Profet Isaia
Nogna Buka Mae Profet Isaia
Thoutonu kmo’ei eigna buka igne
Kmana naikno ghathoni Profet Isaia gne kaisei thofno mae profet teke rioriso soru nogna chekere. Profet Isaia fufunu nogna gloku na ka finogha teke King Iusaea, jame ka finogha 740 ame neke karha nga Kraes (740 B.K.). Mana neke loku la thilo profet igre Emos, Hosia, nei Maeka. Profet Isaia neke au Jerusalem, eghuteuna mana neke toutonudi cheke igre ka naikno ka kantri Juda.
Ka finogha tuana, kantri biꞌo Asiria kaisei kantri nheta fara ka nauthoglu igne. Naugna hatimare mae king nei naiknogna kantri Israel ke raru igne leghudi puhi te diꞌa re, LORD God neke kuru meini armi gna Asiria mala paradi naiknodi Israel. Eghuteuna naiknodi Asiria funei fruni ni kantri igne ka finogha 722 B.K. Profet Isaia neke atha glepo igne jateula cheke thotoghale eghu mala farirhiuni King Hesekaea mala lelheghu kolho ka LORD. Eghuteuna kate mei armi gna Asiria te atha namono biꞌo Jerusalem ka finogha 701 B.K., King Hesekaea toreni LORD mala toghodi. Naugna igne LORD ne kuru mei nogna engel na mala aknu falehe 185,000 soldiadi Asiria (Isaia 37:36-37). Profet Isaia jaola neke toutonu eigna God ginauna paradi naikno ka kantri Juda, eghuteuna mana ginauna kuru mei armi gna ka keha kantri mala atha. Igne neke thoke mei ka finogha 586 B.K., igne raugha ke leghugna tela lehehi Profet Isaia.
Nu neuba Profet Isaia ne cheke faheta ka naiknore eigna God ginauna para iheire te tirodi leghuni mana, eghuteuna mana jaola chekeni eigna God ginauna fablahidi iheire te leghuni puhigna mana te doglo na. Isaia neke cheke ka naiknodi Juda eghuteuna chekeni ke leghu na armi di Babilonia igre na huhurudi mare mala jifla ka nodi namono re mala tei au Babilonia, God ginauna batudi mare mala ke pulo mei ka nodi namono re. Eghuteuna mare ginauna au fakeli nei au glealeꞌa ke lamnadi nodi namono re.
Thofno famane gaoghatho ka buka igne, LORD ihei te nodi God naiknodi Israel igne, mana thono blahi fara (Isaia 6:3). Eghuteuna Isaia mana neke chekeni te nogna naikno LORD igne mala jaola blahi. Profet igne jaola kiloni nangha “God te Blahi gna Israel” varadaki namno fata ke lamnagna buka igne. Keha nanghagna God te chekeni Isaia na igne: “LORD ihei te au nolaghi fateote’o,” nei “God ihei te fasnagli ghita,” nei “God ihei te fakarhi ghita,” nei “God ihei te doglo fabrahu.”
Profet Isaia jaola neke chekedi keha cheke eigna kaisei mae ka tharaknagna King Devet. LORD ginauna vahini mana mala kaisei nogna mae gloku mana. Mana cheke eigna puhi nate au ka nauthoglu (Isaia 42:1-7), nei puhi mana ginauna au papara nei lehe (Isaia 52:13–53:12). Ke leghu ka naranegna Isaia te mei posa gognarogne, kmana naikno fatutuani eigna Isaia neke cheke eigna Mesia igne God ginauna kuru mei mala fakarhidi nogna naiknore. Kate mei Mesia na, nogna naikno LORD igre ginauna au fakeli nei naoka theome tangomana nate goigonidi mare na. Mesia ginauna funei fruni ka nogna puhi te doglo LORD, eghuteuna naikno te gnafa ka nauthoglu igne ginauna mei Jerusalem mala kilo fnaknoni LORD. Naikno khiloau jaola fatutuani di unha te chekedi Isaia eigna Jisas ginauna karha (Isaia 7:14).
Keha vido ka buka igne
LORD ginauna fatedi naikno ka nauthoglu: 1–39
Keha cheke faheta nei keha nhaꞌa cheke: 1:1–12:6
LORD ginauna paradi kantri: 13:1–23:18
LORD ginauna fatedi naikno ka nauthoglu: 24:1–27:13
Keha cheke faheta nei keha nhaꞌa cheke: 28:1–35:10
Thoutonu eigna King Hesekaea gna Juda nei naiknodi Asiria: 36:1–39:8
LORD toghodi nogna naiknore mala ke keli pulo: 40–66
Cheke mala farerheta gaoghathodi naiknodi Juda: 40:1–55:13
Keha cheke faheta nei keha nhaꞌa cheke: 56:1–66:24
1Cheke ulu lahu
1Cheke igre, LORD neke cheke mei ka Profet Isaia, thugna mae Emos, mala cheke mana ranghidi naiknodi Jerusalem ghe Juda. Profet neke chekedi cheke igre ka naranegna King Iusaea, King Jotam, King Ehas nei King Hesekaea. Mae igre neke king ka kantri Juda.
LORD neke fatedi nogna naiknore
2LORD ne cheke faheta eghu,
“Ghopa maloa ghe nauthoglu ra!
Ghopa fanomho mei ka nogu cheke iara igre!
Funu ka narane te ikodi teku thugu iara igre,
iara neke reireghi fakelidi,
nu gognarona mare tirodi fanomho ka nogu cheke iara re.
3Buluka na laseni mae khotogna na,
eghuteuna dongki na laseni mae teke reireghini te faghamuni na.
Nu nogu naikno iara Israel igre theome lase ghau iara.
Uve, nogu naikno iara igre theome laseni kaisei glepo te keli.”
4Ghotilo nogu naikno iara igre thono diꞌa fara!
Eghuteuna puhimi ghotilore jaola thono diꞌa fara.
Ghotilo naikno mala tapla jafra fabrahu ka nakhibo kolho.
Eghuteuna ghotilo la tei kokonihi LORD.
Uve, ghotilo tiromini nodi God maedi Israel te thono blahi fara igne la figri tagrunihi mana.
5Naugna unha si ghotilo te tiromini chekegna God ignea?
Ba, ghotilo magnahagheni God te para ghami fabrahu sia?
Puhimi ghotilo re jateula mae te au nafnera biꞌo ka phaꞌugna na te theome ghaoghatho fakeli ra eghu.
6Ghotilo jateula mae te thafru ka thubu funu ka phaꞌugna na te tei posa ka ghahegna ra eghu.
Eghuteuna theo kaisei naikno nate fagaedi thubu igre,
ba nhaꞌa lao meresin tadi ba pipihadi.
7Nomi naoka ghotilore la gnubrahi nomi namono ghotilore
nei goigonihi nomi kantri ghotilore.
Mare blau gano ka nomi nagare ghotilore kate filo teu kolho ghotilo na.
Maedi ka keha namonoi te mei goigonidi gobigna lepo ka nomi kantri ghotilo igne.
8Gognarona, Jerusalem baludi nogu naikno iara te au ka namono igne au sopa jateula kaisei grorofe teke hohoro kaisei mae ka nogna nagare na ia eghu,
ba jateula namono te au farihoteidi mae naokara eghu.
9Jame LORD mae ihei te au nolaghi fateote’o igne theome fakarhidi keha naikno ka tahati meuna,
tahati ginauna jame kafe luvu fahui jateula naiknodi phei namono biꞌo Sodom ghe Gomora tifa ra eghu.
10Ghotilo mae mala baubatu nei iheire eghu te au Jerusalem ra,
fanomho fakeli ka nogna famane cheke LORD igne.
Naugna ghotilo ne jateula mae mala baubatu nei naiknodi teku Sodom ghe Gomora tifa ra neu.
Eghume, ghotilo fanomho fakeli ka nogna famane farirhiu noda God igre!
11LORD neke cheke eghu,
“Iara theome magnahaghedi thua nafnata fafara te edi ghotilo ka iara igre.
Iara hongo ghau ka sipu te gahu ghotilo te hata te mei ka iara igre,
eghuteuna iara jaola tirogudi garofadi nomi sipu ghotilo te blokha are.
Iara tirogudi fara dadaradi buluka nalhaꞌudi nei nanigot nei sipu eghu te falelehe ghotilo are.
12Naugna unha si ghotilo te nolo tafri ke lamnagna nogu suga iara na kate mei pogho soru ka iara gnea?
13Iara theome magnahaghedi fafara te famei fabrahu ghotilo ka iara igre.
Kate gnanghodi iara nomi insens ghotilo igre, iara thono rogu luꞌadi fara.
Eghume, naugna te edi fabrahu ghotilo puhi te diꞌa igre,
iara jaola theome magnahaghei te filodi Gaghamu Khafa,
nei Narane Sabat nei keha narane teu te khapru te faidu ghotilo are.
14Iara theome magnahaghedi nomi Gaghamu Khafa nei nomi narane blahi teu ghotilo tuare.
Glepo te edi ghotilo tuare bukri soru ghau iara pari!
15Kate ngafa haghe ghotilo khamemire te tarai mei ka iara na,
iara ginauna tirogu filo ari ka ghotilo.
Neuba ghotilo ne tarai ne tarai leghu rane,
iara ginauna tirogu fanomho ka ghotilo.
“Naugna dadaradi naikno teke aknu falehe ghotilo ra fodu ka khamemi ghotilore.
16“Ghotilo fagae ghami themi,
eghuteuna thosei ke eni kaisei puhi te diꞌa.
17Ghotilo hironi kolho puhi te doglo na.
Ghotilo tathaji puhi te mala eni glepo te doglo na,
eghuteuna ghotilo koko puhi te diꞌa te goigonidi keha naiknore.
Eghuteuna toghodi goro sua glehe kokoi ba goro naikno biꞌo te lehehi khetodi re are.”
18LORD neke cheke eghu,
“Mei ghotilo mala fadoglini tahati glepo igne!
Neuba ne jateula dadara ka pohe vegha ra neu ne ninhigrana fara atha kokodi nakhibomi ghotilore,
iara tangomana te togho ghami ghotilo te mala thofno gae fara jateula khakla sipu teu ghotilo na.
19Jame te leghu ghau iara ghotilo na,
iara ginauna togho ghami ghotilo te mala au fakeli ghotilo na,
eghuteuna ghotilo ginauna au ghemi gano te keli ka nomi nagare are.
20Nu jame te tiromi leghuni ghotilo nogu cheke iara igne te figri tagru ghau iara na,
iara ginauna snakredi mae naokare mala mei falehe ghami ghotilo.”
Iara LORD te chekeni igne!
Naiknodi Jerusalem theome leghuni God
21Ghotilo naiknomi Jerusalem!
Tifa na ghotilo neke leghuni fara chekegna LORD na,
nu gognarona ghotilo tiromini mana jateula gaꞌase vine te tirognani khetogna na ia eghu.
Ulu lahu na puhidi naiknogna namono igne neke doglo fara,
nu gognarona mare la thofno diꞌa fara.
Tutuani, naikno te falehe naikno igre la jaola kmana fara.
22Ulu lahu na ghotilo neke jateula famane silva neku, nu gognarona,
ghotilo jateula chara te mala koko ra eghu.
Uve, tifa na ghotilo neke jateula famane waen ra neku,
nu gognarona ghotilo jateula waen te fodu ka khoꞌu ra eghu kolho.
23Nomi mae mala baubatu ghotilo igre tirodi leghudi nogu cheke iara re,
eghuteuna mare kheradi fofodu mae te blau.
Leuleghu fata na mare magnahaghei sileni cheke famaemahe koba.
Eghuteuna mare theome toghodi goro sua te glehe kokoi ba goro naikno biꞌo tela lehehi khetodi ra.
24Aonu nodi God mae Israel te rheta nei au nolaghi fateote’o teu igne neke cheke eghu,
“Gognarona ghotilo nogu naoka iara,
eghuteuna ghotilo ginauna theome ke eni kaisei puhi biꞌo ranghi ghau iara.
Iara ginauna nake tughu fapulo ka ghotilo glepo te diꞌa teke edi ghotilo ka iara ra.
25Iara ginauna para ghami ghotilo eidi glepo te diꞌa teke edi ghotilo ka iara ra,
eghuteuna iara ginauna togho ghami ghotilo mala ke klino fapulo,
jateula mae te gahu silva te mala koko thonagna ra eghu.
26Eghuteuna iara ginauna na vavahi mae mala baubatu majaghani nei mae funei majaghani eghu jateula teke eghu ghotilo tifa ra eghu.
Ka narane tuana, naiknore ginauna lase ghami ghotilo naiknomi Jerusalem ra te edi ghotilo glepo te thofno doglo re.
Mare na jaola lase ghami ghotilo te ghatho tahuni fabrahu LORD.”
27Jame te fatedi ghotilo naiknore ka puhi te doglo na,
ghotilo ginauna snagla nomi.
Eghuteuna jame te edi koba ghotilo glepo te doglore,
LORD ginauna fakarhi ghami ghotilo iheire te tughu nagnafa ka nakhibo.
28Nu LORD ginauna falehedi iheire te tapla jafra ka nakhibo nei iheire te figri tagruni Mana.
29“Mana ginauna na famamaja ghami ghotilo,
naugna ghotilo ne pogho soru ka mumuju ke pari gaju blahi ok nei ke lamna nagare blahi.
30Ghotilo ginauna lehe jateula gaju ok te gnhagha ra eghu,
ba jateula nagare te theome soru kaisei nakhete tagna ra eghu.
31Nomi mae nheta ghotilo are ginauna glaꞌe soru jateula khakla gaju te moja ra eghu,
eghuteuna nodi glokure ginauna na jateula khakla gaju te koko lao ka nasnire khaꞌaghi ra eghu.
Mae nheta igre ginauna gnhubra ka khaꞌaghi baludi nodi gobigna lepore,
eghuteuna theo kaisei naikno nate tangomana te faleheni khaꞌaghi igne na.”
2Nonomho eidi Jerusalem ghe Juda
1Cheke igre, cheke eidi Jerusalem ghe Juda neke cheke LORD ka iara Isaia, thugna Emos.
2Ka narane nate mei mana na,
thogele te kegra nogna Sugablahi LORD igne,
ginauna ulu salaꞌudi gnafa keha thogele are.
Eghuteuna naikno te gnafa ka keha kantri are ginauna tangomana te salo fodu mei tagna.
3Kmana naikno ginauna mei cheke eghu,
“Mei, tahati na kafe haghe ka nogna thogele LORD,
nogna God mae Jekop.
Uve, tahati na ari mala pogho soruni mana ka Sugablahi na.
Eghuteuna LORD ginauna farirhiu ghita mala leghuni tahati puhigna mana na.”
Uve, mana ginauna eni igne, naugna chekegna LORD na ginauna jifla Jerusalem,
eghuteuna mana ginauna farirhiudi naiknore heva heva ka puhigna mana na.
4Eghuteuna ka narane igne,
LORD ginauna fadoglidi puhi fapholai fari hoteidi keha kantri are.
Aonu mare ginauna nake kuri naflahi mala magra ra
nei nodi goru teura mala ke vuhai khodo mala dokha glose nei naflahi pekora mala kato grep.
Aonu naiknogna kaisei kantri na ginauna na theome magra ka keha kantri na,
ba farirhiudi mae majaghani re mala magra.
5Ghotilo vikegna mae Jekop ra, mei mala leghuni tahati LORD mae ihei teke falalase ranghi ghita nabrou karha na.
LORD ginauna nhaꞌa faparini ihei te fahaehaghe
6LORD, iagho nodi God vikegna mae Jekop.
Nu gognarona iagho figri tagrudi nou naiknore,
naugna mare ne leghudi nodi thua nafnata kastom chaichaghi naiknodi ke maghati.
Eghuteuna mare fariuriu chekedi unha nate thoke mei nathuꞌu nauriha,
jateula maedi Filistia eghu.
Eghuteuna mare jaola leghudi puhidi naikno bongihehedi keha kantri delei.
7Nodi namono mare igne fodu salaꞌui ka silva,
gol, hose nei chariot.
Theome tangomana kaisei naikno te kahadire.
8Nodi namono mare igre jaola fodu ka mumuju,
eghuteuna mare tarai ka mumuju teke horo kolho thedi tuare.
9God, iagho nhaꞌa faparidi naikno te fahaehaghe tuare mala mamaja mare.
God thosei atha fadelei nakhibodire!
10Naiknore ginauna fariuriu rikha tei ka gluma,
ba dokha khora mala poru lamna,
naugna mare ne mhaghuni LORD mae ihei te au nolaghi biꞌo fateote’o!
11Ka narane igne, LORD ginauna nhaꞌa faparidi naikno te fahaehaghe are,
eghuteuna naikno te gnafa igre ginauna ghatho tahuni LORD kolho.
12Ka narane tuare,
LORD mae ihei te au nolaghi fateote’o igne ginauna nhaꞌa faparidi iheire te fahaehaghe.
13LORD ginauna koko sorudi pari iheire te fahaehaghedi thedi fara are mala jateula famane gaju sida te brahu te kato soru ka namono Lebanon ra eghu,
eghuteuna jaola goigoni gaju ok te rheta ka namono Basan.
14LORD ginauna jateula tuana eghu fasasare thogele te gnafa nei gukhu te gnafa teu ka kantri igne.
15Eghuteuna LORD ginauna jaola paꞌe soru gringni thina maku baludi suga mala toetoe te gnafa.
16Mana ginauna jaola fapluludi vaka biꞌo mala luja kako,
nei keha nafnata vaka langau.
17-18Jateula puhi igne eghu, LORD ginauna tapla faparidi naikno te fahaehaghe.
Eghuteuna mumuju god igre ginauna gnafa dofidi,
eghuteuna naikno te gnafa gre ginauna ghatho tahuni LORD kolho.
19Ka narane LORD mae ihei te king nei mae ihei te au nolaghi fateote’o igne te diꞌatagna nei fakakhana nogna nolaghi na teuna,
naiknore ginauna mhaghu nodi fara na rikha tei ka gluma thina,
ba dokha khora mala poru lamna.
20Ka narane God te fatedi naiknore igne,
mare ginauna koko mumuju god teke hohoro ka gol nei silva,
mala tei koko ka vido aheva te fodu ka nakusi tagna.
21Jaola ka narane igne,
naiknore ginauna mhaghu rikha tei poru lamna khora glose nei ka thogele,
naugna LORD mae ihei te king, mae au nolaghi fateote’o,
eghuteuna mana ginauna fakakhana nogna nolaghi na kate diꞌatagna na.
22Ghotilo thosei au nomi grouronu kaisei phile ka naikno,
naugna mare theome au raugha lehe kolho.
Mare theo nafudi kolho eghuteuna theome tangomana nate togho ghami ghotilo.
3God ginauna paradi naiknodi Jerusalem nei Juda
1Fanomho mei, ghotilo naiknomi Jerusalem nei Juda!
LORD mae ihei te au nolaghi fateote’o igne,
ginauna atha fadelei gano nei khoꞌu eghu te magnahaghedi fara ghotilo ka nakarhami are.
2-3Mana ginauna jaola hata fadelei mae funeidi armi baludi mae te graju ka magra nei hatimare mae soldia,
goro mae biꞌo ka gavman, mae mala fate,
mae profet nei mae mala batuni king ka gaoghatho te keli,
hatimare mae kastom baludi mae glalase,
nei mae iheire te lase edi glepo te keli.
4LORD neke cheke eghu,
“Iara ginauna vahidi goro mae nalhaꞌu majaghani ra mala nomi mae funei ghotilo naiknomi Jerusalem nei Juda.
Eghuteuna goro mae sitei gre ginauna funei frunini kantri igne leghuni unha te magnahagheni thedi na.”
5Naiknore ginauna fari pholai fari thedi.
Naiknore ginauna theome keli ranghidi kheradi fofodure,
eghuteuna mae nalhaꞌu majaghani nei gaꞌase majaghani teu igre ginauna theome ghatho tahudi naikno biꞌo nei mae biꞌo teure.
Eghuteuna naiknore ginauna maꞌedi kolho nomi mae funei ghotilore.
6Ka narane igne, keha mae ka ghotilo ginauna vahidi vikedi thedire mala mae baubatu,
mare na cheke eghu ka mana,
“Nakarhada tahati gognarogna thono diꞌa fara, nu nou pohe iagho igne roi keliu.
Eghume iagho ginauna na funei fruni ghita tahati!”
7Nu mana ginauna kegra haghe cheke eghu,
“Iara theome tangomana te togho ghami ghotilo na,
naugna iara theo nogu pohe ba gano ka nogu suga na!
Eghume faꞌunha eghu iara fadoglini nomi puhi biꞌo ghotilo igne?
Theome keli ghotilo te vahi ghau iara te mala nomi mae mala baubatu ghotilo na.”
8Puhi igne ginauna thoke mei tutuani ka naiknodi Jerusalem nei Juda,
naugna nodi cheke nei nodi gloku teure faparini nei goigonini eghu Nanghagna LORD mae ihei te haghe fara.
Mare edi koba puhi te diꞌa igre jateula naikno te thaviru tela ukahi pari ra eghu ka tathagna mana na.
9Naikno igre theome jafra ka naiknodi Sodom tifa ra.
Mare theome mamaja te eni puhi te diꞌa na ka tathadi keha naiknore.
Kokhonidi fara naikno igre, naugna mare ei puhi biꞌo ranghidi thedi.
10Ghotilo cheke ka iheire te leghuni puhi te doglo na,
eigna LORD ginauna fablahidi mare,
naugna mare ne edi glepo te kelire.
11Nu kokhonidi fara iheire te leghuni puhi te diꞌa na!
LORD ginauna tughu fapulo ka mare glepo te diꞌa fateote’o teke edi mare ra.
12LORD neke cheke eghu,
“Gognarona goro gaꞌase kolho nate funei fruni ghami ghotilo na,
nei goro sua gre goigoni ghami ghotilo nogu naikno iara gre.
Eghuteuna nomi mae mala baubatu ghotilore ginauna batu ghami ghotilo mala leghuni ghotilo puhi te theome doglo na.”
13LORD gognarona tarabana mala fatedi iheire te edi glepo te theome doglore!
14Eghuteuna gognarona LORD funu fatedi goro mae biꞌo nei mae mala baubatu ghita tahati nogna naikno manare.
Eghuteuna mana ne cheke eghu ka mare,
“Ghotilo mae igre goigonidi koba nogu naikno iara igre ka puhi te fafofodu nomi sugare ka glepo teke blau ka naikno te kuma re.
Puhi igne ghotilo jateula te goigonini nogu nagare grep iara na eghu.
15Theome doglo te goigonidi ghotilo nogu naikno iara igre,
eghuteuna puhi te eni ghotilo igne,
jateula te tapla ka phaꞌudi naikno te kuma ra eghu thofno diꞌa fara.”
Igne nogna cheke LORD mae ihei te au nolaghi fateote’o.
Cheke ranghidi goro gaꞌasedi Jerusalem
16LORD neke cheke eghu,
“Gaꞌasedi Jerusalem igre thofno faghaja fara! Kate nolo tafri na,
rehati filo haghe kligna balu sepe-sepe thinidire,
eghuteuna kaflo gehe ka mae nalhaꞌure.
Eghuteuna rehati solt sesele ka ghahedire mala taitanhi kate nolo tafri rehati re,
mala filo lao mae nalhaꞌu tadi.
17Naugna igne, iara ginauna paradi reꞌe,
eghuteuna iara ginauna lisei lao thubu ka phaꞌudire,
eghuteuna iara ginauna snakredi hatimare mae naoka mala koko nodi pohere,
mala filo nodi naiknore kate soesole rehati na.”
18-23Ka narane igne, LORD ginauna atha koko nodi famane glalaoni gaꞌasedi Jerusalem. Eghuteuna mana ginauna atha koko glalaoni ka phaꞌu, ka khuli, ka nehu, ka grara, ka khame, ka geghesu nei ka ghahe teu te faghajadi fara reꞌe igre. Eghuteuna mana ginauna jaola hata koko famane pohe mala piha phaꞌu nei pohe mala piha tafru tathadi nei foflodi, nei nhugha, nei gloi, nei kastom meresin, nei botol oel ikoi te siri kelidi fara igre.
24Rehati ginauna na theome siri kelidi,
nu rehati ginauna thono siri diꞌadi fara.
Rehati ginauna na theome hugha ka famane nhugha te keli,
nu hatimare mae naoka ginauna harudi reꞌe ka gnarho jateula naikno sneka eghu.
Khakladire ginauna theome keli filodire,
mae naoka ginauna ghoighori fagae phaꞌudire ka bledi.
Rehati ginauna theome pipichi ka famane pohe te keli,
nu reꞌe ginauna pipichi kolho ka pohe te thona.
Rehati ginauna theome keli filodire jateula gognarogne eghu,
naugna hatimare mae naoka ginauna goigoni thinidire jateula thinidi naikno sneka eghu.
25Ka narane igne,
hatimare mae naoka ginauna falehedi mae soldiadi Jerusalem ka magra.
26Aonu naikno te gnafa ka nomi namono te theome lehe nga teura ginauna diꞌanagnafa nei tanhi eghu,
naugna namono igne ginauna na jateula kaisei gaꞌase te mei naikno te hata fateo nogna gobigna lepora eghu.
41Ka narane tuana,
fitu gaꞌase magnahaghei te tolaghi ka kaisei mae nalhaꞌu kolho,
eghume goro gaꞌase igre ginauna cheke eghu,
“Ghehati tangomana te hiro ghemi gano nei pohe eghu themi.
Nu ghehati thono mamaja nomi fara,
naugna ghehati gne theo khetomi.
Eghume ghehati magnahaghei te tolaghi nomi ka iagho.”
2Kate thoke mei narane tuana, nogna grege gaju LORD na ginauna kotu seke majaghani, eghuteuna nanghagna LORD na ginauna fnakno. Naiknodi Israel te au faleghu teu igre ginauna thofno keli tadi fara, naugna LORD ginauna fablahini glose igne mala vuragha kmana gano. 3Naikno te karha teu Jerusalem igre LORD neke kilodi nogna naiknore, naikno blahi. Eghuteuna mana riorisohi nanghadire ka nogna buka na. 4LORD ginauna fatedi goro gaꞌasedi Jerusalem nei paradi eghu rehati eidi puhi te diꞌa teke edi rehati re. Eghuteuna mana ginauna tihi fagaedi mala klino reꞌe, jateula te koko lao chara ka khaꞌaghi ra eghu. 5Ka narane igne, LORD ginauna kuruni kaisei khoveo mala mei jateula gagahu eghu toku tafruni Thogele Saion baludi naikno te salofodu te tarai teu jare, eghuteuna bongiro na mana ginauna kuru mei khaꞌaghi. Mana ginauna toku soru ke klignadi nogna nolaghi na jateula kaisei suga tapuale eghu. 6Nogna nolaghi biꞌo mana igne ginauna eni namono igne mala kaisei namono keli mala poru. Eghuteuna neubane naprai biꞌo, ba ne nakhete biꞌo, ba ne saeklon, glepo igre ginauna theome tangomana te mei goigonidi naiknore.
5Khoje eigna nogna nagare LORD
1Iara ginauna kojeni kaisei khoje eigna mae ihei te namhani fara iara na.
Jateula igne eghu, mae igne neke eni kaisei nagare grep ka vido glose te keli rhegna kaisei thogele.
2Mana dokha koko thina te au ka glose igne mala joꞌu grep.
Mana horo kaisei suga mala toetoe mala reireghi vido igne.
Mana eni kaisei vido ka thina mala poji sisi grep.
Eghuteuna mana ginauna rouronu sisi te keli, nu sisi te diꞌa kolho te thakle mei na.
3LORD mae ihei te namhani fara iara igne ne cheke eghu,
“Ghotilo naiknomi Jerusalem nei naiknomi Juda!
Ghotilo fate farihoteigu iara nei nogu nagare iara igne mala laseni ihei te jafra na.
4Iara la edihi gobigna lepore ka nogu nagare iara igne eghuteuna iara theome laseni unha nate eni tagna na.
Kate tei mala hata sisi teu iara tagna na,
iara ne filodi kolho sisi te diꞌare.
5Iara ginauna chekeni ka ghotilo unha nate eni iara ka nagare igne.
Iara ginauna paꞌe soru bara igne mala mei naikno nei buluka eghu mala tapla ke kligna gna.
6Iara ginauna lisa lao ka gnarho fachuchuru mala thafru ka vido igne,
eghuteuna iara ginauna theome snakreni nakhete na mala soru mei ka nagare igne.
Iara ginauna lisa lao vido igne mala vuhai namono nagou kolho.”
7Tutuani, nogna nagare grep LORD mae ihei te au nolaghi fateote’o igne,
naiknodi Israel.
Uve, ghotilo naiknomi Juda igre jateula kaisei nagare te thono magnahagheni fara ia eghu.
LORD na thono rouronu fara ka ghotilo te mala fatedi keha naiknore ka puhi te doglo,
nu ghotilo falehedi koba naiknore.
Mana rouronu ka ghotilo te mala leghuni puhi te doglo na,
nu ghotilo paradi koba naiknore eghu.
Kokhoni ghami fara!
8Kokhoni ghami fara ghotilo iheire te ghamu nhoto ra!
Ghotilo magnahaghei fara te khotodi kmana suga nei kmana vido glose mala theome tangomana keha naiknore te au na, nu ghotilo themi kolho nate au jare na.
9Iara nomhini LORD mae ihei te au nolaghi fateote’o igne ne cheke eghu,
“Tutuani fara, nomi famane suga biꞌo ghotilo are ginauna krogha,
eghuteuna nomi chogho ghotilo are ginauna theo kaisei naikno nate au tadi re.
10Uve, neubane nabotho vido gaju grep ghotilo te joꞌu na,
nu ghotilo ginauna na thokeni kolho varadaki lita waen.
Eghuteuna neubane fodu nabotho kharaꞌo khatu wit te joꞌu ghotilo ka nagare na,
nu ghotilo ginauna atha kolho kaisei kharaꞌo wit tagna.”
11Kokhonidi fara iheire te dofra haghe hamerane boibongi te tei hiro waen nei keha nafnata beer te mala koꞌu te ghilei tei posa fari hotei bongiro!
12Kate ei gaghamu na,
leuleghu fata na ghotilo lalahu gita nei dram ikoi,
eghuteuna ghotilo ifu babuban balu koꞌu beer mala gleale’a nomi,
eghuteuna ghotilo theome tangomana te ghathodi unha teke edi LORD ka ghotilo ra.
13Eghume LORD ginauna huhuru ghami ghotilo nogna naiknore mala jifla kokodi nomi namonore,
mala sneka tei au ka keha kantri delei aheva ghotilo nate lehe ka grofo nei lehe ka khoꞌu.
14Beku na thorau foflogna na jateula kaisei nasava te nganga teu foflogna na te mala tomno soru gano kate rofo fara naia eghu.
Eghuteuna neubane naiknore au nafnakno ba theo,
mare ginauna tei lamna Beku baludi iheire te au ka namono te eha tafri are.
15Eghuteuna LORD ginauna nhaꞌa fapari nodi gaoghatho fahaehaghe naiknore.
16Nu mare ginauna na fafnaknoni Nanghagna LORD mae ihei te au nolaghi fateote’o igne.
Naiknore ginauna filoni puhigna noda God te blahi fara igne thofno doglo fara.
Naugna Mana fatedi naiknore ka puhi te doglo.
17Ka narane tuana sipu nei nanigot ikoi teu igre ginauna mei ghamu buburu te keli ka vido te au namono tagna gognarogne.
18Kokhoni ghami fara ghotilo iheire te tapla jafra fabrahu ka nakhibo te theome tughu puhimi te diꞌa re!
19Kokhoni ghami, ghotilo iheire cheke faparini God koba te cheke eghu ra,
“Noda God tahati maeda Israel te blahi fara igne,
faghose edi unha teke nhaꞌa chekedi mana ra mala filodi nei lasedi eghu tahati gaoghathogna mana na.”
20Kokhoni ghami fara ghotilo iheire te chekeni te glepo te diꞌare keli kolho ka gaoghathomi ghotilo re,
eghuteuna glepo te keli re ke diꞌa! Tore!
Gaoghathomi ghotilo gre thono diꞌa fara.
Ka gaoghathomi ghotilo na grughu na ke naphae,
eghuteuna naphae na ke grughu,
eghuteuna glepo te mamahe na ke raha,
eghuteuna glepo te raha na ke mamahe!
Tore, gaoghathomi ghotilo igre thofno jafra fara!
21Kokhoni ghami fara ghotilo iheire te ne lalase fara themi ne salaꞌudi keha naiknore teu gaoghathomi re igre!
22Kokhoni ghami fara ghotilo iheire te lase koꞌu beer fara nei lase ngigno fodu keha nafnata khoꞌu teu are!
23Kate fatedi ghotilo naiknore, ghotilo lisa teidi kolho iheire te edi puhi te diꞌa re,
naugna mare ne foli ghami ghotilo te mala eni nafnata puhi igne.
Nu ghotilo atha tei ka sosolo naikno te doglore.
24Naugna igne, LORD ginauna thono para ghami ghotilo,
jateula khaꞌaghi te ghamu buburu te brango ra eghu.
Uve, LORD ginauna goigoni ghami ghotilo jateula gaju te boto glathigna na,
eghuteuna chechenge gna na brango
eghuteuna pala me tei nuri delei teura eghu.
Mana eni igne, naugna ghotilo ne tiromi fanomho ka nogna farirhiu noda God tahati maeda Israel mae ihei te au nolaghi fateote’o igne.
25Ghotilo nogna naikno LORD,
nu naugna ghotilo ne eni igne ne diꞌatagna fara mana.
Mana ginauna falehe ghami ghotilo,
naugna mana ne diꞌatagna fara ka ghotilo.
Mana ginauna edi thogele igre mala nghali tongana,
eghuteuna kmana naikno ginauna lehe,
eghuteuna thinidi naikno te lehe igre ginauna na jateula chara eghu thuru tafri ka glalaba,
ba leghu nabrou jateula chara eghu.
Nu neuba LORD neke paradi, mana diꞌatagna fabrahu ka mare. Eghuteuna mana ginauna tarabana mala ke paradi ngala mare.
26LORD ginauna eni kaisei fagaglana ka armi gna kaisei kantri ka keha phile ka nauthoglu igne mala mei.
Uve, mare ginauna na ghosei mei!
27Mae soldia gna armi igne thofno rheta fara.
Theo kaisei ka mare te babaꞌo na,
ba te uka pari kate chari na,
eghuteuna theo kaisei ka mare te thuru na.
Theo kaisei nodi nhugha mare te blogho na,
eghuteuna theo kaisei gnarho gna nodi sadol mare te khusu na.
28Mae igre jaha fafnonuhi nodi gorure,
eghuteuna mare tarabanahi te mala fada ka nodi phalohore.
Nodi hose mae armi re thono nheta fara,
eghuteuna aean te au ka ghahedi nodi hosere thono maku fara jateula thina eghu,
eghuteuna wildi nodi chariot re umhu fara jateula saeklon eghu.
29Nomi naoka ghotilo igre ginauna ulu ghami ghotilo eghu.
Mare ginauna hata tei ghami ghotilo eghuteuna theo kaisei naikno nate togho ghami ghotilo na.
Mae igre jateula lion te eha fabiꞌo kate kathu falehe buluka te ghamu ra eghu.
30Ka narane igne,
mae soldia re ginauna thagru fabiꞌo fara jateula naogladi galo biꞌo te mei poha ka khalaꞌe na ka narane te mei saeklon ra eghu.
Eghuteuna jame ihei te mei ka nomi kantri ghotilo igne na,
mana ginauna filoni puhi biꞌo kolho.
Uve, ka narane igne ginauna na jateula gromno biꞌo te mei te toku tafruni naphaegna naprai na ia eghu!
6LORD ne fagaeni nei kiloni Profet Isaia
1Ka finogha te lehe King Usia igne, iara neke filoni kaisei mifi. Ka mifi igne, iara filo haghe ne filoni LORD mae ihei te fnakno fara te gnokro teu ka nogna sape nafnakno na, eghuteuna nogna phoko brahu mana na ne thafru Sugablahi igne. 2Hatimare mae engel ne kegra falithuini mana. Eghuteuna mare te gnafa na sopa au namno baghi, keha phei re mala toku tafru tathagna nei foflogna teure, eghuteuna keha phei re mala toku tafru thinigna na, eghuteuna keha phei re mala flalo. 3Mare kafe koje fodu eghu fabiꞌo:
“LORD mae ihei te au nolaghi fateote’o, mae ihei te blahi fara!
Nogna nolaghi biꞌo mana na siasigla ka vido te gnafa ka nauthoglu igne.”
4Eghuteuna kate khoje fabiꞌo eghu mare igne, iara ne haimini Sugablahi na ne nghali, eghuteuna iara ne filoni Sugablahi na te fodu ka gagahu.
5Aonu iara mhaghu nogu fara ne cheke eghu, “Tore! Iara theome nabagu te karha na, naugna cheke te gnafa te jifla mei ka foflogu iara na igre fodu ka nakhibo, eghuteuna iara au baludi naikno te diꞌa igre! Neuba ngau, iara la filonihi King igne, LORD mae ihei te au nolaghi fateote’o.”
6Aonu kaisei ka engel igre tei ka olta na ne hata kaisei sisibe brana ka chochomi flalo ne mei balugna ka iara. 7Mana ne famei ka phepeogu iara na sisibe brana igne, ne cheke eghu ka iara, “Filo sagho, God, la hata fadeleihi nakhibomu iagho re, naugna sisibe brana igne la arihi ka phepeomu iagho na.”
8Aonu LORD God ne cheke eghu, “Ihei nate kuruni iara na? Eghuteuna ihei nate tei toutonuni chekegu iara na?”
Iara ne cheke eghu, “Iara au teu ao! Kuru tei ghau iara!”
9Mana ne cheke eghu ka iara, “Iagho tei ka nogu naikno iara ra mala cheke eghu ka mare:
“ ‘Ghotilo ginauna nomhini chekegu iara na,
nu ghotilo ginauna theome lasedi kolho gaoghathodi glepo igre.
Ghotilo ginauna filodi unha te edi iara igre,
nu ghotilo ginauna theome filo glani kolho kaisei glepo!’
10Isaia! Nou cheke iagho igre mare ginauna theome lase fakelidi,
eghuteuna na theome nomhi fakeli,
eghuteuna na jaola theome laseni kaisei glepo.
Ka puhi igne, mare ginauna theome tangomana na teke pulo mei ka iara te mala fakarhidi re.”
11Aonu iara ne ghusna eghu, “Lord, niha nau gnafa nga iara ka gloku igne?”
Mana ne cheke eghu ka iara,
“Ginauna au eghu ghilei thoke mei narane namono te gnafa Israel igre na krogha nei diꞌa fara teuna,
12eghuteuna iara LORD ginauna khi fajifladi naiknore mala tei au delei.
Iara ginauna goigoni kantri igne mala theome naba kaisei naikno te au tagna na.
13Neubane phei, ba thiloi naikno te au na,
iara ginauna na jaola goigonidi.
Neuba, nogu naikno blahi majaghani iara igre ne jateula gaju majaghani te seseke haghe ka pesigna teke kato soruhi ra neu.”
7Nogna cheke LORD ranghini King Ehas
1Ehas thugna King Jotam, eghuteuna Jotam na thugna King Iusaea. Ka narane Ehas te king gna Juda igre, Peka thugna King Remalaea gognarona king gna Israel. Eghuteuna ka narane tuare, King Peka baludi naiknodi Israel igre ne loku fodu balugna King Resin baludi naiknodi Siria mala tei magra Jerusalem, nu mare ne theome uluni namono igne.
2Kate nomhini King Ehas baludi nogna naiknore te loku fodu nodi soldia phei king igre te mala magra Juda na, mare ne mhaghu nodi fara.
3LORD ne cheke eghu ka iara, “Iagho hata balumu thumu Seajasub mala tei filoni King Ehas. Iagho ginauna filoni mana ka vido aheva te mala titihi pohe ka khoꞌu te soru mei funu ka kholo ke holo ia. 4Iagho cheke eghu ka mana, ‘King Ehas! Iagho thosei nanga nou nei mhaghu eghu! Iagho thosei snakreni gaoghathomu na mala glaꞌe soru. Fanomho mei sagho! Iagho thosei mhaghudi phei mae king tuare. Diꞌatadi phiamare ka iagho tuana jateula gagahudi phei nakrono te namo lehe ra eghu kolho. 5Phei mae king igre baludi nodi armi re la ghaoghathohi te mala mei goigoni ghami ghotilo na. 6“Mare magnahaghei te mei magra ka ghotilo mala hata namono Juda. Eghuteuna mare magnahagheni thugna mae Tabel te mala king jare na.” 7Nu iara LORD cheke eghu ka iagho:
“ ‘Nodi gaoghatho te eni phei mae king igre ginauna theo nafugna kolho.
8-9Iara cheke eghu, naugna King Resin au nolaghi kolho te mala funei fruni ni Damaskas,
nodi namono biꞌo lahu naiknodi Siria.
Eghuteuna King Peka au nolaghi kolho te mala funei frunini Samaria,
nodi namono biꞌo lahu naiknodi Israel.
Ke lamnadi namnosalei glima finogha te mei igre,
mae naoka ginauna mei goigonini fara Israel.
Fanomho sagho! Jame te theome kegra heta iagho ka nou fatutuani na,
iagho ginauna theome tangomana te kegra heta na.’ ”
Igne cheke gna LORD.
Fagaglana eigna God te au baluda
10Theome raugha ke leghugna igne, iara neke cheke ka Ehas, king gna Juda unha teke chekedi LORD ka iara re. 11Iara ne cheke eghu, “King Ehas, LORD na noda God tahati, eghuteuna thofno keli fara jame te toreni mana iagho mala falalase ranghi nigho kaisei fagaglana. Mana tangomana te fakakhana kaisei fagaglana ka iagho. Mana tangomana te fakakhana fagaglana te soru mei funugna ka maloa kligna ba haghe funugna ke pari glose.”
12Nu mae Ehas tirogna ne cheke eghu, “Theo, iara ginauna theome fariuriuni LORD jateula tuana teuna.”
13Mae Isaia ne cheke eghu, “Ghema Ehas, fanomho fakeli sagho! Ghotilo vikegna mae Devet ra, ghotilo neke eni igne fabrahu, eghuteuna naiknore la ghilei tirodi ghami ghotilo. Ba, ghotilo magnahagheni nogu God iara gne te tiromi ghami la ghotilo na sia? 14Tutuani fara, LORD thegna ginauna tusu ranghi nigho kaisei fagaglana. Ghotilo ginauna filoni kaisei kupi na bukla, eghuteuna naꞌa ginauna karha kaisei thugna nalhaꞌu, eghuteuna naꞌa ginauna kiloni mana, Imanuel. Gaoghathogna na God na au baluda. 15Kate funu laseni mae sitei igne unha te keli na, nei unha te diꞌa na teuna, mana na ghamu jujurukuli nei milk eghu kolho. Ka narane tuana mana mae sitei ngau kolho. 16King Ehas, iagho gognarona mhaghudi phei king te au ka kantri Israel ghe Aram. Nu te chekeni iara ka iagho na, ame laseni nga mae sua nalhaꞌu na puhi te keli na, nei puhi te diꞌa na teuna, phei mae king te mhaghudi iagho igre ginauna kafe lehe. 17Naugna te tirouni iagho LORD na, LORD ginauna hata mei kaisei puhi biꞌo te thono diꞌa fara ka tharaknamu nei vikemu teu iagho igre. Puhi biꞌo igne ginauna thono diꞌa fara salaꞌudi narane teke fnota pea Israel ghe Juda tifa ra. LORD ginauna chekeni king mala hata mei armi gna Asiria mala magra ka iagho.”
18Ka narane igne, LORD ginauna kiloni armi gna Ijep, eghuteuna mae soldiare ginauna jifla mei ka vido te gnafa ka kantri tuana. Mae igre kmana fara jateula sisimi eghu. Mana ginauna na jaola kiloni armi gna Asiria igne. Mae soldia igre ginauna mei jateula jurukuli eghu mala mei goigonidi nei falehedi eghu naiknore. 19Mae naoka igre ginauna mei au ka vido te gnafa igre Israel. Neubane fari hotei thogele, ba ka gluma thina, ba ke lamna buburu, ka vido aheva te ghamu buluka igre, mare na jaola au jare. 20Ka narane igne, LORD ginauna kilodi maedi Asiria mala mei jateula nuri blahi eghu goigonidi namono te gnafa, nagare te gnafa, nei naikno te gnafa eghu ka kantri Juda. Uve, mare ginauna na loki ghami ghotilo mala ghoighori phaꞌumi, thinimi nei gremohomi teu ghotilo re mala mamaja ghotilo. 21Ka narane igne, theo kaisei naikno nate tangomana te loku ka nagare na. Kaisei mae ginauna tathaji kaisei buluka ikoi, nei phei nanigot eghu kolho. 22Thilo glepo igre kolho nate hata milk mana tadire. Naugna iheire nate au faleghu teu ka namono igne na, mare ginauna theo ghedi gano. Nu mare ginauna au ghedi kmana milk te mala koꞌu na, nei jurukuli eghu, naugna theome kmana naikno te au ka glose igne na. 23Ka narane igne, nagare grep te mala hata sileni biꞌo igre, ginauna buburu fachuchuru nei soro eghu kolho nate kotu haghe tagna na. 24Uve, buburu te diꞌa kolho igre nate fodu ka vido igne. Eghume mae nalhaꞌure ginauna hata nodi phalohore mala tei hili bosu mala ima. 25Buburu te diꞌa igre ginauna thafru ka vido te gnafa ka thogele aheva te au nagare teu ghotilo gognaro igre. Ginauna na theo kaisei naikno nate rogna tei ka vido igne. Buluka nei sipu eghu kolho nate au tagna na.
8Thugna Profet Isaia ginauna kaisei fagaglana ka naiknodi Juda
1LORD ne cheke eghu ka iara, “Iagho hata kaisei glepo te biꞌo mala rioriso nangha igne: Mahea-Salal-Has-Bas. Gaoghathogna na faghose hata glepo teke uludi ka magra ra.” 2Iagho kilo meidi phei mae te lalase mala filo ka nangha igne mala tangomana phiamare teke toutonu ka naiknore. Phei mae igre, mae pris Uraea ghe mae Sekaraea thugna mae Jeberekaea. 3Theome raugha, khetogu iara na la bukla, eghuteuna naꞌa na au kaisei mae sua nalhaꞌu. Aonu LORD ne cheke eghu ka iara, “Iagho kiloni nanghagna mae sua igne, ‘Mahea-Salal-Has-Bas’. 4Kate theome chekeni teu mae sua igne cheke te Ido ba Mama teuna, king gna Asiria igne ginauna mei magra ka naiknodi Damaskas ghe Samaria. Eghuteuna mana ginauna hata fahui nodi gobigna lepo mare teke uludi ghotilo ka magra tifa ra.”
5LORD neke cheke eghui ka iara:
6“Filo sagho! Naikno igre theome magnahaghei ghau iara.
Nu iara jateula khoꞌu gna Siloa te famane loloro ia eghu.
Mare theome magnahagheni puhigu iara na,
naugna mare keli tadi fara ka mae King Resin gna Damaskas ghe mae King Peka gna Samaria.
7-8Naugna igne, iara ginauna snakreni mae king gna Asiria balu nogna soldia mala mei magra ka mare.
Nogna armi mae king gna Asiria igne ginauna mei jateula Khoꞌu biꞌo Iufretis te britha te namo thafru vido te gnafa ra eghu.
Armi igne ginauna toku tafru noda kantri tahati igne Juda.
Nu God ginauna reireghi fakelidi nogna naiknore jateula kaisei gaghata te toku tafru ghegna ganore ka phei baghigna ra eghu.
Imanuel iagho au balumi ghehati!”
9Fanomho fakeli mei, ghotilo naiknomi ka keha kantri ra!
Tarabana ghami themi mala magra!
Nu LORD ginauna thofno goigoni ghami ghotilo.
10Ghotilo tangomana te salofodu mala roghe poru te mala eni unha te magnahagheni ghotilo na.
Nu ginauna na theo nafugna kolho, naugna God na au balumi ghehati.
LORD ne cheke faheta ka profet isaia
11Iara neke haimini nogna nolaghi biꞌo LORD te mei ka iara na. Aonu mana ne cheke eghu faheta ka iara mala thosei leghudi iara puhidi naiknodi Juda te diꞌa re. Naugna igne, mana neke cheke eghu ka iara:
12“Ghema Isaia, te ghathoni mare na,
iagho ne fatei tei cheke poru te mala roꞌeni kantri Juda,
nu iagho thosei ghathoni igne.
Eghuteuna iagho thosei mhaghuni glepo te mhaghuni mare igne.
13Iara LORD mae ihei te au nolaghi fateote’o nei thono blahi fara.
Iara kolho mae ihei te mala ghatho tahuni, nei mhaghuni teu iagho na.
14Iara jateula nomi vido keli mala poru eghu ghotilo tagna.
Nu iara ginauna jateula kaisei thina biꞌo eghu ka phei vikedi Israel ghe Juda igre mala tothokei ghahedire mala uka mare pari.
Iara ginauna na jaola jateula kaisei phighoro eghu mala fakhaledi mare.
Eghuteuna kmana naiknodi Jerusalem ginauna uka tagna.
15Kmana naikno ginauna uka klopa ka thina igne.
Uve, kmana naikno ginauna khale ka phighoro igne na theome tangomana na teke jifla mei na.”
Profet Isaia ne farirhiudi nogna naiknore
16Ghotilo iheire te leghudi nogu farirhiu iara ra!
Ghotilo tajidi farirhiu teke tusu mei God ranghi ghita tahati nogna naikno mana ra.
17Gognarona LORD pophoruhi foflogna nei tathagna teure ka tahati vikegna mae Jekop ra.
Nu neuba ngau, iara ginauna ofoni Mana.
Uve, iara ginauna thofno lelheghu ka Mana.
18Tore! Ghotilo fanomho fakeli! LORD mae ihei te au nolaghi fateote’o igne mana au ka Thogele Saion, eghuteuna mana noda king tahati. Iara au agne baludi goro sua teke tusu mei LORD ka iara igre, eghuteuna mana vahi ghami ghehati mala jateula kaisei fagaglana eghu mala tangomana ghotilo naiknomi Israel ra te filoni na.
19Naiknore ginauna cheke ka ghotilo mala tei ka mae nalhaꞌu nei gaꞌase teu te lasedi kastom nei au naitu khora phaꞌu teura, ba cheke baludi iheire tela lehehi ra. Naikno igre cheke faꞌikoi ka thua nafnata cheke mala theome tangomana kaisei naikno te nomhidire. Nu ghotilo thosei fanomho ka mare. God kolho te mala tore ghotilo na! Ba, mala unha si naikno gre te toredi iheire tela lehehi ra te mala toghodi iheire te karha nga teu igrea? 20Ghotilo fanomho fakeli ka nogna cheke LORD teke farirhiu ghami ghotilo ra. Iheire te theome leghudi farirhiu igre na, mare jateula ihei te au ke lamna gromnora eghu kolho. 21Naiknore ginauna tei tafri ka namono igne, naugna gaoghathodire glaꞌe soru nei rofo fara eghu. Kate rofo na, mare ginauna thono diꞌa tadi fara. Eghuteuna kate filo haghe mare kligna mala toghodi na, nu theo kaisei thotogho kolho nate mei na. Aonu mare na cheke fadiꞌani nodi king na balugna nodi god na. 22Eghuteuna kate filo tafri mare ka nauthoglu igne te mala toghodi na, nu theo kaisei thotogho kolho nate filoni mare na. Mare filoni puhi biꞌo kolho ka vido te gnafare, igne jateula gromno te toku tafruni namono na ia eghu kolho. Eghuteuna God ginauna koko sorudi naikno igre ka vido te romno fara na.
9Kaisei king biꞌo ginauna kegra haghe
1Neuba, namono te autagna puhi biꞌo igne, gromno na ginauna theome au fabrahu tagna. Tifa na, LORD neke eni vikegna Sebulun, nei vikegna Naftali teu igre ginauna au mamaja. Eghuteuna nanghagna nodi namono na ginauna thono diꞌa fara. Nu ka narane nate mei ginauna, LORD ginauna fafnaknoni nanghagna namono igne. Mare kiloni namono igne Galili, kmana naikno te theome Jiu na au tagna. Funu ka Thongna biꞌo Mediterenian tei posa ka keha philegna Khoꞌu biꞌo Jordan.
2Naikno teke tei kate romno tifa ra ginau filoni kaisei juta biꞌo.
Tifa na ghehati neke au ka vido te romno fara,
nu gognarona juta igne phae mei ka ghehati iheire te au ka vido te romno.
3LORD, iagho fagleꞌa ghami ghehati fara.
Uve, ghehati kelitami fara jateula naikno te tei pulei gano ka nagare ra eghu,
ba jateula soldia te glealeꞌa te tufa glepo teke hata ka magra ra eghu.
4Uve, ghehati gleale’a fara,
naugna iagho neke hata fadeleihi diꞌanagnafa teke eni ranghi ghami nomi naoka ra,
eghuteuna iagho lolhopahi khodo teke puri ghami ra.
Iagho goigonidi mare jateula iagho teke goigonidi soldiadi Media tifa ra neu.
5Uve, ghehati thofno glealeꞌa fara,
naugna nodi buti mala fahaghe mae soldia ka magra balu nodi pohe te fodu ka dadara are,
ginauna thofno knoro ka khaꞌaghi jateula naknoro eghu.
6Uve, tahati thofno gleale’a fara, naugna kaisei sua nalhaꞌu ginauna karha mei ka tahati.
LORD tusu mei sua igne mala funei fruni ghami.
Eghuteuna mare ginauna kiloni mana,
Mae keli mala tufa gaoghatho te keli,
eghuteuna God mae ihei te rheta fara,
nei Kmada mae ihei te togho ghita fabrahu,
nei mae biꞌo mala togho ghita mala au ka pharikeli.
7Puhigna mana te mala funei frunidi nogna naiknore ginauna thofno keli fara.
Eghuteuna namono aheva te funei fruni mana igne ginauna au ka pharikeli fabrahu.
Uve, mana ginauna kaisei king ka vikegna King Devet.
Nogna nolaghi nei puhigna teu mana te mala fatedi naiknore ginauna au fabrahu tifa tifa.
LORD, iagho au nou nolaghi fateote’o,
eghuteuna iagho au nou gaoghatho rheta te mala edi gobigna lepo te magnahaghedi iagho themu re.
LORD ginauna paradi naiknodi Israel
8LORD la chekehi nogna cheke te mala paradi naikno te au ke raru Israel.
9Eghuteuna naikno te gnafa Samaria igre ginauna laseni eigna naꞌau papara nate famei LORD igne.
Nu mare te gnafa na kafe fahaehaghe nei patu gama eghu fara, neke cheke eghu,
10“Neuba mae naoka gre ne mei paꞌe soru nomi suga ghehati teke horo ka brik igre,
nu ghehati ginauna nake horo fapulo suga igre ka thina te maku.
Eghuteuna neuba mae naoka igre ne mei hata koko gaju teke sutu haghedi nomi suga ghehati igre,
nu ghehati ginauna nake tughu ka khegra majaghani te thofno keli fara.”
11Nu LORD ne diꞌatagna fara ne tusu lao nolaghi ka King Resin mala tangomana mana te magra ka maedi Israel.
12LORD neke kuru meini armi gna Siria ke maghati nei armi gna Filistia ke mosu mala mei goigonidi naiknodi Israel.
Nu neuba LORD ne paradi, mana theome gnafa te diꞌatagna ka mare na.
Eghuteuna mana ginauna tarabana mala paradi naikno igre.
13Nu neuba, naiknodi Israel igre tirodi teke pulo mei ka LORD na.
Uve, mare theome leghuni kolho puhigna LORD mae ihei te au nolaghi fateote’o na.
14Eghume, LORD ginauna paradi iheire te jateula phaꞌudi nei sekodi teu maedi Israel igre.
Uve, kaisei narane mana ginauna rave koko naikno te haghe fara jateula grege gaju biꞌo teu igre,
nei naikno te pari lahu jateula buburu ka geri khoꞌu ra teu igre.
15Phaꞌudi mae igre na mae biꞌo igre,
baludi naikno te fnakno nanghadire.
Eghuteuna sekodi mae igre na hatimare mae profet te cheke chaichaghi koba igre.
16Mae igre batudi naiknore ka puhi te theome doglo.
17Eghume, LORD na theome kelitagna ka nogna naikno majaghani igre,
eghuteuna mana theome kokhonidi naikno biꞌo teke lehehi khetodi nei goro sua glehe kokoi,
naugna mare te gnafa na kafe tirodini Mana.
Mare theome gnafa te eni puhi te diꞌa na.
Eghuteuna leuleghu fata na mare cheke chaichaghi koba.
Nu neuba LORD ne paradi, mana theome gnafa te diꞌatagna ka mare na.
Eghuteuna mana ginauna tarabana mala paradi naikno igre.
18Puhi te diꞌa te eni mare igne jateula khaꞌaghi te nhako buburu fachuchurure te ghilei tei khasa ka gaju biꞌo matara eghu.
Eghuteuna khujogna khaꞌaghi igne haghe ka maloa na jateula gromno biꞌo te mala nakhete ra eghu.
19Diꞌatagna LORD mae ihei te au nolaghi fateote’o igne jateula khaꞌaghi eghu goigonidi namono nei iheire te au ka namono igre.
Eghuteuna theo kaisei naikno nate mei te toghodi kheradire.
20Puhidi mare mala magra nei falehe naikno teu igne ginauna goigonidi gobigna lepore.
Neuba, mare theome glealeꞌa kolho.
Uve, mare jateula te ghamu fateo ghedi gano kheradire nu theome boho kolho teura eghu.
21Vikegna mae Manase igre ginauna magra ka vikegna mae Efrem,
eghuteuna vikegna mae Efrem igre ginauna magra ka vikegna mae Manase igre.
Eghuteuna phei vike igre ginauna loku fodu mala magra ka vikegna mae Juda.
Nu neuba LORD ne paradi, mana theome gnafa te diꞌatagna ka mare na.
Eghuteuna LORD ginauna tarabana mala paradi naikno igre.
101Kokhonidi fara iheire te baubatu ka kantri Israel!
Mare lisei vetula majaghani te theome doglo nei ninhigrana fara eghu ranghidi naiknore.
2Mare edi vetula majaghani igre ka naikno te kuma nei au kokhonidi teu igre mala theo kaisei nodi nolaghi mare ka unha glepo te khotodi mare re.
Mare snakredi naiknore mala blau nodi glepo naikno biꞌo tela lehehi khetodi nei goro sua glehe kokoi teure.
3Unha nate eni ghotilo kate mei LORD te roꞌe ghami na?
Kate mei funudi ka kantri delei nomi naoka ghotilo re te magra ka ghotilo na,
aheva nate tei poru ghotilo na?
Ihei gne nate tei hironi ghotilo te mala mei togho ghami na?
Aheva nate tei titifuni ghotilo nomi sileni re?
4Phei puhi kolho te au teu malami ghotilo na.
Ghotilo ginauna lehe ka magra igne,
ba mae naoka gre ginauna hata ghami ghotilo tei au ka vido te khaba fara.
Nu neuba LORD ne paradi,
mana theome gnafa te diꞌatagna ka mare na.
Eghuteuna mana tarabana mala paradi mare.
LORD ginauna parani Asiria
5LORD ne cheke eghu,
“Kokhoni ni fara kantri Asiria!
Iara ginauna kilodi mare mala jateula nogu khodo eghu mala aknu falehe ghami ghotilo naiknomi Juda ghe Israel.
6Iara ginauna kuru meidi mae naoka re mala magra ka ghotilo,
naugna ghotilo ne tei koko ghau iara neke bongihehe fapulo.
Iara ginauna snakredi mae naoka igre mala para ghami ghotilo,
naugna ghotilo ne fa ngingiri ghau iara.
Maedi Asiria ginauna mei goigoni nomi namono ghotilo gre,
nei blau nomi glepo ghotilo gre eghu.
Mare ginauna tapla ke klignami ghotilo,
jateula ihei te tapla ke kligna chopu ra eghu.
7Nu gaoghathogna king gna Asiria igne theome jateula gaoghathogu iara eghu.
Theo. Mana magnahaghei te goigonidi naikno ka keha kantri te kmana igre.
8Mae king Asiria igne fahaehagheni fara neke cheke eghu,
‘Mae komanda ka nogu armi iara igne thofno nheta fara salaꞌudi keha king are!
9Mare uludihi namono Kakemis, Kalno, Apad, Hamat, Damaskas nei Samaria.
10Ghehati goigonidi fara kantri te gnafa te tufru soru ka mumuju god.
Nodi god mare igre kmana fara salaꞌudi nodi god naiknodi Jerusalem nei Samaria.
11Iara ginauna goigonini Jerusalem balu nodi mumuju god,
jateula teke goigoni ni iara Samaria balu nodi mumuju god mare tifa ra eghu.’ ”
12Kate paradi te gnafa naikno te au ka Thogele blahi Saion nei Jerusalem, LORD ginauna parani king gna Asiria, naugna mana ne fafnaknoni thegna ne cheke fahaehaghe fara. 13King igne ne cheke eghu fabrahu,
“Ka nogu nolaghi nei glalase eghu iara thegu,
iara ne uludi keha kantri igre ka magra.
Eghuteuna iara jaola tuthugha nodi nohidi keha kantri igre mala nogu namono iara gognarona.
Eghuteuna gognarona iara hatahi nodi gobigna lepo mare re.
Iara nheta fara jateula kaisei buluka nalhaꞌugna neu ne uludi king di keha kantri are.
14Kantri te gnafa ka nauthoglu na igre jateula kaisei gnoku nanghaji eghu.
Eghuteuna iara hatahi nodi dedei mare igre,
jateula te tei iara te hata nakredigna nanghaji igne,
nu idogna na theome eha ba mei kathi ghau iara teu ra eghu kolho.”
15Nu LORD ne cheke eghu,
“Ba, nhirama gne te fagrofo gaju na,
ba naikno te kato gne?
Ba, soa gne te alha gaju na,
ba naikno te loku soa gne?
Ba, khodo gne te lokuni naikno na,
ba naikno gne te loku ka khodo igne?”
16Naugna igne, LORD mae ihei te au nolaghi fateote’o igne ginauna kuru mei kaisei khabru te thono diꞌa fara ka nogna soldia king gna Asiria igre.
Fogra igne ginauna thono goigonidi fara mare jateula khaꞌaghi te nhako fahui gobigna lepore te theome au kaisei glepo ra eghu.
17God na nodi Naphae naiknodi Israel,
eghuteuna Naphae igne ginauna jateula khaꞌaghi eghu mei paradi naiknodi Asiria.
Eghuteuna ka kaisei narane kolho God ginauna goigoni fahui nogna gobigna lepo king re,
jateula khaꞌaghi te ghamu fateo buburu te fachuchuru te moja ra eghu.
18Khaꞌaghi igne ginauna ghamu fahui famane gaju biꞌo nei famane nagare te au kmana gano teu te au ka kantri Asiria.
Eghuteuna khaꞌaghi igne ginauna goigoni vido te gnafa ka nogna kantri king na.
Kantri igne ginauna na jateula mae ihei te fogra te glaꞌe soru te ghilei lehe ra eghu.
19Gaju te gnafa ka kantri Asiria ginauna hui,
eghuteuna phei, ba thiloi kolho nate au na ka vido igne,
eghuteuna neubane sua ikoi tangomana te kahadire.
Keha nogna naikno LORD kolho na teke pulo mei na
20Ka narane igne, keha naiknodi Israel kolho nate karha na.
Eghuteuna naiknore ginauna theome rouronu ka king gna Asiria,
mae ihei te thono paradi fara mare igne.
Nu mare ginauna na rouronu kolho ka LORD nodi God te Blahi mae Israel.
21Uve, iheire te karha teu ka vikegna mae Jekop igre kolho na teke pulo mei ka God mae ihei te nolaghi fara igne.
22-23Gognarona naiknodi Israel igre thono kmana fara jateula nusu ka gratha ra eghu,
nu ka narane tuana kmana naikno ginauna lehe,
eghuteuna ginauna keha ka ghotilo kolho nate theome lehe na teke pulo mei na.
Puhigna LORD mae ihei te au nolaghi fateote’o igne thofno doglo fara,
eghuteuna mana neke kulu chekehi nate goigonidi nogna naiknore.
Uve, mana ginauna goigoni fahui nomi vido te gnafa ghotilo ka kantri igne.
LORD ginauna roꞌeni Asiria
24LORD mae ihei te au nolaghi fateote’o igne neke cheke eghu,
“Ghotilo nogu naikno iara te au ka namono Saion ra,
thosei mhaghudi maedi Asiria.
Neuba mare ne para ghami jateula teke edi mae Ijep ka ghotilo tifa ra neu.
25Na theome raugha, diꞌatagu iara ka ghotilo igne ginauna ari gnafa.
Iara ginauna nake figri nake paradi maedi Asiria,
naugna iara ne diꞌatagu fara ka mare.”
26LORD mae ihei au nolaghi fateote’o igne ginauna puridi mare jateula teke eni mana ka naiknodi Midian rhegna thina biꞌo te kiloni mare Oreb tifa ra eghu.
Mana ginauna paradi naiknodi Asiria jateula teke paradi iara naiknodi Ijep ra eghu.
27Ka narane igne,
iara ginauna hata fadelei puhi biꞌo teke edi naiknodi Asiria ka ghotilo ra.
Mae naoka ginau mei magra ka naiknodi Jerusalem
28Ka narane igne, mae naokare ginauna mei ka namono Aeat,
eghuteuna mare ginauna salaꞌu tei ka namono Migron mala lilisei nodi gobigna lepo te tahu re ka namono Mikmas.
29Mare kasa ka glogu na ne tei thuru ka namono Geba.
Eghuteuna naiknodi Rama igre ne mhaghu nodi fara,
naugna Geba gne namo fara ka mare.
Eghuteuna naiknogna namono Gibea igne ne kafe rikha.
Gibea gne neke nogna namono King Sol tifa.
30Ghotilo naiknomi Galim ra, ghotilo eha fabiꞌo!
Ghotilo naiknomi Laisa ra, fanomho mei khulimi are!
Ghotilo naiknomi Anatot ra, kokhoni ghami fara!
31Naiknodi Madmena ra jaola rikha,
eghuteuna naiknodi Gebim ra na chari tei poru.
32Mae naoka igre ginauna mei ka namono Nob.
Mare ginauna filo lao ka Thogele blahi Saion jare Jerusalem,
eghuteuna mare ngafa haghe khamedire balu faheaheta.
33Nu LORD mae ihei te au nolaghi fateote’o igne ginauna nhaꞌa faparidi iheire te fnakno nanghadi re,
nei iheire te rheta jateula gaju thubi teu are.
34Uve, neuba mare ne rheta fara jateula gaju sida biꞌo gna Lebanon neu,
God mae ihei te au nolaghi fateote’o igne ginauna rave sorudi pari.
11Kaisei king majaghani ka vikegna King Devet gne ginauna funei fruni
1Kaisei ing majaghani ka vikegna King Devet thugna mae Jesi ginauna kotu haghe jateula grege majaghani te kotu mei ka pikhu gaju teke kato soru mare pari tifara eghu.
2Eghuteuna Tharungagna LORD na ginau mei au ka mana mala tusu ranghini gaoghatho te keli nei glalase.
Tharunga igne ginauna tusu ranghini mana cheke te keli nei nolaghi mala funei fruni.
Tharunga gna LORD na ginauna au balugna mana, mala batuni mana.
Eghuteuna Tharunga igne ginauna toghoni king mala laseni unha LORD te magnahagheni te
mala laseni mana na, nei mala ghatho tahuni mana.
3King igne ginauna kelitagna fara te ghatho tahuni LORD.
Mana theome khogla mala fateni naikno na ka unha te nomhini nei filoni teure,
4nu mana ginauna fatedi naikno te kumare ka puhi te doglo.
Mana ginauna famane fanomho fakeli ka fate igne mala ke hata fapulo unha teke nodi mare re.
Ka nogna cheke te autagna nolaghi na mana ginauna paradi naiknogna nauthoglu igne.
Eghuteuna kate cheke kolho mana na naikno te diꞌa re ginauna lehe.
5Mana ginauna funei frunidi nogna naiknore ka puhi te doglo ka tathagna God.
Eghuteuna leuleghu fata na mana ginauna leghudi fabrahu nogna vetula God re.
6Kate funei fruni mana na, khuma fakaukathu nei sua sipu teu igre,
ginauna thuru fodu jateula kaisei tothoghei eghu.
Khurau biꞌo ginauna thuru fodu kaisei vido kolho balu nanigot.
Sua buluka nei sua lion teu igre,
ginauna ghamu fodu kolho.
Eghuteuna neubane kaisei sua nalhaꞌu,
mana ginauna tangomana te reireghidi re.
7Buluka nei bea teu igre,
ginauna ghamu fodu kolho.
Eghuteuna thudire ginauna jaola,
thuru fodu ka kaisei vido.
Eghuteuna lion gre ginauna ghamu buburu jateula buluka eghu.
8Kaisei sua ginauna nairu rhegna khora te au phanaga na.
Eghuteuna neuba sua igne ne habo lao khamegna na ka khora mogo igne,
nu mogo igne ginauna theome kathini kolho.
9Ka Thogele blahi Saion igne,
naiknore ginauna theome tangomana te goigonidi gobigna lepo re,
naugna nauthoglu igne ginauna fodu ka naikno te thofno laseni LORD,
jateula thongna te fodu te salaꞌui ra eghu.
10Ka narane igne, king te jateula glathi ka vikegna King Devet teu igne, ginauna na jateula kaisei flagi eghu, mala tangomana naiknodi keha kantri are te mei filoni mana. Eghuteuna naikno te gnafare ginauna ghatho tahuni namonogna mana Jerusalem. 11Ka narane tuana, LORD ginauna fakakhana nogna nolaghi na mala ke hata fapulo nogna naiknore ka nodi thofno namono re, naikno te au teu Asiria, Ijep, Sudan, Elam, Babilonia, Hamat nei ka moumolu te au ka nhorora Mediterenian.
12LORD ginauna lisei haghe flagi igne mala laseni naiknore na teke hata fapulo mana naiknodi Israel ghe Juda te tei au tafri ka vido te gnafa ka nauthoglu igne.
13Naiknodi Israel igre ginauna theome goghotudi naiknodi Juda nei na theome khidi eghu mare.
Naiknodi Juda igre mala jaola theome goghotudi nei khidi eghu naiknodi Israel.
14Nu phei kantri igre ginauna loku fodu mala magra ke mosu Filistia.
Eghuteuna mare ginauna hata nodi famane glepo naiknodi ke maghati re ka kantri Idom, Moab nei Amon.
Naiknodi kantri igre ginauna au ke parigna nodi nolaghi naiknodi Israel ghe Juda.
15LORD ginauna cheke ranghini Thongna Ukru na mala khapra.
Eghuteuna mana ginauna cheke ranghini nuri te brana na mala ghaghafa mei ka Khoꞌu biꞌo Iufretis mala ghilei khapra soru.
Eghuteuna mana ginauna fofota khoꞌu igne ka fitu khoꞌu ikodi mala bligi ka naiknore te kasa ka keha phile na.
16God eni igne mala bligi ka nogna naiknore te jifla Asiria,
jateula kuꞌeda teke pulo mei funudi Ijep tifa ra eghu.
12Khoje mala kilo fnaknoni LORD
1Ghotilo nogna naikno God ra! Ka narane tuana, vikeda tahati ra ginauna koje kaisei khoje, khoje igne cheke eghu:
“LORD! Iara cheke fakeli nigho!
Tifa na, iagho neke diꞌatamu ka iara,
nu gognarona diꞌatamu iagho ka iara na la gnafahi,
eghuteuna iagho la fakeli nagnafa ghauhi iara.
2Tutuani! LORD na nogu God iara,
eghuteuna mana neke fakarhi ghau iara.
Iara fatutuani ni mana,
eghuteuna iara ginauna theome mhaghu.
LORD na farheta ghau iara,
eghuteuna iara tangomana te koje ka mana na.
Eghuteuna gognarona mana fakarhi ghau iara.”
3Ghotilo ginauna keli tami fara,
naugna God ne thofno fakarhi ghami ghotilo.
4Ka narane tuana, vikeda tahati gre ginauna koje eghu:
“Tahati mala cheke tegioni LORD!
Uve, tahati cheke fakelini nanghagna te biꞌo!
Eghuteuna tahati toutonuni ka naiknodi keha kantri are
eidi unha teke edi God ra!
Tahati toutonuni nanghagna mana
te haghe fara salaꞌudi keha nangha te gnafare.
5Tahati koje mala cheke fakelini LORD,
naugna mana neke edi glepo te biꞌore.
Snakredi naikno te gnafa ka nauthoglu igne
mala nomhini nonomho igne.
6Tahati naiknoda ka namono Saion,
tahati mala koje fabiꞌo!
Tahati mala koje, naugna tahati ne glealeꞌa fara!
Noda God te blahi, tahati maeda Israel,
mana au nolaghi biꞌo,
eghuteuna mana au baluda tahati gognaro na.”
13LORD ginauna roꞌedi naikno te diꞌadi Babilonia
1LORD neke cheke ka mae Isaia thugna mae Emos eigna Babilonia.
2LORD neke cheke eghu,
“Ghotilo rafe haghe kaisei flagi fagaglana eigna magra ke kligna thogele ka vido te snagla.
Ghotilo ehadi nomi soldia ra,
eghuteuna eni kaisei fagaglana ka mare mala mei magra ka hatimare mae biꞌodi Babilonia.
3Naugna iara thono diꞌatagu fara ka mae igre,
tuana te cheke fahetani iara ka mae soldia te nheta teke vahidi iara te mala mei magra na,
eghuteuna mare kelitadi fara ka nafnaknogu iara na.
4“Ghotilo fanomho mei ka naogla biꞌo ke kligna thogele igne!
Naogla igne jateula naogladi kmana naikno nei kmana mae soldiadi kantri te eni mare kate salo fodu ra neu.
Uve, LORD mae ihei te au nolaghi fateote’o igne,
mana la tarabanahi nogna armi te mala magra na.
5Mae soldia igre mei funudi ka kaisei kantri te au khaba fara.
Eghuteuna naugna te thono diꞌatagna fara na,
mana ginauna snakredi mae naokare mala mei roꞌeni nomi kantri ghotilo igne.
6“Ghotilo tanhi! Naugna nogna Narane Biꞌo LORD te mala fatedi naiknore la namo meihi.
Ka narane igne, mae ihei te au nolaghi fateote’o igne ginauna mei roꞌedi gobigna lepo fateote’o re.
7Naugna glepo igne, naiknore ginauna mhaghu nodi glaꞌe soru,
eghuteuna nodi gaoghatho teke nheta re ginauna hui.
8Mare ginauna kafe mhaghu nodi fara,
eghuteuna mare ginauna kabru ghedi fara,
jateula gaꞌase te namo karha sua ra eghu.
Kate mhaghu te salaꞌui na, mare ginauna filo ka thedi,
eghuteuna tathadi nei foflodi teure ginauna ukru jateula khaꞌaghi eghu.
9“Tutuani, nogna Narane LORD igne la thoke meihi.
Ka Narane igne, God ginauna diꞌatagna fara na snakre mei narane te ninhigrana igne.
Eghuteuna mana ginauna goigoni fahui nodi namono mare igre baludi nogna naikno mana te gnognoro fara igre.
10Ka narane igne, nathunu nei glaba teu igre ginauna theome agha bongiro na,
eghuteuna neuba naprai na ne haghe hamerane,
naꞌa ginauna theome agha kolho.”
11LORD ne cheke eghu,
“Iara ginauna parani nauthoglu igne naugna la thono diꞌa fara gognarona.
Eghuteuna iara ginauna paradi naikno te diꞌa igre naugna mare ne tapla jafra fabrahu ka nakhibo.
Iara ginauna nhaꞌa faparidi naikno te fahaehaghe are,
eghuteuna iara ginauna goigoni fahui nodi puhi fahaehaghe mare te fakokhoanadi keha naiknore.
12Thofno kmana naikno fara ginauna lehe,
eghuteuna iara ginauna snakredi keha ghu kolho nate au na,
ginauna na ninhigrana fara na teke filodire.
Jateula te ninhigrana fara te filo deni famane gol ia eghu.
13Iara LORD mae ihei te au nolaghi fateote’o igne,
iara thono diꞌatagu fara,
eghume iara ginauna fakakhana nogu nolaghi na.
Ka narane tuana, iara ginauna fakheuni maloa igne,
eghuteuna glose igne ginauna thugha tei kokoni vido mala augna na.
14“Jaola, ka narane tuana,
naiknodi keha kantri te au ka namono Babilonia,
ginauna nake pulo ka namonodire.
Uve, mare ginauna rikha jateula glepo te tautagu te rikhani mae te hili na ia eghu.
Mare ginauna rikha tafri jateula sipu te theo ihei nga te reireghidi ra eghu.
15-16Jame mae naoka mei hata kaisei mae biꞌo,
eghuteuna mare puri falehe thugna manare.
Mae naoka igre ginauna hata nogna glepo manare,
eghuteuna mare huhuruni khetogna mana na mala thuru nodi balugna naꞌa.
Ka narane tuana, mana ginauna kegra filou kolho ka mare.
Eghuteuna mare ginauna na jaola faleheni mana ka naflahi.”
17LORD ne cheke eghu,
“Iara ginauna huhuruni armi gna Media mala mei magra ka maedi Babilonia.
Mae soldiadi Media igre mare theome ghathodi nodi silva nei gol teu maedi Babilonia igre,
ba keli tadi ka glepo igre. Theo.
18Mae soldia igre ginauna fada falehe goro mae majaghani gna namono na ka jata.
Eghuteuna mare ginauna jaola aknu falehe goro sua ikodi nei gegeꞌe teure.
Uve mare theome kokhonidi kolho naiknore.
19Namono Babilonia igne famane fara salaꞌudi keha namono biꞌo ka nauthoglu igne,
eghuteuna naikno gna namono igne fahaehagheni fara nodi namono na.
Nu LORD ginauna roꞌeni namono biꞌo igne jateula Sodom ghe Gomora tifa ra eghu.
20Ginauna na theo kaisei naikno nate au ka namono tuana.
Eghuteuna maedi Arab ginauna na jaola theome lisei haghe nodi suga tapuale ka vido igne.
Eghuteuna mae greireghi sipu ginauna theome hata mei nodi sipure mala ghamu buburu ka vido igne.
21Namono biꞌo Babilonia igne ginauna gou,
eghuteuna glepo te tautagu te mhaumhaghu are kolho nate mei au jare na.
Nakrudu nei nanghaji biꞌo teu are ginauna jaola mei horo nodi gnoku lamna suga.
Khuma mata ginauna mei ei nodi namono,
eghuteuna nanigot ginauna mei apla tongana nei chari tafri eghu ka namono tuana.
22Nogna suga biꞌo mae king,
balu nodi suga mae funei biꞌo igre,
khuma mata ginauna mei thuru nei iu fabiꞌo eghu ke lamnadi.
Uve, narane te mala groꞌe namono biꞌo Babilonia igne la namo meihi!”
14LORD ginauna nake hata fapulo nogna naiknore
1LORD ginauna kokhoni ghita tahati naikno teke vikegna Israel ra.
Eghuteuna mana ginauna vahi ghita mala ke nogna naikno mana.
Mana ginauna snakre ghita mala au ka noda namono igne.
Eghuteuna naiknodi keha kantri igre mala jaola mei au baluda ka namono igne.
2Kmana naiknodi keha kantri ka nauthoglu igne,
ginauna mei togho ghita mala ke pulo mei ka namono aheva LORD teke tusu ranghi ghita.
Eghuteuna ka narane igne,
naiknodi keha kantri delei ginauna mala noda naikno gloku tahati.
Tifa na, mare neke ulu ghita tahati neke hata noda namono igne neke funei fruni ghita.
Nu tahati ginauna uludi nei funei frunidi eghu mare.
King gna Babilonia ginau lehe
3Ka narane teke hata fajifla ghita LORD ka namono igne teke tei au kabru nei loku jateula sneka teku tahati ra, gognarona mana tusu ranghi ghita na au blagna nei pharikeli. 4Jaola ka narane tuana tahati ginauna cheke faparini mae king gna Babilonia. Tahati ginauna cheke eghu,
“King! Puhimu iagho teke para ghami ghehati ra gognarona la gnafahi!
Diꞌatamu iagho ra jaola gnafahi!
5Nomi LORD ghehati na la roꞌedihi nou nolaghi biꞌo iagho na baludi keha mae king te diꞌa ghotilo puhimi are.
6Funu tifa te mei na, ghotilo diꞌatami koba,
eghuteuna ghotilo fakokhoanadi koba iheire te au ke paridi nomi nolaghi ghotilo re.
Ulu lahu na, ghotilo theome gnafa te edi puhi igre.
Leuleghu fata na ghotilo goigonidi koba naiknodi keha kantri teke uludi ghotilo ka magra ra.
Nu gognarona, LORD na la tapla fapari ghamihi ghotilo.
7Eghuteuna naikno ka nauthoglu igne glealeꞌa,
naugna gognarona mare au ka pharikeli.
Gognarona mare te gnafa na koje balu glealeꞌa biꞌo.
8Uve, gaju paen nei gaju sida teu Lebanon igre jaola glealeꞌa fara,
eigna te nomhini nonomho igne ne cheke eghu,
‘Naugna tela soruhi pari ghotilo naiknomi Babilonia ra,
gognaro na theo kaisei naikno nate au teu te mala kato ghami ghehati na!’
9“King! Beku na mare la tarabanahi te mala soru iagho jare.
Eghuteuna tharungadi iheire teke baubatu ka nauthoglu igne ra mare ginauna dofra haghe mala cheke fakeli nigho iagho.
Uve, tharungadi mae king ka nauthoglu igne ginauna kegra haghe ka nodi sape nafnaknore mala ari thafo nigho iagho.
10Mae igre ginauna maꞌe nigho iagho na cheke eghu,
‘Gognarona iagho glaꞌe jateula ghehati eghu!
Tahati te gnafa na kaisei nanaba gognaro na!’
11Tifa kani teke king na,
iagho neke au nou famane glepo fara, jateula babuban,
nei gita mala koje mala pala hagheni nanghamu iagho na ka maloa kligna.
Tura la soru balumu iagho lamna Beku.
Ka namono igne, madukhe nei siosilo teu igre te jateula gheu gano nei nou khifra nei nou thotoku teu iagho re.
12“King gna Babilonia! Iagho neke haghe fara jateula nathunu rane neku ka tathadi naiknore.
Nu gognarona, iagho khoko la soru funu kligna ka maloa ro.
Tifa na iagho neke kaisei mae nheta ka magra neke uludi kmana kantri,
nu gognarona LORD la koko soru nigho iagho pari.
13Iagho cheke eghu ka gaoghathomu themu na,
‘Iara ginauna haghe kligna!
Iara ginauna fakegra haghe nogu sape nafnakno na ke klignadi nogna nathunu God ka maloa na are.
Eghuteuna iara ginauna gnokro ka sape nafnakno igne ke kligna thogele blahi aheva keha god are nate salo fodu mei tagna.
14Iara ginauna haghe ke kligna khoveo,
eghuteuna iara ginauna kaisei nanaba balugna God mae ihei te thofno haghe fara!’
15Nu theo eghu. Gognarona iagho soru ka Beku baludi iheire tela lehehi ra.
Namono te au iagho tuana mamhara fara salaꞌudi keha vidore.
16“King! Iheire te filoni puhigna God te nhaꞌa fapari nigho iagho igne ginauna rhana nodi fara,
aonu mare na cheke eghu ka gaoghathodi thedire,
‘Ba, ao si mae ihei teke fakheuni nauthoglu igne ia,
eghuteuna jaola me mhaghu nodi keha king re teu ia?
17Igne jau si mae teke roꞌedi namono biꞌo ka nauthoglu igne teke jateula namono nagou teku nauthoglu igne ia?
Igne jau si mae teke theome kokhonidi naiknore teke fasosolodi,
nei theome snakredi mala ke pulo ka namonodi re teku ia?’
18“Kate lehe kaisei king na,
mare giugiluni mana balu nodi famane glepo te keli ke lamna beku.
19Nu iagho na theo.
Mare ginauna theome giugilu thinimu iagho na,
nu mare na koko tei kolho thinimu iagho na mala boto jateula chara eghu.
Ke kligna thinimu iagho na,
mare ginauna koko thinidi mae soldia teke lehe balumu iagho ka magra ra.
Eghuteuna naiknore ginauna tapla ke klignami ghotilo.
20Mare ginauna theome giugilui thinimu iagho na jateula keha mae king ra eghu,
naugna iagho neke goigoni ni fara nou kantri na,
nei jaola neke aknu falehe kheramu themure.
“Iagho mae diꞌa fara! Jame te keli na,
naiknore jame neke thosei ghathodi vikemu iaghora nei iheire nate karha mei ke leghumu iaghore eghu!
21Hata mei thugna king ra mala aknu falehe agne.
Uve, mare mala kafe lehe eidi puhi te diꞌa teke edi mae kuꞌedi tifa ra.
Eghuteuna ginauna theo kaisei ka mare na teke funei fruni ni kantri igne,
ba horo nodi namono biꞌo heva heva ka nauthoglu igne.”
22Igne nogna nonomho LORD mae ihei te au nolaghi fateote’o na.
Mana ne cheke eghu,
“Iara ginauna mei magra Babilonia mala goigonini kantri igne.
Iara ginauna aknu falehe naiknore balu thudi nei iheire nate karha mei ke leghudi mare.
23Iara ginauna eni namono igne mala kaisei grano biꞌo mala jaola nodi namono nakrudu.
Eghuteuna iara ginauna hata kaisei jajaro mala haglu koko gobigna lepore mala krogha namono igne.”
Igne nogna nonomho LORD mae ihei te au nolaghi fateote’o.
LORD ginauna roꞌeni Asiria
24LORD mae ihei te au nolaghi fateote’o igne ne eni kaisei nhaꞌa cheke, ne cheke eghu,
“Glepo teke ghathoni iara igne ginauna thoke mei tutuani fara!
25Iara ginauna goigonidi gnafa naiknodi Asiria te mei au ka nogu glose iara igre.
Eghuteuna iara ginauna tapla ka mare mala thofno goigonidi iheire te mei au ka thogele ka glose igne.
Uve, nogu naikno iara igre ginauna theome mala ke nodi naikno sneka mare,
eghuteuna iara ginauna hata koko glepo te tahu ka faframi ghotilo te huhuru ghami mare te pala ghotilo are.
26“Igne unha teke ghathoni iara te mala eni ka keha kantri te rheta fara ka nauthoglu igne.
Iara la ngafa haghehi khamegu na mala paradi mare.”
27LORD mae ihei te au nolaghi fateote’o igne la ghathonihi unha te mala eni na,
theo kaisei naikno nate fanograni mana na.
Eghuteuna kate ngafa haghe mana khamegna na te mala paradi naiknore,
theo kaisei naikno jaola nate fanograni mana na.
LORD ginauna roꞌeni kantri Filistia
28Igne cheke te cheke mei LORD ka iara ka finogha te lehe King Ahas. 29LORD ne cheke eghu,
“Ghotilo naiknomi Filistia ra!
Theome keli te glealeꞌa fabrahu ghotilo na!
Tutuani, khodo teke puri ghami iara ia la klopahi.
Nu keha khodo na au ngau.
Khodo igne jateula kaisei mogo faghughumhu tela lehehi ra eghu,
nu thugna te karha teuna jaola faghughumhu.
30Iara ginauna reireghi fakelidi iheire te kuma fara jateula mae ihei te reireghi fakelidi nogna sipura eghu mala au fakeli.
Nu iara ginauna snakre meini kaisei narane te theo gano mala kafe lehe tharaknami ghotilore mala theo kaisei ka ghotilo te karha na.
31“Ghotilo naikno te au ka namono biꞌo Filistia!
Ghotilo mhaghu tanhi fabiꞌo!
Naugna ghotilo ginauna filoni gagahu biꞌo te haghe ke mosu kate nako mae naokare namono tuana.
Eghuteuna mare te gnafa na ghosei tarabana mala jaola mei goigoni ghami ghotilo.”
32Jame te kuru mei mare keha mae soldia ka tahati,
tahati na cheke eghu ka mare,
“LORD neke vahini Jerusalem mala nodi vido keli mala poru nogna naikno teke au papara ra.”
15LORD ginauna goigoni kantri Moab
1Igne cheke eigna Moab. LORD neke cheke eghu,
“Kaisei bongi kolho,
phei namono biꞌo Ara ghe Kira ka kantri Moab igre ginauna groꞌe theo tokadi ka hatimare mae naoka.
2Naikno ka namono Dibon igre tei ka vido mala tarai na mala diꞌanagnafa nei tanhi eghu.
Naiknodi Moab igre tanhi fabiꞌo ke kligna thogele Nebo nei ka namono Medeba.
Mare ghoighori phaꞌudi nei gremohodi teure,
naugna mare ne thono diꞌanagnafadi fara.
3Mare ginauna pipichi pohe thona leghu nabrou na tei,
eghuteuna mare ne khapru ka kaisei vido ka namono na ne tanhi fabiꞌo.
4Naiknodi ka phei namono Hesbon ghe Eleale igre ne tanhi fabiꞌo.
Naikno te au faligohodi phei namono igre te ghilei tei thoke ka namono Jaha te khaba fara igre,
mare tangomana te nomhi laodi naogladi te paopado fabiꞌo naiknore igne.
Aonu mae soldiadi Moab igre ne mhaghu nodi fara ne fififri kate nomhini mare te paopado fabiꞌo igne.
5“Nu iara ne kokhoni nogudi fara naiknodi Moab igre.
Naugna keha ka naikno igre rikha ne tei thoke ka namono Soa,
eghuteuna keha naiknore ne tei posa ka namono Eglat-Selisia.
Eghuteuna keha ka mare tanhi leghu brou ne haghe ka namono Luhit.
Eghuteuna keha ka mare jaola tanhi rikha doglo ne tei ka namono Horonaem.
6Khoꞌu biꞌo Nimrim igne ne krango soru,
eghuteuna buburu te kotu ka gerigna khoꞌu na igre jaola ne kafe gnhagha soru,
heva heva ka kantri igne.
Theo kaisei glepo te kotu haghe jare na,
naugna gobigna lepo fateote’o igre la kafe gnhagha soruhi gognarona.
7Keha naiknore hata nodi glepo te kelire rikha ne tei kasa ka glogu gaju wilo mala haghe ka keha phile thogele na.
8Tutuani, heva heva ka kantri igne,
naiknore tangomana te nomhini te paopado fabiꞌo naiknodi Moab igre.
Namono te au ke mata Eglaem,
nei ke raru Ber-Elim teu igre tangomana te nomhini te paopado fabiꞌo naiknore.
9Khoꞌu gna namono biꞌo Dibon igne fodu ka dadara naikno,
nu gaoghathogu iara na mala goigonidi naikno igre.
Naiknodi Moab te karha nga teu igre,
mare fariuriu rikhadi puhi biꞌo igre,
nu iara ginauna kafe falehedi gnafa, jateula te kuruni iara kaisei lion te tei ghamudi mare ra eghu.”
161Ghotilo naiknomi Moab ra!
Ghotilo iheire te rikha te tei au ka namono Sela ke lamna namono nagou Idom ra,
ghotilo hata sua sipu tei ka thogele Jerusalem,
mala tusu lao ka mana jateula namha eghu ka king,
mae ihei te funei frunini kantri igne.
2Nu naikno ka namono Moab igre ofo neu ka geri khoꞌu Anon te khaba fara ka nodi namono re.
Mare tei nei mei neu kolho jateula sua nanghaji te flalo tafri kate jifla kokoni nodi gnoku na te funu flalo tafri baludi idodi nei kmadi teura neu.
3Naiknore toreni king ne cheke eghu, “Togho ghami.
Bara fothi ghami ka nomi naoka gre mala au fakeli ghehati ke parigna nou nolaghi iagho,
jateula gaju biꞌo te tei poru naiknore ka naungogna na kate brana fara naprai na ia eghu.
Ghehati la rikha kokodihi namonomi ra.
Thosei snakre ghami mala ke pulo ka khamedi nomi naoka ra.
4Iagho snakre ghami ghehati mala au ka nou kantri igne. Reireghi ghami ka iheire te magnahaghei mei goigoni ghami igre.”
Nu puhi te fakokhoanadi naiknore nei goigonidi gobigna glepore ka magra teu igne ginauna gnafa ka kantri igne.
5Aonu ka narane igne,
kaisei mae king majaghani ginauna karha mei ka vikegna mae King Devet.
Mana ginauna ghatho tahudi fabrahu nogna naiknore,
eghuteuna naiknore ginauna fatutuani ni mana.
Mana ginauna ghosei eni glepo te keli na,
eghuteuna mana na fatedi naiknore ka puhi te doglo.
6Kate nomhini nodi cheke naiknodi Moab igre,
naiknodi Juda igre ne cheke eghu,
“Tahati la nomhidihi nodi nafnata cheke fahaehaghe mae Moab ra.
Tahati lasedihi te fahaehaghedi thedi fara mare ra,
eghuteuna mare theome kokhonidi ba lolokelidi kolho keha naiknore.
Nu tahati jaola lasedi nodi cheke fahaehaghe mare igre theo nafudi kolho.”
7Eghume, naikno te gnafa ka kantri Moab igre ne tanhi fabiꞌo eidi puhi biꞌo nate thokedi mare igre.
Kate ghathodi mare famane gano teke ima mare tifa ka namono Kira-Hareset igre,
mare ne kafe diꞌanagnafa balu tanhi.
8Nagare te gnafa te au ka namono Hesbon,
baludi nodi nagare grep te gnafa ka namono Sibma igre,
la goigoni fahuihi mae naoka gre.
Nagare igre biꞌo fara ghilei tei posa ke raru namono Jasa,
eghuteuna ke maghati namono nagou nei ke mosu Thongna Lehe.
Nu mae te funei fruni ka keha kantri igre goigonidi fara famane nagare igre.
9Eghume iara tanhi baludi naiknodi Jasa eidi ghedi nagare ka namono Sibma.
Kholodi phei tathagure thofa soru,
naugna iara ne diꞌanagnafagu fara eidi phei namono Hesbon ghe Eleale.
Iara diꞌanagnafagu, naugna theo kaisei naikno te eha nei glealeꞌa teu eidi glepo te keli te hata mare ka nagare igre,
jateula teke sughu edi mare tifa ra teuna.
10Theo kaisei naikno te glealeꞌa, nei koje teu eidi nagare grep igre.
Theo kaisei naikno na poji grep te mala ei waen na,
naugna LORD ne hata fadelei gobigna lepo te keli re.
11Iara diꞌanagnafagu fara eidi naiknodi Kira-Hareset,
baludi keha naiknodi Moab.
12Naiknodi Moab igre kmusa fara kate haghe fabrahu ka thogele te mala tarai ka mumuju.
Neuba mare ne tei ka vido te mala tarai igne, nu igne theo nafugna kolho.
13Igne u nonomho teke chekeni LORD eigna Moab. 14Nu gognarona LORD ne cheke eghu, “Moab gne kaisei kantri te dedei fara te au tagna kmana naikno nei kmana glepo. Nu ame thofno gnafa nga thilo finogha igre teuna, te chekeni keha naiknore, naiknodi Moab baludi nodi dedei te gnafa te fahaehaghedi fara naiknore igre ginauna ari theo nafudi kolho. Eghuteuna naikno te karha teure ginauna theome kmana nei glaꞌe fara eghu.”
17LORD ginauna paradi Siria ghe Israel
1LORD neke cheke eghu eigna Damaskas,
“Neuba Damaskas ne kaisei namono biꞌo,
nu ginauna na kaisei bukrei chara kolho.
2Eghuteuna namono Aroa igne baludi namono te gnafa te au falithui igre ginauna krogha.
Ginauna sipu nei nanigot eghu kolho nate ghamu tafri teu ka namono igne.
Eghuteuna theo kaisei naikno nate au teu jare te mala famamhaghudire.
3Namono te gnafa te bara thina Israel igre ginauna groꞌe.
Eghuteuna Damaskas te namono biꞌo lahu ka kantri Siria te funei fruni ni king igne ginauna jaola hui.
Keha naikno te karha teu Siria igre,
unha te eni ka maedi Israel igne ginauna na jaola thokedi mare.”
Igne nogna cheke LORD mae ihei te au nolaghi fateote’o na.
4Eghuteuna LORD ne cheke eghu,
“Ka narane igne, nogna nafnakno biꞌo Israel igne ginauna theo nafugna kolho,
jateula kaisei mae te blokha te fogra fara te ghilei nhubragna kolho ra eghu.
5Ka narane igne, LORD ginauna mei hata fahui naiknodi Israel igre,
jateula mae te tei hata fahui gano ka nogna nagare ra eghu.
Ginauna na jateula nagare wit te hata fahui ghotilo ka glogu Refaem ra eghu.
6Uve, ginauna na theome kmana naikno nate karha ka kantri igne.
Ginauna Israel gne na jateula kaisei gaju oliv te tei naikno te vigho te brusu soru pari sisigna re te tei hata fahui naikno ra eghu,
eghuteuna phei, ba thiloi sisi kolho nate au teu ka grege kligna na,
eghuteuna phei ba thiloi kolho te au ka grege pari na teura eghu kolho.”
Igne nogna cheke LORD nodi God maedi Israel.
7Ka narane igne, naiknore ginauna filo kolho ka God mae ihei teke vuavuhadi re,
eghuteuna mare ginauna filo glani kolho nodi God te Blahi mae Israel.
8Mare ginauna theome pogho soru ka unha teke horo ka khamedi thedire.
Eghuteuna mare ginauna figri tagruni mumujugna god gaꞌase Asera,
balugna olta te mala gahu insens tagna na.
9Jaola ka narane tuana, nodi namono rheta naiknodi Israel igre ginauna krogha. Uve, namono igre ginauna krogha jateula namhata te theo kaisei naikno te au tagna ra eghu.
10Ghotilo naiknomi Israel ra.
Ghotilo ghatho ihoni God mae ihei teke fakarhi ghami,
nei reireghi ghami teku igne.
God mae ihei te jateula nomi Thina rheta mala poru teu ghotilo igne.
Nu ghotilo loku ka nagare blahi mala tarai ka nodi god keha kantri delei.
11Eghuteuna jame kotu nagare igne,
eghuteuna chechenge ka narane tuanala teuna,
nagare igne ginauna theo ganogna kolho.
Ginauna kaisei fogra te diꞌa te thono kabru fara kolho nate thoke ghami ghotilo na.
LORD ginauna roꞌe fahuidi keha kantri igre
12Tore! Naiknodi keha kantri igre jateula galo biꞌo te mei poha ke kligna khalaꞌe ka narane saeklon ra eghu.
13Nu neuba mare ne chari ne mei jateula galo biꞌo te longa te poha mata ra neu ka tahati,
kate cheke LORD ka mare na, mare ginauna kafe figri na rikha.
Eghuteuna mana na ngolhi fajifladi mare,
eghuteuna mare na flalo jateula khakla gaju moja te flalo te tei ka nuri ra eghu kolho.
14Fei grafi na, tahati maeda Israel ginauna mhaghu noda fara.
Nu fei hamerane na noda naoka tahati re ginauna tei dofidi.
Igne unha nate eni ka naikno te mei goigoni di noda namono tahati igne,
nei jaola blau noda glepo tahatire teu igre.
18LORD ginauna parani kantri Kus
1-2Igne unha te chekeni LORD eigna kantri Kus,
“Kokhonidi fara naikno te au ka kantri Kus!
Mare kuruni kaisei mae mala hata tei nonomho ka keha kantri are mala nhaꞌa cheke baludi mare.
Mare tei ka vaka teke horo ka kaisei nafnata buburu brahu te mala feo te mala faghosei te tei na.
Mare tei tafri jateula cheche te taitanhi fara baghidire kate flalo ra neu.
“Ghotilo mae te mala hata nonomho ra faghose tei!
Ghotilo ke figri ka nomi kantri te au kmana khoꞌu tela fnota ra,
eghuteuna naiknodire brahu fara,
eghuteuna thinidire famane salhu fara.
Ghotilo ke figri ka naikno te nheta nei tangomana te paradi koba naiknore teura.
Uve, naikno heva te heva ka nauthoglu igne mhaghu ghami fara ghotilo.
3Ghotilo naikno te au ka nauthoglu ra!
Mare ginauna lilisei haghe kaisei flagi ke kligna thogele mala tangomana ghotilo te filoni.
Eghuteuna kate filoni ghotilo flagi igne ghotilo tarabana mala magra!
Mare ginauna kufliu, eghume ghotilo fanomho fakeli eghu!”
4Igne unha te chekeni LORD na,
“Iara ginauna au kmu ka namonogu na mala filo soru jateula naprai te agha soru fari hotei aublatha ra eghu.
Eghuteuna iara ginauna na theome fasalaꞌuni kaisei ka ghotilo jateula nakhete bongiro te soru heva heva ka vido te gnafa ka nauthoglu igne ra eghu.”
5Tutuani, kantri igne thofno keli fara jateula gaju grep te thofno keli fara kate khoko chechenge gnare eghuteuna funu muita sisigna re teura eghu.
Nu LORD ginauna roꞌeni kantri Kus jateula kaisei mae te kato soru grege gna gaju grep te theo ghano gnara eghu.
6Thinidi mae soldia te lehere ginauna thuru tafri pari.
Eghuteuna nanghaji nei glepo te tautagu teu ka namhata na are ginauna au ghedi gano nabagna kmana narane.
7Ka narane tuana LORD mae ihei te au nolaghi fateote’o igne ginauna hata mei namha ka kantri te rheta te au kmana khoꞌu igne.
Naiknogna kantri igne brahu fara, eghuteuna thinidire famane salhu fara.
Eghuteuna kantri igne fnakno ka magra,
eghuteuna keha kantri re mhaghu nodi fara tagna.
Naiknore ginauna hata mei nodi namha re ka Thogele Saion, eghuteuna namono igne LORD neke vahini mala tangomana nogna naiknore te mei namo nei tarai eghu ka mana.
19LORD ginauna roꞌeni Ijep
1LORD ne fakakhana ka iara eigna Ijep:
Mana ginauna tei Ijep ke kligna gna kaisei grokho te umhu fara.
Kate tei te thoke mana Ijep na, nodi mumuju god mae Ijep igre mhaghu ne fififri fara.
Eghuteuna naiknodi Ijep re jaola ne mhaghu nodi fara.
2LORD ne cheke eghu,
“Iara ginauna snakredi naiknodi Ijep mala magra fari thedi.
Naiknore ginauna magridi kheradi thedire.
Eghuteuna phei mae ke lamnagna kaisei namono na ginauna magra fari thedi.
Ginauna naikno gna kaisei namono na ginauna magra ka naikno gna keha namono na.
Ginauna naikno gna kaisei provins ginauna magra ka naikno gna keha provins na.
3Gaoghathodi naiknodi Ijep re ginauna glaꞌe soru,
eghuteuna iara ginauna goigoni nodi gaoghatho mare igre.
Eghuteuna mare ginauna tei tarai ka nodi mumuju god mala toghodi.
Mare ginauna tei filodi mae te au naitu khaekae nei iheire te au naitu nhaghe ba iheire te tangomana te cheke baludi tharungadi naikno tela lehehi ra.
4Iara ginauna vahini kaisei mae king te diꞌa fara puhigna na mala funei frunidi naiknodi Ijep.”
Igne cheke gna LORD mae ihei te au nolaghi fateote’o.
5Ka narane tuana,
Khoꞌu biꞌo Nael ginauna loloro faꞌikoi ghilei krango fahui.
6Khoꞌu ikodi teke dokha mare mala faboubothudi nagare re teku ra,
ginauna krango na siri diꞌadi fara.
Fora brahu te karha ka geri khoꞌura,
ginauna gnhagha kafe lehe.
7Eghuteuna nagare te joꞌu naiknore ka geri khoꞌura ginauna gnhagha soru,
eghuteuna nuri ginauna mei pala tafri gano te au ka nagare re ghilei tei dofidi.
8Mae te lase ugra ka Khoꞌu biꞌo Nael ginauna diꞌanagnafa nei tanhi eghu,
naugna nodi thagho nei nodi fangna teure ginauna fiti au kolho.
9Naikno te lase ei pohera ginauna diꞌanagnafa,
naugna glepo mala eꞌei pohe re ginauna kafe lehe dofidi.
10Naikno te lase eꞌei pohe baludi nodi mae glokura,
ginauna diꞌanagnafa fara.
11Hatimare mae mala baubatu ka namono Soan,
nodi namono biꞌo mae Ijep,
mare fameomekro jateula glepo te theo nafudi eghu kolho.
Eghuteuna nogna mae glalase king gna Ijep igre,
mare tusu lao gaoghatho fameomekro ka mana.
Tore! Jame teuna, faꞌunha eghu chekeni iagho ne lalase iagho teuna,
eghuteuna faꞌunha eghu iagho tangomana te chekeni iagho neke vikedi mae king tifa ra teuna?
12King! Ahevau nou mae glalase iagho ra,
mala chekeni mare ka iagho unha te ghathoni LORD mae ihei te au nolaghi fateote’o igne ginauna eni malagna kantri Ijep?
Tore! Mare theome tangomana te togho ghami ghotilo na!
13Hatimare mae mala baubatu ka phei namono Soan ghe Mefis igre la fameomekro gognarona! Mae biꞌo ka kantri igne baubatu fadiꞌadi naiknore!
14LORD magnahaghedi mare te cheke ka naiknore, nu nodi cheke mae igre theome doglo kolho. Naugna phaꞌudi mae igre theome doglo, eghuteuna mae igre jateula mae te koꞌu te salaꞌu te thuru ke klignadi gluꞌadi thedi ra eghu kolho.
15Eghuteuna theo kaisei mae ka mae igre te eni kaisei glepo te mala toghoni kantri Ijep te mala au fakeli na.
Neubane mae biꞌo ba fiti mae kolho theo kaisei ka mare tangomana te eni kaisei glepo te keli na.
Naiknodi Ijep ginauna tufru soru ka LORD
16Ka narane tuana, naiknodi Ijep ginauna mhaghu jateula gaꞌase eghu kolho. Mare ginauna mhaghuni LORD mae ihei te au nolaghi fateote’o igne, naugna mana ginauna ngafa haghe khamegna na mala paradi mare. 17Naiknodi Ijep ginauna mhaghu nodi fara kate nomhini nanghagna kantri Juda igne, naugna mare laseni LORD mae ihei te au nolaghi fateote’o igne ginauna tarabana mala paradi mare.
18Ka narane igne, naiknodi glima namono biꞌo ka kantri Ijep igre ginauna cheke ka cheke Hibru. Eghuteuna naiknodi namono igre ginauna nhaꞌa cheke ka nanghagna LORD mae ihei te au nolaghi fateote’o igne mala leghuni mana. Eghuteuna kaisei ka namono igre ginauna mare kiloni, “Nogna namono Naprai.”
19Ka narane tuana, kaisei nogna olta LORD ginauna au ke lamnagna kantri igne, eghuteuna ka nohigna kantri Ijep igne, mare ginauna fakegra haghe kaisei thina biꞌo fagaglana gna te tufru soruni mare LORD. 20Olta nei thina biꞌo teu igre jateula kaisei fagaglana eghu eigna LORD mae ihei te au nolaghi fateote’o igne te au ke lamnagna kantri Ijep. Eghuteuna jame te tanhi lao ka LORD naiknodi Ijep igre mala toghodi ka hoholo kate au ke paridi nodi nolaghi naiknodi keha kantri igre teuna, LORD ginauna kuruni kaisei mae mala tei fakarhidi. 21LORD ginauna falaseni thegna ka naiknodi Ijep, eghuteuna ka narane tuana, mare ginauna laseni te mana ngala God na. Mare ginauna tarai nei fafara eghu ka mana. Eghuteuna mare ginauna tathaji nodi nhaꞌa cheke teke eni mare balugna LORD. 22LORD ginauna paradi naiknodi Ijep, nu mana eni puhi igne mala fadoglini puhidi mare te diꞌa na. Eghuteuna mare ginauna nake figri nake pulo mei ka LORD, eghuteuna mana ginauna na fanomho ka nodi tharai re mala ke au fakeli mare.
23Eghuteuna ka narane tuana, kaisei nabrou biꞌo ginauna funu Ijep tei posa Asiria. Eghuteuna naiknodi phei kantri igre ginauna tei mei eghu fari hoteidi phei nodi kantri igre. Eghuteuna naiknodi phei kantri igre tangomana te mei tarai fodu na. 24Ka narane tuana, Israel baludi phei kantri Ijep ghe Asiria igre ginauna loku fodu. Eghuteuna LORD ginauna batudi thilo kantri igre jateula kaisei fablahi eghu ka keha naiknore ka nauthoglu igne. 25LORD mae ihei te au nolaghi fateote’o igne ginauna fablahidi naiknodi thilo kantri igre. Mana ginauna na cheke eghu, “Ghotilo naiknomi Ijep ra, ghotilo nogu naikno iara. Ghotilo naiknomi Asiria ra, ghotilo mala nogu naikno iara. Eghuteuna iara jaola neke vahini vikegna Israel ka keha naikno teu ka nauthoglu igne mala nogu iara. Eghuteuna iara ginauna fablahi ghami ghotilo hui.”
20Iheire te fafnaknodi Ijep ghe Kus igre ginauna mamaja nodi fara
1King Sagon gna Asiria, mana neke cheke ka nogna mae funei biꞌogna nogna armi na mala tei magra ka naiknodi Asdod, kaisei nodi namono biꞌo naiknodi Filistia. King igne magra heta neke uludi mare. 2Nu kate theome thoke mei nga teu puhi igne na, LORD neke cheke eghu ka iara, “Isaia, thugna mae Emos, iagho koko pohe thona te pipichi iagho tuana baludi sadol te fahaghe iagho are, fagaglana gna nou diꞌanagnafa na, eghuteuna iagho mala soesole tei kolho.” Eghume iara leghuni kolho unha te chekeni LORD ka iara igne.
3Kate mei mae soldiadi Asiria igre te uluni namono Asdod igne, iara neke toutonuni chekegna LORD na neke cheke eghu, “Tore! Filo si ghotilo! Nogu mae gloku iara Isaia igne mana neke soesole neke nolo tafri nabagna thilo finogha nei theome fahaghe sadol neku. Igne kaisei fagaglana te fakakhana eidi puhi biꞌo nate thoke mei ka naiknodi Ijep nei Kus. 4Kate uludi king gna Asiria phei kantri igre, mana ginauna hata naiknore mala batu fajifladi soesole. Neuba ne mae majaghani ba kuekuꞌe, mare ginauna mala kafe nolo soesole mala thofno mamaja nodi fara mare. 5Naiknodi Filistia te gnafa te rouronu ka naiknodi Kus ghe Ijep te mala toghodi, teu igre ginauna thono mhaghu nodi fara balu diꞌanagnafa. 6Ka narane tuana, naikno te au ka grathagna Filistia igre ginauna cheke eghu, ‘Ghotilo filo kolho ka Ijep ghe Kus te mala togho ghita na, eghuteuna tahati tangomana te chari te tei ka mare te mala fakarhi ghita ka nogna armi king gna Asiria, nu mare la uludihi Ijep ghe Kus. Eghume tahati theo kaisei noda nabrou te mala rikhani armi gna Asiria igne.’ ”
21LORD ginauna roꞌeni Babilonia
1Nonomho eigna kantri Babilonia igne mei ka iara. LORD neke cheke eghu eigna kantri Babilonia,
“Puhi biꞌo ginauna kegra haghe ke mata ka namono aheva te mhaghuni fara naiknore.
Puhi biꞌo igne ginauna mei jateula kaisei nuri blahi te mei fei namono nagou ra eghu.”
2LORD neke fakakhana mei ka iara kaisei mifi.
Ka mifi igne iara neke filodi naikno te majora,
naikno te chaichaghi,
nei edi puhi te thono diꞌa fara ranghidi keha naiknore.
Aonu iara ne nomhini LORD na ne cheke eghu,
“Ghotilo armi gna kantri Elam,
ghotilo tei magra Babilonia!
Ghotilo armi gna Media,
ghotilo tei kegra ligohodi nodi namono phei kantri tuare mala theome tangomana mare te jifla na!
Iara ginauna fahuini nafnata puhi te eni koba naiknodi Babilonia te fadiꞌa nagnafadi,
nei fatanhidi teu keha naiknore.”
3Iara thofno kabru ghegu fara jateula gaꞌase te namo karha sua ra eghu kate filodi glepo te thono diꞌa fara igre.
4Phaꞌugu na thono thabliu fara,
eghuteuna thinigu na ngegra,
naugna iara ne thofno mhaghu nogu fara.
Leuleghu fata na,
iara magnahaghei te ghosei bongi, nu kate plulu naprai na,
iara mhaghu nogu salaꞌui.
5Ka mifi tuana, iara neke filodi mare te tarabana kaisei gaghamu biꞌo.
Eghuteuna mare jaola neke tarabanahi kaisei khifra te mala gnokro tagna na.
Kate ghamu nei koꞌu teu mare na,
kaisei mae biꞌo ne eha eghu fabiꞌo,
“Ghotilo mae funeidi armi ra!
Ghotilo kegra haghe tei tarabana nomi greoreo ra!”
6God neke cheke eghu ka iara,
“Iagho tei lilisei kaisei mae greireghi mala toutonu ka iagho gobigna lepo teke filodi manare.
7Kate filodi mana hose te tungnu chariot,
ba mae te saghe ka dongki,
nei kamel teu te mei igre,
mana ginauna famane fifilo fakeli ka mare!”
8Aonu mae greireghi igne ne eha eghu fabiꞌo,
“Mae funei! Leuleghu narane nei leuleghu bongi teuna,
iara kegra fabrahu ka suga mala toetoedi mae naokare.
9Eghuteuna iara ne filoni kaisei mae ne mei ka hose.
Eghuteuna mae igne ne cheke eghu,
‘Babilonia na la groꞌehi!
Nodi mumuju god mae Babilonia ra la khokohi pari ka glose na la klopahi gognarona!’ ”
10Ghotilo nogu naikno iara ra!
God na la kuru meidihi mae naokare mala mei aknu falehe ghita tahati,
jateula naikno te tapla ke kligna wit te mala koko khunegna ra lau.
Nu iara na chekeni ka ghotilo unha nate chekeni noda God tahati maeda Israel,
LORD mae ihei te au nolaghi fateote’o, mana neke cheke ka iara.
Igne nodi cheke mae Idom
11Cheke igne mei ka iara eigna Idom.
Iara nomhini kaisei maegna Idom ne eha eghu mei ka iara,
“Ghema, la namo rane hi, ba theou?”
12Aonu iara ne cheke eghu ka mana,
“Uve, narane na la meihi,
nu bongi na ginauna na jaola theome raugha thoke mei.
Eghuteuna jame te magnahaghei toreni iagho kaisei glepo ka iara na,
iagho ginauna nake pulo mei.”
LORD ginauna roꞌeni Arebia
13Igne cheke eigna Arebia.
Ghotilo naiknomi Dedan!
Kate tei falithui ghotilo ka vido te mala sabiri nomi glepore,
ghotilo tangomana te lisei haghe nomi suga tapuale re ka namono nagou Arebia.
14Jame kaisei rogna koꞌu fara te mei ka ghotilo na,
ghotilo mala tufa khoꞌu ka mana.
Ghotilo naiknomi Tema!
Jame kaisei mae rikha ka magra eghuteuna mei ka ghotilo,
ghotilo tufa ghegna gano mana.
15Naikno igre rikhadi iheire te loku naflahi,
phaloho nei jata eghu tarabana mala mei aknu falehedi mare.
16Eghuteuna LORD neke cheke eghu ka iara, “Gognarona naiknodi Keda igre fnakno nanghadire, nu kaisei finogha kolho te au na. Eghuteuna nafnakno biꞌo tuana ginauna ari luvu theo nafugna kolho. 17Neuba mae soldiadi Keda igre ne nheta kate magra na, eghuteuna mare laseni fara te fada ka phaloho na neu, nu phei ba thiloi kolho nate karha na. Iara LORD, nodi God maedi Israel te chekeni igne!”
22LORD ne diꞌatagna ka naiknodi Jerusalem
1Nonomho igne mei ka iara eigna Jerusalem nei eigna Glogu Mifi igne. Mana ne cheke eghu:
Unha najafra teke eni ghotilo na?
Naugna unha si ghotilo te haghe ke tagru suga te glealeꞌa gnea?
2Ghotilo rugusi fara heva heva ke lamnagna namono igne,
eghuteuna ghotilo jaola eha tongana,
naugna ghotilo ne ei gaghamu biꞌo.
Nu ghotilo theome ghathodi kolho kherada tela lehehi ra.
Mare neke theome lehe kolho ka magra.
3Nomi mae mala baubatu ghotilo ra neke rikha kolho ka magra.
Neuba mare ne rikha,
ne theome fada ka phaloho, ba theome magra neu,
nu mae naokare neke lokidi mare kolho.
4Eghume, te chekeni iara ka ghotilo na,
ghotilo thosei fariuriu fameomegoni nagnafagu iara gne.
Ghotilo lisa ghau iara mala tanhidi iara puhi te goigonidi mae naoka gre kherada tahati ra.
5LORD God mae ihei te au nolaghi fateote’o igne gognarona vahinihi kaisei narane.
Ka narane igne, puhi biꞌo ginauna thoke mei ka ghotilo ka Glogu Mifi igne.
Hatimare mae naoka ginauna ulu ghita tahati,
eghuteuna gringnigna noda namono tahati igne ginauna groꞌe ka mare.
Eghuteuna tahati ginauna tanhi fabiꞌo mala mei keha naiknore mala togho ghita.
Nu ka narane igne naogladi noda natanhi tahati re ginauna tei posa ka thogelero eghuteuna ke pulo mei ka theda eghu kolho.
6Hatimare mae soldiadi Elam,
mare saghe ka chariot balu nodi phaloho nei jata.
Soldiadi ka namono Kira igre,
mare hata nodi greoreo re tarabana mala magra.
7Heva heva ka glogu te gnafa ka kantri Juda igre ginauna fodu ka nodi chariot mala magra noda mae naoka tahati are.
Mae soldia te saghe ka hose igre la mei foduhi ke ulugna baragna namono igne.
8LORD na theome togho ghami ghotilo mala reireghini kantri Juda.
Kate filoni ghotilo glepo igne,
ghotilo ginauna chari tei mala hata mei glepo mala magra ka suga aheva teke lilisei ghotilore.
9-11Ghotilo tei filoni baragna namono te kiloni tahati,
nogna namono mae King Devet ia la groꞌehia.
Ghotilo tei filodi suga ka namono tuana eghuteuna paꞌe soru keha,
eghuteuna hata keha thina mala ke babana fapulo gringnidi re.
Eghuteuna ghotilo jaola dokha kaisei kholo seu biꞌo mala au khoꞌu fari hoteidi phei gringnigna namono na mala theome kmoꞌe tahati ka khoꞌu.
Eghuteuna khoꞌu te soru mei ka seu te tiatifa ana tangomana te soru ka seu majaghani igne.
Nu ghotilo theome fatutuani ni LORD, mae ihei teke edi gobigna lepo igre.
Eghuteuna ghotilo theome ghatho tahuni kolho mana,
nu mana neke ghathodi neke mei glepo igre funu tifa.
12LORD mae ihei te au nolaghi fateote’o igne neke cheke ranghi ghami ghotilo mala tanhi fabiꞌo.
Eghume ghotilo ghoighori phaꞌumi are eghuteuna ghotilo pipichi ka pohe te thona,
fagaglana gna te diꞌanagnafa fara ghotilo eidi nakhibomire.
13Nu ghotilo maꞌe nei ei gaghamu eghu kolho!
Uve, ghotilo theome gnafa te falehe buluka nei sipu teu te mala ima ghemi nei koꞌu ghemi teuna.
Eghuteuna ghotilo cheke eghu koba,
“Te keli na tahati ima gheda nei koꞌu gheda eghu,
naugna nathuꞌu na tahati ginauna kafe lehe.”
14Nu LORD mae ihei te au nolaghi fateote’o igne neke cheke eghu ka iara, “Iara ginauna na theome hata koko nakhibodi re. Nakhibo igne ginauna au fabrahu ka mare ghilei lehe baludi.” Igne chekegna LORD.
LORD ginauna fagnafani mae Sebna ka nogna gloku na
15LORD mae ihei te au nolaghi fateote’o igne neke cheke eghu ka iara,
“Tei chekeni nogu cheke iara igne ka praeminista Sebna:
16‘Ghema Sebna! Iagho theo glosemu nei vikemu eghu agne.
Naugna unha sagho te chekedi mae igre te jou kaisei khora lamna thina rhegna thogele ignea,
eghuteuna tarabana kaisei vido mala giugilu nigho tagna?
Mae ihei teke snakreni ka iagho te mala khotogna vido glose igne?
17Filo nighoi! Neuba iagho ne kaisei mae biꞌo,
iara LORD ginauna koko tei nigho iagho delei.
18Iara ginauna koko tei nigho iagho ka kaisei kantri biꞌo,
jateula kaisei mae te hata haghe thina ikoi te koko te tei delei fara ra eghu.
Ka namono igne nate lehe iagho na,
eghuteuna nou chariot mala magra iagho igre kolho nate au na.
Iagho kaisei mae te famamajani fara nou mae funei na!
19Iara ginauna fagnafa nigho ka nou gloku na,
eghuteuna iara ginauna hata koko nou nafnakno iagho na mala kaisei mae theo nafumu kolho iagho.’
20“Ka narane igne, iara ginauna kiloni nogu mae gloku Eliakim, thugna mae Hilkaea mala ke tughu nigho iagho. 21Iara ginauna hata koko pohe nei nhugha eghu te fagaglana gna nou nafnakno na kate fahaghe iagho na, mala tusu lao ka mana, mala ke hata kasa mana nou gloku iagho na. Mana ginauna mala jateula kmadi eghu naiknodi Jerusalem nei keha naiknodi langau Juda. 22Iara ginauna vahini mae Eliakim mala kaisei mae biꞌo ka nogna gavman mae king, mae ihei nate karha mei ke leghugna mae King Devet. Eghuteuna iara ginauna tusu ranghini mana nolaghi te mala edi unha te magnahaghedi manare, eghuteuna theo kaisei naikno nate lhotini mana na. 23Iara ginauna toghoni mana mala au famaku ka nogna gloku na, jateula thagho te chakhi te maku ka gringnigna suga na ia eghu. Eghuteuna naugna te hata mana nafnakno biꞌo igne, vikegna manare ginauna jaola hata nafnakno biꞌo. 24Nu vikegna te gnafa mana igre ginauna kafe gefe haghe ka mana, jateula suspen nei dis eghu te gefe ka kaisei thagho kolhora eghu.
25“Ka narane tuana, thagho te chakhi teu ka gringni na igne ginauna blogho khoko pari. Eghuteuna kate khoko pari na, gobigna lepo teke gefe ka thagho igne ginauna khoko phosa diꞌa tongana.” Igne chekegna LORD mae ihei te au nolaghi fateote’o na.
23Igne cheke eigna Fonisia
1Igne unha nate thoke mei ka namono biꞌo Taea.
Ghotilo mae te loku ka vaka ra,
ghotilo tanhi nei diꞌanagnafa eghu,
naugna nomi namono ghotilo igne la groꞌehi ka mae naoka,
eghuteuna theo kaisei suga te kegra teu ka namono Taea.
Ghotilo ginauna filoni igne kate pulo mei funu ka moumolu Saeprus.
2Ghotilo naikno te au ka gratha ra!
Ghotilo mae bisnis ka namono biꞌo Saidon ra, ghotilo au diꞌanagnafa.
Ghotilo dedei la salaꞌui fara ka glepo te hata te mei ghotilo ka namono biꞌo Taea.
3Leuleghu fata na ghotilo neke kuru tei keha mae neke tei kasa nhorora mala foli wit,
nei keha gano eghu te kotu leghui geri Khoꞌu biꞌo Nael ka kantri Ijep mala sabiri ka naiknodi keha kantri are.
4Ghotilo naiknomi Saidon ra!
Ghotilo ginauna mamaja nomi fara!
Naugna nomi god thongna ghotilo te rouronuni fara ghotilo te jateula idomi nei kmami teu ghotilo igne la tirogna ghamihi ghotilo.
Mana neke cheke eghu,
“Iara theome tangomana nate bukla te au sua nalhaꞌu nei gaꞌase teu na.
Iara na theome ke bukla nei nake theome au sua eghu.”
5Kate nomhini naiknodi Ijep igre u thoutonu eigna namono biꞌo Taea igne,
mare mhaghu nodi ne nanga nodi fara.
6Ghotilo naiknomi Fonisia!
Ghotilo diꞌanagnafa nei tanhi fabiꞌo eghu!
Te keli na ghotilo farirhiu rikha tei Spen!
7Taea gne thofno nomi namono tiatifa ghotilo,
eghuteuna naikno te au ka namono igne glealeꞌa nodi fabrahu.
Tifa na mae mala baubatu ka namono igne mare neke kasa nhorora neke tei au nodi ka keha kantri delei.
Nu gognarona la faꞌunha la diꞌa si namono ignea?
8Tifa na naiknodi Taea igre neke lilisei naikno mala funei frunidi keha namonore,
eghuteuna naiknore ghatho tahudi fara mae bisnis di Taea ke tulaodi keha mae bisnis arei.
Nu ghotilo theome laseni glepo te diꞌa te thoke ghami ghotilo igne!
9LORD mae ihei te au nolaghi fateote’o igne mana au nogna gaoghatho te mala fagnafani nomi puhi fahaehaghe ghotilo igne.
Eghuteuna ghotilo nhaꞌa fapari ghami ka puhi te ghatho tahu ghami kolho themi igne.
Mana eni igne mala mamaja nomi ghotilo.
10Ghotilo naiknomi Tasis te au Spen ra!
Ghotilo funu loku ka nagare gognarona mala au ghemi gano,
naugna nomi namono ghotilo Taea ia la thono diꞌa fara gognarona.
Eghume, ghotilo reireghi fakeli ghami themi.
11LORD ngafa haghe khamegna na ke kligna nhorora mala goigonidi keha kantri igre.
Mana cheke faheta mala mei mae naoka mala goigoni di namono nei vido mala poru teu ka kantri Fonisia.
12LORD ne cheke eghu,
“Ghotilo naiknomi Saedon ra!
Tifa na ghotilo neke glealeꞌa nomi fara,
nu nomi narane te keli ghotilo tura la gnafahi.
Gognarona ghotilo au ke parigna nodi nolaghi nomi naoka ghotilo are.
“Eghuteuna jame te magnahaghei rikha ghotilo na,
neubane tei posa ghotilo Saepras, nu ghotilo ginauna theome au fakeli kolho.”
13Ghotilo filo ka kantri Babilonia!
Naiknogna namono tuana la gnafahi.
Maedi Asiria goigoni ni fara namono igne kela nodi namono khuma mata kolho.
Mare nali thina haghe ka baragna namono na mala bligi te apla te ruma te goigoni ni namono igne.
14Ghotilo mae te loku ka vaka biꞌo ra!
Ghotilo diꞌanagnafa gognarona!
Hatimare mae naokare la goigonidihi nomi vido mala poru ghotilo ra.
15Ka narane igne, naiknore ginauna ghatho ihoni namono biꞌo Taea nabagna fitusalei finogha. Eghuteuna ka narane tuare ginauna na jateula nakarhagna kaisei king, funu ka narane karhagna te thoke ka narane glehegna na ia eghu. Ke leghudi fitusalei finogha igre, Taea ginauna na jateula gaꞌase vine te au ka khoje igne eghu,
16“Naikno biꞌo! Mae nalhaꞌu gre la theome ghatho nigho iaghohi!
Hata nou ghita na,
nolo tei ke lamna namono.
Koje ka nou ghita na sagho,
eghuteuna mare nake ghatho fapulo nigho,
eghuteuna mare nake mei khapru faligoho nigho.”
17Kate ari te gnafa fitusalei finogha igre, LORD ginauna snakredi naiknogna namono Taea mala ke fufunu fapulo nodi bisnis fateore. Mare ginauna na chaichaghidi kantri te gnafa ka nauthoglu igne mala hata kmana sileni, jateula gaꞌase vine te snakreni thinigna na ka mae nalhaꞌu ra eghu. 18Nu sileni te hata mare ka bisnis igre mala nogna LORD. Mare ginauna theome tathaji sileni igre, nu mala tufa ka naikno te loku ranghini LORD. Aonu nogna mae gloku LORD igre ginauna au ghedi kmana gano balu nodi famane pohe.
24LORD ginauna parani nauthoglu igne
1Tore! LORD na la namo goigoni nauthoglu igne eghuteuna ginauna theo kaisei glepo nate au tagna na.
Glose igne ginauna diha jateula narane te nakheu ra eghu,
eghuteuna naiknore ginauna rikha tafri tei delei ka keha vidoi ka nauthoglu igne.
2Ka narane igne, naiknore ginauna kafe au papara.
Neubane mae pris ba mae kolho, phiamare mala kafe au papara.
Neubane mae funei ba mae gloku kolho, phiamare mala kafe au papara.
Neubane nakrupe ba gaꞌase gloku kolho, repa mala kafe au papara.
Neubane mae mala maket ba mae mala foli, phiamare mala kafe au papara.
Neubane mae mala tore kaoni ba mae mala snakreni kaoni na, phiamare mala kafe au papara.
Neubane mae dedei ba mae kuma, phiamare mala kafe au papara.
3Uve, nauthoglu igne ginauna thono diꞌa fara,
eghuteuna ginauna na theo kaisei glepo nate au teu tagna na.
Glepo igne ginauna thoke mei tutuani fara, naugna LORD neke chekenihi igne.
4Heva heva ka nauthoglu igne glose igne ginauna khapra fara,
eghuteuna gobigna lepo igre ginauna theome karha kelidi na lehe.
Mae biꞌo te gnafa ka nauthoglu igne ginauna kafe glaꞌe fara.
5Naikno ka nauthoglu igne na goigoni nauthoglu igne na vuhai chara ka tathagna LORD,
naugna mare ne huhughuni nogna vetula God na,
nei nhaꞌa cheke teke eni mare balugna God mae ihei te au fabrahu tifa te tifa.
6Naugna igne, hoholo biꞌo ginauna thokeni nauthoglu igne.
Eghuteuna naikno ka nauthoglu igne na au papara eigna nodi najafra fateote’o.
Eghuteuna ginauna na theome kmana ka mare nate au teu ka nauthoglu igne.
7Gaju grep are ginauna mojadi,
eghuteuna ginauna na theo kaisei waen majaghani nate au na.
Naikno teke glealeꞌa tifa ra,
gognarona mare diꞌanagnafa fara.
8Eghuteuna naikno teke lalahu gita nei babuban nei koje teku tifa ra,
gognarona mare au kmu.
9Uve, theo kaisei mae nate koje kate koꞌu waen jateula teke tifa ra teuna.
Eghuteuna beer te koꞌu mare na thono raha fara ka graradire.
10Theo kaisei glepo te doglo ka namono igne,
eghuteuna naiknore na bibilakhidi thedi lamna suga mala poru.
11Naiknore hiro waen eha uareghe tafri leghu nabrou ka namono,
naugna nodi glealeꞌa mare tifa ra la gnafahi.
12Sugare la breku tafri,
eghuteuna bara gna namono na la thono diꞌa fara.
13Tutuani, igne unha nate thoke mei heva heva ka nauthoglu igne.
Eghuteuna nauthoglu igne ginauna na jateula nagare gaju oliv te pulei fateo sisigna ra eghu.
Ba ginauna na jateula nagare gaju grep te hata fateo sisi te kelire teke lisei faleghu keha maladi naikno te kuma teku ra.
14Ke leghugna narane igne,
iheire te karha teure ginauna koje balu gleꞌa.
Eghuteuna naikno te au ke mosu ra ginauna cheke fakelini LORD mae ihei te fnakno kligna lahu.
15Eghuteuna naikno te au ke maghati ra ginauna ghatho tahuni Mana.
Naikno te au ke raru ra cheke fakelini nanghagna LORD,
nodi God mae Israel.
16Tahati ginauna nomhidi naikno te au ka keha phile nauthoglu igne ginauna koje mala cheke fakelini God mae ihei te doglo fabrahu.
Nu iara na cheke eghu, “Ghema! Iara la lehehi!
Eghuteuna thinigu iara na la jaola nhubragna kolho!
Mae kheragu iara re chaghi kolho ka iara,
eghuteuna mare snakre lao ghau iara ka khamedi nogu naokare.
Leuleghu fata na,
puhidi mare te mala chaghi na raꞌe diꞌa la salaꞌui.”
17Ghotilo naikno ka nauthoglu ra!
Ghotilo fanomho mei ka iara!
Phighoro baludi kmana glepo te mala famamhaghu ghami ghotilore tarabanau ke ulumi ghotilo gognarona.
18Naikno te mhaghu te magnahaghei rikha na,
ginauna snoꞌo ka khora.
Eghuteuna naikno te magnahaghei rikhani phighoro igne na ginauna khale tagna.
Eghuteuna nakhete biꞌo ginauna soru mei,
eghuteuna khotogna glose igne ginauna nghali.
19Glose igne ginauna nghali tongana ghilei bagra pea,
eghuteuna ginauna au glave biꞌo tagna.
20Nauthoglu igne ginauna phili tafri,
jateula kaisei mae te koꞌu te thaviru te theome tangomana te kegra haghera eghu.
Nauthoglu igne ginauna nghali tongana jateula suga naota te nghali tongana ka narane saeklon ra eghu.
Nakhibodi naiknore jateula nanhiꞌo biꞌo te tahu ra eghu ka thagrudi naiknore.
Nakhibo igne ginauna faꞌukadi mare pari,
eghuteuna mare na theome tangomana teke kegra haghe na.
21Ka narane igne, LORD ginauna paradi iheire te au nolaghi kligna,
nei iheire te funei ka nauthoglu igne.
22Mana ginauna kafe koko sorudi ke lamnagna kaisei khora glave biꞌo,
jateula iheire te au ke lamna suga sosolo ra eghu.
Eghuteuna mana ginauna botho lokmo diu jare ghilei thokeni narane nate paradi re.
23Ka narane igne, naprai ghe glaba gre ginauna jaola theome agha.
Naugna LORD mae ihei te au nolaghi fateote’o igne ginauna funei fruni jateula king eghu.
Mana ginauna funei Jerusalem ke kligna Thogele blahi Saion,
eghuteuna noda mae mala baubatu tahati igre ginauna filoni siasiglagna nogna nolaghi biꞌo mana na.
25Profet Isaia ne cheke fakelini LORD
1LORD, iagho nogu God iara.
Iara ginauna cheke fakeli nigho,
eghuteuna pala hagheni nanghamu iagho na.
Iagho edi koba gobigna lepo te biꞌo re,
la jaglo nodi fara naiknore.
Naugna iagho neke ghathodi funu tifa
te mala edi glepo igre,
iagho neke tajini fabrahu nou nhaꞌa cheke na.
2Iagho neke goigonidihi namono biꞌo ra
eghuteuna mare jateula bukrei chara eghu kolho.
Nodi vido mala poru mae naoka ra
iagho neke kafe paꞌe soruhi pari,
eghuteuna mare jateula bukrei thina eghu kolho.
Nodi suga te gnafa nodi king mare igre
la thono diꞌa fara gognarona,
eghuteuna mare ginauna na theome tangomana na teke babana fapulo na.
3Eghume naiknodi kantri
te au nodi nolaghi igre,
ginauna ghatho tahu nigho.
Naiknodi namono biꞌo
te paradi keha naikno gre,
ginauna mhaghu nigho.
4LORD, leuleghu fata kate thoke mei puhi biꞌo na,
naikno te kuma baludi iheire te theo nodi nolaghi igre,
ginauna rikha mei ka iagho mala poru.
Iagho jateula vido keli mala poru eghu ka narane te thoke mei saeklon na,
eghuteuna iagho jateula vido mala jemnu eghu kate brana naprai na,
naugna iheire te paradi keha naikno igre,
jateula nakhete biꞌo balu fila te soru mei ka nauthoglu ra eghu,
5ba jateula te brana te salaꞌui ka namono nagou ra eghu.
Nu iagho la loku fothohi foflodi re,
jateula gromno te toku tafruni naprai na
te mala theome soru mei nabrana ra eghu.
LORD ginauna fakarhi ghita
6Ka Thogele blahi Saion,
LORD mae ihei te au nolaghi fateote’o igne ginauna tarabana kaisei gaghamu biꞌo maladi naikno te gnafa ka nauthoglu igne.
Eghuteuna mana ginauna tarabana gano te keli nei waen te keli.
7Ka thogele blahi igne,
LORD ginauna hata koko gobigna lepo te mala diꞌanagnafadi naiknogna nauthoglu igne.
8LORD ginauna bobotho fabrahu u glehe na,
eghuteuna mana ginauna nuju koko kholo ka tathadi naikno te gnafare.
Eghuteuna mana ginauna hata fadelei mamaja te au ka naiknogna na.
LORD thegna ngala teke chekeni igne.
9Ka narane tuana, naiknore ginauna cheke eghu,
“LORD na noda God tahati!
Tahati au noda grouronu biꞌo ka mana te mala fakarhi ghita na.
Tahati thofno keli tada fara!”
10LORD ginauna doadofrani nei reireghini eghu Thogele blahi Saion.
Nu mana ginauna na tapla ke klignadi naiknodi Moab,
jateula buluka te tapla ke klignadi buburu eghuteuna buburu igre chakhi ka charagna thegnare lamna chopu ra eghu.
11Maedi Moab ginauna koko lao khamedire ke lamnadi chara igre jateula mae te tao te aflo khamegnare kate tao ka nhorora ra eghu.
Eghuteuna neuba mare ne fahaehaghe nei lalase neu,
nu God na ginauna hata fadelei ka mare nodi fahaehaghe nei glalase teu mare igre,
mala theo kaisei ka mare te eni kaisei glepo te keli na.
12Neuba namono Moab igre ne bara ne haghe kligna ne lithui ka thina biꞌo mala tangomana mare te poru lamna kate magra na neu,
nu God ginauna paꞌe soru pari mala jateula gaughavu glose ra eghu kolho.
26Khoje mala cheke fakelini LORD
1Ka narane igne, tahati te gnafa te au Juda ra ginauna kojeni khoje igne:
Tahati au noda namono te rheta!
Eghuteuna God fakarhi ghita,
jateula kaisei bara thina
te falithui namono na te reireghidi naiknore eghu.
2Tothora grengatha biꞌo ka namono igne,
mala iheire te leghuni fabrahu puhi te doglo na
tangomana te ruma mei!
3LORD, iheire te ghatho tahu nigho fabrahu,
ginauna toghodi mala au ka pharikeli,
naugna mare ne rouronu nigho fabrahu.
4Tahati mala rouronu ka LORD fabrahu,
naugna LORD na jateula noda Thina rheta mala poru eghu tahati,
eghuteuna mana ginauna au fabrahu tifa tifa.
5Mana tangomana te nhaꞌa faparini
ihei te fahaehagheni thegna na,
mala soru pari.
Namono te rheta te haghe fara na
mana tangomana te roꞌe soruni pari na,
mala jateula gaughavu glose eghu.
6Ka namono biꞌo igne, au ihei te kuma,
nei iheire te nigra mare paradi keha naiknore.
7LORD, iagho thofno doglo fara.
Eghuteuna leuleghu fata na iagho fadoglidi fabrahu
puhidi nou naiknore,
eghuteuna iagho jaola ei fabligi fabrahu
nakarhadi nou naiknore.
8Uve, ghehati thofno leghuni fara nou vetula iagho na.
Glepo ulu te magnahagheni ghehati na,
naiknore mala ghatho tahuni nanghamu iagho na.
9Leuleghu bongi na, iara magnahaghei nigho fara,
eghuteuna hamerane na,
tharungagu iara na magnahaghei te au balumu iagho.
Kate fateni iagho naiknogna nauthoglu igne,
mare ginauna laseni puhimu iagho te doglo na.
10Neuba iagho ne namhadi naikno te diꞌa igre,
mare ginauna na theome laseni kolho
puhimu iagho te doglo na.
Eghuteuna neuba mare ne au farihoteidi naikno te doglo igre,
mare ginauna leghudi fabrahu kolho puhi te diꞌare,
eghuteuna mare theome tangomana te filo glani nigho iagho King te haghe fara na.
11LORD!
Iagho ghae haghehi khamemu na paradi mare,
nu mare theome tangomana kolho te filo glani na.
Falase ranghidi sagho puhimu iagho te ghatho tahudi nou naiknore igne,
mala mamaja nodi naikno te leghudi puhi te diꞌa igre.
Eghuteuna iagho mala gahudi ka khaꞌaghi
teke kulu tarabanahi iagho maladi nou naoka re teku ia.
12LORD, iagho tusu ranghi ghami pharikeli,
naugna ka nou nolaghi iagho
te mala tangomana ghehati te edi re gloku te kelire.
13LORD! Iagho nomi God ghehati!
Keha fata, keha mae funei delei te funei fruni ghami na,
nu ghehati ghatho tahuni kolho nanghamu iagho na.
14Keha mae funei re la lehehi,
eghuteuna mare theome tangomana na teke karha teke fapulo mei na.
Iagho neke paradi nei goigonidihi neku mare,
eghuteuna theo kaisei naikno na teke ghathodire.
15LORD,
iagho neke eni nomi kantri ghehati igne
mala ke biꞌoi,
eghuteuna iagho neke tuthugha nohi ka vido te gnafa igre
mala tei fakhaba.
Naugna igne, ghehati fafnaknoni nanghamu iagho na!
16LORD! Kate mei te para ghami iagho na nou naikno themu gre,
ghehati ke ghatho fapulo ka iagho neke tarai ari ka iagho.
17Iagho neke ei ghami mala eha fabiꞌo,
jateula gaꞌase te kabru te tanhi
kate namo karha sua ra neu.
18Ghehati jateula te bukla ra eghu
eghuteuna ghehati figri tafri ka khabru igne
nu ghehati theome fakarhini kolho kaisei glepo.
Ghehati theome tangomana te fakarhini na nomi namono igne.
Uve, ghehati theome tangomana te uludi nomi naoka re.
19Ghotilo nogu naikno iara ra!
Kherada teke lehehi tifa ra,
ginauna nake karha fapulo kau glehe.
Ghotilo iheire te thuru lamna beku ra,
ghotilo ginauna dofra haghe glealeꞌa.
Jateula nakhete bongiro te soru mei
teke pila nei majaghani fapulo teu glosera eghu,
jateula tuana eghu
LORD ginauna nake fakarhidi iheire teke lehehi ra.
LORD ginauna fatedi naikno te gnafa ka nauthoglu igne
20Ghotilo nogu naikno iara ra!
Ghotilo ruma lamna ka nomi sugare eghuteuna bobotho grengatha re!
Ghotilo tei poru katha vido mala ghilei gnafa te diꞌatagna LORD igne.
21Mana ginauna soru mei funu kligna mala paradi naikno te gnafa ka nauthoglu igne eidi nakhibodi.
Puhi te falehe poru naikno igre ginauna kakhana,
eghuteuna dadaradi naikno te lehe ra ginauna kakhana ke kligna glose.
271Ka narane tuana,
LORD ginauna parani mogo biꞌo ka thongna te kiloi Leviatana.
Mana ginauna hata nogna naflahi fnonu na mala aknu falehe mogo igne.
2Ka narane tuana, LORD ginauna na cheke eghu,
“Naiknore na koje eigna nagare grep teke joꞌu iara te ure igne.
3Leuleghu fata na, iara reireghini nei faboubothuni eghu nagare grep igne bongi narane na,
mala theome tangomana kaisei naikno te mei goigoni na.
4Iara theome diꞌatagu ka nogu nagare igne.
Nu jame te au tagna buburu te diꞌa nei fachuchuru teu tagna na,
iara ginauna na kato mala koko lao ka khaꞌaghi.
5Eghuteuna jame te magnahaghei ghau iara nodi naoka nogu naikno iara igre te mala reireghidi na,
te keli na mare mei mala fadoglini balugu iara mala au ghehati kau pharikeli.”
6Ka narane igne nate mei,
Israel ginauna kotu jateula kaisei gaju te soru glathigna na ke lamna glose te keli,
eghuteuna karha keligna me fufunu ure teura eghu.
Eghuteuna nauthoglu igne ginauna fodu ka sisigna re.
7LORD na theome goigonidi kolho naiknodi Israel kani teke paradi mana re,
jateula teke paradi nei falehedi teku mana nodi naoka mae Israel ra.
8Puhi te para ghita na te khi fajifla ghita mana te mala tei kokoni tahati noda namono igne.
Uve, nolaghi te khi ghita mana igne jateula nolaghi gna nuri te brana te ghaghafa mei ke maghati ra eghu.
9Jame te magnahagheni God te hata fadeleidi nakhiboda re na,
tahati vikegna mae Jekop gre,
tahati ginauna paꞌe soru nodi olta keha god igre mala bruja ghilei vuhai nakrofu kolho.
Eghuteuna ginauna na theo kaisei mumuju god gaꞌase Asera ba kaisei olta mala gahu insens te au ka vido igne.
10Ka narane igne,
namono biꞌo te bara te lithui ka thina igne ginauna phaꞌe theo tokagna,
eghuteuna namono igne ginauna na jateula namono nagou te theo kaisei naikno te au tagna ra eghu filogna na.
Eghuteuna namono igne ginauna na kaisei nodi vido mala ghamu nei thuru eghu buluka.
Eghuteuna reꞌe ginauna ghamu fahui khakladi gaju te gnafa te au ka vido tuana.
11Kate kafe lehe te khoko soru pari gregedi gaju igre na,
goro gaꞌasere ginauna mei uge mala nodi gaju.
LORD neke toghodi naikno te au ka namono igne,
nu naugna mare ne theome filo glanini mana,
mana ginauna na theome kokhonidi nei keli ranghidi eghu mare.
12Ka narane tuana, LORD ginauna paradi naiknore funu ke raru Khoꞌu biꞌo Iufretis te posa ke mata nohi Ijep. Ginauna na jateula mae te koko khune wit te hata ganodi re te lisei fakeli ra eghu. LORD ginauna salofodu naiknodi Israel ka vido igne. 13Eghuteuna ka narane igne, kaisei mae ginauna kufli mala kafe kilodi vikeda teke hata teke tei mae naoka teke tei au Asiria nei Ijep, mala ke mei mala pogho soruni LORD ka Thogele Blahi Jerusalem.
28LORD ginauna paradi naiknodi Israel te au ke raru
1Kokhonidi fara naikno te au ka namono biꞌo Samaria!
Namono biꞌo te au ke kligna famane glogu igne ginauna thono diꞌa fara.
Naugna mae te mala baubatu igre koꞌu thaviru ka waen,
eghuteuna thiꞌadire fodu ka gano.
Neuba naiknodi Israel igre ne fahaehaghedi fara.
Nu mare ginauna balugna nodi famane taon igne na jateula famane khepi nafnakno teke hohoro goro sua ka flaoa ra eghu kolho.
Ginauna ghosei lehe nei boto eghu kolho.
2Filo ghami ghotilo ia!
LORD ginauna kuru mei kaisei mae nheta mala goigonini namono igne.
Mana ginauna mei jateula kaisei nakhete thina eghu,
ba jateula kaisei saeklon biꞌo,
ba jateula kaisei khoꞌu biꞌo te britha te mei te goigonidi gobigna lepo ra eghu.
3Mae igne ginauna mei goigoni fahui gobigna lepo te fahaehaghedi fara mae mala baubatu igre.
Uve, na jateula kaisei mae te tapla reureku khepi nafnakno teke hohoro ka flaoa ra eghu.
4Namono biꞌo Samaria te au ke kligna famane glogu igne,
keli fara jateula kaisei khepi flaoa eghu filogna na.
Nu ginauna na dofini jateula sisi gaju fig teke saro kulu te khoko pari te filoni naiknore te hata te ghamu ra eghu.
5Ka narane tuana,
LORD mae ihei te au nolaghi fateote’o igne ginauna jateula kaisei famane khepi eghu ranghidi nogna naikno te karha teu igre.
6Mana ginauna tusu lao gaoghatho te doglo ka iheire te lase fate,
eghuteuna mana ginauna toghodi nogna naiknore mala kegra heta nei reireghi fakeli eghu nodi namono na ka mae naoka.
7Hatimare mae profet nei hatimare mae pris teu igre jaola koꞌu thaviru ka waen,
eghuteuna mare theome tangomana te kegra haghe na,
theome tangomana te ghaoghatho fakeli na,
nei jaola theome tangomana te eni kaisei gloku na,
naugna mare koꞌu ne thaviru ka beer.
Mae profet gre koꞌu thaviru fara,
eghuteuna mare theome tangomana te filo glanidi re gaoghathodi mifi te fakakhana LORD ranghidire.
Mae pris gre jaola koꞌu thaviru,
eghuteuna mare theome tangomanadi te fadoglidi nodi puhi iheire te mei ka mare te mala toghodi teure.
8Nodi tevo mala ghamu re fodu ka gluꞌa,
eghuteuna theo kaisei vido te gae na.
9Kate nomhidi mare nogu cheke iara igre,
mare ne cheke eghu balu diꞌatadi ka iara,
“Mae igne magnahaghei te farirhiuni mae ihei signea?
Mae ihei gne te magnahaghei fanomho ka nogna cheke mana re?
Ghehati theome sua ikoi te chuꞌu nga teu ka idogna na ia sia!
10Mae igne jateula te farirhiudi goro sua te ikodi ra eghu chekedi cheke teke chekedila re eghu fabrahu!”
11Tutuani, jame te tirodi fanomho naikno igre ka iara na,
LORD ginauna snakredi naiknodi keha kantri delei te jafra fara nodi cheke are mala mei farirhiudi.
12Mana magnahaghei fara te tusu lao vido mala gnafa ka mare mala kafe glealeꞌa,
nu mare tirodi fara te fanomho ka mana na.
13Naugna igne nogna cheke LORD na ginauna na jateula mae ihei te farirhiudi goro sua ikodi te mala chekedi glepo tuarola eghu fabrahu kolho.
Igne na thono bligi fara te mala nomhi fakelini mare na.
Nu neuba, mare na theome leghuni kolho farirhiu igne.
Naugna igne, mare snoꞌo ke lamnagna nodi phighoro hatimare mae naoka,
eghuteuna mare theome tangomana te rikha na.
Nonomho ranghidi maedi Juda
14Eghume, famane fanomho mei ka nogna cheke LORD igne,
ghotilo mae mala baubatu te gnafa Jerusalem te lase cheke fahaehaghe ra!
15Naugna ghotilo neke chekeni te ghotilo neke eni kaisei nhaꞌa cheke balugna Glehe,
eghuteuna ghotilo jaola neke nhaꞌa cheke balugna Beku.
Eghume te ghathoni ghotilo na ghotilo ginauna na theome tangomana te lehe na jame te thoke ghami puhi biꞌo na,
naugna ghotilo rouronudi nomi cheke chaichaghi nei saosagro teu are nate fakarhi ghami na.
16Nu LORD God ne cheke eghu,
“Gognarona iara na lilisei kaisei thina maku te theo ka nghaligna agne Jerusalem.
Ka narane te babana iara nogu suga na,
iara na lilisei kaisei thina pari mala sutu haghegna suga igne.
Ihei te rouronu ka iara mae ihei teke lilisei gna thina igne na,
mana ginauna theome tangomana te nghali na.
17Puhi te doglo te mala fateni naikno na ginauna jateula gagha te mala ghogrei suga ia eghu.
Eghuteuna puhi te mala eni glepo te keli na jateula led te mala doglo gna gringni thina ia eghu.
Fila balu nakhete ginauna soru mei mala roꞌedi nomi cheke chaichaghi te rouronudi ghotilo are.
Eghuteuna khoꞌu biꞌo ginauna britha mala mei pala koko saosagro te ghathodi na fakarhi ghami teu ghotilo are.
18Iara ginauna hata koko nhaꞌa cheke teke eni ghotilo balugna Glehe igne.
Eghuteuna iara ginauna na jaola hata koko nhaꞌa cheke teke eni ghotilo ka Beku igne.
Eghuteuna kate thoke mei puhi biꞌo jateula goighovi teu ka ghotilo igne,
ghotilo ginauna theome tangomana te poru na,
puhi biꞌo igne ginauna mei goigoni ghami ghotilo.
19Bongi narane na puhi biꞌo igne ginauna thoke ghami ghotilo ka namono igne.”
Iheire naikno te lase fakelini gaoghathogna nogna cheke LORD igne,
ginauna mhaghu nodi fara.
20Ghotilo ginauna na jateula ihei te fariuriu thuru ka sape te sokmo ia eghu,
ba fariuriu totoku ka nabreku pohe te ikoi fara ra eghu.
21LORD ginauna goigoni ghami ghotilo jateula teke eni mana tifa Filistia ka thogele Perasim nei ka naiknodi Amo ka sare biꞌo Gebiꞌon.
Gloku teke ghathoni mala eni teku igne,
filogna na ginauna thono jafra ka unha teke filodi ghotilo tifa ra.
22Gognarona ghotilo thosei cheke faparini nogu cheke iara igne,
te theo ghotilo na naꞌau papara malami ghotilo teku igne.
Eghuteuna ginauna na thono diꞌa fara ka unha LORD mae ihei te au nolaghi fateote’o igne tela chekehi te mala goigonidi vido te gnafa ka noda namono tahati igne.
LORD na lalase fara
23Ghotilo famane fanomho fakeli ka nogu cheke iara igre!
24Ihei te loku ka nagare na, mana theome tangomana te fiti dokha kolho glose na.
Theo. Nu mana mala joꞌu keha gano tagna.
25Kate hou te gnafa na,
mana na kulu joꞌu sisi te kilodi,
dil nei kamin,
eghuteuna ke leghu na,
mana na joꞌu sisi wit nei bali.
Eghuteuna ka gerigna thobi na,
mana na jaola joꞌu keha nafnata wit.
26Mae igne laseni fara puhi te mala edi gloku igre,
naugna God neke farirhiuni mana.
27Eghuteuna mana na theome hata gaju biꞌo te mala kuri dil nei kamin teu igre te mala jifla mei ganogna na.
Nu mana na hata gaju ikoi kolho te mala eni igne na.
28Kate hata flaoa ka wit te mala eni bret na,
mana na theome ghorhu wit igne ghilei theo nafugna.
Mana magnahaghei te kotu gano te keli,
nu mana theome magnahaghei te goigoni gano na ame ghamu nga teuna.
29LORD mae ihei te au nolaghi fateote’o igne mana thono lalase fara,
nei mana laseni fara te tusu mei gaoghatho te keli ka tahati na.
Eghuteuna gaoghatho te keli igne mei funu ka LORD.
29LORD ginauna paradi naiknodi Jerusalem
1LORD ne cheke eghu,
“Kokhoni ghami fara ghotilo naikno te au Jerusalem ka namono gna King Devet ra!
Leuleghu finogha na ghotilo eꞌei gaghamu biꞌo tagna.
2Nu iara ginauna mei goigoni ni Jerusalem,
eghuteuna ghotilo ginauna au papara nei tanhi eghu koba.
Eghuteuna namono igne ginauna jateula nogu olta iara te fodu ka dadara ra eghu.
3Iara ginauna lilisei armi faligohoni Jerusalem mala magra ka ghotilo.
Mare ginauna nanhaꞌa thina nei glose eghu pari ka pesi baragna namono na mala bligi mare te apla te ruma lamna na.
4Namono igne ginauna thono diꞌa fara jateula mae ihei tela lehehi te fariuriu cheke mei ke pari glose ra eghu.
5“Nu nomi naoka ghotilo igre ginauna kokhonidi fara.
Mare ginauna na jateula gaughavu eghu kolho.
Uve, mare ginauna na jateula khune wit te moja te flalo te tei ka nuri ra eghu.
6LORD mae ihei te au nolaghi fateote’o igne ginauna mei balu fila nei nakheu biꞌo,
nei maraghata biꞌo, nuri biꞌo, nei khaꞌaghi biꞌo eghu.
Glepo igre ginauna mei mala goigonidi gobigna lepo re.
7Eghuteuna eidi keha kantri te magra ka ghotilo ke lamnagna Jerusalem igre ginauna na jateula kaisei mifi te filoni bongiro,
nu ke ghatho ihoni teu ra eghu kolho theo nafugna.
8Mae soldia igre ginauna na jateula kaisei mae te rofo fara,
eghuteuna mifi ne ghamu ne bohohi teunu kate dofra haghe na mana rofou kolho.
Uve, mare ginauna na jateula mae te roi koꞌu fara,
eghuteuna mifi ne koꞌuhi eghu,
nu kate dofra haghe na mana glaꞌe fara naugna mana ne theome koꞌu kolho.
Mae armidi ka kantri nate mei magra Jerusalem igre ginauna na jateula igne eghu kolho.”
Naiknore theome fanomho ka mae profet
9Ghotilo naiknomi Juda nei Jerusalem!
Eni si ghotilo unha te magnahaghei na mala fameomekro nomi.
Ghotilo theome dofu, nu ghotilo nolo tafri jateula mae te dofura eghu.
Ghotilo theome koꞌu waen,
nu ghotilo jateula mae te koꞌu te thaviru ka waen nei beer teu te theome tei fadoglo ra neu.
10LORD neke edi tathami ghotilo re mala kukape,
eghuteuna au jateula mae te thuru iho fara ra eghu.
Eghuteuna LORD jaola fadodofu tathadi mae profet igre mala theome tangomana mare te filoni kaisei glepo te keli nei theome togho ghami ghotilo te mala tei ka nabrou te doglo na.
11Gaoghathodi mifi te gnafa igre ginauna poru ka ghotilo, naugna ghotilo themi na jateula te bobothohi eghu chekegna God te au ke lamnagna kaisei buka na. Jame tusu lao ghotilo buka igne ka ihei te lase iu’iju na, eghuteuna toreni mana mala iu’iju teuna, mana ginauna na cheke eghu, “Iara theome laseni. Buka igne la bobothohi.” 12Eghuteuna jame te tusu lao ghotilo buka igne ka mae ihei te theome lase iu’iju na, mana ginauna cheke eghu, “Iara theome laseni igne. Iara theome lase iu’iju.”
13LORD ne cheke eghu ka iara,
“Naikno igre fafnakno ghau iara ka cheke,
nu gaoghathodire thono khaba fara ka iara.
Puhidi mare te mala fafnakno ghau iara na leghuni kolho nogna vetula naikno na.
14Eghume iara ginauna edi kmana glepo nate jaglo nodi fara mare na.
Iara ginauna goigoni nodi glalase iheire te lalase,
eghuteuna iara ginauna jaola fagnafadi nodi glalase mae iheire te au nodi glalase igre.”
15Tore! Kokhoni ghami fara ghotilo iheire te fariuriu pophoru ka LORD nomi gaoghatho te diꞌare. Ba?
Na theo kaisei naikno nate filodi nomi gloku nei puhimi eghu te diꞌa tuare neu si ghotilo ia?
16Nu nomi gaoghatho ghotilo igne figri fadiꞌa gobigna lepo igre.
Unha gne te ulu ka phei glepo igre?
Suspen gne ba naikno teke hohorogna suspen tuana? Ba?
Glepo teke hohoro mana igne tangomana te cheke eghu ka naikno na,
“Thosei hohoro ghau iara?”
Suspen na theome tangomana te cheke eghu ka mae teke hohorogna na,
“Iagho theome laseni kaisei glepo!”
17Uve, na theome raugha,
namhata biꞌo ka namono Lebanon igne ginauna famane glose mala joꞌu gano.
Eghuteuna vido aheva te au famane nagare gognarogne ginauna nake soro fapulo.
18Ka narane tuana,
iheire te meglire ginauna nake nomhidi cheke te au ka buka na igre.
Eghuteuna iheire te dofu te au teu kate romno re,
ginauna nake fifilo fapulo.
19Eghuteuna naikno te kuma te theome fnakno nanghadire ginauna glealeꞌa fara balu ragi,
naugna LORD na nodi God Blahi mae Israel.
20Nu naikno te paradi keha naiknore igre,
LORD ginauna paradi fara.
Ihei te cheke fadiꞌani puhi te doglo na ginauna ari theo nafugna.
Eghuteuna iheire te eni fabrahu puhi te diꞌa na,
LORD ginauna paradi fara mare.
21Ihei te cheke chaghidi keha naiknore ka fate,
nei iheire te chaghi te mala lus ihei te doglo ka fate na,
LORD jaola ginauna paradi fara mare.
22Eghume gognarona LORD noda God tahati vikegna mae Jekop mae ihei teke fakarhini mae Ebraham ka puhi biꞌo na neke cheke eghu ka ghotilo naiknomi Israel,
“Ghotilo vikegna mae Jekop ra,
ghotilo ginauna theome mamaja,
eghuteuna tathami nei foflomi teu ghotilo are ginauna glealeꞌa fara.
23Kate filodi ghotilo goro sua nate kuru ari iara ka ghotilo are,
ghotilo ginauna lase ghau iara te nomi God Blahi ghotilo vikegna mae Jekop,
eghuteuna puhigu iara na thofno doglo fara.
Eghuteuna ghotilo ginauna ghatho tahu ghau iara nomi God ghotilo maemi Israel.
24Naikno te theome muana gaoghathogna nei ihei te khuru cheke teu igne,
ginauna lase fakeli ghau iara nei ginauna leghudi nogu farirhiu iara re.”
30Ijep ginauna theome toghoni Juda
1Igne nogna nonomho LORD. Mana neke cheke eghu,
“Kokhoni ghami fara ghotilo mae mala baubatu te patugama fara ra!
Naugna ghotilo ne leghuni kolho nomi gaoghatho themi te theome nogu gaoghatho iara na.
Eghuteuna ghotilo nhaꞌa cheke baludi keha kantri delei mala togho ghami ka magra.
Igne theome leghuni nogu gaoghatho iara na, naugna igne ghotilo tapla jafra fabrahu ka nakhibo.
2Leuleghu fata na,
ghotilo tei ka mae king gna Ijep mala toreni nogna farirhiu mana na,
nu ghotilo theome kulu mei tore ghau iara.
Uve, leuleghu fata na ghotilo toreni mana kolho te mala reireghi ghami ka mae naoka na.
3Nu ghotilo ginauna mamaja nomi fara,
naugna king ginauna theome togho ghami ka unha te magnahagheni ghotilo na.
Uve, mana ginauna na theome togho ghami ghotilo ka nomi naokare,
eghuteuna ghotilo ginauna kokhoni ghami ka mare.
4Nomi mae funei ghotilore la kulu teihi ke raru namono biꞌo Soa,
eghuteuna mae mala hata nonomhore la teihi ke mata Hanes mala hara thotogho heva heva ka kantri Ijep.
5Nu neuba ngau, ghotilo ginauna mamaja nomi,
naugna Ijep na theome togho ghami ghotilo.
Uve, mana ginauna theome fakarhi ghami ghotilo,
eghuteuna mae naokare ginauna goigoni ghami ghotilo fara.”
6Igne nogna nonomho LORD eidi glepo te tautagu te au Negev ke mata Juda. LORD neke cheke eghu,
“Namono nagou igne fodu ka lion nei ka mogo te faghughumhu eghu tagna.
Mae te mala hata nonomho igre mare luja nodi dedei nei glepo te keli teure ka dongki nei kamel mala tei ka vido igne.
Mare hata tei glepo igre jateula namha eghu ka kantri Ijep te theome toghodi kolho mare igne.
7Nu Ijep theome tangomana te togho ghami ghotilo na.
Gaoghathodi mare na, nheta fara jateula mogo biꞌo fara te au ka thongna te kiloi Rehab.
Nu LORD na kilodi mare, Theo nafudi,
naugna mare ne gnokro kolho ne theo kaisei nodi nolaghi te mala togho ghami ghotilo na.”
Naiknore tirodi fanomho
8LORD ne cheke eghu ka iara,
“Iagho rioriso soru thoutonu eigna nakarhadi naikno igre ka kaisei buka mala iu’ijuni fabrahu kate mei naiknore.
9Naikno igre patugama fara eghuteuna leuleghu fata na jateula sua te chaghi nei theome fanomho teura eghu.
Uve, mare theome leghuni nogu farirhiu iara LORD.
10Leuleghu fata na naiknore tangomana te cheke eghu ka nogu mae profet iara igre na,
‘Ghotilo mae profet ra thosei filodi mifi are!
Ghotilo mala fakakhana ka ghehati puhi te doglo igne!
Ghotilo mala chekeni kolho unha te magnahaghei nomhini ghehati na!
Uve, ghehati magnahaghei nomhidi kolho famane chekere.
11Ghotilo mae profet ra thosei toutonuni mei ka ghehati.
Ghehati theome magnahaghei te nomhidi thua nafnata cheke eigna God te Blahi gna Israel!’ ”
12Nu igne unha te chekeni God te Blahi gna Israel,
“Ghotilo tirominihi nogu cheke iara na,
eghuteuna ghotilo fatutuanini fara puhi te chaichaghi nei cheke famaemahe teu igne nate togho ghami na.
13Ghotilo la tapla jafrahi ka nakhibo,
eghuteuna nakhibo na jateula kaisei bara thina eghu theome tangomana te fakarhi ghami ghotilo na,
nu jare na au kaisei khora biꞌo tarabanau te mala snoꞌo ghotilo tagna na.
14Uve, puhimi ghotilo te diꞌa igne ginauna theome togho ghami ghotilo jateula suspen te phosa te theo kaisei naikno te lilisei kaisei glepo tagna ra eghu.”
15LORD nodi God maedi Israel te blahi igne, mana cheke eghu fabrahu,
“Jame te koko ghotilo puhimi te diꞌare teke figri mei ka iara na,
iara ginauna na fakarhi ghami ghotilo.
Uve, jame te fatutuani ghau iara ghotilo te au kmu ka puhigu iara na,
iara ginauna na farerheta ghami ghotilo.
Nu ghotilo tiromi te eni igne na!
16Ghotilo ne keli neu eghu ka gaoghathomi re,
naugna ghotilo rouronu ka hose te mala rikhadi nomi naokare.
Nu te chekeni iara na,
neubane rikha ghotilo,
nodi hose mae naoka igre umhu fara salaꞌudi nomi hose ghotilore.
17Eghuteuna jame te filoni ghotilo kaisei nodi soldia mae naoka re,
kaisei thogha mae ka ghotilo ginauna rikha,
naugna ghotilo ne mhaghuni mana.
Jame te filodi ghotilo glima mae ka mare na,
ghotilo te gnafa na ginauna na kafe rikha.
Eghuteuna keha ka ghotilo kolho nate karha te mala jateula kaisei gaju flagi te kegra sopa thegna ka thogele ra teuna.”
18Nu LORD na kokhoni ghami ghotilo.
Leuleghu fata na mana eni koba glepo te doglo na.
Eghuteuna ihei te fatutuani ni mana na,
mana ginauna glealeꞌa nogna fara.
LORD ginauna toghodi nogna naiknore
19Ghotilo naiknomi Jerusalem! LORD na kokhoni ghami ghotilo. Ghotilo ginauna nake theome tanhi nei diꞌanagnafa eghu. Naugna LORD ginauna nomhi ghami ghotilo ka vido te tanhi ghotilo ka mana te mala togho ghami na. 20Tutuani, LORD ginauna snakre ghami ghotilo mala au ke lamnadi vido te ninhigrana. Nu LORD thegna au jare mala farirhiu ghami ghotilo, eghume ghotilo ginauna theome tangomana te hironi mana na, naugna mana nate au balumi fabrahu. 21Neuba ghotilo ne figri fei mairi ba fei nheta, ghotilo ginauna tangomana te nomhini naoglagna mana te cheke eghu mei ke leghumi na, “Igne nogu nabrou iara na. Leghuni!” 22Eghuteuna mumuju god te toku tafru ghotilo ka silva nei gol teu igre, ghotilo ginauna koko jateula glepo te diꞌa ra eghu. Ghotilo ginauna koko glepo igre na cheke eghu ka mare, “Iara tirogu nigho fara.”
23Ka narane tuana, LORD ginauna kuru soru mei nakhete mala karha unha teke joꞌu ghotilo ka nagare ra. Ghotilo ginauna au ghemi kmana gano, eghuteuna nomi buluka, sipu, nanigot nei hose teu are ginauna na jaola au ghedi kmana buburu te mala ghamu na. 24Nomi buluka nei dongki teu te mala dokha glose ka nagare na are ginauna ghamu gano te keli mala nheta. 25Jaola, ka narane tuana, neubane lehe kmana naikno eghuteuna nomi vido mala poru ghotilore ginauna thono diꞌa fara neu. Nu glokha khoꞌu are ginauna loloro soru ka gukhu te gnafa nei ka thogele te gnafa teu are. 26Fei bongiro na glaba gne ginauna phae jateula naprai eghu, eghuteuna fei narane na, naprai gne ginauna brana salaꞌuni fitu fata. Glepo igre ginauna thakle mei kate fakeli fapulodi LORD thubu teke paradi mana nogna naiknore.
LORD ginauna paradi maedi Asiria
27Filo ghotilo ia! LORD mae ihei te au nolaghi fateote’o igne,
mana mei funugna ka vido te khaba fara balu nogna nafnakno biꞌo.
Eghuteuna tahati tangomana te filoni mana te mei jateula kaisei maraghata biꞌo teuna.
Diꞌatagna mana igne jateula kaisei nuri biꞌo te namo mei te goigonidi gobigna lepo ra eghu.
Eghuteuna nogna cheke mana na ginauna jateula khaꞌaghi biꞌo eghu naugna mana ne thono diꞌatagna fara.
28Phangagna mana na goigonidi gobigna lepore,
jateula khoꞌu biꞌo te britha te goigonidi gobigna lepo te ghilei haghe ka graragna naikno na ia eghu.
Phanga igne ginauna goigonidi gnafa naikno te gnafa ka keha kantri igre.
Eghuteuna mana ginauna huhurudi mare mala tei au delei ka vido aheva mare te theome magnahaghei te tei au tagna.
29Nu tahati nogna naikno LORD ra tahati ginauna na glealeꞌa fara nei koje jateula te koje tahati ka Gaghamu Blahi ra eghu.
Ginauna tahati glealeꞌa fara jateula naikno te fanomho ka khoje nifu te koje te tei ka nogna thogele blahi LORD ra eghu.
Naugna mana noda Thina rheta nei noda vido keli mala poru eghu tahati maeda Israel.
30Nu LORD mae ihei te noda King tahati igne,
mana toghodi nogna naiknore mala nomhini naoglagna mana te biꞌo na.
Eghuteuna mana ginauna na fakakhana nogna nolaghi biꞌo te jateula khaꞌaghi te ghamu fahui gobigna lepo fateo ra teuna ka mare.
Mana ginauna mei jateula fila eghu soru mei balu nakhete thina.
31Ka narane igne, naiknodi Asiria ginauna mhaghu nodi fara kate nomhini naoglagna LORD na.
Eghuteuna mana ginauna paradi naikno te gnafare ka nogna nolaghi na.
32Eghuteuna kate falehedi LORD naiknodi Asiria igre ka magra na,
tahati nogna naikno LORD ra ginauna glealeꞌa nei koje ka gita nei belo.
33LORD tarabanahi kaisei glave biꞌo mala horo khaꞌaghi mala gnubrani king biꞌogna Asiria.
Glave igne mamhara fara, eghuteuna mare tarabanahi kmana gaju jare.
Eghuteuna LORD ginauna phanga mei khaꞌaghi brana.
Naugna phaphanga gna LORD na brana fara jateula khaꞌaghi eghu.
31LORD ginauna reireghini Jerusalem
1Kokhoni ghami fara ghotilo naikno te soru te hiro thotogho Ijep are!
Ba, ginauna na togho ghami nodi hose baludi chariot nei mae soldia te saghe ka hose na are neu si ghotilo ia?
Theo fara! LORD nodi God te Blahi maedi Israel,
nu ghotilo theome rouronuni mana kolho ba toreni mana mala togho ghami.
2LORD na mae glalase fara,
eghuteuna mana theome tangomana teke tughu nogna nhaꞌa cheke te mala goigonidi naikno te diꞌare.
Mana ginauna snakre mei puhi biꞌo mala thokedi iheire te fariuriu toghodi naikno te diꞌare eghuteuna mana ginauna paradi mare.
3Naiknodi Ijep igre theome god,
nu mare naikno kolho.
Eghuteuna nodi hose re glepo tautagu kolho,
reꞌe jaola tangomana te lehe na.
Ka narane te fakakhana LORD nogna nolaghi na,
mana ginauna goigonidi naiknodi Ijep ka magra.
Mana ginauna jaola goigonidi iheire te rouronu kolho ka naiknodi Ijep.
4Eigna LORD na neke cheke eghuhi,
“Iara ginauna mei jateula kaisei lion te theome mhaghuni kaisei glepo ra eghu.
Neuba mae iheire te reireghi sipu igre ne eha ba ne fariuriu reireghi fakelidi nodi sipu re,
nu lion igne na ginauna mei magra ka mare.
Igne unha nate eni iara LORD mae ihei te au nolaghi fateote’o igne ka iheire te au ka Thogele Saion.
5Iara LORD mae ihei te au nolaghi fateote’o,
iara reireghini Jerusalem jateula nanghaji te flalo ke kligna gnoku te mala reireghini nogna gnoku na ia eghu.
Iara ginauna jateula kaisei greoreo eghu tei salaꞌu ke kligna gna namono biꞌo Jerusalem mala fakarhadi.”
6Ghotilo maemi Israel! Ghotilo ke pulo ka nomi God, mae ihei teke tei kokoni ghotilo ia. 7Na theome raugha ghotilo naikno te diꞌara ginauna tiromidi mumuju god teke horo ghotilo ka gol nei silva.
8LORD ginauna aknu falehe naiknodi Asiria ka magra,
theome ka nogna nolaghi naikno.
Mare ginauna fariuriu rikha,
nu mae naoka ginauna lokidi mae majaghani te nhetadi Asiria mala nodi naikno sneka.
9King gna Asiria baludi nogna mae funeidi armi igre ginauna mhaghu fara na rikha ka magra,
naugna mare na filoni nogna flagi LORD na ke kligna Jerusalem.
Uve, ke kligna Thogele Saion,
igne ngala vido te mala gahu fafara te mala pogho soruni LORD na.
Igne chekegna LORD.
32Kaisei mae king ginauna funei ka puhi te doglo
1Kaisei king ginauna funei ka puhi te thofno doglo fara.
Eghuteuna nogna mae funei re ginauna jaola funei ka puhi te doglo.
2Mae igre jateula kaisei vido te rheta te mala poru ka nuri nei nakhete teura eghu.
Mae igre ginauna na jateula glokha khoꞌu te fura haghe ka namono nagou ra eghu,
ba jateula kaisei naungo thina biꞌo te mala poru ka naprai ra eghu.
3Gognarona mare tangomana te filo glani nei jaola nomhini teu chekegna God na.
4Neuba iheire te theome ghaoghatho fakeli gognaro igre,
mare ginauna lasedi glepo igre.
Eghuteuna iheire te theome lase cheke fakeli igre,
ginauna nodi cheke re na famane glola fakeli.
5Naiknore ginauna theome ghatho tahudi naikno te fameomekro re,
eghuteuna na theome fafnaknodi iheire te cheke chaichaghi.
6Leuleghu fata na naikno te fameomekro na cheke fajiflani kolho cheke te fameomekro na,
eghuteuna ghathoni kolho te mala eni puhi te diꞌa na.
Mana leghuni fabrahu puhi te diꞌa na,
eghuteuna toutonu tafri cheke te chaichaghi eigna LORD.
Mana theome faghamudi ihei te rofo,
ba theome fakoꞌudi iheire te roi koꞌu.
7Puhigna mae te chaichaghi igne jaola diꞌa fara,
eghuteuna leuleghu fata na mana ghaoghaho te mala goigonidi naikno te kuma re, neuba mare ne doglo neu kolho.
8Nu mae te keli na sasaꞌa te mala toghodi keha naiknore,
eghuteuna leuleghu fata na mana ghaoghatho te mala edi glepo te kelire.
LORD ginauna fahuini narane te ninhigrana na
9Ghotilo goro gaꞌasemi Jerusalem!
Fanomho fakeli ka nogna cheke LORD igne.
Leuleghu fata na ghotilo ne au blagna nomi neu eghu gaoghathomi na ne theome fanomho ka unha te chekeni iara igne.
10Gognarona ghotilo glealeꞌa fara naugna ghotilo ne snori nomi,
nu ka finogha te mei gne la ghotilo ginauna nanga nomi fara.
Naugna nomi nagare grep ghotilo are ginauna theome ure.
Eghuteuna theo kaisei nafnata gano nate karha ka nagare ghotilo re.
11Ghotilo goro gaꞌase te au fakeli gognaro igre ginauna mhaghu nomi nei nanga nomi eghu.
Eghuteuna ghotilo ginauna koko nomi famane pohe are mala pipichi ka pohe te thona mala tanhi nei diꞌanagnafa eghu.
12Ghotilo ginauna tutidi babangomi are fagaglana gna nomi diꞌanagnafa na.
Naugna ka narane tuare nomi nagare grep ghotilo are ginauna theome ure.
13Eghuteuna ghotilo ginauna na tanhi nei diꞌanagnafa eghu fabrahu,
naugna nodi namono nogu naikno iara re ginauna thafru ka gnarho phono nei buburu te diꞌa eghu.
Eghuteuna ghotilo na tanhidi suga te gnafa teke glealeꞌadi naiknore tifa ra.
14Nogna suga biꞌo king igne baludi vido rheta te mala poru,
nei nodi suga mala toetoe teu mae soldia igre ginauna krogha.
Eghuteuna namono biꞌo igne ginauna mala nodi vido mala nairu dongki, nei nodi vido mala ghamu sipu tagna.
15Gobigna lepo igre ginauna eghu fabrahu ghilei thoke mei narane LORD nate kuru mei funu kligna Tharunga gna na ka tahati.
Ka narane tuana, ginauna na jateula namono nagou te famane vido te mala joꞌu ganora eghu,
eghuteuna nagare re ginauna famane karha kelidi fara.
16Naikno te gnafa ka namono igne ginauna leghuni puhi te doglo na,
eghuteuna edi fabrahu kolho glepo te keli re ranghidi keha naiknore.
17Eghuteuna naugna te leghuni mare puhi te doglo na,
mare ginauna au fabrahu ka pharikeli,
eghuteuna mare ginauna au fakeli fabrahu na theome ghathoni kaisei glepo.
18Nogu naikno iara re ginauna au fakeli nodi ka nodi sugare,
eghuteuna theome tangomana kaisei glepo te diꞌa nate thokedire.
19Neubane soru mei nakhete thina na ne goigonidi gaju re,
neuba mae naokare ne mei goigonini namono biꞌo igne,
20nu nogu naikno iara re ginauna snori nodi kolho.
Naugna LORD na fablahidi nodi nagare te au ka geri khoꞌu biꞌo.
Nodi buluka nei nodi dongki teure ginauna au ghedi kmana gano te keli te mala ghamu na.
Eghuteuna reꞌe ginauna nolo tafri kolho ka vido igne.
33Tore thotogho ka LORD
1Kokhoni ghami fara ghotilo iheire te fakokhoanadi keha naikno ra!
Ghotilo eni koba puhi igne ka keha naiknore,
naugna theo kaisei naikno te eni nafnata puhi igne ka ghotilo na.
Kokhoni ghami fara ghotilo te eni nafnata puhi te diꞌa igne ka kherami fofodu are!
Ghotilo eni koba puhi igne,
naugna theo kaisei naikno te eni kaisei najafra ka ghotilo na.
Nu kate goigonidi ghotilo keha naiknore,
mare ginauna na jaola ke goigoni ghamila ghotilo.
Eghuteuna kate eni fadiꞌa ghotilo ranghidi kherami fofodu re,
mare ginauna nake jaola nake enila unha puhi te diꞌa na ranghi ghami ghotilo.
2LORD, kokhoni ghami ghehati.
Iagho ngala te ronu nigho ghehati na.
Farheta ghami leuleghu narane,
fakarhi ghami ka hoholo.
3Naoglamu iagho na jateula fila eghu,
eghuteuna kate nomhi nigho naiknodi keha kantri re,
mare ginauna rikha.
Kate fakakhana iagho nou nolaghi biꞌo na,
mare ginauna mhaghu rikha.
4Ghotilo naikno ra! Kate rikha ghotilo na,
mae naokare ginauna mei na jateula cheche te ghamu fateo gobigna lepo ka nagare ra eghu ghosei mei hata fahui nomi gobigna lepo ghotilo teke uludi ka magra ra.
5LORD na haghe fara,
eghuteuna mana au ka vido te haghe fara.
Eghuteuna mana ginauna toghodi maedi Israel
mala leghuni mare puhi te doglo na,
eghuteuna mana fate ka puhi te doglo.
6LORD ginauna jateula thina rheta eghu,
mala theome tangomana ghotilo te uka pari na.
Puhi teke fakarhi ghami nei tusu ranghi ghami gaoghatho te keli nei glalase teu mana igne,
tuana jateula taba biꞌo eghu te hata ghotilo ka LORD na,
kate ghatho tahuni ghotilo LORD na.
7Filo si ghotilo! Nodi mae nheta mare te frane ka magra na mare chari tafri leghudi nabrou re Jerusalem,
eghuteuna mare tanhi mala toghodi.
Eghuteuna mae iheire teke fariuriu mala au ka pharikeli tekura la tanhi fabiꞌo fara.
8Theo kaisei naikno te leghudi nabrougna kantri igne,
naugna thono faꞌiho fara te mala leghudire.
Eghuteuna mare la huhughudihi u nhaꞌa cheke teke edi mare ka naiknodi keha kantri ra,
eghuteuna theo kaisei naikno te ghatho tahudi naikno te tajini nhaꞌa cheke igne.
9Nagare te au ka glose igne ra la dofidi,
eghuteuna theo kaisei naikno te loku tagna na.
Gaju biꞌo te au ka namhata gna kantri Lebanon ra la mojadila.
Famane glose Saron ia la mojahi jateula namono nagou te falithuini Thongna Lehe ia eghu,
eghuteuna khakladi gaju te gnafa Besan ghe Kamel ra la jaola la kafe brusu soru.
LORD cheke faheta ranghidi nogna naokare
10LORD ne cheke eghu ka nogna naiknodi keha kantri re,
“Gognarona iara falase ari ka ghotilo iara te au nolaghi fateoteꞌo na,
eghuteuna naikno te gnafa ka nauthoglu igne ginauna cheke fakeli ghau iara.
11Unha te ghathodi ghotilo re ginauna theo nafudi jateula buburu te gnhagha te ghamu fateo khaꞌaghira eghu kolho.
12Iara ginauna goigoni ghami ghotilo mala jateula glaje te ghamu khaꞌaghi te vuhai kheru ra eghu,
ba gnarho fachuchuru te gnhubra te vuhai nakrofu ra eghu kolho.”
13Filo mei si ghotilo ka gloku biꞌo teke edi iara igre,
ghotilo iheire te au namo nei ghotilo iheire te au khaba teura!
Uve, ghotilo jame filo glani ni nogu nolaghi iara na!
14Gognarona naiknodi Jerusalem te leghuni puhi nakhibo na mare nanga nodi nei mhaghu nodi eghu fara,
eghuteuna mare neke cheke eghu,
“Nogna faefate LORD na jateula khaꞌaghi te brana fara te gnhubra fateo gobigna lepora eghu,
eghuteuna theome tangomana kaisei naikno naba te lao au namo rhegna khaꞌaghi igne.”
15Ihei te eni puhi te doglo na,
eghuteuna chekeni koba unha te tutuani na,
nei ihei te tirogna huhurudi naiknore mala hata seleni tadi ka puhi te theome keli,
ba theome snakredi keha naiknore mala cheke famaemahe mala hata seleni,
nei tirogna gnokro baludi naikno te rogheni puhi te mala falehe poruni naikno na teuna.
Mae igne ngala te theome ghathoni te mala edi nafnata puhi te diꞌa re.
16Nafnata naikno igne nate au fakeli ka kaisei vido te rheta te mala poru ka thogele holoro,
eghuteuna mana ginauna au kmana ghegna gano nei khoꞌu eghu.
Uve, mana ginauna au nogna gobigna lepo te magnahaghedi manare.
LORD na mae King
17Ghotilo nogu naikno iara ra!
Ghotilo ginauna filoni kaisei mae king te fnakno fara kligna lahu,
eghuteuna mana ginauna funei frunidi vido te gnafa ka kantri igne.
18Ghotilo ginauna theome mhaghudi mae naoka nate funei fruni ghami,
nei huhuru ghami mala foli takis teu are.
19Ghotilo ginauna theome filodi mae naoka te fahaehaghe fara te nhogri ka ghotilo nodi cheke re.
20Ghotilo filoni Jerusalem.
Namono aheva te mala ei gaghamu biꞌo nei tarai teu tahati ia.
Igne kaisei namono keli mala poru tahati tagna mala au kau pharikeli.
Ginauna na jateula kaisei suga tapuale te theome tangomana kaisei naikno te rathu koko khegra te loku famaku gnarho gna suga igne,
eghuteuna gnarho igne na theome tangomana te khusu na.
21Ka vido igne nate au LORD noda God tahati mae ihei te nolaghi fara na.
Eghuteuna mana ginauna reireghi ghita jateula kaisei khoꞌu biꞌo te au faligoho ghita ra eghu.
Eghuteuna theome tangomana kaisei nodi vaka mae naoka gre nate mei namo ka tahati na.
22LORD na noda king tahati,
eghuteuna mana fate ghita ka puhi te doglo.
Mana farirhiu ghita nogna vetula re eghuteuna mana ginauna na fakarhi ghita.
23Gognarona ghotilo naikno te au Juda ra,
ghotilo jateula kaisei vaka te diꞌa phukrigna re te theome loku famaku ka khegragna ra eghu.
Eghuteuna selogna re jaola blogho kolho.
Nu kate thoke mei narane na, ghotilo ginauna hata kmana glepo te keli ka mae naoka.
Eghuteuna neuba mae te blughu ghahegna na,
mae igne ginauna jaola hata nogna glepo te keli.
24Ka narane tuana,
theo kaisei naikno ka kantri tuana nate chekeni,
“Iara fogra sia” teuna,
naugna LORD ginauna hata koko nakhibodi naiknogna namono tuana.
34LORD ginauna paradi nogna naokare
1Ghotilo naikno te gnafa te au ka keha kantri ra!
Ghotilo mei fanomho fakeli!
Uve, naikno te gnafa,
nei gobigna lepo te gnafa teu ka nauthoglu igne ra kafe fanomho mei.
2LORD na diꞌatagna fara ka kantri te gnafa ka nauthoglu igne baludi nodi armi re.
Mana la fatedihi mare, eghuteuna mana ginauna kafe falehedi mare gnafa.
3Thinidi naikno igre thono kmana fara,
eghuteuna theome naba nate kafe giugiludire.
Eghuteuna dadaradire ginauna thofa soru leghuni thogele na,
eghuteuna thinidire ginauna boto siri ka vido tuana.
4Naprai, glaba, nei nathunu teu ka maloa na are ginauna dofidi,
eghuteuna maloa gne ginauna pipiri jateula vido pepa eghu.
Eghuteuna nathunure ginauna khoko soru funu kligna jateula khakla grep ba gaju fig te moja ra eghu.
5LORD na la tarabanahi nogna naflahi mala magra na kligna,
eghuteuna mana ginauna magra aknu falehedi naiknodi Idom ka naflahi igne,
naugna mana la fatedihi mare.
6Nogna naflahi mana igne ginauna fodu ka dadara nei garofa,
jateula dadaradi nei garofadi eghu sipu,
ba nanigot te falelehe mae pris te fafara ra eghu.
LORD ginauna aknu falehe naikno te au ka namono biꞌo Bosra,
jateula kaisei fafara eghu.
Eghuteuna mana ginauna jaola aknu falehe kmana naikno ka nodi kantri maedi Idom.
7Mae biꞌodi Idom igre jateula buluka mata eghu.
Uve, mare nheta jateula buluka nalhaꞌugna eghu.
Nu neuba, mare ginauna jaola uka pari jateula keha mae ka namono igne.
Dadaradi nei garofadi teu mae igre ginauna fodu jateula chopu eghu ke kligna glose.
8Ka narane igne, LORD ginauna fakarhidi naikno di Saion.
Mana ginauna nake tughu fapulo unha teke eni mae naokare ka naiknore.
9Ka narane igne, khoꞌu biꞌo ka kantri Idom ginauna brana jateula thina ngire eghu,
eghuteuna glose gna namono igne ginauna gnhubra ka khaꞌaghi te thofno brana fara.
10Khaꞌaghi igne ginauna theome lehe,
eghuteuna gagahu gna na ginauna kujo fabrahu bongi narane.
Neubane karha mei naikno kmana ke leghu,
nu theo kaisei naikno nate nolo ka namono igne.
Uve, namono igne ginauna eghu fabrahu tifa tifa,
naugna la thofno diꞌa fara pari lahu.
11Nanghaji nei thua nafnata nakrudu nei naꞌao langau eghu ginauna au ka namono igne,
eghuteuna namono igne ginauna nodi reꞌe.
LORD ginauna roꞌeni Idom mala jateula narane teke theome vuavuha nga teku nauthoglu igne eghu.
12Ginauna theo kaisei ka vikegna king nate au jare te mala funei frunidi naiknore,
ba theo kaisei mae biꞌo ka kantri igne te mala vavahi king na.
13Phono nei gnarho fachuchuru eghu kolho nate kotu ke lamnagna nogna suga king na nei ke lamnagna suga mala poru na.
Khuma mata nei nakrudu eghu kolho nate mei au ke lamnagna namono biꞌo igne.
14Glepo tautagu ka namono nagou te jateula lion nei nanigot teu igre ginauna mei nolo tafri nei ku’e fabiꞌo eghu ka namono igne.
Eghuteuna glepo tautagu bongiro igre ginauna mei ka vido igne mala hiro nodi vido mala thuru.
15Nakrudu ginauna mei ei gnoku ka namono igne,
eghuteuna reꞌe ginauna opo nakredi,
eghuteuna reꞌe ginauna gnokro ke klignadi ghilei jifla mei sua nakrudu majaghani.
Uve, naꞌa ginauna reireghi fakelidi thugnare ke paridi phei baghi gnare.
Eghuteuna gaghata biꞌo igre ginauna jaola mei au ka namono igne,
eghuteuna reꞌe ginauna jaola au keha gaghata gaꞌasedi mala au balugna.
16Ghotilo filo lamna ka nogna buka LORD igne mala iu’ijudi nogna cheke mana re.
Glepo tautagu te gnafa,
nei nanghaji te gnafa teu te chekedi iara igre ginauna au Idom jateula teke chekenihi LORD ka nogna buka na igne eghu.
Eghuteuna Tharunga gna mana na ginauna salofodu meidi.
17LORD tufa glosegna namono igne ka mare gnafa.
Eghuteuna mare ginauna au fabrahu ka namono Idom igne,
eghuteuna goro sua nate karha mei ke leghure ginauna au fabrahu ka kantri igne.
35Nogna nabrou blahi LORD
1Kaisei narane ginauna mei,
namono nagou igre ginauna glealeꞌa fara,
eghuteuna kmana famane sisi ginauna kotu ka namono
aheva te theo kaisei naikno te au tagna.
2Namono nagou igre ginauna famane keli fara,
eghuteuna reꞌe ginauna glealeꞌa na eha fabiꞌo.
Naiknore ginauna cheke fahaehagheni namono igne
jateula teke cheke fahaehagheni mare kantri Lebanon ia eghu,
eghuteuna mare ginauna na jaola ghatho tahuni namono igne,
jateula mare teke ghatho tahudi phei namono Kamel ghe Saron.
Naikno te gnafare ginauna filoni
nogna nolaghi biꞌo LORD na.
Nogna nolaghi biꞌo God igne
ginauna agha soru ka mare.
3Jame te theome nheta khamemi ghotilo are,
eghuteuna ghahemi ghotilo re glaꞌe teuna,
ghotilo ke farerheta fapulo.
4Ghotilo loku famaku nagnafadi
iheire te mhaghu nei nanga nodi. Ghotilo cheke eghu,
“Ghotilo thosei mhaghu ba nigra,
naugna LORD ginauna fakarhi ghita,
eghuteuna mana ginauna paradi noda naoka tahati re.
Mana ginauna nake tughu fapulo glepo te diꞌa
teke edi mare ka tahati ra.”
5Ka narane tuana,
iheire teke dofu ra ginauna nake fifilo fapulo,
eghuteuna iheire te megli ra, ginauna nake nonomho.
6Naikno te lehe ghahedi ra,
ginauna nake ghasa jateula deer eghu.
Eghuteuna iheire te iho cheke ra,
ginauna na glealeꞌa nake eha fabiꞌo.
Glokha nei khoꞌu biꞌo teura
ginauna loloro ke lamna namono nagou.
7Eghuteuna namono nagou teke au nusu brana kolho tadira,
ginauna kholo biꞌo au tagna.
Namono te theome keli teke au khuma mata ra,
ginauna thua nafnata buburu khoꞌu ginauna kotu tagna.
8Kaisei nabrou biꞌo ginauna au ka namono igne,
eghuteuna mare ginauna kiloni nabrou igne, nogna Nabrou Blahi LORD.
Naikno te diꞌa nei naikno te fameomekro teu ra,
ginauna theome leghuni nabrou igne,
nu iheire te leghuni kolho puhi te keli na
nate tangomana te leghuni nogna Nabrou Blahi LORD.
9Theo kaisei lion ba keha glepo te fakaukathu
nate leghuni nabrou igne.
10Uve, iheire teke foli fapulodihi LORD ra
ginauna nake pulo mei Jerusalem.
Eghuteuna ka narane teke pulo mei mare Saion na,
mare ginauna eha fabiꞌo,
naugna mare ne glealeꞌa fara.
Mare ginauna theome tangomana te diꞌanagnafa nei tanhi teuna,
naugna mare glealeꞌa fabrahu kolho ka namono igne.
36Armi gna Asiria mei magra Juda
1Ka fabotho fati finogha te funei King Hesekaea Juda igne, King Senakerib gna Asiria, mana ne haghe Juda balugna nogna armi na. Armigna Asiria igne magra heta ne hata namono biꞌo te gnafa ka kantri Juda te bara te lithui ka thina igre. 2King Senakerib au neu ka namono Lakis ne kuruni nogna komanda na mala tei Jerusalem balugna kmana soldia, ka namono aheva te au teu King Hesekaea. Mare mei ne au ka nabrou te mala tei ka vido aheva te mala titihi pohe na. Mare kegra neu rhegna khoꞌu te jifla mei ka kholo biꞌo ke holo na. 3Ka narane igne, thilo mae biꞌodi Juda, mae Eliakim, mae Sebna nei mae Joa mei ne thafoni mana. Mae Eliakim gne mae funeidi mae te loku ka sugagna king, eghuteuna mana neke thugna mae Hilkaea. Mae Sebna gne nogna sekretri king, eghuteuna mae Joa, thugna mae Asaf igne mae mala tajini nogna buka vetula king.
4Mae komanda gna Asiria igne ne cheke eghu ka thilo mare, “Ghotilo hata tei ka King Hesekaea nogna cheke king biꞌogna Asiria igne:
“ ‘Ghema Hesekaea, naugna unha sagho te theome ke tughu gaoghathomu na gnea? 5Iagho jame ne mae nheta themu ne laseni puhigna magra na eghu, nu iagho fiti cheke nou kolho. Ba, ihei gne te ronuni iagho nate togho nigho kate mei magra ka iara na? 6Iara lase nigho iagho khogla rouronu kolho ka king gna Ijep. Nu te chekeni iara ka iagho na! Ijep gne jateula kaisei gaju ikoi te nali klopara eghu kolho theome nheta! Jame te fariuriu kodo iagho tagna na, iagho ginauna fnera tagna. Tuana unha nate eni king gna Ijep ka ihei te rouronu ka mana na. 7Nu jame te cheke eghu iagho ka iara na, ghehati rouronu ka LORD nomi God kolho sia teuna, nomi LORD ghotilo tuana ginauna theome tangomana nate togho ghami ghotilo na. Naugna mae Hesekaea neke goigonidihi nogna vido blahi nei olta teu mana ra. Eghuteuna ke leghu na mana neke cheke faheta ka ghotilo naiknomi Jerusalem nei Juda mala kafe mei mala tarai kolho ka kaisei olta Jerusalem. Jame te eni mana nafnata puhi igne ka god igne na, LORD ginauna glaꞌe fara na theome tangomana te togho ghami ghotilo na.
8“ ‘Mae komanda igne tudu ne cheke eghu, “King Hesekaea, mei sagho roghe balugna nogu mae funei iara king gna Asiria. Nogu mae funei iara na tangomana te tusu ranghi nigho phei thogha hose gognarogne, eghu jame te tangomana iagho te hirodi phei thogha soldia te mala saghe ka hose te magra na. Nu te laseni iara na iagho jame theome au nafnata mae igne. 9Nu neuba, nomi armi ghotilo na glaꞌe fara, eghuteuna ghotilo theome tangomana te uluni kaisei ofisa ka nogu armi iara na. Eghuteuna neuba iagho ne rouronu Ijep te mala famei chariot, nei soldia mala magra ka hose neu, iagho ginauna theome tangomana te ulu ghau iara na. 10Eghuteuna keha glepo na igne eghu, iara theome mei leghuni nogu gaoghatho thegu na mala mei magra ka ghotilo. Jame te theome togho ghau LORD na, iara ginauna theome mei agne mala roꞌeni nomi kantri ghotilo gne. Nu LORD thegna kilo mei ghau iara mala roꞌeni kantri igne.” ’ ”
11Aonu mae Eliakim, mae Sebna nei mae Joa eghu ne nomhidi nogna cheke mana igre ne cheke eghu ka mana, “Komanda, cheke sagho ka chekegna Asiria, naugna ghehati laseni cheke igne. Iagho thosei cheke Hibru, glahu nomhidi mae te kegra teu kligna ka gringni thina na are nou cheke iagho are.”
12Nu mae komanda igne ne cheke eghu, “Nogu king iara na neke theome kuru ghau iara mala cheke kolho ka ghotilo balugna nomi funei na neku. Theo! Mae te au kligna ka gringni thina na are mala jaola nomhini cheke igne. Mare ginauna theome raugha ghamu chara te jifla mei ka thedi are, eghuteuna koꞌu ka kholo te jifla mei ka thedi are eghu. Ghotilo thilo mae igre ginauna na jaola eghu, naugna ginauna na theo kaisei gano nei khoꞌu eghu ka namono igne.”
13Aonu mae komanda gna Asiria igne ne filo tei ka mae te kegra teu kligna ka bara na ne eha eghu fabiꞌo ka cheke Hibru, “Ghotilo fanomho mei ka nogna cheke king biꞌogna Asiria igne! 14Ghotilo thosei snakreni mae Hesekaea mala chaghi ghami! Mana theome tangomana te fakarhi ghami ghotilo na! 15Eghuteuna ghotilo thosei fanomho ka nogna famane cheke chaichaghi Hesekaea are mala figri ghotilo gaoghathomi are mala rouronu ka LORD. Te chekeni mana ka ghotilo na, LORD ginauna togho ghami ghotilo eghuteuna ghehati maemi Asiria gre na theome tangomana te ulu ghami ghotilo te mala hata namono biꞌo Jerusalem.
16“Ghotilo thosei fanomho ka mae Hesekaea! Igne unha te chekeni king biꞌogna Asiria na: Ghotilo jifla mei mala nhaꞌa cheke tahati mala thosei magra. Jame te eni ghotilo igne na, ghotilo te gnafa na ginauna na au fakeli. Ghotilo ginauna tangomana te ghamu ghemi sisi grep nei fig eghu teke joꞌu ghotilo ka nagare ra, eghuteuna ghotilo ginauna nake koꞌu ka khoꞌu te keli. 17Eghuteuna ghotilo ginauna au fakeli nomi ghilei thokeni narane nate hata ghami te tei iara ka namono delei te jateula nomi namono ghotilo igne teuna. Iara ginauna lisei ghami ka kaisei namono te au nagare grep, nei jaola au famane glose te mala karha wit mala eꞌei bret.
18“Ghotilo thosei snakreni mae Hesekaea mala chaghi ghami kate chekeni mana LORD ginauna fakarhi ghami ghotilo teu mana igne. Igne theome tutuani! Gaoghathomi ghotilo na nodi god keha kantri te uludi iara ka magra na igre ginauna tangomana te toghodi ka nogu nolaghi iara king gna Asiria gne neu si ghotilo ia? Theo! 19Ka teke tei magra ghehati ka namono biꞌo Hamat, nei Apad, nei Sefavaem tekura? Ahevau si nodi god mare ra neke theome mei fakarhadi mare? Eghuteuna ka narane teke tei magra ghehati Samaria ia, nodi god mae Samaria ra neke fakarhadi mare neke tapla fapari ghami ghehati? Theo kolho! 20Ghehati neke tei magra ka kmana kantri te au kmana god tadi. Nu theo kaisei nodi god kantri igre te fakarhi nogna kantri na te mala nigra ghehati ka magra na. Eghume faꞌunha eghu tangomana LORD te toghoni Jerusalem ka nogu nolaghi iara na?”
21Nu mae te au ke kligna gringni igre ne au kmu ne theome ghagri kaisei cheke, naugna King Hesekaea theome snakredi mare te cheke tughu ka mana na.
22Aonu kate nomhidi nogna cheke mae komanda gna Asiria na igre, mae Eliakim, mae Sebna nei mae Joa eghu ne thono fadiꞌa nagnafadi fara ne rerheku nodi pohere. Aonu thilo mare tei ne toutonu ka king gobigna lepo te chekedi mae komanda gna Asiria na igre.
37King Hesekaea ne toreni Profet Isaia mala toghoni
1Kate nomhini King Hesekaea nodi ripot mare igne, mana diꞌanagnafa gna fara ne rerheku nogna pohe na. Mana pipichi ka pohe thona ne tei ka nogna Sugablahi LORD na. 2Eghuteuna mana ne kurudi phei nogna mae biꞌo igre, mae Eliakim ghe mae Sebna baludi keha mae pris biꞌo mala tei filoni mae profet Isaia, thugna mae Emos. Mare jaola ne diꞌanagnafadi fara ne pipichi ka pohe diꞌanagnafa na. 3Kate filoni mae profet na, mare ne cheke eghu ka mana, “Profet, King Hesekaea neke cheke eghu: Gognarogne kaisei puhi biꞌo thoke ghita tahati, eghuteuna tahati thono mamaja noda fara! Tahati jateula kaisei gaꞌase te namo karha sua, nu theome karha kolho teura eghu. 4King gna Asiria igne neke kuru meini kaisei nogna mae komanda mala cheke faparini God mae ihei te karha te tifa. Tahati toreni LORD noda God mala nomhidi cheke te diꞌa igre, eghuteuna Mana ginauna paradi mare. Eghume, tore ka God eida tahati naikno te karha nga teu gre!”
5Kate hata mae Isaia nogna cheke King Hesekaea igne, 6mana neke fatei cheke igre ka mana. “King, igne unha te chekeni LORD na: Iagho thosei mhaghudi nodi cheke nogna mae gloku mae king gna Asiria igne. Mare khogla cheke fapari ghau iara kolho! 7Iagho thosei mhaghu! Iara ginauna figri gaoghathogna king gna Asiria na kate nomhini mana ripot igne mala ke pulo mana ka nogna kantri na. Eghuteuna mare ginauna aknu faleheni mana ka magra jare.”
King gna Asiria ne cheke faheta ka King Hesekaea
8Mae komanda gna Asiria igne laseni tela jiflahi nogna king na Lakis te tei magra ka namono Libna, aonu mana jifla Jerusalem ne tei Libna mala filoni king gna Asiria.
9Ka narane igne, kaisei nonomho ne thoke mei ka Senakerib, king gna Asiria. Mana nomhini King Tiahaka gna ka kantri Kus mei balu nogna armi mala magra ka mare. Kate nomhini igne, mana kurudi keha nogna mae gloku. Mana ne cheke eghu ka mare, 10“Ghotilo hata tei nonomho igne ka King Hesekaea gna Juda: ‘Iagho thosei snakreni God te fatutuani ni iagho igne mala chaghi nigho! Mana chekeni iara balugna nogu armi na ginauna theome tangomana nate hata namono Jerusalem.’ 11Nu iagho nomhinihi unha te magnahaghei eni king gna Asiria ka keha kantri igre. Funu tifa te mei na, ghehati goigonidi koba mare. Ba? Aheva nate rikha te tei iagho na? 12Kuꞌegu iara tifa ra neke roꞌedihi namono biꞌo Gosan, Haran, nei Resef, neke falehedi naiknodi Eden teke au Telasa ra. Nodi god naikno igre neke theome tangomana teke fakarhidi mare na. 13King di Hamat, Apad, Sefavaem, Hena, nei Iva teura au si ra? Theo. Aknu falehehi ghehati si ra.”
Nogna tharai King Hesekaea
14Mare ne tusu lao letas igne ka King Hesekaea, aonu mana ne iu’iju letas igne. Kate gnafa iu’iju na, mana hata ne tei letas igne ka Sugablahi na ne feferha ke ulugna LORD. 15Aonu King Hesekaea ne tarai eghu ka LORD, 16“LORD, iagho mae ihei te au nolaghi fateote’o! Iagho nomi God ghehati maemi Israel, iagho King mae ihei te gnokro ka sape nafnakno farihoteidi phei engel. Iagho ngala thofno God te tutuani na, eghuteuna iagho funei frunidi kantri te gnafa ka nauthoglu igne. Iagho neke vuavuhadi maloa ghe nauthoglu igre. 17LORD! Filo sagho ka unha te thoke ghami ghehati igre. Fanomho sagho ka gobigna lepo te cheke fadiꞌa nigho King Senakerib igre, iagho God mae ihei te karha te tifa.
18“LORD! Tutuani fara king di Asiria te goigonidi kmana naikno ke lamnadi kantri igre. 19Eghuteuna mare gnubra fahui nodi god naiknore ka khaꞌaghi, nu god igre theome tutuani, naugna neke horo kolho naikno ka gaju nei thina eghu. 20Nu iagho LORD, iagho nomi God ghehati mae Israel. Fakarhi ghami ka nodi nolaghi maedi Asiria, eghuteuna naikno te gnafa ka kantri te gnafa ka nauthoglu igne ginauna lase nigho iagho te kaisei iagho ngala God na.”
Profet Isaia ne fatei cheke ka king
21Aonu, Profet Isaia ne fatei cheke ka King Hesekaea ne cheke eghu ka mana, “King, igne unha te chekeni LORD, nodi God maedi Israel na, ‘Iara nomhinihi nou tharai iagho eigna King Senakerib gna Asiria.’ 22LORD neke cheke eghu,
“King Senakerib!
Naiknodi Jerusalem igre
ginauna maꞌe nigho iagho kate rikha iagho na.
Uve, mare ginauna tuatukma nigho iagho.
23Ihei gne te cheke faparini iagho na?
Ihei gne te eha fabiꞌoni nei cheke faparini teu iagho na?
Iara nodi God maedi Israel te blahi fara,
nu iagho cheke fapari ghau iara!
24Iara nou Funei iagho,
nu iagho kurudi nou mae mala hata nonomho
mala cheke fadiꞌa ghau iara.
Iagho neke cheke fahaehaghe eghu,
‘Ka nogu chariot iara gre,
iara neke tei neke hata thogele biꞌo Lebanon.
Iara neke kato soru famane gaju sida te brahu ra
nei famane gaju paen ra eghu.
Iara jaola neke tei posadi thogele te haghe fara ra,
nei ka vido aheva te au kmana gaju fara tadi ra.
25Iara neke dokha seu
mala koꞌu ka keha kantri delei,
eghuteuna nogu soldia iara gre neke tapla ka khoꞌu biꞌodi Ijep,
neke ghilei kafe krango fahui.’
26“King Senakerib! Ba? Iagho theome laseni ngau?
Iara LORD neke ghathoni igne funu tifa,
mala edi iagho glepo igre,
eghuteuna gognarona iara na eni igne mala thoke mei.
Iara neke tusu ari nolaghi ka iagho
mala goigonidi namono biꞌo te bara ligoho ka thina igre,
mala vuhai bukrei thina kolho.
27Naiknodi namono biꞌo igre
ginauna glaꞌe soru balu mhaghu nodi nei mamaja nodi eghu fara.
Mare jateula buburu fari hotei glalaba,
ba gnarho te kotu ke tagru suga,
te lehe kolho kate ghaghafa mei nuri te brana na.
28“Nu iara lasedihi
gobigna lepo eimu iagho,
unha te edi iagho
nei aheva te tei iagho,
nei puhi te cheke diꞌa tamu fara teu iagho ka iara ra.
29Naugna iara laseni te fahaehaghe fara iagho na,
nei iara laseni te cheke diꞌatamu fara iagho ka iara ra,
iara ginauna lilisei kaisei thagho ka foflomu iagho na,
nei kaisei vido aean ka foflomu iagho na,
mala ke korho fapulo nigho ka nabrou
aheva teke meimu iagho na.
30“Aonu profet Isaia ne cheke eghu ka King Hesekaea,
“Igne kaisei fagaglana malamu iagho na:
Ka finogha igne ghotilo ginauna ghamu
gano teke karha kolho thedi
ka nagaredi tifa ra.
Eghuteuna ka finogha te mei gno, ghotilo ginauna ghamu
gano nate kotu mei ke leghure.
Nu ka fatilo finogha gno, ghotilo ginauna tangomana te loku ka nagare
mala hata gano tagna.
Eghuteuna ghotilo ginauna tangomana te joꞌu grep
mala ghamu sisigna na.
31Ghotilo naiknomi Juda te karha nga teura,
ginauna nake rheta fapulo.
Ghotilo ginauna kotu haghe jateula gaju
te soru pari lamna glose glathi gna na ia eghu,
eghuteuna ure kmana sisi kligna na teura eghu.
32Neuba mae naoka gre ne aknu falehe kmana naikno ka ghotilo,
iara ginauna fakarhidi keha ka ghotilo Jerusalem
ka Thogele blahi Saion,
mala thovu nogu naikno iara re.
Iara LORD mae ihei te au nolaghi fateote’o,
nogu gaoghatho rheta iara na ginauna thoke mei gobigna lepo igre.”
33Mae profet Isaia ne cheke eghu, “Eghume, LORD ne cheke eghu eigna king gna Asiria:
“King gna Asiria baludi nogna soldiare
ginauna theome tangomana te ruma mei Jerusalem,
eghuteuna mare theome tangomana te fada mei kaisei jata agne.
Theo kaisei soldia balu greoreo
nate mei namo ka namono biꞌo igne.
Eghuteuna mare theome tangomana nate bubukrei thina nei glose teu ka pesigna bara igne te mala fada mei lamna na.
34Iara LORD, iara ginauna theome snakreni mana te ruma mei ka namono igne.
Eghuteuna mana ginauna nake figri ka nogna namono na
leghuni nabrou teke mei gna na.
35Iara ginauna reireghini namono igne,
uve, iara ginauna fakarhini Jerusalem.
Naugna iara neke nhaꞌa cheke tifa ka nogu mae gloku King Devet.”
Igne chekegna LORD.
LORD ne goigonini armi gna Asiria
36Aonu ka bongi igne kaisei engel nogna LORD ne mei ka vido te au teu mae soldiadi Asiria igre ne aknu falehe kaisei gobi nhana salei glima thogha ka mare. Kate dofra haghe mare hamerane boibongi na, mare ne filodi thinidi mae soldia te lehere. 37Aonu King Senakerib baludi nogna naikno te karha teure ne jifla ka namono igne neke pulo Ninive.
38Kaisei narane ke leghudi igre, King Senakerib tei ne tarai ka nogna Sugablahi nogna god Nistrok, eghuteuna phei mae thugna mana, mae Adramelek ghe mae Saresa, phia mare ne aknu faleheni mana ka naflahi. Aonu phei mae igre rikha ne tei au Ararat ka nohi te khaba fara. Eghuteuna kaisei thugna mana, mae Esahadon neke king gna Asiria.
38King Hesekaea ne fogra
1Theome raugha ke leghugna igne, armi gna Asiria haghe ne snura Juda. Ka narane igre King Hesekaea ne fogra fara, ne ghilei namo lehe. Aonu mae profet Isaia thugna mae Emos tei ne cheke eghu ka mana, “Igne nogna cheke LORD na: Te keli na iagho fadoglini puhimu na, eigna iagho ginauna lehe, eghuteuna iagho ginauna theome tangomana na teke keli fapulo na.”
2Aonu king figri lao fei gringni na ne tarai, 3“LORD, ghatho ghau. Iara loku ranghi nigho ka nogu nolaghi fateote’o nei ka gaoghathogu fateote’o, eghuteuna iara fariuriu fara te mala edi gobigna lepo te magnahaghedi iagho re.” Eghuteuna kate tore te gnafa na, mana ne funu tanhi fabiꞌo naugna mana ne diꞌanagnafa fara.
4-5Ke leghugna igne, LORD ne cheke ka mae profet Isaia mala tei cheke eghu ka king, “King Hesekaea! LORD nogna God mae kuꞌemu iagho King Devet ia neke cheke eghu: ‘Iara la nomhinihi nou tharai iagho na, eghuteuna iara la lasenihi te tanhi nei diꞌanagnafa teu iagho na. Iara ginauna na togho nigho mala ke keli fapulo iagho. Eghuteuna iagho ginauna nake karha keu nabagna nabotho glima finogha. 6Iara ginauna fakarhi nigho iagho ka nogna nolaghi mae king gna Asiria. Eghuteuna iara ginauna jaola na fakarhini nei reireghi fakelini eghu namono biꞌo Jerusalem.
7“ ‘Eghuteuna igne kaisei fagaglana te mala laseni iagho na LORD te tajini nogna nhaꞌa cheke na: 8Naungo te au ka nathapla gna suga teke horo King Ehas tifa igne LORD ginauna nake tugha fapulo nabotho nathapla.’ ” Aonu naungo igne nake tugha fapulo nabotho nathapla ka nathapla igne.
Nogna khoje King Hesekaea
9Ke leghugna tekela keli fapulo ka fogra na, King Hesekaea ne rioriso kaisei khoje mala cheke fakelini LORD. Igne chekegna khoje teke rioriso mana na:
10“Fari hotei ka nakarhagu na,
iara ginauna tei salaꞌu ka bara gna Beku na.
Eghuteuna keha finogha ka nakarhagu iara na jame sokmo kolho.
11Te chekeni iara ka nauthoglu igne na,
iara ginauna na theome filoni LORD ka nakarhagu na.
Eghuteuna iara na theome filodila
naikno te au ka nauthoglu igne.
12Finoghagu re la salaꞌuhi, la hata fadeleihi ka iara,
jateula mae greireghi sipu te hata fadelei nogna suga tapuale ra eghu.
Uve, te chekeni iara na, nakarhagu na la gnafahi,
jateula mae teke susuki vido pohe,
tela gnafahi nogna gloku ra eghu,
gnafa teuna mana kusu ka masin me lolhopo nga teura eghu.
LORD, bongi narane na,
iagho fagnafani nakarhagu iara na.
13Iara ofou kolho ghilei hamerane boibongi.
Iara ghathoni LORD nate lolhopa nhubragu gre,
jateula lion te ghamu sasaka bosu
teke kathu falehe ra eghu.
LORD, bongi narane na,
iagho fagnafani nakarhagu iara na.
14Iara kabru ghegu fara ne tanhi fabiꞌo.
Nu nogu natanhi iara igne,
jateula te tanhi balhu ra eghu kolho.
Eghuteuna kate filo haghe iara kligna na,
tathagure jaola kabru.
LORD, togho ghau!
Hoholo thoke ghau iara.”
15Nu unha gne nate chekeni iara na?
LORD la chekehi ka iara,
eghuteuna mana edi glepo igre.
Kate karha teuna, iara ginauna theome ghatho tahu ghau thegu,
naugna iara haimini hoholo igne lamna ka nagnafagu na.
16Lord, naugna iagho te tajini fabrahu nou nhaꞌa cheke na,
ghehati naikno gre au fabrahu ka nakarha igne.
Iagho la hata fadeleihi fogragu iara na,
eghuteuna iagho snakre ghau iara mala karhau.
17Iara nabagu te au papara na,
mala filo glani iara
nou namha biꞌo iagho,
te fakarhi ghau iara ka hoholo biꞌo igne.
Eghuteuna iagho la hata kokohi nakhibogu iara re,
la koko faleghuhi ke leghumu,
la ghatho iho noudihi.
18Naikno te au ka Beku ra
theome tangomana te tegio nigho na.
Naikno te au ka namonodi iheire tela lehehi ra
theome tangomana te cheke fakeli nigho na.
Naikno tela lehehi ra
theome tangomana te fatutuanini nou nhaꞌa cheke iagho na.
19Ghehati te karha nga teugre,
ghehati kolho te tangomana te cheke fakeli nigho na,
jateula te eni iara gognarogne eghu.
Kmami ghehati gre toutonu koba ka thudire
eigna puhi te tajini fabrahu
iagho nou nhaꞌa cheke na.
20LORD ginauna fakarhi ghau iara.
Ghehati ginauna lalahu gita,
eghuteuna koje mala kilo fafnakno ni LORD.
Leuleghu fata ka nakarhami na,
ghehati ginauna koje mala cheke fakelini LORD
ke lamnagna nogna Sugablahi na.
21Kate namo keli fapulo King Hesekaea ka fogra na, profet Isaia ne chekedi nogna dokta king re mala hata keha sisi fig mala lama ka thubugna mae king na mala ke keli fapulo.
22Eghuteuna King Hesekaea ne ghusna eghu ka mae profet Isaia, “Unha nafnata fagaglana nate filoni iara te mala laseni iara na teke karha iara ginauna, mala teke tei tarai iara ka Sugagna LORD na?”
39Keha naiknodi Babilonia ne mei Jerusalem
1Ke leghugna igne, king Merodak-Baladan thugna mae Baladan, mana te mae king gna Babilonia gognarona. Mana nomhini te fogra fara mae king Hesekaea nu kela keli fapulo teu na. Aonu mana ne kurudi keha naikno atha ne tei keha letas nei kaisei namha eghu mala tusu lao ka mae king Hesekaea. 2King Hesekaea ne keli tagna fara te filodi naikno igre, aonu mana ne fakakhana ka mare nogna thua nafnotu fateote’o te keli fara te au ka manare. King Hesekaea atha ne tei naikno igre ka vido aheva te au nogna gobigna lepo te kelire mala filodi mare nogna silva, gol, khuromu, oel nei nogna thua nafnata glepo mala magra. Mare ne filodi gobigna lepo te au ka sugagna nei jaola filodi gobigna lepo te au ke lamnagna nogna kantri na igre.
3Profet Isaia mei ka King Hesekaea ne ghusna eghu ka mana, “King, mae igre neke mei funudi aheva, eghuteuna unha te chekeni mare ka iagho na?”
King ne cheke eghu, “Mare mei funudi ka kantri te khaba fara, funudi Babilonia.”
4Mae profet Isaia ne cheke eghu, “Unha te filoni mare ke lamnagna nou suga iagho na?”
Mae Hesekaea ne cheke eghu, “Mare filodihi gobigna lepo fateote’o te au ke lamnagna nogu suga iara na, theo kaisei glepo te poruni iara ka mare na.”
5Aonu mae profet ne cheke eghu, “Fanomho mei ka nogna cheke LORD mae ihei te au nolaghi fateote’o igne. Mana ne cheke eghu: 6Hesekaea, ginauna na thoke mei kaisei narane te mala mei armi gna Babilonia te hata fahui gobigna lepo teke tathaji teku kuꞌemu iagho tifa ke lamnagna nou suga na te ghilei thoke mei ka narane gognarogne. Naiknodi Babilonia ginauna mei hata tei gobigna lepo tuare ka nodi namono re. Eghuteuna ginauna na theo kaisei glepo nate au faleghu na. 7Mare ginauna atha tei keha sua nate karha mei ka vikemu iagho gre mala tei loku ka sugagna mae king gna Babilonia.”
8Nu te ghathoni mae king na jau gaoghathodi cheke te edi mae profet igre ginauna toghoni mala au fakeli fabrahu ka nakarhagna na neu ne cheke eghu, “Unha te chekeni LORD ka iagho igne keliu kolho.”
40God ginauna toghodi nogna naiknore
1Igne nogna cheke noda God tahati na,
“Farerheta nagnafadi nogu naikno iara ra.
Uve, mala rheta fakeli nagnafadi re.
2Thoghei famane cheke ranghidi naiknodi Jerusalem,
eghuteuna cheke ka mare te narane ninhigrana te thokedi mare igne la gnafahi.
Uve, iara LORD la paradihi mare eidi nakhibodi fateote’o teke edi mare ra.
Iara neke tusu ranghidi papara biꞌo,
nu gognarona la gnafahi eghu.”
3Iara neke nomhini kaisei naogla neke eha eghu mei,
“Ghotilo tarabana nabrou ka namono nagou malagna LORD!
Uve, ghotilo fadoglo nabrou malagna noda God!
4Glogu te gnafa ra tatafru,
eghuteuna thogele te gnafa nei gukhu teura fasasare,
eghuteuna vido te poipogili ra ke fasasalhu!
5Eghuteuna ka narane tuana,
nogna nolaghi biꞌo LORD na ginauna agha soru mei,
eghuteuna naikno te gnafa ka nauthoglu igne ginauna filoni.
Naugna thegna LORD neke nhaꞌa cheke eigna igne.”
6Iara neke nomhini kaisei naogla ne cheke eghu,
“Iagho eha tei!”
Aonu iara ne ghusna eghu,
“Unha nate chekeni iara na?”
Naogla igne neke cheke eghu ka iara,
“Iagho na cheke eghu:
Naikno te gnafa igre ginauna theome au raugha ka nauthoglu igne na jateula buburu eghu kolho,
eghuteuna nodi glepo te keli re
jateula chechenge eghu kolho.
7Buburu na gnhagha kolho,
eghuteuna chechenge na khoko pari,
naugna LORD neke eni nuri na mala ghaghafa mei.
Eghume naikno na jateula buburu eghu,
theome au raugha.
8Uve, buburu na tangomana te gnhagha na,
eghuteuna chechenge na tangomana te khoko pari na,
nu chekegna noda God na
ginauna au fabrahu tifa tifa.”
9Ghotilo naiknomi Saion ra!
Ghotilo haghe ka thogele biꞌo gro, mala toutonuni nonomho te keli na.
Ghotilo naiknomi Jerusalem ra thosei mhaghu te mala ehani nonomho te keli igne.
Ghotilo tei cheke eghu ka namono biꞌo Juda,
“Filo si ghotilo!
Noda God tahati na la meihi gognarona!”
10Uve, LORD na la mei
mala funei fruni ka nogna nolaghi biꞌo.
Eghuteuna mana hata mei balugna
taba tela ulunihi mana na.
11Mana reireghi fakelidi nogna naiknore,
jateula mae ihei te reireghi fakelidi nogna sipura eghu.
Uve, mana jateula mae ihei te pala sua te ikodire ka fafragna ra eghu,
eghuteuna mana batudi idodi sipu te au thudire mala blaknoi tei.
Theo kaisei god te jateula LORD teuna
12Ihei gne tangomanani te loku hagheni nhorora gne ka khamegna na?
Ihei gne tangomana te kokhoga maloa gne ka geghesu gna na?
Ihei gne tangomanani te aghu fodu ka kharaꞌo glose te gnafa ka nauthoglu igne te mala skel na?
Eghuteuna ihei gne tangomanani te lasedi tahudi thogele nei gukhu teu igre?
13Ihei gne te thofno lase fakelini gaoghathogna LORD na?
Eghuteuna ihei gne
tangomana te farihriuni mana na?
14Ka mae ihei teke tei hiro glalase LORD na?
Eghuteuna mae ihei teke farirhiuni LORD puhi te doglo na?
Mae ihei teke tusu lao gaoghatho te keli nei glalase teku ka LORD na? Theo kolho!
15Ka God na kantri te gnafa ka nauthoglu na igre jateula glepo te theo nafudi eghu kolho.
Uve, kantri te gnafa igre jateula kaisei natro khoꞌu eghu kolho,
eghuteuna moumolu te gnafa igre jateula gaughavu glose eghu kolho.
16Neubane au kmana nafnata glepo tautagu ka namhata Lebanon,
nu glepo igre theome naba kolho te mala fafara lao ka noda God na.
Eghuteuna neubane au kmana gaju ka namhata na are,
nu gaju igre jaola theome naba kolho te mala gahu fafara na.
17Ka tathagna God na kantri te gnafa ka nauthoglu na igre jateula te theo nafudi eghu kolho.
Uve, ka mana na, naikno te gnafa gre jateula glepo te theo nafudi kolho tutuani fara.
18Ihei gne te jateula God teuna?
Ba? Mumuju na jateula God eghu filogna na?
19Theo. Naikno kolho teke horo mumuju ka gaju na,
eghuteuna keha mae na sesere ka biꞌo,
eghuteuna hohoro chen ka silva mala famane filogna na.
20Mae ihei te kuma na,
mare tangomana te vahini kaisei vido thaba te keli
te theome tangomana te ghosei te boto na.
Eghuteuna tusu lao ka mae te lase horo mumuju
te mala theome tangomana te khoko pari na.
Nu noda God tahati igne, theome jateula tuana eghu! Theo!
21Ba, ghotilo theome laseniu kolho?
Ghotilo theome nomhini kolho?
Ghotilo theome laseni ka ihei nga thoutonu eigna
nauthoglu igne teke kulu vuavuha na?
22LORD neke edi gobigna lepo igre!
Mana te funei frunini nauthoglu igne
jateula kaisei mae king te gnokro ka nogna sape nafnakno ra neku.
Eghuteuna ka tathagna mana na naiknore ikodi nei glaꞌe
jateula cheche eghu kolho.
Uve, mana eni maloa gne ne krepa fara,
jateula kaisei mae te horo kaisei suga tapuale te mala au tagna ra neu.
23LORD ne thofno nhaꞌa faparidi nodi nolaghi mae iheire te funei ka nauthoglu igne
ghilei jateula glepo te theo nafudira neu kolho.
24Mare jateula wit te aongala joꞌu nga,
te kotu haghe nu theome rheta nga meu kolho teura eghu.
Eghuteuna kate eni LORD nuri brana na te brana na te mala ghaghafa na,
wit igre ginauna na mojadi lehe, eghuteuna nuri na pala tei jateula chara te flalo te teihi ra eghu.
25Igne nogna cheke God mae te blahi fara,
“Ihei gne te jateula iara teu puhigna na?
26Ghotilo filo haghe ka maloa gno!
Ihei teke edi nathunu are?”
LORD neke edi neke lilisei ka thofno vido mala audire,
eghuteuna mana jaola neke lilisei nanghadi.
Naugna mana thofno nheta fara nei au nolaghi fateote’o,
eghuteuna theo kaisei nathunu te dofi ka mala augna na.
27Ghotilo naiknomi Israel ra! Ghotilo te gnafa na cheke eghu,
“LORD na theome filo glanidi kolho puhigu iara re.
Uve, mana theome nangadi kolho narane te ninhigrana te thoke ghau iara igre.”
Naugna unha si ghotilo te khuru cheke ka LORD gnea?
28Ba? Ghotilo theome laseniu kolho?
Ghotilo theome nomhini kolho?
LORD na God mae ihei te au fabrahu funu tifa,
eghuteuna mana neke vuavuha gobigna lepo ka nauthoglu igne.
Theo kaisei naikno tangomana te thokeni gaoghathogna LORD na.
Mana theome tangomana te babaꞌo ba te nigra na.
29Mana tusu lao narheta ka iheire te babaꞌo.
Eghuteuna tusu lao nolaghi ka iheire te nigra.
30Mae majaghani re tangomana te babaꞌo nei kmusa teuna,
ghilei uka pari.
31Nu iheire te rouronu ka LORD na,
ginauna nake rheta fapulo.
Uve, mare ginauna flalo ka maloa jateula gaghata eghu.
Mare ginauna na lase chari, nu mare na theome tangomana te babaꞌo na.
Eghuteuna mare ginauna nolo tei kate khaba, nu mare na theome tangomana te nigra na.
41LORD na toghoni Israel
1LORD ne cheke faheta eghu,
“Ghotilo naikno te au ka kantri igne
te ghilei tei posa ka moumolu te khaba ra!
Ghotilo au kmu,
mala fanomho mei ka iara!
Ghotilo tarabana mala kegra haghe ka fate,
mala chekedi nomi cheke re.
Te keli na tahati gnokro fodu,
mala laseni tahati ihei te doglo na.
2“Ghotilo ghaoghatho fakeli.
Ihei teke hata teke mei mae igne funugna ke maghati na?
Mae ihei teke toghoni mana te mala leghuni puhi te doglo na?
Mae ihei teke totogho te mala uludi mana kantri igre ka magra na?
Leuleghu fata na,
mana hata naflahi mala falehedi keha mae king,
mala jateula nakrofu eghu kolho mare.
Uve, mana fathasudi mare ka nogna phaloho na,
jateula chara te flalo te tei dofidi ka nuri ra neu.
3Leuleghu fata na mana ngolhidi mare,
eghuteuna theo kaisei glepo te tangomana te fanograni mana na.
Mana ghosei tei fara,
jateula te flalo ra eghu kolho.
4Ihei teke edi teke thoke mei glepo igre?
Ihei teke ghathodi glepo igre tifa kani teke vuavuhagna nauthoglu igne?
Iara LORD neke kulu auhi neke vuavuha nga gobigna lepo igre,
eghuteuna iara ginauna au ka narane nate ari te gnafadi gobigna lepo fateote’o igre.”
5Kate filodi glepo igre,
naikno te gnafa te au ka vido te khaba igre ginauna fififri nei mhaghu nodi fara eghu.
6Aonu mare ne loku fodu,
ne kafe farerheta nagnafadire.
7Eghuteuna mae ihei te sari mumuju god ka gaju na,
mana na cheke eghu ka mae ihei te loku ka gol na,
“Tore, famane fara sare!”
Eghuteuna mae ihei te tuge mumuju igne ka hama na,
mae igne farerheta gaoghathogna mae te loku fodudi phei vido mumuju igre,
eghuteuna mana na cheke eghu,
“Ghema, iagho famane hohoro fara!”
Aonu mare tutu famaku mumuju tuana mala theome tangomana te khoko pari na.
8“Nu ghotilo naiknomi Israel,
teke karha mei ka vikegna mae kheragu iara mae Ebraham.
Iara neke vahi ghami ghotilo mala thofno nogu naikno gloku iara.
9Iara neke hata mei ghami ghotilo funu ka vido te gnafa ka nauthoglu igne.
Eghume iara na cheke eghu ka ghotilo,
‘Ghotilo nogu naikno gloku iara.’
Iara theome thodo ghami ghotilo. Uve, iara neke vahi ghami ghotilo.
10Eghume ghotilo thosei mhaghu!
Iara nomi God ghotilo mala au balumi ghotilo.
Iara ginauna farheta ghami nei togho ghami eghu ghotilo.
Uve, khame nhetagu iara na ginauna togho ghami ghotilo mala kegra heta ghotilo,
eghuteuna iara ginauna reireghi ghami ghotilo ka puhi te doglo.
11“Iheire te diꞌatadi ka ghotilo na,
mare ginauna mamaja nodi fara,
naugna mare ginauna nigra ka magra.
Eghuteuna iheire te magri ghami ghotilo tuare,
mare ginauna kafe lehe na theo nafudi kolho.
12Jame te fariuriu hirodi iagho mae naokare,
iagho ginauna na theome filodi mare.
Uve, ihei te magra ka iagho na,
mare ginauna theome tangomana te ulu nigho iagho na.
13Ghotilo thugu iara. Iara LORD, nomi God ghotilo!
Iara au balumi ghotilo,
eghuteuna iara ginauna loku famaku ka khame nhetami ghotilo re,
na cheke eghu ka ghotilo,
‘Thosei mhaghu, iara ginauna togho ghami ghotilo.’
14Neuba ghotilo mae Israel gre ne glaꞌe fara,
ghotilo thosei mhaghu, naugna iara ginauna togho ghami ghotilo.”
Igne chekegna LORD nodi thofno God te Blahi mae Israel mae ihei te fakarhi ghami ghotilo.
15LORD neke cheke eghui,
“Iara ginauna togho ghami ghotilo mala maku jateula vido thaba balu aean fnonu majaghani ke parigna na te mala korho ke klignadi khatu wit te mala koko khunegna ra eghu.
Kate tei salaꞌu ghotilo ke kligna thogele na,
ghotilo ginauna goigonidi mare.
Eghuteuna kate tei salaꞌu ghotilo ke kligna gukhu na,
ghotilo ginauna thofno roꞌedi mare mala jateula nakrofu eghu mare.
16Jateula mae te koko haghe wit,
eghuteuna pala nuri me tei koko delei chara gnare teura eghu.
Jateula tuana eghu ghotilo ginauna mala khi teidi nomi naokare mala rikha,
eghuteuna mare ginauna dofidi jare.
Eghuteuna ghotilo ginauna cheke fakeli ghau iara LORD,
nodi God te Blahi mae Israel.
17“Nogu naikno iara igre tanhi mei ka iara mala toghodi,
jateula mae ihei te kuma te magnahaghei fara khoꞌu ra eghu.
Eghuteuna iara LORD, nodi God mae Israel,
iara ginauna nomhidi nodi tharai re na theome ghatho ihodi.
18Iara ginauna chekeni khoꞌu na mala loloro haghe fari hotei thogele te khapra fara,
eghuteuna iara na eni glokha khoꞌu na mala loloro soru fari hotei glogu.
Uve, iara ginauna edi kholo seu re mala fodu ka khoꞌu ke lamna namono nagou,
eghuteuna glokha re ginauna loloro tei ke lamna glose te khapra.
19Iara ginauna joꞌu gaju sida, paen, oliv, junipa, saepras,
nei keha nafnata gaju langau eghu mala karha ke lamna namono nagou.
20Iara ginauna eni igne mala filoni nei laseni eghu naiknore te iara LORD nodi God te Blahi mae Israel teke vuavuhadi gobigna lepo fateote’o igre.”
LORD na nheta salaꞌudi keha god are
21Igne chekegna LORD nomi king ghotilo vikegna mae Jekop.
Mana neke cheke eghu,
“Ghotilo nodi god keha kantri ra,
ghotilo mei ka nogu fate iara igne mala cheke mei nomi chekere.
Kaikaliti fakeli nomi chekere mala cheke fajifladi ka fate igne.
22Ghotilo mei agne mala chekedi unha nate thoke mei ginau,
mala laseni ghehati narane nate thoke mei glepo igre.
Ba, cheke meidi unha glepo teke edi tifa re,
eghuteuna cheke meidi gaoghathodi glepo igre.
23Cheke meidi unha glepo nate thoke mei thogheiro,
mala laseni ghehati iagho god te tutuani na.
Eni si ghotilo glepo igne!
Eigna ghotilo neke famamhaghu neke fififri ghehati!
Ka puhi igne te mala laseni ghehati te ghotilo god te tutuani na.
24Nu theo eghu! Ghotilo theo nafumi kolho!
Ghotilo theome tangomana te eni kaisei glepo na!
Eghuteuna iheire te tarai ka ghotilo are thono diꞌa parilahu!
25“Iara neke kulu vahinihi kaisei maegna ke raru la meihi gognarona.
Mae igne tangomana te fafnaknoni Nanghagu iara te Blahi na,
eghuteuna iara gognarona hata meini mana funu ke raru mala faparidi nei tapla sorudi eghu hatimare mae king,
jateula kaisei mae te tapla ke kligna chopu te mala hohoro suspen thina tagna ra eghu.
26Ihei ka ghotilo te tangomana nate chekeni glepo igne ginauna thoke mei teuna,
mala laseni ghehati te tutuani na?
Theo kolho! Theo kaisei ka ghotilo te chekeni kaisei glepo eigna igne,
eghuteuna theo kaisei naikno te nomhi ghami ghotilo te chekeni kaisei glepo na.
27Iara LORD kolho,
iara mae ulu lahu teke toutonu ranghini Saion unha glepo nate thoke mei ginauna.
LORD ne cheke eghu,
‘Filo si ghotilo mare kela pulo meihi.’
Eghuteuna iara gognarona jaola kuruni kaisei mae mala hata tei nonomho te keli igne Jerusalem.
28Kate efra faligoho iara na, theo kaisei ka god igre te chekeni kaisei glepo eigna unha nate thoke mei ginauna.
Eghuteuna theo kaisei ka god ka igre te cheke tughu ka gusna te ghusna iara na.
29God igre theo nafudi kolho,
nei theome tangomana te eni kaisei glepo na.
God chaichaghi igre khogla thotoghale kolho,
eghuteuna god igre theo kaisei nodi nolaghi.”
42Nogna mae gloku LORD
1LORD ne cheke eghu,
“Igne nogu mae gloku iara na,
eigna iara farerhetani fabrahu mana.
Iara neke vahini mana,
eghuteuna iara gleꞌani fara mana.
Iara lisei laohi Tharungagu na ka mana,
eghuteuna mana ginauna fatedi kantri te gnafa igre ka puhi te doglo.
2Mana ginauna na theome eha fabiꞌo
leghu nabrou ke lamna namono.
3Mana ginauna thofno keli fara
jateula ihei te theome lopi kaisei fora ia eghu
neuba neke oghohi kakatha.
Eghuteuna mana ginauna theome ifu falehe
juta te theome agha fakeli igne.
Uve, leuleghu fata na mana fatedi naiknore ka puhigna te doglo.
4Gaoghathogna mana na ginauna theome glaꞌe soru,
ba theome babaꞌo,
ghilei thokeni narane
nate fadoglidi mana puhidi naikno te gnafa heva te heva ka nauthoglu igne.
Eghuteuna naikno te au ka kantri te khaba igre,
ginauna ofoniu te mala nomhini nogna farirhiu mana na.”
5LORD ngala God mae ihei teke lilisei haghe maloa gne jateula kaisei suga tapuale neku.
Eghuteuna mana neke vuavuha nauthoglu igne neke thafru ka thua nafnata glepo te keli.
Mana neke phanga lao nakarha ka naikno te gnafa ka nauthoglu igne.
LORD neke cheke eghu ka nogna mae gloku na,
6“Iara LORD, iara neke kilo nigho mala fakakhana nakarhagu iara te doglo na.
Iara ginauna au balumu iagho mala reireghi fakeli nigho.
Ka iagho, iara ginauna eni nogu nhaꞌa cheke na baludi naiknogna nauthoglu igne.
Eghuteuna iara ginauna togho nigho mala jateula kaisei juta eghu ka naikno te au romno ka nauthoglu igne.
7Iagho ginauna nake fakelidi tathadi iheire te dofu mala ke fifilo fakeli,
eghuteuna toghodi iheire te au ka suga sosolo te romno mala jifla mei ka nasnagla.
8“Iara LORD, tuana Nanghagu iara na! Eghuteuna iara na theome snakreni kaisei god mala fnakno nanghagna na jateula iara eghu.
Uve, iara ginauna na theome snakredi naiknore mala kilo fnaknoni kaisei god te chaichaghi teke horo kolho naikno.
9Filo si ghotilo!
Glepo te chekedi iara mala thoke mei tekura,
la thoke meihi tutuani.
Eghuteuna gognarona,
iara ginauna toutonu ka ghotilo eidi glepo majaghani nate thakle mei thogheiro.”
Khoje mala cheke fakelini LORD
10Naikno te gnafa ka nauthoglu igne baludi gobigna lepo te au ke lamnagna!
Ghotilo kojeni kaisei khoje majaghani mala kilo fnaknoni Nanghagna LORD!
Ghotilo iheire te tei ka vaka ra,
ghotilo kilo fnaknoni mana.
Ghotilo gobigna lepo te au ba te taotao ke lamna thongna ra,
ghotilo kilo fnaknoni mana.
Ghotilo naikno te au ka kantri te khaba ra,
ghotilo te gnafa na mala kafe kilo fnaknoni mana.
11Ghotilo naikno te au ka namono biꞌo ke lamna namono nagou ra,
ghotilo kilo fnaknoni LORD.
Ghotilo naiknomi ke maghati Keda ra,
ghotilo kilo fnaknoni mana.
Ghotilo naiknomi ka namono biꞌo Sela ra,
ghotilo haghe ka thogele holo mala eha fabiꞌo balu glealeꞌa.
12Ghotilo te au ka gratha ra ba ka kantri te khaba ra,
ghotilo mala kilo fnaknoni LORD,
nei pala hagheni Nanghagna mana na.
13LORD na tei mala magra jateula kaisei mae te nheta eghu,
mana tarabana ni thegna
jateula kaisei mae nheta ka magra eghu.
Mana eha fabiꞌo fagaglana gna nogna nolaghi na
kate uludi nogna naokare.
LORD nhaꞌa cheke mala toghodi nogna naiknore
14LORD ne cheke eghu,
“Raugha fara, iara te au kmu kolho na,
eghuteuna iara neke theome toghodi nogu naiknore.
Nu gognarona la thoke mei narane nate eni iara unha teke ghathoni iara na.
Uve, iara ginauna eha fabiꞌo,
jateula gaꞌase te kabru ghegna fara kate karha thugna ra eghu.
15Iara ginauna goigoni fahui thogele nei gukhu teu are,
eghuteuna iara ginauna cheke ranghidi buburu nei gaju teu are mala kafe lehe.
Eghuteuna khoꞌu biꞌo nei seu teu are ginauna khapra fara.
16Iara ginauna batudi nogu naikno te dofu ra mala leghuni nabrou teke theome leghuni mare tifa na.
Iara ginauna hata fadelei gromno te au teu mare ke lamnagna igne mala phae jateula narane eghu,
eghuteuna iara ginauna fasasare nabrou te poipogili are maladi mare.
Igne unha teke nhaꞌa chekeni mala eni teku iara na,
eghuteuna iara ginauna eni unha teke nhaꞌa chekeni iara na.
17Nu iheire te tarai ka mumuju god,
eghuteuna chekeni te tuana ngala nodi god na teu are,
ginauna filo fameomekro balu mamaja fara.”
Maedi Israel igre megli nei dofu eghu
18LORD neke cheke eghui,
“Fanomho mei ghotilo naikno te megli ra!
Filo mei ghotilo naikno te dofu ra!
19Theo kaisei naikno te dofu fara jateula nogu mae gloku iara Israel teuna,
eghuteuna theo kaisei naikno te megli fara jateula nogu mae mala hata nonomho iara igne teuna.
Theo kaisei naikno te dofu fara jateula ghotilo nogu mae gloku iara te fofodu balugu iara igre teuna.
20Ghotilo neke filodihi kmana glepo, nu ghotilo theome filo glanini kolho kaisei glepo.
Uve, ghotilo au khulimi.
Nu ghotilo theome nomhi fakelini kolho kaisei glepo.”
21LORD kelitagna fara te kilo fnakno ka puhigna mana te doglo.
Eghuteuna mana magnahaghedi fara nogna naiknore te kilo fnaknoni mana nei nogna vetula.
22Nu gognarona ghotilo mae Israel gre la au fadiꞌa tutuani fara.
Naugna mae naoka ra neke mei blau nomi gobigna lepo ghotilo re,
eghuteuna jaola koko lao ghami ka khora ke lamna glose,
ba bibilakhi ghami ke lamna suga sosolo.
Mae naoka gre neke goigoni ghami ghotilo fara,
eghuteuna theo kaisei mae tangomana teke hata fapulo ghami ghotilo ka khamedi mare na.
23Eghume, ihei ka ghotilo nate fanomho ka glepo igre?
Eghuteuna ihei nate fanomho fakeli ka nogu cheke iara igre?
24Ba, ihei teke snakredi mae naoka igre te mei goigoni ni Israel nei blau nomi gobigna lepo ghotilo re teku ra?
LORD thegna ngala teke snakre meidi re,
naugna tahati neke theome leghudi puhigna nei nogna vetula teu mana re.
25Mana thono diꞌatagna fara ka tahati.
Naugna igne te para ghita fara mana na,
nei para ghita kate magra na.
Diꞌatagna mana ka tahati igne thono biꞌo fara jateula kaisei khaꞌaghi biꞌo te gnhubra fahui namono te gnafa agne Israel igre eghu.
Nu neuba ngau, tahati theome hata gaoghatho ka igre mala ke tughu puhidare.
43LORD nhaꞌa cheke mala fakarhini Israel
1Nu LORD mae ihei teke vahi ghami ghotilo naiknomi Israel, mana neke cheke eghu,
“Ghotilo thosei mhaghu,
naugna iara la hata fapulo ghamihi ghotilo.
Eghuteuna iara kilo ghami ghotilo nogu naikno iara.
2Kate thoke mei puhi biꞌo ka ghotilo jateula te kasa ghotilo ke lamna nhorora ra teuna,
iara ginauna au balumi ghotilo mala togho ghami ghotilo.
Eghuteuna kate au ghotilo ke lamnadi narane te ninhigrana te jateula te kasa ghotilo ka khoꞌu biꞌo te britha ra teu igne,
ghotilo ginauna theome kmerhu.
Uve, kate thoke mei puhi biꞌo te jateula te tapla ghotilo ke lamna khaꞌaghi ra teuna,
ghotilo ginauna na theome nhako.
3Tutuani, iara LORD nomi God te Blahi ghotilo mae Israel,
iara nate fakarhi ghami ghotilo na.
Iara ginauna snakre lao kantri Ijep,
Kus nei Seba teu igre ka khamedi nomi naoka ghotilore mala jateula teke foli fajifla ghami eghu ghotilo,
mala tangomana ghotilo te snagla te jifla ka khamedi mare na.
4Uve, ghotilo thofno naikno ulu fara ka tathagu iara na ke tulaodi naikno te gnafa ka nauthoglu igne.
Iara LORD neke vahi ghami ghotilo tughudi naiknodi keha kantri are,
mala tangomana ghotilo teke au ka nakarha te keli.
Naugna iara ghatho tahu ghami fara ghotilo,
nei namha ghami eghu ghotilo.
Eghuteuna iara magnahagheni fara te mala pala haghedi nanghami ghotilore.
5Thosei mhaghu! Iara au ngala balumi ghotilo.
Neuba vikemi ghotilo te au khaba ke maghati, ba ke mosu,
iara ginauna nake hata fapulodi ka namono.
6Iara ginauna chekedi naikno te au ke raru ra,
mala snakredi thugu iara ra mala ke pulo mei ka iara,
eghuteuna naikno te au ke mata ra mala thosei lhotidi ka iara.
Mare ginauna batudi thugu nalhaꞌu nei gaꞌase teu iara te au ka vido te khaba ka khukrugna nauthoglu igne mala ke pulo mei ka iara.
7God neke kafe vuavuhadi mare gnafa mala nogu naikno iara,
eigna iara magnahaghedi mare mala ke pulo mei mala kilo fnaknoni nanghagu iara na.”
LORD ngala God na
8LORD neke cheke eghui,
“Ghotilo hata mei nogu naikno iara ra mala fatedi iara agne.
Mare au tatha, nu mare theome filo glani kaisei glepo teke eni iara na!
Mare au khuli, nu mare theome nomhini kaisei glepo teke chekeni iara na!
9Ghotilo kilodi naikno te gnafa ka keha kantri are mala kafe mei.
Ihei ka nodi god mare igre nate toutonudi gobigna lepo teke edi teke mei tifa,
ba glepo te theome thokei mei nga teure?
Ihei ka keha god igre nate kulu toutonudi glepo te thoke mei gognaro igre?
Lisa lao ka keha god are mala falalase mare te tutuani nodi cheke re.”
10Igne chekegna LORD. Mana neke cheke eghu,
“Ghotilo maemi Israel ra mala toutonu eigu iara!
Iara neke vahi ghami ghotilo mala nogu naikno gloku iara,
eghuteuna ghotilo ginauna mala lase ghau nei fatutuani ghau eghu iara.
Eghuteuna ghotilo ginauna thofno laseni te iara ngala God na.
Theo kaisei god aheva nga teke kulu au teke karha nga iara na.
Eghuteuna ke leghu na ginauna na jaola theo kaisei god na teke hata sapegu iara na.
11Kaisei thegu iara ngala LORD na,
eghuteuna theo kaisei god aheva nga nate fakarhi ghami ghotilo na.
12Iara neke chekedihi unha nate thoke mei ginauna,
eghuteuna iara thofno fakarhi ghami ghotilo.
Theo kaisei god te eni kaisei glepo jateula igne teuna.
Theo fara. Ghotilo nogu naikno gloku iara mala toutonu ka naiknore te iara thegu ngala God te tutuani na.
13Uve, iara God mae ihei te au fabrahu funu tifa na.
Theo kaisei naikno te rikhani nogu nolaghi iara na,
eghuteuna theo kaisei naikno nate tughu glepo teke edi iara re.”
Igne chekegna LORD.
LORD ginauna hata fafigri naiknodi Israel te au sosolo Babilonia
14LORD mae ihei te Blahi nodi God mae Israel,
mae ihei teke hata fajifla ghami ghotilo igne neke cheke eghu,
“Naugna iara magnahaghei te fakarhi ghami ghotilo,
iara ginauna kuru tei soldia mala tei magra Babilonia.
Eghuteuna iara ginauna huhurudi maedi Babilonia igre mala rikha tei lamna vaka teke fahaehagheni naiknore tifa na.
15Iara LORD, nodi God te Blahi mae Israel,
mae ihei teke vuavuha ghami ghotilo, eghuteuna iara nomi King ghotilo.”
16Tifa na, iara LORD neke eni kaisei nabrou farihotei nhorora.
17Eghuteuna iara na snakredi mae naokare mala balu nodi chariot nei hose eghu te mala leghuni mare nabrou igne.
Mare na kafe lehe jateula juta te ifu falehe te theome phae ra eghu.
LORD mae ihei te au nolaghi te mala edi glepo igre neke cheke eghu,
18“Ghotilo thosei loku famaku ka glepodi tifa ra,
eghuteuna thosei ghatho tahudi glepo teke edi tifa ra.
19Ghotilo filo ka glepo majaghani te edi iara gognaro igre!
Iara ginauna eni kaisei nabrou mala tei ke lamna namono nagou,
eghuteuna khoꞌure ginauna loloro soru ka vido te krogha.
20Glepo tautagu igre ginauna ghatho tahu ghau iara.
Uve, khuma mata nei nakrudu teu igre ginauna kilo fnakno ghau iara.
Naugna iara neke chekedi khoꞌure mala loloro tei ke lamna namono nagou,
mala tangomana nogu naikno teke vavahi iara igre te au khoꞌu te mala koꞌu na.
21Iara neke chekedi nogu naiknore mala kilo fnakno ghau iara.”
Puhi te diꞌa te edi naiknodi Israel
22LORD neke cheke eghui,
“Ghotilo naiknomi Israel ra!
Iara filo glani ghami ghotilo tela hongo ghamihi ka iara na,
naugna igne te theome eha mei ghotilo ka iara na!
23Kate fafara na, ghotilo theome ghatho tahu ghau iara.
Ghotilo theome hata mei sipu mala gahu jateula fafara eghu ka nogu olta iara na.
Iara theome huhuru ghami te mala hata te mei kmana gano ka iara,
ba kmana insens mala gahu mei ka iara.
24Nu ghotilo theome foli kolho kaisei insens mala gahu mei ka iara.
Eghuteuna ghotilo theome gahu kolho kaisei garofa buluka nafnata fafara te gleꞌani iara na.
Unha te eni ghotilo gognarona,
ghotilo fapala mei nakhibo tahu ka iara,
la babaꞌo iara ka puhimi ghotilo te diꞌa re.
25“Nu tutuani fara, iara LORD nomi God ghotilo.
Eghuteuna iara hata koko nakhibomi ghotilo tuare leghuni puhigu iara na.
Eghume iara ginauna nake theome ghathodi nakhibomi ghotilo re.
26Mei ghotilo mala fate ghami iara.
Cheke meini jame te theome tapla jafra ghotilo ka nakhibo na.
27Kuꞌemi ghotilo tifa ra neke tapla jafra ka nakhibo,
eghuteuna nomi mae mala baubatu ghotilo ra jaola neke theome leghuni chekegu iara na.
28Naugna igne iara ginauna chekedi mae pris te loku ka nogu Sugablahi iara na igre mala theome klino ke ulugu iara.
Eghuteuna neuba ghotilo ne naiknomi Israel igre ne nogu iara,
iara ginauna snakredi mae naokare mala mei goigoni ghami ghotilo.
Eghuteuna iara ginauna snakredi keha naiknore mala famamaja ghami ghotilo.”
44LORD fablahidi nogna naiknore
1-2Kani au teku ghotilo ka thiꞌadi idomi ra,
LORD neke vahi ghami ghotilo mala vikegna Israel.
Eghuteuna mana neke togho ghami ghotilo neke cheke eghu,
“Ghotilo fanomho mei ka iara, thosei mhaghu!
Iara namha ghami ghotilo neke vahi ghami ghotilo mala nogu naikno gloku iara.
3Eghume, iara ginauna snakre mei nakhete mala soru mei ke kligna glose te theo khoꞌu fara mala tangomana khoꞌu gre te britha ke kligna glose te khapra.
Eghuteuna iara ginauna snakreni Tharungagu na ka thumi ghotilore.
Eghuteuna iara ginauna fablahidi iheire nate karha mei ke leghumi ghotilo re.
4Mare ginauna karha kelidi jateula buburu te karha kelidi ka vido te au kmana khoꞌura eghu,
ba jateula gaju te karha ka geri khoꞌu biꞌo ra eghu.
5Eghuteuna keha naiknodi ka keha kantri are ginauna fatutuani ghau iara.
Keha ka mare ginauna cheke eghu, ‘Iara nogna LORD.’
Eghuteuna kehare ginauna cheke eghu, ‘Iara vikegna Jekop.’
Eghuteuna kehare ginauna rioriso nanghagu iara na ka khamedire.
Eghuteuna kehare ginauna kilodi thedi naiknodi Israel.”
Naiknore sari mumuju god
6LORD mae ihei te au nolaghi fateote’o igne nodi King mae Israel,
eghuteuna mana atha fasnagli ghami ghotilo.
Mana neke cheke eghu,
“Iara ngala God na, iara neke kulu au neke aunga gobigna lepo igre,
eghuteuna iara ginauna na jaola leghu lahu.
Uve, theo kaisei god ahevanga,
kaisei Iara ngala.
7Theo ihei nga jateula iara teuna.
Jaola theo kaisei naikno nate toutonu ranghi ghau iara gobigna lepo teke edi funu ka narane teke theo nga teku nauthoglu igne te ghilei thoke ka huigna nauthoglu igne!
Uve, theo kaisei te tangomana te eni igne na!
8Ghotilo nogu naikno iara ra,
ghotilo thosei mhaghu nei nanga nomi eghu!
Iara neke toutonuhi ka ghotilo gobigna lepo nate thakle mei ginau re.
Ghotilo mala toutonudi glepo te chekedi iara igre.
Ba? Kaisei god au aheva nga te jateula iara teuna?
Iara theome laseni.
Kaisei iara ngala te jateula nomi thina rheta mala poru teu ghotilo na.”
9Ihei te sari mumuju god te mala tarai tagna na,
mae igne theome nabagna kaisei glepo.
Eghuteuna mumuju te eni mana igne theo nafugna kolho.
Naikno te tarai ka mumuju na,
naikno igne dofu ka unha te tutuani na nei noli eghu.
Eghuteuna mana ginauna mamaja nogna fara ka keha naiknore.
10Ihei te horo mumuju ka aean igne,
mana thono fagoigoli fara.
Naugna vido aean te tarai mana tagna igne,
theome tangomana te toghoni mana na!
11Nafnata mae te tarai ka mumuju te theo nafugna igne ginauna mamaja nogna fara.
Mae ihei te sari mumuju igne,
mana naikno kolho nei theo kaisei nogna nolaghi eghu.
Te keli na mae igne mei kegra ke ulugu iara mala fateni iara.
Mana ginauna mhaghu nogna fara nei mamaja nogna fara eghu.
12Mae te lase hohoro glepo ka aean na,
mana ginauna hata kaisei vido aean mala gahu ka khaꞌaghi te brana fara na mala hohoro kaisei mumuju.
Aonu mana kuri aean igne ka nanhetagna fateote’o ghilei eni nafnata mumuju te magnahagheni mana na.
Neubane mae nheta mana, mana tangomana te rofo nei roi koꞌu,
nei babaꞌo langau teuna.
13Ghotilo kulu ghathoni igne.
Kaisei mae kapenta drou thotoghale naikno ka kaisei vido thaba.
Aonu mana famane sari gaju igne mala jateula kaisei naikno eghu.
Aonu mana lilisei haghe mumuju igne ka kaisei vido blahi ka nogna suga na mala tarai tagna.
14Mae igne jame tei mata mala kato kaisei gaju sida,
ba kaisei gaju ok, ba kaisei gaju saepras mala hohoro mumuju tagna.
Ba mana jame joꞌu keha nafnata gaju,
aonu mana ofoni meigna nakhete na mala kotu biꞌo,
eghuteuna kate biꞌo gaju igne na,
mana ginauna kato soru mala hohoro glepo tagna.
15Mae igne hata vidogna gaju igne mala gahu gano,
ba mala peha.
Eghuteuna keha vido na mala sari mumuju god mala tarai nei pogho soru eghu tagna.
16Mana hata keha vido ka gaju igne mala gahu ghegna nafnahi mala ghamu boho.
Eghuteuna kate thoke mei vido te reka na,
mana na peha ka khaꞌaghi igne na cheke eghu,
“Tore, iara la famane brana nogu!
Khaꞌaghi igne thofno keli fara!”
17Nu keha vidogna gaju igne,
mana na sari kaisei mumuju mala tarai nei pogho soru eghu tagna.
Mana tarai ka mumuju igne na cheke eghu,
“Iagho nogu god iara! Fakarhi ghau iara!”
18Nafnata mae igne theome laseni unha te eni na.
Naugna mae igne jateula mae te dofura eghu kolho,
eghuteuna gaoghathogna mana na jaola romno fara theome laseni cheke te tutuani na.
19Ihei te sari mumuju god igne,
theome au kaisei gaoghatho te keli te mala cheke eghu na,
“Tore, keha vidogna gaju igne iara neke gahu ka khaꞌaghi.
Iara jaola gahu nafnahi nei keha ghegu nafnata gano eghu ka khaꞌaghi igne.
Keha vido te salaꞌui ka gaju igne,
iara neke sari kaisei mumuju te diꞌa kolho.
Iara tarai ka phugra gaju te theo nafugna igne kolho!”
LORD ne fakarhidi nogna naiknodi Israel
20Nu neuba, mae igne theome laseni unha te eni na.
Eghuteuna gaoghatho te jafra na batu fadiꞌani mana.
Mana jateula mae te ghamu nakrofu ra eghu kolho.
Mana theome tangomana te fakarhini thegna na, ba te cheke eghu na,
“Mumuju te hata iara igne theome god tutuani,
kaisei vido gaju kolho!”
21LORD neke cheke eghui,
“Ghotilo naiknomi Israel, ghotilo ke ghathodi nogu cheke iara ra.
Ghotilo nogu mae gloku iara ra, iara neke vuavuha ghami ghotilo,
eghuteuna iara theome tangomana te ghatho iho ghami ghotilo na.
22Eghuteuna iara la hata fadeleihi nakhibomi ghotilo re,
jateula khoveo te pala te tei nuri delei ra eghu.
Ghotilo ke figri mei ka iara, naugna iara neke fakarhi ghami ghotilo!”
23Ghotilo gobigna lepo ka maloa ra,
nei ghotilo gobigna lepo ka nauthoglu ra eghu koje balu glealeꞌa!
Ghotilo thogele nei gaju fateote’o teura,
ghotilo jaola glealeꞌa balu eha fabiꞌo! Ghotilo kilo fnaknoni LORD,
naugna Mana neke fakarhidi nogna naiknore neke fakakhana nogna nolaghi na ranghini Israel.
Jerusalem ghe Juda ginauna nake keli fapulo
24LORD mae ihei teke vuavuha ghami ghotilo ka thiꞌadi idomi ghotilo are,
eghuteuna mae ihei te fakarhi ghami ghotilo neke cheke eghu:
“Iara LORD, eghuteuna iara neke vuavuhadi gobigna lepo fateoteꞌo gre.
Iara thegu teke vuavuhadi maloa nei gobigna lepo fateoteꞌo te au ke lamnagna.
Eghuteuna kate vuavuha iara nauthoglu igne, theo kaisei naikno teke togho ghau iara na.
25Iara famamajadi iheire te chaghi nei fariuriu toutonudi teu unha nate thoke mei nathuꞌu nauriha.
Eghuteuna iheire te filo haghe ka nathunu are eghuteuna fariuriu chekedi unha nate thoke mei nathuꞌu nauriha teu igre theome tutuani kolho.
Iara nhaꞌa faparidi nodi cheke mae te lalase igre mala laseni mare te nodi cheke mare igre theo nafudi kolho.
26Nu kate chekeni nogu mae gloku iara igne kaisei glepo na,
glepo igne ginauna thoke mei tutuani.
“Te chekeni iara gognarona,
naiknore ginauna nake pulo mei Jerusalem,
eghuteuna mare ginauna nake babana fapulo namono biꞌo te gnafa Juda teke groꞌe ka mae naoka igre.
27Kate cheke iara na, nhorora nei khoꞌu biꞌo teu igre ginauna krango dofidi.
28Saeras ne kaisei mae king biꞌo.
Iara ngala teke vahini mana te mala reireghidi naiknore ka nanghagu iara,
eghuteuna mana ginauna edi unha te magnahaghedi iara re.
Mana ginauna na cheke faheta ka naiknore mala ke babana fapulo namono biꞌo Jerusalem balugna Sugablahi ia.”
45LORD ne vahini King Saeras mala loku ranghini
1LORD neke vahinihi mae Saeras mala kaisei mae king biꞌo.
LORD neke vahini mana mala magra hatidi keha kantri are,
nei mala hata fadelei nodi nolaghi keha mae king are,
nei mala roꞌe soru baradi nodi namono biꞌo mare re.
LORD neke cheke eghu ka King Saeras,
2“Iara ginauna tarabana nabroumu iagho.
Glepo te ninhigrana te jateula thogele biꞌo teu te fanogra nigho iagho are,
iara ginauna na paꞌe soru mala plata pari.
Iara ginauna paꞌe soru grengatha biꞌo te bara ka bras,
eghuteuna kusu aean biꞌo te loki mare baradi namono are.
3Iara ginauna tusu ari ka iagho glepo te keli teke pophoru mare lamna vido te romno are mala tangomana iagho te laseni puhigu iara LORD,
nodi God mae Israel.
Eghuteuna iara na kiloni nanghamu iagho na mala mei.
4Iara neke nhaꞌa cheke ka nogu mae gloku Jekop nei ka iheire nate karha mei thogheiro.
Naugna igne te kilo mei nigho iara te mala mei toghodi mare gognarogne.
Neuba iagho ne theome filo glani ghau iara,
nu iara ghatho tahuni nanghamu iagho na.
5Kaisei Iara ngala LORD na.
Theo kaisei god aheva nga te au na.
Neuba iagho ne theome lase ghau iara,
iara ginauna farheta nigho iagho mala magra.
6Eghume, naikno te gnafa ka nauthoglu igne,
funu ke maghati tei posa ke mosu na mare ginauna laseni te kaisei iara ngala God na.
7Iara neke vuhadi naphae ghe gromno.
Eghuteuna iara neke jaola neke tusu lao nakarha te keli nei snakre lao hoholo biꞌo ka naiknore.
Iara LORD te edi glepo igre.
8“Maloa nei ghotilo khoveo teura!
Ghotilo snakreni puhigu iara te doglo gne mala soru mei jateula nakhete eghu ka nauthoglu igne.
Iagho glose ia!
Iagho snakreni puhigu iara na mala fakarhidi naikno te kotu haghe jateula buburu teu igre,
eghuteuna snakreni puhigu iara te doglo gne mala jaola kotu haghe.
Iara LORD te edi glepo igre.”
LORD funei frunidi gobigna lepore
9Tore! Kokhoni ghami fara ghotilo iheire te fapholai balugna God mae ihei teke vuavuha ghami ghotilo ra!
Ghotilo jateula kaisei vido suspen tela phosahi ra eghu,
la jateula keha vido suspen tela kokohi ka chara ra eghu.
Ba? Glose teke horo suspen mana igne tangomana te ghusna eghu ka mae teke hohorogna na,
“Unha site eni iagho ignea teuna?”
Ba? Glepo igne tangomana te cheke eghu ka mana na,
“Iagho theome lase horo suspen kolho teuna?”
10Kokhoni ghami fara ghotilo iheire te cheke eghu ka idomi nei kmami teura,
“Naugna unha si ghopa te eni eghu ghau kolho iara gnea?”
11LORD, nodi God te Blahi mae Israel,
mae ihei teke vuavuha ghita tahati igne,
mana neke cheke eghu,
“Ghotilo theo nomi nolaghi te ghusna ghau iara eidi keha thugu iara gre!
Eghuteuna ghotilo jaola theo nomi nolaghi te mala cheke ranghi ghau iara unha te mala eni iara na!
12Iara neke vuavuha nauthoglu igne,
baludi gobigna lepo te au ke lamnagna.
Iara neke vuavuha naikno mala au ke lamnagna nauthoglu igne.
Tutuani fara, ka nogu nolaghi iara,
iara neke vuavuha maloa nei gobigna lepo te au ke lamnagna.
Eghuteuna iara funei frunidi naprai nei glaba nei nathunu eghu te au ka maloa kligna.
13Iara neke vahini King Saeras mala edi mana glepo te magnahaghedi iara re,
nei mala fadoglidi gobigna lepo re.
Iara ginauna toghoni mana ka unha nate edi mana re.
Eghuteuna mana ginauna nake babana fapulo nogu namono biꞌo iara Jerusalem.
Ghotilo nogu naikno iara te loku jateula naikno sneka teu ka keha kantri ra,
mae king igne ginauna atha fajifla ghami ghotilo.
Theo kaisei naikno nate folini mana,
ba tusu ranghini mana kaisei glepo te keli te mala eni mana glepo igne.
14Nodi dedei biꞌo naiknodi Ijep nei Kus teu igre ginauna mala nou iagho,
maedi Seba te brahu igre ginauna mala nou sneka iagho.
Mare ginauna babaꞌo chen mala leghu nigho iagho.
Mare ginauna tarai pogho soru ka iagho,
mare na cheke eghu eha fabiꞌo,
‘Kaisei God ngala te au balumu iagho na,
theo kaisei god ahevanga te au na!’ ”
Igne chekegna LORD mae ihei te au nolaghi fateote’o na.
15Tutuani, iagho God mae ihei te fakarhi ghami ghehati naiknomi Israel.
Nu ghehati theome tangomana te filo nigho na.
16Iheire te sari mumuju god igre,
mare ginauna fagoigoli ba mamaja nodi fara.
17Nu iagho ginauna fakarhi ghami ghehati fabrahu,
eghuteuna ghehati ginauna na theome mamaja.
18LORD na mana God mae ihei teke vuavuha maloa baludi gobigna lepo te au ke lamnagna,
eghuteuna mana jaola neke eni famaku nauthoglu igne mala au fabrahu tifa tifa.
Mana neke theome eni nauthoglu igne mala fiti au kolho neku,
theo, mana neke eni nauthoglu igne mala au naikno tagna.
LORD neke cheke eghu, “Iara ngala LORD na. Theo kaisei god ahevanga.
19Iara theome porudi nogu cheke re,
ba poruni gaoghathogu na ka ghotilo.
Eghuteuna iara neke theome cheke ghami ghotilo mala fiti hiro ghau iara kate theo nafugna.
Iara LORD, iara chekeni kolho cheke te tutuani na.
Uve, leuleghu fata na, iara chekeni kolho unha te doglo na.”
Mumuju god na theome tangomana te fakarhini Babilon
20LORD neke cheke eghu,
“Ghotilo te gnafa ka keha kantri te au karha nga teu ra,
ghotilo kafe mei mala fate ke ulugu iara!
Keha naiknore pala tafri nodi mumuju teke horo kolho ka gaju re.
Eghuteuna mumuju god te tarai mare tadi igre theo kaisei nodi nolaghi te mala fakarhidi mare na.
Nafnata naikno igre theome laseni kolho kaisei glepo.
21Ghotilo mei mala chekedi ka iara nomi cheke re ke lamnagna fate igne.
Ghotilo tangomana te kulu cheke ghu fari themi mala doglo ghu ka gaoghathomi re.
Ihei teke chekedi glepo igre tifa na ame thoke mei nga teku na?
Ba? Ghotilo theome laseni?
Iara LORD! Iara God mae ihei te doglo fabrahu,
eghuteuna iara fakarhi ghami ghotilo.
Theo kaisei god ahevanga te jateula iara teuna!
22“Ghotilo naikno te gnafa ka nauthoglu ra,
ghotilo ke pulo mei ka iara mala fakarhi ghami iara!
Naugna iara ngala God na, eghuteuna theo kaisei god ahevanga te au na!
23Iara la enihi kaisei nhaꞌa cheke,
eghuteuna nhaꞌa cheke igne theome tangomana na teke tuthughu na.
Nogu nhaꞌa cheke iara igne tutuani fabrahu.
Ghotilo te gnafa na mala kafe mei tuturupuku ke ulugu iara,
eghuteuna ghotilo nhaꞌa cheke mala leghu ghau iara.
24Naiknore ginauna chekeni te nheta iara na,
eghuteuna puhigu iara na doglo.”
Nu iheire te tirodi ghau iara re ginauna thono mamaja nodi fara.
25Iara LORD, iara ginauna toghodi iheire nate karha mei ka vikegna Israel mala leghuni puhi te doglo na,
eghuteuna mare ginauna na thofno kilo fnakno ghau iara.
461Igne leghu lahudi phei mumuju god, Bel ghe Nebo,
te mala tarai naiknodi Babilonia ra.
Nu phei god igre dongki kolho te pala tafridi re.
Phei dongki igre, thono tahu fara,
eghuteuna dongki te pala igre jaola thono babaꞌo nodi fara.
2Phei god igre theo kaisei nodi nolaghi te mala fakarhidi thedi na.
Hatimare mae naoka hata la teihi phei god igre ka kantri delei.
Igne ngala leghu lahudi re phei nodi mumuju god mae Babilonia.
3LORD ne cheke eghu, “Fanomho mei ka iara,
ghotilo iheire te aunga teu ka vikegna Israel ra!
Funu tifa te mei ka narane teke karha mei ghotilo tagna na,
iara neke reireghi ghami ghotilo.
4Uve, iara nomi God ghotilo, eghume,
iara ginauna reireghi ghami ghotilo fabrahu ghilei kuekuꞌe nei nufa eghu ghotilo.
Iara neke vuavuha ghami ghotilo,
eghuteuna iara ginauna reireghi ghami ghotilo.
Iara ginauna na jaola togho ghami nei fakarhi ghami eghu ghotilo.
5“Ihei te jateula iara teuna?
Ba? Keha god gre jateula iara eghu?
Theo kaisei te nanaba ka iara na,
ba te jateula iara teuna. Thono theo fara.
6Naiknore tothora nodi gloi re,
eghuteuna tofa soru gol ba silva mala skel.
Aonu mare folini kaisei mae mala hohoro kaisei mumuju ka gol nei silva teu igre.
Gnafa teuna, mare pogho soru ne tarai ka mumuju igne.
7Mare hata mumuju igne ne fakegra haghe ka kaisei vido mala au fabrahu jare,
naugna mumuju igne theome tangomana te nolo tafri thegna na.
Nu ihei te tarai ka mumuju igne na,
mumuju igne ginauna theome tangomana nate nomhini mana na,
nei jaola theome tangomana nate toghoni mana ka narane te thoke mei puhi biꞌo na.
8“Ghotilo naikno te theome fanomho nei figri tagruni God teura,
ghotilo ghatho fakelini cheke igne.
Ghotilo thosei ghatho ihodi unha teke edi iara ra!
9Ghotilo ghathodi glepo teke edi tifa ra.
Eghuteuna te mala laseni ghotilo na,
kaisei iara ngala God na,
theo kaisei god ahevanga te jateula iara teuna.
10Funu tifa te mei na,
iara neke chekedi unha nate thoke mei na.
Funu tifa na iara neke chekenihi unha nate thoke mei ke leghu na.
Uve, nogu gaoghatho iara na ginauna thoke mei tutuani,
eghuteuna iara ginauna edi unha glepo te magnahaghedi iara re.
11Iara ginauna kilo meini kaisei maegna ka vido te khaba fara ke maghati,
eghuteuna mana ginauna ghosei mei jateula kaisei gaghata te ghosei te tava te soru mei funugna kligna te atha ghegna ganora eghu.
Mae igne ginauna mei edi gobigna lepo teke ghathodi iara re.
Iara neke chekehi igne,
eghuteuna iara ginauna edi glepo igre jateula teke chekeni iara ia eghu.
12Ghotilo naikno te patugama fara ra, fanomho mei ka iara!
Ghotilo khaba fara ka puhigu iara te doglo na.
13Gognarona, puhigu iara te doglo igne la namo mei fara.
Tutuani fara, glepo igne ginauna ghosei thoke mei.
Iara ginauna na fakarhini Jerusalem,
eghuteuna iara ginauna pala haghedi nanghadi nogu naikno Israel.”
47LORD ginauna fateni Babilonia
1LORD neke cheke eghui,
“Babilonia! Iagho fnakno fara jateula Kuin te gnokro ka nogna sape nafnakno na ia eghu.
Nu gognarona iagho soru mei pari ka sape tuana mala gnokro ke kligna glose.
Ulu lahu na iagho neke jateula kaisei gaꞌase majaghani te famane fara ra neku,
eghuteuna thinigna na famane jemnu fara.
Nu gognarona iagho theome eghu.
2Iagho tei mala figri thina biꞌo te mala ghorhu wit te mala vuhai bret ia.
Iagho hata koko pohe te mala toku tafrudi tathamu nei foflomu teu are.
Eghuteuna iagho hata koko nou famane pohe ana.
Uve, iagho hesra haghe nou pohe na mala kasa ka khoꞌu biꞌo are.
3Eghuteuna naiknore ginauna filoni te soesole iagho na,
eghuteuna iagho ginauna mamaja nou fara.
Babilonia! Iara ginauna nake tughu fapulo glepo diꞌa teke edi iaghora,
eghuteuna theo kaisei naikno nate fanagri ghau iara na.”
4God mae ihei te togho ghita igne,
nanghagna na LORD mae ihei te au nolaghi fateote’o.
Mana nodi God Blahi mae Israel.
5LORD neke cheke eghui,
“Babilonia! Iagho nodi namono biꞌo naiknodi Babilonia.
Iagho neke jateula Kuin neku,
nu gognarona iagho gnokro kmu au ka vido te romno.
Ginauna theo kaisei naikno nate fafnakno nigho jateula kaisei Kuin te funei frunidi kantri ra teuna.
6Tifa na iara diꞌatagu fara ka nogu naiknore naugna mare ne theome leghuni puhigu iara na.
Iara neke nhaꞌa sorudi ke parigna nou nolaghi iagho,
nu iagho neke goigonidi kolho,
eghuteuna iagho neke theome kokhonidi kolho naiknore.
Neubane mae khuekuꞌe mare, iagho paradi fara.
7Te ghathoni iagho na, iagho ginauna na Kuin fabrahu, nu iagho theome ghathoni unha nate thoke mei ka iagho ke leghu na.
8“Fanomho mei ka cheke igne,
leuleghu fata na iagho magnahaghei glepo fara nei ghathoni kolho te mala au fakeli themu na.
Iagho cheke eghu,
‘Iara jateula God eghu, theo kaisei naikno te jateula iara teuna.
Gaoghatho iagho igne jateula kaisei naikno biꞌo te theome laseni nate lehe khetogna na,
ba nate lehe thugnare teu ia eghu kolho.’
9Nu kokhoni nigho fara eghu,
naugna glepo igre ginauna thoke nigho iagho.
Khetomu nei thumu teu iagho igre ginauna lehe ka kaisei narane kolho.
Neuba iagho ne au nou naitu te nolaghi fara te mala reireghi nigho na.
Theo. Iagho ginauna thafoni narane te diꞌa fara na.
10Te ghathoni iagho na,
puhimu te diꞌa tuare ginauna togho nigho mala au rheta,
eghuteuna theo kaisei naikno nate filo glanidi unha te edi iaghore eghu.
Kmana nou nafnata glalase nei kmana nafnata glepo eghu te fodu ka gaoghathomu na, ne cheke eghu,
‘Iara jateula God eghu, theo kaisei naikno te jateula iara teuna.’
11Nu kaisei puhi biꞌo ginauna thoke mei ka iagho,
eghuteuna iagho theo kaisei nou nolaghi nate kegra fothini glepo igne.
Puhi biꞌo igne ginauna thoke mei ka iagho,
eghuteuna iagho ginauna na theome tangomana te eni kaisei glepo te mala fanagrini nabrou gna puhi biꞌo igne.
Glepo te diꞌa te theome ghathodi iaghore ginauna thoke mei mala goigoni nigho iagho.
12“Ediu sagho nou kastom meresin teke edi teke mei iagho funu suamu ra.
Glahula togho nigho,
ba glahu edi iagho kastom meresin tuare mala mhaghu nodi nou naokare.
13Neuba iagho ne leghudi nodi cheke mae glalase te filo ka nathunu,
ba keha glepo majaghani ka maloa,
ba fariu riu chekedi unha nate thoke mei ginau.
Neuba, iagho theo nou nolaghi.
Mare jaola theome tangomana nate mei te fakarhi nigho iagho na.
14Nou mae glalase iagho igre ginauna na jateula buburu te gnhagha te nhako lao ka khaꞌaghi ra eghu kolho.
Mare ginauna na theome fakarhidi thedi ka khaꞌaghi!
Khaꞌaghi igne theome mala peha mare ka vido te rifu,
nu mala nako lao fahuidi kolho mare.
15Funu majaghanimu na,
iagho neke loku ka bisnis baludi mare.
Nu mare theome eni kaisei glepo te mala togho nigho iagho na.
Mare ginauna tei koko nigho iagho.
Eghuteuna theo kaisei naikno nate fakarhi nigho iagho na.”
48LORD nodi funei gobigna lepore ginau thoke mei nathuꞌu nauriha
1-2Ghotilo naiknomi Israel teke karha mei ka vikegna mae Juda ra,
nei ghotilo goro thugna mae Jekop ra eghu fanomho mei ka cheke igne!
Ghotilo nhaꞌa cheke ka nanghagna LORD,
eghuteuna ghotilo chekeni kolho nate tufru soruni nodi God mae Israel.
Eigna ghotilo cheke fahaehaghe koba ne naiknogna nogna namono Blahi God teuna.
Eghuteuna ghotilo jaola chekeni te lelheghu ka God gna Israel,
nanghagna na LORD mae ihei te au nolaghi fateote’o.
Nu ghotilo thono chaghi fara!
Ghotilo theome thofno leghuni kolho puhigna Mana te doglo na.
3Eghume LORD na cheke eghu ka ghotilo,
“Tifa na iara neke chekedi glepo nate thoke mei ginaure.
Eghuteuna glepo igre na megei nga thakle mei.
4Iara lase ghamihi ghotilo,
eghuteuna phaꞌumi ghotilore ginauna patugama fara jateula thina nei aean eghu na theome leghuni nogu cheke iara na.
5Tifa na iara neke chekenihi unha nate thoke ghami ghotilo na.
Iara eni igne mala theome chekeni ghotilo te nomi mumuju teke hohoro ka gaju nei ka gol nei ka silva,
mare edi glepo igre mala thoke mei.
6Uve, glepo teke chekedi iara igre la thoke meihi.
Ghotilo la nomhidihi cheke igre,
eghuteuna gognarona ghotilo la filodihi glepo te thoke mei igre.
Ba, ghotilo theome fatutuanidi kolho si cheke teke kulu chekedi iara te thofno thoke mei tutuani gognaro igrea?
“Uve, iara na kulu chekedi keha glepo te theome thakle mei teu te theome filodi teu ghotilore.
7Igne ulu lahu te chekedi iara glepo igre.
Uve, iara gognarona na theome toutonuni ka ghotilo kaisei glepogna tifa mala theome chekeni ghotilo neke lasenihi themi teuna.
8Iara theome rouronu ghami ghotilo,
eigna ghotilo ne figri tagru ghau iara funu karha meimi ka nauthoglu igne.
Naugna igne, iara neke theome chekedi glepo igre ka ghotilo,
eghuteuna ghotilo neke theome nomhidi glepo igre.
9Iara neke loku fapulo diꞌatagu na ka ghotilo,
eghuteuna iara ginauna na theome goigoni ghami ghotilo,
naugna iara magnahaghei ghami ghotilo te cheke fakelini kolho nanghagu iara na.
10Iara magnahaghei ghami ghotilo te mala klino,
nu iara theome gahu ghami ghotilo ka khaꞌaghi jateula kaisei mae te gahu silva ka khaꞌaghi te mala koko thonagna na ia eghu.
Nu iara lisa lao ghami ghotilo ka thua nafnata naꞌau papara mala koko ghotilo puhi te diꞌa te edi ghotilo are.
11Iara neke ghathoni nogu nafnakno na neke eni puhi igne ka ghotilo.
Iara magnahaghedi naikno te gnafa gre te ghatho tahu ghau iara.
Iara theome magnahaghei kaisei naikno te goigoni nanghagu iara na.
Uve, iara theome snakreni kaisei god te fnakno jateula iara teuna.”
LORD neke vahini mae King Saeras mala atha fajifla naiknodi Israel
12LORD ne cheke eghu,
“Ghotilo naiknomi Israel,
fanomho mei ka iara! Iara neke vahi ghami ghotilo mala nogu naikno iara.
Kaisei iara ngala God na.
Iara neke kulu au neke aunga gobigna lepo igre,
eghuteuna iara ginauna na jaola leghu lahu ka gobigna lepo fateote’o igre.
13Iara neke vuavuha nauthoglu igne eghuteuna iara neke lilisei maloa gne kligna.
Eghuteuna kate kilodi iara na,
maloa ghe nauthoglu igre ne leghu ghau iara.
14“Ghotilo kafe mei mala nomhini nogu cheke iara igne.
Theo kaisei god te chaichaghi teke vahini ihei te mala magra ka mae Babilonia ka nogu nolaghi iara na.
Iara vahini mae Saerus mala magra ka maedi Babilonia,
eghuteuna mana ginauna eni unha te magnahagheni iara na.
15Iara ngala te chekeni ka ghotilo igne,
eghuteuna iara ngala teke kilo meini mae Saerus na.
Iara na batuni mana,
eghuteuna iara na toghoni mana mala uluni mana magra igne.
16“Ghotilo mei namo ka iara mala fanomho fakeli ka unha nate chekedi iara igre.
“Funu tifa te mei na, iara theome cheke pouporu.
Leuleghu fata na nogu cheke iara igre thakle mei tutuani.”
LORD tusu meihi nogna nolaghi na ka iara,
eghuteuna mana kuru ghau iara mala toutonuni chekegna mana na.
17LORD nodi God te blahi mae Israel,
God mae ihei teke fakarhi ghami ghotilo igne ne cheke eghu,
“Iara LORD, nomi God ghotilo.
Iara na farirhiu ghami ghotilo mala naikno keli.
Eghuteuna iara na batu ghami ghotilo ka nabrou aheva te mala leghuni ghotilo na.
18Jame te leghudi ghotilo nogu cheke iara igre na,
ghotilo ginauna au fabrahu ka pharikeli,
eghuteuna nakarhami ghotilo na jateula khoꞌu te loloro fabrahu te theome krango ra eghu.
Eghuteuna ghotilo ginauna leghuni fabrahu puhi te doglo na jateula galo te poha ka nusu ba ka khalaꞌe ra eghu.
19Eghuteuna jame te leghu ghau iara ghotilo na,
thumi ghotilore ginauna kmana fara jateula nusu ka grathara eghu.
Iara ginauna reireghi fakelidi,
eghuteuna nanghadire na theome gnafa ka nauthoglu igne.”
20Ghotilo jifla Babilonia! Rikha tei kokodi naiknogna kantri igne!
Ghotilo gleale’a nei toutonuni nonomho igne balu eha eghu fabiꞌo heva te heva ka nauthoglu igne,
“LORD na la atha fapulohi nogna naikno gloku, mae Israel!”
21Kani teke batudi teke mei mana kuꞌeda tahati ra ka namono nagou te brana fara na tifa ra,
mare neke theome lehe ka khoꞌu.
Theo. Mana neke tothora thina na neke jifla mei khoꞌu na neke koꞌu mare.
22LORD neke cheke eghu,
“Naikno te diꞌa puhidire igre ginauna theome au ka pharikeli nakarhadire.”
49Nogna mae gloku LORD
1Nogna mae gloku LORD igne ne cheke eghu,
“Fanomho mei ka iara,
ghotilo naikno te au ka kantri te khabara!
Kani theome karha mei nga teku iara ka idogu na,
LORD neke vahi ghauhi iara.
Mana neke kiloni nanghagu iara na
mala nogna mae gloku mana.
2Mana neke eni chekegu iara na
mala fnonu jateula naflahi mala magra eghu.
Mana reireghi ghau iara
jateula te pophoru ka khamegna na.
Mana tarabana ghau iara
jateula iara te kaisei jata te fnonu te tarabana te mala fada ra eghu.
3LORD neke cheke eghu ka iara, ‘Israel,
iagho nogu mae gloku iara.
Eigna ka puhi te eni iagho nogu gloku iara na,
naiknore ginauna fafnakno ghau iara.’
4Nu iara ne cheke eghu, ‘Iara loku heta,
nu iara namo babaꞌo kolho,
la ghilei hui nogu nolaghire,
nu theo nafudi kolho.’
Neuba, nogu LORD iara na,
ginauna fateni nogu gloku iara na.
Mana ginauna tusu mei ka iara glepo te keli
eigna gloku te eni iara na.
5“Tifa, kani theome karha teku iara na,
LORD neke vahi ghauhi iara
mala nogna mae gloku mana,
mala ke atha fafigri iara naiknodi Israel
teke au tafri ka keha vidoi.
Naugna igne, mana fafnaknoni nanghagu iara na,
eghuteuna tusu mei nolaghi ka iara,
6eghuteuna mana ne cheke eghu ka iara,
‘Iagho ginauna toghodi vikegna Israel te karha teu igre,
mala ke rheta fapulo jateula teke ululahu ra eghu.
Nu iara au gloku malamu iagho
te biꞌo te salaꞌui fara.
Iara ginauna vahi nigho iagho mala jateula juta eghu
ranghidi keha kantri are,
eghuteuna nogu nolaghi iara na te mala fakarhidi naiknore,
mala tei posa ka vido te gnafa ka nauthoglu igne.’ ”
7LORD, God te Blahi mae ihei te fakarhini Israel.
Mana cheke ka ihei te tirodini fara naiknore nei nogna mae gloku mae ihei te mala funei fruni.
LORD ne cheke eghu,
“Hatimare mae king ginauna filo nigho
eghuteuna kegra haghe mala fafnakno nigho.
Mae biꞌore ginauna
jaola pogho soru mala kilo fnakno nigho.
Glepo igre ginauna thoke mei,
naugna LORD nodi God te Blahi mae Israel igne,
theome huhughuni nogna nhaꞌa cheke na,
eghuteuna mana vahi nighohi te mala nogna mae gloku na.”
LORD ginauna fakarhidi nogna naiknore
8LORD ne cheke eghu ka nogna naiknore,
“Iagho nogu mae gloku iara.
Ka narane te mala fakarhi nigho na,
iara ginauna kokhoni nigho na nomhini nou tharai iagho na.
Iara ginauna reireghi fakeli nigho mala theo kaisei hoholo te thoke nigho na,
eghuteuna iara ginauna vahi nigho mala jateula kaisei nhaꞌa cheke eghu ka naikno te gnafa ka nauthoglu igne.
Eghuteuna iara ginauna snakre nigho mala eꞌei nodi namono nogu naikno iara igre ka nodi namono naikno te thono diꞌa fara gognaro gre.
9Iara ginauna cheke eghu ka iheire te au ka suga sosolo, ‘Jifla mei ka suga sosolo.’
Eghuteuna iara ginauna cheke eghu ka naikno te au teu kate romno, ‘Ghotilo jifla mei kate phae.’
“Aonu mare ginauna au fakeli jateula sipu te ghamu buburu leghu nabrou nei ke kligna thogele.
10Mare ginauna na theome ke rofo, ba roi koꞌu.
Eghuteuna nabranagna naprai nei nuri teu igre ginauna theome goigonidi.
Naugna iara ne kokhoni nogudi,
iara ginauna batudi mala tei ka vido aheva te au khoꞌu te keli.
11Iara ginauna eni kaisei nabrou te doglo mala tei kasa ka thogele ro,
eghuteuna nogu naikno iara re tangomana te tei leghuni nabrou tuana.
12Nogu naikno iara igre ginauna mei funudi ka vido te khaba fara,
ka vido ke raru ba ka vido ke mosu,
nei funu ka namono biꞌo Aswan te au ke mata Ijep.”
(Profet ne cheke eghu)
13Maloa ghe nauthoglu, ghopa glealeꞌa balu eha fabiꞌo!
Ghotilo thogele ra, ghotilo koje!
Naugna LORD ne faglealeꞌa ghami ghehati nogna naiknore,
mala glealeꞌa.
Uve, mana ginauna kokhoni ghami ghehati
iheire te au papara fara.
14Nu naiknodi Jerusalem igre ne cheke eghu,
“LORD na la tei koko ghitahi! Mana ghatho iho ghitahi!”
15Aonu, LORD ne cheke eghu,
“Ba, gaꞌase na tangomana te ghatho ihoni thugna te chuꞌu teuna?
Ba, naꞌa tangomana te tirognani thugna teke karha ka thegna na?
Thono theo fara!
Nu iara jateula kaisei gaꞌase te theome ghatho ihoni thugna na ia eghu theome tangomana te ghatho iho ghami ghotilo na.
16Tutuani fara, iara theome tangomana te ghatho iho ghami ghotilo na.
Iara la riorisohi nanghami ghotilore ka phei khamegu thegu gre.
17Iheire na teke babana fapulo nomi namono ghotilo re,
mare la namo meihi.
Eghuteuna iheire teke goigoni ghami ghotilo ra,
mare ginauna jifla.
18Ghotilo filo tafri mala filoni unha nate eni gognarogne!
Kherami ghotilore ginauna nake pulo mei!
Iara LORD mae ihei te karha te tifa te chekeni ka ghotilo igne,
ghotilo ginauna glealeꞌa fara ka mare,
jateula gaꞌase te tarabana te mala tolaghi,
eghuteuna naꞌa glealeꞌa ka glepo te lalaoni naꞌa ra eghu.
19“Mae naoka igre la goigonihi nomi kantri ghotilo igne la namo kroghahi.
Nu ka narane igne,
kantri igne ginauna ikoi fara naugna kmana naikno fara nate au jare ginauna.
Tutuani, namono igne ginauna theome nabadi naikno nate mei au ka vido igne.
Eghuteuna iheire teke fakroghani nomi kantri ghotilo igne ginauna au fakhaba ka ghotilo.
20Iheire teke karha ke kosigna nomi kantri ghotilo igne ginauna cheke eghu ka ghotilo,
‘Kantri igne thono ikoi fara!
Ghehati magnahaghei vido te mala au tagna na.’
21Ka narane igne ghotilo ginauna jaglo nomi nei glealeꞌa eghu,
ghotilo na cheke eghu,
‘Thuda tahati igre neke karha aheva sigrea?
Iheire teke fakarhidire?
Te ghathoni tahati na,
tahati la tei kokodihi thudara la theohi thuda.
Mae naoka neke atha fajifla ghita ka noda namono igne neke tei loku jateula naikno sneka neku ka nodi kantri.
Ihei teke reireghidi sua igre, te ghilei kmana fara tuare?’ ”
22LORD God ne cheke eghu,
“Iara ginau lilisei kaisei fagaglana mala filoni naiknodi keha kantri are
mala ke atha ke pulo mei thumi ghotilore.
23Hatimare mae king nei kuin teu igre ginauna jateula kmami nei idomi eghu ghotilo.
Mare ginauna pogho soru pari ke ulumi ghotilo,
eigna mare ghatho tahu ghami ghotilo.
Ka narane igne ghotilo ginauna laseni te iara ngala LORD na.
Iheire naikno te fatutuani ghau nei ofo ghau teu iara te mala toghodire ginauna keli tadi fara.”
24Jame ghotilo cheke eghu ka nagnafami themire,
“Jame faꞌunha eghu iagho atha fajifla glepo teke uludi hatimare mae soldia ka magra ra?
Ba, iagho tangomana nate fakarhidi naikno teke uludi mae te nheta igre ka magra na?
Tore, ninhigrana fara!”
25Nu LORD ne cheke eghu,
“Tutuani fara iara ginauna atha fapulo glepo teke atha mae soldia ra.
Eghuteuna iara ginauna fakarhidi naikno teke hata mae te nheta ra.
Iara ginauna magridi mae iheire teke magri ghami ghotilo ra,
eghuteuna iara ginauna fakarhidi thumi ghotilo ra.
26Iara ginauna faꞌeiꞌeidi mae teke para ghami ghotilo ra mala jateula mae te koꞌu beer te thaviru ra eghu mare mala ghilei falehe naikno fari thedi.
Aonu naikno te gnafa ka nauthoglu igne ginauna laseni te iara LORD te fakarhi ghami ghotilo na.
Eghuteuna mare ginauna na jaola lase ghau iara nodi God vikegna mae Jekop mae ihei te nolaghi te fakarhi ghami.”
50Naiknogna Israel tapla jafra ka nakhibo
1LORD ne cheke eghu,
“Ghotilo naiknomi Israel.
Ba, ne tei koko ghamihi iara jateula mae ihei te tei kokoni khetogna na ia neu jau si ghotilo?
Aheva gneu pepa te mala koko gaꞌase na?
Ba, ne foli ghamihi iara ka naiknodi keha kantri are mala falehe kaoni mala naikno sneka eghu?
Theo. Mare neke atha ghami ghotilo neke tei ka keha kantri delei naugna ghotilo ne edi kmana nakhibo fara.
Eghuteuna iara theome magnahaghei ghami ghotilo naugna puhimi ghotilore thono diꞌa fara.
2Kate mei iara na,
iara theome filoni kaisei naikno jare.
Kate eha iara na,
theo kaisei naikno te cheke tughu na.
Ba, na theome fakarhi ghami iara neu si ghotilo ia?
Ba, ne theo kaisei nogu nolaghi iara te mala fakarhi ghami na neu si ghotilo ia?
Filo si ghotilo, kate cheke kolho iara na nhorora biꞌo na ginau moja,
khoꞌure ginauna jaola figri ke kaisei namono nagou,
eghuteuna sasare ginauna kafe lehe.
3Eghuteuna iara tangomana te eni maloa gne mala ke romno soru,
jateula kaisei mae te diꞌanagnafa fara te tanhini ihei te lehe ra eghu.”
Nogna mae gloku LORD na mala leghuni mana
4Nogna mae gloku LORD na ne cheke eghu,
“LORD God neke farirhiu ghauhi iara
ka unha mana te magnahaghei chekedi iara re,
mala ke farerheta nagnafadi
iheire te nigra.
Leuleghu hamerane na mana fadofra ghau iara
mala nomhidi iara glepo majaghani nate farirhiu ghau iara mana re.
5LORD God neke tusu mei glalase ka iara.
Igne te theome figri tagruni
nei thodoni teu iara mana na.
6Kate mei mare te purini thagrugu iara na,
iara ke figri lao bakoguna
mala tungnu mare gremohogure.
Iara theome lhotidi tathagu nei foflogu teure,
mala kmisudi mare.
7Nu nodi cheke te diꞌa mare igre
theome fadiꞌa ghau iara,
naugna LORD God na togho ghau iara.
Gaoghathogu iara na brana fara
te mala eni gloku igne.
Iara ginauna
na theome mamaja.
8Naugna God na au balugu iara,
eghuteuna mana ginauna na chekeni te theo kaisei najafra ka iara na.
Ba? Ihei gne te magnahaghei athi ghau iara ka fate na?
Uve keli fara, mana tangomana te atha tei ghau iara ka fate na mala chekeni mana unha teke eni fadiꞌa iara na.
9LORD God ginauna togho ghau iara.
Theo kaisei naikno tangomana te chekeni ne jafra iara teuna.
Ihei te cheke fapari ghau iara na ginauna theo nafugna, jateula pohe te ghamu fahui gnata ia eghu kolho.”
10Ghotilo te gnafa igre ghatho tahuni LORD nei leghudi nogna cheke nogna mae gloku LORD ra,
neuba ghotilo ne au ka narane te ninhigrana,
ghotilo mala fatutuani ni mana, nanghagna na LORD.
Uve, ghotilo mala rouronu ka mana.
11Nu ghotilo iheire te theome fatutuanini LORD ra ghotilo ginauna tei thoke ka narane te ninhigrana nei lehe eghu.
Naugna ghotilo ne magnahaghei te hiro nomi nabrou themi,
nu nabrou igne thono romno fara eghu.
51LORD ginauna fakarhidi nogna naiknore
1-2LORD ne cheke eghu,
“Ghotilo iheire te fariuriu leghuni puhigu iara te doglo igne ra,
fanomho mei ka iara!
Uve, ghotilo ghathodi kuꞌemi Ebraham ghe kavemi Sera tifa ra.
Ghotilo neke karha mei ka vikedi repa.
Ka narane teke kiloni iara mae Ebraham na,
mana neke theo thugna.
Nu iara neke fablahini mana neke au kmana thugna fara.
3Iara neke kokhoni noguni namono biꞌo Jerusalem te groꞌe pari igne.
Gognarona namono igne jateula namono nagou eghu.
Nu iara ginauna edi kmana glepo te keli fara jare jateula nagare Iden eghu.
Eghuteuna naikno te au ka namono igne ginauna glealeꞌa fara theome gnafa te koje balu kilo fnakno ghau iara na.
4“Ghotilo nogu naikno iara ra,
fanomho ka nogu cheke iara igne.
Nogu farirhiu iara na ginauna jifla tei ka naikno te gnafa ka keha kantri are,
eghuteuna puhigu iara te keli nei doglo teu ka fate na igne ginauna mala jateula juta eghu ka keha kantri are.
5Nogu narane iara te mala toghodi nei atha fapulodi teu naiknore la namo meihi.
Ka nogu nolaghi biꞌo, iara ginauna funei frunidi keha kantri are ka puhi te doglo.
Naiknodi keha kantri igre ginauna fatutuani ghau iara,
eghuteuna ofo ghau iara mala toghodi.
6Ghotilo filo haghe kligna,
eghuteuna ghotilo jaola filo ka nauthoglu igne.
Maloa igne ginauna dofini jateula khoveo eghu,
eghuteuna nauthoglu igne ginauna thono diꞌa fara jateula kaisei pohe te thona eghu.
Eghuteuna naiknore ginauna kafe lehe jateula sisimi eghu.
Nu puhigu iara te mala toghodi nei atha fapulodi teu naiknore ginauna theome gnafa.
7“Ghotilo iheire te leghuni puhi te doglo na,
nei ghotilo iheire te loku famaku chekegu iara na ka nagnafamire teu ra,
thosei mhaghudi naikno te maꞌe ghami nei cheke fadiꞌa ghami teu are.
8Naiknore ginauna dofidi jateula pohe thona te ghamu khokorosi ra eghu.
Nu puhigu iara te doglo te mala toghodi nei atha fapulodi teu naiknore ginauna au fabrahu tifa tifa.”
9LORD, dofra sagho mala mei balu nou nolaghi biꞌo mala togho ghami ghehati,
jateula teke eni iagho tifa ia eghu.
Iagho neke vuri kusi mogo biꞌo Rehab te au ke lamna nhorora igne.
10Iagho neke fota pea nhorora biꞌo na neke khapra,
aonu nou naikno iagho re neke eni kaisei nabrou ka khotogna nhorora biꞌo na mala kasa ka glose te moja.
11Naikno teke fakarha fapulodi LORD ra,
ginauna nake pulo mei Jerusalem.
Eghuteuna kate pulo mare Saion,
mare ginauna eha fabiꞌo balu koje
naugna mare ne glealeꞌa fara.
Mare ginauna theome diꞌanagnafa ba tanhi ka namono igne,
naugna mare na glealeꞌa fabrahu kolho.
12LORD ne cheke eghu ka nogna naiknore,
“Kaisei iara ngala te kokhoni ghami nei farheta ghami teu ghotilo na.
Eghume naugna unha si ghotilo te mhaghudi naikno grea?
Naikno tuare ginauna ghosei lehe dofidi jateula buburu te theome au raugha ra eghu kolho.
13Ghotilo theome lase ghau iara sia?
Iara ngala mae ihei teke vuavuha ghami ghotilo na.
Iara neke lilisei maloa ghe nauthoglu igre ka thofno mala audire.
Naugna unha si ghotilo te mhaghudi fara naikno te para ghami nei tarabana mala goigoni ghami teu igrea?
Diꞌa tadi mare igre ginauna theome thoke ghami ghotilo.
14Iara ginauna theome raugha atha fajifladi iheire te au ka suga sosolo,
nei fakarhidi ka nogna nolaghi glehe.
Eghuteuna naikno igre ginauna na theome kmoꞌe ka glepo te magnahaghedi re.
15Iara nomi LORD, nei nomi God ghotilo.
Nanghagu iara na LORD,
mae ihei te au nolaghi fateote’o.
Iara neke cheke ranghidi nhorora nei galo teu igre mala oa’ongha fabiꞌo.
16Iara neke lilisei maloa gne ka thofno mala augna na,
eghuteuna lilisei famaku nauthoglu igne.
Iara neke cheke eghu ka naikno te au ka namono Jerusalem,
‘Ghotilo nogu naikno iara.’
Iara neke farirhiu ghami ghotilo,
eghuteuna iara reireghi ghami ka khamegu iara.”
LORD ginauna theome parani Israel
17Dofra haghe ghotilo naiknomi Jerusalem!
Ghotilo la koꞌuhi ka kapu te fodu ka diꞌatagna LORD teke tusu ari mana te mala para ghami ghotilo igne.
Ghotilo te gnafa na koꞌu la thaviru fara, la nolo fameomekro tafri.
18Nu theo kaisei naikno te au te mala loku ka khamemi ghotilo te mala batu ghami ghotilo na.
Thono theo fara.
19Phei puhi biꞌo la thoke ghamihi ghotilo.
Ulu lahu na mae naoka mei la goigonihi nomi namono ghotilo igne.
Fapea na, narane te theo gano na jaola thoke ghamihi ghotilo.
Eghuteuna theo kaisei naikno te au teu te mala kokhoni ghami nei fameomego ghami teu ghotilo na.
20Ghotilo uka tafri ke lamna namono biꞌo,
naugna ghotilo ne thono glaꞌe fara.
Ghotilo jateula kaisei bosu mata te khale ka phighoro ra neu.
Diꞌatagna nomi LORD God ghotilo igne thofno thoke ghami ghotilo.
21Eghume, ghotilo naikno te au diꞌanagnafa nei uka tafri teura fanomho mei.
Ghotilo jateula mae te koꞌu te thaviru fara, nu theo waen teura eghu.
22LORD, mae ihei te God nei nomi Funei teu ghotilo igne nate batu ghami ghotilo na.
Mana neke cheke eghu,
“Iara ginauna atha fadelei kapu te fodu ka diꞌatagu iara te para ghami fara ghotilo igne.
Eghuteuna ghotilo ginauna na theome koꞌu ka kapu nate nolo tafri ghotilo balu fameomekro igne.
23Nu iara ginauna na lisa lao kapu igne ka khamedi mae te para ghami ghotilo igre.
Eigna mare neke fathuru ghami ghotilo pari,
eghuteuna tapla ke klignami ghotilo jateula chara neku.”
52LORD ginauna fakarhini Jerusalem
1Dofra haghe ghotilo naiknomi Jerusalem!
Farerheta nagnafami are!
Ghotilo mala fagae ghami themi ka namono blahi Jerusalem.
Naugna naikno bongihehe baludi naikno te theome gae ka tathagna God igre ginauna theome ruma haghe ka namono Jerusalem.
2Ghotilo naiknomi Jerusalem te loku jateula naikno sneka teura,
kegra haghe mala ghiha koko gnagnapa te au ka thinimi are.
Atha koko chen ka grarami are mala snagla.
3Tutuani fara, igne unha te chekeni LORD na,
“Kani teke atha ghami mae naokare teke tei loku jateula mae sneka tekura,
mare neke theome foli ka sileni kolho.
Eghume kate atha fajifla ghami iara na,
iara ginauna na theome foli fajifla ghami ka sileni.
4Tifa na ghotilo nogu naikno iara igre neke tei au Ijep ka nomi gaoghatho themi.
Nu ke leghu na mae Asiria atha ghami ghotilo neke tei mala loku jateula naikno sneka neku,
eghuteuna mare neke para ghami fara ghotilo.
5Eghume unha nate eni iara gognarona?
Mare neke atha ghami ghotilo mala loku jateula nodi naikno sneka neku,
eghuteuna mare neke theome foli fajifla ghami ghotilo.
Mae iheire teke funei fruni ghami ghotilo ra mare neke cheke fahaehaghe fabrahu,
eghuteuna leuleghu fata na mare neke cheke fapari ghau iara.
6Nu ghotilo ginauna lase ghau iara LORD,
iara na chekeni unha nate thoke mei ginauna.
Uve, iara ngala God na.”
7Thofno keli fara te filoni kaisei mae te chari te mei ka thogele ro,
mana atha mei famane nonomho te keli eigna pharikeli.
Mana toutonu eigna God ginauna fakarhi ghita.
Mana ginauna mei Saion mala cheke eghu ka tahati,
“Nomi God ghotilo na king!”
8Ka narane tuana,
mae iheire te doadofra gna namono biꞌo igne ginauna gleale’a fara balu eha fabiꞌo.
Naugna mare ginauna filoni LORD nake pulo mei Saion.
9Neubane diꞌa fara nomi namono biꞌo ghotilo Jerusalem gne gognarona,
ghotilo gleale’a balu eha fabiꞌo,
naugna LORD ginauna fameomego ghami,
fakarha ghami nei ke eni fakeli namono biꞌo Jerusalem!
10LORD ginauna fakakhana nogna nolaghi te blahi na.
Eghuteuna naikno te gnafa ka nauthoglu igne ginauna filoni mana te fakarhidi nogna naiknore.
11Jifla mei ka namono Babilonia!
Jifla mei ka namono te diꞌa tuana!
Thosei haboni kaisei glepo te thona ka tathagna God.
Ghotilo mae te atha te mei glepo te blahi ka sugagna LORD ra,
ghotilo mala jifla mei ka namono tuana,
eghuteuna ghotilo mala gae ka tathagna God.
12Nu ghotilo ginauna na theome faghosei jifla Babilonia,
jateula te rikha ra teuna.
Naugna LORD nomi God ghotilo maemi Israel ra ginauna batu ghami ghotilo,
eghuteuna mana ginauna au ke leghumi ghotilo mala reireghi ghami ghotilo.
Nogna mae gloku LORD na au papara fara
13LORD ne cheke eghu,
“Unha nate edi nogu mae gloku iara igne ginauna ari thofno horoghoto fara.
Naiknore ginauna ghatho tahuni nei pala hagheni eghu nanghagna mana na kligna.
14Tifa na naiknore neke fakokhoanani mana,
eghuteuna tathagna nei foflogna teure neke thofno diꞌa fara neke theome jateula naikno neku filogna na.
Eghuteuna naiknore neke jaglo nodi fara kate filoni mana na.
15Nu gognarona naiknodi ka kantri te gnafa igre ginauna jaglo nodi fara ka mana,
eghuteuna hatimare mae king ginauna iho cheke ke ulugna mana.
Naugna mare neke theome nomhini eigna mae igne,
eghuteuna mare ginauna nomhi fakelidi unha glepo teke theome nomhidi mare tifare.”
531Naiknore ne cheke eghu,
“Ihei gne nate fatutuanini nomi cheke ghehati na?
Ihei gne nate filo glani nogna nolaghi LORD na?
2LORD snakreni nogna mae gloku na
mala karha haghe jateula kaisei gaju ikoi
te karha majaghani ka vido te moja ra eghu.
Mae gloku igne theome famane mae ka tathadi naiknore,
eghuteuna theo kaisei naikno te magnahaghei filo ka mana na.
Theo glepo te keli te filoni ka mana,
te mala magnahagheni mare na.
3Naiknore tirodini mana neke cheke faparini mana.
Kmana fata mana fodu ka diꞌa nagnafagna fara,
neke au papara fabrahu kolho.
Uve, theo kaisei naikno te magnahaghei filo ka mana na.
Te filoni tahati na, mana jateula te fiti maera eghu kolho.
4“Neuba, mana neke papara
tughu ghita tahati hui.
Te ghathoni tahati na mana au papara,
naugna God neke parani mana.
5Nu theo eghu, mare neke faleheni mana
eidi nakhiboda tahati re,
eghuteuna mare parani mana
eidi puhida tahati te diꞌa gre.
Mana kabru ka naꞌau papara igne,
naugna igne tahati au ka pharikeli.
Eghuteuna ka nafneragna mana igre,
tahati ke keli fapulo.
6Tahati te gnafa na jateula sipu
te snivi ra eghu kolho.
Naugna tahati neke leghudi kolho
puhida thedare.
Nu LORD neke snakreni nogna mae gloku
mala au papara eidi nakhiboda
jame teke au papara eidi tahati re.
7“Neuba mare ne parani mana,
mana neke theome eni kaisei cheke.
Mana nhaꞌa faparini kolho thegna.
Mare athani mana jateula sipu majaghani
te mala aknu falehe ra neku.
Mana jateula sipu te au kmu ra neku kolho
kate kuchi mare khaklagna re,
mana neke theome eni kaisei cheke.
8Mare lokini mana
mala hatini ka fate,
aonu mare athani ne tei mala faleheni mana,
nu theo kaisei naikno te nangani kolho
glehegna mana na.
Mare faleheni mana
eidi nakhiboda tahatire.
9Neuba mana ne theome eni kaisei najafra biꞌo,
ba chekeni kaisei cheke te chaichaghi,
nu mare faleheni mana baludi mae te diꞌare,
eghuteuna giugilui baludi mae iheire te dedei.”
10LORD ne cheke eghu,
“Nogu gaoghatho iara,
te mala au papara nei lehe teu mae igne.
Glehegna mae igne, kaisei fafara
mala atha koko nakhibo,
mala tangomana te filoni
iheire nate karha mei ke leghugna manare.
Nakarhagna mae igne ginauna brahu,
eghuteuna naugna unha te edi mana re,
nogu gaoghatho iara igne ginauna thoke mei tutuani.
11Ke leghugna te au papara na,
mana ginauna nake gleale’au,
naugna mana laseni la
mana theome fiti au papara kolho.
Puhigna nogu mae gloku iara igne
thofno doglo fara,
mana ginauna toghodi kmana naikno mala jaola doglo,
eghuteuna mana au papara eidi nakhibodi naiknore.
12Naugna igne iara ginauna ghatho tahuni mana
baludi mae biꞌo te au nodi nolaghi.
Mana snakreni thegna mala lehe
jateula mae te diꞌa eghu.
Nu mana lehe tughudi kmana naikno te tapla jafra ka nakhibo,
eghuteuna mana tore ghau iara mala atha koko nakhibodire.”
54LORD nhaꞌa cheke mala toghodi nogna naiknore
1LORD ne cheke eghu,
“Ghotilo nogu naikno iara ra.
Funu tifa te ghilei mei posa gognaro gne,
ghotilo jateula gaꞌase khara te theo thugnara eghu.
Nu gognarona ghotilo gleale’a nei koje fabiꞌo eghu.
Eghuteuna neuba ghotilo ne jateula gaꞌase te tei kokoni khetogna na ia neu,
iara ginauna fablahi ghami ghotilo,
eghuteuna ghotilo ginauna au thumi kmana salaꞌuni gaꞌase te au khetogna na.
2Ghotilo vahini kaisei vido mala babana fabiꞌo kaisei nomi suga tapuale.
Eghuteuna ghotilo edi fabrahu phukrignare,
eghuteuna tuge soru pari gaju te mala haru famaku phukri igre.
3Naugna ghotilo ginauna tugha fakrepa nomi nohi na.
Eghuteuna naiknore ginauna nake atha fafigri nodi glose te atha keha kantri gognaro igre.
Namono biꞌo teke jifla kokodi te krogha igre ginauna nake fodu ka ghotilo.
4“Thosei mhaghu! Theo kaisei naikno nate famamaja ghami nei filo fapari ghami teu ghotilo na.
Ghotilo ginauna nake ghatho ihodi narane teke jateula gaꞌase te tei tafri,
ba jateula thau te au sopa te magnahaghei tolaghi teku tifa ra.
5Naugna iara jateula mae tholaghi eghu ka ghotilo,
naugna iara neke vuavuha ghami ghotilo.
Nanghagu iara na LORD,
mae ihei te au nolaghi fateote’o.
Eghuteuna iara nodi God te blahi mae Israel mae ihei te atha fasnagla ghami nei funei frunidi naikno te gnafa ka nauthoglu igne.
6Gognarona ghotilo jateula kaisei gaꞌase majaghani te fnota ka khetogna na te diꞌa nagnafagna ia eghu.
Nu iara LORD ginauna kilo ghami ghotilo mala ke pulo mei ka iara.
7Iara neke tei koko ghami katha vido kmoꞌei kolho.
Nu iara ginauna nake atha fapulo ghami,
naugna iara ne kokhoni ghami ghotilo.
8Iara neke diꞌatagu neke jifla koko ghami ghotilo katha vido kmoꞌei kolho.
Nu iara ghatho tahu ghami nei diꞌa nagnafagu fabrahu eimi ghotilo.”
Igne chekegna LORD mae ihei te fakarhi ghami ghotilo.
9“Ka naranegna mae Noa igne,
iara neke eni kaisei nhaꞌa cheke mala theome plulu nauthoglu igne ka khoꞌu.
Iara gognarona jaola nhaꞌa cheke mala theome diꞌatagu ka ghotilo.
Iara ginauna na theome thodo ghami nei para ghami eghu ghotilo.
10Neuba thogele nei gukhu teu igre ne bruja ne vuhai nakrofu,
puhigu iara te ghatho ghami ghotilo fabrahu igne theo ka gnafa gna.
Nhaꞌa cheke teke eni iara te au fakeli ghotilo ka pharikeli igne,
iara ginauna tathaji fabrahu.”
Igne chekegna LORD mae ihei te kokhoni ghami ghotilo.
Jerusalem ginauna nake majaghani fapulo
11LORD ne cheke eghu,
“Ghotilo naiknomi Jerusalem.
Gognarona ghotilo au papara,
eghuteuna kmana hoholo thoke ghami ghotilo.
Eghuteuna theo kaisei naikno te togho ghami ghotilo te mala ke keli nagnafami ghotilo na.
Iara ginauna babana fakeli ghami ghotilo,
jateula te atha famane thina te babana famaku nomi namono biꞌo ghotilo igne eghu.
12Iara ginauna babana ka thina ukru suga te mala toetoe namono biꞌo igne.
Eghuteuna iara ginauna bara lithui namono biꞌo igne ka famane thina mala thofno keli fara fifilogna na.
Eghuteuna iara ginauna hohoro grengathagna namono igne ka famane thina te siasigla mala jateula khaꞌaghi te phae ra eghu.
13Iara LORD ginauna farirhiu ghami ghotilo,
eghuteuna tusu ari nakarha te keli nei pharikeli eghu ka ghotilo.
14Puhigu iara te doglo na ginauna farheta ghami ghotilo.
Eghuteuna theo kaisei naikno nate para ghami nei famamhaghu ghami teu ghotilo na.
15Iara ginauna na theome kuruni kaisei naikno mala magra ka ghotilo.
Nu jame ihei te magra ka ghotilo na, ghotilo ginauna uluni mana.
16“Iara neke tusu ari glalase ka mae iheire te gahu aean mala hohoro thua nafnata glepo mala magra.
Iara jaola neke toghodi hatimare mae soldia mala atha glepo igre mala falehe naikno.
17Nu theo kaisei glepo mala magra ka igre nate ghoreho ghotilo na.
Eghuteuna ghotilo ginauna tangomana te cheke tughu ka iheire te cheke fapari ghami ghotilo na.
Uve, iara ginauna edi glepo te keli ka ghotilo nogu mae gloku iara ra,
eghuteuna togho ghami ghotilo mala ulu.”
Igne chekegna LORD.
55LORD ne kokhonidi nogna naiknore
1LORD ne cheke eghu,
“Ghotilo mei ka iara!
ghotilo iheire te magnahaghei koꞌu ra, mei koꞌu ka iara.
Khoꞌu na au ngala.
Ghotilo iheire te theo nomi sileni ra, ghotilo mei ka iara.
Ghotilo mei atha gano ka iara mala ima.
Ghotilo mei mala koꞌu milk nei waen,
uve, neubane theo sileni mei kolho.
2Naugna unha si ghotilo te fiti koko sileni ka glepo te mala theome ghamu gnea?
Naugna unha si ghotilo te loku heta ka thuagna nafnata glepo,
nu rofo kolho teugnea?
Ghotilo te gnafa na,
fanomho mei ka iara,
eghuteuna ghotilo eni unha te chekeni iara igne!
Jame te eni ghotilo igne na,
ghotilo ginauna glealeꞌa fara,
jateula te ima famane gano te keli ra eghu.
3Ghotilo mei ka iara! Ghotilo fanomho mei!
Jame te mei ghotilo na,
iara ginauna eni kaisei nhaꞌa cheke balumi ghotilo,
eghuteuna nhaꞌa cheke igne ginauna au fabrahu tifa tifa.
Iara ginauna ghatho tahu ghami ghotilo fabrahu jateula teke ghatho tahuni iara King Devet tifa ia eghu.
4Iara neke vahini mana mala baubatu nei funei frunidi eghu naiknodi ka keha kantri are.
Mana neke fakakhana nogu nolaghi iara na ka mare.
5Iagho nogu mae gloku iara.
Iagho ginauna kilo meidi naiknodi keha kantri teke theome lasedi iagho.
Eghuteuna iheire teke theome lase nigho iagho igre ginauna chari mei ka iagho.
Iara ginauna edi glepo igre mala thoke mei,
naugna iara LORD nodi God te blahi mae Israel,
iara fafnakno nigho.”
6Ghotilo figri ka LORD!
Mana gognarona au balumi ghotilo,
eghume ghotilo tarai ka mana.
7Ghotilo iheire te leghudi puhi te diꞌa ra,
ghotilo koko puhi te diꞌa tuare.
Ghotilo koko gaoghatho te diꞌa tuara mala ke pulo mei ka LORD noda God,
mala kokhoni ghami nei hata fadeleidi nakhibomi ghotilore eghu mana.
8Igne nogna cheke LORD. Mana ne cheke eghu,
“Gaoghathogu iara na theome jateula gaoghathomi ghotilo eghu,
eghuteuna puhigu iara na theome jateula puhimi ghotilo eghu.
9Naugna maloa na haghe fara salaꞌuni nauthoglu igne,
eghume puhigu iara na haghe fara salaꞌudi puhimi ghotilore.
Eghuteuna gaoghathogu iara na jaola haghe fara salaꞌudi gaoghathomi ghotilore.
10Chekegu iara na jateula nakhete te soru mei ka vido te gnafa ka nauthoglu igne te mala kotu te vuragha gano ka nagare ra eghu.
11Chekegu iara na ginauna jateula tuana eghu.
Gobigna lepo te chekedi iara igre ginauna thoke mei tutuani jateula teke ghathoni iara na eghu.
Eghuteuna unha te chekeni iara na, na theome theo.
Uve, gobigna lepo te chekedi iara igre ginauna thoke mei jateula te magnahagheni iara na eghu.
12Neuba ghotilo ne au neu Babilonia,
ghotilo ginauna jifla ka kantri tuana,
eghuteuna ghotilo ginauna glealeꞌa fara.
Kate batu ghami te jifla iara na,
ghotilo ginauna nake au fakeli.
Neubane thogele te au faligoho ghami ghotilo igre ginauna jaola glealeꞌa balu koje.
Neuba gaju igre ginauna jaola glealeꞌa fara balu proaprosa.
13Famane gaju ginauna kotu ka vido aheva te kotu gnarho phono tagna gognarogne.
Fagaglana igre ginauna au fabrahu mala theome ghatho ihodi ghotilo,
eghuteuna glepo biꞌo teke edi iara LORD igre ghotilo ginauna ghathodi fabrahu tifa tifa.”
56Naiknodi keha kantri igre ginauna loku fodu baludi nogna naikno LORD
1LORD ne cheke eghu,
“Ghotilo nogu naikno iara ra!
Ghotilo leghuni puhi te doglo nei keli teuna,
naugna iara namo fakarhi ghami ghotilo.
Eghuteuna iara ginauna jaola namo fakakhana puhigu te doglo na ka ghotilo.
2Iara ginauna fablahidi iheire te tajini narane Sabat,
ba iheire te leghuni vetula eigna narane tuana.
Eghuteuna iara ginauna fablahidi iheire te theome eni kaisei glepo te diꞌa.”
3Theome doglo naiknodi keha kantri igre te nhaꞌa cheke te mala leghuni LORD,
te cheke eghu na,
“LORD ginauna theome snakre ghau iara te tarai baludi nogna naiknore.”
Eghuteuna iheire te theo thudire, thosei cheke eghu,
“Naugna iara gne jateula gaju te theome ure ra eghu theo thugu,
iara theome nabagu te au baludi nogna naikno God igre.”
4Aonu LORD ne cheke eghu,
“Keha ka iheire te theo thudi igre mare tajini fabrahu narane Sabat igne mala ghatho tahu ghau iara,
nei eni unha te gleꞌani iara na,
nei tajini fabrahu nogu nhaꞌa cheke iara na.
5Iara ginauna tusu ari nafnakno ka mare ke lamnagna nogu Sugablahi na,
uluni jame te au thudi mare na.
Eghuteuna nogu naikno iara re ginauna theome ghatho ihodi mare.
6Eghuteuna ghotilo naiknomi ka keha kantri ra neke nhaꞌa cheke mala leghu ghau iara,
eghuteuna iheire te namha ghau iara te loku ranghi ghau iara ra,
nei iheire te tajini narane Sabat na teura,
ghotilo tajini fabrahu nogu nhaꞌa cheke iara na.
7Iara ginauna atha mei ghami ghotilo ka nogu Thogele Blahi iara Saion.
Iara ginauna fagleꞌa ghami ghotilo ke lamnagna nogu suga tharai na.
Eghuteuna iara ginauna keli tagu ka fafara te edi ghotilo ke kligna gna nogu olta iara na.
Naugna nogu Sugablahi iara igne suga tharai mala tarai naikno te gnafa ka kantri te gnafa igre.
8Iara nhaꞌa cheke eigna ginauna iara na atha mei keha naikno mala loku fodu baludi nogu naikno iara igre.”
Igne chekegna LORD mae ihei teke atha fajifla ghami ghotilo naiknomi Israel ka kantri aheva teke tei sosolo ghotilo ia.
LORD ginau fatedi mae lidadi Israel
9LORD ne cheke eghu,
“Ghotilo nodi naoka mae Israel ra!
Ghotilo mei jateula lion te mala mei ghamudi nogu naikno iara ra eghu.
10Nodi lida mae Israel igre jateula mae sekiuriti te dofu nei iho teura eghu,
naugna mare theome kulu chekedi nogu naikno iara re.
Mare theome laseni kaisei glepo.
Mare jateula khuma te fnotho foflogna na te theome eha kate mei mae te blau ra eghu.
Mare jateula mae te thuru teura eghu kolho.
Mare kelitadi kolho te mala koꞌu na.
11Mare jateula khuma te rofo fara,
eghuteuna neuba mare ne ghamu,
nu mare theome tangomana te boho na.
Mae lida igre theome laseni puhigna LORD te keli na.
Mare te gnafa na leghudi kolho gaoghathodi thedi te mala atha unha glepo te keli na.
12Naikno igre cheke eghu,
‘Tahati ari atha waen nei beer eghu mala koꞌu gheda mala ghilei thaviru noda fara!
Nathuꞌu na ginauna thofno keli fara salaꞌuni narane gognarogne.’ ”
571Ka narane igne,
naikno te doglo te lehe,
nu theo kaisei ka naikno te diꞌa te filo glanidi ba nangadi kolho.
Uve, LORD ginauna atha fadelei naikno te ghatho tahuni mana igre.
Nu theo kaisei naikno kolho te filo glani LORD teke atha fadeleidi naikno igre,
mala theo kaisei puhi biꞌo nate thokedi mare.
2Iheire te doglo nakarhadire ginauna au ka pharikeli,
nei mala tangomana mare te gnafa fakeli nodi kate lehe na.
LORD ginauna fatedi nogna naiknore
3LORD ne cheke eghu,
“Nu ghotilo thudi naikno te diꞌara,
nei vikedi iheire te loku ka naitu ra,
nei iheire te tolaghi pedo ra,
nei gaꞌase vine ra eghu ghotilo mei mala fate ghami iara!
4Ghotilo naikno chaichaghi!
Ihei gne te maꞌeni ghotilo na?
Ihei gne te mikoni nei fajifla glapini teu ghotilo na?
Ghotilo naikno mala tiromidi glepo te keli re!
Ghotilo maꞌe, miko nei fajifla glapi eghu ka themi!
5Kate tarai ghotilo ka nomi god te chaichaghi are na,
ghotilo tei eni puhi te diꞌa na baludi goro gaꞌase vine ke pari gaju biꞌo.
Ghotilo tei ka gluma thina te au ka geri glogu,
eghuteuna ghotilo aknu falehe thumire mala fafara ka nomi mumuju god.
6Ghotilo sene thina salhu ka vido igne,
aonu ghotilo pogho soru tagna jateula nomi god eghu.
Ghotilo tofa waen ka thina igre,
mala jateula nomi fafara eghu tadi,
eghuteuna ghotilo jaola fafara gano ka thina igre.
Ba, ne kelitagu iara te filodi glepo igre neu si ghotilo ia?
Thono theo fara!
7Leuleghu fata na ghotilo tei ka thogele holo mala fafara
nei eni puhi te diꞌa na eghu ka gaꞌase nodi pris god igre.
8Ghotilo fakegra haghe mumuju god igre lamna suga ka grengathadi nomi sugare.
Ghotilo tiromi ghau iara, naugna igne ghotilo gognarona thuru soesole balu gaꞌase vine.
Ghotilo magnahaghei gaꞌase fara mala glealeꞌa nomi.
9Leuleghu fata na ghotilo ghiha oel te famane siri keligna ka thinimi re mala tei tarai ka god Molek.
Ghotilo kurudi nomi mae glokure mala tei ka keha kantri te khaba delei mala hiro mumuju god mala tarai tadi.
Neubane ka Beku mare jaola tei hiro mei tagna.
10Ghotilo la ghilei kmusa ka hirogna god igne.
Nu neuba, ghotilo thono heta fara te eni puhi igne.
Te ghathoni ghotilo na, god igreu nate farheta ghami ghotilo na,
naugna igne te theome koko ghotilo puhimi te diꞌa igre.
11“Ghotilo chaghi ghau iara fabrahu,
naugna ghotilo mhaghudi fara god te chaichaghi igre.
Naugna igne, ghotilo la ghatho iho ghauhi iara.
Ba, ne au kmu fabrahu iara neu ne theome ghatho tahu ghau iara si ghotilo ia?
12Puhi te eni ghotilo igne keli fara ka gaoghathomi ghotilo re.
Nu iara ginauna fakakhana puhimi ghotilo te diꞌa re,
eghuteuna nomi god ghotilo tuare ginauna theome togho ghami ghotilo kolho.
13Ka narane te ehani ghotilo ihei te mala mei togho ghami na,
ghotilo snakredi god chaichaghi tuare mala fakarhi ghami.
Nu fiofilo ghami eghu!
Neubane kaisei nuri ikoi kolho tangomana nate ifu sorudi mare na.
Nu iheire te rouronu ghau iara te mala reireghidire,
ginauna au fabrahu ka kantri igne,
eghuteuna mare ginauna tufru soru ghau iara ka nogu Thogele Blahi iara igne.”
LORD neke nhaꞌa cheke mala toghodi nogna naiknore
14Naiknore ginauna nomhini nogna cheke LORD igne,
“Ghotilo naiknora!
Ghotilo tarabana fakeli nabrou igne mala ke pulo mei nogu naikno iara ra.
Ghotilo atha fadelei glepo te fanogradi mare igre mala ke pulo mei mare ka iara.”
15LORD mae ihei te haghe nei blahi fara,
nei karha fabrahu te tifa te tifa igne,
mana ne cheke eghu,
“Iara au ka vido te haghe nei blahi, nu iara jaola au baludi naikno te nhaꞌa faparidi thedi nei au diꞌanagnafa fara eidi nakhibodi re teu igre,
eghuteuna iara tusu lao ranghidi nakarha majaghani.
16Iara ginauna na theome figri tagru ghami,
ba diꞌatagu ka ghotilo,
naugna jame te eghu fabrahu iara na,
ghotilo ginauna na glaꞌe soru.
Uve, jame te eghu ghotilo na,
ghotilo iheire teke tusu ari iara nakarha na tami ra ginauna lehe.
17Tifa na iara neke diꞌatagu ka ghotilo,
naugna ghotilo neke tapla jafra ka nakhibo nei ghamu nhoto fara neku.
Naugna igne te para ghami nei tei koko ghami teu iara na.
Nu neuba, phaꞌumi ghotilore maku fara jateula thina eghu maku fara,
eghuteuna ghotilo leghudi kolho puhimi themi te diꞌare.
18Iara filodihi puhimi ghotilo te diꞌa tuare, nu neuba,
iara ginauna nake fakeli fapulo ghami ghotilo.
Iara ginauna na baubatu ghami nei togho ghami eghu ghotilo.
Iara ginauna farerheta nagnafami ghotilore,
eghuteuna ghotilo iheire te diꞌanagnafa nei tanhi teura ginauna eha nei kilo fnakno ghau iara.
19Neuba ghotilo ne tei au kate khaba, ba au kate namo,
iara magnahaghei ghami ghotilo te au ka pharikeli.
Uve, iara ginauna togho ghami ghotilo mala ke pulo mei.
20Nu naikno te tirodi ghau iara re jateula thongna te malura eghu theome au kmu.
Nu leuleghu fata na,
ghoro falonga mata ka gratha na kmana chara nei chopu eghu.
Eghume, naikno te diꞌa na jateula tuana eghu.
21Uve, pharikeli na theome au ka nagnafadi nafnata naikno te diꞌa igre.”
Igne chekegna LORD nogu God.
58Thofno puhi te mala tufru soruni LORD
1LORD ne cheke eghu ka iara,
“Iagho eha fabiꞌo jateula naogla khufli eghu!
Toutonu ranghidi nogu naikno iara Israel,
eigna puhi te figri tagru ghau nei eidi nakhibo teu are.
2Leuleghu narane na, mare mei mala pogho soru ka iara,
eghuteuna mare magnahaghei fara te laseni nei leghuni teu nogu vetula iara na.
Mare fariuriu mala jateula naikno te magnahaghei ghau iara fara mala toghodi ka puhigu iara te doglo te mala au iara baludi ra eghu gaoghathodi re.
3Nu mare cheke eghu koba ka iara,
‘LORD, filo mei ghami ka vido te theome ima nei nhaꞌa fapari ghami themi teu gre,
naugna unha sagho te theome eni kaisei glepo te mala togho ghami ghehati gnea?’ ”
Nu iara LORD ne cheke eghu ka mare,
“Uve, tutuani fara te theome ima ghotilo te mala ghatho tahu ghau iara teu nu eni fabrahu ghotilo unha te magnahagheni themi na teuna,
ghotilo paradi fabrahu nomi mae glokure.
4Kate theome ima te mala pogho soru ka God na,
ghotilo ghosei diꞌatami fara.
Eghuteuna ghotilo jaola fapholai fabrahu balu magra.
Jame te edi fabrahu ghotilo nafnata puhi igre kate theome ima na,
iara ginauna na theome fanomho ka nomi tharai ghotilore.
5Kate mala ghatho tahu ghau iara teu te theome ima na,
ghotilo papara fara.
Ghotilo pogho pari ghilei tei gefe jateula khakla gaju eghu pari phaꞌumire.
Ghotilo tofa nakrofu ka nomi pohere mala thuru ke klignadi.
Ba, na keli tagu iara ka nafnata puhi te edi ghotilo igre neu si ghotilo ia?
Thono theo fara!
6“Iara theome magnahagheni nafnata puhi igne.
Iara magnahaghei ghami ghotilo te thosei edi nafnata puhi te diꞌa nei goigonidi keha naiknore teu igre.
Ghotilo thosei lisa lao gloku biꞌo mala paradi mare,
nu ghotilo snakredi mare mala snagla.
7Igne puhi te magnahagheni iara na,
ghotilo fei ghegna ihei te rofo.
Eghuteuna kate filoni ihei te kuma te theo nogna suga na,
ghotilo atha meini ka sugamire.
Eghuteuna kate filoni ihei te theo nogna pohe na,
ghotilo tufa nogna pohe.
Eghuteuna ghotilo thosei poruni ihei kherada te mei tore nogna glepo ka ghotilo na.
8Jame te eni ghotilo puhi te magnahagheni iara igne na,
iara ginauna atha fadelei khabrumi ghotilore,
jateula naprai hamerane te atha fadelei u gromno bongiro ra eghu.
Eghuteuna iara ginauna na ghosei fakeli fapulo ghami ghotilo.
Uve, iara ginauna na baubatu ghami ghotilo leghuni puhigu iara te doglo igne,
eghuteuna nogu nolaghi biꞌo iara na ginauna phae faligoho ghami ghotilo.
9Eghume, jame te tarai ghotilo ka iara na,
iara ginauna nomhi ghami ghotilo.
Eghuteuna jame te eha mei ghotilo ka iara na,
iara ginauna tarabana mala togho ghami ghotilo.
“Jame te koko ghotilo puhi te faparidi keha naiknore,
diꞌa ranghidi, tusu khamedi, cheke fadiꞌadi teu keha naiknore,
10eghuteuna jame te toghoni ghotilo ihei te rofo,
ba ihei te au ka puhi biꞌo, iara ginauna togho ghami ghotilo.
Uve, jame te eni ghotilo igne na,
iara ginauna atha fadelei gromno te toku tafru ghami ghotilo igne mala phae jateula naprai fari hotei naublatha ra eghu ghotilo.
11Iara ginauna baubatu ghami ghotilo fabrahu,
eghuteuna tusu ari glepo te keli mala glealeꞌa ghotilo.
Iara LORD ginauna reireghi ghami ghotilo mala rheta nei theome fogra eghu ghotilo.
Ghotilo ginauna na jateula kaisei nagare te soru mei nakhete tagna,
ba jateula kaisei glokha khoꞌu te theome krango ra eghu.
12Nomi namono biꞌo ghotilo teke diꞌahi ra,
naiknore ginauna nake hohoro ka vido teke au suga tifa ra.
Eghuteuna keha naiknore ginauna laseni teke hohoro fapulo ghotilo suga nei nabrou eghu teke diꞌahi igre.”
LORD ginauna fablahidi iheire te tajini narane Sabat
13LORD ne cheke eghu,
“Ghotilo thosei huhughuni vetula eigna narane Sabat.
Eghuteuna ghotilo thosei eni kaisei glepo leghuni unha te ghathoni themi ka narane igne.
Nu ghotilo ghatho ghau iara fabrahu leuleghu narane.
Ghotilo glealeꞌa mala ghatho tahu ghau iara ka narane blahi igne.
Eghume, ghotilo thosei tei fakhaba ka narane igne.
Eghuteuna ghotilo thosei eni kaisei gloku ka narane igne.
Eghuteuna ghotilo thosei toutonu faparini ihei ka narane igne.
Iara ginauna fablahi ghami ghotilo.
14Uve, jame te eni ghotilo igne na,
ghotilo ginauna keli tami fara,
naugna ghotilo ne lase ghau iara.
Naikno te gnafa ka nauthoglu igne ginauna ghatho tahu ghami ghotilo,
eghuteuna ghotilo ginauna na au fakeli ka kantri teke tusu ari iara ka ku’emi Jekop tifa igne.
Iara LORD te chekeni igne!”
59Mae Israel ne tapla jafra ka nakhibo
1Tutuani fara, LORD na au nolaghi biꞌo te mala fakarhi ghami ghotilo na.
Mana tangomana te fanomho kate tore ghotilo mala togho ghami teuna.
2Nu nakhibomi ghotilo re fota ghami ka LORD.
Eghuteuna mana fofotho phei khulignare,
naugna eidi puhimi ghotilo te diꞌa igre.
3Ghotilo naikno mala chaghi nei mala cheke diꞌa eghu!
Ghotilo naikno mala magra nei mala falehe naikno eghu!
4Theo kaisei ka ghotilo te fate naikno ka puhi te doglo na.
Kate tei ka fate na, ghotilo edi thua nafnata cheke chaichaghi fateote’o.
Leuleghu fata na, ghotilo leghudi kolho nomi gaoghatho themi te mala goigonidi keha naiknore.
5-6Gaoghatho te diꞌa te fodu ka thiꞌami ghotilo igre jateula nakredi phanaga eghu.
Ihei te ghamu kaisei nakredi ka igre na, naikno igne ginauna lehe.
Eghuteuna jame te poposa mana nakredi igne na,
kaisei sua phanaga ginauna jifla mei.
Eghume, gaoghatho te diꞌa te edi ghotilo igre tangomana te thoke mei thua nafnata puhi biꞌo te mala goigonidi nakarhadi keha naiknore.
Filo si ghotilo ka khakafre ia, naꞌa horo suga mala fakhale gnata mala ghamu.
Tutuani, ghotilo theome tangomana te porudi nakhibomi re,
jateula tuana eghu naikno na theome tangomana te atha suga khakafre igne te mala horo pohe na. Theo fara.
7Leuleghu fata na, ghotilo magnahaghei fara te ghosei te eni puhi te diꞌa na.
Eghuteuna ghotilo diꞌatami faleheni ihei te theome eni kaisei puhi te diꞌa na.
Gaoghathomi ghotilo igre thofno diꞌa fabrahu,
eghuteuna puhi te mala goigonidi nakarhadi keha naiknore igne jateula nomi nabrou biꞌo eghu ghotilo.
8Ghotilo theome laseni puhi eigna pharikeli na,
eghuteuna ghotilo theome leghuni puhi te doglo te mala fateni naikno na.
Eghume, ihei te theome leghuni puhi te doglo igne na,
ginauna theome au ka pharikeli.
Naiknore ne cheke thakledi nakhibodire
9Aonu naiknore ne cheke eghu ka LORD,
“LORD, ghehati laseni unha te fanogra nigho iagho te theome fakarhi ghami ka nodi nolaghi mae iheire te para ghami igre.
Ghehati magnahaghei fara te au kate phae,
nu gromno kolho te toku tafru ghami na.
10Ghehati nolo tafri jateula naikno te dofu ra eghu.
Neuba ghehati ne nolo tafri fari hotei naublatha,
nu ghehati totokhei uka pari jateula ihei te nolo tafri fari hotei bongiro ra eghu.
Neuba ghehati ne au baludi iheire te nheta igre,
nu ghehati jateula naikno tela lehehi ra eghu kolho.
11Ghehati mhaghu nomi fara, nei jaola diꞌa nagnafami eghu.
Leghu fata na, ghehati magnahaghei nigho te mei fakarhi ghami,
nu puhimu iagho te doglo na khaba fara ka ghehati.
12“LORD, nakhibomi ghehati igre kmana fara ka tathamu iagho na,
eghuteuna nakhibo igre fate ghami ghehati.
Eghuteuna ghehati themi te lase fakelidire puhi te diꞌa nei nakhibo teu teke edi ghehati igre.
13Ghehati figri tagru nigho nei ghatho iho nigho,
nei theome magnahaghei te leghu nigho.
Ghehati tei koko nighohi,
eigna igne ghehati filo faparidi nei paradi eghu koba keha naiknore.
Gaoghathomi fateote’o nei chekemi fateote’o teu igre thofno chaichaghi fara kolho.
14Puhi te doglo te mala fatedi naiknore,
nei unha te keli teu igre theome tangomana te mei namo ka ghehati na.
Naikno na theome tangomana te nomhini kaisei cheke te tutuani,
nu puhi te chaichaghi igne ngala te au ka foflogna naikno na.
15Gognarona theo kaisei naikno te doglo na,
nu jame ihei te koko puhigna te diꞌa igre na,
keha naiknore ginauna nake goigoni ni mana.”
LORD na tarabana mala fakarhidi nogna naiknore
LORD ne filodi naikno te theome doglo puhidire ne diꞌanagnafa gna.
16Mana ne jaglo nogna fara te theo kaisei naikno te toghodi iheire te au papara ka keha naiknore.
Eghume, naugna nogna nhaꞌa cheke teke eni mana baludi nogna naiknore igne,
mana thegna te fakarhidi naikno te au papara ke paridi nodi nolaghi keha naiknore.
17Puhigna LORD te doglo igne jateula phoko aean mala magra ra eghu,
eghuteuna nogna nolaghi mana te mala fakarha naikno igne,
jateula khepi eghu.
Eghuteuna gaoghathogna mana te rheta te mala fadoglini puhi te theome doglo igne,
jateula kaisei pohe te mala pipichi ra eghu.
18LORD ginauna tughu fapulo puhi te diꞌa fateo teke edi naiknore.
Neuba nogna naoka mana igre ne au aheva ka kantri te khaba fara,
ba ka moumolu ke lamna nhorora,
LORD ginauna jaola paradi.
19LORD ginauna mei jateula kaisei nabritha biꞌo ka narane te saeklon ra eghu funu ke maghati tei posa ke mosu.
Eghuteuna naikno te gnafare ginauna ghatho tahuni nogna nafnakno nei nogna nolaghi biꞌo teu mana na.
20LORD ne cheke eghu,
“Iara God mae ihei teke fakarhi ghami ghotilo igne ginauna mei Saion mala togho ghami ghotilo vikegna mae Jekop,
mae iheire te figri tagrunihi puhigna nakhibo na.
21“Igne nogu nhaꞌa cheke iara na: Iara lisei soru Tharungagu na ka ghotilo, eghuteuna iara neke tusu arihi ka ghotilo nogu farirhiu ra. Eghuteuna phei glepo igre, Tharunga ghe Farirhiu ginauna au fabrahu balumi ghotilo. Phei glepo igre ginauna na au fabrahu baludi thumi ghotilore, eghuteuna jaola au baludi iheire nate karha mei ke leghumi ghotilore tifa tifa.” Igne chekegna LORD.
60Jerusalem ginauna groꞌe
1LORD ne cheke eghu,
“Ghotilo naiknomi Jerusalem!
Ghotilo kegra haghe mala phae jateula naprai eghu!
Naugna naphaegna nogna nolaghi biꞌo LORD na phae ke klignami ghotilo.
2Filo si ghotilo. Gromno na toku tafrudi keha naikno te au ka nauthoglu igne.
Nu naphaegna nogna nolaghi biꞌo LORD na agha mei ka ghotilo,
eghuteuna naphae biꞌo igne rheta fara ke klignami ghotilo.
3Naiknodi keha kantri igre ginauna filoni naphae igne na mei ka ghotilo.
Hatimare mae king ginauna na jaola mei mala filoni nomi naphae ghotilo te jateula nathunu rane teu igne.
4“Ghotilo fadoglo haghe pha’umi are mala efra tafri,
eghuteuna ghotilo ginauna filodi thumi nalhaꞌu teke karha ka vikemi ghotilora nake pulo mei funudi ka vido te khaba.
Eghuteuna mare ginauna papa mei jateula sua eghu thumi gaꞌase ghotilore.
5Kate filoni ghotilo igne, ghotilo ginauna na glealeꞌa fara.
Naugna mare ginauna atha mei dedei funudi ka keha kantri delei.
Tutuani, mare ginauna atha mei ka ghotilo famane glepo te ninhigrana fara folidi re.
6Mare ginauna atha mei kmana kamel nei dedei eghu ka ghotilo funudi Midian nei Efa,
eghuteuna naiknodi Seba ginauna atha mei gol nei insens.
Eghuteuna mare ginauna na kafe eha fabiꞌo mala kilo fnaknoni LORD.
7Mare ginauna atha mei famane sipu funu Keda nei Nebaeot,
eghuteuna LORD ginauna kelitagna fara te atha te mei naiknore sipu igre te mala fafara ke kligna nogna olta LORD.
Aonu LORD ginauna fafnaknoni nogna Sugablahi na,
eghuteuna naikno te gnafa ka nauthoglu igne ginauna kilo fnaknoni mana.
8“Naiknore ginauna ghosei ke pulo mei ka vaka jateula khoveo te flalo te ghosei te tei ka nuri ra eghu,
ba jateula balhu te flalo teke pulo mei ka nogna gnokura eghu.
9Kherami ghotilo te au ka kantri te khaba igre ofoni LORD mala toghodi.
Eghuteuna ka narane igne,
mare ginauna famei kaisei vaka biꞌo mala ke luja fapulo thumi ghotilo ra.
Eghuteuna naikno igre ginauna na jaola famei silva nei gol eghu ka vaka igne mala tusu ranghini LORD nodi God mae Israel.
Mare mei mala kilo fnaknoni LORD,
naugna mare ne filoni mana te edi glepo te biꞌo ka ghotilo igre.”
10LORD ne cheke eghu,
“Naiknodi keha kantri igre ginauna mei mala ke babana fapulo gringni thina gna namono biꞌo Jerusalem.
Eghuteuna hatimare mae king ginauna loku ranghi ghami ghotilo.
Ulu lahu na iara neke para ghami ghotilo,
naugna iara neke diꞌatagu fara ka ghotilo.
Nu gognarona, iara kokhoni ghami ghotilo kela keli ranghi ghami ghotilo.
11Grengatha gna namono biꞌo te ringni te ligoho ka thina igne ginauna thora fabrahu bongi narane mala tangomana hatimare mae king di keha kantri are te mala atha te mei kmana dedei ka ghotilo.
12Nu iara ginauna goigonidi kantri te theome mei loku ranghi ghami ghotilo igre.
13Mare ginauna tei ka namhata biꞌo Lebanon mala hata mei famane gaju paen,
junipa nei saepras mala ke horo fapulo Jerusalem,
nei mala ke famane hohoro fakeli nogu Sugablahi iara igne.
14Thudi iheire teke para ghami fara ghotilo ra ginauna mei fafnakno ghami ghotilo,
eghuteuna mare ginauna mei pogho soru pari ke ulumi ghotilo.
Iheire teke filo fapari ghami ghotilo tifa ra ginauna mei tuturupuku ke ulumi ghotilo.
Eghuteuna naiknore ginauna cheke eghu,
‘Tutuani fara, mare ginauna kiloni namono biꞌo Saion igne nogna namono LORD mae ihei te blahi fara,
nodi God mae Israel.’
15“Naiknore figri tagru ghami nei tirodi ghami eghu ghotilo.
Eghuteuna theo kaisei naikno te mei sigho ghami ba ei bisnis ka ghotilo ka namono biꞌo igne.
Neuba, iara ginauna na fafnaknoni fabrahu namono biꞌo igne,
eghuteuna naikno te gnafare ginauna magnahaghei fara te mei tagna.
16Hatimare mae king nei naiknodi teu keha kantri are ginauna reireghi ghami ghotilo,
jateula gaꞌase te fachuꞌuni thugna na ia eghu.
Ka narane igne,
ghotilo ginauna laseni te iara ngala LORD mae ihei te fakarhi ghami ghotilo na.
Eghuteuna ghotilo ginauna jaola lase ghau iara te iara nogna God mae Jekop,
mae ihei te nheta fara nei atha fasnagla ghami ghotilo.
17Tifa na ghotilo neke atha bras mala horo glepo,
nu iara ginauna na tusu ari gol ka ghotilo.
Ghotilo neke atha aean nei gaju,
nu iara ginauna tusu ari silva nei bras ka ghotilo.
Ghotilo neke atha thina,
nu iara ginauna tusu ari aean ka ghotilo.
Eghuteuna nomi mae funei ghotilore neke para ghami ghotilo,
nu iara ginauna na lilisei vetula ka puhi te doglo nei ka pharikeli.
18Ghotilo ginauna na theome nomhini naogla gna magra na ke lamnagna nomi kantri ghotilo igne.
Eghuteuna hatimare mae naoka na theome tangomana te mei goigoni nomi namono ghotilo igne.
Iara ginauna reireghi ghami ghotilo,
nei bara ghami eghu ghotilo,
jateula bara thina te ringni ligoho ghami ghotilo igne eghu.
Eghuteuna ka narane tuana,
ghotilo ginauna cheke fakeli ghau iara,
naugna iara neke fakarhi ghami ghotilo.
19Ka narane tuana naprai gne ginauna theome phae ka ghotilo,
eghuteuna fei bongiro na glaba gne ginauna theome phae ka ghotilo.
Nu iara LORD ginauna na au jateula naprai nei glaba eghu mala tusu ari fabrahu naphae na ka ghotilo.
Nu iara LORD ginauna nomi naphae ghotilo fabrahu.
Uve, naphaegna nogu nolaghi biꞌo iara nomi God ghotilo na ginauna agha mei fabrahu ka ghotilo.
20Narane te ninhigrana teke diꞌanagnafa nei tanhi teku ghotilo ra ginauna hui.
Naugna iara LORD,
ginauna na jateula nomi naprai nei glaba eghu fabrahu ghotilo.
21Ghotilo te gnafa na ginauna doglo fara ke ulugu iara,
eghuteuna ghotilo ginauna khotogna fabrahu kantri igne.
Iara neke lilisei ghami ghotilo ka namono igne,
jateula gaju teke joꞌu iara ia eghu,
eghuteuna naikno te gnafa igre ginauna cheke fakeli ghau iara eidi glepo te keli teke edi iara ra.
22Neubane theome vike biꞌo ghotilo,
nu ghotilo ginauna kmana fara nei nheta eghu,
jateula kaisei kantri biꞌo te nheta fara ra eghu.
Iara LORD,
glepo te chekedi iara igre ginauna ghosei thoke mei tutuani ka nogu thofno narane iara na.”
61LORD ginauna fablahidi nogna naiknore
1Nogna mae gloku LORD na ne cheke eghu,
“Tharunga gna LORD na au balugu iara,
naugna mana neke vahi ghau iara mala toutonuni u nonomho te keli na ka iheire te kuma.
Mana neke kuru ghau iara mala fameomegodi iheire te au diꞌanagnafa.
Mana neke kuru ghau iara mala toutonu ka iheire te au ka suga sosolo,
nei ka iheire te loku jateula naikno sneka teu te mala snagla.
2LORD neke kuru ghau iara mala cheke thakleni narane LORD nate fablahidi nogna naiknore,
eghuteuna mana ginauna uludi nodi naokare.
Mana neke kuru ghau iara mala fameomegodi nagnafadi naikno te diꞌanagnafa nei tanhi teure,
3eghuteuna mala fameomegodi nei faglealeꞌadi eghu naikno te diꞌanagnafa ka namono Saion.
Mare ghiha nakrofu ka phaꞌudire fagaglana gna nodi diꞌanagnafa na,
nu mare ginauna nake gleale’au,
jateula te fahaghe khepi nafnakno ra eghu.
Tifa na mare neke diꞌanagnafa nei tanhi neku,
nu ginauna mare na koje mala kilo fnaknoni LORD.
Mare ginauna doglo ke ulugu iara jateula gaju ok te doglo teke joꞌu thegna LORD ra eghu.
Eghuteuna mare te gnafa na ginauna kilo fnaknoni LORD eidi glepo te keli teke edi manare.
4“Mare ginauna nake babana fapulo namono biꞌo teke diꞌa tifa ra,
eghuteuna mare ginauna nake horo fapulo suga te gnafa teke goigoni mae naoka tifa ra.
5Naiknodi keha kantri are ginauna mei loku ranghi ghami ghotilo nogu naikno iara ra.
Mare ginauna reireghidi nomi sipu ghotilore,
nei joꞌu gano nei reireghidi eghu nomi nagare grep ghotilore.
6Naikno te gnafa igre ginauna lase ghami ghotilo te nogna pris LORD,
eghuteuna ghotilo nogna mae gloku mana.
Ghotilo ginauna atha nodi glepo te keli keha kantri are,
eghuteuna ghotilo ginauna gleale’a,
naugna ghotilo ne khotodi nodi dedei mare re.
7Ghotilo neke mamaja nomi fara naugna nomi naoka ghotilo ra neke ulu ghami ghotilo.
Nu ghotilo ginauna nake au fakeli ka nomi kantri na,
eghuteuna ghotilo ginauna atha kmana glepo nei vido glose eghu teke uludi teke atha ghotilo tifa ra,
eghuteuna ghotilo ginauna gleale’a salaꞌui.
Nomi gleale’a ghotilo igne ginauna au fabrahu.”
8LORD ne cheke eghu,
“Iara LORD magnahagheni fara puhi te doglo na,
nu iara tiroguni fara puhi te blau, ba te edi puhi te diꞌa.
Naugna puhigu iara na thofno doglo fara,
iara ginauna fablahidi nogu naiknore.
Eghuteuna iara ginauna eni kaisei nhaꞌa cheke baludi,
nhaꞌa cheke igne ginauna au fabrahu.
9Vike te gnafa ka keha kantri igre ginauna lasedi nogu naikno iara igre,
eghuteuna ginauna na jaola lasedi iheire nate karha mei thogheiro.
Iheire fateo te filodi naikno igre ginauna lase ghau iara LORD teke fablahidire.”
10Naiknodi Jerusalem igre ginauna cheke eghu,
“Ka gaoghathomi fateote’o,
ghehati thofno gleale’a fara,
naugna LORD na nomi God ghehati.
Puhi te fakarhi ghami,
eghuteuna togho ghami mala leghudi puhigna te doglo teu igre ghehati thofno gleale’a fara jateula gaꞌase ghe nalhaꞌu te pipichi pohe te keli mala tolaghi teura eghu.
11Jateula sisi te kotu haghe fabrahu ke kligna glose ra eghu LORD God ginauna fadoglidi puhimi ghehati gre mala cheke fakelini ke uludi naikno te gnafa ka keha kantri igre.”
62Jerusalem majaghani
1Nogna mae gloku LORD na ne cheke eghu,
“Naugna iara namhani fara Jerusalem,
iara ginauna na theome au kmu.
Iara ginauna tarai fabrahu ghilei thokeni narane LORD nate fadoglidi puhimi nei nakarhami teu ghotilore mala phae jateula naprai hamerane,
ba jateula juta biꞌo te phae bongiro ra eghu.
2Eghuteuna naiknodi keha kantri igre ginauna laseni te doglo ghotilo ka tathagna God,
eghuteuna hatimare mae king te funei frunidi kantri igre ginauna filo fakelini puhimi ghotilo te doglo jateula te filoni mare kaisei juta biꞌo ia eghu.
Eghuteuna naiknore ginauna kilo ghami ghotilo kaisei nangha majaghani.
Nangha igne LORD thegna nate tusu mei ka ghotilo na.
3Ghotilo ginauna na jateula nogna famane khepi nafnakno te louloku teu LORD ra eghu.
4Theo kaisei naikno nate chekeni,
LORD ginauna na tei koko ghami ghotilo teuna.
Theo kaisei naikno nate chekeni nomi glose ghotilo igne ginauna jateula gaꞌase te kokohi khetogna na ra teuna.
Nu igne nangha majaghani nate kilo ghami mare na,
‘LORD na kelitagna fara ka ghotilo.’
Nomi glose ghotilo igne mare ginauna kiloi,
‘Mana kelitagna fara ka khetogna na.’
Naugna LORD ginauna kelitagna fara ka ghotilo,
eghuteuna mana ginauna reireghi fakelini nomi glose ghotilo igne jateula kaisei mae te reireghi fakelini khetogna na ia eghu.
5Ghotilo ginauna atha nomi glose igne,
jateula kaisei mae nalhaꞌu majaghani te atha kaisei gaꞌase majaghani te mala khetogna teura eghu.
God ginauna na jateula tuana eghu na thofno kelitagna fara ka ghotilo.
6“Iara liliseihi mae mala toetoe ke kligna bara thina biꞌo ka namono Jerusalem.
Mare theome au kmu bongi narane na.
Uve, mare mala cheke ka LORD mala thosei ghatho ihoni mana nogna nhaꞌa cheke na.
7Tutuani, mare na theome gnafa ghilei ke eni fapulo LORD namono biꞌo Jerusalem.
Ka puhi igne, naikno te gnafa ka nauthoglu igne ginauna ghatho tahuni namono biꞌo igne.”
8LORD neke enihi kaisei nhaꞌa cheke,
eghuteuna mana ginauna eni unha teke nhaꞌa chekeni thegna igne.
Mana neke cheke eghu,
“Iara ginauna na theome atha kaisei gano ka nagare ghotilo are mala tusu lao ka mae naokare,
eghuteuna naiknodi keha kantri igre ginauna theome koꞌu waen teke loku hetadi ghotilo re.
9Eghume, ghotilo iheire teke kmusa ka atha gano ra,
ghotilo ginauna ima ka gano teke joꞌu themi re,
eghuteuna ghotilo ginauna cheke fakelini LORD eidi gano igre.
Ghotilo iheire teke kmusa ka reireghi nagare grep ra,
eghuteuna ghotilo iheire te atha te mei sisi grep teura,
ginauna ghotilo kolho nate koꞌu waen ke lamnagna nogu Sugablahi iara na ka narane te fafara ghotilo te tegio ka iara na.”
10Ghotilo naiknomi Jerusalem,
ghotilo jifla mei mala tarabana kaisei nabrou biꞌo mala ke pulo mei naiknora,
mare ginauna leghuni mei nabrou tuana.
Ghotilo mala famane eni fakeli nabrou igne,
eghuteuna ghotilo atha fadelei thina te gnafa te au ke lamnagna.
Eghuteuna ghotilo mala lisei haghe kaisei flagi jateula kaisei fagaglana eghu mala filoni naikno te gnafa ka keha kantri igre.
11LORD ne cheke eghu ka naikno te gnafa ka nauthoglu igne,
“Cheke ranghidi naikno te gnafa te au Jerusalem:
‘Filo si ghotilo! Nomi Fakarhai ghotilo ia la mei!
Eghuteuna mana ginauna atha mei balugna naikno te namhadi fara teke uludihi mana re.’ ”
12Ka narane igne, naiknore ginauna kilo ghami ghotilo,
“Nogna naikno blahi God” nei “Naikno teke atha fapulo LORD ka namono igne.”
Eghuteuna mare ginauna kiloni Jerusalem,
“Namono te magnahagheni fara LORD,”
nei “Namono aheva na teke pulo mei te au LORD tagna.”
63LORD ne goigonidi nogna naokare
1Mae sekiuriti te toetoe teu ke kligna bara thina na ne cheke eghu,
“Mae ihei site mei funugna Idom ka namono Bosra ignea?
Mana pipichi ka famane pohe ukru.
Mana mei jateula kaisei mae te nheta nei nolaghi eghu.
Nu mae ihei eghu signea?”
LORD ne cheke eghu,
“Iara ngala te mei igne!
Iara mei mala chekeni tela uluhi iara na,
naugna puhigu iara na thofno doglo fara!
Eghuteuna iara au nogu nolaghi te mala fakarhi ghami ghotilo na.”
2Mae igne ne ghusna eghu ka mana,
“Naugna unha si nou pohe iagho igne te ukru fara jateula nogna pohe mae te mala tapla ka grep mala ei waen teu gnea?”
3LORD ne cheke eghu,
“Iara neke tapla faparidi kmana kantri jateula mae te tapla ke kligna grep,
nu theo kaisei mae te togho ghau iara teura eghu.
Iara tapla ke klignadi mare,
naugna iara ne diꞌatagu fara ka mare,
eghuteuna dadaradi mae igre te ukru nogu pohe iara na.
4Narane teke vahini iara mala teke atha fapulodi nogu naiknore la thoke meihi,
eghume gognarona nogu narane iara mala paradi mae naokare.
5Iara thofno jaglo nogu fara te theo kaisei te mei togho ghau iara na.
Nu diꞌatagu iara igne te farheta ghau iara na mala uludi iara thegu mae naoka igre.
6Naugna iara thono diꞌatagu fara la goigonidi nei aknu falehedi eghu naikno te gnafa ka keha kantri igre.
Uve, dadaradire thofa tongana ka glose na.”
LORD ne kokhonidi naiknodi Israel
7Iara ginauna toutonuni puhigna LORD te ghatho tahu ghita fabrahu nogna naiknore.
Iara ginauna cheke fakelini mana eidi glepo te keli teke edi mana ra.
Mana fakakhana te kokhoni ghita tahati naiknoda Israel,
mana jaola fakakhana nogna namha te theo ka huigna.
8LORD ne cheke eghu,
“Mare theome tangomana te chaghi ghau iara na,
naugna naikno igre nogu naikno iara!”
Eghume, mana neke fakarhidi mare.
9Kate kabru nei au papara teu mare na,
LORD na jaola kabru nei au papara eghu baludi.
Mana namhadi nei kokhonidi eghu,
naugna igne mana thegna teke fakarhidi nei atha fasnagli teku re.
Funu tifa te mei na,
mana neke reireghidi fabrahu.
10Nu mare figri tagruni nei fadiꞌa nagnafani eghu mae Tharunga te Blahi.
Eghume, LORD na kela nodi naoka mare,
eghuteuna mana nake magra ka mare.
11Ka narane igne, mare ghathoni tifa ka naranegna mae Moses baludi nogna naiknore Ijep.
Aonu mare ne ghusna eghu ka mana,
“Ahevau LORD na?
Tifa na mana neke atha mae mala baubatu ka naiknore neke kasa ka thongna na.
Ahevau LORD na?
Tifa na mana neke snakreni nogna Tharunga te Blahi na mala au baludi mare.
12Mana neke tusu lao nolaghi biꞌo ka mae Moses.
Eghuteuna mana neke fofota thongna na ka phei vido neke kasa nogna naiknore ka keha phile na,
eghuteuna ka puhi igne mana ne atha nafnakno biꞌo te theo ka huigna.
13Mana neke batudi nogna naiknore neke kasa mei ke pari thongna ka glose te moja na.”
Eghuteuna naiknore chari faheta neke theome uka, jateula hose te chari ka namono nagou ra neku.
14LORD ne tusu lao ka nogna naiknore kaisei vido mala gnafa,
jateula mae te batudi nogna bulukare te tei ka vido te au buburu te keli ra neku.
Naugna igne naiknore ghatho tahuni fara nanghagna mana na.
Tharai mala tore thotogho ka LORD
15LORD, iagho king,
iagho au ka namonomu te blahi kligna,
eghuteuna siasiglamu nei nou nolaghi teu iagho na fodu ka namono igne.
Nu iagho filo soru mala filo ghami.
Naugna unha sagho te theome fakakhana nou nolaghi biꞌo na ka ghehati gnea?
Iagho theome fakakhana nou kokhoni ghami nei namha teuna ka ghehati.
Ba, iagho theome magnahaghei ghami ghehati sia?
16Nu iagho kmami ghehati!
Ku’emi ghehati mae Ebraham ghe mae Jekop ra theome au balumi eghuteuna phiamare theome lase ghami ghehati.
Nu iagho LORD,
iagho thofno kmami ghehati.
Naiknore kiloni nanghamu iagho na,
“Mae mala fakarha ghami ghehati fabrahu.”
17LORD, naugna unha sagho te snakre ghami te tei snivi ghehati ka puhimu iagho te keli gnea?
Naugna unha sagho te snakre ghami te thufu ghehati te figri fadelei ka iagho gnea?
Funu tifa te ghilei mei posa ka narane gognaro igne,
ghehati nou naikno iagho,
eghuteuna ghehati nou naikno gloku iagho.
Iagho ke pulo mei mala togho ghami!
18Ghehati nou naikno blahi iagho te au katha vido kmo’ei kolho ka nou vido blahi iagho igne.
Nu mae naoka igre mei ngolhi fajifla ghami ka nomi namono re.
Mare gognarona la mei goigonihi nou namono blahi iagho igne.
19Funu tifa te ghilei mei posa gognarogne ghehati jateula naikno te theome funei fruni ghami iagho ra eghu kolho.
Uve, ghehati jateula te fiti naikno ra eghu kolho ka iagho.
641LORD ghehati magnahaghei nigho iagho te tora maloa gne mala soru mei ka nauthoglu igne!
Eghuteuna kate mei iagho na,
thogele te gnafa igre ginauna filo nigho nei na mhaghu nodi fififri fara ke ulumu iagho.
2Jateula khaꞌaghi te brana te ghura suspen ra eghu,
LORD, iagho mei balu nou nolaghi,
eghuteuna hatimare mae naoka ginauna laseni nanghamu iagho na.
Eghuteuna naiknodi keha kantri igre ginauna mhaghu nei fififri eghu kate filo nigho iagho te mei ka mare na.
3Tifa na iagho neke mei edi glepo teke theome ghathodi nei mhaghudi teku ghehati ra.
Ka narane tuana,
thogele te gnafa igre neke filo nigho iagho,
eghuteuna thogele igre neke jateula naikno te mhaghu te fififri fara ra neku.
4Funu tifa te mei na neke theo kaisei naikno te filoni,
ba te nomhini kaisei God te jateula iagho teu te edi glepo te biꞌo te mala toghodi iheire te fatutuani nighore.
5Leuleghu fata na, iagho tarabanau kolho mala toghodi iheire te keli tadi fara te mala eni unha te doglo na,
nei iheire te leghuni puhimu iagho te doglo na.
Nu ghehati tapla jafra fabrahu ka nakhibo,
eghume iagho diꞌatamu fara ka ghehati.
Nu jame te leghu nigho ghehati na iagho ginauna fakarhi ghami ghehati.
6Ghehati te gnafa na kafe tapla jafra ka nakhibo,
eghuteuna ghehati kafe thona fara ka tathamu iagho na.
Eghuteuna puhi ne doglo teu te edi ghehati igre nu theome raꞌe keli jateula pohe te thona ra eghu thofno diꞌa parilahu ka tathamu iagho na.
Tutuani, ghehati jateula khakla gaju te flalo te tei ka nuri ra eghu kolho.
7Theo kaisei ka ghehati te tarai te kiloni nanghamu iagho na,
ba te ari ka iagho te mala togho ghami na.
Ghehati tapla jafra fabrahu ka nakhibo.
Naugna igne,
iagho lisa koko ghami ghehati,
eghuteuna iagho pophoru tathamu nei foflomu teure ka ghehati.
8Nu LORD, iagho kmami ghehati.
Ghehati jateula glose eghu,
eghuteuna iagho jateula mae ihei te hohoro suspen ka glose ra eghu.
Iagho neke vuavuha ghami ghehati hui ka khamemu iagho.
9LORD, thosei diꞌatamu fara ka ghehati.
Ghehati nou naikno iagho!
Iagho kokhoni ghami nei atha kokodi eghu nakhibomi gre.
10Nou namono blahi iagho igre jateula kaisei namono nagou te theo kaisei naikno te au tadira eghu.
Uve, Jerusalem gognarona thofno diꞌa fara,
eghuteuna theo kaisei naikno te au tagna na.
11Nou Sugablahi iagho igne neke blahi fara nei famane fara neku.
Ku’emi ghehati tifa ra neke mei tufru soru nigho ke lamnagna.
Nu gognarona khaꞌaghi la goigonihi.
Eghuteuna nomi famane glepo te gnafa ghehati ra la thofno diꞌa fara.
12LORD, neuba iagho ginauna kokhoni ghami ghehati?
Iagho ginauna na theome eni kaisei glepo ka ghehati?
Papara te tusu mei iagho ka ghehati igne thono biꞌo fara salaꞌu ghami ghehati.
65LORD ginauna paradi iheire te figri tagruni mana
1LORD ne cheke eghu,
“Iara LORD, iara falase ghau thegu ka iheire te theome ghusna ghau iara igre.
Eghuteuna iheire te theome hiro ghau iara igre nate filo ghau iara na.
Ka ihei te theome tarai mei ka iara na, iara na cheke eghu,
‘Iara tarabanau kolho te mala togho ghami ghotilo na.’
2Nu leuleghu fata na phaꞌumi ghotilore maku fara jateula thina eghu leghudi fabrahu puhimi themi te diꞌare.
Neuba, iara tarabana te mala faꞌuve ghami ghotilo na.
3Leuleghu fata na,
ghotilo theome mamajadi koba glepo te diꞌa tagudi iara re.
Iara theome gleꞌadi puhi te fafara koba ghotilo ka nomi mumuju god ke lamna nagare blahi,
nei gahu insens mala pogho soru ka god te chaichaghi tuare.
4Eghuteuna fei bongi na,
ghotilo tei ke lamna beku mala cheke ka tharungadi naikno tela lehehi ra mala falalase ka ghotilo unha nate thoke mei ginauna.
Eghuteuna ghotilo ima nafnahi bosu,
eghuteuna seu kholodi keha nafnata nafnahi te theome keli ka tathagu iara na.
5Aonu ghotilo cheke eghu ka keha naiknore,
‘Ghotilo thosei mei namo ka ghehati,
naugna ghehati gne thono blahi fara!’
Iara theome magnahagheni nafnata puhi te eni ghotilo igne.
Uve, diꞌatagu iara ka ghotilo na thono brana fara jateula khaꞌaghi te theome lehe ia eghu!
6-7“Iara la rioriso soruhi kaisei vetula te mala para ghami ghotilo na.
Iara ginauna para ghami ghotilo mala ke tughu fapulo ghotilo nakhibomi re baludi nakhibodi kuꞌemi ghotilo tifa ra.
Ghotilo gahu insens ka nomi vido blahi ke kligna thogele mala pogho soru ka nomi mumuju god nei cheke diꞌa ranghi ghau iara.
Eghume, iara ginauna na para ghami ghotilo leghuni unha nafnata puhi teke eni ghotilo na.”
8LORD ne cheke eghu,
“Kate au teu katha kholo grep ka sisigna na,
theo kaisei naikno nate goigonidi sisi grep te gnafa igre,
nu mana na eꞌei waen tagna.
Jateula tuana eghu,
iara ginauna theome goigoni ghami ghotilo gnafa nogu naikno iara ra.
Uve, iara ginauna na fakarhi ghami ghotilo iheire te leghu ghau iara ra.
9Iara ginauna fablahi ghami ghotilo mala vuragha vikegna mae Jekop.
Eghuteuna iheire teke karha mei ke leghu ka vikegna mae Juda ra ginauna khotogna nogu namono iara ka thogele are.
Iheire teke vahidi iara mala nogu mae gloku teku igre ginauna khotogna namono igne mala au tagna.
10Eghuteuna iheire te pogho soru ka iara igre nate baubatu te tei nodi buluka nei sipu teure funu ka sare biꞌo ke mosu Saron tei posa ka glogu ke maghati Akoa.
Eghuteuna reꞌe ginauna au ghedi kmana buburu te mala ghamu nei gnafa teuna.
Iara ginauna eni igne ka naikno te hiro ghau iara re.
11“Nu puhi biꞌo ginauna thoke ghami ghotilo iheire te tiromi ghau iara ra,
nei nogu Thogele Blahi iara Saion.
Ghotilo tarai koba ka phei god chaichaghi Gad ghe Meni.
Te chekeni ghotilo na phei god igre te funeidi gobigna lepo te keli nei gobigna lepo te diꞌa teu nate thoke ghami ghotilo.
12Nu iara ginauna vahini kaisei nomi narane ghotilo.
Hatimare mae naoka ginauna mei falehe ghami ghotilo ka magra,
naugna ka narane te kilo ghami iara na,
ghotilo theome cheke tughu ka iara.
Eghuteuna kate cheke iara ka ghotilo na,
ghotilo theome fanomho ka iara.
Leuleghu fata na,
ghotilo tiromi leghu ghau iara,
eghuteuna ghotilo vahidi koba glepo te diꞌare.”
13Eghume, igne unha te chekeni LORD na,
“Nogu mae gloku iara re ginauna ima ghedi,
eghuteuna ghotilo ginauna na rofo kolho.
Nogu mae gloku iara re ginauna koꞌu ghedi,
nu ghotilo ginauna roi koꞌu.
Nogu mae gloku iara re ginauna glealeꞌa fara,
nu ghotilo ginauna mamaja nomi fara.
14Nogu mae gloku iara re ginauna glealeꞌa nei koje eghu,
nu ghotilo ginauna na thofno diꞌanagnafa nei tanhi eghu.
15Naikno nate vavahi iara re ginauna cheke ka nanghami ghotilo mala cheke fadiꞌadi keha naiknore.
Iara LORD ginauna falehe ghami ghotilo,
nu iara ginauna tusu lao nangha majaghani ka nogu mae glokure.
16Jame kaisei naikno ka kantri igne tore mala fablahi,
mana tore ka nanghagna God mae Ihei te Cheke Tutuani.
Eghuteuna jame kaisei naikno nhaꞌa cheke,
mana ginauna nhaꞌa cheke ka nanghagna God mae Ihei te Cheke kate Tutuani.
Puhi biꞌo te gnafa teke thokedi mare tifa ra ginauna hui,
eghuteuna iara ginauna na jaola theome ghathodi.”
LORD ginauna horo maloa majaghani nei nauthoglu majaghani
17LORD ne cheke eghu,
“Iara ginauna horo maloa majaghani nei nauthoglu majaghani.
Gobigna lepo teke edi tifa ra, naiknore ginauna ghatho ihodihi.
18Ghotilo mala glealeꞌa fabrahu ka glepo majaghani te edi iara igre.
Naugna Jerusalem majaghani nate eni iara igne ginauna fodu ka naikno te glealeꞌa fara.
19Leuleghu fata na iara ginauna glealeꞌa fara ka namono biꞌo igne,
eghuteuna iara ginauna jaola glealeꞌa ka naikno te au ka namono tuana.
Theo kaisei naikno ka namono igne nate diꞌanagnafa ba nate tanhi ginauna.
20“Theo kaisei sua nate lehe ka namono igne.
Naikno te gnafa te au ka namono igne ginauna theome ghosei lehe.
Jame ihei te lehe kate thokeni kaisei gobi finogha na,
naiknore te ghathoni na, mae igne majaghaniu ngala.
Eghuteuna jame ihei te lehe te thokeni nga narane igne na,
naiknore ginauna ghathoni ne parani iara teuna.
21-22Naiknore ginauna babana nodi suga,
eghuteuna mare thedi nate au ka suga igre.
Eghuteuna theo kaisei naikno nate mei goigoni te mala ke au ka suga igne.
Nogu naikno iara igre ginauna ghamu sisi grep teke joꞌu thedi re,
eghuteuna mare thedi nate jaola te koꞌu waen tagna na.
Keha naiknore theome tangomana nate mei atha ka mare na.
Naikno teke vavahi iara te mala au ka namono igne ginauna karha fabrahu jateula gaju te karha te tifa ra eghu.
Glepo te loku hetadi mare thedi igre,
mare thedi ginauna atha nei glealeꞌa teu tagna.
23Gloku teke eni mare igne ginauna na theome fiti luvu kolho,
eghuteuna theo kaisei puhi biꞌo nate thokedi thudi mare re.
Leuleghu fata na, iara LORD ginauna fablahidi mare,
eghuteuna iara ginauna jaola fablahidi naikno nate karha mei ke leghudi mare igre.
24Neuba mare ne theome kilo mei ka iara,
iara kulu nomhidihi mare.
Neuba mare ne tarai fabrahu ka iara,
iara kulu enihi unha te toreni mare na.
25Uve, ka narane igne,
khuma mata nei sua sipu teure ginauna ghamu fodu,
eghuteuna lion re ginauna ghamu buburu jateula buluka eghu.
Nu mogo te faghughumhu re ginauna ghamu glose kolho.
Ka nogu Thogele Blahi iara Saion,
theo kaisei glepo te diꞌa ba kaisei glepo te mala goigoni naikno ginauna au tagna.”
Igne chekegna LORD.
66LORD ginauna fatedi naiknodi keha kantri are
1LORD ne cheke eghu,
“Kligna na nogu sape nafnakno iara,
eghuteuna nauthoglu igne nogu vido mala tapla iara phei ghahegu gre.
Eghume, ghotilo ginauna horo nogu suga iara na aheva?
Aheva nate au nogu vido mala gnafa iara na?
2Iara thegu teke vuavuhadi maloa ghe nauthoglu igre baludi gobigna lepo te au ke lamnadi.
“Nu iara keli tagu fara ka nafnata mae te nhaꞌa faparini thegna igne,
ba mae te diꞌa nagnafadi nakhibognare,
mana thofno ghatho tahu ghau iara, eghuteuna leghuni nogu cheke iara na.
3Nu puhimi ghotilore thono diꞌa fara!
Ghotilo edi kolho unha te magnahaghedi themi re,
theome leghuni puhigu iara na.
Eigna iheire te falehe buluka mala fafara ka iara teuna jateula iheire te falehe naikno mala fafara ka nodi god ra eghu.
Iheire te falehe sipu mala fafara teuna jateula iheire te lolhopa graragna khuma na te fafara ka nodi god ra eghu.
Iheire te fafara sopho ka iara na jateula iheire te fafara dadara bosu ka nodi god ra eghu.
Iheire te gahu insens igre jateula iheire te tarai ka mumuju ra eghu.
4Eghume, iara ginauna na edi puhi biꞌo te mhaghudi fara ghotilo ra mala thoke ghami ghotilo,
naugna kate kilo ghami iara na, ghotilo theome cheke tughu ka iara.
Eghuteuna kate cheke iara ka ghotilo na, ghotilo theome fanomho ka iara.
Leuleghu fata na ghotilo tiromi leghu ghau iara, edi fabrahu ngala puhi te diꞌare.
5“Ghotilo naikno te leghu ghau nei ghatho tahu ghau teu iara ra,
fanomho fakeli ka nogu cheke iara LORD.
Naugna ghotilo ghatho tahu ghau iara fabrahu,
eghuteuna keha naikno ka ghotilo theome magnahaghei te loku fodu balumi ghotilo.
Eghuteuna mare maꞌe ghami ghotilo cheke eghu,
‘Snakreni LORD mala mei mana balu nogna nolaghi biꞌo mala filoni ghehati te glealeꞌa fara ghotilo na.’
Nu mare ginauna mamaja nodi fara.
6Ghotilo fanomho fakeli!
Naogla biꞌo te mei funu ka Sugablahi na ka namono biꞌo igne,
tuana naoglagu iara kate paradi iara nogu naokare.
7“Nogu Namono Blahi iara igne jateula kaisei gaꞌase te theome kabru ghegna kate karha sua ra eghu.
8Ba, ghotilo neke filoni nei nomhini neku chekegna nafnata glepo igne tifa na?
Ba, kaisei kantri na tangomana te kegra haghe majaghani ka kaisei narane kolho na?
Theome tangomana!
Nu kate funu papara Saion na, naꞌa ginauna kegra haghe jateula kaisei kantri majaghani eghu.
9Kate fufunu iara nogu gloku na,
iara magnahaghei te eni fahui gloku igne.
Ba, kate tarabana mala fakarha sua teu gaꞌase na,
iara tangomana te lhotini naꞌa te mala theome fakarha sua naꞌa na? Theo!
10Ghotilo iheire te magnahagheni Jerusalem fara ra,
ghotilo eha nei glealeꞌa eghu.
Ghotilo iheire te tanhi nei diꞌanagnafa teu eigna namono igne ra,
gognarona ghotilo glealeꞌa nomi fara tagna.
11Ghotilo ginauna glealeꞌa nomi fara tagna jateula sua te chuꞌu teu ka idogna na ia eghu.
12Iara ginauna tusu ranghi ghami pharikeli,
eghuteuna ghotilo ginauna atha nomi glepo te keli fara ka keha kantri te au faligoho ghami ghotilo are.
Ghotilo ginauna na jateula kaisei khoꞌu te loloro fabrahu te theome krango ka vido te ahora eghu na theome ari kmoꞌe ka kaisei glepo te keli.
Eghuteuna ghotilo ginauna glealeꞌa fara jateula kaisei naikno biꞌo te namhani fara thugna na te pala haghe te fachuꞌu ra eghu.
13Eghuteuna ka ghotilo te au ka namono Jerusalem ra,
iara ginauna fameomego ghami ghotilo,
jateula kaisei naikno biꞌo te fameomegoni thugna na ia eghu.”
Igne chekegna LORD.
14Kate filoni ghotilo glepo nate eni iara ka ghotilo igne,
ghotilo ginauna keli tami fara,
eghuteuna ghotilo ginauna nake karha kelimi.
Ka narane igne ghotilo ginauna laseni LORD te toghodi iheire te leghuni manare,
eghuteuna mana ginauna na fakakhana nogna diꞌatagna na ka nogna naokare.
15Ghotilo ginauna filoni LORD mei balu khaꞌaghi ngire,
eghuteuna mana ginauna saghe ka nogna chariot na umhu mei ke kligna grokho jateula saeklon eghu.
Eghuteuna mana ginauna paradi naikno te diꞌatagnadi fara mana ka nauthoglu igne.
16LORD ginauna mei balu khaꞌaghi nei naflahi eghu mala paradi naikno te gnafa te edi glepo te diꞌa ka nauthoglu igne,
eghuteuna kmana naikno fara ginauna lehe.
17LORD ne cheke eghu, “Naikno igre fagaedi thedi mala blahi ka tathagna mumuju, eghuteuna mare kafe jajagha tei ka nodi nagare blahi mumuju igre mala ghamu nafnahi bosu nei nakusi nei keha nafnata gano te theome gae ka tathagu iara na. Nu mare te gnafa na ginauna ari hui theo nafudi.”
18LORD ne cheke eghu, “Iara lasedihi gaoghathodi nei puhidi teu naikno igre. Eghume narane te mala loku fodudi iara naiknodi kantri te gnafa nei cheke te gnafa teu igre la namo thoke meihi. Kate kafe loku fodu meidi iara naikno te gnafa igre na, mare ginauna filoni naphaegna nogu nolaghi biꞌo iara na.
19“Mare ginauna laseni te fakakhana iara glepo igre mala filoni mare. Nu iara ginauna kurudi iheire te karha nga teu igre mala tei ka kantri te khaba igre: Spen, Libia, nei Lida aheva te au mae iheire te lase magra ka phaloho, nei jare Tubal nei Gris, aheva naiknore theome nomhini ngau nanghagu iara na, nei jaola theome filoni ngau naphaegna nogu nolaghi biꞌo iara na. Eghuteuna mare ginauna toutonuni nogu nolaghi biꞌo iara na. 20Mae igre ginauna atha mei kherami ghotilo te au ka keha kantri are mala mei ka nogu Thogele Blahi iara Jerusalem, mala snakre mei naikno igre ka iara LORD jateula kaisei fafara eghu. Mare ginauna atha mei naikno igre ka hose, ka dongki, ka kamel nei ka chariot. Mare atha mei kherami ghotilo igre mala nogu iara. Ghotilo mala jateula te thofno naiknomi Israel te atha te mei ka kharaꞌo gano te gae ka tathagu iara na te mala mei tufa ka iara ka Sugablahi ia eghu. 21Eghuteuna iara ginauna vavahi keha ka mare mala pris nei keha mala Livaet.
22“Tutuani, maloa majaghani nei nauthoglu majaghani eghu teke vuavuha iara ka nogu nolaghi na igre ginauna au fabrahu tifa tifa ka tathagu iara na. Jateula tuana eghu ghotilo nei iheire nate karha mei ke leghumi ghotilo re ginauna au rheta fabrahu tifa tifa eghuteuna nanghagu iara na ginauna theo ka huigna. 23Ka Gaghamu Khafa leuleghu nhigra, nei narane Sabat te gnafa teu igre, naiknodi kantri te gnafa igre ginauna mei pogho soru ka iara agne Jerusalem. 24Ka narane te jifla mare agne Jerusalem teke figri ka namono na, mare ginauna filodi thinidi iheire teke figri tagru ghau iara tifa ra la lehehi. Mogo te ghamu ka thinidi naikno te lehe igre ginauna theome lehe, eghuteuna khaꞌaghi te gnhubra thinidi naikno te lehe igre ginauna theome lehe. Eghuteuna naiknore ginauna tirodi fara te filo lao ka thinidi naikno te lehe te siri te boto igre.”
Igne chekegna LORD na.