filibi
11 fǝnanda bulus na ṯimǝđawus ñaŋgi ñagaɽo lǝbai lǝyesu masiya. ñageɽǝđo leđa pređ ɽrǝmwa igal masiya yesu ildi lafo alo ifilibi nǝlǝŋǝna nǝkanisa na leđala ildi larǝmoṯwa ŋen ŋǝlaŋge lǝkanisa. 2 ñagǝbeɽǝđia ṯa rǝmwa, papa igëndr, na elǝŋ yesu masiya alǝndǝnaiee đǝbuŋṯia đusila na đëuṯaralo. 3 igaŋërṯu rǝmwa nano rǝlëɽǝñijaiea jaiea ndǝ igǝlëldǝŋǝđeinia eŋen pređ eŋalo. 4 ñoman pređ ndǝ igǝbeɽǝđia rǝmwa ŋen ŋanṯa ñaŋ pređ, igabeɽǝđia đaŋǝrađa nano 5 ŋen ŋanṯa ñaŋ lǝgǝɽǝbǝđiar eŋen ŋaŋǝra ŋǝrǝmwa iliga lananoŋ na mǝldin điñǝđi. 6 igënǝñi igëɽǝni đǝñano eŋen iŋi, ṯa rǝmwa irri rabǝṯa nǝŋǝmëɽria ŋaŋǝra eñaŋ rënǝŋu riđ aɽiñǝđaṯe ŋǝmëɽria iŋi iloman lǝyesu masiya. 7 ŋen ŋope ṯa igandulëldǝŋǝđeinia ñaŋ pređ ṯia ŋen ŋanṯa igerṯǝnde egare gǝlëɽǝñi ndǝ igëndǝnu walla ndǝ igafo nǝsǝria ṯa elwaɽe ṯa ŋen ŋaŋǝra ŋǝrǝmwa ŋǝđeṯam, ŋen ŋanṯa ñaŋ pređ lǝgǝɽǝbǝđiar eŋen ŋǝđǝnaicia mǝɽǝmǝɽeñ đǝrǝmwa. 8 rǝmwa raɽo đamǝđaṯa đǝlëɽǝñi, fǝṯau igǝndonaṯa pređ kaiñ iđubwiđia đal masiya yesu. 9 na igǝbeɽǝđia rǝmwa ṯa đubwiđia eđalo ađoɽreṯe ađǝlëldë-đǝnialo, eđaliŋeṯa pređ na iđirnḏeieia pređ đuđǝrwaṯo, 10 ṯa ñaŋǝnṯi ŋen iŋi ŋame kaiñ, na ṯa ñatǝɽeṯe ṯa ñafeṯe ñagero đǝskinia iloman lal masiya, 11 na ṯa ñaɽeṯe ñagwunḏeinu ŋǝlwaŋa ŋǝŋen ŋuđǝrwaṯo iŋi ŋeṯo iyesu masiya, ṯa rǝmwa arǝnaneini ŋaɽrwa na đame. 12 orn lorldaiñ, igwonaṯa ñagaliŋeṯo ṯa ŋen iŋi ŋarǝmaṯiñi nano ŋaɽo đǝpurǝgwađaṯa nëiñua đǝŋen ŋaŋǝra ŋǝrǝmwa, 13 ṯa ŋen ŋǝlëɽǝñi ŋǝlǝŋinu igaskari pređ na eleđa lomǝn cum, ṯa igëndǝnu isijǝn ŋen ŋanṯa al masiya. 14 na lorǝba lwaiña lǝkanisa liđǝnu lëɽǝni đǝñano egelǝŋ yesu ŋen ŋanṯa igëndǝnu, na lonḏǝṯo ṯa alɽwate ŋen ŋǝrǝmwa ŋǝđaiña ŋerǝlo nano. 15 leđa lǝmaṯan lǝbërrǝŋaieia leđa ŋen ŋal masiya eđǝgiaiđia eŋen na eđǝgerđia. na lǝmaṯan eum eŋen ŋaŋǝra. 16 lënǝŋulu lǝnḏurṯu lëbǝđia ṯia iđubwiđia na lënǝŋulu laliŋeṯo ṯa igëɽǝnu ëli ŋen ŋanṯa đopǝṯa đǝŋen ŋaŋǝra ŋǝrǝmwa. 17 leđa lananoŋ lǝbërrǝŋaieia leđa ŋen ŋal masiya eđǝgerđia, gerṯa eŋen ŋuđǝrwaṯo, laṯa ṯa labakaɽǝjaica đǝcwara đǝlëɽǝñi ndǝ igëndǝnu isijǝn. 18 na wande igi? ŋen ŋëni ṯa erađ pređ, ndǝ gerṯa eŋen ŋǝđeṯam walla ndǝ eŋen ŋǝđeṯam, ŋen ŋal masiya ŋabërrǝŋeinia leđa, na eŋen iŋi igaŋǝra nano. 19 đeṯam, na igiđ eŋǝreṯe nano. ŋen ŋanṯa igaliŋeṯo ṯa ŋen iŋi ŋiđ aŋǝɽeṯe đëbǝrni iñi đaṯurṯiađa rǝmwa eđalo na đamǝđaṯađa đusila gǝyesu masiya. 20 ŋen ŋarno igëɽǝđiaŋǝno igǝṯurṯu ŋen kaiñ ṯa wagero gǝnǝŋ igiđ iwirǝwano, orn đonḏǝṯađa pređ, garno jaica, nṯia điñǝđi cum al masiya aŋoɽreṯe egaŋǝno ilëɽǝñi, ndǝ igamǝṯia walla igaiyo. 21 ŋen ŋanṯa iñi đamǝṯia đaɽ al masiya na ŋǝɽaiñ ŋamama đaɽǝjaica. 22 orn ndǝ igamǝṯia egaŋǝno đǝrldea điđ ađǝfeṯe đǝŋǝmëɽria ŋǝlëɽǝñi mǝldin. orn igaijǝba ŋen igǝbendia. 23 igǝđǝrneiđǝnu eŋen iŋi ŋiɽijan. igwonaṯa igabǝla na ñafeṯe al masiyaga, na ŋen iŋi ŋaŋǝra kaiñ ŋamiñaṯo lorǝba. 24 orn ndǝ igamǝṯia egaŋǝno mǝldin ŋen iŋi ŋaɽo deṯam ŋamiñaṯo lorǝba ŋen ŋanṯa ñaŋ. 25 na igafo igapurgwađeinu eŋen iŋi, nṯia igaliŋeṯo ṯa igiđi alfeṯr, na alɽaŋr ñaŋ pređ ŋen ŋanṯa đǝpurgwađaṯa nëiñua eđalo na đaŋǝra nano eđalo iđonaṯa, 26 ṯa đëminia eđalo ŋen ŋanṯañi ađǝlëldëđǝmalo igal masiya yesu ŋen ŋanṯa lǝgafr teŋ. 27 ŋgiṯr ŋen ŋǝđamǝṯia eđalo aŋǝrǝjađaṯe ŋen ŋanṯa ŋen ŋaŋǝra ŋal masiya, ṯa ndǝ igeṯo igwǝndondaṯa walla ndǝ igerǝnde nano igiđ ene ŋen eŋalo, ṯa ñonḏǝṯe igusila gunto, ñiđi ŋǝmëɽria kaiñ ldǝɽo ŋenŋa ŋunto, ŋen ŋanṯa đonaṯa eŋen ŋaŋǝra ŋǝrǝmwa, 28 na ṯa ñerṯe ñagiđǝña wagǝnǝŋ leđala ildi lageande. ŋen iŋi ŋaɽo đǝŋaicia iŋulu đǝđǝgirnia eđen, orn đǝđëbǝrni eđalo, na iđi irǝmwa. 29 ŋen ŋanṯa ŋen ŋaneinǝnde ŋen ŋanṯa al masiya gerṯa ṯa ñagabendia ŋen ikǝrǝŋ, orn eum ṯa ñananeini ŋen ŋubwa kaiñ ŋen ŋanṯaŋu. 30 ñagerṯo đǝbwaiñǝđia eŋen iđi ñagwondaṯǝñau, na iđi ñagǝnna igafau điñǝđi.
21 ŋen ŋanṯa đamǝṯia iđi lǝgerṯr igal masiya đamama ŋen iŋi ŋaɽatuđia nare, na đǝbëkëndia đǝđubwiđia na đǝɽǝbǝđia eŋen igusila gǝrǝmwa na đubwiđia na đǝŋgǝđeini ŋabaiya nano 2 unḏeinr đaŋǝra nano đǝlëɽǝñi, ŋen ŋanṯa ñafeṯe eŋen ŋunto, na ñerṯe đubwiđia đunto na ñafeṯe ñagakaseiđǝnu eŋen, na ñonaṯe ŋen ŋunto. 3 ñerṯe ñagëbǝđia ŋen ŋǝnǝŋ eŋen ŋǝŋaŋwar walla ŋǝđinia enare. orn eđǝta enare ŋgiṯr eđa gǝnǝŋ aŋiđi leđa lomǝn loɽra lamiñaṯama. 4 ñerṯe ñaŋgiṯi eđa gǝnǝŋ garǝmoṯwa laŋge ǝllëɽǝŋu, orn laŋge lǝleđa lomǝn eum. 5 ŋgiṯr ŋen iŋi aŋǝndaufeṯe, iŋi ñagerṯo igal masiya yesu, 6 igi gafo garno rǝmwa, orn gǝbaṯa ṯa đǝɽǝwaṯia rǝmwara gerṯa đafo đeṯam, 7 orn giđu etam gǝlëɽǝŋu garno wagero ŋeniano, nǝŋǝme ŋen ŋeđa gaɽ ebai, na gafo giđǝnu garno leđa. 8 na ndǝ gafiđǝnu garno eđa gaɽorra, nǝŋiđǝni đǝta egare nǝŋǝne rǝmwa nǝŋǝteṯe eŋen ŋǝŋǝɽaiñ, đeṯam ŋǝŋǝɽaiñ ŋǝđuɽi. 9 ŋen ŋafǝṯia rǝmwa cum ruɽrǝṯǝma kaiñ, na ranaicǝma irǝŋ gamiñaṯo ndrǝŋ nǝlorǝba pređ, 10 ṯa igirǝŋ gǝyesu ndria pređ nǝmukwuđiñǝṯialo nǝlaŋge lafo elo na alo na iđurṯu alo, 11 na ṯa eŋǝla pređ ṯaiyaṯa, đeṯam yesu masiya gaɽ elǝŋ ŋen ŋanṯa ŋaɽrwa ŋǝrǝmwa đaṯa. 12 ŋen ŋafǝṯia ñaŋ ñaŋgi igubwandiya, ŋen ŋarno ñagano jaica, gerṯa ndǝ igënǝñi lǝgafr ldǝɽo ikǝrǝŋ, orn cum ṯǝñano ŋen ŋwaiña ndǝ igero, nṯia cum iđr đëbǝrni eđalo ŋǝđaiñǝŋa na đǝgǝrđiađa đaŋǝno, 13 ŋen ŋanṯa fǝŋu rǝmwa irri rǝndiđiau ŋǝmëɽria ṯa ñameṯǝđǝño na ñiđi đonaṯa đaŋǝra đǝlëɽǝŋu. 14 iđr ŋen pređ đǝđama ŋeniano đero, na đǝgerđe đero. 15 ṯa ñafeṯe đǝskinia đero, na mǝnna gero, na ṯa ñaɽeṯe ñere ñǝrǝmwa đǝtaŋa đero, eleđa iligano lǝliga ildi lǝɽiano eŋen na leieia, ildi ñagafǝlau ñagarno arrerre gafo alo, 16 na ṯa ñëkëndi ŋen ŋǝđamǝṯia, ŋen ŋanṯa igënǝñi yëmini iloman lal masiya ṯa igero igobǝđo mǝɽǝmǝɽeñ walla igiđu ŋǝmëɽria mǝɽǝmǝɽeñ. 17 orn ndǝ cum igareinu garno ŋela nḏǝmǝɽeinia iđi đaɽo đǝnaieia đǝđonaṯa eđalo igaŋǝra nano na lǝgaŋǝrar nano. 18 nṯia eum ñaŋ ŋǝreṯr nano na alaŋǝreṯr nano. 19 orn igaṯurṯia ŋen egelǝŋ yesu ṯa orn yiđ endǝđweiṯi ṯimǝđawus ṯa cum yonḏeicini egare ndǝ igǝno ŋen eŋalo. 20 igero igaberṯia eđa gǝnǝŋ garnǝŋu, igi giđ aŋǝrǝmoṯe ŋen eŋalo đeṯam. 21 ŋen ŋanṯa pređ ṯaɽrǝmoṯo ŋen eŋen, gerṯa ŋen ŋal masiya yesu. 22 orn ñagaliŋeṯo đeṯam ŋen ŋǝṯimǝđawus ṯa ŋen ŋarno ŋere eṯenga gënǝŋu ñagiđǝldǝga ŋǝmëɽria ŋǝŋen ŋaŋǝra ŋǝrǝmwa. 23 ŋen ŋafǝṯia igǝṯurṯia ŋen ṯa orn yiđ endǝmađweiṯi taltal, ndǝ igǝfo igaliŋeṯo ŋen ŋǝlëɽǝñi. 24 orn igabendia ŋen egelǝŋ rǝmwa ṯa igënǝñi cum orn endeṯa nano. 25 orn igaṯa ŋen ŋafo đeṯam ṯa endǝđweiṯi oraiñ abafruḏiṯus, gënǝŋu igi ñagëbǝđia ldǝga ŋǝmëɽria, fǝŋu igi ñagaɽǝldǝga askari, orn đǝđweinia eđalo na igi giđu ŋcn ŋǝđeṯam iñi. 26 gënǝŋu gafo gǝndonaṯa kaiñ na gagǝrđo egare ŋen ŋanṯa ñagano ṯa gënǝŋu gafo gwuma. 27 na đeṯam gënǝŋu gafo gwuma kaiñ, gafo ŋǝɽaiñ ṯwaiñ. orn rǝmwa ragiaṯǝma ŋǝbaiya nano, na gerṯa gënǝŋu ikǝrǝŋ orn igënǝñi cum, ṯa yerṯe igaberṯia đwanano đwomǝn tǝŋ. 28 ŋen ŋafǝṯia igëɽǝđiaŋǝno kaiñ ṯa endǝmađweiṯi ṯa ndǝ ñagamaseicia ñaŋǝreṯe nano na ṯa đagǝrđia đǝlëɽǝñi ađǝteṯe aten. 29 ŋen ŋafǝṯia aŋǝnṯǝmar egelǝŋ rǝmwa đaŋǝrađa nano pređ. na ëndr eđa garnǝŋu eđame 30 ŋen ŋanṯa gënǝŋu gafo ŋǝɽaiñ ṯwaiñ ŋen ŋanṯa ŋǝmëɽria ŋal masiya, nǝŋënṯi eŋǝɽaiñ ṯa aŋunḏǝjaice ŋǝmëɽria eŋalo ŋen ŋanṯañi iŋi ŋafo pwa.
31 na cum lorldaiñ, ŋǝreṯr nano egelǝŋ yesu. igero igaicwaro ndǝ igǝndǝwawërđǝṯi ŋen iŋi, na ŋen iŋi ŋǝndamǝđaṯa ṯa ñafeṯe ŋope. 2 rǝmojǝđr iñina. rǝmojǝđr eleđa ildi lëbǝđia ŋen ŋeieia, rǝmojǝđr eleđa ildi lwanḏa aŋǝno. 3 ŋen ŋanṯa nëndr lǝgǝđuɽǝđǝniar đǝđeṯam, lëŋgr lǝgǝbuŋṯiar rǝmwa usilaga gǝlëɽǝŋu, na lǝgëminiar igal masiya yesu, na lǝgerr lǝgǝbëɽǝniar đǝñano egaŋǝno. 4 orn igaɽǝwađaṯa igǝbëɽǝni đǝñano egaŋǝno. ndǝ eđa gǝnǝŋ gǝbaṯa ṯa gaɽǝwađaṯa gǝbëɽǝni đǝñano egaŋǝno, igamiñaṯǝma. 5 iguɽǝđǝnu ndǝ igǝɽiñađaṯo ñoman đenǝŋ ñǝmiño ñǝɽijin, igǝleđa lisrayil, igǝleđa lǝbenyamin, igaɽ abrani gal abraniyin. eŋen ŋal ganun igaɽo farisi. 6 eŋen ŋǝŋǝmëɽria ŋwonḏǝṯo, igananaico kanisa ŋen ŋubwa kaiñ, eŋen ŋuđǝrwaṯo ŋal ganun igafo đǝskinia đero. 7 orn laŋge ildi laɽo đǝɽǝjaica iñi igaṯa laŋge ildi laɽo đuṯia ŋen ŋanṯa al masiya. 8 a, đeṯam, igaṯa laŋge pređ laɽo đuṯia ŋen ŋanṯa đaŋǝra kaiñ đǝđaliŋeṯa đal masiya yesu elǝŋ gǝlëɽǝñi iđi đamiñaṯa lorǝba pređ. ŋen ŋanṯa ŋu igwaṯe laŋge pređ na igaṯa laɽo đoɽǝđoɽa, ṯa yerṯe al masiya, 9 na ṯa ifiđǝni iŋu gerṯa đuđǝrwaṯađa eŋen đǝlëɽǝñi iđi đaɽaŋa eŋen ŋal ganun, orn đuđǝrwaṯađa eŋen iđi đafo iđonaṯa đal masiya, ŋen ŋuđǝrwaṯo ŋǝđeṯam ŋǝrǝmwa iŋi ŋeṯo iŋu na ŋafo iđonaṯa. 10 a, igwonaṯa kaiñ ṯa eliŋeṯe al masiya, na ŋabǝɽa ŋǝđǝtođa đǝlëɽǝŋu na đǝɽǝbǝđia eŋen ŋubwa ganeinu, na ṯa imalëđǝni jaiea ŋǝɽaiñǝŋa ŋǝlëɽǝŋu, 11 ṯa ndǝ igaɽǝwađaṯa igiđ irǝmaṯe eđatođa đǝŋǝɽaiñ. 12 điñǝđi igamǝlu igarǝmaṯo eŋen iŋi na igamǝlu igǝɽiñǝđeinu, orn igalëldǝña iđurṯu ṯa eum yëndi ŋen ŋanṯa al masiya yesu gëndǝñi ŋen ŋanṯa ŋen iŋi. 13 lorldaiñ, igënǝñi igero igǝbaṯa, igëndu đǝge, orn igëbǝđia ŋen ŋunto. igaijǝbeinu eŋen iŋi ŋananoŋ, na igwonaṯa igabǝrđǝni ŋen ŋanṯa ŋen iŋi ŋafo ñi nëiñua. 14 igalaldǝñaṯa alo iđǝđurwa, ŋen ŋanṯa đǝpǝɽa iđi đaɽo đundǝđia elo đǝrǝmwa al masiya yesuga. 15 ñan ñaŋgi lǝgoɽrar eŋen, alǝŋgiṯr alerṯr ŋen ṯia, na ndǝ eŋen ŋǝnǝŋ ñagerṯo ŋen ŋarto tǝŋ, rǝmwa cum riđ arǝndǝŋaici ŋen iŋi. 16 illi alǝŋgiṯr aɽr eŋen iŋi nëndr lǝgarǝmaṯǝrau na aɽrǝmoṯr ŋen iŋi. 17 lorldaiñ, irnḏeicǝñr ñaŋ ldǝɽo na rǝmoṯr leđa ildi lǝbǝrlda eŋen ŋarno nanda ñagaŋaicǝnde. 18 ŋen ŋanṯa leđa lëni lwaiña, il i igwaɽwatǝṯiandǝlau, na điñǝđi igǝndǝlwaɽǝṯǝlau ŋwalŋa, ildi lafo larno leđa lagea đuɽi đal masiya. 19 na alo esen iđǝđurwa yënǝŋu đǝgera, na nare enen naɽo rǝmwa eren, na lënǝŋulu lëminia iđirǝwano eđen na ŋaṯǝɽa eŋen ŋasa laŋge lalo. 20 ŋǝlǝŋe iŋëndr ŋafo elo na lǝgǝṯurṯiarau đëbǝrni iđëndr, fǝŋu elǝŋ yesu masiya. 21 gënǝŋu giđ aŋǝmǝlëđi aŋǝno isëndr isi yǝta eŋen ṯa aiyarneṯe aŋǝno ilëɽǝŋu isi yerṯo ŋaɽrwa, ŋabǝɽaŋa ŋǝlëɽǝŋu iŋi gënǝŋu goɽǝwađaṯia gǝbëɽia laŋge pređ eŋǝlǝŋe ŋǝlëɽǝŋu.
41 ŋen ŋafǝṯia lorldaiñ, ñaŋgi igubwandiya, ñaŋgi igǝndonaṯa kaiñ, ñaŋgi ñagaɽo đaŋǝra nano đǝlëɽǝñi na ṯaj ilëɽǝñi, ɽaŋr ñagwonḏǝṯo egelǝŋ yesu, ñaŋgi igubwandiya. 2 igǝbeɽǝđia ufuḏia na igǝbeɽǝđia sinṯiki ṯa ñaɽaŋe eŋen ŋunto egelǝŋ yesu. 3 na igaŋeɽǝđia ŋaŋgi đeṯam lǝgëndǝnu eŋǝmëɽria ṯa ŋamǝđaṯe liji ildi, ildi ñagiđǝlda ŋǝmëɽria klimuḏusga eum eŋen ŋaŋǝra ŋǝrǝmwa, na leđa lǝṯënu ildi ñagiđǝlda ŋǝmëɽria, ildi ndrǝŋ enen nǝwërđǝnu egađam gǝđamǝṯia. 4 ŋaŋǝreṯr nano egelǝŋ yesu na igwalwaɽo tǝŋ ŋaŋǝreṯr nano. 5 ŋgiṯr leđa pređ alliŋeṯe đaɽiñaṯa ŋen eđalo. elǝŋ yesu gafo ṯwaiñ. 6 ñerṯe ñaŋgiṯi ṯa đu đǝndǝsano eŋen ŋǝnǝŋ. orn eŋen pređ đǝṯurṯiađa na đeɽǝđiađa, ŋgiṯr đeɽǝđia eđalo ađǝlǝŋini irǝmwa, ñamaŋërṯi nano. 7 na đëuṯaralo đǝrǝmwa iđi đoɽra đamiñaṯa đaliŋeṯa đǝleđa điđ ađǝrǝmoṯe nare enalo na đǝlëldǝŋǝđeinia eđalo, igal masiya yesu. 8 điñǝđi lorldaiñ, lëldǝŋǝđemr eŋen pređ iŋi ŋǝđeṯam na iŋi ŋǝđamia na iŋi ŋuđǝrwaṯo na iŋi ŋatǝɽe na iŋi ŋubwǝniya na iŋi ŋaŋǝra, a, ŋen pređ iŋi ŋaŋǝra kaiñ na ŋerṯo đamia. 9 iđr jaica ŋen iŋi ñagërrǝŋeinu iñi, na iŋi ñagëndu iñi, na iŋi ñaganaṯǝñi, na iŋi ñagaseica iñi, na rǝmwa rǝđëuṯaralo riđi ñaldǝfeṯǝlda. 10 igaŋǝra nano kaiñ egelǝŋ yesu ŋen ŋanṯa điñǝđi ndǝ liga laŋgaṯo lwalano đubwa eđalo ŋen ŋanṯa ñi đatwođo tǝŋ. đeṯam ñagubwaiñiya jaiea jaiea orn ñagafo ñagero ñagaberṯa liga. 11 igero igwalwaɽa ŋen ŋanṯa igaɽo ŋǝbaiyaŋǝno ŋen ŋanṯa igërrǝŋeinu ṯa eŋen ŋǝnǝŋ iŋi igafau, igaŋǝrṯi nano. 12 na igaliŋeṯo ṯau ṯa igamǝṯia laŋgela lǝta na igaliŋeṯo ṯau ṯa igamǝṯia laŋgela lwaiña. eŋen pređ igërrǝŋeinu ŋamǝɽa ṯa igabeṯo walla igaicoiña, na ṯa igafo laŋgela lwaiña walla laŋgela lero. 13 igaɽǝwađaṯa igëbǝđia ŋen pređ al masiyaga igi gaiñonḏǝjaiea. 14 orn ñagiđu ŋen ŋaŋǝra ṯa lǝgǝɽǝbǝđiar eŋen ŋubwa ŋǝlëɽǝñi. 15 na eum ñaŋ ñagalo ifilibi ñagaliŋeṯo ṯa ananoŋ ndǝ ŋen ŋaŋǝra ŋǝrǝmwa ŋërrǝŋeinu eñaŋ, ndǝ igamiño alo imakṯuma, kanisa đero ñagǝɽǝbǝđo eŋen ŋǝđǝnaicia na ŋǝđǝneini illi kanisa eđalo. 16 na ŋen igafo alo iṯasǝluniki ñagwađwaṯo đǝnaicia ñoman ñǝnenǝŋ ŋen ŋanṯa đonaṯa đǝlëɽǝñi. 17 gerṯa đǝnaicia eđalo ṯa igwonaṯa orn igwonaṯa ṯa đaɽǝjaiea eđalo ađoɽreṯe. 18 orn igamo laŋge pređ lǝɽiñǝđeinu đǝge na lomǝn tǝŋ. igwunḏeinu ŋen ŋanṯa abafruḏiṯus ganaiciñi laŋge ildi ñagwađwaṯǝlo, ildi larno đǝmwađa gaiñǝla, na larno đǝɽǝđǝnia iđi rǝmwa raŋǝnṯu na iđi raŋǝrau nano. 19 rǝmwa rǝlëɽǝñi riđ aronḏǝjaice kaiñ laŋge lǝđeṯam eñaŋ eđwala đǝlëɽǝŋu eŋaɽrwa al masiya yesuga. 20 igǝbeɽǝđia ṯa rǝmwa irëndr, đaṯa, arǝnaneini ŋaɽrwa bǝɽǝbǝte. amin. 21 eɽǝđr leđa pređ ɽrǝmwa igal masiya yesu. lorldaiñ ildi ñagaɽaŋalda leɽǝđǝnde. 22 leđa pređ ɽrǝmwa leɽǝđǝnde, na cum lënǝŋulu ildi legeɽa gelǝŋ gaisar. 23 igǝbeɽǝđia ṯa đǝbuŋṯia đelǝŋ yesu masiya alfeṯe usilaga egalo.