Profet Hosia
Nogna Buka Mae Profet Hosia
Thoutonu kmoꞌei eigna buka igne
Ka finogha te loku profet Hosia igre, naiknodi Israel teke karha mei ke leghugna mae Jekop igre la fnotahi ka phei kantri Israel ghe Juda. Naiknodi Israel igre nodi namono biꞌolahu na, Samaria. Eghuteuna naiknodi Juda igre nodi namono biꞌolahu na, Jerusalem. Ke leghugna te gnafa mae profet Emos nogna gloku na, mae profet Hosia neke kegra haghe kaisei mae profet ka kantri Israel. Mae Hosia ne nanga nogna fara ka puhi te tarai naiknore ka mumuju igne. Naiknore theome biꞌo nodi fatutuani na ka God.
Puhidi naikno igre jateula puhigna khetogna mae Hosia igne eghu thono diꞌa fara. Nanghagna khetogna mae Hosia igne, Goma. Goma gne theome ghatho tahuni khetogna na, mae ihei te mae profet ka finogha igre. Naiknore jaola koko puhi te keli te mala leghuni God na, ne tei tarai ka mumuju teke hohoro kolho naikno na. Eghuteuna te chekeni mae Hosia na, neubane theome ke figri mare ka God, God na namhadi nogna naiknore ne nhaꞌa cheke te mala ke hata fapulodi ka thegnare. Nogna namha God ranghidi nogna naiknore thono biꞌo fara. God ne falalase namha igne ka nogna naiknore (11:8). “Ghotilo naiknomi Israel. Na faꞌunha eghu iara lisei ghami ghotilo? Na faꞌunha eghu iara tei koko ghami ghotilo? Iara thofno namha ghami ghotilo ka nagnafagu na. Iara theome magnahaghei te eni kaisei puhi te diꞌa jateula ghotilo eghu.”
Theome raugha ke leghugna te chekeni mae profet na igne, armi gna Asiria ne mei roꞌeni namono biꞌo Samaria. Aonu kantri Israel igne ne groꞌe ne theo tokagna ka finogha fitu gobi varadaki phei neke karha nga Kraes.
Keha vido ka buka igne
Mae Hosia ne tolaghi ne au thugna: 1:1–3:5
God ne diꞌatagna: 4:1–13:16
Hosia ne cheke faheta ka naiknore mala ke pulo ka God: 14:1-9
1Cheke ulu lahu
1God ne cheke lao cheke igne ka mae Hosia, thugna mae Beri ka finogha te king mae Iusaea, nei mae Jotam, nei mae Ahas, nei mae Hesekaea ka kantri Juda. Ka finogha igre mae Jeroboam thugna mae Jehoas ne jaola ne king Israel.
Tharaknagna mae Hosia
2Ka narane igre, God ne cheke eghu ka mae profet Hosia, “Iagho na tei tolaghi ka kaisei gaꞌase, eghuteuna gaꞌase igne ginauna theome ghatho tahuni puhigna tholaghi na. Eghuteuna thugnare ginauna jaola leghuni puhigna idodi na. Nafnata gaꞌase igne ginauna fakakhana puhidi naikno te tei koko ghau iara te tei tarai ka mumuju god igre.” 3Aonu mae Hosia ne leghuni cheke igne ne tei tolaghi ka Goma thugna mae Diblaim. Aonu naꞌa bukla ne au kaisei thugna nalhaꞌu.
4Ke leghugna igne, God ne cheke eghu ka mae Hosia, “Iagho na kiloni thumu na, Jesrel. Gaoghathogna Jesrel teu igne, God ginauna joꞌu soru lamna glose. Naugna iara na theome raugha na parani tharaknagna mae Jehu eidi naikno te lehe ka namono Jesrel tifa ra. Eghuteuna iara ginauna fagnafadi mae king igre mala theo kaisei mae ka vikegna mae Jehu nate funei fruni ni kantri Israel. 5Eghuteuna iara ginauna jaola roꞌeni nogna nolaghi armi gna Israel te thono nheta fara igne ka sare Jesrel.”
6Ke leghugna igne, Goma bukla neke au kaisei thugna gaꞌase. Eghuteuna LORD ne cheke eghu ka mae Hosia, “Iagho kiloni thumu gaꞌase igne, Lo-Ruhama. Gaoghathogna na theome kokhoni ni. Naugna iara ginauna na theome kokhoni ni Israel. Eghuteuna iara ginauna theome hata koko nakhibodi naiknore. 7Nu iara ginauna kokhonidi naiknodi Juda igre mala toghodi. Iara nodi LORD God mare, eghuteuna iara ginauna fakarhidi. Theome ka naflahi, ka phaloho, ka jata, ba ka hose. Theo. Nu iara LORD, God mae ihei te au nolaghi fateote’o, iara ginauna fakarhidi.”
8Aonu ke leghugna te lisa chuꞌu Lo-Ruhama igne, Goma bukla ne karha fapea thugna nalhaꞌu na. 9Aonu LORD ne cheke eghu ka mae Hosia, “Iagho na kiloni thumu igne, Lo-Ami. Gaoghathogna na, theome nogu naikno iara. Naugna ghotilo theome nogu naikno iara, eghuteuna iara theome nomi God ghotilo.”
God ne nhaꞌa cheke ka naiknodi Israel
10Mae profet ne cheke eghu ka naiknore, “Naiknodi Israel igre ginauna kmana fara jateula nusu ka gratha na are eghu. Ghotilo theome tangomana nate kahadire. Te chekeni agne na, ‘Gognarona, ghotilo theome nogu naikno iara.’ Nu mana ginauna cheke eghu ka ghotilo, ‘Ghotilo nogu naikno iara, eghuteuna iara nomi God ghotilo. Iara mae ihei te karha fabrahu tifa te tifa.’ 11Ka finogha igre, naiknodi Israel nei Juda teu igre ginauna loku fodu mala vahini kaisei nodi mae mala baubatu. Mare ginauna kaisei kantri nheta fara. Naugna God ne snakredi mare mala au ka kantri igne. Uve, nogna narane Jesrel igne ginauna kaisei narane biꞌo fara. Naugna God ginauna hata fapulo nogna naiknore mala ke figri mei.”
21“Ka narane tuana, tahati ginauna kilodi thabusidare, ‘Ami,’ gaoghathogna na, ‘ghotilo nogu naikno iara.’ Eghuteuna tahati ginauna kilodi greghada re, ‘Ruhama’ gaoghathogna na, ‘Iara kokhoni nogudi.’ ”
Naiknodi Israel igre jateula Goma eghu tei kokoni God
2God ne cheke naba eghu ka naiknore,
“Ghotilo thugu iara. Ghotilo cheke faheta ka idomi na, naꞌa gognarona theome khetogu iara,
eghuteuna iara theome khetogna naꞌa.
Nu ghotilo na cheke faheta ka naꞌa mala lilisei naꞌa puhi te jateula thau vine teu te theome leghuni puhigna tholaghi na igne.
3Jame te theome lilisei naꞌa puhi te diꞌa igne na,
iara ginauna mei hata koko nogna pohe naꞌare mala soesole tafri naꞌa jateula teke karha mei ka idogna na tifa ia eghu naꞌa ke uludi naiknore.
Iara na eni igne ka naꞌa mala jateula namono nagou te theo kaisei naikno te au tagnara,
ba jateula naikno te roi koꞌura eghu naꞌa.
4-5Iara ginauna na theome kokhonidi thugna naꞌare, naugna naꞌa ne kaisei thau vine.
Naꞌa jaola theome mamaja te edi puhi te diꞌa te snakreni thinigna na ka mae nalhaꞌu te kmana igre.
Naꞌa neke cheke eghu, ‘Iara ginauna tei baludi nalhaꞌu te magnahaghedi thegure.
Uve, nalhaꞌu igre ginau tufa ghegu gano, khoꞌu, pohe, phoko, oel nei waen eghu iara.’
6Eghume, iara ginauna hata gnarho phono mala bara fanogra nabrou te tei koba naꞌa igne
mala theome tei naꞌa ka mae nalhaꞌu te magnahaghedi te tei koba naꞌa are.
7Neuba naꞌa ne tei baludi mae nalhaꞌu te magnahaghedi naꞌa are,
naꞌa ginauna theome tangomana.
Neuba naꞌa ne fariuriu hirodi mare ka vido te gnafa re,
naꞌa ginauna theome tangomana nate filodire.
Eghuteuna ke leghugna igne, naꞌa ginauna cheke eghu,
‘Iara nake figri ka thofno khetogu ia.’
8Nu naꞌa theome lasedi gano, nei oel, nei waen,
eghu te hata naꞌa are neke tufa iara ka naꞌa.
Eghuteuna silva, nei gol teu te lalaoni naꞌa are jaola neke tufa iara ka naꞌa.
Naꞌa theome laseni kolho silva nei gol eghu te lalaoni naꞌa te tarai ka mumuju Baal igre,
iara teke tufa ka naꞌa re.
9“Eghume iara ginauna nake hata fadelei ka naꞌa, ghegu gano ka nagare,
nei sisi ka nogu nagare grep.
Iara ginauna jaola hata fadelei phoko nei famane pohe eghu te lalaoni thegna naꞌa are mala soesole tafriu naꞌa ke uludi naiknore.
10Uve, iara ginauna mei hata koko pohe te pipichi naꞌa tuare ke uludi iheire te tei koba naꞌa baludi are.
Eghuteuna theo kaisei naikno nate fakarhini naꞌa ka khamegu iara na.
11Iara ginauna na theome snakredi ka naꞌa narane gaghamu khafa, narane Sabat,
nei keha nafnata gaghamu biꞌo te tei tarai koba naꞌa leuleghu finogha ka mumuju are.
12Iara ginauna roꞌe fahui glepo igre mala theo nafudi nagare waen,
nei fig eghu teke tufa mae te magnahaghedi naꞌa igre.
Eghuteuna glepo te tautagu ka namhata na are ginauna mei ghamu fahui nagare waen
nei fig teu are mala ke thafru fapulo ka soro.
13Iara ginauna parani naꞌa,
naugna naꞌa ne ghatho iho ghau iara ne tei fafara ka mumuju Baal.
Eghuteuna naꞌa lalaoni geghesugna nei khuligna teure ka ring baludi keha nafnata glepo te famane siasigla teke tufa mae iheire teke tei naꞌa baludire.
Nu naꞌa ghatho iho ghau iara.” Igne chekegna LORD.
LORD ne fakakhana nogna namha na ka naiknodi Israel
14LORD ne cheke eghu ka cheke naba,
“Gognarona, iara ginauna nake hata fapulo khetogu na ke lamna namono nagou.
Eghuteuna ka namono igne iara ginauna nake famane cheke tagna,
mala ke figri mei naꞌa ka iara.
15Aonu iara ginauna nake tusu fapulo ka naꞌa nagare grep teke hata fadelei iara ka naꞌa tifa ra.
Eghuteuna puhi te diꞌa te edi naꞌa igre jateula nabrou te
mala tei ka saregna namono Ako teke tei naiknodi Israel tifa ra eghu.
Nu iara ginauna na vahini sare igne mala jateula nabrou te keli ra eghu.
Ka namono igne na teke pulo mei ka naꞌa gaoghatho te keli na.
Eghuteuna naꞌa ginauna nake leghuni nogu cheke iara na,
jateula kani teke majaghani teku naꞌa teke jifla mei ka namono Ijep tifa ia eghu.
16“Kate thoke mei narane igne,
iara ginauna nake namhani Israel,
eghuteuna naꞌa ginauna nake cheke eghu ka iara, ‘Iagho khetogu iara.’
Eghuteuna naꞌa ginauna nake ghatho ihoni mumuju Baal,
mala theome chekeni naꞌa nafnata cheke te chekeni koba naꞌa igne,
‘Baal, iagho nogu God iara.’
17Iara ginauna nake theome snakreni naꞌa
mala cheke fakelini nanghagna Baal.
18Ka narane tuana, iara ginauna na eni kaisei nhaꞌa cheke baludi bosu, buluka, nanghaji,
nei mogo teu igre mala thosei mei goigonidi nogu naikno iara igre.
Eghuteuna iara ginauna hata fadelei naflahi, phaloho,
nei thua nafnata glepo te mala magra are mala au mare kau pharikeli ka nauthoglu igne.
19Israel! Iara nake hata fapulo nigho mala au balugu fabrahu tifa tifa.
Iara ginauna na falalase ka iagho puhi te doglo na,
eghuteuna iara na theome tei koko nigho.
Eghuteuna iara ginauna na namha nigho,
nei na kokhoni nigho eghu fabrahu.
20Iara ginauna na leghuni nogu nhaꞌa cheke teke eni iara ka iagho ia mala au balumu fabrahu tifa tifa.
Iagho lase ghauhi iara te nou God iagho na.
21-22“Iara LORD, igne nogu cheke iara na,
iara ginauna na fanomho ka nodi tharai nogu naikno Israel.
Eghuteuna iara ginauna snakreni nakhete na mala soru mei ke kligna nagare
mala kmana gano, nei waen, nei oel eghu ka namono Jesrel.
23Iara magnahaghedi nogu naiknore te au ka namono te keli.
Tifa na iara neke kilo ghami ghotilo, Lo-Ruhama,
naugna iara neke theome magnahaghei ghami ghotilo.
Nu gognarona iara kela magnahaghei ghami ghotilo.
Tifa na iara neke kilo ghami ghotilo, Lo-Ami,
naugna ghotilo neke theome nogu naikno iara,
nu gognaro na ghotilo nogu naikno iara.
Eghuteuna naiknodi Israel igre ginauna cheke eghu ka iara,
‘Iagho nomi God ghehati!’ ”
3Mae Hosia neke foli fapulo khetogna na
1LORD ne cheke eghu ka iara, “Iagho mala ke namhani khetomu na mala ke tei au balugna. Neuba naꞌa ne tapla jafra ka keha nalhaꞌui, nu iagho mala falalase ka naꞌa, eigna iagho te namhani fara khetomu na. Iagho mala namhani naꞌa jateula iara te namhadi naiknodi Israel igre eghu. Eigna neuba naikno igre ne figri tagru ghau iara ne hata grep ne tei fafara ka keha god te chaichaghi tuare, iara namhadi nogu naiknore.”
2Eghume, iara neke foli Goma gne ka nabotho glima silva nei kaisei gobi phiatutu kilo bali. 3Aonu iara neke cheke eghu ka naꞌa, “Iagho khetogu iara, nu iara theome tangomana te thuru balumu iagho gognarona. Iagho na ofo ghau iara kmana narane mala koko iagho nafnata puhi te diꞌa te jateula thau vine teu te tei koba baludi keha nalhaꞌui are. Ka narane igre iagho mala thosei tei thuru balugna kaisei mae delei.”
4Naiknodi Israel igre mala jateula igne eghu mala au faraugha katha vido. Eghuteuna mare na theo kaisei nodi mae king, ba kaisei nodi mae mala baubatu. Eghuteuna mare ginauna na theome tangomana nate fafara ka mumuju na, ba theome tangomana nate fakegra haghe kaisei thina mala tarai ka mana. Mare ginauna na theome hata kaisei mumuju, ba kaisei nafnata glepo te mala filo glanidi unha nate thakle mei nathuꞌu nauriha. 5Eghuteuna kaisei narane ke leghudi igre, naiknodi Israel ginauna nake hogri nagnafa mala ke figri ka nodi LORD, nei nodi God. Eghuteuna mare ginauna nake jaola nake figri ka mae ihei nate karha mei ka vikegna mae king Devet, mae igne ginauna nodi king mare. Eghuteuna ka narane tuare, naiknore ginauna mei ka LORD mala kilo fnaknoni mana, eghuteuna mana ginauna na fablahidi.
4Mae profet Hosia ne cheke faheta ka naiknodi Israel
1Ghotilo naiknomi Israel, ghotilo fanomho fakeli ka nogna cheke LORD igne!
Mana na cheke eghu,
“Theo kaisei naikno ka ghotilo nate thofno leghu ghau iara na,
nei jaola theo kaisei ka ghotilo nate ghatho tahu ghau iara na.
Ghotilo te gnafa na theome filo glani ghau iara te nomi LORD ghotilo na.
2Ghotilo nhaꞌa cheke koba ka iara,
nu ghotilo theome leghudi kolho nomi nhaꞌa cheke re eghu.
Tore, ghotilo naikno chaichaghi fara, nei mala falehe naikno,
nei mala blau, nei mala theome leghuni puhigna tholaghi na.
Ghotilo theome leghudi nogu vetula iara re ne paradi koba naiknore.
3Naugna igne, glose igne ginauna moja.
Eghuteuna gobigna lepo te tautagu ke lamna glose, nei nanghaji, nei sasa,
nei naikno teu igre ginauna na jaola kafe lehe.”
LORD ne diꞌatagna ne fatedi mae pris
4LORD ne cheke eghu,
“Ghotilo mae pris ra,
theome keli puhi te cheke fadiꞌadi nei fatedi teu ghotilo naiknore.
Iara thono diꞌatagu fara eigna unha te eni ghotilo igne,
eghume iara ginauna fate ghami ghotilo.
5Leuleghu narane na ghotilo jiji tafri,
jateula naikno te tabo tafri bongiro ra neu.
Eghuteuna hatimare mae profet igre jaola nanaba ka ghotilo.
Eghume, iara ginauna roꞌeni Israel nomi kantri ghotilo te jateula idomi teu ghotilo igne.
6“Uve, iara ginauna paradi nogu naiknore,
naugna naikno igre ne theome filo glani ghau iara te nodi God mare na.
Eghuteuna ghotilo mae pris ra, jaola tiromi fanomho nei leghudi eghu nogu farirhiu iara re.
Naugna igne, iara theome magnahaghei ghami ghotilo mae pris igre.
Eghuteuna iara jaola theome magnahagheidi thumi nalhaꞌu ghotilore te
mala nogu mae pris iara na.
7Ghotilo mae pris igre la kmana fara, ghotilo la edi kmana nakhibo fara.
Eghuteuna nanghami ghotilore la nhudu tongana heva heva ka naiknore.
Nu iara ginauna na nhaꞌa fapari ghami ghotilo
mala mamaja nomi ghotilo ka naiknore.
8Ghotilo magnahaghei te ghamu gano teke fafara naiknore.
Eghume ghotilo magnahaghedi fara naiknore te edi kmana najafra,
naugna ghotilo ne ghamu biꞌo fara!
9Iara ginauna para ghami ghotilo naikno igre,
eghuteuna ghotilo mae pris ra ginauna na jaola au papara eidi puhi te diꞌa te edi ghotilo are.
10“Neuba ghotilo ne ghamu gano te keli,
nu ghotilo ginauna na theome boho kolho.
Eigna ghotilo mae pris igre tapla jafra koba ka goro gaꞌase pris te jateula thau vine teu igre.
Te ghathoni ghotilo na, ghotilo au nomi nolaghi te mala faꞌau kmana sua na,
nei au ghemi kmana gano teu na.
Nu ghotilo ginauna na theome tangomana nate au kmana thumi,
nei au ghemi kmana gano teuna.
Naugna ghotilo ne figri tagru ghau iara ne tei tarai ka mumuju god.”
God ne diꞌatagna fara ka naikno te tarai ka mumuju God
11LORD ne cheke eghu,
“Nafnata puhi te koꞌu te thaviru ghotilo ka waen te tiatifa,
nei majaghani teu igne te fanolidi ghotilo phaꞌumire.
Naugna ka puhi igne te edi ghotilo puhi te thono diꞌa fara igre.
12Eghuteuna ghotilo tarai koba ka mumuju teke hohoro kolho naikno igre,
mala falalase ranghi ghami gaoghathodi nomi mifire.
Te chekeni koba ghotilo na,
vido gaju teke hohoro ghotilo themi igre nate falalase ka ghotilo unha te magnahaghei laseni ghotilo na.
Ka puhi igre te ghatho iho ghau iara ghotilo na,
eghume, ghotilo jateula gaꞌase te ghatho ihoni khetogna na te snakreni thinigna na ka keha nalhaꞌu delei ra eghu.
Ghotilo lisa lao ghami themi mala nogna naikno mumuju,
mala funei frunidi mumuju nakarhami are.
13Ghotilo tei fafara nei gahu insens eghu ka mumuju ke pari gaju biꞌo ka thogele blahi are.
Eghume, thumi gaꞌase ghotilo are ginauna khasidi ka ghotilo mala vine,
nei mala gaꞌase glalaba eghu tafri kolho.
14Nu iara na theome paradi nafnata naikno igre.
Naugna ghotilo ne jaola ne tei baludi gaꞌase vine ka nodi suga tharai mumuju igre.
Eghuteuna ghotilo salo glepo mala tusu lao ka mumuju.
Te chekeni iara na, ghotilo naikno igre theo kaisei gaoghatho te keli ka phaꞌumire,
eghuteuna ghotilo ginauna na theo nafumi kolho.
15“Ghotilo naiknomi Israel, ghotilo jateula gaꞌase vine eghu tei koko ghau iara.
Nu ghotilo naiknomi Juda ra,
ghotilo thosei leghudi nafnata puhi te diꞌa te edi naiknodi Israel igre.
“Ghotilo thosei tei ka namono Gilgal, ba Bet-Aven mala tei tarai ka mumuju,
ba tei mala nhaꞌa cheke ka nanghagu iara mae ihei te karha te tifa.
16Phaꞌumi ghotilo maemi Israel igre jateula phaꞌu buluka eghu theome lalase.
Iara magnahaghei te faghamu ghami ghotilo jateula mae greireghi sipu ra eghu.
Nu theo eghu, naugna ghotilo ne patugama fara.
17Ghotilo vahini te mala tarai ka mumuju na.
Eghume, iara lisa lao ghami ghotilo mala leghudi nomi gaoghatho themire!
18Kate koꞌu te thaviru ka waen na,
ghotilo lisa lao ghami themi ka gaꞌase vine.
Ghotilo magnahaghei fara te eni puhi te diꞌa na mala theome ghatho tahudi naiknore.
19Eghume, fanomho ghotilo ia.
Iara ginauna mei jateula nuri te pala te tei delei chara ra eghu ghami ghotilo mala theo nafumi kolho ghotilo.
Eghuteuna ghotilo ginauna na mamaja nomi fara ka fafara te edi ghotilo ka mumuju are.”
5Profet Hosia ne cheke faheta ka naiknodi Israel
1“Ghotilo mae pris ra,
fanomho mei ka iara.
Ghotilo maemi Israel ra,
fanomho fakeli khulimi are ka nogu cheke iara igre.
Ghotilo vikegna mae Devet ra,
ghotilo fanomho mei ka iara.
Nogu cheke iara igre ginauna fate ghami nei fadiꞌa ghami ghotilo eghu.
Uve, kate pogho soru ghotilo ka mumuju ka namono biꞌo Mispa nei ka thogele Teboa teu igne fagaglana gna te jateula phighoro te
mala falehe nanghaji ra teu ghotilo puhimi re.
2Nu ghotilo ginauna snoꞌo ka puhimi themi te diꞌa te jateula khora teke dokha themi ra teu are.
Iara ginauna kafe para ghami ghotilo hui.
3Iara lasedi puhimi ghotilore.
Eigna ghotilo maemi Israel igre theome tangomana te poru ka iara na.
Eghuteuna ghotilo theome nabami te mei tarai ka iara agne na.
Naugna ghotilo la thonahi ke ulugu iara la tei koko ghau iara jateula gaꞌase vine tela tei kokonihi khetogna ra neu.”
Israel ginauna theome filoni God
4“Puhi te eni ghotilo maemi Israel igne thofno diꞌa fara.
Naugna igne, ghotilo ginauna na theome tangomana te figri ka nomi God.
Eghuteuna unha te eni ghotilo te tarai ka mumuju igne thofno goigonidi puhimi ghotilo re.
Naugna igne, ghotilo ginauna theome tangomana nate filoni nomi LORD God.
5God na la fate ghamihi ghotilo eigna puhi te fahaehaghe fara ghotilo igne.
Ghotilo maemi Juda igre la jateula mare lau la theome nheta,
naugna nakhibo te eni ghotilo igne faglaꞌe ghami ghotilo.
6Eghuteuna, neuba ghotilo ne hata sipu nei buluka neu ne mei fafara ka LORD,
ghotilo ginauna theome tangomana nate filoni LORD na,
naugna mana la tei koko ghamihi ghotilo.
7Ghotilo la tei kokonihi LORD mae ihei te jateula khetomi teu ghotilo na,
eghuteuna ghotilo theome leghuni puhigna tholaghi na.
Jaola, thumi ghotilo igre ginauna theome nogna mana.
Ghotilo jateula thugna thau vine eghu kolho.
Naugna ghotilo ne tarai ka mumuju,
eghuteuna LORD ginauna theome raugha mei goigoni ghami ghotilo maemi Israel baludi nomi namono re.”
Phei kantri Juda ghe Israel igre ginauna magra fari thedi
8LORD ne cheke eghu,
“Ghotilo maemi ka namono Gibea, Rama, Betel, nei Benjamin teura,
ghotilo kufli mala tarabana tei ka magra.
9Narane te mala para ghami iara ghotilo maemi Israel ra ginauna mei.
Te chekeni iara ka ghotilo na,
glepo te chekeni iara ka ghotilo igne ginauna thoke mei tutuani.
10Ghotilo mae mala baubatu te gnafa ka kantri Juda teke blau nodi vido glose mae Israel ra,
iara ginauna tusu ari kaisei papara biꞌo ka ghotilo.
Papara igne ginauna brana jateula khaꞌaghi eghu.
11Naꞌau papara te brana fara jateula khaꞌaghi teu igne ginauna jaola thoke mei Israel.
Iara ginauna na fatedi mare, naugna mare ne tei hiro nodi mae king delei mala mei toghodi.
Nu mae king igne ginauna theome tangomana nate mei te toghodi mare na.
12Eghuteuna, iara ginauna goigonidi fara phei kantri Israel ghe Juda,
jateula nakusi te goigonidi glepo te keli ra eghu.
13“Kate laseni mae Israel igre te jateula te kegra fogra teu te glaꞌe fara thedi na,
mare ginauna nake figri nake tei toreni king biꞌo gna Asiria mala mei toghodi.
Nu king igne ginauna na theome tangomana nate fakelini fogra biꞌo te thokedi mare igne.
Eghuteuna kate filoni mae Juda igre puhi te jateula thubu biꞌo teu te paradi mare igne,
mare na jaola figri mala tei toreni king biꞌo gna Asiria mala mei toghodi.
Nu king igne ginauna theome tangomana nate famafoni thubu biꞌo te thokedi mare igne.
14Iara ginauna kafe goigonidi gnafa naiknodi phei kantri Israel ghe Juda.
Jateula lion te kina sasaka te ghamu thinigna buluka biꞌo na ia eghu.
Eghuteuna ginauna na theo kaisei naikno nate fakarhidi ka narane nate hata fajifladi iara ka phei kantri igre.
15Uve, iara ginauna nake pulo mei ka nogu namono na mala ghilei filo glani mare najafra teke edi thedire.
Kate au ka hoholo na, mare ginauna nake figri mei nake hiro ghau iara.”
6Naiknore theome thofno namhani LORD
1Naiknore na cheke eghu,
“Tahati nake figri ka LORD.
Eigna mana ne snakre mei ka tahati fogra biꞌo igne mala thoke ghita tahati,
nu mana tangomana te fagnafani fogra ka tahati.
Mana kolho teke nhaꞌa mei thubu igne,
nu mana tangomana na teke fakeli ghita tahati na.
2Katha vido kmoꞌei kolho mana ginauna tangomana na teke fakeli fapulo ghita na.
Eghuteuna tahati ginauna nake au balugna mana fabrahu.
3Gognarona tahati mala fariuriu mala lase fakelini LORD nei leghuni mana fabrahu.
Tutuani, mana ginauna mei ka tahati jateula naprai te phage haghe hamerane boibongi ra eghu.
Eghuteuna mana ginauna mei mala fakelidi nakarhada tahati gre.
Mana ginauna na jateula narane te soru mei nakhete te mala faboubothudi glose ra eghu.”
4Aonu LORD ne cheke eghu,
“Ghotilo naiknomi Israel nei Juda teura, unha nate eni iara ka ghotilo na?
Uve, ghotilo namha ghau iara nabagna kaisei narane kolho, theome raugha.
Nomi namha ghotilo na jateula khoveo ke kligna thogele ra eghu kolho,
ba jateula nabubla te ghosei te blalho te dofidi kate haghe naprai na hamerane boibongi ra eghu kolho.
5Naugna igne, iara na kurudi nogu mae profet igre mala kulu ari cheke ka ghotilo.
Eigna iara ginauna na ari fate falehe ghami,
nei goigoni ghami eghu ghotilo.
Eghuteuna puhi te fate ghami iara igne ginauna thakle haghe jateula kaisei naphae eghu.
6Ghotilo fafara buluka ka iara, igne kaisei glepo keli fara,
nu iara magnahaghei ghami ghotilo te ghatho tahu ghau iara salaꞌudi fafara buluka te edi ghotilo ra.
7Naikno igre jateula mae Adam teke huhughuni nogu nhaꞌa cheke iara ia eghu,
eghuteuna jaola tirodi ghatho tahu ghau iara.
8Eghuteuna gognarona namono biꞌo Gilead igne fodu ka naikno te diꞌa nei naikno te falehe naikno.
9Mae pris igre jateula mae mala blau ra eghu poru tafri ka geri nabrou te tei thoke ka namono biꞌo Sekem mala falehe naikno.
Mare edi kmana nafnata puhi te diꞌa igre, nu mare theome magnahaghei te falalase puhi te diꞌa te edi thedire.
10Iara la filonihi kaisei puhi te thono diꞌa fara ka naiknodi Israel igre.
Mare la tei koko ghauhi iara jateula gaꞌase te tei kokoni khetogna ia eghu mala tei tarai ka mumuju.
Mare thona fara ka tathagu iara na.
11“Ghotilo naiknomi Juda,
iara lilisei narane te
mala para ghami ghotilo na eidi glepo te diꞌa te edi ghotilo ra.”
71“Iara magnahaghei fara te tughu nakarhadi nogu naiknore mala ke keli fapulo,
nei mala ke tusu ranghidi glepo te keli.
Nu kate filo lao iara ka mare na,
iara ne filodi puhi te diꞌa fateote’o te edi nogu naikno iara igre.
Leuleghu fata na, mare chaghidi kheradi thedi re,
eghuteuna mare tei ruma mala blau ka nodi suga keha naiknore,
eghuteuna mare sasagu nodi glepo naikno te salaꞌu ka nabrou re.
2Nu mae igre theome laseni te filodi iara unha te edi teu mae igre.
Naugna unha glepo te diꞌa te edi mare igre toku tafru tathadire.”
Naiknore roghe fodu mala faleheni king
3LORD ne cheke eghu,
“King balugna nogna tothoghei funei na keli tadi fara kate filodi unha glepo te diꞌa nei nomhidi thoutonu chaichaghi eghu te edi naiknore.
4Eghuteuna gaoghatho te diꞌa na thofno brana fara jateula khaꞌaghi te nhako fahui namhata na ia eghu ka nagnafadire.
5Ka narane te eni king gaghamu na baludi nogna tothoghei funei na,
mare koꞌu thaviru baludi mae te diꞌare ghilei fanoinoli tafri.
6Nu nodi gaoghatho pouporu mae te diꞌa igre jaola brana fara jateula khaꞌaghi eghu ka nagnafadire.
Ka bongi igne, mare thofno diꞌatadi fara,
eghuteuna fei hamerane na, diꞌatadi mare igne ne thofno brana fara.
7Kate diꞌatadi te salaꞌui na,
mare ne falehedi ne gnafa nogna tothoghei funei king igre,
nu theo ihei nga te mei te tore ghau iara te mala tei toghodi na.”
Maedi Israel ne toredi kantri delei mala mei toghodi
8LORD ne cheke eghu,
“Naiknodi Israel igre jateula bret te theome raꞌe muita ra eghu theo nafudi kolho.
Eigna mare ne rouronu kolho ka nodi nanheta keha kantri te au faligohodi mare igre.
9Nu puhi te pogho soru ka mumuju naiknodi Israel igne khogla nhaꞌa faparidi kolho thedi,
nu mare theome laseni unha puhi biꞌo nate thokedi mare na.
Mae igre khuekuꞌehi la nufahi phaꞌudi re la glaꞌehi thinidi re,
nu mare theome filo glanidi kolho thedi eghu.
10Puhi fahaehaghe te magnahaghei kegra sopa mare igne khogla mala roꞌedi kolho thedi.
Nu mare theome tughu nagnafa mala ke figri mei ka iara nodi LORD nei nodi God.
11“Israel gne jateula kaisei balhu te theome lalase te flalo tafri ra eghu kolho.
Eigna ulu lahu na mare neke toreni Ijep,
eghuteuna ke leghu na mare jaola neke toreni Asiria mala mei toghodi.
12Eghuteuna kate flalo tafri jateula igne teu mare na,
iara ginauna lilisei kaisei fangna mala khale mare,
eghuteuna iara ginauna paradi nafnata naikno te diꞌa igre.
13Naikno igre kokhonodi fara! Naugna mare ne tirodi ghau iara ne tei koko ghau iara.
Eghuteuna iara ginauna na thofno roꞌedi fara mae igre,
naugna mae igre ne figri tagru ghau iara.
Iara magnahaghei te fakarhidi,
nu mare ne cheke chaichaghi eigu iara.
14Mare tarai chaichaghi ka iara.
Eghuteuna kate tarai na, mare thuru pari balu tanhi.
Kate mei tore gano nei waen teuna mare vavahe thinidire jateula mae bongihehe eghu.
Nu mare figri tagru ghau iara.
15Tutuani, neuba iara ne toghodi nei tusu ranghidi nolaghi neu,
mare roghe poru te mala eni puhi te diꞌa na ranghi ghau iara.
16Ka narane te au ka hoholo na,
mare tirodi mei ka iara mae ihei te au nolaghi te mala toghodi na.
Thono theo fara.
Mare tei tore thotogho ka unha te theo kaisei nanheta tadire.
Mare jateula phaloho te blogho te theome naba te mala fada gano ra eghu.
Naugna nodi mae mala baubature cheke fahaehaghe eigna nodi nanheta na,
eghuteuna mare ginauna lehe ka magra,
eghuteuna naiknodi Ijep ginauna maꞌedi kolho mare.”
8Maedi Israel tirodini LORD
1LORD ne cheke eghu,
“Ghotilo mae sekiuriti ra ifu nomi khufli ra mala nomhini dofrau naiknore.
Naoka na ginau soru mei jateula kaisei gaghata eghu mala mei hata nogu kantri iara igne.
Naugna nogu naikno iara igre theome leghuni nogu nhaꞌa cheke teke eni iara ka mare tifa ia,
nei tirodi nomhini chekegu iara na.
2Neuba mare ne cheke eghu,
‘Iagho nomi God ghehati maemi Israel, ghehati lase nigho iagho!’
3Nu theo eghu.
Mare theome magnahaghei te leghuni puhi te keli na nei doglo na teuna.
Eghume, mae naokare ginauna mei ngolhi fajifladi ka namonodire.
4Nogu naikno iara igre vavahi nodi king nei mae mala baubatu eghu thedi,
nei jaola hohoro nodi mumuju god thedi ka silva nei ka gol.
Eghuteuna iara ginauna na roꞌe fahuidi naikno igre.
5Iara theome magnahagheidi buluka te horo maedi Samaria ka gol te pogho soru tagna igne.
Iara thono diꞌatagu fara ka naikno igre.
Niha fata thona fabrahu ka tathagu iara na si naikno igrea?
6Kaisei maegna Israel neke eni mumuju god igne.
Eghuteuna glepo teke eni mana igne theome God tutuani.
Iara ginauna na puri nguanguja mala vuhai nakrofu mumuju tuana.
7“Puhi te diꞌa te eni mare igne jateula kaisei nuri ikoi eghu kolho.
Eghuteuna unha nate thoke mei ka puhi igne na ginauna na roꞌedi mare jateula kaisei seseuru biꞌo te mei roꞌedi namono biꞌo ra eghu.
Eghuteuna mare jateula nagare wit te theome ure te theo kaisei bret te mala ima ra neu.
Neuba ne ure wit, keha kantri delei nate mei te ima na.
8Naiknogna kantri Israel igne jateula naiknodi keha kantri delei ra eghu theome keli.
Kantri igne jateula tapera thina te phosa te diꞌa ra eghu gognaro na.
9Naikno igre jateula dongki te au mata te lelheghu kolho ka thegna ra eghu.
Aonu mare cheke famaemahedi hatimare mae king ka kantri Asiria mala fatei keha sileni mala mei toghodi.
10Uve, mare neke sabiridi thedi ka kantri delei mala tangomana mare te au ka nakarha te keli. Nu iara ginauna salo fodudi, eghuteuna theome raugha ke leghugna igne, king gna Asiria ginauna mei roꞌedi nei tapla faparidi eghu mare.
11“Maedi Israel igre, mare edi kmana olta mala fafara mala hata koko nakhibo.
Nu fafara te edi mare igre theome doglo,
eghuteuna mare edi kmana najafra ke klignadi olta igre.
12Iara neke rioriso kmana vetula maladi mare,
nu ka gaoghathodi mare na,
vetula igre jateula te maladi keha vikei ra eghu kolho.
13Mare edi kmana fafara, nei ima nafnahi teke fafara igre.
Nu iara LORD, theome gleale’adi fafara te edi mare igre.
Eghuteuna gognarona iara ghathodi nakhibodi mare igre,
eigna nakhibo te edi mare igre ginauna paradi mare.
Eghuteuna iara ginauna nake hata fafigridi Ijep ka sosolo.
14Mae Israel igre theome ghatho ghau iara mae ihei teke vuavuhadire.
Mare babana nodi suga biꞌo hatimare mae king.
Eghuteuna naiknodi Juda jaola neke horo famaku namono na ka gringni thina biꞌo te falithuidi mare.
Nu neuba, iara ginauna na koko soru khaꞌaghi mala nhako namono te maku teke eni mare igne balugna nogna suga biꞌo mae king.”
9Mae profet Hosia ne cheke ka God mala parani Israel
1Ghotilo naiknomi Israel! Thosei gleale’a nei eꞌei gaghamu biꞌo eghu koba,
jateula te edi mae bongihehe ra eghu.
Naugna ghotilo gognaro na jateula thau vine te tei kokoni khetogna na ia eghu la tei kokoni noda God.
Eghuteuna gaoghathomi ghotilo na,
mumuju Baal igne nate togho ghami te mala au ghemi kmana gano na eghu.
2Nu theo eghu, eigna ghotilo ginauna na theome raugha rofo nei theome naba gano te mala ima na,
nei theo waen te mala koꞌu na eghu.
3Eghuteuna ghotilo ginauna na theome au ka nogna namono LORD igne.
Ghotilo ginauna mala ke tei sosolo fapulo ka kantri Ijep,
nei jaola mala ke tei sosolo ka kantri Asiria.
Aonu kate tei au teu ka kantri igre,
ghotilo ginauna nake ima gano mala thosei ima teku God ra.
4Kate tei au ghotilo ka nodi kantri keha vikei igre,
ghotilo ginauna na theome au naba waen nei nafnahi eghu te mala fafara ka LORD.
Eghuteuna gano nate ima ghotilo re ginauna na fathona ghami themi ke ulugna God.
Eigna nafnata gano igre mala ima mare ka narane te tanhidi naikno te lehere.
Eghuteuna iheire te gnafa te ima gano igre ginauna kafe thona ka tathagna LORD.
Mare tangomana te ima gano igre, naugna mare ne rofo.
Nu mare na theome hata gano igre tei mala fafara ka nogna suga LORD.
Theo, blahi fara.
5Te edi ghotilo puhi igre na,
unha nate eni ghotilo ka gaghamu te mala kilo fnaknoni LORD na?
Thono theo fara.
6Ke leghugna narane nate thoke mei puhi biꞌo igne ka ghotilo na,
ghotilo ginauna na rikha tafri.
Neuba ngau, maedi ka kantri Ijep ginauna mei hata ghami ghotilo mala tei ka sosolo.
Eghuteuna ghotilo ginauna au jare ghilei lehe.
Eghuteuna mare ginauna na giugilu ghami ghotilo ka namono Memfis,
namono biꞌo lahu ka kantri Ijep.
Ghotilo ginauna nake theome pulo ka namonomi na.
Theo. Nomi suga, nomi silva, nei nomi glepo te keli teu teke khotodi ghotilore ginauna thafru ka soro nei ka gnarho phono.
7Ghotilo maemi Israel ra fanomho fakeli,
naugna narane teke lilisei God te mala para ghami ghotilo na la namohi.
Eghuteuna nafnata puhi te para ghami God igne thofno doglo fara,
eghuteuna unha najafra teke eni ghotilo na ginauna thono biꞌo fara.
Eghuteuna ghotilo jateula te tiromi ghatho tahuni eghu mana.
Iara lase ghami ghotilo cheke eghu ka iara,
“Mae profet igne au tagna tharunga gna God,
nu mana kaisei mae fagoigoli kolho eghu.”
Ghotilo naikno igre tiromi ghau iara,
naugna nakhibomi ghotilore biꞌo fara.
8God neke kuru mei ghau iara mala cheke faheta ka ghotilo nogna naikno mana ra.
Nu namono te gnafa te tei iara igre fariuriu fanogra ghau iara jateula mae te lilisei phighoro te
mala fakhale nanghaji ra eghu.
Neuba iara ne tei ruma ka sugagna LORD na,
iara filodi mae naokare jare.
9Ghotilo edi kmana nafnata puhi te diꞌa igre.
Eghuteuna puhimi ghotilore jateula puhidi mae kuꞌemi tifa ka namono Gibea ra eghu.
Nu LORD na theome ghatho ihodi puhimi ghotilo te diꞌare.
Naugna igne, mana ginauna para ghami ghotilo.
Tabagna nakhibodi mae Israel
10LORD ne cheke eghu ka naiknodi Israel,
“Iara neke vahidi kuꞌemi ghotilo tifa ra mala nogu naikno iara.
Ka narane tuare mare neke jateula fig te fuꞌa ulu te muita ra neku.
Nu kate tei te posa mare ka thogele Pio igne,
mare neke funu tarai neke pogho soru ka mumuju Baal.
Kate magnahagheni mare mumuju Baal te diꞌa igne,
mare ne jateula mumuju neu ne diꞌa fara.
11Neuba ghotilo ne fnakno funu ka ku’emi tifa ra.
Nu nafnakno igne ginauna luvu kolho theo nafugna.
Nafnakno igne ginauna rikha ghami ghotilo jateula kaisei nanghaji te mhaumhaghu ra eghu.
Uve, ghotilo ginauna na theo thumi.
Eghuteuna khetomi ghotilore ginauna khara na theome bukla.
12Eghuteuna neubane au thumi ghotilo,
nu iara ginauna na kafe falelehe thumi ghotilore.
Ghotilo kokhoni ghami fara.
Eigna kate tei koko ghami iara na,
kmana nafnata puhi te diꞌa ginauna na thoke ghami ghotilo.
13Iara filoni Israel gne au ka vido te keli fara,
jateula namono biꞌo Taea eghu.
Nu ghotilo ginauna hata tei thumire mala falelehe mae naokare.”
14LORD! Unha glepo te keli nate tusu ranghidi iagho na?
Jame te keli na,
iagho thosei snakredi goro gaꞌasere mala au thudi,
iagho fakrango chuꞌudire mala theome tangomana rehati te fachuꞌu sua na.
15LORD ne cheke eghu,
“Puhi te diꞌa fara te eni mare igne neke fufunu kani au teku mare ka namono Gilead tifa ia.
Nu ka narane igre iara neke funu diꞌatagu ka mare.
Naikno igre neke edi kmana nakhibo fara.
Eghuteuna nodi mae mala baubature neke jaola neke tirodini chekegu iara na.
Eghuteuna iara ginauna na khi fajifladi ka nogu vido glose igne.
Eghuteuna iara ginauna nake theome magnahaghedi naikno igre.
16Naiknodi Israel igre ginauna na theo thudi,
mare ginauna na jateula kaisei gaju naegro te theo kaisei fuꞌa tagna ra eghu.
Nu jame te au thudi mare na,
iara ginauna falelehe sua te thofno namhadi fara mare igre.”
LORD ginauna paradi naiknodi Israel
17God mae ihei te loku ranghini iara igne ginauna na figri tagrudi nogna naiknore,
naugna naikno igre ne theome leghuni nogna cheke mana na.
Eghuteuna naikno igre ginauna mala tei tafri kolho ka keha kantri delei.
101Tifa na naiknodi Israel igre neke faghano au fakeli fara neke jateula kaisei gaju grep te ure ra neku.
Kate dedei te au nodi kmana glepo na, mare neke edi kmana olta maladi mumuju god.
Kate keli glose na te au ghedi kmana gano na,
mare lilisei haghe thina te keli mala kilo fnaknodi mumuju god.
2Mae igre thofno mae chaichaghi fara,
eghuteuna mae igre ginauna au papara eidi nakhibo teke edi mare igre.
Uve, na theome raugha God ginauna paꞌe soru olta igre.
Eghuteuna mana ginauna puri nguanguja thina teke fakegra haghe mare igre.
3Aonu mare ginauna na cheke eghu, “Tahati theome leghuni nogna cheke LORD,
eghuteuna mana gognaro na theome vavahi ranghi ghita kaisei king.
Nu jame neuba, God ginauna vavahi ranghi ghita kaisei king mala togho ghita.
Mana ginauna na theome eni kolho ranghi ghita kaisei glepo te keli.
Thono theo fara!”
4Mare edi kmana nhaꞌa cheke chaichaghi, nei fiti fatei cheke ka keha kantri delei.
Mae Israel gre la kokohi puhi te doglo na la leghuni kolho puhi te diꞌa na.
Mae igre jateula gnarho khori te mala falehe sasa te kotu haghe ka nagare ra eghu.
5Buluka gol te au ka namono Betel igne ginauna diꞌa,
eghuteuna naikno te au ka namono biꞌo Samaria na igre ginauna mhaghu nodi nei diꞌanagnafa eghu ka buluka igne.
Naikno te gnafa baludi mae pris igre ginauna tanhi nei diꞌanagnafa eghu eigna mumuju buluka igne.
Naugna mae Asiria igre ginauna hata koko gol teke au ka thinigna mumuju buluka igne.
6Maedi Asiria igre ginauna hata mumuju gol igne mala namha ka nodi king biꞌo na.
Eghuteuna nanghagna Israel ginauna na thofno diꞌa parilahu,
eghuteuna mare ginauna na mamaja nodi fara,
eigna mare ne thofno fatutuani ni mumuju igne.
7Mare ginauna hata king gna Israel igne tei delei
mala dofini jateula khoilo te elo te tei delei te dofini ra eghu.
8Vido blahi te mala tarai mare ka mumuju Bet-Aven igre ginauna groꞌe theo tokadi,
eghuteuna olta te au ka vido blahi tuana ginauna thafru ka soro nei ka phono eghu.
Eghuteuna iheire te magnahaghei te tei porure,
mare ginauna na cheke eghu ka thogelere, “Mei toku tafru ghami!”
Eghuteuna cheke eghu ka gukhure, “Soru mei ke klignami!”
Israel ginauna au papara
9LORD ne cheke eghu,
“Naikno igre tapla jafra ka nakhibo funu ka namono Gilead ghilei mei posa ka narane gognarogne.
Naikno igre theome gnafa te eni puhi te diꞌa na ranghi ghau iara.
Gognaro na mare theome tughu nagnafa kolho.
Naugna igne, kaisei magra biꞌo ginauna posa mei ka mare jateula teke eni ka mae kuꞌedi ka namono Gilead tifa ia eghu.
10Iara ginauna na paradi nafnata naikno te diꞌa igre ka narane aheva te magnahaghei iara na.
Papara igne ginauna biꞌo fara nabagna nakhibo te thono diꞌa fara teke eni mare igne.
Uve, iara ginauna snakredi keha kantri are mala salo fodu mala magra ka mare.
11Tifa na Israel neke thofno keli fara jateula kaisei buluka majaghani te tarabana mala tapla ke klignadi wit te mala koko khunedi ra neku.
Nu iara ginauna na lilisei kaisei phukri ka graragna na mala loku heta.
Eghuteuna maedi Israel ginauna mala jaola jateula buluka te korho kaisei aean te mala famane fapiapila glose ra eghu.
12Iara cheke ka ghotilo naiknomi Israel nei Juda mala lilisei ghotilo puhi te diꞌa te edi ghotilore.
Eghuteuna ghotilo mala ke leghuni puhi te doglo na mala tarai tutuani ka iara jateula mae ihei te loku ka nagare majaghani te joꞌu gano te karha nei ure teu ra eghu.
Gognarogne nomi narane ghotilo mala ke pulo mei ka iara nomi LORD
nei nomi God eghuteuna mana ginauna fablahi ghami.
13Nu ghotilo joꞌu fabrahu puhi te diꞌa na.
Naugna igne sisi te diꞌa na ure ka nagnafami ghotilore.
Eghuteuna ghotilo boho kolho ka nomi cheke themi te chaichaghire.
Kate filodi te kmana nomi soldia re,
ghotilo rouronu ka nomi nolaghi themi.
14Eghuteuna mae naokare ginauna mei goigoni nomi namono biꞌo ghotilo te bara te maku igre.
Uve, goigoni nate eni mare igne na jateula teke eni king Salman teke groꞌe namono biꞌo Bet-Abel tifa ia eghu.
Ka magra igne mare neke goigonidi fara goro gaꞌase nei thudi teure neke koko tafri ka namono na.
15Ghotilo naikno te au ka namono Betel:
Ghotilo edi kmana puhi te diꞌa,
eghuteuna kaisei glepo te thofno diꞌa fara na ginauna mei ka ghotilo.
Ka narane igne,
hamerane boibongi kate haghegna naprai na mae naokare ginauna aknu falehe king gna Israel.”
11God namhadi fara naiknodi Israel
1LORD ne cheke eghu,
“Kani teke jateula puhidi sua majaghani ra teku naiknodi Israel igre,
iara neke namhadi fara jateula thofno thugu teke karha majaghani ra neku neke hata fajifladi Ijep.
2Nu kmana fata iara neke ehadi mala mei ka iara,
nu mare tirodi neke tei fakhaba ka iara.
Mare fafara nei jaola gahu insens koba ka mumuju god Baal igre.
3Iara farirhiudi jateula mae te farirhiuni thugna na te mala nonolo ra eghu.
Nu neuba iara ne reireghidi, mare theome filo glani ghau iara.
4Iara neke edi gobigna lepore ranghidi jateula kaisei thugu thegu te thofno namhani fara ra neku neke fakarhidi nei faꞌimadi neku.
5Nu mare tirodi fara teke pulo mei ka iara na.
Naugna igne mare nabadi teke figri Ijep na, eghuteuna maedi Asiria igre ginauna nake funei frunidi mare.
6Uve, naugna te leghudi kolho mare gaoghathodi thedire,
mae naokare ginauna mei goigoni nodi namono biꞌo mare na.
Eghuteuna grengathagna nodi namono biꞌo mare igne ginauna groꞌe theo tokagna.
7Nogu naikno iara igre au nodi gaoghatho te mala figri tagru ghau iara na.
Uve, neuba mare ne eha mei ka iara God mae ihei te au nolaghi fateote’o,
iara ginauna na theome toghodi.
8“Israel! Iara theome tangomana nate tei koko ghami ghotilo na,
ba te rikha ghami na.
Iara na theome roꞌe ghami ghotilo jateula teke eni iara tifa ka phei namono biꞌo Adma ghe Seboim ra.
Theo. Iara thofno namha ghami ghotilo ka nagnafagu na.
Iara theome magnahaghei te eni kaisei puhi te diꞌa jateula ghotilo teuna.
9Neubane diꞌatagu iara ka ghotilo,
iara ginauna na theome para ghami ba goigoni ghami fabrahu ghotilo.
Iara God mae ihei te au balumi fabrahu ghotilo.
Puhigu iara na theome jateula puhigna naikno eghu.
Neubane diꞌatagu iara ka ghotilo,
iara na theome hiro mala para ghami ghotilo. Theo.
10Iara ginauna na eha fabiꞌo jateula lion eghu ka keha lion mala mei ka mana,
eghume nogu naikno iara igre ginauna nake pulo mei ka iara funu ka namono te gnafa igre.
11Mare ginauna mhaghu nake ghosei ke pulo mei ka iara,
jateula nanghaji te ghosei teke pulo mei ka nodi gnoku ra eghu funudi Ijep nei Asiria.
Eghuteuna iara ginauna nake hata meidi ka nodi thofno namono na.
Iara LORD te chekeni igne.”
LORD ginauna paradi phei kantri Israel ghe Juda
12LORD ne cheke eghu,
“Naiknodi Israel igre chaichaghi koba ka iara.
Nu naiknodi Juda igre au famaku ke parigu iara God mae ihei te eni ranghidi puhi te keli nei doglo teuna.”
121“Gobigna lepo te edi mae Israel funu hamerane te ghilei rafi igre theo nafudi kolho.
Unha te edi mare igre jateula puhi sua te fariuriu tathako nuri ia eghu kolho.
Mare cheke pouporu tafri ke leghudi kheradi thedire.
Mare magra nei falehedi eghu kolho kheradi thedi re.
Mare lilisei vetula mala loku balugna king gna Asiria,
nei eꞌei bisnis baludi maedi Ijep te nogna naoka thegna na.”
2Uve, LORD na la fatenihi Juda, eghuteuna mana ginauna paradi mare eidi puhidi mare te diꞌare.
Puhi te diꞌa te gnafa teke edi naiknore, mana nake tughu fapulo ka mare.
3Tifa na, mae Jekop kuꞌedi mare igne neke magra balugna mae Iso ka thiꞌagna idodi na.
Eghuteuna kate biꞌo haghe na, mae Jekop neke magra balugna God.
4Kaisei fata, mana neke magra balugna kaisei engel neke nheta uluni engel igne.
Mana neke toreni engel igne mala fablahini.
Kani au teku mana ka namono Betel,
God neke mei cheke ka mana.
5Mana LORD God mae ihei te au nolaghi fateote’o ka maloa kligna.
Igne nanghagna God mae ihei te mala tarai te pogho soruni tahati na.
6Eghuteuna, ghotilo vikegna mae Jekop ra mala jateula mana eghu tughu nagnafa mala ke figri mei ka noda God.
Ghotilo mala ghatho tahuni nei leghuni eghu mana ka puhi te doglo te mala fatedi naiknore.
Eghuteuna ghotilo ofou mala filoni unha nate eni mana te mala fakarhi ghami na.
LORD ne fateni Israel
7Naiknodi Israel,
mare chaichaghi eidi skel jateula maedi Kenan ra neu.
8Mare neke cheke fahaehaghe eghu,
“Tahati dedei fara,
unha te magnahaghedi tahati re la hatahi tahati!
Theo kaisei naikno nate chekeni ne chaichaghi tahati ne hata glepo te keli teuna!”
9Nu LORD ne cheke eghu,
“Iara nomi LORD nei nomi God eghu ghotilo.
Iara mae ihei teke hata fajifladi mae kuꞌemi ghotilo ra ka kantri Ijep.
Neubane dedei ghotilo gognarogne,
iara ginauna hata fadelei ghami ghotilo ka nomi famane suga igre mala au ghotilo ka suga tapuale.
Ghotilo ginauna nake jateula teke edi mae kuꞌemi tifa ra eghu nake tei au ke lamna namono nagou.
10Tifa na iara neke cheke ka hatimare mae profet,
mala fakakhana ka mare kau mifi.”
11Neuba iara ne edi glepo igre,
kmana ka ghotilo te au ka namono biꞌo Gilead igre edi kmana puhi te diꞌa.
Ghotilo naikno te au ka namono tuana fafara ka mumuju.
Eghuteuna ghotilo ginauna na kafe lehe kolho.
Eghuteuna, nomi olta ghotilo te mala fafara ka mumuju tuare ginauna na jateula bukrei thina te au ka vido te gaera eghu theo nafudi kolho.
12Tifa na kuꞌeda mae Jekop ia neke rikha neke tei ka namono Mesopotemia.
Ka namono igne mana neke reireghi sipu.
Mana neke eni gloku igne mala tolaghi ka thugna gaꞌase mae ihei teke khotodi sipu igre.
13Eghuteuna ka narane teke au mae Israel ka kantri Ijep,
LORD neke kuruni kaisei mae profet mala tei hata fajifladi Ijep.
Eghuteuna mae profet igne neke reireghi fakelidi mare.
14Nu ghotilo vikedi mae Israel igre edi kmana puhi te thono diꞌa fara.
Nu LORD ginauna thofno para ghami ghotilo maemi Israel,
naugna ghotilo tapla jafra ka nakhibo ne cheke faparini nanghagna mana na.
13LORD ginauna parani Israel
1Tifa na kaisei vikegna mae Ifreim kolho teke mala cheke na.
Eghuteuna keha nabotho kaisei vikere neke mhaghu neke ghatho tahudi mae igre,
naugna mare mae nheta fara.
Nu mae igre gognarona tapla jafra ka nakhibo naugna mare pogho soru ka mumuju Baal.
Naugna igne, mare jateula mae tela lehehi ra eghu.
2Gognarona mae Israel igre mare leghuni puhidi vikegna mae Ifreim te diꞌa igre,
mare tapla jafra fabrahu ka nakhibo.
Mare theome gnafa te hohoro mumuju ka silva te mala tarai nei pogho soru ranghini teuna.
Mumuju igre neke hohoro kolho naikno leghuni nogna glalase na.
Naiknodi keha kantri te au faligohodi mare igre cheke eghu,
“Mae Israel igre mare falehe naikno mala fafara ka mumuju,
eghuteuna mare gnangho ka mumuju buluka igne.”
3Naugna te edi ghotilo puhi te diꞌa igre,
ghotilo ginauna na ghosei tei dofi ghami jateula khoveo ke kligna thogele te ghosei te tei dofini hamerane boibongi ra eghu.
Eghuteuna na jateula nabubla te ghosei te moja kate brana naprai ia eghu.
Ghotilo ginauna dofi ghami na jateula chara wit te flalo te tei ka nuri,
ba jateula gagahu khaꞌaghi te tei te dofini ka maloa ra eghu kolho.
4LORD ne cheke eghu,
“Iara LORD nomi God ghotilo,
iara neke hata fajifla kuꞌemi ghotilo ra Ijep.
Eghuteuna iara ngala nomi God ghotilo na,
theo kaisei god aheva nga te mala fakarhi ghami ghotilo na.
5Iara neke reireghidi kuꞌemi ghotilora ke lamna namono nagou te brana fara ia.
6Nu kate hata glose mare te au tagna na, mare neke keli tadi,
naugna iara neke tusu ranghidi kmana gano.
Puhi igne te fahaehagheni fara mare te ghatho iho ghau iara fabrahu te ghilei mei posa gognarogne.
7Naugna igne iara ginauna na jateula lion nei lepad eghu na poru ofou ka geri nabrou mala falehe ghami ghotilo.
8Iara ginauna na jateula bea te diꞌatagna te kathu sasaka glepo te tautagu te mei te blau thugna ra eghu ka ghotilo.
Eghuteuna iara ginauna na kafe falehe ghami ghotilo hui jateula lion te faleheni buluka biꞌo na te ghamu fahui ia eghu.
9“Ghotilo Israel. Iara ginauna roꞌe ghami ghotilo,
naugna ghotilo ne figri tagru ghau iara mae ihei teke togho ghami ghotilo ia!
10Ghotilo neke tore ghau iara mala tusu ranghi ghami kaisei nomi king mala togho ghami.
Nu aheva gne nomi king ghotilo na,
ba nomi mae mala baubatu ghotilo na?
Mare theome tangomana nate fakarhi ghami ghotilo na!
11Iara diꞌatagu neke vahini kaisei king ka ghotilo.
Eghuteuna gognaro na iara jaola diꞌatagu ne brue teidi king igre.
12Iara riorisohi nakhibodi mae Israel igre ka nogu buka na.
13Mare thono fameomekro fara, naugna mare ne tirodini na au te keli na.
Igne jateula sua te au teu ka thiꞌagna idogna na nu tirogna jifla mei teu ia eghu kolho.
14“Nu iara ginauna na hata fafigridi ka namonodi mae tela lehehi ra.
Glehe! Aheva nou nolaghi iagho te mala faleheni naikno na?
Beku! Aheva nou nolaghi iagho te mala goigonini naikno na?
“Uve, iara ginauna na fakarhidi nogu naiknore, eghuteuna iara na theome tughu nagnafagu na.
15Vikegna mae Ifreim igre la kmana fara salaꞌudi keha vike te gnafa Israel igre.
Nu iara ginauna na kuru meini kaisei nuri biꞌo te brana fara funu ka namono nagou ke maghati.
Eghuteuna khoꞌu seu igre ginauna na kafe krango.
Eghuteuna nuri igne ginauna na hata tei nodi glepo te keli mae igre delei.
16Naiknodi Samaria igre theome keli ranghi ghau iara, naugna igne mare ginauna ari deniu glehe na.
Mae naokare ginauna mei mala falehedi naikno igre,
eghuteuna mare ginauna koko tafri goro suare ka glalabagna namono na.
Eghuteuna mare ginauna hata goro gaꞌase te buklare mala vahe pea thiꞌadire.”
14Maedi Israel mala ke figri ka LORD
1Ghotilo maemi Israel, ghotilo ke figri ka LORD nomi God,
naugna nakhibo te edi ghotilo are fapari ghami ghotilo.
2Ghotilo mala ke pulo mei ka LORD, eghuteuna ghotilo tangomana te tarai eghu ka mana,
“God, iagho tangomana te hata kokodi nakhibomi ghehati gre,
eghuteuna jateula nomi fafarai teu ghehati na,
ghehati ginauna na cheke fakeli nigho.
3Hatimare maedi Asiria theome tangomana te fakarhi ghami ghehati na.
Eghuteuna hose te mala magra igre jaola theome tangomana te togho ghami na.
Ghehati ginauna na theome cheke eghu ka mumuju teke hohoro kolho themi igre,
‘Ghotilo nomi god ghehati teuna.’
LORD, kokhoni ghami,
naugna ghehati gne jateula sua glehe kokoi eghu theo ihei te mala togho ghami na.”
Israel ginauna au ka pharikeli
4LORD ne cheke eghu,
“Diꞌatagu iara ka naiknodi Israel ra la gnafahi.
Eghuteuna gognarona iara kela namhadi nogu naiknore ka nagnafagu na.
Neuba mare ne edi puhi te diꞌare, iara ginauna nake keli ranghidi.
5Iara ginauna nake toghodi mala ke au fakeli mare jateula nakhete te soru ke kligna glose teke keli fapulo glose te moja na ia eghu.
Mare ginauna na jateula famane sisi eghu.
Uve, mare ginauna na kegra haghe jateula gaju sida gna Lebanon te soru pari lamna glose glathigna ia eghu.
6Nakarhadi naikno igre nake majaghani fapulo jateula kaisei gaju oliv teke thugru khakla majaghani ra eghu.
Mare ginauna nake au ka nakarha majaghani mala ke au gleale’a jateula gaju sida te famane sisiri keligna Lebanon ia eghu.
7Israel ginauna famane keli jateula gaju sida eghu.
Eghuteuna naiknore ginauna tangomana te au ke pari naungo gna gaju igne.
Israel ginauna na jateula nagare te au kmana gano tagna ra eghu,
ba jateula nagare grep te ure ra eghu.
Naikno te au ka vido te gnafa igre ginauna na lase fakelini mana,
jateula mare te lase fakelini famane waen gna Lebanon ia eghu.
8Ghotilo Israel, thosei tei tarai ka mumuju.
Eigna kate tarai ghotilo ka iara na, iara na fanomho ka ghotilo, eghuteuna iara ginauna na reireghi ghami ghotilo. Iara gognarona jateula kaisei gaju te theome gnhagha khaklagna ra eghu. Thua nafnotu te keli te au ka ghotilo igre, iara ngala teke tusu ari ka ghotilo na.”
Cheke leghu lahu
9Ihei te lalase na, naikno tuana ginauna lase fakelidi cheke te edi iara ka buka na igre,
nei tathaji fakeli ka nagnafagna na.
Eigna puhigna LORD na thofno doglo fara.
Eghuteuna ihei te doglo na mala leghuni puhigna mana na.
Nu ihei te diꞌa na theome tangomana te leghuni puhigna God na,
naugna naikno igne theome ghatho tahuni puhi te doglo na.