2 ṯasǝluniki

2 ṯasǝluniki

¹ fǝnanda bulus na silǝwanus na ṯimǝđawus, ñageɽǝđo leđa lǝkanisa alo iṯasǝluniki ildi lafo irǝmwa, papa igëndr, na egelǝŋ yesu masiya. ² ñagǝbeɽǝđia ṯa rǝmwa, đaṯa na elǝŋ yesu masiya alǝndǝnaice đǝbuŋṯia đusila na đëuṯaralo. ³ ŋen ŋafo đeṯam ṯa nanda ñagaŋërṯia rǝmwa nano ŋen ŋanṯa ñaŋ ñoman pređ, lorlđaiñ, na ŋen ŋaŋǝra ṯa ñagëbǝđia ṯia, ŋen ŋanṯa đonaṯa eđalo ṯađoɽreṯe kaiñ na đubwiđia eđalo ñaŋ pređ ṯađakaɽǝjeinu. ⁴ nṯia nanda ñagandamia jaica jaica ikanisa pređ đǝrǝmwa, ŋen ŋanṯa ñaŋ ñagwalarano na ñagerṯo đonaṯa ndǝ ñagananeinia ŋen ŋubwa ŋeicia na ŋinia iŋi ñagaɽiñaṯa. ⁵ eŋen iŋi lǝgaliŋeṯr ṯa đakǝme đǝrǝmwa đaɽo đuđǝrwaṯa, ŋen ŋanṯa rënǝŋu ronaṯa ṯa ñaŋeiđǝni ṯa ñagarǝjǝđaṯo eŋen ṯa ñënṯi eŋǝlǝŋ ŋǝlëɽǝŋu. na điñǝđi ñaganemia ŋen iŋi ŋubwa ŋen ŋanṯa ŋǝlǝŋe iŋi. ⁶ đeṯam ŋen ŋuđǝrwaṯo ṯa rǝmwa riđ aruɽǝbiṯi leđa ŋen ŋubwa ŋeicia lënǝŋulu ildi lanaicǝnde ŋen ŋubwa ŋeicia, ⁷ na ṯa rënǝŋu riđ arǝndǝnaice đǝmiñǝniano ñaŋ ñaŋgi ñagananeini ŋen ŋubwa ŋeicia, na nanda cum. ŋen ŋiđ aŋfeṯe ṯia liga elǝŋ yesu masiya giđ aŋǝŋeini elo eleđa, mǝlaiyǝkaya eŋabǝɽa ŋǝlëɽǝŋu, ⁸ na isiaya yoɽa na giđ aŋkarme leđa ildi laijǝba rǝmwa, lënǝŋulu ildi laneđo lǝnna ŋen ŋaŋǝra ŋelǝŋ igëndr yesu. ⁹ leđa ildi liđ alakǝmǝni đǝgirniađa đǝbǝɽǝbǝte, na altǝrinṯi alfeṯe alǝsoŋ elǝŋ yesu gerǝlo nano na ŋaɽrwa ŋǝŋabǝɽa ŋǝlëɽǝŋu ŋerǝlo nano cum, ¹⁰ ndǝ eloman ildei gënǝŋu giđ aŋela ṯa aŋǝneini ŋaɽrwa eleđa ǝllëɽǝŋu ltǝɽe na ṯa leđa ildi lëndu ŋen ŋǝlëɽǝŋu liđ alirǝwano ŋen ŋanṯa ŋu, ŋen ŋanṯa đeṯam đamǝđaṯa iđi ñagamǝṯǝnde đëndǝnu. ¹¹ ŋen ŋanṯa ŋen iŋi pređ nanda ñagaṯurṯia rǝmwa ñoman pređ ŋen ŋanṯa ñaŋ, ṯa rǝmwa irëndr arǝndiđi ṯa ñagarǝjađaṯo eđurǝndǝđia iđi đǝlëɽǝŋu, na ṯa arǝndǝbeiei ŋenŋa pređ ŋaŋǝra iŋi ñagwonaṯa na ṯa arǝɽiñǝđaṯe ŋǝmëɽria pređ ŋǝđonaṯa eđalo ŋabǝɽaŋa ŋǝlëɽǝŋu, ¹² ṯa irǝŋ gelǝŋ igëndr yesu aŋǝneini ŋaɽrwa eñaŋ, na ṯa ñaŋ ñaneini ŋaɽrwa iŋu, ŋen ŋanṯa đanaieia mǝɽǝmǝɽeñ đǝrǝmwa irëndr na đelǝŋ yesu masiya.

¹ điñǝđi eŋen ŋǝđela đelǝŋ igëndr yesu masiya na đǝrraiđia iđënđr ŋu nëiñua igǝndeɽǝđia kaiñ, lorldaiñ, ² ṯa nare enalo anerṯe nǝtësǝni taltal, na ṯa ñerṯe ñagagǝrđa ŋenŋa ŋǝnǝŋ ŋusila walla ŋenŋa ŋarto walla ađamga igi leđa laṯa geṯiñi nano igi gaṯa ṯa loman lelǝŋ yesu leṯo đǝge. ³ ñerṯe ñaŋgiṯi eđa gǝnǝŋ ṯa gǝndiṯia ŋađǝna eŋen iŋi, ŋen ŋanṯa loman ilđi laber liđ alela, illi ndǝ đatođa đoɽra eŋen ŋeieia ađǝfeṯe ananoŋ na eđa igei ganeđa al ganun pređ aŋǝŋeini, gënǝŋu igi giđ aŋǝmǝnđëđǝni, ⁴ gënǝŋu igi gageo laŋge pređ ilđi leđa lǝbaṯa ṯa filđi imwa na laŋge pređ ildi ldukwuđiñǝṯialo, na goɽreini kaiñ gamiñaṯǝlo pređ, na igi giđ aŋǝɽaŋe igal ekǝl irǝmwa na giđ aŋaṯa ṯa gënǝŋu gaɽ rǝmwa đurri. ⁵ gerṯa ñaŋ ñagǝlëldǝŋǝđeinia eŋen ṯa ndǝ lǝgafr igafo igwalwaɽǝṯǝnde ŋen iŋi? ⁶ na điñǝđi ñagaliŋeṯo igi guɽǝbǝđia eđa igei, ṯa gënǝŋu giđ aŋǝlǝŋini iliga ilđi ganeinu. ⁷ ŋen ŋanṯa ŋabǝɽa ŋǝŋen ŋeicia iŋi ŋaneđa al ganun pređ ŋëbǝđia ŋǝmëɽria điñǝđi eŋamǝɽa, ŋen gënǝŋu igi gamuɽǝbǝđia điñǝđi gamǝlu gaŋgeinia. ⁸ ndǝ gaŋgeinu đǝge, eđa igei ganeđa al ganun pređ, giđ aŋǝlǝŋini, na elǝŋ yesu giđ aŋǝmaɽiñe ufuđaga gëiñua gǝlëɽǝŋu na giđ aŋǝmarnǝndađe ŋaɽrwaŋa ŋǝđamiña đǝlëɽǝŋu. ⁹ fǝŋu eđa gǝŋen ŋeicia igi ganeđa al ganun pređ, gënǝŋu igi giđ aŋela eŋǝmëɽria ŋǝseṯan ŋabǝɽaŋa pređ, na ŋamǝlaŋa na aŋwaraiya lǝŋaɽǝwen, ¹⁰ na ŋađǝnaŋa ŋǝŋen ŋǝɽiano eleđa ildi liđ alǝmǝndëđǝni, ŋen ŋanṯa lënǝŋulu laneđa ṯa lubwa ŋenŋa ŋǝđeṯam ṯa alëbǝrni. ¹¹ fǝŋen iŋi rǝmwa riđ arǝlǝđweiṯi ŋabǝɽa iŋi ŋalǝbǝrlđeđeṯa eŋen ŋǝɽiano ṯa alëndi ŋaɽǝwen, ¹² ṯa leđa pređ ildi laneđa ṯa lǝbenđia ŋen ŋǝđeṯam orn lafo lonaṯa ŋen ŋǝɽiano, liđ alakǝmǝni. ¹³ ŋen ŋaɽo đeṯam ṯa ñagaŋërṯia rǝmwa nano jaica jaica ŋen ŋanṯa ñaŋ, ya lorldaiñ ñaŋgi elǝŋ yesu gubwandiya, ŋen ŋanṯa rǝmwa roṯǝnde pǝnde rarn ṯa ñaneini đëbǝrnia đatǝɽeđa iđi usila gatǝɽe gananaiđia na đënđiađa đǝŋen ŋǝđeṯam. ¹⁴ nṯia rënǝŋu runđǝđǝnde đërrǝŋaiđiađa eđaiñ đǝŋen ŋaŋǝra, ṯa ñaŋ ñaneini ŋaɽrwa ŋelǝŋ igënđr yesu masiya. ¹⁵ ŋen ŋafǝṯia, lorldaiñ, ɽaŋr ñagwonḏǝṯo ñëndi ŋen kaiñ iŋi nanda ñaganaieǝnde olega na nađamna. ¹⁶ ñagǝbeɽǝđia ṯa elǝŋ igëndr yesu masiya gënǝŋu na rǝmwa, papa igëndr irri rubwandriya na ranaieǝndr đǝbǝɽiano na đwonḏǝṯa ilđi lǝbǝɽǝbǝte na ŋen ŋaŋǝra iŋi lǝgaṯurṯiar đǝnaieiađa đǝlëɽǝŋu mǝɽǝmǝɽeñ, ¹⁷ alonḏǝce nar enalo na alǝndonḏǝce eŋen pređ ŋaŋǝra na eŋǝmëɽria pređ ŋaŋǝra.

¹ eŋen ŋaɽo đurṯu, lorldaiñ, ekeɽǝđr rǝmwa ŋen ŋanṯa nanda mǝldin ṯa ŋen ŋǝrǝmwa aŋǝlaldiñe alo nǝŋǝneini ŋaɽrwa ŋen ŋarno ŋiđǝnu ṯia eñaŋ, ² na ṯa nanda ñëbǝrni eleđa leicia ildi lǝndǝnanaicia ŋen ŋeicia, ŋen ŋanṯa gerṯa leđa pređ lerṯo đonaṯa. ³ orn elǝŋ yesu gerṯo ŋen ŋuđǝrwaṯo na giđ aŋǝndǝnaice đwonḏǝṯa na giđ aŋǝndromǝṯe egeđa geicia. ⁴ nanda ñagëɽǝni dǝñano eŋen eŋalo egelǝŋ yesu ṯa ñagëbǝđia điñǝđi na ṯa ñagiđi ñiđi ŋen iŋi ñaganaicǝnde. ⁵ ñagǝbeɽǝđia ṯa elǝŋ yesu aŋënǝci nar enalo iđubwa đǝrǝmwa na eđwalarano đal masiya. ⁶ điñǝđi nanda ñagǝndǝlwaɽǝṯia, lorldaiñ, irǝŋga gelǝŋ igëndr yesu masiya ṯa ñaneđe oralo gǝnǝŋ gaiñǝlaŋǝno, igi gaber gateṯa ŋen iŋi ñaganeinu inanda. ⁷ ñaganǝñaŋ ñagaliŋeṯo fǝṯau ŋen ŋaɽo đeṯam ṯa ñagǝndirnḏeicia, ŋen ŋanṯa liga lǝgafr nanda ñagero ñagaiñǝlaŋǝno. ⁸ nanda ñagero ñagǝsa ŋǝsa ŋeđa gǝŋǝŋ mǝɽǝmǝɽeñ, orn ñagafo ñagëbǝđia ŋǝmëɽria ëđǝñin na ulǝŋgi đeicwarađa na ŋenŋa ŋini ṯa ñerṯe ñagǝma wagǝnǝŋ eñaŋ. ⁹ ñagiđu ṯia gerṯa ŋen ŋanṯa ñagero ñagaɽǝwađaṯa ṯa ñagamǝcini, orn ṯa nanda ñiđǝni ŋamǝla ṯa ñǝndirnḏeici. ¹⁰ ŋen ŋanṯa cum liga lǝgafr nanda ñagwaɽwatǝṯǝnde ṯa, ndǝ eđa gǝnǝŋ ganeđo ṯa gëbǝđia ŋǝmëɽria ñerṯe ñamaŋgiṯi ṯa aŋǝse. ¹¹ orn nanda ñagǝnana ṯa leđa lǝmaṯan eñaŋ laiñǝlaŋǝno, ildi laber lëbǝđia ŋǝmëɽria kwai kwai, orn lënǝŋulu lalǝŋǝjǝđia ŋenŋa. ¹² na nanda ñagwalwaɽǝṯa leđa ildi na ñagǝleɽǝđia eŋen ŋelǝŋ yesu masiya ṯa lënǝŋulu aliđi ŋǝmëɽria eŋen ole gero na ṯa alǝse ŋǝsa eŋen. ¹³ orn ñaŋ, lorldaiñ, ñerṯe ñagaicwara iđiđia đǝŋen ŋame. ¹⁴ ndǝ eđa gǝnǝŋ ganeđa ṯa gateṯa ŋen eŋaiñ ŋǝwërđǝnu egađam igi seicǝmar ŋope na ñerṯe ñagǝɽaŋǝlda ṯa gënǝŋu aŋirǝwano. ¹⁵ ñerṯe ñagǝmagea orn gariñaṯǝmar garno oralo. ¹⁶ ñagǝbeɽǝđia điñǝđi ṯa elǝŋ yesu, igi gǝndǝnanaicar đëuṯaralo, aŋǝndǝnaice đëuṯaralo eŋen pređ ñagǝfau. ñagǝbeɽǝđia cum ṯa elǝŋ yesu aŋǝndaufeṯe ñaŋ pređ. ¹⁷ igënǝñi, bulus, igǝwërđia đcɽǝđia iđi đaŋđa đǝlëɽǝñi na fǝŋwëɽiña iŋi enađam pređ. igǝwërđia ṯia. ¹⁸ igǝbcɽǝđia ṯa đǝbuŋṯia đelǝŋ igëndr yesu masiya ađǝndaufeṯe ñaŋ pređ.