Profet Hagae
Nogna Buka Mae Profet Hagae
Thoutonu kmo’ei eigna buka igne
Buka igne au keha nonomho teke cheke LORD ka profet Hagae ka finogha 520 B.K. Ka vido tuana, naiknodi Israel re neke jifla kokonihi namono Babilonia, namono aheva teke mei mae naoka teke huhuru mala au mare tagna teku na.
Keha mae ka mare neke pulo au Jerusalem. Mare au roi kmana finogha Jerusalem, nu nogna Sugablahi LORD teke paꞌe soru mae naoka re, diꞌa meu ngala eghu. Me gaoghathogna na, mare theome filo hagheni nogna Sugablahi LORD na, nu jaola theome filo hagheni LORD. Ka puhi igne, LORD ne snakre ranghidi nakarha ninhigrana mare thokedi nhigra rofo. Nu ka nonomho igne, LORD ne cheke ka mae lida mala ke fakegra fapulo Sugablahi na. Eghuteuna mana neke nhaꞌa cheke ka mare. Jame te eni mare nu ke figri mare ka mana teuna, mana ginauna tusu ranghidi kmana glepo. Eghuteuna, mare ginauna au ka pharikeli ka nodi namonore.
Keha vido ka buka igne
Mare mala ke fakegra fapulo nogna Sugablahi LORD na: 1:1-15
Nonomho mala fameomego gaoghathodi mare: 2:1-23
1LORD magnahaghedi mare ke fakegra nogna Sugablahi na
1LORD cheke lao u nonomho ka profet Hagae ka narane ulu lahu na namno nhigra ke lamnadi phia finogha king teku Darius gna Pesia na. LORD ne cheke ka mana mala tei cheke ka Serababel mae gavana gna Juda, thugna mae Sealtiel, nei mae pris biꞌo Josua thugna mae Jehosadak. 2LORD mae ihei te au nolaghi na, ne cheke eghu ka mae Hagae, “Naiknore chekeni te theome thoke ngau narane te mala fakegra fapulo nogu Sugablahi iara na.”
3Aonu LORD ne cheke ka profet Hagae mala tei cheke ni nogna nonomho mana na ne cheke eghu, 4“Ghotilo nogu naikno iara ra! Unha ne thuru ka suga te keli fara ghotilo, kate diꞌa teu nogu Sugablahi iara na?
5“Ghotilo jame filo glanidi ka unha te thoke ghami are. 6Ghotilo jaꞌi kmana sopho ka nagare, nu ka uklidire theome kmana ganodi kolho. Ghotilo ima, nu gano re theome nabami ngala ghotilo. Ghotilo koꞌu waen, nu waen tuana theome naba kolho. Ghotilo au nomi pohe, nu pohe tuare theome naba te mala fabrana ghami ghotilo na. Mae glokure loku heta mala atha kmana sileni, nu sileni te atha mana re, theome naba kolho. Uve, sileni igne jateula te dofini kolho ka gloi ra eghu.”
7Igne unha te chekeni LORD, mae ihei te au nolaghi na. “Ghotilo jame filo glanidi unha te thoke ghami re. 8Gognarona ghotilo thosei theo tei mata mala kusu thaba, eghuteuna ghotilo ke pulo mei mala ke fakegra fapulo nogu Sugablahi iara na. Jame te eghu ghotilo na iara ginauna gleale’a fara, eghuteuna ghotilo ginau filo haghe ghau iara. 9Leghu fata na ghotilo mala ofo mala vuragha ghemi gano ka nagarere, nu keha ghu kolho te kotu haghere. Kate atha te mei ghotilo gano re ka sugami re, iara na snakre mei nuri mala faflalo koko gano tuare! Unha ne eghu nga? Iara LORD cheke fadoglo ka ghotilo. Iara eni igne, naugna ghotilo loku heta mala fakegra kolho nomi suga themi are. Nu nogu Sugablahi iara na theome au fakeli kolho eghu. 10Ka puhi igne, iara theome snakre mei nakhete gne te theome karha fakeli ghemi gano ghotilo are. 11Iara famoja vido te gnafa ka kantri ghotilo igne. Eghuteuna vido ka thogele na are, vido te mala horo thobi, vido nagaredi grep, nagare di gaju oliv teu igre ke famoja gnafa. Puhi igne thoke ghami ghotilo naikno are, nu gobi lepo te tautagu te gnafa igre, ginauna thokedi langau gano jaꞌi mala karha teu ghotilo are eghu.”
Naiknore ne leghuni chekegna LORD
12Aonu Serababel thugna Sealtiel, nei mae pris Josua thugna Jehosadak nei naikno te gnafa te au ka vido tuana, mare pukuni leghuni fara chekegna LORD nodi God na. Mare ne leghuni chekegna LORD mae ihei teke snakre meini profet Hagae te toutonu u nogna nonomho na nu mare mhaghuni fara langau LORD.
13Nu Hagae nogna mae fanohmo LORD ne toutonu nogna nonomho LORD na ne cheke eghu, “LORD ne cheke eghu, ‘Iara na au balumi ghotilo. Igne nogu nhaꞌa cheke iara na!’ ” 14Aonu LORD ne cheke ka mae gavana Serababel, mae pris biꞌo Josua, nei naikno te gnafa teure mala ke fakegra fapulo nogna Sugablahi LORD, mae ihei te au nolaghi fateote’o.
15Eghume, mare ne fufunu gloku igne ka fapea finogha gna King Darius, ka varadaki fati narane gna fafamno nhigra na.
2Sugablahi majaghani igne ginauna famane fara
1Ka varadaki kaisei narane di fafitu nhigra ka finogha igne, LORD ne cheke ka profet Hagae ne cheke eghu, 2“Iagho tei cheke ka Serababel mae gavana gna Juda, nu ka mae pris biꞌo Josua, nu ka naikno te au jare re, mala ghusna eghu: 3Mae ihei ka ghotilo te ghatho fapuloni teu nogu Sugablahi iara tifa te pukuni keli fara igne? Gognaro na ghotilo jateula te fiti naikno ra eghu kolho. Ghotilo gaoghathomi na Sugablahi majaghani igne jateula te theo nafugna eghu kolho. 4Nu iagho Serababel, iagho mae Josua, naikno te gnafa ka namono igne, heta gaoghathomi are. Iara LORD mae ihei te nolaghi fara, iara cheke fadoglo ka ghotilo: Iara magnahaghe ghami ghotilo te gnafa mala loku, naugna iara au balumi ghotilo. 5Ka narane teke jifla kokoni mae kuꞌemi ghotilo re namono Ijep tifa ia, iara neke eni kaisei nhaꞌa cheke mala au fabrahu balumi ghotilo ghilei thoke gognaro gne. Tharungagu iara na au balumi ghotilo. Tuana me thosei mhaghu ghotilo eghu.”
6LORD mae ihei te au nolaghi fara igne ne cheke eghu, “Theome raugha, iara ginauna fanghali maloa nei nauthoglu gne nei thongna nei glose teu igre. 7Iara ginau uludi keha kantri are, eghuteuna hata nodi silva nei gol teu mare igre, ne mei fafofodu ka Sugablahi igne. 8Eghuteuna bukrei silva nei gol teu te au ka nauthoglu igne nogu iara. 9Eghuteuna Sugablahi majaghani igne ginauna famane fara salaꞌuni Sugablahi ulu ia. Eghuteuna naiknore, ginauna au fakeli nei au ka pharikeli. Iara LORD te chekeni igne!”
Profet Hagae ne toutonu baludi mae pris re
10Kate thokeni varadaki fati narane ka fanheva nhigra ka finogha tuana, LORD ne cheke eghu ka profet Hagae: 11“Igne unha te chekeni LORD mae ihei te au nolaghi fateotei igne na, ‘Iagho tei ghusnadi mae pris ra unha te chekeni ka vetula gna Moses na. 12Iagho ginau ghusna eghu ka mare: Jame kaisei mae atha nafnahi teke fablahi igne ka nogna pohe na, eghuteuna pohe tuana ghigri ka kaisei bret, ba susupu, ba waen, ba oel, ba ka keha gano are, ba glepo tuare ginauna jaola blahi?’ ”
Aonu mae pris rere ne cheke tughu eghu ka mana, “Theo!”
13Mae Hagae neke fapea ghusna eghu ka mare, “Jame kaisei mae habo ka thinigna mae te lehehi na, eghuteuna habo ka kaisei gano, ba gano igne na theome klino ka tathagna God na?”
Mae pris igre ne cheke eghu ka mana, “Uve, theome klino!”
14Eghuteuna mae Hagae ne chekeni unha teke chekeni LORD na, ne cheke eghu, “Cheke tuana nanaba ngala ka ghotilo naiknogna namono igne baludi gobi lepo te edi ghotilo are. Nu glepo te gahu ghotilo te fafara mei ghotilo ka iara igre kafe theome klino ka tathagu iara na.
15“Ghotilo ghaoghatho fakeli ka glepo te thoke ghami funu tifa te posa gognaro are. Ka teke theome fakegra nga teku ghotilo nogu Sugablahi iara ia, 16leghu fata teke ukli wit nei bali teu ka nomi thobire, ghotilo gaoghathomi na ginauna ukli thokei phei gobi kilo eghu, nu thokei kaisei gobi kilo kolho. Eghuteuna kate tei atha waen ka vido te au waen na, ghotilo gaoghathomi na, na thokei kaisei gobi lita eghu, nu ghotilo atha kolho phiatutu lita. 17Mala eghu ngala, naugna iara neke kulu hohoro thina aes ka nakhete mala soru ka nomi thobi ghotilo re nu iara kuru mei nuri nabra mala brango thobi ghotilo are. Nei iara na kuru mei nakhete mala goigoni ganodi thobi ghotilo are. Neuba, ghotilo theome figri mei ka iara. 18Gognarona varadaki fati narane gna fanheva nhigra, eghuteuna gognarona ghotilo la enihi babana gna nogu Sugablahi iara na, eghume funu gognarona, ghotilo ginauna filoni unha nate thakle mei na. 19Neubane gnafahi ghemi gano ghotilore, eghuteuna gaju grep, nei gaju fig nei pomegranet teu igre ginauna theome tangomana te ure na, nu gognarona, ghotilo ginauna au ghemi kmana gano te keli te mala ghamu na.
“Iara ginauna thofno fablahi ghami ghotilo!”
LORD ne eni kaisei nhaꞌa cheke ka mae Serababel
20Ka narane tuana, LORD neke fapea chekei ka profet Hagae, mala tei cheke 21ka Serababel mae gavana gna Juda. Mana ne cheke eghu, “Theome raugha iara ginauna fanghali di maloa ghe nauthoglu igre. 22Kantri te gnafa au king tadi igre, iara ginauna goigonidi mare, eghuteuna iarai ginauna atha fadelei nolaghi na ka mare. Nodi chariot mala magra nei mae soldia teu igre tarabana mala magra fari falehei fari thedi eghuteuna mae soldia balu nodi hose igre ginauna lehe.
23“Eghuteuna iagho Serababel thugna Sieltiel, nogu mae gloku iara igne. Ka narane tuana, iara ginauna tusu ari nafnakno biꞌo ka iagho. Nafnakno igne jateula kaisei mae fahaghe ring gol te au ka geghesu phile khame nhetagna te thofno sigla fara ka nogu nolaghi iara igne eghu. Tutuani fara, iara neke kulu vahi nigho iagho te mala nogu mae gloku iara na. Iara LORD te chekeni igne!”