Fatilo Jone
Nogna Fatilo Letas Mae Jone
Thoutonu kmo’ei eigna buka igne
Fatilo letas nogna mae Jone igne neke rioriso ranghini mae Gaeasi. Mana neke cheke fakelini mae Gaeasi naugna ka nogna thotogho nei farirhiu eghu ranghidi keha naikno khiloaure ka nogna farirhiu chaichaghi mae Diotrefes re.
1Toghodi mae gloku ka khiloau
1Iara mae mala baubatu ka khiloau.
Ranghi nigho thabusigna Gaeasi. Iara thofno namha nigho.
2Uve thabusigna, iara laseni nakarhamu iagho ka khiloau na keli fabrahu. Iara tarai eimu iagho mala karha keli eghu mala theome thokei nigho kaisei fogra. 3Kate mei toutonu keha mae gloku ka khiloau gne eigna nakarhamu iagho na, iara ne gleale’a fara. Naugna te chekeni mare na, iagho thofno leghuni Nonomho te Keli eigna mae Jisas Kraes. 4Iara ne thofno keli tagu fara kate nomhidi goro thugu te leghuni Nonomho te Keli gne.
5Uve thabusigna, thofno keli fara te toghodi iagho mae gloku ka khiloau te posa mei ka sugamu na neubane theome lasedi iagho kehare. 6Mare ne mei toutonuni nou namha iagho na ka khiloau igne. Thofno keli fara iagho te toghodi mare ka unha te nabagna nodi thei na, mala tudu fabrahu mare nodi gloku na. Te eni iagho igne, God ginauna keli tagna fara. 7Eigna mare tei toutonuni mae Kraes. Nu mare theome hata thotogho ka hatimare mae bongihehe, neuba mare ne toutonu ranghidi u Nonomho te Keli eigna mae Jisas Kraes. 8Eghume noda gloku tahati te mala toghodi mae igre. Kate eni igne, tahati kaisei loku fodu malagna Nonomho te Keli.
9Iara neke rioriso kaisei letas kmoꞌei ranghini khiloau eigna igne. Nu mae Diotrefes tirogna fanomho ka unha te chekeni iara na. Eigna mana magnahaghei te fnakno nei mae biꞌo eghu ka khiloau gne. 10Kate mei iara na, iara ginauna na chekedi ka ghotilo unha te edi mae Diotrefes. Mana chaichaghi nei cheke fadiꞌa ghita tahati. Nu theome tuana ngala eghu te eni mana na. Mana tirogna toghodi iheire te loku ranghini Kraes. Mana jaola lhotidi iheire te magnahaghei toghodi hatimare mae gloku nei faꞌau kosidi ka khiloau.
11Uve thabusigna, thosei leghuni unha te diꞌa na, nu leghuni unha te keli. Mae ihei te eni unha te keli na mana thugna God. Nu mae ihei te eni unha te diꞌa na mana theome laseni God. 12Naiknore te chekei na mae Demitrias gne kaisei mae keli fara. Eghuteuna unha te chekeni naiknore tutuani fara. Ghehati jaola cheke fakelini mana, eghuteuna ghotilo laseni unha te chekeni ghehati na tutuani fara.
13Iara au kmana glepo te mala chekedi ranghi nigho, nu iara theome magnahaghei te rioriso soru ka letas igne. 14Iara ghaoghatho mala ari filo nigho thogheiro eghuteuna tahati ginauna na loku fodu mala chekedi glepo igre.
15Pharikeli ka iagho.
Thabusigna igre kubae nigho. Kubae ka sopagna kherami ghehati. Me gnafa. Iara, mae Jone.