1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

Fapea Tesalonika

Fapea Letas Teke Riso Tei Mae Pol Ka Khiloau Tesalonika

Thoutonu kmo’ei eigna buka igne

Fapea letas ranghidi naikno khiloau ka namono Tesalonika igne eigna farirhiu te chekeni naiknore, “Narane mala ke pulo meigna Kraes na la meihi.” Mae Pol magnahaghedi naiknore te laseni narane mala ke pulo meigna Kraes na theome mei tutuaniu. Ame ke pulo mei nga Kraes teuna, thua glepo te chara nei thua puhi te chara teu gre ginauna thakle mei. Eghuteuna mae biꞌo te mala baubatudi glepo te chara igre, mae Pol kiloni “Mae mala huhughuni vetula.” Mae tuana mae mala tirogna leghuni Kraes.

Glepo biꞌo te au ka gaoghathogna mae Pol na, mana magnahaghei te fariuriu chekedi naikno khiloaure mala kegra heta ka nodi fatutuani na kate thoke mei puhi biꞌo te paradi mare na.

Phei vido ka letas igne

Farirhiu eigna ke pulo meigna Kraes: 1:1–2:17

Farirhiu eigna gloku te mala edi naikno Khiloau: 3:1-18

1

1Iara mae Pol baludi mae Silas ghe mae Timoti, te riso ari letas igne ka ghotilo naikno khiloau te au Tesalonika nogna God Kmada nei Lord Jisas Kraes.

2Ghehati toreni nogna khokofakasai nei pharikeli God Mama nei nogna mae Jisas Kraes noda Lord te mala au balumi.

Fate kate meigna mae Kraes

3Ghehati cheke fakelini God leghu rane eimi ghotilo kheraguro. Nabami ghehati te eni igne, naugna nomi fatutuani ghotilo na bruara fara. Eghuteuna namha te sopa au ka ghotilo te gnafa na jaola bruara. 4Eghume ka keha khiloau gre, ghehati fahaehaghe ghami ghotilo naugna ghotilo kegra maku nei fatutuani fabrahu kate fakokhoana ghami ba para ghami ka kmana puhi biꞌo.

5Glepo igre thofno falalase puhigna God mala fatedi naiknore thofno doglo fara. Eigna God magnahaghei ghami ghotilo naba te mala au baludi naikno God te funei frunidi. Tuana gaoghathogna te au papara ghotilo gne. 6Eghuteuna God ginauna eni unha te doglo fara. Mana ginauna foli fapulo puhi biꞌo fara ka iheire te ei puhi biꞌo ranghi ghami ghotilo. 7Eghume te chekeni iara ka ghotilo iheire te au papara fara ra, God ginauna fagnafa ghami ghotilo balumi ghehati kate thakle meigna Lord Jisas funu kligna balu nogna tothoghei engel te nolaghi. 8Mana ginau mei funu kligna balu khaꞌaghi ngaja mala fatedi iheire te theome laseni God, nei iheire te tirodi leghuni u Nonomho te Keli eigna noda Lord Jisas Kraes. 9God ginauna paradi fabrahu naikno tuare. Mana ginauna theome snakredi iheire te theome laseni God nei iheire te theome magnahagheni thofno karha te mala au balugna Lord, nei lisei fadeleidi ka nogna nolaghi te biꞌo. 10Kate mei ka narane biꞌo tuana, mana ginauna hata nafnakno ka nogna naikno blahire. Eghuteuna naikno teke fatutuani ni mana tuare ginauna kilo fnaknoni mana. Ghotilo ginauna au ke lamnagna tothoghei naikno fatutuani tuana, naugna ghotilo ne fatutuanidi unha te chekedi ghehati ra.

11Naugna igne, ghehati tarai koba eimi ghotilo, nei toreni noda God mala togho ghami nei nabami te au ka nakarha te keli teke kilo ghamihi mana. Eghuteuna ghehati jaola toreni God ka nogna nolaghi mala togho ghami ghotilo mala leghudi gaoghathomi nei loku fahui gloku teke edi ghotilo naugna te fatutuani ni God. 12Jame eni ghotilo igne na, nanghagna noda Lord Jisas Kraes na ginau fnakno ke lamnami. Eghuteuna ghotilo tangomana te hata nafnakno ka mana. Nafnakno tuana mei funu ka nogna namha noda God nei Lord Jisas Kraes.

2

Glepo diꞌa ginauna thakle mei

1Uve kheraguro, ghehati magnahaghei te cheke ka ghotilo eigna narane meigna noda Lord Jisas Kraes mala salo fodu ghita balugna. 2Ghehati tore ghami ghotilo fara mala thosei ghosei diꞌanagnafami ba rhana nomi kate nomhidi ghotilo nafnata cheke igre, “Narane gna Lord na la meihi.” Glahu chaghi mare cheke eghu, mae Tharunga te Blahi teke cheke eghu na, ba ghehati teke cheke na, ba teke risoni ghehati ka letas na. 3Thosei snakreni kaisei naikno me chaghi ghami, naugna narane meigna noda Lord Jisas Kraes na theome tangomana te mei ghilei thoke mei narane kmana naikno nate figri tagruni God. Eghuteuna mae tuana mare kiloni mana, “Mae mala huhughuni vetula,” mana na kulu meila. God ginauna roꞌeni mae te diꞌa tuana. 4Mana ginauna cheke fadiꞌadi gobigna lepo te tufru sorudi naiknore balu nodi thua nafnata god. Eghuteuna ginauna mana na ghatho tahuni thegna jateula kaisei mae te uludi gobigna lepo te tufru sorudi naikno igre eghu, eghuteuna mana ginauna tei gnokro lamna nogna Sugablahi God eghuteuna mana na chekeni te mana ngala God na.

5Ba, kela ghatho ihodihi si ghotilo glepo teke chekedi iara igrea? Iara neke chekedi glepo igre kani au tekeu balumi ghotilo ia. 6Mae mala huhughuni vetula gne ginauna thakle mei ka nogna thofno narane thegna na. Nu ghotilo lasenihi jare kaisei nolaghi te fanograni mana mala theome thakle mei gognaro. 7Nogna nolaghi mae mala huhughuni vetula na igne loku ka nauthoglu gne gognaro na. Nu mana poru ghilei thokei narane God nate hata fadeleini ka nabrou na mae ihei te fanogra te theome edi glepo igre. 8Ke leghugna igne, mae mala huhughuni vetula na ginau thakle mei. Noda Lord Jisas ginauna faleheni mae tuana ka phaphanga te jifla mei ka foflogna. Uve, ka narane pulo meigna mae Jisas na, nogna nolaghi biꞌo mae Jisas na ginauna siasigla mei mala roꞌeni mae tuana. 9Mae mala huhughuni vetula igne ginau mei ka nogna nolaghi mae Satan, eghuteuna mana ginauna edi kmana kofubobhoi chaichaghi, fagaglana nei glepo biꞌo mala jaglo naiknore. 10Mana ginauna edi kmana nafnata muamugna te diꞌa mala chaghidi iheire mala lehe theome hatani u thofno nakarha na. Mare ginauna lehe naugna mare ne tirodi namhani nei leghuni cheke te tutuani eigna Lord, mae ihei te tangomana te fakarhidi. 11Eghume God ginauna snakre lao ka nafnata naikno igre kaisei nolaghi mala fatutuanidi thoutonu chaghi are. 12Eghuteuna God ginauna fate falehedi gnafa, eigna mare ne tirodi fatutuani cheke te tutuani na, eghuteuna mare ne keli tadi te edi fabrahu glepo te diꞌare.

Kegra heta

13Uve kheraguro, noda Lord thofno namha ghami ghotilo. Ghehati nabami te cheke fakelini God koba eimi ghotilo. Naugna God neke vahi ghami ghotilo ame vuvuha nga nauthoglu igne mala fakarhi ghami. Ghotilo mala nogna naikno blahi God kate fatutuani ni ghotilo cheke te tutuani igne ka nogna nolaghi mae Tharunga te Blahi. 14Ka Nonomho te Keli te mei toutonu ghehati igne, God neke kilo ghami ghotilo mala nogna naikno blahi mana. Jaola God neke kilo mei ghami ghotilo mala hatini u thofno nakarha te mei ka noda Lord Jisas Kraes.

15Eghume, kheraguro, kegra heta ka nomi fatutuani nei loku famaku ka farirhiu teke tusu ari ghehati igne. Ghehati neke farirhiu ghami ghotilo ka chekemi nei ka letas.

16-17Ghehati tarai ka noda Lord Jisas Kraes thegna nei God Kmada mala fameomego ghau nei farheta ghau ka gobigna lepo te keli te edi ba chekedi ghotilo re. God neke namha ghita nei ka nogna khokofakasai na mana tusu ranghi ghita grouronu te keli nei fameomego ghita fabrahu tifa tifa.

3

Mae Pol toredi naikno khiloaure mala taraidi

1Uve kheraguro, tarai ghami mala tangomana chekegna Lord na mala ghosei tei ka namono te gnafa heva heva, eghuteuna naiknore ginauna tangomana te nomhini nei ghatho tahuni eghu farirhiu tuana, jateula teke enihi ka ghotilo ia eghu. 2Ghotilo jaola tarai ghami mala tangomana God te bara fothi ghami ka puhidi naikno te diꞌare, naugna naiknore theome kafe fatutuani ni u Nonomho te Keli gne. 3Nu te keli na, ghotilo tangomana fatutuani ni Lord, naugna mana ginauna farheta ghami nei bara ghami ka nogna nolaghi mae Satan. 4Ghehati rouronu ka Lord eimi ghotilo te mala edi unha teke chekedi ghehati ka ghotilo ra. Eghuteuna jaola te laseni ghehati na, ghotilo ginauna edi fabrahu glepo igre. 5Ghehati toreni noda Lord mala batudi nagnafami are mala laseni ghotilo God te namha ghami. Ghehati jaola tarai mala au heta ghotilo jateula mae Kraes te au heta.

Eidi iheire te tirodi loku

6Uve kheraguro, ka nanghagna mae Jisas Kraes noda Lord, ghehati magnahaghei cheke faheta ka ghotilo. Thosei fofodu ka naikno khiloau te tirodi loku are. Naikno te tirodi loku are theome leghudi farirhiu teke tusu ari ghehati ka ghotilo ra. 7Ghotilo themi lasenihi igne, ghotilo mala leghudi puhimi ghehati gre. Naugna kate au balumi ghotilo ra, ghehati neke theome tiromi loku. 8Eghuteuna ghehati jaola neke theome fiti hata kaisei gano ka naiknore. Ghehati themi teke folidi gobigna lepore. Leghu fata na, ghehati loku heta fara bongi narane, naugna ghehati theome magnahaghei kaisei ka ghotilo te ninhigrana ranghini fara. 9Ghehati neke eni igne, neuba ghehati au nomi nolaghi te mala tore ghami ghotilo te togho ghami na. Nu ghehati loku mala togho ghami themi naugna ghehati magnahaghei te falase arini puhi te keli na ka ghotilo mala leghuni ghotilo. 10Kate au balumi ghotilo ia, ghehati neke cheke eghu ka ghotilo, “Jame ihei te tirogna loku na, ghotilo thosei faghamuni.”

11Ghehati chekeni igne, naugna ghehati nomhidi keha naikno ka ghotilo tirodi loku fara. Mare theome eni kaisei unhanga. Nu mare farugusidi thedi ka nakarhadi keha naiknore. 12Eghume ka nanghagna mae Jisas Kraes noda Lord, ghehati cheke faheta ka mare mala au fakeli nei loku heta mala au ghedi gano thedi. 13Nu ghotilo kheraguro, thosei babaꞌo eigna te eni gloku te keli na.

14Jame ihei ka ghotilo te tirogna leghudi cheke te riso ari ghehati ka ghotilo igre, ghotilo filo glani mae tuana. Thosei fofodu ka mana mala mamaja mana ka puhigna thegna re. 15Nu thosei filo faparini jateula nomi naoka eghu. Te keli na ghotilo cheke faheta kolho ka mana, naugna mana kherada tahati ka khiloau.

Nogna cheke leghu lahu mae Pol

16Iara toreni Lord, mae funei gna pharikeli mala tusu ranghi ghami pharikeli leghu rane nei ka puhi te gnafa. Lord au balumi.

17Iara mae Pol riso kubae ranghi ghami ghotilo ka khamegu thegu. Nogu letas te gnafare iara saen nanghagu na leghu lahu mala laseni teke funu ka iara. Igne puhi te eni koba iara na.

18Iara toreni nogna khokofakasai mae Jisas Kraes noda Lord mala au balumi. Me gnafa. Iara, mae Pol.