Profet Habaku
Nogna Buka Mae Profet Habaku
Thoutonu kmo’ei eigna buka igne
Mae profet Habaku neke toutonuni chekegna God te au ka buka na igre namno gobi finogha neke karha nga Kraes (600 BK). Ka narane tuare Babilonia neke funei fruni ni kantri Israel baludi keha kantri te gnafa te au faligohoni kantri Israel. Mae Habaku ne filoni nafnata puhi te thofno diꞌa fara te paradi koba naiknore mae Babilonia gre. Naugna igne, mae Habaku ne cheke ka God, ne cheke eghu, “Ne faꞌunha sagho te neubane filodi glepo te diꞌa te edi fabrahu naiknodi Babilonia igre, nu theome eni kaisei glepo ranghidi teu gnea? Ne faꞌunha sagho te fakmu nigho teu kolho kate goigonidi mare keha naikno te roi doglo ka mare igre ia?” Aonu te chekeni God na, mana ginauna paradi nafnata naikno igre ka nogna thofno narane na. Ka phei philegna fati nabrougna teu ka buka igne, God neke cheke eghu, “Naikno te fahaehaghe fara igre theome magnahagheni kaisei glepo te doglo. Nu naikno te doglore ginauna karha, naugna mare ne ghatho brana ghau iara.”
Keha vido ka buka igne chekeniu God ginauna goigonidi naikno te theome doglo igre. Eghuteuna ka philegna thiloi, mae Habaku ne koje mala kilo fnaknoni God, nei mala cheke thakleni God ngala te mala rouronuni na.
Keha vido ka buka igne
Profet Habaku ne tanhi lao ka God, eghuteuna God ne cheke tughuni mana: 1:1–2:5
God ginauna paradi naikno te diꞌare: 2:6-20
Nogna tharai mae profet Habaku: 3:1-19
11Profet Habaku neke hata nonomho igne ka LORD ka mifi.
Mae Profet Habaku ne theome kelitagna ka God
2Mana ne cheke eghu, “LORD!
Niha fata tirou fanomho mei ka iara sagho ia kate tanhi ari iara mala togho ghami ka naꞌau papara igre teu gnea?
Ba iagho tirou fakarhi ghami ghehati ka khamedi mae te diꞌa puhidi igre sia?
3Naugna unha sagho te fakakhana ka iara glepo te diꞌa igrea?
Ba, snakredi mare te edi fabrahu puhi biꞌo igrea?
Naikno te diꞌa igre falehe naikno koba,
ba goigonidi koba gobigna lepore ka namono te gnafa igre.
Mare faripholai koba nei magra koba eghu.
4Naiknore theome leghudi nou farirhiu iagho re,
eghuteuna tirodi leghuni puhi te doglo te mala fateni naikno na.
Mare tuthughu puhi te doglore ka puhi te diꞌa.
Tuare te edi fabrahu mare kate hata kasa mare glokure ka naikno te doglore.”
God ne cheke tughu ka mae Habaku
5LORD ne cheke eghu, “Ghotilo nogu naikno iara ra.
Ghotilo filo fakeli ka keha kantri are.
Ghotilo ginauna rhana nomi ka unha nate filodi ghotilore.
Uve, na theome raugha, kaisei glepo ginauna thoke mei.
Kate nomho thoutonu eigna igne,
ghotilo ginauna tiromi fatutuani kolho.
6Iara ginauna tusu lao nolaghi ka naiknodi Babilonia,
iheire te glalama nei iheire te diꞌa puhidire.
Maedi Babilonia igre tei ka namono te gnafa ka nauthoglu igne
mala hata nodi namono keha naiknore.
7Te ghathoni mare na,
mare au nodi nolaghi biꞌo ka nauthoglu igne mala eni unha te magnahagheni thedi na.
Mae igre ne doglo fara thedi eghu ka nagnafadire.
Leuleghu fata na mare famamhaghudi keha naiknore.
8Nodi hosere umhu fara salaꞌuni khurau biꞌo te kiloi lepad.
Kate magra na mae igre jateula khuma mata te rofo ra eghu glalama salaꞌui.
Nodi hosere dadahai pari ka glose na, naugna mare magnahaghei te faghose tei.
Eghuteuna maedi Babilonia igre jateula gaghata te tava te soru pari te mala hata ganora eghu theidi re.
Eghuteuna mae soldia te saghe ka hose igre,
mare chari mei funudi ka vido aheva te khaba mala mei goigonidi nodi naokare.
9Kate kafe mei mare ka magra na,
theome tangomana kaisei naikno te kegra fanogradire.
Kate mei namo armi igne te mala magra na,
naiknore mhaghu nodi fara ne fififri tongana.
Leuleghu fata na mae soldia igre hata kmana naikno te theome tangomana kaisei naikno te kahadire.
10Mae igre maꞌedi kolho nodi king keha kantri are,
eghuteuna tuatukmadi mae funei te loku ke paridi mae king.
Theo kaisei vido aheva nga te rheta naba te mala fanogradi mae igre.
Mare tangomana te salo mei thina balu glose ka pesi gringni gna namono te bara ka thina te mala bligi mare te apla te tei ruma lamna te mala hata namono igne.
11Kate ruma lamna na, mare goigoni salaꞌui jateula saeklon te goigonidi gobigna lepora eghu.
Mae igre thofno diꞌa fara salaꞌui puhidire,
naugna mare fatutuani kolho ka nodi nolaghi thedi.
Igne ngala te jateula nodi god teu mare na.”
Mae Profet Habaku ne fapea fata theome kelitagna ka LORD
12LORD, iagho au funu tifa ghilei mei posa ka narane gognaro gne.
Nogu God te thofno Blahi fara, iagho te karha fabrahu tifa te tifa.
Iagho jateula nogu thina rheta mala poru eghu iara.
Iagho neke vahidi naiknodi Babilonia neke para ghami ghehati eidi nakhibomi ra.
13Iagho thono blahi fara, eghuteuna iagho theome magnahaghei te filoni kaisei glepo te diꞌa.
Naugna unha sagho te au kmu te theome paradi naiknodi Babilonia te diꞌa igrea?
Mare lalamadi fara naikno te doglo te uludi mare igre.
14Naugna unha sagho te theome toghodi naikno te theome nheta jateula sasa,
ba jateula duki teu te theo kaisei mae te baubatudi igrea?
15Mae naokadi Babilonia igre korho naikno tei ka sosolo jateula mae te korho sasa ra eghu.
Mae igre huhurudi naiknore mala jifla ka nodi namonore, jateula sasa te korho haghe ke lamna fangna re eghu.
Eghuteuna kate eni igne, mare ne eha fabiꞌo,
naugna mare gleale’a fara.
16Nodi nolaghi mare te mala hata naikno na, jateula nodi god eghu mare.
Uve, mare jateula nodi god eghu pogho soruni kolho fangna te mala ugra sasa igne.
Eghuteuna mare fafara ka fangna igne eghuteuna gahu insens mala tarai.
Mare eni igne, naugna fangna igne toghodi mare mala salo kmana glepo te keli.
17Mae naoka igre theome kokhonidi naiknore.
Ba? Iagho ginauna snakredi fabrahu mae igre mala magra nei fakokhoanadi eghu naiknodi keha kantri igre sia?
Eigna mae igre theome kokhonini ihei nga!
21Uve, iara ginauna na jateula mae te kegra ke kligna bara gna namono na filo teura eghu.
Iara ofoni LORD mala nomhini unha nate chekeni mana ka iara na,
nei mana ginauna cheke tughuni unha teke chekeni iara ka mana ia.
LORD ne cheke tughu ka mae Habaku
2Aonu LORD ne cheke eghu ka iara,
“Iagho rioriso unha te fakakhana iara ka iagho igne mala bligi iu’iju gna na.
3Naugna narane te mala thoke meidi gobigna lepo teke fakakhana iara ka iagho igre na theome raugha thoke mei.
Jame gaoghathomu iagho na glepo igre ginauna theome ghosei mei eghu.
Nu iagho ofou kolho,
naugna glepo igre ginauna thoke mei ka thofno narane gna na.
4“Igne nogu cheke iara na:
Naikno te fahaehaghe igre theome magnahagheni kaisei glepo te doglo.
Nu naikno te doglore ginauna au kau karha,
naugna mare ne ghatho fobo ghau iara ne leghu ghau iara fabrahu.
5Uve, naikno te fahaehaghe fara igre magnahaghei dedei fara kolho.
Nu mare ginauna na theome gle’ani kolho unha te au tadi na,
eghuteuna puhi te magnahaghei glepo kmana mare igne theome gnafa jateula beku te thora fabrahu malagna ihei te lehe ra eghu.
Naugna igne te uludi mare keha kantri igre na.”
God ginauna paradi naikno te diꞌare
6Nu naiknodi kantri te gnafa teke uludi mae Babilonia ka magra na igre, mare ginauna cheke faparini nei na theome ghatho tahuni eghu kantri Babilonia. Naiknore ginauna cheke eghu:
“Kokhoni ghami fara ghotilo iheire te hata kmana glepo teke theome nomi ghotilo ra.
Niha fata huhurudi keha naiknore mala tusu ari sileni biꞌo mala dedei nomi fara si ghotilo ia?
7Nu neuba, ghotilo maemi Babilonia teke hata nodi gobigna lepo naiknora,
mare ginauna kegra haghe mala magra ka ghotilo.
Eghuteuna ghotilo ginauna mhaghu nomi fara kate thoke meidi mare na.
Eghuteuna mare ginauna hata nomi gobigna lepo ghotilore.
8Ghotilo neke aknu falehedi nei goigonidi neku naikno te au ke lamnadi namono biꞌo igre.
Naugna igne, iheire te karha teu are ginauna ulu ghami ghotilo mala hata nomi glepo ghotilore.
9“Kokhoni ghami fara ghotilo iheire te hata nodi glepo keha naiknore te mala dedei nodi khetomi,
thumi nei kherami teu themi are.
Eghuteuna gognarona ghotilo babana nomi famane suga maku mala theome tangomana ihei te mei roꞌeni,
jateula gnoku gaghata te au kligna ka phaꞌu gajura eghu.
10Ghotilo au nomi gaoghatho rheta te mala tei roꞌedi kmana kantri.
Nu naugna te edi ghotilo glepo igre,
ghotilo khogla famamajadi kolho khetomi nei thumi teu themire,
eghuteuna ghotilo ginauna lehe.
11Eghuteuna thina nei thaba teu te bara famaku ghotilo nomi suga na
are ginauna jaola diꞌatadi eha fabiꞌo ka ghotilo.
12“Kokhoni ghami fara ghotilo mae iheire te aknu falehe kmana naikno mala maku nomi namono na teura ginauna papara.
Ghotilo ghaoghatho mala farerheta nomi namono na teura ghotilo edi thua nafnata puhi te diꞌare.
13Ghotilo naikno te tapla faparidi nei fasosolodi teu naiknodi keha kantri ra,
eghuteuna paradi fara kate edi nomi glepo ghotilore teura ginauna nhako ka khaꞌaghi.
LORD mae ihei te au nolaghi fateote’o igne nate eni na puhi igne!
14Eghuteuna naikno te gnafa heva heva ka nauthoglu igne ginauna fodu ka nogna glalase nei nafnakno eghu LORD,
jateula nhorora te fodu ka khoꞌura eghu.
15“Kokhoni ghami fara ghotilo iheire te diꞌatami fara ka naiknodi keha kantri te au faligoho ghami ghotilo are.
Ghotilo thofno goigonidi fara eghuteuna kelitami te famamajadi naikno igre la ghilei glaꞌe soru.
16Eghume, LORD ginauna na thono diꞌatagna fara ka ghotilo,
eghuteuna ghotilo ginauna na jateula naikno te koꞌu te salaꞌui ra na eghu mamaja nomi salaꞌui.
Naugna naikno te gnafa igre ginauna na kafe filodi thinimi ghotilo te soesolere.
Eghuteuna naiknore ginauna na theome ghatho tahu ghami ghotilo.
Mare na filo fapari ghami ghotilo jateula chara te koko naiknora eghu kolho.
17Ghotilo kato fahui gaju gna nohigna Lebanon.
Eghume LORD ginauna na jateula tuana eghu na goigoni fahui ghami ghotilo.
Ghotilo neke aknu falehe kmana buluka nei sipu neku ka vido tuana.
Nu ghotilo ginauna mhaghu nomi fara kate mei te para ghami LORD na.
Mana ginauna para ghami ghotilo, naugna kmana naikno neke lehe ka ghotilo,
eghuteuna ghotilo neke goigonidi namono biꞌo te gnafa,
nei naikno te gnafa teu te au ka namono igre.
18Theo kaisei glepo te keli nate togho ghami ghotilo ka mumuju god te tarai ghotilo tadi teke sari kolho ka gaju ba thina igre.
Thono theo fara. Mumuju igre chaichaghi ghami ghotilo.
Ihei te sari mumuju igre, mana fatutuanidi kolho glepo teke sari thegna re.
Nu mumuju igre theome tangomana te cheke na!
19Kokhoni ghami fara! Ghotilo cheke eghu koba ka kaisei vido gaju ba ka kaisei thina biꞌo,
‘Dofra! Kegra haghe sagho!’
Ba? Mumuju igne lalase na nomhi ghami nei cheke balumi ghotilo eghu?
Thono theo fara.
Tutuani, ghotilo hohoro mumuju igre ka silva nei ka gol mala famane filodire,
nu theo kaisei nakarha tadi eghu!”
20Nu LORD na theome jateula mumuju eghu.
Theo. Mana au ka nogna Sugablahi kligna,
eghuteuna naikno te gnafa ka nauthoglu igne mala au kmu nei fanomho eghu ka mana.
3Nogna tharai mae Profet Habaku
1Mae profet Habaku ne tarai ka LORD mala toghoni Israel. Mana ne cheke eghu:
2LORD God, iara nomho thoutonu eidi thua nafnotu fateote’o teke edi iagho tifara.
Eghume, iara thofno ghatho tahu nigho.
Iara tore nigho mala eni iagho unha te edi gognaro gre nei unha teke edi iagho tifara.
Neuba iagho ne diꞌatamu ka ghehati, iara tore nigho mala kokhoni ghami ghehati.
3God te Blahi, iagho neke jifla mei funu ka namono nagou Idom,
nei ka thogele Paran.
Nou nolaghi iagho na jateula naprai eghu thafru ka vido te gnafa ka maloa kligna.
Eghuteuna naikno te gnafa ka nauthoglu igne filoni nou nolaghi biꞌo iagho igne ne cheke fakeli nigho.
4Kate mei iagho na, naiknore ginauna filoni nou nolaghi biꞌo iagho ginauna agha jateula naprai eghu ka vido te gnafa heva heva.
5Iagho kuru mei kmana nafnata khabru. Eghuteuna ke leghu na, iagho snakre mei fogra biꞌo mala lehe naiknore.
6Kate kegra haghe iagho na, nauthoglu igne nghali.
Kate filo iagho ka naiknore, naiknore ginauna suaraghi balu mhaghu.
Thogele biꞌo nei gukhu teu teke au funu tifa igre ginauna diha soru pari.
Tutuani, God na neke au funu tifa neke au nga gobigna lepo ka nauthoglu igne.
7LORD, iara filodi naiknodi ka kantri Kusan igre mhaghu nodi fara,
eghuteuna naiknodi Midian igre fififri fara.
8LORD, kate lhotidi iagho khoꞌu eghuteuna fofota thongna na teu igne,
ba, iagho neke diꞌatamu ka ghehati sia?
Theo! Kate mei toghodi iagho nou naiknore te mala uludi mae naokare,
iagho neke mei jateula kaisei nou soldia nei hose nei chariot eghu.
9-10Iagho neke kulu ghao neku nou phaloho na,
eghuteuna iagho cheke ka nou jata na mala tei ka vido aheva teke magnahagheni iagho na.
Kate filo nigho na thogele igre nghali kheu tongana.
Kate snakre mei iagho nakhete na ka nauthoglu igne,
nabritha biꞌo na soru mei.
Khoꞌu te gnafa te au ke pari glose igre jaola ghudu haghe tei posa ka maloa kligna.
11Kate fada iagho nou khuali re, theidi khuali igre umhu fara jateula nakafli eghu,
eghuteuna naprai ghe glaba igre ginauna kegra snoto.
12Iagho diꞌatamu ka kantri igre ne soru tapla ke kligna nauthoglu.
13Iagho eni igne mala fakarhidi nou naiknore balugna nodi king, mae ihei teke vavahi iagho igne.
Iagho neke tapla sorudi nodi lida naikno te diꞌa igre mala theome tangomana mare teke kegra haghe na.
14Mae naokare mei jateula saeklon eghu na khi ghami ghehati.
Mae naoka igre keli tadi fara kate filoni mare te au kokhoana naikno te kumare.
Nu ka narane igne,
iagho neke fada falehe ka jata nodi kapten mae naokara.
15Iagho gnokro ka hose tei ke kligna nhorora mala malu thongna na.
16Iara nomhidi gobigna lepo teke edi iagho igre ne thono bobolo nogu fara balu mhaghu ne fififri foflogu na.
Ghahegu nei khamegu teure kafe glaꞌe soru theome tangomana te kegra haghe na.
Nu te laseni iara na, iagho LORD ginauna mei mala paradi iheire te mei goigoni ghami ghehati igre.
Eghume iara au kmu ofoniu narane igne.
17Neuba tahati ne au ka puhi biꞌo, jateula gaju fig, gaju grep,
gaju oliv teu igre ginauna theo fuꞌadi,
nagare igre theo ganodi,
sipu nei buluka teu igre ginauna kafe lehe,
God ginauna togho ghita!
18Iara ginauna gleale’a fabrahu kolho,
naugna nogu LORD God ginauna fakarhi ghau iara.
19God, nogu LORD iagho ginau tusu mei narheta ka iara.
Iagho ginauna farerheta ghahegu iara gre mala rheta jateu ghahe glepo te kiloi diꞌa igne eghu mala theome tangomana iara te uka na kate tei iara ka thabafe ba ka vido aheva te ninhigrana.