae Simon Pita ne mei ke leghugna mana ne doglo ne tei ruma ka gluma na. Mana ne filodi nabreku pohe au teu jare re. ⁷Mana ne filoni la susurunavi teke piphiri ka pha’ugna mae Jisas na. Eghuteuna pohe tuana lolhopo lilisei neu delei ka nabreku pohe teke pipihani mae Jisas. ⁸Keha mae fanomho teke kulu mei ka gluma na jaola ne ruma lamna. Mana theome filoni mae Jisas, eghuteuna mana ne fatutuani ni mae Jisas tekela khegra fapulohi na. ⁹Phia mae igre theome lasedi ngau grioriso te blahi teke kulu cheke eigna mae Jisas mala teke khegra fapulo kau glehe na. ¹⁰Aonu, phia mare neke pulo ka sugadi na.

Mae Jisas ne thakle ka Meri Makidala

(Mat 28:9-10; Mak 16:9-11)

¹¹Aonu, Meri kegra tanhi neu ke kosigna gluma na. Kate diꞌanagnafa tanhi teuna naꞌa na, naꞌa pogho soru ne efra falamna ka gluma na. ¹²Meri ne filodi phia engel te poko vegha gnokro teu kau vido teke au thinigna mae Jisas na, kaisei fei pha’u nei kehana fei ghahe.

¹³Phia engel igre ne cheke eghu ka Meri, “Naikno biꞌo, tanhi unha sagho ia?”

Naꞌa ne cheke eghu, “Rehati ne atha fadelei thinigna nogu Lord iara na. Nu iara theome laseni aheva te tei lilisei rehati na.” ¹⁴Kate cheke eghu Meri igne, naꞌa figri ne filoni mae Jisas jare. Nu naꞌa theome filo glanini ne mae Jisas teuna.

¹⁵Mae Jisas ne cheke eghu ka naꞌa, “Naikno biꞌo, tanhi unha sagho ia? Mae ihei site harini iagho gnea?”

Meri gaoghathogna na ne kaisei mae greireghi nagare eghu. Aonu naꞌa ne cheke eghu ka mana, “Mae biꞌo, neke iagho nga teke atha fadelei thinigna nogu Lord na nu, ke falalase iagho aheva teke tei liliseini mana iagho na eghu, mala ke tei athani mana iara.”

¹⁶Mae Jisas ne cheke eghu ka naꞌa, “Meri.”

Meri figri ne filo glanini mae Jisas ne cheke eghu, “Raboni!” Gaoghathogna ka cheke Hibru na “Velepuhi”.

¹⁷Mae Jisas ne cheke eghu ka naꞌa, “Meri, thosei habo mei ka iara. Naugna iara theome haghe ngau ka mae Mama. Nu tei filodi mae thabusignara cheke eghu ka mare, ‘Iara na haghe ka mae Mama nei Kmami ghotilo. Ka nogu God nei nomi God ghotilo.’ ”

¹⁸Kate cheke eghu mae Jisas igne, Meri Makidala chari neke pulo ne cheke eghu ka nogna mae fanomhore, “Iara la filonihi Lord na!” Naꞌa ne toutonu ka nogna mae fanomhore unha teke chekedi mae Jisas ka naꞌa re.

Mae Jisas thakle ka nogna mae fanomhore

(Mat 28:16-20; Mak 16:14-18; Luk 24:36-49)

¹⁹Kau grafi Sade, mae fanomhore kafe au neu ka suga na. Mare ne kafe bibilakhi famaku grengathare, naugna mare ne mhaghudi mae biꞌodi hatimare mae Jiu. Eghuteuna, kau vido tuana mae Jisas mei ne kegra farihoteidi mare. Mana ne cheke eghu ka mare, “Pharikeli na au ka ghotilo!” ²⁰Ke leghugna te chekeni igne, mana ne fatakle ka mare glafi te au ka khamegna nei gagarogna teure. Mae fanomhore ne gleale’a fara kate filoni nodi Lord na.

²¹Mae Jisas neke fapea cheke eghui ka mare, “Pharikeli na au ka ghotilo! Mae Mama neke kuru mei ghau iara, eghuteuna gognarona iara nake kuru fajifla ghami ghotilo ka naiknogna nauthoglu igne.”²²Gnafa teuna, mana ne phanga lao ke klignadi mare ne cheke eghu, “Gognarona ghotilo atha Tharunga te Blahi gne.²³Te atha koko ghotilo nakhibogna kaisei naikno na, God ginauna atha koko hui nakhibogna mana re. Nu te theome atha koko ghotilo nakhibogna naikno tuana, God ginauna theome atha koko la nakhibogna mana re.”

Mae Jisas ne thakle ka mae Tomas

²⁴Ka narane teke kulu thakle mae Jisas ka nogna mae fanomhore, mae Tomas keha nanghagna na, mae Didimus, neke theome au baludi mae fanomhore. ²⁵Kate mei mae Tomas na, keha mae fanomho teke filoni mae Jisas re ne cheke eghu ka mana, “Ghehati la filonihi mae Lord na!”

Mae Tomas ne cheke eghu ka mare, “Jame la filodi iara thegu glafidi nila ka khamegnare nei habo lao khamegure ka glafi, nei habo lao khamegure ka gagarogna mana re lau ame fatutuani nga iara teke la karha fapulo mana na eghu.”

²⁶Kaisei wik ke leghugna igne, mae fanomhore kafe au neu ka suga na, eghuteuna mae Tomas au neu baludi mare. Mare ne famane bibilakhi neu grengatha na, eghuteuna mae Jisas mei ne kegra farihoteidi mare ne cheke eghu, “Pharikeli na au ka ghotilo!”²⁷Aonu mae Jisas ne cheke eghu ka mae Tomas, “Habo mei khamemu are agne ka khamegu iara gre mala filodi. Eghuteuna habo mei khamemu ana agne ka gagarogu iara gne. Thosei ghatho peapea, fatutuani sagho!”

²⁸Mae Tomas ne cheke eghu ka mana, “Tutuani fara, iagho nogu Lord nei nogu God!”

²⁹Mae Jisas neke cheke eghu ka mana, “Tomas, iagho fatutuani naugna iagho ne filo ghau iara. Iheire te theome filo ghau iara nu fatutuani teure thofno keli tadi fara.”

Nafugna buka igne

³⁰Tutuani fara, mae Jisas neke edi kmana gloku te nolaghi ke uludi nogna mae fanomhore, te theome riso sorudi iara ka buka igne. ³¹Eghuteuna, glepo igre iara neke riso soru mala iu’ijudi ghotilo nu fatutuani ni mae Jisas gne mae Kraes, Thugna God. Te fatutuani ni mana ghotilo na, ghotilo ginauna tangomana te athani thofno nakarha na ka nanghagna mana.

Mae Jisas ne thakle ka nabotho kaisei mae fanomhore

¹Kaisei fata ke leghugna igne, mae Jisas neke fatakleni thegna ka nogna mae fanomhore ka grathagna Kholo Galili. Igne neke eghu. ²Keha nogna mae fanomho mana igre kafe khapru neu jare, mae Simon Pita ghe mae Tomas ihei te kiloi mae Didimus, nei mae Natanel gna ka namono Kena te au ka nohi Galili, phia mae thugna Sebedi nei keha phia mae nogna fanomho mana re. ³Mae Simon Pita ne cheke eghu ka mare, “Iara na tei ugra sasa.” Mare ne cheke eghu ka mana, “Ghehati na kafe ari balumu iagho.” Mare ne kafe saghe ka mola na ne tei. Mare ne ugra ka bongi brahu tuana ne braku kolho.

⁴Ghagra pasa, ka keha narane na mae Jisas thakle kegra neu ka gratha na. Eghuteuna, mae fanomhore ne theome filo glanini mae Jisas teuna.

⁵Aonu, mana ne cheke eghu ka mare, “Kheraguro, ne atha keha sasa ghotilo ia?”

Mare ne cheke eghu, “Theo kolho.”

⁶Mana ne cheke eghu ka mare, “Atha tei fangna na mala koko soru ka keha phile mola na, ghotilo ginauna maluaga.” Mare leghuni chekegna mana na ne koko soru ka keha phile mola na. Mare ne maluaga fara ne theome tangomanadi te korho haghe fangna na ke lamna mola.

⁷Eghuteuna, mae fanomho te namhani fara mae Jisas na filo glanini mae Jisas ne cheke eghu ka mae Pita, “Noda Lord ia signe!” Kate nomhini mae Pita te cheke mana igne, mana atha pohe na neke pipichi. Naugna mana neke hata koko pohe na mala loku neku. Uve, mana krofu soru lamna kholo ne longa ka mae Jisas. ⁸Keha mae fanomhore ne longa ka mola na ne korho ne longa fangna te fodu ka sasa na. Mare theome thei gaꞌu ka gratha na jame nabagna glimafulu khangafa kolho. ⁹Mare longa mata ne filoni kaisei khaꞌaghi te karha teu sisibegna na. Keha sasare ne foefobe neu ka khaꞌaghi na nei keha bret eghu jare.

¹⁰Aonu, mae Jisas ne cheke eghu ka mare, “Atha mei keha sasa ka teke atha ghotilo are mala gahu.”¹¹Mae Simon Pita neke pulo ne haghe ka mola na ne toghodi keha mae fanomhore neke korho famata fangna te fodu ka sasa biꞌo na. Kaisei gobi glimafulu thiloi khaputudire. Neuba ngau ne kmana fara sasa, fangna na ne theome tangomana te breku na. ¹²Mae Jisas ne cheke eghu ka mare, “Mei ghotilo mala ghamu gheda.” Eghuteuna, theo kaisei mae ka mae fanomhore tangomana te ghusna eghu ka mana na, “Mae ihei sagho ia?” naugna mare la kafe glanihi mana. ¹³Mae Jisas ne atha bret na, ne tufa ka mare. Eghuteuna, mana ke jaola neke tufa sasare. ¹⁴Funu ka narane ke leghugna teke kegra fapulo mana kau glehe na, igne fatilo fata mae Jisas te thakle ka nogna mae fanomhore.

Mae Jisas cheke ka mae Pita

¹⁵Ke leghugna te gnafa ghamu mare na, mae Jisas ne cheke eghu ka mae Simon Pita, “Simon, thugna Jone, iagho thofno namha ghau iara ngau ke uludi keha mae igrei sia?”

Mae Pita ne cheke eghu ka mana, “Uve Lord, iagho lase ghauhi iara te namha nigho na.”

Mae Jisas ne cheke eghu ka mae Pita, “Reireghidi gnafa nogu naikno iara jateula sua sipu teu igre.”

¹⁶Fapea fata na mana neke cheke eghu la ka mae Pita, “Simon, thugna Jone, iagho thofno namha ghau iara ngau sia?”

Mae Pita ne cheke eghu ka mana, “Uve Lord, iagho lase ghauhi iara te namha nigho iagho na.”

Mae Jisas neke cheke eghu ka mae Pita, “Reireghidi gnafa nogu naikno iara jateula sipu teu igre.”

¹⁷Fatilo fata na mae Jisas neke cheke eghu la ka mae Pita, “Simon, thugna Jone, iagho namha ghau iara ngau sia?”

Mae Pita ne diꞌanagnafa gna fara naugna mae Jisas ne thilo fata cheke eghu ka mana, “Iagho namha ghau iara ngau sia?” teuna. Eghume, mae Pita ne cheke eghu ka mana, “Lord, iagho lasedihi gobigna lepore. Iagho lase ghau iara te thofno namha nigho na.”

Mae Jisas ne cheke eghu ka mae Pita, “Reireghidi gnafa nogu naikno iara jateula sipu teu igre.”¹⁸Mae Jisas ne cheke eghu ka mae Pita, “Tutuani fara, te chekeni iara ka iagho na. Kate mae majaghani teu iagho na, iagho neke haru famaku themu nou nhugha na neke tei ka vido aheva te magnahaghei tei iagho na. Nu, kate mae khueku’e na, iagho na fadodoglo phia khamemu are, eghuteuna keha naikno delei nate haru famaku nigho te hata nigho te tei ka vido aheva iagho te theome magnahaghei tei na.”¹⁹Cheke igre mae Jisas ne kulu cheke thakledi ka mae Pita, mala kulu laseni mana unha nafnata glehe nate ludeni mana ginauna, mala kilo fnaknoni God. Aonu, mae Jisas ne cheke eghu ka mae Pita, “Pita, mei leghu ghau iara!”

²⁰Mae Pita figri ne filoni mae fanomho te namhani fara mae Jisas te mei ke leghudi phiamare na. Mana kaisei mae teke gnokro rhegna mae Jisas ka teke ghamu mare Gaghamu Ghasa-Polho na teke ghusna eghu ka mana ia, “Lord, mae ihei si nate majora nigho iagho na ia?” ²¹Kate filoni mae Pita te mei mana ke leghudi na, mana ne cheke eghu ka mae Jisas, “Lord, mae igne ba, na faꞌunha eghu mana ginauna?”

²²Mae Jisas ne cheke eghu ka mae Pita, “Uve, jame iara magnahagheni mana te karha teu teke ghilei pulo mei iara na, tuana theome glepo ulu ka iagho. Mei sagho leghu ghau iara!”²³Eghuteuna, u thoutonu na theome lehe mae fanomho igne teuna, ne tei tongana ka mae fanomhore. Nu mae Jisas theome chekeni te mana na theome lehe teuna. Theo, te chekeni mae Jisas na, “Jame iara magnahagheni mana te karha teu teke pulo mei iara na, tuana theome glepo ulu ka iagho.”

²⁴Mae fanomho te chekeni mae Jisas igne iara ngala. Eghuteuna, iara ngala mae te toutonudi nei rioriso sorudi teu glepo igre. Eghuteuna tahati kafe laseni unha te toutonudi iara igre thono tutuani fara.

Cheke leghu lahu

²⁵Gloku te edi mae Jisas re thono kmana fara. Jame kafe rioriso sorudi me gnafa gobigna lepo teke edi mana re meuna, te ghathoni iara na buka te kmanare jame theome nabagna nauthoglu igne.