filimun
11 fiñi bulus, ñiŋgi igëndǝnu ŋen ŋanṯa al masiya yesu, na oraiñ ṯimǝđawus. ñageɽǝđo filimun igi lǝgëbǝđiarlda ŋǝmëɽria na igi ñagubwamaiya, 2 na ñageɽǝđo oraiñ gaɽǝbwa abfiya igi ñagubwamaiya na arkibbus igi lǝgǝldǝbwaiñǝđiarlda eŋen ŋǝrǝmwa na ñageɽǝđo kanisa iđi đararraiđia egeɽa gǝlaɽǝŋa. 3 ñagǝbeɽǝđia ṯa papa rǝmwa irëndr, na elǝŋ yesu masiya alǝndǝnaice đǝbuŋṯia đusila na đëuṯaralo. 4 igaŋërṯu rǝmwa nano rǝlëɽǝñi jaica jaica, ñoman pređ ŋen igaṯurṯia ndǝ igaŋaulëldǝŋǝđeinia, 5 ŋen ŋanṯa iganana ŋen ŋǝđubwa na ŋǝđonaṯa ǝllaɽǝŋa ildi agerṯǝlo egelǝŋ yesu na eleđa pređ ɽrǝmwa. 6 na igǝbekeɽǝđia rǝmwa ṯa leđa alliŋeṯe ŋen pređ ŋaŋǝra lǝgerṯr igal masiya ŋen ŋanṯa lǝɽǝbǝđia eŋen ŋǝđonaṯa đǝlaɽǝŋa. 7 đeṯam đubwa đǝlaɽǝŋa đǝnanaieǝñi đaŋǝra nano na đwonḏeicia ŋen ŋanṯa aganǝŋa, oraiñ, agatuđu nare nǝleđa ɽrǝmwa. 8 igaɽǝwađaṯa igal masiya igaŋwalwaɽǝṯia ṯa đeṯam agëbǝđia ŋen iŋi ŋafo ŋope, 9 orn ŋen ŋanṯa đubwiđia ađǝfeṯe ŋope, igwonaṯa igaŋeɽǝđia. fiñi bulus ñiŋgi igwǝđweinu na điñǝđi eum igëndǝnu ŋen ŋanṯa al masiya yesu. 10 igaŋeɽǝđia eŋen ŋiđia gǝlëɽǝñi unisimus igi igafo igaɽo eṯen ŋen igëndǝnu isijǝn. 11 ananoŋ gënǝŋu gero gǝberṯia ŋen ŋǝnǝŋ eŋa, orn điñǝđi gerṯo ŋen ŋwaiña eŋa na iñi eum. 12 igaŋamuɽǝbiṯi. đeṯam igwađwaṯa ara gǝlëɽǝñi. 13 igaṯa egare ṯa ŋen ŋaŋǝra ndǝ igamǝndeieia ëli ñaldǝgǝfeṯe ṯa gënǝŋu aŋǝñiṯi ŋǝmëɽria ŋen ŋanṯaŋa ŋen igëndǝnu isijǝn ŋen ŋanṯa ŋen ŋaŋǝra ŋǝrǝmwa. 14 orn igero igaɽǝwađaṯa igëbǝđia ṯia, illi nd agaŋǝnṯu ŋen iŋi, ṯa ŋen ŋǝlaɽǝŋa ŋaŋǝra iñi aŋerṯe ŋatođa ŋen ŋanṯa igaṯa ŋen ŋǝđeṯam, orn ŋen ŋanṯa agwonaṯa agëbǝđia ṯia. 15 aŋgaica fǝŋen iŋi ñagafo ɽeteo iliga lobǝlano ṯa gënǝŋu aŋuɽǝbiṯi ñaldǝgǝfeṯe bǝɽǝbǝte. 16 gerṯa gaɽ ebai mǝldin, orn gaɽo ŋen ŋamiñaṯo ebai. điñǝđi gënǝŋu gaɽ oraiñ gubwaniya kaiñ orn gaɽ oralo ŋen ŋamiñaṯo gaɽ oraiñ ŋen ŋanṯa gënǝŋu gaɽ oralo egaŋǝno na egelǝŋ yesu cum. 17 ŋen ŋafǝṯia ndǝ agǝbaṯa ṯa lǝgǝfia eŋen, aŋǝnṯǝma ŋen ŋarno agaiñaŋǝnṯi. 18 ndǝ gënǝŋu giṯiaŋa ŋen ŋǝnǝŋ ŋeicia walla ndǝ gënǝŋu ñagerṯǝldǝga amǝcu, eɽu ŋen iŋi ŋǝgiaiñi. 19 igënǝñi bulus igǝwërdia ṯia đaŋđa đǝlëɽǝñi ṯa igiđi eŋanaiee ŋen iŋi pređ. igaber igwalwaɽa eŋen ŋamǝcu agerṯo iñi, fǝŋu đamǝṯia đǝlaɽǝŋa. 20 đeṯam, oraiñ, igwonaṯa ṯa agaiñamǝđaṯa egelǝŋ yesu, onḏeico ara gǝlëɽǝñi igal masiya. 21 igëɽǝni đǝñano ŋen igaŋǝwërđǝṯia ṯa agiđi ŋiđi ŋen igwonaṯa, na igaliŋeṯo ṯa agiđi ŋiđi ŋen ŋwaiña ŋamiñaṯo ŋen igaŋeɽǝđia 22 na ṯoɽaṯo alo ŋen ŋanṯa ñi cum, ŋen ŋanṯa igaɽaŋa ṯia ṯa igiđi eɽǝwađaṯe eŋeṯa nano ŋen ŋanṯa agǝbekeɽǝđia rǝmwa ṯia kaiñ. 23 abafras igi nanda ñagëndǝnǝldǝga eŋen ŋal masiya yesu, gënǝŋu geɽǝđiaŋa. 24 na margus, na arisṯarkus, na ḏimas, na luga, ildi ñagëbǝđialda ŋǝmëɽria leɽǝđiaŋa eum. 25 igǝbeɽǝđia ṯa đǝbuŋṯia đelǝŋ yesu masiya alfeṯe usilaga egalo.