Jemes
Nogna Letas Mae Jemes
Thoutonu kmo’ei eigna buka igne
Kmana naikno te ghathoni na, mae Jemes gne thabusigna mae Jisas, mae ihei teke mae biꞌodi naikno khiloau Jerusalem. Kate faleheni mae Stefanas naiknodi Jerusalem re, kmana naikno khiloau ne rikha ne tei ka namono te gnafa ka nauthoglu gne. (Filoni buka Mae Khuru 7:54–8:4.) Mae Jemes ne au fapulo Jerusalem eghuteuna te ghathoni na mare neke faleheni mana ka finogha 62.
Ka letas igne, mae Jemes ne chekedi kmana glepo te mala ghathodi nei edi teu naikno khiloaure. Kmana fata mae Jemes totoghale ka cheke igre keha glepo te kulu lasedihi naiknore. Mana eni igne mala filo glanidi naiknore gaoghathodi glepo te chekedi mana re.
Glepo biꞌo te chekedi mae Jemes re, mana magnahaghedi naikno khiloaure mala edi glepo te kelire ka puhi God te magnahagheni.
Keha vido ka letas igne
Fatutuani ka God: 1:2-18
Puhi te mala edi glepo te keli: 1:19–2:26
Nogna cheke naikno: 3:1-18
Nogna gaoghatho naikno: 4:1–5:6
Glepo leghu lahu te chekedi Jemes te mala edi naiknore: 5:7-20
11Iara mae Jemes, nogna mae gloku God nei nogna Lord Jisas Kraes.
Kubae ghami nogna naikno God te au heva heva ka nauthoglu gne.
Fatutuani nei glalase te keli
2Kheraguro, kate au teu ghotilo ka nauthoglu gne, ghotilo na thafodi kmana nafnata puhi biꞌo. Nu kate mei nafnata puhi biꞌo igre ka ghotilo na, ghotilo gleale’a. 3Naugna ghotilo laseni igne, puhi igre mala mei fariuriudi nomi fatutuani ghotilo re. Eghuteuna ke leghudi fariuriu igre nomi fatutuani ghotilo re ginauna na heta fara. 4Thosei blogho ka nomi fatutuani na, mala au doglo fabrahu ke ulugna God. Te eghu na God ginauna na tusu ranghi ghami ghotilo unha te magnahagheni ghotilo na mala au rheta balugna Kraes. 5Nu ihei te theo nogna gaoghatho te keli na, toreni God. Naugna God ginauna na gleale’a te tufa fabiꞌo ranghini mana gaoghatho te keli na. Eghuteuna God ginauna na theome fafuafuna ka mae ihei te tore ka mana na. 6Nu kate tore ka God na, ghotilo fatutuani ni God nei thosei ghatho peapea. Naugna mae ihei te ghatho peapea na, mana khogla jateula galo te haghe nei ke soru teu ka nuri na ia eghu kolho. 7-8Eghuteuna naikno tuana theome ghatho hetani kolho kaisei glepo nei theome laseni unha te eni na. Eghume nafnata naikno tuana theome tangomana te hatini kaisei glepo te keli ka Lord.
9Naikno khiloau te kuma ka nauthoglu gne, mana keli tagna kolho. Naugna neuba ngau God ginauna na nhaꞌa hagheni mana nei tusu ranghini mana dedei gna kligna. 10Nu mae ihei te dedei fara ka nauthoglu igne, mana na gleale’a langau, naugna God ginauna na nhaꞌa faparini mana. Eigna mae ihei te dedei na theome au raugha, nu ginauna na jateula chechenge gaju te au katha vido kmoꞌei kolho nu khoko me lehe teura eghu kolho. 11Kate haghe naprai na, ginauna na brana e brana. Eghuteuna gaju tuare ginauna na brango ka nabrana gna naprai na, aonu chechenge gaju teke famane khuakhuda tuare ginauna na ghoꞌe khoko soru lehe. Na jateula tuana eghu mae ihei te dedei na. Kate loku teuna mana ginauna lehe kokodi nogna dedeire.
Fariuriu
12Mae ihei te kegra heta nei theome snakreni thegna teu ka fariuriu te mala eni puhi te diꞌa na, mana keli tagna fara. Mana ginauna na hata nogna taba na, karha fei tifa teke kulu nhaꞌa cheke God ranghidi iheire te namhani mana re. 13Eghuteuna kate thoke mei fariuriu igre ka ghotilo na, thosei ghathoni God neke edi fariuriu igre teuna. Naugna God theome tangomana te fariuriuni kaisei naikno te mala eni puhi te diꞌa na, nei theo kaisei glepo te diꞌa tangomana te fariuriu God te mala eni God puhi te diꞌa na. 14God theome fariuriuni mana, nu mana thegna kolho te ghathodi nei magnahaghedi teu puhi te diꞌare. Kate ghathodi mana puhi te diꞌare, mana theome tangomana teke tughu nagnafa na. 15Eghuteuna gaoghatho te diꞌa na, kotu haghe ka nakhibo. Kate biꞌo haghegna nakhibo na jateula sisi eghu. Eghuteuna sisigna nakhibo na, u glehe ngala.
16Uve kheraguro, eghume thosei batu fadelei ghami. 17Glepo te famane keli te gnafa igre neke mei funudi kligna ka God, eghuteuna mana theome tangomana teke tughu puhigna na. Mana theome jateula glepo teke hohoro thegna te siasigla mei ka maloa na are eghu, naugna glepo tuare jateula naungogna gaju te tuthughu vido fabrahu ra eghu. Tutuani, God na theome tangomana tughu puhigna thegna na. 18Leghuni nogna gaoghatho thegna na God ne tusu ranghi ghita u karha majaghani na kau chekegna te tutuani, mala tangomana tahati te ulu lahu ka gobigna lepo teke hohoro thegna re.
Namhani nei leghuni eghu chekegna God na
19Kheraguro, ghaoghatho fakeli ghotilo ia. Te keli na ghotilo kulu fanomho fakeli ghu ame funu cheke nga nei diꞌatami nga eghu ka keha naiknore. 20Naugna ihei te diꞌatagna na, mana theome tangomana te eni unha te doglo ke ulugna God na. 21Eghume, koko nafnata nakhibo nei puhi te diꞌa eghu te edi ghotilo are. Thosei fahaehaghe, nu nhaꞌa fapari ghami themi nei leghuni eghu nogna farirhiu God teke farirhiu ghotilo ia. Naugna farirhiu igne ngala tangomana te fakarhi ghami ghotilo na.
22Ghotilo mala leghuni koba u chekegna God na. Eghuteuna te cheke eghu ghotilo na, “Ghehati la nomhinihi chekegna God na” teu ghotilo, nu tiromi leghuni unha te chekeni mana na teuna, ghotilo chaghi ghami kolho themi. 23Naugna mae ihei te khogla nomhini kolho chekegna God na nu theome leghuni teuna, mana jateula mae ihei te khogla filoni kolho naungogna thegna na ka thiro na ia eghu kolho. 24Eghuteuna ke leghugna te filoni naungogna thegna na, mana na tei delei, eghuteuna na ghosei ghatho ihoni unha teke filoni mana na. 25Nu naikno te thofno gleale’a na ngala mae ihei te famane fifilo fakeli nei leghuni koba teu chekegna God na. Eghuteuna chekegna God te thofno keli tuana ngala tangomana te hata fadelei nakhibo na te mala snagla naiknore. Uve, mana fanomho fakeli nu mana theome ghatho ihodi unha te nomhidi mana re. Mae igne ngala te thofno gleale’a na.
26Mae ihei la naikno khiloau hi thegna teu ka gaoghathogna na nu theome saghe leghu fakelini nogna cheke na teuna, mana chaghini kolho thegna nei nogna fatutuani mana na theo nafudi kolho. 27Nu puhi te doglo ka God Kmada na igne. Taji fakelidi goro sua te glehe kokoi ba goro naikno biꞌo tela lehehi khetodi ra. Naugna phei tothoghei igre ngaguni noda thotogho tahati na. Eghuteuna taji fakelini thegna ka gobigna lepo te diꞌa ka nauthoglu gne. Igne u nafnata naikno khiloau te magnahagheni God na.
2Kafe namhadi naiknore
1Kheraguro, thosei vahini kolho mae ihei te magnahagheni themu na, naugna ghotilo fatutuani ni noda Lord Jisas Kraes, mae ihei te fnakno fabrahu kligna. 2-3Jame phei mae mei tarai balumi ghotilo, keha na mae dedei nei keha na mae kuma. Ghotilo na filo glanidi phei mae igre, naugna mae dedei gne mana pipichi pohe te keli, eghuteuna mae te kuma gne mana pipichi pohe te thona. Ghotilo na ghatho tahuni mae te dedei gne na cheke eghu ka mana, “Mae funei, mei gnokro ka sape nafnakno igne.” Nu ghotilo na cheke eghu ka mae te kuma na, “Sei, iagho kegrau jare, ba iagho gnokro pari rhegna ghahegu iara gne.” 4Te eghu ghotilo na, ghotilo jafra fara, naugna ghotilo ne vahini mae ihei te dedei na nei mae ihei te kuma na neu ka gaoghathomi themi te diꞌare.
5Kheraguro, fanomho fakeli ghotilo ia. God neke vahidi naikno te kuma igre mala biꞌo nodi fatutuani na ka mana. Eghuteuna mana jaola neke vahidi naikno igre mala tusu ranghidi u thofno nakarha na. Eghuteuna, mana neke eni igne naugna mana neke kulu nhaꞌa chekehi te mala namhadi naikno te kuma igre. 6Nu ghotilo ne filo faparidi iheire te kumare. Mae iheire igre te edi puhi diꞌa ka ghotilo, te hata ghami ghotilo ka fate na? Naikno te kuma gre? Theo! Naikno te dedei gre! 7Eghuteuna ne iheire eghu si ghotilo te cheke fadiꞌani nanghagna noda Lord Jisas Kraes ia? Naikno te kuma gre? Theo! Naikno te dedei gre!
8Tahati la iu’ijunihi u vetula te thono ulu fara ka grioriso te blahi na igne, “Namhani kheramu fofodu na jateula iagho te namha nigho themu eghu.” Te eni ghotilo igne na, ghotilo thono doglo fara, naugna ghotilo ne leghuni unha te chekeni ka nogna vetula God na. 9Nu te vahini kolho ghotilo mae ihei te magnahaghei themi, naugna ne mae biꞌo mana teuna, ghotilo thono jafra fara ngala. Naugna ghotilo ne theome leghuni nogna vetula God te thono ulu fara na. 10Mae ihei te leghu fakelini nogna vetula God na nu theome leghuni kaisei vido cheke ka vetula na teuna, mae tuana kafe huhughuni nogna vetula God na. 11God neke cheke eghu, “Thosei tolaghi pedo.” Eghuteuna God jaola neke cheke eghu, “Thosei falehe naikno.” Neubane theome tolaghi pedo iagho, nu falehe naikno iagho teuna, iagho kafe huhughudi ngala nogna vetula God na.
12Eghume ghotilo ghatho fakelini igne ka gobigna lepo te chekedi nei edi teu ghotilo re. Naugna God ginauna na fate ghami ka nogna vetula na mala snagla ghotilo ka nakhibomire. 13Kau narane fate na God ginauna na theome kokhonidi naikno te theome kokhonidi keha naiknore. Eghuteuna God ginauna na jateula tuana eghu kokhonidi naikno te kokhonidi keha naiknore.
Thofno fatutuani ka God
14Kheraguro, theome keli kaisei mae te cheke eghu kolho na, “Iara fatutuani ni God” teu, nu theome eni kolho mana kaisei glepo te keli teu te mala fagaglana gna nogna fatutuani na. Nafnata fatutuani tuana theome mala fakarhini mana. 15Jame laseni ghotilo kaisei naikno khiloau theo ghegna gano ba theo nogna pohe thotoku te mala toghoni brana teuna. 16Eghuteuna kaisei mae ka ghotilo na cheke eghu ka mana, “Kubae ghema! God fablahi nigho. Tei sagho mala hiro gheu gano nei nou pohe eghu themu mala totoku branau.” Nu ghotilo theome toghoni kolho mana kaisei glepo! Ba, unha eghu ghotilo gaoghathomi na, chekemi ghotilo re ngala nate toghoni mana re? Theo! 17Jateula tuana eghu mae ihei te chekeni kolho ne fatutuani ni God teu nu theome toghoni kheragna fofodu na teuna. Nogna fatutuani mana tuana theome tutuani nei theome mala fakarhini mana eghu.
18Nu jame kaisei mae ka ghotilo cheke eghu, “Tahati naikno khiloau gre, kehare mala fatutuani ni God kolho, eghuteuna kehare mala toghodi keha naiknore eghu.”
Te chekeni iara na, jame kaisei mae cheke eghu mana kaisei mae fatutuani nu mana theome edi gloku te mala toghodi keha naiknore teuna, mae tuana theome fatutuani ni God kolho. Mae ihei te thofno fatutuani ni God na, mana theome khogla cheke eghu kolho, nu mana edila unha te kelire mala toghodi keha naiknore. 19Nu te laseni iara na, keha naikno ka ghotilo cheke eghu koba, “Ghehati fatutuani ni kaisei God ngala.” Nu te chekeni iara na, naiture jaola fatutuani ni kaisei God. Nu fatutuani igne theome mala fakarhidi mare. Eghuteuna kate nomhini mare nanghagna God na, mare thono mhaghu nodi fara.
20Ghotilo thono iho fara! Te fatutuani ni kolho ghotilo God nu theome eni ghotilo kaisei glepo te keli ranghini ihei teuna, u nafnata fatutuani tuana theome tutuani kolho. 21Uve, God neke kiloni mae kuꞌeda Ebraham kaisei mae doglo ke ulugna mana. Naugna unha? Naugna mae Ebraham neke snakreni mae thugna Isak mala fafara lao ka God! 22Fanomho fakeli ka iara ghotilo ia. Nogna fatutuani nei nogna gloku te keli eghu teke edi mae Ebraham igre jateula kaisei glepo eghu ngala, theome soasopai glepo. Eghuteuna glepo te keli teke edi mana tuare ngala fagaglana gna nogna fatutuani biꞌo mana ka God na. 23Eghuteuna igne ne horoghoto ka grioriso te blahi ia, “Mae Ebraham neke fatutuani ni God. Naugna igne God ne cheke eghu, ‘Mae Ebraham gne kaisei mae doglo fara ke ulugu iara.’ ” Naugna igne God kiloni mae Ebraham kheragna thegna. 24Eghume, ghotilo la lasenihi igne. Mae ihei te doglo ke ulugna God na, mana doglo ka glepo te keli te edi mana re. Igne u fagaglana gna nogna fatutuani mana na. Nogna fatutuani kolho mana na theome nabagna, naugna theo kaisei fagaglana te mala fatutuani ni na.
25Jateula Rehab, kaisei gaꞌase vine. Thogheiro na naꞌa nake doglo fara ke ulugna God naugna naꞌa neke fatutuani ni God neke toghodi phia maedi Israel teke mei efra re neke pophorudi phiamare ka nogna suga na. Aonu ke leghugna igne naꞌa toghodi phiamare neke pulo ka keha nabrou delei. 26Eghume, mae ihei te khogla cheke eghu kolho mana fatutuani ni God teu nu theome eni kaisei glepo te keli ranghini kheragna fofodu na teuna, nogna fatutuani mana tuana theome tutuani kolho. Khogla jateula thini naikno te theome phaphanga tela lehehi ia eghu.
3Nogna cheke naikno
1Kheraguro, theome kmana mae ka ghotilo te magnahaghei mae velepuhi ka khiloau gne. Naugna ghotilo laseni God ginauna na fate ghita tahati mae velepuhi gre ke tulaodi keha naikno te theome velepuhi are. 2Tutuani fara, tahati te gnafa na kafe edi kmana najafra. Nu jame kaisei mae theome eni kaisei najafra ka unha te chekedi mana re meuna, mae tuana ngala kaisei mae te doglo fara na. Eghuteuna mana ngala mae ihei tangomana te reireghi fakelini nakarhagna na.
3Jaola ghathoni igne. Mare haru kaisei phukri ka gaju ikoi te lilisei ka foflogna hose na. Mare eni igne mala tangomana te batuni hose biꞌo na mala tei ka vido aheva te magnahaghei tei mare na. 4Eghuteuna, ghotilo laseni u vaka biꞌo ia. Neubane nuri biꞌo ngau, vaka na tangomana te tei ke kligna thongna na. Naugna kaisei thaba ikoi ngala te batuni vaka biꞌo na te mala tei thoke ka namono aheva teke magnahaghei tei mae kapten na. 5Jateula tuana eghu glapigna naikno na. Neubane kaisei vido ikoi kolho ka thini na, tahati tangomana te edi tagna kmana nafnata glepo biꞌo te fahaehaghedi tahati re. Nu tahati ghatho nila eigna u khaꞌaghi ia. Neubane ikoi fara ngala ka fufunu gna na, naꞌa na tangomana te biꞌo te ghilei gnubra fahui namhata tongana na. 6Eghuteuna cheke te jifla mei ka foflogna naikno na jateula kaisei khaꞌaghi eghu, naugna tangomana te roꞌedi glepo te kelire. Neubane kaisei vido ikoi fara ngala ka thinida tahati na, u foflo ngala nafugna te mala jifla mei glepo te diꞌa na, eghuteuna tangomana te roꞌedi nakarhada fateo tahati re. Glepo te diꞌa igre tangomana te para ghita funu ka karhada na ghilei lehe tahati. Eghuteuna cheke te diꞌa igre neke mei funudi ka mae Satan.
7Funu tifa te posa gognaro gne, naikno na tangomana te kafe oho nanghaji, ba mogo, ba sasa, ba bosu mhata te mhaumhaghu ka namhata na are. 8Neubane eghu ngau, theo kaisei naikno te oho te mala namha foflogna na. Naugna foflo gne tangomana te chekedi koba glepo te thono diꞌa fara re. Jaola, cheke igre jateula khori te mala falehe sasa ia eghu.
9Foflo gne tahati mala cheke fakelini noda Lord God, eghuteuna tahati jaola ke cheke fadiꞌa dila keha naikno teke hohoro la God ka thotoghale gna thegna na. 10Tore! Cheke te keli nei tibri teu gre kafe jifla mei ngala ka kaisei foflo kolho. Kheraguro, igne thono jafra fara. 11-12Te laseni tahati na, khoꞌu te keli na theome tangomana te jifla mei ka kaisei khora ngala balugna khoꞌu te diꞌa na. Theo! Phei nafnata khoꞌu igre theome fura haghe ngala kaisei vido kolho. Kheraguro, jateula tuana eghu, gaꞌusa na theome tangomana te ure khebu na, eghuteuna kokoa na theome tangomana te ure gaꞌusa na! Eghuteuna jateula tuana eghu u foflogna naikno na.
Nogna gaoghatho te keli God
13U famane glepo khuakhuda te edi kaisei mae ka ghotilo igre fagaglana gna te kaisei mae glalase tutuani mana na. Eghuteuna kate edi mana glepo te khuakhuda igre, mana na theome tangomana te fahaehagheni thegna na. 14Nu jame kaisei mae ne lalasehi eghu ka gaoghathogna thegna na, eghuteuna fodu ka puhi goghotu nei fangiringiri ka kheragna fofodure, ba ghathoni kolho thegna teuna, mana theome mae glalase, nu mana kaisei mae chaichaghi kolho. 15Goghotu nei fahaehaghe teu igre theome gaoghatho mei funudi ka God. Theo! Nafnata gaoghatho te diꞌa tuare nogna naikno kolho, mei funudi ka mae Satan. 16Jame kaisei mae goghotu nei ghathoni thegna teu kolho na. Mana ginauna na edi kmana glepo te diꞌa, nei na edi puhi biꞌo eghu ranghidi keha naiknore.
17Nu glepo ulu lahu na, mae ihei te au nogna gaoghatho te keli teke tusu ranghini God na, mana theome tangomana te eni kaisei glepo te diꞌa na. Mana ginauna na au gleale’a baludi kheragna fofodure. Mana au kmu kolho. Nu mana leghuni u puhi farirhiu te keli na. Jaola mana magnahaghei te toghodi naikno te magnahaghei thotoghore. Eghuteuna mana theome vahini naikno te dedei ba naikno te kuma na, nei mana theome chaghini nakarhagna na. 18Mae ihei te au nogna gaoghatho te keli na mana tangomana te fadoglidi phei mae te magra farihoteidi thedi na. Eghuteuna mae igne ne doglo ke ulugna God, naugna mana ne toghodi phei mae igre mala au fakeli. Igne jateula kaisei mae te hata gano ka nagare ia eghu naugna tifeiro na mana neke joꞌu sisi.
4Mae ihei te theome leghuni God
1Kheraguro, naugna unha site magra koba ghotilo fari themi gnea? Ghotilo magra koba fari themi naugna nafnata gaoghatho te magnahaghei glepo malami themi kolho igne site biꞌo ka nagnafami ghotilo grea. 2Ghotilo magnahaghei nomi glepo kmana fara, nu ghotilo theome tangomana te hata gognaro na. Eghuteuna gaoghatho igne te magnahaghei falehedi ghotilo keha naiknore. Eghuteuna te theome hata ghotilo unha teke thono magnahagheni na, ghotilo na funu magrani mae kherami fofodu na. Nu te chekeni iara ka ghotilo na, ghotilo theome tangomana te hata glepo te magnahagheni ghotilo na, naugna ghotilo ne theome tore ka God. 3Nu kate tore ghotilo ka God na, mana na theome tusu ari ka ghotilo. Naugna gaoghathogna te tore ghotilo na thono jafra fara. Ghotilo khogla toreni kolho glepo te mala eni ghotilo puhi te diꞌa te magnahagheni themi na.
4Ghotilo te tei kokoni God na, ghotilo ginauna na jateula kaisei gaꞌase te tei kokoni khetogna na te mala au fodu balugna kaisei mae delei ngau ia eghu. Ghotilo theome lasenihi igne? Mae ihei te magnahagheni kolho glepo te diꞌa ka nauthoglu igne na, mae tuana nogna mae naoka God. Naugna mae ihei te magnahaghei leghuni kolho nogna gaoghatho naiknogna nauthoglu igne na, mana theome tangomana te leghuni gaoghathogna God na. 5-6Unha te chekeni ka grioriso te blahi na ia thofno tutuani fara eigna God neke snakre meini mae Tharunga te Blahi na ka tahati mala au ke lamnada tahati na thofno magnahaghe ghita tahati te mala leghuni kolho mana. Nu neuba ngau, keha ka ghotilo leghuni gaoghathogna naikno kolho. Nu God tusu ranghi ghami ghotilo nogna thotogho na, mala tangomana ghotilo te hogri nagnafa na. Naugna igne, grioriso te blahi na thofno tutuani fara te chekeni igne,
“God theome magnahagheni ihei te fahaehaghe na.
Nu toghoni ihei te nhaꞌa faparini thegna na.”4:5-6 Pro 3:34.
7Eghume, iara magnahaghei ghami ghotilo te leghuni koba unha te chekeni God na, thosei leghuni unha te chekeni mae Satan na. Aonu, mae Satan ginauna na rikha koko ghami ghotilo. 8Kate mei ghotilo ka God te au balugna mana na, mana ginauna na togho ghami ghotilo. Ghotilo naikno te diꞌa ra, thosei eni kaisei glepo te diꞌa nu eni unha te keli. Thosei kafe leghudi gaoghathogna naikno ghe gaoghathogna God re, nu hata fadelei glepo te thona te au ka nagnafami are nei ghathoni glepo te keli na eghu. 9Ghotilo theome nabami te maꞌe nei gleale’a teuna, nu ghotilo nabami na au diꞌanagnafa nei tanhi eghu, naugna ghotilo au nakhibo biꞌo fara. 10Nhaꞌa fapari ghami themi ke ulugna God eghuteuna God ginauna nake nhaꞌa haghe ghami ghotilo.
11Kheraguro, thosei cheke fadiꞌani ihei, naugna mae ihei te cheke fadiꞌani mae kheragna fofodu na, mana jaola cheke fadiꞌani nogna vetula God na. Eghuteuna mae ihei te fateni mae kheragna fofodu na nei nhaꞌa faparini mana teuna, mana nhaꞌa fapari nila nogna vetula God na. Te eghu ghotilo na, ghotilo theome leghuni nogna vetula God na, nu ghotilo nhaꞌa fahaghe ghami themi ke kligna gna u vetula na. 12Nu thegna God ngala mae ihei te khotogna u vetula na eghuteuna tangomana te mala fate fakelini naikno na. Mana thegna tangomana te fakarhini mana ka puhi te diꞌa na nei tangomana te faleheni mana na. Eghume ghotilo thosei fateni mae ihei te keli na nei mae ihei te diꞌa na naugna tuana nogna gloku thegna God ngala.
Thosei fahaehaghe
13Fanomho fakeli ghotilo ia. Thosei cheke eghu koba, “Gognaro ba nathuꞌu tahati na tei ka kaisei namono biꞌo mala au jare kaisei finogha. Eghuteuna tahati ginauna na loku heta mala hata sileni biꞌo.” 14Tore, nu ghotilo theome laseni unha nate eni nathuꞌu na! Eghuteuna ghotilo theome laseni unha nafnata nakarhagna nate hata ghotilo na. Ghotilo na jateula khoveo te filoni tahati katha vido ikoi hamerane nu kela dofi nila teu ia eghu kolho. 15Eghume ghotilo jame khogla cheke eghu kolho, “Jame magnahagheni God na, tahati ginauna na karha fabrahu mala eni glepo igne.” 16Nu ghotilo fahaehaghe fara eidi unha edi ghotilo glepo igre. Te eni tahati nafnata cheke tuana eigna noda gloku nathuꞌu na thono jafra fara. 17Eghume mae ihei laseni teu ngala unha te keli na nu theome eni teuna, mae tuana loku jafra ke ulugna God.
5Naikno te dedei ra thosei ghatho ihoni igne
1Fanomho fakeli ghotilo naikno te dedei ra. Gognaro na ghotilo tanhi nei diꞌanagnafa eghu naugna God ginauna na fate ghami ghotilo eidi glepo diꞌa te eidi ghotilo are. 2-3Narane God te mala fate ghami ghotilo na la namohi. Igre hila narane leghu lahure, eghuteuna ghotilo heta ghemi fara ka salo fodu sileni malami themi na. Nu nomi dedei ghotilo tuare ginauna na boto. Eghuteuna nomi famane pohe ghotilo tuare ginauna na ghamu khokorosi, nei nomi sileni ghotilo are ginauna na kukuku theo nafudi. Igne tutuani fara, naugna ghotilo ne theome toghodi keha naiknore. Te kukuku nomi sileni ghotilo igre ngala fagaglana gne te khiri ghotilo na. Eghuteuna God ginauna na fate ghami ghotilo naugna ghotilo ne khiri fara. 4Fanomho mei ka iara ghotilo ia! Igne keha fagaglana eigna puhi te salo fodu sileni ghotilo malami themi kolho na. Ghotilo chaghidi nei theome tabadi eghu kolho nomi mae glokure. Eghuteuna God mae ihei te nolaghi na ngala te nomhidi nodi natanhi nei diꞌanagnafa teu nomi mae gloku ghotilo re. 5Mare tanhi nei diꞌanagnafa naugna ghotilo ne theome tabadi mare. Nu ghotilo theome tanhi nei diꞌanagnafa eghu naugna ghotilo dedei fara nei ludeni unha te magnahagheni themi na. Nu ghotilo jateula kaisei buluka biꞌo te mala tarabana te mala falelehe te ghamu ia eghu. Buluka na gleale’a fara leuleghu narane, eghuteuna theome laseni narane mala lehegna na. Ghotilo jateula tuana eghu theome laseni narane God nate fate ghami ghotilo na. 6Eghuteuna ghotilo fate fadiꞌadi naikno te theome eni kaisei najafra gre. Nu neuba ngau mare theome tangomana te magra fapulo na. Eghuteuna ghotilo jaola falehedi mare.
Au kmu ofou
7Kheraguro, thosei babaꞌo, ghotilo au kmu ofou ke ghilei pulo mei noda Lord. Ghathoni si ghotilo mae te loku ka nagare ia. Kate joꞌu te gnafa nagare na, mana na ofoni meigna nakhete na mala kotu ganore. 8Eghume, jateula tuana eghu ghotilo au kmu ofou. Thosei nanga nomi naugna noda Lord na kela namo pulo meihi. 9Kheraguro, thosei khuru cheke fari themi naugna na eghunu fate ghami God eghu. Naugna u narane te mala ke pulo mei mana te fatedi naikno te gnafare la thono namo hi.
10Ke ghathodi si ghotilo hatimare mae profet teke chekeni chekegna God na tifa ra. Neubane naiknore ne edi kmana nafnata puhi te diꞌa ka mare, mare kegra heta ka nodi fatutuani na. 11Eghuteuna te ghathoni tahati te chekeni na mare thono keli tadi fara naugna mare kegra heta fabrahu ne ghilei thoke ka narane leghu lahu na. Eghuteuna ghotilo neke nomhi nila eigna mae Job ia. Kmana nafnata puhi biꞌo thokeni mana, nu mana biꞌo nogna fatutuani na ka God. Eghuteuna ke leghudi puhi igre Lord neke toghoni mana neke tusu ranghini mana gobigna lepo te keli teke magnahaghedi mana re. Naugna Lord na kafe namha ghita nei kokhoni ghita nei magnahaghei toghodi eghu nogna naikno te gnafare.
12Kheraguro, kaisei glepo biꞌo te mala laseni ghotilo na igne. Ne nhaꞌa cheke nganu, ghotilo thosei baubahu lao ka kaisei glepo kligna ba pari ba unha langau. Chekeni ngala, “Uve, tutuani fara” ba chekeni ngala, “Theo, theome tutuani.” Te theome eni ghotilo igne na, God ginauna na fate ghami ghotilo.
Tarai balu fatutuani
13Jame kaisei ka ghotilo au puhi biꞌo, mana tarai ka God. Eghuteuna jame kaisei ka ghotilo au gleale’a, mana koje kilo fnaknoni God. 14Jame kaisei ka ghotilo fogra biꞌo fara, mana kilo fodudi mae biꞌo ka khiloau are mala taofini ka oel te blahi nei taraini eghu ka nanghagna Lord. 15Te tarai ghotilo balu fatutuani na God ginauna na fakelini naikno te fogra tuana nei mana hata fadelei nakhibo jame teke edi mana re. 16Eghume te cheke thakledi ghotilo nakhibomire fari themi nei fari totoghoi ka nomi tharai na mala ke keli fapulo. Nogna tharai mae ihei te doglo fara ke ulugna God na thono nolaghi fara.
17Tahati laseni eigna mae profet Elija ia. Mana kaisei mae jateula tahati eghu kolho. Nu mana neke tarai heta ka God mala theome soru nakhete ka nauthoglu gne. Aonu theome nakhete naba thilo finogha namno nhigra. 18Eghuteuna ke leghugna igne, mae profet Elija neke fapea tarai ka God mala kuru meini nakhete na. Aonu nakhete na neke soru mala ke kotu gobigna lepo te au ke lamnadi glose gre.
19Kheraguro, mae ihei tela tei kokonihi thofno chekegna God na, ghotilo ke toghoni mana mala ke pulo mei. 20Iara magnahaghei ghami te mala thofno lase fakelini igne: God ginauna na hata fadelei nakhibogna mana re nei fakarhini mana eghu ka glehe. Naugna ghotilo neke toghoni mana neke koko fahui nakhibogna mana re mala figri mana ka thofno nakarha te keli na. Me gnafa. Iara, mae Jemes.