Profet Emos
Nogna Buka Mae Profet Emos
Thoutonu kmo’ei eigna buka igne
Ka naranegna mae Emos igre, kantri Israel gne la fnotahi ka phei kantri, Israel ghe Juda. Kantri te ke biꞌo na Israel, eghuteuna nodi namono biꞌo lahu mare na, Samaria. Eghuteuna kantri ke iko na, Juda, eghuteuna nodi namono biꞌo lahu mare na, Jerusalem.
Mae profet Emos gne kaisei maegna Juda, ka namono Tekoa. Nu God neke kuru fajiflani mana mala tei toutonu chekegna God na ka naiknodi Israel. Gloku teke edi mana igre jame neke edi aheva nga ka finogha fitu gobi glimafului neke karha nga mae Kraes (750 BK).
Israel gne kaisei kantri dedei fara, eghuteuna naiknore ne au fakelihi eghu ka gaoghathodi na. Nu ka tathagna mae profet na, mae te dedei nodire ngala te au fakeli nodi na. Eghuteuna mae te dedei igre hiro sileni ka naiknore ka puhi te theome doglo. Mare chaichaghidi naiknore kolho. Naiknore tanhi ka LORD, nu gaoghathodire thofno khaba fara ka mana, eghuteuna kantri igne ginauna theome au fakeli kolho.
Eghume, naugna igne LORD neke kuruni mae profet Emos mala tei cheke faheta mana ka naikno igre eidi puhi te edi mare igre. Mae profet neke theome mhaghudi naiknore, naugna unha te chekeni mana na, LORD ginauna toghoni mana mala paradi naikno te dedei igre. Mana cheke faheta ka mare, naugna LORD magnahagheidi mare te fatedi naiknore ka puhi te doglo. Aonu mae Emos ne jaola ne cheke eghu, “Jame te eni ghotilo igne na, LORD ginauna kokhoni ghami ghotilo naikno te karha nga teu gognarogre.” (5:15)
Keha vido ka buka igne
LORD ginau paradi naiknodi keha kantri te au faligohoni Israel: 1:1–2:5
LORD ginau paradi mae Israel: 2:6–6:14
Glima mifi teke filodi mae Emos: 7:1–9:10
LORD neke nhaꞌa cheke mala hata fajiflani Israel: 9:11-15
1Cheke ulu lahu
1Cheke igre neke cheke thegna LORD ka profet Emos. Mae Emos gne kaisei mae au nogna kmana sipu, ka namono Tekoa ka kantri Juda. Mana neke chekedi cheke igre ke lamnadi phei finogha neke thoke mei nga nakheu biꞌo na ka mare. Ka narane igre, king Iusaea neke funei Juda, nei king Jeroboam thugna mae Jehoas neke King Israel.
LORD na au nolaghi biꞌo
2Mae Emos ne cheke eghu,
“LORD ne eha fabiꞌo jateula kaisei lion eghu ka Thogele Saion.
Eghuteuna naogla gna mana igne oa’ongha jateula fila eghu.
Aonu buburu te gnafa te mala ghamu sipure ne kafe gnhagha soru.
Eghuteuna gaju te gnafa ka Thogele Kamel ra ne jaola ne kafe lehe.”
LORD ginauna roꞌedi kantri te au faligohoni Israel
3LORD ne cheke eghu,
“Naugna te tapla jafra fabrahu naiknodi Damaskas ka nakhibo,
iara ginauna thofno para ghami fara ghotilo eidi puhimi ghotilo te diꞌa tuare.
Ghotilo fakokhoanadi nei goigonidi eghu naiknodi Gilead.
4Naugna igne, iara ginauna snakredi mae naokare mala para ghami ghotilo.
Uve, papara igne ginauna jateula khaꞌaghi teke nhako fahui nodi suga vikegna mae King Hasael
nei namono te gnafa teke bara teke maku mae Ben-Hadad tifa ra eghu.
5Iara ginauna paꞌe soru grengatha thina ka namono biꞌo Damaskas.
Uve, iara ginauna kafe falehedi hui naikno te gnafa te au ka namono igne tei posa ka sugagna king,
mae ihei te funei ka glogu Aven te tei posa ka namono biꞌo Bet-Eden.
Iara ginauna hata fajifla naiknodi Siria igre
mala ke pulo Kira ka nodi vido glose mae ku’edi tifa ra.”
Igne chekegna LORD.
Naiknodi Filistia
6LORD ne cheke eghu,
“Naiknodi Filistia igre tapla jafra fabrahu ka nakhibo.
Mare theome gnafa katha vido ikoi te eni puhi igne.
Thono theo fara. Kate tei ka magra te uluni kaisei namono na,
mare hata tei naiknogna namono tuana mala foli jateula naikno sneka eghu ka kantri Idom.
Tutuani fara,
iara ginauna thofno paradi naiknodi Filistia te edi nafnata puhi te diꞌa igre.
7Eghume iara ginauna kuru soru khaꞌaghi ka baragna namono Gasa
mala nhako fahui suga te rheta ka namono tuana.
8Iara ginauna aknu falehe naiknogna namono biꞌo Asdod.
Eghuteuna iara ginauna jaola aknu falehe king gna namono Askelon.
Iara ginauna na roꞌeni namono biꞌo Ekron,
eghuteuna iara ginauna falehedi gnafa naikno te karha teu ka kantri Filistia.”
Igne chekegna LORD.
Naiknodi phei namono biꞌo Taea nei Fonisia
9LORD ne cheke eghu,
“Kmana fata naiknodi Taea tapla jafra ka nakhibo.
Mare theome gnafa katha vido ikoi ka puhi igne.
Thono theo fara. Kate tei ka magra te uluni kaisei namono na,
mare hata naiknogna namono tuana mala tei foli jateula naikno sneka eghu ka kantri Idom.
Tifa na mare neke nhaꞌa cheke mala au ka pharikeli baludi vike igre,
nu mare theome leghuni kolho nodi nhaꞌa cheke na.
Tutuani fara, iara ginauna roꞌeni namono biꞌo Taea eidi nafnata puhi te diꞌa te edi naiknore igre.
10Iara ginauna koko lao khaꞌaghi ka baragna namono Taea
mala nhako fahui suga te gnafa te rheta ka namono tuana.”
Igne chekegna LORD.
God ginauna fatedi naikno te au ka kantri Idom
11LORD ne cheke eghu,
“Kmana fata naiknogna kantri Idom tapla jafra ka nakhibo.
Mare theome gnafa katha vido ikoi ka puhi igne.
Thono theo fara.
Mare theome kokhonidi thabusidi thedi maedi Israel igre.
Mare diꞌatadi fara ne ngolhi leghudi ne tei aknu falehedi ka naflahi.
Eghuteuna diꞌa tadi mare igne theo ka gnafagna.
Eghume, iara ginauna roꞌedi maedi Idom igre.
12Iara ginauna koko soru khaꞌaghi mala nhako suga te rheta ka nohi Teman
nei ka namono biꞌo Bosra.”
God ginauna fatedi naiknogna kantri Amon
13LORD ne cheke eghu,
“Kmana fata naiknogna kantri Amon tapla jafra ka nakhibo.
Mare theome gnafa katha vido ikoi ka puhi igne.
Thono theo fara.
Mare magra koba mala hata keha vido glose.
Eghuteuna mare vahe pea thiꞌadi goro gaꞌase te bukla ka nohi Gilead mala lehe reꞌe.
Eghume, iara ginauna na roꞌeni kantri Amon.
14Iara ginauna koko soru khaꞌaghi ka baragna namono biꞌo Raba mala nhako fahui suga te gnafa te rheta ka namono tuana.
Kate magra na, hatimare mae soldia ginauna eha fabiꞌo, eghuteuna magra igne ginauna rheta fara jateula kaisei nuri saeklon eghu ka vido tuana.
15Eghuteuna king gna Amon baludi hatimare mae funei ginauna sneka
tei au ka kantri delei.”
Igne chekegna LORD.
2God ginauna fatedi naiknogna kantri Moab
1LORD ne cheke eghu,
“Kmana fata naiknogna kantri Moab tapla jafra ka nakhibo.
Mare theome gnafa katha vido ikoi ka puhi igne.
Thono theo fara.
Mare theome ghatho tahuni king gna Idom.
Aonu mare hata fajifla nhubragnare ka bekugna na ne gnubra ka khaꞌaghi ne ghilei vuhai nakrofu.
Eghume, iara ginauna roꞌeni kantri Moab.
2Iara ginauna koko soru khaꞌaghi ka kantri Moab
mala nhako fahui suga te rheta ka namono biꞌo Keriot.
Eghuteuna kaisei magra biꞌo ginauna posa mei.
Hatimare mae soldia ginauna eha nei kufli eghu.
Ka narane igne hatimare mae Moab ginauna lehe.
3Iara ginauna faleheni king gna Moab balugna nogna tothoghei funei na.”
Igne chekegna LORD.
God ginauna fatedi naiknogna kantri Juda
4LORD ne cheke eghu,
“Kmana fata naiknogna kantri Juda tapla jafra ka nakhibo.
Mare theome gnafa katha vido ikoi ka puhi igne.
Thono theo fara. Mare tirodi fanomho ka nogu cheke iara na,
eghuteuna mare jaola huhughuni nogu vetula iara na.
Naikno igre thofno fagoigoli fara la theome leghu ghau iara.
Mare leghuni mumuju god jateula teke edi mae kuꞌedi tifa ra eghu.
Eghume, te chekeni iara na, iara ginauna roꞌeni Juda.
5Iara ginauna koko soru khaꞌaghi ka kantri Juda
mala nhako suga te rheta ka namono biꞌo Jerusalem.”
Igne chekegna LORD.
God ginauna fatedi naiknogna kantri Israel
6LORD ne cheke eghu,
“Kmana fata naiknogna kantri Israel tapla jafra ka nakhibo.
Mare theome gnafa katha vido ikoi ka puhi igne.
Thono theo fara. Eghume, iara ginauna thofno paradi naikno igre.
Naugna mare ne sabiri naikno te theome tangomana teke tughu fapulo nodi kaonire mala jateula naikno sneka eghu.
Eghuteuna mare jaola theome kokhonidi naikno te kumare.
Naugna naikno te kuma igre ne theome tangomana teke tughu fapulo sileni teke foli sadol na.
7Mare tapla faparidi nei theome toghodi neu iheire te nigra ba iheire te kuma.
Jaola mae kmagna ghe mae thugnare kafe tapla jafra ka kaisei gaꞌase kolho.
Puhi igre thofno diꞌa fara, nei famamajani eghu nanghagu iara te blahi na.
8Ka nodi narane biꞌo te khapru te mala tarai na,
mare kifra thuru rhegna olta na ka pohe teke hata ka naikno te kumare.
Eghuteuna ghotilo hata tathaji malami themi pohe teke kaoni ka naikno te kumare,
mala thuru ka pohe tuana rhegna olta na.
Eghuteuna ghotilo hata sileni teke faen naikno te kuma re igne
mala foli waen mala koꞌu ghilei thaviru ka sugagna nomi god na.
9“Ghotilo nogu naikno iara ra, iara neke togho ghami ghotilo neke falehedi vikegna mae Amo.
Vikegna mae Amo igne brahu nei rheta eghu jateula gaju sida ba gaju ok eghu, nu iara neke kafe falehedi gnafa.
10Iara neke hata fajifla ghami ghotilo Ijep.
Eghuteuna batu ghami ke lamna namono nagou nabagna phiatutu finogha.
Eghuteuna tufa ka ghotilo nodi vido glose vikegna mae Amo.”
11LORD ne cheke eghu,
“Iara neke vavahi keha mae majaghani ka ghotilo mala mae profet nei keha mala nogu mae gloku iara,
iara kilodi mae igre, Nasaraet.
Ba? Ghotilo maemi Israel ra, glepo te chekedi iara igre tutuani ba theo?
Uve, te ghathoni iara na igne thofno tutuani fara.
12Nu neubane tabu te koꞌu waen na, ghotilo ne huhurudi mae Nasaraet igre ne koꞌu waen mare.
Uve, ghotilo jaola theome snakredi nogu mae profet iara igre mala toutonuni chekegu iara na.
13“Eghume, iara ginauna tusu ari kaisei papara biꞌo ka ghotilo.
Papara igne ginauna tahu fara jateula thoklo te fodu ka gano te theome feo ra eghu.
14Ka narane igne, mae te lase chari ra, ginauna theome tangomana te rikha na.
Mae te nhetara ginauna nigra theome tangomana te fakarhidi thedi na.
15Mae soldia te lase magra ka phaloho nei jata teura ginauna theome tangomana te kegra heta ka magra na.
Mae te lase chari ra ginauna theome tangomana te rikha na.
Eghuteuna mae te lase magra ka hose ra ginauna jaola theome tangomana te rikha na.
Theo. Mae naokare ginauna faleheni mana.
16Ka narane igne, mae soldia te theome mhaghu nei frane teura ginauna lisa faleghu nodi glepo
mala magrare na rikha kolho.”
Igne chekegna LORD.
31Eghume, ghotilo maemi Israel ra, LORD neke hata fajifla kuꞌemi ghotilo Ijep tifa ra. Ghotilo fanomho mei ka nogna cheke mana eidi puhimi ghotilo te diꞌa igre. 2LORD ne cheke eghu,
“Kmana vike fara ka nauthoglu igne,
nu iara neke vahi ghami ghotilo kolho mala nogu naikno iara.
Eghuteuna iara tangomana te reireghi fakeli ghami ghotilo na.
Nu kate filoni iara te theome keli ghotilo ranghi ghau iara na,
iara ginauna para ghami ghotilo eidi nakhibo te edi ghotilo ra.”
Nogna gloku mae profet
3Faꞌunha eghu jame te tei fodu phei mae,
nu theome kulu roghe phia mare teuna?
4Lion te au teu mata na ginauna eha fabiꞌo kate hata ghegna gano na.
Jame kaisei lion majaghani au lamna khora thina, ba, naꞌa na eha kate rofo na? Uve!
5Jame kaisei phighoro theo kaisei vido gano te mala chaghini khokorako na,
na faꞌunha eghu ruma lamna khokorako na?
Na faꞌunha eghu prasa phighoro na jame te theome ruma kaisei nanghaji tagna na?
6Jame te kufli kate posa mei magra ka namono na,
ba, naiknore na theome mhaghu?
Jame kaisei namono thoke mei tagna kaisei hoholo biꞌo,
unha eghu te ghathoni ghotilo na?
LORD neke theome kuru meini hoholo igne?
Uve, cheke igre thofno tutuani fara!
7Tutuani fara, ame eni nga LORD unha te magnahagheni na teuna,
mana ginauna kulu cheke ka nogna mae profet.
8Kate eha fabiꞌo lion na, mae te nomhini igne ginauna mhaghu nogna fara.
Eghuteuna kate cheke fabiꞌo LORD na,
mae te nomhi chekegna mana igne ginauna cheke fajiflani chekegna mana na.
Mae Emos ne cheke ranghini namono biꞌo Samaria
9Ghotilo ehadi mae biꞌo te au ka nodi suga biꞌo ka namono Asdod, nei Ijep.
Cheke eghu ka mare,
“Ghotilo kafe tei khapru ka thogele Samaria mala filodi nafnata puhi te diꞌa te edi naiknodi namono tuare.”
10Uve, LORD na ne cheke eghu,
“Ghotilo naiknomi Samaria ra, ghotilo dedei fara ka glepo teke blau,
nei ka magra teura.
Eghume, te chekeni iara na, ghotilo theome laseni puhi te doglo na.
Thono theo fara.
11Naugna igne, kaisei thara ginauna ruma mei ke lamnagna namono igne.
Mare ginauna mei goigoni baradi namono biꞌo te rheta igre mala ruma hata glepo te keli te au ke lamnadi suga tuare.”
12LORD jaola ne cheke eghu,
“Jame kaisei lion ghamu kaisei sipu,
eghuteuna mae te reireghigna sipu igne ginauna fariuriu mala ke hata fapulo.
Mana ginauna filodi kolho keha vido guli nei phei nhubra ghahe eghu kolho.
God ginauna jaola eni nafnata puhi igne ka naikno te au Samaria,
kaisei namono biꞌo ka kantri Israel.
Naikno teke au gleale’a igre ginauna au diꞌanagnafa.
Eghume ginauna na jateula igne eghu theome kmana kolho nate karha na agne Israel.”
13God mae ihei te au nolaghi fateote’o igne ne cheke eghu,
“Ghotilo te gnafa na, ghotilo fanomho fakeli ka nogu cheke iara igre.
Ghotilo mala cheke faheta nei kulu fanomhidi eghu vikegna mae ku’eda Jekop.
14Ka narane igne, iara ginauna paradi mae Israel eidi nakhibo teke edi mare ra.
Iara ginauna jaola roꞌe fahui olta te au ka namono Betel.
Eghuteuna iara ginauna lolhopa koko soru pari fati glepo te au ka fati khukrudi olta are.
Uve, iara ginauna goigonidi gnafa vido mala poru ghotilo are.
15Iara ginauna paꞌe soru nodi famane suga teke babana mae te dedei maladi nhigra te reka,
nei nodi famane suga te mala fajeujemnu ka narane te prai,
nei suga biꞌo te lalaoni ka khe’i elefant teu igre mala vuhai chara kolho.”
Igne chekegna LORD.
41Ghotilo goro gaꞌasemi Samaria te dedei ra, fanomho ka cheke igre.
Ghotilo gognarona blokha jateula buluka te ghamu buburu te blokha ra neu ne theome nanga nomi ni kaisei glepo.
Ghotilo theome kokhonidi naikno te nigra, nei filo faparidi iheire te kuma.
Ghotilo cheke eghu koba ka khetomire, “Hata mei kmana waen mala koꞌu thaviru nogu!”
2LORD mae ihei te thofno blahi fara igne, mana neke nhaꞌa cheke eghu,
“Tutuani fara, kaisei Narane biꞌo ginauna mei.
Ka narane igne,
mae naokare ginauna mei korho ghami ghotilo jateula sasa te korho ka thagho ra eghu tei.
3Mare ginauna hata ghami tei ka baragna namono na
mala koko soru ghami fei Thogele Hemon.”
God paradi maedi Israel
4LORD ne cheke eghu,
“Ghotilo naiknomi Israel ra, ghotilo tei tarai koba ka namono Betel,
nu ghotilo eni koba puhi te diꞌa na ka vido te blahi na.
Ghotilo tei tarai koba ka namono blahi Gilgal,
nu neuba ghotilo ne edi igre,
nu ghotilo raꞌe salaꞌui ka puhi te diꞌa na.
Leuleghu hamerane na, ghotilo hata mei gano mala fafara ka iara,
eghuteuna ghotilo tusu mei ka iara fabothodi nomi gobigna lepore ka fatilo narane na.
5Ghotilo hata mei koba bret te gahu balu isi mala cheke fakelidi ka iara.
Ghotilo fahaehaghe ghami fara kate hata kmana glepo te mei
te mala cheke fakelidi ka iara re.
Puhi igre te thofno magnahaghedi ghotilore.”
Igne chekegna LORD.
6LORD ne cheke eghu,
“Iara ngala teke snakre meini ka ghotilo behu ia, nu neuba,
ghotilo theome tangomana te tughu nagnafa teke pulo mei ka iara na.
Thono theo fara.
7“Iara neke theome snakreni nakhete na mala thosei soru mei ka nomi nagare ghotilo ra.
Eghuteuna iara neke snakreni nakhete na maladi keha namono ghu kolho.
Nu kehare theo kolho,
eghuteuna khoꞌu na theome naba ka naikno te gnafare.
8Tutuani, naiknodi keha namonore rodi koꞌu fara ne tei hiro khoꞌu ka keha namonore.
Naugna khoꞌu na ne theome naba ka naikno te gnafare.
Nu neuba, ghotilo theome magnahaghei teke pulo mei ka iara na.”
9Aonu LORD ne cheke eghu,
“Iara na snakre mei kaisei nuri te brana fara,
eghuteuna kaisei nafnata khabru te diꞌa fara na thoke mei ka nomi nagare ghotilore.
Eghuteuna cheche ginauna mei ghamu fateo nomi nagare,
nei grep mala ei waen, nei fig, nei oliv teu ghotilo are.
Nu neuba, ghotilo theome magnahaghei teke pulo mei ka iara na.
10“Iara na snakreni kaisei fogra te thono diꞌa fara mala para ghami ghotilo,
jateula teke eni iara ka mae kuꞌemi ghotilo Ijep tifa ra eghu.
Eghuteuna iara na snakredi hatimare mae naoka mala falehedi nomi mae majaghani ghotilo are.
Eghuteuna snakredi mare mala hata nomi hose ghotilo are.
Iara na lisa lao thinidi naikno te lehe ka magra re mala siri boto ka namonomi ghotilo are.
Nu neuba, ghotilo theome magnahaghei teke pulo mei ka iara na.
11“Iara na roꞌedi keha ka ghotilo jateula teke roꞌedi iara phei namono biꞌo Sodom ghe Gomora tifa ra eghu.
Uve, ghotilo te karha teu gognaro igre keli tami fara,
naugna ghotilo ne jateula kaisei vido gaju teke hata fajifla mare ka khaꞌaghi biꞌo ra neu.
Nu neuba, ghotilo theome magnahaghei teke pulo mei ka iara na.
12“Naugna igne, iara ginauna para ghami ghotilo.
Eghume, ghotilo te hui na mala tarabana ghami themi te mala kegra ke ulugu iara ka narane fate na.”
Igne chekegna LORD.
God na au nolaghi te mala vuavuhadi gobigna lepore
13Kaisei God ngala te au nolaghi na, teke vuavuhadi thogele nei nuri teu igre.
Mana lasedi gaoghathodi naiknore.
Mana au nogna nolaghi te mala tughu narane na mala ke romno.
Mana fnakno fara, eghuteuna mana funei frunidi vido te gnafa ka nauthoglu igne.
Nanghagna na LORD mae ihei te au nolaghi fateote’o!
5Khoje diꞌanagnafa ranghini Israel
1Ghotilo maemi Israel ra, fanomho mei ka khoje paopado ka glehe igne, gognarona iara na koje ka ghotilo, naugna ghotilo ne jateu tela lehehira neu. 2Khoje na igne:
“Gaꞌase majaghani gna Israel,
naꞌa la ukahi pari,
eghuteuna naꞌa theome tangomana na teke kegra haghe na.
Naꞌa thuru pari ka glose na,
eghuteuna theo kaisei mae nabagna te mala toghoni naꞌa te mala ke kegra haghe na.”
3Naugna igne, LORD ne cheke eghu,
“Jame kaisei thogha soldia jifla ka kaisei namono biꞌo agne Israel mala tei ka magra,
kaisei gobi na teke pulo mei na.
Eghuteuna jame kaisei gobi soldia te tei na,
nabothoi kolho na teke pulo mei na.”
Maedi Israel mala ke pulo mei ka God
4Igne unha te chekeni LORD ranghini Israel,
“Ghotilo mei ka iara,
eghuteuna ghotilo ginauna na hatini u karha na.
5Ghotilo thosei tei tarai ka namono biꞌo Bereseba,
ba fariuriu tei hiro ghau iara ka namono biꞌo Betel,
naugna namono igre ginauna groꞌe ka mae naoka.
Ghotilo thosei tei tarai ka namono biꞌo Gilgal,
naugna naiknodi Gilgal are ginauna tei sosolo ka namono delei.”
6Ghotilo mala ke pulo mei ka LORD.
Jame teke pulo mei ghotilo ka mana na,
ghotilo ginauna na hatani u karha na.
Nu jame te theome ke pulo mei ghotilo ka mana na,
mana ginauna soru mei ka ghotilo jateula kaisei khaꞌaghi biꞌo eghu mala nhako fahui ghotilo naiknomi Israel ra.
Eghuteuna khaꞌaghi igne ginauna ghamu fahui naikno te au ka namono Betel.
Eghuteuna theo kaisei mae te nheta nabagna nate faleheni khaꞌaghi igne na.
7Ghotilo mae iheire te paradi naikno te doglo puhidira,
eghuteuna ke tughu ka puhimi themi te diꞌare teura, fanomho mei ka iara!
8-9God mae ihei teke vuavuhadi nathunu,
nei thua nafnotu fateote’o te phae ka maloa na are,
mana tangomana te chekeni gromno na te mala ke phae na,
eghuteuna naphae na mala ke romno.
Mana tangomana te chekeni thongna na mala tei phosa mata ka glose te moja na.
Mana ginauna tangomana te ghosei te goigonidi iheire te nheta ka nauthoglu igne,
nei pa’e soru nodi suga teke babana famakure.
God tangomana te edi glepo igre,
eghuteuna nanghagna mana na, LORD.
Mae Emos ne chekedi hatimare maedi Israel
10Puhi te eni ghotilo ka fate na igne thono diꞌa fara.
Eigna jame kaisei mae chekedi unha glepo te tutuani re,
eghuteuna diꞌa tagnadi unha te edi fadiꞌa ghotilo ka fate na teu igne,
ghotilo ginauna tiromini mae ihei te doglo puhigna na igne.
11Leuleghu fata na ghotilo filo faparidi nafnata naikno te kuma igre,
eghuteuna ghotilo jaola blau ghedi ganore ka puhi te chaichaghi te edi ghotilo ka naiknore.
Naugna igne, ghotilo ginauna na theome thuru blakno ka famane suga teke babana ghotilo ka thina igre,
ba ghotilo ginauna na theome koꞌu waen ka famane grep teke joꞌu ghotilo ra.
12Iara lase ghami ghotilo, eigna kmana fata ghotilo huhughuni vetula na.
Eghuteuna nakhibomi ghotilore thono kmana fara.
Ghotilo hata sileni ka naikno te diꞌa puhidire,
eigna te mala toghodi mare ka fate na.
Eghuteuna ghotilo fakokhoanadi nei chaghidi eghu naikno te kuma re
mala theome tangomana mare te chekeni unha te tutuani ka fate na.
13Ka narane te edi naiknore nafnata puhi te diꞌa igre,
ghotilo mae te lalase ra au kmu kolho theome ghagri kaisei cheke ka mare.
14Ghotilo leghuni puhi te keli na.
Thosei leghuni puhi te diꞌa na.
Te eghu na, ghotilo ginauna au ka pharikeli nei au ka nakarha te keli.
Eghuteuna ghotilo ginauna na tangomana te cheke eghu ka mana na,
“LORD God, iagho mae ihei te au nolaghi fateote’o ia au balumi.”
Tutuani, jame te edi ghotilo puhi te kelire, God ginauna au balumi.
15Ghotilo lilisei puhi te diꞌa na mala leghuni kolho puhi te keli na.
Eghuteuna ka fate na, ghotilo leghuni kolho puhi te doglo na.
Jame te eni ghotilo igne na,
God ginauna kokhoni ghami ghotilo naiknomi Israel te karha teu gognaro ra.
16-17Naugna te edi ghotilo puhi te diꞌa igre, God mae ihei te au nolaghi fateote’o igne ginauna cheke eghu,
“Iara ginauna mei para ghami ghotilo.
Aonu ghotilo ginauna na tanhi tafri ka nabrougna namono biꞌo igne.
Iheire te lase koje ka glehe mala tanhi ranghi ghami teku teke folidi ghotilo ra ginauna tanhi fabiꞌo balumi ghotilo.
Nu theome naba eghu, eghume,
ghotilo ginauna ehadi naikno te loku ka nagare ra mala tanhi balumi.
Leuleghu fata na naikno te loku ka nagare grep na igre gleale’a nodi koba,
nu ka narane nate mei iara te mala para ghami ghotilo igne,
ghotilo te gnafa na ginauna kafe tanhi fabiꞌo.”
Naiknodi Israel lase chaichaghi
18Kokhoni ghami fara ghotilo naikno te magnahagheni fara te ghosei te mei Narane gna LORD igne.
Unha glepo te keli gne nate hata ghotilo ka narane tuana?
Narane igne na phae eghu ghotilo gaoghathomi na?
Theo fara. Narane igne ginauna romno fara.
Eghuteuna God ginauna nhaꞌa mei papara biꞌo fara ke klignami ghotilo ka narane igne.
19Narane igne ginauna mei jateula kaisei mae te mhaghu lion te rikha te tei thafoni bea na te lehe ra eghu.
Narane igne ginauna mei jateula kaisei mae te pulo mei ka nogna suga na,
eghuteuna kaisei mogo kathini kate habo lao mana ka gringnigna suga na ia eghu.
20Naranegna LORD igne ginauna romno soru, nei na theome phae.
Eghuteuna naiknore ginauna theo kaisei nodi grouronu nate karha na.
21LORD ne cheke eghu,
“Iara theome magnahaghedi nomi narane gaghamu
nei faidu teu te edi ghotilo te mei pogho soru ka iara igre!
22Neuba ghotilo ne gahu buluka, ba sipu mala mei fafara ka iara neu,
ba hata mei keha wit mala fafara ka iara neu, iara theome magnahaghedi.
Te hata te mei ghotilo buluka te blokhare te fafara ka iara na,
iara theome magnahaghedi kolho.
23Ghotilo thosei koje ka iara, nei ghita eghu,
iara tirogu fara te nomhidi naogla te edi ghotilo igre.
24Nu iara magnahaghei ghami ghotilo te edi puhi te keli,
nei doglo teu igre,
eghuteuna puhi igne ginauna au fabrahu ka ghotilo jateula khoꞌu te theome tangomana te moja ra eghu.
25“Ghotilo maemi Israel ra,
phiatutu finogha iara neke batudi ku’emi ghotilo ra ke lamna namono nagou,
eghume ghotilo theome naba te edi nafnata fafara igre ka iara.
26-27Nu gognarona ghotilo tei koko ghauhi iara,
eghuteuna ghotilo tarai ka phei mumuju teke sari themi te kilodi ghotilo keha na,
King Sakut eghuteuna keha na, Nathunu Kaiwan.
Aonu kate kuru tei ghami iara te tei sosolo ka kaisei kantri te khaba fara ka namono biꞌo Damaskas,
eghuteuna ghotilo hata tei balumi mumuju tuare.”
Igne chekegna LORD.
Nanghagna mana na God mae ihei te au nolaghi fateote’o.
6Naiknodi Israel fatutuani ka nolaghi te chaichaghi
1Kokhoni ghami fara ghotilo naikno te au fakeli ka Thogele blahi Saion,
nei naikno te au ka namono biꞌo Samaria.
Te ghathoni ghotilo na, theo kaisei glepo nate goigoni ghami na eghu.
Kokhoni ghami fara ghotilo mae funei te fnakno te au ka kantri Israel,
eghuteuna naiknore mei hiro nodi thotogho ka ghotilo.
2Ke leghugna te tei filoni namono biꞌo Kalneh na, ghotilo tei ne filoni namono biꞌo Hamat.
Eghuteuna ghotilo lithui tei mala filoni namono biꞌo Gat ka kantri Filistia.
Nu ghotilo theome tangomana te lasedi namono biꞌo igre te nheta
ba nate ulu ghami ghotilo te au ka phei kantri Israel ghe Juda.
3Ba? Na theome thoke ghami Narane igne neu si ghotilo ia?
Narane igne ginauna theome raugha thoke mei ka ghotilo,
naugna puhi te diꞌa te edi ghotilo ra.
4Ghotilo thuru ka famane sape te keli,
nei ima ghemi famane nafnahi buluka nei sipu eghu te majaghani.
5Ghotilo magnahaghei khoje majaghani jateula teke eni mae Devet tifa ia eghu,
eghuteuna leuleghu fata na ghotilo koje koba khoje igre ka gita.
6Ghotilo koꞌu waen koba, nei ghiha famane oel te siri keligna ka thinimire.
Nu ghotilo theome kokhonini kolho nomi kantri Israel nate mei mae naoka te goigoni igne.
7Eghume, ghotilo ngala nate kulu mei te hata fajifla ghami mare ka nomi namono igne.
Eghuteuna gaghamu te gleale’a di koba ghotilo ra ginauna hui.
8LORD, God mae ihei te au nolaghi fateote’o igne neke nhaꞌa chekehi ka nanghagna thegna. Igne chekegna LORD na,
“Iara theome magnahagheni puhidi naiknodi Israel te fahaehaghe fara igre,
eghuteuna iara theome gleꞌadi nodi vido mala poru mare igre.
Eghume, nodi namono biꞌo lahu mare igne baludi gobigna lepo fateote’o te
au ke lamnagna igre ginauna lisa lao ka mae naoka.”
9Jame nabotho naikno au ngau ke lamnagna kaisei suga, mare ginauna jaola lehe. 10Kaisei mae ka vikedi naikno te lehe igre ginauna mei hata thinidire ka suga igne. Eghuteuna mae igne ginauna eha eghu tei ka ihei te au nga teu ke lamna suga na, “Ei! Ihei te au teu balumu iagho lamna jare na?” Eghuteuna mae te au teu lamna suga igne ginauna cheke eghu, “Theo kolho!” Mae te au teu ke kosi suga na ginau cheke eghu, “Ssss! Megeu sagho. Tapa mala thosei chekeni nanghagna LORD na glahu jaola falehe ghita mana.”
11LORD neke chekehi ka mare te
mala paꞌe soru suga biꞌo
nei suga ikodi teu igre.
12Hose na theome tangomana te chari ke kligna phegu,
eghuteuna naikno na theome tangomana te joꞌu gano lamna thongna.
Nu ghotilo tughu puhi te doglo na ka puhi fameomekro,
eghuteuna tughu puhi te famane na mala ke jaola ke tughu ka glepo te raha mala ke diꞌa fara salaꞌui.
13Leuleghu fata na ghotilo chekeni koba ne ulunihi namono Lodeba ka magra teuna.
Eghuteuna ghotilo cheke fahaehaghe eghu koba,
“Ghehati hatahi namono Kanaim ka nomi nanheta themi.”
14Igne nogna cheke LORD, God mae ihei te au nolaghi fateote’o na,
“Ghotilo naiknomi Israel!
Iara ginauna snakreni kaisei armi funugna ka keha kantri delei mala mei hata nomi kantri ghotilo igne.
Armi igne ginauna para ghami ghotilo funu ke raru namono Lebo-Hamat
tei posa ke mata glogu Araba.”
7Profet Emos ne filodi thilo mifi
1LORD ne fakakhana kaisei glepo ka iara ka kaisei mifi. Ka mifi tuana, iara filodi nogna mae gloku king igre mare la katohi buburu maladi nogna buluka re mala ghamu reꞌe ka narane te reka fara igre mala ke kotu haghe buburu majaghani. Eghuteuna iara filoni LORD kilodi chechere mala jifla mei mala ghamu fahui buburu majaghani igre, 2mala ghilei thofno ghamu fahui gobigna lepo teke kotu ka vido tuana. Eghuteuna iara ne cheke eghu, “LORD God! LORD God hata fadeleidi nakhibodi nou naikno iagho te au Israel igre! Jame te paradi iagho naikno igre na, na faꞌunha eghu karha sigrea?”
3Eghume LORD neke tughu gaoghathogna na ne cheke eghu, “Glepo teke filoni iagho igne ginauna theome thoke mei.”
4Ke leghugna igne, LORD God neke fakakhana keha mifi na ka iara. Ka mifi igne, iara filoni LORD ne kaikaliti kaisei khaꞌaghi biꞌo mala nhako nogna naiknore. Neuba thongna na ne mamhara fara, nu khaꞌaghi biꞌo igne ginauna fakhaprani kolho thongna te mamhara igne, eghuteuna iara ne filoni te funu gnhubra glose na. 5Iara ne cheke eghu, “LORD God! Iagho falelehe khaꞌaghi igne! Jame eghu te paradi iagho naikno igre na, na faꞌunha eghu karha sigrea?”
6Aonu, LORD God neke tughu gaoghathogna na ne cheke eghu, “Uve. Glepo igne ginauna na jaola theome thoke mei.”
7LORD neke fakakhana keha mifi na ka iara. Ka mifi igne, iara ne filoni te kegra mana rhegna kaisei gringni thina teke fadoglo mare ka teke loku na, eghuteuna iara filoni te jaola te loku teu mana kaisei naula na. 8Mana ne ghusna eghu ka iara, “Emos. Ba, iagho laseni glepo te loku teu iara igne?”
Eghuteuna iara ne cheke eghu, “Uve, kaisei naula.”
Mana neke cheke eghui ka iara, “Iara eni glepo igne mala fakakhana ka nogu naiknore, eigna puhidi re theome doglo jateula gringni thina te theome doglo igne eghu. Iara theome tangomana na teke tughu gaoghathogu na, iara ginauna paradi mare.
9“Iara ginauna goigoni vido te mala tarai naiknodi Israel.
Eghuteuna iara ginauna aknu falehe gnafa naikno te karha
mei ka vikegna King Jeroboam.”
Profet Emos ghe Amasaea
10Aonu Amasaea mae ihei te pris ka namono Betel, mana ne fatei ripot eigu iara ka King Jeroboam mae ihei te king Israel. Ripot igne cheke eghu, “Mae Emos gne gognarona salo fodu mei naiknore mala ei puhi ranghi nigho iagho. Nogna cheke re, mana ginauna thofno goigoni ni noda kantri tahati igne. 11Igne unha te chekeni mana na,
“ ‘King Jeroboam ginauna lehe ka magra,
eghuteuna ghotilo naiknomi Israel ra,
mae naoka ginauna mei huhuru ghami ghotilo mala jifla ka nomi namono re mala tei ka sosolo.’ ”
12Amasaea mei ne cheke eghu ka iara, “Iagho mae ihei te lase filodi mifi ra, iagho jifla agne mala ke pulo Juda! Iagho ginauna toutonu ka namono tuana, eghuteuna naiknogna nou namono iagho na ginauna nate foli nigho iagho na. 13Iagho thosei chekeni nou cheke na agne Betel, naugna namono igne nogna namono blahi king mala tarai!”
14Nu iara ne cheke eghu ka mana, “Nogu gloku iara na theome jateula nodi gloku mae profet ra eghu. Theo. Iara mae mala reireghi buluka nei nogu sipu gre eghu, eghuteuna iara reireghidi kolho nogu nagare gaju fig teu igre. 15Nu LORD neke hata fajifla ghau iara ka nogu gloku na, eghuteuna mana neke cheke faheta ka iara mala mei toutonuni nogna cheke mana na ka ghotilo nogna naikno mana te au ka kantri Israel. 16Amasaea! Iagho fanomho fakeli ka nogna cheke LORD igne. Iagho cheke ranghi ghau iara mala thosei toutonuni chekegna LORD na agne!
17“Nu igne unha te chekeni LORD na:
“ ‘Khetomu iagho na ginauna na kaisei gaꞌase vine ke lamnagna namono igne,
eghuteuna thumi ghopa igre ginauna lehe ka magra.
Keha naiknore ginauna tufa nou glose iaghore ka thedi,
eghuteuna iagho themu ginauna lehe ka nodi kantri naikno bongihehe.
Eghuteuna mae naoka ginauna mei huhuru ghami ghotilo naiknomi Israel
mala jifla kokodi ghotilo nomi namono re.’ ”
81Aonu LORD neke fakakhana ka iara keha mifi na. Ka mifi igne, iara ne filoni kaisei kharaꞌo te fodu ka sisi muita te naba mala ghamu. 2LORD ne cheke eghu ka iara, “Emos. Iagho filo glani glepo igne?”
Iara ne cheke eghu, “Uve, kaisei kharaꞌo fodu ka sisi muita tarabana mala ghamu.”
Mana neke cheke eghui ka iara, “Uve. Iara jaola tarabana mala paradi nogu naiknore. Iara ginauna theome tangomana te tughu gaoghathogu na te mala paradi naikno igre.
3“Ka narane tuana, goro gaꞌase te koje glealeꞌa ka sugagna king igre ginauna nake diꞌanagnafa nei tanhi eghu. Naugna thinidi naikno te lehere ginauna chara heva heva. Ghotilo ginauna pala tei thinidi naikno te lehe igre mala koko kolho ke kosi namono, eghuteuna theo kaisei naogla nate nomhi na.”
Paradi naiknodi Israel
4Ghotilo mae bisnis te goigonidi naikno te kuma nei tapla faparidi iheire te theo kaisei nodi glepo teura!
Ghotilo fanomho fakeli!
5Leuleghu fata na ghotilo cheke eghu,
“Niha nau gnafa nga Narane gaghamu biꞌogna Khafa gnea,
mala sabiri tahati noda wit gre?
Te keli na narane Sabat gne jame nabagna na ghosei gnafa,
mala tangomana tahati te sabiri noda gobigna lepo gre.
Eghuteuna tahati ginauna tugha haghe noda praes na
eghuteuna tahati famamhaku skel gre mala chaghidi iheire te foli ka tahati gre.
6Neuba wit tela diꞌahi are, tahati ginauna tugha haghe praesdi re.
Tahati ginauna foli nodi kaoni naikno te kuma igre,
eghuteuna neuba mae ihei neke kaoni kolho phei phile sadol,
tahati ginauna jaola foli nogna kaoni mana na.
Jame te eni tahati igne na, tahati ginauna tangomana te huhurudi mare te
mala loku jateula naikno sneka teu ka tahati na.”
7Ghotilo naiknomi Israel! LORD, nodi God mae Israel, mana la nhaꞌa chekehi ka nogna nafnakno biꞌo thegna ne cheke eghu, “Iara ginauna na theome ghatho ihodi glepo te diꞌa teke edi ghotilo ra.
8“Naugna igne, iara ginauna kurudi mae naoka gre mala thofno goigonidi nomi namono ghotilo are,
eghuteuna ghotilo te gnafa na ginauna diꞌanagnafa nei tanhi eghu.
Ginauna na jateula kaisei nakheu te fakheuni te nghali kantri igne ra eghu,
eghuteuna glose igne ginauna haghe nei soru eghu,
jateula Khoꞌu biꞌo Nael te britha ra eghu.”
9Igne nogna cheke LORD God na,
“Ka narane tuana, iara ginauna chekeni naprai na mala plulu farihotei naublatha,
eghuteuna nauthoglu igne ginauna romno soru kate agha teu narane na.
10Nomi narane gaghamu ghotilore,
iara ginauna nake figri ka narane mala giugilu naikno te lehe.
Eghuteuna nomi khoje glealeꞌa ghotilore ginauna nake figri diꞌanagnafa nei tanhi eghu.
Iara ginauna ghoighori phaꞌumi ghotilore,
mala pipichi ghotilo ka pohe te thona,
fagaglagna te diꞌanagnafa ghotilo jateula repa tolaghi te diꞌanagnafa kate lehe thudi naia eghu.
Ka narane tuana,
puhi biꞌo ginauna thoke ghami ghotilo!”
11Igne nogna cheke LORD God,
“Iara ginauna snakreni narane mala rofo na mala thoke ghami ghotilo,
eghume narane igne la namo meihi.
Ghotilo ginauna rofo fara, nei magnahaghei koꞌu fara,
nu theo gano nei khoꞌu.
Ka narane tuana,
ghotilo ginauna rofo fara te mala nomhini chekegna LORD.
12Jaola ka narane tuare,
ghotilo ginauna tei ka namono te gnafa ke raru, ke mata, ke maghati
nei ke mosu mala nomhini chekegna LORD na,
nu ghotilo ginauna theome tangomana nate laseni na.
13“Ka narane tuana,
“neuba mae majaghani nei gaꞌase majaghani teu igre ne nheta fara,
mare ginauna thofno rofo fara na glaꞌe soru te mala nomhini chekegu iara na,
jateula mae te roi koꞌu ra eghu.
14Iheire ka ghotilo te nhaꞌa cheke ka nanghagna nodi god maedi Samaria igre,
te cheke eghu na, ‘Iara nhaꞌa cheke ka nanghagna mumuju god gna Dan’
ba cheke eghu, ‘Iara nhaꞌa cheke ka nanghagna mumuju god gna Bereseba teuna,’
mare ginauna mala kafe lehe.”
9LORD na au nolaghi te mala paradi naiknodi Israel
1Iara neke filoni kaisei mifi teke fakakhana LORD ka iara. Ka mifi igne, iara ne filoni mana te kegra teu rhegna olta ka Sugablahi na, eghuteuna mana ne cheke eghu faheta,
“Tututu sagho ke klignadi phei khegra biꞌo ke ulugna Sugablahi na are,
mala nghali Sugablahi igne.
Koko sukha phei khegra igre mala soru ke klignadi naikno te au teu igre.
Eghuteuna iheire te theome lehe ka narane igne,
mare ginauna lehe kate tei ka magra na.
Ginauna theo kaisei ka mare nate rikha agne na, ba nate tei poru na.
Uve, mare te gnafa na mala lehe.
2Neuba mare ne fariuriu tei pari mala poru ke lamna beku neu, iara tangomana te tei teke hata haghedi kligna re.
Eghuteuna neuba mare ne fariuriu rikha ne haghe ka maloa kligna,
iara ginauna tangomana teke hata sukhadi pari re.
3Neuba mare ne haghe poru tafri ke kligna Thogele Kamel,
iara ginauna tei hirodi mala ke hata fapulodi.
Eghuteuna neuba mare ne jufu pari ne tei poru pari ka khotogna nhorora gno,
iara ginauna cheke faheta ka mogo biꞌo te au ka khotogna nhorora na mala ghamudi mare.
4Neuba mae naokare ne hatadi mare ne tei ka namono te khaba fara mala nodi naikno sneka neu,
iara ginauna cheke faheta ka mae naoka igre mala aknu falehedi jare.
“Iara theome tangomana te toghodi re,
iara na goigoni fahuidi gnafa.”
5LORD God, mae ihei te au nolaghi fateote’o,
mana tangomana te habo kolho ka nauthoglu nei glose teu igre mala nghali,
eghuteuna naikno te gnafa re ginauna diꞌanagnafa nei tanhi eghu.
Ginauna na jateula kaisei nakheu eghu na nghali tongana namono te gnafa ka kantri igne,
eghuteuna glose igne ginauna haghe nei soru eghu jateula Khoꞌu biꞌo Nael te britha biꞌo ra eghu.
6LORD eni nogna namono na kligna tei thoke ka maloa ro,
eghuteuna eni kaisei vatara biꞌo ke kligna gna nauthoglu igne.
Mana au nolaghi te mala eni khoꞌu na te mala haghe kligna ka maloa na,
eghuteuna ke soru mei pari ka nauthoglu igne jateula khoꞌu eghu ke kligna glose te moja na.
Uve, nanghagna mana na, LORD!
7LORD ne ghusna eghu ka naiknodi Israel,
“Ne ghatho tahu ghami kolho
iara uludi naiknodi Kus eghu jau si ghotilo gaoghathomi na?
Theo! Tutuani, kani au teku ghotilo ka kantri Ijep,
iara neke hata fajifla ghami ka namono tuana.
Nu filo si ghotilo! Naiknodi Filistia ra iara neke hata fajifladi Krit.
Eghuteuna naiknodi Siria ra, iara neke hata fajifladi Kira.
8Naiknodi Israel! Iara LORD God, iara filodi puhimi ghotilo te diꞌa re.
Eghume, iara ginauna goigoni ghami ghotilo iheire te tapla jafra fabrahu ka nakhibo ra,
eghuteuna roꞌe ghami ghotilo ka nauthoglu igne.
Nu iara ginauna theome thofno fagnafa ghami ghotilo iheire te karha mei ka vikegna kuꞌemi ghotilo Jekop ia.”
Igne nogna cheke LORD.
9LORD neke cheke eghu,
“Iara ginauna cheke faheta ka nomi naoka ghotilo are mala paradi naiknodi Israel,
jateula mae ihei te tofa nusu te mala tei salaꞌu ka strena te mala thofa soru pari ra eghu,
ginauna na theo kaisei ka naikno te diꞌa igre nate theome thokeni papara na.
10Ghotilo nogu naikno iara te tapla jafra fabrahu ka nakhibo ra,
iara ginauna cheke ka nagnafadi mae naoka re mala kafe aknu falehe ghami mare ka magra.
Neuba ghotilo ne cheke eghu,
‘Theo kaisei glepo te diꞌa nate thoke ghita tahati na.’ ”
LORD ginauna nake eni Israel mala ke keli fapulo
11LORD ne cheke eghu,
“Ginauna nake thoke mei narane na teke toghoni iara Israel mala teke rheta fapulo na.
Naiknodi Israel igre jateula kaisei suga tela grofohi ra eghu,
nu iara ginauna nake babana fapulo mala ke keli jateula teke ka narane teke king mae Devet tifa ia eghu.
12Eghuteuna jaola ka narane tuana,
naiknodi Israel igre ginauna nake uluni kantri Idom mala ke hata fapulo baludi keha kantri teke khotodi mare tifa ka nanghagu iara ra,
ginauna nake nogu naikno iara.”
Igne nogna cheke LORD, mae ihei nate edi te thoke mei glepo igre.
13LORD neke cheke eghui,
“Kaisei narane, glose igne ginauna nake keli,
eghuteuna gano re ginauna kmana fara ke lamna nagare,
eghuteuna naiknore ginauna theome naba nate hata fahuidi re.
Jaola ka narane tuana, sisidi gaju grep re ginauna kmana fara,
eghuteuna mae nalhaꞌure ginauna theome naba nate ei waen tagna na.
Eghuteuna mare tangomana te ei kmana waen fara te jateula kholodi sisi igre te thofa soru ka geri thogele na te pila glose naia eghu.”
Igne nogna cheke LORD.
14LORD ne cheke eghu,
“Ka narane tuana, iara ginauna nake hata fapulo naiknodi Israel ka nodi thofno namono re.
Mare ginauna nake babana fapulo mala ke au ka nodi namono teke goigoni mae naoka ra.
Mare ginauna nake joꞌu nagare gaju grep, mala ei waen tagna mala koꞌu.
Mare ginauna nake loku ka nagare, eghuteuna ghamu gano teke joꞌu thedi re.
15Na jateula tuana eghu iara ginauna nake lisei fapulo nogu naiknore ka kantri teke tusu lao iara ka mare tifa ra,
jateula mae te joꞌu gano ka nogna thobi naia eghu,
eghuteuna ginauna na theo kaisei naikno nate tangomana ni na teke hata fadelei naiknore ka namono igne.”
Igne nogna cheke LORD, nomi God ghotilo.