Ululahu Pita
Letas Ululahu Teke Risoi Mae Pita
Thoutonu kmo’ei eigna buka igne
Naikno te kmanare gaoghathodi na mae Pita gne nogna fanomho mae Jisas. Tahati laseni mana kaisei mae biꞌo ka khiloau eghuteuna mana neke au raugha Rom. Mare jame teke faleheni mana Rom ka finogha 68. Mana jame neke risoni letas igne ka finogha 64.
Mae Pita neke risoni letas igne mala toghodi nei au heta eghu naiknore ka hoholo, naugna mare naikno khiloau. Mana magnahaghedi naiknore te au heta ka Nonomho te Keli eigna mae Jisas Kraes. Naugna mare laseni mae Jisas gne neke jaola neke au papara fara. Hoholo igre biꞌo fara mala fariuriudi nodi fatutuanire. Eghuteuna jame te kegra heta mare na, God ginauna tusu ranghidi karha majaghani ka narane teke pulo meigna mae Jisas Kraes na.
Phei vido ka letas igne
Nakarhagna naikno khiloau na mala keli fara: 1:1–2:10
Puhidi naikno khiloau ka narane te au papara: 2:11–4:19
11Iara mae Pita, kaisei nogna khuru mae Jisas Kraes.
Iara riso ari letas igne ka ghotilo nogna naikno God jateula naikno phosa teu ka nauthoglu gne teu te au tafri ka Provins Pontas, Galesia, Kapadosia, Esia nei Bitinia. 2Tifa na, God Mama neke vahi ghami ghotilo leghuni nogna gaoghatho na. Eghuteuna mae Tharunga te Blahi neke fablahi ghami naugna mana neke magnahaghe ghami ghotilo te leghuni mae Jisas Kraes nei fagae ghami ka dadaragna mae Jisas Kraes.
Iara toreni God mala fablahi ghami nei tusu ranghi ghami pharikeli mala bruara fabrahu tifa tifa.
Naꞌau grouronu
3Cheke fakelini God Kmagna noda Lord Jisas Kraes! Eigna ka nogna kokhoni ghita te biꞌo fara, mana neke tusu ranghi ghita u nolaghi te mala teke karha majaghani na. Eghume gognaro na tahati au noda grouronu eigna thofno nakarha na, naugna mae Kraes neke karha fapulo kau glehe. 4Gognaro na tahati rouronu fara eigna u thofno karha te ofo ghita teu kligna te theome tangomana te boto ba te diꞌa. 5Ka nomi fatutuani ghotilo ka God na, mana ginauna na reireghi fakeli ghami ka nogna nolaghi na ghilei thoke mei narane leghu lahu te mala fakarhi ghami na. 6Naugna igne ghotilo tangomana te gleale’a, neubane au papara ghotilo katha vido kmoꞌei ka kmana nafnata fariuriu ka nauthoglu igne. 7Fariuriu igre khogla fariuriudi kolho nomi fatutuani ghotilo re, mala laseni te nheta ba te klino na. Fariuriu igre jateula gol te lilisei ka khaꞌaghi te mala fariuriu nei famane fagagae teu ia eghu kolho. Neuba ngau, gol na ne theome tangomana te au fabrahu tifa tifa. Nu nomi fatutuani ghotilo na glepo ulu fara ka God ke tulao gna gol. Eghume ka narane mala ke pulo meigna mae Jisas Kraes na, mana ginauna kilo fnakno ghami nei cheke fakelidi nanghamire nei ghatho tahu ghami naugna nomi fatutuani na ne heta fara. 8Iara laseni, ghotilo theome filoni mana gognaro, nu ghotilo namhani mana, fatutuani ni mana nei gleale’ani mana. Tutuani, nomi gleale’a ghotilo na biꞌo fara, theome tangomana kaisei naikno te ruruthani gaoghathogna na. 9Naugna ghotilo fatutuani ni mana nei hata thofno nakarha te theo ka huigna, jateula te rouronuni ghotilo nate thoke mei ginau.
10Hatimare mae profet re neke hiro fakelini nei fariuriu mala laseni eigna u nakarha igne tifa na. Mare neke cheke eigna u khokofakasai nate hata ghotilo ginauna. 11Tharunga gna mae Kraes na neke au baludi mare. Eghuteuna mae Tharunga na neke chekeni eigna mae Kraes nate kulu au papara, eghuteuna ke leghugna igne God ginauna tusu ranghini mana siasigla balu nolaghi biꞌo. Hatimare mae profet neke fariuriu hironi faneha ba niha nau nate thokei mei glepo igne ginauna. 12Eghume, God neke falalase ka mare u thofno gaoghathogna cheke igne, theome mala toghodi kolho thedi kate toutonu na, nu mala togho ghami ghotilo. Gognaro na mae Tharunga te Blahi teke kuru mei God funu kligna na tusu lao nolaghi ka keha naiknore mala toutonu ka ghotilo. Naikno igre neke toutonu eigna u Nonomho te Keli na ka ghotilo glepo teke toutonu dila hatimare mae profet ra. Tutuani fara hatimare mae engel, mare magnahaghei te lase fakeli nila Nonomho te Keli igne.
Tahati mala au blahi
13Eghume gognaro na ghotilo tarabana fabrahu nagnafamire mala leghuni Lord nei filo fakeli eghu. Eghuteuna farerheta gaoghathomire ka glepo te keli God nate tusu ranghi ghami ka narane ke pulo meigna mae Jisas Kraes. 14Tifa na ghotilo neke theome lalase, ghotilo neke leghudi kolho puhimi themi te diꞌare. Nu gognaro na ghotilo magnahaghei te leghuni God. Eghume thosei ke au ka nafnata nakarha teke au ghotilo tifa ia. 15God mae ihei teke vahi ghami ghotilo na mana blahi fara. Eghume, jateula tuana eghu ghotilo mala au blahi ka unha fateo te edi ghotilo re. 16Naugna ka grioriso te blahi na God neke cheke eghu, “Ghotilo mala au blahi, naugna iara au blahi.”1:16 Lev 11:44,45; 19:2.
17Kate tarai na ghotilo tangomana te kiloni God, Mama. Tutuani fara, kate fatedi naikno te gnafare, God ginauna theome tangomana te vahini ihei na, nu mana ginauna ghathoni eigna nogna gloku soasopai naikno na. Eghume kate karha nga teu ka nauthoglu igne, ghotilo mala ghatho tahuni God leghu fata. 18Ghotilo laseni igne, tifa na ghotilo neke au ka nakarha te theo nafugna. Ghotilo neke hata u nafnata nakarha te diꞌa igne leghudi mae ku’emi tifa ra. Nu God neke fakarhi ghami ghotilo. Mana neke foli fapulo ghami ghotilo eidi nakarha te diꞌa teke edi ghotilo re. Mana neke theome foli fapulo ghami ka glepo tangomana te boto, jateula silva ba gol. 19Theo. Mana neke foli fapulo ghami ka dadaragna mae Kraes thegna te ulu tulao. Mae Kraes na jateula kaisei sua sipu eghu mala fafara, te famane klino nei theo kaisei thona tagna. 20Ame vuvuha nga nauthoglu igne teku na, God neke kulu vahini mae Kraes mala fakarhi ghami ghotilo. Eghuteuna gognaro na, mae Kraes na la meihi mala togho ghami ghotilo ka narane leghu lahu igre ka nauthoglu igne. 21Naugna igne, ghotilo fatutuani ni God mae ihei teke fakegra fapuloni mae Kraes ka glehe nei tusu ranghini nafnakno biꞌo. Eghume gognaro na nomi fatutuani nei grouronu teu ghotilo na biꞌo fara ka God.
22Gognaro ghotilo fagae ghamihi themi naugna ghotilo leghuni cheke te tutuani na. Eghuteuna gognaro ghotilo jaola tangomana te namhadi kherami fofodure ka khiloau gne. Eghume te keli na ghotilo kafe namhadi naikno khiloau te gnafare ka thofno nagnafami fateo. 23Naugna chekegna God na neke togho ghami ghotilo fara mala ke karha majaghani ghotilo. Eghuteuna chekegna God igne theome tangomana te lehe na, nu karha fabrahu tifa tifa. 24Grioriso te blahi na ne cheke eghu,
“Naikno te gnafare jateula buburu eghu kolho,
eghuteuna nodi nafnaknore jateula chechenge gaju eghu kolho.
Te lehe buburu na, chechenge ginauna na brusu.
25Nu chekegna Lord na ginauna au fabrahu tifa tifa.”1:25 Isa 40:6-8.
Eghuteuna igne cheke te toutonuni mare ka ghotilo na.
2Mae Jisas thina karha ka sugagna God
1Eghume, thosei nomire eghudi puhi te diꞌare. Thosei chaghidi naiknore. Thosei goghotu ba cheke fadiꞌadi keha naiknore. 2Nu ghotilo mala jateula sua gegeꞌe te karha majaghani te magnahaghei chuꞌu ia eghu kolho. Naugna ghotilo nabami na magnahaghei farirhiu te famane klino nei bligi eghu kolho. Eghuteuna ghotilo ginauna tangomana te kotu haghe ka farirhiu igne nei ginauna hata u thofno nakarha eghu. 3Eigna ghotilo lasenihi puhigna Lord na, nei lasenihi mana na kaisei mae keli fara.
4Noda Lord Jisas na thina karha. God neke vahini mana mala glepo ulu tulao ka tathagna God na. Neubane eghu ngau, naiknogna nauthoglu igne theome magnahagheni mana. Nu ghotilo mei ka mana. 5Ghotilo jaola jateu thina karha eghu, eghuteuna God ginauna salo fodu ghami jateula nogna Sugablahi eghu ka nogna nolaghi mae Tharunga te Blahi. Ghotilo ginauna jateula nogna mae pris blahi eghu God mala au fodu mala fafara ka God. Mae Tharunga te Blahi ginauna togho ghami ghotilo mala fafara, nei God ginauna keli tagna fara ka fafara igre ka nanghagna mae Jisas Kraes. 6Glepo igre tutuani fara, naugna grioriso te blahi na cheke eghu,
“Iara vavahi kaisei thina te keli fara mala fakegra hagheni jateula kaisei thina te ulu tulao ka Sugablahi Jerusalem.
Eghuteuna ihei te fatutuani ni mana na,
mana ginauna theome mamaja.”2:6 Isa 28:16.
7Thina igne glepo ulu fara ka ghotilo naikno te fatutuani na. Nu ka naikno te theome fatutuani re, grioriso te blahi na cheke eghu,
“U thina teke tirodini mae iheire te horo suga na,
kela kegra haghe kaisei thina ulu fara ka suga na.”2:7 Sam 118:22.
8Eghuteuna ka keha grioriso te blahi na cheke eghu,
“Naiknore ginauna totokhei ka thina igne.
Eghuteuna mare ginauna na uka ka thina igne.”2:8 Isa 8:14.
Mare uka naugna mare ne theome leghuni unha te chekeni God na. Igne unha te ghathoni God te maladi mare na.
9Nu ghotilo naikno vavahi. Tutuani fara, God neke vahi ghami ghotilo mala nogna vike mana. Ghotilo nogna pris mae King, eghuteuna ghotilo nogna naikno blahi mana. Ghotilo thofno nogna naikno God thegna, neke vahi ghami mala toutonu ranghidi glepo te keli teke edi mana re. Mana neke kilo ghami ghotilo mala jifla mei ka vido te romno na mala ruma lamna nogna famane naphae na. 10Tifa na ghotilo neke theome nogna naikno God, eghuteuna God neke theome kokhoni ghami ghotilo. Nu gognaro na ghotilo nogna naikno mana eghuteuna mana kokhoni ghami ghotilo fara.
Au doglo ke ulugna God
11Uve kheraguro, ghotilo jateula naikno fasigho nei mae phosa eghu ka nauthoglu igne naugna ghotilo theo kaisei namono ka nauthoglu gne te thofno namonomi ghotilo na. Eghume, iara thofno tore ghami ghotilo mala au fadelei ka glepo te diꞌa te magnahaghedi thinimire. Naugna glepo te diꞌa igre magra ka nakarhami ghotilo re. 12Gognaro na naikno te theome fatutuani ni God re cheke fadiꞌa ghami ghotilo fabrahu. Eghume puhimi ghotilo re mala keli nei doglo eghu ka tathadi naikno tuare mala tangomana mare te filodi glepo te keli te edi ghotilo re. Te eghu ghotilo na, ka narane ke pulo meigna mae Kraes na mare ginauna kilo fnaknoni God eidi puhimi ghotilo teke cheke fadiꞌadi mare tifa ra.
13Te mala keli tagna noda Lord na, ghotilo leghudi mae biꞌo te gnafa te au nodi nolaghi re te mala funei fruni ghami ghotilo na. Leghuni mae king biꞌo gna Rom mae ihei te kligna lahu ka naikno te gnafare. 14Leghudi hatimare mae gavana eigna mae king biꞌo neke vahidi mare. Mana neke kuru teidi mare te mala paradi iheire te huhughuni vetula na, eghuteuna kilo fnaknodi iheire te leghuni puhi te keli na. 15Naugna God magnahaghe ghami ghotilo te leghuni koba puhi te doglo na, eghuteuna ghotilo tangomana te fakmudi iheire te cheke fadiꞌa eimi ghotilo. Tutuani fara, mae igre theome laseni u nabrou te doglo na. 16Te keli na ghotilo au jateula naikno te snagla nodi fara eghu, na eghunu ne snaglahi eghu ghotilo edi glepo te diꞌare. Theo. Ghotilo mala au jateula nogna mae sneka God eghu sia. 17Ghatho tahudi naikno te gnafa nei namhadi kherada te gnafa ka khiloau gne. Thofno ghatho tahuni God ke uludi naikno te gnafare nei jaola ghatho tahuni mae king biꞌo gna Rom.
Mae Kraes falalase ka tahati puhi te mala au papara na
18Ghotilo mae gloku ra, leghudi nomi funeire, nei ghatho tahudi eghu. Thofno keli fara te ghatho tahudi ghotilo nomi funeire, neuba mare ne keli fara ranghi ghami ghotilo ba mare tangomana te para ghami ghotilo fara. 19Jame te fiti para ghami mare kate theo nafugna na, nu ghathoni God ghotilo me kegra maku teuna, God ginauna na fablahi ghami ghotilo. 20Nu jame te para ghami mare eigna najafra teke eni ghotilo na, neubane kegra maku ghotilo ka narane tuana, tuana theo nafugna kolho. Nu jame te para ghami mare neubane eidi ngala ghotilo glepo te kelire, eghuteuna kegra heta ghotilo tagna teuna, God ginauna na fablahi ghami ghotilo eigna igne. 21God neke kilo ghamihi mala eni igne, naugna mae Kraes neke papara fara mala fakarha ghami ghotilo. Mana neke falalase ka ghotilo nogna puhi na mala leghuni ghotilo ginau.
22“Mana neke theome eni kaisei nakhibo,
eghuteuna theo kaisei cheke chaichaghi te jifla mei ka foflogna na.”2:22 Isa 53:9.
23Eghuteuna kate cheke fadiꞌani na, mana neke theome cheke diꞌa fapulo. Kate parani na, mana theome diꞌatagna. Nu mana rouronu ka God mae ihei tangomana te fate naikno ka puhi te doglo. 24Kate haghe te mala lehe ka gaju fafatha na, mae Kraes neke pala nakhibodare ka thinigna na. Mana neke eni igne mala tangomana tahati te lilisei ke leghuda puhigna nakhibo na nei tangomana leghuni u puhi te doglo ke ulugna God. Naugna ka nafneragna mana na, mana neke fakeli fapulo ghita. 25Ghotilo tifa na jateula sipu neku neke tei snivi. Nu gognaro na, ghotilo ke pulo mei mala leghuni God, mae greireghi sipu na, thofno mae te mala reireghini nakarhami ghotilo na.
3Puhi eigna tholaghi
1Jaola gaꞌase tholaghi ra, mala leghudi khetomire. Tutuani keha mae re theome fatutuaniu ngala chekegna God na. Te keli na puhimi ghotilo re jame te mala korho meidi mala fatutuani mare. Jame te eni ghotilo igne na, ghotilo theome naba te chekeni kaisei glepo ka mare na. 2Nu mare ginauna tangomana te fatutuani ni mae Kraes kate filodi puhimi ghotilo te keli fara re, naugna ghotilo thofno ghatho tahuni God. 3Eghuteuna theome raꞌe keli te fakekheli kolho thinimi ke kosire te mala kekheliana fifilomi na, jateula ghotilo te flehi khakla ba lilisei keha nafnata glepo teke hohoro ka gol, ba pipichi pohe te keli fara. 4Nu unha te au ke lamna nagnafami ghotilo na tangomana te mala kekheliana fifilogna na. Eghuteuna te kekheliana fifilomi ghotilo na igne theome tangomana teke mala tughu na, naugna mei ka nakarha te au faleghu nei famane muana. Puhi igre thofno kekheliana fifilodire ka tathagna God nei mana ghatho tahudi fara. 5Eigna tifa na, gaꞌase blahi igre neke fatutuani ni God kolho. Eghuteuna rehati neke thofno leghudi khetodire. Ka nafnata puhi igne rehati keli fara kekheliana fifilodire. 6Sera jateula tuana neku neke leghuni mae Ebraham neke kiloni mana mae funei. Jame edi koba ghotilo glepo te keli igre, nei theome mhaghuni kaisei glepo te eni ranghi ghami khetomire teuna, ghotilo ginauna jaola goro thugna Sera.
7Eimi ghotilo mae te tolaghi ra, ghatho tahudi khetomire, naugna rehati theome heta jateula ghotilo eghu. Ghotilo ghatho tahudi reꞌe, naugna God neke tusu ranghidi la reꞌe nogna nhaꞌa cheke na, eigna ka nogna namha biꞌo mana na ginauna tusu ari u thofno nakarha te theo ka huigna ka ghotilo hui. Eghume te keli na ghotilo eni igne mala theome tangomana kaisei glepo te faroredi nomi tharai ghotilo re.
Tahati papara eigna unha te keli
8Leghu lahu na, ghotilo te gnafa na mala kaisei nomi gaoghatho ngala, nei kokhonidi gnafa naiknore. Fari namhai jateula te thabusigna tutuani eghu ngala, nei keli ranghini ihei nei au faleghu ghami themi. 9Jame kaisei mae ei puhi diꞌa ka ghotilo, thosei foli fapulo puhi te diꞌa tuana ka mana. Eghuteuna jame kaisei mae cheke diꞌa ka ghotilo, thosei cheke diꞌa fapulo ka mana. Blahi fara. Nu te keli na, ghotilo tarai ka God mala fablahini mana. Naugna tifa na God neke kilo ghami ghotilo, mana neke nhaꞌa cheke mala fablahi ghami ghotilo. 10Eigna te chekeni ka grioriso te blahi na, cheke eghu,
“Ihei te magnahagheni nakarha te keli nei magnahaghei gleale’a leghu narane teuna,
mana thosei cheke diꞌa nei thosei chekeni kaisei chaichaghi eghu.
11Mana figri lao tagrugna na ka nakhibo nei mala eni unha te keli.
Mana fariuriu mala au ka pharikeli baludi keha naiknore.
12Naugna Lord na reireghi fakelidi naikno te doglore.
Eghuteuna mana tangomana te fanomho ka nodi tharaire,
nu mana figri lao thagrugna na ka naikno te edi puhi te diꞌare.”3:12 Sam 34:12-16.
13Mae ihei gne naba te fadiꞌa ghami ghotilo jame te magnahaghei eni fabrahu ghotilo glepo te keli na? Theo kaisei naikno. 14Nu jame keha naiknore para ghami ghotilo eigna te eni ghotilo unha te doglo na, keli fara, ghotilo keli tami kolho. Eghume ghotilo thosei mhaghudi naikno te para ghami re nei thosei nanga nomi fara eghu ka mare. 15Nu te keli na ghotilo lisa lao ghami themi fabrahu ka mae Kraes nomi Lord. Eghuteuna leuleghu fata na ghotilo tarabana mala cheke tughudi naikno te ghusna ghami eigna unha te fatutuani ni ghotilo mae Kraes na. 16Nu ghotilo blaknoi famane cheke tughu balu ghaoghatho fakeli. Eghuteuna ghotilo mala doglo nei keli eghu nagnafami fabrahu. Naugna igne, naikno teke cheke fadiꞌa ghami ghotilo eigna unha te leghuni ghotilo mae Kraes na, mare ginauna na mamaja nodi fara. 17Jame teke gaoghathogna God te mala au papara tahati eidi glepo te keli teke edi tahati igre na, tuana keli kolho. Nu thono diꞌa fara jame te au papara tahati na naugna te eni tahati unha te theome doglo na. 18Naugna mae Kraes te doglo fara ka tathagna God na neke lehe tughudi naikno te diꞌare kaisei fata ngala. Kate au papara na, mana neke hata fadelei ne hui nakhibomi ghotilo re, eghuteuna ke batu fapulo ghami ka God. Tutuani fara, kate au nga teu mana ka nauthoglu gne, naiknore neke faleheni mana, nu God neke fakarha fapuloni mana ka nogna nolaghi mae Tharunga te Blahi. 19Ka nogna tothogho mae Tharunga te Blahi mana neke tei toutonu eigna Nonomho te Keli na ka tharungadi naikno te au ka suga sosolo re. 20Igre tharungadi naikno teke huhughu fara teke ofodi fabrahu teku God ka narane teke horo vaka mae Noa tifa ia. Kehaghu kolho, nhana naikno khaputudire teke fakarhadi God ka khoꞌu na. 21Eghuteuna khoꞌu igne kaisei fagaglana ranghi ghita eigna apublahi. God gognaro na fakarha ghami ghotilo ka khoꞌu naugna mae Jisas Kraes na kela karha fapulohi. Jaola, apublahi gne theome mala tihi koko thona ka thinimi ghotilo re, nu mala eni ghotilo kaisei nhaꞌa cheke ka God ka thofno gaoghatho te tutuani. 22Mae Jisas Kraes gognaro na gnokrohi kligna fei khame nhetagna God Mama ka sape nafnakno. Mana funei frunidi hatimare mae engel nei nolaghi fateo te au kligna.
4Tahati mala leghuni God
1Kani au teku ka nauthoglu igne, mae Kraes neke au papara ka thinigna thegna. Ghotilo jame jaola au nafnata gaoghatho te au ka mana igne mala kegra heta. Naugna ihei te au papara na, mana ginauna theome tangomana te leghuni puhigna nakhibo na. 2Eghume kani au teu ghotilo ka nauthoglu igne, ghotilo thosei leghudi glepo te diꞌa te magnahagheni fara thini na. Blahi. Ghotilo leghuni kolho unha te magnahagheni God na. 3Tifa na ghotilo neke raꞌe salaꞌui fara kate leghuni puhidi naikno te theome fatutuani ni God re, eigna ghotilo neke magnahagheni fara te jafra ka ihei na, ghotilo magnahagheni fara te eni puhi te diꞌa na, ghotilo magnahagheni fara te koꞌu waen na, ghotilo neke eꞌei gaghamu biꞌo mala ghamu nei koꞌu nei edi glepo te thono diꞌa fara re, nei ghotilo edi glepo te jafra fara kate tufru sorudi ghotilo mumujure. 4Nu gognaro na ghotilo theome tangomana te edi nafnata puhi te diꞌa baludi iheire te theome fatutuani ni God ra. Eghuteuna mare jaglo nodi fara ka igne, eghume gognaro na mare chekedi kmana nafnata glepo te diꞌa eimi ghotilo. 5Nu mare ginauna na toutonudi nakarhadi thedire ke ulugna God, mae ihei tarabana teu te mala fatedi naikno te karha nga teu gognaro gre, nei iheire tela lehehira. 6Naugna igne u Nonomho te Keli gne jaola neke toutonu tifa ranghidi naikno tela lehehira. Tutuani fara, kani au teku ka nauthoglu igne, mare neke theome tangomana te fafraini glehe na. Eigna naikno te gnafare mala lehe. Neuba ngau u Nonomho te Keli na neke toutonu ka mare mala tangomana mare te hogri nagnafa na mala karha fabrahu balugna God ginauna.
Fari totoghoi fari themi
7Nu tahati la mei namohi ka narane gobigna lepo ka nauthoglu igne ginauna hui. Eghume te keli na ghotilo ghaoghatho fakeli, nei filo fakeli eghu mala tangomana ghotilo te tarai na. 8Kaisei glepo te mala eni ghotilo te ulu fara ka gobigna lepore na igne, thofno fari namhai. Naugna puhi te fari namhai igne tangomana ghotilo te hata koko fari themi nakhibo te kmanare. 9Snakredi sugamire ka kherami te fatutuani ni Kraes are balu gleale’a. 10God neke tusu ari ka ghotilo soasopai khokofakasai te mala edi nogna glokure. Eghume ghotilo loku fakeli ka khokofakasai igre mala fari totoghoi ka kmana nafnata puhi. 11Ihei ka ghotilo te toutonuni chekegna God na, mana mala toutonuni cheke teke tusu mei God ka mana kolho. Eghuteuna ihei ka ghotilo te toghodi naiknore, mana eni igne ka nanheta teke tusu ranghini God na. Ka nafnata gloku te keli igre, naiknore ginauna kilo fnaknoni God ka nanghagna mae Jisas Kraes. Nafnakno nei nolaghi biꞌo te au balugna God tifa tifa. Amen.
Tahati mala au papara malagna Kraes
12Uve kheraguro, thosei nanga nomi ka glepo te para ghami gognaro igre. Glepo igre fariuriudi kolho nomi fatutuani ghotilo re. Uve, glepo te mei ka ghotilo igre theome glepo majaghani. 13Nu ghotilo gleale’a nomi kolho kate au papara ka puhi igne, naugna mae Kraes na jaola neke au papara. Eghuteuna ghotilo ginauna jaola na gleale’a fara kate filoni mae Kraes te thakle mei balu nolaghi nei nafnakno. 14Kate cheke fadiꞌa ghami naiknore naugna te leghuni ghotilo mae Kraes na, ghotilo keli tami kolho. Naugna mae Tharunga te Blahi na auhi balumi ghotilo. Mana neke mei funu ka God nei mana au nolaghi biꞌo. 15Theome keli kaisei naikno ka ghotilo te au papara eigna falehe naikno, blau, huhughu vetula, ba fadiꞌani nogna gloku ihei. 16Nu jame kaisei naikno ka ghotilo au papara naugna mana kaisei mae khiloau, thosei mamaja. Ghotilo kilo fnaknoni God naugna naiknore kilo ghami ghotilo “Nogna naikno Kraes”. 17Naugna narane God nate mala fatedi naiknore la fufunuhi. Mana ginauna na kulu fufunu ka nogna naikno thegna re. Te fufunu mana ka tahati na, ginauna thofno ninhigrana ranghidi iheire te theome fatutuani ni u Nonomho te Keli teke mei funu ka God thegna igne. 18U grioriso te blahi na cheke eghu,
“Naikno te doglore kulu thafodi narane te ninhigrana tulao re ame tangomana nga God te fakarhidire eghu.
Eghume naikno te theome leghuni God nei sneka ka nakhibo teure ginauna lehe tutuani fara.”4:18 Pro 11:31.
19Naugna igne, naikno te magnahaghedi God te mala au papara tulao eigna nodi gloku te keli ranghidi keha naiknore, snakre lao nakarhadire ka khamegna God. Naugna God neke vuavuhadi, mana theome tangomana te ghatho ihoni nogna nhaꞌa cheke te mala reireghidire.
5U khiloau na jateula kaisei nogna tothoghei God
1Iara kaisei mae mala baubatu ka khiloau. Iara neke thofno filo tathagu mae Kraes na neke au papara fara. Eghuteuna iara ginauna hata nafnakno biꞌo baludi kmana naikno ka narane nate thakle mei mae Kraes ka tahati na. Eghume, iara magnahaghei te cheke faheta ka ghotilo mae mala baubatu ra mala 2reireghi fakelidi naikno khiloau are jateula mae mala reireghi sipu eghu. Theo kaisei naikno te huhuru ghami te mala eni gloku igne. Nu, ghotilo sasaꞌa mala reireghi fakeli, naugna igne teke magnahagheni God mala eni ghotilo teku na. Theome keli te eni ghotilo gloku igne te mala hata nomi sileni kolho na. Theo. Ghotilo mala loku ka gloku igne naugna ghotilo gleale’a fara te mala toghodi naiknore. 3Thosei kegra me poapola kolho jateula kaisei mae funei eghu ke klignadi naikno te au ka khamemi ghotilo are. Nu te keli na ghotilo loku fodu batudi ka puhi te keli mala tangomana mare te leghu ghami ghotilo na. 4Eghuteuna kate thakle mei Kraes na, mae pha’ugna greireghi sipu na, mana ginauna na tusu ranghi ghami ghotilo taba biꞌo te siasigla fabrahu tifa te tifa.
5Jateula tuana eghu ghotilo mae majaghani ra, nhaꞌa soru ghami themi ke paridi goro mae biꞌo are. Uve, ghotilo huju fapulo ghami themi ka puhi au faleghu mala fari totoghoi. Naugna grioriso te blahi na cheke eghu,
“God theome magnahagheni mae ihei te fahaehaghe na,
nu tusu lao khokofakasai ranghini ihei te au faleghu.”5:5 Pro 3:34.
6Eghume ghotilo nhaꞌa fapari ghami themi mala au ke pari khamegna God te nolaghi fara. Kate thoke mei thofno narane na, mana ginauna na nhaꞌa haghe ghami ghotilo. 7Ghotilo lisa lao ka khamegna mana puhi biꞌo fateo te nanga nomidi ghotilo re, naugna mana tangomana te reireghi fakeli ghami ghotilo na.
8Tarabana koba nei doadofra fakeli eghu! Naugna nomi naoka ghotilo mae Satan, mana tei tafri jateula kaisei lion te rofo eghu nguru tafri hironi ihei mala roꞌeni mana. 9Eghume kegra maku ka nomi fatutuani na mala tangomana ghotilo te theome eni unha te magnahagheni mae Satan na. Naugna ghotilo lasedi thabusimi nei greghami teu te fatutuani ni mae Kraes heva heva ka nauthoglu gne jaola thafodi nafnata naꞌau papara te thoke ghami ghotilo gre.
10Uve, leghu fata na God togho ghami ghotilo ka nogna khokofakasai te biꞌo. Eghuteuna naugna ghotilo te nogna mae Kraes na, mana kilo ghami ghotilo mala hata balugna nafnakno biꞌo te au fabrahu tifa te tifa. Gognaro na ghotilo au papara katha vido kmoꞌei kolho, nu God ginauna togho ghami mala ke majaghani fapulo nakarhamire nei fadodoglo nomi fatutuani ghotilo na. Eghuteuna mana ginauna jaola tusu ranghi ghami nolaghi mala tangomana ghotilo te au heta fabrahu na. 11Tahati kilo fnaknoni mana eigna nogna nolaghi biꞌo te au fabrahu tifa te tifa. Amen.
Nogna cheke leghu lahu mae Pita
12Mae Silas togho ghau iara neke rioriso letas kmoꞌei igne ranghi ghami ghotilo. Iara laseni mana kaisei mae kheragu keli iara ka khiloau gne nei iara thofno ronuni fara mana. Letas igne iara magnahaghei te fahetadi nomi fatutuani ghotilo re, nei jaola mala cheke ka ghotilo eigna u nabrou God teke falalase ka tahati ka nogna khokofakasai. Igne thofno nabrou te tutuani na, eghuteuna ghotilo mala kegra maku tagna.
13Naikno khiloau te au ka namono Babilon gre mare kubae ghami ghotilo. God neke vahidi mare jateula mana teke vahi ghami ghotilo ia eghu. Eghuteuna mae kheragu majaghani iara mae Mak gne jaola kubae ghami ghotilo.
14Kate fari thafoi te kubae na, te keli na ghotilo mala namha ka puhi fofodu mala laseni ghotilo thofno nogna namha mae Kraes na.
Ghotilo nogna naikno Kraes ra, pharikeli na au balumi ghotilo. Me gnafa. Iara, mae Pita.