Fapea Korin
Fapea Letas Teke Riso Tei Mae Pol Ka Khiloau Korin
Thoutonu kmo’ei eigna buka igne
Keha naikno ka khiloau Korin mare neke diꞌa tadi fara ka mae Pol eigna kaisei letas teke riso tei mana ka khiloau jare na, eghuteuna mae Pol magnahaghei te kulu fadoglini puhi igne. Mana magnahaghei fara te au fodu fakeli baludi nei toghodi eghu naikno te gnafa ke lamnagna khiloau gne.
Mae Pol ne cheke ka mare eigna teke cheke faheta fara mana ka keha letas na. Mana gleale’a fara kate nomhini te leghuni mare puhi te doglo na. Keha glepo te chekeni mana na, mana magnahaghedi naikno khiloau ka namono Korin te mala toghodi naikno khiloau te au Jerusalem te au papara fara. Mae Pol jaola neke cheke faheta ka keha mae khuru chaichaghi te au ka namono Korin.
Keha vido ka letas igne
Pol nei khiloau Rom: 1:1–7:16
Salo sileni maladi naikno khiloau Jerusalem: 8:1–9:15
Pol kaisei mae khuru tutuani: 10:1–13:13
11Iara mae Pol. God neke vahi ghau iara mala nogna khuru mae Jisas Kraes. Ghepa mae kherada Timoti te riso ari letas igne ka ghotilo naikno khiloau te au Korin nei ka keha namono ke lamnagna Provins Akaia.
2Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.
Mae Pol cheke fakelini God
3Tahati mala cheke fakelini God nei Kmagna noda Lord Jisas Kraes! Mae ihei te kokhonidi nei tarabana mala toghodi teu naikno te gnafare. 4Mana togho ghami ghehati ka thua hoholo, mala nabami te toghodi keha naiknore te au ka thua hoholo, jateula God te togho ghami ghehati gne eghu. 5Ghehati au papara ka kmana puhi jateula Kraes eghu, eghuteuna God neke tusu ranghi ghami nogna thotogho biꞌo fara eigna ghehati nogna Kraes. 6Eghuteuna God togho ghami ghehati kate au papara eimi ghotilo na. Kate togho ghami ghehati God na, mana jaola farerheta ghami nei togho ghami ghotilo mala hatini u thofno karha na, neuba ghotilo ne papara jateula te eni ghehati gognaro gne neu. 7Ghehati thono lase fakelini eigna ghotilo papara balumi ghehati, God ginauna togho ghami jateula te eni mana ka ghehati gne eghu.
8-9Kheraguro, ghehati magnahaghe ghami ghotilo te lase fakelini eigna unha teke eni ranghi ghami ka Provins Esia. U puhi igre ninhigrana fara ranghi ghami ghehati. Tutuani fara, ghehati neke cheke eghu fari themi, “Tahati gne namo lehehi!” Nu puhi te eni igne theome mala rouronu ghami themi, nu mala rouronuni God ngala ihei te fakarha fapulodi iheire tela lehehira. 10God neke fakarha ghami ghehati kate namo lehe na, eghuteuna mana jaola ginauna nake fakarha ghami ghehati ke leghu na. Ghehati fatutuani ni fara igne eigna mana na fakarha ghami ghehati fabrahu, 11naugna ghotilo togho ghami koba ka nomi tharaire. God ginauna nomhidi nodi tharai naikno te kmanare malami ghehati eghuteuna mana ginauna togho ghami ghehati. Aonu kmana naikno ginauna cheke fakelini God kate togho ghami ghehati mana na!
Mae Pol neke tughu nogna thei na
12Igne unha te fahaehagheni nei thofno laseni teu ghehati ka nagnafamire, eigna ghehati theome leghuni nogna glalase naikno na kate edi gobigna lepore ka nakarhamire. Theo. Tutuani, naugna God tusu mei u khokofakasai ranghi ghami, ghehati leghuni kolho puhi te doglo te magnahagheni God na nei ghehati cheke tutuani koba. Leuleghu fata ka nakarhami kani au teku balumi ghotilo na, ghehati neke eni fara igne. 13-14Ghehati theome neke rioriso ari ka ghotilo glepo te ninhigrana, nu ka glepo te bligi te tangomana ghotilo te laseni teu iu’iju gna na. Neuba ghotilo ne theome thofno lase fakeli eimi ghehati neu, ghehati ghathoni eigna ghotilo ginauna thofno lasedi gobigna lepore eimi ghehati. Eghume kate pulo meigna noda Lord Jisas na, ghotilo ginauna tangomana te fahaehaghe ghami ka ghehati jateula ghehati ginauna tangomana te fahaehaghe ghami ghotilo.
15Iara neke magnahagheni fara te kulu ari filo ghami ghotilo tifa na naugna iara thofno fatutuani ghami ghotilo te lase ghau iara te loku fadoglo ke ulumi. Tutuani, iara neke ghathoni kate filo ghau iara na ghotilo tangomana te phei fata gleale’a na. 16Uve, kate ghathoni iara te mala ari ka Provins Masidonia na, iara neke magnahaghei te filo ghami ghotilo ka nogu thei na. Eghuteuna iara neke ghaoghatho mala fapea filo ghami ka teke pulo meigu na. Ka narane tuana iara neke ghatho ghami ghotilo te togho ghau mala tei thoke iara Judia. 17Ba, kate tughu iara gaoghathogu na ne cheke kolho iara naugna ne theome leghuni unha teke kulu ghathoni iara na neu si ghotilo ia? Theo, iara theome edi gaoghatho igre mala leghudi kolho unha te magnahaghedi thegure, nei iara theome nafnata naikno te kaisei fata chekedi ngala “Uve” ghe “Theo” gne.
18God na cheke tutuani koba eghuteuna iara jaola chekeni unha te tutuani ka ghotilo. Eghume nogu nhaꞌa cheke iara ka ghotilo na theome kaisei “Uve” nei theome kaisei “Theo” eghu kaisei fata ngala. 19Tutuani, iara baludi mae Silas ghe mae Timoti neke toutonu eigna mae Jisas Kraes Thugna God. Eigna mae Jisas na neke theome nafnata naikno te kaisei fata chekedi ngala “Uve” ghe “Theo” gre. Theo, nu mana chekeni koba unha te tutuani na. 20Nogna nhaꞌa cheke te gnafa God re tutuani ka mae Jisas. Naugna igne tahati chekei “Amen” ka nanghagna mana mala cheke fakelini God. 21God thegna te togho ghami ghotilo nei togho ghami ghehati teu te mala au rheta noda fatutuani na ka Kraes. God thegna neke vahi ghita mala nogna naikno mana. 22Mana neke lilisei nogna fagaglana na ka tahati mala laseni te nogna mana na. Eghuteuna lilisei ke lamnada nogna Tharunga te Blahi na mala laseni nogna nhaꞌa cheke mana re ginauna mei tutuani ka tahati.
23God laseni unha te chekeni iara ka ghotilo igne thofno tutuani fara, naugna mana thofno laseni nagnafagu iara na. Tutuani, iara theome ariu ka ghotilo Korin, naugna iara theome magnahaghei te para ghami ghotilo na. 24Ghehati theome magnahagheni te sagheleghudi nomi fatutuani ghotilo re, naugna ghehati lase ghami ghotilo tela kegra hetahi ka nomi fatutuani na ka God. Nu ghehati magnahagheni te loku balumi ghotilo mala tangomana ghotilo te gleale’a na.
21Eghume te ghathoni iara eigna igne na, iara na theome ariu ka ghotilo naugna iara neke theome magnahaghei mala ke fadiꞌa nagnafami ghotilo. 2Eigna jame te fadiꞌa nagnafami iara na, ihei gne nate fakeli nagnafagu iara ginauna? Naugna ghotilo ngala tangomana te mala faglealeꞌa ghau iara na. Nu ghotilo theome tangomana te gleale’a na jame te fadiꞌa nagnafa ghami iara na. 3Ka gaoghatho tuana teke riso arini iara letas na ka ghotilo tifa ia. Neuba iara neke magnahaghei te ari filo ghami ghotilo na, iara theome magnahaghe ghami ghotilo naikno te tangomana te mala faglealeꞌa ghau iara ra te fadiꞌa nagnafa ghau iara na. Te thofno ghathoni iara na, ghotilo te gnafa na mala gleale’a balugu iara. 4Tutuani fara, kate riorisoni letas tifa ia, iara neke diꞌanagnafa fara balu tanhi fabiꞌo kolho. Eghuteuna iara neke theome risoni letas tuana mala diꞌanagnafa ghotilo neku, nu mala laseni ghotilo hui te thofno namha ghami fara iara na kolho.
Mae Pol ne hata fadeleidi nakhibogna kaisei mae
5Mae ihei ka ghotilo te fadiꞌa nagnafadi keha naiknore igne theome thofno eni ranghi ghau iara, nu mana jateula te fadiꞌa nagnafa ghami ghotilo hui eghu kolho. Iara theome magnahaghei te toutonuni kaisei glepo te thono goigoni naikno na. 6Puhi te eni ghotilo naikno kmana ranghini mae tuana la nabagnahi. 7Nu gognaro na ghotilo hata fadeleidi nakhibogna mana re nei toghoni eghu mana mala thosei diꞌanagnafa mana. Na eghunu diꞌanagnafa fara mana me ghilei babaꞌo eghu. 8Eghume iara tore ghami ghotilo mala namhani fara mana, mala laseni mana te namhani mana ghotilo na. 9Iara neke riso ari kaisei letas ka ghotilo tifei naugna iara neke magnahaghei fariuriu ghami ghotilo mala laseni te leghudi koba ghotilo unha te chekedi iara ka ghotilo ra. 10Ihei te hata fadeleidi ghotilo nakhibognare, iara jaola hata fadeleidi nakhibo tuare ka mana, eghu te edi mana unha te naba iara te hata fadeleidi ka mana re. Iara hata fadeleidi nakhibogna mana re ke ulugna Kraes, naugna iara magnahagheni te togho ghami ghotilo. 11Ka puhi igne Satan ginauna theo nogna nolaghi te mala saosagro ke klignada, naugna tahati lasedihi nogna gaoghatho mana re.
Na au kmoꞌei mae Pol Troas
12Kate posa iara Troas te toutonuni u Nonomho te Keli eigna Kraes na, iara laseni Lord na neke tarabana kaisei nabrou malagu iara te togho ghau mala edi kmana gloku te keli jare. 13Nu iara neke thono nanga nogu fara, naugna iara neke theome ludeni mae kherada Taetus. Aonu iara kubaedi kolho naiknore doglo nga me mei Masidonia.
Kraes na la uluhi
14Nu ghehati ne cheke fakelini God, mae ihei te togho ghami fabrahu balugna Kraes te mala uluni ghehati u magra na ka vido aheva mana teke kuru lao ghami na. God ne loku ke lamnami ghehati mala tangomana glalase eigna Kraes na te tei tongana heva heva jateula insens te siri keligna fara. 15Ghehati na jateula nogna insens Kraes eghu mala kilo fnaknoni God ke lamnadi iheire God teke fakarhidi nei iheire te snivi fabrahu. 16Ka iheire te snivi fabrahu re, sisiri igne siri diꞌagna fara, eghuteuna hata mei glehe ka mare. Nu ka iheire teke fakarhidi God re u sisiri igne thofno keli fara eghuteuna hata mei karha ka mare. Eghume ihei te nabagna na gloku igne?! Iara theome nabagu! 17Ghehati theome jateula kmana naikno te magnahaghei sileni kolho kate toutonuni chekegna God na ia eghu sia. Theo. God neke vahi ghami ghehati, eghuteuna ghehati chekeni koba ka nagnafa te tutuani ke ulugna mana. Ghehati toutonuni chekegna mana na naugna ghehati nogna mae gloku Kraes.
31Ba, ne fapea fariuriu fafnakno ghami themi kolho ghehati neu si ghotilo ia? Theo. Ghehati theome jateula keha naikno te magnahaghei kaisei mae te mala rioriso letas eidi thedi ka ghotilo te mala laseni ne thofno nogna mae gloku God tura eghu sia. Tutuani, ghehati jaola theome magnahaghei kaisei letas funu ka ghotilo ba funugna ka iheinga. 2Ghotilo themi ngala te mala jateula kaisei letas teu te mala toutonu eigna nakarhami themi ghehati na ke lamnami ghotilo. Letas tuana theome rioriso ka pepa nu rioriso ka nagnafami ghehatire! Eghuteuna naikno te gnafare tangomana te kafe iu’ijuni nei laseni eghu letas igne. 3Eghuteuna naiknore thofno laseni igne, ghotilo jateula letas teke risoni Kraes hata teke ari ghehati ia eghu. Letas igne Kraes neke theome rioriso ka ink, nu ka Tharunga gna God mae ihei te karha te tifa teke rioriso na. Eghuteuna mana neke theome rioriso ke kligna thina te tataba, nu neke rioriso ke lamna nagnafami ghotilo re.
4Ghehati tangomana te chekeni igne, naugna ka Kraes ghehati biꞌo nomi fatutuani na ka God. 5Tutuani, ghehati theo kaisei nomi nolaghi themi te mala chekeni ghehati nabami si te mala eni gloku igne teuna. Nu God ngala te fatangomana ghami ghehati te mala eni gloku igne na. 6Tutuani, God neke eni kaisei nhaꞌa cheke majaghani baludi nogna naiknore. Mana ngala te fatangomana ghami ghehati te mala loku ranghini mana mala toutonu ka naiknore eigna nhaꞌa cheke majaghani na. Igne u nabrou teke eni mana mala fakarhidi mare. U nhaꞌa cheke majaghani igne theome glepo neke rioriso soru ka nogna vetula mae Moses nu nogna Tharunga te Blahi. Naugna vetula tuana mala faleheni naikno na, nu Tharunga te Blahi na mala tusu meini u karha na.
7Nogna gloku vetula teke rioriso soru mare ke klignadi phei thina tataba igre tifa na, mala falehe naikno kolho. Eghuteuna vetula igne neke mei balu siasigla gna nogna nolaghi biꞌo God, neke siasigla mei ka thinigna mae Moses na. Eghuteuna, neuba siasigla igne ne thoghei ne tei dofini ka thinigna mana na, naiknodi Israel re neke theome tangomana te filo fabrahu ka thinigna mana na. 8Nu siasigla gna nogna nolaghi biꞌo God teke mei balugna nogna gloku Tharunga te Blahi na biꞌo uluni fara teke tifa na. 9Tutuani, nogna gloku vetula na au tagna siasigla nogna nolaghi biꞌo God na, neuba, nogna gloku vetula na mala fate falehedi naiknore. Eghuteuna nogna gloku Tharunga te Blahi na mala fadoglodi naiknore ke ulugna God. Igne au siasigla nogna nolaghi biꞌo God te keli fara ulu tulao gna tifa ia. 10Eghume u siasigla teke filoni naiknore tifa ka nogna vetula mae Moses na tuana la sala’uhi gognaro na, naugna siasigla gna nogna gloku Tharunga te Blahi na thofno biꞌo fara. 11Eghuteuna nogna gloku vetula theome tangomana te au fabrahu na, nu neuba, tifa na au tagna siasigla gna nogna nolaghi biꞌo God. Eghume nogna gloku Tharunga te Blahi na ginauna au fabrahu, eigna au tagna siasigla nogna nolaghi biꞌo God te uluni fara tifa ia!
12Eghume naugna ghehati thofno laseni nogna nolaghi biꞌo God te au fabrahu, ghehati theome tangomana te mhaghu kate loku ranghini Lord na. 13Ghehati theome jateula mae Moses eghu. Mana neke toku tafru thinigna na mala theome filoni naiknodi Israel re. Naugna siasigla gna God na ne thoghei ne tei dofini ka thinigna mana na. 14-15Nu gaoghathodire neke thono romno fara tifa na. Neuba gognaro gne, kate iu’ijuni naiknore u nogna vetula mae Moses na, gaoghathodire romnou ngala. Tutuani, Kraes na ngala te hata fadelei gaoghatho te faromnodi mare igne kate kaisei mare balugna mana na. 16Nu tangomana meu ngala te hata fadelei na eghu, naugna grioriso te blahi na cheke eghu, “Kate figri ihei ka Lord na, mana na hata fadelei gaoghatho te faromnodi mare igne.” 17Te chekeni teu ka grioriso te blahi igne “Lord” na mae Tharunga te Blahi, eghume ihei te figri ka Lord na gaoghathogna na thofno snagla mala fatutuani ni mae Jisas Kraes naugna Tharunga gna Lord na au ka mana. 18Tahati te gnafa na theome nabada kaisei glepo te mala toku tafrudi thinidare jateula teke eni mae Moses tifa ia eghu kate mei te namo ka Lord na. Nu tahati mala fakakhana u siasigla gna nogna nolaghi biꞌo Lord na. Eghuteuna leuleghu fata na siasigla gna Lord mae ihei te Tharunga igne mana na loku ke lamnada mala ghilei tughu tahati jateula thegna mana eghu.
4Toutonu u Nonomho te Keli
1God kokhoni ghami ghehati neke tusu mei gloku blahi igne, eghume ghehati theome tangomana te babaꞌo ka gloku igne na. 2Nu ghehati lisei fadelei glepo te poru ke lamnami te tangomana famamaja ghami teu, nei theome lase chaichaghi, nei theome tangomana te tuthughu chekegna God na. Ghehati farirhiuni unha te tutuani igne te falalase ghami themi ka naikno te gnafare. Mare tangomana te lase ghami ka nagnafadire te unha nafnata naikno ghehati na nei jaola ghehati thofno leghuni Lord. 3Eghuteuna jame te theome fakakhana ka naikno u Nonomho te Keli te toutonuni ghehati igne na, u Nonomho te Keli igne na theome kakhana kolho ka naikno te snivi fabrahu re. 4Eigna Satan mae ihei te funei frunini nauthoglu igne ne faromnodi nagnafadi naikno te theome fatutuanire. Eghume mare theome tangomana te filoni u naphae gna Nonomho te Keli te thofno fatakleni nogna nolaghi biꞌo Kraes na, mae ihei te thofno thotoghale gna God na. 5Ghehati theome toutonu eimi themi, nu ghehati toutonu eigna mae Jisas Kraes na Lord. Eghuteuna ghehati nomi mae gloku ghotilo mala toutonu eigna mae Jisas. 6Naugna God neke chekeni naphae na mala siasigla kate romno na, eghuteuna God tuanala te fasigla mei u naphae gna na ka nagnafami ghehatire. Mana eni igne mala lase fakelini ghehati nogna nolaghi biꞌo God te sigla mei ka thinigna Kraes.
7Nu neuba ghehati ne hatini gloku te mala toutonu u Nonomho te Keli na, ghehati tharuma naikno kolho jateula dis te hohoro ka glose ia eghu kolho. Eghume naikno te gnafare kafe laseni u nolaghi biꞌo te mala laseni gloku igne neke mei funu ka God, theome neke mei funu ka ghehati. 8Kmana fata mare ei puhi biꞌo ka ghehati, nu mare theome tangomana te tapla fapari ghami ghehati na. Kmana fata ghehati nanga nomi fara, nu gaoghathomire theome babaꞌo. 9Kmana naikno para ghami ghehati, nu God na au balumi fabrahu. Kmana fata mare fakabru ghami, nu mare theome tangomana te roꞌe ghami ghehati na. 10Leuleghu fata na, nogna glehe mae Jisas na thakle ka thinimi ghehatire, mala jaola thakle ka thinimi ghehati re nakarhagna mae Jisas na. 11Leuleghu fata na, naiknore fariuriu falehe ghami ghehati eigna ghehati ne leghuni mae Jisas. Ka puhi igne nakarhagna mae Jisas na thakle ka thinimi ghehati te tangomana te mala lehe kolho na. 12Neuba ghehati namo lehe koba kate toutonuni u Nonomho te Keli igne, ghotilo tangomana te hatani u thofno karha na.
13Grioriso te blahi na ne cheke eghu, “Iara neke cheke naugna iara neke fatutuani.”4:13 Sam 116:10. Nomi fatutuani ghehati na kaisei nanaba ka tuana. Eghume ghehati toutonu eigna Kraes naugna ghehati ne fatutuani ni mana. 14Ghehati laseni God na neke fakarha fapuloni noda Lord Jisas Kraes. Eghuteuna mana ginauna nake fakarha fapulo ghami ghehati jateula mae Jisas eghu. Eghuteuna mana ginauna hata ghami ghehati tei balumi ghotilo ka thofno namono gna mana na. Tahati ginauna kegra fodu ke ulugna mana jare. 15Gobigna lepo igre mala togho ghami ghotilo. Eghuteuna jateula igne teu te jifla te tei nogna khokofakasai God na ka naikno te kmanare, naiknore ginauna cheke fakelini God mala fodu salaꞌui nafnaknogna God na.
Tahati fatutuani nogna nhaꞌa cheke God na
16Naugna igne ghehati theome nigra ka gloku na. Neuba thinimi gre ne thoghei ne diꞌa nei nigra neu ne tei ngau, tharungamire majaghani fabrahu leuleghu narane. 17Ghehati au papara katha vido te kmoꞌei kolho gognaro na, nu hoholo igne mala togho ghami mala hatani u nakarha te keli te theo ka huigna na ka God kligna! Nakarha igne ke uluni hoholo tuana. 18Eghume ghehati theome ghaoghatho eigna unha te filoni ka tathada na, nu ghehati ghaoghatho eigna unha te theome filoni nga teu tahati. Glepo te filodi tahati ka tathadare theome au raugha. Nu unha te theome tangomana te filoni tahati na, tuana nate au fabrahu ginauna.
5Namonoda na kligna
1Tahati laseni kate lehe kau nauthoglu gne tahati tangomana te tei au ka thini majaghani te tusu ranghi ghita God kligna na. God ginauna nake vuavuha thini tahati gne mala au fabrahu. Naikno na theome tangomana te vuavuha thini tuana. 2Gognaro na tahati thono hongo ghitani fara thinida igre. Tahati magnahagheni fara te au ka thini majaghani gna kligna. 3Naugna kate au tahati ka thini te majaghani na, thini te majaghani igne na au fabrahu ka tahati tifa tifa. 4Nu tahati au ngau ka thinida ka nauthoglu igne eghuteuna thini igre tahu nei hongo ghitani eghu, nu tahati theome magnahaghei te koko thini igre. Theo. Tahati magnahagheni ngala thinigna kligna na te mei toku tafru ghita, eghuteuna thini te lehe igre ginauna thafru kau karha. 5God neke vuavuha ghita mala tughu tahati neku, eghuteuna mana neke tusu ranghi ghitahi u Tharunga te Blahi na igne kaisei nhaꞌa cheke eigna u karha majaghani nate thofno tusu ranghi ghita na.
6-7Eghume tahati theome nanga noda kolho, neuba unha ne eni ranghini ghita. Eigna nakarhada tahati na u nakarha fatutuani, theome leghuni unha te filodi tahatire. Naugna tahati laseni te au teu tahati ke lamnadi u thini igre, tahati theome thofno namo ka Lord ka vido aheva te au mana na. 8Uve, tahati theome nanga noda. Tutuani, tahati magnahagheni fara te tei kokodi thini igre mala au balugna Lord. 9Nu igne kaisei glepo te ulu na, neuba tahati ne au ka nauthoglu igne ba namono kligna, tahati magnahagheni Lord te gleale’a ka unha te edi tahatire. 10Tahati laseni, tahati te gnafa na ginau ari kegra ka fate ke ulugna Kraes. Mana ginauna taba ghita hui, leghuni unha teke eni tahati ka nakarhada na kau nauthoglu igne, te keli ba te diꞌa.
Tahati kheragna God
11Naugna igne ghehati tangomana te thofno ghatho tahuni Lord, nei fariuriu mala toghodi naiknore mala fatutuanidi nomi chekere eigna thofno karha. God na lase ghami farahi ghehati, eghuteuna te ghathoni iara na ghotilo jaola lase ghami fara ghehati. 12Eghume, ghotilo laseni igne, eigna ghehati theo ngau te fariuriu hironi kaisei nabrou te mala fafnakno ghami themi na. Nu ghehati magnahagheni te falalase ari ka ghotilo unha teke edi ghehati re, mala tangomana ghotilo te fahaehaghe ghami ghehati na. Aonu ghotilo ginauna au glepo te mala chekedi ka iheire te lase fahaehaghe eidi unha te keli fifilodi ke kosire, nu mare theome nangadi unha te au ka nagnafadire. 13Keha naiknore te chekeni na ghehati noli. Jame te eghu na, naugna ghehati ne loku heta malagna God. Nu tutuani gaoghatho te keli na au ka ghehati eghuteuna gaoghatho tuana mala togho ghami ghotilo. 14Nogna namha Kraes na sagheleghu ghami ghehati. Naugna ghehati laseni kaisei Kraes ngala teke lehe tughu ghita te gnafa na. Eghume tahati te gnafa na jateula te lehe balugna mana eghu. 15Kraes na neke lehe tughu ghita gnafa mala tangomana tahati te karha teu gre mala thosei leghudi gaoghathoda thedare. Tahati mala leghuni gaoghathogna Kraes mae ihei teke lehe tughu ghita nei ke karha fapulo teu gognaro gne.
16Eghume gognaro na ghehati theome fateni kaisei naikno leghuni nogna gaoghatho naiknogna nauthoglu gne. Tifa na ghehati neke fateni Kraes leghuni nogna gaoghatho naikno na, naugna ghehati gaoghathomi na ne khogla naikno kolho mana eghu. Nu gognaro na ghehati theome eni tuana. 17Tutuani fara, ihei te nogna Kraes na, mana kaisei naikno majaghani. Glepo te thonare la theohi ka mana, eghuteuna glepo te majaghanire teke mei au ka mana re. 18-19Gobigna lepo igre God ne edi ranghi ghita. Naugna ka nogna gloku Kraes na, God neke hata fapulo ghita mala au fakeli balugna mana. Eghuteuna mana neke tusu mei ka ghehati gloku igne mala ke hata fapulo keha naikno te snivi fabrahu teu ka nakhibo mala au fakeli balugna God. Eghuteuna mana ginauna theome ke ghathodi u nakhibognare. 20Eghume God neke kilo ghami ghehati mala toutonu eigna mae Kraes. Eghuteuna kate eni ghehati igne, jateula God thegna ngala teke ehadi naiknore mala mei ka mana. Uve, ghehati thofno tore ghami ghotilo ka nanghagna Kraes mala ke pulo mei ke au fakeli balugna God. 21Kraes na theo kaisei nakhibogna. Nu te mala togho ghita na, God neke lisa lao ke kligna gna mana nakhiboda te gnafare. God neke eni igne mala tangomana tahati te doglo ke ulugna God.
61Ghehati kafe orio loku balugna God, eghume ghehati thofno tore ghami ghotilo mala ghatho tahuni u khokofakasai teke hata ghotilo ka God igne. Thosei lisa lao khokofakasai igne mala theo nafugna. 2Eigna God neke cheke eghu,
“Ka vido narane te mala togho ghami na,
iara neke nomhi ghami ghotilo.
Ka narane te mala fakarhi ghami na,
iara neke togho ghami ghotilo.”6:2 Isa 49:8.
Filo si ghotilo! Gognaro gne vido narane God te mala nomhi ghami ghotilo na, eghuteuna gognaro gne u narane God te mala fakarhi ghami ghotilo na.
Vido te ninhigrana ranghini mae Pol
3Ghehati theome magnahagheni kaisei naikno te filoni kaisei najafra ka nomi gloku ghehati na. Eghume ghehati theome eni kaisei glepo te diꞌa te mala snakreni kaisei naikno te filoni kaisei nabrou te mala cheke faparini gloku te eni ghehati gne. 4Nu ghehati falalase ghami themi te nogna mae gloku God na ka unha te edi ghehati re. Ghehati keli tami kolho te thafodi hoholo ba thua nafnata glepo te ninhigrana te mei ka ghehati. 5Mare puri ghami nei koko lao ghami ka suga sosolo. Naiknore diꞌa tadi ghami nei magri ghami. Ghehati loku heta, keha fatare ghehati theo kaisei vido mala thuru ba te mala ghamu na. 6Ghehati falaseni eigna ghehati nogna mae gloku God ka nomi glalase eigna Nonomho te Keli na. Puhimire klino fara. Ghehati theome tangomana te ghosei te diꞌatami na nei ghehati tangomana te keli ranghini ihei. Tharunga te Blahi na au ka ghehati, nei u namha tutuani te mala namhani ihei na au ka ghehati. 7Ghehati tangomana te toutonuni u cheke te tutuani na, nei nogna nolaghi God na au ka ghehati. Ghehati tangomana te leghuni puhi te doglo ke ulugna God na, eigna tangomana te togho ghami ghehati te mala magrini mae naoka ka puhi te gnafa igre. 8Keha naiknore ghatho tahu ghami, nu keha naiknore fapari ghami. Keha naiknore cheke fakeli ghami, nu keha naiknore cheke fadiꞌa ghami. Keha naiknore kilo ghami mae velepuhi chaichaghi, nu ghehati chekeni ngala unha te tutuani na. 9Mare chekeni ne theome mae khuru tutuani ghehati teuna, nu naikno te gnafare lase ghami ghehati te thofno mae khuru tutuani na. Ghehati namo lehe, nu ghehati karha meu ngala. Mare tangomana te para ghami, nu mare theome tangomana te falehe ghami. 10Mare tangomana te fadiꞌa nagnafa ghami na, nu ghehati gleale’a fabrahu kolho. Ghehati kuma fara ka nauthoglu igne, nu ghehati toghodi kmana naikno mala dedei kligna. Ghehati theo kaisei nomi glepo ka nauthoglu igne, nu ghehati thofno khotodi glepo te gnafa te au kligna.
11Uve kheraguro ka namono Korin! Ghehati cheke ari ka ghotilo gaoghathomi te gnafare, eghuteuna ghehati thofno namha ghami ghotilo ka nagnafamire. 12Jame te mei kegra fanogra kaisei glepo ka noda namha na, glepo igne mei funu ka ghotilo. Naugna iara thofno laseni eigna ghehati theome gnafa te namha ghami ghotilo na! 13Iara cheke ka ghotilo jateula te cheke ka thugu eghu. Ghotilo mala falalase puhi te keli teke falalase arihi ghehati ka ghotilo igne. Ghotilo mala falalaseni te namha ghami ghehati tutuani na!
Thosei leghuni puhidi iheire te theome fatutuani
14Ghotilo nhogri ka iheire te theome fatutuani, eghume thosei fariuriu loku baludi. Eigna unha te keli na theome tangomana te loku fodu ka unha te diꞌa na. Eghuteuna u naphae na theome tangomana te au fodu ka gromno na. 15Kraes na theome tangomana te kaisei gaoghatho balugna mae Satan. Eghuteuna ihei te fatutuani na theome tangomana te kaisei gaoghatho balugna mae ihei te theome fatutuani na. 16Nogna Sugablahi God na theome mala fodu ka mumuju. Jaola ghotilo laseni eigna tahati na nogna Sugablahi God mae ihei te karha te tifa! Naugna God neke cheke eghu,
“Iara ginauna mala au baludi nogu naiknore,
eghuteuna iara ginauna mala tei baludi.
Iara ginauna mala nodi God mare,
eghuteuna mare ginauna mala nogu naikno iara.”6:16 Lev 26:12; Jer 32:38; Esi 37:27.
17Naugna igne Lord ne cheke eghu,
“Lisa laodi naikno tuare,
eghuteuna ghotilo mala au fadelei ka mare.
Ghotilo mala thosei haboni kaisei glepo te thona ka tathagu iara na.
Jame te leghuni ghotilo igne na, iara ginauna gleale’a mala hata ghami ghotilo.”6:17 Isa 52:11; Esi 20:34,41.
18“Eghuteuna iara ginauna jateula Kmami eghu ghotilo,
eghuteuna ghotilo ginauna jateula thugu nalhaꞌu nei gaꞌase eghu iara.
Iara God mae ihei te au nolaghi te gnafa te chekeni igne.”6:18 2Sa 7:14; 7:8.
71Kheraguro, nhaꞌa cheke te gnafa igre neke edi God ranghi ghita. Naugna igne tahati mala au fadelei ka thua nafnata glepo tangomana te fathonadi thinida ba gaoghathodare. Naugna tahati ghatho tahuni fara God, tahati mala thofno leghuni puhi te blahi na.
Nogna gleale’a mae Pol
2Ghotilo mala falalaseni te namha ghami ghehati na. Ghehati theome eni kaisei najafra ranghini kaisei naikno. Ghehati theome goigonini kaisei naikno, nei ghehati theome chaichaghini kaisei naikno. 3Iara theome chekeni igne mala cheke faparidi puhimi ghotilo re. Theo. Iara neke chekehi ka ghotilo, ghehati namha ghami ghotilo fara, eghuteuna neuba tahati ne karha fodu ba ne lehe fodu tahati ginauna kaisei fabrahu ngala. 4Tutuani fara, iara theo kaisei ghatho peapea eimi ghotilo. Iara jaola fahaehaghe ghami fara ghotilo. Neuba thua nafnata puhi gre ne mei ka ghehati, iara thofno gleale’a fara ka vido tuana.
5Kate tei posa ghehati Masidonia na, ghehati neke theome gnafa. Naugna thua nafnata puhi te edi ka vido tuana. Naiknore mei fapoaphola balumi ghehati eghuteuna ghehati themi na nanga nomi fara. 6Nu neuba, God neke faglealeꞌa ghami ghehati kate mei posa mae Taetus na. Naugna God na tangomana te toghodi iheire te diꞌanagnafa mala ke gleale’a. 7Theome eigna te mei mae Taetus agne na kolho te gleale’ani ghehati na, nu jaola eigna ghotilo te fakelini nagnafagna mana na. Uve, kate mei posa agne na, mana neke mei toutonu ka ghehati thilo glepo: eigna ghotilo magnahaghei ghau iara fara te ari filo ghami, nei ghotilo diꞌanagnafa fara te ei puhi ranghi ghau iara nei magnahaghei te kegra balugu gognaro. Eghume iara thofno gleale’a gognaro na.
8Neuba iara ne fadiꞌa nagnafa ghami ghotilo ka letas teke riso ari iara tifa ia, gognaro na iara theome diꞌanagnafani tuana. Tutuani, iara laseni te fadiꞌa nagnafa ghami iara na eghuteuna iara neke diꞌanagnafa eigna tuana tifa. Nu ghotilo diꞌanagnafa katha vido kmoꞌei kolho. 9Nu iara gognaro na gleale’a. Theome eigna te fadiꞌa nagnafa ghami ghotilo, nu naugna nomi diꞌanagnafa ghotilo re mala ke tughu nagnafa. Ghotilo diꞌanagnafami ka puhi te magnahaghei God na, eghume nogu letas iara na theome goigoni ghami ghotilo. 10Mae ihei te diꞌanagnafa leghuni u puhi te magnahagheni God na, mana tangomana te tughu nagnafa na, eghuteuna God tangomana te fakarhini mana na. Eghume tahati theome tangomana te diꞌa tada ka nafnata puhi tuana. Nu mae ihei te diꞌanagnafa leghuni nogna puhi naikno kolho na, mana tangomana te leheni na. 11Kate ghathoni ghotilo unha te diꞌanagnafani ghotilo na, ghotilo lasenihi puhi tuana mei ka ghotilo leghuni unha te magnahagheni God na. Tutuani, puhi tuana togho ghami ghotilo mala fariuriu fara te eni glepo te keli na. Diꞌanagnafa tuana jaola tangomana te falalaseni te theome jafra ghotilo na, nei falalase diꞌatami na ka mae ihei te eꞌei puhi na. Puhi tuana neke togho ghami mala mhaghuni God, mala magnahaghei fara te filo ghau iara, mala au nomi gaoghatho faheta ka God, nei mala fateni ihei te tapla jafra. Ka gobigna lepo te edi ghotilo re, ghotilo neke falalasenihi te theome jafra ghotilo ka puhi igne na. 12Iara neke risoni letas tuana theome eigna naikno te eni najafra na nei jaola theome risoni eigna naikno te khabru ghegna na. Nu iara risoni letas tuana mala tangomana ghotilo te filoni themi ke ulugna God tothogho biꞌo teke eni ghotilo ranghi ghami ghehati na. 13Naugna igne ghehati gleale’ani fara.
Ghehati theome gleale’a kolho ka ghotilo, nu ghehati jaola gleale’a fara naugna ghotilo ne fakeli nagnafani mae Taetus. 14Iara neke cheke fahaehaghe eimi ghotilo ka mae Taetus. Tutuani, ghotilo theome neke famamaja ghami ghehati naugna gobigna lepo teke chekedi ghehati eimi ghotilo ka mana igre tutuani fara. Jaola gobigna lepo teke chekedi ghehati ka ghotilo ra tutuani fara. 15Nogna namha mae Taetus gognaro na biꞌo fara ranghi ghami naugna mana ghatho fapuloni eigna ghotilo te tarabana mala leghuni mana na. Tutuani, ghotilo tajini nei ghatho tahuni eghu mana balu mhaghu. 16Iara gleale’a fara eigna iara rouronu ghami ghotilo fara!
8Sileni maladi naikno khiloau Jerusalem
1Kheraguro, gognaro na ghehati magnahaghe ghami ghotilo te laseni eigna u khokofakasai God te tusu ranghidi khiloau te au ka Provins Masidonia. 2Kmana puhi biꞌo fara te fariuriudihi mare na, eghuteuna mare kuma fara. Nu neuba ngau, mare neke gleale’a fara te toghodi keha naiknore. 3Iara cheke tutuani ka ghotilo, mare tufa salaꞌui gobigna lepo te naba mala tufa na. Theo iheinga te cheke ranghidi te mala eni igne, thedi kolho. 4Nu mare tore ghami ghehati fabrahu mala snakredi te mala toghodi eghu naikno nogna God te au ka namono Jerusalem. 5Eghuteuna ghehati neke jaglo nomi naugna mare tufa ka puhi teke theome rouronuni ghehati na. Ulu lahu na mare neke kulu snakre laodi thedi ka Lord, eghuteuna ke leghu na mare jaola ne leghuni unha te magnahagheni God na ne snakredi thedi ka ghehati! 6Mae Taetus neke fufunu gloku igne ke lamnami ghotilo mala salo keha sileni ka namha. Eghume ghehati toreni mana mala loku fahui gloku igne. 7Naugna ghotilo keli fara ke uludi keha naiknore ka gobigna lepo te edi ghotilo re, ka fatutuani, ka cheke, ka glalase, ka gaoghatho, ka thotogho nei ka nomi namha ranghi ghami ghehati. Eghume ghehati magnahaghe ghami ghotilo te mala jaola te bruara ka khokofakasai te mala toghodi naikno khiloau te kuma gre.
8Iara theome lisei soru kaisei vetula ranghi ghami. Nu kate toutonu ka ghotilo na iara eni igne mala laseni ghotilo eidi naikno khiloau te au Masidonia, mare magnahaghei fara te toghodi keha naiknore. Uve, iara neke eni igne naugna iara magnahaghei te filoni glahula te au thofno namha na ka ghotilo nanaba ka mare. 9Ghotilo laseni nogna khokofakasai noda Lord Jisas Kraes. Ghotilo laseni eigna mana kaisei mae dedei fara kligna na, nu malami ghotilo mana neke fakumani thegna. Mana neke au jateula kaisei mae te kuma neku ka nauthoglu igne mala tangomana ghotilo te mala naikno dedei kligna na.
10Igne unha te ghathoni iara jame te mala eni ghotilo na. Te keli na ghotilo jame edi fahui unha teke kulu ghathoni ghotilo ka finogha te aria. Naugna ghotilo naikno ulu lahu te sasaꞌa tufa sileni te mala toghodi iheire te kuma nei ghotilo jaola naikno ulu lahu teke tufa na. 11Aonu unha te eni ghotilo na horoghoto ka unha teke magnahaghei eni fara ghotilo na kate fufunu gloku tifa na. Ghotilo mala tufa ka iheire te kuma lelheghu ka nihai te au ka ghotilo na. 12Te magnahaghei tufa ghotilo na, God ginauna gleale’a fara ka unha te tufa ghotilo na. Theome unha te theo ka ghotilo na.
13Iara theome magnahaghei toghodi keha naiknore eghuteuna jaola fakokhoana ghami ghotilo, nu iara magnahaghei te kaisei nanaba te gnafa ngala naiknore. 14Naugna gognaro na ghotilo dedei fara, eghume ghotilo tangomana toghodi iheire te kuma. Aonu, ke leghu na, kate kmo’e ghotilo ka glepo na, mare tangomana te togho ghami ghotilo na. Ka nafnata puhi igre naikno te gnafare tangomana te kaisei nanaba na. 15Jateula te chekeni ka grioriso te blahi na, “Mae ihei teke salo gano kmana na theome au salaꞌui, eghuteuna mae ihei teke salo bua kolho na theome kmo’e.”8:15 Eks 16:8.
Mae Pol ne kuru teini mae Taetus Korin
16Ghehati tegio ka God naugna mana ne snakreni mae Taetus u nagnafa namha jateula ghehati teu te togho ghami ghotilo. 17Tutuani, mae Taetus ne leghuni unha teke toreni ghehati mala eni mana teku na, nu mana jaola thofno magnahaghei fara te ari togho ghami ghotilo. Igne nogna gaoghatho mana thegna. 18Ghehati jaola kuru arini balugna mae Taetus kaisei mae thabusigna te ghathoni fara khiloau te gnafare. Mare ghatho tahuni mae thabusigna igne naugna ka nogna gloku mana te toutonuni u Nonomho te Keli gne. 19Jaola, khiloau gre neke vavahi mae igne mala tei balumi ghehati kate tusu laogna ghehati sileni teke salo igne. Ghehati eni gloku igne mala kilo fafnaknoni Lord nei mala falalaseni ghehati te magnahagheni fara te toghodi keha kherada te au kuma ka khiloau gne. 20Ghehati faghuai eghu kate reireghi gna sileni igne, mala theo kaisei naikno te cheke fapari ghami. 21Ghehati fariuriu eni unha te doglo na. Ghehati magnahaghei eni unha te doglo ka tathagna Lord na nei jaola doglo ka tathadi naiknore.
22Ghehati jaola kuru ari baludi phiamare kaisei mae thabusigna. Kmana fata ghehati neke fariuriuni mana, eghuteuna ghehati glani ka mana te magnahagheni fara te edi nafnata gloku keli te kmana igre. Eghuteuna gognaro na mana magnahaghei fara te eni gloku igne naugna mana ne biꞌo nogna grouronu na ka ghotilo. 23Eigna mae Taetus gne, mana mae kheragu fofodu iara, eghuteuna mana loku balugu iara mala togho ghami ghotilo. Eidi keha phei mae thabusigna igre, ka nanghadi khiloau gre teke kuru meidire nei nodi glokure mala kilo fnaknoni nanghagna Kraes. 24Ghotilo mala thofno namhadi thilo mae igre, mala nomhidi khiloau gre puhimi ghotilo na nei mala laseni mare eigna ghehati doglo te fahaehaghe ghami ghotilo na.
9Puhi te mala toghodi naikno khiloau Jerusalem
1Iara theome naba te riso ari ka ghotilo eigna sileni te mala toghodi nogna naikno God te au ka namono Jerusalem. 2Iara laseni, eigna ghotilo magnahaghei te totogho. Eghuteuna iara cheke fahaehaghe eigna igne ka naikno te au Masidonia. Iara neke cheke eimi ghotilo te au ka Provins Akaia teke tarabanahi u sileni igne funu ka finogha te aria. Eghuteuna ka nomi sasaꞌa ghotilo na, kmana naikno agne Masidonia jaola magnahaghei salo keha sileni. 3Nu iara kuru ari hatimare mae thabusigna ka ghotilo. Iara theome magnahagheni cheke fahaehaghe teke eni iara eimi ghotilo igne te fiti cheke kolho na. Nu iara magnahaghe ghami ghotilo te tarabana fakeli te mala totogho, jateula teke chekenihi iara ka ghotilo ia eghu. 4Jame keha naiknodi Masidonia ari balugu iara thogheiro, eghuteuna filo deni te theome tarabana kolho ghotilo teuna, ghehati ginauna mamaja nomi fara naugna ghehati neke rouronu ghami ghotilo fara. Eghuteuna ghotilo ginauna jaola mamaja nomi fara! 5Eghume te ghathoni iara na, iara na toredi thilo mae thabusigna igre mala kulu ari ka ghotilo ame ari nga ghehati eghu, mala tarabana unha teke nhaꞌa chekehi ghotilo ra. Ghehati laseni te tufa ghotilo ra naugna ghotilo thofno magnahaghei te tufa ka namha, theome naugna te huhuruni ghehati ka ghotilo.
6Ghathoni igne, ihei te theome joꞌu fakmana na, mana ginauna theome hata kmana gano kolho. Ihei te joꞌu fakmana na, mana ginauna jaola hata kmana gano. 7Naikno te gnafare mala tufa unha te ghathoni ka nagnafagna thegna na. Mana theome tangomana te diꞌanagnafa kate tufa na. Mana theome tangomana te tufa naugna keha naiknoi te huhuruni mana na. Tutuani God namhani ihei te tufa balu gleale’a na. 8God tangomana te tufa te salaꞌui unha te nabami ghotilo re. Eghuteuna igne kaisei fablahi biꞌo fara ka ghotilo! Ghotilo ginauna au kmana nomi gobigna lepo fabrahu, eghuteuna ghotilo jaola tangomana te au naba glepo te mala tufa ka gloku keli te gnafare. 9Te chekeni ka grioriso te blahi na,
“Mae te keli na magnahagheni fara te tusu ranghidi iheire te kuma,
eghuteuna puhigna mana te doglore ginauna au fabrahu.”9:9 Sam 112:9.
10God mae ihei te tufa sisi te mala joꞌu tahati na nei tufa gano mala ghamu tahati. Eghuteuna God ginauna jaola tufa naba glepo ka ghotilo mala tufa ghotilo ka iheire te kuma. Mana ginauna fabruara gloku te keli ka puhimi te doglo. 11God ginauna togho ghami mala dedei ghotilo ka glepo te kmana, naba ghotilo tangomana te tufa fabrahu kmana glepo na. Eghuteuna kmana naikno ginauna cheke fakelini ka God eigna sileni teke salo ghotilo te hata te tei ghehati ka mare igne.
12Gloku te keli te edi ghotilo igre ginauna thofno toghodi fara nogna naikno God te au ka namono Jerusalem. Eghuteuna naiknore ginauna jaola thono tegio tahu ka God. 13Nomi gloku te keli ghotilo igre ginauna thakle ka naikno te kmanare, eghuteuna mare ginauna cheke fakelini God eigna nomi gloku na. Naugna ghotilo ne thofno leghuni nogna Nonomho te Keli Kraes te cheke eigna ghotilo na. Jaola mare ginauna cheke fakelini God naugna ghotilo neke toghodi mare nei toghodi fara keha naiknore. 14Eghuteuna kate tarai na, mare ginauna ghatho ghami ghotilo balu namha biꞌo. Naugna mare ginauna filo glani u khokofakasai teke tusu ranghi ghami God igne. 15Tahati mala cheke fakelini God eigna nogna namha ranghi ghita te theo ihei tangomana te ruthini!
10Pol thofno mae khuru
1Keha naikno ka ghotilo cheke eghu, “Kate au teu delei na mae Pol gne cheke faheta fara ka tahati, nu kate mei agne na mana mhaghu te cheke fabiꞌo na!” Fanomho ka iara. Uve, Kraes na mae keli, eghuteuna mana theome ghosei diꞌatagna. Iara leghuni puhigna mana na. Eghume te chekeni iara ka ghotilo na, 2ghotilo thosei huhuru ghau iara mala cheke faheta ka ghotilo hui kate ari posa iara na. Nu iara ginauna cheke faheta ka iheire ne leghuni kolho ghehati puhigna nauthoglu na teuna. 3Ghehati au ka nauthoglu igne, nu ghehati theome magnahaghei leghuni puhigna naikno te au ka nauthoglu gne ka nomi magra balugna mae Satan. 4Glepo mala magra te hata ghehati gre theome nogna nauthoglu igne. Theo. Nu glepo neke mei funu ka God te au nolaghi biꞌo te mala tangomana ghehati te tapla sorudi nogna gloku mae Satan re. Eghume ghehati tangomana te tapla sorudi thua nafnata gaoghatho te theome tutuani. 5Eghuteuna ghehati tangomana te tapla sorudi thua nafnata cheke fahaehaghe te edi naiknore eigna thofno glalase nogna God. Ghehati fariuriu mala tuthughu gaoghathodi naiknore, mala thofno leghuni Kraes. 6Kate laseni ghehati te thofno leghuni ghotilo Kraes na, ghehati ginauna kaikaliti mala fateni ihei te tirogna leghuni mana.
7Ghotilo mala filoni unha te ulu! Ihei te chekeni ne nogna Kraes teuna, mana mala ke ghaoghathoni, eigna ghehati jateula mana eghu nogna Kraes. 8Tutuani fara, Lord neke tusu mei ka ghehati u nolaghi te mala mae khuru na. Nu mana neke tusu mei ka ghehati nolaghi igne mala farerheta ghami ghotilo, theome mala goigoni ghami ghotilo. Eghume iara theome mamaja te cheke fahaehagheni fara u nolaghi igne. 9Tutuani, iara theome magnahaghe ghami te ghatho ghau iara kaisei mae te mala famhaghu ghami ghotilo ka nogu letas re. 10Kaisei naikno jame cheke eghu, “Mae Pol gne nogna letas re nolaghi fara. Nu kate au baluda tahati na mana theome nheta, eghuteuna nogna cheke mana re theo nafudi kolho!” 11Ghehati gognaro na theome au balumi ghotilo jare, eghume ghehati chekedi glepo igre ka letas kolho. Nu kate au ghehati balumi ghotilo na, ghehati jaola falalase ka ghotilo u nolaghi te filonihi ghotilo ka letas na igre. Nafnata naikno te cheke fadiꞌa ghami ghehati igre, jame theome laseni kolho unha te eni ghehati na doglo gna na.
12Naikno te ghatho tahudi fara thedi igre, mare noli fara kolho! Eghu jame te tutuani mare te keli te ulu ghau iara na, aonu ghehati theome nabami te chekeni ne kaisei nanaba ka mare teuna ba ne keli uludi mare teuna. Nu tuana theome tutuani. Theo fara! Naugna mare ghathodi kolho vetula te mala fatedi puhidi thedire kolho eghuteuna jaola leghudi kolho nodi vetula thedire. 13Nu ghehati theome fahaehaghe eidi glepo ke kosigna gloku mala eni ghehati teku na. Ghehati fahaehagheni kolho u gloku teke tusu ranghi ghami God na mala togho ghami ghotilo. 14Jame te theome ari posa ka ghotilo na, ghehati salaꞌui fara nomi fahaehaghe na. Nu theo eghu. Naugna ghehati neke ari ka ghotilo balu Nonomho te Keli nogna Kraes. 15Ghehati fahaehaghe salaꞌui ka nomi gloku na kolho. Ghehati theome magnahaghe te fahaehaghe ka gloku tela edihi keha naiknore. Nu te rouronu ghehati na ghotilo ginauna kotu leuleghu fata ka nomi fatutuani na nei ghotilo ginauna toghoni nomi gloku ghehati gne mala kotu e biꞌo. 16Naugna ke leghugna na, ghehati magnahaghei te ari toutonuni u Nonomho te Keli na ka nohi ka keha philegna namono biꞌo te au ghotilo ana. Naugna ghehati theome magnahaghei te cheke fahaehaghedi gloku tela kulu edihi keha naiknore. 17Grioriso te blahi ne cheke eghu, “Mae ihei te cheke fahaehaghe na, mana mala cheke fahaehagheni kolho unha te eni Lord na.”10:17 Jer 9:24.18Eigna mae ihei Lord te ghatho tahuni na, mana ngala te magnahagheni God na, theome mae ihei te ghatho tahuni thegna na.
11Hatimare mae baubatu chaichaghi ka khiloau Korin
1Iara magnahaghe ghami ghotilo te snakre ghau iara te mala cheke jateula mae te meomekro eghu katha vido kmoꞌei. Tutuani, ghotilo la kulu snakre ghau iara te mala eni tuana! 2Uve, iara reireghi ghami ghotilo fara jateula God jaola te reireghi ghami ghotilo, naugna iara la nhaꞌa chekehi te mala snakre lao ghami ghotilo ka Kraes na. Ghotilo mala jateula khupi eghu ka narane tholaghi na, eghuteuna Kraes ngala khetomi ghotilo na. 3Nu iara nanga nogu fara, glahula baubatu fajafradi mare gaoghathomi ghotilo re mala theome klino nei theome namhani eghu ghotilo Kraes. Glahu jateula mogo teke saosagroni Ivi ka chekegna te chaichaghi ia eghu. 4Naugna ghotilo snakredi naiknore te ari toutonu eigna kaisei Jisas te jafra kate toutonuni ghehati gne. Eghuteuna ghotilo gleale’a te mala nomhini eigna kaisei nafnata tharunga nei kaisei nafnata Nonomho te Keli eghu te jafra ka Tharunga te Blahi nei Nonomho te Keli eghu te hata teke ari ghehati ka ghotilo ia.
5Te ghathoni iara na, mae iheire te kilodi ghotilo “Mae khuru keli fara teu are” theome ulu ghau iara. 6Neuba iara ne theome raꞌe lase cheke fara, nu kau Nonomho te Keli gne glalase na au ka iara. Eghuteuna leuleghu fata na ghehati la falalasehi igne ka ghotilo. 7Iara neke theome toreni kaisei taba ka ghotilo kate toutonuni u Nonomho te Keli nogna God na. Iara au fapari ghau thegu mala tangomana ghotilo te au kligna lahu na. Ba, ne jafra iara eghu si ghotilo ia? 8Kate loku iara ke lamnami ghotilo na keha khiloau ka namono ke kosigna Korin are teke foli ghau iara na, eghume iara jateula te blaudi eghu mare te mala togho ghami ghotilo na. 9Eghuteuna kani teke au iara balumi ghotilo ia iara neke ari neke kmo’e ka glepo, eghuteuna iara neke theome chekeni kaisei naikno ka ghotilo. Hatimare mae thabusigna teke mei funu ka namono Masidonia, mare hata neke mei gobigna lepo teke kmo’edi iara re. Eghume iara neke theome fagloku biꞌo ghami ghotilo ka kaisei glepo tifa na, eghuteuna iara ginauna jaola theome fagloku biꞌo ghami ke leghu na. 10Kraes na chekeni koba unha te tutuani na nei iara jaola eni tuana. Eghume te chekeni iara ka ghotilo na, ginauna theo kaisei naikno ka ghotilo te au heva heva ka Provins Akaia tangomana te tughu puhigu iara te cheke fahaehaghe igne. 11Iara chekeni igne ka ghotilo naugna te theome naba iara te hata nomi tothogho ghotilo na, ba iara ne theome namha ghami ghotilo? Theo! God lase ghau iara te namha ghami fara ghotilo na.
12Keha naiknore magnahaghei fara te mala fahaehaghedi thedi nei chekeni koba nodi glokure te kaisei nanaba ka ghehati mae khuru gre teuna. Nu iara magnahaghei te mala fanogradi mare ka igne. Naugna igne, iara leghuni fabrahu kolho puhigu thegu na. 13Mae tuare theome thofno mae khuru tutuani nu mare mae khuru chaichaghi kolho. Hatimare chaghi eidi nodi glokure, eghuteuna mare fariuriu mala jateula nogna mae khuru tutuani Kraes eghu ka gaoghathodi naiknore. 14Puhi igre theome mala jaglodi tahati. Eigna mae Satan jaola neke fariuriu mala jateu kaisei engel nogna God eghu. 15Eghume theome jaglo noda kate fariuriu nogna mae gloku Satan re te eni kaisei glepo biꞌo te mala jateula mae gloku teu te mala loku eigna unha te doglo na. Nu ka narane leghu lahu na, mae khuru chaichaghi igre ginauna au ka fate nabagna unha teke eni mare na.
Mae khuru Pol neke parani fara
16Iara magnahaghei teke fapea chekei, thosei ghathoni te mae meomekro iara na! Nu ihei te ghathoni ne mae meomekro iara teuna, fanomho mei ka iara jame te mae meomekro iara na mala cheke fahaehaghe ghau iara katha vido kmoꞌei ka ghotilo. 17Iara theome cheke jateula Lord te magnahaghe ghau iara te mala cheke, nu iara cheke fahaehaghe fara eigna igne eghu. Tutuani, iara cheke jateula mae te meomekro eghu kolho. 18Kmana naikno cheke fahaehaghe leghuni kolho gaoghathogna nauthoglu gne, eghume iara tangomana te cheke fahaehaghe jateula tuana teuna. 19Ghotilo themi na ne lalase fara eghu ka gaoghathomire, nu ghotilo gleale’a kolho te fanomho ka mae khuru chaichaghi te meomekro are! 20Tutuani, ghotilo gleale’a kolho ka mare, neuba mare ne huju ghami tafri ba chaichaghi ghami ba saosagro ghami ba filo fapari ghami ba tapo ghami. 21Iara gleale’a eigna te chekeni iara na, ghehati neke theome eni kaisei glepo te diꞌa jateula mare eghu ka ghotilo!
Iara frane te mala cheke fahaehaghe ka unha te cheke fahaehagheni mae ihei na, neuba iara ne cheke jateula kaisei mae te fameomekro neu. 22Mare cheke fahaehaghedi fara te mae Hibru, mae Israel nei vikegna mae Ebraham teuna. Uve, iara jaola tangomana te cheke fahaehaghe ghau jateula mare teuna. 23Mare chekeni koba ne nogna mae gloku Kraes teuna, nu iara jaola nogna mae gloku keli Kraes uludi mare eghu. Iara cheke fara jateu kaisei mae te fameomekro eghu tutuani! Iara loku heta ke tulaodi marei. Iara au ka suga sosolo kmana fata ke tulaodi marei. Naiknore puri ghau ke tulaodi marei. Iara namo lehe kmana fata ke tulaodi marei. 24Glima fata hatimare mae biꞌodi Jiu mare puri ghau iara ka phukri biꞌo ghilei thokeni tolufulu nhevai. 25Hatimare mae biꞌodi Rom thilo fata puri ghau iara ka khodo. Kaisei fata naiknore fariuriu mala fada falehe ghau iara ka thina. Thilo fata ghehati ghorho ka vaka, eghuteuna kaisei fata iara tao lamna nhorora kaisei narane nei kaisei bongi. 26Kmana fata ka nogu thei na, iara namo lehe ka khoꞌu biꞌo ba ka naikno te blau, ka kheragu fofodu mae Jiu, nei ka iheire te theome Jiu. Iara namo lehe ka namono biꞌo, nei ka namhata, nei ka thongna. Eghuteuna iara namo lehe ka iheire te chekeni “Ghehati naikno khiloau” nu mare chaichaghi kolho. 27Iara theome thuru ka gloku biꞌo nei nakmusa. Eghuteuna kmana fata iara rofo nei roi koꞌu. Kmana fata iara dangna nei reka nei theo pohe. 28-29Leuleghu narane na iara nangadi fara khiloau te gnafa gre. Kate nigra ihei na, iara jaola nigra. Eghuteuna kate tapla jafra ihei ka nakhibo na, iara thono diꞌa nagnafagu fara. Eghuteuna, kmana glepo te theome chekedi iara re eidi puhigu iara!
30Jame te cheke fahaehaghe iara gognaro na, iara ginauna cheke fahaehaghe eidi kolho glepo te falaseni te nigra iara na. 31God nei Kmagna noda Lord Jisas Kraes laseni te theome chaichaghi iara na. Tahati cheke fakelini nanghagna mana na tifa tifa! 32Kate au iara ka namono Damaskas na, mae te gavana ke parigna King Aretas mana magnahaghei te loki ghau iara. Aonu mana ne lilisei mae soldia faligohoni namono biꞌo na. 33Nu keha mae khiloau togho ghau iara. Mare ne lilisei ghau lamna khara’o ne farurhu soru khara’o na ka widagna bara biꞌo teke faligohoni namono na mala rikha iara.
12Keha glepo ne thakle ka mae Pol
1Iara mala cheke fahaehaghe fabrahu, neubane theome tangomana te togho ghita na. Iara na chekedi mifi nei glepo teke poru eghu te fatakle Lord ranghi ghau iara re. 2Iara laseni God hata ghau iara neke haghe kligna ka nabotho fati finogha te liu ra. Iara theome raꞌe laseni jame teke eni tutuani ka thinigu iara na ba neke khogla ka mifi kolho, nu God ngala te laseni na. 3-4Eghuteuna iara laseni God neke hata ghau iara neke tei ka namono Paradaes. Nu iara neke nomhidi glepo te theome naba iara te chekedi nei jaola blahi fara te mala toutonudi iara re. Nu iara theome raꞌe laseni jame teke eni tutuani ka thinigu iara na ba neke khogla ka mifi kolho, nu God ngala te laseni na. 5Eghume iara na cheke fahaehaghe ka unha teke eni ka iara na. Nu iara ginauna theome cheke fahaehaghedi kmana glepo teke edi ka nakarhagu na nu iara ginauna cheke fahaehaghedi glepo te falaseni te mae nigra kolho iara na. 6Neuba iara ne cheke fahaehaghe eidi mifi igre, iara theome mae meomekro, naugna iara tangomana te chekedi kolho glepo te tutuani re. Nu iara ginauna theome cheke fahaehaghe, naugna iara theome magnahagheni kaisei naikno te ghatho tahu ghau iara fara uluni unha te eni iara na, ba unha te chekeni iara na. 7Kaisei khabru te thoke ghau iara na jateula kaisei nila eghu ka thinigu iara na. Khabru igne jateula nogna mae gloku Satan te puri ghau iara eghu. Naugna igne iara theome tangomana te fahaehaghe fara eidi glepo biꞌo te fatakle meidi God ka iara gre. 8Iara neke thilo fata toreni Lord mala hata fadelei ka iara puhi biꞌo igne. 9Nu Lord neke cheke eghu ka iara, “Nogu khokofakasai iara igne ngala te nabamu iagho na, naugna kate nigra iagho na, nogu nolaghi iara na heta fara!” Eghume iara gleale’a fara te cheke fahaehaghe eigna nogu nanigra na, eghuteuna nogna nolaghi Kraes na tangomana te au balugu iara na. 10Eghume iara gleale’a fara kate papara naugna iara nogna mae Kraes. Tutuani, kate nigra na, kate cheke fadiꞌa ghau na, ba ka vido te ninhigrana ba ka vido te au papara, ba ka thua nafnata hoholo fateo, iara gleale’a fara naugna ka vido igre Kraes tangomana te tusu mei ka iara nogna u nolaghi biꞌo na.
Mae Pol ghathodi fara naikno khiloau ka namono Korin
11Iara cheke jateula kaisei mae te fameomekro eghu, nu ghotilo huhuru ghau iara mala eni igne. Nabami ghotilo te mala chekedi nogu gloku te keli te edi iara gre. Iara laseni te fiti mae kolho iara na, neuba, iara theome au ke paridi mae iheire te kilodi ghotilo “Hatimare mae khuru keli fara.” 12Kate loku ka ghotilo na, iara theome babaꞌo te edi keha fagaglana nei kofubobhoi te mala filoni ghotilo nogna nolaghi God na. Igre glepo teke edi iara re mala laseni ghotilo te thofno mae khuru iara na. 13Eghume iara neke togho ghami ghotilo jateula te edi ka keha khiloaura eghu. Kaisei glepo kolho te theome eni iara ka ghotilo na, iara neke theome tore ka ghotilo mala togho ghau ka sileni. Tore! Jame te ghathoni ghotilo te jafra iara ka igne na, iara tore ghami ghotilo mala hata fadeleidi nakhibogu iara re eigna igne!
14Iara gognaro na tarabana mala fatilo ari sigho ghami ghotilo, nu iara na theome toreni kaisei glepo ka ghotilo. Naugna iara magnahaghe ghami kolho ghotilo. Ghotilo laseni, goro suare theome tangomana te mala reireghi idodi nei kmadi teure, nu idodi nei kmadi teure te mala reireghi thudire. 15Eghume iara thofno gleale’a fara te tusu ari ranghi ghami gobigna lepo te au ka iara igre nei jaola snakreni thinigu na mala togho ghami ghotilo. Ba, ghotilo ginauna namha faꞌikoi ghau iara kolho, naugna te namha ghami fabiꞌo fara iara gne? 16Tutuani, ghotilo laseni eigna iara gne theome hata kaisei glepo ka ghotilo. Nu jame keha naikno chekeni ne chaichaghi ghami nei saosagro ghami neu kolho iara teuna. 17Ne faꞌunha? Ba, iara neke chaghi ghami ghotilo ka mae teke kuru ari iara ka ghotilo ra? Theo. 18Iara neke toreni mae Taetus mala ari ka ghotilo, eghuteuna iara jaola neke kuru ari kaisei mae thabusigna balugna mana. Ba, mae Taetus neke chaghi ghami ghotilo? Theo! Ghotilo laseni ghepa mae Taetus au kaisei gaoghatho kolho nei leghuni kaisei puhi ngala eghu ka gloku na!
19Ba, ne riso ari ghehati glepo igre mala tafra ghami ghehati themi neu si ghotilo ia? Theo! Ghehati chekedi glepo igre ka puhi te magnahagheni Kraes te mala eni ghehati ka tathagna God na. Eghuteuna gobigna lepo te risodi ghehati gre, kheraguro, mala tangomana te farhetadi nomi fatutuani ghotilo re. 20Eigna iara nanga nogu mala ari posa ka ghotilo, na eghunu jafra ghotilo ka unha te magnahaghei filoni iara ka ghotilo na eghu. Jame te eghu na, iara ginauna jaola na jafra ka unha te magnahagheni ghotilo na. Kate ari posa iara ka ghotilo na, theome keli te filoni iara ke lamnami te magra, goghotu, diꞌatami faghose, ghatho ghami themi kolho, nhagho, buiburi naikno, fahaehaghe, nei theome au fodu. 21Iara nanga nogu fara te mala ari posa ka ghotilo na, naugna theome keli glepo teke edi tifa ra jaola teke edi ghotilo ginauna. Jame te eghu na, God ginauna te famamaja ghau iara eigna unha teke eni ghotilo. Iara ginauna diꞌanagnafagu fara eidi naikno kmana te tapla jafra ka nakhibo teke edi la tifa ra. Tutuani iara ginauna jaola diꞌanagnafagu naugna mare ne tirodi tughu nagnafa ka puhi te gnognoro, eni puhi te diꞌa, nei keha glepo te famamaja ikno.
13Cheke leghu lahu balu kubae
1Igne fatilo fata nate ari posa iara ka ghotilo na. Ghathoni u grioriso te blahi na ne cheke eghu, “Kate fathoethoke ihei eigna keha naikno na, phei ba thilo naikno teke filo tathadi puhi igne na mala au fanomho ka unha te chekeni mana na.” 2Ka fapea fata teke ari posa iara ka ghotilo ia, iara neke cheke faheta farahi ka naikno teke tapla jafra ka nakhibora. Eghuteuna gognaro na iara theome au balumi ghotilo, nu iara cheke ka naikno tuare baludi keha naikno ke lamnami ghotilo te tapla jafra ka nakhibo gognaro gre. Kate ari iara ginau ka ghotilo na, iara ginauna kafe fatedi gnafa naikno tuare. 3Iara ginauna eni igne naugna ghotilo magnahaghei te filo glanini Kraes te loku ke lamnagu iara te mala toutonuni chekegna mana na. Ghotilo ginauna filoni Kraes na theome nigra kate loku ke lamnami ghotilo na. Theo. Mana ginauna fatakleni ka ghotilo nogna nolaghi biꞌo mana na ka iara. 4Tutuani mana neke nigra ka teke tupijuruni mare ke kligna gaju fafatha na, nu gognaro na mana karha ka nogna nolaghi God. Tutuani ghehati nogna mae gloku Kraes gre jaola nigra. Nu ghehati karha balugna mana ka nogna nolaghi God. Eghuteuna ghehati ginauna ari jare mala fadogli ghami ghotilo ka nolaghi igne.
5Ghotilo mala fariuriu ghami themi koba mala laseni ghotilo te thofno fatutuani ni Kraes ba theo. Tutuani, ghotilo thofno laseni mae Jisas Kraes te au ke lamnami na, na eghunu theome fatutuani ni mana ghotilo eghu! 6Nu te rouronuni iara na ghotilo ginauna na filo ghami ghehati te kegra heta ka fariuriu na. 7Ghehati toreni God mala togho ghami ghotilo mala thosei eni kaisei najafra. Ghehati theome eni igne mala thakle ka ghotilo te mae gloku keli ghehati na. Theo. Ghehati magnahaghe ghami ghotilo te kegra heta ka puhi te keli, neuba naiknore ne chekeni ne theome kegra heta ghehati kau fariuriu teuna. 8Naugna ghehati theome tangomana te eni kaisei glepo te mala fanograni cheke te tutuani igne, nu ghehati tangomana te mala toghoni kolho cheke te tutuani igne. 9Ghehati gleale’a fara jame te kegra heta ghotilo ka puhi te doglo na, neuba ghehati ne jateula te nigra neu kolho. Eghume ghehati tarai mala tangomana ghotilo te thofno naikno keli fara ke ulugna God na. 10Iara riso ari letas igne kate theome au teu balumi ghotilo naugna kate ari iara te posa ka ghotilo na, iara theome magnahaghei te cheke faheta ranghi ghami ka nolaghi biꞌo teke tusu mei Lord ka iara igne. Mana neke tusu mei ka iara nolaghi igne mala toghodi nomi fatutuani ghotilo re mala heta, theome mala goigoni ghami ghotilo.
11Uve kheraguro, ghehati magnahaghe ghami ghotilo te gleale’a. Fariuriu edi unha te chekedi iara ka ghotilo gre mala thofno au klino. Eghuteuna ghotilo te gnafa na mala kaisei gaoghatho ngala nei mala kaisei au ngala kau pharikeli. Ka puhi igne God mae ihei te tusu ranghi ghita u namha nei pharikeli teu igne ginauna au balumi ghotilo.
12Kubae fari themi balu namha ghotilo te au ka namono Korin.
13Naikno te gnafa nogna God kubae ghami ghotilo.
14Iara toreni ka God nogna khokofakasai noda Lord Jisas Kraes, nei nogna namha God, nei nogna loku fodu mae Tharunga te Blahi mala au balumi ghotilo hui. Me gnafa. Iara, mae Pol.