Fapea Pita

Fapea Pita

Fapea Letas Teke Risoi Mae Pita

Thoutonu kmo’ei eigna buka igne

Glepo biꞌo te nanga nognani fara mae Pita gognaro na, mana magnahaghedi naikno khiloaure te magra heta ka nodi gloku hatimare mae velepuhi chaichaghi gre. Mae Pita cheke ka mare mala loku famaku kolho ka thofno chekegna God na, teke hata teke mei iheire teke filoni nei nomhini teku nogna farirhiu mae Jisas re.

Kaisei farirhiu chaichaghi te nanga nogna fara mae Pita na eigna cheke te mae Kraes na ginauna theome tangomana teke pulo mei teu igne. Te chekeni mae Pita na, mae Kraes na theome ke pulo mei ngau, naugna God theome magnahagheni kaisei naikno te snivi. Nu mana magnahaghedi naikno te gnafare te koko nakhibo mala kulu pulo mei ka mana.

Keha vido ka letas igne

God neke vahi ghita: 1:1-21

Mae velepuhi chaichaghi: 2:1-22

Ke pulo meigna Kraes: 3:1-18

¹Iara mae Simon Pita kaisei nogna mae gloku nei kaisei nogna mae khuru Jisas Kraes.

Iara riso ari ka ghotilo iheire te hata nomi thofno fatutuani te keli fara ka God jateula ghehati. Tahati te gnafa na kafe hata u fatutuani igne naugna noda God nei Fakarhaida Jisas Kraes, mana kaisei mae keli nei eni unha te doglo fara.

²Ghotilo thofno laseni God nei mae Jisas noda Lord. Eghume, iara toreni God mala bruara ka ghotilo nogna khokofakasai nei pharikeli.

Unha God te magnahaghei eni tahati

³Ka nogna nolaghi God kligna, mae Jisas neke tusu ranghi ghita gobigna lepo te magnahaghedi tahati re mala au ka nakarha te doglo te magnahagheni God. Eghuteuna gobigna lepo igre noda tahati, eigna tahati thofno laseni mae Jisas Kraes mae ihei te kilo ghita ka nogna nolaghi te biꞌo nei nakarhagna te keli. ⁴Ka puhi igne mana neke tusu ranghi ghita glepo te keli fara teke nhaꞌa cheke ranghi ghita. Eigna ka glepo igre tahati au noda nolaghi te mala rikhadi nodi nafnata puhi te diꞌa naiknogna nauthoglu igne. Eghuteuna tahati na tangomana te salofodu ka nakarhagna nei puhigna eghu God te thofno keli fara.

⁵Naugna ka gaoghatho igne, ghotilo hati nhetami na mala loku famaku ka fatutuani igne, eghuteuna fariuriu hata puhi te keli nei glalase te keli. ⁶Ghotilo reireghi fakelidi thinimi are, kegra heta neubane mei narane te ninhigrana, eghuteuna eni leghuni puhigna God te keli. ⁷Ghotilo mala namhadi naikno khiloau are nei namhadi naikno te gnafa. ⁸Eghume, thofno keli fara te kotu haghe te bruara ghotilo ka nafnata puhi te keli igre ka nakarhamire. Naugna ghotilo ginauna theome fiti au kolho. Nu ghotilo ginauna ure sisi te keli ka nakarhamire kate lase fakelini ghotilo noda Lord Jisas Kraes. ⁹Nu ihei te theome au puhi igre ka nakarhagna na, mana jateula kaisei mae te dofu te theome fifilo fakeli ia eghu. Mana ghatho ihonihi God mae ihei teke hata fadelei nakhibo teke edi mana ulu lahu ra.

¹⁰Eghume, kheraguro, God neke kilo ghami nei vahi ghami mala nogna thegna. Hati nhetami na mala filo glani igne ka nakarhami na. Jame eni ghotilo igne na, ghotilo ginauna theome tangomana te tei kokoni u nabrou te tei thokei ka thofno nakarha te tutuani na. ¹¹Eghuteuna God ginauna tangomana te thofno snakre ghami mala ruma ka nauthoglu majaghani te theo ka huigna. Ka nauthoglu igne noda Lord nei fakarhaida Jisas Kraes na King fabrahu tifa tifa.

¹²Tutuani fara, ghotilo lasedi glepo igre, eghuteuna ghotilo jaola kegra heta ka cheke te tutuani teke farirhiu ghami mare igre. Neuba, iara ginauna togho ghami ghotilo mala thosei ghatho ihodi ghotilo glepo igre. ¹³Igne gaoghathogu iara na, karha nga teu iara ka nauthoglu gne, jame te keli na iara togho ghami ghotilo mala thosei ghatho ihodi ghotilo. ¹⁴Naugna iara laseni nakarhagu ka nauthoglu gne theome au raugha. Noda Lord Jisas Kraes neke chekeni igne ka iara. ¹⁵Iara ginauna hata nhetagu na mala togho ghami ghotilo mala theome tangomana ghotilo te ghatho ihodi thofno farirhiu tutuani igre kate lehe iara na.

Thofno nodi nonomho hatimare mae khuru

¹⁶Kate toutonuni ghehati mae khuru gre meigna noda Lord Jisas Kraes na, ghehati neke theome toutonu ka ghotilo famane thoutonu neke hohoro haghe kolho keha naiknoi. Theo. Nu ghetilo mae Jemes nei mae Jone neke thofno filo tathami teke siasigla mae Jisas ka nogna nolaghi biꞌo God na. ¹⁷Eghuteuna ka narane tuana God Kmada neke fafnaknoni nanghagna mae Jisas na, eghuteuna fasiasiglani mana ka nogna nolaghi te biꞌo na. Naugna God mae te nolaghi fara kligna lahu na neke cheke eghu mei, “Igne thofno mae Thugu iara na. Iara namhani mana nei keli taguni eghu mana.” ¹⁸Ghetilo themi neke nomhini naogla igne neke mei funu kligna kate au ghetilo balugna mae Jisas ka thogele blahi na.

¹⁹Eigna igne, ghehati thofno fatutuanidi fara unha teke chekedi hatimare mae profet ra. Eghume, te keli na ghotilo jame jaola loku famaku nodi cheke hatimare mae profet ra, naugna cheke igre jateula kaisei juta te phae kate romno ia eghu. Juta tuana ginauna phae ghilei rane, eghuteuna naphaegna nathunu rane na jateula naphaegna mae Kraes eghu, eghuteuna ginauna phae ke lamnadi nagnafami ghotilo re. ²⁰Nu ghotilo ghaoghatho fakelini igne, eigna theo kaisei mae profet te tutuani te leghuni nogna gaoghatho thegna na te riorisoni chekegna God te au ka buka blahi na. Theo fara. ²¹Naugna nodi cheke hatimare mae profet ra, theo kaisei fata mare thedi te toutonudi glepo igre. Nu mae Tharunga te Blahi neke thofno saghe leghudi mare mala toutonuni cheke teke mei funu ka God.

Hatimare mae velepuhi chaichaghi

¹Tifa na kmana mae profet chaichaghi farihotei naiknodi Israel. Eghuteuna hatimare mae velepuhi chaichaghire ginauna jaola kegra haghe farihoteimi ghotilo. Mare ginauna farirhiu chaichaghi ghami ghotilo nu theo kaisei naikno ghosei te filo glanini u najafra te eni mare na. Eghuteuna mare ginauna fariuriu fadiꞌa ghami ghotilo, naugna mae velepuhi igre neke figri tagruni nodi Lord Jisas, mae ihei teke fakarhidi ka nakhibo. Eghume God ginauna ghosei roꞌedi mare naugna mare neke leghuni nodi puhi thedire. ²Kmana naikno khiloau ginauna jaola leghudi puhi diꞌa te edi mare re. Naugna igne keha naiknore na funu cheke fadiꞌani Nonomho te Keli te thofno tutuani fara igne. ³Mae velepuhi chaichaghi igre na edi kmana thonu chaichaghi, naugna mare magnahaghei hata sileni fara kolho ka ghotilo. Nu God fatedihi mare eidi puhi igre, eghuteuna mana neke ofodi mare funu tifa. Mana theome thuru, nu mana ginauna fatedi mare naugna mana neke kulu chekenihi.

⁴Kate tapla jafra engel re tifa na, God neke kuru teidi Gehena mala au papara mare jare. Mare mala au fabrahu jare ka vido te romno tuana ghilei thokeni narane fate na. ⁵Tifa na neke jaola, mae Noa neke cheke ka naiknore eigna puhi te doglo na. Eghuteuna kate huhughu fara naikno te diꞌa igre, God neke paradi nei kuru meini kaisei nabritha biꞌo mala falehedi. Nu mae Noa nei fitu naikno balugna eghu ngala teke karha na. ⁶God jaola neke fatedi phei namono biꞌo Sodom ghe Gomora, God neke faghamu khaꞌaghidi ne vuhai nakrofu. Igne kaisei thotoghale te mala filoni iheire te huhughuni God nei laseni unha nate thoke mei ka mare nathuꞌu nauriha na. ⁷Nu God neke fakarhini mae Lot ka phei namono igre, Sodom ghe Gomora. Eigna mae Lot gne kaisei mae doglo fara, eghuteuna mana neke au diꞌanagnafa ka puhidi naikno te diꞌare. ⁸Tutuani fara, leuleghu narane na mana au diꞌanagnafa ka unha glepo te diꞌa te filodi ba te nomhidi ka naikno te au balugna re. ⁹Thoutonu igre falalase ranghi ghita Lord ginauna fakarhidi iheire te fatutuani ni mana kate thoke meidi hoholo. Nu iheire te theome doglore, Lord ginauna paradi ghilei thokeni narane te mala fatedi naikno te gnafare. ¹⁰U fate tuana tulao maladi iheire te tapla jafra ka nakhibo te magnahagheni fara thedi, nei maladi iheire te filo faparini nogna nolaghi God.

Mae velepuhi chaichaghi igre thono patugama fara, nei mare magnahaghei te leghudi kolho nagnafadi thedire. Eghume mare theome mhaghu te cheke fadiꞌadi engel di klignare. ¹¹Nu engel gre, neubane au kligna lahu, ba au nolaghi biꞌo ke uludi mae velepuhi chaichaghi gre, mare theome tangomana te cheke fadiꞌani kaisei naikno jateula tuana eghu ke ulugna Lord. ¹²Nu mae velepuhi chaichaghi igre theome tangomana ghaoghatho fakeli nei mare cheke fadiꞌadi unha glepo te theome lasedire. Eghume God ginauna roꞌedi mare jateula naikno te falehe bosu ra eghu. Nu ghotilo laseni bosu na mala lolhoku nei falehe.

¹³Eghuteuna mare ginauna na paradi fara, eigna mae velepuhi chaichaghi igre neke kulu paradi keha naiknore. Mae velepuhi chaichaghi igre magnahaghei fara te hohoro gaghamu te diꞌa, neubane farihotei naublatha. Eghuteuna kate mei ima balumi ghotilo na, mare na famamaja ghami ghotilo fara ka nodi puhi te diꞌare. Nu mare keli tadi fara te mala chaichaghi ka nodi puhi te diꞌa tuare. ¹⁴Leuleghu fata na kaisei glepo ngala te magnahaghei mare na, mala ei puhi ka gaꞌase. Nodi puhi diꞌa igre na theome gnafa ka mare. Mare saosagrodi naikno te theome heta nodi fatutuanire mala jaola fagoigoli. Mare laseni fara puhi mamagna na. Naugna igne God chekenihi te mala paradi naikno igre. ¹⁵Mae velepuhi chaichaghi igre la snivihi ka nabrou te doglo na, eghuteuna mare la tei ihohi, eigna mare leghuni puhigna mae Belam, thugna mae Beo. Mae Belam tifa na neke magnahaghei sileni fara, neuba mana tangomana te hata ka puhi te theome doglo. ¹⁶Nu nogna dongki na neke lhotini mana mala thosei leghuni puhi te diꞌa na. Neubane iho cheke dongki na God neke toghoni dongki na mala cheke jateula naikno eghu. Dongki gne neke cheke faheta ka mana, nei tirognani mae Belam, naugna puhigna Belam na neke thono diꞌa fara.

¹⁷Mae velepuhi chaichaghi igre jateula glokha te moja te theo khoꞌu ia eghu. Mare jateula khoveo te pala tafri ka nuri blahi ia eghu. God kulu tarabanahi kaisei vido te romno fara maladi mare. ¹⁸Mare fahaehaghedi fara eidi nodi cheke te theo nafudire. Mare batudi keha naiknore mala eni unha te diꞌa na ka thinidire. Ka puhi igre mare korho fapulodi naikno teke funu rikha kokodihi puhi te diꞌare. ¹⁹Mare neke nhaꞌa cheke ka naiknore eigna nasnagla na. Nu mare thedi na theome snagla kolho eghu. Mare jateula te sneka eghu ka puhi nate roꞌedi teu mare. Naugna naikno na sneka ka puhi diꞌa te batuni mana na. ²⁰Faꞌunha? Jame lase fakelini naiknore eigna noda Lord Jisas Kraes mae ihei teke fakarhi ghita na meuna, mare na snagla ka puhigna nauthoglu igne. Nu jame teke pulo mare teke edi fabrahu puhi te diꞌa tuare, puhi biꞌo fara ginauna thokedi mare ke uluni teke ulu lahu na. ²¹Uve, te keli na mare thosei laseni nabrou te doglo igne. Naugna theome keli te laseni mare eigna nabrou igne, nei nomhini eigna vetula te blahi igne eghuteuna ke figri tagruni mare nabrou te doglo na teuna. ²²Unha te eni mare igne ne horoghoto fara ka thofno cheke te tutuani ia, “Ke leghugna te lu’a te gnafa na, khuma na neke pulo neke ghamu gluagnare.” Eghuteuna keha cheke na teuna cheke eghu, “Ke leghugna apu te gae na, bosu na nake pulo nake pepele ka chopu na.”

Mae Jisas nake pulo mei

¹Uve kheraguro, igne fapea letas te riso ari iara ka ghotilo na. Iara riso ari ka ghotilo phei letas igre mala togho ghami ghotilo mala ghaoghatho fadoglo. ²Iara magnahaghe ghami ghotilo te ghathodi cheke teke edi hatimare mae profet blahi tifa ra. Eghuteuna ghotilo ghatho dila nogna cheke Lord mae ihei teke fakarhi ghita ia eghu. Ghehati mae khuru gre neke toutonunihi cheke igne ka ghotilo.

³Ghotilo mala thofno laseni eigna glepo igne. Na theome raugha ka nauthoglu gne keha naikno ginauna mala edi glepo te diꞌa te magnahaghedi thedire. Naikno igre ginauna mei maꞌe ghami ghotilo. ⁴Eghuteuna mare ginauna cheke eghu ka ghotilo, “Tore, aheva si mae Jisas na ia? Mana neke nhaꞌa cheke mala ke pulo mei, nu au meu aheva eghu si mana gnea? Mae ku’edara lehe la gnafahi, nu gobigna lepo igre theome ke tughu funu ka narane teke vuavuhagna nauthoglu gne.” ⁵Nu mae igre theome magnahaghei te laseni kaisei glepo. Tifa na God neke cheke kolho, eghuteuna maloa ghe glose gre ne thakle mei. Mana neke vuavuha glose gne mala thakle mei fari hotei khoꞌu, eghuteuna ka khoꞌu mana neke vuavuha gobigna lepo ka nauthoglu gne. ⁶Jateula tuana eghu, God neke rorhoꞌe nauthoglu igne ka khoꞌu. ⁷Nu ka chekegna God tuana la, maloa ghe glose te au teu gognaro gre na ofoniu kolho khaꞌaghi na mala nhako. Maloa ghe glose gre na ofou ghilei thoke mei narane God nate fatedi naikno te diꞌare, eghuteuna kafe faluvudi iheire te theome leghuni mana na.

⁸Uve kheraguro, kaisei glepo ngala te mala ghatho tahuni ghotilo na. Ka gaoghathogna noda Lord na, kaisei narane na jateula kaisei thogha finogha eghu, eghuteuna kaisei thogha finogha na jateula kaisei narane eghu ka gaoghathogna Lord na. ⁹Keha naiknore ka gaoghathodire ne cheke eghu agne, “Tore, noda Lord gne theome leghuni kolho nogna nhaꞌa cheke na!” Nu Lord na theome jateula tuana eghu, naugna mana theome magnahagheni kaisei naikno te au ka glehe fei tifa na, nu mana magnahaghedi naikno te gnafa te mala tughu nagnafa mala ke figri mei ka mana. Eghume mana sasaꞌa te ofo ghami teu ghotilo na.

¹⁰Nu narane mala ke pulo meigna noda Lord na ginauna megei nga mei jateula kaisei mae te mala mei blau te theome laseni tahati narane meigna na ia eghu. Eghuteuna ka narane tuana kaisei naogla biꞌo na mei ka maloa na, eghuteuna maloa na ginauna luvu. Eghuteuna kaisei khaꞌaghi biꞌo ginauna ghamu fateo gobigna lepo te au ke lamnagna maloa na. Nauthoglu igne ginauna jaola dofini baludi gobigna lepo te au ke lamnagna re.

¹¹Eghume gobigna lepo ka nauthoglu gne ginauna groꞌe dofidi, na unha nafnata naikno ghotilo gognaro na? Ghotilo mala au blahi nei au ka nafnata nakarha te magnahagheni God. ¹²Kate ofoni teu nogna narane biꞌo God igne, ghotilo loku heta mala faghose mei narane igne. Ka narane tuana khaꞌaghi na ginauna ghamu fateo maloa na, eghuteuna gobigna lepo ka maloa na ginauna branadi ghilei blalho kolho. ¹³Nu God neke nhaꞌa chekehi mala ke hohoro maloa majaghani nei nauthoglu majaghani, eghuteuna jare nate au naikno te doglore. Eghume tahati ofou kolho mala filodi glepo te majaghani igre.

¹⁴Uve kheraguro, kate ofoni teu ghotilo narane tuana, hatini nhetami na mala au ka pharikeli balugna God. Nakarhami ghotilo re mala keli fara, eghuteuna ghotilo mala doglo fara ke ulugna mana. ¹⁵Noda Lord theome tangomana snakreni narane tuana mala ghosei mei naugna mana magnahaghei te fakarhi ghita kate hogri nagnafa tahati na. God neke batuni kherada mae Pol mala riso ari ka ghotilo nafnata gaoghatho igre. ¹⁶Mae Pol neke rioriso eigna igne ka nogna letas te gnafare. Ka nogna letas mana re, keha chekere ninhigrana fara. Keha naiknore theome lasedi glepo tuare, naugna nodi fatutuani theome heta. Eghume mare tughu koba gaoghathodi nogna cheke mana re ghilei tei ka keha nabroui. Mare jaola rurutha fajafra keha grioriso te blahire. Nu mare roꞌedi thedi kolho kate eni tuana.

¹⁷Nu ghotilo kheraguro, ghotilo lasedihi u cheke igre. Reireghi fakeli ghami themi, na eghunu korho fadelei ghami nodi cheke mae te theome leghu vetula igre eghu, te eghu na ghotilo ginauna theome au heta ka mae Jisas. ¹⁸Nu ghotilo mala au fabrahu ka nogna khokofakasai nei glalase noda Lord Jisas Kraes.

Tahati kilo fnaknoni tifa tifa nanghagna noda Lord mae ihei teke fakarhi ghita. Amen. Me gnafa. Iara, mae Pita.