abraniyin

abraniyin

¹ iliga lǝpǝnde rǝmwa raɽwatiṯu đaṯanda ŋen ŋǝteta ŋǝteta na erađ ɽetǝɽeteo igal anbiya. ² na iliga ildi lǝnḏurṯu rënǝŋu ralwaɽǝṯǝndr iđiaga, igi riđǝma ṯa aŋǝrraṯe elaŋge pređ. rënǝŋu riđu alo na laŋge pređ ŋuga. ³ iđia igi gaɽo đǝwađialo đǝŋaɽrwa ŋǝrǝmwa, na garno rǝmwa đurri. gënǝŋu gǝbekëndeicia laŋge pređ ŋenŋa ŋǝlëɽǝŋu iŋi ŋerṯo ŋabǝɽa pređ. ndǝ giđu đamǝndađa bǝɽan ŋen ŋanṯa ŋen ŋeicia gënǝŋu gaɽaŋo alo nḏaŋ đǝŋaicǝba đǝrǝmwa irri rerṯo ŋǝlǝŋe pređ na ŋaɽrwa pređ. ⁴ gënǝŋu giđǝnu gaŋǝra kaiñ gamiñaṯo mǝlaiyǝka pređ, ŋen ŋarno irǝŋ gënǝŋu ganeinu gaŋǝra kaiñ gamiñaṯo ndrǝŋ enen. ⁵ rǝmwa reiṯu mǝlaiyǝka đǝnǝŋ lomanaŋ ṯa, aganǝŋa agaɽ iđia gǝlëɽǝñi, điñǝđi igalǝŋaŋa? walla tǝŋ raṯa ŋen ŋanṯa mǝlaiyǝka đǝnǝŋ ṯa, igiđi eɽeṯe eṯen na đënǝŋu điđ ađǝɽeṯe iđia gǝlëɽǝñi? ⁶ na ndǝ ranaiđo iđia gǝlëɽǝŋu alo, igi gǝlǝŋǝnu ananoŋ, rënǝŋu raṯa ṯa, ŋgiṯr mǝlaiyǝka pređ irǝmwa aiyǝmukwuđiñǝṯialo. ⁷ rënǝŋu ralwaɽo eŋen ŋǝmǝlaiyǝka ṯa, rënǝŋu rëbǝđia đǝbera ṯa ađarneṯe mǝlaiyǝka ilëɽǝŋu na raŋǝla risia ṯa arǝđuɽǝđǝnṯi. ⁸ rn rënǝŋu raṯa eŋen ŋiđia ṯa, ŋǝlǝŋe ŋǝlaɽǝŋa, ya rǝmwa, ŋiđ aŋfeṯe bǝɽǝbǝte. ŋamǝla ŋǝŋǝlǝŋe ŋǝlaɽǝŋa ŋaɽo ŋamǝla eŋen ŋuđǝrwaṯo. ⁹ aganǝŋa agubwa ŋenŋa ŋuđǝrwaṯo na aganeđo ŋen ŋeicia. ŋen ŋafǝṯia rǝmwa, fǝrǝmwa rǝlaɽǝŋa raicwađaṯǝŋa ŋela nano ŋǝđaŋǝra nano ŋen ŋamiñaṯo lorldalo pređ. ¹⁰ na aganǝŋa, ya elǝŋ rǝmwa, agiđu ađuna yalo ananoŋ na elo yiđǝnu raŋra rǝlaɽǝŋa. ¹¹ yënǝŋulu yiđ aiyǝmǝndëđǝni orn aganǝŋa agiđi ŋafeṯe bǝɽǝbǝte. yënǝŋulu yiđ aiyǝcwareṯe ŋen ŋarno erena ¹² na agiđi ŋalǝpweiđi ŋen ŋarno erena na yiđ aiyǝmǝlëđǝni. orn aganǝŋa agaber agiđi ŋamǝlëđǝni kwai kwai na nṯǝli nǝlaɽǝŋa naber niđ anabǝɽinḏeini. ¹³ rënǝŋu reiṯu mǝlaiyǝka đǝnǝŋ lomanaŋ ṯa, ɽaŋalo nḏaŋ đǝlëɽǝñi đǝŋaicǝba ŋen igamǝlu igiđu leđa lageaŋa ṯa alɽeṯe waŋge gǝrǝmanǝŋ rǝlaɽǝŋa? ¹⁴ gerṯa mǝlaiyǝka pređ yaɽo nusila ini nađuɽǝđǝnia, ini nǝṯweini ṯa anǝđuɽǝđǝni ŋen ŋanṯa leđa ildi liđ alëbǝrni?

¹ ŋen ŋafǝṯia đeṯam ṯa nëndr lǝgarǝmoṯar kaiñ ŋen iŋi lǝganr, ṯa alerṯr lǝgǝriđǝniar eŋen iŋi. ² ndǝ ŋen iŋi ŋwalwaɽǝnu mǝlaiyǝkaya ŋafo ŋǝlǝŋeŋa na ndǝ leđa ildi lagero ŋen iŋi na laneđo ṯa lǝnna ŋen lakǝmǝnu ³ fǝṯau nëndr lǝgiđr almiñr eđakǝme ndǝ lǝgaber lǝgǝbendiar đëbǝri iđi rǝmwa rananaiđia iđi đaŋǝra đoɽra kaiñ? ananoŋ elǝŋ yesu gërrǝŋaicǝnde đëbǝri iđi, na leđa ildi lano ŋen yesu gwaɽwato lamǝđaiđo eŋen iŋi inëndr. ⁴ rǝmwa cum ramađaṯa ŋen iŋi ŋamǝlaŋa na ŋenŋa ŋoɽra na aŋwaraya ɽetǝɽeteo na đanaiciađa đusila gatǝɽe iđi đananeiđǝni eŋen rënǝŋu ronaṯa. ⁵ ŋen ŋanṯa gerṯa fǝmǝlaiyǝka isi rǝmwa ranaicǝlo ŋǝlǝŋe alo isi yiđ aiyela, isi lǝgwaɽwatarau. ⁶ eđa gǝnǝŋ gaṯa pǝnde ṯa, leđa laɽo wande, ya rǝmwa ṯa agǝlwonaṯa? walla iđia gǝleđa ṯa agamarǝmoṯwa ? ⁷ agiđǝlo lǝta imǝlaiyǝka iliga lobǝlano, orn aganaicǝlo ŋaɽrwa na đamia. ⁸ na agëɽu laŋge pređ eŋǝlǝŋe eŋen erǝmanǝña eren. ndǝ rǝmwa ranaico leđa ŋǝlǝŋe elaŋge pređ rënǝŋu rero raŋgiṯia wagǝnǝŋ alǝsoŋ kwai kwai. orn điñǝđi lǝgamǝɽr lǝgǝseiciar laŋge pređ eŋǝlǝŋe ŋǝleđa. ⁹ orn lǝgǝseiciar yesu igi giđǝnu gǝta aten imǝlaiyǝka, gǝneinu ŋaɽrwa na đamia ŋen ŋanṯa ganeinu ŋen ŋubwa ŋǝŋǝɽaiñ, ṯa gënǝŋu aŋënṯi eŋen pređ ŋǝŋǝɽaiñ ŋen ŋanṯa leđa pređ đameđa đǝrǝmwa. ¹⁰ rǝmwa raɽo alo iđǝđurwa elaŋge pređ na riđu laŋge pređ na ŋen ŋafo ŋope ṯa rënǝŋu rëbǝđia elǝŋ gǝđëbǝri eđen gǝɽiñǝđeinu ŋenŋa ŋubwa ŋen arananaice ñere ñwaiña ŋaɽrwa. ¹¹ ŋen ŋanṯa yesu igi gǝliđia ltǝɽe na lënǝŋulu ildi lǝbǝđǝni ltǝɽe pređ ildi lǝlǝŋǝnu eṯen gunto. nṯia yesu gaber girǝwano ndǝ gǝlërrǝnicia lorǝba. ¹² gënǝŋu gaṯa ṯa, igabërrǝŋaicia lorldaiñ irǝŋ gǝlaɽǝŋa, ya rǝmwa. igiđi eŋalǝŋiṯi đamiađa eleđa iligano ɽrǝmwa. ¹³ na gaṯa tǝŋ ṯa, igënǝñi eum igiđi yëɽi đonaṯa đǝlëɽǝñi iŋu na tǝŋ ṯa, fiñi na fǝñere iñi rǝmwa ranaicǝñǝlo. ¹⁴ nṯia ŋen ŋanṯa ñere iñi ñǝɽǝbǝđia eŋen iŋǝfǝni na egeđe, yesu cum giđǝnu bǝɽan ŋǝfǝniŋa na eđeya ṯa ŋǝɽaiñǝŋa ŋǝlëɽǝŋu gënǝŋu aŋǝmǝndađe ŋabǝɽa ŋeđa igi gerṯo ŋabǝɽa ŋǝŋǝɽaiñ, na fǝŋu seṯan, ¹⁵ na ṯa aŋëbǝri leđa pređ ildi lëndǝnu ŋabǝɽaŋa iŋi ŋǝlendia ŋen lamǝṯia, ŋen ŋanṯa liđǝña ŋǝɽaiñ. ¹⁶ ŋen ŋanṯa đeṯam yesu gaber gamǝđaṯa mǝlaiyǝka orn gamǝđaṯa ñere ñibrayim. ¹⁷ ŋen ŋafǝṯia ŋen đeṯam ṯa gënǝŋu gafo giđǝnu garno lorǝba đurri ṯa aŋaɽǝwađaṯe aŋǝɽeṯe elǝŋ gǝkana igi galiŋeṯo ŋabaiya eleđa na igi gǝbiṯia rǝmwa ŋen ŋope araga gunto, ṯa aŋǝŋgeici ŋen ŋeieia ŋǝleđa. ¹⁸ yesu gaɽǝwađaṯa gamǝđaṯa eđa gǝnǝŋ taltal ndǝ ginḏeinu ŋen ŋanṯa gënǝŋu gananeinu ŋen ŋubwa đirnḏeiciađa.

¹ ŋen ŋafǝṯia, lorldaiñ ñaŋgi ñagatǝɽe, ñaŋgi lǝgundǝđǝnr irǝmwa lëldǝŋǝđeinr eŋen ŋǝyesu igi gaɽo đǝđweinia na elǝŋ gǝkana gǝŋen iŋi lǝgǝbendiar. ² gënǝŋu giṯu rǝmwa ŋǝmëɽria araga gunto irri rëɽǝma ŋen ŋarno musa giđu ŋǝmëɽria araga gunto eleđa leɽa gǝrǝmwa. ³ ŋen ŋanṯa ŋen ŋarno eđa igi gwađa eɽa gǝneini ŋaɽrwa ŋwaiña ŋamiñaṯa eɽa, nṯia cum yesu gafiđǝnu garǝjađaṯo eŋen ṯa aŋǝneini ŋaɽrwa ŋwaiña ŋamiñaṯo musa. ⁴ ŋen ŋanṯa neɽa pređ nwađǝnu eđaga gǝnǝŋ orn rǝmwa riđu laŋge pređ. ⁵ musa giđu ŋǝmëɽria eleđa leɽa gǝrǝmwa araga gunto gaɽ eđa gađuɽǝđǝnia ṯa aŋǝmame đamǝđaṯa đǝŋen iŋi ŋiđ aŋǝlwaɽǝni nḏurṯu, ⁶ orn al masiya igi gerṯo ŋǝlǝŋe eleđa leɽa gǝrǝmwa, giđu ŋǝmëɽria araga gunto gaɽ iđia. nëndr lǝgaɽr leđa leɽa igi, ndǝ lǝgǝbendiar kaiñ đëɽǝnia đǝñano iđëndr igal masiya na ŋen lǝgauṯurṯiar iŋi lǝgauwëminiar. ⁷ ŋen ŋarno usila gatǝɽe gaṯa ṯa, ndǝ ñagǝnna ole gǝlëɽǝŋu iloman ildi, ⁸ ñerṯe ñagëbǝđia nare nwonḏǝṯo ŋen ŋarno leđa lisrayil liđu ṯia ndǝ latwođo lageo rǝmwa, liga lënǝŋulu lirnḏeinu eđǝñwa, ⁹ alo isi eṯalanda lirnḏeiciñau na lǝfiđu ṯa igaɽo đeṯam ŋen ŋanṯa laseicu aŋwara ilëɽǝñi nṯǝli eređia marldwan. ¹⁰ ŋen ŋafǝṯia igeicǝṯu leđa ano kaiñ lǝliga lakǝl na igaṯa ṯa, nare enen namiña eŋen ŋǝpiano jaica jaica, na lënǝŋulu lero laliŋeṯo rađ rǝlëɽǝñi. ¹¹ nṯia iđeiciano đǝlëɽǝñi igalǝfo ŋen ṯa lënǝŋulu laber liđ alënṯi iđǝmiñǝniano đǝlëɽǝñi kwai kwai. ¹² ŋen ŋafǝṯia, lorldaiñ, rǝmojǝđr ṯa ara geicia igi gero gǝbendia ŋen ŋǝrǝmwa gaber gafia egeđa gǝnǝŋ eñaŋ, igi gǝmiđia ṯa garređia rǝmwa nano irri ramǝṯia. ¹³ onḏeicr lorldalo pređ ñoman pređ ndǝ liga lafo mǝldin ṯa eđa gero gǝnǝŋ eñaŋ gǝbǝđǝni gwonḏǝṯo egare ŋađǝnaŋa ŋǝŋen ŋeicia. ¹⁴ ŋen ŋanṯa nëndr lǝgiđǝnr ṯa alɽaŋr ldǝɽo igal masiya ndǝ lǝgǝbendiar đëɽǝni đǝñano iđi lǝgafr lǝgerṯr ananoŋ ŋen yesu gamǝlu goɽǝbaṯa alo, ¹⁵ ndǝ ŋen ŋwalwaɽǝnu ṯa, ndǝ ñagǝnna ole gǝlëɽǝŋu iloman ildi, ñerṯe ñagëbǝđia nare nwonḏǝṯo ŋen ŋarno leđa lisrayil liđu ṯia ndǝ latwođo lageo rǝmwa. ¹⁶ fesandǝldi ildi lano ŋen ŋǝlëɽǝŋu orn latwođo lageo rǝmwa? leđa pređ ildi musa gamiñǝlo alo imasr. ¹⁷ na fesandǝldi rǝmwa reicǝṯalano nṯǝli eređia marldwan? leđa pređ ildi liđu ŋen ŋeicia, ildi laiyǝṯo eđǝñwa. ¹⁸ na fesandǝldi rǝmwa ralǝfo ṯa lënǝŋulu laber lǝbenṯia iđǝmiñǝniano đǝlëɽǝŋu? leđa ildi laneđo lǝnna ŋen ŋǝlëɽǝŋu. ¹⁹ nṯia lǝgǝseiciar ṯa lënǝŋulu lafo lero laɽǝwađaṯa lǝbenṯia iđǝmiñǝniano đǝlëɽǝŋu ŋen ŋanṯa lero lǝbendia ŋen ŋǝlëɽǝŋu.

¹ ŋen ŋanṯa liga ŋen iŋi ŋëɽǝnu ŋafo mǝldin ṯa lǝgaɽǝwađaṯar lǝgǝbenṯiar iđǝmiñǝniano đǝlëɽǝŋu alǝđiñǝṯr ṯa aŋgaica eđa gǝnǝŋ eñaŋ aŋǝfiđǝni ṯa gero gǝbenṯia. ² ŋen ŋaŋǝra ŋǝrǝmwa ŋwalwaɽǝnṯǝndr ŋen ŋarno ŋwalwaɽǝnṯu leđa lisrayil lǝpǝnde, orn ŋen iŋi lënǝŋulu lano ŋero ŋǝlamǝđaṯa ŋen ŋanṯa ŋero ŋafiđia đonaṯa iŋulu ildi lano. ³ nëndr lëŋgr lǝgëndr ŋen ŋǝrǝmwa lǝgǝbenṯiar iđǝmiñǝniano đǝlëɽǝŋu, garno rënǝŋu raṯa, nṯia iđeiciano đǝlëɽǝñi igalǝfo ṯa lënǝŋulu laber liđ alënṯi iđǝmiñǝniano đǝlëɽǝñi kwai kwai. orn ŋǝmëɽria ŋǝrǝmwa ŋabǝɽenḏeinu liga alo yiđǝnu. ⁴ ŋen ŋanṯa alo yǝnǝŋ egađam gǝlëɽǝŋu rënǝŋu raṯa eŋen ŋǝloman lǝsabiṯ ṯia ṯa, iloman lǝsabiṯ rǝmwa rǝmiñǝniano eŋǝmëɽria ŋǝlëɽǝŋu pređ. ⁵ na tǝŋ alo isi rënǝŋu raṯa ṯa, lënǝŋulu laber liđ alënṯi iđǝmiñǝniano đǝlëɽǝñi kwai kwai. ⁶ ŋen ŋanṯa leđa lǝmaṯan lǝbenṯia mǝldin iđǝmiñǝniano na leđa ildi lano ŋen ŋaŋǝra ŋǝrǝmwa ananoŋ lero lǝbenṯia ŋen ŋanṯa laɽ ndǝl, ⁷ ŋen ŋafǝṯia rǝmwa riđu liga ǝlnǝŋ tǝŋ. iliga lwalano raṯa ḏawuḏga na ŋen iŋi ŋǝwërđǝnu ṯia ṯa, ndǝ ñagǝnna ole gǝlëɽǝŋu iloman ildi ñerṯe ñagëbǝđia nare nwonḏǝṯo. ⁸ gǝbanṯa yosua gǝnaicǝlo đǝmiñǝniano đeṯam, ṯa rǝmwa rero rǝlwaɽa eŋen ŋǝliga tǝŋ lǝnḏurṯu. ⁹ nṯia đǝmiñǝniano đafo mǝldin ŋen ŋanṯa leđa ɽrǝmwa. ¹⁰ ŋen ŋanṯa eđa igi gǝbenṯia iđǝmiñǝniano đǝrǝmwa, gënǝŋu gaŋgiṯu ŋǝmëɽria ŋǝlëɽǝŋu ŋen ŋarno rǝmwa raŋgiṯu ŋǝmëɽria ŋǝlëɽǝŋu. ¹¹ ŋen ŋafǝṯia alǝnḏǝjeicr ŋǝɽwano ṯa alënṯr iđǝmiñǝniano đakǝl, ṯa eđa gerṯa gǝnǝŋ inëndr aŋiɽi ŋen ŋanṯa gënǝŋu ganeđo gǝnna ṯia eum. ¹² ŋen ŋanṯa ŋen ŋǝrǝmwa ŋamǝṯia na ŋerṯo ŋabǝɽa pređ iŋi ŋëbǝđia ŋǝmëɽria, na ŋerṯo ŋǝfǝni ŋwaiña ŋamiñaṯo đoperre iđi đerṯo ŋǝfǝni aliɽǝm, na ŋawađa leđa alo yoliano yufuđa na yusila na ŋaɽandǝđia ŋođiano na ŋelano, na ŋirnḏeicia ŋen na đonaṯa lǝnare. ¹³ na wagero gǝnǝŋ galǝbijǝnu irǝmwa kwai kwai, orn laŋge pređ lafo mǝɽǝmǝɽeñ lero ltërni na lagagiđǝnu isiano ilëɽǝŋu, irri ŋen đeṯam ṯa lǝgukuɽǝbiṯiar ŋen iŋëndr. ¹⁴ lǝgerṯr elǝŋ gǝkana goɽra gaŋǝra igi gamiño alo pređ yelo, fǝyesu iđia gǝrǝmwa. ŋen ŋafǝṯia alëndr kaiñ đonaṯa iŋu iđëndr. ¹⁵ ŋen ŋanṯa lǝgerr lǝgǝberṯiar elǝŋ gǝkana igi gaber gaɽǝwađaṯa gandǝbǝɽiarano iđëbia iđëndr, orn lǝgerṯr elǝŋ gǝkana igi girnḏeinu eŋen pređ garno nëndr, orn gënǝŋu gero gëbǝđia ŋen ŋeicia. ¹⁶ ŋen ŋafǝṯia aleṯar đëɽǝniađa đǝñano kursi nano eŋǝlǝŋe irǝmwa irri raliŋeṯo ŋabaiya, ṯa alǝgieinr ŋabaiya nano, na ṯa alfiđr đwonḏǝṯa đǝlëɽǝŋu đusila ṯa laŋge ildi alǝndamǝđaṯr ndǝ lǝgǝbirnḏeiniar.

¹ ŋen ŋanṯa nǝlǝŋ pređ nǝkana noṯǝnu eleđa na nëɽǝnu ṯa aniđi ŋǝmëɽria ŋen ŋanṯa leđa elaŋge ɽrǝmwa, na ṯa aŋǝnaiđe đǝnaiđia na đǝɽǝđǝnia ŋen ŋanṯa ŋen ŋeicia. ² nënǝŋulu naɽǝwađaṯa nǝđǝrnaṯaralo leđala laijǝba ŋen na leđala ildi lafo mǝnna ŋen ŋanṯa nënǝŋulu cum nakëđinṯu đëbiađa. ³ ŋen ŋafǝṯia ndǝ nǝnaiđia ŋen ŋǝđǝɽǝđǝnia ŋen ŋanṯa ŋen ŋeieia ŋǝleđa, ŋen đeṯam ṯa nënǝŋulu nanaiđia ŋen ŋǝđǝɽǝđǝnia ŋen ŋanṯa ŋen eŋen ŋeicia cum. ⁴ na eđa gero gǝnǝŋ gǝbǝđǝni elǝŋ gǝkana bǝɽan, orn rǝmwa rëɽǝma ŋen ŋarno rëɽu arun. ⁵ nṯia cum al masiya gero gǝneini ŋaɽrwa ṯa giđǝnu elǝŋ gǝkana bǝɽan, orn rǝmwa rëɽǝma irri reiṯǝma ṯa, aganǝŋa agaɽ iđia gǝlëɽǝñi, điñǝđi igalǝŋaŋa. ⁶ na cum ndrǝmeiṯi alo yarto egađam ṯa, agaɽo kana bǝɽǝbǝte igamǝcu gǝmalkisaḏak. ⁷ ŋen yesu gafo alo ṯaŋǝṯurṯu rǝmwa irri raɽǝwađaṯa ramëbǝri eŋǝɽaiñ nǝŋekeɽǝđe rǝmwa kaiñ olega goɽra na ŋwalŋa, na ŋen ŋanṯa gëđǝña rǝmwa rënǝŋu ranaṯǝma. ⁸ gënǝŋu gaɽ iđia orn gërrǝŋeinu đǝnna ŋenŋa ŋubwa ŋeicia gënǝŋu ganeinu, ⁹ na ŋen ŋanṯa giđǝnu gǝɽiñǝđeinu gënǝŋu gaɽ elǝŋ gǝđëbǝri đǝbǝɽǝbǝte eleđa pređ ildi lamanna, ¹⁰ ŋen ŋanṯa rǝmwa riđǝma gaɽ elǝŋ gǝkana igamǝcu gǝmalkisaḏak. ¹¹ nanda ñagwonaṯa ñagǝndǝlwaɽǝṯia laŋge lwaiña eŋen iŋi orn ŋen ŋabɽwaŋǝno ṯa ñagǝndërrǝŋaicia ŋen iŋi ŋope ŋen ŋanṯa ŋaṯǝɽa eŋalo ŋafo mǝnna. ¹² điñǝđi ŋen ŋafo đeṯam ṯa ñagǝbërrǝŋaicia leđa larto ŋen, orn ñagamǝlu ñagaɽǝwađaṯa ñagëbǝđia ṯia, na ŋen đeṯam ṯa eđa gǝndërrǝŋaicia tǝŋ ŋen ŋananoŋ ŋǝrǝmwa. ŋan ŋaɽo đeṯam eñaŋ, gerṯa aicǝba. ¹³ leđa pređ ildi lamieinu ŋanŋa lënǝŋulu laijǝba ŋen ŋǝđuđǝrwaṯa eŋen. lënǝŋulu laɽo ñere ñǝrra mǝldin. ¹⁴ orn aicǝba ŋen ŋanṯa leđa loɽra ildi laɽǝwađaṯa laliŋeṯo ndǝ ŋen ŋǝnǝŋ ŋaɽo ŋaŋǝra walla ŋeicia, ŋen ŋanṯa lënǝŋulu lirnḏeicu ŋen kaiñ ŋaṯǝɽaŋa na usilaga liga lwalano.

¹ ŋen ŋafǝṯia alǝŋgiṯr ŋen ŋananoŋ ŋal masiya, aɽǝđaṯr nëiñua aloɽreṯr. alerṯr lǝgëbǝđiar tǝŋ ađuna iđǝređia eŋen ŋǝmama ŋǝɽaiñ, na iđonaṯa irǝmwa, ² đërrǝŋaiđiađa eŋen ŋǝđwasǝnia na eŋen ŋǝđëɽǝnia raŋ nano na eŋen ŋǝđǝtođa eŋǝɽaiñ na eŋen ŋǝđakǝme đǝbǝɽǝbǝte. ³ lǝgiđr aɽǝđaṯr nëiñua ndǝ rǝmwa rǝndǝŋgiṯiar ṯa aliđr ṯia. ⁴ ndǝ leđa lërrǝŋeinu ŋen ananoŋ na laliŋeṯo đǝnaicia iđi đeṯo irǝmwa elo na lënṯu iđǝɽǝbǝđia eŋen đusila gatǝɽe, ⁵ na lafo laliŋeṯo ŋen ŋǝrǝmwa ŋaŋǝra, na laliŋeṯo ŋabǝɽa ŋwaiña ŋalo isi yiđ aiyela, ⁶ orn liɽu eđađ, lënǝŋulu laber laɽǝwađaṯa loɽǝbaṯa eđađ tǝŋ, ŋen ŋanṯa laɽiño iđia gǝrǝmwa iđuɽi bǝɽan na lëbǝđia leđa lamađama. ⁷ rǝmwa rabuŋṯia gi igi gǝṯia ŋawa iŋi rǝmwa rauwađǝnṯia nǝŋǝlǝŋe ŋǝsa ŋen ŋanṯa eđa gauwađo, ⁸ orn ndǝ gǝlǝŋa ri na auwǝđëđa gero gǝberṯia ŋen ano na gafo ṯwaiñ gabuŋǝni na giđ aŋuɽǝni nḏurṯu isiaya. ⁹ nanda ñagwaɽwata ṯia, orn eŋen eŋalo, ya lorldaiñ lubwaniya, nanda ñagëɽǝni đǝñano ṯa ŋen ŋaŋǝra ŋamiñaṯa ŋen ŋakǝl, na ŋen iŋi ŋǝmama đëbǝri. ¹⁰ ŋen ŋanṯa rǝmwa rënǝŋu gerṯa rǝɽiano eŋen ṯa rakaijǝbeini eŋǝmëɽria iŋi ñaŋ ñagiđu na eŋen ṯa ñagubwa irǝŋga gǝlëɽǝŋu ndǝ ñagiṯu leđa ŋǝmëɽria ɽrǝmwa na ñagëbǝđia ṯia mǝldin. ¹¹ na nanda ñagwonaṯa ñaŋ pređ ṯa ñagëɽǝđiaŋǝno mǝldin ṯa ñaliŋeṯe ŋope ŋen ñagauṯurṯia liga yesu gamǝlu geṯo, ¹² ṯa ñerṯe ñagaiñǝlaŋǝno orn ṯa ñikirnḏeici leđa ildi laneini đǝbuŋṯia iđi rǝmwa rëɽu ŋen ŋanṯa lerṯo đonaṯa na laɽiñaṯa ŋen. ¹³ ŋen ŋanṯa ndǝ rǝmwa rëɽǝṯu ibrayim ŋen, ralǝfinu bǝɽan ŋen ŋanṯa eđa gero gǝnǝŋ goɽrǝṯu rënǝŋu raɽǝwađaṯa rǝmaiyalǝfia. ¹⁴ ndraṯa ṯa, igiđ iŋabuŋṯi kaiñ na igiđ eŋaɽǝjaice kaiñ. ¹⁵ nṯia ibrayim gǝneinu ŋen iŋi rǝmwa rëɽu ŋen ŋanṯa gaṯurṯu đwalađa arano. ¹⁶ đeṯam leđa lalǝfia eđaga gǝnǝŋ goɽrǝṯǝlo na iđukuɽǝbijǝđǝṯia eŋen eđen, ndǝ eđa gǝnǝŋ galǝfia đukuɽǝbijǝđǝṯia eŋen đamǝndëđǝnu. ¹⁷ ŋen ŋafǝṯia rǝmwa ralwaɽo ŋen iŋi rëɽu đalǝfiađa ŋen ŋanṯa rafo ronaṯa rǝbërrǝŋaicia ŋope leđa ildi liđ alarraṯe eŋen rënǝŋu rëɽu ṯa ŋen iŋi ŋaber ŋaɽǝwađaṯa ŋǝmǝlëđǝni, ¹⁸ ṯa, ŋenŋa iŋi ŋiɽijan iŋi ŋaber ŋaɽǝwađaṯa ŋǝmǝlëđǝni iŋi rǝmwa raber raɽǝwađaṯa reyagagǝbalo kwai kwai, nëndr lëŋgr lǝgabǝđr rǝmwa nano, alneinr đwonḏǝṯa kaiñ iđi điđ ađǝndiđi lǝgǝbendiar ŋen iŋi ŋafo nëndr nëiñua. ¹⁹ ŋen ŋarno đǝpeinia đinia đǝbendeicia đupundǝri đǝŋau ṯa ađerṯe đǝbǝɽǝṯia eŋau, nṯia cum ŋen iŋi ñagauṯurṯia iŋi ŋafo đurri ŋǝbendeieia nare inëndr. ŋen iŋi ñagauṯurṯia ŋǝbenṯia alo yëđǝñinu yatǝɽe yamiñaṯo lorǝba pređ, erena nëiñua isi yelo, ²⁰ alo isi yesu gënṯau nëndr nëiñua ŋen ŋanṯa nëndr, igi gaɽ elǝŋ gǝkana bǝɽǝbǝte igamǝcu gǝmalkisaḏak.

¹ ŋen ŋanṯa eđa igi gǝbernia malkisaḏak, igi gaɽ elǝŋ galo isalim na kana irǝmwa irri roɽrǝṯu laŋge pređ, gënǝŋu lopǝđaiđo ibrayimga ŋen ibrayim goɽǝbǝđo liga gaɽiño nǝlǝŋ neicia đǝge na malkisaḏak nǝŋǝmabuŋṯi. ² ibrayim ganaicǝma laŋge egworǝb ildi ɽređ elaŋge pređ ildi gëndǝlo iđǝbwaiñǝđia. irǝŋ gǝlëɽǝŋu ananoŋ gaɽ elǝŋ gǝŋen ŋuđǝrwaṯo na cum gaɽ elǝŋ galo isalim, gaɽ elǝŋ gǝđëuṯaralo. ³ gënǝŋu gero eṯen na gero lǝŋgen na gero đǝlǝŋǝđia. gënǝŋu gero gǝlǝŋǝnia na đamǝṯia đǝlëɽǝŋu đero đamǝndëđǝnia, orn ŋen ŋarno iđia gǝrǝmwa gënǝŋu gaɽo kana bǝɽǝbǝte. ⁴ nwanr ṯa đeṯam eđa igi goɽra ŋen ŋanṯa đaṯa ibrayim ganaicǝma laŋge egworǝb ildi ɽređ elaŋge pređ ildi gëndǝlo iđǝbwaiñǝđia. ⁵ na liđia lǝlawi ildi liđǝnu kana lerṯo ŋǝlǝŋe eŋen ŋal ganun ṯa almame laŋge egworǝb ildi ɽređ eleđa, lënǝŋulu lararreiđia laŋge ildi elorǝba ildi laɽo liđia librayim. ⁶ orn malkisaḏak igi gerṯa gǝđǝlǝŋǝđia đǝlawi ganeinu laŋge egworǝb ildi ɽređ ildi ibrayim gǝnaicǝmalo, na gabuŋṯu ibrayim gënǝŋu igi rǝmwa rëɽǝṯǝma ŋen. ⁷ ŋen ŋaber ŋaɽǝwađaṯa ŋabǝleini ṯa eđa gabuŋṯia eđa garto gënǝŋu goɽraṯu eđa gabuŋǝnṯu. ⁸ eŋen ŋǝkana yǝlawi fǝleđa ildi lamǝndëđǝni ildi lararreiđu laŋge egworǝb ildi ɽređ, orn igamǝcu gǝmalkisaḏak laŋge egworǝb ildi ɽređ larreiđǝnu eđaga igi gamǝṯia, ŋen ŋarno ŋǝwërđǝnu ṯia. ⁹ lǝgaɽǝwađaṯar lǝgǝbaṯar ṯa lawi igi gǝmama laŋge egworǝb ildi ɽređ gënǝŋu ganaiđo laŋge egworǝb ildi ɽređ cum igibrayim, ¹⁰ ŋen ŋanṯa gënǝŋu gamǝlu gǝlǝŋǝni egeṯen ibrayim, ŋen malkisaḏak lopǝđaiđo ibrayimga. ¹¹ ndǝ đǝɽiñǝđaiđia đeṯo eŋen ŋǝkana yǝlawi, iŋi leđa laneiniau al ganun yǝpǝnde, fǝṯau ŋen ŋaɽo đeṯam ṯa kana imǝŋ tǝŋ yatođo igamǝcu gǝmalkisaḏak na gerṯa igamǝcu garun? ¹² ŋen ŋanṯa ndǝ ŋen ŋǝkana ŋamǝlëđǝni ŋen đeṯam cum ṯa al ganun yamǝlëđǝni. ¹³ ŋen iŋi ŋǝlwaɽǝnu eŋen ŋeđa gǝnǝŋ gǝleđa larto na eđa gero gǝnǝŋ gǝleđa ildi giṯu rǝmwa ŋǝmëɽria ŋaḏuna iđǝɽǝđǝnia. ¹⁴ ŋen ŋanṯa ŋen ŋǝlǝŋinu đurri ṯa elǝŋ igëndr yesu gǝlǝŋǝnu eleđa lǝyawuḏa, na musa gero gwalwaɽa ŋen ŋǝnǝŋ eleđa lǝyawuḏa eŋen ŋǝkana. ¹⁵ na ŋen iŋi ŋaɽo ŋǝlǝŋinu ŋope ndǝ kana imǝŋ tǝŋ yarno malkisaḏak yëɽǝnu, ¹⁶ isi yëɽǝnu gerṯa eŋen ŋaŋǝno orn eŋen ŋǝŋabǝɽa ŋǝđamǝṯia iđi đaber đaɽǝwađaṯa điđ ađǝmǝndëđǝni. ¹⁷ ŋen ŋanṯa đamǝđaṯa đaɽo ṯia ṯa, agaɽo kana bǝɽǝbǝte igamǝcu gǝmalkisaḏak. ¹⁸ đeṯam al ganun isi yananoŋ yǝŋgeinu ŋen ŋanṯa yëbia na yero ŋeniano, ¹⁹ ŋen ŋanṯa al ganun yero yëbǝđia wagǝnǝŋ gǝɽiñǝđeinu. nṯia lǝganeinr ŋen ŋaŋǝra ŋamiñaṯo ŋen ŋananoŋ iŋi lǝgauṯurṯiar, iŋi lǝgaɽǝwađaṯar lǝgiyeṯar rǝmwa nano. ²⁰ na ŋen iŋi ŋëɽǝnu đalǝfiađa. ²¹ kana ipǝnde yëɽǝnu đalǝfia đero orn yesu gëɽǝnu đalǝfiađa garno ŋen ŋwalwaɽǝnṯǝma ṯa, elǝŋ rǝmwa ralǝfo na raber riđ arǝmǝlëđi ŋen, aganǝŋa agaɽo kana bǝɽǝbǝte. ²² nṯia yesu gaɽo đǝndeicia đǝđǝrreiđia ŋen iđi đaŋǝra đamiñaṯo đǝrreiđia ŋen đananoŋ. ²³ kana yakǝl yaɽo ywaiña ŋen ŋanṯa yënǝŋulu yaiyo, nṯia yafo yero yaɽǝwađaṯa yaɽaŋa eŋǝmëɽria eŋen, ²⁴ orn yesu gaɽaŋa eŋen ŋǝkana bǝɽǝbǝte ŋen ŋanṯa gamǝṯia bǝɽǝbǝte. ²⁵ ŋen ŋafǝṯia gënǝŋu gaɽǝwađaṯa gëbǝri leđa pređ eŋen ṯǝɽom ildi leṯo rǝmwa nano ŋuga, ŋen ŋanṯa gënǝŋu gamǝṯia bǝɽǝbǝte ṯa aŋekeɽǝđe rǝmwa ŋen ŋanṯa ŋulu. ²⁶ ŋen ŋanṯa ŋen ŋaɽo đeṯam ṯa lǝgerṯr elǝŋ gǝkana ṯia igi gatǝɽe na gero đǝskiniano na gero gataŋa na igi gatǝrinṯu eleđa ildi lerṯo ŋen ŋeicia, na gǝbeinu ltuŋga eđǝpe elo, ²⁷ na igi ŋen ŋero đeṯam ṯa gananaiđia đǝɽǝđǝnia ñoman pređ ŋen ŋanṯa ŋen ŋǝlëɽǝŋu ŋeicia orn cum ŋen ŋanṯa ŋen ŋǝleđa ŋeicia, ŋen ŋarno nǝlǝŋ nakǝl nǝkana. gënǝŋu giđu ṯia lomanto đǝge ndǝ gǝneiđǝnu bǝɽan gaɽo đǝɽǝđǝnia. ²⁸ đeṯam leđa ildi lëbia lëɽǝnu nǝlǝŋ nǝkana eŋen ŋal ganun, orn ŋen ŋǝđalǝfia đǝrǝmwa iŋi ŋeṯo al ganun nḏurṯu ŋǝbëɽi iđia igi giđǝnu gǝɽiñǝđeinu bǝɽǝbǝte ṯa aŋǝɽete elǝŋ gǝkana.

¹ fǝŋen iŋi igwaɽwatau, nëndr lǝgerṯr elǝŋ gǝkana igi gaɽo ṯia. gënǝŋu gaɽaŋalo nḏaŋ đǝŋaicǝba đǝkursi eŋǝlǝŋe irǝmwa elo irri rerṯo ŋaɽrwa, ² igi gǝđuɽǝđǝnṯia rǝmwa alo yëđǝñinu yatǝɽe yamiñaṯo lorǝba pređ na ekema eđeṯam isi yero yiđǝni eleđa orn elǝŋ rǝmwa riđu. ³ nǝlǝŋ nǝkana pređ nëɽǝnu ṯa anananaiđe đǝnaiđia na đǝɽǝđǝnia, na ŋen ŋafǝṯia ŋen đeṯam ṯa elǝŋ gǝkana igi aŋerṯe waŋge ṯa aŋǝnaiđe. ⁴ gǝbanṯa yesu gafo alo ṯa gero gǝɽia kana kwai kwai ŋen ŋanṯa kana yafo isi yënǝŋulu yananaiđia đǝnaiđia eŋen ŋal ganun. ⁵ orn yënǝŋulu yëbǝđia ŋǝmëɽria alo yatǝɽe isi yaɽo sura na usila yalo yatǝɽe yelo, ŋen ŋanṯa iliga ildi musa gwonaṯa gëbǝđia kema rǝmwa ralwaɽǝṯǝma, rǝmoṯo ŋen ṯa agëbǝđia kema garno sura đurri isi agërrǝŋeinu naiyǝn. ⁶ orn garno lǝgǝseiđiar, al masiya ganeinu đǝđuɽǝđǝnia iđi đaŋǝra kaiñ đamiñaṯo ŋen pređ ŋǝpǝnde, ŋen ŋarno đǝrreiđia eŋen iđi gënǝŋu gaɽiau al kufr đaŋǝra kaiñ đamiñaṯo đǝrreiđia eŋen đǝpǝnde, ŋen ŋanṯa đaɽaŋa eŋen rǝmwa rëɽu iŋi ŋaŋǝra kaiñ ŋamiñaṯo ŋen rǝmwa rëɽu pǝnde. ⁷ gǝbanṯa đǝrreiđia eŋen đananoŋ đero mǝnnano ṯa gerṯa đeṯam đǝrreiđia eŋen đwomǝn đeṯo. ⁸ ŋen ŋanṯa elǝŋ rǝmwa rero raŋǝra nano eŋen ŋǝleđa ǝllëɽǝŋu, rënǝŋu raṯa ṯa, seiđr, liga liđ alela ildi igiđi yǝwiđi đǝrreiđia eŋen đǝmaijǝn leđala lisrayil na leđala lǝyawuḏa. ⁹ đǝrreiđia eŋen iđi đaber điđ ađarneṯe đǝrreiđia eŋen ñagiđu eṯenandala lǝpǝnde ŋen igëndǝlo eraŋ ṯa elǝmiñe alo imasr. ŋen ŋanṯa lënǝŋulu lero laɽaŋa eđǝrreiđia eŋen ñagiđu igaŋgiṯǝlo. elǝŋ rǝmwa rënǝŋu ralwaɽo ŋen iŋi. ¹⁰ na cum raṯa ṯa, fǝđǝrreiđia iđi eŋen ñagiđi ñiđi leđala lisrayil nḏurṯu alo, igiđi yëɽi al ganun ilëɽǝñi eŋaṯǝɽa eŋen na igiđi elǝwërđi enare enen, na igiđi eɽeṯe rǝmwa eren na lënǝŋulu liđ alɽeṯe leđa ǝllëɽǝñi. ¹¹ na eđa gero gǝnǝŋ giđ aŋërrǝŋaici leđa larto na lorǝba ŋen ṯa, alǝŋeṯr elǝŋ rǝmwa, ŋen ŋanṯa leđa pređ liđ alaiñalǝŋeṯe ildi lǝrra na loɽra. ¹² ŋen ŋanṯa igiđi elǝgiaṯe ŋǝbaiya nano eŋen eŋen ŋǝɽiano na igaber igiđ yelëldǝŋǝđeini eŋen eŋen ŋeicia tǝŋ kwai kwai. ¹³ ndǝ rǝmwa rwaɽwata eŋen ŋǝđǝrreiđia eŋen đǝmaijǝn, rënǝŋu rëbǝđia đǝrreiđia eŋen đananoŋ đaɽo đǝpiano, na wagǝnǝŋ igi gǝpiano giđ aŋǝewarǝṯe na giđ aŋǝmǝndëđǝni.

¹ đeṯam đǝrreiđia eŋen đananoŋ đerṯo al ganun isi yërrǝŋaicia leđa ŋen ṯa labuŋṯia rǝmwa ṯau na đerṯo alo yatǝɽe yalo isi leđa labuŋṯiau rǝmwa. ² ŋen ŋanṯa kema yiđǝnu. na kema isi yǝndëuwǝrano yerṯo wagano gǝbendeieia isia na ṯarǝbesa ano na aieǝba ano igi gëɽǝnu rǝmwa nëiñua. alo isi ibernia alo yëđǝñinu yetǝɽe. ³ na kema yomǝn orǝba nano erena nëiñua ibernia alo yëđǝñinu yetǝɽe yamiñaṯo lorǝba pređ. ⁴ alo isi yerṯo ađuna yǝŋela iŋi ŋuɽǝni ŋen ŋanṯa đubwa đabǝṯwa elo, isi yiđǝnu aḏ ḏaǝbya, na yerṯo sanḏug ano iđǝrreiđia eŋen isi yǝtërnu pređ aḏ ḏaǝbya. sanḏug isi yerṯo lǝmbolua ano lǝḏaǝb ildi lerṯo al manna ano, na yerṯo lǝfra ano larun ildi luɽijǝnu nǝñwaṯen, na yerṯo ŋwandra ano iŋi ŋerṯo đǝrreiđiano eŋen đananoŋ iđi đǝwërđǝnu. ⁵ na sanḏug yerṯo laŋge eđǝpe eɽijan larno mǝlaiyǝka ildi laɽo ŋamǝla ṯa rǝmwa rafo alo isi ŋaɽrwaŋa. na lënǝŋulu lëɽu usila alo nano isi ibernia alo iđǝbëɽǝđia eŋen. orn ñagaber ñagaɽǝwađaṯa ñagwaɽwata ŋen ŋwaiña elaŋge ildi. ⁶ ŋen alo isi yatǝɽeinu ṯia kana pređ yǝbërnǝṯia ekema yǝndëuwǝrano ṯa aiyiđi ŋǝmëɽria eŋen. ⁷ orn eđa gero gǝbenṯia alo isi egwaŋano illi elǝŋ gǝkana na gënǝŋu gǝbërǝnṯia lomanto iṯǝli na gerṯa mǝɽǝmǝɽeñ orn ŋǝfǝniŋa iŋi ganaiđia ŋen ŋanṯaŋu na ŋen ŋanṯa ŋen ŋafo mǝnna ŋǝleđa pređ. ⁸ ŋenŋa iŋi usila gatǝɽe gǝbërrǝŋaiđia ŋen ṯa đađ iđi đabenṯia alo isi yëđǝñinu yetǝɽe yamiñaṯo lorǝba pređ đamǝlu đagagiđǝni ŋen kema yǝndëuwǝrano yerṯo ŋeniano mǝldin. ⁹ kema yaɽo sura iliga ildi. đǝnaiđia na đǝɽǝđonia lananeiđǝnu orn laŋge ildi laber laɽǝwađaṯa lëbǝđia nara nwaɽwata đeṯam nǝɽiñǝđeinu nǝleđa ildi lǝbuŋṯia rǝmwa, ¹⁰ ŋen ŋanṯa laŋge ildi lafo ikǝrǝŋ eŋen ŋǝlaŋge leđa ldǝsa na ldǝṯia na eŋen ŋǝđwasǝnia. ŋen iŋi ŋaŋǝno iŋi ŋafo ikǝrǝŋ liga lamǝlu leṯo ildi rǝmwa rëbǝđiau laŋge pređ ludǝrwaṯo. ¹¹ orn al masiya geṯo gaɽ elǝŋ gǝkana gǝlaŋge laŋǝra ildi leṯo điñǝđi. gënǝŋu gënṯu nǝŋǝmiñe ekema isi yaŋǝra na yaɽiñađeinu kaiñ yamiñaṯo orǝba, isi yero yiđǝnu raŋra rǝleđa, nṯia gerṯa yalo isi, ¹² nǝŋënṯi alo yëđǝñinu yetǝɽe yamiñaṯo lorǝba pređ lomanto đǝge. gënǝŋu gero gǝbenṯia ŋǝfǝniŋa ŋoɽo walla ŋǝñǝnḏǝri orn gënṯu ŋǝfǝniŋa ŋǝlëɽǝŋu nṯia giđn đapǝɽa đǝbǝɽǝbǝte ŋen ŋanṯa nëndr. ¹³ ndǝ ŋǝfǝni ŋoɽo na ŋǝñǝnḏǝri na đamǝndeinia ubwanaga gǝṯia laɽǝwađaṯa laṯoɽaṯa leđa ildi lǝtaŋa eŋen ŋǝđatǝɽe đaŋǝno, ¹⁴ ŋen ŋaɽo đeṯam kaiñ ŋamiñaṯo ŋen iŋi ṯa ŋǝfǝni ŋal masiya, igi gënǝŋu ganaiđo etam gǝlëɽǝŋu irǝmwa gaɽo đǝɽǝđǝnia igusila gǝlëɽǝŋu igi gǝbǝɽǝbǝte, ŋiđ aŋǝndwasr enare eŋǝmëɽria iŋi ŋǝmama ŋǝɽaiñ ṯa aliṯr rǝmwa ŋǝmëɽria irri ramǝṯia. ¹⁵ ŋen ŋafǝṯia al masiya gaɽo al kufr eđǝrreiđia eŋen đǝmaijǝn ṯa leđa ildi lurǝndǝđǝnu alneini đǝrraṯa eŋen iŋi ŋafo bǝɽǝbǝte iđi rǝmwa rëɽǝṯǝlo, ŋen ŋanṯa gënǝŋu gaiyo ṯa aŋǝndëbǝrr eŋen ŋeicia ŋiđǝnu eŋen ŋǝđǝrreiđia eŋen đananoŋ. ¹⁶ ŋen ŋanṯa ndǝ eđa gaṯađa laŋge ǝllëɽǝŋu ŋen đeṯam ṯa ŋen aŋërrǝŋeiđǝni ṯa eđa igi gaiyo. ¹⁷ ŋen ŋǝđǝṯađa ŋerṯo ŋeniano ndǝ eđa gaiyo đǝge, ŋen ŋanṯa ŋero ŋeniano ndǝ eđa gaṯađa laŋge gamǝṯo mǝldin. ¹⁸ nṯia đǝrreiđia eŋen đananoŋ đero đǝbǝđǝni ŋǝfǝni ŋero. ¹⁹ ndǝ musa gwalwaɽǝṯu leđa ŋen pređ ŋal ganun gënǝŋu gamo ŋǝfǝni ŋǝñǝnḏǝri na ŋoɽo ŋawaŋa na walaga gore na uɽiga gǝnǝŋ garno yëpi na gënǝŋu galiafǝrjǝđia ađam nano gǝđǝrreiđia eŋen na leđa nano pređ, ²⁰ nǝŋaṯa ṯa, fǝŋǝfǝni ŋǝđǝrreiđia eŋen iđi rǝmwa ralwaɽǝṯǝnde. ²¹ nṯia eum gënǝŋu gafǝrjǝđu ŋǝfǝni kema nano iđǝbuŋṯia na laŋge nano pređ ildi lǝŋen ŋǝđǝbuŋṯia rǝmwa. ²² đeṯam eŋen ŋal ganun laŋge lwaiña kaiñ illi lnenǝŋ liđǝnu ltǝɽe ŋǝfǝniŋa, na ndǝ ŋǝfǝni ŋero ŋirǝwa ŋen ŋeieia ŋaber ŋaɽǝwađaṯa ŋaŋgeini. ²³ ŋen ŋafǝṯia ŋen đeṯam ṯa sura elaŋge lelo aiyiđǝni yetǝɽe ŋenŋa iŋi. orn laŋge lelo lënǝŋulu liđǝnu ltǝɽe đǝɽǝđǝniađa iđi đaŋǝra đamiñaṯa lorǝba. ²⁴ ŋen ŋanṯa al masiya gero gǝbenṯia alo yëđǝñinu yetǝɽe isi yiđǝnu raŋra rǝleđa, isi yaɽo sura yalo eđeṯam, orn gënǝŋu gënṯu elo, alo irǝmwa đurri, ṯa aŋeṯa rǝmwa nëiñua ŋen ŋanṯa nëndr. ²⁵ gënǝŋu gero gǝbenṯia elo ṯa aŋǝnaneiđǝni ñoman ñwaiña ŋen ŋarno elǝŋ gǝkana gǝbërǝnṯia alo yëđǝñinu yetǝɽe yamiñaṯa lorǝba pređ nṯǝli pređ ŋǝfǝniŋa gerṯa ŋǝlëɽǝŋu, ²⁶ ŋen ŋanṯa gǝbanṯa ŋen ŋaɽo ṯia ṯa ŋen đeṯam gananeinu ŋen ŋubwa ŋeicia jaica jaica ŋen iliga alo yiđǝnu na bǝɽǝbǝte. orn fǝŋen ŋǝđeṯam ṯa gënǝŋu geṯo lomanto nḏurṯu alo ṯa aŋgeici ŋen ŋeicia đǝɽǝđǝniađa iđi đaɽo aŋǝno ilëɽǝŋu. ²⁷ đeṯam garno ŋen ŋëɽǝnu ṯa leđa pređ liđ alaiye lomanto orn liđ alirnḏeini ²⁸ nṯia eum al masiya ganeiđǝnu gaɽo đǝɽǝđǝnia lomanto đǝge ṯa aŋgeici ŋcn ŋeicia ŋǝleđa lwaiña, orn giđ aŋela ṯǝŋ, gerṯa eŋen ŋǝnǝŋ ŋǝŋen ŋeicia orn ṯa aŋëbǝri leđa đǝge ildi lamaṯurṯia kaiñ.

¹ ŋen ŋanṯa al ganun yerṯo usila gǝŋen ŋaŋǝra ikǝrǝŋ iŋi ŋiđ aŋela na gerṯa sura đurri, yënǝŋu yaber yaɽǝwađaṯa yëbǝđia leđa ṯa alǝɽiñǝđeini kwai kwai, ildi leṯo ṯa alǝbuŋṯi rǝmwa, đǝɽǝđǝniađa iđi đananeiđǝni nṯǝli nṯǝlia. ² gǝbanṯa đǝɽǝđǝnia điđu leđa ṯa alǝɽiñǝđeini ṯa đǝneiđǝnia đǝđǝɽǝđǝnia đamǝndëđǝnu, ŋen ŋanṯa gǝbanṯa leđa ildi lananaiđo đǝɽǝđǝnia liđǝnu lǝɽiñǝđeinu ṯa laber liđ alaliŋeṯe ŋen ŋeicia mǝldin. ³ orn eŋen ŋǝđǝɽǝđǝnia iđi leđa lǝlëldǝŋǝđeinia eŋen ŋeicia nṯǝli nṯǝlia. ⁴ ŋen ŋanṯa ŋǝfǝni ŋǝñǝnḏǝri na ŋoɽo ŋaber ŋaɽǝwađaṯa ŋaŋgeici ŋen ŋeicia. ⁵ ŋen ŋafǝṯia ndǝ al masiya geṯo alo gënǝŋu gaṯa ṯa, agafo agero agwonaṯa đǝɽǝđǝnia na đǝneiđǝnia, orn agaṯoɽaṯa aŋǝno ŋen ŋanṯa ñi. ⁶ đǝnaneiđǝnia đǝđwala đuɽǝnu na đǝɽǝđǝnia ŋen ŋanṯa ŋen ŋeieia laŋge ildi lero laŋiđia agaŋǝra nano. ⁷ orn igaṯa ṯa, seiđu, igeṯo ṯa yiđi ŋen agwonaṯa ya rǝmwa, ŋen ŋarno ŋen ŋǝwërđǝnu egađam gǝlaɽǝŋa ŋen ŋanṯa ñi. ⁸ gënǝŋu gaṯa ananoŋ ṯa, agafo agero agwonaṯa đǝɽǝđǝnia na đǝneiđǝnia na đǝneiđǝnia đǝđwala đuɽǝnu na đǝɽǝđǝnia ŋen ŋanṯa ŋen ŋeicia na laŋge ildi lero laŋiđia agaŋǝra nano. laŋge ildi lananeiđǝnu eŋen ŋal ganun. ⁹ orn gaṯa nḏurṯu ṯa, seiđu, igeṯo ṯa yiđi ŋen agwonaṯa. nṯia gënǝŋu gaŋgeicu ŋen ŋananoŋ ṯa ŋen ŋǝnḏurṯu aŋǝrraṯe eŋen iŋi. ¹⁰ na ŋenŋa iŋi rǝmwa rafo ronaṯa nëndr lǝgiđǝnr lǝgatǝɽr đǝneiđǝniađa đaŋǝno iyesu masiya đǝlomanto đǝge. ¹¹ na kana pređ yaṯurwa eŋǝmëɽria eŋen ñoman pređ. yananaiđia đǝɽǝđǝnia iđi đaber đamǝlëđǝni iđi đaber đaɽǝwađaṯa đǝŋgeicia ŋen ŋeicia kwai kwai. ¹² orn ndǝ al masiya ganaiđo đǝɽǝđǝnia đunto ŋen ŋanṯa ŋen ŋeicia ŋen ŋanṯa bǝɽǝbǝte gënǝŋu gaɽaŋo alo nḏaŋ đǝŋaieǝba đǝrǝmwa ¹³ ṯa aŋǝđuri ŋen leđa ildi lamagea alɽeṯe waŋge gǝrǝmanǝŋ rǝlëɽǝŋu. ¹⁴ ŋen ŋanṯa đǝneiđǝniađa đunto gënǝŋu giđu leđa ildi lǝbǝđǝni ltǝɽe ṯa lǝɽiñǝđeinu bǝɽǝbǝte. ¹⁵ na cum usila gatǝɽe gamǝđaṯǝndr eŋen iŋi, ŋen ŋanṯa gwalwaɽo ananoŋ ṯa, ¹⁶ elǝŋ rǝmwa raṯa ṯa, fǝđǝrreiđia eŋen iđi ñagiđi ñiđǝlda nḏurṯu alo. igiđi yëɽi al ganun ilëɽǝñi enare enen na igiđi elǝwërđi eŋaṯǝɽa eŋen. ¹⁷ orn ralwaɽo nḏurṯu ṯa, igaber igiđi yǝlëldǝŋǝđeini eŋen eŋen ŋeicia na eŋen eŋen ŋafo mǝnna tǝŋ kwai kwai. ¹⁸ ŋen ŋanṯa ndǝ ŋen ŋeicia na ŋen ŋafo mǝnna ŋǝŋgeinu đǝge, đǝɽǝđǝnia ŋen ŋanṯa ŋen ŋeicia đero đafo mǝldin. ¹⁹ lorldaiñ, nëndr lǝgaɽǝwađaṯar lǝgǝbenṯiar alo isi eđeṯam isi yëđǝñinu yetǝɽe yamiñaṯo lorǝba pređ đëɽǝniađa đǝñano eŋen ŋǝŋǝfǝni ŋǝyesu, ²⁰ eđađ iđi đǝmaijǝn na đerṯo ŋeniano iđi gënǝŋu giṯǝndr egeren, fegaŋǝno ilëɽǝŋu, ²¹ na lǝgerṯr elǝŋ gǝkana igi goɽra gaŋǝra na gerṯo ŋǝlǝŋe egeɽa gǝrǝmwa. ²² ŋen ŋafǝṯia aljomaṯr rǝmwa nano narna nuđǝrwaṯo eŋen na đonaṯađa đǝɽiñǝđeinu na narna niđǝnu natǝɽe iđǝskinia đǝŋen ŋeieia, na aŋǝnoiya ywasǝnu ŋawaŋa ŋatǝɽe. ²³ alëndr kaiñ đǝɽwata eŋen iŋi lǝgauṯurṯiar, đǝtësǝnia đero, ŋen ŋanṯa rënǝŋu irri rëɽu ŋen riđ ariđi đeṯam. ²⁴ aɽrǝmoṯr ŋen ṯa altuđinr ṯa alubwiđr na aliđr ŋǝmëɽria ŋaŋǝra. ²⁵ alerṯr lǝgaŋgiṯiar ŋen ŋǝđararraiđia, garno leđa lǝmaṯan lëbǝđia ṯia, na alonḏeicǝnr nṯia kaiñ ŋen ŋanṯa ñagǝseicia loman lakǝl lwëtu leṯǝnde nano. ²⁶ ndǝ nëndr lǝgaŋǝnṯr đaliŋeṯa đǝŋen ŋǝđeṯam eŋaṯǝɽa orn lǝganeđr ŋen iŋi na lǝgëbǝđiar ŋen ŋeicia đǝɽǝđǝnia đero đǝṯënu đaɽǝwađaṯa đǝneiđǝni ŋen ŋanṯa ŋen iŋëndr ŋeicia, ²⁷ orn lǝgerṯr đakǝme iđi điđ ađela na đeiciano iđi điđ ađase leđa ildi lagea rǝmwa ŋen ŋarno isia na laŋge ildi latuđi ŋǝđaiña kaiñ. ²⁸ eđa igi gagero al ganun imusa gënǝŋu gaɽiñǝnu ŋǝbaiya ŋero ndǝ leđa liɽijan walla liɽijin lamama đamǝđaṯa lamagea. ²⁹ ñagaṯa đakǝme đinia kaiñ đaɽo ṯau iđi đaŋǝra egeđa igi garldǝđaṯa iđia gǝrǝmwa alo na igi gađama ŋǝfǝni ŋǝđǝrreiđia eŋen nǝŋaṯa ŋǝfǝni iŋi ŋǝtaŋa iŋi gënǝŋu giđǝniya gatǝɽe, na igi gađamǝeo usila gatǝɽe eŋen igi gananaiđia đǝbuŋṯia đǝrǝmwa? ³⁰ ŋen ŋanṯa lǝgaliŋeṯr rǝmwa irri raṯa, đǝrria ŋen đaɽo đǝlëɽǝñi, igiđi ekuɽǝbiṯi leđa leicia đapǝɽa, na irri raṯa tǝŋ, elǝŋ rǝrnwa riđ arakǝme leđa ǝllëɽǝŋu. ³¹ fǝŋen iŋi ŋëbǝđia leđa liđǝñalo kaiñ ṯa rǝmwa arǝlëndi irri ramǝṯia. ³² orn lëldǝŋǝđeinr eñoman ñananoŋ ndǝ ñagëndu ŋen ŋǝrǝmwa na ñagaɽiñaṯo ŋen ŋubwa ŋeicia ŋinia iŋi ñagananeinu, ³³ liga ñagađamǝcǝnu ŋen na ñagananeinu ŋen ŋubwa ŋeicia leđa nëiñua na liga ñagafo ñagaɽaŋa leđala ildi lananeinu ŋen iŋi ŋeieia. ³⁴ ŋen ŋanṯa ñaŋ ñagagiaṯa leđa ŋabaiya nano ildi lëndǝnu isijǝn na ñagaŋǝnṯu ŋen đaŋǝrađa nano ndǝ leđa lamamo laŋge pređ eldalo, ŋen ŋanṯa ñagaliŋeṯo ṯa ñagerṯo laŋge laŋǝra kaiñ lamiñaṯo laŋge ildi lǝmamǝnu, ildi eldalo na liđ alfeṯe bǝɽǝbǝte. ³⁵ ŋen ŋafǝṯia ñerṯe ñagauwǝṯa đëɽǝnia đǝñano eđalo iđi điđ ađǝmame đapǝɽa đaŋǝra đoɽra. ³⁶ ŋen ŋanṯa ŋen đeṯam ṯa ñagaɽiñaṯa ŋen, ṯa ñiđi ŋen iŋi rǝmwa ronaṯa na ṯa ñaneini ŋen rënǝŋu rëɽǝṯu leđa ǝllëɽǝŋu. ³⁷ na iliga ltefr, al masiya igi giđ aŋela, đeṯam giđ aŋela na gaber giđ aŋǝđuri. ³⁸ orn eđa igi gǝlëɽǝñi igi guđǝrwaṯo eŋen giđ aŋarnǝṯe đonaṯađa na ndǝ gënǝŋu goɽǝbaṯa nḏurṯu ara gǝlëɽǝñi gaber gaŋǝra nano iŋu. ³⁹ orn nëndr lǝgerṯr lǝgǝleđar ildi lokoɽǝbaṯa nḏurṯu ildi lamǝndëđǝni orn lǝgǝleđar ildi lerṯo đonaṯa nṯia nusila enen nëbǝrni.

¹ đonaṯa đaɽo đaliŋeṯa ṯa laŋge ildi lǝgauṯurṯiar đeṯam liđ alfeṯe, na đëndia ŋen ŋǝlaŋge ildi lǝgaberr lǝgaɽǝwađaṯar lǝgǝldǝseiciar. ² ŋen ŋanṯa rǝmwa raŋǝnṯu leđa lǝpǝnde ŋen ŋanṯa đonaṯa eđen. ³ đonaṯađa lǝgaliŋeṯa ṯa alo yiđǝnu ŋenŋa ŋǝrǝmwa, nṯia laŋge ildi lǝgǝldǝseiciar lafo liđǝnu elaŋge ildi lǝgaberr lǝgaɽǝwađaṯar lǝgǝldǝseiciar. ⁴ ŋen ŋanṯa abil gerṯo đonaṯa, gënǝŋu ganaico rǝmwa đǝɽǝđǝnia đaŋǝra đamiñaṯo đǝɽǝđǝnia đǝkaiyin, na eŋen iŋi abil gaŋǝnǝnṯu guđǝrwaṯo eŋen rǝmwa nëiñua ŋen ŋanṯa rǝmwa raŋǝnṯǝma ŋen ŋanṯa đǝɽǝđǝnia gënǝŋu ganaiđo. gënǝŋu gaiyo orn gwaɽwata mǝldin đonaṯađa đǝlëɽǝŋu. ⁵ ŋen ŋanṯa aknuk gerṯo đonaṯa, gënǝŋu gǝbeinu elo ṯa aŋerṯe gǝbenṯia eŋǝɽaiñ na gënǝŋu gero gǝfiđǝni ŋen ŋanṯa rǝmwa rafo ramama. liga gënǝŋu gamǝlu gǝmǝni ŋen ŋǝlǝŋinu ṯa gënǝŋu giđu rǝmwa raŋǝra nano. ⁶ eđa gero garǝwađaṯia gëbǝđia rǝmwa raŋǝra nano ndǝ gero đonaṯa. ŋen ŋanṯa ndǝ eđa gaburgwađaṯa rǝmwa nano ŋen đeṯam gënǝŋu gǝbenda ŋen ṯa rënǝŋu rëni na ṯa rënǝŋu rapǝɽa leđa ildi labapwaiña. ⁷ rǝmwa rabǝɽia nua nano elaŋge ildi lamǝlu leṯo na nua gano ŋen ŋanṯa gerṯo đonaṯa, nǝŋiđi eɽa gǝlala nǝŋau nṯia gëbǝru liđia na wasenanda. gënǝŋu gakǝmo alo ŋenŋa iŋi na gaɽo eđa igi gǝrraṯa eŋen ŋuđǝrwaṯo iŋi ŋafo đonaṯađa. ⁸ ŋen ŋanṯa ibrayim gerṯo đonaṯa, gënǝŋu gano ŋen ndǝ gundǝđǝnu ṯa aŋǝmiñe alo ilëɽǝŋu na aŋënṯi alo yarto isi giđ aŋǝneini. gënǝŋu gaijǝba ṯa gabǝṯa ŋga orn gamiño. ⁹ ŋen ŋanṯa gerṯo đonaṯa, gënǝŋu gaɽaŋo alo isi yëɽǝnṯǝma ŋen ŋarno ilia, na gënǝŋu lafo ikema isagga na yagubga lënǝŋulu ildi ŋen ŋëɽǝnṯǝlo cum. ¹⁰ ŋen ŋanṯa gënǝŋu gaṯurṯu irnuŋ igi gerṯo ađuna isi yaɽaŋa bǝɽǝbǝte igi rǝmwa rwađa na rëbǝđia. ¹¹ ŋen ŋanṯa sara gerṯo đonaṯa, ganeinu đonḏǝṯa nǝŋwonḏaiee nǝŋǝlǝŋe iđia ŋen gënǝcu đǝbǝɽi ŋen ŋanṯa gënǝŋu gëndu ŋen ṯa ndǝ rǝmwa rëɽu ŋen, ŋen ŋǝlëɽǝŋu ŋiđ aŋfeṯe đeṯam. ¹² nṯia egeđa gǝnǝŋ, na gënǝŋu garno eđa gaiyo, leđa lǝlǝŋǝnu lwaiña kaiñ larno ropa elo na larno ebia eđǝbarlda. ¹³ leđa ildi pređ laiyo laŋǝra nano ŋen ŋanṯa lerṯo đonaṯa. lënǝŋulu lero laneini ŋen iŋi ŋëɽǝnu orn laseicu nëiñua nwaldaŋ ldaŋǝnṯi, nṯia lënǝŋulu laṯa laɽ ilia na leđa liŋami alo. ¹⁴ leđa ildi laɽwata ṯia lǝbërrǝŋaiđia ŋen ṯa labapwaiña alo ṯa aliđi esen. ¹⁵ gǝbanṯa lënǝŋulu lwonaṯa loɽǝbaṯa alo isi lamiñau ṯa liga lëni ṯa aloɽǝbǝđiau. ¹⁶ orn đeṯam lënǝŋulu labapwaiña alo yaŋǝra kaiñ yamiñaṯo alo isi, na alo isi labapwaiña yafo elo. ŋen ŋafǝṯia rǝmwa raber rirǝwano ṯa arënǝjǝni rǝmwa eren na rënǝŋu raṯoɽaṯo irnuŋ ŋen ŋanṯa ŋulu. ¹⁷ ŋen ŋanṯa ibrayim gerṯo đonaṯa, gënǝŋu ganaiđo isag gaɽo đǝɽǝđǝnia ŋen ginḏeinu. gënǝŋu igi ŋen ŋëɽǝnṯǝma gameđǝño ṯa aŋǝnaiđe iđia gǝlëɽǝŋu gunto gaɽo đǝɽǝđǝnia, ¹⁸ gënǝŋu igi ŋen ŋǝwërđǝnu ŋen ŋanṯa ŋu ṯa, ñere ñǝlaɽǝŋa ñiđ aiñënǝjǝni ñere ñisag. ¹⁹ ibrayim gëndu ŋen ṯa rǝmwa raɽǝwađaṯa ratuđi leđa eŋǝɽaiñ. nṯia gënǝŋu guɽǝbinṯu isag ŋen ŋarno eđa gatuđinu eŋǝɽaiñ. ²⁰ ŋen ŋanṯa isag gerṯo đonaṯa, gënǝŋu gabuŋṯu yagub na isu ŋen ŋanṯa liga lamǝlu leṯo. ²¹ ŋen ŋanṯa yagub gerṯo đonaṯa, ŋen gwonaṯa gabaiya gënǝŋu gabuŋṯu liđia liɽijan lǝyusǝf na gabuŋṯu rǝmwa ŋen guđǝrinṯu lǝfrala alo. ²² ŋen ŋanṯa yusǝf gerṯo đonaṯa, ŋen gaɽiñađaṯo ŋuṯwëɽi đǝge gwaɽwata eŋen ŋǝleđa lisrayil lamiña alo imasr na gwalwaɽǝṯo leđa eŋen ŋaŋǝno ilëɽǝŋu liđ alɽaicau. ²³ ŋen ŋanṯa lǝŋgen na eṯen musa lerṯo đonaṯa, lënǝŋulu lalǝbicǝma nubwa niɽijin ŋen ŋanṯa laliŋeṯo ṯa iđia gaŋǝra kaiñ na lero liđǝña al ganun yelǝŋ. ²⁴ ŋen ŋanṯa musa gerṯo đonaṯa, ŋen goɽra đǝge, gënǝŋu ganeđo ṯa gënǝjǝnu iđia gǝŋere ŋǝfero, ²⁵ ŋen ŋanṯa gaṯa ŋen lananeini ŋen ŋubwa ŋeicia leđala ɽrǝmwa ŋaŋǝra ŋamiñaṯo ŋen ṯa gananeini đaŋǝra nano eŋen ŋeicia iđi đamǝndëđǝni taltal. ²⁶ gënǝŋu gëndu ŋen ṯa ŋen ŋubwa ŋeicia ŋananeiđǝnu ŋen ŋanṯa al masiya ŋaŋǝra kaiñ ŋamiñaṯo laŋge pređ laŋǝra lalo imasr, ŋen ŋanṯa gënǝŋu galiŋeṯo đapǝɽa. ²⁷ ŋen ŋanṯa musa gerṯo đonaṯa, gënǝŋu gamiño alo imasr na gero giđǝña đeieiano đelǝŋ ŋen ŋanṯa gaɽiñaṯa ŋen garno gǝseicia rǝmwa jaica jaica irri leđa lero laɽǝwađaṯia laseicia. ²⁸ ŋen ŋanṯa gerṯo đonaṯa, gënǝŋu giđu ŋen ŋal fissa na gafǝrǝjǝđia ŋǝfǝniŋa inëuwǝr ṯa mǝlaiyǝka iđi điđ ađela ađeɽiñe ñere ñaɽo ñǝɽwa ađǝlǝŋgiṯi. ²⁹ ŋen ŋanṯa leđa lerṯo đonaṯa lënǝŋulu luɽǝđu igal bar ibernia yore garno nḏuđa đonḏǝṯo, orn ndǝ leđa lalo imasr linḏeieu ṯa lëbǝđia ṯia lënǝŋulu laiyo eŋau. ³⁰ đonaṯađa uṯa igi gađaiđia alo yariya giɽu ndǝ leđa lisrayil labakađeiđia ñoman đenǝŋ nǝñamiñe ñeɽijan. ³¹ ŋen ŋanṯa rayab igi gaɽ alaiñ gerṯo đonaṯa, gënǝŋu gero gabaiya leđala ildi laɽ ndǝl, ŋen ŋanṯa gënǝŋu gaŋǝnṯu leđa lǝđweinu ŋamǝɽa. ³² na igǝbaṯa ṯau ṯǝŋ ? ŋen ŋanṯa liga lero igwaɽwata eŋen ŋǝjiḏawun na ŋǝbarag na ŋǝsamsun na ŋǝyafṯa na ŋǝḏawuḏ na ŋǝsamwil na ŋal anbiya. ³³ ŋen ŋanṯa leđa ildi lerṯo đonaṯa lënǝŋulu lađamo ŋǝlǝŋe ɽetǝɽeteo na liđu ŋen ŋuđǝrwaṯo na laneinu ŋen rǝmwa rëɽǝṯǝlo. lënǝŋulu landijǝđu ëiñua yǝyëbia, ³⁴ na landijǝđu ŋabǝɽa ŋisia, ldǝmiñe ṯa alǝɽiñǝm yoperreya. iđëbia lënǝŋulu lafiđu đonḏǝṯa kaiñ, na ldiđǝni loɽra lonḏǝṯo eđǝbwaiñǝđia na ldiđi leđa ldǝlëđiñǝṯia ildi lagielo. ³⁵ liji ɽrlda laneinu leđa elden ildi laiyo latuđinu eŋǝɽaiñ. leđa lǝmaṯan laneinu ŋen ŋubwa egaŋǝno, ŋen ŋanṯa laneđa lëbǝria ŋen, ṯa alneini đatođa đaŋǝra đamiñaṯa lorǝba. ³⁶ leđa lǝmaṯan lađamǝnu eŋen na lǝmaṯan lëpǝnu na lǝmaṯan lǝkëndǝnu uriđaga na lǝmaṯan lǝkëɽǝnu isijǝn. ³⁷ lënǝŋulu lamǝndeinu ŋwandraŋa lǝmaṯan, na lǝmaṯan lagǝlǝđǝniano, na lǝmaṯan labirnḏeinu kaiñ, na lǝmaṯan laɽiñǝnu yoperreya. lënǝŋulu lakaldaieo lëɽǝnu erna nano iyaŋala na yoɽo. lënǝŋulu lero laŋge ano, na laginu na labuđinu. ³⁸ alo yero yarijađaṯa ŋen ŋanṯa leđa ildi. lënǝŋulu lakaldaico eđǝñwa na naiyǝn ldǝfeṯe enǝbwa na ejǝṯo alo. ³⁹ rǝmwa raŋǝnṯu leđa ildi pređ ŋen ŋanṯa đonaṯa eđen, orn lënǝŋulu lero laneini ŋen rǝmwa rëɽu ⁴⁰ ŋen ŋanṯa rǝmwa rëɽǝṯǝndr ŋen ŋaŋǝra ŋamiñaṯo orǝba, ṯa lënǝŋulu alerṯe lǝbǝđǝni lǝɽiñǝđeini alǝsoŋ nëndr lǝgerr.

¹ nṯia ŋen ŋanṯa lǝgerṯr leđa lwaiña kaiñ ildi laɽo đamǝđaṯa ildi lëđiṯǝndr, almiñr ŋen pređ nano iŋi ŋǝndǝgiriar na ŋen ŋeieia iŋi ŋëndǝndr kaiñ na alobǝđr đaɽiñaṯađa ŋen iđǝbaparjǝđia iđi lǝgënǝjǝndrau. ² aɽrǝmoṯr yesu igi gatuđu đonaṯa iđëndr na gëbǝđia đǝɽiñǝđeini. gënǝŋu gaɽiñaṯa ŋen ŋǝđuɽi nǝŋǝđame đirǝwano ŋen ŋanṯa đaŋǝra nano iđi đëɽǝnṯǝma na gënǝŋu gaɽa-ŋalo nḏaŋ đaŋaicǝba đǝkursi eŋǝlǝŋe ŋǝrǝmwa. ³ lëldǝŋǝđeinr eŋen ŋǝlëɽǝŋu igi gaɽiñaṯa ŋen ŋubwa ŋeieia iŋi leđa leicia lanaicǝma, ṯa ñerṯe ñagaiewara walla ñagofǝđiano. ⁴ eđǝgea ŋen ŋeieia eđalo đeṯam ñagađwađa orn ñagamǝlu ñagirǝwa ŋǝfǝni eŋalo. ⁵ ñagaijǝbeinu eŋen iŋi ŋǝndnǝci ñere, iŋi ŋaṯa, ya ŋere ŋǝlëɽǝñi, ŋerṯe agađama đaṯoɽaṯa đelǝŋ rǝmwa, na ŋerṯe agofǝđiano ndǝ rënǝŋu raŋagǝriñaṯa. ⁶ ŋen ŋanṯa elǝŋ rǝmwa raṯoɽaṯa leđa pređ ildi rubwaliya na raṯoɽaṯa leđa pređ ildi riđǝlo laɽo liđia ǝllëɽǝŋu. ⁷ fǝŋen ŋanṯa đaṯoɽaṯa iđi ñagaɽiñaṯa ŋen. rǝmwa rǝndǝnanaicia ŋen garno liđia. ŋen ŋanṯa fiđia guŋga igi eṯen gaber gamaṯoɽaṯa? ⁸ ndǝ ñagaber ñagaṯǝɽeinu garno liđia pređ lǝđeṯam ñagaɽo liđia larto na gerṯa liđia lǝđeṯam. ⁹ na cum lǝgafr lǝgerṯr papanda lalo ildi laṯoɽaṯǝndr na lǝgubwarldiya. nṯia gerṯa ŋen đeṯam ṯa aldǝnaṯr eṯen gǝnusila inëndr orn alamǝṯr? ¹⁰ papanda laṯoɽaṯǝndr iliga lobǝlano eŋen eŋen bǝɽan, orn rǝmwa rǝndaṯoɽaṯar eŋen iŋëndr ṯa arǝndamǝđaṯr ṯa aldǝtǝɽeṯǝrlda. ¹¹ iliga đaneiđǝnau đaṯoɽaṯa pređ đaber đǝndiđiar lǝgaŋǝrar nano. đǝndiđiar lǝgwanar. orn iliga lǝnḏurṯu đǝlǝŋa ŋen ŋuđǝrwaṯo eleđa ildi lërrǝŋeiniya. ¹² ŋen ŋafǝṯia tuđir raŋ eralo irri rildiano na onḏeicar ndria enalo ini nobano, ¹³ na idr rad ruđǝrwaṯo ŋen ŋanṯa rǝmanǝña eralo ṯa đǝmanǝña iđi đaɽ ebǝco ađerṯe đamiña orn ṯa ađeiđini. ¹⁴ iđr ŋen kaiñ ṯa ñamǝṯe iđëuṯaralo leđala pređ, na ṯa ñatǝɽeṯe, ŋen ŋanṯa leđa lero ltǝɽe laber liđ alseici elǝŋ rǝmwa. ¹⁵ rǝmojǝđr eŋen ṯa eđa gǝnǝŋ aŋerṯe gǝfia eñaŋ gero gǝneini đǝbuŋṯia đǝrǝmwa. rǝmojǝđr eŋen ṯa ŋen ŋeicia ŋarno laŋge ildi lobǝđo laɽo ŋǝsia aŋerṯe ŋatođa na ŋëbǝđia đǝgerđe na ŋëbǝđia lǝmaṯan eñaŋ ñagataŋau. ¹⁶ rǝmojǝđr eŋen ṯa eđa gǝnǝŋ eñaŋ aŋerṯe gëbǝđia mǝnna eŋen ŋǝđaɽaŋa lijila ɽrǝto walla ganeđa rǝmwa ŋen ŋarno isu igi giliđu ŋen ŋǝđǝrraṯa eŋen đǝlëɽǝŋu ŋen ŋanṯa ŋǝsa ŋǝlomanto. ¹⁷ ŋen ŋanṯa ñagaliŋeṯo ṯa iliga lǝnḏurṯu ndǝ gwonaṯa gǝrraṯa iđǝbuŋṯia gënǝŋu ganiđǝnu ŋen ŋanṯa gero gafiđia liga ṯa gaŋgeiciau ŋen ŋǝlëɽǝŋu ŋeicia, đeṯam ndǝ gabapwaiña liga ṯia ŋwalŋa. ¹⁸ ñaŋ ñagero ñageṯo aiyǝn nano iberni sina isi ñagaɽǝwađaṯa ñagǝbǝra, na isia nano isi yirrǝṯu, na ŋǝrǝmia nano na đabera nano iđi đatođo, ¹⁹ na ole nano yǝđal na ole nano igi ŋen ŋǝlëɽǝŋu ŋiđu leđa lǝbekeɽǝđia ṯa ŋen ŋero ŋwomǝn tǝŋ aŋwalwaɽǝnṯǝlo, ²⁰ ŋen ŋanṯa lënǝŋulu lero laɽǝwađaṯa laɽiñaṯa ŋen iŋi ŋaneiđǝnu ṯa, ndǝ đwala walla wagǝnǝŋ đǝbǝra aiyǝn ŋen đeṯam ṯa ađǝmǝndeini ŋwandraŋa. ²¹ na laŋge ildi lënǝŋulu laseicǝlo liđǝlo liđǝñalo kaiñ ṯia ṯa musa gaṯa, igagǝđiaŋǝno kaiñ ŋǝđaiñaŋa. ²² orn ñaŋ ñageṯo aiyǝn nano ibernia siyun, irnuŋ nano gǝrǝmwa irri ramǝṯia, falo yursalim yelo, na mǝlaiyǝka nano ywaiña kaiñ isi yaber yaɽǝwađaṯa ywumađeini. ²³ ñageṯo eđǝrraiđia đoɽra đǝleđa ildi lǝlǝŋǝnu ananoŋ ildi lǝwërđǝnu elo, na ñageṯǝma nano igi gǝbirnḏeicia ŋen, igi gaɽ rǝrnwa eleđa pređ na elaŋge pređ, na ñageṯo nusila nano nǝleđa luđǝrwaṯo eŋen ildi liđǝnu laɽiñǝđeinu. ²⁴ ñageṯo yesu nano igi gaɽ al kufr iđǝrreiđia eŋen đǝmaijǝn igi ŋǝfǝni ŋǝlëɽǝŋu ŋǝfǝrǝjǝđǝnu ŋerṯo ŋen nano ŋaŋǝra ŋamiñaṯo ŋǝfǝni ŋabil. ²⁵ rǝmojǝđr eŋen ṯa ñagaber ñaganeđa rǝmwa irri raɽwata. ŋen ŋanṯa ndǝ leđa lero lamiña eđakǝme ŋen laneđo irri rabǝɽelo nano alo đeṯam kaiñ nëndr lǝgaber lǝgiđr almiñr eđakǝme ndǝ lǝganeđar irri rǝndǝbǝɽiar nano elo. ²⁶ iliga lakǝl lǝpǝnde ole gǝlëɽǝŋu gatësu alo, orn điñǝđi rënǝŋu rëɽu ŋen ṯa, lomanto tǝŋ igiđi yǝtësi gerṯa alo ikǝrǝŋ orn elo cum. ²⁷ ndǝ ralwaɽa, lomanto tǝŋ, rënǝŋu ramama ŋen ṯa laŋge ildi laɽǝwađaṯa lǝtësǝni liđ alǝmǝndëđǝni garno laŋge liđǝnu, ṯa laŋge ildi laber laɽǝwađaṯa lǝtësǝni liđ alṯëni. ²⁸ ŋen ŋafǝṯia alǝŋërṯr rǝmwa nanojaieajaiea ŋen ŋanṯa lǝganeinr ŋǝlǝŋe iŋi ŋaber ŋaɽǝwađaṯa ŋatësǝni, nṯia aliṯr rǝmwa ŋǝmëɽria ŋope mǝldin đubwađa na ŋǝđaiñaŋa ²⁹ ŋen ŋanṯa rǝmwa irëndr rarno isiya isi yoɽa.

¹ ŋgiṯr đubwiđia ađǝfeṯe mǝldin. ² ñerṯe ñaŋgiṯi ŋen ṯa ñagǝbencia leđa egeɽa ildi liŋamia, ŋen ŋanṯa ṯia leđa lǝmaṯan lënǝcu mǝlaiyǝka eneɽa laijǝba. ³ lëldǝŋǝđeinr elorldalanda ildi lëndǝnu isijǝn ŋen ŋarno ñaŋ ñagëndǝnǝlda isijǝn. lëldǝŋǝđeinr elorldalanda ildi lananeini ŋen ŋubwa ŋeicia ŋen ŋanṯa ñagafo egaŋǝno cum. ⁴ ŋgiṯr leđa pređ alëndi ŋen ŋǝđǝmamǝđia ŋǝđaiñaŋa na ŋgiṯr đandra iđǝmamǝđia ađǝɽeṯe đatǝɽe, đataŋa đero kwai kwai. rǝmwa riđ arakǝme leđa pređ ildi lagera ŋen ŋǝđǝmamǝđia na ildi laɽo nalaiñ, ildi laɽaŋa lijila ɽrǝto. ⁵ ñerṯe ñagubwa al gǝrusya, na beṯr elaŋge ildi ñagerṯǝlo, ŋen ŋanṯa rǝmwa raṯa ṯa, igaber igiđi yiŋgiṯi ṯa igǝndamicia na igaber igiđi endǝneđe. ⁶ ŋen ŋafǝṯia lǝgaɽǝwađaṯar lǝgǝbaṯar đëɽǝniađa đǝñano ṯa, felǝŋ rǝmwa irri riñamǝđaṯa, igaber igiđi yiđǝñalo. fǝwande igi leđa laɽǝwađaṯa lëbǝđia lagiaiñi? ⁷ lëldǝŋǝđeinr enǝlǝŋ ini enalo nǝpǝnde ini nërrǝŋaicǝnde ŋen ŋǝrǝmwa. lëldǝŋǝđeinr eđamǝndëđǝnia đǝđamǝṯia eđen na irnḏeier đonaṯa eđen. ⁸ yesu masiya gaɽo gunto eŋen errega na điñǝđi na bǝɽǝbǝte. ⁹ ñerṯe ñagamiñinia ŋenŋa ŋarto iŋi ŋaɽo ɽetǝɽeteo, ŋen ŋanṯa ŋen ŋaŋǝra ṯa nare enalo anonḏeicǝni đonḏǝṯađa đusila đǝrǝmwa na gerṯa ŋenŋa ŋǝđǝsa, iŋi ŋero ŋamǝđaṯo leđa ildi lëndu. ¹⁰ nëndr lǝgerṯr ađuna isi leđa ildi lađuɽǝđǝnṯia kema đǝđǝbuŋṯia yal yawuḏ laber laŋginia alasau. ¹¹ aŋǝno iđwala iđi elǝŋ gǝkana gǝmama ŋǝfǝni eŋen alo yëđǝñinu yetǝɽe yamiñaṯa lorǝba pređ, ŋaɽo đǝɽǝđǝnia ŋen ŋanṯa ŋen ŋeicia, aŋǝno isi yuɽeini irnuŋ ndëuwǝr. ¹² nṯia eum yesu ganeinu ŋen ŋubwa ŋeieia irnuŋ ndëuwǝr ṯa aŋatǝɽe leđa ŋǝfǝniŋa ŋǝlëɽǝŋu. ¹³ ŋen ŋafǝṯia almiñaṯǝmar nano irnuŋ ndëuwǝr alǝɽiñaṯr đađama ŋen ŋubwa ŋen ŋanṯaŋu. ¹⁴ ŋen ŋanṯa lǝgerr irnuŋ ëli igi gǝbǝɽǝbǝte, orn lǝgabapwaiñar irnuŋ igi giđ aŋǝɽeṯe igëndr. ¹⁵ alnanaiđr đǝɽǝđǝnia igal masiya iđi đaɽo đamia irǝmwa. fole igi gëiñua igi gananaicia irǝŋ gǝrǝmwa ŋaɽrwa. ¹⁶ ñerṯe ñaŋgiṯi điđia đǝŋen ŋaŋǝra na đǝkarnǝđia đǝlaŋge eldalo, ŋen ŋanṯa đǝɽǝđǝnia ṯia đëbǝđia rǝmwa raŋǝra nano kaiñ. ¹⁷ naṯr leđa laɽnda ikanisa na naicǝrldo ntam enalo. ŋen ŋanṯa lënǝŋulu larǝmoṯwa nusila enalo garno leđa ildi liđ aluɽǝbiṯi rǝmwa ŋen. ŋgiṯǝlo aliđi ṯia đaŋǝrađa nano na gerṯa đwanađa ŋen ŋanṯa ŋen ŋǝđwana ŋaber ŋiđ aŋǝndamǝđaṯe kwai kwai. ¹⁸ ṯurṯr rǝmwa eŋen eŋaiñ. ŋen ŋanṯa nara enaiñ nero nǝndǝsǝki, na ñagwonaṯa ŋen eŋaiñ ṯa aŋuđǝrwaṯe elaŋge pređ, ¹⁹ igandeɽǝđia ṯa ñiđi ṯia kaiñ ṯa igiđi endoɽǝbaṯe nano taltal. ²⁰ igǝbeɽǝđia ṯa rǝmwa irri rananaiđia đëuṯaralo na irri ratuđu elǝŋ igëndr yesu eŋǝɽaiñ igi điñǝđi gaɽo eđa goɽra gaŋǝra igi gǝsi yaŋala ŋǝfǝniŋa iŋi gënǝŋu gëndeiciya đǝrreiđia ŋen đǝmaijǝn iđi đafo bǝɽǝbǝte, ²¹ ṯa rënǝŋu arǝndiđia ṯa ñaɽǝwađaṯe ñagëbǝđia ŋen pređ rënǝŋu ronaṯa na ṯa rënǝŋu ariđi ŋen iŋi ramiđia raŋǝra nano eñaŋ yesu al masiyaga. igǝbekeɽǝđia ṯa rǝmwa arǝnaneini ŋaɽrwa bǝɽǝbǝte. amin. ²² igǝndeɽǝđia, lorldaiñ, ṯa ñǝne ŋen iŋi ŋǝđeɽǝđia đwalađa arano, ŋen ŋanṯa igǝwërđǝṯǝnde ađam gǝtefr ikǝrǝŋ. ²³ lǝŋeṯr ṯa oraiñ ṯimǝđawus gëbǝrnu isijǝn. ndǝ gënǝŋu giđ aŋaiñeṯe nano taltal nanda ñagiđi ñǝndeṯa nano. ²⁴ eɽǝđr nǝlǝŋ enalo pređ na leđa pređ ɽrǝmwa. leđa ɽrǝmwa lalo iṯalia leɽǝđǝnde. ²⁵ igǝbeɽǝđia ṯa đǝbuŋṯia đusila đǝrǝmwa ñafeṯǝlda pređ. amin.