yagub
11 fiñi yagub, ñiŋgi igaɽ ebai gǝrǝmwa na gelǝŋ yesu masiya, igeɽǝđo leđa lǝŋǝɽwa ređ ldamiñe liɽijan ildi lǝlaldǝđǝnu alo pređ. 2 lorldaiñ, ndǝ ñagǝbirnḏeinia eŋen ɽetǝɽeteo, aṯar ṯa ñagerṯo liga ṯa ñaŋǝreṯe nano, 3 ŋen ŋanṯa ñagaliŋeṯo ṯa đirnḏeicia đǝđonaṯa eđalo đatuđia đwonḏǝṯa. 4 orn ŋgiṯr đwonḏǝṯa ađǝɽiñǝđaṯe ŋǝmëɽria ŋǝlëɽǝŋu pređ ṯa ñaŋ ñǝɽiñǝđeini, ñerṯe ñagafo pwa eŋen ŋǝnǝŋ. 5 ndǝ eđa gǝnǝŋ eñaŋ gaijǝba ŋen nǝsi ŋgiṯǝmar aŋeɽǝđe rǝmwa irri raliŋeṯa đǝño ndrǝnanaice leđa pređ laŋge ndrerṯe rǝlnaicia ŋen ŋeicia, na gënǝŋu giđ aŋǝneini đaliŋeṯa ŋen nǝsi. 6 orn ŋgiṯǝmar aŋeɽǝđe rǝmwa đonaṯađa araga aŋerṯe gǝɽǝbǝđia nara, ŋen ŋanṯa eđa gǝbeɽǝđia rǝmwa na gǝɽǝbǝđo nara, gënǝŋu garno ŋawa đabera đǝpwa igal bar ṯaŋakaborṯo elo. 7 ñerṯe ñaŋgiṯi eđa gakǝl aŋaṯa ṯa elǝŋ rǝmwa riđ arǝmanaice waŋge gǝnǝŋ. 8 gënǝŋu gerṯo nara niɽijan ṯaŋǝtësǝnu eŋen pređ ŋǝlëɽǝŋu. 9 ŋgiṯr eđa gǝkanisa igi gëbia eŋen aŋareṯe nano ŋen ŋanṯa giđǝnu goɽra, 10 na ŋgiṯr eđa gwaiña đwala aŋareṯe nano ŋen ŋanṯa giđǝnu gǝta, ŋen ŋanṯa leđa ildi lwaiña đwala liđ alǝmǝndëđǝni ŋen ŋarno ŋǝđobǝra ŋǝŋaiña. 11 ŋen ŋanṯa ëđǝñina yatođa yubwa nimuđi ŋaiña aŋǝno na ŋǝđobǝra ŋǝlëɽǝŋu ṯaŋiɽǝwǝṯalo, na ŋaiyo ŋǝlëɽǝŋu ŋiđ aŋǝmǝndëđǝni. nṯia eum eđa igi gwaiña đwala giđ aŋaiyǝṯe liga gëninia eŋen ŋǝlëɽǝŋu. 12 eđa gaŋǝra nano đeṯam igi gaɽiñaṯo iđirnḏeicia đwonḏǝṯađa ŋen ŋanṯa ndǝ gënǝŋu gikirnḏeinu giđ aŋǝme ṯaj iđamǝṯia isi rǝmwa raṯa ṯa riđ arǝnaice leđa ildi lubwaiya. 13 ndǝ eđa girnḏeinu ñerṯe ñamaŋgiṯi gǝbaṯa, rǝmwa raiñinḏeicia. rǝmwa raber raɽǝwađaṯa rirnḏeini eŋen ŋeicia, na rënǝŋu raber rǝbirnḏeicia eđa gǝnǝŋ. 14 orn eđa ginḏeinu eŋen ŋeicia ndǝ đonaṯa đeicia đara gǝlëɽǝŋu đamabǝleđa, nḏǝmabǝrldiđinia nano. 15 orn đonaṯa đǝŋen ŋeicia ndǝ đonḏaico đalǝŋa ŋen ŋeicia đǝge, na ŋen ŋeicia ndǝ ŋoɽra đǝge ŋama ŋǝɽaiñ. 16 ñerṯe ñagǝbǝđǝni ŋađǝna, lorldaiñ ñaŋgi igubwandiya. 17 đǝnaieia đame pređ na đǝnaicia pređ đǝɽiñǝđeinu đeṯo elo, đeṯo đaṯa nano garrerre igi gaɽo gunto jaica, na gafo eŋen ŋunto jaica, na ŋen ŋero ŋǝnǝŋ ŋaɽǝwađaṯa ŋamiđia garto tǝŋ. 18 eŋen ŋǝđonaṯa đǝlëɽǝŋu rënǝŋu ralǝŋǝndr ŋenŋa ŋǝđeṯam ṯa alɽeṯe garno ŋǝlwa ŋananoŋ elaŋge pređ riđǝlo. 19 lorldaiñ ñaŋgi igubwandiya, llǝŋeṯr ŋen iŋi. ŋgiṯr leđa pređ algirǝđǝṯe ole alne, na alerṯe laɽwatađaṯa nëiñua, na alerṯe đǝjeiciano taltal, 20 ŋen ŋanṯa đeieiano đǝleđa đaber đaɽǝwađaṯa đëbǝđia ŋen ŋuđǝrwaṯo iŋi rǝmwa ronaṯa. 21 ŋen ŋafǝṯia ŋgeicr ŋen ŋǝtaŋa pređ, na ŋen ŋǝnǝŋ ŋǝṯënu ŋeieia enare na aŋǝnṯr ŋen iŋi ŋandǝwëwëđiniau đǝđǝrnaṯađa aralo iŋi ŋaɽǝwađaṯa ŋëbǝria nusila enalo. 22 orn ɽeṯr leđa ildi lëbǝđia ŋen, gerṯa leđa ildi lǝnna ikǝrǝŋ ildi lǝbǝđǝni ŋađǝna bǝɽan. 23 ŋen ŋanṯa ndǝ eđa gǝnna ŋen na gaber gëbǝđia gënǝŋu garno eđa gǝsǝđeinu igalmandǝra, 24 gënǝŋu gondaṯa aŋǝno ilëɽǝŋu nǝgabǝla na nǝŋaijǝbeini eŋen taltal ṯa gaɽo ṯau. 25 orn eđa igi gaseiđu igal ganun yǝɽiñǝđeinu yǝđëbǝri, ṯaŋǝseicu, gënǝŋu gerṯa gaɽ eđa igi gǝnna orn nǝŋaijǝbeini eŋen orn gaɽ eđa igi gëbǝđia. gënǝŋu giđ aŋǝbuŋǝnṯi iđiđia đǝlëɽǝŋu. 26 ndǝ eđa gabaṯa ṯa gateṯa rǝmwa na gaber gǝbenđia đaŋǝla đǝlëɽǝŋu orn gǝbǝđǝni ŋađǝna bǝɽan, ŋen ŋǝlëɽǝŋu ŋǝpiano. 27 fǝŋen iŋi ŋatǝɽe na ŋuđǝrwaṯo đaṯa rǝmwa nëiñua, ṯa eđa aŋǝrǝmoṯe ñere iñi ñero lǝŋgenanda na eṯenanda, na liji ɽrlda ildi lǝṯëđǝnialo ebaŋgenanda laiyo eŋen eŋen ŋabɽwaŋǝno na ṯa gënǝŋu aŋǝrǝmujǝni gatǝɽe eŋen ŋalo.
21 lorldaiñ, ŋen ŋanṯa ñagëndu ŋen ŋelǝŋ igëndr yesu masiya igi gerṯo ŋaɽrwa, ñerṯe ñagwoṯa leđa egworǝb. 2 ndǝ eđa gënṯǝndau ñagarraiđo, igi gerṯo al kaṯim ldornan yǝḏaǝb, nǝŋëɽǝni ndrena nano naŋǝra, na eđa gënṯu igi gaɽ ebai cum geicia ndrena 3 na ñagaseicia eđa gerṯo ndrena naŋǝra nǝñamǝlwaɽǝṯi ṯa, elaŋ ŋaɽaŋalo ëli ŋope, orn ñalwaɽǝṯi eđa gaɽ ebai ṯa, đǝru tu walla ɽaŋǝñi erǝmanǝŋ, 4 gerṯa ñagëndu eđa egworǝb na gerṯa ñagǝrnërnu leđa ildi lǝbirnḏeieia ŋen ildi leicia ŋaṯǝɽa ? 5 nǝr lorldaiñ, ñaŋgi igubwandiya, gerṯa rǝmwa roṯo leđa ildi laɽo lǝbai alo ṯa alerṯe đonaṯa đwaiña na ṯa aɽrraṯe eŋǝlǝŋe iŋi rǝmwa rëɽǝṯǝlo ildi lubwaiya ? 6 orn ñaŋ ñagirǝwu eđa ano gaɽ ebai. gerṯa leđa ilđi lwaiña đwala lǝndiṯia ŋen ŋwaiña ? gerṯa fǝŋulu ildi lǝndǝbǝrldeđeṯa nǝsǝria? 7 gerṯa fǝŋulu ildi laɽwata irǝŋ geicia igi gaŋǝra igi ñagënǝjǝniau? 8 ndǝ ñagarǝmoṯwa al ganun yǝrǝmwa đeṯam isi yǝwërđǝnu egađam gǝrǝmwa ṯa, bwiṯu eđaga gaɽ ëuwǝr gǝlaɽǝŋa garno agubwa etamga gǝlaɽǝŋa, agëbǝđia ŋope, 9 orn nđǝ ñagwoṯo leđa egworǝb ñagëbǝđia ŋen ŋeicia na al ganun yǝndakarme ndǝ leđa lagera ŋen. 10 ŋen ŋanṯa eđa gëbǝđia al ganun pređ orn gagera ŋen ŋunto giđ aŋakarmǝni eŋen pređ. 11 ŋen ŋanṯa rënǝŋu irri raṯa, ŋerṯe agaɽaŋa wujiga garto, rënǝŋu raṯa cum, ŋerṯe agaɽiñǝđia. ndǝ agero agaɽaŋa wujiga garto orn agaɽiñǝđo agaɽ eđa igi gagero al ganun. 12 ɽwatr na iđǝr ŋen garno leđa ildi liđ alirnḏeini igal ganun yǝđëbǝri. 13 ŋen ŋanṯa đakǝme đero ŋabaiya ano egeđa igi gero ŋabaiya ano eleđa, orn ŋabaiyaŋǝno ŋađama đakǝme. 14 lorldaiñ, ndǝ eđa gǝbaṯa ṯa gerṯo đonaṯa na gaber gëbǝđia ŋen ŋǝnǝŋ orn ŋen ŋamamađaṯa ṯau? đonaṯa đǝlëɽǝŋu đaɽǝwađaṯa đamëbǝri? 15 ndǝ eđa gǝnǝŋ gǝkanisa, gaɽorra walla gaɽǝbwa, gero ndrena na gero gaberṯia aieǝba lomanaŋ, 16 na eđa gǝnǝŋ eñaŋ gamǝlwaɽǝṯia ṯa, mbu iđëuṯaralo, ŋubwiṯano na ŋabeṯe, orn gero gamanaieia laŋge ilđi gǝlonaṯa ŋen ŋǝmamǝđaṯa ṯau? 17 nṯia đonaṯa đaiyo ndǝ đafo alǝsoŋ đero ŋǝmëɽria. 18 orn eđa gǝnǝŋ giđ aŋǝlwaɽe ṯa, agerṯo đonaṯa na igerṯo ŋǝmëɽria. ŋaicǝñi đonaṯa đǝlaɽǝŋa đero ŋǝmëɽria, na igiđ eŋaŋaice đonaṯa đǝlëɽǝñi ŋǝmëɽriaŋa ŋǝlëɽǝñi. 19 agëndu ŋen ṯa rǝmwa raɽo runto? agiđu ŋope. nusila neieia nëndu ŋen ṯia cum ṯanǝgǝđiaŋǝno. 20 aganǝŋa agero nđa, agaijǝba ṯa đonaṯa đero ŋǝmëɽria đaɽo ltam? 21 gerṯa papa igëndr ibrayim gërrǝŋeiđǝnu ṯa guđǝrwaṯo eŋen ŋenŋa gënǝŋu giđu ndǝ ganaiđo isag, iđia gǝlëɽǝŋu nađuna? 22 ñagaseicia ṯa đonaṯa điđu ŋen ŋǝmëɽriaŋa ŋǝlëɽǝŋu na đonaṯa điđǝnu đǝɽiñađeinu ŋǝmëɽriaŋa. 23 na ŋen ŋaɽiñǝđeinu iŋi ŋǝwërđǝnu egađam gǝrǝmwa iŋi ŋalwaɽo ṯa, ibrayim gëndu ŋen ŋǝrǝmwa na ŋen iŋi ŋëɽǝnu ŋaɽo đuđǝrwaṯa eŋen rǝmwa nëiñua ŋen ŋanṯaŋu, nǝŋënǝjǝni đappa đǝrǝmwa. 24 orn ñagaseicia ŋen ṯa eđa gërrǝŋeiđǝnu ṯa guđǝrwaṯo eŋen ŋǝmëɽriaŋa na gerṯa đonaṯađa đunto. 25 nṯia cum gerṯa rayab, wuji igi gaɽ alaiñ, gërrǝŋeiđǝnu ṯa guđǝrwaṯo eŋen rǝmwa nëiñua ŋǝmëɽriaŋa ndǝ gaŋǝnṯu leđa ildi lǝđweinu na nǝŋǝlǝmiñi eđađ đarto? 26 ŋen ŋarno aŋǝno yero ufuđano yaiyo nṯia cum đonaṯa đero ŋǝmëɽriano đaiyo.
31 lorldaiñ, ñerṯe ñaŋgiṯi leđa lwaiña eñaŋ alɽeṯe leđa ildi lǝbërrǝŋaiđia ŋen, ŋen ŋanṯa ñagaliŋeṯo ṯa nanda ñaŋgi ñagabërrǝŋaieia leđa ŋen ñagiđi ñakarmǝni ñagamiñaṯo lorǝba. 2 nëndr pređ lǝgiđr mǝnna ñoman ñwaiña, na ndǝ eđa gǝnǝŋ gero gëbǝđia mǝnna eŋen gaɽwata gënǝŋu gǝɽiñǝđeini, na gaɽǝwađaṯa gabëkëndia aŋǝno yǝlëɽǝŋu eŋen pređ. 3 nde lǝgǝbëɽia nǝmǝrṯa ŋabǝɽia ëiñua ṯa andǝnaṯe orn ñagarǝkëđia aŋǝno esen pređ. 4 na upundri geŋau cum igi goɽra na đǝbera đaltwađa gënǝŋulu garǝkëđǝnia laŋgela ltefr kaiñ eŋen pređ iŋi leđa lwonaṯa ɽrǝkëđia. 5 nṯia eum, đaŋǝla đaɽo waŋge gǝtefr na đëminia ŋen ŋoɽra. seiđr isia yǝtefr kaiñ yaɽǝwađaṯa aiyuɽi đǝñwa alo yabǝrano kaiñ. 6 na đaŋǝla đaɽo isia na đaŋǝla đaɽ alo eŋen ŋeicia. elaŋge laŋǝno pređ fǝđaŋǝla iđi đëbǝđia aŋǝno pređ yataŋa, na đawaṯa ŋen ŋǝđamǝṯia na đënǝŋu đǝweicǝnu isiya yalo eŋen ŋubwa kaiñ. 7 đwala pređ na ndǝfia pređ na laŋge larraɽalo na laŋge lǝŋau laɽǝwađaṯa lëlǝŋǝđeijǝni na lëlǝŋǝđeijǝni eleđa, 8 orn eđa gero gǝnǝŋ gaɽǝwađaṯa gëlǝŋǝ-đeieia đaŋǝla. đënǝŋu đeicia na eđa gero gǝnǝŋ gaɽǝwađaṯa gǝđama, na đunḏeinu ŋǝsiaŋa iŋi ŋǝɽiñǝđia. 9 fǝđaŋǝla iđi lǝgiabuŋṯiar elǝŋ yesu na đaṯa, na fǝđaŋǝla iđi lǝgiabuŋar leđa, ildi liđǝnu larno rǝmwa. 10 egëiñua yento yamiña đǝbuŋṯiano na đǝboŋa. lorldaiñ, gǝbanṯa ŋen ŋero ŋǝbǝđǝni ŋaɽo ṯia. 11 đoro đaɽǝwađaṯa đorwaiñǝđaṯa ŋawa ŋaiñǝla na ŋeɽe eđoro đunto? 12 lorldaiñ, ebǝđa gaɽǝwađaṯa garldia ŋǝɽwatere na đǝṯǝmwa đaɽǝwađaṯa đarldia ŋǝbǝđa? na ŋawa ŋǝđiña ŋero ŋaɽǝwađaṯa ŋiđ aŋaiñǝleṯe eum. 13 esegi eñaŋ galiŋeṯo ŋen nǝsi na galiŋeṯo ŋen ŋope? ŋgiṯu đamǝṯia đame đǝlëɽǝŋu ađërrǝŋaiđia ŋǝmëɽria ŋǝlëɽǝŋu đǝđǝrnaṯađa aralo đǝđaliŋeṯa ŋen nǝsi. 14 orn ndǝ ñagerṯo ŋen ŋeɽe ŋǝđǝgiaṯa ŋen na đonaṯa đǝŋaŋwar enare enalo, ñerṯe ñagëminia bǝɽan na ñerṯe ñagagǝbiṯia ŋen alo ŋǝđeṯam. 15 gerṯa fǝđaliŋeṯa ŋen nǝsi iđi đirǝwa elo, orn đalo, na đaŋǝno, na đǝnusila neieia. 16 ndǝ đǝgiaṯa ŋen na đonaṯa đǝŋaŋwar lëni ŋen ŋiđ aŋfeṯe ŋurǝgǝđu na ŋen pređ iŋi ŋeicia cum. 17 orn đaliŋeṯa ŋen nǝsi iđi đeṯo elo ananoŋ đatǝɽe, na đǝmama đëuṯaralo, na đǝđǝrnaṯaralo, na đǝnna ŋen, na đunḏeinu ŋǝbaiyaŋǝno na đarldiađa đaŋǝra, na đero đǝɽǝbǝđia nara, na đero ŋenano ŋǝɽiano. 18 liđia lǝŋen ŋuđǝrwaṯo lawëđǝnu đëuṯađa aralo leđala ilđi latuđia đëuṯaralo.
41 đǝbwaiñǝđia eñaŋ đeṯo ŋga? na đǝgerđia eñaŋ đeṯo ŋga? gerṯa đǝđonaṯa đeieia eđalo iđi đëpǝđia elaŋge laŋǝno esalo? 2 ñagwonaṯa laŋge na ñagero ñagaberṯia nṯia ñagaɽiñǝđia. ñagagiaṯa ŋen orn ñagaber ñagaɽǝwađaṯa ñagǝma laŋge ñagwonaṯa, nṯia ñagëpǝđia na ñagǝbwaiñǝđia. ñagero ñaga-berṯia laŋge ŋen ŋanṯa ñagero ñagabeɽǝđia. 3 ñagabeɽǝđia na ñagero ñaganeinia ŋen ŋanṯa ñagabeɽǝđia mǝnna eŋen ŋǝđonaṯa đeicia eđalo. 4 ñaŋ ñaŋgi ñagǝɽiano eŋen, ñagaijǝba ṯa đubwa ŋenŋa ŋalo đagea rǝmwa? orn eđa gǝnǝŋ igi gwonaṯa ṯa alo yaɽo đappa đǝlëɽǝŋu gënǝŋu gǝbǝđǝni bǝɽan gagea rǝmwa. 5 ñagaṯa ṯa ŋen ŋǝpiano iŋi ađam gǝrǝmwa gaṯa, ṯa rǝmwa raɽ aŋwar ndrubwiṯi usilaga igi rëɽu ṯa aŋǝndaufeṯr? 6 orn rënǝŋu rananaiđia đǝbuŋṯia đwaiña đusila. nṯia ađam gaṯa cum ṯa, rǝmwa ragea leđa ildi linia enare, orn rabuŋṯia leđa ildi lǝrra enare. 7 naicr rǝmwa ntam enalo na ŋgiṯr rǝmwa arerṯe ŋǝlǝŋe enare enalo. đwađeinr seṯan na yënǝŋu yiđ endobǝđe nano. 8 burgwađaṯr rǝmwa nano na rënǝŋu riđ arandǝburgwađaṯe nano. asǝnr raŋ ya leđa leieia, tǝɽeṯr nar enalo ñaganǝñaŋ ñaŋgi ñagerṯo ŋen ŋiɽijan. 9 iđǝnr ñagirǝwano, anr na ñare. ŋgiṯr đurrǝmǝđa eđalo ađamërni đwana na đaŋǝra nano eđalo ađǝmërni đirǝwano. 10 iđǝnr ñagǝrra enare elǝŋ rǝmwa nëiñua na rënǝŋu riđ arǝnđoɽre. 11 lorldaiñ, ñerṯe ñagwaɽwataiđia ŋen ŋǝlorldalo ŋeicia. eđa igi gwaɽwata ŋen ŋorǝba ŋeicia, walla girnḏeicia orǝba, gënǝŋu gwaɽwato ŋen ŋal ganun ŋeicia na gabirnḏeieia al ganun. ndǝ aginḏeicu al ganun agaber agëbǝđia al ganun orn agabirnḏeieia ŋen ŋal ganun. 12 eđa gunto ganaiđo al ganun na gabirnḏeieia, gënǝŋu igi gaɽǝwađaṯa gëbǝria na gagera. orn aganǝŋa fǝŋa esegi ṯa agabirnḏeicia ŋen ŋoralo? 13 nǝr, ñaŋgi ñagǝbaṯa ṯa, ñagabǝṯa alo yǝnǝŋ nwaldaŋ điñǝđi walla eṯeɽe ñaɽaŋe tu iṯǝli gunto ñabwana na ñama al gǝrus. 14 ñaganǝñaŋ ñagaijǝba ŋen ŋeṯeɽe, na đamǝṯia eđalo đaɽo ṯau? ñagarno ibwoɽua isi yafo liga lǝtefr orn niyerṯe. 15 gǝbanṯa ñagǝbaṯa ṯa, nđǝ elǝŋ rǝmwa rameđǝño ñagamǝṯia orn ñiđi ṯea na ṯia. 16 orn điñǝđi ñagëmima iđinia enare eđalo. đëminia pređ iđi đaɽo ṯia đeieia. 17 eđa igi galǝŋinnano ŋen ŋame na gaber gëbǝđia gënǝŋu gëbǝđia ŋen ŋeieia.
51 nǝr, ñaŋgi ñagwaiña đwala, anr na ñare ŋen ŋanṯa ŋen ŋubwa iŋi ŋiđ aŋandeṯa nano. 2 đwala eđalo đoṯo alo, na nđrena enalo nabapǝlđǝŋuđǝṯu. 3 aḏ ḏaǝb na faḏḏa esalo yasiđu, na đasiđa eđen điđ ađaɽeṯe đamǝđaṯa đageande na điđ ađǝse aŋǝno esalo garno isia. ñagararreiđu laŋge lwaiña ŋen ŋanṯa ñoman ñǝnḏurṯu. 4 đapǝɽa đǝleđa ilđi liđu ŋǝmëɽria ini enalo iđi ñagasaṯǝlo đabara pǝlelo. na ole gǝleđa ildi lwanḏo garǝmaṯo enënǝŋ nelǝŋ gǝlaŋge pređ. 5 ñagafo alo ñagwaiña laŋge na ñagiđu ŋen pređ ñagwonaṯa. ñagamieo nar enalo ŋen ŋarno đwala đamieinṯu ŋǝɽaiñ. 6 ñagakarmo na ñagaɽiño leđa luđǝrwaṯo eŋen na lënǝŋulu lero landuɽǝbiṯia ŋen ŋǝnǝŋ. 7 orn iđr nar enalo nwalano, lorldaiñ, ŋen đela đamǝlu đelǝŋ yesu. eđa gëbǝđia gi gaṯurṯia ŋǝsa ŋame ŋǝđuđa nǝŋwalarano ŋen gamǝlu ganeinia rǝmwa rađǝne rerramia na rǝđoɽwađa. 8 ñaganǝñaŋ cum, iđr nar enalo nwalano, na ñwonḏǝṯe enare, ŋen ŋanṯa đela đelǝŋ yesu đafo ṯwaiñ. 9 ñerṯe ñaiyamǝđia ŋamǝɽa lorldaiñ, ṯa ñerṯe ñagakǝmǝni. elǝŋ igi gǝbikirnḏeicia ŋen gafǝnde nano. 10 lorldaiñ, seier al anbiya isi ywaɽwata igirǝŋ gelǝŋ rǝmwa. yënǝŋulu yaɽo ŋamǝla ŋǝleđa laneinu ŋen ŋubwa na lwalarano. 11 lǝgǝbaṯar ṯa leđa labuŋǝnṯu ildi laɽaŋa lwonḏǝṯo eŋen. ñagano ŋen ŋaiyub ṯa gaɽaŋo gwonḏǝṯo eŋen orn ñagaseicu ŋen elǝŋ rǝmwa riṯǝma nḏurṯu ŋen ŋanṯa elǝŋ rǝmwa gerṯo ara gobaŋǝno na gerṯo ŋǝbaiyano. 12 orn, lorldaiñ, ŋen iŋi ŋaɽo ŋen ŋǝɽnda. ñerṯe ñagalǝfia kwai kwai eloga walla aloga walla waŋgega gwomǝn kwai kwai. ndǝ ñagǝbaṯa a, ŋgiṯr ŋen eŋalo aŋǝɽeṯe a, na ndǝ ñagǝbaṯa ndo, ŋgiṯr ŋen eŋalo aŋǝɽeṯe ndo, ṯa ñerṯe ñagakamǝm. 13 eđa gǝnǝŋ eñaŋ ganeinu ŋen ŋubwa? ŋgiṯǝma aŋǝṯurṯi rǝmwa. eđa gǝnǝŋ eñaŋ gaŋǝra nano? ŋgiṯǝma aŋalǝŋiṯi rǝmwa. 14 eđa gǝnǝŋ eñaŋ gwuma? ŋgiṯǝma aŋundǝđe nǝlǝŋ nǝkanisa na ŋgiṯǝlo aleɽǝđe rǝmwa eŋen ŋǝlëɽǝŋu almaiewađe ŋela nenda irǝŋga gelǝŋ yesu, 15 na đeɽǝđia rǝmwa iđi đafo eđonaṯa điđ ađeiđi eđa gwuma na elǝŋ yesu giđ aŋǝmatuđi, na ndǝ gënǝŋu giđu ŋen ŋeieia ŋǝnǝŋ ŋiđ aŋgeini. 16 miñeiđr ŋen eŋalo ŋeicia, na ekeɽǝđr rǝmwa eŋen ŋǝlorldalo ṯa ñeiđini. đeɽǝđia rǝmwa đeđa guđǝrwaṯo eŋen đëbǝđia ŋǝmëɽria ŋabǝɽaŋa ŋwaiña. 17 iliya gaɽ eđa garnëndr na gënǝŋu geɽǝđo rǝmwa kain ṯa rǝmwa arerṯe rađǝne orn rero rađǝne nṯǝlia niɽijin na nubwa đenǝŋ nǝŋǝmiñe gunto. 18 orn geɽǝđo rǝmwa tǝŋ na rǝmwa rađǝne na đuđa nḏalǝŋe đǝge. 19 lorldaiñ, ndǝ eđa gǝnǝŋ eñaŋ gamiño eŋen ŋǝđeṯam na eđa gamoɽǝbaicia eđađ, 20 lǝŋeṯr ṯa eđa igi guɽǝbǝđia eđa geieia eŋen ŋǝlëɽǝŋu ŋafo mǝnna gënǝŋu giđ aŋëbǝri usila geđa geieia eŋǝɽaiñ na giđ aŋǝtëri ŋen ŋeieia ŋwaiña.