Fapea Timoti

Fapea Timoti

Fapea Letas Teke Riso Tei Mae Pol Ka Mae Timoti

Thoutonu kmo’ei eigna buka igne

Mae Pol neke rioriso fapea letas igne ranghini mae Timoti kate au teu mana Rom ke lamnagna suga sosolo na.

Ka letas igne mae Pol neke cheke ranghini mae Timoti mala kegra heta fabrahu mana kate toutonu u Nonomho te Keli eigna mae Jisas Kraes. Mana neke cheke ranghini mae Timoti mala eni mana nogna gloku na, neuba keha naiknore ne cheke faparini mana ba cheke faparini nogna khiloau God na. Mae Pol magnahagheni mae Timoti te ghatho fapuloni nakarhagna thegna mae Pol na mala tangomana te leghu fakelidi nakarhagna nei nogna farirhiu te keli teu mae Pol re.

Keha vido ka letas igne

Famane cheke ranghini mae Timoti: 1:1-18

Cheke te mala toghoni mae Timoti: 2:1–4:5

Cheke eigna thegna mae Pol: 4:6-22

¹Iara mae Pol, nogna khuru mae Jisas Kraes. God neke kuru ghau iara mala toutonu eigna u karha fei tifa teke nhaꞌa cheke mana ranghidi naikno te gnafa te fatutuani ni mae Jisas Kraes.

²Uve ghema Timoti, iara riso ari letas igne ka iagho, eigna iagho jateula kaisei mae thofno thugu iara eghu.

Iara toreni nogna khokofakasai, lolokeli, nei pharikeli God Kmada nei Jisas Kraes noda Lord mala au balumu.

Thosei mamajani u Nonomho te Keli na

³Iara cheke fakelini God, eigna iara loku ranghini mana balu gaoghatho te klino ke ulugna God, jateu teke edi mae kuꞌeda tifa ra eghu. Leuleghu fata kate tarai re iara ghatho nigho fabrahu bongi narane. ⁴Gognaro na iara magnahaghei fara te ari filo nigho mala ke keli gaoghathogu na, eigna iara neke ghatho fapuloni teke tanhi ghau iagho ia. ⁵Iara laseni nou fatutuani iagho ka Lord Jisas Kraes na thono heta fara, jateula teke eni kavemu Loesi ghe idomu Iunisi tifa ia eghu. Te ghathoni fara iara na u nafnata fatutuani te heta fara tuana te au ka iagho gognaro na. ⁶Naugna igne iara magnahaghei fapuhi nigho mala fabrabrana ni iagho u nolaghi teke tusu ari God tamu ka narane teke taofi nigho iara ia. ⁷Eigna Tharunga te Blahi teke tusu mei God ka tahati igne theome mala mhaghudi tahati keha naiknore, nu mala heta tahati nei mala namhadi eghu tahati, nei mala tangomana tahati te sagheleghu ghita theda.

⁸Eghume iagho thosei mamaja te toutonu ka naiknore eigna noda Lord Jisas Kraes. Eghuteuna iagho jaola thosei mamaja ghau iara te au ka suga sosolo malagna Lord, eigna iara ne loku ranghini mana. Iagho thosei mhaghudi iheire nate para nigho eigna iagho te toutonuni u Nonomho te Keli. God ginauna tusu ranghi nigho nolaghi te mala eni iagho gloku tuana. ⁹God neke fakarhi ghita, eghuteuna kilo ghita mala nogna naikno mana thegna. Mana neke theome eni igne unha tahati tangomana te eni theda na, nu mana thegna neke magnahaghei eni igne naugna mana namha ghita fara. Eghuteuna nogna namha God tuana neke tusu mei ka tahati ka mae Jisas Kraes kani theome fufunu nga neku nauthoglu igne. ¹⁰Nu nogna namha mana igne neke theome thakle ka tahati ghilei mei noda mae Fakarhai Jisas Kraes. Mae Jisas neke roꞌenihi nogna nolaghi glehe na, eghuteuna ka Nonomho te Keli igne, mana neke falalase ranghi ghita u nabrou te mala hatini tahati u karha te theo ka huigna na. ¹¹God neke vahi ghau iara mala loku jateula kaisei mae khuru ba velepuhi mala toutonuni u Nonomho te Keli igne. ¹²Eghuteuna gognaro na iara au papara naugna iara ne toutonu eigna u Nonomho te Keli gne. Nu iara theome mamaja naugna iara laseni mae Jisas, mae ihei iara te fatutuani nihi. Iara laseni fara igne, mana tangomana te taji fakelini nogu gloku iara te mala toutonuni Nonomho te Keli igne ghilei thoke mei narane leghu lahu na.

¹³Leghu fakelidi cheke teke nomhidi iagho ka iara ra. Cheke igre jateula thotoghale eghu mala laseni iagho nabrou te keli te mala farirhiudi naiknore. Eghuteuna iagho edi igre balu fatutuani ni mae Jisas Kraes nei namhadi keha naiknore eghu eigna tahati nogna naikno mana. ¹⁴Taji fakelini famane farirhiu teke tusu ari God ka khamemu iagho ana. Mae Tharunga te Blahi te au ka tahati na mana ginauna togho nigho iagho mala eni igne.

¹⁵Iagho lasedi mae Fijela ghe mae Hemojeni baludi keha naikno ka Provins Esia mare la tei koko ghauhi iara.

¹⁶Iara toreni Lord mala kokhonini mae Onesifora nei nogna tharakna. Mana neke togho ghau iara koba eghuteuna mana neke theome mamajani te au iara ka suga sosolo na. ¹⁷Nu kate mei agne Rom na, mana neke hiro ghau fara iara ne ghilei deni ghau iara. ¹⁸Iagho laseni fara igne, kmana glepo te togho ghau iara mae Onesifora ka namono Efesus. Iara toreni Lord mala khokonini mana ka narane leghu lahu na.

Nogna soldia keli mae Jisas Kraes

¹Ghema thuguo Timoti, iara magnahaghe nigho te au famaku ka nogna khokofakasai God teke tusu ranghi ghita, naugna tahati nogna mae Jisas Kraes. ²Iagho ke toutonu ranghidi mae iheire te rouronudi iagho ra eigna u farirhiu te nomhidi iagho igre teke edi iara ka naikno te kmanare. Eghuteuna mae igre ginauna jaola tangomana te mala farirhiudi keha naiknore. ³Eghuteuna iagho tarabana mala au papara balugu iara jateula kaisei nogna soldia keli mae Jisas Kraes. ⁴Jame kaisei mae soldia magnahagheni nogna mae funei te gleale’a ka nogna gloku na, mana theome tangomana te leghudi nogna puhi thegna re. ⁵Jame kaisei mae magnahaghei ulu ka kaisei fangenghele, mana ginauna theome tangomana te hata taba jame te theome leghu fakelini mana u vetula gna fangenghele na. ⁶Jaola, mae ihei te loku heta ka nogna nagare na, mana ginauna kulu hata ghegna gano ka teke joꞌu thegna re. ⁷Hironi sagho gaoghathodi cheke te edi iara igre. Lord ginauna togho nigho mala lasedi glepo igre.

⁸Thosei ghatho ihoni mae Jisas Kraes teke karha mei ka vikegna King Devet, eghuteuna mana teke karha fapulo ka glehe. Igne u Nonomho te Keli te toutonuni iara na. ⁹Eghuteuna naugna te toutonuni iara u Nonomho te Keli igne, naiknore ne haru ghau iara ka chen jateula mare te haruni kaisei mae te huhughuni fara u vetula na ia eghu. Nu theome tangomana kaisei naikno ka nauthoglu gne te haruni chekegna God na ka chen. ¹⁰Eghume iara heta ghegu kolho neuba mare ne para ghau. Naugna iara magnahaghei te toghodi naikno teke vavahi God re mala nogna naikno mae Jisas Kraes. Ka puhi igne God ginauna fakarhidi, eghuteuna mare ginauna hatini u karha fei tifa na.

¹¹Igne kaisei cheke tutuani fara,

“Jame te lehe tahati balugna mana na,

tahati ginauna jaola karha balugna mana.

¹²Jame te fatutuani ni fabrahu tahati mae Jisas Kraes na,

neubane au papara, tahati ginauna funei balugna mana ka nogna nauthoglu te theo ka huigna.

Nu jame te chekeni tahati ne theome laseni mana teuna,

mana ginauna jaola chekeni ne theome lase ghita teuna.

¹³Neuba tahati ne theome tajini noda nhaꞌa cheke na,

mana ginauna na tajini fabrahu nogna nhaꞌa cheke na,

naugna mana theome tangomana te chaghini thegna na.”

Mae gloku te keli tagnani God

¹⁴Chekedi koba glepo igre. Iagho cheke faheta tadi ke ulugna God mala thosei magradi cheke te theo nafudi kolho igre. Nafnata puhi te magradi cheke igre thono diꞌa fara, naugna fadidiꞌa kolho nakarhadi naikno te fanomho ka magra tuare. ¹⁵Hati nhetamu na mala kaisei mae gloku keli, eghuteuna God ginauna keli tagna ka nou gloku iagho na. Iagho famane farirhiu thofno chekegna God na ka puhi te doglo mala theome mamaja nou ke ulugna mana. ¹⁶Iagho figri lao thagrumu na ka nafnata cheke te diꞌa te theo nafudi tuare, naugna naikno te edi nafnata cheke tuare khogla eꞌei puhi kolho ranghidi keha naiknore mala tei kokoni God. ¹⁷Nodi farirhiu mae igre fadidiꞌadi naiknore fara, jateula kaisei thubu biꞌo te tei tongana ka thini na ia eghu. Nodi farirhiu mae Haemenias ghe mae Filita igre jateula tuana eghu. ¹⁸Phei mae igre tei kokonihi thofno fatutuani na. Naugna te chekeni phei mae igre na tahati ginauna theome kegra fapulo kolho, naugna tahati naikno khiloau gre neke kegra fapulohi. Nafnata farirhiu igne roꞌedi kolho nodi fatutuani keha naikno khiloaure. ¹⁹Nu neuba ngau, God na la liliseihi thina biꞌo na ke pari gringni ka khiloau gne, eghuteuna thina igre ginauna kegra maku fabrahu. Cheke teke risoni mare ka thina igre cheke eghu, “Lord God lasedi iheire te thofno nogna mana re”, nei keha cheke na jaola cheke eghu, “Ihei te chekeni, ‘Iara nogna Lord God’ teuna, thosei eni kaisei puhi te diꞌa.”

²⁰Keha tapera te au ka suga biꞌo na mare horo ka gol ba silva, eghuteuna keha tapera re mare horo ka gaju ba glose. Kehare maladi narane te ulu, eghuteuna kehare maladi fiti narane kolho. ²¹Nogna naikno God re jateula tuana eghu. Eigna ihei te faklinoni thegna ka glepo te diꞌa te chekedi iara igre, mana jateula kaisei glepo ulu eghu, naugna mana ginauna au ka nakarha te klino. Eghuteuna mana ginauna tarabana mala eni unha gloku te keli ranghini Lord.

²²Au fadelei ka glepo te diꞌa te magnahaghedi naikno majaghani are. Hati nhetamu na mala au doglo nei mala heta nou fatutuani na ka Lord, namhadi naiknore, eghuteuna au fakeli baludi thofno naikno khiloau te gnafare. ²³Nu iagho thosei cheke ba fanomho ka cheke te theo gaoghathodi are. Iagho lasedihi glepo igre khogla faꞌeiꞌeidi naiknore mala magra eghu kolho. ²⁴Te laseni tahati na, nogna mae gloku Lord na theome mala magra, nu mana mala keli ranghidi naikno te gnafare. Mana kaisei mae mala farirhiu, eghuteuna theome mala ghosei diꞌatagna. ²⁵Mana theome mala diꞌatagna kate farirhiudi iheire te theome kaisei gaoghatho ka mana re. Nu mana jame thoghei taegodi ka puhi te doglo, God glahula te tangomana te toghodi naikno tuare mala tughu nagnafa nei lase fakelini u thofno farirhiu te tutuani na. ²⁶Eghuteuna kate keli fapulo gaoghathodire, mare ginauna na rikha kokoni mae Satan. Eigna mae Satan gognaro gne te loku famakudi, eghuteuna mana huhurudi mala edi glepo te magnahaghedi mana thegna re.

Mae velepuhi chaichaghi

¹Ghathoni igne! Jare ginauna na kmana puhi biꞌo ka narane leghu lahu re. ²Ka narane tuare naiknore ginauna ghathodi thedi kolho, nei magnahaghei sileni fara. Mare ginauna fahaehaghe nei fabiꞌobiꞌo fara, eghuteuna mare ginauna cheke fadiꞌadi keha naiknore. Mare ginauna theome leghudi idodi ba kmadire. Naiknore ginauna theome tegio ka God ba theome nafnata naikno God te magnahagheni. ³Mare ginauna theome namhani ihei. Mare ginauna tirodi hata fadelei nakhibogna ihei. Mare ginauna vuavuha cheke eidi keha naiknore. Mare ginauna magnahaghei magra koba nei eꞌei puhi eghu. Mare ginauna theome magnahaghei kaisei glepo te keli. ⁴Ka narane tuare, naiknore ginauna majoradi kheradi thedire. Mare ginauna loku balu fagoigoli nei fahaehaghe fara. Mare ginauna magnahaghei eni kolho unha te keli tadini thedi na, nu mare theome tangomana te namhani God. ⁵Mare ginauna tei tarai koba ka suga tharai, nu mare na theome magnahagheni nogna nolaghi God na te mala funei frunini nakarhadire. Iagho au fadelei ka nafnata naikno tuare.

⁶Keha ka mae igre mare tei ruma ka sugadi naiknore, nei sagudi gaꞌase te theome biꞌo nodi fatutuanire. Eghuteuna rehati mamajadi fara nakhibo teke edi thedi tifa re, nei rehati eidi kmana glepo te jafra fara te magnahagheni thedi. ⁷Nafnata gaꞌase igre fariuriudi koba mala leghudi farirhiu majaghani igre, nu rehati theome tangomana te hatini kaisei glalase te keli eigna thofno cheke te tutuani na. ⁸Mae te diꞌa igre tirodi leghuni thofno cheke te tutuani na, jateula mae Janisi ghe mae Jabrisi teke eni tifa ranghini mae Moses. Mare theome au kaisei nodi gaoghatho te doglo kolho, eghuteuna nodi fatutuanire la tei jafrahi. ⁹Nu puhi te diꞌa te eni mare igne ginauna theome au raugha kolho na te mala chaghidi naiknore. Theo. Naugna naiknore ginauna filo glanidi puhidi mare te theome raꞌe kelire, jateula mare teke filo glanidi puhidi mae Janisi ghe mae Jabrisi tifa ra eghu.

Mae Timoti mala leghuni puhigna mae Pol

¹⁰Nu iagho filo glani ghau iara, iara gne theome nafnata naikno tuana ka nogu farirhiure, ka nogu nakarha nei ka glepo te magnahaghei edi thegure. Iagho filo glaninihi puhigu iara te fatutuani ni mae Kraes na, nogu nagnafa au kmu ba nogu namha biꞌo ranghidi naikno te gnafare, ba nogu naꞌau ka vido te ninhigrana. ¹¹Uve, iagho lasenihi, iara neke kabru nei au papara fara kani au teku ka namono Antiok, Aekoniam nei Listra. Nu noda Lord neke togho ghau nei fakarhi ghau ka puhi te gnafa igre. ¹²Uve, mae ihei te magnahaghei thofno leghuni mae Jisas Kraes te mala nogna mae gloku keli mana na, naiknore ginauna parani mana. ¹³Tutuani fara, naikno te diꞌa nei mae velepuhi chaichaghi teu igre ginauna diꞌa fara puhidire. Mare ginauna chaghidi koba naiknore, nu mae Satan ginauna nake chaghi fapulo dila mare. ¹⁴Nu iagho leghudi fabrahu farirhiu teke lasedi nei fatutuanidi teu iagho ra, naugna iagho lasedi puhimi ghehati mae iheire teke farirhiu nigho iagho ra. ¹⁵Jaola, vuha suamu te mei na, iagho lasedihi u grioriso te blahi igre. Eghuteuna farirhiu igre tangomana te tusu ranghi nigho gaoghatho te keli nei batu nigho kau nakarha te keli naugna iagho ne fatutuani ni mae Jisas Kraes. ¹⁶Grioriso te blahi te gnafa igre, God neke cheke ka naiknore mala rioriso leghuni nogna gaoghatho thegna na. Grioriso te blahi igre thofno keli fara mala farirhiu ghita unha te tutuani nei mala filo glanidi unha te jafra ka nakarhada, nei fadogli ghita nei farirhiu ghita mala eni koba unha te doglo ke ulugna God. ¹⁷Ka puhi igne tahati nogna naikno God ra ginauna nabada fara te edi gloku te keli fateote’o.

¹Iara cheke fajiflani cheke igne ka ghotilo ke ulugna God nei ke ulugna mae Jisas Kraes. Mana ginauna fatedi naikno te gnafa te karha nga teu ba tela lehehi. Naugna mae Kraes ginauna nake pulo mei mala funei frunidi jateula mae King eghu tifa tifa, iara cheke heta ka iagho ²mala toutonuni koba chekegna God na. Tarabana leghu fata mala eni igne, neuba naiknore ne tirodi fanomho ka iagho. Iagho toghodi naiknore mala filo glani mare unha te jafra ka nakarhadire. Eghuteuna iagho fadodoglo puhidi naiknore ka unha te jafra ba toghodi mala nheta nodi fatutuani na. Eghuteuna kate farirhiudire, iagho mala taegodi nei farirhiu fakelidi eghu. ³Naugna ginauna tahati na thoke ka narane nate tirodi fanomho naiknore ka thofno farirhiu na, nu naiknore ginauna leghudi kolho nodi gaoghatho thedire. Eghuteuna mare ginauna hiro mae velepuhi tafri mala nomhini kolho u farirhiu te magnahagheni thedi na. ⁴Eghuteuna mare ginauna figri tagruni farirhiu te tutuani na mala fanomho kolho ka thoutonu te chaichaghire. ⁵Nu iagho ghaoghatho fakeli leuleghu fata na, nei kegra maku ka narane nate thoke mei tamu naꞌau papara na. Eghuteuna iagho heta ka gloku igne mala toutonu eigna u Nonomho te Keli na nei loku fahui nou gloku blahi teke tusu ranghi nigho God na.

Nakarhagna mae Pol

⁶Iara chekeni igne, naugna gognaro na la thoke meihi nogu narane te mala jifla kokoni iara nakarha igne. Nakarhagu iara na jateula u waen te tofa mare ke kligna olta te mala fafara ka God gognaro gne eghu. ⁷Ka nogna gloku blahi God na, iara neke hati nhetagu na jateula kaisei mae te mala chari ka fangenghele te biꞌo na ia eghu. Eghuteuna iara gognaro na thokehi ka narane mala gnafagna u fangenghele na te loku famaku teu iara nogu fatutuani gne. ⁸Eghuteuna gognaro na u taba te mala uluni iara na la kulu auhi. Uve, ka narane leghu lahu na Lord mae ihei te tangomana te mala fatedi naiknore ka puhi te doglo na, mana ginauna cheke eghu ka iara, “Iagho kaisei mae te doglo ke ulugu iara. Igne nou taba iagho na.” Eghuteuna mana ginauna na theome eni igne ka iara kolho, nu jaola ranghidi naikno te gnafa te ofoni teu ke pulo meigna mana na.

Nogna cheke leghu lahu mae Pol

⁹Ghema, hati nhetamu na mala ghose mei ka iara. ¹⁰Iagho lasenihi, mae Dimas ia la tei koko ghauhi iara, naugna mana namhani fara puhigna nauthoglu igne, eghuteuna mana la teihi ka namono Tesalonika. Eghuteuna mae Kriseni la teihi ka Provins Galesia, eghuteuna mae Taetus la teihi ka nohi Dalamatia. ^11-12Mae Luku ngala au teu balugu iara agne na naugna mae Tikikas na la kuru teinihi iara ka namono Efesus. Kate mei agne na, iara magnahaghe nigho te hata te mei balumu mae Mak, naugna mana tangomana te togho ghau iara ka nogu gloku blahi iara agne na. ¹³Eghuteuna iagho hata mei balumu nogu pohe brahu iara teke lilisei teku ka mae Kapus jare Troas ia. Jaola hata mei nogu buka iara ra eghu, tulao iagho thosei ghatho ihoni nogu buka iara teke rioriso ka pepa teke hohoro ka guli sipu ia.

¹⁴Mae Aleksada, mae ihei te lase hohoro glepo ka aean gne edi kmana glepo diꞌa ranghi ghau iara. Lord ginauna nake tughu fapulo unha teke edi mana ka iara re. ¹⁵Fiofilo nighoi ka mana, glahu ke jaola mana tamu, naugna mana cheke faparini fara noda farirhiu tahati na.

¹⁶Ulu lahu te hata ghau iara mare ka fate na, theo kaisei naikno te togho ghau iara na. Thono theo fara. Mare kafe tei koko ghau iara, nu iara taraidi mare mala ghatho ihodi God najafra teke edi mare re eghu. ¹⁷Nu Lord Jisas Kraes togho ghau iara ne tusu mei nolaghi ka iara mala thofno toutonuni u Nonomho te Keli na mala kafe nomhini naikno te theome Jiure. Eghume mana togho fabrahu ghau iara mala theome tangomana mare te fate falehe ghau iara na nei theome snakre lao ghau iara ka lion mala ghamu ghau iara. ¹⁸Lord Jisas Kraes ginauna hata fajifla ghau iara ka glepo te diꞌa fateote’o, eghuteuna hata tei ghau ka namono kligna aheva mana te King. Tahati kilo fnaknoni mana tifa tifa! Amen.

¹⁹Iagho kubaedi Prisila ghe mae Akuila, nei kubaeni nogna tharakna mae Onesifora.

²⁰Mae Erastus neke theome mei balugu iara, nu mana au faleghu ka namono Korin. Eghuteuna mae Trofimas na iara ne liliseini mana jare Maelitas eigna mana ne fogra fara. ²¹Iagho hati nhetamu na mala mei thoke ka iara agne, ame thoke mei nga u khoburu na eghu.

Mae Iubilas gne kubae nigho, jaola mae Pude, mae Linasi, Klodia, nei thabusigna te gnafa ka khiloau gne kubae nigho.

²²Iara toreni Lord Jisas Kraes mala fablahi nigho, eghuteuna nogna khokofakasai God na au balumi hui. Me gnafa. Iara, mae Pol.