ṯiṯus

¹ fiñi bulus ñiŋgi igaɽo ebai gǝrǝmwa na igaɽo đǝđweinia đǝyesu masiya ṯa eɽatuđi đonaṯa eleđa ilđi rǝmwa roṯǝlo na ṯa elmame eđaliŋeṯa pređ đǝŋen ŋǝđeṯam elaŋge ɽrǝmwa, ² iđǝṯurṯia đǝđamǝṯia đǝbǝɽǝbǝte iđi rǝmwa rëɽu liga alo yamǝlu yǝbǝđǝni, rënǝŋu irri raber raɽǝwađaṯa rǝgagǝbalo kwai kwai. ³ iliga lëɽǝnu rënǝŋu riđu ŋen ŋǝlëɽǝŋu ŋǝlǝŋinu iđërrǝŋaiđia đǝŋen na iganeinu đërrǝŋaiđia iđi đǝŋen irǝmwa irri raɽo đëbǝria iđëlǝŋ. ⁴ igeɽǝđo ṯiṯus, iđia gǝlëɽǝñi đurri, eđonaṯa iyesu iđi lǝgerṯo. igǝbeɽǝđia ṯa đǝbuŋṯia đusila na đëuṯaralo alǝŋaufeṯe irǝmwa đaṯa na igal masiya yesu igi gaɽo đëbǝria iđëlǝŋ. ⁵ igaṯađaŋa alo ikriṯ eŋen iŋi, ṯa ŋaṯoɽaṯe ŋen iŋi ŋero ŋǝɽiñađeinu na ṯa ŋëɽi nǝlǝŋ nǝkanisa irnuŋ pređ ŋen ŋarno igwalwaɽǝṯiaŋa. ⁶ ŋen đeṯam ṯa eđa agamëɽi ṯa aŋǝɽeṯe elǝŋ gǝkanisa aŋerṯe đǝskiniano, na aŋǝme wasen gunto, na đeṯam ñere ñǝlëɽǝŋu ñëndu ŋen ŋǝrǝmwa na aiñerṯe đǝskiniano ṯa ñabǝreinialo na đeṯam ṯaiñǝno ŋen ŋǝleđa loɽraṯǝlo. ⁷ ŋen đeṯam ṯa eđa igi garǝmoṯwa ŋen ŋǝrǝmwa ṯa aŋerṯe đǝskiniano, na aŋerṯe gëbǝđia ŋen egar gǝlëɽǝŋu, na aŋerṯe gajeiciano, na aŋerṯe gǝṯia ŋuɽu, na aŋerṯe gafara ṯwaiñ, na aŋerṯe gǝbakađǝna eŋen ŋǝɽiano. ⁸ orn ŋen đeṯam ṯa gënǝŋu aŋǝbwiṯi leđala laijǝbaṯo, na aŋǝbwiṯi ŋenŋa ŋaŋǝra, na aŋaṯuɽeini na aŋuđǝrwaṯe eŋen na aŋatǝɽeṯe na aŋërǝkǝđia aŋǝno, ⁹ na ŋen đeṯam ṯa gënǝŋu aŋëndi ŋen ŋǝrǝmwa kaiñ iŋi ŋuđǝrwaṯo ŋarno gërrǝŋeinu ṯa aŋaɽǝwađaṯe gamǝđaṯa leđa đërrǝŋaiđiađa đǝŋen ŋero ŋǝfia mǝnna na gađama leđa ildi lagea ŋen. ¹⁰ ŋen ŋanṯa leđa lëni lwaiña laber lǝnna ŋen ŋǝleđa laɽo nǝlǝŋ ildi laɽwata mǝɽǝmǝɽeñ na laɽo lađǝna, na lwaiña iŋulu leđa ildi lǝbendia ŋen ŋǝđuɽǝđǝnia. ¹¹ ŋen đeṯam ṯa ëiñua esen aiyëndǝjiđǝni ŋen ŋanṯa lënǝŋulu lađama leđa leɽa đërrǝŋaiđiađa đǝŋen ŋafo mǝnna ṯa alëndi laŋge ŋenŋa ŋǝɽiano. ¹² eđa gǝnǝŋ, igi gaɽo nabi eleđa lalo ikriṯ gaṯa ṯa, leđa lalo ikriṯ lënǝŋulu laɽǝlen, leicia, laiñǝlaŋǝno na lamiñeđǝñano. ¹³ đamǝđaṯa iđi đaɽo đeṯam. ŋen ŋafǝṯia gagariñaṯǝlo ŋenŋa ŋini ṯa alǝbǝɽeṯe nano iđonaṯa iyesu, ¹⁴ na ṯa alneđe ṯa lǝnna đǝmwađǝni đal yawuḏ na ŋen ŋǝleđa ildi lauwujǝṯu ŋen ŋǝđeṯam ŋëɽua. ¹⁵ ŋen pređ ŋaɽo đatǝɽe eleđa ltǝɽe orn ŋen ŋero ŋǝnǝŋ ŋaɽo đatǝɽe eleđa ltaŋa ildi lero lǝbendia ŋen ŋǝrǝmwa, orn ŋaṯǝɽa eŋen na nara enen ini nwaɽwata đeṯam ltaŋa. ¹⁶ lënǝŋulu lǝbaṯa ṯa laliŋeṯo rǝmwa, orn labǝlaica rǝmwa ŋenŋa lëbǝđia. lënǝŋulu ltaŋa kaiñ, laber lǝnna ŋen ŋǝleđa laɽo nǝlǝŋ na laniđǝnu lero ŋeniano ŋame.

¹ orn aganǝŋa ɽwatiṯu leđa ŋen iŋi ŋaɽo đeṯam eđërrǝŋaiđia đǝŋen ŋǝđeṯam. ² ŋen đeṯam ṯa lǝṯwëɽi alape sǝndua, na alerṯe lǝberṯia ŋen ŋëbia, alṯuɽeini, na alonḏǝṯe iđonaṯa na iđubwiđia na eđwalarano. ³ na cum lwaɽǝṯu lǝpo ṯa altǝɽeṯe eŋen pređ eŋen na ṯa alerṯe labwaiđia ŋen, na ṯa alerṯe lǝbendǝni ŋuɽu, orn ṯa alɽeṯe leđa lǝbërrǝŋaiđia ŋen iŋi ŋaŋǝra, ⁴ ṯa lënǝŋulu alërrǝŋaici ñǝŋgenia ŋen ṯa aiñubwiṯi ebaŋgenala na ñereña, ⁵ na ṯa aiñaṯuɽeini, na aiñatǝɽeṯe, na aiñarǝmoṯe ŋǝmëɽria ŋeɽa, na aiñaŋǝreṯe, na aiñǝne ŋen ŋebaŋgenanda, ṯa leđa ɽrǝto alerṯe laɽǝwađaṯa lǝbaṯa ṯa ŋen ŋǝrǝmwa ŋeicia. ⁶ nṯia cum lwaɽǝṯu lëđǝmwa đwonḏǝṯađa ṯa alṯuɽeini. ⁷ eŋen pređ ërrǝŋeiđǝnu ṯa agëbǝđia ŋen pređ ŋaŋǝra. ndǝ ñagǝbërrǝŋaiđia ŋen iđu ṯia đatǝɽeđa na ŋenŋa ṯa leđa alǝŋëđǝñiṯi, ⁸ na ŋenŋa ŋope iŋi leđa laber laɽǝwađaṯa lađama ṯa eđa gageande aŋirǝwano ŋen ŋanṯa gaber gaɽǝwađaṯa gwalwaɽa ŋen ŋǝnǝŋ ŋeicia ŋageande. ⁹ lwaɽǝṯu lǝbai ṯa alǝne leđa ildi lǝliṯia ŋǝmëɽria, na ṯa aldǝŋǝre nano eŋen pred, na ṯa alerṯe lǝmǝlađia ŋenŋa, ¹⁰ na ṯa alerṯe laldǝbǝea orn ṯa alërrǝŋeiđǝni ṯa luđǝrwaṯo na latǝɽe eŋen pređ, nṯia ṯa alnaice ŋen ŋǝrǝmwa, irri raɽo đëbǝri iđëndr ŋaɽrwa eŋen pređ eŋen. ¹¹ ŋen ŋanṯa đanaicia mǝɽǝmǝɽeñ đǝrǝmwa đeṯo, iđi đǝmama đebǝrnia ŋen ŋanṯa leđa pređ, ¹² iđi đǝndërrǝŋaicia ŋen ṯa alǝŋgiṯr ŋen iŋi gerṯa ŋǝrǝmwa na đonaṯa đeicia đǝŋen ŋalo, ṯa alǝɽaŋr iliga ilđi đaṯuɽeiniađa na ŋenŋa ŋuđǝrwaṯo na eŋen ŋǝrǝmwa, ¹³ liga lǝguṯurṯiar ŋen ŋaɽnda iŋi ŋǝđǝbuŋṯia na fǝŋen iŋi đamiñaṯa đǝŋaɽrwa ŋǝrǝmwa irëndr roɽra irri raɽo đëbǝrnia iđëndr, al masiya yesu, ¹⁴ gënǝŋu igi ganaiđo etam gǝlëɽǝŋu ŋen ŋanṯa nëndr ṯa aŋǝndǝpǝɽr eŋen pređ ŋeicia, na ṯa aŋǝṯoɽaṯe leđa ŋen ŋanṯa ŋu, ildi alɽeṯe leđa ǝllëɽǝŋu đurri, ilđi lonaṯa kaiñ ŋen ŋaŋǝra. ¹⁵ ërrǝŋaieu leđa ŋen iŋi ŋekeɽǝđe ŋagagariñaṯe leđa ŋǝlǝŋŋa pređ. ŋerṯe agaŋgiṯia eđa gǝnǝŋ ṯa gaŋađama.

¹ lëlđǝŋǝđaieu leđa eŋen ṯa alnanaice nǝlǝŋ ntam enen na ṯa alǝne ŋen ŋǝleđa ildi lerṯo ŋǝlǝŋe iŋulu, ṯa lënǝŋulu alǝđuɽeini ṯa lëbǝđia ŋen pređ ŋaŋǝra, ² na ṯa alerṯe labwaiđia eđa gǝnǝŋ eŋen, na ṯa alerṯe lǝberṯia đǝgerđia orn ṯa alamǝđaṯe leđa, na ṯa alǝđǝrnaṯaralo eleđa pređ. ³ ŋen ŋanṯa bǝtaŋǝɽan lëlǝŋ cum lǝgafo lǝgaijǝba ŋen nǝsi, na lǝgafo lǝgero lǝgǝnna ŋen ŋǝleđa lerṯo ŋǝlǝŋe, na lǝgafo lǝgiđǝnu ŋađǝna, lǝgafo lǝgaɽo lǝbai lǝđonaṯa đeicia đaŋǝno na lǝŋen ŋalo ŋwaiña ŋǝɽwa, na lǝgafo eŋen ŋeicia na lǝgafo eđǝgiaṯa ŋen, na lǝgafo lǝganiđǝnu eleđa na lǝgǝleđa ildi laneđǝđo. ⁴ orn ndǝ ŋen ŋaŋǝra na đubwa leđala ɽrǝmwa, đëbǝrnia iđëlǝŋ lǝŋeinu, ⁵ rënǝŋu rëbǝrǝnde, gerṯa ŋen ŋanṯa ŋǝmëɽria ŋuđǝrwaṯo iŋi lǝgiđu, orn ŋen ŋanṯa ŋǝbaiya ŋǝlëɽǝŋu đwasađa đǝđǝlǝŋǝnia đǝmaijǝn na đǝđaṯoɽaṯa iđi đusila gatǝɽe, ⁶ na rënǝŋu ranaico usila gatǝɽe landa nano kaiñ yesuga al masiya igi gaɽo đëbǝria iđëlǝŋ, ⁷ ṯa lëlǝŋ alfeṯe rǝmwa nëiñua garno leđa luđǝrwaṯo eŋen, đǝnaiciađa đǝlëɽǝŋu mǝɽǝmǝɽeñ, na ṯa alarraṯe eđamǝṯia đǝbǝɽǝbǝte eŋen ŋǝđǝṯurṯia iŋëlǝŋ. ⁸ ŋen iŋi ŋaɽo đeṯam na igwonaṯa ṯa agwaɽwata ŋen iŋi đwonḏǝṯađa, ṯa leđa ildi lëndu ŋen ŋǝrǝmwa aɽrǝmoṯe ṯa lëbǝđia ŋen ŋaŋǝra. ŋen iŋi ŋaŋǝra na ŋamǝđaṯa leđa. ⁹ ŋgaṯialo eŋen ŋǝđeɽǝđia đǝpiano, na eŋen ŋǝđǝlǝŋǝđia na eđǝgerđe na iđukuɽǝbijǝđǝṯia eŋen ŋal ganun, ŋen ŋanṯa ŋen iŋi pređ ŋǝpiano, ŋero đaɽǝjaica. ¹⁰ ndǝ agagariñaṯa eđa ananoŋ na tǝŋ igi gëbǝđia đakarnǝđia na gënǝŋu gaber gǝnna mǝldin, orn neđǝma, ¹¹ ŋen ŋanṯa agiđi ŋaliŋeṯe đurri ṯa eđa igei gǝɽiano na gerṯo ŋen ŋeicia na ṯa gënǝŋu gaskinu bǝɽan. ¹² ndǝ igiđ endǝđweiṯi arṯimas na ṯikikus, inḏeicu ŋen kaiñ ṯa ŋaiñeṯa nano alo inikubulis, ŋen ŋanṯa igaṯuru eŋen ṯa igid eɽaŋe tu obǝđaiya. ¹³ naieo senas igi gǝbërrǝŋaiđu al ganun, na abullus đǝđwaṯa đaŋǝra, ṯa alerṯe lafo pwa ewaŋge gǝnǝŋ. ¹⁴ ŋen đeṯam eum ṯa leđa ildëlǝŋ alërrǝŋeini ṯa aliđi ŋen ŋaŋǝra, ṯa alerṯe laŋge pređ đeṯam na ṯa alerṯe lamǝṯia đarldia đero. ¹⁵ leđa pređ ildi ñagafǝlda leɽǝđǝŋa. ekeɽǝđo leđa pređ ildi lubwandiya iđonaṯa iyesu. igǝbeɽǝđia ṯa đǝbuŋṯia đusila ađǝndaufeṯe ñaŋ pređ.