Ululahu Korin
Letas Ululahu Teke Riso Tei Mae Pol Ka Khiloau Korin
Thoutonu kmo’ei eigna buka igne
Korin gne kaisei namono biꞌo ka Provins Akaia. Gognaro na provins igne au ke mata gna nodi namono hatimare mae Griki. Ka buka Mae Khuru 18 philegna tahati tangomana te iu’ijuni mae Pol neke thoke ka namono biꞌo igne eghuteuna mana neke toghoni khiloau jare na mala rheta. Mae Pol jame neke rioriso letas igne ka finogha 54, ka fatilo thei mana neke toutonuni u Nonomho te Keli na ranghidi iheire te theome Jiu.
Naiknodi delei ka namono te gnafa ka nauthoglu gne mare mei au Korin. Mare au nodi kmana bisnis nei kmana sileni eghu ka namono tuana. Naiknodi Korin gre fahaehaghedi fara eidi nodi kastom re eghuteuna mare pogho soru ranghidi nodi kmana nafnata god thedire. Keha glepo te biꞌo ka mare na nafnata puhi te eni tafri puhi te diꞌa na.
Mae Pol nanga nogna fara ka puhi kmana te edi ke lamnagna khiloau na, eghume mana rioriso letas te brahu igne mala toghodi naikno igre mala filo glani nakarhadi naikno khiloaure. Mana chekedi puhi tholaghi nei puhi te keli te mala au kate salo fodu mei naikno khiloaure. Mana cheke eigna nogna nolaghi Tharunga te Blahi na nei unha na eni kate pulo mei mae Jisas Kraes. Ka 13 philegna, mae Pol cheke eigna nogna namha God te tusu mei ka tahati hui.
Keha vido ka letas igne
Keha fapholai te fotani khiloau: 1:1–4:21
Keha glepo te jafra te edi naiknore: 5:1–7:40
Nodi god chaichaghi naiknore: 8:1–11:1
Keha faghusna te cheke tughudi mae Pol: 11:2–14:40
Eigna teke karha fapulo: 15:1-58
Nogna cheke leghu lahu mae Pol: 16:1-24
11Iara mae Pol. God neke vahi ghau iara mala kaisei nogna khuru mae Jisas Kraes. Ghepa mae thabusigna Sostinis 2te riso ari letas igne ka ghotilo naikno khiloau te au ka namono biꞌo Korin. God kilo ghami ghotilo mala nogna naikno blahi mana baludi naikno heva heva te tore ka nanghagna noda Lord Jisas Kraes. Jisas noda Lord tahati gnafa!
3Iara toreni nogna khokofakasai nei pharikeli God Kmada nei nogna mae Jisas Kraes noda Lord te mala au balumi.
Mae Pol ne cheke fakelini God
4Iara cheke fakelini God leuleghu fata naugna mana neke tusu ari ka ghotilo nogna khokofakasai na mala kaisei ghotilo balugna Jisas Kraes. 5Naugna igne ghotilo thofno dedei fara ka puhi te gnafa, ka nomi cheke ba ka nomi glalase fateo. 6Jaola, Nonomho te Keli eigna Kraes igne heta fara ka nakarhamire. 7-8Eghume God neke tusu ari ka ghotilo nogna khokofakasai te gnafa Tharunga te Blahi kate ofoni teu ghotilo narane mala ke pulo meigna noda Lord Jisas Kraes. Eghuteuna Kraes ginauna jaola togho ghami ghotilo mala heta nei doglo eghu ke ulugna God ghilei thoke mei narane tuana. 9God na tathaji fabrahu nogna nhaꞌa cheke na ranghidi nogna naiknore. Mana kilo ghami ghotilo mala au fakeli balugna Thugna Jisas Kraes noda Lord.
Puhi biꞌo te fotani khiloau
10Kheraguro, gognaro na iara cheke heta ka nanghagna noda Lord Jisas Kraes. Iara tore ghami fara ghotilo mala thosei eni ghotilo nafnata puhi te fnota tafri ghotilo igne. Te keli na ghotilo jame ke funu loku fodu ka kaisei nagnafa nei kaisei gaoghatho ngala. 11Kheraguro, keha naikno ka tharaknagna Kloe te toutonu ka iara na ghotilo magra koba. 12Igne gaoghathogna unha te chekeni iara na. Keha mae cheke eghu, “Iara nogna mae Pol.” Kehare cheke eghu, “Iara nogna mae Apolosi.” Kehare cheke eghu, “Iara nogna mae Pita.” Eghuteuna kehare cheke eghu, “Iara nogna mae Kraes.”
13Ghotilo theome tangomana te fotani thinigna Kraes na! Ba, iara mae Pol si teke tupijuru eimi ghotilo ka gaju fafatha ia? Ba, ghotilo neke apublahi ka nanghagu iara sia? Theo! 14Iara cheke fakelini God naugna iara neke theome apublahi ghami ghotilo. Mae Krispasi ghe mae Gaeasi ngala teke faꞌapublahidi iara re. 15Eghume theo kaisei naikno te chekeni neke apublahi mala leghu ghau iara teuna. 16Tutuani, iara theome laseni ihei teke faꞌapublahini iara na, nu mae Stefanas nei tharaknagna eghu kolho. 17Kraes neke theome kuru ghau iara mala faꞌapublahi naikno kolho. Theo. Mana neke kuru ghau iara mala toutonu eigna u Nonomho te Keli na. Iara theome tangomana te toutonuni u Nonomho te Keli na ka nafnata puhi te eni mae ihei te lalase fara na, na eghunu glehe teke eni Kraes ka gaju fafatha na igne theo nafugna kolho eghu.
God tusu ranghini Kraes nolaghi nei glalase
18Thoutonu eigna glehegna Kraes ka gaju fafatha na igne theo gaoghathogna ka iheire te leghuni nabrou te mala lehe tifa te tifa. Nu tahati te karha ka God na, u thoutonu igne nogna nolaghi God mala fakarha ghita. 19Jateula te chekeni ka grioriso te blahi na cheke eghu,
“Iara ginauna fahuidi nodi glalase mae iheire te lalase fara,
eghuteuna rorhoꞌe nodi glalasere mala theome tangomana mare te lalase na.”1:19 Isa 29:14.
20Eghume ne faꞌunha si naikno te lalase fara ra, ba mae velepuhigna vetula nogna mae Moses ra, ba mae iheire te laseni fara gaoghathogna nauthoglu ra? Mare tangomana te cheke tughu ka God na? Theo, naugna God la falasenihi ka tahati u glalase gna nauthoglu gne jateula thoutonu te theo nafugna eghu kolho.
21Ninhigrana fara ranghidi naiknore te lase fakelini God leghuni nodi gaoghatho thedi na. Nu God magnahaghei te leghuni gaoghathogna thegna te hata u cheke te toutonuni tahati igne mala fakarhidi iheire te fatutuani ni mana. Neuba keha naiknore ne cheke eghu, “U thoutonu igne theo nafugna kolho.” 22Tutuani, hatimare mae Jiu magnahaghei filo fagaglana funu ka God, eghuteuna hatimare mae Griki hiro glalase. 23Nu tahati toutonu eigna Kraes kolho, mae ihei teke lehe ke kligna gaju fafatha. Hatimare mae Jiu theome magnahaghei nomhini u thoutonu igne, eghuteuna ka hatimare mae te theome Jiure u thoutonu igne theo nafugna kolho. 24Nu tahati naikno teke kilo ghita God ra, neubane mae Jiu ba theome Jiu, tahati laseni u thoutonu eigna Kraes igne, falalase ranghi ghita God te nolaghi nei lalase fara. 25Naugna neuba naiknore ne ghathoni puhigna God na te theo nafugna kolho neu, te chekeni iara ka ghotilo na, puhigna God na uludi fara nodi glalase naiknore. Eghuteuna neuba naiknore ne ghathoni puhigna God na glaꞌe fara neu, nogna puhigna mana na heta fara ke uludi nodi nanheta naiknore!
26Kheraguro, ghathodi si ghotilo nakarhami kani teke kilo ghami God ia. Ka tathagna naikno na, theome kmana ka ghotilo te lalase na, theome kmana ka ghotilo te fnakno na, nei theome kmana ka ghotilo te karha funei na. 27Nu God vahidi iheire te theome lalase teu naiknogna nauthoglu igne mala famamajadi iheire te lalase fara. Mana vahidi iheire te theome nheta teu naiknogna nauthoglu igne mala famamajadi iheire te nheta fara. 28Eghuteuna mana jaola vahidi iheire te pari fara nei diꞌa fara nei fiti naikno kolho teu naiknogna nauthoglu igne mala tapla sorudi iheire te fnakno fara mala theo nafudi ka nauthoglu igne. 29God neke eni igne mala theome tangomana kaisei naikno te fahaehaghe ka tathagna God na. 30Nu God neke togho ghami ghotilo mala kaisei ghotilo balugna mae Jisas Kraes. Eghuteuna ka Kraes na, tahati lalase fara, eghuteuna doglo fara ka tathagna God na, nei mala nogna naikno blahi mana. Kraes na jaola neke foli fajifla ghita ka nakhibo. 31Eghume, tahati laseni gaoghathogna grioriso te blahi te cheke eghu igne, “Mae ihei te magnahaghei fahaehaghe na, mana mala fahaehaghe kolho ka unha teke enihi Lord na.”1:31 Jer 9:24.
2Thoutonu eigna glehegna Kraes
1Kheraguro, kani teke ari ka ghotilo ia, iara neke toutonuni chekegna God teke theome laseni naiknore tifa ia. Iara jaola theome toutonu ka ghotilo jateula kaisei mae te lase cheke fara ba mae te lalalase fara. 2Naugna kate ari ka ghotilo ia, iara neke magnahaghei toutonu eigna mae Jisas Kraes nei glehegna ke kligna gaju fafatha eghu kolho. Tutuani, iara theome magnahaghei toutonu keha glepo delei ka ghotilo. 3Kani teke ari posa iara ka ghotilo mala toutonu teku ia, iara neke nigra fara nei mhaghu neku eigna glahula theome magnahaghei ghau iara ghotilo. 4Nogu farirhiu nei nogu thoutonu teu iara ka ghotilo igre theome jateula puhidi mae te lalase fara nei mae te lase cheke ra eghu. Nu iara toutonuni u Nonomho te Keli igne ka nafnata puhi te mala lase fakelini nogna nolaghi Tharunga gna God na. 5Eghume ghotilo fatutuani naugna ghotilo ne filoni nogna nolaghi God na, theome naugna te nomhini ghotilo nogna glalase naikno kolho.
Nogna thofno cheke glalase God
6Tutuani, u cheke glalase te farirhiu iara ranghidi iheire te kotu haghe tela biꞌohi nakarhadire ka khiloau na igne theome nodi glalase iheire te lalase fara kau nauthoglu igne nei nodi iheire mae te nolaghi te funei frunini nauthoglu igne. Eghuteuna mare ginauna na ari luvu kolho. 7Cheke glalase te toutonuni ghehati igne nogna cheke glalase God. Tutuani, kani teke theome vuavuha teku God u nauthoglu igne, mana neke kulu enihi kaisei nabrou ka nogna glalase te mala tei thoke tahati ka mana kligna na. Mana neke theome falalase cheke igne ghilei thoke gognaro. 8Theo kaisei mae te funei frunini nauthoglu gne te laseni u cheke glalase igne. Jame laseni mare na, mare jame neke theome faleheni Jisas, mae funei gna kligna na. 9Nu grioriso te blahi na cheke eghu,
“Unha God teke kulu tarabana maladi naikno te namhani mana re,
theo kaisei naikno te filoni ba nomhini na.
Theo kaisei naikno teke ghathoni unha nate thoke mei ginauna.”2:9 Isa 64:4.
10Nu God neke vahini Tharunga na mala falalase ka tahati unha teke poru na.
Neubane poru fara ka gaoghathogna God na glepo igre, Tharunga te Blahi na la kulu lasedihi nei fatakledihi. 11Tutuani, theo iheinga te laseni gaoghathogna keha mae na, nu mana thegna ngala te laseni unha te au ka nagnafagna thegna na. Jateula tuana eghu, u Tharunga gna God na, thegna mana ngala te thofno laseni te au ka nagnafagna God na. 12Tharunga te Blahi tela hatahi tahati naikno khiloau gre mei funu ka God mala laseni tahati u khokofakasai teke tusu mei mana ka tahati na. Tahati leghuni mana, theome leghuni gaoghathogna nauthoglu igne. 13Eghume, kate chekedi tahati glepo igre, tahati theome cheke leghuni gaoghathogna naikno na, nu tahati cheke leghuni kolho unha Tharunga te Blahi teke farirhiu ghita na. Tahati toutonu glepo tutuani leghuni gaoghathogna mae Tharunga te Blahi ranghidi naikno tela hatahi mana. 14Ihei te theome au tagna u Tharunga te Blahi na, mana theome tangomana te hata u farirhiu te tusu mei Tharunga gna God na. Mana theome lasedi gaoghathodi farirhiu igre, eghuteuna farirhiu igre theo nafudi kolho ka mana. Eigna ihei ngala te baubatu tagna Tharunga te Blahi na te tangomana te mala lasedi nogna farirhiu mana re. 15Eghume ihei te au tagna Tharunga te Blahi na, mana ngala tangomana te filo glanidire gobigna lepo teke farirhiu mana mae Tharunga te Blahi na. Nu ihei te theome au tagna Tharunga te Blahi na, mana theome tangomana te mala laseni u gaoghathogna mae te au tagna Tharunga te Blahi na. 16Naugna grioriso te blahi na cheke eghu,
“Theo kaisei naikno te laseni gaoghathogna Lord na,
eghuteuna theo kaisei naikno te nabagna te mala fagriuni mana na.”2:16 Isa 40:13.
Nu gaoghathogna Kraes na auhi ka tahati.
3Khiloau na ne fnota
1Kheraguro, tifa na iara neke theome tangomana te cheke ka ghotilo jateula te cheke ka naikno te au Tharunga te Blahi tadira neku. Iara neke cheke ka ghotilo jateula te cheke ka naikno te theome fatutuani ni God ra neku kolho, eigna ghotilo jateula sua eghu kolho puhimire ka khiloau gne. 2Eghume farirhiu teke tusu ari iara ka ghotilo ra jateula milk eghu kolho e bligi fara. Theome jateula gano maku te nabadi mae biꞌo ra eghu e ninhigrana. Naugna theome nabami ghotilo. Neuba gognaro na farirhiu igre jateula gano te maku eghu theome nabami ghotilo. 3Tutuani, puhimi ghotilo re kaisei nanaba ngala ka naikno te leghuni puhigna nauthoglu igne. Naugna goghotu koba, magra koba teu ghotilo igre ngala fagaglana gna te leghuni ghotilo puhigna nauthoglu na, theome leghuni mae Tharunga te Blahi. 4Keha ka ghotilo cheke eghu, “Iara nogna mae Pol,” ba “Iara nogna mae Apolosi.” Cheke igre fagaglana gna te leghuni ghotilo puhigna nauthoglu gne.
5Ba, mae ihei mae Apolosi na? Mana kaisei mae biꞌo? Theo! Ba, mae ihei mae Pol na? Iara na kaisei mae kolho. Ghepa mae Apolosi phei nogna mae gloku God kolho mala togho ghami ghotilo mala fatutuani ni God. Ghepa te gnafa na eni kolho gloku teke tusu ranghi ghami God na. 6Kate farirhiu ghami ghotilo na, iara jateula kaisei mae mala joꞌu sisi ka nagare eghu kolho, eghuteuna mae Apolosi na jateula kaisei mae mala toatofa khoꞌu eghu kolho, nu God thegna kolho te mala fakotu haghedire. 7Tutuani mae ihei te joꞌu nei mae ihei te toatofa khoꞌu teu igne theome ulu. Nu God thegna ngala te ulu fara na, naugna mana thegna ngala te fakotu haghedire. 8Eghume mae te joꞌu sisi nei mae te toatofa khoꞌu teu igre kaisei gaoghatho kolho fei gloku na. Aonu God ginauna tabadi phiamare leghuni nodi gloku na. 9Eigna ghepa kafe loku ranghini God ngala te mala togho ghami ghotilo, eghuteuna ghotilo jateula nogna nagare eghu mana. Eghuteuna ghotilo jaola jateu kaisei suga teke horo God eghu.
10God neke tusu ranghi ghau iara khokofakasai te mala babana suga na. Iara lilisei kmana thina mala famamhakugna suga tuana jateula kaisei mae te lase horo suga fara eghu. Keha mae re gognaro na mala babana ke klignadi thina tuare. Nu te chekeni iara ka ghotilo na, mae te gnafare filo fakelini babana gna na! 11Tutuani, God liliseini mae Jisas Kraes mala jateula kaisei thina biꞌo eghu mala makugna suga na, eghuteuna theo kaisei mae te tangomana te hata fadeleini mana teke tughu ka keha thina delei jare na. 12Kate babana suga igne, keha mae re ginauna lilisei glepo keli fara, jateula gol nei silva nei keha thina te keli ba keha glepo jateula gaju nei buburu nei gnognofi te theome au raugha kolho. 13Eghuteuna ka narane leghu lahu nate mei fate Kraes na nodi gloku naikno te gnafare ginauna na kakhana unha te keli ba unha te diꞌa. Naugna kau narane tuana nogna khaꞌaghi God na ginauna fariuriudi nodi gloku naikno te gnafare mala laseni te keli ba te diꞌa na. 14Jame te theome nhako unha teke babana mana ke kligna gna thina tuana na, God ginauna tabani mana. 15Nu jame te nhako kolho ka khaꞌaghi gloku teke eni mana na, ginauna theo kaisei mae nate tabani mana na. Nu neuba, God ginauna fakarhini mana, eigna God jateula kaisei mae te hata fajiflani mana ka suga te nhako ia eghu.
Naikno khiloaure nogna Sugablahi tutuani God
16Ghotilo lasenihi igne, eigna ghotilo jateula nogna Sugablahi God eghu, eghuteuna Tharunga gna God na auhi ka ghotilo. 17Eghuteuna jame ihei te roꞌeni sugagna God na, God ginauna jaola roꞌeni mana. Naugna sugagna God na blahi fara, eghuteuna ghotilo jateula sugagna mana na eghu mala blahi fara.
18Thosei chaghi ghami themi. Jame kaisei mae ke lamnami ghotilo te magnahaghei lalase fara ka nafnata glalase gna nauthoglu igne na, nabagna na mana mala jateula te meomekro eghu ka puhigna nauthoglu igne mala tangomana mana teke lalase fara na. 19Naugna nogna glalase te keli nauthoglu gne theo nafudi kolho ka God. Tutuani, grioriso te blahi na cheke eghu, “God ginauna fatedi mae glalase te lase chaghi re.”3:19 Job 5:13.20Grioriso te blahi na jaola cheke eghu, “Lord laseni unha te ghathoni mae glalasere theo nafudi kolho.”3:20 Sam 94:11.21Eghume ghotilo theome naba te cheke fahaehagheni unha te eni naikno na! Tutuani fara, gobigna lepore nomi ghotilo. 22Iara mae Pol, baludi mae Apolosi ghe mae Pita nomi ghotilo. Eghuteuna nauthoglu, karha, glehe, glepo te edi gognaro gre nei glepo nate mei nathuꞌu nauriha teu igre nomi ghotilo. 23Eghuteuna ghotilo nogna Kraes, eghuteuna Kraes na nogna God.
4Nodi gloku mae khuru
1Ghotilo mala ghatho ghami ghehati jateula nogna mae gloku Kraes eghu, eigna God vahi ghami ghehati mala toutonuni nogna cheke God teke poru tifa igne. 2Tutuani, mae gloku na mala eni gloku te keli ranghini nogna funei na. 3Nu iara theome nanga nogu jame te fate ghau iara ghotilo ba ihei ka nauthoglu gne. Iara jaola theome tangomana te fateni puhigu thegu na. 4Iara theome laseni kaisei glepo te fajafrani iara na, nu iara theome chekeni ne kaisei mae doglo thegu teuna. Eigna noda Lord ngala te au nolaghi te mala fate ghau iara na. 5Eghume thosei fate naikno nu ofou ghilei thoke mei Lord. Mana ginauna hata fajifla kate phae glepo te diꞌa fara te poru teu kate romno na, eghuteuna mana ginauna fakakhana glepo teke poru ka nagnafadi naiknore. God ginauna jaola fafnaknodi gnafa naikno te leghuni nodi puhi te kelire.
6Kheraguro, te mala laseni ghotilo unha te chekeni iara na, iara neke cheke eidi puhimi ghepa mae Apolosi, mala glola fakeli ka ghotilo gaoghathodi u cheke igre, “Ghotilo leghuni ngala unha te risoni ka grioriso te blahi na.” Ka puhi igne ghotilo ginauna theome tangomana te cheke fahaehagheni fara kaisei naikno ke uludi keha naiknore. 7Ba ihei te chekeni te doglo ghotilo ke uludi keha naiknore? Tutuani, glepo te khotodi ghotilo gre God ngala teke tusu ari ka ghotilo na! Eghume, ghotilo theo nafumi te mala cheke fahaehaghe fara eidi glepo igre.
8Ba, ghotilo la hatahi glepo te magnahaghedire? Ba, ghotilo la mae dedeihi? Ba, ghotilo ulu ghami fara ghehati la king hi? Tutuani, iara magnahaghe ghami fara ghotilo mala king, ghehati jaola mala jateu king eghu balumi ghotilo! Kheraguro, iara cheke igre mala maꞌe kolho sigre. 9Nu gaoghathogu iara na, God lilisei ghami ghehati mae khuru gre leghu lahu. Ghehati jateula mae sosolo tela fate ghamihi mare te mala lehe ra eghu. Ghehati kegra ke uludi engel nei naiknogna nauthoglu gne eghu ka puhimi ghehati re. 10Tore! Gaoghathodi naiknore ghehati gne jateula mae te meomekro eghu, naugna ghehati nogna Kraes. Nu ghotilo la lasenihi, eigna ghotilo nogna Kraes! Ghehati theome heta, nu ghotilo heta fara! Naiknore filo fapari ghami koba ghehati eghuteuna mare ghatho tahu ghami ghotilo! 11Mei te posa gognaro gne, ghehati kmoꞌei ka ghemi gano ba khoꞌu ba pohe. Naiknore puri ghami koba, eghuteuna kate tei heva heva na ghehati theo nomi suga. 12Ghehati loku heta fara te mala au ghemi gano na. Kate cheke fadiꞌa ghami naiknore, ghehati fablahidi. Kate para ghami naiknore, ghehati lisa lao kolho. 13Eghuteuna kate cheke fadiꞌa ghami naiknore, ghehati cheke ranghidi glepo te keli. Naiknore filo ka ghehati na jateula chara eghu kolho. Uve, mei te posa gognaro gne ghehati theo nafumi kolho ka gaoghathodi naiknore.
14Iara riso ari ka ghotilo cheke igre theome mala famamaja ghami ghotilo. Theo. Iara namha ghami ghotilo jateula thofno thugu eghu, nu iara magnahaghei te fadoglidi kolho gaoghathomi ghotilo re. 15Eigna neuba ne au nabotho thogha naikno ghotilo te mala farirhiu ghami puhigna Kraes na, kaisei mae ngala te jateula kmami teu ghotilo na. Tutuani, iara ngala te hata mei u Nonomho te Keli igne ka ghotilo mala jateula kmami eghu ghotilo ka mae Jisas Kraes. 16Eghume iara tore ghami fara ghotilo te mala fariuriu leghuni puhigu iara na. 17Naugna igne, iara kuru arini mae Timoti ka ghotilo. Iara namhani mana jateula thofno mae thugu eghu, naugna mana loku fakeli ranghini Lord. Mana ginauna farirhiu ghami ghotilo puhigna Kraes te leghuni iara gne, jateula iara te farirhiudi naikno khiloau ka namono te gnafa gre eghu.
18Keha ka ghotilo re fahaehaghe ka gaoghathodire nate theome ke ari iara te mala para ghami na. 19Nu jame te magnahaghei ghau iara God na, iara ginauna theome raugha ari ka ghotilo. Eghuteuna ka narane tuana iara ginauna na nomhidi nodi cheke fahaehaghe mae te fahaehaghe tuare, nu jaola iara ginauna ari filoni unha nafnata nolaghi te au ka mare na. 20Naugna tahati laseni God na tangomana te funei frunini ihei te loku ranghini na, theome cheke kolho. 21Eghume filo fakelidi puhimire mala theome ari para ghami iara. Tutuani, iara magnahaghei ari te mala filodi puhimi te kelire nei te falaseni nogu namha na ka ghotilo. Naugna iara magnahaghei te togho ghami ghotilo fara ka puhi te keli.
5Puhi diꞌa ke lamnagna khiloau
1Iara nomhini kaisei thoutonu tutuani eigna kaisei mae ka ghotilo eni kaisei puhi te diꞌa fara. Kaisei mae jare thuru fodu ka khetogna mae thofno kmagna na. Eigna neubane mae bongihehe, mare theome tangomana te eni na glepo te diꞌa fara tuana. 2Tore! Ghotilo theome tangomana te cheke fahaehaghe ghami themi na. Ghotilo jame diꞌanagnafa balu mamaja, eghuteuna mae ihei te eni nakhibo tuana nabagna na mala au kosi. 3Iara jateula te auhi eghu balumi ghotilo, eghume iara la fatenihi mae te eni glepo te diꞌa tuana. Naugna neubane au khaba iara ka ghotilo, gaoghathogu iara na auhi balumi ghotilo. 4Tutuani, iara fateni mae tuana ka nanghagna Jisas noda Lord. Kate salo fodu ghotilo na, gaoghathogu iara na au balumi ghotilo, ka nogna nolaghi Jisas noda Lord. 5Ka narane te salo fodu tuana, tahati lisa laoni mana ka khamegna mae Satan mala roꞌeni thinigna mana na. Ka puhi igne God ginauna tangomana te fakarhini tharunga gna mana na ka narane gna noda Lord na.
6Nomi fahaehaghe ghotilo eidi puhi te diꞌare theome doglo. Naugna ghotilo lasenihi cheke igne, “Katha isi ikoi kolho te mala fabiꞌodi bret te gnafare.” 7Gognaro na ghotilo hata fadeleidi nakhibo te gnafare mala doglo ke ulugna God. Naugna nakhibo na tangomana te roꞌeni nakarhada na jateula isi te tangomana fabiꞌodi bret. Ghotilo jateula bret te theo isi ia eghu, naugna God neke fafaranihi Kraes te mala hata fadeleidi nakhibodare. 8Eghume kate leghuni tahati Kraes ka nakarha majaghani na, theome tangomana tahati te edi nafnata nakhibo ba nafnata puhi te diꞌa teke edi tifa ra. Nu te edi tahati puhi tuare jateula isi te fabiꞌo bret ia eghu. Nu tahati mala jateula bret te theo kaisei isi ka noda Gaghamu Ghasa-Polho na ia eghu mala doglo nei cheke kate tutuani.
9Ka letas teke riso ari iara ka ghotilo tifei ia, iara neke chekehi ka ghotilo mala thosei fofodu baludi iheire te tapla jafra ka nakhibo are. 10Nu iara theome chekeni te mala thosei fofodu ghotilo ka mae te bongihehere, ba mae te edi glepo te diꞌa fara ba mamagna ba blau ba pogho soru ka mumuju. Te tei kokodi ghotilo naikno igre, ghotilo ginauna jifla kokoni nauthoglu igne! 11Tutuani, iara theome magnahaghe ghami ghotilo te fofodu ka iheire te kiloni thedi naikno khiloau, nu edi fabrahu glepo te diꞌa fara, ba mamagna, ba pogho soru ka mumuju, ba toutonu fadiꞌani ihei, ba khuru koꞌu, ba chaghi mala hata glepo ka keha naiknore. Ghotilo thosei gnokro fodu baludi nafnata naikno tuare, ba ima baludi. Igne gaoghathogna nogu letas iara teke riso ari ka ghotilo tifa ia.
12-13Uve, theome nogu gloku iara te mala fatedi naikno bongihehere. God thegna kolho te mala fatedire. Nu ghotilo naikno khiloau are te mala fatedire mae khiloau kolho. Naugna u grioriso te blahi na cheke eghu, “Ghotilo mala faꞌau kosidi iheire te tapla jafra koba ka nakhibo na.”
6Puhi keli te mala fadoglini u najafra na
1Jame kaisei ka ghotilo magra balugna kaisei thabusigna ka khiloau, ghotilo theome tangomana te hata te tei puhi tuana ka mae bongihehere mala fadoglini mare. Naugna u najafra tuana nodi gloku mae khiloau kolho te mala fadoglini na. 2Eigna ghotilo lasenihi ginauna naikno khiloau gre tangomana te fatedi naikno te gnafa ka nauthoglu gne. Eghume jame te nabami ghotilo te fateni naiknogna nauthoglu igne na ghotilo jaola tangomana fara te fadoglidi farihoteimi themi puhi te ikodi tuare. 3Ghotilo laseni nathuꞌu nauriha na tahati naikno khiloau gre ginauna jaola fatedi nogna engel God re. Te eghu na, glepo ikodi te edi leghu narane igre, bligi kolho tahati te mala fadoglidire. 4Kate thakle mei puhi igre, naugna unha si ghotilo te tei fathoethoke koba ka mae ihei te au ke kosigna khiloau gnea? Naugna ghotilo theome ghatho tahudi mare! 5Tore, ghotilo theome mamaja nomi sia?! Naugna te laseni iara na, jare ke lamnami ghotilo na au keha mae glalase tangomana te fadoglidi magra te edi farihoteimi ghotilo naikno khiloau are. 6Nu ghotilo magnahaghei te tei toreni mae bongihehe na te mala fadoglini puhi teke eni kaisei mae ranghini keha mae thabusigna ka khiloau na!
7Nafnata puhi te eni ghotilo fari themi ka fate na igne falaseni te thofno jafrahi ghotilo na. Te keli na ghotilo snakredi keha thabusigna ka khiloau gne mala fanenei ghami, ba mala hata nomi glepore! 8Nu ghotilo theo eghu. Tutuani neubane kafe naikno khiloau, ghotilo fanenei fari themi nei jaola blau fari themi! 9-10Ghotilo thofno laseni ihei te edi glepo te diꞌa igre ginauna theome thokeni u nakarha te funei frunini God na. Naikno igre te diꞌare: iheire te gnognoro, ba iheire te pogho soru ka mumuju, ba iheire te huhughuni vetula gna tholaghi, ba nalhaꞌu te ei puhi diꞌa fari nalhaꞌu, ba iheire te blau, ba iheire te mamagna, ba iheire te koꞌu te dranga, ba iheire te toutonu chaichaghidi keha naiknore, nei iheire te chaghi mala hata glepo ka keha naiknore. Eghume kheraguro, thosei snakreni ihei te mala chaghi ghami ghotilo eigna puhidi naikno te funei frunidi God re. 11Tifa na, keha naikno ka ghotilo neke jateula tuana neku! Nu ka nanghagna noda Lord Jisas Kraes nei ka nogna nolaghi Tharunga gna noda God, mana neke hata fadelei nakhibomire mala nogna naikno nei mala au doglo ka tathagna God na.
Sugablahi nogna Tharunga te Blahi
12Keha ka ghotilo cheke eghu, “Naugna iara leghuni Kraes, iara tangomana te eni unha te magnahagheni thegu na.” Igne tutuani, nu gobigna lepore theome mala togho nigho eghu. Eghume, neuba iara ne tangomana te edi gobigna lepore, iara theome snakreni kaisei puhi te mala funei fruni ghau na. 13Keha mae na jame jaola cheke eghu, “Thi’a na malagna gano, eghuteuna gano na malagna thi’a.” Uve. Nu God ginauna kafe roꞌedi phei glepo igre. Nu ghotilo theome tangomana te chekeni thini na mala gnognoro teuna. Naugna thini na mala loku ranghini Lord, eghuteuna Lord na mala funei frunini u thini na. 14Tutuani, ka nogna nolaghi God neke fakarha fapuloni Lord Jisas kau glehe, eghuteuna God ginauna jaola fakarha fapulo ghita ka nogna nolaghi na. 15Ghotilo thofno laseni igne, eigna thinimi ghotilo re kaisei ka thinigna Kraes. Eghume tahati theome tangomana te hata thinigna Kraes na te loku fodu ka thinigna thau vine na. 16Ghotilo laseni igne, eigna mae ihei te thuru fodu balugna thau vine na repa ginauna kaisei thini ngala. Naugna grioriso te blahi na cheke eghu, “Repa ginauna kaisei thini ngala.” 17Nu ihei te loku fodu balugna Lord na, phiamare na kaisei ngala ka thofno nakarha na.
18Ghotilo thosei leghuni puhi gnognoro na! Keha nakhibo te edi naiknore au ka gaoghatho kolho theome loku fodu ka thini. Nu iheire te gnognoro re thofno fathonadi fara thinidi thedire. 19Ba, ghotilo theome laseni thinimi ghotilo gre jateula Sugablahi nogna Tharunga te Blahi teuna!? Tharunga te Blahi na au ke lamnami ghotilo, eigna God neke tusu mei ka ghotilo. Ghotilo theome nomi themi, 20naugna God neke foli fapulo ghamihi ka nakhibo mala fasnagla ghami. Eghuteuna tabagna teke foli ghami ghotilo na biꞌo fara. Eghume thinimi ghotilo re mala kilo fnaknoni God kolho.
7Eigna tholaghi
1Gognaro na iara magnahaghei te cheke tughudi unha teke riso mei ghotilo ka iara ra. Ulu lahu na, te keli na mae nalhaꞌu na thosei thuru balugna kaisei gaꞌase. 2Nu naugna kmana naikno gnognoro fara, eghume jame te keli na mae nalhaꞌu te gnafare nabagna te hata khetogna thegna, eghuteuna gaꞌase na jaola hata khetogna langau thegna. 3Mae tholaghi na mala thuru fodu ka khetogna na, eghuteuna thau tholaghi na mala jaola thuru fodu ka khetogna na. 4Naugna gaꞌase tholaghi na theome mala funei fruni ni thinigna thegna na, nu mae khetogna na jaola funei fruni ni thinigna naꞌa na. Eghuteuna mae nalhaꞌu na mala theome funei fruni ni thinigna thegna na, nu khetogna na jaola funei fruni ni thinigna mana na. 5Nu repa jame kaisei nodi gaoghatho mala thosei thuru fodu katha vido, mala tangomana repa te snagla te mala tharai na. Nu ke leghu na repa ginauna funu thuru fodu nodi. Nu kaisei ka repa thosei thodo te snakreni thinigna na ka keha ikno na mala thuru balugna eghu. Te theo na mae Satan tangomana te fariuriuni kaisei ka repa te theome tangomana te nheta na. 6Iara chekeni igne mala togho ghami ghotilo, theome jateula kaisei vetula eghu mala leghuni ghotilo. 7Ka gaoghathogu iara na, iara magnahaghei ghami ghotilo hui te mala au jateula iara eghu mala theome tolaghi kolho. Nu God neke tusu ranghi ghita soasopai khokofakasai. Kaisei mae hata keha nafnata khokofakasai na, eghuteuna keha mae na hata keha nafnata khokofakasai na.
8Gognaro na iara cheke ka ghotilo iheire te theome tolaghi teura, nei iheire tela lehehi khetodira eghu, te keli na ghotilo jame theome tolaghi jateula iara eghu kolho. 9Nu jame nalhaꞌu ba gaꞌase te theome tangomana te au kolho na, nabami na ghotilo tolaghi kolho. Naugna puhi tholaghi na keli fara uluni nafnata puhi te fiti thuru fodu kolho na.
10Ka ghotilo iheire tela tolaghihira, iara tusu ari vetula igne ka ghotilo, eigna theome nogu iara kolho nu nogna Lord. Vetula na igne, gaꞌase na theome mala tei kokoni khetogna na. 11Nu jame kaisei gaꞌase tei kokonihi khetogna na, naꞌa mala thosei ke tolaghi, ba naꞌa ke pulo au fodu ka khetogna na. Eghuteuna nalhaꞌu na jaola thosei koko khetogna na.
12Ranghi ghami ghotilo keha naiknora, iara kolho te chekeni igne, theome nogna Lord. Uve, te chekeni iara na, jame kaisei mae khiloau tolaghi ka gaꞌase te theome fatutuani ni Kraes nu naꞌa magnahaghei au fabrahu balugna mana teuna, mana mala thosei koko gaꞌase igne. 13Eghuteuna jame kaisei gaꞌase khiloau tolaghi ka mae te theome fatutuani ni Kraes, nu mana magnahaghei au fabrahu balugna naꞌa teuna, gaꞌase tuana thosei koko mae nalhaꞌu igne. 14Mae ihei te theome fatutuani na, mana tangomana te mei namo ka God na, naugna mana ne kaisei balugna thau khiloau te tolaghi mana tagna na. Eghuteuna gaꞌase te theome fatutuani na, naꞌa tangomana te mei namo ka God naugna naꞌa ne kaisei balugna mae khiloau te tolaghi naꞌa tagna na. Jame te theome tutuani igne na, thumi ghotilo re ginauna theome doglo ka tathagna God na. Nu gognaro na naugna ka nomi fatutuani ghotilo idodi kmadira, thumi ghotilo re tangomana te mei namo ka God.
15Jame kaisei naikno theome fatutuani ni Kraes, eghuteuna magnahaghei koko khetogna te fatutuani ni Kraes na teuna, keli kolho te snakre teini na. Jame te eghu na, thabusida ba greghada ka Kraes tuana na snagla ka puhi tholaghi na. Nu te tangomana na, repa au fodu naugna God neke kilo ghita mala au ka pharikeli. 16Iara chekeni igne ka ghotilo gaꞌase khiloau ba nalhaꞌu khiloau ra mala au fodu fabrahu baludi khetomire. Naugna ghotilo ginauna jau theome laseni te fakarhidi khetomi te theome fatutuanire.
Soasopai nafnata nakarhada
17Nu neubane tahati te gnafa na mala au fabrahu ka nafnata nakarha teke tusu ranghi ghita Lord na. Jateula nafnata nakarha teke au tahati kani teke kilo ghita God ia eghu. Igne u vetula te chekeni iara ka khiloau te gnafare. 18Jame kaisei mae teke kulu vahehi kani teke kiloni God na, mana mala thosei ke tughu igne. Eghuteuna jame kaisei mae teke theome vahe teku kani teke kiloni God na, mana mala thosei huhuruni thegna mala ke vahe. 19Naugna te vahe ba te theome vahe na theome glepo ulu. Glepo te ulu na te leghuni ngala nogna vetula God na. 20Ghotilo te gnafa na mala au fabrahu ka nafnata nakarha jateula kani teke kilo ghami God igne eghu.
21Jame iagho teke kaisei mae sneka kani teke kilo nigho God na, iagho thosei nanga nou ka puhi igne. Nu jame iagho te filoni kaisei nabrou te snagla na, iagho tangomana te leghuni tuana mala snagla fabrahu. 22Tutuani, mae ihei teke mae sneka kani teke kiloni Lord na, mana gognaro na snagla malagna Lord. Jateula mae teke snagla kolho kani teke kiloni Lord na, mana gognaro na mae sneka malagna Kraes. 23God neke foli fajifla ghamihi ka nakhibo, eghuteuna tabagna teke foli ghami mana na biꞌo fara. Eghume thosei snakreni kaisei naikno hata ghami mala sneka. 24Kheraguro, ghotilo te gnafa na mala au fabrahu ka nafnata nakarha te keli balugna God, jateula teke eni ghotilo kani teke kilo ghami God ia eghu.
Gusna eidi iheire te theome tholaghi
25Gognaro na iara cheke eidi iheire te theome tolaghi ra. Iara theo kaisei nogu vetula funu ka Lord eigna igne, nu iara na cheke arini gaoghathogu thegu na. Tutuani, ghotilo tangomana te rouronu ghau iara na, naugna Lord neke lolokeli ranghi ghau iara nei toghoni gaoghathogu na.
26Tutuani, kate filoni iara puhi biꞌo nate mei ginauna, iara ne ghathoni igne, te keli na ghotilo au ka nakarha te au teu themi gognaro gne te mala tolaghi ba te mala theome tolaghi na. 27Jame mae ihei teke kulu tolaghihi na, thosei fariuriu mala sopa au ka khetogna na. Eghuteuna jame ihei te theome tolaghi nga teuna, thosei fariuriu hironi kaisei gaꞌase. 28Nu jame kaisei mae te magnahaghei tolaghi na, keli fara, theome jafra. Eghuteuna jaola theome jafra jame te tolaghi gaꞌase khupi na. Nu iheire te tolaghire ginauna dedi kmana puhi ka nakarhadire, eghume iara chekeni igne ka ghotilo naugna iara theome magnahagheni te thoke ghami ghotilo puhi igre na.
29Uve kheraguro, igne gaoghathogna nogu cheke iara na, katha vido kmoꞌei kolho te mala loku tahati ranghini Lord na. Eghume, funu gognaro na, mae iheire tela tolaghihira, mare mala au jateula iheire te theome tolaghi eghu mala loku brana. 30-31Eghuteuna iheire te diꞌanagnafa ka nauthoglu igne ra, mala au jateula iheire te gleale’a fara ra eghu. Iheire te gleale’a fara ra, mala au jateula ihei te diꞌanagnafa eghu. Eghuteuna iheire te dedei ka nauthoglu igne ra, mare mala au jateula ihei te kuma eghu eigna iheire te dedei ka nauthoglu igne ra mare na theome edi glepo igre tifa tifa. Tutuani, tahati te gnafa na mala snagla gaoghathodare mala loku ranghini Lord. Naugna nauthoglu te filoni tahati gognaro gne, la namo sala’u arihi.
32Iara magnahaghe ghami ghotilo te mala thosei nangani kaisei glepo ka nauthoglu igne malagna nakarhami themi na. Tutuani, mae ihei te theome tolaghi na mala nangani kolho nogna gloku Lord na, naugna mana magnahagheni Lord te gleale’a fara. 33Nu mae ihei te tolaghi na, mana nangadi fara glepo gna nauthoglu igne, naugna mana magnahagheni khetogna na te gleale’a fara, 34eghuteuna mana fnota gaoghathogna na ka phei nabrou. Naikno biꞌo te theome tolaghi ba khupi na, naꞌa mala nangani kolho nogna gloku Lord na, naugna naꞌa magnahaghei te snakreni thegna ka Lord. Nu gaꞌase te tolaghi na, naꞌa tangomana te nangani fara glepo gna nauthoglu igne, naugna naꞌa fariuriu mala faglealeꞌani khetogna na. 35Iara chekeni igne ka ghotilo, naugna iara magnahaghei te togho ghami ghotilo. Eghuteuna iara theome magnahaghei te lhotini puhi tholaghi na ka ghotilo. Eigna iara magnahaghei ghami ghotilo te eni kolho unha te doglo na nei snakre ghami themi mala loku fabrahu ranghini Lord.
36Jame phei naikno nhaꞌa chekehi mala tolaghi. Eghuteuna gaꞌase na la fatapeahi eghu, neuba mae nalhaꞌu na magnahaghei thuru fodu ka naꞌa teuna, te keli na repa tolaghi gognaro na. Igne theome nakhibo. 37Jame kaisei mae te au gaoghathogna fara te mala tirogna tolaghi ka khupi na teuna, gaoghatho te eni mana igne keli fara. Naugna theo kaisei naikno te huhuruni mana te mala tolaghi na. 38Eghume mae ihei te tolaghi na, mana eni glepo te doglo na. Nu mae ihei te theome tolaghi na, mana eni glepo ke ulu tulaoi.
39Gaꞌase tholaghi na mala au fabrahu balugna khetogna na. Nu jame te lehe khetogna na, naꞌa tangomana teke tolaghi ka ihei te magnahagheni naꞌa na, eghu jame te kaisei mae khiloau mana na. 40Nu gaoghathogu iara na, naꞌa ginauna gleale’a fara jame te theome fapea tolaghi na. Eghuteuna kate cheke ranghi ghami eigna puhi igne, iara fatutuani ni Tharunga gna God na au balugu iara mala batuni gaoghathogu na.
8Eigna gano te fafara ka mumuju
1Gognaro na iara magnahaghei cheke eigna gano teke fafara ka mumuju. Tutuani fara, keha naiknore cheke eghu, “Tahati te gnafa na kafe au noda glalase.” Neuba, nafnata glalase te mala laseni unha te tutuani ba unha te theome tutuani na igre mala fahaehaghe ghita theda kolho. Nu namha na biꞌo uluni glalase na naugna namha na tangomana te thofno fahetani noda fatutuani na. 2Ihei te cheke eghu na, “Iara lasedi fara gobigna lepore” teuna, naikno tuana theome thofno laseniu kolho puhi glalase na. 3Nu ihei te namhani God na, God laseni mana.
4Eghume igne unha te chekeni iara eigna te ghamu gano teke fafara ka mumuju na. Eigna te laseni tahati na, u mumuju na tharumaꞌei lepo kolho ka nauthoglu igne. Eghuteuna te laseni langau tahati na jare na kaisei God ngala. 5Tutuani, kligna ba ka nauthoglu gne au glepo te kilodi mare “god”. Eghuteuna neubane au kmana nafnata “god” nei kmana nafnata “Lord”, 6te fatutuani ni tahati na jare na kaisei God tutuani ngala te au na. Mana Kmada tahati naikno khiloau, eghuteuna mana neke vuavuhadi gobigna lepore, nakarhada tahati na nogna mana. Kaisei Lord ngala nanghagna na Jisas Kraes. God neke vuavuha gobigna lepore ka mana, nei tahati jaola karha kolho ka mana.
7Nu neuba ngau, keha naiknore theome kafe lase fakelini mumuju na, eigna mumuju na theome god tutuani. Naugna kate ima gano teke fafara ka mumuju na, mare ghaoghathodi na jateula te fafaradi thedi eghu ka nodi mumuju mae bongihehe tifa ra. Gaoghathodire theome heta kolho, eghuteuna gano teke fafara ka mumuju igne fathonadi kolho mare. 8Nu gano na theo nogna nolaghi te mala hata gita te ari namo ka God na. Jame te tiroda ima tahati na, tahati theome au khaba ka God. Eghuteuna neubane ima tahati nafnata gano igne, gano tuana theome mala fakeli ghita ke ulugna God.
9Neuba, ghotilo filo fakeli glahu totokhei naikno te theome biꞌo nodi fatutuani re ka unha te eni ghotilo na. 10Naugna jame ihei te theome nheta gaoghathogna na ginauna filo nigho te ima teu iagho ke lamnagna nogna Sugablahi mumuju na. Eigna iagho laseni theome jafra te ima jare ka gano teke fafara ka mumuju na. Nu neuba iagho ginauna batuni mana mala ima koba gano teke fafara ka mumujure! 11Eghume nou glalase iagho eigna gano igne na batu fadiꞌani mae ihei te theome nheta nogna fatutuani na. Ba, ghotilo theome laseni Kraes teke lehe eigna mae kherada igne?! Tutuani, ghotilo laseni mae kherada igne mana kaisei mae biꞌo ka Kraes. 12Ka puhi igne ghotilo jafra ranghini Kraes ka unha te jafra ghotilo ranghini mae kherami fofodu te theome nheta nagnafagna na. 13Eghume jame te fadidiꞌa iara nogna fatutuani mae kheragu fofodu na ka gano te ima iara teke fafara ka mumuju na, iara ginauna thosei ke ima gano teke fafara ka mumuju na.
9Nolaghi nei nodi gloku mae khuru
1Ghotilo lase ghauhi iara, eigna iara kaisei mae te snagla te eni unha te magnahagheni thegu na. Eghuteuna ghotilo jaola lase ghau iara kaisei mae khuru. Ghotilo lase ghau iara neke filoni mae Jisas noda Lord. Eghuteuna ghotilo lasenihi eigna ghotilo te gnafa na funu fatutuani ni Lord ka nogu gloku iara na. 2Neubane theome filo glani ghau iara keha naiknore te mae khuru iara na, ghotilo filo glani ghau iara. Naugna ka nomi thofno nakarha majaghani ghotilo na, ghotilo kaisei balugna Lord. Igne fagaglana eigna te kaisei mae khuru tutuani iara na.
3Keha naiknore cheke fapari ghau iara, nu igne nogu cheke tughu iara na: 4naugna iara kaisei mae khuru, tutuani iara tangomana te toredi naiknore te mala togho ghau ka gano ba khoꞌu jame te magnahagheni iara na. 5Eghuteuna jame magnahagheni iara na, iara jaola tangomana te hata kaisei gaꞌase khiloau te mala tei balugu ka nogu gloku na, jateula te edi keha mae khurura eghu, hatimare mae thabusigna Lord, nei mae Pita teu ra neke eni igne. 6Jaola, mae khuru gre theome loku sileni. Nu ghepa mae Banabas loku mala togho ghami themi. Ba, ghepa ngala?
7Ka nogu puhi iara te mala hiro sileni, filo si ghotilo: theo kaisei mae soldia te loku ka armi te mala folini thegna nogna taba na. Eghuteuna jaola theo kaisei mae te loku ka nagare, eghuteuna theome ima keha sisi thegna teuna. Ba, kaisei mae te reireghi sipu te hata keha milk te mala koꞌu thegna na. 8Kate chekeni igne, iara theome leghuni kolho nogna gaoghatho naikno na, naugna nogna vetula mae Moses na jaola neke chekeni igne. 9Uve, te risoni ka nogna vetula mae Moses na cheke eghu, “Thosei haru foflogna buluka na mala lhotini te ghamu kate tapla naꞌa ke kligna wit na.” Ba, kate chekeni igne, God neke ghathoni eigna buluka kolho? Theo. 10Mana neke thofno cheke eida tahati mae gloku blahi ra ka grioriso te blahi tuana. Mae ihei te joꞌu nei mae ihei te pulei teuna, phiamare mala kafe hata ghedi vido gano ka unha teke loku phiamare na. 11Ghehati mae khuru gre joꞌu sisi malagna te famane kotu haghe nakarhami ghotilo re ka khiloau gne. Eghume ghotilo nabami te mala togho ghami ghehati fei thini na. 12Keha naiknore au nodi nolaghi te mala salo glepo ka ghotilo na. Tutuani fara, ghehati jaola au nolaghi biꞌo uludi mare!
Nu ghehati theome loku ka nolaghi igne. Theo. Neubane ninhigrana ranghi ghami gobigna lepore, ghehati theome toreni kaisei glepo ka ghotilo, naugna ghehati theome magnahaghei te eni kaisei glepo te mala fanograni u Nonomho te Keli eigna Kraes na.
13Ghotilo lasedihi iheire te loku ka Sugablahi ra, mare tangomana te hata gano ka Sugablahi na. Eghuteuna iheire te gahu fafara ka olta ra, mare tangomana te hata vido gano teke fafara mare ka olta na. 14Jateula tuana eghu, Lord neke cheke ranghidi iheire te toutonuni u Nonomho te Keli na mala hata sileni eigna nodi gloku na.
15Nu neuba, iara theome toreni kaisei vido sileni ka ghotilo. Eghuteuna iara theome risoni igne mala hata kaisei glepo ka ghotilo. Nabagu na iara mala kulu lehe kolho! Tutuani, theo kaisei naikno te tangomana te tughu puhigu iara te fahaehaghe koba igne. 16Nogu gloku iara te mala toutonuni u Nonomho te Keli na theome glepo mala fahaehagheni iara, naugna gloku te eni iara igne neke tusu mei God ka iara. Eghuteuna God ginauna na fate ghau iara jame te theome toutonuni iara u Nonomho te Keli na. 17Jame thegu iara kolho teke vahini gloku igne na meuna, iara jame tangomana te hata sileni eigna. Nu iara neke theome vahini, iara eni kolho unha God teke cheke ranghi ghau na. 18Eghume, nafnata taba nate hata iara na u nolaghi te mala toutonuni u Nonomho te Keli na ranghidi naikno te gnafare eghuteuna theome mala tore fofoli tagna. Ka puhi igne iara theome loku ka nogu nolaghi thegu te mala hata glepo ka naiknore.
19Neuba, iara kaisei mae snagla, eghuteuna theo kaisei naikno te funei fruni ghau na, iara lisa lao ghau thegu mala kaisei mae sneka ranghidi naikno te gnafa. Iara eni igne mala toghodi naikno kmanare mala fatutuani ni Kraes. 20Kate loku iara baludi mae Jiure, iara jaola au baludi mare jateula kaisei mae Jiu, mala tangomana iara te toghodi mare te mala fatutuani ni Kraes na. Eghuteuna neubane theome leghuni iara nogna vetula mae Moses na, kate loku iara baludi mae Jiu te leghuni vetula na, iara leghuni vetula tuana mala tangomana iara te toghodi mare te mala fatutuani ni Kraes na. 21Eghuteuna kate loku iara baludi iheire te theome Jiure, iara na jateula mare eghu, eigna mare theome leghuni u vetula na. Iara eni igne te mala tangomana te toghodi iheire te fatutuani ni Kraes. Iara theome huhughuni nogna vetula God na, naugna iara tangomana te leghuni nogna vetula Kraes. 22Kate au iara baludi iheire te theome heta nodi fatutuani na, iara na leghudi keha puhi te edi mare re, mala tangomana iara te toghodi mare te mala fatutuani ni Kraes. Tutuani iara leghudi thua nafnata puhidi naikno te gnafare. Iara fariuriudi nabrou te gnafare mala tangomana te toghodi keha naiknore mala hatini u thofno karha na. 23Gobigna lepo te edi iara igre malagna Nonomho te Keli gne, mala jifla tei tongana heva heva, nei jaola mala tangomana te thokeni nogna fablahi God ka iara na.
24Ghotilo laseni, neubane kmana mae te chari kate fangenghele na, nu na kaisei mae ngala te hata taba na. Eghume, ghotilo te gnafa na mala loku heta ranghini God jateula te chari heta te mala hata taba ia eghu. 25Tutuani, iheire fateo te magnahaghei chari ka fangenghele na, mare mala reireghi fakelidi koba thinidire mala nheta. Mare eni igne mala hata kaisei khepi nafnakno te theome au raugha kolho. Nu khepi nafnakno nate hata tahati na u khepi nafnakno gna kligna nate tusu ranghi ghita God na te au fabrahu tifa tifa. 26Iara thegu na la chari la tei thokehi ka taba te mala ulu na. Eghuteuna iara jateula mae te mala magra eghu, mala koko soruni keha mae na pari. Iara theome magnahaghei te fiti tutini kolho maloa na. 27Tutuani, iara thofno funei frunini nakarhagu thegu na mala nogu mae sneka iara. Naugna iara magnahaghei fara te hatini u thofno nakarha na. Uve, kate toutonuni iara ka naiknore eigna nabrou te mala hata thofno nakarha na, iara thegu na jaola leghuni nabrou tuana, na eghunu theome hata iara tabadi naikno khiloau te fatutuani ni Kraes re eghu.
10Thosei leghudi puhidi mae Jiu te tirodini God
1Kheraguro, iara magnahaghe ghami ghotilo te kulu ghathodi kuꞌeda teke leghuni mae Moses tifa ka namono nagou ia. Kaisei khoveo neke batudi neke kasa ka thongna te kiloni “Thongna Ukru”. 2Eghuteuna mare neke kafe leghuni mae Moses neke kaisei balugna mana jateula te apublahi balugna mana ka khoveo nei ka thongna neku. 3Mare neke kafe ima gano teke tusu ranghidi God na. 4Eghuteuna mare kafe koꞌu ka khoꞌu teke fafura mei God ranghidi ka thina teke tei baludi na. Thina igne Kraes thegna ngala. 5Neuba God neke toghodi ngau, kmana theome thofno leghuni mana. Eghume God neke diꞌatagnadi fara nei falehedi neku ke lamnagna namono nagou na.
6Glepo igre jateula te cheke faheta eghu ranghi ghita tahati. Tutuani, glepo igre farirhiu ghita mala thosei magnahaghedi fara tahati glepo te diꞌare jateula kuꞌeda tifa tuare eghu. 7Tahati mala thosei pogho soru ka mumuju jateula mare eghu. Eigna grioriso te blahi na cheke eghu, “Naiknore gnokro soru mala ima nei koꞌu. Aonu kegra haghe mala tei gnognoro tafri.”10:7 Eks 32:6.8Tahati mala thosei gnognoro tafri jateula mare eghu, eigna God neke falehedi varadaki thilo thogha naikno ka mare ka kaisei narane kolho. 9Eghuteuna tahati mala thosei fariuriuni Lord jateula mare eghu, eigna mogo na neke falehedi mare. 10Eghuteuna tahati mala thosei buiburini nogna gloku God ka nakarhadare jateula mare eghu, eigna engel gna glehe na neke falehedi mare.
11Glepo teke edi kuꞌeda igre jateula te cheke faheta eghu ranghi ghita eigna nogna gloku God na. Naugna tahati auhi ka narane leghu lahu te mala ari te gnafagna nauthoglu igne. 12Eghume, ihei la kegra hetahi thegna ka fatutuani na teu ka gaoghathogna na, filo fakeli eghu, glahu uka kolho. 13Gobigna lepo te mei fariuriu ghami ghotilo igre, nafnata glepo thoke dila naikno te gnafare. Nu God ginauna theome ghatho ihoni nogna nhaꞌa cheke te mala togho ghami na. Tutuani, mana ginauna theome snakreni kaisei fariuriu mala funei frunini nomi nolaghi ghotilo na. Naugna kate thoke mei ka ghotilo fariuriu na, God ginauna togho ghami ghotilo mala tangomana ghotilo te kegra heta na. Aonu, God ginauna jaola tusu ranghi ghami kaisei nabrou te mala gnafagna u fariuriu tuana.
Eigna gaghamu mumuju nei ima blahi
14Eghume kheraguro, thosei pogho soru ka mumuju. 15Iara cheke ka ghotilo iheire te lalase ra mala vahini themi unha te chekedi iara tami gre, te doglo ba theo. 16Ghotilo ghathoni u hinao te cheke fakelini tahati ka God ia. Kate koꞌu tahati ka hinao igne, tahati kaisei ka dadaragna Kraes. Eghuteuna kate ima u bret te piphike igne, tahati kaisei ka thinigna Kraes. 17Eghuteuna kaisei bret ngala. Eghume, neuba tahati ne kmana, tahati kaisei thini ngala, naugna tahati te gnafa na kafe ima ka kaisei bret ngala.
18Ghatho laodi naiknodi Israel ra. Kate imani mare unha teke fafara ka God ka olta na, mare kaisei ngala balugna God. 19Ba, ghotilo laseni eigna unha te chekeni iara igne? Naugna mumuju ba gano te fafara ka mumuju igre thofno glepo ulu fara? 20Theo! Nu unha te fafara iheire te theome fatutuani ni God re, mare fafara ka naitu kolho, theome ka God. Eghuteuna iara theome magnahaghe ghami ghotilo te kaisei balugna naitu na. 21Theome naba ghotilo te koꞌu ka nogna hinao Lord na nei jaola koꞌu ka nogna hinao naitu na. Eghuteuna ghotilo theome naba la te ima ka nogna tevo Lord na nei jaola ima ka nogna tevo naitu na. 22Ba, tahati magnahagheni Lord te diꞌatagna? Ba, tahati nheta fara uluni mana? Theo fara!
Namha na batudi naikno khiloaure
23Tutuani fara keha naikno ka ghotilo cheke eghu, “Iara tangomana te eni unha te magnahagheni thegu na.” Nu gobigna lepo igre theome tangomana te mala togho ghita nei mala fakeli ghita teuna. 24Eghume, theome tangomana kaisei naikno te ghathoni kolho thegna na. Nu tahati mala eni unha te keli na mala toghodi keha naiknore.
25Tutuani, tahati tangomana te ima gano teke foli ka maket na. Thosei ghusnani unha teke eni mare ka nafnata gano igne te mala laseni iagho te jafra mala ima na. 26Ghotilo tangomana te ima na, naugna grioriso te blahi na cheke eghu, “Nauthoglu nei gobigna lepo ke lamnagna teu igre nogna Lord.”10:26 Sam 24:1.
27Jame kaisei mae te theome fatutuani ni Kraes tore ghami ghotilo mala tei ima balugna. Jame te magnahaghei ghotilo na, ima unha te lilisei mana ke ulumi na, thosei ghusna mala laseni jame iagho ghathoni glahu jafra te ima na. 28Nu jame kaisei mae cheke eghu ka ghotilo, “Gano igre neke fafara ka mumuju,” ghotilo ghathoni cheke mana igne mala thosei ima gano tuana. 29Ka gaoghathomu iagho na keli kolho, nu thosei fadidiꞌani gaoghathogna keha mae na eghu. Eghuteuna iagho na jaola fadidiꞌani mana. Glahu cheke eghu kaisei mae, “Naugna unha si mae gne te lhoti ghau iara te theome eni iara unha te magnahagheini iara gnea? 30Iara tangomana te cheke fakelini God eigna gano tuana. Eghume naugna unha si keha naikno gre te cheke fanogra ghau iara eigna glepo teke cheke fakelinihi ka God gnea?”
31Uve, tutuani, jame te ima, ba koꞌu ba eni ghotilo unha na, ghotilo mala edi gobigna lepore ka puhi te mala kilo fnaknoni God. 32Thosei eni kaisei puhi te mala roꞌeni nodi fatutuani keha naiknore, neubane mae Jiu, ba mae te theome Jiu, ba naikno khiloau. 33Ghotilo mala leghuni puhigu iara na. Naugna leuleghu fata na iara fariuriu toghodi keha naiknore te mala heta nodi fatutuani na. Iara theome hironi te mala fakeli ghau thegu na, nu ghathodi keha naiknore mala toghodi, nei mala tangomana God te fakarhidi.
111Eghume ghotilo mala leghuni puhigu iara na, jateula iara te leghuni kolho puhigna Kraes na.
Puhigna gaꞌase khiloau
2Iara cheke fakeli ghami ghotilo naugna ghotilo theome ghatho ihodi puhigu iara re, eghuteuna thofno leghuni nogna farirhiu khiloau teke tusu ari iara ka ghotilo ra. 3Nu iara magnahaghe ghami ghotilo te mala lase fakelini eigna God na pha’ugna Kraes, eghuteuna Kraes na pha’ugna nalhaꞌu eghuteuna nalhaꞌu na pha’ugna khetogna na. 4Jame kaisei mae khiloau toku tafru pha’ugna na, kate tarai ba toutonuni chekegna God na, mana faparini Kraes. 5Eghuteuna jame kaisei gaꞌase te theome toku tafru pha’ugna na, kate tarai ba toutonuni chekegna God na, naꞌa faparini khetogna na. Naꞌa kaisei nanaba ka gaꞌase te ghoighori khaklagna na. 6Jame kaisei gaꞌase theome toku tafru pha’ugna na, naꞌa nabagna na kuchi khaklagna na. Nu naugna te mamaja nogna naꞌa te kuchi, ba ghoighori khaklagna na, gaꞌase igne mala toku tafru pha’ugna na kate tarai ba toutonuni chekegna God na.
7Mae nalhaꞌu na theome mala toku tafru pha’ugna na kate tarai ba toutonuni chekegna God na, naugna mana jateula thotoghale gna eghu God, nei fagaglana gna nogna nolaghi God te thakle ka mana na. Nu gaꞌase na fagaglana gna nogna nolaghi khetogna na te thakle ka naꞌa na. 8Naugna ka narane teke vuavuha God nalhaꞌu na, God neke theome vuavuhani mana ka thinigna gaꞌase. Nu ka narane teke vuavuhani gaꞌase na, God neke vuavuhani naꞌa ka thinigna nalhaꞌu. 9Eghuteuna God neke theome vuavuha nalhaꞌu na mala toghoni gaꞌase, nu God neke vuavuhani gaꞌase na mala toghoni nalhaꞌu. 10Eghume, naugna igne gaꞌase na mala toku tafru pha’ugna na kate tarai ba toutonuni chekegna God na. Gaꞌase na jaola mala toku tafru pha’ugna na naugna naꞌa mala cheke ke uludi hatimare mae engel. Igne u fagaglana gna naꞌa te au ke parigna nogna nolaghi khetogna na. 11Naugna nakarhada ka Lord na gaꞌase ghe nalha’ure theome mala sopa au. 12Igne tutuani fara, naugna gaꞌase na neke mei funu ka nalhaꞌu tifa na, nu nalhaꞌu na jaola karha mei ka gaꞌase. Eghuteuna gobigna lepore neke mei funu ka God.
13Ghotilo themi ghathoni igne. Ba, jame keli kolho gaꞌase na te theome toku tafru pha’ugna na, kate mei tarai ka God na? Theo, theome keli. 14Tutuani, puhidi gobigna lepo teke vuavuha God ka nauthoglu gne cheke ranghi ghita eigna mae nalhaꞌu te farerheu na famamajani kolho thegna. 15Nu gaꞌase te brahu khakla na, nogna nafnakno naꞌa. Naugna God neke tusu ranghini khakla te brahu mala toku tafru pha’ugna na. 16Jame ihei te magnahaghei fapoaphola eigna igne, iara na cheke eghu, “Ghehati baludi nogna khiloau God gre, theome au keha nabrou aheva nga te mala leghui na.”
Eigna ima blahi
17Keha glepo te magnahaghei chekedi iara gognaro gre, iara theome cheke fakeli ghami ghotilo. Naugna ka nomi faidure ghotilo lalamadi fara naiknore! 18Glepo ulu lahu te nomhini iara na, kate khapru te mala tarai na ghotilo fnota ka phei tothoghei, tothoghei mae dedei nei tothoghei mae khuma. Iara fatutuani ni igne jame roi tutuani fara. 19Uve, keli ka ghotilo te fnota ka phei tothoghei ka khiloau na mala laseni ihei te thofno leghuni cheke te tutuani na. Phei tothoghei igre theome nodi tothoghei mae te dedei nei mae te khuma eghu nu nodi tothoghei iheire te thofno nomhini chekegna God na ba iheire te tirodi nomhini chekegna mana na. 20Nu kate khapru na, ghotilo theome mei mala imani thofno nogna gaghamu Lord na. 21Naugna kate ima na, ghotilo te gnafa na sopai ima theome ofodi keha naiknore. Eghume kehare dranga ka waen nei keha ka ghotilo rofo kolho naugna ganore la gnafahila. 22Ba, ghotilo theo nomi suga themi te mala gnokro te mala ima, nei koꞌu teuna? Tore! Kate eni igne na, ghotilo lalamani kolho nogna khiloau God na, nei ghotilo paradi iheire te kuma. Unha gne nate chekeni iara ka ghotilo na? Ghotilo magnahaghei ghau iara te cheke fakeli ghami? Theo. Iara theome tangomana te cheke fakeli ghami ghotilo na!
23Farirhiu teke hata iara ka Lord na tela tusu arihi iara ka ghotilo ana. Tutuani, ka bongi mae Judas teke snakreni Jisas ka khamedi mae naokare, Lord Jisas neke hata bret na, 24neke cheke fakelini ka God. Mana piepike bret na ne tusu ranghidi nogna mae fanomhore neke cheke eghu, “Igne thinigu iara na malami ghotilo. Hata ima, mala ghatho fapulo ghau iara.”25Jaola, ke leghugna te ima bret na, mana hata hinao na ne cheke eghu, “Hinao igne u nhaꞌa cheke majaghani funu ka God ranghidi nogna naiknore. Nhaꞌa cheke majaghani igne farerheta ka dadara glehegu iara na. Kate ko’uni igne, ghotilo ghatho fapulo ghau iara.”26Tutuani, leuleghu fata kate ima bret na nei koꞌu ka hinao igne teuna, ghotilo falalase eigna glehegna Lord ghilei ke pulo mei mana.
27Eghume jame ihei te ima bret igne nei koꞌu ka nogna hinao Lord teu ka nagnafa te theome nabagna na, God ginauna na fateni mana naugna mana ne lausasaba thinigna nei dadaragna teu noda Lord na. 28Naugna igne mana kulu filo glaninighu nagnafagna thegna na ame ima nga bret igne nei koꞌu nga hinao igne eghu. 29Eigna jame ihei te ima bret igne nei koꞌu hinao igne teu nu theome filo glanini thinigna Lord te blahi na teuna, God ginauna fateni mana. 30Naugna igne, kmana ka ghotilo nigra nei fogra nei kehare la lehehi. 31Jame te kulu filo glanidighu tahati nagnafada thedare nei edi gobigna lepo te doglo ba loku ka puhi te keli teuna, God ginauna theome fate ghita. 32Nu kate farirhiu ghita na, Lord na togho ghita mala laseni tahati puhi te doglo na. Mana eni igne ka tahati mala theome au tahati kau fate ginauna baludi naikno te theome fatutuani ni mana re.
33Eghume kheraguro, kate khapru te mala imani nogna gaghamu Lord na, ghotilo mala ofo fari themi. 34Jame ihei te rofo na, nabagna na kulu imaghu ka sugagna na ame mei nga eghu. Ghotilo eni igne mala theome fate ghami God eidi puhi te diꞌa teke edi ghotilo kate ima fodure gognaro gre.
Eidi keha glepore iara na chekediu kate ke pulo mei ka ghotilo ginauna.
12Nogna nolaghi Tharunga te Blahi
1Gognaro na kheraguro, iara magnahaghe ghami ghotilo te lase fakelini eigna nogna khokofakasai Tharunga te Blahi nate tusu mei God ka nogna naiknore. 2Uve, ghotilo laseni kani au teku ghotilo ka nodi puhi iheire te theome fatutuani God ra, mae Satan neke batu fadelei ghami te mala pogho soru ghotilo ka mumuju te theo karha tadire. 3Eghume, te chekeni iara ka ghotilo na, theo kaisei naikno te cheke eghu ka nogna baubatu Tharunga gna God na, “Jisas na mae diꞌa!” Eghuteuna ihei ngala te baubatu Tharunga te Blahi na, mana tangomana te thofno cheke eghu na, “Jisas na mae funei!”
4Jare na soasopai nafnata khokofakasai, nu kaisei Tharunga te Blahi ngala teke tusu meidire eghu. 5Jare na soasopai nafnata gloku ranghini God, nu kaisei Lord ngala te loku ranghini tahati na eghu. 6Eghuteuna jare na soasopai nafnata gloku tahati te mala toghodi naikno te gnafare, nu kaisei God ngala teke tusu meidi ka tahati soasopai nafnata nolaghi te mala edi gloku igre.
7Tutuani, Tharunga te Blahi na falalase nogna nolaghi na ka tahati gnafa, mala tangomana tahati te toghodi naiknore. 8Tharunga te Blahi na tusu ranghini kaisei naikno glalase te mala toutonuni chekegna God na ka gaoghatho te keli, eghuteuna ka keha naikno na tusu ranghini nolaghi te mala cheke ka glalase te biꞌo fara mala toghodi naiknore. 9Ka kaisei naikno Tharunga te Blahi na tusu ranghini nolaghi te mala thofno fatutuani. Eghuteuna ka keha naikno na tusu ranghini nolaghi te mala fakelidi iheire te fogra. 10Eghuteuna ka keha naikno na Tharunga te Blahi tusu ranghini nolaghi te mala eꞌei kofubobhoi. Ka keha naikno na nolaghi mala toutonuni chekegna God na jateula mae profet eghu. Eghuteuna ka keha naikno na nolaghi mala filo glanini nogna nafnata nolaghi naikno, jame te nogna God ba theo. Ka keha naikno na Tharunga te Blahi na tusu ranghini nolaghi te mala cheke ka keha nafnata cheke. Eghuteuna ka keha naikno na tusu ranghini nolaghi te mala rurutha gaoghathodi nafnata cheke tuare. 11Kaisei Tharunga te Blahi igne ngala te edi glepo igre leghuni unha te magnahaghei thegna. Mana tusu mei ka soasopai naikno nolaghi te mala loku ka nafnata khokofakasai igre na.
Tahati leghuni Kraes mala kaisei thini ngala
12Kraes na jateula kaisei thini eghu, eghuteuna au kmana grerege thini tagna. Neubane au kmana nafnata vido tagna, mana kaisei thini ngala. 13Eghuteuna neuba tahati ne mae Jiu ba theome mae Jiu, mae sneka ba theome mae sneka, kaisei Tharunga te Blahi ngala teke kafe faꞌapublahi ghita na mala jateula kaisei thini eghu tahati. God neke tusu ranghi ghita hui kaisei Tharunga te Blahi ngala mala au ke lamnada. 14Eghuteuna thinigna naikno na theome kaisei vido kolho, nu au soasopai nafnata vido.
15Jame ghahe na cheke eghu, “Iara theome khame, eghume iara theome nogna thini eghu,” neuba, ghahe na kaisei vido ka thini ngala. 16Jame khuli na cheke eghu, “Iara theome tatha, eghume iara theome nogna thini eghu,” neuba, khuli na kaisei vido ka thini ngala. 17Jame thini thongana na tatha kolho, thini na theome tangomana te nonomho na. Ba, jame thini thongana na khuli kolho, thini na theome tangomana te gnangho na. 18Nu theome ka puhi tuana God teke vuavuha ghita na. Tutuani mana neke vuavuha kmana vido malagna thinida na eghuteuna lilisei soasopai vido aheva mana te magnahagheni. 19Jame kaisei vido kolho thini na meuna, tuana theome thini kolho. 20Theome jateula tuana eghu, naugna kmana soasopai nafnata vido nu thini na kaisei glepo ngala.
21Eghume, tatha na theome tangomana te cheke eghu ka khame na, “Iara theome magnahaghe nigho.” Eghuteuna pha’u na jaola theome tangomana te cheke eghu ka phei ghahere, “Iara theome magnahaghe ghami ghopa.” 22Theo! Vido ka thinida ne theome nheta teu tahati igre, tahati thofno magnahaghedi fara. 23Eghuteuna vido ka thinida ne theome glepo biꞌo teu tahati igre, igre ngala te mala thofno filo fakelidi tahati re. Eghuteuna vido te mamajadi tahati igre ngala te mala pipichi fakelidi tahati re. 24Nu vido te keli fara ka thinida igre, theome mala toku tafru ka pohe. God thegna neke vuavuha gobigna lepo ka thini na igre neke nhaꞌa fodu ka nafnata puhi te mala fnakno vido ne theome keli teu tahati gre. 25Eghume ka puhi igne, soasopai vido igre na theome fnota, nu mare te gnafa na tangomana te ghathodi kehare. 26Jame kaisei vido au papara, keha vidore na jaola au papara. Ba jame kaisei vido ka thinida na fnakno, keha vidore na mala jaola gleale’a.
27Eghume, ghotilo te gnafa na thinigna Kraes. Ghotilo te gnafa na kaisei vido ngala ka thini tuana. 28God neke lilisei soasopai naikno te mala edi soasopai gna gloku ka khiloau gne. Ulu lahu na, mana neu lilisei hatimare mae khuru, fapea na, hatimare mae profet. Fatilo na, hatimare mae velepuhi. Eghuteuna kehare mala eꞌei kofubobhoi, nei kehare mala fakelidi iheire te fogra, nei kehare mala totogho, nei kehare mala baubatu ka khiloau, nei kehare mala cheke ka keha nafnata cheke. 29Mare theome kafe mae khuru ba profet ba velepuhi. Mare theome kafe au nolaghi mala eꞌei kofubobhoi, 30ba mala fakelidi iheire te fogra, ba mala cheke ka keha nafnata cheke, ba mala rurutha gaoghathogna nafnata cheke tuana. 31Nu ghotilo heta mala hata khokofakasai te thofno keli fara teke tusu mei mae Tharunga te Blahi.
Namha khiloau
Gognaro na, iara na cheke ka ghotilo eidi unha te thofno ulu fara re.
131Neuba iara ne tangomana te chekeni chekegna God na ka soasopai cheke ka nauthoglu igne ba chekegna kligna, nu jame te theome namhadi iara keha naiknore, iara jateula kaisei belo ba vido aean eghu te fiti taitanhia eghu kolho. 2Eghuteuna, neuba iara ne tangomana te toutonuni chekegna God na jateula mae profet, ba lasedi fara gobigna lepo ka nauthoglu gne ba gobigna lepo te poru, ba au nogu fatutuani biꞌo te mala fathughadi thogelere, nu jame te theome namhadi iara keha naiknore, iara theo nafugu kolho. 3Neuba iara ne tufa nogu gobigna lepore ka naikno te kumare, ba snakre lao ghau thegu ka mae naokare mala nako falehe ghau ka khaꞌaghi eigna iara te loku ranghini God na, nu jame te theome namhadi iara keha naiknore, iara theo nafugu kolho ka nauthoglu igne.
4Naikno khiloau na mala namhadi keha naiknore jateula Kraes te namhadi naiknore eghu. Eghume naikno khiloau na mala au kmu nei keli ranghidi keha naiknore. Mana mala theome goghotu, nei theome mala ghatho tahuni thegna, nei theome mala fahaehaghe. 5Mana na theome mala famamaja naikno, theome mala ghamu nhoto, nei theome mala ghosei diꞌatagna. Mana na theome mala ghathoni unha najafra teke eni ranghini kheragna fofodu na. 6Mana na theome mala gleale’ani unha glepo te diꞌa na, nu mala gleale’ani unha te tutuani na. 7Mana theome babaꞌo kate thakle mei puhi biꞌo na nu mana mala heta fabrahu ka nogna fatutuani nei mala rouronuni nogna nhaꞌa cheke God na nei sasaꞌa mala ofou kolho.
8Nogna namha mana ranghidi keha naiknore na theome gnafa. Nu nolaghi te mala toutonuni mana chekegna God na, ginauna hui nei nogna nolaghi te mala chekeni chekegna God ka soasopai nafnata cheke na ginauna hui, nei nogna glalase biꞌo eigna puhigna God na ginauna jaola hui. 9Naugna noda nolaghi nei glalase te mala toutonuni chekegna God na teuna, theome fodu. 10Nu kate mei unha te klino fabrahu na, glepo te theome klino re ginauna na gnafa. 11Tifa, kani suai gu na, nogu cheke nei nogu glalase nei nogu gaoghatho teure jateula sua eghu kolho. Nu gognaro na iara mae biꞌohi, iara theome jateula sua eghu. 12Gognaro na tahati theome tangomana te thofno filo glanidi glepo eigna God re jateula te filo ka thiro te theome klino ia eghu. Nu ka narane nathuꞌu nauriha na, tahati ginauna filo fakelidi gobigna lepore jateula ka tathagna God thegna eghu. Eghume unha te laseni iara eigna God gognaro na, theome naba. Nu ka narane tuana, iara ginauna na thofno lase fakelini God, jateula God te thofno lase fakeli ghauhi iara eghu.
13Eghume thilo glepo te ulu igre au fabrahu tifa tifa: fatutuani, grouronu nei namha. Nu namha na ngala te ulu ka thiloi gre.
14Nogna khokofakasai Tharunga te Blahi
1Hati nhetami na mala leghuni puhigna namha na. Eghuteuna ghotilo jaola hati nhetami na mala hata keha nogna nafnata khokofakasai Tharunga te Blahi, tulao fariuriu fara te mala hata nolaghi te mala toutonuni chekegna God na. 2Tutuani, ihei te chekeni chekegna God ka soasopai nafnata chekei na, mana theome cheke ka naikno, nu mana cheke ka God kolho. Theo kaisei naikno te tangomana te laseni nafnata cheke tuana, naugna Tharunga te Blahi na neke tusu ranghini mana u nolaghi te mala chekedi glepo te poru igre. 3Nu ihei te toutonuni chekegna God na, mana ne cheke ka naiknore. Mana toghodi naiknore mala nheta nodi fatutuani na ka Lord balu fabrabrana nei fameomego. 4Ihei te chekeni chekegna God ka soasopai nafnata chekei na, mana tangomana te mala toghoni kolho nogna fatutuani thegna na, nu ihei te toutonuni chekegna God na, mana tangomana te toghodi nodi fatutuani naikno te gnafa ka khiloau na. 5Tutuani, iara magnahaghe ghami ghotilo hui te hata nolaghi te mala cheke ka soasopai nafnata cheke, ke tulaoi, nolaghi te mala toutonuni chekegna God na. Nu jame kaisei mae ka khiloau na au jare mala rurutha gaoghathodi cheke igre ka soasopai nafnata cheke, mana toghoni naikno khiloau na jateula mae mala toutonuni eghu chekegna God na.
6Ba, kheraguro, jame mei te chekeni iara chekegna God ka soasopai nafnata chekei na, tuana na togho ghami ghotilo? Theo! Nu jame te toutonuni iara glepo teke falalase God ka iara na, ba keha glalase ba chekegna God, ba keha farirhiu, tuana nate togho ghami ghotilo na. 7Glepo te theo karha tadi jateula glalahu nifu ba gita teu igre na jaola. Jame te theome koje fakeli kaisei naikno na, tahati na theome lase fakelini khoje tuana. 8Jaola, jame te theo kaisei naikno te kufli fakeli na, naiknore na theome tarabana mala magra. 9Jateula tuana eghu ka ghotilo na. Jame te theome thakle fakeli chekemi ghotilo re, faꞌunha eghu naiknore ame lasedi nga unha te chekedi ghotilo re? Theome tangomana. Naugna cheke te edi ghotilo re ginauna theo nafugna kolho nu jateula kaisei mae te phanga ranghini maloa na ia eghu kolho. 10Tutuani, jare na kmana nafnata cheke ka nauthoglu igne. Eghuteuna cheke te gnafa igre au gaoghathodi eghu. 11Jame te theome laseni iara gaoghathogna unha te chekeni kaisei naikno ka iara na, iara jateula kaisei mae phosa eghu ka mana, eghuteuna mana jaola kaisei mae phosa ka iara. 12Ghotilo jateula tuana eghu, eigna ghotilo magnahaghedi fara keha nogna nafnata khokofakasai Tharunga te Blahi na. Eghume hati nhetami na mala hata nolaghi te mala toghoni nodi fatutuani naikno te gnafa ka khiloau gne.
13Eghume ihei te chekeni chekegna God ka keha nafnata chekei na, mana mala toreni God mala tangomana mana jaola te rurutha gaoghathogna unha te chekeni mana na. 14Eigna jame te tarai iara ka nafnata cheke te theome laseni iara na, tharungagu iara na ginauna tarai, nu gaoghathogu iara ginauna na theome laseni unha te chekeni na. 15Eghume unha nate eni iara na? Uve, iara ginauna tarai ka God balugna tharungagu na, nu iara ginauna jaola tarai balugna gaoghathogu na. Eghuteuna iara ginauna koje ka God balugna tharungagu na, nu iara ginauna jaola koje balugna gaoghathogu na. 16Nu jame te kilo fnaknoni God ghotilo ka tharungami kolho na, kaisei naikno te majaghani ka khiloau te au balumi ka tharai na ginauna theome laseni unha te chekeni ghotilo na. Mana ginauna theome kaisei gaoghatho ka nomi tharai nei theome tangomana te chekeni “Amen” teu balumi ghotilo na. 17Neuba nomi tharai ghotilo te mala cheke fakelini God na ne keli fara, nomi tharai ghotilo tuana na theome toghoni kolho mana.
18Tutuani, iara cheke fakelini God, naugna iara tangomana te chekeni chekegna God ka keha nafnata chekei na, iara ulu ghami ghotilo hui. 19Nu kate au iara baludi ka khiloau na, iara magnahaghei te farirhiudi. Eghume, neuba iara ne cheke kolho kaisei ba phei cheke te naba nomhini mare na, tuana te keli uluni jame te chekedi iara niha thogha cheke ka nafnata cheke igre.
20Kheraguro, puhimi ghotilo re mala klino jateula sua eghu. Thosei edi glepo te diꞌare. Nu ghotilo mala au jateula mae tela biꞌohi eghu ka puhimire ka khiloau gne, thosei ghaoghatho jateula mae sua eghu. 21Ka grioriso te blahi na, Lord ne cheke eghu,
“Iara ginauna cheke ka naikno te lasedi soasopai nafnata cheke igre mala cheke baludi nogu naiknore.
Uve, iara ginauna cheke ka foflodi naiknodi deleire, neuba,
mare ginauna tirodi fanomho ka unha te chekedi iara re.”14:21 Isa 28:11,12.
22Eghume nafnata nolaghi te mala chekeni chekegna God ka keha nafnata chekei igne, kaisei fagaglana gna nogna nolaghi God maladi iheire te theome fatutuani nga teu, theome maladi iheire te fatutuanihi. Nu nafnata nolaghi te mala toutonuni chekegna God igne, kaisei fagaglana gna nogna nolaghi God maladi iheire te fatutuani, theome maladi iheire te theome fatutuani nga teu.
23Jame kaisei naikno khiloau majaghani ba ihei te theome fatutuani nga teu te mei fodu balumi ghotilo naikno khiloau gre. Eghuteuna mana nomhi ghami ghotilo te hui te cheke ka keha nafnata chekei kolho na, ka gaoghathogna mana na ghotilo meomekro kolho. 24Nu jame mana mei kate toutonuni ghotilo chekegna God na, cheke igre ginauna toghoni mana mala filo glanidi nakhibognare. Cheke igre ginauna fateni mana, 25eghuteuna glepo te poru ka nagnafagna mana re ginauna thakle. Mana ginauna tuturupuku soru mala kilo fnaknoni God, eghuteuna mana ginauna cheke eghu, “Tutuani fara, God na au balumi ghotilo!”
Puhi te keli te mala tarai fodu
26Kheraguro, igne unha te ghathoni iara na. Kate khapru ghotilo te mala tarai na, ghotilo te gnafa na mala kafe totogho. Kaisei naikno mala koje, eghuteuna keha na mala farirhiu, eghuteuna keha na mala chekeni unha teke falalase God tagna na, eghuteuna keha na mala chekeni chekegna God ka soasopai nafnata chekei, eghuteuna keha na mala rurutha gaoghathogna cheke tuana. Gloku te gnafa igre mala toghoni nodi fatutuani naikno te gnafare. 27Kate cheke kaisei ka ghotilo ka soasopai nafnata cheke igre na, phei ba thilo naikno kolho te mala eni tuana. Nu mare ginauna theome tangomana te orio cheke na, eghuteuna keha naiknoi te mala rurutha gaoghathogna unha te chekeni mare na. 28Nu jame te theo kaisei naikno jare te mala rurutha gaoghathogna nafnata cheke tuana na, ihei te magnahaghei cheke ka keha nafnata chekei igne na nabagna na mana mala au kmu kolho. Mana nabagna na mala cheke kolho ka thegna mala nomhini God.
29Eghuteuna te mala toutonuni chekegna God na, theome kmana, nu phei ba thiloi ngala te mala cheke na. Eghuteuna keha naiknore mala vahi fakelini unha te toutonuni mare na. 30Nu jame chekegna God na ghosei mei ka keha naikno te au balumi ghotilo re, mae ihei teke kulu cheke na nabagna na au kmu. 31Eghume ghotilo te gnafa na tangomana te toutonuni chekegna God na, kaisei naikno na tangomana te cheke ke leghugna keha naikno na. Ka puhi igne ghotilo tangomana te mala farirhiudi nei fameomegodi teu naikno te gnafare. 32Mae iheire te toutonuni chekegna God na, mana tangomana te funei fruni ni nogna nolaghi thegna te mala toutonu na. 33Naugna God theome magnahaghei ghita te fiti reꞌe teu ka glepodi khiloaure, nu magnahaghei ghita te loku fakeli nei au ka pharikeli. Igne tutuani fara ka nogna naikno God ka khiloau te gnafa gre.
34Kheraguro, te keli na goro gaꞌasere nabadi na mala au kmu kolho kate tarai na. Iara theome snakredi reꞌe te cheke na. Rehati jaola mala theome baubatu. Igne unha te chekeni ka nogna vetula mae Moses na. 35Jame te magnahaghe laseni reꞌe kaisei glepo na, reꞌe ginauna tangomana te ghusnadi khetodire kate tei posa ka sugadi na. Theome keli fifilogna na te kegra haghe reꞌe te cheke ka faidu na.
36Tore! Chekegna God na neke theome mei funu ka ghotilo, eghuteuna theome ghotilo themi kolho teke hata chekegna God na! 37Jame kaisei mae ghathoni ka gaoghathogna na mana kaisei mae profet, ba nogna nolaghi Tharunga te Blahi na au ka mana, mana mala laseni eigna unha te riso ari iara ka ghotilo igne te mei funu ka Lord. 38Nu jame te theome magnahaghei nomhi mana cheke igne na, ghotilo jaola mala thosei nomhini chekegna mana na eghu.
39Eghume kheraguro, ghotilo fariuriu fara te mala hata nolaghi te mala toutonuni chekegna God na. Nu ghotilo mala thosei fanograni ihei te au nolaghi te mala chekeni chekegna God ka keha nafnata chekei na. 40Eghuteuna ka khiloau na ghotilo mala edi gobigna lepore ka puhi te keli, theome mala fiti reꞌe eghu kolho.
15Karha fapulogna Kraes
1Gognaro na, kheraguro, iara magnahaghe ghami ghotilo teke ghatho fapuloni u Nonomho te Keli teke toutonunihi iara ka ghotilo ia. Ghotilo neke hata balu gleale’a, eghuteuna nomi fatutuani ghotilo re kegra maku tagna. 2Eghuteuna God ginauna fakarhi ghami ghotilo ka Nonomho te Keli igne. Nu ghotilo mala loku famaku ka cheke teke toutonu ranghi ghami iara igne, na eghunu fiti fatutuani kolho ghotilo eghu.
3Cheke te ulu fara teke hata iara na tela toutonu arihi iara ka ghotilo ana. Tutuani, nogu cheke iara na igne, mae Kraes na neke lehe mala hata fadeleidi nakhibodare, jateula te chekeni teu kau grioriso te blahi na. 4Eghuteuna mare neke giugiluni mana, eghuteuna God neke fakarha fapuloni mana ka fatilo narane na, jateula te chekeni teu ka grioriso te blahi ia. 5Mana neke fatakleni thegna ka mae Pita, ke leghu na ka hatimare nabotho phei mae fanomhore. 6Ke leghugna tuana, mae Jisas neke fatakleni thegna ka hatimare sala’uni glima gobi naikno khiloau teke khapru fodu teku kaisei vido ngala. Tutuani, kmana ka naikno igre mare karhau ngala gognaro na. Nu kehare la lehehi. 7Aonu mana neke fatakleni thegna ka mae Jemes, ke leghu na ka hatimare mae fanomho te gnafare. 8Leghu lahu na, iara jaola neke filoni mana. Naugna iara neke filoni mana ke leghudi mare, iara jateula sua te karha mei leghu lahu ia eghu.
9Tutuani, iara ngala leghu lahu ka keha mae khurure. Tutuani, iara theome nabagu te kilo ghau mare mae khuru na naugna iara neke parani nogna khiloau God na. 10Nu ka nogna khokofakasai God iara theome fiti au gognaro na. Theo. Nogna khokofakasai na togho ghau iara te mala nogna mae gloku God. Naugna iara loku heta fara ke uludi keha mae khurure, nu theome nogu gloku iara thegu. Nogna khokofakasai God te au balugu iara na mala togho ghau iara. 11Eghume, neuba iara ba keha mae khurure ne toutonu ka ghotilo, ghehati te gnafa na toutonuni kaisei glepo ngala. Tutuani, u Nonomho te Keli te toutonuni ghehati igne unha te fatutuani ghotilo na.
Karha fapuloda
12Leuleghu fata na ghehati toutonuni eigna God te fakarha fapuloni Kraes kau glehe. Eghume, naugna unha si keha naikno ka ghotilo te cheke eghu, “Naikno tela lelehira theome tangomana te karha fapulo na” teu gnea? 13Jame te theome tangomana teke karha fapulo naikno teke lehehira na, God na jaola neke theome fakarha fapuloni kolho Kraes kau glehe. 14Eghuteuna jame teke theome karha fapulo Kraes kau glehe na, unha te toutonuni ghehati ka ghotilo na theo nafugna kolho, eghuteuna ghotilo theome tangomana te fatutuani ni na. 15-16Eghuteuna keha glepo na teuna ghehati jame jaola chaghi kolho eigna God, kate chekeni ghehati God neke fakarha fapuloni Kraes ka glehe teuna. Naugna ghehati thofno toutonu eigna mana teke fakarha fapuloni kau glehe na. Eghume jame te theome karha fapulo naiknore ka glehe na, faꞌunha eghu tangomana God teke fakarha fapuloni Kraes kau glehe?! 17Jame te theome karha fapulo Kraes kau glehe na, nomi fatutuani ghotilo ka Kraes na theome tutuani. Eghuteuna God na jaola theome hata fadeleidi kolho nakhibomi ghotilo re. 18Eghume naikno khiloau tela lehehira jaola luvu kolho hi. 19Jame noda grouronu ka Kraes na malagna nauthoglu igne kolho meuna, tore kokhoni ghita fara ke uludi naikno te gnafare.
20Nu tutuani fara God neke fakarha fapuloni Kraes kau glehe. Eghuteuna igne kaisei fagaglana eigna God nate fakarha fapulodi naikno te gnafa teke fatutuani ni mana tela lehehira ginauna. 21Glehe na mei ka naikno te gnafare eigna kaisei glepo te diꞌa teke eni kaisei mae na. Nu karha fapulo na jaola mei ka kaisei mae ngala. 22Tahati te gnafa na mala lehe naugna tahati kaisei balugna mae Adam. God ginauna jaola mala fakarha fapulo ghita gnafa, naugna tahati kaisei balugna Kraes. 23Nu naikno te gnafare ginauna karha fapulo kate thoke mei nogna narane na. Kraes na neke kulu karha fapulo ka naikno te gnafare. Eghuteuna kate pulo mei Kraes na, nogna naikno mana re ginauna jaola karha fapulo. 24Aonu kate thoke mei narane leghu lahu na, Kraes ginauna magra mala tapla soruni mae Satan nei naitu te gnafa ka nauthoglu igne, eghuteuna mana ginauna snakreni God Kmagna mala King. 25Eigna Kraes ginauna mala funei frunidi gobigna lepore ghilei thokeni narane God nate lisei soru nogna naoka Kraes re ke parigna nogna nolaghi na. 26Eghuteuna naoka leghu lahu te mala roꞌeni mana na, u glehe. 27-28Naugna grioriso te blahi na cheke eghu, “God lisei soru glepo te gnafare ke parigna nogna nolaghi thegna na.”15:27-28 Sam 8:6. Kate chekeni “glepo te gnafare” lilisei ke parigna mana teu igne, thono glola fara eigna God theome cheke eigna te lisei soruni thegna na. Theo. Nu God thegna ngala teke tusu lao nolaghi igne ka Kraes te mala funei frunidi gobigna lepore. Ke leghugna God te lisei sorudi gobigna lepore ke parigna nogna nolaghi mae Thugna na, Kraes ginauna lisei soruni thegna ke parigna nogna nolaghi God. Eghume, God ngala te au nolaghi biꞌo te mala funei frunidi gobigna lepore.
29Jare iheire te apublahire mala toghodi naikno te lehe ra. Nu keha ka ghotilo cheke eghu, “Naikno te lehere theome tangomana teke karha fapulo na.” Jame te tutuani cheke tuana na mala unha si naikno teke apublahi grea?! 30Jaola, jame te theo u karha fapulo na, naugna unha si ghehati mae khuru gre te eni nomi gloku na kate thoke ghami hoholo leuleghu narane gnea? 31Tutuani fara kheraguro, iara au papara malagna Kraes leuleghu narane. Nu iara jaola gleale’a ka ghotilo kate ghathoni te kaisei tahati balugna Kraes na. 32Uve, iara tifa na magra ka glepo te fakaukathu re agne ka namono Efesus. Jame te eni iara igne leghuni nogna gaoghatho naikno kolho na, unha gne nate fakeli ghau iara te mala au papara iara na? Theo nafugna kolho. Jame te tutuani cheke igne,
“Te theome tangomana teke karha fapulo iheire tela lehehira.”15:32 Isa 22:13.
Eghume, iara ginauna leghuni kolho gaoghatho igne, “Tahati ima nei koꞌu eigna nathuꞌu na tahati lehe.”
33Thosei snakredi naiknore mala chaghi ghami eigna karha fapulo na. Eigna ghotilo lasenihi u cheke igne, “Jame te kaisei ghotilo baludi naikno te diꞌare, mare ginauna fadidiꞌa puhimi ghotilo te kelire.” 34Ghotilo mala ke funu ghaoghatho fakeli, eghuteuna ghotilo mala thosei ke edi puhi te diꞌare. Keha ka ghotilo, mare theome laseni God, eghuteuna iara chekeni igne mala mamaja ghotilo.
Thini majaghani ke leghu glehe
35Nu keha naikno jame ghusna eghu, “Faꞌunha eghu ke karha fapulo si naikno tela lehehi grea? Unha nafnata thini si nate hata mare na ia?” 36U nafnata ghusna igne meomekro kolho! Naugna ghotilo lasenihi kate joꞌu sisi na, sisire mala lehe ke lamna glose ame tangomana nga te karha te kotu haghe na eghu. 37Eghuteuna unha teke joꞌu iagho ke lamna glose na, na theome nanaba ka unha nate kotu haghe ke leghu na. Unha te joꞌu na kaisei sisi ngala, sisi wit ba keha nafnata sisi kolho. 38Ke leghu na, God eni sisi na mala kotu haghe, eghuteuna sisi tuana hata kaisei nafnata thini jateula te magnahagheni God na eghu. Tutuani, thua nafnata sisi igre hata kaisei nafnata thini jateula thinigna thegna. 39-41Eghuteuna thinidi glepo ka nauthoglu na igre theome kaisei nafnatadi ngala. Naugna thini naikno na kaisei nafnatagna, thini bosu na kaisei nafnatagna, thini nanghaji na kaisei nafnatagna, thini sasa na kaisei nafnatagna. Glepo igre au nodi soasopai siasigla thedi. Eghuteuna glepo ka maloa na igre jaola theome kaisei nafnatagna ngala. Naugna thinigna naprai na kaisei nafnatagna, thinigna glaba na kaisei nafnatagna, thinidi nathunure kaisei nafnatagna. Glepo igre au nodi soasopai siasigla thedi.
42Ka narane kegra fapulo na ginauna jateula tuana eghu ranghidi iheire tela lehehira. Tutuani, thini teke giugilui tahati na theome tangomana te au raugha na, nu thini te karha fapulo na au fabrahu tifa tifa. 43Thini te giugilui tahati na diꞌa fara filogna na, nu thini te karha fapulo na famane fara filogna na. Thini te giugilui tahati na glaꞌe fara, nu thini te karha fapulo na nheta fara. 44Thini te giugilui tahati na nogna nauthoglu kolho, nu thini te karha fapulo na malagna kligna.
Tahati au thinigna nauthoglu, eghuteuna tahati jaola au thinigna kligna. 45Naugna u grioriso te blahi na cheke eghu, “Naikno ulu lahu na mae Adam, God neke vuavuhani mana mala karha.” Nu mae Adam leghu lahu na Tharunga mala tusu meini thofno nakarha na ka naiknore. 46Mae gna kligna na neke theome kulu mei, nu mae gna ka nauthoglu na neke kulu mei. 47Mae Adam ulu lahu na God neke vuavuhani mana ka glose gna nauthoglu igne, nu fapea Adam gne neke mei funu kligna. 48Naiknogna nauthoglu na, mare kaisei ka mae teke mei funu ka glose na. Nu iheire te mala naiknodi kligna re, mare kaisei ka mae teke mei funu kligna na. 49Tutuani, gognaro na tahati kaisei nanaba ka mae teke mei funu ka glose na, nu tahati ginauna mala kaisei balugna mae ihei teke mei funu kligna na.
Mae Jisas neke tapla soruni u glehe na
50Kheraguro, iara magnahaghei te chekeni ka ghotilo igne, thinigna naikno na theome tangomana te tei thoke kligna na. Uve, thini na theome tangomana te au raugha na naugna glepo mala boto kolho. Eghuteuna glepo te mala boto na theome tangomana te au fodu balugna glepo te theome boto kligna na. 51-52Iara magnahaghei te chekeni kaisei glepo teke poru tifa ia. Tahati ginauna theome kafe lehe, nu tahati na karhau ngala kate nomhini naogla gna khufli ka narane leghu lahu na, tahati te gnafa na ginauna ghosei tughu ngala jateula nakafli eghu. Uve, kate tanhi gna khufli na, naikno teke lehehira ginauna nake ghosei karha fapulo mala karha fabrahu tifa tifa. Eghuteuna tahati te karha nga teugre mala jaola e tughu. 53Naugna unha te theome tangomana te au raugha na, mala tughu ka unha te tangomana te au fabrahu. Eghuteuna unha te tangomana te lehe na, mala ke tughu ka unha te theome tangomana te lehe na. 54Eghuteuna kate eni te hui igne, cheke te eghu ka grioriso te blahi na igne thofno tutuani fara, “Glehe na, God thofno roꞌenihi, nei tapla sorunihi eghu pari!”15:54 Isa 25:8.
55“Glehe, aheva nou nolaghi te mala funei frunidi iagho naiknore?
Glehe, aheva nou nolaghi iagho te mala goigonidi naiknore?”15:55 Hos 13:14
56Tutuani, glehe na au nolaghi mala roꞌedi naiknore naugna glehe na funu mei ka nakhibo. Eghuteuna nogna vetula mae Moses na ngala te au nogna nolaghi te mala fatakle nakhibo ka nakarhadare. 57Nu tahati cheke fakelini God, eigna mana te tapla soruni u glehe na ranghi ghita naugna ka nogna gloku noda Lord Jisas Kraes!
58Eghume kheraguro, naugna igne ghotilo kegra heta ka nomi fatutuani na nei thosei snakreni kaisei glepo mala ngali tafri ghami. Ghotilo mala rugusi fabrahu ka nogna gloku Lord na. Naugna ghotilo lasenihi nomi gloku ranghini Lord na theome tangomana te fiti luvu kolho.
16Sileni maladi naikno khiloau Jerusalem
1Gognaro na iara magnahaghei chekeni ka ghotilo eigna sileni te mala toghodi naikno khiloau te au Jerusalem. Ghotilo mala edi unha teke chekedihi iara ranghidi khiloau ka Provins Galesia. 2Leuleghu narane Sade na ghotilo te gnafa na mala lilisei fadelei keha sileni nihai teke thokeni ghotilo ka nomi gloku na mala theome ke salo ghotilo ke leghugna te posa ari iara ka ghotilo na eghu. 3Kate posa ari iara jare na, iara ginauna kurudi keha mae teke vahidi ghotilo re mala hata tei sileni tuana Jerusalem. Eghuteuna iara ginauna tusu lao kaisei letas ka mare mala hata tei baludi. Letas igne na cheke ranghidi naikno khiloau Jerusalem eidi mae te hatagna te tei sileni teke salo ghotilo igre. 4Jame naba te teila iara na, mae igre ginauna tei balugu iara.
Keha nogna gaoghatho mae Pol
5Iara ginauna ari posa ka ghotilo ke leghugna te ari sala’u iara ka Provins Masidonia na. 6Jau iara ginauna ari au raugha balumi ghotilo jare. Jame ka vido te khoburu na iara ginauna au balumi ghotilo, mala tangomana ghotilo te togho ghau iara ka vido aheva te tei iara na. 7Iara theome magnahaghei te filo ghami gognaro na naugna iara au katha vido kmoꞌei kolho. Gaoghathogu na iara magnahaghei te ari au faraugha balumi ghotilo, eghu jame te snakre ghau Lord na. 8Nu iara ginauna au agne Efesus ghilei thokei narane Pentekos. 9Naugna gognaro na, grengatha na la thora ranghi ghauhi iara, mala tangomana iara te edi kmana gloku te keli fara, neubane kmana naoka langau te loku fanogra ghau iara na.
10Jame te ari mae Timoti ka ghotilo na, ghotilo mala reireghi fakelini mana naugna mana jateula iara eghu loku ranghini Lord. 11Eghume theo kaisei ka ghotilo te mala filo faparini mae Timoti na. Nu ghotilo mala toghoni mana ka vido aheva te tei mana, mala gleale’a ke pulo mei mana ka iara thogheiro na. Naugna iara ofoni mana mala ke pulo mei baludi keha naikno khiloaure.
12Eigna thabusida ka khiloau mae Apolosi, iara chekeni mana kmana fata mala ari baludi keha mae thabusigna mala sigho ghami ghotilo. Gognaro na mana theome ghathoni ngau te mala ari na, nu ka vido te snagla ginauna, mana na ari ka ghotilo.
Nogna cheke leghu lahu mae Pol
13Reireghi fakeli ghami themi, brana ka nomi fatutuani na, thosei mhaghu, nei au heta fabrahu ka gaoghathomire. 14Gobigna lepo te edi ghotilo re mala jifla mei ka nomi namha na.
15-16Ghotilo lasenihi tharaknagna mae Stefanas ia. Mare ngala teke kulu fatutuani ni Kraes na ka Provins Akaia, eghuteuna mare loku fabrahu mala toghodi nogna naikno God re. Kheraguro, iara tore ghami mala leghudi naikno te baubatu ghami igre, baludila iheire te loku ka gloku blahi igne. 17Iara gleale’a fara naugna mae Stefanas nei mae Fotiunetas nei mae Akaikas eghu thilomare neke mei posa ka iara agne. Ghotilo theome tangomana te mei agne na, nu thilomare te hata sapemi ghotilo re. 18Thilomare faglealeꞌa ghau iara jateula mare teke faglealeꞌa ghami ghotilo tifa ia eghu. Ghotilo mala ghatho tahudi nafnata mae igre.
19Khiloau ka Provins Esia igre, mare kubae ghami ghotilo.
Mae Akuila ghe Prisila baludi naikno khiloau te khapru leghu fata ka sugadi repa re, kubae ghami ghotilo ka nanghagna Lord.
20Eghuteuna naikno khiloau te gnafa igre kubae ghami ghotilo.
Kate fari thafoi na, te keli na ghotilo kubae fari themi ka thofno namha.
21Iara riso ranghi ghami ghotilo letas igne ka khamegu thegu.
22Jame ihei te theome namhani Lord na, iara magnahagheni mae tuana ginauna mala fnota fabrahu ka God tifa tifa. Nomi Lord, mei iagho!
23Iara toreni nogna khokofakasai Lord Jisas mala au balumi.
24Iara namha ghami ghotilo gnafa. Tahati kaisei ngala ka Jisas Kraes.
Me gnafa. Iara, mae Pol.