Ululahu Tesalonika
Letas Ululahu Teke Riso Tei Mae Pol Ka Khiloau Tesalonika
Thoutonu kmo’ei eigna buka igne
Tesalonika gne namono biꞌo ka Provins Masidonia. Kaisei fata mae Pol neke tei Tesalonika neke toutonuni nogna Nonomho te Keli Lord na ka naiknogna namono tuana. Kmana naikno te theome Jiu fatutuani ne leghuni nogna farirhiu mana na. Nu theome raugha keha naiknore ne goghotu ka glepo te keli te edi mae Pol farihoteidi naikno te theome Jiu re. Aonu ka vido tuana mare ne funu khini mae ka namono tuana, aonu mana neke tei ka namono Berea (filoni buka Mae Khuru 17:1-15). Aonu ke leghu, kate au mana Korin, kheragna mana mae Timoti ne toutonu ka mana eidi naikno khiloau Tesalonika.
Aonu mae Pol ne risoni letas igne ka finogha 50. Mae Pol ne cheke tegio ka God kate nomhidi nodi fatutuani, nei namha farihoteidi thedi. Eghuteuna mana jaola ne cheke tughudi keha ghusna te edi mare eigna ke pulo meigna Kraes. Mae Pol magnahaghei gaoghathodi naikno Tesalonika te mala kegra heta ka nodi fatutuani na. Mana cheke ranghidi mala loku fakeli ghilei thokeni narane mala ke pulo meigna Kraes na.
Phei vido ka letas igne
Tegio nei famane cheke: 1:1–3:13
Farirhiu eigna gloku te mala edi naikno Khiloau: 4:1–5:28
11Iara mae Pol baludi mae Silas ghe mae Timoti, te riso ari letas igne ka ghotilo naikno khiloau nogna God Mama nei noda Lord Jisas Kraes te au ka namono Tesalonika. Ghehati toreni nogna khokofakasai nei pharikeli God Mama te mala au balumi.
Nodi fatutuani naikno khiloau Tesalonika
2Uve, kate tarai na ghehati ghatho ghami koba nei cheke fakelini God eimi ghotilo. 3Ghehati cheke fakelini God Kmada eidi gloku te keli teke edi ghotilo naugna nomi fatutuani nei namha. Ghehati jaola cheke fakelini God eigna ghotilo te kegra maku fabrahu ka nomi grouronu ka noda Lord Jisas Kraes.
4Uve kheraguro, God namha ghami ghotilo. Eghuteuna ghehati laseni mana vahi ghami ghotilo mala nogna thegna. 5Kate hata mei ka ghotilo Nonomho te Keli na, ghehati theome mei balu cheke kolho, nu jaola mei balu nolaghi nei Tharunga te Blahi, eghuteuna thofno laseni u Nonomho te Keli gne tutuani fara. Jaola ghotilo filoni unha nafnata nakarha te batuni ghehati. Ghehati batuni nafnata nakarha igne mala togho ghami ghotilo. 6Eghuteuna ghotilo mala filo leghu ka ghehati nei ka noda Lord. Eigna neubane au papara fara, ghotilo hatini Nonomho te Keli na balu gleale’a te mei ka mae Tharunga te Blahi. 7Eghume ghotilo mala pala batudi naikno khiloau ka namono Masidonia nei Akaia. 8Kmana kmana naikno te au ka Provins Masidonia nei ka Provins Akaia nomhinihi u Nonomho te Keli eigna mae Jisas Kraes teke toutonuni ghotilo. Nu nonomho gna nomi fatutuani ghotilo ka God na jaola tei tongana heva heva. Eghume ghehati theome tangomana te cheke eigna nomi fatutuani ghotilo na. 9Eigna naikno te gnafa re chekeni koba unha teke eni ghotilo ranghi ghami ka teke ari sigho ghami jarea. Eghuteuna te chekeni mare na ghotilo figri tagruni mumuju god na neke pogho soruni nei loku ranghini thofno God te karha nei tutuani. 10Jaola te chekeni mare na ghotilo ofoni Thugna God mala mei vuha kligna. God neke fakarha fapuloni mae Jisas ka glehe mala tangomana mana te fakarhi ghita ka fate nogna God nate mei tutuani thogheiro.
2Nogna gloku mae Pol Tesalonika
1Uve kheraguro, ghotilo lasenihi nomi thei teke ari ghotilo ia theome khobagna. 2Ghotilo laseni ame ari posa nga ka ghotilo teku na, ghehati neke au papara ka namono Filipae. Mae biꞌo mala baubatu ka namono tuana cheke fadiꞌa ghami ghehati. Nu neubane khale ghami kmana hoholo, noda God ne togho ghami ghehati mala frane te toutonuni ka ghotilo u Nonomho te Keli na. 3Eghume cheke te edi ghehati te mala farerhetadi nomi fatutuani ghotilo re theome chaghi, theome gaoghatho fadiꞌa ba theome saosagro ghami. 4Nu God neke fariuriu nei fatutuani ghami ghehati te mala toutonuni Nonomho te Keli gne. Kate toutonuni Nonomho te Keli na ghehati theome fariuriu mala keli tadi naiknore. Theo. Ghehati fariuriu mala keli tagna God, mae ihei te fariuriudi nagnafadare. 5Ghotilo laseni igne, ghehati theome cheke famaemahe mala hata ghami ghotilo, ba saosagro mala hata sileni ka ghotilo. Theo. Ghehati theome poruni khiri na ka ghotilo, God laseni igne tutuani fara. 6-7Ghehati theome hironi nafnakno na ka ghotilo, ba ka ihei. Ghehati nogna khuru mae Kraes. Naugna igne, kate au balumi ghotilo na, ghehati tangomana te tore glepo ka ghotilo.
Nu ghehati faꞌamama ka ghotilo jateula kaisei gaꞌase te taegodi goro thugna. 8Naugna ka nomi namha biꞌo ranghi ghami ghotilo ia ghehati keli tami fara te falase ari ka ghotilo Nonomho te Keli eigna mae Jisas Kraes. Theome tuana kolho. Nu ghehati jaola keli tami mala lehe eimi ghotilo. 9Uve, kheraguro, ghotilo lase ghamihi ghehati loku heta fara bongi narane mala foli unha te nabami themi. Naugna ghehati theome magnahagheni te eni kaisei puhi biꞌo ka ghotilo kate toutonuni Nonomho te Keli gne. 10Kate au balumi ghotilo naikno khiloau re, ghotilo theome filoni kaisei najafra ba kaisei puhi biꞌo ka ghehati naugna ghehati nakarhami na doglo fara ke ulugna God. Ghotilo themi laseni igne. God thegna jaola laseni unha teke eni ghehati ka ghotilo na thofno klino fara. 11Jateula tuana, ghotilo laseni, ghehati sopa togho ghami ghotilo jateula kaisei mae te toghodi goro thugna. 12Ghehati faheta ghami, togho ghami nei cheke ranghi ghami ghotilo mala leghuni nafnata nakarha te keli tagna God. Mana kilo ghami mala au ka thofno nakarha nate keli te funei frunini God ginauna.
13Eghuteuna ghehati jaola cheke fakelini God leghu narane, kate hatini ghotilo chekegna God te nomhini ka ghehati. Naugna ghotilo theome hatini jateula nogna cheke naikno kolho eghu, nu thofno chekegna God. Eghuteuna thofno chekegna God igne loku ke lamnami ghotilo iheire te fatutuani. 14Uve kheraguro, ghotilo filo leghudi naikno khiloau te au ka namono Judia. Ghotilo neke au papara ka kherami themi, jateula naikno khiloau teke au papara ka hatimare mae Jiu. 15Mae Jiu tuare neke faleheni noda Lord Jisas nei hatimare mae profet. Eghuteuna mare jaola huhuru ghita mala jifla ka namono tuana. Mare theome keli ranghini God, eghuteuna mare nodi naoka naikno te gnafa. 16Mare fariuriu lhoti ghami ghehati te mala cheke ranghidi iheire te theome Jiu mala fakarhidi. Kate eni igne, mae Jiu tuare fodu salaꞌui ka nakhibo. Eghuteuna leghu lahu na, diꞌatagna God na la meihi ke klignadi mare.
Mae Pol magnahaghei fapea sighodi
17Uve kheraguro, neubane kuru fajifla ghami mare katha vido kmoꞌei, gaoghathomire ghehati au ngala ka ghotilo. Eghume ghehati neke thofno fariuriu fara mala ke ari filo ghami ghotilo. 18Ghehati magnahaghei ari sigho ghami, tulao iara mae Pol fariuriu kmana fata, nu mae Satan lhoti ghami ghehati te ari na. 19Eigna ghotilo nomi grouronu, nomi gleale’a, nei nomi nafnakno. Uve, naugna eimi ghotilo, ghehati thofno gleale’a fara kate kegra fodu balugna Lord Jisas Kraes kate pulo mei mana na. 20Tutuani fara ghotilo nomi nafnakno nei nomi gleale’a.
31Ghehati neke theome tangomana ari ka ghotilo, nu ninhigrana fara ofo te raugha na. Eghume ghehati ghaoghatho mala au kolho ka namono Atens themi, 2eghuteuna neke kuru arini mae kherada Timoti ka ghotilo. Mae Timoti kaisei mae nogna gloku God te loku balumi ghehati mala toutonu ranghidi naiknore Nonomho te Keli eigna mae Kraes. Ghehati kuru arini mala farheta ghami nei toghodi eghu mana nomi fatutuani ghotilo re. 3Ghehati kuru arini mana mala theo kaisei ka ghotilo te figri fapulo ka nogna fatutuani na eidi naꞌau papara gognaro gre. Eigna ghotilo themi lasedi nafnata naꞌau papara igre u gaoghathogna God malada tahati. 4Kani au teku balumi ia, ghehati neke kulu chekedi ka ghotilo naꞌau papara te thoke mei ka tahati te gnafa igre. Eghuteuna ghotilo lasenihi igne thofno thakle mei tutuani fara. 5Naugna igne, iara kuru arini mae Timoti ka ghotilo mala tangomana iara te laseni nomi fatutuani ghotilo na. Iara kuru arini mana kate theome tangomana ofo te raugha. Te mhaghuni iara na mae Satan jame neke fariuriu ghami ghotilo, eghuteuna nakmusa fateo te edi tahati igre ginauna na theo nafudi kolho.
6Nu mae Timoti gne kela pulo mei ka ghehati funu ka ghotilo. Mana hata mei famane nonomho te keli eigna nomi fatutuani nei namha. Mana toutonu ka ghehati eimi ghotilo te ghatho ghami fabrahu ka puhi te keli, nei magnahaghei filo ghami fara jateula ghehati te magnahaghei filo ghami ghotilo. 7Eghume kheraguro, nonomho te keli teke nomhini ghehati eigna nomi fatutuani na fameomego ghami farihoteidi puhi biꞌo nei naꞌau papara gre. Naugna gognaro na ghehati laseni ghotilo thofno kegra maku ka nomi fatutuani na. 8Gognaro na ghehati kela phanga fapulo naugna ghotilo te kegra maku ka Lord. 9Tutuani fara, ghehati tangomana te cheke fakelini God eimi ghotilo. Nu nomi kilo fnakno ghehati na theome nabagna u gleale’a biꞌo ke ulugna noda God eimi ghotilo! 10Eghuteuna ghehati tarai heta fabrahu eimi ghotilo bongi narane. Ghehati tarai mala tangomana teke filo ghami nei tusu ari tami gobigna lepo te nabami ghotilo mala farhetadi nomi fatutuani.
11Ghehati tarai ka God Kmada thegna nei noda Lord Jisas Kraes mala kuru fapulo ghami ka ghotilo thogheiro. 12Iara toreni Lord mala fabruarani nei fathovuni nomi namha na fari themi nei naikno te gnafa jateula ghehati te namha ghami ghotilo. 13Ka nafnata puhi igne mana ginauna farhetadi nagnafami, eghuteuna ghotilo ginauna klino nei blahi ke ulugna God Kmada kate pulo mei noda Lord Jisas Kraes baludi nogna naikno blahi fateote’o.
4Nafnata nakarha te keli tagnani God
1Uve kheraguro, gognaro na iara au keha glepo te mala chekedi ka ghotilo. Ghehati neke farirhiu ghami ghotilo nafnata nakarha te keli tagnani God igne. Eghuteuna ghotilo auhi ka nafnata nakarha tuana. Gognaro na ghehati tore ghami ghotilo ka nanghagna Lord Jisas mala au fabrahu ka nafnata nakarha te keli tuana. 2Eigna ghotilo lasedihi farirhiu teke tusu ari tami ka nogna nolaghi noda Lord Jisas.
3Te chekeni iara igne unha te magnahagheni God na. Mana magnahaghei ghami ghotilo te blahi nei klino. Eghume te keli na ghotilo te au fadelei ka gnognoro. 4God magnahaghei ghami ghotilo mae nalha’ura te sopa ghatho tahudi khetomi are ka puhi te thofno blahi fara. 5Thosei lisa lao thinimi are ka gnognoro jateula naikno te theome laseni God ra eghu. 6Eghume theome tangomana kaisei mae te eꞌei puhi diꞌa ranghini mae kheragna fofodu na ka puhi igne. God ginauna fatedi naikno te edi glepo igre. Ghehati kulu cheke faheta ka ghotilo eigna igne. 7Naugna God neke kilo ghita mala naikno blahi eghuteuna theome magnahaghei ghita te au ka nakhibo. 8Eghume ihei te tirogna leghuni farirhiu igne, mana theome tirogna leghuni naikno nu mana tirogna leghuni God, mae ihei teke tusu ranghi ghau nogna Tharunga te Blahi.
9Ghehati theome naba te riso ari ka ghotilo eigna te mala namhani kherada fofodu ka khiloau. Naugna God thegna farirhiu ghamihi ghotilo te mala fari namhai na. 10Tutuani fara, ghotilo namhadi kherada te gnafa ka namono Masidonia. Eghume ghehati tore ghami fara kheraguro mala biꞌo e biꞌo ghotilo nomi namha na ranghidi. 11Hati nhetami na au ka nakarha te muana. Loku fakelidi nomi gloku themi are, nei loku ka khamemi themi are. Naugna ghehati neke kulu chekehi ka ghotilo te mala edi glepo igre. 12Te leghudi ghotilo farirhiu igre, naikno te au ke kosigna khiloau gne ginauna ghatho tahu ghami ghotilo. Eghuteuna ghotilo ginauna theome rouronu ka ihei malagna unha te nabami themi na.
Meigna Lord
13Kheraguro, ghehati magnahaghei ghami ghotilo te thofno lasedi iheire tela lehehi ra. Ghehati theome magnahaghei ghami ghotilo te diꞌanagnafa eidi iheire tela lehehi jateula naikno te diꞌanagnafa te theome fatutuani ni mae Jisas. 14Tahati fatutuani ni mae Jisas neke lehe eghuteuna ke karha fapulo. Eghume, tahati jaola fatutuani narane ke pulo meigna mae Jisas, God ginauna hata fodu balugna mae Jisas naikno khiloau teke lehe ra. 15Unha te chekedi ghehati gognaro igre nogna farirhiu thegna Lord. Tahati karha teu ka narane ke pulo meigna Lord na ginauna au balugna mana, nu theome thofno tei mala au balugna mana ke uludi iheire tela lehehi ra. 16Lord thegna ginauna mei funu kligna. Tahati ginauna nomhini kaisei neha biꞌo balu naoglagna kaisei mae funeidi engel nei balu naogla khufli nogna God. Eghuteuna naikno khiloau teke lehe ra ginauna kulu kegra mala thafoni Lord. 17Ke leghugna igne, tahati karha au teu ka nauthoglu igne God ginauna salo fodu haghe ghita baludi mare ke lamna grokho mala thafoni Lord ka maloa. Eghuteuna tahati ginauna au balugna Lord tifa tifa. 18Eghume fari totoghoi ka cheke igre.
5Tarabana mala meigna Lord
1Uve kheraguro, ghehati theome nabami te riso ari ka ghotilo eidi narane ba nhigra mala pulo meigna Lord. 2Ghotilo thofno laseni fara eigna theo kaisei naikno te laseni. Narane mala ke pulo meigna Lord tuana ginauna farhanidi naikno jateula kaisei mae blau te mei bongiro ia eghu. 3Kate chekeni naiknore, “Pharikeli nei nasnagla,” God ginauna ghosei roꞌedi, jateula khabru ghosei te mei ka gaꞌase te namo karha sua ia eghu. Eghuteuna naikno tuare ginauna theome rikha.
4Nu kheraguro, ghotilo theome au kate romno. Eghume narane tuana ginauna theome farhani ghami ghotilo jateula kaisei mae te mei ka suga na te mala blau. 5Ghotilo hui nogna naikno naphae. Ghotilo nogna naikno narane. Tutuani tahati theome nogna bongi ba gromno. 6Eghume tahati thosei jateula keha naikno te thuru te theome lasedi glepo igre, nu tahati dofra nei reireghi fakeli ghita theda. 7Eigna iheire te thuru, thuru bongiro, eghuteuna iheire te koꞌu dranga, koꞌu bongiro. 8Nu tahati nogna narane. Eghume tahati reireghi fakeli ghita theda. Noda fatutuani nei noda namha ranghini God jateula noda greoreo, nei noda grouronu te mala hatini tahati u karha fei tifa na jateula noda khepi eghu. 9God theome vahi ghita mala para ghita kate diꞌatagna, nu mala hatini tahati u thofno nakarha na ka noda Lord Jisas Kraes. 10Mae Jisas neke lehe eida tahati mala tangomana tahati te karha balugna mana tifa tifa, neubane karha neu ba lehehi kate mei mae Jisas na. 11Eghume fari totoghoi nei fari faheahetai, jateu te eni ghotilo gognaro gne eghu.
Farirhiu leghu lahu nei kubae
12Uve kheraguro, ghehati gognaro na tore ghami ghotilo mala ghatho tahudi naikno te loku heta balumi ghotilo, iheire God teke vahidi mala reireghi ghami nei farirhiu ghami eigna nakarhagna khiloau na. 13Thofno ghatho tahudi fara nei namhadi eghu eigna nodi gloku te edi ranghi ghami ghotilo ra. Au fodu ka pharikeli. 14Kheraguro, ghehati tore ghami ghotilo mala cheke fahetadi iheire te thodo loku. Fafranedi iheire te mhaghu. Toghodi iheire te nigra. Thoghei famane cheke ranghidi naikno te gnafa. 15Fiofilo fakeli, thosei snakreni kaisei naikno me foli fapulo glepo te diꞌa ka ihei tughuni glepo te diꞌa. Nu fariuriu eni unha te keli koba fari themi, ba ranghidi naikno te gnafa.
16Gleale’a koba. 17Tarai koba. 18Cheke fakeli eidi gobigna lepo fateo, neubane unha te keli ba diꞌa. Tuana unha God te magnahagheni ka ghotilo naikno khiloau ra.
19Thosei fakhusuni nogna gloku mae Tharunga te Blahi na. 20Thosei susukuni chekedi hatimare mae profet. 21Nu fariuriudi gobigna lepo fateote’o. Loku famaku ka unha te keli. 22Tafradi gobigna lepo te diꞌa.
23Ghehati tarai ka God thegna, mae ihei te tusu ranghi ghami nogna pharikeli, mala faklino ghami fabrahu. Ghehati tarai ka God mala batu fakelidi nagnafami, tharungami nei thinimi fateo, mala theo kaisei najafra kate mei noda Lord Jisas Kraes. 24Mae ihei te kilo ghami ghotilo ginauna na eni igne ranghi ghami ghotilo. Ghotilo tangomana te fatutuani ni mana.
25Kheraguro, tarai mei ghami.
26Kubaedi kherada ka namono Tesalonika balu namha.
27Iara cheke ka ghotilo, ka nogna nolaghi Lord, mala iu’iju letas igne ranghidi kherada te gnafa jare Tesalonika.
28Iara toreni nogna khokofakasai mae Jisas Kraes noda Lord mala au balumi. Me gnafa. Iara, mae Pol.