Nogna Buka Esta

Nogna Buka Esta

Buka Esta Keha Thoutonu Eigna Buka Igne

Thoutonu kmo’ei eigna buka igne

Thoutonu te au ka buka igne, thoutonu eigna kaisei glepo teke eni ka narane teke funei mae king Sekses ka kantri Pesia. Mae King Sekses neke funu kegra funei ka finogha fati gobi nhana salei glima finogha neke karha nga Kraes ka finogha fati gobi namno salei glimai (485-465).

Thoutonu igne eigna kaisei gaꞌase Jiu nanghagna na Esta. Ka narane igre naiknore naoka ka naiknodi Israel te au ka kantri igne. Mare magnahaghei te falehedi gnafa naiknodi Israel igre. Nu Esta gne naꞌa thofno namhadi fara nogna naikno thegna re, eghume naꞌa jaola tarabana te mala lehe tughudi nogna naiknore ne eni kaisei glepo te biꞌo te mala toghodi nogna naiknore. Ka puhi te eni naꞌa igne, mae Jiu gre ne tangomana te uludi naiknodi Pesia te naoka ka mare igre. Buka igne jaola toutonu eigna teke fufunu gna mare kaisei nodi narane biꞌo mae Jiu te kiloi mare, “Gaghamu Purim.” Narane igne mare eniu koba ghilei mei posa ka narane gognarogne.

Keha vido ka buka igne

Esta ne Kuin ka kantri Pesia: 1:1–2:23

Mae Haman ne gaoghatho mala faleheni mae Modikae: 3:1–5:14

Esta ghe Modikae ne uluni gaoghatho igne: 6:1–8:2

Mae Jiu gre ne falehedi mae naokare: 8:3–9:19

Gaghamu Purim: 9:20–10:3

Mae king biꞌogna Pesia ne eni kaisei gaghamu biꞌo

^1-2Igre glepo teke edi king Sekses ka finogha teke khegra funei mana ka kantri Pesia. Mana neke funei frunidi kaisei gobi varadaki fitu provins, funu India tei posa ke mosu ka kantri Kus. Eghuteuna mana au soru ka namono biꞌo Susa. ³Ka fatilo finogha te king mana igne, mana ne eni kaisei gaghamu biꞌo maladi mae biꞌo te gnafa, mae funei te gnafa, mae biꞌodi armi te gnafa, mae lida te gnafa ka provins te gnafa ka phei kantri biꞌo Pesia ghe Media.

⁴Gaghamu biꞌo igne hata nabagna namno nhigra thongana. Eghuteuna ka narane igre King Sekses ne fakakhana ka mae funei te gnafa igre nogna dedei nei nogna nafnakno nei nogna famane suga biꞌo teure. ⁵Ke leghudi namno nhigra igre, mana jaola ne edi keha gaghamu biꞌo maladi naikno te gnafa te au ka namono biꞌo Susa. Eghuteuna hatimare mae biꞌo, hatimare mae te dedei nei hatimare mae te kuma teu igre ne kafe mei ka gaghamu biꞌo igne. Mana ne tarabana gaghamu biꞌo igne fari hotei glalaba ke kosigna nogna suga biꞌo thegna na. Gaghamu biꞌo igne hata kaisei wik thongana. ⁶Mare lalaoni vido mala ima igne ka pohe te jateula blu nei ka pohe te vegha. Mare fagefe haghe pohe igre ka phukri te ngonge. Eghuteuna haru phukri silva igre ka famane thina te kiloi mabol. Eghuteuna mare jaola hata mei keha chea teke hohoro ka silva nei ka gol. Glalaba igne famane tulao, naugna mare horo ka famane thina te vegha, te ukru, te kakarha nei keha nafnata glepo te siasigla jateula thiro. ⁷Eghuteuna kapu te koꞌu waen naiknore igre kmana nafnatadi, neke hohoro ka gol. Ka narane igne, king ne gleale’a fara, aonu mana ne tufa kmana famane waen ka naiknore. ⁸Mana ne chekedi nogna mae glokure mala lelheghu ka thedi, te koꞌu ba theo.

⁹Kuin Vasti jaola ne eni kaisei gaghamu maladi langau goro gaꞌase te au ka sugagna king.

Kuin Vasti ne theome leghuni chekegna king

¹⁰Ka fafitu narane na, king Sekses ne thofno keli tagna fara, naugna mana ne koꞌu waen ne salaꞌui. Aonu mana ne kilo meidi fitu nogna mae gloku igre: mae Mehuman, mae Bista, mae Habona, mae Bikta, mae Abakta, mae Seta nei mae Kakas. ¹¹Mana kurudi mae igre mala tei chekeni Kuin Vasti mala fahaghe nogna khepi nafnakno na mala mei kegra ke ulugna. Mana magnahaghedi nogna mae funei nei naikno teu te au ka gaghamu igre te filoni naꞌa, naugna Kuin Vasti igne kaisei famane gaꞌase fara. ¹²Nu kate tei cheke mare na, naꞌa ne tirogna te mei filoni king. Aonu kate nomhini igne, king ne thono diꞌatagna fara ka puhi te eni naꞌa igne.

¹³Leuleghu fata na, king magnahaghei te ghusnadi iheire te lasedi vetulare mala toghoni kate thoke mei nafnata puhi igre. ¹⁴King au fitu mae mala toghoni, mae igre mae biꞌodi Pesia nei Media. Mae igre mae biꞌodi ka kantri te funei frunidi mana igre. Leuleghu fata na, mana toredi koba mae igre mala mei toghoni. Igre nanghadi mae te mala toghoni manare: Mae Kasena, mae Seta, mae Admata, mae Tasis, mae Meres, mae Masena nei mae Memukan.

¹⁵King ne cheke eghu ka mae igre, “Iara king Sekses. Filo ghotilo ia, khetogu iara Kuin Vasti igne, naꞌa tirogna leghuni unha te chekeni iara na. Iara neke kurudi nogu mae gloku igre neke tei chekeni naꞌa mala mei filo ghau iara agne. Nu naꞌa ne huhughu ghau iara ne tirogna mei filo ghau iara agne. Te eghuna, unha eghu te chekeni ka vetula na? Ba unha puhi nate eni tahati ranghini Kuin Vasti na?”

¹⁶Aonu mae Memukan ne cheke eghu ka King Sekses nei mae te au balugna mana igre ne cheke eghu, “Kuin Vasti theome famamaja nigho iagho kolho. Naꞌa jaola famamajadi mae biꞌo te gnafa nei naikno te gnafa ka kantri te funei frunini iagho igne. ¹⁷Khetodi mae biꞌodi Pesia nei Media teu igre ginauna nomhini unha te eni naꞌa igne. Aonu rehati ginauna theome ghatho tahudi khetodire. Rehati ginauna na cheke eghu, ‘Filo si ghotilo! Kuin Vasti tirogna tei filoni King Sekses.’ ¹⁸Gognarogne khetodi mae biꞌodi Pesia ghe Media igre la nomhini eigna unha te eni Kuin igne. Eghume rehati ginauna cheke jateula tuana eghu ka khetodire, eghuteuna tahati ginauna diꞌatada fabrahu ka rehati.

¹⁹“Eghume, King Sekses, jame te doglo ka gaoghathomu iagho ka cheke te edi iara igre na, iagho ginauna eni kaisei vetula. Vetula igne rioriso ka nodi vetula hatimare mae Pesia nei hatimare mae Media. Aonu vetula igne ginauna theome tangomana teke tuthughu na. Vetula igne jame cheke eghu, ‘Iara theome magnahaghei te filoni tathagna Kuin Vasti.’ Jaola iagho na vavahi kaisei gaꞌase te keli puhigna na mala tughuni Kuin Vasti. ²⁰Kate nomhini vetula majaghani igne, goro gaꞌase te gnafa te au ke lamnadi phei kantri igre ginauna ghatho tahudi khetodire. Eghume ginauna, neubane khetodi hatimare mae funei ba fiti mae kolho, rehati ginauna na jaola ghatho tahudi khetodire.”

²¹King baludi nogna funeire ne thofno keli tadi fara ka gaoghatho igne. Aonu King ne leghuni unha te chekeni mae Memukan igne. ²²Mana ne kilodi hatimare mae sekretri mala rioriso cheke igre ka nodi soasopai cheke naikno te au ka provins te gnafa ke lamnagna kantri Pesia, “Mae nalhaꞌu na ngala te mala funei fruni ni tharakna thegna na.”

King Sekses ne vahini Esta

¹Kate gnafa te diꞌatagna na, King Sekses ne ghathoni fabrahu puhi teke eni Kuin Vasti igne, nei vetula te eni mare ranghini naꞌa igne. ²Aonu keha mae te mala toghoni king igre ne tei gnokro rhegna mana ne cheke eghu ka mana, “King, jame te keli na iagho filodi keha famane gaꞌase majaghani te theo kaisei mae te thuru teu baludi. ³Aonu iagho vavahi keha mae funei ka provins te gnafa igre mala hiro meidi keha gaꞌase majaghani mala hata mei au agne Susa ka sugadi khetomu iagho igre. Eghuteuna nou mae gloku iagho, mae Hegae mae te mala reireghidi fapea khetomu iagho igne te mala fiofilodire. Mana ginauna tufa oel mala ghiha ka thinidire nei mala famane fara fifilodire. ⁴Aonu jame te filoni iagho kaisei ka rehati te famane tulao filogna na, tuana ngala nate vahini iagho te mala Kuin tughuni Kuin Vasti.” Kate nomhini igne, mana keli tagna fara ne leghuni unha te chekeni mare na.

⁵Aonu kaisei maegna Juda te au ka namono biꞌo Susa. Nanghagna na, mae Modikae thugna mae Jaea, thugna mae Simei, thugna mae Kis vikegna mae Benjamin. ⁶Tifa na mae King Nebukadnesa neke hata king Jehoakin maegna ka kantri Juda neke tei sosolo ka kantri Babilonia. Eghuteuna mana jaola neke hata mae Modikae neke tei balugna. ⁷Mae Modikae neke taego kaisei sua gaꞌase, nanghagna na Esta. Nu nanghagna naꞌa igne ka cheke Hibru na, Hadasa. Naꞌa kaisei famane gaꞌase fara. Kate lehe idogna kmagnare, mae Modikae ne tajini naꞌa ne ghilei gaꞌase biꞌo. Nanghagna kmagna Esta na, mae Abihael, nebugna mae Modikae.

⁸Mae King Sekses ne fatei cheke ka provins te gnafa ke lamnagna nogna kantri na mala hata mei kmana famane gaꞌase ka mae Hegae mala au ka sugagna mae king ka namono biꞌo Susa. Kate hata te mei mare gaꞌase igre, mare jaola hata ne mei baludi Esta. ⁹Kate filoni Esta na, mae Hegae, mae ihei te mala reireghidi fapea khetogna mae king igre ne thofno keli tagna fara ka Esta. Aonu mana ghosei ne tei hata ne mei famane oel ne ghiha ka thinigna Esta na, nei keha famane gano mala ima naꞌa. Aonu mana ne kaikaliti kaisei chogho te keli ka sugadi goro gaꞌase igre. Eghuteuna mana ne vavahi fitu gaꞌase mala loku ranghini.

¹⁰Mae Modikae ne cheke ka Esta mala thosei cheke thakleni thegna ka naiknore te kaisei thau Jiu naꞌa na. Aonu naꞌa ne leghuni nogna cheke mana igne ne theome cheke thakleni thegna. ¹¹Leuleghu narane na, mae Modikae tei koba ke ulugna suga te au teu Esta igne mala laseni naꞌa te au fakeli teu ba theo, nei mala laseni unha nate eni mare ka naꞌa na.

¹²Goro gaꞌase igre famane fakekheli thinidire ke lamnagna kaisei finogha. Ka namno nhigra ululahu igre, rehati ghiha oel te keli mala famane sisiri kelidi thinidire. Eghuteuna keha namno nhigra ke leghudi igre, rehati ke ghiha keha nafnata oel te keli fara te salaꞌui sisiridire. Ke leghugna igne, mae Hegae hata ne tei gaꞌase igre ka mae King Sekses, kaisei gaꞌase kaisei narane. ¹³Ka narane te tei kaisei gaꞌase ka sugagna mae king na, naꞌa tangomana te lalaoni ka pohe, ba unha te magnahagheni naꞌa kau gaoghathogna na. ¹⁴Gaꞌase majaghani igne tei au kaisei bongi thongana balugna king ghilei hamerane ka keha narane na. Eghuteuna hamerane na, mare hata tei gaꞌase igne ka mae Sesgas, mae ihei te mala reireghi sugadi fapea khetogna king igre mala au baludi rehati ka suga tuana. Gaꞌase igne tangomana teke pulo te mala tei filoni king ka narane te kiloni naꞌa mana na.

^15-16Ka fabotho nhigra te kiloni mare Tebet, ka fafitu finogha te funei king Sekses igne, mare hatani Esta ne tei au balugna mana kaisei bongi thongana. Esta gne kaisei famane gaꞌase fara, eghuteuna naikno te filoni naꞌa re keli tadi fara ka naꞌa. Ka narane igne, naꞌa ne pipichi pohe teke chekedi mae Hegae ka naꞌa re.

¹⁷Kate tei Esta ka king na, mana filoni Esta ne magnahagheni fara ke tulaodi keha gaꞌase teke kulu tei filoni mana igre. Aonu mana ne lisei lao khepi nafnakno na ka phaꞌugna Esta na mala tughuni Kuin Vasti. ¹⁸Ke leghugna igne, King Sekses ne eni kaisei gaghamu biꞌo mala fafnaknoni Kuin Esta. Aonu mana ne kilodi hatimare mae minista te gnafa, nei mae funei te gnafa teu igre mala mei ka gaghamu igne. Eghuteuna mana ne namha ranghidi nogna naiknore keha glepo te keli, nei cheke thakleni narane igne ka naikno te gnafa ka nogna kantri na, narane igne narane mala gnafa.

Modikae ne laseni gaoghatho te diꞌa igne

¹⁹Ka fapea fata te kafe mei gaꞌase igre, king Sekses ne vahini mae Modikae mala kaisei nogna mae minista. ²⁰Tifa na, mae Modikae neke cheke ranghini Esta mala thosei cheke thakleni thegna te kaisei thau Jiu na. Aonu Esta gne thofno leghuni koba nogna cheke mae Modikae re funu sua gna. Eghume naꞌa ne leghuni koba chekegna mae Modikae na gognaro na.

²¹Kate loku mae Modikae ranghini king Sekses igne, phia mae ne diꞌatadi ka king. Aonu phia mare ne ghaoghaho mala faleheni mana. Nanghadi phia mae igre, mae Biktana ghe mae Teres. Phia mae igre nodi gloku na mala reireghi grengatha gna nogna chogho king. ²²Kate nomhini mae Modikae nodi cheke phia mae igre, mana tei ne cheke ka Kuin Esta. Aonu Esta tei ne cheke ka king cheke teke nomhini mae Modikae ka phia mare igne. ²³Kate nomhini king te tutuani puhi igne, king ne chekedi nogna mae gloku re mala hata phei mae igre mala haru gnarho ka graradire mala fagefe haghe ka gaju na mala lehe phia mare. Aonu King ne cheke ka nogna mae gloku re mala rioriso soru puhi igne ka buka te mala rioriso soru unha te edi ke lamnagna nogna kantri na.

Mae Haman magnahaghei te falehedi mae Jiu

¹Theome raugha ke leghugna igne, King Sekses ne vahini mae Haman, thugna mae Hamedata, kaisei mae ka vikegna mae Agag mala kaisei nogna mae Praeminista. ²Aonu king ne cheke ranghidi nogna mae funei re mala pogho soru nei turupuku eghu ke ulugna mae Haman. Nu mae Modikae ne tirogna turupuku, ba fafnaknoni mana.

³Keha nogna mae funei King igre filoni igne ne ghusna eghu ka mae Modikae, “Naugna unha sagho te theome leghuni nogna cheke king ignea?” ⁴Mare chekeni koba ka mae Modikae igne leuleghu narane. Kate theome fanomho mana ka mare na, mare ne cheke ka mae Haman eigna igne. Mare magnahaghei te filoni glahu kelitagna mae Haman ka puhi te eni mae Modikae igne, naugna te chekeni mae Modikae ka mare na mana kaisei mae Jiu.

⁵Kate laseni mae Haman te theome ghatho tahuni, nei turupuku ranghini teu mae Modikae igne, mana ne thono diꞌatagna fara. ⁶Kate laseni mana te kaisei mae Jiu mae Modikae na, mana fariu riu hiro phoge mala faleheni mae Modikae baludi mae Jiu te gnafa te au ke lamnagna nogna kantri mae king Sekses.

⁷Ka nhigra Nisan, igne nhigra ululahu ka nabotho phei finogha te funei king Sekses. Mare lalahu khale ke ulugna mae Haman mala laseni ka narane aheva te keli te mala falehedi mae Jiu igre. Aonu kate lalahu te gnafa na, mare ne filoni narane te mala eni mare puhi igne, ka nabotho thilo narane gna nhigra leghu lahu Ada. Glalahu khale igne mare kiloi, purim.

⁸Aonu mae Haman tei ne cheke eghu ka king, “King Sekses, keha tothoghei naiknore au tafri ke lamnagna kantri te funei frunini iagho igne, nei ka provins te gnafa teu igre. Nodi kastom nei puhidi teure nhogri fara ka nodi kastom nei puhidi teu keha naikno te au igre. Naikno igre theome leghudi vetulagna nou kantri iagho igne. Eghume jame te snakredi iagho naikno igre te au teu agne na, igne ginauna na theome togho nigho iagho, nei jaola, na theome toghoni nou kantri iagho igne. ⁹Eghume, jame te keli na, iagho fatei cheke ka naikno te gnafa te au heva heva ka namono igre mala aknu falehe naikno igre. Jame te leghuni iagho unha te chekeni iara igne na, iara ginauna na tusu ari ka iagho nabotho thogha silva maladi nou gloku iagho igre eghuteuna iara ginauna lilisei sileni igne ka nogna tresari King.”

¹⁰Mae king ne hata koko ring balu nanghagna thegna te au ka geghesugna na ne tusu lao ka mae Haman, nodi naoka hatimare mae Jiu. ¹¹Aonu mae King Sekses ne cheke eghu ka mana, “Sileni nei naikno teu igre nou iagho. Iagho tangomana te eni unha te magnahagheni iagho na.”

¹²Eghume, ka narane nabotho thiloi gna nhigra ulu lahu, mae Haman ne kilodi nogna sekretri te gnafa mae King ka kantri tuana mala mei ka mana. Aonu mare ne rioriso soru nogna cheke mana igne ka buka vetula na. Mare ne rioriso vetula igne ka cheke te gnafa ka provins te gnafa te au ke lamnagna kantri igne. Aonu mae Haman ne hata ring igne ne lilisei soru nanghagna mae king Sekses ka letas igre mala laseni naiknore te letas igre neke mei funudi ka mae king. Aonu letas igre ne tei ka nogna minista te gnafa, ka mae funei te gnafa nei ka vike te gnafa teu king ka provins te gnafa ke lamnagna nogna kantri na. ¹³Hatimare mae te mala hata nonomho igre hata ne tei letas igre ka provins te gnafa gre. Igre cheke te au ka letas igne na, “Ka narane nabotho thiloi ka nhigra nabotho phei Ada, ghotilo mala kafe falehedi naikno Jiu te gnafa are mala theo kaisei naikno te karha na. Eghume mae nalhaꞌu majaghani, gaꞌase majaghani, mae biꞌo, naikno biꞌo nei goro sua teu are mala kafe lehe ka narane tuana. Ghotilo jaola mala hata fahui nodi glepo hatimare mae Jiu. ¹⁴Ghotilo mae funei ra mala iuꞌiju letas igne mala nomhini naikno ra. Eghuteuna, kate thoke mei narane igne, naiknore ginauna tangomana te tarabana te mala falehedi gnafa hatimare mae Jiu.”

¹⁵Aonu mae te mala hata nonomho igre mare ghosei ne hata ne tei nonomho igne ka namono biꞌo Susa, nei ka kantri te gnafa te funei frunidi king Sekses. Kate nomhini cheke igne, naikno te gnafa te au ka namono biꞌo Susa ne funu nanga nodi fara, naugna naiknore theome laseni te eni mare vetula igne. Nu King ghe mae Haman ne thofno keli tadi fara ka vetula igne ne kafe gnokro pari ne koꞌu waen ka narane igne.

Mae Modikae ne toreni Esta mala toghoni

¹Kate nomhini mae Modikae cheke igne, mana ne thofno mhaghu nogna fara. Mana ne thofno diꞌa nagnafagna fara ne rerheku nogna pohe na. Aonu mana kegra haghe ne pipichi ka pohe thona, nei ghiha nakrofu ka phaꞌugna na mala falalaseni nogna diꞌanagnafa. Mana nolo ne tei ke lamnagna namono biꞌo na balu tanhi fabiꞌo. ²Mana tei ne posa ka nogna grengatha mae King, nu mana theome tei ruma lamna suga. Naugna mae ihei te pipichi pohe te thapa jateula igne teuna, mana theome tangomana te tei ruma lamna ka sugagna King. ³Kate toutonu te tei tongana mare ka provins te gnafa igre nogna cheke mae king igne, mae Jiu te gnafa te au ka provins igre ne kafe diꞌanagnafadi fara ne tanhi fabrahu. Mare tanhi fabiꞌo ne tirodi ima, nei tirodi koꞌu neu, kmana naikno Jiu ne pipichi ka pohe thapa ne thuru pari ka nakrofu.

⁴Kate nomhini Esta ka nogna nalhaꞌu gloku, nei gaꞌase gloku teu igre unha te eni mae Modikae igne, naꞌa ne nanga nogna fara. Aonu naꞌa ne hata keha famane pohe ne fatei ka mae Modikae mala koko mana pohe te thapare nei mala tangomana mana te ruma lamna suga na, nu mana ne tirogna te hata pohe igre. ⁵Aonu Kuin Esta ne ehani mae Hatak. Mae Hatak gne kaisei mae neke vavahi king mala loku ranghini Esta. Esta ne kuruni mae igne ne tei ka mae Modikae mala hironi gaoghathogna unha te eni mana igne.

⁶Aonu mae Hatak ne tei ka mae Modikae fari hotei glalaba rhegna nogna suga biꞌo mae king na. ⁷Eghuteuna mae Modikae ne toutonu ranghini mae Hatak unha te diꞌanagnafani nei tanhini teu mana na. Mana jaola ne toutonu ka mana eigna silva teke nhaꞌa chekeni mae Haman ka mae king igne, nei nogna gaoghatho mana te mala falehedi mae Jiu te gnafa te au ke lamnagna kantri igne. ⁸Eghuteuna mae Modikae ne hata nogna letas mae Haman igne ne tusu lao ka mae Hatak. Letas igne cheke ranghidi naiknore mala falehedi hui hatimare mae Jiu. Mae Modikae ne cheke ka mae Hatak mala toutonu ka Kuin Esta gobigna lepo igre. Eghuteuna mae Modikae jaola ne cheke ka mana mala tei Kuin Esta mala toreni King mala kokhonidi nei toghodi eghu naikno Jiu igre.

⁹Aonu mae Hatak ne tei toutonu ka Esta unha teke chekedi mae Modikae igre. ¹⁰Aonu Kuin Esta ne kuru fapuloni mae Hatak mala tei cheke eghu ka mana, ¹¹“Thofno keli fara, nu kaisei vetula na la kulu auhi jare. Jame te theome kiloni king mae igne, nu tei mana ka sugagna King na teuna, mare ginauna na faleheni mae igne. Vetula igne thofno ulu fara. Eghume, naikno te gnafa, funu ka nogna funei mae king igre te tei posa ka naiknodi provins te gnafa igre kafe laseni vetula igne. Kaisei glepo te mala fakarhini naikno na igne kolho: Ihei te tusu lao King tagna nogna khodo teke hohoro ka gol igne ngala nate karha na. Eghume, iagho tore ghau iara mala tei filoni king, nu King la theome kilo ghau iara hi nabagna kaisei nhigra.”

¹²Kate nomhini nogna cheke Esta igne, ¹³mae Modikae ne fatei cheke igne ka Esta, “Thosei ghathoni iagho ne au fakelihi themu ka sugagna King na teu te ghatho iho ghami ghehati naikno Jiu gre. ¹⁴Jame te theome cheke iagho te kmu teu kolho ka narane te ninhigrana igre na, keha naiknoi ginau nate mei te mala togho ghita nei fakarhi ghita. Nu iagho baludi tharaknamure ginauna lehe. Nu tahati theome laseni, jau iagho mala Kuin kolho ka vido te ninhigrana igne jau?”

¹⁵Aonu Esta ne fatei cheke igne ka mae Modikae, ¹⁶“Iagho tei kilo fodudi naikno Jiu te gnafa te au ke lamnagna namono biꞌo Susa mala thosei ima nei koꞌu eghu nabagna thilo narane nei thilo bongi. Eghuteuna iara baludi nogu gaꞌase gloku te au balugu igre ginauna jaola na theome ima nei koꞌu eghu. Aonu ke leghudi thilo narane igre, neuba iara ne huhughuni vetula na, iara ginauna tei filoni king. Eghuteuna, neuba iara ne lehe, iara mala lehe ngala.”

¹⁷Aonu mae Modikae ne nomhini nogna cheke Esta igne ne tei eni unha teke chekeni naꞌa na.

Kuin Esta ne eni kaisei gaghamu ne kilodi King ghe mae Haman

¹Esta ne theome ima nabagna thilo narane. Ka fatilo narane na Esta ne pipichi nogna pohe nafnakno Kuin na ne tei ka sugagna King. Naꞌa ruma haghe ka grengatha na khegra neu jare fei te gnokro figri lao teu King igne. ²Kate filoni Esta te khegra teu jare na, King ne thofno keli tagna fara ka Esta. Aonu mana atha nogna khodo teke hohoro ka gol na ne tusu lao ka Esta. Aonu Esta mei namo ka mana ne habo ka khukrugna nogna khodo mana na.

³Eghuteuna king ne ghusna eghu, “Kuin Esta, unha te magnahagheni iagho na? Jame te chekeni iagho unha te magnahagheni ka iara na, neuba iagho ne toreni kaisei vido biꞌo ka gobigna lepo te au ka kantri te funei frunini iara igne, iara ginauna na tusu ari ka iagho.”

⁴Kuin Esta ne cheke eghu ka mana, “King, iara magnahaghei ghami ghopa mae Haman gognarogne mala mei ima balugu iara.”

⁵King ne faꞌuveni nogna cheke naꞌa igne ne chekeni mae Haman mala faghosei mei mala tei phiamare ka Esta.

Aonu King ghe mae Haman ne tei ka gaghamu biꞌo te tarabana Esta igne. ⁶Kate ghamu te gnafa na, mare ne koꞌu waen, eghuteuna ka vido tuana king ne cheke eghu ka Esta, “Kuin Esta, iagho chekeni ka iara unha te magnahagheni iagho na, iara ginauna na tusu ari ka iagho. Neuba iagho ne toreni kaisei vido biꞌo ka gobigna lepo te au ka kantri te funei frunini iara igne, iara ginauna tusu ari ka iagho.”

⁷Aonu Esta ne cheke eghu ka king, ⁸“King, jame te keli ka iagho na, iara magnahaghei ghami ghopa mae Haman teke kafe mei agne nathuꞌu ka keha gaghamu te tarabana malami ghopa teu iara igne. Kate mei ghopa na, iara ginauna na chekeni ka iagho unha te magnahagheni iara na.”

Mae Haman ne gaogaho mala faleheni mae Modikae

⁹Kate gnafa ima na, mae Haman ne thofno gleale’a fara. Nu mana tei ne filoni mae Modikae te gnokro teu ka geri grengathagna nogna suga mae king na. Nu kate filoni mae Haman te mei na, mae Modikae ne theome kegra haghe nei theome pogho soru ka mana. Aonu mae Haman filoni igne ne thofno diꞌatagna fara ka mae Modikae. ¹⁰Diꞌatagna mana igne thofno brana fara ka thiꞌagna na. Nu mana ne loku famaku gaoghatho igne ne theome eni kaisei glepo.

Mana tei posa ka nogna suga na ne eha meidi mae kheragnare, aonu mana ne chekeni Seres khetogna na mala mei gnokro baludi. ¹¹Kate kafe khapru mei te gnafa mae kheragnare, mana kegra haghe ne fafnaknoni nanghagna thegna na ke uludi mare hui. Mana ne falaseni thegna ka mare te kaisei mae dedei, nei kaisei mae au kmana thugna. Eghuteuna mae king jaola neke tusu lao kaisei sape nafnakno biꞌo ka mana. Eigna mana nogna praeminista mae king. Eghuteuna keha nogna mae minista te gnafa mae king igre au ke parigna mana. ¹²Mana jaola ne cheke eghu ka mare, “Filo si ghotilo! Kuin Esta neke eni kaisei gaghamu biꞌo malami ghepa mae king kolho. Naꞌa neke theome ehadi keha maei te mala mei na. Theo fara. Eghuteuna te chekeni naꞌa na, ghepa ginauna nake tei ima balugna naꞌa nathuꞌu na. ¹³Nu neuba, kaisei glepo na thofno goigonini fara nagnafagu iara na. Iara filoni mae Modikae, mae gna Juda te loku ka sugagna mae king igne. Mana theome ghatho tahu ghau iara. Neuba iara ne filodi kmana glepo te keli, gaoghathogu iara na theome keli kolho.”

¹⁴Aonu Seres baludi kheragna mana igre ne kafe cheke eghu, “Iagho na chekedi keha mae mala fakegra haghe kaisei gaju, nabagna varadaki glima mita haghegna na. Eghuteuna iagho ginauna tei hamerane nathuꞌu mala toreni king mala haru graragna mae Modikae ana mala fagefe hagheni mana ka gaju tuana. Aonu ke leghugna igne, iagho ginauna gleale’a kate tei ka gaghamu na.” Mae Haman nomhini igne ne thofno keli tagna fara. Aonu mae Haman ne chekedi nogna mae glokure ne tei jokra haghe kaisei gaju brahu mala haru graragna mae Modikae na mala fagefe haghe ka gaju tuana mala lehe mana.

King Sekses ne tusu lao nafnakno ka mae Modikae

¹Ka bongi igne, king ne theome thuru. Aonu mana ne chekedi nogna mae glokure mala hata mei ka mana buka te rioriso mare glepo te edi ke lamnagna nogna kantri na mala iuꞌiju ranghini. ²Aonu mare ne iuꞌiju eigna mae Modikae te cheke faheta ka King eidi mae Biktana ghe mae Teres. Phei mae igre mae mala reireghi nogna chogho mae king. Phei mae igre ne fariu riu hironi kaisei nabrou te mala faleheni mae king.

³Mae King ne cheke eghu ka mare, “Unha nafnakno nei nangha biꞌo eghu teke tusu lao tahati ka mana eigna igne?”

Mae glokure ne cheke eghu ka mana, “Tahati neke theome tusu lao kaisei glepo ka mana.”

⁴Aonu mae King ne ghusna eghu ka mare, “Keha nogu mae ofisa iara au ka suga igne, ba theo?” Ka vido igne la mae Haman ne ruma mei ka baragna nogna suga king na. Mana mei mala toreni King mala haru graragna mae Modikae na mala fagefe hagheni mana ka gaju na.

⁵Mae glokure ne filoni mana ne cheke eghu ka mae King, “King, mae Haman na la meihi ofou, mana magnahaghei te mei filo nigho iagho.”

Aonu King ne cheke eghu, “Kilo meini agne.”

⁶Aonu mae Haman ne ruma haghe lamna suga, eghuteuna mae king ne cheke eghu ka mana, “Praeminista Haman! Jame tusu lao iara kaisei nangha biꞌo ka kaisei nogu mae funei, unha glepo gne jame te tusu lao iara ka mana na?”

Nu mae Haman ne cheke eghu ka nagnafagna na, “Mae ihei gne te ghathoni mae king te mala tusu lao nangha biꞌo ka mana na? Theo kaisei mae aheva nga. Kaisei iara ngala!” ⁷Aonu mae Haman ne cheke eghu, “King, jame te magnahaghei iagho te tusu lao kaisei nangha biꞌo ka kaisei mae na, ⁸iagho chekedi nou mae glokure mala hata kaisei pohe ka nafnata pohe te pipichi iagho themu ana, eghuteuna jaola hata mei kaisei hose balu khepi nafnakno ka phaꞌugna na, jateula hose te saghe iagho themu ana eghu. ⁹Eghuteuna iagho vahini kaisei mae minista te biꞌo lahu ka keha nou mae minista te gnafa iagho igre mala falalaoni ni mae igne ka nou pohe iagho na. Eghuteuna mae igne mala gnokro ka hose, eghuteuna mae minista igne mala batuni mana tei farihotei glalabagna namono biꞌo na. Aonu kate tei phia mare na, mae minista igne na eha eghu fabiꞌo, ‘Filo mei ghotilo ka mae igne! Igne nogna puhi mae King te mala tusu lao nafnakno mana ka mae ihei te magnahagheni fara mana na!’ ”

¹⁰Mae King ne cheke eghu ka mae Haman, “Iagho faghosei tei hata mei nogu pohe brahu iara ia, eghuteuna hata mei nogu hose iara ia eghu! Iagho edi glepo igre ka mae Modikae, maegna Juda igne. Mae igne loku au agne. Iagho mala edi glepo igre, jateula te chekedi iara ka iagho igre eghu. Iagho thosei ghatho ihodi gobigna lepo kate chekedi iagho ra.”

¹¹Aonu mae Haman tei ne atha ne mei pohe brahu igne balugna kaisei hose. Eghuteuna mana ne nhaꞌa lao ka mae Modikae pohe brahu igne. Eghuteuna mae Modikae ne gnokro ka hose, eghuteuna mae Haman athani mana ne tei farihotei glalabagna namono biꞌo na. Kate nolo te tei phiamare na, mae Haman ne eha eghu fabiꞌo: “Igne nogna puhi mae King te mala tusu lao nangha biꞌo ka mae ihei te thofno magnahagheni mae King na!”

¹²Ke leghugna igne, mae Modikae neke pulo loku ka sugagna king. Nu mae Haman ne toku tafru tathagna nei foflogna teure, naugna mana ne thofno mamaja nogna fara ne rikha ne tei ka nogna suga na. ¹³Aonu mana ne toutonu ka Seres baludi kheragna re eidi gobigna lepo te edi ka narane igne.

Aonu khetogna nei kheragna teu mana igre ne cheke eghu ka mana, “Gognarona iagho theo kaisei nou nolaghi ka mae Modikae. Mana ginauna ulu nigho iagho, naugna mae igne kaisei mae Jiu.” ¹⁴Kate cheke eghu mare igne, nogna mae gloku mae King igre ne posa mei mala athini mae Haman. Mare magnahagheni mana te tei ka gaghamu biꞌo te tarabana teu Kuin Esta igne.

Mare ne faleheni mae Haman

¹Igne fapea fata te tei ima King ghe mae Haman balugna Kuin Esta. ²Kate koꞌu retilo na, King ne cheke eghu ka Esta, “Kuin Esta, jame te chekeni iagho unha te magnahagheni na, neuba iagho ne toreni kaisei vido biꞌo ka nogu kantri iara igne, iara ginauna na tusu ari ka iagho!”

³Esta ne cheke eghu ka mana, “King, jame te kelitamu iagho ka iara, eghuteuna gle’ani iagho unha te toreni iara na teuna, iara magnahaghei nigho iagho te fakarhini nakarhagu iara gne baludi nogu naikno iara te au ke lamnagna nou kantri iagho igne. ⁴Kaisei mae la fatei chekehi te mala falehe ghau iara baludi nogu naikno iara igre. Mana magnahaghei te falehe ghami ghehati hui gognarona. Jame magnahaghei ghami ghehati mala nou naikno gloku kolho iagho meuna, iara jame theome chekeni igne. Naugna igne theome puhi biꞌo mala nanga nou iagho. Nu mae igne magnahaghei te kafe falehe ghami ghehati hui!”

⁵Aonu King ne ghusna eghu, “Mae ihei te magnahaghei eni puhi igne?”

⁶Esta ne cheke eghu, “Iara chekeni mae Haman kolho. Mae igne nomi naoka ghehati, eghuteuna mana gognarona tarabana mala falehe ghami ghehati.”

Kate nomhini igne, mae Haman ne thofno mhaghu nogna fara ke uludi King ghe Kuin. ⁷King nomhi cheke igne ne thofno diꞌatagna fara, aonu mana kegra haghe ne jifla kosi. Kate filoni te jifla King na, mae Haman lasenihi King ginauna faleheni mana. Aonu mana au neu lamna suga ne toreni Esta mala thosei faleheni.

⁸Kate pulo mei king funugna ka nagare sisi na, mana ne filoni mae Haman te khoko soru ke kligna sape te gnokro teu Esta na. Mana magnahaghei te toreni Esta mala kokhonini. Nu king filoni mana ne eha eghu fabiꞌo, “Tore, mae igne magnahaghei te tapla jafra ka Kuin kate filo teu iara na!”

Kate cheke te gnafa king na, nogna mae gloku manare mei ne toku tafru tathagna nei foflogna teu mae Haman re mala laseni eigna mana nate lehe na. ⁹Eghuteuna kaisei mae, nanghagna na mae Habona, mana ne cheke eghu, “King, mae igne neke kulu tarabanahi kaisei gaju mala falehe naikno rhegna nogna suga na, brahugna gaju igne jame nabagna varadaki glima mita. Mana neke kulu eni igne malagna mae Modikae. Nu mae Modikae gne neke fakarhi nigho iagho ka mae Biktana ghe mae Teres ra.”

Aonu king ne cheke eghu, “Uve, ghotilo hata gnarho mala haru graragna mae igne mala fagefe haghe ka gaju teke eni mana thegna tuana mala lehe mana jare!” ¹⁰Aonu mare ne fagefe hagheni mae Haman ka gaju teke lisei haghe mana malagna mae Modikae teku igne. Kate eni te gnafa mare igne diꞌatagna mae king na ne hui.

King ne vahini mae Modikae mala Praeminista

¹Ka narane igne, King Sekses ne snakre lao nogna suga, nei nogna gobigna lepo teku mae Haman, nodi naoka naiknodi Juda igre, ka Kuin Esta. Eghuteuna ke leghugna igne, Esta ne cheke thakleni ka king, eigna mae Modikae gne te nebugna thegna na, aonu king ne snakreni mae Modikae te mala mei te filoni koba mana na. ²King ne vahini mae Modikae te mala nogna mae Praeminista tughuni mae Haman. Eghuteuna mana ne hata ring te au nanghagna thegna teke hata fapulo ka mae Haman na ne nhaꞌa lao ka geghesu gna mae Modikae na. Eghuteuna Esta ne snakre lao ka mae Modikae gobigna lepo teke nogna mae Haman igre mala reireghi mana.

³Ke leghugna igne, Esta tei ne pogho soru ke ulugna king ne tanhi. Aonu naꞌa ne toreni king mala lhotini nafnata puhi te diꞌa teke eni mae Haman ka naikno Jiu gre. ⁴King ne tusu lao khodo gol na ka Esta, aonu Esta kegra haghe ne cheke eghu, ⁵“King, jame te doglo ka gaoghathomu iagho na unha nate chekeni iara ka iagho igne, iara magnahaghei nigho iagho te eni kaisei vetula mala thosei eni nogna cheke mae Haman gne, eghuteuna iagho fatei cheke ka nou mae funei ra mala thosei falehe ghami ghehati naiknomi Juda. Naugna mae Haman neke ghaoghaho mala falehe ghami ghehati naikno Jiu te au ke lamnagna nou kantri iagho igne. ⁶King, jame te theome gnafa puhi igne na, iara ginauna thofno diꞌa nagnafagu fara. Naugna naiknogna kantri igne ginauna falehedi kheragu, nei vikegu teu iara igre. Eghume, iara nabagu na mala jaola lehe baludi.”

⁷Aonu King Sekses ne cheke eghu ka Kuin Esta ghe mae Modikae, “Fanomho. Nogna gaoghatho poru mae Haman mala falehedi naiknodi Juda gre teku igne la theo nafugnahi. Uve, iara neke snakredi nogu mae gloku gre neke hatani mae Haman neke tei fagefe hagheni mana. Eghuteuna iara gognarona la hatahi nogna gobigna lepo mana ra la tusu arihi ka iagho Esta. ⁸Nu nogu cheke iara igre la rioriso soruhi mare balugna nogu fagaglana iara na. Eghume theome tangomana kaisei naikno na teke tuthughu nogu cheke iara igre. Nu ghopa tangomana te rioriso kaisei cheke majaghani mala toghodi naiknodi Juda. Ginauna ghopa rioriso unha te doglo ka gaoghathomi ghopa na, eghuteuna hata nogu ring iara gne mala lilisei nogu fagaglana iara na tagna, eghuteuna fatei ka nanghagu iara.”

⁹Mare ne eni igne ka narane varadaki thiloi gna fatilo nhigra, Sivan. Mae Modikae ne kilo fodudi hatimare nogna mae sekretri te gnafa mae king igre ne rioriso soru kaisei cheke ka nanghagna King. Cheke igne ne tei ka mae Jiu te gnafa, ka nogna tothoghei minista te gnafa, ka nogna tothoghei mae primia te gnafa nei ka hatimare mae biꞌo te gnafa ke lamnadi kaisei gobi varadaki fitu provins, funu ka kantri India ke maghati na tei posa ka kantri Itiopia ke mosu na. Mare ne rioriso cheke igne ka nodi cheke provins te gnafa nei ka nodi cheke hatimare mae Jiu. ¹⁰Mae Modikae ne cheke ranghidi hatimare mae sekretri mala rioriso ka nanghagna mae King Sekses, eghuteuna lilisei fagaglana gna king. Mana ne fatei nogna cheke King igre ka mae mala hata nonomho igre tei ka hose, hose te oho mare malagna King mala ghosei tei ka namono te gnafare.

^11-12Cheke igne cheke ranghidi mae Jiu te gnafa te au ka namono biꞌo te gnafa gre mala kafe salo mei mala tarabana mala reireghidi thedi. Letas igne ne cheke eghu: “Ka narane nabotho thiloi gna nhigra Ada ke lamnagna finogha igne, ghotilo tarabana mala magra. Neuba ghotilo ne au ka provins te au ke lamnagna nogu kantri iara igne, jame ihei te hata balugna kaisei glepo mala magra mala mei falehe ghami ghotilo baludi khetomi nei thumi teuna, ghotilo falehedi. Ka narane igne, ghotilo ginauna au nomi nolaghi te mala falehedi iheire te magnahaghei mei falehe ghami ghotilore. Eghuteuna ghotilo ginauna hata nodi gobigna lepo teke khotodi naikno tuare. Igne nogu cheke iara ranghi ghami ghotilo Jiu te gnafa te au ke lamnagna nogu kantri iara igne. ¹³Ghotilo mae funei ra leghuni nogna vetula king igne chekedi naikno te gnafa ra eigna igne. Eghuteuna naikno Jiu te gnafa te au ka provins igne ginauna tarabana mala magridi mae naoka ka narane igne.”

¹⁴Aonu mae te mala hata nonomho igre saghe ka nogna hose King igne ne ghosei hata ne tei nonomho igne. Eghuteuna cheke igre jaola ne tei tongana ka namono biꞌo Susa.

¹⁵Mare ne fapichi lao ka mae Modikae pohe te jateula blu teu, ne pohei te vegha. Mare ne fapichi lao kaisei phoko ukru te brahu, nei kaisei khepi nafnakno te gol ka mana, aonu mana ne jifla mei ka suga gna king. Aonu naikno te gnafa ka vido te gnafa ke lamnagna namono biꞌo Susa igre ne kafe eha fabiꞌo balu gleale’a. ¹⁶Hatimare mae Jiu igre ne thofno gleale’a fara, naugna mare laseni tela uludi nodi naoka gre ka narane igne. ¹⁷Nogna cheke mae King igne ne tei tongana ka naikno Jiu te au ka namono biꞌo te gnafa ka provins te gnafa igre. Naiknore kelitadi fara ne eni kaisei gaghamu biꞌo. Eghuteuna kate filoni igne, kmana naikno ka keha vike igre ne mhaghu nodi fara ne salofodu mei baludi mare.

Mae Jiu ne uludi nodi naokare

¹Nogna cheke king igne ne thoke mei ka narane nabotho thiloi gna nhigra Ada. Narane igne neke vavahi mae Haman ka nanghagna king mala aknu falehe naikno Jiu te gnafa ka kantri igne. Nu narane igne ne theome jateula teke ghathoni mae Haman igne neu. Theo, naikno Jiu igre ne uludi nodi naoka re. ²Hatimare mae Jiu te au ka nogna namono biꞌo King igre, mare tarabana mala magra fapulo ka iheire te magnahaghei falehedi mare igre. Eghuteuna keha naiknore ne mhaghudi mae Jiu igre, eigna mare theome naba te eni kaisei glepo ka mare. ³Nogna minista te gnafa, mae primia te gnafa, mae funei biꞌo te gnafa, nei mae gloku te gnafa teu mae king ka provins te gnafa igre ne toghodi mae Jiu gre, naugna mare ne mhaghuni mae Modikae. ⁴Naikno te gnafa ka kantri igne ne kafe laseni mae Modikae. Mana gognarona thofno nolaghi biꞌo, naugna King neke vahini mana mala mae praeminista.

⁵Eghume, gognarona mae Jiu igre, mare falehedi nodi naokare, leghuni unha teke ghathoni mare na. ⁶Mae Jiu ne aknu falehe glima gobi naikno ka namono biꞌo Susa. ^7-10Igre nanghadi nabotho thugna nalhaꞌu mae Haman te aknu falehe mare ka narane igne: Mae Pasandata, mae Dalfon, mae Aspata, mae Porata, mae Adalia, mae Aridata, mae Pamasta, mae Arisae, mae Aridae nei mae Vaesata. Nu neuba ngau mae Jiu igre ne falehedi nodi naokare, mare theome hata kaisei glepo ka mare.

¹¹Ka narane igre king ne nomhidi niha naikno te aknu falehe mae Jiu igre ka namono biꞌo Susa. ¹²Mana ne cheke eghu, “Kuin Esta, mae Jiu igre aknu falehe glima gobi naikno baludi nabotho thugna mae Haman ra. Eghuteuna naikno te lehe ka provins igne jame ke kmana fara salaꞌudi igre. Unha ngau eghu te magnahagheni iagho na? Unha te toreni iagho ka iara na, iara ginauna tusu ari ka iagho.”

¹³Aonu Esta ne cheke eghu, “King, jame te keli kolho ka gaoghathomu iagho na, iara magnahaghei nigho iagho te snakredi mae Jiu te au ka namono biꞌo Susa igre mala eni nathuꞌu unha te eni mare gognarogne. Jaola iara magnahaghei nigho iagho te chekedi nou mae gloku ra mala fagefe haghe thinidi nabotho thugna mae Haman ra.”

¹⁴King ne eni unha te toreni Kuin Esta igne ne fatei cheke ka namono biꞌo Susa. Aonu nogna mae gloku king igre ne fagefe haghe thinidi nabotho thugna mae Haman gre mala filo naiknore. ¹⁵Ka narane nabotho fati gna nhigra Ada, hatimare mae Jiu ne aknu falehe thilo gobi naikno ka narane tuana. Nu mare ne theome vavaro nodi glepo naikno te lehe igre.

¹⁶Eghuteuna mae Jiu te au ka provins igre jaola ne magra heta. Mare ne aknu falehe fitu salei glima thogha naoka. Nu mare jaola ne theome hata kaisei glepo ka naikno te lehe igre. ¹⁷Ka narane nabotho thiloi gna nhigra Ada, magra igne ne tei tongana heva heva ke lamnadi provins te gnafa igre. Eghuteuna ka narane nabotho fati na, mare ne theome aknu falehedi nodi naokare. Nu mare ne eni kaisei gaghamu biꞌo ne thofno gleale’a fara ka narane igne.

¹⁸Nu mae Jiu te au ka namono biꞌo Susa ne vahini narane nabotho glimai gna nhigra Ada narane mala gaghamu nei gleale’a. Naugna mare neke aknu falehedi naokare ka narane nabotho thiloi nei nabotho fati. Eghuteuna ka narane nabotho glimai igne mare neke theome magra.

¹⁹Naugna igne, mae Jiu te au ka namono te ikodi igre, mare ghathoni narane nabotho fati gna nhigra Ada igne leuleghu finogha na. Narane igne kaisei nodi narane mala gnafa, mala ei gaghamu biꞌo, nei mala gleale’a biꞌo eghu mare. Eghuteuna soasopai tharakna na, mare tangomana te edi ghedi gano nei tufa namha eghu ka kheradire.

Gaghamu biꞌo te kiloi Purim

²⁰Mae Modikae ne chekedi hatimare mae sekretri mala rioriso ripot eidi unha te edi ka narane igne. Eghuteuna fatei letas ka hatimare mae Jiu te au namo ba te au khaba heva heva ka provins te gnafa ke lamnagna kantri te funei fruni mae King Sekses. ²¹Aonu mana ne cheke ranghidi naiknore mala ghathodi phei narane, nabotho fati nei nabotho glimai gna nhigra Ada leuleghu finogha. ²²Eigna ka narane igne hatimare mae Jiu neke bruedi nodi naokare. Eghuteuna jaola ka nhigra igne, nodi naꞌau papara nei diꞌanagnafa teku mae Jiu igre neke tughu ka pharikeli. Mae Modikae ne cheke ranghidi naiknore mala ei gaghamu biꞌo, nei gleale’a eghu ka phei narane igre. Eghuteuna mare mala tufa gano, ba glepo ka kheradi thofno ba ka iheire te au kokhonidi.

²³Aonu hatimare mae Jiu nomhini igne ne eni unha te chekeni mae Modikae igne leuleghu finogha. ²⁴Eigna tifa na mae Haman, thugna mae Hamedata, vikegna mae Agag igne neke naoka ka mae Jiu igre. Mare neke lalahu khale te kiloi purim mala laseni narane te mala falehedi mae Jiu te gnafa te au ka kantri igre. Mae Haman neke fatei cheke mala falehe fahuidi mae Jiu ka narane igne. ²⁵Nu kate nomhini King gaoghatho te diꞌa te eni mae Haman igne, mana neke fatei cheke ka nogna kantri na. Eghuteuna gaoghatho te diꞌa teke eni mae Haman ranghidi mae Jiu gre igne neke figri ka thegna. Aonu mare ne fagefe hagheni mana baludi nabotho mae thugnare ka gaju na. ²⁶Naugna igne, mae Jiu gre kilodi phei narane igre Purim, ba Lalahu Khale. Mare neke eni puhi igne, naugna mare neke ghatho fapulodi unha glepo teke edi ka mare igre. Naugna eidi gobigna lepo teke rioriso ka letas teke fatei mae Modikae igne, naiknore ne gnafa nei ei gaghamu biꞌo ka narane igne. ²⁷Mare ne lilisei vetula igne maladi mae Jiu nei iheire nate karha mei thogheiro, ba iheire te magnahaghei leghuni puhidi mae Jiu. Mare ne ghatho tahudi phei narane igre leuleghu finogha leghuni unha te chekeni mae Modikae ka letas na igne. ²⁸Funu gognaro te haghe na, tharakna te gnafa, phagusu nate karha mei thogheiro, nei naikno te au ka provins te gnafa nei ka namono biꞌo te gnafa teu igre mala ghatho tahuni leuleghu finogha Narane Biꞌo Purim igne.

²⁹Ke leghugna igne, Kuin Esta thugna Abihael ghe mae Modikae neke rioriso fapea letas eigna narane Purim. Repa rioriso igne mala laseni naiknore letas teke rioriso mae Modikae ululahu ia tutuani fara. ³⁰Repa neke fatei letas igne ka mae Jiu te au ke lamnadi kaisei gobi varadaki fitu provins te funei frunidi mae King Sekses. Ka letas igne repa neke cheke ranghidi mae Jiu te gnafa igre mala au ka pharikeli. ³¹Letas igne chekedi mare gnafa nei vikedi mare nate karha mei thogheiro. Mare mala tathaji phei Narane Purim igre kate thoke mei naranedire. Mare mala tathaji phei narane igre jateula keha vetula tifa te mala theome ima, diꞌanagnafa nei tanhi teu kate lehe naikno ra. Mae Modikae ghe Kuin Esta ne lilisei vetula igne. ³²Aonu mare ne rioriso soru cheke igre ka buka vetula na leghuni nogna cheke Kuin Esta eigna gaghamu Purim.

King Sekses ne keli tagna ka mae Modikae

¹King Sekses magnahaghedi naikno te au ka namono te gnafa ke lamnagna nogna kantri na te foli takis, neubane tei posa namono biꞌo te au ke tongna. ²Mare rioriso soru thoutonu eigna nogna nafnakno nei nogna nolaghi eghu king Sekses. Nei unha teke edi mae King ranghini mae Modikae, eghuteuna vahini mana mala kaisei nogna mae funei biꞌo ka nogna kantri na. Mare ne rioriso soru cheke igre ka nodi buka hatimare mae king di phei kantri Pesia ghe Media. ³Eghuteuna mae Modikae maegna Juda igne ne mei fapea mae ka mae King Sekses. Mae Jiu igre ne thofno ghatho tahuni mae Modikae, naugna mana loku heta ranghidi nogna naiknore mala au fakeli nei au kau pharikeli eghu ke lamnagna kantri igne.