Diutronomi
Nogna Cheke Mae Moses
Thoutonu kmo’ei eigna buka igne
Narane God teke hata fajifla naiknodi Israel funu Ijep, mare nolo tafri nabagna phiatutu finogha ke lamna namono nagou naugna mare neke tapla jafra ka nakhibo ranghini God. Mare tei ne posa Moab, ka sare biꞌo ke maghati Khoꞌu biꞌo Jordan, eghuteuna mare tarabana mala tei ke lamna namono Kenan aheva teke nhaꞌa cheke LORD mala tusu ranghidi mare teku na. Eghuteuna ka namono igne, mae Moses nodi lida mare na, mana ne cheke leghu lahu ranghidi, eghuteuna buka igne cheke eidi nogna cheke mana re. Nanghagna buka igne, Nogna Cheke Mae Moses, nangha igne fakmoꞌeigna Diutronomi.
Nogna cheke ulu lahu mae Moses, mana cheke eidi glepo biꞌo teke edi LORD ka mare ke lamnadi phiatutu finogha igre. Eghuteuna mae Moses jaola neke cheke faheta ka mare, mala ghatho tahuni LORD kolho.
Fapea cheke na, mana cheke eidi Nabotho Vetula LORD teke tusu ranghidi ka Thogele Sanai. Eghuteuna mana cheke faheta ka mare eigna vetula ulu lahu te chekeni mare mala pogho soruni LORD kolho. Eghuteuna ke leghu na, mana cheke eidi keha vetula teke tusu lao LORD ka mare mala leghudi ka nodi namono majaghani mare Kenan.
Fatilo cheke, mana cheke eigna nhaꞌa cheke teke eni mare balugna LORD. Kate tarabana mare te mala ruma lamna ka namono Kenan, mae Moses ne kilodi mare mala mei eni nhaꞌa cheke igne balugna LORD mala rheta fakeli.
Ka nogna cheke leghu lahu na, mana vahini mae Josua mala tughuni mana, mala nodi lida naiknodi Israel. Aonu mana ne kojeni kaisei khoje mala toghodi naiknodi Israel mala ghathoni unha LORD teke eni ka nogna nhaꞌa cheke na. Eghuteuna ke leghu na, mana ne fablahidi nabotho phei vikegna Israel. Aonu mana ne lehe ka thogele Nebo ka rijon gna Moab.
Gaoghatho te biꞌo lahu ka buka igne, mana chekeni LORD na namhadi naiknodi Israel, eghuteuna mana vahidi mare mala nogna naikno mana, eghuteuna leuleghu fata na mana fakarhidi nei fablahidi mare. Mare mala ghathoni eigna puhi igne. Eghuteuna jame te namhani nei leghuni mana teu mare na, mare ginauna tangomana te au fabrahu ka namono aheva teke nhaꞌa cheke mana te mala tusu lao ka mare teku igne.
Cheke ka philegna 6:4-5 cheke eghu, “Israel, ghotilo fanomho! LORD kolho noda God tahati na. Eghuteuna ghotilo mala namhani LORD, nomi God, ka gaoghathomi fateote’o, nei ka nagnafami fateote’o, nei ka nanhetami fateote’o.”
Cheke igne falaseni gaoghatho te biꞌo ka buka igne, nei ka Nonomho majaghani, te chekeni Jisas na vetula igne te kligna lahu ka keha vetula teke tusu mei LORD igre.
Keha vido ka buka igne
Nogna cheke ulu lahu mae Moses: Glepo tela edihi: 1:1–4:43
Fapea nogna cheke mae Moses: Vetula: 4:44–29:1
Fatilo nogna cheke mae Moses: Mare mala nhaꞌa cheke balugna LORD: 29:2–30:20
Josua tughuni mae Moses: 31:1-13
Nogna cheke leghu lahu LORD ka mae Moses: 31:14-29
Nogna cheke leghu lahu mae Moses: 31:30–33:29
Moses ne lehe: 34:1-12
1Nogna cheke ulu lahu mae Moses
1-5Buka igne au cheke teke cheke mae Moses ka naiknodi Israel ka teke au teu mare ka namono nagou Moab, ka glogu Khoꞌu biꞌo Jordan, rhegna namono Suf nei fari hoteidi namono Paran, Tofel, Laban, Haserot, nei Disahab. Tifa na mare neke posa ka nohi Moab, mae Moses neke uluni King Sihon kokhologna mae Amoa jare Hesbon, eghuteuna neke uluni King Og maegna Besan nei phei nogna namono mana Astarot ghe Edrei. Ihei te jifla ka Thogele Horeb, keha nanghagna na Thogele Sanai, tei posa Kades Banea, mana tangomana te nolo nabagna nabotho kaisei narane. Neuba, mae Moses ne chekeni cheke igne ke leghudi phiatutu finogha teke jifla mare Ijep igre.
Ka narane ulu lahugna fabotho kaisei nhigragna finogha tuana, eghuteuna mare aunga neku ka nohi Moab ke maghati ka keha Khoꞌu biꞌo Jordan, mae Moses neke cheke eigna vetula nogna nhaꞌa cheke LORD.
6Mae Moses neke cheke eghu, “Tifa, kani au teku tahati ka Thogele Sanai, LORD, noda God tahati na neke cheke eghu ka iara: Ghotilo au raugha fara ka thogele igne. 7Ghotilo jifla tei au ka nodi namono kokhologna mae Amoa ka thogele nei ka glogu Khoꞌu biꞌo Jordan, nei ka nodi namono kokhologna Kenan, nei ka namono nagou ke mata Kenan. Namono igne tei posa ke mosu Thongna Mediterenian, eghuteuna ke raru na tei posa ka Thogele Lebanon, eghuteuna ke mosu na tei posa ka Khoꞌu biꞌo Iufretis. 8Igne namono teke nhaꞌa cheke iara teke tusu lao ka thilo kuꞌemi ghotilo tifara, Ebraham, Isak nei Jekop, baludi iheire nate karha mei ke leghudi thilo mare. Gognarona ghotilo tei hata namono igne, nomi ghotilo.”
Mae Moses vavahi mae mala fate
9Mae Moses tudu ne cheke eghu, “Tifa kani au teku tahati ka Thogele Sanai, iara neke cheke eghu ka kuꞌemi ghotilo ra, ‘Gloku te mala batu ghami ghotilo igne, tahu fara ranghi ghau iara te pala sopa kolho iara thegu na. 10LORD, nomi God ghotilo igne fablahi ghami ghotilo la kmana fara la jateula nathunu ka maloa na are lau. 11Snakreni LORD, nodi God kuꞌemi ghotilo ra, fablahi ghami ghotilo mala kmana fara salaꞌui, jateula teke nhaꞌa chekeni mana na eghu.’ 12Nu gloku te mala fatedi nomi puhi biꞌo nei fapholai teu ghotilo igre biꞌo fara ranghi ghau iara. 13Gognarona ghotilo vavahi keha mae ka vikeda tahati te au gaoghatho te keli nei glalase, nei au nangha te keli ka nodi glokure. Eghuteuna iara ginauna vahidi mare mala nomi lida ghotilo.”
14Ghotilo neke cheke tughu eghu ka iara, “Unha te ghathoni iagho igne thofno keli fara.”
15Eghume iara vavahi mae mala baubatu ka vike te lalase nei au nangha te keli. Eghuteuna iara fablahidi mae igre mala batu ghami ghotilo. Keha ka mare mala komanda ka kaisei thogha mae, eghuteuna keha kaisei gobi mae, eghuteuna keha glimafului mae, eghuteuna keha nabotho mae. 16Eghuteuna ka narane tuana iara neke cheke faheta eghu ka mae mala fate igre, “Kate fate te mala fadoglidi faripholai te edi farihoteimi ghotilo re, ghotilo mala fate fadoglo neubane faripholai baludi kherami ba baludi naikno phosa te mei au balumi. 17Eghuteuna kate fatedi naiknore, ghotilo fate ka puhi te doglo, thosei phile ka ihei nga. Neubane mae biꞌo ba fiti mae kolho, ghotilo thosei mhaghuni ihei, nu fatedi naiknore ka puhi te naba ka gaoghathogna God. Eghuteuna jame kaisei puhi biꞌo fara, te theome naba ghotilo te fadoglini na, ghotilo ginauna hata mei ka iara, eghuteuna iara ginauna fadoglini puhi tuana.” 18Ka narane tuana iara neke farirhiudi naiknore ka keha glepo te mala edi mare re.
Mae Moses ne kuru tei keha mae mala tei fasigho poru ka namono re
19Mae Moses ne cheke eghu, “LORD, noda God tahati na neke cheke ka tahati mala jifla Thogele Sanai, eghuteuna tei salaꞌu ka namono nagou biꞌo te thono diꞌa fara, mala tei posa ka nodi thogele kokhologna mae Amoa. Eghume tahati la eni igne la mei thoke agne Kades Banea. 20-21Aonu iara neke cheke eghu ka kuꞌeda tahati ra, ‘Gognarona tahati la mei ka nodi thogele kokhologna mae Amoa. Namono igne LORD, noda God tahati nei nodi God kuꞌeda tifa ra eghu neke tusu mei ka tahati. Filo si ghotilo! Mana neke nhaꞌa chekehi ka tahati namono igne. Eghume ghotilo thosei mhaghu ba ghatho peapea, tei si ghotilo au tagna!’
22“Nu ke leghu na, kuꞌemi ghotilo ra mei filo ghau iara neke cheke eghu, ‘Te keli na tahati kuru tei keha mae mala tei fasigho poru ka namono igne. Eghuteuna kate pulo mei mare na, mare ginauna cheke ka tahati eidi namono nate thokedi tahati ginaure eghuteuna faꞌunha eghu tahati nate tei ka mare na.’
23“Eghuteuna igne jateula kaisei famane gaoghatho eghu ka iara. Aonu iara ne vahidi nabotho phei mae, kaisei ka kaisei vike. 24Aonu mare jifla ne haghe ka thogelero eghuteuna mare mei ne thoke ka glogu Eskol, eghuteuna mare mei ne filo ligohodi namono igre. 25Eghuteuna mare sene keha sisi hata neke pulo mei. Eghuteuna igne ripot teke eni mare na, ‘Namono te tusu mei LORD ka tahati igne kaisei namono keli tutuani fara.’
26“Nu kuꞌemi ghotilo tifa ra neke tirodi fanomho ka nogna cheke LORD nomi God na neke tirodi tei ruma ka namono igne. 27Mare au neku kolho ka nodi suga tapuale re, neke khuru cheke eghu, ‘Jauna LORD na tirogna ghami ghehati eghume mana hata fajifla ghami Ijep mala lehe ka khamedi kokhologna mae Amoa. 28Mala unha kolho si tahati te tei ka namono ignea? Mae teke tei fasigho ka namono igne pulo mei neke famamhaghu ghami ghehati kate chekeni mare te maedi ka namono tuana mare rheta fara nei thono brahu salaꞌu ghita tahati. Eghuteuna nodi namono biꞌo mare igre bara ka thina haghe fara kligna. Eghuteuna mare jaola filodi goigholi ka kokhologna mae Anak jare.’
29“Nu iara neke cheke eghu ka mare, ‘Ghotilo thosei mhaghudi naikno igre! 30LORD, nomi God ghotilo ginauna batu ghami ghotilo mala magra balumi ghotilo, jateula tela filonihi ghotilo Ijep 31nei ka namono nagou ia eghu. Ghotilo la filonihi jateula kani teke hata fajifla ghita mana Ijep ia eghu, theo kaisei glepo teke goigoni ghita tahati ka nabrou te mei posa agne! Mana reireghi fakeli ghami ghotilo jateula kaisei mama te reireghi fakelini thugna na ia eghu.’
32-33“Nu neuba iara ne cheke faꞌunha teuna ka mare, mare theome tangomana te fatutuani ni LORD, noda God. Leuleghu fata na mana batu ghita mei mala gnafa ka vido te keli, eghuteuna mana falalase nabrou ka tahati, eghuteuna ka bongi na mana kulu tei ke uluda ka kaisei khaꞌaghi, eghuteuna ka narane na mana kulu tei ke uluda ka kaisei khoveo biꞌo te kegra fadoglo haghe, nu mare theome tangomana te fatutuani ni mana.”
LORD ne paradi naiknodi Israel
34Mae Moses ne cheke eghu, “Kate nomhini LORD unha te chekeni ghotilo na, mana ne diꞌatagna fara. Eghuteuna mana ne cheke faheta eghu, 35‘Ghotilo naikno te diꞌa gognaro gre ginauna theo kaisei ka ghotilo nate filoni famane namono teke nhaꞌa cheke iara mala tusu lao ka kuꞌemi ghotilo teku ia! 36Nu mae Kaleb thugna mae Jefune kolho ginauna nate tei filoni namono igne, naugna mana ghatho tahu ghau iara fabrahu. Namono tela tapla tagna nei filonihi teu igne iara ginauna tusu lao ka mana baludi thugna mana re.’
37“Eghuteuna LORD jaola diꞌatagna ka iara eidi puhidi mare igre, eghume mana neke cheke eghu ka iara, ‘Iagho jaola na theome tangomana nate filoni namono igne. 38Mae Josua thugna mae Nun, mae ihei te togho nigho iagho igne, mana ginauna tangomana nate baubatudi naiknodi Israel igre mala tei hata namono igne. Eghuteuna iagho mala farerheta gaoghathogna mana na.’ 39Eghuteuna LORD neke cheke eghu ka ghotilo ka narane tuana, ‘Thumi ghotilo te ikodi teu are theome naba te filo glanidi unha te doglo nei unha te jafra, eghuteuna ghotilo neke chekeni te mae naokare ginauna falehedi mare. Neuba, igne na theome thokedi mare, mare ginauna tei hata namono tuana. Nu iara ginauna tufa namono ka mare mala au mare tagna, nei mala khotogna eghu. 40Nu ghotilo mala figri ke pulo fei namono nagou na mala ke leghuni nabrou te tei fei Thongna Ukru.’
41“Nu kuꞌemi ghotilo ra neke cheke eghu, ‘LORD, noda God tahati igne, ghehati tapla jafra ranghi ni mana! Gognarona ghehati ginauna haghe magra leghuni unha teke chekeni mana na.’ Eghuteuna mare te gnafa na, gaoghathodi mare na bligi farau ngala te mala tei magra ka namono holo ka thogelero.
42“Nu LORD ne cheke eghu ka iara, ‘Moses, iagho mala cheke faheta ka mare, eghuteuna iagho lhotidi mare mala thosei tei magra, naugna iara ginauna theome au baludi mare, eghuteuna nodi naoka mare igre ginauna uludi mare.’
43“Eghume iara chekeni igne ka mare leghuni unha teke chekeni LORD, nu mare theome fanomho. Mare cheke faparini LORD na ne haghe ka namono ka thogelero, naugna mare ne patugama. 44Nu kokhologna mae Amoa te au ka thogele igre kafe gru mei jateula jurukuli neku neke ngolhidi neke mei magra ka mare. Mare rikha funu ka rijon Idom ne tei posa ka namono Homa. 45Aonu mare figri neke mei tanhi ka LORD. Nu LORD ne tirogna fanomho ka mare.”
21“Tahati neke au kmana narane Kades. Aonu tahati figri ne leghu nabrou neke tei fei Thongna Ukru, mala ke pulo fei namono nagou, leghuni unha teke chekeni LORD. Eghuteuna tahati tei tafri kmana narane ka thogelero ke lamnagna rijon Idom.”
2“Aonu LORD ne cheke eghu ka iara, 3‘Moses, ghotilo la nolo tafrihi ka thogele igre kmana narane. Gognarona ghotilo tei ke raru.’ 4Eghuteuna mana neke cheke ka iara mala cheke faheta eghu ka naiknore, ‘Ghotilo ginauna tei salaꞌu ka rijon Idom ka namono aheva te au kherami ghotilo teke vikegna mae Iso ra. Mare ginauna mhaghu ghami ghotilo. Eghume ghotilo famane ghaoghatho fakeli eghu. 5Ghotilo thosei magra ka mare, naugna iara ginauna na theome tufa kaisei nodi vido glose mare ka ghotilo. Naugna iara neke tufahi namono ka thogele Seia na igne ka vikegna mae Iso kolho. 6Eghume kate tei ghotilo ka namono igne, ghotilo ginauna foli gano nei khoꞌu eghu ka mare.’
7“Ghotilo thosei ghatho ihoni LORD, nomi God, mana fablahi ghami ghotilo ka gobigna lepo te edi ghotilo re. Phiatutu finogha te nolo tafri tahati ka namono nagou igne, mana neke reireghi fakeli ghami ghotilo, eghuteuna ghotilo neke theome kmoꞌe ka kaisei glepo.”
8“Eghume tahati neke lithui neke tei ka nodi vido vikeda theda mae Iso. Eghuteuna tahati neke theome leghuni nabrou te tei fei Thongna Lehe ia nei phei namono Elat ghe Esion-Geba. Eghuteuna tahati tei neke posa ka namono nagou Moab. 9Aonu LORD neke cheke eghu ka iara, ‘Moses, ghotilo thosei fapholai ba magra ka naikno te au Moab are naugna iara ginauna na theome tusu ari kaisei nodi glose mare ka ghotilo. Iara neke tusu laohi namono Ara igne ka vikegna mae Lot.’ ”
10(Ghotilo laseni, tifa te mei na kaisei vike ka mae te nheta igre neke au Ara, vike te kiloi mare vikegna mae Emim. Mae igre thono brahu fara jateula vikegna mae Anak eghu. 11Phei vike igre, kmana naikno kilodi mare Refaem, nu naiknodi Moab igre kilodi mae igre Emim. 12Eghuteuna tifa te mei na, vikegna mae Hoa igre neke au ka rijon Idom, nu vikegna mae Iso igre neke ngolhi fajifladi nei neke goigonidi iheire teke au ka namono tuana. Jateula teke eni maedi Israel teke ngolhi fajifladi ka mae naoka teke au ka namono aheva teke tusu ranghidi LORD.)
13Aonu mae Moses neke cheke eghu, “LORD neke cheke eghu, ‘Gognarona, ghotilo kegra haghe kasa ka Khoꞌu Sered.’ Eghume tahati na eni unha te chekeni mana na.
14“Nu tolufulu nhana finogha funu ka narane teke jifla tahati Kades Banea, te ghilei mei posa ka narane te kasa tahati ka Khoꞌu Sered. Eghuteuna ka narane tuare, mae te nabadi te mala magra ka magra biꞌo ra mare la kafe lehehi ke lamna namono nagou jateula teke chekeni LORD ia neu. 15Leuleghu fata na LORD snakre laodi koba ka mae naoka mala lehe mare, ghilei theo kaisei ka mare te karha na.
16“Eghuteuna kate lehe te gnafa mae soldia re, 17LORD ne cheke eghu ka iara, 18‘Gognarona ghotilo jifla agne Moab, eghuteuna ghotilo tei ka nabrou te tei kasa ka nohi Ara. 19Kate jifla ghotilo ka namono igne na, ghotilo ginauna tei rhegna nodi nohi vikegna mae Amon. Mae igre vikegna mae Lot, eghuteuna iara neke tusu laohi namono igne ka mare. Ghotilo ginauna thosei fapholai ba magra baludi mare, naugna iara ginauna na theome tufa kaisei nodi namono mare ka ghotilo.’ ”
20(Uve, tifa te mei na, nodi nohi vikegna Amon igne nodi namono mae nheta te kilodi mare Refaem. Nu naiknodi Amon igre kilodi mae igre Samsumim. 21Mae igre brahu fara jateula mae ka vikegna Anak igre eghu. Tifa na, mae igre neke kmana fara, eghuteuna mare mae nheta fara, nu LORD neke kafe falehe fahuidi gnafa. Eghuteuna vikegna mae Amon igre neke ngolhi fajifladi neke hata kasa namono igne. 22LORD neke eni puhi igne neke toghoni vikegna mae Iso te au Idom igre. Mana neke falehedi naiknodi Hoa, eghume vikegna mae Iso igre ne hata kasa nodi namono mare na ne au tagna ne ghilei mei posa gognarogne. 23Eghuteuna jateula igne neu namono te au rhegna Thongna Mediterenian, naiknodi Krit igre hata kasa ne au tagna. Tifa te mei na, namono igre nodi namono vikegna Avim, nu naiknodi Krit igre neke aknu falehedi neke gnafa, eghuteuna mare neke hata kasa ka mare nodi namono mare igre ne tei posa ke mata Gasa.)
24Mae Moses neke cheke eghu, “Ka narane tuare LORD neke cheke eghu, ‘Gognarona ghotilo tei kasa ka Khoꞌu Anon. Iara vahini mae Sihon, king ka vikegna mae Amoa ka namono Hesbon, ka khamemi ghotilo baludi nodi namono te gnafa mare re. Ghotilo tei magra ka mana, eghuteuna mala funu hata kasa nodi namono mare re. 25Funu gognarogne, iara ginauna edi naikno ka namono te gnafa igre mala mhaghu ghami ghotilo. Kate nomhidi mare thoutonu eimi ghotilo na, mare ginauna mhaghu nodi fara na fififri fara thinidi re.’ ”
Naiknodi Israel ne uluni King Sihon
26Eghuteuna mae Moses neke cheke eghu, “Kani au teku tahati ka namono nagou Kedemot ia, iara neke kurudi keha mae neke tei Hesbon mala tei filoni King Sihon. Mare tei mala famane cheke ka mare mala au fodu ka pharikeli, 27‘Ghehati magnahaghei te tei salaꞌu ka nou nohi iagho igne. Ghehati ginauna salaꞌu ka nabrou kolho, ghehati ginauna na theome tei tafri. 28Eghuteuna jame te magnahaghei gano ba khoꞌu ghehati ka iagho na, ghehati ginauna foli ka iagho. Nu ghehati magnahaghei nigho iagho te snakre ghami ghehati te mala nolo salaꞌu kolho ka nou nohi iagho gne. 29Vikegna mae Iso te au Idom igre snakre ghami ghehati te mala tei salaꞌu ka nodi kantri na, nei jaola naiknodi Moab te au ka namono Ara. Mare snakre ghami ghehatihi te tei salaꞌu ka nodi kantri re. Ghehati magnahaghei fara te tei kasa ka Khoꞌu biꞌo Jordan, mala tei ka namono aheva LORD, nomi God teke tusu ranghi ghami ghehati na.’ 30Nu King Sihon ne theome snakre ghita tahati te tei salaꞌu ka nogna namono na, naugna LORD neke eni gaoghathogna king mala patugama. LORD neke eni igne mala tangomana tahati te uluni King Sihon.
31“Ka narane tuana LORD neke cheke eghu ka iara, ‘Gognarona iagho la lasenihi iara ginauna snakreni King Sihon ka khamemi ghotilo. Eghume ghotilo tei funu hata nogna namono mana na mala au ghotilo tagna.’
32“Aonu King Sihon balugna nogna armi na mei neke magra ka tahati rhegna namono Jahas. 33Eghuteuna LORD neke snakreni mana ka khameda tahati. Eghume tahati neke aknu faleheni mana baludi thugna nei nogna naikno te gnafa mana re. 34Eghuteuna tahati neke uludi nodi namono mare re eghuteuna goigoni fahui nodi namono te gnafa mare igre. Eghuteuna tahati neke aknu falehe mae nalhaꞌu, nei goro gaꞌase nei goro thudi teu mare re. Ka narane igne, theo kaisei glepo te karha na ka namono igre. 35Tahati neke hata nodi buluka, sipu, nanigot, dongki nei hose teu mare re, balu famane glepo ka nodi namono mare igre malada theda. 36Ka narane tuana, LORD neke togho ghita tahati neke hata nodi namono mare te funu Aroa ka geri Khoꞌu Anon, nei namono ka sare rhegna khoꞌu igne, tei posa ke raru namono Gilead. Theo kaisei namono te bara thina te haghe fara ba maku fara te mala theome tangomana tahati te uluni na. 37Nu tahati neke theome tei ka nodi namono vikegna mae Amon, neubane ka Khoꞌu Jabok ba holo ka thogelero, naugna LORD, noda God tahati igne neke lhoti ghita tahati.”
3Naiknodi Israel ne uluni King Og
1Mae Moses neke cheke eghu, “Ke leghudi gobigna lepo igre, tahati neke tei fei ke raru, leghui nabrou te tei ka rijon Basan. Jare King Og baludi nogna soldiare neke mei mala magra ka tahati neku rhegna namono Edrei. 2Nu LORD neke cheke eghu ka iara, ‘Moses, iagho thosei mhaghuni king tuana! Iara ginauna lisa ari mana ka khamemu iagho baludi nogna soldia nei nogna namono te gnafa teu mana re. Ghotilo ginauna faleheni mana jateula teke eni ghotilo ka King Sihon vikegna mae Amoa teke funei Hesbon ia eghu.’
3“Eghume, LORD neke lisa mei King Og baludi nogna soldia ka khameda tahati, eghuteuna tahati neke kafe aknu falehedi neke hui neke ghilei theo kaisei te karha na. 4Eghuteuna ka narane tuana, tahati neke tei ruma neke hata namno salei namono ka mare. Tutuani, King Og neke funei frunidi kmana namono te gnafa ka rijon Agob. Tahati mala kafe hatadi gnafa mare. 5Namono igre bara haghe kligna fara ka thina nei grengatha biꞌo te bibilakhi mare na. Eghuteuna tahati neke hata kmana namono ikodi te theome bara te lithui ka thina. 6Ka narane igne, tahati neke goigonihi nodi namono biꞌo nei namono ikodi teu mare re, eghuteuna tahati neke aknu falehe nalhaꞌu, gaꞌase, nei goro sua, jateula teke eni tahati ka nogna namono King Sihon mae ihei teke funei Hesbo. 7Eghuteuna tahati neke hata nodi buluka, sipu, nanigot, dongki nei hose teu mare ra, nei balu famane glepo ka nodi namono mare igre malada theda.
8“Ka narane tuare, nodi namono phei mae king ka vikegna mae Amoa te au ke maghati Khoꞌu biꞌo Jordan, funu ke mata Khoꞌu Anon tei posa ke raru Thogele Hemon, namono te gnafa igre tahati neke hata fahui.” 9(Naiknodi Saedon igre mare kiloi Thogele Hemon gne Sirion, nu vikegna mae Amoa igre mare kiloni namono igne Senia.) 10Eghuteuna mae Moses neke cheke eghu, “Tahati la hata fanhighohi namono te funu ka sare biꞌo holo ke mata thogele te tei posa ka namono ke raru Gilead ghe Basan eghuteuna jaola tei posa ke maghatidi phei namono Saleka ghe Edrei, aheva te nogna kantri King Og.” 11King Og gna Basan igne, mana mae leghu lahu ka vikedi mae te nheta nei brahu teu te kilodi mare Refaem. Eghuteuna kate lehe King Og na, mare horo bokis gna mana na ka thina pipito te fati mita brahugna na eghuteuna namo phei mita krepagna na. Bokis thina igne au ngala posa gognaro ka namono Raba te au ka nodi nohi naiknodi Amon.
Vikegna Israel te au ke maghati Khoꞌu biꞌo Jordan
12Mae Moses neke cheke eghu, “Kate hata tahati nodi glose mare ke maghati Khoꞌu biꞌo Jordan ra, iara neke tufa glose igre ka thilo vike tahati igre. Glose ke biꞌogna na baludi namono te au ke lamnagna glose igne iara neke tusu lao ka vikedi mae Ruben, nei ka vikegna mae Gad teure, funu ka namono Aroa ke mata Khoꞌu Anon, eghuteuna tei posa ka nohi ke raru Gilead namono te au thogelero. 13Eghuteuna keha vidogna nohi Gilead balugna nodi nohi maedi Basan, iara tusu lao ka vido vikegna mae Manase. Keha nanghagna rijon igne na Agob, aheva teke funei King Og ia.” Rijon Basan igne, tifa na neke nodi namono mae iheire te brahu nei nheta eghu, mae te kilodi Refaem. 14Eghuteuna mae Jaea kaisei mae ka vikegna mae Manase, mana neke hata glose ka nohi thongana Agob ka rijon Basan te tei posa ka fofotagna namonodi naiknodi Gesua nei naiknodi ke mosu Maka. Eghuteuna mae Jaea ne fangangha rijon igne ka thegna ne kiloni Havot-Jaea. Nangha igne au ngala posa gognarogne. 15Eghuteuna mae Moses neke cheke eghu, “Iara tusu lao vidogna rijon ke raru Gilead igne ka vikegna Makia. 16Eghuteuna keha vidogna rijon igne balugna glose te tei posa ke mata Khoꞌu Anon iara neke tusu lao ka vikegna mae Ruben nei ka vikegna mae Gad. Nodi glose mare na, fofotagna ke mosu na doglo farihotei Khoꞌu Anon, eghuteuna fofotagna ke maghati na ka Khoꞌu Jabok, eghuteuna naiknodi Amon igre mare au ka keha phile na. 17Eghuteuna ke maghatigna glogu Khoꞌu biꞌo Jordan igne iara neke jaola neke tusu lao ka mare. Eghuteuna fofotagna nodi glose mare ke mosu na ka Khoꞌu biꞌo Jordan, iara neke tusu lao glose funu ke raru Kholo Galili ke posa fei Thongna Lehe ke mata, eghuteuna tei posa ke maghati pesi thogele Pisga.
18“Eghuteuna ka narane tuana, iara neke cheke faheta eghu ka vikedi mae Ruben, mae Gad nei mae Manase, ‘LORD, nomi God ghotilo, mana neke tusu arihi glose igne ka ghotilo mala khotogna. Nu kate kasa ghotilo ka Khoꞌu biꞌo Jordan igne, nomi soldia ghotilo re ginauna hata tei baludi nodi glepo mala magra re mala tei magra ke uludi vikemi themi ghotilo naiknodi Israel. 19Nu khetomi, thumi, nei nomi buluka, nei sipu, nei nanigot, nei dongki, nei hose teu ghotilo are kmana fara, reꞌe ginauna tangomana te au ka namono tela tusu arihi iara ka ghotilo. 20Ghotilo mala toghodi kherami are ghilei au nodi namono mare te mala au tagna na. Eghuteuna mare jaola neke hata glose ka keha phile ke mosu Khoꞌu biꞌo Jordan aheva LORD nomi God ghotilo nate tusu ari ka ghotilo. Eghuteuna ghotilo mala au baludi mare ghilei gnafa magra na, eghuteuna LORD ginauna toghodi mare mala au fakeli, jateula ghotilo te au fakeli ka glose teke tusu ari iara ka ghotilo igne. Eghuteuna ke leghudi glepo igre, ghotilo ginauna tangomana na teke pulo mei mala au ka glose tekela tusu arihi iara ka ghotilo igne.’
21“Eghuteuna ka narane tuana, iara neke cheke eghu balugna mae Josua, ‘Iagho la filodihi gobigna lepo teke edi LORD nomi God ghotilo ka phei king igre. Mana ginauna nake enila puhi igne ka naikno nate tei ghotilo ka nodi glose re. 22Ghotilo thosei mhaghudi mare, naugna LORD nomi God ghotilo ginauna magra ranghi ghami ka mare.’ ”
LORD theome snakreni mae Moses te tei ruma Kenan
23Mae Moses tudu neke cheke eghu, “Ka narane tuana, iara neke tarai eghu ka LORD, 24‘LORD, iagho nogu Funei iara, iara lase nigho iagho teke fufunu fakakhana nou nolaghi biꞌo na. Theo kaisei god kligna nei ka nauthoglu igne eghu tangomana te edi re nafnata glepo biꞌo te nolaghi te edi iagho igre. 25Snakre ghau iara sagho mala tei filodi iara famane glose te au ke kasa Khoꞌu biꞌo Jordan, nei famane glose ka gukhu nei ka Thogele Lebanon.’
26“Nu LORD neke diꞌatagna fara ka iara eidi puhimi ghotilo re neke tirogna fanomho ka iara. Mana neke cheke eghu, ‘Moses! Iagho au kmu! Iagho thosei chekeni kaisei cheke eigna glepo igne! 27Iagho haghe ka thogele Pisga. Eghuteuna iagho filo thongana ka vido te gnafa are. Filo fakeli ka gobigna lepo te filodi iaghore, naugna iagho ginauna theome tangomana te kasa ka Khoꞌu biꞌo Jordan. 28Nu iara magnahaghei te famane cheke ka mae Josua, eghuteuna iagho farerheta gaoghathogna mana na, naugna ginauna mana u ngala te mala batudi naiknore te kasa ka Khoꞌu biꞌo Jordan mala hata glose nate filoni iagho na.’ 29Eghume tahati neke au ka glogu rhegna namono Bet-Peo.”
4Naiknodi Israel mala leghuni LORD
1Mae Moses neke cheke eghu, “Ghotilo naiknomi Israel ra fanomho fakeli ka cheke nei vetula eghu nate farirhiu ghami iara igre. Eghuteuna jame te leghudi ghotilo cheke nei vetula teu igre na, LORD nodi God kuꞌemi ghotilo tifa ra mana ginauna fakarhi ghami, eghuteuna ghotilo ginauna tangomana nate tei te hata glose tarabana teu te mala tusu ari ka ghotilo. 2Ghotilo thosei ke nhaꞌa lao ba hata koko kaisei phugra cheke ikoi kate tusu ari iara ka ghotilo igre. Cheke igre nogna cheke LORD mala leghudi ghotilo.
3“Ghotilo la filo tathamihi gobigna lepo teke edi mana ka ghotilo Baal-Peo ra. Iheire teke pogho soru ka god Baal Peo ra, LORD neke aknu falehe. 4Nu, ghotilo iheire teke ghatho tahuni LORD nomi God ra, ghotilo kafe karha teu gognaro gre.
5“Iara la farirhiu ghamihi ghotilo cheke nei vetula teu igre leghuni unha teke cheke ranghi ghau noda LORD God. Iara eni igne mala leghudi ghotilo vetula igre kate au teu ghotilo ka glose te hata ghotilo re. 6Eghuteuna ghotilo mala famane leghudi nei faꞌuvedi eghu vetula igre, eghuteuna ka puhi tuare te mala fakakhana ka keha naiknore te ghaoghatho fakeli fara nei lalase fara teu ghotilo na. Eghuteuna kate nomhidi mare vetula igre mare ginauna cheke eghu, ‘Tutuani fara, naiknodi Israel igre au tadi gaoghatho te keli na nei glalase na eghu!’ 7Keha kantri te biꞌo igre, neuba mare ne au nolaghi biꞌo jateula unha neu, nu nodi god re theome au baludi jateula LORD te au baluda tahati gne eghu. Kate tarai tahati ka mana na, mana ginauna nomhi ghita fabrahu. 8Eghuteuna keha kantri igre, neuba mare ne au nolaghi jateula unha neu, nu mare theome au kaisei vetula te thofno famane doglo jateula vetula te farirhiu ghami iara gognaro gre.
9“Nu fiofilo ghami eghu! Na eghunu ghatho ihodi ghotilo glepo tela filo tathamihi igre eghu. Leuleghu fata ka nakarhami re, ghotilo mala ghathodi glepo igre. Eghuteuna ghotilo mala farirhiudi thumi are nei grami te ikodi are eghu. 10Thosei ghatho ihoni narane teke mei kegra kuꞌemi ghotilo ka Thogele Sanai teke kegra ke ulugna LORD nomi God. Ka narane tuana, mana neke cheke eghu ka iara, ‘Chekedi naikno ra mala kafe mei rhegu iara agne. Iara magnahaghedi mare te mala nomhidi gobigna lepo nate chekedi iara ka mare. Ka puhi igne, mare tangomana te ghatho tahu ghau iara fabrahu ka nakarhadi re, eghuteuna mare tangomana nate farirhiudi thudi re mala ghatho tahu ghaula iara.’ 11Kuꞌemi ghotilo ra neke kegra haghe ka pesigna Thogele Horeb, eghuteuna kaisei khoveo biꞌo te romno fara mei ne toku tafruni thogele igne, nu naphaegna khaꞌaghi na ne agha kligna ka maloa na. 12LORD au neu ke lamnagna khaꞌaghi igne neke cheke mei ka kuꞌemi ghotilo ra. Kate cheke mana na, mare neke nomhidi nogna cheke mana re, nu mare neke theome filoni mana. 13Eghuteuna mana neke eni nhaꞌa cheke igne baluda tahati, neke cheke ranghi ghita tahati mala leghudi Nabotho Cheke teke rioriso mana ka phei thina tataba igre. 14Eghuteuna ka narane tuana, mana neke cheke faheta ka iara mala farirhiu ghami iara cheke nei vetula eghu te mala leghudi ghotilo kate tei kasa ka khoꞌu te mala tei au ka glose aheva nate au tagna ghotilo na.”
Mare mala thosei tarai ka mumuju
15Mae Moses tudu ne cheke eghu, “Ka narane te cheke mei LORD ka kuꞌemi ghotilo ke lamnagna khaꞌaghi na ka Thogele Sanai ia, mare neke theome filoni mana nu mare neke nomhini kolho chekegna mana na. Eghume ghotilo fiofilo ghami eghu, 16-18glahu sari mumuju mala tarai ghotilo. Puhi igne thofno jafra fara te eni ghotilo na! Neuba mumuju igne ne mae nalhaꞌu, ba gaꞌase, ba buluka, ba ka thua nafnata nanghaji, ba ka thua nafnata sasa, ba ka thua nafnata thotoli ba unha te tagu ka glose, ghotilo thosei edi glepo igre. 19Ghotilo fiofilo ghami glahu chaghi ghami mare korhi ghami mala pogho soru nei tarai eghu ka glepo te filodi ka maloa na are, naprai nei glaba, nei nathunu. LORD neke tusu mei glepo igre ka keha naikno te au heva heva ka nauthoglu igne mala tarai nei pogho soruni eghu God. 20Nu LORD neke fakarhi ghami ghotilo ka puhi biꞌo Ijep te jateula kaisei khaꞌaghi biꞌo te brana fara ra neku, naugna mana magnahaghei ghami ghotilo te mala nogna naikno thegna, eghuteuna tahati au eghu au gognaro gne.
21“Nu LORD ne diꞌatagna fara ka iara eidi puhidi kuꞌemi ghotilo ra, eghume mana neke cheke fadoglo mei ka iara, iara ginauna na theome tangomana nate tei kasa ka Khoꞌu biꞌo Jordan te mala tei ka famane glose nate tufa mana te mala khotogna ghotilo na. 22Iara theome tangomana te tei kasa ka Khoꞌu biꞌo Jordan igne, iara ginauna lehe kolho ka namono igne. Nu ghotilo ginauna tangomana nate tei kasa ka khoꞌu igne te mala khotogna famane glose tuana. 23Ghotilo fiofilo ghami. Glahu ghatho ihoni nei huhughuni eghu ghotilo nogna Nhaꞌa Cheke LORD teke eni mana balumi ghotilo ia. Glahu ghatho ihoni ghotilo eigna blahi te horo ghotilo kaisei mumuju te mala tarai tagna na. 24Blahi naugna LORD, nomi God ghotilo na tangomana te diꞌatagna fara ka ghotilo na. Diꞌatagna mana igne jateula kaisei khaꞌaghi eghu, eghuteuna mana theome magnahaghei ghami ghotilo te tarai ka kaisei god ngau.”
25Neuba ghotilo ne au raugha ka glose igne ne au thumi nei grami neu, ghotilo jafra jame te sari mumuju ghotilo te tarai tagna na. Jame te eni ghotilo glepo te jafra nei theome doglo teu ka tathagna LORD igne na, mana ginauna diꞌatagna fara ka ghotilo. 26Iara kilodi maloa ghe nauthoglu mala fiofilo fakeli ka nogu cheke iara igre gognarona. Jame te horo thua nafnata mumuju ghotilo na, ghotilo na theome raugha dofi ghami ka glose te khotogna ghotilo tuana, naugna LORD ginauna falelehe kmana naikno ka ghotilo. 27Eghuteuna mana ginauna ngolhi fajifla ghami ghotilo mala tei au baludi naiknodi keha namono are, eghuteuna keha ka ghotilo kolho nate karha au teu ka namono tuare. 28Jare ghotilo ginauna tarai ka mumuju teke horo kolho naiknore. Nafnata mumuju teke horo ka gaju ba thina te theome tangomana te fifilo ba fanomho ba ghamu ba gnanghoni kaisei glepo. 29Nu ka keha namonore ghotilo ginauna hironi LORD nomi God. Eghuteuna jame te ghaoghatho fakeli ghotilo ka nomi glalase fateote’o te hironi mana na, ghotilo ginauna tangomana te filo deni mana na. 30Jame te thoke mei puhi biꞌo ka ghotilo te au papara fara ghotilo ka glepo igre na, ghotilo ginauna nake figri ka LORD nomi God mala ke leghuni mana. 31Ghotilo tangomana teke pulo mei na naugna LORD nomi God ghotilo na kokhoni ghami ghotilo. Mana theome tangomana te tei koko ghami ba goigoni ghami ba ghatho ihoni nhaꞌa cheke teke eni baludi kuꞌemi ghotilo tifa ra.
Jare na kaisei God kolho
32“Ghotilo fariuriu ghusnadi thoutonu eidi gobigna lepo teke edi teke mei tifa funu ka narane God teke vuavuha naikno ka nauthoglu igne te ghilei mei posa gognarogne. Ghotilo fariuriu ghusnadi keha god delei heva heva ka nauthoglu igne eidi glepo biꞌo teke edi ka nauthoglu igne. 33Ba, ihei ka keha naikno igre teke nomhini chekegna kaisei god te jifla mei ke lamna khaꞌaghi jateula ghotilo teu te theome lehe tagna na? 34Ba, keha god au aheva nga teke tei ka kaisei kantri teke hata fajifla naikno ka namono igne te mala nogna naikno thegna na? Theo! Nu LORD neke tei Ijep neke hata fajifla ghita ka khame nhetagna. Ghotilo neke filo tathami unha teke eni LORD nomi God, mana neke hata fajifla ghami ghotilo Ijep, mana neke loku ka puhi biꞌo, nei ka kofubobhoi, nei ka nolaghi, nei ka magra biꞌo, nei ka glepo te mamhaghuana fara.
35“Mana fakakhana ka ghotilo glepo igre mala laseni ghotilo te LORD kolho God na, theo kaisei god aheva nga. 36Ka maloa na mana snakre ghami ghotilo mala nomhini naoglagna mana na, mala tangomana mana te fadogli ghami ghotilo na. Eghuteuna ka glose na mana snakre ghami ghotilo mala filoni nogna khaꞌaghi biꞌo na, mala tangomana ghotilo te nomhini chekegna mana te jifla mei ka khaꞌaghi igne. 37Naugna mana neke namhadi fara kuꞌemi ghotilo tifa ra, mana neke vahi ghami ghotilo mala nogna naikno mana. Eghume ka nogna nolaghi mana, mana neke hata fajifla ghami Ijep. 38Eghuteuna mana neke ngolhi fajifladi naikno te nheta fara salaꞌu ghami ghotilo. Mana neke eni igne mala hata nodi glose re mala nomi ghotilo.
39“Eghume ghotilo mala laseni nei ghaoghatho fakeli eghu gognarona, LORD kolho te au kligna nei ka nauthoglu pari igne. Theo kaisei god te au aheva nga. 40Ghotilo mala leghudi nogna cheke nei vetula teu mana te chekedi iara ka ghotilo gognaro igne. Eghuteuna jame te eghu ghotilo na, ghotilo ginauna au ka nakarha te keli, eghuteuna thumi ghotilo baludi goro sua nate karha mei ke leghumi ghotilo re, ginauna jaola au ka nakarha te keli. Eghuteuna ghotilo ginauna au raugha ka glose teke tusu ari LORD na mala khotogna fabrahu ghotilo.”
Namono mala poru
41Aonu mae Moses ne vavahi thilo namono ke maghati Khoꞌu biꞌo Jordan. 42Thilo namono igre mala poru. Jame kaisei mae theome ghathoni te mala faleheni keha mae na, eigna mana neke theome diꞌatagna ka mana tifa, nu mana ne lehe. Mae igne tangomana te rikha te tei poru ka kaisei ka thilo namono igre mala theome faleheni mare. 43Thilo namono igre Bese, Ramot nei Golan. Bese gne au ke lamna namono nagou, ka sare thogele vikegna mae Ruben. Ramot gne ka nohi Gilead ka vikegna mae Gad. Eghuteuna Golan gne ka rijon Basan ka vikegna mae Manase.
Nogna fapea cheke mae Moses
44-49Ka narane te jifla naiknodi Israel Ijep igne, mare mei ne ghilei au ka glogu ke maghati Khoꞌu biꞌo Jordan, rhegna namono Bet-Peo. Tifa na namono igne neke nogna Sihon mana neke au ka namono Hesbon, eghuteuna mana neke king ka vikegna mae Amoa. Nu mae Moses nei naiknodi Israel igre eghu neke uluni mana neke khotodi nogna glose mana re. Eghuteuna mare jaola neke khotogna nogna glose mae Og king gna Basan. Phei king ka vikegna mae Amoa igre neke khotodi glose ke maghati Khoꞌu biꞌo Jordan, nogna nohi mana igne ke mata funu ka namono Aroa ka glogu Khoꞌu Anon, eghuteuna ke raru na posa ka thogele Sirion, keha nanghagna na Hemon. Eghuteuna glose igne au namono ke maghati Khoꞌu biꞌo Jordan, tei posa ke mata Thongna Lehe ka pesi thogele Pisga. Jare Bet-Peo mae Moses ne tusu lao vetula igre ka naiknodi Israel. Igre u cheke nei vetula nei farirhiu eghu teke chekedi mae Moses ka naiknodi Israel.
5Nabotho vetula
1Aonu mae Moses ne kafe kilo fodu meidi naiknodi Israel ne cheke eghu:
“Fanomho fakeli ka cheke nei vetula eghu nate chekedi iara ka ghotilo gognaro igre. Ghotilo mala ghathodi nei leghudi eghu fabrahu! 2LORD, noda God neke eni kaisei nhaꞌa cheke baluda tahati ka Thogele Sanai. 3Neke theome ka kuꞌeda tahati ra kolho. Mana neke baluda tahati gnafa te au teu gognaro gre. 4LORD neke cheke fadoglo mei ka tathami ghotilo re ke kligna thogele, eghuteuna chekegna mana igne jifla mei ke lamna khaꞌaghi. 5Ka narane tuana iara neke kegra fari hoteimi ghotilo nei LORD, eghuteuna iara neke cheke ka ghotilo cheke teke chekedi LORD re, naugna ghotilo neke mhaghu fara ka khaꞌaghi igne neke theome tangomana tei kegra ka thogele na.
“Eghuteuna LORD neke cheke eghu,
6“Iara LORD, nomi God ghotilo. Iara neke atha fajifla ghami ghotilo ka naꞌau sosolo Ijep neke atha mei ghami ghotilo agne.
7Thosei ghatho tahuni kaisei god delei, kaisei Iara ngala te mala ghatho tahu ghau ghotilo na.
8Thosei sari kaisei mumuju, ba eni kaisei thotogale gna kaisei glepo te au ka maloa ba ka nauthoglu ba ka nhorora ke pari glose. 9Ghotilo thosei pogho soru ka kaisei mumuju ba tarai tagna, naugna iara LORD, nomi God ghotilo, iara theome magnahaghei ghami ghotilo te ghatho tahuni kaisei god delei. Puhigu iara na jateula: iheire te tirodi ghau iara, nei tei koko ghau iara teu igre, iara ginauna paradi mare baludi thudi, nei gradi teure ghilei thokedi fapea gradi mare ginaure. 10Nu jame te namha ghau iara nei leghudi nogu vetula iara gre teu ghotilo na, iara ginau na thofno namha ghami ghotilo nei kaisei thogha vikemi ghotilo nate karha mei teu thogheiro re.
11Ghotilo thosei lausasaba nanghagu iara na, naugna iara LORD, nomi God ghotilo, eghuteuna iara ginauna parani ihei te lausasaba nanghagu iara na.
12Ghotilo tajini narane Sabat blahi, leghuni unha teke chekeni iara ka ghotilo tifa ia. 13Ghotilo au namno narane ke lamnagna kaisei wik te mala loku na. 14Nu ka fafitu narane na, narane Sabat, narane mala cheke fakelini LORD, nomi God. Ka narane igne, ghotilo ginauna thosei loku tagna. Ghotilo, nei thumire, nei nomi mae gloku, nei gaꞌase gloku, nei nomi buluka nei dongki, nei nomi sipu, nei naikno phosa te au balumi. Ghotilo te gnafa na thosei loku ka narane igne. Ka puhi igne nomi naikno gloku ghotilo re jaola tangomana te gnafa jateula ghotilo eghu. 15Ghotilo ke ghatho fapulodi narane teke sneka ghotilo Ijep tifa ra, nu iara LORD, nomi God ghotilo, iara neke hata fajifla ghami ghotilo jare ka khame nhetagu iara. Naugna igne iara LORD nomi God ghotilo te cheke faheta ka ghotilo mala gnafa ka narane Sabat.
16Ghatho tahudi idomi kmami re, jateula teke chekeni iara LORD nomi God ia eghu. Eghume ghotilo ginauna au raugha ka nakarha te keli ka glose nate tusu ari iara LORD, nomi God.
17Thosei aknu poruni ihei ka gaoghatho te diꞌa.
18Thosei huhughuni vetula gna tholaghi na.
19Thosei blau.
20Thosei vuavuha cheke ranghini kheramu fofodu na.
21Thosei mamagnadi nogna glepo kherami fofodu na mala hata mala nomi themi. Thosei mamagnani khetogna mana na, ba nogna suga na, ba nogna nagare na, ba nogna naikno gloku na, ba nogna buluka na, ba nogna dongki na, ba unha nogna glepo mae kheramu fofodu na.”
22Aonu mae Moses ne cheke eghu, “Igre unha teke chekedi LORD ka tahati re, kani teke salo fodu tahati ka pesigna thogele ia. Mana neke cheke faheta mei ka tahati ke lamna khaꞌaghi nei khoveo te thono romno fara. Vetula igre kolho teke chekedi mana ka narane tuana, aonu mana neke rioriso nogna chekere ke klignadi phei thina tataba neke tusu phei thina igre ka iara.”
23Mae Moses tudu ne cheke eghu, “Kate gnhubra khaꞌaghi biꞌo na ka thogele ia, ghotilo neke nomhini cheke na neke mei funugna ka gromno na. Aonu nomi mae mala baubatu nei mae biꞌodi vike ra eghu neke mei filo ghau iara. 24Mare neke cheke eghu, ‘LORD, noda God tahati igne, gognarona mana fakakhana siasiglagna nogna nolaghi biꞌo na nei puhi te thono haghe fara mana na eghu ka tahati. Eghuteuna tahati nomhini naoglagna mana na mei funu ke lamna khaꞌaghi. Gognarogne ghehati nomhini God tangomana te cheke ka tahati naikno na, neuba ghehati karhau ngala, theome lehe! 25Nu, gognarona ghehati theome magnahaghei te lehe ka khaꞌaghi biꞌo igne! Jame te nomhini ghehati naoglagna LORD, nomi God igne keha fata re ghehati ginauna na thofno lehe. 26Ba, kaisei naikno neke nomhini naoglagna God mae ihei te karha te tifa igne neke cheke mei ke lamna khaꞌaghi jateula te nomhini ghehati igne neku, mana karhau gognarona? 27Tei sagho themu mala fanomho fakeli ka unha te chekeni LORD na. Aonu, iagho ginauna tangomana te mei toutonu ka ghehati gobigna lepo teke chekedi LORD, noda God. Eghuteuna ghehati ginauna tangomana te nomhidi nei leghudi.’
28“Aonu kate nomhidi LORD glepo igre, mana neke cheke eghu ka iara, ‘Moses, iara nomhidi cheke igre tutuani fara. 29Filo sagho, jame au fabrahu ka mare gaoghatho igne meuna, ginauna thofno keli fara. Iara magnahaghedi fara mare te ghatho tahu ghau iara fabrahu eghuteuna leghudi nogu vetula iara re. Naugna jame te eni mare na, nakarhadi mare nei thudire teure ginauna thofno keli fabrahu. 30Gognarona iagho tei cheke ka mare mala ke figri ka nodi suga tapuale ra. 31Iagho kolho nate au teu agne balugu iara na. Eghuteuna iara ginauna tusu ari ka iagho nogu cheke te gnafa nei vetula, nei cheke faheta te gnafa teu igre. Eghuteuna ke leghu na, iagho mala farirhiu glepo igre ka naiknore, mala leghudi mare ka glose teke tusu lao iara ka mare mala khotodi.’ ”
32Aonu mae Moses ne cheke eghu, “Ghotilo mala faghuai eghu te mala edi gobigna lepo teke chekedi LORD, nomi God ka ghotilo ra. Ghotilo mala thofno leghudi vetula igre. 33Ghotilo mala leghudi mare gnafa. Eghuteuna jame te eni ghotilo igne na, nakarhami ghotilo re ginauna keli fara, eghuteuna ghotilo ginauna tangomana te au raugha ka glose nate au ghotilo tagna na.”
6Vetula te biꞌo lahu
1Aonu mae Moses ne cheke eghu, “Igre nogna cheke nei vetula eghu LORD nomi God ghotilo teke cheke ranghi ghau iara te mala farirhiu ghami ghotilo. Te mala leghudi ghotilo ka glose nate tei ghotilo te hata ginauna. 2Ghotilo, baludi thumi nei grami teure mala ghatho tahuni fabrahu LORD nomi God ka puhi te leghudi ghotilo cheke nei vetula eghu te chekedi iara ka ghotilo gognaro igre. Jame te eni ghotilo igne na, ghotilo ginauna au ka nakarha te brahu. 3Eghume, ghotilo Israel, ghotilo fanomho fakeli ka vetula igre, eghuteuna famane leghu fakelidi. Jame te eghu ghotilo na, ghotilo ginauna au fakeli, eghuteuna ghotilo ginauna na vuragha ka famane glose igne, jateula LORD nodi God kuꞌemi ghotilo teke nhaꞌa cheke ka ghotilo ra.
4“Fanomho, Israel! LORD noda God tahati na, mana kaisei God kolho te mala tarai nei pogho soruni teu tahati na. 5Eghuteuna ghotilo mala namhani LORD nomi God ka nagnafami fateote’o, nei ka gaoghathomi fateote’o, nei ka nanhetami fateote’o. 6Ghotilo mala au gaoghathomi fabrahu ka cheke te tusu ari iara ka ghotilo gognarogne. 7Farirhiudi koba thumi re. Cheke eidi glepo igre kate au teu ka suga, ba kate nolo ka nabrou, ba kate thuru sukha, ba kate kegra haghe. 8Ghotilo rioriso soru cheke igre, eghuteuna haru famaku jateula kaisei tuthuana eghu ka khamemi nei ka greremi teu are. 9Eghuteuna ghotilo mala rioriso ka phei khegradi nomi grengathadi suga re, nei ka grengathadi nomi namono re eghu.”
Israel mala tarai kolho LORD
10Aonu mae Moses tudu ne cheke eghu, “LORD, nomi God ghotilo igne neke nhaꞌa chekehi ka Ebraham, ka Isak nei ka Jekop, thilo kuꞌeda tahati ra, mala tufa glose ka ghotilo. Glose igne au famane namono teke theome horo nga teku ghotilo ra. 11Eghuteuna glose igne au suga te fodu ka glepo te keli teke theome lilisei ghotilo, seu teke theome dokha ghotilo, nei nagare grep, nei nagare oliv eghu teke theome joꞌu ghotilo. Eghume kate ghamu te boho ghotilo ka gano igre, 12ghotilo fiofilo ghami eghu, glahu ghatho ihoni ghotilo LORD mae ihei teke hata fajifla ghami Ijep ka namono aheva teke loku jateula naikno sneka teku ghotilo ra.
13“Ghotilo mala ghatho tahuni LORD, nomi God, mala loku ranghini kolho mana. Eghuteuna ghotilo nhaꞌa cheke kolho ka nanghagna mana. 14Ghotilo thosei pogho soru ka nodi god keha naiknoi te au faligoho ghami ghotilo are, 15naugna LORD nomi God, mae ihei te au balumi ghotilo igne ginauna diꞌatagna fara ka ghotilo. Diꞌatagna mana igne ginauna jateula kaisei khaꞌaghi biꞌo eghu goigoni ghami ghotilo hui mala theo kaisei ka ghotilo te karha au teu ka nauthoglu igne. 16Ghotilo thosei fariuriuni LORD, nomi God jateula teke eni ghotilo tifa kani au teku ghotilo ka namono Masa ia eghu. 17Leuleghu fata na ghotilo mala thofno leghudi nogna cheke LORD, nei farirhiu nei vetula eghu teke tusu ari mana ka ghotilo ra. 18Ghotilo mala edi unha te keli nei doglo ka tathagna LORD. Jame te eni ghotilo igne na, ghotilo ginauna tangomana te au ka nakarha te keli, eghuteuna ghotilo ginauna tangomana te tei hata glose teke kulu nhaꞌa chekenihi LORD ka kuꞌemi ghotilo ra. 19Ghotilo ginauna ngolhi fajifladi naoka te au ka glose igne jateula teke chekenihi LORD ia eghu.
20“Nathuꞌu nauriha na thumi ghotilore ginauna ghusna eghu ka ghotilo, ‘Naugna unha si LORD, noda God tahati gne te cheke ranghi ghita tahati te mala leghudi farirhiu nei cheke nei vetula teu igrea?’ 21Ghotilo ginauna cheke eghu ranghidi, ‘Tifa na ghehati neke nogna sneka king gna Ijep. Nu LORD neke mei fakarhi ghami ghehati Ijep ka nogna nolaghi biꞌo na. 22Ka narane tuare, mana neke edi kmana fagaglana nei kofubobhoi nei glepo mamhaghuana, eghuteuna mana loku ka nogna nolaghi biꞌo ranghidi naiknodi Ijep, king nei nomi mae biꞌo te gnafa. 23Mana neke hata fajifla ghita Ijep, eghuteuna mana hata mei ghita agne ka glose teke nhaꞌa chekeni mana ka kuꞌeda tahati ra. 24Eghuteuna LORD noda God neke cheke faheta ka tahati mala leghudi vetula igre, nei ghatho tahuni LORD. Ka puhi igne, mana ginauna fablahi ghita fabrahu nei reireghi fakelidi nakarhada, jateula te eni mana ka tahati gognarogne eghu. 25Eghuteuna jame te thofno leghudi tahati vetula te chekedi God igre na, tahati tangomana te au doglo balugna LORD noda God.’ ”
7Naiknodi Israel mala ngolhi fajifladi naiknodi Kenan
1Aonu mae Moses ne cheke eghu, “LORD, nomi God ghotilo na ginauna hata ghami ghotilo tei mala hata glose ka vikegna mae Het, nei ka vikegna mae Gigas, nei ka vikegna mae Amoa, nei ka vikegna mae Kenan, nei ka vikegna mae Peris, nei ka vikegna mae Hivi, nei ka vikegna mae Jebus. Mana ginauna ngolhi fajifladi keha naikno te au ka glose igne. Eghuteuna neuba fitu vike igre ne nheta ulu ghami ghotilo, 2nu mana ginauna lisa ari naikno igre ka khamemi ghotilo, eghuteuna ghotilo ginauna uludi mare. Ka narane tuana, ghotilo mala aknu falehedi gnafa. Ghotilo mala thosei eni kaisei nhaꞌa cheke te mala au fakeli baludi mare na. Eghuteuna ghotilo mala thosei kokhonidi mare. 3Ghotilo mala thosei snakredi thumi nalhaꞌure mala tolaghi ka thudi gaꞌase mare re, eghuteuna thudi nalhaꞌu mare igre thosei mei tolaghi ka thumi gaꞌase ghotilo re. 4Jame te eni ghotilo igne na, mare ginauna tangomana te figri gaoghathodi thumi ghotilo re mala theome leghuni LORD nu tei leghudi keha god delei. Jame te eni mare igne na, LORD ginauna diꞌatagna fara ka ghotilo, eghuteuna mana ginauna ghosei goigoni ghami ghotilo. 5Eghume ghotilo mala roꞌe soru nodi olta nei mumuju thina, nei roꞌe soru mumuju gna gaꞌase god Astarot, eghuteuna ghotilo mala gnhubra nodi mumuju mare re. 6Ghotilo mala edi glepo igre, naugna ghotilo nogna naikno blahi LORD, nomi God. Mana neke vahi fadelei ghami ka keha naikno te gnafa ka nauthoglu igne mala nogna naikno thegna.
7“LORD namha ghami ghotilo neke vahi fadelei ghami ghotilo, theome naugna te kmana te salaꞌudi ghotilo keha naiknore ka nauthoglu igne. Ghotilo laseni, ghotilo bua fara salaꞌudi keha naiknore ka nauthoglu igne. 8Nu naugna mana namha ghami ghotilo, eghuteuna mana leghuni nhaꞌa cheke teke eni mana baludi kuꞌemi ghotilo tifa ra, mana neke fakarhi ghami ghotilo ka nogna nolaghi biꞌo na kani teke hata fajifla ghami ka khamegna king gna Ijep mala theome sneka ghotilo. 9Te mala laseni ghotilo na LORD nomi God ghotilo na, mana ngala God mae ihei te ghatho tahu ghami ghotilo na. Eghuteuna mana tajini nogna nhaꞌa cheke na, eghuteuna mana namha ghami ghotilo iheire te namhani nei leghudi teu nogna vetula mana re. Kate namhani nei leghuni teu ghotilo mana na, mana tangomana te tajini u nhaꞌa cheke na balumi ghotilo nei thumi ghotilo re eghu fabrahu ghilei posani kmana thogha finogha. 10Nu ka iheire te tirodini mana re, mana ginauna ghosei paradi nei goigonidi naikno igre. 11Eghume, ghotilo mala thofno leghudi nogna cheke, nogna vetula nei nogna farirhiu teu mana te chekedi iara ka ghotilo gognaro igre.”
LORD fablahidi iheire te leghuni mana re
12Mae Moses ne cheke eghu, “Jame te leghudi nei nomhidi teu ghotilo vetula igre na, LORD nomi God ghotilo igne ginauna tajini nogna nhaꞌa cheke na eghuteuna namha ghami ghotilo fabrahu jateula teke nhaꞌa chekeni mana ka kuꞌemi ghotilo ra eghu. 13Eghuteuna kate leghudi ghotilo vetula igre, mana ginauna namha ghami nei fablahi ghami eghu mala vuragha au kmana thumi ghotilo, eghuteuna ghemi nagare ghotilo re ginauna au kmana gano, eghuteuna ghotilo ginauna au ghemi kmana waen, nei kmana oel mala kuki. Eghuteuna mana ginauna fablahidi nomi buluka nei sipu teu ghotilo re mala karha kmana thudi. Ka puhi jateula igre eghu mana ginauna tangomana te fablahi ghami ghotilo kate au ghotilo ka glose teke nhaꞌa chekehi mana ka kuꞌemi ghotilo ra. 14LORD ginauna fablahi ghami ghotilo tulao ke klignadi keha naikno te gnafa ka nauthoglu igne. Eghume ghotilo te gnafa na, neubane nalhaꞌu ba gaꞌase ginauna au thugna. Eghuteuna glepo tautagu te gnafa igre ginauna jaola au thudi. 15Eghuteuna LORD ginauna bara fothi ghami ka thua fogra fateote’o. Mana ginauna na theome snakre ghami ghotilo mala thoke ghami thua nafnata fogra te thono diꞌa fara te lasedi ghotilo Ijep ra. Nu mana ginauna snakre lao fogra igre ka nomi naoka ghotilore. 16Ghotilo mala aknu falehe naikno te gnafa te lisa ari LORD ka khamemi ghotilo are, thosei kokhonidi. Ghotilo mala thosei pogho soru ka nodi god mare re, naugna igne kaisei puhi te mala jateula kaisei phighoro teu mare te mala fakhale ghami ghotilo na.
17“Glahu cheke eghu ghotilo, ‘Naikno igre thono nheta fara salaꞌu ghita tahati! Thono ninhigrana fara ranghi ghita tahati te mala ngolhi fajifladi re!’ 18Nu ghotilo thosei mhaghudi mare! Khogla ke ghathodi unha LORD nomi God teke edi ka king nei ka naikno te gnafa Ijep tifa ra. 19Mana neke hata fajifla ghami ka khame nhetagna king gna Ijep. Ghotilo neke filo tathamihi kofubobhoi nei nolaghi nei glepo te mamhaghuana fara LORD noda God teke edi kani teke hata fajifla ghami ghotilo Ijep ia. Eghume, LORD nomi God ghotilo igne ginauna jateula tuana eghu goigonidi naikno te mhaghudi ghotilo tuare. 20Neuba keha ne fariuriu poru, LORD nomi God igne ginauna famamhaghudi fara mala rikha tafri ghilei kafe lehe gnafa mare! 21Eghume ghotilo thosei mhaghudi mare, naugna LORD nomi God ghotilo na au balumi ghotilo. Mana au nolaghi fateote’o, eghuteuna mare mhaghu nodini fara mana. 22LORD nomi God ghotilo igne ginauna ngolhi fajifladi mare ka puhi te theome faghose fara. Eghume ghotilo theome tangomana aknu falehedi mare kaisei fata kolho na, naugna jame te eni ghotilo igne na, glepo tautagu te au ka vido tuana ginauna kmana fara eghuteuna glepo igre tangomana te goigoni ghami ghotilo na. 23Nu LORD ginauna tusu ari ka ghotilo nodi glose naiknore. Eghuteuna naikno teke khotogna glose igne ginauna mhaghu nodi fara na theome tangomana te eni unha na, ghilei aknu falehe gnafa ghotilo naiknore. 24Iara ginauna lisa ari nodi king re ka khamemi ghotilo mala aknu falehedi hui mala theo kaisei na teke ghathodi re. Ghotilo ginauna aknu falehedi naiknore, eghuteuna theo kaisei naikno na teke kegra fanogridi ka ghotilo re. 25Ghotilo gnubra nodi mumuju re ka khaꞌaghi. Eghuteuna ghotilo thosei mamagnadi silva nei gol eghu te au ka mumuju igre ba hata malami themi, nu ghotilo mala gnubra fahui. Glepo igre diꞌa fara ka LORD nomi God. Ghotilo thosei tathaji naugna jateula kaisei phighoro eghu ka ghotilo. 26Ghotilo thosei hata mei kaisei glepo te diꞌa igre ka sugami re. Jame te eni ghotilo igne na, LORD ginauna goigoni ghami ghotilo jateula mana te goigonidi glepo igre eghu.”
8Naiknodi Israel mala thosei ghatho ihoni LORD
1Aonu mae Moses ne cheke eghu, “Ghotilo mala thofno leghu fakelidi vetula te gnafa te tusu ari iara ka ghotilo gognaro igre. Jame te leghudi ghotilo cheke igre na, ghotilo ginauna karha nei thovu eghu, eghuteuna ghotilo ginauna tangomana te hata te khotogna glose teke nhaꞌa cheke LORD ka kuꞌemi ra. 2Leuleghu fata na ghotilo mala ke ghathoni LORD nomi God mae ihei teke batu ghami ke lamna namono nagou nabagna phiatutu finogha. Mana neke fariuriu ghami ghotilo kate thokedi narane te ninhigrana mala laseni na tangomana ghotilo te leghudi nogna vetula mana re ba theo. 3Uve, mana neke magnahaghei te fariuriu ghami ghotilo neke rofo eghuteuna faghamu ghami ka ‘manna’, kaisei gano te theome laseni ghotilo nei kuꞌemi ghotilo tifa ra. Mana neke eni igne mala farirhiu ghami ghotilo te naikno na theome tangomana te karha ka gano kolho, nu tahati karha ka cheke te gnafa te mei ka foflogna LORD. 4Ka phiatutu finogha igre ghotilo nolo neke tei eghuteuna nomi pohere neke theome breku, eghuteuna ghahemi re neke theome huge ba thubu. 5Ghotilo laseni, LORD nomi God ghotilo na tangomana te fadogli ghami ghotilo na jateula kaisei mae te fadoglini thugna na ia eghu.
6“Eghume ghotilo mala leghudi nogna cheke teke chekedihi ka ghotilo ra, eghuteuna ghotilo mala leghudi puhigna mana re eghuteuna thofno ghatho tahuni mana. 7LORD nomi God ghotilo igne ginauna hata tei ghami ghotilo ka glose te keli te au khoꞌu nei glokha te loloro ka glogu nei ka gukhu. 8Glose igne au nagare wit nei bali, nei sisi grep, nei sisi pomegranet, nei gaju fig, nei gaju oliv, nei jaola au kmana jurukuli. 9Eghuteuna kate au teu ghotilo ka glose igne, ghotilo ginauna na theome kmoꞌe ka gano na, eghuteuna ghotilo ginauna jaola theome ninhigrana ka kaisei glepo na. Jare na au thina mala horo aean tagna, eghuteuna ghotilo ginauna tangomana te dokha bras ke lamna gukhu.
10“Ghotilo ginauna ghamu boho ka gano te vuragha te salaꞌudi unha te magnahaghedi ghotilo re, eghume ghotilo mala cheke fakelini LORD naugna mana neke tusu ranghi ghami ghotilo glose te keli igne. 11Fiofilo ghami, glahu ghatho ihoni ghotilo LORD nomi God, ba theome leghudi nogna cheke mana ra, nei vetula nei farirhiu eghu te tusu ari ka ghotilo gognaro igre. 12Eghuteuna ghotilo faghuai eghu ka narane te au ghemi kmana gano te keli ba horo nomi famane suga te mala thuru tagna na. 13Eghuteuna ghotilo mala faghuai eghu ka narane te au nomi kmana gol nei silva, nei kmana buluka nei kmana sipu baludi keha glepo langau teu are. 14Jame te theome filo fakeli ghotilo na, ghotilo tangomana te ghatho tahu ghami themi, eghuteuna ghotilo ginauna ghatho ihoni LORD nomi God. Mae ihei teke hata fajifla ghami ka naꞌau papara Ijep kani teke au sneka jare ia. 15Thosei ghatho ihoni teke batu ghami mana ke lamnagna namono nagou te krepa nei biꞌo fara nei diꞌa fara. Ka namono nagou aheva te au kmana mogo faghughumhu nei thafrasege, nei theo khoꞌu. Nu LORD neke chekeni khoꞌu na neke jifla mei ka kaisei thina biꞌo mala koꞌu ghotilo. 16Eghuteuna mana neke tusu mei ka ghotilo ‘manna’ igne mala ghamu boho ghotilo. Nu gano igne, ghotilo baludi kuꞌemi ghotilo tifara neke theome laseni gano igne. LORD neke eni igne mala thoke ghami ghotilo narane te ninhigrana mala fariuriu ghami ghotilo, nei mala gaoghathomi ghotilo na, eghuteuna ke leghu na LORD neke fablahi ghami ghotilo ka kmana nafnata glepo te keli. 17Eghume ghotilo fiofilo ghami, glahu ne nomi nanheta themi kolho te jateula na dedei teuna eghu ghotilo gaoghathomi na. 18Ghathoni LORD nomi God. Mana ngala mae ihei teke tusu ari nolaghi ka ghotilo na mala au nomi kmana glepo te keli. Mana eni igne gognarona naugna mana tajini nhaꞌa cheke teke eni mana baludi kuꞌemi ghotilo tifara.
19“Iara cheke fadoglo ari ka ghotilo gognarona, jame te ghatho ihoni ghotilo LORD nomi God na, eghuteuna leghudi keha god delei, eghuteuna tarai nei tufru soru tadi teuna, LORD ginauna thofno goigoni ghami fara ghotilo. 20Uve, jame te theome leghuni LORD ghotilo na, mana ginauna goigoni ghami ghotilo jateula teke thofno goigonidi fara mana naikno te au glose nate tei posa ghotilo tagna na.”
9Gaoghatho LORD te toghodi naiknodi Israel
1Aonu mae Moses ne cheke eghu, “Naiknomi Israel, ghotilo fanomho fakeli! Gognarona ghotilo namo kasa ka Khoꞌu biꞌo Jordan mala tei hata glose na ka naikno te nheta ulu ghami ghotilo. Nodi namono re biꞌo fara, eghuteuna gringni thina te bara te lithui na thono haghe fara. 2Eghuteuna naiknore brahu fara, nei thono nheta fara, mae igre vikegna mae Anak. Ghotilo lasedi eghuteuna te nomhidi ghotilo eidi mae igre na, mare chekeni te theome tangomana kaisei mae te uludi vikegna mae Anak. 3Nu gognarona ghotilo laseni, LORD nomi God ghotilo na neke nhaꞌa chekehi te mala kulu ulu ka ghotilo na. Kate kulu tei na mana ginauna jateula kaisei khaꞌaghi te gnhubra gobigna lepora eghu na thofno goigonidi fara naikno tuare. Eghume ghotilo tangomana te ngolhi fajifladi re, eghuteuna ghotilo ginauna ghosei aknu falehedi kolho.
4“Aonu ke leghugna teke kulu ulu LORD nomi God ghotilo na teke ngolhi fajifladihi naikno igre na, ghotilo thosei cheke eghu fari themi, ‘LORD neke hata mei ghami ghehati ka glose igne naugna ghehati gne doglo ka tathagna mana na!’ Theo, mana ginauna ngolhi fajifladi naiknore naugna mare ne leghuni puhi te diꞌa na. 5Theome naugna te keli nei doglo teu ghotilo na. Theo! LORD ginauna ngolhi fajifladi naikno igre naugna mare ne eni unha te diꞌa nei naugna teke nhaꞌa chekeni mana ka kuꞌemi ghotilo mae Ebraham, Isak nei Jekop mala tusu ranghi ghami ghotilo glose igne. 6Ghotilo laseni, LORD nomi God ghotilo na neke theome tusu ari ka ghotilo glose igne naugna te naikno doglo ghotilo na. Theo. Ghotilo patu gama fara!
Naiknodi Israel neke horo mumuju buluka ka gol
7“Ghotilo thosei ghatho ihoni unha teke eni LORD nomi God ka namono nagou ia, mana neke diꞌatagna fara ka ghotilo. Funu ka narane teke jifla ghotilo Ijep te thoke ka narane te mei posa ghotilo ka namono igne, ghotilo neke theome leghuni LORD. 8Jare Thogele Sanai, ghotilo neke faꞌeiꞌei neke diꞌatagna fara LORD, eghuteuna diꞌatagna mana igne namo falehe ghami ghotilo. 9Ka narane tuana, iara neke haghe ka thogele na neke hata phei thina tataba te au nogna nhaꞌa cheke LORD teke eni mana balumi ghotilo ia. Eghuteuna iara neke au ka thogele igne phiatutu narane nei phiatutu bongi, eghuteuna ka narane tuare iara neke theome ghamu nei theome koꞌu. 10-11Eghuteuna ke leghudi te gnafa phiatutu narane nei phiatutu bongi teu igre, LORD neke tusu mei phei thina tataba igre ka iara.
“Ke klignadi phei thina tataba igre, LORD neke rioriso ka khamegna thegna cheke te gnafa teke jifla mei ke lamna khaꞌaghi ka narane teke khapru teku ghotilo ka pesi thogele ia. 12Aonu LORD ne cheke eghu ka iara, ‘Moses, faghose sukha, naugna naikno teke hata fajifla iagho Ijep igre gognarona la fadiꞌadi thedi. Mare la koko puhi teke cheke ranghidi iara mala leghuni mare teku igne. Mare horo kaisei nodi mumuju ka gol mala tarai.’
13“Eghuteuna LORD ne cheke eghu ka iara, ‘Iara la lasedihi naikno igre, mare patu gama fara. 14Iagho thosei lhoti ghau iara, iara ginauna goigonidi mare. Iara ginauna na theome snakreni kaisei naikno mala ke ghathodi mare. Eghume iara ginauna eni vikemu iagho na mala kaisei vike te biꞌo nei nolaghi fara eghu uludi mare.’
15“Aonu iara figri neke sukha funu ka thogele na kate dudulu teu khaꞌaghi na. Eghuteuna iara ne hata balugu phei thina nhaꞌa cheke igre. 16Eghuteuna kate posa iara ka ghotilo na, iara filo ghami ghotilo te eni nakhibo biꞌo ranghini LORD nomi God. Ghotilo neke eni kaisei mumuju sua buluka ka gol. Ghotilo ghosei ngala te tei kokoni puhi teke chekeni LORD mala leghuni ghotilo teku ia. 17Aonu iara neke koko sukha phei thina igre pari neke phike ke ulumi ghotilo.
18“Eghuteuna iara ne khoko sukha pari ka glose na ne tarai ke ulugna LORD nabagna phiatutu narane nei phiatutu bongi, iara theome ghamu nei theome koꞌu. Iara eni igne naugna ghotilo neke eni nakhibo biꞌo ranghini LORD neke ghilei diꞌatagna fara mana. 19Iara mhaghu noguni fara diꞌatagna LORD na naugna mana diꞌatagna fara jateula mana tarabana teu te mala aknu falehe ghami ghotilo na. Nu LORD neke nomhini nogu tharai iara na. 20Eghuteuna LORD jaola neke diꞌatagna fara ka mae Eron, jateula mana te tarabana teu te mala aknu faleheni ra neu. Nu iara ne taraini mae Eron, aonu mana neke theome faleheni mana. 21Eghuteuna ghotilo neke eni nakhibo ka God kate horo ghotilo mumuju buluka tuana. Eghume iara neke hata buluka tuana neke koko lao ka khaꞌaghi. Aonu iara neke piphike faꞌikoi mumuju buluka tuana neke ghilei vuhai nakrofu, eghuteuna iara koko ne tei nakrofu igre ka khoꞌu te loloro sukha funu ka thogelero.
22“Ka keha thilo narane re ghotilo neke eni puhi te diꞌatagna fara LORD jare ka namono Tabera, nei Masa, nei namono Kibrot-Hatava.
23“Eghuteuna jare Kades Banea, LORD neke cheke ka ghotilo mala tei ghotilo hata glose teke nhaꞌa chekeni mana na. Nu ghotilo neke theome leghuni nogna cheke mana na. Ghotilo theome fatutuani ni mana, ba leghuni mana. 24Funu ka narane te lase ghami iara te ghilei mei posa gognarogne, ghotilo theome keli ranghini LORD.
25“Aonu iara ne thuru sukha pari ke ulugna LORD nabagna phiatutu narane nei phiatutu bongi, naugna iara laseni mana neke chekeni te mala falehe ghami ghotilo na. 26Ka narane tuana iara tarai ka LORD ne cheke eghu, ‘LORD nogu Funei, thosei falehedi. Naikno igre nou iagho, eghuteuna iagho neke hata fajifladi Ijep ka nou nolaghi te biꞌo nei ka khamemu te rheta tulao. 27Ghathodi sagho thilo nou mae glokura, Ebraham, Isak nei Jekop. Eghuteuna kate ghathodi iagho thilo mae igre, thosei filo ka nakhibo teke edi naikno te patu gama fara igre. 28Jame te goigonidi iagho naikno igre na, naiknodi Ijep igre ginauna cheke eghu, “Naiknodi Israel igre la lehehi naugna LORD na theome tangomana te hatadi te tei ka glose teke nhaꞌa chekeni mana mala tusu lao ka mare teku na.” Ba, mare ginauna cheke eghu, “Mana falehedi mare naugna mana tirognadi; mana magnahaghei te hata teidi kolho ka namono nagou na mala falehedi jare.” 29Nu iagho lasedi, naikno igre nou iagho, iagho neke hata fajifladi Ijep ka nou nolaghi te biꞌo nei ka khamemu te rheta tulao.’ ”
10LORD fapea tusu lao Nabotho Vetula igre ka mae Moses
1“Ka narane tuana LORD ne cheke eghu ka iara, ‘Moses, iagho ghagra ka phei thina tataba igre jateula teke phei ulu lahu ra eghu. Eghuteuna iagho horo kaisei bokis ka thaba. Eghuteuna iagho haghe ka iara agne ka thogele igne hata mei balumu phei thina tataba tuare. 2Iara ginauna rioriso ka phei thina tataba igre cheke teke au ka phei thina tataba teke piphikehi iagho ra. Eghuteuna iagho mala lilisei phei thina tataba gre ka bokis tuana.’
3“Aonu iara ne eni kaisei bokis ka taba gaju akesia. Eghuteuna iara ne kato phei thina tataba jateula ulu lahu ra neu. Aonu iara pala ne haghe ka thogele na. 4Aonu LORD hata phei thina igre neke rioriso Nabotho Vetula igre ke klignadi. Nogna cheke mana igre nanaba kolho jateula cheke teke cheke mei ka tahati funu ka khaꞌaghi na ka narane teke khapru teku tahati ka pesi thogele ia eghu. 5Aonu iara figri neke sukha mei funu ka thogele ro, eghuteuna iara lilisei phei thina igre ka bokis teke horo iara jateula teke chekeni mana na teu igne. Eghuteuna phei thina igre au ngala ka bokis tuana gognarogne.”
Pris Eron ne lehe
6(Kaisei fata, naiknodi Israel jifla ka nodi seu vikegna mae Jakan ne tei ka nohi Mosera. Jare pris biꞌo Eron ne lehe eghuteuna mare ne giugiluni mana. Eghuteuna mae Eleasa thugna mana igne teke tughuni mana teke mae pris biꞌo na. 7Funu Mosera mare ne tei ka gluma Gudgoda, eghuteuna funu jare mare neke tei ka nohi Jotbata. Namono igne au kmana khoꞌu tagna. 8Eghuteuna ka narane tuana, LORD neke vahini vikegna mae Livae mala palagna nogna Bokis Blahi Nhaꞌa cheke LORD na. Eghuteuna mae igre loku ka Suga Tapuale te Blahi na nei mala fablahidi naiknore ka nanghagna LORD. Igre nodi gloku mare te mei posa gognarogne. 9Naugna igne mae Livaet gre theo thufadi ka glepo ba vido glose jateula keha vikedi Israel te au thufadi ba au nodi vido glose teu igre eghu. Naugna LORD nomi God ghotilo igne mana la chekehi ka mare te mana tangomana te tusu lao gobigna lepo te nabadi mare te mala karha tagna na.)
10Mae Moses ne cheke eghu, “Iara neke au ka thogele igne phiatutu narane nei phiatutu bongi, jateula teke eni iara ulu lahu ia neku. Eghuteuna LORD neke nomhini nogu tharai iara na ka narane tuana, aonu mana neke theome falehe ghami ghotilo. 11Nu LORD ne cheke eghu ka iara, ‘Iagho tei, mala batudi naiknore tei mala hata glose teke nhaꞌa chekehi iara mala tusu lao ka kuꞌemi ghotilo ra teku igne.’ ”
12Aonu mae Moses ne cheke eghu, “Ghotilo naiknomi Israel. Unha te magnahaghei eni ghotilo teu LORD nomi God ghotilo na? Ghotilo mala ghatho tahuni nei leghuni eghu puhigna mana na, eghuteuna tahati mala namhani nei loku ranghini eghu mana ka nagnafada fateote’o nei ka gaoghathoda fateote’o. 13Eghuteuna ghotilo mala leghudi nogna cheke nei farirhiu eghu teke tusu ari mana te mala keli nakarhami ghotilo re.
14“Kligna nei nauthoglu nei gobigna lepo fateote’o te au ke lamnadi teu igre nogna LORD nomi God ghotilo khotodi re. 15Neuba, mana namhadi fara thilo kuꞌemi ghotilo ra, Ebraham, nei mae Isak, nei mae Jekop. Eghuteuna mana theome magnahaghedi keha naiknore ka nauthoglu igne, nu mana neke vahi ghami ghotilo iheire teke karha mei ka vikedi thilo mae igre. Eghuteuna gognarona ghotilo nogna naikno mana. 16Eghume, ghotilo kato koko gobigna lepo ka gaoghathomi ghotilo te patu gama nei theome tajini teu nogna nhaꞌa cheke LORD igne. 17LORD nomi God ghotilo igne, mana God frunidi god te gnafa nei LORD frunidi Lord te gnafa teu igre. Mana Thofno God mae ihei te au nolaghi fateote’o eghuteuna naikno te gnafa ka nauthoglu igne mhaghuni mana. Kate fateni ihei na, mana theome tangomana te phile ka ihei, eghuteuna mana theome tangomana te hata sileni ka ihei te mala theome fate ka puhi te doglo. 18Mana reireghi fakelidi naikno biꞌo te lehe khetodi re nei naikno glehe kokoi, mala theome chaghidi mare. Mana fakakhana nogna namha na ranghidi naikno phosa te au balumi ghotilo eghuteuna tufa ghedi gano nei nodi pohe. 19Eghume ghotilo mala jaola mala namhadi naikno phosa igre, naugna tifa na, ghotilo neke jaola neke naikno phosa Ijep. 20Ghotilo mala ghatho tahuni LORD nomi God, nei leghudi unha te chekedi mana re. Ghotilo ghatho tahuni kolho mana. Eghuteuna nomi nhaꞌa cheke re, ghotilo edi ka nanghagna mana kolho. 21Ghotilo ghatho tahuni LORD! Eigna mana ngala nomi God ghotilo mae ihei teke edi glepo biꞌo te mamhaghuana teke filodi ghotilo ra. 22Kuꞌemi ghotilo teke sukha teke au Ijep tifa ra neke theome kmana, mare neke fitusalei naikno kolho. Nu gognarona LORD nomi God ghotilo na fablahi ghami ghotilo la ghilei kmana fara jateula nathunu ka maloa na are lau!”
11Mare mala namhani LORD
1Mae Moses ne cheke eghu, “Ghotilo mala namhani LORD nomi God nei leghudi fabrahu nogna vetula, nogna farirhiu nei nogna cheke teu mana ka ghotilo igre. 2Gognarona ghotilo mala ghathodi thumi ghotilo teke theome lasedi nei haimidi teku unha teke edi LORD nomi God. Mare neke theome filodi nogna nolaghi nei nogna nanheta nei ka khamegna te nolaghi eghu teke uludi mana nogna naoka re. 3Eghuteuna mare neke jaola neke theome filodi kofubobhoi nei glepo biꞌo eghu teke edi mana ka king gna Ijep nei ka nogna naikno te gnafa. 4Eghuteuna thumi ghotilo gre neke theome filoni puhi teke eni LORD teke goigonihi armigna Ijep kani teke ngolhi ghami ghotilo mare ra. Ghotilo kolho teke filoni LORD teke goigoni ni armi gna Ijep igne balu hose nei nogna chariot mala magra king, eghuteuna mana neke fakmerhudi ke lamna Thongna Ukru. 5Thumi ghotilo re theome lasedi, nu ghotilo kolho lasedi glepo teke edi LORD ka ghotilo ke lamna namono nagou ghilei mei posa ghotilo agne. 6Thumi ghotilo gre theome filoni unha teke eni mana ka mae Dotan ghe mae Abiram, phei thugna mae Eliab vikegna mae Ruben, nu ghotilo naiknodi Israel filoni glose na neke thora na, eghuteuna phiamare balu nodi tharakna, nei nodi suga tapuale, nei nodi gobigna lepo fateote’o te karha re eghu ne snoꞌo pari lamna glose. 7Nu ghotilo neke thofno filo tathami gobigna lepo te biꞌo teke edi LORD ra.”
Glepo te keli te au ka glosegna Kenan
8Mae Moses ne cheke eghu, “Ghotilo mala leghudi vetula te tusu ari iara ka ghotilo gognaro gre, ka puhi igne ghotilo ginauna au nomi nolaghi te mala hata glose kate kasa ghotilo ka Khoꞌu biꞌo Jordan. 9Eghuteuna ghotilo ginauna tangomana te au raugha ka thofno glose te keli teke nhaꞌa cheke LORD ka kuꞌemi ghotilo ra nei ka ghotilo vikedi mare ra. 10Glose nate tei ghotilo tagna te hata igne, theome jateula glose Ijep te jifla kokoni ghotilo ia eghu. Jare na, leuleghu narane na ghotilo gloku biꞌo fara kate pala khoꞌu te tei lilisei ka nomi nagare re. 11Nu glose nate tei kasa ghotilo ka Khoꞌu biꞌo Jordan te hata igne, au gukhu nei glogu, eghuteuna leuleghu fata na nakhete fabrahu mala karha gano. 12LORD nomi God ghotilo igne mana reireghi fakelini glose igne. Leuleghu narane na mana filo tongana ni, funu ka vuvuhagna finogha na tei posa ka gnafagna finogha na.
13“Jame te leghudi ghotilo vetula te tusu ari iara ka ghotilo gognarogne, eghuteuna ghotilo mala namhani LORD nomi God nei loku ranghini mana ka nagnafami fateote’o nei ka gaoghathomi fateote’o, 14jame te eghu ghotilo na, mana ginauna kuru mei nakhete ka nomi glose ghotilo gne ka thofno naranegna na. Uve, famane nakhete ginauna mei ka narane te mala kaikaliti joꞌu nagare, nei ka narane mala famane kotu gano. Ka puhi jateula igne teuna ghotilo ginauna au ghemi kmana gano, nei waen, nei oel mala kuki. 15Eghuteuna ghotilo ginauna au kmana buburu mala ghamu ghedi nomi glepo tautagu te oho ghotilo are. Eghume, ghotilo ginauna au ghemi gano te gnafa te magnahaghedi ghotilo re.
16“Nu filo fakeli ghami eghu, glahu chaghi ghami keha mae mala figri tagruni LORD, eghuteuna loku ranghidi nei pogho sorudi eghu keha god delei. 17Jame te eghu ghotilo na, LORD ginauna diꞌatagna fara ka ghotilo, eghuteuna mana ginauna theome snakreni nakhete na, aonu nomi vido glose ghotilo re ginauna khapra eghuteuna theo kaisei glepo nate kotu tagna na. Eghuteuna neuba glose teke tusu ari LORD ka ghotilo igne ne thofno keli fara, nu ghotilo ginauna theome raugha lehe tagna.
18“Ghotilo mala iju polodi nei ghaoghathodi eghu nogu cheke iara igre. Ghotilo rioriso soru cheke igre, eghuteuna haru famaku jateula kaisei tuthuana eghu ka khamemi nei ka greremi teu are. 19Farirhiudi thumire. Toutonu eidi glepo igre kate au teu ka suga, ba kate nolo ka nabrou, ba kate thuru, ba kate kegra haghe. 20Eghuteuna ghotilo mala rioriso ka phei khegradi nomi grengathadi suga re, nei ka grengathadi nomi namono re eghu. 21Jame te eghu ghotilo na, ghotilo nei thumi re teuna, ghotilo te gnafa na ginauna tangomana te au raugha ka glose teke nhaꞌa chekeni LORD teke tusu ari ka kuꞌemi ghotilo tifa ra. Uve, ghotilo te gnafa na ginauna tangomana te au fabrahu jateula maloa te au fabrahu ke kligna nauthoglu igne eghu.
22“Leuleghu fata na gaoghathomi ghotilore mala au rheta mala leghudi cheke te gnafa te tusu ari iara ka ghotilo gognarogne. Ghotilo mala namhani LORD nomi God, eghuteuna ghotilo mala leghudi puhigna mana re, eghuteuna ghotilo mala ghatho tahuni mana. 23Jame te thofno edi ghotilo igre na, neubane nheta ulu ghami ghotilo vikedi naikno te au ka glose igne, LORD ginauna ngolhi fajifladi kate tei magra ghotilo ka mare na. 24Aheva te tei tapla ghotilo tagna na, glose tuana nomi ghotilo. Nomi nohi ghotilo na ginauna funu ke mata namono nagou tei posa ke raru Thogele Lebanon, eghuteuna funu ke maghati Khoꞌu biꞌo Iufretis tei posa ke mosu Thongna Mediterenian. 25Eghuteuna kate tei ghotilo ka glose igne na, ginauna theo kaisei naikno nate kegra fanogra ghami ghotilo na, naugna LORD nomi God ghotilo na ginauna edi naiknore mala mhaghu ghami ghotilo jateula teke nhaꞌa chekenihi mana ka ghotilo ia eghu.
26“Gognarona iara na tusu ari phei nabrou, mala vavahi ghotilo. Kaisei na mana na fablahi ghami ghotilo, kehana mana na ei puhi biꞌo mala mei thoke ghami ghotilo. 27Jame te leghudi ghotilo nogna cheke LORD nomi God te tusu ari iara ka ghotilo gognarogne, mana ginauna fablahi ghami ghotilo. 28Nu jame te tiromi leghudi ghotilo nogna cheke LORD nomi God te figri tagruni mana te tei leghudi keha god delei teke theome lasedi ghotilore, mana ginauna ei puhi biꞌo mala mei thoke ghami ghotilo. 29Kate hata ghami LORD nomi God te tei ka glose nate hata ghotilo na, ghotilo mala chekedi phei philedi cheke igre. Kate kegra ghotilo ka thogele Gerisim, ghotilo mala chekeni phile cheke aheva gne nate fablahi ghami mana na. Eghuteuna kate kegra ghotilo ka thogele Ebal, ghotilo mala chekeni phile cheke aheva gne nate eni mana puhi biꞌo na te mala thoke ghami ghotilo na.” 30Phei thogele igre au ke kasa Khoꞌu biꞌo Jordan, ka nodi glose vikegna Kenan te au ka glogu Khoꞌu biꞌo Jordan. Phei thogele igre au rhegna nabrou te mala tei salaꞌu ke mosu gaju blahi More, rhegna namono Gilgal.
31Aonu mae Moses ne cheke eghu, “Gognarona ghotilo la namo tei kasa ka Khoꞌu biꞌo Jordan mala hata glose LORD nomi God teke tusu ari ka ghotilo igne. Kate hata ghotilo glose na te au fakeli tagna na, 32ghotilo mala thofno leghudi nogna cheke nei nogna farirhiu teu mana te tusu ari iara ka ghotilo gognarogne.”
12Vetula te mala leghudi naiknodi Israel kate au mare ka kantri Kenan
Mare mala au kaisei vido blahi kolho
1Mae Moses tudu ne cheke eghu, “Gognarona iara na chekedi vetula nei farirhiu eghu te mala thofno leghudi fabrahu ghotilo ka glose LORD nodi God kuꞌemi ghotilo teke tusu ari ka ghotilo ra. Vetula igre: 2Kate ngolhi fajifladi ghotilo naikno teke au ka glose igne na, ghotilo mala goigoni fahui nodi vido blahi te gnafa nodi god mare te au ka thogele nei ka gukhu, nei ke pari gaju. 3Ghotilo mala paꞌe sukha nodi olta re, eghuteuna goigoni nodi mumuju thina re. Eghuteuna ghotilo gnubra ka khaꞌaghi mumujugna god gaꞌase Astarot, eghuteuna kato sukha mumujudi nodi god re. Eghuteuna ghiha koko nanghadi nodi god re ka vido tuare mala theome tangomana kaisei naikno na teke ghathodi re.
4“Ghotilo thosei leghudi puhidi naikno bongihehe te au ka glose tuana kate pogho soruni ghotilo LORD nomi God na. 5Nu ghotilo mala filoni kaisei vido blahi kolho aheva LORD nomi God nate vahini te mala au fabrahu nanghagna mana na jare eghuteuna ghotilo mala ghatho tahuni nanghagna mana na. Ka vido blahi tuana kolho 6ghotilo nate hata te mei unha te mala fafara na. Fafara te thofno krono nei keha nafnata fafara la ngau, nei kaisei nomi fabotho re, nei nafnata fafara te nheta eigna nhaꞌa cheke, nei keha nafnata fafara te edi ghotilo leghuni unha te magnahagheni ghotilo, nei nomi sua buluka te karha ulu. 7Ka vido blahi tuana, ghotilo baludi tharaknami re tangomana te mei ke ulugna LORD nomi God. Jare ghotilo tangomana te ghamu gano te keli mala glealeꞌa ka gobigna lepore, naugna mana neke fablahidi nomi gloku ghotilo re.
8-9“Gognarona ghotilo theome tei posa ngau ka glose teke tusu ari LORD ka ghotilo igne. Glose igne nate au fakeli ghotilo tagna ginauna. Eghume gognarona tahati mala fafara leghudi noda gaoghatho theda re. Nu kate tei posa ghotilo ka glose igne na, ghotilo ginauna theome tangomana na teke fafara jateula te edi ghotilo gognarogre teuna. 10Ghotilo ginauna tei kasa ka Khoꞌu biꞌo Jordan mala thofno au fabrahu ka glose aheva LORD nomi God teke tusu ari mala khotogna ghotilo teku na. Eghuteuna mana ginauna togho ghami ghotilo mala au muana nei theome nangadi nomi naokare. 11Aonu ghotilo mala tei hata mei gobigna lepo teke chekedi re ka kaisei vido blahi kolho aheva LORD nomi God teke vahini te mala au nanghagna na jare. Ka vido blahi tuana kolho, te tangomana ghotilo hata te mei glepo teke chekedi iara ka ghotilo ra. Igne fafara te thofno krono na, nei keha nafnata fafara langau eghu, nei kaisei ka fabothodi nomi glepo re, nei kaisei nomi glepo te keli teke nhaꞌa cheke ghotilo te mala tusu lao ka LORD. 12Ka vido blahi tuana ghotilo tangomana te glealeꞌa ke ulugna LORD. Ghotilo baludi thumi nalhaꞌu nei thumi gaꞌase, nei nomi mae gloku teure, ghotilo te gnafa na tangomana te glealeꞌa jare na. Eghuteuna ghotilo mala edi vikedi mae Livaet te au ka nomi namono ghotilo are mala mei glealeꞌa balumi ghotilo jare, naugna mare theo nodi glose thedi. 13-14LORD ginauna vavahi kaisei vido blahi kolho ka nogna glose kaisei vike ka ghotilo. Eghume ghotilo filo ghami thosei gahu fafara ka kaisei vido aheva ghotilo te magnahagheini. Ghotilo mala gahu nomi fafara re ka vido blahi tuana kolho, eghuteuna jare ghotilo mala jaola edi keha glepo blahi teke chekedi iara ka ghotilo ra.
15“Nu kate magnahaghei aknu falehe ghotilo kaisei buluka ba sipu te mala ghamu na, ghotilo tangomana te aknu falehe ka vido aheva te au ghotilo tagna na. Jame LORD nomi God tusu ari kmana buluka ba sipu ka ghotilo, ghotilo tangomana te ghamu nafnahidi re jateula ghotilo te ghamu nafnahidi glepo tautagu ka namhata na are eghu. Ghotilo te gnafa na tangomana te ghamu nafnata nafnahi igne, neuba ghotilo ne klino ka tathagna LORD na ba ghotilo theome klino, naugna theome nafnahi neke fafara. 16Nu ghotilo ginauna thosei ghamu dadaradi glepo te tautagu igre. Ghotilo tofa tei dadara igre ka glose. 17Gobigna lepo te tufa ghotilo ka LORD igre, ghotilo thosei ghamu ka sugami re. Neubane kaisei ka fabothodi gano ba waen ba oel, eghuteuna neubane sua karha ulu ka nomi glepo te tautagu ghotilo, ba fafara eigna kaisei nhaꞌa cheke, ba kaisei fafara te eni ghotilo leghuni unha te magnahagheni ghotilo na, ba keha fafara la ngau, gobigna lepo jateula igre teuna blahi te ghamu ghotilo ka sugami re. 18Ghotilo baludi thumi nei nomi mae gloku nei vikegna mae Livae te au balumi ghotilo are eghu, ghotilo te gnafa na ginauna mala ghamu glepo blahi re ke ulugna LORD ka vido blahi teke vahini mana na. Jare ghotilo tangomana te gleꞌa ka gobigna lepo te edi ghotilo re. 19Eghuteuna kate au ghotilo ka glose igne na, ghotilo ginauna thofno reireghi fakelidi vikegna mae Livae.
20“Kate togho ghami LORD nomi God te krepa nei biꞌo teu nomi glose ghotilo igne jateula te nhaꞌa chekeni mana na teuna, jau ghotilo magnahaghei fara te ghamu nafnahi na. Jame te eghu na, ghotilo tangomana te ghamu nafnahi leghuni unha te magnahagheni ghotilo na. 21Jame vido blahi teke vahini LORD nomi God te mala lilisei nanghagna mana igne na au delei fara ka ghotilo, ghotilo tangomana te au teu ka nomi namonore kate aknu falehe ghotilo buluka nei sipu eghu teke tusu ari LORD ka ghotilo ra. Eghuteuna ghotilo tangomana te ghamu nafnahi igne ka nomi namonore, jateula teke chekenihi iara ka ghotilo ia eghu. 22Ghotilo tangomana te ghamu nafnahi tuana jateula te ghamu ghotilo nafnahidi glepo te tautagu ka namhata ra eghu. Ghotilo te gnafa na tangomana te ghamu nafnata nafnahi igne, neuba ghotilo ne klino ka tathagna LORD na ba ghotilo theome klino. 23Nu ghotilo thosei koꞌu dadara, naugna nakarhagna glepo te tautagu igne au ka dadaragna na, eghuteuna blahi te ghamu nafnahi te au teu karha tagna na. 24Eghume ghotilo thosei koꞌu dadaragna glepo tautagu igne. Nu ghotilo totofa dadara igne jateula khoꞌu eghu ke kligna glose. 25Eghuteuna kate theome koꞌu ghotilo kaisei dadara na, ghotilo thofno leghuni unha te doglo ka tathagna LORD, aonu mana ginauna edi gobigna lepo igre thofno keli fara ka nakarhami ghotilore nei ka nakarhadi thumi ghotilore eghu.
26“Hata tei glepo teke fablahi ghotilo igre nei glepo teke nhaꞌa chekehi ghotilo mala tusu ranghini LORD tekura, ghotilo hata tei ka vido blahi aheva teke vahini LORD nomi God. 27Ka vido blahi igne kolho, ghotilo ginauna tangomana te hata te mei fafara te thofno krono na ke kligna gna nogna olta LORD nomi God. Eghuteuna keha nafnata fafara te edi ghotilo ra, ghotilo tangomana te ghamu nafnahigna na, nu dadaragna na, ghotilo tofa soru ke kligna olta. 28Fiofilo ghami te mala leghudi vetula te chekedi koba iara ka ghotilo ra. Jame te leghudi ghotilore, ghotilo thofno eni unha te doglo ka tathagna LORD na, eghume mana ginauna edi gobigna lepore thofno keli fara ka nakarhami ghotilore nei ka nakarhadi thumi ghotilore eghu tifa tifa.”
29-30Mae Moses ne cheke eghu, “LORD nomi God ghotilo igne ginauna tei ke ulumi ghotilo mala goigonidi nei mala ngolhi fajifladi eghu naikno te au ka glose te mala tei hata ghotilo igne. Nu kate goigonidihi LORD eghuteuna ghotilo ngolhi fajifla mare te auhi ka glose igne, ghotilo fiofilo ghami eghu, glahu ghusnadi ghotilo nodi god mare re. Jame ghotilo ghusna eghu tafri, ‘Faꞌunha eghu si naikno igre te tarai ka nodi god rea? Tahati ginauna leghuni puhidi mae igre.’ Te eghu na, ghotilo ginauna snoꞌo ka nodi phighoro mare na. 31Ghotilo thosei leghudi puhidi mare re kate pogho soruni ghotilo LORD nomi God. Naugna kate pogho soru mare ka nodi god re, mare edi glepo te thono diꞌa fara te tirognadi fara LORD. Ghotilo laseni, mare gahu thudire mala fafara ka nodi god re.
32“Eghume, ghotilo mala edi gobigna lepo tela chekedihi iara ka ghotilo ra. Ghotilo thosei ke nhaꞌa lao keha chekei, eghuteuna ghotilo thosei ke hata koko kaisei cheke tagna.”
131Mae Moses ne cheke eghu, “Jame kaisei mae profet ba kaisei mae ihei ke lamnami ghotilo mei chekeni ka ghotilo gaoghathogna mifi na, mana na mei eni kaisei kofubobhoi ba kaisei fagaglana. 2Eghuteuna kate thakle mei kofubobhoi ba fagaglana igne na, glahu cheke eghu mana, ‘Tahati ari mala tarai ka god teke theome laseni ghotilo tifa igne.’ 3Nu ghotilo thosei leghuni nogna cheke mae profet tuana. LORD nomi God ghotilo na, mana tangomana te fariuriu ghami ghotilo mala laseni jame ghotilo te thofno namhani mana ka nagnafami fateote’o nei ka gaoghathomi fateote’o. 4Leuleghu fata na ghotilo mala loku ranghini LORD nomi God eghuteuna ghatho tahuni nei leghuni eghu kolho mana. Ghotilo mala nomhidi nogna cheke mana re, pogho soruni mana, eghuteuna ghatho tahuni mana kolho. 5Tifa na ghotilo neke sneka Ijep, eghuteuna LORD neke hata fajifla ghami neke fakarhi ghami ghotilo. Eghume ghotilo mala aknu falehe mae profet te fariuriu batu fadelei ghami ghotilo are, eigna mare magnahaghei ghami ghotilo te figri tagruni LORD nomi God, mala thosei ke eni mare puhi te batu fadiꞌadi naiknore igne.
6-8“Neubane thabusimi, ba thumu, ba khetomu ihei iagho te namhani fara, ba kaisei mae kheramu fofodu keli, jame kaisei ka mare mei cheke poru eghu ka iagho, ‘Tapa ari mala tarai ka keha god delei,’ iagho thosei fanomho ka mana! Jau mana magnahaghei ghami ghopa te tei tarai ka nodi god naikno te au rhemi ghotilo are, ba nodi god naikno te au khaba ka ghotilo are. Jau mana magnahaghei ghami ghopa te tei tarai ka nodi god naikno te au ka glose igne, god teke theome lasedi ghotilo nei kuꞌemi tifa ra. Nu iagho thosei fanomho tagna. Eghuteuna iagho thosei diꞌanagnafamu, nei iagho thosei pophoru mae igne mala theome thokeni mana papara na. 9Iagho aknu faleheni mana. Iagho mae ulu lahu te mala fadi thina ni mana na, eghuteuna ke leghu, keha naiknore jaola fadi thina ni mana mala ghilei lehe mana. 10Iagho fadi faleheni mana ka thina, naugna mana ne fariuriu batu fadelei nigho iagho ka LORD nomi God ghotilo na, mae ihei teke fakarhi ghami ghotilo Ijep ka namono teke sneka ghotilo tagna ia. 11Aonu kate eni iagho igne na, naikno te gnafa Israel igre ginauna nomhini igne na mhaghu nodi fara. Eghume ginauna na theo kaisei ka ghotilo na teke eni puhi te diꞌa igne na.
12“Kate funu au fakeli ghotilo ka namono aheva LORD nate tusu ranghi ghami na, glahu nomhini ghotilo kaisei cheke te diꞌa. 13Glahu nomhidi ghotilo keha mae te diꞌa ka keha namono te au ghotilo tadi are batu fadelei ghami ghotilo cheke eghu, ‘Tahati ari mala tarai ka keha god teke theome laseni ghotilo tifa igne.’ 14Puhi igne thono diꞌa fara. Eghume jame te nomhini ghotilo kaisei cheke jateula igne teuna, ghotilo ginauna ghusnani nei hironi eghu gaoghathogna cheke igne, te tutuani ba theo. Jame te tutuani unha teke chekeni mana igne na, 15ghotilo ginauna hata naflahi mala aknu falehedi naiknogna namono tuana. Eghuteuna ghotilo mala jaola aknu falehe hui nodi buluka, sipu, nanigot nei dongki teure. Eghuteuna ghotilo mala goigoni fahui namono tuana. 16Aonu ghotilo hata mei bubukrei farihotei namono nodi gobigna lepore. Nako namono tuana baludi gobigna lepore, mala tusu ranghini LORD nomi God jateula fafara te gahu te thono krono ra eghu. Eghuteuna namono tuana ginauna diꞌa fabrahu na theome tangomana na teke kegra haghe na, eghuteuna blahi kaisei naikno na teke loku tagna na. 17-18Gobi lepogna namono tuana blahi eghuteuna ghotilo thosei hata kaisei glepo tagna. Jame te leghuni cheke igne na, LORD ginauna na theome ke diꞌatagna ka ghotilo, eghuteuna ginauna mana nake kokhoni ghami ghotilo. Kate leghudi ghotilo nogna vetula mana teke tusu ari iara ka ghotilo gognaro igre, nei edi unha te doglo ka tathagna mana na teuna, mana ginauna keli ranghi ghami ghotilo, eghuteuna mana ginauna fablahi ghami ghotilo mala kmana e kmana jateula teke nhaꞌa chekehi mana ka kuꞌemi ghotilo tifa ra eghu.”
14Vetula mala kokhoni ni ihei te lehe
1Mae Moses ne cheke eghu, “Ghotilo thugna LORD nomi God. Eghume kate lehe kaisei naikno na, ghotilo thosei vahe thinimi themi are, ba ghoighori khakla ka greremi are eigna te lehe naikno na. 2Ghotilo thosei diꞌanagnafa, jateula keha naikno te leghudi keha nafnata god delei ra eghu. Naugna ghotilo nogna naikno blahi LORD nomi God. Eghuteuna Mana neke vahi fadelei ghami ka keha naikno te gnafa ka nauthoglu igne mala nogna naikno mana kolho.”
Nafnata gano te naba te mala ghamu naikno na
3Aonu mae Moses ne cheke eghu, “Ghotilo thosei ghamu kaisei gano te thono diꞌa fara. 4Igre gano naba te mala ghamu ghotilo re: buluka, nei sipu, nei nanigot, 5nei deer, nei sipu mata, nei nanigot mata. 6Ghotilo tangomana te ghamu glepo te tautagu te fnota pea thatabladi re, eghuteuna ghamu buburu jateula buluka eghu. 7Nu nafnata glepo te tautagu jateula kamel, nei gauha te au ka thina, nei rabet, neuba glepo igre ne ghamu buburu jateula buluka neu, nu thatabladi re theome fnota pea, eghume glepo igre blahi te mala ghamu ghotilo na. Nafnata glepo te tautagu igre theome klino ka tathagna LORD. 8Eghuteuna ghotilo thosei ghamu bosu, eigna bosu na thona ka tathagna LORD na. Neubane fnota thatablagna ka phei vido, bosu na theome ghamu buburu jateula buluka eghu. Ghotilo thosei ghamu nafnahidi nafnata glepo te tautagu igre ba habodi thinidi te lehe re.
9“Eghuteuna ghotilo tangomana te ghamu sasa te au sekudi nei khapudi teu are. 10Blahi te ghamu ghotilo glepo te karha te au ke lamna thongna te theome au sekudi nei khapudi teu are, naugna theome gae ka tathagna LORD.
11“Ghotilo tangomana te ghamu nanghaji te gae ka tathagna LORD. 12-18Nu igre nafnata nanghaji te blahi te mala ghamu ghotilo re: Gaghata, saroko, thua nafnata nakrudu, thua nafnata jopla, thua nafnata khopi nei thua nafnata nasihe.
19“Keha nanghaji te au baghidi te tagu pari ke kligna glose igre theome gae ka tathagna LORD, eghuteuna blahi te mala ghamu ghotilo na. 20Nu keha nanghaji te au baghi te gae ka tathagna LORD na, ghotilo tangomana te ghamu na.
21“Ghotilo thosei ghamu buluka ba unha te filoni ghotilo tela lehehi thegna na. Ghotilo tangomana te tusu lao glepo igne ka maedi delei te mei au balumi ghotilo are mala ghamu mare, ba ghotilo tangomana te sabiri ka naiknodi keha kantri are. Ghotilo eni igne naugna ghotilo nogna naikno blahi LORD, nomi God.
“Eghuteuna kate kuki ghotilo kaisei nanigot ikoi na, ghotilo thosei kuki ka milk gna idogna na.”
Fabothodi gobigna lepore
22Mae Moses tudu ne cheke eghu, “Ghotilo lisei fadelei fabothodi gano teke hata ghotilo ka nomi nagare are, ba sisidi gaju te joꞌu ghotilo are, ghotilo lisei fadelei malagna LORD. 23Hata fabothodi gano, nei waen, nei oel, nei sua teke kulu karha ka nomi buluka ghotilo re. Hata tei glepo igre ka vido blahi aheva LORD teke vahini. Jare te mala ghamu ghotilo glepo igre ke ulugna LORD, nomi God. Ka puhi igne ghotilo ginauna laseni unha te magnahagheini mana na. 24Keha fata jame ninhigrana te mala hata te tei glepo igre naugna vido blahi aheva te au nanghagna LORD na khaba fara, ba naugna LORD neke fablahidi nomi nagare ghotilo re balu kmana gano. 25Jame te eghu na, ghotilo sabiri fabothodi nomi gobigna lepore, eghuteuna ghotilo hata tei sileni gna na ka nogna vido blahi LORD. 26Aonu ghotilo hata sileni igne mala foli buluka, ba sipu, ba waen, ba beer, ba keha nafnata ganoi. Eghuteuna ghotilo te gnafa baludi tharaknami are tangomana te ghamu nei glealeꞌa eghu ka vido blahi te au LORD nomi God. 27Eghuteuna ghotilo thosei ghatho ihodi vikegna mae Livae te au balumi are, naugna mare theome khotogna kaisei vido glose te mala tobi nagare na.
28“Ke leghudi thilo finoghare, ghotilo hata mei fabothodi gano ka nomi nagare are mala lilisei ka vido aheva te mala tathajidi teu ka nomi namono re. 29Ka puhi igne vikegna mae Livae te theo nodi glose igre ginauna tangomana te au ghedi gano na. Eghuteuna jaola naiknodi delei te mei au balumi ghotilo are, nei iheire te glehe kokoi, nei goro naikno biꞌo tela lehehi khetodire teu te au ka namonomi ghotilo are eghu tangomana te kafe mei ka vido igne mala hata gano te nabadi. Jame te eghu ghotilo na, LORD ginauna fablahidi nomi gloku te gnafa ghotilore.”
15Vetula mala kaoni
1Mae Moses ne cheke eghu, “Leuleghu fata ka fafitu finogha na, ghotilo ghiha koko kaoni are. 2Igne puhi te mala eni ghotilo na, jame kaisei mae kheramu iagho kaoni ka iagho, iagho ghatho ihoni kaoni tuana, naugna nogna narane LORD te mala ghiha koko kaoni na la thoke meihi. 3Te mala ghiha koko kaoni igne maladi kolho maedi Israel, theome naiknodi delei te mei au balumi ghotilo are. 4-6Ghotilo mala thofno leghuni LORD, nomi God, eghuteuna ghotilo leghudi cheke te gnafa te tusu ari iara ka ghotilo gognaro igre. Jame te leghudi ghotilo unha te chekedi iara ka ghotilo igre na, LORD ginauna tangomana te fablahi ghami ghotilo ka glose teke tusu ari mala khotogna ghotilo teku igne. Eghuteuna ginauna theo kaisei ka ghotilo nate kuma na. Eghuteuna jame te leghudi ghotilo cheke igre na, LORD ginauna fablahi ghami ghotilo jateula teke nhaꞌa chekeni hi mana ia eghu. Eghume naiknodi keha kantri are ginauna tore kaoni ka ghotilo, nu ghotilo thosei tei kaoni ka ihei nga. Keha kantri are ginauna au ke parigna nomi nolaghi ghotilo na, nu theo kaisei ka keha kantri are nate au nodi nolaghi ke klignami ghotilo ginauna.
7“Kate tei te au ghotilo ka glose teke tusu ari LORD nomi God ka ghotilo na, jame kaisei kherami ghotilo ka namonomi na kmoꞌe ka glepo, ghotilo thosei hongo ghami ka mana, eghuteuna thosei thodo te toghoni na. 8Nu ghotilo mala keli ranghini nei glealeꞌa te tusu lao kaoni tagna ka kaisei glepo te magnahagheni mana na. 9Ghotilo thosei au gaoghatho te diꞌa nei tiromi te tusu lao kaoni ka ihei nga eghu naugna fafitu finogha te mala ghiha koko kaoni na la namohi. Ghotilo thosei snakreni gaoghatho ghamu nhoto tuana mala tiromi toghoni kherami te au ka puhi biꞌo na. Naugna jame te theome toghoni ghotilo mana na, mana ginauna tanhi lao ka LORD, eghuteuna LORD ginauna ghathoni te ghotilo nabami te au papara eigna igne. 10Ghotilo glealeꞌa eghuteuna thosei thodo te toghoni ihei te kuma. Eghuteuna jame te eni ghotilo igne na, LORD ginauna fablahi ghami ghotilo ka gobigna lepo te edi ghotilore. 11Naikno te kuma igre ginauna au fabrahu ke lamnadi nomi glose ghotilore. Naugna igne te chekeni iara ka ghotilo te mala glealeꞌa te mala thofno toghodi kherami maedi Israel te kmoꞌe ka glepo igre.”
Vetula eidi naikno te sneka
12Aonu mae Moses tudu ne cheke eghu, “Jame kaisei ka ghotilo Hibru, nalhaꞌu ba gaꞌase sabirini thegna ka ghotilo mala nomi sneka ghotilo. Kate salaꞌu namno finogha teke loku ranghi ghami ghotilo na, ghotilo ginauna theome tangomana teke loku fapuloni na. Ka fafitu finogha na, ghotilo snakreni naikno gloku igne mala snagla ke tei nogna. 13Eghuteuna kate snakre teini iagho na, iagho thosei fiti kuru teini kolho, iagho tusu ranghini keha nogna glepo. 14Iagho kubae namha ranghini sipu, nei gano, nei waen. Tusu ranghini kmana glepo jateula te eni LORD, nomi God teke fablahi ghami balu kmana glepo ra eghu. 15Ghotilo ke ghathodi narane teke sneka ghotilo Ijep ra eghuteuna LORD nomi God neke hata fajifla ghami ka khamegna Fero, king gna Ijep. Naugna igne teke cheke faheta iara ka ghotilo gognarogne.
16“Nu jame kaisei nomi naikno sneka ghotilo cheke eghu, ‘Iara tirogu tei koko nigho iagho naugna iara namha nigho iagho baludi tharaknamu iagho gne, eghume te keli na iara na au balumi ghotilo.’ 17Jame te eghuna, iagho hatani tei ka grengathagna suga na, eghuteuna iagho hata nila, aonu iagho huta nila igne churu ka khuligna tei posa ka grengatha na. Ka puhi igne mana ginauna nou naikno gloku iagho fabrahu ka nakarhagna na. Eghuteuna iagho jaola eni igne ka nou gaꞌase gloku na.
18“Nu jame iagho snakre teini kaisei nou naikno gloku, iagho thosei diꞌanagnafa. Iagho snakreni mala snagla tei nogna naugna namno finogha teke loku ranghi nigho iagho ra, tabagna gloku igne vidogna ka unha te nabagna te mala foli mana eigna unha teke eni mana na. Jame te edi ghotilo glepo igre, LORD, nomi God ginauna fablahidi nomi gloku ghotilore.”
Fafara buluka teke kulu karha
19Mae Moses tudu ne cheke eghu, “Kaisei buluka nalhaꞌugna teke kulu karha, ba nanigot, ba nomi sipu ghotilo, ghotilo fablahidi naugna nogna LORD, nomi God ghotilo. Ghotilo ginauna thosei hata kaisei buluka teke kulu karha mala loku, eghuteuna ghotilo thosei kuchi khaklagna kaisei sipu teke kulu karha. 20Aonu leuleghu finogha kate tei ghotilo balu tharaknami ka vido blahi aheva teke vahini LORD nomi God igne, ghotilo mala fafara nei ghamu eghu gano igre jare. 21Nu jame kaisei buluka ba kaisei sipu ba dongki diꞌa ghahegna na, ba dofu tathagna na, ba au keha nafnata khabru tagna, ghotilo thosei fafara ka LORD, nomi God. 22Nafnata glepo tautagu te diꞌa igre ghotilo tangomana te hata tei ghamu ka nomi namonore, jateula te ghamu ghotilo glepo ka namhata ra eghu te kilodi gasele ba deer. Neuba ghotilo ne klino ka tathagna LORD ba theo, ghotilo te gnafa na tangomana te ghamu glepo igre. 23Nu ghotilo thosei ghamu dadaradi glepo tautagu igre, ghotilo totofa koko dadara igre.”
16Gaghamu Ghasa-Polho
1Aonu mae Moses ne cheke eghu, “Leuleghu finogha, ka nhigra Abib, ghotilo ei Gaghamu Ghasa-Polho. Ghotilo eni gaghamu igne, naugna kaisei bongi ka nhigra Abib, LORD, nomi God ghotilo na neke hata fajifla ghami ghotilo Ijep. 2Eghume ghotilo tei ka vido blahi aheva LORD vahini te mala falelehe ghotilo kaisei sipu ba nanigot ba buluka mala fafara ka LORD, nomi God. 3Eghuteuna kate ghamu ghotilo gaghamu igne, ghotilo ghamu bret te theo isi gna na. Ka fitu narane igre ghotilo ghamu bret te theo isi tagna na. Igne unha teke ghamu tahati kani teke papara fara teke ghosei teke jifla Ijep. Ka puhi igne ghotilo tangomana te ghathoni fabrahu nakarhami ghotilo ka narane teke jifla ghotilo Ijep. 4Ka fitu narane gaghamu tuare, blahi ranghini ihei te hata isi ke lamnami ghotilo na. Nafnahi te fafara ghotilo ka grafigna narane ulu lahu na, ghotilo thosei tokiu ghilei hamerane ka keha narane na.
5“Ghotilo thosei fiti fafara tafri Gaghamu Ghasa-Polho igne ka namono teke tusu ari LORD nomi God ka ghotilo are. 6Ghotilo mala fafara kolho ka vido blahi aheva LORD nomi God teke vahini te mala au nanghagna mana na. Ka vido blahi igne, ghotilo mala fafara ka vido narane te plulu naprai na, naugna tuana te doglo ka narane teke jifla tahati Ijep. 7Ghotilo gahu nafnahi igne ghamu ka vido blahi teke vahini LORD nomi God. Aonu hamerane ka keha narane na ghotilo tangomana teke figri teke pulo ka nomi suga tapuale re. 8Nabagna keha namno narane ka gaghamu na ghotilo mala ghamu bret te theo isi gna na. Aonu ka fafitu narane na, ghotilo mala ghamu fodu mala kilo fnaknoni LORD, nomi God. Eghuteuna ka narane tuana ghotilo thosei loku.”
Narane biꞌodi Fitu Wik
9Mae Moses ne cheke eghu, “Funu ka narane te funu hata gano ghotilo ka nagare, ghotilo mala kaha fitu wik. 10Aonu ka narane ululahu gna fahana gna wik, ghotilo ei Gaghamu biꞌo nabagna Fitu Wik. Ka narane biꞌo igne, ghotilo mala hata mei ka LORD leghuni unha ghotilo te magnahagheni. Unha te hata mei ghotilo na naba te leghudi glepo teke fablahi ghami LORD. 11Ghotilo balu thumi, nomi mae gloku nei gaꞌase gloku, nei mae Livaet ka namonomi ghotilo ra, maedi delei te au balumi ghotilo ra, goro sua glehe kokoi ra, goro naikno biꞌo ra, ghotilo te gnafa na kafe tei mala glealeꞌa ka vido blahi aheva LORD teke vahini te mala au nanghagna na. 12Ghotilo ke ghatho fapulodi narane teke au sneka Ijep ra, eghume ghotilo mala thofno leghudi vetula igre.”
Narane biꞌo te mala Au ka Grorofe Ikoi
13Mae Moses ne cheke eghu, “Leuleghu fata kate gnafa gloku ghotilo ka nagare na, nei hata keha sisi grep ka nagare na teuna, ghotilo ei Gaghamu biꞌo te mala Au ka Grorofe Ikoi na. Gaghamu biꞌo igne nabagna fitu narane. 14Ghotilo balu thumi, nomi mae gloku, nei gaꞌase gloku, nei mae Livaet te au ka namonomi ghotilo are, nei naiknodi delei te mei au balumi ghotilo are, nei goro sua glehe kokoi, nei goro naikno biꞌo te au ka namonomi ghotilo are, ghotilo te gnafa na mala kafe tei mala thofno glealeꞌa ka gaghamu igne. 15Ka fitu narane te glealeꞌa ghotilo ka gaghamu biꞌo te eni ghotilo ka vido blahi te vahini LORD igne. Ghotilo tangomana te glealeꞌa na naugna LORD, nomi God neke fablahidi nomi nagare nei nomi gloku teu ghotilo re. Ka narane te eghu igre ghotilo ginauna thofno glealeꞌa nomi fara.
16“Leuleghu finogha, ghotilo mae nalhaꞌu te gnafa Israel ra ghotilo mei thilo fata ka vido blahi teke vahini LORD igne. Thilo fata igre, Gaghamu Ghasa-Polho na, nei Narane biꞌodi Fitu Wik, nei mala Au ka Grorofe Ikoi teuna. Ka thilo gaghamu igre, theome tangomana kaisei naikno te fiti sasama te mei na. 17Naikno te gnafare mala kafe hata mei unha te tangomana leghuni fablahi teke tusu ranghi ghami LORD, nomi God.”
Mae mala fate
18Aonu mae Moses ne cheke eghu, “Ghotilo ginauna vavahi keha mae mala fate, eghuteuna keha mae mala mae biꞌo ka namono te gnafa aheva nate tusu ari LORD ka ghotilo na. Mae igre mala fatedi gobigna lepo ka puhi te doglo ka fate na. 19Mare mala theome leghuni puhi te theome doglo na. Mare theome mala phile baludi keha mae kolho. Mare theome mala snakreni ihei mala famaemaheni kaisei naikno mala hata sileni ka mana, naugna puhi te famaemahe igre tangomana te fadofuni mae mala fate neuba mana ne mae glalase, eghuteuna mae mala fate ginauna theome cheke fadoglo ka kot. 20Leuleghu fata na ghotilo mala eni puhi te doglo na ka naiknore. Jame te eghu ghotilo na, ghotilo ginauna tangomana te khotogna glose teke tusu ari LORD ka ghotilo ana, eghuteuna ghotilo ginauna au raugha tagna.
21“Kate eni ghotilo nogna olta LORD na, ghotilo thosei ke eni ka thaba mumuju gna god gaꞌase Astarot igne mala fakegra haghe rhegna nogna olta LORD igne. 22Eghuteuna ghotilo mala thosei fakegra haghe kaisei mumuju thina, naugna LORD nomi God tirognadi fara nafnata mumuju igre.”
171“Jame kaisei buluka, ba sipu, ba nanigot au thubu ka thinigna na, ghotilo thosei fafara lao ka LORD nomi God, naugna nafnata fafara igne thofno diꞌa fara ka mana.”
Thosei tarai ka keha god delei
2“Jame kaisei mae ba kaisei gaꞌase te au balumi ghotilo ka kaisei namono teke tusu ari LORD nomi God ka ghotilo are eni puhi te theome doglo ka tathagna LORD kate goigoni nogna nhaꞌa cheke mana na teuna. 3Jau mae igne huhughuni nogna vetula LORD na eghuteuna mana tarai ka keha god delei, ba jau mana pogho soru tarai ka naprai, ba glaba, ba ka nathunu. 4Jame te nomhini ghotilo eigna igne na, te keli na ghotilo kulu tei hironi te tutuani ba theo. Jame tutuani teke eni glepo diꞌa igne ka ghotilo na, 5ghotilo ginauna hata tei mae igne ba gaꞌase ke kosi namono mala fada falehe ka thina. 6Nu ulu lahu na, ame aknu falehe nga ghotilo teu na, ghotilo mala au phei ba thilo witnes ka puhi igne. Jame kaisei mae kolho te chekeni glepo igne na, ghotilo theome tangomana te faleheni mana ba gaꞌase na. 7Mae iheire te witnes ka puhi igne na te mala kulu fada faleheni mana ba gaꞌase ka thina na. Aonu keha naiknore tangomana te fadini mana ba gaꞌase na ka thina ke leghu. Igne unha te mala eni ghotilo te mala hata koko puhi te diꞌa igne ka namonomi ghotilore.
Puhigna kot
8“Jame keha fata, keha puhi biꞌo te ninhigrana fara ranghini mae mala fate te fadogli gna na thoke mei. Jame puhi biꞌo eigna mae te lehe, ba fapholai ka thua nafnata vetula, ba ka puhi eigna kaisei mae te ghoreho. Jame puhi biꞌo jateula igne eghu thoke mei, ghotilo mala tei fadoglini ka vido blahi aheva teke vahini LORD, nomi God. 9Ghotilo mala cheke thakleni puhi biꞌo tuana ka mae pris ka vikegna Livae, ba cheke thakleni ka hatimare mae fate mae te fanomho ka narane tuana. Eigna mare te mala fateni na puhi biꞌo tuana. 10Ghotilo mala thofno leghuni unha te chekeni mare ka ghotilo jare na. Ghotilo mala edi gobigna lepo te chekedi mare re. 11Neubane unha nafnata cheke te farirhiu mare ka ghotilo na, nu ghotilo mala glealeꞌa tagna, eghuteuna ghotilo mala leghu fakelidi eghuteuna thosei ghatho ihoi kaisei glepo. 12Ihei te theome magnahaghedi nei cheke fadiꞌadi teu unha te chekedi nogna mae mala fate ba nogna mae pris LORD nomi God ghotilo igre mala lehe. Igne unha te mala eni ghotilo na te mala hata fadelei puhi te diꞌa igne ka namonomi ghotilo re. 13Eghuteuna kate nomhi keha naiknore cheke igne, naikno igre ginauna mhaghu, eghuteuna theo kaisei ka keha naiknore nate cheke fadiꞌadi mae mala fate nei mae pris teu igre.”
Vetula te mala leghuni king
14Aonu mae Moses ne cheke eghu, “Kate hata ghotilo glose aheva LORD, nomi God nate tusu ari ka ghotilo te mala au tagna na, ghotilo ginauna na ghaoghatho eghu, ‘Tahati nabada na jame vahini kaisei noda king mala funei fruni ghita jateula keha kantri te au faligoho ghita igre eghu.’ 15Jame te eghu na, ghotilo filo fakelini mae ihei LORD nomi God kolho te vahini na. Ghotilo mala vahini kaisei maegna Israel ka themi, mana theome maegna ka namono delei te mala au nogna nolaghi te mala funei fruni ghami ghotilo na. 16Eghuteuna king igne theome mala au kmana hose ka nogna armi na, ba kurudi keha mae mala ke pulo Ijep mala foli hose. Naugna LORD neke chekehi mala thosei ke pulo ghotilo Ijep. 17Eghuteuna king igne theome mala hata kmana khetogna, naugna jame te hata kmana khetogna mana na, goro gaꞌase igre ginauna figri gaoghathogna mana na, eghuteuna mana ginauna na theome ghatho tahuni LORD. Eghuteuna mana theome mala dedei ka silva nei gol.
18“Kate king te gnokro mana ka sape nafnakno na, mana mala rioriso soru kaisei nogna vetula LORD teke hata ka hatimare mae pris ka vikegna mae Livae. 19Mana mala tathaji nei iuꞌiju eghu fabrahu ka buka igne, mala tangomana mana te ghatho tahuni LORD nogna God na kate leghudi fabrahu mana vetula nei farirhiu teu te chekedi ka buka igne. 20Ka puhi igne mana ginauna theome fahaehaghe nei theome ghathoni ne keli fara thegna ne salaꞌudi kheragna Israel igre teuna. Eghuteuna mana ginauna theome ghatho ihoni nogna vetula LORD na. Jame te ghatho tahuni LORD mana na, mana ginauna king fabrahu kmana finogha, eghuteuna vikegna mana re ginauna jaola king fabrahu Israel.”
18Nodi glepo mae pris
1Mae Moses ne cheke eghu, “Mae pris nei keha mae la ngau teu ka vikegna Livae igre ginauna theome khotogna kaisei vido ka glose ka keha vikemi ghotilo maemi Israel. Nu mare ginauna karha ka glepo blahi te hata te mei fafara ka LORD. Glepo blahi igre te nodi mare re. 2Mare ginauna na theome khotogna kaisei vido glose jateula ghotilo kheradi mare igre eghu. Naugna gobigna lepo te magnahaghedi mare re, LORD ginauna tusu ranghidi mare leghuni unha teke nhaꞌa chekeni mana na.
3“Kate fafara ghotilo buluka ba sipu ba nanigot hata te mei naiknore, ghotilo tufa keha vidogna na ka mae pris. Te nafnata vido igre: fafragna, nei gagama na nei butugna. 4Eghuteuna ghotilo jaola tufa ka mare keha glepoi eghu ka vikegna mae Livae. Glepo ululahu ka gano nei grep nei oel teke hata ghotilo ka nomi nagare are, nei vido ululahu ka khakla sipu teke kuchi ghotilo are. 5Ghotilo eni igne naugna LORD neke vahi fadelei vikegna Livae igne ka keha vike ghotilo are. Tutuani, LORD neke vahi fadeleidi mare ka keha vikere mala loku ranghini mana fabrahu ka vido blahi na.
6“Jame kaisei mae ka vikegna Livae jifla ka namono gna na jare Israel, eghuteuna mana magnahaghei te tei au ka nogna vido blahi LORD na. 7Jame te eni mana igne na, mana tangomana te loku ka vido blahi na ka nanghagna LORD nogna God na, jateula te edi mae kheragna ra eghu. 8Eghuteuna mana tangomana te au thufagna ka gano teke fafara re jateula keha mae pris gre eghu, neuba mana ne hata thotogho ka kheragna re.”
Thosei leghudi puhidi naikno te diꞌadi Kenan
9Mae Moses ne cheke eghu, “Kate tei ghotilo ka glose aheva LORD nomi God teke tusu lao ka ghotilo na, ghotilo thosei leghudi puhidi naikno te diꞌa te au ka vido tuana. 10Ghotilo thosei snakreni kaisei naikno mala gahu fafara thugna nalhaꞌu ba thugna gaꞌase na. Ghotilo thosei snakreni kaisei naikno mala fafara mala laseni eigna unha nate thoke mei ke leghu na. Ghotilo thosei snakreni kaisei naikno mala loku ka neilehe ba poesen. 11Ghotilo thosei snakreni kaisei naikno loku ka khakla gaju ba fadofra naitu ba cheke ka tharungadi naikno tela lehehi ra. 12Ihei te edi nafnata glepo igre, thono diꞌa fara ka tathagna LORD na. Uve, naugna igne mana na kulu tei brue fajifladi naikno te au ka glose tuana. 13Ka glepo igre, ghotilo mala thofno keli fara fabrahu ka tathagna LORD nomi God.”
LORD nhaꞌa cheke mala kuruni mei kaisei mae profet ka mare
14Mae Moses ne cheke eghu, “Naikno nate brue fajifladi ghotilo ka nodi glose re igre mare tangomana te leghudi nodi cheke mae te falehe naikno ba mae iheire te fafara te mala lasedi unha nate thoke mei. Nu nomi LORD God ghotilo na theome snakre ghami ghotilo te leghuni nafnata puhi te diꞌa igne na. 15Mana ginauna kuruni kaisei mae profet jateula iara eghu mala mei ka ghotilo. Mae profet igne kaisei mae kherami ghotilo, eghuteuna ghotilo ginauna mala leghuni mana. 16Tifa, ka narane teke au ghotilo ka Thogele Sanai ia, ghotilo neke theome magnahaghei te nomhini naoglagna LORD nomi God ba filoni khaꞌaghi biꞌo na, naugna ghotilo neke mhaghu nomi fara na eghunu lehe nomi neku gaoghathomi na.
17“Eghume LORD neke cheke eghu ka iara, ‘Unha te chekeni mare igne tutuani ngala. 18Uve, iara ginauna kuru mei kaisei mae profet jateula iagho eghu, eghuteuna mana ginauna kaisei mae kheradi thedi. Iara ginauna cheke lao ka mana nogu chekere, eghuteuna mana ginauna cheke ka naiknore gobigna lepo teke chekedi iara ka mana ra. 19Mana ginauna cheke ka nanghagu iara, eghuteuna ihei te theome leghuni mana na, iara ginauna parani mae igne. 20Nu jame kaisei mae profet cheke ka nanghagu iara unha teke theome chekedi iara ka mana re, ghotilo faleheni mana. Eghuteuna jame kaisei mae profet cheke ka nanghadi keha god delei, ghotilo jaola faleheni mae igne.’
21“Nu jame ghotilo cheke eghu, ‘Faꞌunha eghu laseni ghehati cheke igne neke theome mei funugna ka LORD teuna?’ 22Uve, puhi te mala laseni nafnata glepo igne na eghu agne, jame kaisei mae profet cheke ka nanghagna LORD, nu glepo te chekedi mana igre theome thoke mei tutuani teuna, ghotilo laseni cheke igne theome nogna LORD. Profet igne fiti cheke kolho, eghume ghotilo mala thosei mhaghuni mana.”
19Namono mala poru
1Mae Moses ne cheke eghu, “LORD nomi God ghotilo igne, mana ginauna goigonidi naikno te au ka glose teke tusu ari mana ka ghotilo are. Eghuteuna ghotilo ginauna ngolhi fajifladi naiknore eghuteuna ghotilo hata nodi namono nei nodi suga teu mare re mala au jare. 2-3Ka narane tuana, ghotilo ginauna fofota glose igne ka thilo nohi. Aonu ghotilo mala vavahi thilo namono mala poru. Nohi te gnafa ka thilo nohi igre au kaisei namono mala poru. Ghotilo lase fakelini igne, namono mala poru igre au farihotei nohi. Ka puhi igne, jame ihei te aknu faleheni kaisei mae na, mana ginauna tangomana te rikha te tei poru ka kaisei ka thilo namono igre.
4“Jame kaisei mae theome ghathoni te mala diꞌatagna na nei theome ghathoni kolho te mala aknu faleheni keha mae na, nu keha mae igne lehe teuna, ghotilo snakreni mae igne rikha tei mala poru ka kaisei ka thilo namono igre. 5Kaisei cheke naba, jame kaisei mae balu kheragna, phiamare nolo tei mata mala uge gaju. Eghuteuna mae igne kato soru kaisei gaju, aonu nogna nhirama mana na snamhu flada tei kahini mae kheragna mana na aonu mala lehe ka narane tuana. Te eghu na, mae igne tangomana te rikha te tei poru ka kaisei namono mala poru, mala karha jare. 6Jame kaisei namono kolho ghotilo te mala poru na, eghuteuna khaba fara te mala ghosei te tei thoke ka namono mala poru igne, kheragna mae te lehe igne na hironi mae igne ghilei thokeni mana. Eghuteuna ke tughu fapulo glehe igne naugna mana thono diꞌatagna fara. Nafnata puhi igne theome doglo, naugna mae igne theome ghathoni te mala diꞌatagna na nei theome ghathoni kolho te mala faleheni mae kheragna na. 7Naugna igne iara cheke faheta ka ghotilo mala vavahi thilo namono mala poru.
8-9“Jame te leghudi ghotilo gobigna lepo te chekedi iara ka ghotilo gognaro igre, eghuteuna ghotilo namhani LORD nomi God, nei leghudi ghotilo nogna vetula mana re teuna, mana ginauna tuthugha tei krepa biꞌo nomi glose ghotilo igne jateula teke cheke ranghidi mana kuꞌemi ghotilo tifa ra eghu, eghuteuna mana neke tusu ari ka vido te gnafa ka glose teke nhaꞌa chekedi mana ka ghotilo ra. Eghume kate biꞌo te krepa nomi glose ghotilo igne na, ghotilo ginauna vavahi thilo namono mala poru. 10Ghotilo eni igne, naugna glahu mae ihei teke theome eni kaisei najafra na fiti lehe kolho naugna namono mala poru igre khaba fara. Jame mae te doglo na lehe ka glose teke tusu ari LORD nomi God mala khotogna ghotilo teku na, ghotilo nabami te papara ka glehegna mae igne.
11“Nu jame kaisei mae theome keli ranghini keha mae na, eghuteuna leghuni gaoghatho te diꞌa na ne magrini nei faleheni eghu mana teuna, aonu mana rikha tei ka kaisei namono mala poru igre. 12Jame te eghu na, hatimare mae mala baubatu ka namono di mare na fatei cheke mala ke pulo mei mana. Aonu mare snakre laoni mana ka kheragna mae ihei te lehe igne mala ke tughu fapulo glehegna mana na. 13Ghotilo thosei kokhoni ni nafnata mae igne. Mae te diꞌa igne mala lehe, eghume ghotilo maemi Israel igre theome naba te mala papara ka unha te eni kate faleheni mae ihei te doglo na. Ka puhi igne ghotilo ginauna tangomana te au ka nakarha te keli.”
Puhi te mala eni puhi te doglo na
14Mae Moses ne cheke eghu, “Ka glose teke tusu ari LORD nomi God mala khotogna ghotilo teku igne, ghotilo ginauna thosei tuthugha thina teke lilisei kuꞌemi ghotilo ra fagaglana eigna fofotagna nohigna nodi vido glose kherami ghotilo are.”
15Aonu mae Moses ne cheke eghu, “Ghotilo theome tangomana te fateni ihei jame te kaisei witnes kolho te chekeni najafragna mana na. Phei ba thilo mae te mala witnes ka najafra teke eni mana na ame fateni nga ghotilo mana eghu.
16“Jame kaisei mae vuavuha cheke eigna keha mae na mala goigonini mana, 17te keli na phiamare kafe tei ka nogna vido blahi LORD. Jare phiamare mala mei ka mae pris nei ka mae mala fate teu te loku ka narane tuana. 18Mare te mala fifilo fakeli ka puhi biꞌo igne. Jame laseni mare te mae igne chaghi mala goigonini mae kheragna na teuna, 19ghotilo ginauna parani mana ka nafnata puhi te magnahagheni mana teke parani keha mae na. Ka puhi igne, ghotilo ginauna hata fadelei ke lamnami puhi te diꞌa igne. 20Eghuteuna kate nomhini keha naiknore puhi igne, mare ginauna mhaghu, eghuteuna theo kaisei naikno ginauna nate eni glepo te diꞌa te chaghini kheragna na ka fate igne. 21Ghotilo thosei kokhonini ihei te chaghi ka fate te mala goigonini keha mae na. Nafnata papara te magnahaghei eni mana ka keha mae na igne, ghotilo mala parani mana ka nafnata puhi teke enila mana na. Eghume, ghotilo mala hata tathagna, kheꞌigna, khamegna, gahegna, nei nakarhagna eghu naikno tuana nabagna unha teke eni mana na.”
20Vetula eigna magra biꞌo
1Mae Moses ne cheke eghu, “Kate tei ghotilo te magra ka nomi naokare, ghotilo jame filodi kmana hose nei kmana chariot mala magra, nei kmana soldia salaꞌu ghami ghotilo. Nu ghotilo thosei mhaghudi mare, naugna LORD nomi God, mae ihei teke hata fajifla ghami ghotilo Ijep ia ginauna au balumi ghotilo. 2Aonu kate tarabana ghotilo te mala tei ka magra na, kaisei mae pris mala mei kegra ke ulumi ghotilo mala cheke ka nomi armi ghotilo na. 3Mana ginauna cheke eghu, ‘Ghotilo maemi Israel fanomho mei ka nogu cheke iara igne! Gognarona ghotilo tarabana mala tei magra ka nomi naokare. Ghotilo thosei mhaghu ba ghatho peapea ba nanga nomi ba farikha ghami! 4Naugna LORD nomi God ghotilo na ginauna tei balumi ghotilo mala magra balumi ghotilo ka nomi naoka re, eghuteuna mana ginauna togho ghami ghotilo mala uluni ghotilo magra tuana.’
5“Aonu mae biꞌore ginauna cheke eghu ka mae soldiare, ‘Jame kaisei mae ka ghotilo horo kaisei suga majaghani, mare theome fablahi nga meu suga igne, te eghuna, mana ke pulo au tagna. Glahu lehe mana ka magra eghuteuna keha maei na teke fablahi teke au tagna na. 6Eghuteuna jame ao ngala joꞌu ngau nagare grep na, nu mana theome ukli ngau ghegna sisi saro ulu na, te eghu na mana ke pulo ka namono. Glahu lehe ka magra eghuteuna keha maei na teke glealeꞌa ka sisigna na. 7Eghuteuna jame kaisei mae paruhi ka kaisei gaꞌase, nu repa theome tolaghi ngau, te eghuna mana ke pulo ka namono. Glahu lehe ka magra eghuteuna keha maei na teke tolaghi ka gaꞌase igne.’ 8Eghuteuna goro mae biꞌo re ginauna jaola cheke eghu, ‘Jame gaoghathogna kaisei mae na glaꞌe soru ba mana mhaghu nogna, mana ke pulo ka namono. Glahula eni mana igne jaola glaꞌe soru gaoghathogna keha mae soldia na.’ 9Eghuteuna kate cheke te gnafa mare ka nodi mae soldia re, mare ne vavahi komandadi soasopai tothoghei soldia.
10“Kate tei magra ghotilo ka kaisei namono biꞌo na, ulu lahu na ghotilo tusu ranghidi pharikeli. 11Jame te faꞌuveni mare nomi cheke ghotilo na te tothora ka ghotilo grengathagna namono na, naikno te gnafa te au ke lamnagna namono igne ginauna mala nomi naikno sneka ghotilo, eghuteuna ghotilo ginauna tangomana te huhurudi mare te mala edi nomi gloku ghotilo re. 12Nu jame tirodi au ka pharikeli naiknogna namono tuana te magnahaghei magra mare na, nomi soldia ghotilo are kegra faligohoni namono tuana mala magra. 13Aonu kate snakre ghami ghotilo LORD nomi God te mala hata namono tuana na, ghotilo ginauna aknu falehe mae te gnafa ka namono tuana. 14Nu ghotilo ginauna tangomana te hata goro gaꞌase, goro sua, buluka nei keha glepo eghu te au ka namono tuana. Ghotilo ginauna tangomana te tathaji nodi gobigna lepo nomi naoka ghotilo re, naugna LORD nomi God la tusu arihi ka ghotilo glepo igre. 15Igne unha nate eni ghotilo ka naiknodi namono te khaba fara te au ke kosigna nomi glose ghotilo igne.
16“Nu kate tei te hata ghotilo namono ka glose teke tusu ari LORD mala khotogna ghotilo teku igne, ghotilo aknu falehe naikno te gnafa nei gobigna lepo te tautagu te gnafa teure. 17Ghotilo mala aknu falehe hui naikno ka vike igre: vikegna mae Het, nei vikegna mae Amoa, nei vikegna mae Kenan, nei vikegna mae Peris, nei vikegna mae Hivi, nei vikegna mae Jebus. Ghotilo kafe falehedi hui, jateula teke cheke ranghi ghami LORD ia eghu. 18Jame te theo na, mare ginauna farirhiu ghami ghotilo mala leghudi ghotilo puhidi mare te diꞌa re mala tarai ka nodi god mare are. Eghuteuna jame te eghu ghotilo na, ghotilo ginauna eni nakhibo biꞌo ranghini LORD nomi God.
19“Kate au faligohoni te magra ghotilo ka kaisei namono na, ghotilo kato soru gaju mala hata paꞌe soru gringni thina biꞌogna namono tuana, nu neuba ghotilo ne au raugha jare, ghotilo thosei kato soru gaju te au sisidi re eghu. Naugna gaju igre theome naoka ranghi ghami ghotilo, eghume ghotilo tangomana te ghamu sisidi gaju igre. 20Ghotilo ginauna tangomana te kato soru gaju te theo sisidi are, mala horo glepo mala magra, mala ghilei uluni ghotilo namono tuana.”
21Unha te mala eni kate lehe naikno na
1Mae Moses ne cheke eghu, “Kate au ghotilo ka glose aheva LORD nomi God nate tusu ari ka ghotilo na, jame keha mae filoni kaisei mae na lehe mata nu ghotilo theome laseni mae ihei teke falehe gna na. 2Jame te eghu na, nomi mae lida nei nomi mae mala fate teu ghotilo re tei ka vido aheva te au thinigna mae te lehe igne. Ghotilo falaseni vido aheva te au rhegna namono tuana. 3Aonu, mae lida gna namono tuana tei vahini kaisei sua buluka te theome eni teu kaisei gloku. 4Aonu mare batuni sua buluka igne soru ka kaisei vido te au khoꞌu tagna. Vido igne theome au kaisei nagare tagna. Aonu ka vido igne nate lolhopa mare graragna na mala aknu falehe. 5Eghuteuna mae pris ka vikegna mae Livae igne jaola mala tei ka vido igne. LORD nomi God ghotilo na neke vahidi mae pris mala edi nogna gloku re, nei mala chekeni fablahi na ka nanghagna mana, nei mala fatedi puhi biꞌo teke fari pholai nei magra teku re. 6Aonu mae lida te gnafa ka namono tuana mare ginauna titihi khamedi re ke kligna gna buluka tela aknu falehehi igne. 7Eghuteuna mare na cheke eghu, ‘Ghehati neke theome aknu falehe mae igne, eghuteuna ghehati theome laseni mae ihei teke aknu faleheni mana na. 8LORD, iagho gleꞌani fafara igne mala hata fadelei nakhibodi nou naikno iagho teke fakarhidi iagho gre. Thosei lisa mei ke klignami nakhibo igne mala para ghami naugna keha mae neke aknu faleheni mae te doglo igne.’ Eghume, LORD ginauna tangomana hata fadelei nakhibomi ghotilo re ka glehegna mae igne. 9Ka puhi igne, ghotilo ginauna theome naba te papara ka glehegna mae ihei te doglo igne, naugna ghotilo ne edi glepo te magnahaghedi LORD re.”
Puhi te mala tolaghi ka gaꞌase teke hata hatimare mae soldia ka magra
10Aonu mae Moses ne cheke eghu, “Kate togho ghami LORD nomi God te uluni ghotilo magra na ka nomi naokare, ghotilo ginauna tangomana te hata naikno te uludi ghotilo re. 11Eghuteuna jame kaisei mae ka ghotilo filoni kaisei famane gaꞌase fara, eghuteuna mana khaeni fara naꞌa magnahaghei te tolaghi ka gaꞌase igne. Uve, jame te eghuna, mana tangomana te tolaghi ka gaꞌase igne. 12Mana hata gaꞌase igne tei ka sugagna. Gaꞌase na mala ghoighori phaꞌugna na, eghuteuna kusu geghesugna re. 13Aonu naꞌa hata koko nogna kastom pohe thegna na ke tughu ka nomi nafnata pohe ghotilo na. Naꞌa ginauna au nabagna kaisei nhigra ka nogna suga na, mala tanhidi idogna kmagna re. Aonu ke leghugna igne, mae igne tangomana te tolaghi ka naꞌa te mala thuru balugna naꞌa na. 14Nu jame mae igne theome magnahagheni gaꞌase igne ke leghugna te tolaghi ka naꞌa na, mana snakreni gaꞌase igne mala snagla tei nogna kolho. Mana theome tangomana te sabirini naꞌa ba ghathoni naꞌa jateula naikno sneka teuna, naugna mana neke thuruhi balugna naꞌa.”
15Eghuteuna mae Moses ne cheke eghu, “Jame kaisei mae au phei khetogna, nu mana namhani kolho kaisei, eghuteuna mana theome namhani keha na. Repa kafe au thudi nalhaꞌu ka mana, nu teke kulu karha na thugna gaꞌase te theome namhani fara mana na. 16Uve, kate tufa mana nogna gobigna lepore ka phia thugna nalhaꞌu re, mana na theome ghatho tahuni fapea thugna nalhaꞌu teke karha ka gaꞌase te namhani fara mana na. Eghuteuna mana theome tusu lao glepo ka fapea teke thofno kulu karha na, thugna gaꞌase teke theome namhani fara na. 17Kate tufa mana nogna gobigna lepo re, mana falalase ihei teke kulu karha na, thugna gaꞌase teke theome namhani fara mana na. Neuba glepo te tusu lao mana ka fapea nalhaꞌu na igre, mana mala tusu lao phia fata ka glepo igre ka thugna ulu lahu na naugna ulu lahu nei nogna nolaghi eghu mana.”
Mae majaghani te theome leghudi idogna kmagnare
18Mae Moses ne cheke eghu, “Jame kaisei mae au kaisei thugna mae ihei te theome leghudi idogna kmagna re, neuba repa ne purini ngau mana. 19Idogna kmagna mae sitei igne na hatani tei mana ka hatimare mae lida rhegna grengatha gna namono igne mala fateni mana. 20Aonu repa mala cheke eghu ka hatimare mae lida igre, ‘Thumi ghepa igne patu gama fara nei tirogna leghu ghami ghepa eghu. Mana jojokei nomi sileni ghepa re, eghuteuna mana kaisei koꞌu thaviru toghei kolho.’ 21Eghume nabagna na maegna ka namono igne fada faleheni mana ka thina mala ghilei lehe mana. Ka puhi igne, ghotilo ginauna fahuhui puhi te diꞌa igne ke lamnami ghotilo. Aonu kate nomhini igne, naiknodi Israel igre ginauna mhaghu nodi fara.”
Keha vetula
22Mae Moses ne cheke eghu, “Jame kaisei mae eni kaisei najafra te nabagna te lehe na, eghuteuna ghotilo aknu faleheni mana eghuteuna fagefe hagheni thinigna mana na ka kaisei gaju. 23Thini igne thosei gefeu ka gaju na jare ghilei rane. Ghotilo giugilui thinigna mana na ka narane tuanala. Naugna ihei te lehe ke kligna gaju na, God ginauna parani mana. Eghume, ghotilo mala giugilui thinigna mae ihei teke eni puhi te diꞌa na mala theome goigoni ghotilo glose teke tusu ari LORD ka ghotilo igne.”
221“Jame ghotilo filoni kaisei nogna buluka ba kaisei nogna sipu ba nanigot mae kherami ghotilo te rikha na, ghotilo thofno ke hata fafigri ka mae khotogna na. 2Nu jame mae khotogna na au ka vido te khaba fara, ba ghotilo theome laseni mae ihei khotogna na, ghotilo ginauna hata ke pulo ka namonomi ghotilo na. Ghotilo reireghi fakeli buluka igne ghilei thokeni narane te mei te hironi mae khotogna na. Aonu ghotilo tangomana teke tusu fapulo ka mana na. 3Eghuteuna jame te filoni ghotilo kaisei dongki ba kaisei pohe ba keha glepo te nogna mae kherami ghotilo na, ghotilo ginauna mala eni jateula tuana eghu mala keli tagna mana ka ghotilo.
4“Jame kaisei nogna dongki ba kaisei nogna buluka mae kherami ghotilo, pala tahu fara khoko soru ka nabrou na, ghotilo tei toghoni mae kherami na mala pala hagheni buluka igne, mala fakegra hagheni.
5“Gaꞌase na theome mala pipichi nogna pohe nalhaꞌu na, eghuteuna mae nalhaꞌu na theome mala pipichi nogna pohe gaꞌase na. LORD nomi God ghotilo na thono theome magnahagheni kaisei naikno te eni glepo igne.
6“Jame ghotilo filoni gnokugna nanghaji na kligna ka gaju ba pari ka glose te opo nakredi ba ka thugna na, ghotilo thosei falelehe idogna na. 7Ghotilo tangomana te hata thugna na, nu ghotilo lisani idogna na. Jame te eghu ghotilo na, ghotilo ginauna tangomana te au raugha na, eghuteuna ghotilo tangomana te au ka nakarha te keli na.
8“Kate eni ghotilo kaisei vido ke kligna suga mala faghaghafa, ghotilo bara lithui ka thaba mala theome tangomana kaisei naikno te uka te lehe na, naugna jame te lehe naikno na ghotilo ginauna khale ka falehe naikno.
9“Ghotilo thosei joꞌu keha nafnata sisi farihotei ka nomi nagare grep are. Jame te eni ghotilo igne na, gano te kotu nei sisidi gaju grep teu igre ginauna blahi, eghuteuna ghotilo theome tangomana nate hata na.
10“Ghotilo thosei loku fodu buluka ghe dongki re mala korho masin mala dokha glose.
11“Ghotilo thosei pipichi ka pohe teke susuki fodu ka koten ghe khaklagna sipu.
12“Ghotilo mala susuki fodu keha gnarho kmoꞌei mala fagegefe ka fati khukrududi nomi pohere.”
Mae ihei teke tolaghila nu ke tirognani khetogna na
13Mae Moses ne cheke eghu, “Jame kaisei mae tolaghi ka kaisei gaꞌase, nu ke leghugna te thuru balugna naꞌa na, mana ke tirognani gaꞌase igne. 14Aonu mana cheke fadiꞌani gaꞌase igne, ne cheke eghu, ‘Iara neke tolaghi ka gaꞌase igne, nu kate tei thuru iara balugna na ne laseni nga iara te kaisei mae neke thuruhi balugna naꞌa.’ 15Jame te eghu na, idogna kmagna gaꞌase igne hata vido pohe te au dadara tagna na naugna repa neke ghiha kani teke thuru fodu repa na. Igne te mala laseni teke theo kaisei mae teke thuru fodu ka gaꞌase igne tifa na. Repa mala hata mei vido pohe igne ka hatimare mae lida rhegna grengathagna namono na. 16Kmagna gaꞌase igne mala cheke eghu, ‘Iara neke snakre lao thugu na ka mae igne mala khetogna mana neku, nu mae igne tirognani naꞌa. 17Uve, mana neke cheke famamajani naꞌa neke chekeni naꞌa neke thuru balugna kaisei mae ngau teuna. Nu igne pohe teke thuru repa kani teke thuru fodu repa tagna na. Filo si ghotilo! Au dadara tagna. Igne fagaglana gna te theo kaisei mae teke thuru balugna thugu iara tifa na.’ 18Eghume mae lida gna namono na mala puphuri mae igne. 19Mare jaola chekeni mana mala faen kaisei gobi vido silva. Mare ginauna tusu lao sileni igne ka kmagna gaꞌase igne, naugna mae tuana ne famamajani kaisei gaꞌasegna Israel. Gaꞌase igne ginauna khetogna mae tuana fabrahu eghuteuna mana theome tangomana nate koko gaꞌase igne ka nakarhagna na.
20“Nu jame mae tuana cheke tutuani, eghuteuna mare theo kaisei vido pohe te mala laseni te gaꞌase igne neke theome thuru balugna keha maei tifa na neke tolaghi nga teuna. 21Jame te tutuani na, hatimare mae lida mala hata tei gaꞌase igne ka grengatha gna nogna suga mae kmagna na. Aonu mae nalhaꞌugna namono na fadini naꞌa ka thina ghilei lehe naꞌa. Gaꞌase igne neke jafra kani au teku ka suga gna kmagna na eghuteuna naꞌa ne famamajadi naiknodi Israel. Eghume ka puhi igne, ghotilo koko puhi te diꞌa igne.”
22Mae Moses ne cheke eghu, “Jame ghotilo filoni kaisei mae tapla jafra ka khetogna keha mae na, ghotilo fadidi repa ka thina mala ghilei lehe repa. Ka puhi igne ghotilo ginauna koko puhi te diꞌa igne agne Israel.
23“Jame kaisei mae tei ka kaisei namono eghuteuna mana thafoni kaisei gaꞌase, gaꞌase igne la paruhi eghuteuna mana eni puhi te diꞌa na ka gaꞌase igne. 24Jame te eghu na, ghotilo hatadi repa tei ke kosi grengathagna nomi namono na mala fadi thinadi mala ghilei lehe repa. Gaꞌase igne mala lehe, naugna kate eni mae igne puhi te diꞌa na ka naꞌa na, naꞌa au nekeu ka nomi namono ghotilo na eghuteuna naꞌa neke theome ehani kaisei naikno mala mei toghoni. Eghuteuna mae tuana nabagna te lehe naugna mana ne goigonini khetogna keha mae na. Eghume te keli na ghotilo koko puhi te diꞌa igne ka ghotilo.
25“Jame kaisei mae eni puhi te diꞌa na ka kaisei gaꞌase ka vido te theo ihei nga te au namo teu jare na, mae igne nabagna te lehe. 26Nu ghotilo thosei eni kaisei unha nga ka gaꞌase igne, naugna gaꞌase igne neke theome eni kaisei glepo te diꞌa naba te mala lehe naꞌa na. Puhi igne nogna najafra mae nalhaꞌu gne kolho, jateula nafnata puhi te eni mana te aknu faleheni mae kheragna ia eghu kolho. 27Naugna mae tuana ne eni puhi te diꞌa na ka gaꞌase igne ka vido te theo kaisei naikno te au namo jare na, eghuteuna neuba gaꞌase igne ne eha, nu theo kaisei naikno te tangomana te nomhini te mei toghoni naꞌa na.
28“Jame ghotilo filoni kaisei mae te huhuruni kaisei gaꞌase majaghani mala thuru balugna naꞌa, eghuteuna gaꞌase igne theome paru ngau, 29uve, te eghu na, mae tuana tusu lao glima fulu vido silva ka kmagna gaꞌase igne. Eghuteuna mana tolaghi ka gaꞌase igne eghu, naugna mae tuana neke goigonini naꞌa. Eghuteuna mana theome tangomana teke kokoni gaꞌase igne.
30“Blahi fara kaisei mae te tolaghi ka teke khetogna ulu lahu mae kmagna na, naugna puhi igne famamajani mae kmagna na.”
23Mae ihei te theome au ka nodi faidu nogna naikno LORD
1Mae Moses ne cheke eghu, “Jame kaisei mae au jare mae ihei teke vahe mamajagna na ba vahe koko glepogna na. Nafnata mae igne theo nogna nolaghi te mala mei au ka nodi faidu nogna naikno LORD igne.
2“Jame kaisei mae karha kate theome thofno tolaghi leghuni nodi vetula naiknodi Israel, eghuteuna iheire ginauna nate karha mei ka vikegna mae igne, nafnata mae igne theo nogna nolaghi te au ka nodi faidu nogna naikno LORD igne.
3“Jame kaisei ka vikegna Amon, ba vikegna Moab, eghuteuna iheire ginau nate karha mei ka phei vike igre, nafnata naikno igre jateula te theo nodi nolaghi eghu te mala au ka kaisei nodi faidu nogna naikno LORD igne. 4Naugna tifa kani teke jifla ghotilo Ijep ia, ghotilo neke mei salaꞌu ka nodi nohi naiknodi Amon, eghuteuna mare neke theome kelitadi te tufa gano nei khoꞌu teu ka ghotilo na. Eghuteuna kate mei ghotilo ka nodi nohi naiknodi Moab, mare neke kilo meini mae Balam thugna mae Beo, maegna ka namono Petoa jare Mesopotemia. Mare folini mae Balam mala tibri ghami ghotilo. 5Nu LORD nomi God ghotilo igne neke tirogna fanomho ka mae Balam. Eghuteuna neuba mae Balam ne tibri ghami ghotilo, God figri thibri igne ka kaisei fablahi, naugna mana namha ghami ghotilo. 6Eghume ghotilo ginauna thosei toghodi naikno tuare nei thosei eni kaisei glepo te keli eghu ranghidi nafnata naikno tuare mala au mare ka nakarha te keli.
7“Nu ghotilo theome tiromini kaisei maegna Idom, naugna ghotilo kheragna mana. Eghuteuna ghotilo theome thofno tiromini maegna Ijep, naugna tifa na ghotilo neke au ka nodi kantri mare na jateula mae phosa neku. 8Gradi nafnata mae igre au nogna nolaghi te mala au ka kaisei nodi faidu nogna naikno LORD.”
Mae soldia re mala klino ka tathagna LORD
9Mae Moses ne cheke eghu, “Kate tei ghotilo te au ka kaisei namono te mala magra ka nomi naokare, ghotilo faghuai eghu mala theo kaisei glepo te fathona ghami ghotilo ka tathagna LORD. 10Jame kaisei mae theome klino, naugna mana neke mifini te thofa khoꞌu bongiro na, mae igne tei au fadelei thegna narane thongana tuana. 11Fei grafi ke apu nga mana. Eghuteuna kate plulu naprai na, mana tangomana teke pulo mei ka vido te au ghotilo na.
12“Leuleghu fata na, ghotilo lilisei kaisei vido ke kosigna te au mae armi tagna tuana, mala tangomana mare te tei tagna na. 13Eghuteuna leuleghu fata kate tei mata na, ghotilo hata khodo tei balumi mala dokha khora mala fufruni charami re. 14Ghotilo edi glepo igre naugna LORD nomi God ghotilo igne, mana au balumi ghotilo, eghuteuna mana ginauna reireghi ghami ghotilo, eghuteuna mana ginauna togho ghami ghotilo mala tangomana ghotilo te uludi nomi naokare. Eghume vido te au ghotilo igne mala kaisei vido blahi, eghuteuna LORD theome magnahagheni te filoni kaisei glepo te famamaja ikno ka ghotilo, ba glahu figri tagru ghami mana.”
15Mae Moses ne cheke eghu, “Jame kaisei naikno sneka rikha ka nogna funei na mei poru ka ghotilo, ghotilo thosei ke kuru fapuloni. 16Keliu mala au balumi ghotilo ka namono aheva te vahini mana na. Eghuteuna kate au mana balumi ghotilo na, ghotilo thosei cheke faparini. 17Theo kaisei mae ba gaꞌasegna Israel, te tangomana te vinegna kaisei vido blahi na. 18Thosei hata mei kaisei sileni jateula fafara teke nhaꞌa chekeni ka LORD nomi God na eghu, glahu neke hata mana sileni igne ka nogna gloku vine nalhaꞌu ba gaꞌase. LORD thofno tirognadi fara phei nafnata vinegna vido blahi na.
19“Kate kaoni sileni, ba gano, ba keha glepo ka ghotilo mae kherami ghotilo na, ghotilo thosei foli kaisei intres ka mana. 20Ghotilo tangomana te eni kaisei mae phosa te mala foli intres na. Nu ghotilo theome tangomana te eni mae kherami na te mala foli intres mana na. Ka puhi igne, LORD nomi God ghotilo na ginauna fablahi ghami ghotilo ka gobigna lepo te edi ghotilo ka glose nate hata ghotilo igne.
21“Kate nhaꞌa cheke ghotilo ka LORD nomi God na, ghotilo thosei paipalighi fara te mala eni unha teke nhaꞌa chekeni ghotilo na. LORD ginauna theome ghatho ihodi nomi nhaꞌa cheke ghotilo ra, eghuteuna jame te theome edi ghotilo re, ghotilo ginauna nabami te mala au papara ka nakhibo igne. 22Nu jame te theome eni ghotilo kaisei nhaꞌa cheke ka LORD na, igne theome nakhibo, keliu kolho. 23Nu kate nhaꞌa cheke na, ghotilo tajini nhaꞌa cheke igne, naugna ghotilo eni cheke igne leghuni unha te magnahagheni ghotilo te mala tusu lao ka LORD nomi God.
24“Kate tei ghotilo ka nogna nagare grep mae kherami na, ghotilo tangomana te ghamu keha sisi. Ghotilo tangomana te ghamu te magnahagheni iagho na, nu blahi iagho te fafofodu te nhiꞌo te tei nou kharaꞌo na. 25Eghuteuna kate tei ghotilo ka nogna nagare wit mae kherami na, ghotilo ginauna tangomana te hata keha gano tagna mala ghamu, nu ghotilo hata ka khame kolho, blahi te kato ghotilo ka naflahi te mala hata kmana gano tagna na.”
24Gaꞌase te koko khetogna na, ke leghu naꞌa ke tolaghi
1Mae Moses ne cheke eghu, “Jame kaisei mae tolaghi ka kaisei gaꞌase, eghuteuna ke leghu, mae igne ke tirognani gaꞌase igne naugna mana neke laseni kaisei glepo te diꞌa eigna naꞌa. Aonu mana rioriso pepa mala koko, eghuteuna tusu lao ka gaꞌase igne, eghuteuna mana kuru fajiflani naꞌa ka nogna suga na. 2Eghume, gaꞌase igne jame ke tolaghi ka keha mae na. 3Ke leghu, fapea khetogna na ke tirognani gaꞌase igne. Aonu mana rioriso pepa mala koko, eghuteuna tusu lao ka gaꞌase igne, eghuteuna mana jaola kuru fajiflani ka nogna suga na. Ba fapea khetogna naꞌa igne lehe. 4Jame te thoke mei puhi igre na, khetogna ulu lahu naꞌa igne theome tangomana teke tolaghi ka naꞌa na, naugna gaꞌase igne theome klino ka tathagna God, eghuteuna theome keli ka tathagna LORD na khetogna ulu lahu naꞌa igne teke tolaghi ka naꞌa na. Ghotilo ginauna thosei eni nafnata puhi te diꞌa igne ka glose teke tusu ari LORD ka ghotilo igne.”
5Mae Moses ne cheke eghu, “Jame kaisei mae ao ngala tolaghi nga, ghotilo theome tangomana te kuruni mana tei magra ka armi. Eghuteuna ghotilo theome tangomana teke tusu lao keha gloku ka armi. Ghotilo lisani mana mala au kaisei finogha thongana balugna khetogna na, mala glealeꞌa khetogna na.
6“Kate kaoni kaisei mae ka ghotilo na, ghotilo tangomana te hata glepo mala ke tughu fapulo mana nogna kaoni na. Nu ghotilo thosei hata kaisei ba phei thina te mala ghorhu wit, naugna igre glepo te mala edi mana te au gano tharaknagna mana na.
7“Jame kaisei mae lokini mae kheragna na eghuteuna huhuruni mana mala nogna naikno sneka, ba foli mala kaisei nogna sneka, te eghuna, ghotilo aknu falehe mae igne. Ghotilo aknu falehe mae igne mala koko puhi te diꞌa igne ka ghotilo.
8“Jame kaisei ka ghotilo au fogra diꞌa ka guligna na, mana mala edi gobigna lepo mae pris ka vikegna Livae te chekedi ka mana re. 9Ghotilo ghathoni unha LORD nomi God teke eni ka Miriam kani teke jifla ghotilo Ijep ia.
10“Jame te snakreni ghotilo kaoni na ka mae kherami na, ghotilo ginauna theome tangomana te tei ruma ka nogna suga mana na mala hata nogna pohe mana mala ke tughu fapulo nogna kaoni na. 11Ghotilo ofou ke kosi, mala mei faꞌari kolho mana ka iagho. 12Jame mae igne kuma fara, ghotilo thosei hata nogna pohe na bongiro. 13Leuleghu narane na, ghotilo hata fapulo pohe igne ka mana grafiro, mala totoku mana kate thuru na. Jame te eghu na, mana ginauna glealeꞌa ka iagho. Eghuteuna LORD ginauna filoni puhimi ghotilo te doglo fara na.
14“Jame kaisei nomi mae gloku ghotilo kuma fara, neuba ne kherami, ba mae phosa te au ka nomi namono ghotilo na, ghotilo thosei chaghini mana. 15Leuleghu narane na, ame plulu nga naprai na teuna, ghotilo folini teke loku mana na, naugna mae igne kuma fara eghuteuna mana magnahaghei sileni. Jame te theome folini ghotilo mana na, mana ginauna tei tanhi ka LORD, eghuteuna ghotilo ginauna naba te papara ka nakhibo igne.
16“Jame kaisei sua huhughuni vetula na eghuteuna nabagna te lehe na, ghotilo thosei faleheni mae kmagna na. Eghuteuna jame kaisei mae huhughuni vetula te nabagna te lehe na, ghotilo ginauna thosei faleheni thugna mana na. Naikno na tangomana te lehe eigna nakhibo gna thegna na.
17“Ghotilo leghuni puhi te doglo ka fate na ranghidi naikno phosa nei goro sua te glehe kokoi. Eghuteuna jame kaisei naikno biꞌo tela lehehi khetogna na kaoni ka ghotilo, ghotilo thosei hata nogna pohe na mala ke tughu fapulo nogna kaoni na. 18Leuleghu fata na ghotilo ke ghathoni teke sneka ghotilo Ijep ia, eghuteuna LORD nomi God neke hata fajifla ghami ka na au sosolo igne. Naugna igne iara tusu ari ka ghotilo nafnata vetula igre.
19“Kate hata gano ghotilo ka nagare na, glahu ghatho ihodi ghotilo keha gano. Jame te eghu na, ghotilo thosei pulo ke hata. Ghotilo khudau maladi naikno phosa, nei goro sua glehe kokoi, nei goro naikno biꞌo. Kate eghu ghotilo na, LORD nomi God ghotilo igne ginauna fablahidi nomi gloku te gnafa ghotilo re. 20Eghuteuna kate tei ghotilo te hata ghemi sisi gaju oliv na, eghuteuna keha au meu ka gaju re teuna, ghotilo thosei ke figri mala ke hata sisi igre. Ghotilo khudau, ghedi naikno phosa, nei goro sua glehe kokoi, nei goro naikno biꞌo. 21Eghuteuna jame ghotilo tei ka nagare mala hata ghemi keha sisi grep, eghuteuna keha sisi au meu teuna, ghotilo thosei ke figri mala ke hata. Ghotilo khudau, ghedi naikno phosa, nei goro sua, nei goro naikno biꞌo. 22Leuleghu fata na ghotilo ghathoni narane teke sneka ghotilo Ijep ia. Naugna igne te tusu ari iara nafnata vetula igre ka ghotilo.”
251Mae Moses neke cheke eghu, “Jame phia mae fari fapholai, phia mare tei ka fate mala fadoglini fapholai igne. Eghuteuna mae fate na ginauna cheke fajiflani ihei te doglo na, nei ihei te nabagna te au papara na. 2Jame mae fate cheke ka mare mala purini kaisei mae, mae igne thuru pari ka glose na ke ulugna mae fate. Aonu mare puphuri ka thagrugna mae igne niha fata te nabagna puhi biꞌo teke eni mana na. 3Nu mare theome tangomana te puphuri te salaꞌuni phiatutu fata na. Jame te salaꞌuni phiatutu fata na, ginauna goigonini fara kherami na ka tathadi naikno te gnafa re.
4“Jame hata te mei ghotilo buluka na te nolo ka phaꞌudi wit te mala koko kunedi sisi wit igre na, ghotilo thosei fofotho foflogna buluka igne, ghotilo lisani mala ghamu ka keha wit igre.”
5Mae Moses ne cheke eghu, “Jame phei mae thabusigna au fodu, eghuteuna kaisei ka phei mae igre lehe, nu mana theo thugna nalhaꞌu. Jame te eghu na, khetogna mana teke lehe kokoi igne thosei tolaghi ka keha tharaknai. Thabusigna mae te lehe igne mala ke tolaghi ka naꞌa. 6Mae sua nalhaꞌu teke kulu karha ka repa na, igne thofno thugna mae teke lehe ia, eghuteuna nanghagna na ke fangangha ka mae teke lehe na. Ka puhi igne nanghagna mae teke lehe na theome tangomana te gnafa ke lamnadi naiknodi Israel. 7Nu jame thabusigna mae teke lehe igne tirogna tolaghi ka naikno biꞌo igne, naꞌa tei filodi mae lida rhegna grengathagna namono na. Naꞌa na cheke eghu ka mare, ‘Thabusigna khetogu iara te lehe ia tirogna te tolaghi ka iara na jateula te chekeni ka vetula na ia eghu. Naꞌa theome magnahagheni nanghagna thabusigna na te au fabrahu ka naiknodi Israel.’
8“Aonu mae lida gna namono na igre kilo meini mae thabusigna igne mala cheke ranghini mana. Nu jame chekeni meu ngala mana te tirogna teuna, 9uve, ka tathadi mae lida igre, naikno biꞌo igne tei hata koko nogna slipa mae thabusigna igne, eghuteuna kmisu ka tathagna re, eghuteuna cheke eghu tagna, ‘Igne thofno puhi te mala eni ka iagho na, naugna iagho ne tirouni nanghagna thabusimu na te au fabrahu ka naiknodi Israel.’ 10Aonu ghotilo te gnafa na ginauna kiloni tharaknagna mae thabusigna igne, ‘Tharaknagna mae ihei te koko nogna slipa na.’ ” Naugna mana ne theome magnahagheini nanghagna mae thabusigna thegna na.
Keha vetula
11Aonu mae Moses ne cheke eghu, “Jame phia mae magra, eghuteuna khetogna keha mae na toghoni khetogna na, eghuteuna loku ka khoa keha mae na. 12Jame te eghu na, ghotilo kusu koko khamegna gaꞌase igne, eghuteuna ghotilo thosei kokhoni ni naꞌa.
13“Ghotilo thosei edi phei sopai glepo kate skel gano ghotilo ka ihei na. 14Eghuteuna ghotilo thosei edi phei sopai botol mala skel gano mala theome tangomana ghotilo te chaghini ihei na.
15“Kate skel ghotilo tahudi glepo, ba ghotilo skel niha lita glepo igre, ghotilo mala famane edi fadoglo fara. Jame te eni ghotilo igne na, ghotilo ginauna tangomana te au raugha ka glose teke tusu ari LORD ka ghotilo igne. 16Nu LORD nomi God thono tirognani fara naikno te chaghini ihei ka nogna bisnis na.”
Naiknodi Israel mala aknu falehe tharaknagna mae Amalek
17Mae Moses ne cheke eghu, “Ghotilo thosei ghatho ihoni unha teke eni vikegna mae Amalek ka ghotilo kani teke jifla ghotilo Ijep ia. 18Ka narane tuana, mare neke theome mhaghuni God, aonu neuba ghotilo ne babaꞌo fara, nei glaꞌe soru neu, mare ngolhi ghami ghotilo aknu falehedi iheire te thoghei fara te nolo leghui. 19LORD nomi God ghotilo igne ginauna togho ghami ghotilo mala gnafa ka glose teke tusu ari mana te mala khotogna na, eghuteuna mae naoka te au faligoho ghami ghotilo are ginauna theome eni kaisei puhi te diꞌa ka ghotilo. Aonu ka narane tuare, ghotilo ginauna tei falehedi gnafa vikegna mae Amalek. Ghotilo ginauna goigonidi gnafa, mala theome tangomana kaisei naikno teke ghathodi re. Ghotilo thosei ghatho ihoni igne!”
26Gano saro ulu ka nagare
1Mae Moses ne cheke eghu, “LORD nomi God ghotilo igne neke tusu ari glose ka ghotilo mala hata khotogna. Eghume kate au fakeli ghotilo tagna na, 2ghotilo mala hata gano saro ulu ka nagare ghotilo are. Ghotilo mala lilisei gano igre ka kaisei kharaꞌo. Aonu ghotilo mala hata tei ka vido blahi teke vahini LORD aheva te mala au nanghagna mana na. 3Eghuteuna ghotilo mala tei filoni pris mae ihei te loku ka narane tuana. Eghuteuna ghotilo cheke eghu ka mana, ‘Gognaro na, iara cheke ka LORD nogu God, eigna iara la meihi ka glose teke nhaꞌa cheke mana ka kuꞌeda ra.’
4“Eghuteuna mae pris tuana ginauna hata kharaꞌo tuana ka khamemu iagho na, aonu mana ginauna tei lilisei ke ulugna nogna olta LORD. 5Aonu iagho cheke eghu ke ulugna LORD nou God,
“ ‘Kuꞌegu iara maegna Aram,
mana theo kaisei nogna namono thegna.
Mana hata tharaknagna na ne tei au Ijep.
Kate tei mare na, mare theome kmana,
nu kate au mare ka namono na,
mare kaisei vike te rheta,
nei au kmana vike tagna.
6Naiknodi Ijep igre cheke fapari ghami ghehati,
mare para ghami ghehati,
eghuteuna mare huhuru ghami mala nodi sneka mare.
7Nu ghehati tanhi ka LORD nodi God kuꞌemi ghehati ra.
LORD nomhidi nomi natanhi ghehati re,
eghuteuna mana filo ghami te papara fara,
nei diꞌanagnafa nei au ka narane te ninhigrana.
8Aonu LORD hata fajifla ghami Ijep ka khame nhetagna mana.
Kate hata fajifla ghami mana Ijep mana neke edi kmana kofubobhoi nei nolaghi,
nei glepo te mamhaghuana fara.
9Mana hata mei ghami ka namono igne,
eghuteuna mana tusu ranghi ghami glose te thofno keli fara, eigna glose igne au kmana gano tagna.
10Eghume gognarona, iara hata mei
gano saro ulu te kotu ka glose iagho, LORD God tela tusu meihi ka iara.’
“Aonu iagho lilisei kharaꞌo igne ke ulugna nogna olta LORD, eghuteuna iagho pogho soru mala kilo fnaknoni mana. 11Aonu iagho nei mae Livaet nei hatimare mae phosa te au balumu iagho igre, ghotilo tangomana te ghamu gano te keli ka gaghamu igne mala glealeꞌa ka gobigna lepo LORD teke tusu ari ka ghotilo ra.
12“Leuleghu thilo finogha, ghotilo eni fabothodi gano te hata ghotilo ka nagare are. Eghuteuna ka finogha tuana ghotilo tusu lao fabothodi gano igre ka mae Livaet, nei ka mae phosa te au balumi ghotilo, nei goro sua glehe kokoi, nei goro naikno biꞌo tela lehehi khetodi ra. Ghotilo eni igne, mala tangomana naikno te kuma igre te au ghedi naba gano ka namonomi ghotilo are. 13Aonu ghotilo tangomana te tarai eghu ka LORD, ‘LORD nogu God. Iara hata mei funu ka sugagu na gano te blahi igne mala tusu ari ka iagho, theo kaisei vidogna te au teu ka sugagu iara na. Iara tusu lao gobigna lepo igre ka naikno te kuma nei ka mae Livaet, nei ka mae phosa, nei goro sua glehe kokoi, nei ka goro naikno biꞌo tela lehehi khetodi. Iara eni igne leghuni unha teke chekenihi iagho ia. Iara theome tei kokodi nou cheke iagho eidi glepo igre, eghuteuna iara theome ghatho ihoni kaisei nou cheke iagho. 14Iara theome eni kaisei glepo te mala goigonidi gano blahi igre. Kate tanhi ni mae te lehe na, iara theome ghamuni katha vidogna. Eghuteuna kate thona iara ka tathamu iagho na, iara theome haboni. Eghuteuna iara theome hata kaisei vidogna mala tusu lao jateula kaisei fafara eghu ka ihei te lehe. LORD God, iara faꞌuve nighohi, eghuteuna iara leghudi gobigna lepo te chekedi iagho ka iara ra. 15Iagho au kligna ka nou vido blahi na. Filo soru sagho ka ghehati naiknomi Israel, mala fablahi ghami, nei fablahini famane glose te keli tela tusu meihi iagho ka ghehati jateula teke nhaꞌa chekeni iagho ka kuꞌemi ghehati tifa ra.’ ”
Mae Moses cheke ne gnafa ka vetula eidi nogna nhaꞌa cheke LORD
16Aonu mae Moses ne cheke eghu ka mare, “Ka narane gognarogne, LORD nomi God ghotilo igne cheke ranghi ghami ghotilo mala leghudi nogna vetula nei farirhiu teu mana igre. Eghume ghotilo faghuai eghu ka gaoghathomi fateote’o nei ka nomi glalase fateote’o mala leghudi vetula nei farirhiu teu igre. 17Gognarona, ghotilo chekeni te LORD na nomi God ghotilo. Eghuteuna ghotilo nhaꞌa cheke nate leghudi ghotilo puhigna mana re, eghuteuna ghotilo tangomana nate faꞌuvedi nogna cheke, nei nogna farirhiu, nei nogna vetula teu mana re, eghuteuna edi gobigna lepo te chekedi mana re. 18LORD chekeni te gognarogne ghotilo nogna naikno mana, ghotilo thofno nogna naikno thegna mana, jateula teke nhaꞌa chekeni hi mana ia eghu. Eghuteuna mana chekehi ka ghotilo mala leghudi nogna vetula mana re. 19Eghuteuna te chekeni mana na, mana ginauna fablahi ghami ghotilo mala au nangha biꞌo ghotilo salaꞌudi keha naikno ka nauthoglu igne, eghuteuna mare ginauna thofno ghatho tahu ghami ghotilo. Eghuteuna ghotilo ginauna nogna naikno blahi LORD nomi God, thofno jateula teke nhaꞌa chekenihi mana ia eghu.”
27Mare mala rioriso nogna vetula LORD ke kligna thina biꞌo
1Aonu mae Moses ne kegra haghe baludi mae lida di Israel ne cheke eghu ka naiknore, “Ghotilo mala leghudi vetula te tusu ari iara ka ghotilo gognaro gne igre. 2-4Ka narane nate tei kasa ghotilo ka Khoꞌu biꞌo Jordan te mala tei ka glose aheva te thofno keli fara LORD, nomi God teke tusu ari ka ghotilo igne, ghotilo ginauna fakegra haghe keha thina biꞌo ka thogele Ebal. Ghotilo ginauna lilisei plasta vegha ka thina igre. Aonu cheke te gnafa te au ka vetula na igne, ghotilo mala rioriso ka plasta ka thina igre. 5Eghuteuna jare nate eni kaisei olta mala pogho soruni LORD, nomi God. Thina gna olta igne, ghotilo thosei hata kaisei tul te mala katodi re. 6Eghume ghotilo mala hata thina mata mala horo kaisei nogna olta LORD. Aonu ka olta tuana, ghotilo mala gahu fafara ka LORD. 7Jaola ghotilo edi fafara igre mala laseni te ghotilo au fakeli balugna LORD. Eghuteuna kate ghamu ghotilo fafara igne ke ulugna LORD na, ghotilo ginauna tangomana te thofno glealeꞌa fara tagna. 8Eghuteuna ghotilo mala famane rioriso fakeli cheke igre ka thina teke plasta ghotilo igre.
9“Aonu mae Moses kegra baludi mae pris re ne cheke eghu, ‘Ghotilo naiknomi Israel ra au fakmu nei fanomho eghu! Gognaro na ghotilo nogna naikno LORD nomi God. 10Eghume ghotilo mala leghuni LORD nomi God, kate leghudi ghotilo nogna cheke nei nogna farirhiu teu mana te tusu ari iara ka ghotilo gognaro igre.’ ”
LORD ginauna parani ihei te theome leghuni mana na
11Ka narane tuanala mae Moses jaola ne cheke eghu ka naiknodi Israel:
12“Kate kasa te gnafa ghotilo ka Khoꞌu biꞌo Jordan, vikegna Simion, Livae, Juda, Isaka, Josep, nei mae Benjamin teu igre mala tei kegra ka thogele Gerisim mala fablahidi naiknore. 13Eghuteuna namno vike igre mala tei kegra ka thogele Ebal. Mare mala nomhidi puhi biꞌo nate eni LORD ka naikno te theome leghuni mana re. Igre vike te mala tei kegra ka thogele Ebal, vikegna mae Ruben, nei vikegna mae Gad, nei vikegna mae Asa, nei vikegna mae Sebulun, nei vikegna mae Dan, nei vikegna mae Naftali.
14“Aonu vikegna mae Livae igre ginauna eha eghu fabiꞌo:
15“ ‘Puhi biꞌo ginauna thokeni ihei te hata thaba ba thina ba aean mala hohoro mumujudi keha god delei, eghuteuna pophoru mala pogho soru tagna. LORD thono tirognadi fara nafnata mumuju igre!’
Eghuteuna naiknore ginauna cheke eghu, ‘Amen!’
16“ ‘Puhi biꞌo ginauna thokeni ihei te theome ghatho tahudi idogna kmagna re, LORD ginauna parani mana.’
Eghuteuna naiknore ginauna cheke eghu, ‘Amen!’
17“ ‘Puhi biꞌo ginauna thokeni ihei te tuthugha thina teke fagaglana gna nogna vido glose mae kheragna na.’
Eghuteuna naiknore ginauna cheke eghu, ‘Amen!’
18“ ‘Puhi biꞌo ginauna thokeni ihei te batuni mae te dofu na te tei ka nabrou te jafra.’
Eghuteuna naiknore ginauna cheke eghu, ‘Amen!’
19“ ‘Puhi biꞌo ginauna thokeni ihei te theome leghuni puhi te doglo kate fateni naikno phosa nei goro sua te glehe kokoi, nei goro naikno biꞌo tela lehehi khetodi re.’
Eghuteuna naiknore ginauna cheke eghu, ‘Amen!’
20“ ‘Puhi biꞌo ginauna thokeni ihei te thuru balugna khetogna kmagna na, naugna puhi igne famamajani kmagna na.’
Eghuteuna naiknore ginauna cheke eghu, ‘Amen!’
21“ ‘Puhi biꞌo ginauna thokeni ihei te eni puhi te diꞌa na ka khuma ba bosu ba buluka.’
Eghuteuna naiknore ginauna cheke eghu, ‘Amen!’
22“ ‘Puhi biꞌo ginauna thokeni ihei te thuru balugna greghagna na, neuba naꞌa ne thugna gaꞌase kmagna mana, ba thugna gaꞌase idogna mana.’
Eghuteuna naiknore ginauna cheke eghu, ‘Amen!’
23“ ‘Puhi biꞌo ginauna thokeni ihei te thuru fodu ka idogna khetogna na.’
Eghuteuna naiknore ginauna cheke eghu, ‘Amen!’
24“ ‘Puhi biꞌo ginauna thokeni ihei te aknu falehe poruni kheragna na.’
Eghuteuna naiknore ginauna cheke eghu, ‘Amen!’
25“ ‘Puhi biꞌo ginauna thokeni ihei te hata sileni te mala aknu faleheni ihei te theo nakhibogna na.’
Eghuteuna naiknore ginauna cheke eghu, ‘Amen!’
26“ ‘Puhi biꞌo ginauna thokeni ihei te theome leghudi famane farirhiu igre.’
Eghuteuna naiknore ginauna cheke eghu, ‘Amen!’ ”
28LORD ginauna fablahidi naikno te leghuni mana re
1Aonu mae Moses neke cheke eghu, “Jame te thofno leghuni ghotilo LORD, nomi God na, eghuteuna leghudi ghotilo famane cheke te tusu ari iara ka ghotilo gognaro gre teuna, mana ginauna fablahi ghami ghotilo mala hata nangha biꞌo salaꞌudi keha naikno ka nauthoglu igne. 2Jame te leghuni ghotilo LORD, nomi God na, mana ginauna tusu ari ka ghotilo fablahi igre:
3“Nomi bisnis nei nomi nagare teu ghotilo are ginauna thofno keli fara.
4“Ghotilo ginauna au kmana thumi. Eghuteuna ghemi nagare ghotilo are ginauna vuragha gano. Eghuteuna nomi glepo tautagu ghotilo are ginauna jaola au kmana thudi.
5“Ghotilo ginauna au ghemi kmana wit mala ei ghemi bret.
6“LORD ginauna reireghi ghami ghotilo ka vido aheva te tei ghotilo tagna na.
7“Mana ginauna togho ghami ghotilo mala uludi nomi naoka te mei magra ka ghotilo are. Neuba naoka igre ne mei fodu ka narane te mala mei magra ka ghotilo na, mare ginauna rikha rikiraka tafri tei ka sopai nabrou.
8“LORD ginauna fablahidi suga te mala lilisei gano ghotilo are mala fodu salaꞌui. Eghuteuna nomi gloku ghotilo are ginauna keli fara. LORD nomi God ghotilo igne ginauna fablahi ghami ghotilo ka glose teke tusu ari mana ka ghotilo igne.
9“Jame te leghudi ghotilo nogna vetula mana re, eghuteuna leghudi puhigna mana re teuna, mana ginauna fablahi ghami ghotilo, eghuteuna ghotilo ginauna nogna naikno blahi mana, jateula teke nhaꞌa cheke hi mana ia eghu. 10Eghume naikno te gnafa ka nauthoglu igne ginauna filo glani ghami ghotilo te nogna naikno LORD na, eghuteuna mare ginauna mhaghu ghami ghotilo. 11Kate au ghotilo ka glose aheva teke nhaꞌa chekeni LORD ka kuꞌemi ghotilo tifa ra, mana ginauna fablahi ghami ghotilo mala au kmana thumi, nei kmana nomi buluka, nei sipu, nei nanigot, nei dongki, nei kmana gano ka nagare.
12“Maloa gne jateula kaisei suga te mala liliseidi nogna famane glepo LORD ra eghu, eghuteuna mana ginauna tothora maloa gne mala soru mei nakhete ka thofno narane gna na. LORD ginauna fablahidi ghemi nagare ghotilo are mala au kmana gano. Eghume ghotilo ginauna au ghemi kmana gano, eghuteuna naiknodi keha kantri are tangomana te mei kaoni ka ghotilo. Eghuteuna theo kaisei glepo nate faꞌiho ghami ghotilo te mala tei kaoni ghotilo ka keha kantri delei. 13LORD ginauna togho ghami ghotilo mala au nolaghi ke klignadi keha kantri are, eghuteuna mana theome snakre ghami ghotilo te au ke paridi nodi nolaghi keha kantri are. Jame te thofno leghudi nei ghatho tahuni teu ghotilo vetula te tusu ari iara ka ghotilo gognaro igre na, mana ginauna togho ghami ghotilo mala au ghotilo ke klignadi keha kantri are, eghuteuna LORD na theome snakre ghami ghotilo te mala au ke paridi mare na. 14Ghotilo mala thofno leghu fakelidi vetula te tusu ari iara ka ghotilo gognaro igre, eghume ghotilo thosei ngolho leghudi keha god delei, eghuteuna ghotilo thosei tarai nei pogho soru eghu ka keha god te chaichaghi igre.”
15Mae Moses ne cheke eghu, “Nu jame te tiromi fanomho ghotilo ka LORD nomi God, eghuteuna theome leghu fakelidi nogna cheke nei vetula teu mana te tusu ari iara ka ghotilo gognaro igre na, mana ginauna edi puhi biꞌo igre mala thoke ghami ghotilo:
16“Nomi bisnis nei nomi nagare teu ghotilo are ginauna diꞌa salaꞌui.
17“Ghotilo ginauna theo nagare wit te mala ei bret na.
18“Ghotilo ginauna theo sua. Eghuteuna ghemi nagare ghotilo are ginauna theo ganodi. Eghuteuna nomi buluka nei nomi sipu nei nomi nanigot teu ghotilo are ginauna jaola theo thudi.
19“Ghotilo ginauna thoke ghami puhi biꞌo ka vido te gnafa aheva te tei ghotilo tagna na.
20“Kate figri tagruni ghotilo LORD, te leghuni ghotilo puhi te diꞌa na, mana ginauna tusu ari puhi biꞌo mala thokedi gobigna lepo te edi ghotilo are. Mana ginauna tei koko ghami ghotilo, eghuteuna ghotilo ginauna mhaghu nomi na theome tangomana te laseni unha nate eni na, ghilei goigoni ghami fabrahu ghotilo. 21Eghuteuna LORD ginauna snakre ari fogra biꞌo ka ghotilo mala ghilei lehe fahui ghotilo, eghuteuna theo kaisei naikno nate au ka glose aheva nate tei te au ghotilo tagna na. 22LORD ginauna snakre ari thua nafnata fogra te diꞌa, eghuteuna ghotilo ginauna thoke ghami nhuge, nei fagrutu biꞌo. Eghuteuna nomi glose ghotilo are ginauna moja fara, eghuteuna mana na snakre mei nuri te thono brana fara mala flea nei mala goigoni eghu ghemi nagare ghotilo are. Puhi biꞌo igre ginauna goigoni ghami ghotilo mala ghilei kafe lehe ghotilo. 23Ginauna theo kaisei nakhete nate soru mei ka namono ghotilo are, eghuteuna nomi glose ghotilo are ginauna maku jateula aean eghu. 24Eghuteuna LORD ginauna snakre mei nusu nei gaughavu mala thofa soru funu kligna ka maloa gno jateula nakhete eghu mala ghilei goigoni fahui ghami ghotilo.
25“LORD ginauna toghodi mae naoka re mala ulu ghami ghotilo. Neuba ghotilo ne mei fodu ne kaisei mala magridi mare, ghotilo ginauna rikha ka soasopai nabrou. Eghuteuna naikno ka nauthoglu igne ginauna ghatho ghami ghotilo na kaisei glepo diꞌa kolho. 26Kate lehe ghotilo na, nanghaji nei glepo tautagu teu igre ginauna mei ghamu thinimi ghotilo re, eghuteuna ginauna na theo kaisei naikno nate au teu te mala bruedi re. 27LORD ginauna para ghami ghotilo ka nhuge jateula naiknodi Ijep tifa ra eghu. Thinimi ghotilore ginauna thafru ka thubu te fodu ka glotho. Eghuteuna thinimi ghotilore ginauna gharo fabrahu, nu theo kaisei meresin te au teu te mala teke keli fapulo ghotilo na. 28LORD ginauna eni ghami ghotilo mala fameomekro, eghuteuna ghotilo na noli nei dofu eghu. 29Fari hotei naublatha na, ghotilo ginauna ngafa khame tafri jateula mae te dofu ra eghu, eghuteuna ghotilo ginauna na theome tangomana te thafoni nabrou aheva te magnahaghei tei ghotilo tagna na. Eghuteuna gobigna lepo te edi ghotilo re ginauna theome keli. Leuleghu fata na nomi naoka ghotilo igre ginauna cheke fapari ghami, chaghi ghami nei blau ghami, eghuteuna theo kaisei naikno nate fakarhi ghami ghotilo na.
30“Jame iagho paru ka kaisei gaꞌase mala tolaghi ka naꞌa, nu keha mae ginauna mei goigoni gaꞌase igne. Jame kaisei mae horo kaisei suga, nu mana ginauna na theome tangomana te thuru tagna na. Jame kaisei mae joꞌu kaisei nagare grep, nu mana ginauna theome tangomana te ukli sisigna na. 31Keha mae ginauna mei aknu falehe nou buluka iagho re kate filo teu iagho na, nu ghotilo ginauna na theome tangomana nate ghamu nafnahi gna na. Mare ginauna mei blau nou dongki iagho na, eghuteuna mare ginauna theome tusu fapulo ka ghotilo. Nomi naoka ghotilo re ginauna mei blau nomi sipu ghotilo re, eghuteuna ginauna na theo kaisei mae nate tangomana te togho ghami ghotilo na. 32Mare ginauna mei hata thumi nalhaꞌu nei gaꞌase teu ghotilo are mala tei sneka ka keha kantri delei. Eghuteuna ghotilo ginauna magnahaghedi fara thumi re teke pulo mei, eghume leuleghu narane na ghotilo ginauna hiro na ghilei kabru tathami re, nu na theome tangomana kolho eghu. 33Ghotilo ginauna loku heta fara ka nagare mala kotu gano, nu maedi ka keha kantri delei ginauna mei hata ganodi re. Eghuteuna leuleghu fata na mare ginauna thofno goigoni ghami ghotilo. 34Ghotilo ginauna na ghilei noli kate filodi ghotilo glepo te diꞌa te au faligoho ghami ghotilo re. 35LORD ginauna toku tafru ghahemi ghotilo are ka nhuge te theome tangomana te gnafa dire, funu ka ghahemi are haghe posa ka phaꞌumi ghotilo are.
36“LORD ginauna kuru fajifla ghami ghotilo balugna nomi king na, eghuteuna ghotilo ginauna tei ka keha kantri te khaba fara aheva ghotilo nei kuꞌemi ra eghu te theome tangomana laseni. Kate au teu ghotilo ka kantri tuana, mare ginauna huhuru ghami ghotilo mala tarai nei pogho soru eghu ka mumuju god teke horo kolho ka thaba nei thina. 37Aonu ka namono aheva LORD nate kuru tei ghami ghotilo tuana, naiknore ginauna tirodi filo ghami, cheke goigoni ghami, nei na nagho ghami eghu ghotilo.
38“Neuba ghotilo ne joꞌu kmana sisi ka nagare biꞌo are, ghotilo ginauna theome tangomana te hata kmana gano tagna na, naugna cheche ginauna ghamu fahui ghemi gano ghotilo re. 39Ghotilo ginauna joꞌu nei reireghidi eghu nagare grep, nu ginauna theome au kmana sisidi eghuteuna ghotilo na theome tangomana te eni waen te mala koꞌu na, naugna siosilo ginauna goigoni fahui. 40Nomi glose ghotilo na au kmana sisi ka gaju oliv, nu ghotilo ginauna theome tangomana te eni oel mala kuki na, naugna kate ikodi teu sisidire, ginauna na brusu khoko pari. 41Ghotilo ginauna au thumi nalhaꞌu nei gaꞌase, nu ghotilo ginauna theome tajidi naugna mae soldia ginauna hata tei ka sosolo. 42Eghuteuna kmana cheche ginauna mei goigoni nomi gaju nei nagare teu ghotilo re.
43“Naikno phosa te au balumi ghotilo are ginauna nheta e nheta, nu ghotilo ginauna na nigra e nigra. 44Naikno phosa igre ginauna dedei fara, nu ghotilo ginauna au kuma, aonu mare ginauna snakreni kaoni ka ghotilo. Eghuteuna mare ginauna theome tangomana te mei kaoni ka ghotilo na. Naikno phosa igre ginauna au nodi nolaghi ke klignami ghotilo, eghuteuna ghotilo tangomana te au ke parigna nodi nolaghi mare.
45“Jame te tiromi fanomho ghotilo ka LORD nomi God eghuteuna theome leghudi cheke nei vetula eghu teke tusu ari mana ka ghotilo igre teuna, puhi biꞌo te gnafa igre ginauna thoke ghami ghotilo ghilei kafe lehe fahui ghotilo. 46Puhi biꞌo igre kaisei fagaglana ke lamnami ghotilo nei vikemi teu ghotilore tifa tifa. 47Kate fablahi ghami LORD ka glepo te kmana re, eghuteuna ghotilo theome thofno keli tami te pogho soru ka mana teuna, 48ghotilo ginauna rofo, nei roi koꞌu, nei soesole nei kmoꞌe ka gobigna lepo fateote’o. Glepo igre ginauna thoke ghami ghotilo naugna ghotilo ginauna na loku ranghidi nomi naoka ghotilo teke kuru mei LORD ka ghotilo are. Mare ginauna thofno para ghami fara ghotilo ka gloku biꞌo te ninhigrana fara ghilei ghotilo te gnafa na kafe lehe hui.
49“LORD ginauna hata mei kaisei armi gna kaisei kantri te khaba fara mala mei magra ka ghotilo. Nodi namono na au ka keha philegna nauthoglu igne, eghuteuna ghotilo theome laseni nodi cheke mare na. Mare ginauna mei ka ghotilo jateula kaisei gaghata te flalo te sukha ra eghu. 50Ghotilo ginauna thono mhaghudi mare, eghuteuna mare theome tangomana te kokhonidi naikno biꞌo, mae biꞌo nei goro sua. 51Mare ginauna aknu falehe nomi buluka, sipu, nanigot nei dongki teu ghotilo re, eghuteuna mare na jaola hata gano ka nagare ghotilo re. Eghume ghotilo ginauna rofo ghilei lehe. Mare ginauna theome lisei soru kaisei wit, ba waen majaghani, ba oliv oel, ba buluka, ba sipu, eghuteuna ghotilo ginauna rofo ghilei lehe. 52Naoka igre ginauna mei magra ka nomi namono biꞌo ghotilo are, eghuteuna mare ginauna paꞌe soru gringnidi namono aheva te rouronudi ghotilo na reireghi ghami ka glose aheva LORD teke tusu ari ka ghotilo teku are.
53“Ka narane te mei nomi naoka ghotilo igre te au falithu ka nomi namono ghotilo re, ghotilo ginauna diꞌa nagnafami fara naugna ghotilo ne theo ghemi gano. Ghotilo ginauna thono rofo fara na ghilei hata ghamu thinidi thumi nalhaꞌu nei thumi gaꞌase teu teke tusu ari LORD ka ghotilo are. 54-55Eghuteuna neuba kaisei mae te keli te thofno ke keli fara puhigna na, nu ka narane tuana, mana ginauna diꞌa nagnafagna fara ka grofo, aonu mana ginauna aknu falehe kaisei thugna mala ghamu nafnahigna na. Nu mana ginauna na theome tangomana te tufa kaisei nafnahi ka mae kheragna na, ba ka khetogna te namhani fara mana na, ba ka keha thugna te karha teure. 56-57Kate mei naokare te goigoni ni nomi namono ghotilo na, neuba kaisei famane gaꞌase te thono dedei fara te au ka suga gna na, nu ka narane tuana, naꞌa ginauna kokhoni ni fara ka grofo. Eghume naꞌa ginauna ghamu thugna teke karhala na, eghuteuna naꞌa ginauna jaola ghamu glepo te jifla mei ka nathuthuru gna sua teke karha la. Eghuteuna naꞌa pophoru mala ghamu, mala theome tangomana naꞌa te tufa kaisei ghegna nafnahi ka khetogna te namhani fara na, ba ka keha thugna re.
58“Nanghagna LORD nomi God ghotilo na thono haghe fara, eghuteuna ghotilo mala ghatho tahuni mana. Eghume jame te theome ghatho tahuni nei theome leghudi teu ghotilo nogna cheke mana tela riorisohi iara ka Buka gna vetula na igre, 59mana ginauna kuru mei fogra te diꞌa tulao ka ghotilo nei thumi teu ka tharaknami ghotilo are. Mana ginauna kuru mei keha fogra te diꞌa mala thoke ghami ghotilo gnafa, fogra igre ginauna theome tangomana nate ari te gnafa dire. 60Fogra te diꞌa teke filodi ghotilo Ijep teke mhaghu nomidi fara ghotilo tifa ra, ginauna nake thoke ghami ghotilo, eghuteuna fogra igre ginauna theome tangomana nate ari te gnafa na. 61Eghuteuna LORD ginauna kuru ari keha nafnata fogra nei puhi biꞌo eghu mala thoke ghami ghotilo. Eghuteuna theo kaisei mae teke rioriso soruhi fogra igre ka Buka vetula igne. Eghuteuna fogra igre ginauna goigoni ghami ghotilo. 62Neuba ghotilo ne kmana naikno ne jateula nathunu ka maloa na are neu, nu jame te theome leghuni ghotilo LORD nomi God na, phei ba thiloi kolho nate karha na. 63Mei te posa gognarogne, kate leghuni LORD ghotilo na mana neke keli tagna ka ghotilo neke tusu ranghi ghami nakarha te keli neke thovu neke kmana naikno. Nu jame te theome leghuni ghotilo mana na, mana ginauna keli tagnau kolho te thofno goigoni ghami ghotilo na. Jateula mae ihei te rathu koko buburu te diꞌa ka nagare ra eghu, mae naoka igre ginauna mei hata fajifla ghami ghotilo ka glose nate tei te hata ghotilo igne.
64“Jame te theome ghatho tahuni ghotilo LORD na, mana ginauna fariki raka ghami ghotilo ka keha kantri are, funu ka keha philegna nauthoglu na tei posa ka keha philegna nauthoglu na. Kate au ghotilo ka kantri igre, mare ginauna huhuru ghami ghotilo mala tarai pogho soru ka keha god teke horo ka thaba nei thina eghu kolho, eghuteuna ghotilo nei kuꞌemi ra eghu neke theome lasedi mumuju igre. 65Eghuteuna ka keha namonore, ghotilo ginauna na theome tangomana te filoni pharikeli ba vido mala gnafa. Eghuteuna theo kaisei namono te ghathoni ghotilo ne nomi namono themi teuna. Ghotilo ginauna nanga nomi fabrahu, eghuteuna gaoghathomi ghotilo re na theome tangomana te au blagna na, aonu gaoghathomi ghotilo re ginauna glaꞌe soru. 66Leuleghu fata na ghotilo ginauna au ka puhi biꞌo, eghuteuna glehe na au namo kolho ka ghotilo bongi narane na. 67Gaoghathomi ghotilo re ginauna faꞌiho fara, naugna ghotilo mhaghu nomi fara ka glepo te filodi ghotilo re. Kate dofra haghe hamerane na, ghotilo ginauna magnahaghei fara teke romno na. Eghuteuna kate romno na, ghotilo ginauna magnahaghei fara teke phae na. 68Neuba LORD neke chekenihi ka ghotilo na teke theome tangomana na teke pulo Ijep na, nu mana ginauna nake lilisei ghami ghotilo ka vaka mala ke kuru fapulo ghami jare. Eghuteuna kate au teu ghotilo jare na, ghotilo ginauna tangomana te toredi nomi mae naokare mala mei foli ghami ghotilo mala tei loku jateula naikno sneka eghu ka mare, nu ginauna na theo kaisei mae nate keli tagna te foli ghami ghotilo na.”
291Igre chekegna nhaꞌa cheke teke eni LORD baludi nogna naiknodi Israel. Cheke igre neke cheke mana ka mae Moses kani au teku mare Moab mala toutonu ranghidi naiknore. Nhaꞌa cheke igne neke nhaꞌa lao mae Moses ka nhaꞌa cheke teke eni LORD baludi mare tifa ka Thogele Sanai.
LORD falalaseni te nodi God mae Israel
2Mae Moses ne kilo meidi naiknodi Israel, aonu mana ne cheke eghu ka mare:
“Ghotilo la filodihi gobigna lepo teke edi LORD ka king gna Ijep, nei nogna mae gloku te gnafa, nei naikno te gnafa ka kantri Ijep. 3Ghotilo neke filodi puhi biꞌo, nei kofubobhoi, nei glepo biꞌo eghu teke fakakhana LORD nogna nolaghi na. 4Nu mei te posa gognarogne, LORD theome tothora gaoghathomi ghotilo re mala lasedi ghotilo glepo teke edi mana re. Mana neke theome tothora tathami ghotilo re mala filo glanidi ghotilo glepo igre, eghuteuna mana jaola neke theome tothora khulimi ghotilo re mala nomhi glanidi ghotilo glepo tuare. 5LORD neke cheke eghu ka ghotilo, ‘Phiatutu finogha iara neke batu ghami ghotilo ke lamna namono nagou, eghuteuna nomi pohe nei nomi slipa teu ghotilo re neke theome breku ba neke theome diꞌa. 6Ka narane tuare, ghotilo neke theome ghamu bret, nei neke theome koꞌu kaisei waen ba kaisei beer, nu iara neke reireghi ghami ghotilo mala laseni ghotilo te iara LORD nomi God ghotilo na.’
7“Kate thoke mei ghotilo ka namono igne na, King Sihon gna namono biꞌo Hesbon, ghe King Og gna namono biꞌo Basan, phei mae igre neke mei magri ghami ghotilo, nu ghotilo neke uludi phiamare. 8Eghuteuna ghotilo neke hata nodi glose phia mae igre. Aonu ghotilo neke tufa ka vikegna Ruben, nei ka vikegna Gad, nei ka vido vikegna Manase.
9“Eghume, leuleghu fata na ghotilo thofno leghuni chekegna nhaꞌa cheke igne mala tangomana ghotilo te au ka nakarha te thofno keli fara. 10Gognarona ghotilo kafe kegra haghe ke ulugna LORD. Ghotilo mae mala baubatu te gnafa ra, mae funei ra, mae biꞌo ra, mae khuekuꞌe ra, baludi mae te gnafa Israel ra. 11Ghotilo goro gaꞌase ra, goro sua ra, naikno phosa te mala uge nomi gaju nei mala pala khoꞌu mei teu ka ghotilo ra. 12Gognarona ghotilo kafe kegra haghe agne mala eni nomi nhaꞌa cheke na ka LORD nomi God. Mana neke eni nhaꞌa cheke igne balumi ghotilo, eghuteuna ghotilo lasedi nogna cheke mana te thofno rheta fara igre. 13Mana magnahaghei cheke ka ghotilo gognarogne mala glola fakeli ka ghotilo te nogna naikno mana na, eghuteuna mana nomi God ghotilo, jateula teke nhaꞌa chekeni mana ka thilo kuꞌemi ghotilo tifa ra, mae Ebraham, mae Aesak nei mae Jekop. 14LORD neke cheke eghu ka ghotilo, ‘Nu iara neke theome eni nhaꞌa cheke igne balumi ghotilo kolho, eghuteuna theome ghotilo kolho te mala leghuni nogna cheke te nheta mana igne. 15Tutuani, iara neke eni nhaꞌa cheke igne balumi ghotilo te kafe kegra ke ulugu iara agne igre, eghuteuna iara jaola eni igne baludi iheire nate karha mei ke leghumi ghotilo ginaure.’
Ghotilo naiknomi Israel ra thosei tei ka keha god delei
16“Tutuani, ghotilo laseni unha nafnata nakarha te ninhigrana teke au tahati tagna Ijep tifa ia. Eghuteuna ghotilo jaola laseni teke tei salaꞌu tahati ka nodi glose keha naiknoi te mala mei thoke ka namono igne. 17Eghuteuna ghotilo neke filodi mumuju teke horo ka thaba, nei ka thina, nei ka silva, nei ka gol teu te thono diꞌa fara ra. 18Eghume ghotilo fiofilo ghami eghuteuna thosei snakreni kaisei naikno mala figri thagrugna na ka LORD nomi God. Neuba kaisei mae, ba kaisei gaꞌase, ba kaisei tharakna, ba kaisei vikemi ghotilo, theo kaisei naikno te tangomana te tei tarai nei pogho soru ka nodi god keha naiknore. Theome keli kaisei ka ghotilo te biꞌo haghe jateula kaisei gaju te ure sisi poesen ra eghu.
19“Iheire teke nomhini eigna nhaꞌa cheke igne, nu mana patu gama fara nei leghuni kolho fabrahu puhigna thegna na. Eghume puhi biꞌo igne ginauna goigonini mana nei naikno te gnafa Israel neubane naikno keli ba diꞌa, mare ginauna kafe lehe hui. 20LORD ginauna theome tangomana nate hata fadelei nakhibogna nafnata mae igne. Diꞌa tagna LORD na ginauna mei ka mae igne jateula kaisei khaꞌaghi eghu. Eghuteuna thibri te gnafa teke rioriso mare ka Buka vetula igre ginauna soru ke kligna gna mana, eghuteuna LORD ginauna ghiha koko nanghagna mana na mala theome tangomana kaisei naikno ka nauthoglu igne nate ghathoni mana na. 21LORD ginauna hata fadelei mae igne ka vike te gnafa Israel, mala koko soru ke kligna gna thibri teke nhaꞌa cheke ni ka Buka vetula igne.
22“Aonu unha nate eni ginauna, thumi ghotilo re, baludi iheire nate mei ke leghumi ghotilo re, nei naikno phosadi keha kantri te khaba are, mare ginauna filodi puhi biꞌo nate nhaꞌa mei LORD ka namonomi ghotilo are, eghuteuna mare ginauna jaola filodi fogra nate thoke ghami ghotilo. 23Heva heva ka nomi glose ghotilo are ginauna krogha, eghuteuna ginauna na theo kaisei glepo nate karha tagna na. Ghotilo ginauna theome tangomana te joꞌu kaisei glepo tagna na. Naugna khaꞌaghi ghe solt ginauna thafru tagna. Neubane kaisei buburu kolho, theome tangomana te jaola te karha tagna na. Nomi namono ghotilo re ginauna diꞌa jateula namono biꞌo Sodom, nei Gomora, nei Adma, nei Seboim eghu teke goigoni LORD tifa kani teke diꞌatagna fara mana ka mare ra eghu. 24Eghuteuna naiknodi keha namono are ginauna ghusna eghu, ‘Naugna unha si LORD te goigoni glose ignea? Naugna unha si mana te diꞌatagna fara gnea?’
25“Eghuteuna naiknore ginauna cheke tughu eghu, ‘Naugna mare neke theome leghuni u nhaꞌa cheke teke eni mare balugna LORD nodi God mae kuꞌedi ra, kani teke hata fajifladi ka kantri Ijep. 26Naiknore figri ne tarai nei pogho sorudi neu keha god teke theome lasedi mare tifa re, eigna LORD theome snakredi nogna naiknore te tarai nei pogho soru teu ka god igre. 27Naugna igne, diꞌatagna LORD na ne gnubra nodi glose mare igne, eghuteuna thibri te gnafa teke rioriso soru ka Buka gna Vetula na igne ne thoke mei tutuani ka nodi namono re. 28LORD ne thofno diꞌatagna fara, aonu mana brue fajifladi ka nodi namono re jateula ihei te rathu koko buburu te diꞌa re ka nogna nagare na ia eghu. Eghuteuna koko teidi ka keha kantri delei, aheva te au teu mare tela ghilei mei posa ka narane gognaro gre!’
29“LORD noda God tahati na au keha nogna gaoghatho poru te theome tangomana kaisei naikno te laseni. Nu mana cheke ranghi ghitahi ka nogna vetula na, nei ka iheire nate karha mei ke leghuda, eghume tahati mala leghudi fabrahu nogna cheke te gnafa mana re.”
30Naiknodi Israel tangomana teke figri mei ka LORD
1Mae Moses ne cheke eghu, “Iara la chekehi puhi nate tangomana LORD nate fablahi ghami ghotilo na, nei puhi nate tangomana te mala thoke ghami ghotilo puhi biꞌo na. Eghume kate thoke ghami ghotilo gobigna lepo igre na, neuba ne unha nafnata kantri LORD nomi God vahini mala au ghotilo teku na, ghotilo mala ghaoghatho eidi u farirhiu igre. 2Eghuteuna kate ghathodi ghotilo nei thumi re teu farirhiu igre, ghotilo ke figri gaoghathomi re mala ke pulo mei ka LORD nomi God. Ghotilo mala leghudi ka gaoghathomi fateote’o, nei ka nomi glalase fateote’o eghu cheke te tusu ari iara ka ghotilo gognaro igre. 3Jame te eghu ghotilo na, LORD ginauna kelitagna ka ghotilo, eghuteuna mana ginauna tangomana nate atha fajifla ghami ka keha namono aheva teke brue ghami mana teke tei ghotilo tadi are. 4Neuba mana neke brue fajifla ghami ghotilo neke tei ka keha phile nauthoglu te khaba fara, nu mana ginauna nake hata fapulo mei ghami ghotilo. 5LORD nomi God ginauna nake hata fapulo mei ghami ghotilo ka glose teke kulu au ghotilo tagna igne. Eghuteuna ka narane tuana, mana ginauna nake snakreni ka ghotilo mala ke khotogna glose tuana, mala au ka nakarha te keli, nei mala ke rheta salaꞌui ghotilo gognaro gne. 6Aonu LORD nomi God ginauna hata koko glepo te diꞌa fateote’o ka gaoghathomi ghotilo are, nei ka gaoghathodi vikemi ghotilo are eghu. Eghume ghotilo te gnafa ginauna namhani mana ka gaoghathomi fateote’o, nei ka nomi glalase fateote’o mala tangomana ghotilo te karha na. 7Aonu LORD ginauna lisa lao puhi biꞌo igre mala thokedi nomi naoka ghotilo te tirodi ghami nei goigoni ghami teu are. 8Eghuteuna ghotilo ginauna leghuni mana, eghuteuna tajidi nogna vetula mana te tusu ari iara ka ghotilo gognaro igre. 9-10Ghotilo mala leghuni LORD nomi God, eghuteuna leghudi nogna vetula nei nogna farirhiu teu mana te rioriso soru ka Buka na igre. Eghuteuna ghotilo mala ke figri mei ka LORD nomi God gaoghathomi fateote’o nei nomi glalase fateote’o. Jame te eghu ghotilo na, mana ginauna tusu ranghi ghami nakarha te keli, eghuteuna ghotilo ginauna na au kmana thumi, nei kmana nomi buluka, sipu, nanigot, dongki nei hose, eghuteuna ghemi nagare ghotilo re ginauna au kmana gano tadi. Eghuteuna LORD ginauna keli tagna fara ka ghotilo eghuteuna togho ghami ghotilo mala au ka nakarha te keli te salaꞌui, jateula mana te keli tagna ka ghotilo gognarogne eghu.”
Vahini nabrou gna karha na
11Mae Moses ne cheke eghu, “Vetula te tusu ari iara ka ghotilo gognaro igne theome ninhigrana fara, nei theome au delei eghu mala theome leghuni ghotilo. Theo! 12Theome au ka maloa kligna mala cheke eghu ghotilo, ‘Ihei gne nate haghe kligna te mala hata te soru vetula igne ka tahati na, mala tangomana tahati te nomhini nei leghuni teuna?’ 13Theome au ke lamna nhorora, eghume iagho theome tangomana te cheke eghu na, ‘Ihei nate soru lamna nhorora te mala hata te mei ka tahati na, mala tangomana tahati te nomhi ni nei leghuni teuna?’ 14Vetula igne au ngala balumi ghotilo. Ghotilo la lasenihi, eghuteuna ghotilo tangomana te iju poloni, eghume ghotilo tangomana te leghuni na.
15“Fanomho ghotilo ia! Gognarona iara chekedi cheke igre mala tangomana ghotilo te vahini nabrou gna karha na, mala keli nakarhami ghotilo re, ba nabrou gna glehe na mala goigoni ghami ghotilo re. 16Iara cheke faheta ka ghotilo gognaro na, mala namhani LORD nomi God. Ghotilo mala leghudi nogna cheke, nogna farirhiu nei nogna vetula teu mana re. Jame te eghu ghotilo na, ghotilo ginauna au ka nakarha te keli, nei vikemi, nei thumi teu ghotilore ginauna kmana fara, eghuteuna LORD nomi God ginauna fablahi ghami ghotilo ka glose nate tei ghotilo te au tagna na.
17“Nu jame te figri tagru ghotilo te tiromi fanomho, eghuteuna tei tarai ka keha god delei teuna, 18LORD ginauna goigoni ghami ghotilo. Gognarona iara cheke faheta ka ghotilo jame te eghu ghotilo na, ghotilo ginauna na theome au raugha ka glose nate tei kasa ghotilo ka Khoꞌu biꞌo Jordan te mala tei au tagna na.
19-20“Gognarona iara cheke fadoglo ari ka ghotilo jame ghotilo kolho te mala vahidi puhimi ghotilo re. Iara eha tei ka maloa ghe glose mala jateula witnes eghu repa ka nogu cheke iara gre. Eghume, ghotilo magnahaghei karha, ba ghotilo magnahaghei lehe? Ghotilo magnahagheni LORD te mala fablahi ghami, ba ghotilo magnahaghei ni LORD te goigoni ghami? Iara magnahaghei ghami ghotilo fara te mala vahini u karha na! Ghotilo mala namhani LORD nomi God, eghuteuna ghotilo mala fanomho ka mana nei leghuni fabrahu eghu mana. LORD kolho te tangomana te tusu ari karha ka ghotilo nei ka vikemi ghotilo ra eghu. Eghuteuna ghotilo ginauna tangomana te au raugha ka glose teke nhaꞌa cheke mana ka thilo mae kuꞌemi ghotilo ra Ebraham, Isak nei mae Jekop.”
31Mae Josua ne tughuni mae Moses
1Mae Moses ne cheke ka naiknodi Israel. 2Mana ne cheke eghu, “Gognarona iara la kuekuꞌe fara, iara la thokeni hi kaisei gobi varadaki finogha. Iara na theome tangomana nate batu ghami ghotilo na. Eghuteuna LORD nomi God ghotilo na neke cheke ka iara, eigna iara ginauna theome tangomana nate tei kasa ka Khoꞌu biꞌo Jordan. 3Nu LORD ginauna tei ke ulumi ghotilo, eghuteuna mana ginauna goigonidi naikno te au ka glose nate tei ghotilo tagna na, eghuteuna ghotilo ginauna khotodi gobigna lepo te au ka nodi glose mare re. Gognarona mae Josua ginauna nate nomi mae lida ghotilo na jateu tela chekenihi LORD ia eghu. 4LORD ginauna goigoni naiknodi Kenan jateula teke goigonidi mana King Sihon ghe King Og, nei nodi namono vikegna mae Amoa. 5Mana ginauna lisa mei ka khamemu iagho mala uludi naiknodi Kenan. Eghume ghotilo mala edi gobigna lepore ka mare thofno jateula tela chekedi hi iara ka ghotilo igre eghu. 6Eghume ghotilo farerheta gaoghathomi are, eghuteuna ghotilo mala kegra heta leghu fata. Thosei mhaghu nei bobolo nomi eghu, naugna LORD nomi God ghotilo na au balumi ghotilo. Mana ginauna na theome tei koko ghami ghotilo, ba ghatho iho ghami.”
7Aonu mae Moses ne kilo meini mae Josua ke uludi naiknodi Israel ne cheke eghu, “Rheta gaoghathomu na eghuteuna kegra heta fabrahu eghu. Naugna iagho ginauna na batudi naiknore, mala tangomana ghotilo tei te hata glose teke nhaꞌa cheke ni LORD nomi God ka kuꞌemi ghotilo tifa ra. 8LORD thegna ginauna batu ghami ghotilo, eghuteuna mana ginauna au balumi ghotilo. Mana ginauna theome tangomana nate lisa koko ghami ghotilo na, eghume gaoghathomi ghotilo re mala theome glaꞌe soru nei mhaghu eghu.”
9Aonu mae Moses ne rioriso nogna Buka vetula LORD na ne tusu lao ka hatimare mae pris nei mae iheire te baubatu ka naiknodi Israel. Mae pris igre ka vikegna mae Livae, eghuteuna mare tangomana te pala nogna Bokis Blahi Nhaꞌa cheke LORD. 10-11Aonu mana ne cheke eghu ka mare, “Ka khukru gna fafitu finogha, kate ghiha koko kaoni ghotilo ka Narane biꞌo te mala Au ka Grorofe Ikoi igne, eghuteuna ghotilo te gnafa na mala kafe salo fodu mei ke ulugna LORD nomi God ka vido blahi aheva nate vavahi mana na, aonu ghotilo mala iuꞌiju vetula igne, mala nomhini naiknore. 12Ka narane tuana, mae nalhaꞌu nei goro gaꞌase teura mala kafe mei, eghuteuna goro sua nei naikno phosa teu te au balumi ghotilo ra jaola kafe mei, mala tangomana mare te kafe nomhini vetula igne. Ka nafnata puhi igne, mare tangomana te laseni puhi te mala ghatho tahuni LORD nomi God. Eghuteuna mala tangomana mare te thofno leghudi cheke te gnafa te au ka vetula igne. 13Ghotilo eni igne, mala tangomana thumi ghotilo te theome karha nga teu ka naiknodi Israel igre, nei iheire te theome laseni vetula igne, mare mala jaola nomhini nei hironi eghu puhi te mala ghatho tahuni LORD nomi God. Mare mala nomhini fabrahu ka glose ke kasa Khoꞌu biꞌo Jordan aheva nate tei te au ghotilo tagna na.”
14Aonu LORD ne cheke eghu ka mae Moses, “Gognarona, nou narane te mala lehe iagho na la namohi. Kilo meini mae Josua mala mei ka nogu Suga Tapuale te Blahi iara na. Eghuteuna iara ginauna fablahi ni mana jare mala nodi lida mae Israel.” Aonu mae Moses ghe mae Josua ne tei ka Suga Tapuale te Blahi na.
15Eghuteuna LORD ne thakle ka phiamare ka kaisei grokho biꞌo te kegra fadoglo haghe ka grengatha gna Suga Tapuale te Blahi igne. 16Aonu, LORD ne cheke eghu ka mae Moses, “Iagho ginauna lehe. Eghuteuna kate lehe iagho na, naikno igre ginauna na theome raugha tarai nei pogho soru eghu ka nodi god naikno te au ka glose nate tei ghotilo tagna na. Mare ginauna lisa ghau iara, eghuteuna mare ginauna huhughuni u nhaꞌa cheke teke eni iara baludi mare ia. 17Aonu kate eni mare igne na, iara ginauna diꞌatagu fara ka mare, eghuteuna iara ginauna lisadi mare. Iara ginauna poru ka mare, eghuteuna kmana puhi ginauna mei goigonidi mare. Mare ginauna thokedi kmana puhi biꞌo, eghuteuna kate thoke mei glepo te diꞌa ka mare na, mare ginauna laseni te theome au iara baludi mare na. 18Iagho laseni, ka narane tuana, iara ginauna thofno poru ka mare naugna mare ne leghudi puhi te diꞌa re figri ne tei tarai nei pogho soru neu ka keha god delei.
19“Gognarona, iara na tusu ari kaisei khoje ka ghotilo, eghuteuna iara magnahaghei ghami ghotilo te rioriso khoje igne. Moses, iagho farirhiudi naiknodi Israel mala koje mare. Ka puhi igne, khoje igne ginauna kaisei glepo te mala laseni te iara leghuni kolho unha teke chekeni ka mare ia. 20Iara ginauna hata teidi ka glose te thofno keli fara teke nhaꞌa cheke iara ka kuꞌemi ghotilo tifa ra. Eghuteuna kate au mare tagna na, mare na au ghedi kmana gano, eghuteuna mare ginauna glealeꞌa fabrahu. Neuba mare ginauna nake figri ke tarai nei pogho soru eghu ka keha god delei na figri tagru ghau iara, eghuteuna mare ginauna huhughuni u nhaꞌa cheke teke eni iara baludi mare ia. 21Aonu kate thoke mei kmana hoholo biꞌo ka mare na, eghuteuna khoje igne ginauna na jateula kaisei nogu witnes eghu iara fakakhana puhidi mare te diꞌa re, naugna mare vikegna Israel theome tangomana te ghatho ihoni khoje igne. Neuba iara ne theome hatadi mare neu ka glose teke nhaꞌa cheke iara ka mare na, nu iara la lasenihi unha nate eni mare ke leghu na.” 22Eghume ka narane tuana la mae Moses ne rioriso soru khoje igne ne farirhiu ka naiknodi Israel.
23Aonu LORD ne cheke eghu ka mae Josua, “Rheta gaoghathomu na nei kegra maku fabrahu eghu. Iagho ngala ginauna batudi tei naiknodi Israel ka glose aheva teke nhaꞌa cheke hi iara mala tusu ari ka ghotilo teku ia. Eghuteuna iara ginauna au balumi ghotilo.”
24Mae Moses ne rioriso gobigna lepo ka nogna Vetula LORD na ka kaisei buka. 25Kate rioriso te gnafa na, mana ne kilo meidi hatimare mae pris ka vikegna mae Livae mae iheire te pala nogna Bokis Nhaꞌa Cheke LORD. Aonu mana ne cheke eghu ka mare, 26“Ghotilo hata nogna Buka vetula LORD nomi God igne tei lilisei rhegna nogna Bokis Blahi Nhaꞌa cheke mana na. Igne jateula kaisei witnes eghu ka ghotilo naiknomi Israel jame te leghudi ghotilo puhi te diꞌa re. 27Iara lase ghamihi te patu gama fara ghotilo ranghini LORD. Neuba, kate karha teu te au teu iara balumi ghotilo gognarogne, leuleghu fata na ghotilo figri tagruni LORD. Eghuteuna jame te lehe iara na, iara laseni ghotilo ginauna tangomana nate figri tagruni fara mana na. 28Iara magnahaghei ghami ghotilo te chekedi mae mala baubatu ka vike nei mae biꞌo teu ra mala kafe mei. Mala tangomana iara te cheke fadoglo ka mare na, eghuteuna iara ginauna kilodi maloa ghe glose mala jateula witnes eghu ka unha te chekedi iara ka mare igre. 29Iara laseni ke leghugna te lehe iara na, ghotilo ginauna na thofno diꞌa fara, eghuteuna ghotilo ginauna figri tagrudi glepo te farirhiu ghami iara igre. Eghume ka narane nate mei are puhi biꞌo ginauna thoke ghami ghotilo, naugna ghotilo ne edi glepo te diꞌa te diꞌatagnadi fara LORD re.”
Khoje neke farirhiu mae Moses ka mare
30Aonu mae Moses ne chekedi chekegna khoje igne ka naiknodi Israel teke mei fanomho re.
321“Maloa ghe glose, ghopa fanomho ka nogu cheke iara gne,
ghopa fanomho fakeli ka unha te chekedi iara igre.
2Nogu farirhiu iara na ginauna soru mei jateula nakhete eghu,
ginauna mei jateula nabubla bongiro eghu.
Nogu cheke iara na jateula nakhete ikoi ka nagare majaghani ra eghu,
jateula famane nakhete te mala kotu buburu ra eghu.
3“Iara ginauna cheke fakelini nanghagna LORD!
Tahati te gnafa na cheke fakelini mana naugna mana haghe fara!
4LORD na vido keli mala poru.
Puhigna mana na keli fara, eghuteuna mana doglo fabrahu kolho.
God na ghatho tahu ghami ghotilo nogna naiknore.
Mana doglo kolho theome eni kaisei glepo te diꞌa.
5“Ghotilo naiknomi Israel theome leghuni u puhigna LORD te doglo na.
Kokhoni ghami fara, ghotilo famamaja ghami themi eghume ghotilo theome nabami te au jateula thugna LORD teuna,
nu ghotilo naikno chaghi nei leghuni kolho puhi te diꞌa na.
6Ba, tuana puhi te keli te mala tegio ka LORD na?
Theo. Ghotilo noli fara!
Ghotilo theo kaisei nomi glalase te keli!
LORD na kmami ghotilo, eghuteuna mana ngala teke vuavuha ghami ghotilo na.
7“Ghathodi narane tifa te mei ra.
Tei ghusnani kmamu mala toutonu ranghi nigho.
Tei ghusnadi kuꞌemi are mala toutonu eidi glepo te thoke ghita tahati igre.
8God mae ihei te haghe fara igne neke tufa vido glose ka soasopai naikno mala au tagna.
Mana ei nodi nohi keha naiknore.
Eghuteuna mana ne lilisei nodi nohi naiknodi keha kantri are leghuni nabadi nodi god.
9Nu ghotilo nogna naikno LORD.
Ghotilo naikno ka vikegna Jekop ra, ghotilo nogna LORD.
10“LORD neke filo ghami ghotilo ke lamna namono nagou aheva te theome tangomana kaisei naikno te au tagna eghuteuna nuri na ghaghafa fabrahu.
Mana neke reireghi ghami nei fiofilo ghami neku ghotilo.
Mana neke fakarhi ghami ghotilo,
naugna ghotilo nhogri fara ka keha naiknore ka tathagna mana na. 11Mana neke taji fakeli ghami ghotilo jateula gaghata te farirhiudi thugnare te mala flalo ra neku.
Naꞌa theome snakredi thugnare te khoko pari, naꞌa flalo sukha ke parigna mala tako hagheni.
12LORD kolho teke batu ghami ghotilo na.
Theo kaisei god teke au balumi ghotilo na.
13Mana hata mei ghami ghotilo ke lamna kmana thogele ka namono Kenan.
Mana tusu ari kmana famane gano ka nagare ghotilo re.
Mana neke togho ghami ghotilo mala au ghemi kmana jurukuli te jifla mei ke lamna goro thina.
Mana neke fablahi ghami ghotilo baludi famane gaju oliv te kotu ka glose aheva teke theome naba te mala tobi nagare ghotilo.
14Eghuteuna nomi buluka nei nanigot nei sipu teu ghotilo re blokha fara ka teke au reꞌe ka namono Besan.
Reꞌe tufa kmana milk ka ghotilo.
Eghuteuna nomi nagare wit ghotilo re famane fara.
Eghuteuna waen ukru te koꞌu ghotilo re thofno mamahe fara.
15“Ghotilo iheire te doglo ra neke blokha fara.
Ghotilo au ghemi kmana gano fara eghuteuna ghotilo ghamu neke ghilei blokha neke salaꞌui.
Eghume ghotilo leghuni puhi te theome doglo na
eghuteuna ghotilo tei kokoni God mae ihei teke vuavuha ghami na.
Ghotilo figri lao thagrumi re ka God mae ihei nomi vido keli te mala poru ghotilo na.
16Kate pogho soru ghotilo ka keha god delei na, mana goghotu.
Mana diꞌatagna fara ka nomi mumuju god ghotilo are.
17Ghotilo fafara ka naitu te theome thofno god kolho na.
God chaichaghi igre, kuꞌemi ghotilo tifa ra neke theome lasedi,
god igre posa mei majaghani kolho.
Eghuteuna kuꞌemi ghotilo tifara neke theome ghatho tahudi nei mhaghudi neku.
18Ghotilo tei kokoni God mae ihei teke vuavuha ghami nei nomi vido keli mala poru ghotilo.
Mana neke tusu ranghi ghami nakarha.
Mana tusu ari nakarha ka ghotilo,
nu ghotilo ghatho ihoni mana.
19“LORD na filodi glepo igre ne tirogna ghami ghotilo,
naugna mana diꞌatagna fara ka ghotilo thugna nalhaꞌu nei gaꞌase teu mana re.”
20“LORD neke cheke eghu ka ghotilo, ‘Gognarona iara poru ka ghotilo.
Aonu iara ginauna na filoni unha nate goigoni ghami ghotilo na,
naugna ghotilo ne phaꞌu boto fara,
eghuteuna ghotilo sua theome ghatho tahu ghau iara.
21Iara goghotu ka ghotilo, naugna ghotilo ne pogho soru ka god te theo nafudi kolho are.
Iara diꞌatagu fara ka ghotilo, naugna ghotilo ne magnahagheidi mumuju blahi te theo nafudi are.
Eghume iara ginauna chekedi naikno te theo nafudi kolho are mala famamaja ghami ghotilo.
Eghuteuna iara ginauna eni igne mala diꞌatami ghotilo ka iheire te theo tadi kaisei gaoghatho te keli.
22Diꞌatagu iara na brana jateula khaꞌaghi biꞌo te ghamu fateo gobigna lepo ka nauthoglu igne
te ghilei soru pari ka namonodi naikno te lehe ra eghu.
Ghemi nagare te gnafa ghotilo are ginauna nhako,
eghuteuna ginauna jaola nhako ke paridi thogele are.
23“ ‘Iara ginauna lisa mei puhi biꞌo ke klignami ghotilo.
Puhi biꞌo igre ginauna mei ka ghotilo jateula iara te fada jata ghami ghotilo ra eghu.
24Ghotilo ginauna lehe ka grofo,
nei ka fagrutu, nei ka kmana nafnata fogra te diꞌa.
Iara ginauna kuru mei khuma mata mala ngolhi ghami ghotilo,
eghuteuna mogo phanaga ginauna mei kathi ghami ghotilo.
25Ka nabrou are naoka ginauna mei akni falehedi thumi nalhaꞌu majaghani nei gaꞌase majaghani teu ghotilo are.
Eghuteuna ka suga re naiknore ginauna kafe mhaghu nodi fara.
Mae majaghani, nei gaꞌase majaghani, goro sua nei naikno biꞌo teu are ginauna kafe lehe.
26Te chekeni iara na, iara ginauna ngolho fajifla ghami ghotilo,
eghuteuna theo kaisei naikno ka nauthoglu igne nate tangomana na teke ghatho ghami ghotilo na.
27Nu iara laseni jame te eni iara igne na,
nomi naoka ghotilore ginauna cheke fadiꞌa eghu ghau iara,
“Ghehati neke uludi naiknodi Israel ka nomi nolaghi themi,
LORD neke theome togho ghami ghehati neke uludi mare!” ’
28“Nu ghotilo naiknomi Israel, ghotilo theome lalase.
Theo kaisei ka ghotilo te lalase na.
29Jame kaisei ka ghotilo te lalase na, mana tangomana jame te ghathodi gobigna lepo tela thoke meihi igre,
eghuteuna mana jame jaola lasedi unha nate thoke mei ginauna igre.
30Ghathodi nogu ghusna iara gre.
Faꞌunha eghu tangomana kaisei soldia kolho te uludi kaisei thogha mae ka magra na?
Faꞌunha eghu tangomana phei soldia kolho te ngolhi teidi nabotho thogha mae ka magra na?
Ghotilo mala filo glani tuana:
Glepo igne na thoke mei naugna LORD nomi vido keli mala poru ghotilo naiknomi Israel igne tei koko ghami ghotilo.
31Nomi naoka ghotilo are laseniu te nodi god naikno tuare theo nodi nolaghi
te jateula nolaghi te au ka iara igne teuna.
32Puhidi mae naoka gre diꞌa,
jateula puhidi maedi Sodom ghe Gomora tifa ra neu.
Mare jateula gaju grep te raha sisigna ra nei poesen teura eghu.
33Puhidire jateula waen teke horo ka mogo phanaga ra eghu.
34“ ‘Iara ghathodi glepo te diꞌa teke edi nomi naoka ghotilo ra.
Jateula te tathaji teu iara waen poesen igne ka kaisei vido te keli.
35Iara kolho te tangomana te tughu fapulo puhi biꞌo tuana ka nomi naoka ghotilo are.
Iara ginauna nake foli fapulo ka mare.
Na theome raugha mare ginauna uka pari.
Nodi narane mare te mala au diꞌanagnafa na ginau posa mei.
Eghuteuna puhi biꞌo igne na ghosei mei toku tafrudi mare.’
36“Kate filoni LORD te glaꞌe soru nogna naiknore,
eghuteuna phei ba thiloi kolho ka ghotilo te au na,
mana ginauna chekeni te ghotilo theome nabami te au papara na.
Eghuteuna mana ginauna keli ka ghotilo nogna mae glokure.
37Aonu mana ginauna ghusna eghu ka ghotilo,
‘Ahevau nomi god te mala tei poru ghotilo tagna na?
38Ghotilo neke faghamudi ka garofadi nafnahi teke fafara ghotilo ra,
eghuteuna tusu ranghidi waen mala koꞌu mare,
nu god igre theome togho ghami nei reireghi ghami eghu ghotilo.
39“ ‘Filo si ghotilo. Iara kolho God te tutuani na!
Jare na theo kaisei god te au na!
Iara tangomana te faleheni naikno na,
nei tangomana te fakarhini naikno na.
Iara tangomana te faghorehoni naikno na,
nei tangomana teke fakeli fapuloni naikno na.
Theo kaisei naikno tangomana te fanograni unha te eni iara na.
40Iara karha fabrahu,
eghuteuna iara eni kaisei nhaꞌa cheke eghu,
41iara ginauna hata nogu naflahi mala magra te siasigla fara na.
Iara ginauna jaha ghilei fnonu fara.
Aonu iara ginauna tughu fapulo ka nogu naokare,
eghuteuna iara ginauna paradi iheire te tirodi ghau iara re.
42Nogu jata iara gre ginauna apu ka dadaradi naikno te tirodi ghau iara re.
Nogu naflahi mala magra iara na ginauna ghamu thinidire,
eghuteuna ginauna falehedi mae te au ka sosolo,
eghuteuna kusu phaꞌudi mae biꞌo te naokare.’
43“Ghotilo te gnafa klignara,
ghotilo mala glealeꞌa balugna LORD.
Ghotilo god te gnafa ra,
ghotilo pogho soru ka mana.
LORD ginauna nake tughu fapulo glehedi goro thugna mana ra.
Nu ginauna mana hata fadelei nakhibodi nogna naiknore,
eghuteuna nodi glose re ginauna na klino ka tathagna mana.”
44Aonu Moses ghe mae Josua, thugna mae Nun, ne iuꞌiju chekegna khoje igne ka naiknodi Israel te mei fanomho igre.
Nogna cheke leghu lahu mae Moses ka naiknodi Israel
45Kate cheke te gnafa mae Moses cheke igre ka naiknore, 46mana ne cheke eghu, “Ghotilo ghatho fakelidi cheke te gnafa te farirhiu ghami iara gognarogne. Ghotilo mala farirhiudi thumire mala leghudi mare nogna vetula LORD ka buka na igre. 47Ghotilo laseni! Farirhiu igre theome cheke theo nafudi kolho. Nakarhami ghotilo na au ka farirhiu igre! Ghotilo mala leghudi farirhiu igre mala tangomana ghotilo te au raugha ka glose nate au ghotilo kate tei kasa ghotilo ka Khoꞌu biꞌo Jordan.”
48Ka narane tuanala, LORD ne cheke eghu ka mae Moses, 49“Iagho tei ka nohi Moab, ka keha phile Khoꞌu biꞌo Jordan ka namono Jeriko. Eghuteuna jare, iagho tei apla ka thogele Nebo, eghuteuna iagho ginauna filoni namono Kenan nate tusu lao iara ka naiknodi Israel. 50Iagho ginauna lehe jare ka thogele tuana, jateula thabusimu iagho Eron teke lehe ka thogele Hor. 51Naugna ghopa neke theome ghatho tahu ghau iara ke uludi naiknodi Israel tifa ra. Ka narane tuana ghopa neke au ka khoꞌu Meriba, rhegna namono Kades ke lamna namono nagou Sin, eghuteuna ghopa neke theome fakakhana te mae blahi iara na ka tathadi naiknodi Israel. 52Eghume iagho ginauna filo fakhaba teini kolho namono nate snakre lao iara ka naiknodi Israel, nu iagho na theome tangomana nate tei ruma tagna na.”
33Nogna cheke leghu lahu mae Moses ka naiknodi Israel
1Moses nogna mae gloku God igne, mana la namohi nogna narane te mala lehe na. Aonu mana fablahidi naiknodi Israel ne cheke eghu:
2“LORD mei funugna Sanai neke mei ka ghotilo.
Mana mei ka ghotilo jateula naprai te haghe ka keha phile nohi Idom ra eghu.
Eghuteuna siasiglagna na phae funu ka thogele Paran mei posa ka ghotilo.
Nabotho thogha engel te mei balugna mana na,
eghuteuna mana louloku kaisei khaꞌaghi biꞌo fei khame nhetagna.
3Tutuani, LORD namhadi nogna naiknore.
Mana thofno reireghi fakeli ghami ghotilo nogna naikno blahi mana ra.
Eghume ghotilo mei mala pogho soru ka mana,
eghuteuna mana na farirhiu ghami ghotilo.
4Iara chekeni nogna vetula mana igne ka ghotilo.
Vetula igne nomi glepo ulu fara ghotilo naikno ka vikegna mae Jekop.
5Kate salo fodu ghotilo mae biꞌo nei mae lida teu ka vikegna Israel ra,
LORD na nomi King ghotilo.”
6Mae Moses tudu ne cheke eghu ka vikedi Israel:
“Vikegna mae Ruben, ghotilo ginauna theome kmana, nu ghotilo ginauna karha,
eghuteuna jame te keli na ghotilo na theome tangomana nate lehe na.
7LORD, fanomho ka vikegna Juda kate tarai ari mare ka iagho te mala toghodire.
LORD, ke hata fapulo meidi keha vikemi ghehati ra.
Tusu lao nolaghi ka vikegna Juda mala magra thedi ka nodi naoka re.
Eghume iagho toghodi mala uludi mare nodi naokare.
8Vikegna mae Livae, ghotilo mae pris te hata phei nogna thina LORD te kilodi Tumim ghe Urim.
LORD laseni te ghotilo kolho te doglo kani teke fariuriu ghami mana namono Masa nei ka khoꞌu Meriba.
9Eghuteuna keha fata na, ghotilo faꞌuveni LORD neke theome nangadi idomi kmami ra,
ba kherami ba thumi teu ghotilo ra.
Ghotilo neke reireghini kolho nogna nhaꞌa cheke LORD.
10Ghotilo vikegna Livae ra tangomana te farirhiudi vikegna mae Jekop igre ka nogna vetula LORD.
Ghotilo tangomana te toghodi naiknodi Israel igre te iuꞌijudi nogna vetula manare.
Ghotilo gahu insens mala cheke fakelini LORD,
ghotilo tangomana te gahu fafara ka nogna olta mana na.
11LORD, fablahidi vikegna mae Livae,
eghuteuna iagho thofno kelitamu ka nodi gloku mare re.
Iagho goigonidi nodi naoka mare are,
mala thosei ke mei magra mare.
12Vikegna mae Benjamin, LORD thofno namha ghami ghotilo.
Ghotilo tangomana te au muana balugna LORD.
Mana au balumi ghotilo ka nomi thogele ghotilo are,
eghuteuna mana reireghi ghami ghotilo fabrahu.
13Vikegna mae Josep, snakreni LORD mala fablahini nomi glose ghotilo na.
Snakreni mana mala kuru soru nakhete ka glose igne nei mala fura haghe glokha khoꞌu tagna.
14Snakreni mana mala agha mei fakeli naprai na ka nomi nagare ghotilo are,
eghuteuna leuleghu nhigra na nagare ghotilo are mala vuragha ka gano.
15Uve, nagare te gnafa ghotilo ka thogele di tifa are,
ginauna au kmana famane gano.
16Snakredi nohi ghotilo are mala kafe fodu ka glepo te keli.
Snakreni LORD, God mae ihei te au ke lamna khaꞌaghi te nhako kaisei gaju ikoi igne,
mana keli fara ka ghotilo.
Iara magnahaghedi fablahi te gnafa igre mala mei ka ghotilo vikegna mae Josep mae ihei te mae biꞌo ka mae thabusigna mana re.
17Vikegna mae Efrem au kmana thogha mae,
eghuteuna vikegna mae Manase, jaola au kmana thogha mae.
Ghopa phei vike igre nheta jateula buluka teke kulu karha ra eghu,
eghuteuna ghotilo lase magra jateula buluka nalhaꞌugna mata ra eghu.
Ghopa phei vike igre ginauna tangomana te goigonidi naiknodi keha kantri are,
eghuteuna huhurudi naikno igre mala au ka khukrugna nauthoglu igne,
ghopa ginauna tangomana te goigonidi mare.
18Vikegna Sebulun, ghotilo tangomana te glealeꞌa te tei ka nomi vaka re.
Vikegna mae Isak, ghotilo tangomana te glealeꞌa ka nomi suga tapuale te mala au nomi tadi are.
19Ghopa phei vike igre tangomana te toredi keha vike are
mala mei loku fodu balumi ghotilo ka vido blahi ka thogele are.
Jare ghopa tangomana te gahu thofno fafara re,
eghuteuna ghotilo tangomana te ei gaghamu ka gobigna lepo te au ka nomi bisnis ghopa ka thongna nei ka geri thongna.
20Vikegna mae Gad, ghotilo cheke fakelini LORD,
naugna mana eni ne krepa nomi glose ghotilo na.
Ghotilo lase magra jateula kaisei lion te thofno ghamu fahui khamegna ba phaꞌugna buluka teke kathu falehe thegnara neu.
21Ghotilo vavahi vido glose te keli te magnahagheni themi na.
Ghotilo hata vido glose te nabadi mae biꞌo.
Eghuteuna kate mei loku fodu nodi lida naiknodi Israel re,
ghotilo leghudi nogna famane vetula nei nogna cheke teu LORD re.
22Vikegna mae Dan, ghotilo jateula kaisei lion majaghani gna Basan eghu.
Ghotilo tangomana te ghosei te tei goigonidi nomi naokare.
23Vikegna mae Naftali, LORD ginauna thofno fablahi ghami ghotilo ka thua glepo te keli.
Ghotilo mala hata glose ke mosu nei ke mata Kholo Galili.
24Vikegna mae Asa, LORD ginauna fablahi ghami ghotilo salaꞌudi keha vike are.
Mana ginauna magnahaghei ghami ghotilo salaꞌudi keha vike are.
Eghuteuna nomi namono ghotilore ginauna fodu salaꞌui ka oliv.
25Ghotilo tangomana te au fakeli fabrahu naugna ghotilo tangomana te hata aean nei bras eghu
mala horo grengathadi gringni thinagna nomi namono na mala maku fakeli.
Eghuteuna nakarhami ghotilore ginauna rheta fabrahu leghu rane.”
26Aonu mae Moses neke cheke eghu ka naikno te gnafadi Israel,
“Theo kaisei god te jateula nomi God ghotilo naiknomi Israel te doglo ra.
Mana tangomana te kasa ka maloa na te togho ghami ghotilo,
eghuteuna mana tei ke lamna khoveo ka nogna nolaghi biꞌo.
27Ghotilo tangomana te au fakeli ka God mae ihei te karha te tifa.
Leuleghu fata na, mana theome gnafa te loku ka khamemi ghotilore te mala togho ghami ghotilo na.
Ka narane te cheke ka ghotilo te mala goigonidi nomi naoka ghotilore,
mana ginauna ngolhi fajifladi.
28Eghume ghotilo Israel ginauna au ka pharikeli.
Eghuteuna nomi namono ghotilo ka vikegna mae Jekop ra na au fakeli.
Nomi glose ghotilo are ginauna au kmana gano nei waen,
eghuteuna leuleghu fata na nakhete fabrahu.
29Gognarona ghotilo Israel glealeꞌa fara.
Theo kaisei naikno te jateula ghotilo te fakarhi ghamihi LORD teu igre.
LORD na jateula nomi greoreo eghu ghotilo
mala theome tangomana nodi jata nomi naoka ghotilo are te fadi ghami ghotilo na.
Eghuteuna mana jateula nomi famane naflahi eghu ghotilo mala uludi ghotilo naokare.
Naoka igre ginauna mei mhaghu fififri balu tanhi ke ulumi ghotilo,
nu ghotilo ginauna tapla ke klignadi nei goigonidi eghu mare.”
34Moses ne lehe
1Aonu mae Moses jifla ka sare biꞌo Moab ne tei apla ka thogele Pisga, eghuteuna mana haghe kligna ka thogele Nebo ka keha phile Khoꞌu biꞌo Jordan funu Jeriko. Kate au teu jare na, LORD ne fakakhana ka mana glose te gnafa ke lamna nohi Kenan. Mana fakakhana vido te gnafa funu ka nohi Gilead ke maghati Jordan tei posa ke raru Dan. 2Eghuteuna mana jaola filo laoni nogna nohi Naftali, nei nogna nohi Efrem, nei nogna nohi Manase. Eghuteuna mana jaola filo tongana heva heva ka nogna nohi Juda ke mosu tei posa Thongna Mediterenian, 3nei nogna nohi Juda ke mata aheva te kiloi Negev, nei glogu Jeriko namonodi gaju thubo, nei nohi ke mata tei posa ka namono Soa. 4Aonu LORD ne cheke eghu ka mana, “Glose igne iara neke nhaꞌa cheke hi ka mae Ebraham, nei mae Isak nei mae Jekop. Iara neke chekeni nate tusu lao iara glose igne ka vikedi thilo mare. Iara snakre nigho iagho mala filo kolho tagna, nu iara theome snakre nigho iagho te tei ruma tagna na.”
5Aonu, mae Moses nogna mae gloku LORD igne ne lehe jare Moab, ne thofno horoghoto ka chekegna LORD na. 6LORD ne giugiluni mana ka kaisei glogu jare Moab rhegna namono Bet-Peo. Nu funu ka narane tuana te mei posa gognarogne theo kaisei naikno te thofno laseni ka vido aheva te au bekugna mana na. 7Mae Moses neke thokeni kaisei gobi varadaki finogha neke lehe nga. Mana nheta fabrahu, eghuteuna tathagnare jaola keli kolho. 8Ka narane tuare naiknodi Israel teke au ka sare biꞌo Moab igre ne diꞌanagnafadi fara ne tanhi ka glehegna mana na ne ghilei thokeni tolufulu narane, tuare gnafadi narane te mala tanhire.
9Eghuteuna mae Josua thugna mae Nun neke tughuni mae Moses, eghuteuna LORD ne toghoni mae Josua ne lalase fara, naugna mae Moses neke taofinihi mana. Aonu naiknodi Israel igre ne leghuni mana ne edi jateula teke chekedi LORD ka mae Moses ra neu.
Theo kaisei profet jateula mae Moses teuna
10Mae Moses gne kaisei mae profet biꞌogna Israel ghilei mei posa gognarogne, eigna theo kaisei profet te jateula mana teu te thofno filoni tathagna LORD na te cheke balugna mana na. 11LORD neke kuruni mae Moses neke tei Ijep neke edi kofubobhoi nei fagaglana ranghini king gna Ijep, nei nogna mae biꞌo, nei naiknodi Ijep. 12Theo kaisei profet tangomana te fakakhana nolaghi biꞌo te mamhaghuana te edi mae Moses ke uludi naiknodi Israel.