afǝsus

afǝsus

¹ fiñi bulus ñiŋgi igaɽo đǝđweinia đal masiya yesu eŋen rǝmwa rëɽu ananoŋ. igeɽǝđo leđa ɽrǝmwa, ñaŋgi ñagafo alo yafǝsus, ñaŋgi ñagǝbendeieia ŋen ŋal masiya yesu ŋope. ² igǝbeɽǝđia ṯa rǝmwa, papa igëndr, na elǝŋ yesu masiya alǝndǝnaice đǝbuŋṯia đusila na đëuṯaralo. ³ igǝbeɽǝđia ṯa đaṯa rǝmwa relǝŋ igëndr yesu masiya arǝbuŋǝnṯi. rënǝŋu rǝbuŋṯǝndr đǝbuŋṯiađa pređ đusila elo na igal masiya, ⁴ ŋen ŋarno rënǝŋu roṯǝnde igal masiya ŋen alo yamǝlu yǝbǝđǝni. rënǝŋu roṯǝndr ṯa altǝɽeṯr na ṯa alerṯr đǝskiniano ŋu nëiñua. ⁵ rënǝŋu rubwandriya ndrëɽi ŋen ananoŋ ṯa arǝndiđr liđia ǝllëɽǝŋu yesu masiyaga, ŋen ŋanṯa ŋen iŋi ŋaŋǝra ŋu nëiñua. ⁶ rënǝŋu riđu ŋen iŋi ṯa leđa alnananaice đame ŋen ŋanṯa đǝnaieia mǝɽǝmǝɽeñ đǝlëɽǝŋu iđi đerṯo ŋaɽrwa iđi rënǝŋu rǝndǝnanaieiar ŋuga igi rubwamaiya. ⁷ igal masiya lǝgapǝɽǝnr ŋǝfǝniŋa ŋǝlëɽǝŋu. nṯia ŋen iŋëndr ŋeicia ŋǝŋgeinu eŋen ŋǝđǝnaieia mǝɽǝmǝɽeñ đǝlëɽǝŋu, iđi rënǝŋu rananaiđia đaliŋeṯađa đǝño đoɽra kaiñ. ⁸ rënǝŋu rarǝjaicǝndr nano đǝnaicia mǝɽǝmǝɽeñ đǝlëɽǝŋu đwaiña. ⁹ rënǝŋu riđǝndr lǝgaliŋeṯr ŋamǝɽa ŋǝŋen rënǝŋu ronaṯa đaliŋeṯađa ŋen ŋǝsi pređ na đaliŋeṯađa pređ garno rënǝŋu rëɽu ŋen. rënǝŋu rëɽu ŋen iŋi igal masiya ¹⁰ ṯa ndǝ liga lǝɽiñǝđeinu ararreiđi laŋge pređ ldǝɽo igal masiya, laŋge lelo na laŋge lalo. ¹¹ igal masiya lǝgiđǝnr leđa ildi larraṯa eŋen ŋǝrǝmwa. rënǝŋu rëɽu ŋen iŋi ananoŋ garno ronaṯa. rënǝŋu rëbǝđia ŋen jaica jaiea garno ronaṯa. ¹² rënǝŋu riđu ṯia ṯa nëndr alfeṯr ŋope ṯa leđa alnanaice ŋaɽrwa ŋǝlëɽǝŋu đame, nëndr lëŋgr lǝgǝṯurṯr ŋen igal masiya ananoŋ. ¹³ iŋu ñaŋ eum ñagano ŋen ŋǝđeṯam iŋi ŋaɽo ŋen ŋaŋǝra ṯa ñagëbǝrnu na ñagëndu ŋen ŋǝlëɽǝŋu eum, orn nṯia ñagëɽǝnu ŋwëɽiña nano usilaga gatǝɽe igi rǝmwa rwalwaɽo ṯa arǝndǝnaice. ¹⁴ usila gatǝɽe gaɽo waŋge gananoŋ elaŋge lǝgiđr aldǝneinr ŋen lǝgamǝɽr lǝgǝlneiniar đǝge. ŋen ŋafo ṯia ṯa leđa alnanaiee ŋaɽrwa ŋǝlëɽǝŋu đame. ¹⁵ igano ŋen ŋǝđonaṯa eđalo egelǝŋ yesu na ṯa ñagubwa leđala pređ ɽrǝmwa, ¹⁶ na ŋen ŋafǝṯia igaŋërṯu rǝmwa nano ŋen ŋanṯa ñaŋ jaiea jaiea ndǝ igaṯurṯia. ¹⁷ igǝbeɽǝđia ṯa rǝmwa relǝŋ igëndr yesu masiya, irri raɽo đaṯa irri rerṯo ŋaɽrwa, arǝndǝnaiee usila igi galiŋeṯo ŋen nǝsi na igi gǝndërrǝŋaicia ŋen ṯa ñaliŋeṯe ŋope, ¹⁸ na ṯa ariđi nare enalo naliŋeṯo ŋen, ṯa ñaliŋeṯe ñagaṯurṯia đundǝđia đǝlëɽǝŋu ṯau, na ṯa ñaliŋeṯe đǝrraṯa eŋen iđi đerṯo ŋaɽrwa iđi rënǝŋu rerṯo eleđa ǝllëɽǝŋu, ¹⁹ na ṯa ñaliŋeṯe ṯa ŋabǝɽa ŋǝlëɽǝŋu ŋoɽra kaiñ ŋen ŋanṯa nëndr lëŋgr lǝgëndr ŋen ŋǝlëɽǝŋu. ndǝ rǝmwa riđu ṯia rënǝŋu riđu ŋǝmëɽria ŋabǝɽaŋa ŋǝlëɽǝŋu ŋwaiña kaiñ. ²⁰ rënǝŋu rërrǝŋaiđu ŋabǝɽa ŋǝlëɽǝŋu igal masiya ndǝ ratuđima eŋǝɽaiñ ndrǝmiđi gaɽaŋalo nḏaŋ đǝlëɽǝŋu đaŋaicǝba elo, ²¹ ndramiđi goɽra kaiñ gamiñaṯa ŋǝlǝŋe pređ ɽetǝɽeteo na ndrǝŋ pređ ini nuɽwatǝni gerṯa alo isi ikǝrǝŋ orn curn alo isi yiđ aiyela. ²² na rënǝŋu rëɽu laŋge pređ erǝmanǝŋ rǝlëɽǝŋu ndrǝmanaiee ŋǝlǝŋe elaŋge ildi, ndramiđi gaɽnda eŋen pređ ikanisa ²³ iđi đaɽo aŋǝno ilëɽǝŋu, iđi đunḏǝjeinu iŋu igi gwunḏǝjaiea laŋge pređ.

¹ rǝmwa riđǝnde ñagamǝṯia liga ñagaiyo ŋen ŋanṯa ŋen ŋeieia na ŋen ŋafo mǝnna, ² ŋen iŋi ñagerldau ananoŋ ndǝ ñagateṯo elǝŋ galo isi, ndǝ ñagateṯo elǝŋ gǝŋabǝɽa ŋǝltuŋga igi gaɽ usila igi gëbǝđia ŋǝmëɽria eleđa ildi laɽ ndǝl. ³ nëndr pređ lǝgafr ananoŋ eŋen iŋi ndǝ lǝgateṯr đonaṯa đaŋǝno isëndr na đǝŋaṯǝɽa iŋëndr na lǝgafr lǝgaɽr jaica jaica leđa ildi lǝjeiciano ŋen ŋarno leđa pređ lalo. ⁴ orn rǝmwa rerṯo ŋǝbaiyano ŋoɽra kaiñ na ŋen ŋanṯa đubwa đǝlëɽǝŋu đwaiña kaiñ rënǝŋu rubwandriya, ⁵ ndǝ lǝgaiyr ŋen ŋanṯa ŋen iŋëndr iŋi ŋafo mǝnna na rënǝŋu riđǝndr lǝgamǝṯiar ldǝɽo al masiyaga. nṯia ñaŋ ñagëbǝrnu eŋen ŋǝđǝnaieia mǝɽǝmǝɽeñ đǝlëɽǝŋu. ⁶ rënǝŋu ratuđindr lëndǝrlda ndrǝndiđr lǝgaldǝɽaŋarlda elo. rǝmwa riđu ŋen iŋi al masiyaga yesu ⁷ ṯa alo isi yiđ aiyela rënǝŋu riđ arërrǝŋaiđe ṯa đame đǝlëɽǝŋu đoɽra kaiñ ndǝ rǝndǝnanaieiar ŋen ŋaŋǝra igal masiya yesu. ⁸ ñagëbǝrnu đameđa đǝlëɽǝŋu ŋen ŋanṯa đonaṯa eđalo. na đëbǝrnia iđi gerṯa đađalo bǝɽan orn fǝđǝneinia đǝrǝmwa. ⁹ ñagero ñagëbǝrni ŋen ŋanṯa ŋen ŋǝnǝŋ ñagiđu ṯa eđa aŋerṯe gǝnǝŋ gaɽǝwađaṯa gëminia bǝɽan. ¹⁰ ŋen ŋanṯa lǝgaɽr ŋǝmëɽria iŋi rǝmwa riđu. lǝgiđǝnr igal masiya yesu ṯa aliđr ŋǝmëɽria ŋaŋǝra iŋi rǝmwa raṯoɽaṯa ananoŋ ṯa alerldr eŋen iŋi ŋaŋǝra. ¹¹ ŋen ŋafǝṯia ñaŋ ñaŋgi gerṯa ñagaɽ al yawuḏ egaŋǝno lëldǝŋǝđeinr eŋen ŋǝbǝtaŋǝɽan ṯa leđa ildi luɽǝđǝnu lënǝeǝnde leđa ildi lero luɽǝđǝni. fǝđuɽǝđǝnia đaŋǝno iđi điđǝnu raŋra. ¹² lëldǝŋǝđeinr eŋen ṯa iliga lakǝl ñaŋ ñagatǝrinṯu igal masiya na ñagatǝrinṯu eŋǝlǝŋe ŋisrayil, na ñagaɽo ilia eđǝrreiđia eŋen iđi rǝmwa rëɽu. ñagafo ñagero đǝṯurṯia đǝwagǝnǝŋ na ñagero rǝmwa alo. ¹³ orn điñǝđi igal masiya yesu ñaŋ ñaŋgi ñagafo nwaldaŋ bǝtaŋǝɽan ñagameinu ṯwaiñ eŋen ŋǝŋǝfǝni ŋal masiya. ¹⁴ ŋen ŋanṯa gënǝŋu gaɽo đǝbëɽǝđia eŋen iđëndr igi giđǝndr lǝgaɽr lǝguntr na gënǝŋu gagero ŋen ŋeieia iŋi ŋǝndǝđǝndrano. ¹⁵ gënǝŋu gamandađo egaŋǝno ilëɽǝŋu al ganun isi ywalwa-ɽǝṯǝndr ṯa lǝgëbǝđiar ṯau, ṯa aŋiđi bǝɽan leđa ildi laɽo liɽijan ṯa alɽeṯe eđa gunto gǝmaijǝn, nṯia ṯa aŋiđi đëuṯaralo, ¹⁶ na ṯa aŋǝndoɽǝbaier pređ rǝmwa nano egaŋǝno yento. gënǝŋu giđu ŋen iŋi đuɽiđa nṯia gamǝndađo ŋen ŋeieia iŋi ŋǝndǝđǝndrano. ¹⁷ na gënǝŋu geṯo nǝŋǝndërrǝŋaiei đëuṯaralo ñaŋgi ñagafo nwaldaŋ na nǝŋǝlërrǝŋaiei đëuṯaralo ildi lafo ṯwaiñ. ¹⁸ ñaŋ na nanda lǝgaɽǝwađaṯar lǝgeṯr đaṯa nano igusila gunto ŋen ŋanṯa ŋu. ¹⁹ nṯia điñǝđi ñaganǝñaŋ gerṯa ñagaɽ ilia na leđa liŋamia mǝldin orn ñagaɽo ñagǝleđa ɽrǝmwa na ñagǝleđa leɽa gǝrǝmwa. ²⁰ na ñagwađǝnu nađuna eleđa lǝđweinu na igal anbiya na al masiya yesu gënǝŋu gaɽo lwandra laɽnda lađuna isi. ²¹ fǝŋu igi đwađa đakaseiđǝnu iŋu na ađǝɽatođe ṯa ađǝɽeṯe alo yëđǝñinu yetǝɽe egelǝŋ rǝmwa. ²² na ñaganǝñaŋ ñagabijeiđǝni ldǝɽo iŋu usilaga gatǝɽe ṯa ñaɽeṯe eɽa ŋen ŋanṯa rǝmwa.

¹ ŋen ŋafǝṯia igǝbeɽǝđia rǝmwa eŋen eŋalo, igënǝñi bulus ñiŋgi yesu masiya gëndiñi ŋen ŋanṯa leđa ildi gerṯa laɽ al yawuḏ. ² igaṯa ñagano ṯa iganeinu đǝnaicia mǝɽǝmǝɽeñ đǝrǝmwa ṯa erǝmoṯe ŋen ŋanṯa ñaŋ, ³ na ṯa ŋen ŋamǝñiṯiñi ṯa elǝŋeṯe ŋamǝɽa ŋen ŋarno igǝwërđiau ŋen ŋǝtefr ananoŋ. ⁴ ndǝ ñagǝbëgǝri ŋen iŋi ñagiđi ñaseici ṯa igaliŋeṯo ŋamǝɽa ŋal masiya. ⁵ iliga lǝnëiñua ŋamǝɽa iŋi ŋero ŋǝbërrǝŋeini eleđa, orn điñǝđi usila gatǝɽe gërrǝŋaicu leđa ildi lǝđweinu ltǝɽe na al anbiya. ⁶ fǝŋamǝɽa, ṯa leđa ildi gerṯa laɽ al yawuḏ larraṯa eŋen al yawuḏya na ṯa lënǝŋulu pređ laŋǝno yento na lënǝŋulu lǝɽǝbǝđǝlda eŋen iŋi rǝmwa rëɽu igal masiya yesu. ŋen iŋi ŋafo ŋenŋa ŋaŋǝra ŋǝrǝmwa. ⁷ igëɽǝnu ṯa iđuɽǝđǝnṯi ŋen ŋaŋǝra ŋǝrǝmwa eŋen ŋǝđǝnaicia mǝɽǝmǝɽeñ đǝrǝmwa iđi rënǝŋu ranaieiñi ŋenŋa ŋǝŋabǝɽa ŋǝlëɽǝŋu. ⁸ đǝnaieia mǝɽǝmǝɽeñ iđi đǝneiniñi ñiŋgi igǝta igamiñaṯo leđa pređ ɽrǝmwa ṯa yërrǝŋaiei leđa ildi gerṯa laɽ al yawuḏ ŋen ŋal masiya iŋi ŋoɽra ŋaŋǝra kaiñ, ⁹ na ṯa yiđi leđa pređ alliŋeṯe ŋen ŋǝŋamǝɽa. ŋamǝɽa ŋafo ŋalǝbijǝnu iliga lwalano kaiñ irǝmwa irri riđu laŋge pređ, ¹⁰ ṯa điñǝđi kanisađa ŋen pređ ŋǝđaliŋeṯa ŋen nǝsi đǝrǝmwa ađiđǝni đǝlǝŋinu enǝlǝŋ pređ na eŋǝlǝŋe pređ elo. ¹¹ ŋen iŋi ŋafo eŋen rǝmwa rëɽu ŋen ŋanṯa bǝɽǝbǝte iŋi rënǝŋu rǝɽiñǝđaiđo igal masiya yesu elǝŋ igëndr, ¹² na iŋu lǝgaɽǝwađaṯar lǝgeṯr rǝmwa nano ŋǝđaiña ŋero, na đëɽǝniađa đǝñano ŋen ŋanṯa đonaṯa iđëndr iŋu. ¹³ nṯia igǝndeɽǝđia kaiñ ṯa ñerṯe ñagofǝđiano ŋen ŋanṯa ŋen ŋwaiña ŋubwa ŋeieia igananeinia ŋen ŋanṯa ñaŋ. đeṯam ŋen iŋi ŋafo ṯa ñaŋ ñaneini ŋaɽrwa. ¹⁴ ŋen ŋafǝṯia igokwođiñǝṯia ndria nalo đaṯa rǝmwa nëiñua, ¹⁵ irri rǝbërnieia leđa ndrǝŋ lǝneɽa pređ elo na alo. ¹⁶ na igabeɽǝđia ṯa eŋen ŋǝŋaɽrwa ŋǝlëɽǝŋu ŋoɽra rënǝŋu arǝndiđi ñagwonḏǝṯo ŋabǝɽaŋa usilaga gatǝɽe gǝlëɽǝŋu enar enalo, ¹⁷ na ṯa al masiya aŋǝndǝɽaŋe enare đonaṯađa. igǝbeɽǝđia cum ṯa ñatǝđalo na ñëndi alo iđubwiđia, ¹⁸ na ṯa ñeṯe ŋabǝɽa ṯa ñaliŋeṯe leđala pređ ɽrǝmwa đwalano na đobǝrano na đwala na đoliano lǝđubwa đǝrǝmwa, ¹⁹ na ṯa ñaliŋeṯe đubwa đal masiya iđi leđa laber laɽǝwađaṯa laliŋeṯo đurri, na ṯa ñunḏeini đǝɽiñǝđeiniađa đǝrǝmwa. ²⁰ rǝmwa raɽǝwađaṯa rëbǝđia ŋen ŋwaiña ŋamiñaṯa ŋen lǝgǝbeɽǝđiar walla lǝgaulëldǝŋǝđeiniar ŋabǝɽaŋa iŋi ŋëbǝđia ŋǝmëɽria inëndr, ²¹ na igǝbeɽǝđia ṯa rënǝŋu arǝnaneini ŋaɽrwa ikanisa na igal masiya yesu eleđa pređ lǝliga pređ bǝɽǝbǝte. amin.

¹ ŋen ŋafǝṯia igënǝñi ñiŋgi igëndǝnu ŋen ŋanṯa elǝŋ yesu igǝndeɽǝđia ṯa ñafeṯe ñagarajađaṯo eŋen iŋi rǝmwa rundǝdei-nǝnde nano. ² reṯr enare jaiea jaica, ñađǝrnaṯe naralo na ñaɽiñaṯe ŋen. alwer narano eñaŋ iđubwiđia. ³ ɽǝđiṯr aŋǝno, ñakase đǝɽǝbǝđia eŋen iđi usila gatǝɽe gananaiđia đëuṯađa aralo. ⁴ aŋǝno yaɽo yento na usila gatǝɽe gaɽo gunto ŋen ŋarno ñaŋ ñagundǝđǝnu ṯa ñerṯe ŋen ŋunto ṯa ñauṯurṯi iŋi ŋǝđundǝđǝma eđalo. ⁵ elǝŋ rǝmwa raɽo runto na đonaṯa đaɽo đunto mamuḏiya yaɽo yento. ⁶ rǝrnwa raɽo runto irri raɽo papa igëndr irri roɽra ramiñaṯo laŋge pređ na laŋge pređ lafo ŋuga na rënǝŋu rafo elaŋge pređ. ⁷ orn nëndr pređ lǝganeinr đǝnaieia mǝɽǝmǝɽeñ đǝrǝmwa eŋen ŋǝđǝnaicia đal masiya iđi đoɽra kaiñ. ⁸ ŋen ŋafǝṯia ŋen ŋwalwaɽǝnu ṯa, ndǝ gënǝŋu gabǝṯo elo gamǝndeiṯu leđa nëiñua ildi gakëndǝlo, nǝŋǝnanaice leđa laŋge. ⁹ ndǝ ađam gaṯa ṯa gënǝŋu gabǝṯo elo lǝgaliŋeṯr ṯa gënǝŋu girǝwuṯalo iđuđa cum. ¹⁰ gënǝŋu igi girǝwu fǝŋu igi gabǝṯo pǝlelo ltuŋga eđǝpe ṯa aŋunḏǝjeini elaŋge pređ. ¹¹ na đǝnaicia đǝlëɽǝŋu ṯa ađiđi leđa lǝmaṯan laɽo đǝđweinia na lǝmaṯan laɽo anbiya na lǝmaṯan laɽo mubassarin na lǝmaṯan laɽo gǝsus na leđa lǝbërrǝŋaiđia ŋen ŋǝrǝmwa, ¹² ṯa alnanaice leđa ɽrǝmwa laŋge ildi laɽo đeṯam ŋen ŋanṯa ŋǝmëɽria eŋen ndǝ lǝmađuɽǝđǝnṯia na ŋen ŋanṯa đǝbapurgwađaṯa đaŋǝno yal masiya. ¹³ nṯia nëndr pređ lǝgiđr alɽeṯr lǝguntr iđonaṯa iyesu na pređ lǝgiđr alliŋeṯr iđia gǝremwa, na lǝgiđr alɽeṯr leđa loɽra linḏeinu đǝɽiñǝđeiniađa đal masiya. ¹⁴ ŋen ŋiđ aŋfeṯe ṯia ṯa alerṯr lǝgaɽiar ñere mǝldin iñi ñǝṯwëđǝni alo ŋenŋa pređ ñërrǝŋeinu garno waŋge đǝbera đǝṯwađa alo, na ŋađǝnaŋa ŋǝleđa ildi laɽatuđi ŋen ŋǝmaijǝn ŋafo mǝnna. ¹⁵ orn lǝgiđr alɽwatr ŋen ŋǝđeṯam iđubwiđia na lǝgiđr alǝbapurgwađaṯr eŋen pređ igal masiya ṯa alɽeṯr lǝguntr ŋuga. ¹⁶ gënǝŋu gaɽnda na gamica aŋǝno ilëɽǝŋu pređ. aŋǝno yakaseiđǝnu aloya isi yurrǝpǝđǝnu na ndǝ laŋge pređ laŋǝno lëbǝđia ŋǝmëɽria aŋǝno pređ yabapurgwađaṯa niyoɽreṯe iđubwiđia. ¹⁷ fǝŋen iŋi igwalwaɽa na igaɽo đamǝđaṯa đǝŋen iŋi egelǝŋ yesu ṯa ŋen đeṯam ñaŋ ñagaber ñagafia mǝldin ñagarno leđa ildi gerṯa laɽ al yawuḏ ildi lerṯo ŋen ŋǝpiano eŋaṯǝɽa eŋen. ¹⁸ ŋaṯǝɽa eŋen ŋaɽo ŋǝrǝmia ṯa alerṯe lǝberṯia đaliŋeṯa na lënǝŋulu latǝrinṯu iđamǝṯia đǝrǝrnwa ŋen ŋanṯa đaijǝbǝnia nano đafo iŋulu na ŋen ŋanṯa labɽwaŋǝno enare. ¹⁹ lënǝŋuln laɽo tǝgǝtǝg inusila enen ldǝnaiđe ntam enen ṯa aleicǝṯi ŋǝɽwa. lënǝŋulu lero laneđa ŋen ŋǝnǝŋ ṯa alǝbeice đonaṯa eđen đeieia. ²⁰ orn ñaŋ ñagero ñagërrǝŋeinu al masiya ṯia, ²¹ ndǝ đeṯam ñagano ŋen ŋǝlëɽǝŋu na ñagërrǝŋeinu ŋen ŋǝđeṯam iŋu, garno ŋafo iyesu. ²² miñeicr ŋen alo ŋǝbǝtaŋǝɽan iŋi ŋǝđamǝṯia ñagafo ñagafau, iđi đaicǝbǝro ŋen ŋanṯa đonaṯa đeicia iđi điđǝnde ŋađǝna. ²³ na iđǝnr ñagǝmaijǝn inusila enalo na eŋaṯǝɽa eŋalo. ²⁴ ëɽǝnr ŋen nano ŋǝmaijǝn iŋi ŋiđǝnu ŋarno ŋǝrǝmwa na iŋi ŋërrǝŋeiđǝnu eŋen ŋuđǝrwaṯo na ŋatǝɽe iŋi ŋatuđini ŋenŋa ŋǝđeṯam. ²⁵ ŋen ŋafǝṯia auwǝṯr ŋaɽǝwen ñaɽwataiđe ŋenŋa ŋǝđeṯam ŋen ŋanṯa nëndr pređ lǝgakaseiđǝnr ldǝɽo na eđa gǝnǝŋ geđa gwomǝn. ²⁶ ndǝ ñageiciano ñerṯe ñagaŋgiṯia đeiciano eđalo ađǝndiđi ñagëbǝđia ŋen ŋeieia. ŋgeier đeiciano ŋen ëđǝñina yamǝlu yirǝwa. ²⁷ ñerṯe ñagǝbëɽǝṯia seṯan liga alo kwai kwai. ²⁸ ŋen đeṯam ṯa oɽom gaber galaldǝbǝca laŋge mǝldin orn ŋen đeṯam gënǝŋu gëbǝđia ŋǝmëɽria kaiñ raŋra na ŋenŋa ŋuđǝrwaṯo ṯa aŋerṯe laŋge aldakarnǝđe leđala laɽo lǝbai. ²⁹ ñerṯe ñagaŋgiṯia ŋen ŋǝnǝŋ ŋeieia ṯa ŋamiña ëiñua esalo orn ɽwatr ŋen ŋaŋǝra iŋi ŋamǝđaṯa leđa albapurgwađaṯe eŋen ṯa aŋǝbuŋṯi leđa ildi lǝnna. ³⁰ ñerṯe ñagwëni usila gatǝɽe gǝrǝmwa igi gaɽo ŋwëɽiña ŋëɽǝnǝnde nano ŋen ŋanṯa loman lǝđapǝɽa. ³¹ ŋgeier ŋen pređ iŋi ñagiyiđia leđa leiciano, na đǝjeiciano, na đaboŋa na đwara na đǝbwaiđia eŋen, na ŋen pređ iŋi ŋagea leđa. ³² orn nanaicr lorldalo ŋen ŋaŋǝra, na lǝŋeṯr ŋabaiyano. ŋgǝđeicr lorldalanda ŋen eŋen ŋeieia ŋen ŋarno rǝmwa raŋgǝđeieǝnde ŋen eŋalo ŋeieia al masiyaga.

¹ ŋen ŋafǝṯia ikirnḏeier rǝmwa garno ñere iñi ñubwaniya. ² na erldr iđubwiđia ŋen ŋarno al masiya gubwandriya nǝŋǝnaiđe etam gǝlëɽǝŋu ŋen ŋanṯa nëndr gaɽo đǝneinia na đǝɽǝđǝnia iđi đëbǝđia rǝmwa raŋǝra nano garno đǝmwađa gaiñǝla. ³ ñerṯe ñagaŋgiṯia ŋen ŋǝlwaɽǝni eñaŋ kwai kwai ŋǝđaɽaŋa lijila ɽrǝto ildi lamameinu eneɽa na ñereña iñi ñamǝlu ñamameim eneɽa walla ŋen ŋataŋa walla ŋen ŋǝđonaṯa laŋge lǝleđa lwomǝn, ŋen ŋanṯa ŋen iŋi ŋaɽo đeṯam eleđa ɽrǝmwa. ⁴ neđr ŋen ŋataŋa na ŋen ŋaɽo ŋiɽǝṯiano na ŋen ŋarno ŋǝđǝramǝɽua ŋen ŋanṯa ŋen iŋi pređ ŋeicia. orn ŋaŋǝrṯr rǝmwa nano. ⁵ lǝŋeṯr ŋen iŋi ṯa eđa gǝnǝŋ igi geicia nda walla gaɽaŋa wujiga garto walla gamǝñeđǝñano gëbǝđia đǝmama đǝlaŋge lwaiña đaɽo waŋge igi gukwuđiñǝṯialo, gënǝŋu gaber giđ aŋǝrraṯe eŋǝlǝŋe ŋal masiya na ŋǝrǝmwa. ⁶ ñerṯe ñagaŋgiṯia eđa gǝnǝŋ gǝndiđia ŋađǝna ŋenŋa ŋǝpiano, ŋen ŋanṯa eŋen iŋi đeieiano đǝrǝmwa đeṯo leđa nano ildi laɽ ndǝl. ⁷ ŋen ŋafǝṯia ñerṯe ñagaɽaŋa leđala ild kgwi kwai, ⁸ ŋen ŋanṯa ñagaɽo ŋǝrǝm bǝtaŋǝɽan orn điñǝđi ñaaɽa arrerre egelǝŋ yesu. erldr ŋen ŋarno ñere ñarrerre, ⁹ ŋen ŋanṯa ŋǝlwa ŋarrerre ŋafiđǝnu eŋen pređ iŋi ŋaŋǝra na ŋuđǝrwaṯo na ŋǝđeṯam. ¹⁰ na inḏeier ŋen ṯa ñërrǝŋeini ŋen iŋi ŋëbǝđia elǝŋ yesu gaŋǝra nano. ¹¹ ñerṯe ñagǝɽǝbǝđia eŋen ŋǝŋǝrǝm iŋi ŋaber ŋalǝŋa orn iđr ŋǝlǝŋinu ṯa ŋeieia. ¹² ŋen ŋanṯa ŋen ŋaniđǝnu ṯa lǝgwaɽwatar eŋen leđa leieia lëbǝđia ŋoɽoma. ¹³ orn ndǝ waŋge gǝnǝŋ gërrǝŋeiđǝnu arrerrega gaɽǝwađaṯa gaseinia ŋen ŋanṯa laŋge pređ leđa laɽǝwađaṯa ldǝseieia lënǝŋulu laɽ arrerre. ¹⁴ ŋen ŋafǝṯia ŋen ŋwalwaɽǝnu ṯa, aganǝŋa ŋaŋgi agandro, twođo iŋuriđ ŋatwođe eŋǝɽaiñ na al masiya giđ aŋanaice arrerre. ¹⁵ nṯia rǝmoṯr eŋen ṯa ñagǝbǝrlda ṯau. ñerṯe ñagǝbǝrlda ŋen ŋarno leđa laijǝba ŋen nǝsi orn erldr ŋen ŋarno leđa laliŋeṯo ŋen nǝsi. ¹⁶ ñerṯe ñagaŋgiṯia liga lnǝŋ lǝpiano kwai kwai ŋen ŋanṯa liga ildi leieia. ¹⁷ ŋen ŋafǝṯia ñerṯe ñagaɽia mɽǝṯiano orn lǝŋeṯr ŋen ŋafo ṯau iŋi elǝŋ rǝmwa ronaṯa, ¹⁸ ñerṯe ñagǝramǝɽua iŋuɽu ŋen ŋanṯa ŋuɽu ŋǝndiđia ñagagera ŋen, orn unḏǝjeinr usila ano gatǝɽe. ¹⁹ ɽwataiđr ñalǝŋe ŋǝlǝŋa ŋusila gatǝɽe na eŋen ŋǝwërđǝnu imasamir. alǝŋr ŋǝlǝŋa ŋaŋǝra egelǝŋ rǝmwa narena pređ enalo, ²⁰ ñaŋërṯi đaṯa rǝmwa nano jaica jaica ŋen ŋanṯa laŋge pređ igirǝŋ gelǝŋ igëndr yesu masiya. ²¹ nanaiđr eŋen ŋen ŋanṯa ñagiđǝña al masiya. ²² ñǝŋgema, naṯr ebaŋgalanda garno ñaganaṯa elǝŋ yesu. ²³ ŋen ŋanṯa eđa gaɽorra gaɽnda igwuji gǝlëɽǝŋu ŋen ŋarno al masiya gaɽnda ikanisa đǝlëɽǝŋu iđi đaɽo aŋǝno ilëɽǝŋu, na fǝŋu gëbǝru kanisa. ²⁴ ŋen ŋarno kanisa đafo eŋǝlǝŋe ŋal masiya na ṯia ŋen đeṯam cum liji ɽrlda lafo eŋǝlǝŋe ŋebaŋgenanda eŋen pređ. ²⁵ lṯenia, bwiṯr wasalandala ŋen ŋarno al masiya gubwa kanisađa nǝŋǝnaiđe etam gǝlëɽǝŋu ŋen ŋanṯa kanisa, ²⁶ ṯa aŋwase ŋawaŋa na ŋenŋa ŋǝlëɽǝŋu na ṯa aŋëɽi đatǝɽe. ²⁷ gënǝŋu giđu ṯia ṯa aŋǝneini kanisa iđi đerṯo ŋaɽrwa ŋwaiña na đero amǝrta nano na đero đǝɽia nëɽiaŋǝno na ṯa ađǝɽeṯe đatǝɽe đǝɽiñǝđeinu ŋen ŋerano ŋataŋa kwai kwai. ²⁸ nṯia cum ŋen đeṯam lṯenia lubwa wasenala ŋen ŋarno lubwa aŋǝnoiya esen. eđa gubwa wasenga gënǝŋu gubwa aŋǝnoiya ilëɽǝŋu. ²⁹ ŋen ŋanṯa eđa gero ganeđa aŋǝno ilëɽǝŋu orn gamica na garǝmoṯwa ŋen ŋarno al masiya gamica kanisa na garǝmoṯwa. ³⁰ na nëndr lǝgaɽr laŋge laŋǝno ilëɽǝŋu. ³¹ ŋen ŋafǝṯia eđa gaɽorra gaṯađa eṯen na lǝŋgen alakaseiđǝni wasenga, na lënǝŋulu liɽijan liđ alɽeṯe aŋǝno yento. ³² ŋen iŋi ŋaɽo ŋamǝɽa ŋoɽra na igaṯa ŋǝndërrǝŋaiciar ŋen ŋal masiya na ŋǝkanisa. ³³ orn ŋen iŋi ŋǝbërrǝŋaiđia cum ṯa eđa gǝnǝŋ eñaŋ gamo wasen ŋen đeṯam gubwa wasenga garno gubwa aŋǝnoiya ilëɽǝŋu na ṯa wuji gǝnǝŋ gamǝnu aŋǝđǝñiṯi ebaŋgen.

¹ ñere, naṯr lǝŋgalanda na eṯalanda egelǝŋ yesu ŋen ŋanṯa ŋen iŋi ŋafo ŋope. ² ŋen ŋǝnëiñua ŋal ganun isi rǝmwa ranaieo musa iŋi ŋerṯo ŋen ŋëɽǝnṯu leđa ildi larǝmoṯwa, fǝŋu, điñǝṯr eṯalanda na lǝŋgalanda, ³ ṯa ŋen aŋǝndeṯa nano ŋaŋǝra na ṯa ñafeṯe alo liga lwalano. ⁴ lṯenia, ñerṯe ñagëbǝđia ñere eñalo ñeieiano mǝɽǝmǝɽeñ orn rǝmoṯǝrldo ŋope, ërrǝŋaicǝrldo ŋen ṯǝñalṯoɽaṯo eŋen ŋelǝŋ rǝmwa. ⁵ lǝbai, naṯr leđa ildi lerṯǝnde alo ŋǝđaiñǝŋa đǝgǝrđiađa aŋǝno na araga gunto ŋen ŋarno ñaganaṯa al masiya. ⁶ ñerṯe ñagǝlǝđuɽǝđǝnṯia aŋǝnoiya ikǝrǝŋ ṯa leđa alǝndǝseici alǝndǝnaice đame, orn iđr ŋen iŋi rǝmwa ronaṯa narena pređ ŋen ŋarno lǝbai lal masiya. ⁷ đuɽǝđǝnr đaŋǝrađa nano ŋen ŋarno leđa ildi lǝđuɽǝđǝnṯia elǝŋ yesu na gerṯa leđa. ⁸ ŋen ŋanṯa ñagaliŋeṯo ṯa elǝŋ yesu giđ aŋǝpǝɽe leđa pređ ŋen ŋanṯa ŋen pređ ŋaŋǝra lënǝŋulu liđu ndǝ laɽo lǝbai walla gerṯa laɽo lǝbai. ⁹ ya leđa ñaŋgi ñagerṯo lǝbai, naieǝrldo ŋen ṯia cum. ñerṯe ñagalǝgagariñaṯa ŋenŋa ŋabɽwaŋǝno, orn lëldǝŋǝđeinr ṯa ñaŋ na ŋulu ñagerṯo elǝŋ gunto elo na leđa pređ laɽǝwaṯo eŋen ŋu nëiñua. ¹⁰ fǝŋen ŋǝnḏurṯu. ɽeṯr ñagwonḏǝṯo egelǝŋ yesu na eŋabǝɽa ŋǝlëɽǝŋu iŋi ŋwaiña kaiñ. ¹¹ ëɽǝnr ndrena nuriđa nano pređ ini rǝmwa rananaiđialo ṯa ñaɽǝwađaṯe ñagǝđurwa ñageye ŋađǝna pređ ŋǝseṯan. ¹² ŋen ŋanṯa gerṯa lǝgǝbwaiñǝđiar lǝgagear leđa ildi laɽ aŋǝno orn lǝgagear ŋǝlǝŋe ɽetǝɽeteo ŋalo isi yaɽo ŋǝrǝmia na lǝgagear nusila nǝŋen ŋeicia elo. ¹³ nṯia ŋen đeṯam ṯa ñëɽǝni ndrena nuriđa nano pređ nǝrǝmwa ṯa ñaɽǝwađaṯe ñagǝđurwa eloman lǝŋen ŋeicia na ṯa ñabǝɽǝnḏeṯe ŋen pređ orn ñađuri mǝldin. ¹⁴ đurr ñagwonḏǝṯo. ëɽǝnr yerna eniywa eŋen ŋǝđeṯam, ñëɽǝni ndrena niŋurum nǝŋen ŋuđǝrwaṯo. ¹⁵ ëɽǝnr nḏǝbina erǝmanǝña nǝŋen ŋaŋǝra ŋǝrǝmwa ŋǝđëuṯaralo. ¹⁶ na laŋgela ildi pređ mǝr nëɽi nǝđonaṯa ini ñagaɽǝwađaṯa ñagiyopǝṯa ñǝrlda pređ ñeđa geieia. ¹⁷ mǝr đëbǝria đaɽo ŋaɽe ŋǝnenda, na đoperre iđi usila gatǝɽe ganaiđia, fǝŋen iŋi ŋǝrǝmwa. ¹⁸ ṯurṯr rǝmwa jaica jaica igusila gatǝɽe đǝṯurṯiađa pređ na đeɽǝđiađa pređ. nṯia apr sǝndua eŋen iŋi ŋǝtǝđaŋa pređ ñekeɽǝđe rǝmwa ŋen ŋanṯa leđa pređ ǝllëɽǝŋu. ¹⁹ na ekeɽǝđr rǝmwa ŋen ŋanṯa ñi ṯa ndǝ igǝbǝlađia ëiñuano enaneini ŋen ŋope eɽwate, ṯa eɽwate ŋamǝɽa ŋǝŋen ŋaŋǝra ŋǝrǝmwa ŋǝđaiña ŋero. ²⁰ igënǝñi igaɽ al kufr yëndǝnu uriđaga ŋen ŋanṯa ŋen iŋi ŋaŋǝra ŋǝrǝmwa ekeɽǝđr rǝmwa ṯa eɽwate eŋen ŋaŋǝra ŋǝrǝmwa ŋǝđaiña ŋero, garno ŋen đeṯam igëbǝđia ṯia. ²¹ ṯikikus, oraiñ igi lǝgubwamarya na igi gǝđuɽǝđǝnṯia elǝŋ yesu araga gunto, gënǝŋu giđ aŋǝndǝlwaɽǝṯi ŋen pređ ṯa ñaliŋeṯe igafo ṯau na igëbǝđia ṯau. ²² igwađweiṯǝndǝma ṯa aŋiđi ṯia, ṯa ñaliŋeṯe nanda ñagafo ṯau na ṯa aŋǝndonḏeici enare. ²³ igǝbeɽǝđia ṯa rǝmwa đaṯa na elǝŋ yesu masiya alnanaiee lorǝba lǝkanisa đëuṯaralo na đubwa đonaṯađa. ²⁴ igǝbeɽǝđia ṯa đǝbuŋṯia đǝrǝmwa alfeṯe leđala ildi lubwa elǝŋga igëndr yesu masiya đubwađa iđi đaber điđ ađǝmǝndëđǝni.