Kolose

Kolose

Letas Teke Riso Tei Mae Pol Ka Khiloau Kolose

Thoutonu kmo’ei eigna buka igne

Kolose gne kaisei namono biꞌo ka Provins Esia, naonamo kakatha ka namono biꞌo ka Provins Efesus. Provins Esia gne gognaro na kaisei vido ke mosu ka namono te laseni tahati nohi Turki. Filo laogna na mae Pol thegna neke theome thoke Kolose. Nu kate au teu Efesus na, mana neke kurudi kolho keha nogna mae glokure mala tei toutonuni Nonomho te Keli na ka namono tuana. Mae Pol jame neke rioriso letas igne kani teke rioriso letas mana ranghini mae Filimon. Mae Pol jame neke rioriso letas igne ka finogha 60 kani teke au mana ka suga sosolo Rom.

Mae Pol nomhidi keha mae velepuhi chaichaghi au ka khiloau Kolose. Unha te chekeni mare na, naikno khiloaure tangomana te pogho sorudi ngala thua nafnata god te au nolaghi, nei leghudi ngala thua nafnata vetula te mala tohi fagaglana nei nafnata gano te blahi te mala ghamu naikno khiloaure.

Mae Pol riso tei ka mare mala thosei leghudi nafnata farirhiu tuare, naugna vetula igre mala goigonidi kolho nodi fatutuani naiknore. Eigna Kraes neke vuavuha gobigna lepo ka nauthoglu gne, eghuteuna God snakredi naiknogna nauthoglu gne mala mei ka mana. Te fatutuani tahati ka Kraes na, igne ngala kaisei nabrou God te mala fakarhi ghita na.

Phei vido ka letas igne

Nakarha te tutuani nei nogna gloku Kraes: 1:1–2:19

Nakarha majaghani kate fatutuani tahati ka Kraes: 2:20–4:18

¹Iara mae Pol, eigna God neke magnahaghe ghau iara mala nogna khuru mae Jisas Kraes. Ghepa kherada mae Timoti, ²riso ari ka ghotilo nogna naikno God te au ka namono Kolose, ghotilo kherami ghepa te thofno leghuni mae Kraes tela nognahi mana. Ghehati toreni God Kmada mala tusu ranghi ghami khokofakasai nei pharikeli.

Mae Pol ne cheke fakelini God eidi naikno khiloau

³Ka nomi tharai eimi ghotilo na ghehati cheke fakelini God fabrahu, Kmagna noda Lord Jisas Kraes. ⁴Ghehati cheke fakelini God naugna nomhini nomi fatutuani biꞌo ka mae Jisas Kraes nei namhadi nogna naikno God te gnafare. ⁵Tutuani fara, fatutuani nei namha teuna au ka ghotilo naugna ghotilo rouronu mala hata unha God tela kulu tarabanahi malami ghotilo kligna. Ghotilo laseni grouronu igne kani teke nomhini cheke te tutuani eigna mae Jisas Kraes. ⁶Nonomho te Keli te nomhini ghotilo igne mala toghoni nodi fatutuani naikno heva heva ka nauthoglu igne. Igne neke enila ka ghotilo, kate nomhini ghotilo u Nonomho te Keli igne nei thofno laseni gaoghathogna nogna khokofakasai God na. ⁷Ghotilo neke laseni eigna nogna khokofakasai God na ka mae kherada Epafra. Gognaro na mana loku balumi ghehati, eghuteuna mana kaisei nogna mae gloku keli fara mae Kraes malada tahati. ⁸Mae Epafra jaola neke toutonu ka ghehati eigna nomi namha biꞌo ghotilo ranghidi naiknore, namha biꞌo igne neke tusu ari ka ghotilo mae Tharunga te Blahi.

⁹Naugna mana neke farirhiu ghami nei togho ghami mala fatutuani ni mae Jisas, ghehati tarai ghami ghotilo fabrahu funu ka narane te nomhini ghehati igne eimi ghotilo na. Ghehati toreni God mala fodu ghotilo ka gaoghatho te keli nei glalase te keli, eghume ka nogna thotogho mae Tharunga te Blahi na ghotilo mala lase fakelini unha te magnahagheni God na. ¹⁰Aonu ghotilo ginauna au ka nafnata nakarha te doglo fara ke ulugna Lord nei jaola fagleꞌani mana ka puhimire. Ghotilo tangomana te edi kmana nafnata gloku te keli nei lase fakelini God. ¹¹God te au nolaghi biꞌo fateote’o, eghuteuna ghehati tarai ka mana mala tusu ranghi ghami nolaghi igne mala tangomana ghotilo te kegra heta ka unha puhi biꞌo te mei ke uluda. ¹²Eghuteuna ghotilo ginauna gleale’a balu cheke fakelini Kmada. Mana ne fatangomana ghami ghotilo te hatini u nakarha teke kulu tarabanahi maladi nogna naikno te au kligna ka nauthoglu te phae fabrahu na. ¹³God neke hata fadelei ghitahi ka nogna nolaghi mae Satan, eghuteuna lisei ghita ke parigna nogna nolaghi Thugna God, mae ihei mana te namhani fara. ¹⁴Tutuani, mae Thugna na neke foli fajifla ghita nei hata kokodi nakhibodare.

Mae Kraes pha’udi gobigna lepo fateote’o re

¹⁵Mae Kraes gne thofno thotoghale gna God mae ihei tahati te theome filoni na, nei thofno Thugna God, pha’udi glepo vuavuha fateo. ¹⁶Naugna mae Kraes thegna ngala mae vuavuha na, mae ihei teke vuavuhadi gobigna lepo te filodi nei theome filodi tahati, ba gobigna lepo ka nauthoglu igne nei kligna, ba nhuludi mae engel ba naitu te gnafa te au nolaghi te mala funei fruni. Mana neke vuavuhadi gobigna lepore mala ghatho tahuni nanghagna mae Jisas Kraes. ¹⁷Mae Kraes neke kulu au ke uludi gobigna lepore, eghuteuna ka nogna nolaghi mana te loku fodudi gobigna lepore. ¹⁸Mae Kraes ngala pha’ugna khiloau na, eghuteuna khiloau na jateula thinigna mana eghu, eghuteuna nakarhagna khiloau na mei funu ka mana. Mana ngala mae ulu lahu teke karha fapulo ka glehe na. Eghume mae Jisas ngala pha’udi gobigna lepo fateote’o re. ¹⁹Naugna God ne leghuni nogna gaoghatho thegna na ne fafodu lao ka mae Kraes nakarhagna thegna na. ²⁰Tifa na, tahati nei gobigna lepo te au ka nauthoglu igne ba kligna theome au ka pharikeli balugna God. Eghume God neke eni kaisei nabrou mala eꞌei pharikeli balugna mana kate snakreni mae Kraes mala lehe ka gaju fafatha jateula kaisei fafara. Ka nogna gloku mae Kraes, God neke salofodu gobigna lepo kligna ba pari mala ke kaisei fapulo ka thegna.

²¹Tifa na, ghotilo neke fnota ka God. Ghotilo neke nogna naoka mana nei tiromini mana ka gaoghathomi te diꞌare nei ka gloku fateo te diꞌa teke edi ghotilo re. ²²Nu gognaro na mae Kraes kela hata fapulo ghami ghotilo mala kheragna God. Mana neke eni igne kau glehegna. Eghume mana tangomana te fakegra ghami ke ulugna God jateula naikno blahi te theo nakhibogna. ²³Mae Kraes tangomana te eni igne mala te kegra heta fabrahu ghotilo ka nomi fatutuani na. Thosei snakreni kaisei glepo ka nauthoglu igne mala hata fadelei ghami ka puhi fatutuani teke nomhinihi ghotilo ka Nonomho te Keli gne. Hatimare mae fatutuani ra neke toutonunihi u Nonomho te Keli gne ka naikno te gnafa ka nauthoglu gne. Eghuteuna iara mae Pol, kaisei mae gloku mala toutonu nila u Nonomho te Keli gne.

Mae Pol nogna mae gloku khiloau

²⁴Gognaro na iara keli tagu fara neubane au papara, naugna naꞌau papara te eni iara igne mala togho ghami ghotilo. Tifa na mae Kraes neke papara fara mala toghoni khiloau, thinigna mana na. Eghuteuna, iara jaola au papara ka thinigu na mala fakhaputu nogna gloku mae Kraes te theome gnafa nga teu. ²⁵God neke vahi ghau iara kaisei mae gloku ka khiloau gne mala togho ghami ghotilo. Eghuteuna nogu gloku iara na mala thofno toutonuni chekegna mana na. ²⁶Ka fufunu gna nauthoglu na te ghilei posa gognaro gne, cheke igne neke poru ka naikno te gnafare, nu gognaro na God la falalasehi ka nogna naiknore. ²⁷God magnahaghei falalase ka nogna naiknore u famane cheke poru igne mala toghodi fara naikno te gnafa ka nauthoglu igne. U cheke poru igne gaoghathogna na mae Kraes na auhi ke lamnami ghotilo, eghuteuna mana ginauna hata ghami tei mala au balugna God.

²⁸Eghume, ghehati toutonuni u Nonomho te Keli eigna mae Kraes na koba ranghidi naikno te gnafare, nei ghehati cheke faheta nei famane farirhiudi eghu koba. Ghehati cheke ka gaoghatho te keli mala tangomana te toghodi mare te gnafa na mala kotu haghe nei nheta ka nodi fatutuani na ka mae Kraes. ²⁹Te mala eni igne na iara loku heta fara. Iara loku heta, eigna iara loku ka nolaghi teke tusu ranghi ghau mae Kraes.

¹Iara magnahaghe ghami ghotilo te lase ghau iara te loku heta fara mala togho ghami ghotilo baludi naikno khiloau ka namono Leodisia nei keha naikno te theome filo ghau teu iara. ²Iara eni igne mala heta ghotilo nagnafamire nei au fodu ghotilo kau namha. Ka puhi igne, ghotilo thofno lase fakelini mae ihei God teke theome falalaseni tifa, mae igne Jisas Kraes thegna. ³Eghuteuna mae Kraes ne tothora ranghidi naikno te gnafare nogna gaoghatho te keli nei glalase eghu God teke au poru funu tifa. ^4-5Gognaro na iara theome au balumi ghotilo nu nagnafagu na auhi balumi ghotilo. Tutuani iara gleale’a fara te filoni nakarhami nei nomi fatutuani te heta ka mae Kraes. Nu neuba iara chekeni igne ka ghotilo eigna iara theome magnahagheni kaisei naikno te chaghi ghami ghotilo ka nogna cheke te famaemahe fara igre. Naugna cheke igre mala batu fadelei ghami ghotilo mala theome fatutuani ni Kraes. Cheke te famaemahe igre keli fara fanomhodire nu chaichaghi kolho eghu.

Tahati kaisei balugna Kraes nei hata karha fei tifa

⁶Ghotilo hatahi mae Jisas Kraes jateula nomi funei eghu, eghume ghotilo mala leghuni fabrahu puhigna mana na. ⁷Ghotilo kaisei balugna Kraes jateula kaisei gaju ba suga te kegra maku ke kligna glose. Eghuteuna nomi fatutuani ghotilo ka mae Kraes na mala e heta fakeli, jateula mare teke farirhiu ghami ghotilo. Eghuteuna leuleghu fata na ghotilo mala cheke fakelini mana.

⁸Fiofilo ghami, thosei snakreni kaisei naikno mala mei chaghi ghami nei mei sagu ghami eghu ka thoutonu te theo nafugna teke eni haghe kolho ka gaoghathogna naikno ghe naitu. Nafnata thoutonu tuare neke theome mei funu ka mae Kraes.

⁹Naugna ghotilo laseni, mae Kraes na neke vuhai naikno jateula tahati neku, eghuteuna God nei gaoghathogna fateo te au ka mae Kraes. ¹⁰Eghuteuna ghotilo te kaisei balugna mae Kraes na, mana tusu ari ka ghotilo thofno nakarha na. Mana te funei frunidi thua engel fateo nei nolaghi fateo. ¹¹Kate mei ghotilo te kaisei balugna mae Kraes na, mana ne hata fasnagla ghami ka gaoghatho te diꞌa. Kraes neke tohi fagaglana ghami ghotilo, theome tohi fagaglana fei thini nu fei tharunga. ¹²Kate apublahi na ghotilo kaisei ka mae Kraes, jateula mare te giugilu ghami nei ke karha fapulo ka glehe balugna mana. Igne tutuani fara ka ghotilo naugna nomi fatutuani ka nogna nolaghi biꞌo God teke fakarha fapuloni mana ka glehe.

¹³Tifa na, ghotilo neke jateula te lehehi neku naugna nakhibo teke edi ghotilo re nei naugna ghotilo neke theome snagla ka nogna nolaghi nakhibo te funei frunidi gaoghathomi are. Nu God neke fakarha fapulo ghami balugna mae Kraes. Eghuteuna God hata fadeleidi la gnafahi nakhibomire. ¹⁴Mana ghiha kokohi nogna fathoro vetula teke eni ranghi ghita te naba te mala fate falehe ghita na. Mana neke ghiha koko fahui vetula igre kate lehe mana ke kligna gaju fafatha na. ¹⁵Mae Kraes neke hata koko fahui nodi nolaghi naitu te gnafa te mala funei fruni na. Ka gaju fafatha na, mae Kraes ne tapla faparidi nei famamajadi eghu mare fara ke uludi naiknore.

¹⁶Eghume, thosei snakreni kaisei naikno mala lilisei kaisei vetula ranghi ghami eidi gano nei khoꞌu ba narane Sabat ba gaghamu eigna glaba majaghani ba keha narane tuthuana teu are. ¹⁷Glepo igre jateula thotoghale eghu kolho eigna thofno glepo tutuani nate thoke mei thogheiro. Nu thofno glepo te tutuani na mae Kraes ngala. ¹⁸Keha mae te fahaehaghedi fara nodi mifire, eghuteuna farirhiudi naiknore mala au faleghu ka puhi te theo nafugna, eghuteuna mala tufru soru ranghidi hatimare mae engel. Thosei snakreni kaisei mae ka mae igre mala batu fadelei ghami te mala theome fatutuani ni mae Kraes. Mare fiti fahaehaghe kolho, eigna gaoghathogna naikno ka nauthoglu na theome tutuani, ¹⁹nei mare theome au heta ka mae Kraes. Mae Kraes pha’ugna khiloau na, eghuteuna khiloau na jateula thinigna mana eghu. Eghuteuna pha’u na tangomana te edi grerege te gnafare te mala kotu heta nei kaisei baludi nhubra ghe naula. Eghuteuna thinigna mae Kraes gne na kotu haghe ka puhi te magnahagheni God na eghu.

Tahati lehe balugna Kraes nei ke karha fapulo balugna mana

^20-21Ghotilo jateula igne eghu, kate lehe mae Kraes na, ghotilo jaola lehe balugna mana. Eghuteuna mana neke fakarha ghami ghotilo ka nogna nolaghi nauthoglu. Ba, naugna unha si ghotilo te leghuni teu ngala nogna vetula nauthoglu te cheke eghu, “Ghotilo thosei loku ka glepo igne,” “Ghotilo thosei ghamu ana,” “Ghotilo thosei habo ka glepo ana” teu gnea? ²²Vetula igre chekedi kolho glepo te edi tahatire nu gnafa teura kolho. Naugna naikno kolho te edi haghedi te farirhiu vetula igre. ²³Tutuani fara, gaoghathogna naikno na u nafnata vetula igre keli fara. Naugna vetula igre cheke eida tahati mala tufru soru leghuni gaoghathogna naikno na kolho nei eigna fapari ghita theda, nei eigna mala paradi thinida thedare eghu. Nu vetula igre theome tangomana te togho ghita te mala gnafa puhi te diꞌa te au ka thinida gre.

Nakarha majaghani ka Kraes

¹Ghotilo neke karha fapulohi balugna mae Kraes. Eghume, ghotilo magnahagheini fabrahu unha te au kligna na, aheva mae Kraes te gnokro soru ka sape nafnakno mala funei ka khame nhetagna God. ²Thosei ghathodi kolho unha te diꞌa ka nauthoglu igne, nu au nagnafami fara ka nakarhagna kligna na. ³Eigna ghotilo jateu tela lehehi eghu, eghuteuna thofno nakarhami ghotilo na poru ka mae Kraes, mae ihei te au balugna God Mama. ⁴Thofno nakarhada na jifla mei ka mae Kraes. Eghuteuna kate ke pulo meigna na, mana ginauna hata ghami ghotilo mala au balugna kligna, eghuteuna mana na fafnakno ghami ghotilo jare.

⁵Eghume, kafe nhaꞌa fadelei ka nagnafamire puhigna nauthoglu te diꞌa igre, tulao: puhi gnognoro, puhi diꞌa te gnafa, puhi te sneka ka gaoghatho te diꞌa, nei puhi magnahaghei glepo te diꞌa. Eghuteuna ghotilo jaola nhaꞌa fadelei ka nagnafamire puhi te mamagnadi nodi glepo keha naikno gre, naugna puhi igne jateula te tufru soruni eghu mumuju. ⁶God ginauna paradi fara naikno te edi puhi te diꞌa fara igre. ⁷Tifeiro na, ghotilo jaola neke sneka ka puhi te diꞌa igre. ⁸Nu gognaro na ghotilo mala nhaꞌa fadelei puhi te diꞌa igre: diꞌatami, magnahaghei eni puhi te diꞌa ranghini ihei, cheke faparini ihei, cheke diꞌa, ⁹nei thosei chaghi fari themi. Naugna ghotilo neke nhaꞌa fadeleihi puhi diꞌa teke edi ghotilo tifa ra. ¹⁰Eghuteuna ghotilo la hatahi u nakarha majaghani na. Tutuani, God loku fabrahu ke lamnami ghotilo mala tuthughu ghotilo jateula thegna eghu nei togho ghami mala lase fakelini mana. ¹¹Ka nakarha majaghani igne na, naikno te gnafare mala kaisei nanaba ngala. Neuba tahati ne mae Jiu ba theome mae Jiu, neuba tahati ne tohi fagaglana ba theome tohi fagaglana, neuba tahati ne mae sikolu ba tahati maeda holo, ba tahati mae sneka ba tahati mae au snagla kolho, nu kaisei mae Kraes ngala te glepo ulu ka nakarhada na, eghuteuna mae Kraes te au ke lamnada gnafa.

Nakarha majaghani te hata tahati gognaro gne

¹²God neke vahi ghami ghotilo te mala nogna naikno blahi mana nei namha ghami fara ghotilo. Eghume ghotilo mala edi fabrahu glepo igre: kokhonidi keha naiknore, taegodi, au faleghu, au blagna, thosei diꞌatami faghose ka keha naiknore. ¹³Eghuteuna kate au nogna puhi fadiadiꞌa kaisei naikno ka ghotilo ranghini kheragna fofodu na, te keli na phiamare thosei magra, nu hata koko nakhibo fari thedi. Naugna Lord neke hata kokodi nakhibomi ghotilo re, jateula tuana eghu ghotilo mala hata koko nakhibo fari themi. ¹⁴Eghuteuna baludi puhi te keli igre, glepo te ulu na ghotilo mala famane namhadi keha naiknore. Naugna u namha gne ngala te tangomana te kafe loku fodu ghami ghotilo ka naꞌau fodu te doglo na.

¹⁵Eghuteuna snakreni nogna pharikeli Kraes na mala saghe leghudi gaoghathomire. Naugna God neke kilo ghami ghotilo mala au fodu jateula kaisei thini eghu ngala, nei u pharikeli igne tangomana te au balumi ghotilo. Eghuteuna leuleghu fata na ghotilo mala cheke fakelini God. ¹⁶Snakreni chekegna mae Kraes na mala bruara fabrahu ke lamnami ghotilo u glalase te mala farirhiu nei farerheta eghu fari themi. Eghuteuna te keli na, ghotilo kilo fnaknoni God ka nagnafamire kate koje tharai ka Sam, himu, nei keha khoje te tusu ranghi ghami mae Tharunga te Blahi na. ¹⁷Gobigna lepo te edi ba te chekedi ghotilo re la kafe edihi malagna noda Lord Jisas Kraes. Eghuteuna ghotilo cheke fakelini God Kmada ka mana.

Puhigna tharakna ka nakarha majaghani

¹⁸Ghotilo goro gaꞌasera, leghudi khetomire, naugna ghotilo naikno khiloau.

¹⁹Ghotilo mae nalha’ura, famane namhadi khetomire, thosei cheke fabiꞌodi.

²⁰Ghotilo goro suara, leghudi idomi kmami are, naugna noda Lord na keli tagna fara ka igne.

²¹Ghotilo mae kmadira, kate farirhiudi thumire, thosei fadiꞌa nagnafadi na eghunu tirodi fariuriu reꞌe eghu.

²²Ghotilo naikno snekara, leghudi fabrahu nomi funeire ka gobigna lepo te edi ghotilo re. Thosei leghudi kolho kate filo teu ka ghotilo na, mala famaemahedi kolho mare. Nu famane loku ranghidi naugna ghotilo mhaghuni Lord nei magnahaghedi eni unha te keli na. ^23-24Ka gloku te gnafa te edi ghotilo igre, ghotilo loku fakeli ka thofno gaoghathomi. Naugna ghotilo theome thofno loku ranghini naikno kolho, nu loku ranghini Kraes noda Lord. Eghume ghotilo kafe laseni Lord ginauna taba ghami ghotilo, eigna ghotilo ginauna hata u karha majaghani teke kulu tarabana mana kligna maladi nogna naiknore. ²⁵Eghuteuna God na theome vahini ihei. Eghume, ihei te edi glepo te diꞌare God ginauna nake foli fapulo ka mana leghuni unha teke eni mana na.

¹Ghotilo mae funeira, reireghi fakelidi nomi mae glokure ka puhi te doglo. Naugna ghotilo laseni te au kaisei nomi mae funei biꞌo kligna, mae ihei te filo ghami nei taba ghami ba para ghami leghuni unha te eni ghotilo na.

Cheke eigna tharai

²Sasaꞌa mala tarai fabrahu nei ghaoghatho fakeli. Kate tarai na, ghotilo cheke fakelini God fabrahu. ³Jaola tarai ghami ghehati. Naugna te toutonuni iara chekegna mana igne, hatimare ne lilisei ghau iara ka suga sosolo. Toreni God mala snakreni ka ghehati vido te keli te mala toutonuni ghehati ka naiknore chekegna mae Kraes teke poru tifa igne. ⁴Ghotilo toreni God mala totogho ghau iara mala tangomana iara te cheke fakeli ka naiknore eigna cheke igne, naugna unha te mala eni iara na. ⁵Ghotilo filo fakeli ka naꞌaumi baludi naikno te theome fatutuani ni mae Kraes are mala ghaoghatho fakeli kate toutonu baludire eghu. ⁶Leuleghu fata na nomi chekere mala keli nei doglo eghu fabrahu te mala toghodi keha naiknore. Eghuteuna God ginauna togho ghami ghotilo te mala tangomana te cheke tughu ka puhi te doglo ka naikno te gnafare.

Nogna cheke leghu lahu mae Pol

⁷Mae Tikikas ginauna toutonu ka ghotilo thoutonu eigu iara na. Mana mae kheragu keli fara iara nei kaisei mae gloku te rouronuni tahati. Mana te mala loku baluda ranghini Lord. ⁸Iara kuru arini mana ka ghotilo mala ke keli nagnafami ghotilo, naugna mana tangomana te toutonu fakeli ka ghotilo eimi ghehati. ⁹Iara na jaola kuruni mae kherami ghotilo Onesimasi mala ari balugna mana. Mae Onesimasi gne kaisei mae kherada keli tahati mae ihei te rouronuni fara tahati na. Phiamare ginauna toutonudi gobigna lepo te edi agne re.

¹⁰Mae Aristakas te au balugu iara ka suga sosolo gne kubae ghami ghotilo. Eghuteuna mae Mak, nebugna mae Banabas, jaola kubae ghami ghotilo. Jame te ari posa mae Mak na, ghotilo reireghi fakelini mana ka sugamire, jateula teke chekenihi iara ka ghotilo ia eghu.

¹¹Mae Josua Jastusi jaola kubae ghami ghotilo. Thilo mae igre, mae Aristakas, mae Mak, nei mae Josua Jastusi, mae igre ngala mae Jiu te fatutuani ni mae Jisas te loku balugu iara te mala toutonu eigna u nakarha majaghani God te funei frunini na. Thilo mae igre farhetani nagnafagu iara na.

¹²Kaisei mae kherami keli ghotilo, mae Epafra nogna mae gloku Jisas Kraes, mana jaola kubae ghami ghotilo. Leuleghu fata na, mana tarai heta koba eimi ghotilo. Mana toreni God mala togho ghami ghotilo mala kegra heta ka nomi fatutuani na, nei mala thofno lasedi gobigna lepo God te magnahaghei edi ghotilo re. ¹³Iara tangomana te toutonudi ka ghotilo eidi gloku brana te edi mana te mala togho ghami ghotilo nei toghodi naikno te au ka namono Leodisia nei Hierapolis.

¹⁴Mae kherada keli dokta Luku, phiamare Dimas, jaola kubae ghami ghotilo.

¹⁵Iara ngagu ghami ghotilo fara te mala chekeni nogu kubae na ranghidi kherada naikno khiloau te au ka namono Leodisia. Eghuteuna iara jaola kubaeni Nifa nei naikno khiloau te mei tarai koba ka sugagna naꞌa na.

¹⁶Kate iu’iju te gnafa ghotilo nogu letas iara gne, ghotilo hata ke tei ka naikno khiloau te au ka namono Leodisia ra, mala ke iu’iju langau mare. Iara jaola magnahaghe ghami ghotilo te iu’iju nila letas teke riso tei iara Leodisia ia.

¹⁷Eghuteuna ghotilo cheke ka mae Akipas mala eni fahui nogna gloku blahi teke tusu ranghini Lord na.

¹⁸Iara mae Pol neke risoni kubae igne ka khamegu thegu. Ghatho ghau iara te au ka suga sosolo gne. Iara toreni nogna khokofakasai God na mala au balumi ghotilo. Me gnafa. Iara, mae Pol.