Efesus
Letas Teke Riso Tei Mae Pol Ka Khiloau Efesus
Thoutonu kmo’ei eigna buka igne
Efesus gne kaisei namono biꞌo ka Provins Esia. Mae Pol neke thoke Efesus ka nogna fapea thei nei fatilo teu mana kate tei te mala toutonuni Nonomho te Keli na ranghidi iheire te theome Jiu (Filoni buka Mae Khuru 18:19-21 nei 19 philegna).
Glepo biꞌo ka gaoghathogna mae Pol na eidi glepo te keli teke ghathodi God mala edi teku re naugna ka mae Jisas Kraes. Ka 1 philegna thoke ka 3 philegna mae Pol neke toutonuni unha teke eni God te mala vahidi nogna naiknore. Eghuteuna mana toutonuni unha teke eni God na naugna ka nogna gloku mae Jisas Kraes, nei snakre meini mae Tharunga te Blahi na mala toghodi nogna naiknore. Fufunu ka 4 philegna, mae Pol neke cheke ka naikno khiloaure mala au fodu kaisei ngala ka Kraes. Mae Pol edi keha thotoghale mala laseni naiknodi Efesus re eigna naikno te gnafare la kaiseihi ka Kraes. Kaisei thotoghale na eigna khiloau baludi nogna naikno te gnafare jateula kaisei thini eghu. Thini igne thinigna Kraes eghuteuna Kraes pha’ugna na.
Phei vido ka letas igne
Kraes nei nogna Khiloau: 1:1–3:21
Nakarha majaghani balugna Kraes: 4:1–6:24
11God neke vahi ghau iara mae Pol mala nogna khuru mae Jisas Kraes.
Iara riso ari ka ghotilo naikno khiloau te au ka namono Efesus iheire te leghuni fabrahu mae Jisas Kraes. Naugna ghotilo nognahi mana.
2Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.
Nogna fablahi mae Jisas Kraes
3Tahati cheke fakelini God, Kmagna noda Lord Jisas Kraes! Naugna tahati nogna mae Jisas Kraes, God neke tusu mei ranghi ghita u fablahi te gnafa te mei funu kligna. 4Ka narane theome vuavuha nga teku nauthoglu gne God neke vahi ghita mala nogna thegna kate kaisei tahati balugna Kraes. Tutuani, God neke vahi ghita mala naikno blahi nei theo kaisei najafra ke ulugna mana. 5God neke namha ghita nei vahi ghita vuha tifa mala thugna mana ka nogna gloku mae Jisas Kraes. Igne unha te magnahagheni nei gleꞌani teu God na. 6Tahati kilo fnaknoni God eigna nogna khokofakasai te thofno keli fara! U khokofakasai igne mana neke khogla tusu ranghi ghita kolho naugna nogna gloku mae Jisas mae ihei God te namhani fara. 7Kraes neke foli fajifla ghita ka dadara glehegna ke kligna gaju fafatha jateula kaisei fafara teu te mala hata fadelei nakhiboda ka nogna khokofakasai God te bruara igne. 8U khokofakasai igne mana neke tusu mei neke salaꞌui ka tahati balu gaoghatho te keli nei glalase te keli. 9Mana neke enihi unha teke ghathoni thegna na. Uve, mana neke falalase ka tahati gaoghatho teke poru teku igne, eigna mana neke kulu ghathoni igne tifa mala kaputu ka mae Jisas Kraes. 10Nogna gaoghatho God igne ginauna thokei mei ka thofno narane te mala salofodu ka Kraes gobigna lepo te au kligna ba pari. Eghuteuna Kraes ginauna mala pha’udi gobigna lepore.
11Gobigna lepo igre God neke edi leghuni nogna gaoghatho nei glalase teu thegna na. Mana ne leghuni nogna gaoghatho thegna na neke vahi ghita tifa mala nogna naikno Kraes. 12Naugna igne, God neke vahi ghami ghehati mala fafnaknoni thegna ka iheire teke kulu fatutuani ni mae Kraes. 13Ghotilo jaola mala nogna naikno God kate nomhini thofno farirhiu te tutuani igne, u Nonomho te Keli eigna u thofno nakarha te malami ghotilo. Kate fatutuani ni ghotilo Kraes na, God neke tusu ranghi ghami mae Tharunga te Blahi teke nhaꞌa chekeni mana na, mala laseni ghotilo te nogna naikno mana re. 14Tutuani, naugna tahati la hatahi mae Tharunga te Blahi na, tahati ginauna tangomana te hata unha God teke nhaꞌa cheke ranghi ghita tifa na. Naugna igne tahati thofno laseni God ginauna thofno fasnagladi nogna naiknore balugna. Eghume tahati kilo fnaknoni God eigna nogna nafnakno biꞌo!
Nogna tharai mae Pol
15-16Eigna igne, iara theome gnafa te cheke fakelini God eimi ghotilo na. Tutuani, leuleghu fata na iara tangomana te ghatho ghami ka nogu tharaire funu ka narane te nomhi ghami iara te fatutuani ni ghotilo Lord Jisas nei nomhi ghami ghotilo te thofno namhadi nogna naikno te gnafa God re. 17Eghuteuna iara toreni God koba, Kmagna noda Lord Jisas Kraes, mala tusu ranghi ghami nogna Tharunga te Blahi na mala tangomana ghotilo te filo glani puhigna God na, nei thofno laseni mana. 18Iara toreni noda God mala tusu ari glalase te biꞌo. Glalase igne ginauna togho ghami ghotilo mala filo glanini unha teke kilo ghita God na. Jaola glalase igne mala togho ghami ghotilo te mala filo glanini thofno glepo keli te gnafa teke nhaꞌa cheke ranghidi nogna naiknore. 19-20Jaola mala filo glanini ghotilo thofno nogna nolaghi te heta fara te loku ke lamnadi iheire te fatutuani ni mana. Nolaghi biꞌo te loku ke lamnada igne u nolaghi teke fakarha fapuloni mae Kraes kau glehe ia, eghuteuna fagnokroni ka sape nafnakno fei nhetagna kligna. 21Tutuani, Kraes na au kligna mala funei frunidi hatimare mae King te gnafa, nei hatimare mae engel, nei keha nafnata nolaghi fateo langau ka maloa gne. Kraes au nangha te biꞌo tulao ke uludi keha nangha te au nolaghi biꞌo ka nauthoglu igne, ba ka keha narane te mei ginau. 22God lilisei gobigna lepo fateo ke parigna nogna nolaghi Kraes. God tusu ranghini Kraes u nolaghi mala pha’ugna khiloau mala jateula pha’udi eghu gobigna lepo te gnafare. 23Eigna khiloau na thinigna Kraes, eghuteuna ka thini tuana te au mae ihei te au nolaghi ke klignadi gobigna lepo te au heva heva.
2Karha balugna Kraes
1Tifa na ghotilo neke au ka glehe, naugna ghotilo neke huhughuni God nei edi unha glepo te diꞌa. 2Uve, tifa na ghotilo neke leghuni puhidi naikno te diꞌa ka nauthoglu igne. Ghotilo neke leghuni kolho mae Satan, mae funeidi naitu ka maloa gne, eigna mana gognaro na tangomana te funeidi iheire naikno te theome leghuni God. 3Tifa na, tahati te gnafa na neke au jateula mare neku. Tahati neke diꞌa nei leghuni kolho unha te magnahagheni theda na, eigna tahati eni unha thini nei gaoghathoda te magnahagheni. Naugna igne, God nabagna te para ghita jateula keha naikno te theome leghuni mana re eghu. 4Nu neuba, tahati nabada te lehe naugna u nakhiboda, God neke kokhoni ghita fara nei namha ghita fara. 5Kate au tahati ka glehe eigna te huhughuni nogna cheke na, God neke fakarhi ghita balugna Kraes. Eghume ghotilo karha ka nogna khokofakasai God. 6Naugna te kaisei tahati balugna na, God jaola ne fakarha fapulo ghita balugna Kraes mala tangomana tahati hui te mala au balugna Kraes kligna. 7Eghume, gaoghatho teke eni mana igne tangomana te falase ghita tifa tifa nogna khokofakasai biꞌo nei nogna thotogho ka tahati naugna mae Jisas Kraes. 8-9Ka narane teke fatutuani ghotilo na, God neke fakarhi ghami. Ghotilo theome tangomana te fahaehaghe ghami themi neke hatini thofno nakarha na naugna gloku teke edi themire teuna. Theo. Ghotilo neke hatini thofno nakarha igne ka nogna khokofakasai God. 10Gognaro na God nake vuavuha fapulo ghita eghuteuna tusu ranghi ghita u karha majaghani kate salo fodu ghita balugna mae Jisas Kraes. Mana neke eni igne mala tangomana tahati te edi unha gloku te keli teke kulu tarabana thegna te mala edi tahatire.
Mae Kraes ne salo fodu naikno te gnafare
11-12Mae Jiure vahe mae sua nalha’ure ka khamedi thedi, eghume kilodi thedi “Naikno vahe”. Nu mare kilo ghami ghotilo “Naikno theome vahe”. Naugna ghotilo neke theome karha mei Jiu. Uve, ghotilo ghathoni igne. Tifa na ghotilo neke au khaba fara ka Kraes neke theome au fodu baludi naikno teke vavahi God re. Ka narane tuana ghotilo neke au ke kosigna nhaꞌa cheke teke cheke mei God ka nogna naiknore. Eghuteuna ghotilo fiti au kolho ka nauthoglu igne aheva ghotilo te theome au kaisei glepo te keli te mala ofoni, nei ghotilo theome laseni God. 13Uve, tifa na ghotilo neke au fakhaba ka God. Nu gognaro na ghotilo kaisei balugna mae Jisas Kraes. God hata ghami ghotilo mala mei namo ka mana, naugna dadaragna Kraes teke thofa ka glehegna jateula kaisei fafara.
14Ka Kraes tahati gognaro na au ka pharikeli. Naugna kate snakreni thegna te mala lehe na, mae Kraes neke hata koko puhi naoka te fafnotadi fabrahu teu mae Jiu nei mae te theome mae Jiu. Mana neke salo fodudi mare mala kaisei naikno kolho. 15Mana neke hata koko nodi vetula hatimare mae Jiu gre baludi keha nafnata grereghidi vetulare mala theome fotadi naikno te theome leghudire ka naikno te leghudire. Ka puhi igne, mana neke hata fodu phei nafnata naikno igre mala kaisei nafnata naikno majaghani balugna thegna nei mala au kau pharikeli. 16Kate lehe kau gaju fafatha na, Kraes neke fahuhui puhidi mare te au naoka fabrahu igne. Mana neke salo fodu phei nafnata naikno igre mala kaisei thini ngala, eghuteuna ke hata fapulodi ka God. 17Eghuteuna Kraes neke mei toutonu u Nonomho te Keli eigna pharikeli maladi naikno te gnafa, ka ghotilo iheire te theome Jiu te au khaba ka God nei ka mae Jiu te au namo ka mana langau eghu. 18Eghume gognaro na tahati hui, mae Jiu ba mae te theome Jiu tangomana te mei ke ulugna God Kmada ka nogna nolaghi kaisei Tharunga te Blahi.
19Eghume ghotilo iheire te theome Jiura, ghotilo theome jateula naikno te posa mei ka namono delei eghu. Theo. Ghotilo gognaro na kaisei vike baludi nogna naikno God, nei tharaknagna mana. 20Tahati naikno khiloau na jateula kaisei suga teke horo God eghu. Suga igne babana famaku ke klignadi hatimare mae khuru nei hatimare mae profet, jateula gogho thina eghu, eghuteuna thofno thina ulugna suga igne thegna mae Jisas Kraes ngala. 21Mana thegna te loku haghe gna suga thongana igne mala au heta kate loku fodu, eghuteuna mana te mala babana fabiꞌo gna te mala Sugablahi nogna Lord. 22Eigna ghotilo kaisei balugna Kraes, ghotilo jaola mala kaisei baludi naikno khiloau aheva te au God mae Tharunga te Blahi.
3Nogna gloku mae Pol
1Naugna igne, iara mae Pol te au ka suga sosolo eigna iara ne leghuni mae Jisas Kraes. Iara tarai ghami ka God. U gaoghathogna te sosoloni iara gne naugna iara ne toutonuni chekegna God na ka ghotilo iheire te theome Jiu.
2Iara thofno laseni eigna ghotilo nomhinihi ka nogna khokofakasai God. Mana neke tusu ranghi ghau iara gloku igne mala togho ghami ghotilo. 3God neke falalase ka iara mala laseni u gaoghatho teke theome laseni naiknore tifa na igne. Iara kulu riorisohi katha vido eigna igne, 4jame iu’iju fakeli ghotilo unha te risoni iara na meuna, ghotilo ginauna laseni unha te laseni iara eigna Kraes teke theome laseni tifa igne. 5Tifa na God neke theome chekeni ka naiknore eigna u gaoghatho teke poru igne. Nu gognaro na Tharungagna God na la falalasehi ka hatimare nogna mae khuru te blahi nei hatimare nogna mae profet. 6U gaoghathogna Nonomho te Keli teke poru igne God magnahaghe ghami ghotilo te mala kaisei vike nei kaisei thini balumi ghehati mae Jiu. Eghuteuna unha teke nhaꞌa chekeni God ka ghehati eigna mae Jisas Kraes igne mala nomi la ghotilo.
7-8Ka nogna nolaghi, God neke tusu mei ka iara khokofakasai mala toutonuni u Nonomho te Keli igne. Tutuani, neubane iko lahu ngau iara ka nogna naikno God gre, God vahi ghau iara ka nogna khokofakasai na mala tei ka naikno te theome Jiu gre mala toutonuni Nonomho te Keli eidi nogna gloku te keli fara Kraes te theome naba tahati te lasedire. 9Eghuteuna mana vahi ghau iara mala toghodi naikno te gnafa gre mala filo glanini nagnafagna God eigna nogna gaoghatho poru igne. Tifa na, God mae ihei teke vuavuhadi nauthoglu ghe maloa gre neke theome snakredi naiknore mala laseni unha te ghathoni mana na. 10Nu gognaro na God ne babana u khiloau gne mala falalase nogna glalase te keli te gnafa God ka hatimare mae engel nei keha nafnata nolaghi langau ka maloa gne. 11Unha te eni God igne ne thofno horoghoto ka puhi teke ghathoni mana ka vuvuhagna na. Tutuani fara, mana ne eni igne ka nogna gloku mae Jisas Kraes noda Lord. 12Naugna tahati kaisei balugna Kraes nei tahati fatutuani ni mana, nagnafadare heta fara nei tahati theome mhaghu te mei ka God na. 13Eghume iara magnahaghei te cheke faheta fara ka ghotilo, thosei glaꞌe kate filo ghau iara te au papara eimi ghotilo gne, naugna iara eni igne mala togho ghami ghotilo.
Nogna namha Kraes
14Eghume gognaro na iara tarai ke ulugna Kmada kligna. 15Eigna mae fatutuani te gnafa te au nga teu ka nauthoglu gne, ba iheire te au teu kligna gognaro gne mana kilodi goro thugna. 16Iara toreni God ka nogna nafnakno biꞌo kligna mala snakre meini nogna Tharunga te Blahi na ka ghotilo, mala tangomana ghotilo te heta ka nagnafamire. 17-18Uve, iara toreni Kraes mala au mana ka nagnafamire, eigna ghotilo fatutuani ni mana. Iara jaola toreni mana eigna gobigna lepo te edi ghotilo re thofno jifla mei ka nomi namha te biꞌo ranghini God nei naikno te gnafa, mala ghotilo nei nogna naikno te gnafa God re au glalase te mala lase fakelini nogna namha Kraes te biꞌo fara nei brahu fara nei haghe fara nei mamhara fara. 19Iara toreni God mala fodu e salaꞌui ghotilo ka puhigna God thegna kate lase fakelini ghotilo nogna namha Kraes igne. Iara toreni igne neubane theo kaisei naikno tangomana te thofno ruruthani ba thofno lase fakelini u namha igne!
20Nogna nolaghi God te loku ka nagnafada gre tangomana te eni glepo te ulu fara ka unha tahati te toreni ba ghathoni. 21Tahati nogna khiloau mana eigna tahati kaisei balugna mae Jisas Kraes, tahati ginauna kilo fnaknoni God fabrahu tifa tifa. Amen.
4Tahati te gnafa na mala kaisei au fodu
1Iara au ka suga sosolo naugna iara ne loku ranghini Lord. Eghume iara cheke heta ka ghotilo, eigna nakarhami ghotilo na mala au doglo mala nanaba ka puhigna God mae ihei te kilo mei ghami na mala leghuni mana. 2Ghotilo mala edi fabrahu glepo igre: au faleghu, au blagna, nei thosei diꞌatami faghose ka keha naiknore. Eghuteuna kate au nogna puhi fadidiꞌa kaisei naikno ka ghotilo na ranghini kheragna fofodu na, te keli na phiamare thosei magra, nu fari fathaegoi ka puhi namha. 3Tharunga te Blahi na salo fodu ghami ka puhi pharikeli. Hati nhetami na mala au ka puhi tuana ke lamnami. 4Tahati naikno khiloau gre kaisei thini ngala. Jare kaisei Tharunga te Blahi. Eghuteuna God neke kilo ghita tahati gnafa mala hata kaisei glepo te keli ngala te ofoni teu tahati na. 5Jare na kaisei Lord, kaisei fatutuani, nei kaisei apublahi. 6Jare na kaisei God Kmada gnafa. Mana funei fruni ghita gnafa, nei au heva heva ka nauthoglu gne, nei au baluda gnafa.
7Kraes neke tusu ranghi ghita soasopai khokofakasai te mala loku ranghini God leghuni thofno gaoghathogna. 8Naugna igne grioriso te blahi na ne cheke eghu agne,
“Kate haghe kligna ka thofno namono na,
mana na sesekai kmana naikno balugna.
Eghuteuna tusu lao khokofakasai ka naiknore.”
9Te chekeni na, “Mana neke haghe kligna,” unha eghu gaoghathogna na? Gaoghathogna na mana neke kulu soru mei ka nauthoglu igne. 10Tutuani fara, Jisas mae ihei teke soru mei, eghuteuna mana la mae ihei teke haghe na. Mana haghe ne tei sala’uni maloa gne. Mana neke eni igne mala au heva heva ka gobigna lepo fateore. 11Eghuteuna Jisas mae ihei teke tusu mei ka tahati u khokofakasai te mala loku ranghini God. Mana neke vavahi keha mae mala khuru, keha mae mala profet, keha mae mala toutonu eigna Nonomho te Keli, keha mae mala velepuhi nei reireghini nogna khiloau na. 12Mana neke eni igne mala tangomana nogna naikno te gnafa God re te mala loku fakelidi nogna glokure, nei mala kotu heta thinigna Kraes. 13U gloku igne na theome gnafa ghilei kaisei ngala tahati hui ka fatutuani nei ka glalase eigna Thugna God. Eghuteuna tahati ginauna naikno puhi nei kotu haghe jateula Kraes ka nakarhagna eghu.
14Kate kotu haghe te naikno biꞌo na, tahati ginauna theome jateula vaka te pala tafri ka nuri ba galo biꞌo ia eghu. Tahati ginauna theome tangomana te ghosei leghuni u nafnata farirhiu te chaichaghi na. Neuba hatimare mae velepuhi chaichaghi are ne magnahaghei chaghi ghita tahati kolho mala leghuni tahati nabrou te jafra na. 15Theo! Tahati mala cheke ranghidi kheradare unha te tutuani nei doglo balu namha, mala tangomana tahati te thofno kotu haghe te mala kaisei balugna Kraes mae ihei te pha’ugna khiloau. 16Naugna Kraes te pha’ugna u thini na, sopagna vido te gnafa ka thini na famane loku fodu fakeli, te loku fodu baludi gnarho teke tusu mei Kraes. Soasopa vido ka thini na eni fakeli nogna gloku na. Eghuteuna gloku igre tangomana te toghoni thini tongana na te mala kotu nei heta balu namha.
Puhi majaghani
17Ka nanghagna Lord, iara magnahaghei te cheke heta ka ghotilo, thosei au fabrahu jateula naikno te theome fatutuani ni God eghu. Gaoghathodire theo nafudi kolho. 18Tutuani mare theome laseni kaisei glepo nogna God naugna nagnafadire ne patugama fara. Eghume mare au khaba ka thofno nakarha te tutuani teke tusu mei God igne. 19Mare la theo hi te haimini mamaja na, mare heta ghedi ka unha te jafra nei magnahaghei fara te eni koba unha glepo te diꞌa na.
20Nu theome nafnata puhi tuana teke farirhiu ghami te mala leghuni Kraes na eghu. Theo. 21Ghotilo neke thofno nomhinihi eigna mae Jisas Kraes, eghuteuna ghehati neke farirhiu ghami ghotilo unha te tutuani na. 22Tutuani, ghehati neke farirhiu ghami ghotilo mala lilisei puhi te diꞌa gna tifa teke leghuni ghotilo ka nakarhamira. Naugna puhigna tifa igne fodu ka chaichaghi nei puhi diꞌa, eghuteuna puhigna tifa na tangomana te fadidiꞌa ghami fabrahu. 23Ghehati neke farirhiu ghami mala thofno majaghani fara ka nagnafami nei gaoghathomi teu ghotilo re. 24Uve, ghehati neke farirhiu ghami ghotilo mala au ka thofno puhi majaghani, eigna God neke vuavuha ghami ghotilo mala leghuni puhigna thegna na mala thofno doglo nei blahi eghu.
25Eghume te keli na ghotilo lilisei puhi te chaichaghi gne. Eghuteuna unha te chekeni ghotilo ka naikno khiloaure glepo te tutuani na ngala, naugna tahati te gnafa na kaisei ngala ka thinigna Kraes. 26Ne diꞌa tamu nganu, thosei snakreni diꞌa tamu na mala eni kaisei najafra. Thosei diꞌatami fabrahu ghilei plulu naprai na. 27Thosei snakreni mae Satan mala fadiꞌani nakarhami na. 28Mae ihei te blau koba na, lilisei nafnata puhi tuana mala ke funu loku fakeli. Te keli na mana loku heta mala tangomana te toghoni thegna ka puhi te keli nei tangomana te toghodi iheire te kuma.
29Kate cheke na, ghotilo thosei chekeni kaisei cheke te diꞌa. Nu te keli na, chekeni ngala unha te nabagna te mala nomhini naiknore, eghuteuna nomi cheke ghotilo re ginauna tangomana te toghodi naikno te fanomhore. 30Eghuteuna thosei fadiꞌa nagnafani mae Tharunga te Blahi, naugna mana nogna nhaꞌa cheke God eigna God ginauna thofno fasnagla ghami ka narane leghu lahu na. 31Lilisei puhi te gnafa te poru ka nagnafamire te mala fari fadiadiꞌai; thosei cheke diꞌa ba diꞌatami; thosei fnaja fabiꞌo; thosei vuavuha cheke; thosei majora. 32Nu te keli na ghotilo fathaegoi nei fari namhai. Fari hata fadelei nakhibo jateula God teke hata fadeleidi nakhibomira eghu naugna ghotilo fatutuani ni Kraes.
5Tahati au ka naphae
1Ghotilo goro thugna God, eigna mana namha ghami ghotilo. Eghume ghotilo mala leghudi puhigna mana re. 2Ghotilo mala biꞌo nomi namha na jateula Kraes eghu ka nagnafamire. Eigna mana namha ghita fara neke snakreni thegna neke lehe eida tahati jateula kaisei fafara te keli tagna God. Jateula mare te fafara nafnahi ka mana te sisiri keligna nei gleꞌani mana teu ia eghu.
3Nu te gnognoro ba eni te kaisei nafnata glepo te diꞌa ba mamagna teu igre, thofno theome naba ghotilo naikno blahi nogna God ra te edire. 4Jaola, theome keli te nomhidi ka ghotilo te chekedi u nafnata cheke te diꞌa ba cheke glalama ba nafnata cheke muamugna te thona. Glepo igre theome doglo te edi ghotilo re. Nu te keli na ghotilo mala cheke fakelini God. 5Ghotilo themi la lasenihi igne, nafnata naikno te gnognoro nei edi nafnata glepo te diꞌa igre teuna, mare theo sapedi ka nauthoglu majaghani Kraes ghe God te funei frunini na. Eghuteuna jaola iheire te mamagnadi nodi glepo keha naiknore, mare theo sapedi jare naugna naikno igre jateu te tufru soruni mumuju eghu kolho. 6Ghotilo thosei snakreni kaisei naikno te mala chaghi ghami ka cheke te theome tutuani are. Tutuani fara, God ginauna na fatedi naikno te theome leghuni mana nu leghudi puhi te diꞌa igre teuna. 7Eghume ghotilo thosei fofodu baludi nafnata naikno igre.
8Tifa na, ghotilo neke au ka naromno, nu gognaro na ghotilo kela au ka naphae, naugna ghotilo nognahi Lord. Eghume ghotilo leghuni puhidi naikno te au ka naphae, 9naugna puhigna u naphae na tangomana tahati te edi glepo te keli nei doglo nei tutuani. 10Fariuriu mala filo glanini gloku te keli tagnadi Lord re. 11Eidi naikno te au nga teu kate romno gre, ghotilo thosei fofodu baludi mala edi glepo te diꞌare. Eigna glepo igre mala fadiꞌadi kolho nakarhadi naiknore. Nu ghotilo falalase ranghidi unha te eni mare igne mala filo glanidi mare nodi najafrare. 12Glepo te edi poru naiknore igre, neubane chekeni kolho tahati, thono mamaja noda ni fara. 13-14Nu kate thakle te gnafa gobigna lepo igre kate phae na, naiknore ginauna thofno filo glanidi glepo te edi thedi igre. Eigna u naphae na mala fathakledi gobigna lepore. Naugna igne kaisei cheke naba na cheke eghu,
“Dofra haghe ghotilo iheire te thuru ra! Kegra haghe ka glehe,
eghuteuna mae Jisas Kraes ginauna faphae ghami ghotilo.”
15Eghume, kheraguro, famane filo fakelini u nafnata nakarha te batuni ghotilo na. Thosei jateula naikno te theome laseni kaisei glepo ra eghu, nu jateula naikno te au gaoghatho te keli ke lamnadi ra eghu. 16Tutuani, naugna puhi te diꞌa na heta fara gognaro na, leuleghu fata na ghotilo tangomana te mala edi unha glepo te kelire. 17Thosei fanolini nakarhami na, nu fariuriu mala filo glanini unha Lord te magnahaghei eni iagho na. 18Thosei koꞌu me dranga ka waen, naugna igne ginauna batu fadiꞌadi puhimi ghotilo re. Nu snakreni mae Tharunga te Blahi na mala fodu ke lamnami mala batu fakeli ghami. 19Eghuteuna kate khapru te koje na, ghotilo mala koje ka Sam nei ka himu nei keha khoje te tusu mei mae Tharunga te Blahi na. Ghotilo koje nei kilo fnaknoni Lord ka nagnafamire. 20Eghuteuna ka nanghagna mae Jisas Kraes noda Lord, ghotilo cheke fakelini God Kmada eidi gobigna lepo te edi leuleghu narane.
Cheke eigna tharakna ka khiloau
21Lisa lao ghami fari themi naugna nomi ghatho tahu eigna Kraes.
22Ghotilo gaꞌase tholaghi ra leghudi khetomi are jateula ghotilo te leghuni Lord eghu. 23Naugna mae nalhaꞌu na pha’ugna khetogna na, jateula Kraes te pha’ugna khiloau. Khiloau na u thinigna Kraes eigna mana neke fakarhinihi khiloau na. 24Eghuteuna ka puhi khiloau te leghuni Kraes igne, gaꞌase tholaghire mala jaola leghudi fabrahu khetodire.
25Ghotilo mae tholaghi ra, namhadi khetomi are jateula Kraes te namhani fara khiloau gne eghu. Naugna mana namhani khiloau na. Mana neke snakreni thegna neke lehe mala fakarhani khiloau na. 26Mana neke eni igne mala fablahini nei mala tihi fagaeni eghu khiloau na ka khoꞌu nei ka chekegna. 27Naugna kate hata mei Kraes khiloau na ka thegna na, mana magnahagheni khiloau na te famane keli fifilogna na mala theo kaisei najafra tagna, nu mala thofno doglo fara nei blahi eghu. 28Ghotilo mae nalhaꞌu ra mala namhadi khetomi are jateula ghotilo te namhadi fara thinimi themi are eghu. Kate namhani mana khetogna na, mana namhani thegna. 29Tutuani, theo kaisei mae te magnahaghei fadiꞌani thinigna thegna na. Theo. Tahati ima fakeli nei taji fakelini eghu thinida na jateula Kraes te taji fakelini khiloau. 30Naugna tahati ka khiloau na jateula vido thinigna mana eghu. 31Naugna igne u grioriso te blahi na cheke eghu, “Mae nalhaꞌu na ginau jifla kokodi idogna kmagnare mala au fodu ka khetogna na, eghuteuna repa ginauna kaisei ngala.” 32U cheke tuana e poru gaoghathogna na eghuteuna iara cheke eidi tuare agne naugna cheke tuana jaola cheke eigna Kraes nei nogna khiloau. 33Nu cheke tuana jaola eimi ghotilo. Eghume, ghotilo mae tholaghi te gnafa ra namhadi khetomi are jateula ghotilo te namha ghami themi are eghu, eghuteuna ghotilo gaꞌase tholaghi ra jaola ghatho tahudi khetomi are.
6Goro sua nei idodi kmadi
1Goro sua, igne puhi te keli na, leghudi idomi kmami are. Naugna Lord magnahaghe ghami ghotilo te eni tuana. 2Tutuani, u cheke ulu lahu ka vetula na au balugna kaisei nhaꞌa cheke ne cheke eghu, “Ghatho tahudi idomi kmami are, 3aonu gobigna lepore ginauna keli ranghi nigho nei mala tangomana iagho te karha te tifa na ka nauthoglu igne.”
4Iara magnahaghei cheke ka ghotilo mae iheire te kmadi suara, thosei eni kaisei puhi ba cheke te mala diꞌa tadi fara thumire. Nu ghotilo taji fakelidi nei farirhiudi eghu ka puhida tahati naikno khiloau.
Cheke eidi naikno sneka
5Ghotilo naikno sneka ra, leghudi nomi funei ka nauthoglu gne balu mhaghu nei ghatho tahu eghu. Eghuteuna gaoghathomi ghotilo re mala au doglo, eigna ghotilo leghudi mare jateula ghotilo te leghuni Kraes. 6Theome keli te leghudi ghotilo mare kate filo teu kolho mare na, tuana puhi mala famaemahedi kolho mare. Nu te keli na ghotilo thofno leghudi mare ka gaoghathomi fateo mala eni unha te magnahagheni God na, naugna ghotilo thofno nogna mae sneka Kraes. 7Gleale’a ka nomi gloku na, naugna ghotilo theome loku ranghidi naiknore kolho, nu ghotilo loku ranghini noda Lord. 8Ghotilo te gnafa na laseni igne, eigna Lord thegna ginauna tabadi iheire te loku fakelire, neubane mae sneka ba theome mae sneka.
9Ghotilo mae funeira, jaola keli ranghidi nomi mae snekare. Eghuteuna koko nafnata puhi te famamhaghudi nomi mae sneka are. Naugna ghotilo laseni nomi funei ghotilo nei nodi funei mare teuna au kligna, eghuteuna naikno te gnafa na kaisei nanaba ngala ka mana.
Naikno khiloau na jateula mae soldia eghu
10Nogu cheke leghu lahu iara ka ghotilo na igne. Kegra heta ka nogna nolaghi biꞌo Lord, eigna ghotilo kaisei balugna mana. 11Fahaghe nomi gobigna lepo mala magra teke tusu ari God ka ghotilo are mala nabami te kegra fanogradi nogna saosagro te diꞌa mae Satan. 12Tahati theome magrini nogna nanheta nei glalase eghu naikno kolho, nu tahati magrani mae Satan nei nogna nolaghi. Tutuani fara, tahati magridi naitu ka maloa gne nei keha nafnata nolaghi te au ka nauthoglu te romno te funei frunini mae Satan igne. 13Eghume, gognaro na ghotilo fahaghe gobigna lepo te mala magra teke tusu ari God ka ghotilo ra. Eghuteuna ghotilo ginauna tangomana te fanograni mae naoka igne, neuba mana ne mei ka unha narane te mala eni ranghi ghami ghotilo glepo te diꞌa fara na. Eghuteuna kate magra te gnafa na, ghotilo ginauna kegra heta fabrahu. 14Eghume, ghotilo kegra heta balugna nomi nhugha mala magra na, igne u cheke te tutuani na. Eghuteuna fahaghe nomi phokore, igne puhimi ghotilo te doglore. 15Fahaghe sadol ka ghahemi are, igne puhi te mala tarabana fabrahu ghotilo mala toutonuni u Nonomho te Keli eigna pharikeli na. 16Jaola ghotilo louloku fabrahu nomi greoreo na, mala tafradi jata khaꞌaghi te fada mei mae Satan ka magra na. Glepo mala tafra na igne nomi fatutuani ghotilo na. 17Eghuteuna ghotilo fahaghe kaisei khepi mala magra, igne puhigna God te mala fakarhi ghami ghotilo na. Ghotilo jaola hata nogna naflahi biꞌo mae Tharunga te Blahi na, igne chekegna God na.
18Kate edi ghotilo glepo igre, ghotilo tarai nei toreni God eghu mala togho ghami mana. Tarai fabrahu ka nogna nolaghi mae Tharunga te Blahi. Tutuani, ghotilo tarabana fakeli koba nei thosei babaꞌo nei taraidi koba hatimare nogna naikno God fateote’o. 19Eghuteuna ghotilo jaola tarai ghau iara, mala tangomana God te tusu mei ka iara cheke te mala toutonuni iara na. Tarai ghau iara te mala theome mhaghuni te mala toutonu cheke te tutuani eigna Nonomho te Keli na. 20Naugna iara mae gloku mala toutonuni u Nonomho te Keli igne, neubane au ka suga sosolo iara gognaro gne. Ghotilo tarai ghau iara mala theome mhaghu iara kate toutonuni Nonomho te Keli ka puhi te naba te mala eni iara na.
Nogna cheke leghu lahu mae Pol
21Mae Tikikas ginauna toutonu ka ghotilo thoutonu eigu iara na. Mana kaisei mae kherada keli tahati, nei kaisei mae gloku te rouronuni tahati. Mana mala loku baluda ranghini Lord. 22Iara kuru arini mana ka ghotilo mala ke keli nagnafami ghotilo, naugna mana tangomana te toutonu fakeli eimi ghehati.
23Iara toreni God Kmada nei Jisas Kraes noda Lord, eigna phiamare ginauna tusu ranghi ghita pharikeli nei namha balu fatutuani ka kherada naikno khiloau fateote’o.
24Eghuteuna iara tarai eigna nogna khokofakasai God mala au balumi ghotilo hui iheire te namhani fabrahu noda Lord Jisas Kraes. Me gnafa. Iara, mae Pol.