1 kǝrunđus

¹ fiñi bulus, ñiŋgi igundǝđǝnu eŋen ŋǝŋǝma ŋǝrǝmwa ṯa eɽeṯe eđa gǝđweinu gal masiya yesu, na sosṯanis oraiñ igëndr. ² ñageɽǝđo leđa lǝkanisa đǝrǝmwa alo ikǝrunđus, ildi liđǝnu ltǝɽe igal masiya yesu, ildi luṯǝnu egworǝb ltǝɽe leđala lalo pređ ildi lurǝndǝđia irǝŋ gelǝŋ igëndr yesu masiya, elǝŋ egen na igëndr. ³ igǝbeɽǝđia ṯa rǝmwa papa igëndr na elǝŋ yesu masiya aŋǝndǝnaice đǝbuŋṯia đusila na đëuṯaralo. ⁴ ñoman pređ igaŋërṯu rǝmwa nano rǝlëɽǝñi ŋen ŋanṯa ñaŋ, ŋen ŋanṯa đǝnaieia mǝɽǝmǝɽeñ đǝrǝmwa iđi al masiya yesu ganaieǝnde, ⁵ ŋen ŋanṯa ñagiđǝnu ñagaɽo nǝlǝŋ iŋu laŋgela pređ, egole pređ, na eđaliŋeṯa pređ, ⁶ ŋen ŋarno đamǝđaṯa đal masiya đërrǝŋeiđǝnu eñaŋ ṯa đǝđeṯam. ⁷ nṯia ñaŋ ñagero ñagafo pwa iđǝnaieia đǝnǝŋ đusila gǝrǝmwa liga ñagaṯurṯia đamiñaṯa đelǝŋ igëndr yesu masiya, ⁸ gënǝŋu igi giđ aŋǝndiđi ñagwonḏǝṯo liga lǝnḏurṯu lamǝlu leṯo đǝskinia đernde nano iloman lelǝŋ igëndr yesu masiya. ⁹ rǝmwa ruđǝrwaṯo eŋen na rënǝŋu rundǝđǝnde eđǝɽǝbǝđia eŋen điđia gǝlëɽǝŋu yesu masiya igi gaɽ elǝŋ igëndr. ¹⁰ điñǝđi igǝndeɽǝđia, lorldaiñ, irǝŋga gelǝŋ igëndr yesu masiya ṯa ñerṯe ŋen ŋunto, na ñerṯe ñagaberṯia ŋen ɽetǝɽeteo, orn ṯa ñaɽeṯe ñagunto eđonaṯa đunto na eŋen ŋunto. ¹¹ ŋen ŋanṯa leđa lǝkulawi lalwaɽǝṯiñi ŋen eŋalo, lorldaiñ, ṯa ñagerṯo đǝgerđia enare enalo. ¹² fǝŋen igwalwaɽǝṯia ṯa ñaŋ pređ ñagwaɽwata ŋen ɽetǝɽeteo. eđa gǝnǝŋ gǝbaṯa, igǝbulus, na gwomǝn gǝbaṯa, igënǝñi igabullus, na gwomǝn gǝbaṯa, igënǝñi igǝsifa, na gwomǝn gǝbaṯa, igënǝñi igal masiya. ¹³ al masiya gaɽo ɽetǝɽeteo? bulus gaiyǝṯǝnde iđuɽi? ñaganeinu mamuḏiya irǝŋga gǝbulus? ¹⁴ igaŋërṯu rǝmwa nano ŋen ŋanṯa igero iganaicia eđa gǝnǝŋ mamuḏiya eñaŋ illi krusbus na gaiyus, ¹⁵ ŋen ŋanṯa eđa gero gǝnǝŋ gaɽǝwađaṯa gǝbaṯa ṯa ganeinu mamuḏiya irǝŋga gǝlëɽǝñi. ¹⁶ na iganaico leđa lisṯǝfanus mamuḏiya eum. igaṯa aŋgaica igero iganaicia eđa gǝnǝŋ mamuḏiya tǝŋ. ¹⁷ al masiya gero gaiñǝđwaṯa ṯa enanaiđe mamuḏiya, orn ŋen ŋanṯa yërrǝŋaiđe ŋen ŋaŋǝra ŋǝrǝmwa gerṯa ŋenŋa ŋǝđaliŋeṯa ŋen nǝsi ṯa ŋen ŋǝđuɽi đǝyesu aŋerṯe ŋǝbǝđǝni ŋǝpiano. ¹⁸ ŋen ŋǝđuɽi ŋǝpiano eleđa ildi lamǝndëđǝni, orn ŋaɽo ŋabǝɽa ŋǝrǝmwa inëndr, lëŋgr lǝgëbǝrnr. ¹⁹ ŋen ŋanṯa ŋen ŋǝwërđǝnu ṯa, igiđ egere đaliŋeṯa ŋen nǝsi đǝleđa laliŋeṯo ŋen nǝsi, na igiđi yela iŋgeici ŋaṯǝɽa ŋǝleđa ildi lerṯo ŋaṯǝɽa. ²⁰ eđa gwuŋga igi galiŋeṯo ŋen nǝsi? eđa gwuŋga igi gǝbërrǝŋaiđia ŋen ŋal ganun? eđa gwuŋga igi gagerđe olega iliga ildi ? rǝmwa rero rëbǝđia đaliŋeṯa ŋen nǝsi đalo isi đǝpiano? ²¹ rǝmwa rëɽu ŋen đaliŋeṯađa ŋen nǝsi đǝlëɽǝŋu ṯa leđa lalo alerṯe laliŋeṯa rǝmwa đaliŋeṯađa ŋen nǝsi, na ŋen ŋafǝṯia ŋen nǝŋërṯi rǝmwa nano ṯa arëbǝri leđa ildi lǝbendia ŋen đërrǝŋaiđiađa iŋi leđa lǝbaṯa ṯa đǝpiano. ²² al yawuḏ yabekeɽǝđia yonaṯa iseicia ŋamǝla, na al yunaniyin yonaṯa đaliŋeṯa ŋen nǝsi. ²³ orn lëndr lǝgabërrǝŋaiciar leđa ŋen ŋal masiya igi gaɽiñǝnu iđuɽi. ŋen iŋi ŋarno đar đǝbakǝrǝŋaicia igal yawuḏ na ŋen ŋǝpiano igal yunaniyin, ²⁴ orn eleđa ildi luṯǝnu, al yawuḏ na al yunaniyin, al masiya gaɽo ŋabǝɽa ŋǝrǝmwa na dliŋeṯa ŋen nǝsi đǝrǝrnwa. ²⁵ leđa lebaṯa ṯa ŋen ŋǝrǝmwa ŋǝpiano, orn ŋen iŋi ŋerṯo đaliŋeṯa ŋen nǝsi ŋamiñaṯo leđa na leđa lǝbaṯa ṯa rǝmwa rëbia đǝñano orn ŋen iŋi leda laṯa ṯa fǝđëbia đǝrǝmwa ŋerṯo ŋabǝɽa ŋwaiña ŋamiñaṯo leđa. ²⁶ lorldaiñ, lëldǝŋǝdeinr eŋen ṯa rǝmwa rundǝđǝnde ṯau. leđa lǝmaṯan lǝtefr eñaŋ ildi laliŋeṯo ŋen nǝsi eŋen ŋalo, na ildi loɽra eŋen, na ildi lǝlǝŋǝnu inǝlǝŋ. ²⁷ orn rǝmwa roṯo laŋge lǝpiano lalo ṯa alǝđame leđa ildi laliŋeṯa ŋen nǝsi, na rǝmwa roṯo laŋge lëbia, ṯa alǝđame leđa ildi lerṯo ŋabǝɽa. ²⁸ rǝmwa roṯo laŋge laldoŋai lalo na laŋge laniđǝnu na laŋge ildi larno lero ṯa aliđi laŋge ildi lafo điñǝđi lǝpiano, ²⁹ ṯa eđa gero gǝnǝŋ gaɽǝwađaṯa gëminia bǝɽan rǝmwa nëiñua. ³⁰ orn ŋen ŋanṯa ŋu ñaŋ ñagafo igal masiya yesu, na rǝmwa riṯǝndǝrnar đaliŋeṯa ŋen nǝsi đǝlëɽǝŋu, na ŋen ŋuđǝrwaṯo na đatǝɽe na đǝpǝɽa iđi đëbǝrndr. ³¹ nṯia ŋen ŋarno ŋǝwërđǝnu ṯa, eđa gëminia ŋgiṯǝmar aŋëmini egelǝŋ yesu.

¹ ŋen ŋafǝṯia lorldaiñ, liga igeṯǝnde nano na iganaieǝnde đamǝđaṯa đǝrǝmwa, igero igeṯo đǝɽwatađa đoɽra walla đaliŋeṯađa ŋen nǝsi. ² igëɽu ŋen ṯa igaijǝba waŋgǝnǝŋ ndǝ lǝgafr, illi yesu masiya gunto na ṯa feŋu igi gǝɽiñǝnu iđuɽi. ³ na igënǝñi lǝgafr, iđëbia na eŋǝđaiña na eđǝgarđia đwaiña. ⁴ na đǝɽwata đǝlëɽǝñi na ŋen igërrǝŋaieǝnde lero đǝbǝrldiđinia garno ŋen ŋǝđaliŋeṯa ŋen nǝsi đǝleđa, orn lërrǝŋeiđǝnu ṯa lǝđeṯam usilaga gatǝɽe na ŋabǝɽaŋa, ⁵ ṯa đonaṯa eđalo ađerṯe đaɽaŋa iđaliŋeṯa ŋen nǝsi đǝleđa, orn eŋabǝɽa ŋǝrǝmwa. ⁶ orn nanda ñagwaɽwata đaliŋeṯa ŋen nǝsi eleđa ildi lǝɽiñǝđeinu, orn gerṯa đaliŋeṯa ŋen nǝsi đǝleđa lǝliga ildi, walla đǝnǝlǝŋ nǝliga ildi ini nǝbǝđǝni nero ŋeniano. ⁷ orn ñagwaɽwata đaliŋeṯa ŋen nǝsi đǝrǝmwa iđi đafo eŋamǝɽa na đalǝbijǝnu, iđi rǝmwa rǝṯoɽaṯo ŋen ramǝlu rëbǝđia alo ṯa alneinr ŋaɽrwa. ⁸ elǝŋ gero gǝnǝŋ enǝlǝŋ nǝliga ildi galiŋeṯo ŋen iŋi, ŋen ŋanṯa gǝbanṯa naliŋeṯo ṯa nero naɽiña elǝŋ igi gerṯo ŋaɽrwa. ⁹ orn garno ŋen ŋǝwërđǝnu ñagwaɽwata, ŋen iŋi isi yero iseicia na nënǝñia nero nǝnna na ŋero ŋabenṯia eđa egare, fǝŋen iŋi rǝmwa rëɽǝṯǝlo ildi lubwaiya. ¹⁰ orn rǝmwa rǝŋaicǝndr laŋge ildi usilaga gǝlëɽǝŋu, ŋen ŋanṯa usila gagagwonḏǝđia eŋen pređ, a, ŋen ŋǝrǝmwa iŋi leđa laber laɽǝwađaṯa laliŋeṯa. ¹¹ ŋen ŋanṯa esegi galiŋeṯo ŋen ŋeđa gǝnǝŋ, illi usila geđa igi gafǝmau? nṯia eđa gero gǝnǝŋ galiŋeṯo laŋge ɽrǝmwa illi usila gǝrǝmwa. ¹² orn nëndr gerṯa lǝgǝneinr usila galo, orn usila igi geṯo irǝmwa ṯa nëndr alliŋeṯr laŋge ildi rǝmwa rananaicǝndrǝldo. ¹³ fǝlaŋge ildi ñagwaɽwatǝlau, gerṯa ŋenŋa iŋi đaliŋeṯa ŋen nǝsi đalo đǝndërrǝŋaicia, orn ŋenŋa iŋi usila gatǝɽe gǝndërrǝŋaicia. ñagǝbërrǝŋaicia leđa ŋen ŋusila ildi lerṯo usila nano gǝrǝmwa. ¹⁴ orn eđa galo gaber gǝbaŋǝnṯi laŋge lusila gǝrǝmwa ŋen ŋanṯa ŋen ŋǝpiano iŋu, na gaber gaɽǝwađaṯa galiŋeṯa, ŋen ŋanṯa lënǝŋulu lalǝŋinu usilaga gǝrǝmwa. ¹⁵ orn eđa gerṯo usila nano gǝrǝmwa gǝbirnḏeicia ŋen pređ orn eđa gero gǝnǝŋ gaminḏeicia. ¹⁶ ŋen ŋanṯa esegi galiŋeṯo ŋaṯǝɽa ŋelǝŋ rǝmwa ṯa gaɽǝwađaṯa gabërrǝŋaieia rǝmwa ŋen ? orn nëndr lǝgerṯr ŋaṯǝɽa ŋal masiya.

¹ orn lorldaiñ, igero igaɽǝwađaṯa igandǝɽwatiṯia garno leđa ildi lerṯo usila nano gǝrǝmwa, orn garno leđa laŋǝno, garno ñere ñǝrra igal masiya. ² iganaieǝnde ŋan ṯa ñëṯi na gerṯa ŋǝsa ŋen ŋanṯa ñagero ñagaɽǝwađaṯa, na ñagamǝlu ñagaɽǝwađaṯa ñagasa ŋǝsa. ³ ŋen ŋanṯa ñagaɽo leđa laŋǝno mǝldin. ndǝ đǝgiaiđia eŋen na đǝgerđe eŋen lafo eñaŋ gerṯa ñagaŋǝno? gerṯa ñaŋ ṯiñerldo garno leđa laŋǝno? ⁴ ŋen ŋanṯa ndǝ eđa gǝbaṯa, igënǝñi igǝbulus, na gwomǝn tǝŋ gǝbaṯa, igënǝñi igabullus, gerṯa ñagaɽo leđa laŋǝno? ⁵ abullus gaɽo wande? na bulus gaɽo wande? lënǝŋulu laɽo leđa ildi lǝđuɽǝđǝnia ildi ñagëndu ŋen iŋulu, garno elǝŋ rǝmwa ranaieǝllo ŋen. ⁶ igakađo na abullus ṯaŋarǝjaico ŋawa, orn rǝmwa rubǝđia ŋǝlwa. ⁷ nṯia gënǝŋu igi gakađo na gënǝŋu igi garǝjaica ŋawa, lënǝŋulu larno wagero, illi rǝmwa irri rubǝđia ŋǝlwa. ⁸ điñǝđi gënǝŋu igi gakađa na gënǝŋu igi garǝjaica ŋawa laɽǝwaṯo eŋen. na lënǝŋulu liđ alneini đǝpǝɽa ŋen ŋarno ŋǝmëɽria liđu. ⁹ nanda ñagëbǝđia ŋǝmëɽria rǝmwala, ñaganǝñaŋ ñagaɽo gi gǝrǝmwa na ñagaɽo đwëđǝnia đǝrǝmwa. ¹⁰ garno đǝnaicia mǝɽǝmǝɽeñ đǝrǝmwa iđi rënǝŋu ranaicǝñi igënǝñi igiđu ađuna eđabijǝđia, garno eđa galiŋeṯo ŋen nǝsi gabijǝđia neɽa, na eđa gwomǝn tǝŋ gwađa nađuna eđape. orn ŋgiṯu eđa gǝnǝŋ aŋarǝmoṯe ŋen ṯa fǝṯau gwađa nađuna eđape. ¹¹ ŋen ŋanṯa eđa gero gǝnǝŋ gaɽǝwađaṯa gëbǝđia ađuna imǝn tǝŋ illi isi yiđǝnu đǝge, yënǝŋu yesu masiya. ¹² ndǝ eđa gǝnǝŋ gwađa nađuna isi ḏaǝb walla faḏḏa, walla ŋwandra ŋwaiña iliano walla oṯe, walla ŋaiña ŋwonḏǝṯo, walla ŋobe, ¹³ ŋǝmëɽria ŋǝleđa pređ ŋiđ aŋǝlǝŋini. loman lakǝl liđ alǝŋeini isiaya, na isia yiđ aiyikirnḏeici ŋǝmëɽria ŋǝleđa pređ ṯa ŋaɽo ṯau. ¹⁴ ndǝ ŋǝmëɽria ŋeđa gǝnǝŋ ŋafo ŋope isia gënǝŋu giđ aŋǝneini đǝpǝɽa. ¹⁵ orn ndǝ isia yuɽu ŋǝmëɽria ŋeđa gǝnǝŋ, gënǝŋu gaber giđ aŋǝneini đǝpǝɽa, gënǝŋu giđ aŋëbǝrni orn garno eđa gamiña isia. ¹⁶ ñagaijǝbǝnnano ṯa ñaŋ ñagaɽo eɽa gatǝɽe gǝrǝmwa, na usila gǝrǝmwa gafǝndau? ¹⁷ ndǝ eđa gǝnǝŋ gagera eɽa gatǝɽe gǝrǝmwa, rǝmwa riđ arǝmagere, ŋen ŋanṯa eɽa gatǝɽe gǝrǝmwa gaɽo gatǝɽe. na ñaŋ ñagaɽo eɽa gatǝɽe igi. ¹⁸ ñerṯe ñaŋgiṯi eđa gǝnǝŋ gǝbǝđǝni ŋađǝna bǝɽan. ndǝ eđa gǝnǝŋ eñaŋ gǝbaṯa ṯa gerṯo đaliŋeṯa ŋen nǝsi đalo ŋgiṯǝmar aŋpiṯano, ṯa gënǝŋu giđ aŋerṯe đaliŋeṯa ŋen nǝsi đǝđeṯam. ¹⁹ ŋen ŋanṯa đaliŋeṯa ŋen nǝsi đalo đaɽo ŋen ŋǝpiano rǝmwa nëiñua, ŋen ŋanṯa ŋen ŋǝwërđǝnu ṯa, rënǝŋu rǝbekendia leđa ildi laliŋeṯo ŋen nǝsi ŋađǝnaŋa eŋen. ²⁰ na ŋen ŋǝwërđǝnu tǝŋ ṯa, elǝŋ rǝmwa raliŋeṯo ŋen ŋǝleđa ildi laliŋeṯo ŋen nǝsi ṯa ŋǝpiano. ²¹ ŋen ŋafǝṯia ñerṯe ñaŋgiṯi eđa gǝnǝŋ ṯa gëminia eŋen ŋǝleđa, ŋen ŋanṯa laŋge pređ eldalo, ²² ndǝ bulus walla abullus walla sifa walla alo walla đamǝṯia, walla ŋǝɽaiñ, walla laŋge ildi lafo điñǝđi walla laŋge ildi lamǝlu leṯo, ildi pređ eldalo, ²³ na ñaŋ ñagal masiya na al masiya gǝrǝmwa.

¹ ŋgiṯr eđa aŋaṯa ṯa nanda ñagaɽo leđa ildi lǝđuɽǝđǝnṯia al masiya, ildi ɽrǝmoṯwa ŋamǝɽa ŋǝrǝmwa. ² orn cum ŋen đeṯam eleđa ilđi ɽrǝmoṯwa ŋen ŋǝrǝmwa, ṯa eđa aŋfiđǝni ṯa guđǝrwaṯo eŋen. ³ orn ŋen ŋǝpiano ñi nano ndǝ iginḏeinu eñaŋ walla nǝsǝria eleđa. orn cum igaber igirnḏeini bǝɽan. ⁴ igaijǝbǝnnano ŋen ŋǝnǝŋ ŋaiñagea, orn eŋen iŋi, ŋen ŋaber ŋaɽǝwađaṯa ŋǝlwaɽǝni ṯa igero mǝnna. eđa igi gaiñirnḏeicia, fǝŋu elǝŋ yesu. ⁵ ŋen ŋafǝṯia, ñerṯe ñagakǝme wagǝnǝŋ ndǝ liga lamǝlu ildi lëɽǝnu, ŋen elǝŋ yesu gamǝlu geṯo. gënǝŋu giđ aŋǝme laŋge ildi lalǝbijǝnu lǝŋǝrǝmia egarrerre, na giđ aŋiđi ŋen ŋǝnare nǝleđa ŋǝlǝŋinu. orn leđa pređ liđ alneini đame eđen irǝmwa. ⁶ lorldaiñ, igëɽu ŋen iŋi ŋen ŋanṯa ñi na abullus ŋen ŋanṯa ñaŋ, ṯa enanda ñaliŋeṯe ṯa ñerṯe ŋen ŋǝđeṯam ŋarno ŋǝwërđǝnu eleđa, ṯa ñaŋ ñerṯe ñagabinia enare ñalwaɽe ṯa eđa gǝnǝŋ goɽra gamiñaṯo orǝba gǝnǝŋ. ⁷ ŋen ŋanṯa esegi giđiaŋa agoɽra? na agerṯo wande igi agero agǝneini ? orn ndǝ cum aganeinu agëminia bǝɽan ṯau garno agero agǝneini? ⁸ điñǝđi ñaganǝñaŋ ñagabeṯo. điñǝđi ñagaɽo leđa ildi lerṯo laŋge lwaiña. ñaŋ ñagaɽo nǝlǝŋ bǝɽan nanda ñagero. igwonaṯa ṯa ñaɽeṯe nǝlǝŋ đeṯam, na eum nanda lǝgaɽr nǝlǝŋ. ⁹ igaṯa ṯa rǝmwa rërrǝŋaiđǝnde ñaŋgi ñagaɽo leđa ǝllëɽǝŋu lǝđweinu ṯa ñagafo leđa nḏurṯu pređ, garno leđa luṯǝnu ṯa liđ alaiye, ŋen ŋanṯa ñagaɽo đǝseieia alo na emǝlaiyǝka na eleđa. ¹⁰ nanda ñagaɽo leđa lǝpiano ŋen ŋanṯa al masiya, orn ñaŋ ñagaliŋeṯo ŋen nǝsi igal masiya, nanda ñagëbia đǝñano orn ñaŋ ñagwonḏǝṯo, ñaŋ ñagananeim ŋaɽrwa orn nanda ñaganiđǝnu. ¹¹ na điñǝđi mǝldin nanda ñagaicoiña na aŋal garrande eum, nanda ñagero ndrena, ñagarieinia ŋǝɽǝtǝbiaŋa na ñagero neɽa, ¹² ñagaiewërini bǝɽan ndǝ ñagëbǝđia ŋǝmëɽria raŋra. ndǝ leđa landǝđamǝce eŋen ṯǝñalǝbuŋṯu, ndǝ leđa lǝnđǝnanaicia ŋen ŋubwa ṯǝñaɽiñaṯo ŋen iŋi. ¹³ ndǝ leđa landǝnaicia ŋen ŋeicia ṯǝñaɽwatiṯu ŋen ŋame. nanda ñagaɽo ŋarldeđa ŋalo, nanda nǝñarneṯe lange-linidunu eleđa pređ điñǝđi mǝldin. ¹⁴ igaber igawërđia ŋen iŋi ŋen ŋanṯa indiđi ñagirǝwano orn endamǝđaṯe garno ñere ñǝlëɽǝñi ñubwiniya. ¹⁵ ñagerṯo leđa lwaiña lǝndarǝmoṯwa igal masiya orn ñagero ñagaberṯia eṯalanda lwaiña, ŋen ŋanṯa igal masiya yesu igalǝŋǝnde ŋenŋa ŋaŋǝra ŋǝrǝmwa, ¹⁶ ŋen ŋafǝṯia igǝndeɽǝđia ṯa ṯǝñaiñirnḏeieu. ¹⁷ fǝŋen iŋi igǝndǝđweiṯia ṯimǝđawus igi gaɽ iđia gǝlëɽǝñi igubwamaiya, gerṯo ŋen ŋuđǝrwaṯo egelǝŋ yesu gënǝŋu giđ aŋǝndǝlëldǝŋǝđaieia eŋen ŋǝlëɽǝñi iŋi igal masiya, garno igabërrǝŋaicia leđa ikanisa alo pređ. ¹⁸ leđa lǝmaṯan eñaŋ linia enare, laṯa ṯa igaber igiđ endeṯa nano, ¹⁹ orn igiđi endeṯa nano taltal ndǝ elǝŋ yesu gameđǝño, na igiđ enwane gerṯa ŋen ŋǝleđa ildi linia enare orn ŋabǝɽa eŋen, ²⁰ ŋen ŋanṯa ŋǝlǝŋe ŋǝrǝmwa ŋero ŋafo eŋen orn ŋafo eŋabǝɽa. ²¹ ñagwonaṯa wande ? igiđ endeṯa nano ëupwaiya walla đubwiđiađa na ŋenŋa ŋǝđǝđǝrnaṯaralo?

¹ leđa lǝbaṯa ṯa đaɽaŋa wujiga garto đafo eñaŋ nṯia đeicia kaiñ iđi đero eleđa ildi laijǝba rǝmwa, ṯa eđa gǝnǝŋ gamo wuji geṯen. ² na ñaganǝñaŋ ñaginia enare mǝldin. gerṯa ŋen ŋaŋǝra ñagwana ṯa ñamiñeici eđa ndëuwǝr eñaŋ igi giđu ŋen iŋi? ³ igero igǝndaufia egaŋǝno orn igafǝndau usilaga, na garno eđa gafo, igënǝñi igakǝmo eđa igi giđu ŋen iŋi. ⁴ irǝŋga geŋ yesu, rraiđr ldǝɽo na usilaga gǝlëɽǝñi na ŋabǝɽaŋa ŋelǝŋ yesu ⁵ ṯa ñanaice seṯan eđa igi giđu ṯia ŋen ŋanṯa đagera đaŋǝno, ṯa usila gǝlëɽǝŋu aŋëbǝrni iloman lelǝŋ yesu. ⁶ đëminia eđalo đero đaŋǝra. ñagaijǝbǝnnano ṯa uđǝɽi gatefr gupini aicǝbano pređ? ⁷ ŋen ŋafǝṯia ŋgeicr uđǝɽi igi gaicǝwaro ṯa ñaɽeṯe aicǝba gǝmaijǝn, ŋen ŋanṯa đeṯam ñagarno aicǝba igi uđǝɽi gerau. ŋen ŋanṯa al masiya gǝɽǝđǝnṯǝndr igi gaɽo ŋaŋala iŋëndr ŋǝđǝsa đal fissa. ⁸ ŋen ŋafǝṯia ŋgiṯǝndr aliđr đǝsa gerṯa uđǝɽiga gaicwaro, na gerṯa uđǝɽiga gǝŋen ŋeicia na gǝŋǝmëɽria ŋeicia, orn aicǝbaga igi uđǝɽi gerau igi gǝđatǝɽe na gǝđeṯam. ⁹ igǝwërđǝṯǝnde egađam, ṯa ñerṯe ñagafafia leđala ildi laɽaŋa lijila ɽrto, ¹⁰ orn igero igwalwaɽo eŋen ŋǝleđa lalo isi ildi laɽaŋa lijila ɽrto, walla ildi lamǝñeđǝñano walla laɽo ndom, walla leđa ildi lukwuđiñǝṯia laŋge alo lǝpiano, ndǝ ñagaŋgiṯǝlo kwai kwai gǝbanṯa ñaŋgaṯe alo. ¹¹ orn igǝwërđǝṯǝnde ṯa ñerṯe ñagafia eđala gëmjǝnu oralo, ndǝ gënǝŋu gaɽaŋa wujiga garto walla gamǝñeđǝñano walla gukwuđiñǝṯia laŋge alo lǝpiano walla gađamǝca leđa eŋen walla gǝramǝɽua walla gaɽ oɽom. đeṯam cum ñerṯe ñagasa eđala igi. ¹² fǝṯau igakǝme leđa ndëuwǝr? gerṯa leđa ildi lafo egwaŋ lǝkanisa ildi ñagǝlakǝme? ¹³ orn rǝmwa riđ arakǝme leđa ndëuwǝr. miñeicr eđa geicia eñaŋ.

¹ eđa gǝnǝŋ eñaŋ, ndǝ gerṯo ŋen ŋagea eđa gǝnǝŋ gero ŋǝđaiñano ṯa gabǝṯa nǝsǝria leđa nëiñua ildi lǝɽiano eŋen, na gerṯa gabǝṯa leđa nëiñua ltǝɽe? ² ñagaijǝbǝnnano ṯa leđa ildi ltǝɽe liđ alinḏeici alo? na ndǝ ñaŋ ñagiđi ñinḏeici alo, gerṯa ñagaɽǝwađaṯa ñaginḏeicia ŋen iŋi ŋǝtefr? ³ ñagaijǝbǝnnano ṯa nëndr lǝgiđr alinḏeicr mǝlaiyǝka? na ŋen iŋi ŋamiñaṯo lorǝba kaiñ ṯa ñinḏeiei ŋen ŋǝđamǝṯia iđi. ⁴ ndǝ điñǝđi ñaŋ ñaginḏeicia ŋen ŋǝđamǝṯia iđi, ñagëndu leđa ildi lëbia eŋen ikanisa ṯa alinḏeici ŋen? ⁵ igwalwaɽo ṯia ṯa indiđi ñagirǝwano. đeṯam eđa gero gǝnǝŋ gerṯo đaliŋeṯa ŋen nǝsi eñaŋ igi gaɽǝwađaṯa gabirnḏeicia elorldalanda ? ⁶ orn eđa gǝnǝŋ gabǝṯa orǝbaga nǝsǝria, nṯia leđa nëiñua ildi lero lǝbendia ŋen ŋǝrǝmwa. ⁷ đeṯam ŋen ŋafo mǝnna eñaŋ, ṯa ñagëbǝđia sǝria. orn ŋen ŋanṯau ñagaber ñagaɽiñaṯa ŋen ŋeicia ŋiđǝnṯǝnde na ŋen ŋǝleđa ildi lasǝnde? ⁸ orn ñaganǝñaŋ ñagëbiṯia leđa ŋen ŋeicia na ñagasaṯa leđa ildi laɽo lorldalanda. ⁹ ñagaijǝba ṯa leđa lǝɽiano eŋen laber liđ aɽrraṯe eŋǝlǝŋe ŋǝrǝmwa? ñerṯe ñaŋgiṯi eđa gǝnǝŋ gebǝđǝni ŋađǝna. leđa ildi laɽaŋa lijila ɽrǝto, lamameinu eneɽa walla ñereña ñamǝlu ñamameim eneɽa na leđa ildi lukwuđiñǝṯia laŋge alo lǝpiano, na leđa ildi laɽaŋa leđala laɽo yamwaɽe, ¹⁰ na ndom, na leđa ildi lamǝñeđǝñano, na leđa ɽramǝɽna. na ildi lađamǝca leđa eŋen na ildi lasaṯa leđa lënǝŋulu laber liđ aɽrraṯe eŋǝlǝŋe ŋǝrǝmwa. ¹¹ na lǝmaṯan eñaŋ lafo lafo ṯia, orn ñagafo ñagwasǝnu, orn ñagafo ñagiđǝnu ñagatǝɽe, na ñagiđǝnu ñaguđǝrwaṯo eŋen rǝmwa nëiñua, irǝŋga gelǝŋ yesu, na usilaga gǝrǝmwa irëndr. ¹² ŋen pređ ŋame ṯa yiđi, orn gerṯa ŋen pređ ŋamǝđaṯa. ŋen pređ ŋame ṯa yiđi orn igaber igaŋgiṯia ŋen ŋǝnǝŋ ṯa ŋaiñëndi ŋabǝɽa. ¹³ ŋǝsa ŋen ŋanṯa ara, na ara ŋen ŋanṯa ŋǝsa, orn rǝmwa riđ arǝlǝmǝndađe ndǝm. orn aŋǝno gerṯa ŋen ŋanṯa đaɽaŋa lijila ɽrǝto, orn ŋen ŋanṯa elǝn rǝmwa, na elǝŋ rǝmwa ŋen ŋanṯa aŋǝno. ¹⁴ na rǝmwa ratuđu elǝŋ yesu, na randǝtuđiar cum ŋabǝɽaŋa ŋǝlëɽǝŋu. ¹⁵ ñagaijǝba ṯa aŋǝno isalo yaɽo laŋge ltetaŋ laŋǝno lal masiya? ŋen ŋafǝṯia igǝma laŋge ltetaŋ laŋǝno lal masiya, na igiđ iliđi laŋge ltetaŋ laŋǝno lǝwuji gaɽ alaiñ? ndo kwai kwai. ¹⁶ walla ñagaijǝba ṯa eđa igi laɽaŋa wujiga gaɽ alaiñ gënǝŋu laɽ aŋǝno yento? ŋen ŋanṯa ađam gǝrǝmwa gaṯa ṯa, lënǝŋulu liɽijan liđ alɽeṯe aŋǝno yento. ¹⁷ orn eđa lakasǝnu elǝŋga yesu gënǝŋu laɽ usila gunto. ¹⁸ laldǝñiṯr đaɽaŋa lijila ɽrǝto. ŋen pređ ŋwomǝn iŋi eđa gëbǝđia ŋeicia gafo aŋǝno ndëuwǝr orn eđa igi laɽaŋa lijila ɽrǝto gënǝŋu gëbǝđia ŋen ŋeicia gageo aŋǝno ilëɽǝŋu. ¹⁹ ñagaijǝba ṯa aŋǝno esalo yaɽ eɽa gatǝɽe gusila gatǝɽe, igi gafǝndau, igi ñagerṯo irǝmwa, na ñaŋ gerṯa nagalo? ²⁰ ñaŋ ñagiliđǝnu ilia. ŋen ŋafǝṯia nanaicr rǝmwa ŋaɽrwa egaŋǝno esalo.

¹ orn eŋen ŋǝlaŋge ildi ñagǝwërđǝṯiñǝlo, nd eđa gǝnǝŋ gero gamǝđia kwai kwai, ŋen iŋi ŋame. ² orn ṯa leđa alerṯe laɽaŋa lijila ɽrǝto, ŋgiṯr eđa aŋǝme wasen gǝlëɽǝŋu na cum ŋgiṯr wuji gaɽǝbwa aŋǝmǝni ebaŋgen gǝlëɽǝŋu. ³ ŋgiṯr eđa aŋǝrmoṯe ŋen ŋǝwasen, na wuji aŋǝrmoṯe ŋen ŋebaŋgen cum. ⁴ wuji gero gaberṯia ŋǝlǝŋe egaŋǝno ilëɽǝŋu, orn ebaŋgen gerṯo, na eđa gero gaberṯia ŋǝlǝŋe egaŋǝno ilëɽǝŋu, orn wasen gerṯo. ⁵ ñerṯe ñaŋgiṯi eđa gǝnǝŋ ganeđa wasen walla wuji ganeđa ebaŋgen ṯa laldǝgǝɽaŋa, illi ndǝ ñagarreiđu ŋen ṯa ñiđi ṯia iliga lobǝlano, ŋen ŋanṯa ñaɽaŋe ŋorwaṯaŋa na ñaṯurṯi rǝmwa, na ñoɽǝbǝđe ñaŋ ndǝm, ṯa seṯan aiyerṯe yindirnḏeieia ŋen ŋanṯa ñagaber ñagërǝkǝđia aŋǝno. ⁶ rǝmwa raŋgiṯiñi ṯa elwaɽe, orn rero raiñǝlwaɽǝṯia. ⁷ igaŋǝra nano ndǝ leđa pređ larno ñi. orn leđa pređ lerṯo đǝneinia đusila irǝmwa, eđa gǝnǝŋ gerṯo đǝneinia đǝnǝŋ na eđa gwomǝn gerṯo đǝneinia đwomǝn. ⁸ orn igwalwaɽǝṯa leđa ildi lamǝlu lamamǝđia na lamǝlu lamamǝni, na liji ɽrlda ildi lǝṯëđǝnialo ṯa, ŋen ŋame ndǝ laɽaŋa larno ñi. ⁹ orn ndǝ lero lërǝkǝđia aŋǝno ŋgiṯǝrldo almamǝđe na almamǝni. ŋen ŋaŋǝra ndǝ eđa gamǝđo, ŋamiñaṯo ŋen ṯa đonaṯa đeđa đamuɽi. ¹⁰ na leđa ildi lamǝđo na lamǝnu, igǝlǝlwaɽǝṯia, gerṯa fiñi, orn elǝŋ rǝmwa, ñerṯe ñaŋgiṯi wuji ṯa ganeđa ebaŋgen. ¹¹ na ndǝ wuji ganeđo ebaŋgen, ŋgiṯǝmar aŋaɽaŋe ŋëpia, walla aŋoɽǝbaṯe ebaŋgen nano, na ñerṯe ñaŋgiṯi maji ṯa ganeđo wasen. ¹² orn điñǝđi igwalwaɽa, gerṯa elǝŋ rǝmwa, ṯa ndǝ eđa gǝnǝŋ ikanisa gerṯo wasen gero gǝbendia ŋen, na wasen gǝmwonaṯa ñerṯe ñaŋgiṯi maji igi ṯa ganeđa wasen. ¹³ na ndǝ wuji gerṯo ebaŋgen gero gǝbendia ŋen, na ebaŋgen gǝmwonaṯa, ñerṯe ñaŋgiṯi wuji igi ṯa ganeđa ebaŋgen. ¹⁴ ŋen ŋanṯa maji gero gǝbendia ŋen gǝbǝđǝni gatǝɽe ewasen, na wuji gero gǝbendia ŋen gǝbǝđǝni gatǝɽe egebaŋgen. ndǝ ŋen iŋi ŋero, ñere eñalo ñero ñatǝɽe, orn điñǝđi ñatǝɽe. ¹⁵ orn ndǝ eđa gero gǝbendia ŋen gwonaṯa gabǝla, ŋgiṯǝmar aŋǝɽe. oraiñ agero agabakaseiđǝni eŋen iŋi. rǝmwa roṯǝnde ṯa ñaɽaŋe iđëuṯaralo. ¹⁶ wuji, agaliŋeṯo ŋen ṯau? aŋgaica agiđi ŋëbǝri ebaŋgalo. maji, agaliŋeṯo ŋen ṯau? aŋgaica agiđi ŋëbǝri wasalo. ¹⁷ orn ŋgiṯu eđa gǝnǝŋ aŋǝɽaŋe eŋen elǝŋ rǝmwa ranaicǝma, na eŋen ŋarno elǝŋ rǝmwa rëndǝma. igëɽu ŋen ṯia ikanisa pređ. ¹⁸ eđa gǝnǝŋ gëndǝnu igi guɽǝđǝnu? ñerṯe ñamaŋgiṯi ṯa gaŋgǝđeinia ŋwëɽiña ŋǝđuɽǝđǝnia. eđa gǝnǝŋ gëndǝnu igi gero guɽǝđǝnia? ñerṯe ñamaŋgiṯi aŋuɽǝđǝni. ¹⁹ đuɽǝđǝnia đarno wagero gǝnǝŋ, na đuɽǝđǝnia đero đarno wagero gǝnǝŋ, orn ŋen ṯa eđa garǝmoṯwa ŋen ŋǝrǝmwa ŋerṯo ŋeniano. ²⁰ ŋgiṯr eđa gǝnǝŋ aŋfeṯe eŋen ŋarno iŋi rǝmwa rundǝđǝmau. ²¹ agafo agaɽ ebai ŋen rǝmwa rundǝđiaŋa? gerṯa ageieiano, orn ndǝ liga lëni aŋǝɽeṯe eđa gero gǝbendǝni, mo đëbǝrni. ²² ŋen ŋanṯa eđa igi gafo gaɽ ebai ŋen rǝmwa rundǝđǝma, gënǝŋu giđǝnu gaɽ eđa gero gǝbendǝni gelǝŋ rǝmwa, na cum eđa igi gero gǝbendǝni ŋen rǝmwa rundǝđǝma gënǝŋu gaɽ ebai gal masiya. ²³ ñaŋ ñagiliđǝnu ilia. ñerṯe ñagǝɽe lǝbai lǝleđa. ²⁴ lorldaiñ, ŋgiṯr eđa gǝnǝŋ alɽaŋe rǝmwara, eŋen iŋi gafo gǝfau ŋen rǝmwa rundǝđǝma. ²⁵ elǝŋ rǝmwa rero rǝlwaɽǝṯiñi ŋen ŋǝnǝŋ eŋen ŋǝliji lero lamǝđia walla lamǝni orn igǝndǝlwaɽǝṯia ŋen ŋǝlëɽǝñi, garno eđa igi giđǝnu guđǝrwaṯo eŋen ŋabaiyaŋa ŋǝrǝmwa. ²⁶ igaṯa aŋgaica ŋen ŋame iliga ildi lǝđaicwarǝnia ndǝ eđa gaɽaŋa ŋen ŋarno ŋǝbǝtaŋǝɽan. ²⁷ agakaseiđǝnu wasaloga? ŋerṯe agwonaṯa agëbǝrni. agafo mǝɽǝmǝɽeñ wasalo gero? ŋerṯe agapwaiña wuji. ²⁸ orn ndǝ agamǝđo, agero agëbǝđia mǝnna, na ndǝ ŋere ŋaɽo ŋoa ŋamǝnu, ŋënǝŋu ŋero ŋëbǝđia mǝnna, orn ildi liđ alneini ŋen ŋubwa alo, na igwonaṯa igǝndamiña eŋen iŋi. ²⁹ orn igalwaɽǝṯia lorldaiñ, ṯa liga lǝṯënu lobǝlano. nṯia ŋgiṯr leđa lerṯo wasenanda alarneṯe leđa lero wasenanda, ³⁰ na leđa ildi labara alarneṯe leđa ildi laber labara, na leđa ildi laŋǝra nano alarneṯe leđa ildi lero đaŋǝra nano, na leđa ildi lǝbǝrldiđa alarneṯe leđa ildi lero laŋge, ³¹ na leđa ildi lëbǝđia ŋen laŋgela lalo, alarneṯe leđa ildi laber lëbǝđia ŋen laŋgela lalo kwai kwai, ŋen ŋanṯa ŋen ŋalo ŋamǝndëđǝni. ³² igwonaṯa ṯa ñerṯe ñagagǝrđia. eđa gero gamǝđia garǝmoṯwa ŋen ŋǝrǝmwa, ṯa aŋiđi elǝŋ rǝmwa raŋǝra nano, ³³ orn eđa gamǝđo garǝmoṯwa ŋen ŋalo ṯa aŋiđi wasen gaŋǝra nano. ³⁴ na wasen eum gerṯo ŋen ŋiɽijan egare. ŋere ŋaɽo ŋoa iŋi ŋero ŋǝmǝni ŋarǝmoṯwa ŋen ŋelǝŋ rǝmwa ṯa ŋënǝŋu aŋǝtǝɽeṯe egaŋǝno na igusila cum, orn wuji gǝmǝnu garǝmoṯwa ŋen ŋalo ṯa aŋiđi ebaŋgen gaŋǝra nano. ³⁵ igalwaɽǝṯia ŋen ŋanṯa endamǝđaṯe, gerṯa ŋen ŋanṯa indiɽǝweici, orn ŋen ŋanṯa ŋen aŋfeṯe ŋope, na ṯa ñarǝmoṯe ŋen ŋelǝŋ rǝmwa, waŋge gero gǝnǝŋ gǝndama eŋǝmëɽria ŋǝlëɽǝŋu. ³⁶ orn ndǝ đaṯa gǝnǝŋ gǝbaṯa ṯa aŋgaica gaber gëbǝđia ŋen ŋafo ŋope ŋen ŋanṯa ŋere ŋǝlëɽǝŋu iŋi ŋero ŋǝmǝni, na ŋënǝŋu ŋoɽra aten, na ŋen nǝŋǝɽeṯe đeṯam, ŋgiṯǝmar aŋiđi ŋen ŋarno gwonaṯa. gënǝŋu gaber gëbǝđia mǝnna. ŋgiṯu ŋere aŋǝmǝni. ³⁷ orn eđa igi ŋen ŋaṯurwa egare gǝlëɽǝŋu, ndǝ ŋen ŋero ŋǝɽia đeṯam, na gerṯo ŋǝlǝŋe ṯa aŋiđi ŋen iŋi gwonaṯa, nǝŋëɽi ŋen egare ṯa gaber ganaiđia ŋere eđǝma, gënǝŋu gëbǝđia ŋen ŋaŋǝra. ³⁸ ŋen ŋafǝṯia eđa igi ganaiđo ŋere eđǝma iŋi ŋero ŋǝmǝni gëbǝđia ŋen ŋame, orn eđa igi gero ganaiđia ŋere ŋǝlëɽǝŋu eđǝma gëbǝđia ŋen ŋame kaiñ gamiñaṯo orǝba. ³⁹ wuji gakaseiđǝnu ebaŋgenga ŋen gamǝṯo, orn ndǝ ebaŋgen gaiyo gaɽǝwađaṯa gǝmǝni egeđa gamwonaṯa nde maji gafo egelǝŋ rǝmwa. ⁴⁰ orn gënǝŋu giđ aŋǝreṯe nano gamiñaṯo orǝba ndǝ gaɽaŋa mǝɽǝmǝɽeñ. fǝŋen igënǝñi igwalwaɽo na igaṯa, igerṯo usila gǝrǝmwa eum.

¹ fǝŋen ŋǝlaŋge ildi leđa lanaicǝlo laɽo đǝɽǝđǝnia elaŋge lǝpiano ildi ldukwuđiñǝṯialo. lǝgaliŋeṯr ṯa nëndr pređ lǝgerṯr đaliŋeṯa. đaliŋeṯa đëbǝđia leđa linia enare, orn đubwa đabakaɽǝjaicia leđa eŋen. ² orn nđǝ eđa gǝnǝŋ gǝbaṯa ṯa gerṯo đaliŋeṯa, gënǝŋu gaijǝba wagǝnǝŋ garno đeṯam ṯa galiŋeṯa. ³ orn ndǝ eđa gǝnǝŋ gubwa rǝmwara, rǝmwa raliŋeṯǝma. ⁴ ŋen ŋafǝṯia ŋen ŋǝlaŋge ildi leđa lanaicǝlo laɽo đǝɽǝđǝnia elaŋge lǝpiano ildi leđa ldukwuđiñǝṯialo, lǝgaliŋeṯr ṯa laŋge ildi lǝpiano lero waŋgano gǝnǝŋ, na rǝmwa rero rǝmǝn tǝŋ, illi irri runto. ⁵ ndǝ đeṯam leđa lëbǝđia laŋge laṯa fimwa ildi, ndǝ elo walla alo, ŋen ŋarno đeṯam imwa yëni ywaiña na nǝlǝŋ nëni nwaiña, ⁶ orn nëndr lǝgerṯr rǝmwa runto, đaṯa, igi laŋge pređ leṯo iŋu, na igi nëndr lǝgafr ŋen ŋanṯa ŋu, na lǝgerṯr elǝŋ gunto, yesu masiya, igi laŋge pređ leṯo ŋuga, na nëndr lǝgafr ŋuga. ⁷ orn đaliŋeṯa iđi đero đǝfia eleđa pređ. leđa lǝmaṯan ildi lafo lafo eŋen ŋǝlaŋge ildi lǝpiano leđa ldukwuđiñǝṯialo lasa ŋǝsa mǝldin điñǝđi garno ŋǝđǝɽǝđǝnia elaŋge ildi lǝpiano, na nare enen ini naɽwata đeṯam niđǝnu nataŋa ŋen ŋanṯa nëbia. ⁸ orn ŋǝsa ŋaber ŋǝndiđiar rǝmwa rǝndaŋǝnṯiar, ŋen ŋanṯa ndǝ lǝgasr ŋǝsa, lǝgaber lǝgamiar, walla ndǝ lǝgaber lǝgasr ŋǝsa lǝgaber lǝgeiciar. ⁹ orn rǝmojǝđr ŋen ṯa ŋabǝɽa eŋalo aŋerṯe ŋǝɽe đar đǝbekǝndia laŋge eleđa lëbia. ¹⁰ nđǝ eđa gǝnǝŋ gaŋaseicia ŋaŋgi agerṯo đaliŋeṯa agasa egeɽa gǝwaŋge gǝpiano leđa ldukwuđiñǝṯialo, gerṯa ara gǝlëɽǝŋu igi gwaɽwata đeṯam giđ aŋonḏǝṯe ṯa gënǝŋu aŋǝse ŋǝsa ŋǝđǝɽǝđǝnia elaŋge lǝpiano ildi leđa ldukwuđiñǝṯialo? ¹¹ nṯia, đaliŋeṯađa đǝlaɽǝŋa, oralo igi gëbia gagirni igi al masiya gaiyo ŋen ŋanṯaŋu. ¹² orn nđǝ agëbǝđia mǝnna agǝgeo lorlđalanda ṯia na agaɽandǝđe nare enen ini naɽwata đeṯam ini nëbia, agëbǝđia mǝnna agǝgeo al masiya. ¹³ ŋen ŋafǝṯia nđǝ ŋǝsa ŋëbǝđia oraiñ gëɽǝŋeinu, igaber igiđi ese eđe kwai kwai bǝɽǝbǝte, ṯa yerṯe igëbǝđia oraiñ gëɽǝŋeinu.

¹ gerṯa igǝfia mǝɽǝmǝɽeñ igero igëndǝnu? gerṯa igaɽ eđa gwǝđweinu ? gerṯa igaseieu yesu igi gaɽ elǝŋ igëndr? ñaganǝñaŋ gerṯa ñagǝɽo ŋǝmëɽria ŋǝlëɽǝñi egelǝŋ yesu? ² nđǝ gerṯa igwǝđweinu eleđa lomǝn tǝŋ, đeṯam igwǝđweinu eñaŋ ŋen ŋanṯa ñagaɽo ŋamǝla ŋǝđǝđweinia đǝlëɽǝñi egelǝŋ yesu. ³ đopǝṯa đǝlëɽǝñi eleđa ildi laiñirnḏeicia đafo ṯia. ⁴ nanda ñagero ñagaberṯia ŋǝlǝŋe ṯa ñase na ñëṯi? ⁵ nanda ñagero ñagaberṯia ŋǝlǝŋe ṯa ñageimama wuji ñagǝmo igi gëndu ŋen, ŋen ŋarno leđa ildi lǝđweinu lomǝn tǝŋ na ŋen ŋarno lorǝba lelǝŋ yesu, na sifa? ⁶ walla igënǝñi na barnaba, ñagaɽo nđǝjan, ñagero ñagaberṯia ŋǝlǝŋe ṯa ñaŋgiṯi ŋǝmëɽria, iŋi ñagiyamǝṯia? ⁷ esegi gaɽ askari gabǝɽo iđǝbwaiñǝđia iliga lnǝŋ đǝpǝɽađa đǝlëɽǝŋu? esegi galaɽa gi ginǝb na ṯaŋerṯo gausa? esegi gǝsi oɽo na ṯaŋerṯo gǝlṯiṯa ŋan? ⁸ igwalwaɽo ŋen iŋi ŋǝlǝŋeŋa ŋǝleđa ikǝrǝŋ? gerṯa al ganun yalwaɽo ṯia cum? ⁹ ŋen ŋǝwërđǝnu imusa ṯa, ñerṯe ñagabakasa ŋǝnḏǝri ëiñua iŋi ŋoɽa ŋwala ŋǝlëmu. fǝñǝnḏǝri iñi rǝmwa rǝɽrǝmoṯwa? ¹⁰ walla ralwaɽo ŋen ŋanṯa nëndr? a, đeṯam ŋen ŋǝwërđǝnu ŋen ŋanṯa nënđr, ŋen ŋanṯa ŋen ŋafo ŋope nđǝ eđa galaɽa na eđa goɽa ŋwana lëbǝđia ṯia ṯalṯurṯu ŋen ṯa alakarnǝđe ŋwana. ¹¹ ndǝ nanda ñagakađo ŋǝlwa ŋusila eñaŋ, ŋen ŋëni ŋoɽra ndǝ ñagwanḏa eñaŋ laŋge laŋǝno? ¹² ndǝ leđa lwomǝn lerṯo ŋǝlǝŋe eŋen iŋi eñaŋ, gerṯa ñagananda ñagaberṯia ŋǝlǝŋe eñaŋ ñagamiñaṯǝla? orn ñagero ñagǝma ŋǝlǝŋe iŋi, orn ñagaɽiñaṯo ŋen pređ, ṯa ñerṯe ñagabakeɽia đela alo đǝŋen ŋaŋǝra ŋal masiya. ¹³ ñagaijǝba ṯa leđa ildi lëbǝđia ŋǝmëɽria ŋal ekǝl lënǝŋulu lamicini elaŋge lal ekǝl ? na leđa ildi lëbǝđia ŋǝmëɽria ŋađuna yǝđǝɽǝđǝnia labakarnǝđia laŋge lǝđǝɽǝđǝnia? ¹⁴ elǝŋ rǝmwa raṯa ṯa leđa ild labërrǝŋaiđia ŋen ŋaŋǝra ŋǝlëɽǝŋu lamǝṯia ŋenŋa ŋaŋǝra ŋǝlëɽǝŋu. ¹⁵ orn igënǝñi igero igǝma wagǝnǝŋ eŋen iŋi, na igero igǝwërđia ŋen iŋi ṯa laŋge ildi aliñǝneini, ŋen ŋanṯa ŋen ṯa igabaiya ŋaŋǝra ŋamiñaṯo ŋen iŋi. eđa gero gǝnǝŋ giđ aŋiđi đëminia bǝɽan đǝlëɽǝñi đǝpiano. ¹⁶ ndǝ igabërrǝŋaicia leđa ŋen ŋaŋǝra ŋǝrǝmwa, igero igaɽǝwađaṯa igauwëminia, na đeṯam đafǝñau. iganeim ŋen ŋubwa ndǝ igaber igabërrǝŋaicia leđa ŋen ŋaŋǝra ŋǝrǝmwa. ¹⁷ ndǝ igameđǝño igëbǝđia ṯia igiđ eneini đǝpǝɽa, orn ndǝ igero igameđǝño đeṯam ŋen iŋi ŋaneinǝñi ŋen ŋanṯa yiđi. ¹⁸ ŋen ŋafǝṯia wande igi gaɽo đǝpǝɽa đǝlëɽǝñi? fǝŋu ṯa đeṯam ndǝ igabërrǝŋaieia leđa ŋen ŋaŋǝra ŋǝrǝmwa, igëbǝđia ṯia mǝɽǝmǝɽeñ, ilia yero, ṯa yerṯe igǝma ŋǝlǝŋe preḏ iŋi ŋǝlëɽǝñi iŋi igerṯo eŋen ŋaŋǝra ŋǝrǝmwa. ¹⁹ igero igaɽ ebai egeđa gǝnǝŋ, orn igëbǝđia etam gǝlëɽǝñi gaɽ ebai eleđa pređ, ṯa imamǝṯi rǝmwa leđa lwaiña. ²⁰ igarno al yawuḏ eleđa lal yawuḏ, ṯa imamǝṯi rǝmwa al yawuḏ. eleđa ildi lakaseiđǝnu eŋen ŋal ganun igarno eđa gakaseiđǝnu eŋen ŋal ganun ṯa ilmamǝṯa rǝmwa nano, orn igënǝñi igero igakaseiđǝni eŋen ŋal ganun. ²¹ igero igafo ŋen ndëuwǝr ŋal ganun irǝmwa orn igafo eŋen ŋal ganun igal masiya, orn eleđa ildi lafo ŋen ndëuwǝr ŋal ganun igarno eđa igi gafo ŋen ndëuwǝr ŋal ganun ṯa ilmamǝṯa rǝmwa nano. ²² eleđa lëbia, igarno igëbia ṯa ilmamǝṯa rǝmwa nano ildi lëbia. igaɽo ŋen pređ eleđa pređ ṯa đađđa đǝnǝŋ ilmamǝṯa rǝmwa nano lǝmaṯan. ²³ igëbǝđia ŋen pređ ŋen ŋanṯa ŋen ŋaŋǝra ŋǝrǝmwa ṯa igënǝñi ñagǝɽǝbǝđiar eđǝbuŋṯia đǝŋen ŋaŋǝra ŋǝrǝmwa. ²⁴ ñagaijǝba ṯa leđa ildi lalaldiña iđǝbaparjǝđia lalaldiña pređ, orn eđa gunto giđ aŋǝneini wagǝnǝŋ. laldiñr ṯia ṯa ñaneini waŋge igi. ²⁵ na eđa gǝnǝŋ igi gǝɽo erraɽa ṯa aŋǝɽeṯe oɽǝfa gënǝŋu gëɽǝkǝđiaŋǝno elaŋge pređ. eđa igi gëbǝđia ṯia ŋen ŋanṯa aŋǝneini ṯaj isi yiđ aiyǝmǝndëđǝni, orn lëndr ŋen ŋanṯa alneinr ṯaj isi yaber yiđ aiyǝmǝndëđǝni. ²⁶ ŋen ŋafǝṯia igalaldiña ṯia gerṯe garno eđa gaijǝba ŋope, igabwaiñǝđia ŋen ŋero ŋǝbarna eđa gëpǝđia igǝbuđ gǝpiano. ²⁷ orn igëpǝni aŋǝno ilëɽǝñi jaica bǝɽan, na jaica jaica igabǝkǝđia yaɽ ebai ṯa đađđa đǝnǝŋ, nde igabërrǝŋaicia leđa ŋen, yerṯe igamǝrnia waŋge gero ŋen ŋǝnǝŋ.

¹ na lorldaiñ, igwonaṯa ṯa ñaliŋeṯe ṯa eṯalanda pređ lafo lafo isbwoɽua pǝlalo, na pređ lduɽǝđi igal bar. ² na pređ laŋǝnṯu mamuḏiya iđǝɽǝbǝđia eŋen ŋǝmusa, isbwoɽua na igal bar, ³ na pređ laso ŋǝsa ŋunto ŋusila, ⁴ na pređ lëṯu ŋawa ŋunto ŋusila, ŋen ŋanṯa lënǝŋulu lëṯu elwandra lusila ildi ldeteṯe alo na lwandra ildi fǝŋu al masiya. ⁵ orn rǝmwa rero ralǝŋǝrṯia nano lwaiña iŋulu, ŋen ŋanṯa lënǝŋulu lađamǝnu eđǝñwa. ⁶ laŋge pređ ildi laɽo đǝbǝɽia nano inëndr, ṯa nëndr alerṯr lǝgwonaṯar laŋge leicia, ŋen ŋarno lënǝŋulu lonaṯa kaiñ. ⁷ na ñerṯe ñagukwuđǝñǝṯia laŋge alo lǝpiano ŋen ŋarno lǝmaṯan iŋulu liđu ṯia, ŋen ŋarno ŋǝwërđǝnu ṯa, leđa laɽaŋa alo ṯa alase na alṯi, ldǝtođe ṯa aɽrǝṯe. ⁸ alerṯr lǝgaɽaŋar lijila ɽrǝto ŋen ŋarno lǝmaṯan iŋulu liđu ṯia, na iloman lunto laiyo alǝf eređia giɽijan nalo alǝf giɽijin. ⁹ alerṯr lǝgǝbirnḏeiciar elǝŋ yesu ŋen ŋarno lǝmaṯan iŋulu linḏeieǝma ldaiye isǝmwa yeicia. ¹⁰ alerṯr lǝgamǝlađiar ŋenŋa ŋen ŋarno lǝmaṯan iŋulu liđu ṯia ldaiye imǝlaiyǝka iđi đǝɽiñǝđia. ¹¹ laŋge pređ ildi larǝmaṯǝlo nano laɽo ŋamǝla, na lǝwërđǝnu ṯa alǝndërrǝŋaicr ŋen, nëndr lëŋgr đamǝndađa đǝliga ildi đeṯǝndr nano. ¹² ŋen ŋafǝṯia ŋgiṯu eđa gabaṯa ṯa gënǝŋu gaɽaŋa aŋarǝmojǝđe ṯa aŋerṯe gǝbǝɽia. ¹³ đirnḏeinia đero đǝnǝŋ đinḏeieǝnde illi iđi đǝlǝŋinu eleđa pređ. orn rǝmwa rerṯo ŋen ŋuđǝrwaṯo na raber randǝŋgiṯia ṯa ñinḏeini đirnḏeiniađa iđi ñagaber ñagaɽǝwađaṯa ñagaɽiñaṯa, orn đirnḏeiniađa rënǝŋu rǝndǝnaicia đađ đǝđamiña, ṯa ñaɽǝwađaṯe ñagaɽiñaṯa ŋen. ¹⁴ ŋen ŋafǝṯia lorldaiñ ñaŋgi igubwandriya, laldiñiṯr đukwuđiñǝṯia laŋge alo lǝpiano. ¹⁵ igǝndǝlwaɽǝṯia garno eleđa laliŋeṯo ŋen nǝsi. irnḏeicr ŋen ŋǝlëɽǝñi. ¹⁶ finjan iđabuŋṯia isi lǝgabuŋṯiar, yënǝŋu gerṯa yaɽo đǝɽǝbǝđia eŋen ŋǝŋǝfǝni ŋal masiya? aicǝba igi lǝgagerar gënǝŋu gerṯa gaɽo đǝɽǝbǝđia eŋen ŋaŋǝno ŋal masiya? ¹⁷ nëndr lǝgwaiñar orn lǝgaɽr aicǝba gunto na aŋǝno yento ŋen ŋanṯa nëndr pređ lǝgabakarnǝđiar aieǝba gunto. ¹⁸ nwanr leđa lisrayil laɽ aŋǝno. leđa ildi lǝsa laŋge lǝđǝɽǝđǝnia, gerṯa lënǝŋulu lǝɽǝbǝđia eŋen ađunaiya? ¹⁹ igwalwaɽa ṯau? igwalwaɽa ṯa ŋǝsa ŋaɽo wagǝnǝŋ iŋi ŋaneinu laŋge lǝpiano ildi leđa ldukwuđiñǝṯialo ? walla igwalwaɽa ṯa waŋge igi leđa lukwuđiñǝṯialo gaɽo waŋge đeṯam ? ²⁰ ndo. orn igwalwaɽa ṯa đǝɽǝđǝnia đǝleđa, lënǝŋulu lananaica nusila neicia, ini gerṯa naɽ rǝmwa. na igaber igwonaṯa ṯa ñagǝɽǝbǝđia eŋen nusilana neicia. ²¹ ñagero ñagaɽǝwađaṯia ñagǝṯia finjan yelǝŋ rǝmwa, na cum finjan yǝnusila neicia. ñagero ñagaɽǝwađaṯia ñagabakarnǝđia iṯarǝbesa đelǝŋ rǝmwa, na cum iṯarǝbesa đǝnusila neieia. ²² nëndr lǝgëbǝđiar rǝmwa ragiaṯađa ŋen? nënđr lǝgwonḏǝṯr lǝgamiñaṯr rǝmwa? ²³ ŋen pređ ŋame ṯa yiđi, orn gerṯa ŋen pređ ŋamǝđaṯa. ŋen pređ ŋame ṯa yiđi, orn gerṯa ŋen pređ ŋabakaɽǝjaiđia eŋen. ²⁴ ñerṯe ñaŋgiṯi eđa gǝnǝŋ ṯa gapwaiña ŋen ŋǝlëɽǝŋu ikǝrǝŋ, orn ŋgiṯr eđa gǝnǝŋ aŋǝpwaiñe ŋen ŋeđa gwomǝn. ²⁵ sǝr eđe isi yiliđǝnu nǝsuk, mǝɽǝmǝɽeñ, đeɽǝđia đero, ŋen ŋanṯa nara nwaɽwata đeṯam, ²⁶ ŋen ŋanṯa alo yelǝŋ rǝmwa na laŋge pređ ildi lafau. ²⁷ ndǝ eđa gǝnǝŋ gero gǝbendia ŋen gundǝđeicǝnde egeɽa gǝlëɽǝŋu na ñagwonaṯa ñagabǝla, sǝr laŋge ildi ganai-cǝndǝlo pređ, mǝɽǝmǝɽeñ đeɽǝđia đero, ŋen ŋanṯa nara nwaɽwata đeṯam. ²⁸ orn ndǝ eđa gǝnǝŋ gwalwaɽǝṯǝnde ṯa laŋge ildi lǝđǝɽǝđǝnia đǝlaŋge lǝpiano ildi leđa ldukwuđiñiṯialo, ñerṯe ñagǝlǝsa ŋen ŋanṯa eđa igi gwalwaɽǝṯǝnde na ŋen ŋanṯa nara nwaɽwata đeṯam, ²⁹ gerṯa ŋen ŋanṯa nara nwaɽwata đeṯam enalo orn ara gwaɽwata đeṯam geđa gakǝl. đǝfia alo đǝlëɽǝñi đirnḏeinu araga gwaɽwata đeṯam geđa gwomǝn eđa? ³⁰ ndǝ igaŋërṯu rǝmwa nano nese, ŋen ŋanṯau igađamǝcǝnu eŋen ŋǝlaŋge ildi igaŋërṯǝlau rǝmwanano? ³¹ ŋen ŋafǝṯia ndǝ ñagasa na ṯǝñëṯu walla ṯiñiđu wagǝnǝŋ, iđǝr laŋge pređ ṯa ñananaice rǝmwa ŋaɽrwa. ³² ñerṯe ñagǝɽia đǝkëɽǝŋeicia igal yawuḏ walla igal yunaniym walla ikanisa đǝrǝmwa. ³³ ŋen ŋarno igëbǝđia lcđa laŋǝra nano pređ eŋen pređ, na igaber igapwaiña đaɽǝjaica đǝlëɽǝñi, orn đaɽǝjaica đǝleđa lwaiña, ṯa lënǝŋulu liđ alëbǝrni.

¹ ṯiñirnḏeicǝñi ŋen ŋarno igǝbirnḏeicia al masiya cum. ² igandamia lorldaiñ, ŋen ŋanṯa ṯiñǝlëldǝŋǝđeinǝñau eŋen pređ, na ŋen ŋanṯa ṯǝñarǝmoṯo ŋen iganeinu ŋen ŋarno iganaicǝnde. ³ orn igwonaṯa ṯa ñaliŋeṯe ṯa al masiya gaɽnda eleđa pređ, na maji gaɽnda igwuji gaɽǝbwa na rǝmwa raɽnda igal masiya. ⁴ maji gǝnǝŋ igi gaṯurṯia rǝmwa walla gabërrǝŋaicia leđa ŋen, igi gerṯo waŋge nenda, gënǝŋu ganaicia nda đeicia. ⁵ orn wuji gǝnǝŋ gaɽǝbwa igi gaṯurṯia rǝmwa walla gabërrǝŋaicia leđa ŋen, na nda luji lero laberṯa waŋge nano gǝnǝŋ, gënǝŋu ganaicia nda đeicia. nṯia cum wuji gǝbëđǝnu. ⁶ ndǝ wuji gaɽǝbwa gero gǝtërnia nda, ŋgiṯǝma aŋgǝleini nda. orn ndǝ wuji girǝwano ŋen ŋanṯa nda lǝgǝlnu walla lǝbëđǝnu ŋgiṯǝma aŋǝtërni nda. ⁷ na maji đeṯam aŋerṯe gatërnia nda, ŋen ŋanṯa gënǝŋu garno rǝmwa, na gaɽo ŋaɽrwa ŋǝrǝmwa, orn wuji gaɽo ŋaɽrwa ŋǝmaji. ⁸ ŋen ŋanṯa maji gero geṯo igwuji gaɽǝbwa, orn wuji geṯo imaji. ⁹ na maji gero gǝbǝđǝnia ŋen ŋanṯa wuji gaɽǝbwa, orn wuji giđǝnṯu maji. ¹⁰ ŋen ŋafǝṯia đeṯam wuji gaɽǝbwa gerṯo ŋamǝla ŋǝŋǝlǝŋe nenda ǝllëɽǝŋu, ŋen ŋanṯa mǝlaiyǝka. ¹¹ orn egelǝŋ rǝmwa maji gero gǝfia alǝsoŋ igwuji gaɽǝbwa, na wuji gero gafia alǝsoŋ imaji, ¹² ŋen ŋafǝṯia, garno wuji geṯo imaji ananoŋ, nṯia cum leđa ɽrwa leṯo iliji ɽrlđa, orn laŋge pređ leṯo irǝmwa. ¹³ inḏeicr ŋen iŋi entam enalo. ŋen ŋame ndǝ wuji gaṯurṯia rǝmwa mǝɽǝmǝɽeñ gero gǝtërma nda? ¹⁴ ŋaṯǝɽa ŋaber ŋandërrǝŋaicia ŋen ṯa ndǝ maji gerṯo iri ywala nenda ŋen iŋi ŋamanaicia đeicia? ¹⁵ orn nđǝ wuji gaɽǝbwa gerṯo iri ywala nenda yënǝŋu yaɽo ŋaɽrwa igwuji. iri ywala nenda yǝneinu wuji ŋen ŋanṯa aitëri nda. ¹⁶ orn ndǝ eđa gǝnǝŋ gwonaṯa gakuɽǝbijǝđǝṯia eŋen iŋi, đeṯam ñagero ŋen ṯia na kanisa đǝrǝmwa đero ŋen ṯia cum. ¹⁷ orn eŋen iŋi igǝndǝlwaɽǝṯia điñǝđi, igaber igǝnđamia, ŋen ŋanṯa ndǝ ñagararraiđia ñagëbǝđia ṯia gerṯa eŋen ŋame orn eŋen ŋeicia. ¹⁸ ŋen ananoŋ, ndǝ ñagararraiđia ikanisa, igano ṯa ñagafo ɽetǝɽeteo. na igabǝđo eŋen iŋi ŋǝmaṯan, ¹⁹ ŋen ŋanṯa đeṯam ñagaɽaŋa ɽetǝɽeteo eŋen ṯa leđa ildi lirnḏeinu lđǝfiđǝni luđǝrwaṯo eŋen alǝliŋini eñaŋ. ²⁰ ndǝ ñagararraiđia gerṯa ṯa ñase đǝsa đelǝŋ yesu, ²¹ ŋen ŋanṯa leđa pređ lasa ŋǝsa eŋen taltal lorǝba lumǝlu lasa, na leđa lǝmaṯan ldǝcoiñǝṯe, na lǝmaṯan ldǝramǝɽua. ²² ñagero ñagaberṯia neɽa ñagǝlosa na ñagǝluṯia? ñagǝđamǝcu kanisa đǝrǝmwa eŋen, na ñagirǝwia leđa ano ildi lero laberṯia laŋge? igǝndǝlwaɽǝṯia ṯau? igiđi enđame eŋen iŋi? igaber igǝndamia. ²³ ŋen ŋanṯa igamaṯo elǝŋ rǝmwa, ŋen iŋi igǝnaicǝnde cum, ṯa elǝŋ yesu ulǝŋgi igi ganeiđǝniau, gamo aicǝba, ²⁴ nǝŋǝlǝŋǝđeini irǝmwa, nǝŋgere aicǝba, nǝŋaṯa, mǝr ñase, fǝŋu igi gaɽ aŋǝno ilëɽǝñi, isi igirnu ŋen ŋanṯa ñaŋ. iđǝr ṯia ṯañaiñulëlđǝŋǝđeinu. ²⁵ nṯia eum ndǝ gaso đǝge, gënǝŋu nǝŋǝme finjan nǝŋaṯa, finjan isi yaɽo đǝrreiđia eŋen đǝmaijǝn iđi đëndǝnu alo ŋǝfǝniŋa ŋǝlëɽǝñi. iđǝr ṯia ndǝ ñagǝṯia na ṯǝñaiñulëldǝŋǝđeinu. ²⁶ ŋen ŋanṯa ndǝ ñagasa aicǝba igi na ṯiñëṯu finjan isi ñagǝbërrǝŋaicia leđa ŋǝɽaiñ ŋelǝŋ yesu ŋen gumǝlu geṯo. ²⁷ ŋen ŋafǝṯia eđa gǝnǝŋ igi gerṯo ŋen ŋeicia egare na gasa aicǝba igi, na gǝṯia finjan yelǝŋ, gënǝŋu gëbǝđia ŋen ŋeicia gageo aŋǝno na ŋǝfǝni lelǝŋ yesu. ²⁸ orn ŋgiṯu eđa aŋinḏeici etam gǝlëɽǝŋu, nṯia ŋgiṯǝma aŋǝse egaicǝba na aŋǝṯi ifinjan, ²⁹ ŋen ŋanṯa eđa igi gasa na gǝṯia eŋen ŋeicia, na gero gǝseicia nǝŋaijǝbeṯe ŋen ŋaŋǝno yelǝŋ yesu, gënǝŋu gasa na gǝṯia đakǝme egǝtam gǝlëɽǝŋu. ³⁰ ŋen ŋafǝṯia lwaiña eñaŋ laiñǝlaŋǝno na luma na lwaiña laiyo. ³¹ ndǝ lǝgǝseieiar ntam inëndr đeṯam, lǝgaber lǝgiđr alakǝmǝnr. ³² orn ndǝ nëndr lǝgakǝminiar, elǝŋ rǝmwa randǝṯoɽaṯar ṯa alerṯr lǝgiđr alakǝmǝnr leđala lalo. ³³ ŋen ŋafǝṯia, lorldaiñ, ndǝ ñagararraiđia ṯa ñase, ṯurṯr leđa pređ lomǝn. ³⁴ ndǝ eđa gǝnǝŋ gaicoiña ŋgiṯǝmar aŋǝɽe aŋǝse egeɽa gǝlëɽǝŋu, ṯa đarraiđia eđalo ađerṯe đǝndǝmǝṯia đakǝme. igiđi endǝnaice ŋen elaŋge lṯënu ndǝ igeṯǝnde nano.

¹ lorldaiñ, igaber igwonaṯa ṯa ñagaijǝba ŋen ŋǝđǝnaicia đusila. ² ñagaliŋeṯo ṯa liga ñagafo ñagero ñagǝbendia ŋen, na ñagǝmamǝnu elaŋge lǝpiano ildi leđa ldukwuđiñǝṯialo, ildi laijǝba laɽwata, garno ñagamamǝnu jaica jaica. ³ nṯia igwonaṯa ṯa ñagaliŋeṯo ṯa eđa gero gǝnǝŋ igi gwaɽwata usilaga gǝrǝmwa gaṯa ṯa yesu gaboŋǝnu, na ṯa eđa gero gǝnǝŋ gaɽǝwađaṯa gǝbaṯa ṯa yesu gaɽ elǝŋ, illi usilaga gatǝɽe. ⁴ đǝnaicia đëni đerṯo ŋen ɽetǝɽeteo, orn usila gaɽo gunto. ⁵ na đǝđuɽǝđǝnṯia đëni đerṯo ŋen ɽetǝɽeteo orn elǝŋ rǝmwa raɽ runto. ⁶ na ŋabǝɽa ŋëni ŋëbǝđia ŋǝmëɽria ɽetǝɽeteo, orn rǝmwa raɽ runto irri rëbǝđia ŋen pređ eleđa pređ. ⁷ orn đamiñaṯa đusila đǝneiđǝnu eleđa pređ ŋen ŋanṯa đamǝđaṯa, ⁸ ŋen ŋanṯa usila gǝrǝmwa ganaicia eđa gǝnǝŋ đǝɽwata đǝđaliŋeṯa ŋen nǝsi, na usila gaɽo gunto ganaicia eđa gwomǝn đǝɽwata đǝđaliŋeṯa. ⁹ usila gaɽo gunto igi ganaicia eđa gwomǝn đonaṯa, na usila gaɽo gunto igi ganaicia eđa gwomǝn đǝnaicia đǝđǝkeiđia leđa luma. ¹⁰ na eđa gwomǝn gǝneinu ŋabǝɽa ṯa aŋiđi aŋwara, na eđa gwomǝn ganeinu ŋen ṯa gaɽǝwađaṯa gǝbërrǝŋaiđia ŋen ŋǝrǝmwa, na eđa gwomǝn gǝneinu đaliŋeṯa đǝnusila nd naŋǝra walla neicia, na eđa gwomǝn gǝneinu đaɽwata đole gero gǝlǝŋinu, na eđa gwomǝn gǝneinu ŋabǝɽa ŋǝđǝkoɽǝbaica ole gero gǝlǝŋinu. ¹¹ orn usila gaɽo gunto, igi gëbǝđia ŋǝmëɽria eŋen iŋi pređ, na ganaicia eđa gǝnǝŋ ŋen ŋarno usila gwonaṯa. ¹² ŋen ŋarno aŋǝno yeɽo yento, orn yerṯo laŋgano lwaiña, na laŋge pređ laŋǝno yento, ildi lwaiña laɽ aŋǝno yento, al masiya gaɽo ṯia cum. ¹³ ŋen ŋanṯa igusila gunto nëndr pređ lǝganeinr mamuḏiya ldënǝcǝnr igaŋǝno yento, ndǝ yawuḏ walla gerṯa yawuḏ walla lǝbai walla leđa lero lǝɽia lǝbai. na nënđr pređ lǝgiđǝnr lǝgǝṯiar usila gunto. ¹⁴ aŋǝno yero yǝɽe waŋge gunto, orn yerṯo laŋge nano lwaiña. ¹⁵ nđǝ đǝmanǝña đaṯa, ŋen ŋanṯa gerṯa igaɽo đaŋ, gerṯa igaŋǝno, ŋen aŋerṯe ŋǝfia ṯa đënǝŋu gerṯa đaŋǝno. ¹⁶ na ndǝ ënǝñia gaṯa, ŋen ŋanṯa gerṯa igaɽ isi gerṯa igaŋǝno, ŋen aŋerṯe ŋǝfia ṯa gënǝŋu gerṯa gaŋǝno. ¹⁷ ndǝ aŋǝno pređ yaɽ isi, đǝnna đuŋga? ndǝ aŋǝno pređ yaɽo đǝnna đǝmwaṯa đuŋga? ¹⁸ orn điñǝđi rǝmwa rëɽu laŋge pređ egaŋǝno, ŋen ŋarno ronaṯa. ¹⁹ ndǝ pređ laɽo lunto aŋǝno yuŋga? ²⁰ orn điñǝđi laŋge lëni lwaiña, orn aŋǝno yaɽo yento. ²¹ isi yaber yaɽǝwađaṯa yǝbeiṯi đaŋ ṯa, agero agǝɽe đeṯam, walla nda laber laɽǝwađaṯa lǝlwaɽǝṯia rǝmanǝña ṯa, ñagero ñagǝɽe đeṯam. ²² orn ŋen ŋǝmǝrldađo nano laŋge ildi laŋǝno leđa lǝbaṯa lëbia đǝñano lënǝŋulu laɽo đeṯam, ²³ na lǝgamiar laŋge laŋǝno kaiñ ildi lǝgaṯar lero đame. laŋge laŋǝno isëndr ildi lero đame lǝbǝđǝni lame. ²⁴ orn laŋge laŋǝra laŋǝno laber lonaṯa wagǝnǝŋ tǝŋ, orn rǝmwa rëɽu laŋge pređ egaŋǝno na laŋge ildi lero đame, rënǝŋu ranaicǝlo đame đamiñaṯo lorǝba, ²⁵ ṯa laŋge laŋǝno alerṯe laɽia ɽetǝɽeteo, orn ṯa laŋge pređ laŋǝno aɽrǝmoṯe ŋen ŋǝlorǝba lomǝn. ²⁶ ndǝ waŋge gaŋǝno gǝnǝŋ ganeinu ŋen ŋubwa, laŋge pređ laneinu ŋen ŋubwa ldǝɽo. ndǝ waŋge gaŋǝno gǝnǝŋ gǝneinu ŋaɽrwa, laŋge pređ laŋǝra nano ldǝɽo. ²⁷ nṯia eum ñaŋ ñagaɽ aŋǝno yal masiya, ñaŋ pređ ñagaɽo laŋge laŋǝno ilëɽǝŋu. ²⁸ nṯia rǝmwa rëɽu leđa ikanisa, ananoŋ leđa ildi lwǝđweinu, na lomǝn ildi laɽwata ŋen ŋǝrǝmwa, na lomǝn tǝŋ ildi lǝbërrǝŋaiđia ŋen, na lomǝn ildi lëbǝđia aŋwara, na lomǝn ildi labakeiđia leđa luma, na lomǝn ildi lamǝđaṯa na lomǝn ildi ɽromǝṯwa ŋen ŋǝkanisa na lomǝn ildi laɽwata ole gero gǝlǝŋini. ²⁹ leđa pređ lwǝđweinu? leđa pređ laɽwata ŋen ŋǝrǝmwa? leđa pređ labërrǝŋaiđia ŋen? leđa pređ lëbǝđia aŋwara ? ³⁰ leđa pređ labakeiđia leđa luma ? leđa pređ laɽwata ole gero gǝlǝŋini? leđa pređ lokoɽǝbaica ole? ³¹ onaṯr đǝnaica iđi đame đamiñaṯa lorǝba pređ. orn igǝndǝŋaicia đađ đaŋǝra kaiñ đamiñaṯa lorǝba pređ.

¹ ndǝ igwaɽwata ole gǝleđa walla gǝmǝlaiyǝka, orn igero đubwa, igarno đǝpeini đǝsatrtr đupunia walla imǝŋ gǝbara, ² ndǝ igerṯo đǝnaica ṯa igaɽǝwađaṯa igǝbërrǝŋaiđia ŋen ŋǝrǝmwa na igaliŋeṯo ŋamǝɽa pređ, na đaliŋeṯa pređ, na ndǝ igerṯo đonaṯa pređ ṯa igaɽǝwađaṯa igabaṯa aiyǝn alo yomǝn, na igero đubwa, igarno wagero. ³ na ndǝ iganaiđo laŋge pređ ǝllëɽǝñi ltetaŋ ltetaŋ na ndǝ iganaiđo aŋǝno ilëɽǝñi ṯa aiyuɽǝm, orn igero đubwa, đaɽǝjaica đero. ⁴ đubwa đwalarano, na đananaiđia ŋen ŋaŋǝra. đubwa đaber đǝgiaṯađa ŋen. đubwa đaber đëminia bǝɽan, walla đinia enare. ⁵ đubwa đaber đëbǝđia ŋen iŋi ŋeicia leđa nano na đaber đǝɽia eṯǝđa. đaber đǝjeiciano, na đaber đǝlëldǝŋǝđeinia eŋen ŋeicia, ⁶ đaber đǝŋaŋǝrṯia ŋen nano ŋeicia orn đaŋǝra nano ŋenŋa ŋǝđeṯam. ⁷ đubwa đaɽiñaṯa ŋen pređ, đǝđëndia ŋen elaŋge pređ, na đǝṯurṯia elaŋge pređ, na đwonḏǝṯo eŋen pređ. ⁸ đubwa đaber đamǝndëđǝni. ndǝ đǝɽwata đëni đǝŋen ŋǝrǝmwa, điđ ađǝmǝndëđǝni. ndǝ ole gëni gero gǝlǝŋini, giđ aŋerṯe. ndǝ đaliŋeṯa đëni, điđ ađǝmǝndëđǝni. ⁹ đaliŋeṯa iđëndr đafo pwa na đwaɽwata ŋen ŋǝrǝmwa iđëndr đafo pwa. ¹⁰ orn ndǝ ŋen ŋeṯo ŋǝɽiñađeinu, ŋen iŋi ŋafo pwa ŋiđ aŋǝmǝndëđǝni. ¹¹ ndǝ igaɽo ŋere ŋǝta, igwaɽwata ndǝ ŋere ŋǝta, na igǝlëldǝŋǝđeinia eŋen ndǝ ŋere ŋǝta, na igaliŋeṯo ndǝ ŋere ŋǝta, orn ndǝ igaɽo maji goɽra igaŋgeicu ŋen ŋǝñere ñǝrra. ¹² điñǝđi lǝgwondaṯar ŋǝrǝm eŋaɽa, orn lǝgiđr alopǝđaiđr alseiđr ŋope. điñǝđi đaliŋeṯa đǝlëɽǝñi đafo pwa orn igiđ eliŋeṯe đurri ŋen ŋarno igǝlǝŋinu. ¹³ nṯia laŋge ildi liɽijin laɽaŋa, đonaṯa na đǝṯurṯia ŋen na đubwa, orn đubwa đaɽnda iŋulu.

¹ lëlđiñr đubwa na onaṯr đǝnaica đusila. orn onaṯr ŋen ṯa ñagǝbërrǝŋaiđia ŋen ŋǝrǝmwa ŋamiñaṯo đǝnaica pređ. ² eđa igi gwaɽwata ole garto gero gǝliŋini gaber gwaɽwatiṯia leđa orn gwaɽwatiṯia rǝmwa, ŋen ŋanṯa eđa gero gǝnǝŋ gǝnna. gënǝŋu gwaɽwata ŋamǝɽa igusil. ³ orn eđa igi gabërrǝŋaicia leđa ŋen ŋǝrǝmwa gënǝŋu gwaɽwatiṯia leđa ŋen iŋi ŋalakaɽǝjaicia eŋen na ŋǝlonḏǝjeiei na ŋǝlǝbǝɽia nano. ⁴ eđa gwaɽwata ole gero gǝlǝŋini gabakaɽǝjeinu eŋen bǝɽan, orn eđa gabërrǝŋaiđia ŋen ŋǝrǝmwa gënǝŋu gabakaɽǝjaicia leđa lǝkanisa eŋen. ⁵ igwonaṯa ñaŋ pređ ṯa ñaɽwate ole gero gǝlǝŋini, orn igwonaṯa ñaŋ pređ ṯa ñërrǝŋaici leđa ŋen ŋǝrǝmwa ŋamiñaṯo lorǝba ŋen ŋanṯa eđa gabërrǝŋaicia leđa ŋen gamiñaṯo eđa gwaɽwata ole gero gǝlǝŋini, illi nđǝ gokoɽǝbaica ole ṯa kanisa ađakaɽǝjeini eŋen. ⁶ nṯia lorlđaiñ, ndǝ igeṯǝnde nano olega gero gǝlǝŋini igiđ enđamǝđaṯe ṯau, illi ndǝ igǝndǝɽwatiṯia eŋen ŋǝđamiñaṯa irǝmwa walla ŋǝđaliŋeṯa walla ŋǝđǝɽwata walla ŋǝđërrǝŋaiđia ŋen ŋǝrǝmwa? ⁷ nṯia cum laŋge ilđi lero lamǝṯia ildi lerṯo ole, ndǝ lǝmëgǝŋ walla mberǝmbera, ndǝ lero laberṯia ole ɽetǝɽeteo, ŋen ŋiđ aŋǝlǝŋini ṯau? ⁸ nđǝ đal đaber đabara ŋope, esegi giđ aŋǝbǝɽeṯe nano ŋen ŋanṯa đǝbwaiñǝđia? ⁹ nṯia cum eñaŋ. ndǝ ñagaber ñagwaɽwata ŋen ŋǝlǝŋinu olega, ŋen ŋǝlwaɽǝnu ŋiđ aŋǝliŋini ṯau? ŋen ŋanṯa ñagwaɽwata ṯa eđǝber mǝɽǝmǝɽeñ. ¹⁰ aŋgaica ole gëni gwaiña alo na pređ gerṯo ŋeniano. ¹¹ nṯia nđǝ igaijǝba ŋen ŋole eđa gwaɽwata, igaɽǝṯǝma ilia, na eđa gwaɽwata gaɽǝṯiñi ilia. ¹² na ñaŋ cum, ŋen ŋanṯa ñagëɽǝđiaŋǝno ñagwonaṯa đǝnaica đusila, nḏǝjeicr ŋen ndano ṯa ñafeṯe ŋope eŋen iŋi ŋabakaɽǝjaicia leđa lǝkanisa eŋen. ¹³ ŋen ŋafǝṯia eđa gwaɽwata ole gero gǝlǝŋini, ŋgiṯǝma aŋǝṯurṯi rǝmwa ṯa gënǝŋu ṯaŋkoɽǝbaico ole. ¹⁴ nđǝ igaṯurṯia rǝmwa ole gero gǝlǝŋini, usila gǝlëɽǝñi gaṯurṯia rǝmwa, orn ŋaṯǝɽa ŋǝlëɽǝñi ŋaber ŋarlđia. ¹⁵ nṯia ŋen ŋafo ṯau? igiđ iṯurṯi rǝmwa usilaga gǝlëɽǝñi orn igiđ iṯurṯi rǝmwa ŋaṯǝɽaŋa cum. igiđ yalǝŋiṯi rǝmwa usilaga orn igiđi yalǝŋiṯi rǝmwa ŋaṯǝɽaŋa cum. ¹⁶ ŋen ŋanṯa nđǝ agaŋërṯu rǝmwa nano usilaga gǝlaɽǝŋa, eđa gǝnǝŋ eleđa laijǝba, gënǝŋu giđ aŋǝlwaɽe amin ṯau? ŋen ŋanṯa gaijǝba ŋen agwalwaɽo. ¹⁷ agaŋërṯu rǝmwa nano ŋope, orn eđa gwomǝn gaber gabakaɽǝjeini eŋen. ¹⁸ igaŋërṯu rǝmwa nano ŋen ŋanṯa igwaɽwata ole gero gǝlǝŋini igamiñaṯǝnde pređ, ¹⁹ orn ikanisa igwonaṯa ŋen ṯa igwaɽwata ŋen đenǝŋ ŋaṯǝɽaŋa ŋǝlëɽǝñi, ṯa yërrǝŋaici leđa lomǝn ŋen, ŋamiñaṯo ŋen ṯa igwaɽwata ŋen alǝf ređ olega gero gǝlǝŋini. ²⁰ lorldaiñ, ñerṯe ñagǝɽia ñere eŋaṯǝɽa eŋalo. ɽeṯr ñere eŋen ŋeicia, orn ɽeṯr leđa loɽra eŋaṯǝɽa. ²¹ ŋen ŋǝwërđǝnu egađam gal ganun ṯa, elǝŋ rǝmwa raṯa igiđ eɽwatiṯia leđa ildi leđala lerṯo ole gwomǝn na ëiñuaya eleđa laɽ ilia, orn lamǝlu laiñǝnaṯa. ²² nṯia đǝɽwata olega gero gǝlǝŋini đëni đaɽo ŋamǝla, gerṯa eleđa ildi lëndu ŋen orn eleđa ildi lero lǝbendia ŋen. orn đërrǝŋaiđia ŋen đëni ŋen ŋanṯa leđa ildi lëndu ŋen, gerṯa ŋen ŋanṯa leđa lero lǝbendia ŋen. ²³ nṯia ndǝ leđa lǝkanisa larraiđia alo yǝnǝŋ, na pređ lwaɽwata ole ɽetǝɽeteo, gero gǝlǝŋini, orn leđa leṯo ildi laijǝba ŋen walla lero lǝbendia ŋen, lënǝŋulu laber liđ alaṯa ṯa ñagaɽo nëɽi? ²⁴ orn ndǝ pređ ñagabërrǝŋaicia leđa ŋen ŋǝrǝmwa na ndǝ eđa geṯo igi gaijǝba ŋen walla gero gǝbendia ŋen gënǝŋu giđ aŋǝliŋeṯe ŋen ŋeicia ŋǝlëɽǝŋu, ŋen ŋanṯa eŋen eŋalo pređ, na giđ aŋinḏeini eñaŋ pređ. ²⁵ nṯia ŋamǝɽa ŋara gǝlëɽǝŋu ŋiđ aŋǝlǝŋini. nṯia gënǝŋu giđ aŋuđǝñiṯi rǝmwa alo aŋǝbuŋṯi, na giđ aŋǝlwaɽe ṯa, đeṯam rǝmwa ñagafǝlda. ²⁶ ŋen ŋaɽo ṯau lorldaiñ? ndǝ ñagararraiđia ñaŋ ñagerṯo ŋen iŋi, eđa gǝnǝŋ gerṯo ŋǝlǝŋa, na gwomǝn gerṯo đërrǝŋaiđia ŋen, na gwomǝn tǝŋ gerṯo ŋen ŋamiñaṯǝma, na gwomǝn gerṯo ole gero gǝlǝŋini, na gwomǝn tǝŋ gwonaṯa gokoɽǝbaica ŋen. ŋgiṯr ŋen pređ aŋiđǝni ṯa aŋakaɽǝjaiđe eŋen. ²⁷ ndǝ leđa laɽwata ole gero gǝlǝŋini, ŋgiṯǝrldo liɽijan walla liɽijin ikǝrǝŋ, na iliga elden na ŋgiṯr eđa gǝnǝŋ ṯaŋkoɽǝbaico ole. ²⁸ ndǝ eđa gero gǝnǝŋ gaɽǝwađaṯa gokoɽǝbaicia ole, ŋgiṯǝma aŋǝbwaiñe ŋǝma ikanisa, orn ŋgiṯǝma aŋǝɽwatinṯi bǝɽan na aŋǝɽwatiṯi rǝmwa. ²⁹ ŋgiṯr leđa liɽijan walla liɽijin alërrǝŋaici leđa ŋen, na leđa lomǝn alëldǝŋǝđeini eŋen ŋǝleđa ildi laɽwata. ³⁰ ndǝ ŋen ŋamiñiṯu eđa gǝnǝŋ igi gaɽaŋalo, ŋgiṯr eđa igi gananoŋ aŋǝbwaiñe ŋǝma, ³¹ ŋen ŋanṯa ñaŋ pređ ñagaɽǝwađaṯa ñagabërrǝŋaieia leđa ŋen, ñagǝnenǝŋ, ṯa pređ ñërrǝŋeini ŋen, na pređ ñonđǝjeini. ³² na nusila nǝleđa lǝbërrǝŋaiđia ŋen ŋǝrǝmwa, nanaṯa leđa ildi lǝbërrǝŋaiđia ŋen ŋǝrǝmwa. ³³ ŋen ŋanṯa rǝmwa gerṯa rǝmwa rǝŋen ŋurǝgǝđu orn rǝđëuṯaralo. garno ŋen ŋafo ikamsa alo pređ đǝleđa ltǝɽe ɽrǝmwa, ³⁴ ŋgiṯr liji eldalo ɽrlda alǝbwaiñe ŋǝma ikanisa, ŋen ŋanṯa ŋen ŋëđǝñinu ṯa laɽwata. ŋgiṯǝrldo aɽreṯe enare garno ŋen ŋǝwërđǝnu igal ganun. ³⁵ ndǝ lonaṯa lǝbërrǝŋeinia ŋen ŋǝnǝŋ, ŋgiṯǝrldo aleɽǝđo ebaŋgenanda eneɽa tǝŋgen, ŋen ŋanṯa đirǝwano đëni nđǝ liji ɽrlđa laɽwata ikanisa. ³⁶ fǝñaŋ ñaŋgi ŋen ŋǝrǝmwa ŋamiñǝnđau? walla ŋarǝmaṯande nano ikǝrǝŋ ? ³⁷ ndǝ eđa gǝnǝŋ gabaṯa ṯa gaɽo nabi walla gerṯo đǝnaica đusila, ŋgiṯǝmar aŋaliŋeṯe ṯa ŋen pređ iŋi igǝwërđǝṯǝnde fǝŋu ŋen ŋelǝŋ rǝmwa. ³⁸ orn ndǝ eđa gǝnǝŋ gaijǝbaṯa, ŋgiṯǝmar aŋaijǝbeini. ³⁹ fǝṯia lorldaiñ, onaṯr ṯa ñagabërrǝŋaieia leđa ŋen ŋǝrǝmwa, na ñerṯe ñaganeđa leđa laɽwata olega gero gǝlǝŋini. ⁴⁰ ŋgiṯr laŋge pređ aliđǝni ŋope na alṯuɽǝđeini.

¹ igalǝŋiđeinǝndau lorldaiñ, ŋenŋa ŋaŋǝra ŋal masiya iŋi igërrǝŋaieǝnde. ñagamo ŋen iŋi, na ñagaɽaŋau, ² na ñagowëbǝrvi, ndǝ ñagǝbendeicia ŋen iŋi ŋaŋǝra igërrǝŋaicǝnde, illi ndǝ ñagëndu mǝɽǝmǝɽeñ. ³ iganaicǝnde ŋen iŋi ŋaɽnda iŋi igamo, ṯa al masiya gaiyo ŋen ŋanṯa ŋen ŋeieia iŋëndr, ŋen ŋarno ŋǝwërđǝnu egađam gǝrǝmwa, ⁴ na ṯa gurnu nǝŋǝtuđini ndǝ ñoman ñaɽo ñiɽijin, ŋen ŋarno ŋǝwërđǝnu egađam gǝrǝmwa, ⁵ na ṯa gamiñiṯu sifa na ṯalǝmis isi ređ nemiñe eɽijan. ⁶ orn nǝŋǝmiñiṯi leđa ildi lamiñaṯo miyya đenǝŋ ilđi lëndu ŋen, na leđa lwaiña iŋulu lamǝṯia mǝlđin, orn lǝmaṯan laiyo. ⁷ orn nǝŋǝmiñiṯi yagub, na leđa pređ ildi lǝđweinu, ⁸ orn iliga lǝnḏurṯu nǝŋǝñǝmiñiṯi garno igaɽo ŋere ŋuɽǝbǝđǝniano. ⁹ igǝta igamiñaṯa leđa pređ ilđi lǝđweinu, orn igaṯa igero igarǝjǝđaṯa eŋen ṯa igabënǝjǝnia eđa gwǝđweinu, ŋen ŋanṯa igananaico kanisa đǝrǝmwa ŋen ŋubwa kaiñ. ¹⁰ orn igarno ṯia điñǝđi đǝnaicađa mǝɽǝmǝɽeñ đǝrǝmwa, na đǝnaica đǝlëɽǝŋu iđi đǝneiniñi gerṯa đaɽo mǝɽǝmǝɽeñ, orn igiđu ŋǝmëɽria ŋwaiña igamiñaṯǝlo pređ, orn gerṯa fiñi, orn đǝnaica mǝɽǝmǝɽeñ đǝrǝmwa iđi ñagafǝldǝga. ¹¹ ŋen ŋafǝṯia ndǝ fiñi walla ndǝ fǝŋulu, fǝŋen iŋi ñaga-bërrǝŋaicia leđa na fǝŋen iŋi ñaganǝñaŋ ñagëndu. ¹² điñǝđi ndǝ ŋen ŋal masiya ŋërrǝŋeinu ṯa gatuđinu eŋǝɽaiñ, ŋen ŋanṯau leđa lǝmaṯan eñaŋ lǝbaṯa ṯa đǝtwođa eŋǝɽaiñ đero? ¹³ orn ndǝ đǝtwođa eŋǝɽaiñ đero, al masiya gero gǝtuđini cum. ¹⁴ orn ndǝ al masiya gero gǝtuđini eŋǝɽaiñ, đërrǝŋaiđia ŋen eđaiñ đǝpiano na đonaṯa eđalo đǝpiano cum. ¹⁵ na nanda ñagafiđǝnu ñagaɽǝlen eŋen ŋǝrǝmwa, ŋen ŋanṯa ñagwalwaɽo đamǝđaṯa iđi đǝrǝmwa ṯa ratuđu al masiya, orn rënǝŋu rero ramatuđi ndǝ leđa laiyo lero latuđini. ¹⁶ ŋen ŋanṯa ndǝ leđa lero latuđini, al masiya gero gatuđini cum. ¹⁷ orn ndǝ al masiya gero gǝtuđini, đonaṯa eđalo đǝpiano, na ñagafo mǝldin eŋabǝɽa ŋǝŋen eŋalo ŋeicia. ¹⁸ na leđa ildi laiyo igal masiya lamǝndëđǝnu cum. ¹⁹ ndǝ iđamǝṯia iđi ikǝrǝŋ lǝgǝṯurṯiar ŋen igal masiya, lǝgaɽr ŋǝbaiyaŋǝno lǝgamiñaṯr leđa pređ. ²⁰ orn đeṯam al masiya gatuđinu eŋǝɽaiñ nǝŋǝɽeṯe đǝrlde đananoŋ đǝleđa ildi laiyo. ²¹ ŋen ŋanṯa ŋen ŋarno ŋǝɽaiñ ŋeṯo egeđa gǝnǝŋ, nṯia cum đǝtwođa eŋǝɽaiñ đeṯo egeđa garto. ²² ŋen ŋarno leđa pređ lǝbaiya egađǝm, nṯia cum leđa pređ liđ aliđǝni lamǝṯia igal masiya. ²³ ŋen pređ ŋeṯo igǝṯǝrria. ananoŋ al masiya igi gaɽo đǝrlde đananoŋ, orn leđa ildi lal masiya iliga lǝđoɽǝbǝđi đǝlëɽǝŋu, ²⁴ orn đǝmǝndëđǝnia ndǝ gënǝŋu giđ aŋanaice rǝmwa ŋǝlǝŋe irri raɽo đaṯa, ndǝ gamǝndađo ŋǝlǝŋe pređ ɽetǝɽeteo na ŋabǝɽa pređ. ²⁵ ŋen ŋanṯa đeṯam al masiya giđ aŋfeṯe eŋǝlǝŋ liga gamǝlu gǝbëɽi laŋge pređ ildi lǝgeama erǝmanǝŋ. ²⁶ na waŋge igi gǝgeama, igi giđ aŋǝmǝndëđǝni gǝnḏurṯu alo fǝŋu ŋǝɽaiñ. ²⁷ ŋen ŋanṯa rǝmwa rëɽu laŋge pređ eŋǝlǝŋe ŋal masiya erǝmanǝŋ rǝlëɽǝŋu. orn ndǝ ŋen ŋǝlwaɽǝnu ṯa laŋge lëɽǝnu eŋǝlǝŋe ŋǝlëɽǝŋu, ŋen ŋǝliŋinu ṯa fǝŋulu laŋge pređ illi rënǝŋu irri rëɽu laŋge pređ eŋǝlǝŋe ŋǝlëɽǝŋu. ²⁸ na ndǝ laŋge pređ lëɽǝnu eŋǝlǝŋe ŋiđia gënǝŋu giđ aŋǝɽeṯe eŋǝlǝŋe ŋǝrǝmwa irri rëɽu laŋge pređ eŋǝlǝŋe ŋiđia, ṯa rǝmwa arǝfeṯe eŋen pređ na ŋen pređ aŋfeṯe iŋu. ²⁹ ndǝ ŋen ŋero ŋafǝṯia, leđa ildi lananeinu mamuḏiya ŋen ŋanṯa leđa ilđi laiyo liđ aliđi ṯau? ŋen ŋanṯau lënǝŋulu lananeini mamuḏiya ŋen ŋanṯa leđa ildi laiyo ndǝ laber latuđini? ³⁰ na cum nanda ñagǝbenṯia eŋen ŋubwa ëđǝñin pređ eđa? ³¹ igǝbenṯia eŋǝɽaiñ ñoman pređ. igwalwaɽo ṯa ŋen iŋi ŋǝđeṯam đëminiađa đǝlëɽǝñi eñaŋ igal masiya yesu, elǝŋ igënđr. ³² ndǝ ñagëpǝđu đwalađa đeđǝñwa alo yafǝsus eŋen ŋǝleđa, fǝđaɽǝjaica đaŋga nđǝ leđa laiyo lero lǝtuđini? ŋgiṯǝndr alǝsr na alṯr ŋen ŋanṯa eṯeɽe lǝgabaiyar. ³³ ñerṯe ñagǝbǝđǝni ŋađǝna. đaɽaŋa leđala leicia đëbǝđia ŋen ŋaŋǝra ŋeicia. ³⁴ tođr eŋen ŋuđǝrwaṯo na ñerṯe ñagëbǝđia ŋen ŋeicia mǝldin, ŋen ŋanṯa leđa lǝmaṯan lero laberṯia đaliŋeṯa đǝrǝmwa. igwalwaɽo ṯia ŋen ŋanṯa ñirǝwano. ³⁵ orn leđa lǝmaṯan lǝbaṯa, leđa laiyo latuđini ṯau? na aŋǝno isi lënǝŋulu leṯau yiđ aiyǝɽeṯe ṯau? ³⁶ agero ŋaṯǝɽa, waŋge igi agǝwađa gaber gatođa eđamǝṯia illi ndǝ gaiyo. ³⁷ na ŋǝlwa iŋi agǝwađǝlo, agero agǝwađa aŋǝno yakǝl isi yiđ aiyefeṯe, orn ŋǝlwa ŋǝmaṯan ŋǝpiano, aŋgaica ŋwana walla ŋǝlwa ŋomǝn tǝŋ. ³⁸ orn rǝmwa ranaicǝlo aŋǝno, eŋen ŋǝlëɽǝŋu, ŋǝlwa pređ ŋerṯo aŋǝno ɽetǝɽeteo. ³⁹ eđe pređ gerṯa yaɽ ento, orn eđe yǝleđa na eđe yomǝn tǝŋ yǝđwala na eđe yomǝn tǝŋ yǝlǝmme na eđe yomǝn tǝŋ yǝndǝfia. ⁴⁰ na aŋǝno yëni iltuŋga pǝlelo, na aŋǝno yalo, orn ŋaɽrwa ŋaŋǝno yelo ŋarto, na ŋaɽrwa ŋaŋǝno yalo ŋarto. ⁴¹ ŋaɽrwa ŋëni ŋunto ŋëđǝñina, na ŋaɽrwa ŋomǝn tǝŋ ŋubwa, na ŋaɽrwa ŋomǝn tǝŋ ŋǝropa na ropa rafo ɽetǝɽeteo eŋaɽrwa. ⁴² na eum đatuđia đǝleđa laiyo đafo ṯia. aŋǝno yǝwëđǝnu necǝbǝre, orn yatuđini niyerṯe yǝcǝbǝre kwai kwai. ⁴³ yǝwëđǝnu ŋaɽrwa ŋero, orn yatuđini yerṯo ŋaɽrwa. yǝwëđǝnu yëbia orn yatuđini yerṯo ŋabǝɽa. ⁴⁴ aŋǝno yǝwëđǝnu yaɽ aŋǝno yalo, orn yatuđini yaɽ aŋǝno yusila. ndǝ aŋǝno yëni yalo, đeṯam aŋǝno yëni yusila cum. ⁴⁵ nṯia cum ŋen ŋǝwërđǝnu ṯa, eđa gananoŋ, ađǝm, gafo gaɽ ufuđa gamǝṯo, ađǝm gǝnḏurṯu alo giđǝnu gaɽ usila igi gananaiđia đamǝṯia. ⁴⁶ orn laŋge lusila gerṯa laɽnda, orn laŋge lalo, na laŋge lusila lafo nḏurṯu. ⁴⁷ eđa gaɽnda geṯo alo, giđǝnu đuđađa, orn eđa gǝnḏurṯu geṯo elo. ⁴⁸ leđa ilđi liđǝnu đuđađa larno eđa gakǝl giđǝnu đuđađa, na leđa lelo larno eđa igi geṯo elo. ⁴⁹ ŋen ŋarno lǝgafr lǝgarnr eđa giđǝnu đuđađa, nṯia cum ligiđr alarneṯr eđa gelo. ⁵⁰ orn igwalwaɽǝṯia ŋen iŋi lorldaiñ. eđe na ŋǝfǝni laber laɽǝwađaṯa larraṯa eŋǝlǝŋe ŋǝrǝmwa. na igi gaicǝbǝro gaber gaɽǝwađaṯa garraṯa ewaŋge igi gaber gaicǝbǝre. ⁵¹ nǝr. igandǝlwaɽǝṯia ŋamǝɽa. gerṯa lǝgǝbaiyar pređ, orn nëndr pređ lǝgiđr almǝlëđǝnr ⁵² iliga lǝtefr kaiñ iliga lǝđal đǝnḏurṯu alo. đal điđ ađare, na leđa ildi laiyo liđ altuđini, laber liđ alǝcǝbǝre kwai kwai, na lëndr lǝgiđr almǝlëđǝnr, ⁵³ ŋen ŋanṯa đeṯam ŋen iŋi ŋǝđaicǝbǝre ŋiđ aŋëɽǝni ŋen nano ŋǝđero đaicǝbǝre. na ŋen iŋi ŋabaiya ŋiđ aŋëɽǝni ŋen nano ŋaber ŋabaiya. ⁵⁴ orn ndǝ ŋen iŋi ŋǝđaicǝbǝre ŋëɽǝnu ŋen nano ŋǝđero đaicǝbǝre, na ndǝ ŋen iŋi ŋabaiya ŋëɽǝnu ŋen nano ŋaber ŋabaiya, ŋen ŋiđ aŋǝɽiñǝđeini iŋi ŋǝwërđǝnu ṯa, ŋǝɽaiñ ŋarnǝnu eđǝđama. ⁵⁵ ya ŋǝɽaiñ, đǝwađa đuŋga đǝlaɽǝŋa? ya ŋǝɽaiñ, đǝđama đuŋga đǝlaɽǝŋa? ⁵⁶ đǝwađa đǝŋǝɽaiñ, fǝŋu ŋen ŋeicia, na ŋabǝɽa ŋǝŋen ŋeicia fǝŋu ŋen ŋal ganun. ⁵⁷ orn lǝgaŋǝrṯr rǝmwa nano irri randǝnanaicar đǝđama elǝŋga igëndr yesu masiya. ⁵⁸ ŋen ŋafǝṯia lorldaiñ lubwamya, ɽeṯr ñagwonḏǝṯo, ñagaber ñagǝtësǝnia, laldëđǝnr alo jaica eŋǝmëɽria ŋelǝŋ rǝmwa, ŋen ŋanṯa ñagaliŋeṯo ṯa ŋǝmëɽria eŋalo egelǝŋ rǝmwa gerṯa ŋǝpiano.

¹ điñǝđi ŋen ŋǝđǝmama gǝrus ŋen ŋanṯa leđa ɽrǝmwa igandonaṯa ñagëbǝđia ŋen ŋarno igwalwaɽǝṯu leđa lǝkanisa alo igalǝṯiya ṯa aliđi ṯia. ² ñoman pređ eloman lǝnëiñua igusbua ŋgiṯr leđa pređ alëɽi laŋge alǝsoŋ, ṯalakaɽǝjaico laŋge ŋen ŋarno lënǝŋulu lamǝlo, ṯa ndǝ igeṯo đǝmama gǝrus ađerṯe. ³ ndǝ igarǝmaṯǝnde nano igiđ eđwaṯe leđa ildi ñagǝlwonaṯa nađamna ṯa alǝme laŋge ildi ñaganaiđǝlo ikanisa, ṯa aldeɽe alo yursalim. ⁴ ndǝ ŋen ŋafo ŋame ṯa igabǝla cum, ñagiđi ñaɽǝlda. ⁵ igiđ endeṯa nano ndǝ igamiño alo imakṯunia, ŋen ŋanṯa đeṯam igiđ yamiñe alo imakṯunia. ⁶ na aŋgaica lǝgiđr alɽaŋr tǝŋgalo, aŋgaica lǝgiđr alɽaŋr obǝđaiya, ṯa ñǝñamǝđaṯe eđađ alo isi igabǝṯau. ⁷ ŋen ŋanṯa igaber igwonaṯa igandǝnwana iliga lǝtefr orn igwonaṯa lǝgaɽaŋar liga lwalano, ndǝ elǝŋ rǝmwa rǝŋgiṯiñi. ⁸ orn igiđ eɽaŋe alo yafǝsus ŋen loman lamǝlu ildi lǝbernia al kamsin. ⁹ ŋen ŋanṯa ëuwǝr yëni igagiđǝnṯiñi ŋen ŋanṯa ŋǝmëɽria ŋǝrǝmwa ŋwaiña, na leđa lëni lwaiña lagiaiñi. ¹⁰ ndǝ ṯimǝđawus geṯo rǝmoṯr ŋen ṯa ñafeṯǝlda ŋǝđaiña aŋerṯe, ŋen ŋanṯa gënǝŋu gëbǝđia ŋǝmëɽria ŋelǝŋ rǝmwa ŋarno igëbǝđia. ¹¹ ñerṯe ñaŋgiṯi eđa gǝnǝŋ gǝmaneđa. orn đwaṯǝmar nëiñua đaŋǝrađa nano eđalo, ṯa aŋǝñeṯa nano, ŋen ŋanṯa ñagamaṯurṯia lorldaiñala. ¹² na ŋen ŋoraiñ abullus igeɽǝđǝma kaiñ ṯa aŋǝndeṯa nano lorldaiñala. orn gero gameđǝño ṯa geṯǝnđe nano điñǝđi, orn giđ aŋela ndǝ liga lafo. ¹³ apr sǝndua, ñaɽaŋe ñagwonḏǝṯo đonaṯađa. iđǝnr ñagarrwa, ñiđǝni ñagwonḏǝṯo. ¹⁴ ŋgiṯr ŋen pređ eŋalo aŋiđǝni đubwiđiađa. ¹⁵ igandeɽǝđia lorldaiñ. ñagaliŋeṯo leđa legeɽa lisṯǝfanus, ṯa lënǝŋulu laɽo đǝrlde đananoŋ đalo yakaiya, na lanaiđo ntam enen ṯa alǝđuɽǝđǝnṯi leđa ɽrǝmwa. ¹⁶ ñaŋ curn, ëɽr ntam enalo pǝlalo eleđa ildi lǝɽnda larno ildi na eleđa pređ ildi ñagǝldiđialda ŋǝmëɽria, na ildi lëbǝđia ŋǝmëɽria kaiñ. ¹⁷ orn igaŋǝra nano ŋen ŋanṯa isṯǝfanus na farṯunaṯus na akaikus leṯǝñi nano, ŋen ŋanṯa lënǝŋulu lunḏǝjaico đǝfia pwa eđalo. ¹⁸ lënǝŋulu latuđu usila gǝlëɽǝñi na nusila enalo. ŋen ŋafǝṯia lǝŋeṯr leđa larno ṯia. ¹⁹ leđa lǝkanisa đalo yasiya leɽǝđǝnde. akila na briska na kanisa iđi đǝrarraiđia egeɽa egen leɽǝđǝnde egelǝŋ yesu. ²⁰ lorldaiñ pređ leɽǝđǝnee. ekeɽǝđǝđr đǝkëndǝđiađano đatǝɽe. ²¹ fiñi bulus igeɽǝđǝnde đaŋđa đǝlëɽǝñi. ²² ndǝ eđa gǝnǝŋ gero gubwa elǝŋga yesu, ŋgiṯǝmar aŋǝbuŋǝni. elǝŋ yesu igëndr, elaŋ. ²³ igǝbeɽǝđia ṯa đǝnaica mǝɽǝmǝɽeñ đelǝŋ yesu ñafeṯǝlda. ²⁴ na đubwiđia đǝlëɽǝñi ñagafǝlda pređ igal masiya yesu.