Ululahu Jone
Nogna Letas Ululahu Mae Jone
Thoutonu kmo’ei eigna buka igne
Mae ihei teke risoni letas igne theome thofno chekeni nanghagna na. Neuba, mare fatutuani ni letas igne neke rioriso ngala mae khuru Jone. Mae igne kaisei mae ka hatimare nabotho phei nogna fanomho mae Jisas, eghuteuna mana jaola neke rioriso nogna Nonomho te Keli mae Jone igne.
Letas igne mae Jone neke riso tei ka naikno khiloau mala kegra heta nei fiofilodi eghu ka farirhiu te jafra. Ka vido igre, keha mae velepuhi chaichaghi mare cheke eghu, “Mae Jisas gne theome thofno Thugna God.” Eghume mare jaola tirodi leghuni chekegna mana na. Eghuteuna mae velepuhi chaichaghi gre, mare theome lase fakeli ghita tahati naikno khiloau gre, eigna tahati mala namhadi naikno te gnafare nei tahati mala jaola theome eni kaisei najafra. Eghume mae Jone cheke ka naikno khiloaure mala leghuni kolho nogna farirhiu mae Jisas Kraes nei nogna mae khurure.
Keha vido ka letas igne
Puhi te au ka naphae nei puhi te au kate romno: 1:1–2:29
Thugna God nei thugna Satan: 3:1-24
Tharunga te tutuani nogna God nei tharunga te chaichaghi: 4:1-6
Nogna namha God: 4:7-21
Thofno fatutuani: 5:1-21
1Cheke karha
1Ghehati riso ari ka ghotilo eigna Cheke te karha fabrahu igne. Ghehati nomhinihi. Ghehati filonihi. Ghehati efranihi, nei habonihi ka khamemire. Ghehati riso ari ka ghotilo eigna Cheke te tusu meini u karha na. 2Cheke igne thakle mei ka tahati ne vuhai naikno. Tahati neke filonihi mana, eghume ghehati toutonuni ka ghotilo eigna u karha teke au funu tifa balugna Mama, eghuteuna mana ne thakle mei ka tahati. 3Gognaro na ghehati toutonuni ka ghotilo unha ghehati teke filoni nei nomhini, naugna ghehati magnahaghe ghami ghotilo te kaisei fofodu balumi. Tahati mala kaisei fofodu ngala balugna God Mama nei Thugna, Jisas Kraes. 4Ghehati riso ari letas igne ka ghotilo mala gleale’a fodu balumi.
God hata fadelei nakhiboda
5Gognaro na ghehati nake toutonu ari ka ghotilo cheke teke nomhini ka mae Jisas Kraes. Mana neke cheke eghu, “God na naphae, eghuteuna ka mana jare na theo kaisei gromno.” 6Eghume te chekeni tahati, “Tahati gne kheragna God, nu au fabrahu meu ngala ka gromno teuna”, tahati chaghi kolho. Eghuteuna tahati theome leghuni u nabrou te tutuani na. 7Nu te au tahati ka naphae ke ulugna God jateula mae Jisas Kraes teuna, tahati na kaisei au fodu fari theda, eghuteuna dadaragna mae Jisas Kraes Thugna God na fagaedi nakhiboda fateote’o re.
8Te chekeni tahati, “Tahati theo kaisei nakhiboda teuna”, tahati chaghi ghita theda kolho, eghuteuna u tutuani na theome au ke lamnada. 9Nu te cheke thakledi tahati ka God nakhibodare, mana ginauna hata fadeleidi. Tahati fatutuani ni God te eni unha te doglo na. Eghume mana ginauna na hata fadelei nakhiboda nei fagae ghita ka thua najafra fateo. 10Te chekeni tahati, “Tahati theo kaisei nakhiboda teuna”, tahati chaghi nei kiloni God kaisei mae chaichaghi naugna mana chekenihi tahati kafe tapla jafra ka nakhibo. Eghuteuna u chekegna God na theome au ke lamnada.
2Mae Jisas mala togho ghita
1Uve thuguro, iara riso ari letas igne ka ghotilo mala thosei tapla jafra ka nakhibo. Nu jame ihei te tapla jafra ka nakhibo na, tahati au mae Jisas Kraes kaisei mae te doglo fara mala togho ghita. Mana mala tore ghita ke ulugna God Mama. 2Mae Jisas ngala u fafara te mala hata fadeleidi nakhibodare, theome malada tahati kolho, nu jaola maladi naikno te gnafa ka nauthoglu gne.
3Te leghuni tahati unha te magnahaghei God na, tahati thofno laseni mana. 4Jame kaisei naikno cheke eghu, “Iara laseni God!” nu theome leghuni chekegna God teuna, mana kaisei mae chaichaghi. Eghuteuna cheke tutuani na theome au ke lamnagna mana. 5-6Nu ihei te leghuni chekegna God na, tahati laseni ka nakarhagna na mana te namhani God. Ka igne tahati laseni mana te leghuni God: Ihei te chekeni ne au balugna God teuna mana nabagna te au jateula teke eni mae Jisas Kraes ia eghu.
Vetula majaghani
7Uve kheraguro, iara theome riso ari ka ghotilo kaisei vetula majaghani. Nu vetula te nomhihi ghotilo funu tifa ia kolho. 8Neuba, vetula igne majaghani fabrahu, jateula te filonihi ka mae Jisas Kraes nei ka ghotilo. Naugna gromno na sala’u ari, eghuteuna thofno naphae na la siasigla mei.
9Neuba ihei ka ghotilo ne cheke eghu, “Iara auhi ka naphae!” nu te tirognani mana mae kheragna fofodu na, mana au ngala kate romno fabrahu ghilei posa gognaro. 10Mae ihei te namhani kheragna fofodu na, mana au kate phae, eghuteuna jare na theo kaisei nafugna te mala eni mana kaisei najafra na. 11Nu ihei te tirognani kheragna fofodu na, mana au kate romno, nei theome laseni aheva te tei na naugna gromno na fadofuni mana.
12Iara riso ari ka ghotilo glepo igre thuguro,
naugna God hata fadeleihi nakhibomire ka nanghagna mae Jisas.
13Iara riso ari ka ghotilo mamare, naugna ghotilo lasenihi God,
mae ihei te au fabrahu funu tifa ka vuvuhagna nauthoglu gne.
Iara riso ari ka ghotilo mae majaghani ra,
naugna ghotilo tapla sorunihi mae Satan.
14Iara riso ari ka ghotilo goro sua nalhaꞌu nei goro sua gaꞌase teura,
naugna ghotilo lasenihi Mama.
Iara riso ari ka ghotilo mamare, naugna ghotilo lasenihi God,
mae ihei te au fabrahu funu tifa ka vuvuhagna nauthoglu gne.
Iara riso ari ka ghotilo mae majaghani ra,
naugna ghotilo heta fara.
Eghuteuna chekegna God na au balumi nei ghotilo tapla sorunihi mae Satan.
15Thosei namhani puhigna nauthoglu igne ba glepo gna nauthoglu igne. Jame ihei te namhani puhigna nauthoglu na, nogna namha Mama na theome au ka mana. 16Igre glepo diꞌa ka nauthoglu igne: magnahaghei glepo diꞌa te keli tagna thini, magnahaghei glepo diꞌa te filoni ka tatha, nei fahaehaghedi fara eidi glepo te au tada. Nu glepo igre funudi ka puhigna nauthoglu igne, theome funudi ka God Mama. 17Nauthoglu igne na ginauna hui. Eghuteuna gobigna lepo te magnahaghedi naikno ka nauthoglu igne na hui. Nu ihei te eni unha te magnahagheni God na karha tifa tifa.
Nogna naoka mae Kraes
18Uve thuguro, narane leghu lahu na la namohi! Ghotilo nomhinihi nogna naoka mae Kraes la namo mei. Tutuani fara, gognaro na kmana nogna naoka mae Kraes auhi agne! Eghume tahati laseni u narane leghu lahu la namo meihi. 19Nogna naoka mae Kraes gre neke au baluda tahati. Nu gognaro na mare la jifla koko ghitahi. Naugna mare theome thofno nogna tothoghei tahati gne. Jame thofno nogna tothoghei tahati gne na, mare au ngau baluda tahati. Nu mare tei koko ghita tahati, eghume gaglana fara te theo kaisei mae ka mare tarabana te mala leghuni mae Kraes baluda tahati na.
20Nu ghotilo theome jateula mare eghu, eigna mae Tharunga te Blahi neke meihi ke klignami ghotilo. Eghume ghotilo te gnafa na laseni cheke te tutuani na. 21Iara theome riso ari ka ghotilo naugna ne theome laseni cheke te tutuani na. Theo. Iara riso ari ka ghotilo naugna ghotilo lasenihi cheke te tutuani na, eghuteuna ghotilo lasedihi chaichaghi ghe tutuani gre theome tei fodu.
22Eghume ihei gne naikno te chaichaghi na eghu? Naikno te chekeni mae Jisas na theome mae Kraes teu igne. Nafnata naikno tuana nogna naoka mae Kraes. Mana theome fatutuani ni Mama ba Thugna. 23Jame kaisei naikno te theome fatutuani ni Thugna na, mana theome fatutuani nila Mama. Naikno te fatutuani ni Thugna na, mana fatutuani nila Mama.
24Hati nhetami na leghuni fabrahu farirhiu teke nomhini ghotilo tifa ia. Jame leghuni fabrahu ghotilo farirhiu tuana, ghotilo ginauna na au baludi Thugna ghe Mama. 25Eghuteuna igne unha teke nhaꞌa chekeni thegna mae Kraes te mala tusu ranghi ghita tahati na, eigna u karha fei tifa.
26Iara riso ari ka ghotilo letas igne eidi iheire te fariu batu fadiꞌa ghami ghotilo. 27Nu mae Kraes neke kuru meini mae Tharunga te Blahi na ka ghotilo. Mae Tharunga te Blahi gne au ngala balumi ghotilo mala farirhiu ghami gobigna lepore. Eghume ghotilo theome magnahagheni kaisei mae velepuhi delei te mala farirhiu ghami na. Mae Tharunga te Blahi gne tutuani fara, theome chaichaghi. Eghume heta ghemi au balugna mae Kraes, jateula mae Tharunga te Blahi teke farirhiu ghami ghotilo ia eghu.
28Uve thuguro, au fabrahu balugna mana. Te eni tahati igne na, tahati theome tangomana te mhaghu ka narane nate pulo mei mae Kraes. Tahati ginauna theome tangomana te poru ba mamaja kate mei mana na.
29Ghotilo kafe laseni God na mae keli fara nei eni fabrahu unha te doglo na. Eghume ghotilo kafe laseni iheire te eni unha te doglo na mare goro thugna God.
3Tahati goro thugna God
1Tahati thofno lasenihi unha nafnata namha biꞌo Mama te tusu ranghi ghita. Ka nogna namha biꞌo igne mana kilo ghita goro thugna. Eghuteuna tahati thofno Thugna mana. Nu naiknogna nauthoglu igne theome filo glani ghita te goro thugna God, naugna mare theome laseni mana. 2Uve kheraguro, gognaro na tahati goro thugna God, nu tahati theome laseni jateula unha teu thogheiro na. Nu tahati laseni kate thakle mei mae Kraes na, tahati ginauna na jateula mana. Naugna tahati ginauna na thofno filoni mana. 3Eghuteuna iheire fateo te thofno fatutuani ni mae Kraes kate ofoni teu mana na fariuriu au klino, naugna mae Kraes na klino fara.
4Ihei te tapla jafra ka nakhibo na, mana huhughuni fara nogna vetula God na, naugna nakhibo na huhughuni vetula na. 5Ghotilo laseni mae Kraes neke mei mala hata fadeleidi nakhiboda, eghuteuna theo kaisei nakhibo ka mana. 6Eghume naikno te au balugna Kraes na theome mala tapla jafra fabrahu ka nakhibo. Jame tapla jafra fabrahu ka nakhibo na, mana theome raꞌe filonihi mae Kraes ba theome lasenihi mana.
7Uve thuguro, thosei snakreni kaisei naikno mala batu ghami ka puhi te diꞌa! Ihei te eni unha te doglo na mana doglo fara, jateula mae Kraes te doglo fara. 8Nu ihei te tapla jafra fabrahu ka nakhibo na mana nogna mae Satan, naugna mae Satan tapla jafra fabrahu vuha tifa. Thugna God neke thakle mei malagna gaoghatho igne, mala roꞌeni nogna gloku mae Satan. 9Ihei te thugna God na mana theome tapla jafra fabrahu ka nakhibo, naugna God tusu ranghini mana nakarha majaghani. Eghume mana theome tangomana te tapla jafra fabrahu ka nakhibo na, naugna mana kaisei thugna God. 10Eghume tahati lasedihi iheire te thugna God nei iheire te thugna mae Satan. Iheire te theome eni unha te doglo na theome thugna God. Eghuteuna ihei te theome namhani kheragna fofodu na mana theome thugna God.
Fari namhai
11Igne vetula te nomhini ghotilo tifa na: Tahati mala fari namhai. 12Thosei jateula mae Kein, mana nogna mae Satan neke faleheni mae tahigna na. Mana faleheni mae tahigna naugna glepo te edi mana re diꞌa fara, eghuteuna glepo te edi mae tahignare keli fara. 13Kheraguro, thosei jaglo nomi kate tirodi ghami naikno te leghuni puhigna nauthoglu igne. 14Tahati laseni tela tei kokonihi glehe na eghuteuna mei rumahi kau karha. Tahati laseni igne naugna tahati namhani kherada fofodu na balugna mae Kraes. Ihei te theome namhani kheragna fofodu na mana au ngala ka glehe. 15Ihei te tirognani kheragna fofodu na mae tuana kaisei naikno aknu poru ka nagnafagna na. Ghotilo lasenihi theo kaisei naikno aknu poru te hatani karha fei tifa na.
16Ka igne te laseni tahati eigna u namha na: Mae Jisas neke lisa soru nakarhagna na malada tahati. Eghume tahati jaola nabada te lisa soru nakarhadare maladi kherada fofodu! 17Jame kaisei naikno khiloau dedei eghuteuna filoni mae kheragna fofodu ka khiloau te kmoꞌei ka glepo na, eghuteuna theome kokhonini mae kheragna na teuna, nogna namha God na theo kolho ka nagnafagna naikno khiloau te dedei tuana. 18Thuguro, noda namha na theome ka cheke kolho nu tahati thofno fatakleni noda namha ka unha te eni tahati ranghini kheragna fofodu.
19-20Eghume, ka puhi tuana tahati laseni te leghuni nabrou te tutuani na. Eghuteuna kate laseni tahati te eni unha te diꞌa ranghini kherada fofodu na ka nagnafadare, tahati tangomana te au teu ngala ka pharikeli ke ulugna God. Naugna nogna namha God na thofno biꞌo fara, eghuteuna mana lasedi gobigna lepore. 21Uve kheraguro, jame theome fate ghita nagnafada na, tahati theome tangomana mhaghu te mei ka God. 22Eghuteuna tahati na hata ka mana unha teke toreni. Naugna tahati leghuni nei eni unha te keli tagna mana. 23Mana cheke faheta ka tahati mala fatutuani ni Thugna, Jisas Kraes, nei fari namhai jateula te chekeni mae Kraes. 24Ihei te leghuni chekegna God na mana au balugna God, eghuteuna God au balugna mana. Faꞌunha laseni tahati God te au baluda na? Tahati laseni igne naugna God neke kuru meini mae Tharunga te Blahi na ka tahati.
4Mae velepuhi chaichaghi
1Uve kheraguro, gognaro na kmana mae profet chaichaghi ka nauthoglu gne. Eghume kate toutonu naiknore, thosei fatutuani nodi cheke te gnafare, nu faglanidi eghu glahula gaoghatho te au ka mare tuare neke mei funu ka God. 2Nu jame mae ihei te cheke eghu na, “Iara fatutuani ni mae Jisas Kraes, mana mei ka nauthoglu gne neke vuhai naikno.” Ka puhi tuana, ghotilo tangomana te laseni gaoghatho teke mei funu ka mae Tharunga te Blahi na. Tutuani, gaoghatho tuana neke funu mei ka God. 3Keha naiknore tirodi chekeni tuana eigna mae Jisas. Nodi gaoghathore theome funu mei ka God, nu funu mei ka nogna naoka mae Kraes. Ghotilo nomhihi nogna naoka mae Kraes ginau mei. Tutuani fara, gognaro na mana auhi ka nauthoglu gne.
4Uve thuguro, ghotilo nogna God, eghuteuna ghotilo tapla sorudihi mae profet chaichaghi gre, naugna mae Tharunga te Blahi te au balumi ghotilo na au nolaghi fara uluni mae Satan, mae ihei te au ka naikno te leghuni puhigna nauthoglu gne. 5Mae igre nogna nauthoglu igne. Naugna igne mare cheke eigna puhigna nauthoglu, eghuteuna naiknogna nauthoglu gne fanomho ka mare. 6Nu tahati nogna God. Ihei te laseni God na fanomho ka tahati, nu ihei te theome nogna God na theome fanomho ka tahati. Eghume, igne puhi te mala laseni tahati gaoghatho te tutuani ba chaichaghi.
Namha mei funu ka God
7Uve kheraguro, tahati fari namhai, naugna namha na mei funu ka God. Ihei te namha na thugna God nei laseni God. 8Ihei te theome namhadi keha naiknore theome laseni God, naugna namha na mei funu ka God. 9God fatakle nogna namha na ke lamnada kate kuru mei kaisei thofno Thugna ngala ka nauthoglu gne mala fakarhi ghita. 10Ka gloku igne tahati filoni thofno namha na, theome eigna tahati ne namhani God, nu God namha ghita nei kuru mei Thugna jateula kaisei fafara mala hata fadelei nakhiboda. 11Uve kheraguro, eigna God namha ghita jateula igne teuna, tahati jaola nabada te fari namhai. 12Theo kaisei naikno te filoni God, nu te fari namhai tahati na, God au baluda nei nogna namha na thofno horoghoto ke lamnada.
13Tahati laseni tahati au balugna God nei mana au baluda tahati, naugna mana neke kuru mei tada nogna Tharunga te Blahi na. 14Tahati filonihi mana nei toutonuni ka naikno eigna Mama te kuru meini Thugna mala fakarhidi naikno te gnafa ka glehe. 15Ihei te fatutuani nei chekeni Jisas na Thugna God, God au balugna mana nei mana au balugna God. 16Eghume tahati lasenihi nei fatutuanihi nogna namha ranghi ghita.
Namha na funu mei ka God. Eghume, ihei te au ka namha na au balugna God nei God au balugna mana. 17Ka igne nogna namha na horoghoto ke lamnada mala frane tahati ka narane te mala fate ghita na. Naugna ka nauthoglu gne tahati jateula mana. 18Theo kaisei namhaghu ka thofno namha na. Nu thofno namha na brue fadeleini namhaghu. Eghuteuna ihei te ofoni fate na au balu mhaghu. Eghume ihei te mhaghu na, thofno namha na theome horoghoto ka mana.
19Tahati namha, naugna God neke kulu namha ghita. 20Jame kaisei naikno cheke eghu, “Iara namhani God,” nu tirognani kheragna fofodu na teuna, mana kaisei mae chaichaghi. Eigna mana theome tangomana te namhani God, mae ihei mana te theome filoni, jame te theome namhani mana mae kheragna fofodu na, mae ihei mana te filoni. 21Mae ihei te namhani God na mana jaola namhani mae kheragna fofodu na. Vetula igne teke tusu ranghi ghita mae Kraes na.
5Fatutuani ka Thugna God
1Iheire fateo te fatutuani ni mae Jisas na mae Kraes, igre goro thugna God. Ihei te namhani God Mama na jaola namhadi thugnare. 2Faꞌunha ne laseni tahati, tahati te namhadi thugna God re? Tahati laseni igne naugna tahati namhani God nei leghudi nogna vetulare. 3Namhani God, gaoghathogna na leghudi nogna vetula, eghuteuna nogna vetulare theome ninhigrana ranghi ghita. 4Ihei te thugna God na, mana fatutuani ni mae Jisas. Eghume mana au nolaghi mala tapla soruni puhigna nauthoglu igne. 5Ba, ihei tangomana te tapla soruni puhigna nauthoglu igne? Uve, mae ihei ngala te fatutuani ni mae Jisas na thofno Thugna God.
6Igne mae Jisas Kraes, mae ihei te mei balu khoꞌu apublahi nei dadara glehe. Theome khoꞌu kolho, nu khoꞌu balu dadara. Eghuteuna mae Tharunga te Blahi na thofno tutuani fara. Te chekeni mae Tharunga te Blahi na igne te thofno tutuani fara mae Jisas neke meihi ka puhi igne. 7Thiloi igre mala cheke eigna mae Jisas: 8Tharunga te Blahi, khoꞌu, nei dadara. Thiloi igre kaisei ngala. 9Tahati fatutuani ka unha te chekeni naikno na. Nu unha te chekeni God na thono heta fara uluni chekegna naikno, eghuteuna mana cheke eigna Thugna. 10Ihei te fatutuani ni Thugna God na, mana laseni ka nagnafagna na cheke igne thofno tutuani fara. Nu ihei te theome fatutuani ni God na, unha God te chekeni eigna mae Thugna na, mana kiloni God kaisei mae chaichaghi, naugna mana theome fatutuani ni unha te chekeni God eigna mae Thugna na. 11Igne unha te chekeni God ka tahati na: God tusu ranghi ghita karha fei tifa, eghuteuna karha igne mei balugna Thugna. 12Eghume ihei te hatini Thugna God na hatini thofno karha na. Nu ihei te theome hatini Thugna God na theome hatini thofno karha na.
Tahati gognaro na hatini karha fei tifa na
13Iara riso ari letas igne ka ghotilo naikno te fatutuani ni Thugna God ra. Iara riso ari ka ghotilo mala laseni gognaro ghotilo te hatini thofno karha na. 14Tahati thofno laseni igne, mana ginauna na nomhi ghita kate toreni tahati unha te leghuni gaoghathogna. 15God fanomho ka tahati leghu fata kate tore tahati na. Eghume tahati laseni mana tusu ranghi ghita glepo te toreni tahati ka mana na.
16Jame kaisei naikno ka ghotilo filoni mae kheragna fofodu ka khiloau na tapla jafra ka nakhibo te theome nabagna te mala au ka glehe fei tifa na, tarai ka God eigna mae kheragna fofodu ka khiloau te tapla jafra ka nakhibo tuana. Eghuteuna God ginauna na tusu ranghini u karha. Iara cheke eidi naikno te tapla jafra ka nakhibo te theome nabagna te mala au ka glehe fei tifa na. Nu jare kaisei nafnata nakhibo nabagna te mala au ka glehe fei tifa na, eghuteuna iara theome chekeni ka ghotilo mala tarai ka God eigna nafnata nakhibo tuana. 17Najafra fateote’o kafe nakhibo hui. Nu jare keha nakhibo theome nabagna te mala au ka glehe fei tifa na.
18Tahati laseni ihei te thugna God na theome mala tapla jafra fabrahu ka nakhibo, naugna mae Jisas Thugna God na reireghi fakelini mana, eghuteuna mae Satan theome tangomana te habo lao ka mana. 19Tahati lasenihi tahati goro thugna God nu mae Satan funei fruni nauthoglu tongana gne. 20Eghuteuna tahati lasenihi Thugna God ne mei tusu ranghi ghita glalase mala laseni tahati thofno God. Eghuteuna tahati au balugna mae ihei te tutuani, tulao balugna mae Jisas Kraes. Mana thofno God nei mae ihei te tusu ranghi ghita u karha fei tifa na.
21Uve thuguro, reireghi fakeli ghami themi ka mumuju are. Me gnafa. Iara, mae Jone.