1 ṯimǝđawus

¹ fiñi bulus ñiŋgi igaɽo đǝđweinia đal masiya yesu eŋen ŋǝrǝmwa irri raɽo đëbǝria iđëlǝŋ na eŋen ŋal masiya yesu igi ŋen pređ ŋafǝmau iŋi lǝgauṯurṯia. ² igeɽǝđo ṯimǝđawus igi đeṯam gaɽ iđia gǝlëɽǝñi iđonaṯa iyesu. igabeɽǝđia ṯa rǝmwa đaṯa na al masiya yesu, elǝŋ igëlǝŋ alǝŋanaiee đanaicia mǝɽǝmǝɽeñ na ŋabaiyaŋǝno na đëuṯaralo. ³ ŋen ŋarno igeɽǝđǝŋa ṯa ŋaɽaŋe alo yafǝsus ndǝ igabǝɽo alo imakṯunia nṯia ɽaŋo tu mǝldin ṯa ŋagagariñaṯe leđa lǝnǝŋ ṯa alerṯe lǝbërrǝŋaiđia ŋen ŋarto, ⁴ na ṯa alerṯe lǝnna ŋen ŋǝpiano na ŋen ŋǝđǝlǝŋǝđia. ŋen iŋi ŋatuđi đǝgerđe na gerṯa đamǝđaṯa đǝrǝmwa iđi đeṯo iđonaṯa. ⁵ lǝgǝbërrǝŋaicia leđa ṯa alerṯe đubwa iđi đeṯo enare natǝɽe, na nare ini naɽwata đeṯam ini nero đǝskiđiano na đonaṯa iđi đǝđeṯam. ⁶ leđa lǝmaṯan lamiño eŋen iŋi ldǝređialo eŋen ŋǝpiano. ⁷ lënǝŋulu lwonaṯa lǝbërrǝŋaiđia ŋen ŋal ganun irǝmwa ipǝnde orn laijǝba ŋen lwaɽwata na laijǝba laŋge laldoɽwata đonḏǝṯađa. ⁸ lǝgaliŋeṯo ṯa al ganun yaŋǝra ndǝ eđa gëndu ŋope, ⁹ nǝŋaliŋeṯe al ganun yero yafo ŋen ŋanṯa leđa ildi luđǝrwaṯo eŋen orn yafo ŋen ŋanṯa leđa ildi lagera ŋen na ildi lero lǝnna na ildi lero liđǝña rǝmwa, na ildi lëbǝđia ŋen ŋeicia, na ildi lataŋa eŋen, na ildi lađamiea eŋen ŋatǝɽe ŋen, na ildi laɽiña eṯenanda na lǝŋgenanda, na ildi laɽiñǝđia, ¹⁰ na leđa ildi laɽaŋa lijila ɽrǝto, na leđa ɽrwa ild landra leđala ɽrwa, na ildi lǝbǝrldeđa liji ŋabǝɽa, na ildi laɽǝlen na ildi lalǝfia ŋen ŋǝŋaɽǝwen, na leđa pređ ildi lëbǝđia ŋen ŋagea đërrǝŋaiđia ŋen đǝđeṯam, ¹¹ iđi đaɽo ŋen ŋaŋǝra ŋǝrǝmwa irri rǝbuŋǝnṯu iŋi ŋerṯo ŋaɽrwa. igënǝñi iganeinu ŋen iŋi ṯa erǝmoṯe. ¹² igaŋërṯu al masiya yesu nano jaica jaica igi gaɽ elǝŋ igëlǝŋ igi gaiñǝnanaicia đonḏǝṯa, ŋen ŋanṯa gaŋǝnṯiñi garno igerṯo ŋen ŋunto egare nǝŋǝñëɽi ṯa emiṯi ŋǝmëɽria. ¹³ orn ananoŋ igwaɽwato ole gǝlëɽǝŋu geicia, nemǝnanaice ŋen ŋubwa ŋeieia nemađamǝce eŋen. orn gënǝŋu gagiaṯiñi ŋǝbaiya nano ŋen ŋanṯa igafo igaijǝba ŋen ŋǝđeṯam na igafo igamǝlu igǝbenđia ŋope ŋen ŋǝrǝmwa. ¹⁴ na đǝnaicia mǝɽǝmǝɽeñ đelǝŋ igëlǝŋ đǝreiniñi nano kaiñ na cum đonaṯa na đubwa ildi lafo igal masiya yesu. ¹⁵ ŋen iŋi ŋaɽo đeṯam na ŋarǝjađaṯo eŋen ṯa leđa pređ alënđi, ṯa al masiya yesu geṯo alo ṯa aŋëbǝri leđa leicia. na igënǝñi igeicia igamiñaṯo leđa pređ leieia. ¹⁶ orn igagieinu ŋabaiya nano ṯa yesu masiya aŋërrǝŋaiđe đaɽiñaṯa ŋen đǝlëɽǝŋu iđi đǝɽiñǝđeinu iñi ñiŋgi igeicia igamiñaṯo leđa pređ leicia. nṯia gënǝŋu giđu ŋamǝla eleđa ilđi liđ alëndi ŋen ŋǝlëɽǝŋu ṯa alneini đamǝṯia đǝbǝɽǝbǝte. ¹⁷ igǝbeɽǝđia ṯa elǝŋ goɽra gǝbǝɽǝbǝte, igi gamǝṯia bǝɽǝbǝte, igi leđa laber laɽǝwađaṯa lamaseicia, igi gaɽ rǝmwa runto, gënǝŋu aŋǝneini đame na ŋaɽrwa bǝɽǝbǝte. amin. ¹⁸ ya ṯimǝđawus, iđia gǝlëɽǝñi, igaŋǝlwaɽǝṯia ŋen ŋǝnǝŋ iŋi ŋwǝlwaɽǝnu ananoŋ eŋa ṯa aŋatuđi ṯa ŋabwaiñǝđe ŋope eŋen ŋǝrǝmwa, ¹⁹ nđǝ agǝbenđeiei đonaṯa na ṯaŋaɽaŋo egara gǝlaɽǝŋa igi gwaɽwata đeṯam đǝskinia đero. leđa lǝmaṯan lađamo ŋen lëndu enare nṯia đonaṯa eđen đagirnu garno đǝpundri đeŋau nđǝ ŋawa ŋagera đǝteta đǝteta. ²⁰ iminawis na iskandr lafo eleđa ildi na iganaiđǝlo eđaŋ đǝseṯan ṯa alërrǝŋeini ŋen ṯa alerṯe lwaɽwata ole gǝrǝmwa geicia.

¹ ŋen ŋaɽnda igaŋeɽǝđia kaiñ ṯa ñekeɽǝđe rǝmwa, ñaṯurṯi na ñaɽwataiđe rǝmwara na ñaŋërṯi rǝmwa nano eŋen ŋǝleđa pređ, ² na eŋen ŋǝnǝlǝŋ noɽra na eŋen ŋǝleđa lerṯo ŋǝlǝŋe, ṯa alɽaŋr ŋope iđëuṯaralo đǝgerđe đero eŋen ŋǝrǝmwa na ṯa alneinr đame eŋen pređ, ŋǝđaiñaŋa. ³ ŋen iŋi ŋaŋǝra na ŋëbǝđia rǝmwa raŋǝra nano irri raɽo đëbǝria iđëlǝŋ, ⁴ irri ronaṯa leđa pređ alëbǝrni na alliŋeṯe ŋen ŋǝđeṯam. ⁵ rǝmwa raɽo runto na eđa gaɽo gunto gokoɽǝbaiea ŋen rǝmwa nano ŋen ŋanṯa leđa, na fǝŋu al masiya yesu igi gaɽo maji, ⁶ igi ganaiđo etam gǝlëɽǝŋu gaɽo đǝpǝɽa ŋen ŋanṯa leđa pređ. rǝmwa ramǝđaṯo ŋen iŋi iliga lëɽǝnu. ⁷ igënǝñi igëɽǝnu, ṯa eɽeṯe eđa gwaɽwata ŋen ŋǝrǝmwa na đǝđweinia na ṯa yërrǝŋaiđe leđa ŋen ildi gerṯa laɽ al yawuḏ iđonaṯa na eŋen ŋǝđeṯam. igwalwaɽa đeṯam. igaber igagǝbalo. ⁸ ŋen ŋafǝṯia igwonaṯa leđa pređ alṯurṯi rǝmwa labǝee raŋ elo irri ratǝɽe, đeiciano đero na đǝgerđe đero eŋen. ⁹ nṯia cum igwonaṯa liji ɽrlđa aliđǝni ŋaiyo eŋen ŋaŋǝra alëɽǝni ndrena nano ŋope, gerṯa đǝbǝɽuađa đǝṯelia, na gerṯa ŋabǝɽeŋa na gerṯa ñerldeña na gerṯa ndrenna nwaiña iliano, ¹⁰ orn ŋǝmëɽriaŋa ŋaŋǝra. ŋen ṯia ŋaŋǝra iliji ɽrlda ildi lǝbaṯa lubwa rǝmwara. ¹¹ ŋgiṯr liji ɽrlda alërrǝŋeini ŋen đǝbwaiñađa ŋǝma na đaɽiñaṯađa ŋen. ¹² igaber igaŋgiṯia liji ɽrlda alërrǝŋaiđe ŋen walla alerṯe ŋǝlǝŋe eleđa ɽrwa. đeṯam labwaiña ŋǝma. ¹³ ŋen ŋanṯa ađǝm giđǝnu ananoŋ orn auwa giđǝnu nḏurṯu. ¹⁴ na ađǝm gëro gǝbǝđǝni ŋađǝna orn wuji gǝlëɽǝŋu giđǝnu ŋađǝna nǝŋiđi ŋen ŋeieia. ¹⁵ orn liji ɽrlda liđ alëbǝrni ndǝ lalǝŋa ndǝ ṯalɽaŋo iđonaṯa, na iđubwa, na eđatǝɽe đǝtađa enare.

¹ ŋen iŋi ŋaɽo đeṯam. ndǝ eđa gǝnǝŋ gëɽǝđiaŋǝno ṯa aŋǝɽeṯe elǝŋ ikanisa, gënǝŋu gwonaṯa ŋen ŋaŋǝra. ² ŋen đeṯam ṯa elǝŋ gǝkanisa aŋfeṯe eŋen mǝnna gero, na gafo gamo wuji gunto, na gërǝkǝđia aŋǝno, na gaṯuɽeinu, na gëđǝñinu ŋen ŋanṯa ŋen ŋǝlëɽǝŋu ŋuđǝrwaṯo, na galiŋeṯo đǝño na gaɽǝwađaṯa gǝbërrǝŋaiđia ŋen. ³ ŋen đeṯam ṯa gënǝŋu aŋerṯe gǝṯia ŋuɽu. ŋen đeṯam ṯa gënǝŋu aŋerṯe đǝjeieiano orn ṯa aŋǝđǝrnaṯaralo, na ṯa aŋerṯe gagǝrđe eŋen. ŋen đeṯam ṯa gënǝŋu aŋerṯe gubwa al gǝrusya. ⁴ ŋen đeṯam ṯa gënǝŋu aŋǝrmoṯe leđa ǝllëɽǝŋu na ŋen ŋeɽa gǝlëɽǝŋu ŋope, na ṯa aŋaṯoɽaṯe ñere ñǝlëɽǝŋu ṯa aiñǝmanaṯe na aiñǝmađǝñiṯi eŋen pređ. ⁵ ndǝ eđa gaber gaɽǝwađaṯa garǝmoṯwa leđa leɽa gǝlëɽǝŋu ŋen ŋanṯau gënǝŋu gaɽǝwađaṯa garǝmoṯwa leđa lǝkanisa đǝrǝmwa? ⁶ ŋen đeṯam ṯa gënǝŋu aŋerṯe gëndu ŋen maijǝn, ŋen ŋanṯa ndǝ ŋen ŋafǝṯia aŋgaica gënǝŋu giđ aŋinṯi egare, nṯia liđ alakǝmǝni seṯanya. ⁷ ŋen đeṯam ṯa gënǝŋu gerṯo ŋen ŋaŋǝra leđa nëiñua lǝndëuwǝr. ndǝ ŋen ŋero ŋafǝṯia aŋgaica leđa liđ almasǝki nṯia gënǝŋu giđ aŋëndǝni eŋen ŋǝseṯan. ⁸ nṯia eum leđa ildi lëɽǝnu ṯa alǝđuɽǝđǝnṯi leđa lǝkanisa, ŋen đeṯam ṯa lënǝŋulu aɽrajađaṯe eŋen ṯa leđa aldǝđǝñiṯi. ŋen đeṯam ṯa lënǝŋulu alerṯe lalǝŋǝjǝđia ŋenŋa, na ṯa alerṯe lǝṯia ŋuɽu ŋwaiña, na ṯa alerṯe lonaṯa lǝberṯia laŋge lwaiña. ⁹ ŋen đeṯam ṯa lënǝŋulu alëndeici ŋen ŋǝđonaṯa iyesu iŋi ŋërrǝŋeinu eleđa ǝllëɽǝŋu narena ini naɽwata đeṯam, nero đǝskiniano. ¹⁰ ŋgiṯǝrldo alirnḏeini ananoŋ na ndǝ lǝfiđǝnu lero mǝnna ŋgiṯǝrldo alǝđuɽǝđǝni. ¹¹ nṯia eum ŋen đeṯam ṯa wasenanda aɽrǝjađaṯe eŋen ṯa leđa aldǝđǝñiṯi. ŋen đeṯam ṯa lënǝŋulu alerṯe labwaiđia ŋen na ṯa alëɽǝkǝđia aŋǝno, orn ṯa lerṯo ara gunto eŋen pređ. ¹² ŋen đeṯam ṯa eđa gëɽǝnu ṯa aŋǝđuɽǝđǝni gafo gamo wuji gunto, na ṯa garǝmoṯwa ñere ñǝlëɽǝŋu na ŋen ŋeɽa gǝlëɽǝŋu ŋope. ¹³ leđa ildi lǝduɽǝđǝnu ŋope liđ alǝđǝñini lënǝŋulu, na liđ altuđi đëɽǝni đǝñano đoɽra iđonaṯa igal masiya yesu. ¹⁴ ndǝ igaɽǝwađaṯa, igwonaṯa igiđi eŋeṯa nano ṯwaiñ, orn igaŋǝwërđǝṯia ṯa, ¹⁵ ndǝ ŋen ŋǝnǝŋ ŋëndiñi, ŋaliŋeṯe leđa lëbǝđia ṯau ildi leɽa gǝrǝmwa. eɽa gǝrǝmwa gaɽo kanisa đǝrǝmwa irri ramǝṯia bǝɽǝbǝte, iđi đaɽo lwađe na ađuna lǝŋen ŋǝđeṯam. ¹⁶ đeṯam ŋen ŋoɽra iŋi ŋafo ŋalǝbijǝnu ananoŋ orn điñǝđi ŋërrǝŋeiđǝnu, iŋi lǝgǝbendia, ṯa yesu gaseinu egaŋǝno, giđǝnu gǝlǝŋinu igusila gatǝɽe, na mǝlaiyǝka yaseicǝma na gënǝŋu gërrǝŋeinu eleđa lalo na ŋen ŋǝlëɽǝŋu ŋëndǝnu alo na gënǝŋu gabeinu elo eŋaɽrwa.

¹ usila gatǝɽe gaṯa đurri ṯa iliga lǝnḏurṯu leđa lǝmaṯan liđ aliɽi eŋen ŋǝđonaṯa iyesu ŋen ŋanṯa lënǝŋulu lǝnna ŋen ŋǝnusila ini nǝlmamaṯa eŋen ŋeicia na lǝnna đërrǝŋaiđia ŋen iđi nusila neicia nwaɽwata ² leđala ildi lerṯo ŋen ŋiɽijan na ildi laɽwata ŋaɽǝwen ildi nare enen ini naɽwata đeṯam niđǝnu naɽo tǝgǝtǝg. ³ lënǝŋulu laɽǝtǝriṯia leđa ṯa almamǝđe na laber laŋgiṯia leđa alǝse ŋǝsa ŋǝmaṯan iŋi rǝmwa riṯu leđa ilđi lënđu ŋen ŋǝlëɽǝŋu ṯa alǝse almaŋërṯi nano. ⁴ laŋge pređ laŋǝra ildi rǝmwa riđǝlo na wagero gǝnǝŋ giđǝnu ṯa aŋǝniđǝni ndǝ leđa lamo ldǝŋërṯi rǝmwa nano. ⁵ ŋen ŋanṯa laŋge liđǝnu ltǝɽe ṯia ŋenŋa ŋǝrǝmwa na đǝṯurṯiađa rǝmwa. ⁶ ndǝ agwaɽwatiṯia lorldalo ŋen iŋi agǝđuɽǝđǝnṯia al masiya yesu ŋope, ŋaŋgi agamicini ŋenŋa ŋǝđeṯam na ŋenŋa ŋǝđërrǝŋaiđia ŋen iđi agarǝmoṯwa ṯaŋiđu. ⁷ orn neđo kaiñ ŋen pređ ŋǝpiano iŋi gerṯa ŋǝrǝmwa na ŋaɽo ŋiɽǝṯiano. irnḏeinu mǝlđin eŋen ŋǝrǝmwa. ⁸ đirnḏeicia đaŋǝno đamǝđaṯa leđa aten orn điđia đǝŋen ŋǝrǝmwa điđ ađamǝđaṯe leđa eŋen pređ ŋen ŋanṯa đerṯo ŋen ŋëɽǝnu ŋen ŋanṯa đamǝṯia iđi đalo na ŋen ŋanṯa đamǝṯia iđi điđ ađela. ⁹ ŋen iŋi ŋaɽo đeṯam na ŋarǝjađaṯo ṯa leđa pređ alëndi. ¹⁰ ŋen ŋafǝṯia lǝgǝbǝđia ŋǝmëɽria kaiñ na lǝgǝbirnḏeicia ŋen ŋen ŋanṯa lǝgǝṯurṯia ŋen irǝmwa irri ramǝṯia, rënǝŋu irri raɽo đëbǝria đǝleđa pređ, orn đǝleđa ilđi lëndu ŋen ŋǝlëɽǝŋu đurri. ¹¹ ɽwato ŋërrǝŋaici leđa ŋen iŋi. ¹² ŋerṯe agaŋgiṯia eđa gǝnǝŋ aŋađamǝce eŋen ŋen ŋanṯa agaɽ ëđǝm orn iđu ŋen ŋope jaica jaica ṯa leđa ilđi lënđu ŋen ṯalǝŋirnḏeicu eŋen agwaɽwata na eŋen pređ agëbǝđia na iđubwa na iđonaṯa na iđatǝɽe đegare. ¹³ liga igamǝlu igeṯo ɽaŋo eŋen iŋi ṯa agabëgǝriṯia leđa ađam gǝrǝmwa na ṯa agwaɽwata na agǝbërrǝŋaiđia ŋen ŋǝrǝmwa. ¹⁴ ŋerṯe agaŋgiṯia đanaicia iđi agerṯo iđi usila gatǝɽe ganaicǝŋa eŋen iŋi ŋwalwaɽǝnu ananoŋ liga nǝlǝŋ nǝkanisa nëɽǝŋa raŋ nano. ¹⁵ iđu ŋen iŋi jaiea jaiea. ɽaŋo eŋen iŋi araga gunto ṯa leđa pređ alseici ṯa agoɽra eŋen ŋǝrǝmwa. ¹⁶ rǝmoṯo etam gǝlaɽǝŋa na đërrǝŋaiđia ŋen đǝlaɽǝŋa. ëndeieu ŋen iŋi. ndǝ agëbǝđia ṯia agiđi ŋëbǝri etam gǝlaɽǝŋa na leđa ildi lanaṯǝŋa cum.

¹ ŋerṯe agagariñaṯa lṯwëɽi kaiñ ikanisa orn ekeɽǝđǝlo garno agǝbeɽǝđia eṯalo. nanaieo lëđǝmwa ŋen garno lorldalo. ² nanaieo lǝpo ŋen garno lǝŋgalo na nanaico ñǝŋgenia ŋen garno lorldalo orn ŋenŋa ŋatǝɽe. ³ amǝđaṯo liji ɽrlda ildi lǝṯëđǝnialo ebaŋgenanda laiyo, ildi lero leđa laldamǝee. ⁴ orn ndǝ wuji gǝṯëđǝnialo gerṯo ñere ŋgiṯu ñere iñi aiñërrǝŋeini ananoŋ ṯa aiñiđi ŋen ŋǝrǝmwa eneɽa enen na ṯa aiñamǝđaṯe eṯenanda na lǝŋgenanda ildi lamǝđaṯǝlo ananoŋ. ŋen ṯia ŋëbǝđia rǝmwa raŋǝra nano. ⁵ wuji igi gǝṯëđǝnialo gero ñere, gënǝŋu ṯaŋaṯurṯu ŋen ŋǝrǝmwa, ṯaŋekeɽǝđo rǝmwa ṯaɽwataiđo rǝmwara ulǝŋgi na ëđǝñin. ⁶ orn wuji igi gwonaṯa đeieia đaŋǝno gënǝŋu gaiyo liga gamǝṯia. ⁷ lwaɽǝṯu leđa ŋen iŋi ṯa aliđi, nṯia ṯa alfeṯe mǝnna gero. ⁸ ndǝ eđa gaber gamǝđaṯa leđa leɽa gǝlëɽǝŋu đurri na leđa ildi laɽo ŋǝđurǝba gënǝŋu gabǝlaico ŋen ŋǝrǝmwa na geicia gamiñaṯo eđa igi ganeđo gǝbendia ŋen ŋǝrǝmwa. ⁹ ŋerṯe agǝwërđia wuji gaɽǝbwa gǝṯëđǝnialo ijaḏwal ikanisa illi nd gerṯo nṯǝli eređia đenǝŋ nalo ređ na gafo gerṯo ebaŋgen gunto. ¹⁰ na ŋen đeṯam wuji gǝlǝŋinu eleđa pređ ŋen ŋanṯa ŋǝmëɽria ŋaŋǝra, ṯa gënǝŋu ṯaŋarǝmoṯo ñere ñǝlëɽǝŋu, na galiŋeṯo đǝño, na gwaso rǝmanǝña rǝleđa ɽrǝmwa, na gamǝđaṯo leđa ildi laginu, na ganaiđo etam gǝlëɽǝŋu eŋen pređ ŋaŋǝra. ¹¹ orn neđo ṯa agǝwërđia ñǝŋgenia ildi lǝṯëđǝnialo ijaḏwal ikanisa ŋen ŋanṯa ndǝ đonaṯa đaŋǝno đalabǝleđa igal masiya lënǝŋulu liđ alonaṯe lǝmǝni. ¹² ŋen ŋafǝṯia lënǝŋulu lakǝmǝni ŋen ŋanṯa lǝŋgeieu ŋen nḏurṯu iŋi lëɽu ananoŋ. ¹³ na cum lënǝŋulu lǝbërrǝŋeinia ṯa liđǝña ŋǝmëɽria ŋen ŋanṯa labakaɽalo eneɽa, na gerṯa liđǝña ŋǝmëɽria ikǝrǝŋ orn laliŋǝjǝđia ŋenŋa na ṯalǝpwaiño ŋen ŋǝleđa larto eum, na lǝbaṯa ŋen iŋi ŋeicia ṯa lǝbaṯau. ¹⁴ nṯia igabaṯa, ŋen ŋaŋǝra ṯa lǝŋgenia alǝmǝni allǝŋe ñere aɽrǝmoṯe neɽa nṯia ṯa alerṯe lanaica leđa ildi lageandr liga ṯa alǝndǝđamier eŋen. ¹⁵ leđa lǝmaṯan lamiño eŋen đǝge ldǝteṯe seṯan. ¹⁶ ŋen đeṯam ṯa leđa pređ ɽrwa na ɽrlda ildi lëndu ŋen ŋǝrǝmwa alamǝđaṯe leđa laɽo ŋađurǝba eŋen ildi lǝṯëđǝnialo. ŋerṯe agaŋgiṯia kanisa ṯa ađamǝđaṯe leđa ildi ṯa ađaɽǝwađaṯe đamǝđaṯa leđa ildi lǝṯëđǝnialo lero ñere. ¹⁷ nǝlǝŋ nǝkanisa ini nëbǝđia ŋǝmëɽria eŋen ŋope nënǝŋulu narǝjađaṯo eŋen ṯa aneini đǝpǝɽa ñoman ñiɽijan, nënǝŋulu ini nëbǝđia ŋǝmëɽria kaiñ ṯa anǝɽwate na anërrǝŋaici leđa ŋen ŋǝrǝmwa. ¹⁸ ađam gǝrǝmwa gaṯa, ñerṯe ñagabakasa ŋǝnḏǝri ëiñua iŋi ŋoɽa ŋwala ŋǝlëmu, na ŋen ŋaŋǝra ṯa eđa igi gëbǝđia ŋǝmëɽria aŋǝneini đǝpǝɽa. ¹⁹ ŋerṯe agabaŋǝnṯia đǝskiđia đagea elǝŋ gǝnǝŋ gǝkanisa illi ndǝ leđa liɽijan walla liɽijin lerṯo đamǝđaṯa eŋen iŋi. ²⁰ gariñaṯo elǝŋ igi gaɽaŋa eŋen ŋeicia leđa nëiñua pređ ṯa leđa lǝṯënu aliđǝñiṯalo. ²¹ igaŋwalwaɽǝṯia đwonḏǝṯađa rǝmwa nëiñua na al masiya yesu nëiñua na mǝlaiyǝka ilëɽǝŋu nëiñua isi ywoṯǝnu ṯa ŋiđi ŋen iŋi pređ ŋenŋa ŋaɽǝwaṯo eleđa pređ. ²² ŋerṯe agǝbëɽia leđa raŋ nano taltal nṯia ŋerṯe agaɽo đamǝđaṯa eŋen ŋeicia ŋǝleđa lwomǝn. rǝmoṯo ŋen ṯa ŋaɽaŋe agatǝɽe. ²³ ŋerṯe agǝṯia ŋawa ikǝrǝŋ mǝldin, orn ṯu ŋawa ŋǝtefr ŋinab ŋen ŋanṯa ara gǝlaɽǝŋa na ŋen ŋanṯa đumwa iđi đaŋǝkëndi ñoman ñǝmǝn. ²⁴ ŋen ŋeicia iŋi leđa lǝmaṯan lëbǝđia laseinu taltal nǝŋǝmame đakǝme orn ŋen ŋeicia ŋǝleđa lwomǝn ŋërrǝŋeiđǝni nḏurṯu. ²⁵ nṯia ŋen ŋaŋǝra ŋaseinu na ndǝ ŋero ŋaseini ŋaber ŋaɽǝwađaṯa ŋaɽaŋa ŋalǝbijǝnu.

¹ ŋen đeṯam ṯa lǝbai aliđǝñiṯi leđa lerṯǝlo ŋope, ṯa irǝŋ gǝrǝmwa aŋerṯe gwaɽwatǝni geieia na ṯa đërrǝŋaiđia ŋen ŋǝrǝmwa ađerṯe đađamǝeǝni eŋen. ² lǝbai ildi leđa lerṯǝlo lëndu ŋen ŋǝrǝmwa ŋen đeṯam ṯa lënǝŋulu alerṯe lafo pwa eŋen ṯa liđǝña leđa lerṯǝlo ŋen ŋanṯa laɽo lorǝba. đeṯam lënǝŋulu aldǝđuɽǝđǝnṯi ŋope lamiñaṯa lorǝba ildi lero lǝbendia ŋen ŋǝrǝmwa ŋen ŋanṯa leđa ildi lamǝđeinu ŋǝmëɽriaŋa eŋen lënǝŋulu laɽo lorǝba na lubwaniya. ɽrwato ŋërrǝŋaice leđa ŋen iŋi. ³ nđǝ eđa gǝnǝŋ gǝbërrǝŋaiđia ŋen ŋarto ŋagea ŋen iŋi, nǝŋerṯe gǝbendia ŋen ŋǝđeṯam, fǝŋen ŋelǝŋ igëndr yesu masiya na đërrǝŋaiđia ŋen ŋǝđeṯam, ⁴ eđa igi ginia egare, nǝŋerṯe galiŋeṯo ŋen ŋǝnǝŋ na gënǝŋu gerṯo đonaṯa đǝɽiano ṯa aŋukuɽǝbijǝđǝṯi eŋen. laŋge ilđi latuđi đǝgiaṯa ŋen na đǝgerđia na đwaɽwata đagea leđa na ŋen ŋeicia eŋaṯǝɽa ŋagea leđa, ⁵ na đǝbwaiñǝđia đǝleđa ildi ŋaṯǝɽa eŋen ŋǝɽiano, na ildi lero ŋen ŋǝđeṯam ildi lǝbaṯa ṯa leđa lǝbendia ŋen ŋǝrǝmwa illi ṯa ŋen eŋen aŋaɽǝjeini. ⁶ đëndia đǝŋen ŋǝrǝmwa đeṯam đabaɽǝjaica ŋen iŋëlǝŋ nđǝ lǝgaŋǝra nano enare, đǝtësǝni đero. ⁷ ŋen ŋanṯa ŋen lǝgǝlǝŋǝnu alo lǝgero laŋge na lǝgaber lǝgaɽǝwađaṯa lǝgapa laŋge ndǝ lǝgamiña alo. ⁸ ndǝ lǝgerṯo ŋǝsa na ndrena lǝgiđi albeṯe laŋgela ildi. ⁹ leđa ildi labakađǝna laŋge lwaiña lënǝŋulu lǝbiɽi iđirnḏeicia na elaŋge ilđi lǝlëndia na iđonaṯa đwaiña đeicia iđi đǝpiano na đalmamǝṯi ŋen ŋeicia na iđi đǝbënǝcia leđa iđagera na iđamǝnđëđǝnia. ¹⁰ đubwa al gǝrusya đatuđi ŋen pređ ŋeicia. leđa lǝmaṯan ildi lëɽǝđiaŋǝno ṯa alerṯe laŋge lwaiña lënǝŋulu lamiñǝnu eŋen ŋǝrǝmwa đëɽǝđiaŋǝnođa iđi, na ŋen ŋwaiña ŋubwa ṯaŋalǝđo enare. ¹¹ orn aganǝŋa, ŋaŋgi agaɽ eđa gǝrǝmwa đeṯam obǝđo elaŋge ildi. lëldiñu ŋen ŋuđǝrwaṯo na ŋen ŋǝrǝmwa na đonaṯa na đubwa na đwonḏǝṯa na đǝđǝrnaṯaralo. ¹² ɽaŋo mǝlđin iđǝbwaiñǝđia đaŋǝra đǝđonaṯa iyesu. ëndeicu đamǝṯia đǝbǝɽǝbǝte. agafo agunđǝđǝnu na agwalwaɽo ŋope iđonaṯa đǝlaɽǝŋa iyesu masiya leđa nëiñua lwaiña ṯa ŋiđi ṯia. ¹³ rǝmwa nëiñua irri rananaicia laŋge pređ đamǝṯia na al masiya yesu nëiñua igi gwalwaɽo ŋen ŋǝđeṯam bilaṯus nëiñua al bunṯi, ¹⁴ igaŋeɽǝđia ṯa aŋarǝmoṯe ŋen iŋi rǝmwa ranaicǝŋa ṯa aŋfeṯe mǝnna gero na đǝskinia đero liga đamiña đelǝŋ igëlǝŋ yesu masiya đamǝlu đeṯo. ¹⁵ ndǝ liga lafo ildi lëɽǝnu rǝmwa irri raɽnda irri runto na rǝbuŋǝnṯu irri raɽo malik imǝluk na elǝŋ gǝnǝlǝŋ, rënǝŋu riđ arërrǝŋaiđe đamiña iđi đǝyesu. ¹⁶ rënǝŋu runto rerṯo đamǝṯia đǝbǝɽǝbǝte bǝɽan na rafo igarrerre irri eđa gero gǝnǝŋ gaɽǝwađaṯa gaijomaṯa irri eđa gero gǝnǝŋ gaseicu walla gaɽǝwađaṯa gaseicia. đame đǝlëɽǝŋu na ŋabǝɽa ŋǝbǝɽǝbǝte ŋǝlëɽǝŋu. amin. ¹⁷ ɽwatiṯu leđa mǝldin ildi lerṯo laŋge lwaiña lalo isi, ṯa alerṯe lǝbinia enare na ṯa alerṯe laŋǝđeini elaŋge ildi lero lǝlǝŋini orn ṯa alaŋǝđeini irǝmwa irri rǝndǝnanaiciar laŋge pređ kaiñ ṯa alaŋǝreṯr nano iŋulu. ¹⁸ ɽwatiṯǝlo eum ṯa aliđi ŋen ŋaŋǝra na ṯa alerṯe ŋǝmëɽria ŋwaiña ŋaŋǝra na ṯa alliŋeṯe đǝño na ṯa alǝmeđǝño labakarnǝđia laŋge elden leđala lwomǝn. ¹⁹ ndǝ lënǝŋulu lëbǝđia ṯia liđ alađǝri laŋge lwaiña ildi alɽeṯe ađuna yaŋǝra ŋen ŋanṯa liga lamǝlu leṯo, ṯa alëndeici đamǝṯia iđi đaɽo đamǝṯia đǝđeṯam. ²⁰ ṯimǝđawus, rǝmoṯo ŋen iŋi aganeinu. neđo đǝkëɽi ŋen ŋǝpiano na đagera ŋen iđi leđa lǝmaṯan lǝbaṯa đaɽo đaliŋeṯa orn gerṯa fǝṯia. ²¹ leđa lǝmaṯan lëndǝṯu đonaṯa alo iyesu ndǝ laṯa ṯa lerṯo đaliŋeṯo iđi. igǝbeɽǝđia ṯa đǝbuŋṯia đǝrǝmwa ñafeṯǝldǝga.