amal ar rasul

¹ egađam gǝnëiñua, ya đawufilus, igawërđu ŋen pređ yesu giđu na gërrǝŋaiđu, ² ŋen loman lamǝlu gabǝṯau rǝmwa nano ndǝ galwaɽǝṯu leđa ǝllëɽǝŋu ildi lǝđweinu, ildi gwoṯǝlo eleđa, ŋen pređ ŋǝlëɽǝŋu usilaga gatǝɽe. ³ yesu gërrǝŋaieǝlo aŋǝno ilëɽǝŋu ŋen yamǝṯo ndǝ gatođo eŋǝɽaiñ ŋenŋa ŋǝđeṯam. gamiñiṯǝlo eñoman eređia marldwan nǝŋǝlǝlwaɽǝṯi ŋen ŋǝŋǝlǝŋe ŋǝrǝmwa. ⁴ ndǝ larraiđǝlda gënǝŋu galwaɽǝṯǝlo ṯa alerṯe latođa alo yursalim orn alṯurṯi ŋen đaṯa gëɽu. nǝŋǝleiṯi ṯa, igalwaɽǝṯǝnde ŋen iŋi, ⁵ ŋen ŋanṯa yuanna gananaico leđa mamuḏiya ŋawaŋa, orn aten ndǝ ñoman ñaŋgaṯo ñǝmaṯan ñaŋ ñagiđi ñaneini mamuḏiya usilaga gatǝɽe gǝrǝmwa. ⁶ nṯia ndǝ lafǝldǝɽo ldeɽǝđe yesu ldaṯa, elǝŋ yesu agiđi ŋoɽǝbeiṯi israyil ŋǝlǝŋe điñǝđi? ⁷ na gwalwaɽǝṯǝlo, ṯa gerṯa ŋen eŋalo ṯa ñaliŋeṯe liga đaṯa gëɽu eŋǝlǝŋe ŋǝlëɽǝŋu. ⁸ orn ñagiđi ñaneini ŋabǝɽa ndǝ usila gatǝɽe geṯǝnde enare orn ñaɽeṯe đamǝđaṯa đǝlëɽǝñi alo yursalim, na alo yuḏiya, na alo isamǝri na alo pređ na ltuŋga đǝrṯi. ⁹ na ndǝ galwaɽo ṯia đǝge lënǝŋulu laseieǝma gabeinia elo na ibwoɽua nitërǝlo isiano esen. ¹⁰ ndǝ laseiđia elo kaiñ taltal leđa liɽijan lađurǝlo nano ildi lerṯo ndrena nano nabǝjo kaiñ, ¹¹ ldaṯa, ya leđa lalo ijalil, ñagađǝru ṯǝñaseiđu elo eđa? fǝyesu igi gamǝnu eñaŋ giđ aŋoɽǝbǝđe ŋen ŋarno iŋi ñagaseicǝma gabeinia elo. ¹² orn ldirǝwi naiyǝn ibernia aiyǝn iseṯun ldabǝṯa alo yursalim, alo yafo ṯwaiñ, garno al ganun yaṯa ṯa leđa laɽǝwađaṯa labǝrldau iloman lǝđǝmiñǝniano. ¹³ na ndǝ larǝmaṯo ldënṯi eɽa gǝnǝŋ gafo pǝlelo, alo isi laɽaŋau. fǝbuṯrus na yuanna na yagub na anḏǝrawus, na filibus na ṯoma, barđulamawus na maṯṯa, yagub iđia galfi na siman igi gënǝjǝnu giwur na yausa iđia gǝyagub. ¹⁴ ildi pređ lerṯo ara gunto ṯalṯurṯu rǝmwa araga gunto, leđala ɽrlda na miriam lǝŋgen yesu na lorǝba ǝllëɽǝŋu. ¹⁵ iliga ildi buṯrus gatođo lorǝba nëiñua, ildi pređ laɽo eređia ređ na eređia giɽijan, nǝŋaṯa ṯa, ¹⁶ lorldaiñ, đeṯam ŋen ŋǝrǝmwa ŋaɽiñǝđeinu ŋǝpǝnde, iŋi usila gatǝɽe galwaɽo ëiñuaya yǝḏawuḏ eŋen ŋǝyausa maji igi gamǝđaṯo leđa ildi lëndu yesu. ¹⁷ yausa gumǝđeinu landǝlda na lǝganeinǝrlda ŋǝmëɽria ŋǝrǝmwa. ¹⁸ na maji igi giliđu gi đapǝɽađa đǝŋen ŋǝlëɽǝŋu ŋeieia nǝŋiɽi nǝŋandiđiano egare na yu nemiñaṯe ndëuwǝr pređ. ¹⁹ na ŋen iŋi ŋafo ŋalǝŋinu eleđa pređ lalo yursalim, na lënǝcu gi igi akaldama egole gagen ŋen ŋanṯa gi gǝŋǝfǝni. ²⁰ ŋen ŋǝwërđǝnu egađam gǝmasamir ṯa, ŋgiṯu eɽa gǝlëɽǝŋu aŋǝṯëđǝni, na eđa gǝnǝŋ aŋerṯe gǝfia egeɽa igi, na, ŋgiṯu eđa gǝnǝŋ aŋǝrraṯe eŋǝmëɽria ŋǝlëɽǝŋu. ²¹ ŋen ŋafǝṯia eleđa ildi ɽrwa lǝgarraiđǝrlda iliga pređ ildi ñagafo elǝŋ yesu ŋǝla, ²² iliga ildi yuanna gananaiđo mamuḏiya orn iliga ildi yesu gabeinu elo inëndr ŋen đeṯam ṯa eđa gǝnǝŋ iŋulu ñaldǝɽeṯǝlda đamǝđaṯa eđǝtođa eŋǝɽaiñ đǝlëɽǝŋu. ²³ orn fǝyusǝf gënǝjǝnu barsaba, eṯen gǝberni yusṯus, na maṯiyas. ²⁴ orn ldǝṯurṯi rǝmwa, ldaṯa, elǝŋ yesu agaliŋeṯo nar nǝleđa pređ, aŋaicǝnde maji igi agëndǝma eleđa ildi liɽijan ²⁵ ṯa aŋǝrraṯe eŋǝmëɽria ŋǝyausa igi gaŋgaṯo eŋǝmëɽria ŋǝrmwa ṯaŋaɽe alo ilëɽǝŋu. ²⁶ na ṯalǝmis yǝnḏeieu ŋen imajianda ildi, na ŋen ŋiɽǝṯu maṯiyas nano na lumǝđeinu leđala ređ ldamiñe liɽijan ildi lǝđweinu.

¹ ndǝ loman leṯo ildi lǝbernia al kamsin, larraiđo ldǝɽo alo yunto ² na taltal ole nǝŋirǝwa elo garno đǝbera đura na gwunḏǝjeinu egeɽa igi loɽaŋa. ³ na raŋǝla ramiñiṯǝlo rarno isia ndrirǝwǝṯǝlo nano ɽetǝɽeteo. ⁴ na pređ ldunḏǝjeini usilaga gatǝɽe ṯalwaɽwato ole gǝleđa ɽetǝɽeteo ŋen ŋarno usila ganaicǝlo ṯa aɽwate ṯia. ⁵ na leđa lal yawuḏ lafo alo yursalim laŋǝra eŋen, ildi leṯo alo pređ. ⁶ na ndǝ lano ole igi leđa lwaiña ldǝrraiđe ldǝɽo orn ŋen ŋaijǝbinṯǝlo nano ŋen ŋanṯa pređ lano ole egen ɽetǝɽeteo. ⁷ ldirǝwano pređ, ldaṯa ṯa ildi laɽwata, gerṯa lalo ijalil pređ? ⁸ orn ŋen ŋanṯau lǝganr ole egaiñ ɽetǝɽeteo? ⁹ lǝgaɽr farṯiym na maḏiyin na ilamiyin, na leđa lalo imabenalbaren, na lalo yuḏiya na lalo ikabaḏukiya, na lalo ibunṯus na lalo yasiya, ¹⁰ na lalo ifarijiya na lalo ibamfiliya, na lalo imasr na lalo pređ ilibiya isi igirǝwan, na leđa laijǝbaṯo lalo irumiya na al yawuḏ na leđa lalo yarto ildi lëndu ŋen ŋal yawuḏ, ¹¹ na kariṯiyin na arabiyin na lǝganar lënǝŋulu laɽwata ole igëndr ɽetǝɽeteo lalwaɽǝṯǝndr ŋen ŋoɽra ŋǝrǝmwa. ¹² ldirǝwano pređ ldiđǝñiṯalo, ldaṯa, ŋen ŋanṯau iŋi? ¹³ orn lǝmaṯan lađamicǝlo eŋen ldaṯa ṯa laramǝɽua. ¹⁴ buṯrus gađurǝlia ildi ɽređ gamiño gunto, ṯaŋaɽwato ole pǝlelo, nǝŋǝleiṯi ṯa, leđa lalo yuḏiya na ildi lafo alo yursalim ñaŋ pređ, lǝŋinr nano na nǝr ŋope ŋen iŋi. ¹⁵ ŋen ŋanṯa leđa ildi lero laramǝɽua garno ñagalwaɽo ŋen ŋanṯa ëđǝñin yaɽo đenǝŋ nemiñe marldwan ulaldiṯano, ¹⁶ orn fǝŋen iŋi nabi yuwil galwaɽo pǝnde, ¹⁷ ṯa, rǝmwa raṯa ṯa liga ildi lǝnḏurṯu igiđi erajaice leđa usila nano pređ, na lemmi na ñere eñalo liđ alɽwate ŋen ŋǝrǝmwa na ŋen ŋiđ aŋǝmiñiṯi lëđǝmwa eldalo, na lǝṯwëɽi eldalo liđi ṯalǝndro ŋuriđ ŋeicia. ¹⁸ đeṯam igiđi erǝjaice usila gǝlëɽǝñi lǝbai nano ǝllëɽǝñi ɽrwa na ɽrlda, na liđ alɽwate ŋen ŋǝrǝmwa. ¹⁹ na igiđi yemiñeici laŋge loɽra elo laijǝbinṯǝnde nano na aŋwara alo, ŋǝfǝni, na isia na đubwa. ²⁰ ëđǝñina yiđ ayamërni ŋǝrǝmia na ubwa giđ aŋamërni ŋǝfǝni, ndǝ loman lelǝŋ rǝmwa lamǝlu leṯo, loman lakǝl loɽra kaiñ. ²¹ na ŋen ŋiđ aŋfeṯe ṯa leđa ildi liđ alundǝđi igirǝŋ gelǝŋ rǝmwa liđ alëbǝrni. ²² ya leđa lisrayil, nǝr ole igi. yesu galo inasiraṯ maji igi rǝmwa riđǝma gǝlǝŋinu eñaŋ ŋenŋa ŋoɽra na aŋwaraiya na ŋamǝlaŋa ildi rǝmwa riđǝlo eñaŋ ŋuga, garno ñagaliŋeṯo, ²³ fǝŋu igi gǝneiđǝnu garno ŋen iŋi rǝmwa rëɽu na raliŋeṯo pǝnde, na, ñagëndǝma nǝñamaɽiñe raŋra rǝleđa leicia ndǝ lëɽǝma iđuɽi rwalara. ²⁴ orn rǝmwa ratuđǝma eŋǝɽaiñ ramëbǝri eđubwa đǝŋǝɽaiñ, ŋen ŋanṯa ŋero ŋaɽǝwađaṯa ŋamëndi. ²⁵ ḏawuḏ gwalwaɽo eŋen ŋǝlëɽǝŋu nǝŋaṯa, igaseieu elǝŋ rǝmwa gafǝñi nano jaica ŋen ŋanṯa gafǝñi đaŋ đǝŋaicǝba ṯa yerṯe iṯësǝni. ²⁶ ŋen ŋafǝṯia ara gǝlëɽǝñi gaŋǝra nano kaiñ, na đaŋǝla đǝlëɽǝñi đaŋǝra nano, na aŋǝno ilëɽǝñi cum yiđ aiyǝṯurṯi ŋen iŋi ŋiđ aŋfeṯe đeṯam. ²⁷ ŋen ŋanṯa agaber agiđi ŋaŋgiṯi usila gǝlëɽǝñi gaṯëđǝm alo eleđa laiyo, na agaber agiđi ŋaŋgiṯi eđa gǝlaɽǝŋa gatǝɽe aŋaicǝbǝre. ²⁸ agaŋaicǝñi rađ rǝđamǝṯia, na agiđi ŋaiñunḏǝjaice đaŋǝrađa nano ŋaga na lǝgiđ alfeṯe. ²⁹ lorldaiñ, igandǝlwaɽǝṯia đeṯam ŋen ŋǝnabi ḏawuḏ ṯa gaiyo nǝŋurǝni, na đel đǝlëɽǝŋu đëni iliga ildi. ³⁰ gënǝŋu gaɽo nabi, na galiŋeṯo ṯa rǝmwa ralwaɽǝṯǝma đalǝfiađa ṯa ŋere ŋǝlëɽǝŋu ŋǝnḏurṯu ŋiđ aŋaɽaŋe nal kursi eŋǝlǝŋe ilëɽǝŋu, ³¹ gënǝŋu gaseicu ŋen ŋǝnḏurṯu na gaɽwato eŋen ŋǝđǝtođa eŋǝɽaiñ đal masiya ṯa gero gaṯënu alo eleđa laiyo na aŋǝno ilëɽǝŋu yero yaieǝbǝro. ³² fǝŋu igi yesu igi rǝmwa ratuđǝma na eŋen iŋi nanda ñagaɽo đamǝđaṯa, ³³ na ŋen ŋanṯa gabeinu elo đaŋđa đǝŋaicǝba đǝrǝmwa, na ganeinu iđaṯa usila gatǝɽe garno ŋen ŋëɽǝnu, gënǝŋu garaicǝnde ŋen nano iŋi ñagaseicia na ñagǝnna. ³⁴ ḏawuḏ gero gabǝṯa elo, orn gënǝŋu gaṯa ṯa, elǝŋ rǝmwa ralwaɽǝṯu elǝŋ gǝlëɽǝñi, ɽaŋalo nḏaŋ đǝŋaicǝba đǝlëɽǝni, ³⁵ ŋen igamǝlu igëbǝđia leđa ildi lageaŋa ṯa alɽeṯe waŋge gǝrǝmanǝña rǝlaɽǝŋa. ³⁶ nṯia ŋgiṯr leđa pređ lisrayil alliŋeṯe đeṯam ṯa rǝmwa riđuma gaɽ elǝŋ na al masiya eum, yesu igi ñagaɽiñǝma iđuɽi. ³⁷ ndǝ lano ŋen iŋi nǝŋǝlwađe enare, ldǝlwaɽǝṯi buṯrus na leđa lǝđweinu pređ ṯa, lorldaiñ ñagëbǝđia ṯau? ³⁸ na buṯrus galwaɽǝṯǝlo ṯa, ṯađr ŋen ŋeicia ñoɽǝbaṯe rǝmwa nano orn ñananeini mamuḏiya irǝŋga gǝyesu masiya ñaŋ pređ, ŋen ŋanṯa đǝŋgeinia đǝŋen eŋalo ŋeicia, na ñagiđi ñaneini đǝneinia iđi đaɽo usila gatǝɽe. ³⁹ ŋen iŋi ŋëɽǝnṯǝnde na ñere eñalo na ildi pređ lafo nwaldaŋ, ildi pređ elǝŋ rǝmwa eraiñ riđ arǝlunduđi. ⁴⁰ na buṯrus nǝŋǝlǝlwaɽǝṯi ŋen ŋwaiña nǝŋǝleɽǝđe kaiñ nǝŋaṯa, ëbǝrr ntam enalo eleđa lǝɽiano lǝliga ildi. ⁴¹ orn leđa ildi laŋǝnṯu ŋen ŋǝlëɽǝŋu lananeinu mamuḏiya na ildi laɽǝjeinu egworǝb loman lakǝl laɽo alǝf iɽijin. ⁴² na ldǝnaiee ntam enen ldënṯi eđërrǝŋaiđia ŋen ŋǝleđa lǝđweinu, na eđǝɽǝbǝđia ŋen na eđagera aicǝba na eđaṯurṯia rǝmwa. ⁴³ na ŋǝđaiña ŋëndǝlo pređ, na leđa lǝđweinu ldiđi ŋen ŋwaiña ŋoɽra kaiñ. ⁴⁴ na ildi pređ lëndu ŋen lafǝldǝɽo na laŋge elden lafǝldǝɽo, ⁴⁵ ldiliđi laŋge elden na lakarnǝđǝlo ldǝɽo garno lonaṯa. ⁴⁶ na lararraiđo igal ekǝl ñoman pređ, na ṯalgero aieǝba eneɽa đaŋǝrađa nano na narna name, ⁴⁷ ldǝnanaiee rǝmwa đame đaŋǝrađa nano na leđa laŋërṯǝlo nano, na elǝŋ rǝmwa rabakaɽǝjaieo ñoman pređ ildi labërǝni.

¹ orn buṯrus na yuanna labǝṯa al ekǝl liga lǝđǝṯurṯia rǝmwa, ëđǝñin yaɽ iɽijin. ² na maji gafo gǝnǝŋ galǝŋǝnu gero gabǝlǝđia na leđa ṯalmarrapo ṯalmakëɽu igëuwǝr yal ekǝl isi ibernia ëuwǝr eŋǝra, ŋen ŋanṯa ṯaŋǝtǝmǝđeicu leđa laŋge. ³ ndǝ gwanwano buṯrus na yuanna lonaṯa labenṯia igal ekǝl, nǝŋǝleɽǝđe nǝŋaṯa naiciñi wagǝnǝŋ. ⁴ na buṯrus na yuanna ṯalǝseicu maji, na buṯrus nǝŋaṯa, nwanǝnde. ⁵ na gënǝŋu nǝŋǝlnwane taltal ṯaŋaṯa aŋgaicia lamanaica wagǝnǝŋ. ⁶ orn buṯrus nǝŋaṯa faḏḏa na ḏaǝb yero, orn ŋen ŋëni ŋǝnǝŋ igaŋanaicia, irǝŋga gǝyesu masiya galo inasiraṯ, erǝldo. ⁷ nǝŋǝmëndi eđaŋ đǝŋaicǝba nǝŋǝmatuđi, na ram rǝmanǝña rǝlëɽǝŋu na ñuɽe lderṯe ŋabǝɽa. ⁸ na ṯaŋakaborṯo elo nǝŋuđǝri na ṯaŋerldo na ldënṯi igal ekǝl ŋulda, na ṯaŋerldo, ṯaŋakaborṯo elo nǝŋërṯi rǝmwa nano. ⁹ na leđa pređ ldamaseici gabǝrlda na gaŋërṯu rǝmwa nano, ¹⁰ ldǝmaliŋeṯe ṯa fǝŋu igi gaɽaŋa igëuwǝr yal ekǝl isi ibernia ëuwǝr eŋǝra, fǝŋu igi gǝtǝmǝđeieu leđa laŋge, na ŋen ŋaijǝbinṯǝlo nano lirǝwǝṯu ŋeniano iŋi ŋiđǝnṯu maji. ¹¹ ŋen gëndu buṯrus na yuanna leđa pređ lobǝđaṯǝlo nano iltu lǝsuliman ildi labijǝđǝnu lǝđǝraiñjala, ldirǝwano kaiñ. ¹² ndǝ buṯrus gaseicu ŋen iŋi nǝŋǝleiṯi ṯa, leđa lisrayil ñagirǝwano eŋen iŋi eđa? na ñagandǝseicia kaiñ eđa? ñaŋ ñagaṯa ṯa ñagiđu maji gǝbǝrlda ŋabǝɽaŋa eŋaiñ walla ŋenŋa eŋaiñ ŋuđǝrwaṯo? ¹³ rǝmwa ribrayim na risag, na rǝyagub, rǝmwa irri rǝpapanda ranaieo yesu ŋaɽrwa, igi gađuɽǝđǝnṯia, igi ñagëndǝma na ñaganeđǝma bilaṯus nëiñua ndǝ gwonaṯa gamëbǝri. ¹⁴ orn ñaganeđǝma igi gatǝɽe na guđǝrwaṯo eŋen nǝñeɽǝđe ṯa maji aŋëbǝrni igi gaɽiñǝđo. ¹⁵ orn ñagaɽiñǝma igi gananaiđia đamǝṯia. fǝŋu igi rǝmwa ratuđǝma eŋǝɽaiñ. orn nanda ñagaɽo đamǝđaṯa eŋen iŋi. ¹⁶ na irǝŋ gǝlëɽǝŋu, gatuđu đonaṯa igirǝŋ gǝlëɽǝŋu nǝŋǝnaice maji igi ŋabǝɽa igi ñagaseicǝma ñagaliŋeṯǝma, fǝđonaṯa iđi đafo iyesu đeiđu maji igi garno ñagamaseicia. ¹⁷ điñǝđi lorldaiñ, igaliŋeṯo ṯa ñagaijǝba ŋen ñagiđu ŋeieia, garno nǝlǝŋ enalo naijǝba cum. ¹⁸ nṯia rǝrnwa rëɽiñađaiđo ŋen iŋi ralwaɽo pǝnde ëiñuaya yal anbiya pređ, ṯa al masiya ilëɽǝŋu giđ aŋǝneini ŋen ŋubwa. ¹⁹ orn ŋgiṯr ŋen eŋalo ŋeieia ñoɽǝbaṯe rǝmwa nano, ṯa ŋen eŋalo ŋeicia aŋǝmǝndëđǝni. ²⁰ orn elǝŋ rǝmwa riđ arǝndǝnaice liga lǝđatođa, na riđ arǝndǝnaice yesu igi rëɽǝma gaɽ al masiya egalo. ²¹ fǝŋu eɽa gǝrǝmwa elo gamaŋǝnṯia ŋen liga lakǝl lamǝlu ildi rǝmwa riđ araṯoɽaṯe ŋen pređ ralwaɽo pǝnde ëiñuaya yal anbiya ilëɽǝŋu pređ yetǝɽe. ²² musa gaṯa, elǝŋ rǝmwa riđ arǝtuđi nabi gunto elorldalo, ŋen ŋanṯǝnde, garno ratuđǝñi. ñagiđi ñamanaṯe eŋen pređ giđ aŋǝndǝlwaɽǝṯi. ²³ orn leđa pređ ildi laber lǝnna ŋen ŋǝnabi isi liđ alǝmǝndëđǝni eleđa pređ. ²⁴ na al anbiya pređ, samwil na ildi lǝnḏurṯu, ndǝ lalwaɽo pǝnde lalwaɽo ŋen ŋǝñoman iñi. ²⁵ ñaŋ ñagaɽo liđia lal anbiya na lǝđǝrreiđia ŋen iđi rǝmwa liđu eṯalandala ndǝ ralwaɽǝṯu ibrayim ṯa, leđa pređ lalo liđ alǝbuŋǝnṯi eŋere ŋǝlaɽǝŋa. ²⁶ ndǝ rǝmwa ratuđu eđa gađuɽǝđǝnṯia rǝđwaṯǝma eñaŋ ananoŋ ṯa aŋǝndǝbuŋṯi ndǝ ñagaṯađo ŋen eŋalo ŋeicia.

¹ na ndǝ laɽwatiṯia leđa, nǝlǝŋ nǝkana na elǝŋ gaskari yal ekǝl na as saḏḏugiyin ldǝleṯa nano, ² ldǝeiṯano ŋen ŋanṯa buṯrusanda lǝbërrǝŋaieia leđa ŋen ṯa yesu gatođo eŋǝɽaiñ. ³ orn ldǝlëndi na ldǝlënǝei isijǝn ṯaldǝṯurṯu ulaldiṯano, ŋen ŋanṯa erregano gaɽo. ⁴ orn leđa lwaiña ildi lano ŋen ldëndi, garno alǝf đenǝŋ. ⁵ na iloman leṯeɽe nǝlǝŋ na leđa loɽra na leđa ildi labërrǝŋaiđia ŋen ŋal ganun lal yawuḏ larraiđo alo yursalim, ⁶ na annan elǝŋ goɽra gǝkana na giyafa na yuanna na alaskandr na pređ ildi lelǝŋ goɽra gǝkana. ⁷ na ndǝ lëɽǝlo iligano ldǝleɽǝđe ṯa, ñagiđu ŋen ŋabǝɽaŋa ŋesegi na irǝŋga gesegi? ⁸ orn buṯrus, gwunḏǝjeinu usilaga gatǝɽe nǝŋǝleiṯi ṯa, ya nǝlǝŋ nǝleđa na leđa loɽra, ⁹ ndǝ ñagandǝnḏeicia điñǝđi ŋen iŋi ŋaŋǝra ŋiđǝnṯu maji igi gaijǝba gabǝlǝđia, ṯa gënǝŋu geiđinu ṯau, ¹⁰ lǝŋeṯr ñaŋ pređ, na leđa pređ lisrayil, ṯa ŋen ŋiđǝnu irǝŋga gǝyesu masiya galo inasiraṯ, igi ñagaɽiñǝma, igi rǝmwa ratuđǝma eŋǝɽaiñ. đeṯam irǝŋga igi na gerṯa irǝŋga garto maji igi gafǝnde nëiñua gëpi. ¹¹ fǝlwandra ildi ñaganeđo, ñaŋgi ñagaɽo leđa labijǝđia, orn điñǝđi laɽo lwandra laɽnda lađuna. ¹² đëbǝria đero egeđa gǝnǝŋ tǝŋ, ŋen ŋanṯa irǝŋ gero gwomǝn tǝŋ igi gafo ltuŋga iđurṯu alo, ganeinu leđa igi lǝgaɽǝwađaṯar lǝgiyëbǝrniar. ¹³ ndǝ lwanwano buṯrus na yuanna ṯa lero liđǝñalo, na laliŋeṯǝlo ṯa lero laɽaŋa imadrasa, lero lǝbëɽǝnṯia ŋenia, lënǝŋulu ldirǝwano kaiñ, na laliŋeṯo ṯa lënǝŋulu lafo yesu ŋǝla. ¹⁴ orn ndǝ lanwano maji igi geiđinu laldǝṯurwalda lënǝŋulu lero laɽǝwađaṯa lǝbaṯa wagǝnǝŋ. ¹⁵ orn ndǝ lalwaɽǝṯo buṯrus na yuanna ṯa alamiñe enǝlǝŋ ini nararraiđo ṯalɽwataiđo eŋen eŋen, ¹⁶ ldaṯa, lǝgiđr aliđr ṯau eleđa ildi? ŋen ŋanṯa ŋen iŋi ŋiđǝnu đaŋđa eđen ŋoɽra kaiñ na leđa pređ lalo yursalim laliŋeṯo na lǝgerr lǝgaɽǝwađaṯar lǝgabǝlaicar. ¹⁷ orn ṯa ŋen aŋerṯe aŋǝlaldǝđǝni alo eleđa, aldǝgariñaṯr ṯa alerṯe lalwaɽǝṯia eđa gǝnǝŋ irǝŋga igi gǝyesu tǝŋ. ¹⁸ orn ldǝlundǝđi ldǝlǝlwaɽǝṯi ṯa alerṯe lalwaɽa na alerṯe labërrǝŋaicia leđa ŋen irǝŋga gǝyesu kwai kwai. ¹⁹ orn buṯrus na yuanna ldǝluɽǝbiṯi eŋen ṯa ndǝ ŋen ŋafo ŋope rǝmwa nëiñua ṯa ñagandǝnaṯa eŋen ŋamiñaṯa rǝmwa, lwaɽr ñaganǝñaŋ. ²⁰ orn nanda, ñagero ñagaɽǝwađaṯa ñagabwaiña ŋǝma eŋen iŋi ñagaseieu na ñagano. ²¹ na ndǝ lanaieǝlo ŋen ŋubwa tǝŋ, lënǝŋulu ldǝlëbǝri, na lero lafiđia ŋen ŋǝnǝŋ ṯa lalasǝkia ŋen ŋanṯa liđǝña leđa ŋen ŋanṯa leđa pređ lananaieia rǝmwa đame eŋen iŋi ŋiđǝnu. ²² ŋen ŋanṯa maji igi geiđinu goɽra gamiñaṯa nṯǝli eređia marldwan, na ŋen iŋi ŋaɽ aŋwara. ²³ ndǝ lëbǝrnu buṯrus na yuanna labǝṯa alo yǝrappa ldǝlǝlwaɽǝṯi ŋen pređ iŋi nǝlǝŋ nǝkana na leđa loɽra lalwaɽǝṯǝlo. ²⁴ ndǝ lano lënǝŋulu lalwaɽǝṯia rǝmwa olega gunto ldaṯa, elǝŋ rǝmwa fǝŋa ŋaŋgi agiđu elo na alo na ebarlda na laŋge pređ ildi lafǝlau, ²⁵ ŋaŋgi agwalwaɽo usilaga gatǝɽe, ëiñuaya yǝḏawuḏ, papa egaiñ, igi gaŋađuɽǝđǝnṯia agaṯa, leđa ildi gerṯa laɽo al yawuḏ leieiano eđa? na leđa lamamǝṯa ŋen nǝsi ŋeicia eđa? ²⁶ nǝlǝŋ nalo natwođo na narraiđo ldǝɽo nagea elǝŋ rǝmwa na al masiya gǝlëɽǝŋu. ²⁷ na đeṯam alo isi iruḏus na bilaṯus al bunṯi na leđa ildi lero laɽo al yawuḏ na leđa lisrayil larraiđo ldǝɽo lagea yesu, eđa gatǝɽe igi agëɽǝma gaɽ al masiya, igi gaŋađuɽǝđǝnṯia. ²⁸ lënǝŋulu larraiđo ṯa aliđi ŋen iŋi ŋafo đaŋ đǝlaɽǝŋa na đonaṯa đǝlaɽǝŋa lëɽu ṯa aŋiđǝni. ²⁹ na điñǝđi elǝŋ rǝmwa, nwano ŋen ŋubwa eŋen na naieo leđa ildi laŋađuɽǝđǝnṯia ŋabǝɽa ṯa liđ alwaɽe ŋen ŋǝlaɽǝŋa lero ŋađaiña, ³⁰ nđd agakwale đaŋ đǝlaɽǝŋa ṯa ađeiđi đǝmwa na ṯa ađiđi aŋwara irǝŋga gǝyesu igi gatǝɽe gaŋađuɽǝđǝnṯia. ³¹ na ndǝ laṯurṯu rǝmwa đǝge alo isi lënǝŋulu lafau ṯaiyǝtësǝnu na pređ lunḏǝjeinu usilaga gatǝɽe gǝrǝmwa na ṯalɽwato ŋen ŋǝrǝmwa lero ŋađaiña. ³² na leđa ildi lëndu ŋen lerṯo ara gunto na ŋen ŋunto na eđa gero gǝnǝŋ gwalwaɽo elaŋge ǝllëɽǝŋu ṯa laŋge ǝllëɽǝñi ŋen ŋanṯa elden pređ ldǝɽo. ³³ na ŋabǝɽaŋa ŋwaiña leđa lǝđweinu yanaico leđa ŋen ŋǝđatođa đelǝŋ yesu eŋǝɽaiñ ŋen ŋanṯa allǝŋeṯe na đubwiđia na đame đǝrǝmwa đafǝlo enare pređ. ³⁴ eđa gero gǝnǝŋ gaɽ ebai iŋulu ŋen ŋanṯa leđa ilđi lerṯo ni na neɽa lirldiđǝlo na leṯo al gǝrusya ³⁵ ldëɽi erǝmanǝña rǝleđa lǝđweinu na lakarnǝđiṯu leđa ŋen ŋarno eđa gwonaṯa. ³⁶ na yusǝf igi gaɽo lawi galo igubrus igi leđa lǝđweinu lënǝeǝma barnaba, irǝŋ gǝnǝnu eđa gǝbǝɽiano, ³⁷ gënǝŋu gerṯo gi nǝŋǝliđi nǝŋǝme al gǝrus nǝŋëɽi erǝmanǝña rǝleđa lǝđweinu.

¹ orn maji gǝnǝŋ gǝbernia ananiya na wasen gǝlëɽǝŋu gǝbernia safira liliđu gi, ² na gënǝŋu nǝŋëndi gǝrus yǝmaṯan, na wasen galiŋeṯo, nǝŋǝme isi yǝṯënu nǝŋëɽi erǝmanǝña rǝleđa lǝđweinu. ³ orn buṯrus gaṯa, ananiya, seṯan yënṯu egare gǝlaɽǝŋa eđa ṯa agagabiṯia usila gatǝɽe gǝrǝmwa alo na agëndu gǝrus yǝmaṯan ŋamǝɽa isi agiliđǝlo gi? ⁴ ndǝ gi gamǝlu giliđǝnu gerṯa gǝlaɽǝŋa? na ndǝ giliđǝnu đǝge gerṯa al gǝrus yafo eđaŋ đǝlaɽǝŋa? orn agëɽu ŋen ŋaɽǝṯia egare eđa? agero agagabiṯia leđa alo orn agagabiṯu rǝmwa alo. ⁵ nd ananiya gano ŋen iŋi giɽu nǝŋaiye. na ŋǝđaiña nǝŋëndi leđa kaiñ ildi lano ŋen. ⁶ na lëđǝmwa latwođo, ldǝmanindeici erenaga, ldǝmape ldǝmaiyǝmiñaṯe ndëuwǝr ldǝmuri. ⁷ ndǝ ëđǝñin yaŋgaṯo yarno iɽijin wasen gënṯu, gaijǝba ŋen ŋiđǝnu. ⁸ na buṯrus nǝŋǝmeiṯi ṯa, lwaɽǝṯiñi fǝgǝrus isi ṯia ñagiliđǝlo gi? na wuji nǝŋaṯa a, gǝrus fisi ṯia. ⁹ orn buṯrus nǝŋǝmeiṯi ṯa, ŋen ŋanṯau ñagarreiđu ŋen ñaŋ ndǝm ṯa ñǝnḏeici usila gelǝŋ rǝmwa ? nwano leđa ildi luru ebaŋgalo lafo igëuwǝr na liđ alaŋape ndëuwǝr cum. ¹⁰ na ram nǝŋiɽǝṯi erǝmanǝŋ rǝbuṯrus nǝŋaiye. ndǝ lëđǝmwa lënṯu lafiđǝma gaiyo, ldǝmape ndëuwǝr ldǝmuri ebaŋgen eđǝɽe. ¹¹ na ŋǝđaiña ŋëndu leđa pređ lǝkanisa kaiñ, na ildi pređ lano ŋen iŋi. ¹² ŋen ŋwaiña ŋoɽra na aŋwara liđǝnu leđa nëiñua raŋra rǝleđa lǝđweinu. na lënǝŋulu pređ ṯaɽrraiđu iltu lǝsuliman, ildi labijǝđǝnu lǝđǝraiñjala, lafo alo yal ekǝl. ¹³ na leđa lǝṯënu liđǝñalo ṯa aldǝɽaŋǝlda orn laṯa ṯa leđa ildi lame. ¹⁴ na leđa ildi lëndu ŋen ŋelǝŋ rǝmwa ṯalakaɽǝjaiđo egworǝb lwaiña ɽrwa na ɽrlda. ¹⁵ na leđa ṯalarrǝpaṯo leđa lwuma erađ al aŋgǝremya na đǝṯeliađa ŋen ŋanṯa buṯrus usila gǝlëɽǝŋu aŋalǝmiñe nano lǝmaṯan. ¹⁶ na leđa lwaiña eum leṯo alo yursalim ṯwaiñ, larrapo leđa lwuma na ildi lerṯo usila nano geicia, na leiđinu pređ. ¹⁷ orn elǝŋ goɽra gǝkana gatwođo na ildi pređ lafǝlda, na leđa las saḏḏugiyin ldǝeiṯano kaiñ, ¹⁸ ldǝkëndi leđa lǝđweinu ldǝlëkëɽi isijǝn yǝleđa pređ, ¹⁹ orn ulǝŋgi mǝlaiyǝka đǝrǝmwa đagiđu ëuwǝr yǝsijǝn na đamiñeieǝlo ndëuwǝr nḏaṯa, ²⁰ mbǝr ñađuri igal ekǝl ñalwaɽǝṯe leđa ŋen pređ ŋǝđamǝṯia iđi đafo iyesu. ²¹ na ndǝ lano ŋen iŋi lënṯu igal ekǝl bǝrni bǝrnia ṯalërrǝŋaieo leđa ŋen. orn elǝŋ goɽra gǝkana geṯo na ildi lafǝlda ldundǝđi nǝlǝŋ ini nararraiđia lisrayil lađwaiđo isijǝn ṯa alǝme buṯrusanda. ²² orn ndǝ leṯo na lero ldǝfiđa isijǝn loɽǝbǝđo ²³ ldaṯa ṯa, ñagafiđu sijǝn yǝldandǝnu ŋope na askari yarǝmoṯwa ëuwǝr orn ndǝ ñagagiđu ñagero ñagafiđia eđa gǝnǝŋ egwaŋ. ²⁴ orn ndǝ nǝlǝŋ nǝkana na elǝŋ gaskari yal ekǝl lano ŋen iŋi ŋen ŋaijǝbinṯǝlo nano ldirǝwano ṯa ŋen ŋaɽo ṯau. ²⁵ na eđa geṯo gǝnǝŋ nǝŋǝlǝlwaɽǝṯi ṯa, leđa ildi ñagëɽǝlo isijǝn lwëtu igal ekǝl lađǝru lǝbërrǝŋaieia leđa ŋen. ²⁶ orn elǝŋ gaskari na ildi lađuɽǝđinṯǝlo labǝɽo ldǝlǝma, orn lamǝlo ŋen ŋame ŋen ŋanṯa liđǝña leđa, laṯa liđ aldǝmǝndaiye ŋwandraŋa. ²⁷ na ndǝ lamǝlo, lëɽǝlo iligano nǝlǝŋ nëiñua ini nararraiđia na elǝŋ goɽra gǝkana geɽǝđǝlo ²⁸ nǝŋaṯa, ñagwalwaɽǝṯǝnde ŋope ṯa ñerṯe ñagabërrǝŋaicia leđa ŋen irǝŋga igi gǝyesu. na nwanr ñagwunḏǝjaico alo yursalim đërrǝŋaiđiađa eđalo na ñagwonaṯa ṯa ñagoɽǝbaica ŋǝfǝni ŋǝmaji igi nanda nano. ²⁹ orn buṯrus na leđa lomǝn lǝđweinu ldǝluɽǝbiṯi eŋen ṯa, ŋen ŋame đeṯam ñaganaṯa rǝmwa gamiñaṯo leđa. ³⁰ rǝmwa rǝpapanda ratuđu yesu igi ñagaɽiñǝma ndǝ ñagëɽǝma gabǝreicia iđuɽi, ³¹ fǝŋu igi rǝmwa rabaṯǝma elo nḏaŋ đǝŋaicǝba đǝlëɽǝŋu gaɽ elǝŋ na đëbǝria ṯa aŋanaice leđa lisrayil ŋen enare ŋǝđaṯađa na đǝŋgeinia ŋen ŋeicia na đoɽǝbaṯa rǝmwa nano. ³² na ñagaɽo đamǝđaṯa eŋen iŋi na usila gatǝɽe gǝrǝmwa gaɽo đamǝđaṯa cum igi rǝmwa rananaicia leđa ildi lǝmanaṯa. ³³ ndǝ lano ŋen iŋi ldǝciṯano kaiñ, lonaṯa laldǝɽiña. ³⁴ orn maji gǝnǝŋ gal farisiyin igi genǝlǝŋ ini nararraiđia, gǝbernia gǝmalaiyǝl igi gǝbërrǝŋaiđia ŋen ŋal ganun, leđa pređ lubwamaiya, gënǝŋu gatwođo nǝŋǝleiṯi ṯa, miñeicǝrldo ndëuwǝr ŋen ŋǝtefr. ³⁵ nǝŋǝlǝlwaɽǝṯi ṯa, leđa lisrayil, rǝmojǝđr eŋen iŋi ñagiđi ñiṯi leđa ildi. ³⁶ bǝtëgǝluŋ maji gǝbernia đuḏas gatođo, gaṯa goɽra, na liji ɽrwa larno miyya marldwan lëndu ŋen ŋǝlëɽǝŋu, orn gaɽiñǝnu na ildi pređ lǝmateṯa lalaldǝđǝnu alo na ŋen nǝŋerṯe đǝge. ³⁷ orn maji galo ijalil gatwođo gana yausa, iliga lakǝl nǝlǝŋ numađaṯa leđa, na leđa lateṯǝma lwaiña, na gënǝŋu gaɽiñǝnu cum na ildi pređ lamateṯa lalaldǝđǝnu alo. ³⁸ na điñǝđi, eŋen ŋǝleđa ildi igandǝlwaɽǝṯia ŋgiṯǝrldo, ŋen ŋanṯa ndǝ ŋen iŋi ŋǝleđa, ŋiđ aŋerṯe, ³⁹ orn ndǝ ŋǝrǝmwa, ñagero ñagaɽǝwađaṯa ñagalǝđama. aŋgaica ŋen ŋiđ aŋfiđǝni ṯa ñagagea rǝmwa. ⁴⁰ na lënǝŋulu lano ŋen ŋǝlëɽǝŋu, na ndǝ lundǝđu leđa lǝđweinu lëpǝlo ldǝlǝlwaɽǝṯi ṯa alerṯe laɽwata irǝŋga gǝyesu orn ldǝlëbǝri. ⁴¹ ndǝ lamiño enǝlǝŋ ini nararraiđia laŋǝra nano ŋen ŋanṯa lafiđǝnu larǝjađaṯo eŋen ṯa alneini ŋen ŋubwa ŋen ŋanṯa irǝŋ gǝyesu. ⁴² na ñoman pređ igal ekǝl na irnuŋ lero laŋgiṯia đërrǝŋaiđia ŋen ṯa yesu gaɽo al masiya.

¹ na iliga ildi ndǝ ṯalǝmis yaɽǝjaiđo egworǝb leđa ildi laɽo al yawuḏ laɽwato ole gǝyunaniyin, lamo ŋen ŋwaiña ŋagea leđa laɽo al yawuḏ ildi laɽwato ole gibraniym ŋen ŋanṯa liji ɽrlda elden lǝṯëđǝnialo, ebangenanda laiyo lero lananeini laŋge lnǝŋ elaŋge ildi labakarnǝđǝnia ñoman pređ. ² na ṯalǝmis isi ređ nemiñe eɽijan yundǝđu ṯalǝmis pređ ldǝɽo niyaṯa, ŋen ŋero ŋafo ŋope ṯa nanda ñagaŋgiṯia đërrǝŋaiđia đǝŋen ŋǝrǝmwa, ṯa ñagëbǝđia ŋǝmëɽria ŋǝlaŋge lǝđǝsa. ³ lorldaiñ, oṯǝr leđa eñaŋ ɽrwa đenǝŋ ldamiñe liɽijan ildi luneini, lunḏǝjeinu enare usilaga gatǝɽe, na laliŋeṯo ŋen nǝsi, ṯa ñalnaice ŋǝmëɽria iŋi. ⁴ orn nanda ñagǝbendia ŋen ŋǝđǝṯurṯia rǝmwa na ŋǝđërrǝŋaiđia đǝŋen ŋǝrǝmwa. ⁵ na ŋen iŋi laŋǝrau nano pređ ldëndi isṯǝfanus, maji igi gwunḏǝjeinu đonaṯađa na usilaga gatǝɽe gǝrǝmwa, na filibus, na burukurus, na nikanur, na timun, na barminas na nikulawus galo yanṯakiya. ⁶ ldǝlǝme leđa nëiñua lǝđweinu na lënǝŋulu ldǝṯurṯi rǝmwa ldǝlëɽi raŋ nǝŋǝɽwa. ⁷ na ŋen ŋǝrǝmwa ṯaŋunḏǝjeinu alo na ṯalǝmis ṯaiyakaɽǝjaiđo egworǝb ywaiña kaiñ alo yursalim na kana ywaiña yëndu ŋen ŋǝrǝmwa. ⁸ na isṯǝfanus, gwunḏǝjeinu đǝnaieiađa đǝrǝmwa na ŋabǝɽaŋa ṯaŋiđu ŋen ŋoɽra na aŋwara leđa nëiñua. ⁹ na leđa latwođo lǝmaṯan lǝmajma isi yǝbernia majma yǝlǝbarṯiniyin na lǝmaṯan lǝgirǝwaniyin, na laskandariyin na lalo ikilikiya na lalo yasiya ldukuɽǝbijǝđǝṯi eŋen isṯǝfanus ŋǝla. ¹⁰ orn lënǝŋulu lero laɽǝwađaṯa lamǝđama ŋen ŋanṯa gwaɽwato đaliŋeṯađa ŋen nǝsi na usilaga gatǝɽe. ¹¹ orn lënǝŋulu lanaico majianda ole ŋamǝɽa na ildi laṯa ñagano fǝŋu gaṯa ṯa ŋen ŋǝmusa ŋeicia na ŋen ŋǝrǝmwa ŋeicia. ¹² na labwođo ŋenŋa ŋeicia leđala na nǝlǝŋna na leđala ildi lǝbërrǝŋaiđia ŋen ŋal ganun ldǝmëndi na leṯǝmaiya nǝlǝŋ nëiñua ini nararraiđia, ¹³ na lamo leđa ildi laɽwato ŋaɽǝwen, ildi laṯa, maji igi gwaɽwata jaica ŋen ŋeicia ŋalo isi yëđǝñinu yatǝɽe na ŋal ganun cum. ¹⁴ ŋen ŋanṯa ñaganǝma gwalwaɽo ṯa yesu igi galo inasiraṯ giđ aŋgere alo isi, na giđ aŋamǝleđe ŋen iŋi musa ganaicǝndr. ¹⁵ na nǝlǝŋ pređ ini nararraiđo leđala ildi lafǝlda ṯalmaseicu ldǝseici isiano yarno isiano imǝlaiyǝka.

¹ na elǝŋ goɽra gǝkana geɽǝđǝma, fǝṯia đeṯam ? ² na isṯǝfanus nǝŋaṯa, lorldaiñ na lǝṯenia, naṯǝñr. rǝmwa rǝŋaɽrwa ramiñiṯu papa igëndr ibrayim ndǝ gafo alo imabenalbaren ŋen gamǝlu gaɽaŋa alo yaran, ³ ndrǝmeiṯr ṯa, twođo alo ilaɽǝŋa na ŋgiṯu leđa ǝllaɽǝŋa ŋaɽe alo isi igaŋaŋaicia. ⁴ orn gamiño alo ikaldamyin nǝgabǝṯa alo yaran. ndǝ eṯen gaiyo đǝge rǝmwa rǝtucǝma alo isi ñagafau điñǝđi, ⁵ orn rǝmwa rero ranaicǝma alo isi yǝtefr cum isi gaɽǝwađaṯa gǝwëɽi đǝmanǝña ano. orn rǝlwaɽǝṯǝma ṯa riđ arǝmanaice na ñere ñǝlëɽǝŋu ñǝnḏurṯu, ŋen gero gǝberṯia ŋere. ⁶ na rǝmwa rǝlwaɽo ŋen ṯia, ṯa ñere ñǝlëɽǝŋu ñiđi ñamërni ñarto alo yarto na leđa liđ aldiđi laɽo lǝbai na liđ aldǝnaice ŋen ŋubwa nṯǝli miyya marldwan. ⁷ orn rǝmwa raṯa ṯa igiđi ekarme leđa ildi laldicwëri, orn liđ alamiñe alo yakǝl na liđ alaiñǝbuŋṯi alo isi. ⁸ na rǝmwa ranaico ibrayirn ŋen ŋǝđuɽǝđǝnia. na ibrayim galǝŋo isag nǝŋamuɽǝđi ndǝ ñoman ñaɽo đenǝŋ ñamiñe ñiɽijin, na isag galǝŋo yagub na yagub galǝŋo papanda lǝpǝnde ređ ldǝmiñe liɽijan. ⁹ na papanda ildi licǝṯu yusǝf ano ldǝmiliđiṯi leđa lalo irnasr, orn rǝmwa rafǝmaiya, ¹⁰ na rëbǝrǝma eŋen ŋubwa pređ ganeinu, na rǝnaicǝma đaliŋeṯa ŋen nǝsi fero nëiñua elǝŋ galo imasr, na fero gaŋǝrṯǝma nano, na giđǝrna gaɽ elǝŋ alo imasr na egeɽa gǝlëɽǝŋu pređ. ¹¹ orn ŋorwaṯa ŋeṯo alo imasr pređ na alo ikanan na đeicwara đwaiña, na papanda lderṯe lafiđia laŋge lasǝni. ¹² orn ndǝ yagub gano ŋen ṯa ŋwana ŋwëtu alo imasr nǝŋǝđwaṯe papanda iliga lǝnëiñua. ¹³ na iliga lǝnḏurṯu yusǝf gaŋeinu lorǝba nǝŋǝlǝŋaice fero. ¹⁴ na yusǝf nǝŋǝđwaiđe ṯa yagub, eṯen aŋela na leđa pređ laɽ amǝeu gǝlëɽǝŋu, ildi laɽ eređia đenǝŋ nalo eređia giɽijan na đenǝŋ. ¹⁵ orn yagub nǝgabǝṯa alo imasr, nǝŋaiye, gënǝŋu na papanda cum, ¹⁶ na lënǝŋulu larrapǝnu luɽǝbeinu alo isakim na lurǝnu eđel iđi ibrayim giliđiṯu liđia lǝmaji gǝbernia amur, alo isakim. ¹⁷ ndǝ liga lafo ṯwaiñ ildi rǝmwa ronaṯa rǝɽiñađaṯa ŋen iŋi rëɽǝṯu ibrayim, liji ildi lalaŋǝđaiđo alo imasr lwaiña, ¹⁸ orn elǝŋ nǝŋǝtwođe gǝmaijǝn gaijǝba yusǝf. ¹⁹ gënǝŋu gafo galnanaiea ŋen ŋubwa ŋeicia kaiñ ṯa papanda alabǝlaice ñere eñen ŋen ŋanṯa aiñerṯe ñamǝṯe. ²⁰ iliga ildi musa gǝlǝŋǝnu gaɽo ŋere ŋaŋǝra kaiñ rǝmwa nëiñua, nǝŋamicini nubwa niɽijin egeɽa geṯen, ²¹ nǝŋëɽǝni ndëuwǝr na ŋere ŋǝfero nǝŋamabaṯe egeɽa gǝlëɽǝŋu nǝŋǝɽeṯe iđi gǝlëɽǝŋu. ²² na musa nǝŋërrǝŋeini ŋen ŋǝđaliŋeṯa ŋen nǝsi đǝleđa lalo imasr, na gënǝŋu goɽra eŋen pređ na eŋǝmëɽria. ²³ ndǝ gerṯo nṯǝli eređia marldwan, ŋen nǝŋameṯa egare ṯaŋwonaṯo ganwana lorǝba ǝllëɽǝŋu, liđia lisrayil. ²⁴ na ndǝ gaseicu gunto gǝneinu ŋen ŋubwa gamađaṯǝma nǝŋǝrreṯe eŋen ṯalpǝđu majiga galo imasr, nǝŋǝmaɽiñe. ²⁵ gënǝŋu gaṯa ṯa lorǝba laliŋeṯo ṯa rǝmwa ronaṯa ralëbǝri đaŋđa đǝlëɽǝŋu, orn laijǝba. ²⁶ na iloman leṯeɽe tǝŋ geṯǝlo nano ndǝ lëpwǝđi gwonaṯa galbëɽǝjǝđia, nǝŋaṯa, ñagǝlǝŋǝnu, ñagëpwǝđi eđa? ²⁷ orn maji igi gǝbiṯi orǝba ŋen ŋeieia nǝŋǝđwađe musa đaŋđa, nǝŋaṯa, esegi giđǝŋa agaɽ elǝŋ ṯa agǝbikirnḏeicia ŋen eŋaiñ? ²⁸ agwonaṯa agaiñaɽiña garno erega agaɽiño maji galo imasr? ²⁹ ndǝ musa gano ŋen iŋi gobǝđaṯo alo yǝmiḏian nǝŋǝmërni eđa gaɽ ilia. orn nǝŋalǝŋe ñere ñiɽijan ñarrwa alo yakǝl. ³⁰ ndǝ nṯǝli naŋgaṯo eređia marldwan, mǝlaiyǝka nḏǝmeṯa nano nḏǝmiñeiei isi uɽi nano eđǝñwa aiyǝn nano ibernia sina. ³¹ ndǝ musa gaseieu ŋen ŋaijǝbinṯǝma nano, na ndǝ gabǝṯa ṯwaiñ ŋen ŋanṯa aŋǝseiei ŋen iŋi nǝŋǝne ole gelǝŋ rǝmwa igi gaṯa, ³² igaɽo rǝmwa reṯalanda, rǝmwa ribrayim na risag na rǝyagub. na musa ṯaŋgǝđiaŋǝno nǝŋulǝŋǝđeici nda alo. ³³ na elǝŋ rǝmwa reiṯǝma ṯa miñeinu nḏǝbina erǝmanǝŋ rǝlaɽǝŋa, ŋen ŋanṯa alo isi agađǝrau yatǝɽe. ³⁴ đeṯam igaseicu ŋen ŋubwa ŋǝleđa ǝllëɽǝñi alo imasr na igano đarǝjinia alo eđen, na igiruwǝṯalo ṯa elëbǝri. điñǝđi elaŋ, igiđ eŋǝđwaṯe alo imasr. ³⁵ musa igi fǝŋu leđa laneđǝma, ildi laṯa, esegi giđǝŋa agaɽ elǝŋ na eđa gabikirnḏeieia ŋen? rǝmwa rađwaṯǝma đaŋđa đǝmǝlaiyǝka iđi đeṯǝma nano iguɽi, gaɽ elǝŋ na đëbǝri cum. ³⁶ na musa gënǝŋu gamiñǝlo ndǝ gafo giđu ŋen ŋoɽra na aŋwara alo imasr na alo igal bar yore, na eđǝñwa nṯǝlia eređia marldwan. ³⁷ fǝmusa igi galwaɽǝṯu leđa lisrayil ṯa, rǝmwa riđ arǝndǝtuđiṯi nabi yǝnǝŋ elorldalanda garno ratuđǝñi. ³⁸ fǝŋu igi gafo larraiđu leđala eđǝñwa na mǝlaiyǝkađa iđi đaɽwato ŋuga naiyǝn yana sina, na papandala, igi ganeinu ŋen iŋi ŋamǝṯo ŋǝrǝmwa ṯa aŋǝndǝnaicr. ³⁹ papanda laneđǝma, lëɽǝma alǝsoŋ, na enare enen ldoɽǝbaṯe alo imasr, ⁴⁰ ldǝlwaɽǝṯi arun ṯa, iṯǝnde imwa yarto aiyandǝfiṯi nëiñua, ñagaijǝba ŋen ŋǝmusa gënǝŋu igi gamiñǝndr alo imasr ndǝ geṯo, ndǝ gaber geṯo. ⁴¹ ldiđi ŋǝmbǝɽo raŋra ldiṯi waŋge igi lukwuđiñǝṯialo đǝɽǝđǝnia ldaŋǝreṯe nano egwaŋge liđu. ⁴² na rǝmwa raṯađǝlo na raŋgiṯǝlo ṯalǝbuŋṯu laŋge lelo, garno gǝwërđǝnu egađam gǝnabi ṯa rǝmwa raṯa, liji lisrayil, ñaganaieǝñi đeṯam laŋge lǝđǝɽǝđinia eđǝñwa nṯǝli eređia marldwan? ⁴³ ñagarrapo al kema imolok na đopa đǝrǝmwa rǝnǝŋ rǝbernia ramufan na laŋge ildi ñagiđǝlo ṯa ñǝlukwuđiñǝṯialo. igiđi endape alo ibabil nëiñua. ⁴⁴ orn papanda lerṯo al kema eđǝrreiđia ŋen ndǝ lafo eđǝñwa garno rǝmwa ralwaɽǝṯu musa ṯa aŋiđi ŋen ŋarno iŋi gaseicu. ⁴⁵ orn papanda lamo al kema isi ndǝ leṯo yosuala nde lamǝlađaiđo alo eleđa lakǝl ildi rǝmwa rǝlëldiñǝlo papanda nëiñua. orn al kema yaɽaŋa ëli nṯǝli nwaiña kaiñ ḏawuḏ nǝŋalǝŋǝni nǝŋǝɽeṯe elǝŋ, ⁴⁶ fǝŋu rǝmwa raŋǝrṯǝma nano, na geɽǝđo rǝmwa ṯa aŋwađe eɽa, rǝmwa irri rǝyagub. ⁴⁷ orn suliman fǝŋu gwađo eɽa ŋen ŋanṯa rǝmwa. ⁴⁸ orn igi goɽra gamiñaṯo leđa pređ gënǝŋu gaber gaɽaŋa eneɽa niđǝnu raŋra, garno nabi galwaɽo, ⁴⁹ elo yaɽo kursi ilëɽǝñi, na alo yaɽo waŋge gǝrǝmanǝŋ rǝlëɽǝñi. elǝŋ rǝmwa ralwaɽo, eɽa gaɽo ṯau igi ñaŋ ñagwađǝṯiñi, na alo yuŋga igumiñǝniano? ⁵⁰ gerṯa raŋ rǝlëɽǝñi riđu laŋge ildi pređ? ⁵¹ ñaŋgi ñagwonḏǝṯo ntam, ñagamǝlu ñagaliŋeṯo rǝmwa enare na nënǝñia enalo naɽ ndul eŋen ŋǝđeṯarn. ñaganeđo usila gatǝɽe gǝrǝmwa jaica. ŋen ŋarno eṯalanda liđu ñagëbǝđia cum ⁵² nabi yuŋga eṯalanda gero gamanaicia ŋen ŋubwa? na lënǝŋulu laɽiñǝlo ildi lalwaɽo ananoŋ ŋen ŋǝđela đǝlëɽǝŋu igi guđǝrwaṯo eŋen, igi ñaganeđǝma na ñagaɽiñǝma, ⁵³ ñaŋgi ñagǝneinu al ganun isi mǝlaiyǝka yanaicǝnde orn ñagero ñagarǝmoṯwa. ⁵⁴ ndǝ leđa lano ŋen iŋi ldǝciṯano enare kaiñ ṯalǝsaṯo eŋađ. ⁵⁵ orn isṯǝfanus gwunḏeinu egare usilaga gatǝɽe gǝrǝmwa, gaseiđu elo nǝŋǝseici ŋaɽrwa ŋǝrǝmwa, na yesu gađǝru nḏaŋ đǝŋaicǝba đǝrǝmwa, ⁵⁶ nǝŋaṯa igaseieia ltuŋga lagagiđǝnu, na iđia gǝleđa gađǝru nḏaŋ đǝŋaicǝba đǝrǝmwa. ⁵⁷ orn ṯaɽrǝjaico ole pǝlelo na lǝtërnu inënǝñia ldamobǝđaṯe nano taltal. ⁵⁸ na ldǝmabǝrǝldeđeṯe ndëuwǝr alo yarto na ldǝmamǝndaiye ŋwandraŋa, na leđa laɽo đamǝđaṯa lëɽu ndrena enen erǝmanǝŋ rëdǝmwa gǝnǝŋ ganṯa sawul. ⁵⁹ na ŋen lamǝndaiya isṯǝfanus ŋwandraŋa, gënǝŋu geɽǝđo rǝmwa, nǝŋaṯa, elǝŋ yesu, aŋǝnṯu usila gǝlëɽǝñi. ⁶⁰ na nǝŋwođǝñiṯi alo ṯaŋarǝjaico ole pǝlelo, nǝŋaṯa, elǝŋ yesu ŋerṯe agalasǝkia eŋen ŋeicia liđu. na ŋen galwaɽo ṯia nǝŋaiye.

¹ na sawul gameđǝño iđǝɽiñǝnia ŋisṯǝfanus. na iloman lakǝl ŋen ŋatođo ŋubwa kaiñ ŋagea leđa lǝkanisa iđi đǝfo alo yursalim, na leđa pređ lalǝldëđǝni alo alo yuḏiya na alo isamǝri, illi leđa lǝđweinu. ² na leđa laŋǝra eŋen luru isṯǝfanus na ṯalmarǝṯo. ³ orn sawul giṯu kanisa ŋen ŋeicia kaiñ na gënṯu eneɽa pređ nǝŋakëndi leđa ɽrwa na ɽrlda nǝŋalǝkëɽi isijǝn. ⁴ orn leđa ildi lalaldëđǝnu alo ṯalakaldaico alo pređ ṯalërrǝŋaiđo ŋen ŋaŋǝra ŋǝrǝmwa. ⁵ na filibus nǝŋirǝwǝṯa alo isamǝri nǝŋërrǝŋaice leđa ŋen ŋal masiya. ⁶ na leđa lwaiña ṯalnaṯo filibus araga gunto, ndǝ lano ŋen ŋǝlëɽǝŋu na laseicu aŋwara giđu raŋra. ⁷ ŋen ŋanṯa nusila neicia namiño leđa nano lwaiña ildi lerṯǝlo nano, narǝjaico ole pǝlelo, na lwaiña lwuma na laɽo lebǝco leiđinu. ⁸ orn đaŋǝra nano nḏǝfeṯe đwaiña alo isi. ⁹ orn maji gǝnǝŋ ganṯa siman gafo giđu ŋen ŋoɽra kaiñ alo yakǝl ŋaijǝbinṯu leđa pređ lalo isamǝri ldirǝwǝṯiano kaiñ, fǝŋu gaṯa ṯa gaɽ eđa goɽra. ¹⁰ leda lanaṯǝma pređ na nǝlǝŋ cum laṯa maji igi gaɽo ŋabǝɽa ŋǝrǝmwa iŋi ñënǝjǝnu ŋoɽra. ¹¹ na lanaṯǝma ŋen ŋanṯa liga lwalano giđu ŋen ŋaijǝbinṯǝlo. ¹² orn ndǝ lanaṯo filibus ndǝ gërrǝŋaicǝlo ŋen ŋame ŋǝŋǝlǝŋe ŋǝrǝmwa na ŋirǝŋ gǝyesu masiya ldǝnaneini mamuḏiya, ɽrwa na ɽrlda cum. ¹³ na siman, fǝŋu cum, gëndu ŋen na ndǝ ganeinu mamuḏiya đǝge ṯaŋateṯo filibus, na ndǝ gaseicu ŋen ŋoɽra na aŋwara isi filibus giđu nǝŋirǝwano. ¹⁴ orn ndǝ leđa lǝđweinu ildi lafo alo yursalim lano ŋen ṯa leđa lalo isamǝri laŋǝnṯu ŋen ŋǝrǝmwa, ldǝlǝđweiṯi buṯrus na yuanna, ¹⁵ ildi leṯo ldeɽǝđe rǝmwa ŋen ŋanṯa ŋulu ṯa liđ alneini usila gatǝɽe gǝrǝmwa, ¹⁶ ŋen ŋanṯa gamǝlu girǝwǝṯu leđa enare illi lënǝŋulu lananeinu mamuḏiya igirǝŋ gelǝŋ yesu. ¹⁷ orn lëɽǝlo raŋ nǝŋǝɽwa eŋen na ldǝneini usila gatǝɽe gǝrǝmwa. ¹⁸ orn ndǝ siman gaseicu ŋen ṯa laneinu usila gatǝɽe ŋenŋa ŋǝraŋ rǝleđa lǝđweinu ndǝ rëɽǝnu leđa nano, gwonaṯa gǝlnaica gǝrus, ¹⁹ nǝŋaṯa, naicǝñi cum ŋabǝɽa iŋi ṯa ndǝ igëɽu eđa gǝnǝŋ raŋ nano rǝlëɽǝñi giđ aŋǝneini usila gatǝɽe gǝrǝmwa. ²⁰ orn buṯrus nǝŋǝmeiṯi ṯa, faḏḏa ilaɽǝŋa ñagiđi ñaldǝgǝmǝndëđǝm ŋen ŋanṯa agaṯa đǝnaicia mǝɽǝmǝɽeñ đǝrǝmwa đabǝliđǝni al gǝrus. ²¹ agero eŋen iŋi kwai kwai ŋen ŋanṯa ara gǝlaɽǝŋa gero gafo ŋope rǝmwa nëiñua. ²² ŋen ŋafǝṯia ṯađo ŋen iŋi ŋeieia ŋǝlaɽǝŋa, na eɽǝđo elǝŋ rǝmwa ndǝ raɽǝwađaṯa ṯa ŋen ŋafo egare gǝlaɽǝŋa aŋgeini. ²³ ŋen ŋanṯa igaŋaseicia ṯa ŋen ŋeɽe ŋiđiaŋa garno agëṯu ŋisia na agëndǝnu eŋen ŋeieia kaiñ. ²⁴ na siman nǝŋǝmuɽǝbiṯi eŋen ṯa, ṯurṯu rǝmwa ŋen ŋanṯǝñi ṯa ŋen iŋi agǝlwaɽo aŋerṯe ŋeṯǝñi nano. ²⁵ orn ndǝ laɽwato ŋen ldërrǝŋaiee leđa ŋen ŋelǝŋ yesu ldoɽǝbaṯe alo yursalim, ṯalërrǝŋaicu leđa ŋen ŋaŋǝra ŋǝrǝmwa irnuŋ gwaiña alo isamǝri. ²⁶ orn mǝlaiyǝka đelǝŋ yesu đeiṯu filibus ṯa twođo ŋirǝwi eđađ đamiña alo yursalim đabaṯa alo igasa. đađ iđi alo yatǝɽe ano. ²⁷ nǝŋǝtwođe nǝgabǝla. na maji gǝnǝŋ galo yabas igi gaɽo đǝmwaɽe gaɽo maji goɽra egeɽa gǝkandis elǝŋ gaɽǝbwa gǝleđa lalo yabas, garǝmoṯo laŋge pređ egeɽa gelǝŋ, orn geṯo alo yursalim ŋen ŋanṯa aŋǝbuŋṯi rǝmwa, ²⁸ ndǝ goɽǝbǝđo eṯarǝmbil ilëɽǝŋu isi yemǝrṯa, gaɽaŋau ṯaŋëgǝru ađam gǝnabi isaiya. ²⁹ na usila gǝrǝmwa galwaɽǝṯu filibus ṯa, mbu ṯarǝmbil nano. ³⁰ na filibus gobǝđaṯǝma nano na gano gabëgǝri ađam gǝnabi isaiya, na galwaɽǝṯǝma ṯa, agaliŋeṯo ŋen iŋi agabëgǝri? ³¹ na maji nǝŋaṯa, igaliŋeṯo ṯau, ndǝ eđa gǝnǝŋ gero gamađaṯǝñi? nǝŋǝlwaɽǝṯi filibus ṯa, abǝṯwaŋ alɽaŋe. ³² na alo isi yađam gǝwëgǝri, ađam gaṯa ṯa, garno đaŋala đëɽǝnṯu ŋǝɽaiñ, walla garno ŋaŋala ŋgǝleini wala ŋǝbwaiña ŋǝma, orn gënǝŋu gabwaiño ŋǝma eum. ³³ eŋen ŋubwa ŋǝlëɽǝŋu gero gafiđia ŋen ŋuđǝrwaṯo iđǝskinia. esegi gaɽǝwađaṯa gaɽwata ŋen ŋǝleđa lǝliga lakǝl ǝllëɽǝŋu ṯa laɽo ṯau? ŋen ŋanṯa đamǝṯia đǝlëɽǝŋu đamiña alo. ³⁴ orn maji gaɽo đǝmwaɽe nǝŋeiṯi filibus ṯa, lwaɽǝṯiñi, nabi galwaɽo ŋen iŋi ŋesegi, ŋǝlëɽǝŋu walla ŋeđa garto? ³⁵ orn filibus nǝŋǝlwaɽe ëiñua nǝŋǝlwaɽe eŋen iŋi ananoŋ nǝŋǝmaɽwatǝṯi ŋen ŋame ŋǝyesu. ³⁶ na ndǝ leṯo eđađ leṯo alo eŋau na maji gaɽo đǝmwaɽe gaṯa, nwano ŋawa ŋëni ëli, ŋen ŋëni ŋǝnǝŋ ŋaiñiđarna iganeinia mamuḏiya? ³⁷ na filibus nǝŋaṯa, ndǝ agëndu ŋen araga gunto agaɽǝwađaṯa. na maji nǝŋǝmuɽǝbiṯi eŋen ṯa, igëndu ŋen ṯa yesu gaɽo iđia gǝrǝmwa. ³⁸ na maji gađuri ṯarǝmbil, ldirǝwiṯi eŋau ndǝm, filibus na maji, na filibus nǝŋǝmanaice mamuḏiya. ³⁹ ndǝ labǝṯo eŋau usila gelǝŋ rǝmwa gabaṯo filibus alo yarto na maji gaɽo dǝmwaɽe gero gamaseicia tǝŋ, na gabǝla eđađ gaŋǝra nano kaiñ. ⁴⁰ orn filibus nǝŋǝmiñaṯe alo yasḏuḏ nǝŋakaldaice nǝŋǝmiñe irnuŋ ṯaŋërrǝŋaicu leđa ŋen ŋaŋǝra ŋǝrǝmwa orn nǝŋarǝmaṯe alo igaisariya.

¹ orn sawul gerṯo ŋen egare mǝldin ŋǝđaɽiñǝni iṯalǝmis yelǝŋ yesu, nagabǝṯa elǝŋ nano igi goɽra gǝkana, ² nǝŋaṯa ṯa aŋamanaice nađam aŋǝliyeɽe enǝlǝŋ nǝmajma alo iḏimiska, ṯa ndǝ gafiđu leđa lëndu ŋen ŋǝđađ iđi đǝyesu, ɽrwa na ɽrlda cum gid aŋalakëndi aŋaleɽe alo yursalim. ³ orn ndǝ gafo eđađ alo iḏimiska ṯwaiñ arrerre nǝŋirǝwa elo nǝŋamawađe nano taltal, ⁴ nǝŋiɽǝṯi iđuđa nǝŋǝne ole elo gǝbaṯa ṯa, sawul sawul, agaiñǝnanaieia ŋen ŋubwa eđa? ⁵ sawul nǝŋaṯa, ya elǝŋ, agaɽ esegi ? na ole nǝŋaṯe fiñi yesu galo masiraṯ, ñiŋgi agaiñǝnanaicia ŋen ŋubwa. ⁶ twođo ŋaɽe irnuŋ na agiđi ŋwalwaɽǝnṯi ŋen ṯa agiđi ŋiđi ṯau. ⁷ leđa ildi lafǝlda eđađ ldǝđuri ṯalabwaiño ŋǝma, ŋen ŋanṯa lano ole orn ṯalerṯo laseicia eđa gǝnǝŋ. ⁸ na ndǝ sawul nǝŋatwođe nǝŋëbǝri isi nǝŋǝfiđi irǝmiṯu, na leđa ṯalmakëndu eraŋ ldamaiyǝṯa alo iḏimiska. ⁹ na ñoman ñiɽijin gero gaseiđia, na gero gasa na gero gǝṯia cum. ¹⁰ na ṯalǝmis yëni yǝnǝŋ alo iḏimiska gana ananiya, na elǝŋ yesu nǝŋamalwaɽǝṯi iŋuriđ nǝŋaṯa, ananiya. na ananiya nǝŋǝmeiṯi ṯa, igëni ëli elǝŋ. ¹¹ na elǝŋ yesu geiṯǝma ṯa twođo ŋaɽe eđađ iđi đanṯa đuđǝrwaṯo, ŋaɽe eɽa gǝyauđa ŋeɽǝđe leđa ṯa maji gëni galo iṯarsus ganṯa sawul, ŋen ŋanṯa gënǝŋu gaṯurṯia rǝmwa, ¹² na gaseicu ŋen ṯa maji ganṯa ananiya geṯǝma nano nǝŋamëɽi raŋ nano ṯa aŋamǝbǝriđi isi. ¹³ orn ananiya nǝŋǝmuɽǝbiṯi eŋen nǝŋaṯa, ya elǝŋ, igano eleđa lwaiña eŋen ŋǝmaji igi ṯa giđu ŋen ŋeicia ŋwaiña eleđa ǝllaɽǝŋa ltǝɽe alo yursalim, ¹⁴ na geṯo ëli điñǝđi gerṯo ŋǝlǝŋe enǝlǝŋ nǝkana ṯa gabakendia leda ildi pređ laɽwata irǝŋ gǝlaɽǝŋa. ¹⁵ orn elǝŋ nǝŋǝmeiṯi ṯa, mbu, ŋen ŋanṯa igundǝđǝma ṯa aŋǝme irǝŋ gǝlëɽǝñi eleđa gerṯa laɽo al yawuḏ na enǝlǝŋ enen na iliđia lisrayil, ¹⁶ na igiđ emaŋaice ŋen ŋubwa giđ aŋǝnaneini ŋen ŋanṯa irǝŋ gǝlëɽǝñi. ¹⁷ orn ananiya gabǝla nǝŋënṯi eɽa, nǝŋëɽi raŋ maji nano nǝŋaṯa, oraiñ sawul, elǝŋ yesu, igi gamǝñiṯiŋa eđađ ndǝ ageṯo, gënǝŋu gađwaṯiñi ŋa nano ṯa iŋëbǝriđi isi na ṯa ŋunḏeini usilaga gatǝɽe gǝrǝmwa. ¹⁸ na ram wagǝnǝŋ garno abređa nǝŋamiɽi isi nǝŋaseiđi. orn nǝŋǝtwođe nǝŋǝneini mamuḏiya, ¹⁹ nǝŋase ŋǝsa đǝge nǝŋafiđi ŋabǝɽa. orn gaɽaŋa alo iḏimiska ṯalǝmisya ñoman ñǝmaṯan. ²⁰ na ram imajma ywaiña ṯaŋërrǝŋaiđu ŋen ŋǝyesu, ṯa yesu gaɽ iđia gǝrǝmwa. ²¹ na leđa pređ ndǝ lano ldirǝwano, ldaṯa, gerṯa fǝmaji igi gëbǝđia ŋen ŋeicia alo yursalim eleđa ildi laɽwata igirǝŋ igi? na geṯo ëli eŋen iŋi cum ṯa ŋabakendi leđa aldakase aldeɽe enǝlǝŋ nǝkana? ²² orn sawul gabakëɽǝjinṯi ŋabǝɽa ŋwaiña ṯaŋǝđamo leđa lal yawuḏ ildi lafo alo iḏimiska ŋenŋa ŋǝyesu ṯaŋǝlërrǝŋaieu ṯa yesu gaɽ al masiya đeṯam. ²³ ndǝ ñoman ñaŋgaṯo ñwaiña, al yawuḏ myǝɽwataiđe eŋen ṯa aiyǝmaɽiñe, ²⁴ orn sawul nǝŋǝlǝŋinnano eŋen iŋi. na leđa ṯaɽrǝmoṯo ëuwǝr yirnuŋ ëđǝñëđǝñin na ulǝŋgǝlǝŋ ṯa almaɽiñe, ²⁵ orn ṯalǝmis lamama ulǝŋgi ldǝmëɽi egone ldǝmirǝwi nuṯa. ²⁶ na ndǝ geṯo alo yursalim gwonaṯa larraiđia ṯalǝmisya orn ṯalǝmis niyiđǝñiṯalo pređ ŋen ŋanṯa yero yebendia ŋen ṯa gaɽ eđa gateṯo ŋen ŋǝyesu. ²⁷ orn barnaba gamama na geṯomaiya leđa nano lǝđweinu nǝŋǝlǝlwaɽǝṯi ŋope ṯa ŋen gafo eđađ gaseicu elǝŋ yesu, igi ganaicǝma ole, na alo iḏimiska gërrǝŋaicu leđa ŋen irǝŋga gǝyesu ŋǝđaiña ŋero. ²⁸ orn ldǝfeṯe ṯalǝmisya ldǝɽo alo yursalim, ²⁹ ṯaŋërrǝŋaiđu ŋen irǝŋga gelǝŋ yesu ŋǝđaiña ŋero. na ṯaŋǝɽwataiđo leđala, ildi laɽ al yawuḏ orn lerṯo ole gal yunaniyin, orn ṯalonaṯo lamaɽiña. ³⁰ na ndǝ lorǝba lalǝŋinnano ldǝmaiyǝɽe alo igaisariya, na ldǝmađwaṯe alo iṯarsus. ³¹ orn kanisa pređ isi yafo alo yuḏiya na alo ijalil na alo isamǝri yerṯo ŋen ŋaŋǝra yaɽaŋa ŋope na yafiđu ŋabǝɽa, na ṯaŋerldo ŋope elǝŋ yesu nëiñua na đamǝđaṯađa đusila gatǝɽe gǝrǝmwa nḏoɽreṯe. ³² orn ndǝ buṯrus gafo gabakaldaiea iŋulu pređ gabǝṯa leđa nano ltǝɽe ɽrǝmwa ildi lafo alo iluḏḏa cum, ³³ nǝŋǝfiđi maji tu ganṯa ainias gwuma gaijǝba rǝmanǝñara gandro nal aŋgǝrem nṯǝli đenǝŋ nemiñe niɽijin. ³⁴ na buṯrus geiṯǝma ṯa, ainias, yesu al masiya gaŋeiđi, twođo ŋekeleee nal aŋgǝrem ilaɽǝŋa. na maji nǝŋǝtwođe ram. ³⁵ na leđa pređ lalo iluḏḏa na alo isarun lǝseieǝma ldëndi ŋen ŋelǝŋ yesu. ³⁶ orn alo yanṯa yafa wuji gëni gǝnǝŋ gaɽǝbwa gǝbernia ṯabiđa, igi irǝŋ gǝlëɽǝŋu ḏorkǝs walla ođe. gënǝŋu gëbǝđia ŋen ŋaŋǝra ŋwaiña ŋǝđubwiđiya. ³⁷ orn iliga lakǝl nǝŋwumǝṯi nǝŋaiye, na lwasǝma ldǝmëɽi egeɽa pǝlelo, igi gakadǝreidu gwala. ³⁸ orn ŋen ŋanṯa alo iluḏḏa yafo ṯwaiñ alo yafa, na ṯalǝmis yano ṯa buṯrus gwëtu alo iluḏḏa, niyađwaṯe leđa liɽijan ldaṯa, aɽr tu taltal. ³⁹ orn buṯrus gatwođo na leṯǝlda. orn ndǝ larǝmaṯo labǝṯǝmaiya egeɽa pǝlelo. na leđa pređ ɽrlda ildi lǝṯëđǝnialo lađǝruma eđǝɽe ṯwaiñ ṯalaro, na ṯalërrǝŋaieo buṯrus ndrena nǝnano ini ḏorkǝs giđǝlo ndǝ lafǝlda. ⁴⁰ orn buṯrus gamiñeicu leđa pređ ndëuwǝr nǝŋwođǝñiṯi ndria nalo ṯaŋǝṯurṯu rǝmwa, orn nǝŋǝreiđe nǝŋǝnwane aŋǝno nǝŋaṯa, ṯabiđa, twođo. na ṯabiđa nǝŋëbǝri isi na ndǝ ganwano buṯrus nǝŋǝtwođe nǝŋǝɽaŋalo. ⁴¹ na buṯrus nǝŋwaliṯǝma đaŋ nǝŋǝmatuđi orn nǝŋundǝđi leđa ltǝɽe ɽrǝmwa na leđa ɽrlda ildi lṯëđǝnialo na ganaicǝlo wuji igi gamǝṯo đǝge. ⁴² orn ŋen iŋi ŋǝlǝŋinu alo yafa pređ na leđa lwaiña lëndu ŋen ŋelǝŋ yesu. ⁴³ orn buṯrus nǝŋǝɽaŋe alo yafa ñoman ñwaiña majiga ganṯa siman igi gǝbǝɽia yerna.

¹ alo igaisariya maji gëni ganṯa karnilius gaɽ elǝŋ gaskari yaɽo miyya ijes ibernia yiṯalia. ² gënǝŋu gaŋǝra eŋen na giđǝña rǝmwa leđala pređ legeɽa gǝlëɽǝŋu, na giṯu leđa pređ ŋen ŋwaiña ŋaŋǝra, ṯaŋǝṯurṯu rǝmwa jaica. ³ na lomanaŋ garno ëđǝñin iɽijin, ŋen ŋamiñiṯǝma nǝŋǝseici ŋope mǝlaiyǝka đǝrǝmwa đameṯa nano nḏaṯa, karnilius. ⁴ na ṯaŋaseicu kaiñ na ŋǝđaiña nǝŋǝmëndi, nǝŋaṯa ŋen ŋanṯau ya elǝŋ ? orn mǝlaiyǝka nḏǝmeiṯi ṯa, đǝṯurṯia đǝlaɽǝŋa na đaliŋeṯo đǝño đǝlaɽǝŋa đabǝṯo rǝmwa nano na đalǝŋǝđeiniau rǝmwa nëiñua. ⁵ na điñǝđi đwaṯo leđa alo yafa ṯa alundǝđi eđa gǝbernia siman, igi ganṯa buṯrus eum, ⁶ gënǝŋu gaɽaŋa egeɽa gǝsiman, igi gǝbǝɽi yerna. na eɽa gafo al bar nano. ⁷ ndǝ mǝlaiyǝka đabǝɽo đǝge, iđi đanaico karnilius ŋen, gënǝŋu gundǝđu leđa liɽijan na askari isi yaŋǝra eŋen ildi lađuɽǝđǝnṯǝma, ⁸ na ndǝ galwaɽǝṯǝlo ŋen pređ nǝŋǝlǝđwaṯe alo yafa. ⁹ na iloman leṯeɽe ndǝ lafo alo yafa ṯwaiñ, buṯrus nǝŋabǝṯa eɽa eđǝpe ŋen ŋanṯa aŋǝṯurṯi rǝmwa ëđǝñinano. ¹⁰ orn nǝŋǝeoiñǝṯe kaiñ ṯaŋwonaṯo gasa, orn ndǝ liji lëtu lëbǝđia aieǝba, ŋen ŋamiñiṯǝma ŋarno iŋuriđ. ¹¹ na gaseicu ltuŋga lagagiđǝnu na wagǝnǝŋ garno al farǝđi yiruwǝṯu alo gakasǝnu alo marldwan, ¹² yerṯo laŋge ano ɽruguđu đwala đeđǝñwa na đirnuŋ, na imwa yeicia na ndǝfia nelo. ¹³ na ole nǝŋǝmeṯa nano nǝŋaṯa, buṯrus, twođo ŋaɽiñe ŋase. ¹⁴ orn buṯrus nǝŋaṯa, ndo, elǝŋ yesu, igënǝñi igero igaso wagǝnǝŋ gataŋa geieia lomanaŋ. ¹⁵ orn ole igi geṯǝma nano tǝŋ nǝŋaṯa, waŋge rǝmwa riđu gatǝɽe gerṯa agabaṯa ṯa gataŋa. ¹⁶ orn ŋen iŋi ŋaɽaico lorǝba ŋiɽijin orn waŋge goɽǝbaṯe elo đǝge. ¹⁷ orn buṯrus girǝwano ginḏeiea ŋen mǝldin egare gǝlëɽǝŋu ṯa ŋen iŋi ŋanṯau. orn leđa ildi karnilius gađwaṯǝlo labekeɽǝđia eɽa gǝsiman, laṯurwa igëuwǝr iliga lakǝl đurri, ¹⁸ na lundǝđu ldeɽǝđe ṯa, siman igi ganṯa buṯrus gëni ëli? ¹⁹ na ndǝ buṯrus gafo ginḏeicia ŋen egare gǝlëɽǝŋu iŋi gaseicu, usila gǝrǝmwa galwaɽǝṯǝma ṯa, nwano, leđa lëni liɽijin laŋapwaiña. ²⁰ twođo ŋirǝwe ñaɽelda. gerṯa agirǝwano eŋen ŋǝnǝŋ, ŋen ŋanṯa igënǝñi igađwaṯǝlo. ²¹ nṯia buṯrus nǝŋǝlirǝwǝṯi nano nǝŋaṯa ṯa fiñi ñiŋgi ñagaiñǝpwaiña. ŋen ŋanṯau iŋi ñagilṯu? ²² na leđa ldaṯa, karnilius, maji gaɽ elǝŋ gaskari miyya igi guđǝrwaṯo eŋen rǝmwa nëiñua na giđǝña rǝmwa, na al yawuḏ pređ laɽo đamǝđaṯa eŋen ŋaŋǝra ŋǝlëɽǝŋu, gënǝŋu ganeinu ŋen mǝlaiyǝkađa đatǝɽe đǝrǝmwa ṯa aŋundǝđaici egeɽa gǝlëɽǝŋu aŋǝnaṯe ŋen ŋǝlaɽǝŋa. ²³ orn buṯrus gundǝđǝlo ṯa alënṯi egwaŋ. na iloman leṯeɽe lamiño buṯrusala na lorǝba lǝmaṯan lalo yafa ldabǝlǝlda. ²⁴ na iloman leṯeɽe lomǝn ldënṯi alo igaisariya. na karnilius gafo gǝlṯurṯia na gundǝđu leđa ǝllëɽǝŋu na rappa. ²⁵ ndǝ buṯrus gënṯu eɽa karnilius nǝŋǝmuđiñiṯi alo. ²⁶ orn buṯrus gatuđǝma nǝŋǝmeiṯi ṯa, twođo, igënǝñi igaɽo maji cum. ²⁷ orn ṯalɽwatǝldǝga ldënṯi nǝŋǝfiđi leđa lwaiña larraiđo ²⁸ na buṯrus nǝŋǝleiṯi ṯa, ñaganǝñaŋ ñagaliŋeṯo ŋope ṯa ŋen ŋëđǝñinu kaiñ ṯa eđa gaɽ al yawuḏ laɽaŋa eđaga garto, na ṯa gabǝṯa egeɽa gǝlëɽǝŋu, orn rǝmwa raŋaicǝñi ŋen ṯa igaber igalwaɽa ṯa eđa gǝnǝŋ gataŋa walla geicia. ²⁹ nṯia điñǝđi igeṯo igero iganeđa ndǝ ñagundǝđiñi orn igandeɽǝđe ṯa, ñagundǝđiñi eđa? ³⁰ na karnilius nǝŋaṯa, điñǝđi ñoman ñaŋgaṯo marldwan ŋen ŋarno ëđǝñin isi, ëđǝñina iɽijin, igafo igaṯurṯia rǝmwa egeɽa gǝlëɽǝñi, orn maji nǝŋǝñǝđuri nëiñua gëɽǝnu ndrena nano nǝwađialo natǝɽe kaiñ, ³¹ nǝŋaṯa, karnilius, đǝṯurṯia đǝlaɽǝŋa đanǝnu na đalǝŋeṯa đǝño đǝlaɽǝŋa đalǝŋǝđeiniau rǝmwa nëiñua. ³² đwaṯo leđa alo yafa ŋundǝđi siman ganṯa buṯrus, gënǝŋu gafo eɽa gǝsiman maji gǝbǝɽi yerna igi gafo al bar nano. ³³ orn igwađweiṯiaŋalo ram, orn agiđu ŋen ŋaŋǝra, ageṯo. orn điñǝđi ñagarraiđo pređ rǝmwa nëiñua ṯa ñane ŋen pređ iŋi elǝŋ yesu galwaɽǝṯǝŋa. ³⁴ na buṯrus nǝŋǝbǝlađe ëiñuano ilëɽǝŋu nǝŋaṯa ṯa, đeṯam igaseicu ŋen na igaliŋeṯo ŋope ṯa rǝmwa rero raberṯia ŋen ŋǝnǝŋ eleđa lǝmaṯan na ŋarto eleđa lǝmaṯan, ³⁵ orn leđa pređ lalo pređ, ndǝ liđǝña rǝmwa na lëbǝđia ŋen pređ rǝmwa ronaṯa, rǝmwa ralaŋǝnṯi. ³⁶ fǝŋen iŋi rënǝŋu rađwaṯo eleđa lisrayil ṯa arǝlërrǝŋaiđe ŋen ŋaŋǝra ŋǝđëuṯaralo iyesu masiya, gënǝŋu igi gaɽo elǝŋ gǝlaŋge pređ. ³⁷ ŋen ŋakǝl ŋërrǝŋeinu alo yuḏiya pređ, ŋatwođo alo ijalil, ndǝ yuanna gërrǝŋaieu leđa ŋen ŋǝmamuḏiya. ³⁸ ñagaliŋeṯo ṯa rǝmwa rabuŋṯu yesu galo inasiraṯ usilaga gatǝɽe na ŋabǝɽaŋa, na gënǝŋu ṯaŋakaldaieo ṯaŋiđu ŋen ŋaŋǝra ṯaŋakeiđu leđa pređ ildi lađamǝnu iseṯan, ŋen ŋanṯa rǝmwa rafomaiya. ³⁹ na nanda ñagaɽo đamǝđaṯa eŋen pređ iŋi gënǝŋu giđu alo yal yawuḏ na alo yursalim. leđa laɽiñǝma ndǝ lëɽǝma gabǝreieia iđuɽi ⁴⁰ orn rǝmwa ratuđǝma ndǝ ñoman ñaɽo ñiɽijin ndrǝmaŋgiṯi aŋǝseini, ⁴¹ gerṯa eleđa pređ orn inanda ñaŋgi rǝmwa roṯǝnde eleđa ananoŋ ṯa ñaɽeṯe đamǝđaṯa, nanda ñaŋgi ñagasǝlda na ñagëṯǝlda ŋen gënǝŋu gatwođo eŋǝɽaiñ. ⁴² yesu gwalwaɽǝṯǝnde ṯa ñërrǝŋaiee leđa na ñaɽeṯe đamǝđaṯa ṯa fǝŋu igi rǝmwa rëɽǝma gaɽ elǝŋ igi giđ aŋakarme leđa lamǝṯo na laiyo. ⁴³ fǝŋu al anbiya pređ yaro đamǝđaṯa eŋen ŋǝlëɽǝŋu ṯa leđa pređ ildi lëndu ŋen ŋǝlëɽǝŋu liđ alǝŋgǝđeini ŋen eŋen ŋeieia irǝŋga gǝlëɽǝŋu. ⁴⁴ ndǝ buṯrus gaɽwata ŋen iŋi usila gatǝɽe gǝrǝmwa nǝŋǝliruwǝṯi nano ildi pređ lano ole. ⁴⁵ na leda ildi leto buṯrusala ildi lëndu ŋen ŋǝrǝmwa, na luɽǝđǝnu lënǝŋulu ldirǝwano kaiñ ŋen ŋanṯa đǝnaica usila gatǝɽe gǝrǝmwa girǝwuṯu leđa enare ildi lero laɽo al yawuḏ. ⁴⁶ ŋen ŋanṯa lalnaṯa laɽwata ole ɽetǝɽeteo ldǝnanaice rǝmwa ŋaɽrwa. orn buṯrus gaṯa, ⁴⁷ eda gǝnǝŋ gaɽǝwađaṯa ganeđa ṯa leđa ildi laneini mamuḏiya, ildi laneinu usila gatǝɽe gǝrǝmwa garno nanda? ⁴⁸ na galwaɽǝṯǝlo ṯa alneini mamuđiya irnga gǝyesu masiya. orn ldeɽǝđe buṯrus ṯa alǝɽaŋǝlda ñoman ñǝmaṯan.

¹ orn leđa lǝđweinu na lorǝba lǝkanisa lafo alo yuḏiya, lano ṯa leđa ildi gerṯa laɽo yawuḏ lërrǝŋeinu ŋen ŋǝrǝmwa eum. ² orn ndǝ buṯrus gabǝṯa alo yursalim leđa ildi lëndu ŋen ŋǝđuɽǝđǝnia ṯalɽwataiđo buṯrusga, ³ ldaṯa, agabǝɽo eleđa lero luɽǝđǝnia nǝñasǝlda eđa? ⁴ orn buṯrus galwaɽǝṯǝlo ŋen pređ igǝṯǝrria nǝŋaṯa, ⁵ igafo igafo alo yafa ṯiṯurṯu rǝmwa, orn ŋen ŋamiñiṯiñi. wagǝnǝŋ girǝwu elo garno al farǝđi yoɽra yakasǝnu alo marldwan niruwǝṯiñi nano. ⁶ orn ṯiseieu ŋope ninwane laŋge ɽruguđu, đwala đeđǝñwa na đirnuŋ na imwa yeicia na ndǝfia nelo. ⁷ na nene ole geiṯiñi ṯa, buṯrus, twođo ŋaɽiñe ŋase. ⁸ orn niyaṯa ndo elǝŋ yesu, wagero gǝnǝŋ gataŋa geicia gënṯiñi ëiñua lomanaŋ. ⁹ orn ole igi geṯiñi nano tǝŋ nǝŋaṯa, waŋge rǝmwa riđu gatǝɽe gerṯa agabaṯa ṯa gataŋa. ¹⁰ orn ŋen iŋi ŋaɽaico lorǝba ŋiɽijin orn waŋge nǝŋoɽǝbaṯe elo đǝge. ¹¹ orn iliga lakǝl đurri leđa liɽijin larǝmaṯo eɽa igei igafau, lǝđweinṯiñi alo igaisariya. ¹² na usila gǝrǝmwa galwaɽǝṯiñi ṯa ñaɽǝlda yerṯe igirǝwano eŋen ŋǝnǝŋ. orn ñaɽe lorldaiñala ildi laɽo đenǝŋ nǝŋamiñe gunto niñënṯi eɽa gǝmaji. ¹³ orn nǝŋǝndǝlwaɽǝṯi fǝṯau gaseicu mǝlaiyǝka đađǝru egeɽa gǝlëɽǝŋu, nḏǝmeiṯi ṯa, đwaṯo leđa alo yafa aɽe alundǝđi siman igi gënǝjǝnu buṯrus, ¹⁴ gënǝŋu giđ aŋǝndǝlwaɽǝṯi ŋen iŋi agiyëbǝrǝni na leđa pređ legeɽa gǝlaɽǝŋa. ¹⁵ orn ŋen igabǝṯa nole igaɽwata, usila gatǝɽe gǝrǝmwa nǝŋaliruwǝṯi enare ŋen ŋarno nanda ananoŋ. ¹⁶ orn nilǝŋǝđeini eŋen ŋelǝŋ yesu galwaɽo ṯa, yuanna gananaiđo mamuḏiya ŋawaŋa, orn ñaŋ ñagiđi ñananeini mamuḏiya usilaga gatǝɽe. ¹⁷ orn ndǝ rǝmwa ranaieǝlo đanaica đurri ŋen ŋarno ranaicǝnde ndǝ ñagëndu ŋcn ŋelǝŋ yesu masiya, igënǝñi esegi ṯa igađama rǝmwa eŋen ralwaɽo. ¹⁸ orn ndǝ lano ŋen iŋi ldabwaiñe ŋǝma, orn ldanaice rǝmwa ŋaɽrwa ldaṯa orn rǝmwa ranaico leđa ŋen ildi gerṯa laɽo al yawuḏ cum ṯa alǝŋgǝđeini ŋen eŋen ŋeicia aloɽǝbaṯe rǝmwa nano ṯa alamǝṯe. ¹⁹ orn leđa ilđi lalaldǝđǝnu alo ŋen ŋanṯa ŋen ŋubwa iŋi ŋatwođo eŋen ŋisṯǝfanus labǝɽo nwaldaŋ alo ifinigiya na igubrus na yanṯakiya orn lderṯe lǝbërrǝŋaicia leđa ŋen ŋǝrǝmwa illi al yawuḏ ǝrtođ. ²⁰ orn lǝmaṯan iŋulu lalo igubrus na igirǝwaniya, ndǝ lënṯu alo yanṯakiya ldërrǝŋaici leđa ŋen ŋelǝŋ yesu, ilđi gerṯa laɽo al yawuḏ, ²¹ na đaŋ đelǝŋ yesu lafǝlđa na lwaiña ldëndi ŋen ldređeṯe elǝŋ rǝmwa nano. ²² ndǝ leđa lalo yursalim lano ŋen iŋi ldađwaṯe barnaba ṯa aŋaɽe alo yanṯakiya. ²³ ndǝ geṯo na gaseicu đubwiđiya na đame đǝrǝmwa, nǝŋǝreṯe nano, gërrǝŋaicǝlo ŋen kaiñ ṯa alđuri ŋope eŋen ŋelǝŋ yesu araga gunto ŋenŋa ŋwonḏǝṯo, ²⁴ ŋen ŋanṯa gënǝŋu gaŋǝra egare gwunḏǝjeinu usilaga gatǝɽe na đonaṯađa. na leđa lwaiña laɽǝjaiđo egelǝŋ yesu. ²⁵ orn barnaba nǝgabǝṯa alo iṯarsus ṯa aŋǝpwaiñe sawul. ²⁶ na ndǝ gafiđǝma gamǝma alo yanṯakiya. na lënǝŋulu larraiđo ikanisa iṯǝli đurri lërrǝŋaicu leđa ŋen lwaiña kaiñ. na alo yanṯakiya iliga lakǝl ṯalǝmis yënǝjǝnu masiyin ŋen ŋaɽnda. ²⁷ na iñoman iñi anbiya yeṯo alo yursalim yabǝṯa alo yanṯakiya, ²⁸ na gǝnǝŋ iŋulu ganṯa agabus gatwođo nǝŋǝlwaɽe usilaga gatǝɽe ṯa ŋorwaṯa ŋiđ aŋela ŋoɽra aŋëndi alo pređ, na ŋorwaṯa iŋi ŋeṯo iliga lǝkuluḏius. ²⁹ na ṯalǝmis yëɽu ŋen enare ṯa yiđ aiyamǝđaṯe lorǝba lǝkanisa alo yuḏiya laŋgela, ŋen ŋarno laŋge rǝmwa ranaicǝlo ɽetǝɽeteo. ³⁰ na ṯalǝmis niyiđi ṯia niyǝđwaṯe barnaba na sawul laŋgela enǝlǝŋ nǝkanisa alo yuḏiya.

¹ iliga lakǝl elǝŋ ganṯa iruḏus gënđu leđa lǝmaṯan lǝkanisa nǝŋǝlnaice ŋen ŋubwa. ² nǝŋaɽiñe yagub, orǝba gǝyuanna đoperređa ³ na ndǝ gwanwano ŋen iŋi ŋaŋǝra leđa nano lal yawuḏ nǝŋëndi buṯrus cum. ŋen iŋi ŋafo iliga lǝđǝsa ndǝ leđa laso aicǝba gaicǝfa. ⁴ orn ndǝ gëndǝma gëɽǝma isijǝn nǝŋǝđwaṯe askari ređ na đenǝŋ nemiñe yunto, niyela liga lnǝŋ marldwan na iliga lnǝŋ marldwan, gaṯa ndǝ đǝsa đaŋgaṯo giđ aŋǝmǝmaṯe leđa nëiñua. ⁵ na buṯrus gërǝmǝjeinia isijǝn, orn leđa lǝkanisa lafo laṯurṯia rǝmwa araga gunto eŋen ŋǝlëɽǝŋu. ⁶ na ulǝŋgi gakǝl đurri ndǝ iruḏus gwonaṯa gamamaṯa leđa nëiñua buṯrus gafo gandro askariya iɽijan yëɽiṯǝma iligano gakasǝnu nuriđana niɽijan, orn askari yafo igëuwǝr yarǝmoṯwa sijǝn. ⁷ na mǝlaiyǝka đelǝŋ rǝmwa nḏela na arrerre nǝŋǝwađialo isijǝn, na mǝlaiyǝka đabǝɽu buṯrus aŋǝno nḏǝmatuđi iŋuriđ nḏaṯa, twođo taltal. na nuriđa nǝmiɽi raŋ. ⁸ na mǝlaiyǝka nḏǝmeiṯi ṯa arǝnijǝnu ndrena na nḏǝbina nǝrǝmanǝña. nǝŋiđi ṯia. orn mǝlaiyǝka nḏǝmeiṯi tǝŋ ṯa, tërǝnu molfaya isi yaɽo erena gǝṯǝña na ŋaiñǝteṯe. ⁹ nṯia nǝŋǝmiñe ṯaŋǝteṯo, orn nǝŋaijǝbeṯe ṯa ŋen iŋi ŋiđǝnu mǝlaiyǝkađa ŋaɽo đeṯam, orn gaṯa aŋgaica gaseicu ŋen iŋuriđ. ¹⁰ ndǝ lamiñaṯo askari yeɽnda na yomǝn inḏurṯu ldarǝmaṯe igëuwǝr yipeini, ëuwǝr isi eređeṯo nǝsuk, yǝgǝgiđǝnṯǝlo mǝɽǝmǝɽeñ, na lamiñaṯo ndëuwǝr lderlde mǝnna mǝnna na ram ldǝpërǝđǝniano mǝlaiyǝkađa. ¹¹ na buṯrus galǝŋinnano ṯa gëbǝrnu nǝŋaṯa ṯa, điñǝđi igaliŋeṯo ṯa elǝŋ yesu gađwaṯo mǝlaiyǝka đǝlëɽǝŋu nḏëbǝriñi eđaŋ điruḏus na eŋen pređ iŋi leđa lal yawuḏ laiñǝṯurṯi. ¹² orn ndǝ galiŋeṯo ṯa ŋen iŋi ŋǝđeṯam nǝŋaɽe egeɽa gǝmiriam, lǝŋgen yuanna igi ganṯa margus, igi leđa lwaiña lafo laurarraiđia ṯalṯurṯu rǝmwa. ¹³ orn buṯrus gabǝɽu đǝpundri đëuwǝr yeɽa na ŋere nǝŋela ŋanṯa ruḏa ṯa aŋalǝŋeṯe ŋen, ¹⁴ orn ndǝ ŋaliŋeṯo ole gǝbuṯrus nǝŋǝreṯe nano kaiñ na nǝŋerṯe ŋǝmagagiṯi, orn ŋobǝđaṯo egwaŋ nǝŋalwaɽǝṯi leđa ṯa, buṯrus gëni gaṯurwa igëuwǝr. ¹⁵ na leđa ldǝmeiṯi ṯa agǝramǝɽua. orn ṯaŋǝlwaɽo ṯa đeṯam fǝŋu. na lënǝŋulu ldaṯa fǝmǝlaiyǝka đǝlëɽǝŋu. ¹⁶ orn buṯrus ṯaŋëpu đǝpundi mǝldin, na ndǝ lǝgǝgiđu lanwanǝma ldirǝwano kaiñ. ¹⁷ orn buṯrus nǝŋǝlabeiṯi đaŋ elo ṯa alɽaŋe aten, nǝŋǝlǝlwaɽǝṯi ŋen ṯau elǝŋ ycsu gëbǝrma isijǝn. nǝŋaṯa lwaɽǝṯr yagub ŋen iŋi na lorǝba cum. orn nǝŋamiñe nǝŋaɽe alo yarto. ¹⁸ na ndǝ ëđǝñin gaɽo đǝge ŋen nǝŋwaiñǝṯe igaskari ŋen ŋanṯa buṯrus gero. ¹⁹ na ndǝ iruḏus gapwaiñǝma na gero gamafiđia ginḏeicu askari na gagariñaiđo ṯa aiyǝmamǝm aiyǝɽiñini. orn nǝŋǝtwođe alo yuḏiya nǝŋaɽe alo igaisariya nǝŋafeṯe tu. ²⁰ orn iruḏus nǝŋǝciṯano eleđa lalo isur na isiḏa, na lënǝŋulu ldǝmeṯa nano ŋenŋa ŋunto, orn lariđicu bilastǝs eŋen eŋen, maji gađuɽǝđǝnṯia elǝŋ, ldeɽǝde elǝŋ ṯa alṯoɽaṯe ŋen aŋǝreṯe nano, ŋen ŋanṯa alo esen leđa lamama lalasǝni egelǝŋ. ²¹ orn iloman ildi lëɽǝnu elǝŋ iruḏus garrǝpo ndrena nano nǝŋǝlǝŋe na nǝŋǝɽaŋe nal kurs ṯaŋǝɽwatiṯu leđa. ²² na leđa larǝjaico ole ldaṯa, ole igi gǝrǝmwa, gerṯa geđa. ²³ na ram mǝlaiyǝka đelǝŋ yesu đabǝɽuma ŋen ŋanṯa gero ganaiea rǝmwa ŋaɽrwa, orn luđa ṯalmaso nǝŋaiye. ²⁴ orn ŋen ŋǝrǝmwa ṯaŋǝkaɽǝjaiđo ṯa ŋoɽra. ²⁵ na barnaba na sawul loɽǝbǝđo alo yursalim ndǝ laɽiñađaṯo ŋǝmëɽria đǝge, ldame yuanna igi ganṯa margus.

¹ na ikanisa alo yanṯakiya anbiya yëni na leđa labërrǝŋaiđia ŋen. fǝbarnaba, na simaun igi ganṯa nijar, na lukiyus galo igirǝwaniya, na manayin igi lamǝṯo eɽa gunto iruḏusga gaɽo elǝŋ, na sawul. ² ndǝ lafo labuŋṯia rǝmwa, na laɽaŋo ŋorwaṯaŋa, usila gatǝɽe gǝrǝmwa gǝlwaɽǝṯǝlo ṯa, ëɽr barnaba na sawul alǝsoŋ ṯa aliṯiñi ŋǝmëɽria iŋi gwundǝđeieǝlo. ³ orn ndǝ laɽaŋo ŋorwaṯaŋa laṯurṯu rǝmwa ldǝlëɽi raŋ nǝŋǝɽwa ldǝlǝđwaṯe. ⁴ na ildi liɽijan lǝđweinu eŋen ŋusila gatǝɽe labǝɽo alo isalukiya, na tu lënṯu iđǝpundr đǝŋau ldabǝṯa alo igubrus. ⁵ ndǝ larǝmaṯo alo isalamis ldërrǝŋaiei leđa ŋen ŋǝrǝmwa imajma yal yawuḏ. na lafo yuannala galamǝđaṯa. ⁶ nd lërrǝŋaicu leđa ŋen alo pređ, alo isi yerṯo neɽa ano ŋawa ŋakëđiṯu iligano, ldarǝmaṯe irnuŋ gǝnǝŋ gǝbernia bafus ldǝfiđi maji gaɽo yawuḏ gaɽo uđǝmi na gaɽo nabi eŋaɽǝwen ganṯa baryesu. ⁷ lafo majiga goɽra iŋǝmëɽria ŋǝlǝŋ, ganṯa sǝrjius bulǝs, gënǝŋu gerṯo ŋaṯǝɽa ŋoɽra eŋen pređ. na gënǝŋu gundǝđu barnaba na sawul ṯa aŋalnaṯe ŋen ŋǝrǝmwa. ⁸ orn maji igi gaɽo uđǝmi, igi irǝŋ gǝlëɽǝŋu gwomǝn ganṯa alim, gagealo ŋen ŋanṯa gaber gwonaṯa ṯa maji igi goɽra gǝbendia ŋen ŋǝrǝmwa. ⁹ orn sawul, igi ganṯa bulus cum, gwunḏǝjeinu usilaga gatǝɽe, ṯaŋǝmaseicu kaiñ, ¹⁰ nǝŋaṯa aganǝŋa ŋaŋgi agaɽo ŋere ŋǝseṯan, agageo ŋen pređ ŋuđǝrwaṯo, agwunḏǝjeinu ŋađǝna nano na ŋenŋa ŋeicia tǝmǝtǝm, agabwaiña ṯa agagera đađ đǝrǝmwa iđi đuđǝrwaṯojaica? ¹¹ na điñǝđi đaŋ đelǝŋ yesu đafǝŋa nano. agiđi ŋǝrǝmiṯi ṯa ŋerṯe agǝseiđia ëđǝñina liga lǝmaṯan. na ram nǝŋǝrǝmiṯi ṯaŋapwaiño eđa gǝmakendi eđaŋ ṯaŋǝmirldu. ¹² orn maji goɽra ndǝ gaseicu ŋen ŋiđǝnu nǝŋëndi ŋen, ŋen ŋanṯa gafo girǝwano iđërrǝŋaiđia đelǝŋ yesu. ¹³ orn bulusanda ldǝtwođe alo ibafus, lđabǝṯa alo ibarja alo yanṯa bamfiliya. na yuanna gaṯađǝlo nǝŋoɽǝbaṯe alo yursalim. ¹⁴ orn lënǝŋulu ldamiñe alo ibarja ldabǝṯa alo yanṯakiya alo ibisiḏiya. iloman lǝđǝmiñǝniano lđënṯi imajma ldǝɽaŋalo. ¹⁵ ndǝ nǝlǝŋ nal majma nëgǝriṯi leđa ŋen ŋađam gǝmusa na ŋal anbiya đǝge neɽǝđe bulusanda ṯa, lorldaiñanda ndǝ ñagerṯo ŋen ṯa ñagabërrǝŋaicia leđa, ërrǝŋaicǝrldo. ¹⁶ orn bulus nǝŋǝtwođe nǝŋabǝce đaŋ elo nǝŋaṯa, leđa lisrayil na ildi liđǝña rǝmwa, nǝr, ¹⁷ rǝmwa rǝleđa ilëndr lisrayil rënǝŋu roṯo papanda ildëndr na riđǝlo loɽra ndǝ lafo alo imasr, na đaŋđa đǝbeini elo ndrǝlamiñi. ¹⁸ na garno nṯǝli eređia marldwan ragagariñaṯǝlo eđǝñwa. ¹⁹ na ndǝ ramǝndađo leđa lerṯo ole ɽetǝɽeteo laiyǝn đenǝŋ nemiñe iɽijan alo ikanan, ndrǝlakarnǝđiṯi đuđa ndrǝlnanaice garno nṯǝli miyya marldwan na eređia đenǝŋ. ²⁰ orn ndǝ nṯǝli naŋgaṯo ini rǝmwa rǝnaicǝlo al gaḏianda, orn ndǝ al gaḏianda ildi đǝge rǝnaicǝlo samwil igi gaɽo nabi. ²¹ orn leđa ldǝmeɽǝđe elǝŋ goɽra đǝge, na rǝmwa ranaicǝlo sawul iđia gǝgayis eleđa lǝbenyamin, ŋen ŋanṯa nṯǝli eređia marldwan. ²² na ndǝ raŋgeicǝma đǝge ndrǝtuđi ḏawuḏ gaɽo elǝŋ egen, ndraṯa, igafiđu ḏawuḏ iđia gǝyassi, maji gerṯo ara garno gǝlëɽǝñi igi giđ aŋiđi ŋen pređ igwonaṯa. ²³ orn iliđia lǝmaji igi lǝnḏurṯu rǝmwa ranaico israyil đëbǝri, fǝŋu yesu, garno rëɽu ŋen pǝnđe. ²⁴ ndǝ gamǝlu geṯo yuanna gërrǝŋaicu leđa pređ lisrayil ṯa mamuḏiya yaɽo đamǝđaṯa đǝđaṯađa ŋen ŋeicia na đǝđoɽobaṯa rǝmwa nano, ²⁵ na ndǝ yuanna gafo ṯwaiñ gaɽiñǝđaṯa ŋǝmëɽria ŋǝlëɽǝŋu gaṯa, ñaganǝñaŋ ñagaṯa fiñi esegi? igero gaɽo al masiya orn eđa gëni gǝnǝŋ giđ aŋǝñela nḏurṯu na igero igarǝjađaṯa eŋen ṯa igobaica yar ano yǝnḏǝbina nǝrǝmanǝŋ rǝlëɽǝŋu. ²⁶ lorldaiñ, liđia lamǝcu gibrayim, na ildi lafǝndau liđiña rǝmwa ŋen ŋađweinṯǝndr iŋi ŋǝđëbǝri iđi. ²⁷ ŋen ŋanṯa leđa ildi lafo alo yursalim na nǝlǝŋ enen laijǝba yesu na ŋen ŋal anbiya iŋi ŋaɽwatǝni ñoman pređ ñǝđǝmiñǝniano, lënǝŋulu laɽiñađaṯo ŋen iŋi ndǝ lanedǝma, ldǝmakarme. ²⁸ lero lafidia ŋen ŋǝnǝŋ ṯa almauɽiñe orn leɽǝdo bilaṯus ṯa aŋǝɽiñǝni. ²⁹ orn ndǝ laɽiñadaṯo ŋen pređ ŋǝwërđǝnu eŋen ŋǝlëɽǝŋu liruwǝma iđuɽi ldǝmëɽi eđel. ³⁰ orn rǝmwa ratuđima eŋǝɽaiñ, ³¹ na ñoman ñwaiña gamiñiṯu leđa ildi latođǝlda alo ijalil labǝṯa alo yursalim, na điñǝđi laɽo đamǝđaṯa đǝlëɽǝŋu eleđa. ³² na nanda ñagǝndërrǝŋaicia ŋen ŋaŋǝra ṯa ŋen iŋi rǝmwa rëɽǝṯu papanda lǝpǝnde, ³³ iŋi rënǝŋu raɽiñǝđiṯǝndr lëŋgr lǝgaɽr ñere eñen ndǝ ratuṯǝndr yesu, garno ŋen ŋǝwërđǝnu egađam gǝmasmur iɽijan ṯa, aganǝŋa agaɽo iđia gǝlëɽǝñi, iloman ildi igalǝŋaŋa. ³⁴ na eŋen iŋi ṯa rǝtuđǝma eŋǝɽaiñ gaber giđ aŋoɽǝbaṯe ṯa aŋaieǝbǝre tǝŋ, raṯa, igiđi indǝnaice đǝbuŋṯia iđi đatǝɽe na đaɽo đeṯam iđi igëɽǝṯu ḏawuḏ. ³⁵ ralwaɽo cum imasmur gwomǝn ṯa, agaber agaŋgiṯi eđa gatǝɽe gǝlaɽǝŋa aŋaicǝbǝre. ³⁶ ŋen ŋanṯa ḏawuḏ ndǝ giđu ŋǝmëɽria ŋǝrǝmwa đǝge gandro eŋǝɽaiñ nǝŋurǝni eṯenandala, nǝŋaieǝbǝre, ³⁷ orn igi rǝmwa ratuđima gero gaicǝbǝro. ³⁸ orn ŋgiṯr ŋen iŋi aŋǝlǝŋini eñaŋ, lorldaiñ, ṯa ŋen iŋi ñagano diñǝđi ŋǝđǝŋgeinia đǝŋen ŋeieia iđi đafo imaji igi, ³⁹ na iŋu leđa pređ ildi lëndu ŋen alëbǝrni eŋen pređ iŋi lero laɽǝwađaṯa ṯa lëbǝrni igal ganun imusa. ⁴⁰ orn rǝmoṯr ŋen ṯa ŋen aŋerṯe ŋǝndeṯa nano iŋi al anbiya yalwaɽo, ⁴¹ ṯa, nwanǝđr, ñaŋgi ñagǝđama ŋen, irǝwarano na ñaiye ŋen ŋanṯa igëbǝđia ŋen ŋǝnǝŋ iliga eldalo na ŋen iŋi ñagaber ñagidi ñagaŋǝnṯi kwai kwai ndǝ eđa gǝnǝŋ galwaɽǝṯǝnde. ⁴² na ndǝ lamiñaṯo ndëuwǝr leđa leɽǝđǝlo kaiñ ṯa aldërrǝŋaiee ŋen iŋi tǝŋ ndǝ loman leṯo lǝđǝmiñǝniano tǝŋ. ⁴³ na ndǝ ŋen ŋamǝndëđǝnu leđa lwaiña, ildi laɽo al yawuḏ na ildi larto lëndu ŋen, lateṯo bulus na barnaba, ildi lalwaɽǝṯǝlo ŋen araga gunto ṯa alɽaŋe ŋope eŋen ŋǝđubwiđiya na đame đǝrǝmwa. ⁴⁴ orn ndǝ loman leṯo lwomǝn lǝđǝmiñǝniano leđa larraiđo lwaiña kaiñ ṯa alne ŋen ŋǝrǝmwa. ⁴⁵ orn ndǝ leđa lal yawuḏ laseicu leđa lwaiña ldǝciṯano, ṯalǝkuɽǝbǝjǝđǝṯu eŋen bulusala, ldǝmware. ⁴⁶ na bulus na barnaba lalwaɽǝṯǝlo nëiñua ŋǝđaiña ŋero, lđaṯa ŋen đeṯam ṯa ñagano ŋen ŋǝrǝmwa ananoŋ ñaganǝñaŋ. orn điñǝđi ŋen ŋanṯa ñaganeđo na ñagamo đǝskinia ntam enalo ṯa ñagero ñagarǝjađaṯa eŋen ṯa ñerṯe đamǝṯia đǝbǝɽǝbǝte, orn đǝge ñagabërrǝŋaice leđa ŋen ildi gerṯa laɽ al yawuḏ ⁴⁷ ŋen ŋanṯa elǝŋ rǝmwa rwalwaɽǝṯǝnde ṯa, igëɽǝnde ñagaɽ arrerre ŋen ŋanṯa leđa ildi gerṯa laɽo al yawuḏ ṯa ñananaiđe đëbǝri alo pređ na ltuŋga đǝrti. ⁴⁸ na ndǝ leđa lano ŋen iŋi ildi gerṯa laɽo al yawuḏ ldaŋǝreṯe nano ṯaloɽre ŋen ŋelǝŋ yesu, na ildi rǝmwa roṯǝlo pǝnde ram ṯa alame đamǝṯia đǝbǝɽǝbǝte ldëndi ŋen. ⁴⁹ na ŋen ŋelǝŋ yesu ŋǝlaldǝđǝni alo pređ. ⁵⁰ orn leđa lal yawuḏ ldatuđi nare nǝliji ɽrlda eŋen ildi laŋǝra eŋen, ṯaŋǝbuŋṯu rǝmwa na leđa loɽra lalo yakǝl, ldǝnanaiee bulus na barnaba ŋen ŋubwa ldǝlmiñe alo esen. ⁵¹ orn bulus na barnaba labuɽuṯǝlo abǝɽǝtua erǝmanǝña eren, nǝlṯađe lđabǝṯa alo igunia, ⁵² na ṯalǝmis yunḏeinu enare đaŋǝrađa nano na usilaga gatǝɽe.

¹ orn alo igunia lënṯu ndǝm imajma yal yawuḏ ldǝlërrǝŋaiee ŋen ŋabǝɽaŋa ŋusila gatǝɽe orn lwaiña lal yawuḏ na lal yunaniyin lano ldëndi ŋen. ² orn leđa lal yawuḏ ildi lero labendia ŋen lǝtuđeieu leđa ŋen enare ildi gerṯa laɽ al yawuḏ, ldǝɽriđici eŋaṯǝɽa ṯa alǝgea lorǝba lǝkanisa. ³ orn bulus na barnaba laɽaŋa alo yakǝl ñoman ñwaiña ṯalërrǝŋaicu leđa ŋen ŋelǝŋ yesu lero ŋǝđaiña nano, na gënǝŋu gaɽo đamǝđaṯa eŋen ŋǝlëɽǝŋu iŋi ŋǝđubwiđiya na đame đǝlëɽǝŋu, na giđu ŋen ŋoɽra na aŋwara raŋra eren. ⁴ orn leđa lalo yakǝl lakarnǝđiano, lǝmaṯan lwonaṯa ŋen ŋal yawuḏ na lǝmaṯan lwonaṯa ŋen ŋǝleđa lǝđweinu. ⁵ orn ŋen ŋafo eleđa ildi gerṯa laɽ al yawuḏ na igal yawuḏ cum na enǝlǝŋ enen, ṯa aldëndi na aldamǝndaiye ŋwandraŋa. ⁶ orn ndǝ lalǝŋinnano ldobǝđaṯe alo ilisṯra na iḏarba alo ilikoniya na alo pređ tu, ⁷ na ṯalërrǝŋaicu leđa ŋen ŋaŋǝra ŋǝrǝmwa alo yakǝl. ⁸ orn alo ilisṯra maji gëni gǝnǝŋ gaɽaŋa alo igi gaijǝba rǝmanǝñara, gǝlǝŋǝnu egare gǝlǝŋgen gaɽo ṯia, gaijǝba gabǝrlda kwai kwai. ⁹ maji gano bulus gaɽwata, na bulus ṯaŋǝmaseici kaiñ galǝŋinnano ṯa gënǝŋu gerṯo đonaṯa ṯa aŋeiđini, ¹⁰ nǝŋalwaɽe olega goɽra, nǝŋaṯa, twođo ŋǝđuri. orn nǝŋǝborṯe elo ṯaŋerldo. ¹¹ na ndǝ leda pređ lanwano ŋen iŋi bulus giđu, lalwaɽo pǝlelo olega galo ilikoniya ldaṯa, imwa niyirǝwǝṯǝndau yarno leđa. ¹² na leđa lënǝcu barnaba sifs na bulus armis, ŋen ŋanṯa gënǝŋu goɽra eŋen. ¹³ orn kana irǝmwa irri ranṯa sifs, irri rerṯo eɽa gǝlëɽǝŋu eđađ iđi đǝbenṯia irnuŋ igi, yamo ñǝnḏǝri na ŋǝđobǝra ŋen ŋanṯa yonaṯa yanaica rǝmwa eren đǝɽǝđinia leđala igëuwǝr yirnuŋ. ¹⁴ ndǝ leđa lǝđweinu, barnaba na bulus lano, lagero ndrena enen ldobađaṯe leđa nano ndëuwǝr ṯaɽrajaico ole, ¹⁵ ldaṯa, leđa bǝṯrau. ñagëbǝđia ṯia eđa? nanda ñagaɽo leđa cum, ñagarno ñaŋ na ñagandërrǝŋaicia ŋen ŋaŋǝra ṯa ñaŋgiṯi ŋen iŋi ŋǝpiano ñateṯe rǝmwa ramǝṯo irri riđu elo na alo na ebarlda na laŋge pređ ildi lafǝlau. ¹⁶ iliga lǝpǝnde raŋgiṯu leđa ṯalerldo eŋen eŋen, ¹⁷ orn rerṯo đamǝđaṯa đǝlëɽǝŋr jaica jaica, ŋen ŋanṯa rënǝŋu riđu ŋen ŋame ranaieǝnde ŋawa ŋađǝne na lalǝsǝni igiṯǝli, na nare enalo ldǝbeṯe ldǝŋǝreṯe nano. ¹⁸ ndǝ leđa lano ŋen iŋi lwonaṯa ṯa lalnaieia đǝɽǝđinia mǝldin orn ldǝŋgiṯi ŋen. ¹⁹ orn al yawuḏ yeṯo alo yanṯakiya na alo igunia yanaieo leđa ŋen niyǝtuđi nare enen orn leđa ldamǝndaiye bulus ŋwandraŋa ldamabǝleđeṯe ndëuwǝr ldaṯa gaiyo. ²⁰ orn ṯalǝmis yarraiđǝma nano yëɽiṯima iligano nǝŋatwođe nǝŋoɽǝbaṯe alo yakǝl na iloman leṯeɽe lđabǝla barnabaga alo iḏarba. ²¹ ndǝ lërrǝŋaicu leđa ŋen ŋaŋǝra ŋǝrǝmwa alo yakǝl na leđa lwaiña lateṯǝlo ldiđǝni ṯalǝmis, lđoɽǝbaṯe alo ilisṯra na alo igunia na alo yanṯakiya, ²² lamađaṯa ṯalǝmis eŋen ŋǝrǝmwa lalwaɽǝṯǝlo ṯa alđuri ŋope alerṯe đonaṯa, lđaṯa, lǝgǝbenṯiar eŋǝlǝŋe ŋǝrǝmwa đirǝnḏeiniađa đwaiña na ŋenŋa ŋubwa. ²³ na ṯalṯurṯu rǝmwa ṯalɽaŋo ŋorwaṯaŋa ṯa alëndi leđa ildi rǝmwa ronaṯa ṯa alǝɽeṯe nǝlǝŋ ikanisa pređ, na leɽǝđo elǝŋ yesu ṯa aŋǝlǝbuŋṯi ildi lëndu ŋen ŋǝlëɽǝŋu. ²⁴ orn lamiño alo ibisiḏiya ldeṯa alo ibamfiliya, ²⁵ na ndǝ lërrǝŋaicu leđa ŋen ŋǝrǝmwa alo ibarja leṯo alo yaṯalia. ²⁶ orn latwođo tu iđǝpundr đǝŋau ldabǝṯa alo yanṯakiya, alo isi kanisa yađwaṯǝlo ṯa aliđi ŋǝmëɽria ŋǝrǝmwa iŋi laɽiñǝđaṯo. ²⁷ na ndǝ larǝmaṯo đǝge larreiđu leđa lǝkanisa ldǝlǝlwaɽǝṯi ŋen pređ rǝmwa riđu ŋulda na ragagiđu ëuwǝr eleđa ildi gerṯa laɽ al yawuḏ ṯa alaɽǝwađaṯe lǝberṯia đonaṯa. ²⁸ na laɽaŋa tu ñoman ñwaiña ṯalǝmisya.

¹ orn leđa lǝmaṯan leṯo alo yuḏiya ṯalërrǝŋaieu leđa ŋen, ldaṯa, ndǝ ñagero ñaguɽǝđǝnia garno ŋen ŋǝpǝnde ŋǝmusa ñagaber ñagaɽǝwađaṯa ñagëbǝrni. ² na ndǝ bulus na barnaba lukuɽǝbijǝđǝṯu leđala ole kaiñ, bulus na barnaba na leđa lǝmaṯan lǝđweinu alo yursalim ŋen ŋanṯa aɽrraiđe leđala lǝđweinu na nǝlǝŋna nǝkanisa eŋen iŋi. ³ orn ildi lorǝba lǝkanisa lǝđwaṯǝlo lamiño alo yǝfimgiya na alo isamǝri lalwaɽǝṯu leđa lǝkanisa tu ṯa leđa ildi gerṯa laɽ al yawuḏ lano ŋen ŋǝrǝmwa ldëndi. na ndǝ lano ŋen iŋi ldaŋǝreṯe nano kaiñ. ⁴ ndǝ bulusanda larǝmaṯo alo yursalim leđa lǝkanisa tu leđala lǝđweinu na nǝlǝŋanda nǝkanisa lamǝlo eđađ lđǝlaŋërṯe nano. na bulusanda lǝlwaɽǝṯǝlo ŋen pređ rǝmwa riđu ŋulda. ⁵ orn leđa lǝmaṯan ildi lëndu ŋen laɽo al farisiyin, latwođo ldaṯa, ŋen đeṯam leđa ildi aluɽǝđǝni na alërrǝŋeini ŋen ṯa aɽrǝmoṯe ŋen ŋal ganun imusa. ⁶ na leđa lǝđweinu na nǝlǝŋ nǝkanisa larraiđo lđǝɽo ṯalinḏeicu ŋen iŋi. ⁷ na ndǝ laɽwataiđo liga lwalano buṯrus nǝŋǝtwođe nǝŋǝleiṯi ṯa, lorldaiñ, ñagaliŋeṯo rǝmwa rundǝđiñi bǝtëgǝlǝŋ eñaŋ ṯa leđa gerṯa laɽ al yawuḏ liđ alne ŋen ŋǝrǝmwa ëiñuaya ilëɽǝñi na alëndi. ⁸ na rǝmwa irri raliŋeṯo nare nǝleđa raɽo đamǝđaṯa eđen, ranaicǝlo usila gatǝɽe gǝlëɽǝŋu ŋen ŋarno rǝnaicǝndr, ⁹ na rero rǝnaicǝndr ŋen ɽetǝɽeteo, rǝnaicǝndr ŋen ŋunto, orn rwasǝlo enare đonaṯađa. ¹⁰ orn ñagabinḏeica rǝmwa eđa? ñaganaicia ṯalǝmis isi ŋen ŋinia papanda igëndr lero laɽǝwađaṯa na nëndr lǝgerr lǝgaɽǝwađaṯar ? ¹¹ orn lagëndr ŋen ṯa lǝgiđr alëbǝrnr đǝnaicađa đelǝŋ yesu, ŋen ŋarno ŋulu. ¹² orn leđa pređ labwaiña ŋǝma, lanaṯo barnaba na bulus ndǝ lalwaɽǝṯǝlo ŋen ŋoɽra na aŋwara ildi rǝmwa riđǝlo eŋen eŋen eleđa gerṯa laɽ al yawuḏ. ¹³ ndǝ lalwaɽo đǝge yagub nǝŋaṯa, lorldaiñ naṯiñr. ¹⁴ siman galwaɽǝṯǝndr ŋen ŋǝrǝmwa ndǝ reṯo leđa nano gerṯa laɽ al yawuḏ ŋen ŋaɽnđa ṯa arëndi leda lǝmaṯan eleđa ildi ṯa alme irǝŋ gǝlëɽǝŋu. ¹⁵ na ŋen iŋi ñagano điñǝđi na ŋen iŋi ŋal anbiya yǝpǝnde ŋaɽo ŋunto ŋen ŋanṯa ŋen ŋǝwërđǝnu egađam gǝrǝmwa ṯa, ¹⁶ rǝmwa ralwaɽo ṯa, orn igiđi yoɽǝbǝđe na igiđi yabǝjeđi eɽa gǝḏawuḏ tǝŋ, igi giɽu, igiđi yaṯoɽaṯe laŋge ǝllëɽǝŋu ildi liɽu iltuđi, ¹⁷ igiđi yiđi ṯia ṯa leđa ildi lǝṯënu alǝpwaiñe elǝŋ rǝmwa, na ildi pređ gerṯa laɽ al yawuđ alënǝjǝni irǝŋga gǝlëɽǝñi. ¹⁸ rǝmwa ralwaɽo ŋen iŋi irri ranaicǝndr ŋen pǝnde. ¹⁹ orn igwalwaɽo ṯa lǝgaber lǝgaicwariar leđa ildi gerṯa laɽ al yawuḏ ildi lëndu ŋen ŋǝrǝmwa, ²⁰ orn aldǝnaier ađam ṯa alǝŋgiṯi laŋge ildi ltaŋa ildi leđa ldukwuđiñǝṯialo, na ŋen pređ iŋi ŋataŋa ŋaŋǝno, na laŋge pređ ildi laiyo mǝɽǝmǝɽeñ ŋǝfǝni ŋero ŋirǝwa, na ŋen ṯa leđa labëkëɽi ŋǝfǝni egaicǝba lasa. ²¹ ŋen ŋanṯa đërrǝŋaiđia iđi đǝmusa đafo alo pređ nṯǝli pređ ŋen ŋanṯa đǝɽwatǝni imajma ñoman pređ ñǝđǝmiñǝniano. ²² orn leđa lǝđweinu na nǝlǝŋ nǝkanisa na leđa pređ lǝkanisa laṯa ṯa ŋen ŋame lǝgǝbendiar leđa egworǝb lǝmaṯan inënd aldǝđwaṯr bulusala na barnaba alo yanṯakiya. orn ldǝđwaṯe yauđa gënǝjǝnu barsaba na sila, ildi loɽra eleđa lǝkanisa. ²³ lǝđwaṯǝlo ađamga igi gaṯa, fǝnanda leđa lǝđweinu na nǝlǝŋ nǝkanisa ñaŋgi ñagaɽo lorldalo, ñageɽǝđo lorldaiñ eleđa gerṯa laɽ al yawuḏ, ildi lafo alo yanṯakiya na alo isuriya na alo ikilikiya. ²⁴ ñagano ŋen ṯa leđa lǝmaṯan inanda liđǝnde ñagagǝrđa ŋenŋa eŋen ŋaijǝbinṯǝnde nano ildi ñagero ñagalǝđwaṯa ŋenŋa iŋi, ²⁵ na ŋen ŋafǝṯia ŋen ŋaŋǝrǝnde nano imajlis esaiñ ṯa ñagǝbendia leđa inanda lǝmaṯan ṯa ñandǝlǝđweiṯi barnabaga na bulus ildi ñagubwaliya. ²⁶ ildi lënṯu eŋǝɽaiñ ŋen ŋanṯa elǝŋ igëndr yesu masiya. ²⁷ orn ñagwađwaṯo yauđa na sila, na lënǝŋulu liđ alandǝlwaɽǝṯi ŋen iŋi ëiñuaya đurri. ²⁸ ŋen ŋanṯa usila gatǝɽe na nanda ñagaṯa ṯa ŋen ŋaŋǝra ñagaber ñagandǝcwaria ŋenŋa ŋwaiña. ²⁹ illi ñagwonaṯa ṯa ñaŋ ñerṯe ñagasa iđǝɽǝđǝnia đǝlaŋge lǝpiano ildi leđa lđukwuđiñǝṯialo walla ŋǝfǝni iŋi leđa labǝkëɽia igaicǝba walla laŋge ildi laiyo mǝɽǝmǝɽeñ na ṯa ñaŋgiṯi ŋen ŋeieia ŋaŋǝno, ndǝ ñagaṯađa ŋen iŋi pređ ñagëbǝđia ŋen ŋaŋǝra. a, đǝge, erṯr ŋabǝɽa. ³⁰ orn ndǝ lǝđweinu đǝge ldabǝṯe alo yanṯakiya, ldǝrreiđi leđa đǝge ldǝlnaice ađam. ³¹ ndǝ leđa lëgǝriṯu đǝge ldaŋǝreṯe nano kaiñ. ³² na yauđa na sila, ildi laɽo anbiya đurri, lërrǝŋaicu lorǝba ŋen ŋope đurri lamǝđaṯǝlo ŋope. ³³ ndǝ ldǝɽaŋe tu liga orn lorǝba loɽǝbaicǝlo eđađ đeɽǝđiađa đaŋǝra tǝŋ eleđa ildi lađwaṯǝlo. ³⁴ orn ŋen ŋaŋǝra sila nano ṯa gaɽaŋa tu. ³⁵ orn bulus na barnaba laɽaŋo alo yanṯakiya ldërrǝŋaiee leđa ŋen ŋelǝŋ yesu leđala larto eum. ³⁶ ndǝ ñoman ñaŋgaṯo ñǝmaṯan bulus geiṯu barnaba ṯa, aɽe alnwane lorǝba ildi lǝgërrǝŋaieǝlo ŋen ŋǝrǝmwa ikanisa tǝmǝtǝm, gaɽe lafo ŋope. ³⁷ na barnaba gwonaṯa yuanna igi gǝbernia margus ṯa alɽǝlda, ³⁸ orn bulus gaṯa, gǝbanṯa lǝgaŋgiṯia yuanna igi gaṯađǝnde alo ibamfilia na gero ganda-mađaṯa iŋǝmëɽria iŋi ŋǝrǝmwa. ³⁹ orn đeiciano nḏǝtwođe nḏǝlandǝđiano, ldǝbapërǝđǝniano ɽetǝɽeteo. barnaba gamo margus ldënṯi iđǝpundr lamiña alo yanṯa gubrus. ⁴⁰ orn bulus nǝŋǝme sila ldabǝla na lorǝba lǝkanisa ṯalduṯurṯu rǝmwa. ⁴¹ lënǝŋulu ldabǝṯa eđađ đalo isuria na alo ikilikiya ldamǝđaṯe kanisa pređ.

¹ na lënǝŋulu ldeṯa alo iḏarba na alo ilisṯra. na ṯalǝmis yafo tu yǝnǝŋ yanṯa ṯimǝđawus, lǝŋgen gaɽo yawuḏ gënđu ŋen ŋǝrǝmwa orn eṯen gaɽo yunani. ² lorǝba pređ lalo ilisṯra na lalo igunia lubwamaiya. ³ na bulus gwonaṯa gamama ṯimǝđawus, nṯia guɽǝđǝma ŋen ŋanṯa al yawuḏ isi yafo alo isi aiyalǝŋinnano ṯa eṯen gaɽo yunani. ⁴ orn ndǝ labǝṯa kanisa pređ lërrǝŋaicǝlo ŋen ŋal ganun yǝkanisa isi leđa lǝđweinu na nǝlǝŋ nǝkanisa laṯoɽaṯo alo yursalim. ⁵ nṯia kanisa pređ yǝfiđu ŋabǝɽa iđonaṯa na leđa ṯalakaɽǝjaiđo egworǝb ñoman pređ. ⁶ na bulusanda lamiño alo ifrijiya na alo yǝgǝlaṯiya, orn usila gatǝɽe gǝrǝmwa ganeđo ṯa lǝbërrǝŋaicia leđa ŋen ŋǝrǝmwa alo yasiya. ⁷ na ndǝ laređǝđo aloya imisiya lonaṯa labǝṯa alo ibiđiniya orn usila gǝyesu ganeđo, ⁸ nṯia lamiñaṯo alo imisiya ldabǝṯa alo iṯruwas. ⁹ na bulus gaseieu ŋen iŋuriđ ulǝŋgi nǝŋaseici maji galo imakṯunia gađǝru, ṯaŋaṯa, elaŋ ŋeṯa alo imakṯunia ŋandǝmađaṯe. ¹⁰ na ndǝ bulus gaseicu ŋen iŋi, ram ldaṯa ṯa ñagabǝla, rǝmwa rundǝđǝnde ṯa ñërrǝŋaice leđa ŋen ŋaŋǝra ŋǝrǝmwa tu. ¹¹ nṯia ñagatwođo alo iṯruwas iđǝpundr đǝŋau na ñagamo đađ iđi đuđǝrwaṯo đabǝṯa alo isamuđraki, na iloman leṯeɽe nǝñarǝmaṯe alo iniyabulis, ¹² orn ñageṯo alo ifilibi, isi yaɽo suk yoɽra yalo imakṯunia na leđa lalo irumiya gerṯo ŋǝlǝŋe ŋalo isi. nǝñaɽaŋe alo isi ñoman ñǝmaṯan, ¹³ na iloman lǝđǝmiñǝniano ñagamiñaṯa nđëuwǝr, nǝñagabǝṯa đǝbarlda nano, ñagaṯa aŋgaiea alo yëni ñagauṯurṯia rǝmwa. na ñagaɽaŋalo ñagǝbërrǝŋaicia liji ɽrlđa ŋen ildi larraiđo tu. ¹⁴ na wuji gafo gǝnǝŋ gǝnna ŋen eŋaiñ ganṯa liḏiya galo iđiyaṯira, igi gǝbirldiđia nđrena nore đore đǝmǝnu, ṯaŋǝbuŋṯu rǝmwa, orn elǝŋ yesu gagagiđu ara gǝlëɽǝŋu ṯa aŋǝne ŋen ŋǝbulus. ¹⁵ orn ndǝ liḏiya ganeinu mamuḏiya na leđa pređ legeɽa gǝlëɽǝŋu, gënǝŋu geiṯǝnde ṯa ndǝ ñagaṯa ṯa igëndu ŋen ŋelǝŋ yesu đeṯam, eṯar eɽa gǝlëɽǝñi ñauɽaŋe. orn nǝñane nǝñabǝla. ¹⁶ na lomanaŋ ndǝ ñagabǝṯa alo iđǝṯurṯia rǝmwa ñagopǝđaiđo ŋerela ŋaɽ ebai ŋerṯo usila nano geieia, igi gwaɽwato ŋen ŋamǝlu ŋeṯo, na leđa ildi ŋǝđuɽǝđǝnṯǝlo lamama gǝrus eŋen ŋǝlëɽǝŋu ndǝ gwalwaɽo ŋen ŋamǝlu ŋeṯo. ¹⁷ na ŋere iŋi ŋǝteṯa bulus na nanda nǝŋarǝjaiee ole nǝŋaṯa, leda ildi lađuɽǝđinṯi rǝmwa irri roɽra ramiñaṯo laŋge pređ lǝndërrǝŋaieia ŋen ŋǝđëbǝria. ¹⁸ na ŋere ŋiđu ṯia ñoman ñwaiña. orn bulus nǝŋǝeiṯano nǝŋǝređialo nǝŋeiṯi usila geieia ṯa, igagariñaṯaŋa irǝŋga gǝyesu masiya ṯa ŋamiñe ŋere nano. orn usila geieia nǝŋamiñe nano liga ildi đurri. ¹⁹ orn ndǝ leđa ildi lerṯo ŋere laliŋeṯo ṯa ŋen ŋagǝro ŋǝgǝrus đǝge lëndu bulus na sila ldǝlabǝrldǝđeṯe nǝsuk nǝlǝŋ nëiñua, ²⁰ na ndǝ leṯo nǝlǝŋ nano ldǝleiṯi ṯa, leđa ildi laɽo yawuḏ na liđu ŋen ŋwaiña alo esaiñ, ²¹ lërrǝŋaicu leđa ŋen iŋi al ganun esaiñ yaṯa ṯa ñagero ñagaɽǝwađaṯa ñagǝbendia walla ñagëbǝđia ŋen ŋanṯa ñagaɽo rumamym. ²² orn leđa ldǝtwođe leiciano, na nǝlǝŋ nǝlǝbǝrlđeđeṯe nđrena nano naṯa pǝrldo. ²³ na ndǝ leđa lëpǝlo kaiñ ldǝlëɽi isijǝn na nǝlǝŋ nǝlwaɽǝṯi gafir isi yarǝmoṯwa sijǝn ṯa, rǝmoṯo majianda ildi ŋope. ²⁴ ndǝ gafir yano ŋen iŋi yënǝeǝlo isijǝn egwaŋano niyǝlërǝnǝei rǝmanǝña esanḏug ŋen ŋanṯa alerṯe laɽǝwađaṯa lǝbǝrlda. ²⁵ orn ulǝŋgiano bulus na sila laṯurṯu rǝmwa na ṯalalǝŋiṯu rǝmwa, na leđa ildi lakëndǝnu ṯalno. ²⁶ orn ŋen nǝŋela taltal đuđa ṯađǝtësǝnu na ađuna yǝsijǝn ṯaiyǝtësǝnu na ram ipundri inëuwǝr nigagiđǝni pređ na nuriđa nemiñe erǝmanǝña pređ rǝleđa ildi lafo egwaŋ. ²⁷ orn gafir isi yarǝmoṯo sijǝn ndǝ gatwođo iŋuriđ ṯaŋǝseieu nëuwǝr nagagiđǝnu pređ niyuɽǝđeini đoperre nǝŋaṯa gaɽiñǝni bǝɽan ṯayaṯa leđa lobǝđo pređ. ²⁸ orn bulus ṯaŋamurundǝđu pǝlelo ṯaŋaṯa, ŋerṯe agasini aŋǝno. ñagëni pređ. ²⁹ orn gafir niyǝđwaṯe eđa aŋǝmamǝṯi lamba niyobǝđaṯe egwaŋ, ṯaiyagǝđia aŋǝno niywođǝñiṯi bulus na sila alo erǝmanǝña, ³⁰ na niyǝlamiñi niyaṯa, ya nǝlǝŋ, igëbǝđia ṯau ṯa yëbǝrni? ³¹ na lënǝŋulu ldǝmeiṯi ṯa, ëndu ŋen ŋelǝŋ yesu orn ŋëbǝrni na leđa ǝllaɽǝŋa cum. ³² na bulusanda ldǝmërrǝŋaiee ŋen ŋelǝŋ yesu na leđa legeɽa gǝlëɽǝŋu pređ. ³³ na ulǝŋgi igi gafir niyǝlame niyǝlwase erëɽi, niyǝneini mamuḏiya na leđa ǝllëɽǝŋu pređ. ³⁴ orn yënǝcǝlo eɽa gǝlëɽǝŋu, niyalnaice ŋǝsa, niyërṯi rǝmwa nano kaiñ na leđa legeɽa gǝlëɽǝŋu pređ ŋen ŋanṯa yëndu ŋen ŋǝrǝmwa. ³⁵ na iloman leṯeɽe alo yakaro nǝlǝŋ nǝđwaṯe askari naṯa aiyǝđwaṯe bulusanda. ³⁶ na gafir yalwaɽǝṯu bulus ŋen niyaṯa, nǝlǝŋ nađwaṯo ŋen ṯa ñagabǝla. twođr ñaɽe đǝge đaŋǝrađa nano. ³⁷ orn bulus nǝŋǝleiṯi ṯa, nënǝŋulu nëpǝnde leđa nëiñua, ñagero ñagakǝmǝni, na ñagaɽo rumaniyin, na nǝndëɽi isijǝn. orn điñǝđi nǝđwaṯǝnđe ŋamǝɽa? ŋgiṯǝlo anela anǝndëbǝri. ³⁸ askari yǝlwaɽǝṯu nǝlǝŋ ŋen iŋi na niđǝñiṯalo ndǝ lano ṯa ildi laɽo rumaniyin, ³⁹ na neṯǝlo nano nǝlwaɽǝṯi bulusanda ṯa ñagiđu mǝnna. orn namiñeieǝlo nđëuwǝr nǝleiṯi ṯa, ŋgaṯr alo esaiñ. ⁴⁰ na ndǝ lamiño isijǝn ldabǝṯa eɽa gǝliḏiya na ndǝ laseicu lorǝba lamǝđaṯǝlo eŋen ŋǝrǝmwa orn labǝla đǝge.

¹ orn ndǝ lamiño alo yamfibulis na alo yabulunia larǝmaṯo alo iṯasǝluniki, alo isi yerṯo majma yal yawuḏ. ² na bulus gënṯu, ŋen ŋarno gëbǝđia jaica, ldukuɽǝbijǝđǝṯi leđala eŋen ŋegađam gǝrǝmwa usbua iɽijin, ³ gërrǝŋaicǝlo ŋope ṯa ŋen đeṯam al masiya giđ aŋǝneini ŋen ŋubwa na giđ aŋatwođe eŋǝɽaiñ, nǝŋaṯa ṯa fǝyesu igi igandërrǝŋaicia ŋen ŋǝlëɽǝŋu, fǝŋu gaɽo al masiya đeṯam. ⁴ na leđa lǝmaṯan iŋulu lanaṯǝma na lënṯu eŋen bulusla na sila, na leđa lwaiña laɽo yunamyin cum, ildi ṯalbuŋṯu rǝmwa, na lwaiña ɽrlda cum ildi laɽo wasenanda lǝleđa loɽra. ⁵ orn al yawuḏ yagiaṯo bulusanđa eŋen lamo leđa ildi leicia eleđa lero ŋǝɽwa ldǝbwaiđe leđa, na leđa pređ lirnuŋ ldǝtođe ldǝciṯano na labǝṯa eɽa gǝmaji ganṯa yasun almađiñalo ŋen ŋanṯa aldǝmiñiṯi bulusanda. ⁶ orn ndǝ lero lǝfiđǝlo labǝrldeđa yasun na lorǝba lǝmaṯan eum lǝkanisa nǝlǝŋ nano, ldaṯa, leđa ildi lariđu leđa lalo isiano leṯo ëli eum ⁷ na yasun gaŋǝnṯǝlo. lënǝŋulu pređ lageo ŋen ŋelǝŋ goɽra gaisar ŋen ŋanṯa ldaṯa ṯa elǝŋ gëni gwomǝn ganṯa yesu. ⁸ na leđa na nǝlǝŋanda ldirǝwano ndǝ lano ŋen iŋi ⁹ na ndǝ yasunanda lǝnaico nǝlǝŋ waŋge ṯa aloɽǝbǝđe, nǝlǝŋ nǝlëbǝri. ¹⁰ na ram lorǝba ildi lafo eŋen ŋunto lađwaṯo bulus na sila alo ibiria ulǝŋgi, na ndǝ larǝmaṯo đǝge ldënṯi imajma yal yawuḏ. ¹¹ orn al yawuḏ yalo isi yame eŋen yamiñaṯo isi yalo iṯasǝluniki ŋen ŋanṯa yaŋǝnṯu ŋen araga gunto, labirnḏeicia ađam gǝrǝmwa ñoman pređ ŋen ŋanṯa ṯalǝseicu ndǝ ŋen ŋaɽo ṯia. ¹² orn lwaiña ldëndi ŋen, ildi ɽrlda cum wasenanda lǝleđa loɽra laɽo yunaniyin na ɽrwa eum lwaiña. ¹³ orn ndǝ al yawuḏ yalo iṯasǝluniki isi yeieia yaliŋeṯo ṯa bulus gǝbërrǝŋaicia leđa ŋen ŋǝrǝmwa alo ibiria cum yënǝŋulu yeṯo alo yakǝl cum ldatuđi nare nǝleđa lwaiña. ¹⁴ na ram lorǝba lǝkanisa lǝđwaṯo bulus eđađ iđi đamiña nǝŋau, orn sila na ṯimǝđawus ldǝɽaŋe mǝldin. ¹⁵ na leđa ildi laɽeicu bulus ldarǝmaṯǝlda alo yađina orn bulus nǝŋǝlëđiṯi ṯa mbǝr ñalwaɽǝṯi sila na ṯimǝđawus alela taltal, orn labǝla. ¹⁶ na ndǝ bulus galṯurṯi alo yađina girǝwano kaiñ ŋen ŋanṯa gaseicu alo yunḏeinu laŋgela lǝpiano ildi leđa lđukwuđiñǝṯialo. ¹⁷ orn ñoman pređ gokoɽǝbijǝđǝṯu eŋen al yawuḏya na leđala laŋǝra eŋen imajma, na alo yǝsuk eum leđala ildi labǝrldeṯa nǝsuk. ¹⁸ na lǝmaṯan cum lǝbikuriyin, na lǝmaṯan lǝruwagiyin, leđa ildi laliŋeṯo ŋen nǝsi ŋalo laɽwataiđia eŋen ŋǝđamǝṯia đǝleđa lënǝŋulu lđopǝđaiđe bulusala. na lǝmaṯan laṯa ṯa, maji igi gwaiña ŋeniano gwonaṯa gandǝlwaɽǝṯi ŋen ŋanṯau? na lǝmaṯan laṯa ṯa, aŋgaica gerṯo đërrǝŋaiđia ŋen đǝrǝmwa rarto. lwalwaɽo ṯia ŋen ŋanṯa gërrǝŋaicia leđa ŋen ŋǝyesu na ŋǝđǝtwođa eŋǝɽaiñ. ¹⁹ na lëndǝma ldǝmaiyǝɽe alo ibernia arbusabagus, yaɽo alo yǝwirnḏeini ŋen ŋoɽra, laṯa ṯa ñagwonaṯa ñaŋanaṯa ŋen iŋi ŋǝmaijǝn agabërrǝŋaicia leđa. ²⁰ ŋen ŋanṯa ŋen ŋǝmaṯan ñagano ŋaijǝbinṯǝnde nano ñagwonaṯa ñagaliŋeṯo ŋen iŋi ŋafo ṯau. ²¹ leđa pređ lalo yađina na leđa ildi larto lafo alo yađina, ṯaɽrraiđu jaiea labǝkëɽia ŋen ŋǝnǝŋ ŋǝmaijǝn. ²² orn bulus gađǝru arbusabagus iligano nǝŋǝleiṯi ṯa, leđa lalo yađina igaliŋeṯo ṯa ñagwonaṯa ñagaliŋeṯa rǝmwa. ²³ ŋen ŋanṯa ndǝ igeṯo eđađ igaseicu laŋge lwaiña ildi ñagǝlukwuđiñǝṯialo, na igaseicu ađuna cum na ŋen ŋǝwërđǝnu ṯa, ŋen ŋanṯa rǝmwa irri raijǝbǝnu. orn irri ñagǝṯurṯi ñagaijǝba fǝŋu irri indërrǝŋaice ŋen ŋǝlëɽǝŋu. ²⁴ rǝmwa irri riđu alo na laŋge pređ lafau, irri raɽ elǝŋ relo na ralo, rero rafo elaŋge liđǝnu raŋra rǝleđa, ²⁵ na cum eđa gero gaɽǝwađaṯa ṯaŋamađuɽǝđinṯu ŋen ŋarno ṯa ronaṯa wagǝnǝŋ, ŋen ŋanṯa fǝŋu rënǝŋu rananaica leđa pređ đamǝṯia, na ufuđa enare, na laŋge pređ. ²⁶ na rënǝŋu riđu leđa pređ egeđa gunto lalo pređ ṯa alɽaŋe alo, orn rëɽu liga ananoŋ lǝleđa pređ na rëɽu alo eum yǝleđa ɽetǝɽeteo, ²⁷ ṯa alpwaiñe rǝmwa na aŋgaiea alparǝđi alfiđi. orn rǝmwa rero rafia nwaldaŋ, rafǝndr ṯwaiñ, lëndr pređ. ²⁸ ŋen ŋanṯa lagerṯr đamǝṯia iŋu na lǝgǝbǝrldar na lǝgafr iŋu garno ŋen iŋi ŋǝleđa lǝmaṯan eldalo ildi laɽo nǝlǝŋa, ldaṯa ṯa ñagaɽo ñere ñǝlëɽǝŋu. ²⁹ orn ndǝ ñagaɽo ñere ñǝrǝmwa ŋen ŋafo mǝnna ndǝ ñagǝbaṯa ṯa rǝmwa irri roɽra rarno ḏaǝb walla faḏḏa walla ŋwandra walla laŋge laɽǝwađaṯa liđǝni raŋra na ŋaṯǝɽaŋa lǝleđa. ³⁰ liga lakǝl leđa laijǝba ŋen, rǝmwa raŋgiṯu đǝge, orn điñǝđi ralwaɽǝṯia leđa pređ alo pređ ṯa alṯađe ŋen ŋeicia eŋen aloɽǝbaṯe nano ³¹ ŋen ŋanṯa rǝmwa rerṯo liga ṯa riđ arǝwakǝme alo ŋenŋa ŋuđǝrwaṯo eđaga gǝnǝŋ igi rǝmwa rëɽǝma. rënǝŋu rërrǝŋaicu leđa pređ ṯa ŋen iŋi ŋǝđeṯam ndǝ ratuđǝma eŋǝɽaiñ. ³² orn ndǝ lano ŋen ŋǝđǝtođa eŋǝɽaiñ lǝmaṯan ldaṯa ṯa, ŋen ŋǝpiano na lǝmaṯan ldaṯa ṯa, ñagiđi ñaŋanaṯe ŋen iŋi tǝŋ. ³³ orn bulus gǝṯađǝlo. ³⁴ orn leđa ɽrwa lǝmaṯan lano ŋen ŋǝbulus ldëndi, maji gǝnǝŋ ganṯa điwinisiwus galo yarbusabagus na wuji gaɽǝbwa ganṯa ḏamaris na lǝmaṯan ṯǝŋ.

¹ orn bulus gatwođo alo yađina nǝgabǝṯa alo ikǝrunđus, ² nǝŋǝfiđi al yawuḏ yǝnǝŋ yanṯa akila yalo ibunṯis, geṯo alo iṯalia wasenga ganṯa briskila, ŋen ŋanṯa elǝŋ kuluḏius gëɽu ŋen ṯa al yawuḏ pređ aiyǝtwođe alo irumiya. orn bulus nǝgabǝla nǝŋǝlnwane, na ŋen ŋanṯa lafo eŋǝmëɽria ŋunto laɽaŋǝlda, na lëbǝđia ŋǝmëɽria, ŋen ŋanṯa ŋǝmëɽria eŋen lawaṯa al kema. ⁴ na lukuɽǝbijǝđǝṯu eŋen ñoman pređ ñǝđǝmiñǝniano imajma na gabǝrǝldeđeṯa al yawuḏ na yunaniyin lwaiña eŋen ŋǝrǝmwa. ⁵ ndǝ sila na ṯimǝđawus leṯo alo imakṯunia đǝge lafiđu bulus gabërrǝŋaieia leđa ŋen kaiñ, ṯaŋǝɽwatiṯu al yawuḏ ŋen ṯa yesu fǝŋu gaɽo al masiya đeṯam. ⁶ orn ŋen ŋanṯa lamwara na laneđo đërrǝŋaicia iđi orn nǝŋape ndrena nǝlëɽǝŋu nǝŋǝlupi abǝɽǝtua nǝŋǝleiṯi ṯa, ŋǝfǝni eŋalo ŋarǝmađaṯǝnde ṯia nǝŋǝɽwa eŋalo, igënǝñi igëpi. điñǝđi igabǝla ṯiyërrǝŋaicu leđa ŋen ildi gerṯa laɽ al yawuḏ. ⁷ orn nǝŋǝtwođe nǝgabǝṯa eɽa gǝmaji gǝbernia ṯiṯus yusṯus, igi ṯaŋǝbuŋṯu rǝmwa na eɽa gǝlëɽǝŋu gafo majma nano ṯwaiñ. ⁸ na krisbus, elǝŋ gǝmajma, gëndu ŋen ŋelǝŋ yesu na leđa pređ legeɽa gǝlëɽǝŋu, na leđa lwaiña lalo ikǝrunđus ndǝ lano ŋen ŋǝbulus ldëndi orn ldǝneini mamuḏiya. ⁹ na ulǝŋgi gǝnǝŋ ŋen ŋamiñiṯu bulus nano na elǝŋ yesu nǝŋǝmeiṯi ṯa, ŋerṯe agiđǝñalo, ɽwato, ŋerṯe agabwaiña ŋǝma, ¹⁰ lǝgafo, na eđa gero gǝnǝŋ giđ aŋafe aŋëndi walla aŋanaiee ŋen ŋeicia ŋǝnǝŋ ŋen ŋanṯa igerṯo leđa lwaiña alo isi. ¹¹ nṯia bulus nǝŋǝɽiñađaṯe iṯilia na nubwa đenǝŋ nǝŋǝmiñe gunto gabërrǝŋaicia leđa ŋen ŋǝrǝmwa alo isei. ¹² orn liga kalyun gaɽo elǝŋ galo yakaiya, al yawuḏ nǝyiđi ŋen ldǝɽo niyëndi bulus niyǝmaiyǝɽe nǝsǝria, ¹³ niyaṯa, maji igi garǝkeiđia leđa ṯa albuŋṯi rǝmwa ŋen iŋi al ganun esaiñ eneđo. ¹⁴ orn ndǝ bulus gwonaṯa galwaɽo, kalyun nǝŋeiṯi al yawuḏ ṯa, ndǝ ŋen ŋoɽra ŋeicia ŋiđǝnu igaɽǝwađaṯa igǝnna ŋen eŋalo, ñaŋ al yawuḏ, ¹⁵ orn ŋen ŋanṯa ŋen iŋi ŋađam na ŋole, na ŋǝndrǝŋ na ŋal ganun esalo, mbǝr ñanwane ŋen ñaganǝñaŋ. iganeđo igǝbirnḏeieia ŋen iŋi igënǝñi. ¹⁶ na gënǝŋu nǝŋǝlǝmiñi igǝsǝria. ¹⁷ orn leđa pređ ldëndi sosṯanis, igi gaɽo elǝŋ gal majma, ldǝmëupwaṯe eɽa nëiñua gǝsǝria, orn elǝŋ kalyun gaŋgiṯǝlo eŋen eŋen. ¹⁸ orn bulus nǝŋaɽaŋe alo isei ñoman ñwaiña tǝŋ, orn nǝŋaṯađe lorǝba nǝgabǝṯa alo isuria iđǝpunđr đǝŋau, na briskila na akila ldabǝlǝlda. na alo ikangiria bulus nǝŋǝbađǝni nda ŋen ŋanṯa ŋen ŋëndǝma ŋǝnǝŋ. ¹⁹ orn nde larǝmaṯo alo yafǝsus nǝŋalṯađe nǝŋënṯi imajma nǝŋukuɽǝbijǝđǝṯi al yawuḏ eŋen. ²⁰ orn ndǝ leɽǝđǝma ṯa aŋǝɽaŋe alo esen bulus nǝŋǝneđe. ²¹ orn ndǝ gwonaṯa gabǝla dǝge nǝŋǝleiṯi ṯa, igiđi yoɽǝbǝđe ndǝ rǝmwa raŋgiṯiñi. orn nǝŋënṯi iđǝpundr đǝŋau nǝŋǝtwode alo yafǝsus. ²² na ndǝ garǝmaṯo alo igaisariya nǝŋǝɽe ikanisa nǝŋǝne leđa ëiñua, orn nǝgabǝṯa alo yanṯakiya. ²³ orn ndǝ gaɽaŋo alo isei ñoman ñamaṯan orn nǝŋakaldaice alo ikanisa pređ, alo igǝlaṯiya na ifrijiya, nǝŋamǝđaṯe ṯalǝmis pređ. ²⁴ eđa gǝnǝŋ gal yawuḏ ganṯa abullus galo yiskandriya geṯo alo yafǝsus. gënǝŋu galiŋeṯo gaɽwata na galiŋeṯo ađam gǝrǝmwa ŋope. ²⁵ gënǝŋu gafo gërrǝŋeinu ŋen ŋelǝŋ yesu, gerṯo ŋabǝɽa ŋǝrǝmwa kaiñ, gabërrǝŋaicia leđa ŋen ŋope kaiñ đurri iŋi ŋǝyesu, orn gënǝŋu galiŋeṯo mamuḏiya đǝyuanna gunto. ²⁶ na gënǝŋu gërrǝŋaicu leđa ŋen imajma ŋabǝɽaŋa ŋǝđaiña ŋero, orn ndǝ briskila na akila lano ŋen ŋǝlëɽǝŋu ldǝmame ldǝmërrǝŋaici ŋen ŋǝrǝmwa ŋwaiña tǝŋ. ²⁷ orn ndǝ abullus gwonaṯa gabǝṯa alo yakaiya lorǝba lǝkanisa ldǝmamǝđaṯe ldǝwërđǝṯi ṯalǝmis tu ađam ṯa, aŋǝnṯr maji igi araga gunto. ndǝ garǝmaṯo tu đǝge gamǝđaṯa leđa kaiñ ildi lëbǝrnu ŋen ŋanṯa đǝnaicia mǝɽǝmǝɽeñ đǝrǝmwa, ²⁸ ŋen ŋanṯa gënǝŋu gađađamo al yawuḏ ŋabǝɽaŋa ŋǝrǝmwa leđa nëiñua, ŋen ŋanṯa gaŋaicǝlo ŋen ađamga ṯa yesu gaɽo al masiya đeṯam.

¹ ndǝ abullus gafo alo ikǝrunđus bulus gabakaldaico alo yafo ndele orn nǝŋirǝwǝṯa alo yafǝsus. na alo isi gafiđu ṯalǝmis yǝmaṯan, ² nǝŋǝleiṯi ṯa, ñaganeinu usila gatǝɽe gǝrǝmwa liga ñagëndu ŋen? orn lënǝŋulu ldǝmeiṯi ṯa, ndo, ñagero ñagǝnna lomanaŋ ṯa usila gatǝɽe gëni. ³ orn bulus nǝŋeɽǝđǝlo ṯa, ñaganeinu mamuḏiya đǝwande? orn ldaṯa ṯa, ñaganeinu mamuḏiya đǝyuanna. ⁴ na bulus nǝŋaṯa, mamuḏiya đǝyuanna đaɽo đǝŋgeinia đǝŋen ŋeicia. gënǝŋu gërrǝŋaicu leđa ŋen jaica ṯa alëndi ŋen ŋeda igi giđ aŋǝmela nḏurṯu, fǝyesu igi. ⁵ na ndǝ leda lano ŋen iŋi ldǝneini mamuḏiya irǝŋga gelǝŋ yesu, ⁶ na ndǝ bulus gëɽǝlo raŋ nǝŋǝɽwa usila gatǝɽe geṯǝlo nano na ṯalɽwato olega gwaiña ɽetǝɽeteo na ṯalɽwato ŋen ŋǝrǝmwa. ⁷ na ildi larno ređ ldamiñe liɽijan. ⁸ orn bulus nǝŋënṯi imajma alo isei na nubwa niɽijin ṯaŋaɽwato ŋabǝɽaŋa ŋǝđaiña ŋero, ṯaŋukuɽǝbjiđǝṯu leđa eŋen ŋǝŋǝlǝŋe ŋǝrǝmwa ŋǝtǝđaŋa, ⁹ orn ndǝ lǝmaṯan lwonḏǝṯo enare ṯa alerṯe lǝnna, ṯalɽwato ŋen ŋeicia ŋǝđađ iđi đǝyesu, leđa nëiñua, bulus nǝŋǝlṯađe nǝŋǝme ṯalǝmis ṯalukuɽǝbijǝđǝṯu leđala eŋen ñoman pređ alo yǝmaji ganṯa ṯiranus. ¹⁰ na bulus ṯaŋiđu ṯia nṯǝli niɽijan na leđa pređ lalo yasiya, al yawuḏ na leđa gerṯa laɽ al yawuḏ ldǝne ŋen ŋelǝŋ yesu. ¹¹ na rǝmwa riđu ŋen ŋoɽra kaiñ raŋra rǝbulus, ¹² ndǝ leđa ldape erena gǝnǝŋ gǝbulus ldëɽi leđa nano lwuma orn alpiṯi na nusila neicia namiñǝlo nano. ¹³ orn al yawuḏ yǝmaṯan, isi yǝbakǝldaica alo yaɽo nḏǝmia yinḏeicu ŋen niyǝɽwate irǝŋ gǝyesu leđa nano ildi lerṯo nusila nano neicia, na yeiṯu nusila neicia ṯa, igǝndalwaɽǝṯia irǝŋga gǝyesu igi bulus gërrǝŋaieia leđa. ¹⁴ al yawuḏ yǝnǝŋ yanṯa sika, isi yaɽo elǝŋ gǝkana, yerṯo liđia đenǝŋ ldǝmiñe liɽijan lëbǝđia ṯia. ¹⁵ orn usila geicia nǝŋǝluɽǝbiṯi eŋen ṯa, igaliŋeṯo yesu, na igaliŋeṯo bulus, orn ñaganǝñaŋ ñagaɽ esegi? ¹⁶ na maji igi gerṯo usila nano geicia nǝŋǝlǝborṯe nano nǝŋǝlǝđamǝce ldobǝđaṯe ndëuwǝr lëpǝnu rëɽra lero ndrena nano. ¹⁷ na ŋen iŋi ŋǝlǝŋinu eleđa pređ lalo yafǝsus, na al yawuḏ na al yunaniyin cum, na ŋǝđaiña nǝŋǝlëndi pređ na irǝŋ gelǝŋ yesu nǝŋoɽreṯe. ¹⁸ na leđa lwaiña cum ildi lëndu ŋen maijǝn ṯalerldo ṯalǝmiñu ŋen iŋi lafau mǝnna ananoŋ. ¹⁹ na leđa lwaiña ildi laɽo nḏǝmia ildi lerṯo nađam nǝŋuđǝmi lamǝlo ldǝluɽi leđa nëiñua pređ, na ndǝ lumǝđaṯa al gǝrus isi yiliđinu nađam ywaiña kaiñ yarno jǝnei alǝf eređia giɽijan. ²⁰ orn ŋen ŋelǝŋ yesu nǝŋamiñe alo yoɽra ŋabǝɽaŋa kaiñ. ²¹ orn bulus gëɽu ŋen egare usilaga gatǝɽe ṯa aŋamiñe eđađ iđi đabǝṯa alo imakṯunia na yakaiya orn aŋǝɽe alo yursalim, nǝŋaṯa ṯa ndǝ igaseicu ŋen tu orn yeɽe alo irumiya cum. ²² orn ŋen ŋanṯa gafo gađwaṯo ṯimǝđawus na arasṯus alo imakṯunia, gënǝŋu gaɽaŋa alo yasiya aten. ²³ na iliga lakǝl ŋen ŋatwođo ŋwaiña ŋagea đađ đǝyesu. ²⁴ ŋen ŋanṯa maji gǝnǝŋ ganṯa ḏimiṯriwus gënǝŋu gǝđoṯa ipeini isi yaɽo faḏḏa, ṯaŋiđu laŋge lǝpiano larno arṯamis igi leđa lǝmukwuđiñǝṯialo na leđa ildi liđu ŋǝmëɽria iŋi lerṯo leđa lwaiña lđiliđiṯi. ²⁵ orn nǝŋǝlǝrreiđi leđala pređ ildi liđu ŋǝmëɽria iŋi, nǝŋǝleiṯi ṯa, ya leđa ɽrwa, ñagaliŋeṯo ṯa ŋǝmëɽria fiŋi ŋanđǝnǝnaiear đwala iđënđr đwaiña. ²⁶ na ñagaseicu na ñagano, gerṯa falo yafǝsus yunto orn alo ywaiña alo yasiya fǝbulus igi gërǝkǝđia nare nǝleđa lwaiña, nǝŋaṯa ṯa rǝmwa irri riđǝnu raŋra gerṯa rǝmwa irri. ²⁷ na ŋen ŋaɽǝwađaṯa ŋeṯo ŋeicia, gerṯa ŋen ŋǝŋǝmëɽria iŋënđr gunto ndǝ leđa laṯa ŋeieia, orn cum ŋen ŋanṯa eɽa igi goɽra gaŋǝra gǝrǝmwa irëndr irri raɽǝbwa ranṯa arṯamis ṯa leđa liđ alneđe, na ŋen ŋǝrǝmwa irri cum ŋiđ aŋǝpiṯano, irri leđa lasiya pređ na lalo pređ ṯalǝbuŋṯu. ²⁸ nđǝ lano ŋen iŋi ldǝeiṯano kaiñ ṯaɽrǝjaico ole, ldaṯa ṯa, arṯamis gǝleđa lalo yafǝsus goɽra kaiñ. ²⁹ na leđa pređ ṯaliđu ŋen ŋwaiña ŋaijǝbinṯǝlo nano, ldobǝđaṯe alo isi leđa laurarraiđia ldënṯi egwaŋ ldabǝrǝldǝđe gaiyus na arisṯarkus leđa lalo imakṯunia ildi leṯo bulusala. ³⁰ na bulus gafo gwonaṯa gǝbenṯia eleđa orn ṯalǝmis yaneđo. ³¹ na lǝmaṯan cum lalo yasiya ildi laɽo rappa rǝbulus lǝđwaiđo olega ṯa bulus aŋerṯe gǝbenṯia eleđa ildi larraiđo. ³² leđa ṯaɽrǝjaico ole ɽetǝɽeteo na lwaiña iŋulu laijǝba ŋen ṯa larraiđo eđa. ³³ leđa lǝmaṯan ldǝlwaɽǝṯi iskandr igi al yawuḏ ṯaiyǝmađwađwaṯo nëiñua ṯa aŋǝtwođe, na iskanđr nǝŋabeici raŋ elo ŋen ŋanṯa gwonaṯa galwaɽǝṯia leđa ŋen ŋǝnǝŋ. ³⁴ orn ndǝ leđa laliŋeṯǝma ṯa gënǝŋu gaɽo yawuḏ, ṯaɽrǝjaico ole twannaŋ ṯalaṯa, arṯamis gǝleđa lalo yafǝsus goɽra kaiñ. ³⁵ orn ndǝ kaṯib yiđu leđa labwaiña ŋǝma, na gënǝŋu nǝŋǝleiṯi ṯa, ya leđa ɽrwa lalo yafǝsus, eđa gwuŋga gaijǝba ŋen ṯa alo yafǝsus yarǝmoṯwa eɽa game gatǝɽe garṯamis na lwandra lakǝl ltǝɽe ildi liɽu pǝlelo? ³⁶ điñǝđi ŋen ŋanṯa ñaliŋeṯe ṯa ŋen iŋi ŋero ŋaɽǝwađaṯa aŋǝmǝlëđǝni gǝbanṯa ñagabwaiña ŋǝma aiñerṯe ñagëbǝđia ŋen taltal. ³⁷ ŋen ŋanṯa ñagëndu leđa ildi ɽrwa ildi lero lëbǝđia ŋen ŋeicia na lero lalwaɽa ŋen ŋeicia ŋǝnǝŋ ŋǝrǝmwa irënđr raɽǝbwa. ³⁸ ndǝ ḏimiṯriwus na leđa ildi lafo iŋǝmëɽria ŋǝlëɽǝŋu lonaṯa lǝsǝki eđa gǝnǝŋ, sǝria yëni na nǝlǝŋ nëni. ŋgiṯǝlo alǝskiđi. ³⁹ orn ndǝ ñagwonaṯa ñagabinḏeieia ŋen ŋwomǝn ŋen iŋi ŋiđ aŋinḏeini imajlis liga ildi lëɽǝnu. ⁴⁰ ŋen ŋanṯa lagaɽǝwađaṯar lagundǝđǝnr alǝskinr ṯa lǝgatuđr iloman ildi, ŋen ŋanṯa ŋen ŋero ŋǝnǝŋ ŋuđǝrwaṯo lǝgwalwaɽar eŋen iŋi. ⁴¹ orn ndǝ galwaɽo ṯia nǝŋǝleiṯi ṯa, lëldǝđǝndr alo.

¹ ndǝ ŋen ŋamǝndađo đǝge iŋi ŋwaiña ŋeieia, orn bulus nǝŋundǝđi ṯalǝmis nǝŋǝlamǝđaṯe nǝŋalne ëiñua orn nǝŋǝtwođe nǝgabǝṯa alo imakṯunia. ² na ndǝ gamiño alo isei đǝge na gamǝđaṯo leđa kaiñ orn nǝgabǝṯa alo yallas, ³ nǝŋaɽaŋe tu nubwa niɽijin, orn ndǝ gwonaṯa gatwođa gabǝṯa alo isuriya galǝŋinnano ṯa al yawuḏ yerṯo ŋen ŋamǝɽa ŋamagea orn nǝŋamǝlëđi ŋen nǝŋoɽǝbǝđe eđađ đabǝṯa alo imakṯunia. ⁴ na sobaṯrus galo ibiria, iđia gǝbairus, labǝla bulusga, na arisṯarkus na sakunḏus lalo iṯasǝluniki, na gaiyus galo iḏarba, na ṯimǝđawus, na ṯikikus na ṯrufimus lalo yasiya. ⁵ ildi pređ labǝɽo nëiñua lǝndǝṯurṯia alo iṯruwas, ⁶ orn nanda ñagatwođo alo ifilibi iđǝpundr đǝŋau ndǝ ñoman ñaŋgaṯo ñǝđǝsa đǝberni faṯir ndǝ leđa laso aicǝba gaicǝfa, orn ndǝ ñoman ñaŋgaṯo đenǝŋ nǝñarǝmaṯe alo iṯruwas nǝñǝlǝfiđi đǝge, nǝñaɽaŋǝld alo yakǝl ñoman đenǝŋ ñǝmiñe ñiɽijan. ⁷ na iloman lǝnëiñua igusbua, ndǝ ñagarraiđo ldǝɽo ṯa ñagere aicǝba, na bulus gwaɽwatiṯu leđala na gafo gwonaṯa gabǝṯa alo yarto iloman leṯeɽe nṯia ṯaŋërrǝŋaieu leđa ŋen ŋǝrǝmwa kaiñ, ulǝŋgiano nǝŋǝɽeṯe. ⁸ na ñamba ñafo ñwaiña alo isi leđa larraiđau egeɽa pǝlelo, eɽa igi gakađǝrreiđu lorǝba eđǝpe naɽo niɽijin. ⁹ na ëđǝmwa gafo gǝnǝŋ gǝbernia afṯikus gaɽaŋa igëuwǝr isǝbak. orn ŋen ŋanṯa bulus galwaɽo ŋen ŋwalano ŋuriđ ŋapǝma kaiñ nǝŋiɽǝṯi pǝlalo nǝŋapǝni gaiyo. ¹⁰ na bulus nǝŋǝmirǝwaṯa nano nǝŋǝmëndiano nǝŋǝlwaɽǝṯi leđa ṯa, ñerṯe ñagakǝrđia. maji gamǝṯo. ¹¹ na ndǝ bulus goɽǝbaṯo egeɽa elo na ndǝ gagero aicǝba nǝŋǝse đǝge nǝŋoɽǝbaṯe nole ṯalɽwataiđo pǝr alo nǝyakarṯe, orn nǝŋaɽe đǝge. ¹² na leđa ldǝmamo ëđǝmwa gamǝṯo ldaŋǝreṯe nano kaiñ. ¹³ orn nanda ñafǝđe nëiñua nǝñënṯi iđǝpundr đǝŋau nǝñaɽe alo yanṯa asus na ñagwonaṯa ñagǝbencia bulus iđǝpundr tu ŋen ŋarno galwaɽǝṯǝnde ṯa ñaɽe ñaldopǝđaiđǝlda tu ŋen ŋanṯa giđ aŋela rǝmandra alo. ¹⁴ orn ndǝ ñagǝfiđǝma alo yasus nǝñëntǝlda iđǝpundr nǝñaɽe alo imiṯilini. ¹⁵ orn ñagatwođo tu na iloman leṯeɽe alo ikiwus, na iloman leṯeɽe igei nǝñarǝmaṯe alo isamus, na iloman leṯeɽe gwomǝn tǝŋ nǝñarǝmaṯe alo imiliṯus. ¹⁶ ŋen ŋanṯa bulus gafo gwonaṯa gabǝla taltal gaber gwonaṯa gǝđǝru alo yafǝsus ŋen ŋanṯa liga lero gaɽaŋa alo yasiya, gwonaṯa garǝmaṯa alo yursalim ndǝ gaɽǝwađaṯa iloman lǝbernia al kamsin. ¹⁷ na alo imiliṯus nǝŋađwaiđe alo yafǝsus nǝŋundǝđi nǝlǝŋ nǝkanisa ṯa anǝmeṯa nano. ¹⁸ ndǝ neṯǝma nano bulus nǝŋǝleiṯi ṯa, ñaŋ ñagaliŋeṯo ŋen ṯa lǝgafr ṯau tǝŋgalo ŋen igeṯo ŋen ŋaɽnda alo yasiya. ¹⁹ ñagaliŋeṯo ṯa igađuɽǝđinṯu elǝŋ yesu araga gǝta, na ŋwalŋa na ŋenŋa ŋubwa iŋi ŋeṯǝñi nano ŋenŋa al yawuḏ yëɽu, ²⁰ ñagaliŋeṯo ṯa igero igabakoɽalo ṯa igǝndǝlwaɽǝṯia ŋen pređ iŋi ŋaɽǝwađaṯa ŋǝndamǝđaṯa na igërrǝŋaicǝnde ŋen leđa nëiñua pređ na eneɽa cum. ²¹ igërrǝŋaicu al yawuḏ na al yunaniyin ŋen ŋope ṯa alǝŋgiṯi ŋen ŋeicia aloɽǝbaṯe rǝmwa nano na alerṯe đonaṯa egelǝŋ igëndr yesu masiya. ²² na điñǝđi ñagaiñǝseica igabǝṯa alo yursalim. usila gǝrǝmwa gaiñǝmamaṯa tu na igaber igaɽǝwađaṯa iganeđa, orn igaijǝba ŋen iŋi ŋiđ aŋǝñeṯa nano tu, ²³ illi usila gatǝɽe gaɽo đamǝđaṯa egare gǝlëɽǝñi ṯa đëndǝni isijǝn na ŋen ŋubwa laiñǝṯurṯia alo pređ isi igawënini. ²⁴ orn igaber igarǝmoṯwa etam gǝlëɽǝñi illi igwonaṯa ṯa eɽiñađaṯe ŋen iŋi rǝmwa ranaicǝñi na ŋǝmëɽria iŋi elǝŋ yesu ganaieǝñi ṯa igaɽo đamǝđaṯa đǝŋen ŋaŋǝra ŋǝđubwiđiya na ŋǝđamia đǝrǝmwa. ²⁵ na điñǝđi igaliŋeṯo ṯa ñaŋ pređ ñaŋgi igakalđaico eñaŋ igërrǝŋaicǝnde ŋen ŋǝŋǝlǝŋe ŋǝrǝmwa ñagaber ñagiđi ñanwane isiano ilëɽǝñi tǝŋ. ²⁶ na điñǝđi igǝndǝlwaɽǝṯia ṯa igero ŋen ŋǝnǝŋ ŋǝṯëđǝnu ñi nano eŋen ŋǝŋǝfǝni eŋalo, ²⁷ ŋen ŋanṯa igero igabakaɽalo ṯa igǝnđërrǝŋaicia ŋen pređ ŋǝrǝmwa, ŋǝđaiña ŋero ñi nano. ²⁸ rǝmoṯr ŋen iŋi eŋalo na ŋǝleđa pređ ildi usila gatǝɽe galnaicǝnde ṯa ñǝɽrǝmoṯe ṯa ñǝsi yaŋala yelǝŋ yesu isi giliđǝlo ŋǝfǝniŋa ŋǝlëɽǝŋu. ²⁹ igaliŋeṯo ndǝ igabǝɽo đǝge al kǝraiñ yeicia kaiñ yiđ aindeṯa nano yero ŋǝbaiya nano, ³⁰ na leđa lëni lǝmaṯan liđ altwođe eñaŋ đurri alɽwate ŋen ŋǝfo mǝnna ṯa ṯalǝmis yiđ aiyǝlteṯe. ³¹ nṯia apǝr sǝndua, ñǝlëldǝŋǝđeini eŋen ṯa nṯǝlia mɽijin igërrǝŋaieǝnde ŋen ulǝŋgi na ëđǝñin, igero igaŋgiṯia ŋen lomanaŋ, na igamǝđaṯǝnde ñaŋ pređ ŋwalŋa. ³² na điñǝđi iganaiđǝnde eđaŋ đǝrǝmwa, na eŋen ŋǝđubwiđia na đame ǝllëɽǝŋu iŋi ŋerṯo ŋabǝɽa ṯa ŋandoɽre eŋen na ṯa ŋǝndanaicia đǝrraṯa eŋen leđala ildi ltǝɽe. ³³ igero igwonaṯa wagǝnǝŋ egalo, faḏḏa walla ḏaǝb walla ndrena. ³⁴ ñaganǝñaŋ ñagaliŋeṯo ṯa fǝraŋ irri igiđiliya ŋǝmëɽria pređ ŋǝlëɽǝñi na ŋǝmajianda ildi ñagafǝlda. ³⁵ eŋen pređ iŋi igërrǝŋaicǝnde ŋen ṯa ñaliŋeṯe ṯa ŋen iŋi ŋaɽo đeṯam ñagamǝđaṯa leđa ildi laijǝba lëbǝđia ŋǝmëɽria, ŋabǝɽa ŋero, ŋen ŋanṯa ñalëldǝŋǝđeini eŋen elǝŋ yesu galwaɽo, ṯa đǝbuŋṯia đafo iđǝnaiđia ŋen gamiñaṯa iđǝma. ³⁶ orn ndǝ galwaɽo ṯia nǝŋwođiñiṯi ndria nalo leđala pređ ildi lafǝlda nǝŋǝṯurṯi rǝmwa. ³⁷ na ṯalaro pređ na ṯalmakëndu ano ṯalmwëtwëṯu ëiñua egworǝb eŋen ŋǝđubwiđiya, ³⁸ ṯalnwano kaiñ eŋen iŋi galwaɽo ṯa laber liđ alseice isiano ilëɽǝŋu lomanǝŋ tǝŋ. orn ldǝmaiyǝɽe đǝpundri nano đǝŋau.

¹ na ndǝ ñagaŋgiṯǝlo đǝge ñagamiño eđađ iđi đuđǝrwaṯo đabǝṯa alo ikus, na iloman leṯeɽe nǝñabǝṯa alo iruḏus orn nǝñabǝṯa alo ibaṯara. ² orn ñagafiđu đǝpundri đǝŋau, đabǝṯa alo ifinigiya, orn nǝñënṯi nǝñatwođe. ³ orn ndǝ ñagarǝmaṯo alo igubrus ṯwaiñ ñagaṯađo alo isi đaŋ đaŋabur nǝñëndi đađ iđi đuđǝrwaṯo đabǝṯa alo isuriya orn nǝñaɽe nǝñađuri alo isur ŋen ŋanṯa alo isi đǝpundri đođaṯađa laŋge. ⁴ orn nǝñaɽe ñapwaiñe ṯalǝmis alo isei nǝñaɽaŋǝlda ñoman đenǝŋ nǝñǝmiñe ñiɽijan. orn ṯalǝmis yalwaɽǝṯu bulus usilaga gatǝɽe ṯa aŋerṯe gabǝṯa alo yursalim. ⁵ orn ndǝ ñoman ñaŋgaṯo iñi nǝñatwođe na nǝñaɽe, na ṯalǝmisanda na wasenanda na ñere pređ ldeɽeiei eđađ nǝñarǝmaṯe irnuŋ ndëuwǝr orn nǝñwođǝñiṯi alo nëṯǝndi nǝñaṯurṯi rǝmwa orn nǝñanǝnǝđe ëiñua pređ. ⁶ orn ñagënṯu đǝge iđǝpundr đǝŋau na lënǝŋulu ldoɽǝbaṯe irnuŋ. ⁷ orn ndǝ ñagaŋgaṯo alo isur ñagabǝṯo alo ibuṯulimais na alo isi ñagano lorǝba ëiñua nǝñaɽaŋǝlda lomanto. ⁸ na iloman leṯeɽe nǝñatwođe nǝñabǝṯa alo igaisariya, nǝñënṯi eɽa gǝfilibus igi gabërrǝŋaicia leđa ŋen ŋǝrǝmwa, fǝŋu ildi lëndǝnu laɽo nǝlǝŋ ŋen ŋaɽnda đenǝŋ ldamiñe liɽijan, nǝñaɽaŋǝlda. ⁹ gënǝŋu gerṯo ñere marldwan iñi ñero ñǝmǝni ñaɽwato ŋen ŋǝrǝmwa. ¹⁰ ndǝ ñagaɽaŋo alo isei ñoman ñǝmaṯan nabi niyela yǝnǝŋ yanṯa agabus geṯo alo yuḏiya. ¹¹ na geṯo ṯa gǝndǝnwana nǝŋape đǝrna đǝbulus đegweya nǝŋakǝsǝni rǝmanǝña na raŋ nǝŋaṯa ṯa, usila gatǝɽe gaṯa al yawuḏ isi yafo alo yursalim yiđ aiyakase maji igi gerṯo đǝrna iđi ŋen ŋarno iŋi igǝkasǝnu, orn almanaiee leđa ildi gerṯa laɽo al yawuḏ. ¹² ndǝ ñagano ŋen iŋi, nanda na leđa lalo isi, ñagalwaɽǝṯu bulus kaiñ ṯa aŋerṯe gabǝṯa alo yursalim đeṯam. ¹³ orn bulus nǝŋǝnduɽǝbiṯi eŋen nǝŋǝndeiṯi ṯa, ñagëbǝđi ṯau ñagabara ṯia ñagagero ara gǝlëɽǝñi ? igameđǝño gerṯa ṯa igëndǝnu isijǝn ikǝrǝŋ orn cum ṯa yaiye alo yursalim ŋen ŋanṯa irǝŋ gelǝŋ yesu. ¹⁴ orn ndǝ gero ganaṯǝnde eŋen iŋi nǝñǝŋgiṯi nǝñaṯa ṯa, ŋgiṯr ŋen iŋi elǝŋ yesu gwonaṯa aŋiđini. ¹⁵ orn ndǝ liga laŋgaṯo ildi nǝñarreiđi laŋge nǝñabǝṯa alo yursalim. ¹⁶ na ṯalǝmis yǝmaṯan yalo igaisariya ñagabǝɽǝlda, laŋaieǝnde eɽa gǝmaji gǝbernia manasun galo igubrus, fǝŋu gaɽo ṯalǝmis ram, ṯa ñaɽaŋe egeɽa gǝlëɽǝŋu. ¹⁷ ndǝ ñagarǝmaṯo alo yursalim lorǝba lǝkanisa ldamame đaŋǝrađa nano. ¹⁸ na iloman leṯeɽe nǝñaɽe bulusala eɽa gǝyagub, na nǝlǝŋ pređ nǝkanisa nafo eum. ¹⁹ ndǝ bulus ganǝlo ëiñua pređ đǝge, nǝŋǝlǝlwaɽǝṯi ŋen pređ ŋǝnenǝŋ ŋǝnenǝŋ ŋalo tǝmǝtǝm iŋi rǝmwa riđu eleđa gerṯa laɽ al yawuḏ eŋǝmëɽria ŋǝlëɽǝŋu. ²⁰ orn ndǝ lano ldaŋërṯi rǝmwa nano. orn ldǝmeiṯi ṯa, oraiñ, agaseieu ṯa leđa lwaiña kaiñ laɽo al yawuḏ lëndu ŋen, orn larǝmoṯwa ŋen ŋal ganun imusa kaiñ, ²¹ na lano ŋen ṯa agǝbërrǝŋaieia al yawuḏ ŋen alo pređ, isi yafo leđala ildi gerṯa laɽ al yawuḏ, ṯa alǝŋgiṯi musa na alerṯe luɽǝđa ñere eñen na alǝŋgiṯi ŋen pređ ŋǝlëɽǝŋu. ²² orn agëbǝđia ṯau điñǝđi? đeṯam liđ alne ŋen ṯa ageṯo. ²³ ŋen ŋafǝṯia iđu ŋen iŋi ñagaŋǝlwaɽǝṯia. ñagerṯo leđa marldwan ildi lëndǝnu eŋen ŋǝnǝŋ. ²⁴ ma leda ildi na ñaldǝtǝɽeinǝlda, na eŋen iŋi ŋwonaṯa al gǝrus naiđo al gǝrus aganǝŋa ṯa lënǝŋulu aɽǝwađaṯa lǝbađǝni. nṯia leđa pređ liđ alalǝŋeṯe ṯa ŋen ŋǝpiano iŋi lano ŋen ŋanṯa laseieǝŋa agarǝmoṯwa ŋen ŋal ganun imusa. ²⁵ orn eŋen ŋǝleđa gerṯa laɽ al yawuḏ, ildi lëndu ŋen, ñagwađweiṯǝlo ađam ṯa aɽrǝmoṯe ŋen iŋi ŋarno kanisa đarǝmoṯwa eđaiñ, ṯa alerṯe lǝsa iđǝɽǝđǝnia đǝlaŋge lǝpiano ildi leđa ldukwuđiñǝṯialo na ŋǝfǝni, na laŋge ildi laiyo mǝɽǝmǝɽeñ na ṯa alǝŋgiṯi ŋen pređ ŋeieia ŋaŋǝno. ²⁶ na bulus nǝŋame leđa ildi iloman leṯeɽe ldǝṯoɽeinǝlda na ldënṯi igal ekǝl ṯa alwaɽe ŋen ŋǝliga elden lǝđatoɽaṯo ṯa alǝɽiñǝđeinu ndoŋǝɽa na ŋǝđǝnaiđia ŋen ŋanṯǝlo pređ. ²⁷ ndǝ ñoman ñafo ṯwaiñ ñamǝndëđǝni iñi ñaɽo đenǝŋ nǝñǝmiñe ñiɽijan al yawuḏ yalo yasiya isi yaseicu bulus igal ekǝl, niyǝtuđi nare nǝleđa pređ ldǝciṯano orn niyǝmëndi, ²⁸ ṯairajaico ole niyaṯa, ya leđa ɽrwa lisrayil, amǝđaṯǝndr. fǝmaji igi gabërrǝŋaicia leđa ŋen alo pređ iŋi ŋageo leđa eldaiñ na al ganun na alo isi, na cum gamǝmaṯo yunaniyin igal ekǝl na giđu alo isi yatǝɽe yǝtaŋa. ²⁹ ŋen ŋanṯa yafo yaseicu ṯrufimus galo yafǝsus lafo bulusga nǝsuk niyaṯa ṯa aŋgaica bulus gënǝcǝma igal ekǝl. ³⁰ orn leđa pređ lalo yakǝl ldǝeiṯano ldobǝđaṯe ldǝɽo ldëndi bulus ldǝmabǝrldeđeṯe ndëuwǝr ldǝndanḏe ëuwǝr ram. ³¹ na leđa laṯa ṯa lamaɽiña na ole nǝŋarǝmaṯe maji nano igi gaɽo elǝŋ goɽra gaskari ṯa alo yursalim yafo ŋen ŋwaiña ŋǝđǝgerđe. ³² na elǝŋ goɽra gaskari nǝŋǝme askari na nǝlǝŋ nǝta naskari lđobǝđaṯe leđa nano, orn ndǝ leđa lanwano askari ldaŋgiṯi bulus ṯa lderṯe lamëpwa tǝŋ. ³³ na elǝŋ goɽra gaskari nǝŋameṯa nano nǝŋamëndi nǝŋalwaɽǝṯi askari ṯa aiyǝmakase nuriđana niɽijan, orn geɽǝđo leđa ṯa maji gaŋga igi na giđu ṯau? ³⁴ na lǝmaṯan larǝjaico ole ldaṯa ŋen ŋǝnǝŋ na lǝmaṯan ldaṯa ŋen ŋwomǝn, orn elǝŋ nǝŋerṯe gaɽǝwađaṯa galiŋeṯo ŋen ŋope ŋen ŋanṯa ŋen ŋwaiña laɽwata orn galwaɽǝṯu askari ṯa aiyǝmamamaṯe egeɽa egen. ³⁵ orn ndǝ bulus garǝmaṯo nǝŋǝbapǝŋga ŋeɽa gaskari, askari nimapaṯe elo ŋen ŋanṯa leđa leieiano kaiñ, ³⁶ ŋen ŋanṯa leđa ildi lwaiña laldeteṯalo ṯaɽrajaico ole ldaṯa ṯa, ɽiñǝmar. ³⁷ orn ndǝ yonaṯa ṯa yǝmënei egwaŋ đǝge bulus nǝŋeɽǝđe elǝŋ goɽra gaskari ṯa, igaŋalwaɽǝṯia ŋen ŋǝnǝŋ ? na elǝŋ goɽra gaskari nǝŋeiṯi bulus ṯa, agaliŋeṯo ole gal yunaniyim? ³⁸ gerṯa fǝŋa agaɽo maji galo imasr igi gatuđu đǝgerđe maijǝn orn nǝŋǝme leđa ildi laɽiñǝđo laɽo alǝf marldwan nǝñaɽǝlda eđǝñwa? ³⁹ bulus nǝŋǝmuɽǝbiṯi eŋen ṯa, igaɽo al yawuḏ galo iṯarsus alo ikilikiya, igaɽo eđa galo isi yoɽra yǝlǝŋinu alo pređ, ŋgiṯiñi igalwaɽǝṯia leđa. ⁴⁰ orn ndǝ gaŋgiṯǝma, bulus nǝŋuđǝri nǝŋǝbapǝŋga nǝŋǝbeiṯi leđa raŋ elo, na ndǝ leđa laŋgiṯu ole đǝge nǝŋǝlwaɽǝṯǝlo olega gibraniyin, nǝŋaṯa,

¹ lorldaiñ na lṯenia, nǝr đopǝṯa iđi igwonaṯa igǝndǝlwaɽǝṯia. ² orn ndǝ lano ṯa galwaɽǝṯǝlo ṯia olega gibraniyin, ṯalabwaiñaiđo ŋǝma nano kaiñ. na bulus nǝŋaṯa, ³ igaɽo al yawuḏ, igǝlǝŋeinu alo iṯarsus alo ikilikiya, orn igamǝṯǝṯo alo isi na gamalayil gërrǝŋaieiñi ŋen ŋope ŋal ganun yǝpapanda ilëndr ṯa yerṯe igamiña eđǝɽe na igëndu ŋen araga gunto ŋen ŋarno ñaŋ ñagëndu mǝldin điñǝđi. ⁴ igafo igananaico leđa ŋen ŋubwa kaiñ ṯa alaiye ildi lafo eđađ iđi đǝyesu. igakëndu leđa ɽrwa na ɽrlda eum nilëkëɽe isijǝn, ⁵ na elǝŋ goɽra gǝkana na nǝlǝŋ pređ ini nararraiđia laɽo đamǝđaṯa đǝlëɽǝñi eŋen iŋi. lënǝŋulu lanaicǝñi nađam nǝlorǝba lalo iḏimiska ṯa yekëndi leđa tu ildi lëndu ŋen ilmamaṯa alo yursalim lakeinu nuriđana ŋen ŋanṯa alakǝmǝni. ⁶ ndǝ igafo eđađ igafo ṯwaiñ igaramaṯa alo iḏimska ëđǝñinano taltal arrerre nǝŋirǝwa elo nǝŋaiñǝwađe nano. ⁷ na niɽiṯi iđuđa alo na nene ole geiṯiñi ṯa sawul, sawul, igaiñananaieia ŋen ŋubwa eđa? ⁸ na igoɽǝbaico ŋen ṯa, ya elǝŋ agaɽ esegi? na nǝŋǝñeiṯi ṯa, fiñi yesu galo inasiraṯ igi agaiñǝnanaicia ŋen ŋubwa. ⁹ na leđa ildi ñagafǝlda laseieu arrerre orn lero lǝnna ole geđa igi galwaɽǝṯiñi. ¹⁰ orn niyaṯa, igëbǝđia ṯau elǝŋ yesu? na elǝŋ yesu nǝŋaiñǝlwaɽǝṯi ṯa, twođo ŋaɽe alo iḏimiska na tu agiđi ŋalwaɽǝnṯi ŋen pređ iŋi ŋaṯuɽǝđinṯiaŋa alo ṯa agiđi ŋiđi. ¹¹ na igafo igaijǝba igǝseiđia ŋen ŋanṯa arrerre garǝmiciñi, na leđa ildi ñagafǝlda ṯalñǝkëndu eraŋ ldaiñeṯa alo iḏimiska. ¹² na maji gǝnǝŋ ganṯa ananiya garǝmoṯwa al ganun ŋope, na al yawuḏ pređ yalo isi yaŋǝrṯǝma nano, ¹³ gënǝŋu geṯǝñi nano na nǝŋuđǝri nǝŋǝñeiṯi ṯa, oraiñ sawul, ëbǝrǝđu isi. na iliga ildi taltal ṯiywondaiđo na ṯimaseieu. ¹⁴ nǝŋaṯa, rǝmwa rǝpapanda ildëndr rundǝđǝŋa ṯa ŋaliŋeṯe ŋen ŋǝŋǝma ŋǝlëɽǝŋu ṯa ŋamaseici igi gerṯo ŋen ŋuđǝrwaṯo na ṯaŋǝno ole igëiñua ilëɽǝŋu, ¹⁵ ŋen ŋanṯa agiđi ŋaɽeṯe đamǝđaṯa đǝlëɽǝŋu eleđa pređ eŋen iŋi agwondaṯo na agano. ¹⁶ na điñǝđi agaṯurṯia wande? twođo ŋaneini mamuḏiya ŋundǝđi irǝŋ gǝyesu ṯa ŋwaseini ŋen ŋeicia ŋǝlaɽǝŋa. ¹⁷ ndǝ igoɽǝbaṯo alo yursalim igafo igaṯurṯia rǝmwa igal ekǝl na ŋen ŋamiñiṯiñi ŋarno iŋuriđ. ¹⁸ igaseicu yesu nǝŋaiñǝlwaɽǝṯi ṯa, twođo ŋaɽe taltal ŋaŋgaṯe alo yursalim ŋen ŋanṯa leđa laber liđi alne ŋen ŋǝlëɽǝñi eŋen ŋǝlaɽǝŋa. ¹⁹ niyaṯa ya elǝŋ yesu, lënǝŋulu laliŋeṯo ṯa igafo igakëndia leđa igal majma pređ ildi lëndu ŋen ŋǝlaɽǝŋa, na igëpǝlo. ²⁰ na ndǝ ŋǝfǝni ŋisṯǝfanus igi gaɽo đamǝđaṯa đǝlaɽǝŋa ŋirǝwǝṯalo, igënǝñi eum igafo igafǝma nano ṯwaiñ na igafo igameđǝño iđǝɽiñinia đǝlëɽǝŋu na igafo igabenđeieia ndrena nǝleđa ildi laɽiñǝma. ²¹ orn yesu geiṯiñi ṯa, mbu ŋen ŋanṯa igiđi eŋađwaṯe nwaldaŋ ileđa ildi gerṯa laɽ al yawuḏ. ²² leđa lafo lamanaṯa orn ndǝ lano ŋen iŋi ṯaɽrǝjaieo ole ldaṯa, ŋgeier maji igi alo, gǝbanṯa aŋerṯe gamǝṯia. ²³ na ṯaɽrǝjaico ole na ṯaltaseieu ndrena elo na ṯalauwǝṯu abǝɽǝtua elo, ²⁴ na elǝŋ goɽra gaskari nǝŋalwaɽǝṯi askari ṯa alënei bulus egwaŋ ŋen ŋanṯa aŋǝnḏeini đëpǝniađa ŋen ŋanṯa aŋaliŋeṯe ŋen iŋi leđa ɽrǝjeiṯia ole. ²⁵ orn ndǝ lakasǝma đǝrnađa bulus nǝŋeɽǝđe elǝŋ gǝta gaskari ṯa, al ganun yǝndeiṯa ṯa ñëpwi eđa gaɽo rumani igi gero gakǝmǝni cum? ²⁶ orn ndǝ elǝŋ gǝta gano ŋen iŋi nǝŋaɽe elǝŋ nano goɽra gaskari nǝŋǝmeiṯi ṯa, agëbǝđia ṯau? ŋen ŋanṯa maji igi gaɽo rumani. ²⁷ nṯia elǝŋ goɽra nǝŋǝmeṯa nano nǝŋǝmeiṯi ṯa, lwaɽǝṯiñi, agaɽo rumani? na bulus nǝŋaṯa, a. ²⁸ na elǝŋ geiṯǝma ṯa, iganaiđo gǝrus ywaiña ŋen ŋanṯa imërni rumani. na bulus nǝŋaṯa, orn igënǝñi igaɽo rumani ŋen ŋanṯa igǝlǝŋǝnu igaɽo rumani. ²⁹ orn leđa ildi lonaṯa laminḏeica ldǝmaŋgaṯe nano taltal, na elǝŋ igi goɽra gaskari nǝŋiđǝñiṯalo eum, ŋen ŋanṯa gǝlǝŋinnano ṯa bulus gaɽo rumani na ṯa fǝŋu gakasǝma. ³⁰ orn iloman leṯeɽe ṯaŋwonaṯa ṯa galiŋeṯo ŋope ṯa al yawuḏ yasǝkima eŋen ŋaŋga, na nǝŋamamiñi, na nǝŋalwaɽǝṯi nǝlǝŋ nǝkana na nǝlǝŋ pređ ini nararraiđia ṯa aɽrraiđe, na nǝŋǝme bulus na nǝŋǝmëɽi ŋulu nëiñua.

¹ na bulus ṯaŋwondaṯo nǝlǝŋ isiano ini nararraiđia nǝŋaṯa, ya lorldaiñ, igafo rǝmwa nëiñua araga gatǝɽe jaica na điñǝđi mǝldin. ² na elǝŋ goɽra gǝkana ganṯa ananiya nǝŋalwaɽǝṯi leđa ildi luđǝrǝma nano ṯa albuɽaṯe bulus ëiñua. ³ orn bulus nǝŋǝmeiṯi ṯa, rǝmwa riđ araŋëpwi aganǝŋa agarno uṯa gǝtaŋa igi gabǝliđǝnu ŋawa nano ŋabǝjo. agaṯa agaiñakame eŋen ŋal ganun orn ṯaŋaɽwatiṯu leđa ṯa aliñëpwi ŋen iŋi al ganun yaneđo? ⁴ na ildi lađǝru laṯa, agaboŋa elǝŋ goɽra gǝkana gǝrǝmwa? ⁵ orn bulus nǝŋaṯa, igaijǝba lorlđaiñ ṯa fǝŋu gaɽ elǝŋ goɽra gǝkana, ŋen ŋanṯa ŋen ŋǝwërđǝnu ṯa, ŋerṯe agaboŋa elǝŋ gǝleđa ǝllaɽǝŋa. ⁶ orn ndǝ bulus galiŋeṯo ṯa leđa lǝmaṯan laɽ as saḏḏugiyin, na lǝmaṯan laɽ al farisiyin, nǝŋaraice ole enǝlǝŋ ini nararraiđia nǝŋaṯa, lorldaiñ, igaɽo farisi igal farisiyin, na iginḏeinia điñǝđi eŋen lǝgǝṯurṯiar ṯa leđa laiyo liđ altwođe. ⁷ orn ndǝ galwaɽo ṯia đǝge ŋen ŋatwođo ŋwaiña eleđa laɽ al farisiyin na as saḏḏugiyin na leđa ldakarnǝđiano. ⁸ ŋen ŋanṯa as saḏḏugiyin laṯa ṯa đatwođo eŋǝɽaiñ đero na mǝlaiyǝka đero na usila gero, orn al farisiyin yëndu ŋen iŋi pređ. ⁹ orn ŋen ŋatođo ŋwaiña ŋeicia đǝge na leđa lǝmaṯan lal farisiyin ildi lǝbërrǝŋaiđia ŋen ŋal ganun latwođo leiciano ldaṯa, ñagero ñagǝfiđia ŋen ŋeicia ŋǝnǝŋ imaji igi. ndǝ usila walla mǝlaiyǝka đǝlwaɽǝṯǝma ŋen, fǝwandigi tǝŋ? ¹⁰ orn ndǝ ŋen ŋatwođo ŋubwa kaiñ đǝge elǝŋ goɽra gaskari nǝŋiđǝñiṯalo ṯa aŋgaica leđa alǝgǝlǝđe bulus ano, na nǝŋalwaɽǝṯi askari ṯa aiyirǝwa aiyapa bulus eleđa iligano aiyamaiyeṯa egwaŋ eɽa gaskari. ¹¹ na ulǝŋgiano elǝŋ yesu nǝŋuđǝri bulus nano nǝŋǝmeiṯi ṯa, ëɽinu đǝñano ŋen ŋanṯa garno agwaɽwato ŋen ŋǝlëɽǝñi alo yursalim đeṯam, agiđi ŋaɽeṯe đamǝđaṯa đǝlëɽǝñi alo irumiya cum. ¹² nđǝ ëđǝñin gaɽo al yawuḏ yǝmaṯan yarreiđu ŋen nǝyëndǝni bǝɽan eŋen iŋi đalǝfiađa, yaṯa ṯa yaber yasa walla yǝṯia kwai kwai illi ndǝ yaɽiño bulus. ¹³ leđa ildi lalwaɽo ṯia lamiñaṯo eređia marlđwan. ¹⁴ orn ldabǝla nǝlǝŋ nano nǝkana na leđa nano loɽra ldaṯa, ñagëndǝnu bǝɽan eŋen đalǝfiađa ṯa ñagaber ñagǝnaṯa ŋǝsa ŋǝnǝŋ kwai kwai illi ndǝ ñagaɽiño bulus. ¹⁵ orn ñaŋ na nǝlǝŋ cum ini nararraiđia, lwaɽǝṯr elǝŋ goɽra gaskari aŋǝndeṯa nano bulusga garno ṯa ñagwonaṯa ñagabinḏeicia ŋen ŋǝlëɽǝŋu ŋope. orn nanda ñagaṯoɽaṯo ŋen ṯa ñagiđi ñamaɽiñe ndǝ gafo eđađ gamǝlu garǝmaṯa. ¹⁶ orn iđia gorǝba gaɽǝbwa gǝbulus nǝŋǝne ŋen eŋen nǝgabǝṯa alo yaskari nǝŋënṯi egwaŋ nǝŋalwaɽǝṯi bulus. ¹⁷ na bulus nǝŋundǝđi elǝŋ gǝnǝŋ gaskari nǝŋǝmeiṯi ṯa, mo ëđǝmwa igi ŋǝmaiyǝɽe elǝŋ nano goɽra gaskari ŋen ŋanṯa gerṯo ŋen gwonaṯa gamalwaɽǝṯia. ¹⁸ orn nǝŋǝmaiyǝɽe elǝŋ nano nǝŋaṯa, bulus igi gëndǝnu gundǝđiñi ṯa yela ëđǝmwaga igi ŋen ŋanṯa gerṯo ŋen ŋǝnǝŋ gwonaṯa gǝŋalwaɽǝṯia. ¹⁹ na elǝŋ goɽra gaskari nǝŋëndi ëđǝmwa eđaŋ nǝŋamaiyǝɽe alǝsoŋ nǝŋǝmeiṯi ṯa, ŋen ŋanṯau agwonaṯa agaiñǝlwaɽǝṯia? ²⁰ na ëđǝmwa gaṯa, al yawuḏ larreiđu ŋen ldǝɽo ṯa aiŋeɽǝđe ṯa aŋaɽe bulusga enǝlǝŋ ini nararraiđia eṯeɽe, garno ṯa ywonaṯa yǝbinḏeicia ŋen ŋǝlëɽǝŋu ŋope. ²¹ orn ŋerṯe agǝnna ŋen eŋen, ŋen ŋanṯa yawuḏ ywaiña yamiñaṯo eređia marldwan yamaɽaŋǝṯia ŋen ŋanṯa niyëndǝni bǝɽan eŋen ṯa yaber yasa walla yǝṯia kwai kwai illi ndǝ yaɽiño bulus, na diñǝđi yaṯuɽǝđeinu alo yaṯurṯia ole gǝlaɽǝŋa. ²² orn elǝŋ nǝŋǝŋgiṯi ëđǝmwa ṯa aŋǝɽe orn nǝŋǝmeiṯi ṯa, gerṯa agǝlwaɽǝṯia eđa gǝnǝŋ ṯa agǝlwaɽǝṯiñi ŋen iŋi. ²³ orn nǝŋundǝđi nǝlǝŋ niɽijan nǝta naskari nǝŋǝleiṯi ṯa, ulǝŋgi igi garno ëđǝñin đenǝŋ nemiñe marldwan ṯoɽǝdaṯr askari alo miyya eɽijan, na isi yǝnǝmarṯa eređia đenǝŋ nalo eređia giɽijan, na isi eñarlda miyya eɽijan ṯa aiyǝɽe alo igaisariya. ²⁴ na eum mar nǝmarṯa nǝmaṯan ŋen ŋanṯa bulus aŋaborṯe, ñǝmaiyǝɽe ŋope elǝŋ filiks nano. ²⁵ nǝŋǝwërđi ađam ŋen ŋaɽo ṯia. ²⁶ fiñi kuluḏius lisias igeɽǝđǝŋa kaiñ, ya elǝŋ goɽra filiks. ²⁷ al yawuḏ yëndu maji igi ywonaṯa yamaɽiña, na ñagano ṯa maji igi gaɽo rumani na ñaleṯa nano askariya nǝñǝmëbǝri. ²⁸ orn igafo igwonaṯa igaliŋeṯa ŋen ṯa yasǝkima eda, orn imaiyǝɽe nǝlǝŋ nano enen ini nararraiđia. ²⁹ na igafiđu ŋen ṯa yasǝkima eŋen ŋal ganun esen, gerṯa ŋen iŋi ŋaɽǝwađaṯa ŋǝma ŋǝɽaiñ walla đëndǝni. ³⁰ orn ndǝ igano ŋen ṯa yawuḏ yǝrreidu ŋen ŋamagea ṯa aiyǝmaɽiñe mŋamađweiṯi taltal, na igalwaɽǝṯu leđa ildi lǝsǝkima ṯa alela alǝŋalwaɽǝṯi ŋen iŋi lonaṯa lamasǝkiau. ³¹ orn askari niyǝme bulus niyǝmaiyǝɽe ulǝŋgi ŋen ŋarno ilwaɽǝnṯu alo yanṯibaṯris. ³² na iloman leṯeɽe askari yǝmaṯan nǝyoɽǝbaṯe alo esen, na niyǝŋgiṯi isi yerṯo nǝmarṯa niyabǝla bulusga. ³³ ndǝ yarǝmaṯo alo igaisariya niyǝnaiee elǝŋ ađam, orn niyǝmanaice bulus cum. ³⁴ orn ndǝ gëgǝru ađam nǝŋeɽǝđǝđe ṯa elǝŋ gǝlëɽǝŋu fǝgaŋga đurri.. " orn ndǝ galiŋeṯo ṯa bulus galo ikilikiya ³⁵ nǝŋaṯa, igiđi eŋanaṯe ŋen cum ndǝ leđa leṯo ildi lǝsǝkiŋa. na nǝŋalwaɽǝṯi askari ṯa, aiyerǝmađwaṯe bulus egeɽa giruḏus.

¹ orn ndǝ ñoman ñaŋgaṯo đenǝŋ elǝŋ goɽra gǝkana, ananiya nǝŋela leđala lǝmaṯan loɽra na ṯarṯulus igi galiŋeṯo ŋen ṯaŋalukuɽǝbeiṯu ole. orn ldǝlwaɽǝṯi elǝŋ ŋen iŋi lǝsǝkiau bulus. ² na ndǝ bulus gundǝđǝnu đǝge ṯarṯulus nǝŋalwaɽe ŋen iŋi lǝsǝkimau, nǝŋaṯa ṯa, ya elǝŋ filiks, agame, ŋen ŋanṯa eŋen ŋǝlaɽǝŋa đëuṯaralo đafo, na ŋen ŋiđǝnu ŋwaiña ŋame alo esandr ŋen ŋanṯa đaliŋeṯa ŋen nǝsi đǝlaɽǝŋa. ³ na alo pređ ñagaŋǝnṯu ŋen pređ ŋǝlaɽǝŋa đaŋǝrađa nano. ⁴ orn điñǝđi ñagaber ñagwonaṯa ñagǝŋagereicia ŋǝmëɽria orn igaŋeɽǝđia ŋen ŋanṯa agerṯo ŋabaiya nano ṯa agiđi ŋandǝne eŋen iŋi eŋaiñ ŋobǝlano. ⁵ ñagafiđu maji igi gwaiña ŋeniano kaiñ na gaɽǝtuđia ŋen ŋwaiña jaica jaica igal yawuḏ alo pređ, na fǝŋu đurri goɽra eleđa ildi lǝbernia nasariyin. ⁶ na gënǝŋu gwonaṯa gëbǝđia al ekǝl yataŋa orn nǝñamëndi. na ñagaṯa ṯa ñagiđi ñaminḏeici al ganunya esaiñ. ⁷ orn elǝŋ goɽra gaskari gaberni lisias nǝŋela nǝŋǝndǝmamaṯe ŋabǝɽa ŋwaiña ⁸ nǝŋagariñaṯe leđa ildi lasǝkima ṯa alǝŋeṯa nëiñua. ndǝ agaminḏeicia aganǝŋa, agaɽǝwađaṯo agiđi ŋalǝŋeṯe ŋen pređ iŋu iŋi ñagǝsǝkimau. ⁹ al yawuḏ cum niyënṯi eŋen niyaṯa ŋen iŋi pređ ŋaɽo đeṯam. ¹⁰ orn elǝŋ goɽra gwalwaɽǝṯu bulus đaŋđa ṯa aŋǝlwaɽe đǝge, na bulus nǝŋaṯa, ŋen ŋanṯa igaliŋeṯo ṯa agaɽo elǝŋ alo isi nṯǝli nwaiña igopǝṯa đaŋǝrađa nano. ¹¹ agaɽǝwađaṯa agaliŋeṯo ŋope ṯa liga lakǝl igabǝɽo alo yursalim ṯa ibuŋṯi rǝmwa igerṯo garno ñoman ređ nǝñǝmiñe ñiɽijan, ¹² na leđa lero laiñǝfiđia ñagagerđia eđaga gǝnǝŋ, walla igatuđia ŋen eleđa lwaiña, ndǝ igal ekǝl walla imajma walla alo yursalim. ¹³ na lero laɽǝwađaṯa lǝbërrǝŋaiđia ŋen ŋunto ŋǝđeṯam eŋen lǝsǝkiñau. ¹⁴ orn igaŋalwaɽǝṯia ŋen iŋi, ṯa eŋen iŋi ŋǝđađ iđi đǝyesu ŋen iŋi laṯa ŋafo mǝnna, igǝđuɽǝđǝnṯia rǝmwa irri rǝpapanda ildëndr, na igëndu ŋen pređ iŋi ŋǝwërđǝnu enađam nal ganun na nal anbiya, ¹⁵ na igerṯo ŋen igaṯurṯia egare garno ŋulu lerṯo cum ṯa đatođa eŋǝɽaiñ điđ ađǝfeṯe eleđa ildi luđǝrwaṯo eŋen na lǝɽiano eŋen cum. ¹⁶ nṯia igarǝmoṯwa ŋen jaica ṯa ara gǝlëɽǝñi aŋǝfeṯe ŋope rǝmwa nëiñua na leđa nëiñua. ¹⁷ orn ndǝ nṯǝli naŋgaṯo nǝmaṯan igeṯo ṯa enanaice leđa ildi lalo ilëɽǝñi laŋge lǝđubwiđia na đǝnaiđia. ¹⁸ na ndǝ igëbǝđia ṯia lǝfiđǝñi igal ekǝl igatǝɽe, gerṯa leđala lwaiña walla ŋenŋa ŋwaiña. orn yawuḏ yafo yǝmaṯan yalo yasiya. ¹⁹ na gǝbanṯa yënǝŋulu aiyǝfeṯǝŋa nëiñua điñǝđi ṯa aiñǝsǝki, ndǝ yerṯo ŋen ŋǝnǝŋ ṯa aiñǝsǝkiau. ²⁰ walla ŋgiṯǝlo ildi lafo điñǝđi alwaɽe ŋen iŋi lafiđu ŋafo mǝnna eŋen ŋǝlëɽǝñi ndǝ igǝđǝru nǝlǝŋ nëiñua ini nararraiđia. ²¹ illi ŋen iŋi ŋunto ndǝ igarǝjaico ole ṯa, iginḏeinia ñaŋ nëiñua điñǝđi eŋen ŋǝđatođa eŋǝɽaiñ. ²² orn elǝŋ filiks galiŋeṯo ŋope ŋen iŋi ŋǝđađ iđi đǝyesu na gaburgwađeicu ŋen nǝŋǝlǝlwaɽǝṯi ṯa, ndǝ elǝŋ gaskari lisias geṯo igiđ inḏeici ŋen eŋalo. ²³ na galwaɽǝṯu elǝŋ gaskari ṯa bulus aŋëndǝni orn aŋëbǝreini alo, na ṯa ndǝ rappa reṯo rǝlëɽǝŋu ronaṯa ramamǝđaṯa arerṯe rǝtrinṯia. ²⁴ ndǝ ñoman ñaŋgaṯo ñǝmaṯan filiks ldela wasenga ganṯa ḏrusila, igi gaɽo yawuḏ, nǝŋundǝđǝnṯi bulus nǝŋǝne, galwaɽa eŋen ŋǝđonaṯa igal masiya yesu. ²⁵ na ndǝ bulus laɽwata elǝŋga eŋen ŋǝđǝđǝrwaṯa eŋen na ŋǝđërǝkǝđi aŋǝno na ŋǝđǝtaŋa na ŋǝđǝkarmǝnia iđi điđ ađǝfeṯe đǝrǝmwa, filiks nǝŋirǝwano na nǝŋiđǝñiṯalo na nǝŋeiṯi bulus ṯa, mbu điñǝđi. ndǝ igerṯo liga orn iŋundǝđi tǝŋ. ²⁶ na gafo gabaṯa ṯa aŋgaica bulus giđ aŋǝmanaice gǝrus nṯia ṯaŋamurundǝđu ñoman ñwaiña ṯalɽwatǝldǝga. ²⁷ orn filiks ŋen ŋanṯa gwonaṯa ṯa al yawuḏ yamaŋǝrṯi nano nǝŋgiṯi bulus aŋëndǝni isijǝn. na ndǝ nṯǝli naŋgaṯo niɽijan burkius fasṯus nǝŋǝme ŋǝlǝŋe ŋǝfiliks.

¹ orn ndǝ elǝŋ fasṯus geṯo gaɽaŋa alo eŋǝlǝŋe ŋǝlëɽǝŋu, ndǝ ñoman ñaŋgaṯo ñiɽijin nǝŋǝtođe alo igaisariya nǝgabǝṯa alo yursalim. ² na nǝlǝŋ nǝkana na leđa ilei loɽra eŋen igal yawuḏ ldǝmaŋaiei ŋen iŋi lǝgiaieau bulus, na ldǝmalwaɽǝṯi kaiñ ṯalmariṯu ŋabaiya ³ ṯa aŋǝlamǝđaṯe, laṯa ŋgiṯu maji aŋwǝđweinia alo yursalim, ŋen ŋanṯa lënǝŋulu lerṯo ŋen enare ṯa alǝmaɽaŋǝṯi almaɽiñaṯe eđađ. ⁴ na fasṯus nǝŋǝlǝlwaɽǝṯi ṯa bulus aŋarǝmujǝni alo igaisariya, orn aten giđ aŋǝɽe tu gënǝŋu. ⁵ orn nǝŋaṯa, ŋgiṯr leđa ildi loɽra eñaŋ aiñirǝwǝlda, na ndǝ ŋen ŋǝnǝŋ ŋafo mǝnna imaji igi ŋgiṯǝlo almasǝki. ⁶ orn ndǝ laɽaŋo ñoman ñǝmaṯan gerṯa gamiñaṯo đenǝŋ nǝñamiñe ñiɽijin walla ređ, nǝŋirǝwǝṯa alo igaisariya, na iloman leṯeɽe nǝŋǝɽaŋe nal kurs eŋǝlǝŋe nǝŋǝlwaɽe ṯa bulus aŋǝyelni. ⁷ orn ndǝ geṯo đǝge al yawuḏ isi yafo yeṯo alo yursalim nimađiṯi ṯwaiñ nisǝki bulus ŋen ŋwaiña ŋini orn nǝyerṯe yaɽǝwađaṯa yǝbërrǝŋaiđia ŋen ŋǝnǝŋ ṯa ŋǝđeṯam. ⁸ orn ndǝ bulus gopǝṯo gënǝŋu nǝŋaṯa, iger igagera ŋen ŋǝnǝŋ ŋal ganun yal yawuḏ walla ŋal ekǝl walla ŋelǝŋ goɽra gaisar. ⁹ orn fasṯus ŋen ŋanṯa gwonaṯa al yawuḏ yǝŋërṯǝma nano, geiṯu bulus ṯa, agwonaṯa agabǝṯa alo yursalim ṯa ŋinḏeini tu eŋen iŋi yǝlwaɽǝṯǝñi? ¹⁰ na bulus nǝŋaṯa, igađǝru kursi nëiñua yelǝŋ goɽra gaisar, alo isi gǝbanṯa iwinḏeini, igero igǝbiṯia al yawuḏ ŋen ŋafo mǝnna ŋǝnǝŋ garno agaliŋeṯo ŋope cum aganǝŋa. ¹¹ orn ndǝ igiđu mǝnna na igiđu ŋen ŋǝnǝŋ ŋeieia ŋaɽǝwađaṯa ŋǝma ŋǝɽaiñ igaber igwonaṯa igëbǝrni eŋǝɽaiñ, orn ndǝ ŋen ŋero ŋǝnǝŋ iđǝskiđia eđen eđa gero gǝnǝŋ gaɽǝwađaṯa gaiñǝnaiđia iŋulu. igwonaṯa elǝŋ goɽra gaisar aŋinḏeici ŋen. ¹² orn fasṯus, ndǝ linḏeicu ŋen leđala ildi lamǝđaṯǝma nǝŋǝmuɽǝbiṯi eŋen ṯa, agwonaṯa elǝŋ goɽra gaisar, agiđi ŋaɽe elǝŋ goɽra gaisar nano. ¹³ orn ndǝ ñoman ñaŋgaṯo ñǝmaṯan elǝŋ agribas na barnika leṯo alo igaisariya ŋen ŋanṯa alne elǝŋ fasṯus ëiñua. ¹⁴ na ndǝ laɽaŋa tu ñoman ñwaiña fasṯus nǝŋǝlwaɽǝṯi elǝŋ agribas ŋen ŋǝbulus nǝŋaṯa, maji gëni gǝnǝŋ filiks gǝṯađǝma gëndǝnu, ¹⁵ na ndǝ igafo alo yursalim nǝlǝŋ nǝkana na leđa loɽra eŋen ŋal yawuḏ lalwaɽǝṯiñi ŋen ŋǝlëɽǝŋu, ldaiñeɽǝđe ṯa emakǝme. ¹⁶ orn iguɽǝbiṯǝlo eŋen ṯa gerṯa ŋen ŋǝrumaniyin ṯa yanaiđe eđa gǝnǝŋ ndǝ gamǝlu gabinḏeinia leđa nëiñua ildi lamasikia, na aŋerṯe liga ṯa aŋopǝṯe eŋen iŋi lǝsǝkimau. ¹⁷ orn ndǝ larraiđo ëli niyerṯe igaṯurṯia liga larto orn iloman leṯeɽe neɽaŋe nal kurs eŋǝlǝŋe niyǝlwaɽe ṯa maji aŋǝmǝni. ¹⁸ na ndǝ leđa ildi lasǝkima latwođo, lderṯe lǝmasǝki eŋen ŋeicia ŋǝnǝŋ giđu garno igǝbaṯa aŋgaica ŋëni, ¹⁹ orn lerṯo ŋen ɽetǝɽeteo eŋen iŋi lëndu na eŋen ŋǝmaji gǝnǝŋ ganṯa yesu, igi gaiyo orn bulus ṯaŋaṯa gamǝṯo. ²⁰ orn igaijǝba ŋen ṯa igǝbinḏeicia ŋen iŋi ṯau, orn niyǝmeɽǝđe ndǝ gwonaṯa gabǝṯa alo yursalim ṯa aŋinḏeini tu eŋen eŋen. ²¹ orn bulus gwonaṯa ṯa aŋëndǝni aŋinḏeini egelǝŋ goɽrǝṯu nǝlǝŋ, na nimađarnaṯe ëli ŋen ŋanṯa yiđi imađweiṯi elǝŋ goɽra gaisar. ²² na agribas nǝŋeiṯi fasṯus ṯa, igënǝñi igwonaṯa igiđ enaṯa maji ŋen, na fasṯus nǝŋaṯa, eṯeɽe agiđi ŋamanaṯe. ²³ na iloman leṯeɽe agribas na barnika leṯo ldënṯi alo isi leđa laurarraiđia lǝṯiña ŋen nano, nǝlǝŋna naskari na leđala ildi loɽra eŋen lalo isi. orn fasṯus nǝŋalwaɽe ṯa bulus aŋǝmǝni. ²⁴ na fasṯus nǝŋaṯa, ya elǝŋ agribas na ñaŋgi pređ lǝgafr, ñagaseicia maji igi al yawuḏ pređ isi yalo yursalim na yalo isi eum, yarǝjaieu ole na yalwaɽǝṯiñi ṯa maji aŋerṯe gamǝṯia tǝŋ. ²⁵ orn igënǝñi igero igafiđiṯa ŋen ŋǝnǝŋ giđu ŋeicia ŋarǝjađaṯo eŋen ŋǝŋǝɽaiñ, na ŋen ŋanṯa gënǝŋu gwonaṯa gǝbinḏeinia egelǝŋ goɽrǝṯu nǝlǝŋ igaṯa ṯa igamađwaṯa. ²⁶ orn igero igafiđa ŋen ŋǝnǝŋ đurri eŋen ŋǝlëɽǝŋu ṯa igawërđǝṯia elǝŋ goɽra ađam. nṯia igeṯǝmaiya ñaŋ nëiñua, na ŋa đurri, ya elǝŋ agribas, ṯa ndǝ lǝginḏeicǝmar ifiđi ŋen ŋǝnǝŋ iwërđi. ²⁷ ŋen ŋanṯa igënǝñi igaṯa ŋen ŋafo mǝnna igađwaṯa eđa gëndnu elǝŋ nëiñua na igero igalwaɽa ŋen ŋǝnǝŋ ṯa gǝsǝkinu eđa.

¹ agribas nǝŋeiṯi bulus ṯa, agerṯo liga ṯa agǝlwaɽa ŋen ŋǝlaɽǝŋa. bulus nǝŋǝbaice đaŋ elo nǝŋopǝṯe đǝge, ² nǝŋaṯa, igaŋǝra nano ṯa eŋǝpǝṯe ŋa nëiñua ya elǝŋ agribas, eŋen iŋi pređ al yawuḏ yasǝkiñau ³ ŋen ŋanṯa aganǝŋa agaliŋeṯo ŋope ŋen pređ ŋal yawuḏ na đǝgiaiđia eŋen eđen, na ŋen ŋafǝṯia igaŋeɽǝđia ṯa ŋaiñǝnaṯe araga gwalano. ⁴ ŋen pređ ŋǝlëɽǝñi ŋǝlǝŋinu ŋope igal yawuḏ pređ ŋen ñagafo leđala ǝllëɽǝñi na alo yursalim eum. ⁵ yaliŋeṯo liga lwalano, ndǝ yonaṯa yalwaɽo, ṯa igaɽo farisi na igëndu ŋen pređ ŋal yawuḏ araga gunto garno leđa ildi lero lamiña eđǝɽe. ⁶ na điñǝđi igǝđǝru iginḏeini ëli ŋen ŋanṯa igaṯa ŋen iŋi ŋiđ aŋfeṯe đeṯam iŋi rǝmwa rëɽǝṯu papanda ildëndr, ⁷ iŋi leđa eldaiñ lǝŋǝɽwa ređ ldamiñe liɽijan lafo lǝbuŋṯia rǝmwa araga gunto ulǝŋgi na ëđǝñin ŋen ŋanṯa laṯa liđ alǝseiei ŋen ŋiđ aŋfeṯe. na ya elǝŋ, igǝsǝkinu igal yawuḏ ŋen ŋanṯa igaṯurṯia ŋen iŋi. ⁸ ñagǝđamo ŋen ṯa rǝmwa raɽǝwađaṯa ratuđi eđa eŋǝɽaiñ eđa? ⁹ igënǝñi đurri igaṯa gǝbanṯa igëbǝđia ŋen ŋwaiña ṯa egeye irǝŋ gǝyesu galo inasiraṯ. ¹⁰ na igiđu ṯia alo yursalim. na gerṯa igakëndu lwaiña eleđa ltǝɽe ikǝrǝŋ ŋǝlǝŋeŋa ŋǝnǝlǝŋ nǝkana, orn cum ndǝ lǝɽiñǝnu igaṯa ŋen ŋëpi alɽiñǝrldo. ¹¹ na igafo igakǝmalo ñoman ñwaiña igal majma pređ na igananaicǝlo ŋen ŋubwa ṯa alwaɽe ŋen ŋǝyesu ŋeieia, na đeicianođa đwaiña igagealo, na igananaicǝlo ŋen ŋubwa alo yarto nwaldaŋ. ¹² na eŋen iŋi igabǝṯa alo iḏimiska ŋǝlǝŋeŋa ŋǝnǝlǝŋ nǝkana ini nađwaṯiñi, ¹³ na ëđǝñinano, ya elǝŋ, ŋen igafo eđađ igaseieu arrerre girǝwa elo gatǝɽe kaiñ gamiñaṯa ëđǝñina, nǝŋaiñǝwađe nano na leđa nano ildi ñagafǝlda, ¹⁴ na ndǝ ñagirǝtǝṯu alo nǝñane ole gaiñilwaɽǝṯi olega gibraniyin, nǝŋaṯa ṯa, sawul, sawul, agaiñǝnanaica ŋen ŋubwa eđa? ŋen ŋwonḏǝṯo ŋa nano ṯa aganeđa ŋen ŋǝlëɽǝñi. ¹⁵ niyaṯa, ya elǝŋ agaɽ esegi? na elǝŋ yesu nǝŋaṯa, fiñi yesu, ñiŋgi agaiñǝnanaicia ŋen ŋubwa. ¹⁶ orn twođo ŋǝđuri rǝmanǝñara alo rǝlaɽǝŋa ŋen ŋanṯa igamiñiṯiaŋa eŋen iŋi, ṯa iŋundǝđi ñaiñiđuɽǝđinṯi na ŋaɽeṯe đamǝđaṯa eŋen iŋi agwondǝṯiñau, na eŋen iŋi igiđi iŋaumiñiṯi. ¹⁷ igiđi iŋëbǝri eđaŋ đǝleđa na eleđa ildi gerṯa laɽo al yawuḏ, ildi igiđi eŋǝlǝđweiṯi ¹⁸ ṯa ŋalëbǝrđi isi esen ṯa aɽređe iŋǝrǝm aleṯa egarrerre na ṯa aɽređe eŋabǝɽa ŋǝseṯan aleṯa rǝmwa nano, ṯa alǝŋgǝđeini eŋen ŋeicia eŋen na alfiđi alo leđala ildi ltǝɽe ŋen ŋanṯa lerṯo đonaṯa iñi. ¹⁹ orn ya ëlǝŋ agribas, igero iganeđa ŋen iŋi ŋeṯo elo, ²⁰ ananoŋ igalwaɽǝṯu leđa ŋen ildi lalo iḏimiska orn ildi lalo yursalim, orn alo pređ yuḏiya, na leđa ildi gerṯa laɽ al yawuḏ cum, ṯa alṯađe ŋen eŋen ŋeicia aɽrǝđeṯe rǝmwa nano na ṯaliđu ŋen iŋi ŋǝbërrǝŋaiđia ŋen ṯa loɽǝbaṯo rǝmwa nano. ²¹ na eŋen iŋi al yawuḏ yënḏeiciñi igal ekǝl niyaṯa yaiñaɽiña. ²² na rǝmwa ramǝđaṯiñi jaica jaica na điñǝđi mǝldin, na ŋen igadǝru ëli igaɽo đamǝđaṯa eleđa lǝrra na loɽra pređ, igero igǝlwaɽa ŋen ŋǝnǝŋ illi ŋen iŋi al anbiya pređ na musa lalwaɽo ṯa ŋiđ aŋfeṯe, ²³ ṯa al masiya giđ aŋǝneini ŋen ŋubwa, na ŋen ŋanṯa fǝŋu gatwođo eŋǝɽaiñ ananoŋ gënǝŋu giđ aŋǝŋaiee al yawuḏ na leđa arrerre ildi gerṯa laɽ al yawuḏ. ²⁴ ndǝ bulus gopǝṯo ŋenŋa iŋi fasṯus nǝŋǝrǝjaice ole pǝlelo nǝŋaṯa, bulus agǝramǝɽua, đaliŋeṯa đǝlaɽǝŋa đwaiña đagera ŋaṯǝɽa ŋǝlaɽǝŋa. ²⁵ orn bulus nǝŋaṯa, igero igǝramǝɽua, ya elǝŋ fasṯus. igaɽwata ŋen iŋi ŋuđǝrwaṯo na ŋǝđeṯam. ²⁶ ŋen ŋanṯa elǝŋ agribas galiŋeṯo ŋen iŋi ŋope na igalwaɽǝṯǝma ŋǝđaiña ŋero, ŋen ŋanṯa igaṯa đeṯam gënǝŋu galiŋeṯo ŋen iŋi pređ ŋen ŋanṯa ŋen ŋero ŋǝnǝŋ ŋalǝbijǝnu. ²⁷ nǝŋaṯa, ya elǝŋ agribas agëndu ŋen ŋal anbiya? igaliŋeṯo ṯa agëndu. ²⁸ na agribas nǝŋeiṯi bulus ṯa, agaṯa ṯa agaiñimeđiñwa ṯa yëndi ŋen ŋal masiya iliga lobǝlano. ²⁹ na bulus nǝŋaṯa, ndǝ liga lobǝlano walla lwalano igwonaṯa irǝmwa ṯa gerṯa aganǝŋa agunto orn leđa pređ ildi lano ŋen ŋǝlëɽǝñi điñǝđi aiñarneṯe, illi ñerṯe ñagabǝkasǝm nuriđana. ³⁰ orn elǝŋ fasṯus nǝŋǝtwođe na elǝŋ goɽra agribas na barnika na ildi pređ lafǝlda, ³¹ na ndǝ lamiñaṯa ndëuwǝr ṯalɽwataiđo ldǝɽo ldaṯa, maji igi gero gëbǝđia ŋen ŋǝnǝŋ ŋeicia ṯa aŋǝɽiñǝni walla aŋëndǝni. ³² na agribas nǝŋeiti fasṯus ṯa, maji igi ndǝ gero gǝbaṯa aŋinḏeini elǝŋ goɽra gaisar nano gaɽǝwađaṯa gëbǝrni.

¹ na ndǝ liga lëɽǝnu đǝge ṯa ñaɽe alo iṯalia iđǝpundr đǝŋau, elǝŋ gǝnǝŋ gaskari miyya ijes ibernia yugasṯas igi ganṯa yulius, ganeinu bulus na leđa lwomǝn lëndǝnu ṯa aŋaɽrǝmoṯe. ² na nǝñënṯi iđǝpundr đǝŋau alo yaḏramiṯinia, iđi đonaṯa đabǝṯa alo yipundri yasiya, nǝñatwođe đǝge. na maji gǝnǝŋ ñagafǝlda gǝbernia arisṯarkus galo iṯasǝluniki alo imakṯunia, ³ na iloman leṯeɽe nǝñarǝmaṯe alo isiḏa na yulius nǝŋgiaṯe bulus ŋabaiyaŋǝno, nǝŋǝmaŋgiṯi ṯa aŋǝɽe rappa nano rǝlëɽǝŋu ṯa arǝmamǝđaṯe. ⁴ na ndǝ ñagatwođo tu nǝñëndi đađ đamiña alo igubrus ṯwaiñ đǝɽe đǝndalǝŋgwa ŋen ŋanṯa đǝbera đafo đwaiña đwonaṯa đoɽǝbaica đǝpundr nḏurṯu. ⁵ na ndǝ ñaguɽǝđu igal bar alo ikilikiya na ibamfiliya, nǝñeṯa alo imira alo ilikia. ⁶ na alo isi elǝŋ nǝŋǝfiđi đǝpundri đalo iskandriya đabǝṯa alo iṯalia orn nǝñënṯi. ⁷ na ñoman ñǝmaṯan ṯǝñǝlaldiñu aten aten nǝñarǝmaṯe alo ikimḏus ŋenŋa ŋini, na ŋen ŋanṯa đǝbera đero đandiŋgiṯia ta ñagǝbendia đađ đǝnëiñua orn nǝñëndi đađ iđi đabǝṯa alo isalmuni đǝɽe đǝndalǝŋgwa alo ikriṯ. ⁸ orn nǝñaɽe aten aten ëtǝndi nano ŋenŋa ŋini nǝñeṯa alo yanṯa almawani alo isi yafo alo ṯwaiñ ilasaiya. ⁹ orn liga lwaṯo lwalano na đađ đerṯo ŋen ŋini, na liga labǝɽo ildi leđa laɽaŋau ŋorwaṯaŋa, na ŋen ŋafǝṯia bulus nǝŋǝleiṯi ṯa, ¹⁰ ya nǝlǝŋ, igwonḏaṯa ṯa ŋen ŋini ŋiđ aŋfeṯe eđela iđëndr, gerṯa elaŋge ildi lafo iđǝpundr na iđǝpundr ikǝrǝŋ, orn entam inëndr cum. ¹¹ orn elǝŋ yulius nǝŋanaṯe elǝŋ gǝđǝpundr na maji gerṯo đǝpundri gamiñaṯo ŋen ŋǝbulus. ¹² na alo yakǝl yero yaŋǝra ṯa lauɽaŋa obǝđaiya, na leđa lwaiña ldaṯa, gǝbanṯa lǝgabǝlar ŋen ŋanṯa aŋgaica lǝgiđr aɽrǝmaṯr alo ifiniks alo isi đǝpundri đǝṯurwa alo ikriṯ eređeṯo đǝɽe đǝndele na đǝnđalǝŋgwa, orn alɽaŋe tu obǝđaiya. ¹³ na ndǝ đǝbera đeṯo ndalǝŋgwa aten ldaṯa aŋgaica đǝɽiñađaṯo ŋen eŋen, orn ldape đǝpeini iđi đǝbekendia đǝpundri ldǝtwođe na ṯalđađaṯo ëṯǝndi nano galo ikriṯ. ¹⁴ orn aten đabera đwaiña kaiñ nḏirǝwa ndele, ṯađuru alo isei, ¹⁵ na ndǝ đabera đǝtësu đǝpundri ndǝ ñagaliŋeṯo ṯa ñagero ñagaɽǝwađaṯa ñagǝđama đabera nǝñǝŋgiṯi đabera ṯa ađaṯwađe đǝpunđri ŋen ŋarno đonaṯa. ¹⁶ orn nǝñamiñe eđađ iđi đamiño jǝsira nano yanṯa kaluḏi, alo isi ŋawa ŋakađiṯu iligano, na alo isi nǝñape đǝpunđri đǝta iđi đakaseinu orǝba nano đoɽra nǝñabǝṯe egworǝb ŋenŋa ŋini kaiñ nǝñakase ŋope, ¹⁷ orn ndǝ labaico đǝpundri egworǝb đǝge lđakasaṯe yar đǝpundri nano ŋen ŋanṯa ṯaiyarǝmoṯo, orn ŋen ŋanṯa liđiñalo ṯa aŋgaica đǝpundri ađǝliyeɽe sirṯis, isi yaɽo ebe gǝbërnicia laŋge, orn ldirǝwi ndrena ini nǝmama đabera na đabera ṯađǝṯwađo đǝpundri bipi. ¹⁸ na ŋen ŋanṯa ŋawa ŋarrapa đǝpundi đoɽa đoɽa kaiñ iloman leṯǝɽe leđa ldarruṯi laŋge lǝmaṯan eŋau, ildi lapǝnu lilia, ¹⁹ na iloman leṯeɽe gwomǝn ñoman ñaɽo ñiɽijin đǝge, ldarruṯi laŋge lǝđǝpundri đurri raŋra eren, ²⁰ na ndǝ ëđǝñina na ropa lderṯe lǝseini ñoman ñwaiña, na wëɽǝni gaicwarǝnde kaiñ gǝŋawa na gǝđabera, nǝñaṯa ñagaber ñagamǝṯia tǝŋ. ²¹ orn ŋen ŋanṯa lero lasa liga lwalano bulus nǝŋeṯa leđa nano nǝŋǝleiṯi ṯa, ya leđa, gǝbanṯa ñaganaṯiñi ṯa lǝgerr lǝgatwođar alo ikriṯ ṯa laŋge ildi pređ alerṯe lagirnu ldwoṯe. ²² na điñǝđi ëɽǝnr đǝñano ŋen ŋanṯa eđa gero gǝnǝŋ inëndr giđ aŋǝɽe ŋen ŋǝnǝŋ illi đǝpundri đunto. ²³ ŋen ŋanṯa ëṯǝndi ulǝŋgi mǝlaiyǝka đǝrǝmwa irri igaɽo eđa gǝlëɽǝŋu na irri igabuŋṯia đađǝriñi nano, ²⁴ nḏǝñeiṯi ṯa, bulus, gerṯa agiđǝñalo, đeṯam agiđi ŋǝđuri elǝŋ goɽra gaisar nëiñua, na rǝmwa ranaicǝŋa leđa pređ ildi ñagafǝlda iđǝpundr. ²⁵ nṯia ëɽǝnr đǝñano ya leđa, ŋen ŋanṯa igerṯo đonaṯa irǝmwa ṯa ŋen ŋiđ aŋǝfeṯe iŋi ŋǝlwaɽǝnṯiñi đeṯam. ²⁶ orn đeṯam đǝpundri điđ ađǝtriđinṯi alo yǝnǝŋ yǝjǝsira isi ŋawa ŋakađiṯu iligano. ²⁷ na ndǝ ñoman ñaɽo ređ nǝñǝmiñe marlđwan ulǝŋgi ñagabakǝldaica nǝŋau bipi igal bar yaḏria, ulǝŋgiano leđa lǝđǝpundri laṯa ṯa aŋgaica laijomaṯe ëṯǝndi gǝnǝŋ, ²⁸ orn ndǝ linḏeieu ŋawa ldǝfiđi ŋoliano aten. orn aten ldinḏeici tǝŋ ldǝfiđi ŋaṯarwano aten. ²⁹ orn ŋen ŋanṯa liđinalo ṯa aŋgaica larǝmaṯo alo yeicia yerṯo ŋwandra, ldauwǝṯi ipeini marldwan, isi yǝfo đǝpundri nḏurṯu ṯa aiyëndeiei đǝpundri, na lafo lonaṯa ṯa alo aiyakerṯe. ³⁰ orn leđa lǝmaṯan ildi lëbǝđia ŋǝmëɽria iđǝpundr, lapwaiño ŋen ṯa alobǝđe iđǝpundr đoɽra orn ldiruwaṯe đǝpundri đǝta iđi đǝfo iđǝpundr đoɽra. laṯa ṯa lonaṯa lauwǝṯi ipeini isi iđǝpundr nëiñua. ³¹ na bulus nǝŋalwaɽǝṯi elǝŋ gaskari na askari ṯa, ndǝ leđa ildi laber laɽaŋa iđǝpundr ñagaber ñagaɽǝwađaṯa ñagëbǝrni. ³² na askari nǝyagǝle yar iđǝpundr đǝta ṯa ađiɽi. ³³ ndǝ alo yaɽo bǝrni bǝrnia bulus nǝŋalwaɽǝṯi leđa ṯa alǝse, nǝŋaṯa ṯa, điñǝđi ñoman ñaɽo ređ nǝñamiñe marldwan ŋen ŋaijǝbinṯǝnde nano na ñagaɽaŋo ñagero ñagǝsa. ³⁴ ŋen ŋafǝṯia igǝndǝlwaɽǝṯia ṯa ñase ŋǝsa iŋi aŋandǝnaice ŋabǝɽa, ŋen ŋanṯa đǝria đǝnenda đaber điđ ađǝṯwe đeđa gǝnǝŋ eñaŋ. ³⁵ ndǝ galwaɽo ṯia nǝŋape ragif nǝŋǝrṯi rǝmwa nano leđa nëiñua pređ nǝŋgerano ṯaŋaso. ³⁶ orn ldonḏǝjeini na ṯalaso lënǝŋulu cum. ³⁷ na nanda pređ ñaŋgi ñagafo iđǝpundr đǝŋau ñagaɽo miyya iɽijan na eređia đenǝŋ nalo eređia giɽijan, na đenǝŋ nǝŋǝmiñe gunto. ³⁸ ndǝ labeṯo đǝge leđa larruṯu ŋwana eŋau ŋen ŋanṯa đǝpundri ađëbiṯano. ³⁹ orn ndǝ alo yakero đǝge ldaijǝbeṯe alo, orn ṯalseicu alo yǝnǝŋ yandralo, ëṯǝndi nano, yaɽo ebe, ldaṯa ṯa ndǝ lǝgaɽǝwađaṯr aɽr đǝpundrida alo isi. ⁴⁰ orn ldǝgele ipeini isi yǝbǝkendi đǝpundri ldǝlṯađe eŋau, na cum ldamiñe yar ano isi yëndu waŋge igi gǝrǝkeiđia đǝpundri, na ldabaiee erena elo igi gafo nëiñua ṯa đǝbera ađandǝmamaṯe ëṯǝndi nano. ⁴¹ orn ndǝ ñagarǝmaṯo alo eŋau ŋorǝpǝđaiđo ŋǝlaldiña ŋwaiña ŋabǝrano kaiñ na đǝpundri đǝɽnda nḏënṯi iđuđa nḏëndǝni kaiñ, na ŋawa nǝŋgere đǝɽo đurṯu. ⁴² na askari niyaṯa ṯa yaɽiña leđa ildi lǝkëndǝnu ŋen ŋanṯa yabaṯa aŋgaica liđ alǝlale nǝŋau alabǝṯa nëṯǝndi alaldiñe, ⁴³ orn elǝŋ gaskari ŋen ŋanṯa gwonaṯa gëbǝri bulus nǝŋgere ŋen iŋi. na nǝŋalwaɽǝṯi leđa ildi laliŋeṯo lalala nǝŋau ṯa alirǝwǝṯi eŋau ananoŋ na alǝlale alabǝṯe nëṯǝndi, ⁴⁴ na ildi lṯënu alakuɽǝđi ipǝndri isi yagǝro. nṯia pređ lđëbǝrđeini nëṯǝndi.

¹ orn ndǝ ñagëbǝrǝđǝnu pređ đǝge ñagaliŋeṯo ṯa alo isi yaɽo jǝsira ibernia maliṯa. ² na leđa lalo isi lǝgiaṯǝnde ŋabaiyaŋǝno kaiñ ŋen ŋanṯa lorǝđaieo isia na ldǝndundǝđi pređ, ŋen ŋanṯa rǝmwa rađǝne na alo yamǝle. ³ na bulus gafo gararreiđu ǝrwa nǝŋǝlëɽi isia na rǝmwa reieia ndramiñe erwa ŋen ŋanṯa riđǝña aŋal gisia, ndrǝmase đaŋ. ⁴ ndǝ leđa lalo isi lǝseicu rǝmwa rënduđǝma ldaṯa, đeṯam maji igi gaɽiñǝđo. gëbǝrnu eŋau orn ŋen ŋuđǝrwaṯo ŋǝneđǝma gamǝṯia. ⁵ orn bulus nǝŋǝfǝrijǝđi rǝmwara isia na ŋen nǝŋerṯe ŋeṯǝma nano ŋeieia ŋǝnǝŋ, ⁶ orn leđa ṯalṯurṯu ŋen ṯa lanwana bulus gǝmamǝni aŋǝno walla aŋiɽi aŋaiye taltal, orn ndǝ laṯurṯu liga lwalano ldǝseiei ŋen ŋero ŋeṯǝma nano ŋeicia ŋǝnǝŋ ldamǝlëđe ŋen eŋen ldaṯa ṯa gënǝŋu gaɽo rǝmwa rǝnǝŋ. ⁷ na alo isi ṯwaiñ alo yafo yelǝŋ yǝfǝsira igi gǝbernia bublius, gamǝnde nǝŋǝndrǝmoṯe ŋope ñoman ñiɽijin. ⁸ na eṯen bublius gafo gwuma gubwa piđ aŋǝno na gurǝđa ŋǝfǝni, na bulus nǝŋamaɽe nano nǝŋaṯurṯi rǝmwa nǝŋamëɽi raŋ nano nǝŋǝmeiđi. ⁹ ndǝ ŋen ŋiđǝnu iŋi leđa pređ ildi yǝjǝsira lwuma leṯo ldeiđini. ¹⁰ na ldǝndǝnaice laŋge lwaiña na ndǝ ñagatwođo lđandǝkëɽǝṯi laŋge iđǝpundr garno ñagwonaṯa. ¹¹ ndǝ nubwa naŋgaṯo niɽijin nǝñatwođe iđǝpundr đǝnǝŋ đalo iskandriya iđi đafo alo imaliṯa liga lobǝđaiya, iđi đerṯo đǝpundri đǝnëiñua đaṯuɽeinu đarno lorǝba ildi laɽo yeŋor. ¹² orn nǝñarǝmaṯe alo yanṯa sirakusa nǝñaɽaŋe tu ñoman ñiɽijin. ¹³ orn nǝñatwođe tǝŋ nǝñađaiđe alo nǝñarǝmaṯe alo irigiyun, na ndǝ loman laŋgaṯo lunto đabera nḏǝtwođe đǝɽe đǝndalǝŋgwa, na iloman leṯeɽe gwomǝn nǝñeṯa alo ibuṯuyuli. ¹⁴ alo isi ñagǝfiđu lorǝba orn ldǝndeiṯi ṯa ñaɽaŋǝlda ñoman đenǝŋ nǝñǝmiñe ñiɽijan, orn nṯia ñagarǝmaṯo alo irumiya. ¹⁵ ndǝ lorǝba tu lano ŋen ṯa ñageṯo ldela nwaldaŋ alo ifarun, yalo yabiyus na alo yaluwaniṯ ṯa ñopǝđaiđǝlda. ndǝ bulus ganwanǝlo nǝŋërṯi rǝmwa nano na nǝŋëɽǝni đǝñano. ¹⁶ ndǝ ñageṯo alo irumiya elǝŋ gaskari nǝŋgiṯi bulus ṯa aŋǝɽaŋe alǝsoŋ askariya yǝnǝŋ isi yamarǝmoṯwa. ¹⁷ orn ndǝ ñoman ñaŋgaṯo ñiɽijin bulus nǝŋundǝđi leđa ildi loɽra eŋen ŋal yawuḏ, na ndǝ larraiđo đǝge bulus nǝŋǝleiṯi ṯa, lorldaiñ, igero igëbǝđia ŋen ŋeicia ŋǝnǝŋ eleđa walla igal ganun ipapanđa ildëndr lǝpǝnde, orn igëndǝnu iganeinu rumaniyin alo yursalim. ¹⁸ ndǝ linḏeieiñi lafo lonaṯa ṯa laiñëbǝri ŋen ŋanṯa lero lafiđia ŋen ŋǝnǝŋ ŋerṯo orǝbano gǝŋǝɽaiñ eŋen ŋǝlëɽǝñi. ¹⁹ orn ndǝ al yawuḏ yaneđo igaṯa, gǝbanṯa igǝbinḏeini egelǝŋ goɽra gaisar, orn igero igǝberṯia ŋen ŋǝnǝŋ ṯa igǝsiki leđa ǝllëɽǝñi. ²⁰ eŋen iŋi igundǝđǝnde ṯa alɽwatr, ŋen ŋanṯa fǝŋen iŋi ŋǝđǝṯurṯia đisrayil igëndeiniau uriđaga igi. ²¹ na lënǝŋulu lđǝmeiṯi ṯa, ñagero ñagǝneinia ađam gǝnǝŋ galo yuḏiya eŋen ŋǝlaɽǝŋa na leđa lero lnǝŋ leṯo tu lalwaɽo ŋen ŋeieia ŋǝlaɽǝŋa. ²² orn ñagwonaṯa ṯa ñagaŋanaṯa ŋen iŋi agëndu, ŋen ŋanṯa ñagaliŋeṯo ṯa alo pređ leđa laɽwata lagea ŋen iŋi. ²³ orn ndǝ lëɽǝṯǝma liga đǝge ldǝmeṯa nano lwaiña alo isi gafau. na bulus nǝŋǝlërrǝŋaice ŋen iŋi ëđǝñëđǝñin nǝŋalǝlwaɽǝṯi ŋen ŋǝŋǝlǝŋe ŋǝrǝmwa na nǝŋǝlǝđǝrnaiđe eŋen ŋǝyesu ŋenŋa ŋal ganun imusa na ŋal anbiya. ²⁴ na lǝmaṯan ldǝđǝrneinǝđi na lǝmaṯan lđerṯe lǝbendia ŋen. ²⁵ nṯia ldǝđaŋe ṯalɽwataṯelo orn ananoŋ bulus gafo galwaɽǝṯǝlo ŋen ŋunto tǝŋ ṯa, usila gatǝɽe gǝrǝmwa galwaɽo ŋope ŋen galwaɽǝṯu eṯalanđa ŋen nabiya isaiya. ²⁶ isaiya gaṯa, mbu eleđa ildi ŋǝlǝlwaɽǝṯi ṯa, đeṯam ñagiđi ñane orn ñagaber ñagiđi ñaliŋeṯe, ñagiđi ñaseiđi orn ñagaber ñagiđi ñaseiđi. ²⁷ ŋen ŋanta ŋaṯǝɽa ŋǝleđa ildi ŋaɽo tǝgǝtǝg na laɽ ndul na laldanḏeinu isi ṯa alerṯe lǝseiđia isiya na ṯa alerṯe lǝnna nënǝñiana na ṯa alerṯe laliŋeṯo eŋaṯǝɽa na ṯa yerṯe igǝleiđia. ²⁸ orn lǝŋinr nano ṯa đëbǝria iđi đǝrǝmwa đǝđweinṯu leđa gerṯa laɽ al yawuḏ, na lënǝŋulu liđi alne. ²⁹ orn ndǝ galwaɽo ṯia al yawuḏ yabǝɽo ṯalukuɽǝbijǝđǝṯu ŋen ŋwaiña ldǝɽo. ³⁰ na bulus nǝŋaɽaŋe alo isi nṯǝli niɽijan na gafo gǝsa nḏaŋ đǝlëɽǝŋu, gǝŋǝrṯu leđa nano ildi pređ lamerldeṯa nano, ³¹ nǝŋǝlërrǝŋaiđe ŋen ŋǝŋǝlǝŋe ŋǝrǝmwa na ŋelǝŋ yesu al masiya ŋamǝɽa ŋero na gero gandǝgirinṯia.