Ululahu Timoti

Ululahu Timoti

Letas Ulu Lahu Teke Riso Tei Mae Pol Ka Mae Timoti

Thoutonu kmo’ei eigna buka igne

Mae Timoti gne mae gna ka namono Listra. Idogna na thau Jiu eghuteuna kmagna mae Griki. Mae Timoti gne kheragna mae Pol, mana tei balugna mae Pol ka vido aheva te toutonu mana Nonomho te Keli eigna mae Jisas Kraes.

Mae Pol cheke ranghini mae Timoti mala fiofilo ka farirhiu chaichaghi tangomana te mei ke lamnagna khiloau. Farirhiu chaichaghi igne cheke ranghidi naikno khiloaure mala atha kaisei nafnata glalase, nei theome tangomana te ima kmana nafnata gano, nei theome mala tolaghi eghu.

Ka letas igne, mae Pol cheke eigna puhidi naikno khiloau kate tarai ka khiloau na. Mana jaola chekeni unha nafnata naikno nabagna te mala loku ka khiloau na. Naugna nogna gloku mae Timoti na mala farirhiudi mae biꞌo nei keha naikno langau eghu ka khiloau na, mae Pol riso soru kmana cheke eigna te mala toghoni mana ka gloku igne. Phei letas te riso tei mae Pol ka mae Timoti balugna letas te riso tei mana ka mae Taetus igne kaisei nafnata farirhiu ngala.

Phei vido ka letas igne

Farirhiu eigna khiloau nei nogna mae gloku: 1:1–3:16

Farirhiu eigna nogna gloku mae Timoti: 4:1–6:21

¹Iara mae Pol, nogna mae khuru Jisas Kraes leghuni chekegna God mae Fakarhaida nei mae Jisas Kraes mae ihei te fatutuani ni tahati.

²Uve ghema Timoti, ka noda fatutuani ka mae Jisas Kraes, iagho jateula kaisei mae thofno thugu eghu iara.

Iara toreni nogna khokofakasai, lolokeli, nei pharikeli God Kmada nei Jisas Kraes noda Lord mala au balumu.

U cheke faheta eigna farirhiu chaichaghi

³Kate jifla iara ka namono Efesus te mala tei ka Provins Masidonia na, iara neke cheke faheta ka iagho. Eigna iara magnahaghe nigho te au fapulo ka namono Efesus mala fanogradi iheire te farirhiu glepo te theome leghuni nogna farirhiu khiloau na. ⁴Iagho jaola chekedi mae te farirhiu chaichaghi tuare mala thosei toutonudi mare nafnata susurei te theome tutuani nei thura nangha te brahu, nanghadi hatimare mae biꞌodi tifa ra. Glepo igre mala faꞌeiꞌei magra kolho ka naiknore, eghuteuna naiknore ginauna theome eni unha teke ghathoni God te mala eni mare teku na. Naugna kaisei puhi fatutuani ngala te tangomana te mala togho ghita te mala leghuni tahati gaoghathogna God na. ⁵Jame te leghuni mare nogu cheke iara na, mare ginauna namhadi keha naiknore. U namha igne neke jifla mei ka nagnafa te thofno gae nei ka gaoghatho te doglo nei ka thofno fatutuani. ⁶Nu keha naiknore la tei snivihi ka glepo igre nei chekedi koba glepo te theo nafudire. ⁷Naugna mare magnahaghei te farirhiu eigna nogna vetula mae Moses, nu mare thedi na theome lasedi gaoghathodi unha te chekedi thedire. Eghuteuna mare theome lase nila u farirhiu ne lasedi farahi thedi teure.

⁸Tahati laseni nogna vetula God na au gaoghatho te keli jame te thofno leghuni tahati unha te chekeni u vetula na. ⁹Jaola tahati laseni vetula na neke theome lilisei mala fadoglidi iheire te keli, nu mala fadoglidi iheire te huhughuni vetula na, iheire te eꞌei puhi diꞌa fabrahu, iheire te theome leghuni God, iheire te au ka puhi nakhibo, iheire te cheke faparini God ba iheire te cheke fadiꞌadi glepo te blahi re. U vetula na jaola mala fadoglidi iheire te falehedi idodi ba kmadi, ba aknu poruni ihei, ¹⁰ba iheire te eni puhi te diꞌa, ba iheire te glalama fari nalhaꞌu, ba iheire te blau naikno te mala fofoli jateula sneka, ba iheire te cheke chaichaghi tafri, ba iheire te cheke chaichaghi ka fate, ba iheire te eni kaisei glepo te theome leghuni farirhiu te keli na. ¹¹Tuana farirhiu leghuni u Nonomho te Keli God teke tusu mei ka iara mala toutonu iara. Nonomho te Keli igne siasigla balu nolaghi biꞌo neke mei funu ka God mae ihei te blahi fara.

God kokhonidi naikno

¹²Iara cheke fakelini mae Jisas Kraes noda Lord eigna mana rouronu ghau iara mala loku ranghini. Mana neke tusu ranghi ghau iara nanheta malagna gloku blahi igne. ¹³Tutuani fara, tifa na iara neke cheke fadiꞌani mana nei jaola paradi nei lalamadi iheire teke leghuni mana re. Nu neuba ngau, mana neke kokhoni ghau iara, naugna iara neke theome laseni glepo te diꞌa teke eni iara na. Iara neke edi glepo igre kani theome fatutuani ni ngau mana. ¹⁴Nu mae Jisas Kraes noda Lord neke bruara khokofakasai te biꞌo ke klignagu iara eghuteuna tusu ranghi ghau iara fatutuani nei namha maladi naiknore.

¹⁵Mae Jisas Kraes neke mei ka nauthoglu igne mala fakarhi ghita ka nakhibo fateote’o. U cheke tuana thofno tutuani fara, mala nomhini nei fatutuani ni eghu naiknore. Iara tifa na neke diꞌa pari lahu ka nakhibo ke uludi naikno te gnafare gre. ¹⁶Nu naugna igne God neke kokhoni ghau iara tulao mala tangomana mae Jisas Kraes te fatakle nogna namha biꞌo ranghi ghau iara na. Igne mala toghodi naiknore mala fatutuani ni mana thogheiro, nei mala athini u karha fei tifa na. ¹⁷Nafnakno nei siasigla ranghini mae King te funei fabrahu tifa tifa! Mana theome tangomana te lehe eghuteuna tahati theome tangomana te filoni mana, eghuteuna kaisei mana ngala God na. Tahati ginauna na ghatho tahuni nei cheke fakelini nanghagna mana na tifa tifa. Amen.

Nogna gloku mae Timoti

¹⁸Uve thuguo Timoti, cheke te edi iara igre leghudi kolho nodi cheke hatimare mae profet teke cheke eimu iagho tifa ia. Iagho famane leghudi farirhiu igre mala togho nigho nei magridi eghu puhi diꞌa fateo ka nauthoglu igne. ¹⁹Iara magnahaghe nigho te loku maku fabrahu nou fatutuani ba ka gaoghathomu te keli. Keha naiknore theome eni igne. Eghuteuna nodi fatutuanire la diꞌahi. ²⁰Mae Haemenias ghe mae Aleksada gre eni igne la teihi baludi mare. Iara lisa laodihi phei mae igre ka mae Satan mala laseni phiamare gaoghathogna te thosei cheke faparini God teuna.

Keha vetula maladi gaꞌase ba nalhaꞌu

¹Glepo ulu lahu te toreni iara ka ghotilo naikno khiloau ra, iara magnahaghei ghami ghotilo te taraidi naikno te gnafa nei cheke fakelini God eidi mare. Eghuteuna toreni God mala toghodi iheire te au kokhonidi. ²Iagho mala taraidi hatimare mae King nei iheire fateo te au ka sape nafnakno. Taraidi hatimare mae biꞌo are mala tangomana tahati te au kmu ke paridi nei au fakeli baludi keha naiknore, ba au doglo nei ghatho tahuni God. ³Tarai jateula igne teuna keli fara, eghuteuna God mae ihei teke fakarhi ghita na jaola keli tagna fara. ⁴God magnahaghedi naikno te gnafare mala athini karha fei tifa na nei mala laseni u Nonomho te Keli te tutuani na. ⁵Eigna jare na kaisei God ngala. Eghuteuna kaisei nabrou ngala te tangomana naiknore te tei thoke ka God na. U nabrou tuana ka mae Jisas Kraes, mae ihei jaola te kaisei naikno. ⁶Mana snakreni thegna mala lehe mala tangomana te foli fajifladi naikno fateote’o ka nogna nolaghi nakhibo. Mae Jisas ngala kaisei fagaglana God te magnahaghei fakarhidi naikno te gnafare. Eghuteuna fagaglana tuana mei ka thofno nogna narane na. ⁷Naugna igne God neke vahi ghau iara mala loku jateu kaisei mae khuru mala toutonuni u Nonomho te Keli na ranghidi iheire te theome Jiu mala fatutuani nei laseni cheke te tutuani na. Iara cheke kate tutuani, theome chaichaghi!

⁸Eghume iara magnahaghedi mae nalha’ura heva heva ka khiloau gne mala tarai. Kate tarai na, mare mala au nagnafa te klino nei mala theo diꞌa tadi na ba magra na. ⁹Eghuteuna iara jaola magnahaghedi gaꞌasera mala pipichi pohe te nabadi, thosei fahaghe kmana nafnata pohe ba phoko te theome raꞌe doglo ka tathagna naikno na. Thosei flehi khakla ba lilisei gol ba buli siasigla ka pha’ure, ba ghathoni te mala pipichi pohe te foli ka sileni te biꞌo fara te mala fakhuakhudadi thedi. ¹⁰Nu rehati te leghuni chekegna God na mala fakhuakhudadi thedi kate eni unha gloku te keli na.

¹¹Kate tarai na, gaꞌasera nabadi na au kmu fanomho mala lalase. ¹²Iara theome snakredi gaꞌasera te mala farirhiu ba au nodi nolaghi ke klignadi hatimare mae nalhaꞌu. Theome naba, rehati mala au kmu kolho. ¹³Naugna te laseni tahati na, God neke kulu vuavuhani mae Adam, eghuteuna ke leghu na ame vuavuhani nga Ivi. ¹⁴Eghuteuna mae Satan neke theome chaghini mae Adam, nu Satan neke kulu chaghini Ivi. Ka puhi igne gaꞌase na neke huhughuni nogna vetula God na. ¹⁵Nu God ginauna fakarhidi gaꞌasere kate fakarha sua na. Tutuani, God ginauna fakarhidi reꞌe eghu te fatutuani fabrahu, namha, klino, nei au fakeli fabrahu teu reꞌe ka nakarhadire.

Mae ihei te baubatu ka khiloau

¹Unha te chekeni iara igne tutuani fara: mae ihei te magnahaghei loku jateula kaisei mae mala baubatu teu ka khiloau na, gloku te keli na te magnahagheni mana igne. ²Eghume mae ihei te mala baubatu ka khiloau na mana mala kaisei mae doglo fara, eghuteuna theo kaisei naikno te filoni kaisei najafra ka mana na. Mana mala tolaghi ka kaisei gaꞌase ngala eghuteuna tangomana te mala reireghi fakelini thegna. Mana theome mala ghosei diꞌatagna, nu mana kaisei mae mala au doglo fabrahu. Eghuteuna mana tangomana te mala reireghi fakelidi naikno te posa mei ka sugagna na, eghuteuna mala laseni puhi farirhiu na. ³Mana theome nafnata naikno te koꞌu fara are, ba te magnahaghei magra koba, ba te magnahaghei sileni fara. Nu mana mae mala au faleghu nei au kmu. ⁴Mana mala reireghi fakelini tharaknagna thegna na ba farirhiu fakelidi thugnare mala leghuni ba ghatho tahuni eghu mana. ⁵Eigna jame kaisei mae te theome baubatu fakelini tharaknagna na, mana ginauna theome tangomana te baubatu fakelini la nogna khiloau God na. ⁶Nu mae mala baubatu na theome mae ihei teke ruma meila ka khiloau, na eghunu fahaehaghe fara mana eghu, eghuteuna God ginauna fate faleheni mana jateula teke eni tifa ka mae Satan ia eghu. ⁷Puhigna mana na mala doglo fabrahu mala tangomana naikno te theome fatutuanire te ghatho tahuni mana na. Jaola naiknore ginauna theome filo faparini mana nei mae Satan ginauna jaola theome sagu nila mana.

Mae iheire te mala totogho ka khiloau

⁸Mae ihei te mala totogho ka khiloau na, mana jaola mala batuni nakarha te keli na. Mana theome mala chaichaghi, ba koꞌu waen fara, ba loku mala hata sileni kolho. ⁹Mana mala thofno fatutuani ni nogna farirhiu khiloau na, nei theome mala ghatho peapeani u thofno farirhiu tuana. ¹⁰Mae ihei te magnahaghei totogho ka khiloau na, iagho ulu lahu na kulu filo fakelini ghu mana. Eghuteuna kate laseni iagho te keli mana nakarhagna na, iagho tangomana te snakreni mana mala loku ka khiloau.

¹¹Jateula tuana eghu khetogna na, naꞌa mala baubatu nila nakarha te keli na, eghuteuna naꞌa theome mala vuavuha chekedi keha naiknore, nu naꞌa mala reireghi fakelini thegna. Eghume naꞌa mala nafnata gaꞌase tahati te ghatho tahuni fabrahu.

¹²Mae ihei te mala totogho ka khiloau na mala tolaghi ka kaisei gaꞌase ngala, eghuteuna mana mala reireghi fakelidi khetogna nei thugnare nei iheire te au ka nogna khora suga na. ¹³Ihei te loku fakeli ka gloku blahi igne na keha naikno khiloaure ginauna ghatho tahuni mana, eghuteuna mana ginauna tangomana te au heta mala toutonu eigna nogna fatutuani biꞌo ka mae Jisas Kraes.

Nogna thofno farirhiu khiloau

¹⁴Kate risoni letas igne, iara gaoghathogu na magnahaghei te ari filo nigho thogheiro. ¹⁵Nu neubane theome faghose ari iara, iagho ginauna tangomana te iu’ijuni letas igne eidi gloku te keli te edi nogna naikno God re. Igne u khiloau nogna God, mae ihei karha te tifa. Eghuteuna khiloau gne ngala te loku famakuni u thofno cheke te tutuani na mala theo kaisei naikno te roꞌeni. ¹⁶Tutuani fara, nogna thofno farirhiu khiloau na kaisei glepo biꞌo fara. Eghuteuna thofno farirhiu tuana cheke eghu,

Mae Kraes neke vuha mei thini jateula naikno.

Mae Tharunga te Blahi neke fatakleni puhigna mae Kraes na thono doglo fara.

Engel re neke filoni mana.

Naiknore neke tei toutonu eigna mana ka namono te kmanare.

Naikno heva heva ka nauthoglu igne neke fatutuani ni mana.

God neke hata hagheni mana kligna ka siasigla.

Mae velepuhi chaichaghi

¹Mae Tharunga te Blahi neke thono cheke fara eidi keha naiknore ginauna tei kokoni nodi fatutuani na ka narane te mei thogheiro re. Mare ginauna leghudi keha naitu te lase chaichaghi fara re, eghuteuna mare ginauna leghu dila nogna farirhiu mae Satan. ²Nafnata farirhiu igre mei ka puhidi naikno te theome doglo nu lase chaichaghi fara, eigna gaoghathodi teke doglore la lehehi, jateula teke nhako ka khaꞌaghi te ngaja ia eghu. ³Nafnata naikno igre cheke ka keha naiknore theome keli te tolaghi ba te ima kmana nafnata gano na. Nu God neke vuavuha gano igre mala ima tahati. Naugna tahati te fatutuani ni God nei laseni nogna cheke te tutuani na, tahati tangomana te ima gano igre balu kilo fafnaknoni God. ^4-5Glepo te gnafa teke vuavuha God igre thofno keli fara, theo kaisei glepo te diꞌa na. Naugna God neke fablahidi gano igre ka nogna cheke thegna nei tahati jaola taraidi. Eghume kate imadi glepo igre tahati tangomana kilo fafnaknoni God.

Kaisei nogna mae gloku keli mae Jisas Kraes

⁶Uve, iara magnahaghe nigho te chekedi glepo igre ka kherada naikno khiloau are. Te eni iagho igne, iagho ginauna kaisei nogna mae gloku keli mae Jisas Kraes. Eghuteuna iagho ginauna biꞌo haghe ka nogna farirhiu keli khiloau te leghudi te mei iagho ra. ⁷Iara theome magnahaghe nigho iagho te fanomho ka thoutonu te chaichaghi fara te theome nanaba ka chekegna God te tutuani fara. Nu te keli na iagho farirhiu nigho themu kolho mala leghuni God. ⁸Jame te keli na tahati fariuriudi thinida gre mala heta. Nu te fariuriu tahati nakarhada ka khiloau gne te mala heta na, tuana te thofno keli fara na. Naugna ginauna tangomana te togho ghita ka puhi te gnafa ka nakarhada gognaro nei ka nakarha nate mei nathuꞌu nauriha. ⁹Cheke igne thofno tutuani fara, te keli na naikno te gnafare mala nomhini nei leghuni eghu. ¹⁰Eigna igne tahati loku heta, naugna tahati thofno fatutuani ni God mae ihei tangomana te fakarhadi naikno fateote’o. Eghuteuna mana ginauna kafe fakarha ghita gnafa, tulao iheire te fatutuani ni mana.

¹¹Iagho chekedi nei famane farirhiudi eghu glepo igre ka naiknore. ¹²Theome keli kaisei naikno jateula kaisei fiti mae kolho iagho teu te theome leghudi nou cheke iagho re naugna iagho kaisei mae majaghani. Iagho mala baubatuni puhi te keli na ka naiknore, ka chekemu ba ka nakarhamu, ba ka nou namha, ba ka nou fatutuani ba ka nou puhi te doglo mala tangomana naikno khiloaure te leghu nigho na. ¹³Kate ofoni teu ke pulo meigu iara na, leuleghu fata na iagho mala iu’iju fabrahu buka blahi gne ka naiknore, fahetadi nei farirhiudi eghu. ¹⁴Uve ghema Timoti, u khokofakasai te au ka iagho ana mala loku, theome mala fiti au kolho. God neke tusu ari ka iagho, kani teke cheke eimu iagho hatimare mae profet nei kani teke taofi nigho hatimare mae biꞌo ka khiloau ra.

¹⁵Edi fabrahu glepo igre. Eghuteuna naikno te gnafare tangomana te filoni nakarhamu iagho ka Kraes na bruara fara. ¹⁶Iagho reireghi fakelini nakarhamu themu na baludi farirhiu te edi iagho ra mala doglo fabrahu. Jame te eni iagho igne na, iagho ginauna fakarhi nigho themu baludi naikno te nomhi nigho are.

Gloku te mala eni ka khiloau

¹Kate fadoglini kaisei mae tela kueku’ehi na, iagho thosei cheke fabiꞌo ka mana. Nu iagho famane cheke ranghini mana jateula te cheke ka mae kmamu themu eghu. Fadoglidi hatimare mae majaghani jateula thabusigna eghu, ²eghuteuna khaekave are jateula idomu eghu. Eghuteuna thau majaghani are jateula greghamu eghu kolho. Iagho eni igne ka thau majaghani are ka thofno puhi te doglo.

³Ka nou gloku te mala baubatudi naikno khiloau re, iagho toghodi thau te lehe khetodire te theo ihei nga te toghodire. ⁴Nu jame kaisei thau te lehe khetogna na au thugna ba gragna, ulu lahu na rehati leghu fakelini puhigna khiloau te doglo na mala toghoni tharaknagna thegna na, naugna God na keli tagna fara ka nafnata puhi igne. Kate eni igne, rehati ginauna foli fapulodi idodi ba kmadi nei kavedi ba ku’edi kani teke majaghanidi teku re. ⁵Jame kaisei thau te lehe khetogna na au kolho thegna, eghuteuna theome toghoni thegna teuna, naꞌa na nhaꞌa lao nogna fatutuani te biꞌo na ka God, eghuteuna toreni nogna thotogho God na bongi narane. ⁶Nu thau te lisa lao thinigna na te mala eni nafnata puhi te diꞌa na, neubane karha neu naꞌa, naꞌa la kulu lehehi. ⁷Iagho famane farirhiu ranghidi cheke igre mala theome tangomana kaisei naikno te cheke faparidire. ⁸Naugna ihei te theome eni kaisei glepo te mala toghoni vikegna ba tulao tharaknagna thegna na, mana figri tagrunihi nogna fatutuani na. Puhigna mae igne thono diꞌa fara uludi naikno te theome fatutuani ni God.

⁹Kaisei buka te mala riso soru nanghadi thau te lehe khetodire te mala totogho khiloau na. Iagho thosei riso soru nanghadi thau teke lehe khetodi te theome thokeni teu namno salei finogha na ba salaꞌui, ba teke phei fata tolaghi. ¹⁰Eghuteuna naiknore filo glani naꞌa tangomana te edi gloku te kelire. Nafnata gloku jateula igre eghu te mala reireghi fakeli thugna, nei farumadi naikno phosa ka sugagna na, nei fafnaknodi naikno khiloaure kate titihi ghahedire, nei mala toghodi naikno te au puhi biꞌo ka nakarhadire. Uve, nafnata thau te fariuriu edi fabrahu thua nafnata gloku te keli.

¹¹Nu iagho thosei riso soru nanghadi thau majaghani teu te lehe khetodire ka buka igne. Naugna ke leghugna te snakre laodihi thedi ka Kraes na, rehati au gaoghathodi fara ka nalhaꞌu ne ghatho ihoni nodi nhaꞌa cheke na neke tolaghi fapulo. ¹²Eghuteuna God ginauna fatedi thau majaghani igre eghu, naugna rehati ne theome leghuni nodi nhaꞌa cheke teke eni thedi ka Kraes na. ¹³Jaola thau majaghani teke lehe khetodire igre ginauna fiti au kolho nei leuleghu suga tafri kolho. Eghuteuna nafnata puhi te eni rehati igne ginauna thono diꞌa fara, eigna rehati ginauna funu vuavuha chekedi keha naiknore, eghuteuna na farugusidi thedi ka nakarhadi keha naiknore. Jaola rehati chekedi koba glepo te theome naba te mala chekedire. ¹⁴Eghume, iara magnahaghedi thau majaghani teke lehe khetodira ke tolaghi fapulo, mala au thudi, nei mala reireghi fakelidi nodi sugare. Jame eni rehati igne na, noda naoka tahati re ginauna theome filoni kaisei nabrou te mala cheke fapari ghita na. ¹⁵Nu te laseni tahati na keha thau majaghani teke lehe khetodire la jifla kokonihi khiloau na mala leghuni mae Satan.

¹⁶Jame kaisei gaꞌase ka khiloau gne au thau teke lehe khetodire ka tharaknagna na, te keli na gaꞌase tuana mala toghodi. Ka puhi igne khiloau na tangomana te toghodi keha thau teke lehe khetodire, tulao iheire te au thedi kolho.

Farirhiu maladi mae biꞌo ka khiloau

¹⁷Mae biꞌo te baubatu fakeli ka khiloau nei tulao iheire te loku heta kate toutonuni nei farirhiuni teu chekegna God na naba te hata taba na. ¹⁸Eigna te chekeni ka grioriso te blahi na cheke eghu, “Thosei haru foflogna buluka na mala lhotini te ghamu kate tapla naꞌa ke kligna wit na.” Eghuteuna grioriso te blahi na jaola cheke eghu, “Mae gloku na naba te hata nogna taba.” ¹⁹Thosei fanomho ka fathoro te eni ihei ranghini mae biꞌo ka khiloau na, eghu te kaisei mae kolho te theome phei ba thilo naikno te kulu mei toutonu fakeli ka iagho eigna u fathoro tuana. ²⁰Nu jame kaisei mae biꞌo ka khiloau tapla jafra ka nakhibo, iagho cheke faheta fara ka mana kate kafe au fodu teu naikno khiloaure mala mhaghu keha naiknore mala thosei ke enila najafra tuana. ²¹Iara cheke faheta ka iagho ke ulugna God nei Jisas Kraes nei hatimare mae engel te blahi, iagho mala famane leghudi cheke igre. Eghuteuna kate leghudi cheke igre, iagho thosei filo ka tatha me vahini kolho mae ihei te magnahagheni themu na.

²²Ghaoghatho fakeli ame taofini nga mae ihei te mala loku ka khiloau na eghu. Kate filoni iagho mae biꞌo ka khiloau te tapla jafra ka nakhibo na, thosei ke tapla jafrala ngau iagho eghu. Nu reireghi nigho themu mala klino.

²³Ghema Timoti, theome keli te koꞌu khoꞌu fabrahu kolho iagho na. Iagho nabamu na jaola koꞌu katha waen mala toghoni thi’amu na, mala hui fogra te au fabrahu ka iagho ana.

²⁴Nakhibodi keha naiknore bligi mala filodi, eghuteuna naiknore tangomana ghosei te fatedi. Nu nakhibodi keha naiknore filodi ke leghu kolho. ²⁵Jateula tuana eghu gloku te kelire e bligi fara te mala filodire. Nu neubane theome bligi ngau te mala filodire, theome tangomana te poru fabrahu na.

Cheke ranghidi mae te sneka ka khiloau

¹Mae snekare mala ghatho tahudi nodi mae funeire. Kate eni igne, theo kaisei naikno ke kosigna khiloau na tangomana te cheke faparini nanghagna God nei nogna farirhiu khiloau na teuna. ²Jaola mae sneka te loku ranghidi mae funei ka khiloau na thosei cheke eghu, “Nogu mae funei iara gne ghepa thabusigna kolho ka khiloau gne. Eghume iara theome mala ghatho tahuni ba thofno loku heta ranghini mana.” Theo. Mae sneka ka khiloaure mala loku heta mala toghodi mae funei ka khiloaure, naugna mare kaisei ka fatutuani nei namhani God.

Farirhiu chaichaghi nei thofno dedei

Uve ghema Timoti, iara magnahaghe nigho te mala farirhiu eghu ka naiknore glepo igre. Eghuteuna iagho cheke faheta ka naiknore mala leghudi. ³Keha naiknore funu farirhiu glepo te jafra fara nei theome leghuni thofno nogna farirhiu tutuani noda Lord Jisas Kraes nei nogna farirhiu khiloau na. ⁴Naikno te farirhiu chaichaghi igre theome laseni kaisei glepo nu mare fahaehaghe fara eghu, eghuteuna au gaoghatho te diꞌa mala magra fabrahu eidi nafnata cheke te theo nafudi. Nafnata puhi igne faꞌeiꞌeidi naiknore mala goghotu, magra, nagho nei au gaoghatho te diꞌa. ⁵Mare magra koba eghuteuna theome au kaisei gaoghatho te doglo ka nagnafadire. Mare theome tangomana te filo glani kaisei glepo te tutuani. Mare cheke eghu ka gaoghathodi thedire, “Te loku ranghini God tahati na ngala kaisei nabrou te mala dedei na.”

⁶Tutuani, mae ihei te fatutuani ni God na mana dedei fara ka nakarhagna na, jame teuna mana gleꞌani fara unha te auhi tagna na. ⁷Kate karha meida na tahati neke theome hata mei baluda kaisei glepo keli ka nauthoglu gne. Eghuteuna ka gleheda na ginauna tahati jaola theome tangomana te hata fajifla kaisei glepo keli ka nauthoglu igne. ⁸Eghume tahati nabada na gleale’a kolho jame te au gheda gano ba noda pohe na. ⁹Bligi fara ranghidi iheire te magnahaghei kolho dedei na te snoꞌo ka fariuriu na. Mare tangomana te tapla jafra ka nafnata glepo te fanoinoli ba glepo te diꞌa. Glepo igre tangomana te korho fadeleidi mare ghilei diꞌa fara nakarhadire, eghuteuna God ginauna na paradi fara. ¹⁰Magnahaghei sileni biꞌo na u glathigna puhi diꞌa fateote’o. Keha naiknore jifla kokoni khiloau gne naugna mare magnahaghei sileni biꞌo. Nu mare khogla fadiꞌa nagnafadi nei paradi eghu kolho thedi.

Unha te mala eni mae Timoti

¹¹Nu iagho kaisei mae nogna God. Eghume iagho nabamu na au fadelei ka glepo te diꞌa tuare. Iagho fariuriu koba mala edi unha te doglo ke ulugna God. Eghuteuna au fakeli nakarhamu na ka khiloau gne, nei loku famaku ka nou fatutuani na. Au heta ka vido te ninhigrana, biꞌo nou namha na ranghini ihei nei lolokelidi keha naiknore. ¹²Fariuriu fara nakarhamu ka khiloau gne mala au fakeli, jateula mae ihei te fariuriu chari te mala ulu ka fangenghele ia eghu. Ghaoghatho heta eigna iagho la hatahi nou taba u karha fei tifa na. God neke kilo nigho mala hata karha tuana. Eghuteuna iagho neke cheke thakleni nou fatutuani biꞌo eigna mae Kraes ke uludi kmana naikno te nomhini. ¹³Ke ulugna God mae ihei teke tusu lao karha ka gobigna lepo fateote’o nei ke ulugna mae Jisas Kraes mae ihei teke theome mhaghu teke cheke thakleni nogna fatutuani biꞌo na ke ulugna mae Pontius Paelat, iara gognaro na cheke faheta ka iagho. ¹⁴Naugna glepo teke chekedi God mala edi iagho teku ra, iagho famane leghudi ka puhi te doglo ghilei thokeni narane mala ke pulo meigna noda Lord Jisas Kraes. ¹⁵God ginauna na fapulo meini mae Kraes ka narane mana thegna teke vahini. God na keli fara nei mana thegna ngala te au nolaghi biꞌo te mala funei frunidi gobigna lepo fateote’o ka nauthoglu gne. Mana ngala te King ke uludi mae King te gnafa nei Lord ke uludi mae funei te gnafa. ¹⁶Mana thegna ngala te theome tangomana te lehe na. Mana au ke lamnagna naphae biꞌo te theome tangomana naiknore te tei rhegnai. Theo kaisei naikno te filoni God, ba tangomana te filoni mana. Ranghini nafnakno nei nolaghi tifa tifa. Amen.

¹⁷Cheke faheta ranghidi iheire te dedei fara ka nauthoglu igne mala thosei fahaehaghe fara nei thosei rouronudi glepo nate dofidi kaisei narane, nu cheke ranghidi mala fatutuani ni God mae ihei te tusu ranghi ghita gobigna lepo te keli mala gleale’a tahati. ¹⁸Timoti, iagho cheke faheta ka mare mala edi mare glepo te kelire, eghuteuna sasaꞌa mala toghodi keha naiknore nei tufa unha te au ka mare. Nafnata gloku te keli igre ngala, jateula te nodi dedei mare na. ¹⁹Ka puhi igne mare ginauna na salofodu maladi thedi dedei te heta fara malagna nathuꞌu nauriha. Eghuteuna mare ginauna tangomana te thokeni nakarha te thofno tutuani igne.

²⁰Ghema Timoti, iagho mala reireghi fakelidi gobigna lepo fateo teke lisei arihi God ka khamemu iagho igne. Figri lao thagrumu na ka nafnata cheke te diꞌa fara te theo nafudi nei ka nafnata cheke te chaichaghi te chekeni “Puhi glalase.” Cheke igne theome kaisei ka gaoghathogna khiloau na. ²¹Keha naiknore la leghunihi puhi chaichaghi igne la jifla kokonihi khiloau na.

Iara toreni nogna khokofakasai God mala au balumi ghotilo. Me gnafa. Iara, mae Pol.