Esra

Esra

Esra Nei Mae Jiu Neke Figri Ka Nodi Namono Na

Thoutonu kmo’ei eigna buka igne

Esra kaisei nogna pris LORD kate au teu naiknodi Juda igre Babilonia. Thoutonu te au ka buka igne neke fufunu kate mei ka gnafagna buka igne 2 Kronikols. Tifa na naiknodi Babilonia igre neke huhurudi mala jifla kokoni mare nodi namono na mala tei au Babilonia. Nu ka buka igne, cheke eidi naiknodi Juda te jifla Babilonia teke figri ka nodi namono na. Mare leghuni koba nodi kastom na, nei tarai koba ka LORD Jerusalem. Mae ihei teke rioriso buka igne, mana neke fofota thoutonu igne ka thilo vido.

Ka vido ulu lahu na, mana cheke eigna King Saeras gna Pesia, mae ihei te uluni kantri biꞌo Babilonia ka magra. King Saeras neke cheke faheta ka naiknodi Juda te au teu Babilonia, mare tangomana teke figri ka nodi namono na mala teke babana fapulo nogna Sugablahi LORD na. Aonu kaisei tothoghei ka mare teke figri na.

Ka fapea vido na, mana toutonu eidi naikno teke kulu figri teke funu loku ka nogna Sugablahi LORD na. Mare neke fablahi Sugablahi igne, eghuteuna ke famane fadoglini puhi te mala tufru soruni LORD.

Eghuteuna ka vido leghu lahu na, mana toutonu eidi finogha te kmana tela salaꞌu ra, ke leghu, Pris Esra neke batuni kaisei tothoghei mala jifla Babilonia mala ke pulo Jerusalem. Mae Esra gne kaisei mae velepuhi keli fei nogna Vetula LORD na, eghuteuna mana toghodi koba naiknodi Juda mala fadoglini puhidi mare kate tarai na, mala tangomana mare te leghu fakelidi kastom teke tusu lao LORD ka kuꞌedi mare tifa ra.

Keha vido ka buka igne

Kaisei tothoghei jifla funudi Babilonia balugna Serubabel, neke figri Jerusalem: 1:1–2:70

Mare neke loku fapulo nogna Sugablahi LORD na, neke fablahi: 3:1–6:22

Pris Esra neke batuni keha tothoghei na mala jifla Babilonia, mala ke pulo mei Jerusalem: 7:1–10:44

Nogna cheke te rheta King Saeras

¹Ka finogha ululahu King Saeras gna Pesia te funei fruni Babilonia igne, king neke uluni namono biꞌo Babilonia. LORD ne loku ka nagnafagna king igne mala eni kaisei vetula. Nogna sekretri mana re ne rioriso soru vetula igne, eghuteuna mana ne fateitei nonomho igne heva heva ka vido te gnafa te funei frunidi mana igre, mala iu’iju soru ka naiknore. LORD neke eni igne, mala thoke mei tutuani chekegna LORD teke chekeni Profet Jeremaea igne:

²“King Saeras gna Pesia neke cheke eghu:

“ ‘LORD, God gna kligna, mana neke vahi ghau iara mala funei frunidi kantri te gnafa ka nauthoglu igne. Eghuteuna mana neke jaola neke vahi ghau iara mala ke babana fapulo nogna Sugablahi mana igne ka namono Jerusalem, te au ka kantri Juda. ³Iara toreni God gna Israel mala au baludi nogna naiknore. Ihei ka mare teke magnahaghei figri na, mare tangomana teke figri Jerusalem mala ke babana fapulo nogna Sugablahi LORD, nodi God mae Israel te tufru soruni mare Jerusalem. ⁴Jame keha Jiu ka igre au ka kaisei namono, naiknogna namono tuana mala toghodi naikno tuare mala ke figri mare. Naiknogna namono te au mare tuana ginauna falao silva nei gol ka mare, nei glepo mala tei nabrou, nei dongki mala luja nodi glepore. Eghuteuna mare ginauna jaola tangomana te tusu ranghidi gano leghuni unha te magnahagheni mare te mala tei ka nogna Sugablahi LORD Jerusalem.’ ”

⁵Ka narane tuare, LORD ne loku ka gaoghathodi naikno kmana mala ke figri ke babana nogna Sugablahi mana na. Aonu phaꞌu maedi vikegna Juda nei vikegna Benjamin, nei hatimare mae pris nei hatimare mae Livaet teu igre, mare tarabana mala ke figri Jerusalem. ⁶Keha naikno te au rhedi mare ka namono tuare na toghodi mare. Mare na falao glepo teke horo ka silva nei gol, nei glepo te nabadi mare ka nabrou, nei dongki te mala luja nodi glepo mare igre, nei jaola keha glepo te keli baludi gano leghuni unha te magnahagheni mare.

⁷Eghuteuna King Saeras jaola neke hata fajifla glepo teke hata fajifla King Nebukadnesa tifa ka nogna Sugablahi LORD na Jerusalem hata neke tei Babilonia, neke lilisei ka sugagna nogna god na. ⁸King neke cheke ka mae Mitredat, mae mala reireghidi nogna sileni king mala hata fajifla glepo blahi igre. Eghuteuna mae Mitredat ne kaha glepo igre ke ulugna mae Sesbasa, mae gavana gna Juda, neke tusu fapulo ka mana. ⁹Glepo teke kaha mana re igre:

tolufulu dis gol,

kaisei thogha dis silva,

varadaki nhevai keha dis,

¹⁰tolufulu dis gol ikodi,

eghuteuna fati gobi nabotho dis silva ikodi,

eghuteuna kaisei thogha plet nei keha glepo la ngau.

¹¹Khaputudi glepo igre baludi keha gol nei silva eghu teke hata mae Sesbasa igre thokeni glima thogha fati gobi. Mae Sesbasa ne hata glepo igre ka narane te jifla mana Babilonia baludi keha naiknodi Israel neke figri Jerusalem.

Thura nanghadi naikno teke figri re igre

(Neh 7:6-73)

¹Igre nanghadi naikno teke sosolo mala teke jifla ka provins igne Babilonia mala ke figri ka nodi namono Jerusalem nei keha namono ka provins Juda. Mare neke au sosolo Babilonia funu ka narane teke haghe nogna armi Nebukadnesa na neke hata fajifladi ka nodi namono re neke tei au Babilonia. ²Nanghadi mae iheire teke batudi mare teke figri re igre:

Mae Serubabel, nei mae Jesua, nei mae Nehemaea, nei mae Seraea, nei mae Relaea, nei mae Modikae, nei mae Bilsan, nei mae Mispa, nei mae Bigvae, nei mae Rehum nei mae Bana.

Khaputudi naikno nei tharakna gna Israel teu teke figri re igre:

³Ka tharaknagna mae Paros: 2,172.

⁴Ka tharaknagna mae Sefataea: 372.

⁵Ka tharaknagna mae Ara: 775.

⁶Ka tharaknagna mae Pahat-Moab, teke karha mei ka phei tharaknadi mae Jesua ghe mae Joab: 2,812.

⁷Ka tharaknagna mae Elam: 1,254.

⁸Ka tharaknagna mae Satu: 945.

⁹Ka tharaknagna mae Sakae: 760.

¹⁰Ka tharaknagna mae Bani: 642.

¹¹Ka tharaknagna mae Bebae: 623.

¹²Ka tharaknagna mae Asgad: 1,222.

¹³Ka tharaknagna mae Adonikam: 666.

¹⁴Ka tharaknagna mae Bigvae: 2,056.

¹⁵Ka tharaknagna mae Adin: 454.

¹⁶Ka tharaknagna mae Ata, keha nanghagna mae Hesekaea: 98.

¹⁷Ka tharaknagna mae Besae: 323.

¹⁸Ka tharaknagna mae Jora: 112.

¹⁹Ka tharaknagna mae Hasum: 223.

²⁰Ka tharaknagna mae Giba: 95.

²¹Eghuteuna keha naikno teke figri re, thuradi namono aheva teke au mare tifa nei khaputudi naiknore teu re, igre:

Betlehem: 123.

²²Netofa: 56.

²³Anatot: 128.

²⁴Asmavet: 42.

²⁵Kiriat-Jaerim, nei Kefira, nei Berot: 743.

²⁶Rama ghe Geba: 621.

²⁷Mikmas: 122.

²⁸Betel ghe Ai: 223.

²⁹Nebo: 52.

³⁰Magbis: 156.

³¹Keha Elam: 1,254.

³²Harim: 320.

³³Lod, nei Hadid, nei Ono: 725.

³⁴Jeriko: 345.

³⁵Sena: 3,630.

³⁶Vikedi mae pris teke figri re, thuradi tharakna nei khaputudi naiknore eghu igre:

Ka tharaknagna mae Jedaea teke karha mei ka tharaknagna mae Jesua: 973.

³⁷Ka tharaknagna mae Ima: 1,052.

³⁸Ka tharaknagna mae Pasuru: 1,247.

³⁹Ka tharaknagna mae Harim: 1,017.

⁴⁰Mae Livaet ka tharaknagna mae Jesua, nei ka tharaknagna mae Kadmiel nei ka tharaknagna mae Hodavaea teu igre, khaputudi re 74.

⁴¹Mae Livaet te koje ka Sugablahi na, tharaknagna mae Asaf, khaputudi re 128.

⁴²Mae Livaet te reireghidi grengathagna Sugablahi na, tharaknagna mae Salum, nei mae Ata, nei mae Talmon, nei mae Akub, nei mae Hatita, nei mae Sobae, khaputudi re 139.

⁴³Mae Livaet te loku ka Sugablahi na, mae igre neke karha mei ka tharaknadi

mae Siha, nei mae Hasufa, nei mae Tabaot,

⁴⁴nei mae Keros, nei mae Siaha, nei mae Padon,

⁴⁵nei mae Lebana, nei mae Hagaba, nei mae Akub,

⁴⁶nei mae Hagaba, nei mae Salmae, nei mae Hanan,

⁴⁷nei mae Gidel, nei mae Gaha, nei mae Reaea,

⁴⁸nei mae Resin, nei mae Nekoda, nei mae Gasam,

⁴⁹nei mae Usa, nei mae Pasea, nei mae Besae,

⁵⁰nei mae Asna, nei mae Meunim, nei mae Nefisim,

⁵¹nei mae Bakbuk, nei mae Hakufa, nei mae Hahua,

⁵²nei mae Baslut, nei mae Mehida, nei mae Hasa,

⁵³nei mae Bakos, nei mae Sisera, nei mae Tema,

⁵⁴nei mae Nesaea, nei mae Hatifa.

⁵⁵Eghuteuna tharaknadi nogna mae gloku King Solomon tifa ra, mare neke karha mei ka tharaknadi

mae Sotae, nei mae Hasoferet, nei mae Peruda,

⁵⁶nei mae Jala, nei mae Dakon, nei mae Gidel,

⁵⁷nei mae Sefataea nei mae Hatil, nei mae Pokeret-Hasebaem, nei mae Ami.

⁵⁸Tharaknadi mae te loku ka Sugablahi na baludi tharaknadi mae te loku ka King Solomon tifa ra, khaputudi re 392.

⁵⁹Keha naikno teke figri funu Babilonia igre tharakna neke au tifa ka namono Tel-Mela, nei Tel-Hasa, nei Kerub, nei Adon, nei Ima. Nu naikno igre theome thofno lasedi neke tharaknadi Israel teure. ⁶⁰Naikno igre neke karha mei ka tharaknadi

mae Delaea, nei mae Tabaea, nei mae Nekoda, khaputudi re 652.

⁶¹Eghuteuna keha pris teke figri funudi Babilonia igre neke karha mei ka tharaknadi

mae Hobaea, nei mae Hakos, nei mae Basilae. (Mae Basilae gne neke tolaghi ka kaisei thugna gaꞌase kaisei maegna Gilead, nanghagna na Basilae, eghume mana hata nanghagna kmagna khetogna na.)

⁶²Aonu mae pris igre ne filo ka buka susurei na mala laseni mae igre thofno au ka tharakna igne, nu mare ne theome filoni. Eghume mae biꞌodi mae pris gre theome snakredi mare te eni nogna gloku pris na. ⁶³Eghuteuna mae gavana gna provins na jaola ne theome snakredi mare te ghamu ka Sugablahi na u gano blahi igne, ghilei thoke ka narane kaisei mae pris te hata Urim ghe Tumim, mae pris gre tangomana te hironi gaoghathogna God na ka phei glepo igre.

⁶⁴Khaputudi iheire te gnafa teke figri funudi Babilonia re, thokeni 42,360. ⁶⁵Eghuteuna mare hata mei baludi 7,337 mae gloku nei gaꞌase gloku, nei 200 nalhaꞌu nei gaꞌase mala koje. ⁶⁶Mare jaola hata mei baludi keha glepo tautagu, khaputudi glepo igre na:

hose: 736

mule: 245

⁶⁷kamel: 435

dongki: 6,720.

⁶⁸Kate posa naiknore Jerusalem, mare ne tei ka vido aheva teke augna nogna Sugablahi LORD tifa na. Aonu keha ka phaꞌu maedi tharakna igre na, mare ne tusu lao sileni leghuni unha te tangomanadi mare na, mala toghodi mare mala ke babana fapulo gna Sugablahi igne ka vido aheva teke augna tifa na. ⁶⁹Mare ne nhaꞌa lao niha sileni teke au tadi re ne posani 500 kilo gol, 2,800 kilo silva, nei 100 famane pohe maladi mae pris.

⁷⁰Mae pris nei mae Livaet, nei mae mala koje ka Sugablahi na, nei mae te mala reireghidi grengathagna Sugablahi na, nei mae te loku ka Sugablahi na, mae igre baludi keha naiknore neke figri ka namono aheva teke au tharaknadi mare tifa ra.

Naiknore neke funu tarai Jerusalem

¹Naiknodi Israel igre neke pulo mei neke au fakeli ka nodi namono re. Eghuteuna kate namo mei fafitu nhigra ka finogha igne mare mei ne salofodu Jerusalem. ²Aonu pris biꞌo Jesua, thugna Jehosadak, nei keha mae pris nei mae Serubabel, thugna mae Sealtiel baludi kheragna mana re, mare neke horo fapulo nogna olta God gna Israel, mala tangomana mare teke gahu fafara tagna. Igne thofno leghuni unha te au ka nogna Vetula mae Moses, nogna mae gloku God. ³Neuba mare ne mhaghudi keha naikno te au ka namono te au faligohodi re, neke horo fapulo olta igne ka thofno vido aheva teke au olta tifa na. Aonu mare ne funu gahu ke kligna gna olta igne fafara te krono fara na hamerane grafi mala tufru soruni LORD. ⁴Eghuteuna mare thofno leghuni unha te chekeni ka vetula na, mare khapru ka Narane Gaghamugna Grorofe na. Eghuteuna leuleghu fata na, mare fafara ka narane biꞌo igne. ⁵Ke leghugna narane biꞌo igne, mare eni fafara te krono fara igne leuleghu hamerane grafi mala tufru soruni LORD. Eghuteuna mare fafara ka Gaghamu Khafa, nei ka keha nogna narane biꞌo LORD. Mare jaola edi fafara te mala tufru soruni LORD leghuni unha te magnahagheni mare na. ⁶Nabotho glima narane ke ulugna narane Gaghamu Grorofe igne, neuba mare ne theome funu babana fapulo neu Sugablahi na, mare ne funu eni fafara te thofno krono na mala tufru soruni LORD.

Mare ne funu babana fapulo nogna Sugablahi LORD

⁷Aonu naiknore ne falao sileni mala folidi mae kapenta baludi mae iheire te lase kato thina. Eghuteuna mare ne fatei gano, nei waen, nei oliv oel eghu ka phei namono Taea ghe Saedon, mala foli gaju sida gna Lebanon mala horo gna Sugablahi na, leghuni unha teke chekeni King Saeras gna Pesia. Mare tangomana te lilisei gaju igre tongna, mala hata soru ka naprona biꞌo Jopa.

⁸Ka fapea nhigra gna fapea finogha ke leghugna narane teke pulo mei ka vido aheva teke augna Sugablahi tifa na, mare ne funu babana fapulo Sugablahi igne. Mae Serubabel thugna mae Sealtiel, nei mae Jesua thugna mae Jehosadak, baludi mae pris nei mae Livaet, nei iheire te gnafa teke pulo mei Jerusalem, mare ne loku fodu mala eni gloku igne. Hatimare mae lida ne vahidi mae Livaet te varadaki finoghadi, mala bos gna gloku igne. ⁹Ka mae Livaet igre, mae Jesua baludi mae thugna, nei kheragna re, nei mae Kadmiel baludi mae thugna teke karha mei ka tharaknagna mae Hodavaea, mare loku fodu mala fiofiloni gloku igne. Mae Livaet teke karha mei ka tharaknagna mae Henadad igre ne toghodi mae igre.

¹⁰Kate fufunu lilisei mare thina biꞌo ka khotogna nogna Sugablahi LORD igne, hatimare mae pris ne fahaghe nodi phoko blahi re, aonu mare hata trampet ne tei khegra ka nodi vido re. Aonu mare ne tarabana mala kilo fnaknoni LORD, leghuni unha teke chekeni mae Devet king gna Israel ka naiknore tifa. ¹¹Eghuteuna mare koje ne kilo fnaknoni LORD nei mala tegioni mana. Mare koje ne cheke eghu,

“LORD na thofno keli fara!

Eghuteuna nogna namha ranghini Israel theo ka huigna!”

Naiknore ne kafe koje fabiꞌo mala kilo fnaknoni LORD, naugna gloku te lilisei thina biꞌo ka khotogna Sugablahi igne la fufunu gognarona. ¹²Nu keha mae biꞌodi mae pris nei mae Livaet baludi keha phaꞌu maedi keha tharakna igre, mare ne thono diꞌanagnafadi fara ne tanhi, naugna mare neke filoni nogna Sugablahi ululahu LORD teke au ka vido igne tifa na. Nu kmana keha naikno ne eha fabiꞌo, naugna mare ne glealeꞌa fara. ¹³Eghuteuna theo kaisei naikno te nomhi glanini ihei te eha na nei ihei te tanhi na, naugna naogla te eni naiknore igne thono biꞌo fara, eghuteuna ihei te au teu delei na tangomana te nomhi meini naogla biꞌo igne.

Naokare magnahaghei te fatheꞌoni nodi gloku mae Israel

¹Nodi naoka naiknodi Juda nei Benjamin teu igre mare nomho thoutonu eidi naiknore teke pulo mei funudi Babilonia, eghuteuna mare kela fufunu babana fapulo nogna Sugablahi LORD nodi God maedi Israel. ²Aonu mae naoka igre tei ne filoni mae Serubabel baludi phaꞌu maedi tharaknadi mare re, ne cheke eghu, “Ghehati ginauna loku balumi ghotilo ka gloku igne, naugna ghehati jaola tufru sorunila nomi God ghotilo gne. Ghehati fafara ka mana funu ka narane King Esahadon gna Asiria, mana neke snakredi kuꞌemi ghehati ra neke au agne tifa na.”

³Nu Serubabel ghe mae Jesua baludi phaꞌu maedi tharaknadi mare re ne cheke eghu ka mare, “Ghehati Israel kolho te nogna naikno LORD na, ghotilo theome tangomana te loku balumi ghehati ka gloku te mala ke babana fapulo nogna Sugablahi nomi God ghehati igne. Nu ghehati themi kolho nate loku ka nogna Sugablahi LORD igne, leghuni unha teke chekeni King Saeras gna Pesia ka ghehati na.”

⁴Aonu naikno te au ka namono te au faligohodi mare igre ne fariuriu famamhaghudi nei fabebeadi eghu gaoghathodi naiknodi Juda mala lilisei mare gloku igne. ⁵Eghuteuna naikno igre jaola ne falao sileni ka gavman gna Pesia, mala famaemahedi mare mala goigoni ni nodi gloku maedi Juda. Mae naoka gre eni fabrahu puhi igne funu ka narane te funei fruni King Saeras, ghilei mei posa ka narane Darius te tughuni mana te khegra king gna Pesia.

Ke leghugna narane te eni mare gloku igne, mae naoka igre magnahaghei te goigoni gloku te eni mare ka namono Jerusalem

⁶Ke leghugna tela lehehi King Darius, King Sekses ne funu funei fruni Pesia. Eghuteuna ka narane igre hatimare mae naoka gre ne rioriso tei kaisei letas ka king mala fatedi naikno te au Juda nei Jerusalem eigna gloku igne.

⁷Eghuteuna ke leghugna te lehe King Sekses igne, King Atasekses ne funei fruni Pesia, aonu mae Bislam, nei mae Mitredat, nei mae Tabel baludi kheradi thilo mae igre, mare jaola ne rioriso kaisei letas ka king gna Pesia. Mare rioriso tei letas igne ka cheke Arameik, nodi cheke maedi Pesia.

⁸Eghuteuna gavana Rehum ghe mae Simsae mae sekretri gna provins na, phiamare jaola ne rioriso tei kaisei letas ka King Atasekses mala fatedi naiknodi Jerusalem. Ka letas igne, phiamare ne cheke eghu,

^9-11King Atasekses. Iara gavana Rehum, nou mae biꞌo iagho ka provins ke mosu Khoꞌu biꞌo Iufretis, nei mae Simsae mae sekretri gna provins igne baludi nou mae gloku iagho ka provins igne, ghehati rioriso ari letas igne ka iagho. Mae iheire te loku balumi ghepa re, hatimare mae fate nei keha mae biꞌo, nei naiknodi Tripoli, nei Pesia, nei Babilonia, nei Erek, nei naiknodi Susa te au ka kantri Elam, nei keha naikno la ngau, balugna mae biꞌo te nolaghi fara King Asubanipal tifa na mana neke hata fajifladi ka namonodi re neke au soru ka namono biꞌo Samaria, nei ka keha namono ka provins igne ke mosu Khoꞌu biꞌo Iufretis.

Ghehati nou mae biꞌo iagho ka provins igne, ghehati rioriso ari letas igne ka iagho:

“King Atasekses.

¹²“Ghehati magnahaghei nigho iagho te lasedi naikno Jiu teke jifla ka keha nou provins iagho ra, gognarona mare au agne Jerusalem. Mare kela babana fapulo namono te diꞌa igne, leuleghu fata na naiknore theome magnahaghedi king te funei frunidi re. Mare kela loku fapulo thina biꞌo ka khotogna gringni thina gna namono igne, eghuteuna mare ginauna theome raugha fagnagnafa gloku igne.

¹³“King, te mala laseni iagho na jame teke loku fapulo mare namono igne na, eghuteuna loku fagnafa mare gringni thina igne teuna, mare ginauna na theome foli mei thua nafnata takis igre ka iagho, eghuteuna iagho ginauna ari kmoꞌe ka sileni te mala loku ka nou kantri na. ¹⁴Naugna ghehati gne nou mae gloku iagho mala fariuriu te mala ari te keligna kantri te funei fruni iagho igne, eghume theome doglo kaisei glepo te goigoni nigho iagho na. Eghume, ghehati rioriso ari letas igne ka iagho, ¹⁵mala tangomana iagho te chekedi nou mae gloku re mala filoni ripot eigna namono igne ke lamnadi buka teke rioriso soru kuꞌemu iagho tifa ra. Jame te eghu iagho na, iagho ginauna lasedi naiknogna namono igne, eigna leuleghu fata na mare theome leghudi iheire te funei frunidi re. Puhi te diꞌa igne funu tifa ghilei mei posa gognarogne, eghuteuna mae igre eꞌei puhi biꞌo koba ka hatimare mae king nei hatimare mae lida eghu gna provins igne. Leuleghu fata na ninhigrana fara te mala funei frunidi iagho naikno Jiu igre, naugna igne teke mei armi tifa teke goigoni namono igne. ¹⁶Eghume king, ghehati magnahaghei te cheke ka iagho, jame teke loku fapulo namono igne balugna gringni gne, mare ginauna funei fruni ni provins igne ke mosugna Khoꞌu biꞌo Iufretis.” Me hui letas igne.

¹⁷King riso tughuni letas igne ne cheke eghu:

“Letas igne tei ka gavana Rehum, ghe mae Simsae sekretri gna provins, nei iheire te loku balumi ghopa Samaria ra nei ka keha namono ka provins te au ke mosu Khoꞌu biꞌo Iufretis ra. Iara King Atasekses, iara kubae ghami ghotilo.

¹⁸“Letas teke famei ghotilo igne, mare figri ka cheke gna Pesia ne mei iuꞌiju ka iara. ¹⁹Iara neke chekedi hatimare mae sekretri ra mala hironi puhi igne, eghuteuna mare laseni cheke igne tutuani fara. Funu tifa te mei posa gognarogne, naiknogna namono tuana huhughudi koba hatimare mae king mae iheire te funei frunidi mare re, eghuteuna mae igre eꞌei puhi biꞌo koba gognarona. ²⁰Tifa na keha mae king te au nodi nolaghi biꞌo igre, mare neke funei fruni ni provins thongana tei posa ke mosu Khoꞌu biꞌo Iufretis. Eghuteuna leuleghu fata na mare hata thua nafnata takis ka naiknogna provins tuana. ²¹Eghume ghotilo cheke faheta ka mae igre mala gnafa mare gloku igne ghilei cheke iara te mala ke eni fapulo gloku igne. ²²Ghotilo faghose tei cheke ka mare. Glahu ei puhi biꞌo mare ka nogu kantri iara igne.” Me hui letas igne.

²³Mare hata ne tei nogna letas King Atasekses igne ka Rehum ghe Simsae nei ka mae iheire te loku baludi phiamare ne iuꞌiju letas igne ka mare. Kate nomhini mare nogna cheke king igne, mare ghosei ne tei Jerusalem, eghuteuna mare cheke faheta ka hatimare mae Jiu mala gnafa mare gloku igne.

²⁴Naugna igne, gloku mala ke babana fapulo gna nogna Sugablahi God Jerusalem igne ne thofno snoto ne fiti au neu kolho ne ghilei posa ka fapea finogha te funei fruni King Darius gna Pesia.

Hatimare mae Jiu neke funu babana fapulo nogna Sugablahi LORD

¹Ka narane tuare, Profet Hagae ghe Profet Sekaraea phei thugna mae Ido, phiamare profet ka mae Jiu te au Jerusalem nei ka keha nohi Juda, phiamare toutonu ka nanghagna God gna Israel. ²Kate nomhidi mae Serubabel thugna mae Sealtiel ghe mae pris biꞌo Jesua thugna mae Jehosadak nodi cheke phei mae profet igre, phiamare neke fufunu babana fapulo nogna Sugablahi God igne Jerusalem. Eghuteuna phei nogna profet God igre ne toghodi mare.

³Nu ka narane tuare, mae Tatenae mae ihei te gavana ka provins ke mosu Khoꞌu biꞌo Iufretis ghe mae Seta-Bosenae baludi keha mae biꞌo ka provins igne, mare tei Jerusalem ne ghusna eghu, “Mae ihei teke tusu ari nolaghi ka ghotilo teke mala fufunu babana fapulo Sugablahi igne, eghuteuna tarabana thina nei thabagna teuna?” ⁴Mare jaola ne ghusna eghu, “Mae iheire nanghadi mae te batuni glokugna Sugablahi igne?” ⁵Nu God na filo ka nodi lida mae Jiu gre. Mae biꞌogna provins igne neke kulu rioriso tei kaisei letas ka King Darius, eghuteuna mare ofoniu cheke tughugna letas igne, mala theome fagnafani mare gloku igne.

⁶Igne letas Tatenae gavana gna provins ke mosu Khoꞌu biꞌo Iufretis ghe Seta-Bosenae baludi keha mae biꞌo ka provins igne, teke rioriso tei ka King Darius. ⁷Igne ripot teke fatei mare ka mana na:

“King Darius.

“Ghehati thofno kilo fnaknoni nanghamu iagho na.

⁸“King, ghehati magnahaghei te cheke arini ka iagho, eigna ghehati neke tei sighoni nohi gna Juda, eghuteuna ghehati filoni naiknore la eni kaisei nogna Sugablahi majaghani God te nolaghi fara. Mare horo Suga igne ka thina biꞌo teke tei kato mare re, eghuteuna mare lilisei thaba biꞌo lamna ka gringnigna na. Mae igre loku heta fara mala doglo fakeli gobi lepogna Sugablahi igne, eghuteuna gloku igne la thofno keli fara.

⁹“Eghume, ghehati neke ghusna eghu ka nodi lida naiknore, ‘Mae ihei teke tusu ari nolaghi ka ghotilo te mala ke babana fapulo Sugablahi igne, eghuteuna mala tarabana thinagna nei thabagna teuna?’ ¹⁰Eghuteuna ghehati jaola neke ghusnadi nanghadi mare re, mala tangomana ghehati te fathoethokedi ka iagho mae iheire te baubatu ka gloku igne.

¹¹“Igne nodi cheke tughu mare na.

“Mare ne cheke eghu, ‘Nomi God ghehati na, mana God gna kligna nei nauthoglu igne, eghuteuna ghehati gne nogna mae gloku mana. Ghehati mala ke loku fapulo Sugablahi igne naugna kaisei nomi king rheta ghehati maemi Israel gre teke horogna na Sugablahi igne tifa na. ¹²Nu naugna kuꞌemi ghehati tifa ra neke eni God gna kligna na neke diꞌatagna, mana neke snakreni King Nebukadnesa gna Babilonia, maegna Kaldia igne neke mei mala ulu ghami ghehati. Mana mei neke paꞌe soru Sugablahi igne eghuteuna hata kuꞌemi ghehati ra mala tei au Babilonia.

¹³“ ‘Neuba, ka finogha ululahu te funei fruni King Saeras Babilonia igne, king ne cheke faheta ka mae biꞌodi Jerusalem mala ke loku fapulo nogna Sugablahi God igne. ¹⁴Eghuteuna King Saeras neke tusu fapulo ka ghehati glepo blahi te mala loku ka Sugablahi teke horo mare ka gol nei silva. King Nebukadnesa neke hata fajifla glepo igre neke tei lilisei ka sugagna nogna god na Babilonia. Nu King Saeras neke hata fajifla glepo igre neke tusu lao ka mae Sesbasa, mae ihei te gavana ka nohi Juda. ¹⁵King cheke ka mana mala hata glepo igre ke pulo Jerusalem, mala ke horo fapulo Sugablahi na vido teke augna tifa na, mala ke lilisei glepo blahi igre ke lamnagna Sugablahi igne.’

¹⁶“Aonu mae Sesbasa mei Jerusalem neke fufunu fapulo glokugna nogna Sugablahi God igne, nu gloku na theome gnafa ngau. Igne nodi cheke mare na.”

¹⁷Aonu mae biꞌodi Juda igre ne cheke eghu, “King, jame te magnahagheni iagho na, iagho tangomana te chekedi nou mae sekretri ra, mala filo fakeli mare ka rekod buka gna Babilonia ia, mala laseni tahati tela cheke fajiflahi King Saeras vetula te mala ke loku fapulo Sugablahi igne Jerusalem, ba theo. Eghuteuna ke leghu na, iagho fanomhi ghami ghehati te keliu ngala teke loku mare ka Sugablahi igne teuna, ba theo.”

King Darius ne filoni nogna ripot King Saeras

¹Aonu King Darius ne chekedi nogna sekretri re mala hironi nogna cheke King Saeras ka buka teke tathaji teku mare ka sugadi rekod gna namono Babilonia. ²Mare ne theome filoni Babilonia, nu mare ne filoni rekod buka igne ka namono Ekbatana ka provins Media aheva te bara te lithui mare ka thina. Nu buka igne cheke eghu,

³“Ka finogha ulu lahu funei fruni King Saeras Babilonia, mana neke cheke faheta ka mare mala ke babana fapulo nogna Sugablahi God igne Jerusalem:

“Mala tangomana naiknore teke gahu fafara, ba keha nafnata glepo te mala tusu lao ka nodi God. Mare mala lisei fakeli thina pari mala babana Sugablahi igne ke kligna gna. Eghuteuna haghegna na mala thokeni varadaki fitu mita eghuteuna krepagna na jaola thokeni varadaki fitu mita. ⁴Ka gringni gna na, mare mala horo kaisei thura ka thaba mala au ke kligna gna fatilo thura thina na. Mare mala eni igne ghilei gnafa gringni na. Eghuteuna sileni te mala eni gloku igne nei sileni te mala folidi mae gloku gre teuna ginauna jifla mei ka nogna sileni king. ⁵Jaola glepo blahi teke horo mare ka gol nei silva eghu teke hata fajifla King Nebukadnesa ka Sugablahi na hata teke tei Babilonia igre mala ke hata fapulo Jerusalem ka Sugablahi majaghani igne.”

King Darius cheke mala tei faꞌulu gloku na

⁶Aonu King Darius ne fatei nogna cheke tughu na ka mare, ne cheke eghu,

“Ka iagho Tatenae, gavana gna provins ke mosu Khoꞌu biꞌo Iufretis, nei ka iagho Seta-Bosenae baludi keha mae biꞌo gna provins igne. Ghotilo au fadelei ka mare! ⁷Ghotilo thosei farore ka glokugna nogna Sugablahi God igne. Ghotilo lisa lao ka gavana gna Juda nei ka nodi lida mae Jiu mala ke babana fapulo Sugablahi igne ka vido aheva teke augna tifa na.

⁸“Eghume, iara gognarona cheke faheta ka ghotilo: ghotilo toghodi mare mala ke babana fapulo Sugablahi igne. Ghotilo fadoglini sileni mala tabadi mae gloku ra, eghuteuna kate magnahaghei foli glepo malagna gloku igne teu mare na, ghotilo faghose tusu lao sileni igne ka mare. Ghotilo hata fajifla sileni igne ka takis teke hata tahati ka provins ke mosu Khoꞌu biꞌo Iufretis ia, mala theome ari snoto gloku igne. ⁹Jame mae pris di Jerusalem igre magnahaghedi keha buluka majaghani, ba sipu nalhaꞌudi, ba sua sipu nalhaꞌudi eghu mala fafara ka God gna kligna, ba wit, ba solt, ba waen, ba oliv oel, ghotilo tusu lao ka mare leuleghu rane. ¹⁰Ghotilo mala tusu lao ka mare glepo igre, mala tangomana mare te fafara lao ka God gna Kligna, eghuteuna mana ginauna kelitagna fara ka mare. Eghuteuna mare tangomana te tarai ka mana te mala fablahi ghau iara baludi thugu iara gre.

¹¹“Eghuteuna iara nake chekei ka ghotilo, jame ihei ka ghotilo te theome faꞌuveni nogu cheke iara igne, ba fariuriu tuthughu cheke igne teuna, nogu mae gloku iara gre ginauna hata kaisei vido thaba ka Suga na, eghuteuna fafofnonu khukrugna na eghuteuna fakegra haghe ke lamna glose. Aonu mare na pala haghe mae igne ke kligna gna thaba fnonu igne, mala churu suplu mana thiꞌa na ka thaba igne mala lehe mana. Eghuteuna mare ginauna thofno paꞌe soru nogna suga mana na mala jateula kaisei vido mala koko chara ra eghu kolho. ¹²God neke vahini Jerusalem mala jateula namono aheva te mala tarai nei tufru soruni nei kilo fnaknoni eghu nanghagna mana na. Eghuteuna mana thegna ngala nate koko soruni kaisei king ba kaisei kantri te fariuriu tuthughu nogu cheke iara na, ba fariuriu goigoni nogna Sugablahi God igne Jerusalem!

“Iara King Darius te faꞌari cheke igne. Eghume ghotilo loku heta mala faꞌuveni cheke igne.”

Mare ne loku fahui nogna Sugablahi God

¹³Naugna ka nogna cheke King Darius igne, mae Tatenae gavana gna provins ke mosu Khoꞌu biꞌo Iufretis ghe mae Seta-Bosenae baludi keha mae biꞌogna provins igne, mare ne thofno loku heta mala leghuni cheke igne. ¹⁴Eghuteuna nodi lida mae Jiu igre ne loku heta ka gloku igne nei kelitadi ka nodi cheke Profet Hagae ghe Profet Sekaraea thugna mae Ido. Mare ne loku fahui Sugablahi igne, jateula teke chekeni nodi God mae Israel, nei cheke ka Saeras, Darius, nei Atasekses thilo king di Pesia. ¹⁵Mare ne loku fahui Sugablahi igne ka fatilo narane gna nhigra Ada ka fafamno finogha King Darius te funei fruni Pesia.

¹⁶Mae pris baludi mae Livaet nei keha naiknodi Israel eghu iheire teke pulo mei funudi Babilonia, mare ne fablahi nogna Sugablahi God igne. Naiknore ne thofno glealeꞌa fara, eghuteuna mare ne ei gaghamu ka narane biꞌo igne. ¹⁷Ka narane biꞌo teke fablahigna Sugablahi igne, mare ne aknu falehe kaisei gobi buluka nalhaꞌudi, nei phia gobi sipu nalhaꞌudi, nei fati gobi sua sipu nalhaꞌudi eghu mala fafara. Eghuteuna mare aknu falehe nabotho phei nanigot nalhaꞌudi mala fafara mala gae naiknore ka tathagna LORD. Mare fafara kaisei nanigot kaisei tharakna eghu ka nabotho phei vikegna Israel. ¹⁸Ka narane tuana, mare ne fablahidi mae pris nei mae Livaet mala loku ka nogna Sugablahi LORD igne Jerusalem, leghuni unha te chekeni ka nogna buka mae Moses.

Mare ne eni Gaghamu gna Ghasa-Polho

¹⁹Ka keha nhigra te nhigra ululahu ka finogha majaghani igne, ka botho fati naranegna na, iheire teke pulo mei funudi Babilonia igre ne eni Gaghamu gna Ghasa-Polho na. ²⁰Ulu lahu na, mae pris baludi mae Livaet igre mare mala fagaedi thedi ka tathagna LORD. Aonu mae Livaet gre ne aknu falehe sua sipu mala fafara ka Ghasa-Polho igne. Fafara igne maladi thedi, nei maladi mae pris, nei maladi keha naikno teke pulo mei funudi Babilonia. ²¹Eghume naikno Jiu teke pulo mei funudi Babilonia igre, mare ne kafe ghamu nafnahi gna fafara Ghasa-Polho igne. Eghuteuna naikno teke au faleghu teku, nu theome magnahaghei leghudi puhi te diꞌa te edi naikno bongihehe te au faligohodi teu mare igre teure, mare jaola ne mei mala tufru soru ka LORD, nodi God mae Israel, eghuteuna mare te gnafa na ne kafe ghamu ka fafara igne. ²²Ka fitu narane igre, mare ne thofno glealeꞌa fara, eghuteuna mare ne eni Gaghamu biꞌo eigna Bret te Theo Isi gna na. Mare glealeꞌa naugna LORD neke loku ka nagnafagna king gna Asiria, mala toghodi mare mala ke babana fapulo nogna Sugablahi nodi God mae Israel.

Pris Esra ne mei Jerusalem

^1-5Kmana finogha salaꞌu ke leghudi igre, King Atasekses neke funei fruni Pesia. Ka narane tuare, kaisei pris nanghagna na Esra. Mana karha mei ka vikegna mae pris biꞌo ululahu gna Israel. Vike igne eghu agne: Esra, Seraea, Asaraea, Hilkaea, Salum, Sadok, Ahitub, Amaraea, Asaraea, Meraeot, Serahaea, Usi, Buki, Abisua, Finehas, Eleasa, Eron mae ihei teke kulu mae pris biꞌo na. ^6-7Pris Esra neke pulo mei funu Babilonia. Mana kaisei mae velepuhi te laseni fara Vetula teke tusu lao LORD nodi God mae Israel ka mae Moses tifa ia. Ka fafitu finogha te funei fruni King Atasekses Pesia igne, Esra neke tarabana kaisei tothoghei biꞌo gna Israel mala batudi ke pulo Jerusalem. Naugna LORD nogna God mana igne fablahini mana, gobigna lepo te toredi mana ka king re, king igne tusu lao ngala ka mana. Ka tothoghei igne, au mae pris nei mae Livaet, nei mae kwaea, nei mae greireghi, nei mae gloku, mae igre mala loku ka Sugablahi.

^8-9Mare jifla Babilonia ka narane ululahu ka nhigra ululahu gna fafitu finogha te funei fruni King Atasekses Pesia. God fablahini Esra mala toghodi kate tei mare ka nabrou na. Aonu mare ne tei posa Jerusalem ka narane ululahu ka falima nhigra gna finogha tuana. ¹⁰LORD ne toghodi naiknodi Israel, naugna Esra neke loku heta fara kate hiro posidi nei leghudi teu nogna Vetula LORD. Eghuteuna mana neke farirhiudi naiknodi Israel igre u vetula nei cheke teu te au ka buka vetula na igre.

Letas teke tusu King Atasekses ka Esra

¹¹Igne letas teke tusu lao King Atasekses ka Esra na, eigna mae Esra gne kaisei mae pris nei kaisei mae velepuhi eghu, eghuteuna mana thofno lase fakelidi vetula nei cheke teu teke tusu lao LORD ka naiknodi Israel igre. Letas igne neke cheke eghu:

¹²“Iara King Atasekses, mae ihei te king frunidi keha king te gnafa ka nauthoglu igne,

“Iara tusu ari cheke igne ka iagho Pris Esra, iagho mae velepuhigna nogna vetula God gna kligna.

“Iara kubae nigho.

¹³“Ka letas igne iara cheke faheta ka nogu mae ofisa iara ra. Cheke igne, jame ihei ka naiknodi Israel ra te magnahaghei jifla ka nogu kantri iara gne teke pulo Jerusalem balumu iagho na, mare tangomana te tei na. Neubane mae pris, ba mae Livaet, ba ihei ka vikegna Israel, mare keliu kolho teke pulo Jerusalem. ¹⁴Nou God iagho na neke lisa arihi nogna Vetula na ka khamemu iagho. Iara baludi fitu nogu mae advaesa igre na kuru tei nigho iagho Jerusalem, nei Juda mala lasedi iagho iheire te leghudi vetula igre, ba theo. ¹⁵Eghuteuna ghehati magnahaghei te tusu ari keha namha silva nei gol ka nomi God ghotilo maemi Israel ra. Eghume iagho mala hata tei namha igre Jerusalem mala tei lilisei ka nogna Sugablahi God. ¹⁶Iagho jaola kafe hata silva nei gol eghu teke salo iagho ka namono te gnafa ka provins Babilonia baludi nodi fafara naiknodi Israel baludi mae pris, teke tufa mare malagna nogna Sugablahi God Jerusalem. ¹⁷Iagho thosei koko tafri sileni igne, iagho mala foli buluka nalhaꞌudi nei sipu nalhaꞌudi nei sua sipu nei wit nei waen, mala fafara ke kligna olta ka nogna Sugablahi God na Jerusalem.

¹⁸“Jame salaꞌu teu keha silva nei gol teu ke leghugna te foli te gnafa iagho fafara igre na, iagho baludi nou vike na tangomana te hata te foli unha glepo te magnahaghedi ghotilo re, nu mala leghuni kolho gaoghathogna nomi God ghotilo na. ¹⁹Keha glepo na igne, iagho hata dis teke tusu ari naiknore ka iagho ra mala loku ke lamnagna nogna Sugablahi nomi God ghotilo ia, eghuteuna iagho hata glepo tuare mala ke tusu fapulo ka God. ²⁰Jame te magnahaghedi iagho keha glepo malagna nogna Sugablahi God igne na, iagho ginauna hata fajifla ka sileni gna nogu provins iara igne mala foli glepo te magnahaghedi iaghore.

²¹“Iara King Atasekses, iara cheke faheta cheke igre ka nogu mae biꞌo iara te fiofilodi sileni gna provins ke mosu Khoꞌu biꞌo Iufretis. Unha Pris Esra mae velepuhi gna Vetula nogna God gna Kligna igne mei te tore gobigna lepo igre ka ghotilo na, ghotilo mala faghosei tusu lao glepo igre ka mana. ²²Nabadi glepo te mala tusu lao ghotilo ka mana re eghu agne: Jame te tore silva mana na, ghotilo tusu lao ka mana thokeni thilo thogha fati gobi kilo. Jame te tore wit mana ka ghotilo na, ghotilo tusu lao ka mana thokeni nabotho nhana thogha thilo gobi kilo. Jame te tore waen ba oliv oel mana ka ghotilo na, ghotilo tusu lao ka mana thokeni phei thogha lita. Jame te tore tahi mana ka ghotilo na, ghotilo tusu lao nihai te magnahagheni mana na. ²³Jame God gna Kligna igne cheke ka Esra mala toredi gobigna lepo ba edi keha glepo malagna nogna Sugablahi mana na teuna, ghotilo mala edi gobigna lepo aheva te tangomana ghami ghotilo te mala toghoni mana na. Glahula diꞌatagna God ka iara baludi thugu iara gre nei nogu provins iara gne eghu. ²⁴Jaola te mala laseni ghotilo na, iara neke theome tusu ari nolaghi ka ghotilo te mala salo takis ka mae pris ba ka mae Livaet ba ka mae mala koje ba ka mae mala reireghi grengatha ba ka mae gloku ba ka mae iheire te loku ka nogna Sugablahi God igne.

²⁵“Iagho ghema Esra, loku ka famane gaoghatho te keli teke tusu ranghi nigho nou God na mala vavahi mae funei nei mae mala fate mala tangomana mare te fate ka puhi te doglo. Naikno te au ka provins ke mosu Khoꞌu biꞌo Iufretis igre mare leghudi nogna Vetula nou God iagho na. Eghuteuna jame ihei te theome lasedi Vetula igre na, te keli na, iagho mala farirhiudi. ²⁶Jame ihei te theome leghudi nogna Vetula nou God iagho gne, nei theome leghudi vetula gna nogu provins iara igne teuna, naikno tuana nabagna te faghosei parani. Eghuteuna papara igne nabagna nogna najafra mana na. Mare ginauna aknu faleheni, ba khini mala jifla mana ka nogna glose na mala tei au ka keha kantri delei, ba hata fadelei gobigna lepo teke khotodi manare, ba koko laoni ka suga sosolo.”

²⁷Aonu Pris Esra ne cheke eghu, “Tahati cheke fakelini LORD nodi God kuꞌeda tifa ra! Mana loku ka gaoghathogna king, mala ghatho tahuni king nogna Sugablahi LORD Jerusalem. ²⁸LORD ghatho tahu ghau fara iara, eghuteuna mana cheke ranghini king balu nogna mae advaesa, eghuteuna nogna mae biꞌo mana re au nodi nolaghi mala keli tadi ka iara. LORD nogu God iara na fablahi ghau iara nei farerhetani gaoghathogu iara na, mala tangomana iara te salo fodu kmana lida di Israel mala ke pulo mei balugu iara.”

Nanghadi iheire teke pulo mei funudi Babilonia

¹Igre nanghadi phaꞌu maedi ka soasopai kokholo teke tei pulo mei funu Babilonia balugu iara, ka narane teke funei fruni King Atasekses Babilonia. Keha mae ka kokholo jaola teke pulo mei balumi ghehati. Nanghadire:

^2-3Ka vikegna Finehas:

Geson.

Ka vikegna Itama:

Daniel.

Ka vikegna Devet:

Hatus ka tharaknagna Sekanaea.

Ka vikegna Paros:

Sekaraea balugna kaisei gobi glimafulu mae te au ka thura vikegna mana.

⁴Ka vikegna Pahat-Moab:

Eliehoenae, thugna Serahaea, balugna phia gobi mae.

⁵Ka vikegna Satu:

Sekanaea, thugna Jahasiel, balugna thilo gobi mae.

⁶Ka vikegna Adin:

Ebed, thugna Jonatan, balugna glimafulu mae.

⁷Ka vikegna Elam:

Jesaea, thugna Atalaea, balugna fitusalei mae.

⁸Ka vikegna Sefataea:

Sebadaea, thugna Maekol, balugna nhanasalei mae.

⁹Ka vikegna Joab:

Obadaea, thugna Jehiel, balugna phia gobi nabotho nhana mae.

¹⁰Ka vikegna Bani:

Selomit, thugna Josifaea, balugna kaisei gobi namnosalei mae.

¹¹Ka vikegna Bebae:

Sekaraea, thugna Bebae, balugna varadaki nhana mae.

¹²Ka vikegna Asgad:

Johanan, thugna Hakatan, balugna kaisei gobi nabotho mae.

¹³Ka vikegna Adonikam:

Elifelet, nei Juel nei Semaea, thilo mae leghu lahu ka vike igne, baludi namnosalei mae.

¹⁴Ka vikegna Bigvae:

Utae ghe Sakua, baludi fitusalei mae.

Mae Livaet mala loku ka Sugablahi

¹⁵Iara Esra neke loku fodudi naikno iheire te magnahaghei mei balugu iara re ne salo fodu ka geri khoꞌu ikoi te loloro te tei ka namono Ahava, eghuteuna ghehati au neu ka vido igne nabagna thilo narane. Te filoni iara ka naikno igre na, mae pris kolho te au teu balumi ghehati na, nu theo kaisei mae Livaet te au jare na. ¹⁶Aonu iara ne kilodi nheva mae lida igre mala mei filo ghau iara: Mae Eliesa, mae Ariel, mae Semaea, mae Elnatan, mae Jarib, nei keha mae Elnatan, mae Natan, mae Sekaraea nei mae Mesulam. Iara jaola neke kilodi phei mae velepuhi igre, phia mae igre mae glalase fara, mae Jarib ghe mae Elnatan. ¹⁷Iara neke kurudi mare mala tei filoni Ido, mae ihei te lida ka mae te loku ka nogna Sugablahi God te au ka namono Kasifia. Iara cheke ka mare unha te mala chekeni mare ka mana baludi kheragna mana re, mala tangomana mare te kuru mei keha ka mare mala mei balumi ghehati mala loku ka nogna Sugablahi noda God. ¹⁸Naugna noda God tahati gne mana fablahi ghami ghehati fara, aonu mare kuru meini kaisei mae Livaet, nanghagna na mae Serebaea, kaisei mae ka vikegna mae Mali. Mana kaisei mae lase loku fara, eghuteuna thugna nei kheragna teu mana igre nabotho nhana mae khaputudi re, mare ne kafe mei balugna mae Serebaea. ¹⁹Eghuteuna mare ne kurudi mae Hasabaea ghe mae Jesaea, phei mae ka vikegna mae Merari, thugna mae Livae, baludi varadaki mae ka tharaknadi phiamare. ²⁰Mare jaola kuru meidi keha phei gobi varadaki mae mala mei balumi ghehati. Mae igre au ka tothoghei vavahi King Devet baludi nogna mae biꞌore tifa ra mala toghodi hatimare mae Livaet mala loku ka Sugablahi na. Eghuteuna phia gobi varadaki mae igre nanghadi re au ka kaisei thura.

Esra baludi naiknore ne theome ghamu nei tarai

²¹Kate au teu ghehati ka gerigna khoꞌu biꞌo Ahava igne, iara ne cheke ka mae iheire te khapru teu ka vido igne mala thosei ghamu nei nhaꞌa fapari ghami themi ke ulugna God. Eghuteuna ghehati toreni mana mala batu ghami ka nabrou na nei reireghi fakelidi thumi nei nomi gobigna lepore. ²²Iara mamaja nogu fara te toreni king te mala kuru nogna soldia nei mae te saghe ka hose te mala reireghi ghami ghehati ka nabrou na. Iara mamaja nogu naugna iara neke cheke eghuhi ka king, “Nomi God ghehati gne thofno fablahidi fabrahu iheire te fatutuanini mana re, nu thono diꞌatagna fara ka iheire te figri tagruni mana re.” ²³Eghume ghehati theome ghamu, eghuteuna ghehati tarai heta ka God mala reireghi fakeli ghami ka nabrou, eghuteuna God ne nomhidi nomi tharai ghehati re.

Namha malagna nogna Sugablahi God

²⁴Iara neke ehadi phei mae Livaet, mae Serabaea ghe mae Hasabaea baludi keha nabotho nodi lida hatimare mae pris mala mei. ²⁵Aonu iara ne skel silva, nei gol, nei glepo mala loku ka Sugablahi teu teke namha king baludi nogna mae advaesa nei nogna mae biꞌo, nei vikegna Israel te au Babilonia igre eghu mala loku ka nogna Sugablahi noda God. Aonu iara ne tusu lao glepo igre ka hatimare mae pris mala reireghi fakelidi mare kate tei ka nabrou na. ^26-27Tahudi glepo teke tusu lao iara ka mare re igre:

Silva: varadaki phei thogha kaisei gobi kilo.

Glepo teke horo ka silva: thilo thogha fati gobi kilo.

Gol: thilo thogha fati gobi kilo.

Varadaki dis biꞌo teke horo ka gol: nhana vidogna kilo.

Phei famane besin teke horo ka famane bras te siasigla fara, eghuteuna praes dire nanaba ngala ka praes gna besin teke horo ka gol.

²⁸Iara tusu lao glepo igre ka hatimare nabotho phei mae pris igre, neke cheke eghu ka mare, “Ghotilo mae mala loku ranghini LORD nodi God kuꞌeda tifa ra, eghuteuna dis igre jaola nogna LORD. Eghuteuna gol nei silva teu igre jaola mala namha ranghini LORD. ²⁹Ghotilo famane reireghi fakelidi glepo igre, ghilei tei posa ka Sugablahi Jerusalem. Jare ka nodi chogho mae pris igne te mala skel nei tusu lao ka mae lida di hatimare mae pris baludi lida di mae Livaet, nei ka phaꞌu maedi vikegna Israel.” ³⁰Aonu mae pris nei mae Livaet teu igre ne hata silva nei gol eghu teke skel iara ra mala hata tei mare ka nogna Sugablahi noda God Jerusalem.

Mare ne thoke Jerusalem

³¹Ka fabotho phei naranegna nhigra ulu lahu igne ghehati jifla ka khoꞌu biꞌo Ahava leghu nabrou ne tei mala tei posa Jerusalem. Eghuteuna God ne au balumi nei reireghi fakeli ghami neu ghehati ka naoka ba iheire te poru teu ka geri nabrou mala blau naikno ba falehe naikno. ³²Kate tei te posa Jerusalem na, ghehati ne gnafa nabagna thilo narane.

³³Ka fafati narane na, ghehati hata ne tei gol nei silva nei dis teu igre ka nogna Sugablahi God na mala skel tahudi glepo igre. Kate skel te gnafa na, ghehati ne tusu lao glepo igre ka Pris Meremot, thugna mae Iuraea. Balugna mana re mae Pris Eleasa thugna mae Finehas, eghuteuna phei mae Livaet, mae Josabad thugna mae Jesua ghe mae Noadaea thugna mae Binui. ³⁴Aonu mare kaha nei skel fakeli neu glepo igre. Eghuteuna mare ne skel nei rioriso soru naba neu glepo igre ka kaisei buka.

³⁵Ghehati te gnafa iheire teke pulo mei funu Babilonia ra, ghehati hata neke mei glepo mala fafara ka God gna Israel. Malagna fafara te gahu te krono fara igne, ghehati hata nabotho phei buluka nalhaꞌudi nanaba ka nabotho phei vikegna Israel, eghuteuna nhevasalei namno sipu nalhaꞌudi, eghuteuna fitusalei fitu sua sipu nalhaꞌudi. Eghuteuna ghehati jaola hata nabotho phei nanigot nalhaꞌudi mala fafara mala hata fadelei LORD nakhibodi re. Igre unha teke fafara ghehati ka LORD. ³⁶Aonu ghehati hata nogna letas king teke tusu mei ka ghehati igne ne tusu lao ka gavana nei hatimare nogna mae biꞌo king te au ka provins ke mosu Khoꞌu biꞌo Iufretis. Aonu mae biꞌo igre ne toghodi naiknore, eghuteuna mare ne togho ghami ghehati ka glokugna nogna Sugablahi God.

Keha maedi Israel ne tolaghi ka gaꞌase bongihehe di keha kantri delei

¹Ke leghudi glepo igre, keha mae lida mei ne filo ghau iara ne cheke eghu, “Esra, hatimare mae pris nei mae Livaet nei naiknodi Israel teu igre mare theome au fadeleidi thedi ka puhidi naikno bongihehe te thono diꞌa fara te au faligoho ghita tahati igre. Mare leghudi puhidi naiknodi Kenan, nei naiknodi Het, nei naiknodi Peris, nei naiknodi Jebus, nei naiknodi Amon, nei naiknodi Moab, nei naiknodi Ijep nei naiknodi Amo. ²Mare hata gaꞌase bongihehe igre mala tolaghi, eghuteuna mare jaola hata thudi gaꞌase mare re mala tolaghi ka thudi nalhaꞌure. Eghume tahati nogna naikno blahi God igre la kaisei loku fodu baludi naikno bongihehe te au faligoho ghita igre la thona ka tathagna noda God. Eghuteuna noda mae lida tahati igre baludi keha mae biꞌo igre ngala te baubatudi naiknore te edi puhi te jafra igre.”

³Kate nomhini igne, iara thono diꞌanagnafagu fara ne rerheku nogu pohe na, eghuteuna iara rarathu khakladi phaꞌugu nei gremohogu teure, aonu iara tei ne gnokro pari naugna iara ne thono faꞌiho ghau fara. ⁴Iara gnokro neu balu diꞌanagnafa ne ghilei thokeni vido mala fafara fei grafi na. Eghuteuna naikno te ghatho tahudi nogna cheke nomi God ghehati igne ne mhaghu nodi fara ka unha nate thoke mei naugna nakhibo te edi iheire teke pulo mei funudi Babilonia te theome leghudi nogna cheke God igre.

⁵Ka grafi te fafara igne, iara theome keli gaoghathogu na ne fahaghe neu ngala pohe teke rerheku iara ia. Iara kegra haghe ka vido aheva teke diꞌanagnafa iara na, aonu iara tuturupuku soru pari ne ngafa haghe khamegure ka nogu God kligna, ⁶ne tarai eghu,

“Nogu God! Iara thono mamaja nogu fara, iara theome tangomana te ghae haghe tathagu nei foflogu teu gre te mala ari posa ka iagho kligna na. Nakhibomi ghehati gre kmana fara, ghehati nabami te papara eidi nakhibo igre. Naugna nakhibomi ghehati igre la pagu la haghe salaꞌudi phaꞌumi ghehati gre la ghilei tei posa kligna. ⁷Funu ka naranedi kuꞌemi tifa ra tela ghilei mei posa ka narane gognarogne, thofno nabami fara te papara fara eidi nakhibomi igre. Naugna nakhibomi ghehati igre, iagho lisei lao ghami baludi nomi king nei nomi pris teu igre ke paridi nodi nolaghi nomi naoka gre. Mae naoka igre aknu falehe keha ka ghehati, eghuteuna hata kehare mala loku jateula naikno sneka eghu, eghuteuna mare blau nomi gobigna lepo ghehati re. Mare famamaja ghami fara ghehati, glepo igre edi fabrahu la ghilei mei posa ka narane gognaro gne.

⁸“Nu gognarona, iagho nomi LORD God thofno keli fara ka ghehati, eghuteuna iagho snakredi keha ka ghehati mala karhau, mala tangomana ghehati teke pulo mei mala teke au fakeli ka nou vido blahi iagho igne. Neuba ghehati ne au jateula naikno sneka neu, nu iagho tusu mei nakarha majaghani ka ghehati mala farerheta gaoghathomi ghehati gre. ⁹Tutuani, ghehati neke au jateula naikno sneka neku, nu iagho nomi God neke theome tei koko ghami ghehati. Iagho ghatho tahu ghami ghehati fara neke cheke ka nagnafagna king gna Pesia mala togho ghami nei snakre ghami te mala karha teu ghehati mala teke babana fapulo nou Sugablahi iagho teke goigoni mae naoka ra. Eghuteuna iagho neke tusu lao gaoghatho te keli ka mare neke togho ghami nei tusu ranghi ghami glepo te mala eni gloku igne. Eghuteuna gognarona ghehati au ka pharikeli agne Juda nei Jerusalem.

¹⁰“Nu gognarona, nomi God, unha nate chekeni ghehati ka iagho ke leghugna igne na? Eigna ghehati gne theome leghudi cheke teke tusu mei iagho ka ghehati ra. ¹¹Hatimare mae profet nou mae gloku iagho ra neke cheke eghu, ‘Kantri nate tei au ghotilo tagna igne theome gae ka tathagna God na. Naugna funu ka keha phile glose na te tei posa ka keha phile glose na fodu ka naikno bongihehe te diꞌa fara puhidi igre. ¹²Eghume ghotilo thosei snakredi thumi gaꞌase are mala tolaghi ka thudi nalhaꞌu mare are, eghuteuna ghotilo thosei hata thudi gaꞌase mare are mala tolaghi mei ka thumi ghotilo are. Ghotilo ginauna thosei toghodi naikno igre mala rheta nei au fakeli eghu mare. Jame te leghudi ghotilo nogu cheke iara igre na, ghotilo ginauna tangomana te au fakeli nei ghamu fakeli teu ka glose igne, eghuteuna ke leghu na vikemi ghotilo re ginauna au fakeli fabrahu ka glose igne.’

¹³“God, tutuani fara te cheke eghu iagho ka ghehati na, nu ghehati theome leghudi nou cheke iagho ra ne edi kmana nakhibo biꞌo nei najafra. Eghume iagho nabamu te para ghami ghehati eidi puhi te diꞌa igre. Nu theo eghu, iagho kokhoni ghami ghehati nei snakredi keha ka ghehati mala karhau. ¹⁴Ba, keli kolho te theome leghudi ghehati nou cheke iagho re te tolaghi ka naikno bongihehe te thono diꞌa fara puhidi igre? Theo! Jame te eghu ghehati na, iagho ginauna diꞌatamu fara ka ghehati, aonu iagho ginauna aknu falehe ghami ghehati hui, eghuteuna theo kaisei ka ghehati nate karha na. ¹⁵LORD God gna Israel! Leuleghu fata na iagho fate ka puhi te doglo. Ghehati nou naikno iagho te karha teu aro ghehati au kolho naugna iagho snakre ghami ghehati te karha teuna. Nu naugna nakhibomi ghehati te biꞌo fara gre, ghehati nabami te papara na, nei theome nabami te kegra haghe ke ulumu iagho na.”

Mare ne koko gaꞌase bongihehe re

¹Pris Esra tuturupuku soru ke kosigna grengathagna nogna Sugablahi God na ne tarai balu diꞌanagnafa ne tanhi neu, eghuteuna mana ne cheke thakledi nakhibodi naiknodi Israel re. Ka narane igne, kmana nalhaꞌu nei gaꞌase, goro sua eghudi Israel gre mei khapru faligohoni mana, eghuteuna naikno igre jaola ne tanhi fara. ²Aonu mae Sekanaea, thugna mae Jehiel vikegna mae Elam igne ne cheke eghu ka mae Esra, “Tutuani fara, ghehati la huhughuni chekegna God na kate tolaghi ghehati ka gaꞌase bongihehe igre. Nu neuba ngau, tahati au noda grouronu eigna God ginauna theome goigoni ghita tahati naiknoda Israel. ³Eghume gognarona tahati na eni kaisei nhaꞌa cheke ka noda God mala kuru fapulodi gaꞌase bongihehe igre balu thudi mala ke pulo ka namonodi re. Uve, tahati ginauna edi unha te cheke ranghi ghami iagho nei mae iheire te ghatho tahudi nogna nhaꞌa cheke noda God igre. Eghuteuna tahati ginauna jaola leghudi unha te chekedi ka nogna Vetula God ra. ⁴Nou gloku iagho te mala fadoglidi puhi biꞌo igre. Eghume, iagho thosei mhaghu. Kegra haghe faghose fadoglidi puhi igre. Eghuteuna ghehati ginauna au ka pharikeli balumu iagho mala leghudi nou cheke iagho re.”

⁵Aonu mae Esra kegra haghe ne cheke faheta ka phaꞌu maedi hatimare mae pris nei mae Livaet nei hatimare mae biꞌodi Israel mala eni kaisei nhaꞌa cheke ka God, jateula unha teke chekeni mae Sekanaea ia eghu. ⁶Aonu mae Esra kegra haghe ka vido ke kosigna grengathagna nogna Sugablahi God na ne tei ruma lamna ka nogna chogho mae Jehohanan thugna mae Eliasib. Kate au teu mana ka vido igne, mana ne theome ghamu nei theome koꞌuni kaisei glepo, naugna mana ne diꞌanagnafagna nei tanhidi neu puhi te edi iheire naikno teke pulo mei funudi Babilonia.

⁷Hatimare mae lida igre ne fatei cheke ka vido te gnafa Jerusalem nei ka keha vido aheva te au ka nohi Juda, mala chekedi mei iheire teke pulo mei funudi Babilonia, mare mala mei ka kaisei faidu Jerusalem. ⁸Mare lilisei nabagna thilo narane te mala mei mare ka faidu igne. Eghuteuna te chekeni mare na jame mae ihei te theome mei ka narane igne na, mare ginauna hata koko gobigna lepo teke khotodi mana re, eghuteuna nhaꞌa fadeleini ka naiknodi Israel.

⁹Ka thilo narane igre, mae iheire teke au ka phei nohidi Juda ghe Benjamin igre ne mei Jerusalem. Ka fatilo narane, ka varadaki naranegna faheva nhigra, mae te gnafa igre ne khapru mei ne gnokro soru pari ka glalaba ke ulugna nogna Sugablahi God. Nakhete biꞌo ne soru mei ka mare, mala buebugne mare, eghuteuna mare jaola ne fififri eigna gaoghathogna teke kilodi mare teke mei ka faidu igne. ¹⁰Esra khegra ke uludi mare ne cheke eghu, “Ghotilo maemi Israel! Ghotilo theome fatutuani ni God! Ghotilo tolaghi ka gaꞌase bongihehedi delei, eghume tahati naiknoda Israel nabada te papara. ¹¹Gognarona, ghotilo mala cheke thakledi nakhibomire ka LORD, nodi God kuꞌeda tifara. Eghuteuna ghotilo mala leghudi puhi te magnahaghedi mana re. Eghume ghotilo au fadelei ka naikno bongihehe te au ka noda glose tahati gne eghuteuna ghotilo koko gaꞌase bongihehe te tolaghi ghotilo are.”

¹²Aonu naiknore ne kafe eha eghu fabiꞌo, “Tutuani fara! Ghehati ginauna eni unha te chekeni iagho na! ¹³Nu ghehati kmana fara te au teu ka vido igne, eghuteuna nakhete biꞌo jaola soru mei. Eghume ghehati theome tangomana te kegra teu kosi agne te fadoglini puhi igne. Eghuteuna puhi igne biꞌo fara theome tangomana te ghosei te doglo ka phei ba thilo narane kolho, naugna nakhibomi ghehati igne thono biꞌo fara. ¹⁴Eghume te ghathoni ghehati na, jame te keli na lisa lao ka noda mae lida tahati igre mala filo fakelini ghu mare puhi biꞌo igne, mala ke pulo ghu ghehati ka namonomi re. Ke leghu, mae iheire te tolaghi ka gaꞌase bongihehedi keha kantri igre ginauna faidu baludi mae lida nei mae mala fate teugna nogna namono na mala fadoglini puhi biꞌo igne. Ka puhi igne, diꞌatagna God eigna nakhiboda tahati te biꞌo igne ginauna gnafa.” ¹⁵Mare ne kelitadi ka cheke igne. Nu mae Jonatan thugna mae Asahel, ghe mae Jasea thugna mae Tikva, phiamae igre ne theome magnahagheni. Eghuteuna mae Mesulam balugna mae Sabetae kaisei mae Livaet, phiamare ne leghuni nodi gaoghatho phei mae igre.

^16-17Aonu mare ne eni unha te chekeni hatimare mae lida igre, eghuteuna Pris Esra ne vahidi mae iheire te phaꞌudi tharaknadi mare te gnafa re ne rioriso soru nanghadire. Aonu ka narane ululahu ka fabotho nhigra, mare ne faidu mala lasedi mae iheire te tolaghi ka gaꞌase bongihehedi keha kantri re. Eghuteuna ka narane ululahu ka nhigra ululahu gna finogha majaghani na, mare ne eni fahui gloku igne.

¹⁸Igne thura nanghadi mae pris te tolaghi ka gaꞌase bongihehe re:

Ka tharaknagna mae Jesua thugna mae Josadak, baludi mae thabusigna mana re:

mae Masea nei mae Eliesa, nei mae Jarib, nei mae Gedalaea. ¹⁹Mare ne nhaꞌa cheke mala koko khetodire. Eghuteuna naugna eidi nakhibodire, mare hata kaisei sua sipu mala fafara ka God.

²⁰Ka tharaknagna mae Ima:

mae Hanani ghe mae Sebadaea.

²¹Ka tharaknagna mae Harim: mae Masea, nei mae Elija, nei mae Semaea, nei mae Jehiel nei mae Usaea.

²²Ka tharaknagna mae Pasuru: mae Elioenae, nei mae Masea, nei mae Ismael, nei mae Netanel, nei mae Josabad nei mae Elasa.

²³Ka hatimare mae Livaet: mae Josabad, nei mae Simei, nei mae Petahaea, nei mae Juda, nei mae Eliesa, nei mae Kelaea keha nanghagna na mae Kelita.

²⁴Mae Livaet te koje ka Sugablahi:

mae Eliasib.

Mae Livaet te reireghi Sugablahi:

mae Salum, nei mae Telem nei mae Uri.

²⁵Igre keha mae ka keha vikedi mae Israel teke tolaghi ka gaꞌase bongihehe re:

Ka tharaknagna mae Paros:

mae Ramaea, nei mae Isaea, nei mae Malkaeja, nei mae Mijamin, nei mae Eleasa, nei keha Malkaeja nei mae Benaea.

²⁶Ka tharaknagna mae Elam:

mae Matanaea, nei mae Sekaraea, nei mae Jehiel, nei mae Abdi, nei mae Jeremot nei mae Elija.

²⁷Ka tharaknagna mae Satu:

mae Elioenae, nei mae Eliasib, nei mae Matanaea, nei mae Jeremot, nei mae Sabad nei mae Asisa.

²⁸Ka tharaknagna mae Bebae:

mae Jehohanan, nei mae Hananaea, nei mae Sabae nei mae Atlae.

²⁹Ka tharaknagna mae Bani:

mae Mesulam, nei mae Maluk, nei mae Adaea, nei mae Jasub, nei mae Seal, nei mae Jeremot.

³⁰Ka tharaknagna mae Pahat-Moab:

mae Adna, nei mae Kelal, nei mae Benaea, nei mae Masea, nei mae Matanaea, nei mae Besalel, nei mae Binui, nei mae Manase.

^31-32Ka tharaknagna mae Harim:

mae Eliesa, nei mae Isaeja, nei mae Malkaeja, nei mae Semaea, nei mae Simion, nei mae Benjamin, nei mae Maluk, nei mae Semaraea.

³³Ka tharaknagna mae Hasum:

mae Metanaea, nei mae Matata, nei mae Sabad, nei mae Elifelet, nei mae Jeremae, nei mae Manase, nei mae Simei.

^34-37Ka tharaknagna mae Bani:

mae Madae, nei mae Amram, nei mae Uel, nei mae Benaea, nei mae Bedea, nei mae Keluhi, nei mae Vanaea, nei mae Meremot, nei mae Eliasib, nei mae Matanaea, nei mae Matenae, nei mae Jasu.

^38-42Ka tharaknagna mae Binui:

mae Simei, nei mae Selemaea, nei mae Natan, nei mae Adaea, nei mae Maknadebae, nei mae Sasae, nei mae Sarae, nei mae Asarel, nei mae Selemaea, nei mae Semaraea, nei mae Salum, nei mae Amaraea, nei mae Josef.

⁴³Ka tharaknagna mae Nebo:

mae Jel, nei mae Matitaea, nei mae Sabad, nei mae Sebina, nei mae Jadae, nei mae Joel, nei mae Benaea.

⁴⁴Mae te gnafa igre tolaghi ka gaꞌase bongihehe. Eghuteuna mare koko khetodire neke kuru teidi balu thudi.